ചൈനീസ് എസ്‍യുവികള്‍ നിരത്തിലേക്ക്, ഇന്ത്യയിലെ ആസ്ഥാനമന്ദിരം തുറന്നു
ഷാന്‍ഹായ് ഓട്ടോമോട്ടീവ് ഇന്‍ഡസ്ട്രി കോര്‍പറേഷന്‍റെ ഉടമസ്ഥതയിലുള്ള ഐക്കണിക് ബ്രിട്ടീഷ് ബ്രാന്‍ഡായ എംജി (മോറിസ് ഗാരേജസ്) യുടെ ഇന്ത്യയിലെ ആസ്ഥാനമന്ദിരം തുറന്നു
ചൈനയിലെ മുന്‍നിര വാഹന നിര്‍മാതാക്കളായ SAIC (ഷാന്‍ഹായ് ഓട്ടോമോട്ടീവ് ഇന്‍ഡസ്ട്രി കോര്‍പറേഷന്‍) മോട്ടോര്‍സ് ഉടമസ്ഥതയിലുള്ള ഐക്കണിക് ബ്രിട്ടീഷ് ബ്രാന്‍ഡായ എംജി (മോറിസ് ഗാരേജസ്) യുടെ ഇന്ത്യന്‍ വിപണി പ്രവേശനത്തെക്കുറിച്ച് ഏറെക്കാലമായി കേട്ടു തുടങ്ങിയിട്ട്. ഇപ്പോഴിതാ വീണ്ടും വാര്‍ത്തകളില്‍ നിറയുകയാണ് എംജി.
കമ്പനിയുടെ ഇന്ത്യയിലെ ആസ്ഥാനമന്ദിരം തുറന്നതായാണ് ആ വാര്‍ത്ത. 150 കോടി രൂപ ചെലവിട്ട് ഹരിയാനയിലെ ഗുരുഗ്രാമിലാണ് മോറിസ് ഗാരേജസ് ഇന്ത്യാ ഹെഡ് ക്വാര്‍ട്ടേഴ്‌സ് പ്രവര്‍ത്തനം തുടങ്ങിയത്.
46,000 ചതുരശ്ര അടി വിസ്തീര്‍ണമുള്ള പുതിയ ഓഫീസ് അടുത്ത രണ്ടു മാസത്തിനുള്ളില്‍ തയ്യാറാകും. കമ്പനിയുടെ ഇന്ത്യയിലെ ആദ്യ മോഡലായ ഹെക്ടര്‍ വിപണിയിലെത്തുന്നതിനു മുമ്പായിത്തനെ ജീവനക്കാര്‍ ഈ ഓഫീസിലേക്ക് മാറും. സെന്‍ട്രല്‍ ഓഫീസിന്റെ താഴത്തെ നിലയില്‍ ഫ്‌ളാഗ്ഷിപ്പ് ഷോറൂമും ബ്രാന്‍ഡ് സ്‌റ്റോറും ഒരുക്കിയിട്ടുണ്ട്.
ഗ്രീക്ക് ദേവനായ ഹെക്ടറിൽ നിന്നു പ്രചോദനം ഉൾക്കൊണ്ടാണ് ഈ വാഹനത്തിന് എംജി ഈ പേരു നൽകിയിരിക്കുന്നത്. വാഹനം ഈ വർഷം രണ്ടാ പാദത്തിൽ വിപണിയിലെത്തുമെന്നും ജീപ്പ് കോംപസ്, ടാറ്റ ഹാരിയർ തുടങ്ങിയവര്‍ എതിരാളികളാകുന്ന വാഹനത്തിനു 14 ലക്ഷം മുതൽ 18 ലക്ഷം വരെയായിരിക്കും വിലയെന്നുമാണ് റിപ്പോര്‍ട്ടുകള്‍.
കേന്ദ്രസര്‍ക്കാരിന്‍റെ മേക്ക് ഇന്‍ ഇന്ത്യ പദ്ധതിയുടെ ചുവടുപിടിച്ചാണ് കമ്പനി ഇന്ത്യയിലേക്കെത്തുന്നത്. ഇന്ത്യയിലെ ആഭ്യന്തര വില്‍പ്പന അവസാനിപ്പിച്ച് അമേരിക്കയിലേക്ക് മടങ്ങുന്ന ജനറല്‍ മോട്ടോഴ്സിന്റെ ഗുജറാത്തിലെ ഹലോല്‍ നിര്‍മാണ കേന്ദ്രം കമ്പനി ഏറ്റെടുത്തത് അടുത്തകാലത്താണ്.
രൂപകൽപനയിലും സാങ്കേതികതയിലും ഒപ്പം വിലയിലും എതിരാളികൾക്ക് പേടി സ്വപ്നമാകും എം ജിയുടെ മോഡലുകളെന്നാണ് ഇന്ത്യന്‍ വാഹനലോകത്തെ പ്രതീക്ഷകള്‍. രൂപകൽപന ബ്രിട്ടനിലും ഉത്പാദനം പൂർണമായി ഇന്ത്യയിലുമായിട്ടാണ് എംജി മോട്ടോഴ്സ് പ്രവർത്തനം ആരംഭിക്കുന്നതെന്നും റിപ്പോര്‍ട്ടുകളുണ്ട്.
ഏകദേശം 2000 കോടി രൂപയുടെ നിക്ഷേപം എംജിയുടെ വരവോടെ രാജ്യത്തെത്തുമെന്നാണ് റിപ്പോര്‍ട്ടുകള്‍. ആയിരത്തോളം പേര്‍ക്ക് ഹലോല്‍ പ്ലാന്റില്‍ ജോലി നല്‍കുമെന്നും ധാരാണപത്രത്തില്‍ കമ്പനി വ്യക്തമാക്കിയിട്ടുണ്ട്. ആദ്യഘട്ടത്തില്‍ 2019-മുതല്‍ വര്‍ഷംതോറും 50,000-70,000 യൂണിറ്റുകള്‍ ഈ പ്ലാന്റില്‍ നിര്‍മിക്കാനാണ് കമ്പനി ലക്ഷ്യമിടുന്നത്. പെട്രോള്‍-ഡീസല്‍ കാറുകളുടെ അതിപ്രസരമുള്ള ഇന്ത്യന്‍ നിരത്തില്‍ ഇലക്ട്രിക് കാറുകളില്‍ കമ്പനി കൂടുതല്‍ ശ്രദ്ധ കേന്ദ്രീകരിക്കാനും സാധ്യതയുണ്ട്.
അടുത്തിടെ ഇന്ത്യൻ മാധ്യമപ്രവർത്തകർക്കായി ഷാങ്ഹായിൽ നടത്തിയ ചടങ്ങിൽ ഹെക്ടറിന്‍റെ ആദ്യ ചിത്രം എംജി പ്രദർശിപ്പിച്ചിരുന്നു. ഹെക്ടറിനു പിന്നാലെ രണ്ടാമതായി സമ്പൂര്‍ണ ഇലക്ട്രിക് എസ്‍യുവി.യും കമ്പനി നിരത്തിലെത്തിച്ചേക്കും. ഇത് ബെയ്‍ജന്‍ 510 മോഡലായിരിക്കുമെന്നാണ് സൂചന. ഹെക്ടറിന്‍റെ ആദ്യ ടീസര്‍ വീഡിയോ അടുത്തിടെ കമ്പനി പുറത്തു വിട്ടിരുന്നു.
