ഈ ലക്ഷണങ്ങള് ശ്രദ്ധിക്കുക; ഡയബറ്റിക് ന്യൂറോപ്പതിയാകാം
ചൂടും തണുപ്പും സ്പർശനവുമെല്ലാം എങ്ങനെയാണ് നമുക്ക് അനുഭവേദ്യമാകുന്നതെന്ന് ചിന്തിച്ചിട്ടുണ്ടോ? ഇൗ ശാരീരിക അനുഭവങ്ങൾ ഇലക്ട്രിക് സന്ദേശങ്ങളായി ശരീരത്തിലെ നാഡീവ്യൂഹത്തിലൂടെ സഞ്ചരിച്ച് തലച്ചോറിലെത്തി സംവദിക്കുമ്പോഴാണ് അവ തിരിച്ചറിയുന്നത്. തലച്ചോറിൽ നിന്ന് തിരികെ സന്ദേശങ്ങൾ നമ്മുടെ ഇന്ദ്രിയങ്ങളിലേക്ക് തിരികെയും ലഭിക്കുന്നു. ഇൗ പ്രക്രിയ ആയുഷ്ക്കാലം മുഴുവൻ ഇടതടവില്ലാതെ നടക്കുന്നു.
ജീവിത ശൈലീ രോഗങ്ങളിൽ ഏറ്റവും കൂടുതൽ പേരെ പിടികൂടുന്നതാണ് പ്രമേഹം. നമ്മുടെ ശരീരത്തിലെ സന്ദേശപ്രവാഹത്തെ ബാധിക്കുന്ന തരത്തിൽ പ്രമേഹം നിയന്ത്രണ രഹിതമായി മാറാറുണ്ട്. നാഡീവ്യവസ്ഥയെ ബാധിക്കുന്ന ഇൗ അവസ്ഥയാണ് ഡയബറ്റിക് ന്യൂറോപ്പതി. പഞ്ചസാരയുടെ അളവ് ശരീരത്തിൽ നിയന്ത്രിക്കപ്പെടാതെ കൂടുതൽ കാലം തുടരുമ്പോഴാണ് നാഡീവ്യൂഹത്തെ ബാധിക്കുന്നത്. 50 ശതമാനം പ്രമേഹരോഗികളും 25വർഷത്തിനകം വേദനയോട്കൂടിയ ഡയബറ്റിക് ന്യൂറോപ്പതിക്ക് വിധേയരാകുന്നുവെന്നാണ് കണക്കുകൾ.
പ്രധാനമായും കാലിലെ ഞരമ്പുകളെയാണ് ഇത് ബാധിക്കുന്നത്. മറ്റ് ഭാഗങ്ങളെയും ബാധിക്കാം. പാദങ്ങളിലെ ഞരമ്പുകളിൽ പ്രമേഹമുണ്ടാക്കുന്ന പ്രശ്നം പെരിഫറൽ ഡയബറ്റിക് ന്യൂറോപ്പതി എന്ന് അറിയപ്പെടുന്നു. പഞ്ചസാരയുടെ അളവ് ക്രമീകരിക്കാതെ തുടരുന്നതാണ് ഇതിനുള്ള കാരണം.
ഒട്ടേറെ പേരുടെ ഉറക്കം കെടുത്തുന്ന ഇൗ രോഗവാസ്ഥയുടെ ചില ലക്ഷണങ്ങൾ ഇതാ:
1. കാലുകളിലെ അസഹ്യമായ വേദന
2. കാലിൽ ഉൾപ്പെടെ ശരീര ഭാഗങ്ങളിൽ മരവിപ്പ്
3. പേശികളിലുണ്ടാകുന്ന വലിവും ബലഹീനതയും
4. സ്പർശനത്തോട് അമിതമായ ബലഹീനത
5. ചൂടും, തണുപ്പും പോലുള്ള അവസ്ഥ തിരിച്ചറിയാതിരിക്കുക
6. ശരീരത്തിന്റെ നിയന്ത്രണം നഷ്ടപ്പെടുക
പെരിഫറൽ ന്യൂറോപ്പതി കൂടാതെ കാലുകളിൽ തുടർച്ചയായി വേദന അനുഭവപ്പെടുന്ന അവസ്ഥയാണ് ക്രോണിക് ഡയബറ്റിക് ന്യൂറോപ്പതി. രാത്രിയിൽ വേദന ക്രമാതീതമായി കൂടുന്നു. ഇത് ചിലർക്ക് ഉറക്കം കെടുത്തുന്നതും ദൈനംദിന പ്രവൃത്തികളെ ബാധിക്കുന്ന തരത്തിൽ അസഹനീയവുമായി മാറാറുണ്ട്. ചിലർക്ക് നാഡീ സംവേദനമില്ലായ്മ കാരണം കാലുകളിലുണ്ടാകുന്ന മുറിവുകളും മറ്റും തിരിച്ചറിയാനാകാതെ വരുന്നു. ഇൗ അവസ്ഥ മൂർഛിക്കുമ്പോള് ഫൂട് അൾസറിനും കാൽമുറിച്ചുമാറ്റുന്നതിനും വരെ കാരണമാകുന്നു.
ഇത്തരം രോഗസാധ്യതയുള്ളവർ ശ്രദ്ധിക്കുക. കാലുകളിൽ മുറിവ്, വിള്ളൽ, നിറംമാറ്റം, അണുബാധ തുടങ്ങിയവ സ്ഥിരമായി പരിശോധിക്കുക, പാദരക്ഷയില്ലാതെ നടക്കരുത്, കൃത്യമായ അളവിലുള്ള പാദരക്ഷകൾ ഉപയോഗിക്കുക, പാദരക്ഷകൾക്കൊപ്പം സോക്സ് കൂടി ഉപയോഗിക്കുന്നത് ഉത്തമമാണ്, മഞ്ഞുകാലത്ത് തണുപ്പിൽ നിന്ന് സംരക്ഷണത്തിന് ഉതകുന്ന പാദരക്ഷ ധരിക്കുക, കാൽ നഖങ്ങൾ മുറിക്കുമ്പോള് മുറിവ് വരാതിരിക്കാൻ ശ്രദ്ധിക്കുക.
രോഗം വന്നാൽ മികച്ച ഡോക്ടറെ കണ്ട് ചികിത്സ തേടിയില്ലെങ്കിൽ അപകടമാണ്. സ്വന്തം നിലക്ക് വേദന സംഹാരികൾ കഴിക്കുന്നത് ഡയബറ്റിക് ന്യൂറോപ്പതി തടയാൻ പര്യാപ്തമല്ല. സ്വയം ചികിത്സ പാർശ്വഫലങ്ങൾ ക്ഷണിച്ചുവരുത്തുകയും ചെയ്യും. ഡോക്ടറെ കണ്ട് നേരെത്ത ചികിത്സ തുടങ്ങുന്നതിലൂടെ വേദന രഹിതമായ ജീവിതത്തിന് സഹായകമാണ്.