Asianet News Malayalam

തക്കാളിയിലെ കീടങ്ങളെ അകറ്റാൻ ജൈവ വഴികൾ പലതുണ്ട്

Web Desk — Tue, 26 May 2026 17:00:35 +0530

തക്കാളിയിലെ കീടങ്ങളെ അകറ്റാൻ ജൈവ വഴികൾ തന്നെ ധാരാളം. എന്തൊക്കെയാണ് ചെയ്യേണ്ടത്?

കുറഞ്ഞ പരിചരണം, മികച്ച പ്രതിരോധശേഷി, മധുരക്കിഴങ്ങ് ഗ്രോ ബാഗിൽ വളർത്താം

Web Desk — Sun, 28 Jun 2026 17:12:27 +0530

നമ്മുടെ വീടിന്റെ ടെറസിലെ ഗ്രോ ബാഗുകളിൽ വളരെ എളുപ്പത്തിൽ വളർത്തിയെടുക്കാവുന്ന ഒന്നാണ് മധുരക്കിഴങ്ങ്. കുറഞ്ഞ പരിചരണവും മികച്ച പ്രതിരോധശേഷിയുമാണ് പ്രത്യേകത.

പച്ചപിടിച്ച വഴുതനത്തോട്ടം വേണോ? ഇതാ ചില സൂത്രങ്ങൾ

Web Desk — Sat, 04 Apr 2026 22:17:42 +0530

എങ്ങനെ വഴുതന നട്ടുവളർത്തി നല്ല വിളവെടുക്കാം? വിത്തുകൾ നേരിട്ട് നടുന്നതിനേക്കാൾ ട്രേകളിലോ ചെറിയ തടങ്ങളിലോ പാകി മുളപ്പിച്ച്, നാല് ഇലകൾ വന്നശേഷം മാറ്റി നടാം.

കിഴങ്ങുവിളകളിൽ പൊന്നുവിളയിക്കാൻ ഇതാ ചില വഴികൾ

Web Desk — Sun, 31 May 2026 17:32:19 +0530

രുചിയും ആരോഗ്യവും ഒന്നിച്ച് ചേരുന്നവയാണ് നമ്മുടെ പറമ്പുകളിലെ കിഴങ്ങുവർഗ്ഗങ്ങൾ. ചേമ്പും ചേനയും കാച്ചിലും മരച്ചീനിയുമൊക്കെ വലിയ പരിചരണമില്ലാതെ വളരുമെന്ന് പറയാറുണ്ടെങ്കിലും, ഇവയെ സ്നേഹത്തോടെ പരിചരിച്ചില്ലെങ്കിൽ കീടങ്ങൾ വില്ലന്മാരായെത്തിയേക്കാം. കുറച്ചൊന്ന് ശ്രദ്ധിച്ചാൽ വിഷമയമില്ലാത്ത നല്ല നാടൻ കിഴങ്ങുകൾ നമുക്ക് അടുക്കളയിലെത്തിക്കാം.

കൃഷിയിടങ്ങളിൽ നമ്മൾ സാധാരണ നേരിടാറുള്ള ചില കുഞ്ഞുവില്ലന്മാരെയും അവരെ പക്വതയോടെ നേരിടാനുള്ള ചില എളുപ്പവഴികളും പരിചയപ്പെടാം:

ആരാണ് ആ വില്ലന്മാർ?

ചേനയുടെയും ചേമ്പിന്റെയും അടിയിലിരുന്ന് നീരൂറ്റിക്കുടിക്കുന്ന മൂട്ടകളും ചെള്ളുകളുമാണ് പലപ്പോഴും കർഷകരുടെ ഉറക്കം കെടുത്താറുള്ളത്. ഇവ കിഴങ്ങുകൾ ചീയാൻ കാരണമാകും. അതുപോലെ മധുരക്കിഴങ്ങ് ഇഷ്ടപ്പെടുന്നവരെ സങ്കടത്തിലാക്കുന്ന ഒന്നാണ് കിഴങ്ങ് തുരപ്പൻ പുഴുക്കൾ. ഇവ കിഴങ്ങ് തുരന്ന് തിന്നുക മാത്രമല്ല, രുചി കയ്പ്പുള്ളതാക്കി മാറ്റുകയും ചെയ്യും. മരച്ചീനിയിലാവട്ടെ ഇലപ്പേനും ചുവന്ന ചിലന്തിയുമാണ് ഇലകൾ മഞ്ഞളിച്ച് ചുരുട്ടിക്കളയുന്നത്.

വിത്തിന് നൽകാം ഒരു കുളി

നടാൻ ഉദ്ദേശിക്കുന്ന കിഴങ്ങുകൾക്ക് തുടക്കത്തിലേ ഒരല്പം പ്രതിരോധശേഷി നൽകാം. ഇതിനായി ഒരു ലിറ്റർ വെള്ളത്തിൽ 20 ഗ്രാം സ്യൂഡോമോണാസ് പൊടി കലക്കി, അതിൽ വിത്ത് കിഴങ്ങുകൾ ഒരു അരമണിക്കൂർ മുക്കിവെക്കാം. അതിനുശേഷം തണലിലിട്ട് ഉണക്കി നട്ടാൽ കിഴങ്ങുചീയൽ രോഗത്തോട് ബൈ പറയാം.

മണ്ണിന് വേപ്പിൻപിണ്ണാക്കിന്റെ കരുത്ത്:

നമ്മൾ തടമൊരുക്കുമ്പോൾ തന്നെ കുറച്ച് വേപ്പിൻപിണ്ണാക്ക് മണ്ണിൽ ചേർത്തുകൊടുക്കുന്നത് മണ്ണിലുള്ള കീടങ്ങളെയും അവയുടെ മുട്ടകളെയും അകറ്റിനിർത്താൻ സഹായിക്കും.

മധുരക്കിഴങ്ങിന് മണ്ണുടുപ്പ്

മധുരക്കിഴങ്ങ് നട്ട് ഒരു മാസം കഴിയുമ്പോൾ ചുവട്ടിൽ നല്ലപോലെ മണ്ണ് കൂട്ടിക്കൊടുക്കണം. കിഴങ്ങുകൾ മണ്ണിൽ നന്നായി മൂടിക്കിടന്നാൽ വണ്ടുകൾ വന്ന് മുട്ടയിടില്ല.

അടുക്കളയിലെ പരിഹാരം

രാസവസ്തുക്കളുടെ പുകവലയമില്ലാതെ തികച്ചും ജൈവരീതിയിൽ ഇവയെ നമുക്ക് തുരത്താം.

വേപ്പെണ്ണ-വെളുത്തുള്ളി കൂട്ട്: വെളുത്തുള്ളി അല്പം അരച്ചെടുത്ത് വേപ്പെണ്ണയും സോപ്പുലായനിയും (20 മില്ലി വേപ്പെണ്ണ + 20 ഗ്രാം വെളുത്തുള്ളി നീര് + ഒരു ലിറ്റർ വെള്ളം) ചേർത്ത് ഇലകളുടെ ഇരുവശത്തും തളിച്ചുകൊടുത്താൽ ഇലപ്പേനും ചെള്ളുമൊക്കെ വഴിമാറിപ്പോകും.

വഴിമാറ്റി നടാം: ഒരു തവണ കിഴങ്ങ് നട്ട അതേ സ്ഥലത്ത് അടുത്ത തവണ പയറോ മറ്റ് വിളകളോ നടുന്നത് മണ്ണിന്റെ ഫലഭൂയിഷ്ഠത കൂട്ടാനും കീടങ്ങളുടെ ശല്യം പൂർണ്ണമായി ഇല്ലാതാക്കാനും സഹായിക്കും.

വലിയ ആർഭാടങ്ങളില്ലാതെ, വീട്ടിലെ ചെറിയ പരിചരണങ്ങൾ കൊണ്ട് തന്നെ നമ്മുടെ പറമ്പിലെ കിഴങ്ങുകളെ കീടങ്ങളിൽ നിന്ന് കാത്തുരക്ഷിക്കാം.

പാഷൻ ഫ്രൂട്ട് വീട്ടിൽ വളർത്തണോ? ഇതാ 10 ലളിതമായ ഘട്ടങ്ങൾ

Web Desk — Wed, 25 Mar 2026 17:11:40 +0530

പാഷൻ ഫ്രൂട്ട് വളരെ എളുപ്പത്തിൽ വീട്ടിൽ വളർത്തിയെടുക്കാം. എന്തൊക്കെയാണ് വിവിധ ഘട്ടങ്ങൾ?

ഡ്രാഗൺ ഫ്രൂട്ട്: വീട്ടുവളപ്പിലെ അത്ഭുത ഫലം: കൃഷിരീതികൾ

Web Desk — Mon, 13 Apr 2026 16:24:13 +0530

ആരോഗ്യ ഗുണങ്ങൾ കൊണ്ടും വിപണിയിലെ ഡിമാൻഡ് കൊണ്ടും ഇന്ന് കർഷകരുടെയും വീട്ടമ്മമാരുടെയും പ്രിയപ്പെട്ട ഒന്നായി ഡ്രാഗൺ ഫ്രൂട്ട് മാറിക്കഴിഞ്ഞു. ഉഷ്ണമേഖലാ പ്രദേശങ്ങളിൽ വളരെ എളുപ്പത്തിൽ വളർത്താൻ കഴിയുന്ന ഒരു കാക്റ്റസ് ഇനത്തിൽപ്പെട്ട ചെടിയാണിത്.

ചീര കൃഷി ചെയ്യുമ്പോൾ കീടബാധ പണി തരുന്നുണ്ടോ? മാർഗമുണ്ട്

Web Desk — Fri, 17 Apr 2026 22:09:52 +0530

ചീര കൃഷിയിലെ കീടബാധ ഒഴിവാക്കാൻ എന്തെല്ലാം വഴികൾ നോക്കാം?

മഴക്കാലത്തും നൂറുമേനി വിളവെടുക്കാം; കൃഷി ഇങ്ങനെ ആയാലോ? സമ്പൂർണ ഗൈഡ്

Web Desk — Thu, 07 May 2026 15:04:54 +0530

മലയാളിക്ക് മെയ്, ജൂൺ മാസങ്ങൾ വെറും മഴക്കാലത്തിന്റെ തുടക്കമല്ല, മറിച്ച് പ്രതീക്ഷയുടെ വിത്തിടൽ കൂടിയാണ്. കത്തുന്ന വേനലിന് വിട നൽകി ഇടവപ്പാതിയുടെ കുളിർമഴ മണ്ണിലേക്ക് ഇറങ്ങുമ്പോൾ, നമ്മുടെ കൃഷിയിടങ്ങളെ സജീവമാക്കാൻ പറ്റിയ ഏറ്റവും മികച്ച സമയമാണിത്. കൃത്യമായ മണ്ണൊരുക്കവും ശാസ്ത്രീയമായ പരിപാലനവും ഉണ്ടെങ്കിൽ സമൃദ്ധമായ ഒരു വിളവെടുപ്പിലേക്ക് ഈ മഴക്കാലം നമ്മെ നയിക്കും. ജൂണിലെ കനത്ത മഴയ്ക്ക് മുൻപായി മെയ് മാസത്തിൽ തന്നെ നാം തുടങ്ങേണ്ട ഒരുക്കങ്ങൾ എന്തൊക്കെയാണെന്ന് നോക്കാം.

1. മണ്ണൊരുക്കൽ: അടിത്തറ ഭദ്രമാക്കാം

മഴക്കാല കൃഷിയിൽ ഏറ്റവും പ്രധാനം മണ്ണിലെ അമ്ലത നിയന്ത്രിക്കുക എന്നതാണ്.

കുമ്മായം ചേർക്കൽ: മഴ തുടങ്ങുന്നതിന് രണ്ടാഴ്ച മുൻപെങ്കിലും സെന്റിന് 2 കിലോ എന്ന തോതിൽ കുമ്മായമോ ഡോളോമൈറ്റോ ചേർത്ത് മണ്ണ് ഇളക്കി വിടണം. ഇത് മണ്ണിലെ പുളിപ്പ് കുറയ്ക്കാനും ചെടികൾക്ക് പോഷകങ്ങൾ വേഗത്തിൽ വലിച്ചെടുക്കാനും സഹായിക്കും.

നീർവാർച്ചാ സൗകര്യം: മഴവെള്ളം കെട്ടിക്കിടന്നാൽ വേരു ചീയൽ ഉണ്ടാകാൻ സാധ്യതയുണ്ട്. അതിനാൽ പച്ചക്കറികൾക്കായി ഉയരത്തിൽ തടങ്ങൾ എടുക്കാനോ വാരങ്ങൾ കോരാനോ പ്രത്യേകം ശ്രദ്ധിക്കണം.

2. നടാൻ അനുയോജ്യമായ വിളകൾ

മഴക്കാലത്തിന്റെ ഈർപ്പം ഇഷ്ടപ്പെടുന്ന ഒട്ടേറെ വിളകൾ ഈ സമയത്ത് നട്ടു തുടങ്ങാം.

കിഴങ്ങുവിളകൾ: ഇഞ്ചി, മഞ്ഞൾ, ചേന, ചേമ്പ്, കാച്ചിൽ എന്നിവ നടാൻ ഏറ്റവും അനുയോജ്യമായ സമയമാണിത്. ഇഞ്ചിയിലും മഞ്ഞളിലും വിത്തുചികിത്സ നടത്തിയാൽ രോഗങ്ങളെ ഒരു പരിധിവരെ തടയാം.

പച്ചക്കറികൾ: വെണ്ട, പയർ, വഴുതന, പച്ചമുളക് എന്നിവയുടെ വിത്തുകൾ പാകാം. പാവൽ, പടവലം തുടങ്ങിയ പന്തൽ വിളകൾക്കും ഈ സമയം ഉത്തമമാണ്.

വാഴയും ഫലവൃക്ഷങ്ങളും: നേന്ത്രവാഴ കന്നുകൾ നടുന്നതിനും തെങ്ങിൻ തൈകൾ, പ്ലാവ്, മാവ് തുടങ്ങിയ ഫലവൃക്ഷങ്ങൾ വെച്ചുപിടിപ്പിക്കുന്നതിനും ഇടവപ്പാതിയുടെ തുടക്കം പ്രയോജനപ്പെടുത്താം.

3. വളപ്രയോഗം: കരുത്തോടെ വളരാൻ

അടിസ്ഥാന വളം: കുമ്മായം ചേർത്ത് രണ്ടാഴ്ച കഴിഞ്ഞ് നടീൽ സമയത്ത് ആവശ്യത്തിന് ചാണകപ്പൊടിയോ കമ്പോസ്റ്റോ ചേർക്കുക.

ജൈവ സമൃദ്ധി: ചെടികൾ വളർന്നു തുടങ്ങുമ്പോൾ കടലപ്പിണ്ണാക്ക് ലായനി, എല്ലുപൊടി, വേപ്പിൻ പിണ്ണാക്ക് എന്നിവ നൽകുന്നത് ചെടികളുടെ രോഗപ്രതിരോധ ശേഷി വർദ്ധിപ്പിക്കും. മഴവെള്ളത്തിൽ വളം ഒലിച്ചുപോകാതിരിക്കാൻ തടം തുറന്ന് വളമിട്ട ശേഷം മണ്ണ് കൊണ്ട് നന്നായി മൂടണം.

4. കരുതൽ നടപടികൾ

വിത്തുചികിത്സ: നടുന്നതിന് മുൻപ് വിത്തുകളോ കിഴങ്ങുകളോ 2% വീര്യമുള്ള സിഡോമോണാസ് ലായനിയിൽ അരമണിക്കൂർ മുക്കിവെക്കുന്നത് മഴക്കാലത്തെ കുമിൾ രോഗങ്ങളെ തടയാൻ സഹായിക്കും.

താങ്ങ് നൽകൽ: ജൂണിലെ കനത്ത കാറ്റിലും മഴയിലും വാഴകളും പയർ വർഗ്ഗങ്ങളും നശിക്കാതിരിക്കാൻ ബലമുള്ള താങ്ങുകൾ നൽകണം.

തണൽ: കനത്ത മഴ തൈകളിൽ നേരിട്ട് പതിച്ച് നശിക്കാതിരിക്കാൻ തെങ്ങോലയോ മറ്റോ ഉപയോഗിച്ച് ചെറിയ തണൽ നൽകുന്നത് നല്ലതാണ്.

മണ്ണിനെ അറിഞ്ഞ്, പ്രകൃതിയുടെ താളത്തിനൊത്ത് കൃഷി ആരംഭിച്ചാൽ ഈ വർഷത്തെ മഴക്കാലം നിങ്ങളുടെ കൃഷിയിടത്തിൽ നൂറുമേനി വിളവ് സമ്മാനിക്കുമെന്നതിൽ സംശയമില്ല. അല്പം കരുതലും കൃത്യമായ ആസൂത്രണവും ഉണ്ടെങ്കിൽ നമുക്ക് ഈ ഇടവപ്പാതിയെ സമൃദ്ധിയുടേതാക്കി മാറ്റാം.

ചീരയിൽ മൊത്തം കീടമാണോ? ടെൻഷൻ വേണ്ട, അകറ്റാൻ വഴിയുണ്ട്

Web Desk — Fri, 27 Mar 2026 14:51:58 +0530

വീട്ടില്‍ ചീര വളര്‍ത്തി. ആകെ മൊത്തം കീടമാണ്. ടെന്‍ഷനായോ? വഴിയുണ്ട്. ഇതാ കീടങ്ങളെ നിയന്ത്രിക്കാനുള്ള ചില മാര്‍ഗങ്ങള്‍. ഇവ പരീക്ഷിച്ച് നോക്കാവുന്നതാണ്.

മഴ പെയ്താൽ കൃഷി പോകുമോ എന്ന് പേടിക്കേണ്ട; ഇതാ ചില എളുപ്പമുള്ള മഴക്കാല പരിപാലന രീതികൾ

Web Desk — Fri, 22 May 2026 17:31:09 +0530

സംസ്ഥാനത്ത് കാലവർഷം എത്താറായിരിക്കെ, കൃഷിയിടങ്ങളിൽ അതീവ ജാഗ്രത പുലർത്തണമെന്ന് കാർഷിക വിദഗ്ദ്ധർ. പെയ്യുന്ന മഴ വിളകൾക്ക് ജീവനാമൃതമാണെങ്കിലും, അമിതമായ വെള്ളക്കെട്ടും സൂര്യപ്രകാശത്തിന്റെ കുറവും കാരണം രോഗ-കീടബാധകൾ വർദ്ധിക്കാൻ സാധ്യതയുള്ള സമയമാണിത്. ശാസ്ത്രീയമായ നീർവാർച്ചാ സൗകര്യങ്ങളും മുൻകരുതലുകളും ഒരുക്കിയില്ലെങ്കിൽ കർഷകർക്ക് വൻ കൃഷിനാശമുണ്ടാകാൻ സാധ്യതയുണ്ട്.

വർഷകാലത്ത് പ്രത്യേക പരിചരണം ആവശ്യമുള്ള പ്രധാന വിളകളും അവയ്ക്കായി സ്വീകരിക്കേണ്ട പ്രതിരോധ മാർഗ്ഗങ്ങളും താഴെ പറയുന്നവയാണ്:

പച്ചക്കറികൾക്ക് വേണം മുൻകരുതൽ

പാവൽ, പടവലം, തക്കാളി, മുളക് തുടങ്ങിയ പച്ചക്കറി വിളകളെയാണ് മഴക്കാല രോഗങ്ങൾ ഏറ്റവും കൂടുതൽ ബാധിക്കുന്നത്.

വേരുചീയലും ഇലപ്പുള്ളിയും:

തടങ്ങളിൽ വെള്ളം കെട്ടിക്കിടന്നാൽ വേരുകൾ ചീഞ്ഞുപോവുകയും ചെടികൾ വാടി നശിക്കുകയും ചെയ്യും. ഇലകളിൽ കറുത്ത പുള്ളികൾ വീഴുന്ന രോഗവും ഈ സമയത്ത് വ്യാപകമാണ്.

പ്രതിവിധി: തടങ്ങളിൽ നിന്ന് വെള്ളം സുഗമമായി വാർന്നുപോകാൻ ഓടകൾ കീറുക. പടരുന്ന പച്ചക്കറികൾക്ക് ശക്തമായ പന്തലുകൾ ഒരുക്കണം. ആഴ്ചയിലൊരിക്കൽ 20 ഗ്രാം സ്യൂഡോമോണാസ് ഒരു ലിറ്റർ വെള്ളത്തിൽ കലക്കി തളിക്കുന്നത് രോഗപ്രതിരോധ ശേഷി കൂട്ടും.

കുരുമുളക് തോട്ടങ്ങളിൽ 'ദ്രുതവാട്ടം' ജാഗ്രത

കേരളത്തിലെ കർഷകരുടെ പ്രധാന വരുമാനമാർഗ്ഗമായ കുരുമുളകിന് മൺസൂൺ കാലം കടുത്ത വെല്ലുവിളിയാണ്. 'ദ്രുതവാട്ടം' എന്ന മാരക രോഗം പടരുന്നത് ഈ സമയത്താണ്.

പരിപാലനം: കുരുമുളക് കൊടിയുടെ ചുവട്ടിൽ ഒട്ടും തന്നെ വെള്ളം കെട്ടിനിൽക്കരുത്. തോട്ടത്തിൽ നല്ലതുപോലെ വെളിച്ചം വീഴാൻ പാകത്തിന് താങ്ങുമരങ്ങളുടെ ചില്ലകൾ വെട്ടിമാറ്റണം. കാലവർഷം ശക്തമാകുന്നതിന് മുൻപ് 1% വീര്യമുള്ള ബോർഡോ മിശ്രിതം കൊടികളിലും ചുവട്ടിലും തളിക്കുന്നത് ദ്രുതവാട്ടത്തെ തടയും. ചുവട്ടിൽ ട്രൈക്കോഡെർമ ചേർത്ത ജൈവവളം നൽകുന്നതും നല്ലതാണ്.

വാഴകൾക്ക് താങ്ങും നീർവാർച്ചയും

മഴക്കാലത്തെ ശക്തമായ കാറ്റും വെള്ളക്കെട്ടുമാണ് വാഴക്കൃഷിക്ക് വില്ലനാകുന്നത്. കാറ്റിൽ ഒടിഞ്ഞുവീഴുന്നതിനൊപ്പം മാണവണ്ട് ശല്യവും സിഗട്ടോക ഇലപ്പുള്ളി രോഗവും ഇക്കാലത്ത് കൂടും.

പരിപാലനം: കുലച്ചതും കുലക്കാറായതുമായ വാഴകൾക്ക് മുളയോ മറ്റോ ഉപയോഗിച്ച് ബലമുള്ള താങ്ങുകൾ നൽകണം. ഇലകളിൽ മഞ്ഞയും തവിട്ടും നിറത്തിലുള്ള പുള്ളികൾ കാണുന്ന സിഗട്ടോക രോഗം ബാധിച്ച ഇലകൾ മുറിച്ചുമാറ്റി നശിപ്പിക്കുക. വാഴത്തടത്തിന് ചുറ്റും വെള്ളം കെട്ടിനിൽക്കാതെ നോക്കേണ്ടത് അനിവാര്യമാണ്.

തെങ്ങിന് മണ്ടയഴുകൽ പ്രതിരോധം

മഴക്കാലത്ത് തെങ്ങിന്റെ മണ്ടയിൽ വെള്ളം തങ്ങിനിന്ന് 'കൂമ്പ് ചീയൽ', 'മണ്ടയഴുകൽ' തുടങ്ങിയ രോഗങ്ങൾ വരാൻ വലിയ സാധ്യതയുണ്ട്.

പരിപാലനം: മഴക്കാലത്തിന് മുൻപായി തെങ്ങിൻ മണ്ട വൃത്തിയാക്കുക. രോഗബാധ തടയാൻ തെങ്ങിൻ മണ്ടയിൽ ബോർഡോ മിശ്രിതം തളിക്കുകയോ പെറോക്സൈഡ് ഗുളികകൾ വെച്ചുകൊടുക്കുകയോ ചെയ്യാം.

പൊതുവായ നിർദ്ദേശങ്ങൾ

വളപ്രയോഗം: കനത്ത മഴയുള്ളപ്പോൾ രാസവളങ്ങൾ നൽകുന്നത് ഒഴിവാക്കണം. മഴ ഒന്നു ശമിക്കുന്ന സമയത്തോ ചാറ്റൽ മഴയുള്ളപ്പോഴോ മാത്രം വളം ചേർക്കുക. ഈ സമയത്ത് ജൈവ സ്ലറിയോ, പുളിപ്പിച്ച പിണ്ണാക്ക് ലായനിയോ നൽകുന്നതാണ് കൂടുതൽ ഫലപ്രദം.

കളനിയന്ത്രണം: മഴക്കാലത്ത് കളകൾ അതിവേഗം വളരുകയും വിളകളുടെ പോഷകങ്ങളും സൂര്യപ്രകാശവും കവരുകയും ചെയ്യും. അതിനാൽ കൃത്യമായ ഇടവേളകളിൽ കളകൾ പറിച്ച് മാറ്റണം.

കാലവർഷാരംഭത്തിന് മുൻപ് തന്നെ കൃഷിയിടങ്ങളിൽ ആവശ്യമായ ഒരുക്കങ്ങൾ പൂർത്തിയാക്കിയാൽ രോഗ-കീടബാധകളിൽ നിന്ന് വിളകളെ പൂർണ്ണമായി സംരക്ഷിക്കാനും മികച്ച വിളവ് ഉറപ്പാക്കാനും സാധിക്കും.

വില കൂടിയ മിയാസാക്കി മാമ്പഴം വളർത്തി പണം നേടാം, ശ്രദ്ധിക്കേണ്ടത്

Web Desk — Mon, 18 May 2026 14:26:18 +0530

ലോകത്തിലെ തന്നെ ഏറ്റവും വിലകൂടിയ മാമ്പഴങ്ങളിലൊന്നാണ് മിയാസാക്കി മാമ്പഴം. നമ്മുടെ നാട്ടിലെ കാലാവസ്ഥയിൽ എങ്ങനെ ഈ മാമ്പഴം വളർത്തിയെടുക്കാം?

റമ്പൂട്ടാൻ വെറുതെ നട്ടാൽ പോരാ, ഇക്കാര്യങ്ങൾ ശ്രദ്ധിക്കണേ

Web Desk — Wed, 15 Apr 2026 16:45:16 +0530

കുറഞ്ഞ പരിപാലനത്തിൽ മികച്ച വരുമാനം നൽകുന്ന വിളയാണ് റമ്പൂട്ടാൻ. ഒരു നല്ല വിളവെടുപ്പ് ഉറപ്പാക്കാൻ കർഷകർ ശ്രദ്ധിക്കേണ്ട കാര്യങ്ങൾ എന്തൊക്കെയാണ്?

കിലോയ്‍ക്ക് ലക്ഷങ്ങൾ വിലവരുന്ന മാമ്പഴം നട്ടുവളർത്തി, യുവാവിന്‍റെ ഉറക്കം പോലും മാവിനടുത്ത്, എങ്ങനെ വിൽക്കുമെന്നറിയില്ല!

Web Desk — Thu, 28 May 2026 20:24:41 +0530

ലോകത്തിലെ വില കൂടിയ മാങ്ങയെന്നറിയപ്പെടുന്ന അപൂർവ ജാപ്പനീസ് മിയാസാക്കി മാമ്പഴം വിജയകരമായി വളർത്തിയെടുത്ത് ശ്രദ്ധ നേടുകയാണ് ഒഡീഷയിലെ മൽക്കാൻഗിരി ജില്ലയിൽ നിന്നുള്ള ഒരു കർഷകൻ. അന്താരാഷ്ട്ര തലത്തിൽ കിലോഗ്രാമിന് ഏകദേശം 3 ലക്ഷം രൂപയോളം വില വരും ഈ മാമ്പഴത്തിന്. തമാസ ഗ്രാമത്തിലെ ദേബ പാധിയാമി എന്ന കർഷകന് ഏകദേശം നാല് വർഷം മുമ്പാണ് ഒരു സാമൂഹിക പ്രവർത്തകനിൽ നിന്നും ഈ മാമ്പഴത്തൈ ലഭിച്ചത്. വർഷങ്ങളുടെ ക്ഷമയോടെയുള്ള പരിചരണത്തിനും സംരക്ഷണത്തിനും ശേഷം, മാവ് ഒടുവിൽ കായ്ക്കാൻ തുടങ്ങി.

എന്നാൽ, ലോകത്തിലെ ഏറ്റവും വില കൂടിയ മാമ്പഴം നട്ടുവളർത്തിയെടുത്തുവെങ്കിലും ഇപ്പോൾ അതിന്റെ പേരിൽ മാനസിക സമ്മർദ്ദം അനുഭവിക്കുകയാണ് ദേബ. വലിയ വിലയുള്ള മാങ്ങയായതിനാൽ തന്നെ ഇത് ആരെങ്കിലും മോഷ്ടിച്ചിട്ടു പോകുമോ എന്നാണ് അദ്ദേഹത്തിന്റെ ഭയം. അതിനാൽ തന്നെ മരത്തിനടുത്താണ് ഈ കർഷകന്റെ ഉറക്കം പോലും. മാവിലുള്ള ഈ വിലയേറിയ മാമ്പഴങ്ങൾ കള്ളന്മാരെ ആകർഷിക്കുമെന്നും തന്റെ കണ്ണ് വെട്ടിച്ച് അവരത് മോഷ്ടിച്ചുകൊണ്ടുപോകുമെന്നും ഭയന്ന് താൻ ഈ മാവുകൾക്കടുത്ത് തന്നെയാണ് ഉറക്കമെന്നാണ് അദ്ദേഹം പറയുന്നത്.

ലോകത്തിലെ ഏറ്റവും വില കൂടിയ മാമ്പഴങ്ങളിലൊന്ന് കൃഷി ചെയ്യുന്നുണ്ടെങ്കിലും, അവ എങ്ങനെ വിൽക്കണമെന്ന് ദേബയ്ക്ക് അറിയില്ല. ഇത്തരം വില കൂടിയ പഴങ്ങൾക്ക് പ്രത്യേക പാക്കേജിംഗിനെ കുറിച്ചും, പ്രീമിയം ഹോട്ടലുകൾ, എക്സ്പോർട്ടിംഗ് അല്ലെങ്കിൽ ഇത്തരം പഴങ്ങൾ നേരിട്ടു വാങ്ങുന്നവർ എന്നിവരെ കുറിച്ചുമെല്ലാം അറിയേണ്ടതായിട്ടുണ്ട്. അതേസമയം, ചുവപ്പ് രത്നം പോലെ മനോഹരമായ മിയാസാക്കി ഭൂമിയിലെ ഏറ്റവും വിലയേറിയ മാമ്പഴമായാണ് അറിയപ്പെടുന്നത്. 'സൂര്യൻറെ മുട്ട' എന്നും മിയാസാക്കി മാമ്പഴത്തെ വിളിക്കുന്നു. കടും ചുവപ്പു നിറത്തിൽ കാണപ്പെടുന്ന ഈ മാമ്പഴം ഏറെ രുചികരവും മധുരമുള്ളതുമാണ്.

മുരിങ്ങ പൂത്തുലഞ്ഞിട്ടും കായ പിടിക്കുന്നില്ലേ? ദേ ഈ കാര്യങ്ങൾ ശ്രദ്ധിക്കൂ, കായ വിറ്റ് കാശാക്കാം

Web Desk — Mon, 25 May 2026 16:54:11 +0530

മുരിങ്ങ നന്നായി പൂവിടുന്നുണ്ട്. പക്ഷേ, കായ ഉണ്ടാകുന്നില്ലേ? വിഷമിക്കേണ്ട. ചില കാര്യങ്ങള്‍ ശ്രദ്ധിച്ചാല്‍ വിളവു നന്നാക്കാം. അതിലൂടെ മുരിങ്ങാക്കായ വിറ്റ് കാശാക്കുകയും ചെയ്യാം. എന്തൊക്കെയാണ് മുരിങ്ങ കൃഷി ചെയ്യുമ്പോള്‍ കായയുണ്ടാകാന്‍ ചെയ്യേണ്ടത്?

വീട്ടുവളപ്പിലെ മുരിങ്ങയിൽ നിന്നും കൂടുതൽ കായകൾ ഉത്പാദിപ്പിക്കുന്നതിനും പൂകൊഴിച്ചിൽ തടയുന്നതിനും കൃത്യമായ പരിചരണങ്ങൾ ആവശ്യമാണ്. പലപ്പോഴും അമിത പരിചരണവും ആവശ്യമായ പോഷകങ്ങളുടെ കുറവുമാണ് മുരിങ്ങയിൽ വിളവ് കുറയാൻ കാരണമാകുന്നത്. മുരിങ്ങക്കായുടെ ഉത്പാദനം വർദ്ധിപ്പിക്കാൻ കർഷകർക്ക് ചെയ്യാവുന്ന പ്രധാന കാര്യങ്ങൾ താഴെ പറയുന്നവയാണ്.

മുരിങ്ങ പൂക്കുന്ന സമയത്ത് അമിതമായി നനയ്ക്കുന്നത് പൂക്കൾ കൊഴിയാൻ പ്രധാന കാരണമാകും. അതിനാൽ പൂവിടുന്ന ഘട്ടത്തിൽ നനയ്ക്കുന്നത് പരിമിതപ്പെടുത്തണം. എന്നാൽ, കായകൾ പിടിച്ചു തുടങ്ങിയാൽ ആവശ്യത്തിന് നനയ്ക്കുകയും വേണം.

വർഷത്തിൽ രണ്ടുതവണ (മഴക്കാലത്തിന് മുൻപും ശേഷവും) മുരിങ്ങയുടെ ചുവട്ടിൽ നിന്ന് അല്പം മാറ്റി തടമെടുക്കണം. ചാണകപ്പൊടി, കമ്പോസ്റ്റ്, അല്ലെങ്കിൽ കോഴിവളം എന്നിവ നൽകി മണ്ണ് മൂടുന്നത് ചെടിയുടെ വളർച്ചയ്ക്ക് ആവശ്യമായ നൈട്രജൻ ലഭ്യമാക്കും.

മുരിങ്ങയുടെ കായപിടുത്തത്തിന് ഏറ്റവും അനുയോജ്യമായ ഒന്നാണ് ചാരം. ചുവട്ടിൽ അല്പം കരിയിലക്കഷണങ്ങൾക്കൊപ്പമോ അല്ലാതെയോ ചാരം വിതറുന്നത് മണ്ണിലെ പൊട്ടാസ്യത്തിന്റെ അളവ് കൂട്ടുകയും കൂടുതൽ കായകൾ ഉണ്ടാകാൻ സഹായിക്കുകയും ചെയ്യും.

മുരിങ്ങ നേരിടുന്ന പ്രധാന വെല്ലുവിളിയാണ് കായീച്ചകളുടെ ആക്രമണം. കായകൾ ചെറുതായിരിക്കുമ്പോൾ തന്നെ നെറ്റ് ബാഗുകളോ സുഷിരങ്ങളുള്ള പ്ലാസ്റ്റിക് കവറുകളോ ഉപയോഗിച്ച് മൂടുന്നത് കായീച്ചകൾ മുട്ടയിടുന്നത് തടയും.

മുരിങ്ങ ഒരുപാട് ഉയരത്തിൽ വളരാൻ അനുവദിക്കരുത്. വിളവെടുപ്പിന് ശേഷം പ്രധാന കമ്പുകളുടെ തലപ്പ് നുള്ളി വിടുന്നത് പുതിയ ശാഖകൾ പൊട്ടാനും, ആ ശാഖകളിൽ കൂടുതൽ പൂക്കൾ വരാനും സഹായിക്കും.

പൂക്കൾ കൊഴിയുന്നത് തടയാൻ പുളിപ്പിച്ച മോര് അല്ലെങ്കിൽ കഞ്ഞിവെള്ളം നന്നായി നേർപ്പിച്ച് മുരിങ്ങയിലുകളിലും പൂക്കളിലും തളിച്ചു കൊടുക്കുന്നത് മികച്ച ഒരു നാടൻ പ്രയോഗമാണ്.

മുരിങ്ങയിൽ ധാരാളം പൂക്കൾ വന്നിട്ടും അവ കായയാകാതെ കൊഴിയുന്നുണ്ടെങ്കിൽ അത് ബോറോണിന്റെ കുറവ് കൊണ്ടാകാം. കൃഷിഭവന്റെ നിർദ്ദേശപ്രകാരം അനുയോജ്യമായ ബോറോൺ മിശ്രിതം നേർപ്പിച്ചു തളിക്കുന്നത് വഴി ഈ പ്രശ്നം പരിഹരിക്കാം.

വേരുചീയൽ, ഇലപ്പുള്ളി രോഗം എന്നിവ തടയാനും മുരിങ്ങയുടെ രോഗപ്രതിരോധ ശേഷി വർദ്ധിപ്പിക്കാനും 20 ഗ്രാം സുഡോമോണസ് ഒരു ലിറ്റർ വെള്ളത്തിൽ കലക്കി മുരിങ്ങയുടെ ചുവട്ടിൽ ഒഴിച്ച് കൊടുക്കാവുന്നതാണ്.

മുരിങ്ങയ്ക്ക് നന്നായി സൂര്യപ്രകാശം ലഭിക്കുന്ന സ്ഥലം വേണം തിരഞ്ഞെടുക്കാൻ. തണലുള്ള സ്ഥലങ്ങളിൽ മുരിങ്ങ വളർത്തിയാൽ പൂക്കളുടെ എണ്ണം കുറയുകയും കായപിടുത്തം വളരെ മോശമാകുകയും ചെയ്യും.

കടലപ്പിണ്ണാക്കും വേപ്പിൻപിണ്ണാക്കും പുളിപ്പിച്ചുണ്ടാക്കുന്ന ജൈവ സ്ലറി മാസത്തിലൊരിക്കൽ നേർപ്പിച്ചു ചുവട്ടിൽ ഒഴിച്ച് കൊടുക്കുന്നത് മുരിങ്ങ പെട്ടെന്ന് വളരാനും വർഷം മുഴുവൻ കായ തരാനും സഹായിക്കും.

മധുരക്കിഴങ്ങിനെന്തിന് കടയിൽ പോണം? വീട്ടിൽ തന്നെ വളർത്താമല്ലോ?

Web Desk — Sun, 29 Mar 2026 16:27:00 +0530

മധുരക്കിഴങ്ങ് വീട്ടില്‍ തന്നെ കൃഷി ചെയ്ത് വിളവെടുക്കാം? എന്തൊക്കെ കാര്യങ്ങളാണ് ശ്രദ്ധിക്കേണ്ടത്? എങ്ങനെയാണ് നിലം ഒരുക്കേണ്ടത്?

മല്ലി ഇലയും കറിവേപ്പിലയും വീട്ടിൽ വളർത്താം; ചില എളുപ്പവഴികൾ

Web Desk — Thu, 02 Apr 2026 15:14:38 +0530

നമ്മുടെ നിത്യജീവിതത്തിലെ കറികൾക്ക് രുചിയും മണവും പകരുന്നതിൽ മല്ലിയിലയ്ക്കും കറിവേപ്പിലയ്ക്കും വലിയ സ്ഥാനമാണുള്ളത്. എന്നാൽ വിപണിയിൽ നിന്ന് നാം വാങ്ങുന്ന ഇവയിൽ മാരകമായ അളവിൽ കീടനാശിനികൾ അടങ്ങിയിട്ടുണ്ടെന്ന വാർത്തകൾ പലപ്പോഴും നമ്മെ ആശങ്കപ്പെടുത്താറുണ്ട്. ഈ പേടിയില്ലാതെ, തികച്ചും ജൈവരീതിയിൽ നമ്മുടെ വീടിന്‍റെ ബാല്ക്കണിയിലോ മുറ്റത്തോ ഈ രണ്ട് സസ്യങ്ങളെയും എങ്ങനെ വളർത്തിയെടുക്കാം എന്ന് നോക്കാം.

മല്ലിയില കൃഷി: വിത്ത് തയ്യാറാക്കുന്നതിലാണ് വിജയം

സാധാരണ മല്ലി വിത്തുകൾ നേരിട്ട് പാകുന്നതിന് പകരം, അവ പതുക്കെ ഉടച്ച് രണ്ട് പിളർപ്പുകളാക്കി പാകുന്നത് മുളയ്ക്കൽ ശേഷി വർദ്ധിപ്പിക്കുമെന്ന് വിദഗ്ധർ ചൂണ്ടിക്കാട്ടുന്നു. ചട്ടികളിലോ പ്ലാസ്റ്റിക് കവറുകളിലോ മണ്ണ്, മണൽ, ചാണകപ്പൊടി എന്നിവ കലർത്തിയ മിശ്രിതത്തിൽ മല്ലി വിതറാം. ഈർപ്പം നിലനിർത്താൻ ദിവസവും വെള്ളം സ്പ്രേ ചെയ്തു കൊടുക്കണം. 30 മുതൽ 45 ദിവസത്തിനുള്ളിൽ തന്നെ ഇലകൾ പറിച്ചു തുടങ്ങാം.

കറിവേപ്പില: കഞ്ഞിവെള്ളവും ജൈവവളവും പ്രധാനം

ഒരു തൈ നട്ടാൽ വർഷങ്ങളോളം ഇലകൾ തരുന്ന ഒന്നാണ് കറിവേപ്പില. ഹൈബ്രിഡ് ഇനങ്ങളേക്കാൾ കൂടുതൽ സുഗന്ധമുള്ള നാടൻ ഇനങ്ങൾ നട്ടുപിടിപ്പിക്കാൻ ശ്രദ്ധിക്കണം. കറിവേപ്പിന്‍റെ ചുവട്ടിൽ നിന്ന് മുളച്ചു വരുന്ന വേരുതൈകൾ (Root Suckers) പറിച്ചു നടുന്നതാണ് ഏറ്റവും നല്ലത്. തായ്‌ചെടിയുടെ അതേ ഗുണങ്ങൾ ഈ തൈകൾക്കും ലഭിക്കും. കറിവേപ്പില ഉയരത്തിൽ വല്ലാതെ വളരാൻ അനുവദിക്കരുത്. ചെടി ഏകദേശം രണ്ടടി ഉയരമെത്തുമ്പോൾ അതിന്‍റെ മുകൾഭാഗം നുള്ളിക്കളയണം. ഇത് കൂടുതൽ വശങ്ങളിലേക്ക് ശാഖകൾ പടരാനും ചെടി നല്ല കുറ്റിച്ചെടിയായി വളരാനും സഹായിക്കും. കറിവേപ്പിലയ്ക്ക് നല്ല സൂര്യപ്രകാശം അത്യാവശ്യമാണ്. തണലത്ത് വെച്ചാൽ ചെടി പെട്ടെന്ന് വളരില്ല.

അല്പം അമ്ലാംശമുള്ള മണ്ണിലാണ് കറിവേപ്പില നന്നായി വളരുന്നത്. മാസത്തിലൊരിക്കൽ ഒരു ടീസ്പൂൺ തൈരോ മോരോ വെള്ളത്തിൽ കലർത്തി ചുവട്ടിൽ ഒഴിക്കുന്നത് മണ്ണിന്‍റെ ഗുണമേന്മ വർദ്ധിപ്പിക്കാൻ സഹായിക്കും. കറിവേപ്പിന്‍റെ ചുവട്ടിൽ പുളിച്ച കഞ്ഞിവെള്ളം ഒഴിക്കുന്നത് ചെടിയുടെ ആരോഗ്യത്തിന് വളരെ നല്ലതാണ്. ഇലകൾ പറിക്കുമ്പോൾ തണ്ടോടെ മുറിച്ചെടുക്കുന്നത് പുതിയ ശാഖകൾ ഉണ്ടാകാൻ സഹായിക്കും. രാസവളങ്ങൾക്ക് പകരം കടലപ്പിണ്ണാക്ക്, ആട്ടിൻകാഷ്ഠം എന്നിവ ഉപയോഗിക്കുന്നത് ഗുണമേന്മയുള്ള വിളവ് നൽകും. കറിവേപ്പിലയെ ബാധിക്കുന്ന ഇലപ്പുള്ളി രോഗത്തിന് വേപ്പെണ്ണ മിശ്രിതം മികച്ച പ്രതിവിധിയാണ്.

മഴക്കാലം വരുമ്പോൾ അടുക്കളത്തോട്ടത്തിൽ ഒരു കുറ്റിക്കുരുമുളക് തൈ കൂടിയാവാം

Web Desk — Sun, 19 Apr 2026 17:13:19 +0530

സാധാരണ കുരുമുളക് വള്ളികൾ പടർന്നു കയറാൻ വലിയ മരങ്ങളോ താങ്ങുകാലുകളോ ആവശ്യമാണ്. എന്നാൽ, കുറഞ്ഞ സ്ഥല പരിമിതിയുള്ളവർക്കും ഫ്ലാറ്റുകളിൽ താമസിക്കുന്നവർക്കും ഒരുപോലെ വളർത്താൻ കഴിയുന്ന ഒന്നാണ് കുറ്റിക്കുരുമുളക് (Bush Pepper).

ഒരു അലങ്കാരച്ചെടിയായും അതേസമയം വീട്ടിലേക്കാവശ്യമായ കുരുമുളക് ലഭിക്കാനും ഇത് സഹായിക്കുന്നു. സാധാരണ കുരുമുളക് ചെടിയുടെ വശങ്ങളിലേക്ക് വളരുന്ന ശാഖകൾ മുറിച്ചു നട്ടുണ്ടാക്കുന്ന ചെടികളാണിവ. ഇവ മുകളിലേക്ക് പടരാതെ ഒരു ചെറിയ കുറ്റിച്ചെടിയായി മാത്രം വളരുന്നു. നട്ടു കഴിഞ്ഞാൽ ആദ്യ വർഷം മുതൽ തന്നെ ഇതിൽ നിന്നും വിളവെടുക്കാം എന്നതാണ് ഏറ്റവും വലിയ പ്രത്യേകത.

കരിമുണ്ട: കേരളത്തിൽ ഏറ്റവും കൂടുതൽ കൃഷി ചെയ്യുന്നതും മികച്ച വിളവ് തരുന്നതുമായ ഇനം.

പന്നിയൂർ ഇനങ്ങൾ: പന്നിയൂർ 1 മുതൽ 5 വരെയുള്ള ഇനങ്ങൾ കുറ്റിക്കുരുമുളകായി വളർത്താം.

പൗർണ്ണമി, ശുഭകര, ശ്രീകര: ഇവ രോഗപ്രതിരോധ ശേഷി കൂടുതലുള്ള മികച്ച ഇനങ്ങളാണ്.

വിശ്വസനീയമായ നഴ്സറികളിൽ നിന്നോ കൃഷി ഭവനുകളിൽ നിന്നോ 3-4 ഇലകളുള്ള ആരോഗ്യവാനായ തൈകൾ തിരഞ്ഞെടുക്കുക. വശങ്ങളിലേക്ക് പടർന്ന ശാഖകളിൽ നിന്നുള്ള തൈകളാണെന്ന് ഉറപ്പുവരുത്തണം.

കുറഞ്ഞത് ഒരു മീറ്റർ ഉയരത്തിൽ വളരുന്നതിനാൽ വലിയ ചട്ടികളോ 40 സെ.മീ വലിപ്പമുള്ള ഗ്രോബാഗുകളോ വേണം തിരഞ്ഞെടുക്കാൻ. ചാണകപ്പൊടി, മണ്ണ്, മണൽ എന്നിവ സമമായി കലർത്തിയ മിശ്രിതം നിറയ്ക്കുക. മണ്ണ് അമിതമായി അമർത്തരുത്, വെള്ളം വാർന്നുപോകാൻ ചട്ടിയുടെ അടിയിൽ സുഷിരങ്ങൾ ഉണ്ടെന്ന് ഉറപ്പാക്കുക.

കുറ്റിക്കുരുമുളകിന് നേരിട്ടുള്ള കഠിനമായ വെയിൽ ഇഷ്ടമല്ല. ഭാഗികമായ തണൽ ലഭിക്കുന്ന സ്ഥലമാണ് ഏറ്റവും അനുയോജ്യം. ചെടിയുടെ ചുവട്ടിൽ എപ്പോഴും നേരിയ ഈർപ്പം ഉണ്ടായിരിക്കണം, എന്നാൽ വെള്ളം കെട്ടിനിൽക്കാൻ പാടില്ല.

രണ്ടാഴ്ചയിലൊരിക്കൽ കടലപ്പിണ്ണാക്ക് ലായനി അല്ലെങ്കിൽ നേർപ്പിച്ച ഗോമൂത്രം ഒഴിച്ചു കൊടുക്കുന്നത് ചെടി വേഗത്തിൽ വളരാൻ സഹായിക്കും. മണ്ണിര വളം അല്ലെങ്കിൽ എല്ലുപൊടി വായുസഞ്ചാരമുള്ള രീതിയിൽ മണ്ണിൽ ഇളക്കി ചേർക്കാം. രാസവളങ്ങൾ ഒഴിവാക്കി പൂർണ്ണമായും ജൈവരീതിയിൽ വളർത്തുന്നതാണ് ഉത്തമം.

കുറ്റിക്കുരുമുളകിനെ പ്രധാനമായും ബാധിക്കുന്നത് വേരുചീച്ചൽ, ദ്രുതവാട്ടം എന്നിവയാണ്.

പ്രതിവിധി: ട്രൈക്കോഡെർമ കലർത്തിയ വളം ഉപയോഗിക്കുന്നത് വേരുചീച്ചൽ തടയാൻ സഹായിക്കും. ഇലകളിൽ കറുത്ത പാടുകൾ കണ്ടാൽ ബോർഡോ മിശ്രിതം തളിക്കാവുന്നതാണ്.

നട്ടു കഴിഞ്ഞ് ഒരു വർഷത്തിനുള്ളിൽ തന്നെ തിരികൾ വരാൻ തുടങ്ങും. തിരികളിൽ ഒന്നോ രണ്ടോ കുരുമുളക് മണികൾ പഴുത്ത് ചുവക്കുമ്പോൾ കുലകളോടെ പറിച്ചെടുക്കാം. കൃത്യമായി പരിപാലിച്ചാൽ 10 മുതൽ 15 വർഷം വരെ ഒരു ചെടിയിൽ നിന്ന് വിളവ് ലഭിക്കും. കുറ്റിക്കുരുമുളകിന്റെ ചുവട്ടിൽ പുതയിടുന്നത് ഈർപ്പം നിലനിർത്താൻ സഹായിക്കും. കൂടാതെ, വശങ്ങളിലേക്ക് വളരുന്ന ശിഖരങ്ങൾ ആവശ്യമെങ്കിൽ മാത്രം പ്രൂൺ ചെയ്തു കൊടുക്കുന്നത് ചെടിയുടെ ആകൃതി നിലനിർത്താൻ സഹായിക്കും. ഈ മഴക്കാലത്ത് നിങ്ങളുടെ അടുക്കളത്തോട്ടത്തിൽ ഒരു കുറ്റിക്കുരുമുളക് തൈ കൂടി നടാൻ മറക്കരുത്!

അടുത്ത മാസം കൂടി കഴിഞ്ഞോട്ടെ പൈനാപ്പിൾ കൃഷി ചെയ്യാം, ഒരുക്കം ഇങ്ങനെ

Web Desk — Tue, 09 Jun 2026 16:29:31 +0530

പൈനാപ്പിൾ കൃഷി ചെയ്യുമ്പോൾ എന്തൊക്കെയാണ് ശ്രദ്ധിക്കേണ്ടത്?

പച്ചമുളക് നട്ടു, പൂവിടുന്നില്ല, കായ്ക്കുന്നുമില്ല, നിരാശരാവേണ്ട, വഴിയുണ്ട്

Web Desk — Fri, 10 Apr 2026 14:38:08 +0530

വീട്ടിൽ പച്ചമുളക് നട്ടു. പക്ഷേ, പ്രതീക്ഷിച്ചപോലെ പൂവിടുകയോ കായ്ക്കുകയോ ചെയ്യുന്നില്ലേ? വിഷമിക്കണ്ട, വഴിയുണ്ട്. ഇക്കാര്യങ്ങൾ ശ്രദ്ധിച്ചാൽ മതി. തണലത്ത് വളരുന്ന ചെടികൾ പൂവിടാൻ മടിക്കും. ചെടിയുടെ ചുവട്ടിൽ എപ്പോഴും ഈർപ്പം നിലനിൽക്കണം.

വീട്ടിൽ പച്ചമുളക് നട്ടു. പക്ഷേ, പ്രതീക്ഷിച്ചപോലെ പൂവിടുകയോ കായ്ക്കുകയോ ചെയ്യുന്നില്ലേ? വിഷമിക്കണ്ട, വഴിയുണ്ട്. ഇക്കാര്യങ്ങൾ ശ്രദ്ധിച്ചാൽ മതി.

ഒന്നാമതായി, മുളക് ചെടിക്ക് ദിവസവും കുറഞ്ഞത് 6 മുതൽ 8 മണിക്കൂർ വരെ നേരിട്ടുള്ള സൂര്യപ്രകാശം ലഭിക്കുന്നുണ്ടെന്ന് ഉറപ്പുവരുത്തുക. തണലത്ത് വളരുന്ന ചെടികൾ പൂവിടാൻ മടിക്കും. ചെടിയുടെ ചുവട്ടിൽ എപ്പോഴും ഈർപ്പം നിലനിൽക്കണം, എന്നാൽ വെള്ളം കെട്ടിക്കിടക്കരുത്. മണ്ണ് അധികം ഉണങ്ങുന്നതും പൂക്കൾ കൊഴിയാൻ കാരണമാകും.

പൂവിടാൻ നൈട്രജനേക്കാൾ കൂടുതൽ ഫോസ്ഫറസും പൊട്ടാസ്യവുമാണ് ആവശ്യം. എല്ലുപൊടി, ചാരം എന്നിവ ചെടിയുടെ ചുവട്ടിൽ ചേർക്കുന്നത് പൂക്കൾ വിരിയാൻ സഹായിക്കും. ആഴ്ചയിലൊരിക്കൽ സ്യൂഡോമോണസ് ലായനി തളിക്കുന്നത് ചെടിയുടെ പ്രതിരോധശേഷി വർദ്ധിപ്പിക്കാനും ആരോഗ്യത്തോടെ പൂവിടാനും സഹായിക്കും.

പുളിപ്പിച്ച കഞ്ഞിവെള്ളം മൂന്നിരട്ടി വെള്ളം ചേർത്ത് ചെടിയുടെ ചുവട്ടിൽ ഒഴിക്കുന്നത് മികച്ചൊരു ജൈവ ഉത്തേജകമാണ്. ചെടി നന്നായി വളർന്നു കഴിഞ്ഞാൽ നന അല്പം കുറയ്ക്കുന്നത് ചെടിയിൽ 'സ്ട്രെസ്' ഉണ്ടാക്കുകയും പൂവിടാൻ പ്രേരിപ്പിക്കുകയും ചെയ്യും. കൊഴിച്ചിൽ തടയാൻ ഒരു ചെറിയ കഷ്ണം കായം വെള്ളത്തിൽ കലക്കി ചെടികളിൽ തളിക്കുന്നത് പാരമ്പര്യമായി ഫലപ്രദമെന്ന് കണ്ടുവരുന്ന രീതിയാണ്.

കപ്പലണ്ടി പിണ്ണാക്കും ചാണകവും വെള്ളത്തിൽ കലക്കി പുളിപ്പിച്ച ശേഷം അതിന്റെ തെളി ഒഴിച്ചു കൊടുക്കുന്നത് ചെടിക്ക് പെട്ടെന്ന് ഊർജ്ജം നൽകും. ഇലചുരുട്ടി പുഴുക്കളോ വെള്ളീച്ചകളോ ഉണ്ടോ എന്ന് പരിശോധിക്കുക. വേപ്പെണ്ണ-സോപ്പ് മിശ്രിതം ഉപയോഗിച്ച് ഇവയെ നിയന്ത്രിക്കുന്നത് ചെടിയുടെ ആരോഗ്യം നിലനിർത്തും. ചെടിക്ക് ഏകദേശം ഒരടി ഉയരമാകുമ്പോൾ അതിന്റെ തലപ്പ് നുള്ളിക്കൊടുക്കുന്നത് കൂടുതൽ ശാഖകൾ വളരാനും അതുവഴി കൂടുതൽ പൂക്കൾ ഉണ്ടാകാനും സഹായിക്കും.

മഴക്കാലമിങ്ങെത്തി, അടുക്കളത്തോട്ടത്തിലും വേണം ചില ശ്രദ്ധ

Web Desk — Tue, 19 May 2026 13:13:58 +0530

മഴക്കാലം ഇങ്ങെത്തിപ്പോയി. അടുക്കളത്തോട്ടത്തിൽ പച്ചക്കറി നടുന്നവരാണെങ്കിൽ കുറച്ച് കാര്യങ്ങൾ ശ്രദ്ധിക്കേണ്ടതുണ്ട്. അവയെന്തൊക്കെയാണ്?