Asianet News Malayalam

'കൊമ്പനെ കാണുന്നത് അനിയനെപോലെയാണ്..'; ലൗ ട്രാക്ക് തന്ത്രം മാറ്റിപിടിക്കാനൊരുങ്ങി ഐശ്വര്യ

Web Desk — Thu, 24 Sep 2026 22:54:25 +0530

ബിഗ് ബോസ് മലയാളം സീസൺ 8 പുരോഗമിച്ചുകൊണ്ടിരിക്കുകയാണ്. മത്സരം പതിനെട്ടാം ദിവസത്തിലേക്ക് കടക്കുമ്പോൾ ഫിസിക്കൽ അസോൾട്ട് ആരോപണങ്ങളും ഇന്നത്തെ ദിവസം കനത്തിരുന്നു. കഴിഞ്ഞ എപ്പിസോഡിന്റെ തുടർച്ചയെന്നോണം താഷിക്കെതിരെ എൽദോയും ഗൗതം ശശിയും രംഗത്തുവന്നിരുന്നു. എന്നാൽ താഷിക്കെതിരെ താൻ ഒന്നും പറയില്ലെന്നാണ് ഗൗതം ശശി പറയുന്നത്.

അതിനിടയിൽ കൊമ്പനും ഐശ്വര്യയും തമ്മിലുള്ള ലൗ ട്രാക്കും ചർച്ചയാവുന്നുണ്ട്. തന്റെ അച്ഛന്റെ പേര് വിളിച്ചുകൊണ്ട് തന്നെ അഭിസംബോധന ചെയ്യരുതെന്ന് കൊമ്പനോട് ഐശ്വര്യ മുന്നറിയിപ്പ് നൽകുന്നുണ്ട്. എന്നാൽ ഇത് അവഗണിച്ച് കൊമ്പൻ വീണ്ടും ഇത് ആവർത്തിച്ചത് ഇരുവർക്കിടയിലും വലിയ രീതിയിൽ വിടവ് വരുത്തിയിട്ടുണ്ട്.

അതിനിടെ ഐശ്വര്യ തനിക്ക് ബിഗ് ബോസ് വീട്ടിൽ മറ്റൊരാളോട് ക്രഷ് തോന്നിയിട്ടുണ്ടെന്ന് ഷിബിനയോടും, നോബിയോടും പറയുന്നുണ്ട്. വിക്കിയോട് അല്ലേ ക്രഷ് എന്ന് ഷിബിന പറയുന്നുണ്ടെങ്കിലും ഐശ്വര്യ അതിന് മറുപടി ഒന്നും പറയുന്നില്ല. എന്നാൽ ഐശ്വര്യയോട് തനിക്ക് ക്രഷ് തോന്നിയിട്ടുണ്ടെന്ന് നോബി ഇന്ന് തുറന്നുപറയുന്നുണ്ട്. തന്റെ ക്രഷ് ആരാണെന്ന് വെളിപ്പെടുത്താത്തത്കൊണ്ട് തന്നെ നോബിയും ലിസ്റ്റിലുണ്ടെന്ന സൂചന ഐശ്വര്യ നൽകുന്നുണ്ട്. ഇതിനിടെ ഐശ്വര്യയോട് ഇനി മുതൽ താൻ ഒരു ഡിസ്റ്റൻസ് കീപ്പ് ചെയ്ത മാത്രമേ നിൽക്കൂ എന്നാണ് കൊമ്പൻ ഷിജിനുമായുള്ള സംസാരത്തിൽ പറയുന്നത്. ഇതിനിടെ ഐശ്വര്യ ഒറ്റക്കിരുന്ന് കരയുകയും കൊമ്പനെ നല്ലൊരു സുഹൃത്തും അണിയനുമായാണ് കാണുന്നതെന്നും ക്യാമറയിൽ നോക്കി പറയുന്നുണ്ട്.

നോബിക്ക് തന്നോട് ക്രഷ് ഉണ്ടെന്ന് പറഞ്ഞതിന് ശേഷം തന്റെ ആദ്യത്തെ ക്രഷ് ആയ വിക്കിയോടും സുഹൃത്തും ലൗ ട്രാക്ക് പോലെ മുന്നോട്ട് പോയിരുന്ന കൊമ്പനുമായുള്ള സൗഹൃദവും ഇനി എന്താവുമെന്ന ആകാംക്ഷയിലാണ് പ്രേക്ഷകർ. എന്നാൽ നോബിക്ക് ക്രഷ് ഉണ്ടെന്ന് പറഞ്ഞത് കള്ളമാണെന്ന് ഷിബിനയും നോബിയും പ്ലാൻ ചെയ്യുന്നുണ്ട്. ഐശ്വര്യയുടെ ഇരട്ടത്താപ്പും ലൗ ട്രാക്കും കേവലം ഗെയിമിന് വേണ്ടി മാത്രമുള്ളതാണെന്നാണ് ഷിബിനയും നോബിയും പറയുന്നത്.

'അടുത്ത ആഴ്ചയിലെ നോമിനേഷനിലേക്ക് എല്ലാ മത്സരാർത്ഥികളും..'; തീരുമാനമെടുത്ത് മോഹൻലാൽ

Web Desk — Sat, 26 Sep 2026 22:51:25 +0530

ബിഗ് ബോസ് മലയാളം സീസൺ 8 മറ്റൊരു വീക്കന്റ് എപ്പിസോഡിലേക്ക് എത്തിയിരിക്കുകയാണ്. കഴിഞ്ഞ ആഴ്ചയിലെ എല്ലാ പ്രശ്നങ്ങൾക്കും ഇന്നത്തെ എപ്പിസോഡിൽ മോഹൻലാൽ മത്സരാർത്ഥികളെ ചോദ്യം ചെയ്യുന്നുണ്ട്. താഷി- ഗൗതം- എൽദോ വിഷയത്തിൽ മൂന്ന് പേർക്കും വലിയ രീതിയിലുള്ള വിമർശനമാണ് ലഭിച്ചത്.

എൽദോയെ വലിയ രീതിയിലാണ് മോഹൻലാൽ വിമർശിച്ചത്. ഇത് തന്റെ വീടാണെന്നും അത്തരം ഡയലോഗുകൾ വീട്ടിൽ അനുവദിക്കില്ലെന്നും മോഹൻലാൽ മുന്നറിയിപ്പ് നൽകുന്നുണ്ട്. കൂടാതെ താഷിയുടെ ദേഷ്യം കുറയ്ക്കാനും ഷിജിനോട് ഒറ്റപ്പെടൽ തന്ത്രം ഒഴിവാക്കി യഥാർത്ഥ ഗെയിം കളിക്കാനും മോഹൻലാൽ നിർദ്ദേശം നൽകുന്നു. കഴിഞ്ഞ ആഴ്ച ഏറ്റവും നന്നായി ഗെയിം കളിച്ചതിന് ആസിഫിന് പ്രശംസയും ബർഗറും മോഹൻലാൽ നൽകുകയുണ്ടായി. മുൻപ് ഷിജിൻ മോഹൻലാൽ നൽകിയ ബർഗർ നിരസിച്ചത് ഓർമ്മപ്പെടുത്തിക്കൊണ്ടായിരുന്നു മോഹൻലാലിന്റെ ഈ ഇടപെടൽ എന്നതും ശ്രദ്ധേയമാണ്. കൂടാതെ ഷിജിൻ പ്രോപ്പർട്ടി നശിപ്പിച്ചതും വലിയ രീതിയിൽ വിമർശിക്കപ്പെടുകയുണ്ടായി. ഇനി അത്തരത്തി എന്തെങ്കിലുമുണ്ടായാൽ വീട്ടിൽ നിന്നും പുറത്തുപോവേണ്ടിവരുമെന്നും മോഹൻലാൽ ഓർമ്മിപ്പിച്ചു.

കഴിഞ്ഞ ആഴ്ച ലീഡർ ആയ നോബിയെ ടാസ്ക് തോൽപ്പിക്കാനായി നിർദ്ദേശം നൽകിയതിനെ തുടർന്ന് ലീഡർ സ്ഥാനം മോഹൻലാൽ റദ്ദ് ചെയ്യുകയുണ്ടായി. അതേസമയം ഇന്നത്തെ എപ്പിസോഡിൽ ഈവിഷ ഉണ്ടായിരുന്നില്ല. നാളെത്തെ എപ്പിസോഡിലേക്കാണ് എവിക്ഷൻ മാറ്റി വച്ചിരിക്കുന്നത്. നാളെ എന്തായാലും ഒരാൾ പുറത്തുപോവുമെന്നാണ് മോഹൻലാൽ പറഞ്ഞിരിക്കുന്നത്. അടുത്ത ആഴ്ചയിലെ നോമിനേഷനിൽ എല്ലാ മത്സരാർത്ഥികളും ഉൾപ്പെട്ടിട്ടുണ്ട്. അതുകൊണ്ട് തന്നെ വരും ആഴ്ചയിൽ ഏറ്റവും നല്ല ഗെയിം തന്നെ കാണാൻ കഴിയും എന്ന് തന്നെയാണ് പ്രേക്ഷകർ വിശ്വസിക്കുന്നത്.

'ബിഗ് ബോസ്സിൽ നിന്ന് ഒരിക്കലും പ്രണയമുണ്ടാവില്ല..'; തുറന്നുപറഞ്ഞ് ഐശ്വര്യ

Web Desk — Mon, 28 Sep 2026 22:59:43 +0530

ബിഗ് ബോസ് മലയാളം സീസൺ 8 പുരോഗമിച്ചുകൊണ്ടിരിക്കുകയാണ്. പത്തൊൻപത് പേരാണ് ഇനി വീട്ടിലുള്ളത്. ഇന്നലെ നടന്ന വീക്കന്റ് എപ്പിസോഡിൽ ഷിബിനായാണ് എവിക്ട് ആയിരിക്കുന്നത്. കഴിഞ്ഞ ദിവസം വലിയ രീതിയിലാണ് മോഹൻലാൽ ബിഗ് ബോസ് വീട്ടിൽ മത്സരാർത്ഥികളോട് പ്രതികരിച്ചത്. ഷിബിനയുടെ വസ്ത്രത്തിലെ വള്ളി പിടിച്ച് വലിച്ചതുമായി ബന്ധപ്പെട്ട് ഗൗതമിനും ശ്രീലക്ഷ്മിക്കും വലിയ രീതിയിലുള്ള വിമർശനമാണ് ലഭിച്ചത്. കൂടാതെ ജസീലയുടെ വിഷയത്തിൽ നോബിക്കും വലിയ രീതിയിൽ വിമർശനം ലഭിച്ചു.

തനിക്ക് ക്രഷ് തോന്നിയത് ഒരിക്കലും തെറ്റല്ല എന്നാണ് ഐശ്വര്യ പറയുന്നത്. ബിഗ് ബോസ് വീട്ടിൽ നിന്നും തനിക്ക് ഒരിക്കലും പ്രണയമുണ്ടാവില്ല എന്നും ഐശ്വര്യ കൊമ്പനോട് പറയുന്നുണ്ട്. അതോടൊപ്പം തന്നെ കൊമ്പനും തന്റെ നിലപാട് വ്യക്തമാക്കുന്നുണ്ട്. തനിക്കും ഇവിടെ നിന്നും ഒരു പ്രണയമുണ്ടാവില്ലെന്നും ഐശ്വര്യ ഇവിടുന്ന് ഇറങ്ങുമ്പോൾ തന്റെ ഏറ്റവും നല്ല സുഹൃത്തായിരിക്കുമെന്നും കൊമ്പൻ വ്യക്തമാക്കുന്നുണ്ട്. ഐശ്വര്യ ലൗ ട്രാക്ക് മാറ്റി പിടിക്കുന്ന സൂചനയാണ് ഇതെന്നാണ് പ്രേക്ഷകർ ഇതിനോട് പ്രതികരിക്കുന്നത്. ഐശ്വര്യയുമായുള്ള കോംബോ പിടിക്കുമ്പോൾ കൊമ്പൻ ഗെയിം കളിക്കാൻ മരുന്നുപോകുന്നുവെന്ന വിമർശനം ആദ്യം മുതലേ ഉണ്ടായിരുന്നു. എന്തായാലും ഇനി കൊമ്പന്റെ മികച്ച ഗെയിം ബിഗ് ബോസ് വീട്ടിൽ കാണാൻ ആവുമെന്ന പ്രതീക്ഷയിൽ തന്നെയാണ് പ്രേക്ഷകർ.

അതേസമയം ലീഡർ ഇല്ലാതെയാണ് ഈ ആഴ്ച തുടങ്ങിയത്. അതുകൊണ്ട് ലീഡറെ തിരഞ്ഞെടുക്കാനുള്ള ടാസ്ക് ബിഗ് ബോസ് വീട്ടിൽ പുരോഗമിക്കുകയാണ്. ആരാവും ഇത്തവണ ലീഡർ ആവുക എന്നത് പ്രേക്ഷകരെ സംബന്ധിച്ച ആകാംക്ഷയുണർത്തുന്ന കാര്യം കൂടിയാണ്.

നിയമങ്ങള്‍ തെറ്റിച്ച് മത്സരാര്‍ഥികള്‍; ലക്ഷ്വറി ബജറ്റ് നിഷേധിച്ച് ബിഗ് ബോസ്

Web Desk — Thu, 17 Sep 2026 22:48:33 +0530

ബിഗ് ബോസ് മലയാളം സീസണ്‍ 8 ലെ ആദ്യ വാരം താരതമ്യേന സമാധാനപരമായിരുന്നു. എന്നാല്‍ മത്സരാര്‍ഥികള്‍ ഇന്‍ഡിവിജ്വല്‍ ആയി പരിശ്രമിക്കുന്നില്ലെന്ന് മോഹന്‍ലാല്‍ വാരാന്ത്യ എപ്പിസോഡില്‍ വിമര്‍ശിച്ചിരുന്നു. ആദ്യ വാരത്തിലെ പ്രകടനം കണ്ടിട്ടോ എന്തോ, രണ്ടാം വാരത്തില്‍ കനപ്പെട്ട ഒരു വീക്കിലി ടാസ്ക് ആണ് ബിഗ് ബോസ് മത്സരാര്‍ഥികള്‍ക്ക് നല്‍കിയത്. സീസണ്‍ 8 ല്‍ വീറും വാശിയും പുറത്തുകൊണ്ടുവന്ന വീക്കിലി ടാസ്ക് ആണ് നടന്നത്. എന്നാല്‍ വീക്കിലി ടാസ്കിന്‍റെ അവസാന റൗണ്ടും മുഴുവന്‍ ടാസ്കുകളില്‍ നിന്നും ലഭിക്കേണ്ടിയിരുന്ന ലക്ഷ്വറി പോയിന്‍റുകളും ബിഗ് ബോസ് റദ്ദാക്കി. മത്സരാവേശം കൂടിയതിന് പിന്നാലെ മത്സരാര്‍ഥികള്‍ ബിഗ് ബോസിന്‍റെ നിയമങ്ങള്‍ ലംഘിച്ചു എന്നത് ചൂണ്ടിക്കാട്ടി ആയിരുന്നു ഇത്.

ബിഗ് ബോസ് സിറ്റിയുടെ നിര്‍മ്മാണത്തിന്‍റെ ഭാഗമായി ജനങ്ങള്‍ക്ക് വിതരണം ചെയ്യാനുള്ള ഭക്ഷ്യ കിറ്റ് തയ്യാറാക്കുക എന്നതായിരുന്നു ടാസ്ക്. ഇതിനായി അരി, പാല്‍, പച്ചക്കറി, മരുന്ന് എന്നിവ പാക്ക് ചെയ്യേണ്ടിയിരുന്നു. സൈറണുകളുടെ ഇടവേളയില്‍ കണ്‍വെയര്‍ ബെല്‍റ്റിലൂടെയാണ് ഈ വസ്തുക്കള്‍ വന്നത്. എന്നാല്‍ ഇത് സ്വന്തമാക്കാനുള്ള വീറിലും വാശിയിലും മത്സരാര്‍ഥികള്‍ നിയമങ്ങള്‍ ലംഘിച്ചു എന്നാണ് ബിഗ് ബോസ് കണ്ടെത്തിയത്. കണ്‍വെയര്‍ ബെല്‍റ്റ് വരുന്ന ഇടത്തിലേക്ക് കൈയും തലയും ഇടരുതെന്ന ആവര്‍ത്തിച്ചുള്ള മുന്നറിയിപ്പും മത്സരാര്‍ഥികള്‍ ലംഘിച്ചതോടെയാണ് ഈ റൗണ്ട് റദ്ദാക്കുന്നതായി ബിഗ് ബോസ് പ്രഖ്യാപിച്ചത്. ലക്ഷ്വറി ഭക്ഷ്യവസ്തുക്കള്‍ക്കായുള്ള ലക്ഷ്വറി പോയിന്‍റുകളും റദ്ദാക്കുകയാണെന്നും ബിഗ് ബോസ് അറിയിച്ചു.

ബിഗ് ബോസിന്‍റെ പ്രഖ്യാപനം വന്നതിന് പിന്നാലെ തങ്ങള്‍ക്ക് ഒരു അവസരം കൂടി നല്‍കാനാവുമോ എന്ന് ഈ വാരത്തിലെ ലീഡറായ രാഹുല്‍ ഈശ്വര്‍ ചോദിക്കുന്നുണ്ടായിരുന്നു. വീക്കിലി ടാസ്കുകളില്‍ നേടിയ തുക വച്ച് ഏറ്റവും മുന്നിലെത്തിയ രണ്ട് പേര്‍ നോബിയും ജസീലയുമാണ്. ഒരു രൂപ പോലും കൈയില്‍ ഇല്ലാതിരുന്നവര്‍ സുമേഷ്, രാജേഷ്, എല്‍ദോ, മൃദുല, ശ്രീലയ, ഷിബിന, ഗായത്രി, താഷി, ആസിഫ്, ഷിജിന്‍ എന്നിവരും. ഇതില്‍ നിന്ന് 3 പേരെ അടുത്ത നോമിനേഷനിലേക്ക് ലീഡര്‍ക്ക് നേരിട്ട് നോമിനേറ്റ് ചെയ്യാമെന്ന് ബിഗ് ബോസ് അറിയിച്ചു. ഷിജിന്‍, രാജേഷ്, മൃദുല എന്നിവരെയാണ് രാഹുല്‍ നോമിനേറ്റ് ചെയ്തത്. എന്നാല്‍ തന്‍റെ പക്കല്‍ കറന്‍സി ഉണ്ടെന്ന് വെളിപ്പെടുത്തി മൃദുല എല്ലാവരെയും ഞെട്ടിച്ചു. അഞ്ജലിയുടെ കറന്‍സി മൃദുല മോഷ്ടിക്കുകയായിരുന്നു.

'എൽദോ കാണിച്ചത് മണ്ടത്തരം, ബിഗ് ബോസിനോടാണ് നമ്മൾ കളിക്കേണ്ടത്'; വിമർശിച്ച് അഖിൽ മാരാർ

Web Desk — Wed, 16 Sep 2026 11:36:51 +0530

ഗായത്രിയെ ബിഗ് ബോസിൽ തിരികെ കൊണ്ടുവരാൻ ലീഡർ സ്ഥാനം പോലും താൻ ത്യജിക്കാൻ തയ്യാറാണെന്നു പറഞ്ഞ എൽദോയുടെ തീരുമാനത്തെ വിമർശിച്ച് ബിഗ് ബോസ് മുൻ വിജയി അഖിൽ മാരാർ. ജനാധിപത്യം എന്ന തീമിനോട് നീതി പുലർത്തുന്ന പ്രസ്താവനയല്ല എൽദോയുടെ ഭാഗത്തു നിന്നും ഉണ്ടായതെന്ന് ഒരു യൂട്യൂബ് ചാനലിൽ‍ സംസാരിച്ചുകൊണ്ട് അഖിൽ മാരാർ പറഞ്ഞു.

''എൽദോയുടേത് ഏറ്റവും വിഡ്ഢിത്തരം നിറഞ്ഞ ഒരു ഗെയിം ആണെന്ന് ഞാൻ പറയും. ജനാധിപത്യം എന്ന തീമിനോട് നീതി പുലർത്തുന്ന തീരുമാനമാണോ എൽദോ എടുത്തത്? എൽദോയെ 15 പേർ ചേർന്ന് തിരഞ്ഞെടുത്തു, രാഹുൽ ഈശ്വറിനെ നാലുപേർ പിന്തുണച്ചു. മൂന്നിൽ രണ്ട് ഭൂരിപക്ഷത്തോടെ തിരഞ്ഞെടുക്കപ്പെട്ട എൽദോ സ്വന്തം തീരുമാനത്തിലൂടെ തന്നെ മണ്ടനായി മാറി. ജനങ്ങളുടെ തീരുമാനത്തെ മാനിക്കാത്ത നേതാവായി എൽദോ. ഗായത്രിയെ തിരിച്ചുകൊണ്ടുവരണമെന്ന എൽദോയുടെ ആവശ്യം ശരിയായിരുന്നെങ്കിലും അതിനായി അധികാരം കൈവിടേണ്ടതില്ലായിരുന്നു. താൻ അധികാര സ്ഥാനത്തു നിന്നു മാറാം, പക്ഷേ വീണ്ടുമൊരു തിരഞ്ഞെടുപ്പ് ഉണ്ടാകണം എന്നായിരുന്നു എൽദോ പറയേണ്ടിയിരുന്നത്. വീണ്ടുമൊരു തിരഞ്ഞെടുപ്പ് ഉണ്ടായാലും അവിടെ എൽദോക്കു തന്നെ മുൻതൂക്കം ലഭിക്കും.

ഒരു ലീഡർ എന്ന നിലയിൽ, എൻറെ ജനങ്ങൾക്ക് വേണ്ടിയിട്ട് ഞങ്ങളുടെ നാടിനു വേണ്ടിയിട്ട്, ഇന്നലയിൽ ഇവിടെ നടന്ന ജനാധിപത്യ വിരുദ്ധമായ ഒരു നടപടിയുടെ ഭാഗമായി പുറത്തുപോയ ഗായത്രിയെ തിരിച്ചുകൊണ്ടുവരണം, അതിനുവേണ്ടി രാജിവെക്കാൻ ഞാൻ തയ്യാറാണ്, പക്ഷേ വീണ്ടും ഒരു തിരഞ്ഞെടുപ്പ് നടക്കണം, കാരണം ഞങ്ങളെ ആര് ഭരിക്കണം എന്നത് തീരുമാനിക്കേണ്ടത് ബിഗ് ബോസ് അല്ല തീരുമാനിക്കേണ്ടത് ഇവിടുത്തെ ജനങ്ങളാണെന്ന് പറയണം. ആ തീരുമാനം ഞാൻ ജനങ്ങൾക്ക് വിട്ടുകൊടുക്കുന്നുവെന്ന് പറയണം. നമ്മൾ ബിഗ് ബോസിനോടാണ് കളിക്കേണ്ടത്'', അഖിൽ മാരാർ പറഞ്ഞു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

സംഭവിക്കാൻ പാടില്ലായിരുന്നു, തെറ്റായിരുന്നു; ഡ്രസിന്റെ കയർ വലിച്ചത് മനപൂർവമല്ല..; വിശദീകരണവുമായി ഗൗതമിന്റെ ടീം

Web Desk — Mon, 28 Sep 2026 17:35:32 +0530

ബിഗ് ബോസ് മലയാളം സീസൺ 8 ൽ മൽസരങ്ങൾ പുരോഗമിക്കുന്നതിനിടെ കഴിഞ്ഞ ദിവസം എവിക്ട് ആയ ഷിബിനയോട് ഗൗതം ശശിയും ശ്രീലക്ഷ്മി അറക്കലും ചേർന്നു നടത്തിയ പെരുമാറ്റം വലിയ ശ്രദ്ധ നേടിയിരുന്നു. മറ്റൊരു മത്സരാർത്ഥിയുടെ വാദം നടക്കുന്നതിനിടയിൽ പിന്നിലിരുന്ന ഗൗതം ശശി തന്റെ ഉടുപ്പിന്റെ വള്ളി അഴിക്കുകയും അതിൽ ചെരുപ്പ് കെട്ടി തൂക്കുകയും ചെയ്തു എന്നും ശ്രീലക്ഷ്മി അറക്കൽ അതിനെ പ്രോത്സാഹിപ്പിച്ചു എന്നും ഷിബിന വെളിപ്പെടുത്തിയിരുന്നു. തനിക്ക് തെറ്റ് പറ്റി പോയി എന്ന് ഗൗതമും സമ്മതിച്ചിരുന്നു. ഇപ്പോഴിതാ ഇതു സംബന്ധിച്ച ഔദ്യോഗിക വിശദീകരണം ഗൗതമിന്റെ പേജിൽ തന്നെ പ്രത്യക്ഷപ്പെട്ടിരിക്കുകയാണ്.

''കഴിഞ്ഞ രണ്ട് ദിവസമായി ഞങ്ങൾ മൗനം പാലിച്ചതിന്റെ കാരണം പങ്കുവെക്കാനാണ് ഞങ്ങൾ ആഗ്രഹിക്കുന്നത്. സമീപകാലത്തെയൊരു സംഭവവുമായി ബന്ധപ്പെട്ട് ധാരാളം ചർച്ചകളും വ്യത്യസ്ത അഭിപ്രായങ്ങളും ഉണ്ടായിരുന്നു. അതിനാൽ, ഒരു പ്രസ്താവന നടത്തുന്നതിന് മുമ്പ് ഒരു പടി പിന്നോട്ട് മാറി, സാഹചര്യം പൂർണമായി മനസിലാക്കാനും എല്ലാ കാഴ്ചപ്പാടുകളും കേൾക്കാൻ ഇടം നൽകാനും ഞങ്ങൾ ആഗ്രഹിച്ചു. ഏതൊരു കാര്യത്തിനും രണ്ട് വശങ്ങളുണ്ടെന്നും, ഉൾപ്പെട്ടിരിക്കുന്ന എല്ലാവരുടെയും ഭാഗം കേൾക്കുന്നത് ന്യായമാണെന്നും ഞങ്ങൾ ശക്തമായി വിശ്വസിക്കുന്നു. ഓരോരുത്തരുടെയും അനുഭവങ്ങളും വികാരങ്ങളും പ്രധാനപ്പെട്ടതാണ്, കൂടാതെ സംഭവിച്ചതിനെക്കുറിച്ച് ഓരോ വ്യക്തിക്കും അവരുടേതായ കാഴ്ചപ്പാടുണ്ടാകാമെന്നതിനെ ഞങ്ങൾ ബഹുമാനിക്കുന്നു. എല്ലാവരുടെയും ശബ്ദം കേൾക്കാൻ അർഹതയുണ്ടെന്നതിനാലും, പൂർണ്ണമായ പശ്ചാത്തലമില്ലാതെ പ്രതികരിക്കുന്നത് ഒഴിവാക്കാൻ ആഗ്രഹിച്ചതിനാലുമാണ് ഈ സമയത്ത് ഞങ്ങൾ മൗനം പാലിക്കാൻ തിരഞ്ഞെടുത്തത്.

ഗൗതം സ്വയം സമ്മതിക്കുന്നത് പോലെ, ഇത് സംഭവിക്കാൻ പാടില്ലായിരുന്നുവെന്നും അത് തെറ്റാണെന്നും ഞങ്ങൾ പൂർണ്ണമായി സമ്മതിക്കുന്നു. ഈ സംഭവത്തെക്കുറിച്ചുള്ള ആശങ്കകൾ ഞങ്ങൾ മനസ്സിലാക്കുമ്പോൾ തന്നെ, അവൻ ബോധപൂർവ്വം കയർ വലിച്ചു എന്ന് അവകാശപ്പെടുന്നത് പോലുള്ള തെറ്റായ കഥകൾ പ്രചരിപ്പിക്കുന്നത് ഒഴിവാക്കണമെന്ന് ഞങ്ങൾ ആത്മാർത്ഥമായി അഭ്യർത്ഥിക്കുന്നു. ഗൗതമിനും ഒരു കുടുംബവും പ്രിയപ്പെട്ടവരും ഷോയ്ക്ക് അപ്പുറം ഒരു ജീവിതവുമുണ്ട്. ഒരാളുടെ പ്രവർത്തികൾക്ക് അവരെ ഉത്തരവാദികളാക്കുന്നത് പ്രധാനമാണ്, എന്നാൽ അത് സംഭവങ്ങളെ തെറ്റായി ചിത്രീകരിക്കുന്നതിന്റെയോ അവനെയും അവന്റെ കുടുംബത്തേയും അനാവശ്യമായി വേദനിപ്പിക്കുന്നതിന്റെയോ വിലയിലാകരുത്.

എന്തെങ്കിലും തെറ്റ് ചെയ്തിട്ടുണ്ടെങ്കിൽ അത് തീർച്ചയായും തെറ്റാണ്, ആരെങ്കിലും ആത്മാർത്ഥമായി മാപ്പ് ചോദിക്കുകയാണെങ്കിൽ, അത് തുറന്ന മനസ്സോടെ കേൾക്കണം. പൂർണ്ണമായ പശ്ചാത്തലം പരിഗണിക്കാതെ മുൻവിധികളിലെത്തുന്നതിനെക്കാൾ എപ്പോഴും നല്ലത് ആരോഗ്യകരമായ സംഭാഷണങ്ങളും പരസ്പര ധാരണയുമാണ്.

സഹമത്സരാർത്ഥി ഇപ്പോൾ വീട് വിട്ടുപോകുന്നതിനാൽ, ഷോയിലെ അവളുടെ യാത്രയെ അഭിനന്ദിക്കാനും അംഗീകരിക്കാനും ഞങ്ങൾ ഈ അവസരം ഉപയോഗിക്കാൻ ആഗ്രഹിക്കുന്നു. അവൾ ശക്തയും സ്വാധീനം ചെലുത്തുന്നതുമായ ഒരു കളിക്കാരിയായിരുന്നു, ഈ സീസൺ രസകരമാക്കാൻ പല വിധത്തിൽ സംഭാവനകൾ നൽകിയിട്ടുണ്ട്. ഭാവിയിലേക്കുള്ള എല്ലാവിധ ആശംസകളും ഞങ്ങൾ അവൾക്ക് നേരുന്നു. കൂടാതെ പുറത്തും അവൾ മികച്ച കാര്യങ്ങൾ നേടുന്നത് തുടരുമെന്ന് ഞങ്ങൾ പ്രതീക്ഷിക്കുന്നു.

അവസാനമായി, സൈബർ ദീഷണി, വിദ്വേഷം, വ്യക്തിപരമായ ആക്രമണങ്ങൾ, അല്ലെങ്കിൽ ഗൗതമിനെയും കുടുംബത്തെയും ലക്ഷ്യമിട്ടുള്ള കമന്റുകൾ എന്നിവയിൽ നിന്ന് വിട്ടുനിൽക്കാൻ എല്ലാവരോടും ഞങ്ങൾ അഭ്യർത്ഥിക്കുന്നു. ചർച്ചകൾ മാന്യവും ഉത്തരവാദിത്തത്തോടും ദയയുള്ളതുമായി നിലനിർത്തിക്കൊണ്ട് നമുക്ക് തുടർന്നും നമ്മുടെ അഭിപ്രായങ്ങൾ പ്രകടിപ്പിക്കാം'', എന്നാണ് ഗൗതം ശശിയുടെ ഇൻസ്റ്റഗ്രാമിൽ പ്രത്യക്ഷപ്പെട്ട കുറിപ്പിൽ പറയുന്നത്.

ബിഗ് ബോസ് മലയാളം: കൊമ്പനും ഐശ്വര്യയും തമ്മിലെ വഴക്കിന് കാരണം നേഹയോ?

Web Desk — Mon, 21 Sep 2026 22:50:00 +0530

ബിഗ് ബോസ് മലയാളം സീസൺ 8 പുരോഗമിക്കുകയാണ്. കഴിഞ്ഞ വീക്കന്റിൽ ശ്രീലയയാണ് എവിക്ട് ആയത്. എട്ടാം സീസൺ പതിനഞ്ചാം ദിവസത്തിലേക്ക് കടക്കുമ്പോൾ മത്സരവും മുറുകുകയാണ്. ഐശ്വര്യയും കടൽ കൊമ്പനും തമ്മിലുള്ള ലൗ ട്രാക്ക് നല്ലപോലെ മുന്നോട്ട് പോകുന്നതിനിടയിൽ രാവിലെ തന്നെ ഇരുവരും തമ്മിൽ ഉടക്കുന്ന കാഴ്ചയ്ക്കും ബിഗ് ബോസ് വീട് ഇന്ന് സാക്ഷിയായി. ഐശ്വര്യ നോബിയുടെ ബെഡിൽ പോയി കിടന്നതുമായി ബന്ധപ്പെട്ടാണ് ചർച്ച തുടങ്ങിയത്. തുടർന്ന് നേഹ രംഗത്തുവന്നതോട് കൂടി ചർച്ച കൂടുതൽ മുറുകി. കൊമ്പനുമായി നേഹ സംസാരിച്ചതോട് കൂടിയാണ് രംഗം വഷളായത്. നേഹ ചെയ്യുന്നത് കുത്തിത്തിരിപ്പാണെന്നും അത് മോശമാണെന്നും പറഞ്ഞുകൊണ്ട് നേഹയെ ഐശ്വര്യ പ്രകോപിപ്പിച്ചുകൊണ്ടിരിക്കുന്നു.

എന്നാൽ താൻ കൊമ്പനുമായി സംസാരിക്കുക മാത്രമാണ് ചെയ്തതെന്നും അത് ഒരിക്കലും കുത്തിത്തിരിപ്പല്ലെന്നും നേഹ വ്യക്തമാക്കിയെങ്കിലും ഐശ്വര്യ വീണ്ടും വീണ്ടും അതേകാര്യം തന്നെ പറയുന്ന കാഴ്ചയ്ക്കാണ് രാവിലെ തന്നെ ബിബി വീട് സാക്ഷ്യം വഹിച്ചത്. നേഹ പറഞ്ഞത് കുത്തിത്തിരിപ്പാണോ എന്ന് അവസാനം കൊമ്പനോട് തന്നെ ചോദ്യം വന്നപ്പോൾ ചോദ്യത്തിന് മുന്നിൽ വ്യക്തമായ മറുപടി പറയാതെ നിൽക്കുന്ന കൊമ്പനെയാണ് കാണാൻ കഴിയുന്നത്. ഇത് ഐശ്വര്യയെ സംബന്ധിച്ച് വലിയ രീതിയിൽ പ്രശ്നമായി മാറി.

തുടർന്ന് കൊമ്പനുമായി വാക്കുതർക്കത്തിൽ ഏർപ്പെടുന്ന ഐശ്വര്യയെ ആണ് കാണാൻ കഴിയുന്നത്. ബിബി വീട്ടിൽ ലൗ ട്രാക്ക് പിടിക്കാൻ തുടങ്ങിയതിന് ശേഷം ആദ്യമായാണ് ഇരുവരും തമ്മിൽ ശക്തമായ വിയോജിപ്പിൽ വാക്കുതർക്കം ഉണ്ടാവുന്നത്. എന്തായാലും പ്രേക്ഷകർക്കിടയിൽ ഇരുവരുടെയും ബന്ധം കൂടുതൽ ചർച്ചയാവുന്നുണ്ട്. ഐശ്വര്യയോട് കൊമ്പൻ കാണിക്കുന്ന ആത്മാർത്ഥതയും സ്നേഹവും സൗഹൃദവും കാണുമ്പോൾ പല ബിബി ആരാധകരും കമന്റ് ചെയ്യുന്നത് എവെരി ഗേൾ ഡിസേർവേസ്‌ എ കൊമ്പൻ ഇൻ ദെയ്ർ ലൈഫ് എന്നാണ്. അതേസമയം ഐശ്വര്യ ജനുവിൻ ആണോ അല്ലയോ എന്നതും പ്രേക്ഷകർക്കിടയിൽ ഒരു ചോദ്യചിഹ്നമാണ്.

ആരാവും ബിഗ് ബോസ് ഹൗസിലെ അടുത്ത ലീഡര്‍? നടക്കാനിരിക്കുന്നത് വന്‍ മത്സരം

Web Desk — Mon, 28 Sep 2026 11:47:45 +0530

ബിഗ് ബോസ് മലയാളം സീസണ്‍ 8 ന്‍റെ പ്രധാന പ്രത്യേകതകളില്‍ ഒന്നാണ് അതിന്‍റെ തീം. ജനാധിപത്യം എന്നതാണ് ഈ സീസണിന്‍റെ തീം. അതിനാല്‍ത്തന്നെ മുന്‍ സീസണുകളില്‍ ഉണ്ടായിരുന്ന ക്യാപ്റ്റന് ഇക്കുറി ലീഡര്‍ എന്നാണ് പേര്. ഓരോ വാരത്തിലും ഹൗസിനെ നയിക്കാന്‍ വേണ്ടി മത്സരാര്‍ഥികള്‍ ചേര്‍ന്ന് തിരഞ്ഞെടുക്കുന്ന ആളാണ് ലീഡര്‍. ലീഡര്‍ക്ക് രണ്ട് അനുയായികളും വേണം. ലീഡര്‍ക്കും അനുയായികള്‍ക്കും പ്രധാന കാര്യങ്ങള്‍ മത്സരാര്‍ഥികളുമായും പരസ്പരവും ചര്‍ച്ച ചെയ്യാനായി ജനസഭ എന്ന പുതിയൊരു മുറി കൂടി ഇത്തവണത്തെ ബിഗ് ബോസ് ഹൗസില്‍ ഉണ്ട്. നാലാം വാരത്തിലെ ലീഡര്‍ക്കായുള്ള തിരഞ്ഞെടുപ്പ് ഇന്ന് ഹൗസില്‍ നടക്കും. ഇതിന്‍റെ പ്രൊമോ ഏഷ്യാനെറ്റ് പുറത്ത് വിട്ടിട്ടുണ്ട്.

കഴിഞ്ഞ തവണത്തേക്കാളൊക്കെ ആവേശഭരിതമായാണ് മത്സരാര്‍ഥികള്‍ ഇത്തവണത്തെ ലീഡര്‍ തിരഞ്ഞെടുപ്പിനെ നേരിടുന്നതെന്ന് പ്രൊമോ വ്യക്തമാക്കുന്നുണ്ട്. ശബ്ദമുയര്‍ത്തി തന്‍റെ ഭാഗം പറയുന്ന രാഹുല്‍ ഈശ്വറിനെയും ഷിജിനെയുമൊക്കെ പ്രൊമോയില്‍ കാണാം. മുന്‍പ് ഒരിക്കല്‍ ലീഡര്‍ ആയ ആളാണ് രാഹുല്‍ ഈശ്വര്‍. എന്നാല്‍ ലീഡര്‍ എന്ന നിലയില്‍ തന്‍റെ വ്യക്തിത്വം സ്ഥാപിക്കാന്‍ അദ്ദേഹത്തിന് കഴിയാതെ പോയി. പ്രശ്നങ്ങള്‍ ഉണ്ടാകാതെ നോക്കുകയും ഇനി മത്സരാര്‍ഥികള്‍ക്കിടയില്‍ പ്രശ്നങ്ങള്‍ ഉണ്ടായാല്‍ അത് വേഗത്തില്‍ പരിഹരിക്കാന്‍ ശ്രമിക്കുകയുമാണ് ലീഡര്‍ ആയ രണ്ടാം വാരത്തില്‍ രാഹുല്‍ ഈശ്വര്‍ ചെയ്തത്. എന്നാല്‍ ഇതിന് ഒരു നെഗറ്റീവ് വശം കൂടി ഉണ്ടായിരുന്നു. ബിഗ് ബോസ് ഹൗസ് വലിയ ചലനമില്ലാതെ കിടന്നു എന്നതായിരുന്നു അത്.

ഈ സീസണിലെ ആദ്യ ലീഡര്‍ ജസീല പര്‍വീണ്‍ ആയിരുന്നു. രാഹുല്‍ ഈശ്വറിനേക്കാള്‍ തിളങ്ങാന്‍ കഴിഞ്ഞ ലീഡര്‍ ആയിരുന്നു ജസീല. എന്നാല്‍ പിന്നാലെ വന്ന വാരാന്ത്യ എപ്പിസോഡുകളില്‍ ജസീലയുടെ ലീഡര്‍ഷിപ്പിനെതിരെ സംസാരിച്ച മത്സരാര്‍ഥികളും ഉണ്ടായിരുന്നു. രാഹുല്‍ ഈശ്വറിന് ശേഷം മൂന്നാം വാരത്തില്‍ ഹൗസിന്‍റെ ലീഡര്‍ ആയത് നോബി ആയിരുന്നു. ഈ സീസണിലെ കൗശലക്കാരനായ ഗെയിമര്‍മാരില്‍ ഒരാളായി വിലയിരുത്തപ്പെടുന്ന നോബി തന്‍റേതായ രീതിയില്‍ ഈ സ്ഥാനം ഉപയോഗപ്പെടുത്തുന്ന കാഴ്ചയാണ് പ്രേക്ഷകര്‍ കണ്ടത്. എന്നാല്‍ ലീഡര്‍ എന്നതിനേക്കാള്‍ തന്നിലെ മത്സരാര്‍ഥിയുടെ മുന്നോട്ടുപോക്കിനാണ് നോബി പ്രാധാന്യം കൊടുത്തത് എന്നതിനാല്‍ വീക്കിലി ടാസ്ക് ഉള്‍പ്പെടെ പലതും കുളമായ കാഴ്ചയും പ്രേക്ഷകര്‍ കണ്ടു. മോഹന്‍ലാലും ഇതിനെ വിമര്‍ശിച്ചിരുന്നു.

കോടതി ടാസ്കിനിടയിലെ സംഭവം; മത്സരാര്‍ഥികളെ ചോദ്യം ചെയ്ത് മോഹന്‍ലാല്‍

Web Desk — Sun, 27 Sep 2026 09:51:03 +0530

ബിഗ് ബോസ് മലയാളം സീസണ്‍ 8 അതിന്‍റെ നാലാം വാരത്തിലേക്ക് കടക്കുകയാണ്. മുന്‍ സീസണുകളെ അപേക്ഷിച്ച് പല പ്രത്യേകതകളോടെയുമാണ് എട്ടാം സീസണ്‍ നടക്കുന്നത്. ജനാധിപത്യം എന്നതാണ് പുതിയ സീസണിന്‍റെ തീം. മുന്‍ സീസണുകളിലൊക്കെ ഈ സമയം ആവുമ്പോഴേക്ക് ഏതാനും മത്സരാര്‍ഥികള്‍ കൂടുതല്‍ സ്ക്രീന്‍ സ്പേസ് കൈയടക്കുന്നത് ദൃശ്യമായിരുന്നെങ്കില്‍ ഇക്കുറി അങ്ങനെയല്ല. ഒപ്പത്തിനൊപ്പം നില്‍ക്കുന്ന മത്സരാര്‍ഥികളാണ് ഇക്കുറി എത്തിയിരിക്കുന്നത് എന്നതാണ് അതിന് കാരണം. ഇന്നത്തെ വാരാന്ത്യ എപ്പിസോഡില്‍ കഴിഞ്ഞ വാരം നടന്ന ഗൗരവമുള്ള ഒരു കാര്യം മത്സരാര്‍ഥികളോട് മോഹന്‍ലാല്‍ ചോദിക്കുന്നുണ്ട്.

കഴിഞ്ഞ വാരം നടന്ന കോടതി ടാസ്കില്‍ ഷിബിന നേരിട്ട ഒരു സാഹചര്യമാണ് മോഹന്‍ലാല്‍ അതിന് ഇടയാക്കിയവരോടടക്കം ചോദിക്കുന്നത്. ഇതിന്‍റെ പ്രൊമോ ഏഷ്യാനെറ്റ് പുറത്ത് വിട്ടിട്ടുണ്ട്. ജയില്‍ നോമിനേഷന്‍ ലഭിച്ച മൂന്ന് പേരില്‍ ആരൊക്കെ ജയിലില്‍ പോകണമെന്നത് തീരുമാനിക്കാനാണ് ബിഗ് ബോസ് കോടതി ടാസ്ക് സംഘടിപ്പിച്ചത്. അതില്‍ ഒരാള്‍ ഷിബിന ആയിരുന്നു. രാഹുല്‍ ഈശ്വറാണ് ഷിബിനയുടെ വക്കീല്‍ ആയി എത്തിയത്. ഷിബിന അങ്ങനെ ജയില്‍ശിക്ഷയില്‍ നിന്ന് ഒഴിവാകുകയും ചെയ്തു. നോമിനേഷന്‍ ലഭിച്ച മറ്റൊരു മത്സരാര്‍ഥിയുടെ വാദം നടക്കുമ്പോള്‍ അവിടെ ഇരിക്കുയായിരുന്ന തന്‍റെ ഉടുപ്പിന്‍റെ വള്ളി പിന്നില്‍ ഇരുന്നവര്‍ അഴിച്ചുവെന്നും അതില്‍ ചെരുപ്പ് കെട്ടിയിട്ടുവെന്നും ഷിബിന പിന്നീട് പറഞ്ഞിരുന്നു.

ഗൗതം ശശി ആയിരുന്നു ഇതിന് പിന്നില്‍. ഇതിനെ തടയാതെ പ്രോത്സാഹിപ്പിക്കുന്ന നിലപാടാണ് ശ്രീലക്ഷ്മി അറയ്ക്കല്‍ സ്വീകരിച്ചതെന്നും ചില മത്സരാര്‍ഥികള്‍ ആരോപിച്ചിരുന്നു. ഷിബിന ഇതിനെക്കുറിച്ച് വീണ്ടും വീണ്ടും സംസാരിച്ചതോടെയാണ് മറ്റുള്ളവര്‍ക്കും സംഭവത്തിന്‍റെ ഗൗരവം മനസിലായത്. മരിക്കുന്നത് വരെ തനിക്ക് ഏറ്റവും ട്രോമ തരുന്ന ഒരു സംഭവമായി അത് മാറാമെന്ന് മോഹന്‍ലാലിനോട് പറയുന്ന ഷിബിനയെ പ്രൊമോയില്‍ കാണാം. ഗൗതമാണോ അത് ചെയ്തത് എന്ന് ചോദിക്കുന്ന മോഹന്‍ലാലിനോട് തെറ്റ് പറ്റിപ്പോയി എന്ന് പറയുന്ന ഗൗതത്തെയും വീഡിയോയില്‍ കാണാം. നിങ്ങള്‍ അതിര് കടക്കുന്നതായി തോന്നുന്നുവെന്നാണ് ശ്രീലക്ഷ്മിയോട് മോഹന്‍ലാല്‍ പറയുന്നു. എന്തിനാണ് ആവശ്യമില്ലാത്ത കാര്യത്തില്‍ പോയി ഇടപെടുന്നതെന്ന് രാഹുല്‍ ഈശ്വറിനോടും മോഹന്‍ലാല്‍ ചോദിക്കുന്നു. എന്താണ് ഈ വിഷയത്തില്‍ ചെയ്യേണ്ടതെന്നും മോഹന്‍ലാല്‍ ഷിബിനയോട് ചോദിക്കുന്നുണ്ട്. ശ്രീലക്ഷ്മിയില്‍ നിന്നും ഗൗതം ശശിയില്‍ നിന്നും ഒരു തരത്തിലുള്ള ക്ഷമാപണവും തനിക്ക് ആവശ്യമില്ല എന്നാണ് ഇതിന് ഷിബിനയുടെ മറുപടി. അതേസമയം വിഷയത്തില്‍ മോഹന്‍ലാലിന്‍റെയും ബിഗ് ബോസിന്‍റെയും നിലപാട് എന്തെന്ന് അറിയാനുള്ള കാത്തിരിപ്പിലാണ് പ്രേക്ഷകര്‍.

വീക്കന്റ് ടാസ്കിന്റെ പ്രതിഫലത്തുക കൂടുതൽ കൈക്കലാക്കിയ നോബിയുടെ നടപടി ശരിയായോ?; ബിഗ് ബോസ് വീട്ടിൽ ചേരി തിരിഞ്ഞ് ചർച്ച

Web Desk — Tue, 15 Sep 2026 22:43:42 +0530

ബിഗ് ബോസ് മലയാളം സീസൺ 8 ഒൻപതാം ദിവസത്തിലേക്ക് എത്തിയിരിക്കുകയാണ്. വീക്കന്റ് എപ്പിസോഡിൽ കാളിയും റിനിയും പുറത്തായി. എന്നാൽ വൈൽഡ് കാർഡ് എൻട്രിയായി ഒറ്റ മത്സരാത്ഥിയായി താഷിയും ഷിബിനയും ബിബി വീട്ടിലെത്തി. പുതിയ ആഴ്ചയിൽ രാഹുൽ ഈശ്വറിനെയാണ് ലീഡറായി തിരഞ്ഞെടുക്കപ്പെട്ടത്. പ്രതിപക്ഷ നേതാവായി എൽദോയും തിരഞ്ഞെടുക്കപ്പെട്ടു.

ഗായത്രി സുരേഷിന്റെ വീട്ടിലേക്കുള്ള റീ എൻട്രി ആയിരുന്നു ഇന്നത്തെ എപ്പിസോഡിലെ ഏറ്റവും വലിയ സർപ്രൈസ്. രാവിലെ തന്നെ ഗായത്രി വീട്ടിലേക്ക് റീ എൻട്രി നടത്തുകയുണ്ടായി. ഇനി ഗായത്രി എങ്ങനെയാവും ഗെയിം മുന്നോട്ട് കൊണ്ടുപോവുക എന്നാണ് പ്രേക്ഷകർ ഏവരും ഉറ്റുനോക്കുന്നത്. ജസീലക്കെതിരെ ഗായത്രി ഗെയിം കളിക്കുമോ അതോ ന്യൂട്രൽ ആയി നിന്നുകൊണ്ടാണോ കളിക്കുക എന്നതാണ് പ്രധാന കാര്യം.

അതേസമയം ഇന്നത്തെ ദിവസത്തെ ടാസ്ക് ആയി ബിഗ് ബോസ് റോഡ് നിർമാണമാണ് അംഗംങ്ങൾക്ക് നൽകിയത്. കോൺട്രാക്ടർമാരായി ശ്രീലക്ഷ്മിയെയും കടൽ കൊമ്പനെയും നിയമിച്ച ബിഗ് ബോസ് നോമിനേഷനിലുള്ള അംഗങ്ങളെ ഇരു ടീമുകളിലുമായി വിന്യസിച്ചു. ഏറ്റവും നന്നായി റോഡ് നിർമ്മാണം പൂർത്തിയാക്കുക എന്നതായിരുന്നു ടാസ്ക് എങ്കിലും പരസ്പരം നിർമ്മാണ സാമഗ്രികകൾ തട്ടിപറിച്ചുകൊണ്ടാണ് ഇരു ടീമും ടാസ്ക് കളിച്ചത് എന്നതും ശ്രദ്ധേയമാണ്.

തുടർന്ന് അധികാരികളായ രാഹുൽ ഈശ്വറും സംഘവും പരിശോധനക്കെത്തിയപ്പോൾ ശ്രീലക്ഷ്മിയും വിജയിച്ചുവെന്നാണ് വിധിയെഴുതിയത്. അധികാരികളുടെ തീരുമാനം ബിഗ് ബോസും ശരിവച്ചു. വിജയിച്ചവർക്കുള്ള പ്രതിഫലതുകയിൽ നിന്നും ഏറ്റവും കൂടുതൽ സ്വന്തമാക്കുന്ന രണ്ട് പേർ ലീഡർ സ്ഥാനാർഥികൾ ആവുകയും ഏറ്റവും കുറവ് ലഭിക്കുന്ന രണ്ട് പേർ നേരിട്ട് നോമിനേഷനിലേക്ക് കടക്കുകയും ചെയ്യും.

ഏറ്റവും കൂടുതൽ നോബിയാണ് എടുത്തത്. രാകേഷിനും എൽദോയ്ക്കും പ്രതിഫലം ഒന്നും തന്നെ ലഭിച്ചില്ല. 6900 കരസ്ഥമാക്കിയ നോബിയുടെ നടപടിയെ കോൺട്രാക്ടർ ആയ ശ്രീലക്ഷ്മി ചോദ്യം ചെയ്യുകയും ബിബി വീട്ടിൽ വലിയ ചർച്ചയാവുകയും ചെയ്തു. താൻ കളിച്ചത് ഫെയർ ആയ ഗെയിം അല്ലെന്നും അതാണ് തന്റെ ഗെയിം എന്നും നോബി വ്യക്തമാക്കി. നോബിയുടെ നടപടി ശരിയാണോ എന്നാണ് ഇപ്പോൾ പ്രേക്ഷകർക്കിടയിൽ ഉയർന്നുവരുന്ന പ്രധാന കാര്യം. എന്തായാലും വീക്കന്റ് എപ്പിസോഡിൽ മോഹൻലാൽ വരുമ്പോൾ ഇക്കാര്യത്തെ എങ്ങനെയാണ് ഡീൽ ചെയ്യുന്നത് എന്നതും പ്രധാനപ്പെട്ടതാണ്.

ഒരേ കടമ്പ താണ്ടി ബിബി വീട്ടിലേക്കെത്തിയ 'എതിരാളികൾ', കളം പിടിച്ച് മുന്നേറി എൽദോയും ഷിജിനും

Bibin Babu — Fri, 18 Sep 2026 18:03:58 +0530

അഗ്നിപരീക്ഷ താണ്ടി വീട്ടിലേക്കെത്തിയ രണ്ട് പേർ, ഒരാൾ തന്റെ വാക് സാമർത്ഥ്യംകൊണ്ട് പിടിച്ചുനിൽക്കുന്നയാൾ. മറ്റൊരാൾ തന്റെ വ്യത്യസ്തമായ ചിന്താരീതികൊണ്ടും പെരുമാറ്റം കൊണ്ടും പ്രേക്ഷകരുടെ ഇഷ്ടം നേടുന്ന ആൾ. ഒരാൾ ബിഗ് ബോസ് വീടിനുള്ളിൽ ഏറെ സ്വീകാര്യനായ ആൾ, മറ്റേയാൾ വീട്ടിലെ ഭൂരിപക്ഷം ആളുകൾക്കും താല്പര്യമില്ലാത്ത ആൾ. ഒരാൾ കൂട്ടം ചേർന്ന് കളിയ്ക്കാൻ ശ്രമിക്കുമ്പോൾ മറ്റേയാൾ ഒറ്റക്കുനിന്ന് കളിയ്ക്കാൻ ശ്രമിക്കുന്നു. പറഞ്ഞുവരുന്നത് എൽദോയെയും ഷിജിനെയും കുറിച്ചാണ്. കരുത്തരെന്ന് തോന്നിപ്പിക്കുന്ന ഒന്നിലേറെ മത്സരാർത്ഥികളുള്ള ഈ സീസണിൽ ഏറെ നിർണ്ണായകമായേക്കാവുന്നതാണ് എൽദോയും ഷിജിനും തമ്മിലെ പ്രത്യക്ഷവും പരോക്ഷവുമായ ഏറ്റുമുട്ടലുകൾ. ഷോയുടെ ഗതിയിൽത്തന്നെ മാറ്റങ്ങൾ വരുത്താൻ പൊട്ടൻഷ്യലുണ്ട് ഇവർക്കും ഇവരുടെ ഇടയിലെ മത്സരബുദ്ധിക്കും.

അഗ്നിപരീക്ഷയിൽനിന്ന് സെലക്ട് ആയേക്കുമെന്ന് ഏറെക്കുറെ എല്ലാവർക്കും ഉറപ്പുണ്ടായിരുന്നു വ്യക്തി ആണ് എൽദോ എങ്കിൽ ബിഗ് ബോസ് വീട്ടിലേക്ക് സെലക്റ്റ് ചെയ്യപ്പെട്ടതിലെ ഏറ്റവും അൺഎക്സ്പെക്റ്റഡ് മത്സരാർത്ഥി ആയിരുന്നു ഷിജിൻ. ഷിജിനുപോലും ഏറെ അപ്രതീക്ഷിതമായിരുന്നു ആ തെരഞ്ഞെടുപ്പ്. അഗ്നിപരീക്ഷയുടെ ആദ്യ ഘട്ടങ്ങളിൽ അത്ര ആക്റ്റീവ് ആകാതിരുന്ന എൽദോ പോകെപ്പോകെയാണ് ഷോയിൽ തന്റേതായ സ്ഥാനം ഉറപ്പിച്ചത് എങ്കിൽ ഷിജിന്റെ കാര്യത്തിൽ ഇത് നേരെ തിരിച്ചാണ്. ആദ്യ ദിവസങ്ങളിൽ പൊട്ടൻഷ്യലുള്ള മത്സരാർത്ഥി എന്ന് തോന്നിപ്പിക്കാനായ ഷിജിന് മുന്നോട്ടുള്ള യാത്രയിൽ ആ ഇമേജ് നിലനിർത്താൻ സാധിച്ചിരുന്നില്ല.

ബിഗ് ബോസ് ഷോയിൽ വളരെ അൺഫിറ്റ് ആയ ആളാണ് ഷിജിനെന്ന് സഹമത്സരാർത്ഥികളും ജഡ്ജസും ഒന്നിലേറെ തവണ അഭിപ്രായപ്പെടുകയും ചെയ്തിട്ടുണ്ട്. ഒരുപക്ഷേ അതൊക്കെത്തന്നെയാകണം അയാളുടെ ബിഗ് ബോസ് വീട്ടിലേക്കുള്ള വരവിലേക്കും വഴിവച്ചത്. അഗ്നിപരീക്ഷയിൽ പല ഘട്ടത്തിലും ഷിജിൻ നേരിട്ട ഒറ്റപ്പെടലുകൾ പ്രേക്ഷകരുമായി അയാൾ പോലുമറിയാതെ അയാൾക്കൊരു കണക്ഷൻ ഉണ്ടാക്കിയിട്ടുണ്ട്. അതേ സമയം എൽദോയുടെത് കുറച്ചുകൂടി 'സ്ലോ ആൻഡ് സ്റ്റെഡി' രീതിയിലുള്ള മുന്നേറ്റമായിരുന്നു. ആദ്യമൊന്നും അധികം ശ്രദ്ധിക്കപ്പെടാതിരുന്ന എൽദോ പതുക്കെപ്പതുക്കെ തന്റെ ഗ്രാഫ് ഉയർത്തുന്നതാണ് അഗ്നിപരീക്ഷയിൽ നമ്മൾ കണ്ടത്.

അഗ്നിപരീക്ഷയിൽ മറ്റുള്ളവരെല്ലാം ഒറ്റപ്പെടുത്തിയപ്പോഴും ഷിജിന് പിന്തുണ നൽകിയ മത്സരാർത്ഥി കൂടിയായിരുന്നു എൽദോ. പലപ്പോഴും മാനസികമായി ഷിജിൻ തളരുന്ന ഘട്ടങ്ങളിൽ എൽദോ ഷിജിനുവേണ്ടി സംസാരിച്ചു. എന്നാൽ ബിഗ് ബോസ് വീട്ടിൽ എൽദോയുടെ ഏറ്റവും വലിയ എതിരാളി ഇതേ ഷിജിൻ ആണ്. എന്താകും അതിന്റെ കാരണം? ഉത്തരം വളരെ സിംപിൾ ആണ്. ഷിജിൻ അഗ്നിപരീക്ഷ താണ്ടി എത്തുമെന്ന് എൽദോ ഒരിക്കലും പ്രതീക്ഷിച്ചിരുന്നില്ല എന്നതുതന്നെ. എല്ലാവരാലും ഒറ്റപ്പെട്ടുപോയ താരതമ്യേന വീക്ക് ആയ ഒരു മത്സരാർത്ഥിയെ പിന്തുണയ്ക്കുന്നതിലൂടെ തനിക്ക് ലഭിക്കുന്ന പ്രേക്ഷക പിന്തുണ എന്തായിരിക്കുമെന്ന് എൽദോയെ പോലൊരു കണ്ണിങ് മത്സരാർത്ഥിക്ക് ഊഹിക്കാവുന്നതേയുള്ളൂ. ഒപ്പം ഷിജിൻ തനിക്ക് ഒരിക്കലും ഒരു എതിരാളിയാകില്ല എന്നും എൽദോ കരുതിയിരുന്നിരിക്കണം.

കഴിഞ്ഞ ദിവസം ഗായത്രി സുരേഷിന് തിരികെ വീട്ടിലേക്ക് എത്തണമെങ്കിൽ തന്റെ ലീഡർ സ്ഥാനം രാഹുൽ ഈശ്വറിന് നൽകേണ്ടിവരുമെന്ന സാഹചര്യത്തിൽ മുൻപിൻ ആലോചിക്കാതെയാണ് എൽദോ അത് സമ്മതിച്ചത്. അയാളുടെ ആ മൂവ് വളരെ വലിയ ജനസമ്മതി ഉണ്ടാക്കി എന്നത് തർക്കമില്ലാത്ത കാര്യവുമാണ്. ഇതുതന്നെയാണ് അഗ്നിപരീക്ഷയിൽ എൽദോ ഷിജിന് നൽകിയ പിന്തുണയിലും ലക്ഷ്യമിട്ടത് എന്നാണ് കരുതാനാവുക. കാരണം എൽദോ എപ്പോഴും ദീർഘകാലാടിസ്ഥാനത്തിനുള്ള ഗുണം ലക്ഷ്യമിട്ട് മുന്നോട്ടുനീങ്ങുന്ന ആളാണ്. തന്റെ എതിരാളികളെ കൃത്യമായി സ്പോട്ട് ചെയ്യാനും അവർക്കെതിരെ പ്ലാനിങ്ങോടെ നീങ്ങാനുമുള്ള എൽദോയുടെ കഴിവ് ബിഗ് ബോസ് പോലൊരു ഷോയിൽ വളരെ വലിയ ഇമ്പാക്ട് ഉണ്ടാക്കുന്നതുമാണ്. പക്ഷേ ഷിജിൻ കൂടി ബിഗ് ബോസിലേക്ക് എത്തിയതോടെയാണ് കാര്യങ്ങൾ മാറി മറിഞ്ഞത്.

വീട്ടിലേക്ക് കയറിയ ഷിജിൻ വളരെ കോൺഫിഡന്റ് ആയ മറ്റൊരാളായാണ് പെരുമാറിയത്. തനിക്ക് ലഭിച്ച പ്രേക്ഷക പിന്തുണ ഷിജിനെ അഗ്നിപരീക്ഷയിൽനിന്നും ഏറെ വ്യത്യസ്തനായ മറ്റൊരാളാക്കി മാറ്റുകയും ചെയ്തു. താൻ ഒറ്റക്കാണെന്ന പ്രതീതി ഉണ്ടാക്കി കളിക്കാനാണ് ഷിജിൻ എപ്പോഴും ശ്രമിച്ചത്. അതുകൊണ്ടുതന്നെ അഗ്നിപരീക്ഷയിൽനിന്നെത്തിയ മറ്റ് മൂന്ന് മത്സരാർത്ഥികളും ഒരുമിച്ച് നിൽക്കുമ്പോൾ അവർക്കെതിരെ നിൽക്കാനാണ് ഷിജിൻ നോക്കിയത്. അഗ്നിപരീക്ഷയിൽ തനിക്ക് ഗുണമായ ഒറ്റപ്പെടൽ ഇവിടെയും പയറ്റാനുള്ള ശ്രമങ്ങളും ഷിജിന്റെ ഭാഗത്തുനിന്ന് ഉണ്ടായി. എന്നാൽ അഗ്നിപരീക്ഷയിൽ അത് വളരെ സ്വാഭാവികമായാണ് സംഭവിച്ചതെങ്കിൽ ഇവിടെ അത് കുറേയൊക്കെ ഇന്റൻഷനൽ ആയിരുന്നു.

അതുകൊണ്ടുതന്നെ ഷിജിന്റെ ഒറ്റപ്പെടൽ സ്ട്രാറ്റജി എത്രത്തോളം വർക്ക്ഔട്ട് ആകുമെന്ന് പറയാനാവില്ല. മറ്റുള്ളവരിൽനിന്ന് അൽപ്പം വ്യത്യസ്തമായി കളിക്കണമെന്ന ഷിജിന്റെ നിർബന്ധബുദ്ധിയും ഒന്നിലേറെ ടാസ്കുകളിൽ വ്യക്തമായതാണ്. താൻ നന്നായി ടാസ്കുകളിൽ പെർഫോം ചെയ്യുന്നു എന്ന പ്രതീതി സൃഷ്ടിക്കാൻ അതുകൊണ്ടുതന്നെ ഷിജിന് കഴിയുന്നുമുണ്ട്. എന്നാൽ അതിനെ ഫലപ്രദമായി മുന്നോട്ട് ഉപയോഗിക്കാനോ അതിനൊരു തുടർച്ച ഉണ്ടാക്കാനോ അയാൾക്ക് കഴിയുന്നില്ല എന്നതാണ് ഷിജിന്റെ പ്രധാന പോരായ്മ. ലക്ഷ്വറി ടാസ്കിൽ ഹൌസ് മുഴുവൻ എതിരെ നിന്നിട്ടും തനിക്ക് ശരിയെന്ന് തോന്നിയ കാര്യങ്ങൾ ഷിജിൻ പ്രാവർത്തികമാക്കി. അതിന് വീക്കെൻഡ് എപ്പിസോഡിൽ മോഹൻലാൽ അഭിനന്ദിക്കുകയും സമ്മാനം നൽകുകയും ചെയ്തു. എന്നാൽ വീണ്ടുവിചാരമില്ലാത്ത പ്രവർത്തിച്ച് ഷിജിൻ തനിക്ക് ലഭിക്കേണ്ടിയിരുന്ന ആ 'ഹീറോയിക് മൊമെന്റ്‌' നഷ്ടമാക്കുകയാണ് ചെയ്തത്.

ഇത്തരം കാര്യങ്ങളിലാണ് എൽദോയുടെ മികവ്. ഗായത്രിയുടെ മടങ്ങിവരവിനുവേണ്ടി ലീഡർ സ്ഥാനം ത്യജിച്ച സംഭവം തന്നെ ഉദാഹരണം. പ്രതിപക്ഷ നേതാവാണ് എങ്കിൽപ്പോലും ലീഡറായ രാഹുലിനേക്കാൾ വോയ്‌സ് ഉറപ്പായും എൽദോയ്ക്ക് ഈ ആഴ്ച വീട്ടിൽ ഉണ്ടാകും. അടുത്ത ലീഡറാകാൻ ഭൂരിപക്ഷം എൽദോയെ വീണ്ടും തെരഞ്ഞെടുത്തേക്കാനും ഇടയുണ്ട്. അത്തരത്തിൽ കിട്ടുന്ന അവസരങ്ങൾ കൂടുതൽ ശ്രദ്ധയോടെ ഉപയോഗിക്കാൻ എൽദോ ശ്രമിക്കുമ്പോൾ കാര്യങ്ങൾ മനസിലാക്കാതെ എടുത്തുചാടുന്നു എന്നതാണ് ഷിജിൻ ചെയ്യുന്നത്.

കമ്മ്യൂണിക്കേഷൻ സ്കിൽ ആണ് എൽദോയുടെ മറ്റൊരു പോസിറ്റീവ്. വാക്കുകൾ നിർത്തിവച്ച് ഒരു പ്രസംഗികനെപ്പോലെ സംസാരിക്കാൻ എൽദോയ്ക്ക് സാധിക്കുന്നു എന്നുള്ളതുകൊണ്ട് അയാൾ പറയുന്നത് പോയിന്റുകളാണെന്ന് വീട്ടിൽ ഉള്ളവരെ പെട്ടന്ന് തോന്നിപ്പിക്കാൻ എൽദോയ്ക്ക് കഴിയാറുണ്ട്. എന്നാൽ ഷിജിൻ ഇക്കാര്യത്തിൽ വളരെ പിന്നിലാണ്. കാര്യങ്ങൾ നന്നായി കമ്മ്യൂണിക്കേറ്റ് ചെയ്യാനോ പറഞ്ഞുഫലിപ്പിക്കാനോ മറ്റുള്ളവരെ മനസിലാക്കിച്ചുകൊടുക്കാനോ ഷിജിന് പലപ്പോഴും പറ്റാതെ പോകുന്നതാണ് നമ്മൾ കാണുന്നത്. അതേസമയം വളരെ ഓപ്പൺ ആയ ഷിജിന്റെ പെരുമാറ്റവും എക്സ്പ്രസീവ് ആയ ശൈലിയും കാരണം പ്രേക്ഷകർക്കിടയിൽ അയാൾക്കൊരു ജെനുവിൻ വ്യക്തി എന്ന ഇമേജ് ഉണ്ടാവാനും ഇടയുണ്ട്. ഇക്കാര്യത്തിലാണ് എൽദോ അൽപ്പം പിന്നിലാവുന്നത്.

നാടകീയവും അതിഭാവുകത്വവും നിറഞ്ഞ സംസാര ശൈലിയും പെരുമാറ്റവും അത്ര ജെനുവിനായി പ്രേക്ഷകർക്ക് തോന്നാൻ ഇടയില്ല. നല്ല ഗെയ്മർ ആണെന്ന് പറയുമ്പോഴും എൽദോ ഒരു ജെനുവിൻ മത്സരാർത്ഥി ആണോ എന്നതിൽ പ്രേക്ഷകർ സംശയം പ്രകടിപ്പിച്ചാൽ കുറ്റം പറയാനുമാവില്ല. ഇക്കാരണങ്ങൾ കൊണ്ടുതന്നെ വീടിനുള്ളിൽ എൽദോ ഒരു മികച്ച ഗെയ്മർ എന്ന തോന്നൽ ഉണ്ടാക്കുമ്പോൾ ഷിജിൻ മോശം മത്സരാർത്ഥി എന്ന ഇമേജ് ആണ് സൃഷ്ടിക്കുന്നത്. പക്ഷെ വീടിന് പുറത്ത് ഇതിൽ ഏറ്റക്കുറച്ചിലുകൾ സംഭവിക്കുന്നുമുണ്ട്. എന്തായാലും അഗ്നിപരീക്ഷ എന്ന കടമ്പ താണ്ടി വീട്ടിലേക്കെത്തിയ ഈ രണ്ടുപേരും ബിഗ് ബോസിൽ ഏറെദൂരം മുന്നോട്ടുപോകാൻ തന്നെയാണ് സാധ്യത.

ഷിജിൻ ഗെയിം മാറ്റിയോ?; ടാസ്കുകൾ ഒന്നും വിജയിക്കാതെ മത്സരാർത്ഥികൾ, ഫിസിക്കൽ അറ്റാക്കിന് ആരൊക്കെ പുറത്തുപോകും?

Web Desk — Wed, 23 Sep 2026 22:57:02 +0530

ബിഗ് ബോസ് മലയാളം സീസൺ 8 പതിനേഴാം ദിവസത്തിലേക്ക് കടന്നിരിക്കുകയാണ്. കടുത്ത മത്സരത്തിന്റെ ഘട്ടത്തിലേക്കാണ് ബിഗ് ബോസ് വീട് കടന്നിരിക്കുന്നത്. പുതിയ വീക്കന്റ് ടാസ്ക് വീട്ടിൽ നടന്നുകൊണ്ടിരിക്കുകയാണ്. ലീഡറും അനുയായികളും മാത്രമാണ് ഇപ്പോൾ വീടിനുള്ളിൽ ഉള്ളത്. ബാക്കിയുള്ള ഭൂരിപക്ഷം മത്സരാർത്ഥികളും വീടിന് പുറത്താണ്. ടാസ്ക് വിജയിച്ചയാൾ മാത്രമേ ഉള്ളിലേക്ക് പ്രവേശനം ലഭിക്കുകയുള്ളു. കഴിഞ്ഞ ദിവസം ടാസ്ക് വിജയിച്ച് ജസീലയും നേഹയും താഷിയും ഗായത്രിയും ആസിഫും വീടിനുള്ളിലേക്ക് പ്രവേശനം നേടുകയുണ്ടായി. കൂടാതെ ലീഡറുടെ നേരിട്ടുള്ള തിരഞ്ഞെടുപ്പ് വഴി വിക്കിയും ഷിജിനും വീടിനുളിലേക്ക് പ്രവേശനം നേടുകയുണ്ടായി.

ഷിജിൻ വീടിനുള്ളിലേക്ക് കയറിയതോട് കൂടി ഗെയിം മാറുന്ന കാഴ്ചയാണ് ബിഗ് ബോസ് വീട്ടിൽ കാണാൻ കഴിയുന്നത്. ഇന്നത്തെ ടാസ്കിൽ അധികാരികളിൽ നിന്നും ജനങ്ങളിൽ നിന്നും മൂന്ന് പേർ അടങ്ങുന്ന ടീമായി മാറി ടാസ്ക് വിജയിക്കുന്ന ടീമിന് അടുക്കള ഭരണം ലഭിക്കുമെന്നായിരുന്നു നിർദ്ദേശം. എന്നാൽ ഉന്തും തള്ളുമായി മാറിയ ടാസ്ക് കൃത്യമായി മനസ്സിലാക്കാനോ ഇരു ടീമിനും സാധിക്കാത്തതിനാൽ ടാസ്ക് ബിഗ് ബോസ് റദ്ധാക്കുകയാണുണ്ടായത്. മൂന്നാം ടാസ്‌കും കൃത്യമായി കളിക്കാൻ ഇരു ടീമിനും സാധിച്ചില്ല.

ഇതിനിടയിൽ ഗെയിമിനിടയിലെ തർക്കം വാക്കേറ്റത്തിലേക്കും തുടർന്ന് വലിയ രീതിയിലുള്ള ഉന്തും തല്ലിലേക്കും നീങ്ങുകയുണ്ടായി. താഷി ഗൗതം ശശിയെ ഫിസിക്കൽ അസോൾട്ട് ചെയ്തുവെന്ന് ആരോപിച്ച് വലിയ രീതിയിലുള്ള തർക്കമാണ് വീട്ടിൽ അരങ്ങേറുന്നത്. താഷിയെ ബിഗ് ബോസ് എന്ത് തരത്തിലുള്ള ശിക്ഷയാണ് നൽകാൻ പോകുന്നതെന്നാണ് ഇനി പ്രേക്ഷകർ ഉറ്റുനോക്കുന്നത്.

പുതിയ ലീഡറായി തിരഞ്ഞെടുക്കപ്പെട്ടത് എല്‍ദോ; ഒടുവില്‍ ബിഗ് ബോസിന്‍റെ ട്വിസ്റ്റ്

Web Desk — Mon, 14 Sep 2026 23:15:49 +0530

ബിഗ് ബോസ് മലയാളം സീസണ്‍ 8 ല്‍ രണ്ടാം വാരത്തിലെ ലീഡര്‍ തിരഞ്ഞെടുപ്പില്‍ ട്വിസ്റ്റുമായി ബിഗ് ബോസ്. ഒന്നാം വാരത്തിലെ ലീഡര്‍ ജസീല പര്‍വീണ്‍ ആയിരുന്നു. ലീഡര്‍ സ്ഥാനം രണ്ടാം വാരത്തിലും തുടര്‍ന്ന് വഹിക്കണമെങ്കില്‍ ജസീലയ്ക്ക് വിശ്വാസവോട്ട് നേടണമായിരുന്നു. എന്നാല്‍ ജനസഭയില്‍ നടന്ന വിശ്വാസ വോട്ടെടുപ്പില്‍ ഭരണമാറ്റമാണ് മറ്റ് മത്സരാര്‍ഥികള്‍ ആവശ്യപ്പെട്ടത്. അങ്ങനെ ജസീലയുടെ ലീഡര്‍ സ്ഥാനവും മൃദുല വിജയ്, സുമേഷ് ചന്ദ്രന്‍ എന്നിവരുടെ അനുയായിസ്ഥാനങ്ങളും നഷ്ടമായി. തുടര്‍ന്ന് പുതിയ ലീഡറെ കണ്ടെത്താനുള്ള വോട്ടിംഗ് നടന്നു. ഇതില്‍ ഏറ്റവുമധികം ആളുകള്‍ പറഞ്ഞ രണ്ട് പേരുകള്‍ എല്‍ദോയുടേയും രാഹുല്‍ ഈശ്വറിന്‍റേതും ആയിരുന്നു. പിന്നീട് ഇവരില്‍ ആരാണ് അടുത്ത ലീഡര്‍ എന്ന് കണ്ടെത്താനുള്ള വോട്ടിംഗ് നടന്നു.

എന്നാല്‍ ഇതില്‍ രാഹുല്‍ ഈശ്വറിനെ ഞെട്ടിച്ചുകൊണ്ട് വന്‍ മാര്‍ജിനിലാണ് എല്‍ജോ ജയിച്ചത്. രാഹുല്‍ ഈശ്വറിന് വെറും 4 വോട്ടുകള്‍ മാത്രം ലഭിച്ചപ്പോള്‍ എല്‍ദോയ്ക്ക് ലഭിച്ചത് 15 വോട്ടുകള്‍ ആണ്. സ്വാഭാവികമായും എല്‍ദോ അടുത്ത ലീഡറായി തിരഞ്ഞെടുക്കപ്പെട്ടു. ആദ്യം തന്നെ ബിഗ് ബോസ് എല്‍ദോയോട് ഒരു കാര്യം ആരാഞ്ഞു. കഴിഞ്ഞ ഭരണ സമിതി എടുത്ത ഏതെങ്കിലും തീരുമാനം തിരുത്തണമെന്ന് തോന്നുന്നുണ്ടോ എന്നായിരുന്നു അത്. സ്പോട്ട് എവിക്ഷനിലൂടെ ഗായത്രി സുരേഷിനെ പുറത്താക്കിയ തീരുമാനം തിരുത്തണമെന്ന് ആഗ്രഹമുണ്ടെന്ന് എല്‍ദോ അറിയിച്ചു. അവിടെ ബിഗ് ബോസിന്‍റെ ട്വിസ്റ്റും എത്തി.

ആ ആവശ്യം അംഗീകരിക്കണമെങ്കില്‍ എല്‍ദോ ഒരു കാര്യം ചെയ്യേണ്ടിവരുമെന്ന് ബിഗ് ബോസ് അറിയിച്ചു. ഗായത്രി സുരേഷിനെ തിരികെ കൊണ്ടുവരണമെങ്കില്‍ എല്‍ദോ ഇപ്പോള്‍ ലഭിച്ച ലീഡര്‍ സ്ഥാനം ഒഴിയണമെന്നും പകരം ആ സ്ഥാനത്തേക്ക് ഇപ്പോള്‍ പ്രതിപക്ഷ നേതൃസ്ഥാനത്ത് ഇരിക്കുന്ന രാഹുല്‍ ഈശ്വറിനെ നിയമിക്കേണ്ടിവരുമെന്നും ബിഗ് ബോസ് അറിയിച്ചു. ഉടന്‍ തന്നെ എല്‍ദോ തന്‍റെ തീരുമാനം പറഞ്ഞു. ലീഡര്‍ സ്ഥാനം ഒഴിയാന്‍ താന്‍ തയ്യാറാണെന്നതായിരുന്നു അത്. അങ്ങനെ എല്‍ദോ ലീഡര്‍ സ്ഥാനം ഒഴിയുകയും രാഹുല്‍ ഈശ്വര്‍ ലീഡര്‍ ആവുകയും ചെയ്തു. വിക്കി തഗ്ഗും ലൊലീറ്റയുമാണ് രാഹുല്‍ ഈശ്വറിന്‍റെ അനുയായികള്‍. ഒരു അനുയായിയായി ആര്‍ജെ അഞ്ജലിയുടെ പേര്‍ ചിലര്‍ നിര്‍ദേശിച്ചെങ്കിലും വിക്കി തഗ്ഗ് അതില്‍ തന്‍റെ എതിര്‍പ്പ് അറിയിക്കുകയായിരുന്നു.

'റിനിയെ എന്തിനാണ് അതിജീവിതയെന്ന് വിളിക്കുന്നത്?, അതിജീവിച്ചത് രാഹുല്‍ ഈശ്വറല്ലേ?'; ചോദ്യവുമായി ദീപ

Web Desk — Tue, 15 Sep 2026 14:39:28 +0530

കേരളമാകെ ചർച്ച ചെയ്ത ഒരു കേസിൽ ഇരുചേരികളിൽ നിന്നവരായിരുന്നു രാഹുൽ ഈശ്വറും മാധ്യമപ്രവർത്തകയും നടിയുമൊക്കെയായ റിനി ആൻ ജോർ‌ജും. ഇത്തവണ ബിഗ്ബോസിൽ ഇരുവരും മാറ്റുരക്കാൻ എത്തുകയും ചെയ്തു. ബിഗ് ബോസിൽ എത്തിയതിന് പിന്നാലെ റിനിയും രാഹുൽ ഈശ്വറും തമ്മിൽ അഭിപ്രായവ്യത്യാസങ്ങൾ ഉണ്ടായിരുന്നെങ്കിലും പിന്നീട് ഇരുവരും രമ്യതയിലെത്തി. പിന്നാലെ റിനി പുറത്താകുകയും ചെയ്‍തിരുന്നു.

ഇതിനിടെ രാഹുൽ ഈശ്വറിന്റെ ഭാര്യ ദീപ റിനി ആൻ ജോർജിനെ കുറിച്ച് പറഞ്ഞ കാര്യങ്ങളാണ് ഇപ്പോൾ സോഷ്യൽ മീഡിയയിൽ വീണ്ടും ചർച്ച ആകുന്നത്. റിനി തങ്ങളുടെ ജീവിതത്തിൽ നല്ല രീതിയിൽ ഒരു പ്രശ്നമുണ്ടാക്കിയ വ്യക്തിയാണ് എന്നാണ് ദീപ രാഹുൽ പറയുന്നത്. ‘അതിജീവത’ എന്ന വിശേഷണം ഉപയോഗിക്കുന്നതിലാണ് തനിക്ക് കൂടുതൽ വിഷമമെന്നും ദീപ കൂട്ടിച്ചേർത്തു. ''ചേട്ടൻ 16 ദിവസം ജയിലിൽ പോയതിൽ എവിടെയൊക്കെയോ ഒരു കാരണക്കാരി റിനി കൂടി ആയിരുന്നു. എന്നാൽ അവരെ ഇപ്പോഴും ആളുകൾ അതിജീവിത എന്ന് വിളിക്കുന്നതിന്റെ കാരണമാണ് എനിക്ക് മനസിലാകാത്തത്. എത്രയോ കള്ളക്കേസുകളാണ് നമ്മുടെ നാട്ടിലുള്ളത്. വ്യാജ കേസുകൾ കാരണം ജീവിതം നഷ്ടപ്പെട്ട എത്രയോ ആളുകൾ നമുക്ക് ചുറ്റുമുണ്ട്. റിനി എന്താണ് സർവൈവ് ചെയ്തത്? ശരിക്കും ഇതിൽ സർവൈവ് ചെയ്തത് എന്റെ ഭർത്താവല്ലേ?. എന്റെ കുട്ടികൾക്കും സമാനമായൊരു സാഹചര്യം ഭാവിയിൽ ഉണ്ടായേക്കില്ലേ'' എന്നും ദീപ ചോദിക്കുന്നു.

ബിഗ് ബോസ് മലയാളം സീസൺ 8ൽ നിന്നും ശ്രീലയ എവിക്ട്

Nithya G Robinson — Sun, 20 Sep 2026 22:15:38 +0530

ബിഗ് ബോസ് മലയാളം സീസൺ 8ൽ രണ്ടാമത്തെ മത്സരാർത്ഥിയും ഹൗസിൽ നിന്നും പുറത്തേക്ക്. നടിയായ ശ്രീലയ ആണ് ഹൗസിന് പുറത്തേക്ക് പോയിരിക്കുന്നത്. നോബി, സുമേഷ്, കൊമ്പൻ, ഐശ്വര്യ, ശ്രീലയ, നേഹ, ശ്രീലക്ഷ്മി, അഞ്ജലി, ജസീല തുടങ്ങി ഒൻപത് പേരാണ് നോമിനേഷനിൽ ഉണ്ടായിരുന്നത്. അതിൽ കഴിഞ്ഞ ദിവസം നോബി സേഫ് ആകുകയും ചെയ്തു. ബാക്കി ഉള്ള 8 പേരിൽ നിന്നുമാണ് ശ്രീലയ പുറത്തേക്ക് പോയത്. 3 നോമിനേഷൻ ആയിരുന്നു ശ്രീലയയ്ക്ക് ലഭിച്ചിരുന്നത്.

“പുറത്തുനിന്ന് കാണുന്ന വീടല്ല അത്. ജെനുവിന്‍ ആയിട്ടുള്ള ആള്‍ക്ക് അവിടെ നില്‍ക്കാനാവില്ല. അങ്ങനെ പറഞ്ഞാണ് എന്നെ നോമിനേറ്റ് ചെയ്തതും”, എന്നായിരുന്നു തിരികെ ബിഗ് ബോസ് സ്റ്റേജില്‍ എത്തിയ ശ്രീലയ പറഞ്ഞത്. പിന്നാലെ ആശംസകള്‍ അറിയിച്ച് മോഹന്‍ലാല്‍ പുറത്തേക്ക് വിടുകയും ചെയ്തു. സീസൺ തുടങ്ങി ആദ്യ ആഴ്ച കാളിയായിരുന്നു ഔട്ട് ആയത്.

ബിഗ് ബോസ് അഞ്ചാം സീസണിലെ മത്സരാർത്ഥിയായിരുന്ന ശ്രുതിലക്ഷ്മിയുടെ സഹോദരി കൂടിയായ ശ്രീലയ അഭിനയ രംഗത്തും സജീവമായിരുന്ന ആളായിരുന്നു. എന്നാൽ ബിഗ് ബോസ് വീട്ടിൽ ഒരു ഘട്ടത്തിലും തന്റേതായ സ്ഥാനം കണ്ടെത്താൻ ശ്രീലയയ്ക്ക് രണ്ടാഴ്ച കഴിഞ്ഞിട്ടും സാധിച്ചിരുന്നില്ല. കഴിഞ്ഞ ആഴ്ചയിലെ വീക്കിലി ടാസ്കിൽ പങ്കെടുക്കാൻ അവസരം ലഭിച്ചിട്ടും അത് കാര്യമായി ഉപയോഗിക്കാൻ അവർക്ക് കഴിഞ്ഞിട്ടുമില്ല. രണ്ടാഴ്ചയിൽ തനിക്ക് ലഭിച്ച ഒരവസരവും നന്നായി പ്രയോജനപ്പെടുത്താനോ തന്നെ ബിഗ് ബോസ് വീടിനുള്ളിൽ പ്രേക്ഷകർക്കിടയിലും അടയാളപ്പെടുത്താനും ശ്രീലയക്ക് കഴിഞ്ഞിരുന്നില്ല. അതൊക്കെ തന്നെയാകാം ഇപ്പോൾ ബിഗ് ബോസ് വീടിന് പുറത്തേക്ക് പോകാൻ ശ്രീലയയ്ക്ക് വഴിവച്ചതും.

അതേസമയം, അഗ്നിപരീക്ഷയില്‍ നിന്നും വിജയിച്ച് വൈല്‍ഡ് കാര്‍ഡായി ബിഗ് ബോസില്‍ എത്തിയവരാണ് ഷിബിനയും താഷിയും. ഇരുവരും ഒരു മത്സരാര്‍ത്ഥിയായിട്ടായിരുന്നു എത്തിയത്. എന്നാല്‍ ഇനി മുതല്‍ ഇരുവരും രണ്ട് മത്സരാര്‍ത്ഥികളായിരിക്കും എന്ന് മോഹന്‍ലാല്‍ അറിയിച്ചു. രണ്ട് പേരായി തുടരുകയാണെങ്കില്‍ കണ്‍ഫെര്‍ട്ടബിളും കൂടുതല്‍ ആക്ടീവ് ആകാനും സാധിക്കുമെന്നും താഷിയും ഷിബിനയും പറയുകയും ചെയ്തു.

രാഹുൽ ഈശ്വറിന് ശാസന, ഷിജിന്റെ 'നോട്ടം', ആസിഫിന് അവസാന വാണിംഗ്, നോമിനേഷൻ നാളെ

Nithya G Robinson — Sat, 19 Sep 2026 22:29:03 +0530

ബിഗ് ബോസ് മലയാളം സീസൺ 8 രണ്ടാമത്തെ ആഴ്ചയിൽ എത്തിനിൽക്കുകയാണ്. ഓരോ ദിവസം കഴിയുന്തോറും രസകരവും സംഘർഷഭരിതവുമായി സംഭവങ്ങളുമായി മുന്നോട്ട് പോകുന്ന ഷോയിൽ ഇന്ന് മോഹൻലാൽ എത്തുന്ന വീക്കെൻഡ് എപ്പിസോഡ് ആണ് നടന്നത്. കഴിഞ്ഞ ഒരാഴ്ച ബിഗ് ബോസ് ഹൗസിൽ നടന്നതും പ്രേക്ഷകർക്കിടയിൽ ചർച്ചയായതുമായ വിഷങ്ങൾ മോഹൻലാൽ മത്സരാർത്ഥികളോട് ചോദിക്കുകയും ചെയ്തു. പലരേയും ശാസിക്കുകയും ഉപദേശിക്കുകയും ഒക്കെ ചെയ്തു.

രാഹുൽ ഈശ്വറോട് ചോദ്യങ്ങൾ ഉന്നയിച്ചുകൊണ്ടാണ് മോഹൻലാൽ തുടങ്ങിയത്. "മറ്റുള്ളവർക്ക് രാഹുൽ സ്പെയ്സ് കൊടുക്കുന്നില്ല. മറ്റുള്ളവരുടെ പ്രശ്നങ്ങൾ പരിഹരിക്കുകയാണ്. അവരുടെ സ്ക്രീൻ സ്പെയ്സ് നിങ്ങൾ എടുക്കുന്നു. അവർക്ക് കൂടി കളിക്കാനുള്ള സ്പെയ്സ് കൊടുക്ക് രാഹുലേ..", എന്ന് മോഹൻലാൽ പറയുന്നുണ്ട്. അങ്ങനെ ആർക്കെങ്കിലും തോന്നിയോ എന്ന് മോഹൻലാൽ ചോദിച്ചപ്പോൾ നേഹ, നോബി, മൃദുല വിജയ്, ശ്രീലക്ഷ്മി അറയ്ക്കൽ, താഷി, ഐശ്വര്യ തുടങ്ങിയവർ രാഹുലിന്റെ "വല്യേട്ടൻ കളി"യ്ക്കെതിരെ സംസാരിച്ചു. പിന്നാലെ സപ്പോർട്ട് ചെയ്തവരുടെ മൈക്ക് രാഹുലിന് ഇട്ടുകൊടുക്കാൻ മോഹൻലാൽ പറഞ്ഞു. പിന്നാലെ രാഹുലിന് ഒരു വീണ മോഹൻലാൽ സമ്മാനിക്കുകയും ചെയ്തിരുന്നു.

ഷിജിന്റെ നോട്ടം ശരിയല്ലെന്ന തരത്തിൽ ലോലിറ്റ, രാകേഷിനോട് പറഞ്ഞത് പ്രേക്ഷകർക്കിടയിൽ വലിയ ചർച്ചയായിരുന്നു. ഇതും മോഹൻലാൽ ചോദിച്ചു. ഷിജിൻ എന്താണ് പേടിപ്പിച്ച് നോക്കുന്നത്? എന്നാണ് ലോലിറ്റയോട് മോഹൻലാൽ ചോദിച്ചത്. അഗ്നിപരീക്ഷയിൽ നിന്നും വ്യത്യസ്തമായി വേറൊരാളായി ഷിജിനെ തോന്നിയെന്നും ശേഷം ഒരു ബൗണ്ടറി വച്ചെന്നും ലോലിറ്റ പറഞ്ഞു. നേഹയോട് ഇതെ പറ്റി മോഹൻലാൽ ചോദിച്ചപ്പോൾ "അവന്റെ നോട്ടമാണ് രസമുള്ള നോട്ടം" എന്നായിരുന്നു മറുപടി നൽകിയത്. അഗ്നിപരീക്ഷയിൽ നിന്നത് പോലെ താൻ ഇപ്പോഴും നിങ്ങൾക്കണമെന്നാണ് പലരും ആഗ്രഹിക്കുന്നതെന്നും എന്നാൽ താൻ ഇംപ്രൂവ് ആകുന്നതാണെന്നും ഷിജിൻ മറുപടിയായി പറയുകയും ചെയ്തു.

ഹൗസിന് അകത്തും പുറത്തും ഒരുപോലെ ചർച്ചയായ ആസിഫിന്റെ മോശം ഭാഷാപ്രയോഗത്തേയും മോഹൻലാൽ ചോദ്യം ചെയ്തു. കടൽ കൊമ്പനെ കുറിച്ച് 'രാഹുലേട്ടാ തൊടല്ലേ.. തൊട്ടാൽ നാറും', എന്ന് ആസിഫ് പറഞ്ഞത് അടക്കമുള്ള കാര്യങ്ങൾ ചോദ്യം ചെയ്ത മോഹൻലാൽ "അങ്ങനെ ഉപയോഗിക്കാൻ പാടില്ലായിരുന്നു. ഇത് ഞങ്ങളുടെ ഗെയിം ആണ്. ഇത് പ്രോത്സാഹിപ്പിക്കാൻ പറ്റില്ല. മര്യാദയ്ക്ക് കളിക്കാൻ പറ്റുമെങ്കിൽ മതി. സ്ഥിരമായി ഉപയോഗിക്കുന്ന വാക്കുകൾ പുറത്ത് പോയി പറയൂ. നമ്മളതിനെ എന്റർടെയ്ൻ ചെയ്യില്ല. ലക്ഷക്കണക്കിന് ആളുകൾ കാണുന്ന ഷോയാണിത്. വാ വിട്ട വാക്കും കൈ വിട്ട ആയുധവും തിരിച്ചെടുക്കാനാവില്ല. ആസിഫ്.. ഇനി ഇതിനെ കുറിച്ച് സംസാരിക്കില്ല. വേറൊരു തരത്തിലായിരിക്കും ഞാൻ പ്രതികരിക്കുക", എന്നും പറഞ്ഞു. ആസിഫിന്റെ മോശം വാക്കുകൾ കേട്ട് ചിരിച്ച ലോലിറ്റയേയും മോഹൻലാൽ ചോദ്യം ചെയ്തിരുന്നു.

അതേസമയം, ഈ ആഴ്ച നോബി, സുമേഷ്, കൊമ്പൻ, ഐശ്വര്യ, ശ്രീലയ, നേഹ, ശ്രീലക്ഷ്മി, അഞ്ജലി, ജസീല തുടങ്ങി ഒൻപത് പേരാണ് നോമിനേഷനിൽ വന്നത്. ഇതിൽ നോബി സേഫ് ആയി. ബാക്കിയുള്ള എട്ട് പേരിൽ ആരാകും എവിക്ട് ആകുകയെന്ന് നാളെ അറിയാനാകും.

ബിഗ് ബോസ് മലയാളം സീസൺ 8ൽ നിന്നും ഷിബിന എവിക്ട്

Nithya G Robinson — Sun, 27 Sep 2026 22:16:59 +0530

ബിഗ് ബോസ് മലയാളം സീസൺ 8ൽ നിന്നും ഒരാൾ കൂടി പുറത്തേക്ക്. അഗ്നിപരീക്ഷയിലൂടെ ജയിച്ച് കയറി ബിഗ് ബോസ് വീട്ടിൽ ആദ്യ വൈൽഡ് കാർഡ് എൻട്രിയായി എത്തിയ ഷിബിനയാണ് എവിക്ട് ആയിരിക്കുന്നത്. കാളി, റിനി ആൻ ജോർജ് എന്നിവർക്ക് ശേഷം ബിഗ് ബോസ് സീസൺ 8ൽ നിന്നും പുറത്താകുന്ന മൂന്നാമത്തെ മത്സരാർത്ഥിയാണ് ഷിബിന. സുമേഷ്, ഗൗതം ശശി, രാകേഷ്, ഷിജിൻ, ജസീല, ഗായത്രി, കൊമ്പൻ, ഐശ്വര്യ, ഷിബിന, മൃദുല തുടങ്ങി 10 പേരായിരുന്നു ഈ ആഴ്ച നോമിനേഷനിൽ ഉണ്ടായിരുന്നത്. ഇനി 19 മത്സരാർത്ഥികളാണ് സീസണിൽ അവശേഷിക്കുന്നത്.

“വല്ലാത്തൊരു ഷോക്കായി പോയി. രണ്ട് പേർ ഒരുമിച്ചാണ് കയറിയതെങ്കിലും ഞാൻ ഞാനായിട്ടും താഷി താഷിയായിട്ടും ആയിരുന്നു കളിച്ചത്. എന്ത് കാര്യമാണെങ്കിലും മുഖത്തടിച്ച് ഞാൻ സംസാരിച്ചിട്ടുണ്ട്. ചിലപ്പോൾ അതാകും ഇപ്പോൾ പുറത്താകാൻ കാരണം. എന്നെ ഇഷ്ടപ്പെടുന്ന കുറേ പേരുണ്ടാകാം. എന്റെ ബെസ്റ്റ് കൊടുത്തിട്ടാണ് നിന്നത്. അതിൽ എനിക്ക് സന്തോഷമുണ്ട്. മലയാളത്തിന്റെ മഹാനടനൊപ്പം ഇങ്ങനെ നിൽക്കാൻ പറ്റി. എനിക്ക് ഇനിയും ഗെയിം കുറച്ചു കൂടി കളിക്കാനുണ്ടായിരുന്നു. എന്നെ കാണിക്കാനുണ്ടായിരുന്നു. ഗെയിം സ്ട്രാറ്റജി ഉണ്ടായിരുന്നു. അതൊന്നും കാണിക്കാൻ പറ്റാത്തതിലുള്ള വിഷമമുണ്ട്. ഇതുവരെ പിന്തുണച്ച എല്ലാവരോടും നന്ദി”, എന്നായിരുന്നു എവിക്ടിന് ശേഷം ഷിബിന, മോഹന്‍ലാലിന് മുന്‍പില്‍ പറഞ്ഞത്. ഷിബിന മികച്ച മത്സരാർത്ഥിയായിരുന്നുവെന്നാണ് മോഹൻലാൽ പറഞ്ഞത്.

അഗ്നിപരീക്ഷയല്ല ബിഗ് ബോസ് എന്ന് തിരിച്ചറിയുന്നിടത്ത് തന്നെയാണ് ഷിബിനയ്ക്ക് പിഴവുണ്ടായിരിക്കുന്നത്. അഗ്നിപരീക്ഷയിൽ കാഴ്ചവച്ച അഗ്രസീവ്നെസ് അവിടെ അവർക്ക് തുണയായി എങ്കിൽ ബിഗ് ബോസ് വീട്ടിൽ അതേ കാര്യം തന്നെയാണ് അവർക്ക് തിരിച്ചടിയായതും. വളരെ ആക്റ്റീവ് ആയി പെരുമാറിയിട്ടുപോലും അത് നെഗറ്റിവിറ്റി സ്‌പ്രെഡ്‌ ചെയ്യാനാണ് ഷിബിനെ അധികവും ഉപയോഗിച്ചത് എന്നത് തന്നെയാണ് ഇത്രവേഗമുള്ള പുറത്താവലിലേക്കും വഴിയൊരുക്കിയത്. ബിഗ് ബോസിൽ നിങ്ങൾ കളിക്കുന്നതും ഇമ്പ്രഷൻ സൃഷ്ടിക്കുന്നതും സഹമത്സരാർത്ഥികളോട് മാത്രമല്ല, പ്രേക്ഷകരോട് കൂടിയാണ്. വീട്ടിലുള്ളവരെ ഇറിറ്റേറ്റ് ചെയ്തും വെറുപ്പിച്ചും വീട്ടിൽ പെട്ടന്നൊരു സ്ഥാനം ഉണ്ടാക്കാനാകുമെന്ന് പ്രതീക്ഷിക്കുന്നത് പലപ്പോഴും തിരിച്ചടി ഉണ്ടാക്കാനാണ് സാധ്യത.

ബിബി വീട്ടിൽ ആളിക്കത്തുമെന് പ്രതീക്ഷിച്ച റിനിയ്ക്ക് ചുവട് പിഴച്ചത് എവിടെയാണ്?

Web Desk — Mon, 14 Sep 2026 18:56:52 +0530

ബിഗ് ബോസ് മലയാളം സീസൺ 8 ഒരാഴ്ച പിന്നിടുമ്പോൾ വീട്ടിൽനിന്ന് രണ്ടാമത്തെ മത്സരാർത്ഥിയും പുറത്തേക്ക് പോയിരിക്കുകയാണ്. റിനി ആൻ ജോർജ് ആണ് ഷോയിൽനിന്ന് പുറത്തായിരിക്കുന്നത്. ആദ്യ ആഴ്ചയിൽത്തന്നെ ഡബിൾ എവിക്ഷൻ നടക്കുന്നത് ആദ്യമായാണ്. സോഷ്യൽ മീഡിയയിലൂടെയും വാർത്തകളിലൂടെയും ഏറെ പരിചിത മുഖമായിരുന്നു റിനി വീടിനുള്ളിലും ഒരാഴ്ചകൊണ്ട് പലതരം ചലനങ്ങൾ സൃഷ്‌ടിച്ച വ്യക്തിയാണ്. എന്നിട്ടും എന്തുകൊണ്ടാവും അവിടെ പിടിച്ചുനിൽക്കാൻ റിനിക്ക് കഴിയാതെ പോയത്? എവിടെയാണ് റിനിയ്ക്ക് പിഴച്ചത്?

ഒരാഴ്ച ഏറെക്കുറെ ആക്റ്റീവ് ആയിരുന്നിട്ടും ഒരു പോസിറ്റീവ് ആയ ഇമ്പാക്റ്റ് ഉണ്ടാക്കാനായില്ല എന്നത് തന്നെയാണ് റിനിയുടെ ഭാഗത്തുണ്ടായ പ്രധാന പ്രശ്നം. രാഹുൽ ഈശ്വർ എന്ന ഒറ്റ മത്സരാർത്ഥിയെ ഫോക്കസ് ചെയ്തായിരുന്നു റിനിയുടെ ഗെയിം എന്നതും തിരിച്ചടിയായിട്ടുണ്ട്. ഇത്തവണ വീട്ടിലേക്കെത്തിയവരിലെ പരിചിത മുഖങ്ങളിൽ ഒന്നായിരുന്നു റിനിയുടേത്. വന്ന ആദ്യ ദിവസങ്ങളിൽത്തന്നെ റിനി വീടിനകത്തും പുറത്തുമുള്ളവരിൽ തന്നെ അടയാളപ്പെടുത്താൻ ശ്രമിച്ചിരുന്നു. പക്ഷെ ഒരു നെഗറ്റീവ് ഗെയിം പ്ലാനാണ് റിനി അവിടെ പയറ്റിയത്. വീടിന് പുറത്തുള്ള കാര്യങ്ങളെ ഫോക്കസ് ചെയ്താണ് റിനി കളിച്ചത് എന്നതായിരുന്നു അവരുടെ ഭാഗത്തുണ്ടായ ആദ്യ പിഴവ്. രാഹുൽ ഈശ്വറുമായി തനിക്കുള്ള അഭിപ്രായ വ്യത്യസങ്ങൾ മാത്രം മുൻനിർത്തിക്കൊണ്ടായിരുന്നു ഒന്നാം ദിവസം മുതൽ റിനി മുന്നോട്ടുപോകാൻ ശ്രമിച്ചത്.

അതേസമയം വീടിനകത്തെ കാര്യങ്ങളിൽ അവർ അധികം ശ്രദ്ധ കൊടുക്കുന്നതായി തോന്നിയതുമില്ല. ഇതുകൊണ്ടുതന്നെ സഹമത്സരാർത്ഥികളിൽ തന്നെക്കുറിച്ച് എന്തെങ്കിലും മതിപ്പ് ഉളവാക്കാൻ റിനിക്ക് കഴിയാതെ പോയി. ഏറ്റവും കൂടുതൽ വോട്ടുകളോടെ നോമിനേഷനിൽ വന്ന മത്സരാർത്ഥിയും റിനി തന്നെ. പുറത്തെ കാര്യങ്ങൾക്കപ്പുറത്തേക്ക് മറ്റൊന്നും തനിക്ക് സംസാരിക്കാനില്ലെന്ന നിലയിലേക്ക് റിനി വളരെ വേഗത്തിൽ എത്തി. പക്ഷേ അക്കാര്യത്തിലും നന്നായി സംസാരിക്കാനോ തന്റെ പോയിന്റുകൾ കൃത്യമായി മുന്നോട്ടുവയ്ക്കാനോ പലപ്പോഴും അവർക്ക് കഴിയാതെയും പോയി. ജയിൽ നോമിനേഷനിൽ അടക്കം ഇക്കാര്യങ്ങൾ വ്യക്തമായിരുന്നു. എല്ലാവരും കാര്യകാരണങ്ങൾ അടക്കം ഓരോരുത്തരെ നോമിനേറ്റ് ചെയ്തപ്പോൾ റിനി അവിടെയും പതറുന്ന കാഴ്ചകളാണ് കണ്ടത്. ഇതോടെ റിനി ഈ ഷോയ്ക്ക് ഫിറ്റ് അല്ല എന്ന രീതിയിൽ ആളുകൾ ചിന്തിക്കാനും തുടങ്ങി.

രാഹുൽ ഈശ്വർ അല്ലാതെ മറ്റൊരു ടാർഗെറ്റ് റിനിക്ക് അവിടെ ഉണ്ടായിരുന്നില്ല. പക്ഷേ പോകെപ്പോകെ തന്റെ നിലപാടുകൾ പലതും റിനി തന്നെ മയപ്പെടുത്തുന്നതും രാഹുലിന്റെ മാനിപ്പുലേഷനിൽ പെട്ട് പറഞ്ഞ കാര്യങ്ങളിൽ തിരുത്തലുകൾ വരുത്തുന്നതുമാണ് പിന്നീട് കണ്ടത്. ഇതോടെ റിനിയുടെ നിലപാടുകളെക്കുറിച്ചും പ്രേക്ഷകർക്ക് ആശയക്കുഴപ്പമുണ്ടായി. വളരെ വേഗത്തിൽ മാനിപ്പുലേറ്റ് ചെയ്യപ്പെടുന്ന വ്യക്തി കൂടിയാണ് റിനി എന്ന ഇമേജ് അവർക്കുണ്ടാകുകയും ചെയ്തു. ബിഗ് ബോസ് പോലൊരു ഷോയിൽ ഇമോഷണൽ ഇന്റലിജൻസ് എന്നത് ഓരോ വ്യക്തിക്കും ഏറെ വേണ്ടുന്ന ക്വാളിറ്റി തന്നെയാണ്. ഇക്കാര്യത്തിലും റിനി പലപ്പോഴും പിന്നിലായിരുന്നു. ഗെയിമിന്റെ പല ഘട്ടത്തിലും അവർ വേഗത്തിൽ ബ്രേക്ക്ഡൌൺ ആവുകയും ഇമോഷണലായി പിടിവിട്ടുപോകുകയും ചെയ്തിട്ടുണ്ട്. ഇതും റിനിക്ക് തിരിച്ചടിയായി എന്നുവേണം കരുതാൻ.

പ്രത്യേകിച്ച് രണ്ടാം ദിവസം നടന്ന സ്പോട്ട് എവിക്ഷനിൽ ഏറ്റവും കൂടുതൽ ആളുകൾ പറഞ്ഞ പേര് റിനിയുടേതായിരുന്നു. എന്നാൽ അതിനെ ഗെയിം സെൻസിൽ കാണാനോ നല്ല നിലയിൽ ഡീൽ ചെയ്യാനോ റിനിക്ക് കഴിഞ്ഞില്ല. പകരം തന്നെ വീടിനകത്തുള്ളവരും ടാർഗെറ്റ് ചെയ്യുകയാണ് എന്ന തരത്തിൽ വിക്‌ടിം കാർഡ് എടുക്കുകയാണ് റിനി ചെയ്തത്. ഈ സാഹചര്യത്തിൽ കൂടിയാണ് ഗായത്രിയ്ക്ക് പുറത്ത് പോകേണ്ടി വന്നതും. ഇതോടെ പ്രേക്ഷകർക്ക് ഗായത്രി നേരിട്ട അനീതിയുടെ ഒരു കാരണം റിനിയാണെന്ന തോന്നലുണ്ടായി. അത് ഗായത്രിയോട് സിമ്പതി തോന്നാനും റിനിയോട് ദേഷ്യം തോന്നാനും ഇടയാക്കിയിട്ടുണ്ട്.

താൻ വീട്ടിൽ ഒറ്റപ്പെടുകയാണ് എന്ന നിലയിലുള്ള വിക്ടിം ഗെയിം കളിക്കാനാണ് എല്ലാ ഘട്ടത്തിലും റിനി ശ്രമിച്ചത്. പക്ഷേ അതും ഫലപ്രദമായി നടപ്പിലാക്കാൻ അവർക്ക് കഴിഞ്ഞിട്ടുമില്ല. രാഹുൽ ഈശ്വറുമായുള്ള അഭിപ്രായ ഭിന്നതകൾ മാറ്റിയത് സമയമെടുത്തായിരുന്നെങ്കിലോ അത് പ്രേക്ഷകർക്ക് കൺവിൻസ്‌ ആകുന്ന തരത്തിൽ ഡീൽ ചെയ്യുകയോ ചെയ്തിരുന്നെങ്കിൽ റിനിക്ക് ഒരുപക്ഷെ കുറച്ചുനാൾ കൂടി വീട്ടിൽ തുടരാൻ കഴിഞ്ഞേക്കുമായിരുന്നു. എന്നാൽ അവിടെയും അവർ തന്റെ നിലപാടുകളിൽ പെട്ടാണ് പെട്ടെന്ന് മാറ്റങ്ങൾ വരുത്തിയതും എതിരാളിയെന്ന നിലയിൽ അവർതന്നെ എസ്റ്റാബ്ലിഷ്‌ ചെയ്ത രാഹുലിനോട് പെട്ടന്ന് സന്ധി ചെയ്തതായി തോന്നിപ്പിക്കുകയും ചെയ്തതോടെയാണ് കാര്യങ്ങൾ കൂടുതൽ കൈവിട്ടുപോയതും. പക്ഷേ അതേസമയം പുറത്തായശേഷമുള്ള റിനിയുടെ സംസാരം കൂടുതൽ പക്വതയുള്ളതും ക്ലാരിറ്റിയുള്ളതുമായിരുന്നു. ഈ രീതിയിൽ അവർ തുടക്കം മുതൽ സംസാരിച്ചിരുന്നെങ്കിൽ പുറത്താകുമായിരുന്നില്ല എന്നുപോലും പല പ്രേക്ഷകരും അഭിപ്രായപ്പെട്ടു.

പ്രേക്ഷകരുമായി ഒരു കണക്ഷൻ ഉണ്ടാക്കാൻ കഴിയാതെ പോയതും തുടക്കം മുതൽ നെഗറ്റീവ് ഗെയിം കളിയ്ക്കാൻ ശ്രമിച്ചതുമായിരുന്നു റിനി ആൻ ജോർജിന്റെ ബിഗ് ബോസ് വീട്ടിൽനിന്നുള്ള പടിയിറക്കത്തിന് കാരണമായത്. തന്റെ വീക്ക് പോയിന്റുകൾ ആദ്യംതന്നെ എതിരാളികൾക്കുമുന്നിൽ തുറന്നുകാട്ടിയതും അവർക്ക് തിരിച്ചടിയായി. കൂടുതൽ ശ്രദ്ധയോടെയും കരുതലോടെയും മുന്നോട്ടുപോയിരുന്നെങ്കിൽ റിനി ഒരുപക്ഷേ കൂടുതൽ ദൂരം സഞ്ചരിക്കുമായിരുന്നു. എന്തായാലും രാഹുൽ ഈശ്വർ അടക്കമുള്ള പല മത്സരാർത്ഥികളുടെയും ഗെയ്മിനെ പല രീതിയിലും സ്വാധീനിച്ചിരുന്ന റിനിയുടെ പുറത്താവൽ ഗെയിമിന്റെ ഗതിയിൽ ചില മാറ്റങ്ങൾ ഉണ്ടാക്കാൻ തന്നെയാണ് സാധ്യത.

ലൗ ട്രാക്ക് മാറ്റി പിടിച്ച് കൊമ്പൻ..; ഇനി ഷിജിനുമായുള്ള ഫ്രണ്ട്ഷിപ്പ് കോംബോ

Web Desk — Fri, 25 Sep 2026 22:47:22 +0530

ബിഗ് ബോസ് മലയാളം സീസൺ 8 പുരോഗമിച്ചുകൊണ്ടിരിക്കുകയാണ്. സീസൺ പത്തൊൻപതാം ദിവസത്തിലേക്ക് കടക്കുമ്പോൾ മത്സരവും അതിനനുസരിച്ച് കൊടുക്കുകയാണ്. കഴിഞ്ഞ ദിവസങ്ങളിൽ താഷിയും ഗൗതം ശശിയും തമ്മിലുണ്ടായ വാക്കേറ്റവും ഫിസിക്കൽ അസോൾട്ട് ആരോപണങ്ങളും ഇന്നത്തെ എപ്പിസോഡിൽ ഇരുവരും സംസാരിച്ച് ഒത്തുതീർപ്പാക്കിയിട്ടുണ്ട്.

ഇതിനിടെ ജയിൽ നോമിനേഷനിൽ ഇത്തവണ മൂന്ന് മത്സരാർത്ഥികളാണ് ഇത്തവണയുള്ളത്. താഷി, ഷിബിന, ഷിജിൻ എന്നിവരാണ് ഇത്തവണ നോമിനേഷനിലുള്ളത്. നോമിനേഷൻ മുക്തി നേടാനായി കോടതി ടാസ്ക് ആണ് ബിഗ് ബോസ് ഇത്തവണ നൽകിയത്. ഏറ്റവും വിശ്വാസം ഉള്ള ആളെ തങ്ങൾക്ക് വേണ്ടി വാദിക്കാൻ തിരഞ്ഞെടുക്കാമെന്ന ഓപ്‌ഷനും വച്ചിരുന്നു.

ഷിജിന് വേണ്ടി കൊമ്പനും, ഷിബിനയ്ക്ക് വേണ്ടി രാഹുൽ ഈശ്വറും താഷിക് വേണ്ടി ആസിഫുമാണ് രംഗത്തെത്തിയത്. രാഹുൽ ഈശ്വർ മികച്ച രീതിയിൽ വാദിച്ചത് കൊണ്ട് തന്നെ ഷിബിനയ്ക്ക് ജയിൽ നോമിനേഷൻ ലഭിക്കുമെന്നാണ് പ്രേക്ഷകർ കരുതുന്നത്. എന്നാൽ കൊമ്പന് ഷിജിന് വേണ്ടി മികച്ച രീതിയിൽ വാദിക്കാൻ സാധിച്ചില്ല. അതുകൊണ്ട് തന്നെ ഷിജിനും താഷിയും എന്തായാലും ഇത്തവണ ജയിലിലേക്ക് എത്തിയിരിക്കുകയാണ്. കൂടാതെ ഐശ്വര്യയുമായുള്ള ലൗ ട്രാക്കിൽ നിന്നും കൊമ്പൻ മാറിയിട്ടുണ്ട്. നിലവിൽ ഷിജിനുമായുള്ള ഫ്രണ്ട്ഷിപ്പ് കോംബോ മുന്നോട്ട് കൊണ്ടുപോകുമോ എന്നും പ്രേക്ഷകർ ഉറ്റുനോക്കുന്നുണ്ട്.

അതിനിടയിൽ ഷിബിനയുടെ വസ്ത്രത്തിന്റെ ഒരു ഭാഗത്ത് ഗൗതമും ശ്രീലക്ഷ്മിയും ചേർന്ന് ഷൂ കെട്ടിയിട്ടെന്ന ആരോപണം വരുന്നുണ്ട്. ശ്രീലക്ഷ്മി തന്റെ പ്രവർത്തിയിൽ ഷിബിനയോട് ക്ഷമ ചോദിച്ചെങ്കിലും ഷിബിന അത് കേൾക്കാൻ പോലും തയ്യാറായിരുന്നില്ല. വീക്കന്റ് എപ്പിസോഡിൽ മോഹൻലാൽ ഇക്കാര്യത്തിൽ എന്ത് നിലപാടാണ് എടുക്കാൻ പോകുന്നതെന്ന് പ്രേക്ഷകർ ഒന്നടങ്കം കാത്തിരിക്കുകയാണ്.

ബിഗ് ബോസ് വീട്ടിലെ 'ഒറ്റയാൻ'; ഷിജിന്റെ സ്ട്രാറ്റജികൾ

Web Desk — Sat, 26 Sep 2026 15:26:20 +0530

അഗ്നിപരീക്ഷയിൽനിന്ന് ബിഗ് ബോസിലേക്കെത്തുമെന്ന് ആരും പ്രതീക്ഷിക്കാതിരുന്ന മത്സരാർത്ഥി, വീട്ടിലേക്കെത്തിയപ്പോഴാകട്ടെ ഈ സീസണിൽ ഏറ്റവും കൂടുതൽ ചർച്ചാ വിഷയമാകുന്ന ആളുകളിൽ ഒരാളായി മാറി. പലതരം ഗ്രൂപ്പുകളും കൂട്ടുകെട്ടുകളുമുള്ള ബിഗ് ബോസ് വീട്ടിലെ ഒറ്റയാൻ. ഷിജിൻ സത്യത്തിൽ നായകനാണോ അതോ വില്ലനോ?

അഗ്നിപരീക്ഷയിൽ ആദ്യം മികച്ച തുടക്കം നൽകിയ ഷിജിന്റെ ഗ്രാഫ് പെട്ടന്നുതന്നെ താഴ്ന്ന കാഴ്ചയാണ് നമ്മൾ കണ്ടത്. ടാസ്കുകളിൽ പലപ്പോഴും അഗ്രസീവ് ആയി പെരുമാറുന്നു എന്ന് ജഡ്ജസ് പറഞ്ഞതോടെ സ്വയം നിയന്ത്രിക്കുന്നത് പോലെയും തോന്നിയിരുന്നു. സഹമത്സരാർത്ഥികൾ പലരും പടിപടിയായി തങ്ങളുടെ ഗ്രാഫ് ഉയർത്തിയപ്പോൾ ഷിജിന് അതിന് കഴിയാതെവന്നു. ജഡ്ജസും മറ്റുള്ള മത്സരാര്ഥികളും ബിഗ് ബോസിന് ഒട്ടും ഫിറ്റ് ആകാത്ത ആളെന്ന നിലയിൽ ഒന്നിൽകൂടുതൽ തവണ വിലയിരുത്തിയതും ഷിജിന്റെ ആത്മവിശ്വാസം പൂർണ്ണമായി ഇടിച്ചു. അതുകൊണ്ടൊക്കെത്തന്നെ വീട്ടിലേക്ക് കയറുന്നവരുടെ കൂട്ടത്തിൽ താനും ഉണ്ടാകുമെന്ന് ഷിജിൻ പോലും പ്രതീക്ഷിച്ചിരുന്നില്ല.

എന്നാൽ വീട്ടിലേക്ക് കയറിയശേഷം പിന്നീട് നമ്മൾ കണ്ടത് ഷിജിൻ 2.0 യാണ്. പഴയതിലും ആത്മവിശ്വാസമുള്ള, ധൈര്യമുള്ള മറ്റൊരു ഷിജിൻ. പ്രേക്ഷകരുടെ പിന്തുണ തനിക്കുണ്ട് എന്ന മനസ്സിലാക്കൽ തന്നെയാണ് അതിന്റെ പ്രധാന കാരണം. അതുകൊണ്ടുതന്നെയാണ് വീട്ടിലെത്തിയ ഷിജിൻ 'താൻ ഒറ്റക്കല്ല വന്നത്' എന്ന് ആവർത്തിക്കുന്നതും. അഗ്നിപരീക്ഷയിൽ എല്ലാവരും വീക്ക് ആണെന്ന് പറഞ്ഞിട്ടും തനിക്ക് ബിഗ് ബോസിലേക്കെത്താൻ പറ്റിയെങ്കിൽ അതിന് പ്രേക്ഷകരുടെ വോട്ട് ഒരു പരിധിയിൽ അധികം സഹായകമായിട്ടുണ്ടെന്ന ബോധ്യം ഷിജിനുണ്ട്. ആ ബോധ്യത്തിലാണ് ഷിജിന്റെ ബിഗ് ബോസ് വീട്ടിലെ മുന്നോട്ടുപോക്കും.

മുൻ സീസണുകളിൽ പലരും പയറ്റിയിട്ടുള്ള പല സ്ട്രാറ്റജികളുടെയും മിക്സ് ആണ് പലപ്പോഴും ഷിജിന്റെ ഗെയിം. ഇടക്കൊക്കെ അയാൾക്കതിൽ വിജയിക്കാനാവുന്നുണ്ട് എങ്കിലും പലപ്പോഴും കൈവിട്ട് പോകുന്നുമുണ്ട്. അഗ്നിപരീക്ഷയിൽനിന്ന് ആദ്യ ദിവസം തന്നെ വീട്ടിലേക്ക് കയറിയത് നാല് പേരായിരുന്നു. ഷിജിൻ, എൽദോ, രാകേഷ്, ലോലീറ്റ. ഇതിൽ ഷിജിൻ ഒഴികെ ബാക്കി മൂന്നുപേരും ഏറെക്കുറെ ഒരു ടീമായാണ് ആദ്യ ദിവസം മുതൽ കളിക്കുന്നത്. ഷിജിനാകട്ടെ ഒന്നാം ദിവസം തന്നെ വളരെ കൃത്യമായി ഇവരിൽനിന്ന് വിട്ടുനിൽക്കുകയും താനാ ഗ്രൂപ്പിന്റെ ഭാഗമല്ലെന്ന് വീടിനകത്തും പുറത്തുമുള്ളവർക്ക് വ്യക്തമാക്കിക്കൊടുക്കുകയും ചെയ്തു. ആ ഗ്രൂപ്പ് എന്നല്ല, വീട്ടിലെ ഒരു ഗ്രൂപ്പിന്റെയും ഭാഗമാകാൻ ഷിജിൻ ഇതുവരെ ശ്രമിച്ചിട്ടില്ല. എന്നുമാത്രമല്ല, താൻ ഒറ്റക്കാണ് ഗെയിം കളിക്കുന്നത് എന്ന പ്രതീതി ഉണ്ടാക്കാനും ഷിജിന് കഴിഞ്ഞിട്ടുണ്ട്. പലപ്പോഴും ഒരുതരം ഒറ്റപ്പെടൽ സ്ട്രാറ്റജിയും ഷിജിൻ പുറത്തെടുത്തിട്ടുണ്ട്. വീട്ടിൽ മറ്റുള്ളവരെല്ലാം തനിക്ക് എതിരാണെന്നും തന്നെ വിലകുറച്ച് കാണുന്നവരാണ് എന്നുമുള്ള വാദം ഷിജിൻ പലപ്പോഴും പറഞ്ഞിട്ടുണ്ട്. കുറെയൊക്കെ അത് സ്ഥാപിക്കാനും അയാൾക്ക് ആയിട്ടുണ്ട്.

വീട്ടിൽ ഷിജിന് കുറച്ച് അടുപ്പമുള്ളതായി തോന്നുന്നത് കൊമ്പനോടാണ്. തന്നെപ്പോലെ ഒരാളായി ഷിജിൻ കൊമ്പനെ കാണുന്നുണ്ടെന്ന് പലപ്പോഴും തോന്നിയിട്ടുണ്ട്. അതുകൊണ്ടുതന്നെ ഐശ്വര്യയിൽനിന്ന് മാറി കൊമ്പൻ ഒറ്റക്ക് ഗെയിം കളിക്കണമെന്ന് ആഗ്രഹവും ഷിജിനുണ്ട്. തന്നാൽ കഴിയുമ്പോൾ ഷിജിൻ ഇത് കൊമ്പന് മനസിലാക്കി കൊടുക്കാൻ ശ്രമിക്കാറുമുണ്ട്.

എല്ലാവരും വലത്തേക്ക് നടന്നാൽ തനിക്ക് ഇടത്തേക്ക് നടക്കണമെന്ന നിർബന്ധമാണ് ഷിജിന്റെ മറ്റൊരു പ്രത്യേകത. ബിഗ് ബോസ് വീട്ടിലെ 'വ്യത്യസ്തൻ' എന്ന ലേബൽ മറ്റാർക്കും വിട്ടുകൊടുക്കില്ല എന്ന വാശിയോടെയാണ് ഷിജിൻ പലപ്പോഴും തീരുമാനങ്ങൾ എടുക്കുന്നത്. ഓരോ ടാസ്കിലും അത് വളരെ വ്യക്തവുമാണ്. തന്റെ ഗെയ്മിലും ആക്റ്റിലും എല്ലാം ഈ വ്യത്യസ്തത ഉണ്ടാകണമെന്ന് ഷിജിന് നിർബന്ധവുമുണ്ട്. ഇക്കഴിഞ്ഞ വീക്കിലി ടാസ്കിൽ അടക്കമുള്ള ഷിജിന്റെ പ്രവർത്തികൾ തന്നെ അതിന് ഉദാഹരണം.

എന്നാൽ വീണ്ടുവിചാരമില്ലാത്ത പ്രവർത്തികളാണ് പലപ്പോഴും ഷിജിന് തിരിച്ചടിയാകുന്നത്. മിക്കപ്പോഴും ഒറ്റബുദ്ധിയിലുള്ള പെരുമാറ്റമാണ് ഷിജിന്റെ ഭാഗത്തുനിന്നും ഉണ്ടാവുക. താൻ ചെയ്യാൻ പോകുന്ന ആക്റ്റിനെ കുറിച്ചോ അതിന്റെ വരുംവരായ്കയെ കുറിച്ചോ ചിന്തിക്കാൻ പലപ്പോഴും അയാൾക്ക് കഴിയുന്നില്ല. മോഹൻലാൽ നൽകിയ ബെസ്റ്റ് പെർഫോമർക്കുള്ള ബർഗർ നിരസിച്ചതും വീടിനകത്തേക്ക് കടക്കാൻ പ്രോപ്പർട്ടി നശിപ്പിച്ചതുമടക്കം ഇത്തരത്തിലെ ഒറ്റബുദ്ധിയിലെടുത്ത തീരുമാനത്തിന്റെ ഭാഗമാണ്. ലോലീറ്റയുടെ മാനിപുലേഷന്റെ കൂടി ഭാഗമായാണ് വീടിനകത്തേക്ക് കയറാനുള്ള തീരുമാനം ഷിജിൻ എടുത്തത്. എന്നാൽ ലോലീറ്റ തന്നെ കരുവാക്കുകയാണെന്ന് തിരിച്ചറിയാനോ അതിനെ കുറച്ചുകൂടി നന്നായി എക്സിക്യൂട്ട് ചെയ്യാനോ ഷിജിന് കഴിയാതെ പോയി.

വീട്ടിലെ എല്ലാ പ്രശ്നങ്ങളിലും ഇടപെടാനും ഫോക്കസ് തന്നിലേക്ക് തിരിക്കാനും ഷിജിൻ പലപ്പോഴും ശ്രമിക്കാറുണ്ട്. ചിലപ്പോഴൊക്കെ ഇത് വർക്ക്ഔട്ട് ആകാറുമുണ്ട്. എന്നാൽ ഷിജിൻ കൂടുതൽ ഫോക്കസ് ചെയ്യാറുള്ളതും എതിർഭാഗത്ത് നിർത്താൻ ശ്രമിക്കാറുള്ളതും പ്രധാനമായും അഗ്നിപരീക്ഷ മത്സരാർത്ഥികളെയാണ്. അവരാണ് തന്റെ നേരിട്ടുള്ള എതിരാളികൾ എന്ന ബോധ്യം ഷിജിന് എപ്പോഴുമുള്ളതായി തോന്നാറുണ്ട്. എല്ലാ പ്രശ്നങ്ങളും ഇടപെടുന്നു എന്ന് പറയുമ്പോൾപ്പോലും പ്രശ്നങ്ങളിൽനിന്ന് മുതലെടുക്കാനുള്ള പ്രവണത ഷിജിന് താരതമ്യേന കുറവാണെന്നും തോന്നിയിട്ടുണ്ട്. താഷി, ഗൗതം വിഷയത്തിൽ എരിതീയിൽ എണ്ണയൊഴിക്കാൻ പലരും ശ്രമിച്ചപ്പോഴും ഷിജിൻ അങ്ങനെ ചെയ്യുന്നതായി തോന്നിയിട്ടില്ല.

സംസാരത്തിലെ ക്ലാരിറ്റി കുറവാണ് ഷിജിന്റെ പ്രധാന പോരായ്മ. തന്റെ ഭാഗത്ത് ന്യായമുള്ള വിഷയങ്ങൾ പോലും നന്നായി സംസാരിച്ച് ഫലിപ്പിക്കാൻ ഷിജിന് കഴിയാറില്ല. ഉദാഹരണത്തിന് കഴിഞ്ഞ വീക്കിലി ടാസ്കിൽ വീടിനുള്ളിലേക്ക് താൻ കയറിയത് ലോലീറ്റയുടെ കൂടി പ്രേരണ കൊണ്ടാണെന്ന വസ്തുത പറയാനോ ലോലീറ്റയുടെ പല വിഷയത്തിലെയും ഇരട്ടത്താപ്പ് പൊളിക്കാനോ ഷിജിന് കഴിഞ്ഞിരുന്നില്ല. അക്കാര്യം ഷിജിൻ വ്യക്തമായി പറഞ്ഞിരുന്നു എങ്കിൽ ലോലീറ്റ വീടിനുള്ളിൽ എക്പോസ് ചെയ്യപ്പെട്ടേനെ. പക്ഷെ അത്തരത്തിൽ ആളുകളെ എക്പോസ് ആക്കാനോ സംസാരത്തിലൂടെ ആളുകളുടെ കള്ളത്തരങ്ങളും ഇരട്ടത്താപ്പും പൊളിക്കാനോ ഷിജിന് കഴിഞ്ഞിട്ടില്ല.

ഇതിനോടകം ഒരു ഫാൻ ബേസ് ഉണ്ടാക്കാൻ സാധിച്ചിട്ടുള്ള ചുരുക്കം മത്സരാർത്ഥികളിൽ ഒരാളുമാണ് ഷിജിൻ. ജെനുവിനായ വ്യക്തി എന്നതാണ് പ്രേക്ഷകർക്ക് ഷിജിനോട് കണക്ഷൻ ഉണ്ടാകാനുള്ള പ്രധാന കാരണം. എന്നാൽ മുൻപിൻ നോക്കാതെയുള്ള ഈ എടുത്തുചാട്ടം അൽപ്പമെങ്കിലും നിയന്ത്രിക്കാൻ അയാൾക്കായില്ലെങ്കിൽ ഷിജിന്റെ മുന്നോട്ടുള്ള ഗെയ്മിനെ പോലും അത് ബാധിച്ചേക്കും. അത്തരം കാര്യങ്ങളിൽ ഒരു നിയന്ത്രണം വരുത്താനും കൂടുതൽ ഫോക്കസ്ഡ് ആയി ഗെയിം കളിക്കാനും സാധിച്ചാൽ ഒരുപക്ഷെ ഷിജിൻ 100 ദിവസങ്ങൾ മുന്നോട്ടുപോകാൻ പോലും സാധ്യതയുണ്ട്.