തലസ്ഥാനത്ത് വീണ്ടും എടിഎം കവര്ച്ചാ ശ്രമം
തിരുവനന്തപുരം: തലസ്ഥാനത്ത് വീണ്ടും എടിഎം കവര്ച്ചാശ്രമം. കഴക്കൂട്ടത്തെ എ ടി എം കവര്ച്ചയുടെ ഞെട്ടല്മാറും മുമ്പാണ് കോവളം ഉപാസന ജംഗഷനിലെ എടിഎമ്മും മോഷ്ടാക്കള് ലക്ഷ്യമിട്ടത്. എടിഎമ്മിന്റെ വാതില് തുറന്നുകിടക്കുന്നത് കണ്ട പൊലീസാണ് മോഷണ ശ്രമം തിരിച്ചറിഞ്ഞത്. സി സി ടി വി ക്യാമറയിലൂടെ, എസ് ബി ഐ സെക്യൂരിറ്റി വിഭാഗം ഉദ്യോഗസ്ഥര് സംശയാസ്പദ സാഹചര്യത്തില് ആളെ കണ്ടതും മോഷണം ശ്രമം തടയാന് കാരണമായി. ഉടന്തന്നെ കണ്ട്രോള് റൂമില് വിവരമറിയിച്ചത് തിരിച്ചറിഞ്ഞ മോഷ്ടാക്കള് ഉടന് സ്ഥലം കാലിയാക്കി. എ ടി എം കൗണ്ടറിനുളളിലെ ഇന്വെര്ട്ടറും ബാറ്ററിയും മോഷ്ടിക്കാനും ശ്രമം നടന്നതായി കണ്ടെത്തിയിട്ടുണ്ട്. വിരലടയാള വിദഗ്ധര് സ്ഥലത്തെത്തി പരിശോധന നടത്തി. സിസിടിവി ദൃശ്യങ്ങളെ പിന്തുടര്ന്നും അന്വേഷണം പുരോഗമിക്കുകയാണ്.