Asianet News Malayalam

സഹപൈലറ്റ് പ്രാർഥിക്കണമെന്ന് പറഞ്ഞു, പിന്നാലെ തലയ്ക്ക് പിറകിൽ ശക്തമായ അടിയേറ്റു, കാഴ്ചമങ്ങി; കോക്ക്പിറ്റിലെ ജീവൻമരണ പോരാട്ടം വിവരിച്ച് സ്മിത് മച്ചാർ

അഫീഫ്. എം — Sun, 04 Oct 2026 12:42:00 +0530

ന്യൂഡൽഹി: ഫ്ലൈ ദുബായ് വിമാനത്തിലുണ്ടായ സംഭവവികാസങ്ങൾ വിശദമായി വിവരിച്ച് ക്യാപ്റ്റൻ സ്മിത് മച്ചാർ. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി സംസാരിക്കുന്നതിനിടെയാണ് കോക്ക്പിറ്റിൽ സംഭവിച്ചകാര്യങ്ങൾ സ്മിത് മച്ചാർ വിശദമായി പറഞ്ഞത്. സാധാരണപോലെയാണ് വിമാനം സർവീസ് ആരംഭിച്ചതെന്നും എന്നാൽ, അല്പസമയത്തിനകം സഹപൈലറ്റ് പ്രാർഥിക്കണമെന്ന് പറഞ്ഞെന്നും സ്മിത് മച്ചാർ പറഞ്ഞു. തുടർന്ന് ഏതാനും മിനിറ്റുകൾക്കുള്ളിലാണ് തനിക്ക് തലയ്ക്ക് പിറകിൽ അടിയേറ്റത്. കോക്ക്പിറ്റിൽ അടിയന്തര സാഹചര്യങ്ങളിൽ രക്ഷാപ്രവർത്തനായി ഉപയോഗിക്കുന്ന ചെറിയ മഴു ഉപയോഗിച്ചാണ് സഹപൈലറ്റ് ആക്രമണം നടത്തിയതെന്നും സ്മിത് മച്ചാർ വ്യക്തമാക്കി.

അതൊരു സാധാരണ വിമാനയാത്രയായിരുന്നു. വിമാനം പറന്നുയർന്നതിന് പിന്നാലെ സഹപൈലറ്റ് പ്രാർഥിക്കണമെന്ന് പറഞ്ഞു. അത് പലരും ചെയ്യുന്നതാണ്. അതൊരു അസാധാരണ കാര്യവുമല്ല. അദ്ദേഹം പ്രാർഥിച്ചുകൊണ്ടിരിക്കുമ്പോൾ ആദരസൂചകമായി ഞാൻ മുന്നിലേക്ക് തന്നെ നോക്കിയിരുന്നു. പിറകിലേക്ക് നോക്കിയില്ല. പക്ഷേ, നാലോ അഞ്ചോ മിനിറ്റിന് ശേഷം പെട്ടെന്നാണ് അതുണ്ടായത്. എന്റെ തലയുടെ പിറകിൽ ശക്തമായ അടിയേറ്റു. വിമാനത്തിന് എന്തോ സംഭവിച്ചെന്നാണ് ആദ്യം കരുതിയത്. എന്നാൽ, തുടർച്ചയായി മർദനമേറ്റതോടെ പ്രശ്നം വിമാനത്തിനല്ല, കോക്ക്പിറ്റിൽ എനിക്കൊപ്പമുള്ള വ്യക്തിയുടേതാണെന്ന് തിരിച്ചറിഞ്ഞു. ഞാൻ അയാളെ തടയാൻ ശ്രമിച്ചു. പക്ഷേ, ആദ്യത്തെ ആദ്യത്തെ പ്രഹരത്തിൽ തന്നെ എന്റെ കാഴ്ച മങ്ങിത്തുടങ്ങിയിരുന്നു. ആ സമയത്ത് വിമാനം താഴേക്ക് പതിക്കുന്നതായി അനുഭവപ്പെട്ടു. ആ സമയത്തെ പലതും ഓർമയില്ല. ഓർമകളെല്ലാം ചിതറിക്കിടക്കുകയാണ്. പക്ഷേ, ഞാൻ കോക്ക്പിറ്റിന്റെ വാതിൽ തുറക്കാൻ ശ്രമിച്ചത് ഓർമയുണ്ട്. പക്ഷേ, അയാൾ വാതിൽ വീണ്ടും അടച്ചെന്നാണ് തോന്നുന്നത്. ഈ സമയം ഞാൻ കോക്ക്പിറ്റിൽ നിലത്തുവീണ് കിടക്കുകയായിരുന്നു. വിമാനം താഴേക്ക് പതിക്കുന്നതും യാത്രക്കാരുടെ നിലവിളികളും ‍ഞാൻ കേട്ടിരുന്നു. പക്ഷേ, അവസാനമായി ഒന്നുകൂടി പോരാടാൻ തീരുമാനിച്ചു. അത് എനിക്കുവേണ്ടിയാണെന്നോ അല്ലെങ്കിൽ വിമാനത്തിലുണ്ടായിരുന്ന മറ്റുള്ളവർക്ക് വേണ്ടിയാണെന്നോ എങ്ങനെ വേണമെങ്കിലും വിശേഷിപ്പിക്കാം. അങ്ങനെ ചെയ്തില്ലെങ്കിൽ ഞാൻ മരിച്ചുപോകുമായിരുന്നു. അതോടെ എല്ലാ തടസങ്ങളെയും മറികടന്ന് പോരാടാൻ തീരുമാനിച്ചു. സർവശക്തിയുമെടുത്ത് കോക്ക്പിറ്റിന്റെ വാതിലിനടുത്തെത്തി. വാതിൽ തുറന്നു. ആ സമയത്ത് ആളുകൾ വാതിലിന് പുറത്ത് കാത്തുനിൽക്കുന്നുണ്ടായിരുന്നു. അവർ അക്രമിയെ തിരിച്ചടിച്ചു. എല്ലാ നിയന്ത്രണങ്ങളും അവർ ഏറ്റെടുത്തു- സ്മിത് മച്ചാർ വിശദീകരിച്ചു.

കഴിഞ്ഞ ബുധനാഴ്ചയാണ് ദുബായിൽനിന്ന് ടെൽ അവീവിലേക്ക് പോവുകയായിരുന്ന ഫ്ലൈ ദുബായ് വിമാനത്തിലെ സഹപൈലറ്റ് ക്യാപ്റ്റനായ സ്മിത് മച്ചാറിനെ ആക്രമിച്ചത്. സഹപൈലറ്റിന്റെ ആക്രമണം ചെറുത്തുനിന്ന സ്മിത് മച്ചാർ വലിയൊരു ദുരന്തമാണ് ഒഴിവാക്കിയത്. ഇതിനിടെ കോക്ക്പിറ്റിന്റെ വാതിൽ തുറന്നതോടെ യാത്രക്കാർ സഹപൈലറ്റിനെ കീഴ്പ്പെടുത്തി. പിന്നാലെ വിമാനത്തിൽ യാത്രചെയ്തിരുന്ന അവധിയിലായിരുന്ന രണ്ട് പൈലറ്റുമാർ വിമാനത്തിന്റെ നിയന്ത്രണം ഏറ്റെടുത്തു. വിമാനം സൗദി അറേബ്യയിലെ തബൂക്ക് വിമാനത്താവളത്തിൽ സുരക്ഷിതമായി ഇറക്കി.

സഹപൈലറ്റിന്റെ ആക്രമണത്തിൽ ഗുരുതരപരിക്കേറ്റ സ്മിത് മച്ചാർ യുഎഇയിലെ ആശുപത്രിയിൽ ചികിത്സയിലാണ്. ദുബായ് കിരീടാവകാശി കഴിഞ്ഞദിവസം അദ്ദേഹത്തെ ആശുപത്രിയിൽ സന്ദർശിച്ചിരുന്നു. പ്രധാനമന്ത്രി നരേന്ദ്രമോദി സ്മിത് മച്ചാറിനെ നേരിട്ടുവിളിച്ച് പ്രശംസ അറിയിച്ചു. ഇതിനുപിന്നാലെയാണ് ഇസ്രയേൽ പ്രധാനമന്ത്രിയും സ്മിത് മച്ചാറിനെ വിളിച്ച് അഭിനന്ദനം അറിയിച്ചത്. അതേസമയം, ഒമാൻ പൗരനായ ഹമാം അൽ ഹമാമിയാണ് വിമാനത്തിൽ ആക്രമണം നടത്തിയ സഹപൈലറ്റെന്ന് യുഎഇ സ്ഥിരീകരിച്ചു. സംഭവം ഭീകരാക്രമണശ്രമമാണെന്നും യുഎഇ അറ്റോർണി ജനറൽ ഹമാദ് സൈഫ് അൽ ഷംസിയും പ്രതികരിച്ചു. കോക്പിറ്റിൽ ക്യാപ്റ്റനെ ആക്രമിച്ച് വിമാനത്തിന്റെ നിയന്ത്രണം ഏറ്റെടുക്കാനാണ് സഹപൈലറ്റ് ശ്രമിച്ചതെന്നും അദ്ദേഹം പറഞ്ഞു. സംഭവത്തിൽ യുഎഇയുടെ അന്വേഷണം തുടരുകയാണ്.

ഹോർമൂസിൽ വീണ്ടും കപ്പലുകൾക്ക് നേരെ ആക്രമണം; സൗദിയിൽ മിസൈൽ അവശിഷ്ടം വീണ് പ്രവാസിക്ക് പരിക്ക്

Aishwarya S Babu — Sat, 03 Oct 2026 20:19:11 +0530

ടെഹ്റാൻ: ഹോർമൂസിൽ വീണ്ടും രണ്ട് കപ്പലുകൾക്ക് നേരെ ആക്രമണം. കുവൈത്ത് പതാക വഹിക്കുന്ന കപ്പലിൽ നിന്ന് അഞ്ച് ഇന്ത്യക്കാരെ രക്ഷിച്ചു. സൗദിയിലെ അസീറിൽ മിസൈൽ അവശിഷ്ടം വീണ് പ്രവാസിക്ക് പരിക്കേറ്റു. നജ്റാൻ പ്രവിശ്യയിൽ സ്കൂളിന് മുകളിൽ ഡ്രോൺ അവശിഷ്ടം പതിച്ചു. ഹോർമൂസിൽ ഒരു കപ്പലാക്രമിക്കപ്പെട്ടത് ഒമാൻ തീരത്തോട് ചേർന്ന് തന്നെയാണ്. തുറമുഖത്ത് നിന്ന കപ്പലിന് നേരെയുള്ള ആക്രമണത്തിൽ തീപ്പിടുത്തമുണ്ടായി. എല്ലാ ജീവനക്കാരും സുരക്ഷിതരമാണ്.

ഹോർമൂസിൽ നിന്ന് പുറത്തു കടക്കാനിരിക്കെയാണ് മറ്റൊരു എണ്ണക്കപ്പൽ ആക്രമിക്കപ്പെട്ട് തീപിടിച്ചത്. ഇതിലും ആർക്കും പരിക്കില്ല. ഒമാനിലെ ഇന്ത്യൻ എംബസിയാണ് കപ്പലിൽ നിന്ന് അഞ്ച് ജീവനക്കാരെ രക്ഷിച്ച കാര്യം അറിയിച്ചത്. അഞ്ച് പേരും ഇന്ത്യക്കാരാണ്. കുവൈത്തിന്റെ ഖമീസ ത്രി എന്ന കപ്പലാണിത്. സൗദിയിൽ ഹൂതികളുടെ ആക്രമണം ശക്തമായി തുടരുകയാണ്. നജ്റാനിൽ സ്കൂളിൽ പതിച്ച ഡ്രോൺ അവശിഷ്ടം കാര്യമായ നാശനഷ്ടമുണ്ടാക്കി. ആർക്കും പരിക്കില്ല. അതേസമയം അസീറിൽ പള്ളിക്ക് മേലെ പതിച്ച ബലിസ്റ്റിക് മിസൈൽ അവശിഷ്ടം പതിച്ചാണ് ഏഷ്യക്കാരനായ പ്രവാസിക്ക് പരിക്കേറ്റത്. വാഹനങ്ങൾക്കും കെട്ടിടങ്ങൾക്കും കേടുപാടുകളുണ്ട്.

'വിമാനത്തിലോ ഉയരമുള്ള കെട്ടിടത്തിലോ ഇടിച്ചിറക്കാൻ പദ്ധതിയിട്ടു, പക്ഷേ നടന്നില്ല'; അന്വേഷണ ഉദ്യോഗസ്ഥരോട് കൂടുതൽ വിവരങ്ങൾ വെളിപ്പെടുത്തി സഹപൈലറ്റ്

Web Desk — Mon, 05 Oct 2026 08:52:08 +0530

ഡൽഹി: ടെൽ അവീവിലേക്ക് പോവുകയായിരുന്ന ഫ്ലൈദുബായ് വിമാനത്തിൽ പൈലറ്റിനെ ആക്രമിച്ച സഹ പൈലറ്റ് ഹമാം അൽ-ഹമ്മാമി അന്വേഷണ ഉദ്യോഗസ്ഥരോട് കൂടുതൽ വിവരങ്ങൾ വെളിപ്പെടുത്തി. വിമാനം ഇടിച്ചിറക്കാൻ ലക്ഷ്യമിട്ടത് ടെൽ അവീവിലെ വിമാനത്താവളത്തിലാണെന്നും ക്യാപ്റ്റൻ സ്മിത് മച്ചാറിനെ കൊലപ്പെടുത്തിയ ശേഷം സാധാരണപോലെ യാത്ര തുടരാനാണ് ഉദ്ദേശിച്ചതെന്നും വിമാനത്താവളത്തിൽ ലാൻഡിംഗ് അനുമതി നേടിയ ശേഷം മറ്റൊരു വിമാനത്തിലോ ഉയരമുള്ള കെട്ടിടത്തിലോ ഇടിച്ചിറക്കൽ ആയിരുന്നു ലക്ഷ്യം. എന്നാൽ, സ്മിത്ത് മച്ചാർ കോക്പിറ്റ് വാതിൽ തുറന്നതോടെ പദ്ധതി പൊളിയുകയായിരുന്നു. ഏറെക്കാലമായുള്ള പദ്ധതിയെന്നും ഫ്ലൈ ദുബായിൽ ജോലി നേടിയത് തന്നെ ഈ ലക്ഷ്യവുമായിട്ടാണെന്നും.

ക്യാപ്റ്റൻ സ്മിത് മച്ചാർ പറയുന്നത്

ഫ്ലൈ ദുബായ് വിമാനത്തിലുണ്ടായ സംഭവവികാസങ്ങൾ ക്യാപ്റ്റൻ സ്മിത് മച്ചാർ വിശദമായി വിവരിച്ചു. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി സംസാരിക്കുന്നതിനിടെയാണ് കോക്ക്പിറ്റിൽ സംഭവിച്ചകാര്യങ്ങൾ സ്മിത് മച്ചാർ വിശദമായി പറഞ്ഞത്. സാധാരണപോലെയാണ് വിമാനം സർവീസ് ആരംഭിച്ചതെന്നും എന്നാൽ, അല്പസമയത്തിനകം സഹപൈലറ്റ് പ്രാർഥിക്കണമെന്ന് പറഞ്ഞെന്നും സ്മിത് മച്ചാർ പറഞ്ഞു. തുടർന്ന് ഏതാനും മിനിറ്റുകൾക്കുള്ളിലാണ് തനിക്ക് തലയ്ക്ക് പിറകിൽ അടിയേറ്റത്. കോക്ക്പിറ്റിൽ അടിയന്തര സാഹചര്യങ്ങളിൽ രക്ഷാപ്രവർത്തനായി ഉപയോഗിക്കുന്ന ചെറിയ മഴു ഉപയോഗിച്ചാണ് സഹപൈലറ്റ് ആക്രമണം നടത്തിയതെന്നും സ്മിത് മച്ചാർ വ്യക്തമാക്കി.

ഫ്ലൈ ദുബായ് സഹപൈലറ്റിന്റെ ഓസ്ട്രേലിയൻ ബന്ധം, വിസ റദ്ദാക്കിയത് കോഴ്സ് പൂർത്തിയാക്കാതെ വന്നപ്പോൾ, അന്വേഷണം

Elsa TJ — Sun, 04 Oct 2026 20:52:39 +0530

സിഡ്നി: ടെൽ അവീവിലേക്ക് പോവുകയായിരുന്ന ഫ്ലൈദുബായ് വിമാനത്തിൽ പൈലറ്റിനെ ആക്രമിച്ച സഹപൈലറ്റിന്റെ ഓസ്ട്രേലിയൻ ബന്ധത്തിൽ അന്വേഷണം ആരംഭിച്ചു. രണ്ട് വർഷത്തോളം ഈ പൈലറ്റ് ഓസ്ട്രേലിയയിൽ വിദ്യാർത്ഥിയായി കഴിഞ്ഞിരുന്നു. ഒമാൻ പൈലറ്റിന് 2014ലാണ് ഓസ്ട്രേലിയയിലേക്ക് വിദ്യാർത്ഥി വിസ നൽകിയത്. 2017ലാണ് ഇയാൾ ഓസ്ട്രേലിയയിൽ നിന്ന് പോയി. 2019ൽ പഠിച്ചിരുന്ന കോഴ്സ് തുടരാത്തതിനാൽ ഇയാളുടെ വിസ റദ്ദാക്കുകയായിരുന്നു. ഓസ്ട്രേലിയൻ ഫെഡറൽ പോലീസും സുരക്ഷാ ഇന്റലിജൻസ് ഓർഗനൈസേഷനും ഉൾപ്പെടുന്ന കൗണ്ടർ ടെററിസം ടീം ഇയാൾക്ക് ഓസ്ട്രേലിയയിലുണ്ടായിരുന്ന ബന്ധങ്ങളെക്കുറിച്ച് വിശദമായി അന്വേഷിക്കുന്നുണട്. ഇയാൾ ഓസ്ട്രേലിയൻ സർവ്വകലാശാലയിൽ എഞ്ചിനീയറിംഗും യുകെയിലെ ബക്കിംഗ്ഹാംഷെയർ ന്യൂ യൂണിവേഴ്സിറ്റിയിൽ ഏവിയേഷൻ മാനേജ്‌മെന്റിൽ വിദൂര വിദ്യാഭ്യാസ കോഴ്സും പൂർത്തിയാക്കിയിരുന്നതായി റിപ്പോർട്ടുകളുണ്ട്.

സംഭവത്തിന് പിന്നാലെ ദുബായിക്കും തെൽ അവീവിനുമിടയിലുള്ള വിമാന സർവ്വീസുകൾ ഫ്ലൈദുബായ് താത്കാലികമായി നിർത്തിവെച്ചിട്ടുണ്ട്. ആക്രമണത്തിന് പിന്നിലെ യഥാർത്ഥ കാരണങ്ങളെക്കുറിച്ചുള്ള അന്വേഷണത്തിൽ യു.എ.ഇക്ക് പുറമെ ഇസ്രായേൽ ഉൾപ്പെടെയുള്ള മറ്റ് വിവിധ രാജ്യങ്ങളും പങ്കാളികളാകുന്നുണ്ട്. ദുബായിൽ നിന്ന് ടെൽ അവീവിലേക്കുള്ള വിമാനത്തിലെ അനിഷ്ട സംഭവങ്ങൾക്ക് പിന്നാലെ ഇസ്രയേലിലേക്കുള്ള മുഴുവൻ വിമാനവും ഫ്ലൈദുബായ് നിർത്തിവച്ചിരിക്കുകയാണ്. സുരക്ഷയാണ് പ്രധാനം എന്ന് വ്യക്തമാക്കിക്കൊണ്ടാണ് ഫ്ലൈദുബായ് വിമാന സർവീസുകൾ നിർത്തിവച്ചത്.സെപ്തംബർ 30ന് 180 യാത്രക്കാരുമായി ടെൽ അവീവിലേക്ക് പോയ വിമാനത്തിൻ്റെ കോക്‌പിറ്റിൽ വച്ച് പൈലറ്റിനെ സഹപൈലറ്റ് കുത്തുകയും വിമാനം ഇസ്രായേലിലേക്ക് ഇടിച്ചിറക്കാൻ ശ്രമിക്കുകയുമായിരുന്നു.

ഏഷ്യാനെറ്റ് ന്യൂസ് ലൈവ് കാണാം

മുന്നറിയിപ്പുകൾ അവഗണിച്ചു, കിഴക്കൻ സമുദ്രത്തിലേക്ക് ഉത്തര കൊറിയ വീണ്ടും മിസൈൽ തൊടുത്തതായി ദക്ഷിണ കൊറിയ

Elsa TJ — Sat, 03 Oct 2026 13:49:34 +0530

സിയോൾ: അന്താരാഷ്ട്ര മുന്നറിയിപ്പുകൾ അവഗണിച്ച് കിഴക്കൻ സമുദ്രത്തിലേക്ക് ഉത്തര കൊറിയ വീണ്ടും മിസൈൽ തൊടുത്തതായി ദക്ഷിണ കൊറിയ. ഇരു രാജ്യങ്ങളും തമ്മിൽ അതിർത്തിയിൽ കടുത്ത സംഘർഷാവസ്ഥ നിലനിൽക്കുന്നതിനിടെയാണ് പ്രകോപനം . കഴിഞ്ഞ മാസം അതിർത്തിയിലുണ്ടായ കുഴിബോംബ് സ്ഫോടനത്തിൽ മൂന്ന് ദക്ഷിണ കൊറിയൻ സൈനികർക്ക് ഗുരുതരമായി പരിക്കേറ്റിരുന്നു. ശനിയാഴ്ച പ്രാദേശിക സമയം രാവിലെ 6.30 ഓടെ ഉത്തര കൊറിയയുടെ കിഴക്കൻ തീരത്തുള്ള വോൺസാൻ മേഖലയിൽ നിന്നാണ് മിസൈൽ വിക്ഷേപിച്ചത്. ഈ മിസൈൽ 700 കിലോമീറ്ററിലധികം ദൂരം സഞ്ചരിച്ചതായി കണ്ടെത്തിയിട്ടുണ്ട്. വിക്ഷേപണത്തെത്തുടർന്ന് തങ്ങളുടെ സൈനിക നിരീക്ഷണവും സജ്ജീകരണങ്ങളും ശക്തമാക്കിയതായി അറിയിച്ച ദക്ഷിണ കൊറിയ യുഎസ് അധികൃതരുമായി ചേർന്ന് മിസൈലിന്റെ സാങ്കേതിക വിവരങ്ങൾ കൂടുതൽ വിശകലനം ചെയ്തുവരികയാണെന്നാണ് ദക്ഷിണ കൊറിയൻ ജോയിന്റ് ചീഫ്സ് ഓഫ് സ്റ്റാഫ് പുറത്ത് വിട്ട പ്രസ്താവനയിൽ വിശദമാക്കുന്നത്.

ഐക്യരാഷ്ട്രസഭയുടെ സുരക്ഷാ കൗൺസിൽ പ്രമേയങ്ങളുടെ നഗ്നമായ ലംഘനമാണ് ഇത്തരം നീക്കങ്ങളെന്ന് ചൂണ്ടിക്കാട്ടിയ സിയോൾ ഭരണകൂടം, മിസൈൽ വിക്ഷേപണങ്ങൾ ഉടനടി നിർത്തിവെക്കണമെന്ന് ഉത്തര കൊറിയയോട് ആവശ്യപ്പെട്ടു. കഴിഞ്ഞ ഒരു മാസത്തിനിടെ ഉത്തര കൊറിയ നടത്തുന്ന രണ്ടാമത്തെ മിസൈൽ പരീക്ഷണമാണിത്. എന്നാൽ ഉത്തര കൊറിയ ഈ ആരോപണങ്ങൾ പൂർണ്ണമായും തള്ളിക്കളയുകയും സ്ഫോടനത്തെക്കുറിച്ചുള്ള അന്വേഷണത്തെ ഒരു നാടകമെന്ന് പരിഹസിക്കുകയുമാണ് ചെയ്തത്.

അമേരിക്കൻ രഹസ്യാന്വേഷണ ഏജൻസികളുടെ ഏറ്റവും പുതിയ ഭീഷണി വിലയിരുത്തൽ റിപ്പോർട്ട് അനുസരിച്ച് അമേരിക്കൻ വൻകരയിൽ വരെ ആക്രമണം നടത്താൻ ശേഷിയുള്ള അന്തർഭൂഖണ്ഡ ബാലിസ്റ്റിക് മിസൈലുകൾ ഉത്തര കൊറിയ വിജയകരമായി പരീക്ഷിച്ചിട്ടുണ്ട്. കൂടാതെ ഉക്രെയ്നെതിരായ യുദ്ധത്തിൽ പങ്കെടുത്തതിലൂടെ റഷ്യയിൽ നിന്ന് വിലയേറിയ യുദ്ധപരിപരിചയവും സൈനിക സാങ്കേതികവിദ്യയും ഉത്തര കൊറിയ നേടിയെടുത്തിട്ടുണ്ടെന്നും റിപ്പോർട്ടിൽ പറയുന്നു. 2024ൽ പുടിനുമായി ഒപ്പുവെച്ച സൈനിക കരാറിന് ശേഷം, ഹൈപ്പർസോണിക് മിസൈലുകൾ ഉൾപ്പെടെയുള്ള ആയുധ വികസനത്തിൽ ഉത്തര കൊറിയ അതിവേഗ പുരോഗതി കൈവരിക്കുന്നുണ്ടെന്ന് ജപ്പാനും തങ്ങളുടെ പ്രതിരോധ റിപ്പോർട്ടിൽ വ്യക്തമാക്കിയിട്ടുണ്ട്.

ഏഷ്യാനെറ്റ് ന്യൂസ് ലൈവ് കാണാം

വധശിക്ഷ നടപ്പാക്കുന്നതിൽ വീഴ്ച, അമേരിക്കയിൽ രാജി പ്രഖ്യാപനവുമായി ജയിൽ മേധാവി

Elsa TJ — Sun, 04 Oct 2026 18:34:57 +0530

ടെന്നസി: അമേരിക്കയിലെ ടെന്നസി സംസ്ഥാനത്ത് കഴിഞ്ഞ 200 വര്‍ഷത്തിനിടെ വധശിക്ഷയ്ക്ക് വിധിക്കപ്പെട്ട ഏക വനിതയായ ക്രിസ്റ്റ ഗെയിൽ പൈക്കിന്‍റെ വധശിക്ഷ നടപ്പാക്കുന്നതിൽ വീഴ്ച. പിന്നാലെ രാജി പ്രഖ്യാപിച്ച് ജയിൽ മേധാവി. ടെന്നസിയിലെ ജയിൽ വകുപ്പ് മേധാവി ഫ്രാങ്ക് സ്ട്രാഡ തന്റെ പദവി രാജിവെക്കാൻ തീരുമാനിച്ചതായാണ് ഗവർണർ ബിൽ ലീ വിശദമാക്കിയത്. വധശിക്ഷയ്ക്ക് വിധിക്കപ്പെട്ട ക്രിസ്റ്റ പൈക്ക് എന്ന വനിതയുടെ വധശിക്ഷ നടപ്പാക്കാനുള്ള ശ്രമം പരാജയപ്പെടുകയും അവർ ബോധരഹിതയായി ആശുപത്രിയിൽ വെന്റിലേറ്ററിലാവുകയും ചെയ്ത സംഭവത്തെത്തുടർന്നാണ് രാജി. വധശിക്ഷ നടപ്പിലാക്കുന്നതിലെ പരാജയം ടെന്നസിയിലെ ജയിൽ വകുപ്പിൽ വൻ തോതിലുള്ള മാറ്റങ്ങൾക്കാണ് വഴിയൊരുങ്ങിയിരിക്കുന്നത്.ടെന്നസിയിലെ ഡിപ്പാർട്ട്‌മെന്റ് ഓഫ് കറക്ഷൻ കമ്മീഷണറായ ഫ്രാങ്ക് സ്ട്രാഡ ഈ മാസം തന്നെ സ്ഥാനമൊഴിയുമെന്ന് ഗവർണർ വ്യക്തമാക്കി. ഭരിക്കുന്ന റിപ്പബ്ലിക്കൻ പാർട്ടിയിലെ പ്രമുഖരും മറ്റ് ജനപ്രതിനിധികളും നേതൃത്വത്തിൽ മാറ്റം വേണമെന്ന് ശക്തമായി ആവശ്യപ്പെട്ടതിനെത്തുടർന്നാണ് നടപടി. മേയ് മാസത്തിന് ശേഷം മരണത്തിന് തൊട്ടടുത്തെത്തിയ ഒരു തടവുകാരന്റെ വധശിക്ഷ പൂർത്തിയാക്കാൻ ടെന്നസിയിലെ അധികൃതർക്ക് സാധിക്കാതെ പോകുന്ന രണ്ടാമത്തെ സംഭവമാണിത്.

ക്രിസ്റ്റ പൈക്കിന്റെ വധശിക്ഷാ മുറിയിൽ യഥാർത്ഥത്തിൽ സംഭവിച്ചതെന്താണെന്ന് അന്വേഷിക്കാൻ മുൻ യു.എസ് അറ്റോർണി എഡ് സ്റ്റാന്റണെ ഗവർണർ ചുമതലപ്പെടുത്തിയിട്ടുണ്ട്. മുൻപ് 2022ൽ മറ്റൊരു വധശിക്ഷ ഗവർണർ റദ്ദാക്കിയപ്പോഴും എഡ് സ്റ്റാന്റൺ തന്നെയാണ് അന്വേഷണം നടത്തിയത്. അന്ന് വിഷവസ്തു കുത്തിവെച്ച് വധശിക്ഷ നടപ്പാക്കുന്ന പ്രക്രിയയിൽ ടെന്നസി സർക്കാർ സ്വന്തം ചട്ടങ്ങൾ പാലിച്ചില്ലെന്ന് അദ്ദേഹം കണ്ടെത്തിയിരുന്നു. എഡ് സ്റ്റാന്റണിന്റെ അന്വേഷണം പുരോഗമിക്കുന്ന പശ്ചാത്തലത്തിൽ താൻ പദവി ഒഴിയുന്നതാണ് ടെന്നസിയിലെ ജനങ്ങൾക്ക് ഏറ്റവും നല്ലതെന്ന് സ്ട്രാഡ പ്രസ്താവനയിലൂടെ വ്യക്തമാക്കി. അതേസമയം പൈക്കിന്റെ ശരീരത്തിലേക്ക് 'പെന്റോബാർബിറ്റൽ' എന്ന മാരകമായ മരുന്നിന്റെ രണ്ട് ഡോസുകൾ കുത്തിവെച്ചെങ്കിലും വധശിക്ഷ വിജയകരമായി നടപ്പാക്കാൻ സാധിച്ചിക്കാതെ വരികയായിരുന്നു.നിലവിൽ 50 വയസ്സുള്ള ക്രിസ്റ്റ പൈക്കിന് 18 വയസ്സുള്ളപ്പോഴാണ് 1995ൽ അസൂയ മൂലം സഹപാഠിയായ കൊളീൻ സ്ലെമ്മറെ കാമുകനൊപ്പം ചേർന്ന് ക്രൂരമായി പീഡിപ്പിച്ച് കൊലപ്പെടുത്തിയത്. തുടർന്ന് അമേരിക്കയിൽ വധശിക്ഷയ്ക്ക് വിധിക്കപ്പെടുന്ന ഏറ്റവും പ്രായം കുറഞ്ഞ വനിതകളിൽ ഒരാളായി പൈക്ക് മാറിയിരുന്നു.

വിഷവസ്തു ശരീരത്തിൽ കുത്തിവെക്കാനായി ഐവി ലൈനുകൾ ബന്ധിപ്പിച്ചതിലുണ്ടായ പാളിച്ചയാണ് മരുന്ന് രക്തക്കുഴലുകളിലേക്ക് പോകുന്നതിന് പകരം മറ്റു ഭാഗങ്ങളിലേക്ക് പടരാൻ കാരണമായതെന്നാണ് പൈക്കിന്റെ അഭിഭാഷകർ പറയുന്നത്. വധശിക്ഷ നടപ്പാക്കുന്ന സംഘത്തോട് ഐവി നൽകാൻ പൈക്ക് പൂർണ്ണമായി സഹകരിച്ചിരുന്നുവെന്നും ശരീരത്തിലെ വിരലുകളും കൈകളും ചൂണ്ടിക്കൊടുത്തിരുന്നുവെന്നും അഭിഭാഷകർ വ്യക്തമാക്കി. സംഭവം വൻ വിവാദമായതോടെ വധശിക്ഷയെ അനുകൂലിക്കുന്നവരും എതിർക്കുന്നവരും ശക്തമായ പ്രതിഷേധവുമായി രംഗത്തെത്തിയിട്ടുണ്ട്. ഇതോടെ പുതിയ വധശിക്ഷകളെല്ലാം ഗവർണർ താത്കാലികമായി നിർത്തിവെച്ചു. മേയ് മാസത്തിൽ ടോണി കാരുതേഴ്‌സ് എന്ന തടവുകാരന്റെ വധശിക്ഷയും സമാനമായ രീതിയിൽ ഐവി ലൈൻ ശരിയായി ബന്ധിപ്പിക്കാൻ സാധിക്കാത്തതിനെത്തുടർന്ന് അവസാന നിമിഷം നിർത്തിവെക്കേണ്ടി വന്നിരുന്നു. തുടർന്ന് ഇയാളുടെ വധശിക്ഷ നടപ്പാക്കാൻ കുറഞ്ഞത് ഒരു വർഷമെങ്കിലും കാത്തിരിക്കാൻ ഗവർണർ ഉത്തരവിട്ടിരുന്നു.

2023 ജനുവരിയിലാണ് അരിസോണയിലെ ജയിൽ വകുപ്പിൽ നിന്നും ഫ്രാങ്ക് സ്ട്രാഡ ടെന്നസിയിലേക്ക് കമ്മീഷണറായി എത്തുന്നത്. 2024 അവസാനത്തോടെ വിഷവസ്തു കുത്തിവെക്കുന്ന രീതിയിൽ അദ്ദേഹം മാറ്റം വരുത്തുകയും പെന്റോബാർബിറ്റൽ മാത്രം ഉപയോഗിക്കാൻ തീരുമാനിക്കുകയും ചെയ്തു. സ്ട്രാഡയുടെ ചുമതലയിൽ അരിസോണയിൽ നടന്ന വധശിക്ഷകളിലും മുൻപ് സമാനമായ സാങ്കേതിക തടസ്സങ്ങളും സങ്കീർണ്ണതകളും ഉണ്ടായതായി കോടതി രേഖകൾ വ്യക്തമാക്കുന്നുണ്ട്. അരിസോണയിൽ സ്ട്രാഡ വധശിക്ഷകൾക്ക് മേൽനോട്ടം വഹിച്ചപ്പോൾ തടവുകാരുടെ രക്തക്കുഴലുകൾ കണ്ടെത്താൻ സാധിക്കാതെ തുടയിലെയും കൈപ്പത്തിയിലെയും ഞരമ്പുകളിൽ ഐവി ലൈനുകൾ നൽകേണ്ടി വരികയും പ്രക്രിയകൾ വൈകുകയും ചെയ്തിരുന്നു. സ്ട്രാഡയ്ക്ക് വധശിക്ഷകൾ നടപ്പാക്കുന്നതിൽ ഇത്തരം മോശം ചരിത്രമുണ്ടെന്ന് അറിഞ്ഞുകൊണ്ടുതന്നെയാണ് ടെന്നസി ഗവർണർ അദ്ദേഹത്തെ നിയമിച്ചതെന്ന് മനുഷ്യാവകാശ അഭിഭാഷകർ വിമർശിക്കുന്നത്.

ഏഷ്യാനെറ്റ് ന്യൂസ് ലൈവ് കാണാം

ഹൂത്തികളിൽ നിന്ന് രാജ്യത്തിന്റെ ഭാഗങ്ങൾ മോചിപ്പിക്കാനുള്ള സൈനിക നടപടി പ്രഖ്യാപിച്ച് യെമൻ

Elsa TJ — Sun, 04 Oct 2026 22:02:41 +0530

സന: ഹൂത്തികളിൽ നിന്ന് രാജ്യത്തിന്റെ ഭാഗങ്ങൾ മോചിപ്പിക്കാനുള്ള സൈനിക നടപടി പ്രഖ്യാപിച്ച് യെമൻ. പ്രസിഡണ്ട് റഷാദ് അൽ അലീമിയാണ് സൈനിക നടപടി പ്രഖ്യാപിച്ചത്. ഹൂത്തി കേന്ദ്രങ്ങളിൽ നിന്ന് ഒഴിഞ്ഞു നിൽക്കാൻ പൊതുജനങ്ങളോട് പ്രസിഡണ്ട് അഭ്യർത്ഥിച്ചു. സൗദിയുടെ കൂടി പിന്തുണയോടെയാകും നടപടികളെന്ന് വ്യക്തമാക്കുന്നതായിരുന്നു പ്രസ്താവന. ബാബ് അൽ മന്ദബ്, മോക്ക തുറമുഖ നഗരം ഉൾപ്പടെ പുതുതായി ഹൂത്തികൾ കീഴടക്കിയിരുന്നു. ഇതോടെ യെമനിൽ സംഘർഷം കൂടുതൽ കടുക്കുമെന്ന് ഉറപ്പായി. സൗദിയിൽ ഊർജ്ജ കേന്ദ്രങ്ങൾ ലക്ഷ്യമാക്കി ഹൂത്തികൾ ആക്രമണം ശക്തമാക്കിയതിന് പിന്നാലെയാണ് പ്രഖ്യാപനമെന്നതും ശ്രദ്ധേയമാണ്. രാജ്യത്തെ അഭിസംബോധന ചെയ്തുകൊണ്ട് നടത്തിയ ടെലിവിഷൻ പ്രസംഗത്തിലാണ് ഈ നിർണായക പ്രഖ്യാപനം നടത്തിയത്.

സമാധാന ചർച്ചകൾക്കും സംഘർഷങ്ങൾ ഒഴിവാക്കുന്നതിനുമായി സർക്കാരിന് നൽകാൻ കഴിയുന്ന എല്ലാ അവസരങ്ങളും സമയവും നൽകിയിരുന്നുവെന്നും എന്നാൽ സമാധാന ശ്രമങ്ങളെല്ലാം പൂർണ്ണമായി പരാജയപ്പെട്ട സാഹചര്യത്തിലാണ് സൈനിക നടപടിയിലേക്ക് കടക്കുന്നതെന്നും റഷാദ് അൽ അലീമി വ്യക്തമാക്കി. സൈനിക നടപടികൾക്ക് ഒപ്പം തന്നെ തിരിച്ചെടുക്കുന്ന നഗരങ്ങളിൽ ജീവനക്കാരുടെ കുടിശ്ശിക ശമ്പളം വിതരണം ചെയ്യാനും, തകർന്ന റോഡുകളും വൈദ്യുതി-കുടിവെള്ള സംവിധാനങ്ങളും പുനരുദ്ധരിക്കാനുമുള്ള പദ്ധതികൾ തയ്യാറാക്കാൻ സർക്കാരിന് നിർദ്ദേശം നൽകിയിട്ടുണ്ട്.

ഏഷ്യാനെറ്റ് ന്യൂസ് ലൈവ് കാണാം

ഫ്ലൈ ദുബായ് വിമാനത്തിലുണ്ടായത് ഭീകരാക്രമണ നീക്കം; ശ്രമിച്ചത് വിമാനം തട്ടിയെടുക്കാൻ; സ്ഥീരികരിച്ച് യുഎഇ

Sumam Thomas — Sat, 03 Oct 2026 13:20:34 +0530

ദില്ലി: ഫ്ലൈ ദുബായ് വിമാനത്തിലുണ്ടായത് ഭീകരാക്രമണ നീക്കമെന്ന് സ്ഥിരീകരിച്ച് യുഎഇ. ഭീകരപ്രവർത്തനമാണ് സഹപൈലറ്റ് നടത്തിയത്. വിമാനം തട്ടിയെടുക്കാൻ വേണ്ടിയാണ് ശ്രമിച്ചത്. മുഴുവൻ വിവരങ്ങളും ഉടൻ നൽകുമെന്ന് യുഎഇ അറ്റോണി ജനറൽ വ്യക്തമാക്കി.

കരിങ്കടലിലെ ആക്രമണം: കപ്പലിലുണ്ടായിരുന്ന മൂന്ന് ഇന്ത്യക്കാരും സുരക്ഷിതരെന്ന് റൊമാനിയയിലെ ഇന്ത്യൻ എംബസി

Web Desk — Tue, 06 Oct 2026 08:59:47 +0530

ബുക്കാറസ്റ്റ്: കരിങ്കടലിൽ ആക്രമിക്കപ്പെട്ട കപ്പലിലെ ഇന്ത്യക്കാർ സുരക്ഷിതർ. കപ്പലിലുണ്ടായിരുന്ന മൂന്ന് ഇന്ത്യൻ നാവികരും സുരക്ഷിതരാണെന്നും ഇവരിൽ ഒരാൾക്ക് വൈദ്യസഹായം നൽകിവരുന്നതായും റൊമാനിയയിലെ ഇന്ത്യൻ എംബസി അറിയിച്ചു.

കഴിഞ്ഞദിവസമാണ് കരീബിയൻ രാജ്യമായ സെയ്ന്റ് കിറ്റ്സ് ആൻഡ് നെവിസിന്റെ പതാകയുള്ള എംവി റോയാഡ് മമ്മാഡോവ് എന്ന കപ്പലിന് നേരേ കരിങ്കടലിൽ ആക്രമണമുണ്ടായത്. കരീബിയൻ രാജ്യത്തിന്റെ പതാകയുള്ള കപ്പലാണെങ്കിലും ഇത് തുർക്കിയിലെ കമ്പനിയുടെ ഉടമസ്ഥതയിലുള്ളതാണ്. കഴിഞ്ഞദിവസമുണ്ടായ ആക്രമണത്തിൽ കപ്പലിലെ രണ്ട് ജീവനക്കാരാണ് കൊല്ലപ്പെട്ടത്.

പരിക്കേറ്റ കപ്പലിലെ ജീവനക്കാരെ കഴിഞ്ഞദിവസം തന്നെ ചികിത്സയ്ക്കായി റൊമാനിയയിലെ ആശുപത്രിയിൽ പ്രവേശിപ്പിച്ചെന്നാണ് ഇന്ത്യൻ എംബസിയുടെ വിശദീകരണം. കപ്പലിലുണ്ടായിരുന്ന ഇന്ത്യക്കാരായ മൂന്ന് നാവികരും സുരക്ഷിതരാണ്. ഇതിൽ ഒരാൾക്ക് പരിക്കേറ്റിട്ടുണ്ട്. ഇദ്ദേഹത്തെ ചികിത്സയ്ക്കായി ആശുപത്രിയിൽ പ്രവേശിപ്പിച്ചതായും ആശുപത്രി അധികൃതരുമായി ബന്ധപ്പെടുന്നുണ്ടെന്നും എംബസി വ്യക്തമാക്കി. കപ്പലിലെ ഇന്ത്യൻ ജീവനക്കാരുമായി ഇന്ത്യൻ അംബാസഡർ മനോജ് മോഹപാത്ര സംസാരിച്ചതായും എംബസി അറിയിച്ചു.

'നിങ്ങൾ ലോകത്തിൻ്റെ ഹീറോ'; ക്യാപ്റ്റൻ സ്മിത്ത് മച്ചാറുമായി സംസാരിച്ച് നെതന്യാഹു; ഇസ്രായേലിലേക്ക് ക്ഷണം

Deepu Divakaran — Sun, 04 Oct 2026 09:40:04 +0530

ടെൽ അവീവ്: ഫ്ലൈ ദുബായ് പൈലറ്റ് ക്യാപ്റ്റൻ സ്മിത് മച്ചാറിനെ ഫോണിൽ വിളിച്ച് അഭിനന്ദിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. സ്മിത്ത് മച്ചാറിനെ ഹീറോയെന്ന് വിശേഷിപ്പിച്ച നെതന്യാഹു, അദ്ദേഹത്തെ ഇസ്രായേൽ സ്വാതന്ത്ര്യദിന പരിപാടിയിലേക്ക് ക്ഷണിച്ചു. എത്രയും വേഗം സുഖം പ്രാപിക്കട്ടെ എന്നും നെതന്യാഹു ആശംസിച്ചു. ദുബായിൽ നിന്ന് ടെൽ അവീവിലേക്ക് പറന്ന ഫ്ലൈ ദുബായ് വിമാനത്തിലെ കോക്പിറ്റിൽ നടന്ന അക്രമ സംഭവങ്ങൾ സ്മിത്ത് മച്ചാർ നെതന്യാഹുവിനോട് വിശദീകരിച്ചു.

അടുത്ത ഇസ്രായേൽ സ്വാതന്ത്ര്യദിനത്തിൽ ദീപം തെളിയിക്കാനാണ് സ്മിത്ത് മച്ചാറിനെ നെതന്യാഹു ക്ഷണിച്ചത്. പ്രധാനമന്ത്രി നരേന്ദ്ര മോദിക്കൊപ്പം പങ്കെടുക്കാനാണ് ക്ഷണം. ഇന്ത്യയിലെയും ഇസ്രായേലിലെയും ധീരരായ ജനങ്ങളുടെ യഥാർത്ഥ ഹീറോയാണ് സ്മിത്തെന്നും ലോകത്തിന്റെ മുഴുവൻ ഹീറോയാണെന്നും നെതന്യാഹു വിശേഷിപ്പിച്ചു.

Prime Minister Benjamin Netanyahu in a conversation with the Indian pilot from the flight from Dubai, Captain Smit Machchhar:

"You are a hero for Israel, India, and the entire world. I invite Prime Minister @NarendraModi and you to light a flame on Israeli Independence Day."

During the emotional conversation that took place this evening, the Prime Minister asked Captain Machchhar how it all started, and Machchhar revealed new details about the terrifying moments in the cockpit.

— Prime Minister of Israel (@IsraeliPM) October 3, 2026

"ഇസ്രായേലി യാത്രക്കാരിൽ നിന്ന് ഞാൻ കാര്യങ്ങൾ അറിഞ്ഞു. താങ്കൾ വലിയൊരു ഹീറോയാണ്. താങ്കൾക്കൊപ്പം മറ്റ് ഹീറോകളും ഉണ്ടായിരുന്നു. നിങ്ങളാണ് ആ ദിവസം രക്ഷിച്ചത്. നിരവധി ജീവനുകളാണ് താങ്കൾ രക്ഷിച്ചത്. അതിനേക്കാൾ വലിയൊരു കാര്യവും താങ്കൾ ചെയ്തു. എത്ര വലിയ ഭീഷണിയുണ്ടായാലും ധീരനായ ഒരു പൈലറ്റിനും യാത്രക്കാർക്കും അതിനെ മറികടക്കാൻ കഴിയുമെന്ന് ലോകത്തിന് കാണിച്ചുകൊടുത്തു. ലോകം മുഴുവൻ താങ്കളെ പ്രശംസിക്കുകയാണ്. താങ്കൾ ഇസ്രായേലിന്റെ ഹീറോയാണ്. ഇന്ത്യയുടെ ഹീറോയാണ്. ലോകത്തിന്റെ മുഴുവൻ ഹീറോയാണ്. ഇസ്രായേലിലെ ജനങ്ങൾ താങ്കളെ ഇരുകൈയും നീട്ടി സ്വീകരിക്കുമെന്ന് ഞാൻ ഉറപ്പുനൽകുന്നു"- നെതന്യാഹു പറഞ്ഞു.

"എന്റെയും ഭാര്യയുടെയും അന്വേഷണം താങ്കളുടെ ഭാര്യയെയും അറിയിക്കുക. താങ്കൾക്ക് ഒരു കുടുംബമുണ്ടെന്ന് എനിക്കറിയാം. താങ്കൾ ലോകരാഷ്ട്രങ്ങളുടെ കുടുംബത്തിലെ ഒരു ധീരനായ അംഗമാണ്. എത്രയും വേഗം സുഖം പ്രാപിക്കട്ടെ" - നെതന്യാഹു സ്മിത്ത് മച്ചാറിനോട് പറഞ്ഞു.

വിമാനം സാധാരണ നിലയിൽ പോകുമ്പോഴാണ് പ്രാർത്ഥിക്കണം എന്ന് പറഞ്ഞ് സഹപൈലറ്റ് പെട്ടെന്ന് ആക്രമിച്ചതെന്ന് സ്മിത്ത് മച്ചാർ നെതന്യാഹുവിനോട് പറഞ്ഞു. "യാത്ര സാധാരണ നിലയിലായിരുന്നു. അയാൾക്ക് പ്രാർത്ഥിക്കണം എന്ന് പറഞ്ഞു. അതിൽ അസ്വാഭാവികതയൊന്നും തോന്നിയില്ല. അയാൾ പ്രാർത്ഥിക്കുമ്പോൾ ബഹുമാനസൂചകമായി ഞാൻ മുന്നിലേക്കാണ് നോക്കിയിരുന്നത്. പെട്ടെന്ന് എന്റെ തലയ്ക്ക് പിന്നിൽ ശക്തമായ ഒരു അടി കിട്ടി. വിമാനത്തിന് എന്തെങ്കിലും തകരാർ സംഭവിച്ചതാകും എന്നാണ് ആദ്യം കരുതിയത്. എന്നാൽ തുടരെത്തുടരെ അടി കിട്ടിയപ്പോഴാണ് വിമാനത്തിനല്ല, കൂടെയുള്ള ആൾക്കാണ് പ്രശ്നമെന്ന് എനിക്ക് മനസ്സിലായത്"- സ്മിത്ത് മച്ചാർ പറഞ്ഞു.

ആദ്യത്തെ അടി കിട്ടിയപ്പോൾ തന്നെ അക്രമിയെ തടയാൻ ശ്രമിച്ചെങ്കിലും തന്റെ കാഴ്ച മങ്ങിപ്പോയെന്ന് സ്മിത്ത് മച്ചാർ പറഞ്ഞു. ഇതോടെ വിമാനം അതിവേഗം താഴേക്ക് പോയി. ആ സമയത്ത് നടന്ന കാര്യങ്ങളിൽ തനിക്ക് ഓർമ്മയുള്ളത് ഇത്രയുമാണെന്ന് സ്മിത്ത് മച്ചാർ പറഞ്ഞു. താൻ കോക്ക്പിറ്റിന്റെ വാതിൽ തുറക്കാൻ ശ്രമിച്ചെങ്കിലും അക്രമി അത് വീണ്ടും അടച്ചു. യാത്രക്കാർ നിലവിളിക്കുന്നത് കേട്ട് കോക്ക്പിറ്റിന്റെ തറയിൽ കിടന്ന കാര്യവും സ്മിത്ത് മച്ചാർ ഓർത്തെടുത്തു. സ്മിത്ത് മച്ചാറിന്റെ വാക്കുകൾ കേട്ട നെതന്യാഹു, അദ്ദേഹത്തിന്റെ ധീരതയിൽ താൻ അത്ഭുതപ്പെടുന്നുവെന്നും പ്രതികരിച്ചു.

സെപ്റ്റംബർ 30നാണ് ദുബായിൽ നിന്ന് ടെൽ അവീവിലേക്ക് പറന്ന ഫ്ലൈ ദുബായ് വിമാനത്തിൽ വെച്ചാണ് പൈലറ്റായ സ്മിത്ത് മച്ചാറിനെ സഹപൈലറ്റായ ഒമാൻ സ്വദേശി ഹമാം അൽ ഹമ്മാമി ആക്രമിച്ചത്. പൈലറ്റിനെ ആക്രമിച്ച് വിമാനം തകർക്കുക എന്ന ലക്ഷ്യത്തോടെ ആയിരുന്നു നീക്കം. ഗുരുതരമായി പരിക്കേറ്റിട്ടും സ്മിത്ത് മച്ചാർ അക്രമിയെ ചെറുക്കുകയും കോക്ക്പിറ്റിന്റെ വാതിൽ തുറക്കുകയും ചെയ്തോടെ വിമാനത്തിലെ ജീവനക്കാരും യാത്രക്കാരും ചേർന്ന് സഹപൈലറ്റിനെ കീഴ്പ്പെടുത്തി. ഡ്യൂട്ടിയിലില്ലാതിരുന്ന രണ്ട് പൈലറ്റുമാർ വിമാനത്തിലുണ്ടായിരുന്നതോടെ വിമാനത്തിന്റെ നിയന്ത്രണം ഏറ്റെടുത്ത് സുരക്ഷിത ലാൻഡിങ്ങിനും സാധിച്ചു.

ആയുധ നിർമ്മാണ ശേഷിയും വിതരണ ശൃംഖലയും മുൻപത്തേക്കാൾ ശക്തമെന്ന് ഇറാൻ സേന

Elsa TJ — Sun, 04 Oct 2026 22:49:34 +0530

ടെഹ്റാൻ: ഇറാന്റെ ആയുധ നിർമ്മാണ ശേഷിയും വിതരണ ശൃംഖലയും മുൻപതേക്കാൾ ശക്തമെന്ന് ഇറാൻ സേന. മിസൈലുകളുടെ ദൂര പരിധി വർധിപ്പിക്കുമെന്നും ഇറാൻ മുന്നറിയിപ്പ് നൽകി. അതേസമയം അമേരിക്കയുമായി ചർച്ചകൾ തുടരുന്നുണ്ട് എന്നത് ഇറാൻ നിഷേധിക്കുന്നില്ല. ചർച്ചകളും യുദ്ധവും ഒരുപോലെ മുന്നോട്ടു കൊണ്ടു പോകുമെന്ന് ഇറാൻ പാർലമെന്റ് സ്പീക്കർ എം.ബി ഗാലിബാഫ് പറഞ്ഞു. ഇനി ആക്രമണം ഉണ്ടായാൽ തിരിച്ചടി മുൻപത്തേക്കാൾ കടുത്തതായിരിക്കുമെന്നാണ് ഇറാൻ നേതാക്കൾ ഒരുപോലെ ആവർത്തിക്കുന്നത്. അതിനിടെ , ചർച്ചകൾ സ്തംഭനാവസ്ഥയിലായതിനെ തുടർന്ന്, യു.എൻ സമ്മേളനത്തിനെത്തിയ ഇറാൻ വിദേശകാര്യ മന്ത്രിയുൾപ്പടെ നയതന്ത്ര സംഘത്തെ രാജ്യത്ത് നിന്ന് പുറത്താക്കിയെന്ന അമേരിക്കൻ വാദം ഇറാൻ തള്ളി. സമാധാന നിർദേശങ്ങളിൽ അമേരിക്ക അറിയിച്ച മറുപടിയോട് ഇറാൻ ഇതുവരെ പ്രതികരിച്ചിട്ടില്ല.

ഏഷ്യാനെറ്റ് ന്യൂസ് ലൈവ് കാണാം

ഫ്ലൈ ദുബായ് വിമാനത്തിൽ നടന്നത് ഭീകരപ്രവർത്തന ശ്രമമെന്ന് വെളിപ്പെടുത്തൽ; പൈലറ്റിനെ സഹപൈലറ്റ് മഴു ഉപയോഗിച്ച് ആക്രമിച്ചു

Reshma Vijayan — Sat, 03 Oct 2026 12:45:28 +0530

അബുദാബി: ഫ്ലൈ ദുബായ് വിമാനത്തിൽ സഹപൈലറ്റ് ഭീകരപ്രവർത്തനത്തിന് ശ്രമിച്ചതായി യുഎഇ ഫെഡറൽ പ്രോസിക്യൂട്ടർ കൗൺസിലർ ഡോ. ഹമദ് സൈഫ് അൽ ഷംസി അറിയിച്ചു. ഇസ്രയേലിലേക്ക് സർവീസ് നടത്തിയ എഫ്ഇസെഡ്1073 ഫ്ലൈ ദുബായ് വിമാനത്തിലാണ് ഞെട്ടിക്കുന്ന സംഭവം ഉണ്ടായത്.

കോക്പിറ്റിൽ വെച്ച് സഹപൈലറ്റ് പെട്ടെന്ന് ക്രാഷ് ആക്സ് (വിമാനങ്ങളിൽ അടിയന്തര സാഹചര്യങ്ങളിൽ ഉപയോഗിക്കാൻ സൂക്ഷിച്ചിരിക്കുന്ന ഒരു പ്രത്യേക തരം മഴു) ഉപയോഗിച്ച് പൈലറ്റിനെ ക്രൂരമായി ആക്രമിക്കുകയും വിമാനത്തിന്റെ നിയന്ത്രണം പിടിച്ചെടുക്കാൻ ശ്രമിക്കുകയുമായിരുന്നു. തുടർന്ന് അടിയന്തര നീക്കങ്ങളിലൂടെയാണ് വൻ ദുരന്തം ഒഴിവായത്. സംഭവത്തിന് പിന്നിലെ കൃത്യമായ ലക്ഷ്യങ്ങളെക്കുറിച്ചും ഇതിൽ മറ്റാർക്കെങ്കിലും പങ്കുണ്ടോ എന്നതിനെക്കുറിച്ചും സമഗ്രമായ അന്വേഷണം പുരോഗമിക്കുകയാണെന്ന് ഫെഡറൽ പ്രോസിക്യൂട്ടർ വ്യക്തമാക്കി. വിമാനത്തിലെ സാങ്കേതിക പരിശോധനകളും ഡിജിറ്റൽ, ഭൗതിക തെളിവുകളുടെ വിശകലനവും നടന്നുവരികയാണ്. അന്വേഷണ നടപടികൾ പൂർത്തിയായ ശേഷം കൂടുതൽ വിവരങ്ങൾ ഔദ്യോഗികമായി പുറത്തുവിടുമെന്ന് അധികൃതർ അറിയിച്ചു.

സെപ്റ്റംബർ 30-നാണ് ദുബായിൽ നിന്ന് ടെൽ അവീവിലേക്ക് പറന്ന എഫ് ഇസെഡ് 1073 വിമാനത്തിന്റെ കോക്ക്പിറ്റിൽ ജീവനക്കാർ തമ്മിൽ രൂക്ഷമായ തർക്കവും കൈയാങ്കളിയും ഉണ്ടായത്. വിമാനത്തിലുണ്ടായിരുന്ന മറ്റ് ക്രൂ അംഗങ്ങൾ ഇടപെട്ട് സാഹചര്യം നിയന്ത്രണവിധേയമാക്കുകയും, തുടര്‍ന്ന് വിമാനം സൗദി അറേബ്യയിലെ തബൂക്ക് വിമാനത്താവളത്തിലേക്ക് തിരിച്ചുവിട്ട് സുരക്ഷിതമായി ലാൻഡ് ചെയ്യിക്കുകയുമായിരുന്നു. വിമാനത്തിലുണ്ടായിരുന്ന എല്ലാ യാത്രക്കാരും ജീവനക്കാരും സുരക്ഷിതരാണെന്ന് കമ്പനി അറിയിച്ചിരുന്നു. സഹ പൈലറ്റിന്റെ ആക്രമണത്തെ ധീരമായി ചെറുത്ത ഇന്ത്യാക്കാരനായ പൈലറ്റ് സ്മിത് മച്ചാറിന് അഭിനന്ദന പ്രവാഹമാണ്. സ്മിത് മച്ചാർ ഹീറോയെന്ന് ട്രംപും നെതന്യാഹുവും പ്രതികരിച്ചു. പ്രധാനമന്ത്രി നരേന്ദ്ര മോദിയും സ്മിത് മച്ചാറിനെ പ്രശംസിച്ചു. ക്യാപ്റ്റൻ മച്ചാറിന്‍റെ ധീരതയിൽ ഇന്ത്യ അഭിമാനിക്കുന്നുവെന്ന് പ്രധാനമന്ത്രി നരേന്ദ്ര മോദി പറഞ്ഞു.

'ഇനി ആക്രമണമുണ്ടായാൽ നിയന്ത്രണം വിട്ടുള്ള തിരിച്ചടി', അമേരിക്കയ്ക്ക് മുന്നറിയിപ്പുമായി ഇറാൻ; ഹോർമൂസ് കടക്കാൻ ശ്രമിച്ച എണ്ണക്കപ്പൽ തിരിച്ചയച്ചു

Web Desk — Tue, 06 Oct 2026 01:04:43 +0530

ടെഹ്റാൻ: അമേരിക്കയുടെ ആക്രമണം ഇനിയുമുണ്ടായാൽ തിരിച്ചടി നിയന്ത്രണം വിടുമെന്നും, എല്ലായിടത്തേക്കും പടരുമെന്നും ഇറാന്‍റെ മുന്നറിയിപ്പ്. ഇറാൻ സേനകളുടേതാണ് മുന്നറിയിപ്പ്. അമേരിക്കയിലെ ഇടക്കാല തെരഞ്ഞെടുപ്പ് അവസാനിച്ചാലുടൻ അമേരിക്ക ഇറാനെതിരായ ആക്രമണം പുനരാരംഭിച്ചേക്കുമെന്ന കണക്കുകൂട്ടലുകൾക്ക് ഇടെയാണ് ഇത്. ഹോർമൂസ് കടക്കാൻ ശ്രമിച്ച ഒരു എണ്ണക്കപ്പൽ ഇറാന്‍റെ വിപ്ലവ സേന ഇന്ന് തിരിച്ചയച്ചു. മറ്റ് കപ്പലുകൾക്ക് നേരെ കഴിഞ്ഞ ദിവസം ആക്രമണം ഉണ്ടായതിന്‍റെ റിപ്പോർട്ടുകളും ഇന്ന് പുറത്തു വന്നു.

തലസ്ഥാനമായ സൻആ ഉൾപ്പടെ ഹൂത്തികളിൽ നിന്ന് മോചിപ്പിക്കാൻ സൗദിയും യെമനും ചേർന്ന് സൈനിക നടപടി തുടങ്ങിയതടെ യുദ്ധക്കളമായി യെമൻ. ബാബ് അൽ മന്ദബിലെ പ്രധാന ഭാഗങ്ങൾ തിരിച്ചു പിടിച്ചതായി സംയുക്ത സേന അവകാശപ്പെട്ടു. നൂറ് പോർ വിമാനങ്ങളാണ് സൗദി അയച്ചിരിക്കുന്നത്. 324 ഹൂത്തി കേന്ദ്രങ്ങൾ ഇതിനോടകം തകർത്തു.

ഹോർമുസിൽ നിന്ന് പുറത്തുകടക്കുന്നതിനിടെ 2 കപ്പലിന് നേർക്ക് ആക്രമണം; 5 ഇന്ത്യക്കാരെ രക്ഷിച്ചെന്ന് ഇന്ത്യൻ എംബസി

Sumam Thomas — Sat, 03 Oct 2026 15:52:16 +0530

വാഷിംഗ്ടൺ: ഹോർമൂസിൽ വീണ്ടും രണ്ട് കപ്പലുകൾക്ക് നേരെ ആക്രമണം. കുവൈത്ത് പതാക വഹിക്കുന്ന കപ്പലിൽ നിന്ന് അഞ്ച് ഇന്ത്യക്കാരെ രക്ഷിച്ചു. സൗദിയിലെ അസീറിൽ മിസൈൽ അവശിഷ്ടം വീണ് പ്രവാസിക്ക് പരിക്കേറ്റു. നജ്റാൻ പ്രവിശ്യയിൽ സ്കൂളിന് മുകളിൽ ഡ്രോൺ അവശിഷ്ടം പതിച്ചു.

ഹോർമൂസിൽ ഒരു കപ്പലാക്രമിക്കപ്പെട്ടത് ഒമാൻ തീരത്തോട് ചേർന്ന് തന്നെയാണ്. തുറമുഖത്ത് നിന്ന കപ്പലിന് നേരെയുള്ള ആക്രമണത്തിൽ തീപ്പിടുത്തമുണ്ടായി. എല്ലാ ജീവനക്കാരും സുരക്ഷിതരാണ്. ഹോർമൂസിൽ നിന്ന് പുറത്തു കടക്കാനിരിക്കെയാണ് മറ്റൊരു എണ്ണക്കപ്പൽ ആക്രമിക്കപ്പെട്ട് തീപ്പിടിച്ചത്. ഇതിലും ആർക്കും പരിക്കില്ല. ഒമാനിലെ ഇന്ത്യൻ എംബസിയാണ് കപ്പലിൽ നിന്ന് അഞ്ച് ജീവനക്കാരെ രക്ഷിച്ച കാര്യം അറിയിച്ചത്. അഞ്ച് പേരും ഇന്ത്യക്കാരാണ്. കുവൈത്തിന്റെ ഖമീസ ത്രി എന്ന കപ്പലാണിത്.

സൗദിയിൽ ഹൂത്തികളുടെ ആക്രമണം ശക്തമായി തുടരുകയാണ്. നജ്റാനിൽ സ്കൂളിൽ പതിച്ച ഡ്രോൺ അവശിഷ്ടം കാര്യമായ നാശനനഷ്ടമുണ്ടാക്കി. ആർക്കും പരിക്കില്ല. അതേസമയം അസീറിൽ പള്ളിക്ക് മേലെ പതിച്ച ബാലിസ്റ്റിക് മിസൈൽ അവശിഷ്ടം പതിച്ചാണ് ഏഷ്യക്കാരനായ പ്രവാസിക്ക് പരിക്കേറ്റത്. വാഹനങ്ങൾക്കും കെട്ടിടങ്ങൾക്കും കേടുപാടുകളുണ്ട്.

ജർമ്മൻ ചാൻസലറുടെ സന്ദർശനത്തിനിടെ കീവിലെ പ്രധാന പാലത്തിന് നേരെ ഡ്രോൺ ആക്രമണവുമായി റഷ്യ

Elsa TJ — Sun, 04 Oct 2026 19:03:27 +0530

കീവ്: ജർമ്മൻ ചാൻസലർ ഫ്രീഡ്രിച്ച് മെർസ് യുക്രെയ്ൻ സന്ദർശിക്കുന്നതിനിടയിൽ തലസ്ഥാനമായ കീവിലെ പ്രധാന പാലത്തിന് നേരെ ആക്രമണം നടത്തി റഷ്യ. യുക്രെയ്ന് പിന്തുണ പ്രഖ്യാപിക്കുന്നതിനായി മുൻകൂട്ടി അറിയിക്കാതെ നടത്തിയ സന്ദർശനത്തിനായി മെർസ് കിവിൽ എത്തിയതിന് തൊട്ടുപിന്നാലെയാണ് ഈ ആക്രമണമുണ്ടായത്. കീവിലെ ഡിനിപ്രോ നദിക്ക് കുറുകെയുള്ള നോർത്തേൺ ബ്രിഡ്ജ് എന്ന പ്രമുഖ പാലത്തിലാണ് റഷ്യൻ ഡ്രോൺ പതിച്ചത്. ഡ്രോൺ റോഡിലേക്ക് പതിച്ച് വൻ തീഗോളമായി മാറുമ്പോൾ വാഹനങ്ങൾ കടന്നുപോകുന്നത് വീഡിയോ ദൃശ്യങ്ങളിൽ പുറത്ത് വന്നിട്ടുണ്ട്. ആക്രമണത്തിൽ രണ്ടുപേർക്ക് പരിക്കേറ്റതായി കീവ് മേയർ വിറ്റാലി ക്ലിറ്റ്ഷ്കോ അറിയിച്ചു. നദിയുടെ ഇരുവശങ്ങളിലേക്കും ആയിരക്കണക്കിന് ആളുകൾ യാത്ര ചെയ്യാൻ ഉപയോഗിക്കുന്ന പാലങ്ങൾക്ക് നേരെ തുടർച്ചയായി നാലാം ദിവസമാണ് റഷ്യ ആക്രമണം നടത്തുന്നത്.

കഴിഞ്ഞ കുറച്ചു ആഴ്ചകളായി പുതിയ ജെറ്റ് അധിഷ്ഠിത ഡ്രോണുകൾ ഉപയോഗിച്ച് കിവിൽ നിരന്തരമായ ആക്രമണങ്ങൾ നടത്തുകയാണ് റഷ്യ. മേഖലയിൽ ജീവിതത്തെ തടസ്സപ്പെടുത്തുന്നതിനൊപ്പം വരുന്ന തണുപ്പുകാലത്ത് നഗരത്തിലെ വൈദ്യുതി വിതരണം പൂർണ്ണമായി നിലയ്ക്കുമോ എന്ന ആശങ്കയും സൃഷ്ടിക്കുന്നുണ്ട്. പാലങ്ങൾ തകർന്നിട്ടില്ലെങ്കിലും തുടർച്ചയായ ആക്രമണ ഭീഷണികൾ കാരണം ഡിനിപ്രോ നദിക്ക് കുറുകെയുള്ള ആറ് റോഡ് പാലങ്ങളിൽ അഞ്ചെണ്ണത്തിലും ഗതാഗതം നിയന്ത്രിതമായാണ് നടത്തുന്നത്. ഇത് നഗരത്തിൽ വലിയ ഗതാഗതക്കുരുക്കിന് കാരണമായിട്ടുണ്ട്. അടിസ്ഥാന സൗകര്യങ്ങളും ഊർജ്ജ സംവിധാനങ്ങളും തകർക്കുന്നതിനുള്ള റഷ്യൻ തന്ത്രത്തിന്റെ ഭാഗമായാണ് ഈ ആക്രമണങ്ങൾ വിലയിരുത്തപ്പെടുന്നത്.

ജർമ്മൻ ചാൻസലറായി ചുമതലയേറ്റ ശേഷം മെർസിന്റെ രണ്ടാമത്തെ യുക്രെയ്ൻ സന്ദർശനമാണിത്. 2025 മേയിൽ മെർസ് അധികാരാരഭിച്ച ശേഷം, അമേരിക്കൻ സഹായത്തിൽ കുറവ് വന്നതോടെ യുക്രെയ്ന് ഏറ്റവും കൂടുതൽ സൈനിക സഹായം നൽകുന്ന രാജ്യമായി ജർമ്മനി മാറിയിരുന്നു. യുക്രെയ്ന് നൽകുന്ന സഹായങ്ങളെച്ചൊല്ലി സ്വന്തം രാജ്യത്ത് വലിയ രാഷ്ട്രീയ എതിർപ്പുകളും മെർസ് നേരിടുന്നുണ്ട്. എന്നാൽ ഈ എതിർപ്പുകൾക്കിടയിലും യുക്രെയ്നുള്ള ജർമ്മനിയുടെ പിന്തുണ ശക്തമായി തുടരുമെന്നാണ് മെർസ് വ്യക്തമാക്കുന്നത്.

ഏഷ്യാനെറ്റ് ന്യൂസ് ലൈവ് കാണാം

ഫ്ലൈ ദുബായ് വിമാനം ടെൽ അവീവിലേക്ക് പറക്കുകയാണെങ്കിൽ വിമാനം വെടിവെച്ചിടാനായി ഇസ്രയേൽ സൈന്യം തയ്യാറെടുത്തു- റിപ്പോർട്ട്

Web Desk — Tue, 06 Oct 2026 10:37:39 +0530

ടെൽ അവീവ്: കോക്ക്പിറ്റിൽ ആക്രമണമുണ്ടായ ഫ്ലൈ ദുബായ് വിമാനം ടെൽ അവീവിലേക്ക് പറക്കുകയാണെങ്കിൽ ഇസ്രയേൽ സൈന്യം വിമാനം വെടിവെച്ചിടാൻ തയ്യാറെടുത്തിരുന്നതായി റിപ്പോർട്ട്. സിബിഎസ് ന്യൂസ് ആണ് ഇസ്രയേൽ സൈന്യം സ്വീകരിച്ച അടിയന്തര നടപടികളെക്കുറിച്ച് റിപ്പോർട്ട് ചെയ്തത്.

വിമാനത്തിലെ സഹപൈലറ്റായ ഒമാൻ പൗരൻ ഹമാം അൽ ഹമ്മാമിയാണ് ക്യാപ്റ്റനായ സ്മിത് മച്ചാറിനെ കോക്ക്പിറ്റിൽവെച്ച് ക്രൂരമായി ആക്രമിച്ചത്. ദുബായിൽനിന്ന് ഇസ്രയേലിലേക്ക് പോവുകയായിരുന്ന ഫ്ലൈ ദുബായ് വിമാനത്തിൽ സെപ്റ്റംബർ 30-നായിരുന്നു സംഭവം. ക്യാപ്റ്റനെ ആക്രമിച്ച് വിമാനത്തിന്റെ നിയന്ത്രണം കൈക്കലാക്കാനായിരുന്നു സഹപൈലറ്റിന്റെ ശ്രമം. ഇത് ഭീകരാക്രമണശ്രമമാണെന്ന് യുഎഇ പിന്നീട് സ്ഥിരീകരിക്കുകയുംചെയ്തിരുന്നു.

സഹപൈലറ്റ് ക്യാപ്റ്റനെ ആക്രമിച്ചതിന് പിന്നാലെ 30 സെക്കൻഡിനുള്ളിൽ വിമാനം 16,000 അടി താഴ്ചയിലേക്ക് പതിച്ചിരുന്നു. ഇതോടെയാണ് ഇസ്രയേൽ വ്യോമസേനയ്ക്ക് അപായസന്ദേശം ലഭിച്ചത്. വിമാനം റാഞ്ചിയതാണെന്നും ഇസ്രയേലിന് നേരേയുള്ള ആക്രമണമാണെന്നും സൈന്യം കരുതി. തുടർന്ന് വിമാനത്തിലെ കോക്ക്പിറ്റുമായി ബന്ധപ്പെടാൻ ശ്രമിച്ചെങ്കിലും പ്രതികരണമുണ്ടായില്ല. ഇതോടെ ഇസ്രയേൽ വ്യോമസേനയും സൈന്യവും അടിയന്തര നീക്കങ്ങൾ ആരംഭിച്ചു. കൂടുതൽ നടപടികൾക്കായി കമാൻഡ് സെന്റർ സ്ഥാപിച്ചു. മുൻകരുതലിന്റെ ഭാഗമായി ഇസ്രയേൽ വ്യോമപാതയും അടച്ചു. തൊട്ടുപിന്നാലെ യുദ്ധവിമാനങ്ങളും ഇസ്രയേലിൽനിന്ന് പറന്നുയർന്നു. വിമാനം സൗദി അറേബ്യയിലേക്ക് നീങ്ങുന്നതായി മനസിലായതോടെയാണ് ഇസ്രയേൽ തങ്ങളുടെ യുദ്ധവിമാനങ്ങളെ തിരികെവിളിച്ചത്. ഇതേസമയം സൗദിയും തങ്ങളുടെ യുദ്ധവിമാനങ്ങൾ അയച്ചിരുന്നതായും സിബിഎസ് ന്യൂസിന്റെ റിപ്പോർട്ടിൽ പറയുന്നു.

ഫ്ലൈ ദുബായ് വിമാനം ടെൽ അവീവിലേക്ക് യാത്ര തുടരുകയാണെങ്കിൽ വിമാനം വെടിവെച്ചിടാനുള്ള തയ്യാറെടുപ്പിലായിരുന്നു ഇസ്രയേൽ സൈന്യം. ഇസ്രയേൽ യുദ്ധവിമാനങ്ങളിലെ പൈലറ്റുമാർ ഇതിനായി തയ്യാറെടുത്തിരുന്നു. ഫ്ലൈ ദുബായ് വിമാനത്തിനടുത്തേക്ക് പറക്കാനും കോക്ക്പിറ്റിലുള്ളവരെ നിരീക്ഷിക്കാനും യുദ്ധവിമാനങ്ങളിലെ പൈലറ്റുമാർ ശ്രമം നടത്തിയിരുന്നു.

ഫ്ലൈ ദുബായ് വിമാനം ടെൽ അവീവ് ലക്ഷ്യമാക്കി നീങ്ങുകയാണെങ്കിൽ അതിന് മുൻപ് തന്നെ വെടിവെച്ചിടാനായിരുന്നു നീക്കം. ബെൻ‍ ഗുരിയോൺ വിമാനത്താവളം, അസ്രിയേലി സെന്റർ തുടങ്ങിയ തന്ത്രപ്രധാന മേഖലകളെ ആക്രമണത്തിൽനിന്ന് രക്ഷിക്കാനാണ് ടെൽ അവീവിലേക്ക് നീങ്ങുന്നതിന് മുൻപേ വിമാനം വെടിവെച്ചിടാനുള്ള പദ്ധതി ആസൂത്രണം ചെയ്തത്. വിമാനം വെടിവെച്ചിടാനായി അന്തിമ അനുമതി നൽകേണ്ടത് ഇസ്രയേൽ പ്രധാനമന്ത്രിയായിരുന്നുവെന്നും റിപ്പോർട്ടിൽ പറയുന്നു.

2026-ലെ വൈദ്യശാസ്ത്ര നൊബേൽ പ്രഖ്യാപിച്ചു; കാള്‍ ഡൈയ്സറോത്ത്, പീറ്റര്‍ ഹെഗ്മാന്‍, ഗയോര്‍ക് നഗേല്‍ എന്നിവർക്ക് പുരസ്കാരം

Web Desk — Mon, 05 Oct 2026 15:56:27 +0530

സ്റ്റോക്ക്ഹോം: ഈ വര്‍ഷത്തെ വൈദ്യശാസ്ത്രത്തിനുളള നൊബേല്‍ പുരസ്കാരം മൂന്നു പേര്‍ പങ്കിട്ടു. അമേരിക്കൻ, ജർമ്മൻ ഗവേഷകരായ കാള്‍ അലക്സാണ്ടർ ‍‍ഡൈയ്സറോത്ത്, പീറ്റര്‍ ഹെഗ്മാന്‍, ഗയോര്‍ക് നഗേല്‍ എന്നിവർക്കാണ് പുരസ്കാരം. ഒപ്റ്റോജെനെറ്റിക്സുമായി ബന്ധപ്പെട്ട കണ്ടെത്തലുകൾക്കാണ് പുര്സ്കാരം. പ്രകാശം ഉപയോഗിച്ച് നാഡീകോശങ്ങളെ നിയന്ത്രിക്കാൻ സഹായിക്കുന്ന രീതിയാണ് ഒപ്റ്റോജെനെറ്റിക്സ്.

കരോലിൻസ്ക ഇൻസ്റ്റിറ്റ്യൂട്ടിലെ 50 പ്രൊഫസർമാർ അടങ്ങുന്ന നൊബൽ അസംബ്ലിയാണ് പുരസ്കാര ജേതാക്കളെ തെരഞ്ഞെടുത്തത്. സമ്മാനത്തുകയായ 11.5 കോടി രൂപ മൂന്ന് ശാസ്ത്രജ്ഞർക്കുമായി തുല്യമായി വീതിച്ചുനൽകും. ഈ വർഷത്തെ നൊബേൽ സീസണിൽ പ്രഖ്യാപിക്കപ്പെടുന്ന ആദ്യ പുരസ്കാരമാണിത്. ഭൗതികശാസ്ത്രം, രസതന്ത്രം, സാഹിത്യം, സമാധാനം, സാമ്പത്തിക എന്നീ മേഖലകളിലെ നൊബേൽ സമ്മാനം വരുംദിവസങ്ങളിൽ പ്രഖ്യാപിക്കും.

BREAKING NEWS

The 2026 #NobelPrize in Physiology or Medicine has been awarded to Karl Deisseroth, Peter Hegemann and Georg Nagel “for their discoveries concerning light-gated ion channels and optogenetics.” https://t.co/pkDDEBWtkz

— The Nobel Prize (@NobelPrize) October 5, 2026

പാകിസ്ഥാൻ നയതന്ത്ര പ്രതിനിധിയെ വിളിച്ചുവരുത്തി താക്കീത് നൽകി ഇന്ത്യ, അതിർത്തിയിലെ നുഴഞ്ഞുകയറ്റം തടയാൻ കർശന നടപടിയും ആവശ്യപ്പെട്ടു

Anver Sajad — Sat, 03 Oct 2026 22:25:12 +0530

ദില്ലി: പാകിസ്ഥാൻ നയതന്ത്ര പ്രതിനിധിയെ വിളിച്ചുവരുത്തി താക്കീത് നൽകി ഇന്ത്യ. ഫിറോസ്പൂരിൽ അന്താരാഷ്ട്ര അതിർത്തിയിൽ ഇന്ത്യ രണ്ട് നാട്ടുകാരെ വെടിവെച്ചു കൊന്നു എന്ന് പാകിസ്ഥാൻ ആരോപിച്ചതടക്കമുള്ള വിഷയങ്ങളിലാണ് നടപടി. പ്രകോപനമില്ലാതെ വെടിവെച്ചെന്ന പാകിസ്ഥാൻ ആരോപണം ഇന്ത്യ തള്ളികളയുകയും ചെയ്തു. മുന്നറിയിപ്പുകൾ നൽകിയിട്ടും അതിർത്തി വഴി നുഴഞ്ഞു കയറാൻ മൂന്ന് പേർ ശ്രമം നടത്തിയെന്ന് വിദേശകാര്യ മന്ത്രാലയം. മയക്കുമരുന്ന് കള്ളക്കടത്തിനുള്ള നീക്കമാണ് നടന്നതെന്നും ഇന്ത്യ വ്യക്തമാക്കി. നുഴഞ്ഞുകയറ്റം തടയാൻ പാകിസ്ഥാൻ നടപടി സ്വീകരിക്കണമെന്നും ആവശ്യപ്പെട്ടു. താക്കീതുകൾ തുടർച്ചയായി അവഗണിച്ചത് കൊണ്ടാണ് നുഴഞ്ഞു കയറാൻ നോക്കിയവരെ നേരിടേണ്ടി വന്നതെന്നും ഇന്ത്യ വ്യക്തമാക്കി.

ഏഷ്യാനെറ്റ് ന്യൂസ് വാർത്തകൾ തത്സമയം കാണാം

ഒമാനി പൈലറ്റ് ഹമാം ലക്ഷ്യമിട്ടത് ഫ്ലൈദുബായ് വിമാനം ഇസ്രയേലിലെ വിമാനത്താവളത്തിൽ ഇടിച്ചിറക്കാൻ, ഞെട്ടിക്കുന്ന വിവരങ്ങൾ പുറത്തുവിട്ട് ഇസ്രയേലി മാധ്യമങ്ങൾ

Anver Sajad — Mon, 05 Oct 2026 15:36:24 +0530

ടെൽ അവീവ്: ഫ്ലൈദുബായ് വിമാനം തട്ടിയെടുത്ത് ഇസ്രയേലിലെ ബെൻ ഗൂറിയൻ വിമാനത്താവളത്തിൽ ഇടിച്ചിറക്കാനാണ് സഹപൈലറ്റ് ഹമാം അൽ ഹമാമി ലക്ഷ്യമിട്ടതെന്ന് ഇസ്രയേലി മാധ്യമ റിപ്പോർട്ടുകൾ. അന്വേഷണത്തിനിടെ ഒമാനി സഹപൈലറ്റ് നൽകിയ മൊഴിയായാണ് ഇവ പുറത്തു വന്നത്. ക്യാപ്റ്റനെ വീഴ്ത്തി, സാധാരണ നിലയിൽ ടെൽ അവീവിലേക്ക് പറന്ന്, സംശയം തോന്നാത്ത വിധം ലാൻഡിങ് അനുമതി വരെ നേടിയെടുക്കാനായിരുന്നു ശ്രമം. ശേഷം ബെൻ ഗുറിയോൺ വിമാനത്താവളത്തിൽ ഇടിച്ചിറക്കാനായിരുന്നു പദ്ധതി. മുൻപും ആക്രമണം നടത്താൻ പദ്ധതിയിട്ടിരുന്നുവെന്നും റിപ്പോർട്ടുകളുണ്ട്. ഇസ്രയേലി മാധ്യമങ്ങളായ ചാനൽ 12 ഉം വൈ - നെറ്റുമാണ് ഇക്കാര്യങ്ങൾ റിപ്പോർട്ട് ചെയ്തത്.

വിശദവിവരങ്ങൾ

ഫ്ലൈദുബായ് വിമാനം തട്ടിയെടുത്ത ഉടനെ എവിടെയെങ്കിലും ഇടിച്ച് തകർക്കാനായിരുന്നില്ല സഹപൈലറ്റായിരുന്ന ഒമാനി പൗരനായ ഹമാം അൽ ഹമാമി ലക്ഷ്യമിട്ടത് എന്നും വ്യക്തമായ പദ്ധതി ഉണ്ടായിരുന്നെന്നുമാണ് റിപ്പോർട്ടുകൾ. ക്യാപ്റ്റനെ വീഴ്ത്തി, സാധാരണ നിലയിൽ ടെൽ അവീവിലേക്ക് പറന്ന്, സംശയം തോന്നാത്ത വിധം ലാൻഡിങ് അനുമതി വരെ നേടിയെടുക്കാനായിരുന്നു ശ്രമം. ശേഷം ബെൻ ഗുറിയോൺ വിമാനത്താവളത്തിൽ ഇടിച്ചിറക്കാനും പദ്ധതിയിട്ടിരുന്നു. അല്ലാത്ത പക്ഷം അപായസൂചന ലഭിച്ച് വിമാനത്തിന് നേരെ വ്യോമപ്രതിരോധ നടപടികളുണ്ടായേനെ. ഇസ്രയേലി മാധ്യമങ്ങളായ ചാനൽ 12 ഉം വൈ - നെറ്റുമാണ് ഇക്കാര്യങ്ങൾ റിപ്പോർട്ട് ചെയ്തത്. എന്നാൽ അതിന് മുൻപേ, ആക്രമിക്കപ്പെട്ട ക്യാപ്റ്റൻ സ്മിത്ത് മച്ഛാർ കോക്പിറ്റ് വാതിൽ തുറന്നതും യാത്രക്കാരിടപെട്ട് സഹപൈലറ്റിന് കീഴ്പ്പെടുത്തിയതും എല്ലാ ആസൂത്രണങ്ങളെയും പൊളിച്ചു. മാസങ്ങളെടുത്ത ആസൂത്രണത്തിലായിരുന്നു ഇയാൾ എന്നാണ് വിവരം. ബെൻ ഗൂറിയോൺ വിമാനത്താവളത്തെ കുറിച്ചുള്ള വിവരങ്ങൾ പല യാത്രകളിലായി ശേഖരിച്ചു. നേരത്തെ ജൂലൈയിൽ ഇതേ ആക്രമണം ലക്ഷ്യമിട്ടെങ്കിലും അന്നത്തെ ക്രൂ അംഗങ്ങളിൽ ഒരാൾ സുഹൃത്തായതിനാൽ അത് ഉപേക്ഷിച്ചുവെന്നാണ് മറ്റൊരു റിപ്പോർട്ട്. നേരത്തെ, ഇയാളുടെ തീവ്ര ആശയങ്ങൾ കാരണം ഒമാൻ എയർ വിമാനം പറത്തുന്നതിൽ നിന്ന് ഇയാളെ വിലക്കിയിരുന്നതായി വാൾ സ്ട്രീറ്റ് ജേണൽ റിപ്പോർട്ട് ചെയ്തു. ടെൽ അവീവിലേക്ക് പറക്കുന്ന വിമാനമായതിനാൽ ഫ്ലൈ ദുബായ് ലക്ഷ്യമിട്ടു എന്നും റിപ്പോർട്ടുകളിൽ പറയുന്നു.

'ആയുധം വെച്ചു കീഴടങ്ങിയാൽ പൊതുമാപ്പ്'; ഹൂതികളോട് യെമൻ പ്രസിഡൻ്റ് റഷാദ് അൽ അലിമി; മുഴുവൻ മേഖലകളും തിരിച്ചുപിടിക്കാൻ നീക്കം

Deepu Divakaran — Mon, 05 Oct 2026 03:21:59 +0530

സനാ: യെമനിൽ ഹൂതി വിമതരുടെ നിയന്ത്രണത്തിലുള്ള മുഴുവൻ മേഖലകളും തിരിച്ചുപിടിക്കാൻ സൈനിക നടപടി ആരംഭിച്ച് സൗദി അറേബ്യയുടെ പിന്തുണയുള്ള യെമൻ ഭരണകൂടം. ഹൂതി ഭീകരരുടെ പിടിയിൽ നിന്ന് രാജ്യത്തിന് മോചനം ലഭിക്കുംവരെ ശക്തമായ സൈനിക നടപടി ഉണ്ടാകുമെന്ന് യെമനി പ്രസിഡൻ്റ് റഷാദ് അൽ അലിമി രാജ്യത്തെ അഭിസംബോധന ചെയ്ത് അറിയിച്ചു. ഇതിന് പിന്നാലെ ഹൂതികൾ ആയുധം താഴെവെക്കണമെന്ന ആഹ്വാനവുമായി സൈനിക വക്താവും രംഗത്തെത്തി. ഇറാൻ്റെ പിന്തുണയോടെ പ്രവർത്തിക്കുന്ന ഹൂതി വിമതരെ പരാജയപ്പെടുത്തി, രാജ്യത്തിന്റെ പരമാധികാരം പൂർണമായി വീണ്ടെടുക്കുകയാണ് ദൗത്യത്തിന്റെ ലക്ഷ്യം.

2014 മുതൽ രാജ്യതലസ്ഥാനമായ സനാ അടക്കം വടക്കുപടിഞ്ഞാറൻ ഭാഗത്തെ ജനവാസമേഖലകളെല്ലാം ഹൂതി വിമതരുടെ നിയന്ത്രണത്തിലാണ്. ഇറാൻ്റെ സഹായത്തോടെ ആയുധശേഖരം ആധുനികവത്കരിക്കുന്ന ഹൂതികൾ, കഴിഞ്ഞ മാസങ്ങളിൽ യെമനിൽ വലിയ തോതിലുള്ള മുന്നേറ്റം നടത്തിയിരുന്നു. അന്താരാഷ്ട്ര കപ്പൽ ഗതാഗതത്തിൻ്റെ പ്രധാന പാതയായ ബാബ് അൽ മന്ദബ് കടലിടുക്കും അതിനോട് ചേർന്നുള്ള ഏകദേശം 150 കിലോമീറ്ററോളം വരുന്ന ചെങ്കടൽ തീരപ്രദേശവും ഹൂതികൾ പിടിച്ചെടുത്തു. ഇത് അന്താരാഷ്ട്ര വ്യാപാര മേഖലയ്ക്കും യെമൻ ഗവൺമെന്റിനും കനത്ത തിരിച്ചടിയായിരുന്നു.

യെമൻ സ‍ർക്കാരിൻ്റെ താൽക്കാലിക തലസ്ഥാനമായ അദനെയും തന്ത്രപ്രധാന നഗരമായ തായിസിനെയും ബന്ധിപ്പിക്കുന്ന പ്രധാന വിതരണ പാത കഴിഞ്ഞ ദിവസങ്ങളിൽ ഹൂതികൾ ആക്രമിച്ചു കീഴടക്കിയിരുന്നു. ഇതോടെ തായിസ് നഗരം പൂർണമായും സ‍ർക്കാർ നിയന്ത്രണത്തിൽ നിന്ന് ഒറ്റപ്പെടുകയും ഹൂതികളുടെ ഉപരോധത്തിലാവുകയും ചെയ്തു. ഈ അടിയന്തര സാഹചര്യമാണ് പുതിയ സൈനിക പ്രഖ്യാപനത്തിലേക്ക് നയിച്ചത്.

സമാധാനത്തിനുള്ള എല്ലാ സാധ്യതകളും ഹൂതികൾ ഇല്ലാതാക്കിയ സാഹചര്യത്തിലാണ് അന്തിമ തീരുമാനമെന്നാണ് പ്രസിഡന്റ് റഷാദ് അൽ അലിമിയുടെ വിശദീകരണം. ഹൂതികളുടെ സൈനിക താവളങ്ങളിൽ നിന്നും വിതരണ പാതകളിൽ നിന്നും ജനങ്ങൾ ഒഴിഞ്ഞുനിൽക്കണമെന്ന് പ്രസി‍ഡൻ്റ് അഭ്യർത്ഥിച്ചിട്ടുണ്ട്. കൂടാതെ, ആയുധം വെച്ചു കീഴടങ്ങുന്ന ഹൂതികൾക്ക് പൊതുമാപ്പ് നൽകുമെന്നും റഷാദ് അൽ അലിമി പ്രഖ്യാപിച്ചു.

അതേസമയം സൈനിക നീക്കം പ്രഖ്യാപിച്ചതിന് തൊട്ടുപിന്നാലെ, തങ്ങൾക്ക് നേരെ സൗദി സഖ്യസേന കഴിഞ്ഞ മണിക്കൂറുകളിൽ 50 ഓളം വ്യോമാക്രമണങ്ങൾ നടത്തിയതായി ഹൂതികൾ ആരോപിച്ചു. ഇതിന് പ്രതികാരമായി റിയാദിലുള്ള സൗദി അരാംകോയുടെ എണ്ണ ഉൽപ്പാദന കേന്ദ്രങ്ങൾക്ക് നേരെ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയതായും ഹൂതികൾ അവകാശപ്പെട്ടു.