Asianet News Malayalam

'ലോകകപ്പിന്റെ ഫൈനലിലെത്തിയത് കഠിനാധ്വാനത്തിലൂടെ'; ഗൂഢാലോചനാ സിദ്ധാന്തങ്ങള്‍ക്ക് മറുപടിയുമായി മെസി

Web Desk — Wed, 07 Oct 2026 10:21:02 +0530

ബ്യൂണസ് ഐറിസ്: അന്താരാഷ്ട്ര ഫുട്‌ബോളില്‍ നിന്ന് ഇതിഹാതാരം ലയണല്‍ മെസി വിരമിച്ചു. അര്‍ജന്റീനയിലെ മൊനുമെന്റല്‍ സ്റ്റേഡിയത്തില്‍ ബെനിനെതിരെ നടന്ന മത്സരത്തിന് ശേഷമായിരുന്നു മെസിയുടെ വിടവാങ്ങല്‍ പ്രഖ്യാപനം. ഒന്നിനെതിരെ മൂന്ന് ഗോളുകള്‍ക്ക് അര്‍ജന്റീന വിജയിച്ച മത്സരത്തില്‍ രണ്ട് അസിസ്റ്റുകളും ഒരു പെനാല്‍റ്റി ഗോളും സ്വന്തമാക്കിയാണ് മെസി കളം വിട്ടത്. ഡ്രോണ്‍ ഷോയ്ക്കും സംഗീത പരിപാടികള്‍ക്കും ശേഷം കാണികളെയും സഹതാരങ്ങളെയും അഭിസംബോധന ചെയ്തുകൊണ്ട് മെസി തന്റെ വിടവാങ്ങല്‍ പ്രസംഗം നടത്തി.

കഴിഞ്ഞ ഓഗസ്റ്റില്‍ അന്തരിച്ച തന്റെ പിതാവ് ജോര്‍ജിയെ അനുസ്മരിച്ചുകൊണ്ടാണ് മെസി സംസാരിച്ചുതുടങ്ങിയത്. അന്താരാഷ്ട്ര ഫുട്‌ബോളില്‍ നിന്ന് വിരമിക്കുന്നതില്‍ വിഷമമുണ്ടെന്നും, കഴിഞ്ഞ ലോകകപ്പും അതിനുശേഷമുള്ള കാര്യങ്ങളും തങ്ങളെ മാനസികമായും ശാരീരികമായും തളര്‍ത്തിയിരുന്നുവെന്നും അദ്ദേഹം തുറന്നുപറഞ്ഞു. ഫൈനലില്‍ സ്‌പെയിനുമായി ഏറ്റുമുട്ടിയ ലോകകപ്പ് ക്യാമ്പെയ്‌നെക്കുറിച്ച് ഉയര്‍ന്ന വിവാദങ്ങള്‍ക്കും ഗൂഢാലോചനാ സിദ്ധാന്തങ്ങള്‍ക്കും മെസി മറുപടി നല്‍കി. തങ്ങളുടെ വിജയങ്ങള്‍ക്ക് പിന്നില്‍ യാതൊരുവിധ പ്രത്യേക അനുകൂല്യങ്ങളും ഉണ്ടായിരുന്നില്ലെന്നും, എല്ലാം കഠിനാധ്വാനത്തിലൂടെ നേടിയതാണെന്നും അദ്ദേഹം വ്യക്തമാക്കി.

മെസ്സിയുടെ വിടവാങ്ങല്‍ പ്രസംഗത്തില്‍ നിന്ന്... ''ഞാന്‍ എന്റെ ജീവിതകാലം മുഴുവന്‍ ഇവിടെ തുടരാന്‍ ആഗ്രഹിക്കുന്നു. അര്‍ജന്റീനയുടെ ജേഴ്‌സി അണിയുക എന്നത് ഒരാള്‍ക്ക് ലഭിക്കാവുന്നതില്‍വെച്ച് ഏറ്റവും മനോഹരമായ കാര്യമാണ്. കഴിഞ്ഞ ലോകകപ്പ് എനിക്ക് വലിയ രീതിയില്‍ മാനസിക സമ്മര്‍ദ്ദമുണ്ടാക്കി. ശാരീരികമായും മാനസികമായും ഞങ്ങള്‍ ഞങ്ങളുടെ പരമാവധി പരിധിയിലെത്തിയിരുന്നു. ലോകകപ്പിന് ശേഷം പലതരം വ്യാജ കഥകളും തിയറികളും പ്രചരിച്ചു. എന്നാല്‍ വിചിത്രമായതൊന്നും അവിടെ സംഭവിച്ചിട്ടില്ല. ഞങ്ങള്‍ ജീവനുവേണ്ടി പൊരുതിയാണ് ഇവിടെയെത്തിയത്.'' മെസി പറഞ്ഞു.

അദ്ദേഹം തുടര്‍ന്നു... ''എന്റെ സ്വപ്നം സാക്ഷാത്കരിക്കാന്‍ സഹായിച്ചതിന് എല്ലാ സഹതാരങ്ങള്‍ക്കും നന്ദി. ഇത് എനിക്കുവേണ്ടി മാത്രം സംഭവിച്ചതല്ല, നിങ്ങളെന്നെ അതിന് സഹായിച്ചു. അര്‍ജന്റീനയുടെ കുപ്പായം ഞാന്‍ വല്ലാതെ മിസ്സ് ചെയ്യും. എന്നാല്‍ ഇനി ഞാന്‍ പുറത്തിരുന്ന് ഈ യുവതാരങ്ങളെ പിന്തുണയ്ക്കും. നമ്മള്‍ എപ്പോഴും ഐക്യത്തോടെ നിലകൊള്ളണം. നമ്മള്‍ ഒന്നിച്ചുനില്‍ക്കുമ്പോള്‍ മറ്റാരേക്കാളും ശക്തരാണ്.'' മെസി പറഞ്ഞുനിര്‍ത്തി.

തന്റെ കരിയറിലുടനീളം പിന്തുണച്ച സഹതാരങ്ങള്‍ക്കും ആരാധകര്‍ക്കും മെസി ഹൃദയപൂര്‍വ്വം നന്ദി പറഞ്ഞു. ടീമിനെതിരെയുള്ള വ്യാജ പ്രചാരണങ്ങളെ ചെറുത്തു തോല്‍പ്പിക്കാന്‍ ആരാധകര്‍ എന്നും ഒന്നിച്ചു നില്‍ക്കണമെന്നും അദ്ദേഹം പറഞ്ഞു.

'ബാലണ്‍ ഡി ഓര്‍ മെസി മാത്രമേ അര്‍ഹിക്കുന്നുള്ളൂ, അവകാശവാദം ഉന്നയിക്കുന്നവര്‍ ലോകകപ്പിലെ മെസിയുടെ മാന്ത്രിക പ്രകടനം കണ്ടില്ലെന്ന്‌ നടിക്കുന്നു'

Web Desk — Wed, 07 Oct 2026 13:26:18 +0530

2026 ബാലണ്‍ ഡി ഓറിന്‌ ലയണല്‍ മെസിയല്ലാതെ മറ്റൊരു അവകാശിയില്ലെന്ന്‌ ആഴ്‌സണലിന്റെ മുന്‍ സൂപ്പര്‍ താരം ആന്ദ്രെ അര്‍ഷാവിന്‍. ലോകകപ്പില്‍ മെസിയുടെ ഫോം വളരെ മികച്ചതായിരുന്നു. അദ്ദേഹത്തിന്റെ പ്രകടനം അര്‍ജന്റീനയെ തുടരെ രണ്ടാം ലോകകപ്പ്‌ ഫൈനലില്‍ പ്രവേശിപ്പിച്ചു. ഓരോ മത്സരവും മെസി തന്റെ മാന്ത്രികതയാല്‍ അര്‍ജന്റീനക്ക്‌ അനുകൂലമാക്കിയതാണ്‌ തന്നെ ഏറെ ആകര്‍ഷിച്ചതെന്ന്‌ അര്‍ഷാവിന്‍ പറയുന്നു. ഇന്റര്‍മിയാമിയെ ആദ്യമായി എംഎല്‍എസ്‌ കിരീട വിജയത്തിലേക്ക്‌ നയിച്ചതും മെസിയെ ബാലണ്‍ ഡി ഓറിന്‌ അര്‍ഹനാക്കുന്നുവെന്ന്‌ റഷ്യന്‍ താരം പറയുന്നു.

ബാലണ്‍ ഡി ഓറിന്‌ അവകാശവാദം ഉന്നയിച്ച ഫ്രഞ്ച്‌ താരം കിലിയന്‍ എംബാപെക്കും സ്‌പെയ്‌നിന്റെ ലാമിന്‍ യമാലിനുമുള്ള മറുപടി കൂടിയാണ്‌ അര്‍ഷാവിന്റേത്‌. ലോകകപ്പ്‌ ഫുട്‌ബോള്‍ ചരിത്രത്തിലെ എക്കാലത്തേയും ടോപ്‌ സ്‌കോറര്‍ ആയി മാറിയ കിലിയന്‍ എംബാപെ അതൊരു ക്യാമ്പയിനാക്കി മാറ്റിയിട്ടുണ്ട്‌. കിരീട വിജയങ്ങള്‍ ഇല്ലെന്ന്‌ കരുതി തന്റെ മൂല്യം കുറയുന്നില്ലെന്നാണ്‌ എംബാപെ പരസ്യമായി പ്രഖ്യാപിച്ചത്‌. ലാമിയന്‍ യമാലും പുരസ്‌കാരത്തിനായി ശക്തമായി രംഗത്തുണ്ട്‌. ഗോളുകളുടെ എണ്ണമല്ല, ടീം ഏതെല്ലാം കിരീടവിജയങ്ങള്‍ നേടിയെന്നതാണ്‌ പരിഗണിക്കപ്പെടേണ്ടതെന്ന്‌ യമാല്‍ വാദമുന്നയിച്ചു. ഈ ഘട്ടത്തിലാണ്‌ ലയണല്‍ മെസിക്ക്‌ വേണ്ടി ഫുട്‌ബോള്‍ താരങ്ങള്‍ രംഗത്ത്‌ വരുന്നത്‌. ഇന്റര്‍മിയാമി ക്ലബ്ബ്‌ ഉടമ ഡേവിഡ്‌ ബെക്കാം ഉറച്ചുവിശ്വസിക്കുന്നത്‌ 2026 ബാലണ്‍ ഡി ഓര്‍ മെസിക്കുള്ളതാണ്‌ എന്നാണ്‌.മുന്‍ ഇംഗ്ലണ്ട്‌ താരമായ ബെക്കാം മെസിയെ ശക്തമായി പിന്തുണയ്‌ക്കുന്നുണ്ട്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഇന്ത്യ നാളെ സൗഹൃദ മത്സരത്തില്‍ ഉറുഗ്വെയ്‌ക്കെതിരെ; ടിക്കറ്റ് നിരക്കില്‍ വന്‍ വിലക്കുറവ്

Web Desk — Mon, 05 Oct 2026 10:51:57 +0530

കൊല്‍ക്കത്ത: ഇന്ത്യ - ഉറൂഗ്വേ സൗഹൃദ മത്സരത്തിന് നാളെ കൊല്‍ക്കത്ത സാള്‍ട്ട് ലേക്ക് സ്‌റ്റേഡിയം വേദിയാകും. വൈകിട്ട് ഏഴരയ്ക്കാണ് കളിതുടങ്ങുക. കഴിഞ്ഞ ദിവസം കരുത്തരായ ബ്രസീലിനോട് നാല് ഗോളിന് തോറ്റെങ്കിലും ആത്മവിശ്വാസത്തോടെ കളിക്കാനായത് ഇന്ത്യക്ക് കരുത്താവും. ബ്രസീലിനെതിരായ മത്സരം കാണാന്‍ കാണികള്‍ കുറഞ്ഞതോടെ ഉറുഗ്വേയ്‌ക്കെതിരായ മത്സരത്തിന്റെ ടിക്കറ്റ് വില കുത്തനെ കുറച്ചു. 1999 രൂപയുടെ ടിക്കറ്റ് 199 രൂപ ആയാണ് കുറച്ചത്.

എണ്‍പത്തയ്യായിരം പേര്‍ക്കിരിക്കാവുന്ന സ്റ്റേഡിയത്തില്‍ അന്‍പതിനായിരത്തോളം ആളുകളാണ് ബ്രസീലുമായുള്ള മത്സരം കാണാന്‍ എത്തിയത്. ഡീഗോ ഫോര്‍ലാന്‍ പരിശീലിപ്പിക്കുന്ന ഉറുഗ്വേ ടീമില്‍ ഫെഡറിക്കോ വെല്‍വെര്‍ദേ, റൊണാള്‍ഡ് അറൗഹോ, ഡാര്‍വിന്‍ നൂനസ് തുടങ്ങിയ സൂപ്പര്‍ താരങ്ങളുണ്ട്. ബ്രസീലിനെതിരായ മത്സരത്തില്‍ മൂന്ന് മലയാളി താരങ്ങള്‍ പ്ലേയിംഗ് ഇലവനിലുണ്ടായിരുന്നു. ആഷിഖ് കുരുണിയന്‍, സഹല്‍ അബ്ദുള്‍ സമദ്, ബിജോയ് വര്‍ഗീസ് എന്നിവരാണ് ഇലവനില്‍ കളിച്ചത്. മറ്റൊരു മലയാലി താരം മുഹമ്മദ് സനാന്‍ പകരക്കാരനായും കളിച്ചിരുന്നു.

കൂടുതല്‍ താരങ്ങളെ സ്വന്തമാക്കി കേരള ബ്ലാസ്‌റ്റേഴ്‌സ്

ഐ എസ് എല്‍ സീസണ് മുന്നോടിയായി കൂടുതല്‍ താരങ്ങളെ ടീമിലെത്തിച്ച് കേരള ബ്ലാസ്റ്റേഴ്സ്. ഇന്ത്യന്‍ ഗോള്‍കീപ്പര്‍ അമരീന്ദര്‍ സിംഗ്, മിഡ്ഫീല്‍ഡര്‍ മുഹമ്മദ് യാസിര്‍, സ്‌ട്രൈക്കര്‍ റാംലുന്‍ ചുംങ എന്നിവരെയാണ് ബ്ലാസ്റ്റേഴ്‌സ് സ്വന്തമാക്കിയത്. ഒരു വര്‍ഷത്തേക്കാണ് കരാര്‍. ഇരുവരും ചെന്നൈയില്‍ നടക്കുന്ന പ്രീ സീസണ്‍ ക്യാമ്പില്‍ ചേര്‍ന്നു. ഒഡീഷ എഫ്‌സിയില്‍ നിന്നാണ് 33 കാരനായ അമരീന്ദര്‍, ബ്ലാസ്റ്റേഴ്സില്‍ എത്തുന്നത്. മുഹമ്മദ് യാസിര്‍ എഫ്‌സി ഗോവയില്‍ നിന്നാണ് ബ്ലാസ്റ്റേഴ്സിന്റെ ഭാഗമാകുന്നത്. കഴിഞ്ഞ ദിവസം അഡ്രിയന്‍ ലൂണ തിരികെ എത്തിയതിനൊപ്പം, ആന്ദ്രേ ഗ്രീന്‍, മുഹമ്മദ് സനാന്‍ എന്നിവരേയും ബ്ലാസ്റ്റേഴ്‌സ് സ്വന്തമാക്കിയിരുന്നു.

ഇംഗ്ലീഷ് പ്രീമിയർ ലീഗിലെ പരിചയസമ്പത്തുമായി ആന്ദ്രെ ഗ്രീൻ; കേരള ബ്ലാസ്റ്റേഴ്‌സ് ആക്രമണനിരക്ക് പുതിയ ഊർജ്ജം

Gopalakrishnan C — Wed, 07 Oct 2026 06:00:17 +0530

കൊച്ചി: ഇന്ത്യൻ സൂപ്പർ ലീഗ് സീസണ് മുന്നോടിയായി ഇംഗ്ലീഷ് മുന്നേറ്റ താരം ആന്ദ്രെ ഗ്രീനെ ടീമിലെത്തിച്ച് കേരള ബ്ലാസ്റ്റേഴ്‌സ് എഫ്‌സി. 2026-27 സീസൺ അവസാനിക്കുന്നത് വരെയുള്ള കരാറിലാണ് 27-കാരനായ താരം ബ്ലാസ്റ്റേഴ്സുമായി ഒപ്പുവെച്ചത്. നിലവിൽ ചെന്നൈയിൽ നടക്കുന്ന ടീമിന്‍റെ പ്രീസീസൺ ക്യാമ്പിൽ ചേർന്ന ഗ്രീൻ, വരാനിരിക്കുന്ന സീസണായുള്ള പരിശീലനം ആരംഭിച്ചുകഴിഞ്ഞു.

പ്രീമിയര്‍ ലീഗ് ടീമായ ആസ്റ്റൺ വില്ലയുടെ അക്കാദമിയിലൂടെ വളർന്നുവന്ന ആന്ദ്രെ ഗ്രീൻ, 2015ലാണ് ക്ലബ്ബിന്‍റെ സീനിയർ ടീമിൽ അരങ്ങേറ്റം കുറിക്കുന്നത്. തുടർന്ന് വിവിധ ചാമ്പ്യൻഷിപ്പുകളിലായി ആസ്റ്റൺ വില്ലയ്ക്കായി അമ്പതിലധികം മത്സരങ്ങളിൽ കളത്തിലിറങ്ങി. ഇംഗ്ലീഷ് പ്രീമിയർ ലീഗ്, ഇഎഫ്എൽ ചാമ്പ്യൻഷിപ്പ് ഉൾപ്പെടെയുള്ള ടോപ് ടയർ ലീഗുകളിൽ പോർട്സ്മൗത്ത്, പ്രെസ്റ്റൺ നോർത്ത് എൻഡ്, ഷെഫീൽഡ് യുണൈറ്റഡ്, റോഥർഹാം യുണൈറ്റഡ് തുടങ്ങിയ പ്രമുഖ ക്ലബ്ബുകൾക്കായും ഗ്രീൻ ബൂട്ടണിഞ്ഞിട്ടുണ്ട്. ഇംഗ്ലണ്ടിന്‍റെ അണ്ടര്‍ 18, 19, 20 ദേശീയ യൂത്ത് ടീമുകളെ പ്രതിനിധീകരിച്ചിട്ടുള്ള ഗ്രീന്‍ വിദേശ ലീഗുകളിലും കളിച്ച പരിചയസമ്പത്തുമായാണ് ഇന്ത്യയിലേക്ക് എത്തുന്നത്.

പ്രധാനമായും വിംഗുകളിൽ കളിക്കുന്ന താരമാണ് ഗ്രീൻ. ഇരു വിംഗുകളിലൂടെയും ഒരേ മികവോടെ മുന്നേറാൻ കഴിവുള്ള ഗ്രീനിന്‍റെ വേഗതയും മികച്ച പന്ത് നിയന്ത്രണവും വൺ ഓൺ വൺ സാഹചര്യങ്ങളിലെ ഡ്രിബ്ലിംഗ് മികവും കൊണ്ട് എതിർ പ്രതിരോധനിരയ്ക്ക് കനത്ത വെല്ലുവിളി ഉയർത്താൻ കെൽപ്പുള്ളയാളാണ്. പന്തില്ലാതെ താരം നടത്തുന്ന സമയോചിതമായ നീക്കങ്ങൾ എതിർ പ്രതിരോധത്തിന്‍റെ ഘടന തകർക്കാനും സഹതാരങ്ങൾക്ക് ഒഴിഞ്ഞ ഇടങ്ങൾ തുറന്നുനൽകാനും വഴിയൊരുക്കും. മുന്നേറ്റനിരയിൽ എവിടെയും കളിക്കാൻ സാധിക്കുമെന്നത് അറ്റാക്കിംഗ് തേർഡിൽ ബ്ലാസ്റ്റേഴ്സിന് കൂടുതൽ സാധ്യതകൾ നൽകും. ഉയർന്ന തലത്തിലുള്ള മത്സരങ്ങളിലെ വലിയ പരിചയസമ്പത്തുമായി എത്തുന്ന ആന്ദ്രെ ഗ്രീന്‍റെ വരവ് ബ്ലാസ്റ്റേഴ്സിന്‍റെ മുന്നേറ്റങ്ങൾക്ക് പുതിയ ഊർജ്ജം പകരും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'എന്നെന്നും ഓർമ്മിക്കപ്പെടുന്ന ചരിത്രം'; അർജന്റീന കുപ്പായമഴിച്ച മെസിക്ക് സ്നേഹാദരങ്ങളുമായി റൊണാൾഡോ

Gopalakrishnan C — Thu, 08 Oct 2026 11:04:58 +0530

ബ്യൂണസ് അയേഴ്സ്: അന്താരാഷ്ട്ര ഫുട്ബോളിൽ നിന്ന് വിടവാങ്ങിയ അർജന്‍റീനയുടെ ഇതിഹാസ താരം ലിയോണൽ മെസിയെക്കുറിച്ച് വൈകാരിക കുറിപ്പുമായി പോര്‍ച്ചുഗല്‍ താരം ക്രിസ്റ്റ്യാനോ റൊണാൾഡോ. ബ്യൂണസ് അയേഴ്സിലെ എസ്റ്റാഡിയോ മാസ് മോണുമെന്‍റലിൽ ബെനിനെതിരായ വിടവാങ്ങൽ മത്സരത്തിന് ശേഷമാണ് മെസി അർജന്‍റീന കുപ്പായമഴിച്ചുവെച്ചത്. അർജന്‍റീനയ്ക്കായുള്ള തന്‍റെ അവിസ്മരണീയമായ യാത്രയെക്കുറിച്ച് മെസി പങ്കുവെച്ച സോഷ്യൽ മീഡിയ പോസ്റ്റിന് താഴെയാണ് ക്രിസ്റ്റ്യാനോ റൊണാൾഡോയുടെ പ്രതികരിച്ചത്.

ലിയോ, ഇത്രയും വർഷങ്ങൾ സ്വന്തം രാജ്യത്തിന് വേണ്ടി പോരാടിയതിന് ബിഗ് സല്യൂട്ട്, എന്നും ഓർമ്മിക്കപ്പെടുന്ന ഒരു ചരിത്രമാണ് നീ കുറിച്ചിട്ടത്. അർജന്‍റീനയ്ക്കായി നീ കൈവരിച്ച എല്ലാ നേട്ടങ്ങളോടും എനിക്ക് വലിയ ബഹുമാനമുണ്ട്. സ്നേഹത്തോടെ ഒരു ആലിംഗനം, എന്നായിരുന്നു റൊണാള്‍ഡോയുടെ പ്രതികരണം.

അവസാന മത്സരത്തിന് ശേഷം ഏറെ വൈകാരികമായാണ് മെസി ആരാധകരോട് വിടപറഞ്ഞത്. അർജന്‍റീന കുപ്പായത്തിലെ തന്‍റെ അനുഭവങ്ങൾ താരം സോഷ്യൽ മീഡിയയിൽ കുറിച്ചു. ഇന്നലെ അർജന്‍റീനയ്ക്കായുള്ള എന്‍റെ അവസാന മത്സരമായിരുന്നു. ആ നീലയും വെള്ളയും കുപ്പായമണിയുന്നത് ഞാൻ ഇപ്പോൾ തന്നെ മിസ്സ് ചെയ്തു തുടങ്ങി. സന്തോഷവും സങ്കടവും നിറഞ്ഞതായിരുന്നു ഈ യാത്ര. എങ്കിലും എടുത്ത ഓരോ ചുവടും വിലപ്പെട്ടതായിരുന്നു എന്ന് എനിക്ക് ഉറപ്പുണ്ട്.

Cristiano Ronaldo REPLIES to Leo Messi. https://t.co/Vud1TRypc0

— Madrid Xtra (@MadridXtra) October 7, 2026

എന്‍റെ കുടുംബത്തിനും സഹതാരങ്ങൾക്കും ഒപ്പം നിന്ന എല്ലാവർക്കും നന്ദി. സ്വർഗത്തിൽ ഇരുന്ന് ഞങ്ങളെ വഴികാട്ടിയ ഡീഗോ മറഡോണയെയും ഞാൻ ഓർക്കുന്നു. ദൈവം തുണച്ചതുകൊണ്ടാണ് നമുക്ക് ഈ സ്വപ്നങ്ങളൊക്കെ സാക്ഷാത്കരിക്കാൻ സാധിച്ചത്-മെസി കുറിച്ചു. ബെനിനെതിരായ വിടവാങ്ങൽ മത്സരത്തിൽ 3-0ന്‍റെ ഉജ്ജ്വല ജയത്തോടെയാണ് അർജന്‍റീനയും മെസിയും പടിയിറങ്ങിയത്. മത്സരത്തിൽ ഒരു ഗോളും രണ്ട് അസിസ്റ്റുകളും നേടി മെസി വീണ്ടും കളിക്കളത്തിൽ വിസ്മയം തീർത്തു. അർജന്‍റീനയ്ക്കായി 208 മത്സരങ്ങളിൽ നിന്ന് 126 ഗോളുകൾ നേടിയിട്ടുള്ള താരം, ഒരു ലോകകപ്പും (2022) രണ്ട് കോപ്പ അമേരിക്ക കിരീടങ്ങളും (2021, 2024) രാജ്യത്തിന് സമ്മാനിച്ചാണ് അന്താരാഷ്ട്ര ഫുട്ബോളിൽ നിന്ന് വിടവാങ്ങുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ലിയോണല്‍ മെസ്സിക്ക് നാളെ വിടവാങ്ങല്‍ മത്സരം; അവസാന മത്സരത്തിലെ ജേഴ്‌സിക്കും പ്രത്യേകത

Web Desk — Mon, 05 Oct 2026 09:49:05 +0530

ബ്യൂണസ് ഐറിസ്: ലിയോണല്‍ മെസ്സിക്ക് നാളെ അന്താരാഷ്ട്ര ഫുട്‌ബോളിലെ വിടവാങ്ങല്‍ മത്സരം. ആഫ്രിക്കന്‍ ടീമായ ബെനിനാണ് എതിരാളികള്‍. ഇന്ത്യന്‍ സമയം ബുധാനാഴ്ച പുലര്‍ച്ചെ നാലരയ്ക്കാണ് കളി തുടങ്ങുക. ത്രസിപ്പിച്ച ഗോളുകള്‍, വിസ്മയിപ്പിച്ച അസിസ്റ്റുകള്‍, റെക്കോര്‍ഡുകള്‍, കിരീടങ്ങള്‍. ലിയോണല്‍ മെസ്സിയുടെ സമാനതകളില്ലാത്ത അന്താരാഷ്ട്ര ഫുട്‌ബോള്‍ കരിയറിന് നാളെ ബ്യൂണസ് യേഴ്‌സിലെ മോണ്യുമെന്റല്‍ സ്റ്റേഡിയത്തില്‍ അവസാനമാവുന്നു. ച്ഛന്റെ വിയോഗത്തിന് പിന്നാലെ ഓഗസ്റ്റ് മുപ്പത്തിയൊന്നിനായിരുന്നു മെസ്സിയുടെ വിരമിക്കല്‍ പ്രഖ്യാപനം.

ഇതിഹാസ താരത്തിന് അര്‍ഹമായ യാത്രയപ്പ് നല്‍കാനാണ് അര്‍ജന്റൈന്‍ ഫുട്‌ബോള്‍ അസോസിയേഷന്‍ ബെനിനെതിരായ മത്സരം സംഘടിപ്പിച്ചിരിക്കുന്നത്. 2022ല്‍ ലോകകപ്പ് നേടിയ ടീമിലെ മുഴുവന്‍ താരങ്ങളേയും മെസ്സിയുടെ വിടവാങ്ങല്‍ മത്സരത്തിന് ക്ഷണിച്ചിട്ടുണ്ട്. വിഖ്യാതമായ നീലയും വെള്ളയും ജഴ്‌സി മെസ്സി അവസാനമായി അണിയുമ്പോള്‍ ജഴ്‌സിക്കുമുണ്ട് പ്രത്യേകത. പത്താം നമ്പറും മെസ്സിയുടെ പേരും സ്വര്‍ണം നിറത്തിലാവും ജഴ്‌സിയില്‍ ആലേഖനം ചെയ്യുക. 2002ല്‍ ഹംഗറിക്കെതിരെ അരങ്ങേറ്റം കുറിച്ച മെസ്സിയുടെ 208-ാം മത്സരമായിരിക്കുമിത്.

125 അന്താരാഷ്ട്ര ഗോളുകളുടെ തിളക്കത്തോടെണ് 85000 പേര്‍ക്കിരിക്കാവുന്ന മോണുമെന്റല്‍ സ്റ്റേഡിയത്തിലേക്ക് കളിക്കാരനായി മെസ്സിയുടെ അവസാന വരവ്. അമേരിക്കന്‍ ക്ലബ് ഇന്റര്‍ മയാമി താരമായ മെസ്സി വിടവാങ്ങല്‍ മത്സരത്തിനായി കഴിഞ്ഞ ദിവസം ജന്‍മനാടായ റൊസാരിയോയില്‍ എത്തിയിരുന്നു.

അർജന്‍റീന ജേഴ്‌‌സിയിൽ ലിയോണൽ മെസിയുടെ അവസാന പോരാട്ടം, ഇന്ത്യയിൽ മത്സരം കാണാനുള്ള വഴികള്‍, സമയം

Gopalakrishnan C — Mon, 05 Oct 2026 20:14:41 +0530

ബ്യൂണസ് അയേഴ്സ്: രണ്ടു പതിറ്റാണ്ടിലേറെ നീണ്ട ഇതിഹാസ തുല്യമായ അന്താരാഷ്ട്ര ഫുട്ബോൾ കരിയറിന് ഫൈനല്‍ വിസിലൂതാന്‍ അർജന്‍റീനയുടെ ഇതിഹാസതാരം ലിയോണൽ മെസി നാളെ ഇറങ്ങുന്നു. അര്‍ജന്‍റീന സമയം നാളെ രാത്രി 8 മണിക്ക്( ഇന്ത്യ സമയം ബുധനാഴ്ച പുലർച്ചെ 4.30ന്) ആഫ്രിക്കൻ രാജ്യമായ ബെനിനെതിരെ നടക്കുന്ന സൗഹൃദ മത്സരത്തോടെ 39കാരനായ മെസി അർജന്‍റീനയുടെ വെള്ളയും നീലയും കലർന്ന ജേഴ്‌‌സി അഴിച്ചുവെക്കും.

ബ്യൂണസ് അയേഴ്സിലെ എസ്റ്റാഡിയോ മാസ മോണുമെന്‍റൽ സ്റ്റേഡിയത്തിൽ 85,000-ത്തോളം വരുന്ന കാണികളെ സാക്ഷി നിർത്തിയാകും മെസിയുടെ വിടവാങ്ങൽ മത്സരം അരങ്ങേറുക. 2022-ലെ ഖത്തർ ലോകകപ്പ് വിജയികളായ അര്‍ജന്‍റീന ടീമിലെ സഹതാരങ്ങളും അർജന്‍റീനയുടെ പുതിയ തലമുറയും ഈ ചരിത്ര നിമിഷത്തിൽ മെസിക്കൊപ്പം അണിനിരക്കും. അന്താരാഷ്ട്ര ഫുട്ബോളിലെ നിരവധി ചരിത്ര റെക്കോർഡുകൾ സ്വന്തമാക്കിയാണ് മെസി തന്‍റെ കരിയറിന് പൂർണ്ണവിരാമമിടുന്നത്. അർജന്‍റീനയ്ക്കായി ഏറ്റവും കൂടുതൽ ഗോളുകളും അസിസ്റ്റുകളും നേടിയ മെസി ബെനിനെതിരായ മത്സരത്തോടെ 208 അന്താരാഷ്ട്ര മത്സരങ്ങൾ തികയ്ക്കും.

തന്‍റെ അന്താരാഷ്ട്ര കരിയറിൽ 125 ഗോളുകളും 68 അസിസ്റ്റുകളുമാണ് മെസി അര്‍ജന്‍റീന കുപ്പായത്തില്‍ നേടിയിട്ടുള്ളത്. 2022-ലെ ഫിഫ ലോകകപ്പ് കിരീടത്തിന് പുറമെ രണ്ട് കോപ്പ അമേരിക്ക ട്രോഫികളും ഒരു ഫൈനലിസിമ കിരീടവും അർജന്‍റീനയ്ക്ക് സമ്മാനിച്ച ശേഷമാണ് താരം പടിയിറങ്ങുന്നത്. രണ്ട് തവണ അര്‍ജന്‍റീനയ ലോകകപ്പ് ഫൈനലിലേക്ക് നയിക്കാനും മെസിക്കായി. അർജന്‍റീനയുടെ വൈസ് ക്യാപ്റ്റനും ഡിഫൻഡറുമായ 38കാരൻ നിക്കോളാസ് ഒട്ടമെൻഡിയും ഈ മത്സരത്തോടെ അന്താരാഷ്ട്ര ഫുട്ബോളിൽ നിന്ന് മെസിക്കൊപ്പം വിടവാങ്ങും.

ഇന്ത്യയിൽ മത്സരം കാണാനുള്ള വഴികള്‍

അര്‍ജന്‍റീന സമയം നാളെ രാത്രി 8 മണിക്കാണ് (ഇന്ത്യൻ സമയം ബുധനാഴ്ച പുലർച്ചെ 04:30) മത്സരത്തിന് കിക്കോഫ് ആകുക. സൗഹൃദ മത്സരമായതിനാൽ ഇന്ത്യയിലെ ടെലിവിഷൻ ചാനലുകളിൽ തത്സമയ സംപ്രേക്ഷണം ഉണ്ടായിരിക്കില്ലെങ്കിലും, ആരാധകർക്ക് സീ5(ZEE5) ആപ്പിലൂടെയും വെബ്‌സൈറ്റിലൂടെയും മത്സരത്തിന്‍റെ ലൈവ് സ്ട്രീം കാണാവുന്നതാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

പണം കൊടുക്കേണ്ട, സബ്‌സ്‌ക്രിപ്‌ഷൻ വേണ്ട, ഫുട്ബോള്‍ ആരാധകർക്ക് സർപ്രൈസ്, ഐഎസ്എൽ മത്സരങ്ങൾ യൂട്യൂബിൽ തത്സമയം കാണാം

Gopalakrishnan C — Wed, 07 Oct 2026 18:10:11 +0530

ദില്ലി: ഇന്ത്യൻ ഫുട്ബോൾ ആരാധകർക്ക് വൻ സർപ്രൈസുമായി ഇന്ത്യൻ സൂപ്പർ ലീഗ് (ഐഎസ്എൽ) സംഘാടകർ. ഒക്ടോബർ 10 മുതൽ ആരംഭിക്കുന്ന ഐഎസ്എല്ലിന്‍റെ 2026-27 സീസണിലെ മുഴുവൻ മത്സരങ്ങളും യൂട്യൂബിലൂടെ സൗജന്യമായി തത്സമയം സംപ്രേഷണം ചെയ്യും. ഡിജിറ്റൽ സ്ട്രീമിംഗ് പങ്കാളിയായി യൂട്യൂബിനെ ഉൾപ്പെടുത്തിയതോടെ ആരാധകർക്ക് പ്രത്യേക വരിസംഖ്യയോ സബ്‌സ്‌ക്രിപ്‌ഷൻ ചാർജുകളോ ഇല്ലാതെ തന്നെ മത്സരങ്ങൾ കാണാൻ സാധിക്കും. രാജ്യത്തുടനീളം അന്താരാഷ്ട്ര തലത്തിലും ഫുട്ബോളിന്‍റെ ജനപ്രീതി വർദ്ധിപ്പിക്കുക എന്ന ലക്ഷ്യത്തോടെയാണ് ഈ തീരുമാനം. യൂട്യൂബിന് പുറമേ സോണിലിവ് ഒടിടി പ്ലാറ്റ്‌ഫോമിലും ഡിജിറ്റൽ സംപ്രേഷണം ലഭ്യമായിരിക്കും.

കുറഞ്ഞ ദൈർഘ്യമുള്ള സീസണിൽ നിന്ന് മാറി, പഴയപടിയുള്ള 'ഹോം ആൻഡ് എവേ' ഫോർമാറ്റിലേക്ക് ലീഗ് തിരിച്ചെത്തുന്നു എന്ന പ്രത്യേകതയും ഇത്തവണയുണ്ട്. ഒക്ടോബർ 10 മുതൽ 2027 മേയ് വരെ നീണ്ടുനിൽക്കുന്ന എട്ട് മാസത്തെ ദൈർഘ്യമേറിയ സീസണിൽ ആകെ 163 മത്സരങ്ങളാണ് ക്രമീകരിച്ചിരിക്കുന്നത്. ഇതിൽ ജനുവരി 17 വരെയുള്ള ആദ്യ ഘട്ടത്തിൽ 78 മത്സരങ്ങൾ നടക്കും. വാരാന്ത്യങ്ങളിൽ കൂടുതൽ ആളുകളിലേക്ക് കളി എത്തിക്കുന്നതിനായി ആദ്യ ഘട്ടത്തിലെ 53 മത്സരങ്ങളും വെള്ളി, ശനി, ഞായർ ദിവസങ്ങളിലാണ് ക്രമീകരിച്ചിരിക്കുന്നത്.

ഇത്തവണ ആകെ 13 ടീമുകളാണ് ചാമ്പ്യൻഷിപ്പിൽ മാറ്റുരയ്ക്കുന്നത്. കേരള ബ്ലാസ്റ്റേഴ്‌സ്, മോഹൻ ബഗാൻ, മുംബൈ സിറ്റി, ബംഗളൂരു എഫ്‌സി ഉൾപ്പെടെയുള്ള പ്രമുഖ ടീമുകൾക്കൊപ്പം ജാംഷെഡ്പൂർ എഫ്‌സിക്ക് പകരം എത്തുന്ന ചർച്ചിൽ ബ്രദേഴ്‌സും ലീഗിന്‍റെ ഭാഗമാകും. ഇതോടെ ഐഎസ്എൽ ചരിത്രത്തിലെ ആദ്യ 'ഗോവൻ ഡെർബി'ക്ക് ഇത്തവണ വേദി ഒരുങ്ങും. കൂടാതെ ഇംഫാലിലെ ഖുമാൻ ലംപാക് സ്റ്റേഡിയത്തിലും ഇത്തവണ ഐഎസ്എൽ പോരാട്ടം അരങ്ങേറും. നവംബർ 24-ന് നടക്കുന്ന മത്സരത്തിൽ നോർത്ത് ഈസ്റ്റ് യുണൈറ്റഡും സ്‌പോർട്ടിംഗ് ക്ലബ് ഡൽഹിയുമാണ് ഇവിടെ ഏറ്റുമുട്ടുന്നത്.

അതേസമയം, പ്രൊമോഷൻ ലഭിച്ച് എത്തിയ ഡയമണ്ട് ഹാർബർ എഫ്‌സിക്ക് അഡ്മിനിസ്ട്രേറ്റീവ് ഫീസ് അടയ്ക്കാൻ കഴിയാത്തതിനെ തുടർന്ന് ഇത്തവണത്തെ പോയിന്റ് പട്ടികയിൽ നിന്ന് ഒഴിവാക്കിയിട്ടുണ്ട്. ലീഗ് ഘട്ടത്തിൽ ഏറ്റവും കൂടുതൽ പോയിന്റ് നേടുന്ന ടീമിന് ഐഎസ്എൽ ഷീൽഡും ഏഷ്യൻ ചാമ്പ്യൻഷിപ്പുകളിലേക്കുള്ള യോഗ്യതയും ലഭിക്കും. തുടർന്ന് പോയിന്‍റ് പട്ടികയിലെ ആദ്യ ആറ് സ്ഥാനക്കാർ പ്ലേഓഫിലേക്ക് കടക്കുകയും ഐഎസ്എൽ കപ്പിനായി പോരാടുകയും ചെയ്യും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ലിയോണല്‍ മെസിക്ക് നാളെ അര്‍ജന്റീന ജഴ്‌സിയില്‍ അവസാന മത്സരം; ഇതിഹാസം ഇറങ്ങുന്നത് 208-ാം മത്സരത്തിന്

Web Desk — Tue, 06 Oct 2026 09:41:03 +0530

ബ്യൂണസ് ഐറിസ്: അര്‍ജന്റൈന്‍ ജഴ്‌സിയില്‍ ലിയോണല്‍ മെസിക്ക് നാളെ അവസാന മത്സരം. ആഫ്രിക്കന്‍ ടീമായ ബെനിനാണ് എതിരാളികള്‍. ബുധാനാഴ്ച പുലര്‍ച്ചെ നാലരയ്ക്കാണ് കളി തുടങ്ങുക. അര്‍ജന്റീനയ്ക്ക് ഇത് വെറുമൊരു മത്സരമല്ല, ഫുട്‌ബോള്‍ ചരിത്രത്തിനും. ബ്യൂണസ് അയേഴ്‌സിലെ മോണുമെന്റല്‍ സ്റ്റേഡിയത്തില്‍ ലിയോണല്‍ മെസി അവസാനമായി നീലയും വെള്ളയും ജഴ്‌സിയില്‍ ബൂട്ടുകെട്ടിയിറങ്ങുന്നു. ഇതിഹാസ താരത്തിന്റെ ജന്‍മ നാടിനോടുള്ള 21 വര്‍ഷം നീണ്ട ഫുട്‌ബോള്‍ പ്രണയകഥയിലെ അവസാന അധ്യായം.

ലോംഗ് വിസിലിന് ശേഷം അര്‍ജന്റൈന്‍ ഫുട്‌ബോള്‍ ചരിത്രം രണ്ടായി പിളരും. മെസിക്ക് മുന്‍പും മെസിക്ക് ശേഷവും. 2005ല്‍ അര്‍ജന്റൈന്‍ ടീമില്‍ അരങ്ങേറ്റം കുറിച്ച മെസി ഇറങ്ങുന്നത് ഇരുന്നൂറ്റിയെട്ടാം മത്സരത്തിന്. ഇടങ്കാല്‍ വിസ്മയത്തില്‍ പിറന്നത് 125 ഗോള്‍. 68 അസിസ്റ്റ്. രണ്ട് കോപ്പയും ഫൈനലിസിമയും എല്ലാ വിമര്‍ശനങ്ങളും സംശയങ്ങളും ഉടച്ചുകളഞ്ഞ ലോകകപ്പും മെസിക്ക് സ്വന്തം. അര്‍ജന്റൈന്‍ ജഴ്‌സിയില്‍ മെസി മോണുമെന്റല്‍ സ്റ്റേഡിയത്തില്‍ ഇറങ്ങുന്നത് 208-ാം മത്സരത്തിന്.

ഒറ്റക്കളിയിലും അര്‍ജന്റീന തോറ്റിട്ടില്ല. 22 ജയം ആറ് സമനില. ബൊളിവിയക്കെതിരായ ഹാട്രിക് ഉള്‍പ്പെടെ മെസി മാജിക്കില്‍ പിറന്നത് 19ഗോള്‍. ലോകകപ്പ് യോഗ്യതയുടെ അരികില്‍ പോലും എത്താത്ത ആഫ്രിക്കന്‍ ടീമായ ബെനിന്‍ ഒറ്റമത്സരത്തിലൂടെ ഫുട്‌ബോള്‍ ചരിത്രത്താളില്‍ മായാതെ നില്‍ക്കും. മെസ്സിയുടെ അവസാന എതിരാളികള്‍ എന്ന വിശേഷണത്തോടെ.

'മികച്ച ടീമുകള്‍ക്കെതിരെ കളിക്കുമ്പോള്‍ സമ്മര്‍ദ്ദം സ്വാഭാവികമാണ്'; തോല്‍വികളുടെ ഉത്തരവാദിത്തം ഏറ്റെടുത്ത് ഖാലിദ് ജമീല്‍

Web Desk — Wed, 07 Oct 2026 11:19:22 +0530

കൊല്‍ക്കത്ത: ഉറുഗ്വേക്കെതിരായ മത്സരത്തില്‍ ഇന്ത്യ നേരിട്ട കനത്ത തോല്‍വിയുടെ പൂര്‍ണ ഉത്തരവാദിത്തം ഏറ്റെടുത്ത് ഇന്ത്യന്‍ ഹെഡ് കോച്ച് ഖാലിദ് ജമീല്‍. രണ്ട് മത്സരങ്ങളില്‍ നിന്നായി പത്ത് ഗോളുകള്‍ വഴങ്ങിയ ഈ അന്താരാഷ്ട്ര ഇടവേള ടീമിനെ സംബന്ധിച്ചിടത്തോളം വളരെ പ്രയാസമേറിയതാണെന്ന് അദ്ദേഹം സമ്മതിച്ചു. തന്റെ ഗെയിം പ്ലാന്‍ പാളിയെന്നും എന്നാല്‍ മോശം ഫലങ്ങളുടെ പേരില്‍ കളിക്കാരെ കുറ്റപ്പെടുത്താന്‍ തയ്യാറല്ലെന്നും ജമീല്‍ വ്യക്തമാക്കി. ബെംഗളൂരുവില്‍ പനാമയുമായുള്ള സമനിലയോടെയാണ് ഇന്ത്യ ഈ മത്സരങ്ങള്‍ക്ക് തുടക്കമിട്ടത്.

എന്നാല്‍ പിന്നീട് ബ്രസീലിനെതിരെ 4-0നും, സോള്‍ട്ട് ലേക്ക് സ്റ്റേഡിയത്തില്‍ ഉറുഗ്വേക്കെതിരെ 6-1നും ഇന്ത്യ പരാജയപ്പെടുകയായിരുന്നു. ഉറുഗ്വേക്കെതിരായ മത്സരത്തില്‍ അനിരുദ്ധ് ഥാപ്പയാണ് ഇന്ത്യയുടെ ആശ്വാസ ഗോള്‍ നേടിയത്. മത്സരത്തില്‍ 35 മിനിറ്റോളം നീണ്ടുനിന്ന മഴ തടസ്സത്തിന് ശേഷം ഉറുഗ്വേ തങ്ങളുടെ ആക്രമണം ശക്തമാക്കുകയും ഇന്ത്യയുടെ പ്രതിരോധത്തിലെ വീഴ്ചകള്‍ മുതലെടുത്ത് ഗോളുകള്‍ നേടുകയും ചെയ്തു. 'ഇതുപോലുള്ള കാര്യങ്ങള്‍ സംഭവിക്കാം. മികച്ച ടീമുകള്‍ക്കെതിരെ കളിക്കുമ്പോള്‍ സമ്മര്‍ദ്ദം സ്വാഭാവികമാണ്. കളിക്കാര്‍ എന്റെ നിര്‍ദ്ദേശങ്ങള്‍ അനുസരിക്കാത്തതുകൊണ്ടല്ല ഇത് സംഭവിച്ചത്. ഈ മത്സരത്തെക്കുറിച്ച് പറയുകയാണെങ്കില്‍, എന്റെ പ്ലാന്‍ നിലവാരത്തിനനുസരിച്ച് ഉയര്‍ന്നിരുന്നില്ല എന്ന് പറയേണ്ടിവരും.' ഖാലിദ് ജമീല്‍ പറഞ്ഞു.

തുടര്‍ച്ചയായ മത്സരങ്ങളുടെ ആദ്യ മുക്കാല്‍ മണിക്കൂര്‍ ഭേദപ്പെട്ട പ്രകടനം കാഴ്ചവെക്കാന്‍ കഴിഞ്ഞെങ്കിലും, പിന്നീട് ശാരീരികക്ഷമതയിലോ ഏകാഗ്രതയിലോ ഉണ്ടായ കുറവാണ് വലിയ തോല്‍വികളിലേക്ക് നയിച്ചതെന്ന് ജമീല്‍ ചൂണ്ടിക്കാണിച്ചു. 'രണ്ട് മത്സരങ്ങളില്‍ നിന്നായി 10 ഗോളുകള്‍ വഴങ്ങിയത് വളരെ മോശമാണ്. എന്നാല്‍ ഇത് എന്റെ തെറ്റാണ്, മറ്റാരെയും കുറ്റപ്പെടുത്താന്‍ ഞാന്‍ ആഗ്രഹിക്കുന്നില്ല. മത്സരങ്ങളില്‍ സ്ഥിരത പുലര്‍ത്താന്‍ കൂടുതല്‍ പരിശീലന ക്യാമ്പുകള്‍ ആവശ്യമാണ്.' ണെന്നും അദ്ദേഹം പറഞ്ഞു.

ബ്രസീല്‍, ഉറുഗ്വേ തുടങ്ങിയ വന്‍കിട ടീമുകള്‍ക്കെതിരെ കളിക്കുന്നത് ടീമിന്റെ നിലവാരം മനസ്സിലാക്കാന്‍ സഹായിക്കുമെന്നും, ഫലങ്ങള്‍ അനുകൂലമല്ലെങ്കിലും ഇത്തരം മത്സരങ്ങള്‍ ആവശ്യമാണെന്നും അദ്ദേഹം കൂട്ടിച്ചേര്‍ത്തു. നവംബറില്‍ ന്യൂസിലന്‍ഡിനെതിരെയാണ് ഇന്ത്യയുടെ അടുത്ത അന്താരാഷ്ട്ര പര്യടനം.

‘നീ സൃഷ്ടിച്ച ചരിത്രം കാലങ്ങളെ അതിജീവിക്കും, നിനക്കെന്റെ ഹൃദയാലിംഗനം’, മെസിക്ക്‌ ആശംസകള്‍ നേര്‍ന്ന്‌ ക്രിസ്റ്റ്യാനോ

Web Desk — Thu, 08 Oct 2026 08:52:11 +0530

‘ലിയോ, വര്‍ഷങ്ങളായി താങ്കള്‍ രാജ്യത്തിനായി പൊരുതുന്നു, ആ ചരിത്രം എക്കാലവും നിലനില്‍ക്കും. അര്‍ജന്റീനക്കൊപ്പം താങ്കള്‍ നേടിയെടുത്തതിനോടെല്ലാം അങ്ങേയറ്റം ബഹുമാനം മാത്രം. എന്റെ ഹൃദയാലിംഗനം സ്വീകരിക്കൂ’ - ക്രിസ്‌റ്റിയാനോ റൊണാള്‍ഡോ ഇന്‍സ്‌റ്റഗ്രാമില്‍ പോസ്‌റ്റ്‌ ചെയ്‌ത വരികള്‍.

അര്‍ജന്റീനക്ക്‌ വേണ്ടി അവസാന മത്സരം കളിച്ച്‌, അന്താരാഷ്ട്ര ഫുട്‌ബോളിനോട്‌ വിടപറയല്‍ അവിസ്‌മരണീയമാക്കിയ ലയണല്‍ മെസിയെ കുറിച്ച്‌ ക്രിസ്റ്റ്യാനോ പറഞ്ഞ നല്ല വാക്കുകള്‍ സോഷ്യല്‍ മീഡിയയില്‍ തരംഗമായി. ലോകഫുട്‌ബോളില്‍ മെസിയും ക്രിസ്‌റ്റിയാനോയും തമ്മിലുള്ള ആരോഗ്യപരമായ മത്സരം ലോകശ്രദ്ധയാകര്‍ഷിച്ചിരുന്നു. ഒരു ദശാബ്ദത്തിലേറെക്കാലം ലോകഫുട്‌ബോളിനെ ഭരിച്ചിരുന്നത്‌ ഇവരായിരുന്നു. മെസിയുടെ ബാഴ്‌സലോണയും ക്രിസ്‌റ്റിയാനോയുടെ റയല്‍ മാഡ്രിഡും നേര്‍ക്കുനേര്‍ വരുന്ന എല്‍ക്ലാസികോ പോരാട്ടം ചരിത്രം സൃഷ്ടിച്ചു.

അന്താരാഷ്ട്ര തലത്തില്‍ രണ്ട്‌ പേരും നേര്‍ക്കുനേര്‍ വന്നത്‌ രണ്ട്‌ തവണ മാത്രം. രണ്ടും സൗഹൃദ ഫുട്‌ബോള്‍ മത്സരങ്ങള്‍. 2011 ലായിരുന്നു ആദ്യത്തേത്‌. അര്‍ജന്റീന ജയിച്ച മത്സരത്തില്‍ മെസിയും ക്രിസ്റ്റ്യാനോയും സ്‌കോര്‍ ഷീറ്റില്‍ ഇടം പിടിച്ചു. 2014 ല്‍ ജയം പോര്‍ച്ചുഗലിനായിരുന്നു. അന്ന്‌ അവസാന നിമിഷം റാഫേല്‍ ഗ്യുറേറോ നേടിയ ഗോളിലായിരുന്നു ജയം.

മെസിയുടെ വിടപറയല്‍ മത്സരത്തില്‍ ബെനിനെതിരെ അര്‍ജന്റീന എതിരില്ലാത്ത മൂന്ന്‌ ഗോളുകള്‍ക്ക്‌ ജയിച്ചു. ഒരു ഗോളടിച്ചും രണ്ട്‌ ഗോളുകള്‍ക്ക്‌ വഴിയൊരുക്കിയും മെസി പതിവ്‌ പോലെ കളം നിറഞ്ഞു. ക്രിസ്‌റ്റിയാനോ റൊണാള്‍ഡോ ഇപ്പോള്‍ പോര്‍ച്ചുഗല്‍ ടീം ക്യാമ്പില്‍ ഇല്ല. ഹെഡ്‌ കോച്ചുമായി ഉടക്കി ദേശീയ ടീമില്‍ നിന്ന്‌ മാറി നില്‍ക്കുന്ന ക്രിസ്‌റ്റിയാനോയുടെ ഭാവി പരിപാടികള്‍ വ്യക്തമല്ല. ആയിരം ഗോളുകള്‍ എന്ന ലക്ഷ്യം മുന്നില്‍ വെച്ചാണ്‌ ക്രിസ്‌റ്റിയാനോ കരിയര്‍ ദീര്‍ഘിപ്പിക്കുന്നത്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

അവസാന ആട്ടത്തിലും നിറഞ്ഞ് കവിഞ്ഞ് മെസി; ഒരുഗോളും രണ്ട് അസിസ്റ്റും, അവസാന മത്സരം അവിസ്മരണീയമാക്കി ഇതിഹാസം

Web Desk — Wed, 07 Oct 2026 07:21:24 +0530

ലോകത്തെ കാൽക്കീഴിലാക്കിയ രണ്ട് ദശാബ്ദത്തിന് വിരാമമിട്ട് ലയണൽ മെസി. തന്റെ വിടവാങ്ങൽ മത്സരത്തിൽ മെസി മിന്നിത്തിളങ്ങി. അർജന്റീന ഏകപക്ഷീയമായ മൂന്ന് ഗോളുകൾക്ക് ആഫ്രിക്കൻ രാജ്യമായ ബെനിനെ തോൽപ്പിച്ചു. രണ്ട് ഗോളുകൾക്ക് അസിസ്റ്റ് നൽകിയും പെനാൽറ്റി ഗോളാക്കി മാറ്റിയും മെസി കളം നിറഞ്ഞ് കളിച്ച് അവസാന മത്സരം അവിസ്മരണീയമാക്കി. ഗോൾ രഹിതമായ ഒന്നാം പകുതിക്ക് ശേഷം രണ്ടാം പകുതിയിലായിരുന്നു നീലപ്പടയുടെ മൂന്ന് ഗോളുകളും പിറന്നത്. 48-ാം മിനിറ്റിൽ മെസിയെടുത്ത കോർണർ കിക്കിൽ നിന്ന് ഗോൾ കണ്ടെത്തി ഒട്ടാമെൻഡി സ്കോറിങ്ങിന് തുടക്കമിട്ടു. 61-ാം മിനിറ്റിൽ യുവതാരം നിക്കോ പാസ് ഗോൾ നേടി. മെസി നൽകിയ പാസിൽ നിന്നായിരുന്നു നിക്കോ പാസിന്റെ ഗോൾ. 71-ാം മിനിറ്റിൽ ഒടുവിൽ ആ നിമിഷമെത്തി. തന്റെ അവസാന മത്സരത്തിൽ ലഭിച്ച പെനാൽറ്റി അദ്ദേഹം ലക്ഷ്യം കണ്ടു. മത്സരത്തിന്റെ പത്താം മിനിറ്റിൽ താരത്തിന് ആദരമർപ്പിച്ച് മത്സരം നിർത്തിവെച്ചിരുന്നു.

2022ൽ ഫിഫ ലോകകപ്പ് വിജയിച്ച അർജന്റീന ടീമംഗങ്ങളും മെസ്സിക്കൊപ്പം പന്ത് തട്ടി. തന്‍റെ അവസാന മത്സരത്തിന് നിറകണ്ണുകളോടെയാണ് മെസി സ്റ്റേഡിയത്തിലെത്തിയത്. ആരാധകരുടെ തിരക്ക് കാരണം നിശ്ചയിച്ചതിലും വൈകിയാണ് ടീം ബസ് എത്തിയത്. ഇതോടെ മത്സരം വൈകി. മെസി എത്തിയതോടെ ആരാധകരും വികാരഭരിതരായി. മത്സരം അവസാനിച്ചതോടെ അർജന്റീനയ്ക്കൊപ്പം രണ്ടു പതിറ്റാണ്ടിലേറെ നീണ്ട മെസ്സിയുടെ ഫുട്ബോൾ യാത്രക്ക് അവസാനമായി. 2005-ലാണ് മെസ്സി ദേശീയ ടീമിനായി അരങ്ങേറ്റ മത്സരം കളിച്ചത്. 207 രാജ്യാന്തര മത്സരങ്ങളിൽനിന്ന് 125 ഗോളുകൾ‍ നേടി. മെസിയുടെ മികവിൽ മൂന്നു പ്രാവശ്യം അർജന്റീന ലോകകപ്പ് ഫൈനലെത്തി. 2022 ഖത്തർ ലോകകപ്പിൽ കിരീടം സ്വന്തമാക്കി. 2014ൽ ജർമനിയോടും 2026ൽ സ്പെയിനിനോടും ഫൈനലിൽ അടിയറവ് പറഞ്ഞു. അർജന്റീനയ്ക്കൊപ്പം രണ്ട് കോപ്പ അമേരിക്ക കിരീടങ്ങളും മെസി നേടി. ഇന്റർമയാമിക്കായി ആ കാലുകൾ ഇനിയും കവിത വിരിയിക്കും...

ആ കണക്കങ്ങ്‌ തീര്‍ത്തു! കണ്ണൂരിനെ വീഴ്‌ത്തി തിരുവനന്തപുരത്തിന്റെ കൊമ്പന്‍മാര്‍ സീസണിലെ ആദ്യ ജയം ആഘോഷിച്ചു

Web Desk — Mon, 05 Oct 2026 07:47:20 +0530

തിരുവനന്തപുരം: കണ്ണൂര്‍ വാരിയേഴ്‌സിനോടൊരു കണക്ക്‌ തീര്‍ക്കാനുണ്ടായിരുന്നു, തിരുവനന്തപുരത്തിന്റെ കൊമ്പന്‍മാര്‍ അതങ്ങ്‌ തീര്‍ത്തു. കഴിഞ്ഞ സീസണിലെ ആദ്യ മത്സരത്തില്‍ സ്വന്തം മണ്ണില്‍ കണ്ണൂരിനോടേറ്റ പരാജയത്തിന്റെ നിരാശ ഇത്തവണ ഷൂട്ടൗട്ട്‌ വിജയത്തിലൂടെ (4-1) തിരുവനന്തപുരം കൊമ്പന്‍സ്‌ എഫ്‌ സി മറികടന്നു. സീസണിലെ കന്നിമത്സരത്തില്‍ കാലിക്കറ്റിനോടേറ്റ തോല്‍വിയുടെ ക്ഷീണവും തീര്‍ത്തു.

സൂപ്പര്‍ ലീഗ്‌ കേരള ഫുട്‌ബോളിന്റെ മൂന്നാം സീസണില്‍ കൊമ്പന്‍സ്‌ എഫ്‌ സിയുടെ ആദ്യ ജയമാണിത്‌. നിശ്ചിത സമയത്ത്‌ 1-1 ആയിരുന്നു സ്‌കോര്‍. തിരുവനന്തപുരത്തിനായി യുവതാരം മുഹമ്മദ് നിഷാമും കണ്ണൂരിനായി ഫെഡറിക് ബോച്ച്വെയും നിശ്ചിത സമയത്ത് ഗോൾ നേടി. ഷൂട്ടൗട്ടിൽ കണ്ണൂരിന്റെ എസിയർ ഗോമസ്, ഏണസ്റ്റൻ ലവ്സാംബ, ആൽവാരോ ആൽവാരസ് എന്നിവർ എടുത്ത കിക്കുകൾ പിഴച്ചപ്പോൾ തിരുവനന്തപുരം മൂന്ന് കിക്കുകളും ഗോളാക്കിമാറ്റി.

മത്സരത്തിലെ ഗോൾമണമുള്ള ആദ്യ നീക്കം പതിനൊന്നാം മിനിറ്റിലായിരുന്നു. വലതു ടച്ച് ലൈനിനരികിൽ നിന്ന് നിജോ ഗിൽബെർട്ട് തൊടുത്ത ഫ്രീകിക്ക് തിരുവനന്തപുരം പ്രതിരോധത്തിൽ ആശങ്ക പടർത്തി. അപകടകരമായ പന്ത് ഗോൾമുഖത്തേക്ക് താഴ്ന്നിറങ്ങിയെങ്കിലും കൃത്യമായ ഫിനിഷിങ്ങിലൂടെ അവസരം മുതലെടുക്കാൻ ബോക്സിലുണ്ടായിരുന്ന രണ്ട് കണ്ണൂർ താരങ്ങൾക്കും കഴിഞ്ഞില്ല.കളിയുടെ തുടക്കത്തിൽ ഫ്രീകിക്കുകളും കോർണറുകളും നേടിയെടുക്കാൻ തിരുവനന്തപുരത്തിന് സാധിച്ചെങ്കിലും അവയെ ഫലപ്രദമായ ആക്രമണങ്ങളാക്കി മാറ്റാനുള്ള പദ്ധതിയുണ്ടായിരുന്നില്ല. സെറ്റ് പീസുകളിൽനിന്ന് ഗോളവസരങ്ങൾ സൃഷ്ടിക്കാനോ എതിരാളികളുടെ പ്രതിരോധത്തെ സമ്മർദത്തിലാക്കാനോ അവർക്ക് കഴിഞ്ഞില്ല.

31-ാം മിനിറ്റിൽ സെർബിയൻ താരം സ്റ്റെമൻകോവിച്ചിലൂടെ കണ്ണൂർ ലീഡ് നേടുന്നതിന്റെ വക്കിലെത്തി. പ്രതിരോധത്തിലെ വിടവ് മുതലെടുത്ത് ഗോൾമുഖത്തേക്ക് നീങ്ങിയ താരത്തിന്റെ ശ്രമം പക്ഷേ, കൃത്യമായ സമയത്ത് മുന്നോട്ടുകയറി തിരുവനന്തപുരം ഗോൾ കീപ്പർ സത്യജിത് തടഞ്ഞു.42-ാം മിനിറ്റിൽ തിരുവനന്തപുരത്തിന്റെ ആക്രമണം ലക്ഷ്യം കണ്ടു. മധ്യനിരയിൽ നിന്ന് അർജുൻ നൽകിയ പ്രതിരോധനിരയെ കീറിമുറിച്ച പാസ് കൃത്യമായി വായിച്ചെടുത്ത മുഹമ്മദ് നിഷാം, നെഞ്ചിൽ പന്ത് നിയന്ത്രിച്ച് പ്രതിരോധതാരങ്ങൾക്ക് പ്രതികരിക്കാൻ അവസരം നൽകാതെ പുറംകാലുകൊണ്ട് വലയിലേക്ക് തിരിച്ചുവിട്ടു. കൃത്യമായ പാസും മികവുറ്റ ഫിനിഷിങ്ങും ചേർന്ന ഗോളിലൂടെ ആതിഥേയർക്ക് ലീഡ് (1-0).

രണ്ടാം പകുതിയുടെ തുടക്കത്തിൽ പാട്രിക് മോട്ടയുടെ കോർണറിൽ നിന്ന് വന്ന പന്ത് തിരുവനന്തപുരം ക്യാപ്റ്റൻ ഷിനു പോസ്റ്റിലേക്ക് തിരിച്ചു വിട്ടെങ്കിലും പ്രതിരോധത്തിൽ തട്ടി വിഫലമായി. പിന്നാലെ ആദിൽ, ഷിജിൻ എന്നിവർ തിരുവനന്തപുരം നിരയിലേക്ക് പകരക്കാരായി എത്തി. ഗൗതം, ഫെഡറിക് ബോച്ച്വെ എന്നിവർക്ക് കണ്ണൂരും അവസരം നൽകി.

80-ാം മിനിറ്റിൽ കണ്ണൂരിന്റെ സമനില ഗോൾ വന്നു. നിജോ ഗിൽബെർട്ട് നൽകിയ ക്രോസ് ഘാനക്കാരൻ ഫെഡറിക് ബോച്ച്വെ ഗോളാക്കി മാറ്റി (1-1). പിന്നീട് ഗോൾ പിറക്കാതിരുന്നതോടെ മത്സരം ഷൂട്ടൗട്ടിലേക്ക് നീങ്ങി. രണ്ട് റൗണ്ട് മത്സരം പൂർത്തിയായപ്പോൾ കാലിക്കറ്റ്‌ എഫ് സി (5), ഫോഴ്‌സ കൊച്ചി എഫ് സി (5), കണ്ണൂർ വാരിയേഴ്‌സ് എഫ് സി (4), തിരുവനന്തപുരം കൊമ്പൻസ് എഫ് സി (2), മലപ്പുറം എഫ് സി (1), തൃശൂർ മാജിക് എഫ് സി (1) എന്നിങ്ങനെയാണ് പോയന്റ് നില. 7868 പേർ മത്സരം കാണാൻ ഗ്യാലറിയിലെത്തി.

ഒക്ടോബർ 9 വെള്ളിയാഴ്ച മൂന്നാം റൗണ്ട് മത്സരങ്ങൾ തുടങ്ങും. കണ്ണൂർ ജവഹർ മുനിസിപ്പൽ സ്റ്റേഡിയത്തിൽ കണ്ണൂർ വാരിയേഴ്‌സ് എഫ്‌ സി, ഫോഴ്‌സ കൊച്ചി എഫ്‌ സിയെ നേരിടും. കിക്കോഫ് രാത്രി 7.30ന്.

ടിക്കറ്റുകൾക്ക് https://www.superleaguekerala.com/tickets സന്ദർശിക്കുക. സ്റ്റേഡിയത്തിലെ ബോക്സ് ഓഫീസുകളിലും ടിക്കറ്റുകൾ ലഭിക്കും

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

മുന്നേറ്റനിരക്ക് മലയാളി കരുത്ത്; മുഹമ്മദ് സനാനുമായി ദീർഘകാല കരാറിലെത്തി കേരള ബ്ലാസ്റ്റേഴ്‌സ്

Gopalakrishnan C — Mon, 05 Oct 2026 19:30:05 +0530

കൊച്ചി: മലയാളി മുന്നേറ്റ താരം മുഹമ്മദ് സനാനെ സ്വന്തമാക്കിയതായി കേരള ബ്ലാസ്റ്റേഴ്‌സ് എഫ്‌സി അറിയിച്ചു. ജംഷഡ്പൂർ എഫ്‌സിയിൽ നിന്നാണ് 22കാരനായ താരം മഞ്ഞപ്പടയുടെ ഭാഗമാകുന്നത്. 2028-29 സീസൺ അവസാനിക്കുന്നത് വരെയുള്ള ദീർഘകാല കരാറിലാണ് സനാൻ ഒപ്പുവെച്ചത്. കേരളത്തിന്‍റെ കാൽപ്പന്ത് സംസ്കാരത്തിലൂടെ വളർന്നുവന്ന സനാൻ, റിലയൻസ് ഫൗണ്ടേഷൻ യംഗ് ചാംപ്സ് പ്രോഗ്രാമിലൂടെയാണ് തന്‍റെ ഫുട്ബോൾ അടിത്തറ ശക്തമാക്കിയത്. തുടർന്ന് 2023ൽ ജംഷഡ്പൂർ എഫ്‌‌സിയിലൂടെ സീനിയർ തലത്തിലേക്ക് ചുവടുവെച്ച താരം ചുരുങ്ങിയ കാലം കൊണ്ട് ഇന്ത്യൻ സൂപ്പർ ലീഗിൽ തന്റേതായ ഇടം കണ്ടെത്തി.

2023-24 സീസണിൽ ഐഎസ്എൽ അരങ്ങേറ്റം കുറിച്ച സനാൻ, ആദ്യ സീസണിൽ തന്നെ 20 ലീഗ് മത്സരങ്ങളിൽ കളത്തിലിറങ്ങി. തൊട്ടടുത്ത 2024-25 സീസണിൽ 24 ലീഗ് മത്സരങ്ങളിൽ കൂടി ബൂട്ടണിഞ്ഞ താരം ജംഷഡ്പൂരിന്റെ ആക്രമണനിരയിലെ സ്ഥിരസാന്നിധ്യമായി മാറി. പ്രധാനമായും ലെഫ്റ്റ് വിംഗറായി കളിക്കുന്ന സനാന് വലതു വിംഗിലും സെൻട്രൽ അറ്റാക്കിംഗ് പൊസിഷനുകളിലും ഒരുപോലെ തിളങ്ങാൻ കഴിവുണ്ട്. പന്തുമായി അതിവേഗം മുന്നേറാനും എതിർ പ്രതിരോധ നിരയെ മറികടന്ന് മുന്നോട്ട് കുതിക്കാനുമുള്ള മികവ് അറ്റാക്കിംഗ് തേർഡിൽ താരത്തെ കൂടുതൽ അപകടകാരിയാക്കുന്നു. താരത്തിന്റെ ഈ കളിശൈലി ബ്ലാസ്റ്റേഴ്സിന്റെ മുന്നേറ്റനിരയ്ക്ക് പുതിയ മാനങ്ങളും വൈവിധ്യവും നൽകും.

22-ാം വയസ്സിൽ തന്നെ ഐഎസ്എല്ലിൽ 40-ലധികം മത്സരങ്ങൾ കളിച്ചുള്ള അനുഭവസമ്പത്ത് സനാന് വലിയ മുതൽക്കൂട്ടാണ്. സ്വന്തം നാട്ടിലേക്ക് തിരിച്ചെത്തുന്ന സനാന്, കേരള ബ്ലാസ്റ്റേഴ്സിന്‍റെ വൻ ആരാധകവൃന്ദത്തിന് മുന്നിൽ പന്തുതട്ടാനുള്ള മികച്ച അവസരം കൂടിയാണ് ഈ കൂടുമാറ്റത്തിലൂടെ തുറന്നുകിട്ടുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

യമാലും ഹാരി കെയ്‌നും ബാലണ്‍ ഡി ഓര്‍ നേടില്ല, ചാന്‍സ്‌ രണ്ട്‌ പേര്‍ക്ക്‌, ലോകകപ്പിലെ പ്രകടനം നിര്‍ണായകം, നിരീക്ഷണവുമായി ജര്‍മന്‍ ഫുട്‌ബോള്‍ ഇതിഹാസം

Web Desk — Tue, 06 Oct 2026 14:08:22 +0530

മ്യൂണിക്‌: 2026 ബാലണ്‍ ഡി ഓര്‍ പുരസ്‌കാരം കിലിയന്‍ എംബാപയോ മൈക്കല്‍ ഒലിസെയോ നേടാനാണ്‌ സാധ്യതയെന്ന്‌ ജര്‍മനിയുടെ ഇതിഹാസ താരം തോമസ്‌ മുള്ളര്‍. സ്‌പെയ്‌നിന്റെ ലാമിന്‍ യമാലിനും ഇംഗ്ലണ്ട്‌ ക്യാപറ്റന്‍ ഹാരി കെയ്‌നിനും യാതൊരു സാധ്യതയും തോമസ്‌ മുള്ളര്‍ കാണുന്നില്ല.

ഫിഫ ലോകകപ്പില്‍ ഫ്രാന്‍സ്‌ നാലാം സ്ഥാനത്താണ്‌ ഫിനിഷ്‌ ചെയ്‌തതെങ്കിലും കിലിയന്‍ എംബാപെയും മൈക്കല്‍ ഒലിസെയും നിര്‍ണായക റോള്‍ വഹിച്ചത്‌ മറക്കാന്‍ കഴിയില്ലെന്ന്‌ മുന്‍ ബയേണ്‍ മ്യൂണിക്‌ സ്‌ട്രൈക്കര്‍ നിരീക്ഷിച്ചു. പത്ത്‌ ഗോളുകള്‍ നേടിയ കിലിയന്‍ എംപാബെ ലോകകപ്പില്‍ ടോപ്‌ സ്‌കോററായിരുന്നു. ഏഴ്‌ അസിസ്‌റ്റുകള്‍ നടത്തിയ മൈക്കല്‍ ഒലിസെ ആ നിലക്കും ലോകകപ്പില്‍ ശ്രദ്ധേയനായി.

ഫ്രാന്‍സ്‌ താരങ്ങളുടെ ടച്ചില്‍ ഒരു മാജിക്‌ കാണാനുണ്ടായിരുന്നു.ലോകഫുട്‌ബോളര്‍ പട്ടം നേടാനുള്ള മെറ്റീരിയല്‍ ഇവരില്‍ മാത്രമേ താന്‍ കാണുന്നുള്ളൂവെന്നും മുന്‍ ജര്‍മന്‍ താരം പറഞ്ഞു. ഒക്ടോബര്‍ 26നാണ്‌ ബാലണ്‍ ഡി ഓര്‍ പുരസ്‌കാരം പ്രഖ്യാപിക്കുക.

എംബാപെയും ആത്മവിശ്വാസത്തില്‍...

കഴിഞ്ഞ സീസണില്‍ കിരീടവിജയങ്ങളില്‍ പങ്കാളിയാകാന്‍ കഴിഞ്ഞിട്ടില്ലെങ്കിലും ബാലണ്‍ ഡി ഓര്‍ പുരസ്‌കാരത്തിന്‌ താന്‍ അര്‍ഹനാണെന്ന്‌ കിലിയന്‍ എംബാപെ പരസ്യ പ്രസ്‌താവന നടത്തിയിരുന്നു. ഫ്രാന്‍സ്‌ ലോകകപ്പ്‌ നേടാതെ പോയതും റയല്‍ മാഡ്രിഡ്‌ ചാമ്പ്യന്‍സ്‌ ലീഗ്‌ ജേതാക്കളാകാതെ പോയതും തന്റെ ബാലണ്‍ ഡി ഓറിനെ ബാധിക്കുന്നതല്ല. ഇത്‌ തികച്ചും വ്യക്തിഗത മികവിനെ അടിസ്ഥാനമാക്കിയുള്ള അവാര്‍ഡാണ്‌ - എംബാപെ പറയുന്നു. ലാമിന്‍ യമാലും താന്‍ എന്തുകൊണ്ട്‌ ബാലണ്‍ ഡി ഓര്‍ അര്‍ഹിക്കുന്നുവെന്ന പരസ്യപ്രസ്‌താവനയുമായി പിന്നീട്‌ രംഗത്ത്‌ വന്നിരുന്നു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

റൊണാൾഡോയ്ക്ക് മുന്നിൽ വാതിലുകൾ അടഞ്ഞിട്ടില്ല; പ്രതികരണവുമായി പോർച്ചുഗൽ പരിശീലകൻ ജോർജ് ജീസസ്

Gopalakrishnan C — Mon, 05 Oct 2026 19:10:12 +0530

ലിസ്ബൺ: പോർച്ചുഗൽ ദേശീയ ടീമിൽ സൂപ്പർ താരം ക്രിസ്റ്റ്യാനോ റൊണാൾഡോയ്ക്കുള്ള വാതിലുകൾ അടഞ്ഞിട്ടില്ലെന്ന് പോർച്ചുഗൽ കോച്ച് ജോർജ് ജീസസ്. . അന്താരാഷ്ട്ര കരിയറിന്‍റെ കാര്യത്തിൽ ഇനി തീരുമാനം എടുക്കേണ്ടത് റൊണാൾഡോ തന്നെയാണെന്നും, ഉണ്ടായ സംഭവങ്ങൾ ഒരു തെറ്റിദ്ധാരണ മാത്രമാണെന്നും അദ്ദേഹം വ്യക്തമാക്കി. യുവേഫ നേഷൻസ് ലീഗിൽ നോർവേയ്‌ക്കെതിരായ 2-1ന്റെ വിജയത്തിന് ശേഷമാണ് കോച്ച് പ്രതികരണവുമായി രംഗത്തെത്തിയത്. നോർവേയ്‌ക്കും ഡെൻമാർക്കിനും എതിരായ മത്സരങ്ങളിൽ ആദ്യ ഇലവനിൽ അവസരം ലഭിക്കില്ലെന്ന് മനസ്സിലായതോടെയാണ് 41കാരനായ റൊണാൾഡോ കോപ്പൻഹേഗനിലെ ക്യാമ്പ് വിട്ട് പുറത്തുപോയത്. റൊണാൾഡോയുടെ ഈ അപ്രതീക്ഷിത പിന്മാറ്റത്തിന് പിന്നാലെയാണ് കോച്ചിന്‍റെ പ്രതികരണം പുറത്തുവന്നിരിക്കുന്നത്.

️ Jorge Jesus On His Pre Match Conference against Norway :

️“O Cristiano Ronaldo já não pode jogar por nós. Desrespeitou-me e a toda a direção. Isto é inaceitável”

Translated in English: “Cristiano Ronaldo can no longer play for us . He disrespected me and the whole board. It’s not acceptable” #PORNOR

— Lord Zeus CFC/RM (@LordZeus_Usulor) October 4, 2026

മത്സരശേഷം ആർ.ടി.പിയോട് സാരിക്കവേയാണ് ജോർജ് ജീസസ് മനസ്സ് തുറന്നത്. ഇനി എന്താണ് സംഭവിക്കുകയെന്ന് എനിക്കറിയില്ല. എന്നെ സംബന്ധിച്ച് എല്ലാ സാധ്യതകളും മുന്നിലുണ്ട്. തന്‍റെ ഭാവി തീരുമാനിക്കേണ്ടത് റൊണാൾഡോ തന്നെയാണ്. അദ്ദേഹം ക്ലബ്ബിൽ കളിക്കുകയും അടുത്ത ക്യാമ്പിലേക്ക് ദേശീയ ടീമിനൊപ്പം ചേരാൻ ആഗ്രഹിക്കുകയും ചെയ്യുന്നുവെങ്കിൽ എന്തുകൊണ്ട് ആയിക്കൂടാ?. ആർക്കും ഒരു വെറുപ്പുമില്ല, ഇത് വെറുമൊരു തെറ്റിദ്ധാരണ മാത്രമാണ്. ഇത് വളരെ എളുപ്പത്തിൽ പരിഹരിക്കാൻ കഴിയുന്ന കാര്യമാണെന്നും ജോര്‍ജ് ജീസസ് പറഞ്ഞു. അതേസമയം, റൊണാൾഡോ ഇപ്പോഴും ദേശീയ ടീമിന്‍റെ ഭാഗമാണെന്നും നിലവിലുണ്ടായ പ്രശ്നങ്ങൾ രമ്യമായി പരിഹരിക്കുമെന്നും പോർച്ചുഗീസ് ഫുട്ബോൾ ഫെഡറേഷനും വ്യക്തമാക്കി.

റൊണാൾഡോയുടെ അപ്രതീക്ഷിത പിന്മാറ്റത്തിനിടയിലും പോർച്ചുഗലിൽ യുവേഫ നേഷൻസ് ലീഗില്‍ തുടർച്ചയായ നാലാം വിജയം ആഘോഷിച്ചിരുന്നു. ചുമതലയേറ്റ ശേഷമുള്ള ആദ്യ നാല് മത്സരങ്ങളിലും ടീമിനെ വിജയത്തിലെത്തിക്കാൻ ജീസസിന് സാധിച്ചു. നോർവേയെ തോൽപ്പിച്ചതോടെ പോർച്ചുഗൽ നേഷൻസ് ലീഗിന്‍റെ ക്വാർട്ടർ ഫൈനൽ യോഗ്യതയും ഉറപ്പിച്ചു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ബ്ലാസ്റ്റേഴ്‌സിന്റെ സൈനിങ്ങുകള്‍ നല്‍കുന്ന സൂചനയെന്ത്, ഇനി ആരൊക്കെ വരും?

Hari Krishnan M — Mon, 05 Oct 2026 15:44:35 +0530

അത് സംഭവിക്കുകയാണ്, കേരള ബ്ലാസ്റ്റേഴ്‌സ് തുടങ്ങുന്നു...ഒരുവാരം മുൻപ് കേരള ബ്ലാസ്റ്റേഴ്സിന്റെ സ്ക്വാഡ് ഡെപ്ത് കേവലം 13 മാത്രമായിരുന്നു, അതായത് സബ്‌സ്റ്റിറ്റ്യൂഷൻ നടത്തുക പോലും പ്രയാസം...അല്‍ ഫുർസാന് കീഴില്‍ ദിവസങ്ങള്‍ക്കൊണ്ട് കഥ മാറിയിരിക്കുന്നു, ആഷ്‌ലി വെസ്റ്റ്‌വുഡ് ബ്ലാസ്റ്റേഴ്‌സിന്റെ മറ്റൊരു വേര്‍ഷൻ അണ്‍ലീഷ് ചെയ്യാൻ ഒരുങ്ങുകയാണ്... സൈനിങ്ങുകള്‍ നല്‍കുന്ന സൂചനയെന്താണ്...വന്നവര്‍ ആരൊക്കെ, ഇനി ആരൊക്കെയെത്തും, പരിശോധിക്കാം.

ഒഡീഷ എഫ്‌സിയില്‍ നിന്ന് അമരീന്ദര്‍ സിംഗ്, സീസണിന് മുന്നോടിയായുള്ള ആദ്യ സൈനിങ്ങ്. 33 വയസുകാരനായ അമരീന്ദര്‍ ഗോള്‍ വല കാക്കാൻ എത്തുന്നത് ഒന്നരപതിറ്റാണ്ടിന്റെ പരിചയസമ്പത്തുമായാണ്. 150ലധികം ഐഎസ്എല്‍ മത്സരങ്ങള്‍ കളിച്ചിട്ടുള്ള താരമെത്തുമ്പോള്‍ രണ്ട് പ്രധാന ചോദ്യമാണ് മുന്നിലുള്ളത്. ഒന്ന് താരത്തിന്റെ ഫോം തന്നെയാണ്. 2024-25 സീസണില്‍ 83 സേവുകളുണ്ടായിരുന്നു അമരീന്ദറിന്റെ പേരില്‍, പക്ഷേ 24 മത്സരങ്ങളില്‍ നാല് ക്ലീൻ ഷീറ്റുകള്‍ മാത്രം. കഴിഞ്ഞ സീസണില്‍ എട്ട് സ്റ്റാര്‍ട്ടില്‍ നിന്ന് 14 സേവും ഒരു ക്ലീൻ ഷീറ്റും. സേവ് പേഴ്‌സന്റേജിലും ഇടിവുണ്ടായി.

ക്ലീൻ ഷീറ്റുകളുടെ കാര്യത്തില്‍ അമരീന്ദറിനെ മാത്രം പഴിക്കാനാകില്ല, ഒഡീഷയുടെ ഡിഫൻസീവ് സ്ട്രക്‌ചറിനും കൂട്ടുത്തരവാദിത്തം ഉണ്ട്. രണ്ടാമത്തെ ചോദ്യവും ഇവിടെയാണ്. ബ്ലാസ്റ്റേഴ്‌സിന്റെ ഡിഫൻസും അമരീന്ദറും എങ്ങനെ വര്‍ക്ക് ചെയ്യുമെന്നത്. പോയ സീസണില്‍ 17 ഗോളുകളാണ് ബ്ലാസ്റ്റേഴ്‌സ് വഴങ്ങിയത്. ഇവിടെ അമരീന്ദറിന്റെ എക്‌സ്പീരിയൻസാണ് പ്രധാനം. പ്രെഷര്‍ സിറ്റുവേഷൻസിലും പൊസിഷനിങ്ങിലുമാണ് അമരീന്ദറിന്റെ മികവ് കൂടുതലായി കണ്ടിട്ടുള്ളത്. അമരീന്ദറിന്റെ പരിചയസമ്പത്തിനൊപ്പം തന്നെ ഡിഫൻസും സോളിഡായാല്‍ മാത്രമെ ഐഡിയല്‍ കോമ്പിനേഷനിലേക്ക് എത്താനാകു.

മധ്യനിര താരം മുഹമ്മദ് യാസിറാണ് മറ്റൊരു സൈനിങ്. എഫ് സി ഗോവയില്‍ നിന്നാണ് താരം ബ്ലാസ്റ്റേഴ്സിനൊപ്പം ചേരുന്നത്. വിങ്ങറായും മധ്യനിരയിലും സ്വിച്ച് ചെയ്യാൻ കഴിയുന്ന താരമാണ് യാസിര്‍. സ്കോറിങ്ങല്ല യാസിറിന്റെ ഏറ്റവും മികച്ച ക്വാളിറ്റി, മറിച്ച് വിഷനും ക്രിയേറ്റിവിറ്റിയുമാണ്. പ്രത്യേകിച്ചും ബോക്സിലേക്ക് പന്ത് നല്‍കുന്നതില്‍. യാസിറിന്റെ വരവ് ലൂണയുടെ ഭാരം കുറയ്ക്കുന്ന ഘടകമാണ്. കാരണം, കഴിഞ്ഞ കുറച്ച് സീസണിലാണ് ബ്ലാസ്റ്റേഴ്സിന്റെ അറ്റാക്കിങ്ങിലെ ക്രിയേറ്റീവ് ഹെഡ് ലൂണ മാത്രമായിരുന്നു.

യാസിറിനെ സംബന്ധിച്ച് ഡിഫൻഡേഴ്സിനെ ഡ്രാഗ് ചെയ്യാനും ഫൈനല്‍ തേഡിലേക്ക് പന്ത് കൈമാറാൻ അനായാസം കഴിയും. ഇതോടെ ലൂണയ്ക്ക് കുറച്ച് കൂടി സ്വാതന്ത്ര്യത്തോടെ കളിക്കാനും കഴിയും. ഒരുപക്ഷേ, ലൂണയുടെ ഏറ്റവും മികച്ച വേര്‍ഷൻ തന്നെ പുറത്തെടുക്കാൻ ഇത് സഹായിച്ചേക്കും. ഇരുവരേയും വെസ്റ്റ് വുഡ് എങ്ങനെ ഉപയോഗിക്കുമെന്നതാണ് പ്രധാനം. ഇരുവരും അറ്റാക്കിങ്ങിലേക്ക് ഷിഫ്റ്റ് ചെയ്താല്‍ മിഡ് ഫീല്‍ഡില്‍ സ്പേസ് ഉണ്ടാകുകയും എതിരാളികള്‍ക്ക് അവസരം ഒരുങ്ങുകയും ചെയ്യും. ഡിസിപ്ലിൻഡ് ആയിട്ടുള്ള സ്ട്രക്ചറില്‍ മിഡ്ഫീല്‍ഡ് ഒരുക്കേണ്ടതുണ്ട്.

റാംലുൻഛുങ്ങയാണ് മൂന്നാമൻ, സ്പോര്‍ട്ടിങ് ക്ലബ്ബ് ഡല്‍ഹിയില്‍ നിന്നാണ് താരം എത്തുന്നത്. ബ്ലാസ്റ്റേഴ്സിന്റെ അറ്റാക്കിങ്ങിലെ വേഗക്കാലുകള്‍, ലൂണയ്ക്കും യാസിറിനുമൊപ്പമാണ് റാംലുൻഛുങ്ങ ചേരുന്നത്. വൈഡ് ഏരിയകളില്‍ നിന്ന് പന്തുമായി കുതിച്ച് ഡയറക്റ്റ് അറ്റാക്ക് ചെയ്യുന്ന ശൈലിയുള്ള താരം, വണ്‍ ഓണ്‍ വണ്‍ സിറ്റുവേഷനുകളിലും റാംലുൻഛുങ്ങയ്ക്ക് എഡ്ജുണ്ട്. റാംലുൻഛുങ്ങ ഡിഫൻസിനെ സ്ട്രെച്ച് ചെയ്യുമ്പോള്‍ ലൂണയ്ക്കും യാസിറിനും കൂടുതല്‍ സ്പേസും ലഭിക്കും. 2024-25 സീസണില്‍ ഹൈദരാബാദ് എഫ് സിക്കായി 41 ഷോട്ടുകളാണ് താരം ഉതിര്‍ത്തത്, 15 ഓണ്‍ ടാര്‍ഗറ്റുമുണ്ടായി. രണ്ട് ഗോളും മുന്ന് അസിസ്റ്റുമായിരുന്നു ആകെ നേട്ടം.

ഇനി വരാൻ ഇരിക്കുന്ന താരങ്ങള്‍. മുൻ അസ്റ്റണ്‍ വില്ല താരമായ ആന്ദ്രെ ഗ്രീൻ. പ്രീമിയര്‍ ലീഗിലും യൂറോപ്പിലും പരിചയസമ്പത്തുള്ള ആന്ദ്ര ഗ്രീനിന് ഇരുപാര്‍ശ്വങ്ങളിലും സ്ട്രൈക്കറായും കളിക്കാൻ കഴിയും. പക്ഷേ, അമരീന്ദറിന് സമാനമായി ആന്ദ്രെയും തന്റെ കരിയറിന്റെ ഏറ്റവും മികച്ച ഫോമില്‍ അല്ല നിലവില്‍. കഴിഞ്ഞ സീസണില്‍ ഗ്രീക്ക് ലീഗില്‍ പാൻസെറായിക്കോസിനായി ഒൻപത് മത്സരങ്ങളിലായി ഒരു അസിസ്റ്റ് മാത്രമാണ് നേടാൻ കഴിഞ്ഞത്. താരത്തിന്റെ ബെസ്റ്റ് വേര്‍ഷൻ വെസ്റ്റ്‌വുഡിന് പുറത്തെടുക്കാൻ സാധിക്കുമെങ്കില്‍ ബ്ലാസ്റ്റേഴ്‌സിന്റെ ഫ്രണ്ട് ലൈനിന്റെ കാര്യത്തില്‍ ആശങ്കകള്‍ വേണ്ട.

മലയാളി താരമായ മുഹമ്മദ് സനാൻ. നിലവില്‍ ഇന്ത്യൻ ഫുട്ബോളിലെ തന്നെ ഏറ്റവും മികച്ച യുവതാരങ്ങളിലൊരാള്‍. നാച്ചുറലായുള്ള അറ്റാങ്ങിങ് എബിലിറ്റിയും എക്സെപ്ഷണല്‍ ഡ്രിബിളിങ് കപ്പാസിറ്റിയുമുള്ള താരം. കഴിഞ്ഞ മൂന്ന് സീസണിലായി ഏഴ് ഗോളും ഒരു അസിസ്റ്റും സനാന്റെ പേരിലുണ്ട്. പ്രൊമിസിങ്ങായുള്ള ഒരു യങ് ടാലന്റില്‍ നിന്ന് വെസ്റ്റ്‌വുഡിന്റെ അറ്റാക്കിങ് വെപ്പണായി മാറാൻ ഡ്രിബിളിങ്ങുകള്‍ ഗോളിലേക്കും അസിസ്റ്റുകളിലേക്കും പരിവര്‍ത്തനപ്പെടുത്തേണ്ടതുണ്ട്...

ഗോളിൽ ആറാടി ഉറുഗ്വോ; അനിരുദ്ധ് ഥാപ്പയുടെ ചരിത്ര ഗോൾ, സൗഹൃപ്പോരില്‍ ഇന്ത്യക്ക് വമ്പൻ തോല്‍വി

Gopalakrishnan C — Tue, 06 Oct 2026 23:02:00 +0530

കൊൽക്കത്ത: അന്താരാഷ്ട്ര സൗഹൃദ മത്സരത്തില്‍ മുന്‍ ലോക ചാമ്പ്യൻമാരായ ഉറുഗ്വേക്കെതിരെ ഇന്ത്യക്ക് വമ്പന്‍ തോല്‍വി. കൊല്‍ക്കത്ത സാൾട്ട് ലേക് സ്റ്റേഡിയത്തിൽ നടന്ന മത്സരത്തില്‍ ഒന്നിനെതിരെ ആറ് ഗോളുകൾക്കാണ് (6-1) ഉറുഗ്വേ ഇന്ത്യയെ തകർത്തുവിട്ടത്. മത്സരത്തിന്‍റെ ആദ്യ പകുതിയില്‍ അനിരുദ്ധ് ഥാപ്പ നേടിയ ഗോളില്‍ ഉറുഗ്വോയെ കുറച്ചുനേരത്തേക്കെങ്കിലും സമനിലയില്‍ പിടിക്കാനയത് ആരാധകരെ ആവേശത്തിലാഴ്ത്തിയെങ്കിലും പിന്നീട് ഇന്ത്യ കളിമറന്നത് നിരാശയായി.

ഡാർവിൻ നുണെസിന്‍റെ പെനാൽറ്റി ഗോളിലൂടെ 11-ാം മിനിറ്റിൽ തന്നെ ഉറുഗ്വേ മുന്നിലെത്തി. എന്നാൽ 22-ാം മിനിറ്റിൽ അനിരുദ്ധ് ഥാപ്പ ഇന്ത്യക്ക് സമനില ഗോൾ സമ്മാനിച്ചു. 1982-ൽ മാനസ് ഭട്ടാചാർജിക്ക് ശേഷം ഉറുഗ്വെയ്‌ക്കെതിരെ ഗോൾ നേടുന്ന രണ്ടാമത്തെ ഇന്ത്യൻ താരമാണ് അനിരുദ്ധ് ഥാപ്പ. 35 മിനിറ്റോളം മഴ മൂലം കളി തടസപ്പെട്ടശേഷം കളി പുനരാരംഭിച്ചതോടെയാണ് ഉറുഗ്വേ ഗോള്‍മഴ പെയ്യിച്ചത്. 28-ാം മിനിറ്റില്‍ മാക്സിമിലിയാനോ അറൗഹോയുടെ ഗോളിലൂടെ ലീഡ് തിരിച്ചുപിടിച്ച ഉറുഗ്വോ 2-1നാണ് ഇടവേളക്ക് പിരിഞ്ഞത്.

India equalise against Uruguay!!!!!

India 1-1 Uruguay https://t.co/DdOIvnrJig

— Whoever embeds this is a Gandu (@Redhood194) October 6, 2026

രണ്ടാം പകുതിയുടെ തുടക്കത്തില്‍ 53ാം മിനിറ്റില്‍ റോഡ്രിഗോ സലാസറിന്‍റെയും ഗോളിലൂടെ ലീഡുയര്‍ത്തിയ ഉറുഗ്വോ 59-ാം മിനിറ്റില്‍ മാക്സിമിലിയാനോയുടെ രണ്ടാം ഗോളിലൂടെ വിജയം ഉറപ്പിച്ചു. പിന്നാലെ 71ാം മിനിറ്റില്‍ സനാബ്രിയയും 86-ാം മിനിറ്റില്‍ റോഡ്രിഗോ അഗ്വിറെയും ചേര്‍ന്ന് ഉറുഗ്വോയുടെ ഗോള്‍പ്പട്ടിക തികച്ചു.

Football experts!!! How on earth is this not offside? India 1-2 down to Uruguay at the end of the first half. https://t.co/P1CBs91mPI

— Psycho (@ThePsychoIN) October 6, 2026

ബ്രസീലിനെതിരെയുള്ള 4-0 തോൽവിക്ക് ശേഷം ബംഗാളിന്‍റെ ഫുട്ബോൾ തലസ്ഥാനമായ കൊൽക്കത്തയിൽ നടന്ന മത്സരത്തിൽ പ്രതിരോധ നിരയുടെ ഗുരുതരമായ പിഴവുകളാണ് ഇന്ത്യക്ക് വീണ്ടും വൻ തിരിച്ചടിയായത്. പാനമയ്‌ക്കെതിരെ നടന്ന സൗഹൃദ മത്സരത്തില്‍ സമനില നേടിയെങ്കിലും (1-1) അവസാന രണ്ട് മത്സരങ്ങളിൽ നിന്നായി 10 ഗോളുകളാണ് ഇന്ത്യൻ പ്രതിരോധനിര വഴങ്ങിയത്.

| Uruguay are cooking Indian team even harder than Brazil did

4-1 already, with 30 minutes still to play!! https://t.co/3RFCRQD75v

— Winna F.C. (@WinnaFC) October 6, 2026

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ജേഴ്സി പിൻവലിക്കാൻ ഫിഫ നിയമം അനുവദിക്കില്ല; മെസി അനശ്വരമാക്കിയ 10-ാം നമ്പര്‍ ജേഴ്സിക്ക് പിന്‍ഗാമിയെ തേടി ആരാധകര്‍

Gopalakrishnan C — Thu, 08 Oct 2026 16:44:06 +0530

ബ്യൂണസ് അയേഴ്സ്: ലിയോണൽ മെസി അന്താരാഷ്ട്ര ഫുട്ബോളിൽ നിന്ന് പടിയിറങ്ങിയതോടെ ആരാകും അര്‍ജന്‍റീനയുടെ വിഖ്യാതമായ പത്താം നമ്പര്‍ ജേഴ്സി ഇനി അണിയുക എന്നതാണിപ്പോള്‍ ആരാധകര്‍ക്കിടയിലെ പ്രധാന ചോദ്യം. ഫിഫയുടെ ഔദ്യോഗിക ടൂർണമെന്‍റുകളിലെ നിയമമനുസരിച്ച് ടീമിലെ കളിക്കാർക്ക് 1 മുതൽ 26 വരെയുള്ള ജേഴ്സി നമ്പറുകൾ ക്രമമായി നൽകേണ്ടതുണ്ട്. അതിനാൽ തന്നെ മെസിയോടുള്ള ആദരസൂചകമായി പത്താം നമ്പർ ജേഴ്സിക്ക് പിന്‍വലിക്കാൻ അർജന്‍റീനയ്ക്ക് സാധിക്കില്ല.

തുടക്കത്തിൽ പരിശീലകൻ ലിയോണൽ സ്കലോണി പത്താം നമ്പർ ജേഴ്സി ആർക്കും നൽകാതെ മാറ്റി നിർത്തിയിരുന്നെങ്കിലും അത് ശാശ്വതമായ ഒരു പരിഹാരമല്ല. അതുകൊണ്ടുതന്നെ അർജന്‍റീനയുടെ പുതിയ പത്താമനായി 22-കാരനായ മധ്യനിര താരം നിക്കോ പാസിനെയാണ് ഫുട്ബോൾ ലോകം പ്രധാനമായും ഉറ്റുനോക്കുന്നത്. നിലവിൽ സീരി എ ക്ലബ്ബായ കോമോയ്ക്കായി മികച്ച പ്രകടനം പുറത്തെടുക്കുന്ന ഈ യുവതാരം അർജന്‍റീന ദേശീയ ടീമിലും തന്‍റെ സ്വാധീനം ഉറപ്പിച്ചു കഴിഞ്ഞു.

മിന്നുന്ന ഡ്രിബ്ലിംഗും ഡിഫൻസീവ് ലൈനുകൾക്കിടയിലൂടെ പന്ത് ബോക്സിലേക്ക് എത്തിക്കാനുള്ള അസാധാരണ കഴിവും നിക്കോ പാസിനെ വ്യത്യസ്തനാക്കുന്നു. ബൊളീവിയ, ബുർക്കിന ഫാസോ എന്നിവർക്കെതിരായ മത്സരങ്ങളിൽ തുടർച്ചയായി ഗോൾ നേടി നിക്കോ പാസ് തന്‍റെ മികവ് തെളിയിച്ചിട്ടുണ്ട്. മെസിയുടെ വിടവാങ്ങൽ മത്സരത്തിൽ നിക്കോ പാസ് നേടിയ മഴവില്‍ ഗോളിന് വഴിയൊരുക്കിയത് മെസി തന്നെയായിരുന്നു.

ഒരു തലമുറ അടുത്ത തലമുറയ്ക്ക് ബാറ്റൺ കൈമാറുന്നതിന്‍റെ സൂചനയായാണ് ഫുട്ബോൾ ആരാധകര്‍ ആ നിമിഷത്തെ വിലയിരുത്തുന്നത്.നിക്കോ പാസിന്‍റെ പേര് ഉയർന്നു കേള്‍ക്കുന്നുണ്ടെങ്കിലും മെസിയുടെ ഐക്കണിക് പത്താം നമ്പർ ജേഴ്സി ഔദ്യോഗികമായി ആർക്ക് നൽകുമെന്ന കാര്യത്തിൽ അർജന്‍റീന ഫുട്ബോൾ അസോസിയേഷൻ ഇതുവരെ അന്തിമ തീരുമാനമെടുത്തിട്ടില്ല.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

മുന്നേറ്റനിരയ്ക്ക് പുതിയ വേഗത; റാംലുൻഛുങ്ങയെ ടീമിലെത്തിച്ച് കേരള ബ്ലാസ്റ്റേഴ്‌സ്

Gopalakrishnan C — Mon, 05 Oct 2026 18:00:06 +0530

കൊച്ചി: ഐഎസ്എൽ പതിമൂന്നാം സീസണ് മുന്നോടിയായി മുന്നേറ്റനിര കൂടുതൽ ശക്തമാക്കാൻ ഇന്ത്യൻ വിങ്ങർ റാംലുൻഛുങ്ങയെ (ഛുങ്ങ ഹ്മാർ) സ്വന്തമാക്കി കേരള ബ്ലാസ്റ്റേഴ്‌സ് എഫ്‌‌സി. എസ് സി ഡൽഹിയിൽ നിന്നാണ് 25 കാരനായ മിസോറം താരം ബ്ലാസ്റ്റേഴ്സിന്‍റെ ഭാഗമാകുന്നത്. 2027-28 സീസൺ വരെയുള്ള കരാറിലാണ് താരം ഒപ്പുവെച്ചിരിക്കുന്നത്.

മിസോറമിലെ കൊലാസിബ് സ്വദേശിയായ റാംലുൻഛുങ്ങ 2020-ൽ ഐസ്വാൾ എഫ്‌സിയിലൂടെയാണ് പ്രൊഫഷണൽ കരിയറിന് തുടക്കമിട്ടത്. തുടർന്ന് ഹൈദരാബാദ് എഫ്‌സിയിലെത്തിയ താരം 2022-23 സീസണിൽ ലോൺ അടിസ്ഥാനത്തിൽ ശ്രീനിധി ഡെക്കാനായി മികച്ച പ്രകടനം പുറത്തെടുത്തു. ശ്രീനിധിക്കായി 22 ലീഗ് മത്സരങ്ങളിൽ നിന്ന് രണ്ട് ഗോളുകളും ആറ് അസിസ്റ്റുകളും താരം നേടി. ഹൈദരാബാദ് എഫ്‌സിയിൽ തിരിച്ചെത്തിയ ശേഷം 2023-24 സീസണിൽ ഐഎസ്എല്ലിലും അരങ്ങേറ്റം കുറിച്ചു. വിംഗുകളിലൂടെ അതിവേഗം പന്തുമായി കുതിക്കാനും എതിർ പ്രതിരോധനിരയെ അനായാസം മറികടക്കാനുമുള്ള മിടുക്കാണ് റാംലുൻഛുങ്ങയുടെ പ്രധാന കരുത്ത്. മികച്ച ബോൾ കൺട്രോളും വേഗതയും അറ്റാക്കിംഗ് തേർഡിൽ താരത്തെ കൂടുതൽ അപകടകാരിയാക്കുന്നു. മുന്നേറ്റനിരയിൽ ഒന്നിലധികം പൊസിഷനുകളിൽ ഒരുപോലെ തിളങ്ങാൻ സാധിക്കുമെന്നത് ബ്ലാസ്റ്റേഴ്സിന്‍റെ ആക്രമണങ്ങൾക്ക് പുതിയ മാനങ്ങൾ നൽകും.

ഐ ലീഗിലെയും ഐഎസ്എല്ലിലെയും അനുഭവസമ്പത്തുമായി എത്തുന്ന റാംലുൻഛുങ്ങയുടെ വരവ് വരാനിരിക്കുന്ന സീസണിൽ ടീമിന് വലിയ കരുത്താകും. ഐഎസ്എൽ സീസണിന് മുന്നോടിയായി ചെന്നൈയിൽ നടക്കുന്ന പ്രീസീസൺ ക്യാമ്പിൽ ചേർന്ന താരം സഹതാരങ്ങൾക്കൊപ്പം പരിശീലനം ആരംഭിച്ചുകഴിഞ്ഞു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക