ഇന്ത്യക്കെതിരായ ട്വന്റി-20 പരമ്പര: മാറ്റങ്ങളുമായി ന്യൂസിലന്‍ഡ് ടീം
ഡാരി മിച്ചല്‍, ബ്ലെയര്‍ ടിക്നര് എന്നിവരാണ് 14 അംഗ ടീമിലെ പുതുമുഖങ്ങള്‍.ന്യൂസിലന്‍ഡിലെ ആഭ്യന്തര ട്വന്റി-20 ലീഗായ സൂപ്പര്‍ സ്മാഷ് ലീഗിലെ തകര്‍പ്പന്‍ പ്രകടനമാണ് മിച്ചലിന് ടീമില്‍ അവസരമൊരുക്കിയത്.
വെല്ലിംഗ്ടണ്‍: ഇന്ത്യക്കെതിരായ ട്വന്റി-20 പരമ്പരക്കുള്ള 14 അംഗ ടീമിനെ പ്രഖ്യാപിച്ച് ന്യൂസിലന്‍ഡ്. ഏകദിന ടീമിലുള്ള ഹെന്‍റി നിക്കോള്‍സിനെ ഒഴിവാക്കിയപ്പോള്‍ പേസ് ബൗളര്‍ ട്രെന്റ് ബോള്‍ട്ടിന് കീവീസ് വിശ്രമം അനുവദിച്ചു. ശ്രീലങ്കക്കെതിരായ ഏക ട്വന്റി-20 മത്സരത്തില്‍ കളിക്കാതിരുന്ന ക്യാപ്റ്റന്‍ കെയ്ന്‍ വില്യാംസണ്‍ തിരിച്ചെത്തിയപ്പോള്‍ പരിക്കേറ്റ ജിമ്മി നീഷാമിന് പകരക്കാരനായി ടീമിലെത്തിയ ഡഗ് ബ്രേസ്‌വെല്ലിനെ ടീമില്‍ നിലനിര്‍ത്തി.
ഡാരി മിച്ചല്‍, ബ്ലെയര്‍ ടിക്നര് എന്നിവരാണ് 14 അംഗ ടീമിലെ പുതുമുഖങ്ങള്‍.ന്യൂസിലന്‍ഡിലെ ആഭ്യന്തര ട്വന്റി-20 ലീഗായ സൂപ്പര്‍ സ്മാഷ് ലീഗിലെ തകര്‍പ്പന്‍ പ്രകടനമാണ് മിച്ചലിന് ടീമില്‍ അവസരമൊരുക്കിയത്. ആദ്യ രണ്ട് മത്സരങ്ങള്‍ക്ക് ശേഷം ലോക്കി ഫെര്ഗൂസന് പകരമായി മൂന്നാം ട്വന്റി-20യില്‍ മാത്രമായിരിക്കും ടിക്നര് ടീമിനൊപ്പം ചേരുക. മൂന്ന് മത്സരങ്ങളടങ്ങിയ പരമ്പര അടുത്ത മാസം ആറിന് ആരംഭിക്കും.
ഇന്ത്യക്കെതിരായ ട്വന്റി-20 പരമ്പരക്കുള്ള ന്യൂസിലന്‍ഡ് ടീം: കെയ്ന്‍ വില്യാംസണ്‍(ക്യാപ്റ്റന്‍), ഡഗ് ബ്രേസ്‌വെല്‍, കോളിന്‍ ഡി ഗ്രാന്ദ്ഹോമെ, ലോക്കി ഫെര്ഗൂസന്, മാര്‍ട്ടിന്‍ ഗപ്ടില്‍, സ്കോട്ട് കുഗ്ലെജിന്‍, ഡാരില്‍ മിച്ചല്‍, കോളിന്‍ മണ്‍റോ, മിച്ചല്‍ സാന്റനര്‍, ടിം സീഫര്‍ട്ട്, ഇഷ് സോധി, ടിം സൗത്തി, റോസ് ടെയ്‌ലര്‍, ബ്ലെയര്‍ ടിക്നര്.
