Asianet News Malayalam

നോയല്‍ ടാറ്റയും എന്‍ ചന്ദ്രശേഖരനും തമ്മില്‍ രഹസ്യ ചര്‍ച്ച: നേതൃത്വ തര്‍ക്കം പരിഹരിക്കാന്‍ ശ്രമം; തീരുമാനമായില്ലെന്ന് സൂചന

Sangeetha KS — Fri, 30 Oct 2026 13:13:31 +0530

ടാറ്റ ഗ്രൂപ്പിന്റെ നേതൃത്വവുമായി ബന്ധപ്പെട്ട് ഉയര്‍ന്ന ഭിന്നതകള്‍ പരിഹരിക്കാന്‍ ടാറ്റ സണ്‍സ് ചെയര്‍മാന്‍ എന്‍. ചന്ദ്രശേഖരനും ടാറ്റ ട്രസ്റ്റ്സ് ചെയര്‍മാന്‍ നോയല്‍ ടാറ്റയും തമ്മില്‍ നടത്തിയ രഹസ്യ ചര്‍ച്ച തീരുമാനമാകാതെ പിരിഞ്ഞതായി റിപ്പോര്‍ട്ട്. ഒക്ടോബര്‍ 25നായിരുന്നു ഇരുവരും കൂടിക്കാഴ്ച നടത്തിയത്. ടാറ്റ സണ്‍സിന്റെ ഓഹരികള്‍ വിപണിയില്‍ ലിസ്റ്റ് ചെയ്യുന്നത്, ഹോള്‍ഡിങ് കമ്പനിയിലെ ഷാപൂര്‍ജി പല്ലോന്‍ജി (എസ്.പി.) ഗ്രൂപ്പിന്റെ ഓഹരികള്‍ ഏറ്റെടുക്കാനുള്ള നിര്‍ദേശം, ചന്ദ്രശേഖരന്റെ ചെയര്‍മാന്‍ കാലാവധി തുടങ്ങിയ വിഷയങ്ങളാണ് ചര്‍ച്ചയില്‍ പ്രധാനമായും ഉയര്‍ന്നത്.

ചന്ദ്രശേഖരനെ വീണ്ടും ചെയര്‍മാനായി നിയമിക്കുന്നതിന് അംഗീകാരം നല്‍കാന്‍ സ്വീകരിച്ച നടപടിക്രമങ്ങളെയും വോട്ടിങ് വ്യവസ്ഥകളെയും ചോദ്യം ചെയ്ത് നോയല്‍ ടാറ്റ ഒക്ടോബര്‍ 26ന് കത്തയച്ചിരുന്നു. ഇതിന് പുറമെ, ബോര്‍ഡ് യോഗത്തിന്റെ റെക്കോര്‍ഡിങ്ങുകള്‍, അന്തിമ മിനിറ്റ്‌സ്, വോട്ടിങ് രേഖകള്‍ എന്നിവയും അദ്ദേഹം ആവശ്യപ്പെട്ടിരുന്നു.

അതേസമയം, ടാറ്റ ഗ്രൂപ്പിലെ ആറ് പ്രമുഖ കമ്പനികളുടെ ഡയറക്ടര്‍ ബോര്‍ഡുകളില്‍നിന്ന് നോയല്‍ ടാറ്റ പടിയിറങ്ങും. നവംബര്‍ 12ന് 70 വയസ്സ് തികയുന്നതോടെയാണ് ഈ മാറ്റം. നോണ്‍ എക്‌സിക്യൂട്ടീവ് ഡയറക്ടര്‍മാര്‍ക്കുള്ള വിരമിക്കല്‍ നയത്തിന്റെ ഭാഗമായാണ് തീരുമാനം.

എന്നാല്‍, ടാറ്റ ഗ്രൂപ്പിന്റെ ഹോള്‍ഡിങ് കമ്പനിയായ ടാറ്റ സണ്‍സിന്റെ ബോര്‍ഡില്‍ ടാറ്റ ട്രസ്റ്റ്സിന്റെ നോമിനി ഡയറക്ടറായി അദ്ദേഹം തുടരും. നിലവില്‍ ട്രെന്റ്, വോള്‍ട്ടാസ്, ടാറ്റ ഇന്‍വെസ്റ്റ്‌മെന്റ് കോര്‍പ്പറേഷന്‍, ടാറ്റ ഇന്റര്‍നാഷനല്‍, ട്രെന്റ് ഹൈപ്പര്‍മാര്‍ക്കറ്റ് പ്രൈവറ്റ് ലിമിറ്റഡ്, ദുബായിലെ ടാറ്റ ഇന്റര്‍നാഷനല്‍ വെസ്റ്റ് ഏഷ്യ ഡിഎംസിസി എന്നീ കമ്പനികളുടെ നോണ്‍ എക്‌സിക്യൂട്ടീവ് ചെയര്‍മാനാണ് നോയല്‍ ടാറ്റ.

ടാറ്റ സ്റ്റീല്‍, ടൈറ്റന്‍ കമ്പനി എന്നിവയുടെ നോണ്‍ എക്‌സിക്യൂട്ടീവ് വൈസ് ചെയര്‍മാനായും അദ്ദേഹം പ്രവര്‍ത്തിക്കുന്നുണ്ട്. സ്പാനിഷ് ഫാഷന്‍ റീട്ടെയിലറായ ഇന്‍ഡിടെക്‌സുമായി ബന്ധപ്പെട്ട സംയുക്ത സംരംഭമായ ഇന്‍ഡിടെക്‌സ് ട്രെന്റ് റീട്ടെയില്‍ ഇന്ത്യ പ്രൈവറ്റ് ലിമിറ്റഡിന്റെ ഡയറക്ടര്‍ സ്ഥാനവും അദ്ദേഹം വഹിക്കുന്നു.

റെഡ് ബുള്‍ ഇനി 'എനര്‍ജി ഡ്രിങ്ക്' അല്ലേ? എഫ്എസ്എസ്എഐ ഉത്തരവിനെതിരെ കമ്പനി ഹൈക്കോടതിയില്‍

Sangeetha KS — Mon, 28 Sep 2026 18:08:05 +0530

കുപ്പികളില്‍ നിന്നും പരസ്യങ്ങളില്‍ നിന്നും 'എനര്‍ജി' എന്ന വാക്ക് ഒഴിവാക്കണമെന്ന ഭക്ഷ്യസുരക്ഷാ അതോറിറ്റിയുടെ ഉത്തരവിനെതിരെ പ്രമുഖ പാനീയ നിര്‍മാതാക്കളായ റെഡ് ബുള്‍ ഹൈക്കോടതിയെ സമീപിച്ചു. തങ്ങള്‍ക്ക് കാരണം കാണിക്കല്‍ നോട്ടീസ് നല്‍കുകയോ വിശദീകരണം നല്‍കാന്‍ അവസരം നല്‍കുകയോ ചെയ്യാതെയാണ് എഫ്എസ്എസ്എഐ ഇത്തരമൊരു ഉത്തരവിറക്കിയതെന്നാണ് റെഡ് ബുള്‍ ഹര്‍ജിയില്‍ പറയുന്നു. കോടതി, റെഡ് ബുളിന് മുന്‍കൂര്‍ നോട്ടീസ് നല്‍കിയിരുന്നോ എന്ന് പരിശോധിക്കാന്‍ എഫ്എസ്എസ്എഐയോട് നിര്‍ദേശിച്ചു. കേസ് ചൊവ്വാഴ്ച വീണ്ടും പരിഗണിക്കും.

മാറ്റാന്‍ 90 ദിവസം കഴിഞ്ഞ ജൂലൈ ഒന്നിനാണ് എഫ്എസ്എസ്എഐ ഈ നിര്‍ണായക ഉത്തരവിറക്കിയത്. റെഡ് ബുള്‍, സ്റ്റിങ് , അഡ്രിനാലിന്‍ റഷ്, കാമ്പ ഗോള്‍ഡ് ബൂസ്റ്റ്, ഹെല്‍ എനര്‍ജി, മോണ്‍സ്റ്റര്‍ തുടങ്ങിയ പ്രമുഖ ബ്രാന്‍ഡുകളോടാണ് തങ്ങളുടെ ലേബലുകളില്‍ നിന്നും മാര്‍ക്കറ്റിങ്ങില്‍ നിന്നും 90 ദിവസത്തിനകം 'എനര്‍ജി' എന്ന വാക്ക് നീക്കം ചെയ്യാന്‍ നിര്‍ദേശിച്ചത്.

ഉപഭോക്താക്കളെ തെറ്റിദ്ധരിപ്പിക്കുന്നുവോ?

നിലവില്‍ 'എനര്‍ജി ഡ്രിങ്ക്' എന്നൊരു വിഭാഗത്തെ അംഗീകരിക്കുന്നില്ലെന്നും ഇതിന് വ്യക്തമായ മാനദണ്ഡങ്ങളില്ലെന്നുമാണ് ഭക്ഷ്യസുരക്ഷാ അതോറിറ്റിയുടെ നിലപാട്. 'ശരീരത്തിനും മനസ്സിനും ഉന്മേഷം നല്‍കുന്നു' എന്നതുപോലുള്ള അവകാശവാദങ്ങള്‍ ഉപഭോക്താക്കളെ തെറ്റിദ്ധരിപ്പിക്കാന്‍ ഇടയാക്കുമെന്നും എഫ്എസ്എസ്എഐ ചൂണ്ടിക്കാണിക്കുന്നു. എനര്‍ജി ഡ്രിങ്ക് എന്നതിന് പകരം ഇവയെ 'കഫീനേറ്റഡ് ബിവറേജസ്' എന്ന് ലേബല്‍ ചെയ്യാമെന്നും അതോറിറ്റി നിര്‍ദേശിച്ചിരുന്നു.

എതിര്‍പ്പുമായി കമ്പനികള്‍

എന്നാല്‍, എഫ്എസ്എസ്എഐയുടെ ഈ നിര്‍ദേശത്തിനെതിരെ പാനീയ നിര്‍മാതാക്കളുടെ സംഘടനയായ ഇന്ത്യന്‍ ബിവറേജ് അസോസിയേഷന്‍ രംഗത്തെത്തിയിട്ടുണ്ട്. റെഡ് ബുള്‍, പെപ്‌സികോ, റിലയന്‍സ് തുടങ്ങിയ വമ്പന്‍ കമ്പനികള്‍ ഉള്‍പ്പെടുന്നതാണ് ഈ സംഘടന.

'കഫീനേറ്റഡ് ബിവറേജസ്' എന്ന് ലേബല്‍ ചെയ്യുന്നത് കാപ്പി മുതല്‍ സാധാരണ സോഫ്റ്റ് ഡ്രിങ്കുകള്‍ക്ക് വരെ ബാധകമാകുന്ന വളരെ വിശാലമായ ഒന്നാണെന്നും, ഇത് ഉപഭോക്താക്കളില്‍ വലിയ ആശയക്കുഴപ്പമുണ്ടാക്കുമെന്നുമാണ് ഇവരുടെ വാദം. മാത്രമല്ല, കഫീന്‍ അടങ്ങിയ പാനീയങ്ങള്‍ക്ക് 'എനര്‍ജി ഡ്രിങ്ക്‌സ്' എന്ന പേര് ഉപയോഗിക്കാന്‍ അനുമതി നല്‍കിക്കൊണ്ട് 2024 ഏപ്രിലില്‍ എഫ്എസ്എസ്എഐ തന്നെ ഇറക്കിയ രേഖകളും കമ്പനികള്‍ ചൂണ്ടിക്കാണിക്കുന്നു. കര്‍ശന നടപടികള്‍ എടുക്കുന്നതിന് മുന്‍പ് കമ്പനികള്‍ക്ക് അവരുടെ സാങ്കേതികവും നിയമപരവുമായ കാര്യങ്ങള്‍ അവതരിപ്പിക്കാന്‍ അവസരം നല്‍കണമെന്നാണ് അസോസിയേഷന്‍ ആവശ്യപ്പെടുന്നത്.

അതേസമയം, നിയമം പാലിക്കുന്നതിനായി പെപ്‌സികോ തങ്ങളുടെ പ്രശസ്ത പാനീയമായ 'സ്റ്റിങ്ങി'ല്‍ നിന്ന് 'എനര്‍ജി' എന്ന വാക്ക് ഒഴിവാക്കാന്‍ തീരുമാനിച്ചിട്ടുണ്ട്. 016-ല്‍ ഇത്തരം പാനീയങ്ങളില്‍ അടങ്ങിയിരിക്കേണ്ട കഫീന്റെ അളവ് ലിറ്ററിന് പരമാവധി 300 മില്ലിഗ്രാം ആയി എഫ്എസ്എസ്എഐ നിജപ്പെടുത്തിയിരുന്നു. കൂടാതെ, ലേബലുകളില്‍ കഫീന്റെ അളവ് വ്യക്തമാക്കണമെന്നും നിര്‍ബന്ധമാക്കിയിട്ടുണ്ട്. ഇനി ഈ പാനീയങ്ങളെ എങ്ങനെ ലേബല്‍ ചെയ്യണമെന്നും, റെഡ് ബുളിനോട് ലേബല്‍ മാറ്റാന്‍ ആവശ്യപ്പെട്ടതില്‍ എഫ്എസ്എസ്എഐ കൃത്യമായ നടപടിക്രമങ്ങള്‍ പാലിച്ചിട്ടുണ്ടോ എന്നതുമാണ് നിലവില്‍ കോടതിക്ക് മുന്‍പിലുള്ള പ്രധാന വിഷയം.

ടാറ്റാ സൺസിനെ പബ്ലിക് ലിസ്റ്റിംഗിൽ നിന്ന് ഒഴിവാക്കാൻ തന്ത്രപരമായ നീക്കം: രണ്ട് ഗ്രൂപ്പ് കമ്പനികളെ ടാറ്റാ സൺസിൽ ലയിപ്പിക്കാൻ ടാറ്റാ ട്രസ്റ്റ് ശുപാർശ

Web Desk — Tue, 29 Sep 2026 00:02:11 +0530

മുംബൈ: ടാറ്റാ ഗ്രൂപ്പിന്റെ മാതൃ കമ്പനിയായ ടാറ്റാ സൺസിനെ സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്യുന്നത് ഒഴിവാക്കാൻ പുതിയ പുനഃസംഘടനാ നിർദ്ദേശവുമായി ടാറ്റാ ട്രസ്റ്റ്. ടാറ്റാ ഗ്രൂപ്പിലെ രണ്ട് പ്രമുഖ കമ്പനികളായ ടാറ്റാ ഇലക്ട്രോണിക്സ് സിസ്റ്റംസ് സൊല്യൂഷൻസ്, ടാറ്റാ കൺസൾട്ടിംഗ് എൻജിനീയേഴ്സ് എന്നിവയെ ടാറ്റാ സൺസുമായി ലയിപ്പിക്കാനാണ് ടാറ്റാ ട്രസ്റ്റ് നിർദ്ദേശിച്ചിരിക്കുന്നത്.

റിസർവ് ബാങ്ക് ഓഫ് ഇന്ത്യയുടെ നിബന്ധനകൾ അനുസരിച്ച് ടാറ്റാ സൺസ് നിലവിൽ 'അപ്പർ ലെയർ' നോൺ-ബാങ്കിംഗ് ഫിനാൻഷ്യൽ കമ്പനി, കോർ ഇൻവെസ്റ്റ്‌മെന്റ് കമ്പനി എന്നീ വിഭാഗങ്ങളിലാണ് ഉൾപ്പെടുന്നത്. ഈ കാറ്റഗറിയിൽപ്പെടുന്ന കമ്പനികൾ നിർബന്ധമായും ഓഹരി വിപണിയിൽ പബ്ലിക് ലിസ്റ്റിംഗ് നടത്തണമെന്നാണ് ആർ.ബി.ഐ വ്യവസ്ഥ. എന്നാൽ, ടാറ്റാ സൺസിനെ ഒരു സ്വകാര്യ അൺലിസ്റ്റഡ് കമ്പനിയായി നിലനിർത്താനാണ് ടാറ്റാ ട്രസ്റ്റ് ആഗ്രഹിക്കുന്നത്.

രണ്ട് ഓപ്പറേറ്റിംഗ് കമ്പനികളെ ടാറ്റാ സൺസിലേക്ക് ലയിപ്പിക്കുന്നതോടെ കമ്പനിയുടെ വരുമാന ഘടന പൂർണ്ണമായും മാറും. സാമ്പത്തിക നിക്ഷേപങ്ങളിൽ നിന്നുള്ള വരുമാനത്തേക്കാൾ കൂടുതൽ തുക നേരിട്ടുള്ള പ്രവർത്തനങ്ങളിൽ നിന്ന് ലഭ്യമാകുന്നതോടെ ടാറ്റാ സൺസ് എൻ.ബി.എഫ്.സി അല്ലെങ്കിൽ സി.ഐ.സി പരിധിയിൽ നിന്ന് സ്വാഭാവികമായി ഒഴിവാക്കപ്പെടും. ഇതോടെ ലിസ്റ്റിംഗ് മാനദണ്ഡങ്ങളിൽ നിന്ന് വിടുതൽ നേടാമെന്നാണ് ട്രസ്റ്റിന്റെ കണക്കുകൂട്ടൽ. ഈ പുനഃസംഘടനാ നിർദ്ദേശം ടാറ്റാ സൺസ് ബോർഡിന് മുന്നിൽ സമർപ്പിച്ചിട്ടുണ്ട്. ഡയറക്ടർ ബോർഡിന്റെ അംഗീകാരത്തിന് ശേഷം റിസർവ് ബാങ്കിൽ നിന്ന് മുൻകൂട്ടി നോ-ഒബ്ജക്ഷൻ സർട്ടിഫിക്കറ്റ് ലഭ്യമാക്കാനുള്ള നടപടികളുമായി മുന്നോട്ടുപോകാനാണ് ടാറ്റാ ട്രസ്റ്റ് തീരുമാനിച്ചിരിക്കുന്നത്.

'50 ലക്ഷം രൂപയിലേറെ സിടിസിയുണ്ടായിട്ടും ടിസിഎസിൽ നിന്ന് 25% ശമ്പള വർധന'; വിമർശകർക്ക് മറുപടിയുമായി ജീവനക്കാരൻ

Sangeetha KS — Sat, 03 Oct 2026 16:21:27 +0530

പുതിയ ജീവനക്കാർക്ക് കുറഞ്ഞ ശമ്പള പാക്കേജുകൾ നൽകുന്നുവെന്ന വിമർശനം നേരിടാറുള്ള ഐടി കമ്പനിയാണ് ടാറ്റ കൺസൾട്ടൻസി സർവീസസ് അഥവാ ടിസിഎസ്. പ്രതിവർഷം മൂന്നുലക്ഷം രൂപയോളം വരുന്ന പാക്കേജുകളാണ് പുതുമുഖങ്ങൾക്ക് ലഭിക്കുന്നതെന്ന് ചൂണ്ടിക്കാട്ടിയാണ് സോഷ്യൽ മീഡിയയിൽ പലപ്പോഴും വിമർശനങ്ങൾ ഉയരുന്നത്. എന്നാൽ ടിസിഎസിനെതിരായ ഇത്തരം വിമർശനങ്ങൾക്ക് മറുപടിയുമായി ഇവൈ ജീവനക്കാരനായ സോഫ്റ്റ്‌വെയർ ഡെവലപ്പർ രംഗത്തെത്തിയിരിക്കുകയാണ്.

ഹൈദരാബാദ് സ്വദേശിയായ പങ്കജ് കുമാറാണ് തന്റെ അനുഭവം സമൂഹമാധ്യമങ്ങളിലൂടെ പങ്കുവച്ചത്. 10 വർഷത്തിലേറെയായി എന്റർപ്രൈസ് ആപ്ലിക്കേഷനുകളുടെ നിർമാണ മേഖലയിൽ പ്രവർത്തിക്കുന്ന കുമാർ, ടിസിഎസിന്റെ ഇക്കോസ്പേസ് ക്യാമ്പസിൽ മാനേജർ തലത്തിലുള്ള അഭിമുഖത്തിന്റെ അവസാന ഘട്ടത്തിലായിരുന്നു.

50 ലക്ഷം രൂപയ്ക്ക് മുകളിൽ നിലവിലെ സിടിസി

അഭിമുഖവുമായി മുന്നോട്ടുപോകുന്നതിന് മുമ്പ് തന്റെ ശമ്പള പ്രതീക്ഷകൾ പാലിക്കാൻ ടിസിഎസ് തയ്യാറാണോ എന്ന് ഉറപ്പാക്കാൻ അദ്ദേഹം തീരുമാനിച്ചു. പ്രതീക്ഷിക്കുന്ന സിടിസി നൽകാൻ കഴിയുമോ എന്ന് കമ്പനിയോട് മൂന്ന് തവണ ചോദിച്ചുവെന്നാണ് കുമാറിന്റെ അവകാശവാദം. ടിസിഎസ് തനിക്ക് 25 ശതമാനം ശമ്പള വർധനയും നൽകുന്നുണ്ടെന്നും അതുകൊണ്ട് ടിസിഎസിനെ പരിഹസിക്കുന്നത് നിർത്തൂ എന്നുമാണ് കുമാർ പറയുന്നത്.

62.5 ലക്ഷം രൂപയിലധികം പാക്കേജ്?

കുമാർ പങ്കുവച്ച കണക്കുകൾ പ്രകാരം 50 ലക്ഷം രൂപയുടെ സിടിസിയിൽ 25 ശതമാനം വർധന ലഭിച്ചാൽ വാർഷിക പാക്കേജ് കുറഞ്ഞത് 62.5 ലക്ഷം രൂപയാകും. എന്നാൽ അദ്ദേഹത്തിന്റെ കൃത്യമായ നിലവിലെ സിടിസിയും പുതിയ ശമ്പള പാക്കേജിന്റെ ഘടനയും അനുസരിച്ച് യഥാർഥ പ്രതിഫലം ഇതിലും കൂടുതലായിരിക്കാം.

മൂന്ന് ലക്ഷം രൂപ മാത്രമല്ല നൽകുന്നത്...

പുതിയ ജീവനക്കാരുടെ ശമ്പളവുമായി ബന്ധപ്പെട്ട ടിസിഎസ് വിമർശനങ്ങൾക്ക് മറുപടിയായാണ് കുമാറിന്റെ പ്രതികരണം. എന്നാൽ അദ്ദേഹത്തിന്റെ അനുഭവം 10 വർഷത്തിലേറെ പ്രവൃത്തിപരിചയമുള്ള ഒരു പ്രൊഫഷണലിന്റേതും മാനേജർ തലത്തിലുള്ള തസ്‍തികയിലേക്കുള്ള നിയമനവുമായി ബന്ധപ്പെട്ടതുമാണ്. ടിസിഎസിനെ ട്രോൾ ചെയ്യുകയും അവർ മൂന്ന് ലക്ഷം രൂപ വാർഷിക പാക്കേജ് മാത്രമാണ് നൽകുന്നതെന്ന് പറയുകയും ചെയ്യുന്നുണ്ടെങ്കിൽ നിങ്ങൾ തെറ്റാണ്. കാരണം ടിസിഎസ് അതിനെക്കുറിച്ചുള്ള പൊതുധാരണ മാറ്റിക്കൊണ്ടിരിക്കുകയാണെന്നും പങ്കജ് കുമാർ പറഞ്ഞു.

സോഷ്യൽ മീഡിയയിൽ സമ്മിശ്ര പ്രതികരണം

പങ്കജ് കുമാറിന്റെ വീഡിയോയ്ക്ക് സമൂഹമാധ്യമങ്ങളിൽ നിരവധി പ്രതികരണങ്ങളാണ് ലഭിച്ചത്. ചിലർ അദ്ദേഹത്തെ അഭിനന്ദിച്ചപ്പോൾ, 50 ലക്ഷം രൂപയിലധികം സമ്പാദിക്കുന്ന ഒരു പ്രൊഫഷണലിന് ഇതിലും വലിയ ശമ്പള വർധന ലഭിക്കേണ്ടതായിരുന്നുവെന്ന് തമാശരൂപേണ പ്രതികരിച്ചവരുമുണ്ട്.

പരിചയ സമ്പന്നനായ ഒരു ഉദ്യോഗാർഥിക്ക് ഇത്രയും ഉയർന്ന പാക്കേജ് ലഭിക്കാൻ കാരണമെന്താകാമെന്നും ചിലർ വിശദീകരിച്ചു. പോർഷെയും എഐ/എംഎൽ പദ്ധതികളും ഉൾപ്പെടുന്ന പ്രത്യേക പ്രോജക്ടുകൾക്കായി പ്രത്യേക വൈദഗ്ധ്യമുള്ള ജീവനക്കാരെ ടിസിഎസ് നിയമിക്കുന്നുണ്ടാകാമെന്നാണ് ഒരാളുടെ അഭിപ്രായം. എന്നാൽ ഇത് സമൂഹമാധ്യമത്തിലെ ഒരു ഉപയോക്താവിന്റെ അഭിപ്രായം മാത്രമാണ്. ടിസിഎസ് ഇക്കാര്യം സ്ഥിരീകരിച്ചിട്ടില്ല.

ശമ്പള പരിഷ്‍കരണത്തിലും ടിസിഎസിന് വിമർശനം

2026 മേയിൽ ടിസിഎസ് ഏറ്റവും പുതിയ ശമ്പള പരിഷ്‍കരണം നടപ്പാക്കിയതിന് പിന്നാലെയാണ് പുതിയ ചർച്ചകൾ ഉയരുന്നത്. ശരാശരി അഞ്ച് ശതമാനത്തോളം ശമ്പള വർധന പ്രഖ്യാപിച്ചിരുന്നെങ്കിലും ചില ജീവനക്കാർക്ക് ലഭിച്ച പരിഷ്‍കരണം വളരെ ചെറിയതാണെന്നും ചില സാഹചര്യങ്ങളിൽ രേഖകളിൽ ശമ്പളം കുറഞ്ഞതായി കാണുന്നുണ്ടെന്നും ആരോപണങ്ങൾ ഉയർന്നിരുന്നു.

ഇന്ത്യയിലെ പുതിയ തൊഴിൽ നിയമങ്ങൾ പ്രാബല്യത്തിൽ വരുന്നതിന്റെ ഭാഗമായി ശമ്പള ഘടനയിൽ വരുത്തിയ മാറ്റങ്ങളാണ് ഇതിന് ഒരു കാരണമെന്നാണ് റിപ്പോർട്ടുകൾ. ഈ വർഷത്തെ സിടിസിയിൽ ഗ്രാറ്റുവിറ്റി ടിസിഎസ് ഉൾപ്പെടുത്തിയില്ല. എന്നാൽ ആനുകൂല്യം കമ്പനി നൽകുന്നത് തുടരുന്നുണ്ട് എന്നാണ് റിപ്പോർട്ടുകൾ. മൊത്ത ശമ്പളത്തിലും ജീവനക്കാർക്ക് ലഭിക്കുന്ന തുകയിലും മാറ്റമില്ലെന്നും പഴയ ശമ്പള രേഖകളിൽ ഗ്രാറ്റുവിറ്റി ഉൾപ്പെടുത്തിയിരുന്നതിനാലാണ് താരതമ്യത്തിൽ ആശയക്കുഴപ്പം ഉണ്ടായതെന്നും കമ്പനിയിലെ മുതിർന്ന വൃത്തങ്ങൾ വ്യക്തമാക്കിയിരുന്നു.

വേരിയബിൾ പേയിലും ആശങ്ക

വേരിയബിൾ പേ സംബന്ധിച്ചും ജീവനക്കാർ ആശങ്ക ഉന്നയിച്ചിരുന്നു. പ്രതിമാസം ലഭിച്ചിരുന്ന ചില തുകകൾ കുറയ്ക്കുകയോ ത്രൈമാസ, വാർഷിക പേയ്മെന്റ് രീതിയിലേക്ക് മാറ്റുകയോ ചെയ്തുവെന്നാണ് ചില ജീവനക്കാരുടെ ആരോപണം. വർക്ക് ഫ്രം ഓഫീസ് നിബന്ധന പാലിക്കുന്നതുമായി ബോണസുകളും പ്രകടനാധിഷ്ഠിത ആനുകൂല്യങ്ങളും കൂടുതൽ ബന്ധിപ്പിക്കുന്നുവെന്നും ചിലർ ആരോപിക്കുന്നു.

പെർഫോമൻസിന് അനുസരിച്ച് ശമ്പള വർധനവ്

ജീവനക്കാരുടെ പ്രകടനം സംബന്ധിച്ചുള്ള വിലയിരുത്തൽ അനുസരിച്ചും ശമ്പള വർധനയിൽ വ്യത്യാസമുണ്ടായി. എ പ്ലസ് വിഭാഗത്തിൽ ഉൾപ്പെട്ട ജീവനക്കാർ ഇരട്ട അക്കത്തിൽ ശമ്പള വർധന ലഭിച്ചതായി റിപ്പോർട്ട് ചെയ്തപ്പോൾ, ബി, സി വിഭാഗങ്ങളിലുള്ള ചില ജീവനക്കാർക്ക് വർധന വളരെ കുറവായിരുന്നുവെന്നാണ് അവകാശവാദം.

അതേസമയം പുതിയ തൊഴിൽ നിയമങ്ങൾ പാലിക്കുന്നതിനും ഇന്ത്യയിലെ ജീവനക്കാരുടെ ശമ്പള ഘടന ഏകീകരിക്കുന്നതിനും വേണ്ടിയാണ് മാറ്റങ്ങൾ വരുത്തിയതെന്ന് ടി.സി.എസ് വ്യക്തമാക്കി. ജീവനക്കാരുടെ കൈയിൽ ലഭിക്കുന്ന ശമ്പളം സംരക്ഷിക്കുന്നതിനൊപ്പം നികുതി ആസൂത്രണത്തിന് കൂടുതൽ സൗകര്യം നൽകുന്നതിനാണ് പുതിയ ഘടനയെന്നും കമ്പനി അറിയിച്ചു.

ക്യു4 വരുമാന പ്രഖ്യാപനത്തിൽ അറിയിച്ചതനുസരിച്ച് അർഹരായ ജീവനക്കാർക്കുള്ള വാർഷിക ശമ്പള വർധന നടപ്പാക്കിയിട്ടുണ്ട്. കൂടാതെ, ഇന്ത്യയിലെ എല്ലാ ജീവനക്കാരുടെയും ശമ്പള ഘടന പുതിയ തൊഴിൽ നിയമങ്ങളുമായി പൊരുത്തപ്പെടുന്ന രീതിയിൽ പുനഃക്രമീകരിക്കുന്ന നടപടിയും പൂർത്തിയാക്കിയതായി ടിസിഎസ് വക്താവ് ഇന്ത്യ ടുഡേ ടെക്കിനോട് പറഞ്ഞു. അർഹരായ ജീവനക്കാർക്ക് വർഷംതോറും വാർഷിക ശമ്പള വർധന നൽകുന്നത് കമ്പനി തുടരുന്നുണ്ടെന്നും ടിസിഎസ് വ്യക്തമാക്കി.

മത്സരിക്കുമ്പോഴും പരസ്പരം സഹകരിച്ച് വമ്പന്‍മാര്‍; ഗൂഗിളിന്റെ എഐ ചിപ്പുകള്‍ വാങ്ങാന്‍ ഒരുങ്ങി ഓപ്പണ്‍എഐ

Sangeetha KS — Wed, 28 Oct 2026 12:41:23 +0530

എഐ രംഗത്തെ നിക്ഷേപം വര്‍ധിപ്പിക്കുന്നതിനിടെ, ഗൂഗിളിന്റെ ആര്‍ട്ടിഫിഷ്യല്‍ ഇന്റലിജന്‍സ് ചിപ്പുകള്‍ വാങ്ങാന്‍ ഓപ്പണ്‍എഐ പദ്ധതിയിടുന്നതായി റിപ്പോര്‍ട്ട്. എഐ ഉല്‍പ്പന്നങ്ങളുടെയും സെര്‍ച്ച് സേവനങ്ങളുടെയും കാര്യത്തില്‍ പരസ്പരം മത്സരിക്കുന്ന ഓപ്പണ്‍എഐയും ഗൂഗിളിന്റെ മാതൃകമ്പനിയായ ആല്‍ഫബെറ്റും തമ്മിലുള്ള വാണിജ്യബന്ധം കൂടുതല്‍ ശക്തമാകുന്നതിന്റെ സൂചനയായാണ് ഈ നീക്കം വിലയിരുത്തപ്പെടുന്നത്. കഴിഞ്ഞയാഴ്ച, തങ്ങളുടെ ഏറ്റവും നൂതനമായ എഐ മോഡലുകള്‍ ഗൂഗിള്‍ ക്ലൗഡ് വഴി ലഭ്യമാക്കുമെന്ന് ഓപ്പണ്‍എഐ അറിയിച്ചിരുന്നു. 2025 മുതല്‍ ഓപ്പണ്‍എഐ ഗൂഗിളിന്റെ എഐ ചിപ്പുകള്‍ വാടകയ്‌ക്കെടുത്ത് ഉപയോഗിക്കുന്നുണ്ട്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

വിപണിയില്‍ മുന്‍നിരയിലുള്ള എന്‍വിഡിയയുടെ എഐ ചിപ്പുകള്‍ക്ക് പകരമായി ഉപയോഗിക്കാവുന്ന, ചെലവ് കുറഞ്ഞ മറ്റൊരു മാര്‍ഗമായാണ് ഗൂഗിളിന്റെ ടെന്‍സര്‍ പ്രോസസിങ് യൂണിറ്റുകള്‍ (ടിപിയു) ശ്രദ്ധ നേടുന്നത്. ഈ വര്‍ഷം മുതല്‍ ചില ഉപഭോക്താക്കള്‍ക്ക് ടിപിയു ചിപ്പുകള്‍ നേരിട്ട് വില്‍ക്കാനും ഗൂഗിള്‍ തുടങ്ങിയിട്ടുണ്ട്. എതിരാളിയായ ആന്ത്രോപിക്കുള്‍പ്പെടെയുള്ള കമ്പനികളുമായുള്ള ഇടപാടുകള്‍ ഗൂഗിളിന്റെ ടിപിയു ചിപ്പുകള്‍ക്കുള്ള ആവശ്യം വര്‍ധിപ്പിച്ചിട്ടുണ്ട്.

സ്വന്തം എഐ ചിപ്പും വികസിപ്പിച്ച് ഓപ്പണ്‍എഐ

അതേസമയം, സ്വന്തമായി എഐ ചിപ്പ് വികസിപ്പിക്കുന്നതിനുള്ള പ്രവര്‍ത്തനങ്ങളും ഓപ്പണ്‍എഐ തുടരുകയാണ്. ബ്രോഡ്‌കോമുമായി ചേര്‍ന്ന് രൂപകല്‍പ്പന ചെയ്ത ആദ്യ കസ്റ്റം എഐ ചിപ്പ് ജൂണില്‍ കമ്പനി അവതരിപ്പിച്ചിരുന്നു.

എഐ അടിസ്ഥാന സൗകര്യങ്ങള്‍ക്കായി വന്‍ നിക്ഷേപം

എഐ കമ്പ്യൂട്ടിങ്ങിനുള്ള ആവശ്യം കുതിച്ചുയരുന്ന സാഹചര്യത്തില്‍, സാങ്കേതിക കമ്പനികള്‍ അടിസ്ഥാന സൗകര്യങ്ങള്‍ വികസിപ്പിക്കാന്‍ വന്‍തോതില്‍ പണം ചെലവഴിച്ചുവരികയാണ്. ആമസോണ്‍, മൈക്രോസോഫ്റ്റ്, ആല്‍ഫബെറ്റ് എന്നിവ ഈ വര്‍ഷം എഐ അടിസ്ഥാനസൗകര്യങ്ങള്‍ക്കായി ആകെ 600 ബില്യണ്‍ ഡോളര്‍ വരെ ചെലവഴിക്കാന്‍ പദ്ധതിയിടുന്നുണ്ട്. അതേസമയം, ഈ വന്‍ നിക്ഷേപങ്ങള്‍ എപ്പോള്‍ കാര്യമായ വരുമാനമായി മാറുമെന്ന കാര്യത്തില്‍ നിക്ഷേപകര്‍ കൂടുതല്‍ ചോദ്യങ്ങള്‍ ഉയര്‍ത്തുന്നുണ്ട്.

പെട്രോളിൽ എഥനോൾ സാന്നിധ്യം 30 ശതമാനത്തിലേറെയെന്ന് കണ്ടെത്തൽ, ആശങ്കയായി കണ്ടെത്തൽ

Elsa TJ — Fri, 06 Nov 2026 18:15:13 +0530

ബെംഗളൂരു: രാജ്യത്ത് വിൽക്കുന്ന പെട്രോളിൽ ആശങ്കയായി എഥനോൾ സാന്നിധ്യം. കർണാടകത്തിൽ വിൽക്കുന്ന പെട്രോളിൽ എഥനോൾ അളവ് കൂടുതലെന്ന് കണ്ടെത്തൽ. ബെംഗളൂരു ഉൾപ്പെടെ 7 നഗരങ്ങളിൽ പരിശോധന നടത്തി കർണാടക സർക്കാർ. പൊതുമേഖലാ, സ്വകാര്യ മേഖല എണ്ണ കന്പനികളിലെ പെട്രോൾ പരിശോധിച്ചു. മിക്കയിടങ്ങളിലും എഥനോൾ സാന്നിധ്യം 30 ശതമാനത്തിലും അധികമാണെന്നാണ് കണ്ടെത്തൽ. ഇന്ത്യൻ ഓയിൽ പെട്രോളിലാണ് ഏറ്റവും അധികം എഥനോൾ കണ്ടെത്തിയത്. 31.2 ശതമാനമാണ് ഇന്ത്യൻ ഓയിൽ പെട്രോളിൽ എഥനോളിന്റെ സാന്നിധ്യം. എച്ച്പിസിഎല്ലിൽ 30.5 ശതമാനവും ബിപിസിഎല്ലിൽ 26.5 ശതമാനവും നയാരയിൽ 26.1 ശതമാനവും ഷെല്ലിൽ 25.5 ശതമാനവും എഥനോൾ സാന്നിധ്യം കണ്ടെത്തിയിട്ടുണ്ട്. ആവർത്തിച്ചാവശ്യപ്പെട്ടിട്ടും കമ്പനികൾ കണക്ക് നൽകിയിരുന്നില്ല.

Addressed a press conference today and shared laboratory findings exposing excessive ethanol blending in petrol supplied across Karnataka. Tests conducted at NABL-accredited and ISO-certified laboratories found ethanol levels exceeding 20%, with certain IOCL and HPCL samples recording 31.2% and 30.5%, respectively.

Under the leadership of Hon’ble Chief Minister Shri D.K. Shivakumar, we demand transparency from the Union Government, strict action against over-blending, compensation for affected consumers and mandatory disclosure of ethanol content at fuel stations. Consumers deserve quality fuel and transparency for every rupee they pay.

#PressConference #Ethanol #E20

— Rizwan Arshad (@ArshadRizwan) November 6, 2026

ഈ സാഹചര്യത്തിലാണ് കർണാടക സർക്കാർ നേരിട്ട് പരിശോധിപ്പിച്ചത്. റിപ്പോർട്ട് കേന്ദ്രത്തിന് കൈമാറുമെന്ന് സർക്കാർ വിശദമാക്കി. ബെംഗളൂരുവിൽ നടന്ന പത്ര സമ്മേളനത്തിൽ കർണാടക സിവിൽ സപ്ലൈസ് മന്ത്രി റിസ്വാൻ അർഷാദ് ആണ് ഇക്കാര്യം വിശദമാക്കുന്നത്. സംസ്ഥാനത്തിന്റെ വിവിധ ഭാഗത്തിൽ നിന്നുള്ള 63 പെട്രോൾ സാംപിളുകളാണ് പഠന വിധേയമാക്കിയത്. ഇന്ത്യൻ നിരത്തുകളിൽ ഓടുന്ന 99 ശതമാനം വാഹനങ്ങളും 20 ശതമാനത്തിലേറെ എഥനോൾ പെട്രോളിന് അനുയോജ്യമായ നിലയിൽ അല്ല നിർമ്മിച്ചതെന്നാണ് മന്ത്രി വിശദമാക്കിയത്. ഉപയോക്താക്കൾക്ക് 62000ലേറെ രൂപയുടെ അപ്രതീക്ഷിത നഷ്ടങ്ങളാണ് എഥനോൾ കലർത്തൽ മൂലമുണ്ടാവുന്നതെന്നും മന്ത്രി നിരീക്ഷിച്ചു.

ഏഷ്യാനെറ്റ് ന്യൂസ് ലൈവ് കാണാം

ടെസ്ലയും സ്പേസ് എക്സും ലയിക്കുമോ? 3.5 ലക്ഷം കോടി ഡോളറിന്റെ വമ്പന്‍ കമ്പനിക്ക് സാധ്യത

Sangeetha KS — Wed, 21 Oct 2026 15:45:48 +0530

ഇലോണ്‍ മസ്‌കിന്റെ ഉടമസ്ഥതയിലുള്ള രണ്ട് വന്‍കിട കമ്പനികളായ ടെസ്ലയും സ്പേസ് എക്സും ലയിക്കുന്ന കാര്യം പരിഗണനയിൽ. ഇരു കമ്പനികളും ഒന്നിച്ചാല്‍ 3 ട്രില്യണ്‍ ഡോളറിലധികം മൂല്യമുള്ള വമ്പന്‍ കോര്‍പറേറ്റ് സ്ഥാപനമായി മാറും. ലയനസാധ്യത പരിശോധിക്കുന്നതിനായി ഇരു കമ്പനികളും പ്രത്യേക സമിതികള്‍ രൂപീകരിച്ചതായി മസ്‌ക് സ്ഥിരീകരിച്ചു.സ്പേസ് എക്സിന്റെ വരുമാനവുമായി ബന്ധപ്പെട്ട ചര്‍ച്ചയ്ക്കിടെയാണ് മസ്‌ക് ഇക്കാര്യം വ്യക്തമാക്കിയത്.

എഐ ഉള്‍പ്പെടെയുള്ള സാങ്കേതികവിദ്യകളില്‍ ഇരു കമ്പനികളും പ്രവര്‍ത്തിക്കുന്നതിനാല്‍ ലയനത്തിന് അവസരമുണ്ടെന്നാണ് അദ്ദേഹത്തിന്റെ വിലയിരുത്തല്‍. എന്നാല്‍, ലയനവുമായി ബന്ധപ്പെട്ട് പ്രത്യേക സമിതികള്‍ ഇതുവരെ അന്തിമ ധാരണയിലെത്തിയിട്ടില്ല. ലയന നിര്‍ദേശം ആദ്യം തയ്യാറാക്കുകയും പിന്നീട് ഓഹരിയുടമകളുടെ വോട്ടെടുപ്പിന് സമര്‍പ്പിക്കുകയും വേണമെന്ന് മസ്‌ക് പറഞ്ഞു. ഓഹരിയുടമകളുടെ അംഗീകാരം നേടുക എന്നത് വെല്ലുവിളിയാകാമെന്നും അദ്ദേഹം ചൂണ്ടിക്കാട്ടി. ടെസ്ലയുടെ ഓഹരിയുടമകളുടെ അംഗീകാരം ആവശ്യമാണ്. കുറഞ്ഞത് 50 ശതമാനം ഓഹരിയുടമകളെങ്കിലും ലയനത്തെ അനുകൂലിച്ച് വോട്ട് ചെയ്യേണ്ടതുണ്ട്.

കോര്‍പറേറ്റ് ചരിത്രത്തിലെ ഏറ്റവും വലിയ ലയനമാകുമോ?

സ്പേസ് എക്സും ടെസ്ലയും തമ്മിലുള്ള ലയനം യാഥാര്‍ഥ്യമായാല്‍ കോര്‍പറേറ്റ് ലോകത്തെ ഏറ്റവും വലിയ ലയനങ്ങളിലൊന്നായി മാറിയേക്കും. സ്പേസ് എക്സും മസ്‌കിന്റെ എഐ കമ്പനിയായ എക്സ്എഐയും തമ്മിലുള്ള 1.25 ട്രില്യണ്‍ ഡോളര്‍ മൂല്യമുള്ള ലയനത്തേക്കാള്‍ വലുതായിരിക്കും ടെസ്ല-സ്പേസ് എക്സ് ലയനമെന്നാണ് പ്രതീക്ഷ.ലോകത്തിലെ ഏഴാമത്തെ വലിയ കമ്പനിയെന്നാണ് സ്പേസ് എക്സിനെ വിശേഷിപ്പിക്കുന്നത്. ടെസ്ല പതിനൊന്നാം സ്ഥാനത്താണ്. നിലവിലെ വിപണി മൂല്യം കണക്കാക്കിയാല്‍ ഇരു കമ്പനികളുടെയും സംയുക്ത മൂല്യം ഏകദേശം 3.5 ട്രില്യണ്‍ ഡോളറിലെത്തും.

എഐയിലൂടെ വിവിധ മേഖലകളെ ഒരുമിപ്പിക്കാന്‍ നീക്കം

ലയനം നടന്നാല്‍ വിവിധ മേഖലകളില്‍ പ്രവര്‍ത്തിക്കുന്ന കമ്പനികള്‍ ഒരൊറ്റ കോര്‍പറേറ്റ് സ്ഥാപനത്തിന് കീഴിലാകും. വൈദ്യുത വാഹനങ്ങള്‍, ഊര്‍ജസംഭരണ ബാറ്ററികള്‍, റോക്കറ്റുകള്‍, ഉപഗ്രഹങ്ങള്‍ തുടങ്ങിയ വ്യത്യസ്ത മേഖലകളെ നിര്‍മിതബുദ്ധിയിലൂടെ പരസ്പരം ബന്ധിപ്പിക്കാനാണ് ലക്ഷ്യമിടുന്നത്.ബഹിരാകാശത്തെ അടിസ്ഥാനസൗകര്യങ്ങള്‍ ഉപയോഗിച്ച് കംപ്യൂട്ടിങ് പ്രവര്‍ത്തനങ്ങള്‍ക്കും എഐ സംവിധാനങ്ങള്‍ക്കും ആവശ്യമായ പിന്തുണ നല്‍കുകയെന്ന ആശയവും ഇതിനു പിന്നിലുണ്ട്. സ്വയം നിയന്ത്രിച്ച് ഓടുന്ന വാഹനങ്ങളുടെ സാങ്കേതികവിദ്യ മെച്ചപ്പെടുത്തുന്നതിനും റോബോട്ടുകളുടെ വികസനത്തിനും ടെസ്ലയ്ക്ക് എഐ പ്രയോജനപ്പെടുത്താനാകും.

പുതിയ ഉൽപന്നങ്ങൾ വിപണിയിലിറക്കി, പിന്നാലെ ആമസോണിൽ വീണ്ടും പിരിച്ചുവിടൽ; 250 ജീവനക്കാരെ ഒഴിവാക്കി

Sangeetha KS — Thu, 29 Oct 2026 11:31:01 +0530

വാഷിംഗ്ടൺ: പുതിയ കിൻഡിൽ ഇ- റീഡറുകളും ടാബ്‌ലെറ്റ് കമ്പ്യൂട്ടറുകളും വിപണിയിലെത്തിച്ചതിന് തൊട്ടുപിന്നാലെ ഡിവൈസസ് ആൻഡ് സർവീസസ് വിഭാഗത്തിൽ നിന്നും 250 ഓളം ജീവനക്കാരെ പിരിച്ചുവിട്ട് ആമസോൺ. റോയിട്ടേഴ്‌സിന്റെ അന്വേഷണത്തിന് മറുപടിയായാണ് കമ്പനി പിരിച്ചുവിടൽ സ്ഥിരീകരിച്ചത്. പ്രവർത്തനം കൂടുതൽ കാര്യക്ഷമമാക്കുന്നതിനും കമ്പനിയുടെ ഭാവി റോഡ്‌മാപ്പിന് അനുസൃതമായി ഘടന പുനഃസംഘടിപ്പിക്കുന്നതിനുമാണ് ഈ നീക്കമെന്ന് ആമസോൺ വക്താവ് വ്യക്തമാക്കി.

പ്രധാനമായും സോഫ്റ്റ്‌വെയർ ഡെവലപ്‌മെന്റ് വിഭാഗത്തിൽ പ്രവർത്തിക്കുന്ന ജീവനക്കാരെയാണ് ഈ തീരുമാനം ബാധിച്ചത്. കമ്പനിയുടെ പതിവ് രീതി പോലെ, ബുധനാഴ്ച രാവിലെ ടെക്സ്റ്റ് സന്ദേശങ്ങളിലൂടെയും ഇമെയിലുകളിലൂടെയുമാണ് ജീവനക്കാരെ പിരിച്ചുവിട്ട വിവരം ജീവനക്കാരെ അറിയിച്ചത്. വിശദമായ അവലോകനം നടത്തിയ ശേഷമാണ് തസ്തികകൾ ഒഴിവാക്കാൻ തീരുമാനിച്ചതെന്ന് ഡിവൈസസ് ആൻഡ് സർവീസസ് വിഭാഗം എച്ച്. ആർ വൈസ് പ്രസിഡന്റ് ചെറി റോബിൻസൺ ജീവനക്കാർക്കയച്ച സന്ദേശത്തിൽ വ്യക്തമാക്കിയിട്ടുണ്ട്.

അടുത്തിടെ പുതിയ കിൻഡിൽ മോഡലുകളും ടാബ്‌ലെറ്റുകളും വിപണിയിലെത്തിച്ച ആമസോൺ, അലക്‌സ പ്രവർത്തിക്കുന്ന പുതിയ അലാറം ക്ലോക്കും ഫോട്ടോ ഫ്രെയിമും കൂടി പുറത്തിറക്കിയിരുന്നു. ഇതിന് തൊട്ടുപിന്നാലെയാണ് പുതിയ പിരിച്ചുവിടൽ വാർത്ത വരുന്നത്. ഈ മാസത്തിന്റെ തുടക്കത്തിൽ ആമസോണിന്റെ പ്രധാന റീട്ടെയിൽ വിഭാഗത്തിൽ നിന്ന് ആയിരത്തോളം ജീവനക്കാരെ പിരിച്ചുവിട്ടിരുന്നു. അതിനുശേഷമാണ് ഇപ്പോൾ വീണ്ടും 250 തസ്തികകൾ കൂടി വെട്ടിക്കുറച്ചിരിക്കുന്നത്. കമ്പനിയുടെ മൂന്നാം പാദ സാമ്പത്തിക ഫലങ്ങൾ പുറത്തുവിടാനിരിക്കെയാണ് ഈ നടപടികൾ.

ലുലു ഗ്രൂപ്പിനെ കബളിപ്പിച്ച് തട്ടിയത് കോടികൾ, ഇറ്റാലിയൻ കമ്പനിയുടെ പേരിൽ വ്യാജ ഇമെയിൽ, 27 ദിവസത്തിൽ നഷ്ടമായത് 1.64 കോടി രൂപ

Sangeetha KS — Sat, 24 Oct 2026 10:47:06 +0530

കൊച്ചി: ലുലു ഗ്രൂപ്പിനെ വ്യാജ ഇ മെയിൽ വഴി കബളിപ്പിച്ച് 1.64 കോടി രൂപ തട്ടിയെടുത്തു. ഇറ്റാലിയൻ കമ്പനിയുടെ പേരിലാണ് ആൾമാറാട്ടം. കൊച്ചി സൈബർ പൊലീസ് കേസെടുത്ത് അന്വേഷണം തുടങ്ങിയിട്ടുണ്ട്. ലുലു ഗ്രൂപ്പുമായി ദീർഘകാലമായി വ്യാപാരബന്ധമുള്ള ഇറ്റലിയിലെ 'IE Park S.R.L' എന്ന കമ്പനിയുടെ ഔദ്യോഗിക ഇമെയിൽ വിലാസങ്ങളോട് സാമ്യമുള്ള വിലാസങ്ങൾ ഉണ്ടാക്കിയാണ് തട്ടിപ്പ് നടത്തിയത്. സെപ്റ്റംബർ 2 മുതൽ 29 വരെയുള്ള കാലയളവിലാണ് തട്ടിപ്പ് നടന്നത്. ഗെയിമിംഗ് ഉപകരണങ്ങൾ വാങ്ങിയ വകയിൽ നൽകാനുണ്ടായിരുന്ന തുകയാണ് തട്ടിയത്. കൂടുതൽ അന്വേഷണം നടന്നു വരികയാണ്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

കച്ചവടക്കാരെ സഹായിക്കാൻ കൈക്കൂലി വാങ്ങിയെന്ന ആരോപണം; ഫ്ലിപ്കാർട്ടിലെ 150 കോടിയുടെ അഴിമതിയിൽ അന്വേഷണത്തിനൊരുങ്ങി വാൾമാർട്ട്

Sangeetha KS — Sat, 31 Oct 2026 15:36:25 +0530

ഫ്ളിപ്കാർട്ട് ജീവനക്കാർ 150 കോടി രൂപയിലധികം കോഴ വാങ്ങിയെന്ന പരാതിയിന്മേൽ അന്വേഷണം ആരംഭിച്ച് മാതൃകമ്പനിയായ വാൾമാർട്ട്. സ്മാർട്ട്ഫോൺ, യാത്രാ ബാഗുകൾ എന്നീ വിഭാഗങ്ങളിലെ ജീവനക്കാർക്ക് എതിരെയൊണ് ആരോപണം ഉയർന്നിരിക്കുന്നത്. ചില മൊബൈൽ ബ്രാൻഡ് വെണ്ടർമാരിൽ നിന്നും ജീവനക്കാർ അനധികൃതമായി പണം കൈപ്പറ്റുകയും, പകരം ഫ്ലിപ്കാർട്ട് പ്ലാറ്റ്‌ഫോമിൽ ഈ ഉൽപ്പന്നങ്ങൾക്ക് ഉയർന്ന വിസിബിലിറ്റിയും കൂടുതൽ വിൽപ്പനയ്ക്കുള്ള സൗകര്യങ്ങളും നൽകുന്നു എന്നുമാണ് പ്രാഥമികമായ കണ്ടെത്തൽ. മണികൺട്രോളാണ് ഈ വിവരം പുറത്തുവിട്ടിരിക്കുന്നത്.

പ്രധാനമായും ഫ്ലിപ്കാർട്ടിന്റെ ബിസിനസ് ടു ബിസിനസ് (B2B) വിഭാഗത്തിലാണ് ഈ ക്രമക്കേട് നടന്നിട്ടുള്ളത്. വിഷയത്തിൽ വാൾമാർട്ട് ഇതുവരെ ഔദ്യോഗിക പ്രതികരണം നടത്തിയിട്ടില്ലെങ്കിലും, തങ്ങൾക്ക് കർശനമായ ഭരണനിർവഹണ സംവിധാനങ്ങളുണ്ടെന്നും ഏത് പരാതിയും ഗൗരവമായി പരിശോധിച്ച് ആവശ്യമായ നടപടികൾ സ്വീകരിക്കുമെന്നും ഫ്ലിപ്കാർട്ട് അറിയിച്ചു.

കഴിഞ്ഞ മൂന്ന് വർഷത്തിനിടെ ഫ്ലിപ്കാർട്ടിലെ സാമ്പത്തിക ക്രമക്കേടുകളുമായി ബന്ധപ്പെട്ട് വാൾമാർട്ട് നടത്തുന്ന മൂന്നാമത്തെ അന്വേഷണമാണിത്. മുമ്പ് നടത്തിയ അന്വേഷണങ്ങളിൽ ക്രമക്കേട് കണ്ടെത്തിയതിനെ തുടർന്ന് ചില ജീവനക്കാരെ പുറത്താക്കുകയും ചിലർ രാജിവയ്ക്കുകയും ചെയ്തിരുന്നു. നിലവിൽ ഐപിഒ (IPO) വൈകുന്നതിലെ ആശങ്കകൾ, മുതിർന്ന ഉദ്യോഗസ്ഥരുടെ രാജി, ജീവനക്കാരുടെ ഇഎസ്ഒപി (ESOP) തർക്കങ്ങൾ എന്നിവ നേരിടുന്ന ഫ്ലിപ്കാർട്ടിന് പുതിയ അന്വേഷണം വലിയ തിരിച്ചടിയാണ് ഉണ്ടാക്കിയിരിക്കുന്നത്.

'ജസ്റ്റ് ഡു ഇറ്റ്': ലോകത്തെ ഏറ്റവും വലിയ സ്പോർട്സ് ബ്രാൻഡിന് സംഭവിച്ചതെന്ത്? നൈക്കിക്ക് നഷ്ടമായത് 230 ബില്യണ്‍ ഡോളര്‍!

Sangeetha KS — Sat, 03 Oct 2026 11:56:42 +0530

മികച്ച ഷൂസുകള്‍, പരസ്യത്തിനായി ലോകത്തെ വമ്പന്‍ കായിക താരങ്ങള്‍, ആളുകളുടെ മനസില്‍ തങ്ങിനില്‍ക്കുന്ന പരസ്യവാചകങ്ങള്‍, എവിടെ നോക്കിയാലും കാണുന്ന പ്രശസ്തമായ ലോഗോ... ഇവയൊക്കെയായിരുന്നു വര്‍ഷങ്ങളോളം ലോകത്തെ ഏറ്റവും വലിയ സ്‌പോര്‍ട്‌സ് ബ്രാന്‍ഡായ നൈക്കിയുടെ വിജയമന്ത്രം. അവര്‍ ലോകത്തോട് പറഞ്ഞത് 'ജസ്റ്റ് ഡു ഇറ്റ്' എന്നാണ്. എന്നാല്‍ ഇന്ന് ജീവനക്കാരെ പിരിച്ചുവിട്ടും, ബിസിനസ് രീതികൾ അപ്പാടെ മാറ്റിയും, വില്‍പനയിലെ കനത്ത ഇടിവ് നേരിട്ടും വലിയൊരു പ്രതിസന്ധിയിലൂടെയാണ് നൈക്കി കടന്നുപോകുന്നത്. വര്‍ഷങ്ങളായി തുടരുന്ന പ്രശ്‌നങ്ങള്‍ പരിഹരിക്കാനുള്ള നെട്ടോട്ടത്തിലാണ് കമ്പനി ഇപ്പോള്‍.

ഓഗസ്റ്റ് 31-ന് അവസാനിച്ച പാദത്തില്‍ നൈക്കിയുടെ വരുമാനം 4 ശതമാനം ഇടിഞ്ഞ് 11.2 ബില്യണ്‍ ഡോളറിലെത്തി. ലാഭത്തിൽ 2 ശതമാനത്തിന്റെ കുറവുണ്ടായി (712 മില്യണ്‍ ഡോളര്‍). എന്നാല്‍ നിക്ഷേപകരെ ഏറ്റവും കൂടുതല്‍ ഭയപ്പെടുത്തുന്നത് വരാനിരിക്കുന്ന കണക്കുകളാണ്. 2027 സാമ്പത്തിക വര്‍ഷത്തില്‍ വരുമാനത്തില്‍ വലിയ തോതിലുള്ള ഇടിവ് ഉണ്ടാകുമെന്നാണ് കമ്പനിയുടെ തന്നെ മുന്നറിയിപ്പ്. ഇത് നിക്ഷേപകര്‍ക്ക് ഒട്ടും ദഹിച്ചിട്ടില്ല. കണക്കുകള്‍ പുറത്തുവന്നതിന് പിന്നാലെ കമ്പനിയുടെ ഓഹരികളില്‍ 8.5 ശതമാനത്തിന്റെ വരെ ഇടിവുണ്ടായി. നൈക്കിയുടെ വിപണി മൂല്യത്തില്‍ നിന്നും ഇതുവരെ ഏകദേശം 230 ബില്യണ്‍ ഡോളറാണ് ഒലിച്ചുപോയത്.

ഉല്‍പ്പന്നങ്ങളിലെ പാളിച്ച

ആളുകള്‍ സ്‌പോര്‍ട്‌സ് വെയറുകള്‍ വാങ്ങുന്നത് നിര്‍ത്തിയതല്ല കമ്പനിയുടെ പ്രധാന പ്രശ്‌നം. മറിച്ച്, ഉപഭോക്താക്കളെ ആകര്‍ഷിക്കുന്ന പുതിയ ഉല്‍പ്പന്നങ്ങള്‍ ഇറക്കുന്നതില്‍ നൈക്കി പരാജയപ്പെട്ടു എന്നതാണ്. റണ്ണിംഗ് ഷൂസ് ഉള്‍പ്പെടെയുള്ള ചില വിഭാഗങ്ങളില്‍ പുരോഗതിയുണ്ടെന്ന് കമ്പനി തന്നെ സമ്മതിക്കുമ്പോഴും, ലൈഫ്‌സ്‌റ്റൈല്‍ വസ്ത്രങ്ങളുടെയും ഷൂസുകളുടെയും വില്‍പനയില്‍ വലിയ തകര്‍ച്ചയാണ് നേരിടുന്നത്.

ഒരു കാലത്ത് വന്‍ ജനപ്രീതിയുണ്ടായിരുന്ന എയര്‍ ഫോഴ്‌സ് 1, ഡങ്ക്, എയര്‍ ജോര്‍ദാന്‍, കോര്‍ട്ടെസ് തുടങ്ങിയ മോഡലുകള്‍ക്ക് പഴയ ഡിമാന്‍ഡില്ല. വിപണിയിൽ ഇവ കായികതാരങ്ങള്‍ക്ക് മാത്രമുള്ള ഷൂസുകള്‍ ആയിരുന്നില്ല, മറിച്ച് ഫാഷന്‍ ഐക്കണുകള്‍ കൂടിയായിരുന്നു. എന്നാല്‍ ഉപഭോക്താക്കളുടെ മാറുന്ന അഭിരുചിക്കൊപ്പം പിടിച്ചുനില്‍ക്കാന്‍ ഇവയ്ക്ക് കഴിയുന്നില്ല. നൈക്കിയുടെ കീഴിലുള്ള കണ്‍വേഴ്‌സിന്റെ വരുമാനം ഏറ്റവും പുതിയ പാദത്തില്‍ 28 ശതമാനമാണ് ഇടിഞ്ഞത്. ഈ സമയത്ത് ഓണ്‍ ക്ലൗഡ്, ഹോക്ക തുടങ്ങിയ പുതിയ ബ്രാന്‍ഡുകള്‍ വിപണിയില്‍ വലിയ മുന്നേറ്റം നടത്തുകയും ചെയ്തു.

ചൈനീസ് വിപണിയിലെ തിരിച്ചടി

നൈക്കിക്ക് ഏറ്റവും വലിയ തലവേദന സൃഷ്ടിക്കുന്നത് ചൈനീസ് വിപണിയാണ്. കഴിഞ്ഞ പാദത്തില്‍ ഗ്രേറ്റര്‍ ചൈനയിലെ വരുമാനത്തില്‍ 22 ശതമാനം ഇടിവുണ്ടായി. ചൈനീസ് പ്രാദേശിക ബ്രാന്‍ഡുകള്‍ വിപണി പിടിച്ചടക്കിയതാണ് ഇതിന് കാരണം.

ഇടനിലക്കാരെയും റീട്ടെയില്‍ കടകളെയും ഒഴിവാക്കി നേരിട്ട് ഉപഭോക്താക്കളിലേക്ക് ഉല്‍പ്പന്നങ്ങള്‍ എത്തിക്കാനുള്ള നൈക്കിയുടെ ശ്രമം പാളിപ്പോയി. ഷോപ്പുകളില്‍ നൈക്കി ഷൂസുകള്‍ അപ്രത്യക്ഷമായത് വില്‍പനയെ സാരമായി ബാധിച്ചു. നോര്‍ത്ത് അമേരിക്കയില്‍ ഹോള്‍സെയില്‍ വില്‍പന 2 ശതമാനം വളര്‍ന്നപ്പോള്‍, നൈക്കി ഡയറക്ട് 8 ശതമാനവും ഡിജിറ്റല്‍ വില്‍പന 13 ശതമാനവും ഇടിഞ്ഞു. സ്വന്തമായി സ്റ്റോറുകളും ഡിജിറ്റല്‍ പ്ലാറ്റ്ഫോമുകളും വേണമെങ്കിലും മറ്റ് റീട്ടെയിലര്‍മാരെയും കമ്പനിക്ക് ആവശ്യമുണ്ടെന്ന് ഇപ്പോള്‍ നൈക്കി തിരിച്ചറിയുന്നു.

നഷ്ടപ്പെട്ട തിളക്കം

ഇതിഹാസ താരങ്ങളെ വെച്ച് സ്‌പോര്‍ട്‌സ് ലോകത്തെ അടക്കിഭരിച്ചിരുന്ന നൈക്കിക്ക് പഴയ ആവേശമുണ്ടാക്കാന്‍ കഴിയുന്നില്ല. ഇന്ന് വിപണിയില്‍ ഉപഭോക്താക്കള്‍ക്ക് നിരവധി ചോയ്‌സുകളുണ്ട്. നൈക്കിക്ക് ഇപ്പോഴും വലിയ ബ്രാന്‍ഡ് വാല്യു ഉണ്ടെങ്കിലും, ആളുകളില്‍ ആവേശം നിറയ്ക്കാന്‍ അതിന് കഴിയുന്നില്ല.

ഒടിടി മല്‍സരം കടുക്കുന്നു; ജീവനക്കാരെ പിരിച്ചുവിട്ട് നെറ്റ്ഫ്‌ളിക്സ്, 1000 പേര്‍ക്ക് ജോലി നഷ്ടമാകും

Sangeetha KS — Thu, 15 Oct 2026 15:25:09 +0530

ആഗോള ഒടിടി കമ്പനിയായ നെറ്റ്ഫ്‌ലിക്‌സ് ഏകദേശം 1,000 ജീവനക്കാരെ പിരിച്ചുവിടാനൊരുങ്ങുന്നു. കമ്പനിയിലെ മൊത്തം ജീവനക്കാരുടെ ഏകദേശം 6 ശതമാനം വരുമിത്. 2022 ന് ശേഷമുള്ള ഏറ്റവും വലിയ തൊഴില്‍ വെട്ടിക്കുറയ്ക്കലാണിത്. എച്ച്ആര്‍, നിയമം, സാങ്കേതികവിദ്യ തുടങ്ങിയ വിഭാഗങ്ങളിലെ ജീവനക്കാരെയാണ് പ്രധാനമായും ഇത് ബാധിക്കുക. ജോലി നഷ്ടപ്പെടുന്ന ജീവനക്കാരെക്കുറിച്ച് മാനേജര്‍മാര്‍ ഉടന്‍ തന്നെ വിവരം നല്‍കും.

മത്സരം കനക്കുന്നു; വളര്‍ച്ച മന്ദഗതിയിലോ?

കമ്പനിയുടെ വളര്‍ച്ച താന്‍ ആഗ്രഹിച്ച വേഗതയിലല്ല മുന്നോട്ടുപോകുന്നതെന്ന് നെറ്റ്ഫ്‌ലിക്‌സ് കോ-ചീഫ് എക്‌സിക്യൂട്ടീവ് ടെഡ് സാരന്‍ഡോസ് കഴിഞ്ഞ മാസം ബ്ലൂംബെര്‍ഗ് സ്‌ക്രീന്‍ടൈം ഉച്ചകോടിയില്‍ വ്യക്തമാക്കിയിരുന്നു. യൂട്യൂബ്, ടിക് ടോക് തുടങ്ങിയ സൗജന്യ പ്ലാറ്റ്ഫോമുകള്‍ ഉപയോക്താക്കളെ ആകര്‍ഷിക്കുന്നതും ഒടിടി രംഗത്തെ കടുത്ത മത്സരവുമാണ് നെറ്റ്ഫ്‌ലിക്‌സിന് വെല്ലുവിളിയാകുന്നത്.

ഇതിനിടയില്‍, എച്ച്ബിഒയുടെ ഉടമകളായ വാര്‍ണര്‍ബ്രോസുമായുള്ള പാരമൗണ്ടിന്റെ 110 ബില്യണ്‍ ഡോളറിന്റെ ലയനം ഒടിടി മേഖലയില്‍ വലിയ മാറ്റങ്ങളാണുണ്ടാക്കുന്നത്. വാര്‍ണര്‍ ബ്രോസിനെ സ്വന്തമാക്കാന്‍ നെറ്റ്ഫ്‌ലിക്‌സും ശ്രമിച്ചിരുന്നെങ്കിലും ഒടുവില്‍ പാരമൗണ്ടിന് മുന്നില്‍ പിന്‍വാങ്ങേണ്ടി വന്നു.

ജീവനക്കാര്‍ക്കയച്ച ഇമെയില്‍ സന്ദേശത്തില്‍, കോ-ചീഫ് എക്‌സിക്യൂട്ടീവ്മാരായ ടെഡ് സാരന്‍ഡോസും ഗ്രെഗ് പീറ്റേഴ്‌സും ഇക്കാര്യം സ്ഥിരീകരിച്ചിട്ടുണ്ട്. ലോകത്തെ രസിപ്പിക്കുകയെന്ന ഞങ്ങളുടെ ദൗത്യം വലുതാണ്, അതിനായി മുന്‍ഗണനകളില്‍ കര്‍ശനമായ അച്ചടക്കം പാലിക്കേണ്ടതുണ്ടെന്ന് അവര്‍ സന്ദേശത്തില്‍ വ്യക്തമാക്കി. എങ്കിലും, സേവനങ്ങള്‍ മെച്ചപ്പെടുത്തുന്നതിനും വളര്‍ച്ചയ്ക്കും വേണ്ടി പ്രധാന മേഖലകളില്‍ കമ്പനി ശക്തമായി നിക്ഷേപം തുടരുമെന്നും അവര്‍ കൂട്ടിച്ചേര്‍ത്തു.

പുതിയ വരുമാന സ്രോതസുകള്‍ കണ്ടെത്താന്‍ നെട്ടോട്ടം

ഗെയിമിംഗ് രംഗത്തേക്കുള്ള പ്രവേശനവും ഷോകള്‍ക്ക് മുന്നിലും ഇടയിലും പരസ്യങ്ങള്‍ അനുവദിക്കുന്നതുമടക്കം വിവിധ പരീക്ഷണങ്ങള്‍ കമ്പനി നടത്തുന്നുണ്ടെങ്കിലും, നിലവിലെ സബ്സ്‌ക്രിപ്ഷന്‍ ബിസിനസ്സ് അതിന്റെ പരിധിയിലെത്തിക്കഴിഞ്ഞതായി നിരീക്ഷകര്‍ കരുതുന്നു. പുതിയൊരു വലിയ വരുമാന സ്രോതസ്സ് കണ്ടെത്താന്‍ കമ്പനി പാടുപെടുകയാണെന്ന് വിദഗ്ധര്‍ പറയുന്നു. വരിക്കാരുടെ എണ്ണത്തില്‍ കുറവുണ്ടായതിനെ തുടര്‍ന്ന് 2022ല്‍ 450-ഓളം ജീവനക്കാരെ പിരിച്ചുവിട്ടതായിരുന്നു നെറ്റ്ഫ്‌ലിക്‌സിലെ അവസാനത്തെ വലിയ തൊഴില്‍ വെട്ടിക്കുറയ്ക്കല്‍ നടപടി.

ഇന്ത്യക്കാർക്ക് സ്പെഷ്യൽ! റണ്ണിംഗ് പ്രേമികള്‍ക്ക് നൈകിയുടെ പുതിയ സമ്മാനം; ആദ്യമായി ഇന്ത്യക്കായി ഒരു ഷൂ വരുന്നു, 'വേഗം റണ്‍' വിപണിയില്‍

Sangeetha KS — Mon, 02 Nov 2026 17:16:57 +0530

ഇന്ത്യയിലെ കായികപ്രേമികള്‍ക്കും റണ്ണേഴ്‌സിനും വേണ്ടി പ്രമുഖ ആഗോള ബ്രാന്‍ഡായ നൈകി തങ്ങളുടെ ആദ്യ റണ്ണിംഗ് ഷൂ പുറത്തിറക്കി. 'വേഗം റണ്‍' എന്ന് പേരിട്ടിരിക്കുന്ന ഈ ഷൂ, മികച്ച കുഷ്യനിംഗും വായുസഞ്ചാരവും ഈടും ഉറപ്പുനല്‍കുന്നു. ഇന്ത്യന്‍ വിപണിയെ ലക്ഷ്യമിട്ട് നൈക്കി വികസിപ്പിച്ച ആദ്യ റണ്ണിങ് ഷൂവാണ് ഇത്. ദൈനംദിന ഉപയോഗത്തിനും ഓട്ടത്തിനുമടക്കം ഉപയോഗിക്കാന്‍ കഴിയുന്ന തരത്തിലാണ് ഇതിന്റെ നിര്‍മ്മാണം. 3,795 രൂപയാണ് ഇതിന്റെ വില.

രൂപകല്‍പ്പന

ഇന്ത്യയിലെ വിവിധ ഭാഗങ്ങളിലുള്ള റണ്ണേഴ്‌സുമായി നേരിട്ട് സംസാരിച്ചും അവരുടെ പരിശീലനരീതികളും ജീവിതരീതികളും മനസിലാക്കിയുമാണ് ഈ ഷൂ രൂപകല്‍പ്പന ചെയ്തിരിക്കുന്നത്. ഭാരം കുറഞ്ഞതും മികച്ച വായുസഞ്ചാരം നല്‍കുന്നതുമായ അപ്പര്‍ ഭാഗം, കാല്‍പ്പാദത്തിന് ആഘാതമേല്‍ക്കാത്ത പ്ലഷ് ഫോം ബെഡ്, ഷൂവിന് കൂടുതല്‍ ഈടുനില്‍പ്പും ആയുസും നല്‍കുന്നതിനായി പെരിമീറ്റര്‍ റബ്ബറും സ്റ്റാക്ക് ചെയ്ത ടെക്‌സ്ചര്‍ ചെയ്ത ഔട്ട്‌സോളും എന്നിവയാണ് ഷൂവിന്റെ പ്രത്യേകതകള്‍. ഷൂ എളുപ്പത്തില്‍ ധരിക്കാനും ഊരിയെടുക്കാനും സഹായിക്കുന്ന ടാബ് സംവിധാനവുമുണ്ട്. ആധുനിക രീതിയിലുള്ള ലളിതമായ ഡിസൈനാണ് ഷൂവിന്റേത്. ആകര്‍ഷകമായ കളര്‍ ഓപ്ഷനുകളില്‍ ഷൂ ലഭ്യമാണ്.

റെക്കോര്‍ഡ് വേഗതയില്‍ നിര്‍മ്മാണം

വെറും 55 ദിവസം കൊണ്ടാണ് നൈകി ഇതിന്റെ ഡിസൈനില്‍ നിന്ന് ഉല്‍പ്പന്ന നിര്‍മാണത്തിലേക്ക് എത്തിയത്. വിപണിയിലെത്തിക്കാന്‍ ഏകദേശം അഞ്ച് മാസം മാത്രമാണ് എടുത്തത്. നൈകിയുടെ 'വേഗം റണ്‍' നവംബര്‍ 1 മുതല്‍ ഇന്ത്യയില്‍ ലഭ്യമായിത്തുടങ്ങിയിട്ടുണ്ട്. ഫ്ലിപ്കാർട്ട് വഴിയും തിരഞ്ഞെടുത്ത റീട്ടെയില്‍ സ്റ്റോറുകള്‍ വഴിയുമാണ് നിലവില്‍ ഇത് ലഭ്യമാക്കിയിരിക്കുന്നത്. തുടര്‍ന്ന് അടുത്ത വര്‍ഷം തുടക്കത്തില്‍ നൈകിയുടെ മറ്റ് പങ്കാളികള്‍ വഴിയും ഇന്ത്യയിലുടനീളം ഇതിന്റെ വില്‍പ്പന വ്യാപിപ്പിക്കും. കൂടാതെ 2027-ല്‍ ലോകമെമ്പാടുമുള്ള മറ്റ് വിപണികളിലേക്കും 'വേഗം റണ്‍' എത്തും.

എഐ കമ്പനികൾ തകരുമോ? ഇലോൺ മസ്‌കിന്റെ ആ പ്രവചനം

Prashobh Prasannan — Mon, 26 Oct 2026 15:23:29 +0530

ആർട്ടിഫിഷ്യൽ ഇന്റലിജൻസ് മേഖലയിൽ വൻ നിക്ഷേപങ്ങൾ ഒഴുകുന്നതിനിടെ ചെറുകിട എഐ കമ്പനികൾക്ക് മുന്നറിയിപ്പുമായി ഇലോൺ മസ്‌ക്. എഐ ചിപ്പുകൾ വാടകയ്ക്ക് നൽകുന്ന നൂറുകണക്കിന് ക്ലൗഡ് കമ്പനികൾ അടുത്ത കാലത്ത് കടുത്ത സാമ്പത്തിക പ്രതിസന്ധിയിലാകുമെന്നാണ് മസ്‌കിന്റെ പ്രവചനം. അതേസമയം, ജിപിയു വാങ്ങുന്നതിനായി തന്റെ കമ്പനിയായ സ്‌പേസ് എക്‌സ് 40 ബില്യൺ ഡോളറിന്റെ വായ്പാ ഇടപാട് പൂർത്തിയാക്കിയതായും അദ്ദേഹം വെളിപ്പെടുത്തി.

200ലധികം കമ്പനികൾ പ്രതിസന്ധിയിൽ?

എക്‌സ് പ്ലാറ്റ്‌ഫോമിൽ നടന്ന ചർച്ചയ്ക്കിടെയാണ് എഐ അടിസ്ഥാനസൗകര്യ മേഖലയിലെ പ്രതിസന്ധിയെക്കുറിച്ച് മസ്‌ക് മുന്നറിയിപ്പ് നൽകിയത്. നിർമാണം പാതിവഴിയിൽ നിലച്ച ഡാറ്റാ സെന്ററുകളിൽ കമ്പ്യൂട്ടിങ് ശേഷി ഉപയോഗിക്കപ്പെടാതെ കിടക്കുന്ന സാഹചര്യം വ്യാപകമാകുമെന്ന് അദ്ദേഹം പറഞ്ഞു. എഐ ഡാറ്റാ സെന്ററുകളെ മാത്രം ആശ്രയിച്ച് പ്രവർത്തിക്കുന്ന കമ്പനികൾക്ക് വായ്പ നൽകാൻ ധനകാര്യ സ്ഥാപനങ്ങൾ ഇപ്പോൾ വലിയ താൽപര്യം കാണിക്കുന്നില്ലെന്നും മസ്‌ക് ചൂണ്ടിക്കാട്ടി. ഇതോടെ മറ്റ് കമ്പനികൾക്ക് എഐ ചിപ്പുകൾ വാടകയ്ക്ക് നൽകുന്ന 200ലധികം നിയോക്ലൗഡ് കമ്പനികൾ കൂട്ടത്തകർച്ചയും ലയനങ്ങളും നേരിടേണ്ടിവരുമെന്നാണ് അദ്ദേഹത്തിന്റെ വിലയിരുത്തൽ.

ഡാറ്റാ സെന്ററുകൾക്ക് വേണ്ടത് കോടികൾ

എഐ ഡാറ്റാ സെന്ററുകൾ സ്ഥാപിക്കണമെങ്കിൽ വൻതുക നിക്ഷേപിക്കേണ്ടതുണ്ട്. അത്യാധുനിക ഗ്രാഫിക്സ് പ്രോസസിങ് യൂണിറ്റുകൾ അഥവാ ജിപിയു വാങ്ങുന്നതിനും അവ പ്രവർത്തിപ്പിക്കാനുള്ള വൈദ്യുതി ഉറപ്പാക്കുന്നതിനുമാണ് പ്രധാനമായും പണം ചെലവാകുന്നത്. എന്നാൽ, ഇത്തരം പദ്ധതികൾക്ക് വായ്പ നൽകുമ്പോൾ കമ്പനികൾക്ക് മറ്റ് സ്ഥിരമായ വരുമാന സ്രോതസുകൾ ഉണ്ടോയെന്ന് വായ്പാദാതാക്കൾ പരിശോധിക്കുന്നുണ്ട്. എഐ മേഖലയിലെ വരുമാനത്തെ മാത്രം ആശ്രയിക്കുന്ന സ്ഥാപനങ്ങൾക്ക് ഇനി മുന്നോട്ടുള്ള യാത്ര എളുപ്പമാകില്ലെന്ന സൂചനയാണിത്.

സ്‌പേസ് എക്‌സിന് 40 ബില്യൺ ഡോളറിന്റെ വായ്പ

ചെറുകിട കമ്പനികൾ പണം കണ്ടെത്താൻ ബുദ്ധിമുട്ടുമ്പോൾ, ജിപിയു വാങ്ങുന്നതിനായി 40 ബില്യൺ ഡോളറിന്റെ വായ്പാ ഇടപാട് പൂർത്തിയാക്കിയതായി മസ്‌ക് വ്യക്തമാക്കി. സ്‌പേസ് എക്‌സിന്റെ ക്രെഡിറ്റ് നിലവാരവും സ്റ്റാർലിങ്ക് ഉപഗ്രഹ ഇന്റർനെറ്റ് സേവനത്തിൽനിന്നും റോക്കറ്റ് വിക്ഷേപണങ്ങളിൽനിന്നുമുള്ള വരുമാനവുമാണ് വായ്പ ലഭിക്കാൻ സഹായിച്ചതെന്ന് അദ്ദേഹം പറഞ്ഞു. മറ്റ് മേഖലകളിൽനിന്ന് സ്ഥിരമായ വരുമാനം ലഭിക്കുന്നതിനാൽ സ്‌പേസ് എക്‌സിനെ വായ്പാദാതാക്കൾ സുരക്ഷിതമായ നിക്ഷേപമായാണ് കാണുന്നതെന്നും മസ്‌കിന്റെ പ്രതികരണം വ്യക്തമാക്കുന്നു.

2027 നിർണായക വർഷമാകുമോ?

വെഞ്ചർ ക്യാപിറ്റലിസ്റ്റ് ചമത് പാലിഹാപിറ്റിയയും എഐ അടിസ്ഥാനസൗകര്യ മേഖലയിലെ പ്രതിസന്ധിയെക്കുറിച്ച് മുന്നറിയിപ്പ് നൽകിയിട്ടുണ്ട്. മോശം നിക്ഷേപങ്ങളും മതിയായ മൂലധനമില്ലാത്ത കമ്പനികളും പുറത്താകുന്നതോടെ 2027 പ്രക്ഷുബ്ധമായ വർഷമാകുമെന്നാണ് അദ്ദേഹത്തിന്റെ വിലയിരുത്തൽ. വൈദ്യുതി ശൃംഖലകളിലെ ശേഷിക്കുറവ്, പൊതുജനങ്ങളുടെ എതിർപ്പ്, ഭരണപരമായ തടസങ്ങൾ എന്നിവ ഡാറ്റാ സെന്ററുകളുടെ നിർമാണം വൈകിപ്പിക്കുന്നുണ്ട്. വൈദ്യുതി ലഭ്യമാകാത്തതിനാൽ വിലകൂടിയ എഐ ചിപ്പുകൾ ഉപയോഗിക്കാനാകാതെ കിടക്കുന്ന സാഹചര്യവും ഉണ്ടായേക്കാം. വൻതോതിൽ നിക്ഷേപം നടത്താൻ ശേഷിയുള്ളതും സ്ഥിരമായ വരുമാനമുള്ളതുമായ കമ്പനികൾക്ക് മുൻതൂക്കം ലഭിക്കുമ്പോൾ, ചെറുകിട സ്ഥാപനങ്ങൾക്ക് എഐ മത്സരത്തിൽ പിടിച്ചുനിൽക്കുക കൂടുതൽ ദുഷ്‍കരമാകുമെന്നാണ് വിലയിരുത്തൽ.

വാട്‍സാപ്പിന് പകരക്കാരനാകാൻ 'അരട്ടൈ'; ബിസിനസുകൾക്കായി പുതിയ സേവനം, സർക്കാർ സ്ഥാപനങ്ങൾക്ക് സൗജന്യം

Sangeetha KS — Mon, 05 Oct 2026 13:07:17 +0530

വാട്‍സാപ്പിന് ഇന്ത്യൻ ബദലായി ശ്രദ്ധ നേടിയ അരട്ടൈ ബിസിനസ് രംഗത്തേക്കും ചുവടുവയ്ക്കുന്നു. സോഹോയുടെ ഉടമസ്ഥതയിലുള്ള അരട്ടൈയുടെ പുതിയ പതിപ്പായ അരട്ടൈ ബിസിനസ് ഔദ്യോഗികമായി പുറത്തിറക്കി. ഉപഭോക്താക്കളുമായും ജീവനക്കാരുമായും ആശയവിനിമയം നടത്താൻ ബിസിനസുകൾക്ക് ഇനി അരട്ടൈ ഉപയോഗിക്കാം. സോഹോ സ്ഥാപകൻ ശ്രീധർ വെമ്പുവാണ് പുതിയ സേവനത്തിന്റെ വരവ് എക്സിലൂടെ പ്രഖ്യാപിച്ചത്. ബിസിനസുകൾക്ക് ഉപഭോക്താക്കളുമായി നേരിട്ട് ആശയവിനിമയം നടത്താൻ അരട്ടൈ ബിസിനസ് സഹായിക്കുമെന്ന് അദ്ദേഹം അറിയിച്ചു.

സർക്കാർ, പൊതുസേവന സ്ഥാപനങ്ങൾക്ക് സൗജന്യം

അരട്ടൈ ബിസിനസിനൊപ്പം അരട്ടൈ ബിസിനസ് പ്ലാറ്റ്‌ഫോം എന്ന സംവിധാനവും സോഹോ അവതരിപ്പിച്ചിട്ടുണ്ട്. വിവിധ സോഫ്റ്റ്‌വെയർ സംവിധാനങ്ങളെ പരസ്പരം ബന്ധിപ്പിച്ച് സ്ഥാപനങ്ങളുടെ പ്രവർത്തനങ്ങൾ ഏകീകരിക്കാൻ ലക്ഷ്യമിട്ടുള്ളതാണ് പുതിയ പ്ലാറ്റ്‌ഫോം. സർക്കാർ സ്ഥാപനങ്ങൾക്കും പൊതുസേവനങ്ങൾക്കും അരട്ടൈ ബിസിനസ് പ്ലാറ്റ്‌ഫോം സൗജന്യമായി ഉപയോഗിക്കാമെന്നാണ് ശ്രീധർ വെമ്പു അറിയിച്ചത്. റെയിൽവേ പോലുള്ള പൊതുസേവന സ്ഥാപനങ്ങൾക്കും ഈ സൗകര്യം ലഭിക്കും.

പ്രത്യേക ആനുകൂല്യം

ആരോഗ്യ, വിദ്യാഭ്യാസ മേഖലകളിലെ സ്ഥാപനങ്ങളെയും അരട്ടൈ ബിസിനസിലേക്ക് ആകർഷിക്കാൻ പ്രത്യേക ആനുകൂല്യമാണ് സോഹോ പ്രഖ്യാപിച്ചിരിക്കുന്നത്. ഇത്തരം സ്ഥാപനങ്ങൾക്ക് പ്രതിമാസം 1,000,000 സന്ദേശങ്ങൾ വരെ സൗജന്യമായി അയയ്ക്കാൻ കഴിയും. അതേസമയം, അരട്ടൈ ബിസിനസിന്റെ ഉപയോഗത്തിനുള്ള നിരക്ക് എത്രയായിരിക്കുമെന്ന് സോഹോ ഇതുവരെ വ്യക്തമാക്കിയിട്ടില്ല.

സുരക്ഷിതമായ ആശയവിനിമയം

ഇന്ത്യയിൽ വികസിപ്പിച്ച് ഇന്ത്യൻ ബിസിനസുകൾക്കായി രൂപകൽപ്പന ചെയ്ത സേവനമാണ് അരട്ടൈ ബിസിനസെന്ന് സോഹോ പറയുന്നു. സന്ദേശങ്ങൾക്ക് പൂർണമായും സുരക്ഷ ഉറപ്പാക്കുന്ന എൻഡ്- ടു- എൻഡ് എൻക്രിപ്ഷൻ, വിവിധ ഉപകരണങ്ങളിലെ സുരക്ഷിത സംഭാഷണങ്ങൾ ഏകീകരിക്കുന്ന സംവിധാനം, വിവരങ്ങളുടെ ഉടമസ്ഥാവകാശം തുടങ്ങിയ സൗകര്യങ്ങൾ ഇതിലുണ്ട്. ബിസിനസുകൾക്ക് സ്ഥാപനത്തിനുള്ളിലെ ആശയവിനിമയത്തിനും ഉപഭോക്താക്കളുമായി ബന്ധപ്പെടുന്നതിനും ഒരേ വേദി ഉപയോഗിക്കാനാകുമെന്നതാണ് അരട്ടൈ ബിസിനസിന്റെ പ്രധാന സവിശേഷത.

വാട്സ്ആപ്പിന് വെല്ലുവിളി

കഴിഞ്ഞ വർഷം വാട്‍സാപ്പിന് ഇന്ത്യൻ ബദൽ എന്ന നിലയിൽ അരട്ടൈ വലിയ ശ്രദ്ധ നേടിയിരുന്നു. ഇന്ത്യയിലെ ആപ്പ് സ്റ്റോറുകളിൽ ഒന്നാം സ്ഥാനത്തേക്കും അരട്ടൈ എത്തിയിരുന്നു. തമിഴിലെ ‘അരട്ടൈ’ എന്ന വാക്കിന് സൗഹൃദ സംഭാഷണം എന്നാണ് അർഥം. വാട്‍സാപ്പ് ബിസിനസിന്റെ നിരക്കുകളിൽ മെറ്റ മാറ്റം വരുത്തിയതിന് പിന്നാലെയാണ് അരട്ടൈ ബിസിനസിന്റെ വരവ്. ഒക്ടോബർ 1 മുതൽ ഓർഡർ സ്ഥിരീകരണം, വിതരണ വിവരങ്ങൾ തുടങ്ങിയ ചില സേവന സന്ദേശങ്ങൾക്ക് വാട്സ്ആപ്പ് നിരക്ക് ഈടാക്കിത്തുടങ്ങിയിരുന്നു. ഈ സാഹചര്യത്തിൽ ഇന്ത്യൻ ബിസിനസുകൾക്ക് പുതിയൊരു ആശയവിനിമയ വേദി ഒരുക്കുകയാണ് അരട്ടൈയുടെ ലക്ഷ്യം.

കാലിഫോർണിയ വിടുമെന്ന് ഭീഷണി; മാർക്ക് സക്കർബർഗിനെ നിലനിർത്താൻ മെറ്റയുടെ നിർണായക നീക്കം

Sangeetha KS — Sat, 24 Oct 2026 14:44:52 +0530

കാലിഫോർണിയ വിടാനൊരുങ്ങിയ മാർക്ക് സക്കർബർഗിനെ മെറ്റയിൽ തുടരാൻ പ്രേരിപ്പിച്ച് കമ്പനി ഡയറക്ടർ ബോർഡ്. പ്രതിഫലത്തെയും കമ്പനിയിലെ വോട്ടിങ് അധികാരത്തെയും ചൊല്ലി സക്കർബർഗും ബോർഡും തമ്മിൽ മാസങ്ങളായി നിലനിന്ന തർക്കത്തിനൊടുവിലാണ് ധാരണയിലെത്തിയത്. മെറ്റയിലെ നിയന്ത്രണം നഷ്ടപ്പെടാതെ നിശ്ചിത എണ്ണം ഓഹരികൾ വിൽക്കാൻ സക്കർബർഗിന് അവസരം നൽകുന്നതാണ് പുതിയ കരാർ. നിർമിതബുദ്ധി രംഗത്ത് വൻതോതിൽ നിക്ഷേപം നടത്താൻ കൂടുതൽ പണം കണ്ടെത്താനുള്ള മെറ്റയുടെ നീക്കങ്ങൾക്കിടെയാണ് ഈ തർക്കം ഉടലെടുത്തത്. കഴിഞ്ഞദിവസം മെറ്റ പുറത്തുവിട്ട സാമ്പത്തിക രേഖയിലാണ് തർക്കത്തിന്റെ വിശദാംശങ്ങൾ പുറത്തുവന്നത് എന്ന് വാഷിങ്ടൺ പോസ്റ്റിനെ ഉദ്ദരിച്ച് ഇന്ത്യാ ടുഡേ ടെക്ക് റിപ്പോർട്ട് ചെയ്യുന്നു.

പുതിയ ഓഹരി പദ്ധതി

നിർമിതബുദ്ധി രംഗത്തെ മത്സരം ശക്തമാകുന്നതിനിടെ കൂടുതൽ പണം ആവശ്യമായി വരുമെന്ന് മെറ്റയുടെ മാനേജ്‌മെന്റ് തിരിച്ചറിഞ്ഞതോടെയാണ് തർക്കം തുടങ്ങിയത്. 2025 ഒക്ടോബറിൽ തന്നെ എഐ വികസനത്തിനായി വൻതോതിൽ പണം ചെലവഴിക്കുന്നുണ്ടെന്ന് സക്കർബർഗ് നിക്ഷേപകരോട് വ്യക്തമാക്കിയിരുന്നു. ഭാവിയിൽ വിപണി തിരിച്ചടി നേരിടാനുള്ള സാധ്യതയുണ്ടെങ്കിലും നേരത്തേ തന്നെ ആവശ്യമായ ശേഷി വികസിപ്പിക്കുന്നത് ഉചിതമാണെന്നായിരുന്നു അദ്ദേഹത്തിന്റെ നിലപാട്.

പണം കണ്ടെത്തുന്നതിനായി പുതിയൊരു വിഭാഗം ഓഹരികൾ അവതരിപ്പിക്കാനായിരുന്നു മെറ്റയുടെ പദ്ധതി. നിക്ഷേപകർക്ക് വിൽക്കാനും ഏറ്റെടുക്കലുകൾക്കായി ഉപയോഗിക്കാനും ജീവനക്കാർക്ക് പ്രതിഫലമായി നൽകാനും കഴിയുന്ന തരത്തിലായിരിക്കും ഈ ഓഹരികൾ.

പദ്ധതിയോട് സക്കർബർഗിന് എതിർപ്പില്ലായിരുന്നെങ്കിലും സ്വന്തം ഓഹരികൾ വിൽക്കുന്നതിലൂടെ കമ്പനിയിലെ വോട്ടിങ് നിയന്ത്രണം കുറയരുതെന്ന നിലപാടിലായിരുന്നു അദ്ദേഹം. എന്നാൽ, ഓഹരികൾ വിറ്റിട്ടും പൂർണ നിയന്ത്രണം നിലനിർത്താൻ സക്കർബർഗിനെ അനുവദിക്കുന്നത് മറ്റ് ഓഹരി ഉടമകളോട് നീതികേടാകുമെന്ന് ഡയറക്ടർമാർ കരുതിയതായി റിപ്പോർട്ടുണ്ട്. 2017ലും സമാനമായ പദ്ധതി കമ്പനി പരിഗണിച്ചെങ്കിലും നിക്ഷേപകർ നിയമനടപടി സ്വീകരിച്ചതിനെത്തുടർന്ന് പിൻവലിച്ചിരുന്നു.

ഇലോൺ മസ്‌കിന് സമാനമായ പ്രതിഫല പാക്കേജും ചർച്ചയിൽ

കമ്പനിയിലെ ഓഹരികൾ അടിസ്ഥാനമാക്കിയുള്ള വലിയ പ്രതിഫല പാക്കേജിനായും സക്കർബർഗിന്റെ പ്രതിനിധികൾ സമ്മർദം ചെലുത്തിയതായി റിപ്പോർട്ടുണ്ട്. ടെസ്‌ല സിഇഒ ഇലോൺ മസ്‌കിന്റെ പ്രകടനാധിഷ്ഠിത പ്രതിഫല കരാറുകൾക്ക് സമാനമായ രീതിയിലുള്ള പാക്കേജാണ് പരിഗണിച്ചത്. മെറ്റയുടെ രേഖകൾ പ്രകാരം സക്കർബർഗിന്റെ വാർഷിക ശമ്പളം നിലവിൽ 1 ഡോളറാണ്.

സമ്പത്ത് നികുതിയും കാലിഫോർണിയ വിടാനുള്ള നീക്കവും

കാലിഫോർണിയയിൽ നിർദേശിക്കപ്പെട്ട ഒറ്റത്തവണ സമ്പത്ത് നികുതി അടയ്ക്കുന്നതിനായി വലിയ അളവിൽ മെറ്റ ഓഹരികൾ വിൽക്കേണ്ടിവരുമെന്ന് സക്കർബർഗ് അറിയിച്ചതോടെ തർക്കം കൂടുതൽ സങ്കീർണമായി. കാലിഫോർണിയ വിട്ടുപോകാനുള്ള സാധ്യതയും അദ്ദേഹം ആവർത്തിച്ച് ഉന്നയിച്ചു. എഐ രംഗത്ത് കമ്പനിയുടെ പ്രവർത്തനങ്ങൾ വ്യാപിപ്പിക്കുന്ന സാഹചര്യത്തിൽ സക്കർബർഗിന്റെ കാലിഫോർണിയയിലെ സാന്നിധ്യം പ്രധാനമാണെന്ന് ഡയറക്ടർ ബോർഡ് കരുതിയിരുന്നു. അതിനാൽ താമസം മാറ്റാനുള്ള നീക്കം കമ്പനിക്കുള്ളിൽ ആശങ്കയുണ്ടാക്കി. സെപ്റ്റംബർ ആദ്യത്തോടെ ചർച്ചകൾ നിർണായക ഘട്ടത്തിലെത്തി. സക്കർബർഗ് വിട്ടുവീഴ്ചയ്ക്ക് തയ്യാറായില്ലെങ്കിൽ ചർച്ചകൾക്ക് നേതൃത്വം നൽകിയ മൂന്ന് ഡയറക്ടർമാർ രാജിവയ്ക്കുന്നതിനെക്കുറിച്ചുപോലും ആലോചിച്ചതായി റിപ്പോർട്ടുണ്ട്.

എട്ട് വർഷം കാലിഫോർണിയയിൽ തുടരും

സെപ്റ്റംബർ 9ന് സക്കർബർഗ് തന്റെ പാലോ ആൾട്ടോയിലെ വീട് നാല് ദിവസത്തിനുള്ളിൽ വിൽപ്പനയ്ക്ക് വെക്കുമെന്ന് ചില ഡയറക്ടർമാരെ അറിയിച്ചതായാണ് റിപ്പോർട്ട്. ഇത് കാലിഫോർണിയ വിടാനുള്ള നീക്കത്തെക്കുറിച്ചുള്ള ചർച്ചകൾക്ക് കൂടുതൽ ശ്രദ്ധ നേടിക്കൊടുത്തു. തുടർന്ന് ചർച്ചകൾ വേഗത്തിലായി. സെപ്റ്റംബർ 14ഓടെ ഇരുപക്ഷവും ധാരണയിലെത്തി. കരാർ പ്രകാരം ചില ഒഴിവുകൾക്ക് വിധേയമായി അടുത്ത എട്ട് വർഷം കാലിഫോർണിയയിൽ താമസിക്കാൻ സക്കർബർഗ് സമ്മതിച്ചിട്ടുണ്ട്. കമ്പനിയിലെ വോട്ടിങ് നിയന്ത്രണം നഷ്ടപ്പെടാതെ നിശ്ചിത പരിധിയിൽ ഓഹരികൾ വിൽക്കാനും അദ്ദേഹത്തിന് കഴിയും. മെറ്റയിൽ തുടരുന്ന കാലയളവ് കൂടുന്നതിനനുസരിച്ച് നിയന്ത്രണാധികാരത്തെ ബാധിക്കാതെ വിൽക്കാവുന്ന ഓഹരികളുടെ എണ്ണവും വർധിക്കും.

എഐ നിക്ഷേപവും സ്ഥാപകന്റെ നിയന്ത്രണവും ഒരുമിച്ച്

പുതിയ ഓഹരി ഘടനയിലൂടെ നിർമിതബുദ്ധി പദ്ധതികൾക്കാവശ്യമായ പണം കണ്ടെത്തുന്നതിനൊപ്പം സ്ഥാപകന്റെ നേതൃത്വത്തിലുള്ള കമ്പനിയുടെ നിലവിലെ മോഡൽ നിലനിർത്താനും കഴിയുമെന്നാണ് മെറ്റയുടെ നിലപാട്. എഐ രംഗത്തെ വൻ നിക്ഷേപങ്ങൾക്കായി പണം കണ്ടെത്തേണ്ടതും കമ്പനിയിലെ നിയന്ത്രണം നിലനിർത്തേണ്ടതും തമ്മിലുള്ള തർക്കത്തിൽ സക്കർബർഗിന് അനുകൂലമായ ചില വ്യവസ്ഥകൾ ഉൾപ്പെട്ടതാണ് പുതിയ ധാരണയുടെ പ്രധാന സവിശേഷത.

രാജിവെക്കാൻ ജീവനക്കാർക്ക് പണം വാഗ്‍ദാനം ചെയ്ത് മൈക്രോസോഫ്റ്റ്

Prashobh Prasannan — Fri, 30 Oct 2026 11:32:49 +0530

ചെലവ് കുറയ്ക്കുന്നതിനും പ്രവർത്തനരീതികൾ പുനഃസംഘടിപ്പിക്കുന്നതിനുമായി ജീവനക്കാർക്ക് സ്വയം വിരമിക്കൽ ഓഫറുമായി മൈക്രോസോഫ്റ്റ്. ആർട്ടിഫിഷ്യൽ ഇന്റലിജൻസ് മേഖലയിൽ കൂടുതൽ ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് കമ്പനിയുടെ പുതിയ നീക്കം. ഏകദേശം 60,000 ജീവനക്കാർക്കാണ് കമ്പനി സ്വമേധയാ ജോലി ഉപേക്ഷിക്കാനുള്ള അവസരം നൽകിയിരിക്കുന്നത്. എന്നാൽ ഇതിൽ 3,000 പേരോ അതിൽ താഴെയോ മാത്രമേ ഓഫർ സ്വീകരിക്കൂ എന്നാണ് കമ്പനി പ്രതീക്ഷിക്കുന്നത് എന്നാണ് റിപ്പോർട്ടുകൾ.

സാമ്പത്തിക ആനുകൂല്യങ്ങളുമായി സ്വമേധയാ പിരിഞ്ഞുപോകാം

ഒക്ടോബർ 26 തിങ്കളാഴ്ച മൈക്രോസോഫ്റ്റിന്റെ ചീഫ് പീപ്പിൾ ഓഫീസർ എമി കോൾമാൻ ആഭ്യന്തര മെമ്മോയിലൂടെയാണ് പുതിയ പദ്ധതി പ്രഖ്യാപിച്ചത്. വൊളന്ററി എക്സിറ്റ് ഓഫർ എന്ന പേരിലുള്ള പദ്ധതിയിലൂടെ അർഹരായ ജീവനക്കാർക്ക് സാമ്പത്തിക ആനുകൂല്യങ്ങളോടെ കമ്പനിയിൽനിന്ന് സ്വമേധയാ പിരിഞ്ഞുപോകാം. ഇന്ത്യ, അമേരിക്ക, ബ്രിട്ടൻ, കാനഡ എന്നീ രാജ്യങ്ങളിലെ തിരഞ്ഞെടുത്ത ജീവനക്കാർക്കാണ് ഓഫർ ലഭിക്കുക. കമ്പനിയുടെ ആകെ ജീവനക്കാരിൽ നാലിലൊന്നിലധികം വരുന്ന ഏകദേശം 60,000 പേരാണ് പദ്ധതിയുടെ പരിധിയിലുള്ളത്. ജോലി ഉപേക്ഷിക്കുന്നവർക്ക് സാമ്പത്തിക സഹായത്തിനൊപ്പം കരിയർ ആസൂത്രണത്തിനുള്ള പിന്തുണയും കമ്പനി വാഗ്‍ദാനം ചെയ്യുന്നുണ്ട്.

ഓഫർ സ്വീകരിക്കുക 3,000 പേരിൽ താഴെയെന്ന് കമ്പനി

എന്നാൽ ഭൂരിഭാഗം ജീവനക്കാരും ഓഫർ സ്വീകരിക്കില്ലെന്നാണ് മൈക്രോസോഫ്റ്റിന്റെ പ്രതീക്ഷ. 'ബിസിനസ് ഇൻസൈഡർ' റിപ്പോർട്ട് പ്രകാരം, കമ്പനിയുടെ ചീഫ് ഫിനാൻഷ്യൽ ഓഫീസർ എമി ഹുഡ് വളരെ കുറച്ച് ജീവനക്കാർ മാത്രമേ ഈ അവസരം പ്രയോജനപ്പെടുത്തുകയുള്ളൂവെന്ന് വ്യക്തമാക്കിയിട്ടുണ്ട്. മൈക്രോസോഫ്റ്റിലെ വളർച്ചാ സാധ്യതകളാണ് ജീവനക്കാരെ കമ്പനിയിൽ തുടരാൻ പ്രേരിപ്പിക്കുന്നതെന്നാണ് വിലയിരുത്തൽ. 3,000 പേരോ അതിൽ താഴെയോ മാത്രമേ ഓഫർ സ്വീകരിക്കൂവെന്ന് മൈക്രോസോഫ്റ്റ് വക്താവും പ്രസിദ്ധീകരണത്തോട് സ്ഥിരീകരിച്ചിട്ടുണ്ട്. ജീവനക്കാർക്ക് സ്വന്തം താൽപ്പര്യപ്രകാരം കമ്പനിയിൽനിന്ന് പിരിഞ്ഞുപോകാനുള്ള അവസരം നൽകുകയാണ് പദ്ധതിയുടെ ലക്ഷ്യമെന്ന് എമി ഹുഡ് ആഭ്യന്തര സന്ദേശത്തിൽ വ്യക്തമാക്കി.

ആർക്കൊക്കെയാണ് ആനുകൂല്യം ലഭിക്കുക?

അമേരിക്ക, കാനഡ, ഇന്ത്യ, ബ്രിട്ടൻ എന്നിവിടങ്ങളിൽ ജോലി ചെയ്യുന്ന 70-ാം ഗ്രേഡോ അതിൽ താഴെയോ ഉള്ള അർഹരായ ജീവനക്കാർക്കാണ് ഓഫർ ലഭിക്കുക. ഇവിടെ 70 എന്നത് ജീവനക്കാരുടെ പ്രായമോ പ്രവൃത്തിപരിചയമോ അല്ല. കമ്പനിയിലെ തസ്തികകളുടെ ചുമതലയും സീനിയോറിറ്റിയും അടിസ്ഥാനമാക്കിയുള്ള തൊഴിൽ ഗ്രേഡാണിത്. എന്നാൽ എല്ലാ വിഭാഗങ്ങളിലെയും ജീവനക്കാർക്ക് പദ്ധതിയുടെ ആനുകൂല്യം ലഭിക്കില്ല. എക്സ്ബോക്സ്, വിൻഡോസ്, കോപൈലറ്റ്, ധനകാര്യ വിഭാഗങ്ങൾ തുടങ്ങിയവയിലെ തിരഞ്ഞെടുത്ത ടീമുകൾ പദ്ധതിയിൽ ഉൾപ്പെടുന്നുണ്ട്. ഡാറ്റാ സെന്ററുകൾ, വിൽപ്പന, വിപണനം, സൈബർ സുരക്ഷ, ക്വാണ്ടം കമ്പ്യൂട്ടിങ് തുടങ്ങിയ മേഖലകളിലെ ചില ജീവനക്കാർ ഒഴിവാക്കപ്പെട്ടതായും റിപ്പോർട്ടുകളുണ്ട്.

ഡിസംബറോടെ തീരുമാനമെടുക്കണം

ഈ വർഷം ആദ്യം അമേരിക്കയിൽ വിരമിക്കൽ പ്രായമെത്തിയ ജീവനക്കാർക്കായി മൈക്രോസോഫ്റ്റ് സമാനമായ പദ്ധതി പ്രഖ്യാപിച്ചിരുന്നു. അന്ന് ഓഫറിന് അർഹരായ ഏകദേശം 8,750 ജീവനക്കാരിൽ 30 ശതമാനത്തിലധികം പേർ പദ്ധതി സ്വീകരിച്ചു. തുടർന്നുണ്ടായ പിരിച്ചുവിടലുകളുടെ ആഘാതം കുറയ്ക്കാനും ഈ നീക്കം സഹായിച്ചിരുന്നു. എന്നാൽ ഇത്തവണ ഓഫർ സ്വീകരിക്കുന്നവരുടെ എണ്ണം വളരെ കുറവായിരിക്കുമെന്നാണ് കമ്പനിയുടെ കണക്കുകൂട്ടൽ. അർഹരായ ജീവനക്കാരിൽ ഏകദേശം അഞ്ച് ശതമാനം മാത്രമേ പദ്ധതി പ്രയോജനപ്പെടുത്തൂ എന്നാണ് പ്രതീക്ഷിക്കുന്നത്. ഓഫർ സ്വീകരിക്കണോ എന്ന കാര്യത്തിൽ ജീവനക്കാർക്ക് ഡിസംബർ ആദ്യവാരം വരെ തീരുമാനമെടുക്കാം. പദ്ധതി സ്വീകരിക്കുന്നവർ വർഷാവസാനത്തോടെ കമ്പനിയിൽനിന്ന് പിരിഞ്ഞുപോകുമെന്നാണ് റിപ്പോർട്ടുകൾ.

ഫുഡ് ഡെലിവറി രംഗത്തേക്ക് ഫ്ലിപ്‍കാർട്ടും; 8,000 ജീവനക്കാരെ ഉൾപ്പെടുത്തി പരീക്ഷണം, ഉടൻ സേവനം ആരംഭിച്ചേക്കും

Sangeetha KS — Wed, 21 Oct 2026 16:13:07 +0530

ഇന്ത്യയിലെ ഓൺലൈൻ ഭക്ഷണ വിതരണ രംഗത്തേക്ക് ചുവടുവയ്ക്കാൻ പ്രമുഖ ഇ- കൊമേഴ്‌സ് കമ്പനിയായ ഫ്ലിപ്‍കാർട്ട്. സ്വിഗ്ഗിക്കും സൊമാറ്റോയ്ക്കും വെല്ലുവിളിയാകുന്ന പുതിയ സേവനം ഈ മാസം അവസാനത്തോടെ ആരംഭിച്ചേക്കുമെന്നാണ് റിപ്പോർട്ടുകൾ. ഭക്ഷണം ഓർഡർ ചെയ്ത് വീട്ടിലെത്തിക്കുന്ന സേവനത്തിന്റെ പരീക്ഷണം കമ്പനി ഇതിനകം ആരംഭിച്ചതായാണ് വിവരം.

'ഈറ്റ്- ഇൻ ബൈ മിനിറ്റ്സ്' പരീക്ഷണ ഘട്ടത്തിൽ

'ഈറ്റ്-ഇൻ ബൈ മിനിറ്റ്സ്' എന്ന പേരിലാണ് ഫ്ലിപ്‍കാർട്ട് പുതിയ ഭക്ഷണ വിതരണ സേവനം പരീക്ഷിക്കുന്നത് എന്ന് ടെക്‌ക്രഞ്ച് റിപ്പോർട്ട് ഉദ്ദരിച്ച് ഇന്ത്യാ ടുഡേ ടെക്ക് റിപ്പോർട്ട് ചെയ്യുന്നു. ബെംഗളൂരുവിലാണ് ആദ്യഘട്ട പരീക്ഷണം നടക്കുന്നത്. ഫ്ലിപ്‍കാർട്ടിന്റെ അതിവേഗ സാധന വിതരണ സേവനമായ ' ഫ്ലിപ്‍കാർട്ട് മിനിറ്റ്സി'നോട് ബന്ധപ്പെടുത്തിയാണ് പുതിയ സേവനത്തിന് ഈ പേര് നൽകിയിരിക്കുന്നതെന്നാണ് സൂചന. ഈ മാസം അവസാനത്തോടെ സേവനം ആരംഭിച്ചേക്കാമെങ്കിലും ആദ്യഘട്ടത്തിൽ ഏതെല്ലാം നഗരങ്ങളിൽ ലഭ്യമാകുമെന്ന കാര്യത്തിൽ വ്യക്തതയില്ല.

ഇതുസംബന്ധിച്ച് ഫ്ലിപ്‍കാർട്ടിന്റെ ഔദ്യോഗിക പ്രതികരണം ലഭ്യമായിട്ടില്ല. ഈ വർഷം ജൂലൈയിൽ കമ്പനി ഭക്ഷണ വിതരണ സേവനം ആരംഭിക്കാൻ പദ്ധതിയിടുന്നതായി ഫ്ലിപ്‍കാർട്ട് ഗ്രൂപ്പ് ചീഫ് എക്സിക്യൂട്ടീവ് ഓഫീസർ കല്യാൺ കൃഷ്‍ണമൂർത്തി സ്ഥിരീകരിച്ചിരുന്നു.

8,000 ജീവനക്കാർക്ക് പരീക്ഷണ സേവനം

നിലവിൽ കമ്പനി ജീവനക്കാർക്ക് മാത്രമായി പരിമിതപ്പെടുത്തിയ പരീക്ഷണമാണ് നടക്കുന്നത്. തുടക്കത്തിൽ ഏതാനും നൂറ് ജീവനക്കാരെ ഉൾപ്പെടുത്തിയിരുന്ന പരീക്ഷണം ഇപ്പോൾ ഏകദേശം 8,000 ജീവനക്കാരിലേക്ക് വ്യാപിപ്പിച്ചതായാണ് റിപ്പോർട്ട്. ഫ്ലിപ്‍കാർട്ടിന്റെ ഷോപ്പിങ് ആപ്പിൽ പുതിയ സേവനത്തിനായി പ്രത്യേക ടാബ് ഉൾപ്പെടുത്തിയിട്ടുണ്ട്. ഫ്ലിപ്‍കാർട്ട് മിനിറ്റ്സ്, യാത്രാ ബുക്കിങ് തുടങ്ങിയ സേവനങ്ങൾക്കൊപ്പമായിരിക്കും ഭക്ഷണ വിതരണ വിഭാഗവും ലഭ്യമാകുക.

ഭക്ഷണം എത്തിക്കാൻ ഇകാർട്ടിന്റെ സേവനം

സർക്കാർ പിന്തുണയോടെ പ്രവർത്തിക്കുന്ന ഓപ്പൺ നെറ്റ്‌വർക്ക് ഫോർ ഡിജിറ്റൽ കൊമേഴ്‌സ് (ഒഎൻഡിസി) വഴി പട്ടികപ്പെടുത്തിയിരിക്കുന്ന ഭക്ഷണശാലകൾക്കും ഫ്ലിപ്‍കാർട്ടുമായി നേരിട്ട് കരാറിലേർപ്പെട്ട റെസ്റ്റോറന്റുകൾക്കും പുതിയ സേവനത്തിൽ ഇടം ലഭിക്കുമെന്നാണ് റിപ്പോർട്ട്. ഭക്ഷണം ഉപഭോക്താക്കളിലേക്ക് എത്തിക്കാൻ ഫ്ലിപ്‍കാർട്ടിന്റെ ലോജിസ്റ്റിക്സ് വിഭാഗമായ ഇകാർട്ടിന്റെ പ്രത്യേക വിതരണ ശൃംഖല ഉപയോഗിക്കുമെന്നാണ് വിവരം. അതിവേഗ സാധന വിതരണത്തിനായി പ്രവർത്തിക്കുന്ന ജീവനക്കാരിൽനിന്ന് വ്യത്യസ്‍തരായിരിക്കും ഭക്ഷണ വിതരണത്തിനുള്ള ജീവനക്കാർ. ബെംഗളൂരുവിൽ 'ഈറ്റ്-ഇൻ ബൈ മിനിറ്റ്സ്' എന്ന പേരുള്ള ടീ ഷർട്ടുകൾ ധരിച്ച വിതരണ ജീവനക്കാരെ കണ്ടതായും റിപ്പോർട്ടുകൾ പറയുന്നു.

സൊമാറ്റോയ്ക്കും സ്വിഗ്ഗിക്കും വെല്ലുവിളി

നിലവിൽ ഇന്ത്യയിലെ ഭക്ഷണ വിതരണ വിപണിയിൽ സൊമാറ്റോയും സ്വിഗ്ഗിയുമാണ് പ്രധാന സ്ഥാനങ്ങളിൽ. കെൻ റിസർച്ചിന്റെ കണക്കുകൾ പ്രകാരം, 2024ൽ സൊമാറ്റോയ്ക്ക് 58 ശതമാനം വിപണി വിഹിതവും സ്വിഗ്ഗിക്ക് ഏകദേശം 34 ശതമാനം വിഹിതവുമുണ്ടായിരുന്നു. റാപ്പിഡോയും 'ഓൺലി' എന്ന പേരിൽ ഭക്ഷണ വിതരണ സേവനം ആരംഭിച്ചിട്ടുണ്ടെങ്കിലും പരിമിതമായ മേഖലകളിൽ മാത്രമാണ് ലഭ്യമാകുന്നത്. നേരത്തെ ഉബർ, ആമസോൺ, ഗൂഗിൾ തുടങ്ങിയ കമ്പനികളും ഈ രംഗത്ത് പ്രവേശിക്കാൻ ശ്രമിച്ചിരുന്നു. എന്നാൽ കാര്യമായ വിപണി സ്വാധീനം നേടാൻ സാധിച്ചില്ല. 2020ൽ ഉബർ ഇന്ത്യയിലെ ഉബർ ഈറ്റ്സ് പ്രവർത്തനങ്ങൾ സൊമാറ്റോയ്ക്ക് കൈമാറി.

വളരുന്ന ഓൺലൈൻ ഭക്ഷണ വിപണി

മത്സരം ശക്തമാണെങ്കിലും ഇന്ത്യയിലെ ഓൺലൈൻ ഭക്ഷണ വിതരണ വിപണിക്ക് വലിയ വളർച്ചാ സാധ്യതയുണ്ടെന്നാണ് വിലയിരുത്തൽ. ബ്രോക്കറേജ് സ്ഥാപനമായ ബെർൺസ്റ്റീന്റെ കണക്കനുസരിച്ച്, ആകെ ഭക്ഷ്യസേവന വിപണിയുടെ 15 ശതമാനത്തിൽ അധികം മാത്രമാണ് നിലവിൽ ഓൺലൈൻ വിതരണത്തിന്റെ പങ്ക്. ഈ വിപണി പ്രതിവർഷം 18% മുതൽ 20% വരെ വളരുന്നുണ്ടെന്നും കണക്കുകൾ സൂചിപ്പിക്കുന്നു. ഈ സാഹചര്യത്തിൽ ഫ്ലിപ്‍കാർട്ടിന്റെ പ്രവേശനം ഇന്ത്യയിലെ ഭക്ഷണ വിതരണ രംഗത്തെ മത്സരം കൂടുതൽ ശക്തമാക്കുമെന്നാണ് പ്രതീക്ഷിക്കുന്നത്.

'ലാക്ടോജന്‍ പ്രോ 1 ദഹിക്കാന്‍ എളുപ്പം'; എഫ്എസ്എസ്എഐക്ക് വിശദീകരണം നല്‍കി നെസ്ലെ ഇന്ത്യ

Sangeetha KS — Thu, 22 Oct 2026 12:57:20 +0530

ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ്സ് അതോറിറ്റി ഓഫ് ഇന്ത്യയുടെ ചോദ്യങ്ങള്‍ക്ക് മറുപടി നല്‍കി നെസ്ലെ ഇന്ത്യ. ശിശുക്കള്‍ക്കുള്ള പോഷകാഹാര ഉല്‍പന്നമായ ലാക്ടോജന്‍ പ്രോ 1-ന്റെ പാക്കറ്റില്‍ അടങ്ങിയിരിക്കുന്ന വേ പ്രോട്ടീന്‍ ദഹിക്കാന്‍ എളുപ്പമാണെന്ന് അവകാശപ്പെട്ടതുമായി ബന്ധപ്പെട്ടാണ് നെസ്ലെ ഉത്തരം നൽകിയത്. ഉല്‍പന്നത്തിലെ വേ പ്രോട്ടീന്‍ എളുപ്പത്തില്‍ ദഹിക്കുമെന്ന അവകാശവാദം സ്ഥിരീകരിക്കുന്ന ശാസ്ത്രീയ തെളിവുകള്‍ സമര്‍പ്പിക്കണമെന്നായിരുന്നു എഫ്എസ്എസ്എഐയുടെ നിര്‍ദേശം. ലാക്ടോജന്‍ പ്രോ 1-ന്റെ പാക്കറ്റിലും പരസ്യങ്ങകളിലും വേ പ്രോട്ടീന്‍, പാലിലെ പ്രോട്ടീനിന്റെ ഭാഗമാണെന്നും എളുപ്പത്തില്‍ ദഹിക്കുമെന്നുമുള്ള അവകാശവാദം ശ്രദ്ധയില്‍പ്പെട്ടതായി എഫ്എസ്എസ്എഐ അറിയിച്ചു. ഈ അവകാശവാദത്തെ പിന്തുണയ്ക്കുന്ന ആവശ്യമായ രേഖകളും ശാസ്ത്രീയ തെളിവുകളും നിശ്ചിത സമയപരിധിക്കുള്ളില്‍ സമര്‍പ്പിക്കണമെന്നായിരുന്നു നിര്‍ദേശം.

അവകാശവാദങ്ങളില്‍ പരിശോധന

ശിശുക്കള്‍ക്കുള്ള പോഷകാഹാര ഉല്‍പന്നങ്ങളെക്കുറിച്ച് തെറ്റിദ്ധരിപ്പിക്കുന്ന അവകാശവാദങ്ങളും ചട്ടങ്ങള്‍ പാലിക്കാത്ത പ്രചാരണങ്ങളും നടത്തിയെന്ന പരാതികളില്‍ ഭക്ഷ്യനിര്‍മാതാക്കള്‍ ഉള്‍പ്പെടെയുള്ള സ്ഥാപനങ്ങള്‍ക്കെതിരെ എഫ്എസ്എസ്എഐ നടപടി ശക്തമാക്കിയതിന് പിന്നാലെയാണ് ഈ നീക്കം. ശിശു പോഷകാഹാര ഉല്‍പന്നങ്ങളിലെ ചില ചേരുവകള്‍ സാധാരണ രോഗപ്രതിരോധ പ്രവര്‍ത്തനത്തെ സഹായിക്കുമെന്ന അവകാശവാദങ്ങളെക്കുറിച്ചും എഫ്എസ്എസ്എഐ നേരത്തെ സംശയങ്ങള്‍ ഉന്നയിച്ചിരുന്നു. വേ പ്രോട്ടീന്‍ എളുപ്പത്തില്‍ ദഹിക്കുമെന്ന പ്രസ്താവനയ്ക്ക് ശാസ്ത്രീയ തെളിവുകളും തേടിയിരുന്നു.

കുഞ്ഞുങ്ങൾക്ക് പാലിന് പകരമായി നല്‍കുന്ന ഉല്‍പന്നങ്ങളെക്കുറിച്ചുള്ള സമൂഹമാധ്യമ പ്രചാരണങ്ങളും എഫ്എസ്എസ്എഐ പരിശോധിക്കുന്നുണ്ട്. ഇത്തരം ഉല്‍പന്നങ്ങള്‍ സമീകൃത പോഷകാഹാരം നല്‍കും, രോഗപ്രതിരോധശേഷി വര്‍ധിപ്പിക്കും, തലച്ചോറിന്റെ വികാസത്തെ സഹായിക്കും തുടങ്ങിയ ഗുണങ്ങള്‍ അവകാശപ്പെട്ടുകൊണ്ടുള്ള പ്രചാരണങ്ങളും എഫ്എസ്എസ്എഐയുടെ ശ്രദ്ധയില്‍പ്പെട്ടിട്ടുണ്ട്.

നിയമലംഘനമുണ്ടോയെന്ന് പരിശോധിക്കുന്നു

ചില പ്രചാരണങ്ങള്‍ 1992ലെ ഇന്‍ഫന്റ് മില്‍ക്ക് സബ്സ്റ്റിറ്റിയൂട്ട്‌സ് ആക്ടിന്റെയും 2003ലെ ഭേദഗതിയുടെയും ലംഘനമാണെന്ന് എഫ്എസ്എസ്എഐ ചൂണ്ടിക്കാട്ടി. 2020ലെ ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ്സ് (ഫുഡ്‌സ് ഫോര്‍ ഇന്‍ഫന്റ് ന്യൂട്രീഷന്‍) ചട്ടങ്ങളുടെ ലംഘനസാധ്യതയും റെഗുലേറ്റര്‍ പരിശോധിക്കുന്നുണ്ട്.ഇക്കാര്യങ്ങളില്‍ ബന്ധപ്പെട്ട സ്ഥാപനങ്ങളില്‍നിന്ന് വിശദീകരണവും അവകാശവാദങ്ങളെ പിന്തുണയ്ക്കുന്ന തെളിവുകളും എഫ്എസ്എസ്എഐ തേടിയിട്ടുണ്ട്. ഇവ പരിശോധിച്ച ശേഷമായിരിക്കും തുടര്‍നടപടികള്‍ സംബന്ധിച്ച് തീരുമാനമെടുക്കുക.

ആദ്യം സ്റ്റീവ് ജോബ്സ് വേണ്ടെന്നുവെച്ച 'i'; പിന്നീട് തിരുത്തിയെഴുതിയത് ആപ്പിളിന്റെ ചരിത്രം, ഐഫോണിന്റെ പേരിന് പിന്നിലെ കഥ

Sangeetha KS — Sat, 17 Oct 2026 12:48:38 +0530

സാങ്കേതികവിദ്യ അടക്കി ഭരിക്കുന്ന ഈ ലോകത്ത് നമുക്കേറ്റവും പരിചിതമായ ചിഹ്നങ്ങളിലൊന്നാണ് ആപ്പിൾ ഉൽപ്പന്നങ്ങളുടെ പേരിന് മുന്നിലുള്ള 'i' എന്ന ചെറിയ അക്ഷരം. എന്നാൽ ആദ്യത്തെ ഐഫോൺ പുറത്തിറങ്ങുന്നതിനും ഏകദേശം പത്ത് വർഷം മുമ്പ് ഇറങ്ങിയ ഒരു കമ്പ്യൂട്ടറിൽ നിന്നാണ് ഈ പേരിന്റെ തുടക്കമെന്ന് നിങ്ങൾക്കറിയാമോ? സ്റ്റീവ് ജോബ്സ് പോലും ആദ്യ ഘട്ടത്തിൽ വേണ്ടെന്നുവെച്ച ആ സ്മോൾ ലെറ്റർ എങ്ങനെയാണ് ഒരു ആഗോള ബ്രാൻഡിന്റെ ഐഡന്റിറ്റിയായി മാറിയതെന്ന് നോക്കാം.

1998-ലാണ് ഈ കഥയുടെ തുടക്കം. ഇന്റർനെറ്റ് ഉപയോഗം എളുപ്പമാക്കുന്നതിനായി ഒരു പുതിയ കളർഫുൾ ഡെസ്ക്ടോപ്പ് കമ്പ്യൂട്ടർ വിപണിയിലെത്തിക്കാൻ ഒരുങ്ങുകയായിരുന്നു ആപ്പിൾ (Apple). ആപ്പിൾ സഹസ്ഥാപകനായ സ്റ്റീവ് ജോബ്സ് അന്ന് ഈ കമ്പ്യൂട്ടറിന് ഇടാൻ ആഗ്രഹിച്ച പേര് 'മാക്മാൻ' (MacMan) എന്നായിരുന്നു. എന്നാൽ ആപ്പിളിന്റെ പരസ്യ ഏജൻസിയിൽ പ്രവർത്തിച്ചിരുന്ന കെൻ സെഗാളിന്റെ തലയിൽ ഉദിച്ചത് മറ്റൊരു ആശയമായിരുന്നു. അദ്ദേഹം 'ഐമാക്' (iMac) എന്ന പുതിയൊരു പേര് നിർദ്ദേശിച്ചു.

ആദ്യ ഘട്ടത്തിൽ സ്റ്റീവ് ജോബ്സിന് 'iMac' എന്ന പേര് ഒട്ടും ഇഷ്ടപ്പെട്ടില്ല. 'MacMan' എന്നതിനേക്കാൾ മികച്ച മറ്റൊരു പേര് കണ്ടെത്താൻ അദ്ദേഹം സെഗാളിന്റെ ടീമിനോട് ആവശ്യപ്പെട്ടു. എന്നാൽ കെൻ സെഗാളും ടീമും 'iMac' എന്ന പേരിൽ തന്നെ ഉറച്ചുനിന്നു. പിന്നീട് കമ്പ്യൂട്ടറിന്റെ മോഡലിൽ ഈ പേര് ചേർത്തപ്പോൾ ലഭിച്ച മികച്ച പ്രതികരണമാണ് സ്റ്റീവ് ജോബ്സിന്റെ മനസ്സ് മാറ്റിയത്.

പിന്നീട് 1998 മേയ് 6-ന് ഐമാക് ലോകത്തിന് മുന്നിലേക്ക് പരിചയപ്പെടുത്തുമ്പോൾ പേരിന് പിന്നിലെ ആ രഹസ്യവും ജോബ്സ് വ്യക്തമാക്കി. പ്രധാനമായും 'ഇന്റർനെറ്റ്' എന്നതിനെയാണ് ഈ 'i' സൂചിപ്പിക്കുന്നത്. അതോടൊപ്പം തന്നെ Individual, Instruct, Inform, Inspire എന്നീ ആശയങ്ങളും ഈ ഒരു ചെറിയ അക്ഷരത്തിൽ അടങ്ങിയിട്ടുണ്ടെന്ന് അദ്ദേഹം പറഞ്ഞു.

പിന്നീട് 2007 ജനുവരിയിൽ സ്റ്റീവ് ജോബ്സ് ആദ്യത്തെ ഐഫോൺ ലോകത്തിന് മുന്നിൽ അനൌൺസ് ചെയ്തപ്പോഴും, ഐമാക്കിലൂടെ ജനപ്രിയമായ ഈ നാമകരണ ശൈലി തന്നെയാണ് ഉപയോഗിച്ചത്. 2007 ജൂണിലാണ് ഐഫോൺ ഔദ്യോഗികമായി പുറത്തിറക്കിയത്. തുടർന്ന് ഐപോഡ്, ഐപാഡ് തുടങ്ങിയ ആപ്പിളിന്റെ ജനപ്രിയ ഉൽപ്പന്നങ്ങളിലെല്ലാം ഈ 'i' സ്ഥാനം പിടിച്ചു. കാലക്രമേണ ആപ്പിൾ വാച്ച്, ആപ്പിൾ വിഷൻ പ്രോ എന്നിങ്ങനെ മുന്നിൽ 'i' ഇല്ലാത്ത പേരുകളിലേക്കും കമ്പനി മാറിയെങ്കിലും, സാങ്കേതികവിദ്യാ ലോകത്ത് വൻ വിപ്ലവം സൃഷ്ടിച്ച ഈ ഒരു സിരീസിന്റെ തുടക്കം കെൻ സെഗാൽ നിർദ്ദേശിച്ച ആ ഒറ്റ ചെറിയ അക്ഷരത്തിൽ നിന്നായിരുന്നു.

അന്ന് സ്റ്റീവ് ജോബ്സ് തന്റെ നിലപാടിൽ മാത്രം ഉറച്ചുനിൽക്കുകയും 'മാക്മാൻ' എന്ന പേര് തിരഞ്ഞെടുക്കുകയും ചെയ്തിരുന്നെങ്കിൽ, ഇന്ന് നമ്മൾ ഉപയോഗിക്കുന്ന ഐഫോണും ഐപാഡുമെല്ലാം മറ്റൊരു പേരിൽ അറിയപ്പെടുമായിരുന്നു. ഉൽപ്പന്നങ്ങളുടെ ഡിസൈനിൽ മാത്രമല്ല, പേരിടലിൽ പോലും ആപ്പിൾ പുലർത്തുന്ന ഈ ക്രിയേറ്റിവിറ്റി ലോകത്തെ മാർക്കറ്റിംഗ് കമ്പനികൾക്കും ബ്രാന്റിംഗിനും മുന്നിലുള്ള മികച്ച ഉദാഹരണങ്ങളിൽ ഒന്നാണ്.