'റൂഫിങ്', ഷീറ്റുകളും ഓടുകളും

ഏത് നിർമ്മാണ രീതിയാണങ്കിലും കാലങ്ങളോളും നിലനിൽക്കുക എന്നതാണ് പ്രധാനം. വീടിന്റെ റൂഫിങ് കാര്യത്തിലും ഇത്തരത്തിൽ 
ക്യത്യമായ പ്ലാനുണ്ടാവണം.  റൂഫിങിനായി കേരളത്തിലധികവും ഉപയോഗിക്കുന്നത് ഷീറ്റുകളും ഓടുകളുമാണ്. റൂഫിങ് ഷീറ്റുകൾ വാങ്ങുമ്പോൾ ഗുണമേന്മയുള്ളതു തന്നെ തെരഞ്ഞെടുക്കണം. കാലങ്ങളോളം സംരക്ഷണം നൽകുവാൻ കഴിയുന്ന ഷീറ്റുകൾ വാങ്ങിയാൽ മാത്രമെ സാമ്പത്തികമായി ഗുണമുള്ളു.

പ്ലെയിൻ ഷീറ്റുകൾ, കോറുഗേറ്റഡ് ഷീറ്റുകൾ, ഓടു പോലെ തോന്നിക്കുന്ന ടൈൽ പ്രൊഫൈൽ ഷീറ്റുകൾ, പ്രീ കോട്ടഡ് ഷീറ്റുകൾ, ഡബിൾ സൈഡഡ് പ്രീ കോട്ടഡ് ഷീറ്റ്, പോളികാർബണേറ്റ് ഷീറ്റ്, ജിഐ ഷീറ്റ് എന്നിവയാണ് പ്രധാനപ്പെട്ട റൂഫിങ് ഷീറ്റുകൾ. പ്രീകോട്ടഡ് ഷീറ്റുകൾ പൗഡർ കോട്ടിങ് വഴി കളർ കോട്ടഡ് ആയാണ് ലഭിക്കുന്നത്. ഇവയിൽ പുറമേക്കുള്ള ഭാഗത്ത് നിറവും പുറകിലായി കറുത്ത നിറവും ആയിരിക്കും. എന്നാൽ ഡബിൾ സൈഡഡ് ഷീറ്റുകളിൽ രണ്ടു ഭാഗത്തും നിറം പൂശിയിരിക്കും. സൺഷേഡ് കൊടുക്കുമ്പോൾ ഇത്തരം ഷീറ്റുകളായിരിക്കും അഭികാമ്യം.പോളികാർബണേറ്റ് ഷീറ്റുകൾ രണ്ടു തരത്തിലുണ്ട്. സോളിഡും മൾട്ടിവോളും. മൾട്ടിവോൾ രീതിയിലുള്ള ഷീറ്റിൽ രണ്ടു ഷീറ്റുകൾക്കിടയ്ക്ക് നാല്– ആറ് എംഎം കനത്തിൽ ട്യൂബുലാർ ആകൃതി കൊടുത്തിരിക്കും. ഇത് വായുവിനെ പിടിച്ചു നിർത്തുന്നതിനാല്‍ ചൂടു കുറവ് അനുഭവപ്പെടും. എന്നാൽ ഇതിനുപയോഗിക്കുന്ന മെറ്റീരിയൽ ഗുണനിലവാരമുള്ളതാണോ എന്ന് കണിശമായി പരിശോധിക്കേണ്ടിവരും. അല്ലെങ്കിൽ അത് വളരെ വേഗം പൊട്ടിപ്പോകാനോ അതിലൂടെ വെള്ളം ഒലിച്ചിറങ്ങാനോ ഒക്കെ ഇടയായെന്നിരിക്കും. വില കുറവാണെന്നതാണ് ഇതിന്റെ ആകർഷണം. സോളിഡ് പോളികാർബണേറ്റിന് സ്ക്വയർഫീറ്റിന് 180 രൂപയ്ക്കടുത്ത് വിലയുള്ളപ്പോൾ മൾട്ടിവോളിന് ഏകദേശം 50 രൂപയേ വരൂ.

ഗ്രാനുലാർ കോട്ടിങ് ഉള്ള റൂഫിങ് ഷീറ്റുകളുണ്ട്. കാണാൻ നല്ല ഭംഗിയുള്ള ഇത്തരം ഷീറ്റുകളിൽ മഴക്കാലത്ത് വെള്ളം വീണാലും അധികം ശബ്ദം ഉണ്ടാവുകയില്ല. ഷിംഗിൾസ് പോലെയുള്ള ഇത്തരം ഷീറ്റുകൾക്ക് വില അൽപം കൂടും. മാത്രമല്ല, ഫ്ലാറ്റ് ആയ റൂഫിൽ മറൈൻപ്ലൈ പോലുള്ള ഫ്രെയിം വർക്കുകൾ ചെയ്തിട്ടുവേണം അതിന്മേൽ ഷിംഗിൾസ് ഒട്ടിക്കാൻ. അലുമിനിയം കോട്ടിങ് കൂടുതലുള്ള ഷീറ്റുകൾ ചൂടിൽ നിന്നും തുരുമ്പിൽ നിന്നും സംരക്ഷണം നൽകും.