ജോസ് കെ മാണിയുടെ കേരളയാത്രയ്ക്ക് ഇന്ന് സമാപനം; യോഗത്തിൽ പിജെ ജോസഫ് പങ്കെടുക്കില്ല
സമാപന യോഗത്തിൽ പി ജെ ജോസഫ് പങ്കെടുക്കില്ല. ലോക കേരളാ സഭയിൽ പങ്കെടുക്കാൻ ദുബായിൽ പോവുന്നതിനാലെന്നാണ് വിശദീകരണം
തിരുവനന്തപുരം: കേരളാ കോൺഗ്രസ് വൈസ് ചെയർമാൻ ജോസ് കെ മാണി നയിക്കുന്ന കേരളാ യാത്ര ഇന്ന് തലസ്ഥാനത്ത് സമാപിക്കും. വൈകീട്ട് നടക്കുന്ന റാലിയോടെയാണ് സമാപനം. കെ എം മാണി, രമേശ് ചെന്നത്തല, പി കെ കുഞ്ഞാലിക്കുട്ടി എന്നിവർ പങ്കെടുക്കുന്ന യോഗത്തിൽ പക്ഷെ പി ജെ ജോസഫ് പങ്കെടുക്കില്ല. ലോക കേരളാ സഭയിൽ പങ്കെടുക്കാൻ ദുബായിൽ പോവുന്നതിനാലെന്നാണ് വിശദീകരണം. അതേ സമയം പിജെ ജോസഫ് വിഭാഗത്തിലെ മറ്റു നേതാക്കൾ പരിപാടിയിൽ പങ്കെടുക്കും.
എം പി നയിക്കുന്ന കേരള യാത്രയ്ക്ക് പാര്‍ട്ടിയുടെ തട്ടകമായ ഇടുക്കി ജില്ലയിൽ കിട്ടിയത് തണുപ്പൻ സ്വീകരണങ്ങളായിരുന്നു. പിജെ ജോസഫിന്‍റെ തട്ടകമായ തൊടുപുഴയില്‍ യാത്രയ്ക്ക് കിട്ടിയ സ്വീകരണം പാർട്ടിയിലെ ഗ്രൂപ്പ് ഭിന്നതകൾ ഭാഗികമായി പ്രകടമാക്കുന്നതായിരുന്നു. ജനപങ്കാളിത്തം കുറഞ്ഞ സ്വീകരണ പരിപാടിയിൽ പി.ജെ.ജോസഫ് എത്തിയതാവട്ടെ ഒന്നര മണിക്കൂർ വൈകിയും.
