കെ.എം.മാണിക്കെതിരേ ആഞ്ഞടിച്ച് കോണ്ഗ്രസ്
തിരുവനന്തപുരം: കെ.എം.മാണിക്കെതിരേ ആഞ്ഞടിച്ച് കോണ്ഗ്രസ് നേതാക്കൾ രംഗത്ത്. കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനത്തേയ്ക്കുള്ള തെരഞ്ഞെടുപ്പിൽ മാണി കാണിച്ചത് രാഷ്ട്രീയ വഞ്ചനയാണെന്ന് കെപിസിസി അധ്യക്ഷൻ എം.എം.ഹസനും പ്രതിപക്ഷ നേതാവ് രമേശ് ചെന്നിത്തലയും മുൻ മുഖ്യമന്ത്രി ഉമ്മൻ ചാണ്ടിയും ആരോപിച്ചു. തിരുവനന്തപുരത്ത് മൂവരും സംയുക്തമായി നടത്തിയ വാർത്താ സമ്മേളനത്തിലാണ് വിമർശനം ഉന്നയിച്ചത്.
കടുത്ത രാഷ്ട്രീയ വഞ്ചനയാണ് മാണി വിഭാഗം കാട്ടിയതെന്നും കേരള കോണ്ഗ്രസ് എമ്മിന്റെ കൈകോർത്ത സിപിഎം സിപിഐക്ക് മറുപടി നൽകിയിരിക്കുകയാണെന്നും ഹസൻ പറഞ്ഞു. ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പിൽ നേരത്തെയുണ്ടാക്കിയ ധാരണ പാലിക്കുന്നതായിരുന്നു മര്യാദ. എന്നാൽ മാണി മര്യാദകളെല്ലാം ലംഘിക്കുകയായിരുന്നുവെന്നും അദ്ദേഹം കുറ്റപ്പെടുത്തി.
കോട്ടയം ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പിൽ നടന്നത് രാഷ്ട്രീയ കുതിരക്കച്ചവടമാണെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു. കഴിഞ്ഞ സർക്കാരിൽ ധനമന്ത്രിയായിരുന്ന മാണിയെ ബജറ്റ് അവതരിപ്പിക്കാൻ പോലും തയാറാകാതിരുന്നവരുടെ കൂടെ കൂടാൻ കേരള കോണ്ഗ്രസിന് ഒരുമടിയും ഉണ്ടായില്ല. മാണിക്കെതിരേ സിപിഎം ഉന്നയിച്ച ആരോപണങ്ങളിലെല്ലാം അവർ ഉറച്ചുനിൽക്കുന്നുണ്ടോ എന്നും ചെന്നിത്തല ചോദിച്ചു.