സുക്കർബർഗ് കാത്തിരിക്കുന്നു; കളർ ബലൂണിൽ ചൈനയിലേക്ക് പറക്കാൻ
ലോകത്ത് ഏറ്റവും കൂടുതൽ ജനസംഖ്യയുള്ള രാജ്യമായ ചൈനയിൽ പ്രവേശിക്കാൻ ഫെയ്സ്ബുക്കിന് പുതുവഴി. കളർ ബലൂൺസ് എന്ന പേരിൽ പുതിയ ഫോട്ടോ ഷെയറിങ് ആപ് പുറത്തിറക്കിയാണ് ഫെയ്സ്ബുക്കിനുള്ള ചൈനീസ് വിലക്ക് സുക്കർബർഗും ടീമും മറികടക്കുന്നത്. ലോകത്തെ ഒന്നടങ്കം ബന്ധിപ്പിക്കാനുള്ള ഫെയ്സ്ബുക്കിൻ്റെ ശ്രമങ്ങൾ ലോകത്തെ ഏറ്റവും കൂടിയ ജനസംഖ്യയുള്ള രാജ്യമായ ചൈന വിട്ടുനിൽക്കുന്നത് വഴി സാധ്യമാകില്ലെന്നാണ് ഫെയ്സ്ബുക്ക് അധികൃതർ തന്നെ പറയുന്നത്.
ചൈനയുടെ കാര്യത്തിൽ പ്രത്യേക താൽപര്യമുണ്ടെന്നും രാജ്യത്തെ വിവിധ രൂപത്തിൽ പഠിക്കാൻ കമ്പനി കൂടുതൽ സമയം ചെലവഴിക്കുന്നതായി ഫെയ്സ്ബുക്ക് അധികൃതർ തന്നെ പറയുന്നു. ഫെയ്സ്ബുക്കിൻ്റെ പ്ലാറ്റ് ഫോം ഉപയോഗപ്പെടുത്തി ചൈനയിലെ ബിസിനസിനും സംരംഭങ്ങൾക്കുമുള്ള വിപണി രാജ്യത്തിൻ്റെ പുറത്തേക്ക് കൂടി വ്യാപിപ്പിക്കാൻ സഹായിക്കുകയാണ് തങ്ങൾ ചെയ്യുന്നതെന്നും ഇവർ പറയുന്നു. ചൈനയിലെ 700 മില്യൺ ഇൻ്റർനെറ്റ് ഉപയോക്താക്കളിലേക്ക് ഫെയ്സ്ബുക്ക് ദീർഘകാലമായി കണ്ണുംനട്ടിരിക്കുകയാണ്.
നിലവിൽ ചൈനയിൽ തന്നെ വികസിച്ചുവന്ന വി ചാറ്റ് പോലുള്ള സോഷ്യൽ നെറ്റ്വർക്കുകൾ ആണ് ഇവർ ഉപയോഗിക്കുന്നത്. ഫെയ്സ്ബുക്ക് സി.ഇ.ഒ മാർക്ക് സുക്കർബർഗ് ചൈനീസ് പ്രസിഡൻ്റ് ഉൾപ്പെടെയുള്ള അധികൃതരെ അനുനയിപ്പിക്കാൻ നിരന്തര ശ്രമങ്ങൾ നടത്തിവരികയാണ്. കഴിഞ്ഞ വർഷം ടിയാൻമെൻ സ്ക്വയറിൽ ജോഗിങ് നടത്തുന്ന ഫോട്ടാ പോസ്റ്റ് ചെയ്ത സുക്കർബർഗിൻ്റെ നടപടി സാമൂഹിക മാധ്യമങ്ങളിൽ തരംഗം സൃഷ്ടിച്ചിരുന്നു. ചൈനീസ് അധികൃതർ സാമൂഹിക മാധ്യമങ്ങൾക്ക് മേലുള്ള സെൻസർഷിപ്പ് തുടരുകയാണ്. കഴിഞ്ഞ മാസം ഫെയ്സ്ബുക്കിൻ്റെ ഉടമസ്ഥതയിലുള്ള വാട്സ്ആപ് ഭാഗികമായി ബോക്ക് ചെയ്തിരുന്നു. ഒട്ടേറെ പേർ വിദേശങ്ങളിലെ സ്വകാര്യനെറ്റ് വർക്ക് ഉപയോഗിച്ച് സാമൂഹിക മാധ്യമങ്ങൾ ഉപയോഗിച്ചതും ഗവൺമെൻ്റ് തടഞ്ഞിരുന്നു.