Asianet News Malayalam

ആതർ കൊണാർക്ക്: മെറ്റൽ ബോഡിയുമായി പുതിയ താരം?

Prashobh Prasannan — Fri, 28 Aug 2026 16:40:49 +0530

ഇലക്ട്രിക് ഇരുചക്ര വാഹന വിപണിയിൽ പുതിയ മോഡലുമായി ആതർ എനർജി. കമ്പനിയുടെ പുതിയ ഇലക്ട്രിക് സ്‍കൂട്ടറായ കൊണാർക്ക് ഓഗസ്റ്റ് 29ന് ഔദ്യോഗികമായി അവതരിപ്പിക്കും. 2026ലെ ആതർ കമ്മ്യൂണിറ്റി ദിനത്തോടനുബന്ധിച്ചായിരിക്കും പുതിയ സ്‍കൂട്ടറിന്റെ അരങ്ങേറ്റം. കഴിഞ്ഞ കുറച്ച് മാസങ്ങളായി കൊണാർക്ക് പരീക്ഷണ ഓട്ടം നടത്തുന്നത് പലതവണ ശ്രദ്ധയിൽപ്പെട്ടിരുന്നു. സ്‍കൂട്ടറിന്റെ ചിത്രങ്ങളും പുറത്തുവന്നിരുന്നു. ഇപ്പോൾ ആതർ സിഇഒ തരുൺ മേത്ത പങ്കുവെച്ച പുതിയ ടീസറിലൂടെ വാഹനത്തിന്റെ ചില പ്രധാന സവിശേഷതകളുടെ സൂചനകൾ കൂടി ലഭിച്ചിരിക്കുകയാണ്.

മെറ്റൽ ബോഡിയായിരിക്കുമോ?

പുതിയ ടീസറിലെ ഏറ്റവും ശ്രദ്ധേയമായ കാര്യം സ്‍കൂട്ടറിന്റെ ബോഡി പാനലുകളിലൊന്നിൽ കാന്തം ഘടിപ്പിക്കുന്ന തരുൺ മേത്തയുടെ ദൃശ്യങ്ങളാണ്. സ്‍കൂട്ടറിന്റെ ചില ബോഡി ഭാഗങ്ങളെങ്കിലും ലോഹത്തിൽ നിർമിച്ചതാകാമെന്ന സൂചനയാണ് ഇതിലൂടെ ലഭിക്കുന്നത്. മെറ്റൽ ബോഡി സംബന്ധിച്ച് ആതർ ഔദ്യോഗിക സ്ഥിരീകരണം നടത്തിയിട്ടില്ല. എന്നാൽ ഇത് യാഥാർഥ്യമായാൽ ഹോണ്ട ആക്ടിവ, ബജാജ് ചേതക് തുടങ്ങിയ ലോഹ ബോഡി പാനലുകൾ ഉപയോഗിക്കുന്ന മോഡലുകളുടെ നിരയിലേക്ക് കൊണാർക്കും എത്തും.

കുടുംബ ഉപയോഗത്തിന് പുതിയ സ്‍കൂട്ടർ

പുതിയ ഇഎൽ പ്ലാറ്റ്‌ഫോമിനെ അടിസ്ഥാനമാക്കിയാണ് കൊണാർക്ക് എത്തുകയെന്നാണ് റിപ്പോർട്ടുകൾ. പ്രകടനത്തിന് മുൻതൂക്കം നൽകുന്ന 450 സീരീസിൽ നിന്ന് വ്യത്യസ്തമായി ദൈനംദിന ഉപയോഗം, പ്രായോഗികത, യാത്രാ സുഖം എന്നിവയ്ക്കായിരിക്കും കൊണാർക്കിൽ കൂടുതൽ പ്രാധാന്യം നൽകുക. ഒന്നിലധികം റൈഡിങ് മോഡുകൾ, റിവേഴ്സ് അസിസ്റ്റ്, ഹിൽ-ഹോൾഡ് കൺട്രോൾ തുടങ്ങിയ ഫീച്ചറുകളും പ്രതീക്ഷിക്കുന്നു. കുടുംബ ഉപയോക്താക്കളെ ലക്ഷ്യമിട്ടുള്ള പ്രായോഗിക ഇലക്ട്രിക് സ്‍കൂട്ടറായിരിക്കും കൊണാർക്ക് എന്നാണ് സൂചന.

നീളമുള്ള സീറ്റും പരന്ന ഫ്ലോർബോർഡും

പുറത്തുവന്ന പരീക്ഷണ ചിത്രങ്ങൾ അനുസരിച്ച് ഹാൻഡിൽബാറിൽ ഘടിപ്പിച്ച ഹെഡ്‌ലൈറ്റ്, നീളമുള്ള സീറ്റ്, പരന്ന ഫ്ലോർബോർഡ് എന്നിവ സ്കൂട്ടറിലുണ്ടാകും. നഗര യാത്രകളിൽ കൂടുതൽ സൗകര്യവും ഉപയോഗപ്രദമായ സീറ്റിങ് സംവിധാനവും നൽകുകയാണ് ഇതിലൂടെ ലക്ഷ്യമിടുന്നത്. ടെലിസ്കോപിക് ഫ്രണ്ട് ഫോർക്കുകൾ ഉൾപ്പെടുന്ന സസ്പെൻഷൻ സംവിധാനമായിരിക്കും വാഹനത്തിൽ. 14 ഇഞ്ച് ഫ്രണ്ട് വീലും 12 ഇഞ്ച് റിയർ വീലും ലഭിച്ചേക്കും. ഫ്രണ്ട് ഡിസ്കിനൊപ്പം റിയർ ഡ്രം ബ്രേക്കും പ്രതീക്ഷിക്കുന്നു.

സ്‍മാർട്ട് ഫീച്ചറുകളും എത്തും

ടിഎഫ്ടി ഇൻസ്ട്രുമെന്റ് ക്ലസ്റ്ററും സ്മാർട്ട്ഫോൺ കണക്റ്റിവിറ്റി സംവിധാനങ്ങളും കൊണാർക്കിൽ ലഭിച്ചേക്കും. വോയ്സ് കമാൻഡുകൾ, റോഡിലെ കുഴികൾ സംബന്ധിച്ച മുന്നറിയിപ്പ്, ടോ അലേർട്ട്, അപകട അറിയിപ്പ് തുടങ്ങിയ ഫീച്ചറുകൾ ഉൾപ്പെടുന്ന ആതറിന്റെ സ്റ്റാക്ക് 7.0 സംവിധാനവും പുതിയ സ്‍കൂട്ടറിന് ലഭിക്കാൻ സാധ്യതയുണ്ട്. സ്മാർട്ട്ഫോൺ കണക്റ്റ് ചെയ്യാതെ തന്നെ പ്രവർത്തിക്കാൻ കഴിയുന്ന ഓൺബോർഡ് നാവിഗേഷൻ സംവിധാനവും കൊണാർക്കിന്റെ പ്രധാന പ്രത്യേകതകളിലൊന്നായേക്കും.

200 കിലോമീറ്റർ വരെ റേഞ്ച്?

പുറത്തുവന്ന വിവരങ്ങൾ അനുസരിച്ച് കൊണാർക്ക് 6 വകഭേദങ്ങളിൽ എത്തിയേക്കും. 4 എസ് ട്രിമ്മുകളും 2 ഉയർന്ന സവിശേഷതകളുള്ള ക്യു വകഭേദങ്ങളുമാണ് പ്രതീക്ഷിക്കുന്നത്. വകഭേദം അനുസരിച്ച് 100 കിലോമീറ്റർ മുതൽ 200 കിലോമീറ്റർ വരെ റേഞ്ച് നൽകുന്ന പതിപ്പുകൾ ഉണ്ടായേക്കുമെന്നാണ് റിപ്പോർട്ടുകൾ. എന്നാൽ കൃത്യമായ ബാറ്ററി ശേഷിയും റേഞ്ചും ഓഗസ്റ്റ് 29ന് മാത്രമേ ആതർ സ്ഥിരീകരിക്കുകയുള്ളൂ.

ബാറ്ററി വാടകയ്ക്ക് എടുക്കാമോ?

കൊണാർക്കിനൊപ്പം ബാറ്ററി ആസ് എ സർവീസ് സംവിധാനം അവതരിപ്പിച്ചേക്കുമെന്നും റിപ്പോർട്ടുകളുണ്ട്. ഈ സംവിധാനത്തിൽ ബാറ്ററി ഉൾപ്പെടാതെയുള്ള വാഹനത്തിന് പണം നൽകി വാങ്ങുകയും പകരം പ്രതിമാസ ഉപയോഗ പ്ലാൻ തിരഞ്ഞെടുക്കുകയും ചെയ്യാം. ഇതിലൂടെ വാഹനത്തിന്റെ പ്രാരംഭ വാങ്ങൽ ചെലവ് കുറയ്ക്കാൻ സാധിക്കുമെന്നാണ് പ്രതീക്ഷ. കൊണാർക്കിന്റെ വില, ബാറ്ററി ഓപ്ഷനുകൾ, റേഞ്ച്, ബി എ എ എസ് സംവിധാനം എന്നിവ സംബന്ധിച്ച കൂടുതൽ വിവരങ്ങൾ ഓഗസ്റ്റ് 29ന് നടക്കുന്ന ആതർ കമ്മ്യൂണിറ്റി ദിനത്തിൽ പുറത്തുവരും.

പുതിയ ഹീറോ ഗ്ലാമർ എക്സ്: സുരക്ഷയിൽ പുതിയ വിപ്ലവം

Prashobh Prasannan — Sat, 12 Sep 2026 12:59:33 +0530

ഗ്ലാമർ X' മോട്ടോർസൈക്കിൾ ഇന്റഗ്രേറ്റഡ്-എബിഎസ് സഹിതം ഹീറോ മോട്ടോകോർപ്പ് വിപണിയിൽ അവതരിപ്പിച്ചു. സിംഗിൾ-ചാനൽ എബിഎസും ഇൻ്റഗ്രേറ്റഡ് ബ്രേക്കിംഗ് സിസ്റ്റവും സംയോജിപ്പിച്ചുകൊണ്ട് ഈ വിഭാഗത്തിൽ പുതിയൊരു മാനദണ്ഡം സൃഷ്ടിക്കുന്ന ഈ വാഹനം, വാഹനത്തിന്റെ സ്ഥിരത വർദ്ധിപ്പിക്കാനും ബ്രേക്കിംഗ് ദൂരം കുറയ്ക്കാനും സഹായിക്കുന്നു.

വിവിധ റോഡ് സാഹചര്യങ്ങളിൽ സുരക്ഷിതമായ ബ്രേക്കിംഗ് അനുഭവം നൽകുന്നതിനൊപ്പം പാനിക് ബ്രേക്ക് അലേർട്ട്, ഹാസാർഡ് ലാമ്പുകൾ എന്നിവയും ഇതിലുണ്ട്. 'ഒ' സിഗ്നേച്ചർ ഉള്ള ഫുൾ എൽഇഡി ലൈറ്റിംഗ് സംവിധാനവും സ്പോർട്ടി ഗ്രാഫിക്സും ഇതിന്റെ രൂപഭംഗി കൂട്ടുന്നു. ആംബിയന്റ് ലൈറ്റിംഗും 60-ലധികം ഫീച്ചറുകളുമുള്ള 10.7 സെ.മീ അഡാപ്റ്റീവ് മൾട്ടി-കളർ കൺസോൾ, ബ്ലൂടൂത്ത് കണക്റ്റിവിറ്റി, ടേൺ-ബൈ-ടേൺ നാവിഗേഷൻ, ഗിയർ ഷിഫ്റ്റ് അഡ്വൈസറി എന്നിവ റൈഡർമാർക്ക് മികച്ച അനുഭവവും കണക്റ്റിവിറ്റിയും നൽകുന്നു.

സുഗമമായ പവർ ഡെലിവറിയും കുറഞ്ഞ NVH നിലവാരവും ഉറപ്പാക്കുന്ന എൻജിൻ 8250 rpm-ൽ 11.4 BHP കരുത്ത് നൽകുന്നു. കൂടാതെ ഇക്കോ, റോഡ്, പവർ എന്നീ മൂന്ന് റൈഡ് മോഡുകളും ക്രൂയിസ് കൺട്രോൾ സംവിധാനവും ഇതിലുണ്ട്. വീതിയേറിയ ഹാൻഡിൽബാർ, നീളമേറിയ സീറ്റ്, സി-ടൈപ്പ് യുഎസ്ബി ചാർജിംഗ് പോർട്ട് എന്നിവ യാത്രകൾ കൂടുതൽ സുഖകരമാക്കുന്നു. ബ്ലാക്ക് പേൾ റെഡ്, ബ്ലാക്ക് ടീൽ ബ്ലൂ എന്നീ നിറങ്ങൾക്ക് പുറമേ ഗൺ മെറ്റൽ ഗ്രേ, മാറ്റ് ആക്‌സിസ് ഗ്രേ എന്നീ പുതിയ നിറങ്ങളിലും ഈ വാഹനം ലഭ്യമാണ്.

പുതിയ മോഡലിന്റെ അവതരണത്തിലൂടെ 125 സിസി വിഭാഗത്തിലെ സുരക്ഷാ മാനദണ്ഡങ്ങൾ പുനർനിർവചിക്കുകയാണെന്ന് ഹീറോ മോട്ടോകോർപ്പ് ഇന്ത്യ ബിസിനസ് യൂണിറ്റ് ചീഫ് ബിസിനസ് ഓഫീസർ അശുതോഷ് വർമ്മ പറഞ്ഞു.രാജ്യത്തുടനീളമുള്ള ഹീറോ മോട്ടോ കോർപ്പ് ഡീലർഷിപ്പുകളിൽ ഈ പുതിയ വേരിയന്റ്റ് ലഭ്യമാണ്.1,01,000 രൂപയാണ് എക്സ് ഷോറൂം വില.

ഫുൾചാർജ്ജിൽ 145 കിലോമീറ്റർ ഓടും; ഇതാ പുതിയ ഹോണ്ട ക്യുസി3, വില 1.35 ലക്ഷം

Prashobh Prasannan — Wed, 23 Sep 2026 16:55:28 +0530

ഇന്ത്യൻ ഇലക്ട്രിക് സ്‍കൂട്ടർ വിപണിയിൽ പുതിയ മോഡലുമായി ഹോണ്ട. ഹോണ്ട 2 വീലേഴ്സ് ഇന്ത്യയുടെ പുതിയ ഫാമിലി ഇലക്ട്രിക് സ്‍കൂട്ടറായ ക്യുസി3 ആണ് വിപണിയിൽ അവതരിപ്പിച്ചത്. ഇന്ത്യയിൽ തന്നെ നിർമിച്ചിരിക്കുന്ന ക്യുസി3യുടെ ഡൽഹി എക്സ്-ഷോറൂം വില 1.35 ലക്ഷം രൂപയാണ്. ആതർ റിസ്‍ത, ടിവിഎസ് ഐക്യൂബ്, ബജാജ് ചേതക്, ബി ഗാസ് സി12 മാക്സ് ആർ തുടങ്ങിയ ഇലക്ട്രിക് സ്‍കൂട്ടറുകളുമായാണ് പുതിയ ഹോണ്ട ക്യുസി3 മത്സരിക്കുക. താൽപര്യമുള്ള ഉപഭോക്താക്കൾക്ക് 5,000 രൂപ ടോക്കൺ തുക നൽകി ഹോണ്ടയുടെ അംഗീകൃത റെഡ്‌വിംഗ് ഡീലർഷിപ്പുകളിൽ സ്‍കൂട്ടർ ബുക്ക് ചെയ്യാം.

145 കിലോമീറ്റർ റേഞ്ച്

പവർട്രെയിനിലേക്ക് വരുമ്പോൾ മൂന്ന് കിലോവാട്ട് മണിക്കൂർ ബാറ്ററി പായ്ക്കാണ് ഹോണ്ട ക്യുസി3യിൽ നൽകിയിരിക്കുന്നത്. ഒറ്റ ചാർജിൽ 145 കിലോമീറ്റർ വരെ ഐഡിസി അഥവാ ഇന്ത്യൻ ഡ്രൈവിംഗ് കണ്ടീഷൻ റേഞ്ചാണ് കമ്പനി അവകാശപ്പെടുന്നത്. ബാറ്ററി 0 മുതൽ 80 ശതമാനം വരെ ചാർജ് ചെയ്യാൻ 2 മണിക്കൂർ 40 മിനിറ്റ് സമയം വേണ്ടിവരും. കുടുംബ ഉപയോഗം ലക്ഷ്യമിട്ടാണ് പുതിയ ഇലക്ട്രിക് സ്‍കൂട്ടർ ഹോണ്ട ഒരുക്കിയിരിക്കുന്നത്.

സസ്പെൻഷനും ബ്രേക്കും

മുൻവശത്ത് പരമ്പരാഗത ടെലിസ്കോപിക് ഫോർക്കാണ് സസ്പെൻഷനായി നൽകിയിരിക്കുന്നത്. പിന്നിൽ ഇരട്ട ഷോക്ക് അബ്സോർബറുകളാണ് ഉപയോഗിച്ചിരിക്കുന്നത്. ബ്രേക്കിംഗ് ചുമതലകൾ മുൻവശത്തെ ഡിസ്‍ക് ബ്രേക്കും പിന്നിലെ ഡ്രം ബ്രേക്കും നിർവഹിക്കും. ഇവയ്ക്കൊപ്പം സി‌ബി‌എസ് അഥവാ കമ്പൈൻഡ് ബ്രേക്കിംഗ് സിസ്റ്റവും ലഭിക്കും. മുൻവശത്തും പിൻവശത്തും 12 ഇഞ്ച് അലോയ് വീലുകളിലാണ് ഹോണ്ട ക്യുസി3 സഞ്ചരിക്കുന്നത്.

സ്‍മാർട്ട് ഫീച്ചറുകളും

അഞ്ച് ഇഞ്ച് ടിഎഫ്‍ടി കൺസോളാണ് പുതിയ ഹോണ്ട ഇലക്ട്രിക് സ്‍കൂട്ടറിലെ പ്രധാന ഫീച്ചറുകളിലൊന്ന്. സ്‍മാർട്ട്ഫോൺ കണക്റ്റിവിറ്റിക്കൊപ്പം എസ്എംഎസ്, കോൾ അലർട്ടുകൾ, ടേൺ-ബൈ-ടേൺ നാവിഗേഷൻ, മ്യൂസിക് കൺട്രോൾ തുടങ്ങിയ സൗകര്യങ്ങളും ഇതിലുണ്ട്. കീലെസ് ഇഗ്നിഷൻ സംവിധാനവും 32 ലിറ്റർ അണ്ടർസീറ്റ് സ്റ്റോറേജ് സ്പേസും ക്യുസി3യിൽ ലഭിക്കും. കുടുംബ ആവശ്യങ്ങൾക്ക് കൂടുതൽ പ്രായോഗികത നൽകുന്നതാണ് ഈ സ്റ്റോറേജ് സൗകര്യം.

ആകർഷകമായ ഡിസൈൻ

ആധുനിക ഡിസൈനാണ് പുതിയ ഹോണ്ട ക്യുസി3 ഇലക്ട്രിക് സ്‍കൂട്ടറിന് നൽകിയിരിക്കുന്നത്. ഏപ്രണിൽ സ്ഥാപിച്ച എൽഇഡി ഹെഡ്‌ലാമ്പും അതിനൊപ്പം നൽകിയിരിക്കുന്ന ഡിആർഎൽ സ്ട്രിപ്പും സ്‍കൂട്ടറിന് വ്യത്യസ്‍തമായ രൂപം നൽകുന്നു. പേൾ പ്രെഷ്യസ് വൈറ്റ്, പേൾ സൈറൺ ബ്ലൂ, മാറ്റ് ഫോട്ടോൺ ഗ്രേ മെറ്റാലിക്, പേൾ ഷാലോ ബ്ലൂ എന്നീ ട്രിപ്പിൾ-ടോൺ കളർ ഓപ്ഷനുകളിലാണ് പുതിയ ക്യുസി3 ലഭ്യമാകുന്നത്. 1.35 ലക്ഷം രൂപ വിലയും 145 കിലോമീറ്റർ അവകാശപ്പെടുന്ന റേഞ്ചും കുടുംബ കേന്ദ്രീകൃത ഫീച്ചറുകളുമാണ് പുതിയ ഹോണ്ട ക്യുസി3യുടെ പ്രധാന ആകർഷണങ്ങൾ.

ബജാജിന്‍റെ സർപ്രൈസ്; പൾസർ നിരയിലേക്ക് ആറ് പുത്തൻ താരങ്ങൾ

Prashobh Prasannan — Mon, 31 Aug 2026 12:24:31 +0530

ഇന്ത്യൻ ഇരുചക്ര വാഹന വിപണിയിൽ വൻ നീക്കവുമായി ബജാജ് ഓട്ടോ. ഉത്സവ സീസണിന് മുന്നോടിയായി 6 പുതിയ മോട്ടോർസൈക്കിളുകൾ കൂടി വിപണിയിലെത്തിക്കാനാണ് കമ്പനിയുടെ നീക്കം. ശക്തമായ എൻജിനുകളും പുതുക്കിയ ഡിസൈനും കൂടുതൽ ഫീച്ചറുകളും ഉൾപ്പെടുത്തി പൾസർ ശ്രേണിയിൽ വലിയ അഴിച്ചുപണിയാണ് ബജാജ് നടത്തുന്നത്. ഓഗസ്റ്റ് മാസം തന്നെ കമ്പനിയെ സംബന്ധിച്ചിടത്തോളം തിരക്കേറിയതായിരുന്നു. പുതിയ പൾസർ 125, പൾസർ 150, പൾസർ എൻ160 എസ്, പൾസർ എസ്എസ് എന്നിവ ഉൾപ്പെടെ 4 പുതിയ മോഡലുകൾ കമ്പനി അവതരിപ്പിച്ചിരുന്നു. എന്നാൽ പുതിയ മോഡലുകളുടെ അവതരണം ഇതോടെ അവസാനിക്കുന്നില്ലെന്നാണ് ബജാജ് വ്യക്തമാക്കുന്നത്.

10 പുതിയ മോഡലുകൾ; രണ്ടെണ്ണം പൂർണമായും പുതിയത്

ബജാജിന്റെ പുതിയ പദ്ധതിയിൽ ആകെ 10 മോഡലുകളാണ് ഉൾപ്പെടുന്നത്. ഇതിൽ രണ്ടെണ്ണം പൂർണമായും പുതിയ പൾസർ മോഡലുകളായിരിക്കുമെന്നാണ് സൂചന. ശേഷിക്കുന്ന മോഡലുകൾ പുതിയ വകഭേദങ്ങളോ നിലവിലുള്ള ഉൽപ്പന്നങ്ങളുടെ പ്രധാന നവീകരണങ്ങളോ ആയിരിക്കും. 125 സിസി മുതൽ 160 സിസി വരെയുള്ള മോട്ടോർസൈക്കിൾ ശ്രേണി കൂടുതൽ ശക്തമാക്കുകയാണ് കമ്പനിയുടെ ലക്ഷ്യം. ഈ വിഭാഗത്തിൽ ഹീറോ സ്പ്ലെൻഡർ, ഹോണ്ട ഷൈൻ തുടങ്ങിയ ജനപ്രിയ മോഡലുകൾക്ക് കൂടുതൽ ശക്തമായ മത്സരം നൽകാനും ബജാജ് ലക്ഷ്യമിടുന്നു.

മൂന്ന് പൾസർ പ്ലാറ്റ്‌ഫോമുകൾ

പുതിയ മോഡൽ നിര മൂന്ന് വ്യത്യസ്ത പൾസർ പ്ലാറ്റ്‌ഫോമുകളെ അടിസ്ഥാനമാക്കിയാകും ഒരുങ്ങുക. ഒറിജിനൽ പൾസർ, എൻ സീരീസ്, എൻഎസ് സീരീസ് എന്നിവയാണ് ഈ മൂന്ന് പ്ലാറ്റ്‌ഫോമുകൾ. വ്യത്യസ്ത ഉപഭോക്താക്കളുടെ ആവശ്യങ്ങളും അവരുടെ റൈഡിങ് രീതികളും പരിഗണിച്ചാണ് ഓരോ പ്ലാറ്റ്‌ഫോമും വികസിപ്പിക്കുന്നതെന്ന് ബജാജ് ഓട്ടോ മാർക്കറ്റിങ് പ്രസിഡന്റ് സുമീത് നരംഗ് പറഞ്ഞു. പുതിയ മോഡലുകളുടെ വരവോടെ പൾസർ ശ്രേണിയിൽ കൂടുതൽ വ്യക്തമായ വേർതിരിവും ഉപഭോക്താക്കൾക്ക് കൂടുതൽ തിരഞ്ഞെടുപ്പ് സാധ്യതകളും ലഭിക്കുമെന്നാണ് കമ്പനിയുടെ പ്രതീക്ഷ.

ദീപാവലിയോടെ എല്ലാ മോഡലുകളും

ശേഷിക്കുന്ന 6 മോഡലുകളും ഈ വർഷത്തെ ഉത്സവ സീസണോടെ വിപണിയിലെത്തിക്കാനാണ് ബജാജിന്റെ പദ്ധതി. ദീപാവലിയോടെ പുതിയ മോഡലുകൾ ഉപഭോക്താക്കൾക്ക് ലഭ്യമാകുമെന്നാണ് പ്രതീക്ഷ. ഇന്ത്യയിലെ ഏറ്റവും കൂടുതൽ വിറ്റഴിക്കപ്പെടുന്ന മോട്ടോർസൈക്കിൾ ശ്രേണികളിൽ ഒന്നാണ് പൾസർ. ജൂലൈയിൽ 66,156 യൂണിറ്റുകളുടെ വിൽപ്പനയുമായി മോട്ടോർസൈക്കിൾ വിൽപ്പന പട്ടികയിൽ മൂന്നാം സ്ഥാനത്തായിരുന്നു പൾസർ ശ്രേണി.

സ്പോർട്സ് ബൈക്കുകൾക്ക് മികച്ച വളർച്ച

ബജാജിന്റെ സ്പോർട്സ് മോട്ടോർസൈക്കിൾ വിഭാഗവും മികച്ച വളർച്ചയാണ് രേഖപ്പെടുത്തുന്നത്. ഏപ്രിൽ മുതൽ ജൂൺ വരെയുള്ള പാദത്തിൽ ഈ വിഭാഗം വാർഷികാടിസ്ഥാനത്തിൽ ഏകദേശം 50 ശതമാനം വളർച്ച കൈവരിച്ചു. പൾസറിന് പുറമെ അവഞ്ചർ, ഡോമിനാർ തുടങ്ങിയ മോഡലുകളും ഇരട്ടയക്ക വളർച്ച രേഖപ്പെടുത്തിയിട്ടുണ്ട്. ഈ വളർച്ച കൂടുതൽ ശക്തമാക്കാൻ പുതിയ മോഡലുകളുടെ അവതരണം സഹായിക്കുമെന്നാണ് കമ്പനിയുടെ വിലയിരുത്തൽ.

പുതിയ ഡ്യുവൽ സ്പോർട്ട് ബൈക്കും വരുന്നു

ബജാജിന്റെ ആദ്യ ഡ്യുവൽ സ്പോർട്ട് മോട്ടോർസൈക്കിളും വീണ്ടും പരീക്ഷണയോട്ടത്തിനിടെ കണ്ടെത്തിയിട്ടുണ്ട്. ഈ വർഷം അവസാനത്തോടെ ബ്രസീലിയൻ വിപണിയിൽ അവതരിപ്പിച്ച ശേഷം ഇന്ത്യയിലും എത്തിച്ചേക്കുമെന്നാണ് റിപ്പോർട്ടുകൾ. എന്നാൽ പുതിയ 10 മോഡൽ പദ്ധതിയിൽ ഈ ഡ്യുവൽ സ്പോർട്ട് മോട്ടോർസൈക്കിൾ ഉൾപ്പെടുമോ എന്ന കാര്യത്തിൽ ബജാജ് ഇതുവരെ വ്യക്തത വരുത്തിയിട്ടില്ല.

ട്രയംഫ് ബോണവിൽ 400നും സാധ്യത

ബജാജ്-ട്രയംഫ് കൂട്ടുകെട്ടിൽ നിന്നുള്ള മറ്റൊരു പ്രധാന മോഡലിനും കാത്തിരിക്കുകയാണ് വിപണി. നിലവിലുള്ള ട്രയംഫ് 400 ശ്രേണിയുടെ റെട്രോ രൂപത്തിലുള്ള പതിപ്പായ ബോണവിൽ 400 ഉടൻ എത്തുമെന്നാണ് പ്രതീക്ഷ. ക്ലാസിക് ഡിസൈനും ആധുനിക സാങ്കേതികവിദ്യയും സംയോജിപ്പിച്ച മോഡലായിരിക്കും ഇതെന്നാണ് സൂചന.

ഉൽപ്പാദന ശേഷി 90 ലക്ഷം യൂണിറ്റിലേക്ക്

വർധിച്ചുവരുന്ന ആവശ്യകത നേരിടുന്നതിനായി ഉൽപ്പാദന ശേഷി ഉയർത്താനും ബജാജ് പദ്ധതിയിടുന്നുണ്ട്. നിലവിലെ ഏകദേശം 72 ലക്ഷം യൂണിറ്റ് വാർഷിക ശേഷി 90 ലക്ഷത്തിലധികമായി ഉയർത്താനാണ് കമ്പനി ലക്ഷ്യമിടുന്നത്. നിലവിലുള്ള പ്ലാന്റുകളുടെ വിപുലീകരണത്തിനൊപ്പം പുതിയ ഉൽപ്പാദന സൗകര്യങ്ങളും പരിഗണിക്കുന്നുണ്ട്. എന്നാൽ ഇതുമായി ബന്ധപ്പെട്ട നിക്ഷേപവും സ്ഥലവും സംബന്ധിച്ച് അന്തിമ തീരുമാനം എടുത്തിട്ടില്ല. ഉത്സവ സീസൺ അടുത്തെത്തിയതോടെ പുതിയ മോഡലുകളുടെ അവതരണവും ഉൽപ്പാദന വർധനയും ഒരേസമയം മുന്നോട്ട് കൊണ്ടുപോകാനുള്ള തിരക്കിലാണ് ബജാജ്. പുതിയ പൾസർ മോഡലുകൾക്ക് വിപണിയിൽ എത്രത്തോളം സ്വീകാര്യത ലഭിക്കുമെന്നതാണ് ഇനി ശ്രദ്ധിക്കേണ്ടത്.

ഹോണ്ടയുടെ മിന്നും പ്രകടനം; ഓഗസ്റ്റിലെ വിൽപ്പനയിൽ കുതിപ്പ്

Prashobh Prasannan — Thu, 03 Sep 2026 13:18:35 +0530

ഇന്ത്യൻ ഇരുചക്രവാഹന വിപണിയിൽ മികച്ച വിൽപ്പനയുമായി ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യ. 2026 ഓഗസ്റ്റിൽ 5,79,162 ഇരുചക്രവാഹനങ്ങളാണ് കമ്പനി വിറ്റഴിച്ചത്. 2025 ഓഗസ്റ്റിൽ 5,34,861 യൂണിറ്റുകളായിരുന്നു വിൽപ്പന. ഇതോടെ വാർഷിക വിൽപ്പനയിൽ 8.28 ശതമാനം വളർച്ചയാണ് ഹോണ്ട രേഖപ്പെടുത്തിയത്. 2026 ജൂലൈയിലെ വിൽപ്പനയുമായി താരതമ്യം ചെയ്യുമ്പോഴും ഹോണ്ടയ്ക്ക് നേട്ടമുണ്ടായി. ജൂലൈയിൽ 5,43,000ത്തോളം യൂണിറ്റുകളായിരുന്നു വിൽപ്പന. ഓഗസ്റ്റിൽ പ്രതിമാസ വിൽപ്പനയിലും 6.67 ശതമാനം വർധന രേഖപ്പെടുത്തി. ആഭ്യന്തര വിപണിയിലും കയറ്റുമതിയിലും ഓഗസ്റ്റിൽ വാർഷിക വളർച്ച കൈവരിക്കാൻ കമ്പനിക്ക് സാധിച്ചു.

ആഭ്യന്തര വിൽപ്പന 5.17 ലക്ഷം കടന്നു

2026 ഓഗസ്റ്റിൽ ഹോണ്ടയുടെ ആഭ്യന്തര വിൽപ്പന 5,17,329 യൂണിറ്റായിരുന്നു. കഴിഞ്ഞ വർഷം ഇതേ മാസത്തിൽ 4,81,021 യൂണിറ്റുകളാണ് കമ്പനി വിറ്റത്. ഇതോടെ ആഭ്യന്തര വിപണിയിൽ 36,308 യൂണിറ്റുകളുടെ വർധന രേഖപ്പെടുത്തി. വാർഷിക വളർച്ച 7.55 ശതമാനമാണ്. 2026 ജൂലൈയിൽ ആഭ്യന്തര വിൽപ്പന 4,76,436 യൂണിറ്റായിരുന്നു. ഇതുമായി താരതമ്യം ചെയ്യുമ്പോൾ ഓഗസ്റ്റിൽ 40,893 യൂണിറ്റുകളുടെ വർധനയുണ്ടായി. പ്രതിമാസ വളർച്ച 8.58 ശതമാനമാണ്. ഓഗസ്റ്റിലെ ഹോണ്ടയുടെ ആകെ ഇരുചക്രവാഹന വിൽപ്പനയിൽ ആഭ്യന്തര വിപണിയുടെ വിഹിതം 89.32 ശതമാനമായിരുന്നു. ആക്ടിവ, ഷൈൻ, എസ്‌പി125, യൂണികോൺ, ഡിയോ തുടങ്ങിയ ജനപ്രിയ മോഡലുകളാണ് വിൽപ്പനയിൽ പ്രധാന പങ്കുവഹിച്ചത്.

കയറ്റുമതിയിലും ഇരട്ടയക്ക വളർച്ച

ഇന്ത്യയിൽ നിന്ന് 2026 ഓഗസ്റ്റിൽ ഹോണ്ട 61,833 ഇരുചക്രവാഹനങ്ങളാണ് കയറ്റുമതി ചെയ്തത്. 2025 ഓഗസ്റ്റിൽ 53,840 യൂണിറ്റുകളായിരുന്നു കയറ്റുമതി. അതായത് 7,993 യൂണിറ്റുകളുടെ വർധന. വാർഷികാടിസ്ഥാനത്തിൽ കയറ്റുമതി 14.85 ശതമാനം ഉയർന്നു. എന്നാൽ ജൂലൈയെ അപേക്ഷിച്ച് കയറ്റുമതിയിൽ ഇടിവുണ്ടായി. 2026 ജൂലൈയിൽ 66,498 യൂണിറ്റുകൾ കയറ്റുമതി ചെയ്ത സ്ഥാനത്ത് ഓഗസ്റ്റിൽ ഇത് 61,833 യൂണിറ്റായി കുറഞ്ഞു. പ്രതിമാസ ഇടിവ് 7.02 ശതമാനമാണ്. ഓഗസ്റ്റിലെ ആകെ വിൽപ്പനയിൽ കയറ്റുമതിയുടെ വിഹിതം 10.68 ശതമാനമായിരുന്നു.

2026-27 സാമ്പത്തിക വർഷത്തിലും മികച്ച പ്രകടനം

2026-27 സാമ്പത്തിക വർഷത്തിലെ ആദ്യ 5 മാസങ്ങളിലും ഹോണ്ട മികച്ച വിൽപ്പന പ്രകടനം നിലനിർത്തി. 2026 ഏപ്രിൽ മുതൽ ഓഗസ്റ്റ് വരെയുള്ള കാലയളവിൽ കമ്പനി ആകെ 27,33,758 ഇരുചക്രവാഹനങ്ങളാണ് വിറ്റത്. കഴിഞ്ഞ സാമ്പത്തിക വർഷം ഇതേ കാലയളവിൽ 24,25,391 യൂണിറ്റുകളായിരുന്നു വിൽപ്പന. ഇത്തവണ 3,08,367 യൂണിറ്റുകളുടെ വർധനയാണ് ഉണ്ടായത്. വാർഷിക വളർച്ച 12.71 ശതമാനമാണ്.

കയറ്റുമതി വളർച്ച ആഭ്യന്തര വിപണിയേക്കാൾ വേഗത്തിൽ

2026 ഏപ്രിൽ മുതൽ ഓഗസ്റ്റ് വരെയുള്ള കാലയളവിൽ ഹോണ്ടയുടെ ആഭ്യന്തര വിൽപ്പന 24,07,304 യൂണിറ്റായിരുന്നു. കഴിഞ്ഞ വർഷത്തെ സമാന കാലയളവിനെ അപേക്ഷിച്ച് 10.61 ശതമാനം വളർച്ചയാണ് ആഭ്യന്തര വിപണിയിൽ രേഖപ്പെടുത്തിയത്. അതേസമയം കയറ്റുമതിയിൽ കൂടുതൽ വേഗത്തിലുള്ള വളർച്ചയാണ് കമ്പനി കൈവരിച്ചത്. ഈ കാലയളവിൽ 3,26,454 യൂണിറ്റുകൾ കയറ്റുമതി ചെയ്തു. കഴിഞ്ഞ വർഷം ഇതേ കാലയളവിൽ 2,49,046 യൂണിറ്റുകളായിരുന്നു കയറ്റുമതി. ഇതോടെ കയറ്റുമതിയിൽ 31.08 ശതമാനം വളർച്ച രേഖപ്പെടുത്തി. 2026-27 സാമ്പത്തിക വർഷത്തിലെ ആദ്യ 5 മാസത്തെ ആകെ വിൽപ്പനയിൽ കയറ്റുമതിയുടെ വിഹിതം 11.94 ശതമാനമായി ഉയർന്നു. ആഭ്യന്തര വിപണിയുടെ വിഹിതം 88.06 ശതമാനമാണ്. ആഭ്യന്തര വിൽപ്പനയ്ക്കൊപ്പം ഹോണ്ടയുടെ കയറ്റുമതി ബിസിനസും അതിവേഗം വളരുന്നതാണ് വിൽപ്പന കണക്കുകൾ വ്യക്തമാക്കുന്നത്.

റോയൽ എൻഫീൽഡ് 'വൺ റൈഡ്': ഹിമപ്പുലികൾക്കായി ഒരു ആഗോളയാത്ര

Prashobh Prasannan — Mon, 31 Aug 2026 14:32:09 +0530

ഐക്കണിക്ക് ഇന്ത്യൻ ടൂവീലർ ബ്രാൻഡായ റോയൽ എൻഫീൽഡിന്റെ 125-ാം വാർഷികാഘോഷങ്ങൾക്ക് കൂടുതൽ ആവേശം പകരാൻ ആഗോളതലത്തിൽ വൻ ബൈക്ക് റൈഡുമായി കമ്പനി. 2026 സെപ്റ്റംബർ 20ന് ലോകമെമ്പാടുമായി ‘വൺ റൈഡ് 2026’ സംഘടിപ്പിക്കുമെന്ന് റോയൽ എൻഫീൽഡ് അറിയിച്ചു.

60ൽ അധികം രാജ്യങ്ങളിലായി ഒരേ ദിവസം 1,600ൽ അധികം റൈഡുകളാണ് സംഘടിപ്പിക്കുന്നത്. എന്നാൽ ഇത്തവണ ബൈക്ക് യാത്ര മാത്രമല്ല പരിപാടിയുടെ ലക്ഷ്യം. ഹിമാലയൻ പരിസ്ഥിതിയുടെയും അവിടെ ജീവിക്കുന്ന ഹിമപ്പുലികളുടെയും സംരക്ഷണത്തിനായുള്ള പ്രവർത്തനങ്ങളുമായി റൈഡിനെ ബന്ധിപ്പിച്ചിരിക്കുകയാണ് കമ്പനി. റൈഡിൽ പങ്കെടുക്കുന്ന ഓരോ ബൈക്ക് യാത്രികന്റെയും പേരിൽ ഹിമപ്പുലി സംരക്ഷണ പ്രവർത്തനങ്ങൾക്ക് റോയൽ എൻഫീൽഡ് സംഭാവന നൽകും.

മുംബൈ മുതൽ മാഡ്രിഡ് വരെ; സാവോ പോളോ മുതൽ സിഡ്‍നി വരെ

റോയൽ എൻഫീൽഡിന്റെ 125-ാം വാർഷികം പ്രമാണിച്ച് വിപുലമായ രീതിയിലാണ് ഇത്തവണ വൺ റൈഡ് സംഘടിപ്പിക്കുന്നത്. ലോകത്തിന്റെ വിവിധ ഭാഗങ്ങളിലെ പ്രധാന നഗരങ്ങളിൽ നിന്നുള്ള ബൈക്ക് യാത്രികർ ഒരേസമയം നിരത്തിലിറങ്ങും. മുംബൈ മുതൽ മാഡ്രിഡ് വരെയും സാവോ പോളോ മുതൽ സിഡ്നി വരെയും റോയൽ എൻഫീൽഡ് ബൈക്കുകളിൽ യാത്രികർ റൈഡിൽ പങ്കെടുക്കും. ലോകമെമ്പാടുമുള്ള റോയൽ എൻഫീൽഡ് ആരാധകരെ അവരുടെ പൊതുവായ ബൈക്ക് പ്രേമത്തിലൂടെ ഒരുമിപ്പിക്കുകയാണ് പരിപാടിയുടെ ലക്ഷ്യമെന്ന് കമ്പനി വ്യക്തമാക്കി.

കഴിഞ്ഞ വർഷം പങ്കെടുത്തത് 53,000ലധികം പേർ

വൺ റൈഡിന് ഓരോ വർഷവും വലിയ പങ്കാളിത്തമാണ് ലഭിക്കുന്നത്. 2025ൽ നടന്ന വൺ റൈഡിൽ 53,000ലധികം ബൈക്ക് യാത്രികർ പങ്കെടുത്തതായി റോയൽ എൻഫീൽഡ് അറിയിച്ചു. ഈ വർഷം പങ്കെടുക്കുന്നവരുടെ എണ്ണം ഇതിലും ഉയരുമെന്നാണ് കമ്പനിയുടെ പ്രതീക്ഷ. 125-ാം വാർഷികത്തിന്റെ പ്രത്യേകതയ്ക്കൊപ്പം പരിസ്ഥിതി സംരക്ഷണ സന്ദേശവും മുന്നോട്ടുവയ്ക്കുന്നതിനാൽ ഇത്തവണത്തെ പരിപാടിക്ക് കൂടുതൽ പ്രാധാന്യമുണ്ട്.

ഹിമപ്പുലി സംരക്ഷണം പ്രധാന ലക്ഷ്യം

ഹിമാലയവും റോയൽ എൻഫീൽഡും തമ്മിൽ വർഷങ്ങളായുള്ള ബന്ധമാണുള്ളത്. രാജ്യത്തിന്റെ വിവിധ ഭാഗങ്ങളിൽ നിന്നുള്ള ബൈക്ക് യാത്രികർ പതിവായി ഹിമാലയൻ മേഖലകളിലേക്ക് യാത്ര ചെയ്യാറുണ്ട്. ഈ ബന്ധം കൂടുതൽ ശക്തമാക്കുന്നതിന്റെ ഭാഗമായാണ് ഇത്തവണത്തെ വൺ റൈഡിനെ ഹിമപ്പുലി സംരക്ഷണവുമായി ബന്ധിപ്പിച്ചിരിക്കുന്നത്. ഇന്ത്യയിൽ നിലവിൽ ഏകദേശം 718 ഹിമപ്പുലികൾ മാത്രമാണ് അവശേഷിക്കുന്നതെന്നാണ് കണക്ക്. ഉയർന്ന ഹിമാലയൻ പ്രദേശങ്ങളിലെ പരിസ്ഥിതിയുടെ സ്വാഭാവിക സന്തുലിതാവസ്ഥ നിലനിർത്തുന്നതിൽ ഹിമപ്പുലികൾക്ക് പ്രധാന പങ്കുണ്ട്.

10,500 ചതുരശ്ര കിലോമീറ്ററിലധികം മേഖലയിൽ പ്രവർത്തനം

സാമൂഹിക ഉത്തരവാദിത്ത പദ്ധതികളുടെ ഭാഗമായി ഹിമപ്പുലി സംരക്ഷണത്തിനായി വിവിധ ഹിമാലയൻ മേഖലകളിൽ റോയൽ എൻഫീൽഡ് പ്രവർത്തിക്കുന്നുണ്ട്. ഹിമാചൽ പ്രദേശ്, ലഡാക്ക്, ഉത്തരാഖണ്ഡ്, സിക്കിം, ജമ്മു കശ്മീർ തുടങ്ങിയ പ്രദേശങ്ങളിലെ പ്രാദേശിക സമൂഹങ്ങളുമായി സഹകരിച്ചാണ് സംരക്ഷണ പ്രവർത്തനങ്ങൾ നടത്തുന്നത്. ഇതിനകം തന്നെ 10,500 ചതുരശ്ര കിലോമീറ്ററിലധികം പ്രദേശത്ത് ഈ പ്രവർത്തനങ്ങൾ വ്യാപിച്ചുകിടക്കുന്നതായി കമ്പനി പറയുന്നു. വൺ റൈഡ് 2026ലൂടെ ഈ സംരക്ഷണ പ്രവർത്തനങ്ങൾക്ക് കൂടുതൽ പിന്തുണ നൽകാനാണ് ലക്ഷ്യം.

‘ഹിമാലയം ഞങ്ങളുടെ ഹൃദയവും വീടും’

റോയൽ എൻഫീൽഡുമായി ബന്ധപ്പെട്ടവരുടെ ഹൃദയത്തോട് ഹിമാലയത്തിന് എന്നും പ്രത്യേക സ്ഥാനമുണ്ടെന്ന് കമ്പനിയുടെ ബ്രാൻഡ് ആൻഡ് സ്ട്രാറ്റജി പ്രസിഡന്റ് മോഹിത് ധർ ജയാൽ പറഞ്ഞു. ബൈക്ക് യാത്രികർക്ക് ഹിമാലയം ഒരു തീർത്ഥാടന കേന്ദ്രം പോലെയാണ്. എന്നാൽ ഹിമപ്പുലികൾക്ക് അത് അവരുടെ യഥാർഥ വീടാണ്. കമ്പനിയുടെ 125 വർഷത്തെ യാത്ര ആഘോഷിക്കുന്ന വേളയിൽ ലോകമെമ്പാടുമുള്ള ബൈക്ക് യാത്രികരെ ഒരുമിപ്പിക്കുന്നതിനൊപ്പം തങ്ങളുടെ ഉത്തരവാദിത്തം നിറവേറ്റാനുള്ള അവസരമാണ് വൺ റൈഡ് 2026 നൽകുന്നതെന്നും അദ്ദേഹം വ്യക്തമാക്കി. 125-ാം വാർഷികത്തിന്റെ ആഘോഷത്തിനൊപ്പം പരിസ്ഥിതി സംരക്ഷണ സന്ദേശവും ലോകമെമ്പാടും എത്തിക്കുകയാണ് റോയൽ എൻഫീൽഡിന്റെ ഇത്തവണത്തെ വൺ റൈഡിന്റെ ലക്ഷ്യം.

ടിവിഎസ് റോണിൻ പുതിയ വേരിയന്‍റ് എത്തി; മാറ്റങ്ങൾ എന്തെല്ലാം?

Prashobh Prasannan — Thu, 24 Sep 2026 17:35:51 +0530

ജനപ്രിയ റോണിൻ മോട്ടോർസൈക്കിളിന്റെ പുതിയ ബേസ്+ വേരിയന്റ് അവതരിപ്പിച്ച് ടിവിഎസ് മോട്ടോർ കമ്പനി. ബേസ്, മിഡ് വേരിയന്റുകൾക്കിടയിലാണ് പുതിയ മോഡലിന്റെ സ്ഥാനം. ഇതോടെ ടിവിഎസ് റോണിൻ ഇന്ത്യൻ വിപണിയിൽ നാല് വേരിയന്റുകളിൽ ലഭ്യമാണ്. 1.26 ലക്ഷം രൂപ മുതൽ 1.64 ലക്ഷം രൂപ വരെയാണ് ഇന്ത്യയിൽ ടിവിഎസ് റോണിന്റെ എക്സ്-ഷോറൂം വില. റോയൽ എൻഫീൽഡ് ഹണ്ടർ 350 ഉൾപ്പെടെയുള്ള മോട്ടോർസൈക്കിളുകളുമായാണ് റോണിൻ മത്സരിക്കുന്നത്.

ബേസ്+ വേരിയന്റിന് പ്രത്യേകത എന്ത്?

റോണിന്റെ അടിസ്ഥാന വേരിയന്റിൽ സിംഗിൾ-ചാനൽ എബിഎസും റെയിൻ, അർബൻ എന്നീ രണ്ട് റൈഡിംഗ് മോഡുകളുമാണ് ലഭിക്കുന്നത്. 159 കിലോഗ്രാമാണ് ഈ വേരിയന്റിന്റെ ഭാരം. മറ്റ് വേരിയന്റുകളെ അപേക്ഷിച്ച് ഏകദേശം 1 കിലോഗ്രാം ഭാരം കുറവാണിത്. പൂർണമായും എൽഇഡി ലൈറ്റിംഗ് സംവിധാനവും അസമമായ രൂപകൽപ്പനയിലുള്ള ഡിജിറ്റൽ ഇൻസ്ട്രുമെന്റ് ക്ലസ്റ്ററും ബൈക്കിലുണ്ട്. വേഗത, ഗിയർ പൊസിഷൻ, ഓഡോമീറ്റർ, ട്രിപ്പ് മീറ്റർ, ഇന്ധന നില, ടാക്കോമീറ്റർ തുടങ്ങിയ വിവരങ്ങൾ ഡിജിറ്റൽ കൺസോളിൽ ലഭിക്കും.

പ്രധാന അപ്ഡേറ്റ് ഡ്യുവൽ-ചാനൽ എബിഎസ്

അടിസ്ഥാന റോണിൻ വേരിയന്റിലെ പ്രധാന സവിശേഷതകളെല്ലാം ബേസ്+ മോഡലിലും നിലനിർത്തിയിട്ടുണ്ട്. എന്നാൽ ഏറ്റവും ശ്രദ്ധേയമായ മാറ്റം ഡ്യുവൽ-ചാനൽ എബിഎസ് ഉൾപ്പെടുത്തിയതാണ്. രണ്ട് പുതിയ നിറങ്ങളിലുള്ള ഓപ്ഷനുകളും ബേസ്+ വേരിയന്റിൽ ലഭിക്കും. ഡ്യുവൽ-ചാനൽ എബിഎസ് ലഭിക്കുന്ന റോണിൻ നിരയിലെ ഏറ്റവും താങ്ങാനാവുന്ന മോഡലായി ഇതോടെ ബേസ്+ മാറുന്നു. കുറഞ്ഞ വിലയിൽ ഡ്യുവൽ-ചാനൽ എബിഎസ് ഉൾപ്പെടെയുള്ള സൗകര്യങ്ങൾ തേടുന്ന ഉപഭോക്താക്കളെ ലക്ഷ്യമിട്ടാണ് പുതിയ വേരിയന്റ് എത്തിയിരിക്കുന്നത്.

എഞ്ചിനിൽ മാറ്റമില്ല

പുതിയ ബേസ്+ വേരിയന്റിന്റെ എഞ്ചിനിലും മെക്കാനിക്കൽ സംവിധാനങ്ങളിലും മാറ്റമില്ല. നിലവിലുള്ള അതേ 225.9 സിസി ഓയിൽ-കൂൾഡ് എഞ്ചിനാണ് ബൈക്കിലും ഉപയോഗിച്ചിരിക്കുന്നത്. ഈ എഞ്ചിൻ 20.1 ബിഎച്ച്പി പരമാവധി കരുത്തും 19.9 എൻഎം പരമാവധി ടോർക്കും ഉത്പാദിപ്പിക്കും. ബേസ്+ വേരിയന്റിലും റോണിന്റെ നിലവിലുള്ള എൻജിൻ പ്രകടനം തന്നെയാണ് തുടരുന്നത്. പുതിയ ബേസ്+ വേരിയന്റിലൂടെ കുറഞ്ഞ വിലയിൽ കൂടുതൽ സുരക്ഷാ ഫീച്ചറുകൾ നൽകാനാണ് ടിവിഎസ് ലക്ഷ്യമിടുന്നത്. ഇതോടെ റോയൽ എൻഫീൽഡ് ഹണ്ടർ 350 ഉൾപ്പെടെയുള്ള എതിരാളികൾക്കെതിരായ റോണിന്റെ മത്സരം കൂടുതൽ ശക്തമാകുമെന്നാണ് പ്രതീക്ഷ.

സിമ്പിൾ വേവ്: വിപണി പിടിക്കാൻ പുതിയ ഇലക്ട്രിക് തരംഗം

Prashobh Prasannan — Fri, 04 Sep 2026 14:32:47 +0530

ഇന്ത്യൻ ഇലക്ട്രിക് സ്‍കൂട്ടർ വിപണിയിൽ പുതിയ മോഡലുമായി സിമ്പിൾ എനർജി. കമ്പനിയുടെ പുതിയ ഇലക്ട്രിക് സ്കൂട്ടറായ സിമ്പിൾ വേവ് ഇന്ത്യൻ വിപണിയിൽ അവതരിപ്പിച്ചു. ₹1.10 ലക്ഷം (എക്സ്-ഷോറൂം) ആണ് സ്‍കൂട്ടറിന്റെ പ്രാരംഭ വില. സിമ്പിൾ എനർജി ഇന്ത്യയിൽ അവതരിപ്പിക്കുന്ന ആദ്യ കുടുംബ കേന്ദ്രീകൃത ഇലക്ട്രിക് സ്കൂട്ടർ കൂടിയാണിത്. ഡീലർഷിപ്പുകളിൽ വാഹനത്തിന്റെ ബുക്കിംഗ് ആരംഭിച്ചിട്ടുണ്ട്. സെപ്റ്റംബർ അവസാന വാരത്തോടെ ഡെലിവറികൾ ആരംഭിക്കുമെന്നാണ് കമ്പനി പ്രതീക്ഷിക്കുന്നത്. ഒറ്റ ചാർജിൽ 243 കിലോമീറ്റർ വരെ സഞ്ചരിക്കാൻ കഴിയുന്ന റേഞ്ചിനൊപ്പം നിരവധി സ്‍മാർട്ട് ഫീച്ചറുകളും സിമ്പിൾ വേവിൽ കമ്പനി നൽകിയിട്ടുണ്ട്.

243 കിലോമീറ്റർ വരെ റേഞ്ച്

സിമ്പിൾ വേവ് എസ്, സിമ്പിൾ വേവ്, സിമ്പിൾ വേവ്+ എന്നിങ്ങനെ വിവിധ കോൺഫിഗറേഷനുകളിലാണ് സ്‍കൂട്ടർ അവതരിപ്പിച്ചിരിക്കുന്നത്. ഇതിൽ ഏറ്റവും ഉയർന്ന വേരിയന്റായ വേവ്+ൽ 5 കിലോവാട്ട് ബാറ്ററി പാക്കും 6.4 കിലോവാട്ട് പിഎംഎസ്എം ഇലക്ട്രിക് മോട്ടോറുമാണ് ലഭിക്കുന്നത്. ഈ വേരിയന്റിന് 243 കിലോമീറ്റർ ഐഡിസി റേഞ്ചാണ് കമ്പനി അവകാശപ്പെടുന്നത്. പരമാവധി വേഗത മണിക്കൂറിൽ 90 കിലോമീറ്ററാണ്. മോട്ടോർ 179 എൻഎം വീൽ ടോർക്ക് ഉത്പാദിപ്പിക്കുമെന്നും കമ്പനി വ്യക്തമാക്കുന്നു. മറ്റ് വേരിയന്റുകളിൽ 3.7 കിലോവാട്ട്, 2.7 കിലോവാട്ട്, 2.2 കിലോവാട്ട് ബാറ്ററി പാക്കുകളാണ് നൽകിയിരിക്കുന്നത്. ഇവയ്ക്ക് യഥാക്രമം 171 കിലോമീറ്റർ, 132 കിലോമീറ്റർ, 110 കിലോമീറ്റർ ഐഡിസി റേഞ്ചാണ് ലഭിക്കുന്നത്. ബാറ്ററി, ഫീച്ചർ കോമ്പിനേഷൻ എന്നിവ തിരഞ്ഞെടുക്കുന്ന വേരിയന്റിന് അനുസരിച്ച് വ്യത്യാസപ്പെടും. എല്ലാ മോഡലുകളിലും റൈഡ്, ഇക്കോ, ഇക്കോഎക്സ് എന്നീ റൈഡിംഗ് മോഡുകൾ ലഭ്യമാണ്. ഉയർന്ന വേരിയന്റിൽ സ്പോർട്ട് മോഡും കമ്പനി നൽകിയിട്ടുണ്ട്.

2 മണിക്കൂർ 15 മിനിറ്റിൽ 80 ശതമാനം ചാർജ്

സിമ്പിൾ വേവിൽ ചെയിൻ-ഡ്രൈവ് ട്രാൻസ്മിഷനാണ് ഉപയോഗിച്ചിരിക്കുന്നത്. മോട്ടോറിനും ബാറ്ററിക്കും ഐപി67 റേറ്റിംഗും ലഭിക്കുന്നു. സ്കൂട്ടറിനൊപ്പം പോർട്ടബിൾ ചാർജറും ലഭിക്കും. ടോപ്പ്-സ്പെക്ക് വേവ്+ വേരിയന്റിലാണ് ഫാസ്റ്റ് ചാർജിംഗ് സൗകര്യം നൽകിയിരിക്കുന്നത്. ഫാസ്റ്റ് ചാർജർ ഉപയോഗിച്ച് ബാറ്ററി 0 മുതൽ 80 ശതമാനം വരെ വെറും 2 മണിക്കൂർ 15 മിനിറ്റിനുള്ളിൽ ചാർജ് ചെയ്യാൻ കഴിയുമെന്നാണ് സിമ്പിൾ എനർജിയുടെ അവകാശവാദം.

70 ലിറ്റർ വരെ സ്റ്റോറേജ്

ഡിസൈനിന്റെ കാര്യത്തിൽ മിനുസമാർന്ന വളവുകളും വൃത്താകൃതിയിലുള്ള അരികുകളുമാണ് സിമ്പിൾ വേവിന് നൽകിയിരിക്കുന്നത്. മുൻവശത്തെ ആപ്രോണിലാണ് ഹെഡ്‌ലാമ്പ് സ്ഥാപിച്ചിരിക്കുന്നത്. ഇതിൽ സംയോജിത ഡിആർഎല്ലുകളും ലഭിക്കും. സൈഡ് പാനലുകളിൽ വേവ് ബാഡ്ജിംഗും സിംഗിൾ-പീസ് സീറ്റുമാണ് നൽകിയിരിക്കുന്നത്. 70 ലിറ്റർ വരെ സ്റ്റോറേജ് സ്പേസാണ് സ്കൂട്ടറിന്റെ പ്രധാന പ്രത്യേകതകളിലൊന്ന്. ഇതിൽ 63 ലിറ്റർ അണ്ടർ-സീറ്റ് സ്റ്റോറേജ്, 3 ലിറ്റർ ഗ്ലൗബോക്സ്, പ്രത്യേക 4 ലിറ്റർ പിൽ കമ്പാർട്ട്മെന്റ് എന്നിവ ഉൾപ്പെടുന്നു. പേൾ വൈറ്റ്, കോറൽ റെഡ്, ട്വിലൈറ്റ് ബ്ലാക്ക്, പോളാർ ബ്ലൂ, ഡോൾഫിൻ ഗ്രേ, ഫോറസ്റ്റ് ഗ്രീൻ എന്നീ നിറങ്ങളിലാണ് സിമ്പിൾ വേവ് ലഭിക്കുക. തിരഞ്ഞെടുക്കുന്ന വേരിയന്റിന് അനുസരിച്ച് കളർ ഓപ്ഷനുകളിൽ മാറ്റമുണ്ടാകും.

7 ഇഞ്ച് ടിഎഫ്ടിയും സ്മാർട്ട് ഫീച്ചറുകളും

വേരിയന്റിന് അനുസരിച്ച് സിമ്പിൾ വേവിൽ 7 ഇഞ്ച് ടിഎഫ്ടി ഡിസ്പ്ലേയോ 5 ഇഞ്ച് ഇബിഎൻ സ്ക്രീനോ ലഭിക്കും. ടിഎഫ്ടി ഡിസ്പ്ലേയുള്ള മോഡലുകളിൽ ബ്ലൂടൂത്ത് കണക്റ്റിവിറ്റി, ടേൺ-ബൈ-ടേൺ നാവിഗേഷൻ, ജിപിഎസ് ട്രാക്കിംഗ്, കോൾ, മ്യൂസിക് കൺട്രോളുകൾ, യുഎസ്ബി ചാർജിംഗ്, ഒടിഎ അപ്ഡേറ്റുകൾ തുടങ്ങിയ സൗകര്യങ്ങളുണ്ട്. ടോപ്പ്-എൻഡ് വേരിയന്റുകളിൽ ട്രാക്ഷൻ കൺട്രോൾ, റീജനറേറ്റീവ് ബ്രേക്കിംഗ്, ഹിൽ-ഹോൾഡ് അസിസ്റ്റ്, റിവേഴ്സ് മോഡ്, ക്രാൾ മോഡ്, വെഹിക്കിൾ ട്രാക്കിംഗ് തുടങ്ങിയ ഫീച്ചറുകളും ലഭിക്കും. ഫുൾ എൽഇഡി ലൈറ്റിംഗ് എല്ലാ വേരിയന്റുകളിലും സ്റ്റാൻഡേർഡാണ്.

150 കിലോഗ്രാം പേലോഡ് ശേഷി

ഹാർഡ്‌വെയർ സവിശേഷതകളിലും സിമ്പിൾ വേവ് ശ്രദ്ധേയമാണ്. 1,347 എംഎം വീൽബേസും 150 കിലോഗ്രാം പേലോഡ് ശേഷിയും 775 എംഎം സീറ്റ് ഉയരവും 175 എംഎം ഗ്രൗണ്ട് ക്ലിയറൻസുമാണ് സ്കൂട്ടറിനുള്ളത്. 300 എംഎം ആണ് വാട്ടർ-വേഡിംഗ് ശേഷിയെന്ന് റിപ്പോർട്ടുകൾ വ്യക്തമാക്കുന്നു. ട്യൂബുലാർ സ്റ്റീൽ ഫ്രെയിം, ടെലിസ്കോപ്പിക് ഫ്രണ്ട് സസ്‌പെൻഷൻ, പ്രോഗ്രസീവ് ട്വിൻ റിയർ ഷോക്ക് അബ്സോർബറുകൾ, 12 ഇഞ്ച് അലോയ് വീലുകൾ എന്നിവയാണ് മറ്റ് പ്രധാന ഹാർഡ്‌വെയർ സവിശേഷതകൾ. ബ്രേക്കിംഗിനായി ഫ്രണ്ട് ഡിസ്കും റിയർ ഡ്രമ്മും ഉൾപ്പെടുന്ന സംയോജിത ബ്രേക്കിംഗ് സംവിധാനമാണ് നൽകിയിരിക്കുന്നത്.

പ്രധാന എതിരാളികൾ

ഇന്ത്യൻ വിപണിയിൽ സിമ്പിൾ വേവ് നേരിടുന്നത് നിലവിൽ ശ്രദ്ധേയമായ ഇലക്ട്രിക് സ്കൂട്ടറുകളെയാണ്. ആതർ കൊണാർക്ക്, ടിവിഎസ് ഐക്യുബ്, ബജാജ് ചേതക് തുടങ്ങിയ മോഡലുകളുമായാണ് പുതിയ സിമ്പിൾ വേവ് മത്സരിക്കുക.

132 കിലോമീറ്റർ റേഞ്ചുമായി പുതിയ ഇലക്ട്രിക് സ്‍കൂട്ടർ; ക്രൂയിസ് കൺട്രോളും, വില 1.18 ലക്ഷം!

Prashobh Prasannan — Fri, 11 Sep 2026 15:04:13 +0530

ഇലക്ട്രിക് സ്‍കൂട്ടർ വിപണിയിൽ പുതിയ മോഡലുമായി കൈനറ്റിക്. കമ്പനിയുടെ ഡിഎക്സ് ഇലക്ട്രിക് സ്‍കൂട്ടർ ശ്രേണിയിലേക്ക് പുതിയ ഡിഎക്സ് പ്ലസ് 3.1 കിലോവാട്ട്അവർ മോഡലാണ് എത്തിയിരിക്കുന്നത്. 3.1 കിലോവാട്ട്അവർ ബാറ്ററിയും ഒറ്റ ചാർജിൽ 132 കിലോമീറ്റർ വരെ ഐഡിസി റേഞ്ചുമാണ് വാഹനത്തിന്റെ പ്രധാന ആകർഷണം. പുതിയ മോഡലിന്റെ എക്സ്-ഷോറൂം വില 1.18 ലക്ഷം മുതലാണ്. ക്രൂയിസ് കൺട്രോൾ ഉൾപ്പെടെയുള്ള നിരവധി ഫീച്ചറുകളോടെയാണ് പുതിയ ഡിഎക്സ് പ്ലസ് വിപണിയിലെത്തുന്നത്.

27 കിലോമീറ്റർ അധിക റേഞ്ച്

നിലവിലുള്ള 2.6 കിലോവാട്ട്അവർ ഡിഎക്സ് പ്ലസിനൊപ്പം പുതിയ 3.1 കിലോവാട്ട്അവർ പതിപ്പും കൈനറ്റിക് വിൽക്കും. സാധാരണ ഡിഎക്സ് മോഡലിൽ 2.6 കിലോവാട്ട്അവർ ബാറ്ററി തന്നെയാണ് ലഭിക്കുന്നത്. 3.1 കിലോവാട്ട്അവർ ബാറ്ററിയെത്തിയതോടെ ഡിഎക്സ് പ്ലസിന്റെ അവകാശപ്പെടുന്ന ഐഡിസി റേഞ്ച് 132 കിലോമീറ്ററായി ഉയർന്നു. 2.6 കിലോവാട്ട്അവർ പതിപ്പിന് 105 കിലോമീറ്റർ ഐഡിസി റേഞ്ചാണ് ലഭിക്കുന്നത്. അതായത് പുതിയ മോഡലിന് 27 കിലോമീറ്റർ അധിക റേഞ്ച് ലഭിക്കും. എൽഎഫ്പി സാങ്കേതികവിദ്യയിലുള്ള ബാറ്ററിയാണ് കൈനറ്റിക് നൽകിയിരിക്കുന്നത്. മികച്ച താപനില നിയന്ത്രണവും ദീർഘമായ ബാറ്ററി ആയുസ്സുമാണ് ഈ സാങ്കേതികവിദ്യയുടെ പ്രധാന നേട്ടങ്ങൾ. എന്നാൽ 132 കിലോമീറ്റർ എന്നത് ഐഡിസി പരീക്ഷണത്തെ അടിസ്ഥാനമാക്കിയുള്ള റേഞ്ചാണ്. യഥാർഥ ഉപയോഗത്തിൽ റേഞ്ചിൽ വ്യത്യാസമുണ്ടാകാം.

റേഞ്ച് കൂടിയപ്പോൾ മോട്ടോർ പവർ കുറഞ്ഞു

പുതിയ ബാറ്ററി മാത്രമല്ല 3.1 കിലോവാട്ട്അവർ മോഡലിന്റെ റേഞ്ച് വർധിപ്പിച്ചത്. ഇതിൽ 3.8 കിലോവാട്ട് മോട്ടോറാണ് നൽകിയിരിക്കുന്നത്. താരതമ്യപ്പെടുത്തുമ്പോൾ, 2.6 കിലോവാട്ട്അവർ ഡിഎക്സ് പ്ലസിൽ 4.78 കിലോവാട്ട് മോട്ടോറാണ് ഉപയോഗിക്കുന്നത്. പുതിയ പതിപ്പിൽ റേഞ്ച്, പവർ എന്നീ റൈഡിംഗ് മോഡുകളുണ്ട്. സാധാരണ ഡിഎക്സ്, 2.6 കിലോവാട്ട്അവർ ഡിഎക്സ് പ്ലസ് എന്നിവയിൽ ലഭിക്കുന്ന ടർബോ മോഡ് പുതിയ മോഡലിൽ ഇല്ല. അതിനാൽ കൂടുതൽ ദൂരം യാത്ര ചെയ്യാനും ഇടയ്ക്കിടെ ചാർജ് ചെയ്യുന്നത് ഒഴിവാക്കാനും ആഗ്രഹിക്കുന്നവർക്ക് 3.1 കിലോവാട്ട്അവർ പതിപ്പ് കൂടുതൽ അനുയോജ്യമാകാം. അതേസമയം, കൂടുതൽ വേഗതയും മികച്ച സ്റ്റാർട്ടിംഗ് ഗ്രിപ്പും ആവശ്യമുള്ളവർക്ക് 2.6 കിലോവാട്ട്അവർ ഡിഎക്സ് പ്ലസ് പരിഗണിക്കാം.

ഫീച്ചറുകളുടെ കാര്യത്തിൽ സമ്പന്നം

നിലവിലുള്ള ഡിഎക്സ് പ്ലസിലെ ഭൂരിഭാഗം ഫീച്ചറുകളും പുതിയ മോഡലിലും ലഭ്യമാണ്. മെറ്റൽ ബോഡി, എൽഇഡി ലൈറ്റുകൾ, 8.8 ഇഞ്ച് എൽസിഡി സ്ക്രീൻ, സീറ്റിനടിയിൽ 37 ലിറ്റർ സ്റ്റോറേജ് എന്നിവ വാഹനത്തിലുണ്ട്. കീലെസ് സ്റ്റാർട്ട്, പാസ്‌വേഡ് ഇഗ്നിഷൻ, ഫ്ലിപ്പ് ഫുട്‌റെസ്റ്റ്, ക്രൂയിസ് കൺട്രോൾ, ടെലിമാറ്റിക്സ് എന്നിവയും ലഭിക്കും. ഫ്രണ്ട് ഡിസ്‍ക് ബ്രേക്ക്, പാർക്ക് അസിസ്റ്റ്, റിവേഴ്‌സ് മോഡ്, ബ്രേക്കിംഗ് സമയത്ത് ബാറ്ററി റീജനറേഷൻ എന്നിവയും പ്രധാന ഫീച്ചറുകളാണ്.

അഞ്ച് നിറങ്ങളിൽ ലഭിക്കും

പുതിയ കൈനറ്റിക് ഡിഎക്സ് പ്ലസ് 3.1 കിലോവാട്ട്അവർ ചുവപ്പ്, നീല, കറുപ്പ്, ചാര, വെള്ള നിറങ്ങളിൽ ലഭ്യമാണ്. മികച്ച റേഞ്ചിനൊപ്പം ക്രൂയിസ് കൺട്രോൾ ഉൾപ്പെടെയുള്ള ഫീച്ചറുകളും ലഭിക്കുന്നതിനാൽ ദീർഘദൂര യാത്രകൾക്ക് പ്രായോഗികമായ ഇലക്ട്രിക് സ്‍കൂട്ടർ എന്ന നിലയിലാണ് പുതിയ മോഡലിനെ കൈനറ്റിക് അവതരിപ്പിച്ചിരിക്കുന്നത്.

റോയൽ എൻഫീൽഡ് ക്ലാസിക് 350ന്‍റെ പുതിയ വേരിയന്‍റ് എത്തി; വില 2.24 ലക്ഷം രൂപ മുതൽ, ഫീച്ചറുകളും കിടിലൻ

Prashobh Prasannan — Thu, 24 Sep 2026 13:40:59 +0530

റോയൽ എൻഫീൽഡിന്റെ ജനപ്രിയ മോഡലായ ക്ലാസിക് 350യുടെ പുതിയ സിഗ്നേച്ചർ വൈറ്റ് എഡിഷൻ വിപണിയിൽ. പുതിയ സവിശേഷതകളും കൂടുതൽ പ്രീമിയം ലുക്കും നൽകിയാണ് പുതിയ വേരിയന്റ് അവതരിപ്പിച്ചിരിക്കുന്നത്. 2,24,275 രൂപ മുതലാണ് എക്സ്-ഷോറൂം വില. ക്ലാസിക് 350യുടെ ഉയർന്ന വേരിയന്റുകളുടെ ഭാഗമായാണ് സിഗ്നേച്ചർ വൈറ്റ് എഡിഷൻ എത്തുന്നത്. കമ്പനിയുടെ എമറാൾഡ് ഗ്രീൻ എഡിഷനൊപ്പമായിരിക്കും പുതിയ മോഡലിന്റെ സ്ഥാനം. സെപ്റ്റംബർ 22 മുതൽ രാജ്യത്തുടനീളമുള്ള റോയൽ എൻഫീൽഡ് സ്റ്റോറുകളിൽ പുതിയ ബൈക്ക് ലഭ്യമാകും.

കൂടുതൽ പ്രീമിയം ലുക്കിൽ ക്ലാസിക് 350

ക്ലാസിക് 350 സിഗ്നേച്ചർ വൈറ്റ് എഡിഷനിൽ പ്രീമിയം ബ്രൗൺ ടൂറിംഗ് സീറ്റുകളാണ് നൽകിയിരിക്കുന്നത്. പ്രത്യേക പില്യൺ സീറ്റും ലഭിക്കും. സൈഡ് പാനലുകളിൽ പുതിയ ക്ലാസിക് ലോഗോ യൂണിറ്റും ഉൾപ്പെടുത്തിയിട്ടുണ്ട്. ഇന്ധന ടാങ്കിൽ സ്റ്റെൻസിൽ ശൈലിയിലുള്ള ഡെക്കലും നൽകിയിട്ടുണ്ട്. ഇരുവശങ്ങളിലും റോയൽ എൻഫീൽഡ് ബാഡ്ജുകളും കാണാം. ക്ലാസിക് 350യുടെ അടിസ്ഥാന ഡിസൈൻ നിലനിർത്തിക്കൊണ്ട് കൂടുതൽ പ്രീമിയം രൂപം നൽകുകയാണ് ഈ മാറ്റങ്ങളിലൂടെ കമ്പനി ലക്ഷ്യമിടുന്നത്.

റൈഡിംഗ് എളുപ്പമാക്കാൻ പുതിയ ഫീച്ചറുകൾ

പുതിയ ക്ലാസിക് 350 സിഗ്നേച്ചർ വൈറ്റ് എഡിഷനിൽ അസിസ്റ്റ്, സ്ലിപ്പർ ക്ലച്ച് സംവിധാനങ്ങളും ഉൾപ്പെടുത്തിയിട്ടുണ്ട്. ക്ലച്ച്, ബ്രേക്ക് ലിവറുകൾ ക്രമീകരിക്കാനുള്ള സൗകര്യവും ലഭിക്കും. ക്ലച്ച് പ്രവർത്തനം കൂടുതൽ ലഘൂകരിക്കാനും റൈഡിംഗ് എളുപ്പമാക്കാനും ഈ സംവിധാനം സഹായിക്കുമെന്ന് റോയൽ എൻഫീൽഡ് പറയുന്നു. നഗര യാത്രകളിൽ ഇടയ്ക്കിടെ ക്ലച്ചും ഗിയറുകളും ഉപയോഗിക്കേണ്ടി വരുന്ന റൈഡർമാർക്ക് ഇത് പ്രയോജനപ്പെടും. ദീർഘദൂര യാത്രകളിലും റൈഡിംഗ് അനുഭവം മെച്ചപ്പെടുത്താൻ ഈ സവിശേഷതകൾ സഹായിക്കും.

യുഎസ്ബി ടൈപ്പ്-സി, ട്രിപ്പർ പോഡ് സ്റ്റാൻഡേർഡ്

പുതിയ വേരിയന്റിൽ യുഎസ്ബി ടൈപ്പ്-സി ഫാസ്റ്റ് ചാർജിംഗ് പോർട്ടും സ്റ്റാൻഡേർഡായി നൽകിയിട്ടുണ്ട്. യാത്രയ്ക്കിടെ സ്മാർട്ട്‌ഫോൺ ഉൾപ്പെടെയുള്ള അനുയോജ്യമായ ഉപകരണങ്ങൾ ചാർജ് ചെയ്യാൻ ഇതിലൂടെ സാധിക്കും. ട്രിപ്പർ പോഡും എല്ലാ മോഡലുകളിലും ലഭ്യമാണ്. ടേൺ-ബൈ-ടേൺ നാവിഗേഷൻ സൗകര്യം നൽകുന്ന സംവിധാനമാണിത്. റൈഡർമാർക്ക് യാത്രയ്ക്കിടെ വഴികണ്ടെത്തുന്നത് കൂടുതൽ എളുപ്പമാക്കുകയാണ് ട്രിപ്പർ പോഡിന്റെ ലക്ഷ്യം. പുതിയ സിഗ്നേച്ചർ വൈറ്റ് എഡിഷനിലൂടെ ക്ലാസിക് 350യുടെ പരമ്പരാഗത രൂപവും ആധുനിക സാങ്കേതിക സവിശേഷതകളും ഒരുമിച്ച് നൽകാനാണ് റോയൽ എൻഫീൽഡ് ശ്രമിക്കുന്നത്.

ജാവ 42 ഓൾ സ്റ്റാർസ്: ബുള്ളറ്റിന് പുതിയ വെല്ലുവിളി?

Prashobh Prasannan — Thu, 10 Sep 2026 15:20:22 +0530

റോയൽ എൻഫീൽഡ് ബുള്ളറ്റ് 350, ഹണ്ടർ 350 തുടങ്ങിയ മോഡലുകൾക്ക് വെല്ലുവിളിയുമായി ജാവയുടെ പുതിയ മോട്ടോർസൈക്കിൾ ഇന്ത്യൻ വിപണിയിൽ എത്തി. ജാവ യെസ്ഡി മോട്ടോർസൈക്കിൾസ് പുതിയ ജാവ 42 ഓൾ സ്റ്റാർസ് ആണ് പുറത്തിറക്കിയത്. 179,942 രൂപ എക്സ്-ഷോറൂം വിലയുള്ള മോട്ടോർസൈക്കിൾ, കമ്പനിയുടെ പുതിയ ഓൾ സ്റ്റാർസ് ശ്രേണിയിലെത്തുന്ന മൂന്നാമത്തെ മോഡലാണ്.

2018ന് ശേഷമുള്ള ഏറ്റവും വലിയ അപ്‌ഗ്രേഡ്

2018ൽ പുറത്തിറങ്ങിയ ജാവ 42ന്റെ ഏറ്റവും വലിയ അപ്‌ഗ്രേഡാണ് പുതിയ മോഡലെന്ന് കമ്പനി പറയുന്നു. ആധുനിക ക്ലാസിക് ഡിസൈൻ നിലനിർത്തിക്കൊണ്ടുതന്നെ കൂടുതൽ മസ്‍കുലാർ രൂപമാണ് പുതിയ 42ന് നൽകിയിരിക്കുന്നത്. പുനർരൂപകൽപ്പന ചെയ്ത സൈഡ് പാനലുകൾ, വീതിയേറിയ മുൻ ടയർ, പുതിയ അലോയ് വീലുകൾ, അപ്‌സ്വെപ്റ്റ് ചെയ്ത ട്വിൻ എക്‌സ്‌ഹോസ്റ്റ് മഫ്‌ളർ, വീതിയേറിയ പിൻ ടയർ എന്നിവയാണ് പ്രധാന ഡിസൈൻ മാറ്റങ്ങൾ. പിന്നിൽ 150/70-17 ടയറും പുതുക്കിയ ഫെൻഡറും നൽകിയിട്ടുണ്ട്.

790 എംഎം സീറ്റ്

ജാവയുടെ സിഗ്നേച്ചർ ഫ്ലാറ്റ് ബെഞ്ച് സീറ്റ് ഡിസൈൻ പുതിയ മോഡലിലും തുടരുന്നു. 790 എംഎം സീറ്റ് മികച്ച കുഷ്യനിംഗോടെയാണ് ഒരുക്കിയിരിക്കുന്നത്. ഫ്രെയിം കാഠിന്യം, സ്വിംഗാർം, ഭാരം വിതരണം എന്നിവയിലും മാറ്റങ്ങൾ വരുത്തിയതായി കമ്പനി വ്യക്തമാക്കി. ഇതിലൂടെ ബൈക്കിന്റെ ഹാൻഡ്‌ലിംഗ് മെച്ചപ്പെടുകയും നഗരത്തിലെ തിരക്കേറിയ റോഡുകളിൽ കൂടുതൽ എളുപ്പത്തിൽ കൈകാര്യം ചെയ്യാൻ സാധിക്കുകയും ചെയ്യുമെന്ന് ജാവ പറയുന്നു.

294.72 സിസി എൻജിൻ

294.72 സിസി, സിംഗിൾ സിലിണ്ടർ, ലിക്വിഡ് കൂൾഡ് ഡിഒഎച്ച്സി എൻജിനാണ് ജാവ 42 ഓൾ സ്റ്റാർസിന് കരുത്തേകുന്നത്. 6-സ്പീഡ് ഗിയർബോക്‌സാണ് ട്രാൻസ്മിഷൻ. മുന്നിലും പിന്നിലും ഡിസ്ക് ബ്രേക്കുകൾ നൽകിയിട്ടുണ്ട്. ഡ്യുവൽ ചാനൽ എബിഎസ് സ്റ്റാൻഡേർഡായി ലഭിക്കും.

6 നിറങ്ങൾ, വില 1.89 ലക്ഷം വരെ

ജാവ 42 ഓൾ സ്റ്റാർസ് ആറ് നിറങ്ങളിൽ ലഭിക്കും. എക്സ്-ഷോറൂം വില ₹179,942 മുതൽ ₹189,942 വരെയാണ്. ഇന്ത്യയിലുടനീളമുള്ള ജാവ യെസ്ഡി ഡീലർഷിപ്പുകളിൽ ബുക്കിങ് ആരംഭിച്ചു. ഉത്സവ സീസണിന് മുന്നോടിയായി 2026 സെപ്റ്റംബർ 14 മുതൽ ഉപഭോക്തൃ ഡെലിവറികൾ ആരംഭിക്കുമെന്നാണ് പ്രതീക്ഷിക്കുന്നത്. റോയൽ എൻഫീൽഡ് ബുള്ളറ്റ് 350, ഹണ്ടർ 350, ഹോണ്ട സി ബി 350 തുടങ്ങിയ മോഡലുകളാണ് ജാവ 42 ഓൾ സ്റ്റാർസിന്റെ പ്രധാന എതിരാളികൾ.

ഐക്യൂബ് മില്യൺ: ടിവിഎസിന്‍റെ ആഘോഷ പതിപ്പ് വിപണിയിൽ

Prashobh Prasannan — Mon, 31 Aug 2026 12:51:22 +0530

ഇന്ത്യൻ ഇലക്ട്രിക് സ്‍കൂട്ടർ വിപണിയിൽ ശ്രദ്ധേയ നേട്ടവുമായി ടിവിഎസ് ഐക്യൂബ്. 2020ൽ വിപണിയിലെത്തിയ ഐക്യൂബ് രാജ്യത്ത് പത്ത് ലക്ഷം യൂണിറ്റ് വിൽപ്പന എന്ന നാഴികക്കല്ല് പിന്നിട്ടു. ഈ നേട്ടം ആഘോഷിക്കുന്നതിന്റെ ഭാഗമായി ഐക്യൂബിന്റെ പ്രത്യേക പതിപ്പ് അവതരിപ്പിച്ചിരിക്കുകയാണ് ടിവിഎസ്. ഐക്യൂബ് മില്യൺ എന്ന പേരിലാണ് പരിമിത പതിപ്പ് വിപണിയിലെത്തുന്നത്. കർണാടകയിലെ എക്സ്-ഷോറൂം വില 1,48,138 രൂപയാണ്. 3.5 കിലോവാട്ട് മണിക്കൂർ ബാറ്ററിയുള്ള സാധാരണ ഐക്യൂബിനെ അപേക്ഷിച്ച് ഏകദേശം 1448 രൂപ കുറവിലാണ് പ്രത്യേക പതിപ്പ് ലഭിക്കുന്നത്.

പുതിയ നിറവും പ്രത്യേക ബാഡ്‍ജും

ഐക്യൂബ് മില്യൺ പതിപ്പിന്റെ പ്രധാന ആകർഷണം പുതിയ രൂപകൽപ്പനയാണ്. നോർത്തേൺ ലൈറ്റ്സിൽ നിന്ന് പ്രചോദനം ഉൾക്കൊണ്ട ഇരട്ട നിറത്തിലുള്ള ബോഡി, പുതിയ ഗ്രാഫിക്സ് എന്നിവ സ്‍കൂട്ടറിന് വ്യത്യസ്‍തമായ രൂപം നൽകുന്നു. ബോഡി പാനലുകളിൽ നൽകിയിരിക്കുന്ന മില്യൺ ആർ പ്രത്യേക പതിപ്പ് ബാഡ്‍ജും സാധാരണ ഐക്യൂബിൽ നിന്ന് വാഹനത്തെ വേറിട്ടുനിർത്തുന്നു. ബ്രൗൺ നിറത്തിലുള്ള സീറ്റും പുതിയ അപ്ഹോൾസ്റ്ററിയും പ്രത്യേക പതിപ്പിന്റെ ഭാഗമാണ്.

കൂടുതൽ സ്റ്റോറേജ് സൗകര്യം

ഉപയോക്താക്കളുടെ ദൈനംദിന ആവശ്യങ്ങൾ പരിഗണിച്ച് സ്‍കൂട്ടറിൽ പുതിയ സ്റ്റോറേജ് സൗകര്യവും ഉൾപ്പെടുത്തിയിട്ടുണ്ട്. മുന്നിൽ അധിക സ്റ്റോറേജ് കമ്പാർട്ട്മെന്റ് നൽകിയിട്ടുണ്ട്. ഇതോടെ ഐക്യൂബിന്റെ മൊത്തം സ്റ്റോറേജ് ശേഷി 32 ലിറ്ററിൽ നിന്ന് 35.5 ലിറ്ററായി ഉയർന്നു. മൊബൈൽ ഫോണുകളും മറ്റ് ഉപകരണങ്ങളും എളുപ്പത്തിൽ ചാർജ് ചെയ്യുന്നതിനായി യു.എസ്.ബി ടൈപ്പ്-സി ചാർജിങ് പോർട്ടും ലഭിക്കും.

ബാറ്ററിയിലും മാറ്റമില്ല

പ്രത്യേക പതിപ്പിലും 3.5 കിലോവാട്ട് മണിക്കൂർ ശേഷിയുള്ള ബാറ്ററി പാക്കാണ് ഉപയോഗിക്കുന്നത്. 4.4 കിലോവാട്ട് ശേഷിയുള്ള ഹബ് മൗണ്ടഡ് വൈദ്യുത മോട്ടോറാണ് സ്‍കൂട്ടറിന് കരുത്തേകുന്നത്. ഒറ്റ ചാർജിൽ 145 കിലോമീറ്റർ വരെ ഐഡിസി പരിധി ലഭിക്കുമെന്നാണ് ടിവിഎസ് അവകാശപ്പെടുന്നത്. മണിക്കൂറിൽ 82 കിലോമീറ്ററാണ് പരമാവധി വേഗത. പത്ത് ലക്ഷം വിൽപ്പന എന്ന വലിയ നേട്ടത്തിന് പിന്നാലെ അവതരിപ്പിച്ച ഐക്യൂബ് മില്യൺ പതിപ്പിലൂടെ ഇലക്ട്രിക് സ്‍കൂട്ടർ ശ്രേണിയിലെ തങ്ങളുടെ ജനപ്രീതി കൂടുതൽ ശക്തമാക്കാനാണ് ടിവിഎസ് ലക്ഷ്യമിടുന്നത്.

റോയൽ എൻഫീൽഡിനെ നേരിടാൻ ട്രയംഫിന്‍റെ പുതിയ ബൈക്ക് വരുന്നു

Prashobh Prasannan — Fri, 18 Sep 2026 16:46:31 +0530

രാജ്യത്തെ ബൈക്ക് പ്രേമികൾക്ക് സന്തോഷവാർത്ത. ട്രയംഫ് മോട്ടോർസൈക്കിൾസ് പുതിയ ബോണവില്ലെ 400 ഇന്ത്യൻ വിപണിയിൽ അവതരിപ്പിക്കാനൊരുങ്ങുന്നതായി റിപ്പോർട്ട്. 2026 ദീപാവലിക്ക് മുമ്പ് തന്നെ ബൈക്ക് വിപണിയിലെത്തുമെന്നാണ് പ്രതീക്ഷിക്കുന്നത്. ട്രയംഫിന്റെ നിലവിലെ 400 സിസി ശ്രേണിയിലെ മറ്റ് മോഡലുകളെപ്പോലെ പുതിയ ബൈക്കും പൂനെയിലെ ബജാജ് ഓട്ടോ പ്ലാന്റിലാകും നിർമ്മിക്കുക. പ്രാദേശികമായി നിർമ്മിക്കുന്നതിലൂടെ വില മത്സരാധിഷ്ഠിതമായി നിലനിർത്താനും റെട്രോ രൂപകൽപ്പന ഇഷ്ടപ്പെടുന്ന കൂടുതൽ ഉപഭോക്താക്കളിലേക്ക് എത്താനും കമ്പനിക്ക് സാധിച്ചേക്കും.

ക്ലാസിക് ലുക്കുമായി ബോണവില്ലെ 400

റോയൽ എൻഫീൽഡ് ക്ലാസിക് 350, ഹോണ്ട സി ബി350 തുടങ്ങിയ റെട്രോ മോട്ടോർസൈക്കിളുകളോട് മത്സരിക്കാനാണ് ബോണവില്ലെ 400 എത്തുന്നത്. നിവർന്നുള്ള റൈഡിങ് പൊസിഷൻ, നീളമുള്ള പരന്ന സീറ്റ്, വയർ-സ്പോക്ക് വീലുകൾ, ഡ്യുവൽ റിയർ ഷോക്ക് അബ്സോർബറുകൾ, ക്രോം ഫിനിഷ് എന്നിവ ബൈക്കിൽ പ്രതീക്ഷിക്കാം. പുറത്തുവന്ന സ്പൈ ചിത്രങ്ങളിൽ ടെലിസ്കോപ്പിക് ഫ്രണ്ട് ഫോർക്കുകൾ കാണാം. സ്പീഡ് 400ൽ ഉപയോഗിക്കുന്ന അപ്‌സൈഡ്-ഡൗൺ ഫോർക്കുകളിൽ നിന്ന് വ്യത്യസ്തമാണിത്. ക്ലാസിക് രൂപഭാവം കൂടുതൽ ശക്തമാക്കാനാണ് ടെലിസ്കോപ്പിക് ഫോർക്കുകൾ ഉപയോഗിക്കുന്നതെന്നാണ് സൂചന.

വിന്റേജ് രൂപത്തിൽ കൂടുതൽ പ്രത്യേകതകൾ

ടിയർഡ്രോപ്പ് ആകൃതിയിലുള്ള ഇന്ധന ടാങ്ക്, വൃത്താകൃതിയിലുള്ള എൽഇഡി ഹെഡ്‌ലൈറ്റ്, വലുപ്പമേറിയ മഡ്‌ഗാർഡുകൾ, വൃത്താകൃതിയിലുള്ള സൈഡ് പാനലുകൾ എന്നിവയും ബോണവില്ലെ 400ൽ പ്രതീക്ഷിക്കുന്നു. വിന്റേജ് ശൈലിയിലുള്ള എക്‌സ്‌ഹോസ്റ്റും ബൈക്കിന്റെ പരമ്പരാഗത റോഡ്‌സ്റ്റർ രൂപത്തിന് കൂടുതൽ ആകർഷണം നൽകും. വയർ-സ്പോക്ക് വീലുകളും ട്യൂബ്ഡ് ടയറുകളും ഉപയോഗിച്ചുള്ള പരീക്ഷണ ബൈക്കുകളുടെ ദൃശ്യങ്ങളും പുറത്തുവന്നിട്ടുണ്ട്. ട്യൂബ്ലെസ് ടയറുകളെ അപേക്ഷിച്ച് ട്യൂബ്ഡ് ടയറുകളിലെ പഞ്ചർ പരിഹരിക്കുന്നതിന് കൂടുതൽ സമയം ആവശ്യമായി വന്നേക്കും.

36.5 ബിഎച്ച്പി പവർ പ്രതീക്ഷിക്കാം

ട്രയംഫിന്റെ 349 സിസി, സിംഗിൾ സിലിണ്ടർ, ലിക്വിഡ് കൂൾഡ് എൻജിനായിരിക്കും ബോണവില്ലെ 400ന് കരുത്തേകുകയെന്നാണ് റിപ്പോർട്ട്. കമ്പനിയുടെ നിലവിലെ 400 സിസി മോഡലുകളിലെ എൻജിൻ സജ്ജീകരണത്തിന്റെ അടിസ്ഥാനത്തിൽ ഏകദേശം 36.5 ബിഎച്ച്പി പവറും 32 എൻഎം ടോർക്കും ഉൽപ്പാദിപ്പിക്കാൻ പുതിയ ബൈക്കിന് സാധിച്ചേക്കും. 6 സ്പീഡ് ഗിയർബോക്സുമായി എൻജിൻ ഘടിപ്പിക്കുമെന്നാണ് പ്രതീക്ഷിക്കുന്നത്.

ക്ലാസിക് 350യെക്കാൾ കൂടുതൽ പവർ

റോയൽ എൻഫീൽഡ് ക്ലാസിക് 350യിലെ 349 സിസി എൻജിൻ 20.2 ബിഎച്ച്പി പവറും 27 എൻഎം ടോർക്കുമാണ് ഉൽപ്പാദിപ്പിക്കുന്നത്. ഹോണ്ട സി ബി350യിലെ 348.6 സിസി എൻജിൻ ഏകദേശം 21 ബിഎച്ച്പി പവറും 29.5 എൻഎം ടോർക്കും നൽകുന്നു. ഇതിനേക്കാൾ ഉയർന്ന പവർ നൽകാൻ ബോണവില്ലെ 400ന് സാധിക്കുമെന്നാണ് പ്രതീക്ഷ. എന്നാൽ ഉയർന്ന പവർ മാത്രം പോരാ. ദൈനംദിന ഉപയോഗത്തിൽ സുഗമവും സുഖകരവുമായ റൈഡിങ് അനുഭവം ഉറപ്പാക്കാൻ എൻജിനും ഷാസിയും അനുയോജ്യമായി ക്രമീകരിക്കേണ്ടതുണ്ട്.

വില എത്രയാകും?

ബോണവില്ലെ 400ന്റെ വില ട്രയംഫ് ഇതുവരെ ഔദ്യോഗികമായി പ്രഖ്യാപിച്ചിട്ടില്ല. ഏകദേശം ₹2.3 ലക്ഷം മുതൽ ₹2.6 ലക്ഷം വരെ എക്സ്-ഷോറൂം വില പ്രതീക്ഷിക്കപ്പെടുന്നു. ഈ വില പരിധിയിൽ എത്തിയാൽ റോയൽ എൻഫീൽഡ് ക്ലാസിക് 350, ഹോണ്ട സി ബി350 തുടങ്ങിയ മോഡലുകളുമായി നേരിട്ട് മത്സരിക്കാൻ ബോണവില്ലെ 400ന് സാധിക്കും. റെട്രോ ഡിസൈൻ നിലനിർത്തുന്നതിനൊപ്പം കൂടുതൽ പവർ ആഗ്രഹിക്കുന്ന ഉപഭോക്താക്കളെയും പുതിയ ബൈക്ക് ലക്ഷ്യമിടും.

ട്രയംഫിന്റെ 400 സിസി ശ്രേണി വിപുലമാകും

ബോണവില്ലെ 400 കൂടി എത്തുന്നതോടെ ഇന്ത്യയിലെ ട്രയംഫിന്റെ 400 സിസി ശ്രേണി കൂടുതൽ വിപുലമാകും. സ്പീഡ് 400, സ്പീഡ് ടി4, സ്ക്രാംബ്ലർ 400 എക്സ്, സ്ക്രാംബ്ലർ 400 എക്സ്സി, ത്രക്സ്റ്റൺ 400, ട്രാക്കർ 400 തുടങ്ങിയ മോഡലുകൾ ഇതിനകം ഈ വിഭാഗത്തിലുണ്ട്. ബോണവില്ലെ 400ന്റെ ലോഞ്ച് തീയതി, കൃത്യമായ സാങ്കേതിക സവിശേഷതകൾ, ഔദ്യോഗിക വില എന്നിവ സംബന്ധിച്ച് ട്രയംഫിന്റെ പ്രഖ്യാപനം വരാനുണ്ട്.

പുതിയ ട്രയംഫ് ഡേറ്റോണ 660 എത്തി; മാറ്റങ്ങൾ എന്തൊക്കെ?

Prashobh Prasannan — Wed, 23 Sep 2026 15:56:07 +0530

പുതിയ ഫീച്ചറുകളുമായി ട്രയംഫിന്റെ ഡേറ്റോണ 660 ഇന്ത്യൻ വിപണിയിൽ എത്തി. ട്രയംഫ് മോട്ടോർസൈക്കിൾസ് ഇന്ത്യ പുതുക്കിയ 2026 ഡേറ്റോണ 660 ആണ് അവതരിപ്പിച്ചത്. 9.99 ലക്ഷം രൂപയാണ് ബൈക്കിന്റെ എക്സ്-ഷോറൂം വില. മുൻ മോഡലിനെ അപേക്ഷിച്ച് 11,000 രൂപയുടെ വില വർധനവാണ് പുതിയ പതിപ്പിന് ഉണ്ടായിരിക്കുന്നത്. വില കൂടിയെങ്കിലും നിരവധി പ്രധാന അപ്‌ഡേറ്റുകളാണ് ഇത്തവണ ബൈക്കിൽ ഉൾപ്പെടുത്തിയിരിക്കുന്നത്.

പുതിയ ഫ്രണ്ട് സസ്‌പെൻഷൻ

2026 ഡേറ്റോണ 660-ലെ ഏറ്റവും ശ്രദ്ധേയമായ മാറ്റങ്ങളിലൊന്ന് ഫ്രണ്ട് സസ്‌പെൻഷനിലാണ്. കംപ്രഷനും റീബൗണ്ട് ഡാമ്പിംഗും ക്രമീകരിക്കാൻ കഴിയുന്ന 41 മില്ലിമീറ്റർ ഷോവ യുഎസ്ഡി ഫോർക്ക് പുതിയ മോഡലിന് ലഭിച്ചു. മുൻ മോഡലിലെ ഫ്രണ്ട് ഫോർക്ക് ക്രമീകരിക്കാൻ കഴിയാത്തതായിരുന്നു. പുതിയ സംവിധാനത്തോടെ റൈഡറുടെ ആവശ്യത്തിനനുസരിച്ച് സസ്‌പെൻഷൻ സജ്ജീകരിക്കാൻ സാധിക്കും. ഫ്രണ്ട് സസ്‌പെൻഷൻ ട്രാവൽ 110 മില്ലിമീറ്ററായി തന്നെ തുടരും. പിന്നിൽ പ്രീലോഡ് ക്രമീകരിക്കാവുന്ന മോണോഷോക്ക് സസ്‌പെൻഷനാണ് നൽകിയിരിക്കുന്നത്. ഇതിന് 130 മില്ലിമീറ്റർ ട്രാവലുണ്ട്.

ക്വിക്ക്ഷിഫ്റ്റർ ഇനി സ്റ്റാൻഡേർഡ്

പുതിയ ഡേറ്റോണ 660-ൽ ബൈ-ഡയറക്ഷണൽ ക്വിക്ക്ഷിഫ്റ്റർ സ്റ്റാൻഡേർഡ് ഫീച്ചറാക്കിയിട്ടുണ്ട്. പഴയ മോഡലിൽ ഇത് അധിക ആക്‌സസറിയായി മാത്രമാണ് ലഭിച്ചിരുന്നത്. അതിനാൽ പുതിയ മോഡൽ സ്വന്തമാക്കുന്നവർക്ക് ക്വിക്ക്ഷിഫ്റ്ററിനായി അധിക തുക ചെലവഴിക്കേണ്ടതില്ല. ഗിയർ മാറ്റങ്ങൾ കൂടുതൽ വേഗത്തിലും സുഗമമായും നടത്താൻ ഈ സംവിധാനം സഹായിക്കും.

പുതിയ ടയറുകളും

ടയറുകളിലും മാറ്റം വരുത്തിയിട്ടുണ്ട്. മുൻ മോഡലിൽ മിഷെലിൻ പവർ 6 ടയറുകളാണ് ഉപയോഗിച്ചിരുന്നത്. പുതിയ ഡേറ്റോണ 660-ൽ മെറ്റ്‌സെലർ എം9 ആർആർ ടയറുകളാണ് നൽകിയിരിക്കുന്നത്. പുതിയ ടയറുകൾ മികച്ച ഗ്രിപ്പും കൂടുതൽ സ്പോർട്ടിയ റൈഡിംഗ് അനുഭവവും നൽകുമെന്നാണ് പ്രതീക്ഷ.

എൻജിനിൽ മാറ്റമില്ല

എൻജിൻ സജ്ജീകരണത്തിൽ കാര്യമായ മാറ്റങ്ങളൊന്നും വരുത്തിയിട്ടില്ല. 660 സിസി ലിക്വിഡ്-കൂൾഡ് ഇൻലൈൻ-3 സിലിണ്ടർ എൻജിൻ തന്നെയാണ് പുതിയ ഡേറ്റോണ 660-ലും ഉപയോഗിക്കുന്നത്. എൻജിൻ ഏകദേശം 95 ബിഎച്ച്പി കരുത്തും 68 എൻഎം ടോർക്കും ഉത്പാദിപ്പിക്കും. 6-സ്പീഡ് ഗിയർബോക്സുമായാണ് എൻജിൻ ബന്ധിപ്പിച്ചിരിക്കുന്നത്. സ്റ്റീൽ പെരിമീറ്റർ ഫ്രെയിം, റേഡിയൽ കാലിപ്പറുകളുള്ള ഇരട്ട ഫ്രണ്ട് ഡിസ്ക് ബ്രേക്കുകൾ, സ്പോർട്ടിയ സ്വഭാവത്തിനൊപ്പം സുഖകരമായ റൈഡിംഗ് പൊസിഷൻ എന്നിവയും പുതിയ മോഡലിൽ തുടരുന്നു.

മൂന്ന് പുതിയ നിറങ്ങൾ

പുതിയ ഡേറ്റോണ 660-ന് മൂന്ന് പുതിയ കളർ ഓപ്ഷനുകളും ട്രയംഫ് അവതരിപ്പിച്ചിട്ടുണ്ട്. അലുമിനിയം സിൽവർ, കോസ്മിക് യെല്ലോ, സഫയർ ബ്ലാക്ക് എന്നിവയാണ് നിറങ്ങൾ. അലുമിനിയം സിൽവർ, കോസ്മിക് യെല്ലോ പതിപ്പുകളിൽ സഫയർ ബ്ലാക്ക് ഹൈലൈറ്റുകൾ നൽകിയിട്ടുണ്ട്. സഫയർ ബ്ലാക്ക് പതിപ്പിന് തിളങ്ങുന്ന ഫിനിഷാണുള്ളത്. ട്രയംഫ് ഇന്ത്യയുടെ വെബ്സൈറ്റിൽ പുതിയ ഡേറ്റോണ 660 ലിസ്റ്റ് ചെയ്തിട്ടുണ്ട്. വരും ആഴ്ചകളിൽ ഡീലർഷിപ്പുകളിൽ വാഹനത്തിന്റെ ഡെലിവറി ആരംഭിക്കുമെന്നാണ് പ്രതീക്ഷ.

റോയൽ എൻഫീൽഡ് വൺ റൈഡ് 2026: ഈ മഹായാത്രയുടെ യഥാർത്ഥ ലക്ഷ്യം?

Prashobh Prasannan — Mon, 28 Sep 2026 14:04:27 +0530

ഐക്കണിക്ക് ടൂവീലർ ബ്രാൻഡായ റോയൽ എൻഫീൽഡിന്റെ ആഗോള റൈഡിങ് പരിപാടിയായ വൺ റൈഡ് 2026ന് വൻ പങ്കാളിത്തം. 60 രാജ്യങ്ങളിൽ നിന്നായി 1.5 ലക്ഷത്തിലധികം റൈഡർമാരാണ് ഇത്തവണ പരിപാടിയുടെ ഭാഗമായത്. 2011ൽ ആരംഭിച്ച വൺ റൈഡിന്റെ ചരിത്രത്തിലെ ഏറ്റവും വലിയ പതിപ്പായി 2026ലെ പരിപാടി മാറിയെന്ന് റോയൽ എൻഫീൽഡ് അറിയിച്ചു. സെപ്റ്റംബർ 20നായിരുന്നു വൺ റൈഡ് 2026 സംഘടിപ്പിച്ചത്. വിവിധ രാജ്യങ്ങളിലും മേഖലകളിലുമായി 1,600ലധികം റൈഡുകളാണ് ഇതിന്റെ ഭാഗമായി നടന്നത്. റോയൽ എൻഫീൽഡ് 125-ാം വാർഷികം ആഘോഷിക്കുന്ന വേളയിലാണ് ഇത്തവണത്തെ വൺ റൈഡ് സംഘടിപ്പിച്ചത്.

ലക്ഷ്യം ഹിമപ്പുലി സംരക്ഷണം

“ഓരോ റൈഡറും. ഓരോ റോഡും. ഒരേയൊരു ദൗത്യം” എന്ന ആശയത്തിലായിരുന്നു ഈ വർഷത്തെ വൺ റൈഡ്. മഞ്ഞുപുലി സംരക്ഷണത്തിനും ഹിമാലയൻ പരിസ്ഥിതി വ്യവസ്ഥയുടെ സംരക്ഷണത്തിനുമാണ് ഇത്തവണ പരിപാടി പ്രധാനമായും ശ്രദ്ധ നൽകിയത്. വൺ റൈഡ് 2026ൽ പങ്കെടുത്ത ഓരോ റൈഡർക്കും വേണ്ടി മഞ്ഞുപുലി സംരക്ഷണ പ്രവർത്തനങ്ങൾക്ക് സംഭാവന നൽകുമെന്ന് റോയൽ എൻഫീൽഡ് പ്രഖ്യാപിച്ചിട്ടുണ്ട്. ഹിമാലയൻ മേഖലയിലെ സംരക്ഷണ പ്രവർത്തനങ്ങളുമായി ബന്ധപ്പെട്ട് കമ്പനി നേരത്തെ തന്നെ വിവിധ പദ്ധതികൾ നടപ്പാക്കുന്നുണ്ട്.

10,500 ചതുരശ്ര കിലോമീറ്റർ ആവാസവ്യവസ്ഥ

ഹിമാചൽ പ്രദേശ്, ലഡാക്ക്, ഉത്തരാഖണ്ഡ്, സിക്കിം, ജമ്മു കശ്മീർ തുടങ്ങിയ മേഖലകളിലാണ് റോയൽ എൻഫീൽഡിന്റെ സാമൂഹിക ദൗത്യ പദ്ധതികൾ പ്രധാനമായും പ്രവർത്തിക്കുന്നത്. കമ്പനിയുടെ കണക്കനുസരിച്ച് 10,500 ചതുരശ്ര കിലോമീറ്ററിലധികം വരുന്ന മഞ്ഞുപുലി ആവാസവ്യവസ്ഥയിലാണ് സംരക്ഷണ പദ്ധതികൾ വ്യാപിച്ചുകിടക്കുന്നത്. ഇതിൽ 53 ചതുരശ്ര കിലോമീറ്റർ പ്രദേശം സമൂഹാധിഷ്ഠിത സംരക്ഷണ പദ്ധതികളുടെ പരിധിയിലാണ്. ഇന്ത്യയിൽ ഏകദേശം 718 ഹിമപ്പുലികളുണ്ടെന്നാണ് കണക്കാക്കപ്പെടുന്നത്.

1,600ലേറെ റൈഡുകൾ

വർഷങ്ങളായി വൺ റൈഡ് ഒരു ആഗോള റൈഡിങ് പരിപാടിയായി വളർന്നിട്ടുണ്ട്. വിവിധ രാജ്യങ്ങളിലും വ്യത്യസ്ത ഭൂപ്രദേശങ്ങളിലുമായി റൈഡർമാർ ഒരുമിച്ച് യാത്ര ചെയ്യുന്നതാണ് പരിപാടിയുടെ പ്രത്യേകത. 2026ലെ പതിപ്പിൽ 60 രാജ്യങ്ങളിലായി 1,600ലധികം റൈഡുകൾ സംഘടിപ്പിച്ചു. മഞ്ഞുപുലി സംരക്ഷണം ഉൾപ്പെടെയുള്ള പരിസ്ഥിതി വിഷയങ്ങളിലേക്കും റൈഡർമാരുടെ ശ്രദ്ധ എത്തിക്കുന്ന രീതിയിലായിരുന്നു പരിപാടി.

ഒക്ടോബർ 23ന് അടുത്ത പ്രഖ്യാപനം

സെപ്റ്റംബർ 20ന് വൺ റൈഡ് 2026 അവസാനിച്ചെങ്കിലും സംരക്ഷണ ദൗത്യവുമായി ബന്ധപ്പെട്ട പ്രവർത്തനങ്ങൾ തുടരും. ഒക്ടോബർ 23ന് അന്താരാഷ്ട്ര മഞ്ഞുപുലി ദിനത്തോടനുബന്ധിച്ച് പരിപാടിയുടെ അടുത്ത ഘട്ടം പ്രഖ്യാപിക്കും. അന്നേ ദിവസം ഗ്ലോബൽ വൺ റൈഡ് 2026 ആഫ്റ്റർമൂവിയും റോയൽ എൻഫീൽഡ് പുറത്തിറക്കും. ലോകത്തിന്റെ വിവിധ ഭാഗങ്ങളിൽ നടന്ന റൈഡുകളുടെയും റൈഡർമാരുടെ പങ്കാളിത്തത്തിന്റെയും ദൃശ്യങ്ങൾ ഉൾപ്പെടുന്നതായിരിക്കും ഈ ചിത്രം. വൺ റൈഡ് 2026ന്റെ ഭാഗമായി മഞ്ഞുപുലി സംരക്ഷണത്തിനായി കമ്പനി നൽകിയ വാഗ്ദാനത്തിന്റെ ആകെ സംഭാവനയും ഒക്ടോബർ 23ന് പ്രഖ്യാപിക്കും. മഞ്ഞുപുലികളെയും ഹിമാലയൻ പരിസ്ഥിതി വ്യവസ്ഥയെയും സംരക്ഷിക്കുന്നതിനുള്ള പ്രവർത്തനങ്ങൾക്കായാണ് ഈ തുക ഉപയോഗിക്കുക.

കാവസാക്കി വേർസിസ് 650: പുതിയ നിറത്തിൽ, അതേ കരുത്തിൽ; വില?

Prashobh Prasannan — Mon, 31 Aug 2026 14:54:58 +0530

കാവസാക്കി ഇന്ത്യ തങ്ങളുടെ ജനപ്രിയ അഡ്വഞ്ചർ ടൂറർ മോഡലായ വേർസിസ് 650-ന്റെ 2027 പതിപ്പ് വിപണിയിലെത്തിച്ചു. 8.63 ലക്ഷം രൂപയാണ് പുതിയ മോഡലിന്റെ എക്സ്-ഷോറൂം വില. വലിയ മെക്കാനിക്കൽ മാറ്റങ്ങളൊന്നും വരുത്താതെയാണ് പുതിയ മോഡൽ വർഷ പതിപ്പ് എത്തിയിരിക്കുന്നത്. എന്നാൽ പുതിയ നിറം വേർസിസ് 650-ന് കൂടുതൽ ശ്രദ്ധേയമായ രൂപം നൽകുന്നു. കാൻഡി ലൈം ഗ്രീൻ എന്ന പുതിയ പെയിന്റ് സ്‍കീമാണ് 2027 മോഡലിന്റെ പ്രധാന ആകർഷണം.

പുതിയ നിറം മാത്രം, ബാക്കി എല്ലാം പഴയത്

2027 വേർസിസ് 650 നിലവിൽ കാൻഡി ലൈം ഗ്രീൻ നിറത്തിൽ മാത്രമാണ് ലഭ്യമാകുന്നത്. കാവസാക്കിയുടെ പരമ്പരാഗത പച്ച നിറത്തിന് കൂടുതൽ തിളക്കമുള്ള പുതിയ രൂപമാണ് ഈ നിറം നൽകുന്നത്. നിറം ഒഴികെ ബൈക്കിന്റെ ഡിസൈനിൽ കാര്യമായ മാറ്റങ്ങളൊന്നുമില്ല. എൻജിൻ, ഫ്രെയിം, സസ്പെൻഷൻ, ഇലക്ട്രോണിക്സ്, ഫീച്ചറുകൾ എന്നിവയെല്ലാം മുൻ മോഡലിൽ നിന്ന് അതേപടി തുടരുന്നു.

649 സിസി എൻജിൻ; 67 ബിഎച്ച്പി കരുത്ത്

649 സിസി, ലിക്വിഡ് കൂൾഡ്, പാരലൽ ട്വിൻ എൻജിനാണ് വേർസിസ് 650-ന് കരുത്ത് നൽകുന്നത്. 8,500 ആർപിഎമ്മിൽ 67 ബിഎച്ച്പി പരമാവധി കരുത്തും 7,000 ആർപിഎമ്മിൽ 61 എൻഎം ടോർക്കും എൻജിൻ ഉത്പാദിപ്പിക്കും. 6 സ്പീഡ് ഗിയർബോക്സാണ് എൻജിനുമായി ബന്ധിപ്പിച്ചിരിക്കുന്നത്. ഗിയർ മാറ്റങ്ങൾ കൂടുതൽ സുഗമമാക്കുന്നതിനായി അസിസ്റ്റ് ആൻഡ് സ്ലിപ്പർ ക്ലച്ചും ബൈക്കിൽ നൽകിയിട്ടുണ്ട്.

ദീർഘദൂര യാത്രകൾക്ക് അനുയോജ്യം

ടൂറിങ്ങിനും ദീർഘദൂര യാത്രകൾക്കും പ്രാധാന്യം നൽകി രൂപകൽപ്പന ചെയ്ത മോഡലാണ് വേർസിസ് 650. ട്യൂബുലാർ ഡയമണ്ട് ഫ്രെയിമാണ് ബൈക്കിൽ ഉപയോഗിച്ചിരിക്കുന്നത്. മുൻവശത്ത് 41 എംഎം ടെലിസ്കോപിക് ഫോർക്കാണ് സസ്പെൻഷൻ കൈകാര്യം ചെയ്യുന്നത്. 150 എംഎം ട്രാവലാണ് മുൻ സസ്പെൻഷനുള്ളത്. പിന്നിൽ മോണോഷോക്ക് സസ്പെൻഷൻ 145 എംഎം ട്രാവൽ നൽകുന്നു. പിന്നിലെ സസ്പെൻഷനിൽ റിമോട്ട് പ്രീലോഡ് അഡ്ജസ്റ്ററും നൽകിയിട്ടുണ്ട്. ലഗേജുമായി യാത്ര ചെയ്യുമ്പോഴോ പിന്നിൽ പില്യൺ റൈഡറുണ്ടാകുമ്പോഴോ സസ്പെൻഷൻ ക്രമീകരിക്കാൻ ഈ സംവിധാനം സഹായിക്കും.

ഫീച്ചറുകളിലും മാറ്റമില്ല

2027 മോഡലിലും മുൻ പതിപ്പിലെ ഫീച്ചറുകൾ തന്നെയാണ് തുടരുന്നത്. റൈഡറുടെ സൗകര്യത്തിനനുസരിച്ച് ഉയരം ക്രമീകരിക്കാവുന്ന വിൻഡ്സ്ക്രീൻ ബൈക്കിലുണ്ട്. പൂർണ എൽഇഡി ലൈറ്റിംഗ്, ട്രാക്ഷൻ കൺട്രോൾ, 4.3 ഇഞ്ച് ടിഎഫ്ടി കളർ ഡിസ്പ്ലേ എന്നിവയും ലഭിക്കും. ടിഎഫ്ടി ഡിസ്പ്ലേയിൽ സ്മാർട്ട്ഫോൺ കണക്റ്റിവിറ്റിയും നൽകിയിട്ടുണ്ട്.

21 ലിറ്റർ ഇന്ധന ടാങ്ക്

വേർസിസ് 650-ന്റെ മറ്റൊരു പ്രധാന പ്രത്യേകത 21 ലിറ്റർ ശേഷിയുള്ള വലിയ ഇന്ധന ടാങ്കാണ്. ദീർഘദൂര യാത്രകളിൽ ഇടയ്ക്കിടെ ഇന്ധനം നിറയ്ക്കേണ്ട സാഹചര്യം കുറയ്ക്കാൻ വലിയ ടാങ്ക് സഹായിക്കും. ഫുൾ ടാങ്കുമായി ബൈക്കിന്റെ ഭാരം 220 കിലോഗ്രാമാണ്. 845 എംഎം ആണ് സീറ്റ് ഉയരം. അതിനാൽ ഉയരം കുറഞ്ഞ റൈഡർമാർക്ക് ബൈക്ക് കൈകാര്യം ചെയ്യുന്നത് അൽപ്പം ബുദ്ധിമുട്ടായേക്കാം. 170 എംഎം ഗ്രൗണ്ട് ക്ലിയറൻസ് മോശം റോഡുകളിലും സ്പീഡ് ബ്രേക്കറുകളിലും അസമമായ പാതകളിലും പ്രയോജനപ്പെടും.

ഹോണ്ട എൻഎക്സ്500-ന് എതിരാളി

ഇന്ത്യൻ വിപണിയിൽ മിഡിൽവെയ്റ്റ് ടൂറിങ്, അഡ്വഞ്ചർ ബൈക്ക് വിഭാഗത്തിലാണ് കാവസാക്കി വേർസിസ് 650 മത്സരിക്കുന്നത്. ഹോണ്ട എൻഎക്സ്500 ആണ് പ്രധാന എതിരാളികളിലൊന്ന്. ഹോണ്ട എൻഎക്സ്500-ന് 7.44 ലക്ഷം രൂപയാണ് വില. എന്നാൽ രണ്ട് മോഡലുകളുടെയും സ്വഭാവത്തിൽ വ്യത്യാസമുണ്ട്. വേർസിസ് 650 കൂടുതൽ ടൂറിങ് കേന്ദ്രീകൃതമായാണ് ഒരുക്കിയിരിക്കുന്നത്. അതേസമയം എൻഎക്സ്500 കൂടുതൽ അഡ്വഞ്ചർ റൈഡിങ്ങിലേക്ക് ചായുന്ന രൂപകൽപ്പനയാണ് നൽകുന്നത്.

വില 8.63 ലക്ഷം രൂപ

2027 കാവസാക്കി വേർസിസ് 650-ന് 8.63 ലക്ഷം രൂപയാണ് എക്സ്-ഷോറൂം വില. പുതിയ കാൻഡി ലൈം ഗ്രീൻ നിറമാണ് ഇത്തവണ മോഡലിൽ വരുത്തിയ പ്രധാന മാറ്റം. വലിയ മെക്കാനിക്കൽ പരിഷ്‍കാരങ്ങളൊന്നും ഇല്ലെങ്കിലും ദീർഘദൂര യാത്രകൾക്ക് സുഖകരമായ റൈഡിങ് പൊസിഷനും ശക്തമായ എൻജിനും വലിയ ഇന്ധന ടാങ്കും ഉൾപ്പെടെയുള്ള സവിശേഷതകൾ കാരണം വേർസിസ് 650 ടൂറിങ് പ്രേമികൾക്ക് ശ്രദ്ധേയമായ ഓപ്ഷനായി തുടരുന്നു.

ആംപിയർ സൈബർ: വിപണി ഇളക്കാൻ പുതിയ ഇ-ബൈക്ക്

Prashobh Prasannan — Tue, 01 Sep 2026 15:05:13 +0530

ഇലക്ട്രിക് ഇരുചക്ര വാഹന വിപണിയിൽ പുതിയ നീക്കവുമായി ആംപിയർ. ഗ്രീവ്സ് ഇലക്ട്രിക് മൊബിലിറ്റിയുടെ ഇലക്ട്രിക് ഇരുചക്ര വാഹന ബ്രാൻഡായ ആംപിയർ ഇനി ഇലക്ട്രിക് മോട്ടോർസൈക്കിൾ വിഭാഗത്തിലേക്കും കടക്കുകയാണ്. 2025ലെ ഇന്ത്യ മൊബിലിറ്റി എക്സ്പോയിൽ അവതരിപ്പിച്ച സൈബർ കൺസെപ്റ്റിന്റെ പ്രൊഡക്ഷൻ പതിപ്പിനാണ് കമ്പനി ഒരുങ്ങുന്നതെന്നാണ് റിപ്പോർട്ടുകൾ.

നിലവിൽ ഓല, റിവോൾട്ട്, ഓബെൻ തുടങ്ങിയ കമ്പനികളുടെ ഇലക്ട്രിക് മോട്ടോർസൈക്കിളുകളോട് മത്സരിക്കാനായിരിക്കും പുതിയ മോഡൽ എത്തുക. ഒറ്റ ചാർജിൽ ഏകദേശം 200 കിലോമീറ്റർ റേഞ്ച് നൽകുന്ന വലിയ ബാറ്ററി പായ്ക്കാണ് സൈബറിൽ പ്രതീക്ഷിക്കുന്നത്.

പേറ്റന്‍റ് ലഭിച്ചു; കൺസെപ്റ്റ് രൂപത്തിന് സമാനം

ആംപിയർ സൈബറിന്റെ ഡിസൈനിന് ഇന്ത്യയിൽ പേറ്റന്റ് ലഭിച്ചതായാണ് വിവരം. കഴിഞ്ഞ വർഷം പ്രദർശിപ്പിച്ച കൺസെപ്റ്റ് മോഡലിനോട് ഏറെ സാമ്യമുള്ളതാണ് പേറ്റന്റ് ഡിസൈൻ. വ്യത്യസ്തവും ഭാവിയിലേക്ക് നോക്കിയുള്ളതുമായ രൂപകൽപ്പനയാണ് സൈബറിന്റെ പ്രധാന പ്രത്യേകത. സ്ട്രീറ്റ്-നേക്കഡ് മോട്ടോർസൈക്കിൾ ശൈലിയിലുള്ള വാഹനത്തിൽ ഇന്ധന ടാങ്ക് ഇല്ലാത്തതിനാൽ മുൻഭാഗം മുതൽ പിൻ സബ്ഫ്രെയിം വരെ നീളുന്ന ഒറ്റ ബോഡി പാനലാണ് നൽകിയിരിക്കുന്നത്.

മസ്കുലാർ ഡിസൈനും എൽഇഡി ഹെഡ്‌ലൈറ്റും

ആംപിയർ ലോഗോയും പേരും ഉൾപ്പെടുത്തിയ മസ്കുലാർ ടാങ്ക് ആവരണമാണ് വാഹനത്തിന് നൽകിയിരിക്കുന്നത്. ഹെഡ്‌ലൈറ്റിന് മുകളിലുള്ള ഫ്ലൈസ്‌ക്രീനിലും സമാനമായ ബ്രാൻഡിങ് കാണാം. ടേൺ ഇൻഡിക്കേറ്ററുകൾക്ക് പുറമെ വിംഗ്‌ലെറ്റ് പോലുള്ള ഘടകങ്ങളും ഡിസൈനിന്റെ ഭാഗമാണ്. പൂർണമായും എൽഇഡി ഹെഡ്‌ലൈറ്റാണ് വാഹനത്തിൽ ഉപയോഗിച്ചിരിക്കുന്നത്. ലോ ബീമിന്റെയും ഹൈ ബീമിന്റെയും ഉയരം ക്രമീകരിക്കാൻ രണ്ട് ഡയലുകളും കൺസെപ്റ്റ് മോഡലിൽ നൽകിയിരുന്നു.

ബാറ്ററിയും മോട്ടോറും ലിക്വിഡ് കൂൾഡ്

ചാർജിങ് പോർട്ട് മോട്ടോർസൈക്കിളിന്റെ മുകളിലാണ് നൽകിയിരിക്കുന്നത്. സാധാരണ ഇന്ധന മോട്ടോർസൈക്കിളുകളിൽ ഇന്ധനം നിറയ്ക്കുന്ന ഭാഗത്താണ് ഇത് സ്ഥിതി ചെയ്യുന്നത്. ബാറ്ററിക്ക് ചുറ്റുമുള്ള പ്രത്യേക കേസിങ്ങും ശ്രദ്ധേയമാണ്. ഇരുവശത്തും എയർ ഇൻടേക്കുകൾക്ക് സമാനമായി തോന്നുന്ന ഹീറ്റ് സിങ്ക് രൂപകൽപ്പനയും നൽകിയിട്ടുണ്ട്. ബാറ്ററിയും മോട്ടോറും ലിക്വിഡ് കൂൾഡ് സംവിധാനമുള്ളതായിരിക്കും എന്നാണ് സൂചന.

10 കിലോവാട്ട് മിഡ് മൗണ്ടഡ് മോട്ടോർ

10 കിലോവാട്ട് വരെ, അതായത് ഏകദേശം 13.5 ബിഎച്ച്പി വരെ പവർ നൽകുന്ന മിഡ് മൗണ്ടഡ് ഇലക്ട്രിക് മോട്ടോറായിരിക്കും സൈബറിന്റെ മറ്റൊരു പ്രധാന സവിശേഷത. ചെയിൻ ഡ്രൈവ് വഴിയാണ് പിൻ ചക്രത്തിലേക്ക് മോട്ടോറിന്റെ ശക്തി കൈമാറുക. ഏകദേശം 200 കിലോമീറ്റർ റേഞ്ച് നൽകാൻ ശേഷിയുള്ള വലിയ ബാറ്ററി പാക്കായിരിക്കും വാഹനത്തിൽ ഉപയോഗിക്കുകയെന്നാണ് പ്രതീക്ഷ.

പ്രീമിയം ഹാർഡ്‌വെയറും

സ്പ്ലിറ്റ് സീറ്റുകൾ, സ്പ്ലിറ്റ് ഗ്രാബ് റെയിലുകൾ, സിംഗിൾ പീസ് സ്ട്രീറ്റ്-സ്റ്റൈൽ ഹാൻഡിൽബാർ എന്നിവ സൈബറിന്റെ ഡിസൈനിന്റെ ഭാഗമാണ്. പിൻഭാഗത്ത് വ്യത്യസ്‍തമായ എക്സ് ആകൃതിയിലുള്ള എൽഇഡി ടെയിൽലൈറ്റുകളും നൽകിയിട്ടുണ്ട്. ബ്ലൂടൂത്ത് കണക്റ്റിവിറ്റിയും ഗൂഗിൾ മാപ്പ് പിന്തുണയും ലഭിക്കുന്ന ചെറിയ തിരശ്ചീന ടിഎഫ്ടി ഇൻസ്ട്രുമെന്റ് ക്ലസ്റ്ററും കൺസെപ്റ്റിൽ ഉണ്ടായിരുന്നു. ഈ സംവിധാനം പ്രൊഡക്ഷൻ മോഡലിലും എത്തുമെന്നാണ് പ്രതീക്ഷ.

ഓല, റിവോൾട്ട്, ഓബെൻ എന്നിവരോട് മത്സരം

മുൻവശത്ത് യുഎസ്‍ഡി ഫോർക്കുകളും പിന്നിൽ മോണോ ഷോക്കും മുന്നിലും പിന്നിലും ഡിസ്ക് ബ്രേക്കുകളും കട്ടിയുള്ള ടയറുകളും ഉൾപ്പെടെയുള്ള പ്രീമിയം ഘടകങ്ങളും സൈബറിൽ പ്രതീക്ഷിക്കുന്നു. നിലവിൽ ആംപിയർ സൈബറിന്റെ വിലയോ കൃത്യമായ ലോഞ്ച് തീയതിയോ കമ്പനി പുറത്തുവിട്ടിട്ടില്ല. എന്നാൽ വിപണിയിലെത്തുമ്പോൾ ഓല, റിവോൾട്ട്, ഓബെൻ തുടങ്ങിയ ബ്രാൻഡുകളുടെ ഇലക്ട്രിക് മോട്ടോർസൈക്കിളുകൾക്കായിരിക്കും സൈബർ പ്രധാനമായും വെല്ലുവിളി ഉയർത്തുക. ഇലക്ട്രിക് സ്‍കൂട്ടർ വിഭാഗത്തിൽ നാല് ലക്ഷം വാഹനങ്ങൾ നിർമ്മിച്ചെന്ന നേട്ടത്തിന് പിന്നാലെയാണ് ആംപിയർ മോട്ടോർസൈക്കിൾ വിഭാഗത്തിലേക്കും ചുവടുവയ്ക്കുന്നത്. പുതിയ മോഡൽ എത്തിയാൽ ഇന്ത്യൻ ഇലക്ട്രിക് ഇരുചക്ര വാഹന വിപണിയിലെ മത്സരം കൂടുതൽ ശക്തമാകുമെന്നാണ് പ്രതീക്ഷിക്കുന്നത്.

ഹോണ്ടയുടെ പുതിയ 350 സിസി ബൈക്കുകൾ: ഈ മാറ്റങ്ങൾ ഞെട്ടിക്കുമോ?

Prashobh Prasannan — Thu, 24 Sep 2026 17:33:42 +0530

ഇന്ത്യയിലെ 350 സിസി മോട്ടോർസൈക്കിൾ ശ്രേണി പരിഷ്കരിച്ച് ഹോണ്ട. സിബി350, സിബി350ആർഎസ്, സിബി350സി എന്നീ മോഡലുകൾക്ക് പുതിയ വേരിയന്റുകളും സ്റ്റൈലിംഗ് ഓപ്ഷനുകളുമാണ് കമ്പനി അവതരിപ്പിച്ചിരിക്കുന്നത്. ഹോണ്ട ബിഗ് വിങ് ഡീലർഷിപ്പുകൾ വഴിയായിരിക്കും ഈ ബൈക്കുകളുടെ വിൽപ്പന. പുതുക്കിയ ശ്രേണിയുടെ എക്സ്-ഷോറൂം വില 1,95,200 രൂപ മുതൽ 2,04,700 രൂപ വരെയാണ്. റോയൽ എൻഫീൽഡ് ഉൾപ്പെടെയുള്ള എതിരാളികളോട് മത്സരിക്കുകയാണ് ഹോണ്ടയുടെ 350 സിസി മോഡലുകൾ.

ഹോണ്ട സിബി350; വില 1.95 ലക്ഷം രൂപ മുതൽ

ഹോണ്ട സിബി350 മൂന്ന് വേരിയന്റുകളിലാണ് ലഭ്യമാകുന്നത്. സ്റ്റാൻഡേർഡ് വേരിയന്റിന് 1,95,200 രൂപയും ഡിഎൽഎക്സിന് 1,97,900 രൂപയും ഉയർന്ന ക്രോം വേരിയന്റിന് 1,99,900 രൂപയുമാണ് എക്സ്-ഷോറൂം വില. വൃത്താകൃതിയിലുള്ള ഹെഡ്‌ലാമ്പ്, വൃത്താകൃതിയിലുള്ള ഇന്ധന ടാങ്ക്, ക്രോം ഫിനിഷിലുള്ള വിവിധ ഘടകങ്ങൾ എന്നിവ ഉൾപ്പെടുന്ന ആധുനിക-ക്ലാസിക് ഡിസൈനാണ് സിബി350യുടേത്. പുതിയ കളർ, ട്രിം ഓപ്ഷനുകൾക്കൊപ്പം ക്രോം ഫിനിഷ് ചെയ്ത ഭാഗങ്ങളും ബ്രൗൺ സീറ്റ് ഓപ്ഷനും ലഭിക്കും.

സ്പോർട്ടി ലുക്കുമായി സിബി350ആർഎസ്

കൂടുതൽ സ്പോർട്ടി ഡിസൈനാണ് ഹോണ്ട സിബി350ആർഎസിന് നൽകിയിരിക്കുന്നത്. സ്റ്റാൻഡേർഡ്, ഡിഎൽഎക്സ് എന്നിങ്ങനെ രണ്ട് വേരിയന്റുകളിലാണ് മോഡൽ എത്തുന്നത്. യഥാക്രമം 1,99,900 രൂപയും 2,02,500 രൂപയുമാണ് എക്സ്-ഷോറൂം വില. സിബി350യെ അപേക്ഷിച്ച് ഇരുണ്ട ഫിനിഷുകളും കോൺട്രാസ്റ്റ് ആക്സന്റുകളും കറുത്ത എക്സ്ഹോസ്റ്റും ഫോർക്ക് ഗെയ്‌റ്ററുകളും ചെറിയ പിൻഭാഗവുമാണ് സിബി350ആർഎസിന്റെ പ്രധാന ഡിസൈൻ പ്രത്യേകതകൾ. 350 സിസി വിഭാഗത്തിൽ കൂടുതൽ സ്പോർട്ടി രൂപം ആഗ്രഹിക്കുന്നവരെയാണ് ഈ മോഡൽ ലക്ഷ്യമിടുന്നത്.

മൂന്ന് വേരിയന്റുകളുമായി സിബി350സി

കൂടുതൽ പരമ്പരാഗത ഡിസൈനുമായാണ് ഹോണ്ട സിബി350സി എത്തുന്നത്. സ്റ്റാൻഡേർഡ്, ഡിഎൽഎക്സ്, സ്പെഷ്യൽ എഡിഷൻ എന്നിങ്ങനെ മൂന്ന് വേരിയന്റുകളുണ്ട്. ഇവയ്ക്ക് യഥാക്രമം 2,00,300 രൂപ, 2,02,700 രൂപ, 2,04,700 രൂപ എന്നിങ്ങനെയാണ് എക്സ്-ഷോറൂം വില. വലിയ മഡ്ഗാർഡുകൾ, ടാങ്ക് നീ പാഡുകൾ, ക്രോം എക്സ്ഹോസ്റ്റ്, സ്പ്ലിറ്റ് ബ്രൗൺ സീറ്റുകൾ എന്നിവയാണ് സിബി350സിയുടെ പ്രധാന ഡിസൈൻ സവിശേഷതകൾ. സ്പെഷ്യൽ എഡിഷനാണ് ശ്രേണിയിലെ ഏറ്റവും വില കൂടിയ വേരിയന്റ്.

348.6 സിസി എഞ്ചിൻ

മൂന്ന് മോഡലുകളിലും 348.6 സിസി എയർ-കൂൾഡ്, സിംഗിൾ സിലിണ്ടർ എഞ്ചിനാണ് ഉപയോഗിക്കുന്നത്. ഈ എഞ്ചിൻ 21.07 പിഎസ് കരുത്തും 29.4 എൻഎം ടോർക്കും ഉത്പാദിപ്പിക്കും. 5-സ്പീഡ് ഗിയർബോക്സുമായാണ് എഞ്ചിൻ ബന്ധിപ്പിച്ചിരിക്കുന്നത്. ഹോണ്ട റോഡ്‌സിങ്ക് കണക്റ്റിവിറ്റി, അസിസ്റ്റ്, സ്ലിപ്പർ ക്ലച്ച്, ഡ്യുവൽ-ചാനൽ എബിഎസ് തുടങ്ങിയ സവിശേഷതകളും ലഭ്യമാണ്. എൽഇഡി ലൈറ്റിംഗ്, ഹോണ്ട സെലക്ടബിൾ ടോർക്ക് കൺട്രോൾ, രണ്ട് വീലുകളിലും ഡിസ്ക് ബ്രേക്കുകൾ എന്നിവയും മൂന്ന് മോഡലുകളിലും ഉൾപ്പെടുത്തിയിട്ടുണ്ട്.

വിപണിയെ ഞെട്ടിക്കാൻ ആതർ കൊണാർക്ക്; സവിശേഷതകൾ അറിയാമോ?

Prashobh Prasannan — Thu, 24 Sep 2026 14:51:24 +0530

ഇലക്ട്രിക് സ്‍കൂട്ടർ വിപണിയിൽ പുതിയ മോഡലുമായി ആതർ എനർജി. കമ്പനിയുടെ പുതിയ ഇലക്ട്രിക് സ്‍കൂട്ടറായ ആതർ കൊണാർക്ക് ഇന്ത്യയിൽ അവതരിപ്പിച്ചു. നാലാമത് വാർഷിക കമ്മ്യൂണിറ്റി ദിനത്തിന്റെ ഭാഗമായാണ് പുതിയ സ്‍കൂട്ടർ അവതരിപ്പിച്ചത്. കൊണാർക്കിനൊപ്പം ദൈനംദിന ഉപയോഗം ലക്ഷ്യമിട്ട് വികസിപ്പിച്ച പുതിയ ഇഎൽ പ്ലാറ്റ്‌ഫോമും കമ്പനി അവതരിപ്പിച്ചു. ഒറ്റ ചാർജിൽ 161 കിലോമീറ്റർ വരെ സഞ്ചരിക്കാൻ കഴിയുന്ന മോഡലാണ് കൊണാർക്ക് എസ് 161. ഓട്ടോ ഹോൾഡ്, പാർക്ക് അസിസ്റ്റ്, മാജിക് കീ തുടങ്ങിയ നിരവധി സവിശേഷതകളും സ്‍കൂട്ടറിലുണ്ട്.

ഒരുലക്ഷം രൂപയ്ക്ക് കൊണാർക്ക് എസ് 100

നിലവിൽ എസ്, ഇസഡ് വേരിയന്റുകളിലാണ് ആതർ കൊണാർക്ക് എത്തുന്നത്. എസ് സീരീസിലെ മൂന്ന് മോഡലുകളുടെ വിലയാണ് കമ്പനി പ്രഖ്യാപിച്ചിരിക്കുന്നത്. കൊണാർക്ക് എസ് 100ന് 99,999 രൂപ മുതലാണ് വില. എസ് 125ന് 1,21,999 രൂപയും എസ് 161ന് 1,44,999 രൂപയുമാണ് വില. എല്ലാ വിലകളും എക്സ്-ഷോറൂം ആണ്. ഭാവിയിൽ 200 കിലോമീറ്റർ റേഞ്ചുള്ള മോഡലും കൊണാർക്ക് നിരയിലേക്ക് എത്തിക്കാനാണ് കമ്പനിയുടെ പദ്ധതി. 125 കിലോമീറ്റർ, 161 കിലോമീറ്റർ റേഞ്ചുള്ള കൊണാർക്ക് ഇസഡ് മോഡലുകളും പിന്നീട് അവതരിപ്പിക്കും. ഇസഡ് സീരീസിന്റെ വില കമ്പനി ഇതുവരെ പ്രഖ്യാപിച്ചിട്ടില്ല.

2027ൽ കൂടുതൽ മോഡലുകൾ

കൊണാർക്ക് എസ് 125, എസ് 161 മോഡലുകളുടെ ഡെലിവറി സെപ്റ്റംബറിൽ ആരംഭിക്കുമെന്നാണ് പ്രതീക്ഷിക്കുന്നത്. എസ് 100 മോഡൽ 2027ന്റെ ആദ്യ പാദത്തിൽ വിപണിയിലെത്തും. 200 കിലോമീറ്റർ റേഞ്ചുള്ള എസ് സീരീസ് മോഡൽ 2027ന്റെ മൂന്നാം പാദത്തിൽ അവതരിപ്പിക്കാനാണ് പദ്ധതി. ഇസഡ് സീരീസ് 2027ന്റെ രണ്ടാം പാദത്തിൽ എത്തിയേക്കും.

161 കിലോമീറ്റർ വരെ റേഞ്ച്

ആതറിന്റെ പുതിയ ഇഎൽ പ്ലാറ്റ്‌ഫോമിനെ അടിസ്ഥാനമാക്കിയുള്ള ആദ്യ ഇലക്ട്രിക് സ്കൂട്ടറാണ് കൊണാർക്ക്. ഏകദേശം 2.6 ദശലക്ഷം കിലോമീറ്റർ ഫീൽഡ് ഡാറ്റയുടെ അടിസ്ഥാനത്തിലാണ് പ്ലാറ്റ്‌ഫോം വികസിപ്പിച്ചതെന്ന് കമ്പനി പറയുന്നു. കൊണാർക്ക് എസ് 100ൽ 2.1 കിലോവാട്ട് അവർ ബാറ്ററിയും എസ് 125ൽ 2.7 കിലോവാട്ട് അവർ ബാറ്ററിയും എസ് 161ൽ 3.5 കിലോവാട്ട് അവർ ബാറ്ററിയുമാണ് ഉപയോഗിച്ചിരിക്കുന്നത്. എസ് 100ന് 4 കിലോവാട്ട് പീക്ക് പവറും 16 എൻഎം ടോർക്കുമുണ്ട്. എസ് 125, എസ് 161 മോഡലുകൾക്ക് 4.7 കിലോവാട്ട് പീക്ക് പവറും 16 എൻഎം ടോർക്കുമാണ് ലഭിക്കുന്നത്. മൂന്ന് മോഡലുകളുടെയും പരമാവധി വേഗത 70 കിലോമീറ്റർ ആണ്.

പാർക്കിംഗ് എളുപ്പമാക്കാൻ പാർക്ക് അസിസ്റ്റ്

ദൈനംദിന ഉപയോഗം കൂടുതൽ എളുപ്പമാക്കുന്ന നിരവധി സവിശേഷതകളുമായാണ് കൊണാർക്ക് എത്തുന്നത്. മോട്ടോറിന്റെ സഹായത്തോടെ സ്കൂട്ടർ പിന്നിലേക്ക് നീക്കാൻ പാർക്ക് അസിസ്റ്റ് സഹായിക്കും. വാഹനം നിർത്തിയശേഷം അതേ സ്ഥാനത്ത് തുടരാൻ ഓട്ടോ ഹോൾഡ് സംവിധാനവും സഹായിക്കുന്നു. ഇസഡ് വേരിയന്റിൽ എഇബിഎസ് അഥവാ അഡ്വാൻസ്ഡ് ഇലക്ട്രോണിക് ബ്രേക്കിംഗ് സിസ്റ്റവും ലഭിക്കും. ഇലക്ട്രോണിക് നിയന്ത്രണത്തിലൂടെ ബ്രേക്കിംഗ് മെച്ചപ്പെടുത്താനും നിർത്താനുള്ള ദൂരം കുറയ്ക്കാനും ശക്തമായി ബ്രേക്ക് ചെയ്യുമ്പോൾ പിൻചക്രം ലോക്ക് ആകാനുള്ള സാധ്യത കുറയ്ക്കാനും ഈ സംവിധാനം സഹായിക്കുമെന്ന് കമ്പനി പറയുന്നു.

ആപ്പ് ഉപയോഗിച്ച് ബൂട്ട് തുറക്കാം

മാജിക് കീ സംവിധാനത്തിലൂടെ ആതർ ആപ്പ് ഉപയോഗിച്ച് സ്കൂട്ടറിന്റെ ബൂട്ട് തുറക്കാൻ കഴിയും. കൊണാർക്ക് ഇസഡ് 161ൽ ഈ സംവിധാനത്തോടൊപ്പം ഓട്ടോപോപ്പ് സവിശേഷതയും ലഭിക്കും. ഇതിലൂടെ ബൂട്ട് സ്വമേധയാ തുറക്കാൻ സാധിക്കും.

ഗൂഗിൾ മാപ്സും വാട്ട്‌സ്ആപ്പും

കൊണാർക്ക് ഇസഡിന്റെ ഡാഷ്‌ബോർഡിൽ ഗൂഗിൾ മാപ്സും വാട്ട്‌സ്ആപ്പും ലഭ്യമാകും. സ്‍കൂട്ടർ നിശ്ചലമായിരിക്കുമ്പോൾ ക്രിക്കറ്റ് സ്കോറുകൾ കാണാനുള്ള സൗകര്യവും ഉണ്ടാകും. ആതർ കണക്റ്റ് സബ്‌സ്‌ക്രിപ്‌ഷനിലൂടെ മോഷണ, ടോ അലേർട്ടുകൾ, റൈഡ് സ്റ്റാറ്റിസ്റ്റിക്സ്, ഫൈൻഡ് മൈ സ്‍കൂട്ടർ, റിമോട്ട് ചാർജിംഗ് സ്റ്റാറ്റസ്, ഒടിഎ അപ്‌ഡേറ്റുകൾ തുടങ്ങിയ സൗകര്യങ്ങളും ലഭിക്കും. ടോപ്പ് വേരിയന്റിൽ വെഹിക്കിൾ ഫാൾസേഫും ഉൾപ്പെടുത്തിയിട്ടുണ്ട്. എസ് 125, എസ് 161 മോഡലുകളിൽ എയർവാക്ക് സവിശേഷതയും ലഭിക്കും.

പുതിയ കവാസാക്കി വൾക്കൻ എസ് എത്തി; മാറ്റങ്ങൾ എന്തൊക്കെ?

Prashobh Prasannan — Thu, 17 Sep 2026 14:17:28 +0530

ജാപ്പനീസ് ടൂവീലർ ബ്രാൻഡായ കാവാസാക്കി തങ്ങളുടെ ജനപ്രിയ ക്രൂയിസർ മോട്ടോർസൈക്കിളായ 2027 വൾക്കൻ എസ് ഇന്ത്യയിൽ അവതരിപ്പിച്ചു. ₹8.23 ലക്ഷം ആണ് പുതിയ മോഡലിന്റെ എക്സ്-ഷോറൂം വില. 2026 വൾക്കൻ എസ് മോഡലിനെ അപേക്ഷിച്ച് ഏകദേശം ₹10,000 ആണ് വില വർധിച്ചത്. വില കൂടിയെങ്കിലും ബൈക്കിൽ കാര്യമായ മാറ്റങ്ങൾ വരുത്തിയിട്ടില്ല. എൻജിൻ അടിസ്ഥാനപരമായി അതേപടി തുടരുമ്പോൾ ടോർക്ക് ഔട്ട്പുട്ടിൽ ചെറിയ വർധനവുണ്ട്. ബ്രേക്ക് ഡിസ്കുകളുടെ വലുപ്പത്തിലും മാറ്റം വരുത്തിയിട്ടുണ്ട്. പുതിയ കളർ ഓപ്ഷനും ലഭിക്കും. ബൈക്കിന്റെ ഡെലിവറി ഉടൻ ആരംഭിക്കുമെന്നാണ് പ്രതീക്ഷിക്കുന്നത്.

649 സിസി എൻജിൻ

2027 കവാസാക്കി വൾക്കൻ എസിൽ 649 സിസി പാരലൽ-ട്വിൻ എൻജിനാണ് ഉപയോഗിക്കുന്നത്. ഇത് 59.1 ബിഎച്ച്പി കരുത്തും 62.4 എൻഎം ടോർക്കും നൽകുന്നു. പവർ ഔട്ട്പുട്ടിൽ മാറ്റമില്ല. എന്നാൽ 2026 മോഡലിലെ 61 എൻഎം ടോർക്കിനെ അപേക്ഷിച്ച് പുതിയ മോഡലിൽ 1.4 എൻഎം വർധനവുണ്ട്. എൻജിന്റെ പവർ ഡെലിവറിയിലും ടോർക്ക് ലഭിക്കുന്ന ശ്രേണിയിലും കാര്യമായ മാറ്റമില്ല. അതിനാൽ പ്രകടനത്തിൽ വലിയ വ്യത്യാസം പ്രതീക്ഷിക്കേണ്ടതില്ല.

ഫീച്ചറുകളിൽ വലിയ മാറ്റമില്ല

പുതിയ വൾക്കൻ എസിന്റെ ഫീച്ചറുകൾ മുൻ മോഡലിന് സമാനമാണ്. അനലോഗ്-ഡിജിറ്റൽ ഇൻസ്ട്രുമെന്റ് ക്ലസ്റ്ററാണ് പ്രധാന സവിശേഷത. ഡ്യുവൽ-ചാനൽ എബിഎസും ലഭിക്കും. ഇതിന് പുറമെ പ്രധാന ഇലക്ട്രോണിക് റൈഡർ എയ്ഡുകൾ നൽകിയിട്ടില്ല.

ബ്രേക്ക് ഡിസ്കുകൾക്ക് മാറ്റം

2027 മോഡലിലെ പ്രധാന മാറ്റങ്ങളിലൊന്ന് ബ്രേക്കിംഗ് സംവിധാനത്തിലാണ്. മുന്നിലും പിന്നിലും ഡിസ്ക് ബ്രേക്കുകൾ നൽകിയിട്ടുണ്ടെങ്കിലും ഡിസ്കുകളുടെ വലുപ്പം കുറച്ചിട്ടുണ്ട്. 2026 മോഡലിൽ 300 എംഎം ആയിരുന്ന ഫ്രണ്ട് ഡിസ്കിന് പകരം പുതിയ മോഡലിൽ 272 എംഎം ഡിസ്കാണ് നൽകിയിരിക്കുന്നത്. പിൻ ഡിസ്കിന്റെ വലുപ്പം 250 എംഎമ്മിൽ നിന്ന് 216 എംഎമ്മായും കുറഞ്ഞു.

705 എംഎം സീറ്റ് ഉയരം

130 എംഎം ട്രാവലുള്ള 41 എംഎം ഫ്രണ്ട് ഫോർക്കാണ് വൾക്കൻ എസിലുള്ളത്. പിന്നിൽ 80 എംഎം ട്രാവലുള്ള ലിങ്ക്-ടൈപ്പ് മോണോഷോക്കും പ്രീലോഡ് ക്രമീകരണവും നൽകിയിട്ടുണ്ട്. ബൈക്കിന്റെ സീറ്റ് ഉയരം 705 എംഎം ആണ്. ഉയരം കുറഞ്ഞ റൈഡർമാർക്കും എളുപ്പത്തിൽ കൈകാര്യം ചെയ്യാൻ ഇത് സഹായിക്കും. എന്നാൽ 130 എംഎം മാത്രമാണ് ഗ്രൗണ്ട് ക്ലിയറൻസ്. ബൈക്കിന്റെ കെർബ് ഭാരം 235 കിലോഗ്രാമാണ്.

പുതിയ നിറവും എത്തി

2027 വൾക്കൻ എസിൽ പുതിയ പെയിന്റ് സ്കീമും കവാസാക്കി അവതരിപ്പിച്ചിട്ടുണ്ട്. മുൻ മോഡലിലെ മെറ്റാലിക് ഫ്ലാറ്റ് സ്പാർക്ക് ബ്ലാക്കിന് പകരം മെറ്റാലിക് കാർബൺ ഗ്രേ നിറമാണ് നൽകിയിരിക്കുന്നത്. നീല-പച്ച നിറത്തിലുള്ള സൂക്ഷ്മ ഹൈലൈറ്റുകളും പുതിയ കളർ സ്കീമിന്റെ ഭാഗമാണ്.

പ്രധാന ബദൽ സൂപ്പർ മെറ്റിയർ 650

ഇന്ത്യൻ വിപണിയിൽ വൾക്കൻ എസിന് നേരിട്ടുള്ള മത്സരം പരിമിതമാണ്. എന്നാൽ റോയൽ എൻഫീൽഡ് സൂപ്പർ മെറ്റിയർ 650 ഒരു പ്രധാന ബദലാണ്. സൂപ്പർ മെറ്റിയർ 650ന്റെ എക്സ്-ഷോറൂം വില ഏകദേശം ₹4.05 ലക്ഷം മുതലാണ്. ഇതോടെ കവാസാക്കി വൾക്കൻ എസ്, റോയൽ എൻഫീൽഡ് സൂപ്പർ മെറ്റിയർ 650 എന്നിവ തമ്മിൽ വിലയിൽ വലിയ വ്യത്യാസമുണ്ട്.