മണിക്കൂറില്‍ 84; ബുക്കിംഗില്‍ റെക്കോര്‍ഡ് തീര്‍ത്ത് ഹ്യുണ്ടായി വെന്യു
ഹ്യുണ്ടായിയുടെ തന്നെ പ്രീമിയം എസ്‌യുവികളായ സാന്റേ ഫേ, പാലിസേഡ് തുടങ്ങിയ മോഡലുകളില്‍ നിന്ന് പ്രചോദനം ഉള്‍ക്കൊണ്ട ഡിസൈനാണ് ഒറ്റനോട്ടത്തില്‍ വെന്യുവിന്
മുംബൈ: ഹ്യുണ്ടായിയുടെ ഏറ്റവും പുതിയ എസ്‍യുവിയായ വെന്യു ഇന്ത്യന്‍ നിരത്തുകളിലേക്ക് എത്തുന്നതേയുള്ളു. രണ്ടാഴ്ചക്കപ്പുറം മെയ് 21 -ന് വെന്യൂ ഇന്ത്യന്‍ വിപണിയിലെത്തുമെന്നാണ് കമ്പനി വ്യക്തമാക്കിയിട്ടുള്ളത്. അതിനു മുന്നോടിയായുള്ള ബുക്കിംഗില്‍ തരംഗം തീര്‍ക്കുകയാണ് ഹ്യുണ്ടായി വെന്യു. ആദ്യ ദിനത്തില്‍ തന്നെ രണ്ടായിരത്തോളം ബുക്കിംഗ് നടന്നെന്ന് ദക്ഷിണ കൊറിയന്‍ നിര്‍മ്മാണ കമ്പനി അവകാശപ്പെട്ടു. മണിക്കൂറില്‍ ശരാശരി 84 എന്ന തോതിലാണ് ബുക്കിംഗ് നടക്കുന്നതെന്നും ഇത് റെക്കോര്‍ഡാണെന്നും ഹ്യൂണ്ടായി അധികൃതര്‍ വ്യക്തമാക്കി.
വിപണിയില്‍ ഏഴരലക്ഷം രൂപ മുതലാണ് വെന്യുവിന്‍റെ വില. ഹ്യുണ്ടായിയുടെ തന്നെ പ്രീമിയം എസ്‌യുവികളായ സാന്റേ ഫേ, പാലിസേഡ് തുടങ്ങിയ മോഡലുകളില്‍ നിന്ന് പ്രചോദനം ഉള്‍ക്കൊണ്ട ഡിസൈനാണ് ഒറ്റനോട്ടത്തില്‍ വെന്യുവിന്. ക്രോമിയം ആവരണമുള്ള കാസ്‌കേഡ് ഗ്രില്ല്, പ്രൊജക്ഷന്‍ ഉള്‍പ്പെടെ നല്‍കിയിട്ടുള്ള ഡ്യുവല്‍ ബീം ഹെഡ്‌ലാമ്പ്, ഡിആര്‍എല്‍ തുടങ്ങിയവ മുന്‍വശത്തെ വേറിട്ടതാക്കുന്നു. ബ്ലാക്ക് ഫിനിഷിങ് വീല്‍ ആര്‍ച്ച്, ക്ലാഡിങ്ങ്, പുതുതായി ഡിസൈന്‍ ചെയ്‍ത അലോയി വീല്‍, റൂഫ് റെയില്‍ എന്നിവ വശങ്ങളേയും എല്‍ഇഡി ടെയ്ല്‍ ലാമ്പ്, ചതുരാകൃതിയിലുള്ള ഫോഗ് ലാമ്പ്, ഡ്യുവല്‍ ടോണ്‍ ബമ്പര്‍, ക്രെറ്റയിലേതിന് സമാനമായ ടെയില്‍ ഗേറ്റ് എന്നിവയാണ് പിന്‍വശത്ത്.
രാജ്യത്തെ ആദ്യ കണക്ടഡ് എസ്‌യുവിയാണ് ഹ്യുണ്ടായി വെന്യു. 3995 എംഎം നീളവും 1770 എംഎം വീതിയും 1590 എംഎം ഉയരവുമുള്ള വാഹനത്തില്‍ ഇലക്ട്രിക് സണ്‍റൂഫ്, വയര്‍ലെസ് ഫോണ്‍ ചാര്‍ജിങ്, എയര്‍ പ്യൂരിഫയര്‍, ക്രൂയിസ് കണ്‍ട്രോള്‍, റിയര്‍ എസി വെന്റ്, കോര്‍ണറിങ് ലാമ്പ്, കൂളിങ് ഗ്ലൗ ബോക്‌സ് എന്നിവയുമുണ്ട്. സെന്റര്‍ കണ്‍സോളില്‍ നല്‍കിയിട്ടുള്ള ഫ്‌ളോട്ടിങ് ഇന്‍ഫോടെയ്ന്‍മെന്റ് സിസ്റ്റമാണ് ഇന്റീരിയറിലെ പ്രധാനം. സുരക്ഷി, സൗകര്യം, വെഹിക്കിള്‍ മാനേജ്മെന്റ് റിലേഷന്‍ഷിപ്പ് സര്‍വീസ് തുടങ്ങിയവ ഇന്ത്യയിലെ ഗതാഗതത്തെ അടിസ്ഥാനപ്പെടുത്തി വികസിപ്പിച്ചെടുത്തതാണ് 33-ല്‍ അധികം സേവനങ്ങള്‍ ഒരുക്കുന്ന ബ്ലൂലിങ്ക് സാങ്കേതികവിദ്യയിലുള്ള ഈ ഡിവൈസ്.
വോഡഫോണ്‍ ഇ-സിം, ശബ്ദത്തിന് അനുസൃതമായി പ്രവര്‍ത്തിക്കുന്ന നിര്‍മ്മിതബുദ്ധി സംവിധാനം എന്നിവ വഴിയാണ് ബ്ലൂലിങ്കിന്‍റെ പ്രവര്‍ത്തനം. അതാത് സമയങ്ങളിലെ ട്രാഫിക് നാവിഗേഷന്‍, സ്ഥലങ്ങള്‍, ഓട്ടോമാറ്റിക് ക്രാഷ് നോട്ടിഫിക്കേഷന്‍, എമര്‍ജന്‍സി അലര്‍ട്ട്സ്, മെഡിക്കല്‍ ആന്‍ഡ് പാനിക് അസിസ്റ്റന്‍സ് തുടങ്ങിയവ ബ്ലൂലിങ്കിലുണ്ട്. ബ്ലാക്ക് ഫിനിഷിങ് ഇന്റീരിയറില്‍ സില്‍വര്‍ ആവരണത്തില്‍ നല്‍കിയിട്ടുള്ള എസി വെന്റുകള്‍, റിമോട്ട് ക്ലൈമറ്റ് കണ്‍ട്രോള്‍ സംവിധാനം, റിമോട്ട് സ്റ്റാര്‍ട്ട്-സ്‌റ്റോപ്പ്, ത്രീ സ്‌പോക്ക് മള്‍ട്ടി ഫങ്ഷന്‍ സ്റ്റീയറിങ് വീല്‍ എന്നിവയും ഇന്റീരിയറിന്റെ സവിശേഷതകളാണ്.
118 ബിഎച്ച്പി പവറും 172 എന്‍എം ടോര്‍ക്കും സൃഷ്‍ടിക്കുന്ന 1.0 ലിറ്റര്‍ ടര്‍ബോചാര്‍ജ്ഡ് പെട്രോള്‍ എന്‍ജിനിലും 82 ബിഎച്ച്പി പവറും 114 എന്‍എം ടോര്‍ക്കുമേകുന്ന 1.2 ലിറ്റര്‍ പെട്രോള്‍ എന്‍ജിനിലും 89 ബിഎച്ച്പി പവറും 220 എന്‍എം ടോര്‍ക്കുമേകുന്ന 1.5 ലിറ്റര്‍ ഡീസല്‍ എന്‍ജിനിലുമാണ് ഈ വാഹനം എത്തുന്നത്. 1.0 ലിറ്റര്‍ എന്‍ജിനില്‍ ഏഴ് സ്പീഡ് ഓട്ടോമാറ്റിക്കും മാനുവല്‍ ഗിയര്‍ബോക്‌സും 1.2 ലിറ്റര്‍ പെട്രോള്‍ എന്‍ജിനില്‍ അഞ്ച് സ്പീഡ് മാനുവല്‍ ഗിയര്‍ബോക്‌സും ഡീസല്‍ എന്‍ജിനില്‍ ആറ് സ്പീഡ് മാനുവല്‍ ഗിയര്‍ബോക്‌സുമാണ് ട്രാന്‍സ്‍മിഷന്‍. ക്രൂയിസ് കണ്‍ട്രോള്‍, ആറ് എയര്‍ബാഗ്, സ്പീഡ് സെന്‍സിങ് ഡോര്‍ ലോക്ക്, എബിഎസ് വിത്ത് ഇഎസ്‌സി, ഹില്‍ അസിസ്റ്റ് കണ്‍ട്രോള്‍ എന്നിവയാണ് വാഹനത്തിന് സുരക്ഷയൊരുക്കുന്നത്. മാരുതി ബ്രസ, ടാറ്റ നെക്സോണ്‍ തുടങ്ങിയവയായിരിക്കും വെന്യുവിന്‍റെ മുഖ്യ എതിരാളികള്‍.
