Asianet News Malayalam

ഒരുലക്ഷം രൂപയിൽ താഴെ മികച്ച വീഡിയോ റെക്കോർഡിങ് ഫോണുകൾ; ഐഫോൺ മുതൽ പിക്സൽ വരെ

Prashobh Prasannan — Tue, 22 Sep 2026 10:39:31 +0530

സ്‍മാർട്ട്ഫോണുകൾ ഇന്ന് ആശയവിനിമയത്തിനുള്ള ഉപകരണങ്ങൾ മാത്രമല്ല. മികച്ച ക്യാമറകളുള്ള ഫോണുകൾ ഉപയോഗിച്ച് പ്രൊഫഷണൽ നിലവാരത്തിലുള്ള വീഡിയോകൾ വരെ എളുപ്പത്തിൽ ചിത്രീകരിക്കാം. വിലകുറഞ്ഞ മോഡലുകൾ മുതൽ പ്രീമിയം ഫോണുകൾ വരെ പിന്നിലും മുന്നിലും മികച്ച ക്യാമറകൾ ലഭ്യമാണ്. ഫ്ലാഗ്ഷിപ്പ്, പ്രീമിയം മിഡ് റേഞ്ച് ഫോണുകളിൽ പലതും 4K/60 എഫ്പിഎസ് വീഡിയോ റെക്കോർഡിങ് പിന്തുണയ്ക്കുമ്പോൾ ചില മോഡലുകൾ 8K വീഡിയോ റെക്കോർഡിങ്ങും വാഗ്ദാനം ചെയ്യുന്നു. യൂട്യൂബ് കണ്ടന്റ് ക്രിയേറ്റർമാർക്കും സോഷ്യൽ മീഡിയയിൽ വീഡിയോകൾ പങ്കുവയ്ക്കുന്നവർക്കും മികച്ച ക്യാമറയുള്ള സ്മാർട്ട്ഫോൺ ഏറെ പ്രയോജനകരമാണ്. ഇന്ത്യയിൽ 1,00,000 രൂപയിൽ താഴെ വിലയിൽ മികച്ച വീഡിയോ റെക്കോർഡിങ് ശേഷിയുള്ള നിരവധി ഫോണുകൾ ലഭ്യമാണ്. അവയിൽ ശ്രദ്ധേയമായ 5 മോഡലുകൾ പരിചയപ്പെടാം.

ഐഫോൺ 17

ആപ്പിളിന്റെ ഐഫോൺ 17 ആണ് പട്ടികയിലെ പ്രധാന മോഡലുകളിലൊന്ന്. എ19 ചിപ്സെറ്റിന്റെ കരുത്തിൽ പ്രവർത്തിക്കുന്ന ഫോണിൽ 48 മെഗാപിക്സൽ പ്രധാന ക്യാമറയും 48 മെഗാപിക്സൽ അൾട്രാവൈഡ് ക്യാമറയുമുണ്ട്. 4K റെസല്യൂഷനിൽ 60 എഫ്പിഎസ് വരെ വീഡിയോ റെക്കോർഡ് ചെയ്യാം. 18 മെഗാപിക്സൽ മുൻ ക്യാമറയ്ക്കൊപ്പം സെന്റർ സ്റ്റേജ് ഫീച്ചറും ഫോണിലുണ്ട്. 256 ജിബി സ്റ്റോറേജുള്ള അടിസ്ഥാന മോഡലിന് 99,900 രൂപ മുതലാണ് ഇന്ത്യയിലെ വില.

സാംസങ് ഗാലക്സി എസ്26

സാംസങിന്റെ ഏറ്റവും പുതിയ എസ് സീരീസ് മോഡലായ ഗാലക്സി എസ്26 എക്സിനോസ് 2600 ചിപ്സെറ്റിലാണ് പ്രവർത്തിക്കുന്നത്. 50 മെഗാപിക്സൽ പ്രധാന ക്യാമറയ്ക്കൊപ്പം 10 മെഗാപിക്സൽ ടെലിഫോട്ടോ, 12 മെഗാപിക്സൽ അൾട്രാവൈഡ് ക്യാമറകളും ഫോണിലുണ്ട്. 8K റെസല്യൂഷനിൽ 30 എഫ്പിഎസ് വരെയും 4Kയിൽ 60 എഫ്പിഎസ് വരെയും വീഡിയോ റെക്കോർഡ് ചെയ്യാൻ സാധിക്കും. 256 ജിബി പതിപ്പിന് 79,999 രൂപ മുതലാണ് വില.

വിവോ എക്സ്300 എഫ്ഇ

സ്നാപ്ഡ്രാഗൺ 8 ജെൻ 5 ചിപ്സെറ്റുമായി എത്തിയിരിക്കുന്ന വിവോ എക്സ്300 എഫ്ഇയിൽ 50 മെഗാപിക്സൽ പ്രധാന ക്യാമറയും 50 മെഗാപിക്സൽ ടെലിഫോട്ടോ ക്യാമറയും 8 മെഗാപിക്സൽ അൾട്രാവൈഡ് ക്യാമറയുമുണ്ട്. 8K വീഡിയോ റെക്കോർഡിങ് പിന്തുണയ്ക്കുന്ന ഫോണിൽ 50 മെഗാപിക്സൽ മുൻ ക്യാമറയും ലഭ്യമാണ്. 256 ജിബി അടിസ്ഥാന മോഡലിന് 89,999 രൂപ മുതലാണ് വില.

ഒപ്പോ ഫൈൻഡ് എക്സ്9

ഒപ്പോയുടെ ഫൈൻഡ് എക്സ്9-ൽ 50 മെഗാപിക്സൽ വീതമുള്ള പ്രധാന, അൾട്രാവൈഡ്, ടെലിഫോട്ടോ ക്യാമറകളടങ്ങിയ ട്രിപ്പിൾ പിൻ ക്യാമറ സജ്ജീകരണമാണുള്ളത്. മീഡിയടെക് ഡൈമെൻസിറ്റി 9500 ചിപ്സെറ്റാണ് ഫോണിന് കരുത്തേകുന്നത്. 4K റെസല്യൂഷനിൽ 120 എഫ്പിഎസ് വരെ വീഡിയോ റെക്കോർഡ് ചെയ്യാൻ കഴിയും. 7,025 എംഎഎച്ച് ബാറ്ററിയും 80 വാട്ട് വയർഡ്, 50 വാട്ട് വയർലെസ് ചാർജിങ് പിന്തുണയും ഫോണിലുണ്ട്. 256 ജിബി മോഡലിന് 84,999 രൂപയാണ് വില.

ഗൂഗിൾ പിക്സൽ 11

ഗൂഗിളിന്റെ പിക്സൽ 11 ആണ് പട്ടികയിലെ മറ്റൊരു ശ്രദ്ധേയ മോഡൽ. ഗൂഗിളിന്റെ ടെൻസർ ജി6 ചിപ്സെറ്റിൽ പ്രവർത്തിക്കുന്ന ഫോണിൽ 48 മെഗാപിക്സൽ പ്രധാന ക്യാമറ, 13 മെഗാപിക്സൽ അൾട്രാവൈഡ് ക്യാമറ, 10.8 മെഗാപിക്സൽ ടെലിഫോട്ടോ ക്യാമറ എന്നിവയുണ്ട്. 4K റെസല്യൂഷനിൽ 60 എഫ്പിഎസ് വരെ വീഡിയോ റെക്കോർഡ് ചെയ്യാം. 12 ജിബി റാമും 256 ജിബി, 512 ജിബി സ്റ്റോറേജ് ഓപ്ഷനുകളും ലഭ്യമാണ്. 256 ജിബി പതിപ്പിന് 89,999 രൂപ മുതലാണ് ഇന്ത്യയിലെ വില.

വീഡിയോ റെക്കോർഡിങ്ങിന് ഏത് ഫോൺ?

ഒരു ലക്ഷം രൂപയിൽ താഴെ മികച്ച വീഡിയോ റെക്കോർഡിങ് ശേഷിയുള്ള നിരവധി ഫോണുകളാണ് നിലവിൽ ഇന്ത്യൻ വിപണിയിലുള്ളത്. 8K വീഡിയോ ആവശ്യമുള്ളവർക്ക് സാംസങ് ഗാലക്സി എസ്26, വിവോ എക്സ്300 എഫ്ഇ തുടങ്ങിയ മോഡലുകൾ പരിഗണിക്കാം. ഉയർന്ന ഫ്രെയിം റേറ്റിലുള്ള 4K വീഡിയോ ആവശ്യമുള്ളവർക്ക് ഒപ്പോ ഫൈൻഡ് എക്സ്9 ശ്രദ്ധേയമായ ഓപ്ഷനാണ്. അതേസമയം, ആപ്പിളിന്റെയും ഗൂഗിളിന്റെയും മോഡലുകളും മികച്ച വീഡിയോ റെക്കോർഡിങ് അനുഭവം നൽകുന്നു.

ഞെട്ടിക്കാൻ ഒപ്പോ കെ14 പ്ലസ് വരുന്നു; ഫീച്ചറുകൾ അറിയാമോ?

Prashobh Prasannan — Fri, 25 Sep 2026 16:41:56 +0530

മിഡ് റേഞ്ച് സ്‍മാർട്ട്ഫോൺ വിപണിയിൽ പുതിയ മോഡലുമായി ഒപ്പോ. കെ14 പ്ലസ് സ്‍മാർട്ട്ഫോൺ ഇന്ത്യയിൽ സെപ്റ്റംബർ 29ന് അവതരിപ്പിക്കും. ഉച്ചയ്ക്ക് 12 മണിക്കാണ് ലോഞ്ച്. ഫ്ലിപ്‍കാർട്ടിൽ ഒരുക്കിയ പ്രത്യേക മൈക്രോസൈറ്റിലൂടെ ഫോണിന്റെ ഡിസൈൻ ഉൾപ്പെടെയുള്ള പ്രധാന ഫീച്ചറുകൾ ഒപ്പോ പുറത്തുവിട്ടിട്ടുണ്ട്.

കെ സീരീസിലെ നാലാമൻ

ഇന്ത്യയിലെ ഒപ്പോ കെ സീരീസിലെ നാലാമത്തെ സ്‍മാർട്ട്ഫോണായിരിക്കും കെ14 പ്ലസ്. അടുത്തിടെ പുറത്തിറക്കിയ കെ14 ലൈറ്റ്, കെ14 എക്സ് എന്നീ മോഡലുകൾക്ക് പിന്നാലെയാണ് പുതിയ ഫോൺ എത്തുന്നത്. ഫ്ലിപ്‍കാർട്ടിന്റെ ബിഗ് ബില്യൺ ഡേയിസ് വിൽപ്പനയുടെ ഭാഗമായും കെ14 പ്ലസ് ലഭ്യമാകും. ലോഞ്ചിനോട് അനുബന്ധിച്ച് പ്രത്യേക ഓഫറുകളും കമ്പനി പ്രഖ്യാപിക്കുമെന്നാണ് പ്രതീക്ഷിക്കുന്നത്.

144 ഹെർട്സ് അമോലെഡ് ഡിസ്പ്ലേ

6.77 ഇഞ്ച് വലുപ്പമുള്ള 1.5കെ അമോലെഡ് ഡിസ്പ്ലേയാണ് കെ14 പ്ലസിൽ നൽകിയിരിക്കുന്നത്. 144 ഹെർട്സ് റിഫ്രഷ് റേറ്റും 3600 നിറ്റ് വരെ പീക്ക് ബ്രൈറ്റ്നസും ഡിസ്പ്ലേയുടെ പ്രത്യേകതകളാണ്. മീഡിയടെക് ഡൈമെൻസിറ്റി 7360 മാക്സ് ചിപ്സെറ്റാണ് ഫോണിന് കരുത്തേകുന്നത്. 8 ജിബി റാമും 256 ജിബി സ്റ്റോറേജുമുള്ള പതിപ്പാണ് നിലവിൽ സ്ഥിരീകരിച്ചിരിക്കുന്നത്. കളർഒഎസ് 16 ആയിരിക്കും ഫോണിന്റെ ഓപ്പറേറ്റിങ് സിസ്റ്റം.

50 മെഗാപിക്സൽ ക്യാമറ

പിന്നിൽ ഡ്യുവൽ ക്യാമറ സജ്ജീകരണമാണ് ഒപ്പോ നൽകിയിരിക്കുന്നത്. ഒപ്റ്റിക്കൽ ഇമേജ് സ്റ്റെബിലൈസേഷൻ അഥവാ ഒഐഎസ് പിന്തുണയുള്ള 50 മെഗാപിക്സൽ പ്രൈമറി ക്യാമറയാണ് ഇതിലെ പ്രധാന ക്യാമറ. സെൽഫികൾക്കായി 16 മെഗാപിക്സൽ ഫ്രണ്ട് ക്യാമറയും ലഭിക്കും. 4കെ വീഡിയോ റെക്കോർഡിങ്ങിനും ഫോൺ പിന്തുണ നൽകും.

8000 എംഎഎച്ച് ബാറ്ററി

കെ14 പ്ലസിന്റെ പ്രധാന സവിശേഷതകളിലൊന്ന് 8000 എംഎഎച്ച് ബാറ്ററിയാണ്. 45 വാട്ട് ഫാസ്റ്റ് ചാർജിങ് പിന്തുണയോടെയാണ് ബാറ്ററി എത്തുന്നത്. ദീർഘനേരം ഉപയോഗിക്കുമ്പോൾ ഫോൺ ചൂടാകുന്നത് നിയന്ത്രിക്കുന്നതിനായി 5000 ചതുരശ്ര മില്ലിമീറ്റർ വലുപ്പമുള്ള വേപ്പർ ചേംബർ കൂളിങ് സംവിധാനവും നൽകിയിട്ടുണ്ട്.

ഐപി69കെ റേറ്റിങ്ങും സ്റ്റീരിയോ സ്പീക്കറുകളും

ഡ്യുവൽ സ്റ്റീരിയോ സ്പീക്കറുകൾ, ഇൻ-ഡിസ്പ്ലേ ഫിംഗർപ്രിന്റ് സ്‍കാനർ എന്നിവയും കെ14 പ്ലസിലുണ്ടാകും. പൊടിയും വെള്ളവും പ്രതിരോധിക്കുന്ന ഐപി69കെ റേറ്റിങ്ങും ഫോണിനുണ്ട്. ഡാമേജ് പ്രൂഫ് 360 ആർമർ ബോഡി ഡിസൈനും 6 വർഷത്തെ സ്‍മൂത്ത്നെസ് പ്രൊട്ടക്ഷൻ സർട്ടിഫിക്കേഷനും ഫോണിന്റെ മറ്റൊരു പ്രത്യേകതയാണ്.

വില പ്രഖ്യാപിച്ചിട്ടില്ല

കെ14 പ്ലസിന്റെ ഇന്ത്യയിലെ വില ഒപ്പോ ഇതുവരെ പുറത്തുവിട്ടിട്ടില്ല. ഫോണിന്റെ മുഴുവൻ മെമ്മറി വേരിയന്റുകളും കമ്പനി സ്ഥിരീകരിച്ചിട്ടില്ല. ഫ്ലിപ്കാർട്ടിലൂടെ മാത്രമായിരിക്കും വിൽപ്പന. ഫോണിന്റെ നിറങ്ങളുടെ ഔദ്യോഗിക പേരുകളും ഇതുവരെ വെളിപ്പെടുത്തിയിട്ടില്ല. സെപ്റ്റംബർ 29ന് നടക്കുന്ന ലോഞ്ച് ചടങ്ങിൽ വില, വിൽപ്പന ഓഫറുകൾ, മറ്റ് സവിശേഷതകൾ എന്നിവ സംബന്ധിച്ച കൂടുതൽ വിവരങ്ങൾ ഒപ്പോ പുറത്തുവിടും.

ഐഫോൺ ഡ്യൂവോയ്ക്ക് പിന്നാലെ വമ്പൻ ഐഫോൺ ഡ്യൂവോ മാക്സ്; മടക്കാവുന്ന ഫോണുകളുടെ നിര വിപുലീകരിക്കാൻ ആപ്പിൾ

Prashobh Prasannan — Tue, 15 Sep 2026 12:06:23 +0530

കഴിഞ്ഞദിവസമാണ് ആപ്പിളിന്‍റെ മൂന്നുലക്ഷം രൂപ വിലയുള്ള ഐഫോൺ ഡ്യൂവോ വിപണിയിലെത്തിയത്. ഇതിന്‍റെ ആവേശം കെട്ടടങ്ങും മുമ്പേ ഇപ്പോഴിതാ അടുത്ത തലമുറ മടക്കാവുന്ന ഐഫോൺ മോഡലുകളെക്കുറിച്ചുള്ള അഭ്യൂഹങ്ങൾ സജീവമാകുന്നു. ഐഫോൺ ഡ്യൂവോ ശ്രേണി വരും വർഷങ്ങളിൽ കൂടുതൽ മോഡലുകളിലേക്ക് വ്യാപിപ്പിക്കാൻ ആപ്പിൾ ആലോചിക്കുന്നതായാണ് പുതിയ റിപ്പോർട്ടുകൾ. ഇതിൽ ഏറ്റവും ശ്രദ്ധേയമായ സാധ്യത വലിയ ഡിസ്പ്ലേയുമായി എത്തിയേക്കാവുന്ന ഐഫോൺ ഡ്യൂവോ മാക്സ് ആണ്. കൂടാതെ കുറഞ്ഞ വിലയിൽ കൂടുതൽ ഉപയോക്താക്കളെ ലക്ഷ്യമിട്ട് ഡ്യൂവോ എസ്ഇ മോഡലും, ക്ലാംഷെൽ മാതൃകയിൽ രൂപകൽപ്പന ചെയ്ത ചെറിയ ഡ്യൂവോ മിനി മോഡലും ആപ്പിൾ അവതരിപ്പിച്ചേക്കുമെന്നും റിപ്പോർട്ടിൽ പറയുന്നു.

‘ഡ്യൂവോ’ എന്ന പേര് കൂടുതൽ സാധ്യതകൾ തുറക്കുന്നു

ബ്ലൂംബെർഗിലെ മാർക്ക് ഗുർമാൻ പറയുന്നതനുസരിച്ച്, മടക്കാവുന്ന ഫോണിന് ‘അൾട്രാ’ എന്ന പേര് നൽകുന്നതിന് പകരം ‘ഡ്യൂവോ’ എന്ന പേര് തിരഞ്ഞെടുത്തത് ഭാവിയിൽ കൂടുതൽ മോഡലുകൾ അവതരിപ്പിക്കാൻ ആപ്പിളിന് സൗകര്യമൊരുക്കും. ഫോൺ പുറത്തിറങ്ങുന്നതിന് മുമ്പ് ആപ്പിളിലെ ചില ജീവനക്കാർ ഉപകരണത്തെ ‘ഐഫോൺ അൾട്രാ’ എന്ന് വിളിച്ചിരുന്നതായും റിപ്പോർട്ടുകളുണ്ടായിരുന്നു. എന്നാൽ ഒടുവിൽ ആപ്പിൾ ‘ഐഫോൺ ഡ്യൂവോ’ എന്ന പേരാണ് തിരഞ്ഞെടുത്തത്. ‘എയർ’, ‘പ്രോ’ തുടങ്ങിയ പേരുകളുമായി ചേരുന്ന രീതിയിലുള്ള മൂന്ന് അക്ഷരങ്ങളുള്ള പേര് എന്ന നിലയിൽ ‘ഡ്യൂവോ’ ഭാവിയിലെ മോഡൽ വികസനത്തിന് കൂടുതൽ വഴികൾ തുറക്കുമെന്നാണ് ഗുർമാന്റെ വിലയിരുത്തൽ. ഉദാഹരണത്തിന്, വലിയ സ്ക്രീനുള്ള പതിപ്പിന് ഐഫോൺ ഡ്യൂവോ മാക്സ് എന്ന പേര് സ്വാഭാവികമായും അനുയോജ്യമാകാം. കുറഞ്ഞ ഫീച്ചറുകളുള്ള മോഡലിന് ഡ്യൂവോ എസ്ഇ എന്നും ചെറിയ ക്ലാംഷെൽ രൂപകൽപ്പനയുള്ള മോഡലിന് ഡ്യൂവോ മിനി എന്നും പേര് നൽകാനും സാധ്യതയുണ്ട്.

ഐഫോൺ ഡ്യൂവോയുടെ പ്രധാന സവിശേഷതകൾ

വിടർത്തുമ്പോൾ 7.6 ഇഞ്ച് വലുപ്പമുള്ള എൽടിപിഒ സൂപ്പർ റെറ്റിന എക്സ്ഡിആർ ഒഎൽഇഡി ഡിസ്പ്ലേയാണ് ഐഫോൺ ഡ്യൂവോയിൽ നൽകിയിരിക്കുന്നത്. 120 ഹെർട്സ് പുതുക്കൽ നിരക്ക്, എച്ച്ഡിആർ10, ഡോൾബി വിഷൻ എന്നിവ ഡിസ്പ്ലേ പിന്തുണയ്ക്കുന്നു. പരമാവധി 3,000 നിറ്റ്സ് തെളിച്ചം ലഭിക്കുന്ന സ്ക്രീനിൽ നാനോ ടെക്സ്ചർ ഫിനിഷും പ്രതിഫലനം കുറയ്ക്കുന്നതിനുള്ള പ്രത്യേക കോട്ടിങ്ങും നൽകിയിട്ടുണ്ട്. ഫോൺ മടക്കിയിരിക്കുമ്പോൾ ഉപയോഗിക്കാനായി 5.4 ഇഞ്ച് കവർ ഡിസ്പ്ലേയും ലഭിക്കും.

രണ്ട് ടിബി വരെ സ്റ്റോറേജ്

രണ്ട് നാനോമീറ്റർ സാങ്കേതികവിദ്യയിൽ നിർമിച്ച ആപ്പിളിന്റെ എ20 പ്രോ ചിപ്പാണ് ഫോണിന് കരുത്തേകുന്നത്. 12 ജിബി റാമിനൊപ്പം പരമാവധി 2 ടിബി വരെ സ്റ്റോറേജ് ലഭ്യമാണ്. ഐഒഎസ് 27ൽ പ്രവർത്തിക്കുന്ന ഫോണിൽ 6 കോർ സിപിയുവും 7 കോർ ആപ്പിൾ ജിപിയുവുമാണുള്ളത്.

48 മെഗാപിക്സൽ ഇരട്ട ക്യാമറ

പിന്നിൽ ഇരട്ട ക്യാമറ സംവിധാനമാണ് ഐഫോൺ ഡ്യൂവോയിലുള്ളത്. വൈഡ് ആംഗിൾ ലെൻസും പിഡിഎഎഫും സെൻസർ-ഷിഫ്റ്റ് ഒപ്റ്റിക്കൽ ഇമേജ് സ്റ്റെബിലൈസേഷനുമുള്ള 48 മെഗാപിക്സൽ പ്രധാന ക്യാമറയ്ക്കൊപ്പം 120 ഡിഗ്രി ദൃശ്യപരിധിയുള്ള മറ്റൊരു 48 മെഗാപിക്സൽ അൾട്രാവൈഡ് ക്യാമറയും നൽകിയിട്ടുണ്ട്. 4കെ നിലവാരത്തിൽ 120 എഫ്പിഎസ് വരെ വീഡിയോ റെക്കോർഡ് ചെയ്യാം. ഡോൾബി വിഷൻ എച്ച്ഡിആർ, പ്രോറസ്, സ്പേഷ്യൽ വീഡിയോ തുടങ്ങിയ ഫീച്ചറുകളും ക്യാമറകൾ പിന്തുണയ്ക്കുന്നു. കവർ ഡിസ്പ്ലേയിൽ ഓട്ടോഫോക്കസുള്ള 12 മെഗാപിക്സൽ മുൻ ക്യാമറയും ലഭിക്കും.

20 മിനിറ്റിൽ 50 ശതമാനം ചാർജ്

ലിഥിയം-അയൺ ബാറ്ററിയാണ് ഫോണിൽ ഉപയോഗിച്ചിരിക്കുന്നത്. വയർഡ് ചാർജിങ് പിന്തുണയ്ക്കുന്ന ഫോൺ ഏകദേശം 20 മിനിറ്റിനുള്ളിൽ 50 ശതമാനം വരെ ചാർജ് ചെയ്യാനാകും. മാഗ്സേഫ്, ക്യൂഐ2 എന്നിവ വഴി 25 വാട്ട് വയർലെസ് ചാർജിങ്ങും ലഭിക്കും. ഇതിലൂടെ ഏകദേശം 30 മിനിറ്റിൽ 50 ശതമാനം ചാർജ് ചെയ്യാനാകും.

വില കേട്ടാൽ ഞെട്ടും

ഐഫോൺ ഡ്യൂവോയുടെ ഏറ്റവും വലിയ പ്രത്യേകതകളിലൊന്ന് അതിന്റെ വില തന്നെയാണ്. ഇന്ത്യയിൽ 256 ജിബി പതിപ്പിന് 2,99,900 രൂപയാണ് പ്രാരംഭ വില. 512 ജിബി മോഡലിന് 3,24,900 രൂപ, 1 ടിബി പതിപ്പിന് 3,74,900 രൂപ എന്നിങ്ങനെയാണ് വില. ഏറ്റവും ഉയർന്ന 2 ടിബി മോഡലിന് 4,49,900 രൂപ നൽകണം. ഭാവിയിൽ ഡ്യൂവോ മാക്സ് ഉൾപ്പെടെയുള്ള പുതിയ മോഡലുകൾ എത്തിയാൽ ആപ്പിളിന്റെ മടക്കാവുന്ന ഐഫോൺ ശ്രേണി കൂടുതൽ വൈവിധ്യമാർന്നതാകുമെന്നാണ് സൂചന.

ലാവയുടെ പുതിയ 5ജി ഫോൺ വിപണിയിൽ; സവിശേഷതകൾ ഞെട്ടിക്കുമോ?

Prashobh Prasannan — Wed, 23 Sep 2026 12:30:08 +0530

ഇന്ത്യൻ സ്‍മാർട്ട്ഫോൺ നിർമാതാക്കളായ ലാവ പുതിയ ബജറ്റ് 5ജി സ്‍മാർട്ട്ഫോൺ ഇന്ത്യയിൽ അവതരിപ്പിച്ചു. ലാവ ബോൾഡ് എൻ4 പ്രോ 5ജി എന്ന പേരിലാണ് പുതിയ ഫോൺ വിപണിയിലെത്തുന്നത്. കഴിഞ്ഞ മാസം ബോൾഡ് എൻ4 ലൈറ്റ് അവതരിപ്പിച്ചതിന് പിന്നാലെയാണ് കൂടുതൽ ശേഷിയുള്ള ബാറ്ററിയും നവീകരിച്ച ഹാർഡ്‌വെയറുമായുള്ള പുതിയ മോഡൽ അവതരിപ്പിച്ചിരിക്കുന്നത്. 6000എംഎഎച്ച് ബാറ്ററിയും 50എംപി പ്രധാന ക്യാമറയുമാണ് ഫോണിന്‍റെ പ്രധാന സവിശേഷതകൾ. മോനാക്കോ ബ്ലൂ, ഒപ്പുലന്റ് ലിലാക് എന്നീ രണ്ട് നിറങ്ങളിൽ ഫോൺ ലഭ്യമാകും.

6.75 ഇഞ്ച് ഡിസ്‌പ്ലേ

ഫ്ലാറ്റ് പിൻ പാനലാണ് ലാവ ബോൾഡ് എൻ4 പ്രോ 5ജിയുടെ ഡിസൈൻ. മുകൾഭാഗത്ത് ഇടതുവശത്തായാണ് ക്യാമറ മൊഡ്യൂൾ നൽകിയിരിക്കുന്നത്. രണ്ട് പ്രധാന ക്യാമറ ലെൻസുകൾ, ചെറിയ വൃത്താകൃതിയിലുള്ള ഭാഗങ്ങൾ, എൽഇഡി ഫ്ലാഷ് എന്നിവ ക്യാമറ മൊഡ്യൂളിലുണ്ട്. ഫ്ലാറ്റ് ഫ്രെയിമിന്റെ വലതുവശത്താണ് ശബ്‍ദനിയന്ത്രണ ബട്ടണുകളും പവർ ബട്ടണും നൽകിയിരിക്കുന്നത്. സെൽഫി ക്യാമറയ്ക്കായി മുൻവശത്ത് വാട്ടർഡ്രോപ്പ് മാതൃകയിലുള്ള നോച്ചും നൽകിയിട്ടുണ്ട്. 6.75 ഇഞ്ച് എൽസിഡി എച്ച്ഡി പ്ലസ് ഡിസ്‌പ്ലേയാണ് ഫോണിലുള്ളത്. 120 ഹെർട്സ് റിഫ്രഷ് റേറ്റും പരമാവധി 550 നിറ്റ് തെളിച്ചവും ഡിസ്‌പ്ലേ നൽകുന്നു. വേഗത്തിലുള്ള സ്ക്രോളിങ്ങിനും ദൃശ്യങ്ങൾ കൂടുതൽ സുഗമമായി കാണുന്നതിനും ഉയർന്ന റിഫ്രഷ് റേറ്റ് സഹായിക്കും.

യുണിസോക് ടി8200 5ജി ചിപ്സെറ്റ്

യുണിസോക് ടി8200 5ജി ചിപ്സെറ്റാണ് ലാവ ബോൾഡ് എൻ4 പ്രോ 5ജിക്ക് കരുത്തേകുന്നത്. 6ജിബി റാമിനൊപ്പം 6ജിബി വരെ വെർച്വൽ റാം പിന്തുണയും ലഭിക്കും. 128ജിബിയാണ് ആന്തരിക സംഭരണശേഷി. ആൻഡ്രോയിഡ് 16 ഓപ്പറേറ്റിങ് സിസ്റ്റമാണ് ഫോണിൽ ലഭിക്കുക. വൃത്തിയുള്ള സോഫ്റ്റ്‌വെയർ അനുഭവമാണ് കമ്പനി വാഗ്ദാനം ചെയ്യുന്നത്.

50എംപി ക്യാമറ

ഫോട്ടോഗ്രഫിക്കായി എഐ പിന്തുണയുള്ള 50എംപി ഡ്യുവൽ പിൻ ക്യാമറ സംവിധാനമാണ് ഫോണിൽ നൽകിയിരിക്കുന്നത്. വിവിധ സാഹചര്യങ്ങളിൽ മികച്ച ചിത്രങ്ങൾ പകർത്താൻ എഐ അധിഷ്ഠിത ക്യാമറ സംവിധാനത്തിന് സാധിക്കുമെന്നാണ് കമ്പനി അവകാശപ്പെടുന്നത്. 6000എംഎച്ച് ശേഷിയുള്ള ബാറ്ററിയാണ് ഫോണിന്റെ മറ്റൊരു പ്രധാന സവിശേഷത. 18വാട്ട് ചാർജിങ് പിന്തുണയുമുണ്ട്. പൊടിയും വെള്ളവും പ്രതിരോധിക്കുന്ന ഐപി64 റേറ്റിങ്ങും ഫോണിന് ലഭിച്ചിട്ടുണ്ട്.

വില 13,999 രൂപ

6ജിബി റാമും 128ജിബി സംഭരണശേഷിയുമുള്ള വേരിയന്റിന് 13,999 രൂപയാണ് പ്രത്യേക ലോഞ്ച് വില. എല്ലാ ഓഫറുകളും ഉൾപ്പെടുത്തിയുള്ള വിലയാണിത്. സെപ്റ്റംബർ 26ന് ഉച്ചയ്ക്ക് 12 മണി മുതൽ ആമസോൺ വഴി ഫോൺ വിൽപ്പനയ്ക്കെത്തും. മോനാക്കോ ബ്ലൂ, ഒപ്പുലന്റ് ലിലാക് എന്നീ നിറങ്ങളിലാണ് ഫോൺ ലഭ്യമാകുക. ഫോണിന്റെ കൂടുതൽ സവിശേഷതകൾ വിൽപ്പന ആരംഭിക്കുന്നതിന് മുന്നോടിയായി പുറത്തുവിടുമെന്നാണ് പ്രതീക്ഷിക്കുന്നത്. ഇന്ത്യയിലുടനീളമുള്ള ഉപഭോക്താക്കൾക്കായി വീടുകളിലെത്തി സേവനം നൽകുന്ന സൗജന്യ സർവീസ് അറ്റ് ഹോം സൗകര്യവും ലാവ ബോൾഡ് എൻ4 പ്രോ 5ജിക്കായി ലഭ്യമാക്കുന്നുണ്ട്. ഉപഭോക്താക്കൾക്ക് വീട്ടിൽവെച്ച് തന്നെ വിൽപ്പനാനന്തര സേവനം ലഭ്യമാക്കുന്നതാണ് ഈ സംവിധാനത്തിലൂടെ ലക്ഷ്യമിടുന്നത്.

വൺപ്ലസ് 16 വരുന്നു; ഈ രഹസ്യ ഫീച്ചറുകൾ നിങ്ങളെ ഞെട്ടിക്കും!

Prashobh Prasannan — Tue, 22 Sep 2026 11:38:25 +0530

വൺപ്ലസിന്റെ അടുത്ത ഫ്ലാഗ്ഷിപ്പ് സ്‍മാർട്ട്ഫോണായ വൺപ്ലസ് 16 വിപണിയിലെത്താൻ ഒരുങ്ങുന്നു. ചൈനയിൽ ആദ്യം അവതരിപ്പിക്കുമെന്ന് പ്രതീക്ഷിക്കുന്ന ഫോണിന്റെ ചില വിവരങ്ങൾ കമ്പനി നേരത്തെ തന്നെ പുറത്തുവിട്ടിരുന്നു. എന്നാൽ ഇപ്പോൾ ഫോണിന്റെ ക്യാമറ, ചിപ്സെറ്റ്, ബാറ്ററി തുടങ്ങി ഏതാണ്ട് പൂർണമായ സവിശേഷതകൾ പുറത്തുവന്നതായാണ് റിപ്പോർട്ടുകൾ. ടിപ്സ്റ്റർ ഡിജിറ്റൽ ചാറ്റ് സ്റ്റേഷൻ വെയ്‌ബോയിൽ പങ്കുവെച്ച വിവരങ്ങളാണ് പുതിയ ചർച്ചകൾക്ക് വഴിവച്ചിരിക്കുന്നത്.

165 ഹെർട്‍സ് ഡിസ്‌പ്ലേ

വൺപ്ലസ് 16 ബ്രാൻഡിന്റെ ആദ്യ കളർഒഎസ് 17 അധിഷ്ഠിത സ്‍മാർട്ട്ഫോൺ ആയിരിക്കുമെന്ന് വൺപ്ലസ് സ്ഥിരീകരിച്ചിട്ടുണ്ട്. 165 ഹെർട്‍സ് റിഫ്രഷ് റേറ്റും ഫോണിൽ ലഭിക്കും. മുൻഗാമിയായ വൺപ്ലസ് 15ലും 165 ഹെർട്സ് റിഫ്രഷ് റേറ്റ് നൽകിയിരുന്നു. എന്നാൽ ഗെയിമിങ് സമയത്താണ് പ്രധാനമായും ഈ റിഫ്രഷ് റേറ്റ് ഉപയോഗിക്കാൻ സാധിച്ചിരുന്നത്. സാധാരണ ഉപയോഗത്തിൽ ഇത് 120 ഹെർട്സായി പരിമിതപ്പെടുത്തിയിരുന്നു. പുതിയ വൺപ്ലസ് 16ൽ സാധാരണ ഉപയോഗത്തിലും 165 ഹെർട്‍സ് റിഫ്രഷ് റേറ്റ് ലഭിക്കുമെന്നാണ് റിപ്പോർട്ട്.

ഗെയിമിങ്ങിൽ 185 ഹെർട്‍സ്

വൺപ്ലസ് 16ൽ ബിഒഇ എക്സ്4 ഡിസ്‌പ്ലേ ആയിരിക്കും ഉപയോഗിക്കുകയെന്നാണ് ഡിജിറ്റൽ ചാറ്റ് സ്റ്റേഷന്റെ വെളിപ്പെടുത്തൽ. സാധാരണ ഉപയോഗത്തിൽ 165 ഹെർട്‍സ് റിഫ്രഷ് റേറ്റ് ലഭിക്കുമ്പോൾ ഗെയിമിങ്ങിൽ ഇത് 185 ഹെർട്‍സ് വരെ ഉയർന്നേക്കാം.

9000എംഎഎച്ച് ബാറ്ററി

വൺപ്ലസ് 16ന്റെ പ്രധാന ആകർഷണങ്ങളിലൊന്ന് വലിയ ബാറ്ററിയായിരിക്കും. 9000എംഎഎച്ച് ബാറ്ററിയാണ് ഫോണിൽ ഉൾപ്പെടുത്തുകയെന്നാണ് റിപ്പോർട്ട്. ബാറ്ററിയുടെ റേറ്റഡ് കപ്പാസിറ്റി 8780എംഎഎച്ച് ആയിരിക്കുമെന്നും സൂചനയുണ്ട്. 100വാട്ട് വയർഡ് ചാർജിങ്, 50വാട്ട് വയർലെസ് ചാർജിങ് എന്നിവ ഫോണിൽ ലഭിച്ചേക്കും. രണ്ട് സെല്ലുകളുള്ള ബാറ്ററി സംവിധാനമായിരിക്കും ഉപയോഗിക്കുക എന്നും റിപ്പോർട്ടുകളുണ്ട്.

200എംപി പ്രധാന ക്യാമറ

ക്യാമറ വിഭാഗത്തിലും വൺപ്ലസ് 16 വലിയ അപ്‌ഗ്രേഡ് കൊണ്ടുവരുമെന്നാണ് സൂചന. 1/1.4 ഇഞ്ച് സെൻസറുള്ള 200എംപി പ്രധാന ക്യാമറയായിരിക്കും ഫോണിൽ ഉണ്ടാകുകയെന്നാണ് റിപ്പോർട്ട്. ഇതിനൊപ്പം 50എംപി അൾട്രാ വൈഡ് ക്യാമറയും 1/1.95 ഇഞ്ച് സെൻസറുള്ള 50എംപി പെരിസ്‌കോപ്പ് ടെലിഫോട്ടോ ക്യാമറയും ലഭിച്ചേക്കും. ക്യാമറ സംവിധാനത്തിന്റെ മറ്റ് വിശദാംശങ്ങൾ കമ്പനി ഇതുവരെ ഔദ്യോഗികമായി പുറത്തുവിട്ടിട്ടില്ല.

സ്നാപ്ഡ്രാഗൺ 8 എലൈറ്റ് ജെൻ 6 പ്രോ

പ്രകടനത്തിനായി ക്വാൽകോമിന്റെ സ്നാപ്ഡ്രാഗൺ 8 എലൈറ്റ് ജെൻ 6 പ്രോ ചിപ്സെറ്റായിരിക്കും വൺപ്ലസ് 16ൽ ഉപയോഗിക്കുകയെന്നാണ് റിപ്പോർട്ട്. ടി‌എസ്‌എം‌സിയുടെ 2 നാനോമീറ്റർ നിർമാണ സാങ്കേതികവിദ്യയിലാണ് ചിപ്സെറ്റ് നിർമിക്കുന്നതെന്നും സൂചനയുണ്ട്. 2+3+3 കോർ ക്രമീകരണമുള്ള ഒക്ടാ-കോർ സിപിയുവും അഡ്രിനോ 850 ജിപിയുവും ഫോണിൽ ലഭിച്ചേക്കും.

കനം കുറഞ്ഞ ബെസലുകൾ

ഡിസൈനുമായി ബന്ധപ്പെട്ട മുൻ ചോർച്ചകൾ പ്രകാരം വൺപ്ലസ് 16ൽ മുൻഗാമിയേക്കാൾ കനം കുറഞ്ഞ ബെസലുകൾ നൽകിയേക്കും. ഇത് കൂടുതൽ ഇമ്മേഴ്സീവ് ഡിസ്‌പ്ലേ അനുഭവം നൽകുമെന്നാണ് വിലയിരുത്തൽ. എന്നാൽ ഫോണിന്റെ ഡിസൈനോ കൃത്യമായ ലോഞ്ച് തീയതിയോ വൺപ്ലസ് ഇതുവരെ ഔദ്യോഗികമായി പ്രഖ്യാപിച്ചിട്ടില്ല.

ഒക്ടോബറിൽ ചൈനയിൽ എത്തിയേക്കും

വൺപ്ലസ് 16 ചൈനയിൽ 2026 ഒക്ടോബറിൽ അവതരിപ്പിച്ചേക്കുമെന്നാണ് നിലവിലെ റിപ്പോർട്ടുകൾ. തുടർന്ന് നവംബറിൽ ആഗോള വിപണിയിലും ഫോൺ അവതരിപ്പിച്ചേക്കും. ലോഞ്ച് തീയതിയും മറ്റ് സവിശേഷതകളും സംബന്ധിച്ച ഔദ്യോഗിക വിവരങ്ങൾക്കായി വൺപ്ലസിന്റെ പ്രഖ്യാപനം കാത്തിരിക്കേണ്ടതുണ്ട്.

ഐഫോൺ 17 പ്രോയ്ക്ക് വൻ വിലയിടിവ്: ഇപ്പോൾ വാങ്ങണോ?

Prashobh Prasannan — Mon, 14 Sep 2026 15:52:00 +0530

പുതിയ ഐഫോൺ മോഡലുകൾ വിപണിയിലെത്തിയതോടെ കഴിഞ്ഞ വർഷത്തെ പ്രോ മോഡലുകൾക്ക് വൻ വിലക്കുറവ്. ആപ്പിൾ ഐഫോൺ 18 പ്രോ സീരീസും പുതിയ ഐഫോൺ ഡ്യൂയോയും അവതരിപ്പിച്ചതിന് പിന്നാലെയാണ് ഐഫോൺ 17 പ്രോ, ഐഫോൺ 17 പ്രോ മാക്സ് മോഡലുകൾക്ക് ആകർഷകമായ ഓഫറുകൾ ലഭിക്കുന്നത്. ഇന്ത്യയിൽ 1,34,900 രൂപയ്ക്ക് അവതരിപ്പിച്ച ഐഫോൺ 17 പ്രോ ഇപ്പോൾ 69,990 രൂപ വരെ കുറഞ്ഞ വിലയിൽ സ്വന്തമാക്കാമെന്നാണ് ക്രോമയുടെ പുതിയ ഓഫർ വ്യക്തമാക്കുന്നത്. എന്നാൽ ഈ വില ലഭിക്കാൻ പഴയ ഫോൺ കൈമാറുന്നതുൾപ്പെടെയുള്ള ഓഫറുകൾ പ്രയോജനപ്പെടുത്തണം.

69,990 രൂപയ്ക്ക് എങ്ങനെ ഐഫോൺ 17 പ്രോ സ്വന്തമാക്കാം?

ഐഫോൺ 17 പ്രോയുടെ 256 ജിബി പതിപ്പിന് നിലവിൽ 1,30,490 രൂപയാണ് വില. ലോഞ്ച് വിലയുമായി താരതമ്യം ചെയ്യുമ്പോൾ 4,410 രൂപയുടെ നേരിട്ടുള്ള വിലക്കുറവാണിത്. ഇതിന് പുറമെ ബാങ്ക് ഓഫറിലൂടെ 4,000 രൂപ വരെ അധികമായി ലാഭിക്കാം. ഇതോടെ ഫോണിന്റെ വില 1,26,490 രൂപയായി കുറയും. എന്നാൽ ഏറ്റവും വലിയ ലാഭം ലഭിക്കുന്നത് പഴയ ഫോൺ കൈമാറുമ്പോഴാണ്. ഐഫോൺ 15 പ്രോ പോലുള്ള പഴയ ഉപകരണം എക്സ്ചേഞ്ച് ചെയ്യുമ്പോൾ 44,500 രൂപ വരെ ലഭിക്കാം. കൈമാറുന്ന ഫോണിന്റെ മോഡലും പ്രവർത്തനക്ഷമതയും അവസ്ഥയും അനുസരിച്ച് എക്സ്ചേഞ്ച് തുകയിൽ വ്യത്യാസമുണ്ടാകും. ഇതിന് പുറമെ 12,000 രൂപയുടെ എക്സ്ചേഞ്ച് ബോണസും ലഭിക്കും. ഇതെല്ലാം കൂടി കണക്കിലെടുക്കുമ്പോഴാണ് ഐഫോൺ 17 പ്രോയുടെ ഫലപ്രദമായ വില 69,990 രൂപയായി കുറയുന്നത്. ഐഫോൺ 17 പ്രോ മാക്സിനും സമാനമായ ഓഫറുണ്ട്. എക്സ്ചേഞ്ച് ഉൾപ്പെടെയുള്ള ആനുകൂല്യങ്ങൾ പ്രയോജനപ്പെടുത്തിയാൽ 74,990 രൂപ വരെ കുറഞ്ഞ വിലയിൽ മോഡൽ സ്വന്തമാക്കാം.

ഐഫോൺ 17 പ്രോ വാങ്ങുന്നത് നല്ല തീരുമാനമോ?

പുതിയ ഐഫോൺ മോഡലുകളുടെ വില ഉയർന്ന സാഹചര്യത്തിൽ, കുറഞ്ഞ വിലയിൽ ഒരു പ്രോ ഐഫോൺ സ്വന്തമാക്കാൻ ആഗ്രഹിക്കുന്നവർക്ക് ഐഫോൺ 17 പ്രോ പരിഗണിക്കാം. ഒരു വർഷം പഴക്കമുള്ള മോഡലാണെങ്കിലും പ്രകടനത്തിന്റെ കാര്യത്തിൽ ഐഫോൺ 17 പ്രോ ഇപ്പോഴും ശക്തമാണ്. എ19 പ്രോ ചിപ്പിനൊപ്പം വേപ്പർ കൂളിങ് സംവിധാനവും ഫോണിലുണ്ട്. ഐഫോൺ 18 പ്രോയോട് സാമ്യമുള്ള അലുമിനിയം ഏകീകൃത രൂപകൽപ്പനയും ലഭിക്കും.

ക്യാമറയിലും മികവ്

48 മെഗാപിക്സൽ വീതമുള്ള 3 ക്യാമറകളാണ് ഫോണിന്റെ പിൻഭാഗത്തുള്ളത്. പ്രധാന ക്യാമറ, അൾട്രാ വൈഡ് ക്യാമറ, 4 മടങ്ങ് ടെലിഫോട്ടോ ക്യാമറ എന്നിവയാണ് ഇവ. മുൻവശത്ത് 18 മെഗാപിക്സൽ സെൽഫി ക്യാമറയാണുള്ളത്. ഐഫോൺ 18 പ്രോയിലും സമാനമായ 18 മെഗാപിക്സൽ മുൻ ക്യാമറയാണ് നൽകിയിരിക്കുന്നത്.

ഐഫോൺ 18 പ്രോയ്ക്കും ഓഫറുണ്ട്

എന്നാൽ ഐഫോൺ 17 പ്രോ വാങ്ങാൻ തീരുമാനിക്കുന്നതിന് മുമ്പ് പുതിയ ഐഫോൺ 18 പ്രോ സീരീസിനുള്ള ഓഫറുകളും പരിശോധിക്കണം. ഐഫോൺ 18 പ്രോ, ഐഫോൺ 18 പ്രോ മാക്സ് എന്നിവയുടെ മുൻകൂർ ബുക്കിങ്ങിൽ 12,000 രൂപയുടെ എക്സ്ചേഞ്ച് ബോണസ് ലഭിക്കും. പഴയ ഫോണിന്റെ എക്സ്ചേഞ്ച് മൂല്യത്തിന് പുറമെയായിരിക്കും ഈ ബോണസ് ലഭിക്കുക. സെപ്റ്റംബർ 12ന് ഐഫോൺ 18 പ്രോയുടെ മുൻകൂർ ബുക്കിങ് ആരംഭിക്കും. സെപ്റ്റംബർ 18 മുതൽ വിൽപ്പനയും ആരംഭിക്കും.

30,000 രൂപയുടെ വ്യത്യാസം

എന്നാൽ പുതിയ മോഡലിന് വലിയ വില നൽകേണ്ടിവരും. ഇന്ത്യയിൽ ഐഫോൺ 18 പ്രോയുടെ തുടക്കവില 1,64,900 രൂപയാണ്. ഐഫോൺ 17 പ്രോ സീരീസിന്റെ ലോഞ്ച് വിലയേക്കാൾ 30,000 രൂപ കൂടുതലാണിത്. അതിനാൽ ഏറ്റവും പുതിയ ഐഫോൺ തന്നെ വേണമെന്നില്ലെങ്കിൽ, വലിയ ബജറ്റ് മാറ്റിവയ്ക്കാൻ താൽപര്യമില്ലാത്തവർക്ക് നിലവിലെ ഓഫറിൽ ഐഫോൺ 17 പ്രോ പരിഗണിക്കാം. പ്രത്യേകിച്ച് പഴയ പ്രീമിയം ഫോൺ എക്സ്ചേഞ്ച് ചെയ്യാൻ കഴിയുന്നവർക്ക് 69,990 രൂപയുടെ ഫലപ്രദമായ വില ആകർഷകമായ ഓഫറായേക്കും.

വൺപ്ലസ് എൻ6 ലൈറ്റ് വരുന്നു; ഈ പുതിയ ഫോണിലെ പ്രത്യേകതകൾ?

Prashobh Prasannan — Wed, 16 Sep 2026 13:14:51 +0530

ബജറ്റ് ശ്രേണിയിൽ പുതിയ സ്‍മാർട്ട്ഫോണുമായി വൺപ്ലസ്. കമ്പനിയുടെ ‘എൻ’ ശ്രേണിയിലെ പുതിയ മോഡലായ വൺപ്ലസ് എൻ6 ലൈറ്റ് സെപ്റ്റംബർ 22ന് ഇന്ത്യയിൽ അവതരിപ്പിക്കും. ഫോൺ പുറത്തിറങ്ങുന്നതിന് മുന്നോടിയായി രൂപകൽപ്പനയും ബാറ്ററി ഉൾപ്പെടെയുള്ള പ്രധാന സവിശേഷതകളും കമ്പനി പുറത്തുവിട്ടിട്ടുണ്ട്. വില, വിൽപ്പന ആരംഭിക്കുന്ന തീയതി, ലോഞ്ച് ഓഫറുകൾ തുടങ്ങിയ വിവരങ്ങൾ കമ്പനി ഇതുവരെ പ്രഖ്യാപിച്ചിട്ടില്ല. സെപ്റ്റംബർ 22ന് നടക്കുന്ന ഔദ്യോഗിക അവതരണ പരിപാടിയിൽ ഇതുസംബന്ധിച്ച കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷിക്കുന്നത്.

7,000എംഎഎച്ച് ബാറ്ററി

വൺപ്ലസ് എൻ6 ലൈറ്റിന്റെ പ്രധാന സവിശേഷതകളിലൊന്ന് 7,000എംഎഎച്ച് ശേഷിയുള്ള വലിയ ബാറ്ററിയാണ്. ഒറ്റ ചാർജിൽ 3 ദിവസം വരെ ഫോൺ ഉപയോഗിക്കാനാകുമെന്നാണ് വൺപ്ലസിന്റെ അവകാശവാദം. 26.8 മണിക്കൂർ വരെ വീഡിയോ കാണാനും 29.9 മണിക്കൂർ വരെ ഗൂഗിൾ മാപ്സ് ഉപയോഗിച്ച് നാവിഗേഷൻ നടത്താനും 49.7 മണിക്കൂർ വരെ ഫോൺ കോളുകൾ ചെയ്യാനും ബാറ്ററിക്ക് കഴിയുമെന്നാണ് കമ്പനി പറയുന്നത്. ബാറ്ററി മറ്റ് ഉപകരണങ്ങൾ ചാർജ് ചെയ്യാനും ഉപയോഗിക്കാം. വയർഡ് റിവേഴ്സ് ചാർജിങ് സൗകര്യത്തിലൂടെ മറ്റ് ഉപകരണങ്ങൾക്കും വൺപ്ലസ് ഓഡിയോ ഉൽപ്പന്നങ്ങൾക്കും ബാറ്ററി പങ്കിടാൻ സാധിക്കും.

6 വർഷം വരെ ബാറ്ററി ആരോഗ്യം

ദീർഘകാല ഉപയോഗത്തിലും ബാറ്ററിയുടെ കാര്യക്ഷമത നിലനിർത്താൻ കഴിയുമെന്നാണ് വൺപ്ലസ് അവകാശപ്പെടുന്നത്. 6 വർഷത്തിന് ശേഷവും ബാറ്ററി ആരോഗ്യനില 80 ശതമാനത്തിന് മുകളിൽ നിലനിർത്താൻ കഴിയുന്ന തരത്തിലാണ് ബാറ്ററി രൂപകൽപ്പന ചെയ്തിരിക്കുന്നത്. 1,600 ചാർജിങ് ചക്രങ്ങളിലൂടെ ബാറ്ററി പരീക്ഷിച്ചിട്ടുണ്ടെന്നും കമ്പനി വ്യക്തമാക്കുന്നു.

6.75 ഇഞ്ച് ഡിസ്പ്ലേ

വൺപ്ലസ് എൻ6 ലൈറ്റിൽ 6.75 ഇഞ്ച് വലിപ്പമുള്ള വലിയ ഡിസ്പ്ലേയാണ് നൽകിയിരിക്കുന്നത്. 120 ഹെർട്സ് പുതുക്കൽ നിരക്കുള്ള സ്ക്രീനാണ് ഫോണിലുണ്ടാകുക. നനഞ്ഞ കൈകളോ ഈർപ്പം, എണ്ണ തുടങ്ങിയവ സ്ക്രീനിലുണ്ടായിരിക്കുമ്പോഴും ടച്ച് പ്രതികരണം മെച്ചപ്പെടുത്തുന്നതിനുള്ള ‘അക്വാ ടച്ച്’ സൗകര്യവും ഫോണിലുണ്ടാകും.

കട്ടിയേറിയ ബാറ്ററിയുണ്ടെങ്കിലും ഭാരം നിയന്ത്രിച്ചു

7,000എംഎഎച്ച് ബാറ്ററിയുണ്ടെങ്കിലും ഫോണിന്റെ കനം 8.95 മില്ലിമീറ്ററാണ്. ഏകദേശം 215 ഗ്രാം ഭാരമാണ് വൺപ്ലസ് എൻ6 ലൈറ്റിനുള്ളത്. ദൈനംദിന ഉപയോഗത്തിനിടയിലെ വീഴ്ചകളും ആഘാതങ്ങളും നേരിടാൻ കഴിയുന്ന തരത്തിലാണ് ഫോൺ രൂപകൽപ്പന ചെയ്തിരിക്കുന്നതെന്നും കമ്പനി പറയുന്നു. സൈനിക നിലവാരത്തിലുള്ള ദൃഢതാ പരിശോധനാ മാനദണ്ഡമായ എംഐഎൽ-എസ്‌ടിഡി-810എച്ച് സർട്ടിഫിക്കേഷനും ഫോണിനുണ്ട്.

രണ്ട് നിറങ്ങളിൽ ലഭിക്കും

മിഡ്നൈറ്റ് ഹൈപ്പ്, നിയോ ഗ്രീൻ എന്നീ രണ്ട് നിറങ്ങളിലാണ് വൺപ്ലസ് എൻ6 ലൈറ്റ് എത്തുന്നത്. ദീർഘകാല ഉപയോഗത്തിന് ശേഷവും ഫോണിന്റെ പ്രവർത്തനം സുഗമമായി നിലനിർത്തുന്നതിനായി 36 മാസത്തെ പ്രവർത്തന മികവ് സംരക്ഷണ സൗകര്യവും ഫോണിൽ ഉൾപ്പെടുത്തിയിട്ടുണ്ട്.

കൃത്രിമ ബുദ്ധി സൗകര്യങ്ങളും

കൃത്രിമ ബുദ്ധി അടിസ്ഥാനമാക്കിയുള്ള നിരവധി സൗകര്യങ്ങളും വൺപ്ലസ് എൻ6 ലൈറ്റിലുണ്ടാകും. ചിത്രങ്ങളിലെ മുഖങ്ങൾ കൂടുതൽ വ്യക്തതയോടെ മെച്ചപ്പെടുത്താൻ ‘എഐ ക്ലിയർ ഫേസ്’, അനാവശ്യ വസ്തുക്കൾ നീക്കം ചെയ്യാൻ ‘എഐ ഇറേസർ’ എന്നിവ ലഭിക്കും. സമൂഹമാധ്യമങ്ങളിൽ പങ്കുവയ്ക്കാൻ അനുയോജ്യമായ ചിത്രങ്ങൾ വേഗത്തിൽ തയ്യാറാക്കാനും ഈ സൗകര്യങ്ങൾ സഹായിക്കും. ദൈനംദിന ആവശ്യങ്ങൾക്കായി ഗൂഗിൾ ജെമിനിയും ഫോണിൽ ലഭിക്കും. വിവരങ്ങൾ കണ്ടെത്താനും വിവിധ കാര്യങ്ങളിൽ സഹായം തേടാനും ആശയങ്ങൾ പര്യവേക്ഷണം ചെയ്യാനും ജെമിനി ഉപയോഗിക്കാം.

സെപ്റ്റംബർ 22ന് വില അറിയാം

വൺപ്ലസ് എൻ6 ലൈറ്റ് സെപ്റ്റംബർ 22ന് ഇന്ത്യയിൽ ഔദ്യോഗികമായി അവതരിപ്പിക്കും. അന്നുതന്നെ ഫോണിന്റെ വില, തുറന്ന വിൽപ്പന ആരംഭിക്കുന്ന തീയതി, ലോഞ്ച് ഓഫറുകൾ തുടങ്ങിയ വിവരങ്ങൾ കമ്പനി പ്രഖ്യാപിക്കും. വൺപ്ലസിന്റെ ഔദ്യോഗിക വെബ്സൈറ്റ്, വൺപ്ലസ് സ്റ്റോർ ആപ്ലിക്കേഷൻ, ആമസോൺ, വൺപ്ലസ് എക്സ്പീരിയൻസ് സ്റ്റോറുകൾ, തിരഞ്ഞെടുത്ത റീട്ടെയിൽ ഔട്ട്ലെറ്റുകൾ എന്നിവയിലൂടെ ഫോൺ വിൽപ്പനയ്ക്കെത്തും.

ഒരുലക്ഷത്തിന് അടുത്ത് വിലയുള്ള ഐഫോൺ 17ന് ഇനി വൻ ഡിസ്‍കൌണ്ട്! ഫ്ലിപ്‍കാർട്ട് നൽകുന്ന സൂചന ഇതാ

Prashobh Prasannan — Wed, 23 Sep 2026 11:37:12 +0530

ഫ്ലിപ്‍കാർട്ടിന്റെ ബിഗ് ബില്യൺ ഡേയിസ് വിൽപ്പനയ്ക്ക് മുന്നോടിയായി ഐഫോൺ 17ന് ലഭിക്കാനിടയുള്ള വൻ വിലക്കുറവിന്റെ സൂചന നൽകി കമ്പനി. വിൽപ്പനയുടെ ഭാഗമായി ഐഫോൺ 17നെ മികച്ച ഓഫറുകളുടെ പട്ടികയിൽ ഉൾപ്പെടുത്തിയിട്ടുണ്ട്. ഫോണിന്റെ ഓഫർ വില 7X,XXX എന്ന രീതിയിലാണ് ഇപ്പോൾ പ്രദർശിപ്പിച്ചിരിക്കുന്നത്.

കൃത്യമായ വില പുറത്തുവിട്ടിട്ടില്ല

ഫ്ലിപ്‍കാർട്ട് പുറത്തുവിട്ട സൂചന പ്രകാരം ഐഫോൺ 17ന് ഗണ്യമായ വിലക്കുറവ് ലഭിച്ചേക്കും. എന്നാൽ കൃത്യമായ ഓഫർ വില ഇതുവരെ പുറത്തുവിട്ടിട്ടില്ല. കൂടാതെ, ഈ വിലയ്ക്ക് ലഭിക്കുക ഐഫോൺ 17ന്റെ ഏത് സംഭരണ ശേഷിയുള്ള പതിപ്പാണെന്നും വ്യക്തമാക്കിയിട്ടില്ല. വിലയ്ക്കൊപ്പം നൽകിയിരിക്കുന്ന നക്ഷത്രചിഹ്നം അധിക നിബന്ധനകളും വ്യവസ്ഥകളും ബാധകമായേക്കുമെന്ന സൂചനയാണ് നൽകുന്നത്.

നിലവിലെ വില 98,400

നിലവിൽ ഫ്ലിപ്‍കാർട്ടിൽ ഐഫോൺ 17ന്റെ വില 98,400 രൂപ ആണ്. ഇതുമായി താരതമ്യം ചെയ്യുമ്പോൾ വരാനിരിക്കുന്ന വിൽപ്പനയിലെ വില ഗണ്യമായി കുറയാൻ സാധ്യതയുണ്ട്. വിലക്കുറവിന് പുറമെ ബാങ്ക് കാർഡ് ഓഫറുകളും മറ്റ് പണമിടപാട് ആനുകൂല്യങ്ങളും ലഭ്യമാകുമെന്നാണ് ഫ്ലിപ്കാർട്ട് നൽകുന്ന സൂചന.

1,250യുടെ സ്വാഗത വൗച്ചറും

ബിഗ് ബില്യൺ ഡേയ്സ് വിൽപ്പനയുടെ ഭാഗമായി ₹1,250യുടെ സ്വാഗത വൗച്ചർ, തിരഞ്ഞെടുത്ത ആക്സിസ് ബാങ്ക് കാർഡുകളിൽ സേവിങ്സ്, കാർഡില്ലാത്ത ഇഎംഐ സൗകര്യം, ഫ്ലിപ്കാർട്ട് പേ ലേറ്റർ ആനുകൂല്യങ്ങൾ എന്നിവയും കമ്പനി പ്രഖ്യാപിച്ചിട്ടുണ്ട്. പരിമിത സമയത്തേക്ക് മാത്രമുള്ള പ്രത്യേക ഡീലുകളും അധിക വിലക്കുറവുകളും വിൽപ്പനയ്ക്കിടെ ലഭ്യമാകും.

സെപ്റ്റംബർ 24 മുതൽ ആദ്യകാല ഓഫറുകൾ

ഫ്ലിപ്‍കാർട്ടിന്റെ ആദ്യകാല ഓഫറുകൾ സെപ്റ്റംബർ 24ന് ആരംഭിക്കും. ഐഫോൺ 17 ഉൾപ്പെടെയുള്ള നിരവധി സ്മാർട്ട്ഫോണുകൾ ഈ ഘട്ടത്തിൽ ഓഫറുകളോടെ ലഭിക്കുമെന്നാണ് കമ്പനി വ്യക്തമാക്കിയിരിക്കുന്നത്. ബിഗ് ബില്യൺ ഡേയിസ് വിൽപ്പനയ്ക്കിടെ തിരഞ്ഞെടുത്ത ആക്സിസ് ബാങ്ക്, ഐസിഐസിഐ ബാങ്ക് കാർഡുകൾക്ക് 10 ശതമാനം വരെ സേവിങ്സ് ലഭിക്കുമെന്നും ഫ്ലിപ്കാർട്ട് അറിയിച്ചിട്ടുണ്ട്.

ഐഫോൺ 17ന്റെ വില വീണ്ടും ഉയർത്തിയിരുന്നു

അതിനിടെ, ഐഫോൺ 18 പ്രോ ശ്രേണി പുറത്തിറങ്ങിയതിന് പിന്നാലെ ഇന്ത്യയിൽ ഐഫോൺ 17ന്റെ ഔദ്യോഗിക വില ആപ്പിൾ വർധിപ്പിച്ചിരുന്നു. 256 ജിബി സംഭരണ ശേഷിയുള്ള അടിസ്ഥാന പതിപ്പ് ഇന്ത്യയിൽ ആദ്യം ₹82,900 വിലയിലാണ് അവതരിപ്പിച്ചത്. പിന്നീട് വില 99,900 രൂപ ആയി ഉയർത്തി. 512 ജിബി പതിപ്പിന്റെ നിലവിലെ വില 1,24,900 രൂപ ആണ്.

ഓഫർ വില അറിയാൻ കാത്തിരിക്കണം

ഫ്ലിപ്‍കാർട്ട് ബിഗ് ബില്യൺ ഡേയിസ് വിൽപ്പന ആരംഭിക്കുന്നതോടെ ഐഫോൺ 17ന്റെ കൃത്യമായ ഓഫർ വിലയും ലഭ്യമാകുന്ന പതിപ്പും അധിക നിബന്ധനകളും വ്യക്തമാകും. നിലവിലെ സൂചനകൾ പ്രകാരം, ആപ്പിൾ ഫോണിനായി കാത്തിരിക്കുന്ന ഉപഭോക്താക്കൾക്ക് വിൽപ്പനയിൽ ശ്രദ്ധേയമായ വിലക്കുറവ് ലഭിച്ചേക്കുമെന്നാണ് പ്രതീക്ഷിക്കുന്നത്.

ഇവി ചാർജിംഗ് വേഗത്തിലാക്കാൻ പുതിയ ബാറ്ററി; വിപ്ലവമാകുമോ?

Prashobh Prasannan — Tue, 22 Sep 2026 14:08:28 +0530

ഇലക്ട്രിക് വാഹനങ്ങളുടെ സ്വീകാര്യത ലോകമെമ്പാടും വർധിച്ചുവരികയാണ്. എന്നാൽ ചാർജിങ്ങിന് എടുക്കുന്ന സമയവും വാഹനങ്ങളുടെ റേഞ്ചും ഇപ്പോഴും ഉപഭോക്താക്കൾ നേരിടുന്ന പ്രധാന ആശങ്കകളാണ്. പെട്രോൾ, ഡീസൽ വാഹനങ്ങളിൽ ഏതാനും മിനിറ്റുകൾക്കുള്ളിൽ ഇന്ധനം നിറച്ച് യാത്ര തുടരാനാകുമ്പോൾ ഇലക്ട്രിക് വാഹനങ്ങൾ ചാർജ് ചെയ്യാൻ കൂടുതൽ സമയം ആവശ്യമായി വരുന്നു. ഈ പ്രശ്നത്തിന് പരിഹാരം കാണുന്നതിനായി വിവിധ കമ്പനികൾ അതിവേഗ ചാർജിങ് സാങ്കേതികവിദ്യകളിൽ പരീക്ഷണം നടത്തിവരികയാണ്. ഇതിനിടെയാണ് പ്രമുഖ ചൈനീസ് ബാറ്ററി നിർമാതാക്കളായ സൺവോഡ ഇവിബി പുതിയ ബാറ്ററി സാങ്കേതികവിദ്യ അവതരിപ്പിച്ചിരിക്കുന്നത്.

5 മിനിറ്റിൽ 70 ശതമാനം ചാർജ്

സൺവോഡ ഇവിബി അവതരിപ്പിച്ച പുതിയ 15സി എൽഎഫ്പി ബാറ്ററി സാങ്കേതികവിദ്യയാണ് ശ്രദ്ധ നേടുന്നത്. കമ്പനിയുടെ അവകാശവാദമനുസരിച്ച്, ഈ ബാറ്ററി 10 ശതമാനത്തിൽ നിന്ന് 70 ശതമാനം വരെ ചാർജ് ചെയ്യാൻ വെറും 5 മിനിറ്റ് മതിയാകും. 9 മിനിറ്റിനുള്ളിൽ ബാറ്ററി 97 ശതമാനം വരെ ചാർജ് ചെയ്യാനും സാധിക്കുമെന്നാണ് കമ്പനിയുടെ അവകാശവാദം. മിനിറ്റിൽ ഏകദേശം 100 കിലോമീറ്റർ റേഞ്ചിന് ആവശ്യമായ ചാർജ് നൽകാൻ ഈ സാങ്കേതികവിദ്യയ്ക്ക് കഴിയുമെന്നും സൺവോഡ പറയുന്നു. എന്നാൽ വാഹനത്തിന് ലഭിക്കുന്ന യഥാർഥ റേഞ്ച് ബാറ്ററി ശേഷി, വാഹനത്തിന്റെ മോഡൽ, ഡ്രൈവിങ് രീതി, കാലാവസ്ഥ തുടങ്ങിയ നിരവധി ഘടകങ്ങളെ ആശ്രയിച്ചിരിക്കും.

എന്താണ് എൽഎഫ്പി ബാറ്ററി?

ലിഥിയം അയൺ ഫോസ്ഫേറ്റിന്റെ ചുരുക്കപ്പേരാണ് എൽഎഫ്പി. ഇലക്ട്രിക് വാഹനങ്ങളിൽ വ്യാപകമായി ഉപയോഗിക്കുന്ന ബാറ്ററി സാങ്കേതികവിദ്യകളിലൊന്നാണിത്. സുരക്ഷ, താരതമ്യേന കുറഞ്ഞ ചെലവ്, ദീർഘമായ ആയുസ്സ് എന്നിവയാണ് എൽഎഫ്പി ബാറ്ററികളുടെ പ്രധാന സവിശേഷതകൾ. പുതിയ 15സി സാങ്കേതികവിദ്യയിലൂടെ ഇതേ ബാറ്ററി സാങ്കേതികവിദ്യയിൽ അതിവേഗ ചാർജിങ് ശേഷി വർധിപ്പിക്കാനാണ് സൺവോഡ ലക്ഷ്യമിടുന്നത്.

അതിവേഗ ചാർജിങ്ങിനൊപ്പം ചൂട് നിയന്ത്രണം

ബാറ്ററി വളരെ വേഗത്തിൽ ചാർജ് ചെയ്യുമ്പോൾ ഉണ്ടാകുന്ന അമിതമായ ചൂട് പ്രധാന വെല്ലുവിളിയാണ്. കുറഞ്ഞ സമയത്തിനുള്ളിൽ വലിയ അളവിൽ വൈദ്യുതി ബാറ്ററിയിലേക്ക് എത്തിക്കുന്നത് താപനില ഉയരാൻ കാരണമാകും. ഇത് ബാറ്ററിയുടെ സുരക്ഷ, പ്രവർത്തനക്ഷമത, ആയുസ്സ് എന്നിവയെ ബാധിക്കാനുള്ള സാധ്യതയുണ്ട്. പുതിയ 15സി ബാറ്ററി സാങ്കേതികവിദ്യയിൽ ചാർജിങ്ങിനിടയിലെ താപനില നിയന്ത്രിക്കാൻ കഴിയുന്ന സംവിധാനമുണ്ടെന്നാണ് സൺവോഡയുടെ അവകാശവാദം. സാധാരണ മുറിയിലെ താപനിലയിൽ പോലും ബാറ്ററിക്ക് താപ സ്ഥിരത നിലനിർത്താൻ കഴിയുമെന്നും കമ്പനി പറയുന്നു.

-20 ഡിഗ്രിയിലും അതിവേഗ ചാർജിങ്?

കടുത്ത തണുപ്പിലും പുതിയ ബാറ്ററി സാങ്കേതികവിദ്യ പ്രവർത്തിക്കുമെന്ന് സൺവോഡ അവകാശപ്പെടുന്നു. -20 ഡിഗ്രി സെൽഷ്യസ് താപനിലയിൽ പോലും 15 മിനിറ്റിനുള്ളിൽ ബാറ്ററി 10 ശതമാനത്തിൽ നിന്ന് 97 ശതമാനം വരെ ചാർജ് ചെയ്യാൻ കഴിയുമെന്നാണ് കമ്പനിയുടെ അവകാശവാദം. ഇത്തരത്തിൽ ചാർജ് ചെയ്താൽ വാഹനത്തിന് 700 കിലോമീറ്റർ വരെ സഞ്ചരിക്കാനാകുമെന്നും കമ്പനി പറയുന്നു. എന്നാൽ ഇവയെല്ലാം നിലവിൽ നിർമാതാവ് പുറത്തുവിട്ട കണക്കുകളാണ്. യഥാർഥ സാഹചര്യങ്ങളിൽ ചാർജിങ് വേഗതയിലും റേഞ്ചിലും വ്യത്യാസമുണ്ടാകാം. പുതിയ സാങ്കേതികവിദ്യയുടെ അവകാശവാദങ്ങൾ പ്രമുഖ ആഗോള വാഹന നിർമാതാക്കൾ നിലവിൽ സ്വതന്ത്രമായി സ്ഥിരീകരിച്ചിട്ടില്ല.

സാംസങ്ങിന്‍റെ പുതിയ ബജറ്റ് ഫോൺ എത്തി; സവിശേഷതകൾ അറിയാമോ?

Prashobh Prasannan — Thu, 17 Sep 2026 10:52:35 +0530

എൻട്രി ലെവൽ സ്മാർട്ട്ഫോൺ ശ്രേണിയിൽ പുതിയ മോഡലുമായി സാംസങ്. ഗാലക്സി എ08 തിരഞ്ഞെടുത്ത ആഗോള വിപണികളിൽ അവതരിപ്പിച്ചു. സാംസങ് ഉക്രെയ്ൻ ഓൺലൈൻ സ്റ്റോർ വഴിയാണ് നിലവിൽ ഫോൺ വിൽപ്പനയ്ക്ക് എത്തിച്ചിരിക്കുന്നത്. 4GB റാമും 128GB സ്റ്റോറേജുമുള്ള ഒരേയൊരു പതിപ്പിലാണ് ഗാലക്സി എ08 ലഭ്യമാകുന്നത്.

വിലയും നിറങ്ങളും

10,699 ഉക്രേനിയൻ ഹ്രീവ്നിയയാണ് ഗാലക്സി എ08ന്റെ വില. ഇന്ത്യൻ രൂപയിൽ ഏകദേശം 23000 രൂപ വരും ഇത്. ഡാർക്ക് ബ്ലൂ, ഗ്രീൻ, സിൽവർ എന്നീ 3 നിറങ്ങളിലാണ് ഫോൺ എത്തുന്നത്. ഇന്ത്യയിൽ ഗാലക്സി എ08 എപ്പോൾ വിൽപ്പനയ്ക്ക് എത്തുമെന്നോ വില എത്രയായിരിക്കുമെന്നോ സാംസങ് വ്യക്തമാക്കിയിട്ടില്ല.

120Hz ഡിസ്പ്ലേ

6.7 ഇഞ്ച് എച്ച്ഡി പ്ലസ് പി എൽ എസ് എൽസിഡി ഡിസ്പ്ലേയാണ് ഗാലക്സി എ08ൽ നൽകിയിരിക്കുന്നത്. 720 x 1600 പിക്സൽ റെസല്യൂഷനുള്ള ഡിസ്പ്ലേയ്ക്ക് 120Hz വരെ റിഫ്രഷ് റേറ്റ് ലഭിക്കും. 16 ദശലക്ഷം നിറങ്ങൾ പ്രദർശിപ്പിക്കാനും സ്ക്രീനിന് സാധിക്കും. ആൻഡ്രോയിഡ് 16 അടിസ്ഥാനമാക്കിയുള്ള വൺ യുഐ 8 ആണ് ഫോണിലെ ഓപ്പറേറ്റിങ് സിസ്റ്റം. 2032 വരെ സോഫ്റ്റ്‌വെയർ പിന്തുണ നൽകുമെന്നും സാംസങ് വ്യക്തമാക്കിയിട്ടുണ്ട്.

മീഡിയടെക് ചിപ്സെറ്റ്

6nm നിർമാണ സാങ്കേതികവിദ്യയിൽ തയ്യാറാക്കിയ മീഡിയടെക് ഹീലിയോ ജി99 ചിപ്സെറ്റാണ് ഗാലക്സി എ08ന് കരുത്തേകുന്നത്. 2.2GHz വരെ ക്ലോക്ക് വേഗത നൽകുന്ന 2 പെർഫോമൻസ് കോറുകളും 2.0GHz വരെ വേഗതയുള്ള 6 എഫിഷ്യൻസി കോറുകളുമാണ് ചിപ്സെറ്റിലുള്ളത്. 4GB റാമും 128GB ഇന്റേണൽ സ്റ്റോറേജുമാണ് ഫോണിലുള്ളത്. മൈക്രോ എസ്ഡി കാർഡ് ഉപയോഗിച്ച് സ്റ്റോറേജ് 2TB വരെ വികസിപ്പിക്കാം.

50MP പ്രധാന ക്യാമറ

ക്യാമറ വിഭാഗത്തിൽ 50MP പ്രധാന ക്യാമറ ഉൾപ്പെടുന്ന ഡ്യുവൽ പിൻ ക്യാമറ സംവിധാനമാണ് സാംസങ് നൽകിയിരിക്കുന്നത്. f/1.8 അപ്പർച്ചറുള്ള പ്രധാന ക്യാമറയിൽ ഓട്ടോഫോക്കസും 10x വരെ ഡിജിറ്റൽ സൂമും ലഭിക്കും. 2MP സെക്കൻഡറി ക്യാമറയാണ് ഇതിനൊപ്പം നൽകിയിരിക്കുന്നത്. സെൽഫികൾക്കും വീഡിയോ കോളുകൾക്കുമായി 8MP മുൻ ക്യാമറയുണ്ട്. എച്ച്ഡി വീഡിയോ 120fps വരെ റെക്കോർഡ് ചെയ്യാനും ഫോണിന് സാധിക്കും.

6000mAh ബാറ്ററി

6000mAh ശേഷിയുള്ള ബാറ്ററിയാണ് ഗാലക്സി എ08ന്റെ പ്രധാന സവിശേഷതകളിലൊന്ന്. 4ജി എൽടിഇ, ഡ്യുവൽ-ബാൻഡ് വൈ-ഫൈ, ബ്ലൂടൂത്ത് 5.3, യുഎസ്ബി ടൈപ്പ്-സി എന്നിവയാണ് പ്രധാന കണക്റ്റിവിറ്റി സൗകര്യങ്ങൾ. ജിപിഎസ്, ബെയ്‌ദൗ, ഗലീലിയോ, ഒസഡ്‌എസ്എസ് എന്നിവയും ഫോണിലുണ്ട്. സുരക്ഷയ്ക്കായി ഫിംഗർപ്രിന്റ് സ്കാനറും ആംബിയന്റ് ലൈറ്റ് സെൻസറും പ്രോക്സിമിറ്റി സെൻസറും നൽകിയിട്ടുണ്ട്. 167.4 x 77.4 x 8mm ആണ് ഫോണിന്റെ അളവുകൾ. ഏകദേശം 197 ഗ്രാം ഭാരവുമുണ്ട്. ഇന്ത്യൻ വിപണിയിൽ ഗാലക്സി എ08 എത്തുമ്പോൾ വിലയും ലഭ്യതയും സംബന്ധിച്ച കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷിക്കുന്നത്.

ഗാലക്‌സി ടാബ് S10+ ന് അവിശ്വസനീയ ഓഫറുകൾ!

Prashobh Prasannan — Sat, 12 Sep 2026 13:27:50 +0530

ഉത്സവകാല വിൽപ്പനയ്ക്ക് മുന്നോടിയായി ഗാലക്‌സി ടാബ് എസ്10+ന് പ്രത്യേക ആനുകൂല്യങ്ങൾ പ്രഖ്യാപിച്ച് സാംസങ് ഇന്ത്യ. ഉത്സവകാല ഓഫറിന്റെ ഭാഗമായി 12 ജി.ബി. റാം, 256 ജിബി സ്റ്റോറേജുള്ള ഗാലക്‌സി ടാബ് എസ്10+ വൈ-ഫൈ പതിപ്പ് 1,05,999 രൂപയിൽ നിന്നും 88,999 രൂപയും 5ജി പതിപ്പ് 1,20,999 രൂപയിൽ നിന്നും 1,03,999 രൂപയ്ക്കും ലഭിക്കും. ബാങ്കുകൾ വഴി ആറ് മാസത്തേക്കും എൻ.ബി.എഫ്.സി.കൾ വഴി 12 മാസത്തേക്കും നോ-കോസ്റ്റ് ഇഎംഐ സൗകര്യമുണ്ട്. വൈ-ഫൈ പതിപ്പിന് ബാങ്ക് ഇഎംഐ പ്രതിമാസം 14,833 രൂപ മുതലും എൻബിഎഫ്‍സി ഇഎംഐ 7,417 രൂപ മുതലും സാംസങ് ഫിനാൻസ് പ്ലസ് വഴി 15 ശതമാനം ഡൗൺ പേയ്‌മെന്റോടെ ₹6,877 മുതലുമാണ്. 5ജി പതിപ്പിന് യഥാക്രമം ₹17,333, ₹8,667, ₹8,036 എന്നിങ്ങനെയാണ് പ്രതിമാസ ഇ.എം.ഐ. നിരക്കുകൾ എന്നും കമ്പനി വാർത്താക്കുറിപ്പിൽ അറിയിച്ചു.

ഉൽപ്പാദനക്ഷമത, സർഗാത്മക പ്രവർത്തനങ്ങൾ, വിനോദം, സ്മാർട്ട് ഹോം നിയന്ത്രണം എന്നിവ ഒരൊറ്റ ഉപകരണത്തിൽ സാധ്യമാക്കുന്ന തരത്തിലാണ് ഗാലക്‌സി ടാബ് എസ്10+ രൂപകൽപ്പന ചെയ്തിരിക്കുന്നത്. 31.47 സെ.മീ. ഡൈനാമിക് അമോലെഡ് 2X ഡിസ്‌പ്ലേയും പ്രതിഫലനം കുറയ്ക്കുന്ന സാങ്കേതികവിദ്യയും മികച്ച ദൃശ്യാനുഭവം നൽകുന്നു. എ.ഐ. ഡയലോഗ് ബൂസ്റ്റ് സംവിധാനമുള്ള ക്വാഡ് സ്പീക്കർ, ഐ.പി.68 പൊടി-ജല പ്രതിരോധം, ആർമർ അലുമിനിയം നിർമാണം എന്നിവയും ടാബിന്റെ പ്രധാന സവിശേഷതകളാണ്.

എസ് പെൻ ഉപയോഗിച്ച് യോഗത്തിലെ കുറിപ്പുകൾ തയ്യാറാക്കാനും രേഖകളിൽ അടയാളപ്പെടുത്താനും സ്കെച്ചുകൾ വരയ്ക്കാനും കഴിയും. നോട്ട് അസിസ്റ്റ് എ.ഐ. ഉപയോഗിച്ച് കുറിപ്പുകൾ പകർത്തിയെഴുതാനും ചുരുക്കാനും സഹായിക്കുന്നു. പി.ഡി.എഫ്. ഓവർലേ ട്രാൻസ്ലേഷൻ വഴി സ്ക്രീനിൽ തന്നെ പി.ഡി.എഫ്. രേഖകൾ പരിഭാഷപ്പെടുത്താം. ഹാൻഡ്‌റൈറ്റിംഗ് ഹെൽപ്പ് കൈയെഴുത്ത് കുറിപ്പുകൾ വൃത്തിയുള്ള രൂപത്തിലാക്കുന്നു. സർക്കിൾ ടു സെർച്ച് ഉപയോഗിച്ച് ആപ്പുകൾ മാറ്റാതെ സ്ക്രീനിലുള്ള വിവരങ്ങൾ തിരയാനും പരിഭാഷപ്പെടുത്താനും കഴിയും. എ.ഐ. ഉൾപ്പെടുത്തിയ എയർ കമാൻഡ് വഴി ഗാലക്‌സി എ.ഐ. അസിസ്റ്റന്റ് സവിശേഷതകളിലേക്കും വേഗത്തിൽ പ്രവേശിക്കാം. അനുയോജ്യമായ അനുഭവങ്ങളിൽ സാംസങ് ബിക്സ്ബിയോ ഗൂഗിൾ ജെമിനിയോ തിരഞ്ഞെടുക്കാനുള്ള സൗകര്യവും ഗാലക്‌സി എ.ഐ. സംവിധാനത്തിലുണ്ട്.

സ്മാർട്ട് ഹോം ഹബ്ബായും ഗാലക്‌സി ടാബ് എസ്10+ ഉപയോഗിക്കാം. സ്മാർട്ട് തിങ്സിലെ 3ഡി മാപ്പ് വ്യൂ ഉപയോഗിച്ച് കണക്റ്റുചെയ്‌ത ഉപകരണങ്ങൾ ഒരൊറ്റ സ്ക്രീനിൽ നിരീക്ഷിക്കാം. സ്മാർട്ട് തിങ്സ് എനർജിയും എ.ഐ. എനർജി മോഡും വൈദ്യുതി ഉപയോഗത്തെക്കുറിച്ചുള്ള വിവരങ്ങൾ നൽകുന്നു. മീഡിയടെക് ഡൈമെൻസിറ്റി 9300+ പ്രോസസറാണ് ടാബിന് കരുത്തേകുന്നത്. 12 ജി.ബി. റാമും 256 ജി.ബി. സ്റ്റോറേജും മൈക്രോ എസ്.ഡി. കാർഡ് വഴി വികസിപ്പിക്കാവുന്നതാണ്. 10,090 എം.എ.എച്ച് ബാറ്ററിയും 45 വാട്ട് ഫാസ്റ്റ് ചാർജിങ്ങും ലഭ്യമാണ്.

സാംസങ് ഗാലക്സി എസ്26 എഫ്ഇ ഇന്ത്യയിൽ; എന്താണ് പ്രത്യേകത?

Prashobh Prasannan — Wed, 16 Sep 2026 13:22:13 +0530

ഗാലക്സി എസ്26 സീരീസിലേക്ക് പുതിയ മോഡൽ കൂടി അവതരിപ്പിച്ച് സാംസങ്. ഗാലക്സി എസ്26 എഫ്ഇ ആണ് കമ്പനി ഇന്ത്യയിൽ അവതരിപ്പിച്ചത്. മുൻനിര ഫോണുകളിലെ പ്രധാന സവിശേഷതകൾ കൂടുതൽ ഉപയോക്താക്കളിലേക്ക് എത്തിക്കുക എന്ന ലക്ഷ്യത്തോടെയാണ് പുതിയ എഫ്ഇ മോഡൽ അവതരിപ്പിച്ചിരിക്കുന്നത്. മികച്ച ക്യാമറ സംവിധാനത്തിനൊപ്പം ഗാലക്സി എഐ ഫീച്ചറുകളും ദൈനംദിന ഉപയോഗത്തിനുള്ള കരുത്തുറ്റ പ്രകടനവുമാണ് ഫോണിന്റെ പ്രധാന സവിശേഷതകൾ. 120 ഹെർട്സ് പുതുക്കൽ നിരക്കുള്ള 6.7 ഇഞ്ച് ഡൈനാമിക് അമോലെഡ് 2എക്സ് ഡിസ്പ്ലേ, എക്സിനോസ് 2500 പ്രോസസർ, 4,900 എംഎഎച്ച് ബാറ്ററി എന്നിവയും ഫോണിലുണ്ട്.

ഗാലക്സി എസ്26 എഫ്ഇയുടെ വില

ഇന്ത്യയിൽ 8 ജിബി റാമും 256 ജിബി സ്റ്റോറേജുമുള്ള മോഡലിന് 79,999 രൂപയാണ് വില. പിസ്റ്റാഷിയോ, ബ്ലൂബെറി, ഗ്രാഫൈറ്റ് എന്നീ നിറങ്ങളിൽ ഫോൺ ലഭിക്കും. പുതിയ ഫോൺ വാങ്ങുന്നവർക്ക് വിവിധ ഓഫറുകളും സാംസങ് പ്രഖ്യാപിച്ചിട്ടുണ്ട്. പഴയ ഫോൺ എക്സ്ചേഞ്ച് ചെയ്യുമ്പോൾ 8,000 രൂപ വരെ അപ്ഗ്രേഡ് ബോണസ് ലഭിക്കും. തിരഞ്ഞെടുത്ത ബാങ്കിങ് ഇതര ധനകാര്യ സ്ഥാപനങ്ങളുടെ പങ്കാളിത്തത്തോടെ 30 മാസം വരെയുള്ള പലിശരഹിത തവണ വ്യവസ്ഥയും ലഭ്യമാണ്. ഇതിനൊപ്പം 3,000 രൂപയുടെ അധിക അപ്ഗ്രേഡ് ബോണസും ലഭിക്കും. പ്രധാന ബാങ്ക് കാർഡുകൾ ഉപയോഗിക്കുന്നവർക്ക് 7,000 രൂപ വരെ ക്യാഷ്ബാക്ക് അല്ലെങ്കിൽ 12 മാസത്തെ പലിശരഹിത ബാങ്ക് തവണ വ്യവസ്ഥ തിരഞ്ഞെടുക്കാനും കഴിയും.

6.7 ഇഞ്ച് അമോലെഡ് ഡിസ്പ്ലേ

ഗാലക്സി എസ്26 എഫ്ഇയിൽ 6.7 ഇഞ്ച് ഫുൾ എച്ച്ഡി പ്ലസ് ഡൈനാമിക് അമോലെഡ് 2എക്സ് ഡിസ്പ്ലേയാണ് നൽകിയിരിക്കുന്നത്. 120 ഹെർട്സ് പുതുക്കൽ നിരക്കുള്ള സ്ക്രീനിന് പരമാവധി 1,900 നിറ്റ്സ് തെളിച്ചം ലഭിക്കും. ഫോണിന് കരുത്തേകുന്നത് എക്സിനോസ് 2500 പ്രോസസറാണ്. വൈദ്യുതി ആവശ്യങ്ങൾ കൈകാര്യം ചെയ്യുന്നതിനായി 4,900 എംഎഎച്ച് ശേഷിയുള്ള ബാറ്ററിയും നൽകിയിട്ടുണ്ട്.

ട്രിപ്പിൾ പിൻ ക്യാമറ

ക്യാമറ വിഭാഗത്തിൽ 50 മെഗാപിക്സൽ വൈഡ് ക്യാമറ, 12 മെഗാപിക്സൽ അൾട്രാവൈഡ് ക്യാമറ, 3 മടങ്ങ് ഒപ്റ്റിക്കൽ സൂം പിന്തുണയ്ക്കുന്ന 8 മെഗാപിക്സൽ ടെലിഫോട്ടോ ക്യാമറ എന്നിവ ഉൾപ്പെടുന്ന ട്രിപ്പിൾ പിൻ ക്യാമറ സംവിധാനമാണ് ഫോണിലുള്ളത്. സെൽഫികൾക്കും വീഡിയോ കോളുകൾക്കുമായി 12 മെഗാപിക്സൽ മുൻ ക്യാമറയും നൽകിയിട്ടുണ്ട്.

ഗാലക്സി എഐയുമായി പുതിയ സോഫ്റ്റ്‌വെയർ

ആൻഡ്രോയിഡ് 17 അടിസ്ഥാനമാക്കിയുള്ള വൺ യുഐ 9ലാണ് ഗാലക്സി എസ്26 എഫ്ഇ പ്രവർത്തിക്കുന്നത്. ദൈനംദിന ഉപയോഗം കൂടുതൽ എളുപ്പമാക്കുന്ന സാഹചര്യബോധമുള്ള ഗാലക്സി എഐ ഫീച്ചറുകളാണ് പുതിയ സോഫ്റ്റ്‌വെയറിന്റെ പ്രധാന ആകർഷണം. പുതുക്കിയ നൗ ബ്രീഫ് സംവിധാനം ഉപയോക്താവിന് ആവശ്യമായ വിവരങ്ങൾ വ്യക്തിഗത രീതിയിൽ ലഭ്യമാക്കും. ഇഷ്ടാനുസൃതമാക്കാവുന്ന ബ്രീഫിങ് കാർഡുകൾ, കാലാവസ്ഥാ വിവരങ്ങൾ, ആരോഗ്യ-ക്ഷേമവുമായി ബന്ധപ്പെട്ട വിവരങ്ങൾ എന്നിവ ഇതിലൂടെ ലഭിക്കും. ലളിതമായ നിർദേശം നൽകുന്നതിലൂടെ ഉപയോക്താക്കൾക്ക് സ്വന്തം കാർഡുകളും സൃഷ്ടിക്കാം. തിരഞ്ഞെടുത്ത മൂന്നാംകക്ഷി ആപ്പുകളിലും നോട്ടിഫിക്കേഷനുകളിലും സാഹചര്യത്തിന് അനുസരിച്ചുള്ള നിർദേശങ്ങൾ നൽകാനും നൗ ബ്രീഫിന് സാധിക്കും.

45 വാട്ട് ഫാസ്റ്റ് ചാർജിങ്

3 നാനോമീറ്റർ സാങ്കേതികവിദ്യയിൽ നിർമിച്ച എക്സിനോസ് 2500 പ്രോസസറാണ് ഫോണിലുള്ളത്. 5ജി, എൽടിഇ, വൈഫൈ 6ഇ, വൈഫൈ ഡയറക്ട്, ബ്ലൂടൂത്ത് 5.4 എന്നിവ ഫോണിൽ പിന്തുണയ്ക്കുന്നു. 4,900 എംഎഎച്ച് ബാറ്ററി 45 വാട്ട് വയർഡ് ഫാസ്റ്റ് ചാർജിങ് പിന്തുണയ്ക്കുന്നു. 45 വാട്ട് അഡാപ്റ്റർ ഉപയോഗിച്ചാൽ ഏകദേശം 30 മിനിറ്റിൽ ബാറ്ററി 69 ശതമാനം വരെ ചാർജ് ചെയ്യാനാകുമെന്ന് സാംസങ് അവകാശപ്പെടുന്നു. 15 വാട്ട് ഫാസ്റ്റ് വയർലെസ് ചാർജിങ്ങും വയർലെസ് പവർ ഷെയർ സൗകര്യവും ഫോണിലുണ്ട്.

ഐപി68 സുരക്ഷയും 7 വർഷത്തെ അപ്ഡേറ്റും

161.6 x 76.9 x 7.4 മില്ലിമീറ്റർ വലുപ്പമുള്ള ഫോണിന് 193 ഗ്രാം ഭാരമാണുള്ളത്. വെള്ളത്തെയും പൊടിയെയും പ്രതിരോധിക്കുന്ന ഐപി68 റേറ്റിങ്ങും ലഭിച്ചിട്ടുണ്ട്. ദീർഘകാല സോഫ്റ്റ്‌വെയർ പിന്തുണയും സാംസങ് വാഗ്ദാനം ചെയ്യുന്നു. ആഗോള വിപണിയിലെത്തിയ തീയതി മുതൽ 7 തലമുറ ഓപ്പറേറ്റിങ് സിസ്റ്റം അപ്ഗ്രേഡുകളും 7 വർഷത്തെ സുരക്ഷാ അപ്ഡേറ്റുകളും ഫോണിന് ലഭിക്കുമെന്ന് കമ്പനി അറിയിച്ചു.

സാംസങ് ഗാലക്സി എസ്26 വില കൂടിയേക്കും

Prashobh Prasannan — Fri, 18 Sep 2026 10:41:56 +0530

ഇന്ത്യയിൽ സാംസങ് ഗാലക്സി എസ്26 സീരീസിന്റെ വില വർധിപ്പിച്ചേക്കുമെന്ന് റിപ്പോർട്ട്. ഗാലക്സി എസ്26ന്റെ ലഭ്യമായ രണ്ട് സ്റ്റോറേജ് വേരിയന്റുകൾക്കും 12,000 രൂപ വീതം വില കൂടിയേക്കുമെന്നാണ് പുതിയ റിപ്പോർട്ടുകൾ. ടിപ്സ്റ്റർ സഞ്ജു ചൗധരി എക്സിൽ പങ്കുവെച്ച വിവരങ്ങളിലാണ് വില വർധന സംബന്ധിച്ച സൂചനകൾ പുറത്തുവന്നത്. എന്നാൽ വില വർധിപ്പിക്കുന്നതുമായി ബന്ധപ്പെട്ട് സാംസങ് ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല.

256 ജിബി മോഡലിന് പുതിയ വില

റിപ്പോർട്ട് പ്രകാരം, 12 ജിബി റാം + 256 ജിബി സ്റ്റോറേജ് മോഡലിന്റെ വില 87,999 രൂപയിൽ നിന്ന് 99,999 രൂപയായി ഉയർന്നേക്കും. അതേസമയം, 12 ജിബി റാം + 512 ജിബി സ്റ്റോറേജ് വേരിയന്റിന് 1,07,999 രൂപയിൽ നിന്ന് 1,19,999 രൂപയായി വില ഉയരുമെന്നാണ് സൂചന. അതായത് രണ്ട് മോഡലുകൾക്കും 12,000 രൂപയുടെ വർധനയുണ്ടാകുമെന്നാണ് റിപ്പോർട്ട്.

നിലവിലെ വില എത്ര?

സാംസങ്ങിന്റെ ഔദ്യോഗിക വെബ്സൈറ്റിൽ നിലവിൽ ഗാലക്സി എസ്26ന്റെ 12 ജിബി റാം + 256 ജിബി സ്റ്റോറേജ് മോഡലിന് 79,999 രൂപയാണ് വില. 12 ജിബി റാം + 512 ജിബി സ്റ്റോറേജ് മോഡലിന് 99,999 രൂപയും നൽകണം. റിപ്പോർട്ട് ചെയ്യപ്പെട്ട പുതിയ വിലകൾ ഇതുവരെ സാംസങ്ങിന്റെ ഔദ്യോഗിക വെബ്സൈറ്റിൽ പ്രത്യക്ഷപ്പെട്ടിട്ടില്ല. അതിനാൽ വില വർധന സംബന്ധിച്ച വിവരങ്ങൾ ഔദ്യോഗിക സ്ഥിരീകരണം ലഭിക്കുന്നതുവരെ അഭ്യൂഹമായി മാത്രമേ കണക്കാക്കാനാകൂ.

മറ്റ് ഫോണുകൾക്കും വില കൂടുമോ?

ഗാലക്സി എസ്26ന് പുറമെ സാംസങ്ങിന്റെ മറ്റ് മുൻനിര മോഡലുകൾക്കും വില വർധിച്ചേക്കുമെന്നാണ് റിപ്പോർട്ടുകൾ. ഗാലക്സി എസ്26 അൾട്രാ, ഗാലക്സി ഇസഡ് ഫോൾഡ് 8, ഗാലക്സി ഇസഡ് ഫോൾഡ് 8 അൾട്രാ എന്നിവയ്ക്കും വില ഉയർന്നേക്കുമെന്ന് സൂചനയുണ്ട്. ഈ വില വർധനകളൊന്നും സാംസങ് ഔദ്യോഗികമായി സ്ഥിരീകരിച്ചിട്ടില്ല. പുതിയ വിലകൾ എപ്പോൾ പ്രാബല്യത്തിൽ വരുമെന്നും വ്യക്തമല്ല.

ഗാലക്സി എസ്26 അൾട്രയ്ക്കും വില ഉയർന്നേക്കും

ഗാലക്സി എസ്26 അൾട്രയുടെ വിലയും ഉടൻ വർധിച്ചേക്കുമെന്ന് നേരത്തെ റിപ്പോർട്ടുകളുണ്ടായിരുന്നു. വില വർധിച്ചാൽ ഇന്ത്യയിലെ ആപ്പിളിന്റെ ഏറ്റവും പുതിയ പ്രോ മോഡലുകളുടെ വിലയുമായി സാംസങ്ങിന്റെ മുൻനിര ഫോണിന്റെ വില കൂടുതൽ അടുത്തെത്തും. ഇന്ത്യയിൽ ആപ്പിളിന്റെ ഏറ്റവും പുതിയ പ്രോ മോഡലിന് 1,64,900 രൂപ മുതലാണ് വില. അതേസമയം, ഗാലക്സി എസ്26 അൾട്രയുടെ നിലവിലെ പ്രാരംഭ എംആർപി 1,39,999 രൂപയാണ്.

ഫോൾഡബിൾ ഫോണുകൾക്കായി പുതിയ പദ്ധതി

അതിനിടെ, ഗാലക്സി ഇസഡ് ഫോൾഡ് 8 അൾട്ര, ഗാലക്സി ഇസഡ് ഫോൾഡ് 8 എന്നീ ഫോണുകൾക്കായി സാംസങ് ഇന്ത്യയിൽ പുതിയ 24 മാസത്തെ ‘ഗാലക്സി ഫോർഎവർ’ പേയ്മെന്റ് ഓപ്ഷൻ പ്രഖ്യാപിച്ചിട്ടുണ്ട്. ഈ പദ്ധതിയിൽ ഫോണിന്റെ വിലയുടെ 60 ശതമാനം ഇഎംഐ വഴി അടയ്ക്കണം. ബാക്കി 40 ശതമാനം തുക 24 മാസത്തെ കാലാവധി അവസാനിക്കുന്നതുവരെ മാറ്റിവയ്ക്കാനാകും.

ഇഎംഐയിലും കുറവ്

പുതിയ പദ്ധതിയുടെ ഭാഗമായി ഗാലക്സി ഇസഡ് ഫോൾഡ് 8 അൾട്രയുടെ പ്രതിമാസ ഇഎംഐ 9,417 രൂപയിൽ നിന്ന് 6,997 രൂപയായി കുറയും. ഗാലക്സി ഇസഡ് ഫോൾഡ് 8ന്റെ ഇഎംഐ 8,584 രൂപയിൽ നിന്ന് 6,416 രൂപയായും കുറയുമെന്ന് സാംസങ് വ്യക്തമാക്കിയിട്ടുണ്ട്. ഗാലക്സി എസ്26ന്റെ പുതിയ വില സംബന്ധിച്ച ഔദ്യോഗിക സ്ഥിരീകരണം സാംസങിൽ നിന്ന് ലഭിച്ചിട്ടില്ല. അതിനാൽ നിലവിലെ വിലയിൽ മാറ്റം വരുന്നതുവരെ ഔദ്യോഗിക വെബ്സൈറ്റിലെ വിലയാണ് പരിഗണിക്കേണ്ടത്.

ഓപ്പൺഎഐയുടെ പുതിയ ജിപിടി-6 മോഡലുകളിൽ ഒളിപ്പിച്ചതെന്ത്?

Prashobh Prasannan — Fri, 25 Sep 2026 12:43:41 +0530

ആർട്ടിഫിഷ്യൽ ഇന്റലിജൻസ് രംഗത്ത് പുതിയ മോഡലുകളുമായി ഓപ്പൺഎഐ. പ്രൊഫഷണൽ ജോലികൾ, കോഡിങ്, കമ്പ്യൂട്ടർ ഉപയോഗം തുടങ്ങിയ മേഖലകളിൽ കൂടുതൽ കാര്യക്ഷമമായ പ്രവർത്തനം ലക്ഷ്യമിട്ട് ജിപിടി-6 സോൾ, ജിപിടി-6 ലൂണ എന്നീ മോഡലുകളാണ് കമ്പനി അവതരിപ്പിച്ചത്. ഓപ്പൺഎഐയുടെ ഏറ്റവും ശേഷിയേറിയ മോഡലായ ജിപിടി-6 ആസ്ട്രയിൽ ഉൾപ്പെടുത്തിയിരിക്കുന്ന ചില സവിശേഷതകൾ കുറഞ്ഞ ചെലവിൽ ലഭ്യമാക്കുകയാണ് പുതിയ മോഡലുകളിലൂടെ ലക്ഷ്യമിടുന്നത്.

കൂടുതൽ പ്ലാറ്റ്‌ഫോമുകളിൽ ലഭിക്കും

ഓപ്പൺഎഐയുടെ വർക്ക്, കോഡെക്സ് പ്ലാറ്റ്‌ഫോമുകളിലും എപിഐ വഴിയും ജിപിടി-6 സോൾ, ജിപിടി-6 ലൂണ മോഡലുകൾ ലഭ്യമാകും. പ്ലസ്, പ്രോ, ബിസിനസ്, എന്റർപ്രൈസ്, എഡ്യൂ ഉപയോക്താക്കൾക്ക് വർക്ക്, കോഡെക്സ് വഴി മോഡലുകൾ ഉപയോഗിക്കാം. ഫ്രീ, ഗോ ഉപയോക്താക്കൾക്ക് ഡെസ്ക്ടോപ്പ് ആപ്പ് വഴി ജിപിടി-6 ലൂണ ലഭിക്കും. സാധാരണ ചാറ്റ്ജിപിടിയിൽ മോഡലുകൾ നിലവിൽ ലഭ്യമല്ല. എന്നാൽ ഘട്ടംഘട്ടമായി ഇവ അവതരിപ്പിക്കുമെന്ന് ഓപ്പൺഎഐ അറിയിച്ചു.

എപിഐ നിരക്കിൽ 50 ശതമാനം കുറവ്

പുതിയ മോഡലുകളുടെ എപിഐ നിരക്കിലും കാര്യമായ കുറവാണ് കമ്പനി പ്രഖ്യാപിച്ചിരിക്കുന്നത്. ജിപിടി-6 സോളിന് ഒരു ദശലക്ഷം ഇൻപുട്ട് ടോക്കണുകൾക്ക് 2 ഡോളറും ഔട്ട്പുട്ട് ടോക്കണുകൾക്ക് 10 ഡോളറുമാണ് നിരക്ക്. ജിപിടി-6 ലൂണയ്ക്ക് ഒരു ദശലക്ഷം ഇൻപുട്ട് ടോക്കണുകൾക്ക് 0.10 ഡോളറും ഔട്ട്പുട്ട് ടോക്കണുകൾക്ക് 0.50 ഡോളറുമാണ് നിരക്ക്. ജിപിടി-5.6 സോൾ, ജിപിടി-5.6 ലൂണ എന്നിവയുടെ പ്രമോഷണൽ നിരക്കുകളെ അപേക്ഷിച്ച് ഇത് 50 ശതമാനം കുറവാണെന്നാണ് ഓപ്പൺഎഐയുടെ വിശദീകരണം.

പ്രകടനത്തിലും മുന്നേറ്റം

പ്രൊഫഷണൽ ജോലികൾ, കോഡിങ്, കമ്പ്യൂട്ടർ ഉപയോഗം, വസ്തുതാപരത തുടങ്ങിയ മേഖലകളിൽ പുതിയ മോഡലുകൾ മെച്ചപ്പെട്ട പ്രകടനം കാഴ്ചവയ്ക്കുന്നുവെന്നാണ് ഓപ്പൺഎഐയുടെ അവകാശവാദം. ഓട്ടോമേഷൻബെഞ്ച് പരിശോധനയിൽ പരമാവധി ശ്രമനിലയിൽ ജിപിടി-6 സോൾ 33.2 ശതമാനം സ്കോർ നേടി. ക്ലോഡ് ഓപസ് 5 നേടിയ 26.9 ശതമാനത്തേക്കാൾ ഉയർന്ന സ്കോറാണിത്. ഓരോ ടാസ്കിനും ഏകദേശം 0.27 ഡോളറാണ് ചെലവ്.

കോഡിങ്ങിലും മികച്ച പ്രകടനം

ഡീപ്‌സ്വീ പരിശോധനയിൽ ജിപിടി-6 സോൾ 68.8 ശതമാനം സ്കോർ നേടി. ക്ലോഡ് ഫേബിൾ 5 നേടിയ 69.9 ശതമാനത്തിന് അടുത്ത പ്രകടനമാണിത്. എന്നാൽ ഓരോ ടാസ്കിനുമുള്ള ചെലവ് ഏകദേശം 80 ശതമാനം കുറവാണെന്ന് ഓപ്പൺഎഐ പറയുന്നു. ഓപ്പൺഎഐയുടെ കണക്കുകൾ പ്രകാരം, ഓസ്‌വേൾഡ് 2.0 പരിശോധനയിൽ ജിപിടി-6 സോൾ 60.5 ശതമാനം സ്കോർ നേടി. ക്ലോഡ് ഓപസ് 5ന്റെ 60.3 ശതമാനവുമായി താരതമ്യം ചെയ്യുമ്പോൾ നേരിയ മുന്നേറ്റമാണിത്.

പിഴവുകൾ കുറയ്ക്കാനും ലക്ഷ്യം

ആന്തരിക വസ്തുതാപരതാ പരിശോധനയിൽ ജിപിടി-6 സോൾ, ജിപിടി-5.6 സോളിനെ അപേക്ഷിച്ച് പകുതിയോളം പിഴവുകൾ മാത്രമാണ് വരുത്തിയതെന്ന് ഓപ്പൺഎഐ അറിയിച്ചു. ഉയർന്ന ശ്രമനിലയിൽ ജിപിടി-6 ലൂണയ്ക്ക് ജിപിടി-5.6 സോളിനോട് സമാനമായ പ്രകടനം വളരെ കുറഞ്ഞ ചെലവിൽ നൽകാനാകുമെന്നും കമ്പനി അവകാശപ്പെടുന്നു. കൂടുതൽ വ്യക്തമായ മറുപടികൾ, സാങ്കേതിക പദപ്രയോഗങ്ങളുടെ കുറവ്, അനാവശ്യ വിശദാംശങ്ങൾ ഒഴിവാക്കൽ എന്നിവയും പുതിയ മോഡലുകളുടെ പ്രത്യേകതകളായി ഓപ്പൺഎഐ ചൂണ്ടിക്കാട്ടുന്നു.

ഷവോമി 18 പ്രോ സീരീസ് എത്തി; ഫീച്ചറുകൾ കണ്ട് ഞെട്ടരുത്!

Prashobh Prasannan — Fri, 25 Sep 2026 11:09:40 +0530

ഷവോമിയുടെ ഏറ്റവും പുതിയ മുൻനിര സ്മാർട്ട്ഫോൺ മോഡലുകളായ ഷവോമി 18 പ്രോ, ഷവോമി 18 പ്രോ മാക്സ് എന്നിവ ചൈനയിൽ അവതരിപ്പിച്ചു. മുൻഗാമി മോഡലുകളുടെ ഡിസൈൻ നിലനിർത്തിക്കൊണ്ടാണ് പുതിയ ഫോണുകൾ എത്തിയിരിക്കുന്നത്. പിന്നിൽ രണ്ടാമത്തെ ഡിസ്പ്ലേ ഉൾപ്പെടെയുള്ള പ്രത്യേകതകൾ തുടരുന്നതിനൊപ്പം ഹാർഡ്‌വെയറിലും ക്യാമറയിലും ബാറ്ററിയിലും ശ്രദ്ധേയമായ അപ്‌ഗ്രേഡുകളാണ് കമ്പനി നൽകിയിരിക്കുന്നത്. സ്നാപ്ഡ്രാഗൺ 8 എലൈറ്റ് ജെൻ 6 ശ്രേണിയിലെ ഏറ്റവും പുതിയ ചിപ്പുകളാണ് ഫോണുകൾക്ക് കരുത്തേകുന്നത്. ഇതോടൊപ്പം ഷവോമി പാഡ് 9 പ്രോ, പാഡ് 9 ടാബ്‌ലെറ്റുകളും കമ്പനി പുറത്തിറക്കി. ഈ മാസം ആദ്യം അവതരിപ്പിച്ച പാഡ് 9 പ്രോ മാക്സിനൊപ്പം പുതിയ ടാബ്‌ലെറ്റുകളും ഇനി ഷവോമിയുടെ ടാബ്‌ലെറ്റ് നിരയുടെ ഭാഗമാകും.

6.4 ഇഞ്ച് മുതൽ 6.9 ഇഞ്ച് വരെ അമോലെഡ് ഡിസ്പ്ലേ

ഷവോമി 18 പ്രോയിൽ 6.4 ഇഞ്ച് ഫുൾ എച്ച്‌ഡി പ്ലസ് അമോലെഡ് ഡിസ്പ്ലേയാണ് നൽകിയിരിക്കുന്നത്. 120 ഹെർട്സ് റിഫ്രഷ് റേറ്റ്, 300 ഹെർട്സ് ടച്ച് സാംപ്ലിങ് റേറ്റ്, പരമാവധി 4,000 നിറ്റ്സ് ബ്രൈറ്റ്നസ് എന്നിവയാണ് ഡിസ്പ്ലേയുടെ പ്രത്യേകതകൾ. 18 പ്രോ മാക്സിൽ 6.9 ഇഞ്ച് ഫുൾ എച്ച്‌ഡി പ്ലസ് അമോലെഡ് ഡിസ്പ്ലേയാണ്. 120 ഹെർട്സ് റിഫ്രഷ് റേറ്റ്, 300 ഹെർട്സ് ടച്ച് സാംപ്ലിങ്, 4,000 നിറ്റ്സ് വരെ പരമാവധി ബ്രൈറ്റ്നസ് എന്നിവ ഇവിടെയും ലഭിക്കും. ഇരു ഫോണുകളുടെയും ഡിസ്പ്ലേകൾ ഡി‌സിഐ-പി3 കളർ ഗാമറ്റിനെ പിന്തുണയ്ക്കുന്നു. പുതിയ പ്രൈവസി ഡിസ്പ്ലേ ഫീച്ചറും നൽകിയിട്ടുണ്ട്. സ്ക്രീൻ കാണാനാകുന്ന ആംഗിൾ കുറയ്ക്കുകയും സമീപത്തുള്ളവർ സ്ക്രീനിലേക്ക് നോക്കുന്നത് തടയുകയുമാണ് ഇതിന്റെ ലക്ഷ്യം.

പിന്നിലും അമോലെഡ് സ്ക്രീൻ

ഫോണുകളുടെ പിന്നിൽ രണ്ടാമത്തെ അമോലെഡ് ഡിസ്പ്ലേയും നൽകിയിട്ടുണ്ട്. ഷവോമി 18 പ്രോയിൽ 2.7 ഇഞ്ച് സ്ക്രീനാണെങ്കിൽ 18 പ്രോ മാക്സിൽ 2.9 ഇഞ്ച് സ്ക്രീനാണ്. രണ്ട് പിൻ ഡിസ്പ്ലേകൾക്കും 120 ഹെർട്സ് റിഫ്രഷ് റേറ്റും 4,000 നിറ്റ്സ് വരെ പരമാവധി ബ്രൈറ്റ്നസും ലഭിക്കും.

200 എംപി ക്യാമറകളുടെ കരുത്ത്

ക്യാമറ വിഭാഗത്തിലാണ് ഫോണുകളുടെ പ്രധാന ആകർഷണം. ഇരു മോഡലുകളിലും ട്രിപ്പിൾ പിൻ ക്യാമറ സജ്ജീകരണമാണുള്ളത്. ഒഐഎസ് പിന്തുണയുള്ള 200 എംപി പ്രൈമറി ക്യാമറ, ഒഐഎസ് പിന്തുണയുള്ള 200 എംപി പെരിസ്കോപ്പ് ടെലിഫോട്ടോ ക്യാമറ, 102 ഡിഗ്രി വ്യൂ ഫീൽഡുള്ള 50 എംപി അൾട്രാ വൈഡ് ക്യാമറ എന്നിവയാണ് പിൻഭാഗത്തുള്ളത്. 8കെ റെസല്യൂഷനിൽ 30 എഫ്പിഎസ് വരെ വീഡിയോ റെക്കോർഡ് ചെയ്യാനും സാധിക്കും. സെൽഫികൾക്കും വീഡിയോ കോളുകൾക്കുമായി 50 എംപി മുൻ ക്യാമറയും നൽകിയിട്ടുണ്ട്.

8,500 എംഎഎച്ച് ബാറ്ററി

ബാറ്ററി ശേഷിയിലും ഷവോമി വലിയ മുന്നേറ്റമാണ് നടത്തിയിരിക്കുന്നത്. ഷവോമി 18 പ്രോയിൽ 7,000 എംഎഎച്ച് ബാറ്ററിയാണുള്ളത്. 18 പ്രോ മാക്സിൽ ഇത് 8,500 എംഎഎച്ചായി ഉയരും. രണ്ട് മോഡലുകളും 100 വാട്ട് വയർഡ് ചാർജിങ്ങും 50 വാട്ട് വയർലെസ് ചാർജിങ്ങും പിന്തുണയ്ക്കുന്നു. 27 വാട്ട് വയർഡ് റിവേഴ്സ് ചാർജിങ് സൗകര്യവും ലഭിക്കും. ഇൻ-ഡിസ്പ്ലേ ഫിംഗർപ്രിന്റ് സെൻസർ, ഫേസ് അൺലോക്ക് എന്നിവയും ഫോണുകളിലുണ്ട്. ആൻഡ്രോയിഡ് 17 അടിസ്ഥാനമാക്കിയുള്ള ഷവോമിയുടെ ഹൈപ്പർഒഎസ് 4 ആണ് ഓപ്പറേറ്റിങ് സിസ്റ്റം.

ഷവോമി പാഡ് 9 പ്രോയും പാഡ് 9ഉം

സ്മാർട്ട്ഫോണുകൾക്കൊപ്പം ഷവോമി പാഡ് 9 പ്രോ, പാഡ് 9 എന്നീ ടാബ്‌ലെറ്റുകളും അവതരിപ്പിച്ചു. പാഡ് 9 പ്രോയിൽ 12.5 ഇഞ്ച് എൽസിഡി ഡിസ്പ്ലേയാണ്. 3.2കെ റെസല്യൂഷനും 144 ഹെർട്സ് റിഫ്രഷ് റേറ്റുമുണ്ട്. സ്നാപ്ഡ്രാഗൺ 8 ജെൻ 5 ചിപ്പാണ് ടാബ്‌ലെറ്റിന് കരുത്തേകുന്നത്. 12 ജിബി വരെ റാമും 256 ജിബി വരെ യു‌എഫ്‌എസ് 4.1 സ്റ്റോറേജും ലഭിക്കും.

50 എംപി പിൻ ക്യാമറയും 32 എംപി മുൻ ക്യാമറയുമാണ് നൽകിയിരിക്കുന്നത്. 67 വാട്ട് ഫാസ്റ്റ് ചാർജിങ് പിന്തുണയുള്ള 11,000 എംഎഎച്ച് ബാറ്ററിയാണ് മറ്റൊരു പ്രധാന പ്രത്യേകത. പാഡ് 9ൽ 11.2 ഇഞ്ച് ഡിസ്പ്ലേയാണ്. 3.2കെ റെസല്യൂഷനും 144 ഹെർട്സ് റിഫ്രഷ് റേറ്റുമുണ്ട്. സ്നാപ്ഡ്രാഗൺ 8എസ് ജെൻ 4 ചിപ്പാണ് ഉപയോഗിച്ചിരിക്കുന്നത്. 12 ജിബി വരെ റാമും 256 ജിബി വരെ സ്റ്റോറേജും ലഭിക്കും. 13 എംപി പിൻ ക്യാമറയും 8 എംപി മുൻ ക്യാമറയുമാണ് പാഡ് 9ൽ. 45 വാട്ട് ഫാസ്റ്റ് ചാർജിങ് പിന്തുണയുള്ള 9,720 എംഎഎച്ച് ബാറ്ററിയാണ് നൽകിയിരിക്കുന്നത്.

വില എത്ര?

ഷവോമി 18 പ്രോയുടെ 12 ജിബി റാം, 256 ജിബി സ്റ്റോറേജ് പതിപ്പിന് ചൈനയിൽ വില 5,999 യുവാൻ ആണ്. ഇന്ത്യൻ കറൻസിയിൽ ഏകദേശം ₹86,000 വരും. 12 ജിബി/512 ജിബി പതിപ്പിന് 6,999 യുവാനും 16 ജിബി/512 ജിബി പതിപ്പിന് 7,999 യുവാനുമാണ് വില. 16 ജിബി/1 ടിബി പതിപ്പിന് 8,999 യുവാൻ നൽകണം. സുതാര്യമായ ഡിസൈൻ ഉള്ള 16 ജിബി/1 ടിബി പതിപ്പിന് 9,999 യുവാനാണ് വില.

ഷവോമി 18 പ്രോ മാക്സിന്റെ 12 ജിബി/256 ജിബി പതിപ്പിന് 6,999 യുവാനാണ് വില. 12 ജിബി/512 ജിബി പതിപ്പിന് 7,999 യുവാനും 16 ജിബി/512 ജിബിക്ക് 8,999 യുവാനും വില വരും. 16 ജിബി/1 ടിബി പതിപ്പിന് 9,999 യുവാനും സുതാര്യ പതിപ്പിന് 10,999 യുവാനുമാണ് വില. പാഡ് 9 പ്രോയുടെ വില 3,799 യുവാൻ മുതലാണ്. പാഡ് 9ന്റെ വില 2,999 യുവാൻ മുതലാണ് ആരംഭിക്കുന്നത്. ഇന്ത്യയിലെ വിലയും വിൽപ്പന തീയതിയും സംബന്ധിച്ച് കമ്പനി പിന്നീട് പ്രഖ്യാപനം നടത്തുമെന്നാണ് പ്രതീക്ഷിക്കുന്നത്.

ഒപ്പോയുടെ പുതിയ ഫോൺ വരുന്നു; ഈ ഫീച്ചറുകൾ നിങ്ങളെ ഞെട്ടിക്കും

Prashobh Prasannan — Thu, 24 Sep 2026 10:25:25 +0530

കെ സീരീസിലെ നാലാമൻ

144 ഹെർട്സ് അമോലെഡ് ഡിസ്പ്ലേ

50 മെഗാപിക്സൽ ക്യാമറ

8000 എംഎഎച്ച് ബാറ്ററി

ഐപി69കെ റേറ്റിങ്ങും സ്റ്റീരിയോ സ്പീക്കറുകളും

വില പ്രഖ്യാപിച്ചിട്ടില്ല

ഐഫോൺ 18 പ്രോ വാങ്ങിയവർ ശ്രദ്ധിക്കുക; ഫേസ് ഐഡി പണി മുടക്കുന്നു, ഫോൺ തനിയെ റീബൂട്ട് ചെയ്യുന്നതായി പരാതി

Prashobh Prasannan — Tue, 22 Sep 2026 13:23:07 +0530

ഐഫോൺ 18 പ്രോ, ഐഫോൺ 18 പ്രോ മാക്സ് ഉപയോക്താക്കൾക്ക് പുതിയ തലവേദന. ഫേസ് ഐഡി ഉപയോഗിക്കാൻ ശ്രമിക്കുമ്പോൾ ഫോൺ മരവിക്കുകയും പിന്നീട് തനിയെ റീബൂട്ടായി ലോക്ക് സ്ക്രീനിലേക്ക് മടങ്ങുകയും ചെയ്യുന്നതായാണ് ചില ഉപയോക്താക്കളുടെ പരാതി. പ്രശ്നം എല്ലാ ഉപയോക്താക്കളെയും ബാധിക്കുന്നതായി നിലവിൽ സൂചനയില്ലെങ്കിലും ഫേസ് ഐഡിയുമായി ബന്ധപ്പെട്ട വിവിധ തകരാറുകൾ റിപ്പോർട്ട് ചെയ്യപ്പെട്ടിട്ടുണ്ട്.

ഫേസ് ഐഡി ഉപയോഗിക്കുമ്പോൾ ഫോൺ ഹാംഗാകുന്നു

ആപ്പ് തുറക്കുന്നതിനായി ഫേസ് ഐഡി ഉപയോഗിക്കുമ്പോഴാണ് ചിലർക്ക് പ്രധാനമായും പ്രശ്‍നം നേരിടുന്നതെന്നാണ് റിപ്പോർട്ടുകൾ. ഫേസ് ഐഡി ഉപയോഗിച്ച് തിരിച്ചറിയൽ നടത്താൻ ശ്രമിക്കുന്നതിനിടെ ഐഫോൺ പ്രതികരിക്കാതാകുകയും പിന്നീട് സ്വയം റീബൂട്ടാകുകയും ചെയ്യുന്നു. റീബൂട്ടായതിന് ശേഷം ഫോൺ വീണ്ടും ലോക്ക് സ്ക്രീനിൽ എത്തുന്നതായും ഉപയോക്താക്കൾ പറയുന്നു. മാക്‌റൂമേഴ്‌സിന്റെ റിപ്പോർട്ട് പ്രകാരം, റെഡിറ്റിലെ ഒരു ഉപയോക്താവാണ് ഇത്തരമൊരു അനുഭവം പങ്കുവച്ചത്. 9ടുമാക് ആണ് ഈ പോസ്റ്റ് ശ്രദ്ധയിൽപ്പെടുത്തിയതെന്ന് ബിസിനസ് ടുഡേ റിപ്പോർട്ട് ചെയ്യുന്നു.

‘ഫേസ് ഐഡി ലഭ്യമല്ല’ എന്ന മുന്നറിയിപ്പും

മാക്‌റൂമേഴ്‌സ് ഫോറത്തിലും സമാനമായ പരാതികൾ ഉയർന്നിട്ടുണ്ട്. ഫേസ് ഐഡി ക്രമീകരിക്കുന്നതിനിടെ ‘ഫേസ് ഐഡി ലഭ്യമല്ല’ എന്ന മുന്നറിയിപ്പ് ലഭിച്ചതായി ചില ഐഫോൺ 18 പ്രോ ഉപയോക്താക്കൾ പറയുന്നു. ഫേസ് ഐഡി ഉപയോഗിക്കുമ്പോൾ ഉപയോക്താവ് സ്ക്രീനിലേക്ക് നോക്കുന്നുണ്ടോ എന്ന് പരിശോധിക്കുന്നതിനുള്ള ‘ശ്രദ്ധ ആവശ്യമാണ്’ എന്ന ക്രമീകരണം പ്രവർത്തിക്കുന്നതിലും സ്ഥിരതയില്ലെന്നാണ് മറ്റുചിലരുടെ പരാതി.

ഫേസ് ഐഡി സംവിധാനത്തിൽ മാറ്റവുമായി ആപ്പിൾ

ഐഫോൺ 18 പ്രോ മോഡലുകളിൽ ഫേസ് ഐഡിയുടെ ഹാർഡ്‌വെയറിൽ ആപ്പിൾ മാറ്റം വരുത്തിയതായാണ് റിപ്പോർട്ടുകൾ. ഡൈനാമിക് ഐലൻഡിന്റെ വലുപ്പം കുറയ്ക്കുന്നതിന്റെ ഭാഗമായി ഇൻഫ്രാറെഡ് ക്യാമറ സ്ക്രീനിന് താഴെയായി, മുകളിലെ ഇടതുഭാഗത്തേക്ക് മാറ്റിയതായാണ് വിവരം. ഈ ഹാർഡ്‌വെയർ മാറ്റത്തിന് ഇപ്പോൾ റിപ്പോർട്ട് ചെയ്യുന്ന ഫേസ് ഐഡി പ്രശ്നങ്ങളുമായി ബന്ധമുണ്ടോ എന്നത് വ്യക്തമല്ല. സോഫ്റ്റ്‌വെയറിലെ പിഴവുകളും കാരണമാകാമെന്നാണ് വിലയിരുത്തൽ.

ഐഒഎസ് 27 അപ്‌ഡേറ്റിൽ പരിഹാരമുണ്ടാകുമോ?

ഭാവിയിൽ പുറത്തിറങ്ങുന്ന ഐഒഎസ് 27 അപ്‌ഡേറ്റിലൂടെ ഫേസ് ഐഡിയുമായി ബന്ധപ്പെട്ട ഇത്തരം തകരാറുകൾ ആപ്പിൾ പരിഹരിച്ചേക്കുമെന്നാണ് മാക്‌റൂമേഴ്‌സ് റിപ്പോർട്ട് ചെയ്യുന്നത്. നിലവിൽ പരിമിതമായ എണ്ണം ഉപയോക്താക്കളിൽ നിന്നാണ് പരാതികൾ ലഭിച്ചിരിക്കുന്നത്. അതിനാൽ ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകളിലെ പ്രശ്നത്തിന്റെ യഥാർഥ വ്യാപ്‍തി വ്യക്തമല്ല. എല്ലാ ഉപയോക്താക്കളെയും ഈ തകരാർ ബാധിക്കുന്നതായി നിലവിൽ തെളിവുകളില്ല.

ക്യാമറയിൽ പുതിയ ചരിത്രം? ഓപ്പോ ഫൈൻഡ് X10 പ്രോ മാക്സ്

Prashobh Prasannan — Tue, 15 Sep 2026 12:31:35 +0530

ചൈനീസ് സ്‍മാർട്ട്ഫോൺ നിർമാതാക്കളായ ഓപ്പോ ക്യാമറ സാങ്കേതികവിദ്യയിൽ പുതിയ റെക്കോർഡ് ലക്ഷ്യമിടുന്നതായി റിപ്പോർട്ട്. ഒരേ ഫോണിൽ മൂന്ന് 200 മെഗാപിക്സൽ ക്യാമറകളുമായി ഓപ്പോ ഫൈൻഡ് എക്സ്10 പ്രോ മാക്സ് അവതരിപ്പിക്കാനാണ് കമ്പനിയുടെ നീക്കമെന്നാണ് സൂചന. സെപ്റ്റംബർ 22ന് ചൈനയിൽ നടക്കുന്ന ചടങ്ങിൽ ഫൈൻഡ് എക്സ്10 സീരീസ് ഔദ്യോഗികമായി അവതരിപ്പിക്കും.

ഈ വർഷം മാർച്ചിൽ വിവോയുടെ ക്യാമറ കേന്ദ്രീകൃത ഫ്ലാഗ്ഷിപ്പ് ഫോണായ എക്സ്300 അൾട്രയാണ് ലോകത്ത് ആദ്യമായി രണ്ട് 200 മെഗാപിക്സൽ ക്യാമറകളുമായി എത്തിയത്. പിന്നാലെ ഓപ്പോ ഫൈൻഡ് എക്സ്9 അൾട്രയിലും രണ്ട് 200 മെഗാപിക്സൽ ക്യാമറകൾ അവതരിപ്പിച്ചിരുന്നു. ഇതിന് പിന്നാലെയാണ് മൂന്ന് 200 മെഗാപിക്സൽ ക്യാമറകളുമായി പുതിയ മോഡൽ എത്തിക്കാൻ ഓപ്പോ ഒരുങ്ങുന്നത്.

സെപ്റ്റംബർ 22ന് ഫൈൻഡ് എക്സ്10 സീരീസ്

ഫൈൻഡ് എക്സ്10 സീരീസ് സെപ്റ്റംബർ 22ന് ചൈനയിൽ അവതരിപ്പിക്കുമെന്ന് ഓപ്പോ ഔദ്യോഗികമായി സ്ഥിരീകരിച്ചിട്ടുണ്ട്. ഫൈൻഡ് എക്സ്10ഇ, ഫൈൻഡ് എക്സ്10, ഫൈൻഡ് എക്സ്10 പ്രോ മാക്സ് എന്നീ സ്മാർട്ട്ഫോണുകൾക്കൊപ്പം വാച്ച് എസ്2 സ്മാർട്ട് വാച്ചും എൻകോ എക്സ്4 വയർലെസ് ഇയർബഡുകളും അവതരിപ്പിക്കും. പ്രഖ്യാപനത്തിന് പിന്നാലെ ചൈനയിലെ ഓപ്പോ വെബ്സൈറ്റിൽ പ്രീ-ഓർഡർ ആരംഭിച്ചിട്ടുണ്ട്. ഫോണുകളുടെ ചിത്രങ്ങൾ, മെമ്മറി-സ്റ്റോറേജ് ഓപ്ഷനുകൾ, നിറങ്ങൾ തുടങ്ങിയ വിവരങ്ങളും ഇതിലൂടെ പുറത്തുവന്നിട്ടുണ്ട്.

മൂന്ന് 200 മെഗാപിക്സൽ ക്യാമറകൾ

ലോകത്തിലെ ആദ്യ മൂന്ന് 200 മെഗാപിക്സൽ ക്യാമറകളുള്ള സ്മാർട്ട്ഫോൺ എന്ന പ്രത്യേകതയോടെയായിരിക്കും ഫൈൻഡ് എക്സ്10 പ്രോ മാക്സ് എത്തുകയെന്നാണ് സൂചന. പ്രമുഖ ടിപ്സ്റ്ററായ ഐസ് യൂണിവേഴ്സാണ് ഇതുസംബന്ധിച്ച വിവരങ്ങൾ ആദ്യം പുറത്തുവിട്ടത്. പ്രധാന ക്യാമറയ്ക്കായി സാംസങ്ങിന്റെ ഏറ്റവും മികച്ച എച്ച്പിസി സെൻസർ ഉപയോഗിക്കുമെന്നാണ് റിപ്പോർട്ട്. ഫോട്ടോഗ്രഫി മേഖലയിൽ പുതിയ നിലവാരം സൃഷ്ടിക്കുകയാണ് ഓപ്പോയുടെ ലക്ഷ്യമെന്നാണ് സൂചന.

16 ജിബി റാമും 1 ടിബി സ്റ്റോറേജും

വാം ഓറഞ്ച്, മൂൺ വൈറ്റ്, ലൈറ്റ് ടൈറ്റാനിയം എന്നീ മൂന്ന് നിറങ്ങളിലാണ് ഫൈൻഡ് എക്സ്10 പ്രോ മാക്സ് എത്തുകയെന്നാണ് റിപ്പോർട്ട്. മെമ്മറി-സ്റ്റോറേജ് കാര്യത്തിലും ഫോണിന് നിരവധി ഓപ്ഷനുകളുണ്ടാകും. 12 ജിബി റാം, 256 ജിബി സ്റ്റോറേജ് മുതൽ 12 ജിബി റാം, 512 ജിബി സ്റ്റോറേജ്, 16 ജിബി റാം, 512 ജിബി സ്റ്റോറേജ്, 16 ജിബി റാം, 1 ടിബി സ്റ്റോറേജ് എന്നിങ്ങനെയാണ് പ്രതീക്ഷിക്കുന്ന വേരിയന്റുകൾ.

ഫൈൻഡ് എക്സ്10നും വമ്പൻ മെമ്മറി

സാധാരണ ഫൈൻഡ് എക്സ്10 മോഡലിനും നിരവധി മെമ്മറി ഓപ്ഷനുകൾ ലഭിക്കുമെന്നാണ് സൂചന. ക്വിങ്‌ചെങ്, ഐസ് ബ്ലൂ, ലൈറ്റ് ടൈറ്റാനിയം എന്നീ നിറങ്ങളിലാണ് ഫോൺ എത്തുകയെന്നാണ് റിപ്പോർട്ട്. 12 ജിബി റാം, 256 ജിബി സ്റ്റോറേജ്; 12 ജിബി റാം, 512 ജിബി സ്റ്റോറേജ്; 16 ജിബി റാം, 512 ജിബി സ്റ്റോറേജ്; 16 ജിബി റാം, 1 ടിബി സ്റ്റോറേജ് എന്നിങ്ങനെ നാല് കോൺഫിഗറേഷനുകൾ ലഭിച്ചേക്കും. സാധാരണ ഫൈൻഡ് എക്സ്10 മോഡലിലും 16 ജിബി റാമും 1 ടിബി സ്റ്റോറേജും ലഭിക്കുമെന്നതാണ് ശ്രദ്ധേയം.

ചെറിയ മോഡലിന് രണ്ട് ഓപ്ഷനുകൾ

ഫൈൻഡ് എക്സ്10ഇ താരതമ്യേന ലളിതമായ കോൺഫിഗറേഷനുകളുമായാകും എത്തുക. ഐസ് ബ്ലൂ, ലൈറ്റ് ടൈറ്റാനിയം നിറങ്ങളിൽ ഫോൺ ലഭിച്ചേക്കും. 12 ജിബി റാം, 256 ജിബി സ്റ്റോറേജ്, 16 ജിബി റാം, 512 ജിബി സ്റ്റോറേജ് എന്നിങ്ങനെ രണ്ട് ഓപ്ഷനുകളാണ് പ്രതീക്ഷിക്കുന്നത്.

കരുത്തേകുന്നത് പുതിയ ചിപ്പുകൾ

പ്രകടനത്തിന്റെ കാര്യത്തിലും ഫൈൻഡ് എക്സ്10 സീരീസ് ശ്രദ്ധേയമായിരിക്കുമെന്നാണ് റിപ്പോർട്ട്. ഫൈൻഡ് എക്സ്10ൽ ഡൈമെൻസിറ്റി 9600എമ്മും ഫൈൻഡ് എക്സ്10 പ്രോ മാക്സിൽ ഡൈമെൻസിറ്റി 9600 പ്രോ ചിപ്പും ഉപയോഗിച്ചേക്കും. പ്രോ മാക്സിലെ ചിപ്പ് പുതിയ 2 നാനോമീറ്റർ സാങ്കേതികവിദ്യയിൽ നിർമിച്ചതായിരിക്കുമെന്നാണ് സൂചന. അതേസമയം ഡൈമെൻസിറ്റി 9600എം, ഡൈമെൻസിറ്റി 9500നെ അടിസ്ഥാനമാക്കിയുള്ള പരിഷ്കരിച്ച 3 നാനോമീറ്റർ ചിപ്പായിരിക്കാമെന്നും റിപ്പോർട്ടുകളുണ്ട്. ഫൈൻഡ് എക്സ്10ഇയിൽ ഏത് ചിപ്പായിരിക്കും ഉപയോഗിക്കുക എന്നത് വ്യക്തമല്ല.

ഫോണുകൾക്കൊപ്പം വാച്ചും ഇയർബഡും

സ്മാർട്ട്ഫോണുകൾക്കൊപ്പം പുതിയ സ്മാർട്ട് വാച്ചും വയർലെസ് ഇയർബഡുകളും ഓപ്പോ അവതരിപ്പിക്കും. വാച്ച് എസ്2 വൈബ്രന്റ് ഓറഞ്ച്, മിസ്റ്റി പൗഡർ, മൗണ്ടൻ ഷാഡോ ഗ്രേ എന്നീ നിറങ്ങളിൽ ലഭിച്ചേക്കും. എൻകോ എക്സ്4 വയർലെസ് ഇയർബഡുകൾ പിങ്ക് ഗോൾഡ്, സോഫ്റ്റ് വൈറ്റ്, ടൈറ്റാനിയം ഗ്രേ എന്നീ നിറങ്ങളിലാകും എത്തുകയെന്നാണ് റിപ്പോർട്ട്. ഫൈൻഡ് എക്സ്10 സീരീസിനൊപ്പം സ്മാർട്ട്ഫോൺ, സ്മാർട്ട് വാച്ച്, വയർലെസ് ഇയർബഡുകൾ ഉൾപ്പെടുന്ന വിപുലമായ ഉപകരണ നിരയാണ് ഓപ്പോ അവതരിപ്പിക്കാൻ ഒരുങ്ങുന്നതെന്നാണ് സൂചന.

സ്മാര്‍ട്ട് ഫോൺ ക്യാമറ വിപ്ലവത്തിന് ഓപ്പണ്‍എഐ; 300 ദശലക്ഷം ഡോളറിന് 'ഗ്ലാസ് ഇമേജിങ്' സ്വന്തമാക്കി കമ്പനി

Sangeetha KS — Tue, 15 Sep 2026 14:55:29 +0530

സ്മാര്‍ട്ട്ഫോൺ ക്യാമറ രംഗത്തെ മുന്‍നിര സ്റ്റാര്‍ട്ടപ്പായ 'ഗ്ലാസ് ഇമേജിങ്' സ്വന്തമാക്കി ചാറ്റ്ജിപിടിയുടെ നിര്‍മാതാക്കളായ ഓപ്പണ്‍എഐ. ആപ്പിളിന്റെ മുന്‍ എന്‍ജിനീയര്‍മാര്‍ രൂപീകരിച്ച ഈ കമ്പനിയെ സ്വന്തമാക്കുന്നതോടെ, സ്വന്തമായി ഹാര്‍ഡ്വെയര്‍ ഉല്‍പ്പന്നങ്ങള്‍ നിര്‍മിക്കാനുള്ള നീക്കം ഓപ്പണ്‍എഐ കൂടുതല്‍ ശക്തമാക്കുകയാണ്. 300 ദശലക്ഷത്തിലധികം ഡോളറിനാണ് ഈ കരാറെന്ന് വാള്‍ സ്ട്രീറ്റ് ജേര്‍ണല്‍ റിപ്പോര്‍ട്ട് ചെയ്തു.

ആപ്പിളിലെ മിടുക്കന്മാര്‍ തുടങ്ങിയ സ്റ്റാര്‍ട്ടപ്പ്

ആപ്പിളിന്റെ പ്രശസ്തമായ 'പോര്‍ട്രെയ്റ്റ് മോഡ്' സാങ്കേതികവിദ്യ വികസിപ്പിച്ച ടീമിന് നേതൃത്വം നല്‍കിയ സിവ് അറ്റാര്‍, ടോം ബിഷപ്പ് എന്നിവര്‍ ചേര്‍ന്ന് 2019-ലാണ് ഗ്ലാസ് ഇമേജിങ് ആരംഭിക്കുന്നത്. കാലിഫോര്‍ണിയയിലെ ലോസ് ആള്‍ട്ടോസ് ആസ്ഥാനമായി പ്രവര്‍ത്തിക്കുന്ന ഈ കമ്പനി, ഏറ്റെടുക്കലിന് മുന്‍പായി വിവിധ നിക്ഷേപകരില്‍ നിന്നായി 30 ദശലക്ഷം ഡോളറോളം ഫണ്ട് സമാഹരിച്ചിരുന്നു.

ഫോട്ടോ എടുക്കുന്ന നിമിഷത്തില്‍ തന്നെ വരും ക്ലാരിറ്റി!

സ്മാര്‍ട്‌ഫോണ്‍ ക്യാമറകളുടെ ഭൗതികമായ പരിമിതികള്‍ നിര്‍മ്മിത ബുദ്ധി ഉപയോഗിച്ച് പരിഹരിക്കുകയാണ് ഗ്ലാസ് ഇമേജിങ് ചെയ്യുന്നത്. വിവിധ സ്മാര്‍ട്‌ഫോണ്‍ മോഡലുകളില്‍ ഉപയോഗിക്കുന്ന ക്യാമറ സിസ്റ്റങ്ങള്‍ക്ക് അനുയോജ്യമായ രീതിയില്‍ പ്രത്യേകം പരിശീലനം ലഭിച്ച 'ന്യൂറല്‍ നെറ്റ്വര്‍ക്കുകള്‍' ആണ് കമ്പനി ഇതിനായി ഉപയോഗിക്കുന്നത്. സാധാരണ ഫോട്ടോ എടുത്ത ശേഷം എഐ ഉപയോഗിച്ച് എഡിറ്റ് ചെയ്തു ക്വാളിറ്റി കൂട്ടുന്ന രീതിയില്‍ നിന്ന് വ്യത്യസ്തമായി, ക്യാമറയുടെ ഷട്ടര്‍ ബട്ടണ്‍ അമര്‍ത്തുന്ന നിമിഷത്തില്‍ തന്നെ ചിത്രത്തിന്റെ നിലവാരം മികച്ചതാക്കാന്‍ ഈ സാങ്കേതികവിദ്യയ്ക്ക് കഴിയും.

ഹാര്‍ഡ് വെയർ വിപണിയിലേക്ക് ഓപ്പണ്‍എഐ

സ്വന്തമായി ടെക്‌നോളജി ഉപകരണങ്ങള്‍ വിപണിയിലെത്തിക്കാനുള്ള ഓപ്പണ്‍എഐയുടെ പദ്ധതികള്‍ക്ക് വലിയ ഊര്‍ജ്ജം നല്‍കുന്നതാണ് ഈ ഏറ്റെടുക്കല്‍. സ്മാര്‍ട്‌ഫോണുകള്‍, ഇയര്‍ബഡ്സ്, എഐ കംപാനിയന്‍ ഉപകരണങ്ങള്‍ എന്നിവ വികസിപ്പിക്കാനുള്ള സാധ്യതകള്‍ കമ്പനി പരിശോധിച്ചു വരികയാണ്.

ആപ്പിളിന്റെ മുന്‍ ചീഫ് ഡിസൈനറായ ജോണി ഐവുമായി ചേര്‍ന്നും ഓപ്പണ്‍എഐ പുതിയ ഡിവൈസുകള്‍ക്കായി പ്രവര്‍ത്തിക്കുന്നുണ്ട്. സ്മാര്‍ട്‌ഫോണ്‍ ഫോട്ടോഗ്രഫിയിലും ആപ്പിളിന്റെ ക്യാമറ സാങ്കേതികവിദ്യയിലും മികച്ച പരിചയസമ്പത്തുള്ള ഒരു സംഘത്തെ തന്നെ ഒപ്പം കിട്ടുന്നത് ഓപ്പണ്‍എഐക്ക് ക്യാമറ- ഇമേജിങ് ശേഷി വര്‍ധിപ്പിക്കാന്‍ സഹായകമാകും. അതേസമയം, ഈ ഏറ്റെടുക്കല്‍ വാര്‍ത്തയോട് ഓപ്പണ്‍എഐ ഇതുവരെ ഔദ്യോഗികമായി പ്രതികരിച്ചിട്ടില്ല.

ഐഫോൺ 18 പ്രോ: ഇന്ത്യയിൽ നിർമ്മിച്ച് കയറ്റുമതി ചെയ്യാൻ ആപ്പിൾ

Prashobh Prasannan — Fri, 18 Sep 2026 11:48:28 +0530

ഐഫോൺ 18 പ്രോ, ഐഫോൺ 18 പ്രോ മാക്സ് മോഡലുകളുടെ വിൽപ്പനയ്ക്കുള്ള ഒരുക്കങ്ങൾ ശക്തമാക്കി ആപ്പിൾ. ആദ്യദിനം മുതൽ തന്നെ ഇന്ത്യയിൽ നിർമ്മിക്കുന്ന പ്രോ മോഡലുകൾ ആഗോള വിപണിയിൽ എത്തിക്കാനാണ് കമ്പനിയുടെ നീക്കം. സെപ്റ്റംബർ 18ന് ആഗോളതലത്തിൽ വിൽപ്പന ആരംഭിക്കുന്നതിന് മുന്നോടിയായി ഇന്ത്യയിലെ ആപ്പിളിന്റെ നിർമ്മാണ കേന്ദ്രങ്ങളിൽ നിന്ന് പുതിയ ഐഫോണുകൾ കയറ്റുമതി ചെയ്തതായി റിപ്പോർട്ടുകൾ പറയുന്നു. ആദ്യമായി ഐഫോണിന്റെ ഏറ്റവും പുതിയ പ്രോ മോഡലുകൾ പുറത്തിറങ്ങുന്ന ദിവസം തന്നെ ഇന്ത്യയിൽ നിർമ്മിക്കുന്നുവെന്ന പ്രത്യേകതയും ഇത്തവണയുണ്ട്.

ചെന്നൈയിൽ നിന്ന് ചാർട്ടർ വിമാനങ്ങൾ

ദി ഇക്കണോമിക് ടൈംസ് റിപ്പോർട്ട് പ്രകാരം, ഐഫോൺ 18 പ്രോ, ഐഫോൺ 18 പ്രോ മാക്സ് ഫോണുകളുമായി നിരവധി ചാർട്ടർ വിമാനങ്ങൾ ചെന്നൈയിൽ നിന്ന് പുറപ്പെട്ടിട്ടുണ്ട്. അമേരിക്ക ഉൾപ്പെടെയുള്ള വിവിധ വിപണികളിലെ ആപ്പിൾ സ്റ്റോറുകളിൽ വിൽപ്പന ആരംഭിക്കുന്ന സമയത്ത് തന്നെ ആവശ്യത്തിന് ഫോണുകൾ ലഭ്യമാക്കുന്നതിനാണ് ഈ നീക്കം. വരും ദിവസങ്ങളിൽ കൂടുതൽ ചാർട്ടർ വിമാനങ്ങൾ സർവീസ് നടത്താനും സാധ്യതയുണ്ടെന്നാണ് റിപ്പോർട്ട്.

ഫോക്സ്കോൺ, ടാറ്റ ഇലക്ട്രോണിക്സ്

ഫോക്സ്കോണും ടാറ്റ ഇലക്ട്രോണിക്സും നടത്തുന്ന രണ്ട് ഫാക്ടറികളിലാണ് ഐഫോൺ 18 പ്രോ, പ്രോ മാക്സ് മോഡലുകളുടെ നിർമ്മാണം നടക്കുന്നതെന്നാണ് റിപ്പോർട്ട്. ആഗോള വിപണിയിലെ ആവശ്യകത അനുസരിച്ച് നിർമ്മാണ ലൈനുകളുടെ എണ്ണം ഏകദേശം 12 ആയി ഉയർത്താനും ആപ്പിൾ പദ്ധതിയിടുന്നതായി റിപ്പോർട്ടിൽ പറയുന്നു. ഐഫോൺ 18 പ്രോ സീരീസിന്റെ ആകെ ഉൽപ്പാദനത്തിന്റെ ഏകദേശം 80 മുതൽ 90 ശതമാനം വരെ മറ്റ് രാജ്യങ്ങളിലേക്ക് കയറ്റുമതി ചെയ്യാനാണ് സാധ്യത. ഇന്ത്യയിൽ വിൽക്കുന്ന ആകെ ഐഫോണുകളിൽ പ്രോ, പ്രോ മാക്സ് മോഡലുകൾക്ക് ഏകദേശം 15 ശതമാനം പങ്കുണ്ടെന്നും റിപ്പോർട്ടുകൾ പറയുന്നു.

ആദ്യമായി ഐഫോൺ 17ന് ശേഷം

ആദ്യ ദിവസം തന്നെ ഇന്ത്യയിൽ നിർമ്മിച്ച് ആഗോള വിപണിയിലേക്ക് കയറ്റുമതി ചെയ്യുന്ന ഐഫോൺ മോഡലുകളിൽ ഇത് രണ്ടാമത്തേതാണ്. കഴിഞ്ഞ വർഷം വിൽപ്പന ആരംഭിച്ച ദിവസം മുതൽ തന്നെ ഇന്ത്യയിൽ നിർമ്മിച്ച് ആഗോളതലത്തിൽ കയറ്റുമതി ചെയ്ത ആദ്യ ഐഫോൺ ഐഫോൺ 17 ആയിരുന്നു. അതേസമയം, ആപ്പിളിന്റെ ആദ്യ ഫോൾഡബിൾ ഫോണായ ഐഫോൺ ഡ്യൂയോ ഇന്ത്യയിൽ നിർമ്മിക്കുന്നില്ലെന്നാണ് വിവരം.

അമേരിക്കയിലേക്ക് ഇന്ത്യയിൽ നിന്ന് കൂടുതൽ ഐഫോണുകൾ

സ്‍മാർട്ട്ഫോൺ കയറ്റുമതിയിൽ ഇന്ത്യയുടെ ഏറ്റവും വലിയ വിപണിയായി അമേരിക്ക മാറിയിട്ടുണ്ട്. പ്രത്യേകിച്ച് ഐഫോൺ കയറ്റുമതിയാണ് ഈ മാറ്റത്തിന് പ്രധാന കാരണം. കൗണ്ടർപോയിന്റ് റിസർച്ചിലെ സീനിയർ റിസർച്ച് അനലിസ്റ്റ് പ്രാചിർ സിങ്ങിന്റെ അഭിപ്രായത്തിൽ, ആപ്പിൾ ഇന്ത്യയിലേക്ക് ഐഫോൺ നിർമ്മാണം മാറ്റുന്നതിന്റെ ഭാഗമായാണ് ഈ മാറ്റം സംഭവിച്ചത്. അമേരിക്കയിലേക്കുള്ള സ്മാർട്ട്ഫോൺ ഇറക്കുമതിയുടെ പ്രധാന ഉറവിടമായി ഇന്ത്യ ചൈനയെ മറികടന്നതായും, ഫോക്സ്കോൺ, ടാറ്റ പ്ലാന്റുകളിലേക്കുള്ള ആപ്പിളിന്റെ നിർമ്മാണ മാറ്റമാണ് ഇതിന് പ്രധാന കാരണമെന്നും അദ്ദേഹം ഇന്ത്യ ടുഡേ ടെക്കിനോട് പറഞ്ഞു.

2026ൽ 26 ശതമാനം ഐഫോണുകൾ ഇന്ത്യയിൽ നിർമ്മിക്കുമെന്ന് കണക്ക്

2026ൽ ആഗോളതലത്തിൽ കയറ്റുമതി ചെയ്യുന്ന ഐഫോണുകളിൽ ഏകദേശം 26 ശതമാനവും ഇന്ത്യയിൽ നിർമ്മിച്ചതായിരിക്കുമെന്നാണ് കൗണ്ടർപോയിന്റ് റിസർച്ചിന്റെ കണക്ക്. അതായത് ആഗോളതലത്തിൽ കയറ്റുമതി ചെയ്യുന്ന ഏകദേശം നാല് ഐഫോണുകളിൽ ഒരെണ്ണം ഇന്ത്യയിൽ നിർമ്മിച്ചതായിരിക്കാനുള്ള സാധ്യതയുണ്ട്.

ഇന്ത്യയിൽ വിപുലമാകുന്ന നിർമ്മാണ ശൃംഖല

അതേസമയം ആപ്പിൾ ഇന്ത്യയിലെ പ്രവർത്തനങ്ങൾ വലിയ തോതിൽ വിപുലീകരിക്കുന്നതായി റിപ്പോർട്ടുകൾ ഉണ്ട്. അന്തിമ അസംബ്ലിംഗ്, പരിശോധന, ഫോൺ ബോഡി നിർമ്മാണം, തിരഞ്ഞെടുത്ത മെക്കാനിക്കൽ ഭാഗങ്ങൾ, ബാറ്ററി പാക്കുകൾ, ചാർജറുകൾ, കേബിളുകൾ, പാക്കേജിങ്, നിർമ്മാണ ഉപകരണങ്ങൾ, ചില ഉപഘടകങ്ങൾ എന്നിവയുടെ നിർമ്മാണവും പ്രവർത്തനങ്ങളും ഇന്ത്യയിൽ നടക്കുന്നതായി അദ്ദേഹം പറഞ്ഞു. എന്നാൽ ഉയർന്ന മൂല്യമുള്ളതോ സാങ്കേതികമായി കൂടുതൽ സങ്കീർണ്ണമായതോ ആയ നിരവധി ഘടകങ്ങൾ ഇപ്പോഴും ഇറക്കുമതി ചെയ്യുന്നതാണ്. ഡിസ്പ്ലേകൾ, ക്യാമറ മൊഡ്യൂളുകൾ, നൂതന സെമികണ്ടക്ടറുകൾ, മെമ്മറി, പ്രധാന ഇലക്ട്രോണിക് ഉപഘടകങ്ങൾ എന്നിവ ഇതിൽ ഉൾപ്പെടുന്നു. ഇന്ത്യയിലെ ഐഫോൺ നിർമ്മാണം വർധിക്കുന്നതോടെ ആഗോള വിപണിയിലേക്കുള്ള ആപ്പിളിന്റെ വിതരണ ശൃംഖലയിൽ രാജ്യത്തിന്റെ പങ്ക് കൂടുതൽ ശക്തമാകുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്.