ചെക്ക് വാഹന നിര്‍മ്മാതാക്കളായ സ്‍കോഡ ഇതുവരെ നിര്‍മിച്ചത് എഴുപത് ലക്ഷം യൂണിറ്റ് ഒക്ടാവിയകള്‍. 70 ലക്ഷമെന്ന എണ്ണം തികച്ച ഒക്ടാവിയയെ സ്‌കോഡയുടെ  മ്ലാഡ ബോലെസ്ലാവ് പ്ലാന്റില്‍നിന്നും പുറത്തിറക്കി. 

1959 മുതല്‍ 1971 വരെയാണ് സ്‌കോഡ ഒക്ടാവിയ ആദ്യം നിര്‍മിച്ചിരുന്നത്. പിന്നീട് ആധുനിക കാലത്തെ ആദ്യ തലമുറ സ്‌കോഡ ഒക്ടാവിയ 1996 ല്‍ വിപണിയിലെത്തി. ഫോക്‌സ്‌വാഗണ്‍ ഗ്രൂപ്പിനുകീഴില്‍ വികസിപ്പിച്ച ആദ്യ സ്‌കോഡ ആയിരുന്നു ഒക്ടാവിയ.

2019 നവംബറില്‍ പ്രാഗില്‍ നാലാം തലമുറ സ്‌കോഡ ഒക്ടാവിയ ആഗോള അരങ്ങേറ്റം നടത്തി. മുന്‍ഗാമിയേക്കാള്‍ കൂടുതല്‍ സ്ഥലസൗകര്യവും കൂടുതല്‍ സുരക്ഷാ, കണക്റ്റിവിറ്റി ഫീച്ചറുകളും ലഭിച്ച മോഡലാണ് നാലാം തലമുറ ഒക്ടാവിയ. ബൂട്ട് ശേഷിയും കൂടുതലാണ്. സ്‌കോഡയുടെ പുതിയ ഡിസൈന്‍ ഭാഷയിലാണ് പുതിയ ഒക്ടാവിയ അണിയിച്ചൊരുക്കിയത്. കാറിനകത്തെ വസ്തുക്കള്‍ ഉന്നത നിലവാരം പുലര്‍ത്തുന്നവയാണ്.

സ്‌കോഡ എന്ന ബ്രാന്‍ഡിന്റെ ഹൃദയമാണ് ഒക്ടാവിയ എന്ന് സ്‌കോഡ ഓട്ടോ ബോര്‍ഡ് അംഗം (പ്രൊഡക്ഷന്‍ & ലോജിസ്റ്റിക്‌സ്) മൈക്കല്‍ ഓയെല്‍ജെക്ലോസ് പറഞ്ഞു. 1990 കളുടെ പകുതി മുതല്‍ വിജയകുതിപ്പ് തുടരുകയാണ് സ്‌കോഡ ഒക്ടാവിയ. ആഗോള കാര്‍ നിര്‍മാതാക്കള്‍ എന്ന മേല്‍വിലാസത്തിലേക്ക് ചുവടുമാറ്റുന്നതില്‍ ഒക്ടാവിയ എന്ന മോഡല്‍ വലിയ സംഭാവന നല്‍കിയതായി അദ്ദേഹം പ്രസ്താവിച്ചു. 2019 ല്‍ മാത്രം 3,63,700 യൂണിറ്റ് ഒക്ടാവിയ ആണ് ആഗോളതലത്തില്‍ ഡെലിവറി ചെയ്തത്.

2020 മോഡല്‍ ഒക്ടാവിയയെ സ്‌കോഡ അടുത്തിടെയാണ് അനാവരണം ചെയ്‍ത് .  നാലാം തലമുറ ഒക്ടാവിയ സുരക്ഷയുടെ കാര്യത്തില്‍ ഉഗ്രനാണെന്നും തെളിയിച്ചിരുന്നു.  യൂറോ എന്‍ക്യാപ് ക്രാഷ് ടെസ്റ്റില്‍ ഫൈവ് സ്റ്റാര്‍ റേറ്റിങ്ങാണ് ഈ സെഡാന്‍ സ്വന്തമാക്കിത്. മുതിര്‍ന്നവര്‍ക്ക്‌ 92 ശതമാനവും കുട്ടികള്‍ക്ക് 88 ശതമാനവും കാല്‍നട യാത്രക്കാരന് 78 ശതമാനവും സുരക്ഷയാണ് വാഹനം ഉറപ്പാക്കുന്നത്. 

മുന്നില്‍ നിന്നുള്ള ആഘാതത്തില്‍ ക്യാബിന്‍ സുരക്ഷിതമാണെന്നാണ് ക്രാഷ് ടെസ്റ്റ് തെളിയിക്കുന്നത്. ബോണറ്റിലേല്‍ക്കുന്ന ആഘാതം മുന്നിലെ ടയറിനപ്പുറത്തേക്ക് എത്തുന്നില്ലെന്നും വശങ്ങളിലെ ആഘാതത്തെ ചെറുക്കാന്‍ ബോഡിക്ക് കരുത്തുണ്ടെന്നും ക്രാഷ് ടെസ്റ്റ് തെളിയിച്ചതായാണ് റിപ്പോര്‍ട്ടുകള്‍. 

അത്യന്തം എയ്‌റോഡൈനാമിക്കാണ് പുതിയ ഒക്ടാവിയ . എയര്‍ബാഗുകള്‍, സീറ്റ് ബെല്‍റ്റ് പ്രീ ടെന്‍ഷനര്‍, ഐസോഫിക്‌സ് ചൈല്‍ഡ് സീറ്റ് മൗണ്ട്‌സ്, ലെയ്ന്‍ അസിസ്റ്റ്, കൊളീഷന്‍ അവോയിഡന്‍സ് സിസ്റ്റം,  സ്പീഡ് അസിസ്റ്റന്‍സ് എന്നീ സംവിധാനങ്ങളാണ് ഒക്ടാവിയയില്‍ സുരക്ഷയൊരുക്കുന്നത്. 0.24 ആണ് ഡ്രാഗ് കോ-എഫിഷ്യന്റ്. കൂട്ടിയിടി ഒഴിവാക്കുന്ന സംവിധാനം, സ്റ്റിയറിംഗ് വളയത്തില്‍ കൈ ഉണ്ടെന്ന് തിരിച്ചറിയുന്ന സംവിധാനം, ഡോറുകള്‍ തുറക്കുമ്പോള്‍ വാഹനങ്ങള്‍ കടന്നുപോയേക്കാമെന്ന് ഡ്രൈവര്‍ക്ക് മുന്നറിയിപ്പ് നല്‍കുന്ന സംവിധാനം എന്നിവയെല്ലാം പുതിയ സുരക്ഷാ ഫീച്ചറുകളാണ്. 

ആക്റ്റീവ്, അംബീഷന്‍, സ്‌റ്റൈല്‍ എന്നീ മൂന്ന് വേരിയന്റുകളിലാണ് പുതിയ ഒക്ടാവിയ എത്തുന്നത്. കോംബി സ്‌കൗട്ട് ഓഫ്-റോഡ്, ആര്‍എസ് സ്‌പോര്‍ട്ടി വേരിയന്റുകള്‍ പിന്നീട് പുറത്തിറക്കും. മുന്‍ഗാമികളേക്കാള്‍ വലുതാണ് പുതിയ കാര്‍. ഡിസൈന്‍ കൂടുതല്‍ ഷാര്‍പ്പാണ്. കൂടുതല്‍ മെലിഞ്ഞ പുതിയ ഓപ്ഷണല്‍ മാട്രിക്‌സ് എല്‍ഇഡി ഹെഡ്‌ലാംപുകളും എല്‍ഇഡി ടെയ്ല്‍ലാംപുകളും വാഹനത്തെ വേറിട്ടതാക്കുന്നു. 

പുതിയ ഒക്ടാവിയയില്‍ പുതുനിര എന്‍ജിനുകള്‍ നല്‍കിയിരിക്കുന്നു. 1.4 ലിറ്റര്‍ ടര്‍ബോ-പെട്രോള്‍ എന്‍ജിനും ഇലക്ട്രിക് മോട്ടോറുമാണ് ഒക്ടാവിയ ഐ5 എന്ന പ്ലഗ്-ഇന്‍ ഹൈബ്രിഡ് വേരിയന്റിന് കരുത്തേകുന്നത്. 204 പിഎസ് കരുത്ത് ഉല്‍പ്പാദിപ്പിക്കും. 6 സ്പീഡ് ഡുവല്‍ ക്ലച്ച് ട്രാന്‍സ്മിഷന്‍ നല്‍കിയിരിക്കുന്നു. കൂടുതല്‍ കരുത്തുറ്റ 245 പിഎസ് വേര്‍ഷന്‍ പിന്നീട് അവതരിപ്പിക്കും. 1.0 ലിറ്റര്‍ 3 സിലിണ്ടര്‍, 1.5 ലിറ്റര്‍ 4 സിലിണ്ടര്‍, 2.0 ലിറ്റര്‍ എന്നിവയാണ് മറ്റ് ടര്‍ബോ-പെട്രോള്‍ എന്‍ജിനുകള്‍. മൂന്ന് എന്‍ജിനുകള്‍ യഥാക്രമം 115 പിഎസ്, 150 പിഎസ്, 190 പിഎസ് കരുത്ത് പുറപ്പെടുവിക്കും. എല്ലാ എന്‍ജിനുകളുമായി 7 സ്പീഡ് ഡിഎസ്‍ജിയാണ് ട്രാന്‍സ്‍മിഷന്‍. 

1.0 ലിറ്റര്‍, 1.5 ലിറ്റര്‍ എന്‍ജിനുകളുടെ കൂടെ 48 വോള്‍ട്ട് മൈല്‍ഡ് ഹൈബ്രിഡ് സാങ്കേതികവിദ്യ നല്‍കി. ഈ രണ്ട് എന്‍ജിനുകളും 6 സ്പീഡ് മാന്വല്‍ ഗിയര്‍ബോക്‌സുമായും ലഭിക്കും. എന്നാല്‍ മൈല്‍ഡ് ഹൈബ്രിഡ് സാങ്കേതികവിദ്യ ഉണ്ടായിരിക്കില്ല. ഫോക്‌സ്‌വാഗണ്‍ ഗ്രൂപ്പിന്റെ പുതിയ ‘ഇവോ’ ഡീസല്‍ എന്‍ജിന്‍ പുതിയ ഒക്ടാവിയയില്‍ അരങ്ങേറി. 2.0 ലിറ്റര്‍ 4 സിലിണ്ടര്‍ എന്‍ജിന്‍ യൂറോ 6ഡി പാലിക്കുന്നതാണ്.

ഇന്ത്യയിലെത്തുമ്പോള്‍ ബിഎസ് 6 അനുസരിക്കും. 115 പിഎസ്, 150 പിഎസ്, 200 പിഎസ് ട്യൂണുകളില്‍ ഈ മോട്ടോര്‍ ലഭിക്കും. ജി-ടെക് സിഎന്‍ജി വേരിയന്റും ലഭ്യമാണ്. 130 പിഎസ് പുറപ്പെടുവിക്കുന്ന 1.5 ലിറ്റര്‍ മോട്ടോറാണ് ഈ വേരിയന്റിന് കരുത്തേകുന്നത്. 6 സ്പീഡ് മാന്വല്‍, 7 സ്പീഡ് ഡിഎസ്ജി ട്രാന്‍സ്മിഷന്‍ എന്നിവയാണ് ഓപ്ഷനുകള്‍. ഈ വര്‍ഷം വാഹനം ഇന്ത്യയിലെത്തിയേക്കും.