Asianet News Malayalam

ധോണിക്ക്‌ 3300 കോടിരൂപയുടെ ഓഹരി ചെന്നൈ നല്‍കുമോ? ഇതൊക്കെ എങ്ങനെ വിശ്വസിക്കും

Web Desk — Thu, 27 Aug 2026 11:16:49 +0530

ചെന്നൈ: 2008 മുതല്‍ ചെന്നൈ സൂപ്പര്‍ കിംഗ്‌സിന്റെ തല ആയി എം എസ്‌ ധോണിയുണ്ട്‌. ഐ പി എല്‍ ആരംഭിച്ചത്‌ മുതല്‍ സി എസ്‌ കെയുടെ മുഖം ധോണിയാണ്‌. അഞ്ച്‌ ഐ പി എല്‍ കിരീടങ്ങളും രണ്ട്‌ ചാമ്പ്യന്‍സ്‌ ലീഗ്‌ ടി20 കിരീടങ്ങളും ധോണിയുടെ നായകത്വത്തിന്‌ കീഴില്‍ ചെന്നൈ സൂപ്പര്‍ കിംഗ്‌സ്‌ സ്വന്തമാക്കിയിട്ടുണ്ട്‌.

ചെന്നൈ ഫ്രാഞ്ചൈസിക്ക്‌ രാജ്യം മുഴുവന്‍ ആരാധകരെ നേടിക്കൊടുത്തതും ധോണിയുടെ ക്യാപ്‌റ്റന്‍സിയാണ്‌. രണ്ട്‌ വര്‍ഷം മുമ്പ്‌ ധോണി തന്റെ പിന്‍ഗാമിയായി റുതുരാജ്‌ ഗെയ്‌ക്വാദിനെ വാഴിച്ചു. പതിയെ, അദ്ദേഹം മത്സരങ്ങളില്‍ നിന്ന്‌ പിന്‍വാങ്ങുന്നതാണ്‌ ക്രിക്കറ്റ്‌ ലോകം കണ്ടത്‌. കഴിഞ്ഞ സീസണില്‍ ടീമിന്റെ ഭാഗമായെങ്കിലും ധോണി തന്റെ ആകര്‍ഷണീയത കുറച്ച്‌, സി എസ്‌ കെയില്‍ നിന്ന്‌ സ്വതന്ത്രനാകാനുള്ള ശ്രമമമാണ്‌ നടത്തിയത്‌.

ഇപ്പോഴിതാ എംഎസ്‌ ധോണി ചെന്നൈ സൂപ്പര്‍ കിംഗ്‌സ്‌ മാനേജ്‌മെന്റുമായി ഓഹരി സംബന്ധിച്ച തര്‍ക്കത്തിലാണെന്ന്‌ അഭ്യൂഹങ്ങള്‍. ധോണി 25 ശതമാനം ഓഹരി ആദ്യം ആവശ്യപ്പെട്ടെന്നും പിന്നീട്‌ ഇത്‌ പതിനെട്ട്‌ ശതമാനമായി കുറച്ചെന്നും റിപ്പോര്‍ട്ടുകളുണ്ട്‌. അതേസമയം, സി എസ്‌ കെ മാനേജ്‌മെന്റ്‌ ആദ്യം മൂന്ന്‌ ശതമാനവും പിന്നീട്‌ ചര്‍ച്ചയുടെ ഭാഗമായി പരമാവധി 5.5 ശതമാനവും വാഗ്‌ദാനം ചെയ്‌തു. എന്നാല്‍, ഇരുകൂട്ടരും ധാരണയിലെത്താതെ ചര്‍ച്ച പിരിഞ്ഞുവെന്നുമാണ്‌ പുറത്തുവരുന്ന വിവരങ്ങള്‍. ധോണിയോ, ടീം മാനേജ്‌മെന്റോ ഇതുസംബന്ധിച്ച്‌ യാതൊരു ഔദ്യോഗിക പ്രസ്‌താവനയും നടത്തിയിട്ടില്ല.

അതേസമയം, ക്രിക്കറ്റ്‌ ലോകത്ത്‌ ഇതൊരു വലിയ ചര്‍ച്ചയാണ്‌. കൊല്‍ക്കത്ത നൈറ്റ്‌ റൈഡേഴ്‌സിന്റെ മുന്‍ താരം ആകാശ്‌ ചോപ്ര തന്റെ യുട്യൂബ്‌ ചാനലില്‍ ആശ്ചര്യത്തോടെ ചോദിക്കുന്നത്‌ ഏതെങ്കിലും ഫ്രാഞ്ചൈസി ഒരു മുന്‍താരത്തിന്‌ നാനൂറ്‌ മില്യണ്‍ ഡോളര്‍ നല്‍കുമോ എന്നാണ്‌. ഈ ചര്‍ച്ചകളുടെ വിവരങ്ങള്‍ യാഥാര്‍ഥ്യമാകാനിടയില്ല. ചെന്നൈ സൂപ്പര്‍ കിംഗ്‌സ്‌ വലിയൊരു ബ്രാന്‍ഡാണ്‌. 1.8 ബില്യണ്‍ ഡോളര്‍ മൂല്യമുള്ള സി എസ്‌ കെയോട്‌ ധോണി 25 ശതമാനം ഓഹരി ചോദിച്ചുവെന്ന്‌ പറയുന്നത്‌ എങ്ങനെ യഥാര്‍ഥമാകും, ഇതൊരിക്കലും സാധ്യമല്ല. ആരും 400 മില്യണ്‍ ഡോളറൊന്നും ഒരാള്‍ക്കും കൊടുക്കില്ല - ആകാശ്‌ ചോപ്ര പറയുന്നു. സി എസ്‌ കെ ഓഫര്‍ ചെയത 5.5 ശതമാനം ഓഹരിയാണെങ്കില്‍ പോലും അതൊരു വലിയ തുകയാണ്‌. അതുകൊണ്ട്‌, ഇതെല്ലാം ആരോ സൃഷ്ടിച്ച കഥയായിട്ടാണ്‌ തനിക്ക്‌ അനുഭവപ്പെടുന്നതെന്ന്‌ ആകാശ്‌ ചോപ്ര പറഞ്ഞു.

സി എസ്‌ കെയുടെ ബ്രാന്‍ഡ്‌ വാല്യു വെച്ച്‌ ധോണി ആവശ്യപ്പെട്ടത്‌ ഏകദേശം 3,300 കോടിയിലധികം രൂപയാണ്‌. കോര്‍പറേറ്റ്‌ ലോകത്ത്‌ ഇത്രയും വലിയൊരു തുക ആരും വെറുതെ കൊടുക്കില്ലെന്ന്‌ തന്റെ കോര്‍പറേറ്റ്‌ ബിസിനസ്‌ യുക്തി വെച്ച്‌ ആകാശ്‌ ചോപ്ര പറയുന്നു, ഒപ്പം തന്നെ മാധ്യമവാര്‍ത്തകളെ തള്ളിക്കളയുന്നു.

ഐപിഎല്‍ ചരിത്രത്തിലെ ഏറ്റവും മികച്ച ടീമാണ് സിഎസ്കെ എന്ന് ബ്രാവോ, തര്‍ക്കിച്ച് പൊള്ളാര്‍ഡ്-വീഡിയോ

Web Team — Fri, 02 Jun 2023 08:39:03 +0530

ചെന്നൈ: ഐപിഎല്ലില്‍ ചെന്നൈ സൂപ്പര്‍ കിംഗ്സ് കിരീടം നേടയിതിന്‍റെ ആഘോഷങ്ങള്‍ ഇനിയും തീര്‍ന്നിട്ടില്ല. തിങ്കളാഴ്ച നടന്ന ഫൈനലില്‍ ഗുജറാത്ത് ടൈറ്റന്‍സിനെ അവസാന പന്തില്‍ കീഴടക്കിയാണ് ചെന്നൈ സൂപ്പര്‍ കിംഗ്സ് അഞ്ചാം ഐപിഎല്‍ കിരീടം സ്വന്തമാക്കിയത്. ഇതോടെ ഐപിഎല്‍ കിരീടനേട്ടങ്ങളില്‍ സി എസ് കെ മുംബൈ ഇന്ത്യന്‍സിനൊപ്പമെത്തുകയും ചെയ്തു.

കിരീടനേട്ടത്തില്‍ ഒപ്പമാണെങ്കിലും ഐപിഎല്‍ ചരിത്രത്തിലെ ഏറ്റവും മികച്ച ടീമാണ് ചെന്നൈ സൂപ്പര്‍ കിംഗ്സ് എന്ന് തുറന്നുപറയുകയാണ് ചെന്നൈയുടെ എക്കാലത്തെയും മികച്ച താരങ്ങളിലൊരാളും ഈ സീസണിലെ ബൗളിംഗ് പരിശീലകനുമായിരുന്ന ഡ്വയിന്‍ ബ്രാവോ. മുംബൈയുടെ ഇതിഹാസ താരവും ഈ സീസണിലെ ബാറ്റിംഗ് പരിശീലകനുമായിരുന്ന കെയ്റോണ്‍ പൊള്ളാര്‍ഡിനൊപ്പം കാറിലിരുന്നുള്ള സൗഹൃദ സംഭാഷണത്തിലാണ് ഐപിഎല്ലിലെ ഏറ്റവും മികച്ച ടീമിനെക്കുറിച്ച് ബ്രാവോയുടെ തുറന്നു പറച്ചില്‍.

പുത്തന്‍ ഡിസൈനുകള്‍, പത്തരമാറ്റ് തിളക്കം; ടീം ഇന്ത്യയുടെ ജേഴ്‌സി പുറത്തിറക്കി അഡിഡാസ്

എന്നാല്‍ മംബൈ ഇന്ത്യന്‍സ് ചെന്നൈക്ക് മുമ്പെ അഞ്ച് ഐപിഎല്‍ കിരീടം നേടിയ കാര്യവും ഇരു ടീമിനും അഞ്ച് കിരീടങ്ങള്‍ വീതമാണുള്ളതെന്നും പൊള്ളാര്‍ഡ് ബ്രാവോയെ ഓര്‍മിപ്പിക്കുമ്പള്‍ ചെന്നൈക്ക് ചാമ്പ്യന്‍സ് ട്രോഫി കിരീടം കൂടിയുണ്ടെന്ന് ബ്രാവോ പൊള്ളാര്‍ഡിന് മറുപടി നല്‍കി. എത്ര എണ്ണമെന്ന പൊള്ളാര്‍ഡിന്‍റെ ചോദ്യത്തിന് ചെന്നൈ രണ്ട് തവണ ചാമ്പ്യന്‍സ് ട്രോഫിയില്‍ ചാമ്പ്യന്‍മാരായിട്ടുണ്ടെന്നും മുംബൈക്ക് ഒരു തവണ മാത്രമെ ചാമ്പ്യന്‍സ് ട്രോഫി കിരീടം നേടാനായിട്ടുള്ളൂവെന്നും ബ്രാവോ ഓര്‍മപ്പിക്കുന്നു.

തുടര്‍ന്ന് കളിക്കാരനെന്ന നിലയിലെ കിരീടങ്ങളെടുത്താലും താന്‍ പൊള്ളാര്‍ഡിനെക്കാള്‍ മുന്നിലാണെന്ന് ബ്രാവോ പറഞ്ഞു. നീ എത്ര കിരീടം നേടിയിട്ടുണ്ടെന്ന പൊള്ളാര്‍ഡിന്‍റെ ചോദ്യത്തിന് ഫ്രാഞ്ചൈസി ക്രിക്കറ്റില്‍ 17 കിരീടങ്ങള്‍ തനിക്കുണ്ടെന്ന് ബ്രാവോ പറഞ്ഞു. നിങ്ങള്‍ക്കോ എന്ന ബ്രാവോയുടെ ചോദ്യത്തിന് എണ്ണിയിട്ടില്ല എന്നായിരുന്നു പൊള്ളാര്‍ഡിന്‍റെ മറുപടി. എന്നാല്‍ താന്‍ എണ്ണിയിട്ടുണ്ടെന്നും 15 എണ്ണമെ ഉള്ളൂവെന്നും തനിക്കൊപ്പമെത്താന്‍ ഇനിയും പരിശ്രമിക്കേണ്ടിയിരിക്കുന്നുവെന്നും ബ്രാവോ പൊള്ളാര്‍ഡിനെ ഉപദേശിച്ചു.

View this post on Instagram

A post shared by Dwayne Bravo aka SIR Champion (@djbravo47)

അതുകൊണ്ട് തന്‍റെ പേര് പറയുമ്പോള്‍ കുറച്ച് ബഹുമാനമൊക്കെ ആവാമെന്നും പറഞ്ഞാണ് ബ്രാവോ സംഭാഷണം അവസാനിപ്പിക്കുന്നത്. ഐപിഎല്ലിന് പുറമെ കരീബിയന്‍ പ്രീമിയര്‍ ലീഗില്‍ ട്രിന്‍ബാഗോ നൈറ്റ് റൈഡേഴ്സിനായി ഒരുമിച്ച് കളിച്ചിട്ടുള്ള ബ്രാവോയും പൊള്ളാര്‍ഡും നിരവധി കിരീടങ്ങള്‍ നേടിയിട്ടുണ്ട്. ഐപിഎല്ലില്‍ മുന്‍ മുംബൈ ഇന്ത്യന്‍സ് താരമായിരുന്ന ബ്രാവോ ചെന്നൈ സൂപ്പര്‍ കിംഗ്സിലാണ് കൂടുതല്‍ തിളങ്ങിയത്. വെസ്റ്റ് ഇന്‍ഡീസ് ടീമിലും സഹതാരങ്ങളായിരുന്ന ഇരുവരും ആത്മാര്‍ത്ഥ സുഹൃത്തുക്കള്‍ കൂടിയാണ്.

ഐപിഎല്‍ ഫൈനല്‍ താരങ്ങളും ലണ്ടനില്‍; ഇനി ടീം ഇന്ത്യക്ക് തീപാറും പരിശീലനം

Web Team — Wed, 31 May 2023 18:07:11 +0530

ലണ്ടന്‍: ഓസ്ട്രേലിയക്ക് എതിരായ ലോക ടെസ്റ്റ് ചാമ്പ്യന്‍ഷിപ്പ് ഫൈനലിനായി കൂടുതല്‍ ഇന്ത്യന്‍ താരങ്ങള്‍ ഇംഗ്ലണ്ടിലെത്തി. രവീന്ദ്ര ജഡേജ, ശുഭ്‌മാന്‍ ഗില്‍, മുഹമ്മദ് ഷമി, അജിങ്ക്യ രഹാനെ, കെ എസ് ഭരത് എന്നീ താരങ്ങളാണ് ഐപിഎല്‍ ഫൈനല്‍ കഴിഞ്ഞ് ഇന്ത്യന്‍ സ്‌ക്വാഡിനൊപ്പം സസെക്‌സില്‍ ചേര്‍ന്നത്. ഇവര്‍ വ്യാഴാഴ്‌ച പരിശീലനം ആരംഭിക്കും. ഇവരെല്ലാം ഐപിഎല്‍ ഫൈനല്‍ കളിച്ച താരങ്ങളാണ്. ഐപിഎല്‍ ഫൈനല്‍ കളിച്ച ഗില്ലും ഷമിയും ഭരതും ഗുജറാത്ത് ടൈറ്റന്‍സിന്‍റെയും രഹാനെ, ജഡേജ എന്നിവര്‍ ചെന്നൈ സൂപ്പര്‍ കിംഗ്‌സിന്‍റേയും താരങ്ങളാണ്.

ഇന്ത്യന്‍ മുഖ്യ പരിശീലകന്‍ രാഹുല്‍ ദ്രാവിഡിന് കീഴില്‍ നായകന്‍ രോഹിത് ശര്‍മ്മയും സ്റ്റാര്‍ ബാറ്റര്‍ വിരാട് കോലിയും സ്‌പിന്നര്‍ രവിചന്ദ്രന്‍ അശ്വിനും അടക്കമുള്ള താരങ്ങള്‍ ഇതിനകം പരിശീലനം തുടങ്ങിയിട്ടുണ്ട്. കോലിയും രോഹിത്തും ഏറെ നേരം നെറ്റ്‌സില്‍ ബാറ്റ് ചെയ്‌തപ്പോള്‍ അശ്വിനും അക്‌സര്‍ പട്ടേലും ഷര്‍ദുല്‍ താക്കൂറും മുഹമ്മദ് സിറാജും ബൗളിംഗ് പരിശീലനം നടത്തി. ഇന്ത്യയില്‍ നിന്ന് വ്യത്യസ്തമായ സാഹചര്യമാണ് ഓവലിലേത് എന്നതിനാല്‍ ഐപിഎല്ലില്‍ പ്ലേ ഓഫ് കാണാതെ പുറത്തായ ടീമുകളിലെ താരങ്ങള്‍ ഉടന്‍ തന്നെ ഇംഗ്ലണ്ടിലെത്തുകയായിരുന്നു. വിവിധ സംഘങ്ങളായായിരുന്നു ഇന്ത്യന്‍ ടീമിന്‍റെ യാത്ര. ജൂണ്‍ ഏഴിന് ആരംഭിക്കുന്ന ഫൈനലിന് മുമ്പ് ഇന്ത്യന്‍ ടീമിന് വാംഅപ് മത്സരങ്ങള്‍ കാണില്ല. ഇന്‍ട്രാ-സ്‌ക്വാഡ് മത്സരങ്ങള്‍ കളിക്കുന്നതിലാണ് രോഹിത് ശര്‍മ്മയും സംഘവും ശ്രദ്ധ പതിപ്പിക്കുക.

തുടര്‍ച്ചയായ രണ്ടാം വട്ടമാണ് ടീം ഇന്ത്യ ലോക ടെസ്റ്റ് ചാമ്പ്യന്‍ഷിപ്പിന്‍റെ ഫൈനലില്‍ കളിക്കുന്നത്. കഴിഞ്ഞ സീസണില്‍ ഇന്ത്യയെ തോല്‍പിച്ച് ന്യൂസിലന്‍ഡ് ചാമ്പ്യന്‍മാരായിരുന്നു. ശക്തമായ സ്‌ക്വാഡിനെയാണ് ഫൈനലിനായി പ്രഖ്യാപിച്ചിരിക്കുന്നത് എങ്കിലും അന്തിമ ഇലവനില്‍ വിക്കറ്റ് കീപ്പറുടെ തെരഞ്ഞെടുപ്പ് അടക്കം ടീമിന് വെല്ലുവിളികള്‍ മുന്നിലുണ്ട്. എത്ര സ്‌പിന്നറെ കളിപ്പിക്കും എന്നതാണ് മറ്റൊരു പ്രധാന ചോദ്യം.

Read more: 'കരുതിയിരുന്നോ ഫൈനലില്‍ ഓസ്‌ട്രേലിയ, ഹിറ്റ്‌മാന്‍റെ സെഞ്ചുറി ലോഡിംഗ്'- വീഡിയോ

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

ഐപിഎല്‍ 2023ലെ ഏറ്റവും സ്ഥിരതയാര്‍ന്ന ടീമിന്‍റെ പേരുമായി ടോം മൂഡി; അത് സിഎസ്‌കെ അല്ല

Web Team — Thu, 01 Jun 2023 16:01:31 +0530

അഹമ്മദാബാദ്: ഐപിഎല്‍ ചരിത്രത്തിലെ ഏറ്റവും മികച്ച സീസണാണ് ഇത്തവണത്തേത് എന്ന വിലയിരുത്തലുകളുണ്ട്. വാശിയേറിയ മത്സരങ്ങളും ഒട്ടേറെ യുവതാരങ്ങളുടെ വരവറിയിക്കലും ചെന്നൈ സൂപ്പര്‍ കിംഗ്‌സിന്‍റെ അഞ്ചാം കിരീട നേട്ടവുമെല്ലാം സീസണിന്‍റെ മേന്‍മയായി പലരും കണക്കാക്കുന്നു. ഓസ്ട്രേലിയന്‍ ഇതിഹാസം ടോം മൂഡിയുടെ അഭിപ്രായത്തില്‍ ഐപിഎല്‍ 2023ല്‍ ഏറ്റവും സ്ഥിരതയാര്‍ന്ന പ്രകടനം കാഴ്‌ചവെച്ച ടീം ഗുജറാത്ത് ടൈറ്റന്‍സാണ്. കിരീടപോരാട്ടത്തില്‍ സിഎസ്‌കെയോട് തോറ്റെങ്കിലും സീസണിലെ ഏറ്റവും മികച്ച സംഘം ഹാര്‍ദിക് പാണ്ഡ്യയും കൂട്ടരുമാണ് എന്ന് മൂഡി വിലയിരുത്തുന്നു.

ഫൈനലില്‍ ഗുജറാത്ത് ടൈറ്റന്‍സ് തോറ്റത് എന്നെ അത്ഭുതപ്പെടുത്തി. അവരായിരുന്നു എന്‍റെ ഫേവറൈറ്റ് ടീം. എല്ലാ ഡിപാര്‍ട്‌മെന്‍റിലും മികച്ച താരങ്ങളുണ്ടായിരുന്നു. അവരുടെ ബാറ്റിംഗ് വളരെ ശക്തവും ആഴമുള്ളതുമായിരുന്നു. ഈ സീസണില്‍ ഏറ്റവും സ്ഥിരത കാണിച്ച ടീം ടൈറ്റന്‍സാണ്. കൂടുതല്‍ മത്സരങ്ങള്‍ ജയിച്ചതും ഗുജറാത്താണ്. പ്ലേ ഓഫിലെത്തിയ ശേഷം സിഎസ്‌കെയോട് ക്വാളിഫയര്‍ ഒന്നില്‍ ടൈറ്റന്‍സ് 15 റണ്ണിന് തോറ്റു. ഇതിന് ശേഷം ഫൈനലിലെത്താനുള്ള രണ്ടാം അവസരത്തില്‍ മുംബൈ ഇന്ത്യന്‍സിനെ രണ്ടാം ക്വാളിഫയറില്‍62 റണ്‍സിന് തോല്‍പിച്ചു. അടുത്ത കിരീടവും നേടുന്നതിലായിരുന്നു ഫൈനലില്‍ ചെന്നൈ സൂപ്പര്‍ കിംഗ്‌സിന്‍റെ കണ്ണുകള്‍ എല്ലാം എന്നും ടോം മൂഡി കൂട്ടിച്ചേര്‍ത്തു.

അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ ഗുജറാത്ത് ടൈറ്റന്‍സിനെ മഴനിയമ പ്രകാരം അഞ്ച് വിക്കറ്റിന് തോല്‍പിച്ച് എം എസ് ധോണിയുടെ സിഎസ്‌കെ അഞ്ചാം കിരീടം ഉയര്‍ത്തുകയായിരുന്നു. മഴ കാരണം 15 ഓവറില്‍ 171 ആയി പുതുക്കി നിശ്ചയിക്കപ്പെട്ട വിജയലക്ഷ്യത്തിലേക്ക് ബാറ്റേന്തിയ ചെന്നൈ ഇന്നിംഗ്സിലെ അവസാന പന്തുകളില്‍ രവീന്ദ്ര ജഡേജയുടെ സിക്‌സറും ഫോറുമായി 5 വിക്കറ്റ് നഷ്‌ടത്തില്‍ ജയം സ്വന്തമാക്കി. നിലവിലെ ചാമ്പ്യന്‍മാരായ ഗുജറാത്ത് ടൈറ്റന്‍സിനെ തോല്‍പിച്ചതോടെ അഞ്ച് കിരീടങ്ങള്‍ എന്ന മുംബൈ ഇന്ത്യന്‍സ് ക്യാപ്റ്റന്‍ രോഹിത് ശർമ്മയുടെ റെക്കോർഡിന് എം എസ് ധോണി ഒപ്പമെത്തിയിരുന്നു.

Read more: ധോണിയുടെ കാല്‍മുട്ടിലെ ചികില്‍സ, വിരമിക്കല്‍; അഭ്യൂഹങ്ങളോട് പ്രതികരിച്ച് സിഎസ്‌കെ സിഇഒ

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

ടി20 ലോകകപ്പില്‍ കോലി പാകിസ്ഥാനെതിരെ നേടിയത് പോലെ! ഐപിഎല്‍ ഫൈനലിലെ റായുഡുവിന്റെ സിക്‌സിനെ പുകഴ്ത്തി കൈഫ്

Web Team — Wed, 31 May 2023 20:00:55 +0530

ദില്ലി: ഐപിഎല്ലില്‍ ഗുജറാത്ത് ടൈറ്റന്‍സിനെതിരായ ഫൈനലില്‍ ചെന്നൈ സൂപ്പര്‍ കിംഗ്‌സിനെ ജയിപ്പിക്കുന്നതില്‍ നിര്‍ണായക പ്രകടനം പുറത്തെടുത്ത താരമാണ് അമ്പാട്ടി റായുഡു. കരിയറിലെ തന്റെ അവസാന മത്സരത്തില്‍ എട്ട് പന്തുകള്‍ മാത്രാണ് റായുഡു നേരിട്ടത്. എന്നാല്‍ വിലപ്പെട്ട 19 റണ്‍സ് കൂട്ടിചേര്‍ക്കാന്‍ റായുഡുവിനായി. രണ്ട് സിക്‌സും ഒരു ഫോറും ഉള്‍പ്പെടുന്നതായിരുന്നു റായുഡുവിന്റെ ഇന്നിംഗ്‌സ്. ടൂര്‍ണമെന്റിലുടനീളം മനോഹരമായി പന്തെറിഞ്ഞ മോഹിത് ശര്‍മക്കെതിരായാണ് റായുഡു ബൗണ്ടറികള്‍ പായിച്ചത്.

റായുഡുവിന്റെ സിക്‌സിനെ പ്രകീര്‍ത്തിക്കുകയാണിപ്പോള്‍ മുന്‍ ഇന്ത്യന്‍ താരം മുഹമ്മദ് കൈഫ്. ടൂര്‍ണമെന്റിലെ ഷോട്ടെന്നാണ് കൈഫ് വിശേഷിപ്പിച്ചത്. ഇക്കഴിഞ്ഞ ടി20 ലോകകപ്പില്‍ വിരാട് കോലി പാക്കിസ്ഥാനെതിരെ നേടിയ സിക്‌സിന് സമാനമാണെന്നും കൈഫ് പറയുന്നു. അദ്ദേഹത്തിന്റെ വാക്കുകള്‍... ''ഈ ടൂര്‍ണമെന്റിലെ ഏറ്റവും മികച്ച ഷോട്ടായിരുന്നു റായുഡുവിന്റേത്. ടി20 ലോകകപ്പില്‍ പാകിസ്ഥാനെതിരെ മെല്‍ബണില്‍ നടന്ന മത്സരത്തില്‍ കോലി നേടിയ സിക്‌സിന് സമാനമായിരുന്നു ഷോട്ട്. നേടിയത് ചെറിയ സ്‌കോറെങ്കില്‍ പോലും റായുഡുവിന്റെ ഇന്നിംഗ്‌സ് പ്രാധാന്യമുണ്ടായിരുന്നു. വിജയത്തിലൂടെ റായുഡുവിന് മികച്ച രീതിയില്‍ കരിയര്‍ അവസാനിപ്പിക്കാനും സാധിച്ചു.'' കൈഫ് പറഞ്ഞു.

മത്സരത്തില്‍ അഞ്ച് വിക്കറ്റിനായിരുന്നു ചെന്നൈയുടെ ജയം. ടോസ് നഷ്ടപ്പെട്ട് ബാറ്റിംഗിനെത്തിയ ഗുജറാത്ത് ടൈറ്റന്‍സ് നിശ്ചിത ഓവരില്‍ നാല് വിക്കറ്റ് നഷ്ടത്തില്‍ 214 റണ്‍സാണ് നേടിയത്. മറുപടി ബാറ്റിംഗിനിടെ മഴയെത്തി. ഇതോടെ ചെന്നൈയുടെ വിജയക്ഷ്യം 15 ഓവറില്‍ 171 റണ്‍സായി പുനര്‍നിശ്ചയിക്കപ്പെട്ടു.

മെസിയെ ബാഴ്‌സയില്‍ തിരിച്ചെത്തിക്കാന്‍ സാധ്യമായതെല്ലാം ചെയ്യും; ആരാധകര്‍ക്ക് പ്രതീക്ഷ നല്‍കി സാവി

അവസാന രണ്ട് പന്തുകളിലാണ് ചെന്നൈ ജയം പിടിച്ചത്. മോഹിത്തിന്റെ അവസാന രണ്ട് പന്തുകള്‍ രവീന്ദ്ര ജഡേജ സിക്‌സും ഫോറും പായിക്കുകയായിരുന്നു. ചെന്നൈയുടെ അഞ്ചാം ഐപിഎല്‍ കിരീടമായിരുന്നത്.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

ഐപിഎല്ലിനെ വെല്ലാനൊരു ലീഗില്ല, മത്സരങ്ങളുടെ എണ്ണം ഉയര്‍ന്നേക്കും; സന്തോഷ വാര്‍ത്തകളുമായി അരുണ്‍ ധുമാല്‍

Web Team — Thu, 01 Jun 2023 16:57:09 +0530

മുംബൈ: ക്രിക്കറ്റ് ലോകത്തെ മിക്ക രാജ്യങ്ങളും ട്വന്‍റി 20 ഫ്രാഞ്ചൈസി ക്രിക്കറ്റ് ആരംഭിക്കുന്നതില്‍ സന്തോഷമെന്ന് ഐപിഎല്‍ ചെയര്‍മാന്‍ അരുണ്‍ ധുമാല്‍. എന്നാല്‍ മറ്റൊരു ലീഗും ഐപിഎല്ലിനോട് കിടപിടിക്കുന്നതല്ല എന്നും മറ്റൊരു ഫ്രാഞ്ചൈസി ക്രിക്കറ്റുമായും കിടമത്സരം ഇല്ലെന്നും അദേഹം വാര്‍ത്താ ഏജന്‍സിയായ റോയിട്ടേഴ്‌സിനോട് വ്യക്തമാക്കി.

'ആരെയും ഞങ്ങള്‍ മത്സരാര്‍ഥികളായി കാണുന്നില്ല. മറ്റേത് ട്വന്‍റി 20 ലീഗും ഐപിഎല്ലിനൊപ്പം വരില്ല. എല്ലാ ക്രിക്കറ്റ് ബോര്‍ഡുകളും ട്വന്‍റി 20 ലീഗുകള്‍ ആരംഭിക്കുന്നതിന് ആശംസകള്‍ നേരുന്നു. എങ്കിലും ഒരു ലീഗും ഐപിഎല്ലിന് വെല്ലുവിളിയാണ് എന്ന് കരുതുന്നില്ല. ഐപിഎല്ലിന്‍റേത് വിസ്‌മയാവഹമായ വിജയമാണ്. ആരാധകരില്‍ നിന്ന് മികച്ച പ്രതികരണമാണ് ലഭിക്കുന്നത്. ടെലിവിഷനിലും ഡിജിറ്റലിലും ആരാധകപിന്തുണ ഏറുന്നു. സ്റ്റേഡിയങ്ങളിലും ആരാധകരുടെ വലിയ പിന്തുണ കിട്ടി. കൂടുതല്‍ മത്സരങ്ങള്‍ അവസാന ഓവര്‍ ത്രില്ലറിലേക്ക് നീങ്ങിയത് ഐപിഎല്‍ ആവേശമാക്കി. വരും സീസണുകളില്‍ ഐപിഎല്‍ കൂടുതല്‍ മികച്ചതും കാണികളുടെ പിന്തുണയുള്ളതുമായാണ് മാറുക. ഐസിസിയുടെ ഫ്യൂച്ചര്‍ ടൂര്‍ പ്രോഗ്രാമില്‍ പ്രത്യേക കാലയളവ് ലഭിച്ചാല്‍ ഐപിഎല്‍ മത്സരങ്ങളുടെ എണ്ണം 74ല്‍ നിന്ന് 94ലേക്ക് ഉയര്‍ന്നേക്കാം. തീരുമാനം എടുക്കുന്നതിന് മുമ്പ് ഫ്രാഞ്ചൈസികളുടെയും ഉടമകളുടേയും അഭിപ്രായം ഇക്കാര്യത്തില്‍ തേടും. എന്തായാലും അടുത്ത ഐപിഎല്‍ സീസണിന് 10 മാസം അവശേഷിക്കുന്നുണ്ട്. അതിനാല്‍ ഏറെ ചര്‍ച്ചകള്‍ നടക്കേണ്ടിയിരിക്കുന്നു' എന്നും അരുണ്‍ ധുമാല്‍ പറഞ്ഞു.

ഐപിഎല്ലിനൊപ്പം ഓസ്ട്രേലിയ, ഇംഗ്ലണ്ട്, പാകിസ്ഥാന്‍, വെസ്റ്റ് ഇന്‍ഡീസ് ബോര്‍ഡുകള്‍ക്ക് നേരത്തെ തന്നെ ട്വന്‍റി 20 ഫ്രാഞ്ചൈസി ക്രിക്കറ്റുണ്ടായിരുന്നു. പുതുതായി യുഎഇയിലും ദക്ഷിണാഫ്രിക്കയിലും ഈ വര്‍ഷം ടൂര്‍ണമെന്‍റ് തുടങ്ങി. കൂടുതല്‍ ബോര്‍ഡുകള്‍ ടി20 ഫ്രാഞ്ചൈസി ക്രിക്കറ്റുകള്‍ ആരംഭിക്കുന്നത് പരിഗണിക്കുന്നുണ്ട്.

Read more: ലാന്‍സ് ക്ലൂസ്‌നര്‍ പരിശീലകനായി ഇന്ത്യയിലേക്ക്; സ്വന്തമാക്കിയത് ത്രിപുര ക്രിക്കറ്റ് ടീം

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

ധോണി നയിക്കും! ഗുജറാത്തിന്‍റെ അഞ്ച് താരങ്ങള്‍; കോലിയും രോഹിത്തുമില്ലാതെ ഓസീസ് ഇതിഹാസത്തിന്‍റെ ഐപിഎല്‍ ടീം

Web Team — Thu, 01 Jun 2023 09:43:12 +0530

അഹമ്മദാബാദ്: ഐപിഎല്‍ സീസണിലെ ഓള്‍ സ്റ്റാര്‍ ഇലവനെ തെരഞ്ഞെടുത്ത് മുന്‍താരവും കമന്റേറ്ററുമായ മാത്യു ഹെയ്ഡന്‍. റണ്‍വേട്ടക്കാരില്‍ ആദ്യ അഞ്ചിലുള്ള റോയല്‍ ചലഞ്ചേഴ്‌സ് ബാംഗ്ലൂര്‍ മുന്‍ ക്യാപ്റ്റന്‍ വിരാട് കോലി, മുംബൈ ഇന്ത്യന്‍സ് നായകന്‍ രോഹിത് ശര്‍മ എന്നിവര്‍ക്കൊന്നും ഹെയ്ഡന്റെ ടീമില്‍ ഇടംപിടിക്കാനായില്ല. ചെന്നൈ സൂപ്പര്‍ കിംഗ്‌സിനെ ചാംപ്യന്മാരാക്കിയ എം എസ് ധോണിയാണ് ടീമിനെ നയിക്കുന്നത്. രാജസ്ഥാന്‍ റോയല്‍സിന്റെ ഓപ്പണര്‍ യഷസ്വീ ജെയ്‌സ്വാളും ടീമിലില്ല.

ഈ സീസണില്‍ തകര്‍ത്തടിച്ച ഗുജറാത്ത് ടൈറ്റന്‍സിന്റെ ശുഭ്മാന്‍ ഗില്ലും ചെന്നൈ സൂപ്പര്‍ കിംഗ്‌സിന്റെ റുതുരാജ് ഗെയ്ക്‌വാദുമാണ് ഓപ്പണര്‍മാര്‍. മൂന്നാമനായി റോയല്‍ ചലഞ്ചേഴ്‌സ് ബാംഗ്ലൂര്‍ നായകന്‍ ഫാഫ് ഡുപ്ലെസി. നാലാം സ്ഥാനത്തില്‍ സംശയങ്ങളൊന്നുമില്ല. മുംബൈ ഇന്ത്യന്‍സിന്റെ സൂര്യകുമാര്‍ യാദവ് ഉറപ്പിച്ചു. തൊട്ടുപിന്നാലെ മുംബൈയുടെ ഓസ്‌ട്രേലിയന്‍ ഓള്‍റൗണ്ടര്‍ കാമറൂണ്‍ ഗ്രീനും. ഫൈനലില്‍ ഗുജറാത്തിനെതിരെ ചെന്നൈയെ വിജയത്തിലേക്ക് നയിച്ച രവീന്ദ്ര ജഡേജയാണ് സ്പിന്‍ ഓള്‍റൗണ്ടല്‍.

എം എസ് ധോണിയാണ് വിക്കറ്റ് കീപ്പറും നായകനുമാവും. ഗുജറാത്ത് സ്പിന്നിര്‍ റാഷിദ് ഖാനും ടീമിലെത്തി. ബാറ്റിംഗ് മികവും അദ്ദേഹത്തിന് ഗുണം ചെയ്തു. ഗുജറാത്തിന്റെ മറ്റൊരു അഫ്ഗാന്‍ സ്പിന്നര്‍ നൂര്‍ അഹമ്മദിനും ടീമില്‍ സ്ഥാനം പിടിക്കാനായി. രണ്ട് സ്‌പെഷ്യലിസ്റ്റ് പേസര്‍മാര്‍ മുഹമ്മദ് ഷമിയും മോഹിത് ശര്‍മയും ടീമിലെത്തി. ഇരുവരും ഗുജറാത്തിന്റെ താരങ്ങളാണ്. ഗുജറാത്ത് ക്യാപ്റ്റന്‍ ഹാര്‍ദിക് പാണ്ഡ്യയ്ക്കും ടീമിലിടം കണ്ടെത്താനായില്ല.

അണ്ടര്‍ 20 ലോകകപ്പില്‍ അര്‍ജന്റൈന്‍ ദുരന്തം! നൈജീരിയക്ക് മുന്നില്‍ നാണംകെട്ടു; കാനറികള്‍ ക്വാര്‍ട്ടറിലേക്ക്

അഞ്ച് ഗുജറാത്ത് താരങ്ങള്‍ ടീമിലെത്തി. ചെന്നൈയുടെ മൂന്ന് താരങ്ങളും ഹെയ്ഡന്റെ ടീമിലുണ്ട്. മുംബൈയുടെ രണ്ടും ബാംഗ്ലൂരിന്റെ ഒരു താരവും ടീമിലിടം കണ്ടെത്തി.

മാത്യൂ ഹെയ്ഡന്റെ ടീം: ശുഭ്മാന്‍ ഗില്‍, റുതുരാജ് ഗെയ്കവാദ്, ഫാഫ് ഡു പ്ലെസിസ്, സൂര്യകുമാര്‍ യാദവ്, കാമറൂണ്‍ ഗ്രീന്‍, രവീന്ദ്ര ജഡേജ, എം എസ് ധോണി (വിക്കറ്റ് കീപ്പര്‍ / ക്യാപ്റ്റന്‍), റാഷിദ് ഖാന്‍, നൂര്‍ അഹമ്മദ്, മുഹമ്മദ് ഷമി, മോഹിത് ശര്‍മ.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

'തല' തന്നെ തലപ്പത്ത്; ഐപിഎല്ലില്‍ ധോണിയുടെ ലെഗസി മറ്റാര്‍ക്കുമില്ലെന്ന് രവി ശാസ്‌ത്രി

Web Team — Wed, 31 May 2023 16:38:05 +0530

അഹമ്മദാബാദ്: ഇന്ത്യന്‍ പ്രീമിയര്‍ ലീഗില്‍ ക്യാപ്റ്റനായി അഞ്ച് കിരീടങ്ങള്‍, 250 മത്സരങ്ങള്‍, അയ്യായിരത്തിലേറെ റണ്‍സ്. ഐപിഎല്ലില്‍ മറ്റാര്‍ക്കും എത്തിപ്പിടിക്കാനില്ലാത്ത ഉയരത്തിലാണ് ചെന്നൈ സൂപ്പര്‍ കിംഗ്‌സിന്‍റെ എം എസ് ധോണി എന്ന പടനായകന്‍. 41-ാം വയസിലും ഐപിഎല്‍ കിരീടം ഉയര്‍ത്താന്‍ മറ്റൊരു നായകന്‍ ഉണ്ടാകുമോ ഐപിഎല്ലില്‍ എന്ന് കാത്തിരുന്ന് തന്നെ അറിയണം. ഇതുതന്നെയാണ് ഇന്ത്യന്‍ മുന്‍ താരവും കമന്‍റേറ്ററുമായ രവി ശാസ്‌ത്രി പറയുന്നത്. ഐപിഎല്ലില്‍ എം എസ് ധോണിയുടെ ലെഗസിയുമായി താരതമ്യം ചെയ്യാന്‍ പോലും മറ്റാരെയുമാവില്ല എന്നാണ് ശാസ്‌ത്രിയുടെ നിരീക്ഷണം.

'ഐപിഎല്ലിലെ ധോണിയുടെ ലെഗസിക്കൊപ്പം മറ്റാര്‍ക്കും എത്താനാവില്ല. ചെന്നൈയിലും തമിഴ്‌നാടിലും 'തല' എന്നാണ് ധോണി അറിയപ്പെടുന്നത്. ഝാർഖണ്ഡില്‍ നിന്നുള്ള ഒരാള്‍ക്ക് ദക്ഷിണേന്ത്യയില്‍ സിഎസ്‌കെ ആരാധകരില്‍ നിന്ന് ലഭിക്കുന്ന സ്നേഹവും ബഹുമാനവും എം എസ് ധോണിയുടെ മഹത്വം വ്യക്തമാക്കുന്നു' എന്നും ശാസ്‌ത്രി കൂട്ടിച്ചേര്‍ത്തു. ഐപിഎല്‍ ചരിത്രത്തില്‍ മുംബൈ ഇന്ത്യന്‍സിന്‍റെ രോഹിത് ശര്‍മ്മയ്‌ക്ക് ശേഷം അഞ്ച് കിരീടമുള്ള ഏക ക്യാപ്റ്റനാണ് സിഎസ്‌കെയുടെ എം എസ് ധോണി. 2010, 2011, 2018, 2021, 2023 വര്‍ഷങ്ങളിലാണ് ധോണിയുടെ ക്യാപ്റ്റന്‍സിയില്‍ ചെന്നൈ സൂപ്പര്‍ കിംഗ്‌സ് കിരീടം സ്വന്തമാക്കിയത്.

ഐപിഎല്‍ പതിനാറാം സീസണിന്‍റെ ഫൈനലില്‍ എതിരാളികളുടെ ഹോം മൈതാനത്ത് ഗുജറാത്ത് ടൈറ്റന്‍സിനെ മഴനിയമ പ്രകാരം അഞ്ച് വിക്കറ്റിന് തോല്‍പിച്ച് എം എസ് ധോണിയും സിഎസ്‌കെയും കിരീടം ഉയര്‍ത്തുകയായിരുന്നു. മഴ കാരണം 15 ഓവറില്‍ 171 ആയി പുതുക്കി നിശ്ചയിക്കപ്പെട്ട വിജയലക്ഷ്യത്തിലേക്ക് ബാറ്റേന്തിയ സിഎസ്കെ ഇന്നിംഗ്സിലെ അവസാന പന്തുകളില്‍ രവീന്ദ്ര ജഡേജയുടെ സിക്‌സറും ഫോറുമായി 5 വിക്കറ്റ് നഷ്‌ടത്തില്‍ ജയം സ്വന്തമാക്കി. നിലവിലെ ചാമ്പ്യന്‍മാരായ ഗുജറാത്ത് ടൈറ്റന്‍സിനെ തോല്‍പിച്ചതോടെ അഞ്ച് കിരീടങ്ങള്‍ എന്ന മുംബൈ ഇന്ത്യന്‍സ് ക്യാപ്റ്റന്‍ രോഹിത് ശർമ്മയുടെ റെക്കോർഡിന് എം എസ് ധോണി ഒപ്പമെത്തി. ഐപിഎല്‍ കരിയറില്‍ അഞ്ച് കിരീടങ്ങള്‍ക്കൊപ്പം 250 കളികളില്‍ 38.79 ശരാശരിയിലും 135.92 സ്ട്രൈക്ക് റേറ്റിലും 24 ഫിഫ്റ്റികളോടെ 5082 റണ്‍സ് ധോണിക്കുണ്ട്.

Read more: ഐപിഎല്ലിലെ ധോണിയുടെ ഭാവി; ക്ലാസിക്ക് മറുപടിയുമായി ശിവം ദുബെ

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

ധോണിയുടെ കാല്‍മുട്ടിലെ ചികില്‍സ, വിരമിക്കല്‍; അഭ്യൂഹങ്ങളോട് പ്രതികരിച്ച് സിഎസ്‌കെ സിഇഒ

Web Team — Wed, 31 May 2023 21:22:33 +0530

ചെന്നൈ: ചെന്നൈ സൂപ്പര്‍ കിംഗ്‌സ് നായകന്‍ എം എസ് ധോണിയുടെ കാല്‍മുട്ടിലെ പരിക്കും വിരമിക്കല്‍ അഭ്യൂഹങ്ങളും ആരാധകരെ ആശങ്കയിലാഴ്‌ത്തിയിരിക്കേ പ്രതികരണവുമായി സിഎസ്‌കെ സിഇഒ കാശി വിശ്വനാഥന്‍. കാല്‍മുട്ടില്‍ ശസ്‌ത്രക്രിയ വേണമോ എന്ന് വിദഗ്‌ധ ഉപദേശം ആരാഞ്ഞ ശേഷം ധോണി തീരുമാനം കൈക്കൊള്ളും, അടുത്ത സീസണില്‍ ധോണി കളിക്കുമോ എന്ന ചര്‍ച്ചകള്‍ക്കൊന്നും ഇപ്പോള്‍ പ്രസക്തിയില്ല എന്നുമാണ് കാശി വിശ്വനാഥന്‍റെ പ്രതികരണം.

ഇടത് കാല്‍മുട്ടിലെ പരിക്കുമായാണ് ഐപിഎല്‍ 2023 സീസണ്‍ നാല്‍പ്പത്തിയൊന്നുകാരനായ എം എസ് ധോണി കളിച്ചത്. എല്ലാ മത്സരങ്ങളിലും വിക്കറ്റ് കീപ്പറുടെ ഗ്ലൗ അണിഞ്ഞ താരം കാര്യമായി റണ്‍സ് കണ്ടെത്തിയില്ലെങ്കിലും ബാറ്റിംഗിന് ഇറങ്ങി. കിരീടവുമായി സിഎസ്‌കെ പതിനാറാം സീസണ്‍ അവസാനിപ്പിച്ചതിന് പിന്നാലെ ആരാധകരെ തേടിയെത്തിയ വാര്‍ത്ത ധോണി കാല്‍മുട്ടില്‍ ശസ്‌ത്രക്രിയക്ക് വിധേയനാവാന്‍ പോകുന്നു എന്നതാണ്. ഈ റിപ്പോര്‍ട്ടുകളോട് സിഎസ്‌കെ സിഇഒ പ്രതികരിച്ചു. 'ഇടത്തേ കാല്‍മുട്ടിലെ പരിക്കിന് ധോണി വിദഗ്‌ധ ഉപദേശം തേടും എന്നത് സത്യമാണ്. പരിശോധനാ ഫലം വന്ന ശേഷം മാത്രമേ ശസ്‌ത്രക്രിയ വേണ്ടിവരുമോ എന്ന് വ്യക്തമാകൂ. ശസ്‌ത്രക്രിയ നടത്തണോ എന്നത് ധോണിയുടെ പരിധിയില്‍ വരുന്ന തീരുമാനമാണ്. സത്യസന്ധമായി പറയാല്ലോ ധോണിയുടെ വിരമിക്കലിനെ കുറിച്ച് നമ്മളിപ്പോള്‍ ചിന്തിക്കുന്നില്ല. ആ ഘട്ടത്തില്‍ നാമിപ്പോള്‍ എത്തിയിട്ടില്ല. എപ്പോള്‍ വിരമിക്കണം എന്ന് തീരുമാനിക്കേണ്ടത് ധോണിയാണ്. ടീം സ്‌പിരിറ്റിനാലാണ് കപ്പ് എടുത്തത്. എല്ലാ താരങ്ങള്‍ക്കും അവരുടെ ചുമതകള്‍ നന്നായി അറിയാം. സിഎസ്‌കെയില്‍ എല്ലാം സുഗമമായി നടത്തുന്നത് നായകന്‍ എം എസ് ധോണിയാണ്' എന്നും കാശി വിശ്വനാഥന്‍ കൂട്ടിച്ചേര്‍ത്തു.

കാല്‍മുട്ടിലെ ചികില്‍സയ്‌ക്കായി എം എസ് ധോണി മുംബൈയിലെത്തും എന്ന റിപ്പോര്‍ട്ടുകള്‍ ഇന്ന് പുറത്തുവന്നിരുന്നു. സജീവ ക്രിക്കറ്റില്‍ ഐപിഎല്ലില്‍ മാത്രം കളിക്കുന്ന ധോണി ഇതുവരെ വിരമിക്കല്‍ പ്രഖ്യാപിച്ചിട്ടില്ല. പതിനാറാം സീസണില്‍ ഗുജറാത്ത് ടൈറ്റന്‍സിനെ പരാജയപ്പെടുത്തി സിഎസ്‌കെയ്‌ക്ക് അഞ്ചാം കിരീടം സമ്മാനിച്ച ഇതിഹാസ നായകന്‍ വരും സീസണിലും ടീമില്‍ തുടരും എന്നാണ് ആരാധകരുടെ ആഗ്രഹം.

Read more: ഐപിഎല്‍ കിരീടനേട്ടത്തിന് പിന്നാലെ ധോണി ആശുപത്രിയില്‍! ലക്ഷ്യം അടുത്ത സീസണ്‍?

ധോണി നായകനാകുന്ന ടീമില്‍ സഞ്ജുവിന് ഇടമുണ്ടോ?; ഐപിഎല്ലിലെ മികച്ച ഇലവനെ തെരഞ്ഞെടുത്ത് ശ്രീശാന്ത്

Web Team — Fri, 02 Jun 2023 10:12:34 +0530

കൊച്ചി: രണ്ട് മാസം നീണ്ട ഐപിഎല്‍ പൂരം കൊടിയിറങ്ങിയെങ്കിലും ഐപിഎല്ലിലെ മികവിന്‍റെ അടിസ്ഥാനത്തില്‍ മുന്‍ താരങ്ങള്‍ മികച്ച ടീമിനെ തെരഞ്ഞെടുക്കുന്നത് തുടരുകയാണ്. ഏറ്റവും ഒടുവിലായി മലയാളി പേസര്‍ എസ് ശ്രീശാന്താണ് ഐപിഎല്ലിലെ ഏറ്റവും മികച്ച ഇലവനെ തെര‍ഞ്ഞെടുത്തിരിക്കുന്നത്. ഐപിഎല്ലില്‍ ചെന്നൈ സൂപ്പര്‍ കിംഗ്സിനെ അഞ്ചാം കിരീടത്തിലേക്ക് നയിച്ച എം എസ് ധോണിയാണ് ശ്രീശാന്തിന്‍റെ ടീമിന്‍റെയും നായകന്‍. രാജസ്ഥാന്‍ റോയല്‍സില്‍ നിന്ന് രണ്ട് താരങ്ങളും ശ്രീശാന്തിന്‍റെ ടീമിലുണ്ട്.

ഐപിഎല്ലിലെ ടോപ് സ്കോററായ ശുഭ്മാന്‍ ഗില്‍ തന്നെയാണ് ശ്രീശാന്തിന്‍റെ ടീമിലെയും ഓപ്പണര്‍. ഈ സീസണില്‍ രാജസ്ഥാന്‍ റോയല്‍സിന്‍റെ ടോപ് സ്കോററായ യശസ്വി ജയ്‌സ്വാളാണ് ഗില്ലിന്‍റെ സഹ ഓപ്പണര്‍. ആര്‍സിബി താരം വിരാട് കോലിയാണ് മൂന്നാം നമ്പറില്‍. നാലാം നമ്പറില്‍ എല്ലാവരെയും അമ്പരപ്പിച്ച് ചെന്നൈ സൂപ്പര്‍ കിംഗ്സിനായി തകര്‍ത്തടിച്ച അജിങ്ക്യാ രഹാനെയെ ആണ് ശ്രീശാന്ത് ഉള്‍പ്പെടുത്തിയത്.

സൂര്യകുമാര്‍ യാദവ് അഞ്ചാം നമ്പറിലിറങ്ങുന്ന ശ്രീശാന്തിന്‍റെ ടീമില്‍ ശിവം ദുബെയോ റിങ്കു സിംഗോ ഫിനിഷറായി ഇറങ്ങുമെന്ന് ടെലിവിഷന്‍ ചാറ്റ് ഷോയില്‍ ശ്രീശാന്ത് പറഞ്ഞു. എം എസ് ധോണിയണ് വിക്കറ്റ് കീപ്പറും നായകനുമായി എത്തുന്നത്.

ലോക ടെസ്റ്റ് ചാമ്പ്യന്‍ഷിപ്പ് ഫൈനല്‍; ഇന്ത്യയെക്കാള്‍ ഓസീസിനെ ഭയപ്പെടുത്തുന്നത് ഓവലിലെ ചരിത്രം

ബൗളര്‍മാരായി ശ്രീശാന്ത് തെരഞ്ഞെടുത്തത് വിക്കറ്റ് വേട്ടയില്‍ ഒന്നാം സ്ഥാനത്തെത്തിയ മുഹമ്മദ് ഷമിയെയും രണ്ടാം സ്ഥാനത്തുള്ള റാഷിദ് ഖാനെയുമാണ്. രാജസ്ഥാന്‍ റോയല്‍സ് സ്പിന്നറായ യുസ്‌വേന്ദ്ര ചാഹലാണ് രണ്ടാമത്തെ സ്പിന്നര്‍. ആര്‍സിബി താരമായ മുഹമ്മദ് സിറാജാണ് ടീമിലെ മൂന്നാം പേസര്‍. ഐപിഎല്ലില്‍ റണ്‍വേട്ടയില്‍ മുന്നിലെത്തിയ ഫാഫ് ഡൂപ്ലെസിയും റുതുരാജ് ‌ഗെയ്‌ക്വാദും ഡെവോണ്‍ കോണ്‍വെയുമൊന്നും ശ്രീശാന്തിന്‍റെ ടീമിലിടം നേടിയില്ലെന്നതും ശ്രദ്ധേയമാണ്.

ശ്രീശാന്ത് തെരഞ്ഞെടുത്ത ഐപിഎല്‍ ഇലവന്‍: യശസ്വി ജയ്‌സ്വാൾ, ശുഭ്മാൻ ഗിൽ, വിരാട് കോലി, അജിങ്ക്യ രഹാനെ, സൂര്യകുമാർ യാദവ്, ശിവം ദുബെ/റിങ്കു സിംഗ്, എംഎസ് ധോണി (ക്യാപ്റ്റന്‍), മുഹമ്മദ് ഷമി, റാഷിദ് ഖാൻ, യുസ്‌വേന്ദ്ര ചാഹൽ, മുഹമ്മദ് സിറാജ്.

ഐപിഎല്‍ കിരീടനേട്ടത്തിന് പിന്നാലെ ധോണി ആശുപത്രിയില്‍! ലക്ഷ്യം അടുത്ത സീസണ്‍?

Web Team — Thu, 01 Jun 2023 12:18:06 +0530

മുംബൈ: അഞ്ചാം ഐപിഎല്‍ കിരീടം ചെന്നൈ സൂപ്പര്‍ കിംഗ്‌സിന് നേടികൊടുത്തതിന് പിന്നാലെ ക്യാപ്റ്റന്‍ എം എസ് ധോണി ആശുപത്രിയില്‍. കാല്‍മുട്ടിനേറ്റ പരിക്കിന് പരിഹാരം തേടിയാണ് ധോണി മുംബൈയിലെ കോകിലാബെന്‍ ആശുപത്രിയിലെത്തിയത്. അദ്ദേഹം ഇന്നുതന്നെ ആശുപത്രിയില്‍ ആഡ്മിറ്റാകുമെന്നാണ് പുറത്തുവരുന്ന വിവരങ്ങള്‍. ഇടത് കാല്‍മുട്ടില്‍ കൂടുതല്‍ പരിശോധനകള്‍ നടത്താനുണ്ട്. ഈ ഐപിഎല്‍ സീസണ്‍ ഒന്നാകെ കാല്‍മുട്ടിനേറ്റ പരിക്കുമായിട്ടാണ് ധോണി കളിച്ചത്.

കാല്‍മുട്ടിന്റെ സംരക്ഷണത്തിനായി അദ്ദേഹം ഗാര്‍ഡും സ്ട്രാപ്പും ധരിച്ചിരുന്നു. ഒരു ഐപിഎല്‍ സീസണ്‍ കൂടെ കളിക്കുമെന്ന് ഗുജറാത്ത് ടൈറ്റന്‍സിനെതിരായ ഫൈനലിന് ശേഷം ധോണി വ്യക്തമാക്കിയിരുന്നു. എന്നാല്‍ ശരീരം സമ്മതിക്കുമെങ്കില്‍ മാത്രമെ കളിക്കൂവെന്നായിരുന്നു ധോണിയുടെ പക്ഷം. ആറ്- ഏഴ് മാസം സമയമുണ്ടെന്നും അതിന് ശേഷം തിരുമാനമെടുക്കുമെന്നും ധോണി വ്യക്തമാക്കിയിരുന്നു. ഫിറ്റ്‌നെസ് വീണ്ടെടുക്കുന്നതിന്റെ ഭാഗമായിട്ടാണ് അദ്ദേഹം ആശുപത്രിയില്‍ പ്രവേശിച്ചതെന്നാണ് വിലയിരുത്തല്‍.

ഫൈനലിന് ശേഷം ധോണി സംസാരിച്ചത് ഇങ്ങനെയായിരുന്നു... ''സാഹചര്യങ്ങള്‍വെച്ച് നോക്കുകയാണെങ്കില്‍ ഇതാണ് വിരമിക്കല്‍ പ്രഖ്യാപിക്കാനുള്ള ഏറ്റവും അനുയോജ്യമായ സമയം. ഏറ്റവും എളുപ്പമുള്ള കാര്യവും എല്ലാവരോടും നന്ദി പറഞ്ഞ് വിരമിക്കുക എന്നതാണ്. എന്നാല്‍ ഈ വര്‍ഷം ഞാന്‍ കളിച്ച ഇടങ്ങളിലെല്ലാം ആരാധകരില്‍ നിന്ന് എനിക്ക് ലഭിച്ച സ്‌നേഹവും പിന്തുണയും കാണുമ്പോള്‍ ബുദ്ധിമുട്ടേറിയ കാര്യം അടുത്ത ഒമ്പത് മാസവും കഠിനാധ്വാനം ചെയ്ത് അടുത്ത ഐപിഎല്ലില്‍ കൂടി കളിക്കുക എന്നതാണ്.

അവര്‍ ടീമില്‍ വേണം! ടെസ്റ്റ് ചാംപ്യന്‍ഷിപ്പ് ഫൈനലില്‍ ഇന്ത്യയുടെ എക്‌സ് ഫാക്റ്ററിനെ കുറിച്ച് പോണ്ടിംഗ്

എന്നാല്‍ അത് ശാരീരികക്ഷമത ഉള്‍പ്പെടെ മറ്റ് ഒരുപാട് കാര്യങ്ങളെ ആശ്രയിച്ചാണിരിക്കുന്നത്. എങ്കിലും ആ തീരുമാനമെടുക്കാന്‍ എനിക്ക് മുന്നില്‍ ഇനിയും ആറോ ഏഴോ മാസമുണ്ട്. ആരാധകര്‍ എന്നോട് കാണിക്കുന്ന സ്‌നേഹത്തിനും പിന്തുണക്കും അവര്‍ക്ക് നല്‍കാവുന്ന ഏറ്റവും വലിയ സമ്മാനമായിരിക്കും അടുത്ത സീസണില്‍ കൂടി അവസാനമായി കളിക്കുക എന്ന് എനിക്ക് തോന്നുന്നു. അതുകൊണ്ട് അതിനായി ഞാന്‍ കഠിനമായി ശ്രമിക്കും.'' ധോണി പറഞ്ഞു.

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

ഈഡന്‍ ഗാര്‍ഡന്‍സിനെ കണ്ട് പഠിക്കൂ, നരേന്ദ്ര മോദി സ്റ്റേഡിയത്തിലെ വെള്ളക്കെട്ട് മാറ്റാം; നിര്‍ദേശം

Web Team — Wed, 31 May 2023 20:29:39 +0530

കൊല്‍ക്കത്ത: ഐപിഎല്‍ പതിനാറാം സീസണിലെ ഫൈനലിന് വേദിയായ അഹമ്മദാബാദിലെ നരേന്ദ്ര മോദി സ്റ്റേഡിയത്തിലെ മഴകവച സംവിധാനം വലിയ വിമര്‍ശനം നേരിട്ടിരുന്നു. ഫൈനല്‍ റിസര്‍വ് ദിനത്തിലേക്ക് നീട്ടിയപ്പോള്‍ രണ്ടാംദിനം മത്സരത്തിനിടെ പെയ്‌ത മഴയ്‌ക്ക് ശേഷം മണിക്കൂറുകള്‍ വേണ്ടിവന്നു സ്റ്റേഡ‍ിയം ഉണക്കി വീണ്ടും മത്സര യോഗ്യമാക്കാന്‍. ലോകത്തിലെ അതിസമ്പന്നമായ ക്രിക്കറ്റ് ബോര്‍ഡിന്‍റെ ഏറ്റവും വലിയ സ്റ്റേഡിയത്തില്‍ പോലും ആവശ്യമായ സംവിധാനങ്ങളില്ല എന്നായിരുന്നു ആരാധകരുടെ വിമര്‍ശനം. കൊല്‍ക്കത്ത ഈഡന്‍ ഗാര്‍ഡന്‍സിലെ സംവിധാനങ്ങള്‍ അഹമ്മദാബാദിലും ഒരുക്കുകയാണ് വേണ്ടത് എന്നാണ് ബംഗാള്‍ ക്രിക്കറ്റ് അസോസിയേഷന്‍ പ്രസിഡന്‍റ് സ്നേഹാശിഷ് ഗാംഗുലിയുടെ നിരീക്ഷണം.

'വശത്തുള്ള പരിശീലന വിക്കറ്റുകള്‍ നനഞ്ഞുകിടന്നതിലാണ് മത്സരം പുനരാരംഭിക്കാന്‍ വൈകിയത്. അഹമ്മദാബാദിലേത് പുതിയ സ്റ്റേഡിയമാണ്. ഈ പ്രശ്‌നം വേഗം പ്രതികരിക്കുമെന്ന് പ്രതീക്ഷ. ഗ്രൗണ്ട് പൂര്‍ണമായും മറച്ചാല്‍ പ്രശ്‌നങ്ങളൊന്നുമുണ്ടാവില്ല. ലോകകപ്പിന് മുമ്പ് പ്രശ്‌നങ്ങളെല്ലാം പരിഹരിക്കപ്പെടുമെന്ന് കരുതുന്നു. ഈഡന്‍ ഗാര്‍ഡന്‍സിലെ പോലെ ഗ്രൗണ്ട് പൂര്‍ണമായും മറയ്‌ക്കാന്‍ കഴിഞ്ഞാല്‍ എല്ലാ പ്രശ്‌നങ്ങളും പരിഹരിക്കപ്പെടും. രണ്ട് വര്‍ഷം മുമ്പ് ഇതിനായി ഈഡനില്‍ ഏകദേശം 80 ലക്ഷം രൂപയാണ് ചിലവായത്. ഇങ്ങനെ ചെയ്‌താല്‍ മൈതാനത്തിന് ഇരട്ടി സുരക്ഷയുണ്ടാകും' എന്നും സ്നേഹാശിഷ് ഗാംഗുലി വാര്‍ത്താ ഏജന്‍സിയായ പിടിഐയോട് പറഞ്ഞു. പൂര്‍ണമായും മൂടി മഴകവച സംവിധാനമുള്ള ഇന്ത്യയിലെ ആദ്യ ക്രിക്കറ്റ് സ്റ്റേഡിയമാണ് ഈഡനിലേക്. ഐപിഎല്‍ 2023 സീസണിലെ ഏറ്റവും മികച്ച സ്റ്റേഡിയങ്ങളിലൊന്ന് കൂടിയായിരുന്നു ഇത്.

ഐപിഎല്‍ പതിനാറാം സീസണില്‍ ചെന്നൈ സൂപ്പർ കിംഗ്സും ഗുജറാത്ത് ടൈറ്റന്‍സും തമ്മിലുള്ള ഫൈനല്‍ മഴ കാരണം തടസപ്പെട്ടിരുന്നു. സിഎസ്കെയുടെ മറുപടി ബാറ്റിംഗ് ആരംഭിച്ചതിന് പിന്നാലെ എത്തിയ കനത്ത മഴയും കാറ്റും മത്സരം തടസപ്പെടുത്തിയപ്പോള്‍ പരിശീലന പിച്ചുകളിലെ വെള്ളക്കെട്ട് കാരണം മത്സരം ആരംഭിക്കാന്‍ ഏറെനേരം വൈകി. സ്പോഞ്ചും ബക്കറ്റും ഉപയോഗിച്ച് വെള്ളം ഒപ്പിയെടുക്കാന്‍ ഗ്രൗണ്ട് സ്റ്റാഫ് പിടിപ്പത് പണിയെടുത്തത് വലിയ വിമര്‍ശനങ്ങള്‍ക്ക് ഇടയാക്കിയിരുന്നു. മഴ കാരണം മത്സരം 15 ഓവറായി വെട്ടിച്ചുരുക്കേണ്ടിവന്നിരുന്നു.

Read more: മൈതാനം ഉണക്കാന്‍ ഇവിടെ ബക്കറ്റും സ്പോഞ്ചും തന്നെ ശരണം; ബിസിസിഐയെ പൊരിച്ച് ആരാധകർ

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

'ചെന്നൈയെ സഞ്‌ജു നയിക്കട്ടെ, ക്യാപ്‌റ്റന്‍സി സച്ചിന്റെ ബാറ്റിംഗ്‌ ഫോമിനെയും ബാധിച്ചിരുന്നു, ഒരു മാറ്റം ഗുണം ചെയ്യും'- മുന്‍ ഇന്ത്യന്‍ താരങ്ങള്‍

Web Desk — Sat, 05 Sep 2026 18:08:51 +0530

ചെന്നൈ: മഹേന്ദ്ര സിംഗ്‌ ധോണി നായകനായിരുന്നപ്പോള്‍ ഐ പി എല്ലില്‍ ചെന്നൈ സൂപ്പര്‍ കിംഗ്‌സിനുണ്ടായിരുന്ന തലയെടുപ്പ്‌ ഇപ്പോഴില്ല. അഞ്ച്‌തവണ ചാമ്പ്യന്‍മാരായ സി എസ്‌ കെ പ്രതാപം നഷ്ടപ്പെട്ട്‌ ഉഴലുകയാണ്‌. തുടരെ മൂന്ന്‌ സീസണുകളായി പ്ലേ ഓഫ്‌ കാണാതെ പുറത്താകുന്നു. നേതൃത്വം മാറാതെ രക്ഷയില്ലെന്ന അഭിപ്രായമാണ്‌ ഉയരുന്നത്‌. നായകനായ റുതുരാജ്‌ ഗെയ്‌ക്വാദിന്‌ ബാറ്റിംഗ്‌ ഫോം കൂടി നഷ്ടമായതോടെ, ലീഡര്‍ഷിപ്പ്‌ ക്വാളിറ്റിയുള്ള സഞ്‌ജു സാംസണിനെ ക്യാപ്‌റ്റന്‍ സ്ഥാനത്തേക്ക്‌ കൊണ്ടുവരണമെന്ന്‌ മുന്‍ ഇന്ത്യന്‍ താരം സദഗോപന്‍ രമേശ്‌ അഭിപ്രായപ്പെട്ടു.

രാജസ്ഥാന്‍ റോയല്‍സിനെ നയിച്ചതിന്റെ പരിചയസമ്പത്ത്‌ സഞ്‌ജുവിനുണ്ട്‌. വിക്കറ്റ്‌ കീപ്പര്‍ ബാറ്റ്‌സ്‌മാനായ സഞ്‌ജുവിന്‌ എം എസ്‌ ധോണിയെ പോലെ ടീമിനെ ലീഡ്‌ ചെയ്യാനുള്ള മികവുണ്ട്‌. 2026 ട്വന്റി20 ലോകകപ്പില്‍ പ്ലെയര്‍ ഓഫ്‌ ദ ടൂര്‍ണമെന്റായ സഞ്‌ജുവിന്റ പക്വതയാര്‍ന്ന ഇന്നിംഗ്‌സുകള്‍ ഐ പി എല്ലില്‍ ചെന്നൈ സൂപ്പര്‍ കിംഗ്‌സും ആസ്വദിച്ചിരുന്നു. ഐ പി എല്ലില്‍ ചെന്നൈയുടെ ടോപ്‌ സ്‌കോറര്‍ സഞ്‌ജുവായിരുന്നു.

ചെന്നൈ സൂപ്പര്‍ കിംസ്‌ഗ്‌ മാനേജ്‌മെന്റ്‌ പുതിയ ക്യാപ്‌റ്റനെ കണ്ടെത്തേണ്ടത്‌ അനിവാര്യതയാണ്‌. സഞ്‌ജു ഒരു ഗംഭീര താരമാണ്‌, അയാള്‍ക്കായിരിക്കണം ആദ്യ പരിഗണനയെന്നും സദഗോപന്‍ രമേശ്‌ ഇന്‍സ്റ്റഗ്രാമില്‍ എഴുതി. ഐ പി എല്ലില്‍ സഞ്‌ജുവിന്റെ ക്യാപ്‌റ്റന്‍സിറെക്കോര്‍ഡ്‌ മികച്ചതാണ്‌. രാജസ്ഥാനെ 66 മത്സരങ്ങളില്‍ നയിച്ചപ്പോള്‍ 33 ലും ജയം. അമ്പത്‌ ശതമാനം വിജയനിലവാരം. രാജസ്ഥാന്‍ റോയല്‍സിനെ ഒരിക്കല്‍ ഫൈനലിലെത്തിക്കുകയും ഒരുതവണ പ്ലേ ഓഫിലെത്തിക്കുകയും ചെയ്‌തിട്ടുണ്ട്‌ സഞ്‌ജു.

സഞ്‌ജുവിനെ സി എസ്‌ കെയുടെ ക്യാപ്‌റ്റനാക്കണമെന്ന്‌ നിര്‍ദേശിച്ച ആദ്യ വ്യക്തിയല്ല സദഗോപന്‍ രമേശ്‌. മുന്‍ സി എസ്‌ കെ, ഇന്ത്യന്‍ ബാറ്റന്‍ എസ്‌ ബദരിനാഥും റുതുരാജിനെ ക്യാപ്‌റ്റന്റെ ചുമതയില്‍ നിന്ന്‌ മാറ്റി അദ്ദേഹത്തിന്‌ ബാറ്റിംഗില്‍ ശ്രദ്ധ കേന്ദ്രീകരിക്കാന്‍ അവസരമൊരുക്കണമെന്ന്‌ ആവശ്യപ്പെട്ടിരുന്നു. റുതുരാജിനെ ക്യാപ്‌റ്റന്‍ സ്ഥാനത്ത്‌ നിന്ന്‌ മാറ്റുന്നതോടെ അദ്ദേഹത്തില്‍ നിന്ന്‌ മികച്ച പ്രകടനം കാണാം. അത്‌ അദ്ദേഹത്തിന്റെ കരിയറിനും ഗുണം ചെയ്യും. ക്യാപ്‌റ്റന്‍സിയുടെ ഭാരം സച്ചിനെ പോലെ മഹാന്‍മാരായ താരങ്ങളെ പോലും ബാധിച്ചിരുന്നുവെന്ന്‌ ഓര്‍ക്കണം - ബദരിനാഥ്‌ പറഞ്ഞു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

വിക്കറ്റ് കീപ്പര്‍ നില്‍ക്കാനായിരുന്നു താല്‍പര്യം, പക്ഷേ സഞ്ജു! വ്യക്തമാക്കി രാജസ്ഥാന്‍ താരം ധ്രുവ് ജുറല്‍

Web Team — Mon, 05 Jun 2023 13:53:08 +0530

ജയ്പൂര്‍: ഐപിഎല്‍ പതിനാറാം സീസണില്‍ രാജസ്ഥാന്‍ റോയല്‍സിനായി ഭേദപ്പെട്ട പ്രകടനമായിരുന്നു യുവതാര ധ്രുവ് ജുറലിന്റേത്. വാലറ്റത്ത് ബാറ്റിംിഗിനെത്തിയ ജുറല്‍ 13 മത്സരങ്ങളില്‍ 172.73 സ്ട്രൈക്ക് റേറ്റില്‍ 152 റണ്‍സാണ് നേടിയത്. താരത്തെ ടോപ് ഓര്‍ഡറില്‍ പരീക്ഷിക്കണമെന്ന് അഭിപ്രായങ്ങളുണ്ടായിരുന്നു. എന്നാല്‍ ഇടം ലഭിക്കുക പ്രയാസമുള്ള കാര്യമായിരുന്നു.

വിക്കറ്റ് കീപ്പര്‍ കൂടിയാണ് ജുറല്‍. എന്നാല്‍ ക്യാപ്റ്റന്‍ സഞ്ജു സാംസണ്‍ വിക്കറ്റിന് പിന്നിലുള്ളതിനാല്‍ അവസരം ലഭിച്ചില്ല. ജുറല്‍ കീപ്പിംഗ് പരിശീലനം നടത്തുന്ന വീഡിയോ രാജസ്ഥാന്‍ റോയല്‍സ് സോഷ്യല്‍ മീഡിയയില്‍ പങ്കുവച്ചിരുന്നു. എന്നാലിപ്പോള്‍ കീപ്പറാവാന്‍ താല്‍പര്യമുണ്ടെന്ന് വ്യക്തമാക്കിയിരിക്കുകയാണ് ജുറല്‍.

22 കാരനായ ജുറല്‍ പറയുന്നതിങ്ങനെ... ''അണ്ടര്‍ 19 തലത്തില്‍ ഞാന്‍ ഇന്ത്യന്‍ ടീമിനെ നയിച്ചിട്ടുണ്ട്. നായകനായുള്ള ചെറിയ പരിചയസമ്പത്ത് എനിക്കുണ്ട്. ക്യാപ്റ്റന്‍ വിക്കറ്റ് കീപ്പറാവുമ്പോള്‍ അവര്‍ക്ക് ഗ്രൗണ്ടിനെ കുറിച്ച് വ്യക്തമായ കാഴ്ച്ചപാടുണ്ടാവും. കാരണം, നമ്മള്‍ ഗ്രൗണ്ടിന്റെ മധ്യത്തിലായിരിക്കും. അതുകൊണ്ട് സഞ്ജു കീപ്പ് ചെയ്യുന്നു. ഞാനും വിക്കറ്റിന് പിന്നില്‍ നില്‍ക്കാന്‍ ആഗ്രഹിക്കുന്നു. എന്നാല്‍ അവസരം ലഭിച്ചില്ല. എങ്കിലും കളിക്കാന്‍ കഴിഞ്ഞതില്‍ ഞാന്‍ സന്തോഷവാനാണ്.'' ജുറല്‍ പറഞ്ഞു.

ഓവലില്‍ കാറ്റ് അവന് അനുകൂലം, ടെസ്റ്റ് ചാമ്പ്യന്‍ഷിപ്പ് ഫൈനലില്‍ തിളങ്ങുക ആരെന്ന് വ്യക്തമാക്കി ഗ്രെഗ് ചാപ്പല്‍

ഐപിഎല്‍ രാജസ്ഥാന്‍ റോയല്‍സ് അഞ്ചാം സ്ഥാനത്താണ് രാജസ്ഥാന്‍ റോയല്‍സ് സീസണ്‍ അവസാനിപ്പിച്ചത്. 14 മത്സങ്ങളില്‍ 14 പോയിന്റാണ് ടീമിനുണ്ടായിരുന്നത്. സീസണില്‍ നന്നായി തുടങ്ങിയെങ്കിലും പിന്നീട് പിന്നീട് ആ മികവ് നിലനിര്‍ത്താന്‍ ടീമിനായില്ല. സഞ്ജുവും ജോസ് ബട്ലറും ഫോം കണ്ടെത്താന്‍ വിഷമിച്ചത് ടീമിനെ കാര്യമായി ബാധിച്ചു. വരും സീസണില്‍ ടീമിനെ ഉടച്ചുവാര്‍ക്കാനൊരുങ്ങുകയാണ് ഉടമകള്‍. സഞ്ജുവിനെ നായകസ്ഥാനത്ത് നിന്ന് മാറ്റുമെന്ന് വാര്‍ത്തകളുണ്ടായിരുന്നു. പകരം ജോസ് ബട്‌ലറെ നായകനാക്കാനാണ് പദ്ധതി.

ഏഷ്യാനെറ്റ് ന്യൂസ് ലൈവ് യൂട്യൂബില്‍ കാണാം

ഐപിഎല്ലിലെ ധോണിയുടെ ഭാവി; ക്ലാസിക്ക് മറുപടിയുമായി ശിവം ദുബെ

Web Team — Wed, 31 May 2023 16:10:04 +0530

ചെന്നൈ: ഇനിയൊരു ഐപിഎല്‍ സീസണ്‍ കൂടി ക്യാപ്റ്റന്‍-ബാറ്റിംഗ് ഇതിഹാസം എം എസ് ധോണിക്കുണ്ടാകുമോ എന്ന കാര്യം വ്യക്തമല്ല. 42-ാം വയസിലേക്ക് കടക്കുന്ന ധോണി ഐപിഎല്‍ പതിനാറാം സീസണോടെ ഫ്രാഞ്ചൈസി ക്രിക്കറ്റ് അവസാനിപ്പിക്കും എന്നാണ് പലരും കരുതുന്നത്. എന്നാല്‍ സീസണ്‍ അവസാനിച്ചെങ്കിലും ധോണി ഇതുവരെ ഔദ്യോഗികമായി വിരമിക്കല്‍ പ്രഖ്യാപിച്ചിട്ടില്ല. ധോണിയുടെ കാര്യത്തില്‍ തന്‍റെ ആഗ്രഹം തുറന്നുപറഞ്ഞിരിക്കുകയാണ് ചെന്നൈ സൂപ്പര്‍ കിംഗ്‌സിലെ സഹതാരം ശിവം ദുബെ.

'എങ്ങനെ കളിക്കണം എന്ന കാര്യത്തില്‍ മഹി ഭായി(എം എസ് ധോണി) എനിക്ക് വ്യക്തത തന്നിരുന്നു. എന്താണ് എന്‍റെ ചുമതല എന്ന് ധോണി പറ‌‌ഞ്ഞുതന്നിരുന്നു. നേരത്തെ പുറത്തായാലും പ്രശ്‌നമില്ല, എന്നാല്‍ ഏറ്റവും മികച്ച പ്രകടനം പുറത്തെടുക്കണം എന്നായിരുന്നു ധോണിയുടെ വാക്കുകള്‍. ഇതായിരുന്നു അദേഹം പറഞ്ഞതിന്‍റെ രത്നച്ചുരുക്കം. അടുത്ത വര്‍ഷം ധോണി ഐപിഎല്ലില്‍ കളിക്കുമോ എന്ന് എനിക്കറിയില്ല. എന്നാല്‍ ധോണിയെ ഞങ്ങള്‍ക്ക് ആവശ്യമുണ്ട്. കാരണം ധോണിക്ക് കീഴില്‍ എനിക്ക് വളരാന്‍ കഴിയും' എന്നുമാണ് ദ് ഇന്ത്യന്‍ എക്‌സ്‌പ്രസിനോട് ശുവം ദുബെയുടെ വാക്കുകള്‍. പതിനാറാം സീസണിലെ 14 ഇന്നിംഗ്‌സുകളില്‍ 38.00 ശരാശരിയിലും 158.33 സ്‌ട്രൈക്ക് റേറ്റിലും 418 റണ്‍സ് ദുബെ സ്വന്തമാക്കിയിരുന്നു. 35 സിക്‌സാണ് സീസണില്‍ താരം അടിച്ചുകൂട്ടിയത്. സീസണില്‍ ഏറ്റവും കൂടുതല്‍ സിക്‌സര്‍ നേടിയ താരങ്ങളില്‍ 36 എണ്ണമുള്ള ഫാഫ് ഡുപ്ലസിസിന് പിന്നില്‍ രണ്ടാമനാണ് ശിവം ദുബെ.

ഐപിഎല്‍ 2023 ഫൈനലില്‍ എം എസ് ധോണിയുടെ നായകത്വത്തില്‍ ചെന്നൈ സൂപ്പർ കിംഗ്‌സ് അഞ്ചാം കിരീടം നേടിയിരുന്നു. മഴ കാരണം 15 ഓവറില്‍ 171 ആയി പുതുക്കി നിശ്ചയിക്കപ്പെട്ട വിജയലക്ഷ്യത്തിലേക്ക് ബാറ്റേന്തിയ സിഎസ്കെ ഇന്നിംഗ്സിലെ അവസാന പന്തുകളില്‍ രവീന്ദ്ര ജഡേജയുടെ സിക്‌സറും ഫോറുമായി 5 വിക്കറ്റ് നഷ്‌ടത്തില്‍ ജയം സ്വന്തമാക്കുകയായിരുന്നു. നിലവിലെ ചാമ്പ്യന്‍മാരായ ഗുജറാത്ത് ടൈറ്റന്‍സിനെ തോല്‍പിച്ചതോടെ അഞ്ച് കിരീടങ്ങള്‍ എന്ന മുംബൈ ഇന്ത്യന്‍സ് ക്യാപ്റ്റന്‍ രോഹിത് ശർമ്മയുടെ റെക്കോർഡിന് ഒപ്പമെത്തി എം എസ് ധോണി. ഫൈനലില്‍ രണ്ട് സിക്‌സടക്കം ദുബെ 21 പന്തില്‍ 32* റണ്‍സുമായി പുറത്താവാതെ നിന്നു.

Read more: ആശാന്‍മാരായി കോലിയും അശ്വിനും; ഇന്ത്യന്‍ ടീമിനൊപ്പം യശസ്വി ജയ്‌സ്വാളിന്‍റെ ആദ്യ നെറ്റ് സെഷന്‍ വൈറല്‍

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

അവനല്ലാതെ മറ്റാരാണ് ഫേവറൈറ്റ്? ഐപിഎല്ലില്‍ ഇഷ്ടപ്പെട്ട അണ്‍ക്യാപ്ഡ് താരത്തെ കുറിച്ച് സുനില്‍ ഗവാസ്‌കര്‍

Web Team — Thu, 01 Jun 2023 15:43:39 +0530

മുംബൈ: ഐപിഎല്‍ പതിനാറാം സീസണില്‍ രാജസ്ഥാന്‍ റോയല്‍സ് കിതച്ചപ്പോഴും കുതിച്ച താരമാണ് യശസ്വി ജയ്സ്വാള്‍. സീസണിലെ 14 മത്സരങ്ങളില്‍ 48.08 ശരാശരിയിലും 163.61 സ്‌ട്രൈക്ക് റേറ്റിലും 625 റണ്‍സ് നേടിയ ജയ്സ്വാള്‍ ഇതോടെ ഇന്ത്യന്‍ ടീമിലേക്ക് പ്രതീക്ഷ വയ്ക്കുകയാണ്.

ടൂര്‍ണമെന്റിലെ എമേര്‍ജിംഗ് പ്ലയര്‍ പുരസ്‌കാരവും ജയ്‌സ്വാള്‍ കൊണ്ടുപോയി. വൈകാതെ താരത്തിന് ദേശീയ ടീമിലേക്കുള്ള വിളിയുമെത്തി. ഇംഗ്ലണ്ടിനെതിരെ ഐസിസി ടെസ്റ്റ് ചാംപ്യന്‍ഷിപ്പ് ഫൈനലില്‍ സ്റ്റാന്‍ഡ് ബൈ താരമായിട്ടാണ് താരത്തെ ഉള്‍പ്പെടുത്തിയത്. ഓപ്പണിംഗ് റോളില്‍ തിളങ്ങുന്ന ജയസ്വാളിന് ഓപ്പണര്‍മാരായ ശുഭ്മാന്‍ ഗില്‍, രോഹിത് ശര്‍മ എന്നിവരില്‍ ഒരാള്‍ക്ക് പരിക്കേറ്റാല്‍ മാത്രമെ കളിക്കാനുള്ള അവസരം ലഭിക്കൂ.

ഇപ്പോള്‍ ഇതിഹാസതാരം സുനില്‍ ഗവാസ്‌ക്കറും ജയ്‌സ്വാളിനെ കുറിച്ച് പറയുകയാണ്. ഐപിഎല്‍ സീസണില്‍ തനിക്ക് നന്നേ ബോധിച്ച അണ്‍ക്യാപ്ഡ് താരം ജയ്‌സ്വാളാണെന്നാണ് ഗവാസ്‌കര്‍ പറയുന്നത്. അദ്ദേഹം വിശദീകരിക്കുന്നതിങ്ങനെ... ''ജയ്‌സ്വള്‍ നേടിയ സെഞ്ചുറികളും അര്‍ധ സെഞ്ചുറികളും നോക്കൂ. ടൂര്‍ണമെന്റില്‍ 500ല്‍ കൂടുതല്‍ റണ്‍സ് നേടാന്‍ അവന് സാധിച്ചു. വലിയ പ്രകടനങ്ങള്‍ വരാനുണ്ടെന്ന് തെളിയിക്കുന്നതായിരുന്നു ജയസ്വാളിന്റെ ഓരോ ഇന്നിംഗ്േസും.'' ഗവാസ്‌കര്‍ പറഞ്ഞു.

നേരത്തെയും ഗവാസ്‌കര്‍ ജയ്‌സ്വാളിനെ കുറിച്ച് സംസാരിച്ചിട്ടുണ്ട്. അന്ന് അദ്ദേഹം പറഞ്ഞതിങ്ങനെ... ''ടി20 ഫോര്‍മാറ്റില്‍ ഒരു താരം 40-50 റണ്‍സുകള്‍ 20-25 പന്തില്‍ നേടുന്നുണ്ടെങ്കില്‍ അദേഹം ടീമിനായി മികച്ച പ്രകടനം പുറത്തെടുക്കുന്നുണ്ട്. എന്നാല്‍ ഓപ്പണര്‍ എന്ന നിലയില്‍ 15 ഓവറുകള്‍ ബാറ്റ് ചെയ്യേണ്ടതുണ്ട്. അങ്ങനെ അയാള്‍ സെഞ്ചുറി നേടുന്നുണ്ടെങ്കില്‍ ടീം സ്‌കോര്‍ അനായാസമായി 190-200 കടക്കും.

ലാന്‍സ് ക്ലൂസ്‌നര്‍ പരിശീലകനായി ഇന്ത്യയിലേക്ക്; സ്വന്തമാക്കിയത് ത്രിപുര ക്രിക്കറ്റ് ടീം

ജയ്സ്വാള്‍ ഈ സീസണില്‍ ബാറ്റ് ചെയ്ത രീതി എന്നെ ഏറെ സന്തോഷിപ്പിച്ചു. അദേഹം മികച്ച സാങ്കേതിക തികവുള്ള ബാറ്റര്‍ കൂടിയാണ്. യശസ്വിക്ക് ഇന്ത്യന്‍ ടീമില്‍ അവസരം നല്‍കേണ്ട സമയമായി. ഫോമിലുള്ളപ്പോള്‍ ഒരു താരത്തിന് അവസരം നല്‍കിയാല്‍ അയാളുടെ ആത്മവിശ്വാസം വര്‍ധിക്കും.'' ഗാവസ്‌കര്‍ കൂട്ടിച്ചേര്‍ത്തു.

ഏഷ്യാനെറ്റ് ന്യൂസ് ലൈവ് യൂട്യൂബില്‍ കാണാം

അന്ന് മുംബൈ-ആര്‍സിബി മത്സരത്തിലെ ബോൾ ബോയ്, ഇന്ന് ഐപിഎല്‍ ക്യാപ്റ്റന്‍;ആദ്യ ഐപിഎൽ അനുഭവത്തെക്കുറിച്ച് ശ്രേയസ്

Web Desk — Tue, 18 Mar 2025 22:07:18 +0530

ചണ്ഡീഗഡ്: ഐപിഎല്‍ ഇന്ത്യൻ ക്രിക്കറ്റിലെ പലരുടെയും തലവര മാറ്റിയിട്ടുണ്ട്. 13 കാരന്‍ വൈഭവ് സൂര്യവൻശി മുതല്‍ 43 കാരന്‍ എം എസ് ധോണി വരെ കളിക്കുന്ന ഐപിഎല്ലില്‍ ആദ്യ ഐപിഎല്‍ സീസണെക്കുറിച്ച് അധികമാര്‍ക്കും അറിയാത്ത രഹസ്യം പങ്കുവെച്ചിരിക്കുകയാണ് കഴിഞ്ഞ സീസണില്‍ കൊല്‍ക്കത്തക്ക് ഐപിഎല്‍ കിരീടം സമ്മാനിച്ച നായകനും ഈ സീസണില്‍ പഞ്ചാബ് കിംഗ്സ് ക്യാപ്റ്റനുമായ ശ്രേയസ് അയ്യര്‍. ജിയോ ഹോട്സ്റ്റാറിന് നല്‍കിയ അഭിമുഖത്തിലാണ് ശ്രേയസ് തന്‍റെ ആദ്യ ഐപിഎല്‍ അനുഭവം പങ്കിട്ടത്.

2008ലെ ആദ്യ ഐപിഎല്ലിൽ മുംബൈ വാംഖഡെ സ്റ്റേഡിയത്തില്‍ നടന്ന മുംബൈ ഇന്ത്യൻസ്- റോയല്‍ ചലഞ്ചേഴ്സ് ബെംഗളൂരു മത്സരത്തില്‍ ബോള്‍ ബോയ് ആയിരുന്നു താനെന്ന് ശ്രേയസ് അയ്യര്‍ പറഞ്ഞു. സ്ട്രീറ്റ് ക്രിക്കറ്റ് കളിച്ചാണ് ഞാന്‍ വളര്‍ന്നത്. മുംബൈ അണ്ടര്‍ 14 ടീമില്‍ കളിക്കുന്ന കാലത്താണ് മുംബൈ ടീമിലെ എല്ലാ കളിക്കാരെയും ഐപിഎല്ലിലെ മുംബൈ-ആര്‍സിബി പോരാട്ടത്തിനുള്ള ബോള്‍ ബോയ്സായി തെരഞ്ഞെടുത്തത്. എന്‍റെ ആദ്യ ഐപിഎല്‍ അനുഭവമായിരുന്നു അത്.

അതൃപ്തി പരസ്യമാക്കി കോലി; കുടുംബത്തെ കൂടെ കൂട്ടുന്നതിന് ഏര്‍പ്പെടുത്തിയ നിയന്ത്രണങ്ങളിൽ ഇളവ് നല്‍കാന്‍ ബിസിസിഐ

അന്ന് പൊതുവെ നാണംകുണുങ്ങിയും അന്തര്‍മുഖനുമായിരുന്നു ഞാന്‍. എങ്കിലും ഭാഗ്യം കൊണ്ട് ബോള്‍ ബോയ് ആവാന്‍ തെരഞ്ഞെടുക്കപ്പെട്ടവരില്‍ ഞാനും ഉള്‍പ്പെട്ടു. എന്‍റെ കൂടെയുള്ളവരെല്ലാം കളിക്കാരെ പരിചയപ്പെടാന്‍ ശ്രമിക്കുമ്പോള്‍ ഞാന്‍ മാറി നില്‍ക്കാറാണ് പതിവ്. എങ്കിലും അക്കാലത്തെ എന്‍റെ ഇഷ്ടതാരമായിരുന്ന റോസ് ടെയ്‌ലറെ അടുത്ത് കിട്ടിയപ്പോള്‍ ഞാനും അദ്ദേഹത്തെ പരിചയപ്പെട്ടു. ഞാനദ്ദേഹത്തോട് പറഞ്ഞു, ഞാന്‍ നിങ്ങളുടെ വലിയ ആരാധകനാണെന്ന്. അദ്ദേഹം ചിരിച്ചുകൊണ്ട് നന്ദി പറഞ്ഞു. എന്‍റെ കൂടെയുള്ളവരെല്ലാം കളിക്കാരോട് ബാറ്റും ഗ്ലൗസുമെല്ലാം ചോദിക്കുമ്പോള്‍ വേണമെന്നുണ്ടെങ്കിലും എനിക്ക് ചോദിക്കാന്‍ മടിയായിരുന്നു.

റിസ്‌വാന്‍റെ ഇംഗ്ലീഷിനെ കളിയാക്കിയ ഓസ്ട്രേലിയന്‍ താരത്തെ നിര്‍ത്തി പൊരിച്ച് ആരാധകര്‍

ഒരിക്കല്‍ ലോംഗ് ഓണില്‍ ഫീല്‍ഡ് ചെയ്യുകയായിരുന്ന ഇര്‍ഫാന്‍ പത്താന്‍ ഞങ്ങള്‍ക്കൊപ്പം ബൗണ്ടറി ലൈനിന് പുറത്ത് വന്നിരുന്ന് കളി ആസ്വദിക്കുന്നുണ്ടോ എന്ന് ചോദിച്ചത് ഇപ്പോഴും മറന്നിട്ടില്ലെന്നും ജിയോ ഹോട്സ്റ്റാറിന് നല്‍കിയ അഭിമുഖത്തില്‍ ശ്രേയസ് പറഞ്ഞു. ബോള്‍ ബോയ് ആയിരുന്ന ആദ്യ ഐപിഎല്‍ കഴിഞ്ഞ് ഏഴ് വര്‍ഷങ്ങള്‍ക്ക് ശേഷം ഡല്‍ഹി ക്യാപിറ്റല്‍സ് കുപ്പായത്തില്‍ 2015ല്‍ ഐപിഎല്ലില്‍ കളിക്കാരനായി അരങ്ങേറിയ ശ്രേയസ് ആ സീസണിലെ മികച്ച യുവതാരമായി തെരഞ്ഞെടുക്കപ്പെട്ടിരുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ധോണി ഉഗ്രന്‍ പോരാളി, ഐപിഎല്‍ കളിച്ചത് ഒരു കാലിലെ വേദന കടിച്ചമര്‍ത്തി; വാഴ്‌ത്തി മുന്‍ താരം

Web Team — Sat, 03 Jun 2023 17:59:40 +0530

ചെന്നൈ: ഐപിഎല്‍ പതിനാറാം സീസണില്‍ ചെന്നൈ സൂപ്പര്‍ കിംഗ്‌സ് നായകന്‍ എം എസ് ധോണി കളിച്ചത് കാലിലെ പരിക്ക് വകവെക്കാതെയാണ് എന്നത് എല്ലാവര്‍ക്കും അറിയാവുന്ന കാര്യമാണ്. ധോണി പലപ്പോഴും മൈതാനത്ത് മുടന്തി നടക്കുന്നത് ആരാധകര്‍ കണ്ടിരുന്നു. പരിക്ക് കാര്യമാക്കാതെ സീസണില്‍ ചെന്നൈയെ ചാമ്പ്യന്‍മാരാക്കിയ ധോണിയെ പോരാളി എന്നാണ് ഇന്ത്യന്‍ മുന്‍ താരം ലക്ഷ്‌മണ്‍ ശിവരാമകൃഷ്‌ണന്‍ വിശേഷിപ്പിക്കുന്നത്.

എം എസ് ധോണി കാല്‍മുട്ടിലെ ശസ്‌ത്രക്രിയക്ക് വിധേയനായി. അത് വിജയകരമാണ്. ധോണിയൊരു യഥാര്‍ഥ നായകനാണ്. ഒരു കാല്‍ കൊണ്ടാണ് ഐപിഎല്ലില്‍ കളിച്ചത്. വിജയമുണ്ടാകണമെങ്കില്‍ വേദന സഹിച്ചേ തീരു. എന്നാല്‍ കാലിലെ വേദന ധോണിയുടെ ചിന്തകളെ ബാധിച്ചില്ല. വേദനയ്‌ക്കിടയിലും ചെന്നൈ സൂപ്പര്‍ കിംഗ്‌സിനെ ധോണി നയിച്ച രീതി വിസ്‌മയകരമാണ്. ഒരു പോരാളിയുടെ മനസാണ് ധോണിക്ക്. ഒരു ചാമ്പ്യനാണ് അദേഹം എന്നുമാണ് ലക്ഷ്‌മണ്‍ ശിവരാമകൃഷ്‌ണന്‍റെ വാക്കുകള്‍. ഐപിഎല്‍ പതിനാറാം സീസണിന്‍റെ ഫൈനലില്‍ ഗുജറാത്ത് ടൈറ്റന്‍സിനെ തോല്‍പിച്ച് എം എസ് ധോണി സിഎസ്‌കെയ്‌ക്ക് അഞ്ചാം കിരീടം സമ്മാനിച്ചിരുന്നു. അഞ്ച് വിക്കറ്റിനായിരുന്നു കലാശപ്പോരില്‍ ചെന്നൈ ടീമിന്‍റെ വിജയം.

ഐപിഎല്‍ 2023 പൂര്‍ത്തിയായതിന് പിന്നാലെ മെയ് 31ന് വൈകിട്ട് കാല്‍മുട്ടിലെ ചികില്‍സയ്‌ക്കായി എം എസ് ധോണി മുംബൈയില്‍ എത്തിയിരുന്നു. വിദഗ്‌ധ പരിശോധനകള്‍ക്ക് ശേഷം ധോണിയെ ശസ്‌ത്രക്രിയക്ക് വിധേയനാക്കി. സ്പോര്‍ട്‌‌സ് മെഡിസിന്‍ വിദഗ്‌ധനായ ഡോ. ദിന്‍ഷാ പര്‍ദിവാലയുടെ നേതൃത്വത്തിലായിരുന്നു ധോണിയുടെ ശസ്‌ത്രക്രിയ. മുമ്പ് കാറപകടത്തില്‍ കാലിന് ഗുരുതരമായി പരിക്കേറ്റ വിക്കറ്റ് കീപ്പര്‍ ബാറ്റര്‍ റിഷഭ് പന്തിന്‍റെ ശസ്‌ത്രക്രിയയും പര്‍ദിവാലയുടെ മേല്‍നോട്ടത്തിലായിരുന്നു. ധോണിക്ക് എപ്പോള്‍ പൂര്‍ണ ഫിറ്റ്‌നസ് വീണ്ടെടുക്കാനാകും എന്ന് വ്യക്തമല്ലെങ്കിലും രണ്ട് മാസം കൊണ്ട് നാല്‍പത്തിയൊന്നുകാരനായ താരത്തിന് നടക്കാന്‍ സാധിക്കും എന്നാണ് പ്രതീക്ഷിക്കുന്നത്.

Read more: ആശ്വാസ വാര്‍ത്ത, 'തല' സുഖമായിരിക്കുന്നു; ധോണിയുടെ ശസ്‌ത്രക്രിയ വിജയകരം

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം

പിന്‍വാങ്ങാന്‍ തയ്യാറല്ല! കാല്‍മുട്ടില്‍ പരിക്കേറ്റിട്ടും ധോണിയുടെ അര്‍പ്പണബോധം; വൈറല്‍ വീഡിയോ

Web Team — Thu, 01 Jun 2023 13:22:32 +0530

അഹമ്മദാബാദ്: ഐപിഎല്‍ 2023 സീസണ്‍ മുഴുവന്‍ ഇടത് കാല്‍മുട്ടിലെ പരിക്കുമായാണ് നാല്‍പ്പത്തിയൊന്നുകാരനായ എം എസ് ധോണി കളിച്ചത്. എല്ലാ മത്സരങ്ങളിലും വിക്കറ്റ് കീപ്പറുടെ ഗ്ലൗ അണിഞ്ഞ താരം ബാറ്റിംഗില്‍ ഫിനിഷര്‍ റോളിലും തിളങ്ങി. കിരീടവുമായി സിഎസ്‌കെ പതിനാറാം സീസണ്‍ അവസാനിപ്പിച്ചതിന് പിന്നാലെ ആരാധകരെ തേടിയെത്തിയ വാര്‍ത്ത ധോണി കാല്‍മുട്ടില്‍ ശസ്ത്രക്രിയക്ക് വിധേയനാവാന്‍ പോകുന്നു എന്നതാണ്.

കാല്‍മുട്ടിനേറ്റ പരിക്കിന് പരിഹാരം തേടി ധോണി മുംബൈയിലെ കോകിലാബെന്‍ ആശുപത്രിയിലെത്തിയെന്ന് വാര്‍ത്തകള്‍ വന്നിരുന്നു. ഇടത് കാല്‍മുട്ടില്‍ കൂടുതല്‍ പരിശോധനകള്‍ നടത്താനുണ്ട്. കാല്‍മുട്ടിന്റെ സംരക്ഷണത്തിനായി അദ്ദേഹം ഗാര്‍ഡും സ്ട്രാപ്പും ധരിച്ചിരുന്നു.

ഗ്രൗണ്ടില്‍ ഇറങ്ങുന്നതിന് മുമ്പ് അദ്ദേഹം കാല്‍മുട്ടില്‍ സ്ട്രാപ്പ് കെട്ടുന്ന ഒരു വീഡിയോയാണ് ഇപ്പോള്‍ വൈറലായിരിക്കുന്നത്. ക്രിക്കറ്റിനോട് അദ്ദേഹത്തിന് എത്രത്തോളം അത്മാത്ഥതയുണ്ടെണ്ടെന്ന് തെളിയിക്കുന്നതായിരുന്നു വീഡിയോ. ദ്യശ്യങ്ങള്‍ കാണാം...

MS Dhoni came to bat even with this injured knee His commitment towards the game pic.twitter.com/9AL8BQGvf5

— ♚ (@balltamperrer) May 31, 2023

ഒരു ഐപിഎല്‍ സീസണ്‍ കൂടെ കളിക്കുമെന്ന് ഗുജറാത്ത് ടൈറ്റന്‍സിനെതിരായ ഫൈനലിന് ശേഷം ധോണി വ്യക്തമാക്കിയിരുന്നു. എന്നാല്‍ ശരീരം സമ്മതിക്കുമെങ്കില്‍ മാത്രമെ കളിക്കൂവെന്നായിരുന്നു ധോണിയുടെ പക്ഷം. ആറ്- ഏഴ് മാസം സമയമുണ്ടെന്നും അതിന് ശേഷം തിരുമാനമെടുക്കുമെന്നും ധോണി വ്യക്തമാക്കിയിരുന്നു. ഫിറ്റ്നെസ് വീണ്ടെടുക്കുന്നതിന്റെ ഭാഗമായിട്ടാണ് അദ്ദേഹം ആശുപത്രിയില്‍ പ്രവേശിച്ചതെന്നാണ് വിലയിരുത്തല്‍.

നായകന്‍ രോഹിത്, ജഡജേയില്ല! നാല് ഇന്ത്യന്‍ താരങ്ങള്‍ മാത്രം; ഇന്ത്യ - ഓസീസ് സംയുക്ത ഇലവനുമായി ഇംഗ്ലണ്ട് ഇതിഹാസം

ഫൈനലിന് ശേഷം ധോണി സംസാരിച്ചത് ഇങ്ങനെയായിരുന്നു... ''സാഹചര്യങ്ങള്‍വെച്ച് നോക്കുകയാണെങ്കില്‍ ഇതാണ് വിരമിക്കല്‍ പ്രഖ്യാപിക്കാനുള്ള ഏറ്റവും അനുയോജ്യമായ സമയം. ഏറ്റവും എളുപ്പമുള്ള കാര്യവും എല്ലാവരോടും നന്ദി പറഞ്ഞ് വിരമിക്കുക എന്നതാണ്. എന്നാല്‍ ഈ വര്‍ഷം ഞാന്‍ കളിച്ച ഇടങ്ങളിലെല്ലാം ആരാധകരില്‍ നിന്ന് എനിക്ക് ലഭിച്ച സ്നേഹവും പിന്തുണയും കാണുമ്പോള്‍ ബുദ്ധിമുട്ടേറിയ കാര്യം അടുത്ത ഒമ്പത് മാസവും കഠിനാധ്വാനം ചെയ്ത് അടുത്ത ഐപിഎല്ലില്‍ കൂടി കളിക്കുക എന്നതാണ്.'' ധോണി പറഞ്ഞു.

ധോണിമാനിയ! ഐപിഎല്‍ സീസണ്‍ ഓര്‍ക്കപ്പെടുക ധോണിയുടെ പേരില്‍; കാരണം വ്യക്തമാക്കി മുന്‍ പാകിസ്ഥാന്‍ ക്യാപ്റ്റന്‍

Web Team — Sat, 03 Jun 2023 14:08:09 +0530

ഇസ്ലാമാബാദ്: ഐപിഎല്‍ 16-ാം സീസണില്‍ ചെന്നൈ സൂപ്പര്‍ കിംഗ്‌സ് കിരീടം നേടുമ്പോള്‍ ക്യാപ്റ്റന്‍ എം എസ് ധോണിയുടെ പങ്ക് വലുതായിരുന്നു. ഗുജറാത്ത് ടൈറ്റന്‍സിനെ തോല്‍പ്പിച്ചാണ് ചെന്നൈ ഐപിഎല്ലിലെ പത്താം കിരീടം ഉയര്‍ത്തിയത്. ഇപ്പോള്‍ ടൂര്‍ണമെന്റിലെ മഹത്തായ മുഹൂര്‍ത്തങ്ങള്‍ ഓര്‍ത്തെടുക്കുകയാണ് മുന്‍ പാകിസ്ഥാന്‍ ക്യാപ്റ്റന്‍ റമീസ് രാജ.

ചെന്നൈ ക്യാപ്റ്റന്‍ ധോണി, ക്രിക്കറ്റ് ഇതിഹാസം സുനില്‍ ഗവാസ്്ക്കറുടെ ഷര്‍ട്ടില്‍ ഓട്ടോഗ്രാഫ് നല്‍കിയ കാര്യം ഓര്‍ത്തെടുത്താണ് റമീസ് സംസാരിക്കുന്നത്. അദ്ദേഹത്തിന്റെ വാക്കുകള്‍... ''ഇക്കഴിഞ്ഞ ഐപിഎല്‍ ഓര്‍മിക്കപ്പെടുക ധോണിയുടെയും സിഎസ്‌കെയുടേയും പേരിലായിരിക്കും. ധോണിമാനിയ, ധോണിയുടെ ക്യാപ്റ്റന്‍സി, ശാന്തത, മനുഷ്യത്വം, കീപ്പിംഗ് എല്ലാം ഭാവിയില്‍ ഓര്‍ക്കപ്പെടും. എന്നാല്‍ ഇതിലെല്ലാം അപ്പുറത്ത്, ധോണി ഇതിഹാസതാരം ഗവാസ്‌ക്കറുടെ മാറില്‍ ചാര്‍ത്തി കൊടുത്ത ഒപ്പാണ് ഓര്‍മിക്കേണ്ടത്. ധോണിക്ക് ഇതിനേക്കാള്‍ വലിയ ആദരം കിട്ടാനില്ല.'' റമീസ് പറഞ്ഞു.

യുവതാരങ്ങളുടെ ഐപിഎല്‍ കൂടിയായിരുന്നു ഇത്തവണത്തേതെന്ന് റമീസ് വ്യക്തമാക്കി. ''യുവ ബാറ്റര്‍മാരുടെ ഐപിഎല്‍ കൂടിയായിരുന്നിത്. റിങ്കു സിംഗ്, ശുഭ്മാന്‍ ഗില്‍, യഷസ്വി ജയ്‌സ്വാള്‍, റിതുരാജ് ഗെയ്കവാദ് എന്നിവരെല്ലാം നിറഞ്ഞാടി. അവര്‍ വരും സീസണുകളിലും പ്രകടനം കൊണ്ട് ഐപിഎല്ലിന് സമ്പന്നമാക്കും.'' റമീസ് വ്യക്തമാക്കി.

ഓസ്‌ട്രേലിയക്കെതിരായ ടെസ്റ്റ് ചാംപ്യന്‍ഷിപ്പ് ഫൈനലില്‍ അശ്വിന്‍ കളിച്ചേക്കില്ല! സ്പിന്നറായി ജഡേജ മാത്രം

അവസാന രണ്ട് പന്തുകളിലാണ് ചെന്നൈ ജയം പിടിച്ചത്. മോഹിത്തിന്റെ അവസാന രണ്ട് പന്തുകള്‍ രവീന്ദ്ര ജഡേജ സിക്സും ഫോറും പായിക്കുകയായിരുന്നു. ചെന്നൈയുടെ അഞ്ചാം ഐപിഎല്‍ കിരീടമായിരുന്നത്.

ഏഷ്യാനെറ്റ് ന്യൂസ് ലൈവ് യൂട്യൂബില്‍ കാണാം