റെഡ്മി നോട്ട് 9 എസ് മാര്‍ച്ച് 23-ന്, പ്രത്യേകതകളും വിലസൂചനയും ഇങ്ങനെ
റെഡ്മി നോട്ട് 9 എസിന്റെ ടീസര്‍ പോസ്റ്ററില്‍ നിന്ന് വ്യക്തമാകുന്നതുപോലെ, സ്മാര്‍ട്ട്‌ഫോണിന്റെ പിന്നില്‍ ഒരു ക്വാഡ് ക്യാമറ സജ്ജീകരണം ഉള്‍ക്കൊള്ളുന്നു. ക്യാമറ മൊഡ്യൂള്‍ റെഡ്മി നോട്ട് 9 പ്രോ, പ്രോ മാക്‌സ് എന്നിവയിലേതുപോലെ ക്രമീകരിച്ചിരിക്കുന്നു.
റെഡ്മിയുടെ പുതിയൊരു ഫോണ്‍ കൂടി വിപണിയിലേക്ക്. അടുത്തിടെ ഇന്ത്യയില്‍ അവതരിപ്പിച്ച റെഡ്മി നോട്ട് 9 പ്രോ, പ്രോ മാക്‌സ് എന്നിവ കൂടാതെ മറ്റൊന്നു കൂടി അന്താരാഷ്ട്ര വിപണിയിലെത്തുന്നു. റെഡ്മി നോട്ട് സീരീസിലെ പുതിയ സവിശേഷതകളും പ്രത്യേകതകളും നിറഞ്ഞ റെഡ്മി നോട്ട് 9 എസ് എന്നാണ് ഇതിനു പേര്. ഫോണ്‍ മാര്‍ച്ച് 23-ന് ലോഞ്ച് ചെയ്യും.
റെഡ്മി നോട്ട് 9 പ്രോയും റെഡ്മി നോട്ട് 9 പ്രോ മാക്‌സും പുറത്തിറങ്ങിയ ഉടന്‍ തന്നെ, റെഡ്മി നോട്ട് 9 എസ് എന്ന പേരില്‍ മറ്റൊരു പുതിയ ഫോണ്‍ പുറത്തിറക്കാനാണ് ഷവോമി തയ്യാറെടുക്കുന്നത്. വില, സ്‌പെസിഫിക്കേഷന്‍ എന്നിവയെ സംബന്ധിച്ച് ഇപ്പോഴും ദുരൂഹത തുടരുകയാണ്. ഇത് ഷവോമിയുടെ മലേഷ്യന്‍ വിഭാഗമാണ് പ്രഖ്യാപിച്ചിരിക്കുന്നത്. അടുത്തയാഴ്ച മലേഷ്യയില്‍ പുതിയ റെഡ്മി നോട്ട് 9 എസ് പുറത്തിറക്കാനാണ് ഷവോമി പദ്ധതിയിടുന്നത്. സിംഗപ്പൂര്‍ ട്വിറ്റര്‍ ഹാന്‍ഡിലും മലേഷ്യ ഫേസ്ബുക്ക് പേജിലും സ്മാര്‍ട്ട്‌ഫോണ്‍ വിപണിയിലെത്തിയതായി ബ്രാന്‍ഡ് സ്ഥിരീകരിച്ചു. പുതിയ നോട്ട് 9 എസിന്റെ ലോഞ്ച് മാര്‍ച്ച് 23 ന് ആരംഭിക്കും.
റെഡ്മി നോട്ട് 9 എസിന്റെ ടീസര്‍ പോസ്റ്ററില്‍ നിന്ന് വ്യക്തമാകുന്നതുപോലെ, സ്മാര്‍ട്ട്‌ഫോണിന്റെ പിന്നില്‍ ഒരു ക്വാഡ് ക്യാമറ സജ്ജീകരണം ഉള്‍ക്കൊള്ളുന്നു. ക്യാമറ മൊഡ്യൂള്‍ റെഡ്മി നോട്ട് 9 പ്രോ, പ്രോ മാക്‌സ് എന്നിവയിലേതുപോലെ ക്രമീകരിച്ചിരിക്കുന്നു. വരാനിരിക്കുന്ന സ്മാര്‍ട്ട്‌ഫോണിന്റെ മറ്റൊരു പ്രത്യേകത പഞ്ച് ഹോള്‍ ഡിസ്‌പ്ലേയില്‍ വന്നിരിക്കുന്ന സെല്‍ഫി ക്യാമറയാണ്. പഞ്ച് ഹോള്‍ സ്‌ക്രീനിന്റെ മുകളിലെ മധ്യഭാഗത്താണ്. ഇതിനെ 'ഡോട്ട് ഡിസ്‌പ്ലേ' എന്നു ഷവോമി പേരിട്ടിരിക്കുന്നു.
നോട്ട് 9 എസ് പൂര്‍ണ്ണമായും മറ്റൊരു മോഡലാകുമോ അതോ പുതിയ ബ്രാന്‍ഡിംഗും പുതിയ പേരും ഉള്ള നിലവിലുള്ള മോഡലുകളിലൊന്നാണോ എന്ന് ഇപ്പോഴും അറിയില്ല. മാര്‍ച്ച് 23 തിങ്കളാഴ്ച ലോഞ്ച് ചെയ്യുന്നതു വരെ കാത്തിരിക്കേണ്ടി വരും. സവിശേഷതകളെ സംബന്ധിച്ചിടത്തോളം, റെഡ്മി നോട്ട് 9 പ്രോയില്‍ കാണുന്ന 6.6 ഇഞ്ച് പാനലിനേക്കാള്‍ ചെറിയ അളവുകളുള്ള എഫ്എച്ച്ഡി + ഡിസ്‌പ്ലേ ഈ പുതിയ റെഡ്മി സ്മാര്‍ട്ട്‌ഫോണില്‍ ഉള്‍പ്പെടുത്തുമെന്നാണ് അഭ്യൂഹങ്ങള്‍.
റെഡ്മി നോട്ട് 9 പ്രോ, പ്രോ മാക്‌സ് എന്നിവയ്ക്ക് സമാനമായി, പുതിയ റെഡ്മി നോട്ട് 9 എസിന് സ്‌നാപ്ഡ്രാഗണ്‍ 720 ജി ആണുള്ളത്. റെഡ്മി നോട്ട് 9 പ്രോ, പ്രോ മാക്‌സ് എന്നിവയെ സംബന്ധിച്ചിടത്തോളം മാര്‍ച്ച് 12 നാണ് ഈ ഫോണുകള്‍ ഇന്ത്യയില്‍ വിപണിയിലെത്തിയത്. റെഡ്മി നോട്ട് 9 പ്രോയുടെ ആരംഭ വില 12,999 രൂപയാണ്. അതേസമയം, റെഡ്മി നോട്ട് 9 പ്രോ മാക്‌സ് ആരംഭിക്കുന്നത് 14,999 രൂപയ്ക്കാണ്.
