Asianet News Malayalam

ആശുപത്രിയിലെത്തിച്ച ഓട്ടോയിൽ കയറിക്കൂടി,വാഹനാപകടത്തിൽ പരിക്കേറ്റയാളുടെ മാല കവർന്നു; പ്രതി പിടിയിൽ

Elsa TJ — Tue, 06 Oct 2026 18:43:52 +0530

അമ്പലപ്പുഴ: വാഹനാപകടത്തിൽ പരിക്കേറ്റ് വണ്ടാനം മെഡിക്കൽ കോളജ് ആശുപത്രിയിൽ എത്തിച്ചയാളുടെ സ്വർണമാല മോഷ്ടിച്ച പ്രതിയെ പൊലീസ് മണിക്കൂറുകൾക്കുള്ളിൽ പിടികൂടി. പുന്നപ്ര തെക്ക് പഞ്ചായത്ത് ഒൻപതാം വാർഡിൽ ചൂളപ്പറമ്പ് വീട്ടിൽ അഷ്കറിനെയാണ് (34) അമ്പലപ്പുഴ പൊലീസ് അറസ്റ്റ് ചെയ്തത്. ഒക്ടോബർ നാലിന് രാത്രി ഒൻപതരയോടെ വണ്ടാനം മെഡിക്കൽ കോളജ് ആശുപത്രി പരിസരത്തായിരുന്നു അപകടം. പരിക്കേറ്റയാളെ ആശുപത്രിയിലേക്ക് കൊണ്ടുപോയ ഓട്ടോയിൽ കയറിക്കൂടിയ പ്രതി, ആശുപത്രിയിൽ എത്തിയ ഉടൻ ഇയാളുടെ കഴുത്തിൽക്കിടന്ന മാല പൊട്ടിച്ചെടുത്ത് കടന്നു കളയുകയായിരുന്നു. അമ്പലപ്പുഴ സ്റ്റേഷനിൽ ലഭിച്ച പരാതിയുടെ അടിസ്ഥാനത്തിൽ സാങ്കേതിക തെളിവുകളുടെ സഹായത്തോടെ പ്രതിയെ തിരിച്ചറിഞ്ഞ പൊലീസ് കുറവൻതോട് ജങ്ഷനിൽവച്ചാണ് ഇയാളെ അതിസാഹസികമായി കീഴ്പ്പെടുത്തിയത്.

അമ്പലപ്പുഴ സർക്കിൾ ഇൻസ്പെക്ടർ വിഷ്ണുകുമാർ, സബ് ഇൻസ്പെക്ടർമാരായ ജയേഷ് ചന്ദ്രൻ, വിനോദ്, രഞ്ജിത്ത്, സീനിയർ സിവിൽ പൊലീസ് ഓഫിസര്‍മാരായ ബിജോയ്, വിനിൽ, സിവിൽ പൊലീസ് ഓഫിസര്‍മാരായ അരുൺ, വിജിത്ത്, തൻസീം, ദീപക് എന്നിവരടങ്ങിയ സംഘമാണ് പ്രതിയെ പിടികൂടിയത്. അറസ്റ്റിലായ അഷ്കർ മുമ്പും ലഹരിമരുന്ന് കേസിൽ പ്രതിയാണെന്ന് പൊലീസ് അറിയിച്ചു.

ഏഷ്യാനെറ്റ് ന്യൂസ് ലൈവ് കാണാം

നീലേശ്വരത്ത് വൻ മയക്കുമരുന്ന് വേട്ട, റെയിൽവേ സ്റ്റേഷനിൽ എംഡിഎംഎയുമായി രണ്ട് യുവാക്കൾ പിടിയിൽ

Web Desk — Thu, 08 Oct 2026 15:56:19 +0530

കാസർകോട്: നീലേശ്വരത്ത് വൻ മയക്കു മരുന്ന് വേട്ട. തീവണ്ടിയിൽ കടത്തിയ 671 ഗ്രാം എംഡിഎംഎ യുമായി രണ്ട് യുവാക്കൾ പിടിയിൽ. കാസർഗോഡ് മംഗൽപാടി സ്വദേശികളായ മുഹമ്മദ്‌ റുക്‌ഷാദ് , അബ്ദുൽ ഹമീദ് എന്നിവരെയാണ് പിടികൂടിയത്. നീലേശ്വരം റെയിൽവേ സ്റ്റേഷനിൽ തീവണ്ടി ഇറങ്ങുമ്പോഴാണ് എംഡിഎംഎയുമായി പിടിയിലായത്.

വാട്സാപ്പ് ഡിലീറ്റ് ചെയ്ത ആറു വയസുകാരിക്ക് അമ്മയുടെ ക്രൂരമർദനം, ബാലാവകാശ കമ്മിഷൻ കേസെടുത്തു

Elsa TJ — Fri, 09 Oct 2026 22:41:05 +0530

തിരുവനന്തപുരം: നെയ്യാറ്റിൻകരയിൽ ആറു വയസുകാരിക്ക് അമ്മയുടെ ക്രൂരമർദ്ദനമേറ്റ സംഭവത്തിൽ സംസ്ഥാന ബാലാവകാശ സംരക്ഷണ കമ്മിഷൻ സ്വമേധയാ കേസെടുത്തു. ഫോണിലെ വാട്സ്ആപ്പ് ഡിലീറ്റ് ചെയ്തതിനാണ് മർദനം എന്ന വാർത്തയിലാണ് നടപടി. പാറശാല എസ്എച്ച്ഒ, ജില്ലാ ശിശു സംരക്ഷണ ഓഫീസർ എന്നിവരോട് കമ്മിഷൻ വിശദീകരണം തേടി. വാട്‌സ്ആപ്പ് ഡിലീറ്റ് ചെയ്തതിനാണ് ആറുവയസുകാരിക്ക് അമ്മയുടെ ക്രൂരമര്‍ദനമുണ്ടായത്. ഉദിയന്‍കുളങ്ങര സ്വദേശികളായ വിഷ്ണു, ശോഭ ദമ്പതികളുടെ ഇളയ മകള്‍ വിഷ്ണു നന്ദയ്ക്കാണ് മര്‍ദനമേറ്റത്. സംഭവത്തില്‍ കുട്ടിയുടെ അമ്മയെ പൊലീസ് കസ്റ്റഡിയിലെടുത്തു. തടിക്കഷ്ണം ഉപയോഗിച്ചാണ് കുട്ടിയെ മര്‍ദിച്ചതെന്നാണ് വിവരം. മുഖത്തും കാലിലും പരുക്കേറ്റ കുട്ടിയെ കട്ടിലില്‍നിന്ന് വീണതാണെന്ന് പറഞ്ഞ് അമ്മയും അമ്മൂമ്മയും ചേര്‍ന്നാണ് ജനറല്‍ ആശുപത്രിയില്‍ എത്തിച്ചത്. കുട്ടി ജനറൽ ആശുപത്രിയിൽ ചികിത്സയിലാണ്.

ഏഷ്യാനെറ്റ് ന്യൂസ് ലൈവ് കാണാം

ഫസ്റ്റ് ക്ലാസിലുള്ളവരും പൈലറ്റുമാരും ഇറങ്ങി, വിമാനത്തിന്റെ ഡോർ തകർക്കാൻ ശ്രമിച്ച് എസി പോലുമില്ലാതെ ക്യാബിനിൽ കുടുങ്ങിയ യാത്രക്കാർ

Elsa TJ — Fri, 09 Oct 2026 20:55:22 +0530

അറ്റ്ലാന്റ: സാങ്കേതിക തകരാറ് വിമാനം ലാൻഡ് ചെയ്ത് മണിക്കൂറുകൾക്ക് ശേഷവും ക്യാബിനിൽ നിന്ന് പുറത്തിറങ്ങാനായില്ല. വിമാനത്തിന്റെ വാതിൽ തല്ലിത്തകർക്കാൻ ശ്രമിച്ച് യാത്രക്കാർ. എസി പോലുമില്ലാതെ കുടുങ്ങിയതോടെയാണ് യാത്രക്കാർ ക്ഷുഭിതരായത്. അമേരിക്കയിലെ അറ്റ്ലാൻറ വിമാനത്താവളത്തിൽ ലാൻഡ് ചെയ്ത ഫ്രോണ്ടിയർ വിമാനത്തിലാണ് അപ്രതീക്ഷിത സംഭവങ്ങൾ അരങ്ങേറിയത്. വിമാനത്തിൽ നിന്ന് എയർപോർട്ടിലേക്ക് ഇറങ്ങാനുള്ള പാലം തകരാറായതോടെയാണ് യാത്രക്കാർ വിമാനത്തിന്റെ ക്യാബിനിൽ കുടുങ്ങിയത്. വാതിൽ തുറക്കാൻ ശ്രമിച്ച യാത്രക്കാരെ വിമാനത്തിലെ പുരുഷ ക്രൂ അംഗങ്ങൾ തടയാൻ ശ്രമിച്ചത് വലിയ കോലാഹലമാണ് ക്യാബിനുള്ളിൽ ഉണ്ടാക്കിയത്.

ക്യാബിൻ ക്രൂ അംഗങ്ങളും യാത്രക്കാരും തമ്മിലുള്ള ബഹളത്തിന്റെ വീഡിയോ ദൃശ്യങ്ങളും സാമൂഹ്യ മാധ്യമങ്ങളിലൂടെ പുറത്ത് വന്നിട്ടുണ്ട്. 13 സെക്കൻഡ് ദൈർഘ്യമുള്ള വീഡിയോയിൽ യാത്രക്കാരിയെ തള്ളി പിന്നോട്ട് ആക്കാൻ ശ്രമിക്കുന്ന പുരുഷ ക്രൂ അംഗത്തെ കാണാൻ കഴിയും. യാത്രക്കാരിയെ സഹയാത്രികർ പിന്തുണയ്ക്കുന്നതായ വീഡിയോ ദൃശ്യങ്ങളാണ് പുറത്ത് വന്നത്. ന്യൂ ഓർലീൻസിൽ നിന്ന് പുറപ്പെട്ട എയർബസ് എ 321 വിമാനത്തിലാണ് സംഘർഷാവസ്ഥ രൂപം കൊണ്ടത്.

പുറത്തിറങ്ങാനുള്ള ജെറ്റ് ബ്രിഡ്ജിന് സമീപത്തേക്ക് വിമാനം എത്തിയതോടെ എൻജിനുകൾ ഓഫ് ചെയ്തതാണ് ക്യാബിനുള്ളിൽ എസിയും ലൈറ്റുകളും നിലയ്ക്കാൻ കാരണമായത്. ഒരു മണിക്കൂറിലേറെ ഇരുട്ടിൽ ശ്വാസം മുട്ടിയിരുന്ന ശേഷമാണ് യാത്രക്കാർ ബഹളമുണ്ടാക്കി തുടങ്ങിയത്. ഫസ്റ്റ് ക്ലാസ് യാത്രക്കാരെ ഇറക്കി പൈലറ്റുമാർ ക്യാബിൻ വിട്ടതോടെയാണ് ബഹളം സംഘർഷത്തിലേക്ക് വഴിമാറിയത്. വെള്ളം പോലും കിട്ടാതെ കൊടും ചൂടിലിരിക്കേണ്ടി വന്ന യാത്രക്കാരിൽ പലരും തല കറങ്ങി വീണു. യാത്രക്കാർ ദേഹാസ്വസ്ഥ്യം കാണിച്ചിട്ടും ക്രൂ അംഗങ്ങളുടെ ഭാഗത്ത് നിന്ന് അനുഭാവ പൂർണമുള്ള നടപടികളുണ്ടാവാത്തത് വലിയ രീതിയിലുള്ള വിമർശനം വിമാന കമ്പനിക്ക് നേരെ ഉയരാൻ കാരണമായിട്ടുണ്ട്. ഏതാനും യാത്രക്കാർ ഇറങ്ങിയതിന് പിന്നാലെ ഗേറ്റിലുണ്ടായ സാങ്കേതിക തകരാറാണ് പ്രശ്നങ്ങൾക്ക് കാരണമെന്നാണ് വിമാനകമ്പനി വിഷയത്തിൽ പ്രതികരിച്ചിട്ടുള്ളത്.

ഏഷ്യാനെറ്റ് ന്യൂസ് ലൈവ് കാണാം

കാമുകനൊപ്പം ഒളിച്ചോടിയ ഭാര്യയെ ശുദ്ധീകരിക്കാൻ കൂട്ടബലാത്സംഗം ചെയ്യിപ്പിച്ച് ഭർത്താവ്, 9 പേർ അറസ്റ്റിൽ

Elsa TJ — Wed, 07 Oct 2026 13:53:40 +0530

സൂറത്ത്: കാമുകനൊപ്പം ഒളിച്ചോടിയ ഭാര്യയെ ശുദ്ധീകരിക്കാൻ കൂട്ടബലാത്സംഗം ചെയ്യിപ്പിച്ച് ഭർത്താവ്. ഗുജറാത്തിലെ സുരേന്ദ്ര നഗർ ജില്ലയിൽ യുവതി കൂട്ടബലാത്സംഗത്തിനിരയായ സംഭവത്തിൽ പൊലീസ് ഭർത്താവ് അടക്കം 9 പേരെ പൊലീസ് അറസ്റ്റ് ചെയ്തു. ഭാര്യയ്ക്ക് കാമുകനുണ്ടെന്ന് വ്യക്തമായതിന് പിന്നാലെ യുവതിയെ ഭർത്താവും വീട്ടുകാരും ചേർന്ന് വീട്ടിൽ പൂട്ടിയിട്ടിരിക്കുകയായിരുന്നു. എന്നാൽ വീട്ടിൽ നിന്ന് പുറത്ത് കടന്ന യുവതി കാമുകനൊപ്പം ഒളിച്ചോടുകയായിരുന്നു. ഇതിന് പിന്നാലെ ഗ്രാമവാസികളും യുവതിയുടെ ഭർത്താവും ചേർന്ന് ഇരുവരേയും പിടികൂടി ഗ്രാമത്തിലേക്ക് തിരിച്ചെത്തിക്കുകയായിരുന്നു. ഗ്രാമത്തിലെത്തിച്ച യുവതിയെ മരത്തിൽ കെട്ടിയിട്ട ശേഷം ക്രൂരമായി ആക്രമിക്കുകയായിരുന്നു. ഇതിന് പിന്നാലെയാണ് യുവതി കൂട്ടബലാത്സംഗത്തിനിരയായത്. ആക്രമണത്തിന്റെ ദൃശ്യങ്ങൾ ഭർത്താവ് ചിത്രീകരിക്കുകയും ചെയ്തു. ഈ വീഡിയോ ദൃശ്യങ്ങൾ സാമൂഹ്യ മാധ്യമങ്ങളിലൂടെ പ്രചരിച്ചതോടെയാണ് സംഭവം പൊലീസിന്റെ ശ്രദ്ധയിൽപ്പെടുന്നത്. ക്രൂരമായ ആക്രമണത്തിൽ രണ്ട് സ്ത്രീകളും ഉൾപ്പെട്ടതായാണ് പൊലീസ് വിശദമാക്കുന്നത്.

ഏഷ്യാനെറ്റ് ന്യൂസ് ലൈവ് കാണാം

'ശ്രീരാജ് പെൺകുട്ടികളെ ഉപദ്രവിക്കുന്നത് പതിവാക്കിയ ക്രിമിനൽ, പാവപ്പെട്ട നിരവധി പെൺകുട്ടികളെ പ്രതികൾ കുടുക്കിയിട്ടുണ്ട്': വെളിപ്പെടുത്തലുമായി എസിപി

Sumam Thomas — Sat, 10 Oct 2026 10:39:46 +0530

കൊച്ചി: കളമശ്ശേരി കൂട്ടബലാത്സംഗ കേസിലെ ഒന്നാം പ്രതി ശ്രീരാജ് സ്പായുടെ മറവിൽ പെൺകുട്ടികളെ ഉപദ്രവിക്കുന്നത് പതിവാക്കിയ ക്രിമിനലെന്ന് പൊലീസ്. ഏറെ നാളായി കുറ്റകൃത്യം നടന്നുവരികയായിരുന്നുവെന്ന് എസിപി ബിജോയ് ചന്ദ്രൻ ഏഷ്യാനെറ്റ് ന്യൂസിനോട് പ്രതികരിച്ചു. കേസിൽ പിടിയിലായ ശരണ്യയും ശ്രീരാജിന്റെ കെണിയിൽ വീണതാണെന്ന് സംശയിക്കുന്നതായും പൊലീസ് വ്യക്തമാക്കി. പാവപ്പെട്ട നിരവധി പെൺകുട്ടികളെ പ്രതികൾ കുടുക്കിയിട്ടുണ്ടെന്നും എസിപി പറഞ്ഞു.

വളരെ ആലോചിച്ച് നടപ്പാക്കുന്ന പ്രക്രിയ ആയിട്ടാണ് മനസിലാക്കുന്നത്. നാളുകളായി ഇത് നടന്നുവരുന്നു എന്നാണ് വിവരം. നിരാലംബരായ പെൺകുട്ടികളാണ് ഇതിൽ വന്നു പെട്ടുപോകുന്നത്. ശ്രീരാജിനെ കുറിച്ച് അന്വേഷിച്ചപ്പോൾ ഇവിടെയുള്ള പല സ്പാകൾക്കും സ്ത്രീകളെ എത്തിച്ചു കൊടുക്കുന്നത് പോലും ശ്രീരാജാണ് എന്നാണ് മനസിലായത്. പൊലീസുകാർ തങ്ങളുടെ സുഹൃത്തുക്കളാണ്, ഞങ്ങൾക്കൊപ്പം ഗുണ്ടകളുണ്ട് എന്നൊക്കെ പെൺകുട്ടികളോട് പറയുമ്പോൾ പിന്നീട് ഇവർക്കെതിരെ സംസാരിക്കാൻ ഈ സ്ത്രീകൾ ഭയന്ന് തയ്യാറാകില്ല. ഗുണ്ടാ ബന്ധം ഉൾപ്പെടെ പറഞ്ഞു ഭീഷണിപ്പെടുത്തും. സ്പാകളിൽ ചൂഷണത്തിന് ഇരയായവരെ പുനരധിവസിപ്പിക്കുമെന്നും എസിപി വ്യക്തമാക്കി.

ശുചിമുറി ഫീസ് ജിപേ സ്വീകരിച്ചില്ല, അകത്ത് കയറിയതോടെ വാതിൽ തല്ലിപ്പൊളിക്കാൻ ശ്രമം, പുറത്തു വന്നപ്പോൾ മർദനവും, ജീവനക്കാർ പിടിയിൽ

Elsa TJ — Wed, 07 Oct 2026 09:27:11 +0530

കൊച്ചി: ശുചിമുറി ഉപയോഗിക്കുന്നതിനുള്ള 10 രൂപ ഗൂഗിൾ പേ വഴി നൽകാമെന്ന് പറഞ്ഞ യുവാവിനെ സംഘം ചേർന്ന് മർദിച്ച കേസിൽ രണ്ട് ശുചിമുറി ജീവനക്കാർ അറസ്റ്റിൽ. മറൈൻ ഡ്രൈവിലെ ശുചിമുറി ജീവനക്കാരായ കളമശേരി കൊടിയിൽവീട്ടിൽ എസ് അജിത്ത് (44), വരാപ്പുഴ എടമ്പാടം മഠത്തിപ്പറമ്പിൽ എം എം റോബിൻ (59) എന്നിവരെയാണ് സെൻട്രൽ പൊലീസ് അറസ്റ്റ് ചെയ്തത്. വാഴക്കുളം സ്വദേശി താജുദീനാണ് മർദനമേറ്റത്. തിങ്കളാഴ്ച ഉച്ചയ്ക്ക് രണ്ടോടെയായിരുന്നു സംഭവം. ജിസിഡിഎയുടെ കീഴിലുള്ള മറൈൻ ഡ്രൈവ് വോയിലെ ശുചിമുറി ഉപയോഗിക്കാനെത്തിയതായിരുന്നു താജുദീൻ.

ഫീസ് 10 രൂപ ഗൂഗിൾ പേ ചെയ്യാമെന്ന് താജുദീൻ പറഞ്ഞെങ്കിലും പണം മാത്രമേ സ്വീകരിക്കൂവെന്ന് ജീവനക്കാരൻ നിർബന്ധിച്ചതോടെയാണ് തർക്കമുണ്ടായത്. കയ്യിൽ പണമില്ലാതിരുന്നതിനാൽ അത്യാവശ്യത്തിന് ശുചിമുറിയിൽ കയറിയ താജുദീനെ ജീവനക്കാരൻ പിന്തുടർന്നെത്തി വാതിൽ തല്ലിപ്പൊളിക്കാൻ ശ്രമിച്ചെന്നും പുറത്തുവന്നപ്പോൾ മർദിച്ചെന്നുമാണ് പരാതി. വാതിൽ ബലമായി തുറന്നപ്പോൾ താജുദീന്റെ ചുണ്ടിന് പരുക്കേറ്റു. തുടർന്ന് ജീവനക്കാരനൊപ്പമുണ്ടായിരുന്ന മറ്റു മൂന്ന് പേർ ചേർന്ന് മുഖത്തും തലയിലും ഇടിച്ച് പരുക്കേൽപ്പിച്ചതായും പരാതിയിൽ പറയുന്നു. സുരക്ഷാ ജീവനക്കാർ വിവരമറിയിച്ചതിനെ തുടർന്ന് സെൻട്രൽ പൊലീസ് സ്ഥലത്തെത്തുകയായിരുന്നു.

ഏഷ്യാനെറ്റ് ന്യൂസ് ലൈവ് കാണാം

7 വർഷമായിട്ടും കുട്ടികളില്ല, ഭർത്താവിന് പരസ്ത്രീ ബന്ധമെന്ന് സംശയം, മയക്കിക്കിടത്തി സ്വകാര്യ ഭാഗങ്ങൾ കുത്തിക്കീറി ഭാര്യ, അറസ്റ്റ്

Elsa TJ — Fri, 09 Oct 2026 21:48:33 +0530

മീററ്റ്: മറ്റൊരു സ്ത്രീയുമായി ബന്ധമെന്ന് സംശയത്തിന് പിന്നാലെ ഭർത്താവിനെ മയക്കിക്കിടത്തി സ്വകാര്യ ഭാഗങ്ങൾ കത്തി കൊണ്ട് കുത്തിക്കീറി ഭാര്യ. ഉത്തർ പ്രദേശിലെ മീററ്റിലാണ് സംഭവം. സാരമായി പരിക്കേറ്റ യുവാവിന്റെ പരാതിയിൽ ഭാര്യയെ പൊലീസ് വെള്ളിയാഴ്ച അറസ്റ്റ് ചെയ്തു. ലിസാരി പൊലീസ് സ്റ്റേഷൻ പരിധിയിൽ വരുന്ന ജെയ്ഡ് ഗാർഡനിലാണ് സംഭവമുണ്ടായത്. ശബ്നം എന്ന യുവതിയെയാണ് ഭർത്താവിനെ ആക്രമിച്ചതിന് അറസ്റ്റ് ചെയ്തത്. നദീം എന്ന യുവാവ് പരിക്കേറ്റ് ചികിത്സയിൽ തുടരുകയാണ്. കോട്വാലി സർക്കിൾ ഓഫീസർ വ്യക്തമാക്കുന്നത് അനുസരിച്ച് അടുക്കളയിൽ ഉപയോഗിക്കുന്ന കത്തി വച്ചാണ് നദീമിനെ ശബ്നം ആക്രമിച്ചത്. വൈകുന്നേരം നൽകിയ കാപ്പിയിൽ ഉറക്കു മരുന്ന് കലർത്തി നൽകിയ ശേഷമായിരുന്നു ആക്രമണം. പരിക്കേറ്റ് രക്തം വാർന്ന നലയിൽ ബന്ധുക്കളാണ് നദീമിനെ കണ്ടെത്തിയത്.

ഏഴ് വർഷങ്ങൾക്ക് മുൻപ് വിവാഹിതരായ ദമ്പതികൾക്ക് കുട്ടികളുണ്ടായിരുന്നില്ല. ഇതിനിടയിലാണ് നദീം മറ്റൊരു വിവാഹത്തിന് ഒരുങ്ങുന്നതായി ശബ്നത്തിന് സംശയം തോന്നിയത്. ഇതിനെ ചൊല്ലി ഇവർക്കിടയിൽ കലഹം പതിവായിരുന്നു. ആക്രമണത്തിന് പിന്നാലെ ഒളിവിൽ പോയ ശബ്നത്തെ പൊലീസ് പരാതിക്ക് പിന്നാലെ അറസ്റ്റ് ചെയ്യുകയായിരുന്നു.

ഏഷ്യാനെറ്റ് ന്യൂസ് ലൈവ് കാണാം

വസ്ത്രവ്യാപാര സ്ഥാപനത്തിൽ കയറി ജീവനക്കാരിയെ കുത്തിക്കൊന്നു; മുൻ ജീവനക്കാരൻ പിടിയിൽ

Web Desk — Sun, 11 Oct 2026 21:06:57 +0530

ഹൈദരാബാദ്: വസ്ത്രവ്യാപാര സ്ഥാപനത്തിൽ കയറി ജീവനക്കാരിയെ കുത്തിക്കൊന്നു. കടയിലെ മുൻ ജീവനക്കാരനാണ് യുവതിയെ കുത്തിക്കൊലപ്പെടുത്തിയത്. പ്രതിയെ പൊലീസ് കസ്റ്റഡിയിലെടുത്തു.

ഹൈദരാബാദിലെ അസംപുരയിലെ മൻഹ എന്ന വസ്ത്രവ്യാപാര സ്ഥാപനത്തിൽ ശനിയാഴ്ച രാത്രിയായിരുന്നു സംഭവം. ഹോൾസെയിൽ വസ്ത്രവ്യാപാര സ്ഥാപനത്തിലെ ജീവനക്കാരിയായ ചഞ്ചൽഗുഡ നിവാസി താഹിറ ബാനു(35)ആണ് കൊല്ലപ്പെട്ടത്. സ്ഥാപനത്തിലെ മുൻ ജീവനക്കാരനായ മുഹമ്മദ് ഇബ്രാഹിമാണ് താഹിറയെ കൊലപ്പെടുത്തിയത്.

രാത്രി 9.40-ഓടെ കടയിലേക്ക് ഓടിയെത്തിയ പ്രതി കൈയിൽ കരുതിയ കത്തി ഉപയോഗിച്ച് യുവതിയെ കുത്തിപ്പരിക്കേൽപ്പിക്കുകയായിരുന്നു. ഗുരുതരമായി പരിക്കേറ്റ യുവതിയെ ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിന് പിന്നാലെ പ്രതിയായ മുഹമ്മദ് ഇബ്രാഹിമിനെ പൊലീസ് കസ്റ്റഡിയിലെടുത്തിരുന്നു.

ഒരുമിച്ച് ജോലിചെയ്യുന്നതിനിടെ താനും താഹിറ ബാനുവും തമ്മിൽ അടുപ്പത്തിലായിരുന്നുവെന്നും യുവതി പിന്നീട് ബന്ധത്തിൽനിന്ന് അകന്നതാണ് കൊലപാതകത്തിന് കാരണമായതെന്നുമാണ് പ്രതിയുടെ മൊഴി. പ്രതിയായ മുഹമ്മദ് ഇബ്രാഹിം വിവാഹിതനും രണ്ട് കുട്ടികളുടെ പിതാവുമാണ്. ഇയാളുടെ മൊഴികൾ പരിശോധിച്ചുവരികയാണെന്നും കൊലപാതകത്തിന് പിന്നിലെ കാരണം സ്ഥിരീകരിച്ചിട്ടില്ലെന്നും പൊലീസ് പറഞ്ഞു. അതേസമയം, പ്രതിക്ക് നേരേ ആക്രണമുണ്ടാകാൻ സാധ്യതയുള്ളതിനാൽ ഇയാളെ പിന്നീട് മലകാപേട്ട് പൊലീസ് സ്റ്റേഷനിലേക്ക് മാറ്റി.

വിജിത്ത് കൊലപാതകം: 7 വർഷമായി ഒളിവില്‍ കഴിഞ്ഞിരുന്ന പ്രതി പിടിയില്‍

Elsa TJ — Sat, 10 Oct 2026 21:46:47 +0530

തൃശൂര്‍: 2019ല്‍ മതിലകം പോലീസ് സ്റ്റേഷന്‍ പരിധിയില്‍ നടന്ന കൊലപാതകക്കേസില്‍ പോലീസിനെ വെട്ടിച്ച് ഒളിവില്‍ കഴിഞ്ഞിരുന്ന ഒഡീഷ സ്വദേശി ബിക്കാരി മാലിക്ക് (36) അറസ്റ്റിലായി. ഒഡീഷയിലെ ഗഞ്ചാം ജില്ലയില്‍ ജഹാഡ സ്വദേശിയായ ഇയാളെ തൃശൂര്‍ റൂറല്‍ ജില്ലാ പോലീസ് മേധാവി മുഹമ്മദ് നദീമിന്റെ നിര്‍ദേശപ്രകാരം നടത്തിയ അന്വേഷണത്തിലാണ് പിടികൂടിയത്. ഒളിവില്‍ പോയതിനെത്തുടര്‍ന്ന് ഇയാളെ പിടികൂടുന്നതിനായി കൊടുങ്ങല്ലൂര്‍ ജുഡീഷ്യല്‍ മജിസ്‌ട്രേറ്റ് കോടതി വാറണ്ട് പുറപ്പെടുവിച്ചിരുന്നു. ഈ വാറണ്ട് പ്രകാരമാണ് പ്രതിയെ അറസ്റ്റ് ചെയ്തത്. പടിഞ്ഞാറേ വെമ്പല്ലൂര്‍ ചന്ദന സ്വദേശിയായ വിജിത്ത് കൊല്ലപ്പെട്ട കേസിലെ പ്രതിയാണ് ബിക്കാരി മാലിക്ക്. വിജിത്തിനെ കൊലപ്പെടുത്തിയ ശേഷം മൃതദേഹം ബ്ലാങ്കറ്റില്‍ പൊതിഞ്ഞ് ആള്‍താമസമില്ലാതെ കാടുപിടിച്ചു കിടന്നിരുന്ന പറമ്പില്‍ ഒളിപ്പിക്കുകയായിരുന്നു. സംഭവത്തിനുശേഷം ഒഡീഷയിലേക്ക് കടന്ന പ്രതിയെ അവിടെനിന്നാണ് പോലീസ് പിടികൂടിയത്.

കേസിലെ മറ്റു പ്രതികളെ 2019ല്‍ നിലവിലെ മതിലകം സര്‍ക്കിള്‍ ഇന്‍സ്‌പെക്ടര്‍ വിമല്‍ വി.വി.യുടെ നേതൃത്വത്തില്‍ ഒഡീഷയില്‍നിന്ന് അറസ്റ്റ് ചെയ്തിരുന്നു. മതിലകം പോലീസ് സ്റ്റേഷന്‍ ഹൗസ് ഓഫീസര്‍ നെസിയ എം.യുടെ നേതൃത്വത്തില്‍ സീനിയര്‍ സിവില്‍ പോലീസ് ഓഫീസര്‍ പ്രബിന്‍, സിവില്‍ പോലീസ് ഓഫീസര്‍ ബിനില്‍ എന്നിവര്‍ ഒഡീഷയിലെത്തി ദിവസങ്ങളോളം താമസിച്ച് പ്രതിയുടെ താമസസ്ഥലം നിരീക്ഷിച്ചും മറ്റും നടത്തിയ ശാസ്ത്രീയ അന്വേഷണത്തിനൊടുവിലാണ് പ്രതിയെ പിടികൂടിയത്.

ഏഷ്യാനെറ്റ് ന്യൂസ് ലൈവ് കാണാം

ജോലിയിൽ നിന്ന് പിരിച്ചുവിട്ടു, നടപടിക്ക് മുൻകൈ എടുത്തയാളുടെ പേരക്കുട്ടിയെ ക്രൂരമായി കൊലപ്പെടുത്തി, മുൻ സെക്യൂരിറ്റി ജീവനക്കാരനായി തെരച്ചിൽ

Elsa TJ — Sun, 11 Oct 2026 19:59:47 +0530

സെക്കന്ദരാബാദ്: തെലങ്കാനയിലെ സെക്കന്ദരാബാദിന് സമീപത്ത് നിന്ന് കാണാതായ അഞ്ച് വയസുകാരി കൊല്ലപ്പെട്ടനിലയിൽ. കൃഷി ശാസ്ത്രജ്ഞനായ ഫെർണാണ്ടസ് മോസസിന്റെ അഞ്ച് വയസ്സുള്ള മകൾ ഔറേലി മോസസ് ഫെർണാണ്ടസ് ആണ് കൊല്ലപ്പെട്ടത്. ബൊല്ലാറം പോലീസ് സ്റ്റേഷൻ പരിധിയിലെ വില്ല ഓർക്കിഡ്സ് എന്ന വില്ല സമുച്ചയത്തിൽ നിന്ന് ശനിയാഴ്ച വൈകുന്നേരമാണ് ഔറേലി മോസസ് ഫെർണാണ്ടസിനെ കാണാതായത്. വൈകുന്നേരം സ്വന്തം വില്ലയ്ക്ക് സമീപം കളിച്ചുകൊണ്ടിരുന്ന കുട്ടിയെ കാണാതാവുകയായിരുന്നു. കുട്ടിയെ വില്ല സമുച്ചയത്തിലെ മുൻ സെക്യൂരിറ്റി ജീവനക്കാരനാണ് തട്ടിക്കൊണ്ട് പോയതെന്ന് അന്വേഷണത്തിൽ വ്യക്തമായിരുന്നു. ഇയാളുടെ മോശം പെരുമാറ്റത്തിന്റെ പേരിൽ വിക്രമിനെ ജോലിയിൽ നിന്ന് പിരിച്ചുവിട്ടിരുന്നു. വിക്രമിനെ പിരിച്ചുവിടാൻ മുന്നിൽ നിന്നവരിൽ കുട്ടിയുടെ മുത്തശ്ശനും ഉൾപ്പെട്ടിരുന്നു. ഈ വ്യക്തിവൈരാഗ്യമാണ് ക്രൂരമായ കുറ്റകൃത്യത്തിന് പിന്നിലെ പ്രധാന കാരണമെന്നാണ് പോലീസ് വിശദമാക്കുന്നത്. ശനിയാഴ്ച വൈകുന്നേരം വിക്രം 5 വയസുകാരിയുടെ വീട്ടുകാരെ വിളിച്ച് 20 ലക്ഷം രൂപ മോചനദ്രവ്യം ചോദിച്ചിരുന്നു.

പണം നൽകാമെന്ന് കുടുംബം സമ്മതിച്ചെങ്കിലും തുക കൈപ്പറ്റുന്നതിന് പകരം പ്രതി മൊബൈൽ ഫോൺ സ്വിച്ച് ഓഫ് ചെയ്യുകയായിരുന്നു. തുടർന്ന് കുട്ടിയുടെ മാതാപിതാക്കൾ നൽകിയ പരാതിയുടെ അടിസ്ഥാനത്തിലാണ് പൊലീസ് വ്യാപക തിരച്ചിൽ നടത്തിയത്.ഈ അന്വേഷണത്തിനിടയിലാണ് ഗേറ്റഡ് കമ്മ്യൂണിറ്റിയിലെ ക്ലബ്ബ് ഹൗസിന്റെ സെല്ലാറിലുള്ള ടാങ്കിൽ കൈകാലുകൾ കൂട്ടിക്കെട്ടിയ നിലയിൽ കുട്ടിയുടെ മൃതദേഹം കണ്ടെത്തുകയായിരുന്നു. സിസിടിവി ദൃശ്യങ്ങൾ പരിശോധിച്ചപ്പോൾ വിക്രം കുട്ടിയെ പിന്തുടരുന്നത് വ്യക്തമായി കണ്ടിട്ടുണ്ട്. പോലീസിന്റെ പ്രാഥമിക നിഗമനമനുസരിച്ച് മോചനദ്രവ്യം ആവശ്യപ്പെട്ടതിന് തൊട്ടുപിന്നാലെ തന്നെ കുട്ടിയെ വധിച്ച ശേഷം മൃതദേഹം വാട്ടർ ടാങ്കിൽ തള്ളുകയായിരുന്നു.പ്രതിയെ പിടികൂടാനായി പോലീസ് 10 പ്രത്യേക അന്വേഷണ സംഘങ്ങൾക്ക് രൂപം നൽകിയിട്ടുണ്ട്.

ഏഷ്യാനെറ്റ് ന്യൂസ് ലൈവ് കാണാം

പ്രിയദർശിനി ബസിൽ വിദ്യാർത്ഥിനിക്ക് നേരെ ലൈംഗിക അതിക്രമം: പ്രതി പിടിയിൽ

Deepu Divakaran — Fri, 09 Oct 2026 23:06:25 +0530

കോഴിക്കോട്: കെഎസ്ആർടിസി പ്രിയദർശിനി ബസിൽ വിദ്യാർത്ഥിനിക്ക് നേരെ ലൈംഗിക അതിക്രമം നടത്തിയ പ്രതി പിടിയിൽ. കോഴിക്കോട് നടുവണ്ണൂർ കരുവണ്ണൂർ സ്വദേശി രാജേഷ് ആണ് പിടിയിലായത്. താമരശ്ശേരി പരപ്പൻപൊയിലിൽ നിന്ന് പടനിലത്തേക്ക് ബസ് കയറിയ വിദ്യാർത്ഥിനിക്ക് നേരെയാണ് ലൈംഗിക അതിക്രമം ഉണ്ടായത്.

ഇക്കഴിഞ്ഞ അഞ്ചാം തീയതിയായിരുന്നു സംഭവം. നിറയെ യാത്രക്കാരുമായി പോയ ബസ് മണ്ണിൽകടവ് എന്ന സ്ഥലത്ത് എത്തിയപ്പോഴായിരുന്നു ലൈംഗിക അതിക്രമം. സഹികെട്ട പെൺകുട്ടി ഉറക്കെ ബഹളം വെക്കുകയും ദൃശ്യങ്ങൾ പകർത്തുകയുമായിരുന്നു. തുടർന്ന് ബസ് നിർത്തിയതോടെ പ്രതി ഇറങ്ങിയോടുകയായിരുന്നു. സംഭവത്തിൽ കൊടുവള്ളി പൊലീസ് കേസെടുത്ത് അന്വേഷണം തുടങ്ങിയിരുന്നു.

വാടാനപ്പള്ളി കടപ്പുറത്തെ ഗുണ്ടാനേതാവിന്റെ കൊലപാതകം: വാരിയെല്ല് തകർന്നു, ജനനേന്ദ്രിയത്തിലും ഗുരുതരപരിക്ക്; മൂന്ന് പ്രതികൾ പിടിയിൽ

അഫീഫ്. എം — Thu, 08 Oct 2026 02:46:13 +0530

തൃശ്ശൂർ: വാടാനപ്പള്ളിയിൽ ഗുണ്ടാനേതാവായ യുവാവ് കൊല്ലപ്പെട്ട സംഭവത്തിൽ മൂന്ന് പ്രതികൾ പിടിയിലായി. വാടാനപ്പള്ളി സ്വദേശികളായ ഫായിസ്, ഷെഹിൻ, ബിലാൽ എന്നിവരാണ് പിടിയിലായത്. കേസിൽ ഇനി രണ്ടുപേർ കൂടി പിടിയിലാകാനുണ്ട്. ബിൻഷാദ്, റയീസ് എന്നിവരാണ് പിടിയിലാകാനുള്ളത്. ഇവർക്കായി പൊലീസിന്റെ തെരച്ചിൽ തുടരുകയാണ്.

വാടാനപ്പള്ളി സ്വദേശിയായ സലാമിനെയാണ് ഫസൽ നഗർ കടപ്പുറത്ത് കഴിഞ്ഞദിവസം മരിച്ചനിലയിൽ കണ്ടെത്തിയത്. സംഭവം കൊലപാതകമാണെന്ന് പൊലീസിന്റെ പ്രാഥമിക അന്വേഷണത്തിലും പോസ്റ്റ്മോർട്ടത്തിലും തെളിഞ്ഞിരുന്നു. അതിക്രൂരമായാണ് യുവാവിനെ കൊലപ്പെടുത്തിയതെന്നാണ് പോസ്റ്റ്മോർട്ടം റിപ്പോർട്ട്. ശരീരമാസകലം മുറിവുകളുണ്ട്. മർദനമേറ്റ് വാരിയെല്ല് തകർന്നനിലയിലായിരുന്നു. ജനനേന്ദ്രിയത്തിലും ഗുരുതര പരിക്കേറ്റിട്ടുണ്ട്. സ്ഥലത്തെ കുപ്രസിദ്ധ ഗുണ്ടയായിരുന്നു കൊല്ലപ്പെട്ട സലാം.

ചൊവ്വാഴ്ച രാത്രിയാണ് പ്രതികളും സലാമും തമ്മിൽ തർക്കമുണ്ടായതെന്നാണ് വിവരം. പ്രതികളിൽ ബിൻഷാദ് അടക്കമുള്ളവരും ഗുണ്ടകളാണ്. തർക്കത്തിന് പിന്നാലെ ഇവർ ഇടിക്കട്ട ഉൾപ്പെടെ ഉപയോഗിച്ച് സലാമിനെ ആക്രമിക്കുകയായിരുന്നു.

ഒളിപ്പിച്ച ഫോണിലെ ചാറ്റിൽ തെളിഞ്ഞു സത്യം; ഹൃദയാഘാതമല്ല, യുവാവിന്റെ മരണം കൊലപാതകം; കൊലപ്പെടുത്തിയത് ഭാര്യയും കാമുകനും

Web Desk — Wed, 07 Oct 2026 09:42:36 +0530

മീററ്റ്: ഉത്തർപ്രദേശിലെ മീററ്റിലെ യുവാവിന്റെ മരണം കൊലപാതകമെന്ന് പൊലീസ്. ഭാര്യയും ഇവരുടെ കാമുകനും ചേർന്ന് യുവാവിനെ കൊലപ്പെടുത്തിയെന്നാണ് കണ്ടെത്തൽ. സംഭവത്തിൽ ഭാര്യയെ പൊലീസ് കസ്റ്റഡിയിലെടുത്തു.

മീററ്റ് ലോഹ്യനഗർ സ്വദേശി താലിബി(30)ന്റെ മരണമാണ് ദിവസങ്ങൾക്ക് ശേഷം കൊലപാതകമാണെന്ന് തെളിഞ്ഞത്. സംഭവത്തിൽ താലിബിന്റെ ഭാര്യയും ബ്യൂട്ടീഷ്യനുമായ ഇൽമ(27)യാണ് പൊലീസിന്റെ പിടിയിലായത്. ഇൽമയുടെ കാമുകൻ അമനും ഇയാളുടെ സുഹൃത്തിനും കൃത്യത്തിൽ പങ്കുണ്ടെന്നും പൊലീസ് പറഞ്ഞു.

സെപ്റ്റംബർ 28-നാണ് വീട്ടിൽവെച്ച് താലിബ് മരണപ്പെട്ടത്. ജോലി കഴിഞ്ഞെത്തിയ താലിബ് പെട്ടെന്ന് കുഴഞ്ഞുവീണെന്നും പിന്നാലെ മരണം സംഭവിച്ചെന്നുമാണ് ഭാര്യ ബന്ധുക്കളെ അറിയിച്ചിരുന്നത്. ഹൃദയാഘാതം കാരണമാണ് യുവാവ് മരിച്ചതെന്ന് ബന്ധുക്കളും വിശ്വസിച്ചു. തുടർന്ന് മൃതദേഹം മറവുചെയ്യുകയും ചെയ്തു. എന്നാൽ, ഒക്ടോബർ ഒന്നാം തീയതി വീട്ടിലെത്തിയ ബന്ധു താലിബിന്റെ മൊബൈൽഫോൺ കണ്ടെടുത്ത് ഇത് പരിശോധിച്ചതോടെയാണ് മരണത്തിൽ സംശയമുണർന്നത്.

താലിബിന്റെ മരണത്തിന് പിന്നാലെ ഇയാളുടെ മൊബൈൽഫോൺ ഭാര്യ ഒളിപ്പിച്ചിരുന്നു. ഇതിനിടെയാണ് വീട്ടിലെത്തിയ ബന്ധുവായ റയീസ് ഈ മൊബൈൽഫോൺ വസ്ത്രങ്ങൾക്കിടയിൽനിന്ന് കണ്ടെത്തിയത്. തുടർന്ന് ഇദ്ദേഹം ഫോൺ പരിശോധിച്ചതോടെ സംശയാസ്പദമായ ചില ചാറ്റുകൾ കണ്ടു. അമനുമായി താലിബ് നടത്തിയ ചാറ്റുകളാണ് സംശയത്തിനിടയാക്കിയത്. തന്റെ ഭാര്യയോട് സംസാരിക്കരുതെന്ന് താലിബ് അമനോട് പറഞ്ഞതാണ് ചാറ്റിലുണ്ടായിരുന്നത്. ഇത് കണ്ടതോടെ ബന്ധുക്കൾക്ക് സംശയമായി. തുടർന്ന് ഇൽമയെ ബന്ധുക്കൾ ചോദ്യംചെയ്തതോടെ യുവതി കുറ്റംസമ്മതിക്കുകയും തുടർന്ന് പ്രതിയെ പൊലീസിന് കൈമാറുകയുമായിരുന്നു.

നാലുവർഷം മുൻപാണ് താലിബും ഇൽമയും വിവാഹിതരായത്. ദമ്പതിമാർക്ക് മൂന്നുവയസ്സുള്ള മകളുണ്ട്. ഇതിനിടെ അമനും ഇൽമയും അടുപ്പത്തിലായി. ഇക്കാര്യം താലിബ് അറിഞ്ഞു. സെപ്റ്റംബർ 28-ന് താലിബ് ഭാര്യയെ മർദിച്ചു. ഇതിന്റെ വൈരാഗ്യത്തിലാണ് ഇൽമ കാമുകനെ വീട്ടിലേക്ക് വിളിച്ചുവരുത്തിയത്. ഒരു സുഹൃത്തുമായാണ് അമൻ വീട്ടിലെത്തിയത്. തുടർന്ന് മൂവരും ചേർന്ന് താലിബിനെ മർദിച്ചു. പിന്നാലെ അമൻ ഷാൾ ഉപയോഗിച്ച് താലിബിനെ കഴുത്തുഞെരിച്ച് കൊല്ലുകയായിരുന്നു. താലിബ് കൊല്ലപ്പെട്ടെന്ന് ഉറപ്പിച്ചതോടെ ഇത് സ്വഭാവിക മരണമായി ചിത്രീകരിക്കാനും പ്രതികൾ തീരുമാനിച്ചു. ഇൽമയെ വിവാഹം കഴിക്കാമെന്നും അമൻ ഉറപ്പുനൽകി. തുടർന്നാണ് താലിബ് കുഴഞ്ഞുവീണ് മരിച്ചെന്ന് ഇൽമ ബന്ധുക്കളെ അറിയിച്ചത്.

സംഭവത്തിൽ പ്രതികൾക്കെതിരേ കൊലക്കുറ്റം ചുമത്തി കേസെടുത്തതായി പൊലീസ് അറിയിച്ചു. യുവാവിന്റെ മൃതദേഹം പുറത്തെടുത്ത് പോസ്റ്റ്മോർട്ടം ചെയ്യുമെന്നും ഇതിനുശേഷം തുടർനടപടികളിലേക്ക് കടക്കുമെന്നും പൊലീസ് പറഞ്ഞു.

ട്രെയിനിൽ യുവതിക്ക് നേരെ ലൈംഗികാതിക്രമം: എറണാകുളം സ്വദേശി അറസ്റ്റിൽ, പ്രതി പിടിയിലായത് പാലക്കാട് നിന്ന്, സംഭവം ശബരി എക്സ്പ്രസിൽ

Sumam Thomas — Tue, 06 Oct 2026 23:21:19 +0530

കൊച്ചി: ട്രെയിനിൽ യുവതിക്ക് നേരെ ലൈംഗികാതിക്രമം. എറണാകുളത്തുനിന്ന് പാലക്കാട്ടേക്ക് യാത്ര ചെയ്ത യുവതിക്ക് നേരെയായിരുന്നു ലൈംഗികാതിക്രമം നടന്നത്. സംഭവത്തിലെ പ്രതിയായ കടമക്കുടി സ്വദേശി ശ്രീനേഷിനെ പാലക്കാട് നിന്നും പൊലീസ് അറസ്റ്റ് ചെയ്തു. ചിറ്റൂരിലെ സ്വകാര്യ മെഡിക്കൽ കോളേജിലെ അവസാന വർഷ വിദ്യാർത്ഥിയാണ് പ്രതി. നിലവിൽ രണ്ട് കേസുകളിലെ പ്രതി കൂടിയാണ് ഇയാൾ. ശബരി എക്സ്പ്രസിലാണ് അതിക്രമം നടന്നത്.

ഭിന്നശേഷിക്കാരിയായ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച് ദൃശ്യങ്ങൾ പകർത്തിയ കേസ്: പ്രതികൾക്ക് 20 വർഷം കഠിന തടവ്

Web Desk — Sat, 10 Oct 2026 04:57:10 +0530

ബെംഗളൂരു: ബെംഗളൂരുവിൽ ഭിന്നശേഷിക്കാരിയായ പ്രായപൂർത്തിയാകാത്ത പെൺകുട്ടിയെ ക്രൂരമായി പീഡിപ്പിക്കുകയും ദൃശ്യങ്ങൾ മൊബൈൽ ഫോണിൽ പകർത്തുകയും ചെയ്ത കേസിൽ പ്രതികൾക്ക് 20 വർഷം കഠിന തടവ്. ബെംഗളൂരു സൗത്ത് ഡിസ്ട്രിക്റ്റ് കോടതിയാണ് പ്രതികളായ ലോകേഷ്, ഗുരുപ്രസാദ് എന്നിവർക്ക് കഠിനശിക്ഷ വിധിച്ചത്. കേസിൽ ഇരയായ പെൺകുട്ടിക്ക് 5 ലക്ഷം രൂപ ധനസഹായം നൽകാനും കോടതി ഉത്തരവിട്ടു.

പ്രായപൂർത്തിയാകാത്ത ഭിന്നശേഷിക്കാരിയായ പെൺകുട്ടിയെ ക്രൂരമായ ലൈംഗിക അതിക്രമത്തിന് ഇരയാക്കിയ സംഭവത്തിലാണ് കോടതി പ്രതികൾക്ക് ശിക്ഷ വിധിച്ചിരിക്കുന്നത്. 2020 ഒക്ടോബറിൽ കുദൂരു പൊലീസ് സ്റ്റേഷന്റെ പരിധിയിലായിരുന്നു സംഭവം. പെൺകുട്ടിയെ ക്രൂരമായി ഉപദ്രവിച്ച പ്രതികൾ ദൃശ്യങ്ങൾ മൊബൈൽ ഫോണിൽ പകർത്തുകയും ചെയ്തിരുന്നു. സംഭവത്തിൽ പരാതി ഉയർന്നതോടെ, അതിവേഗം അന്വേഷണം പൂർത്തിയാക്കിയ കുദൂരു പൊലീസ് പ്രതികളെ അറസ്റ്റ് ചെയ്യുകയും കൃത്യമായ തെളിവുകളോടെ കോടതിയിൽ കുറ്റപത്രം സമർപ്പിക്കുകയും ചെയ്തു. തുടർന്ന് നടന്ന ദീർഘമായ വിചാരണ നടപടികൾക്കൊടുവിലാണ് പ്രതികൾ കുറ്റക്കാരാണെന്ന് കോടതി കണ്ടെത്തിയത്.

ഒന്നാം പ്രതി ലോകേഷിന് 20 വർഷം കഠിന തടവും പതിനായിരം രൂപ പിഴയുമാണ് ശിക്ഷ. കുറ്റകൃത്യത്തിൽ പങ്കുചേരുകയും ഒന്നാം പ്രതി പെൺകുട്ടിയെ ഉപദ്രവിക്കുന്ന ദൃശ്യങ്ങൾ മൊബൈൽ ഫോണിൽ പകർത്തുകയും ചെയ്ത രണ്ടാം പ്രതി ഗുരുപ്രസാദിന് 5 വർഷം തടവും അയ്യായിരം രൂപ പിഴയുമാണ് ശിക്ഷ. ഒന്നാം അഡീഷണൽ സെഷൻസ് കോടതി ജഡ്ജി പഞ്ചാക്ഷരിയുടേതാണ് ഉത്തരവ്. ശാരീരികമായും മാനസികമായും അതിക്രമം നേരിട്ട പെൺകുട്ടിക്ക് സർക്കാർ അഞ്ച് ലക്ഷം രൂപ അടിയന്തരമായി നൽകണമെന്നും കോടതി ഉത്തരവിൽ വ്യക്തമാക്കിയിട്ടുണ്ട്

കൊച്ചിയെ ഞെട്ടിച്ച കൂട്ടബലാത്സംഗം: അമ്മു യുവതിയെ പീഡിപ്പിക്കുമ്പോൾ കാവൽനിന്ന് മറ്റുള്ളവ‍ർ; ഒളിവിലായിരുന്ന അമ്മുവും ജിതിനും വയനാട്ടിൽനിന്ന് പിടിയിൽ

അഫീഫ്. എം — Wed, 07 Oct 2026 11:54:34 +0530

കൊച്ചി: കളമശ്ശേരി കൂട്ടബലാത്സംഗക്കേസിൽ ഒളിവിലായിരുന്ന രണ്ട് പ്രതികൾ കൂടി പിടിയിലായി. രണ്ടാംപ്രതി അമ്മു എന്ന ശരണ്യയെയും നാലാംപ്രതി ജിതിനെയുമാണ് പൊലീസ് പിടികൂടിയത്. രണ്ടുപ്രതികളെയും വയനാട്ടിലെ പുൽപ്പള്ളിയിൽനിന്നാണ് പൊലീസ് കസ്റ്റഡിയിലെടുത്തത്. ബുധനാഴ്ച ഉച്ചയോടെ പ്രതികളെ കളമശ്ശേരി പൊലീസ് സ്റ്റേഷനിലെത്തിക്കും.

പത്തടിപ്പാലത്തെ സ്പായിൽ ജോലി വാഗ്ദാനംചെയ്താണ് യുവതിയെ കൂട്ടബലാത്സംഗം ചെയ്തത്. കേസിൽ ഒന്നാംപ്രതി ശ്രീരാജ്, മൂന്നാംപ്രതി ജിത്ത് മാർട്ടിൻ എന്നിവരെ കഴിഞ്ഞദിവസം അറസ്റ്റ് ചെയ്തിരുന്നു. ഇതിനിടെയാണ് ശരണ്യയും ജിതിനും ഒളിവിൽപോയത്. തുടർന്ന് പൊലീസ് നടത്തിയ ഊർജിതമായ തെരച്ചിലിലാണ് ഒളിവിൽകഴിയുകയായിരുന്ന രണ്ടുപേരെയും വയനാട്ടിൽനിന്ന് പിടികൂടിയത്. ഇതോടെ കേസിലെ നാലുപ്രതികളും പിടിയിലായി.

ഒക്ടോബർ രണ്ടാം തീയതിയാണ് യുവതിയെ സ്പായിലേക്ക് വിളിച്ചുവരുത്തി പ്രതികൾ കൂട്ടബലാത്സംഗം ചെയ്തത്. പത്തടിപ്പാലത്തെ സ്പായിൽ മാനേജരായി ജോലി അവസരമുണ്ടെന്ന് പ്രതികൾ ഓൺലൈനിൽ പരസ്യംചെയ്തിരുന്നു. ഈ ജോലിക്കായി യുവതിയും അപേക്ഷിച്ചു. രണ്ടാംതീയതി യുവതി നേരിട്ട് അഭിമുഖത്തിനെത്തി. അതേദിവസം വൈകുന്നേരം തന്നെ ജോലി ലഭിച്ചെന്നും വൈകിട്ട് പാർട്ടിയുണ്ടെന്നും പറഞ്ഞ് പ്രതികൾ യുവതിയെ വീണ്ടും വിളിച്ചുവരുത്തി. സ്പായിൽ ശരണ്യയടക്കം ഉണ്ടെന്ന ധൈര്യത്തിലാണ് യുവതി വൈകിട്ട് വീണ്ടുംപോയത്. യുവതിയുടെ ഭർത്താവ് കൊച്ചിയിൽ ഓൺലൈൻ ടാക്സി ഡ്രൈവറാണ്. ഇദ്ദേഹം ടാക്സി ഓടാൻ പോയെന്ന് ഉറപ്പുവരുത്തിയശേഷമാണ് പ്രതികൾ യുവതിയെ വിളിച്ചുവരുത്തിയത്. എന്നാൽ, സ്പായിലെത്തിയ യുവതിയെ പ്രതികൾ അതിക്രൂരമായി ഉപദ്രവിക്കുകയായിരുന്നു.

ഐസ്ക്രീമിലടക്കം ലഹരി കലർത്തിനൽകി യുവതിയെ കൂട്ടബലാത്സംഗംചെയ്തെന്നാണ് പരാതി. രണ്ടാംപ്രതിയായ ശരണ്യയാണ് യുവതിയെ ഏറ്റവും കൂടുതൽ ഉപദ്രവിച്ചതെന്നും പറയുന്നു. ഒരുദിവസം മുഴുവൻ മുറിയിൽ പൂട്ടിയിട്ടായിരുന്നു പീഡനം. ശരണ്യ യുവതിയെ പീഡിപ്പിക്കുമ്പോൾ മറ്റുപ്രതികൾ പുറത്ത് കാവൽ നിൽക്കുകയായിരുന്നു. ക്രൂരമായ പീഡനത്തിന് ശേഷം പിറ്റേദിവസമാണ് യുവതിക്ക് പുറത്തുകടക്കാനായത്. തുടർന്ന് യുവതി ചികിത്സ തേടുകയും പൊലീസിൽ പരാതി നൽകുകയുമായിരുന്നു.

കേസിലെ ഒന്നാംപ്രതി ശ്രീരാജ് നേരത്തേയും കൊച്ചിയിൽ സ്പാ നടത്തിയിരുന്ന ആളാണെന്നാണ് പൊലീസ് പറയുന്നത്. സ്പായുടെ മറവിൽ ഇയാൾ മുൻപും ഒട്ടേറെ പെൺകുട്ടികളെ ചൂഷണം ചെയ്തതായും വിവരമുണ്ട്. ഇതുസംബന്ധിച്ചും പൊലീസ് അന്വേഷണം നടത്തുന്നുണ്ട്. അതിക്രമത്തിനിരയായ യുവതി നിലവിൽ കളമശ്ശേരി മെഡിക്കൽ കോളേജ് ആശുപത്രിയിലാണ്. ആരോഗ്യനില മെച്ചപ്പെട്ടാൽ എസിപിയുടെ നേതൃത്വത്തിൽ യുവതിയുടെ മൊഴിയെടുക്കും. പ്രതികളുടെ തിരിച്ചറിയൽ പരേഡും നടത്തും.

ഗുജറാത്തിൽ യുവതിയെ കൂട്ടബലാത്സംഗം ചെയ്തു; ഭർത്താവും ബന്ധുക്കളും അറസ്റ്റിൽ, ക്രൂരത ശുദ്ധിക്രിയ എന്ന പേരിൽ

Sumam Thomas — Wed, 07 Oct 2026 18:40:05 +0530

ഗാന്ധിനഗർ: ഗുജറാത്തിൽ യുവതിയെ കൂട്ടബലാത്സംഗം ചെയ്ത ഭർത്താവും ബന്ധുക്കളും അറസ്റ്റിൽ. ഭർത്താവുമായി പിരിഞ്ഞ് മറ്റൊരു യുവാവിനൊപ്പം കഴിയുകയായിരുന്ന യുവതിയെ ശുദ്ധിക്രിയയെന്ന പേരിലാണ് പീഡിപ്പിച്ചത്. സംഭവത്തിൽ രണ്ട് സ്ത്രീകൾ ഉൾപ്പടെ 9 പേരെ അറസ്റ്റ് ചെയ്തു.

ഗുജറാത്തിലെ വാപി സ്വദേശിയായ യുവതിയാണ് ക്രൂരപീഡനത്തിനിരയായത്. കഴിഞ്ഞ ഞായറാഴ്ച്ചയായിരുന്നു കേസിനാസ്പദമായ സംഭവം. മൂന്ന് മാസം മുൻപ് ഭർത്താവിനെ വിട്ട് ചോട്ടിലയിലുളള യുവാവിനൊപ്പം പോയതാണ് യുവതി. കഴിഞ്ഞ മാസം ഭർത്താവും ബന്ധുക്കളും വീട്ടിലേക്ക് പിടിച്ചുകൊണ്ടുവന്നു. വീട്ടിൽ ചങ്ങലയിൽ ബന്ധിച്ച് പൂട്ടിയിട്ടു. എന്നാൽ അഞ്ചു ദിവസം മുൻപ് യുവതി രക്ഷപ്പെട്ടു. വീണ്ടും യുവാവിനടുത്തെത്തി. ഇതോടെ തെരഞ്ഞിറങ്ങിയ ഭർത്താവും ബന്ധുക്കളും ഇരുവരെയും പിടികൂടി. യുവാവിനെ മരത്തിൽ കെട്ടിയിട്ട ശേഷം പൊതിരെ തല്ലി. യുവതിയുടെ മൂത്രം കുടിപ്പിച്ചു. ഇരുവരോടും ലൈംഗിക ബന്ധത്തിലേർപ്പെടാൻ നിർബന്ധിച്ചു.

ഇതിന്റെ ദൃശ്യങ്ങൾ പകർത്തി സാമൂഹിക മാധ്യമങ്ങളിൽ പ്രചരിപ്പിച്ചു. മറ്റൊരാളോടൊപ്പം കഴിഞ്ഞ സ്ത്രീയെ ശുദ്ധിക്രിയ നടത്തുന്നുവെന്ന പേരിലായിരുന്നു ക്രൂരതയെല്ലാം. ഇതോടെ പൗര പ്രമുഖനായൊരാൾ പോലീസിൽ പരാതി നൽകി. വീടുകൾ തോറും കയറി പരിശോധിച്ച പോലീസ് യുവതിയെ കണ്ടെത്തി മൊഴിയെടുത്തു. പിന്നാലെ യുവതിയുടെ ഭർത്താവും രണ്ട് യുവതികളുമടക്കം 9 പേരെ പോലീസ് അറസ്റ്റ് ചെയ്തു.

വഴിയാത്രക്കാരിക്ക് നേരെ ലൈംഗികാതിക്രമം നടത്തിയ അഭിഭാഷകന്‍ അറസ്റ്റില്‍

Elsa TJ — Wed, 07 Oct 2026 07:28:04 +0530

തൃശൂര്‍: വഴിയാത്രക്കാരിക്ക് നേരെ ലൈംഗികാതിക്രമം നടത്തിയ അഭിഭാഷകന്‍ അറസ്റ്റില്‍. തൃശൂര്‍ രാമവര്‍മപുരം സ്വദേശി ആസാദ് സുനിലിനെയാ(28)ണ് പാലാരിവട്ടം പൊലീസ് അറസ്റ്റ് ചെയ്തത്. സെപ്തംബര്‍ 30ന് രാത്രി ഒന്പതരയോടെ മാമംഗലം റോഡില്‍ വച്ചായിരുന്നു സംഭവം. റോഡിലൂടെ നടന്നു പോവുകയായിരുന്ന സ്ത്രീയെ ബൈക്കില്‍ ഇതുവഴി വന്ന ആസാദ് സുനില്‍ ആക്രമിക്കുകയായിരുന്നു. യുവതി ബഹളം വച്ചതോടെ ഇയാൾ ഇവിടെ നിന്നും കളഞ്ഞു. സംഭവം വഴിയാത്രക്കാരിക്ക് കടുത്ത മാനസിക ആഘാതമുണ്ടാക്കി. ഇതില്‍ നിന്നും നിന്നും മുക്തയായ ശേഷം വെള്ളിയാഴ്ചയാണ് ഇവര്‍ പാലാരിവട്ടം പൊലീസില്‍ പരാതി നല്‍കിയത്. പൊലീസ് കേസെടുക്കുകയും സിസിടിവി കേന്ദ്രീകരിച്ചുള്ള അന്വേഷണത്തിലൂടെ പ്രതിയെ തിരിച്ചറിയുകയുമായിരുന്നു. നിരവധി സിസിടിവി ദൃശ്യങ്ങള്‍ ഇതിനായി പരിശോധിച്ചു. തുടര്‍ന്ന് ഇയാളെ പിടികൂടുകയും തിങ്കളാഴ്ച വൈകിട്ടോടെ അറസ്റ്റ് ചെയ്യുകയുമായിരുന്നു. യുവതി പരാതി നല്‍കിയതും പൊലീസ് അന്വേഷണം നടത്തുന്നതും ഇയാള്‍ അറിഞ്ഞിരുന്നില്ല.

ഏഷ്യാനെറ്റ് ന്യൂസ് ലൈവ് കാണാം

ആശുപത്രി രേഖയിലെ ഫോൺ നമ്പർ തുമ്പായി; മാലിന്യം തള്ളിയവരെ കൊണ്ട് തന്നെ ഹോമിയോ കടവ് വൃത്തിയാക്കി നഗരസഭ, പിഴ ശിക്ഷയും

Elsa TJ — Sat, 10 Oct 2026 19:58:43 +0530

മുവാറ്റുപുഴ: നഗരമധ്യത്തിലെ ഹോമിയോ കടവിൽ മാലിന്യം തള്ളിയ സംഭവത്തിൽ ഇടപെടലുമായി നഗരസഭ. നഗരസഭ നടത്തിയ അന്വേഷണത്തിൽ കണ്ടെത്തിയ ഉത്തരവാദികൾക്ക് 25000 രൂപ പിഴയിട്ടു. മാലിന്യം തള്ളിയവരെക്കൊണ്ട് തന്നെ അവ നീക്കം ചെയ്യിക്കുകയും ചെയ്തു. ഞായറാഴ്ച രാത്രിയാണ് പ്രദേശത്ത് മാലിന്യം തള്ളിയത്. ഭക്ഷണ അവശിഷ്ടങ്ങളും പുഴുവരിച്ച മറ്റ് മാലിന്യങ്ങളും ഉൾപ്പെട്ട ചാക്കുകളാണ് ഇവിടെ ഉപേക്ഷിച്ചിരുന്നത്. മാലിന്യക്കൂമ്പാരത്തിൽ നിന്ന് ലഭിച്ച ആശുപത്രി രേഖയിലെ ഫോൺ നമ്പറാണ് അന്വേഷണത്തിൽ നിർണായകമായത്. ഇതിന്റെ അടിസ്ഥാനത്തിൽ നടത്തിയ പരിശോധനയിലാണ് നഗരസഭ മാർക്കറ്റിന് സമീപമുള്ള സൂര്യ കോംപ്ലക്സിൽ താമസിക്കുന്ന ഇതര സംസ്ഥാന തൊഴിലാളികളിലേക്ക് അന്വേഷണം എത്തിയത്.

കെട്ടിടത്തിൽ മാലിന്യം സംസ്കരിക്കുന്നതിനുള്ള മതിയായ സൗകര്യങ്ങൾ ഒരുക്കാത്തതിൽ കെട്ടിട ഉടമയ്ക്കെതിരെയും നിയമ നടപടി സ്വീകരിക്കുമെന്ന് നഗരസഭ അറിയിച്ചു. മാലിന്യം തള്ളുന്നതുമായി ബന്ധപ്പെട്ട പരാതികളിൽ നഗരസഭ കർശന നടപടി തുടരുമെന്ന് ചെയർപേഴ്സൺ ജോയ്‌സ് മേരി ആന്റണി വ്യക്തമാക്കി. ഇത്തരം സംഭവങ്ങൾ ആവർത്തിക്കാതിരിക്കാൻ ആവശ്യമായ തിരുത്തൽ നടപടികൾ സ്വീകരിക്കുമെന്നും അവർ പറഞ്ഞു.

ഏഷ്യാനെറ്റ് ന്യൂസ് ലൈവ് കാണാം

Asianet News Malayalam

ആശുപത്രിയിലെത്തിച്ച ഓട്ടോയിൽ കയറിക്കൂടി,വാഹനാപകടത്തിൽ പരിക്കേറ്റയാളുടെ മാല കവർന്നു; പ്രതി പിടിയിൽ

നീലേശ്വരത്ത് വൻ മയക്കുമരുന്ന് വേട്ട, റെയിൽവേ സ്റ്റേഷനിൽ എംഡിഎംഎയുമായി രണ്ട് യുവാക്കൾ പിടിയിൽ

വാട്സാപ്പ് ഡിലീറ്റ് ചെയ്ത ആറു വയസുകാരിക്ക് അമ്മയുടെ ക്രൂരമർദനം, ബാലാവകാശ കമ്മിഷൻ കേസെടുത്തു

കാമുകനൊപ്പം ഒളിച്ചോടിയ ഭാര്യയെ ശുദ്ധീകരിക്കാൻ കൂട്ടബലാത്സംഗം ചെയ്യിപ്പിച്ച് ഭർത്താവ്, 9 പേർ അറസ്റ്റിൽ

വസ്ത്രവ്യാപാര സ്ഥാപനത്തിൽ കയറി ജീവനക്കാരിയെ കുത്തിക്കൊന്നു; മുൻ ജീവനക്കാരൻ പിടിയിൽ

വിജിത്ത് കൊലപാതകം: 7 വർഷമായി ഒളിവില്‍ കഴിഞ്ഞിരുന്ന പ്രതി പിടിയില്‍

പ്രിയദർശിനി ബസിൽ വിദ്യാർത്ഥിനിക്ക് നേരെ ലൈംഗിക അതിക്രമം: പ്രതി പിടിയിൽ

ഗുജറാത്തിൽ യുവതിയെ കൂട്ടബലാത്സം​ഗം ചെയ്തു; ഭർത്താവും ബന്ധുക്കളും അറസ്റ്റിൽ, ക്രൂരത ശുദ്ധിക്രിയ എന്ന പേരിൽ

വഴിയാത്രക്കാരിക്ക് നേരെ ലൈംഗികാതിക്രമം നടത്തിയ അഭിഭാഷകന്‍ അറസ്റ്റില്‍

ഗുജറാത്തിൽ യുവതിയെ കൂട്ടബലാത്സംഗം ചെയ്തു; ഭർത്താവും ബന്ധുക്കളും അറസ്റ്റിൽ, ക്രൂരത ശുദ്ധിക്രിയ എന്ന പേരിൽ