തെലങ്കാനയിലും പ്രചാരണത്തിന് കൊട്ടിക്കലാശം; നിയമസഭ നേരത്തേ പിരിച്ചുവിട്ട കെസിആറിന്‍റെ തന്ത്രം വിജയിക്കുമോ?

രാജസ്ഥാനൊപ്പം, തെലങ്കാനയും വെള്ളിയാഴ്ച പോളിംഗ് ബൂത്തിലേക്ക് നീങ്ങുകയാണ്. ടിഡിപിയ്ക്കും സിപിഐയ്ക്കുമൊപ്പം കോണ്‍ഗ്രസ് നേതൃത്വം കൊടുക്കുന്ന മഹാകൂടമിയാണ് പ്രാദേശികശക്തിയായ തെലങ്കാന രാഷ്ട്രസമിതിയെ നേരിടുന്നത്. 119 അംഗ നിയമസഭയില്‍ അറുപത് സീറ്റുള്ളവര്‍ക്ക് അധികാരത്തിലെത്താം.

Sravan Krishna

Hyderabad, First Published Dec 5, 2018, 11:46 PM IST

ഹൈദരാബാദ്: രാജസ്ഥാനൊപ്പം തന്നെ പോളിംഗ് ബൂത്തിലേയ്ക്ക് നീങ്ങുന്ന തെലങ്കാനയും വരുന്ന ലോക്സഭാ തെരഞ്ഞെടുപ്പിന് നേരെ നീളുന്ന ഒരു ചൂണ്ടുവിരലാണ്. പ്രാദേശികരാഷ്ട്രീയശക്തികൾക്കെതിരെ ഒരു വിശാലപ്രതിപക്ഷത്തിന് ചുവടുറപ്പിയ്ക്കാനാകുമോ എന്ന് തെലങ്കാനയിലെ തെരഞ്ഞെടുപ്പ് വിധിയെഴുതും. ഈ ഡിസംബറിൽ ജനവിധി തേടുന്ന ഏകദക്ഷിണേന്ത്യൻ സംസ്ഥാനം കൂടിയാണ് തെലങ്കാന.

തെലങ്കാനയില്‍ ഉയര്‍ന്നുവരുന്ന ഭരണവിരുദ്ധ വികാരത്തിന്‍റെയും കോണ്‍ഗ്രസ് തുറന്നുവിടുന്ന അഴിമതി ആരോപണങ്ങളുടെയും നടുവിൽ തെരഞ്ഞെടുപ്പിലേക്ക് നീങ്ങിയ മുഖ്യമന്ത്രി കെ.ചന്ദ്രശേഖർ റാവുവിന്‍റെ നീക്കം വിജയിക്കുമോ എന്നതാണ് എല്ലാവരും ഉറ്റുനോക്കുന്നത്. മുമ്പ് ഗുജറാത്ത് മുഖ്യമന്ത്രിയായിരുന്നപ്പോൾ നരേന്ദ്രമോദിയും സമാനരീതിയിൽ നിയമസഭ പിരിച്ചുവിട്ട് ജനവിധി തേടിയിരുന്നു. സ്ഥിതി വഷളാകുംമുൻപ്, ഭരണകാലയളവ് കൂട്ടിക്കിട്ടാൻ നിയമസഭ പിരിച്ചുവിട്ട കെ.ചന്ദ്രശേഖർ റാവു ഒരു പകിടകളിയ്ക്കാണ് ഒരുങ്ങിയത്.

ശ്രദ്ധയൂന്നേണ്ട മണ്ഡലങ്ങൾ ഏതെല്ലാം?

വാറങ്കല്‍, നിസാമാബാദ്, കരിംനഗര്‍, മഹബൂബാബാദ്, കാമാറെഡ്ഡി തുടങ്ങിയ ജില്ലകളെല്ലാം ഇത്തവണയും കെസിആറിനൊപ്പം നിൽക്കുമോ? അവസാനനിമിഷങ്ങളിലെ നീക്കങ്ങള്‍ പോലും വോട്ടിനെ സ്വാധീനിക്കുന്നത്രയും ചുട്ടുപൊള്ളുകയാണോ തെലങ്കാന?