കൊവിഡ്: രാജ്യത്ത് മരണം 111 ആയി, ലോകത്ത് മരണം 73600 കടന്നു; കേരളത്തില്‍ 13 പേര്‍ക്ക് കൂടി രോഗം| Live

covid 19 virus live updates

കൊവിഡ് രോഗബാധയേറ്റുള്ള മരണം ആഗോളതലത്തില്‍ 72000 കടന്നു. പതിമൂന്ന് ലക്ഷത്തിലധികം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായി. അതേസമയം കേരളത്തില്‍ 13 പേർക്ക് കൂടി രോഗം സ്ഥിരീകരിച്ചു

11:17 PM IST

ലോക്ക് ഡൗണ്‍ 21 ദിവസംകൂടി നീട്ടണമെന്ന് ആവശ്യപ്പെട്ട് ഐഎംഎ

കൊവിഡ് 19 രോഗം പടര്‍ന്ന് പിടിക്കുന്നത് നിയന്ത്രിക്കുന്നതിനായി രാജ്യവ്യാപകമായി നടപ്പിലാക്കിയ ലോക്ക് ഡൗണ്‍ ഇപ്പോഴത്തെ കാലാവധിക്ക് ശേഷം അടുത്ത 21 ദിവസം കൂടി തുടരണമെന്ന് ഇന്ത്യന്‍ മെഡിക്കല്‍ അസോസിയേഷന്റെ വിദഗ്ധ സമിതി ആവശ്യപ്പെട്ടു. ഈക്കാര്യം ചൂണ്ടിക്കാട്ടി ഐഎംഎ മുഖ്യമന്ത്രിക്ക് കത്ത് നല്‍കിയതായി ഐഎംഎ യുടെ സംസ്ഥാന പ്രസിഡന്റ് ഡോ. എബഹാം വര്‍ഗീസും സെക്രട്ടറി ഡോ. ഗോപികുമാറും അറിയിച്ചു

10:58 PM IST

കൊവിഡ്: മരണ സംഖ്യ 73600 കടന്നു

ലോകമാകെ മഹാമാരിയായി പടര്‍ന്ന കൊവിഡില്‍ മരണസംഖ്യ ഉയരുന്നു. ആഗോളതലത്തില്‍ മരണ സംഖ്യ 73600 കടന്നു. പതിമൂന്ന് ലക്ഷത്തിലധികം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായിട്ടുണ്ട്

10:32 PM IST

മുംബൈയില്‍ വീണ്ടും മരണം, രാജ്യത്ത് മരണസംഖ്യ 111 ആയി

മഹാരാഷ്ട്രയില്‍ കൊവിഡ് മരണസംഖ്യ വര്‍ധിക്കുന്നു. മുംബൈയില്‍ 38 കാരിയായ ഗര്‍ഭിണിയാണ് ഏറ്റവുമൊടുവില്‍ മരിച്ചത്. ഇതോടെ രാജ്യത്തെ മരണ സംഖ്യ 111 ആയി. മൊത്തം കൊവിഡ‍് ബാധിതരുടെ എണ്ണം 4281 പേര്‍ക്കാണ്.

10:15 PM IST

കൊവിഡ് വ്യാപനത്തിൻ്റെ പേരിൽ മുസ്‍ലീങ്ങളെ കുറ്റപ്പെടുത്തരുത്: യെദൂരിയപ്പ

കൊവിഡ് വ്യാപനത്തിൻ്റെ പേരിൽ മുസ്ലീങ്ങളെ കുറ്റപ്പെടുത്തരുതെന്ന് കർണാടക മുഖ്യമന്ത്രി ബിഎസ് യെദൂരിയപ്പ. മുസ്ലീങ്ങൾക്കെതിരെ ആരും ഒരു വാക്കു പോലും മിണ്ടരുതെന്നും യെദ്യൂരിയപ്പ പറഞ്ഞു. സർക്കാർ നടപടികളോട് തബ്ലീഗ് സമ്മേളനത്തിൽ പങ്കെടുത്തു മടങ്ങിയെത്തിയവർ പൂർണമായും സഹകരിക്കുന്നുണ്ടെന്നും യെദ്യൂരിയപ്പ ആവശ്യപ്പെട്ടു. കർണാടകയിൽ ഇതുവരെ 163 പേർക്കാണ് കൊവിഡ് സ്ഥിരീകരിച്ചത്

9:54 PM IST

കൊവിഡില്‍ മരണസംഖ്യ വര്‍ധിക്കുന്നു; ലോകത്ത് മരണം 72000 കടന്നു

ലോകമാകെ മഹാമാരിയായി പടര്‍ന്ന കൊവിഡില്‍ മരണസംഖ്യ ഉയരുന്നു. ആഗോളതലത്തില്‍ മരണ സംഖ്യ 72000 കടന്നു. പതിമൂന്ന് ലക്ഷത്തിലധികം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായിട്ടുണ്ട്

9:26 PM IST

കൊവിഡ്: ലോകത്ത് മരണ സംഖ്യ 71000 കടന്നു

ലോകമാകെ മഹാമാരിയായി പടര്‍ന്ന കൊവിഡില്‍ മരണസംഖ്യ ഉയരുന്നു. ആഗോളതലത്തില്‍ മരണ സംഖ്യ 71000 കടന്നു. പതിമൂന്ന് ലക്ഷത്തോളം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായിട്ടുണ്ട്

8:48 PM IST

ചികിത്സ കിട്ടാതെ കാസര്‍കോട് ഒരു മരണം കൂടി

അതിര്‍ത്തി അടച്ചതിനാല്‍ ചികിത്സ കിട്ടാതെ കാസര്‍കോട് ഒരു മരണം കൂടി. കടമ്പാർ സ്വദേശി കമല ആണ് മരിച്ചത്. മംഗലുരുവിലെ ആശുപത്രിയിലേക്ക് കൊണ്ടുപോകാൻ ശ്രമിച്ചെങ്കിലും കർണാടക പൊലീസ് തടഞ്ഞു മടക്കി അയച്ചു. കാസര്‍കോട്ടെ സ്വകാര്യ ആശുപത്രിയിൽ ആയിരുന്നു മരണം

8:23 PM IST

യെദിയൂരപ്പയുടെ മുന്നറിയിപ്പ്

കൊവിഡ് വ്യാപനത്തിന്റെ പേരിൽ മുസ്ലിങ്ങളെ കുറ്റപ്പെടുത്തരുതെന്ന് യെദിയൂരപ്പയുടെ മുന്നറിയിപ്പ്. മുസ്ലീങ്ങൾക്കെതിരെ ആരും ഒരു വാക്കുപോലും മിണ്ടരുതെന്നും സർക്കാർ നടപടികളോട് തബ്ലീഗ് സമ്മേളനത്തിൽ പങ്കെടുത്തു മടങ്ങിയെത്തിയവർ പൂർണമായി സഹകരിക്കുന്നുണ്ടെന്നും യെദിയൂരപ്പ. 

8:15 PM IST

തെലങ്കാനയിൽ ലോക്ക് ഡൗൺ നീട്ടിയേക്കും

തെലങ്കാനയിൽ ലോക്ക് ഡൗൺ ജൂൺ 3 വരെ തുടർന്നേക്കുമെന്നു തെലങ്കാന മുഖ്യമന്ത്രി ചന്ദ്രശേഖര റാവു. ലോക്ക് ഡൗൺ നീട്ടാതെ മറ്റ് മാർഗങ്ങളില്ലെന്നും ഇത് പ്രധാനമന്ത്രിയെ അറിയിച്ചെന്നും റാവു പറയുന്നു. ലോക്ക് ഡൗൺ നീട്ടാൻ പ്രധാനമന്ത്രിയോട്  തെലങ്കാന അഭ്യർത്ഥിച്ചു. 

8:24 PM IST

അമേരിക്കയിൽ കടുവയ്ക്ക് കൊവിഡ് ബാധ: ഇന്ത്യയിലെ മൃഗശാലകളിലും ജാഗ്രതാ നിർദേശം

ന്യൂയോർക്കിലെ ബ്രോങ്ക്സ് മൃഗശാലയിൽ കടുവയ്ക്ക് കൊവിഡ് പിടിപെട്ടതിനെതുടര്‍ന്ന് ഇന്ത്യയിലെ മൃഗശാലകൾക്കടക്കം ജാഗ്രതനിർദേശം നൽകി. നാല് വയസ്സുകാരിയായ നാദിയ എന്ന പെൺകടുവയ്ക്കാണ് കൊവിഡ് പിടിപെട്ടത്. മൃഗശാലയിലെ ജീവനക്കാരനിൽ നിന്നാണ് കടുവയ്ക്ക് രോഗബാധയുണ്ടായത് എന്ന് മൃഗശാല അധികൃതർ പറഞ്ഞു

7:56 PM IST

തമിഴ്നാട്ടിൽ വച്ച് കൊവി‍ഡ് ബാധിച്ച ഡോക്ടർക്ക് അസുഖം ഭേദമായി

 

കോട്ടയം സ്വദേശിനിയായ ഡോക്ടറും പത്ത് മാസം പ്രായമായ കുട്ടിയും ഡിസ്ചാർജ് ആയി. കോയമ്പത്തൂർ സർക്കാർ ആശുപത്രിയിൽ ചികിത്സയിലായിരുന്നു. തബ്ലീഗ് സമ്മേളനത്തിൽ പങ്കെടുത്തയാളുമായി സമ്പർക്കം പുലർത്തിയ റെയിൽവേ ജീവനക്കാരനെ ചികിത്സിച്ചതോടെയായിരുന്നു ഡോക്ടർക്ക് രോഗം പകർന്നത്. 

7:53 PM IST

പ്രവാസികളുടെ വിസ കാലാവധി നീട്ടി നല്‍കണം; വിദേശകാര്യമന്ത്രിക്ക് മുഖ്യമന്ത്രിയുടെ കത്ത്

പ്രവാസികളുടെ പ്രശ്‌നങ്ങള്‍ പരിഹരിക്കാന്‍ രാജ്യത്തിന്റെ ഇടപെടല്‍ ആവശ്യപ്പെട്ടുകൊണ്ട്് വിദേശകാര്യമന്ത്രി എസ് ജയശങ്കറുമായി കത്തുമുഖേനെ ബന്ധപ്പെട്ടുവെന്ന് മുഖ്യമന്ത്രി. വിസാ കാലാവധി ആറ് മാസം നീട്ടി നല്‍കണമെന്ന് കത്തില്‍ ആവശ്യപ്പെട്ടു. ആരോഗ്യ ഇന്‍ഷുറന്‍സ് നടപ്പാക്കേണ്ടതിന്റെ ആവശ്യകതയും കത്തില്‍ പരാമര്‍ശിച്ചിട്ടുണ്ട്. ലോക്ക് ഡൗണ്‍ അവസാനിക്കുന്നതോടെ കേരളത്തിലേക്ക് എത്തുന്ന പ്രവാസികളെ സ്വീകരിക്കുന്നതില്‍ പ്രോട്ടോകോള്‍ വേണ്ടതിന്റെ ആവശ്യകത ചൂണ്ടിക്കാട്ടിയെന്നും മുഖ്യമന്ത്രി വാര്‍ത്താസമ്മേളനത്തില്‍ അറിയിച്ചു

7:32 PM IST

ഗള്‍ഫ് മലയാളി സ്‌കൂള്‍ മാനേജ്‌മെന്റുകള്‍ ഫീസടയ്ക്കാന്‍ സമയം നീട്ടിനല്‍കണമെന്ന്  മുഖ്യമന്ത്രി

ലോകമാകെ വ്യാപിച്ചുകിടക്കുന്ന പ്രവാസി മലയാളി സമൂഹം ആശങ്കയിലാണെന്നും അവരെ ചേര്‍ത്ത് നിര്‍ത്തണമെന്നും ആവര്‍ത്തിച്ച് മുഖ്യമന്ത്രി പിണറായി വിജയന്‍. നേരത്തേ സാമ്പത്തികമായി നല്ല നിലയിലായിരുന്നു പ്രവാസികള്‍. എന്നാല്‍ മിക്കവരും ഇപ്പോള്‍ സാമ്പത്തിക ബുദ്ധിമുട്ടുകള്‍ നേരിടുന്നുണ്ട്. ഗള്‍ഫ് മേഖലയിലെ സ്‌കൂളുകള്‍ അടച്ചിട്ടിരിക്കുകയാണ്. എന്നാല്‍ ഈ അദ്ധ്യയന വര്‍ഷത്തെ ഫീസ് നല്‍കേണ്ടസമയമാണിപ്പോള്‍. ഈ സാഹചര്യത്തില്‍ പ്രവാസി മലയാളികള്‍ നടത്തുന്ന സ്‌കൂള്‍ മാനേജ്‌മെന്‍റുകള്‍ ഫീസടയ്ക്കാന്‍ സമയം നീട്ടിനല്‍കണമെന്ന് മുഖ്യമന്ത്രി ആവശ്യപ്പെട്ടു

7:11 PM IST

ആന്ധ്ര പ്രദേശിൽ 37 പേർക്ക് കൂടി കൊവിഡ്

ആന്ധ്ര പ്രദേശിൽ 37 പേർക്ക് കൂടി കൊവിഡ് സ്ഥിരീകരിച്ചു. കുർണൂൽ ജില്ലയിൽ മാത്രം കൊവിഡ് രോഗികൾ 74 ആയി. 

7:10 PM IST

കണ്ണൂർ സ്വദേശി ദില്ലിയിൽ മരിച്ചു

ലോക്ക് ഡൗണിനെ തുടർന്ന് ദില്ലിയിൽ കുടുങ്ങിയ കണ്ണൂർ താക്കാവ് സ്വദേശി  മരിച്ചു. ആർ കുഞ്ഞിരാമൻ നമ്പ്യാരുടെ മകൻ വിപിൻ പാലക്കൽ (28)ആണ് മരിച്ചത്. ഹൃദയാഘാതത്തെ തുടർന്നാണ് മരണം.

6:52 PM IST

കൊവിഡ് കർമ്മ സമിതി റിപ്പോർട്ട്‌ നൽകി

കൊവിഡ് കർമ്മ സമിതി മുഖ്യമന്ത്രിക്ക് റിപ്പോർട്ട്‌ നൽകി. 

6:48 PM IST

ദീപം തെളിയിക്കലിൽ പരോക്ഷവിമർശനവുമായി മുഖ്യമന്ത്രി

തീർത്തും അശാസ്ത്രീയമായ കാര്യം രാജ്യമാകെ ചെയ്യണമെന്ന് പ്രധാനമന്ത്രി പറയുമ്പോൾ വിമർശനങ്ങളുണ്ടാവും. പ്രകാശം പരക്കേണ്ടത് ബുദ്ധിമുട്ടനുഭവിക്കുന്നവരുടെ മനസിലാണെന്ന് മുഖ്യമന്ത്രി. അതിന് സാമ്പത്തിക സഹായം വേണം. അതിനിയും വരേണ്ടതുണ്ട്.

6:45 PM IST

റാപിഡ് ടെസ്റ്റ് തിരുവനന്തപുരത്ത് ആരംഭിച്ചിട്ടില്ലെന്ന് മുഖ്യമന്ത്രി

റാപിഡ് ടെസ്റ്റ് തിരുവനന്തപുരത്ത് ആരംഭിച്ചിട്ടില്ലെന്ന് മുഖ്യമന്ത്രി സാധാരാണ നടത്തുന്ന ടെസ്റ്റാണിതെന്നും തെറ്റായി റിപ്പോർട്ട് ചെയ്തതാണെന്നും മുഖ്യമന്ത്രി. 

6:39 PM IST

കാസർകോടിന് സഹായവുമായി ടാറ്റ ഗ്രൂപ്പും മഹീന്ദ്രയും

കാസർകോട് ഐസൊലേഷനും മറ്റുമായി ടാറ്റ ഗ്രൂപ്പ് സഹകരിക്കും. അവരുടെ സംഘം കാസർകോട് നിന്ന് പ്രവർത്തി പൂർത്തീകരിക്കും. മഹീന്ദ്ര ആന്റ് മഹീന്ദ്ര ആരോഗ്യ പ്രവർത്തകർക്കുള്ള ആയിരം പ്രൊഡക്ടീവ് ഷീൽഡ് നൽകും.

6:38 PM IST

കൊവിഡ് ബാധിതരായ ക്ഷീര കർഷകർക്ക് പതിനായിരം രൂപ

കൊവിഡ് ബാധിതരായ ക്ഷീര കർഷകർക്ക് പതിനായിരം രൂപയും നിരീക്ഷണത്തിലുള്ളർക്ക് രണ്ടായിരം രൂപയും നൽകും. കലാകാരന്മാരുടെ ഈ മാസത്തെ പെൻഷൻ തുക നാളെ മുതൽ അക്കൗണ്ടുകളിലെത്തും. ഈ മാസം 158 പേർക്ക് പുതുതായി അനുവദിച്ചു. സാംസ്കാരിക ക്ഷേമനിധി ബോർഡ് ഒരു കോടി രൂപ കലാകാരന്മാർക്ക് വിതരണം ചെയ്യും.

6:38 PM IST

തൃശ്ശൂർ ജില്ലയിൽ 5280 റാപിഡ് ടെസ്റ്റ് കിറ്റുകൾ

തൃശ്ശൂർ ജില്ലയിൽ 5280 റാപിഡ് ടെസ്റ്റിന് ഒരു കോടി രൂപ അനുവദിച്ചതായി ടി എൻ പ്രതാപൻ എംപി അറിയിച്ചു.

6:35 PM IST

കമ്പ്യൂട്ടർ സെന്‍ററുകൾ, റീ ചാർജ് കടകൾ എന്നിവ ആഴ്ചയിൽ ഒരു ദിവസം തുറക്കാം

ആഴ്ചയിൽ ഒരു ദിവസം കംപ്യൂട്ടർ റിപ്പെയർ സെന്‍ററുകളും റീച്ചാർജ്ജ് കടകളും തുറക്കാൻ ആലോചിക്കും. വാഹനങ്ങളുടെ വർക്‌ഷോപ്പുകളും തുറക്കുമെന്ന് മുഖ്യമന്ത്രി. 

6:32 PM IST

കലാകാരൻമാരുടെ കാര്യം അനുഭാവപൂർവ്വം പരിഗണിക്കുമെന്ന് മുഖ്യമന്ത്രി

3000 അതിഥി മന്ദിരങ്ങളിലായി 42602 അന്തേവാസികളുണ്ട്. ഇവർക്ക് സൗജന്യ അരി നൽകണം. ഇവിടെ നാല് അന്തേവാസികൾക്ക് ഒരു കിറ്റ് എന്ന നിലയിലും സൗജന്യമായി വിതരണം ചെയ്യും. പ്രൊഫഷണൽ നാടക സമിതികൾ, ഗാനമേള ട്രൂപ്പുകൾ, മിമിക്രി കലാകരന്മാർ, തെയ്യവുമായി ബന്ധപ്പെട്ട കലാകാരന്മാരെല്ലാം ഇപ്പോൾ പ്രതിസന്ധിയിലാണ്. അവരുടെ കാര്യം അനുഭാവ പൂർവ്വം പരിഗണിക്കും.

6:30 PM IST

വിമാനയാത്ര റദ്ദാക്കിയവർക്ക് റീഫണ്ട് ലഭിക്കാൻ ഇടപെടണമെന്ന് കേന്ദ്രത്തോട് ആവശ്യപ്പെട്ടു

ലോക്ക് ഡൗണിനെ തുടർന്ന് വിമാനയാത്ര റദ്ദാക്കിയവർക്ക് റീഫണ്ട് ലഭിക്കാൻ ഇടപെടണമെന്ന് കേന്ദ്രത്തോട് ആവശ്യപ്പെട്ടു.

6:30 PM IST

ആളുകളെ പുറത്തിറക്കാൻ കഥകൾ പ്രചരിക്കുന്നു

മലപ്പുറം കോഴിക്കോട് ജില്ലകളിൽ ആളുകളെ പുറത്തിറക്കാൻ പ്രേരിപ്പിക്കുന്ന കഥകൾ പ്രചരിക്കുന്നുവെന്ന് മുഖ്യമന്ത്രി. മോഷ്ടാവിന്‍റെയും അജ്ഞാത ജീവിയുടെയും പേരിൽ ആളുകളെ പുറത്തിറങ്ങാൻ പ്രേരിപ്പിക്കുന്ന സന്ദേശങ്ങൾ പോകുന്നു. അത് അംഗീകരിക്കില്ല. ശക്തമായ നടപടി സ്വീകരിക്കുമെന്ന് മുഖ്യമന്ത്രി. ഉറവിടം കണ്ടെത്താൻ നിർദ്ദേശം നൽകിയതായും മുഖ്യമന്ത്രി.

6:28 PM IST

മലയാളി നഴ്സുമാരുടെ വിഷയത്തിൽ ഇടപെടൽ

മലയാളി നഴ്സുമാർക്ക് കൊവിഡ് ബാധ സ്ഥിരീകരിച്ച പശ്ചാത്തലത്തിൽ ഇടപെടലിനായി പ്രധാനമന്ത്രിക്ക് കത്ത് നൽകിയതായി മുഖ്യമന്ത്രി. മഹാരാഷ്ട്ര സർക്കാരിനും കത്ത് നൽകിയിട്ടുണ്ട്. മുംബൈയിലെ 46 മലയാളി നഴ്സുമാർക്കാണ് രോഗം സ്ഥിരീകരിച്ചത്. 150 ലേറെ നഴ്സുമാർ അവിടെ നിരീക്ഷണത്തിലാണ്. ദില്ലിയിലെ കാൻസർ ഇൻസ്റ്റിറ്റ്യൂട്ടിൽ അഞ്ച് മലയാളി നഴ്സുമാർക്ക് കൊവിഡ് സ്ഥിരീകരിച്ചു. സുരക്ഷാ ഉപകരണമില്ലാതെ ജോലി ചെയ്യേണ്ടി വരുന്നുവെന്നാണ് പരാതി. വിവിധ സംസ്ഥാന മുഖ്യമന്ത്രിമാരുമായി ബന്ധപ്പെടുന്നുണ്ടെന്നും മുഖ്യമന്ത്രി.

6:22 PM IST

കർണ്ണാടക അതിർത്തി വഴി രോഗികളെ കടത്തി വിടാൻ അനുമതി

കർണ്ണാടക അതിർത്തി വഴി രോഗികളെ കടത്തി വിടാൻ അനുമതി ലഭിച്ചതായി മുഖ്യമന്ത്രി. കർണാടകത്തിലേക്ക് കൊവിഡ് ബാധയില്ലാത്ത രോഗികളെ കടത്തിവിടും. കർണാടക ആശുപത്രിയിലേക്ക് മെഡിക്കൽ സർട്ടിഫിക്കറ്റുമായി വേണം യാത്ര ചെയ്യാൻ. തലപ്പാടി ചെക്ക് പോസ്റ്റിൽ കർണ്ണാടകത്തിന്റെ മെഡിക്കൽ സർട്ടിഫിക്കറ്റോടെ മുന്നോട്ട് പോകാൻ അനുവാദം വാങ്ങാം. മംഗലാപുരത്തേക്ക് പോകുന്നവർ മെഡിക്കൽ സർട്ടിഫിക്കറ്റോടെ പോകണം. ഏത് ആശുപത്രിയിലേക്കാണ് പോകുന്നതെന്ന് അതിൽ രേഖപ്പെടുത്തണം.

 

6:20 PM IST

പഠന ചുമതല ഗുലാത്തി ഇൻസ്റ്റിറ്റ്യൂട്ടിന്

ലോക്ക് ഡൗൺ സാഹചര്യത്തിലെ  റവന്യൂ വരുമാനത്തെ കുറിച്ച് പഠിക്കാൻ ഗുലാത്തി ഇൻസ്റ്റിറ്റ്യൂട്ടിനെ ചുമതലപ്പെടുത്തിയതായി മുഖ്യമന്ത്രി.

6:19 PM IST

കേന്ദ്ര വിദേശകാര്യമന്ത്രിയുമായി ബന്ധപ്പെട്ടതായി മുഖ്യമന്ത്രി

കേന്ദ്രമന്ത്രി ജയശങ്കറിനെ കത്ത് വഴി ബന്ധപ്പെട്ടുവെന്ന് മുഖ്യമന്ത്രി പിണറായി വിജയൻ. വിസ കാലാവധി ആറ് മാസം കൂടി വർധിപ്പിക്കണമെന്നും. ആരോഗ്യ ഇൻഷുറൻസ് നടപ്പാക്കേണ്ട ആവശ്യകതയും കത്തിൽ ചൂണ്ടിക്കാട്ടി. ലോക്ക് ഡൗൺ അവസാനിക്കുന്നതോടെ കേരളത്തിലേക്ക് എത്തുന്ന പ്രവാസികളെ സ്വീകരിക്കുന്നത് സംബന്ധിച്ച് പ്രോട്ടോക്കോൾ വേണമെന്ന് കത്തിൽ ആവശ്യപ്പെട്ടു. സംസ്ഥാനം വിദഗ്ദ്ധ സമിതിയുടെ റിപ്പോർട്ട് ലഭിച്ച ശേഷം ആവശ്യമായ തീരുമാനത്തിലെത്തും.

6:18 PM IST

ഇത് ദു‌ർഘടമായ കാലം

ഈ കാലം ദുർഘട കാലമാണ്. നേരത്തെ പ്രവാസികൾ സാമ്പത്തിക ശേഷിയുള്ളവരായിരുന്നു. ഇന്ന് ഒട്ടുമിക്ക ആളുകളും പ്രയാസം അനുഭവിക്കുന്നു. എല്ലായിടത്തും ഇത്തരം ഫീസടക്കൽ മാറ്റിവച്ചിരിക്കുകയാണ്. അത് മാനിച്ച് ഗൾഫ് നാടുകളിലെ സ്കൂൾ മാനേജ്മെന്റുകൾ ഇപ്പോൾ ഫീസടക്കാൻ നിർബന്ധിക്കരുത്. അത് മാറ്റിവയ്ക്കാൻ എല്ലാവരോടും അഭ്യർത്ഥിക്കുന്നു.

6:17 PM IST

പ്രവാസികളുമായി വീഡിയോ കോൺഫറൻസിങ് നടത്തി

പ്രവാസികളുമായി വീഡിയോ കോൺഫറൻസിങ് നടത്തിയതായി മുഖ്യമന്ത്രി. 22 ലോകരാജ്യങ്ങളിൽ നിന്ന് 30 പേർ പങ്കെടുത്തു. ഓരോ മേഖലയിലും വ്യത്യസ്ത വിഷയങ്ങളാണ്. യാത്രാ വിലക്ക്, നിയന്ത്രണങ്ങൾ എന്നിവ പ്രവാസ ജീവിതത്തെ മാറ്റിമറിച്ചു. ഇക്കാര്യങ്ങൾ വിശദമായി ചർച്ച ചെയ്തു. പ്രവാസികളുമായി കൂടുതൽ ചർച്ച നടത്തും. പ്രവാസികൾക്ക് വേണ്ടി ചെയ്യാനാവുന്നതെല്ലാം ചെയ്യും. ഗൾഫ് നാടുകളിലെ സ്കൂളുകളിൽ പഠനം നടക്കുന്നില്ല. എന്നാൽ ഫീസ് നൽകേണ്ടി വരുന്നുണ്ട്. വിദ്യാഭ്യാസ രംഗത്തെ മലയാളി മാനേജ്മെന്റുകളുമായി ഇക്കാര്യം സംസാരിക്കണമെന്ന് അവർ ആവശ്യപ്പെട്ടു. അവരോരുത്തരുമായി പ്രത്യേകം സംസാരിക്കും. എങ്കിലും പരസ്യ അഭ്യർത്ഥന നടത്തുന്നു.

6:12 PM IST

തമിഴ്നാട്ടിൽ ഇന്ന് 50 പേർക്ക് കൂടി കൊവിഡ് 19

തമിഴ്നാട്ടിൽ ഇന്ന് 50 പേർക്ക് കൂടി കൊവിഡ് സ്ഥിരീകരിച്ചു. 48 പേരും നിസാമുദ്ദീനിൽ നിന്ന് തിരിച്ചെത്തിയവരാണ്. ഇതോടെ തമിഴ്നാട്ടിലെ കൊവിഡ് ബാധിതരുടെ എണ്ണം 621 ആയി.

6:12 PM IST

തമിഴ്നാട്ടിൽ ഒരു മരണം കൂടി

തമിഴ്നാട്ടിൽ ഒരു കൊവിഡ് മരണം കൂടി. ചെന്നൈ സ്വദേശിയായ 57 വയസ്സുള്ള സ്ത്രീയാണ് മരിച്ചത്. ഇതോടെ തമിഴ്നാട്ടിൽ മരണം ആറായി.

6:12 PM IST

ക‍ർണാടകയിൽ 12 പേർക്ക് കൂടി കൊവിഡ്

കർണാടകയിൽ 12 പേർക്ക് കൂടി കൊവിഡ് 19 സ്ഥിരീകരിച്ചു. ഇതോടെ ആകെ രോഗികളുടെ എണ്ണം 163 ആയി. ഇന്ന് കർണാടകയിൽ രോഗം സ്ഥിരീകരിച്ചവരിൽ ജർമനിയിൽ നിന്നെത്തിയ എറണാകുളം സ്വദേശിയുമുണ്ട്. 

6:12 PM IST

എംഎൽഎമാരുമായി വീഡിയോ കോൺഫ്രൻസിംഗ് നടത്തിയതായി മുഖ്യമന്ത്രി

എംഎൽഎമാരുമായി കഴിഞ്ഞ ദിവസം വീഡിയോ കോൺഫറൻസിങ് നടത്തിയതായി മുഖ്യമന്ത്രി അറിയിച്ചു. പ്രവർത്തനങ്ങൾ വിലയിരുത്തി മാറ്റം വരുത്തേണ്ടതാണ് ചർച്ച നടത്തിയത്. നിയമസഭാംഗങ്ങൾ കളക്ട്രേറ്റിലെത്തി. സ്പീക്കറും പ്രതിപക്ഷ നേതാവും ഉമ്മൻചാണ്ടിയും പങ്കെടുത്തു. സഭാ സമ്മേളനത്തിന്റെ അതേ പ്രതീതിയായിരുന്നുവെന്ന് മുഖ്യമന്ത്രി. സർക്കാർ ഇടപെടലിൽ എല്ലാവരും സംതൃപ്തി രേഖപ്പെടുത്തിയെന്നും പിണറായി വിജയൻ വാർത്താസമ്മേളനത്തിൽ. 

6:11 PM IST

ജില്ല മാറി റേഷൻ ലഭിക്കാത്ത പ്രശ്നം പരിഹരിക്കും

ജില്ല മാറി റേഷൻ ലഭിക്കാത്ത പ്രശ്നം പരിഹരിക്കാൻ നിർദ്ദേശം നൽകിയതായി മുഖ്യമന്ത്രി. റേഷനുമായി ബന്ധപ്പെട്ട് അപൂർവമായി ചില പരാതികൾ ഉയർന്നു. ചിലർ റേഷൻ മോശമാണെന്ന പ്രചാരണവും നടത്തി. സമൂഹം ആദരിക്കുന്ന ചിലർ ഇത്തരം പ്രചരണങ്ങൾ തെറ്റാണെന്ന് അനുഭവത്തിലൂടെ പറഞ്ഞത് കഴിഞ്ഞ ദിവസങ്ങളിൽ സോഷ്യൽ മീഡിയയിൽ പറഞ്ഞു. നടനും നിർമ്മാതാവുമായ മണിയൻപിള്ള രാജുവിന്റെ പ്രതികരണം ഉദാഹരണം. റേഷൻ കടകളിൽ എല്ലാ സാധനങ്ങളും ഉറപ്പാക്കാൻ ശ്രദ്ധിക്കുന്നുണ്ടെന്ന് മുഖ്യമന്ത്രി. 

6:10 PM IST

ഏത് സാഹചര്യത്തെയും നേരിടാൻ സംസ്ഥാനം സജ്ജമെന്ന് മുഖ്യമന്ത്രി

കൊവിഡ് 19 ഏത് സാഹചര്യത്തെയും നേരിടാൻ സംസ്ഥാനം സജ്ജമാണ്. 1.25 ലക്ഷത്തോളം കിടക്കകൾ സർക്കാർ-സ്വകാര്യ ആശുപത്രികളിൽ ലഭ്യമാണ്. പുറമെ പ്രത്യേക കൊറോണ കെയർ സംവിധാനമുണ്ട്. പ്രതിരോധത്തിന് ത്രിതല സംവിധാനം തയ്യാറാക്കി. പതിനായിരത്തിലേറെ ഐസൊലേഷൻ കിടക്കകൾ ആശുപത്രികളിൽ സജ്ജമാക്കിയെന്ന് മുഖ്യമന്ത്രി. 

6:06 PM IST

മൂന്ന് പേർ കൂടി രോഗമുക്തരായി

കൊല്ലം, തൃശ്ശൂർ, കണ്ണൂർ ജില്ലകളിൽ ഓരോ പേരുടെ പരിശോധനാ ഫലം നെഗറ്റീവായതായി മുഖ്യമന്ത്രി.

 

6:05 PM IST

ഇത് വരെ രോഗം സ്ഥിരീകരിച്ചത് 327 പേർക്ക്

ഇതുവരെ സംസ്ഥാനത്ത് 327 പേർക്ക് രോഗം സ്ഥിരീകരിച്ചു. 266 പേർ ചികിത്സയിലുണ്ട്. 152804 പേർ നിരീക്ഷണത്തിലുണ്ട്. 152009 പേർ വീടുകളിൽ. 895 പേർ ആശുപത്രികളിൽ. 

6:05 PM IST

കാസർകോട് 9 പേർക്ക് കൂടി കൊവിഡ്

കാസർകോട് 9 പേർക്കും, മലപ്പുറത്ത് 2 പേർക്കും, കൊല്ലത്തും പത്തനംതിട്ടയിലും ഓരോ ആൾക്ക് വീതമാണ് ഇന്ന് രോഗം സ്ഥിരീകരിച്ചത്. കാസർകോട് 6 പേർ വിദേശത്ത് നിന്ന് വന്നവരാണ്. 

6:04 PM IST

സംസ്ഥാനത്ത് 13 പേർക്ക് കൂടി കൊവിഡ് സ്ഥിരീകരിച്ചു.

സംസ്ഥാനത്ത് 13 പേർക്ക് കൂടി കൊവിഡ് സ്ഥിരീകരിച്ചു

6:01 PM IST

18 മലയാളികൾ വിവിധ രാജ്യങ്ങളിൽ മരണമടഞ്ഞു

രോഗവ്യാപനം തടുത്ത് നിർത്താനായെന്ന് മുഖ്യമന്ത്രി. പൊതുവിൽ സ്വീകരിച്ച നടപടികൾ അതിന് വലിയ കാരണമാണെന്ന് പിണറായി വിജയൻ. എന്നാൽ ലോകവ്യാപകമായി സ്ഥിതി വ്യത്യസ്ഥമാണെന്നും മുഖ്യമന്ത്രി.. 18 മലയാളികൾ വിവിധ രാജ്യങ്ങളിൽ മരണമടഞ്ഞതായി മുഖ്യമന്ത്രി അറിയിച്ചു. ഈ കണക്ക് അന്തിമമല്ലെന്നും മുഖ്യമന്ത്രി ഔദ്യോഗിക സ്ഥിരീകരണം വരുമ്പോൾ ഇത് കൂടിയേക്കാം. 

5:55 PM IST

നിരീക്ഷണത്തിൽ ഉള്ളയാൾ മരിച്ചു

കൊച്ചിയിൽ നിരീക്ഷണത്തിൽ ഉള്ളയാൾ ഹൃദയസ്തംഭനം മൂലം മരിച്ചു. ഇന്നലെ മെഡിക്കൽ കോളേജിൽ ഐസൊലേഷൻ വാർഡിൽ പ്രവേശിപ്പിച്ച എറണാകുളം സ്വദേശിയായ 65കാരനാണ് രാത്രിയോടെ ഹൃദയാഘാതം മൂലം മരണമടഞ്ഞത്.  ഇയാളുടെ സാമ്പിൾ പരിശോധനാ ഫലം ലഭ്യമായിട്ടില്ല. വീട്ടിൽ 28 ദിവസത്തെ നിരീക്ഷണ കാലാവധി പൂർത്തിയാക്കിയിരുന്നു.

5:52 PM IST

മുംബൈ കോർപ്പറേഷൻ ആശുപത്രിക്കെതിരെ അന്വേഷണം

ഡോക്ടർമാർക്കും നഴ്സുമാർക്കും കൂട്ടത്തോടെ കൊവിഡ് ബാധിച്ച സംഭവത്തിൽ മുംബൈ കോർപ്പറേഷൻ ആശുപത്രിക്കെതിരെ അന്വേഷണം പ്രഖ്യാപിച്ചു.

5:05 PM IST

ഹരിപ്പാട് സ്വദേശിക്കും രോഗം ഭേദമായി

മാർച്ച് 24 ന് കൊവിഡ് സ്ഥിരീകരിച്ച ആലപ്പുഴ ഹരിപ്പാട് സ്വദേശിയുടെ രോഗം ഭേദമായി. തുടർച്ചയായ പരിശോധനാഫലം നെഗറ്റീവ് ആയതോടെ ഇദ്ദേഹത്തെ  മെഡിക്കൽ കോളേജ് ആശുപത്രിയിൽ നിന്നും ഡിസ്ചാർജ് ചെയ്തു. 

4:28 PM IST

ട്രെയിനിൽ സഞ്ചരിച്ചവർ കൺട്രോൾ റൂമുമായി ബന്ധപ്പെടണം

നിസാമുദ്ദീൻ സമ്മേളനത്തിൽ പങ്കെടുത്ത 4 പേർക്ക് കോവിഡ് സ്ഥിരീകരിച്ച സാഹചര്യത്തിൽ  ട്രെയിനിൽ യാത്ര ചെയ്തവരും റെയിൽവേ സ്റ്റേഷനിൽ ഉണ്ടായിരുന്നവരുമായ യാത്രക്കാര്‍ ജില്ലാ കണ്‍ട്രോള്‍ റൂമുമായി ബന്ധപ്പെടണമെന്ന് ജില്ലാ കലക്ടര്‍. മാര്‍ച്ച് 15നും 22 നും വൈകീട്ട് 6.30 നും ഏഴിനും ഇടയിൽ കോഴിക്കോട് റെയില്‍വേ സ്‌റ്റേഷന്‍ പ്ലാറ്റ്‌ഫോം ഒന്നിലും നാലിലും ഉണ്ടായിരുന്നവരാണ് കൺട്രോൾ റൂമുമായി ബന്ധപ്പെടേണ്ടത്. 15ന് നിസാമുദ്ദീന്‍-തിരുവനന്തപുരം എക്‌സ്പ്രസില്‍ (നമ്പര്‍- 22634) സ്ലീപ്പര്‍ കോച്ച് നമ്പര്‍ അഞ്ചില്‍ (എസ്5) യാത്ര ചെയ്ത കോഴിക്കോട് നിവാസികളായ മുഴുവന്‍ യാത്രക്കാരും ഉടന്‍ ജില്ലാ കണ്‍ട്രോള്‍ റൂമുമായി ബന്ധപ്പെടണമെന്ന് ജില്ലാ കലക്ടര്‍ അറിയിച്ചു. മറ്റ് ജില്ലകളിലെ യാത്രക്കാര്‍ അതത് ജില്ലാ കണ്‍ട്രോള്‍ റൂമുമായി ബന്ധപ്പെടണമെന്നും നിര്‍ദ്ദേശിച്ചു.

4:28 PM IST

പത്തനംതിട്ടയിൽ 95 പരിശോധനാ ഫലങ്ങൾ കൂടി നെഗറ്റീവ്

പത്തനംതിട്ടയിൽ 95 പരിശോധനാ ഫലങ്ങൾ കൂടെ നെഗറ്റീവായി. 163 സാംപിൾ കൂടെ പരിശോധനക്ക് അയച്ചിട്ടുണ്ട്.

4:20 PM IST

സമൂഹ വ്യാപനം തടയുകയെന്നത് തന്നെയാണ് പ്രധാനം

സമൂഹ വ്യാപനം തടയുകയെന്നത് തന്നെയാണ് പ്രധാനമെന്ന് ആരോഗ്യമന്ത്രാലയം. കൊവിഡ് ചികിത്സയിൽ ഹൈഡ്രോക്സിക്ലോറോക്വിനിന്റെ ഉപയോഗം ഫലപ്രദമാണെന്നതിന് ഇതുവരെ തെളിവില്ലെന്ന് ICMR. 

4:18 PM IST

തിരുവനന്തപുരത്ത് ഇന്ന് ലഭിച്ച 142 പരിശോധനാ ഫലങ്ങൾ നെഗറ്റീവ്

തിരുവനന്തപുരത്ത് ഇന്ന് ലഭിച്ച 142 പരിശോധനാ ഫലങ്ങൾ നെഗറ്റീവ്. ശശി തരൂർ എംപിയുടെ പ്രാദേശിക വികസന ഫണ്ടിൽ നിന്നു തുക ചെലവഴിച്ചു വാങ്ങിയ 1000 റാപ്പിഡ് ടെസ്റ്റ് കിറ്റുകൂടി ഇന്നു ലഭ്യമായി. 

4:15 PM IST

തബ്ലീഗ് ജമാഅത്തുമായി ബന്ധപ്പെട്ട് 1445 കേസുകൾ

തബ്ലീഗ് ജമാഅത്തുമായി ബന്ധപ്പെട്ട് 1445 പുതിയ കൊവിഡ് കേസുകൾ സ്ഥിരീകരിച്ചതായി കേന്ദ്ര ആരോഗ്യമന്ത്രാലയം. 

4:09 PM IST

യുവാക്കളിൽ രോഗബാധിതരുടെ നിരക്ക് കൂടുന്നത് ആശങ്കാജനകം

യുവാക്കളിൽ രോഗ ബാധ നിരക്ക് കൂടുന്നത് ആശങ്കാജനകമാണെന്ന് കേന്ദ്ര ആരോഗ്യമന്ത്രാലയം. സമൂഹ അകലം പാലിച്ച് എല്ലാവരും സഹകരിക്കണമെന്നും ആരോഗ്യമന്ത്രാലയം. 

4:06 PM IST

24 മണിക്കൂറിനിടെ 693 പുതിയ കേസുകൾ

മരണസംഖ്യയിലും രോഗബാധിതരുടെ എണ്ണത്തിലും ഇന്നത്തേത് ഏറ്റവും ഉയർന്ന നിരക്കെന്ന് കേന്ദ്ര ആരോഗ്യമന്ത്രാലയം. 24 മണിക്കൂറിനിടെ 693 പേർക്ക് കൂടി കൊവിഡ് 19 സ്ഥിരീകരിച്ചുവെന്നാണ് ആരോഗ്യമന്ത്രാലയത്തിൻ്റെ ഔദ്യോഗിക കണക്ക്. കൊവിഡ് കേസുകളിൽ 47 ശതമാനവും 40 വയസിൽ താഴെയുള്ളവരിലെന്നും മന്ത്രാലയം.

3:40 PM IST

എംപിമാരുടെയും മന്ത്രിമാരുടെയും ശമ്പളം കുറയ്ക്കാൻ ഓ‌ർഡിനൻസ്

എംപിമാരുടെയും മന്ത്രിമാരുടെയും ശമ്പളം കുറയ്ക്കാൻ ഓർഡിനൻസ് കൊണ്ടു വരും. 2020-2021,2021-2022 വർഷങ്ങളിലെ എംപി വികസന ഫണ്ടാണ് വേണ്ടെന്ന് വയ്ക്കുന്നത്. 

3:30 PM IST

രാഷ്ട്രപതിയും പ്രധാനമന്ത്രിയും ശമ്പളത്തിന്‍റെ 30 ശതമാനം കുറയ്ക്കും

ശമ്പളത്തിന്‍റെ മുപ്പത് ശതമാനം വേണ്ടെന്ന് വയ്ക്കാൻ രാഷ്ട്രപതിയും പ്രധാനമന്ത്രിയും സംസ്ഥാന ഗവർണർമാരും തീരുമാനിച്ചു. സാമൂഹ്യ പ്രതിബന്ധത ഉയർത്തിപ്പിടിച്ചാണ് തീരുമാനം. എംപിമാരുടെ വേതനവും 30 ശതമാനം കുറയ്ക്കും. ഒരു വർഷത്തേക്കാണ് ശമ്പളം കുറച്ചത്. എംപി ഫണ്ടും രണ്ട് വർഷത്തേക്ക് ഇല്ല, എംപി ഫണ്ട് സഞ്ചിത നിധിയിലേക്ക് പോകും .

3:15 PM IST

വന്യജീവി വകുപ്പുകൾക്കും മൃഗശാലകൾക്കും കേന്ദ്രത്തിന്‍റെ മുന്നറിയിപ്പ്

അമേരിക്കയിൽ കടുവയ്ക്ക് കൊവിഡ് കണ്ടെത്തിയ സാഹചര്യത്തിൽ സംസ്ഥാന വന്യജീവി വകുപ്പുകൾക്കും മൃഗശാലകൾക്കും കേന്ദ്രത്തിന്‍റെ മുന്നറിയിപ്പ്. സംശയമുള്ള മൃഗങ്ങളുടെ പരിശോധന നടത്തണമെന്നും കേന്ദ്രം. 

3:10 PM IST

80 ശതമാനം ആളുകളും റേഷൻ കടകളിൽ നിന്നും ഭക്ഷ്യധാന്യങ്ങൾ കൈപ്പറ്റി

സംസ്ഥാനത്തെ 80 ശതമാനം ആളുകളും റേഷൻ കടകളിൽ നിന്നും ഭക്ഷ്യധാന്യങ്ങൾ കൈപ്പറ്റിയതായി ഭക്ഷ്യമന്ത്രി പി.തിലോത്തമൻ. സംസ്ഥാനത്ത് ആകെ 87.22 ലക്ഷം റേഷൻ കാർഡുകളാണുള്ളത്. ഇതിൽ 63.64 ലക്ഷം കാർഡുടമകളും ഭക്ഷ്യധാന്യങ്ങൾ കൈപ്പറ്റി കഴിഞ്ഞു. ഇതുവരെയും കൈപ്പറ്റാത്തവർക്ക് ഈ മാസം മുപ്പത് വരെ റേഷൻ കൈപ്പാറ്റാൻ അവസരമുണ്ടെന്നും ഭക്ഷ്യമന്ത്രി പി.തിലോത്തമൻ പറഞ്ഞു. ഏഷ്യാനെറ്റ് ന്യൂസിലൂടെ പ്രേക്ഷകരുമായി സംവദിക്കുന്നതിനിടെയാണ് മന്ത്രി ഇക്കാര്യം അറിയിച്ചത്. 

Read more at: റേഷൻ വിതരണം സർവ്വകാല റെക്കോർഡിൽ: 80 ശതമാനം പേരും റേഷൻ കൈപ്പറ്റിയതായി ഭക്ഷ്യമന്ത്രി

 

2:38 PM IST

കൊല്ലം സ്വദേശി രോഗമുക്തനായി

കൊല്ലത്ത് ആദ്യം രോഗം സ്ഥിരീകരിച്ച പ്രാക്കുളം സ്വദേശി രോഗ മുക്തനായി. ഇയാളെ ആശുപത്രിയിൽ നിന്ന് ഡിസ്ചാർജ് ചെയ്തു. ഇനി 14 ദിവസം വീട്ടിൽ നിരീക്ഷണത്തിൽ തുടരും. 

2:09 PM IST

മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭവാന നൽകും

അഡ്വക്കേറ്റ് ജനറൽ, അഡിഷണൽ അഡ്വക്കേറ്റ് ജനറൽമാർ, ഡയറക്ടർ ജനറൽ ഓഫ് പ്രോസിക്യൂഷൻസ്, അഡിഷണൽ ഡയറക്ടർ ജനറൽ ഓഫ് പ്രോസിക്യൂഷൻസ്, സ്റ്റേറ്റ് അറ്റോർണി, എന്നിവരും ഹൈക്കോടതിയിലെ മുഴുവൻ ഗവൺമെന്‍റ് പ്ളീഡർമാരും തങ്ങളുടെ ഒരുമാസത്തെ ശമ്പള തുകയായ ഒരുകോടി അമ്പത്തിമൂന്നു ലക്ഷംത്തിൽപരം രൂപ കേരള മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്യാൻ തീരുമാനിച്ചു.

2:07 PM IST

കണ്ണൂർ സ്വദേശി ലണ്ടനിൽ കൊവിഡ് ബാധിച്ച് മരിച്ചു

കണ്ണൂർ ഇരിട്ടി സ്വദേശി ലണ്ടനിൽ കൊവിഡ് ബാധിച്ച് മരിച്ചു. ഒരാഴ്ചയായി തീവ്രപരിചരണ വിഭാഗത്തിൽ കഴിയുകയായിരുന്ന ഷിൻ്റോ ജോർജ് ആണ് മരിച്ചത്. ജോലിയില്ലാത്ത ഇവരുടെ ഭാര്യയും കുഞ്ഞും ലണ്ടനിലുണ്ട്.

1:46 PM IST

വനിതാ വികസന കോര്‍പറേഷന്‍ ലോണുകള്‍ക്ക് മൂന്ന് മാസം സാവകാശം അനുവദിച്ചു

ലോക് ഡൗണിന്റെ പശ്ചാത്തലത്തില്‍ സംസ്ഥാന വനിത വികസന കോര്‍പറേഷന്റെ എല്ലാ ലോണുകളുടേയും മാര്‍ച്ച്, ഏപ്രില്‍, മേയ് എന്നീ 3 മാസങ്ങളില്‍ ഇന്‍സ്റ്റാള്‍മെന്റുകള്‍ അടയ്‌ക്കേണ്ടതില്ലെന്ന് ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. 60 മാസം കൊണ്ട് അടയ്‌ക്കേണ്ട ഈ ലോണുകള്‍ പിഴപ്പലിശ ഒഴിവാക്കി 63 മാസമാക്കിയാണ് നീട്ടിയിരിക്കുന്നത്.

1:46 PM IST

ആലപ്പുഴയിലും ചെങ്ങന്നൂരും പഴകിയ മത്സ്യം പിടികൂടി

ആലപ്പുഴയിലും ചെങ്ങന്നൂരും വിൽപ്പനയ്ക്കെത്തിച്ച പഴകിയ മത്സ്യം പിടികൂടി. ആലപ്പുഴ ടൗണിന് സമീപത്തുനിന്നാണ് നഗരസഭാ ആരോഗ്യ വിഭാഗം 350 കിലോ പഴകിയ മത്സ്യം പിടികൂടിയത്. ചെങ്ങന്നൂർ കല്ലിശേരിയിൽ നിന്നാണ് 300കിലോ പഴകിയ മത്സ്യം പിടികൂടിയത്. രണ്ട് കടകൾ അടപ്പിച്ചു. ഫുഡ് സേഫ്റ്റി വിഭാഗം പരിശോധനയിലാണ് മത്സ്യം പിടികൂടിയത് 

1:39 PM IST

ലോക്ഡൗണിന് ശേഷം പാലക്കാട് അതിർത്തിയിൽ നിയന്ത്രണം തുടരേണ്ടിവരും: മന്ത്രി എകെ ബാലൻ

ലോക്ഡൗണിന് ശേഷം പാലക്കാട് അതിർത്തിയിൽ നിയന്ത്രണം തുടരേണ്ടി വരുമെന്ന് മന്ത്രി എകെ ബാലൻ. കോയമ്പത്തൂരിൽ ഉൾപ്പെടെ രോഗം വ്യാപിക്കുന്നത് ആശങ്കപ്പെടുത്തുന്നു. ഹോട്ട്സ്പോട്ടിൽ പാലക്കാട് ഇല്ലെങ്കിലും അതിനേക്കാൾ ജാഗ്രത ആവശ്യമാണെന്നും മന്ത്രി വ്യക്തമാക്കി. 

12:59 AM IST

ലോക്ക് ഡൗൺ നടപ്പാക്കിയത് മോശം ആസൂത്രണത്തിലൂടെയെന്ന് കമൽഹാസൻ

രാജ്യത്ത് കൊവിഡ് വൈറസ് പ്രതിരോധനടപടിയുടെ ഭാഗമായ ലോക്ക് ഡൗൺ നടപ്പാക്കിയത് മോശം ആസൂത്രണത്തിലൂടെയാണെന്ന്  മക്കള്‍ നീതി മയ്യം അധ്യക്ഷനും നടനുമായ  കമൽഹാസൻ. നോട്ട് റദ്ദാക്കലിന് ശേഷമുണ്ടായ പ്രതിസന്ധി ആവർത്തിക്കുമോ എന്ന് ഭയക്കുന്നതായി ചൂണ്ടിക്കാട്ടിയ കമൽ ഇക്കാര്യം വ്യക്തമാക്കി പ്രധാനമന്ത്രിക്ക് കത്തയച്ചു.

12:56 PM IST

കർണ്ണാടക അതിർത്തി അടച്ച നടപടി മൗലിക അവകാശ ലംഘനമെന്ന് കേരളം സുപ്രീം കോടതിയിൽ

കർണ്ണാടക അതിർത്തി അടച്ച നടപടി മൗലിക അവകാശ ലംഘനമെന്ന് കേരളം സുപ്രീം കോടതിയിൽ. കേന്ദ്രസർക്കാർ കോടതി ഉത്തരവ് നടപ്പാക്കുന്നില്ലെന്നും കേരളം കോടതിയെ അറിയിച്ചു. കർണ്ണാടക സർക്കാരിൻറെ അപ്പീൽ തള്ളണമെന്ന് ആവശ്യപ്പെട്ട് കേരളം എതിർ സത്യവാങ്മൂലം നല്കി

12:33 PM IST

മദ്യം കിട്ടാതായതോടെ വാര്‍ണിഷ് കുടിച്ചു, തമിഴ്നാട്ടിൽ  മൂന്ന് പേർ മരിച്ചു

തമിഴ്നാട്ടിൽ മദ്യം കിട്ടാതായതോടെ ലഹരിക്ക് വേണ്ടി വാര്‍ണിഷ് കുടിച്ചു. തമിഴ്നാട്ടിൽ മൂന്ന് പേർ മരിച്ചു. ചെങ്കൽപ്പേട്ട് ജില്ലയിലാണ് സംഭവം. ശിവശങ്കർ, പ്രദീപ്, ശിവരാമൻ എന്നിവരാണ് മരിച്ചത്. 

12:05 PM IST

കൊവിഡ്: കണ്ണൂര്‍ സ്വദേശി യുഎഇയില്‍ മരിച്ചു

കൊവിഡ് 19 ബാധിച്ച് യുഎഇയില്‍ കണ്ണൂര്‍ സ്വേദശി മരിച്ചു. ചികിത്സയിലായിരുന്ന കണ്ണൂർ കോളയാട് സ്വദേശി ഹാരിസ് ആലച്ചേരിയാണ് (35) മരിച്ചത്. പനിയും ന്യുമോണിയയും ബാധിച്ചാണ്  ചികത്സ തേടിയത്. കഴിഞ്ഞ ദിവസം ആണ് കൊവിഡ് സ്ഥിരീകരിച്ചത്. അജ്‌മാനീലെ  സ്വകാര്യ ആശുപത്രിയിൽ വെച്ചായിരുന്നു മരണം. 

12:05 PM IST

കൊവിഡിനെതിരായ പ്രതിരോധ നടപടികളിൽ രാജ്യം ഒറ്റക്കെട്ടെന്ന് പ്രധാനമന്ത്രി നരേന്ദ്രമോദി

കൊവിഡിനെതിരായ പ്രതിരോധ നടപടിയിൽ രാജ്യം ഒറ്റക്കെട്ടെന്ന് പ്രധാനമന്ത്രി നരേന്ദ്രമോദി. ഇന്ത്യ കൊവിഡിനെതിരെ സമഗ്രവും സമയോചിതവുമായ നടപടി എടുത്തു.  ഇന്ത്യ തീരുമാനമെടുത്തതിൽ കാണിച്ച വേഗതയെ ലോകം അഭിനന്ദിക്കുന്നു. ഒറ്റക്കെട്ടായാണ് ഇന്ത്യ ഈ യുദ്ധത്തിൽ പങ്കാളിയാവുന്നത്. ലോക്ക്ഡൗണിനോട് ഇന്ത്യയിലെ ജനങ്ങൾ അസാധാരണ ക്ഷമയും സഹകരണം കാട്ടിയതായും പ്രധാനമന്ത്രി. 

11:50 AM IST

ബോളിവുഡ് ഗായിക കനികാ കപൂറിന്റെ പരിശോധന ഫലം നെഗറ്റീവ് ആയി

കൊവിഡ് 19 സ്ഥിരീകരിച്ച ബോളിവുഡ് ഗായിക കനികാ കപൂറിന്റെ പരിശോധന ഫലം നെഗറ്റീവ് ആയി.  ആറാമത്തെ പരിശോധനാ ഫലമാണ് നെഗറ്റീവ് ആയത്  ഇവരെ ആശുപത്രിയിൽ നിന്ന് ഡിസ്ചാർജ് ചെയ്തു. 
 

11:28 AM IST

ആന്ധ്രാപ്രദേശിൽ രണ്ട് കൊവിഡ് മരണം

ആന്ധ്രപ്രദേശിൽ രണ്ട് കൊവിഡ് മരണം.14 പേർക്ക് കൂടി രോഗം സ്ഥിരീകരിച്ചു. 

11:28 AM IST

ശുചീകരണ തൊഴിലാളിക്ക് കൊവിഡ് സ്ഥിരീകരിച്ചു, ദില്ലിയിൽ ആശുപത്രി അടച്ചു

ദില്ലി എൻഡിഎംസിയുടെ ചരക് പാലികയിലെ ആശുപത്രി അടച്ചു. ആശുപത്രിയിലെ മുഴുവൻ സ്റ്റാഫുകളും നിരീക്ഷണത്തിലാണ്. ശുചീകരണ തൊഴിലാളിക്ക് കൊവിഡ് സ്ഥിരീകരിച്ചതിനെ തുടർന്നാണ് ആശുപത്രി അടച്ചത്. 

11:04 AM IST

മലപ്പുറത്ത് കൊവിഡ് സ്ഥിരീകരിച്ച ആദ്യ വ്യക്തി  വീട്ടിലേക്ക് മടങ്ങി

മലപ്പുറത്ത് കോവിഡ് സ്ഥിരീകരിച്ച ആദ്യ വ്യക്തി അസുഖം ഭേദമായി  വീട്ടിലേക്ക് മടങ്ങി. വണ്ടൂര്‍ വാണിയമ്പലം സ്വദേശിനിയാണ് മഞ്ചേരി ഗവ. മെഡിക്കല്‍ കോളജ് ആശുപത്രിയിലെ ചികിത്സക്കു ശേഷം രോഗമുക്തയായത്. ഉംറ കഴിഞ്ഞു തിരിച്ചെത്തിയ ഇവര്‍ക്ക് മാര്‍ച്ച് 16 നാണ് കൊവിഡ് സ്ഥിരീകരിച്ചത്.

10:48 AM IST

ചെന്നൈ വിമാനത്താവളത്തിൽ നിന്ന് പിടികൂടിയ പത്ത് മലേഷ്യൻ സ്വദേശികളെ ക്വാറൻ്റൈനിലാക്കി

ചെന്നൈ വിമാനത്താവളത്തിൽ നിന്ന് പിടികൂടിയ പത്ത് മലേഷ്യൻ സ്വദേശികളെ ക്വാറൻ്റൈനിലാക്കി. ദുരിതാശ്വാസ സാധനങ്ങൾ കൊണ്ടു പോകുന്ന പ്രത്യേക വിമാനത്തിൽ നാട്ടിലേക്ക് മടങ്ങാൻ ശ്രമിക്കവേയാണ് ഇവരെ പിടികൂടിയത്.  ചെന്നൈ വിമാനത്താവളത്തിൽ നിന്ന് കസ്റ്റഡിയിലിടുത്തവരെ പൊലീസിന് കൈമാറിയിരുന്നു.

10:30 AM IST

കൊവിഡ് പശ്ചാത്തലത്തിൽ വെടിനിർത്തൽ പ്രഖ്യാപിച്ച് മാവോയിസ്റ്റുകൾ

കൊവിഡ് പശ്ചാത്തലത്തിൽ സുരക്ഷാ സേനകൾക്ക് നേരെ  ആക്രമണം സംഘടിപ്പിക്കില്ലെന്ന് മാവോയിസ്റ്റുകൾ. സിപിഐ മാവോയിസ്റ്റ് ആന്ധ്ര ഘടകത്തിന്റേതാണ് പ്രസ്താവന

10:24 AM IST

പത്ത് മലേഷ്യൻ സ്വദേശികൾ പിടിയിൽ

ദുരിതാശ്വാസ സാധനങ്ങൾ കൊണ്ടു പോകുന്ന പ്രത്യേക വിമാനത്തിൽ നാട്ടിലേക്ക് മടങ്ങാൻ ശ്രമിച്ച പത്ത് മലേഷ്യൻ സ്വദേശികൾ പിടിയിൽ. ചെന്നൈ വിമാനത്താവളത്തിൽ നിന്ന് കസ്റ്റഡിയിലിടുത്തവരെ പൊലീസിന് കൈമാറി. തബ്ലീഗ് സമ്മേളനത്തിൽ പങ്കെടുത്ത് തിരിച്ചെത്തിയവരാണ് ഇവരെന്നാണ് വിവരം 
 

10:13 AM IST

ലോക്ക് ഡൗണ്‍: സ്ത്രീകൾക്കെതിരായ അതിക്രമങ്ങൾ വര്‍ധിച്ചതായി അന്റോണിയോ ഗുട്ടറെസ്

ലോക്ക് ഡൗണിനിടെ സ്ത്രീകൾക്കെതിരായ അതിക്രമങ്ങൾ ലോകമെമ്പാടും ഭീതിപ്പെടുത്തുന്ന രീതിയിൽ വർധിച്ചെന്ന് യുഎൻ സെക്രട്ടറി ജനറൽ അന്റോണിയോ ഗുട്ടറെസ്. കൊവിഡിനെ നേരിടുന്നതിനൊപ്പം സ്ത്രീകളുടെ സുരക്ഷയ്ക്കും പ്രാധാന്യം നൽകണമെന്ന് ഗുട്ടറെസ് ലോകരാജ്യങ്ങളോട് അഭ്യർത്ഥിച്ചു.

 

10:07 AM IST

ആശുപത്രിയിൽ നിരീക്ഷണത്തിലുണ്ടായിരുന്ന  ഇന്തോനേഷ്യക്കാരന് കൊവിഡ്

ഉത്തർപ്രദേശിലെ പ്രയാഗ് രാജ് ആശുപത്രിയിൽ കരുതൽ നിരീക്ഷണത്തിലാക്കിയ ഇന്തോനേഷ്യക്കാരന് കൊവിഡ് സ്ഥിരീകരിച്ചു. നിസാമുദിൻ സമ്മേളനത്തിൽ പങ്കെടുക്കാൻ എത്തിയതായിരുന്നു ഇയാള്‍. 

9:58 AM IST

പന്ത്രണ്ട് മണിക്കൂറിനിടെ 26 മരണം, രാജ്യത്ത് കൊവിഡ് മരണം 109 ആയി

രാജ്യത്ത് കൊവിഡ് മരണം 109 ആയി. കഴിഞ്ഞ പന്ത്രണ്ട് മണിക്കൂറിനിടെ 26 മരണമുണ്ടായി. ഇതുവരെ 4067 പേർക്ക് രോഗം സ്ഥിരീകരിച്ചു. കഴിഞ്ഞ പന്ത്രണ്ട് മണിക്കൂറിനിടെ 490 പുതിയ കേസുകളാണ് രാജ്യത്ത് റിപ്പോര്‍ട്ട് ചെയ്തത്.

9:34 AM IST

ഡോക്ടര്‍മാര്‍ക്കും നഴ്സുമാര്‍ക്കും കൂട്ടത്തോടെ കൊവിഡ് സ്ഥിരീകരിച്ചു

സ്വകാര്യ ആശുപത്രിയിലെ 26 നഴ്സുമാർക്കും മൂന്ന് ഡോക്ടർമാർക്കും കൊവിഡ് 19 സ്ഥിരീകരിച്ചു. ആശുപത്രിക്കുള്ളിൽ ഇവരെ  ക്വാറന്‍റൈന്‍ ചെയ്തു. ഭൂരിഭാഗം നഴ്സുമാരും മലയാളികളാണ്. ആശുപത്രിക്ക് അകത്തേക്കോ അകത്ത് നിന്ന് പുറത്തേക്കോ ആരെയും കടത്തിവിടില്ല. 
 

9:18 AM IST

ലണ്ടനിൽ മലയാളി കൊവിഡ് ബാധിച്ച് മരിച്ചു

ലണ്ടനിൽ മലയാളി കൊവിഡ് ബാധിച്ച് മരിച്ചു. കൊട്ടാരക്കര സ്വദേശി ഇന്ദിരയാണ് ലണ്ടനിൽ മരിച്ചത്. ഇന്ന് കൊവിഡ് 19 ബാധിച്ച് അമേരിക്കയിൽ രണ്ട് മലയാളികൾ കൂടി മരിച്ചു. പിറവം സ്വദേശി ഏലിയാമ്മ കുര്യാക്കോസ്, ചെങ്ങന്നൂർ സ്വദേശി ഏലിയാമ്മ ജോണും ആണ് മരിച്ചത്. 

9:00 AM IST

ഭോപ്പാലിൽ ആദ്യ കൊവിഡ് മരണം, മധ്യപ്രദേശിൽ മരണം 15 ആയി

ഭോപ്പാലിൽ ആദ്യ കൊവിഡ് മരണം. രോഗം ബാധിച്ച് ചികിത്സയിലിരുന്ന 62 കാരനാണ് മരിച്ചതെന്ന് ഭോപ്പാല്‍ ആരോഗ്യവകുപ്പ് അറിയിച്ചു. സംസ്ഥാനത്ത് ഇതുവരെ കൊവിഡ് ബാധിച്ച് മരിച്ചവരുടെ എണ്ണം 15 ആയി. 

8:59 AM IST

ഇന്ത്യയിൽ കൊവിഡ് മരണം 83,  രോഗം ബാധിച്ചത് 3577 പേര്‍ക്ക്

രാജ്യത്ത് കൊവിഡ് 19 ബാധിച്ച് മരിച്ചവരുടെ എണ്ണം 83 ആയി. 505 പുതിയ കേസുകള്‍ റിപ്പോര്‍ട്ട് ചെയ്തതോടെ രോഗ ബാധിതരുടെ എണ്ണം മൂവായിരത്തി അഞ്ഞൂറ്റി എഴുപത്തിയേഴായി. രാജ്യത്തെ 274 ജില്ലകളെ കൊവിഡ് ബാധിച്ച് കഴിഞ്ഞു. തീവ്രബാധിത മേഖലകളെ ബഫര്‍സോണുകളായി പരിഗണിച്ച് കൂടുതല്‍ നിയന്ത്രണങ്ങളും സംരക്ഷണവും ഏര്‍പ്പെടുത്തും. 

8:50 AM IST

യുഎഇയില്‍ 294 പേർക്ക് കൂടി കൊവിഡ്

സൗദി അറേബ്യയിലും യുഎഇയിലും കൊവിഡ് രോഗബാധിതരുടെ എണ്ണം ഉയരുന്നു. യുഎഇയില്‍ 294 പേരില്‍ കൂടി വൈറസ് സ്ഥിരീകരിച്ചു. ഇതോടെ യുഎഇയിലെ രോഗബാധിതരുടെ എണ്ണം 1799 ആയി. സൗദിയില്‍ ഇതുവരെ 2385 പേരിലാണ് രോഗം സ്ഥിരീകരിച്ചത്.  സൗദിയില്‍ കൊവിഡ് മരണം 34 ആയി. 

8:42 AM IST

കൊവിഡിനെതിരായ പോരാട്ടത്തിൽ വിജയിക്കും, ബ്രിട്ടീഷ് ജനതക്ക് അഭിസംബോധന ചെയ്ത് എലിസബത്ത് രാജ്ഞി

കൊവിഡിനെതിരെയുള്ള പോരാട്ടത്തിൽ ബ്രിട്ടീഷ് ജനത വിജയിക്കുമെന്ന് എലിസബത്ത് രാജ്ഞി. വൈറസ് മൂലമുണ്ടായ ബുദ്ധിമുട്ടുകൾ വെല്ലുവിളിയായി ഏറ്റെടുത്ത് മുന്നേറാൻ രാജ്ഞി ജനങ്ങൾക്ക് ആഹ്വാനം നൽകി. അറുപത്തിയെട്ട് വർഷത്തിനിടെ ഇത് അഞ്ചാമതാണ് രാജ്ഞി ടെലിവിഷനിലൂടെ ജനങ്ങളെ അഭിസംബോധന ചെയ്യുന്നത്.
 

8:35 AM IST

അമേരിക്കയിൽ കൊവിഡ് ബാധിച്ച് രണ്ട് മലയാളികൾ കൂടി മരിച്ചു

കൊവിഡ് 19 ബാധിച്ച് അമേരിക്കയിൽ രണ്ട് മലയാളികൾ കൂടി മരിച്ചു. പിറവം സ്വദേശി ഏലിയാമ്മ കുര്യാക്കോസ്, ചെങ്ങന്നൂർ സ്വദേശി ഏലിയാമ്മ ജോണും ആണ് മരിച്ചത്. വൈറസ് ബാധയെ തുടർന്ന് അമേരിക്കയിൽ മരിച്ച മലയാളികളുടെ എണ്ണം ആറായി. 

8:35 AM IST

ബ്രിട്ടീഷ് പ്രധാനമന്ത്രി ബോറിസ് ജോൺസണ്‍ ആശുപത്രിയിൽ

കൊവിഡ് ബാധിതനായ ബ്രിട്ടീഷ് പ്രധാനമന്ത്രി ബോറിസ് ജോൺസണിനെ  ആശുപത്രിയിൽ പ്രവേശിപ്പിച്ചു. വൈറസ് ബാധ സ്ഥിരീകരിച്ച് 10 ദിവസമായിട്ടും രോഗം ഭേദമാകാതെ വന്നതോടെയാണ് ബോറിസ് ജോൺസണിനെ പരിശോധനകൾക്കായി ആശുപത്രിയിലേക്ക് മാറ്റിയത്. ബ്രിട്ടനിൽ ഇന്നലെ 621 പേരാണ്  ഒറ്റദിവസത്തിനിടെ മരിച്ചത്. 

8:33 AM IST

ലോകത്ത് കൊവിഡ് മരണം 69,456 ആയി

ലോകത്ത് കൊവിഡ് മരണം 69,456 ആയി. കൊവിഡ് ബാധിതരുടെ എണ്ണം പന്ത്രണ്ട് ലക്ഷം കടന്നു. 1,272,737 പേർക്കാണ് ലോകത്ത് കൊവിഡ് രോ​ഗം സ്ഥിരീകരിച്ചത്. ബ്രിട്ടനിൽ 621 പേർ ഒറ്റദിവസത്തിനിടെ മരിച്ചു. ഇറ്റലിയിൽ രണ്ടാഴ്ചക്കിടെയുള്ള ഏറ്റവും കുറഞ്ഞ മരണനിരക്കും ഫ്രാൻസിൽ ഒരാഴ്ചക്കിടെയുള്ള ഏറ്റവും കുറഞ്ഞ മരണനിരക്കും ഇന്നലെ രേഖപ്പെടുത്തി. ഫ്രാൻസിൽ 518 പേർ മരിച്ചപ്പോൾ ഇറ്റലിയിൽ 525 പേരാണ് ഇന്നലെ മരിച്ചത്. മൂന്ന് ദിവസമായി മരണനിരക്ക് കുറഞ്ഞുവരുന്ന സ്പെയിനിൽ ഇന്നലെ 694 പേരാണ് മരിച്ചത്.  

11:19 PM IST:

കൊവിഡ് 19 രോഗം പടര്‍ന്ന് പിടിക്കുന്നത് നിയന്ത്രിക്കുന്നതിനായി രാജ്യവ്യാപകമായി നടപ്പിലാക്കിയ ലോക്ക് ഡൗണ്‍ ഇപ്പോഴത്തെ കാലാവധിക്ക് ശേഷം അടുത്ത 21 ദിവസം കൂടി തുടരണമെന്ന് ഇന്ത്യന്‍ മെഡിക്കല്‍ അസോസിയേഷന്റെ വിദഗ്ധ സമിതി ആവശ്യപ്പെട്ടു. ഈക്കാര്യം ചൂണ്ടിക്കാട്ടി ഐഎംഎ മുഖ്യമന്ത്രിക്ക് കത്ത് നല്‍കിയതായി ഐഎംഎ യുടെ സംസ്ഥാന പ്രസിഡന്റ് ഡോ. എബഹാം വര്‍ഗീസും സെക്രട്ടറി ഡോ. ഗോപികുമാറും അറിയിച്ചു

10:53 PM IST:

ലോകമാകെ മഹാമാരിയായി പടര്‍ന്ന കൊവിഡില്‍ മരണസംഖ്യ ഉയരുന്നു. ആഗോളതലത്തില്‍ മരണ സംഖ്യ 73600 കടന്നു. പതിമൂന്ന് ലക്ഷത്തിലധികം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായിട്ടുണ്ട്

10:29 PM IST:

മഹാരാഷ്ട്രയില്‍ കൊവിഡ് മരണസംഖ്യ വര്‍ധിക്കുന്നു. മുംബൈയില്‍ 38 കാരിയായ ഗര്‍ഭിണിയാണ് ഏറ്റവുമൊടുവില്‍ മരിച്ചത്. ഇതോടെ രാജ്യത്തെ മരണ സംഖ്യ 111 ആയി. മൊത്തം കൊവിഡ‍് ബാധിതരുടെ എണ്ണം 4281 പേര്‍ക്കാണ്.

10:12 PM IST:

കൊവിഡ് വ്യാപനത്തിൻ്റെ പേരിൽ മുസ്ലീങ്ങളെ കുറ്റപ്പെടുത്തരുതെന്ന് കർണാടക മുഖ്യമന്ത്രി ബിഎസ് യെദൂരിയപ്പ. മുസ്ലീങ്ങൾക്കെതിരെ ആരും ഒരു വാക്കു പോലും മിണ്ടരുതെന്നും യെദ്യൂരിയപ്പ പറഞ്ഞു. സർക്കാർ നടപടികളോട് തബ്ലീഗ് സമ്മേളനത്തിൽ പങ്കെടുത്തു മടങ്ങിയെത്തിയവർ പൂർണമായും സഹകരിക്കുന്നുണ്ടെന്നും യെദ്യൂരിയപ്പ ആവശ്യപ്പെട്ടു. കർണാടകയിൽ ഇതുവരെ 163 പേർക്കാണ് കൊവിഡ് സ്ഥിരീകരിച്ചത്

9:56 PM IST:

ലോകമാകെ മഹാമാരിയായി പടര്‍ന്ന കൊവിഡില്‍ മരണസംഖ്യ ഉയരുന്നു. ആഗോളതലത്തില്‍ മരണ സംഖ്യ 72000 കടന്നു. പതിമൂന്ന് ലക്ഷത്തിലധികം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായിട്ടുണ്ട്

9:29 PM IST:

ലോകമാകെ മഹാമാരിയായി പടര്‍ന്ന കൊവിഡില്‍ മരണസംഖ്യ ഉയരുന്നു. ആഗോളതലത്തില്‍ മരണ സംഖ്യ 71000 കടന്നു. പതിമൂന്ന് ലക്ഷത്തോളം പേര്‍ക്കാണ് ലോകത്താകമാനായി രോഗം സ്ഥിരീകരിച്ചിട്ടുള്ളത്. രണ്ടേമുക്കാല്‍ ലക്ഷത്തിലധികം പേര്‍ക്ക് രോഗം ഭേദമായിട്ടുണ്ട്

8:50 PM IST:

അതിര്‍ത്തി അടച്ചതിനാല്‍ ചികിത്സ കിട്ടാതെ കാസര്‍കോട് ഒരു മരണം കൂടി. കടമ്പാർ സ്വദേശി കമല ആണ് മരിച്ചത്. മംഗലുരുവിലെ ആശുപത്രിയിലേക്ക് കൊണ്ടുപോകാൻ ശ്രമിച്ചെങ്കിലും കർണാടക പൊലീസ് തടഞ്ഞു മടക്കി അയച്ചു. കാസര്‍കോട്ടെ സ്വകാര്യ ആശുപത്രിയിൽ ആയിരുന്നു മരണം

8:39 PM IST:

കൊവിഡ് വ്യാപനത്തിന്റെ പേരിൽ മുസ്ലിങ്ങളെ കുറ്റപ്പെടുത്തരുതെന്ന് യെദിയൂരപ്പയുടെ മുന്നറിയിപ്പ്. മുസ്ലീങ്ങൾക്കെതിരെ ആരും ഒരു വാക്കുപോലും മിണ്ടരുതെന്നും സർക്കാർ നടപടികളോട് തബ്ലീഗ് സമ്മേളനത്തിൽ പങ്കെടുത്തു മടങ്ങിയെത്തിയവർ പൂർണമായി സഹകരിക്കുന്നുണ്ടെന്നും യെദിയൂരപ്പ. 

8:38 PM IST:

തെലങ്കാനയിൽ ലോക്ക് ഡൗൺ ജൂൺ 3 വരെ തുടർന്നേക്കുമെന്നു തെലങ്കാന മുഖ്യമന്ത്രി ചന്ദ്രശേഖര റാവു. ലോക്ക് ഡൗൺ നീട്ടാതെ മറ്റ് മാർഗങ്ങളില്ലെന്നും ഇത് പ്രധാനമന്ത്രിയെ അറിയിച്ചെന്നും റാവു പറയുന്നു. ലോക്ക് ഡൗൺ നീട്ടാൻ പ്രധാനമന്ത്രിയോട്  തെലങ്കാന അഭ്യർത്ഥിച്ചു. 

8:26 PM IST:

ന്യൂയോർക്കിലെ ബ്രോങ്ക്സ് മൃഗശാലയിൽ കടുവയ്ക്ക് കൊവിഡ് പിടിപെട്ടതിനെതുടര്‍ന്ന് ഇന്ത്യയിലെ മൃഗശാലകൾക്കടക്കം ജാഗ്രതനിർദേശം നൽകി. നാല് വയസ്സുകാരിയായ നാദിയ എന്ന പെൺകടുവയ്ക്കാണ് കൊവിഡ് പിടിപെട്ടത്. മൃഗശാലയിലെ ജീവനക്കാരനിൽ നിന്നാണ് കടുവയ്ക്ക് രോഗബാധയുണ്ടായത് എന്ന് മൃഗശാല അധികൃതർ പറഞ്ഞു

8:00 PM IST:

 

കോട്ടയം സ്വദേശിനിയായ ഡോക്ടറും പത്ത് മാസം പ്രായമായ കുട്ടിയും ഡിസ്ചാർജ് ആയി. കോയമ്പത്തൂർ സർക്കാർ ആശുപത്രിയിൽ ചികിത്സയിലായിരുന്നു. തബ്ലീഗ് സമ്മേളനത്തിൽ പങ്കെടുത്തയാളുമായി സമ്പർക്കം പുലർത്തിയ റെയിൽവേ ജീവനക്കാരനെ ചികിത്സിച്ചതോടെയായിരുന്നു ഡോക്ടർക്ക് രോഗം പകർന്നത്. 

7:55 PM IST:

പ്രവാസികളുടെ പ്രശ്‌നങ്ങള്‍ പരിഹരിക്കാന്‍ രാജ്യത്തിന്റെ ഇടപെടല്‍ ആവശ്യപ്പെട്ടുകൊണ്ട്് വിദേശകാര്യമന്ത്രി എസ് ജയശങ്കറുമായി കത്തുമുഖേനെ ബന്ധപ്പെട്ടുവെന്ന് മുഖ്യമന്ത്രി. വിസാ കാലാവധി ആറ് മാസം നീട്ടി നല്‍കണമെന്ന് കത്തില്‍ ആവശ്യപ്പെട്ടു. ആരോഗ്യ ഇന്‍ഷുറന്‍സ് നടപ്പാക്കേണ്ടതിന്റെ ആവശ്യകതയും കത്തില്‍ പരാമര്‍ശിച്ചിട്ടുണ്ട്. ലോക്ക് ഡൗണ്‍ അവസാനിക്കുന്നതോടെ കേരളത്തിലേക്ക് എത്തുന്ന പ്രവാസികളെ സ്വീകരിക്കുന്നതില്‍ പ്രോട്ടോകോള്‍ വേണ്ടതിന്റെ ആവശ്യകത ചൂണ്ടിക്കാട്ടിയെന്നും മുഖ്യമന്ത്രി വാര്‍ത്താസമ്മേളനത്തില്‍ അറിയിച്ചു

7:33 PM IST:

ലോകമാകെ വ്യാപിച്ചുകിടക്കുന്ന പ്രവാസി മലയാളി സമൂഹം ആശങ്കയിലാണെന്നും അവരെ ചേര്‍ത്ത് നിര്‍ത്തണമെന്നും ആവര്‍ത്തിച്ച് മുഖ്യമന്ത്രി പിണറായി വിജയന്‍. നേരത്തേ സാമ്പത്തികമായി നല്ല നിലയിലായിരുന്നു പ്രവാസികള്‍. എന്നാല്‍ മിക്കവരും ഇപ്പോള്‍ സാമ്പത്തിക ബുദ്ധിമുട്ടുകള്‍ നേരിടുന്നുണ്ട്. ഗള്‍ഫ് മേഖലയിലെ സ്‌കൂളുകള്‍ അടച്ചിട്ടിരിക്കുകയാണ്. എന്നാല്‍ ഈ അദ്ധ്യയന വര്‍ഷത്തെ ഫീസ് നല്‍കേണ്ടസമയമാണിപ്പോള്‍. ഈ സാഹചര്യത്തില്‍ പ്രവാസി മലയാളികള്‍ നടത്തുന്ന സ്‌കൂള്‍ മാനേജ്‌മെന്‍റുകള്‍ ഫീസടയ്ക്കാന്‍ സമയം നീട്ടിനല്‍കണമെന്ന് മുഖ്യമന്ത്രി ആവശ്യപ്പെട്ടു

7:23 PM IST:

ആന്ധ്ര പ്രദേശിൽ 37 പേർക്ക് കൂടി കൊവിഡ് സ്ഥിരീകരിച്ചു. കുർണൂൽ ജില്ലയിൽ മാത്രം കൊവിഡ് രോഗികൾ 74 ആയി. 

7:23 PM IST:

ലോക്ക് ഡൗണിനെ തുടർന്ന് ദില്ലിയിൽ കുടുങ്ങിയ കണ്ണൂർ താക്കാവ് സ്വദേശി  മരിച്ചു. ആർ കുഞ്ഞിരാമൻ നമ്പ്യാരുടെ മകൻ വിപിൻ പാലക്കൽ (28)ആണ് മരിച്ചത്. ഹൃദയാഘാതത്തെ തുടർന്നാണ് മരണം.

6:53 PM IST:

കൊവിഡ് കർമ്മ സമിതി മുഖ്യമന്ത്രിക്ക് റിപ്പോർട്ട്‌ നൽകി. 

6:51 PM IST:

തീർത്തും അശാസ്ത്രീയമായ കാര്യം രാജ്യമാകെ ചെയ്യണമെന്ന് പ്രധാനമന്ത്രി പറയുമ്പോൾ വിമർശനങ്ങളുണ്ടാവും. പ്രകാശം പരക്കേണ്ടത് ബുദ്ധിമുട്ടനുഭവിക്കുന്നവരുടെ മനസിലാണെന്ന് മുഖ്യമന്ത്രി. അതിന് സാമ്പത്തിക സഹായം വേണം. അതിനിയും വരേണ്ടതുണ്ട്.

6:49 PM IST:

റാപിഡ് ടെസ്റ്റ് തിരുവനന്തപുരത്ത് ആരംഭിച്ചിട്ടില്ലെന്ന് മുഖ്യമന്ത്രി സാധാരാണ നടത്തുന്ന ടെസ്റ്റാണിതെന്നും തെറ്റായി റിപ്പോർട്ട് ചെയ്തതാണെന്നും മുഖ്യമന്ത്രി. 

6:48 PM IST:

കാസർകോട് ഐസൊലേഷനും മറ്റുമായി ടാറ്റ ഗ്രൂപ്പ് സഹകരിക്കും. അവരുടെ സംഘം കാസർകോട് നിന്ന് പ്രവർത്തി പൂർത്തീകരിക്കും. മഹീന്ദ്ര ആന്റ് മഹീന്ദ്ര ആരോഗ്യ പ്രവർത്തകർക്കുള്ള ആയിരം പ്രൊഡക്ടീവ് ഷീൽഡ് നൽകും.

6:47 PM IST:

കൊവിഡ് ബാധിതരായ ക്ഷീര കർഷകർക്ക് പതിനായിരം രൂപയും നിരീക്ഷണത്തിലുള്ളർക്ക് രണ്ടായിരം രൂപയും നൽകും. കലാകാരന്മാരുടെ ഈ മാസത്തെ പെൻഷൻ തുക നാളെ മുതൽ അക്കൗണ്ടുകളിലെത്തും. ഈ മാസം 158 പേർക്ക് പുതുതായി അനുവദിച്ചു. സാംസ്കാരിക ക്ഷേമനിധി ബോർഡ് ഒരു കോടി രൂപ കലാകാരന്മാർക്ക് വിതരണം ചെയ്യും.

6:43 PM IST:

തൃശ്ശൂർ ജില്ലയിൽ 5280 റാപിഡ് ടെസ്റ്റിന് ഒരു കോടി രൂപ അനുവദിച്ചതായി ടി എൻ പ്രതാപൻ എംപി അറിയിച്ചു.

6:39 PM IST:

ആഴ്ചയിൽ ഒരു ദിവസം കംപ്യൂട്ടർ റിപ്പെയർ സെന്‍ററുകളും റീച്ചാർജ്ജ് കടകളും തുറക്കാൻ ആലോചിക്കും. വാഹനങ്ങളുടെ വർക്‌ഷോപ്പുകളും തുറക്കുമെന്ന് മുഖ്യമന്ത്രി. 

6:36 PM IST:

3000 അതിഥി മന്ദിരങ്ങളിലായി 42602 അന്തേവാസികളുണ്ട്. ഇവർക്ക് സൗജന്യ അരി നൽകണം. ഇവിടെ നാല് അന്തേവാസികൾക്ക് ഒരു കിറ്റ് എന്ന നിലയിലും സൗജന്യമായി വിതരണം ചെയ്യും. പ്രൊഫഷണൽ നാടക സമിതികൾ, ഗാനമേള ട്രൂപ്പുകൾ, മിമിക്രി കലാകരന്മാർ, തെയ്യവുമായി ബന്ധപ്പെട്ട കലാകാരന്മാരെല്ലാം ഇപ്പോൾ പ്രതിസന്ധിയിലാണ്. അവരുടെ കാര്യം അനുഭാവ പൂർവ്വം പരിഗണിക്കും.

6:35 PM IST:

ലോക്ക് ഡൗണിനെ തുടർന്ന് വിമാനയാത്ര റദ്ദാക്കിയവർക്ക് റീഫണ്ട് ലഭിക്കാൻ ഇടപെടണമെന്ന് കേന്ദ്രത്തോട് ആവശ്യപ്പെട്ടു.

6:34 PM IST:

മലപ്പുറം കോഴിക്കോട് ജില്ലകളിൽ ആളുകളെ പുറത്തിറക്കാൻ പ്രേരിപ്പിക്കുന്ന കഥകൾ പ്രചരിക്കുന്നുവെന്ന് മുഖ്യമന്ത്രി. മോഷ്ടാവിന്‍റെയും അജ്ഞാത ജീവിയുടെയും പേരിൽ ആളുകളെ പുറത്തിറങ്ങാൻ പ്രേരിപ്പിക്കുന്ന സന്ദേശങ്ങൾ പോകുന്നു. അത് അംഗീകരിക്കില്ല. ശക്തമായ നടപടി സ്വീകരിക്കുമെന്ന് മുഖ്യമന്ത്രി. ഉറവിടം കണ്ടെത്താൻ നിർദ്ദേശം നൽകിയതായും മുഖ്യമന്ത്രി.

6:32 PM IST:

മലയാളി നഴ്സുമാർക്ക് കൊവിഡ് ബാധ സ്ഥിരീകരിച്ച പശ്ചാത്തലത്തിൽ ഇടപെടലിനായി പ്രധാനമന്ത്രിക്ക് കത്ത് നൽകിയതായി മുഖ്യമന്ത്രി. മഹാരാഷ്ട്ര സർക്കാരിനും കത്ത് നൽകിയിട്ടുണ്ട്. മുംബൈയിലെ 46 മലയാളി നഴ്സുമാർക്കാണ് രോഗം സ്ഥിരീകരിച്ചത്. 150 ലേറെ നഴ്സുമാർ അവിടെ നിരീക്ഷണത്തിലാണ്. ദില്ലിയിലെ കാൻസർ ഇൻസ്റ്റിറ്റ്യൂട്ടിൽ അഞ്ച് മലയാളി നഴ്സുമാർക്ക് കൊവിഡ് സ്ഥിരീകരിച്ചു. സുരക്ഷാ ഉപകരണമില്ലാതെ ജോലി ചെയ്യേണ്ടി വരുന്നുവെന്നാണ് പരാതി. വിവിധ സംസ്ഥാന മുഖ്യമന്ത്രിമാരുമായി ബന്ധപ്പെടുന്നുണ്ടെന്നും മുഖ്യമന്ത്രി.

6:28 PM IST:

കർണ്ണാടക അതിർത്തി വഴി രോഗികളെ കടത്തി വിടാൻ അനുമതി ലഭിച്ചതായി മുഖ്യമന്ത്രി. കർണാടകത്തിലേക്ക് കൊവിഡ് ബാധയില്ലാത്ത രോഗികളെ കടത്തിവിടും. കർണാടക ആശുപത്രിയിലേക്ക് മെഡിക്കൽ സർട്ടിഫിക്കറ്റുമായി വേണം യാത്ര ചെയ്യാൻ. തലപ്പാടി ചെക്ക് പോസ്റ്റിൽ കർണ്ണാടകത്തിന്റെ മെഡിക്കൽ സർട്ടിഫിക്കറ്റോടെ മുന്നോട്ട് പോകാൻ അനുവാദം വാങ്ങാം. മംഗലാപുരത്തേക്ക് പോകുന്നവർ മെഡിക്കൽ സർട്ടിഫിക്കറ്റോടെ പോകണം. ഏത് ആശുപത്രിയിലേക്കാണ് പോകുന്നതെന്ന് അതിൽ രേഖപ്പെടുത്തണം.

 

6:29 PM IST:

ലോക്ക് ഡൗൺ സാഹചര്യത്തിലെ  റവന്യൂ വരുമാനത്തെ കുറിച്ച് പഠിക്കാൻ ഗുലാത്തി ഇൻസ്റ്റിറ്റ്യൂട്ടിനെ ചുമതലപ്പെടുത്തിയതായി മുഖ്യമന്ത്രി.

6:25 PM IST:

കേന്ദ്രമന്ത്രി ജയശങ്കറിനെ കത്ത് വഴി ബന്ധപ്പെട്ടുവെന്ന് മുഖ്യമന്ത്രി പിണറായി വിജയൻ. വിസ കാലാവധി ആറ് മാസം കൂടി വർധിപ്പിക്കണമെന്നും. ആരോഗ്യ ഇൻഷുറൻസ് നടപ്പാക്കേണ്ട ആവശ്യകതയും കത്തിൽ ചൂണ്ടിക്കാട്ടി. ലോക്ക് ഡൗൺ അവസാനിക്കുന്നതോടെ കേരളത്തിലേക്ക് എത്തുന്ന പ്രവാസികളെ സ്വീകരിക്കുന്നത് സംബന്ധിച്ച് പ്രോട്ടോക്കോൾ വേണമെന്ന് കത്തിൽ ആവശ്യപ്പെട്ടു. സംസ്ഥാനം വിദഗ്ദ്ധ സമിതിയുടെ റിപ്പോർട്ട് ലഭിച്ച ശേഷം ആവശ്യമായ തീരുമാനത്തിലെത്തും.

6:23 PM IST:

ഈ കാലം ദുർഘട കാലമാണ്. നേരത്തെ പ്രവാസികൾ സാമ്പത്തിക ശേഷിയുള്ളവരായിരുന്നു. ഇന്ന് ഒട്ടുമിക്ക ആളുകളും പ്രയാസം അനുഭവിക്കുന്നു. എല്ലായിടത്തും ഇത്തരം ഫീസടക്കൽ മാറ്റിവച്ചിരിക്കുകയാണ്. അത് മാനിച്ച് ഗൾഫ് നാടുകളിലെ സ്കൂൾ മാനേജ്മെന്റുകൾ ഇപ്പോൾ ഫീസടക്കാൻ നിർബന്ധിക്കരുത്. അത് മാറ്റിവയ്ക്കാൻ എല്ലാവരോടും അഭ്യർത്ഥിക്കുന്നു.

6:22 PM IST:

പ്രവാസികളുമായി വീഡിയോ കോൺഫറൻസിങ് നടത്തിയതായി മുഖ്യമന്ത്രി. 22 ലോകരാജ്യങ്ങളിൽ നിന്ന് 30 പേർ പങ്കെടുത്തു. ഓരോ മേഖലയിലും വ്യത്യസ്ത വിഷയങ്ങളാണ്. യാത്രാ വിലക്ക്, നിയന്ത്രണങ്ങൾ എന്നിവ പ്രവാസ ജീവിതത്തെ മാറ്റിമറിച്ചു. ഇക്കാര്യങ്ങൾ വിശദമായി ചർച്ച ചെയ്തു. പ്രവാസികളുമായി കൂടുതൽ ചർച്ച നടത്തും. പ്രവാസികൾക്ക് വേണ്ടി ചെയ്യാനാവുന്നതെല്ലാം ചെയ്യും. ഗൾഫ് നാടുകളിലെ സ്കൂളുകളിൽ പഠനം നടക്കുന്നില്ല. എന്നാൽ ഫീസ് നൽകേണ്ടി വരുന്നുണ്ട്. വിദ്യാഭ്യാസ രംഗത്തെ മലയാളി മാനേജ്മെന്റുകളുമായി ഇക്കാര്യം സംസാരിക്കണമെന്ന് അവർ ആവശ്യപ്പെട്ടു. അവരോരുത്തരുമായി പ്രത്യേകം സംസാരിക്കും. എങ്കിലും പരസ്യ അഭ്യർത്ഥന നടത്തുന്നു.

6:20 PM IST:

തമിഴ്നാട്ടിൽ ഇന്ന് 50 പേർക്ക് കൂടി കൊവിഡ് സ്ഥിരീകരിച്ചു. 48 പേരും നിസാമുദ്ദീനിൽ നിന്ന് തിരിച്ചെത്തിയവരാണ്. ഇതോടെ തമിഴ്നാട്ടിലെ കൊവിഡ് ബാധിതരുടെ എണ്ണം 621 ആയി.

6:19 PM IST:

തമിഴ്നാട്ടിൽ ഒരു കൊവിഡ് മരണം കൂടി. ചെന്നൈ സ്വദേശിയായ 57 വയസ്സുള്ള സ്ത്രീയാണ് മരിച്ചത്. ഇതോടെ തമിഴ്നാട്ടിൽ മരണം ആറായി.

6:18 PM IST:

കർണാടകയിൽ 12 പേർക്ക് കൂടി കൊവിഡ് 19 സ്ഥിരീകരിച്ചു. ഇതോടെ ആകെ രോഗികളുടെ എണ്ണം 163 ആയി. ഇന്ന് കർണാടകയിൽ രോഗം സ്ഥിരീകരിച്ചവരിൽ ജർമനിയിൽ നിന്നെത്തിയ എറണാകുളം സ്വദേശിയുമുണ്ട്. 

6:16 PM IST:

എംഎൽഎമാരുമായി കഴിഞ്ഞ ദിവസം വീഡിയോ കോൺഫറൻസിങ് നടത്തിയതായി മുഖ്യമന്ത്രി അറിയിച്ചു. പ്രവർത്തനങ്ങൾ വിലയിരുത്തി മാറ്റം വരുത്തേണ്ടതാണ് ചർച്ച നടത്തിയത്. നിയമസഭാംഗങ്ങൾ കളക്ട്രേറ്റിലെത്തി. സ്പീക്കറും പ്രതിപക്ഷ നേതാവും ഉമ്മൻചാണ്ടിയും പങ്കെടുത്തു. സഭാ സമ്മേളനത്തിന്റെ അതേ പ്രതീതിയായിരുന്നുവെന്ന് മുഖ്യമന്ത്രി. സർക്കാർ ഇടപെടലിൽ എല്ലാവരും സംതൃപ്തി രേഖപ്പെടുത്തിയെന്നും പിണറായി വിജയൻ വാർത്താസമ്മേളനത്തിൽ. 

6:14 PM IST:

ജില്ല മാറി റേഷൻ ലഭിക്കാത്ത പ്രശ്നം പരിഹരിക്കാൻ നിർദ്ദേശം നൽകിയതായി മുഖ്യമന്ത്രി. റേഷനുമായി ബന്ധപ്പെട്ട് അപൂർവമായി ചില പരാതികൾ ഉയർന്നു. ചിലർ റേഷൻ മോശമാണെന്ന പ്രചാരണവും നടത്തി. സമൂഹം ആദരിക്കുന്ന ചിലർ ഇത്തരം പ്രചരണങ്ങൾ തെറ്റാണെന്ന് അനുഭവത്തിലൂടെ പറഞ്ഞത് കഴിഞ്ഞ ദിവസങ്ങളിൽ സോഷ്യൽ മീഡിയയിൽ പറഞ്ഞു. നടനും നിർമ്മാതാവുമായ മണിയൻപിള്ള രാജുവിന്റെ പ്രതികരണം ഉദാഹരണം. റേഷൻ കടകളിൽ എല്ലാ സാധനങ്ങളും ഉറപ്പാക്കാൻ ശ്രദ്ധിക്കുന്നുണ്ടെന്ന് മുഖ്യമന്ത്രി. 

6:13 PM IST:

കൊവിഡ് 19 ഏത് സാഹചര്യത്തെയും നേരിടാൻ സംസ്ഥാനം സജ്ജമാണ്. 1.25 ലക്ഷത്തോളം കിടക്കകൾ സർക്കാർ-സ്വകാര്യ ആശുപത്രികളിൽ ലഭ്യമാണ്. പുറമെ പ്രത്യേക കൊറോണ കെയർ സംവിധാനമുണ്ട്. പ്രതിരോധത്തിന് ത്രിതല സംവിധാനം തയ്യാറാക്കി. പതിനായിരത്തിലേറെ ഐസൊലേഷൻ കിടക്കകൾ ആശുപത്രികളിൽ സജ്ജമാക്കിയെന്ന് മുഖ്യമന്ത്രി. 

6:11 PM IST:

കൊല്ലം, തൃശ്ശൂർ, കണ്ണൂർ ജില്ലകളിൽ ഓരോ പേരുടെ പരിശോധനാ ഫലം നെഗറ്റീവായതായി മുഖ്യമന്ത്രി.

 

6:11 PM IST:

ഇതുവരെ സംസ്ഥാനത്ത് 327 പേർക്ക് രോഗം സ്ഥിരീകരിച്ചു. 266 പേർ ചികിത്സയിലുണ്ട്. 152804 പേർ നിരീക്ഷണത്തിലുണ്ട്. 152009 പേർ വീടുകളിൽ. 895 പേർ ആശുപത്രികളിൽ. 

6:07 PM IST:

കാസർകോട് 9 പേർക്കും, മലപ്പുറത്ത് 2 പേർക്കും, കൊല്ലത്തും പത്തനംതിട്ടയിലും ഓരോ ആൾക്ക് വീതമാണ് ഇന്ന് രോഗം സ്ഥിരീകരിച്ചത്. കാസർകോട് 6 പേർ വിദേശത്ത് നിന്ന് വന്നവരാണ്. 

6:06 PM IST:

സംസ്ഥാനത്ത് 13 പേർക്ക് കൂടി കൊവിഡ് സ്ഥിരീകരിച്ചു

6:04 PM IST:

രോഗവ്യാപനം തടുത്ത് നിർത്താനായെന്ന് മുഖ്യമന്ത്രി. പൊതുവിൽ സ്വീകരിച്ച നടപടികൾ അതിന് വലിയ കാരണമാണെന്ന് പിണറായി വിജയൻ. എന്നാൽ ലോകവ്യാപകമായി സ്ഥിതി വ്യത്യസ്ഥമാണെന്നും മുഖ്യമന്ത്രി.. 18 മലയാളികൾ വിവിധ രാജ്യങ്ങളിൽ മരണമടഞ്ഞതായി മുഖ്യമന്ത്രി അറിയിച്ചു. ഈ കണക്ക് അന്തിമമല്ലെന്നും മുഖ്യമന്ത്രി ഔദ്യോഗിക സ്ഥിരീകരണം വരുമ്പോൾ ഇത് കൂടിയേക്കാം. 

5:56 PM IST:

കൊച്ചിയിൽ നിരീക്ഷണത്തിൽ ഉള്ളയാൾ ഹൃദയസ്തംഭനം മൂലം മരിച്ചു. ഇന്നലെ മെഡിക്കൽ കോളേജിൽ ഐസൊലേഷൻ വാർഡിൽ പ്രവേശിപ്പിച്ച എറണാകുളം സ്വദേശിയായ 65കാരനാണ് രാത്രിയോടെ ഹൃദയാഘാതം മൂലം മരണമടഞ്ഞത്.  ഇയാളുടെ സാമ്പിൾ പരിശോധനാ ഫലം ലഭ്യമായിട്ടില്ല. വീട്ടിൽ 28 ദിവസത്തെ നിരീക്ഷണ കാലാവധി പൂർത്തിയാക്കിയിരുന്നു.

5:54 PM IST:

ഡോക്ടർമാർക്കും നഴ്സുമാർക്കും കൂട്ടത്തോടെ കൊവിഡ് ബാധിച്ച സംഭവത്തിൽ മുംബൈ കോർപ്പറേഷൻ ആശുപത്രിക്കെതിരെ അന്വേഷണം പ്രഖ്യാപിച്ചു.

5:51 PM IST:

മാർച്ച് 24 ന് കൊവിഡ് സ്ഥിരീകരിച്ച ആലപ്പുഴ ഹരിപ്പാട് സ്വദേശിയുടെ രോഗം ഭേദമായി. തുടർച്ചയായ പരിശോധനാഫലം നെഗറ്റീവ് ആയതോടെ ഇദ്ദേഹത്തെ  മെഡിക്കൽ കോളേജ് ആശുപത്രിയിൽ നിന്നും ഡിസ്ചാർജ് ചെയ്തു. 

5:02 PM IST:

നിസാമുദ്ദീൻ സമ്മേളനത്തിൽ പങ്കെടുത്ത 4 പേർക്ക് കോവിഡ് സ്ഥിരീകരിച്ച സാഹചര്യത്തിൽ  ട്രെയിനിൽ യാത്ര ചെയ്തവരും റെയിൽവേ സ്റ്റേഷനിൽ ഉണ്ടായിരുന്നവരുമായ യാത്രക്കാര്‍ ജില്ലാ കണ്‍ട്രോള്‍ റൂമുമായി ബന്ധപ്പെടണമെന്ന് ജില്ലാ കലക്ടര്‍. മാര്‍ച്ച് 15നും 22 നും വൈകീട്ട് 6.30 നും ഏഴിനും ഇടയിൽ കോഴിക്കോട് റെയില്‍വേ സ്‌റ്റേഷന്‍ പ്ലാറ്റ്‌ഫോം ഒന്നിലും നാലിലും ഉണ്ടായിരുന്നവരാണ് കൺട്രോൾ റൂമുമായി ബന്ധപ്പെടേണ്ടത്. 15ന് നിസാമുദ്ദീന്‍-തിരുവനന്തപുരം എക്‌സ്പ്രസില്‍ (നമ്പര്‍- 22634) സ്ലീപ്പര്‍ കോച്ച് നമ്പര്‍ അഞ്ചില്‍ (എസ്5) യാത്ര ചെയ്ത കോഴിക്കോട് നിവാസികളായ മുഴുവന്‍ യാത്രക്കാരും ഉടന്‍ ജില്ലാ കണ്‍ട്രോള്‍ റൂമുമായി ബന്ധപ്പെടണമെന്ന് ജില്ലാ കലക്ടര്‍ അറിയിച്ചു. മറ്റ് ജില്ലകളിലെ യാത്രക്കാര്‍ അതത് ജില്ലാ കണ്‍ട്രോള്‍ റൂമുമായി ബന്ധപ്പെടണമെന്നും നിര്‍ദ്ദേശിച്ചു.

5:00 PM IST:

പത്തനംതിട്ടയിൽ 95 പരിശോധനാ ഫലങ്ങൾ കൂടെ നെഗറ്റീവായി. 163 സാംപിൾ കൂടെ പരിശോധനക്ക് അയച്ചിട്ടുണ്ട്.

5:00 PM IST:

സമൂഹ വ്യാപനം തടയുകയെന്നത് തന്നെയാണ് പ്രധാനമെന്ന് ആരോഗ്യമന്ത്രാലയം. കൊവിഡ് ചികിത്സയിൽ ഹൈഡ്രോക്സിക്ലോറോക്വിനിന്റെ ഉപയോഗം ഫലപ്രദമാണെന്നതിന് ഇതുവരെ തെളിവില്ലെന്ന് ICMR. 

4:59 PM IST:

തിരുവനന്തപുരത്ത് ഇന്ന് ലഭിച്ച 142 പരിശോധനാ ഫലങ്ങൾ നെഗറ്റീവ്. ശശി തരൂർ എംപിയുടെ പ്രാദേശിക വികസന ഫണ്ടിൽ നിന്നു തുക ചെലവഴിച്ചു വാങ്ങിയ 1000 റാപ്പിഡ് ടെസ്റ്റ് കിറ്റുകൂടി ഇന്നു ലഭ്യമായി. 

4:20 PM IST:

തബ്ലീഗ് ജമാഅത്തുമായി ബന്ധപ്പെട്ട് 1445 പുതിയ കൊവിഡ് കേസുകൾ സ്ഥിരീകരിച്ചതായി കേന്ദ്ര ആരോഗ്യമന്ത്രാലയം. 

4:14 PM IST:

യുവാക്കളിൽ രോഗ ബാധ നിരക്ക് കൂടുന്നത് ആശങ്കാജനകമാണെന്ന് കേന്ദ്ര ആരോഗ്യമന്ത്രാലയം. സമൂഹ അകലം പാലിച്ച് എല്ലാവരും സഹകരിക്കണമെന്നും ആരോഗ്യമന്ത്രാലയം. 

4:11 PM IST:

മരണസംഖ്യയിലും രോഗബാധിതരുടെ എണ്ണത്തിലും ഇന്നത്തേത് ഏറ്റവും ഉയർന്ന നിരക്കെന്ന് കേന്ദ്ര ആരോഗ്യമന്ത്രാലയം. 24 മണിക്കൂറിനിടെ 693 പേർക്ക് കൂടി കൊവിഡ് 19 സ്ഥിരീകരിച്ചുവെന്നാണ് ആരോഗ്യമന്ത്രാലയത്തിൻ്റെ ഔദ്യോഗിക കണക്ക്. കൊവിഡ് കേസുകളിൽ 47 ശതമാനവും 40 വയസിൽ താഴെയുള്ളവരിലെന്നും മന്ത്രാലയം.

3:49 PM IST:

എംപിമാരുടെയും മന്ത്രിമാരുടെയും ശമ്പളം കുറയ്ക്കാൻ ഓർഡിനൻസ് കൊണ്ടു വരും. 2020-2021,2021-2022 വർഷങ്ങളിലെ എംപി വികസന ഫണ്ടാണ് വേണ്ടെന്ന് വയ്ക്കുന്നത്. 

4:03 PM IST:

ശമ്പളത്തിന്‍റെ മുപ്പത് ശതമാനം വേണ്ടെന്ന് വയ്ക്കാൻ രാഷ്ട്രപതിയും പ്രധാനമന്ത്രിയും സംസ്ഥാന ഗവർണർമാരും തീരുമാനിച്ചു. സാമൂഹ്യ പ്രതിബന്ധത ഉയർത്തിപ്പിടിച്ചാണ് തീരുമാനം. എംപിമാരുടെ വേതനവും 30 ശതമാനം കുറയ്ക്കും. ഒരു വർഷത്തേക്കാണ് ശമ്പളം കുറച്ചത്. എംപി ഫണ്ടും രണ്ട് വർഷത്തേക്ക് ഇല്ല, എംപി ഫണ്ട് സഞ്ചിത നിധിയിലേക്ക് പോകും .

3:37 PM IST:

അമേരിക്കയിൽ കടുവയ്ക്ക് കൊവിഡ് കണ്ടെത്തിയ സാഹചര്യത്തിൽ സംസ്ഥാന വന്യജീവി വകുപ്പുകൾക്കും മൃഗശാലകൾക്കും കേന്ദ്രത്തിന്‍റെ മുന്നറിയിപ്പ്. സംശയമുള്ള മൃഗങ്ങളുടെ പരിശോധന നടത്തണമെന്നും കേന്ദ്രം. 

3:25 PM IST:

സംസ്ഥാനത്തെ 80 ശതമാനം ആളുകളും റേഷൻ കടകളിൽ നിന്നും ഭക്ഷ്യധാന്യങ്ങൾ കൈപ്പറ്റിയതായി ഭക്ഷ്യമന്ത്രി പി.തിലോത്തമൻ. സംസ്ഥാനത്ത് ആകെ 87.22 ലക്ഷം റേഷൻ കാർഡുകളാണുള്ളത്. ഇതിൽ 63.64 ലക്ഷം കാർഡുടമകളും ഭക്ഷ്യധാന്യങ്ങൾ കൈപ്പറ്റി കഴിഞ്ഞു. ഇതുവരെയും കൈപ്പറ്റാത്തവർക്ക് ഈ മാസം മുപ്പത് വരെ റേഷൻ കൈപ്പാറ്റാൻ അവസരമുണ്ടെന്നും ഭക്ഷ്യമന്ത്രി പി.തിലോത്തമൻ പറഞ്ഞു. ഏഷ്യാനെറ്റ് ന്യൂസിലൂടെ പ്രേക്ഷകരുമായി സംവദിക്കുന്നതിനിടെയാണ് മന്ത്രി ഇക്കാര്യം അറിയിച്ചത്. 

Read more at: റേഷൻ വിതരണം സർവ്വകാല റെക്കോർഡിൽ: 80 ശതമാനം പേരും റേഷൻ കൈപ്പറ്റിയതായി ഭക്ഷ്യമന്ത്രി

 

3:04 PM IST:

കൊല്ലത്ത് ആദ്യം രോഗം സ്ഥിരീകരിച്ച പ്രാക്കുളം സ്വദേശി രോഗ മുക്തനായി. ഇയാളെ ആശുപത്രിയിൽ നിന്ന് ഡിസ്ചാർജ് ചെയ്തു. ഇനി 14 ദിവസം വീട്ടിൽ നിരീക്ഷണത്തിൽ തുടരും. 

2:26 PM IST:

അഡ്വക്കേറ്റ് ജനറൽ, അഡിഷണൽ അഡ്വക്കേറ്റ് ജനറൽമാർ, ഡയറക്ടർ ജനറൽ ഓഫ് പ്രോസിക്യൂഷൻസ്, അഡിഷണൽ ഡയറക്ടർ ജനറൽ ഓഫ് പ്രോസിക്യൂഷൻസ്, സ്റ്റേറ്റ് അറ്റോർണി, എന്നിവരും ഹൈക്കോടതിയിലെ മുഴുവൻ ഗവൺമെന്‍റ് പ്ളീഡർമാരും തങ്ങളുടെ ഒരുമാസത്തെ ശമ്പള തുകയായ ഒരുകോടി അമ്പത്തിമൂന്നു ലക്ഷംത്തിൽപരം രൂപ കേരള മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്യാൻ തീരുമാനിച്ചു.

2:22 PM IST:

കണ്ണൂർ ഇരിട്ടി സ്വദേശി ലണ്ടനിൽ കൊവിഡ് ബാധിച്ച് മരിച്ചു. ഒരാഴ്ചയായി തീവ്രപരിചരണ വിഭാഗത്തിൽ കഴിയുകയായിരുന്ന ഷിൻ്റോ ജോർജ് ആണ് മരിച്ചത്. ജോലിയില്ലാത്ത ഇവരുടെ ഭാര്യയും കുഞ്ഞും ലണ്ടനിലുണ്ട്.

1:47 PM IST:

ലോക് ഡൗണിന്റെ പശ്ചാത്തലത്തില്‍ സംസ്ഥാന വനിത വികസന കോര്‍പറേഷന്റെ എല്ലാ ലോണുകളുടേയും മാര്‍ച്ച്, ഏപ്രില്‍, മേയ് എന്നീ 3 മാസങ്ങളില്‍ ഇന്‍സ്റ്റാള്‍മെന്റുകള്‍ അടയ്‌ക്കേണ്ടതില്ലെന്ന് ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. 60 മാസം കൊണ്ട് അടയ്‌ക്കേണ്ട ഈ ലോണുകള്‍ പിഴപ്പലിശ ഒഴിവാക്കി 63 മാസമാക്കിയാണ് നീട്ടിയിരിക്കുന്നത്.

1:45 PM IST:

ആലപ്പുഴയിലും ചെങ്ങന്നൂരും വിൽപ്പനയ്ക്കെത്തിച്ച പഴകിയ മത്സ്യം പിടികൂടി. ആലപ്പുഴ ടൗണിന് സമീപത്തുനിന്നാണ് നഗരസഭാ ആരോഗ്യ വിഭാഗം 350 കിലോ പഴകിയ മത്സ്യം പിടികൂടിയത്. ചെങ്ങന്നൂർ കല്ലിശേരിയിൽ നിന്നാണ് 300കിലോ പഴകിയ മത്സ്യം പിടികൂടിയത്. രണ്ട് കടകൾ അടപ്പിച്ചു. ഫുഡ് സേഫ്റ്റി വിഭാഗം പരിശോധനയിലാണ് മത്സ്യം പിടികൂടിയത് 

1:38 PM IST:

ലോക്ഡൗണിന് ശേഷം പാലക്കാട് അതിർത്തിയിൽ നിയന്ത്രണം തുടരേണ്ടി വരുമെന്ന് മന്ത്രി എകെ ബാലൻ. കോയമ്പത്തൂരിൽ ഉൾപ്പെടെ രോഗം വ്യാപിക്കുന്നത് ആശങ്കപ്പെടുത്തുന്നു. ഹോട്ട്സ്പോട്ടിൽ പാലക്കാട് ഇല്ലെങ്കിലും അതിനേക്കാൾ ജാഗ്രത ആവശ്യമാണെന്നും മന്ത്രി വ്യക്തമാക്കി. 

1:07 PM IST:

രാജ്യത്ത് കൊവിഡ് വൈറസ് പ്രതിരോധനടപടിയുടെ ഭാഗമായ ലോക്ക് ഡൗൺ നടപ്പാക്കിയത് മോശം ആസൂത്രണത്തിലൂടെയാണെന്ന്  മക്കള്‍ നീതി മയ്യം അധ്യക്ഷനും നടനുമായ  കമൽഹാസൻ. നോട്ട് റദ്ദാക്കലിന് ശേഷമുണ്ടായ പ്രതിസന്ധി ആവർത്തിക്കുമോ എന്ന് ഭയക്കുന്നതായി ചൂണ്ടിക്കാട്ടിയ കമൽ ഇക്കാര്യം വ്യക്തമാക്കി പ്രധാനമന്ത്രിക്ക് കത്തയച്ചു.

12:55 PM IST:

കർണ്ണാടക അതിർത്തി അടച്ച നടപടി മൗലിക അവകാശ ലംഘനമെന്ന് കേരളം സുപ്രീം കോടതിയിൽ. കേന്ദ്രസർക്കാർ കോടതി ഉത്തരവ് നടപ്പാക്കുന്നില്ലെന്നും കേരളം കോടതിയെ അറിയിച്ചു. കർണ്ണാടക സർക്കാരിൻറെ അപ്പീൽ തള്ളണമെന്ന് ആവശ്യപ്പെട്ട് കേരളം എതിർ സത്യവാങ്മൂലം നല്കി

12:31 PM IST:

തമിഴ്നാട്ടിൽ മദ്യം കിട്ടാതായതോടെ ലഹരിക്ക് വേണ്ടി വാര്‍ണിഷ് കുടിച്ചു. തമിഴ്നാട്ടിൽ മൂന്ന് പേർ മരിച്ചു. ചെങ്കൽപ്പേട്ട് ജില്ലയിലാണ് സംഭവം. ശിവശങ്കർ, പ്രദീപ്, ശിവരാമൻ എന്നിവരാണ് മരിച്ചത്. 

12:09 PM IST:

കൊവിഡ് 19 ബാധിച്ച് യുഎഇയില്‍ കണ്ണൂര്‍ സ്വേദശി മരിച്ചു. ചികിത്സയിലായിരുന്ന കണ്ണൂർ കോളയാട് സ്വദേശി ഹാരിസ് ആലച്ചേരിയാണ് (35) മരിച്ചത്. പനിയും ന്യുമോണിയയും ബാധിച്ചാണ്  ചികത്സ തേടിയത്. കഴിഞ്ഞ ദിവസം ആണ് കൊവിഡ് സ്ഥിരീകരിച്ചത്. അജ്‌മാനീലെ  സ്വകാര്യ ആശുപത്രിയിൽ വെച്ചായിരുന്നു മരണം. 

12:06 PM IST:

കൊവിഡിനെതിരായ പ്രതിരോധ നടപടിയിൽ രാജ്യം ഒറ്റക്കെട്ടെന്ന് പ്രധാനമന്ത്രി നരേന്ദ്രമോദി. ഇന്ത്യ കൊവിഡിനെതിരെ സമഗ്രവും സമയോചിതവുമായ നടപടി എടുത്തു.  ഇന്ത്യ തീരുമാനമെടുത്തതിൽ കാണിച്ച വേഗതയെ ലോകം അഭിനന്ദിക്കുന്നു. ഒറ്റക്കെട്ടായാണ് ഇന്ത്യ ഈ യുദ്ധത്തിൽ പങ്കാളിയാവുന്നത്. ലോക്ക്ഡൗണിനോട് ഇന്ത്യയിലെ ജനങ്ങൾ അസാധാരണ ക്ഷമയും സഹകരണം കാട്ടിയതായും പ്രധാനമന്ത്രി. 

11:54 AM IST:

കൊവിഡ് 19 സ്ഥിരീകരിച്ച ബോളിവുഡ് ഗായിക കനികാ കപൂറിന്റെ പരിശോധന ഫലം നെഗറ്റീവ് ആയി.  ആറാമത്തെ പരിശോധനാ ഫലമാണ് നെഗറ്റീവ് ആയത്  ഇവരെ ആശുപത്രിയിൽ നിന്ന് ഡിസ്ചാർജ് ചെയ്തു. 
 

11:46 AM IST:

ആന്ധ്രപ്രദേശിൽ രണ്ട് കൊവിഡ് മരണം.14 പേർക്ക് കൂടി രോഗം സ്ഥിരീകരിച്ചു. 

11:25 AM IST:

ദില്ലി എൻഡിഎംസിയുടെ ചരക് പാലികയിലെ ആശുപത്രി അടച്ചു. ആശുപത്രിയിലെ മുഴുവൻ സ്റ്റാഫുകളും നിരീക്ഷണത്തിലാണ്. ശുചീകരണ തൊഴിലാളിക്ക് കൊവിഡ് സ്ഥിരീകരിച്ചതിനെ തുടർന്നാണ് ആശുപത്രി അടച്ചത്. 

11:03 AM IST:

മലപ്പുറത്ത് കോവിഡ് സ്ഥിരീകരിച്ച ആദ്യ വ്യക്തി അസുഖം ഭേദമായി  വീട്ടിലേക്ക് മടങ്ങി. വണ്ടൂര്‍ വാണിയമ്പലം സ്വദേശിനിയാണ് മഞ്ചേരി ഗവ. മെഡിക്കല്‍ കോളജ് ആശുപത്രിയിലെ ചികിത്സക്കു ശേഷം രോഗമുക്തയായത്. ഉംറ കഴിഞ്ഞു തിരിച്ചെത്തിയ ഇവര്‍ക്ക് മാര്‍ച്ച് 16 നാണ് കൊവിഡ് സ്ഥിരീകരിച്ചത്.

10:47 AM IST:

ചെന്നൈ വിമാനത്താവളത്തിൽ നിന്ന് പിടികൂടിയ പത്ത് മലേഷ്യൻ സ്വദേശികളെ ക്വാറൻ്റൈനിലാക്കി. ദുരിതാശ്വാസ സാധനങ്ങൾ കൊണ്ടു പോകുന്ന പ്രത്യേക വിമാനത്തിൽ നാട്ടിലേക്ക് മടങ്ങാൻ ശ്രമിക്കവേയാണ് ഇവരെ പിടികൂടിയത്.  ചെന്നൈ വിമാനത്താവളത്തിൽ നിന്ന് കസ്റ്റഡിയിലിടുത്തവരെ പൊലീസിന് കൈമാറിയിരുന്നു.

10:29 AM IST:

കൊവിഡ് പശ്ചാത്തലത്തിൽ സുരക്ഷാ സേനകൾക്ക് നേരെ  ആക്രമണം സംഘടിപ്പിക്കില്ലെന്ന് മാവോയിസ്റ്റുകൾ. സിപിഐ മാവോയിസ്റ്റ് ആന്ധ്ര ഘടകത്തിന്റേതാണ് പ്രസ്താവന

10:22 AM IST:

ദുരിതാശ്വാസ സാധനങ്ങൾ കൊണ്ടു പോകുന്ന പ്രത്യേക വിമാനത്തിൽ നാട്ടിലേക്ക് മടങ്ങാൻ ശ്രമിച്ച പത്ത് മലേഷ്യൻ സ്വദേശികൾ പിടിയിൽ. ചെന്നൈ വിമാനത്താവളത്തിൽ നിന്ന് കസ്റ്റഡിയിലിടുത്തവരെ പൊലീസിന് കൈമാറി. തബ്ലീഗ് സമ്മേളനത്തിൽ പങ്കെടുത്ത് തിരിച്ചെത്തിയവരാണ് ഇവരെന്നാണ് വിവരം 
 

10:11 AM IST:

ലോക്ക് ഡൗണിനിടെ സ്ത്രീകൾക്കെതിരായ അതിക്രമങ്ങൾ ലോകമെമ്പാടും ഭീതിപ്പെടുത്തുന്ന രീതിയിൽ വർധിച്ചെന്ന് യുഎൻ സെക്രട്ടറി ജനറൽ അന്റോണിയോ ഗുട്ടറെസ്. കൊവിഡിനെ നേരിടുന്നതിനൊപ്പം സ്ത്രീകളുടെ സുരക്ഷയ്ക്കും പ്രാധാന്യം നൽകണമെന്ന് ഗുട്ടറെസ് ലോകരാജ്യങ്ങളോട് അഭ്യർത്ഥിച്ചു.

 

10:06 AM IST:

ഉത്തർപ്രദേശിലെ പ്രയാഗ് രാജ് ആശുപത്രിയിൽ കരുതൽ നിരീക്ഷണത്തിലാക്കിയ ഇന്തോനേഷ്യക്കാരന് കൊവിഡ് സ്ഥിരീകരിച്ചു. നിസാമുദിൻ സമ്മേളനത്തിൽ പങ്കെടുക്കാൻ എത്തിയതായിരുന്നു ഇയാള്‍. 

10:08 AM IST:

രാജ്യത്ത് കൊവിഡ് മരണം 109 ആയി. കഴിഞ്ഞ പന്ത്രണ്ട് മണിക്കൂറിനിടെ 26 മരണമുണ്ടായി. ഇതുവരെ 4067 പേർക്ക് രോഗം സ്ഥിരീകരിച്ചു. കഴിഞ്ഞ പന്ത്രണ്ട് മണിക്കൂറിനിടെ 490 പുതിയ കേസുകളാണ് രാജ്യത്ത് റിപ്പോര്‍ട്ട് ചെയ്തത്.

9:36 AM IST:

സ്വകാര്യ ആശുപത്രിയിലെ 26 നഴ്സുമാർക്കും മൂന്ന് ഡോക്ടർമാർക്കും കൊവിഡ് 19 സ്ഥിരീകരിച്ചു. ആശുപത്രിക്കുള്ളിൽ ഇവരെ  ക്വാറന്‍റൈന്‍ ചെയ്തു. ഭൂരിഭാഗം നഴ്സുമാരും മലയാളികളാണ്. ആശുപത്രിക്ക് അകത്തേക്കോ അകത്ത് നിന്ന് പുറത്തേക്കോ ആരെയും കടത്തിവിടില്ല. 
 

9:16 AM IST:

ലണ്ടനിൽ മലയാളി കൊവിഡ് ബാധിച്ച് മരിച്ചു. കൊട്ടാരക്കര സ്വദേശി ഇന്ദിരയാണ് ലണ്ടനിൽ മരിച്ചത്. ഇന്ന് കൊവിഡ് 19 ബാധിച്ച് അമേരിക്കയിൽ രണ്ട് മലയാളികൾ കൂടി മരിച്ചു. പിറവം സ്വദേശി ഏലിയാമ്മ കുര്യാക്കോസ്, ചെങ്ങന്നൂർ സ്വദേശി ഏലിയാമ്മ ജോണും ആണ് മരിച്ചത്. 

9:01 AM IST:

ഭോപ്പാലിൽ ആദ്യ കൊവിഡ് മരണം. രോഗം ബാധിച്ച് ചികിത്സയിലിരുന്ന 62 കാരനാണ് മരിച്ചതെന്ന് ഭോപ്പാല്‍ ആരോഗ്യവകുപ്പ് അറിയിച്ചു. സംസ്ഥാനത്ത് ഇതുവരെ കൊവിഡ് ബാധിച്ച് മരിച്ചവരുടെ എണ്ണം 15 ആയി. 

8:57 AM IST:

രാജ്യത്ത് കൊവിഡ് 19 ബാധിച്ച് മരിച്ചവരുടെ എണ്ണം 83 ആയി. 505 പുതിയ കേസുകള്‍ റിപ്പോര്‍ട്ട് ചെയ്തതോടെ രോഗ ബാധിതരുടെ എണ്ണം മൂവായിരത്തി അഞ്ഞൂറ്റി എഴുപത്തിയേഴായി. രാജ്യത്തെ 274 ജില്ലകളെ കൊവിഡ് ബാധിച്ച് കഴിഞ്ഞു. തീവ്രബാധിത മേഖലകളെ ബഫര്‍സോണുകളായി പരിഗണിച്ച് കൂടുതല്‍ നിയന്ത്രണങ്ങളും സംരക്ഷണവും ഏര്‍പ്പെടുത്തും. 

8:47 AM IST:

സൗദി അറേബ്യയിലും യുഎഇയിലും കൊവിഡ് രോഗബാധിതരുടെ എണ്ണം ഉയരുന്നു. യുഎഇയില്‍ 294 പേരില്‍ കൂടി വൈറസ് സ്ഥിരീകരിച്ചു. ഇതോടെ യുഎഇയിലെ രോഗബാധിതരുടെ എണ്ണം 1799 ആയി. സൗദിയില്‍ ഇതുവരെ 2385 പേരിലാണ് രോഗം സ്ഥിരീകരിച്ചത്.  സൗദിയില്‍ കൊവിഡ് മരണം 34 ആയി. 

8:41 AM IST:

കൊവിഡിനെതിരെയുള്ള പോരാട്ടത്തിൽ ബ്രിട്ടീഷ് ജനത വിജയിക്കുമെന്ന് എലിസബത്ത് രാജ്ഞി. വൈറസ് മൂലമുണ്ടായ ബുദ്ധിമുട്ടുകൾ വെല്ലുവിളിയായി ഏറ്റെടുത്ത് മുന്നേറാൻ രാജ്ഞി ജനങ്ങൾക്ക് ആഹ്വാനം നൽകി. അറുപത്തിയെട്ട് വർഷത്തിനിടെ ഇത് അഞ്ചാമതാണ് രാജ്ഞി ടെലിവിഷനിലൂടെ ജനങ്ങളെ അഭിസംബോധന ചെയ്യുന്നത്.
 

8:35 AM IST:

കൊവിഡ് 19 ബാധിച്ച് അമേരിക്കയിൽ രണ്ട് മലയാളികൾ കൂടി മരിച്ചു. പിറവം സ്വദേശി ഏലിയാമ്മ കുര്യാക്കോസ്, ചെങ്ങന്നൂർ സ്വദേശി ഏലിയാമ്മ ജോണും ആണ് മരിച്ചത്. വൈറസ് ബാധയെ തുടർന്ന് അമേരിക്കയിൽ മരിച്ച മലയാളികളുടെ എണ്ണം ആറായി. 

8:36 AM IST:

കൊവിഡ് ബാധിതനായ ബ്രിട്ടീഷ് പ്രധാനമന്ത്രി ബോറിസ് ജോൺസണിനെ  ആശുപത്രിയിൽ പ്രവേശിപ്പിച്ചു. വൈറസ് ബാധ സ്ഥിരീകരിച്ച് 10 ദിവസമായിട്ടും രോഗം ഭേദമാകാതെ വന്നതോടെയാണ് ബോറിസ് ജോൺസണിനെ പരിശോധനകൾക്കായി ആശുപത്രിയിലേക്ക് മാറ്റിയത്. ബ്രിട്ടനിൽ ഇന്നലെ 621 പേരാണ്  ഒറ്റദിവസത്തിനിടെ മരിച്ചത്. 

8:32 AM IST:

ലോകത്ത് കൊവിഡ് മരണം 69,456 ആയി. കൊവിഡ് ബാധിതരുടെ എണ്ണം പന്ത്രണ്ട് ലക്ഷം കടന്നു. 1,272,737 പേർക്കാണ് ലോകത്ത് കൊവിഡ് രോ​ഗം സ്ഥിരീകരിച്ചത്. ബ്രിട്ടനിൽ 621 പേർ ഒറ്റദിവസത്തിനിടെ മരിച്ചു. ഇറ്റലിയിൽ രണ്ടാഴ്ചക്കിടെയുള്ള ഏറ്റവും കുറഞ്ഞ മരണനിരക്കും ഫ്രാൻസിൽ ഒരാഴ്ചക്കിടെയുള്ള ഏറ്റവും കുറഞ്ഞ മരണനിരക്കും ഇന്നലെ രേഖപ്പെടുത്തി. ഫ്രാൻസിൽ 518 പേർ മരിച്ചപ്പോൾ ഇറ്റലിയിൽ 525 പേരാണ് ഇന്നലെ മരിച്ചത്. മൂന്ന് ദിവസമായി മരണനിരക്ക് കുറഞ്ഞുവരുന്ന സ്പെയിനിൽ ഇന്നലെ 694 പേരാണ് മരിച്ചത്.