പിഎന്ബി തട്ടിപ്പ്; മുഖ്യസൂത്രധാരനെന്ന് സംശയിക്കപ്പെടുന്നയാള് പിടിയില്
പ്രത്യേക കോടതിയിൽ ഹാജരാക്കിയ വിപുലിനെ മാർച്ച് 17 വരെ റിമാൻഡ് ചെയ്തു.
മുംബൈ: പഞ്ചാബ് നാഷണല് ബാങ്ക് വായ്പ തട്ടിപ്പിന്റെ മുഖ്യസൂത്രധാരനെന്ന് സംശയിക്കപ്പെടുന്ന ഗീതാഞ്ജലി ഗ്രൂപ്പ് വൈസ് പ്രസിഡന്റ് വിപുൽ ചിതാലിയ അറസ്റ്റിൽ. ബാങ്കോക്കിൽ നിന്ന് മുംബൈ വിമാനത്താവളത്തിലെത്തിയ ഇയാളെ എമിഗ്രേഷൻ അധികൃതർ തടഞ്ഞുവെക്കുകയും പിന്നീട് സി.ബി.ഐ കസ്റ്റഡിയിലെടുക്കുകയായിരുന്നു. പി.എൻ.ബി തട്ടിപ്പ് സംബന്ധിച്ച വാർത്ത പുറത്തുവന്ന ജനുവരി 29 മുതൽ ഇയാൾ ഒളിവിലായിരുന്നു.
പ്രത്യേക കോടതിയിൽ ഹാജരാക്കിയ വിപുലിനെ മാർച്ച് 17 വരെ റിമാൻഡ് ചെയ്തു. ഗ്രൂപ്പ് ചെയർമാൻ മെഹുൽ ചോക്സിക്കൊപ്പം തട്ടിപ്പ് നടത്തുന്നതിൽ വിപുലും മുഖ്യ പങ്കുവഹിച്ചിട്ടുണ്ടെന്നാണ് കണ്ടെത്തൽ. പി.എൻ.ബിയുടെ ജാമ്യം ഉപയോഗിച്ച് വിവിധ ബാങ്കുകളിൽ നിന്ന് വായ്പ ലഭിക്കുന്നതിനുള്ള അപേക്ഷ തയ്യാറാക്കിയിരുന്നത് വിപുലാണെന്നാണ് സൂചന. അതുകൊണ്ട് തട്ടിപ്പിൽ ഇയാൾക്കും നേരിട്ട് പങ്കുണ്ടെന്നാണ് സിബിഐ നിഗമനം.