Asianet News Malayalam

13 വർഷത്തെ സേവനത്തിന് ശേഷം രാജി; അഭ്യൂഹങ്ങൾക്കിടെ കാരണം വെളിപ്പെടുത്തി ദിവ്യ മിത്തൽ ഐഎഎസ്

Sithara Sreelayam — Mon, 31 Aug 2026 16:33:56 +0530

ദില്ലി: 13 വർഷത്തെ സേവനത്തിന് ശേഷം ഇന്ത്യൻ അഡ്മിനിസ്ട്രേറ്റീവ് സർവീസിൽ നിന്ന് രാജി വെയ്ക്കാൻ കാരണം എന്തെന്ന് വെളിപ്പെടുത്തി ദിവ്യ മിത്തൽ. സോഷ്യൽ മീഡിയയിൽ പല അഭ്യൂഹങ്ങളും ഉയരുന്നതിനിടെയാണ് ദിവ്യ മിത്തലിന്‍റെ വിശദീകരണം.പെട്ടെന്നുണ്ടായ പ്രകോപനത്തിന്‍റെയോ സമ്മർദ്ദത്തിന്‍റെയോ ഫലമായിട്ടല്ല രാജി വച്ചതെന്നും കൃത്യമായ ആലോചനകൾക്ക് ശേഷമെടുത്ത തീരുമാനമാണെന്നും ദിവ്യ മിത്തൽ വ്യക്തമാക്കി. തന്നെ സംബന്ധിച്ച് ഐഎഎസ് എന്നത് ഔദ്യോഗിക ജീവിതത്തിലെ ഒരു അധ്യായം മാത്രമായിരുന്നുവെന്നും നിലനിൽപ്പ് അതിനെ മാത്രം ആശ്രയിച്ചിട്ടല്ലെന്നും ദിവ്യ മിത്തൽ പറഞ്ഞതായി ഇന്ത്യടുഡെ റിപ്പോർട്ട് ചെയ്തു. വ്യക്തിപരമായ മുൻഗണനകളും താത്പര്യങ്ങളും ഒപ്പം കുടുംബത്തെയും പരിഗണിച്ചാണ് സർവീസിൽ നിന്ന് സ്വമേധയാ പടിയിറങ്ങാൻ തീരുമാനിച്ചതെന്ന് ദിവ്യ കൂട്ടിച്ചേർത്തു.

2013 ബാച്ച് ഉത്തർപ്രദേശ് കേഡർ ഐ എ എസ് ഉദ്യോഗസ്ഥയാണ് ദിവ്യ മിത്തൽ. ദേവരിയ, മിർസാപ്പൂർ, സാന്ത് കബീർ നഗർ എന്നീ ജില്ലകളിൽ കളക്ടറായി സേവനമനുഷ്ഠിച്ചിട്ടുണ്ട്. നിലവിൽ യുപി റെവന്യൂ വകുപ്പിൽ സ്പെഷ്യൽ സെക്രട്ടറിയായി പ്രവർത്തിച്ചു വരികയായിരുന്നു. സർവീസിൽ നിന്നുള്ള വിരമിക്കൽ പ്രഖ്യാപിച്ചുകൊണ്ട് പങ്കുവെച്ച കുറിപ്പിൽ, തന്റെ 13 വർഷത്തെ ഐഎഎസ് ജീവിതത്തെ മറക്കാനാവാത്ത ഒരു യാത്ര എന്നാണ് അവർ വിശേഷിപ്പിച്ചത്. ഒരു സാധാരണ കുടുംബ പശ്ചാത്തലത്തിൽ നിന്ന് വന്ന് സ്വപ്നങ്ങൾ എത്തിപ്പിടിച്ചതിനെ കുറിച്ചും ദിവ്യ വിശദീകരിച്ചു. ഐഐടി ഡൽഹി, ഐഐഎം ബാംഗ്ലൂർ എന്നിവിടങ്ങളിൽ പഠനം പൂർത്തിയാക്കിയ അവർ ലണ്ടനിലെ ജെ പി മോർഗനിൽ ജോലി ചെയ്തിട്ടുണ്ട്. ഭർത്താവ് ഗഗൻദീപ് സിംഗ് ധില്ലൺ സിറ്റി ഗ്രൂപ്പിലും സേവനമനുഷ്ഠിച്ചു. എന്നാൽ വിദേശത്തെ മികച്ച ജീവിതത്തിനിടയിലും എന്തോ ഒന്ന് അപൂർണ്ണമാണെന്ന തോന്നൽ വന്നതോടെയാണ് മാതൃരാജ്യത്തിലേക്ക് മടങ്ങാനും ഈ മണ്ണിൽ സിവിൽ സർവീസിലേക്ക് കടക്കാനും ഇരുവരും തീരുമാനിച്ചത്.

തന്റെ സർവീസ് കാലയളവിനെക്കുറിച്ച് സംസാരിക്കവേ, ഭരണ നേട്ടങ്ങൾക്കപ്പുറമുള്ള ജീവിത പാഠങ്ങളാണ് സമ്മാനിച്ചതെന്ന് ദിവ്യ അഭിപ്രായപ്പെട്ടു. ശരിക്ക് വേണ്ടി നിലകൊള്ളുക എന്നത് തെരഞ്ഞെടുപ്പല്ല മറിച്ച് കടമയാണെന്ന് ദേവരിയയും അസാധ്യം എന്നത് ഒരു വസ്തുതയല്ല വെറുമൊരു അഭിപ്രായം മാത്രമാണെന്ന് മിർസാപ്പൂരും തന്ന പഠിപ്പിച്ചതായി അവർ പറഞ്ഞു. മിർസാപൂരില്‍ കളക്ടറായിരിക്കെ ലഹുരിയാദിഹ് ഗ്രാമത്തില്‍ പൈപ്പ് വഴി കുടിവെള്ളം എത്തിക്കുന്നത് അടക്കമുള്ള പ്രവര്‍ത്തനങ്ങളിലൂടെ ശ്രദ്ധ നേടിയിരുന്നു. യഥാർത്ഥ അധികാരം ഔദ്യോഗിക പദവികളിൽ നിന്നല്ല, മറിച്ച് ദൈവാനുഗ്രഹത്തിൽ നിന്നും ജനങ്ങളുടെ വിശ്വാസത്തിൽ നിന്നുമാണ് ലഭിക്കുന്നതെന്ന് ദിവ്യ മിത്തൽ പറഞ്ഞു.

ഭാവി പരിപാടികളെ കുറിച്ച് ചോദിച്ചപ്പോൾ തനിക്ക് രണ്ട് പെൺമക്കളുണ്ടെന്നും കുടുംബ കാര്യങ്ങൾക്കൊപ്പം ദീർഘകാലമായുള്ള സ്വന്തം ഇഷ്ടങ്ങൾ പ്രാവർത്തികമാക്കാൻ ആഗ്രഹിക്കുന്നുവെന്നും ദിവ്യ മിത്തൽ വ്യക്തമാക്കി. എഴുത്ത്, അധ്യാപനം, അല്ലെങ്കിൽ സാമൂഹിക സേവനം തുടങ്ങിയ മേഖലകളിലേക്ക് കടക്കാൻ സാധ്യതയുണ്ടെന്ന് സൂചിപ്പിച്ചെങ്കിലും, അടുത്തതായി എന്ത് ചെയ്യണമെന്ന കാര്യത്തിൽ അന്തിമ തീരുമാനം എടുത്തിട്ടില്ലെന്ന് അവർ പറഞ്ഞു. ഭർത്താവ് ഗഗൻദീപ് സിംഗ് ധില്ലണും ഐ എ എസ് ഉദ്യോഗസ്ഥനായിരുന്നു. 2022-ൽ കേന്ദ്ര വാണിജ്യ വ്യവസായ മന്ത്രാലയത്തിൽ ജോയിന്റ് ഡയറക്ടർ ജനറലായിരിക്കെയാണ് അദ്ദേഹം രാജി സമർപ്പിച്ചത്. നിലവിൽ ദിവ്യ മിത്തൽ സമർപ്പിച്ച രാജി ഉത്തർപ്രദേശ് സർക്കാരിന്റെ ശിപാർശയ്ക്ക് ശേഷം കേന്ദ്ര ആഭ്യന്തര മന്ത്രാലയത്തിന്റെ പരിഗണനയിലാണ്.

'ശരണ്യ സൂപ്പറാ...', ജന്മനാട്ടിൽ ആദ്യ നിയമനം നേടി ഊരാളി ഗോത്രവിഭാഗത്തിൽ നിന്നുള്ള ആദ്യ ഡോക്ടർ ശരണ്യ

Elsa TJ — Fri, 14 Aug 2026 12:55:04 +0530

ഇടുക്കി: ജന്മനാട്ടിൽ ആദ്യ നിയമനം കിട്ടിയതിൻറെ സന്തോഷത്തിലാണ് ഊരാളി ഗോത്രവിഭാഗത്തിൽ നിന്നുള്ള ഇടുക്കിയിലെ ആദ്യത്തെ ഡോക്ടറായ ശരണ്യ മോഹനൻ. ഇടുക്കി കണ്ണംപടി ആദിവാസി ഉന്നതിയിലാണ് ശരണ്യയുടെ വീട്. ഇതിനടുത്തുള്ള ഉപ്പുതറ സാമൂഹികാരോഗ്യ കേന്ദ്രത്തിലാണ് ശരണ്യക്ക് ജോലി കിട്ടിയത്. ഇടുക്കി വന്യജീവി സങ്കേതത്തിൽപെട്ട കണ്ണംപടി വനമേഖലയിലെ പുന്നപാറ ഉന്നതിയിൽ കണ്ടത്തിൻകര കെ.എൻ. മോഹനൻറെയും മിനിമോളുടെയും ഏകമകളാണ് ശരണ്യ. ഉപ്പുതറ സാമൂഹികാരോഗ്യ കേന്ദ്രത്തിൽ അസിസ്റ്റൻറ് സർജനായാണ് ശരണ്യ ജോലിയിൽ പ്രവേശിച്ചത്. അഞ്ചാം ക്ലാസ് വരെ സ്വരാജ് സയൺ പബ്ലിക് സ്‌കൂളിലാണ് പഠിച്ചത്. പ്ലസ്സു വരെ കുളമാവ് നവോദയ വിദ്യാലയത്തിൽ. പ്ലസ്തുവിന് 88 ശതമാനം മാർക്കു വാങ്ങി ജയിച്ചു. ചെറുപ്പം മുതൽ ഡോക്ടറാകണമെന്നായിരുന്നു ആഗ്രഹം. 2019 ൽ ആദിവാസി വിഭാഗത്തിലെ 23ാം റാങ്ക് നേടിയാണ് ശരണ്യ എംബിബിഎസിന് പ്രവേശനം നേടിയത്. ഫസ്റ്റ് ക്ലാസോടെ എംബിബിഎസ് പാസ്സായി. പി എസ‌് സി റാങ്ക് ലി സ്‌റ്റിൽ ഇടം പിടിച്ച ശരണ്യയ്ക്ക് ഒടുവിൽ ജന്മനാട്ടിലെ സർക്കാർ ആശുപത്രിയിൽ തന്നെ നിയമനം ലഭിച്ചു.

കണ്ണംപടി മേഖലയിലെ പതിനൊന്ന് ആദിവാസി ഉന്നതികളിലുള്ളവരുടെ ഏക ആശ്രയമാണ് ഈ ആശുപത്രി. ശരണ്യയുടെ നേട്ടത്തിൽ വീട്ടുകാർക്കും നാട്ടുകാർക്കും ഒരുപോലെ സന്തോഷം. ജന്മനാട്ടിൽ ആദ്യ നിയമനം കിട്ടിയതോടെ ആഭിനന്ദന പ്രവാഹമാണ് ശരണ്യക്കിപ്പോൾ. പട്ടികവർഗ്ഗ പിന്നാക്ക ക്ഷേമ വകുപ്പ് മന്ത്രി കെ.എ. തുളസി നേരിട്ട് ഫോണിൽ വിളിച്ച് അഭിനന്ദിച്ചു. ഇനി ഇടുക്കിയിലെത്തുമ്പോൾ ശരണ്യയെ സന്ദർശിക്കുമെന്നും മന്ത്രി പറഞ്ഞു.

ഏഷ്യാനെറ്റ് ന്യൂസ് ലൈവ് കാണാം

അപര്‍ണ പ്രഭാകറിന് ഒന്നാം റാങ്ക്, ഇസാ ബിജുവിനും എസ് കൃഷ്ണകുമാറിനും രണ്ടും മൂന്നും റാങ്കുകൾ; പ്രസ് ക്ലബ് ജേണലിസം ഫലം പ്രഖ്യാപിച്ചു

Prabeesh PP — Wed, 29 Jul 2026 16:44:50 +0530

തിരുവനന്തപുരം: തിരുവനന്തപുരം പ്രസ് ക്ലബ് ഇന്‍സ്റ്റിറ്റ്യൂട്ട് ഓഫ് ജേണലിസം നടത്തിയ പി ജി ഡിപ്ലോമ ഇന്‍ ജേണലിസം റഗുലര്‍ ബാച്ചിന്റെ പരീക്ഷാഫലം പ്രഖ്യാപിച്ചു. 18 വിദ്യാര്‍ഥികള്‍ക്ക് ഫസ്റ്റ് ക്ലാസും അഞ്ച് വിദ്യാര്‍ഥികള്‍ക്ക് സെക്കന്‍ഡ് ക്ലാസും ലഭിച്ചു. അപര്‍ണാ പ്രഭാകറിനാണ് ഒന്നാം റാങ്ക്. രണ്ടാംറാങ്ക് ഇസാ ബിജുവും മൂന്നാം റാങ്ക് എസ് കൃഷ്ണകുമാറും നേടി. വഴുതക്കാട് എംപി അപ്പന്‍ റോഡില്‍ പ്രഭാ അജാനൂരിന്റെയും ശോഭന ബി സിയുടെയും മകളാണ് അപര്‍ണ. കേശവദാസപുരം മോസ്‌ക് ലെയിന്‍ തുഷാരയില്‍ ഡി ബിജുവിന്റെയും അജിതാ സി വിയുടെയും മകളാണ് ഇസ. കൊടുങ്ങല്ലൂര്‍ രാധാകൃഷ്ണനിവാസില്‍ ടി എസ് ശ്രീകുമാറിന്റെയും ജ്യോതി കെയുടെയും മകനാണ് കൃഷ്ണകുമാര്‍. ഐ ജെ ടി ബിരുദദാന സമ്മേളനം ഓഗസ്റ്റ് രണ്ടാം വാരം നടക്കും.

പരീക്ഷകളുടെ വിശ്വാസ്യത നിലനിറുത്തണം, വിദ്യാഭ്യാസ രംഗത്ത് ടാസ്ക് ഫോഴ്സ് , പ്രധാനമന്ത്രിയുടെ പ്രഖ്യാപനം ഇൻസ്റ്റഗ്രാമിൽ

Elsa TJ — Sun, 26 Jul 2026 20:20:06 +0530

ഡൽഹി:വിദ്യാഭ്യാസ രംഗത്ത് ടാസ്ക് ഫോഴ്സ് രൂപീകരിച്ച് കേന്ദ്രം. ഇൻഫോസിസ് സഹ സ്ഥാപകനായ നന്ദൻ നിലേകനിയുടെ അദ്ധ്യക്ഷതയിൽ ടാസ്ക് ഫോഴ്സ് രൂപീകരിച്ചതായി പ്രധാനമന്ത്രി ഇൻസ്റ്റഗ്രാം വഴിയാണ് വിശദമാക്കിയത്. പരീക്ഷകളുടെ വിശ്വാസ്യത നിലനിറുത്താനുള്ള നിർദ്ദേശങ്ങൾ ടാസ്ക് ഫോഴ്സ് തയ്യാറാക്കും. എൻടിഎ പരീക്ഷകൾ ഉടച്ചു വാർക്കാൻ ആറംഗ ടാസ്ക് ഫോഴ്സിൽ ഐഎസ്ആർഒ മുൻ ചെയർമാൻ എസ് സോമനാഥും ഉൾപ്പെടുന്നുണ്ട്. രാജ്യത്തെ പരീക്ഷാ സംവിധാനം കൂടുതൽ വിശ്വസനീയവും സുതാര്യവും സാങ്കേതിക വിദ്യയിലധിഷ്ഠിതവുമാക്കുന്നതിനായാണ് നീക്കം. വിദ്യാർത്ഥികളെ അഭിസംബോധന ചെയ്തുകൊണ്ട് നൽകിയ വീഡിയോ സന്ദേശത്തിലാണ് പ്രധാനമന്ത്രി ഈ പ്രധാന തീരുമാനം വ്യക്തമാക്കിയത്. ക്രമക്കേടുകളിൽ പങ്കാളികളായവരെ ജയിലിലടച്ചിട്ടുണ്ടെന്നും വേഗത്തിലുള്ള വിചാരണയ്ക്കായി ഫാസ്റ്റ് ട്രാക്ക് കോടതികൾ സ്ഥാപിച്ചിട്ടുണ്ടെന്നും അദ്ദേഹം വ്യക്തമാക്കി. ഇതിനുപുറമെ, പരീക്ഷാ തട്ടിപ്പുകൾ തടയുന്നതിന് കർശന വ്യവസ്ഥകളടങ്ങിയ പുതിയ നിയമനിർമ്മാണങ്ങളിലേക്ക് പാർലമെന്റ് കടക്കുകയാണെന്നും പ്രധാനമന്ത്രി കൂട്ടിച്ചേർത്തു.

HIGH POWERED TASK FORCE on examination reforms under the leadership of Shri Nandan Nilekani constituted.@NandanNilekani pic.twitter.com/mMpmPdIEL5

— Narendra Modi (@narendramodi) July 26, 2026

ഭാവി തലമുറയുടെ സുരക്ഷിതത്വത്തിനായി പരീക്ഷാ സംവിധാനങ്ങളിൽ കാലോചിതമായ മാറ്റങ്ങൾ വരുത്തേണ്ടതുണ്ടെന്നും പരീക്ഷകൾ സുതാര്യവും വിശ്വസനീയവുമാകുന്നതോടൊപ്പം സാങ്കേതികവിദ്യയുടെ സാധ്യതകൾ പരമാവധി പ്രയോജനപ്പെടുത്തുകയും വേണം.ഈ കമ്മിറ്റി സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ വരാനിരിക്കുന്ന പരീക്ഷകളുടെ വിശ്വാസ്യത എത്രയും വേഗം ഉറപ്പുവരുത്തുകയും ചെയ്യും.ചോദ്യപേപ്പർ ചോർച്ചയും സംഘടിത പരീക്ഷാ തട്ടിപ്പുകളും തടയുന്നതിനായി 'പബ്ലിക് എക്സാമിനേഷൻസ് (പ്രിവൻഷൻ ഓഫ് അൺഫെയർ മീൻസ്) ആക്റ്റിൽ' ഭേദഗതികൾ വരുത്താനും സർക്കാർ നിർദ്ദേശിച്ചിട്ടുണ്ട്. നിർദ്ദിഷ്ട സമയത്തിനുള്ളിൽ അന്വേഷണം പൂർത്തിയാക്കൽ, വേഗത്തിലുള്ള വിചാരണ, കടുത്ത ശിക്ഷാനടപടികൾ എന്നിവ ഇതിലൂടെ ഉറപ്പാക്കും. രാജ്യത്തുടനീളമുള്ള പൊതുപരീക്ഷകളുടെ സുതാര്യതയും വിശ്വാസ്യതയും വർദ്ധിപ്പിക്കുന്നതിന് സാങ്കേതികവിദ്യയുടെ ഉപയോഗവും ഘടനാപരമായ പരിഷ്കാരങ്ങളും നിർദ്ദേശിക്കുക എന്നതായിരിക്കും നന്ദൻ നിലേക്കനി സമിതിയുടെ പ്രധാന ചുമതല.

ഏഷ്യാനെറ്റ് ന്യൂസ് ലൈവ് വീഡിയോ കാണാം

പ്രധാന തസ്‌തികകളിൽ സ്ഥിരം നിയമനം നടത്താതെ പെരിയ കേന്ദ്ര സർവ്വകലാശാല, അധ്യാപകർക്ക് അധിക ചുമതല, ക്ലാസുകൾ മുടങ്ങുന്നതായി പരാതി

Elsa TJ — Thu, 24 Sep 2026 10:47:41 +0530

പെരിയ: പ്രധാന തസ്‌തികകളിൽ സ്ഥിരം നിയമനം നടത്താതെ പെരിയ കേന്ദ്ര സർവ്വകലാശാല. രജിസ്ട്രാറും ഫിനാൻസ് ഓഫീസറും അടക്കം നിരവധി തസ്തികകളാണ് ഒഴിഞ്ഞു കിടക്കുന്നത്. അധ്യാപകർക്ക് അധിക ചുമതല നൽകിയതോടെ പഠനത്തെ ബാധിക്കുന്നു എന്നാണ് വിദ്യാർത്ഥികളുടെ പരാതി. പെരിയ കേന്ദ്ര സർവ്വകലാശാലയിൽ ഒരു വർഷത്തോളമായി സുപ്രധാന രജിസ്ട്രാർ പദവി ഒഴിഞ്ഞ് കിടക്കുന്നത്.ഫിനാൻസ് ഓഫീസർ തസ്തികയിലും സ്ഥിരം നിയമനമില്ല. ലൈബ്രേറിയൻ, എക്സിക്യൂട്ടീവ് എഞ്ചിനീയർ എന്നിവയും സ്ഥിര നിയമനമില്ലാതെ ഒഴിഞ്ഞു കിടക്കുന്നു. ലീഗൽ സെൽ ഡയറക്ടർ, പർച്ചേസ് സെക്ഷൻ ഡെപ്യൂട്ടി രജിസ്ട്രാർ, റിസർച്ച് ആൻ്റ് ഡെവലപ്മെൻറ് സെൽ മേധാവി, എസ്റ്റേറ്റ് സെക്ഷൻ ജോയിൻ്റ് ഡയറക്ടർ, സ്പെഷ്യൽ ഓഫീസർ ടു വി.സി. തുടങ്ങിയ തസ്തികകളും അദ്ധ്യാപകർക്ക് അധിക ചുമതല നൽകി ഇൻ-ചാർജ് ഭരണത്തിലാണ്. ഭരണ ചുമതലകൾ ഏറ്റെടുക്കേണ്ടി വരുന്നതിനാൽ അധ്യാപകർക്ക് കൃത്യമായി ക്ലാസുകൾ എടുക്കാൻ കഴിയുന്നില്ലെന്നും ഇത് വിദ്യാർത്ഥികളുടെ പഠനത്തെ ബാധിക്കുന്നുമെന്നുമാണ് ഉയരുന്ന പരാതി.

കഴിഞ്ഞ മാസം ഫിനാൻസ് ഓഫീസർ പദവിയിലേക്ക് അഭിമുഖം നടത്തിയങ്കിലും പങ്കെടുത്ത 13 പേരും അനുയോജ്യരല്ലെന്നായിരുന്നു വൈസ് ചാൻസലറുടെ തീരുമാനം.എക്സിക്യൂട്ടീവ് എൻജിനീയർ തസ്തിക ഒഴിഞ്ഞുകിടക്കാൻ തുടങ്ങിയിട്ട് മൂന്ന് വർഷമായി. രജിസ്ട്രാർ നിയമനം നടത്താനായി വിജ്ഞാപനം പുറത്തിറക്കി 10 മാസത്തോളമായിട്ടും നിയമനം നടത്താതെ വൈസ് ചാൻസലർ അകാരണമായി ഇത് നീട്ടിക്കൊണ്ടു പോകുകയാണെന്നാണ് ആക്ഷേപം.എത്രയും വേഗം സ്ഥിരം നിയമനം നടത്തി പ്രശ്നം പരിഹരിക്കണമെന്നാണ് ഉയരുന്ന ആവശ്യം.

ഏഷ്യാനെറ്റ് ന്യൂസ് ലൈവ് കാണാം

നീറ്റ് പിജി 2026 ഫലം പ്രഖ്യാപിച്ചു; സ്കോറും കട്ട് ഓഫും അറിയാം

Web Desk — Thu, 24 Sep 2026 16:39:25 +0530

ന്യൂഡൽഹി: നീറ്റ് പിജി ഫലം പ്രഖ്യാപിച്ചു. വ്യാഴാഴ്ചയാണ് നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ്(NBEMS) 2026-ലെ മെഡിക്കൽ പിജി പ്രവേശന പരീക്ഷയുടെ ഫലം പ്രഖ്യാപിച്ചത്.NBEMS വെബ്സൈറ്റിൽ പരീക്ഷാർഥികൾക്ക് ഫലമറിയാം.

ഈ വർഷത്തെ നീറ്റ് പിജി പരീക്ഷയുടെ കട്ട് ഓഫ് മാർക്കുകളും പ്രസിദ്ധീകരിച്ചിട്ടുണ്ട്. ഒക്ടോബർ ഒന്നാം തീയതി മുതൽ വെബ്സൈറ്റിൽനിന്ന് സ്കോർ കാർഡുകൾ ഡൗൺലോഡ് ചെയ്യാം. ഒക്ടോബർ മുതൽ ആറുമാസത്തേക്ക് സ്കോർ കാർഡുകൾ വെബ്സൈറ്റിൽ ലഭ്യമാകും. നീറ്റ് പിജി ഉത്തരസൂചികയും ഒക്ടോബർ ഒന്നാം തീയതിയോ അതിനുശേഷമോ പ്രസിദ്ധീകരിക്കും.

2026-27 അധ്യയന വർഷത്തെ എംഡി, എംഎസ്, ഡിഎൻബി തുടങ്ങിയ പിജി, പിജി ഡിപ്ലോമ കോഴ്സുകളിലേക്കുള്ള പ്രവേശനത്തിനായി ഓഗസ്റ്റ് 30-നാണ് നീറ്റ് പിജി പരീക്ഷ നടത്തിയത്. 2,63,544 പേരാണ് ഇത്തവണത്തെ നീറ്റ് പിജി പരീക്ഷയെഴുതിയത്. അതേസമയം, വൈദ്യുതിതടസ്സം കാരണം ജയ്പുരിലെ രണ്ട് പരീക്ഷാകേന്ദ്രങ്ങളിൽ ഓഗസ്റ്റ് 30-ന് പരീക്ഷ പൂർത്തിയാക്കാനില്ല. ഈ കേന്ദ്രങ്ങളിലെ പരീക്ഷാർഥികൾക്ക് സെപ്റ്റംബർ അഞ്ചിന് വീണ്ടും പരീക്ഷ നടത്തി. സെപ്റ്റംബർ അഞ്ചിന് നടന്ന പരീക്ഷയിൽ 2416 പേരാണ് ഈ രണ്ട് കേന്ദ്രങ്ങളിലായി പരീക്ഷയ്ക്ക് ഹാജരായത്.

#NEETPG2026Result of NEET-PG 2026 has been declared at NBEMS website. pic.twitter.com/Dlxw0hxhup

— NBEMS (@NBEMS_Official) September 24, 2026

നീറ്റ് പരീക്ഷ ഓൺലൈൻ ആയേക്കും, റോഡ് മാപ്പുമായി നന്ദൻ നിലേകനി പാനൽ

Elsa TJ — Fri, 28 Aug 2026 11:39:34 +0530

ഡൽഹി: നീറ്റ് പരീക്ഷ 2027 മുതൽ ഓൺലൈൻ ആയേക്കുമെന്ന് സൂചന. 2027ൽ പരീക്ഷ ഓൺലൈൻ ആക്കാനുള്ള റോഡ് മാപ്പുമായി നന്ദൻ നിലേകനി പാനൽ അവതരിപ്പിച്ചത്. ജെഇഇ മാതൃകയിൽ സിബിറ്റി പരീക്ഷ രീതിയിൽ നീറ്റ് പരീക്ഷയും പരിഗണനയിലെന്നാണ് സൂചന. 12 മുതൽ 14 വരെ ഷിഫ്റ്റുകളിലായി നീറ്റ് പരീക്ഷ നടത്താനാണ് പരിഗണന. ഒന്നിലധികം ദിവസങ്ങളിലായി പരീക്ഷ നടത്താനും നിർദേശമുണ്ട്. സർക്കാർ പിന്തുണയോടെ 1,000 ടെസ്റ്റിംഗ് സെന്ററുകൾ ഒരുക്കും. സംസ്ഥാന സർക്കാരുകളുമായി സഹകരിച്ച് പരീക്ഷാ കേന്ദ്രങ്ങൾ ശക്തിപ്പെടുത്തുമെന്നുമാണ് ലഭ്യമാകുന്ന വിവരം.

ഏഷ്യാനെറ്റ് ന്യൂസ് ലൈവ് കാണാം

കേരളത്തിലെ യുവജനങ്ങൾ സംരംഭക സാധ്യതകൾ പ്രയോജനപ്പെടുത്തണം: റോജി എം ജോൺ

Web Desk — Tue, 11 Aug 2026 17:35:05 +0530

തിരുവനന്തപുരം: കേരളത്തിലെ യുവജനങ്ങൾ വെറും തൊഴിൽ അന്വേഷകരായി മാത്രം മാറാതെ സംരംഭക സാധ്യതകൾ കൂടി പരമാവധി പ്രയോജനപ്പെടുത്തണമെന്ന് ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ. ലൊയോള കോളേജ് ഓഫ് സോഷ്യൽ സയൻസസിലെ((ഓട്ടോണമസ്) 2024–2026 ബാച്ചിന്‍റെ ബിരുദപൂർത്തീകരണ ചടങ്ങായ 'മാജിസ് 2026'ൽ മുഖ്യാതിഥിയായി സംസാരിക്കുകയായിരുന്നു അദ്ദേഹം. ഉന്നതവിദ്യാഭ്യാസ രംഗത്ത് മികച്ച നിലവാരം കാഴ്ചവെക്കുന്ന സംസ്ഥാനമാണ് കേരളമെന്നും മന്ത്രി കൂട്ടിച്ചേർത്തു.

ലൊയോള കോളേജിൽ നിന്ന് നേടിയ അറിവിനും കഴിവുകൾക്കുമൊപ്പം സ്ഥാപനം പകർന്നുനൽകിയ മൂല്യങ്ങളും സാമൂഹിക ഉത്തരവാദിത്വബോധവും ജീവിതത്തിലുടനീളം ഉയർത്തിപ്പിടിക്കണം. ഈ ആർജ്ജിച്ച അറിവുകൾ സമൂഹത്തിന്റെ പുരോഗതിക്കായി വിനിയോഗിക്കാൻ ബിരുദധാരികൾ മുന്നോട്ടുവരണമെന്നും മന്ത്രി വിദ്യാർത്ഥികളോട് അഭ്യർത്ഥിച്ചു.

കേരള സർവകലാശാല സിൻഡിക്കേറ്റ് മെമ്പർ ഡോ. നൗഷാദ് വി., കേരള ജെസ്യൂട്ട് പ്രൊവിൻസ് പ്രൊവിൻഷ്യൽ റവ. ഫാ. ഹെൻറി പട്ടരുമഠത്തിൽ എസ്.ജെ, ലൊയോള ഇൻസ്റ്റിറ്റ്യൂഷൻസ് മാനേജർ ഫാ. സണ്ണി തോമസ് എസ്.ജെ, അക്കാദമിക് ഡയറക്ടർ ഡോ. സൈമൺ തട്ടിൽ, കോളേജ് പ്രിൻസിപ്പൽ ഡോ. പ്രകാശ് പിള്ള ആർ., ഫാക്കൽറ്റി കോർഡിനേറ്റർ ഡോ. ഫ്രാൻസിന പി. എക്സ് എന്നിവർ ചടങ്ങിൽ സംബന്ധിച്ചു. അധ്യാപകർ, ബിരുദധാരികളായ വിദ്യാർത്ഥികൾ, രക്ഷിതാക്കൾ, പൂർവവിദ്യാർത്ഥികൾ തുടങ്ങി നിരവധി വിശിഷ്ടാതിഥികളും ചടങ്ങിൽ പങ്കെടുത്തു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ആറാം ക്ലാസ് മുതൽ പഠിക്കാൻ മൂന്ന് ഭാഷ; കുട്ടികളിൽ അമിതഭാരം, ഈ വർഷം ഇളവ് നൽകിക്കൂടെയെന്ന് സിബിഎസ്സിയോട് സുപ്രീം കോടതി

Prabeesh PP — Thu, 10 Sep 2026 12:43:31 +0530

ദില്ലി: സിബിഎസ്ഇ സ്കൂളുകളിലെ ആറാം ക്ലാസ് വിദ്യാർത്ഥികൾക്ക് ഈ വർഷം മുതൽ നടപ്പാക്കുന്ന ത്രിഭാഷാ പഠനരീതിക്കെതിരെ സുപ്രീം കോടതി. പുതിയ നയം കുട്ടികളിൽ അമിതമായ പഠനഭാരം ഉണ്ടാക്കുമെന്ന് നിരീക്ഷിച്ച കോടതി, ഈ അധ്യയന വർഷം ആറാം ക്ലാസിൽ പ്രവേശനം നേടിയ കുട്ടികൾക്ക് ഇളവ് നൽകുന്ന കാര്യം പരിഗണിക്കണമെന്ന് സിബിഎസ്ഇയോട് ആവശ്യപ്പെട്ടു. നയം അടുത്ത അധ്യയന വർഷം മുതൽ നടപ്പാക്കിയാൽ പോരേയെന്നും കോടതി ചോദിച്ചു. ആറാം ക്ലാസ് മുതൽ എട്ടാം ക്ലാസ് വരെ വിദ്യാർത്ഥികൾ മൂന്ന് ഭാഷകൾ പഠിക്കണമെന്നാണ് സിബിഎസ്ഇയുടെ പുതിയ നയം. ഇതിൽ ഒരു ഭാഷ ഹിന്ദിയോ ഇംഗ്ലീഷോ ആയിരിക്കണം. മറ്റ് രണ്ട് ഭാഷകൾ ഭരണഘടനയുടെ എട്ടാം ഷെഡ്യൂളിൽ ഉൾപ്പെടുത്തിയിട്ടുള്ളവയിൽ നിന്ന് തിരഞ്ഞെടുക്കണം.

ഈ നയത്തെ ചോദ്യം ചെയ്ത് 'സംസ്കൃത ശിക്ഷക് സംഘ്' ആണ് സുപ്രീം കോടതിയെ സമീപിച്ചത്. പുതിയ വ്യവസ്ഥകൾ കാരണം സംസ്കൃതം പഠിക്കാൻ ആഗ്രഹിക്കുന്ന ഒരു കുട്ടിക്ക് അത് നാലാമതൊരു അധിക ഭാഷയായി പഠിക്കേണ്ടി വരുമെന്നും ഇത് വലിയ ഭാരമാണെന്നും ഹർജിയിൽ ചൂണ്ടിക്കാട്ടുന്നു.

കോടതിയുടെ നിർണായക ഇടപെടൽ

ജസ്റ്റിസുമാരായ സഞ്ജയ് കിഷൻ കൗൾ, സുധാംശു ധൂലിയ എന്നിവരടങ്ങിയ ബെഞ്ചാണ് കേസ് പരിഗണിച്ചത്. ചെറിയ കുട്ടികളുടെ മേൽ ഇത്രയധികം ഭാരം ചുമത്തുന്നത് എന്തിനാണെന്ന് കോടതി ചോദിച്ചു. ഈ വർഷം ആറാം ക്ലാസിൽ പഠനം തുടങ്ങിയ കുട്ടികളെ നയത്തിന്റെ പരിധിയിൽ നിന്ന് ഒഴിവാക്കണമെന്നാണ് കോടതിയുടെ പ്രധാന നിർദേശം ഇത്രയധികം ഭാഷാ ഓപ്ഷനുകൾ നൽകുമ്പോൾ, അവ പഠിപ്പിക്കാൻ ആവശ്യമായ അധ്യാപകർ സ്കൂളുകളിൽ ഉണ്ടോയെന്നും കോടതി സംശയം പ്രകടിപ്പിച്ചു. മതിയായ അടിസ്ഥാന സൗകര്യങ്ങൾ ഒരുക്കാതെ തിടുക്കത്തിൽ നയം നടപ്പാക്കുന്നതിലെ പ്രായോഗികതയാണ് കോടതി ചോദ്യം ചെയ്തത്. ഇതോടെ പന്ത് സിബിഎസ്ഇയുടെ കോർട്ടിലായിരിക്കുകയാണ്. കേസ് ഒക്ടോബർ ആദ്യവാരം വീണ്ടും പരിഗണിക്കും. അടുത്ത തവണ വാദം കേൾക്കുന്നതിന് മുൻപ് വിഷയത്തിൽ പ്രായോഗികമായ ഒരു പരിഹാരം കണ്ടെത്താൻ സിബിഎസ്ഇയോട് കോടതി ആവശ്യപ്പെട്ടിട്ടുണ്ട്. വിദ്യാർത്ഥികളുടെ സമ്മർദ്ദം കുറയ്ക്കുന്ന ഒരു തീരുമാനത്തിനായി കാത്തിരിക്കുകയാണ് രക്ഷിതാക്കളും അധ്യാപകരും.

'യു ടേൺ അടിച്ച് സർക്കാർ', ഗുരുവായൂർ ദേവസ്വം ബോർഡിലേക്കുളള നിയമനങ്ങളിൽ ഉദ്യോഗാർത്ഥികൾക്ക് തിരിച്ചടി, യുഡിഎഫിന് ഇരട്ടത്താപ്പെന്ന് ഉദ്യോഗാർത്ഥികൾ

Elsa TJ — Thu, 30 Jul 2026 11:25:23 +0530

തിരുവനന്തപുരം: ഗുരുവായൂർ ദേവസ്വം ബോർഡിലേക്കുളള നിയമനങ്ങളിൽ ഉദ്യോഗാർത്ഥികൾക്ക് തിരിച്ചടിയായി സംസ്ഥാന സർക്കാരിന്റെ നിലപാട് മാറ്റം.താത്കാലിക ജീവനക്കാർക്ക് അനുകൂലമായി സുപ്രീംകോടതിയിലെ അപ്പീൽ സർക്കാർ പിൻവലിച്ചതോടെ, പരീക്ഷയെഴുതി, ചുരുക്കപ്പട്ടികയിൽ വന്നവർക്കുളള നിയമന സാധ്യത തുലാസിലായി. ദേവസ്വം റിക്രൂട്ട്മെന്ർറ് ബോർഡിന്റെ അധികാരം ചോദ്യം ചെയ്തുളള നിയമ പോരാട്ടമാണ് സുപ്രീംകോടതിയിലെത്തിയത്. താത്കാലികക്കാർക്ക് നിയമനം നൽകുന്നതിൽ യുഡിഎഫിന് ഇരട്ടത്താപ്പാണോയെന്ന ചോദ്യമാണ് ഗുരുവായൂർ ദേവസ്വം ബോർഡിന്റെ വിവിധ തസ്തികകളിലേക്ക് പരീക്ഷയെഴുതിയവർ ചോദിക്കുന്നത്.

38 തസ്തികകളിലേക്ക് കേരള ദേവസ്വം റിക്രൂട്ട്മെന്ർറ് ബോർഡ് വഴി പരീക്ഷ നടത്തിയത് കഴിഞ്ഞ വർഷം ജൂലൈയിൽ. പലതിലും ചുരുക്കപ്പട്ടികയായി. പക്ഷേ റാങ്ക് പട്ടിക പ്രസിദ്ധീകരിക്കാനും നിയമനത്തിനും കോടതി വ്യവഹാരങ്ങൾ തടസ്സമായി. നിയമന അധികാരം മാനേജ്മെന്റ് കമ്മിറ്റിക്കെന്നും കെഡിആർബിക്ക് അല്ലെന്നും കാട്ടി ദേവസ്വം എംപ്ലോയീസ് യൂണിയൻ കോടതിയിലെത്തി. ഹൈക്കോടതി ഡിവിഷൻ ബെഞ്ച് അനുകൂലമായി വിധിച്ചു.സുപ്രീം കോടതി ഇത് സ്റ്റേ ചെയ്തു.താത്കാലിക ജീവനക്കാർക്ക് വേണ്ടിയായിരുന്നു എംപ്ലോയീസ് യൂണിയന്ർറെ ഹർജിയെങ്കിൽ, ഉദ്യോഗാർത്ഥികൾക്കും റിക്രൂട്ട്മെന്ർറ് ബോർഡിനും അനുകൂല നിലപാടാണ് സുപ്രീംകോടതിയിൽ സംസ്ഥാന സർക്കാർ സ്വീകരിച്ചിരുന്നത്. അതിലാണിപ്പോൾ യു ടേൺ. കോടതിയിൽ നൽകിയ അപ്പീൽ സർക്കാർ പിൻവലിച്ചു.

സർക്കാർ രൂപീകരിച്ച ബോർഡ് നടത്തിയ പരീക്ഷ സർക്കാർ തന്നെ തളളുന്ന സ്ഥിതിയാണ് നിലവിലുള്ളത്.ദേവസ്വം മന്ത്രിയെ ഉൾപ്പെടെ കണ്ടെങ്കിലും അനുകൂല സമീപനമില്ലെന്നാണ് ഉദ്യോഗാർത്ഥികളുടെ പ്രതികരണം. നേരത്തെ, പരീക്ഷ നടത്തിയ ശേഷം, താത്കാലിക ജീവനക്കാർക്ക് വേണ്ടി, വിജ്ഞാപനം തിരുത്തിയതും വിവാദമായിരുന്നു. വർഷങ്ങളായി ക്ഷേത്രത്തിൽ ജോലി ചെയ്യുന്നവർക്ക് തൊഴിൽ നഷ്ടമാകാതിരിക്കാനെന്നായിരുന്നു വിശദീകരണം.

ഏഷ്യാനെറ്റ് ന്യൂസ് ലൈവ് വീഡിയോ കാണാം

സ്‌ഫടികത്തിലെ മണിയടി യന്ത്രം മുതൽ റോബോട്ട് വരെ, ഒറ്റ മോട്ടോറിൽ വിസ്മയം തീർത്ത് ലെവിൻ, അഭിനന്ദനവുമായി മുഖ്യമന്ത്രി

Elsa TJ — Mon, 27 Jul 2026 13:43:12 +0530

കൊച്ചി: വീട്ടിലെ പരിമിത സാഹചര്യങ്ങളെ ചെറു ഉപകരണങ്ങൾ നിർമ്മിച്ച് മറികടക്കാൻ ശ്രമിക്കുന്ന കുട്ടി സമൂഹ മാധ്യമങ്ങളിൽ ശ്രദ്ധ നേടുകയാണ്. എറണാകുളം സ്വദേശി ലെവിനാണ് ഒരു മോട്ടോറും കാർബോർഡ് കഷ്ണങ്ങളും കൊണ്ട് ചെറു ഉപകരണങ്ങൾ തയ്യാറാക്കുന്നത്. ഒടുവിൽ മുഖ്യമന്ത്രിയുടെ അഭിനന്ദനം വരെ ഏറ്റുവാങ്ങിയിരിക്കുകയാണ് ഈ മിടുക്കൻ. തന്റെ കയ്യിൽ കിട്ടുന്ന ചെറിയ സാധനങ്ങളാണ് ലെവിൻ അമ്മയുടെ കൈ സഹായത്തിനുള്ള ഉപകരണങ്ങളുണ്ടാക്കാൻ ഉപയോഗിക്കുന്നത്.

പിറവം സ്വദേശിയാണ് ലെവിൻ. റോബോട്ട് മുതൽ സ്ഫടികം സിനിമയിലെ മണിയടി യന്ത്രം വരെ ലെവിൻ ഉണ്ടാക്കിയിട്ടുണ്ട്. നേരത്തെ മുതൽ ചെയ്തിരുന്നുവെങ്കിലും യുട്യൂബിൽ വീഡിയോ ചെയ്യാൻ തുടങ്ങിയപ്പോഴാണ് ലെവിനെ ആളുകൾ ശ്രദ്ധിച്ച് തുടങ്ങിയത്. എല്ലാ ഉപകരണങ്ങൾക്കും ഒരേ മോട്ടറാണ് ഉപയോഗിക്കുന്നത്. ആട് വളർത്തലും കൃഷിയുമാണ് ലെവിന്റെ കുടുംബത്തിന്റെ വരുമാന മാർഗം.

ഏഷ്യാനെറ്റ് ന്യൂസ് ലൈവ് വീഡിയോ കാണാം

ഹയർ സെക്കന്ററി ഒന്നാം വർഷ ഇംപ്രൂമെന്റ് പരീക്ഷ ഒക്ടോബർ 12 മുതൽ 17 വരെ

Web Desk — Sat, 22 Aug 2026 19:38:00 +0530

തിരുവനന്തപുരം: ഹയർ സെക്കന്ററി/ വൊക്കേഷണൽ ഹയർ സെക്കന്ററി ഒന്നാം വർഷ ഇംപ്രൂവ്മെന്റ് പരീക്ഷ ഒക്ടോബർ 12 മുതൽ 17 വരെയുള്ള ആറ് ദിവസങ്ങളിൽ നടത്തുമെന്ന് ഹയർ സെക്കന്ററി പരീക്ഷ വിഭാഗം ജോയിൻ്റ് ഡയറക്ടർ അറിയിച്ചു. ഇംപ്രൂവ്മെന്റ് പരീക്ഷ ഒക്ടോബറിൽ നടത്താൻ സർക്കാർ ഉത്തരവ് ഇറക്കിയതിന്റെ അടിസ്ഥാനത്തിലാണ് പരീക്ഷ തീയതി പ്രഖ്യാപിച്ചത്. നേരത്തെ പ്ലസ് വൺ ഇംപ്രൂവ്മെന്റ് പരീക്ഷ പ്ലസ് ടു പരീക്ഷയോടൊപ്പം മാർച്ച് മാസത്തിൽ നടത്തിയിരുന്നത് വിദ്യാർത്ഥികൾക്ക് ഏറെ മാനസിക സംഘർഷം ഉൾപ്പെടെയുള്ള പ്രയാസങ്ങൾക്ക് കാരണമായിരുന്നു.

ഇതിനെ തുടർന്ന് ഇംപ്രൂവ്മെന്റ് പരീക്ഷ മാർച്ച് മാസത്തെ രണ്ടാം വർഷ പരീക്ഷയോടൊപ്പം നടത്തരുതെന്ന് പൊതു വിദ്യാഭ്യാസ വകുപ്പ് മന്ത്രി എൻ ഷംസുദ്ദീന് നിരവധി നിവേദനങ്ങൾ ലഭിച്ചിരുന്നു. ഈ നിവേദനങ്ങൾ പരിഗണിച്ച് പൊതു വിദ്യാഭ്യാസ വകുപ്പ് മന്ത്രി ഇംപ്രൂവ്മെന്റ് പരീക്ഷ ഒക്ടോബറിൽ നടത്താൻ നിർദ്ദേശം നൽകുകയായിരുന്നു. തുടർന്നാണ് ഇംപ്രൂവ്മെന്റ് പരീക്ഷ ഒക്ടോബറിൽ നടത്താൻ കഴിഞ്ഞ ദിവസം സർക്കാർ ഉത്തരവ് ഇറക്കിയത്. ഈ തീയതികളുടെ അടിസ്ഥനത്തിലുള്ള ടൈം ടേബിൾ ഉടൻ പ്രഖ്യാപിക്കും.

ലൊയോള കോളേജ് ഓഫ് സോഷ്യൽ സയൻസസ് ബിരുദപൂർത്തീകരണ ചടങ്ങ് 'മാജിസ് 2026' ഓഗസ്റ്റ് 11-ന്

Web Desk — Sat, 08 Aug 2026 18:31:23 +0530

തിരുവനന്തപുരം: ശ്രീകാര്യം ലൊയോള കോളേജ് ഓഫ് സോഷ്യൽ സയൻസസിൽ (ഓട്ടോണോമസ്) 2024–2026 ബാച്ചിന്‍റെ ബിരുദപൂർത്തീകരണ ചടങ്ങ് 2026 ഓഗസ്റ്റ് 11-ന് നടക്കും. രാവിലെ 10.30-ന് കോളേജിലെ എജ്യൂക്കേഷൻ തിയേറ്ററിൽ ഉന്നത വിദ്യാഭ്യാസ മന്ത്രി റോജി എം. ജോൺ ഉദ്ഘാടനം ചെയ്യും. കേരള ഉന്നത വിദ്യാഭ്യാസ കൗണ്‍സില്‍ വൈസ് ചെയർപേഴ്സൺ ഡോ. അച്യുത്ശങ്കർ എസ്. നായർ, കേരള ജെസ്യൂട്ട് പ്രൊവിൻസ് പ്രൊവിൻഷ്യൽ റവ.ഫാ.ഹെൻറി പട്ടരുമഠത്തിൽ എസ്.ജെ. എന്നിവർ ചടങ്ങിൽ പങ്കെടുക്കും.

കോളേജ് പ്രിൻസിപ്പൽ ഡോ.പ്രകാശ് പിള്ള, ഫാക്കൽറ്റി കോർഡിനേറ്റർ ഡോ.ഫ്രാൻസിന പി.എക്സ് ഉൾപ്പെടെ അധ്യാപകർ, ബിരുദധാരികൾ, രക്ഷിതാക്കൾ, പൂർവവിദ്യാർത്ഥികൾ, വിശിഷ്ടാതിഥികൾ എന്നിവരും ചടങ്ങിൽ പങ്കെടുക്കും. വിദ്യാർത്ഥികളുടെയും അധ്യാപകരുടെയും രക്ഷിതാക്കളുടെയും സാന്നിധ്യത്തിൽ സംഘടിപ്പിക്കുന്ന ബിരുദപൂർത്തീകരണ ചടങ്ങ് വിദ്യാർത്ഥികളുടെ അക്കാദമിക മികവിനെയും നേട്ടങ്ങളെയും സമൂഹത്തിനു മുൻപിൽ ആദരിക്കാനുള്ള അവസരം കൂടിയായിരിക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

വകുപ്പിലെ ഉയർന്ന ഉദ്യോഗസ്ഥരുടെ അഴിമതി, ധാർമ്മിക ഉത്തരവാദിത്തമേറ്റ് രാജി പ്രഖ്യാപിച്ച് ഓസ്ട്രേലിയയിലെ വിദ്യാഭ്യാസ മന്ത്രി

Elsa TJ — Sat, 25 Jul 2026 15:03:41 +0530

കാൻബെറ: വകുപ്പിലെ രണ്ട് മുതിർന്ന ഉദ്യോഗസ്ഥർക്കെതിരെ അഴിമതിക്കേസ്. പിന്നാലെ മന്ത്രി സ്ഥാനം രാജിവച്ച് ഓസ്ട്രേലിയയിലെ വിദ്യാഭ്യാസ മന്ത്രി. മന്ത്രിക്ക് അഴിമതിയിൽ നേരിട്ട് പങ്കില്ലെന്ന് അന്വേഷണ കമ്മീഷൻ വ്യക്തമാക്കിയെങ്കിലും, വകുപ്പിൻ്റെ മേധാവി എന്ന നിലയിൽ രാഷ്ട്രീയ ധാർമ്മികതയുടെ ഉത്തരവാദിത്തം ഏറ്റെടുത്തുകൊണ്ടാണ് അവർ രാജിവച്ചത്. ഓസ്ട്രേലിയൻ ക്യാപിറ്റൽ ടെറിറ്ററിയിലെ വിദ്യാഭ്യാസ മന്ത്രി ഇവെറ്റ് ബെറി രാജി വച്ചത്. ഓസ്ട്രേലിയൻ ക്യാപിറ്റൽ ടെറിറ്ററിയിൽ ഏറ്റവും അധികം കാലം ഉപമുഖ്യമന്ത്രി ആയിരുന്ന വ്യക്തി കൂടിയാണ് ഇവെറ്റ് ബെറി. മുഖ്യമന്ത്രി സ്ഥാനത്തേക്ക് ഏറ്റവുമധികം സാധ്യത നൽകപ്പെട്ടിരുന്ന വ്യക്തി കൂടിയാണ്. വകുപ്പിലെ മുതിർന്ന ഉദ്യോഗസ്ഥരുടെ അഴിമതിയുടെ ധാർമിക ഉത്തരവാദിത്തം ഏറ്റെടുത്ത് ക്യാബിനറ്റിൽ നിന്ന് രാജി വച്ചത്. പാർലമെന്റിലോ പൊതുവിടങ്ങളിലോ വകുപ്പിലെ ഉദ്യോഗസ്ഥരുടെ പേരിൽ മറ്റ് പ്രകടനങ്ങൾ ഉണ്ടാവുന്നതിനോട് താൽപര്യമില്ലെന്ന് വ്യക്തമാക്കിയാണ് രാജി.

2019-2020 കാലഘട്ടത്തിൽ ക്യാമ്പ്‌ബെൽ പ്രൈമറി സ്കൂൾ നവീകരണത്തിനായി നൽകിയ 18.2 മില്യൺ ഡോളറിന്റെ നിർമ്മാണ കരാർ വിതരണത്തിലാണ് ഗുരുതരമായ ക്രമക്കേടുകൾ നടന്നത്. പദ്ധതി പൂർത്തിയാക്കാൻ കുറഞ്ഞ തുക ആവശ്യപ്പെട്ട 'മാന്റീന' എന്ന പ്രാദേശിക നിർമ്മാണ കമ്പനിയെ ഒഴിവാക്കിയ ഉദ്യോഗസ്ഥർ ഒൻപത് ലക്ഷത്തോളം ഡോളർ അധികം ആവശ്യപ്പെട്ട 'ലെൻഡ്‌ലീസ്' എന്ന കമ്പനിക്ക് അനധികൃതമായി കരാർ നൽകുകയായിരുന്നു.ട്രേഡ് യൂണിയനുകളുടെ താത്പര്യങ്ങൾ സംരക്ഷിക്കുന്നതിനായി അന്നത്തെ വിദ്യാഭ്യാസ ഡയറക്ടർ ജനറൽ കാറ്റി ഹെയറും മന്ത്രിയുടെ മുൻ ചീഫ് ഓഫ് സ്റ്റാഫ് ജോഷ്വ സെറാമിഡാസും ചേർന്നാണ് കരാർ പ്രക്രിയയിൽ തിരിമറി നടത്തിയതെന്ന് 'എസിടി ഇന്റഗ്രിറ്റി കമ്മീഷൻ' അന്വേഷണത്തിൽ കണ്ടെത്തിയിരുന്നു. ഇതോടെയാണ് സ്വന്തം ഓഫീസിലെയും വകുപ്പിലെയും ഉദ്യോഗസ്ഥർ നടത്തിയ അഴിമതിയുടെ ഉത്തരവാദിത്തം ഏറ്റെടുത്ത് ഇവെറ്റ് ബെറി രാജി സമർപ്പിച്ചത്.

ഇന്ത്യയിൽ നീറ്റ് ഉൾപ്പെടെയുള്ള പരീക്ഷകളിലെ ക്രമക്കേടുകളെ ചൊല്ലി വിദ്യാഭ്യാസ മന്ത്രിക്കെതിരെ പ്രതിഷേധങ്ങൾ ഉയരുകയും, ഭരണാധികാരികൾ അഴിമതിക്ക് തങ്ങൾ ഉത്തരവാദികളല്ലെന്ന നിലപാട് സ്വീകരിക്കുകയും ചെയ്യുന്ന പശ്ചാത്തലത്തിൽ, ഉദ്യോഗസ്ഥരുടെ അഴിമതിയിൽ പോലും സ്വയം ഉത്തരവാദിത്തമേറ്റെടുത്ത് രാജിവച്ച ഓസ്‌ട്രേലിയൻ മന്ത്രിയുടെ നടപടി വലിയ ചർച്ചകൾക്ക് കാരണമായിരുന്നു.

ഏഷ്യാനെറ്റ് ന്യൂസ് ലൈവ് വീഡിയോ കാണാം

യുജിസി നെറ്റ് 2026: 84 വിഷയങ്ങളുടെ ഫൈനൽ ആ ആൻസർ കീ പ്രസിദ്ധീകരിച്ചു

Prabeesh PP — Fri, 28 Aug 2026 21:39:04 +0530

ന്യൂഡൽഹി: നാഷണൽ ടെസ്റ്റിംഗ് ഏജൻസി യുജിസി നെറ്റ് 2026 പരീക്ഷയുടെ ഫൈനൽ ആൻസർ കീ പ്രസിദ്ധീകരിച്ചു. 84 വിഷയങ്ങളുടെ ഫൈനൽ ആൻസർ കീയാണ് ഔദ്യോഗിക വെബ്‌സൈറ്റായ ugcnet.nta.nic.in വഴി പരിശോധിക്കാൻ ലഭ്യമാക്കിയിട്ടുള്ളത്. പരീക്ഷയെഴുതിയ ഉദ്യോഗാർത്ഥികൾക്ക് ഈ ആൻസർ കീ ഉപയോഗിച്ച് ഉത്തരങ്ങൾ ഒത്തുനോക്കാനും പ്രതീക്ഷിക്കുന്ന സ്കോറുകൾ കണക്കാക്കാനും സാധിക്കും.

മുമ്പ് നൽകിയ പ്രൊവിഷണൽ ആൻസർ കീകൾക്ക് എതിരായി ഉദ്യോഗാർത്ഥികൾ നൽകിയ എതിർപ്പുകളും പരാതികളും പരിശോധിച്ച ശേഷമാണ് എൻടിഎ ഈ ഫൈനൽ ആൻസർ കീ തയ്യാറാക്കിയത്. ഈ ഫൈനൽ ആൻസർ കീയുടെ അടിസ്ഥാനത്തിലായിരിക്കും മൂല്യനിർണ്ണയ പ്രക്രിയകൾ നടക്കുക. ഔദ്യോഗിക ഫലവും സ്കോർകാർഡും വരുന്നത് വരെ ഉദ്യോഗാർത്ഥികൾ കാത്തിരിക്കേണ്ടതുണ്ട്. ജൂനിയർ റിസർച്ച് ഫെലോഷിപ്പ് (JRF), അസിസ്റ്റന്റ് പ്രൊഫസർ തസ്തികയിലേക്കുള്ള യോഗ്യത, പിഎച്ച്ഡി (PhD) അഡ്മിഷൻ എന്നിവ നിർണ്ണയിക്കുന്നതിനാണ് എൻടിഎ യുജിസി നെറ്റ് പരീക്ഷ നടത്തുന്നത്.

ജൂൺ 22 മുതൽ 30 വരെ 87 വിഷയങ്ങളിലായി നടന്ന യുജിസി നെറ്റ് പരീക്ഷയിൽ ഇംഗ്ലീഷ്, കൊമേഴ്സ്, സോഷ്യോളജി ചോദ്യപ്പേപ്പറുകളിൽ പിഴവുകൾ ഉയർന്നുവന്നിരുന്നു. എൻടിഎ സമിതി നടത്തിയ പരിശോധനയിൽ വസ്തുതാപരമായ തെറ്റുകളും അച്ചടി-പരിഭാഷാ പിഴവുകളും കണ്ടെത്തിയതിനെ തുടർന്ന് ഈ മൂന്ന് വിഷയങ്ങളുടെ പരീക്ഷകൾ റദ്ദാക്കുകയും വീണ്ടും നടത്താൻ തീരുമാനിക്കുകയും ചെയ്തു. എന്നാൽ ബാക്കിയുള്ള 84 വിഷയങ്ങളെ ഈ പ്രശ്നം ബാധിച്ചിരുന്നില്ല.

10 വർഷം ആയിരം കോടിയിലേറെ ചിലവ്, ഒടുവിൽ ദി പ്രൈമറി സ്കൂൾ പൂട്ടി പ്രിസില്ല ചാൻ, ബാധിക്കുക 500ലേറെ വിദ്യാർത്ഥികളെ

Elsa TJ — Mon, 24 Aug 2026 17:12:35 +0530

കാലിഫോർണിയ: സാമ്പത്തികമായി പിന്നോക്കം നിൽക്കുന്ന കുട്ടികൾക്കായി മെറ്റാ സിഇഒ മാർക്ക് സക്കർബർഗിന്റെ ഭാര്യയായ പ്രിസില്ല ചാൻ ആരംഭിച്ച സ്കൂൾ അടച്ചുപൂട്ടി. കാലിഫോർണിയയിലെ ഈസ്റ്റ് പാലോ ആൾട്ടോയിൽ 2016ൽ ആരംഭിച്ച ദി പ്രൈമറി സ്കൂൾ എന്ന വിദ്യാലയമാണ് അടച്ച് പൂട്ടിയത്. കുട്ടികളുടെ സമഗ്ര വികസനം ലക്ഷ്യമിട്ടായിരുന്നു സ്കൂൾ ആരംഭിച്ചത്. സൌജന്യമായി വിദ്യാഭ്യാസം നൽകിയിരുന്ന ഈ സ്വകാര്യ സ്കൂളിൽ പഠനത്തോടൊപ്പം ചികിത്സാ സൌകര്യങ്ങളും വിദ്യാർത്ഥികൾക്ക് ലഭ്യമായിരുന്നു. കുട്ടികൾക്ക് സൗജന്യ ദന്തപരിശോധന, കൗൺസിലിംഗ്, രക്ഷിതാക്കൾക്ക് ആവശ്യമായ വെൽനസ് കോച്ചിംഗ് തുടങ്ങിയ സമഗ്രമായ ആരോഗ്യ സാമുദായിക സേവനങ്ങളും ദി പ്രൈമറി സ്കൂളിൽ നൽകിയിരുന്നു. ചാനിന്റെ സ്വപ്ന പദ്ധതിയായ ഈ സ്ഥാപനം കുട്ടികളുടെ ദാരിദ്ര്യവും മാനസിക സംഘർഷങ്ങളും പരിഹരിക്കാനുള്ള വിപ്ലവാത്മകമായ ഒരു ശ്രമമായാണ് വീക്ഷിക്കപ്പെട്ടിരുന്നത്. പത്ത് വർഷത്തിനിടെ ചാൻ സക്കർബർഗ് ഇനിഷ്യേറ്റീവിലൂടെ 125 മില്യൺ ഡോളറിലധികം തുക (ഏകദേശം 11968025000 രൂപ) സ്കൂളിനായി ചെലവഴിച്ചിരുന്നു.

എങ്കിലും വിദ്യാലയം മുൻപോട്ടു കൊണ്ടുപോകുന്നതിൽ നിരവധി വെല്ലുവിളികൾ നേരിടേണ്ടി വന്നു. അനുയോജ്യമായ പഠനരീതികളും നയങ്ങളും കണ്ടെത്തുന്നതിലെ ബുദ്ധിമുട്ടുകൾ, പ്രിൻസിപ്പൽമാരുടെ നിരന്തരമായ മാറ്റം, സങ്കീർണ്ണമായ മാനേജ്‌മെന്റ് പ്രശ്നങ്ങൾ എന്നിവ സ്കൂളിനെ ബാധിച്ചു. ഇതിന് പുറമേസ്കൂളിന്റെ അക്കാദമിക് പ്രകടനം സംസ്ഥാനം ആവശ്യപ്പെടുന്ന മാനദണ്ഡങ്ങളേക്കാളും താഴെയായിരുന്നു. ഇതോടെയാണ് ദി പ്രൈമറി സ്കൂളിനുള്ള സാമ്പത്തിക പിന്തുണ അവസാനിപ്പിക്കാൻ ചാൻ സക്കർബർഗ് ഇനിഷ്യേറ്റീവ് തീരുമാനിച്ചത്. ജീവകാരുണ്യ പ്രവർത്തനങ്ങൾക്കായുള്ള മുൻഗണന മാറ്റാൻ ചാൻ സക്കർബർഗ് ഇനിഷ്യേറ്റീവ് തീരുമാനിച്ചതോടെ സ്കൂൾ പൂട്ടാനുളള ബോർഡ് തീരുമാനം സ്വീകരിക്കുകയായിരുന്നു. തങ്ങളുടെ ശ്രദ്ധയും മൂലധനവും സയൻസ് ഗവേഷണങ്ങളിലേക്കും ആർട്ടിഫിഷ്യൽ ഇന്റലിജൻസ് സാങ്കേതിക വിദ്യകളിലേക്കും തിരിച്ചുവിടുകയായിരുന്നു.

ലോകത്തിലെ ഏറ്റവും വലിയ ശതകോടീശ്വരന്മാരിൽ ഒരാളുടെ പിന്തുണയുണ്ടായിട്ടും ഇത്തരമൊരു സംരംഭം പെട്ടെന്ന് നിലച്ചുപോയത് ആ പ്രദേശത്തെ രക്ഷിതാക്കളെയും ഏകദേശം 500ഓളം വിദ്യാർത്ഥികളെയും കടുത്ത നിരാശയിലേക്കാണ് തള്ളിയിട്ടിട്ടുള്ളത്. സമീപത്തുള്ള പൊതുവിദ്യാലയങ്ങൾക്ക് ഈ കുട്ടികളെ പെട്ടെന്ന് ഉൾക്കൊള്ളേണ്ടി വരുന്നത് വലിയ വെല്ലുവിളിയായി മാറിയിട്ടുമുണ്ട്. ഇത്തരം വിദ്യാഭ്യാസ പരീക്ഷണങ്ങൾക്ക് സാമ്പത്തികമായി പിന്നോക്കമുള്ള വിദ്യാർത്ഥികൾ ഇരയാവേണ്ടി വരുന്നതിനെതിരെയും വിമർശനം ശക്തമാണ്.

ഏഷ്യാനെറ്റ് ന്യൂസ് ലൈവ് കാണാം

മലപ്പുറത്ത് 60, മലബാർ മേഖലയിൽ 120 അധിക പ്ലസ് വണ്‍ ബാച്ച് അനുവദിച്ച് സർക്കാർ ഉത്തരവിറങ്ങി

Prajeesh Ram — Wed, 22 Jul 2026 19:35:07 +0530

തിരുവനന്തപുരം: മലബാർ മേഖലയിലെ പ്ലസ് വൺ പ്രതിസന്ധി പരിഹരിക്കുന്നതിന് വേണ്ടി 120 അധിക ബാച്ച് അനുവദിച്ച് ഉത്തരവിറങ്ങി. യുഡിഎഫ് സർക്കാർ പ്രകടന പത്രികയിൽ പ്ലസ് വണ്ണിന് ആവശ്യമായ സീറ്റുകൾ നൽകുമെന്ന പറഞ്ഞ ഉറപ്പാണ് ഇത് വഴി പാലിച്ചിരിക്കുന്നത്. പാലക്കാട് (30), മലപ്പുറം (60), കോഴിക്കോട് (20), കാസർഗോഡ് (10 ) എന്നിങ്ങനെയാണ് താൽക്കാലിക അധിക ബാച്ചുകൾ അനുവദിച്ചത്. ഒരു ബാച്ചിൽ 60 വിദ്യാർത്ഥികൾക്കാണ് പ്രവേശനം. ഇത് പ്രകാരം ഈ ജില്ലകളിൽ അധികമായി 7,200 വിദ്യാർത്ഥികൾക്ക് പ്രവേശനം ലഭിക്കുമെന്ന് പൊതു വിദ്യാഭ്യാസ വകുപ്പ് മന്ത്രിയുടെ ഓഫീസ് അറിയിച്ചു.

പൊലീസുകാർക്കെതിരായ ബലാത്സംഗ പരാതി; കേസെടുക്കുന്നതിനെതിരെ ഉന്നത പൊലീസ് ഉദ്യോഗസ്ഥർ നൽകിയ അപ്പീൽ തള്ളി

Asianet News — Tue, 21 Jul 2026 09:35:27 +0530

പ്ലസ് വൺ പരീക്ഷാഫലം ഇന്ന് പ്രഖ്യാപിക്കും. മൂന്ന് മണിയോടെ വിദ്യാഭ്യാസ വകുപ്പിന്റെ വിവിധ വെബ് സൈറ്റുകളിലൂടെ ഫലം അറിയാം. രണ്ട് തവണ നീട്ടിവെച്ച ശേഷമാണ് ഇന്ന് ഫലം പ്രഖ്യാപിക്കുന്നത്.

സൂം കോളിൽ പിരിച്ച് വിട്ടത് 900 പേരെ, ഇന്ത്യൻ സിഇഒയെ സ്വന്തം കമ്പനിയിൽ നിന്ന് പിരിച്ചുവിട്ടു, ചതിയെന്ന് വിശാൽ ഗാർഗ്

Elsa TJ — Sun, 16 Aug 2026 05:18:45 +0530

ന്യൂയോർക്ക്: 3 മിനിറ്റ് ദൈർഘ്യമുള്ള സൂം കോളിലൂടെ 900 ജീവനക്കാരെ പിരിച്ചുവിട്ട് കുപ്രസിദ്ധനായ ഇന്ത്യൻ വംശജനായ സിഇഒയ്ക്കും തൊഴിൽ നഷ്ടം. വിശാൽ ഗാർഗിനെ സ്വന്തം കമ്പനിയായ ബെറ്റർ ഹോം ആൻഡ് ഫിനാൻസ് ആണ് ഓഗസ്റ്റ് 3ന് വിശാൽ ഗാർഗിനേയും പിരിച്ച് വിട്ടത്. ഹെഡ്ജ് ഫണ്ട് മാനേജരായ ഡാനിയൽ ലൂയിസ് കമ്പനി ഏറ്റെടുത്ത് ദിവസങ്ങൾക്കുള്ളിലാണ് തീരുമാനം എത്തുന്നത്. ലൂയിസിന് ബോർഡിൽ സ്ഥാനം നൽകാൻ തക്ക രീതിയിൽ വിശ്വസിച്ചരുന്നതായാണ് വിശാൽ ഗാർഗ് വിശദമാക്കുന്നത്. 2021ൽ ക്രിസ്തുമസിന് മുന്നോടിയായി ആയിരുന്നു വിശാലിന്റെ കൂട്ടപ്പിരിച്ച് വിടൽ. നിലവിൽ ചീഫ് എക്സിക്യൂട്ടീവ് ഓഫീസർ സ്ഥാനത്ത് നിന്ന് ഭരണസമിതി വിശാലിനെ പുറത്താക്കിയത്.

കമ്പനിയുടെ ഡയറക്ടർ ബോർഡിൽ പുതിയതായി എത്തിയ ഡാനിയൽ ലൂയിസിനെ താൽക്കാലിക സിഇഒയായി നിയമിച്ചു. വിശാൽ ഗാർഗിന്റെ തീരുമാനങ്ങളിലെ വീഴ്ചകൾ, പെരുമാറ്റ ദൂഷ്യം, വിശ്വസനീയതയില്ലായ്മ എന്നിവയാണ് പുറത്താക്കലിന് കാരണമായി ബോർഡ് വ്യക്തമാക്കിയത്. കൂടാതെ അദ്ദേഹത്തിന്റെ നേതൃത്വത്തിന് കീഴിൽ 2022 മുതൽ കമ്പനിക്ക് 1.5 ബില്യൺ ഡോളറിലധികം നഷ്ടം സംഭവിച്ചതായും ഓഹരി മൂല്യത്തിൽ 90 ശതമാനത്തിലധികം ഇടിവുണ്ടായതായും ബോർഡ് ചൂണ്ടിക്കാട്ടി. ഗൃഹവായ്പാ പ്രക്രിയകളിലെ ബുദ്ധിമുട്ടുകൾ ഒഴിവാക്കുക എന്ന ലക്ഷ്യത്തോടെയാണ് വിശാൽ ഗാർഗ് 2014ൽ ബെറ്റർ സ്ഥാപിച്ചത്.

2021 ഡിസംബറിലെ കൂട്ട പിരിച്ചുവിടലിനേ തുടർന്ന് താൽക്കാലികമായി മാറിനിന്ന അദ്ദേഹം പിന്നീട് കമ്പനിയിലേക്ക് തിരിച്ചെത്തിയെങ്കിലും ആ സംഭവം ബെറ്ററിന്റെ പ്രതിച്ഛായയെ സാരമായി ബാധിച്ചിരുന്നു. എന്നാൽ കമ്പനി ലാഭത്തിലേക്ക് തിരിച്ചെത്തുന്ന നിർണായക ഘട്ടത്തിലാണ് തന്നോട് ഈ ചതി ചെയ്തതെന്ന് വിശാൽ ഗാർഗ് ആരോപിക്കുന്നത്. പുറത്താക്കലിനെ നിയമപരമായി നേരിടാൻ ഒരു പ്രമുഖ നിയമ സംവിധാനത്തെ ചുമതലപ്പെടുത്തിയതായാണ് റിപ്പോർട്ട്.

ഏഷ്യാനെറ്റ് ന്യൂസ് ലൈവ് കാണാം

ലോകത്തിലെ ഏറ്റവും ഉയർന്ന ശമ്പളം കൈപ്പറ്റുന്ന പ്രധാനമന്ത്രി, ഇക്കുറി നേടിയത് 60 ശതമാനം വർധനവ്

Elsa TJ — Wed, 09 Sep 2026 13:26:54 +0530

സിംഗപ്പൂർ സിറ്റി: ലോകത്തിൽ ഏറ്റവുമധികം ശമ്പളം കൈപ്പറ്റുന്ന പ്രധാനമന്ത്രിയുടെ ശമ്പളത്തിൽ വീണ്ടും വർധന. സിംഗപ്പൂരിലാണ് പ്രധാനമന്ത്രിക്കും മറ്റ് മന്ത്രിമാർക്കും വൻ ശമ്പള വർധന പ്രഖ്യാപിച്ചത്. പുതിയ മാറ്റത്തോടെ സിംഗപ്പൂർ പ്രധാനമന്ത്രി ലോറൻസ് വോംഗിന്റെ ശമ്പളം 2.2 മില്യൺ സിംഗപ്പൂർ ഡോളർ (ഏകദേശം13.8 കോടി രൂപ)ഇൽ നിന്ന് 3.6 മില്യൺ സിംഗപ്പൂർ ഡോളറായി (ഏകദേശം 22.9 കോടി രൂപ) ഉയർന്നു. അറുപത് ശതമാനത്തിലേറെയാണ് വർധനവ്. ലോകത്തിൽ തന്നെ പ്രധാനമന്ത്രിക്ക് ഏറ്റവുമധികം ശമ്പളം നൽകുന്ന രാജ്യമാണ് സിംഗപ്പൂർ. സിംഗപ്പൂരിലെ സാധാരണക്കാരും രാഷ്ട്രീയ നേതാക്കൾക്കും ഇടയിലുള്ള സാമ്പത്തിക വൈരുദ്ധ്യം വലിയ രീതിയിൽ മാറ്റം വരുത്തുന്നതാണ് നടപടി. കഴിവുള്ള ആളുകൾ നിർണായക പദവികളിലേക്ക് ആകർഷിക്കുന്നതിന് വലിയ ശമ്പളം വേണമെന്നാണ് സിംഗപ്പൂർ സർക്കാർ ശമ്പള വർധനവിനെ ന്യായീകരിച്ച് വ്യക്തമാക്കുന്നത്.

ശമ്പള വർധനവിലൂടെ അധികമായി ലഭിക്കുന്ന തുക പൂർണ്ണമായും സാമൂഹിക നന്മകൾക്കും ജീവകാരുണ്യ പ്രവർത്തനങ്ങൾക്കുമായി സംഭാവന ചെയ്യുമെന്നാണ് ലോറൻസ് വോങ്ങ് ഇതിനോടകം പ്രതികരിച്ചിട്ടുള്ളത്. അടുത്ത അഞ്ച് വർഷത്തെ തന്റെ ഭരണകാലയളവിൽ ഈ തുക ജീവകാരുണ്യ കാര്യങ്ങൾക്കായി നൽകുമെന്നാണ് അദ്ദേഹം വ്യക്തമാക്കിയത്. 15 വർഷങ്ങൾക്ക് മുമ്പാണ് അവസാനമായി സിംഗപ്പൂരിൽ രാഷ്ട്രീയ ഭാരവാഹികളുടെ ശമ്പളം പരിഷ്കരിച്ചത്. സ്വതന്ത്ര സമിതി സമർപ്പിച്ച ശമ്പള പരിഷ്കരണ ശുപാർശകൾ ഉടൻ തന്നെ പൂർണ്ണമായി നടപ്പിലാക്കില്ലെന്നും നിലവിലെ ഘട്ടത്തിൽ ഒക്ടോബർ 15 മുതൽ പ്രാബല്യത്തിൽ വരുന്ന രീതിയിൽ പരമാവധി 9 ശതമാനം വരെയുള്ള ഒറ്റത്തവണ ശമ്പള ക്രമീകരണം മാത്രമാണ് നടപ്പിലാക്കുന്നതെന്നും പ്രധാനമന്ത്രി വ്യക്തമാക്കി. ഏറ്റവും താഴ്ന്ന റാങ്കിലുള്ള ഒരു മന്ത്രിയുടെ വാർഷിക അടിസ്ഥാന ശമ്പളം 1.1 മില്യൺ സിംഗപ്പൂർ ഡോളറിൽ നിന്ന് 1.2 മില്യൺ സിംഗപ്പൂർ ഡോളറായി ഉയരും.

രാഷ്ട്രീയക്കാരുടെ ശമ്പളം വർധിപ്പിക്കുന്നത് സങ്കീർണ്ണവും വൈകാരികവുമായ ഒരു വിഷയമാണെന്ന് ലോറൻസ് വോങ് സമ്മതിച്ചു. രാജ്യത്തെ സാധാരണ പൗരന്മാർ സമ്പാദിക്കുന്നതിനേക്കാൾ വളരെ ഉയർന്ന തുകയാണ് ഭരണാധികാരികളുടെ ശമ്പളമെന്നും, അതിനാൽ തന്നെ ജനങ്ങൾ ഈ തീരുമാനത്തെ വിമർശനാത്മകമായി കാണുന്നത് സ്വാഭാവികമാണെന്നും അദ്ദേഹം പറഞ്ഞു. പൊതുമേഖലയിലും സ്വകാര്യമേഖലയിലുമുള്ള മികച്ച പ്രതിഭകളെ രാഷ്ട്രീയത്തിലേക്ക് ആകർഷിക്കാനും അഴിമതി ഇല്ലാതാക്കാനുമാണ് സിംഗപ്പൂർ ഉയർന്ന ശമ്പള നയം സ്വീകരിച്ചുവരുന്നത്.

അമേരിക്കൻ പ്രസിഡന്റിന്റെ വാർഷിക ശമ്പളം 4,00,000 ഡോളറും ബ്രിട്ടീഷ് പ്രധാനമന്ത്രിയുടെ ശമ്പളം ഏകദേശം 2,30,000 ഡോളറും മാത്രമായിരിക്കെയാണ് സിംഗപ്പൂർ പ്രധാനമന്ത്രിയുടെ ശമ്പളം ലോകത്തെ മറ്റെല്ലാ ഭരണത്തലവന്മാരെക്കാളും വളരെ ഉയർന്ന തലത്തിൽ എത്തിനിൽക്കുന്നത്. എന്നാൽ തൊഴിലില്ലായ്മ വർധിക്കുകയും ജീവനക്കാരെ പിരിച്ചുവിടുന്നത് ഉയരുകയും ചെയ്യുന്ന നിലവിലെ സാമ്പത്തിക സാഹചര്യത്തിൽ ശമ്പളവർധനവ് പ്രഖ്യാപിച്ച നടപടിക്കെതിരെ സിംഗപ്പൂരിലെ പൊതുജനങ്ങൾക്കിടയിൽ നിന്നും സാമൂഹ്യ മാധ്യമങ്ങളിലും വലിയ വിമർശനങ്ങൾ ഉയരുന്നുണ്ട്.

ഏഷ്യാനെറ്റ് ന്യൂസ് ലൈവ് കാണാം

Asianet News Malayalam

13 വർഷത്തെ സേവനത്തിന് ശേഷം രാജി; അഭ്യൂഹങ്ങൾക്കിടെ കാരണം വെളിപ്പെടുത്തി ദിവ്യ മിത്തൽ ഐഎഎസ്

'ശരണ്യ സൂപ്പറാ...', ജന്മനാട്ടിൽ ആദ്യ നിയമനം നേടി ഊരാളി ഗോത്രവിഭാഗത്തിൽ നിന്നുള്ള ആദ്യ ഡോക്ടർ ശരണ്യ

നീറ്റ് പിജി 2026 ഫലം പ്രഖ്യാപിച്ചു; സ്കോറും കട്ട് ഓഫും അറിയാം

നീറ്റ് പരീക്ഷ ഓൺലൈൻ ആയേക്കും, റോഡ് മാപ്പുമായി നന്ദൻ നിലേകനി പാനൽ

കേരളത്തിലെ യുവജനങ്ങൾ സംരംഭക സാധ്യതകൾ പ്രയോജനപ്പെടുത്തണം: റോജി എം ജോൺ

കോടതിയുടെ നിർണായക ഇടപെടൽ

ഹയർ സെക്കന്ററി ഒന്നാം വർഷ ഇംപ്രൂമെന്റ് പരീക്ഷ ഒക്ടോബർ 12 മുതൽ 17 വരെ

ലൊയോള കോളേജ് ഓഫ് സോഷ്യൽ സയൻസസ് ബിരുദപൂർത്തീകരണ ചടങ്ങ് 'മാജിസ് 2026' ഓഗസ്റ്റ് 11-ന്

യുജിസി നെറ്റ് 2026: 84 വിഷയങ്ങളുടെ ഫൈനൽ ആ ആൻസർ കീ പ്രസിദ്ധീകരിച്ചു

10 വർഷം ആയിരം കോടിയിലേറെ ചിലവ്, ഒടുവിൽ ദി പ്രൈമറി സ്കൂൾ പൂട്ടി പ്രിസില്ല ചാൻ, ബാധിക്കുക 500ലേറെ വിദ്യാർത്ഥികളെ

മലപ്പുറത്ത് 60, മലബാർ മേഖലയിൽ 120 അധിക പ്ലസ് വണ്‍ ബാച്ച് അനുവദിച്ച് സർക്കാർ ഉത്തരവിറങ്ങി

പൊലീസുകാർക്കെതിരായ ബലാത്സംഗ പരാതി; കേസെടുക്കുന്നതിനെതിരെ ഉന്നത പൊലീസ് ഉദ്യോ​ഗസ്ഥർ നൽകിയ അപ്പീൽ തള്ളി

ലോകത്തിലെ ഏറ്റവും ഉയർന്ന ശമ്പളം കൈപ്പറ്റുന്ന പ്രധാനമന്ത്രി, ഇക്കുറി നേടിയത് 60 ശതമാനം വർധനവ്

പൊലീസുകാർക്കെതിരായ ബലാത്സംഗ പരാതി; കേസെടുക്കുന്നതിനെതിരെ ഉന്നത പൊലീസ് ഉദ്യോഗസ്ഥർ നൽകിയ അപ്പീൽ തള്ളി