ഹിന്ദു പാകിസ്താൻ പരാമർശത്തില് ശശി തരൂരിനെ പിന്തുണച്ച് സിപിഎം
- മന്ത്രിസഭാ പുനസംഘടന അജൻഡയിൽ ഇല്ല
- തരൂരിനെ പിന്തുണയ്ക്കാൻ കോൺഗ്രസിന് മടിയാണെന്നും. കോൺഗ്രസിന്റെ മൃദുഹിന്ദുത്വ സമീപനമാണ് പുറത്തു വരുന്നതെന്നും കോടിയേരി
തിരുവനന്തപുരം: ഹിന്ദു പാകിസ്താൻ പരാമർശത്തിൽ കോൺഗ്രസ് നേതാവും തിരുവനന്തപുരം എംപിയുമായ ശശി തരൂരിന് പിന്തുണ നൽകി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. തരൂരിനെതിരായുള്ള ആക്രമണം പ്രതിഷേധാർഹവും അപലപനീയവുമാണെന്ന് കോടിയേരി പറഞ്ഞു.
തരൂരിനെ പിന്തുണയ്ക്കാൻ കോൺഗ്രസിന് മടിയാണെന്നും. കോൺഗ്രസിന്റെ മൃദുഹിന്ദുത്വ സമീപനമാണ് പുറത്തു വരുന്നതെന്നും കോടിയേരി പറഞ്ഞു. ആർഎസ്എസിന് മുന്നിൽ മുട്ടിടിച്ചു നിൽക്കുകയാണ് കോൺഗ്രസെന്നും കോടിയേരി കുറ്റപ്പെടുത്തി. വ്യാഴാഴ്ച്ച തുടങ്ങുന്ന സിപിഎം നേതൃയോഗങ്ങൾക്ക് മുന്നോടിയായി മാധ്യമങ്ങളെ കണ്ടപ്പോൾ ആണ് കോടിയേരി നിലവിലെ വിവാദങ്ങളിൽ സിപിഎം തരൂരിനെ പിന്തുണയ്ക്കുമെന്ന് കോടിയേരി അറിയിച്ചത്.
അതേസമയം മന്ത്രിസഭാ പുന:സംഘടന നിലവിൽ എൽഡിഎഫിന്റേയോ സിപിഎമ്മിന്റേയോ അജൻഡയിൽ ഇല്ലെന്ന് കോടിയേരി വ്യക്തമാക്കി. നാളെ തുടങ്ങുന്ന നേത്യ യോഗങ്ങളിൽ ഇത് ചർച്ച ചെയ്യില്ല. എന്നാൽ മുന്നണിയുമായി സഹകരിച്ചു നിൽക്കുന്നവരെ എങ്ങനെ പ്രായോഗികമായി സഹകരിപ്പിക്കാമെന്ന് എൽഡിഎഫ് ചർച്ച ചെയ്യുമെന്ന് കോടിയേരി അറിയിച്ചു.