ദക്ഷിണാഫ്രിക്കയ്ക്കെതിരായ ആദ്യ ടി20; ഇന്ത്യന്‍ വനിതകള്‍ക്ക് കൂറ്റന്‍ ജയം
ദക്ഷിണാഫ്രിക്കയ്ക്കെതിരായ ആദ്യ ടി20 മത്സരത്തില്‍ ഇന്ത്യന്‍ വനിതകള്‍ക്ക് ഏഴ് വിക്കറ്റിന്‍റെ തകര്‍പ്പന്‍ ജയം. ക്യാപ്റ്റന്‍ മിതാലി രാജ് അര്‍ധസെഞ്ചുറിയുമായി(48 പന്തില്‍ 52) തിളങ്ങിയപ്പോള്‍ ഇന്ത്യ അനായാസം ദക്ഷിണാഫ്രിക്കയെ കീഴടക്കുകയായിരുന്നു. ആദ്യം ബാറ്റ് ചെയ്ത നിശ്ചിത ഓവറില്‍ നാല് വിക്കറ്റിന് 164 റണ്‍സെടുത്തു. എന്നാല്‍ മറുപടി ബാറ്റിംഗില്‍ 18.5 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ ഇന്ത്യ വിജയം കണ്ടു.
സ്മൃതി മന്ദാന 28 റണ്‍സും ജെമീമ റോഡ്രിഡസും വേദ കൃഷ്ണമൂര്‍ത്തിയും 37 റണ്‍സ് വീതവുമെടുത്തു. ദക്ഷിണാഫ്രിക്കയ്ക്കായി മൊസെലിന്‍ ഡാനിയേല്‍സും ഡെയ്ന്‍ വാന്‍ നിയേകെര്‍ക്കും ഓരോ വിക്കറ്റുകള്‍ വീഴ്ത്തി. നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ ദക്ഷിണാഫ്രിക്ക ക്യാപ്റ്റന്‍ ഡെയ്ന്‍ വാന്‍ നിയേകെര്‍കിന്‍റേയും(38) ക്ലോ ട്രൈയോണിന്‍റേയും(32) മികവിലാണ് 164ല്‍ എത്തിയത്. ഇന്ത്യയ്ക്കായി അനുജ പാട്ടീല്‍ രണ്ടും പൂജാ വസ്ത്രകാറും ശിഖാ പാണ്ഡെയും ഓരോ വിക്കറ്റും വീഴ്ത്തി.
