Asianet News MalayalamAsianet News Malayalam

കാട്ടുപ്പന്നിയുടെ മാംസം കഴിച്ച് മലയാളി കുടുംബത്തിലെ മൂന്നുപേര്‍ കോമയിലായി

Three people left in vegetative state after eating suspected poisoned wild boar
Author
First Published Nov 17, 2017, 2:54 PM IST

കാട്ടുപന്നിയുടെ മാംസം കഴിച്ച മലയാളി കുടുംബത്തിലെ മൂന്ന്​ പേർ ഭക്ഷ്യവിഷബാധയേറ്റ്​  ന്യൂസിലാന്‍റിലെ ആശുപത്രിയിൽ അതീവ ഗുരുതരാവസ്​ഥയിൽ കഴിയുന്നു. കൊട്ടാരക്കര സ്വദേശിയായ  ഷിബു കൊച്ചുമ്മൻ, ഭാര്യ സുബി ബാബു, മാതാവ്​ ഏലിക്കുട്ടി എന്നിവരാണ്​ ആശുപത്രിയിൽ ഗുരുതരാവസ്​ഥയിൽ കഴിയുന്നത്​. വീട്ടിൽ നിന്ന്​ രാത്രി ഭക്ഷണം കഴിച്ച ഇവരെ അബോധാവസ്​ഥയിൽ കണ്ടെത്തുകയായിരുന്നു. 1983ന് ശേഷം ഇതാദ്യമായാണ് ന്യൂസിലാന്‍ഡില്‍ ഇത്തരമൊരു കേസ് റിപ്പോര്‍ട്ട് ചെയ്യുന്നതെന്ന് ഇവരെ ചികില്‍സിക്കുന്ന ഡോക്‌ടര്‍മാര്‍ പറയുന്നു. ശരീരത്തിലെ വിഷാംശം പൂര്‍ണമായും മാറി ഇവര്‍ ബോധം വീണ്ടെടുക്കാന്‍ രണ്ടുമാസമെടുക്കുമെന്നും ഡോക്‌ടര്‍മാര്‍ പറയുന്നു. ഇവരുടെ ഒന്നും ഏഴും വയസ് പ്രായമായ രണ്ട്​ കുട്ടികൾ ഇറച്ചി കഴിക്കാത്തതിനാൽ വിഷബാധയേൽക്കാതെ രക്ഷപ്പെട്ടു. ദ ടെലഗ്രാഫ്​ ന്യൂസ്​ ഉൾപ്പെടെയുള്ള അന്താരാഷ്​ട്ര മാധ്യമങ്ങളിൽ വരെ മലയാളി കുടുംബത്തി​ന്‍റെ അപകടം പ്രാധാന്യത്തോടെ റിപ്പോർട്ട്​ ചെയ്​തിട്ടുണ്ട്​. 

വെള്ളിയാഴ്​ച രാത്രിയാണ്​ ഇവരെ വീട്ടിൽ അബോധാവസ്​ഥയിൽ കണ്ടതെന്ന്​ ഇവരുടെ കുടുംബസുഹൃത്തായ ജോജി വർഗീസ്​ പറയുന്നു. ഭക്ഷണം കഴിച്ച്​ അരമണിക്കൂറിനകം ശക്​തമായ ഛർദി അനുഭവപ്പെടുകയായിരുന്നു. ഉടൻ തന്നെ ബാബു എമർജൻസി സർവീസിൽ സഹായം തേടി. മൂവരെയും ഉടൻ തന്നെ ആശുപത്രിയിൽ എത്തിച്ചു. ഗുരുതര ഭക്ഷ്യവിഷബാധയാണ്​ അപകട കാരണമെന്ന്​ സ്​ഥിരീകരിച്ചിട്ടുണ്ട്​. ഗുരുതരാവസ്​ഥയിൽ കഴിയുന്ന മൂവരും പ്രതികരിക്കുന്നുമില്ല. ചുരുങ്ങിയത്​ രണ്ട്​ മാസമെങ്കിലും കഴിഞ്ഞാൽ മാത്രമേ  ചികിൽസയിൽ പുരോഗതി കാണാനാകൂ എന്നാണ്​ വിദഗ്​ദ മെഡിക്കൽ സംഘം പറയുന്നത്​. അഞ്ച്​ വർഷം മുമ്പാണ്​ ഇവർ ന്യൂസിലൻറിൽ എത്തിയത്​. മാതാവ്​ സമീപകാലത്ത്​ വിസിറ്റിങ്​ വിസയിൽ എത്തിയതുമായിരുന്നു.

വേട്ടയാടി കഴിച്ച കാട്ടുപ്പന്നിയുടെ മാംസമാണ്​ ഭക്ഷ്യവിഷബാധക്ക്​ കാരണമെന്നാണ്​ നിഗമനം. ന്യൂസിലാന്‍റിലെ ആരോഗ്യവകുപ്പ്​ അപകട കാരണം പരിശോധിച്ചുവരികയാണ്​. ആരോഗ്യ അവസ്ഥയിൽ യാതൊരു പുരോഗതിയും ഇല്ലാത്ത സാഹചര്യത്തിൽ ഷിബുവി​ന്‍റെ രണ്ട്​ കുട്ടികളെയും ‘ഹാമിൽട്ടൺ മാർത്തോമാ കോൺഗ്രിഗേഷ​ന്‍റെ’  സംരക്ഷണയിൽ  പാർപ്പിച്ചിരിക്കുകയാണ്. 

അതേസമയം, മൂന്ന്​ പേരുടെയും ജീവൻ രക്ഷിക്കാനായുള്ള ചികിത്സക്കായി ഭീമമായ തുക ആവശ്യമായി വന്നിരിക്കുകയാണ്​. ബാബുവി​ന്‍റെ മാതാവ്​ വിസിറ്റിങ്​ വിസയിൽ എത്തിയതിനാൽ ഇവർക്ക്​  ഇൻഷുറൻസ്​ സൗകര്യം പോലും ലഭിക്കില്ല. ഇവരെ ജീവിതത്തിലേക്ക്​ തിരിച്ചുകൊണ്ടുവരാനായി സുഹൃത്തുക്കൾ ഉൾപ്പെടെയുള്ളവർ ​ശ്രമം ആരംഭിച്ചു. ചികിൽസക്ക്​ ആവശ്യമായ ഭീമമായ തുക സമാഹരിക്കാൻ ഹാമിൽടൺ മാർത്തോമ സഭ തുക സമാഹരിക്കാനും തീരുമാനിച്ചിട്ടുണ്ട്​. ഇതിലേക്ക്​ എല്ലാവരുടെയും സഹായങ്ങൾ പ്രവഹിക്കണമെന്ന്​ സുഹൃത്തുക്കൾ ഫെയ്​സ്​ബുക്ക്​ ഉൾപ്പെടെയുള്ള സാമൂഹിക മാധ്യമങ്ങളിലൂടെ അഭ്യർഥനയുമായി എത്തിയിട്ടുണ്ട്​.

Follow Us:
Download App:
  • android
  • ios