Asianet News Malayalam

ലൗലി പ്രൊഫഷണൽ സർവകലാശാലയിൽ സംഘർഷം; സ്ഥിതി നിയന്ത്രണവിധേയമെന്ന് പൊലീസ്

Anusree A — Sun, 27 Sep 2026 09:54:20 +0530

കപൂർത്തല: പഞ്ചാബിലെ ലൗലി പ്രൊഫഷണൽ സർവകലാശാലയിൽ ഇന്ന് പുലർച്ചെയുണ്ടായ സംഘർഷത്തെ തുടർന്ന് ക്യാമ്പസിൽ വലിയ പ്രതിഷേധം. നിരവധി വാഹനങ്ങൾക്ക് തീയിടുകയും സർവകലാശാലയുടെ വിവിധ ഭാഗങ്ങളിൽ അക്രമം നടക്കുകയും ചെയ്തു. ക്യാമ്പസിലെ കടകൾ തകർത്തതിന്റെയും കടകളിൽനിന്ന് സാധനങ്ങൾ മോഷ്ടിക്കുന്നതിന്റെയും ദൃശ്യങ്ങളും പുറത്തുവന്നു. പ്രതിഷേധത്തെ തുടർന്ന് സ്ഥലത്തെത്തിയ പോലീസ് വിദ്യാർഥികളുമായി സംസാരിച്ചു. നിലവിൽ സ്ഥിതി നിയന്ത്രണവിധേയമാണെന്ന് കപൂർത്തല എസ്പി അറിയിച്ചു. ചണ്ഡീഗഡ്–അമൃത്സർ ദേശീയപാതയിലെ ഗതാഗതവും പുനഃസ്ഥാപിച്ചതായി എസ്പി വ്യക്തമാക്കി.

സർവകലാശാലയിലെ ഹോസ്റ്റലിൽ ഒരു പെൺകുട്ടി ലൈംഗികാതിക്രമത്തിനിരയായെന്ന തരത്തിൽ സോഷ്യൽ മീഡിയയിൽ പ്രചരിച്ച പോസ്റ്റിന് പിന്നാലെയാണ് പ്രതിഷേധം ഉണ്ടായതെന്നാണ് വിവരം. എന്നാൽ ഇത്തരമൊരു സംഭവം സർവകലാശാലയിൽ നടന്നിട്ടില്ലെന്നും വിദ്യാർഥികൾ തെറ്റായ വിവരങ്ങൾ വിശ്വസിക്കരുതെന്നും സർവകലാശാല അധികൃതർ അറിയിച്ചു. അതേസമയം, യാഥാർഥ്യം സർവകലാശാല മറച്ചുവെക്കുകയാണെന്നാണ് പ്രതിഷേധിക്കുന്ന വിദ്യാർഥികളുടെ ആരോപണം.

പ്രചരിച്ച അഭ്യൂഹങ്ങൾ പരിശോധിക്കുമെന്ന് കപൂർത്തല എസ്പി വ്യക്തമാക്കി. സർവകലാശാലയുമായി ബന്ധപ്പെട്ട് വിദ്യാർഥികൾ നൽകിയ പരാതികളും പരിശോധിക്കുമെന്നും അദ്ദേഹം അറിയിച്ചു. അതേസമയം, പ്രതിഷേധത്തിന്റെ യഥാർഥ ഉറവിടം സംബന്ധിച്ച് ഇപ്പോഴും വ്യക്തതയില്ല. സോഷ്യൽ മീഡിയയിൽ പ്രചരിച്ച ആരോപണങ്ങളാണോ പ്രതിഷേധത്തിന് പിന്നിലെന്നും മറ്റേതെങ്കിലും വിഷയങ്ങൾ സംഘർഷത്തിലേക്ക് നയിച്ചിട്ടുണ്ടോയെന്നും പോലീസ് പരിശോധിച്ചുവരികയാണ്. സംഘർഷത്തിനിടെ ക്യാമ്പസിന്റെ വിവിധ ഭാഗങ്ങളിൽ വ്യാപക നാശനഷ്ടമുണ്ടായതായും നിരവധി വാഹനങ്ങൾ കത്തിച്ചതായും റിപ്പോർട്ടുകളുണ്ട്.

മുംബൈയിലെ എന്‍എസ്ഇക്ക് പുതിയ കെട്ടിടം, ത്രിവര്‍ണഛായയില്‍ പുതിയ ആസ്ഥാനം

Web Desk — Tue, 10 Nov 2026 20:13:27 +0530

മുംബൈ: മുംബൈയിലെ ബാന്ദ്ര കുര്‍ള കോംപ്ലക്‌സില്‍ (ബികെസി) നിര്‍മിക്കാനൊരുങ്ങുന്ന പുതിയ ആസ്ഥാന മന്ദിരത്തിന്‍റെ രൂപരേഖ പുറത്തുവിട്ട് നാഷനല്‍ സ്റ്റോക്ക് എക്‌സ്‌ചേഞ്ച് ഓഫ് ഇന്ത്യ. പുറത്തേക്ക് ചരിഞ്ഞുനില്‍ക്കുന്ന മുകള്‍ഭാഗവും, ചില്ലുകൊണ്ടുള്ള താഴ്ഭാഗവും, ദേശീയപതാകയുടെ നിറങ്ങളിലുള്ള വരകളുമായി പ്രമുഖ ആര്‍ക്കിടെക്റ്റ് ഹഫീസ് കോണ്‍ട്രാക്ടറാണ് കെട്ടിടം രൂപകല്‍പന ചെയ്തിരിക്കുന്നത്. ആഗോള സാമ്പത്തിക വിപണികളില്‍ ഇന്ത്യയ്ക്കു വര്‍ധിച്ചുവരുന്ന പ്രാധാന്യത്തിന്‍റെയും പ്രതീകമാകാനാണ് പുതിയ കെട്ടിടം ലക്ഷ്യമിടുന്നതെന്ന് എന്‍എസ്ഇ വ്യക്തമാക്കി.

പുറത്തേക്ക് ചരിഞ്ഞ മുകള്‍ഭാഗം; രാത്രിയില്‍ വെളിച്ചത്തിന്‍റെ ഭംഗി

ചില്ലുകൊണ്ടുള്ള താഴത്തെ ഭാഗത്തിനു മുകളിലായി, പുറത്തേക്ക് ചരിഞ്ഞുനില്‍ക്കുന്ന രീതിയിലാണ് കെട്ടിടത്തിന്‍റെ മുകള്‍ഭാഗം രൂപകല്‍പന ചെയ്തിരിക്കുന്നത്. പുറംഭാഗത്ത് കാവി, വെള്ള, പച്ച നിറങ്ങളിലുള്ള തിരശ്ചീന വരകള്‍ കാണാം. രാത്രിയില്‍ കെട്ടിടം ദീപാലങ്കാരത്തോടെ തിളങ്ങുന്ന ദൃശ്യങ്ങളും പുറത്തുവിട്ട വീഡിയോയിലുണ്ട്. തറനിരപ്പില്‍ ഭൂഗോളത്തിന്‍റെ ആകൃതിയില്‍ സ്‌ക്രീന്‍ ഒരുക്കും. 10,995 ചതുരശ്ര മീറ്റര്‍ സ്ഥലത്താണ് പുതിയ ആസ്ഥാനം. മുംബൈ മെട്രോപൊളിറ്റന്‍ റീജന്‍ ഡെവലപ്‌മെന്‍റ് അതോറിറ്റി 80 വര്‍ഷത്തെ പാട്ടത്തിനാണ് ഈ സ്ഥലം അനുവദിച്ചിരിക്കുന്നത്. എക്‌സ്‌ചേഞ്ചിന്‍റെ ദീര്‍ഘകാല വളര്‍ച്ചയ്ക്കും വിപുലീകരണത്തിനും പുതിയ പദ്ധതി സഹായകമാകുമെന്ന് എന്‍എസ്ഇ അറിയിച്ചു. എന്നാല്‍ നിര്‍മാണച്ചെലവ്, കെട്ടിടത്തിന്‍റെ ആകെ തറവിസ്തീര്‍ണം, നിര്‍മാണം പൂര്‍ത്തിയാകുന്ന തീയതി എന്നിവ പോസ്റ്റില്‍ വ്യക്തമാക്കിയിട്ടില്ല.

എന്തുകൊണ്ട് ബികെസി?

മുംബൈയിലെ പ്രധാന സാമ്പത്തിക, വാണിജ്യ കേന്ദ്രങ്ങളിലൊന്നാണ് ബാന്ദ്ര കുര്‍ള കോംപ്ലക്‌സ്. നഗരത്തിന്‍റെ തെക്കന്‍ ഭാഗത്ത് ഓഫിസുകള്‍ കേന്ദ്രീകരിക്കുന്നതു കുറയ്ക്കുന്നതിനായി എംഎംആര്‍ഡിഎ വികസിപ്പിച്ച സ്ഥലമാണിത്. എന്‍എസ്ഇയുടെ നിലവിലെ കെട്ടിടവും ബികെസിയിലാണ്. നിരവധി ബാങ്കുകളുടെ ആസ്ഥാനങ്ങളും ഇവിടെയുണ്ട്. കോംപ്ലക്‌സിലെ വിവിധ ഓഫിസുകളിലായി നാലു ലക്ഷത്തിലധികം പേര്‍ ജോലി ചെയ്യുന്നതായാണ് കണക്ക്.

അകന്നു കഴിയുന്ന ഭാര്യയെ കൊലപാതക കേസിൽ കുടുക്കാനുള്ള ഭർത്താവിന്റെ ശ്രമം അവസാനിച്ചത് ജയിലിൽ

Prabeesh PP — Fri, 02 Oct 2026 04:04:25 +0530

സൂറത്ത്:അകന്നു കഴിയുന്ന ഭാര്യയെ കൊലപാതക കേസിൽ കുടുക്കാനുള്ള ഭർത്താവിന്റെ നീക്കം പാളിയതോടെ ചുരുളഴിഞ്ഞത് മൂന്ന് കൊലപാതകങ്ങൾ. നാല് വർഷം മുൻപ് ഗുജറാത്തിലെ സൂറത്തിലായിരുന്നു കൊലപാതക പരമ്പര. സംഭവത്തിൽ മാധവദാസ് സാധു, ഭാര്യ ഊർമിള എന്നിവരെ പോലീസ് അറസ്റ്റ് ചെയ്തു. അകന്നു കഴിയുന്ന ഭാര്യയെ കുടുക്കാൻ തോന്നിയ ഒരു കുരുട്ട് ബുദ്ധി. ഭാര്യക്കൊപ്പം അതേ വാരിക്കുഴിയിൽ വീണു ഭർത്താവും.

സൂറത്തിലെ കോസംബയിൽ ശാന്താബെൻ എന്ന വയോധിക കൊല്ലപ്പെട്ടുവെന്നും മൃതദേഹം വീട്ടിൽ കുഴിച്ചിട്ടിരിക്കുകയാണെന്നും മാധവദാസ് പൊലീസിൽ പരാതി നൽകി. തന്റെ ഭാര്യയും ബന്ധുവുമാണ് പ്രതികളെന്നും ആരോപണം. അന്വേഷിച്ചിറങ്ങിയ അഹമ്മദാബാദ് ക്രൈം ബ്രാഞ്ച് കണ്ടെത്തിയത് മൂന്ന് കൊലപാതകങ്ങൾ. പക്ഷെ പ്രതികൾ പരാതിക്കാരനും ഭാര്യയും.

2022 ൽ സ്വത്തിനും പണത്തിനും വേണ്ടിയായിരുന്നു തുടർ കൊലപാതകങ്ങൾ.ഭാര്യയുടെ മുത്തശ്ശിയായ ശാന്താബെന്നിനെ ശ്വാസം മുട്ടിച്ചു കൊലപ്പെടുത്തിയ ശേഷം വീപ്പയിൽ സിമെന്റ് നിറച്ച് മൂടി. പിന്നാലെ വീപ്പ വീട്ടിലെ കോർട്ടിയാർഡിൽ കുഴിച്ചിട്ടു. മൃതദേഹം കോവിഡ് പ്രോട്ടോകോൾ പ്രകാരം സംസ്കരിച്ചു എന്ന് എല്ലാവരോടും കള്ളം പറഞ്ഞു. മാസങ്ങൾക്കകം ഊർമിളയുടെ സഹോദരിയായ ഭഗവതീബെൻ കമലേഷ്ഭായിയെയും മാധവദാസിന്റെ അമ്മ മഞ്ജുളാബെന്നിനെയും കൊലപ്പെടുത്തി.

ഇരുവരും അസുഖബാധിതരായിരുന്നതിനാൽ അങ്ങനെ മരിച്ചുവെന്ന് വരുത്തി തീർത്തു. കൊലപാതക പരമ്പരയ്ക്കുശേഷം സ്വർണവും പണവുമായി അകന്നുകഴിയാൻ തുടങ്ങിയതിനെ തുടർന്നാണ് മാധവദാസിന് ഭാര്യയോട് വൈരാഗ്യം തോന്നിയത്. പരാതി കൊടുത്തു കുടുക്കാനുള്ള ശ്രമത്തിൽ രണ്ടുപേരുടെയും ക്രൂരത പുറത്തുവന്നു. വീടിനകത്തു നിന്നും മൃതദേഹ അവശിഷ്ടങ്ങൾ കണ്ടെത്തിയ പോലീസ് തുടർനടപടികൾ തുടങ്ങി.

കളക്ടർക്ക് അശ്ലീല സന്ദേശമയച്ചെന്ന് പരാതി; ടിവികെ എംഎൽഎ അരുൾ വിഗ്നേഷിനെതിരെ കനിമൊഴിയുടെ വിമർശനം

Anusree A — Tue, 10 Nov 2026 09:40:11 +0530

കള്ളക്കുറിച്ചി: ജില്ലാ കളക്ടറോട് മോശം പെരുമാറ്റം നടത്തിയെന്ന പരാതിയിൽ ടിവികെ എംഎൽഎ അരുൾ വിഗ്നേഷ് വിവാദത്തിൽ. ജില്ലാ കളക്ടർക്ക് അശ്ലീല സന്ദേശങ്ങൾ അയച്ചെന്നും മദ്യലഹരിയിൽ രാത്രിയിൽ കളക്ടറുടെ വസതിയിലെത്തിയെന്നുമാണ് പരാതി. സംഭവത്തിന്റെ ഗൗരവം കണക്കിലെടുത്ത് കളക്ടർക്ക് പ്രത്യേക സുരക്ഷ ഏർപ്പെടുത്തിയിട്ടുണ്ട്. കളക്ടറുടെ കുടുംബം ടിവികെ നേതാവും മന്ത്രിയുമായ ബുസി ആനന്ദിനെ നേരിട്ട് പരാതി അറിയിച്ചതായാണ് വിവരം. പരാതിയുടെ പശ്ചാത്തലത്തിൽ എംഎൽഎയ്ക്ക് പാർട്ടി നേതൃത്വം താക്കീത് നൽകിയതായും ടിവികെയുടെ അച്ചടക്ക സമിതി വിഷയം പരിശോധിക്കുമെന്നും റിപ്പോർട്ടുകളുണ്ട്.

അതേസമയം, തനിക്കെതിരായ ആരോപണങ്ങൾക്ക് പിന്നിൽ ജില്ലയിലെ ശക്തനായ ഡിഎംകെ എംഎൽഎയാണെന്നാണ് അരുൾ വിഗ്നേഷിന്റെ ആരോപണം. വിഷയം രാഷ്ട്രീയമായി ഏറ്റെടുത്ത ഡിഎംകെ, ടിവികെ എംഎൽഎയ്ക്കെതിരെ വിമർശനം ശക്തമാക്കി. ജില്ലാ കളക്ടർമാർക്ക് പോലും സുരക്ഷ ഉറപ്പാക്കാൻ കഴിയാത്ത സാഹചര്യമാണെന്ന വിമർശനവുമായി കനിമൊഴിയും എക്സിൽ പോസ്റ്റ് പങ്കുവെച്ചു.

സംഭവത്തിൽ ടിവികെ അധ്യക്ഷൻ വിജയ് കടുത്ത അമർഷത്തിലാണെന്നാണ് സൂചന. പാർട്ടി എംഎൽഎമാരുടെ പെരുമാറ്റത്തിൽ അതൃപ്തി പ്രകടിപ്പിച്ച വിജയ്, എല്ലാ എംഎൽഎമാരെയും ചെന്നൈയിലേക്ക് വിളിപ്പിച്ചിട്ടുണ്ട്. നാളെ രാവിലെ 11 മണിക്ക് അടിയന്തര യോഗം ചേർന്ന് എംഎൽഎമാർക്ക് കർശന മുന്നറിയിപ്പ് നൽകുമെന്നാണ് വിവരം. പാർട്ടിയുടെ അച്ചടക്കവും പൊതുജനങ്ങൾക്കിടയിലെ പ്രതിച്ഛായയും സംബന്ധിച്ച് യോഗത്തിൽ നിർണായക നിർദേശങ്ങൾ ഉണ്ടായേക്കും.

ഇതിനിടെ, ഡെപ്യൂട്ടി സ്പീക്കർ പരാതിക്കാരനെ മർദിച്ച സംഭവവും പാർട്ടിക്ക് വലിയ നാണക്കേടുണ്ടാക്കിയെന്നാണ് നേതൃത്വത്തിന്റെ വിലയിരുത്തൽ. തുടർച്ചയായി ഉയരുന്ന വിവാദങ്ങളിൽ വിജയ് അസ്വസ്ഥനാണെന്നും എംഎൽഎമാരുടെ പ്രവർത്തനങ്ങളിലും പെരുമാറ്റത്തിലും കർശന നിയന്ത്രണം കൊണ്ടുവരാനാണ് നീക്കമെന്നുമാണ് റിപ്പോർട്ടുകൾ.

യുപിഐ ഇടപാടുകൾക്ക് ഫീസ് ഏർപ്പെടുത്തി ഉത്തരവിറങ്ങി; പരമാവധി ചാർജ്ജ് 300 രൂപ

Anusree A — Tue, 15 Sep 2026 20:16:02 +0530

ദില്ലി : രാജ്യത്ത് യുപിഐ ഡിജിറ്റൽ പണമിടപാടുകൾക്ക് പുതിയ ഫീസ് ഘടന നിലവിൽ വന്നു. ഇതുസംബന്ധിച്ച ഔദ്യോഗിക ഉത്തരവ് പുറത്തിറങ്ങി. പുതിയ ഉത്തരവ് പ്രകാരം വ്യക്തികൾ തമ്മിലുള്ള (P2P) സാധാരണ പണമിടപാടുകൾക്ക് യാതൊരുവിധ ഫീസും ഈടാക്കില്ല. സാധാരണക്കാർക്ക് തികച്ചും സൗജന്യമായി തുടർന്നും യുപിഐ സേവനങ്ങൾ ഉപയോഗിക്കാം.

2,000 രൂപയ്ക്ക് മുകളിലുള്ള വാണിജ്യ ഇടപാടുകൾക്ക് 0.4 ശതമാനം വരെ ഫീസ് ഈടാക്കാനാണ് തീരുമാനം. ഒരു ഇടപാടിൽ പരമാവധി 300 രൂപ വരെയായിരിക്കും ഈടാക്കാവുന്ന ഫീസ്. ഈ തുക ഉപഭോക്താക്കളിൽ നിന്ന് നേരിട്ട് ഈടാക്കുന്നതിന് പകരം വ്യാപാരികളിൽ നിന്നായിരിക്കും ഈടാക്കുക.

റെയിൽവേ, ടെലികോം, ഇന്ധനം തുടങ്ങിയ മേഖലകളിലെ 2,000 രൂപയ്ക്ക് മുകളിലുള്ള ഇടപാടുകൾക്ക് അഞ്ച് രൂപ ഫീസ് ഈടാക്കും. ഇതും വ്യാപാരികളിൽ നിന്നാണ് ഈടാക്കുക. അതേസമയം, റൂപേ കാർഡ് ഉപയോഗിച്ചുള്ള ഇടപാടുകൾക്ക് അധിക ഫീസ് ഈടാക്കില്ലെന്നും ഉത്തരവിൽ അറിയിച്ചിട്ടുണ്ട്.

‘അസമിന്റെ അയൺ ലേഡി’ ഇനി കോബ്രയുടെ തലപ്പത്ത്; ചരിത്രമെഴുതി സഞ്ജുക്ത പരാശർ

Anusree A — Wed, 16 Sep 2026 13:47:41 +0530

ദില്ലി : സി.ആർ.പി.എഫിന്റെ അത്യാധുനിക കമാൻഡോ വിഭാഗമായ കോബ്രയുടെ (CoBRA - Commando Battalion for Resolute Action) ഇൻസ്‌പെക്ടർ ജനറലായി സഞ്ജുക്ത പരാശർ ചുമതലയേറ്റു. ഈ പദവിയിലെത്തുന്ന ആദ്യ വനിതാ ഓഫീസറാണ് ഇവർ.

മാവോയിസ്റ്റ് സ്വാധീനം ശക്തമായ ഛത്തീസ്ഗഢ്, ജാർഖണ്ഡ്, ഒഡീഷ, മേഘാലയ തുടങ്ങിയ വനമേഖലകളിലെ അതിനിർണായക ഒളിപ്പോരുകളും ഭീകരവിരുദ്ധ ദൗത്യങ്ങളും കൈകാര്യം ചെയ്യുന്ന കോബ്രയുടെ 10 റെജിമെന്റുകളുടെയും സമഗ്ര മേൽനോട്ട ചുമതല ഇനി സഞ്ജുക്തയ്ക്കായിരിക്കും. മുൻപ് അസമിൽ ഭീകരവാദികൾക്കെതിരെ നടത്തിയ പോരാട്ടങ്ങളിലൂടെ ‘അസമിന്റെ അയൺ ലേഡി’ എന്ന പേര് നേടിയ ഉദ്യോഗസ്ഥയാണ് ഇവർ.

ഡൽഹി യൂണിവേഴ്‌സിറ്റിയിലും ജവഹർലാൽ നെഹ്റു യൂണിവേഴ്‌സിറ്റിയിലും (ജെ.എൻ.യു) വിദ്യാഭ്യാസം പൂർത്തിയാക്കിയ ശേഷമാണ് സഞ്ജുക്ത സിവിൽ സർവീസിലെത്തിയത്. ദേശീയ അന്വേഷണ ഏജൻസിയിൽ (എൻ.ഐ.എ) ഡി.ഐ.ജി ആയി സേവനമനുഷ്ഠിച്ച ഇവർക്ക് സുരക്ഷാ രംഗത്ത് വലിയ അനുഭവസമ്പത്തുണ്ട്. രാജ്യത്തെ ഉന്നത സുരക്ഷാ സേനകളുടെ നേതൃനിരയിലേക്ക് കൂടുതൽ സ്ത്രീകൾ കടന്നുവരുന്നു എന്നതിന്റെ പ്രധാനപ്പെട്ട ചുവടുവെയ്പ്പാണിത്.

എണ്ണക്ക് അധിക താരിഫ് ഇന്ത്യയെ പ്രതിസന്ധിയിലാക്കാൻ അല്ലെന്ന് മാർക്കോ റൂബിയോ,നിയമം പാസാക്കിയത് റഷ്യ-യുക്രെയിൻ സംഘർഷം തീർക്കാൻ

Web Desk — Wed, 21 Oct 2026 06:31:48 +0530

ദില്ലി:റഷ്യയിൽ നിന്ന് എണ്ണ വാങ്ങുന്നതിനുള്ള അധിക താരിഫ് ഇന്ത്യയെ പ്രതിസന്ധിയിലാക്കാൻ അല്ലെന്ന് മാർക്കോ റൂബിയോ. നിയമം പാസാക്കിയത് റഷ്യ-യുക്രെയിൻ സംഘർഷം തീർക്കാനാമെന്ന് വ്യക്തമാക്കുകയാണ് അമേരിക്കൻ സ്റ്റേറ്റ് സെക്രട്ടറി. വലിയ പ്രതിസന്ധി രാജ്യത്തുണ്ടാക്കിയ തീരുമാനത്തിൽ അതൃപ്തി പരിഹരിക്കുന്നതിനുള്ള ശ്രമമാണ് നടത്തുണ്ട്. അമേരിക്കയിലെ വീസ നിയന്ത്രണങ്ങളും ഇന്ത്യയ്ക്ക് ദോഷകരമാകില്ലെന്ന് റൂബിയോ വ്യക്തമാക്കി ഇന്ത്യക്കൊപ്പമാണ് അമേരിക്കയെന്ന് വിശദീകരിക്കുകയാണ് സ്റ്റേറ്റ് സെക്രട്ടറി. വെനസ്വേലയിൽ നിന്ന് കൂടുതൽ എണ്ണ വാങ്ങുന്ന വിഷയം റിലയൻസുമായി ഇന്ന് ചർച്ച ചെയ്യും. ഗൗതം അദാനി, ടാറ്റയുടെ എൻ. ചന്ദ്രശേഖരൻ എന്നിവരെയും മാർക്കോ റൂബിയോ ഇന്ന് കാണും.

നിർണ്ണായചർച്ചകൾ ഇന്നലെ തുടങ്ങി

ഇന്ത്യ-യുഎസ് വ്യാപാര കരാറിൽ നല്ല വാർത്ത വൈകാതെ ഉണ്ടാകുമെന്ന് അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ ഇന്നലെ പറഞ്ഞിരുന്നു. മുംബൈയിൽ വിദേശകാര്യ മന്ത്രി എസ് ജയശങ്കറുമായി മാർക്കോ റൂബിയോ ചർച്ച നടത്തി. ഊർജ്ജ രംഗത്തെ സഹകരണവും കൂടിക്കാഴ്ചയിൽ ചർച്ചയായി. ഇന്നലെ ഉച്ചയ്ക്ക് മുംബൈയിൽ എത്തിയ മാർക്കോ റൂബിയോ നാല് മണിക്കാണ് വിദേശകാര്യ മന്ത്രി എസ് ജയശങ്കറുമായി ചർച്ച നടത്തിയത്. ഇന്ത്യയിലെ യുഎസ് അംബാസഡർ സെർജിയോ ഗോറും വിദേശകാര്യ സെക്രട്ടറി വിക്രം മിസ്രിയും കൂടിക്കാഴ്ചയിൽ പങ്കെടുത്തു. ഊർജ്ജ രംഗത്തെ സഹകരണം രണ്ട് രാജ്യങ്ങളും ചർച്ച ചെയ്തു. റഷ്യയിൽ നിന്ന് എണ്ണ വാങ്ങുന്നതിന് അധിക താരിഫ് തൽക്കാലം ഈടാക്കില്ലെന്ന് അമേരിക്ക പ്രഖ്യാപിച്ചിരുന്നു. അധിക താരിഫ് രണ്ട് രാജ്യങ്ങൾക്കും ഇടയിലുള്ള ബന്ധത്തെ ബാധിക്കും എന്ന നിലപാട് ഇന്ത്യ ആവർത്തിച്ചു. ഇന്ത്യ-യുഎസ് വ്യാപാര കരാർ അന്തിമമാക്കാനുള്ള നടപടികൾ വേഗത്തിലാക്കും. ഇക്കാര്യത്തിൽ വളരെ കുറച്ച് വിഷയങ്ങളെ പരിഹരിക്കാനുള്ളൂ എന്നാണ് മാർക്കോ റൂബിയോ മാധ്യമങ്ങളെ അറിയിച്ചത്. മുംബൈ ഭീകരാക്രമണത്തിൽ കൊല്ലപ്പെട്ടവർക്ക് താജ് മെമ്മോറിയലിൽ എത്തി മാർക്കോ റൂബിയോ ആദരാഞ്ജലി അർപ്പിച്ചു. അമേരിക്കൻ സ്വാതന്ത്ര്യത്തിന്റെ 250ആം വാർഷികത്തോടനുബന്ധിച്ച് മുംബൈയിൽ നടന്ന ആഘോഷത്തിലും രണ്ട് നേതാക്കളും പങ്കെടുത്തു.

എൻഎസ്‌യുഐ നേതാവിനെ മർദിച്ച പൊലീസുകാ‌ർക്കെതിരെ കേസെടുക്കണം; ജയ്പൂരിൽ കോൺഗ്രസ് നേതാക്കളുടെ പ്രതിഷേധം

Anusree A — Tue, 20 Oct 2026 10:13:15 +0530

ജയ്പൂർ: ദില്ലിയിൽവെച്ച് എൻഎസ്‌യുഐ നേതാവിനെ മർദിച്ച ഡൽഹി പൊലീസ് വനിതാ കോൺസ്റ്റബിളിനെതിരെ എഫ്‌ഐആർ രജിസ്റ്റർ ചെയ്യണമെന്നാവശ്യപ്പെട്ട് രാജസ്ഥാൻ കോൺഗ്രസ് അധ്യക്ഷൻ ഗോവിന്ദ് സിംഗ് ദോട്ടസരയുടെ നേതൃത്വത്തിൽ കോൺഗ്രസ് നേതാക്കൾ ജയ്പൂർ പൊലീസ് കമ്മീഷണറേറ്റിൽ രാത്രി മുഴുവൻ കുത്തിയിരുന്ന് പ്രതിഷേധിച്ചു. മോത്തി ഡുംഗ്രി പൊലീസ് സ്റ്റേഷനിൽ പരാതി നൽകിയിട്ടും കേസെടുക്കാൻ പൊലീസ് തയ്യാറായില്ലെന്നാണ് കോൺഗ്രസ് നേതാക്കളുടെ ആരോപണം. ഇതേത്തുടർന്നാണ് നേതാക്കൾ പൊലീസ് കമ്മീഷണറേറ്റിലെത്തിയത്.

കമ്മീഷണറേറ്റിന്റെ ഇടനാഴിയിൽ കിടന്നാണ് നേതാക്കൾ പ്രതിഷേധം നടത്തിയത്. എഫ്‌ഐആർ രജിസ്റ്റർ ചെയ്യുന്നതുവരെ പ്രതിഷേധം അവസാനിപ്പിക്കില്ലെന്ന് ഗോവിന്ദ് സിംഗ് ദോട്ടസര വ്യക്തമാക്കി. രാജ്യത്ത് ജനങ്ങൾക്കിടയിൽ രണ്ട് നിയമങ്ങൾ ഉണ്ടാകാൻ പാടില്ലെന്നും ബിജെപി ഭരിക്കുന്ന രാജസ്ഥാനിൽ പരാതി നൽകിയിട്ടും എന്തുകൊണ്ടാണ് എഫ്‌ഐആർ രജിസ്റ്റർ ചെയ്യാത്തതെന്നും അദ്ദേഹം ചോദിച്ചു.

ഒക്ടോബർ 13ന് ഡൽഹിയിൽ നടന്ന പ്രതിഷേധത്തിനിടെയാണ് ഡൽഹി പൊലീസ് കോൺസ്റ്റബിൾ ചഞ്ചൽ യാദവ് തന്നെ മർദിച്ചതെന്ന് എൻഎസ്‌യുഐ നേതാവ് പരാതിപ്പെട്ടിരുന്നു. സംഭവത്തിൽ മലയാളിയായ ആതിരയ്ക്കും രാജസ്ഥാൻ സ്വദേശിയായ ഋതുവിനും പൊലീസ് മർദനമേറ്റിരുന്നു. ആതിര നൽകിയ പരാതിയിൽ കേരള പൊലീസ് സീറോ എഫ്‌ഐആർ രജിസ്റ്റർ ചെയ്തിരുന്നു. എന്നാൽ, രാജസ്ഥാനിൽ നൽകിയ പരാതിയിൽ പൊലീസ് കേസെടുക്കാൻ തയ്യാറായില്ലെന്നാണ് കോൺഗ്രസ് നേതാക്കൾ ആരോപിക്കുന്നത്.

പ്രധാനമന്ത്രി പദം ഏറ്റെടുക്കാൻ ആദ്യം സമ്മതിച്ചു; പിന്നീട് നിലപാട് മാറ്റിയതിന് പിന്നിലെ കാരണങ്ങൾ തുറന്നുപറഞ്ഞ് സോണിയ

Anusree A — Tue, 10 Nov 2026 12:45:21 +0530

ദില്ലി: 2004ലെ ലോക്‌സഭാ തിരഞ്ഞെടുപ്പിന് മാസങ്ങൾക്കുമുമ്പ് തന്നെ പ്രധാനമന്ത്രി പദം ഏറ്റെടുക്കേണ്ടതില്ലെന്ന് തീരുമാനിച്ചിരുന്നതായി സോണിയ ഗാന്ധി. രാഹുൽ ഗാന്ധിയും പ്രിയങ്ക ഗാന്ധിയും ഇതേ നിലപാടാണ് ആഗ്രഹിച്ചിരുന്നതെന്നും സോണിയ ഗാന്ധി വെളിപ്പെടുത്തി. 2004ലെ തിരഞ്ഞെടുപ്പ് ഫലത്തിന് പിന്നാലെ പ്രധാനമന്ത്രി പദം ഏറ്റെടുക്കാൻ സഖ്യകക്ഷി നേതാക്കളിൽ നിന്ന് കടുത്ത സമ്മർദം നേരിടേണ്ടി വന്നതായും അവർ പറഞ്ഞു.

സഖ്യകക്ഷി നേതാക്കളുടെ സമ്മർദത്തെ തുടർന്ന് ആദ്യം പ്രധാനമന്ത്രി പദം ഏറ്റെടുക്കാമെന്ന് സമ്മതിക്കേണ്ടി വന്നിരുന്നു. എന്നാൽ, സമ്മർദത്തിന് വഴങ്ങരുതെന്ന് രാഹുലും പ്രിയങ്കയും ആവശ്യപ്പെട്ടതായി സോണിയ ഗാന്ധി വ്യക്തമാക്കി. തന്റെ ഉള്ളിൽ രണ്ട് ചിന്തകൾ തമ്മിൽ കടുത്ത സംഘർഷം നിലനിന്നിരുന്നുവെന്നും അവർ വെളിപ്പെടുത്തി. പ്രധാനമന്ത്രി പദം ഏറ്റെടുത്തിരുന്നെങ്കിൽ തന്റെ വിദേശ പൗരത്വം ബിജെപിയും ആർഎസ്എസും രാജ്യത്ത് ഭിന്നത സൃഷ്ടിക്കാൻ ഉപയോഗിക്കുമായിരുന്നുവെന്നും സോണിയ ഗാന്ധി പറഞ്ഞു.

ഇന്ന് പുറത്തിറങ്ങുന്ന പുസ്തകത്തിലാണ് 2004ൽ പ്രധാനമന്ത്രി പദം ഏറ്റെടുക്കാതിരുന്നതിന് പിന്നിലെ കാരണങ്ങളും അന്നത്തെ രാഷ്ട്രീയ സാഹചര്യങ്ങളും സംബന്ധിച്ച് സോണിയ ഗാന്ധി വിശദീകരിക്കുന്നത്. ഇന്ദിര ഗാന്ധിയുടെ വധത്തിലേക്ക് നയിച്ച ഓപ്പറേഷന്‍ ബ്ലൂസ്റ്റാറിനെ കുറിച്ചും സോണിയ വിശദമാക്കുന്നു. വലിയ ആത്മസംഘര്‍ഷമാണ് ആ നാളുകളില്‍ ഇന്ദിരഗാന്ധി അനുഭവിച്ചത്. സുവര്‍ണ്ണക്ഷേത്രത്തിലെ കാഴ്ചകള്‍ അവരുടെ കണ്ണ് നിറച്ചു. നിരന്തരം വധഭീഷണിയെത്തി. വധിക്കപ്പെടുമെന്ന് ഉറപ്പുള്ള ഇന്ദിരാഗാന്ധി കരയരുതെന്ന് രാഹുലിനോട് പറഞ്ഞിരുന്നുവെന്നും സോണിയ കുറിക്കുന്നു. സംഘപരിവാര്‍ അജണ്ടകളെ നിശിതമായി വിമര്‍ശിക്കുന്നിടത്ത് ആ സ്വാധീനമാണ് മോദിയുടെ നെഹ്റു വിരോധത്തിന് പിന്നിലെന്ന് സോണിയ ആരോപിക്കുന്നു. ഔദ്യോഗിക ചടങ്ങുകളില്‍ പരമാവധി മുഖത്ത് നോക്കാതിരിക്കാന്‍ മോദി ശ്രമിക്കുമെന്നും സോണിയ എഴുതുന്നു. 527 പേജുള്ള പുസ്തകത്തിലെ പ്രസക്തമായ മറ്റ് പല ഭാഗങ്ങളും ഇതിനോടകം പുറത്ത് വന്നിരുന്നു.

ബസ്തറിലെ സുരക്ഷാ ഉദ്യോഗസ്ഥർക്കൊപ്പം ദീപാവലി ആഘോഷിച്ച് പ്രധാനമന്ത്രി,രാജ്യം നക്സൽ മുക്തമായി, സോണിയഗാന്ധിക്ക് പരോക്ഷവിമർശനം.

S Ajith Kumar — Sun, 08 Nov 2026 13:14:47 +0530

ദില്ലി. നക്സൽ ബാധിതപ്രദേശങ്ങളിൽ സിആ‍ർപിഎഫ് ജവാൻമാർ വീരമൃത്യുവരിച്ചപ്പോൾ കൊട്ടാരത്തിലിരുന്ന ആർക്കും കണ്ണുനീർ വന്നില്ലെന്ന് പ്രധാനമന്ത്രി നരേന്ദ്രമോദി. ബസ്തറിലും ദണ്ഡേവടയിലും രണ്ട് തവണ ഇവിടെ ജവാൻമാ‍ർക്കെതിരെ ആക്രമണമുണ്ടായെന്നും പ്രധാനമന്ത്രി പറഞ്ഞു. ബാബറി മസ്ജിദ് തർക്കുന്നത് ടെലിവിഷനിൽ കണ്ടപ്പോൾ കരഞ്ഞ് പോയെന്ന് സോണിയാഗാന്ധി തൻ്റെ പുസ്തകത്തിൽ പരാമർശിച്ചിരുന്നു. ഈ പരാ‍ർശത്തിനാണ് മോദിയുടെ പരോക്ഷ മറുപടി. നക്സൽ മുക്തമാക്കിയതിന് ശേഷമുള്ള ആദ്യ ദീപാവലിയാണിതെന്ന് മോദി പറ‍ഞ്ഞു. ബസ്തർ മേഖലയിലെ എല്ലാ ജില്ലകളും നക്സൽ മുക്തമാണ്. ഇതിൻ്റെ എല്ലാ ക്രെഡിറ്റും സുരക്ഷാ ഉദ്യോഗസ്ഥർക്കാണ്. 140 കോടി ജനങ്ങളുടെ പേരിൽ നിങ്ങളുടെ സമർപ്പണത്തെ നമിക്കുന്നുവെന്ന് മോദി പറഞ്ഞു.

ആഭ്യന്തരസുരക്ഷ ശക്തം

രാജ്യത്തിൻ്റെ ആഭ്യന്തര സുരക്ഷ ശക്തമെങ്കിൽ പുറത്തുള്ള ശത്രുകൾക്ക് ഒന്നും ചെയ്യാനാകില്ല. മറിച്ചാണെങ്കിൽ പുറത്തെ ശത്രുക്കൾക്ക് അവസരം നല്കുമെന്നും മോദി പറഞ്ഞു.രാജ്യത്തിൻ്റെ ഐക്യവും സുരക്ഷയും ഉറപ്പാക്കാൻ സിആർപിഎഫ്, കോബ്ര, ബിഎസ്എഫ്, ഐടിബിപി, എസ്എസ്ബി, ഐആർബി എന്നിവരെല്ലാം പ്രവർത്തിച്ചു. ബസ്തർ ഫൈറ്റേഴ്സ്, സ്പെഷൽ ഫോഴ്സ് കമാൻഡോസ് , വനിതാ സുരക്ഷാ ഉദ്യോഗസ്ഥർ എല്ലാം ഇതിനായി പ്രവർത്തിച്ചു. 20 സംസ്ഥാനങ്ങളിലായി 230 ജില്ലകൾ നക്സൽ ബാധിതമായിരുന്നു. രാത്രി ജീവിതം ഭയമുള്ളതായിരുന്നു വോട്ട് ചെയ്യാനുള്ള അധികാരം പോലും കവർച്ച ചെയ്യപ്പെട്ടു. ബിഹാർ, യുപി, ഛത്തീസ്ഗഡ്, മധ്യപ്രദേശ്, മഹാരാഷ്ട്ര തുടങ്ങിയ സംസ്ഥാനങ്ങളുടെ സ്ഥിതി ഇതായിരുന്നു. ഒരു വർഷം 2000 അക്രമങ്ങൾ വരെ നടന്നു. 2010 ൽ ഇവിടെ ദന്തേവാഡയിൽ നക്സലുകൾ സിആർപിഎഫ് ഉദ്യോഗസ്ഥരെ വധിച്ചു. 2013 വരെ കണക്ക് നോക്കിയാൽ നക്സലുകൾ കൊല്ലപ്പെട്ടതിനേക്കാൾ സുരക്ഷാ ഉദ്യോഗസ്ഥർ കൊല്ലപ്പെട്ടിട്ടുണ്ട്. ഈ സ്ഥിതി ഇങ്ങനെ തുടരുമെന്നാണ് രാജ്യത്തുണ്ടായിരുന്ന വിചാരം. എന്നാൽ ഇപ്പോഴത് മാറി. കഴിഞ്ഞ ഒരു വർഷമായി ഡ്യൂട്ടിയിലുള്ള ഒരു സിആർപിഎഫ് ഉദ്യോഗസ്ഥന്റെയും ജീവൻ നഷ്ടമായില്ല. നേരത്തെയുള്ള സർക്കാറുകൾ ഉദ്യോഗസ്ഥരുടെ കൈകൾ കെട്ടിയിട്ടു. സുരക്ഷാ സേനയ്ക്ക് എല്ലാ പ്രവർത്തന സ്വാതന്ത്ര്യവും നല്കി. നേരത്തെ ഉദ്യോഗസ്ഥർക്കിടയിൽ നിന്നും അവർക്ക് സഹായം നല്കി, ഇപ്പോൾ അത് അവസാനിപ്പിച്ചു. നക്സലുകൾ ഇല്ലാതായെങ്കിലും ഭീഷണി തീ‍ർന്നിട്ടില്ലെന്ന് പ്രതിപക്ഷത്തെ ലക്ഷ്യമിട്ട് മോദി പറഞ്ഞു . ദിമാഗി നക്സലുകൾ (ബുദ്ധിജീവി നക്സലുകൾ) വിവിധ ഇടങ്ങളിൽ ഇപ്പോഴുമുണ്ട്. ഇന്നും ഭരണഘടനയ്ക്കും ജനാധിപത്യത്തിനും എതിരെ പ്രവർത്തിക്കുന്നു. വിവിധ സംഘടനകളിലും ഇവർ നുഴഞ്ഞുകയറിയിട്ടുണ്ടെന്നും പ്രധാനമന്ത്രി വിമ‍ർശിച്ചു.

വൈദ്യുതി പ്രതിസന്ധി: അടിയന്തര വാദം ആവശ്യപ്പെട്ട് കേരളം സുപ്രീം കോടതിയിൽ

Dhanesh Ravindran — Tue, 15 Sep 2026 21:22:06 +0530

ദില്ലി : ദീർഘകാല വൈദ്യുതി വാങ്ങൽ കരാറുകൾ പുനഃസ്ഥാപിക്കണമെന്ന ആവശ്യം അടിയന്തരമായി പരിഗണിക്കണമെന്ന് ആവശ്യപ്പെട്ട് കേരളം സുപ്രീം കോടതിയെ സമീപിച്ചു. കരാറുകൾ റദ്ദാക്കിയതോടെ കുറഞ്ഞ നിരക്കിലുള്ള വൈദ്യുതി ലഭിക്കാത്തത് സംസ്ഥാനത്ത് വൈദ്യുതി പ്രതിസന്ധി രൂക്ഷമാക്കിയെന്നും ഖജനാവിന് വലിയ സാമ്പത്തിക ബാധ്യത ഉണ്ടാക്കിയെന്നും സർക്കാർ ഹർജിയിൽ ചൂണ്ടിക്കാട്ടി. ഇതുവരെ 12,570 കോടി രൂപയുടെ നഷ്ടം ഉണ്ടായതായും, 2024–25 സാമ്പത്തിക വർഷത്തിൽ മാത്രം 748.20 കോടി രൂപയുടെ നഷ്ടം നേരിടേണ്ടി വന്നതായും കേരളം വ്യക്തമാക്കി.

2014-ൽ ജാബുവ പവർ, ജിൻഡൽ പവർ, ജിൻഡൽ ഇന്ത്യ തെർമൽ പവർ എന്നീ കമ്പനികളുമായി യൂണിറ്റിന് 4.29 രൂപ നിരക്കിൽ 25 വർഷത്തേക്ക് 472 മെഗാവാട്ട് വൈദ്യുതി വാങ്ങാനായിരുന്നു കരാറുണ്ടാക്കിയിരുന്നത്. 2016 മുതൽ വൈദ്യുതി വാങ്ങിത്തുടങ്ങിയിരുന്നെങ്കിലും, നടപടിക്രമങ്ങളിലെ വീഴ്ച ചൂണ്ടിക്കാട്ടി 2023 മേയിൽ സംസ്ഥാന വൈദ്യുതി റെഗുലേറ്ററി കമ്മിഷൻ വൈദ്യുതി വാങ്ങുന്നത് തടയുകയായിരുന്നു. പിന്നീട് സർക്കാർ ഇടപെടലിനെ തുടർന്ന് കമ്മിഷൻ കരാർ പുനഃസ്ഥാപിച്ചെങ്കിലും, ഇതിനെതിരെ സ്വകാര്യ വൈദ്യുതി കമ്പനികൾ അപ്പലേറ്റ് ട്രിബ്യൂണലിനെ സമീപിക്കുകയും കേരളത്തിന് പ്രതികൂലമായ വിധി സമ്പാദിക്കുകയും ചെയ്തു.

ഈ വിധിക്ക് എതിരെ നൽകിയ ഹർജിയാണ് ഇപ്പോൾ അടിയന്തരമായി പരിഗണിക്കണമെന്നാവശ്യപ്പെട്ട് കേരളം സുപ്രീം കോടതിയെ സമീപിച്ചിരിക്കുന്നത്. സംസ്ഥാന സർക്കാരിന്റെ സ്റ്റാന്റിങ് കോൺസൽ മർസൂഖ് ബാഫഖി തങ്ങളാണ് കേരളത്തിന് വേണ്ടി സുപ്രീം കോടതിയിൽ അപേക്ഷ ഫയൽ ചെയ്തത്.

മമത ബാനർജി സുപ്രീം കോടതിയിൽ ഹർജി നൽകി; തിരഞ്ഞെടുപ്പ് കമ്മീഷൻ മരവിപ്പിച്ച പാർട്ടി ചിഹ്നവും പേരും തിരികെ കിട്ടണമെന്ന് ആവശ്യം

Web Desk — Sat, 19 Sep 2026 07:51:02 +0530

ദില്ലി: തൃണമൂൽ കോൺഗ്രസിന്റെ പാർട്ടി ചിഹ്നവും പേരും മരവിപ്പിച്ച തിരഞ്ഞെടുപ്പ് കമ്മീഷൻ്റെ നടപടിക്കെതിരെ പശ്ചിമ ബംഗാൾ മുൻ മുഖ്യമന്ത്രി മമതാ ബാനർജി സുപ്രീം കോടതിയെ സമീപിച്ചു. പാർട്ടിയിലെ വിമത വിഭാഗവുമായുള്ള തർക്കത്തെ തുടർന്ന് തെരഞ്ഞെടുപ്പ് കമ്മീഷൻ കൈക്കൊണ്ട ഇടക്കാല ഉത്തരവിനെതിരെയാണ് ഹർജി നൽകിയിരിക്കുന്നത്. പാർട്ടി ഘടനയെ സമഗ്രമായി പരിശോധിക്കാതെയാണ് തിരഞ്ഞെടുപ്പ് കമ്മീഷൻ തീരുമാനമെടുത്തതെന്ന് മമത ബാനർജി സമർപ്പിച്ച ഹർജിയിൽ ചൂണ്ടിക്കാണിക്കുന്നു.

ഭരണഘടനയുടെ പത്താം പട്ടിക പ്രകാരം (കൂറുമാറ്റ നിരോധന നിയമം) അയോഗ്യത നേരിടുന്ന വിമത ജനപ്രതിനിധികളുടെ വാദങ്ങളെ മാത്രം ആധാരമാക്കിയാണ് കമ്മീഷന്റെ നടപടിയെന്നും ഹർജിയിൽ ആരോപിക്കുന്നു. പശ്ചിമ ബംഗാളിലെ നന്ദിഗ്രാം, റെജിനഗർ എന്നീ നിയമസഭാ മണ്ഡലങ്ങളിലേക്ക് നടക്കാനിരിക്കുന്ന ഉപതിരഞ്ഞെടുപ്പിന് മുന്നോടിയായാണ് തെരഞ്ഞെടുപ്പ് കമ്മീഷൻ 'പൂവും പുല്ലും' അടങ്ങിയ തൃണമൂൽ കോൺഗ്രസിന്റെ ചിഹ്നവും പേരും മരവിപ്പിച്ചത്. തുടർന്ന് മമതാ ബാനർജി വിഭാഗത്തിന് 'മമത ഓൾ ഇന്ത്യ തൃണമൂൽ കോൺഗ്രസ്' എന്ന പേരും 'ഫുട്ബോൾ കളിക്കാരൻ' ചിഹ്നവും കമ്മീഷൻ അനുവദിച്ചിരുന്നു. റിതബ്രത ബാനർജിയുടെ നേതൃത്വത്തിലുള്ള വിമത വിഭാഗത്തിന് 'ഡെമോക്രാറ്റിക് തൃണമൂൽ കോൺഗ്രസ്' എന്ന പേരും 'എൻവലപ്പ്' (കവർ) ചിഹ്നവുമാണ് നൽകിയത്.

വിദ്യാർത്ഥിയുടെ മരണത്തിൽ അന്വേഷണം വേണം, ഐ ഐ ടി ബോംബെയിൽ കുട്ടികളുടെ പ്രതിഷേധം

Web Desk — Sat, 19 Sep 2026 10:12:12 +0530

മുബൈ: രണ്ടാം വർഷ എനർജി സയൻസ് വിദ്യാർത്ഥി സഹിൽ വക്കോഡെയുടെ മരണത്തിൽ അന്വേഷണം ആവശ്യപ്പെട്ടാണ് വിദ്യാ‍ർത്ഥികൾ പ്രതിഷേധിക്കുന്നത്. ഇന്നലെ വൈകിട്ടാണ് സഹിലിനെ ഹോസ്റ്റലിൽ മരിച്ച നിലയിൽ കണ്ടെത്തിയത്. ചാറ്റ് ജിപിടിയിൽ ഉത്തരം കണ്ടെത്താൻ ശ്രമിക്കുന്നതിനിടെ സഹിലിനെ അധ്യാപകർ പിടികൂടിയിരുന്നു. പരീക്ഷ ഹാളിൽ വച്ച് ചോദ്യപേപ്പർ അപ് ലോഡ് ചെയ്യാനായിരുന്നു ശ്രമമെന്ന് അധ്യാപകർ അറിയിച്ചു. അച്ചടക്ക നടപടി പേടിച്ചാണ് ആത്മഹത്യയെന്ന് സഹപാഠികൾ ആരോപിച്ചു. ഒരു വർഷം സസ്പെൻഷൻ കിട്ടുമെന്ന് അധ്യാപകർ ഭീഷണിപ്പെടുത്തി. എന്നാൽ യാതൊരു അച്ചടക്ക നടപടിക്കും ശുപാർശ ചെയ്തില്ലെന്ന് ഐ ഐ ടി ബോംബെ അറിയിച്ചു. കുട്ടിയോട് വകുപ്പ് മേധാവി സംസാരിച്ചു. എന്നാൽ നടപടി എടുക്കുമെന്ന് പറഞ്ഞില്ലെന്നും ഐഐ‌ടി അറിയിച്ചു. കഴിഞ്ഞ ജൂലൈ 28നും ഒരു കുട്ടി ഹോസ്റ്റലിൽ മരിച്ചു. കുട്ടികളുടെ മാനസികപിരിമുറുക്കം പരിഹരിക്കുന്നതിന് ന‌ടപടി എടുക്കുന്നില്ലെന്ന് വിദ്യാർത്ഥികൾ പറഞ്ഞു.

സൗരവ് ദാസിന്റെയും അശുതോഷ് റാങ്കയുടെയും മോചനം വൈകിപ്പിക്കുന്നത് നിയമവ്യവസ്ഥയുടെ ദുരുപയോഗം: സിജെപി

Anusree A — Tue, 20 Oct 2026 06:32:35 +0530

ദില്ലി: സൗരവ് ദാസിന്റെയും അശുതോഷ് റാങ്കയുടെയും മോചനം ബോധപൂർവം വൈകിപ്പിക്കുകയാണെന്നും ഇത് നിയമവ്യവസ്ഥയുടെ ദുരുപയോഗമാണെന്നും സിജെപി ആരോപിച്ചു. നിസാര കാരണങ്ങൾ ചൂണ്ടിക്കാട്ടി ഇരുവർക്കും ജാമ്യം നിഷേധിക്കുകയാണെന്നും വിഷയത്തിൽ കോടതിയെ സമീപിക്കുമെന്നും സിജെപി പോളിസി ഹെഡ് മെഹർ പശ്രീച്ച ഏഷ്യാനെറ്റ് ന്യൂസിനോട് വ്യക്തമാക്കി.

ഇരുവരും ജയിൽമോചിതരായശേഷം തുടർസമരപരിപാടികൾ പ്രഖ്യാപിക്കുമെന്ന് മെഹർ പശ്രീച്ച പറഞ്ഞു. നിയമവിരുദ്ധമായ നടപടികളെ നിയമപരമായി ചോദ്യം ചെയ്യുമെന്നും മെഹർ പശ്രീച്ച വ്യക്തമാക്കി. ഇരുവരുടെയും മോചനവുമായി ബന്ധപ്പെട്ട വിഷയത്തിൽ നിയമപോരാട്ടം ശക്തമാക്കാനാണ് സിജെപിയുടെ നീക്കം.

ജന്തർ മന്തറിൽ അതിക്രമിച്ചുകയറി പ്രതിഷേധിച്ചതിനെത്തുടർന്ന് സൗരവ് ദാസിനെയും അശുതോഷ് റാങ്കെയെയും ഒക്ടോബർ 13നാണ് ദില്ലി പൊലീസ് അറസ്റ്റ് ചെയ്ത് തിഹാർ ജയിലിലടച്ചത്. തുടർന്ന്, ഇരുവരെയും എക്സിക്യൂട്ടീവ് മജിസ്ട്രേറ്റ് അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിടുകയായിരുന്നു. വിമാനത്തിൽനിന്ന് കസ്റ്റഡിയിലെടുത്തശേഷം വിട്ടയച്ചപ്പോൾ ഏർപ്പെടുത്തിയ ജാമ്യവ്യവസ്ഥകൾ ലംഘിച്ചെന്നാരോപിച്ചാണ് ഇരുവരെയും വീണ്ടും കസ്റ്റഡിയിൽ വിട്ടത്

25 വർഷത്തെ ഭരണം: വികസിതഭാരതം 2047ൽ യാഥാർത്ഥ്യമാക്കുമെന്ന് പ്രധാനമന്ത്രി; 'ഇന്ത്യയിൽ ഒളിംപിക്സ് നടത്തും'

Web Desk — Wed, 07 Oct 2026 12:28:16 +0530

ദില്ലി. വികസിത ഭാരതം 2047ൽ യാഥാർത്ഥ്യമാക്കുമെന്ന് പ്രധാനമന്ത്രി നരേന്ദ്രമോദി. ഇന്ത്യയിൽ ഒളിംപിക്സ് നടത്തുമെന്നും പ്രധാനമന്ത്രി പറഞ്ഞു. നരേന്ദ്രമോദി മുഖ്യമന്ത്രിയും പ്രധാനമന്ത്രിയുമായി അധികാരത്തിലിരുന്നതിൻ്റെ 25 ാം വാ‍ർഷികാഘോഷമായ വികസിത് ഭാരത് സങ്കൽപ് സഭയിൽ സംസാരിക്കുകയായിരുന്നു ‌അദ്ദേഹം. 25 വർഷം ഭരണരംഗത്ത് ഉണ്ടാകുമെന്ന് സ്വപ്നത്തിൽ പോലും വിചാരിച്ചിട്ടില്ല , രാജ്യത്തെ ജനങ്ങൾക്ക് നന്ദി. വോട്ട് ബാങ്ക് രാഷ്ട്രീയം താൻ കളിച്ചിട്ടില്ലെന്നും അദ്ദേഹം പറഞ്ഞു.

ബഹിരാകാശത്തേക്ക് മനുഷ്യനെ അയക്കും. ഇതിനായുള്ള പദ്ധതികൾ നടപ്പാക്കുകയാണ്. ആഗോള ഉൽപ്പാദന ഹബ് ആക്കി ഇന്ത്യയെ മാറ്റും. സംഘടനയ്ക്ക് വേണ്ടി പ്രവർത്തിച്ചതാണ് തൻ്റെ രാഷ്ട്രീയ റിപ്പോർട്ട് കാർഡ്. തനിക്ക് നേരത്തെ തന്നെ രാഷ്ട്രീയത്തിലേക്ക് വരാമായിരുന്നു, അത് പ്രലോഭിപ്പിച്ചിട്ടില്ല. എന്തൊക്കെ ഉത്തരവാദിത്വങ്ങൾ തന്നിലേക്ക് വന്നോ, അതൊക്കെ താൻ പൂർത്തിയാക്കി. സ്വാർത്ഥതയില്ലാത്ത പ്രവർത്തി മാത്രമാണ് തൻ്റെ ലക്ഷ്യം, പ്രവർത്തിയാണ് മതം. രാജ്യത്തെ ഏറ്റവും വലിയ വെല്ലുവിളിയെന്നത് വോട്ടിൻ്റെ പേരിൽ സമൂഹത്തെ വിഭജിക്കുന്നതാണ്. നാട്ടിൽ കറണ്ടില്ലെങ്കിൽ അത് ഒരു വിഭാഗത്തെ മാത്രമല്ല ബാധിക്കുക, എല്ലാവരെയുമാണ് ബാധിക്കുന്നത്. അതിന് പരിഹാരം കാണാനാണ് ശ്രമമെന്നും അദ്ദേഹം പറഞ്ഞു.

ഫ്ലൈ ദുബായ് വിമാനത്തിലെ പൈലറ്റ് സ്മിത് മച്ഛറിനെ വീണ്ടും പ്രശംസിച്ച് മോദി. ഇപ്പോൾ ഇന്ത്യക്കാരനായ ഒരു പൈലറ്റിനെ പറ്റിയാണ് ലോകം സംസാരിക്കുന്നതെന്ന് മോദി പറഞ്ഞു. ഇന്ത്യൻ നിർമ്മിത വിമാനത്തെ പറ്റി സംസാരിക്കുന്ന ഒരു ദിവസം വരും. ദീർഘവീക്ഷണത്തോടെയുള്ള നയങ്ങളിലൂടെയും കഠിനാധ്വാനത്തിലൂടെയും ഈ ലക്ഷ്യങ്ങൾ കൈവരിക്കാനാകുമെന്നും മോദി പറഞ്ഞു. ഇന്ത്യക്ക് മുന്നിൽ വലിയ വെല്ലുവിളികളുണ്ട്, പക്ഷെ 140 കോടി പരിഹാരങ്ങളുണ്ടെന്നും‌ മോദി പറഞ്ഞു. 2001 ലാണ് മോദി ഗുജറാത്ത് മുഖ്യമന്ത്രിയാകുന്നത്. ആഘോഷത്തിൻ്റെ ഭാഗമായി രാജ്യവ്യാപകപരിപാടികളാണ് ബിജെപി നടത്തുന്നത്

തെരഞ്ഞെടുപ്പ് കമ്മീഷൻ്റെ വിശദീകരണത്തിൽ അവ്യക്തത. വിവാദചോദ്യം ഒഴിവാക്കിയിട്ടില്ല, പ്രതിഷേധം തുടരുമെന്ന് കോൺഗ്രസ്, കമ്മീഷനെ പിന്തുണച്ച് ടിഡിപി.

S Ajith Kumar — Sun, 27 Sep 2026 07:42:11 +0530

ദില്ലി തെരഞ്ഞെടുപ്പ് കമ്മീഷൻ്റെ വിശ്വാസ്യത ചോദ്യം ചെയ്യുന്ന റിപ്പോർട്ടുകൾ പുറത്ത് വന്ന ശേഷം നടന്ന കമ്മീഷൻ്റെ സമ്പൂർണ്ണ യോഗത്തിനും വിശദീകരണത്തിനും ശേഷവും ഭിന്നത സംബന്ധിച്ച ചില വിഷയങ്ങളിൽ അവ്യക്തത തുടരുകയാണ്. എസ്ഐആറുമായി ബന്ധപ്പെട്ട് ഫോം 6 ലെ തർക്കവിഷയമായ ചോദ്യം മാറ്റിയതായി സൂചനയില്ല. അപേക്ഷകൻ്റെ മാതാപിതാക്കളെ സംബന്ധിച്ച ചോദ്യം ഒഴിവാക്കണമെന്നാണ് ആവശ്യപ്പെട്ടിരുന്നത് .കഴിഞ്ഞ ഒക്ടോബർ 13നാണ് ഈ ചോദ്യം അനധികൃതമെന്ന് കമ്മീഷണർ എസ്എസ് സന്ധു വിശേഷിപ്പിച്ചിരുന്നത്. എന്നാൽ ഇത് മാറ്റിയതായി വിവരമില്ല. ഫോം 6 സുപ്രീംകോടതി അംഗീകരിച്ചിരുന്നെന്ന വാദമായിരുന്നു ഉയർത്തിയതെങ്കിലും ഇതിലും അവ്യക്തത ഉണ്ട്. SIR സംബന്ധിച്ച മെയ് 27ലെ കോടതി ഉത്തരവിൽ അത്തരമൊരു അംഗീകാരം വ്യക്തമല്ല. ബംഗാളിൽ വോട്ടർമാർക്കെതിരെ അപ്പീൽ നൽകാൻ നിർദേശം നൽകിയത് ആരെന്ന് വ്യക്തമല്ല. വോട്ടർമാരുടെ പേരുകൾ പുനസ്ഥാപിക്കാൻ ഗോവ ആവശ്യപ്പെട്ട സോഫ്‌റ്റ് വെയർ പ്രവർത്തനക്ഷമമാകാത്തതിലും കമ്മീഷൻ്റെ ഭാഗത്ത് നിന്ന് വിശദീകരണമില്ല. രണ്ട് കമ്മീഷണർമാരും നടപടിയെടുക്കണമെന്നാവശ്യപ്പെട്ട തെരഞ്ഞെടുപ്പ് കമ്മീഷൻ ആസ്ഥാനത്ത് ജോലി ചെയ്യുന്ന സീനിയർ ഡപ്യൂട്ടി ഇലക്ഷൻ കമ്മീഷണർ മനീഷ് ഗാർഗ്, DG IT സീമ ഖന്ന എന്നിവരുടെ കാര്യത്തിലും കമ്മീഷൻ മൗനം തുടരുന്നു. ഈ ഉദ്യോഗസ്ഥർ ചില സമ്മർദ്ദങ്ങൾക്ക് വഴങ്ങിയെന്നായിരുന്നു കമ്മീഷണർമാരുടെ ആക്ഷേപം.

ടിഡിപിക്ക് തൃപ്തി

തെരഞ്ഞെടുപ്പ് കമ്മീഷൻ വിശദീകരണത്തെ സ്വാഗതം ചെയ്ത് എൻഡിഎ ഘടകകക്ഷി ടിഡിപി. തെറ്റിദ്ധാരണകൾക്ക് വിരാമമായെന്നാണ് ചന്ദ്രബാബു നായിഡു വ്യക്തമാക്കിയത്. കമ്മീഷൻ്റെ വിശ്വാസ്യത ഒരിക്കൽ കൂടി ഉറപ്പിച്ചെന്ന നായിഡുവിൻ്റെ പ്രസ്താവന ബിജെപിക്ക് ആശ്വസമായി. കേന്ദ്രമന്ത്രി ചിരാഗ് പാസ്വാൻ്റെ വിമർശനം പ്രതിപക്ഷം ആയുധമാക്കിയിരുന്നു. ഇതിനിടെ രാഹുൽഗാന്ധിക്കെതിരെ വിമർശനം ബിജെപി കടുപ്പിക്കുകയാണ്. രാഹുലിൻ്റെ നുണ പൊളിഞ്ഞുവീണെന്ന് രവിശങ്കർ പ്രസാദ് പറഞ്ഞു. കമ്മീഷനെ കുറ്റം പറയാതെ പോയി തെരഞ്ഞെടുപ്പുകൾ ജയിക്കാൻ നോക്കൂയെന്നാണ് രവിശങ്കർ പ്രസാദിൻ്റെ ഉപദേശം. എന്നാൽ കമ്മീഷൻ്റെ പ്രസ്താവന തള്ളിയ കോൺഗ്രസ് പ്രസ്താവന മുകളിൽനിന്നുള്ള സമ്മർദ്ദം മൂലമാണെന്ന് ആരോപിച്ചു. ഗ്യാനേഷ് കുമാറിനെതിരായ പ്രതിഷേധത്തിൽ നിന്ന് പിന്നോട്ടില്ലെന്നും കോൺഗ്രസ് വ്യക്തമാക്കി. എസ്ഐആർ ഉൾപ്പടെ എല്ലാ കാര്യങ്ങളും ഏകകണ്ഠമായാണ് എടുത്തതെന്നാണ് കമ്മീഷൻ വ്യക്തമാക്കിയത്. എസ്ഐആറിൽ നിന്ന് പുറത്തായവർക്ക് പേര് ചേർക്കാൻ ഇനിയും അവസരം നൽകും. പുതുതായ പേരു ചേർക്കാനുള്ള ഫോം 6ൽ നിയമവിരുദ്ധമായ കൂട്ടിചേർക്കൽ ഒഴിവാക്കി. എസ്ഐആർ പൂർത്തിയായ സ്ഥലങ്ങളിൽ പഴയ ഫോം 6 ആയിരിക്കും നിലനിൽക്കുക തുടങ്ങിയവയാണ് വിശദീകരണം.

ചാലക്കുടിയിലെ ബേക്കറിക്ക് വൈൻ ലൈസൻസ് നൽകിയത് യുഡിഎഫ് സർക്കാരെന്ന് എം ബി രാജേഷ്, കർഷകരുടെ ആവശ്യപ്രകാരമാണ് വൈൻ നിർമിക്കാൻ തീരുമാനിച്ചത്

Web Desk — Sun, 18 Oct 2026 14:16:25 +0530

തിരുവനന്തപുരം:ഹോർട്ടി വൈൻ വിൽക്കാൻ ചാലക്കുടിയിലെ ബേക്കറിക്ക് ലൈസൻസ് നൽകിയത് വി ഡി സതീശൻ സർക്കാരിൻ്റെ കാലത്താണെന്ന് മുൻ എക്സൈസ് മന്ത്രി എം ബി രാജേഷ്. ബേക്കറിക്ക് ലൈസൻസ് നൽകിയത് ജൂണിലാണ്. പുതിയ സർക്കാർ അധികാരത്തിലെത്തിയ ശേഷമാണിത്. മന്ത്രി അറിഞ്ഞില്ലെന്നത് അദ്ദേഹത്തിൻ്റെ കുറ്റമാണ്. അവരാണ് അത് പരിശോധിക്കേണ്ടത്. ലൈസൻസ് റദ്ദാക്കാനുള്ള നീക്കത്തെക്കുറിച്ച് കർഷകരാണ് പ്രതികരക്കേണ്ടതെന്നും രാജേഷ് പറഞ്ഞു. കർഷക സംഘടനകളുടെയും കർഷകരുടെയും ആവശ്യ പ്രകാരമാണ് LDF സർക്കാർ ഹോർട്ടി വൈൻ ഉത്പാദനത്തിന് അനുമതി നൽകിയത്. വിശദമായ ചർച്ചകൾക്ക് ശേഷമാണ് തീരുമാനം എടുത്തത്. ഇത് മദ്യമല്ല. ഫെർമെൻറ്റേഷൻ വഴി ഉൽപാദിപ്പിക്കുന്നുന്നതാണ്. ഇതിന് ഒരു വിപണി ഉറപ്പാക്കാൻ ചട്ടഭേദഗതി ചെയ്തുവെന്നും രാജേഷ് പറഞ്ഞു..

വിവാദം നുരയുന്നു

ഇന്നലെ മുതലാണ് ചാലക്കുടിയിലെ ബേക്കറി വഴി ഹോർട്ടി വൈൻ വിൽക്കാൻ അനുമതി നൽകിയത്. ഇത് വിവാദമായതോടെ ബേക്കറി വഴി 15 ശതമാനം വീര്യമുള്ള ഹോർട്ടിവൈൻ വില്പനക്ക് അനുമതി നൽകിയ തീരുമാനം റദ്ദാക്കാൻ സർക്കാർ നീക്കം തുടങ്ങി. മുഖ്യമന്ത്രിയും എക്സൈസ് മന്ത്രിയും അറിയാതെ ബേക്കറിക്ക് ഹോര്‍ട്ടി വൈൻ വിൽക്കാൻ എക്സൈസ് കമ്മീഷണര്‍ ലൈസന്‍സ് അനുവദിച്ചതിനാലാണ് നടപടി. നികുതി സെക്രട്ടറിയോട് നിയമോപദേശം തേടാൻ മന്ത്രിയുടെ നിർദ്ദേശം നല്‍കി

ഇന്ത്യാ-അമേരിക്ക സംയുക്ത സൈനികാഭ്യാസം 'യുദ്ധ് അഭ്യാസി'ന് തുടക്കം

Dhanesh Ravindran — Tue, 15 Sep 2026 17:52:25 +0530

ദില്ലി: ഇന്ത്യയും അമേരിക്കയും തമ്മിലുള്ള 22-ാമത് സംയുക്ത സൈനികാഭ്യാസമായ ‘യുദ്ധ് അഭ്യാസിന്’ ഉത്തരാഖണ്ഡിലെ ഔലിയിൽ തുടക്കമായി. ഔലി ഫോറിൻ ട്രെയിനിംഗ് നോഡിൽ നടന്ന ഔദ്യോഗിക ഉദ്ഘാടന ചടങ്ങിൽ ഇരു രാജ്യങ്ങളുടെയും സൈനിക ഉദ്യോഗസ്ഥരും സേനാംഗങ്ങളും പങ്കെടുത്തു. ഇന്ത്യയുടെ 14 ഇൻഫൻട്രി ഡിവിഷൻ ജനറൽ ഓഫീസർ കമാൻഡിങ് മേജർ ജനറൽ അമരേഷ് ഗുഞ്ചനും അമേരിക്കൻ സൈന്യത്തിലെ 11-ാമത് എയർബോൺ ഡിവിഷൻ ബ്രിഗേഡ് കമാൻഡർ കേണൽ ബെഞ്ചമിൻ ജാക്ക്മാനും ചേർന്ന് സൈനികരെ അഭിസംബോധന ചെയ്തു. ഇരു രാജ്യങ്ങളിൽ നിന്നുമായി 600 വീതം ആകെ 1,200 സൈനികരാണ് ഈ അഭ്യാസപ്രകടനങ്ങളിൽ അണിനിരക്കുന്നത്.

ഉത്തരാഖണ്ഡിലെ ഔലിക്കു പുറമെ രാജസ്ഥാനിലെ മഹാജൻ ഫീൽഡ് ഫയറിങ് റേഞ്ചിലും സൈനികാഭ്യാസം നടക്കുന്നുണ്ട്. ആധുനിക സാങ്കേതികവിദ്യയുടെ ഉപയോഗത്തിന് ഇത്തവണ പ്രത്യേക പ്രാധാന്യം നൽകിയിട്ടുണ്ട്. നിരീക്ഷണ ഡ്രോണുകൾ, സ്വയം പ്രവർത്തിക്കുന്ന സംവിധാനങ്ങൾ എന്നിവ ഉപയോഗിച്ചുള്ള പരിശീലനവും രാജസ്ഥാനിലെ ഫയറിങ് റേഞ്ചിൽ അത്യാധുനിക ആയുധങ്ങളുടെ പ്രദർശനവും ഇതിന്റെ ഭാഗമായി നടക്കും. ഈ സൈനികാഭ്യാസം ഇന്ത്യ-അമേരിക്ക പ്രതിരോധ സഹകരണം കൂടുതൽ ശക്തിപ്പെടുത്തുമെന്ന് കരസേന വ്യക്തമാക്കി.

പാകിസ്ഥാനിൽ നിന്നെത്തിയ 362 മെട്രിക് ടൺ ഈന്തപ്പഴം പിടിച്ചെടുത്ത് ഡി ആർ ഐ

Anusree A — Tue, 15 Sep 2026 13:33:01 +0530

മുംബൈ : പാകിസ്ഥാനിൽ നിന്നെത്തിയ 362 മെട്രിക് ടണ്‍ ഈന്തപ്പഴം പിടികൂടി. യു എ ഇയിൽ നിന്നെന്ന വ്യാജേന മുംബൈയിൽ എത്തിച്ച ഈത്തപ്പഴമാണ് ഡയറക്ടറേറ്റ് ഓഫ് റവന്യൂ ഇന്റലിജൻസ് പരിശോധനയിലൂടെ പിടികൂടിയത്. ഓപ്പറേഷൻ ഡീപ്പ് മാനിഫെസ്റ്റ്' (Operation Deep Manifest) എന്ന പ്രത്യേക നടപടിയുടെ ഭാഗമായി നാസിക്കിലെ അംബാദിലുള്ള കണ്ടെയ്നർ ഫ്രൈറ്റ് സ്റ്റേഷനിൽ വെച്ചാണ് മുംബൈ ആസ്ഥാനമായുള്ള കമ്പനി ഇറക്കുമതി ചെയ്ത 13 കണ്ടെയ്നറുകൾ പിടിച്ചെടുത്തത്.

യു.എ.ഇയിൽ ഉത്പാദിപ്പിച്ചതെന്ന വ്യാജേനയാണ് ഈ ചരക്ക് ഇന്ത്യയിലേക്ക് കൊണ്ടുവന്നത്. എന്നാൽ, കറാച്ചി തുറമുഖത്ത് നിന്ന് പാകിസ്ഥാൻ ഉത്ഭവമായ ഈന്തപ്പഴം യു.എ.ഇയിലെ ജെബൽ അലി വഴി ഇന്ത്യയിലേക്ക് തിരിച്ചുവിടുകയായിരുന്നുവെന്ന് പ്രാഥമിക അന്വേഷണത്തിൽ കണ്ടെത്തി. ജെബൽ അലിയിൽ വെച്ച് കണ്ടെയ്നറുകൾ മാറ്റുകയും മറ്റൊരു കപ്പൽ വഴി ഇന്ത്യയിലേക്ക് അയക്കുകയുമായിരുന്നു. പാകിസ്ഥാൻ പൗരന്മാരുമായി ബന്ധമുള്ള സ്ഥാപനങ്ങളുടെ സഹായത്തോടെയാണ് ഈ വഴിതിരിച്ചുവിടൽ നടത്തിയതെന്നാണ് ഡി.ആർ.ഐയുടെ സംശയം.

ഭീകരാക്രമണത്തെ തുടർന്ന് 2025 മെയ് 2 മുതൽ പാകിസ്ഥാനിൽ നിന്നുള്ള ഉൽപ്പന്നങ്ങളുടെ നേരിട്ടുള്ളതോ അല്ലാത്തതോ ഇറക്കുമതിക്ക് കേന്ദ്ര സർക്കാർ നിരോധനം ഏർപ്പെടുത്തിയിരുന്നു. ചരക്കുകളുടെ വിവരങ്ങളിൽ കൃത്രിമം കാണിക്കുന്നതും വ്യാജരേഖകൾ നിർമ്മിച്ച് ഇറക്കുമതി നടത്തുന്നതുമായ ശൃംഖലകൾക്കെതിരെ ശക്തമായ നിരീക്ഷണം തുടരുകയാണെന്ന് ഡി.ആർ.ഐ അറിയിച്ചു.

തമിഴ്നാട് മുഖ്യമന്ത്രി വിജയ്‌ക്കെതിരെ അസഭ്യ പരാമർശം; ഡിഎംകെ വനിതാ നേതാവിനെതിരെ കേസ്

Anusree A — Tue, 20 Oct 2026 06:02:43 +0530

ചെന്നൈ: തമിഴ്നാട് മുഖ്യമന്ത്രി സി. ജോസഫ് വിജയ്‌ക്കെതിരെ അസഭ്യ പരാമർശം നടത്തിയെന്ന പരാതിയിൽ ഡിഎംകെ വനിതാ നേതാവിനെതിരെ ചെന്നൈ പൊലീസ് കേസെടുത്തു. ഡിഎംകെ കൗൺസിലറും പാർട്ടിയുടെ വനിതാ വിഭാഗം ചെന്നൈ ജില്ലാ ഓർഗനൈസറുമായ സുധ ദീനദയാലനെതിരെയാണ് നടപടി. പരിപാടി സംഘടിപ്പിച്ച ഡിഎംകെ ഹാർബർ ഏരിയ സെക്രട്ടറി മുരളിക്കെതിരെയും കേസെടുത്തിട്ടുണ്ട്.

ഒക്ടോബർ ഏഴിന് ചെന്നൈയിൽ നടന്ന പരിപാടിക്കിടെ നടത്തിയ വിവാദ പരാമർശങ്ങളുടെ ദൃശ്യങ്ങൾ ഇന്നലെയാണ് പുറത്തുവന്നത്. പരാമർശത്തിനെതിരെ മന്ത്രിമാരടക്കം രംഗത്തെത്തിയതിനു പിന്നാലെ രാത്രിയോടെയാണ് പൊലീസ് കേസെടുത്തത്. പരിപാടിയിൽ പങ്കെടുത്ത കനിമൊഴി എംപി, ചെന്നൈ മേയർ പ്രിയ, മുൻ മന്ത്രി ശേഖർ ബാബു എന്നിവർക്കെതിരെ നിലവിൽ കേസെടുത്തിട്ടില്ലെന്നാണ് സൂചന.

അതേസമയം, വേദിയിൽവെച്ചുതന്നെ സുധ ദീനദയാലന്റെ പരാമർശത്തെ കനിമൊഴി തിരുത്തുന്ന ദൃശ്യങ്ങൾ ഡിഎംകെ പുറത്തുവിട്ടു. എന്ത് പ്രകോപനമുണ്ടായാലും മാന്യതയോടെ സംസാരിക്കണമെന്നും പെരിയാറിന്റെയും അണ്ണാദുരൈയുടെയും ആശയങ്ങൾ പിന്തുടരണമെന്നും കനിമൊഴി പ്രസംഗിക്കുന്ന ഭാഗങ്ങളാണ് പുറത്തുവിട്ടത്. വിവാദ പരാമർശത്തെച്ചൊല്ലി രാഷ്ട്രീയ വിവാദം ശക്തമായ സാഹചര്യത്തിലാണ് ഡിഎംകെയുടെ വിശദീകരണ ദൃശ്യങ്ങളും പുറത്തുവന്നിരിക്കുന്നത്