Asianet News Malayalam

'നിനക്കെന്നോട് സ്നേഹമുണ്ടോന്നറിയില്ല, പക്ഷേ എന്റെ അവസാന 7 മിനിറ്റിൽ നീ ഉണ്ടാകും'; മനമുലഞ്ഞ് റോബിൻ രാധാകൃഷ്ണൻ

Nithya G Robinson — Fri, 05 Jun 2026 21:52:11 +0530

ഏറെ വൈകാരികമായ കുറിപ്പുമായി ബിഗ് ബോസ് മലയാളം മുൻ താരം റോബിൻ രാധാക‍ൃഷ്ണൻ. ഭാര്യ ആരതി പൊടിക്ക് സമ്മാനമായി നൽകിയ നായക്കുട്ടിയെ കുറിച്ചുള്ളതാണ് വാക്കുകൾ. ലൂക്ക എന്നാണ് നായയുടെ പേര്. ഏറെ വൈകാരികമായ കുറിപ്പിൽ ആദ്യമൊന്നും തനിക്ക് ലൂക്കയെ ഇഷ്ടമായിരുന്നില്ലെന്നും എന്നാൽ ഇപ്പോൾ അങ്ങനെ അല്ലെന്നും റോബിൻ രാധാകൃഷ്ണൻ പറയുന്നു.

"ലൂക്കാ.. ആദ്യം ഒന്നും എനിക്ക് അത്രയ്ക്ക് ഇഷ്ടമായിരുന്നില്ല. ഓരോ ദിവസം കഴിയും തോറും ഇഷ്ടം കൂടി കൂടി വന്നു. ഞങ്ങൾ അധികം സംസാരിക്കാറില്ല. പക്ഷേ നിന്റെ സാന്നിധ്യം എനിക്ക് ഭയങ്കര ആശ്വാസമാണ്. നിനക്ക് എന്നോട് സ്നേഹം ഉണ്ടോന്ന് അറിയില്ല. പക്ഷേ എനിക്ക് നിന്നെ ഇപ്പോൾ ഭയങ്കര ഇഷ്ടമാണ്. എന്റെ അവസാനത്തെ 7 മിനിറ്റിൽ നിന്നോടൊപ്പമുള്ള ഓർമകളും ഉണ്ടാകും ഐ ലവ് യു ലൂക്കാ..", എന്നാണ് റോബിൻ രാധാകൃഷ്ണൻ കുറിച്ചത്. ഒപ്പം ലൂക്കയുടെ ഫോട്ടോയും പങ്കിട്ടിട്ടുണ്ട്.

പിന്നാലെ കമന്റുമായി ആരതി പൊടിയും രംഗത്ത് എത്തി. "ലവ് യു ലൂക്കാ..നിനക്ക് റോബിൻ ചേട്ടന് അഡിക്ടഡാണെന്ന് എനിക്ക് അറിയാം", എന്നാണ് കമന്റിൽ ആരതി പൊടി കുറിച്ചത്. ബിഗ് ബോസ് സീസൺ 4ലെ മത്സരാർത്ഥിയായിട്ടായിരുന്നു ഡോക്ടർ കൂടിയായ റോബിൻ എത്തുന്നത്. ഒരുപക്ഷേ റോബിനെ ആളുകൾ കൂടുതൽ അറിഞ്ഞതും ഷോയിലൂടെ ആണ്.

സീസണിലെ ഏറ്റവും ശ്രദ്ധേയനായ മത്സരാർത്ഥിയാകാൻ റോബിന് സാധിക്കുകയും ചെയ്തു. വലിയൊരു ആരാധകവൃന്ദവും ഉണ്ടായിരുന്നു. എന്നാൽ സഹമത്സരാർത്ഥിയെ മർദ്ദിച്ചതിന്റെ പേരിൽ പകുതി വഴിയിൽ ഷോയിൽ നിന്നും റോബിന് പുറത്ത് പോകേണ്ടി വന്നു. ഷോ കഴിഞ്ഞ ശേഷം റേബിനെ അഭിമുഖം ചെയ്യാൻ വന്നതായിരുന്നു ആരതി പൊടി. ആ സൗഹൃദം പിന്നീട് പ്രണയത്തിലേക്കും ഒടുവിൽ വിവാഹത്തിലേക്കും എത്തുകയായിരുന്നു. നടിയും മോഡലും ബിസിനസുകാരിയുമാണ് ആരതി പൊടി.

'എനിക്ക് ഫ്രീ ടിക്കറ്റ് വേണ്ട, അവർക്ക് കൊടുക്കാമായിരുന്നു'; കെഎസ്‍ആർടിസി സൗജന്യ യാത്രയിൽ ശോഭ വിശ്വനാഥ്, കയ്യടി

Nithya G Robinson — Sun, 14 Jun 2026 18:59:56 +0530

കോൺഗ്രസ് സർക്കാർ അധികാരത്തിലേറുന്നതിന് മുൻപ് നൽകിയ ഏറ്റവും പ്രധാനപ്പെട്ട വാഗ്ദാനമായിരുന്നു സ്ത്രീകൾക്ക് കെഎസ്ആർടിസിയിൽ സൗജന്യ യാത്ര. ഒരുമാസത്തോളം നീണ്ട കാത്തിരിപ്പിന് ഒടുവിൽ ആ വാഗ്ദാനം നാളെ യാഥാർത്ഥ്യമാകാൻ പോവുകയാണ്. പ്രിയദർശിനി എന്ന് പേരിട്ടിരിക്കുന്ന പദ്ധതി കെഎസ്ആർടിസി ഓർഡിനറി ബസുകളിലാണ് നടപ്പിലാക്കിയിരിക്കുന്നത്. നാളെ പദ്ധതി യാഥാർത്ഥ്യമാകാനിരിക്കെ വിഷയത്തിൽ പ്രതികരണവുമായി എത്തിയിരിക്കുകയാണ് ബിഗ് ബോസ് മലയാളം മുൻ താരവും ബിസിനസുകാരിയുമായ ശോഭ വിശ്വനാഥ്.

തനിക്ക് കെഎസ്ആർടിസിയിൽ ഫ്രീ ടിക്കറ്റ് വേണ്ടെന്നാണ് ശോഭ പറയുന്നത്. അതിന് കാരണവും അവർ വ്യക്തമാക്കുന്നുണ്ട്. "കെഎസ്ആര്‍ടിസിയില്‍ ഞാന്‍ കയറുന്നുണ്ടെങ്കില്‍ പൈസ കൊടുത്ത് ടിക്കറ്റെടുക്കും. എനിക്കിപ്പോള്‍ പൈസ കൊടുത്ത് ടിക്കറ്റെടുക്കാനുള്ള പ്രാപ്തയാണ് ഞാന്‍. അപ്പോള്‍ ഞാന്‍ പൈസ കൊടുത്ത് തന്നെ യാത്ര ചെയ്യും. ബിപിഎല്ലിന് താഴെ ഉള്ളവര്‍ക്ക് ആ ആനുകൂല്യങ്ങള്‍ കൊടുക്കണമായിരുന്നു. ആ അഭിപ്രായം എനിക്കുണ്ട്. ആണിനായാലും പെണ്ണിനായാലും", എന്നായിരുന്നു ശോഭ വിശ്വനാഥിന്റെ വാക്കുകൾ. ഓൺലൈൻ മാധ്യമങ്ങളുടെ ചോദ്യത്തിനായിരുന്നു ശോഭനയുടെ മറുപടി.

വീഡിയോ പുറത്തുവന്നതിന് പിന്നാലെ ശോഭയെ പിന്തുണച്ച് കൊണ്ട് നിരവധി പേർ രംഗത്ത് എത്തി. "അത് പോയിന്റ് ആണ്. ക്യാഷ് കൊടുക്കാൻ പറ്റിയവർ കൊടുക്കട്ടെ. ഡെയ്ലി ബസ് യാത്ര ചെയ്യുന്നത് സർക്കാർ ടീച്ചർമാർ ആണ്. അവർക്ക് ഫ്രീ യാത്ര ഫിനാൻഷ്യലി ആവിശ്യം ഇല്ല. ബട്ട്‌ ദിവസവും ഈ പ്രൈവറ്റ് ജോലി ചെയ്യുന്ന ചേച്ചിമാർ അവർക്കൊക്കെ ഇത് ഉപകാരം ആവും. ഈ തുണിക്കട, ഷോപ്സ്, മാളിലൊക്കെ വർക്ക്‌ ചെയ്യുന്നവർക്കും പിന്നെ തികച്ചും സാദാരണക്കാർക്കും", എന്നാണ് ഒരാളുടെ കമന്റ്.

"കാശ് ഉള്ളവർ അങ്ങനെ തന്നെ വേണം. വരുമാനം കുറവായവർ സൗജന്യമായി യാത്ര ചെയ്യട്ടെ. ഇങ്ങനെ ചിന്തിക്കുന്നവർ വളരെ കുറവാണ് ഈ രാജ്യത്ത്, സൗജന്യമായി കിട്ടുന്നത് അർഹരായവർ മാത്രം കൈപ്പറ്റുന്നതാണ് നാടിനും സമൂഹത്തിനും സർക്കാരിനും നല്ലത്, പൈസയും സാമൂഹിക പ്രേതിബദ്ധതയും ഉള്ളവർ ഈ സൗജന്യം കൈപ്പറ്റരുത്. വയസായവർ, വരുമാനം ഇല്ലാത്തവർ, രോഗികൾ അങ്ങനെ അർഹരായവർ ധാരാളം ഉണ്ട്. സർക്കാർ വേർതിരിവ് കാണിച്ചില്ലെങ്കിലും. അർഹതയില്ലാത്തവർ അതിൽ നിന്നും ഒഴിഞ്ഞു നിൽക്കണം, നല്ല തീരുമാനം. ക്യാഷ് ഉള്ളവർ കൊടുക്കട്ടെ", എന്നിങ്ങനെ പോകുന്നു മറ്റ് കമന്റുകൾ.

'സ്റ്റേജ് 4 കാൻസറിനെ തോൽപ്പിച്ച ആളാണ്, ബിഗ് ബോസ് ഷോ എന്റെ സ്വപ്നം, പക്ഷേ..'; ശ്രദ്ധനേടി കുറിപ്പ്

Nithya G Robinson — Fri, 05 Jun 2026 20:04:36 +0530

ഇന്ത്യൻ ടെലിവിഷൻ ചരിത്രത്തിലെ ഏറ്റവും വലിയ റിയാലിറ്റി ഷോയാണ് ബിഗ് ബോസ്. ഷോയുടെ മലയാളത്തിൽ സീസൺ 8 വരാൻ പോകുകയാണ്. അതിന്റെ അണിയറപ്രവർത്തനങ്ങൾ മുന്നേറുന്നതിനിടെ പ്രൊഡിക്ഷനുകളുമായി ബിഗ് ബോസ് പേജുകളും സജീവമാകുകയാണ്. കഴിഞ്ഞ വർഷത്തിൽ നിന്നും വിപരീതമായ അഗ്നിപരീക്ഷ എന്ന പേരിലൊരു ഷോ ഉണ്ടായിരിക്കും. അതിന് ശേഷമാകും പ്രധാന സീസൺ ആരംഭിക്കുക. ഷോയുമായി ബന്ധപ്പെട്ട ചർച്ചകൾ പുരോഗമിക്കവെ സീസണിൽ പങ്കെടുക്കാനുള്ള ആഗ്രഹം പങ്കുവച്ചിരിക്കുകയാണ് കാൻസർ സർവൈവറും ജിയോളജിസ്റ്റുമായ അരുൺ അപ്പു. കൊല്ലം സ്വദേശിയാണ് ഇദ്ദേഹം.

അരുൺ അപ്പുവിന്റെ ആദ്യ കുറിപ്പ് ഇങ്ങനെ

big Boss എന്നത് എനിക്ക് ഒരു ഷോ മാത്രമല്ല. ജീവിതത്തിൽ ഒരിക്കൽ എങ്കിലും ഭാഗമാകണമെന്ന് ഹൃദയം ആഗ്രഹിക്കുന്ന ഒരു സ്വപ്നമാണ്. പക്ഷേ ഒരു സാധാരണക്കാരൻ എന്ന നിലയിൽ പോലും എന്നെ ആരും കാണുന്നില്ലെന്നൊരു തോന്നൽ ചിലപ്പോൾ മനസിനെ വേദനിപ്പിക്കും.

“നീ ആരാണ്?” എന്ന് ചോദിച്ചാൽ, ഞാൻ വലിയ പേരോ പ്രശസ്തിയോ ഉള്ള ആളല്ല. ജീവിതത്തിന്റെ രണ്ട് അറ്റവും കൂട്ടിമുട്ടിക്കാൻ കഷ്ടപ്പെടുന്ന ഒരു സാധാരണ മനുഷ്യൻ മാത്രം. പക്ഷേ മരണത്തിന്റെ വക്കിൽ നിന്നിരുന്ന Stage 4 Cancer നെ തോൽപ്പിച്ച് വീണ്ടും ജീവിതത്തിലേക്ക് തിരിച്ചു വന്ന ഒരാളാണ് ഞാൻ. അതുകൊണ്ട് തന്നെ എന്റെ കഥ വെറും വേദനയുടെ കഥയല്ല,പ്രതീക്ഷയുടെ കഥയാണ്

ഒരിക്കൽ എങ്കിലും ആ വലിയ വേദിയുടെ ഭാഗമാകാൻ കഴിഞ്ഞാൽ, എന്റെ പോലെ പോരാടുന്ന പലർക്കും അത് ഒരു പ്രതീക്ഷയായിരിക്കും. സ്വപ്നങ്ങൾ സാധാരണക്കാരൻ കാണുന്നതാണ്. ചിലപ്പോൾ അതാണ് ഏറ്റവും വലിയ ശക്തിയും

രണ്ടാം കുറിപ്പ് ഇങ്ങനെ

Big Boss പോയാൽ വില പോകും എന്ന് പലരും പറയാറുണ്ട്. പക്ഷേ എനിക്ക് പറയാനുള്ളത് ഒന്ന് മാത്രം നമ്മളിൽ ആരാണ് പൂർണരായി ജീവിക്കുന്നത്? ജീവിതത്തിൽ പലപ്പോഴും സാഹചര്യങ്ങൾ നമ്മളെ പല തീരുമാനങ്ങളിലേക്കും നയിക്കും. പിടിച്ചുനിൽക്കാനും മുന്നോട്ട് പോകാനും ചിലപ്പോൾ നമ്മൾക്ക് നമ്മളുടേതായ വഴികൾ തിരഞ്ഞെടുക്കേണ്ടി വരും. അതാണ് ജീവിതം.

നമ്മുടെ സ്വന്തം വീടുകൾക്കുള്ളിലും അഭിപ്രായവ്യത്യാസങ്ങളും പ്രശ്നങ്ങളും വഴക്കുകളും ഉണ്ടാകാറുണ്ട്. പക്ഷേ അത് പൊതുജനങ്ങൾ കാണാത്തതിനാൽ ആരും അതിനെക്കുറിച്ച് സംസാരിക്കാറില്ല. Big Boss എന്നത് ഒരു mental and physical game മാത്രമാണ്, അത് ജീവിതകാലം മുഴുവൻ ജീവിക്കേണ്ട ഒരു ലോകമല്ല. ഒരു പരിപാടി എന്ന നിലയിൽ കണ്ടാൽ തീരുന്ന കാര്യങ്ങളാണ് അതിൽ പലതും.

ഒരു ഷോയിലെ ചില നിമിഷങ്ങൾ മാത്രം കണ്ട് ഒരാളുടെ മുഴുവൻ വ്യക്തിത്വവും ജീവിതവും വിലയിരുത്തരുത്. ഓരോരുത്തരും അവിടെ നിലനിൽക്കാൻ ശ്രമിക്കുകയാണ്, ജീവിക്കാൻ പോരാടുകയാണ്. മറ്റുള്ളവരുടെ ജീവിതത്തിലെ തെറ്റുകൾ മാത്രം വലുതാക്കി കാണിക്കുന്നതിന് പകരം, അവരുടെ നല്ല വശങ്ങളും പോരാട്ടങ്ങളും വിജയങ്ങളും കൂടി കാണാൻ നമുക്ക് പഠിക്കാം. കാരണം ഒരു മനുഷ്യനെ നിർവചിക്കുന്നത് അയാളുടെ വീഴ്ചകൾ മാത്രമല്ല, വീണ്ടും എഴുന്നേൽക്കാനുള്ള മനസ്സും കൂടിയാണ്. വിധിയെഴുതുന്നതിന് മുമ്പ് മനസ്സിലാക്കാൻ ശ്രമിക്കാം. കുറ്റങ്ങൾ മാത്രം അല്ല, നന്മകളും കാണാം. അതാണ് ഒരു നല്ല സമൂഹത്തിന്റെ അടയാളം.

'ലാലേട്ടൻ' പറഞ്ഞ അഗ്നിപരീക്ഷ ചില്ലറക്കളിയല്ല ! കോമണേഴ്സ് ഒന്ന് വിയർക്കും; ഇത്തവണ ബിഗ് ബോസ് ഒന്നല്ല, രണ്ട് !

Nithya G Robinson — Tue, 02 Jun 2026 21:08:51 +0530

ഇന്ത്യൻ ടെലിവിഷൻ ചരിത്രത്തിലെ ഏറ്റവും വലിയ റിയാലിറ്റി ഷോയായ ബിഗ് ബോസിന്റെ എട്ടാം സീസൺ മലയാളത്തിൽ വരാനിരിക്കുകയാണ്. അതിന്റെ അണിയറ ഒരുക്കങ്ങളെല്ലാം തന്നെ തകൃതിയായി നടക്കുകയാണ്. ഇതിന്റെ ഭാഗമായി കോമണർ മത്സരാർത്ഥികളെ കുറിച്ചുള്ളൊരു പ്രൊമോ വീഡിയോ ഏഷ്യാനെറ്റ് പുറത്തുവിട്ടിരുന്നത് ശ്രദ്ധനേടിയിരുന്നു. ഇതിൽ ‘അഗ്നിപരീക്ഷ’യെ കുറിച്ച് മോഹൻലാൽ പറയുന്നുണ്ട്. സാധാരണക്കാർ തമ്മിലുള്ളൊരു മത്സരമാണ് അഗ്നിപരീക്ഷ എന്നത്. ഇതിലൂടെ ജയിച്ച് കയറുന്ന കുറച്ചുപേർക്ക് മെയ്ൻ സീസണിലേക്ക് നേരിട്ട് പ്രവേശം ലഭിക്കുമെന്നും മോഹൻലാൽ പറഞ്ഞിരുന്നു.

ഇതിന് പിന്നാലെ എന്താണ് അഗ്നിപരീക്ഷ എന്നതിനെ കുറിച്ചുള്ള ചർച്ചകൾ ബിഗ് ബോസ് ഗ്രൂപ്പുകളിൽ ഉയർന്നു. ബിഗ് ബോസ് തെലുങ്ക് സീസൺ 9ൽ ഈ ഷോ നടന്നിരുന്നു. എൻട്രികളിൽ നിന്നും 45 കോമണേഴ്സ് ആണ് ബിഗ് ബോസ് ഫ്ലോറിൽ എത്തിയത്. ഇതിൽ നിന്നും ജയിച്ച് കയറിയ 6 പേർ മെയ്ൻ സീസണിൽ എത്തുകയും അതിലൊരാളായ കല്യാണ്‍ സീസൺ വിജയിയായി മാറുകയും ചെയ്തിരുന്നു. വിന്നേഴ്‌സ് ട്രോഫി, സമ്മാനത്തുകയായി 35 ലക്ഷം രൂപ, സ്‌പോൺസർ ബോണസായി 5 ലക്ഷം രൂപ, ഒപ്പം ഒരു പുതിയ എസ്‌യുവി കാറും കല്യാണിന് ലഭിച്ചു.

എന്താണ് ബിഗ് ബോസ് അഗ്നിപരീക്ഷ ?

ഏറ്റവും കൂടുതല്‍ കോമണര്‍ മത്സാര്‍ത്ഥികള്‍ പങ്കെടുക്കാന്‍ പോകുന്ന ഒരു സീസണ്‍ ആയിരിക്കും മലയാളം ബിഗ് ബോസ് സീസണ്‍ 8. അഗ്നിപരീക്ഷ എന്ന് പറയുന്നൊരു പ്രീ ഷോ അതായത് സ്പിന്‍ ഓഫ് ആണിത്. പ്രധാന സീസണിന് മുന്‍പ് 15 എപ്പിസോഡുള്ള ചെറിയൊരു സീസണ്‍ ഉണ്ടാവും. ഇതില്‍ പങ്കെടുക്കുന്നവര്‍ എല്ലാം കോമണര്‍ മത്സരാര്‍ത്ഥികളാണ്. അപേക്ഷകർ നൽകുന്ന വീഡിയോയുടെ അടിസ്ഥാനത്തിൽ ആദ്യം 200 പേരെയും പിന്നീട് 100 പേരെയും ഷോര്‍ട് ലിസ്റ്റ് ചെയ്യും. അതില്‍ നിന്നും 50 അല്ലെങ്കില്‍ 45 പേരെയാണ് തെലുങ്കിൽ ഷോര്‍ട് ലിസ്റ്റ് ചെയ്തത്. ഒടുവിൽ 15 പേരിൽ നിന്നായി വോട്ടിങ്ങിലൂടെയും ജഡ്ജസിന്‍റെ സെലക്ഷനിലൂടെയും ആറ് പേരെയാണ് മെയ്ൻ സീസണിലേക്ക് നേരിട്ട് തെരഞ്ഞെടുത്തത്. ഇത്തരത്തിൽ എത്രപേരെയാണോ മലയാളം ബിഗ് ബോസ് തെരഞ്ഞെടുക്കുന്നത് അവർ അഗ്നിപരീക്ഷയിലേക്ക് എത്തുകയും തെരഞ്ഞെടുക്കുന്ന കോമണേഴ്സ് മലയാളം ബിഗ് ബോസ് സീസൺ 8ലേക്ക് എത്തുകയും ചെയ്യും. ശേഷമാകും സെലിബ്രിറ്റി മത്സരാർത്ഥികൾ ഉൾപ്പടെയുള്ള പ്രധാന സീസൺ ആരംഭിക്കുക.

15 എപ്പിസോഡിൽ എന്തൊക്കെ?

15 എപ്പിസോഡില്‍ നിരവധി ഗെയിംസ്, ടാസ്ക് എന്നിവ ഉണ്ടായിരിക്കും. മൂന്ന് ജഡ്ജസ് ഉണ്ട്. ഒരു അവതാരകയും ഉണ്ടായിരിക്കും. ഇവര്‍ മുൻ ബിഗ് ബോസ് വിന്നറുമാരോ റണ്ണറപ്പോ ശ്രദ്ധനേടിയവരോ ഒക്കെ ആയിരിക്കും. ഫിസിക്കല്‍, മെന്‍റല്‍, ഹ്യൂമര്‍, സംവാദം, എല്ലാം മത്സരാർത്ഥികൾ നേരിടേണ്ടി വരും. ഒരു മത്സരാര്‍ത്ഥിക്ക് 3 റെഡ് സിഗ്നല്‍ കിട്ടിയാല്‍ ഔട്ട് ആകും. യെല്ലോ ആണെങ്കില്‍ ഹോള്‍ഡും ഗ്രീന്‍ ആണെങ്കില്‍ സെലക്ടും ആയിരിക്കും. ആറാമത്തെ എപ്പിസോഡ് മുതല്‍ ഇവര്‍ക്ക് വോട്ടിംഗും ഉണ്ടാകും. ഇതെല്ലാം തരണം ചെയ്യുന്നവരാകും മെയ്ന്‍ സീസണിലേക്ക് എത്തുക.

ബിഗ് ബോസ് മലയാളത്തിന്‍റെ ചരിത്രത്തില്‍ ആദ്യം! പിറന്നാള്‍ ദിനത്തില്‍ വന്‍ പ്രഖ്യാപനവുമായി മോഹന്‍ലാല്‍

Web Desk — Thu, 21 May 2026 20:10:53 +0530

മലയാളത്തിലെ ഏറ്റവും ജനപ്രീതി നേടിയ ടെലിവിഷന്‍ റിയാലിറ്റി ഷോയാണ് ബിഗ് ബോസ്. കഴിഞ്ഞ ഏഴ് സീസണുകളിലായി നടന്ന ഷോ ഓരോ സീസണ്‍ കഴിയുന്തോറും പുതിയ പ്രേക്ഷകരെ നേടിയാണ് യാത്ര തുടര്‍ന്നത്. ഏഴാം സീസണിന്‍റെ ഗ്രാന്‍ഡ് ഫിനാലെ വേദിയില്‍ത്തന്നെ അവതാരകനായ മോഹന്‍ലാല്‍ ഷോയുടെ എട്ടാം സീസണും പ്രഖ്യാപിച്ചിരുന്നു. പുതിയ സീസണ്‍ എന്ന് മുതല്‍ ആരംഭിക്കുമെന്ന അറിയിപ്പ് ഇനിയും എത്തിയിട്ടില്ല. എന്നാല്‍ ഇപ്പോഴിതാ എട്ടാം സീസണ്‍ സംബന്ധിച്ച് ഏറെ കൗതുകകരവും പുതുമ നിറഞ്ഞതുമായ ഒരു പ്രഖ്യാപനം എത്തിയിരിക്കുകയാണ്. ഷോയ്ക്ക് വേണ്ടി അവതാരകനായ മോഹന്‍ലാല്‍ തന്നെയാണ് ഈ പ്രഖ്യാപനം നടത്തിയിരിക്കുന്നത്. അദ്ദേഹത്തിന്‍റെ പിറന്നാള്‍ ദിനത്തിലാണ് പുതിയ വിവരം എത്തിയിരിക്കുന്നത് എന്നതും കൗതുകം.

മിനിസ്ക്രീനിലൂടെയും സോഷ്യല്‍ മീഡിയയിലൂടെയുമൊക്കെ ശ്രദ്ധ നേടിയ അഭിനേതാക്കളും ഇന്‍ഫ്ലുവന്‍സേഴ്സുമൊക്കെയാണ് ബിഗ് ബോസില്‍ മത്സരാര്‍ഥികളായി സാധാരണ എത്താറ്. എന്നാല്‍ കഴിഞ്ഞ ഏതാനും സീസണുകളായി കോമണര്‍ എന്ന ഒരു വിഭാഗം കൂടി മത്സരാര്‍ഥികള്‍ക്കിടയില്‍ ഉണ്ട്. സാധാരണക്കാര്‍ക്ക് ഷോയില്‍ പങ്കെടുക്കാനുള്ള അവസരമാണ് ഇത്. അവസാന സീസണില്‍ വിജയിയായ അനീഷ് ടി എ ഈ കാറ്റഗറിയില്‍ ഷോയില്‍ എത്തിയ ആളായിരുന്നു. ഒന്നിലധികം കോമണേഴ്സും ഒരുമിച്ച് പങ്കെടുത്ത സീസണ്‍ മുന്‍പ് ഉണ്ടായിട്ടുണ്ട്. എന്നാല്‍ ഇത്തവണ നിരവധി കോമണേഴ്സ് ആവും ഷോയില്‍ ഉണ്ടാവുക എന്നാണ് മോഹന്‍ലാല്‍ അറിയിച്ചിരിക്കുന്നത്. ഏഷ്യാനെറ്റ് പുറത്തുവിട്ട വീഡിയോയിലൂടെയാണ് മോഹന്‍ലാലിന്‍റെ പ്രഖ്യാപനം.

കോമണേഴ്സിനെ തെരഞ്ഞെടുക്കാനായി ഒരു പ്രത്യേക ഷോ തന്നെ സംഘടിപ്പിക്കാന്‍ ഒരുങ്ങുകയാണ് ഏഷ്യാനെറ്റ്. മോഹന്‍ലാലിന്‍റെ വാക്കുകള്‍ ഇങ്ങനെ- സീസണ്‍ 8 ല്‍ നിരവധി സാധാരണക്കാര്‍ക്കാണ് അവസരം കൊടുക്കുന്നത്. ബിഗ് ബോസ് മത്സരാര്‍ഥികള്‍ക്കായുള്ള തെരഞ്ഞെടുപ്പിനായി ഒരു ഷോയിലൂടെ ഒരു മത്സരവേദി തന്നെ നമ്മള്‍ ഒരുക്കുകയാണ്. ബിഗ് ബോസ് അഗ്നിപരീക്ഷ. അഗ്നിപരീക്ഷ വിജയിച്ചു വരുന്നവര്‍ക്ക്. ഷോയിലെ പ്രകടന മികവിലൂടെ തിരഞ്ഞെടുക്കപ്പെടുന്നവര്‍ക്ക് ബിഗ് ബോസ് മലയാളം സീസണ്‍ 8 ലേക്ക് നേരിട്ട് പ്രവേശനം, മോഹന്‍ലാലിന്‍റെ വാക്കുകള്‍. ബിഗ് ബോസില്‍ പങ്കെടുക്കണമെന്ന ആഗ്രഹവുമായി നടക്കുന്നവര്‍ക്ക് പറ്റിയ പ്ലാറ്റ്ഫോം ആണ് ഒരുങ്ങുന്നത്. ഇതിന്‍റെ കൂടുതല്‍ വിവരങ്ങള്‍ പിന്നാലെ എത്തും. സീസണ്‍ 8 നെ കൂടുതല്‍ കൗതുകകരമാക്കും ഇതെന്ന കാര്യത്തില്‍ തര്‍ക്കമില്ല.

'കെഎസ്ആര്‍ടിസിയില്‍ ഓള്‍ കേരള ഫ്രീ ട്രിപ്പ്, നിരാശരാക്കരുത്'; കോൺഗ്രസിനോട് മസ്താനിയുടെ അപേക്ഷ

Nithya G Robinson — Thu, 14 May 2026 09:36:21 +0530

പത്ത് ദിവസം നീണ്ട കാത്തിരിപ്പുകൾക്ക് ഒടുവിൽ മുഖ്യമന്ത്രി ആരാകും എന്ന കാര്യത്തിൽ ഇന്ന് ക്ലൈമാക്സ് ആകുകയാണ്. അധികം വൈകാതെ തന്നെ കോൺഗ്രസ് നേതൃത്വം കേരളത്തിന്റെ പുതിയ മുഖ്യമന്ത്രി ആരാകുമെന്ന് അറിയിക്കും. അതിനായി കാത്തിരിക്കുകയാണ് കേരളത്തിലെ ജനങ്ങളും. മുഖ്യമന്ത്രി ചർച്ച നടക്കുന്നത് പോലെയാണ് സ്ത്രീകൾക്ക് വേണ്ടി കെഎസ്ആർടിസിയുടെ സൗജന്യ യാത്ര എന്ന വാഗ്ദാനവും. മന്ത്രിസഭ രൂപീകരണം വൈകിയതോടെ സൗജന്യ യാത്ര നടക്കാതെ പോകുമോ എന്ന ആശങ്കയും പലരും പങ്കുവച്ചിരുന്നു. ഒപ്പം ഇത് കെഎസ്ആർടിസിയെ വലിയൊരു നഷ്ടത്തിലേക്ക് തള്ളിവിടുമെന്ന് പറയുന്നവരുമുണ്ട്.

തതവസരത്തിൽ കെഎസ്ആർടിസി സൗജന്യ യാത്രയെ കുറിച്ച് മുൻ ബിഗ് ബോസ് താരവും അവതാരകയുമായ മസ്താനി പറഞ്ഞ കാര്യങ്ങൾ ശ്രദ്ധനേടുകയാണ്. സർക്കാരിന്റെ ചെലവിൽ കേരള ട്രിപ്പ് പ്ലാൻ ചെയ്തിരിക്കുന്ന ആളാണ് താൻ ഉൾപ്പടെയുള്ള സ്ത്രീകളെന്നും അവരെ നിരാശരാക്കരുതെന്ന് യാചിക്കുകയാണെന്നും മസ്താനി പറയുന്നു.

"പ്രിയപ്പെട്ട യുഡിഎഫുകാരോടാണ്. നിങ്ങള്‍ ആരെയെങ്കിലും ഒന്ന് മുഖ്യമന്ത്രി ആക്കണം. പ്ലീസ്. കാരണം സര്‍ക്കാരിന്‍റെ ചെലവില്‍ ഓള്‍ കേരള ട്രിപ്പ് അടിക്കാന്‍ വേണ്ടി പെട്ടി പാക്ക് ചെയ്തിരിക്കുന്ന ഒരാളാണ് ഞാന്‍, എന്നെ പോലെ ഒരുപാട് സ്ത്രീകള്‍ കെഎസ്ആര്‍ടിസിയില്‍ ഓള്‍ കേരള ട്രിപ്പ് ഫ്രീയായിട്ട് പോകാന്‍ വേണ്ടി കാത്തിരിക്കുന്നുണ്ട്. ഞങ്ങളെ നിരാശരാക്കരുത്. നിങ്ങള്‍ കസേര കള കളിച്ചെങ്കിലും ആരെങ്കിലും ഒന്ന് മുഖ്യമന്ത്രിയാക്. പ്ലീസ്. നിങ്ങളോട് യാചിക്കുകയാണ്", എന്നായിരുന്നു മസ്താനിയുടെ വാക്കുകൾ. പിന്നാലെ നിരവധി പേരാണ് കമന്റുകളുമായി രംഗത്ത് എത്തിയത്.

"ട്രിപ്പ്‌ അടിക്കാൻ ഫ്രീ ആയി നടക്കൂല. ആവശ്യങ്ങൾക്ക് മാത്രം ആണ്. അതും പാവപെട്ട സ്ത്രീകൾ ഒൺലി, ആദ്യം പ്രതിപക്ഷ നേതാവിനെ കണ്ടുപിടിക്കട്ട് എന്നിട്ട് നോക്കാം, മുഖ്യമന്ത്രി വരും എല്ലാം ശരിയാകും, നീ ആവെച്ച വെള്ളം അങ്ങുമാറ്റിവച്ചേര്, നീ അങ്ങനെ ട്രിപ്പിന് പോകണ്ട", എന്നിങ്ങനെ പോകുന്നു കമന്റുകൾ. അതേസമയം, ഇന്ന് ഉച്ചയോടെ മുഖ്യമന്ത്രി പ്രഖ്യാപനം ഉണ്ടാകുമെന്നാണ് പ്രതീക്ഷിക്കപ്പെടുന്നത്.

'ചിലർ ചെയ്യുന്നത് പ്രശസ്തിക്കുവേണ്ടി, ഞാൻ എന്നോട് സത്യസന്ധൻ'; ബിഗ് ബോസിനെ കുറിച്ച് കൊറിയൻ മല്ലു

Nithya G Robinson — Wed, 17 Jun 2026 13:38:10 +0530

ബിഗ് ബോസ് മലയാളം സീസൺ 7 കഴിഞ്ഞതിന് പിന്നാലെ അടുത്ത സീസൺ എപ്പോൾ ആരംഭിക്കുമെന്ന കാത്തിരിപ്പിലായിരുന്നു ബിബി പ്രേമികൾ. ഊഹാപോഹങ്ങള്‍ക്കെല്ലാം ഒടുവിൽ ഏതാനും ദിവസങ്ങൾക്ക് മുൻപ് പുതിയ ലോഗോ അവതരിപ്പിച്ച് ഷോയുടെ അനൗൺസ്മെന്റും അവതാരകനായ മോഹൻലാൽ നടത്തി. കോമണേഴ്സിനുള്ള അഗ്നി പരീക്ഷ എന്ന ഷോയ്ക്ക് അപേക്ഷിക്കാനുള്ള അവസാന തീയതിയും ഇന്നലെയോടെ അവസാനിച്ചു. ഇതിനകം തന്നെ സീസൺ 8ൽ വരാൻ പോകുന്ന സെലിബ്രിറ്റ് മത്സരാർത്ഥികളുടെ പ്രെഡിക്ഷൻ ലിസ്റ്റുമായി റിവ്യൂവർമാർ എത്തി കഴിഞ്ഞു. തതവസരത്തിൽ തന്റെ പേരും പ്രെഡിക്ഷൻ ലിസ്റ്റിൽ വന്നിട്ടുണ്ടെന്നും എന്നാൽ തനിക്ക് ബിഗ് ബോസിലേക്ക് വരാൻ താല്പര്യമില്ലെന്നും പറയുകയാണ് കൊറിയൻ മല്ലു എന്നറിയപ്പെടുന്ന ഡോ. സനോജ് റെജിനോൾഡ്.

താൻ ഒരിക്കലും ബിഗ് ബോസിൽ പോകില്ലെന്ന് പറഞ്ഞ സനോജ്, ചിലർ ചെയ്യുന്നത് പ്രശസ്തിക്കുവേണ്ടിയാണ് ഷോയിൽ പോകുന്നതെന്നും ഞാൻ എന്നോട് സത്യസന്ധൻ ആണെന്നും പറഞ്ഞു. തന്റെ ജീവിതത്തിൽ ഒരു ഹൗസിൽ കയറുന്നതിനേക്കാൾ വലിയ ലക്ഷ്യങ്ങളുണ്ടെന്നും അദ്ദേഹം കൂട്ടിച്ചേർത്തു. ശാസ്ത്രജ്ഞനും (സയന്റിസ്റ്റ്), ഇൻവൈറ്റഡ് പ്രൊഫസറും (ദക്ഷിണ കൊറിയ) കൂടിയാണ് സനോജ്.

കൊറിയൻ മല്ലുവിന്റെ വാക്കുകൾ ഇങ്ങനെ

കഴിഞ്ഞ കുറച്ച് വർഷങ്ങളായി ബിഗ് ബോസ് മലയാളത്തിന്‍റെ ഓരോ പുതിയ സീസണും വരുമ്പോൾ എന്റെ പേരും ചില പ്രെഡിക്ഷന്‍ ലിസ്റ്റുകളിലും സോഷ്യൽ മീഡിയ പോസ്റ്റുകളിലും കാണാറുണ്ട്. പലരും മെസേജ് അയക്കാറുണ്ട്, ചിലർ ഉറപ്പായിട്ട് ഞാൻ പോകുന്നുണ്ടെന്ന് പോലും പറയാറുണ്ട്. സത്യം പറഞ്ഞാൽ, സോഷ്യൽ മീഡിയയിൽ ആക്റ്റീവ് ആയിരിക്കുക എന്നത് ബിഗ് ബോസിലേയ്ക്ക് പോകാനുള്ള സൂചനയല്ല.

നിങ്ങൾ എന്നെ സ്നേഹിച്ച് എന്റെ പേര് പറയുന്നതും ചർച്ച ചെയ്യുന്നതും എനിക്ക് സന്തോഷം തന്നെയാണ്. പക്ഷേ എന്റെ ജീവിതത്തിൽ ഇപ്പോൾ അതിനേക്കാൾ പ്രധാനപ്പെട്ട കാര്യങ്ങളുണ്ട്. ഞാൻ ശ്രദ്ധിക്കുന്നത് എന്റെ സ്വപ്നങ്ങളിലേക്കും ലക്ഷ്യങ്ങളിലേക്കും, ഞാൻ ഉണ്ടാക്കാൻ ആഗ്രഹിക്കുന്ന ഭാവിയിലേക്കുമാണ്.

അതുകൊണ്ട് ഈ വർഷവും പറയട്ടെ ബിഗ് ബോസ് മലയാളം എന്റെ പ്ലാനുകളിൽ ഇല്ല. ഒരു ഷോയിൽ പങ്കെടുക്കുന്നതിനെക്കാൾ വലിയ സ്വപ്നങ്ങളുണ്ട്. ഇനിയും ഒരുപാട് കാര്യങ്ങൾ ചെയ്യാനുണ്ട്. അതിനുവേണ്ടിയാണ് ഞാൻ എന്റെ സമയവും ഊർജവും ചെലവഴിക്കുന്നത്.

എന്നെക്കുറിച്ച് കരുതുന്ന എല്ലാവർക്കും നന്ദി. പക്ഷേ എന്റെ വഴി ഞാൻ തന്നെ തിരഞ്ഞെടുക്കും, ഇപ്പോൾ ആ വഴിയിൽ ബിഗ് ബോസ് ഇല്ല. “എന്റെ ജീവിതത്തിൽ ഒരു ഹൗസിൽ കയറുന്നതിനേക്കാൾ വലിയ ലക്ഷ്യങ്ങളുണ്ട്. അതുകൊണ്ട് ഈ വർഷവും ഉത്തരം അതേ തന്നെയാണ് — ഞാൻ ബിഗ് ബോസ് മലയാളത്തിലേക്ക് പോകുന്നില്ല.”

'ബിഗ് ബോസിൽ ഞാൻ എത്താൻ എന്നോളം ആഗ്രഹിച്ച അപ്പച്ചൻ, ഒടുവിൽ കണ്ണുനിറഞ്ഞു'; അച്ഛന്‍റെ വിയോഗത്തിൽ മനമുലഞ്ഞ് അനീഷ്

Nithya G Robinson — Fri, 12 Jun 2026 16:47:58 +0530

തന്റെ പിതാവിന്റെ വിയോഗത്തിൽ വളരെ വൈകാരികമായ കുറിപ്പ് പങ്കിട്ട് ബിഗ് ബോസ് താരം അനീഷ്. കഴിഞ്ഞ ദിവസമായിരുന്നു ആന്റണി തറയിലിന്റെ വിയോഗം. ബിഗ് ബോസിൽ താൻ എത്തണമെന്ന് ഏറെ ആഗ്രഹിച്ച ആളായിരുന്നു അപ്പച്ചനെന്നും ഒടുവിൽ ഷോ കഴിഞ്ഞ് എയർപോർട്ടിലെത്തിയ ജനസാഗരത്തെ കണ്ട് അദ്ദേഹത്തിന്റെ കണ്ണുകൾ നിറഞ്ഞെന്നും അനീഷ് പറയുന്നു. അപ്പച്ചന്റെ മരണം തന്റെ കുടുംബത്തിന് നികത്താനാവാത്ത നഷ്ടമാണെന്നും പകരം വെയ്ക്കാനാവാത്ത വിടവാണതെന്നും അനീഷ് പറയുന്നു.

അനീഷിന്റെ വാക്കുകൾ ഇങ്ങനെ

കഴിഞ്ഞുപോയ ദിനങ്ങൾ അതികഠിനമായിരുന്നു. അപ്പച്ചനെ കുറിച്ച് എങ്ങനെയാണ് പറഞ്ഞു പൂർത്തിയാക്കുക എന്നുപോലും എനിക്കറിയില്ല. അത്രമാത്രം എല്ലാകാലത്തും എന്നെ പിന്തുണച്ചിട്ടുണ്ട്. ജീവിതത്തിലെ ഉയർച്ചയിലും, താഴ്ചയിലും, സന്തോഷത്തിലും, ദുഃഖത്തിലും ഒരുപോലെ സപ്പോർട്ട് ചെയ്യുക എന്നത് നിസ്സാര കാര്യമല്ല. ഉറച്ച നിലപാടുകളും, കാര്യഗൗരവ ശേഷിയും അപ്പച്ചന്റെ വ്യക്തിത്വത്തിന്റെ ഭാഗമായിരുന്നു. ജീവിതത്തിന്റെ ഏത് അവസ്ഥയിലും അമിതമായി ആഹ്ലാദിക്കാത്ത, ലാളിത്യം മുഖമുദ്രയാക്കിയ തനി നാട്ടിൻ പുറത്തുകാരൻ. കൃഷിയെ ജീവിതചര്യയാക്കിയ പ്രകൃതി സ്നേഹി. ഒരു അച്ഛനും മകനെ ഇത്രമാത്രം സപ്പോർട്ട് ചെയ്യുമോ എന്ന് പലപ്പോഴും എനിക്ക് തന്നെ തോന്നാറുണ്ട്.

ബിഗ്ഗ്‌ബോസ്സിൽ ഞാൻ എത്തിപ്പെടാൻ എന്നോളം തന്നെ അപ്പച്ചനും ആഗ്രഹിച്ചു. ഓരോ ദിവസവും എന്നെ മോട്ടിവേറ്റ് ചെയ്തുകൊണ്ടിരുന്നു. തളരാൻ അനുവദിച്ചില്ല. കാര്യങ്ങൾ വളച്ചുകെട്ടില്ലാതെ സംസാരിച്ചു. ശരിയുടെ ഭാഗത്ത് ഉറച്ചുനിന്നു. എന്നിട്ടും ആരെയും വേദനിപ്പിച്ചില്ല. പകരം എല്ലാരേയും സ്നേഹിച്ചു.

അനീഷ് തറയിൽ എന്ന ഈ ഞാൻ ബിഗ് ബോസിൽ കയറിയപ്പോൾ ഏറ്റവും കൂടുതൽ സന്തോഷിച്ചത് ആന്റണി തറയിൽ എന്ന എന്റെ അപ്പച്ചൻ ആയിരുന്നു. ബിഗ് ബോസിന് ശേഷം എയർപോർട്ടിലെത്തിയപ്പോൾ ജനസാഗരങ്ങളെ കണ്ട് അപ്പച്ചന്റെ കണ്ണുനിറഞ്ഞതും, കോടന്നൂരിൽ കിട്ടിയ സ്വീകരണ ചടങ്ങിൽ അഭിമാനത്തോടെ നിന്നതും എനിക്ക് മറക്കാൻ ആകുന്നില്ല. ബഹുമാനപ്പെട്ട മുഖ്യമന്ത്രിയുടെ കയ്യിൽ നിന്ന് പുരസ്കാരം ഏറ്റുവാങ്ങുമ്പോൾ അപ്പച്ചന്റെ കണ്ണുകളിൽ തിളക്കവും, ആത്മനിർവൃതിയും ഞാൻ കണ്ടിരുന്നു.

അപ്പച്ചന്റെ മരണം എന്റെ കുടുംബത്തിന് നികത്താനാവാത്ത നഷ്ടമാണ്. പകരം വെയ്ക്കാനാവാത്ത വിടവാണ്. കഴിഞ്ഞ ഏതാനും ദിവസങ്ങളായി ബന്ധുക്കളും, സുഹൃത്തുക്കളും, നാട്ടുകാരും തന്നുകൊണ്ടിരിക്കുന്ന സപ്പോർട്ട് എനിക്കും, കുടുംബത്തിനും മറക്കാൻ കഴിയില്ല. സംസ്കാരചടങ്ങിൽ പങ്കെടുത്തവരോടും, പ്രാർത്ഥിച്ചവരോടും പ്രത്യേകം നന്ദി പറയുന്നു.

ഒരിക്കലും ക്യാമറകളുടെ മുമ്പിലെത്താൻ അദ്ദേഹം ആഗ്രഹിച്ചിരുന്നില്ല. ജീവിതത്തിൽ പ്രൈവസി അദ്ദേഹം കൂടുതൽ ഇഷ്ടപ്പെട്ടു. ഒരുകാര്യം കൂടി പറഞ്ഞു വയ്ക്കട്ടെ. മരണ വിവരം ഞാൻ സോഷ്യൽ മീഡിയയിൽ പോസ്റ്റ്‌ ചെയ്യാതിരുന്നത്, അപ്പച്ചന്റെ വേർപാടിൽ എനിക്കും കുടുംബത്തിനും പ്രൈവസി കിട്ടണം എന്നതിനാലാണ്. നിങ്ങൾ തന്ന പ്രാർത്ഥനകൾക്ക് ഹൃദയം തൊട്ട നന്ദി അറിയിക്കുന്നു. തുടർന്നും അപ്പച്ചനെ പ്രാർത്ഥനകളിൽ ഓർക്കണമെന്നും അപേക്ഷിക്കുന്നു.

ചക്ക വീണ് മുയൽ ചാവുമോ ? കൊമ്പുകോര്‍ക്കുന്നത് ചില്ലറക്കാരല്ല, ലിസ്റ്റിൽ 'ദൃശ്യം' താരവും ! ബിഗ് ബോസ് സീസൺ 8 ആദ്യ പ്രെഡിക്ഷൻ

Nithya G Robinson — Sun, 07 Jun 2026 17:13:55 +0530

ഏറെ നാളത്തെ കാത്തിരിപ്പുകള്‍ക്കെല്ലാം ഒടുവില്‍ ബിഗ് ബോസ് മലയാളം സീസണ്‍ 8 ആരംഭിക്കാന്‍ പോകുകയാണ്. ഇതിന് മുന്നോടിയായി കോമണേഴ്സിന് വേണ്ടിയുള്ള അഗ്നിപരീക്ഷയുടെ വീഡിയോയും പുറത്തുവന്നു കഴിഞ്ഞു. ഇതിന് പിന്നാലെ ആരൊക്കെയാകും ഈ സീസണില്‍ മത്സരിക്കാന്‍ എത്തുന്ന സെലിബ്രിറ്റികള്‍ എന്ന ചര്‍ച്ചയും ആരംഭിച്ചു കഴിഞ്ഞു. സിനിമ, സീരിയല്‍, കായികം, ടിവി ഷോ തുടങ്ങി നിരവധി മേഖലകളില്‍ ഉള്ളവരുടെ പേരുകള്‍ ഉയര്‍ന്ന് കേള്‍ക്കുന്നുണ്ട്.

തതവസരത്തില്‍ ആദ്യ പ്രെഡിക്ഷന്‍ ലിസ്റ്റുമായി എത്തിയിരിക്കുകയാണ് ബിഗ് ബോസ് റിവ്യൂവറായ അന്‍സിഫ്. ഇയാള്‍ പലപ്പോഴും പറഞ്ഞിട്ടുള്ള പ്രെഡിക്ഷന്‍ ലിസ്റ്റിലുള്ള പലരും പിന്നീട് ഷോയിലും എത്തിയിട്ടുണ്ട്. ആദ്യഘട്ടത്തില്‍ 20 പേരുടെ പ്രെഡിക്ഷനുമായാണ് അന്‍സിഫ് എത്തിയിരിക്കുന്നത്. ഇവരില്‍ ചിലര്‍ ഉണ്ടായേക്കാമെന്നും ചിലര്‍ക്ക് ബിഗ് ബോസിന്‍റെ വിളിപോലും വന്നു കാണില്ലെന്നും അന്‍സിഫ് പറയുന്നുണ്ട്.

പ്രെഡിക്ഷൻ ലിസ്റ്റിലുള്ള 20 പേരുടെ പേരുകൾ ചുവടെ

ഫുഡ് വ്ലോഗർ- സന്ധ്യാമ്മ- (കടൽ മച്ചാൻ അമ്മ)

നടൻ- സിദ്ധാർത്ഥ് പ്രഭു

പിആർ- വിനു വിജയ്

നടി- നീന കുറുപ്പ്

നടൻ, ഗായകൻ- തനൂജ് മേനോൻ

അവതാരക, മോഡൽ- എയ്ഞ്ചൽ ബേബി അശ്വതി

നടൻ- ബിജു സോപാനം

നടി- ഐശ്വര്യ റംസായി(മൗനരാഗം താരം)

നടി- അഞ്ജലി നായർ

നടൻ- സാജൻ സൂര്യ

ആയുർവേദ ഡോക്ടർ, ബിഗ് ബോസ് റിവ്യൂവർ- രേവതി

നടി- ആയിഷ(ബിഗ് ബോസ് തമിഴ്, തെലുങ്ക്)

നടൻ- ആദിത്യൻ ജയൻ

നടി- മൃദുല വിജയ്

നടൻ- യുവ

നടൻ- റോഷൻ ബഷീർ

നടൻ- മീര വാസുദേവ്

അവതാരക- ലക്ഷ്മി നക്ഷത്ര

വ്ലോഗർ, അവതാരകൻ- കാർത്തിക് സൂര്യ

കമന്റേറ്റർ, അവതാരകൻ- രാഹുൽ ഈശ്വർ

ആക്ടിവിസ്റ്റ്- ശ്രീലക്ഷ്മി അറയ്ക്കൽ

വന്‍ അവസരം, ഇനി മണിക്കൂറുകള്‍ കൂടി മാത്രം; നിങ്ങള്‍ അപേക്ഷിച്ചോ?

Web Desk — Mon, 15 Jun 2026 21:08:46 +0530

മലയാളത്തിലെ ഏറ്റവും ജനപ്രീതി നേടിയ ടെലിവിഷന്‍ റിയാലിറ്റി ഷോ ആയ ബിഗ് ബോസ് മലയാളത്തിന്‍റെ എട്ടാമത്തെ സീസണ്‍ വരികയാണ്. ഇക്കുറി കോമണര്‍ ടിക്കറ്റില്‍ നിരവധി സാധാരണക്കാര്‍ക്ക് ബിഗ് ബോസില്‍ പങ്കെടുക്കാന്‍ അവസരമുണ്ടാവുമെന്ന് അണിയറക്കാര്‍ നേരത്തെ അറിയിച്ചിരുന്നു. ഇതിനായി ഒരു ഷോയും ഇക്കുറി സംഘടിപ്പിക്കുന്നുണ്ട്. സീസണ്‍ 8 അഗ്നിപരീക്ഷ എന്ന പേരില്‍ നടക്കുന്ന ഷോയില്‍ വിജയിക്കുന്നവര്‍ക്ക് ബിഗ് ബോസിലേക്ക് എന്‍ട്രി ലഭിക്കും. ഇതിലേക്ക് അപേക്ഷിക്കേണ്ട വിധം എങ്ങനെയെന്ന് നേരത്തെ അറിയിപ്പ് എത്തിയിരുന്നു. ഇതിനായുള്ള അപേക്ഷകള്‍ അയക്കേണ്ട അവസാന തീയതി ഇന്നാണ്. ഏതാനും മണിക്കൂറുകള്‍ മാത്രമാണ് ഇതിനായി അവശേഷിക്കുന്നത്.

ഇത് സംബന്ധിച്ച് ഏഷ്യാനെറ്റ് നേരത്തേ പുറത്തുവിട്ട പ്രൊമോയില്‍ അഗ്നിപരീക്ഷയില്‍ എങ്ങനെ പങ്കെടുക്കുമെന്ന കാര്യം മോഹന്‍ലാല്‍ തന്നെ അറിയിച്ചിരുന്നു. “സീസണ്‍ 8 അഗ്നിപരീക്ഷയിലൂടെ ബിഗ് ബോസ് ഷോയില്‍ പങ്കെടുക്കാന്‍ ആഗ്രഹിക്കുന്നവര്‍ നിങ്ങളുടെ നിലപാടും വ്യക്തിത്വവും വ്യക്തമാക്കുന്ന, നിങ്ങള്‍ യഥാര്‍ഥത്തില്‍ ആരാണ് എന്ന് വെളിപ്പെടുത്തുന്ന 3 മിനിറ്റില്‍ താഴെയുള്ള ഒരു ഇന്‍ട്രൊഡക്ഷന്‍ വീഡിയോ തയ്യാറാക്കി http://asianet.jiostar.com/bb8 എന്ന വെബ്സൈറ്റില്‍ അപ്‍ലോഡ് ചെയ്യുക”, മോഹന്‍ലാലിന്‍റെ വാക്കുകള്‍. അഗ്നിപരീക്ഷയില്‍ വിജയിച്ചാല്‍ സീസണ്‍ 8 ല്‍ പങ്കെടുക്കാനുള്ള അവസരമാണ് മത്സരാര്‍ഥികളെ കാത്തിരിക്കുന്നത്. അയയ്ക്കുന്ന ഇന്‍ട്രൊഡക്ഷന്‍ വീഡിയോയ്ക്ക് ഉണ്ടാകാവുന്ന പരമാവധി സൈസ് 50 എംബി ആണ്. ജൂണ്‍ 15 ആണ് അവസാന തീയതി.

കോമണര്‍ ആയി എത്തിയ അനീഷ് ആയിരുന്നു ബിഗ് ബോസ് മലയാളം ഏഴാം സീസണിലെ വിജയി. അതിനാല്‍ത്തന്നെ പുതിയ സീസണില്‍ കോമണര്‍ മത്സരാര്‍ഥികള്‍ക്ക് സ്വാഭാവികമായും പ്രാധാന്യം കൂടും. അതേസമയം അഗ്നിപരീക്ഷയോ ബിഗ് ബോസ് സീസണ്‍ എട്ടോ എന്ന് ആരംഭിക്കുമെന്ന വിവരം ഇനിയും പുറത്തെത്തിയിട്ടില്ല. അതിനായുള്ള കാത്തിരിപ്പിലാണ് ബിഗ് ബോസ് ആരാധകര്‍. മോഹന്‍ലാല്‍ തന്നെയാണ് ഇത്തവണയും ബിഗ് ബോസ് മലയാളത്തിന്‍റെ അവതാരകനായി എത്തുക.

'കോൺഗ്രസിലെ എല്ലാവർക്കും മൈക്കും കസേരയും വേണം, അക്കാര്യത്തിൽ എൽഡിഎഫ് പക്കയാണ്'; ബിഗ് ബോസ് പ്രവീൺ

Nithya G Robinson — Tue, 28 Apr 2026 17:24:45 +0530

മെയ് 4 ആകാൻ കാത്തിരിക്കുകയാണ് രാജ്യത്തെ ജനങ്ങളും മുന്നണികളും. ആരാകും അടുത്ത അഞ്ച് വർഷം ഭരിക്കാൻ പോകുന്നതെന്നറിയാനുള്ള കാത്തിരിപ്പാണ് അത്. മുന്നണികളെല്ലാവരും ഏറെ പ്രതീക്ഷയിലുമാണ്. തതവസരത്തിൽ തങ്ങളുടെ രാഷ്ട്രീയ അഭിപ്രായങ്ങൾ പങ്കുവച്ച് സെലിബ്രിറ്റികളും രംഗത്ത് എത്തുന്നുണ്ട്. അത്തരത്തിൽ നടനും ബിഗ് ബോസ് മലയാളം സീസൺ 7ലെ മത്സരാർത്ഥിയുമായിരുന്ന പ്രവീൺ പറഞ്ഞ കാര്യങ്ങൾ ശ്രദ്ധനേടുകയാണ്. കേരളത്തിൽ കോൺഗ്രസ് അധികാരത്തിൽ വരാത്തതിന്റെ കാരണമാണ് പ്രവീൺ പറയുന്നത്.

'ഞാന്‍ പറയേണ്ടതില്ലല്ലോ. നിങ്ങളെല്ലാവരും കണ്ടിട്ടുണ്ടാവും. ഒരു മൈക്ക് കൊണ്ട് വച്ചാല്‍ എല്ലാവരും കൂടും. അവര്‍ക്ക് എല്ലാവര്‍ക്കും മൈക്ക് വേണം. എല്ലാവര്‍ക്കും കസേര വേണം. അത് നടക്കുന്ന കാര്യമല്ല. പക്ഷേ അക്കാര്യത്തില്‍ എല്‍ഡിഎഫുകാര്‍ പക്കയാണ്. കാരണം നേതാവിനെ നേതാവെന്നും അണികള്‍ അണികളാണെന്നും ഉള്ളൊരു ചിന്തയുണ്ട്. അതുകൊണ്ടാണ് കോണ്‍ഗ്രസ് പരാജയപ്പെടാനുള്ള കാരണങ്ങള്‍', എന്നായിരുന്നു പ്രവീൺ പറഞ്ഞത്. അക്ബറിന്റെ വിവാഹസൽക്കാരത്തിൽ പങ്കെടുത്ത ശേഷം ഓൺലൈൻ മാധ്യമങ്ങളോട് സംസാരിക്കുകയായിരുന്നു പ്രവീൺ.

തൃക്കാക്കര എൻഡിഎ സ്ഥാനാർത്ഥിയായ അഖിൽ മാരാർ തോൽക്കുമെന്നും പ്രവീൺ പറയുന്നുണ്ട്. 'അഖിൽ മാരാർ തോൽക്കും. എട്ട് നിലയിൽ തന്നെ പൊട്ടും. അതാണ് എന്റെ ഏറ്റവും വലിയ പ്രതീക്ഷ. പുള്ളിയോട് എനിക്ക് വൈരാഗ്യം ഒന്നുമില്ല. വായിൽ വരുന്നതെല്ലാം വിളിച്ച് പറയുകയാണ്. കഴിഞ്ഞ ദിവസം ഗർഭിണികളുടെ കാര്യം പറഞ്ഞില്ലേ. ഇതുപോലൊരു പൊട്ടനെ ഞാൻ വേറെ കണ്ടിട്ടില്ല. സത്യം പറയാമല്ലോ. എട്ട് നിലയിൽ പൊട്ടും. അഖിൽ മാരാർ പിആർ വർക്ക് ചെയ്യുകയാണ്. പൊട്ടനാണ് അഖിൽ. വിവരമില്ലാത്ത മനുഷ്യൻ. ശ്രദ്ധപിടിച്ചു പറ്റാനായി ഓരോന്ന് വിളിച്ച് പറയുന്നു. എനിക്ക് ഒന്നെ പറയാനുള്ളൂ.. അഖിലിനെക്കാളും എത്രയോ ബെറ്ററാണ് അലിൻ ജോസ് പെരേര', എന്നായിരുന്നു പ്രവീണിന്റെ വാക്കുകൾ.

'നന്ദിയില്ലാത്ത കുറേ പേര്‍, പിണറായി വിജയന്‍ എന്താ ചെയ്യാത്തത്' എന്ന് ഞാന്‍ പറഞ്ഞിട്ടില്ല; വ്യാജനെതിരെ നൂറ

Nithya G Robinson — Thu, 07 May 2026 09:46:10 +0530

102 സീറ്റുകൾ നേടി ബഹുഭൂരിപക്ഷത്തിൽ ആയിരുന്നു കോൺഗ്രസ് അധികാരത്തിലേറിയത്. അതേസമയം, കഴിഞ്ഞ പത്ത് വർഷമായി കേരളം ഭരിച്ച എൽഡിഎഫിന് 35 സീറ്റുകൾ മാത്രമാണ് നേടാനായത്. മുഖ്യമന്ത്രി പദം ആര് അലങ്കരിക്കുമെന്ന ചർച്ചകൾ സോഷ്യൽ മീഡിയയിൽ നിറയുന്നതിനൊപ്പം തന്നെ പിണറായി വിജയനെ പ്രശംസിച്ചും അവർക്ക് വന്ന വീഴ്ചകൾ എന്താണെന്നുമെല്ലാം പറഞ്ഞുള്ള പോസ്റ്റുകളും പ്രത്യക്ഷപ്പെടുന്നുണ്ട്. തതവസരത്തിൽ പിണറായി വിജയനെ കുറിച്ച് താൻ പറഞ്ഞെന്ന പേരിൽ പ്രചരിക്കുന്ന വ്യാജ വാർത്തയ്ക്ക് എതിരെ രംഗത്ത് എത്തിയിരിക്കുകയാണ് ബിഗ് ബോസ് താരം നൂറ.

"നന്ദിയില്ലാത്ത കുറേ പേര്‍ ചോദിക്കുന്നുണ്ട് പിണറായി വിജയന്‍ എന്ത് ചെയ്തു എന്ന്. എന്താണ് അദ്ദേഹം ചെയ്യാത്തത് ? ഞാന്‍ പ്രൗഡ് ആയി തന്നെ പറയും ഞാന്‍ പിണറായി വിജയന്‍റെ ഹ്യൂജ് ഫാന്‍", എന്ന് നൂറ പറഞ്ഞുവെന്നാണ് സോഷ്യൽ മീഡിയയിൽ പ്രചരിച്ച വാർത്ത. എന്നാൽ ഇത് യഥാർത്ഥത്തിൽ പറഞ്ഞത് മുൻ ബിഗ് ബോസ് താരവും യുട്യൂബറുമായ നോറ ആയിരുന്നു. ഇതാണ് നൂറയുടെ പേരിൽ പ്രചരിച്ചത്.

ഇത് ശ്രദ്ധയിൽപ്പെട്ട നൂറ പ്രതികരിക്കുകയായിരുന്നു. എന്തിനാണ് ഇത്തരം വ്യാജ വിവരങ്ങൾ പ്രചരിപ്പിക്കുന്നതെന്ന് മനസിലാകുന്നില്ലെന്നാണ് നൂറ പറയുന്നത്. "ഒരു പോസ്റ്റ് സോഷ്യല്‍ മീഡിയയില്‍ പ്രചരിക്കുന്നത് കണ്ടു. എന്‍റെ ഫോട്ടോയാണ് അതിലുള്ളത്. വേറൊരാള്‍ അവരുടെ പൊളിറ്റിക്കല്‍ വ്യൂസ് പറഞ്ഞതാണ് അത്. പക്ഷേ അവരുടെ ഫോട്ടോയോ മറ്റോ ഉപയോഗിക്കുന്നതിന് പകരം എന്‍റേതാണ് ഉപയോഗിച്ചത്. എന്‍റെ പേരും ഉപയോഗിച്ചിട്ടുണ്ട്. ഞാന്‍ ഇങ്ങനെ ഒക്കെ പറഞ്ഞിട്ടുണ്ടോ എന്ന് ചോദിച്ച് കുറേ പേര്‍ എനിക്ക് മെസേജ് അയച്ചിരുന്നു. ഞാന്‍ ഒരിടത്തും പോയി പൊളിറ്റിക്കല്‍ വ്യൂവ്സ് പറയുന്ന ആളല്ല. പക്ഷേ എന്തുകൊണ്ടാണ് ഇന്‍സ്റ്റാഗ്രാം പേജുകള്‍ ആളുകളെ തെറ്റിദ്ധരിപ്പിക്കുന്നത് എന്ന് എനിക്കറിയില്ല. വ്യാജ വിവരങ്ങള്‍ കൊടുക്കുന്നതെന്തിന് എന്ന് എനിക്ക് മനസിലാകുന്നില്ല. അതിലൂടെ അവര്‍ക്ക് എന്താണ് കിട്ടുന്നത്. ആള്‍ക്കാര് കാണുമ്പോള്‍, ങേ.. ഇവള്‍ ഇങ്ങനെ പറഞ്ഞോ ? എന്ന് ചിന്തിക്കും. ഇവളാരാ ഇത് പറയാന്‍ എന്ന് ചോദിച്ച് കൊണ്ടുള്ള കമന്‍റുകളും വരുന്നുണ്ട്. ഞാന്‍ അങ്ങനെ ഒന്നും പറഞ്ഞിട്ടില്ല. അതിനെ പറ്റി എനിക്ക് ഒന്നും പറയാനുമില്ല. പക്ഷേ ഇത്തരം തെറ്റായ കാര്യങ്ങള്‍ പ്രചരിപ്പിക്കുന്നത് പ്ലീസ് നിര്‍ത്തൂ. അത് ശരിയായ കാര്യമല്ല", എന്നായിരുന്നു നൂറയുടെ വാക്കുകൾ.

6 മാസം കഴിഞ്ഞ് കെഎസ്ആർടിസിയിൽ ഫ്രീയല്ലെന്ന് പറഞ്ഞാൽ, അവർ തിരിഞ്ഞ് കൊത്തും; ബിഗ് ബോസ് സിജോ

Nithya G Robinson — Mon, 18 May 2026 08:08:03 +0530

കോൺഗ്രസ് സർക്കാർ അധികാരത്തിലേറാൻ പോകുകയാണ്. തതവസരത്തിൽ കെഎസ്ആർടിസിയിൽ സ്ത്രീകൾക്ക് സൗജന്യ യാത്ര എന്ന ചർച്ചകളും സജീവമായി നിൽക്കുന്നുണ്ട്. ഇപ്പോഴിതാ ഈ സൗജന്യ യാത്രയോട് വ്യക്തിപരമായി താല്പര്യമില്ലെന്ന് പറയുകയാണ് ബിഗ് ബോസ് താരം സിജോ. സ്ത്രീകൾക്ക് ഇതിലൂടെ എന്ത് ഉന്നമനമാണ് ലഭിക്കുന്നതെന്ന് സിജയോ ചോദിക്കുന്നു. നിലവിൽ എല്ലാം പക്കയാണെന്നും ആറ് മാസം കഴി‍ഞ്ഞ് സൗജന്യം പറ്റില്ലെന്ന് പറഞ്ഞാൽ അനുകൂലിക്കുന്നവർ തിരിയുമെന്നും സിജോ ഓർമിപ്പിക്കുന്നു.

സിജോയുടെ വാക്കുകൾ ഇങ്ങനെ

കെഎസ്ആര്‍ടിസിയില്‍ സ്ത്രീകള്‍ക്ക് സൗജന്യ യാത്ര നല്‍കുന്നതിനോട് എനിക്ക് താല്പര്യമില്ല. സ്ത്രീകളുടെ ഉന്നമനമാണ് ഉദ്ദേശിക്കുന്നതെങ്കില്‍ അവര്‍ക്ക് ഫ്രീ സര്‍വീസ് കൊടുക്കേണ്ട ആവശ്യമൊന്നും ഇല്ല. ഫ്രീയായി യാത്ര ചെയ്തോന്ന് പറയുന്നതിനകത്ത് എന്ത് ഉന്നമനമാണ് ഉള്ളത്. അവര്‍ക്ക് ഒരു ഗുണവും ഉണ്ടാകാന്‍ പോകുന്നില്ല. പകരം അവര്‍ക്ക് വരുമാനം ഉണ്ടാക്കാനുള്ള കാര്യങ്ങള്‍ ചെയ്ത് കൊടുത്താല്‍ നല്ലകാര്യമാണ്. അങ്ങനയെ നമ്മുടെ നാടിനും രാജ്യത്തിനുമൊക്കെ വികസനം ഉണ്ടാകൂ. അല്ലാതെ എല്ലാം ഫ്രീയായി കൊടുത്തു കഴിഞ്ഞാല്‍ കുറച്ച് നാള്‍ കഴിയുമ്പോഴേക്കും ബുദ്ധിമുട്ട് ഉണ്ടാകും.

നിലവില്‍ പ്രൈവറ്റ് ബസുകളില്‍ യാത്ര ചെയ്യുന്നവര്‍ കെഎസ്‍ആര്‍ടിസിയില്‍ പോകും. മൂന്നോ നാലോ മാസം കഴിയുമ്പോള്‍ പ്രൈവറ്റുകാര്‍ ടിക്കറ്റ് ചാര്‍ജ് വര്‍ദ്ധനവ് ആവശ്യപ്പെടും. ഒരു സമരം വരും. നമ്മുടെ നാടിനെ തന്നെ അത് ബാധിക്കും. എല്‍ഡിഎഫ് ഇപ്പോള്‍ പ്രതിപക്ഷത്ത് നില്‍ക്കുകയാണ്. ട്രേഡ് യൂണിയനിലെ മിക്ക ആള്‍ക്കാരും ഇടതുപക്ഷ അനുകൂലികളാണ്. സമരം ശക്തമാകും. വലിയൊരു പ്രശ്നത്തിലേക്ക് കാര്യങ്ങള്‍ പോകേണ്ട ചാന്‍സുണ്ട്. പ്രത്യേകിച്ച് കേരളത്തില്‍. എത്രമാത്രം കൃത്യമായി ഇത് മുന്നോട്ട് കൊണ്ടുപോകാന്‍ പറ്റും എന്നത് വലിയ കാര്യമാണ്. കെഎസ്ആര്‍ടിസി ജീവനക്കാര്‍ക്ക് ശമ്പളം പോലും കൊടുക്കാന്‍ പറ്റാതെ പെട്ട് പോയിട്ടുണ്ട്. ഇതൊക്കെ ഇനി എങ്ങനെ മുന്നോട്ട് കൊണ്ടുപോകും എന്നത് വലിയൊരു കാര്യമാണ്.

ഒരു ആറ് മാസം കൊടുത്തിട്ട് പിന്നീട് അത് ഫ്രീ അല്ല, കെഎസ്ആര്‍ടിസി നഷ്ടത്തിലാണെന്ന് പറഞ്ഞാല്‍ ഇപ്പോള്‍ പിന്തുണയ്ക്കുന്നവര്‍ തന്നെ തിരിഞ്ഞ് നില്‍ക്കും. നിലവില്‍ ഇതിന്‍റെ പേരില്‍ ഒരു പ്രതിഷേധം നടന്നു കഴിഞ്ഞു. കെഎസ്ആര്‍ടിസി ഇപ്പോൾ നഷ്ടത്തിലാണ്. അതെങ്ങനെ ഇനി മുന്നോട്ട് ലാഭത്തില്‍ കൊണ്ടുപോകുമെന്ന് കണ്ടറിയാം. ഇപ്പോള്‍ കാണുമ്പോള്‍ എല്ലാം പക്കയാണ്.

'ആട്ടുംതോലിട്ട ചെന്നായ്ക്കളേ..അത്രയും ലോക്കലല്ല ഞാൻ'; സജ്ന-ഫിറോസ് വിവാദത്തിൽ കലിപ്പിച്ച് സൂര്യ മേനോൻ

Nithya G Robinson — Sat, 02 May 2026 16:10:23 +0530

കഴിഞ്ഞ ഏതാനും ദിവസങ്ങളായി സോഷ്യൽ മീഡിയയിലും മറ്റും നിറഞ്ഞു നിൽക്കുന്ന വിവാദമാണ് സജ്ന-ഫിറോസ് വിവാഹമോചനം. മ്യൂസിക് മേഖലയിലെ പ്രമുഖ വ്യക്തിയുമായി സജ്നയ്ക്ക് ബന്ധമുണ്ടെന്നതടക്കമുള്ള വാർത്തകളും പുറത്തുവന്നിരുന്നു. ഇതിനിടെ ഒരു വീഡിയോയിൽ തങ്ങളുടെ ജീവിതത്തിനിടയിലേക്ക് മൂന്നാമതൊരു സ്ത്രീ, അതായത് ബിഗ് ബോസിൽ ഉണ്ടായിരുന്നൊരു സ്ത്രീ കടന്നുവന്നുവെന്ന് സജ്ന പറഞ്ഞിരുന്നു. പിന്നാലെ ഇത് സൂര്യ മേനോൻ ആണെന്ന് ചിലർ കുറ്റപ്പെടുത്തുകയും ചെയ്തു. ഇപ്പോഴിതാ ഇവർക്ക് മറുപടിയുമായി എത്തിയിരിക്കുകയാണ് മുൻ ബിഗ് ബോസ് താരം കൂടിയായ സൂര്യ.

ബിഗ് ബോസ് മുതലെ തന്നെ ഇഷ്ടപ്പെടാത്തവരാണ് സജ്ന- ഫിറോസ് വിഷയത്തിൽ തന്റെ പേര് വലിച്ചിഴയ്ക്കുന്നതെന്നും ആ സ്ത്രീ താനല്ലെന്നും അത്രയും ലോക്കലല്ല താനെന്നും സൂര്യ പറഞ്ഞു. അവരുടെ കുടുംബ ജീവിതത്തിലേക്ക് ഒരു അതിഥിയായി പോലും പോകാത്ത ആളാണ് താനെന്ന് പറഞ്ഞ സൂര്യ, സജ്ന തന്റെ നല്ലൊരു സുഹൃത്ത് മാത്രമാണെന്നും വ്യക്തമാക്കി.

"സജ്നയുടേയും ഫിറോസിന്‍റേയും ഡിവോഴ്സ് സംബന്ധിച്ച വാര്‍ത്തകള്‍ പ്രചരിക്കുകയാണ്. അതില്‍ സജ്ന പറഞ്ഞൊരു സ്റ്റേറ്റ്മെന്‍റുണ്ട്. ബിഗ് ബോസിലെ ഒരു ലേഡി മത്സാരാര്‍ത്ഥി അവരുടെ ലൈഫില്‍ ഇന്‍വോള്‍വ് ആയെന്നൊരു കാര്യം. ആട്ടും തോലിട്ട ചില ചെന്നായ്ക്കള്, അതായത് ബിഗ് ബോസ് മുതലെ എന്നെ ഇഷ്ടപ്പെടാത്ത കുറച്ചു പേര് എന്‍റെ പേര് നശിപ്പിക്കാനായി കമന്‍സ് ഇടുന്നതായി ഞാന്‍ അറിഞ്ഞു. ആ ആട്ടുംതോലിട്ട ചെന്നായ്ക്കളോടാണ് ഞാന്‍ പറയുന്നത്, ആ വ്യക്തി ഞാനല്ല കേട്ടോ. നിങ്ങളെ വിഷമിപ്പിക്കുന്നതില്‍ എനിക്ക് സങ്കടമുണ്ട്. പക്ഷേ ഞാന്‍ അല്ല ആ വ്യക്തി. അവരുടെ കുടുംബ ജീവിതത്തില്‍ ഒരു ഗസ്റ്റ് അപ്പിയറന്‍സ് പോലും ഞാന്‍ ചെയ്തിട്ടില്ല. സജ്ന ഇപ്പോഴും എന്‍റെ നല്ലൊരു സുഹൃത്ത് മാത്രമാണ്. അവരുടെ ജീവിതം നശിപ്പിക്കാനായിട്ട്, അത്രയും ലോക്കലല്ല ഞാന്‍. അങ്ങനെ കമന്‍സ് ഇട്ടവര്‍ അത് ആഗ്രഹിക്കുന്നുണ്ടാവും. പക്ഷേ നിങ്ങളുടെ ക്യാരക്ടറല്ല ഞാന്‍. അതാദ്യം മനസിലാക്കുക. അതുകൊണ്ട് ഇപ്പോഴേ പറയുകയാണ് ആ വ്യക്തി ഞാനല്ല", എന്നായിരുന്നു സൂര്യ മേനോന്റെ വാക്കുകൾ.

'ഞാനിതിന് അർഹനാണോ എന്നുപോലും അറിയില്ല, ഓർമയിൽ ആദ്യം..'; കുറിപ്പുമായി അനീഷ്

Web Desk — Thu, 28 May 2026 19:19:55 +0530

ബിഗ് ബോസ് മലയാളം സീസൺ 7 ലൂടെ ജനഹൃദയങ്ങൾ ഏറ്റെടുത്ത താരമാണ് കോമണർ ആയെത്തിയ അനീഷ്. ബിഗ് ബോസിനു ശേഷവും നിരവധി അവസരങ്ങളാണ് അനീഷിനെ തേടിയെത്തിയത്. ഇപ്പോൾ സമൂഹമാധ്യമങ്ങളിലും അനീഷ് സജീവമാണ്. ആദ്യമായി താൻ പിറന്നാൾ ആഘോഷിച്ചതിനെക്കുറിച്ചാണ് അനീഷിന്റെ പുതിയ ഇൻസ്റ്റഗ്രാം പോസ്റ്റ്. തന്റെ ഓർമയിൽ ആദ്യമായാണ് ഇത്തരമൊരു കാര്യം സംഭവിക്കുന്നതെന്ന് അനീഷ് പറയുന്നു.

"എന്റെ ഓർമയിലൊന്നും ജന്മദിനം ഇത്രമേൽ വിപുലമായി ആഘോഷിച്ചിട്ടില്ല. അതിനു കാരണങ്ങൾ പലതാണ്. പ്രധാനമായി എന്റെ പിറന്നാൾ മെയ്‌ 20 നാണ് എന്നുള്ളത് തന്നെ. ചെറുപ്പത്തിൽ ആ സമയത്ത് സ്കൂളും, കോളേജും അവധിയിലാകും. അപ്പോൾ പിന്നെ ആഘോഷിക്കാൻ അവസരമില്ല. മുതിർന്നപ്പോൾ എന്തുകൊണ്ടോ ഞാനത് ആഘോഷിക്കാറില്ല. ആ ദിവസം സാധാരണ ദിവസം പോലെ കടന്നുപോകും. ചിലപ്പോഴൊക്കെ തോന്നാറുണ്ട്, അങ്ങനെ പോരല്ലോ എന്നൊക്കെ. എങ്കിലും ഞാനത് കാര്യമായി എടുത്തില്ല.

എന്നാൽ ഈ വർഷം എന്റെ പ്രതീക്ഷകൾക്കും അപ്പുറത്ത് കാര്യങ്ങൾ സംഭവിച്ചു. മെയ്‌ 20 നാണ് എന്റെ പിറന്നാൾ എന്ന് ബിഗ്ബോസിൽ പറഞ്ഞിരുന്നെങ്കിലും പിന്നീട് സോഷ്യൽ മീഡിയയിൽ അതിന്റെ യാതൊരു സൂചനയും കൊടുത്തിരുന്നില്ല. എങ്കിലും ഒരുപാട് പേർ അതോർത്തുവെച്ച് എന്നെ വിഷ് ചെയ്തു. സർപ്രൈസ് ഗിഫ്റ്റുകളും, കേക്കുകളും അയച്ചുതന്നു. സർവോപരി നിങ്ങളുടെ സ്നേഹവും, പ്രാർത്ഥനയും തന്നു. എങ്ങനെയാണ് നന്ദി പറയേണ്ടത് എന്നറിയില്ല. ഞാനിതിന് അർഹനാണോ എന്നുപോലും അറിയില്ല. എങ്കിലും പറയുകയാണ്, ഹൃദയം കൊണ്ട് പറയുകയാണ്. നന്ദി.. ഒരുപാട് നന്ദി", അനീഷ് ഇൻസ്റ്റഗ്രാമിൽ കുറിച്ചു. ആർജെ ബിൻസി അടക്കമുള്ള ബിഗ്ബോസിലെ അനീഷിന്റെ സഹതാരങ്ങളും നിരവധി ആരാധകരും താരത്തിന് പിറന്നാൾ ആശംസകൾ നേർന്ന് കമന്റ് ചെയ്തിട്ടുണ്ട്.

തമിഴ് ബിഗ് ബോസില്‍ വന്‍ പ്രഖ്യാപനവുമായി വിജയ് സേതുപതി; ലേറ്റ് ആയാലും ലേറ്റസ്റ്റ് ആയി വരാന്‍ മോഹന്‍ലാല്‍

Web Desk — Tue, 02 Jun 2026 13:38:45 +0530

ഇന്ത്യന്‍ ടെലിവിഷനിലെ തന്നെ ഏറ്റവും ജനപ്രീതിയുള്ള റിയാലിറ്റി ഷോ ആണ് ബിഗ് ബോസ്. പല ഭാഷകളിലായി ഓരോ സീസണിലും കാണികളുടെ എണ്ണം വര്‍ധിപ്പിച്ചുകൊണ്ടിരിക്കുന്ന ഷോ. മലയാളത്തിലും തമിഴിലും പുതിയ സീസണുകളുടെ ആദ്യ അറിയിപ്പുകള്‍ എത്തിത്തുടങ്ങിയിട്ടുണ്ട്. മലയാളത്തില്‍ 11 ദിവസം മുന്‍പ് ഒരു പ്രധാന അറിയിപ്പ് എത്തിയിരുന്നെങ്കില്‍ തമിഴ് ബിഗ് ബോസിന്‍റെ അടുത്ത സീസണ്‍ സംബന്ധിച്ചുള്ള അറിയിപ്പ് എത്തിയത് ഇന്നലെയാണ്. രണ്ട് പ്രഖ്യാപനങ്ങളും തമ്മില്‍ സമാനതയുണ്ട് എന്നതും ശ്രദ്ധേയമാണ്. സെലിബ്രിറ്റികള്‍ അല്ലാതെ ബിഗ് ബോസില്‍ സാധാരണക്കാര്‍ക്ക് പങ്കെടുക്കാനുള്ള കോമണര്‍ ക്വോട്ട സംബന്ധിച്ചുള്ള അറിയിപ്പാണ് രണ്ടും.

തമിഴ് ബിഗ് ബോസ് പ്രദര്‍ശിപ്പിക്കുന്ന സ്റ്റാര്‍ വിജയ് പുറത്തുവിട്ടിരിക്കുന്ന പ്രൊമോയില്‍ കോമണര്‍ ആയി ബിഗ് ബോസിന്‍റെ അടുത്ത സീസണില്‍ പങ്കെടുക്കാന്‍ സാധാരണക്കാരെ ക്ഷണിക്കുന്ന അവതാരകനായ വിജയ് സേതുപതിയെ കാണാം. ഇതിന് എങ്ങനെ അപേക്ഷിക്കണം എന്നും പ്രൊമോയില്‍ പറയുന്നുണ്ട്. തങ്ങളെ പരിചയപ്പെടുത്തുന്ന, എന്തുകൊണ്ട് ബിഗ് ബോസില്‍ പങ്കെടുക്കാന്‍ ആഗ്രഹിക്കുന്നുവെന്ന് പറയുന്ന രണ്ട് മിനിറ്റ് ദൈര്‍ഘ്യമുള്ള വീഡിയോ ആണ് മത്സരാര്‍ഥികള്‍ അയയ്ക്കേണ്ടത്. തമിഴ് ബിഗ് ബോസിന്‍റെ പത്താമത്തെ സീസണാണ് വരാനിരിക്കുന്നത്.

അതേസമയം മലയാളത്തില്‍ വരാനിരിക്കുന്ന സീസണ്‍ 8 ല്‍ വെറുതെ കോമണര്‍മാരെ ക്ഷണിക്കുക മാത്രമല്ല. അവര്‍ക്കു വേണ്ടി ഒരു പ്രത്യേക ഷോ തന്നെ സംഘടിപ്പിക്കാന്‍ ഒരുങ്ങുകയാണ് സംഘാടകര്‍. നേരത്തെ പുറത്തെത്തിയ പ്രൊമോയില്‍ അടുത്ത സീസണ്‍ മലയാളം ബിഗ് ബോസില്‍ കോമണര്‍മാരുടെ എണ്ണം കൂടുതല്‍ ആയിരിക്കുമെന്ന് മോഹന്‍ലാല്‍ പറയുന്നുണ്ട്. ഇവരെ തെരഞ്ഞെടുക്കാനായി ഒരു മത്സരവേദി തന്നെ ഒരുക്കുകയാണ് ഏഷ്യാനെറ്റ്. ബിഗ് ബോസ് അഗ്നിപരീക്ഷ എന്നാണ് ഷോയുടെ പേര്. അഗ്നിപരീക്ഷ വിജയിച്ചു വരുന്നവര്‍ക്ക്, ഷോയിലെ പ്രകടന മികവിലൂടെ തിരഞ്ഞെടുക്കപ്പെടുന്നവര്‍ക്ക് ബിഗ് ബോസ് മലയാളം സീസണ്‍ 8 ലേക്ക് നേരിട്ട് പ്രവേശനം ലഭിക്കും. ബിഗ് ബോസില്‍ പങ്കെടുക്കണമെന്ന ആഗ്രഹവുമായി നടക്കുന്നവര്‍ക്ക് പറ്റിയ പ്ലാറ്റ്ഫോം ആണ് ഒരുങ്ങുന്നത്. എന്നാല്‍ ഇതിനായി അപേക്ഷിക്കുന്നത് എങ്ങനെ എന്ന് തുടങ്ങിയ കാര്യങ്ങള്‍ സംഘാടകര്‍ ഇതുവരെ അറിയിച്ചിട്ടില്ല. ഇത് സംബന്ധിച്ച പ്രഖ്യാപനം ഉടന്‍ ഉണ്ടാവുമെന്നാണ് അറിയുന്നത്. സീസണ്‍ 8 നെ കൂടുതല്‍ കൗതുകകരമാക്കും ഇതെന്ന കാര്യത്തില്‍ തര്‍ക്കമില്ല.

'കസേര കളിയല്ല, മുഖ്യമന്ത്രിയെ കൊണ്ടുവാ', വിഡിയുടെ അല്ല ഞാൻ പിണറായീന്റെ ആളാ..: കടുപ്പിച്ച് നോറ

Nithya G Robinson — Sat, 09 May 2026 22:21:32 +0530

കേരളക്കരയിൽ മുഖ്യമന്ത്രി ആരാകും എന്ന ചർച്ച സജീവമായി നിൽക്കുകയാണ്. ഇന്ന് പ്രഖ്യാപമുണ്ടാകുമെന്ന് കരുതിയിരുന്നുവെങ്കിലും തീരുമാനം ആകാത്തതോടെ ആ കാത്തിരിപ്പും വിഫലമായി. വി.ഡി സതീശൻ, കെ.സി വേണുഗോപാൽ, രമേശ് ചെന്നിത്തല എന്നിവരുടെ പേരുകളാണ് മുഖ്യമന്ത്രി പദത്തിനായി ഉയർന്ന് കേൾക്കുന്നത്. വൈകാതെ തന്നെ ഇക്കാര്യത്തിൽ വ്യക്തതവരുമെന്നാണ് കരുതപ്പെടുന്നത്. തതവസരത്തിൽ പിണറായി വിജയൻ പ്രതിപക്ഷ നേതാവായി വരണമെന്നാണ് ആഗ്രഹമെന്ന് പറയുകയാണ് ബിഗ് ബോസ് താരം നോറ.

ആര് മുഖ്യമന്ത്രിയാകുമെന്ന് ഓൺലൈൻ മാധ്യമങ്ങളുടെ ചോദ്യത്തിന്, "വിഡി സതീശനല്ല. ഞാന്‍ പിണറായിന്‍റേ ആളാ..അദ്ദേഹം പ്രതിപക്ഷ നേതാവായാല്‍ കൊള്ളമെന്നുണ്ട്. ഇത്രയും വോട്ട് മാറ്റ് കുത്തിയത് എന്തിനാണെന്ന് എനിക്ക് ഇപ്പോഴും മനസിലാകുന്നില്ല. അത് അംഗീകരിക്കാന്‍ കൂടി പറ്റുന്നില്ല", എന്ന് നോറ പറയുന്നു. "പിണറായി സര്‍ക്കാരിന്‍റേത് എന്ത് മോശം ഭരണമായിരുന്നുവെന്നാണ് നിങ്ങള്‍ പറയുന്നത്. കൊവിഡിന് ശേഷം കേരളത്തില്‍ വേറെ പ്രശ്നങ്ങളൊന്നും വന്നില്ലേ. കേന്ദ്രം പോലും ഒഴിവാക്കി വിട്ട പല കാര്യങ്ങളും പിണറായി വിജയന്‍ മുന്നിട്ട് നിന്നത് കൊണ്ടാണ് പല കാര്യങ്ങളും കേരളത്തില്‍ നടന്നിട്ടുള്ളത്. പിണറായി ഭരണം തന്നെ വീണ്ടും കേരളത്തില്‍ വരണം. സ്വര്‍ണത്തിന്‍റെ കാര്യം പറയുന്നു. ഒരു പാട്ട് ഉണ്ടാക്കി വച്ചെന്ന് കരുതി അത് സത്യമാവില്ല. എനിക്ക് വേണമെങ്കിലും ഒരു പാട്ട് എഴുതി വച്ച് പാടിയിരിക്കാം. പിണറായി സര്‍ക്കാര്‍ എന്ത് മാറ്റമാണ് കൊണ്ടുവരാത്തത്. പത്ത് കൊല്ലം മുന്‍പ് ഒന്ന് ടൈം ട്രാവല്‍ ചെയ്ത് നോക്ക്. എന്തായിരുന്നു അവസ്ഥയെന്ന്", എന്നും നോറ കൂട്ടിച്ചേർത്തു.

കോൺഗ്രസിനെ അനുകൂലിച്ച് കൊണ്ടുള്ള അക്ബർ ഖാന്റെ പ്രതികരണത്തിന് നോറ നൽകിയ മറുപടിയും വൈറലാകുന്നുണ്ട്. "ജനങ്ങൾ എല്ലം കാണുന്നുണ്ട്. ആദ്യം ഒരു മുഖ്യമന്ത്രിയെ കൊണ്ടു വാ.. എന്നിട്ട് ഡയലോഗ് അടിക്ക്. അപ്പോള്‍ നിങ്ങള്‍ പറയുന്നത് കേള്‍ക്കാം. ജനവിധി എന്തായാലും പിണറായി അംഗീകരിച്ചിട്ടുണ്ട്. അദ്ദേഹത്തിന്‍റെ ലാസ്റ്റ് പോസ്റ്റ് ഒന്ന് പോയി നോക്കിയാല്‍ മനസിലാകും. ജനങ്ങള്‍ തീരുമാനിച്ചതിന്‍റെ ഫലമാണ് ഇപ്പോള്‍ കണ്ടുകൊണ്ടിരിക്കുന്നത്. യുഡിഎഫിലെ മുഖ്യമന്ത്രി എവിടെ എന്നിട്ട്. അവിടെ കസേര കളിയല്ലേ കളിക്കുന്നത്", എന്ന് നോറ ചോദിക്കുന്നു.

ഉസ്താദ് ആകാൻ ഞാനും ആഗ്രഹിച്ചു, ആ സ്വപ്നം സാധിച്ച് കൊടുക്കാനാകാത്ത മകൻ; തുറന്നുപറഞ്ഞ് നാദിറ

Nithya G Robinson — Mon, 01 Jun 2026 16:08:45 +0530

ബിഗ് ബോസ് മലയാളത്തിൽ മത്സരാർത്ഥിയായി എത്തിയതോടെ മലയാളികൾക്ക് ഏറെ സുപരിചിതയായി മാറിയ ആളാണ് നാദിറ മെഹ്റിൻ. ഷോയിൽ മികച്ചൊരു മത്സരാർത്ഥിയായിരുന്ന നാദിറ മണി ബോക്സുമായിട്ടായിരുന്നു പുറത്തേക്ക് പോയത്. ഇതിന് പിന്നാലെ വാർത്താ അവതാരികയായും നിറഞ്ഞു നിൽക്കുന്ന നാദിറ തന്റെ മാതാപിതാക്കളെ കുറിച്ച് പറഞ്ഞ കാര്യങ്ങൾ ശ്രദ്ധനേടുകയാണ്. വാപ്പയ്ക്കും ഉമ്മയ്ക്കും തന്നെ ഉസ്താദ് ആക്കണമെന്നായിരുന്നു ആഗ്രഹമെന്നും താനും അത് സ്വപ്നം കണ്ടിരുന്നതെന്നും പറയുകയാണ് നാദിറ

നാദിറ മെഹ്റിന്റെ വാക്കുകൾ ഇങ്ങനെ

ഞാന്‍ കറുത്തിരുന്നാലും വെളുത്തിരുന്നാലും എന്‍റെ വീട്ടുകാര്‍ക്ക് അവരുടെ മകന്‍ ആണ് ഞാന്‍. നാളെ ഞാന്‍ കിടപ്പിലായാല്‍ പോലും അവര്‍ക്ക് ഞാന്‍ മകനാണ്. കുട്ടിക്കാലത്ത് എനിക്ക് എന്തെങ്കിലും പ്രശ്നമുള്ളതായിട്ട് അവര്‍ക്ക് തോന്നിയിട്ടുമില്ല. പക്ഷേ സമൂഹം അവരോട് നവാസേ.. നിന്‍റെ മകന്‍ എന്താ അങ്ങനെ നടക്കുന്നത് ? എന്ന് ചോദിക്കുമ്പോള്‍ വാപ്പയ്ക്ക് ബുദ്ധിമുട്ടാണ്. ഭാവിയില്‍ ഒരു പെണ്‍കുട്ടിയെ വിവാഹം കഴിക്കണം. കുടുംബം നോക്കണം. ജോലിക്ക് പോകണം. പ്രത്യേകിച്ച് എന്‍റെ ഫാമിലി ബാക്ഗ്രൗണ്ട് വച്ച് നോക്കുകയാണെങ്കില്‍ ദുബായില്‍ ജോലിക്ക് പോകുന്ന ആണുങ്ങളാണ് ഉള്ളത്. അങ്ങനത്തെ പ്രാരാബ്ദങ്ങള്‍ ഏറ്റെടുക്കുന്ന പുരുഷനായിട്ടാണ് ഞാന്‍ സ്വപ്നം കാണുന്നത്. പക്ഷേ ഞാന്‍ ഒരു പെണ്ണായി മാറുമെന്ന്, പ്രത്യേകിച്ച് ആ കാലഘട്ടത്തില്‍ തോന്നിയിട്ടേ ഇല്ല. പെണ്‍കുട്ടി ആണെന്ന് ചിന്തിക്കുന്നത് തന്നെ അതാകുന്നതിന് ഒന്നോ രണ്ടോ വര്‍ഷം മുന്‍പാണ്. അതായത് 16 വയസ് വരെ എനിക്ക് വലിയ സ്വപ്നം എന്നത് വിവാഹവും ജോലിയും സാമ്പത്തികവുമൊക്കെ ആയിരുന്നു. ഞാന്‍ ഒരു ഓര്‍ത്തഡോക്സ് ഫാമിലിയാണ്. അത് എനിക്ക് ഇഷ്ടവുമാണ്. ഇപ്പോഴും അത് ഫോളോ ചെയ്യുന്ന ആളാണ് ഞാന്‍.

എന്‍റെ വീട്ടുകാര് സ്വപ്നം കണ്ടത് ഒരിക്കലും സാധിച്ച് കൊടുക്കാന്‍ പറ്റാത്തൊരു മകനാണ് ഞാന്‍. അതില്‍ എനിക്ക് ഭയങ്കര സങ്കടവുമുണ്ട്. അവര്‍ക്കെന്നെ ഒരു ഉസ്താദ് ആക്കണമെന്നായിരുന്നു ആഗ്രഹം. എനിക്കും ആ ആഗ്രഹം ഉണ്ടായിരുന്നു കേട്ടോ. അതിന് വേണ്ടി പഠിക്കണമെന്നൊക്കെ സ്വപ്നം കണ്ടിരുന്നു. അവര്‍ ആഗ്രഹിച്ച ഒരുകാര്യം സാധിച്ച് കൊടുക്കാന്‍ ഭാഗ്യമില്ലാതായി പോയെന്ന വിഷമം ഇപ്പോഴുമുണ്ട്. മിനിമം ഒരു വീട്ടുകാര്‍ ചിന്തിക്കുന്നതൊക്കെ മക്കള്‍ക്ക് സാധിക്കാനായിട്ടുണ്ട്. പക്ഷേ എനിക്ക് അത് ഒട്ടും പറ്റിയിട്ടില്ല. അവരുടെ കാഴ്ചപ്പാടില്‍ എനിക്ക് ശേഷം വരുന്നൊരു തലമുറയില്ലേ. അതിന് എനിക്ക് സാധിച്ചില്ല. അവര്‍ക്ക് ഇഷ്ടപ്പെടുന്നൊരു ജോലി ചെയ്യുന്ന ആളാകാന്‍ സാധിച്ചില്ല. അവര്‍ക്ക് നല്ലൊരു മകനാകാന്‍ പറ്റിയില്ലെന്നതാണ്.

'സ്വന്തം പിറന്നാളിന് അച്ഛനും അമ്മയ്ക്കും സർപ്രൈസ്'; ഹണ്ടർ 350 സമ്മാനമായി നൽകി ബിൻസി

Web Desk — Tue, 26 May 2026 16:00:58 +0530

ബിഗ്ബോസ് മലയാളം സീസൺ 7 ലൂടെ പലർക്കും സുപരിചിതയായ വ്യക്തിയാണ് ആർജെ ബിൻസി. അവതാരകരെ കണ്ടെത്താനുള്ള സ്വകാര്യ ചാനൽ റിയാലിറ്റി ഷോയിലൂടെയാണ് ബിൻസി ആദ്യം ശ്രദ്ധിക്കപ്പെടുന്നത്. പിന്നീട് ബിഗ്ബോസിലൂടെ കൂടുതൽ പ്രശസ്തയാകുകയായിരുന്നു. സമൂഹമാധ്യമങ്ങളിലും സജീവമാണ് ബിൻസി. കുടുംബാംഗങ്ങൾക്കും ബിഗ്ബോസ് സുഹൃത്തുക്കൾക്കുമൊപ്പം പിറന്നാൾ ആഘോഷിക്കുന്ന ബിൻസിയുടെ വീഡിയോയും സമൂഹമാധ്യമങ്ങളിൽ വൈറലായിക്കഴിഞ്ഞു. ആദ്യമായാണ് ഇത്തരത്തിൽ താൻ പിറന്നാൾ ആഘോഷിക്കുന്നതെന്ന് ബിൻസി പറയുന്നു. ബിൻസിയുടെ പിറന്നാളിന് പാട്ടു പാടി, ബിൻസിയെക്കുറിച്ച് വികാരാധീനയായി സംസാരിക്കുന്ന ഉറ്റസുഹൃത്തും ബിഗ്ബോസ് താരവുമായ ശൈത്യ സന്തോഷിന്റെ വീഡിയോയും സമൂഹമാധ്യമങ്ങളിൽ വൈറലായിരുന്നു.

പിറന്നാൾ ദിനത്തിൽ തന്റെ അച്ഛനും അമ്മക്കും റോയൽ എൻഫീൽഡിന്റെ 'ഹണ്ടർ 350' ബൈക്ക് ആണ് ബിൻസി സർപ്രൈസ് സമ്മാനമായി കൊടുത്തിരിക്കുന്നത്. സാധാരണയായി പിറന്നാൾ ആഘോഷിക്കുന്നയാൾ‌ക്കാണ് സമ്മാനം ലഭിക്കാറുള്ളതെന്നും എന്നാൽ മകൾ തങ്ങളെ ഞെട്ടിച്ചെന്നുമായിരുന്നു ബിൻസിയുടെ അച്ഛന്റെ പ്രതികരണം. ''ഈ മോഡൽ കേരളത്തിൽ 20 എണ്ണം മാത്രമേ ഇറങ്ങിയിട്ടുള്ളൂ എന്നാണ് റോയൽ എൻഫീൽഡിൽ അന്വേഷിച്ചപ്പോൾ പറഞ്ഞത്. പുതിയ മോഡലാണ്. ഹണ്ടർ മൂൺഷോട്ട് വൈറ്റ് എന്നു പറയും. വൈറ്റ് കളറിൽ ഗ്രാഫിക്സ് ഒക്കെ വന്നിട്ടുള്ള ഒരടിപൊളി വണ്ടിയാണ്. കേരളത്തിൽ ഇപ്പോൾ 10 പേരേ ഈ വണ്ടി എടുത്തിട്ടുള്ളൂ. അതിലൊരാളായി ഞങ്ങളും'', എന്നാണ് ബിൻസി സ്റ്റേജിൽ വെച്ച് പറഞ്ഞത്.

പിറന്നാളിന് എനിക്ക് ഒരുപാട് ഗിഫ്റ്റുകൾ കിട്ടി. അതൊന്നും ഞാൻ അൺബോക്സ് ചെയ്തിട്ടില്ല. പക്ഷേ ഞാൻ എന്റെ ചാച്ചനും അമ്മക്കും ഒരു ഗിഫ്റ്റ് കൊടുത്തു, ഹണ്ടർ 350. കഴിഞ്ഞ മാസം ഇറങ്ങിയ വണ്ടിയാണ്. പിന്നെ ഞങ്ങളെല്ലാവരും ചേർന്നാണ് എന്റെ യൂട്യൂബ് പ്ലേ ബട്ടൺ അൺബോക്സ് ചെയ്തത്. അതിലും ഒരുപാട് സന്തോഷമുണ്ട്'', എന്നായിരുന്നു പുറത്തിറങ്ങിയ ശേഷം ഓൺലൈൻ മാധ്യമങ്ങളുടെ ചോദ്യത്തിന് മറുപടിയായി ബിൻസി പ്രതികരിച്ചത്.

ബിഗ് ബോസ് സീസൺ 8 വരുന്നു ! ക്ഷണം ലഭിച്ചാൽ പോകുമോ ? മറുപടിയുമായി അമ്പിളി ദേവി

Nithya G Robinson — Sat, 16 May 2026 18:57:16 +0530

സിനിമയിലും ടെലിവിഷനിലും ഒരുപോലെ നിറഞ്ഞുനിന്നിരുന്ന താരമായിരുന്നു അമ്പിളി ദേവി. ഇപ്പോള്‍ നൃത്തവേദികളിലും സമൂഹമാധ്യമങ്ങളിലുമാണ് താരത്തെ പ്രധാനമായും കാണാറുള്ളത്. അമ്പിളി ദേവിയുടെ ദാമ്പത്യ ജീവിതത്തിലെ ചില പ്രശ്‌നങ്ങളും ഇടയ്ക്ക് വലിയ വാർത്തയായിരുന്നു. ഇപ്പോൾ രണ്ടു മക്കളുമൊത്ത് സിംഗിൾ മദറായി മുൻപോട്ടു പോകുകയാണ് അമ്പിളി. അപ്പു, അർജുൻ എന്നിങ്ങനെ രണ്ടു മക്കളാണ് അമ്പിളി ദേവിക്കുള്ളത്. ഇപ്പോഴിതാ ബിഗ്ബോസിലേക്ക് മൽസരിക്കാൻ ക്ഷണം ലഭിച്ചാൽ പോകുമോ എന്ന ചോദ്യത്തിന് ഉത്തരവുമായി എത്തിയിരിക്കുകയാണ് അമ്പിളി.

''ബിഗ്ബോസിലേക്ക് വിളിച്ചാൽ ഞാൻ പോകില്ല. എന്നെക്കൊണ്ട് അതിനകത്ത് സർവൈവ് ചെയ്യാൻ പറ്റില്ല. ഞാൻ ഫാമിലിയുമായി ഭയങ്കര അറ്റാച്ച്ഡ് ആണ്. രണ്ടു ദിവസത്തിൽ കൂടുതൽ എനിക്ക് മക്കളെ കാണാതിരിക്കാൻ പറ്റില്ല. എന്റെ കൂടെ ജോലി ചെയ്യുന്നവർക്ക് അറിയാം, അയ്യോ എനിക്ക് പെട്ടെന്ന് വീട്ടിൽ പോകണമെന്നു പറയുന്ന ആളാണ് ഞാൻ. ബിഗ്ബോസിൽ പോകാൻ കുറേക്കൂടി ധൈര്യം വേണം'', എന്നാണ് ഓൺലൈൻ മാധ്യമങ്ങളുടെ ചോദ്യത്തിന് മറുപടിയായി അമ്പിളി ദേവി പറഞ്ഞു.

ഇന്ത്യൻ ടെലിവിഷൻ ചരിത്രത്തിലെ ഏറ്റവും വലിയ റിയാലിറ്റി ഷോയാണ് ബിഗ് ബോസ്. തെലുങ്ക്, കന്നഡ, ബംഗാളി, ഹിന്ദി, മലയാളം, തമിഴ് തുടങ്ങി വിവിധ ഭാഷകളിൽ സംപ്രേക്ഷണം ചെയ്യുന്ന ഷോയിൽ അതാത് ഇന്റസ്ട്രിയിലെ സൂപ്പർ താരങ്ങളാണ് അവതാരകരായി എത്തുന്നത്. മോഹൻലാൽ അവതാരകനായി എത്തുന്ന മലയാളം ബിഗ് ബോസിന്റെ സീസൺ 7 നവംബറിൽ കഴിഞ്ഞിരുന്നു. പിന്നാലെ സീസൺ 8 നായുള്ള കാത്തിരിപ്പിലാണ് ആരാധകർ. ഷോയുടെ എട്ടാം സീസണിലേക്കുള്ള മുന്നൊരുക്കങ്ങൾ ആരംഭിച്ചതായായുള്ള റിപ്പോർട്ടുകളും അടുത്തിടെ പുറത്തു വന്നിരുന്നു. സീസൺ 8-ലേക്ക് ആവശ്യമായ സാങ്കേതിക പ്രവർത്തകരെ തേടിക്കൊണ്ടുള്ള അണിയറ പ്രവർത്തകരുടെ സോഷ്യൽ മീഡിയ പോസ്റ്റുകൾ പുറത്തുവന്നതോടെ ആവേശത്തിലാണ് ആരാധകർ.

Asianet News Malayalam

'നിനക്കെന്നോട് സ്നേഹമുണ്ടോന്നറിയില്ല, പക്ഷേ എന്റെ അവസാന 7 മിനിറ്റിൽ നീ ഉണ്ടാകും'; മനമുലഞ്ഞ് റോബിൻ രാധാകൃഷ്ണൻ

'സ്റ്റേജ് 4 കാൻസറിനെ തോൽപ്പിച്ച ആളാണ്, ബി​ഗ് ബോസ് ഷോ എന്റെ സ്വപ്നം, പക്ഷേ..'; ശ്രദ്ധനേടി കുറിപ്പ്

'ലാലേട്ടൻ' പറഞ്ഞ അ​ഗ്നിപരീക്ഷ ചില്ലറക്കളിയല്ല ! കോമണേഴ്സ് ഒന്ന് വിയർക്കും; ഇത്തവണ ബി​ഗ് ബോസ് ഒന്നല്ല, രണ്ട് !

ബി​ഗ് ബോസ് മലയാളത്തിന്‍റെ ചരിത്രത്തില്‍ ആദ്യം! പിറന്നാള്‍ ദിനത്തില്‍ വന്‍ പ്രഖ്യാപനവുമായി മോഹന്‍ലാല്‍

'കെഎസ്ആര്‍ടിസിയില്‍ ഓള്‍ കേരള ഫ്രീ ട്രിപ്പ്, നിരാശരാക്കരുത്'; കോൺ​ഗ്രസിനോട് മസ്താനിയുടെ അപേക്ഷ

'ചിലർ ചെയ്യുന്നത് പ്രശസ്തിക്കുവേണ്ടി, ഞാൻ എന്നോട് സത്യസന്ധൻ'; ബി​ഗ് ബോസിനെ കുറിച്ച് കൊറിയൻ മല്ലു