Asianet News Malayalam

ഗ്ലെൻ മഗ്രാത്തിന്‍റെ റെക്കോർഡ് തകർത്തു; ടെസ്റ്റ് ക്രിക്കറ്റിൽ അപൂര്‍വ നേട്ടം സ്വന്തമാക്കി മിച്ചൽ സ്റ്റാർക്ക്

Gopalakrishnan C — Tue, 20 Oct 2026 15:09:08 +0530

സെഞ്ചൂറിയൻ: ദക്ഷിണാഫ്രിക്കയ്‌ക്കെതിരായ രണ്ടാം ടെസ്റ്റില്‍ അപൂര്‍വനേട്ടം സ്വന്തമാക്കി ഓസ്ട്രേലിയൻ പേസര്‍ മിച്ചൽ സ്റ്റാർക്ക്. ഗെബെർഹയിലെ സെന്‍റ് ജോർജ്ജ് പാർക്കിൽ നടക്കുന്ന രണ്ടാം ടെസ്റ്റിൽ ദക്ഷിണാഫ്രിക്കൻ താരം വിയാൻ മുൾഡറെ പുറത്താക്കിയതോടെ സ്റ്റാർക്ക് ടെസ്റ്റ് ക്രിക്കറ്റിൽ 450 വിക്കറ്റുകൾ തികക്കുന്ന ആദ്യ ഇടം കൈയന്‍ ബൗളറായി. ഇതിമൊപ്പം ഇതിഹാസ താരം ഗ്ലെൻ മഗ്രാത്തിന്‍റെ ലോക റെക്കോർഡ് മറികടക്കാനും സ്റ്റാർക്കിനായി.

പന്തുകളുടെ അടിസ്ഥാനത്തിൽ ഏറ്റവും വേഗത്തിൽ 450 ടെസ്റ്റ് വിക്കറ്റുകൾ തികയ്ക്കുന്ന പേസ് ബൗളറാണ് മിച്ചൽ സ്റ്റാർക്ക്. ടെസ്റ്റില്‍ തന്‍റെ 20,577-ാം പന്തിലാണ് സ്റ്റാർക്ക് 450 വിക്കറ്റ് നേട്ടം തികച്ചത്. 23,474 പന്തുകളിൽ നിന്ന് 450 വിക്കറ്റ് നേടിയ ഗ്ലെൻ മഗ്രാത്തിന്‍റെ റെക്കോർഡാണ് സ്റ്റാർക്ക് തിരുത്തിയെഴുതിയത്. തന്‍റെ 109-ാം ടെസ്റ്റ് മത്സരത്തിലാണ് സ്റ്റാർക്ക് 450 വിക്കറ്റ് നേട്ടത്തിലെത്തിയത്. എന്നാൽ കളിച്ച മത്സരങ്ങളുടെ എണ്ണത്തിൽ ഏറ്റവും വേഗത്തിൽ 450 വിക്കറ്റ് തികച്ച ആദ്യ പേസറെന്ന നേട്ടം ഇപ്പോഴും മഗ്രാത്തിന്‍റെ പേരിലാണ്. 100 മത്സരങ്ങളിൽ നിന്നാണ് മഗ്രാത്ത് 450 വിക്കറ്റ് നേടിയത്.

WICKET NO. 450 FOR MITCHELL STARC!

450 AND COUNTING. THE LEFT ARM MENACE NEVER STOPS! https://t.co/TuvPIPpd2o

— Honey (@stevensmithclub) October 20, 2026

ടെസ്റ്റ് ക്രിക്കറ്റ് ചരിത്രത്തിൽ 450 വിക്കറ്റ് തികയ്ക്കുന്ന ആദ്യ ഇടങ്കയ്യൻ ബൗളർ (സ്പിന്നറോ പേസറോ) എന്ന അപൂർവ്വ നേട്ടവും സ്റ്റാർക്ക് സ്വന്തമാക്കി. ഇടങ്കയ്യൻ ബൗളർമാരുടെ പട്ടികയിൽ രംഗണ ഹെറത്ത്(433), വസീം അക്രം(414), ഡാനിയൽ വെട്ടോറി(362), രവീന്ദ്ര ജഡേജ(356) എന്നിവരെ പിന്നിലാക്കിയാണ് സ്റ്റാർക്ക് ഒന്നാമതെത്തിയത്. ഷെയ്ൻ വോൺ, ഗ്ലെൻ മഗ്രാത്ത്, നഥാൻ ലിയോൺ എന്നിവർക്ക് ശേഷം 450 ടെസ്റ്റ് വിക്കറ്റുകൾ നേടുന്ന നാലാമത്തെ മാത്രം ഓസ്ട്രേലിയൻ ബൗളറെന്ന നേട്ടവും ദക്ഷിണാഫ്രിക്കക്കെതിരെ മിച്ചൽ സ്റ്റാർക്ക് സ്വന്തമാക്കി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'അഭിഷേക് ശര്‍മയുടെ അതിവേഗ സെഞ്ചുറി റെക്കോർഡ് തകർക്കുക ആ ന്യൂസിലന്‍ഡ് താരം', പ്രവചനവുമായി അഭിഷേക് നായർ

Gopalakrishnan C — Tue, 20 Oct 2026 14:27:22 +0530

ക്രൈസ്റ്റ്ചര്‍ച്ച്: ഇന്ത്യ-ന്യൂസിലൻഡ് ടി20 പരമ്പരക്ക് മറ്റന്നാള്‍ ക്രൈസ്റ്റ്ചർച്ചിൽ തുടക്കമാകാനിരിക്കെ, ഇരു ടീമുകളിലെയും വെടിക്കെട്ട് ഓപ്പണർമാരുടെ പ്രകടനത്തിനായി ആകാംക്ഷയോടെ കാത്തിരിക്കുകയാണ് ആരാധകര്‍. ഇതിനിടെ ടി20 ക്രിക്കറ്റിൽ 30 പന്തിൽ സെഞ്ചുറി നേടി റെക്കോർഡിട്ട അഭിഷേക് ശര്‍മയുടെ നിലവിലെ റെക്കോര്‍ഡ് തകർക്കാൻ സാധ്യതയുള്ള താരത്തെ പ്രവചിച്ചിരിക്കുകയാണ് മുന്‍ ഇന്ത്യ സഹപരിശീലകന്‍ കൂടിയായ അഭിഷേക് നായര്‍. ന്യൂസിലൻഡ് ഓപ്പണർ ഫിൻ അലനാണ് അഭിഷേകിന്‍റെ റെക്കോര്‍ഡ് തകര്‍ക്കാൻ സാധ്യതയുള്ള താരമെന്ന് അഭിഷേക് നായർ പറഞ്ഞു.

ന്യൂസിലൻഡിലെ ചെറിയ ബൗണ്ടറികളും അവിടുത്തെ പിച്ചിന്‍റെ സ്വഭാവവും ഫിൻ അലന്‍റെ ബാറ്റിംഗ് ശൈലിക്ക് തികച്ചും അനുയോജ്യമാണെന്ന് ജിയോഹോട്ട്സ്റ്റാറിന്റെ 'ഔട്ട് ഓർ നോട്ട് ഔട്ട്' പ്രോഗ്രാമിൽ അഭിഷേക് നായർ വ്യക്തമാക്കി. ക്രീസിൽ നിലയുറപ്പിച്ചാൽ ബൗണ്ടറികൾക്ക് പകരം സിക്സറുകൾ മാത്രം പറത്തുന്ന ശീലമുള്ള അലന് സ്വന്തം നാട്ടിൽ അഭിഷേകിന്‍റെ റെക്കോർഡ് തകര്‍ക്കുക എന്നത് അസാധ്യമല്ലെന്ന് അഭിഷേക് നായര്‍ ചൂണ്ടിക്കാട്ടി. മുൻപ് ടി20, ഏകദിന ലോകകപ്പ് ചരിത്രത്തിലെ ഏറ്റവും വേഗമേറിയ സെഞ്ചുറി (33 പന്തിൽ)ദക്ഷിണാഫ്രിക്കയ്‌ക്കെതിരെ അലൻ സ്വന്തമാക്കിയിരുന്നു.

ഈ വർഷം മികച്ച ഫോമിലുള്ള അലൻ 10 ടി20 മത്സരങ്ങളിൽ നിന്ന് 202-ന് മുകളിൽ സ്ട്രൈക്ക് റേറ്റിൽ 378 റൺസ് നേടിയിട്ടുണ്ട്. 2026 സീസണിലെ എല്ലാ ടി20 മത്സരങ്ങളിലുമായി 180-ലേറെ സ്ട്രൈക്ക് റേറ്റിൽ 1,496 റൺസാണ് ഫിന്‍ അലൻ അടിച്ചുകൂട്ടിയത്. ചെറിയ ഗ്രൗണ്ടുകളിൽ വേഗത്തിൽ റൺസ് ഉയർത്താനുള്ള അലന്‍റെ കഴിവ് ഇന്ത്യൻ ബൗളർമാർക്ക് വലിയ വെല്ലുവിളിയാകും. മറുഭാഗത്ത്, ഈ വർഷം 34 ടി20കളിൽ നിന്ന് 201.68 സ്ട്രൈക്ക് റേറ്റിൽ 956 റൺസ് നേടിയ അഭിഷേക് ശർമ്മയും മികച്ച ഫോമിലാണ്. അടുത്തിടെ അന്താരാഷ്ട്ര ടി20യിൽ 2000 റൺസ് തികയ്ക്കുന്ന ആറാമത്തെ ഇന്ത്യൻ താരമായും അഭിഷേക് മാറിയിരുന്നു. ന്യൂസിലൻഡ് പരമ്പരയിൽ ഇരു താരങ്ങളുടെയും അതിവേഗ ബാറ്റിംഗ് വെടിക്കെട്ട് കാണാമെന്ന പ്രതീക്ഷയിലാണ് ആരാധകർ.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

അഞ്ചാമനായി ഇറങ്ങി പാക്‌ ബാറ്റര്‍ സല്‍മാന്‌ നാലാം സെഞ്ച്വറി, മുഹമ്മദ്‌ യൂസുഫ്‌ പിറകിലായി, ധോണിയുടെയും യുവരാജിന്റെയും റെക്കോര്‍ഡിന്‌ ഭീഷണി

Web Desk — Tue, 20 Oct 2026 14:07:01 +0530

കറാച്ചി: ഞായറാഴ്‌ച റാവല്‍പിണ്ടി ക്രിക്കറ്റ്‌ സ്റ്റേഡിയം ഒരു ഗംഭീര ഇന്നിംഗ്‌സിന്‌ സാക്ഷ്യം വഹിച്ചു. ശ്രീലങ്കക്കെതിരെ ഏകദിന പരമ്പരയിലെ ആദ്യ മത്സരത്തില്‍ പാക്കിസ്ഥാന്റെ സല്‍മാന്‍ അലി ആഘ നേടിയ തകര്‍പ്പന്‍ സെഞ്ച്വറി പ്രകടനം. 90 പന്തുകളില്‍ 107 റണ്‍സ്‌ നേടിയ സല്‍മാന്റെ ഇന്നിംഗ്‌സില്‍ പത്ത്‌ ഫോറുകളും ഒരു സിക്‌സറും ഉള്‍പ്പെടുന്നു. പാക്കിസ്ഥാന്‍ 37 റണ്‍സിന്‌ നാടകീയ ജയം നേടിയപ്പോള്‍ സല്‍മാന്റെ ഇന്നിംഗ്‌സ്‌ വെട്ടിത്തിളങ്ങി.

സല്‍മാന്റെ ഇന്നിംഗ്‌സിന്‌ ഒരു പ്രത്യേകതുണ്ട്‌. ബാറ്റിംഗ്‌ ഓര്‍ഡറില്‍ അഞ്ചാം സ്ഥാനത്തോ അതിന്‌ താഴെയോ ആയിട്ടാണ്‌ സല്‍മാന്‍ ക്രീസിലെത്താറുള്ളത്‌. ഈയൊരു ബാറ്റിംഗ്‌ ഓര്‍ഡറില്‍ നിന്നു കൊണ്ട്‌ കൂടുതല്‍ ഏകദിന സെഞ്ച്വറികള്‍ നേടിയ പാക്‌ താരമായിരിക്കുകയാണ്‌ സല്‍മാന്‍. 1998 മുതല്‍ 2009 വരെ പാക്കിസ്ഥാന്‌ വേണ്ടി കളിച്ച മുഹമ്മദ്‌ യൂസുഫിന്റെ മൂന്ന്‌ സെഞ്ച്വറികളുടെ റെക്കോര്‍ഡാണ്‌ സല്‍മാന്‍ മറികടന്നത്‌. സല്‍മാന്‍ 54 മത്സരങ്ങളില്‍ നിന്നാണ്‌ ഈ നേട്ടത്തിലെത്തിയത്‌. മുഹമ്മദ്‌ യൂസുഫ്‌ 114 മത്സരങ്ങള്‍ കളിച്ചിരുന്നു. മധ്യനിരയില്‍ പാക്കിസ്ഥാന്റെ ഏറ്റവും മികച്ച ബാറ്റര്‍മാരില്‍ ഒരാളായിട്ടാണ്‌ യൂസുഫിനെ കണക്കാക്കുന്നത്‌.

ബാറ്റിംഗ്‌ ഓര്‍ഡറില്‍ അഞ്ചാം സ്ഥാനത്ത്‌ കളിച്ച്‌ മൂന്ന്‌ സെഞ്ച്വറികള്‍ നേടുന്ന ആദ്യ പാക്‌ താരമാണ്‌ സല്‍മാന്‍. യൂസുഫ്‌ വ്യത്യസ്‌ത പൊസിഷനുകളിലായിരുന്നു സെഞ്ച്വറി നേടിയത്‌. മാത്രമല്ല, സല്‍മാന്റെ ആദ്യ മൂന്ന്‌ സെഞ്ച്വറികള്‍ 33 മത്സരങ്ങളിലായിരുന്നു. യൂസുഫ്‌ അഞ്ചാം സ്ഥാനത്ത്‌ രണ്ട്‌ സെഞ്ച്വറി നേടാന്‍ 84 മത്സരങ്ങള്‍ കളിക്കേണ്ടി വന്നു.

ബാറ്റിംഗ്‌ ഓര്‍ഡറില്‍ അഞ്ചാമതോ, അതിന്‌ താഴെയോ ആയി ബാറ്റ്‌ ചെയ്‌തവരില്‍ കൂടുതല്‍ സെഞ്ച്വറികള്‍ ഇംഗ്ലണ്ട്‌ താരം ജോസ്‌ ബട്‌ലറിന്റെയും ദക്ഷിണാഫ്രിക്കയുടെ ഡേവിഡ്‌ മില്ലറുടെയും പേരിലാണ്‌. എട്ട്‌ സെഞ്ച്വറികളാണ്‌ ഇവര്‍ നേടിയത്‌. എം എസ്‌ ധോണിയും യുവരാജ്‌ സിംഗും ഏഴ്‌ സെഞ്ച്വറികളുമായി ഇവര്‍ക്ക്‌ തൊട്ടുപിറകിലുണ്ട്‌. ആറ്‌ സെഞ്ച്വറികള്‍ നേടിയ എ ബി ഡിവില്ലേഴ്‌സ്‌, ആന്‍ഡ്രൂ സൈമണ്ട്‌സ്‌, ഓയിന്‍ മോര്‍ഗന്‍, സിക്കന്ദര്‍ റാസ എന്നിവരാണ്‌ പിറകിലുള്ളത്‌. ലോ ഓര്‍ഡറില്‍ കളിച്ചവരില്‍ 8324 റണ്‍സുമായി ധോണി മുന്‍നിരയിലുണ്ട്‌. 301 മത്സരങ്ങളാണ്‌ ലോ ഓര്‍ഡറില്‍ ധോണി കളിച്ചത്‌. 174 മത്സരങ്ങളില്‍ നിന്ന്‌ യുവരാജ്‌ 4870 റണ്‍സ്‌ നേടിയിട്ടുണ്ട്‌. ജോസ്‌ ബട്‌ലര്‍ 4997 റണ്‍സും മില്ലര്‍ 4605 റണ്‍സുമാണ്‌ നേടിയത്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

രഞ്ജി ട്രോഫി: വൈശാഖ് ചന്ദ്രന് നാലു വിക്കറ്റ്; ഒഡിഷയ്‌ക്കെതിരെ കേരളത്തിന് കൂറ്റൻ ഒന്നാം ഇന്നിംഗ്സ് ലീഡ്

Gopalakrishnan C — Tue, 20 Oct 2026 13:47:05 +0530

തിരുവനന്തപുരം: രഞ്ജി ട്രോഫി ക്രിക്കറ്റില്‍ ഒഡിഷക്കെതിരെ കേരളത്തിന് 179 റണ്‍സിന്‍റെ കൂറ്റൻ ഒന്നാം ഇന്നിംഗ്സ് ലീഡ്. കേരളത്തിന്‍റെ ഒന്നാം ഇന്നിംഗ്സ് സ്കോറായ 404 റണ്‍സിന് മറുപടിയായി മൂന്നാം ദിനം ഒഡിഷ 225 റണ്‍സിന് ഓള്‍ ഔട്ടായി. 50 റണ്‍സെടുത്ത ക്യാപ്റ്റൻ സൗരഭ് സേനാപതിയും 37 റണ്‍സെടുത്ത ലളിത് യാദവും 34 റണ്‍സെടുത്ത രാജേഷ് ധുപറും മാത്രമാണ് ഒഡിഷക്കായി തിളങ്ങിയത്. കേരളത്തിനായി വൈശാഖ് ചന്ദ്രന്‍ 38 റണ്‍സ് മാത്രം വഴങ്ങി നാലു വിക്കറ്റെടുത്തു.

കാര്യവട്ടം, ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന മത്സരത്തില്‍ കേരളത്തിന്‍റെ ഒന്നാം ഇന്നിംഗ്സ് സ്കോറായ 404 റണ്‍സിന് മറുപടിയായി മൂന്നാം ദിനം മൂന്ന് വിക്കറ്റ് നഷ്ടത്തില്‍ 114 റണ്‍സെന്ന നിലയിലാണ് ഒഡിഷ ക്രീസിലിറങ്ങിയത്. മൂന്നാം ദിനം തുടക്കത്തിലെ സന്ദീപ് പട്നായിക്കിനെ എം ഡി നിധീഷും നിനന്ദ റാഥ്‌വയെ വൈശാഖ് ചന്ദ്രനും പുറത്താക്കിയതോടെ ഒഡിഷ 125-5ലേക്ക് വീണു. പിന്നീട് സൗരഭ് സേനാപതിയും രാജേഷ് ധുപറും ചേര്‍ന്ന് അര്‍ധസെഞ്ചുറി കൂട്ടുകെട്ടുയര്‍ത്തി ഒഡിഷയെ 185 റണ്‍സിലെത്തിച്ചെങ്കിലും രാജേഷ് ധുപറെ വൈശാഖ് ചന്ദ്രൻ പുറത്താക്കിയതോടെ ഒഡിഷ തകര്‍ന്നടിഞ്ഞു, പിന്നാലെ സൗരഭ് സേനാപതിയെ ജലജ് സക്സേന മടക്കി. രാജേഷ് മൊഹന്തിയെയും സൗമ്യ ലെങ്കയെയും പുറത്താക്കി വൈശാഖ് ചന്ദ്രൻ ഒഡിഷയെ 193-9ലേക്ക് തള്ളിയിട്ടു. അവസാന വിക്കറ്റില്‍ ലളിത് യാദവിന്‍റെ പോരാട്ടമാണ് പിന്നീട് ഒഡിഷയെ 200 കടത്തിയത്. പത്താം വിക്കറ്റ് കൂട്ടുകെട്ടില്‍ ഇരുവരും ചേര്‍ന്ന് 54 പന്തില്‍ 32റണ്‍സെടുത്ത് ഒഡിഷയെ 225 റണ്‍സിലെത്തിച്ചു.

ഇന്നലെ രണ്ടാം ദിനം 50 റണ്‍സെടുത്ത ഗൗരവ് ചൗധരിയുടെയും 32 റണ്‍സെടുത്ത ശന്തനു മിശ്രയുടെയും 14 റണ്‍സെടുത്ത ഓം ടി മുണ്ഡെയയുടെയും വിക്കറ്റുകളാണ് ഒഡിഷക്ക് നഷ്ടമായത്. നേരത്തെ കേരളത്തിന്‍റെ ഒന്നാം ഇന്നിംഗ്‌സ് 404 റണ്‍സില്‍ അവസാനിച്ചിരുന്നു. സച്ചിന്‍ ബേബിയുടെയും(113) മുഹമ്മദ് അസറുദ്ദീന്‍റെയും(പുറത്താവാതെ 139), സെഞ്ചുറികളുടെ മികവിലാണ് കേരളം മികച്ച സ്‌കോറിലെത്തിയത്. ആദിത്യ സര്‍വാതെ (53), അഭിജിത് പ്രവീണ്‍(14), വൈശാഖ് ചന്ദ്രന്‍ (1), നിധീഷ് എം ഡി (15) എന്നിവരും കേരളത്തിനായി ഭേദപ്പെട്ട പ്രകടനം പുറത്തെടുത്തു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

രഞ്ജി ട്രോഫിയിൽ പുതിയ ചരിത്രം, ഡല്‍ഹി-ഗുജറാത്ത് മത്സരം നിയന്ത്രിച്ച് ഓസ്ട്രേലിയൻ അംപയർ ബെൻ ട്രെലോർ

Gopalakrishnan C — Tue, 20 Oct 2026 13:43:05 +0530

മുംബൈ: ഇന്ത്യൻ ആഭ്യന്തര ക്രിക്കറ്റ് ചരിത്രത്തിൽ അപൂർവമായൊരു നാഴികക്കല്ലിന് തുടക്കമിട്ട് ഓസ്ട്രേലിയൻ അംപയർ ബെൻ ട്രെലോർ. രഞ്ജി ട്രോഫി മത്സരങ്ങൾ നിയന്ത്രിക്കുന്ന ആദ്യ വിദേശ അമ്പയറായിരിക്കുകയാണ് ബെന്‍ ട്രൈലോര്‍. ഈ സീസണിലെ രണ്ട് രഞ്ജി ട്രോഫി മത്സരങ്ങളിലാണ് ട്രെലോർ അംപയറായി എത്തുന്നത്. ബിസിസിഐയും ക്രിക്കറ്റ് ഓസ്ട്രേലിയയും തമ്മിൽ ഒപ്പുവെച്ച പ്രത്യേക അംപയറിംഗ് എക്സ്ചേഞ്ച് പ്രോഗ്രാമിന്‍റെ ഭാഗമായാണ് ഈ നടപടി.

ഈ കരാറിന്റെ അടിസ്ഥാനത്തിൽ ഇന്ത്യൻ അംപയറായ പരാശർ ജോഷി ഓസ്ട്രേലിയൻ ആഭ്യന്തര ടൂർണമെന്‍റുകളിൽ മത്സരം നിയന്ത്രിക്കാൻ ഓസ്ട്രേലിയയിലേക്ക് തിരിക്കും. രണ്ട് ഷെഫീൽഡ് ഷീൽഡ് മത്സരങ്ങളിലും ഒരു വൺഡേ കപ്പ് മത്സരത്തിലുമാണ് പരാശർ ജോഷി അംപയറാകുക. ഒക്ടോബർ 18-ന് ആരംഭിച്ച ഡൽഹി-ഗുജറാത്ത് രഞ്ജി ട്രോഫി മത്സരത്തിലൂടെയാണ് ബെൻ ട്രെലോർ ഇന്ത്യയിലെ തന്‍റെ അംപയറിംഗ് ദൗത്യം ആരംഭിച്ചത്. ഒക്ടോബർ 26-ന് നടക്കുന്ന മുംബൈ - ഹരിയാന മത്സരത്തിലും അദ്ദേഹം മത്സരം നിയന്ത്രിക്കും.

ഓസ്ട്രേലിയയിൽ 30 ഫസ്റ്റ് ക്ലാസ്, 20 ലിസ്റ്റ് എ, 39 ബിഗ് ബാഷ് ലീഗ് മത്സരങ്ങളും വനിതാ അന്താരാഷ്ട്ര മത്സരങ്ങളും നിയന്ത്രിച്ച് പരിചയസമ്പന്നനാണ് ട്രെലോർ. കൂടാതെ ക്രിക്കറ്റ് ന്യൂ സൗത്ത് വെയിൽസിന്‍റെ അംപയർ എഡ്യൂക്കേഷൻ ഓഫീസർ കൂടിയാണ് ട്രെലോർ. ബിസിസിഐ അംപയറിംഗ് പാനൽ അംഗമായ പരാശർ ജോഷിയുടെ ഓസ്ട്രേലിയൻ പര്യടനം നവംബർ 11-ന് ആരംഭിക്കും. ഗാബ്ബയിൽ നടക്കുന്ന ക്വീൻസ്‌ലൻഡ് - ടാസ്മാനിയ ഷെഫീൽഡ് ഷീൽഡ് മത്സരത്തിലൂടെയാകും ജോഷിയുടെ തുടക്കം.

നവംബർ 16-ലെ വൺഡേ കപ്പ് മത്സരത്തിലും, നവംബർ 22 മുതൽ സിഡ്നി ക്രിക്കറ്റ് ഗ്രൗണ്ടിൽ നടക്കുന്ന ന്യൂ സൗത്ത് വെയിൽസ് - ക്വീൻസ്‌ലൻഡ് മത്സരത്തിലും ജോഷി അംപയറാകും. 2008-ൽ ഇന്ത്യൻ ഐഡൽ നാലാം സീസണിന്‍റെ പിയാനോ റൗണ്ട് വരെ എത്തിയ സംഗീതജ്ഞൻ കൂടിയാണ് പരാശർ ജോഷി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ടീമിൽ നിന്ന് ഒഴിവാക്കി, പിന്നാലെ രഞ്ജി ട്രോഫിയിൽ വെടിക്കെട്ട് സെഞ്ചുറിയുമായി സെലക്ടര്‍മാര്‍ക്ക് മറുപടി നല്‍കി സർഫറാസ് ഖാൻ

Gopalakrishnan C — Tue, 20 Oct 2026 11:55:58 +0530

മുംബൈ: ന്യൂസിലന്‍ഡ് പര്യടനത്തിനുള്ള ഇന്ത്യൻ ടെസ്റ്റ് ടീമില്‍ നിന്ന് ഒഴിവാക്കിയതിന് പിന്നാലെ രഞ്ജി ട്രോഫിയില്‍ വെടിക്കെട്ട് സെഞ്ചുറിയുമായി സെലക്ടര്‍മാര്‍ക്ക് ബാറ്റുകൊണ്ട് മറുപടി നല്‍കി മുംബൈ താരം സർഫറാസ് ഖാൻ. ഹിമാചൽ പ്രദേശിനെതിരായ മത്സരത്തിൽ മുംബൈയ്ക്കായി 228 പന്തില്‍ 154 റൺസ് നേടിയാണ് സര്‍ഫറാസ് തിളങ്ങിയത്. 19 ബൗണ്ടറികള്‍ അടങ്ങുന്നതാണ് സര്‍ഫറാസിന്‍റെ ഇന്നിംഗ്സ്. ഇന്ത്യൻ ടെസ്റ്റ് ടീമിൽ നിന്ന് തുടർച്ചയായി അവഗണിക്കപ്പെടുമ്പോഴും ആഭ്യന്തര ക്രിക്കറ്റില്‍ ബാറ്റ് കൊണ്ട് മറുപടി നൽകുന്ന പതിവ് സർഫറാസ് ഇത്തവണയും ആവർത്തിക്കുകയായിരുന്നു.

ബിലാസ്പൂരിൽ നടന്ന മത്സരത്തിൽ ബാറ്റിംഗ് തകർച്ചയുടെ വക്കിലായിരുന്ന മുംബൈയെ സർഫറാസ് കരകയറ്റുകയായിരുന്നു. ഫസ്റ്റ് ക്ലാസ് ക്രിക്കറ്റിലെ തന്‍റെ 18-ാം സെഞ്ചുറിയാണ് സര്‍ഫറാസ് ഹിമാചലിനെതിരെ കുറിച്ചത്. തുടക്കത്തിലെ സമ്മർദ്ദം അതിജീവിച്ച ശേഷം ക്യാപ്റ്റൻ സിദ്ധേഷ് ലാഡ്, വിക്കറ്റ് കീപ്പർ ആകാശ് ആനന്ദ് എന്നിവർക്കൊപ്പം മികച്ച കൂട്ടുകെട്ടുകൾ പടുത്തുയർത്തിയ സർഫറാസ് മുംബൈയുടെ കൂറ്റൻ സ്കോറിന് അടിത്തറയിട്ടു. സര്‍ഫറാസിന്‍റെ സെഞ്ചുറികരുത്തില്‍ മുംബൈ ആദ്യ ഇന്നിംഗ്സില്‍ 8 വിക്കറ്റ് നഷ്ടത്തില്‍ 528 റണ്‍സെടുത്ത് ഡിക്ലയര്‍ ചെയ്തു. സര്‍ഫറാസിന് പുറമെ ആകാശ് ആനന്ദും(117) മുംബൈക്കായി സെഞ്ചുറി നേടി. സിദ്ദേശ് ലാഡ്(87), സര്‍ഫറാസിന്‍റെ സഹോദരന്‍ മുഷീര്‍ ഖാന്‍(57) എന്നിവരും മുംബൈക്കായി ബാറ്റിംഗില്‍ തിളങ്ങി.

മറുപടി ബാറ്റിംഗിനിറങ്ങിയ ഹിമാചല്‍ മൂന്നാം ദിനം 39.5 ഓവറില്‍ 140 റണ്‍സിന് ഓള്‍ ഔട്ടായി. നാലു വിക്കറ്റ് വീഴ്ത്തിയ തുഷാര്‍ ദേശ്‌പാണ്ഡെയാണ് ഹിമാചലിനെ എറിഞ്ഞിട്ടത്. ആഭ്യന്തര ക്രിക്കറ്റിൽ മികച്ച പ്രകടനം പുറത്തെടുത്തിട്ടും ന്യൂസിലൻഡ് പരമ്പരയ്ക്കുള്ള ഇന്ത്യൻ ടീമിലേക്ക് സർഫറാസിനെ സെലക്ടര്‍മാര്‍ പരിഗണിച്ചിരുന്നില്ല. ശ്രീലങ്കൻ പര്യടനത്തിനുള്ള ടീമിൽ ഉൾപ്പെടുത്തിയിരുന്നെങ്കിലും പ്ലേയിംഗ് ഇലവനില്‍ അവസരം ലഭിച്ചിരുന്നില്ല. രഞ്ജി ട്രോഫിയിലും ഇറാനി കപ്പിലും മികച്ച ഫോം തുടരുകയാണെങ്കിൽ സർഫറാസിന് മുന്നിൽ ഇന്ത്യൻ ടീമിന്‍റെ വാതിലുകൾ വീണ്ടും തുറക്കപ്പെടുമെന്നാണ് പ്രതീക്ഷിക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'ടി20 ലോകകപ്പിനുശേഷം അവനെ തുടര്‍ച്ചയായി തഴയുന്നു', റിങ്കു സിങ്ങിനെ അവഗണിക്കുന്നതിൽ വിമർശനവുമായി ആകാശ് ചോപ്ര

Gopalakrishnan C — Tue, 20 Oct 2026 11:25:41 +0530

ദില്ലി: ഇന്ത്യൻ ക്രിക്കറ്റ് താരം റിങ്കു സിങ്ങിനെ തുടര്‍ച്ചയായി അവഗണിക്കുന്നതിലും, വെറുമൊരു 'വൈറ്റ് ബോൾ' കളിക്കാരനായി മാത്രം പരിഗണിക്കുന്നതിലും വിമർശനവുമായി മുൻ ഇന്ത്യൻ താരം ആകാശ് ചോപ്ര. വരാനിരിക്കുന്ന ന്യൂസിലാൻഡ് പര്യടനത്തിനുള്ള ഇന്ത്യൻ ടീമിലെ ഒരു ഫോർമാറ്റിലും റിങ്കു സിങ്ങിനെ ഉൾപ്പെടുത്താതിരുന്ന പശ്ചാത്തലത്തിലാണ് ചോപ്ര സെലക്ടർമാരുടെ നിലപാടിനെതിരെ തന്‍റെ യൂട്യൂബ് ചാനലിൽ പങ്കുവെച്ച വീഡിയോയിലൂടെ പ്രതികരിച്ചത്.

ഫസ്റ്റ് ക്ലാസ് ക്രിക്കറ്റിൽ മികച്ച പ്രകടനം പുറത്തെടുത്തിട്ടും റിങ്കുവിനെ ടെസ്റ്റ് ടീമിലേക്ക് പരിഗണിക്കാത്തത് നീതികേടാണെന്ന് ചോപ്ര അഭിപ്രായപ്പെട്ടു. ടെസ്റ്റ് ടീമിലേക്ക് പരിഗണിക്കണമെങ്കില്‍ റിങ്കു ഇനി എത്ര റൺസടിക്കണമെന്ന് ചോപ്ര ചോദിച്ചു. തന്‍റെ അവസാന ആറ് ഇന്നിംഗ്സുകളിൽ നിന്ന് നാല് സെഞ്ചുറികൾ നേടിയ റിങ്കു, ഒരു മത്സരത്തിൽ ടീം മുഴുവൻ പുറത്തായപ്പോഴും ഒറ്റയ്ക്ക് പോരാടി 118 റൺസ് നേടിയിരുന്നു. ഫസ്റ്റ് ക്ലാസ് ക്രിക്കറ്റിൽ കുറഞ്ഞത് 50 ഇന്നിംഗ്സുകൾ കളിച്ചവരിൽ ഏറ്റവും മികച്ച ശരാശരിയുള്ള താരങ്ങളുടെ പട്ടിക എടുത്താൽ സർ ഡോൺ ബ്രാഡ്മാനും സർഫറാസ് ഖാനും ഒപ്പം 61.33 ശരാശരിയോടെ റിങ്കു സിങ്ങുമുണ്ടെന്ന് ആകാശ് ചോപ്ര ചൂണ്ടിക്കാട്ടി.

പരിമിത ഓവർ ഫോർമാറ്റുകളിൽ പോലും 2026 ടി20 ലോകകപ്പിന് ശേഷം റിങ്കുവിന് അർഹിച്ച അവസരങ്ങൾ ലഭിച്ചില്ലെന്നും ചോപ്ര വ്യക്തമാക്കി. ബാറ്റിംഗ് ഓർഡറിൽ ഏത് പൊസിഷനിൽ ഇറക്കിയാലും ടീമിനായി മികച്ച പ്രകടനം നടത്തുന്ന റിങ്കുവിനെ പെട്ടെന്ന് പുറത്താക്കി മറ്റുള്ളവർക്ക് അവസരം നൽകുന്നത് അന്യായമാണ്. നിലവിലെ ഇന്ത്യൻ ടെസ്റ്റ് മിഡിൽ ഓർഡറിൽ ഏതു നിമിഷവും ഒഴിവുകൾ വരാൻ സാധ്യതയുണ്ടെങ്കിലും ബാക്കപ്പ് ബാറ്ററായി റിങ്കുവിനെ പോലൊരു താരത്തെ സെലക്ടർമാർ ചിന്തിക്കുന്നു പോലുമില്ലെന്ന് ആകാശ് ചോപ്ര കുറ്റപ്പെടുത്തി.

നിലവിൽ കെ.എൽ. രാഹുൽ, യശസ്വി ജയ്‌സ്വാൾ, ദേവ്ദത്ത് പടിക്കൽ, സായി സുദർശൻ, ശുഭ്മൻ ഗിൽ, റിഷഭ് പന്ത്, ധ്രുവ് ജുറെൽ എന്നിവരടങ്ങുന്ന ബാറ്റിംഗ് നിരയ്ക്ക് ശേഷം വരുന്നൊരു ബാക്കപ്പ് മിഡിൽ ഓർഡർ ബാറ്ററെ വളർത്തിയെടുക്കാൻ മാനേജ്‌മെന്‍റ് ശ്രദ്ധിക്കുന്നില്ല. മുൻപ് സർഫറാസ് ഖാനെ ടീമിൽ ഉൾപ്പെടുത്തിയെങ്കിലും കളിപ്പിച്ചിരുന്നില്ല. ഉടൻ തന്നെ റിങ്കുവിനെ ടെസ്റ്റിൽ കളിപ്പിക്കണം എന്നല്ല, മറിച്ച് ഇന്ത്യ എ ടീമിന്‍റെ പര്യടനങ്ങളിലെങ്കിലും അവനെ ഉൾപ്പെടുത്തി റെഡ് ബോൾ ഫോർമാറ്റിലേക്ക് പരിഗണിക്കണമെന്നും ആകാശ് ചോപ്ര പറഞ്ഞു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

കോലി-ഗംഭീർ ഭിന്നത പരിഹരിക്കാൻ മധ്യസ്ഥനായി പ്രഗ്യാൻ ഓജയെ നിയോഗിച്ച് ബിസിസിഐ

Gopalakrishnan C — Tue, 20 Oct 2026 10:24:21 +0530

മുംബൈ: ഇന്ത്യൻ ക്രിക്കറ്റ് ടീം മുഖ്യ പരിശീലകൻ ഗൗതം ഗംഭീറും മുൻ ക്യാപ്റ്റൻ വിരാട് കോലിയും തമ്മിലുള്ള അഭിപ്രായവ്യത്യാസങ്ങളും ആശയവിനിമയത്തിലെ പോരായ്മകളും പരിഹരിക്കാൻ മുൻ താരം പ്രഗ്യാൻ ഓജയെ ബിസിസിഐ ചുമതലപ്പെടുത്തിയതായി റിപ്പോർട്ട്. പുതിയ ബിസിസിഐ ചീഫ് സെലക്ടറായ ഓജയ്ക്ക് ബോർഡിലും കളിക്കാർക്കിടയിലും ഉള്ള മികച്ച ബന്ധം മുൻനിർത്തിയാണ് മധ്യസ്ഥന്‍റെ റോൾ ബിസിസിഐ നൽകിയതെന്നാണ് റിപ്പോര്‍ട്ട്. സെലക്ഷൻ കമ്മിറ്റിയിൽ സൗത്ത് സോണിനെ പ്രതിനിധീകരിക്കുന്ന ഓജ, തർക്കവിഷയങ്ങളുമായി ബന്ധപ്പെട്ട് വിരാട് കോലിയുമായി നേരിട്ട് സംസാരിച്ചതായാണ് വിവരം. ഇന്ത്യക്കായി കോലിക്കൊപ്പം 22 മത്സരങ്ങളിൽ പ്രഗ്യാൻ ഓജ കളിച്ചിട്ടുണ്ട്.

കളിക്കാരുമായും ഭാരവാഹികളുമായും ആശയവിനിമയം നടത്തുന്നതിൽ ഓജ മുൻപന്തിയിലാണ്. മുൻപ് രോഹിത് ശർമ്മയെ ഏകദിന ടീമിൽ നിന്ന് മാറ്റാൻ തീരുമാനിച്ചപ്പോഴും അത് രോഹിതിനെ അറിയിക്കാൻ അന്നത്തെ ചീഫ് സെലക്ടർ അജിത് അഗാർക്കർ ചുമതലപ്പെടുത്തിയത് ഓജയെയായിരുന്നു. 24 ടെസ്റ്റുകളിൽ ഇന്ത്യയെ പ്രതിനിധീകരിച്ച ഓജയെ, സീനിയോറിറ്റിയുടെ അടിസ്ഥാനത്തിലാണ് അഗാര്‍ക്കര്‍ സ്ഥാനമൊഴിഞ്ഞപ്പോള്‍ ചീഫ് സെലക്ടറായി ബിസിസിഐ ഉയർത്തിയത്.

വിവിഎസ് ലക്ഷ്മണുമായി അടുത്ത ബന്ധം പുലർത്തുന്ന ഓജയ്ക്ക് അഗാർക്കറിന് പകരക്കാരനാവുക എന്നത് വലിയ വെല്ലുവിളിയാണ്. രണ്ടു ഐസിസി ട്രോഫികൾ ഇന്ത്യയ്ക്ക് നേടിക്കൊടുത്ത അഗാർക്കറിന്‍റെ വിജയം തുടരുക എന്നത് വലിയ ഉത്തരവാദിത്തമാണ്. മികച്ച തീരുമാനങ്ങൾ എടുക്കുന്നതിനൊപ്പം കളിക്കാരുമായി നല്ല രീതിയിൽ സംസാരിച്ച് പ്രശ്നങ്ങൾ പരിഹരിക്കാനുള്ള ഓജയുടെ കഴിവ് ഈ നിർണായക ഘട്ടത്തിൽ ബിസിസിഐയ്ക്കും ഇന്ത്യൻ ടീമിനും വലിയ തുണയാകും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'ജയിലർ 2' കാണാൻ തിയേറ്റർ മുഴുവൻ ബുക്ക് ചെയ്ത് മലയാളി താരം സഞ്ജു സാംസണ്‍; കൂട്ടിന് ഇന്ത്യൻ സഹതാരങ്ങളും

Gopalakrishnan C — Tue, 20 Oct 2026 09:33:56 +0530

ദില്ലി: രജിനികാന്ത് നായകനായെത്തിയ പുതിയ ചിത്രം 'ജയിലർ 2' കാണാനായി ഒരു തിയേറ്റർ സ്ക്രീൻ മുഴുവനായി ബുക്ക് ചെയ്ത് മലയാളി താരം സഞ്ജു സാംസണ്‍. തന്‍റെ കുടുംബാംഗങ്ങൾക്കും സുഹൃത്തുക്കൾക്കും ഇന്ത്യൻ ടീമിലെ സഹതാരങ്ങൾക്കുമൊപ്പമാണ് സഞ്ജു സിനിമ കണ്ടത്. ഡൽഹിയിലെ ഔദ്യോഗിക തിരക്കുകൾ കാരണം റിലീസ് ദിനത്തിൽ ചിത്രം കാണാൻ സാധിച്ചിരുന്നില്ലെന്നും തൊട്ടടുത്ത ദിവസം തന്നെ തിയേറ്റർ ബുക്ക് ചെയ്യാൻ കഴിഞ്ഞതിൽ വലിയ സന്തോഷമുണ്ടെന്നും സഞ്ജു പറഞ്ഞു.

രജിനി സാറിന്‍റെ സിനിമകൾ കാണാൻ ഞാൻ എപ്പോഴും ആവേശത്തോടെ കാത്തിരിക്കാറുണ്ട്. ഡൽഹിയിലെ പരിപാടി കാരണം ഇന്നലെ സിനിമ കാണാൻ പറ്റിയില്ല. എന്നാൽ ഇന്ന് ഭാഗ്യവശാൽ തിയേറ്റർ മുഴുവനായി ബുക്ക് ചെയ്യാൻ സാധിച്ചു. ഭാര്യയും സുഹൃത്തുക്കളും ഒപ്പമുണ്ട്. ബിഗ് സ്ക്രീനിൽ രജിനി സാറിനെ കാണാൻ വലിയ ആവേശമാണ്- സഞ്ജു വ്യക്തമാക്കി. ഇന്ത്യൻ ക്രിക്കറ്റ് ടീം ന്യൂസിലന്‍ഡ് പര്യടനത്തിനായി പോകുന്നതിന് തൊട്ടു മുമ്പാണ് സ‌ഞ്ജു സുഹൃത്തുക്കള്‍ക്കൊപ്പം ജയിലര്‍-2 കണ്ടത്. ഏഷ്യൻ ഗെയിംസില്‍ സ്വര്‍ണം നേടിയ ഇന്ത്യൻ താരങ്ങള്‍ക്ക് പ്രധാനമന്ത്രി നരേന്ദ്ര മോദി ഡല്‍ഹിയില്‍ നല്‍കിയ സ്വീകരണച്ചടങ്ങിന് ശേഷമായിരുന്നു സഞ്ജു സൂപ്പര്‍ സ്റ്റാറിന്‍റെ സിനിമ കാണാന്‍ സമയം കണ്ടെത്തിയത്.

View this post on Instagram

A post shared by vishnudigitalmedia (@vishnudigitalmedia)

ഇന്ത്യൻ ക്രിക്കറ്റ് ടീമിലെയും സപ്പോർട്ട് സ്റ്റാഫിലെയും തമിഴ് അറിയാവുന്ന മറ്റ് അംഗങ്ങളും തനിക്കൊപ്പം സിനിമ കാണാൻ എത്തിയിട്ടുണ്ടെന്നും മലയാളി താരം കൂട്ടിച്ചേർത്തു. നെൽസൺ ദിലീപ്കുമാർ സംവിധാനം ചെയ്ത 'ജയിലർ 2', 2023-ൽ പുറത്തിറങ്ങിയ ഹിറ്റ് ചിത്രം 'ജയിലറിന്‍റെ' രണ്ടാം ഭാഗമാണ്. 'ടൈഗർ മുത്തുവേൽ പാണ്ഡ്യൻ' എന്ന ഐക്കണിക് കഥാപാത്രമായി രജിനികാന്ത് വീണ്ടും ബോക്സ് ഓഫീസിൽ തരംഗം സൃഷ്ടിക്കുമ്പോൾ, ആരാധകനെന്ന നിലയിൽ ആഘോഷം അടുത്ത തലത്തിലേക്ക് എത്തിച്ചിരിക്കുകയാണ് സഞ്ജു സാംസൺ.

സി കെ നായിഡു ട്രോഫിയിൽ സൗരാഷ്ട്രക്കെതിരെ തകര്‍ന്നടിഞ്ഞ് കേരളം, 70 റണ്‍സിന് പുറത്ത്

Gopalakrishnan C — Mon, 19 Oct 2026 21:50:27 +0530

പുതുച്ചേരി: 23 വയസ്സിൽ താഴെയുള്ളവർക്കായുള്ള സി കെ നയിഡു ട്രോഫിയിൽ സൗരാഷ്ട്രക്കെതിരെ കേരളത്തിന് ബാറ്റിംഗ് തകർച്ച. ആദ്യ ഇന്നിങ്സിൽ കേരളം 70 റൺസിന് ഓള്‍ ഔട്ടായി. ആറ് വിക്കറ്റ് വീഴ്ത്തിയ ചന്ദ്രരാജ് റാത്തോഡിന്‍റെ ബൗളിംഗാണ് കേരള ബാറ്റിംഗ് നിരയെ തകർത്തത്. മറുപടി ബാറ്റിങ്ങിന് ഇറങ്ങിയ സൗരാഷ്ട്ര ആദ്യ ദിവസം കളി അവസാനിപ്പിക്കുമ്പോൾ ആറ് വിക്കറ്റിന് 269 റൺസെന്ന നിലയിലാണ്. നാലു വിക്കറ്റ് കൈയിലിരിക്കെ സൗരാഷ്ട്രക്ക് 199 റണ്‍സിന്‍റെ ഒന്നാം ഇന്നിംഗ്സ് ലീഡുണ്ട്.

സൗരാഷ്ട്രക്കെതിരെ ആദ്യം ബാറ്റ് ചെയ്ത കേരളത്തിന് സ്കോര്‍ ബോര്‍ഡ് തുറക്കും മുമ്പെ ആദ്യ വിക്കറ്റ് നഷ്ടമായി. പിന്നീട് ബാറ്റിംഗ് നിര കൂട്ടത്തകര്‍ച്ച നേരിട്ടപ്പോള്‍ 30 റൺസെടുത്ത ഗോവിന്ദ് ദേവ് മാത്രമാണ് ചെറുത്തു നിന്നത്. 18 റൺസെടുത്ത ക്യാപ്റ്റൻ അഹ്മദ് ഇമ്രാനും 10 റൺസെടുത്ത ജിഷ്ണു മണികണ്ഠനും മാത്രമാണ് ഗോവിന്ദിന് പുറമെ രണ്ടക്കം കടന്നത്.

മറുപടി ബാറ്റിങ്ങിന് ഇറങ്ങിയ സൗരാഷ്ട്രയെ അൻഷ് ഗോസായിയുടെയും ഹർവൻഷ് സിംഗിന്‍റെയും ഇന്നിംഗ്സുകളാണ് ശക്തമായ നിലയിൽ എത്തിച്ചത്. അൻഷ് 97 റൺസും ഹർവംശ് 67 റൺസും നേടി പുറത്തായി. രക്ഷിത് മേത്ത 35 റൺസ് നേടി. കേരളത്തിന് വേണ്ടി അർജുൻ ആർ നായർ, അഹ്മദ് ഇമ്രാൻ എന്നിവർ രണ്ട് വിക്കറ്റ് വീതം നേടി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

വനിതാ പ്രീമിയര്‍ ലീഗ് താരം ലേലം 28-ന് കൊച്ചിയിൽ;146 താരങ്ങൾ ലേലത്തിന്, കമാലിനി വിലകൂടിയ ഇന്ത്യൻ താരം

Gopalakrishnan C — Mon, 19 Oct 2026 21:20:38 +0530

കൊച്ചി: വനിതാ പ്രീമിയർ ലീഗ് സീസണിന് മുന്നോടിയായുള്ള താരങ്ങളുടെ ലേലം ഒക്ടോബർ 28-ന് കൊച്ചിയിൽ നടക്കും. വൈകുന്നേരം അഞ്ചരക്കാണ് ലേലനടപടികൾ ആരംഭിക്കുക. ആകെയുള്ള അഞ്ച് ഫ്രാഞ്ചൈസികളിലായി ഒഴിവുള്ള 27 സ്ഥാനങ്ങളിലേക്ക് 146 താരങ്ങളാണ് ലേലത്തിൽ പങ്കെടുക്കുന്നത്. ഇതിൽ 119 ഇന്ത്യൻ താരങ്ങളും 6 അസോസിയേറ്റ് രാജ്യങ്ങളിലെ താരങ്ങൾ ഉൾപ്പെടെ 27 വിദേശ താരങ്ങളും ഉൾപ്പെടുന്നു.

ടീമുകളില്‍ ഒഴിവുള്ള 27 സ്ഥാനങ്ങളില്‍ 20 എണ്ണം ഇന്ത്യൻ താരങ്ങൾക്കും 7 എണ്ണം വിദേശ താരങ്ങൾക്കുമായി സംവരണം ചെയ്തിട്ടുള്ളതാണ്. ഇംഗ്ലണ്ട് താരം സോഫിയ ഡങ്ക്‌ലി, ഓസ്‌ട്രേലിയൻ ഓൾറൗണ്ടർ സോഫി മോളിനക്സ് എന്നിവരാണ് ഏറ്റവും ഉയർന്ന അടിസ്ഥാന വിലയായ 50 ലക്ഷം രൂപ വിഭാഗത്തിൽ ഉൾപ്പെട്ടിട്ടുള്ള പ്രമുഖർ. ഇന്ത്യൻ വിക്കറ്റ് കീപ്പർ ജി കമാലിനി, കിരൺ നവ്ഗിരെ, ഹെതർ ഗ്രഹാം, ജെസ് ജോനാസൻ എന്നിവർ 40 ലക്ഷം രൂപ അടിസ്ഥാന വിലയിട്ടപ്പോൾ 30 താരങ്ങൾ 30 ലക്ഷം രൂപ അടിസ്ഥാന വിലയിലാണ് ലേലത്തിനെത്തുന്നത്.

കഴിഞ്ഞ തവണത്തേതുപോലെ യുപി വാരിയേഴ്സാണ് ഏറ്റവും കൂടുതൽ തുക കൈവശമുള്ള ഫ്രാഞ്ചൈസി (3.65 കോടി രൂപ). മുംബൈ ഇന്ത്യൻസും യുപി വാര്യേഴ്സുമാണ് ഏറ്റവും കൂടുതൽ ഒഴിവുകളുള്ള ടീമുകൾ. ഗുജറാത്ത് ജയന്‍റ്സിനാണ് ഏറ്റവും കുറവ് ഒഴിവുകളുള്ളത് (3 ഒഴിവുകൾ). ആകെ 63 താരങ്ങളെ നിലവിലെ ടീമുകൾ നിലനിർത്തിയപ്പോൾ 2027 ജനുവരി 14 മുതൽ ഫെബ്രുവരി 7 വരെയാണ് വനിതാ ഐപിഎല്‍ അഞ്ചാം സീസൺ നടത്താൻ നിശ്ചയിച്ചിരിക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'ടീം പ്രഖ്യാപനം കണ്ടപ്പോൾ ഞാൻ ഞെട്ടിപ്പോയി'; ടെസ്റ്റ് ടീമില്‍ നിന്ന് യുവതാരത്തെ ഒഴിവാക്കിയതിനെതിരെ മുരളി കാർത്തിക്

Gopalakrishnan C — Mon, 19 Oct 2026 20:45:16 +0530

മുംബൈ: ന്യൂസിലൻഡിനെതിരായ ടെസ്റ്റ് പരമ്പരയ്ക്കുള്ള ഇന്ത്യൻ ടീമിൽ നിന്ന് ഇടങ്കയ്യൻ സ്പിന്നർ മാനവ് സുതാറിനെ ഒഴിവാക്കിയ സെലക്ടർമാരുടെ തീരുമാനം ഞെട്ടിച്ചുവെന്ന് മുൻ ഇന്ത്യൻ സ്പിന്നർ മുരളി കാർത്തിക്. കരിയറിന്‍റെ തുടക്കത്തിൽ തന്നെ മികച്ച പ്രകടനം പുറത്തെടുത്തിട്ടും 24-കാരനായ താരത്തെ ഒഴിവാക്കിയത് അംഗീകരിക്കാനാവില്ലെന്ന് സോണി സ്പോർട്സ് നെറ്റ്‌വർക്കിന് നൽകിയ അഭിമുഖത്തിൽ കാർത്തിക് വ്യക്തമാക്കി.

ശ്രീലങ്കൻ പര്യടനത്തിൽ മികച്ച പ്രകടനം പുറത്തെടുത്ത സുതാർ, കളിച്ച ആദ്യ 3 ടെസ്റ്റുകളിൽ നിന്നായി 23 വിക്കറ്റുകൾ വീഴ്ത്തുകയും ലോവര്‍ ഓര്‍ഡര്‍ ബാറ്ററെന്ന നിലയില്‍ 79 റൺസ് നേടുകയും ചെയ്തിരുന്നു. എന്നാല്‍ ന്യൂസിലന്‍ഡിനെതിരായ ടെസ്റ്റ് പരമ്പരയില്‍ കുൽദീപ് യാദവ്, വാഷിംഗ്ടൺ സുന്ദർ, രവീന്ദ്ര ജഡേജ എന്നിവരെയാണ് സ്പിൻ ബൗളര്‍മാരായി സെലക്ടര്‍മാര്‍ ടീമിൽ ഉൾപ്പെടുത്തിയിരിക്കുന്നത്.

ടീം പ്രഖ്യാപനം കണ്ടപ്പോൾ താൻ സത്യത്തിൽ ഞെട്ടിപ്പോയെന്ന് മുരളി കാര്‍ത്തിക് പറഞ്ഞു. സമീപകാലത്ത് നമ്മുടെ ഏറ്റവും മികച്ച കണ്ടെത്തലാണ് മാനവ് സുതാർ. അശ്വിന് ശേഷം ടെസ്റ്റ് മത്സരങ്ങൾക്ക് അനുയോജ്യനായ ഒരു ബൗളറെ നമ്മൾ തിരയുകയായിരുന്നു. ബാറ്റിംഗിൽ സംഭാവന നൽകാൻ കഴിവുള്ള സുതാർ, ഏറ്റവും പ്രധാനമായി ടെസ്റ്റ് പരമ്പരകളിൽ വിക്കറ്റെടുക്കുന്നതിൽ വലിയ സ്ഥിരത പുലർത്തിയ ബൗളറാണെന്നും മുരളി കാർത്തിക് പറഞ്ഞു. ഒരു അധിക കളിക്കാരനെക്കൂടി ടീമിൽ ഉൾപ്പെടുത്തുന്നതിൽ തെറ്റില്ലായിരുന്നുവെന്നും, കുൽദീപ് യാദവിനെപ്പോലെ വിക്കറ്റെടുക്കാൻ ശേഷിയുള്ള സുതാറിനെ ഒഴിവാക്കിയതിന്‍റെ യുക്തി മനസിലാകുന്നില്ലെന്നും കാർത്തിക് കൂട്ടിച്ചേർത്തു.ഇന്ത്യൻ ടെസ്റ്റ് സ്ക്വാ‍‍ഡ്: ശുഭ്മാൻ ഗിൽ (ക്യാപ്റ്റൻ), യശസ്വി ജയ്‌സ്വാൾ, കെ.എൽ. രാഹുൽ (വൈസ് ക്യാപ്റ്റൻ), ദേവ്ദത്ത് പടിക്കൽ, റിഷഭ് പന്ത് (വിക്കറ്റ് കീപ്പർ), ധ്രുവ് ജുറെൽ (വിക്കറ്റ് കീപ്പർ), രവീന്ദ്ര ജഡേജ, അൻഷുൽ കാംബോജ്, ജസ്പ്രീത് ബുംറ, പ്രസിദ്ധ് കൃഷ്ണ, ആകാശ് ദീപ്, സായ് സുദർശൻ, നിതീഷ് കുമാർ റെഡ്ഡി, വാഷിംഗ്ടൺ സുന്ദർ, കുൽദീപ് യാദവ്, മുഹമ്മദ് സിറാജ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ജസ്പ്രീത് ബുംറ മൂന്ന് ഫോർമാറ്റിലും കളിക്കരുത്; ടെസ്റ്റ് ക്രിക്കറ്റിൽ ശ്രദ്ധ കേന്ദ്രീകരിക്കണമെന്ന് രവി ശാസ്ത്രി

Gopalakrishnan C — Mon, 19 Oct 2026 19:50:41 +0530

മുംബൈ: ഇന്ത്യൻ പേസ് പടയുടെ നട്ടെല്ലായ ജസ്പ്രീത് ബുംറ മൂന്ന് ഫോർമാറ്റുകളിലും ഒരുപോലെ കളിക്കുന്നത് ഒഴിവാക്കണമെന്നും, ടെസ്റ്റ് ക്രിക്കറ്റിന് മുൻഗണന നൽകി ജോലിഭാരം കൃത്യമായി നിയന്ത്രിക്കണമെന്നും മുൻ ഇന്ത്യൻ പരിശീലകൻ രവി ശാസ്ത്രി. അടുത്ത വർഷം നടക്കാനിരിക്കുന്ന ഏകദിന ലോകകപ്പിന് മുന്നോടിയായി ബുംറയെ സംരക്ഷിച്ചു നിർത്താൻ വൈറ്റ് ബോൾ ക്രിക്കറ്റിൽ (ഏകദിനം, ടി20) അവസരത്തിനൊത്ത് മാത്രം കളിപ്പിച്ചാൽ മതിയെന്നാണ് ശാസ്ത്രിയുടെ നിർദ്ദേശം.

32-കാരനായ ബുംറയുടെ സേവനം വരാനിരിക്കുന്ന നിർണ്ണായക മത്സരങ്ങളിൽ ഇന്ത്യക്ക് അത്യാവശ്യമാണെന്നും, അതിനാൽ ന്യൂസിലൻഡിനെതിരെയുള്ള വരാനിരിക്കുന്ന രണ്ട് ടെസ്റ്റ് മത്സരങ്ങൾക്കായി അദ്ദേഹത്തെ കാത്തുവെക്കണമെന്നും ശാസ്ത്രി വ്യക്തമാക്കി. ന്യൂസിലൻഡിനെതിരായ ടി20, ഏകദിന പരമ്പരകളിൽ നിന്ന് ബുംറയ്ക്ക് നിലവിൽ വിശ്രമം അനുവദിച്ചിട്ടുണ്ട്.

നവംബർ 19 മുതൽ വെല്ലിംഗ്ടണിൽ ആരംഭിക്കുന്ന രണ്ട് മത്സരങ്ങളടങ്ങിയ ടെസ്റ്റ് പരമ്പരയിലൂടെയാകും താരം ഇന്ത്യൻ ടീമിലേക്ക് തിരിച്ചെത്തുക. ലോക ടെസ്റ്റ് ചാമ്പ്യൻഷിപ്പ് ഫൈനലിൽ യോഗ്യത നേടാൻ ഇന്ത്യക്ക് ന്യൂസിലൻഡിനെതിരെയുള്ള ടെസ്റ്റ് പരമ്പര വിജയിക്കേണ്ടത് അത്യന്താപേക്ഷിതമാണ്. ഫൈനൽ സാധ്യതകൾ നിലനിർത്താൻ ശുഭ്മൻ ഗില്ലിന്‍റെ നേതൃത്വത്തിലിറങ്ങുന്ന ഇന്ത്യൻ ടീമിന് ശേഷിക്കുന്ന മത്സരങ്ങളിൽ വലിയ വിജയം ആവശ്യമാണെന്ന് രവി ശാസ്ത്രി ചൂണ്ടിക്കാട്ടി. ന്യൂസിലൻഡിനെതിരായ രണ്ട് ടെസ്റ്റുകളും ഓസ്‌ട്രേലിയയ്‌ക്കെതിരായ അഞ്ച് മത്സരങ്ങളിൽ കുറഞ്ഞത് നാലെണ്ണവും ജയിക്കുക എന്ന വെല്ലുവിളിയാണ് ഇന്ത്യക്ക് മുന്നിലുള്ളത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

രഞ്ജി ട്രോഫി: കേരളത്തിനെതിരെ ഭേദപ്പെട്ട തുടക്കവുമായി ഒഡിഷ; ഗൗരവ് ചൗധരിക്ക് അർധസെഞ്ചുറി

Gopalakrishnan C — Mon, 19 Oct 2026 18:49:22 +0530

തിരുവനന്തപുരം: രഞ്ജി ട്രോഫി ക്രിക്കറ്റില്‍ കേരളത്തിനെതിരെ ഒഡിഷക്ക് ഭേദപ്പെട്ട തുടക്കം. കാര്യവട്ടം, ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന മത്സരത്തില്‍ കേരളത്തിന്‍റെ ഒന്നാം ഇന്നിംഗ്സ് സ്കോറായ 404 റണ്‍സിന് മറുപടിയായി രണ്ടാം ദിനം കളി നിര്‍ത്തുമ്പോള്‍ ഒഡിഷ മൂന്ന് വിക്കറ്റ് നഷ്ടത്തില്‍ 114 റണ്‍സെന്ന നിലയിലാണ്. 16 റണ്‍സുമായി ക്യാപ്റ്റൻ സുബ്രാന്‍ഷു സേനാപതിയും രണ്ട് റണ്‍സുമായി സന്ദീപ് പട്നായിക്കുമാണ് ക്രീസില്‍. 50 റണ്‍സെടുത്ത ഗൗരവ് ചൗധരിയുടെയും 32 റണ്‍സെടുത്ത ശന്തനു മിശ്രയുടെയും 14 റണ്‍സെടുത്ത ഓം ടി മുണ്ഡെയയുടെയും വിക്കറ്റുകളാണ് ഒഡിഷക്ക് നഷ്ടമായത്. 7 വിക്കറ്റ് ശേഷിക്കെ കേരളത്തിന്‍റെ ഒന്നാം ഇന്നിംഗ്സ് സ്കോറിനൊപ്പമെത്താൻ ഒഡിഷക്ക് 290 റണ്‍സ് കൂടി വേണം.

കേരളത്തിന്‍റെ കൂറ്റൻ ഒന്നാം ഇന്നിംഗ്സ് സ്കോറിനെതിരെ ഒഡിഷ മികച്ച രീതിയിലാണ് തുടങ്ങിയത്. ഓപ്പണര്‍മാരായ ഷന്തനു മിശ്രയും ഗൗരവ് ചൗധരിയും ചേര്‍ന്ന് ഓപ്പണിംഗ് വിക്കറ്റില്‍ 60 റണ്‍സ് കൂട്ടിച്ചേര്‍ത്തു. ഷന്തനു മിശ്രയെ പുറത്താക്കി ജലജ് സക്സേനയാണ് കേരളത്തിന് ആദ്യ ബ്രേക്ക് ത്രൂ നല്‍കിയത്. അര്‍ധസെഞ്ചുറി തികച്ചതിന് പിന്നാലെ ഗൗരവ് ചൗധരിയെ ആദിത്യ സര്‍വാതെ പുറത്താക്കി. സ്കോര്‍ 100 കടന്നതിന് പിന്നാലെ ഓം മുണ്ഡെയെ കൂടി പുറത്താക്കി സര്‍വാതെ ഒഡിഷയുടെ കുതിപ്പിന് കടിഞ്ഞാണിട്ടു.

നേരത്തെ രണ്ടാം ദിനം ആറിന് 245 എന്ന നിലയില്‍ ക്രീസിലിറങ്ങിയ കേരളത്തിന്‍റെ ഒന്നാം ഇന്നിംഗ്‌സ് 404 റണ്‍സില്‍ അവസാനിച്ചിരുന്നു. സച്ചിന്‍ ബേബിയുടെയും അസറുദ്ദീന്‍റെയും മികവിലാണ് കേരളം തുടക്കത്തിലെ തകര്‍ച്ചയില്‍ നിന്നും ശക്തമായി തിരിച്ചുവന്നത്. മുഹമ്മദ് അസറുദ്ദീന്‍ (പുറത്താവാതെ 139), സച്ചിന്‍ ബേബി (113) എന്നിവരുടെ ഇന്നിംഗ്‌സുകളാണ് കേരളത്തെ മികച്ച സ്‌കോറിലേക്ക് നയിച്ചത്. ആദിത്യ സര്‍വാതെ (53), അഭിജിത് പ്രവീണ്‍(14), വൈശാഖ് ചന്ദ്രന്‍ (1), നിധീഷ് എം ഡി (15) എന്നിവരും കേരളത്തിനായി ഭേദപ്പെട്ട പ്രകടനം പുറത്തെടുത്തു. ഇന്നലെ ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് 18 റണ്‍സെടുക്കുന്നതിനിടെ മൂന്ന് വിക്കറ്റുകള്‍ നഷ്ടമായിരുന്നു. തുടര്‍ന്ന് സച്ചിന്‍ ബേബിയും മുഹമ്മദ് അസറുദ്ദീനും ചേര്‍ന്നുള്ള ആറാം വിക്കറ്റ് കൂട്ടുകെട്ടാണ് കേരളത്തിന്റെ ഇന്നിങ്സിന് കരുത്ത് പകര്‍ന്നത്.

കരുതലോടെ ബാറ്റ് ചെയ്ത ഇരുവരും ചേര്‍ന്ന് 141 റണ്‍സ് കൂട്ടിച്ചേര്‍ത്തു. ചായയ്ക്ക് ശേഷം കളി പുനരാരംഭിച്ച് വൈകാതെ തന്നെ സച്ചിന്‍ ബേബി തന്റെ സെഞ്ച്വറി തികച്ചു. ലളിത് യാദവിന്റെ പന്തില്‍ സിംഗിളെടുത്താണ് സച്ചിന്‍ തന്റെ 16-ാം സെഞ്ച്വറി പൂര്‍ത്തിയാക്കിയത്. ഒടുവില്‍ ആദ്യ ദിവസത്തെ കളി അവസാനിക്കുന്നതിന് തൊട്ടുമുന്‍ത്തെ ഓവറിലാണ് സച്ചിന്‍ ബേബിയുടെ വിക്കറ്റ് നഷ്ടമായത്. 11 ബൗണ്ടറികളും ഒരു സിക്സുമടക്കം 112 റണ്‍സെടുത്താണ് സച്ചിന്‍ മടങ്ങിയത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഇന്ത്യ-ന്യൂസിലൻഡ് ടി20 പരമ്പരക്ക് വ്യാഴാഴ്ച തുടക്കം, മത്സരങ്ങൾ കാണാനുള്ള വഴികള്‍, ഇന്ത്യൻ സമയം; അറിയേണ്ടതെല്ലാം

Gopalakrishnan C — Mon, 19 Oct 2026 18:04:18 +0530

ക്രൈസ്റ്റ്ചർച്ച്: ഇന്ത്യയുടെ ന്യൂസിലൻഡ് പര്യടനത്തിലെ അഞ്ച് മത്സരങ്ങളടങ്ങിയ ടി20 പരമ്പരയ്ക്ക് വ്യാഴാഴ്ച(ഒക്ടോബർ 22) തുടക്കമാകും. ക്രൈസ്റ്റ്ചർച്ചിലെ ഹാഗ്ലി ഓവലിലാണ് പരമ്പരയിലെ ആദ്യ മത്സരം നടക്കുന്നത്. ശ്രേയസ് അയ്യരുടെ നേതൃത്വത്തിലിറങ്ങുന്ന 16 അംഗ ഇന്ത്യൻ ടീമിൽ മലയാളി താരം സഞ്ജു സാംസണ്‍, തിലക് വർമ്മ, അഭിഷേക് ശർമ്മ, വൈഭവ് സൂര്യവംശി തുടങ്ങിയ പ്രമുഖതാരങ്ങളെല്ലാമുണ്ട്.

പരമ്പരയിലെ ആദ്യ രണ്ട് ടി20 മത്സരങ്ങൾക്കും ക്രൈസ്റ്റ്ചർച്ചിലെ ഹാഗ്ലി ഓവൽ ആണ് വേദിയാവുന്നത്. ശനിയാഴ്ചയാണ് പരമ്പരയിലെ രണ്ടാം മത്സരം. തുടർന്ന് മൂന്നാം മത്സരം വെല്ലിംഗ്ടണിലെ എൻആർവൈ സ്റ്റേഡിയത്തിലും (ഒക്ടോബർ 27), നാലാം മത്സരം ഓക്ക്‌ലൻഡിലെ ഈഡൻ പാർക്കിലും (ഒക്ടോബർ 30), അവസാന പോരാട്ടം ഹാമിൽട്ടണിലെ സെഡൺ പാർക്കിലും (നവംബർ 1) നടക്കും.

ടി20 പരമ്പരയ്ക്ക് ശേഷം 5 ഏകദിനങ്ങളും 2 ടെസ്റ്റ് മത്സരങ്ങളും അടങ്ങുന്ന പരമ്പരയും ഇന്ത്യ ന്യൂസിലൻഡിൽ കളിക്കും. ന്യൂസിലൻഡിലെ പ്രാദേശിക സമയം രാത്രി 8:00 മണിക്കാണ് എല്ലാ മത്സരങ്ങളും ആരംഭിക്കുന്നത്. ഇന്ത്യൻ സമയം ഉച്ചയ്ക്ക് 12:30നാണ് ടി20 മത്സരങ്ങള്‍ തുടങ്ങുക. ഇന്ത്യയിലെ ആരാധകർക്ക് സോണി സ്പോർട്സ് നെറ്റ്‌വർക്കിലൂടെ മത്സരങ്ങൾ തത്സമയം കാണാം. സോണി ലിവ് ആപ്പിലും വെബ്‌സൈറ്റിലും ലൈവ് സ്ട്രീമിംഗ് ലഭ്യമായിരിക്കും.

രവി ശാസ്ത്രി, സുനിൽ ഗാവസ്കർ, ഹർഷ ഭോഗ്ലെ തുടങ്ങിയ പ്രമുഖർ അടങ്ങുന്ന കമന്‍ററി ടീമിലൂടെ ഹിന്ദി കമന്‍ററിയോടെ മത്സരം ആസ്വദിക്കാനാകും. ന്യൂസിലൻഡിൽ സ്കൈ സ്പോർട്സിലും യു.എസ്.എയിലും കാനഡയിലും വില്ലോ ടിവിയിലുമാണ് സംപ്രേക്ഷണം.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

രഞ്ജി ട്രോഫിയിൽ ചരിത്രം കുറിച്ച് ചിന്മയ് സുതാർ; 1948-ന് ശേഷം ആദ്യമായി 400 റൺസ് നേടുന്ന ആദ്യ താരം

Gopalakrishnan C — Mon, 19 Oct 2026 17:15:37 +0530

ബെംഗളൂരു: രഞ്ജി ട്രോഫി ക്രിക്കറ്റിൽ അപൂർവ്വ നേട്ടം സ്വന്തമാക്കി മിസോറാം താരം ചിന്മയ് സുതാർ. ദിമാപ്പൂരിൽ നാഗാലാൻഡിനെതിരെ നടന്ന പ്ലേറ്റ് ഗ്രൂപ്പ് മത്സരത്തിൽ പുറത്താകാതെ 400 റൺസ് അടിച്ചുകൂട്ടിയാണ് സുതാർ റെക്കോര്‍ഡിട്ടത്. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ മിസോറാം, സുതാറിന്‍റെ മാരത്തൺ ഇന്നിംഗ്സിന്‍റെ കരുത്തിൽ 9 വിക്കറ്റിന് 581 റൺസ് എന്ന നിലയിൽ ഒന്നാം ഇന്നിംഗ്സ് ഡിക്ലയർ ചെയ്യുകയായിരുന്നു. 46 ഫോറുകളും 7 സിക്സറുകളും അടങ്ങുന്നതായിരുന്നു സുതാറിന്‍റെ വെടിക്കെട്ട് ഇന്നിംഗ്സ്. 69 റൺസെടുത്ത ജാഹു ആൻഡേഴ്സൺ സുതാറിന് മികച്ച പിന്തുണ നൽകി.

രഞ്ജി ട്രോഫി ചരിത്രത്തിൽ ക്വാഡ്രപ്പിൾ സെഞ്ച്വറി (400 റൺസ്) തികയ്ക്കുന്ന രണ്ടാമത്തെ മാത്രം ബാറ്ററാണ് ചിന്മയ് സുതാർ. 1948-ൽ മഹാരാഷ്ട്രയ്ക്ക് വേണ്ടി കത്തിയവാറിനെതിരെ പുറത്താകാതെ 443 റൺസ് നേടിയ ബി.ബി. നിംബാൽക്കറാണ് ഇതിനുമുമ്പ് രഞ്ജി ട്രോഫിയിൽ ഈ നേട്ടത്തിലെത്തിയ ഏക താരം. 78 വർഷങ്ങൾക്ക് ശേഷമാണ് ഒരു ഇന്ത്യൻ താരം രഞ്ജി ട്രോഫിയിൽ 400 റൺസ് കടക്കുന്നത്. ഇതോടെ രഞ്ജി ചരിത്രത്തിലെ ഏറ്റവും ഉയർന്ന വ്യക്തിഗത സ്കോറുകളിൽ നിംബാൽക്കർക്ക് തൊട്ടുപിന്നിൽ രണ്ടാമതെത്താനും സുതാറിനായി.

2022-23 സീസണിൽ ആസമിനെതിരെ 379 റൺസ് നേടിയ പ്രഥ്വി ഷാ, 1990-91 സീസണിൽ ഹൈദരാബാദിനെതിരെ 366 റൺസ് നേടിയ സഞ്ജയ് മഞ്ജരേക്കർ, 1993-94 സീസണിൽ 344 റൺസ് നേടിയ എം.വി. ശ്രീധർ എന്നിവരാണ് പട്ടികയിൽ അടുത്ത സ്ഥാനങ്ങളിലുള്ളത്. ഫസ്റ്റ് ക്ലാസ് ക്രിക്കറ്റിൽ 400 റൺസ് തികയ്ക്കുന്ന പത്താമത്തെ മാത്രം ബാറ്ററെന്ന അപൂർവ്വ നേട്ടവും സുതാറിന് സ്വന്തമായി. ബ്രയാൻ ലാറ, ഡോൺ ബ്രാഡ്മാൻ എന്നീ ക്രിക്കറ്റ് ഇതിഹാസങ്ങൾക്കൊപ്പമാണ് സുതാറും പട്ടികയില്‍ ഇടംപിടിച്ചത്. ഇംഗ്ലീഷ് കൗണ്ടിയിൽ ഡർഹാമിനെതിരെ വാർവിക്ഷെയറിനായി പുറത്താകാതെ 501 റൺസ് നേടിയ വെസ്റ്റ് ഇൻഡീസ് ഇതിഹാസം ബ്രയാൻ ലാറയാണ് ഫസ്റ്റ് ക്ലാസ് ക്രിക്കറ്റിലെ ഏറ്റവും ഉയർന്ന വ്യക്തിഗത സ്കോറിന് ഉടമ. കരിയറിന്‍റെ തുടക്കത്തിൽ വലിയ തിരിച്ചടികൾ നേരിട്ട ശേഷമാണ് ചിന്മയ് സുതാർ ഈ റെക്കോർഡ് വേട്ട നടത്തിയത്. ഈ വർഷം ജനുവരിയിൽ വിജയ് ഹസാരെ ട്രോഫിയിൽ മുംബൈക്കായി ലിസ്റ്റ് എ ക്രിക്കറ്റിൽ അരങ്ങേറിയ സുതാർ രണ്ട് റൺസെടുത്ത് റണ്ണൗട്ടാവുകയായിരുന്നു. തുടർന്ന് മിസോറാമിലേക്ക് മാറിയ താരം, തന്‍റെ അരങ്ങേറ്റ ഫസ്റ്റ് ക്ലാസ് മത്സരത്തിലെ രണ്ടാം ഇന്നിംഗ്സിൽ 99 റൺസെടുത്ത് പുറത്തായി. എന്നാൽ ആ നിരാശയെല്ലാം മറികടന്ന് തൊട്ടടുത്ത മത്സരത്തിൽ തന്നെ രഞ്ജി ട്രോഫി റെക്കോര്‍ഡിടാൻ ചിന്മയ് സുതാറിന് സാധിച്ചു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

അജിത് അഗാർക്കറുടെ പകരക്കാരനെ പ്രഖ്യാപിച്ച് ബിസിസിഐ; സെലക്ഷൻ കമ്മിറ്റിയിലേക്ക് പുതിയൊരു അംഗം കൂടി

Gopalakrishnan C — Mon, 19 Oct 2026 16:41:18 +0530

മുംബൈ: ഇന്ത്യൻ ക്രിക്കറ്റ് ടീമിന്‍റെ പുതിയ സെലക്ഷൻ കമ്മിറ്റി അംഗമായി മുൻ ഇന്ത്യൻ സ്പിന്നർ രമേഷ് പവാറിനെ ബിസിസിഐ നിയമിച്ചു. അശോക് മൽഹോത്ര, ജതിൻ പരാഞ്ജ്പെ എന്നിവരടങ്ങിയ ക്രിക്കറ്റ് അഡ്വൈസറി കമ്മിറ്റി ബിസിസിഐ ആസ്ഥാനത്തു വെച്ച് അപേക്ഷകരുടെ അഭിമുഖം പൂർത്തിയാക്കിയ ശേഷമാണ് രമേഷ് പവാറിന്‍റെ പേര് ഐക്യകണ്ഠേന ശുപാർശ ചെയ്തത്. ഇന്ത്യക്കായി 2 ടെസ്റ്റുകളിലും 31 ഏകദിനങ്ങളിലും കളിച്ചിട്ടുള്ള പവാർ, പരിശീലകനെന്ന നിലയിലും മികച്ച പരിചയസമ്പത്തുള്ള വ്യക്തിയാണ്.

ഇന്ത്യൻ വനിതാ ക്രിക്കറ്റ് ടീമിന്‍റെ മുഖ്യ പരിശീലകൻ, മുംബൈ, ഗുജറാത്ത് ടീമുകളുടെ പരിശീലകൻ, ബിസിസിഐ സെന്‍റർ ഓഫ് എക്സലൻസിലെ ബൗളിംഗ് കോച്ച് എന്നീ നിലകളിൽ പവാര്‍ പ്രവർത്തിച്ചിട്ടുണ്ട്. പവാർ പരിശീലകനായിരിക്കെ ഇന്ത്യൻ വനിതാ ടീം ഏഷ്യ കപ്പ് കിരീടവും കോമൺവെൽത്ത് ഗെയിംസിൽ വെള്ളിയും നേടിയിരുന്നു. പവാര്‍ സെലക്ഷന്‍ കമ്മിറ്റിയിലെത്തിയതോടെ സീനിയോറിറ്റിയുടെ (കൂടുതൽ ടെസ്റ്റ് മത്സരങ്ങൾ കളിച്ച പരിചയം) അടിസ്ഥാനത്തിൽ മുൻ സ്പിന്നർ പ്രഗ്യാൻ ഓജ സെലക്ഷൻ കമ്മിറ്റിയുടെ പുതിയ ചെയർമാനാകും.

പുരുഷ സെലക്ഷൻ കമ്മിറ്റി ചെയർമാൻ സ്ഥാനമൊഴിഞ്ഞ അജിത് അഗാർക്കറുടെ സേവനങ്ങൾക്ക് ബിസിസിഐ നന്ദി പറഞ്ഞു. 2023 ജൂലൈയിൽ ചുമതലയേറ്റ അഗാർക്കറുടെ നേതൃത്വത്തിന് കീഴിൽ മൂന്ന് ഐസിസി ട്രോഫികൾ, രണ്ട് ഏഷ്യ കപ്പ് കിരീടങ്ങൾ, തുടർച്ചയായ രണ്ട് ഏഷ്യൻ ഗെയിംസ് സ്വർണ മെഡലുകൾ എന്നിവ ഇന്ത്യ നേടിയിരുന്നു. രമേശ് പവാറിന് പുറമെ അഞ്ചംഗ സെലക്ഷൻ കമ്മിറ്റിയിൽ പ്രഗ്യാൻ ഓജ (ചെയർപേഴ്സൺ),ശിവ് സുന്ദർ ദാസ്, ആർ.പി. സിങ്, അജയ് രത്ര എന്നിവരാണുള്ളത്. മുന്‍ ഇന്ത്യൻ ഓപ്പണര്‍ വസീം ജാഫര്‍ അടക്കമുള്ളവര്‍ സെലക്ഷൻ കമ്മിറ്റിയിലേക്ക് അപേക്ഷിച്ചിരുന്നു.

ജാഫര്‍ സെലക്ഷൻ കമ്മിറ്റിയിൽ എത്തിയിരുന്നെങ്കില്‍ സീനിയോരിറ്റിയുടെ അടിസഥാനത്തില്‍ ചെയർമാൻ ആക്കേണ്ടി വരുമായിരുന്നു. എന്നാല്‍ ബിസിസിഐയുടെ താല്‍പര്യപ്രകാരാമാണ് പ്രഗ്യാൻ ഓജയെ സെലക്ഷൻ കമ്മിറ്റിയ ചെയര്‍മാനാക്കിയത്. അഗാര്‍ക്കര്‍ സ്ഥാനമൊഴിഞ്ഞശേഷം ഓജയുടെ നേതൃത്വത്തിലുള്ള സെലക്ഷന്‍ കമ്മിറ്റിയാണ് ഇന്ത്യയുടെ ന്യൂസിലന്‍ഡ് പര്യടനത്തിനുള്ള ഏകദിന, ടെസ്റ്റ് ടീമുകളെ പ്രഖ്യാപിച്ചത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഇമ്രാന്‍ ഖാന്റെ മോചനത്തിന്‌ വേണ്ടി ശബ്ദമുയര്‍ത്തി, മുന്‍ ഇംഗ്ലണ്ട്‌ താരങ്ങളെ കമെന്ററി പാനലില്‍ നിന്ന്‌ ഒഴിവാക്കി പാക്കിസ്ഥാന്‍

Web Desk — Mon, 19 Oct 2026 16:22:58 +0530

കറാച്ചി : പാക്കിസ്ഥാന്‍ മുന്‍ പ്രധാനമന്ത്രിയും ക്രിക്കറ്റ്‌ ഇതിഹാസവുമായ ഇമ്രാന്‍ഖാനെ മോചിപ്പിക്കണമെന്നാവശ്യപ്പെട്ട ഇംഗ്ലീഷ്‌ കമെന്റേറ്റര്‍മാരെ പാക്‌ ക്രിക്കറ്റ്‌ ബോര്‍ഡ്‌ ആതിഥേയത്വം വഹിക്കുന്ന ടൂര്‍ണമെന്റില്‍ നിന്നൊഴിവാക്കി. മൈക്കല്‍ ആതര്‍ട്ടനെയും നാസര്‍ ഹൂസൈനയുമാണ്‌ പുറത്താക്കിയത്‌.

ഒക്ടോബര്‍ 18 മുതല്‍ 31 വരെ പാക്കിസ്ഥാനില്‍ നടക്കുന്ന പാക്കിസ്ഥാന്‍, ഇംഗ്ലണ്ട്‌, ശ്രീലങ്ക ടീമുകള്‍ ഉള്‍പ്പെടുന്ന ഏകദിന ത്രിരാഷ്ട്ര പരമ്പരക്കുള്ള ആറംഗ കമെന്ററി പാനലില്‍ നിന്നാണ്‌ ഇവരെ ഒഴിവാക്കിയത്‌. ഇംഗ്ലീഷ്‌ കമെന്റേറ്റര്‍മാരെ പുറത്താക്കാനുള്ള ഔദ്യോഗിക കാരണങ്ങള്‍ ഒന്നും പി സി ബി വ്യക്തമാക്കിയിട്ടില്ലെങ്കിലും ഇമ്രാന്‍ഖാന്റെ കുടുംബവുമായി ബന്ധപ്പെട്ടുണ്ടാ വിവാദങ്ങളാണ്‌ ഇതിന്‌ പിന്നിലെന്നാണ്‌ സൂചന.

ഓഗസ്‌റ്റില്‍ ലോര്‍ഡ്‌സില്‍ നിന്ന ഇംഗ്ലണ്ട്‌-പാക്കിസ്ഥാന്‍ ടെസ്റ്റ്‌ മത്സരത്തിനിടെ മൈക്കല്‍ ആതര്‍ട്ടന്‍ ഇമ്രാന്‍ ഖാന്റെ മക്കളായ കാസിം, സുലൈമാന്‍ എന്നിവരുമായി ഒരു അഭിമുഖം നടത്തിയിരുന്നു. സ്‌കൈ സ്‌പോര്‍ട്‌സ്‌ സംപ്രേഷണം ചെയ്‌ത ഈ അഭിമുഖത്തില്‍, ജയിലില്‍ ഇമ്രാന്‍ ഖാന്റെ ആരോഗ്യം മോശമാണെന്നും അദ്ദേഹം തടവറയില്‍ ഒറ്റപ്പെട്ടു കഴിയുകയാണെന്നും മക്കള്‍ ആരോപിച്ചിരുന്നു. രാജ്യാന്തര ക്രിക്കറ്റ്‌ വേദിയെ രാഷ്ട്രീയ ലാഭത്തിനായി ഉപയോഗിച്ചു എന്ന്‌ കാണിച്ച്‌ പാക്കിസ്ഥാന്‍ ക്രിക്കറ്റ്‌ ബോര്‍ഡ്‌ അന്ന്‌ സ്‌കൈ സ്‌പോര്‍ട്‌സിന്‌ എതിരെ ശക്തമായ പരാതി നല്‍കിയിരുന്നു. അന്ന്‌ പാക്കിസ്ഥാന്‍ ടീം മത്സരം ബഹിഷ്‌കരിക്കുമെന്ന്‌ വരെ ഭീഷണി മുഴക്കിയതായി റിപ്പോര്‍ട്ടുകളുണ്ടായിരുന്നു.

ത്രിരാഷ്ട്ര പരമ്പരയില്‍ നാല്‌ കമെന്റേറ്റര്‍മാര്‍ പാക്കിസ്ഥാനികളാണ്‌. വഖാര്‍ യൂനിസ്‌, ആമിര്‍ സൊഹൈല്‍, ബാസിദ്‌ ഖാന്‍, ഉറൂജ്‌ മുംതാസ്‌ എന്നിവര്‍. ശ്രീലങ്കയുടെ റോഷന്‍ അബേസിംഗെയും ദക്ഷിണാഫ്രിക്കയുടെ മാര്‍ക്ക്‌ ബുച്ചറുമാണ്‌ മറ്റ്‌ കമെന്റേറ്റര്‍മാര്‍.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

'ഇന്ത്യന്‍ ടീമിന്റെ പ്ലേയിംഗ് ഇലവനില്‍ പ്രശ്‌നങ്ങളുണ്ട്'; ഗൗതം ഗംഭീറിനെതിരെ സുനില്‍ ഗവാസ്‌കര്‍

Web Desk — Mon, 19 Oct 2026 14:38:14 +0530

മുംബൈ: ഇന്ത്യന്‍ ക്രിക്കറ്റ് ടീം ഹെഡ് കോച്ച് ഗൗതം ഗംഭീറിന്റെ ടീം സെറ്റപ്പിലെ പോരായ്മകള്‍ ചൂണ്ടിക്കാണിച്ച് മുന്‍ നായകന്‍ സുനില്‍ ഗാവസ്‌കര്‍. ടീമിന്റെ ബാലന്‍സിനെക്കുറിച്ചും അദ്ദേഹം വിമര്‍ശനം ഉന്നയിക്കുന്നുണ്ട്. എട്ടാമത് വരെ ബാറ്റിങ് നീളുന്നത് ടീമിന്റെ ബോളിങ് ശക്തിയെ ദുര്‍ബലപ്പെടുത്തുന്നുവെന്നും, ഹാര്‍ദിക് പാണ്ഡ്യയ്ക്ക് പകരം മറ്റൊരാളെ കണ്ടെത്താന്‍ ശ്രമിക്കാത്തത് ടീമിന് തിരിച്ചടിയാകുന്നുണ്ടെന്നും ഗാവസ്‌കര്‍ വ്യക്തമാക്കി.

ഗവാസ്‌ക്കറുടെ വാക്കുകള്‍.. ''ഞങ്ങള്‍ക്ക് ബോളിങ് കാണാന്‍ അവസരം ലഭിച്ചില്ല. ഒമ്പത് ഓവര്‍ മത്സരത്തില്‍ ഇന്ത്യ എങ്ങനെ പന്തെറിയുമെന്ന് കാണാന്‍ രസകരമായിരുന്നു. ബോളിങ് നിരയില്‍ കുറഞ്ഞത് നാല് റെഗുലര്‍ ബോളര്‍മാരെങ്കിലും കളിക്കണം എന്നതാണ് ഈ പരമ്പര നല്‍കുന്ന പാഠം.'' ഗാവസ്‌കര്‍ പറഞ്ഞു. അഞ്ച്, ആറ് സ്ഥാനങ്ങളില്‍ ഓള്‍റൗണ്ടര്‍മാരെ കളിപ്പിക്കാമെന്നും അദ്ദേഹം കൂട്ടിച്ചേര്‍ത്തു.

സ്പിന്‍ കോമ്പിനേഷന് വ്യക്തത നല്‍കണമെന്ന് ചേതേശ്വര്‍ പൂജാര

ഇതേ പാനല്‍ ചര്‍ച്ചയില്‍ സംസാരിച്ച മുന്‍ ഇന്ത്യന്‍ താരം ചേതേശ്വര്‍ പൂജാര, ടീമിലെ സ്പിന്‍ കോമ്പിനേഷനെ കൃത്യമായി തിരിച്ചറിഞ്ഞ് കളിക്കാരെ പിന്തുണയ്ക്കണമെന്ന് വ്യക്തമാക്കി. ചെറിയ ബൗണ്ടറികളുള്ള ഗ്രൗണ്ടുകളില്‍ കുല്‍ദീപ് യാദവിനെപ്പോലെയുള്ള സ്പിന്നര്‍മാര്‍ക്ക് അവസരം ലഭിച്ചേക്കില്ലെന്നും അദ്ദേഹം പറഞ്ഞു. ''ഫോര്‍മാറ്റില്‍ നാല് ഓവറില്‍ 40-50 റണ്‍സ് വഴങ്ങുമ്പോള്‍ സ്പിന്നര്‍മാരുടെ ആത്മവിശ്വാസം നഷ്ടപ്പെടാം. അതിനാല്‍ അടുത്ത രണ്ട് വര്‍ഷത്തേക്ക് ടീമില്‍ ആരെയാണ് ആവശ്യമെന്ന് കണ്ടെത്തി അവര്‍ക്ക് വേണ്ടത്ര അവസരങ്ങള്‍ നല്‍കേണ്ടതുണ്ട്.'' പൂജാര വ്യക്തമാക്കി.

രഞ്ജി ട്രോഫി: ഒഡീഷയ്‌ക്കെതിരെ കേരളത്തിന്റെ ഇന്നിംഗ്‌സ് 404ന് അവസാനിച്ചു; സച്ചിന്‍ ബേബിക്കും അസറുദ്ദീനും സെഞ്ചുറി

Web Desk — Mon, 19 Oct 2026 14:19:46 +0530

തിരുവനന്തപുരം: ഒഡീഷയ്‌ക്കെതിരായ രഞ്ജി ട്രോഫി മത്സരത്തിന്റെ കേരളത്തിന്റെ ഒന്നാം ഇന്നിംഗ്‌സ് 404ന് അവസാനിച്ചു. കാര്യവട്ടം, ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന മത്സരത്തില്‍ മുഹമ്മദ് അസറുദ്ദീന്‍ (പുറത്താവാതെ 139), സച്ചിന്‍ ബേബി (113) എന്നിവരുടെ ഇന്നിംഗ്‌സുകളാണ് കേരളത്തെ മികച്ച സ്‌കോറിലേക്ക് നയിച്ചത്. ഒഡീഷയ്ക്ക് വേണ്ടി ലളിത് യാദവ് മൂന്ന് വിക്കറ്റ് വീഴ്ത്തി. രാജേഷ് മൊഹന്തി, സൗമ്യ ലെങ്ക എന്നിവര്‍ക്ക് രണ്ട് വിക്കറ്റ് വീതമുണ്ട്.

ആറിന് 245 എന്ന നിലയാണ് കേരളം ഇന്ന് ബാറ്റിംഗിനെത്തിയത്. വൈകാതെ അസറുദ്ദീന്‍ സെഞ്ചുറി പൂര്‍ത്തിയാക്കി. 11 ബൗണ്ടറികള്‍ ഉള്‍പ്പെടുന്നതായിരുന്നു കേരള വിക്കറ്റ് കീപ്പറുടെ ഇന്നിംഗ്്‌സ്. ആദിത്യ സര്‍വാതെ (53), അഭിജിത് പ്രവീണ്‍ ്(14), വൈശാക് ചന്ദ്രന്‍ (1), നിധീഷ് എം ഡി (15) എന്നിവരുടെ വിക്കറ്റുകളും കേരളത്തിന് ഇന്ന് നഷ്ടമായി. ഇന്നലെ സച്ചിന്‍ ബേബിയുടെയും അസറുദ്ദീന്റെയും മികവിലാണ് കേരളം തുടക്കത്തിലെ തകര്‍ച്ചയില്‍ നിന്നും ശക്തമായി തിരിച്ചുവന്നത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് 18 റണ്‍സെടുക്കുന്നതിനിടെ മൂന്ന് വിക്കറ്റുകള്‍ നഷ്ടമായി.

അക്കൗണ്ട് തുറക്കാതെ മടങ്ങിയ അഭിഷേക് പി നായരാണ് ആദ്യം പുറത്തായത്. തുടര്‍ന്നെത്തിയ ജലജ് സക്സേനയും പൂജ്യത്തിന് മടങ്ങി. 11 റണ്‍സെടുത്ത അഭിഷേക് ജെ നായരുടെ വിക്കറ്റ് കൂടി നഷ്ടമായി തകര്‍ച്ചയെ അഭിമുഖീകരിച്ച കേരളത്തെ സച്ചിന്‍ ബേബിയും ക്യാപ്റ്റന്‍ വിഷ്ണു വിനോദും ചേര്‍ന്നാണ് കരകയറ്റിയത്. ഇരുവരും ചേര്‍ന്ന് 40 റണ്‍സ് കൂട്ടിച്ചേര്‍ത്തു. 21 റണ്‍സെടുത്ത വിഷ്ണു വിനോദ് സൗമ്യ രഞ്ജന്റെ പന്തില്‍ പുറത്തായി. തുടര്‍ന്നെത്തിയ സല്‍മാന്‍ നിസാര്‍ (21) ബാദല്‍ ബിസ്വാളിന് വിക്കറ്റ് നല്‍കി മടങ്ങുമ്പോള്‍ അഞ്ച് വിക്കറ്റിന് 101 റണ്‍സെന്ന നിലയിലായിരുന്നു കേരളം.

തുടര്‍ന്ന് സച്ചിന്‍ ബേബിയും മുഹമ്മദ് അസറുദ്ദീനും ചേര്‍ന്നുള്ള ആറാം വിക്കറ്റ് കൂട്ടുകെട്ടാണ് കേരളത്തിന്റെ ഇന്നിങ്സിന് കരുത്ത് പകര്‍ന്നത്. കരുതലോടെ ബാറ്റ് ചെയ്ത ഇരുവരും ചേര്‍ന്ന് 141 റണ്‍സ് കൂട്ടിച്ചേര്‍ത്തു. ചായയ്ക്ക് ശേഷം കളി പുനരാരംഭിച്ച് വൈകാതെ തന്നെ സച്ചിന്‍ ബേബി തന്റെ സെഞ്ച്വറി തികച്ചു. ലളിത് യാദവിന്റെ പന്തില്‍ സിംഗിളെടുത്താണ് സച്ചിന്‍ തന്റെ 16-ാം സെഞ്ച്വറി പൂര്‍ത്തിയാക്കിയത്. ഒടുവില്‍ ആദ്യ ദിവസത്തെ കളി അവസാനിക്കുന്നതിന് തൊട്ടുമുന്‍ത്തെ ഓവറിലാണ് സച്ചിന്‍ ബേബിയുടെ വിക്കറ്റ് നഷ്ടമായത്. 11 ബൗണ്ടറികളും ഒരു സിക്സുമടക്കം 112 റണ്‍സെടുത്താണ് സച്ചിന്‍ മടങ്ങിയത്.

സല്‍മാന്‍ ആഘയ്ക്ക് റെക്കോര്‍ഡ് സെഞ്ചുറി; ത്രിരാഷ്ട്ര പരമ്പരയില്‍ ശ്രീലങ്കയെ പരാജയപ്പെടുത്തി പാകിസ്ഥാന്‍

Web Desk — Mon, 19 Oct 2026 14:07:40 +0530

കൊളംബോ: ത്രിരാഷ്ട്ര ഏകദിന പരമ്പരയിലെ ഉദ്ഘാടന മത്സരത്തില്‍ ശ്രീലങ്കയെ 37 റണ്‍സിന് പരാജയപ്പെടുത്തിയിരുന്നു പാകിസ്ഥാന്‍. മത്സരത്തില്‍ സെഞ്ച്വറി നേടി തിളങ്ങിയ പാകിസ്ഥാന്‍ താരം സല്‍മാന്‍ ആഘയാണ് ടീമിന്റെ വിജയത്തിന് ചുക്കാന്‍ പിടിച്ചത്. ആദ്യം ബാറ്റ് ചെയ്ത പാകിസ്ഥാന്‍ 305 റണ്‍സിന് പുറത്തായപ്പോള്‍, മറുപടി ബാറ്റിംഗിനിറങ്ങിയ ശ്രീലങ്ക 268 റണ്‍സിന് ഓള്‍ഔട്ടായി. ടോസ് നേടി ബാറ്റിംഗിനിറങ്ങിയ പാകിസ്ഥാന്‍ 106 റണ്‍സിനിടെ മൂന്ന് വിക്കറ്റുകള്‍ നഷ്ടപ്പെട്ട് തകര്‍ന്ന ഘട്ടത്തിലാണ് അഞ്ചാം നമ്പറില്‍ സല്‍മാന്‍ ആഘ ക്രീസിലിറങ്ങിയത്.

90 പന്തുകളില്‍ നിന്ന് 10 ഫോറും ഒരു സിക്‌സും സഹിതം 107 റണ്‍സ് നേടിയ താരം ടീമിനെ മികച്ച സ് സ്‌കോറിലേക്ക് നയിച്ചു. ഇതോടെ ഒരു റെക്കോഡും താരത്തെ തേടിയെത്തി. ഏകദിനത്തില്‍ അഞ്ചാം നമ്പറിലോ അതിനു താഴെയോ ഇറങ്ങി ഏറ്റവും കൂടുതല്‍ സെഞ്ച്വറികള്‍ നേടുന്ന പാകിസ്ഥാന്‍ താരമെന്ന റെക്കോഡാണ് ആഘ സ്വന്തമാക്കിയത്. അഞ്ചാം നമ്പറിലോ അതിനു താഴെയോ ബാറ്റ് ചെയ്ത് ആഘയുടെ നാലാമത്തെ ഏകദിന സെഞ്ച്വറിയാണിത്. മൂന്ന് സെഞ്ച്വറികള്‍ നേടിയിട്ടുള്ള മുഹമ്മദ് യൂസഫാണ് ഈ പട്ടികയില്‍ രണ്ടാം സ്ഥാനത്തുള്ളത്.

ആഭ്യന്തര ക്രിക്കറ്റിന്റെ കരുത്തില്‍ തിരിച്ചുവരവ്

കഴിഞ്ഞ ആഗസ്റ്റിന് ശേഷം പാകിസ്ഥാനുവേണ്ടി അന്താരാഷ്ട്ര മത്സരങ്ങള്‍ കളിച്ചിട്ടില്ലാത്ത 32 കാരനായ സല്‍മാന്‍ ആഘ, ടി20, ടെസ്റ്റ് ടീമുകളില്‍ നിന്നും ടി20 നായകസ്ഥാനത്തുനിന്നും ഒഴിവാക്കപ്പെട്ടിരുന്നു. എന്നാല്‍ തളര്‍ന്നുപോകാതെ ആഭ്യന്തര ക്രിക്കറ്റിലേക്ക് മടങ്ങിയ താരം, മികച്ച പ്രകടനത്തിലൂടെയാണ് അന്താരാഷ്ട്ര ക്രിക്കറ്റിലേക്ക് ശക്തമായ തിരിച്ചുവരവ് നടത്തിയത്. പ്രസിഡന്റ്‌സ് ട്രോഫി ഗ്രേഡ്-ഐ മത്സരങ്ങളില്‍ കിംഗ്‌സ്‌മെന്‍ ടീമിനായി കളിച്ച അദ്ദേഹം, സെപ്റ്റംബറില്‍ പുറത്താകാതെ ട്രിപ്പിള്‍ സെഞ്ച്വറിയും ഒക്ടോബറില്‍ മറ്റൊരു സെഞ്ച്വറിയും നേടിയിരുന്നു.

ആഭ്യന്തര ക്രിക്കറ്റിലെ പ്രകടനങ്ങള്‍ക്ക് അര്‍ഹമായ അംഗീകാരം ലഭിക്കുന്നില്ലെന്നും, മോശം ഫോമില്‍ നിന്ന് തിരികെവരാന്‍ ശ്രമിക്കുന്ന കളിക്കാരെ സംബന്ധിച്ചിടത്തോളം ആഭ്യന്തര ക്രിക്കറ്റ് നല്‍കുന്ന പിന്തുണ വലുതാണെന്നും മത്സരശേഷം ആഘ പറഞ്ഞു.

'പ്രായമല്ല, മറ്റ് ചില കാരണങ്ങളായിരിക്കാം'; മുഹമ്മദ് ഷമിയെ തഴയുന്നതില്‍ പ്രതികരിച്ച് അഭിനവ് മുകുന്ദ്

Web Desk — Mon, 19 Oct 2026 13:32:42 +0530

ബെംഗളൂരു: ഡൊമിസ്റ്റിക് ക്രിക്കറ്റിലും ഐപിഎല്ലിലും മികച്ച പ്രകടനങ്ങള്‍ പുറത്തെടുത്തിട്ടും മുഹമ്മദ് ഷമിക്ക് ഇന്ത്യന്‍ ടീമിലേക്ക് തിരിച്ചെത്താന്‍ കഴിഞ്ഞിട്ടില്ല. ന്യൂസിലന്‍ഡിനെതിരായ പരമ്പരയിലേക്കും താരത്തെ ബിസിസിഐ പരിഗണിച്ചില്ല. ഭുവനേശ്വര്‍ കുമാര്‍ ടി20 ടീമിലേക്ക് തിരിച്ചെത്തിയ സാഹചര്യത്തില്‍, ഷമിയുടെ തഴയപ്പെടലിന് കാരണം പ്രായമല്ലെന്ന് മുന്‍ ഇന്ത്യന്‍ താരം അഭിനവ് മുകുന്ദ് വ്യക്തമാക്കി.

മുകുന്ദിന്റെ വാക്കുകള്‍... ''ഇന്ത്യന്‍ ടീം ഒരുകൂട്ടം ഫാസ്റ്റ് ബോളര്‍മാരുമായാണ് മുന്നോട്ടുപോകുന്നത്. മുഹമ്മദ് ഷമിയെ തിരഞ്ഞെടുക്കാത്തതിന് അതിന്റേതായ കാരണങ്ങളുണ്ടാകും. പ്രായമാണ് മാനദണ്ഡമെന്ന് ഞാന്‍ കരുതുന്നില്ല. പ്രായമായിരുന്നു മാനദണ്ഡമെങ്കില്‍ ഭുവനേശ്വര്‍ കുമാര്‍ ടി20 ടീമിലേക്ക് തിരിച്ചെത്തില്ലായിരുന്നു.'' മുകുന്ദ് പറഞ്ഞു. 64 ടെസ്റ്റ് മത്സരങ്ങളില്‍ നിന്ന് 229 വിക്കറ്റ് വീഴ്ത്തിയിട്ടുള്ള ഷമി, 2023 ജൂണിലാണ് അവസാനമായി ഇന്ത്യക്കായി ടെസ്റ്റ് കളിച്ചത്.

മറുവശത്ത്, ജസ്പ്രീത് ബുംറ, ആകാശ് ദീപ്, അന്‍ഷുല്‍ കാംബോജ് എന്നിവര്‍ ന്യൂസിലന്‍ഡിനെതിരായ റെഡ്-ബോള്‍ മത്സരങ്ങള്‍ക്കായി ടീമില്‍ തിരിച്ചെത്തിയിട്ടുണ്ട്. മുഹമ്മദ് സിറാജ്, പ്രസിദ്ധ് കൃഷ്ണ എന്നിവരുടെ സാന്നിധ്യം ഇന്ത്യക്ക് അഞ്ച് പേസര്‍മാരുടെ കരുത്ത് നല്‍കുന്നു.

മുകുന്ദ് തുടര്‍ന്നു... ''പരിക്കില്‍ നിന്ന് തിരിച്ചെത്തുന്ന ആകാശ് ദീപ് വളരെ മികച്ചൊരു റെഡ്-ബോള്‍ ബോളറാണ്. അന്‍ഷുല്‍ കാംബോജും മികച്ച പ്രകടനങ്ങള്‍ നടത്തിയിട്ടുണ്ട്. ഭാവിയിലേക്കുള്ള മികച്ചൊരു തിരഞ്ഞെടുപ്പാണ് ഈ ടീമെന്നും ഞാന്‍ കരുതുന്നു.'' മുകുന്ദ് കൂട്ടിച്ചേര്‍ത്തു. ശ്രീലങ്കയ്ക്കെതിരായ കഴിഞ്ഞ ടെസ്റ്റ് ടീമിലുണ്ടായിരുന്ന ഗുര്‍നൂര്‍ ബ്രാര്‍, ഔഖിബ് നബി, സര്‍ഫറാസ് ഖാന്‍, സാരന്‍ഷ് ജെയിന്‍ എന്നിവരെ ന്യൂസിലന്‍ഡ് പരമ്പരയില്‍ നിന്ന് ഒഴിവാക്കിയിട്ടുണ്ട്.

ന്യൂസിലന്‍ഡിനെതിരായ ഇന്ത്യയുടെ ടെസ്റ്റ് സ്‌ക്വാഡ്: ശുഭ്മാന്‍ ഗില്‍ (ക്യാപ്റ്റന്‍), യശസ്വി ജൈസ്വാള്‍, കെ.എല്‍ രാഹുല്‍ (വൈസ് ക്യാപ്റ്റന്‍), ദേവ്ദത്ത് പടിക്കല്‍, റിഷഭ് പന്ത് (വിക്കറ്റ് കീപ്പര്‍), ധ്രുവ് ജുറെല്‍ (വിക്കറ്റ് കീപ്പര്‍), രവീന്ദ്ര ജഡേജ, അന്‍ഷുല്‍ കാംബോജ്, ജസ്പ്രീത് ബുംറ, പ്രസിദ്ധ് കൃഷ്ണ, ആകാശ് ദീപ്, സായ് സുദര്‍ശന്‍, നിതീഷ് കുമാര്‍ റെഡ്ഡി, വാഷിംഗ്ടണ്‍ സുന്ദര്‍, കുല്‍ദീപ് യാദവ്, മുഹമ്മദ് സിറാജ്.

വൈഭവ് സൂര്യവംശി പുറത്ത് തന്നെയിരിക്കുമോ! ബിസിസിഐയുടെ പ്ലാൻ എന്താണ്?

Hari Krishnan M — Mon, 19 Oct 2026 13:18:03 +0530

ഫിനോമിനലായ ഒരു ഐപിഎല്‍ സീസണിന് ശേഷം ഡഗൗട്ടിലിരിക്കേണ്ടി വരിക. എനിക്ക് അവന്റെ മാനസിക സ്ഥിതി മനസിലാകും. ടി20 ലോകകിരീടം നേടിത്തന്ന രണ്ട് പേരുണ്ടവിടെ, അവർ കണ്‍സിസ്റ്റന്റുമാണ്. അവസരം ലഭിക്കും, അതിനെക്കുറിച്ച് കൂടുതല്‍ ചിന്തിക്കാതെ പ്രൊസസില്‍ വിശ്വസിക്കുക.

വെസ്റ്റ് ഇൻഡീസിനെതിരായ ടി20 പരമ്പരയിലുടനീളം പുറത്തിരിക്കേണ്ടി വന്ന വൈഭവ് സൂര്യവംശിയെക്കുറിച്ചുള്ള ചോദ്യത്തിന് ഇന്ത്യൻ നായകൻ ശ്രേയസ് അയ്യ‍ര്‍ നല്‍കിയ ഉത്തരമാണിത്. താല്‍ക്കാലിക പരിശീലകനായിരിക്കെ വൈഭവിനെപ്പോലൊരു ടാലന്റിനെ പാഴാക്കാനാകില്ലെന്ന് പറയുന്ന വിവിഎസ് ലക്ഷ്മണ്‍ ഒരുവശത്ത്, മറുപുറത്ത് സഞ്ജു സാംസണിനേയും അഭിഷേകിനേയും പ്രതിരോധിച്ച് വൈഭവ് കാത്തിരിക്കട്ടെയെന്ന നിലപാടെടുക്കുന്ന ഗൗതം ഗംഭീര്‍. വൈഭവിന്റെ കാര്യത്തില്‍ ബിസിസിഐക്ക് കൃത്യമായൊരു വ്യക്തതയില്ലെ?

ഇന്ത്യയുടെ ന്യൂസിലൻഡ് പര്യടനം, ടി20 പരമ്പര ഒക്ടോബര്‍ 22ന് ക്രൈസ്റ്റ്‌ചർച്ചില്‍ ആരംഭിക്കും. വൈഭവ് ഇന്ത്യക്കായി ഓപ്പണ്‍ ചെയ്യുമോയെന്ന ചോദ്യത്തിന്റെ പ്രസക്തി അല്‍പ്പം കുറയ്ക്കാൻ വിൻഡീസ് പരമ്പരയ്ക്കായിട്ടുണ്ട്. കാരണം ഇന്ത്യയുടെ ടോപ് ത്രീയുടെ പ്രകടനം തന്നെ. സഞ്ജു, അഭിഷേക്, ഇഷാൻ. മൂവരില്‍ ടോപ് സ്കോറര്‍ സഞ്ജുവാണ്, 195 സ്ട്രൈക്ക് റേറ്റില്‍ 168 റണ്‍സ്, രണ്ട് അര്‍ദ്ധ സെഞ്ചുറി. ഇഷാൻ 153 റണ്‍സ് നേടി, സ്ട്രൈക്ക് റേറ്റ് 191 ആണ്. അഭിഷേക് 181 സ്ട്രൈക്ക് റേറ്റില്‍ 145 റണ്‍സ്.

അഞ്ച് മത്സരത്തിലും കണ്‍സിസ്റ്റന്റായി കോണ്‍ട്രിബ്യൂട്ട് ചെയ്യാൻ മൂവർക്കുമായിട്ടില്ലെങ്കിലും, മാച്ച് വിന്നിങ് നോക്കുകള്‍ ഉണ്ടായിട്ടുണ്ട്. ടി20യില്‍ ഗംഭീര്‍ താരങ്ങളെ ബാക്ക് ചെയ്യുന്നതിന്റെ കാരണവും അത് തന്നെയാണ്. കണ്‍സിസ്റ്റൻസിക്ക് മുകളിലാണ് ഇംപാക്റ്റിന് സ്ഥാനം. എന്നിരുന്നാലും വെസ്റ്റ് ഇൻഡീസിനെതിരെ വൈഭവിന് അവസരം ഒരുങ്ങുമായിരുന്നു. ചുരുങ്ങിയത് അവസാന മത്സരത്തിലെങ്കിലും. പക്ഷേ, പരമ്പരയില്‍ വെസ്റ്റ് ഇൻഡീസ് നടത്തിയ മുന്നേറ്റമാണ് തടയിട്ടത്.

ബെംഗളൂരു ടി20ക്ക് മുൻപ് ഇന്ത്യ പരമ്പര സ്വന്തമാക്കിയിരുന്നെങ്കില്‍ സഞ്ജുവിനോ അഭിഷേകിനോ പകരം വൈഭവ് തീർച്ചയായും അന്തിമ ഇലവനിലുണ്ടാകുമായിരുന്നു. ന്യൂസിലൻഡ് പര്യടനത്തിലെ വൈഭവിന്റെ സാധ്യതകളും അങ്ങനെ തന്നെയായിരിക്കും. ടോപ് ത്രീയിലാരെങ്കിലും അത്രത്തോളം ഫ്ലോപ്പായെങ്കില്‍ മാത്രമെ ഒരു മാറ്റത്തിന് ഗംഭീർ തുനിയു. സിംബാബ്‌വെ പര്യടനത്തില്‍ പരമ്പരയിലെ താരമായങ്കിലും കൂടുതല്‍ ബൗണ്‍സി വിക്കറ്റുകളുണ്ടായിരുന്ന ഇംഗ്ലണ്ടില്‍ വൈഭവിന് തന്റെ മികവ് പുലർത്താൻ കഴിഞ്ഞിരുന്നില്ല.

14, 13, 15 എന്നിങ്ങനെയായിരുന്നു വൈഭവിന്റെ സ്കോറുകള്‍. ആകെ നേരിട്ടത് 25 പന്തുകളാണെങ്കിലും അഞ്ച് സിക്സറുകള്‍ കണ്ടെത്താൻ ഇടം കയ്യൻ ബാറ്റര്‍ക്കായിരുന്നു. ഷോര്‍ട്ട് ബോളുകളായിരുന്നു വൈഭവിനെ വീഴ്ത്താൻ ഇംഗ്ലണ്ട് പേസ‍ര്‍മാര്‍ ഉപയോഗിച്ചത്. പ്രത്യേകിച്ചും ജോഫ്ര ആര്‍ച്ചറും ജോഷ് ടങ്ങും. വൈഭവിന്റെ ശരീരത്തെയും തലയേയും നിരന്തരം ലക്ഷ്യമിട്ടായിരുന്നു പവര്‍പ്ലേയിലെ ഇംഗ്ലണ്ടിന്റെ സ്ട്രാറ്റ‍ര്‍ജി. ന്യൂബോളില്‍ സ്ട്രഗിള്‍ ചെയ്യുന്ന വൈഭവിനെ ഇംഗ്ലണ്ടില്‍ കണ്ടു. ആര്‍ച്ചറിനെതിരെ 13 പന്തുകളില്‍ നിന്ന് 18 റണ്‍സായിരുന്നു വൈഭവിന്റെ നേട്ടം, രണ്ട് തവണ പുറത്താകുകയും ചെയ്തു.

വൈഭവിന്റെ സ്വഭാവികമായുള്ള അറ്റാക്കിങ് ശൈലിയെ കൃത്യമായി ഇംഗ്ലീഷ് പേസര്‍മാര്‍ ഉപയോഗിച്ചു. ന്യൂസിലൻഡിലേക്ക് വരുമ്പോഴും കാര്യങ്ങള്‍ വ്യത്യസ്തമായിരിക്കില്ല. വിൻഡീസ് പരമ്പരയിലുടനീളം പുറത്തിരിക്കേണ്ടി വന്ന വൈഭവിന് മതിയായ മാച്ച് ടൈം ലഭിച്ചിട്ടില്ല മറ്റൊരു സീരീസിന് തയാറെടുക്കാൻ. ഇതുതന്നെയാണ് ഇംഗ്ലണ്ടിലെ ഡൗണ്‍ഫാളിന്റെ കാരണമായ ഘടകങ്ങളിലൊന്ന്. അയര്‍ലൻഡ് പര്യടനത്തില്‍ ബെഞ്ചിലിരുന്ന ശേഷമാണ് വൈഭവിന് ഇംഗ്ലണ്ടില്‍ അവസരം കൊടുത്തത്. സമാനസ്ഥിതിയാണ് ന്യൂസിലൻഡിലേക്ക് എത്തുമ്പോഴും.

പക്ഷേ, വൈഭവിന്റെ കാര്യത്തില്‍ ബിസിസിഐ വ്യക്തതയിലെത്തേണ്ടതുണ്ട്. ആരോഗ്യകരമായ മത്സരമാണ് ടോപ് ത്രീയില്‍ നടക്കുന്നതെങ്കിലും താരങ്ങളുടെ ആത്മവിശ്വാസത്തെ ഇത് ബാധിക്കാൻ സാധ്യതയുണ്ട്. കാരണം, എപ്പോള്‍ വേണമെങ്കിലും ടീമിലെ സ്ഥാനം നഷ്ടപ്പെടാം എന്ന സ്ഥിതിയാണ് താരങ്ങള്‍ ബാറ്റ് ചെയ്യാൻ എത്തുന്നത്. ചുറ്റുമുയരുന്ന ഹൈപ്പും നിരന്തരം പുറത്തിരിക്കേണ്ടി വരുന്നതും ഒരു 15 വയസുകാരന്റെ ആത്മവിശ്വാസത്തെ ബാധിക്കാനും സാധ്യതയുണ്ട്. ജനറേഷണല്‍ ടാലന്റായി വാഴ്ത്തപ്പെടുന്ന വൈഭവിനെ കൃത്യമായി ഉപോയിഗിക്കാൻ പദ്ധതി അനിവാര്യമാണ്...സമയമുണ്ട് എന്നതാണ് ആശ്വാസം.

സച്ചിന്‍ ബേബിക്ക് പിന്നാലെ മുഹമ്മദ് അസറുദ്ദീനും സെഞ്ചുറി; രഞ്ജിയില്‍ ഒഡീഷക്കെതിരെ കേരളം ശക്തമായ നിലയിലേക്ക്

Web Desk — Mon, 19 Oct 2026 13:15:09 +0530

തിരുവനന്തപുരം: ഒഡീഷയ്‌ക്കെതിരായ രഞ്ജി ട്രോഫി മത്സരത്തിന്റെ രണ്ടാം ദിനം കേരളം ശക്തമായ നിലയിലേക്ക്. കാര്യവട്ടം, ഗ്രീന്‍ഫീല്‍ഡ് സ്റ്റേഡിയത്തില്‍ പുരോഗമിക്കുന്ന മത്സരത്തില്‍ കേരളം ഒടുവില്‍ വിവരം ലഭിക്കുമ്പോള്‍ എട്ട് വിക്കറ്റ് നഷ്ടത്തില്‍ 374 റണ്‍സെടുത്തിട്ടുണ്ട്. സച്ചിന്‍ ബേബിക്ക് പുറമെ മുഹമ്മദ് അസറുദ്ദീനും സെഞ്ചുറി പൂര്‍ത്തിയാക്കി. 128 റണ്‍സുമായി താരം ക്രീസിലുണ്ട്. വൈശാഖ് ചന്ദ്രനാണ് (1) അസറുദ്ദീന് കൂട്ട്. ഇന്നലെ സച്ചിന്‍ ബേബി 112 റണ്‍സ് നേടി പുറത്തായിരുന്നു. ഒഡീഷയ്ക്ക് വേണ്ടി ലളിത് യാദവ് ഒരു വിക്കറ്റ് വീഴ്ത്തി.

ആറിന് 245 എന്ന നിലയാണ് കേരളം ഇന്ന് ബാറ്റിംഗിനെത്തിയത്. വൈകാതെ അസറുദ്ദീന്‍ സെഞ്ചുറി പൂര്‍ത്തിയാക്കി. ഇതുവരെ 11 ബൗണ്ടറികള്‍ കേരള വിക്കറ്റ് കീപ്പര്‍ നേടിയിട്ടുണ്ട്. ആദിത്യ സര്‍വാതെ (53), അഭിജിത് പ്രവീണ്‍ ്(14) എന്നിവരുടെ വിക്കറ്റുകളാണ് ഇന്ന് കേരളത്തിന് നഷ്ടമായത്. ഇന്നലെ സച്ചിന്‍ ബേബിയുടെയും അസറുദ്ദീന്റെയും മികവിലാണ് കേരളം തുടക്കത്തിലെ തകര്‍ച്ചയില്‍ നിന്നും ശക്തമായി തിരിച്ചുവന്നത്. ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് 18 റണ്‍സെടുക്കുന്നതിനിടെ മൂന്ന് വിക്കറ്റുകള്‍ നഷ്ടമായി.

'എനിക്ക് ഇനിയും ഇന്ത്യന്‍ ടീമിലേക്ക് തിരിച്ചെത്താന്‍ സാധിക്കും'; പ്രത്യാശ പ്രകടിപ്പിച്ച് അഭിമന്യൂ ഈശ്വരന്‍

Web Desk — Mon, 19 Oct 2026 12:48:05 +0530

കൊല്‍ക്കത്ത: ഇന്ത്യന്‍ ക്രിക്കറ്റ് ടീമില്‍ ഇടം നേടാനാകുമെന്ന് പ്രത്യാശ പ്രകടിപ്പിച്ച് അഭിമന്യൂ ഈശ്വരന്‍. ഫസ്റ്റ് ക്ലാസ് ക്രിക്കറ്റില്‍ 8,600ല്‍ അധികം റണ്‍സ് നേടിയിട്ടുള്ള ഈശ്വരന്‍, ബംഗാളിനെയും ഇന്ത്യ എ ടീമിനെയും നയിച്ചിട്ടുണ്ട്. ഇന്ത്യയുടെ സീനിയര്‍ ടെസ്റ്റ് സ്‌ക്വാഡുകളില്‍ ഇടം നേടിയിട്ടും അരങ്ങേറ്റം നടത്താന്‍ അദ്ദേഹത്തിന് സാധിച്ചിരുന്നില്ല. കൂടാതെ, ഈ വര്‍ഷത്തെ ദിലീപ് ട്രോഫിയില്‍ കളിച്ചെങ്കിലും ഓസ്‌ട്രേലിയ എ ടീമിനെതിരെയുള്ള പരമ്പരയിലോ ന്യൂസിലന്‍ഡ് പര്യടനത്തിലോ അദ്ദേഹത്തെ ഉള്‍പ്പെടുത്തിയിരുന്നില്ല.

ഈ ഒഴിവാക്കലുകള്‍ ബുദ്ധിമുട്ടുണ്ടാക്കാറുണ്ടോ എന്ന ചോദ്യത്തിന്, തനിക്ക് അതിനോട് പൊരുത്തപ്പെടാന്‍ കഴിഞ്ഞിട്ടുണ്ടെന്നാണ് ഈശ്വരന്‍ മറുപടി നല്‍കിയത്. ''ഞാന്‍ അതിനോട് പൊരുത്തപ്പെട്ടു; ഇത് ജീവിതത്തിന്റെ ഒരു ഭാഗം മാത്രമാണ്, അതില്‍ കൂടുതല്‍ പറയാനൊന്നുമില്ല. സമയം കടന്നുപോകുമ്പോള്‍ നിങ്ങള്‍ പഠിക്കും. ഒരു സ്‌ക്വാഡില്‍ നിന്ന് ഒഴിവാക്കപ്പെടുമ്പോള്‍'എന്തുകൊണ്ട് വീണ്ടും ഞാന്‍?' എന്ന ചിന്തകള്‍ വരാം, എന്നാല്‍ നിങ്ങള്‍ അതിനോട് ശീലിക്കും. ഏത് ടീമിനുവേണ്ടി കളിക്കുമ്പോഴും നന്നായി ചെയ്യുക എന്നതാണ് നമ്മുടെ ജോലി.'' അദ്ദേഹം പറഞ്ഞു.

ദേശീയ ടീമിലെ അവസരങ്ങള്‍ക്കൊപ്പം ബംഗാളിനായി ഒരു കിരീടം നേടുക എന്നതും തന്റെ പ്രധാന ലക്ഷ്യമാണെന്ന് 31-കാരനായ ഈശ്വരന്‍ വ്യക്തമാക്കുന്നു. 2019-20 സീസണില്‍ സൗരാഷ്ട്രയോട് തോറ്റ് റണ്ണേഴ്‌സ് അപ്പായ ബംഗാളിനെ കിരീടത്തിലേക്ക് നയിക്കുകയാണ് ഈശ്വരന്റെ ആഗ്രഹം. ഈ രഞ്ജി ട്രോഫി സീസണില്‍ ബംഗാള്‍ മികച്ച തുടക്കമാണ് കുറിച്ചത്. ഡല്‍ഹിക്കെതിരായ ആദ്യ മത്സരത്തില്‍ ഒന്‍പത് വിക്കറ്റിന്റെ ജയമാണ് ബംഗാള്‍ നേടിയത്. മുഹമ്മദ് ഷമിയുടെ നാല് വിക്കറ്റ് പ്രകടനവും സുദീപ് കുമാര്‍ ഗരാമി, അഭിഷേക് പൊേറല്‍ എന്നിവരുടെ സെഞ്ച്വറികളും ടീമിന് തുണയായി. ഈ മത്സരത്തില്‍ ഡല്‍ഹിക്കെതിരെയുള്ള വിജയത്തില്‍ പുറത്താകാതെ 34 റണ്‍സ് നേടാന്‍ ഈശ്വരന് സാധിച്ചു.

ഇന്ത്യക്ക് മുന്നില്‍ ഇനി ഇനി ന്യൂസിലന്‍ഡ് പരീക്ഷ; കാത്തിരിക്കുന്നത് 42 ദിവസം നീണ്ടുനില്‍ക്കുന്ന പര്യടനം

Web Desk — Mon, 19 Oct 2026 11:03:09 +0530

മുംബൈ: വെസ്റ്റ് ഇന്‍ഡീസ് പരീക്ഷയ്ക്ക് ശേഷം ഇന്ത്യയെ കാത്തിരിക്കുന്നത് ന്യൂസീലന്‍ഡ് പര്യടനമാണ്. ഇന്ത്യന്‍ ടീമിന്റെ ആഴവും കരുത്തും പരീക്ഷിക്കുന്ന പരമ്പരയാവുമിത്. ഈമാസം 22നാണ് ഇന്ത്യയുടെ ന്യൂസിലന്‍ഡ് പര്യടനത്തിന് തുടക്കമാവുക. 42 ദിവസം നീണ്ടുനില്‍ക്കുന്ന ന്യുസീലന്‍ഡ് പര്യടനത്തില്‍ ഇന്ത്യന്‍ ടീം കളിക്കുക അഞ്ച് വീതം ട്വന്റി 20യും ഏകദിനവും രണ്ട് ടെസ്റ്റും. ഇന്ത്യ എ ടീമിന് മൂന്ന് പരിശീലന മത്സരങ്ങളും. പ്രഖ്യാന്‍ ഓജയുടെ നേതൃത്വത്തിലുള്ള സെലക്ഷന്‍ കമ്മിറ്റില്‍ പരമ്പരയില്‍ പരീക്ഷിക്കുന്നത് നാല്‍പ്പത്തിരണ്ട് താരങ്ങളെ.

നാല് വര്‍ഷത്തെ ഇടവേളയ്ക്ക് ശേഷം ഭുവനേശ്വര്‍ കുമാര്‍ തിരികെ എത്തിയതാണ് ടീമിലെ പ്രധാന സവിശേഷത. ട്വന്റി 20യില്‍ ജസ്പ്രീത് ബുംറയുടെ അഭാവം മുപ്പത്തിയാറുകാരനായ ഭുവനേശ്വര്‍ നികത്തുമെന്നാണ് സെലക്ടര്‍മാരുടെയും ഇന്ത്യന്‍ ടീം മാനേജ്‌മെന്റിന്റെയും പ്രതീക്ഷ. രവി ബിഷ്‌ണോയിക്ക് പകരം പരിക്കുമാറിയ വരുണ്‍ ചക്രവര്‍ത്തിയും തിരിച്ചെത്തി. താരങ്ങളുടെ ജോലിഭാരം കുറയ്ക്കാന്‍ ഏകദിന ടീമിനെ രണ്ടായി വിഭജിച്ചിട്ടുണ്ട്. ആദ്യ മൂന്ന് കളിയില്‍ ശുഭ്മന്‍ ഗില്‍ ടീമിനെ നയിക്കും.

ടെസ്റ്റ് പരമ്പരയ്ക്ക് മുന്‍പ് അവസാന രണ്ട് ഏകദിനത്തില്‍ ശുഭ്മാന്‍ ഗില്‍, കെ എല്‍ രാഹുല്‍, അന്‍ഷുല്‍ കംബോജ്, പ്രസിദ്ധ് കൃഷ്ണ എന്നിവര്‍ക്ക് വിശ്രമം നല്‍കുമ്പോള്‍ തിലക് വര്‍മ്മ, കുമാര്‍ കുശാഗ്ര, ആഖിബ് നബി, യഷ് താക്കൂര്‍ എന്നിവര്‍ ടീമിലെത്തും. ശ്രേയസ് അയ്യരായിരിക്കും ക്യാപ്റ്റന്‍. ഇഷാന്‍ കിഷന് വൈസ് ക്യാപ്റ്റനായി സ്ഥാനക്കയറ്റം. ടെസ്റ്റ് പരമ്പരയില്‍ ശ്രദ്ധിക്കാനായി ഏകദിന ടീമില്‍ നിന്ന് ഒഴിവാക്കിയ യശശ്വീ ജയ്‌സ്വാള്‍ ഇന്ത്യ എയുടെ മൂന്ന് സന്നാഹമത്സരത്തിലും കളിക്കും. റെഡ്‌ബോള്‍ പരിചയത്തിനായി കെ എല്‍ രാഹുലിനെയും അന്‍ഷുല്‍ കംബോജിനെയും ഇന്ത്യ എ ടീമില്‍ ഉള്‍പ്പെടുത്തിയിട്ടുണ്ട്.

ജസ്പ്രീത് ബുംറയെയും ടെസ്റ്റ് പരമ്പരയ്ക്കായി കാത്തുവയ്ക്കാനാണ് സെലക്ടര്‍മാരുടെ തീരുമാനം. വെസ്റ്റ് ഇന്‍ഡീസിനെതിരെ ഏകദിന പരമ്പരയില്‍ കളിച്ച രവീന്ദ്ര ജഡേജയെ ഒഴിവാക്കിയതും ശ്രദ്ധേയം. അടുത്ത വര്‍ഷത്തെ ലോകകപ്പ് ടീമിലേക്ക് പരിഗണിക്കുന്നത് അക്‌സര്‍ പട്ടേലിനെയന്നും വ്യക്തം. ജാര്‍ഖണ്ഡ് വിക്കറ്റ് കീപ്പര്‍ കുമാര്‍ കുശാഗ്രയാണ് ടീമിലെ പുതുമുഖം. ഇന്ത്യ എ ടീമിനൊപ്പം സന്നാഹമത്സരം കളിച്ചാണ് കുശാഗ്ര അവസാന രണ്ട് ഏകദിനത്തില്‍ ഇന്ത്യന്‍ കീപ്പറായെത്തുക. റിഷഭ് പന്ത് പരിക്കില്‍നിന്ന് മുക്തനായില്ലെങ്കില്‍ ടെസ്റ്റ് ടീമിലും കുശാഗ്രയ്ക്ക് അവസരം കിട്ടിയേക്കും.

ആദ്യ മൂന്ന് ടെസ്റ്റില്‍ നിന്ന് 23 വിക്കറ്റ് വീഴ്ത്തിയ ഇടംകൈയന്‍ സ്പിന്നര്‍ മാനവ് സുതറിനെ ഒഴിവാക്കിയ സെലക്ടര്‍മാരുടെ തീരുമാനമാണ് എല്ലാവരേയും അമ്പരപ്പിച്ചത്. ഇന്ത്യ എ ടീമില്‍ ഇടംപിടിച്ചത് മാത്രമാണ് മാനവിന്റെ ആശ്വാസം.

മാഞ്ചസ്റ്റര്‍ യുണൈറ്റഡിന് വീണ്ടും സമനില; ലാ ലിഗയില്‍ റയല്‍ മാഡ്രിഡിന് ജയം

Web Desk — Mon, 19 Oct 2026 10:10:50 +0530

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈഡിന് വീണ്ടും സമനില. ലീഡ്‌സിനെതിരെ ആദ്യം ലീഡെടുത്തിട്ടും യുണൈറ്റഡ് സമനില വഴങ്ങി. 35- മിനിറ്റില്‍ ബ്രയാന്‍ എംബ്യൂമോ യുണൈറ്റഡിനായി ഗോള്‍ നേടി. ഇടവേളയ്ക്ക് ശേഷം ഉടന്‍ തന്നെ ലീഡ്‌സ് ഒപ്പമെത്തി.51- മിനിറ്റില്‍ ഡൊമിനിക് കാല്‍വര്‍ട്ടിന്റെ ഗോള്‍ പിറന്നു. പിന്നാലെ മികച്ച അവസരങ്ങള്‍ സൃഷ്ടിക്കാന്‍ യുണൈറ്റഡിനായെങ്കിലും ഒന്നും ഗോളായില്ല. 7 മത്സരങ്ങളില്‍ നിന്ന് 7 പോയിന്റ് മാത്രം നേടാനായ യുണൈറ്റഡ് നിലവില്‍ 13- സ്ഥാനത്താണ്. ലീഡ്‌സ് ആകട്ടെ ഏഴാം സ്ഥാനത്താണ്.

മറ്റൊരു മത്സരത്തില്‍ ക്രിസ്റ്റല്‍ പാലസിനെ എതിരില്ലാത്ത 5 ഗോളിന് തകര്‍ത്ത് ബ്രൈറ്റണ്‍. മത്സരത്തിന്റെ ആദ്യ പത്ത് മിനിറ്റിനുള്ളില്‍ മൂന്ന് ഗോളുകളാണ് ബ്രൈറ്റണ്‍ നേടിയത്. നാലാം മിനിറ്റില്‍ സെല്‍ഫ് ഗോളിലൂടെ ബ്രൈറ്റണ്‍ മുന്നിലെത്തി. പിന്നാലെ ഏഴാം മിനിറ്റില്‍ മത്സരത്തിലെ അല്‍ഭുത ഗോള്‍ പിറന്നു. 51 മീറ്റര്‍ അകലെ നിന്ന് ഡീഗോ ഗോമസിന്റെ ലോങ് റേഞ്ചര്‍ ലയിലെത്തി. പ്രീമിയിര്‍ ലീഗില്‍ ഇത്ര ദൂരത്ത് നിന്ന് നേടുന്ന അപൂര്‍വം ഗോളുകളില്ലൊന്നായി ഇത്. ിന്നാലെ പത്താം മിനിറ്റില്‍ യാസിന്‍ അയാരിയും 49-ാം മിനിറ്റില്‍ കോസ്റ്റുലാസും 84- മിനിറ്റില്‍ ജാക്ക് ഹിന്‍ഷല്‍വുഡും ഗോളുകള്‍ നേടി. സീസണില്‍ എട്ടാം തവണയാണ് ക്ലീന്‍ ഷീറ്റോടെ ബ്രൈറ്റണ്‍ മത്സരം അവസാനിപ്പിക്കുന്നത്. 16 പോയിന്റോടെ മൂന്നാം സ്ഥാനത്താണ് ബ്രൈറ്റണ്‍.

റയല്‍ മാഡ്രിഡിന് ജയം

സ്പാനിഷ് ലാ ലിഗയില്‍ സെവിയ്യക്കെതിരെ റയല്‍ മാഡ്രിഡിന് തകര്‍പ്പന്‍ വിജയം. സ്വന്തം തട്ടകമായ സാന്റിയാഗോ ബെര്‍ണബ്യൂവില്‍ നടന്ന മത്സരത്തില്‍ 4-1നായിരുന്നു റയലിന്റെ ജയം. കിലിയന്‍ എംബാപ്പെയുടെ ഇരട്ട ഗോള്‍ മികവിലാണ് റയലിന്റെ തകര്‍പ്പന്‍ ജയം. അര്‍ദ ഗുലര്‍, യാന്‍ ഡിയോമാണ്ടെ എന്നിവരും റയലിനായി വലകുലുക്കി. മാനു ബ്യൂണോയിലൂടെയാണ് സെവിയ്യ ഒരു ഗോള്‍ മടക്കിയത്. ജയത്തോടെ ലീഗ് പോയിന്റ് പട്ടികയില്‍ റയല്‍ മൂന്നാം സ്ഥാനത്തേക്കുയര്‍ന്നു.

ഷഫാലി വര്‍മയ്ക്ക് അര്‍ധ സെഞ്ചുറി; സിംബാബ്‌വെക്കെതിരായ ടി20 പരമ്പര ഇന്ത്യക്ക്, ജയം ഒമ്പത് വിക്കറ്റിന്

Web Desk — Sun, 18 Oct 2026 21:37:49 +0530

റായ്പൂര്‍: സിംബാബ്‌വെ വനിതകള്‍ക്കെതിരായ ടി20 പരമ്പര ഇന്ത്യക്ക്. മൂന്ന് മത്സരങ്ങളുടെ പരമ്പരയില്‍ രണ്ടാം ടി20 ഒമ്പത് വിക്കറ്റിന് ജയിച്ചതോടെയാണ് ഇന്ത്യന്‍ വനിതകള്‍ പരമ്പര നേടിയത്. റായ്പൂര്‍, വീര്‍ നാരായണ്‍ സിംഗ് ഇന്റര്‍നാഷണല്‍ സ്റ്റേഡിയത്തില്‍ ടോസ് നേടി ബാറ്റിംഗ് തെരഞ്ഞെടുത്ത സിംബാബ്‌വെ 20 ഓവറില്‍ 102 റണ്‍സിന് എല്ലാവരും പുറത്താവുകയായിരുന്നു. നിക്കി പ്രസാദ് ഇന്ത്യക്ക് വേണ്ടി രണ്ട് വിക്കറ്റ് വീഴ്ത്തി. മറുപടി ബാറ്റിംഗില്‍ ഇന്ത്യ 8.5 ഓവറില്‍ ഒരു വിക്കറ്റ് മാത്രം നഷ്ടത്തില്‍ ലക്ഷ്യം മറികടന്നു.

ഷഫാലി വര്‍മ (25 പന്തില്‍ 55), ക്യാപ്റ്റന്‍ സ്മൃതി മന്ദാന (25 പന്തില്‍ പുറത്താവാതെ 47) എന്നിവരുടെ ഇന്നിംഗ്‌സാണ് ഇന്ത്യക്ക് അനായാസ വിജയം സമ്മാനിച്ചത്. വിജയത്തിനരികെയാണ് ഷഫാലി വീണത്. എട്ടാം ഓവറിലെ അഞ്ചാം പന്തില്‍ ബിലോവ്ഡ് ബിസയ്ക്ക് വിക്കറ്റ് നല്‍കുകയായിരുന്നു. നാല് സിക്‌സും ആറ് ഫോറും ഉള്‍പ്പെടുന്നതായിരുന്നു ഷഫാലിയുടെ ഇന്നിംഗ്‌സ്. സ്മൃതിക്കൊപ്പം 96 റണ്‍സ് ചേര്‍ത്ത ശേഷമാണ് ഷഫാലി മടങ്ങിയത്. എങ്കിലും അനുഷ്‌ക ശര്‍മയ്‌ക്കൊപ്പം (1) ചേര്‍ന്ന് സ്മൃതി ഇന്ത്യയെ അനായാസ വിജയത്തിലേക്ക് നയിച്ചു. രണ്ട് സി്‌സും ആറ് ഫോറും ഉള്‍പ്പെടുന്നതായിരുന്നു സ്മൃതിയുടെ ഇന്നിംഗ്‌സ്.

നേരത്തെ ചിപോ മുഗേരി തിരിപാനോ (34), ക്യാപ്റ്റന്‍ ജോസഫൈന്‍ കോമോ (35 പന്തില്‍ പുറത്താവാതെ 27) എന്നിവര്‍ക്ക് മാത്രമാണ് സിംബാബ്‌വെ നിരയില്‍ അല്‍പമെങ്കിലും പിടിച്ചുനില്‍ക്കാന്‍ സാധിച്ചത്. മറ്റുള്ളവര്‍ക്കൊന്നും രണ്ടക്കം കാണാന്‍ പോലും സാധിച്ചില്ല. നിക്കി പ്രസാദിന് പുറമെ ക്രാന്തി ഗൗദ്, നന്ദനി ശര്‍മ, ദീപ്തി ശര്‍മ, ശ്രീ ചരണി എന്നിവര്‍ ഓരോ വിക്കറ്റും വീഴ്ത്തി. പരമ്പരയിലെ അവസാന മത്സരം ചൊവ്വാഴ്ച്ച നടക്കും. മൂന്ന് മത്സരങ്ങളുള്ള ഏകദിന പരമ്പരയിലും ഇരുവരും കളിക്കും.

'വൈഭവ് ഇനിയും കാത്തിരിക്കേണ്ടി വരും': സഞ്ജു ഓപ്പണറായി കളിക്കുന്നതിന്റെ കാരണം വ്യക്തമാക്കി അഭിഷേക് നായര്‍

Web Desk — Sun, 18 Oct 2026 21:09:06 +0530

മുംബൈ: ഇന്ത്യന്‍ ടീമിന്റെ ഇടത്-വലത് ഓപ്പണിംഗ് കോമ്പിനേഷന്‍ കാരണം യുവതാരം വൈഭവ് സൂര്യവംശിക്ക് അവസരങ്ങള്‍ക്കായി കൂടുതല്‍ കാത്തിരിക്കേണ്ടി വരുമെന്ന് മുന്‍ അസിസ്റ്റന്റ് കോച്ചായിരുന്ന അഭിഷേക് നായര്‍. ന്യൂസിലന്‍ഡിനെതിരെയുള്ള അഞ്ച് മത്സരങ്ങളടങ്ങിയ ടി20 പരമ്പര നവംബര്‍ 22ന് ആരംഭിക്കാനിരിക്കെയാണ് അദ്ദേഹത്തിന്റെ ഈ വിലയിരുത്തല്‍. 15 വയസ് മാത്രം പ്രായമുള്ള വൈഭവ് സൂര്യവംശി, ഇതുവരെ കളിച്ച 8 ടി20 മത്സരങ്ങളില്‍ നിന്ന് 186ല്‍ അധികം സ്‌ട്രൈക്ക് റേറ്റില്‍ 246 റണ്‍സ് നേടിയിട്ടുണ്ട്.

ഇതില്‍ രണ്ട് അര്‍ദ്ധശതകങ്ങളും ഉള്‍പ്പെടുന്നു. എങ്കിലും, സഞ്ജു സാംസണും അഭിഷേക് ശര്‍മയും അടങ്ങിയ പരിചയസമ്പന്നരായ ഓപ്പണിംഗ് ജോഡിയെയാണ് ടീം മാനേജ്‌മെന്റ് നിലവില്‍ ആശ്രയിക്കുന്നത്. വെസ്റ്റ് ഇന്‍ഡീസിനെതിരായ പരമ്പരയില്‍ വൈഭവിന് ഒരു മത്സരത്തില്‍ പോലും പ്ലേയിംഗ് ഇലവനില്‍ ഇടംനേടാന്‍ സാധിച്ചിരുന്നില്ല. ടീമിന്റെ സംസ്‌കാരവും സ്ഥിരതയും നിലനിര്‍ത്തേണ്ടത് സെലക്ഷനില്‍ പ്രധാനമാണെന്ന് അഭിഷേക് വ്യക്തമാക്കി. ''ഒരു കോച്ചോ ക്യാപ്റ്റനോ ആകുമ്പോള്‍ കൃത്യമായ തീരുമാനങ്ങള്‍ എടുക്കേണ്ടത് വളരെ പ്രധാനമാണ്. പെട്ടെന്ന് തോന്നുന്ന രീതിയില്‍ അശ്രദ്ധമായ തീരുമാനങ്ങള്‍ എടുത്താല്‍ അത് വൈഭവ് സൂര്യവംശിയുടെ കരിയറിനേക്കാള്‍ ഉപരി ടീമിന്റെ മൊത്തത്തിലുള്ള സംസ്‌കാരത്തെയായിരിക്കും ബാധിക്കുക. അതിനാല്‍ വൈഭവ് തന്റെ സമയത്തിനായി കാത്തിരിക്കേണ്ടി വരും, തീര്‍ച്ചയായും അവസരങ്ങള്‍ ലഭിക്കുകയും ചെയ്യും.'' അദ്ദേഹം പറഞ്ഞു.

ഓപ്പണിംഗ് നിരയില്‍ ഇടത്-വലത് കോമ്പിനേഷന്‍ നിലനിര്‍ത്തേണ്ടതിന്റെ പ്രാധാന്യവും അദ്ദേഹം ചൂണ്ടിക്കാട്ടി. മൈക്കല്‍ ബ്രേസ്‌വെല്ലിനെ പോലെയുള്ള സ്പിന്നര്‍മാര്‍ക്ക് പവര്‍പ്ലേയില്‍ അനായാസം പന്തെറിയാന്‍ അവസരം നല്‍കാതിരിക്കാന്‍ ഈ കോമ്പിനേഷന്‍ സഹായിക്കുമെന്നും അദ്ദേഹം കൂട്ടിച്ചേര്‍ത്തു. സഞ്ജു സാംസണിന്റെ സമീപകാല ഫോമിനെക്കുറിച്ചും നായര്‍ സംസാരിച്ചു. ചില മത്സരങ്ങളില്‍ തിളങ്ങാതിരിക്കുമ്പോഴും നിര്‍ണായക ഘട്ടങ്ങളില്‍ മാച്ച് വിന്നിംഗ് ഇന്നിങ്‌സുകള്‍ കളിച്ച് വിമര്‍ശകരുടെ വായ അടപ്പിക്കാന്‍ സഞ്ജുവിന് പ്രത്യേക കഴിവുണ്ടെന്ന് അദ്ദേഹം പറഞ്ഞു.

വെസ്റ്റ് ഇന്‍ഡീസിനെതിരായ ടി20 പരമ്പരയില്‍ ഇന്ത്യക്കായി ഏറ്റവും കൂടുതല്‍ റണ്‍സ് നേടുന്ന രണ്ടാമത്തെ താരമായിരുന്ന സഞ്ജു, 5 മത്സരങ്ങളില്‍ നിന്ന് 33.60 ശരാശരിയിലും 195.34 സ്‌ട്രൈക്ക് റേറ്റിലും 168 റണ്‍സ് നേടിയിരുന്നു. 2026-ല്‍ ഇതുവരെ 25 ടി20 മത്സരങ്ങളില്‍ നിന്നായി 703 റണ്‍സാണ് സഞ്ജു നേടിയിട്ടുള്ളത്.

'ഷമിയെ തഴയുന്നതില്‍ ബിസിസിഐ വ്യക്തത വരുത്തണം'; ആഞ്ഞടിച്ച് മുന്‍ ഇന്ത്യന്‍ താരം മുഹമ്മദ് കൈഫ്

Web Desk — Sun, 18 Oct 2026 20:10:40 +0530

ദില്ലി: ന്യൂസിലന്‍ഡിനെതിരായ വരാനിരിക്കുന്ന ടെസ്റ്റ് പരമ്പരയ്ക്കുള്ള ഇന്ത്യന്‍ ടീമില്‍ സീനിയര്‍ പേസര്‍ മുഹമ്മദ് ഷമിയെ ഉള്‍പ്പെടുത്താത്തതില്‍ സെലക്ടര്‍മാര്‍ക്കെതിരെ വിമര്‍ശനവുമായി മുന്‍ ഇന്ത്യന്‍ താരം മുഹമ്മദ് കൈഫ്. 2025-ലെ ഇംഗ്ലണ്ട് പര്യടനത്തിന് ശേഷം ടീമില്‍ നിന്ന് പുറത്തുള്ള ഷമിയെ എന്തുകൊണ്ട് വീണ്ടും പരിഗണിക്കുന്നില്ല എന്നതില്‍ ബിസിസിഐ വ്യക്തത വരുത്തണമെന്ന് കൈഫ് ആവശ്യപ്പെട്ടു.

ആഭ്യന്തര ക്രിക്കറ്റില്‍ മികച്ച പ്രകടനം പുറത്തെടുത്തിട്ടും ഷമിയെ മാറ്റിനിര്‍ത്തുന്നതിലെ കാരണമെന്താണെന്ന് കൈഫ് ചോദിച്ചു. ജസ്പ്രീത് ബുംറയെപ്പോലെയുള്ള താരങ്ങള്‍ക്കും വര്‍ക്ക്‌ലോഡ് മാനേജ്‌മെന്റിന്റെ ഭാഗമായി ഷോര്‍ട്ട് സ്‌പെല്ലുകളാണ് നല്‍കുന്നതെന്നും, എന്നിട്ടും ഷമിയുടെ കാര്യത്തില്‍ മാത്രം ഇത്തരത്തിലുള്ള നിലപാട് എന്തിനാണെന്നും അദ്ദേഹം ചോദിച്ചു. ''കൃത്യമായ സുതാര്യത ഉണ്ടാകേണ്ടതുണ്ട്. എന്താണ് കാരണമെന്ന് തുറന്നുപറയണം. അദ്ദേഹം രഞ്ജി ട്രോഫി കളിക്കുന്നു, വിക്കറ്റുകള്‍ വീഴ്ത്തുന്നു. പിന്നെ എന്താണ് പ്രശ്‌നം?'' കൈഫ് ചോദിച്ചു.

ഷമി ടീമില്‍ ഇല്ലാത്തത് എതിരാളികള്‍ക്ക് വലിയ ആശ്വാസമാകുമെന്നും കൈഫ് കൂട്ടിച്ചേര്‍ത്തു. ''ന്യൂസിലന്‍ഡ് ബാറ്റര്‍മാരോട് ചോദിച്ചു നോക്കൂ, അവര്‍ ആരെയാണ് നേരിടാന്‍ ആഗ്രഹിക്കാത്തതെന്ന്. ആ പട്ടികയില്‍ ഒന്നാമതുള്ള പേര് മുഹമ്മദ് ഷമിയുടേതായിരിക്കും. 2023 ഏകദിന ലോകകപ്പില്‍ ധര്‍മ്മശാലയിലും മുംബൈ വാങ്കഡെയിലുമെല്ലാം ഇന്ത്യക്കായി മത്സരങ്ങള്‍ ജയിപ്പിച്ചുകൊടുത്ത താരമാണ് ഷമി. ഷമി വരുന്നില്ല എന്ന് കേള്‍ക്കുമ്പോള്‍ ന്യൂസിലന്‍ഡ് ബാറ്റര്‍മാര്‍ വലിയ ആശ്വാസത്തിലായിരിക്കും.'' കൈഫ് പറഞ്ഞു.

കഴിഞ്ഞ രഞ്ജി ട്രോഫി സീസണില്‍ ബംഗാളിനായി 7 മത്സരങ്ങളില്‍ നിന്ന് 16.72 ശരാശരിയില്‍ 37 വിക്കറ്റുകള്‍ വീഴ്ത്തിയ ഷമി, പുതിയ സീസണിലെ ആദ്യ മത്സരത്തിലും മികച്ച പ്രകടനം കാഴ്ചവെച്ചിരുന്നു. എങ്കിലും ഫിറ്റ്നസുമായി ബന്ധപ്പെട്ട സംശയങ്ങളുടെ പേരില്‍ താരത്തെ ഇന്ത്യന്‍ ടീമിലേക്ക് വീണ്ടും പരിഗണിക്കാന്‍ സെലക്ടര്‍മാര്‍ തയ്യാറായിട്ടില്ല.

ജൂനിയര്‍ ക്ലബ്ബ് ചാമ്പ്യന്‍ഷിപ്പില്‍ ആത്രേയ, ലിറ്റില്‍ മാസ്റ്റേഴ്‌സ് ക്ലബ്ബുകള്‍ ശക്തമായ നിലയില്‍

Web Desk — Sun, 18 Oct 2026 19:13:15 +0530

കൊച്ചി: 16 വയസ്സില്‍ താഴെയുള്ളവര്‍ക്കായുള്ള കെസിഎ ജൂനിയര്‍ ക്ലബ്ബ് ചാമ്പ്യന്‍ഷിപ്പില്‍ തൃപ്പൂണിത്തുറ ക്രിക്കറ്റ് ക്ലബ്ബിനെതിരെ തൃശൂര്‍ ആത്രേയ ക്രിക്കറ്റ് ക്ലബ്ബിന് ലീഡ്. ബികെ 55 കേരളയ്‌ക്കെതിരെ ലിറ്റില്‍ മാസ്റ്റേഴ്‌സ് ക്രിക്കറ്റ് ക്ലബ്ബ് ലീഡിലേക്ക് നീങ്ങുമ്പോള്‍ എസ് ജി ക്രിക്കറ്റ് സ്‌കൂളും വിന്റേജ് ക്രിക്കറ്റ് ക്ലബ്ബും തമ്മിലുള്ള മത്സരം ആവേശകരമായ നിലയില്‍ പുരോഗമിക്കുകയാണ്.

തൃപ്പൂണിത്തുറ ക്രിക്കറ്റ് ക്ലബ്ബിന്റെ ആദ്യ ഇന്നിങ്‌സ് സ്‌കോറായ 154 റണ്‍സിനെതിരെ അഞ്ച് വിക്കറ്റിന് 63 റണ്‍സെന്ന നിലയില്‍ പതറിയ ആത്രേയ ക്രിക്കറ്റ് ക്ലബ്ബിനെ നീരജ് ബിജുവിന്റെയും നിരഞ്ജന്‍ അരുണ്‍കുമാറിന്റെയും ഇന്നിങ്‌സുകളാണ് ശക്തമായ നിലയിലെത്തിച്ചത്. നീരജിന്റെയും (101) നിരഞ്ജന്റെയും (66) മികവില്‍ ആത്രേയ ഒന്‍പത് വിക്കറ്റിന് 269 റണ്‍സെടുത്തു. തൃപ്പൂണിത്തുറയ്ക്ക് വേണ്ടി ആദിഷ് സതീഷ്, കെ.എസ്. കാര്‍ത്തിക്, കൃഷ്ണദര്‍ശന്‍ എന്നിവര്‍ രണ്ട് വിക്കറ്റ് വീതം വീഴ്ത്തി. രണ്ടാം ഇന്നിങ്‌സ് ബാറ്റിങ്ങിന് ഇറങ്ങിയ തൃപ്പൂണിത്തുറ രണ്ട് വിക്കറ്റിന് 48 റണ്‍സെന്ന നിലയിലാണ്.

ലിറ്റില്‍ മാസ്റ്റേഴ്‌സ് ക്രിക്കറ്റ് ക്ലബ്ബിനെതിരെ ബികെ 55 കേരളയുടെ ആദ്യ ഇന്നിങ്‌സ് 172 റണ്‍സിന് അവസാനിച്ചു. 35 റണ്‍സെടുത്ത ക്യാപ്റ്റന്‍ ഹൃതിക് ഹരിദാസാണ് ബികെ 55-ന്റെ ടോപ് സ്‌കോറര്‍. ലിറ്റില്‍ മാസ്റ്റേഴ്‌സിന് വേണ്ടി ദേവനാരായണ്‍, മുഹമ്മദ് ഷാനിബ് എന്നിവര്‍ മൂന്ന് വിക്കറ്റ് വീതം വീഴ്ത്തി. മറുപടി ബാറ്റിങ്ങിന് ഇറങ്ങിയ ലിറ്റില്‍ മാസ്റ്റേഴ്‌സ് രണ്ടാം ദിവസം കളി നിര്‍ത്തുമ്പോള്‍ രണ്ട് വിക്കറ്റിന് 156 റണ്‍സെന്ന നിലയിലാണ്. ലിറ്റില്‍ മാസ്റ്റേഴ്‌സിന് വേണ്ടി അഭിറാം ജി.ബി. 73-ഉം ക്യാപ്റ്റന്‍ ദേവര്‍ഷ് ബി. പുറത്താകാതെ 59 റണ്‍സും നേടി.

മറ്റൊരു മത്സരത്തില്‍ എസ്.ജി. ക്രിക്കറ്റ് സ്‌കൂളിനെതിരെ വിന്റേജ് ക്രിക്കറ്റ് ക്ലബ്ബ് ലീഡിനായി പൊരുതുകയാണ്. നിര്‍മ്മല്‍ അജിത്തിന്റെയും (126), അര്‍ജുന്‍ വി. നായരുടെയും (47) മികവില്‍ എസ്.ജി. ക്രിക്കറ്റ് സ്‌കൂള്‍ 316 റണ്‍സെടുത്തു. വിന്റേജിന് വേണ്ടി അര്‍മാന്‍ നിജി അഞ്ച് വിക്കറ്റ് വീഴ്ത്തി. മറുപടി ബാറ്റിങ്ങിന് ഇറങ്ങിയ വിന്റേജ് കളി നിര്‍ത്തുമ്പോള്‍ ഒന്‍പത് വിക്കറ്റിന് 309 റണ്‍സെന്ന നിലയിലാണ്. സെഞ്ച്വറി നേടിയ ജൂബിന്‍ തോമസാണ് (105) വിന്റേജിന്റെ ടോപ് സ്‌കോറര്‍. ധക്ഷ് ആര്‍. 47-ഉം അഭിനവ് വി.വി. 35-ഉം ശിവ്ഹരി ശര്‍മ്മ പുറത്താകാതെ 37-ഉം റണ്‍സെടുത്തു. എസ്.ജി. ക്രിക്കറ്റ് സ്‌കൂളിന് വേണ്ടി വൈഷ്ണവ് എസ്. മൂന്ന് വിക്കറ്റ് വീഴ്ത്തി.

സച്ചിന്‍ ബേബിക്ക് സെഞ്ച്വറി; ഒഡീഷയ്‌ക്കെതിരെ കേരളം ആറ് വിക്കറ്റിന് 245 റണ്‍സെന്ന നിലയില്‍

Web Desk — Sun, 18 Oct 2026 18:59:18 +0530

തിരുവനന്തപുരം: ഒഡീഷയ്ക്കെതിരായ രഞ്ജി ട്രോഫി മത്സരത്തിന്റെ ആദ്യ ദിവസത്തെ കളി അവസാനിക്കുമ്പോള്‍ കേരളം ആറ് വിക്കറ്റിന് 245 റണ്‍സെന്ന നിലയില്‍. സച്ചിന്‍ ബേബിയുടെയും മുഹമ്മദ് അസറുദ്ദീന്റെയും മികവിലാണ് കേരളം തുടക്കത്തിലെ തകര്‍ച്ചയില്‍ നിന്നും ശക്തമായി തിരിച്ചുവന്നത്. സച്ചിന്‍ സെഞ്ച്വറി നേടി മടങ്ങിയപ്പോള്‍ അസറുദ്ദീന്‍ 72 റണ്‍സുമായി പുറത്താകാതെ നില്‍ക്കുകയാണ്.

ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് 18 റണ്‍സെടുക്കുന്നതിനിടെ മൂന്ന് വിക്കറ്റുകള്‍ നഷ്ടമായി. അക്കൗണ്ട് തുറക്കാതെ മടങ്ങിയ അഭിഷേക് പി. നായരാണ് ആദ്യം പുറത്തായത്. തുടര്‍ന്നെത്തിയ ജലജ് സക്‌സേനയും പൂജ്യത്തിന് മടങ്ങി. 11 റണ്‍സെടുത്ത അഭിഷേക് ജെ. നായരുടെ വിക്കറ്റ് കൂടി നഷ്ടമായി തകര്‍ച്ചയെ അഭിമുഖീകരിച്ച കേരളത്തെ സച്ചിന്‍ ബേബിയും ക്യാപ്റ്റന്‍ വിഷ്ണു വിനോദും ചേര്‍ന്നാണ് കരകയറ്റിയത്. ഇരുവരും ചേര്‍ന്ന് 40 റണ്‍സ് കൂട്ടിച്ചേര്‍ത്തു. 21 റണ്‍സെടുത്ത വിഷ്ണു വിനോദ് സൗമ്യ രഞ്ജന്റെ പന്തില്‍ പുറത്തായി.

തുടര്‍ന്നെത്തിയ സല്‍മാന്‍ നിസാര്‍ (21) ബാദല്‍ ബിസ്വാളിന് വിക്കറ്റ് നല്‍കി മടങ്ങുമ്പോള്‍ അഞ്ച് വിക്കറ്റിന് 101 റണ്‍സെന്ന നിലയിലായിരുന്നു കേരളം. തുടര്‍ന്ന് സച്ചിന്‍ ബേബിയും മുഹമ്മദ് അസറുദ്ദീനും ചേര്‍ന്നുള്ള ആറാം വിക്കറ്റ് കൂട്ടുകെട്ടാണ് കേരളത്തിന്റെ ഇന്നിങ്‌സിന് കരുത്ത് പകര്‍ന്നത്. കരുതലോടെ ബാറ്റ് ചെയ്ത ഇരുവരും ചേര്‍ന്ന് 141 റണ്‍സ് കൂട്ടിച്ചേര്‍ത്തു. ചായയ്ക്ക് ശേഷം കളി പുനരാരംഭിച്ച് വൈകാതെ തന്നെ സച്ചിന്‍ ബേബി തന്റെ സെഞ്ച്വറി തികച്ചു. ലളിത് യാദവിന്റെ പന്തില്‍ സിംഗിളെടുത്താണ് സച്ചിന്‍ തന്റെ 16-ാം സെഞ്ച്വറി പൂര്‍ത്തിയാക്കിയത്.

തൊട്ടടുത്ത ഓവറില്‍ മുഹമ്മദ് അസറുദ്ദീന്‍ അമ്പതും തികച്ചു. ഒടുവില്‍ ആദ്യ ദിവസത്തെ കളി അവസാനിക്കുന്നതിന് തൊട്ടുമുന്‍ത്തെ ഓവറിലാണ് സച്ചിന്‍ ബേബിയുടെ വിക്കറ്റ് നഷ്ടമായത്. 11 ബൗണ്ടറികളും ഒരു സിക്‌സുമടക്കം 112 റണ്‍സെടുത്താണ് സച്ചിന്‍ മടങ്ങിയത്. കളി നിര്‍ത്തുമ്പോള്‍ മുഹമ്മദ് അസറുദ്ദീന്‍ 72-ഉം ആദിത്യ സര്‍വാടെ മൂന്നും റണ്‍സുമായി ക്രീസിലുണ്ട്.

'ഷമി പൂര്‍ണ ഫിറ്റാണ്, വിശ്രമം ചോദിച്ചു വാങ്ങിയതാണ്': ഫിറ്റ്‌നസ് അഭ്യൂഹങ്ങള്‍ക്ക് മറുപടിയുമായി ബംഗാള്‍ കോച്ച്

Web Desk — Sun, 18 Oct 2026 18:38:16 +0530

കൊല്‍ക്കത്ത: സീനിയര്‍ പേസര്‍ മുഹമ്മദ് ഷമി രഞ്ജി ട്രോഫി രണ്ടാം ഘട്ട മത്സരത്തില്‍ നിന്ന് വിട്ടുനില്‍ക്കുന്നതുമായി ബന്ധപ്പെട്ട അഭ്യൂഹങ്ങള്‍ തള്ളി ബംഗാള്‍ പരിശീലകന്‍ ലക്ഷ്മി രത്തന്‍ ശുക്ല. ഷമി പൂര്‍ണ്ണ ഫിറ്റാണെന്നും, മുന്‍ മത്സരത്തില്‍ കൂടുതല്‍ ഓവറുകള്‍ പന്തെറിഞ്ഞതിനാല്‍ താരം തന്നെ വിശ്രമം ആവശ്യപ്പെടുകയായിരുന്നുവെന്നും ശുക്ല വ്യക്തമാക്കി. സര്‍വീസസിനെതിരായ മത്സരത്തില്‍ ഷമി ബംഗാളിന്റെ പേസ് നിരയെ നയിക്കുമെന്നാണ് കരുതിയിരുന്നത്, പ്രത്യേകിച്ച് ആകാശ് ദീപ്, മുകേഷ് കുമാര്‍ എന്നിവര്‍ ഇന്ത്യ എ ടീം പര്യടനത്തിലായതിനാല്‍.

എന്നാല്‍ ന്യൂഡല്‍ഹിയിലെ പാലം ഗ്രൗണ്ടില്‍ നടന്ന മത്സരത്തിന്റെ പ്ലേയിങ് ഇലവനില്‍ 36കാരനായ ഷമിയെ ഉള്‍പ്പെടുത്തിയിരുന്നില്ല. ന്യൂസിലന്‍ഡിനെതിരായ രണ്ട് ടെസ്റ്റുകളടങ്ങിയ പരമ്പരയ്ക്കുള്ള ഇന്ത്യന്‍ ടീമിലേക്ക് ഷമിയെ പരിഗണിക്കാതിരുന്നതിന് തൊട്ടുപിന്നാലെയാണ് രഞ്ജി മത്സരത്തിലും താരം കളിക്കാതിരുന്നത്. ഇതോടെ താരത്തിന്റെ ഫിറ്റ്‌നസിനെക്കുറിച്ചും സെലക്ഷന്‍ ലഭിക്കാത്തതിലുള്ള നിരാശയാണോ മത്സരത്തില്‍ നിന്ന് വിട്ടുനില്‍ക്കാന്‍ കാരണമെന്നും ക്രിക്കറ്റ് ലോകത്ത് ചോദ്യങ്ങള്‍ ഉയര്‍ന്നിരുന്നു.

എന്നാല്‍ ഈ അഭ്യൂഹങ്ങളെല്ലാം തള്ളിയ ശുക്ല, ഇത് ഷമിയുടെ വര്‍ക്ക്‌ലോഡ് മാനേജ്‌മെന്റിന്റെ ഭാഗം മാത്രമാണെന്ന് മാധ്യമങ്ങളോട് പറഞ്ഞു. ''ഷമി പൂര്‍ണ ഫിറ്റാണ്, അദ്ദേഹത്തിന് വിശ്രമം നല്‍കിയതാണ്. കഴിഞ്ഞ മത്സരത്തില്‍ ഡല്‍ഹിക്കെതിരെ അദ്ദേഹം കൂടുതല്‍ ഓവറുകള്‍ പന്തെറിഞ്ഞിരുന്നു. അദ്ദേഹം തന്നെയാണ് വിശ്രമം ആവശ്യപ്പെട്ടത്. ഷമി ഒരു ചീറ്റപ്പുലി ആണ്. ഷമിക്ക് വിശ്രമം നല്‍കുന്നത് പുതിയ താരങ്ങള്‍ക്ക് അവസരം നല്‍കാന്‍ ഞങ്ങളെ സഹായിക്കും.'' ആദ്യ ദിവസത്തെ കളിക്ക് ശേഷം ശുക്ല മാധ്യമങ്ങളോട് പറഞ്ഞു.

കഴിഞ്ഞ ആഴ്ച കല്യാണിയില്‍ ഡല്‍ഹിക്കെതിരെ നടന്ന മത്സരത്തില്‍ 17.3 ഓവറില്‍ 9 മെയ്ഡനടക്കം 30 റണ്‍സ് വഴങ്ങി 4 വിക്കറ്റുകള്‍ വീഴ്ത്തി ഷമി മികച്ച പ്രകടനം നടത്തിയിരുന്നു. തന്റെ ഫിറ്റ്‌നസിനെക്കുറിച്ച് ഉയര്‍ന്ന ചോദ്യങ്ങള്‍ക്ക് മത്സരശേഷം ഷമി തന്നെ മറുപടി നല്‍കിയിരുന്നു. ''എന്റെ ഫിറ്റ്‌നസ് നിങ്ങള്‍ കണ്ടോളൂ, ഞാന്‍ ഗ്രൗണ്ടിലുണ്ട്. എനിക്ക് സാധിക്കുന്നിടത്തെല്ലാം ഞാന്‍ കളിക്കുന്നുണ്ട്. തുടര്‍ച്ചയായി ബോള്‍ ചെയ്യുക മാത്രമാണ് എന്റെ ജോലി.'' എന്നായിരുന്നു ഷമിയുടെ പ്രതികരണം.

കഴിഞ്ഞ രഞ്ജി സീസണില്‍ ബംഗാളിനായി 7 മത്സരങ്ങളില്‍ നിന്ന് 16.72 ശരാശരിയില്‍ 37 വിക്കറ്റുകള്‍ വീഴ്ത്തി ഷമി മികച്ച പ്രകടനം നടത്തിയിരുന്നു. സര്‍വീസസിനെതിരായ മത്സരത്തിനിടെ ബംഗാള്‍ ഫിസിയോയുമായി ദീര്‍ഘനേരം സംസാരിക്കാനും പരിശീലനത്തില്‍ ഏര്‍പ്പെടാനും ഷമി സമയം കണ്ടെത്തിയിരുന്നു.

ഓണ്‍ലൈന്‍ വാതുവെപ്പ് വിവാദം: പാകിസ്ഥാന്‍ താരം മുഹമ്മദ് റിസ്വാന് താല്‍ക്കാലിക ആശ്വാസം, ആഭ്യന്തര ക്രിക്കറ്റില്‍ കളിക്കാന്‍ അനുമതി

Web Desk — Sun, 18 Oct 2026 18:13:46 +0530

ഇസ്ലമാബാദ്: ഓണ്‍ലൈന്‍ വാതുവെപ്പ്, ചൂതാട്ടം, ഡ്രെസ്സിങ് റൂം വിവരങ്ങള്‍ ചോര്‍ത്തല്‍ തുടങ്ങിയ ആരോപണങ്ങളില്‍ അന്വേഷണം നേരിടുന്ന പാകിസ്ഥാന്‍ വിക്കറ്റ് കീപ്പര്‍ ബാറ്റര്‍ മുഹമ്മദ് റിസ്വാന് താല്‍ക്കാലിക ആശ്വാസം. റിസ്വാനെ ആഭ്യന്തര ക്രിക്കറ്റില്‍ വീണ്ടും കളിക്കാന്‍ പാകിസ്ഥാന്‍ ക്രിക്കറ്റ് ബോര്‍ഡ് അനുമതി നല്‍കി. സൂയി നോര്‍ത്തേണ്‍ ഗ്യാസ് പൈപ്പ്ലൈന്‍സ് ലിമിറ്റഡിന്റെ ഡയറക്ടറും ഹെഡ് കോച്ചും മുന്‍ പാകിസ്ഥാന്‍ ക്യാപ്റ്റനുമായ മുഹമ്മദ് ഹഫീറാണ് ഇക്കാര്യം സ്ഥിരീകരിച്ചത്.

ഒക്ടോബര്‍ 19 മുതല്‍ ആരംഭിക്കുന്ന പ്രസിഡന്റ്‌സ് കപ്പ് ഫസ്റ്റ് ക്ലാസ് ടൂര്‍ണമെന്റില്‍ റിസ്വാന്‍ എസ്എന്‍ജിപിഎല്‍ ടീമിനെ നയിക്കുമെന്ന് ഹഫീസ് അറിയിച്ചു. പിസിബി ആഭ്യന്തര വകുപ്പില്‍ നിന്ന് ഇതുസംബന്ധിച്ച് ഇമെയില്‍ ലഭിച്ചതായും അദ്ദേഹം വ്യക്തമാക്കി. കഴിഞ്ഞ ഓഗസ്റ്റില്‍ ഇംഗ്ലണ്ടിനെതിരായ രണ്ടാം ടെസ്റ്റിന് ശേഷം ഇംഗ്ലണ്ടില്‍ നിന്ന് തിരിച്ചുവിളിച്ച റിസ്വാനെയും മറ്റൊരു താരമായ ഇമാം ഉള്‍ ഹഖിനെയും ആഭ്യന്തര ക്രിക്കറ്റില്‍ കളിക്കുന്നതില്‍ നിന്ന് വിലക്കിയിരുന്നു. ഡ്രെസ്സിങ് റൂം വിവര ചോര്‍ച്ച, ഓണ്‍ലൈന്‍ വാതുവെപ്പ് ആരോപണങ്ങള്‍ എന്നിവയുമായി ബന്ധപ്പെട്ട് നാഷണല്‍ സൈബര്‍ ക്രൈം സെല്ലിന്റെ അന്വേഷണത്തെത്തുടര്‍ന്നായിരുന്നു ഈ നടപടി.

ഇതുവരെ രണ്ട് തവണ എന്‍സിസിഎ മുമ്പാകെ റിസ്വാന്‍ ചോദ്യം ചെയ്യലിന് ഹാജരായിട്ടുണ്ട്. എങ്കിലും ഈ അന്വേഷണത്തിന്റെ കൃത്യമായ വിവരങ്ങള്‍ ഇതുവരെ പുറത്തുവന്നിട്ടില്ല. ലോര്‍ഡ്‌സില്‍ നടന്ന രണ്ടാം ടെസ്റ്റിനിടെ പാകിസ്ഥാന്‍ ടീമിനൊപ്പമുണ്ടായിരുന്ന സുരക്ഷാ ഉദ്യോഗസ്ഥര്‍ റിസ്വാന്‍, ഇമാം എന്നിവരുടെ ഫോണുകള്‍ പിടിച്ചെടുക്കുകയും ഫൊറന്‍സിക് പരിശോധനയ്ക്കായി എന്‍സിസിഎയ്ക്ക് കൈമാറുകയും ചെയ്തിരുന്നു.

ഈ മാസം 10ന് ലാഹോറിലെ എന്‍സിസിഎ ഓഫീസില്‍ റിസ്വാന്‍ അവസാനമായി ചോദ്യം ചെയ്യലിന് ഹാജരായതിന് ശേഷം കാര്യങ്ങള്‍ അനുകൂലമായി മാറിയെന്നാണ് വിശ്വസനീയമായ വൃത്തങ്ങള്‍ നല്‍കുന്ന സൂചന. അന്വേഷണം ഉടന്‍ തന്നെ അവസാനിച്ചേക്കുമെന്നും റിപ്പോര്‍ട്ടുകളുണ്ട്. 47 ടെസ്റ്റുകളും 103 ഏകദിനങ്ങളും 106 ടി20 അന്താരാഷ്ട്ര മത്സരങ്ങളും കളിച്ചിട്ടുള്ള റിസ്വാന്‍, ലോര്‍ഡ്‌സ് ടെസ്റ്റിന് ശേഷം ഇതുവരെ മത്സര ക്രിക്കറ്റില്‍ കളിച്ചിട്ടില്ല.

'ഹാര്‍ദിക് പാണ്ഡ്യയുടെ ഷോട്ടുകളുമായി സാമ്യമുണ്ട്': നമന്‍ ധിറിന്റെ ബാറ്റിംഗ് പ്രകടനത്തെ പ്രശംസിച്ച് ആകാശ് ചോപ്ര

Web Desk — Sun, 18 Oct 2026 17:45:28 +0530

ബെംഗളൂരു: വെസ്റ്റ് ഇന്‍ഡീസിനെതിരായ ടി20 പരമ്പരയില്‍ ഇന്ത്യയുടെ കണ്ടെത്തലായി മാറിയ ഓള്‍റൗണ്ടര്‍ നമന്‍ ധിറിനെ പ്രശംസിച്ച് മുന്‍ ഇന്ത്യന്‍ താരം ആകാശ് ചോപ്ര. പരിക്കേറ്റ ഹാര്‍ദിക് പാണ്ഡ്യയുടെ അഭാവത്തില്‍ ടീമിലിടം നേടിയ പഞ്ചാബ് താരമായ നമന്‍, പരമ്പരയിലുടനീളം തന്റെ ഓള്‍റൗണ്ട് മികവ് തെളിയിച്ചിരുന്നു. പത്ത് ഓവറില്‍ അഞ്ച് വിക്കറ്റുകള്‍ വീഴ്ത്തി ബോളിംഗില്‍ തിളങ്ങിയ നമന്‍, ബെംഗളൂരുവില്‍ നടന്ന അവസാന മത്സരത്തില്‍ തന്റെ ബാറ്റിംഗ് കരുത്താണ് പുറത്തെടുത്തത്.

മത്സരത്തില്‍ വെറും 6 പന്തില്‍ നിന്ന് പുറത്താകാതെ 24 റണ്‍സാണ് നമാന്‍ നേടിയത്. നേരിട്ട ആദ്യ പന്ത് തന്നെ സിക്‌സറടിച്ചുകൊണ്ടാണ് താരം തുടങ്ങിയത്. തുടര്‍ന്ന് ഒരു ഫോറും രണ്ട് സിക്‌സറുകളും കൂടി പറത്തിയ നമന്‍ ആരാധകരെയും ക്രിക്കറ്റ് വിദഗ്ധരെയും ഒരുപോലെ വിസ്മയിപ്പിച്ചു. നമന്റെ ബാറ്റിംഗ് ശൈലിയില്‍ ഹാര്‍ദിക് പാണ്ഡ്യയുടെ പ്രകടനവുമായി ചെറിയ സാദൃശ്യങ്ങളുണ്ടെന്ന് സ്റ്റാര്‍ സ്‌പോര്‍ട്‌സില്‍ സംസാരിക്കവെ ആകാശ് ചോപ്ര വ്യക്തമാക്കി.

ചോപ്ര പറഞ്ഞതിങ്ങനെ... ''നമന്‍ നേരിട്ട ആദ്യ പന്ത് തന്നെ നോക്കൂ. അത് ലെഗ് സൈഡിലെ പന്തായിരുന്നുവെങ്കിലും അതിനെ ഗാലറിയിലെത്തിക്കാന്‍ കഴിഞ്ഞത് അദ്ദേഹത്തിന്റെ ക്ലാസ് വ്യക്തമാക്കുന്നു. മികച്ച ക്രിക്കറ്റിംഗ് സെന്‍സും ത താരത്തിനുണ്ട്. ഉയരവും നീളമുള്ള കൈകളും മികച്ച രീതിയില്‍ ഉപയോഗിക്കാന്‍ അദ്ദേഹത്തിന് കഴിയുന്നുണ്ട്. ബാറ്റ് ചെയ്യുമ്പോള്‍ അദ്ദേഹത്തില്‍ ഹാര്‍ദിക് പാണ്ഡ്യയുടെ ചില സാമ്യത കാണാന്‍ കഴിയുന്നുണ്ട്. മികച്ചൊരു ബേസ് ഉണ്ടാക്കിയെടുക്കാനും ശരീരത്തിന്റെ ബാലന്‍സ് നിലനിര്‍ത്താനും അദ്ദേഹത്തിന് സാധിക്കുന്നു..'' ചോപ്ര പറഞ്ഞു.

ഇന്ത്യന്‍ ടീമില്‍ ആറാം നമ്പരിലോ ഏഴാം നമ്പരിലോ ആണ് നമാന്‍ ബാറ്റിംഗിനെത്തുന്നത്. വളരെ കുറഞ്ഞ പന്തുകള്‍ മാത്രം ലഭിക്കുന്ന ഈ പൊസിഷനില്‍ ഇറങ്ങി ടീമിനായി പരമാവധി റണ്‍സ് കണ്ടെത്തുക എന്നത് ബുദ്ധിമുട്ടേറിയ ജോലിയാണെന്നും ചോപ്ര വിലയിരുത്തി. ശിവം ദുബെയും ഹാര്‍ദിക് പാണ്ഡ്യയും ചെയ്യുന്നതുപോലെ ലോവര്‍ ഓര്‍ഡറില്‍ ഇറങ്ങി ഫിനിഷ് ചെയ്യാനുള്ള കഴിവ് നമനുണ്ടെന്നും അദ്ദേഹം കൂട്ടിച്ചേര്‍ത്തു.

'ഫിനിഷറുടെ റോള്‍ ചെയ്യുന്നതാണ് എനിക്കിഷ്ടം': ബാറ്റിംഗ് പൊസിഷനെക്കുറിച്ചുള്ള ചോദ്യങ്ങള്‍ക്ക് തിലക് വര്‍മയുടെ മറുപടി

Web Desk — Sun, 18 Oct 2026 16:45:33 +0530

ബെംഗളൂരു: ഇന്ത്യന്‍ ടി20 ടീമിലെ ബാറ്റിംഗ് നിരയിലെ തിരക്ക് കാരണം ആറാം നമ്പറില്‍ ബാറ്റ് ചെയ്യേണ്ടി വരുന്നതില്‍ ആശങ്കയില്ലെന്നും ടീമിനായി മത്സരങ്ങള്‍ ഫിനിഷ് ചെയ്യുക മാത്രമാണ് തന്റെ ലക്ഷ്യമെന്നും യുവതാരം തിലക് വര്‍മ. വെസ്റ്റ് ഇന്‍ഡീസിനെതിരായ ടി20 പരമ്പരയ്ക്ക് ശേഷം സംസാരിക്കുകയായിരുന്നു അദ്ദേഹം. ഐപിഎല്ലില്‍ മുംബൈ ഇന്ത്യന്‍സിനായി മൂന്നാം നമ്പരില്‍ മികച്ച പ്രകടനം കാഴ്ചവെച്ച് ശ്രദ്ധനേടിയ താരമാണ് തിലക്. എന്നാല്‍ ഇന്ത്യന്‍ ടീമിന്റെ ആവശ്യങ്ങള്‍ക്കനുസരിച്ച് തന്റെ ബാറ്റിംഗ് ശൈലി മാറ്റാന്‍ താരം തയ്യാറായിരിക്കുകയാണ്.

തുടക്കത്തില്‍ ചില ബുദ്ധിമുട്ടുകള്‍ നേരിട്ടെങ്കിലും, സമ്മര്‍ദ്ദഘട്ടങ്ങളില്‍ നിര്‍ണായക പ്രകടനങ്ങള്‍ പുറത്തെടുക്കാന്‍ താരത്തിന് സാധിച്ചിട്ടുണ്ട്. 2025 ഏഷ്യാ കപ്പിലും 2026 ഏഷ്യന്‍ ഗെയിംസിലും ഇന്ത്യയെ വിജയത്തിലേക്ക് നയിക്കുന്നതില്‍ തിലക് നിര്‍ണായക പങ്കുവഹിച്ചിരുന്നു. മത്സരത്തിന് ശേഷമുള്ള വാര്‍ത്താസമ്മേളനത്തില്‍ സംസാരിക്കവെ, മൂന്നാം നമ്പറിലും ആറാം നമ്പറിലും ബാറ്റ് ചെയ്യാനുള്ള സാങ്കേതിക തികവ് തനിക്കൊപ്പമുണ്ടെന്ന് തിലക് വ്യക്തമാക്കി. എങ്കിലും മൂന്നാം നമ്പറില്‍ ബാറ്റ് ചെയ്യുമ്പോഴാണ് കളി ഫിനിഷ് ചെയ്യാന്‍ കൂടുതല്‍ എളുപ്പമെന്ന് അദ്ദേഹം സമ്മതിച്ചു.

തിലകിന്റെ വാക്കുകള്‍... ''മൂന്നാം നമ്പറില്‍ നിന്നും ആറാം നമ്പറിലേക്ക് മാറുന്നത് അത്ര എളുപ്പമല്ല. എങ്കിലും രാജ്യത്തിനായി മത്സരങ്ങള്‍ ഫിനിഷ് ചെയ്യുന്ന ജോലി എനിക്ക് വളരെ ഇഷ്ടമാണ്. ടോപ് ഓര്‍ഡറിലെ കോമ്പിനേഷന്‍ ഇപ്പോള്‍ വളരെ നന്നായി പ്രവര്‍ത്തിക്കുന്നുണ്ട്. ഫിനിഷറുടെ റോളില്‍ കളിക്കാന്‍ ഞാന്‍ മാനസികമായി തയ്യാറാണ്. മൈതാനത്തിന്റെ എല്ലാ ഭാഗത്തേക്കും പന്ത് പായിക്കാനുള്ള ഷോട്ടുകള്‍ എനിക്കുണ്ട്. മൂന്നാം നമ്പറിലും അഞ്ചാം നമ്പറിലും ബാറ്റ് ചെയ്യാനുള്ള സാങ്കേതിക തികവും എനിക്കുണ്ട്. എനിക്ക് സാഹചര്യത്തിനനുസരിച്ച് മാറാന്‍ സാധിക്കും. ടീം ഏത് റോള്‍ ഏല്‍പ്പിച്ചാലും ഞാന്‍ അത് ഭംഗിയായി നിര്‍വഹിക്കും.'' അദ്ദേഹം പറഞ്ഞു.

ഇന്ത്യന്‍ ടി20 ടീമിന്റെ ടോപ് ഓര്‍ഡറില്‍ നിലവില്‍ കടുത്ത മത്സരമാണ് നടക്കുന്നത്. വൈഭവ് സൂര്യവംശി, അഭിഷേക് ശര്‍മ, സഞ്ജു സാംസണ്‍, ഇഷാന്‍ കിഷന്‍, ശ്രേയസ് അയ്യര്‍, തിലക് വര്‍മ എന്നിവരാണ് ഈ സ്ഥാനങ്ങള്‍ക്കായി മത്സരിക്കുന്നത്. അഭിഷേക്, സഞ്ജു, ഇഷാന്‍ എന്നിവരെയാണ് നിലവില്‍ ടോപ് ഓര്‍ഡറിനായി ടീം മാനേജ്‌മെന്റ് പരിഗണിച്ചിരിക്കുന്നത്. വിന്‍ഡീസ് പരമ്പരയില്‍ നിതീഷ് റെഡ്ഡി, നമാന്‍ ധിര്‍, ശിവം ദുബെ തുടങ്ങിയ താരങ്ങളുടെ സാന്നിധ്യം ടീമിന്റെ ബാറ്റിംഗ് നിരയെ കൂടുതല്‍ ശക്തമാക്കിയിട്ടുണ്ട്.

ബാറ്റിംഗ് നിര നീളുന്നത് കാരണം മിക്ക മത്സരങ്ങളിലും എളുപ്പത്തില്‍ 200 ലധികം സ്‌കോര്‍ നേടാന്‍ ഇന്ത്യക്ക് സാധിക്കുന്നുണ്ടെങ്കിലും, സ്‌പെഷ്യലിസ്റ്റ് ബൗളര്‍മാരുടെ കുറവ് ചിലപ്പോള്‍ തിരിച്ചടിയാകാറുണ്ട്. എങ്കിലും പരമ്പരയില്‍ അഞ്ച് വിക്കറ്റുകള്‍ വീഴ്ത്തിയ നമാന്‍ ധീറിന്റെ പ്രകടനത്തെ തിലക് പ്രത്യേകമായി പ്രശംസിച്ചു.

'വെസ്റ്റ് ഇന്‍ഡീസ് ക്രിക്കറ്റിന് സാമ്പത്തിക പിന്തുണ വേണം': ഇന്ത്യക്കെതിരായ മികച്ച പ്രകടനത്തിന് പിന്നാലെ അഭ്യര്‍ത്ഥനയുമായി ഡാരന്‍ സമി

Web Desk — Sun, 18 Oct 2026 16:18:03 +0530

ബെംഗളൂരു: ഇന്ത്യക്കെതിരായ പരമ്പരയിലെ മിന്നുന്ന പ്രകടനത്തിന് പിന്നാലെ വെസ്റ്റ് ഇന്‍ഡീസ് ക്രിക്കറ്റിന്റെ പുനരുജ്ജീവനത്തിനായി സാമ്പത്തിക സഹായം തേടി മുഖ്യ പരിശീലകന്‍ ഡാരന്‍ സമി. ഇന്ത്യക്കെതിരായ ഏകദിന പരമ്പര 1-2ന് നഷ്ടമായെങ്കിലും, കരുത്തരായ ഇന്ത്യക്കെതിരായ അഞ്ച് മത്സരങ്ങളുടെ ടി20 പരമ്പര 2-2 സമനിലയില്‍ പിടിക്കാന്‍ വിന്‍ഡീസിന് സാധിച്ചിരുന്നു. നിലവില്‍ കടുത്ത സാമ്പത്തിക പ്രതിസന്ധി നേരിടുന്ന വെസ്റ്റ് ഇന്‍ഡീസിന് സ്‌പോണ്‍സര്‍മാരെയും കൂടുതല്‍ നിക്ഷേപകരെയും ആകര്‍ഷിക്കാന്‍ ഈ പ്രകടനം തുണയ്ക്കുമെന്നാണ് സമി പ്രതീക്ഷിക്കുന്നത്.

ബെംഗളൂരുവില്‍ അഞ്ചാമത്തെയും അവസാനത്തെയും ടി20 മഴമൂലം ഉപേക്ഷിച്ചതിന് ശേഷം സംസാരിക്കുകയായിരുന്ന സമി. കരീബിയന്‍ ക്രിക്കറ്റിന് ഇപ്പോള്‍ ശക്തമായ സാമ്പത്തിക പിന്തുണ അത്യന്താപേക്ഷിതമാണെന്ന് അദ്ദേഹം വ്യക്തമാക്കി. ''സാമ്പത്തികമായി വെസ്റ്റ് ഇന്‍ഡീസ് ക്രിക്കറ്റിനെ ചേര്‍ത്തുപിടിക്കാന്‍ ഒരാള്‍ മുന്നോട്ടുവരേണ്ട അവസ്ഥയിലാണിപ്പോള്‍. ലോകത്തെ ഏറ്റവും മികച്ച ടീമിനെതിരെ ഇന്ത്യയില്‍ വെച്ച് കളിച്ച ഇത്തരം പരമ്പരകള്‍ തങ്ങളെ കൂടുതല്‍ അനുകൂല ചര്‍ച്ചകളിലേക്ക് നയിക്കുമെന്ന് പ്രതീക്ഷിക്കുന്നു.'' അദ്ദേഹം പറഞ്ഞു.

ഇന്ത്യയിലെയും വെസ്റ്റ് ഇന്‍ഡീസിലെയും ക്രിക്കറ്റ് അടിസ്ഥാന സൗകര്യങ്ങളെയും സാഹചര്യങ്ങളെയും സമി താരതമ്യം ചെയ്തു. ''ഇന്ത്യ ഏത് ഐസിസി ടൂര്‍ണമെന്റിന് പോയാലും കപ്പടിക്കും. അവര്‍ ജയിക്കുമെന്ന് പ്രതീക്ഷിക്കുന്നു. കാരണം, അവര്‍ അതിനുള്ള എല്ലാ കാര്യങ്ങളും ഒരുക്കിവെച്ചിട്ടുണ്ട്. എന്നാല്‍ വെസ്റ്റ് ഇന്‍ഡീസ് എവിടെയെങ്കിലും പോകുമ്പോള്‍, പ്രതിസന്ധികള്‍ക്കിടയിലും അതിനെ അതിജീവിച്ചാണ് ഞങ്ങള്‍ പ്രകടനം പുറത്തെടുക്കുന്നത്.'' അദ്ദേഹം വിശദീകരിച്ചു.

സ്‌പോണ്‍സര്‍മാരുമായും മറ്റു പങ്കാളികളുമായുള്ള ചര്‍ച്ചകളില്‍ ഈ പരമ്പരയിലെ പ്രകടനം ക്രിക്കറ്റ് വെസ്റ്റ് ഇന്‍ഡീസിന് കൂടുതല്‍ കരുത്ത് പരുമെന്നാണ് മുന്‍ വിന്‍ഡീസ് നായകന്റെ പ്രതീക്ഷ. ''ഒരുവശത്ത് കാര്യങ്ങള്‍ കൃത്യമായി ഒരുക്കിവെച്ചിട്ടുണ്ട്. മറുവശത്ത് പ്രതിസന്ധികള്‍ നിറഞ്ഞ സാഹചര്യങ്ങളുമുണ്ട്. എന്നാല്‍ ഇപ്പോഴും ഞങ്ങള്‍ മുന്നോട്ടുപോകുന്നുണ്ട്. ഇതൊരു വലിയ ചുവടുവെപ്പാണെന്ന് ഞാന്‍ കരുതുന്നു.'' സമി പറഞ്ഞു.