Asianet News MalayalamAsianet News Malayalam

സിനിമയുടെ അണിയറക്കാരുടെ ഭീഷണി; റിവ്യൂകള്‍ നിര്‍ത്തുകയാണെന്ന് നിരൂപകന്‍

  • ഒരു സിനിമയുടെ അണിയറപ്രവര്‍ത്തകരുടെ ഭീഷണിയാല്‍ സിനിമ നിരൂപണങ്ങള്‍ അവസാനിപ്പിക്കേണ്ട അവസ്ഥയിലെന്ന് സിനിമ നിരൂപകന്‍ സുധീഷ് പയ്യന്നൂര്‍
reviewer Sudheesh payyanur facebook post

തിരുവനന്തപുരം :  ഒരു സിനിമയുടെ അണിയറപ്രവര്‍ത്തകരുടെ ഭീഷണിയാല്‍ സിനിമ നിരൂപണങ്ങള്‍ അവസാനിപ്പിക്കേണ്ട അവസ്ഥയിലെന്ന് സിനിമ നിരൂപകന്‍ സുധീഷ് പയ്യന്നൂര്‍. മണ്‍സൂണ്‍ മീഡിയ എന്ന യൂട്യൂബ് ചാനല്‍ വഴിയും, ഫേസ്ബുക്ക് വഴിയും സിനിമ നിരൂപണങ്ങള്‍ ചെയ്യുന്ന സുധീഷ് പയ്യന്നൂര്‍ യുവാക്കള്‍ക്കിടയില്‍ ശ്രദ്ധേയനായ സിനിമ നിരൂപകനാണ്.

കഴിഞ്ഞവാരം ഒരു സിനിമയുടെ റിവ്യൂ യൂട്യൂബില്‍ അപ്ലോഡ് ചെയ്യുകയും റിപ്പോര്‍ട്ട് ചെയ്തതിനെ തുടര്‍ന്ന് യൂട്യൂബ് നീക്കം ചെയ്യുകയും ചെയ്തിരുന്നു. റിവ്യൂ വീണ്ടും പോസ്റ്റ് ചെയ്തതിനെ തുടര്‍ന്ന് സിനിമയുമായി ബന്ധപ്പെട്ട ഒരാള്‍ ഫോണ്‍ ചെയതെന്നും സിനിമയ്ക്ക നെഗറ്റീവ് റിവ്യു നല്‍കിയതിനാല്‍ പ്രശ്നങ്ങള്‍ അനുഭവിക്കേണ്ടി വരുമെന്നും കേസ് നല്‍കിയതായും പറഞ്ഞെന്ന് സുധീഷ് ഫെയ്സ്ബുക്ക് പോസ്റ്റില്‍ പറയുന്നു. 

കൂടാതെ  റിവ്യൂ വീഡിയോകള്‍ ഇഷ്ടപ്പെടാത്തവര്‍ റിപ്പോര്‍ട്ട് ചെയ്യുകയും യൂട്യൂബ് ചാനലിന് സ്ട്രൈക്ക് നല്‍കുകയും ചെയ്യുന്നത് ചാനല്‍ തന്നെ നഷ്ടപ്പെടാന്‍ കാരണമാകുമെന്നും സുധീഷ് ആശങ്ക പ്രകടിപ്പിക്കുന്നു. ചാനലിന്റെ ഭാവി ഓര്‍ത്ത് റിവ്യൂയില്‍ നിന്ന് മാറി നില്‍ക്കുന്നതായും ഒളിച്ചോട്ടമല്ലെന്നും ഇദ്ദഹം വ്യക്തമാക്കുന്നു.

സുധീഷിന്‍റെ ഫേസ്ബുക്ക് പോസ്റ്റിന്‍റെ പൂര്‍ണ്ണരൂപം

സുഹൃത്തുക്കളെ.. ഓർമ വച്ച കാലം മുതൽ സിനിമ കൂടെയുണ്ട്.. ചിത്രഭൂമി, വെള്ളി നക്ഷത്രം ഒക്കെ വായിച്ചു കൊണ്ടാണ് സിനിമയേക്കുറിച്ചു കേട്ടത്... സോളാർ പാനൽ വച്ച് അയൽ വീടുകളിൽ ദൂരദർശൻ കണ്ടാണ് സിനിമയേക്കുറിച്ചു കൂടുതൽ അറിഞ്ഞതും.. ഒരു പക്ഷെ, പ്ലസ് ടു പഠനം മുതൽക്കാണ് സിനിമകൾ ഒക്കെ റിലീസ് ദിവസം തന്നെ കാണുന്നത്.. എല്ലാ നടന്മാരും പ്രീയപ്പെട്ടവർ ആയിരുന്നു.. കുറച്ചധികം ഇഷ്ടം മമ്മുക്കയോടും കമലാഹാസനോടും ആയിരുന്നു അന്ന്.. ആ സമയത്തൊക്കെ സിനിമയ്ക്ക് പ്രചാരണം ആയി സ്വന്തമായി സ്കെച് പേന മേടിച്ചു വലിയ ബോർഡെഴുതി വച്ചിട്ടുണ്ട്... നരസിംഹത്തിന്റെ അടക്കം... അതൊക്കെ ഒരു കാലം...!!!!

ഡിഗ്രി പഠനം തൊട്ടു തിയേറ്ററിൽ റിലീസ് ചെയ്യുന്ന മിക്കവാറും മലയാള സിനിമകളും കൂടെ തമിഴും കാണാറുണ്ട്.. ഇഷ്ടപ്പെട്ടാൽ അഭിപ്രായങ്ങൾ പറയാറും ഉണ്ട്.. ഓണലൈൻ റിവ്യൂ എന്ന നിലയ്ക്ക് തന്നെ മൺസൂൺ മീഡിയയിൽ റിവ്യൂ ചെയ്യാൻ തുടങ്ങിയിട്ട് രണ്ടു വർഷം ആകാൻ പോകുന്നതേ ഉള്ളു.. റിവ്യൂ ചെയ്യുമ്പോൾ ഏറ്റവും കൂടുതൽ വിമർശനം വന്നിട്ടുള്ളതു നീ സിനിമയെ പൊക്കിയടിക്കുന്നു എന്നാണു.. റേറ്റിങ് എല്ലാ സമയവും വളരെ കൂടുതൽ ആണെന്നും.. കാണാൻ കൊള്ളാവുന്ന പടം ആണ് എന്ന് തോന്നിയാൽ അതിനെ വലുതായി കുറ്റം പറയണം എന്ന് തോന്നാറില്ല.. പിന്നെ റേറ്റിംഗ് മാത്രം വച്ച് ഒരു സിനിമയെ സമീപിക്കരുത് എന്നും.. ഇത്രയും കാലത്തിനിടയ്ക്കു ചെയ്ത സിനിമ റിവ്യൂകളിൽ ഒട്ടും ഇഷ്ടപ്പെടാത്തത് എന്ന് പറഞ്ഞ സിനിമകളും വളരെ കുറവാണ്. അങ്ങനെ ആവിഷ്കാര സ്വാതന്ത്ര്യം എന്ന് പറഞ്ഞു വലിച്ചു കീറുന്ന സ്വഭാവം സിനിമ നിരൂപണത്തിൽ കാണിക്കാറും ഇല്ല. വർഷങ്ങൾക്കു മുന്നേ രണ്ടു സിനിമയ്ക്കാണ് അത് ചെയ്തിട്ടുള്ളത്. പിന്നെ ഞാൻ തന്നെ ആ രീതി മാറ്റിയതാണ്.. എനിക്ക് തന്നെ അത് നല്ലതായി തോന്നിയില്ല എന്ന് ഉറപ്പായത് കൊണ്ടാണ്. വളരെ ക്രിട്ടിക്കൽ ആയി സിനിമയെ സമീപിക്കുന്ന രീതിയും ഇല്ല. സിനിമ നല്ലോണം ഇഷ്ടപ്പെട്ടാൽ അതിനെക്കുറിച്ചു കുറച്ചധികം പറയാറുണ്ട്.. ഇഷ്ടപ്പെട്ടില്ലെങ്കിൽ വളരെ ചുരുങ്ങിയ വാക്കുകൾ കൊണ്ട് നിർത്തുകയും ചെയ്യും എന്നതാണ് രീതി. എന്തായാലും അതിനു ഒരു പരി സമാപ്തി വരികയാണ്.. ഇനിമുതൽ കൂടുതൽ കാർക്കശ്യം ആവും എന്നല്ല, സിനിമ ഇഷ്ടപ്പെട്ടില്ലെങ്കിൽ റിവ്യൂ ഉണ്ടാകില്ല... കാരണം... യു ട്യൂബ് നു ചില കാര്യങ്ങൾ ഉണ്ട്.. കോപ്പി റൈറ്റ് പ്രശ്നം കാരണം ആണ് റിവ്യൂ ചിലപ്പോൾ നീക്കം ചെയ്യപ്പെടുന്നത്.. ആ സമയത്തു അത് റിപ്പോർട് ചെയ്ത ടീം ചാനലിന് സ്ട്രൈകും തന്നിട്ട് പോകും.. അങ്ങനെ മൂന്നെണ്ണം കിട്ടിയാൽ ചാനൽ ഇല്ലാതെ ആവും എന്നതിൽ കവിഞ്ഞു ഒന്നുമില്ല... പക്ഷെ അത് നമ്മളെ സംബന്ധിച്ചെടുത്തോളം വലിയ നഷ്ടം ആണല്ലോ.. ഈയിടയ്ക്കു അങ്ങനെ ഒരു സംഭവം നടന്നിരുന്നു..

ട്രൈലറിന്റെ ചില ഭാഗങ്ങൾ ഉപയോഗിച്ച് എന്ന് പറഞ്ഞു റിമൂവ് ചെയ്യുകയും പിന്നീട് അതെല്ലാം ഒഴിവാക്കിയ സമയത്തു അപ്ലോഡ് ചെയ്ത സമയത്തു വീണ്ടും റിമൂവ് ചെയ്യപ്പെട്ടു.. നമ്മൾ ഒരു ചെറിയ സെറ്റപ്പാണ്.. സിനിമ കാണാനുള്ളത് പോയിട്ട് എഡിറ്റ് ചെയ്തു ഇറക്കാനുള്ള പ്രൊഡക്ഷൻ കാശ് പോലും ഇതിൽ നിന്നും കിട്ടുകയില്ല.... ഒരു സാധാരണക്കാരന്റെ അഭിപ്രായത്തിൽ സിനിമയേക്കുറിച്ചു പറയുന്നു എന്ന രീതിയിൽ ആണ് ഇത്രെയേറെ കാഴ്ചക്കാർ ഉണ്ടായതെന്നും കരുതുന്നു. കഴിഞ്ഞ ആഴ്ച, റിമൂവ് ചെയ്യപ്പെട്ട വീഡിയോ വീണ്ടും അപ്ലോഡ് ചെയ്ത സമയത്തു ഒരു ചേട്ടൻ വിളിച്ചിരുന്നു.. സിനിമയുമായി ബന്ധപ്പെട്ട ഒരാൾ ആണ് എന്ന് അറിയാം.. തത്കാലം പേര് പറയുന്നില്ല.. ഏറെ നേരം സംസാരിച്ചു.. ആ സിനിമയ്ക്ക് നെഗറ്റീവ് റിവ്യൂ പറഞ്ഞതിന്റെ - സ്വന്തം ജീവിതത്തിൽ അനുഭവിക്കാൻ പോകുന്ന പ്രശ്നങ്ങളെ കുറിച്ച് വരെ മുൻ ധാരണകൾ തന്നു... പിന്നീടാണ് അറിഞ്ഞത് ചിത്രത്തിന് നെഗറ്റീവ് റിവ്യൂ പറഞ്ഞതിന്റെ പേരിൽ കേസ് കൊടുത്തിരിക്കുക ആണെന്ന്.. ശരി.. ആവട്ടെ...! സിനിമയിൽ ശക്തനായ നേതാവും.... അനീതിക്കെതിരെ പ്രവർത്തിക്കുന്ന ആളും ഒക്കെ ആണെങ്കിലും നമുക്ക് തോന്നിയ അഭിപ്രായം പറയുന്നതിന് ഇന്നത്തെ കാലത്തു ജയിലിൽ കേറേണ്ടി വന്നാൽ അങ്ങനെ ആവട്ടെ.. എന്തായാലും നീതിന്യായ വ്യവസ്ഥയിൽ വിശ്വാസം നഷ്ടപ്പെട്ടിട്ടൊന്നും ഇല്ല. ചിത്രത്തിന്റെ അണിയറ പ്രവർത്തകർ പറഞ്ഞത് ഞാൻ ആ സിനിമയെ റിവ്യൂ പറഞ്ഞു നശിപ്പിച്ചു എന്നാണു.. അവരുടെ വാക്കുകൾ കേട്ടാൽ തോന്നും കേരളത്തിലെ എല്ലാവരും എന്റെ സിനിമ റിവ്യൂ കേട്ടിട്ടാണ് പോകുന്നതെന്ന്...സിനിമയ്ക്ക് ആള് കേറാത്തതു ഞാൻ കാരണം ആണ് എന്നൊക്കെ...! അതൊരിക്കലും പറയാൻ പറ്റും എന്ന് തോന്നുന്നില്ല. നശിപ്പിക്കണം എന്ന ഉദ്ദേശത്തിൽ കടുത്ത വാക്കുകൾ ഉപയോഗിക്കാറും ഇല്ല. അതിന്റെ ആവശ്യം ഇല്ലാതെ ലളിതമായി തന്നെ സിനിമയെപ്പറ്റി പറയാം എന്ന് തന്നെ കരുതുന്നു. റിവ്യൂ എന്ന് പറഞ്ഞു സിനിമയുടെ ഏറ്റവും ചെറിയ സ്പോയിലർ പോലും പറയാറില്ല. ആവിഷ്കാര സ്വാതന്ത്ര്യത്തിനു വേണ്ടി സംസാരിക്കാൻ ഉണ്ട്... പക്ഷെ മൺസൂൺ മീഡിയയ്ക്കു കേരളത്തിലെ ഒരു ഓണലൈൻ ചാനലിന്റെ ഏറ്റവും വലിയ പരിമിതികളും ഉണ്ട്.. ഞാനും അവിടെ ഒരു അതിഥി ആണ്..

ചിലപ്പോൾ തിരുവനന്തപുരത്തോടു യാത്ര പറഞ്ഞു കഴിഞ്ഞാൽ എന്റെ സ്ഥാനത്തു വേറൊരാൾ വരും സിനിമ വർത്തമാനങ്ങൾ പറയാൻ.. അതുകൊണ്ടു തന്നെ ആണ് ഈ തീരുമാനം ഞാനായി എടുത്തതും.. റിവ്യൂ ചെയ്യുന്നതുകൊണ്ട് തന്നെ (ഇടയ്ക്കു ഗവേഷണ കാര്യങ്ങൾ ആയി പൂർണമായി മാറി നിന്നതു ഒഴിച്ചാൽ) എല്ലാ സിനിമകളും (ഒരു പ്രതീക്ഷയും ഇല്ലെങ്കിലും) കാണാൻ ശ്രമിക്കാരും ഉണ്ട്.. ഇനി അതിനും കൂടെ ശമനം ആകും എന്നതും എന്നെ സംബന്ധിച്ചെടുത്തോളം പ്രധാനം ആണ്.. പണം ചിലവഴിക്കുന്നത് വളരെ ശ്രദ്ദിച്ചും ആവാം.. ആ സമയം കൂടി കണക്കിലെടുത്തു വേറെ കുറച്ചു പരിപാടികൾ കൂടെ ചെയ്യാം എന്ന ആലോചന ശക്തമാക്കി ഉറപ്പിക്കുകയും ചെയ്യുന്നു.... ഇനി ഇറങ്ങി മൂന്നു ദിവസത്തിനുള്ളിൽ സിനിമയുടെ റിവ്യൂ വന്നില്ലെങ്കിൽ - ഒന്നുകിൽ ആ സിനിമ ഞാൻ കണ്ടില്ല, അല്ലെങ്കിൽ കണ്ടിട്ട് ഇഷ്ടപ്പെട്ടില്ല എന്ന് ഉറപ്പിക്കുക... യുദ്ധങ്ങളോട് തത്കാലം താല്പര്യം ഇല്ല.. ഇതൊരു ഒളിച്ചോട്ടവും അല്ല.. ഇത്രയും കാലം വളർത്തിക്കൊണ്ടു വന്ന ചാനൽ ഒറ്റയടിക്ക് നഷ്ടപ്പെട്ടേക്കാം എന്ന് ഉള്ളത് കൊണ്ടാണ്... അഥവാ അപ്പീൽ കൊടുത്താലും മാസങ്ങൾ കഴിഞ്ഞേ അതിനുള്ള ഉത്തരം കിട്ടു എന്നുള്ളതും കൊണ്ടാണ്...

ഇവിടത്തെ യു ട്യൂബ് സിസ്റ്റം അത്രയും മെല്ലെ ആണ് കാര്യങ്ങൾ നീക്കുന്നത്.. പിന്നെ മൺസൂൺ മീഡിയ കുറച്ചു പേരുടെ സ്വപ്നവും സന്തോഷവും ആണ്.. ഒരു തരത്തിലും ഒന്നിനെയും അവഹേളിക്കുന്ന വിധത്തിലോ, വ്യക്തി ഹത്യ നടത്തുന്ന വിധത്തിലോ, മുൻ ധാരണയോടു കൂടിയോ ഒരു വീഡിയോ പോലും ചെയ്‌തിട്ടും ഇല്ല.. ഇനിയും ഉണ്ടാകില്ല.. അത് തന്നെ ആണ് മൺസൂൺ മീഡിയ.. എന്നും എപ്പോഴും..!!!

എല്ലാവരോടും സ്നേഹം.... ഇഷ്ടം.. 

സുധീഷ്

 

Follow Us:
Download App:
  • android
  • ios