ഛപാക് സിനിമയെക്കുറിച്ച് അഭിപ്രായവുമായി പാര്വതി
നിയമം കര്ശനമായി നടപ്പാക്കാത്തതിലൂടെ നൂറുകണക്കിന് ആളുകളുടെ ജീവന് അപകടത്തിലാകുന്നതും നമുക്ക് ഓര്മപ്പെടുത്താമെന്നും പാര്വതി കുറിച്ചു.
കൊച്ചി: ആസിഡ് ആക്രമണ ഇരയുടെ കഥപറയുന്ന ഛപാക് സിനിമയെക്കുറിച്ച് അഭിപ്രായം പറഞ്ഞ് മലയാളി താരം പാര്വതി തിരുവോത്ത്. ദീപിക പദുകോണ്, സംവിധായിക മേഘ്ന ഗുല്സാര്, ഛപാക് സിനിമയുടെ അണിയറ പ്രവര്ത്തകരെ പാര്വതി അഭിനന്ദിച്ചു.
ഒരു വര്ഷം മുമ്പ് 'ഉയരെ'യിലൂടെ പറഞ്ഞത് ശക്തമായി ഛപാക് സിനിമ പറയുന്നു. ലോകത്ത് നിരവധി പല്ലവിമാരും മാല്തിമാരും ജീവിക്കുന്നു. ആക്രമണത്തില് ഒരാള് ഇരയും മറ്റൊരാള് ആക്രമിയുമാകുന്നു. ഞങ്ങള്ക്ക് രണ്ട് പേരോടും സംസാരിക്കണം. അവരുടെ കഥകള് മുഖ്യധാരയിലേക്ക് കൊണ്ടവരണം. നന്ദി മേഘ്ന ഗുല്സാര്, നന്ദി ദീപിക പദുകോണ്, ഛപാകിന് പിന്നില് പ്രവര്ത്തിച്ച എല്ലാവര്ക്കും നന്ദി. രാജ്യത്ത് തടസ്സമില്ലാതെ ആസിഡ് വില്പന ഇപ്പോഴും നടക്കുന്നുണ്ടെന്നും നിയമം കര്ശനമായി നടപ്പാക്കാത്തതിലൂടെ നൂറുകണക്കിന് ആളുകളുടെ ജീവന് അപകടത്തിലാകുന്നതും നമുക്ക് ഓര്മപ്പെടുത്താമെന്നും പാര്വതി കുറിച്ചു.
ആസിഡ് ആക്രമണത്തിന് ഇരയായ യുവതിയുടെ കഥ പറയുന്ന 'ഉയരെ'യിലെ പ്രധാന കഥാപാത്രത്തെ അവതരിപ്പിച്ചത് പാര്വതിയായിരുന്നു. നേരത്തെ, തെലുങ്ക് ചിത്രമായ അര്ജുന് റെഡ്ഡിക്കെതിരെ പരസ്യമായി അഭിപ്രായ പ്രകടനം നടത്തിയ പാര്വതി വിവാദത്തില്പ്പെട്ടിരുന്നു. അര്ജുന് റെഡ്ഡി സ്ത്രീ വിരുദ്ധ സിനിമയാണെന്നാണ് പാര്വതി, അര്ജുന് റെഡ്ഡിയിലെ നായക കഥാപാത്രത്തെ അവതരിപ്പിച്ച വിജയ് ദേവരകൊണ്ടെയെ സാക്ഷിയാക്കി പറഞ്ഞത്. തുടര്ന്ന് പാര്വതിയെ പ്രശംസിച്ച് നിരവധിപേര് രംഗത്തെത്തി. നേരത്തെ മമ്മൂട്ടി നായകനായ കസബയെ വിമര്ശിച്ച പാര്വതിക്കെതിരെ സൈബര് ആക്രമണമുണ്ടായിരുന്നു.