എസ്ബിഐയെ കൊള്ളസംഘം എന്ന് വിളിച്ചത് ഫലം കണ്ടു; സൈഫുദ്ദീന് പണം തിരിച്ചുകിട്ടി
കോഴിക്കോട്: എസ്ബിഐയെ കൊള്ളസംഘം എന്ന് വിളിച്ച് പോസ്റ്റിട്ടതിനെ തുടര്ന്ന് മാധ്യമപ്രവര്ത്തകനോട് ക്ഷമാപണവുമായി ബാങ്ക്. കോഴിക്കോട് സ്വദേശി കെഎ സൈഫുദ്ദീനാണ് എസ്ബിഐയുടെ നടപടിക്കെതിരേ പോസ്റ്റിട്ടിരിക്കുന്നത്. യാതൊരു മുന്നറിയിപ്പുമില്ലാതെ 13,300 രൂപയാണ് എസ്ബിഐ വലിച്ചതെന്നാണ് സൈഫുദ്ദീന് പോസ്റ്റിലൂടെ പറഞ്ഞത്. സൈഫുദ്ദീന്റെ ഫേസ്ബുക്ക് പോസ്റ്റ് വൈറലായതോടെ മാത്രമാണ് എസ്ബിഐ കാര്യം ഗൗരവമായി എടുത്തത്.
ഇത് സംബന്ധിച്ച് സൈഫുദ്ദീന് ഏഷ്യാനെറ്റ് ഓണ്ലൈനോട് പറഞ്ഞത് ഇങ്ങനെ, ബുധനാഴ്ച ഉച്ചയായപ്പോള് എസ്ബിഐ റീജിനല് ഓഫീസില് നിന്ന് വിളിച്ചു. ക്ഷമാപണം നടത്തി. പണം തിരിച്ച് നല്കാം എന്ന് പറഞ്ഞു. സാങ്കേതികമായ തെറ്റാണെന്ന് പറഞ്ഞ അവരോട് അതല്ല ഇതൊരു ക്രിമിനല് കുറ്റമാണ് എന്നാണ് ഞാന് പറഞ്ഞത്. ഒരു ദിവസം അനുഭവിച്ച മാനഹാനിക്കും നഷ്ടത്തിനും പരിഹാരം തേടി നിമയപരമായി ബാങ്കിനെതിരെ നീങ്ങുവാനാണ് ഉദ്ദേശിക്കുന്നത് എന്ന് സൈഫുദ്ദീന് പറയുന്നു. ഇന്ന് ഉച്ചയ്ക്ക് ശേഷം സൈഫുദ്ദീന്റെ അക്കൗണ്ടില് പണം തിരിച്ചെത്തിയെന്നും അദ്ദേഹം വ്യക്തമാക്കി.
സൈഫുദ്ദീന്റെ പോസ്റ്റിന്റെ പൂര്ണ്ണരൂപം ഇങ്ങനെ
ബാങ്കല്ല, എസ്.ബി.ഐ കൊള്ളസംഘം തന്നെ...
- കെ.എ. സൈഫുദ്ദീന്
അക്കൗണ്ടില് പതിനയ്യായിരത്തിനുമേല് രൂപ ഉണ്ടെന്ന ഉറപ്പോടെയാണ് ഇന്ന് രാവിലെ ഒരു പാന്റ്സെടുക്കാന് കടയില് കയറിയത്..
ക്യാഷ് പേ ചെയ്യാന് എ.ടി.എം/ഡെബിറ്റ് കാര്ഡെടുത്ത് സൈ്വപ്പ് ചെയ്യുമ്പോള് എറര്. അക്കൗണ്ടില് മതിയായ പണമില്ല... ഞെട്ടിപ്പോയി..
കുറച്ചുമുമ്പ് കാര്ഡുപയോഗിച്ച് പെട്രോള് അടിക്കുകയും എ.ടി.എമ്മില് നിന്ന് ക്യാഷായി രണ്ടായിരം എടുത്ത് മറ്റൊരാള്ക്ക് കൊടുക്കുകയും ചെയ്തതാണ്..
ഇതെന്ത് മറിമായം...?
പാക്ക് ചെയ്ത സാധനം തിരികെ കൊടുത്ത് നേരേ വീട്ടിലത്തെി SBI സൈറ്റില് കയറി അക്കൗണ്ട് ഡീറ്റയില്സ് പരിശോധിക്കുമ്പോള് കാണാം, 13,300 രൂപ ഡിസംബര് 15ന് അക്കൗണ്ടില്നിന്ന് വലിച്ചിരിക്കുന്നു. അത് സംബന്ധമായി യാതൊരുവിധ മെസേജോ മറ്റ് അറിയിപ്പോ ഒന്നും വന്നിരുന്നില്ല. ദോഷം പറയരുതല്ളോ, മാസംതോറും എസ്.എം.എസ് സംവിധാനത്തിന്െറ പേരില് അക്കൗണ്ടില്നിന്ന് കൃത്യമായി പണം പിടിക്കുന്നുണ്ട്.
നേരേ ബാങ്കിലത്തെി കാര്യം ചോദിച്ചപ്പോള് അവര്ക്കാര്ക്കും യാതൊരു വിവരവുമില്ല. തുക withdraw ചെയ്തിരിക്കുന്നുവെന്നല്ലാതെ മറ്റൊന്നും അറിയില്ല. ആര് പിന്വലിച്ചു എന്ന ചോദ്യത്തിനും മറുപടി ഇല്ല..
വിശദമായ അന്വേഷണത്തില് കാശുപോയ വഴി തെളിഞ്ഞുവരുന്നു...
SBIയും SBTയും ലയിക്കുന്നതിനും നാല് വര്ഷം മുമ്പ് വീട് നിര്മാണത്തിന് SBIയില്നിന്ന് 10 ലക്ഷം രൂപ ലോണെടുത്തിരുന്നു. അതിന്െറ EMI 13,300 രൂപയാണ്. എന്െറയും വൈഫിന്െറയും പേരിലാണ് ലോണ് എടുത്തിരിക്കുന്നത്. കോഴിക്കോട് മാനാഞ്ചിറയിലെ RASMECC ബ്രാഞ്ചില്നിന്നാണ് ലോണ്. അതിന്െറ തിരിച്ചടവിനായി ഞങ്ങളുടെ പേരില് അവിടെ തന്നെ ഒരു ജോയന്റ് SB അക്കൗണ്ടുമുണ്ട്. 15ാം തിയതിയാണ് EMI അടയ്ക്കേണ്ട ദിവസം. എല്ലാ ദിവസവും 15ന് മുമ്പായി ഈ അക്കൗണ്ടിലേക്ക് ക്യാഷ് എത്തിക്കാറുണ്ട്. തിരിച്ചടവ് തുടങ്ങിയ അന്നു മുതല് ഇക്കഴിഞ്ഞ ഡിസംബര് 15 വരെ ഒരു തവണ പോലും EMI മുടങ്ങിയിട്ടില്ല. (എന്നിട്ടും രണ്ടുതവണ EMI മുടങ്ങിയെന്ന പേരില് 1800 രൂപ പിഴയായി ഈടാക്കിയിരുന്നു. അക്കൗണ്ട് deatailsന്െറ പ്രിന്റുമായി ബ്രാഞ്ചിലത്തെി ബോധ്യപ്പെടുത്തിയപ്പോള് അത് തിരികെ credit ചെയ്തു)
കോഴിക്കോട് വെള്ളിമാടുകുന്നിലെ SBT ബ്രാഞ്ചിലാണ് ഞങ്ങളുടെ സാലറി അക്കൗണ്ട്. SBIയില് ലയിക്കുന്നതുവരെ വലിയ കുഴപ്പമില്ലാതെ പോയതാണ്്. ലയിച്ചുകഴിഞ്ഞപ്പോള് മുതല് കഷ്ടകാലവും തുടങ്ങി. ഇക്കഴിഞ്ഞ ഡിസംബര് 15ന് മാനാഞ്ചിറയിലെ ഞങ്ങളുടെ ജോയന്റ് അക്കൗണ്ടില്നിന്നും എന്െറ സാലറി അക്കൗണ്ടില്നിന്നും ഒരേ പോലെ 13,300 രൂപ വീതം പിടിച്ചിരിക്കുന്നു. അതാണ് അക്കൗണ്ടിലെ പണം ആവിയായി പോയതിനു കാരണം.
EMI അടയ്ക്കുന്നതില് വീഴ്ചവരുത്താത്ത ഒരാളില് നിന്ന് ഒരേ ദിവസം എങ്ങനെയാണ് രണ്ട് EMI പിടിക്കുക...?
മാത്രവുമല്ല, എന്െറ സാലറി അക്കൗണ്ടില്നിന്ന് പണം EMI പിടിക്കാന് ഞാന് യാതൊരുവിധ Standing Instructionഉം കൊടുത്തിട്ടില്ളെന്നിരിക്കെ എന്െറ അറിവോ സമ്മതമോ ഇല്ലാതെ എന്െറ അക്കൗണ്ടിലെ പണം എങ്ങനെയാണ് മറ്റൊരിടത്തേക്ക് മാറ്റുക..? അപ്പോള് എന്തു സുരക്ഷയാണ് കസ്റ്റമറുടെ പണത്തിനുള്ളത്...?
ഈ ചോദ്യങ്ങള്ക്കൊന്നും ബ്രാഞ്ച് മാനേജര്ക്ക് മറുപടിയില്ല. നിങ്ങളുടെ പണം ഞങ്ങള് എടുത്തിട്ടില്ല എന്നായി അവര്.
‘പിന്നെ ഞാന് വന്നു കുത്തിപ്പൊളിച്ച് എടുത്തോണ്ടു പോയതാണോ..?’ എന്നായി ഞാന്...
എടുത്തിടത്തു പോയി ചോദിക്കൂ എന്നാണ് അവരുടെ ഹുങ്കോടെയുള്ള മറുപടി.
‘എന്െറ സാലറി നിങ്ങളുടെ ബ്രാഞ്ചിലെ അക്കൗണ്ടിലാണ് എത്തിയത്. നിങ്ങള് ഈ ബ്രാഞ്ചിന്െറ മാനേജറാണ്. ഞാന് ഈ ബാങ്കിലെ കസ്റ്റമറും. ഞാന് വന്നു ചോദിക്കുമ്പോള് എന്െറ പണം തന്നേപറ്റൂ. അതിനു പറ്റില്ളെങ്കില് പിന്നെ നിങ്ങളെന്തിനാണ് ബ്രാഞ്ച് മാനേജറായിരിക്കുന്നത്....?’
അങ്ങനെ കലഹം മൂര്ഛിക്കുന്നതിനിടയില് അവര് പറയുന്നു ഞാന് EMI അടയ്ക്കാത്തതുകൊണ്ട് പിടിച്ചതായിരിക്കും, അല്ളെങ്കില് ഫ്രീസ് ചെയ്തതായിരിക്കും എന്ന്.
കണ്ട്രോളു പോകാന് വേറേ വല്ലതും വേണോ...!
‘നിങ്ങളുടെ ബ്രാഞ്ചില്നിന്ന് ഞാന് ലോണെടുത്തിട്ടുണ്ടോ..?’
‘ഇല്ല...’
‘മറ്റൊരിടത്തുനിന്ന് എടുത്ത ലോണിന് ഇവിടുത്തെ അക്കൗണ്ടില്നിന്ന് പണമെടുക്കാന് Standing Instruction തന്നിട്ടുണ്ടോ..?’
‘ഇല്ല...’
‘പിന്നെ എന്െറ പണം എവിടെപ്പോയി..?’
‘അതെനിക്കറിയില്ല...’
ഞാന് പുറത്തുപോയി രണ്ട് അക്കൗണ്ടിന്െറയും ആറുമാസത്തെ Statementന്െറ പ്രിന്െറടുത്ത് അവരുടെ മുന്നില് കൊണ്ടുപോയി കാണിച്ചു.
അതില് രണ്ട് അക്കൗണ്ടില് നിന്നും ഒരേ ദിവസം 13,300 രൂപ EMI പിടിച്ചിരിക്കുന്നു..
ഒടുവില് അവര് പറയുകയാണ് ‘നിങ്ങള് ഒരു പരാതി എഴുതിത്തരൂ, മുകളിലേക്ക് അയക്കാം... ഞങ്ങള് അന്വേഷിക്കാം’ എന്ന് ...’
ഞാന് പറഞ്ഞു പരാതി നിങ്ങള് എഴുതി മോളില് കൊടുത്താല് മതി. ‘എന്െറ ബ്രാഞ്ചിലെ കസ്റ്റമറുടെ പണം കാണുന്നില്ല, തിരികെ തരണമെന്ന്..’
അവസാനം, 24 മണിക്കൂറിനുള്ളില് പണം എന്െറ അക്കൗണ്ടില് എത്തിച്ചില്ളെങ്കില് നാളെ ബാങ്കിന്െറ നടയില് കുത്തിയിരിക്കുമെന്ന് അന്ത്യശാസനം കൊടുത്തിരിക്കുകയാണ്...
മുമ്പും ഇതേപോലെ EMI തിയതിക്കു മുമ്പായി എന്െറ സാലറി അക്കൗണ്ടില്നിന്ന് പണം പിടുങ്ങിയപ്പോള് അത് ബാങ്ക് ലയിപ്പിച്ചതുകൊണ്ട് സര്വറിലുണ്ടായ ആശയക്കുഴപ്പമാണ്, ഇനിയുണ്ടാവില്ല എന്നു പറഞ്ഞതാണ്..
നാളെ മിക്കവാറും കലാപം നടത്തേണ്ടിവരുമെന്നാ തോന്നുന്നത്...
പ്രത്യേക ശ്രദ്ധയ്ക്ക്
----------------------
കണക്കും കാര്യവും സൂക്ഷ്മമായി നോക്കി പോകുന്നതുകൊണ്ടും അതിനു മാത്രമുള്ള പണമേ നമ്മുടെ കൈയില് ഉള്ളൂ എന്നതിനാലുമാണ് ഇങ്ങനെ അക്കൗണ്ട് ആവിയായി പോകുന്നത് തിരിച്ചറിയാന് കഴിഞ്ഞത്. അങ്ങനെയല്ലാത്തവരുടെ അക്കൗണ്ടുകളില് എന്തു നടക്കുന്നു പണം എങ്ങോട്ടു പോകുന്നു എന്നൊക്കെ ഇടയ്ക്കിടെ പരിശോധിച്ചു നോക്കുന്നത് നന്നായിരിക്കും...
കാരണം, മൂത്രമൊഴിക്കാനുള്ള കാശടയ്ക്കല് പോലും അക്കൗണ്ട് വഴിയേ നടക്കൂ എന്ന് നിയമം പാസാക്കിയിരിക്കെ പ്രത്യേകിച്ചും...