Asianet News Malayalam

അകലാപ്പുഴയിൽ ഹൗസ് ബോട്ടിൽ നിന്ന് കായലിൽ വീണ് 5 വയസുകാരന് ദാരുണാന്ത്യം

Elsa TJ — Mon, 12 Oct 2026 22:13:09 +0530

കൊയിലാണ്ടി: കോഴിക്കോട് അകലാപ്പുഴയിൽ ഉല്ലാസയാത്രയ്ക്കിടെ ബോട്ടിൽ നിന്ന് കായലിൽ വീണ് അഞ്ചു വയസ്സുകാരന് ദാരുണാന്ത്യം. ഓമശ്ശേരി നടമ്മൽ പൊയിൽ മേലെ തിരിയം കൊട്ടുമ്മൽ കുന്നുമ്മൽ ഹാരിസിന്റെയും മറിയം സുനൈനയുടെയും മകൻ മുഹമ്മദ്‌ ഐസാമാണ് മരിച്ചത്. ആലിൻതറ റബ്ബാനിയ കിൻസ് ഇംഗ്ലീഷ് സ്കൂൾ എൽ കെ ജി വിദ്യാർഥിയാണ്. ഇന്ന് വൈകിട്ട് അഞ്ചരയോടെയായിരുന്നു അപകടം. ബോട്ടിൻ്റെ മുകളിലത്തെ നിലയിൽ നിന്ന് കുട്ടി വീഴുന്നത് കണ്ട ഉടൻ കൂടെയുണ്ടായിരുന്നവർ പുഴയിലിറങ്ങി തിരച്ചിൽ നടത്തി കുട്ടിയെ കരയ്ക്കെത്തിച്ചു. തുടർന്ന് ആംബുലൻസിൽ കൊയിലാണ്ടി താലൂക്ക് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം കോഴിക്കോട് മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി. യമിൻ അബ്ദുള്ള ഏക സഹോദരനാണ്.

ഏഷ്യാനെറ്റ് ന്യൂസ് ലൈവ് കാണാം

നമ്പർ പ്ലേറ്റില്ല, സംശയം തോന്നി സ്കൂട്ടർ പരിശോധിച്ച പന്തീരാങ്കാവ് എസ്ഐയെ തെറിവിളിച്ചു, യൂണിഫോമിൽ പിടിച്ച് വലിച്ചു; യുവാവ് അറസ്റ്റില്‍

Web Desk — Mon, 12 Oct 2026 20:18:34 +0530

കോഴിക്കോട്: സംശയാസ്പദമായ സാഹചര്യത്തില്‍ കണ്ട സ്‌കൂട്ടര്‍ പരിശോധിക്കാന്‍ ഒരുങ്ങിയ പന്തീരാങ്കാവ് സ്റ്റേഷനിലെ എസ്.ഐയെ അസഭ്യം പറഞ്ഞ് കൈയ്യേറ്റം ചെയ്ത സംഭവത്തില്‍ യുവാവിനെ അറസ്റ്റ് ചെയ്തു. ഫറൂഖ് കോളേജിന് സമീപം പള്ളിമീത്തല്‍ സ്വദേശി അന്താന്‍തോട്ടത്തില്‍ വീട്ടില്‍ മുഹമ്മദ് അനസി(24) നെയാണ് പന്തീരാങ്കാവ് പൊലീസ് കസ്റ്റഡിയിലെടുത്തത്. ഇന്നലെയാണ് കേസിനാസ്പദമായ സംഭവം നടന്നത്. പന്തീരാങ്കാവ് കിങ് ബാറിന് സമീപം വെച്ച് ഡ്യൂട്ടിയിലായിരുന്ന പന്തീരാങ്കാവ് പൊലീസ് സ്റ്റേഷന്‍ സബ്ബ് ഇന്‍സ്‌പെക്ടര്‍ വിനോദിന് നേരെയാണ് കൈയ്യേറ്റമുണ്ടായത്.

തൂഫാന്‍ ഡ്രൈവിന്റെ ഭാഗമായി എസ്.ഐയും സംഘവും പന്തീരാങ്കാവ് കിങ് ബാറിന് സമീപം എത്തിയപ്പോള്‍ നമ്പര്‍ പ്ലേറ്റില്ലാത്ത സ്‌കൂട്ടറിന് മുകളില്‍ ഇരിക്കുകയായിരുന്നു അനസ്. തുടര്‍ന്ന് യുവാവിനോട് വാഹനത്തിന്റെ രേഖകള്‍ ആവശ്യപ്പെട്ടപ്പോള്‍ ''എന്റെ കൂട്ടുകാരന്റെ വണ്ടിയാണ്. വേണമെങ്കില്‍ അവനോട് ചോദിച്ചോ'' എന്ന് മറുപടി പറഞ്ഞു. തുടര്‍ന്ന് വാഹനം പരിശോധിയ്ക്കാനൊരുങ്ങിയ പൊലീസ് ഉദ്യോഗസ്ഥരെ അനസ് അശ്ലീല ഭാഷയില്‍ അസഭ്യം പറയുകയും യൂണിഫോമില്‍ പിടിച്ചുവലിച്ചുകൊണ്ട് ആക്രമിക്കുകയായിരുന്നു. ബലപ്രയോഗത്തിലൂടെയാണ് പൊലീസുകാര്‍ അനസിനെ കസ്റ്റഡിയിലെടുത്തത്. തുടര്‍ന്ന് കോടതിയില്‍ ഹാജരാക്കി റിമാന്റ് ചെയ്തു.

'അറ്റാക്ക് വന്നതാ സാറേ, ഭാര്യയുടെ മൊഴി', തൃശൂരിൽ 41 കാരനെ കൊന്നത് ഭാര്യയും കാമുകനും ചേർന്ന്, തോർത്തുകൊണ്ട് കഴുത്തിൽ വലിച്ച് മുറുക്കി

Vishnu KV — Mon, 12 Oct 2026 19:59:16 +0530

തൃശൂര്‍: കുന്നംകുളം മരത്തംകോട് അതിഥി തൊഴിലാളിയെ വാടക ക്വാട്ടേര്‍ഴ്‌സില്‍ മരിച്ച നിലയില്‍ കണ്ടെത്തിയ സംഭവം കൊലപാതകമാണെന്ന് കണ്ടെത്തി. ബീഹാര്‍ സ്വദേശി മുഹമ്മദ് മുംതാബ് മിയാനാണ് ( 41) കൊല്ലപ്പെട്ടത്. ഭാര്യയും കാമുകനും ചേര്‍ന്നാണ് കൊലപാതകം നടത്തിയത്. ഇവര്‍ പൊലീസ് കസ്റ്റഡിയിലുണ്ട്. കഴിഞ്ഞ ദിവസം രാവിലെ 7.30 നാണ് മരത്തംകോട് പുതിയമാത്തൂര്‍ ചിറപുറത്തുള്ള വാടക ക്വാട്ടേഴ്‌സില്‍ അതിഥി തൊഴിലാളിയെ മരിച്ച നിലയില്‍ കണ്ടെത്തിയത്. സ്വാഭാവിക മരണമെന്നായിരുന്നു പ്രാഥമിക നിഗമനം. ഹൃദയാഘാതമാണ് മരണകാരണമെന്ന് ഭാര്യയും കുടുംബാംഗങ്ങളും പൊലീസിനോട് പറഞ്ഞിരുന്നത്. എന്നാൽ മുഹമ്മദ് മുംതാബിന്‍റെ കഴുത്തില്‍ ചില അടയാളങ്ങള്‍ കണ്ടെത്തിൽ പൊലീസിന് സംശയം തോന്നിയിരുന്നു.

പോസ്റ്റ് മോര്‍ട്ടത്തിനു മുമ്പ് സര്‍ജനോട് പൊലീസ് ഇക്കാര്യങ്ങള്‍ പങ്കുവെച്ചു. പോസ്റ്റ്‌മോര്‍ട്ടത്തില്‍ കഴുത്തില്‍ മുറുക്കി ശ്വാസം മുട്ടിച്ച് കൊലപ്പെടുത്തിയതാണെന്ന് കണ്ടെത്തുകയായിരുന്നു. മുഹമ്മദിന്‍റെ കഴുത്തു ഞെരിച്ചിട്ടുണ്ടെന്നും മുഖവും വായയും പൊത്തിപ്പിടിച്ചിട്ടുണ്ടെന്നും പോസ്റ്റ്മോർട്ടം റിപ്പോർട്ടിൽ വ്യക്തമാക്കി. തുടര്‍ന്ന് കുന്നംകുളം പൊലീസ് സ്ഥലത്തെത്തി അന്വേഷണം ആരംഭിക്കുകയും ഭാര്യയേയും കാമുകനേയും കസ്റ്റഡിയിലെടുക്കുകയുമായിരുന്നു. പ്രതികളെ പൊലീസ് വിശദമായി ചോദ്യം ചെയ്തുവരികയാണ്.

കെട്ടിടനിര്‍മാണ തൊഴിലാളിയായിരുന്ന മുഹമ്മദ് മുംതാബും കുടുംബവും ബീഹാറില്‍ നിന്ന് എട്ടു വര്‍ഷം മുമ്പാണ് ജോലി തേടി തൃശൂരില്‍ എത്തുന്നത്. മദ്യപാനം പതിവായിരുന്ന മുഹമ്മദ് മുംതാബ് മിയാന്‍ വീട്ടില്‍ വഴക്കിടുന്നത് പതിവായിരുന്നു. ഇതിനിടെ ഭാര്യ റോഷന്‍ കാത്തൂണ്‍ ബിഹാര്‍ സ്വദേശിയായ ഹസന്നാന്‍ എന്ന 38കാരനുമായി അടുപ്പത്തിലായി. ഇവർ പ്ലാൻ ചെയ്ത് മുഹമ്മദിനെ കൊലപ്പെടുത്തുകയായിരുന്നുവെന്ന് പൊലീസ് വ്യക്തമാക്കി. കുന്നംകുളം എ.സി.പി ഷാജു കെ.എബ്രഹാം, സി.ഐ. അനില്‍കുമാര്‍ ടി മേപ്പുള്ളി, എസ്.ഐ രോഹിത്ത് എന്നിവരുടെ നേതൃത്വത്തിലാണ് അന്വേഷണം നടത്തിയത്. ഡോഗ് സ്‌കോഡും ഫോറന്‍സിക് വിഭാഗവും സ്ഥലത്തെത്തി തെളിവെടുപ്പ് നടത്തി.

രാത്രി 11 മണിക്ക് കൈവിലങ്ങ് ഊരി പോക്സോ കേസ് പ്രതി സ്റ്റേഷനിൽ നിന്ന് ചാടി, ഒളിച്ചിരുന്ന തുരുത്ത് വളഞ്ഞ് പൊക്കി പൊലീസ്

Web Desk — Mon, 12 Oct 2026 19:27:30 +0530

പത്തനംതിട്ട: തിരുവല്ല പുളിക്കീഴ് പൊലീസ് സ്റ്റേഷനിൽ നിന്നും ചാടിപ്പോയ പോക്സോ കേസ് പ്രതി പിടിയിൽ. നിരണം ഇരതോട് ആശാകുടി പുതുവേൽ വീട്ടിൽ സജിത്ത് (32) ആണ് പിടിയിലായത്. ഇന്ന് വൈകിട്ട് 5 മണിയോടെ പിടികൂടിയത്. ഇയാളുടെ വീടിന് സമീപത്തുള്ള പാടശേഖരത്തിന് നടുവിൽ സ്ഥിതി ചെയ്യുന്ന തുരുത്തിൽ നിന്നുമാണ് പിടികൂടിയത്. ആളൊഴിഞ്ഞ കാടുമുടിക്കിടക്കുന്ന തുരുത്തിനുള്ളിൽ ഇയാൾ ഒളിച്ചിരിക്കുന്നതായ് പൊലീസിന് രഹസ്യ വിവരം ലഭിച്ചിരുന്നു. തുടർന്ന് പൊലീസ് സംഘം തുരുത്ത് വളഞ്ഞ് വിദഗ്ധമായാണ് പ്രതിയെ പിടികൂടിയത്.

പ്രതിയെ തിരുവല്ല പൊലീസ് സ്റ്റേഷനിലേക്ക് മാറ്റി. കഴിഞ്ഞ വെള്ളിയാഴ്ച രാത്രി 11 മണിയോടെയാണ് കൈവിലങ്ങ് ഊരി സ്റ്റേഷനിൽ നിന്നും ചാടിപ്പോയത്. ലോക്കപ്പ് സംവിധാനം ഇല്ലാതിരുന്നതിനാൽ സ്റ്റേഷന്റെ ഉൾവശത്തെ മുറിയിലെ തറയിൽ ഘടിപ്പിച്ചിരുന്ന ഇരുമ്പ് വളയത്തിൽ കൈവിലങ്ങ് ബന്ധിപ്പിച്ചാണ് ഇയാളെ സൂക്ഷിച്ചിരുന്നത്. ഡ്യൂട്ടിയിൽ ഉണ്ടായിരുന്ന പൊലീസുകാരുടെ കണ്ണുവെട്ടിച്ച് പ്രതി സ്റ്റേഷന്റെ മുൻ വാതിലിൽ കൂടി ഓടി രക്ഷപ്പെടുകയായിരുന്നു.

പാറാവ് ഡ്യൂട്ടിയിൽ ഉണ്ടായിരുന്ന പൊലീസുകാർ ഉൾപ്പെടെ പിന്നാലെ ഓടിയെങ്കിലും സ്റ്റേഷന് സമീപത്തുകൂടി കടന്നുപോകുന്ന തിരുവല്ല - കായംകുളം സംസ്ഥാനപാതയ്ക്ക് സമീപത്തെ കാട്ടിലേക്ക് ചാടി രക്ഷപ്പെടുകയായിരുന്നു. പ്രതി കഞ്ചാവ് ഉൾപ്പെടെ പല ലഹരികൾക്കും അടിമയാണെന്ന് പൊലീസ് പറഞ്ഞു.

ഗൂഗിൾ പേയിൽ 3 ലക്ഷം, നേരിട്ട് 5 ലക്ഷം! സെര്‍ബിയയില്‍ വര്‍ക്ക് വിസ വാഗ്ദാനം ചെയ്ത് 8 ലക്ഷം തട്ടി, രഹസ്യമായി ബെംഗളൂരുവിൽ വിമാനമിറങ്ങി; പ്രതി പിടിയിൽ

Web Desk — Mon, 12 Oct 2026 18:59:07 +0530

തൃശൂര്‍: സെര്‍ബിയയിൽ പുത്തന്‍വേലിക്കര സ്വദേശിയായ പരാതിക്കാരനും സഹോദരിക്കും വര്‍ക്ക് വിസ ശരിയാക്കി നല്‍കാമെന്ന് പറഞ്ഞ് വിശ്വസിപ്പിച്ച് എട്ട് ലക്ഷം രൂപ തട്ടിയെടുത്ത കേസില്‍ പ്രതി പിടിയിൽ. പൂമംഗലം വില്ലേജില്‍ കൈപ്പറമ്പ് ചീനക്കുഴി റോഡ് സ്വദേശിയും കല്യാശ്ശേരി വീട്ടില്‍ താമസിക്കുന്നയാളുമായ സനീഷ് (38) ആണ് അറസ്റ്റിലായത്. തൃശ്ശൂര്‍ റൂറല്‍ ജില്ലാ പൊലീസ് മേധാവി മുഹമ്മദ് നദീമിന്‍റെ നിര്‍ദ്ദേശപ്രകാരം പ്രത്യേക അന്വേഷണസംഘം ബാംഗ്ലൂര്‍ വിമാനത്താവളത്തില്‍ നിന്നുമാണ് സനീഷിനെ പിടികൂടിയത്. പ്രതിയെ ഇരിങ്ങാലക്കുട പോലീസ് സ്റ്റേഷന്‍ എത്തിച്ചു. നടപടിക്രമങ്ങള്‍ക്ക് ശേഷം കോടതിയില്‍ ഹാജരാക്കും.

ഇരിങ്ങാലക്കുടയില്‍ പ്രവര്‍ത്തിക്കുന്ന ഇൻഡോ-യുഎസ് ഐടി എഡ്യുകേഷൻ എന്ന സ്ഥാപനത്തിന്റെ ഡയറക്ടറായ പ്രതി, വിദേശത്ത് വര്‍ക്ക് വിസ ശരിയാക്കി നല്‍കാമെന്ന് വാഗ്ദാനം ചെയ്താണ് തട്ടിപ്പ് നടത്തിയത്. 2025 ജൂലൈ 18 മുതല്‍ സെപ്റ്റംബര്‍ 27 വരെയുള്ള വിവിധ തീയതികളിലായി ആണ് പ്രതിയുടെ ബാങ്ക് അക്കൗണ്ടിലേക്ക് ഗൂഗിള്‍ പേ മുഖേന മൂന്ന് ലക്ഷം രൂപയും, 2025 സെപ്റ്റംബര്‍ 27ന് ഇരിങ്ങാലക്കുടയിലെ ഓഫീസില്‍ വെച്ച് നേരിട്ട് അഞ്ച് ലക്ഷം രൂപയും ഉള്‍പ്പെടെ ആകെ എട്ട് ലക്ഷം രൂപയാണ് പരാതിക്കാരനില്‍ നിന്നും കൈപ്പറ്റിയത്. എന്നാല്‍, പണം കൈപ്പറ്റിയ ശേഷം വിസ ശരിയാക്കി നല്‍കാതെ തട്ടിപ്പ് നടത്തുകയായിരുന്നു.

വിദേശത്തായിരുന്ന പ്രതി നാട്ടിലേക്ക് വരാനായി രഹസ്യമായി അബുദാബിയില്‍ നിന്ന് ബെംഗളൂരു എയര്‍പോര്‍ട്ടില്‍ വന്നിറങ്ങിയപ്പോഴാണ് അറസ്റ്റിലായത്. തൃശ്ശൂര്‍ റൂറല്‍ ജില്ലാ പൊലീസ് മേധാവി മുഹമ്മദ് നദീം ഐ.പി.എസിന് ലഭിച്ച വിവരത്തിന്റെ അടിസ്ഥാനത്തില്‍ ആയിരുന്നു അറസ്റ്റ്. ഇരിങ്ങാലക്കുട ഡി.വൈ.എസ്.പി ഷാജി എം.കെ, ഇരിങ്ങാലക്കുട ഇന്‍സ്‌പെക്ടര്‍ എസ്.എച്ച്.ഒ പ്രദീപ് കെ.ഒ, എസ്.ഐ ജാക്‌സണ്‍, എസ്.ഐ സൗമ്യ ഇ.യു, എ.എസ്.ഐ മാരായ മുരുകദാസ്, രാജേഷ്, സി.പി.ഒ അജിത്ത് സി.എസ് എന്നിവരാണ് അന്വേഷണ സംഘത്തിലുണ്ടായിരുന്നത്.

ഹരിപ്പാട് സ്റ്റാൻഡിൽ നിന്ന് റോഡിലേക്ക് ഇറങ്ങിയ കെഎസ്ആർടിസി ബസിൽ ബുള്ളറ്റ് ഇടിച്ചു, യുവാവിന് ദാരുണാന്ത്യം

Web Desk — Mon, 12 Oct 2026 18:21:27 +0530

ഹരിപ്പാട്: ആലപ്പുഴ ഹരിപ്പാട് കെഎസ്ആർടിസി ബസ് സ്റ്റാൻഡിനു സമീപം ബസും ബൈക്കും കൂട്ടിയിടിച്ചുണ്ടായ അപകടത്തിൽ പരിക്കേറ്റ യുവാവ് മരിച്ചു. കുമാരപുരം താമല്ലാക്കൽ കണ്ടത്തിൽ കിഴക്കതിൽ രാജേന്ദ്രൻ –മായ ദമ്പതികളുടെ മകൻ അഞ്ചിത്ത് (24) ആണ് മരിച്ചത്. ഞായറാഴ്ച വൈകിട്ട് 3.30-നായിരുന്നു അപകടം. നങ്ങ്യാർകുളങ്ങരയിൽ നിന്ന് വീട്ടിലേക്ക് ബുള്ളറ്റിൽ മടങ്ങുകയായിരുന്നു അഞ്ചിത്ത്. സ്റ്റാൻഡിൽ നിന്ന് റോഡിലേക്ക് ഇറങ്ങിയ കെഎസ്ആർടിസി ബസുമായി അഞ്ചിത്ത് സഞ്ചരിച്ച ബൈക്ക് കൂട്ടിയിടിക്കുകയായിരുന്നു.

ഹരിപ്പാട് താലൂക്ക് ആശുപത്രിയിലും പിന്നീട് വണ്ടാനം മെഡിക്കൽ കോളജ് ആശുപത്രിയിലും പ്രവേശിപ്പിച്ചു. പരിക്ക് ഗുരുതരമായതിനെ തുടർന്ന് പരുമലയിലെ സ്വകാര്യ ആശുപത്രിയിൽ ചികിത്സയിലിരിക്കെ തിങ്കളാഴ്ച പുലർച്ചെ അഞ്ചരയോടെ മരിച്ചു. സംസ്കാരം ചൊവ്വാഴ്ച രാവിലെ 11-ന് നടക്കും. അഞ്ജിതയാണ് സഹോദരി.

5000 മുതല്‍ 10000 രൂപ വരെ അധിക കൂലി മോഹിച്ച് ഇറങ്ങുന്നത് മരണത്തിലേക്ക്; അനധികൃത മത്സ്യബന്ധന ബോട്ടുകളിലെ മരണങ്ങൾ, ആശങ്ക

Web Desk — Mon, 12 Oct 2026 17:38:52 +0530

കോഴിക്കോട്: അനധികൃത മത്സ്യബന്ധനം നടത്തിയെത്തുന്ന ബോട്ടുകളില്‍ നിന്ന് ദുഷിച്ചുനാറിയ വളമത്സ്യം കോരിയെടുക്കാന്‍ ഇറങ്ങുന്നവര്‍ വിഷവാതകം ശ്വസിച്ച് മരിച്ചുവീഴുന്ന വാര്‍ത്ത പതിവാകുന്നു. കഴിഞ്ഞ ദിവസം കോഴിക്കോട് ബേപ്പൂര്‍ ഹാര്‍ബറില്‍ ബോട്ടിലെ അറയില്‍ ഇറങ്ങിയതിനെ തുടര്‍ന്ന് ഗുരുതരാവസ്ഥയില്‍ ചികിത്സയിലായിരുന്ന രണ്ടാമത്തെ അതിഥി തൊഴിലാളിയും മരിച്ചിരുന്നു. ബംഗാള്‍ സ്വദേശിയായ സച്ചിന്‍ ദാസ് ആണ് ചികിത്സയിലിരിക്കെ മരിച്ചത്.

ഈ ദാരുണ സംഭവം നടന്ന് തൊട്ടടുത്ത ദിവസവും സമാന രീതിയില്‍ ടണ്‍ കണക്കിന് ചെറുമത്സ്യങ്ങളുടെ ശേഖരമാണ് വിവിധയിടങ്ങളിലേക്ക് കയറ്റിയയച്ചത്. അധികൃതര്‍ കൃത്യമായ പരിശോധന നടത്താത്തതാണ് ഇത്തരക്കാര്‍ക്ക് തുണയാകുന്നതെന്ന ആക്ഷേപം നിലനില്‍ക്കുന്നുണ്ട്. ഭക്ഷ്യാവശ്യത്തിനുള്ള മത്സ്യങ്ങളുമായെത്തുന്ന ബോട്ടുകളിലെ അറയിലിറങ്ങുന്ന സാധാരണ ജീവനക്കാര്‍ എന്നാല്‍ വന്‍ ദുര്‍ഗന്ധം വമിക്കുന്ന ഇത്തരത്തിലുള്ള ബോട്ടുകളില്‍ ജോലിക്ക് കയറാറില്ല.

5000 രൂപ മുതല്‍ 10000 രൂപ വരെ അധികം ലഭിക്കുമെന്നതിനാല്‍ അതിഥി തൊഴിലാളികള്‍ ഈ ജോലിക്ക് സന്നദ്ധരായി മുന്നോട്ടുവരികയാണ്. ഇത്തരത്തിലുള്ള ബോട്ടുകളിലെ അറകളില്‍ അമോണിയയുടെയും മറ്റ് രാസലായനികളുടെയും സാനിധ്യം ഏറുന്നതാണ് തൊഴിലാളികള്‍ക്ക് മരണക്കെണിയാകുന്നത്. അധിക കൂലി മാത്രം മോഹിച്ച് യാതൊരു സുരക്ഷാ മുന്‍കരുതലുകളുമില്ലാതെ ബോട്ടില്‍ ഇറങ്ങുന്ന തൊഴിലാളികള്‍ അപകടത്തില്‍പ്പെടുന്നത് പതിവായിരിക്കുകയാണ്.

വടിവാള്‍ വീശീ ഭീഷണിപ്പെടുത്തുന്നത് റീല്‍സിട്ടതോടെ 'റീല്‍സ് യാസീന്‍' ആയി; അതിഥി തൊഴിലാളികളെ വധിക്കാന്‍ ശ്രമിച്ച അസം സ്വദേശി പിടിയില്‍

Web Desk — Mon, 12 Oct 2026 17:38:30 +0530

കോഴിക്കോട്: കഴിഞ്ഞ ദിവസം അതിഥി തൊഴിലാളികളെ വധിക്കാന്‍ ശ്രമിച്ച കേസിലെ മുഖ്യപ്രതിയെന്ന് സംശയിക്കുന്നയാളെ പൊലീസ് അറസ്റ്റ് ചെയ്തു. അസം സ്വദേശിയായ യാസീന്‍ ആലം എന്ന റീല്‍സ് യാസീന്‍ ആണ് കോഴിക്കോട് വെള്ളയില്‍ പൊലീസ് അറസ്റ്റ് ചെയ്തത്. കഴിഞ്ഞ ദിവസം പുലര്‍ച്ചെയോടെ കോഴിക്കോട് ബീച്ച് ആശുപത്രിക്ക് സമീപത്തുവെച്ചാണ് ഇതര സംസ്ഥാനക്കാരായ മൂന്ന് പേര്‍ക്ക് നേരെ അതിക്രമം നടന്നത്. യാസീന്‍ ഉള്‍പ്പെടെയുള്ള അസം സ്വദേശികള്‍ അതിഥി തൊഴിലാളികളുടെ ദേഹത്തേക്ക് ബൈക്ക് ഓടിച്ചു കയറ്റുകയും വടിവാള്‍ വീശി ഭീകരാന്തരീക്ഷം സൃഷ്ടിക്കുകയും ചെയ്യുകയായിരുന്നു.

പരാതി ലഭിച്ചതിനെ തുടര്‍ന്ന് അന്വേഷണം ആരംഭിച്ച പൊലീസ് കഴിഞ്ഞ ദിവസം പുലര്‍ച്ചെ എടപ്പാളിലുള്ള ഒരു വാടകവീട്ടില്‍ വച്ചാണ് ഇയാളെ പിടികൂടിയത്. വെള്ളയില്‍ പൊലീസ് സ്റ്റേഷന്‍ എസ്.എച്ച്.ഒ ഹരീഷ് കുമാറിന്റെ നേതൃത്വത്തിലാണ് അറസ്റ്റ് നടന്നത്. പൊതു നിരത്തുകളില്‍ ബൈക്കിന് പിന്നിലിരുന്ന് സഞ്ചരിച്ച് വടിവാള്‍ വീശി ഭീഷണിപ്പെടുത്തുന്നതും കഴുത്തില്‍ കത്തി വെച്ച് ഭീഷണിപ്പെടുത്തുന്നതും ഉള്‍പ്പെടെയുള്ള ദൃശ്യങ്ങള്‍ സമൂഹമാധ്യമങ്ങളിലൂടെ റീലുകളായി പ്രദര്‍ശിപ്പിച്ചിരുന്ന യാസീനെ റീല്‍സ് യാസീന്‍ എന്നും വിളിച്ചിരുന്നു. അതിഥി തൊഴിലാളികളെ ഭീഷണിപ്പെടുത്ത് പണം തട്ടുന്നതായിരുന്നു ഇയാളുടെ രീതി.

സിനിമയിൽ അവസരം തരാമെന്ന് പറഞ്ഞ് പ്ലസ് വൺ വിദ്യാർത്ഥിനിയെ 75 കാരകൻ പീഡിപ്പിച്ചെന്ന് പരാതി, പോക്സോ ചുമത്തി കേസെടുത്തു

Web Desk — Mon, 12 Oct 2026 16:19:32 +0530

കൊല്ലം: സിനിമയിൽ അവസരം വാഗ്ദാനം ചെയ്ത പ്ലസ് വൺ വിദ്യാർഥിനിയെ പീഡിപ്പിച്ചതായ് പരാതി. പെൺകുട്ടിയുടെ പരാതിയിൽ 75 വയസ്സുകാരനെതിരെ പോക്സോ ചുമത്തി പൊലീസ് കേസ് റജിസ്റ്റർ ചെയ്തു. കൊല്ലം രണ്ടാംകുറ്റി സ്വദേശി നാസിമിനെതിരെയാണ് കേസെടുത്തത്. മൂന്ന് പേർ ചേർന്ന് നിർമിക്കുന്ന സിനിമയിൽ താൻ നിർമാതാവാണെന്നാണ് ഇയാൾ പെൺകുട്ടിയോട് പറഞ്ഞിരുന്നത്. സിനിമയിൽ അഭിനയിപ്പിക്കാമെന്ന് പറഞ്ഞ് ഇയാൾ പെൺകുട്ടിയിൽ നിന്നും 10,000 രൂപയും വാങ്ങിയിരുന്നു. എന്നാൽ സിനിമയുടെ കാര്യം നടക്കാതെ വന്നപ്പോൾ പെൺകുട്ടി പണം തിരികെ ചോദിച്ചു.

ഇതോടെ രണ്ടാംകുറ്റി ജംക്‌ഷനിൽ വച്ച് പണം തിരികെ തരാം എന്ന് പറഞ്ഞ് പെൺകുട്ടിയെ പ്രതി അവിടേക്ക് വിളിച്ചുവരുത്തി. കാറിലെത്തിയ നാസിം പണം വീട്ടിലിരിക്കുകയാണെന്ന് പറഞ്ഞ് പെൺകുട്ടിയെ വീട്ടിലേക്ക് കൂട്ടിക്കൊണ്ടുപോയി ഉപദ്രവിച്ചുവെന്നാണ് മൊഴി. ഇതിനിടെ പെൺകുട്ടി സുഹ്യത്തിന്റെ സഹായം തേടി. മൊബൈലിലേക്ക് ലൊക്കേഷൻ അയച്ചു നൽകിയതോടെ സുഹൃത്ത് എത്തി രക്ഷപ്പെടുത്തുകയായിരുന്നുവെന്നും വനിതാ പൊലീസ് സ്റ്റേഷനിൽ നൽകിയ മൊഴിയിൽ പെൺകുട്ടി പറയുന്നു. സംഭവത്തിൽ കേസെടുത്ത പൊലീസ് വിശദമായ അന്വേഷണം ആരംഭിച്ചു.

നാല് ദിവസം പ്രായമായ കുഞ്ഞിന്‍റെ അസ്വാഭാവിക മരണത്തില്‍ ദുരൂഹതയുടെ ചുരുളഴിയുമോ? മൃതദേഹം പുറത്തെടുത്ത് പോസ്റ്റ്മോർട്ടം നടത്തി

Web Desk — Mon, 12 Oct 2026 16:13:26 +0530

തൃശ്ശൂർ: തൃശ്ശൂർ ചാവക്കാട് നാല് ദിവസം പ്രായമായ കുഞ്ഞിന്റെ അസ്വാഭാവിക മരണത്തിൽ, മൃതദേഹം പുറത്തെടുത്ത് പോസ്റ്റ്മോർട്ടം നടത്തി. എടക്കഴിയൂർ ജുമാ മസ്ജിദിൽ വെച്ച് തൃശ്ശൂർ മെഡിക്കൽ കോളേജ് ഫോറൻസിക് സർജന്റെ നേതൃത്വത്തിലായിരുന്നു പോസ്റ്റ്മോർട്ടം നടന്നത്. കുഞ്ഞിന്റെ അമ്മയുടെ മരണത്തെ കുറിച്ചുള്ള അന്വേഷണത്തിനിടെ, പൊലീസ് സമർപ്പിച്ച അപേക്ഷയിൽ പോസ്റ്റുമോർട്ടത്തിന് കോടതി അനുമതി നൽകിയതോടെയാണ് നടപടി.

മരണം നടന്ന് 9 മാസങ്ങൾക്കപ്പുറമാണ് കുഞ്ഞിന്റെ മൃതദേഹം പുറത്തെടുത്ത്. തൃശ്ശൂർ മെഡിക്കൽ കോളേജ് ഫോറൻസിക് സർജൻ ഹി കേഷ് ശങ്കറിന്റെ നേതൃത്വത്തിൽ ആയിരുന്നു പോസ്റ്റ്മോർട്ടം. കോടതി നിർദ്ദേശപ്രകാരം സബ് കളക്ടർ അടക്കമുള്ളവരുടെ സാന്നിധ്യത്തിൽ പോസ്റ്റ്മോർട്ടം ആകെ വീഡിയോഗ്രാഫ് ചെയ്താണ് നടപടികൾ പൂർത്തിയാക്കിയത്. പോസ്റ്റ്മോർട്ടം റിപ്പോർട്ടിലെ വിവരങ്ങൾ നിർണായകമാകും. അമ്മയുടെ കുടുംബം ആരോപിക്കുന്നത് പോലെ കുഞ്ഞിന്റെ മരണത്തിൽ ദുരൂഹതയുണ്ടോ എന്നതിൽ വ്യക്തത വരും എന്നാണ് പൊലീസ് കരുതുന്നത്.

വീട്ടുപ്രസവത്തിന് പിന്നാലെ 2021 ജനുവരി 10ന് മരണപ്പെട്ട കുഞ്ഞിന്റെ മൃതദേഹം അന്ന് പുറംലോകം അറിയാതെ കുടുംബം മറവ് ചെയ്യുകയായിരുന്നു. രണ്ട് മാസങ്ങൾക്ക് ശേഷം കുഞ്ഞിന്റെ അമ്മ മുഹ്സിനയുടെ മരണത്തിന് പിന്നാലെ ഗുരുതര ആരോപണങ്ങളുമായി കുടുംബം രംഗത്തെത്തി. മുഹ്സിനയ്ക്ക് അക്യുപഞ്ചറിസ്റ്റായ ഭർത്താവ് ഇബാഹിം മതിയായ ചികിത്സ നൽകില്ലെന്ന പരാതിയിൽ പൊലീസ് കേസെടുത്തിരുന്നു. ഇവരുടെ രണ്ട് മക്കളുടെ മരണത്തിലും ഇതോടെയാണ് സംശയങ്ങൾ ഉയരുന്നത്. ചാവക്കാട് പൊലീസ് കോടതിയിൽ സമർപ്പിച്ച അപേക്ഷയിൽ നാല് ദിവസം പ്രായമുള്ള കുഞ്ഞിന്റെ മൃതദേഹം പുറത്തെടുക്കാൻ അനുമതി ലഭിച്ചതോടെയാണ് നടപടി. പോസ്റ്റ്മോർട്ടം റിപ്പോർട്ടിലെ വിവരങ്ങൾ വൈകാതെ പുറത്തുവരും.

കൊല്ലത്ത് നിന്നും കാണാതായ ഓട്ടോ ഡ്രൈവർ അമ്പലക്കരയിലെ ബാറിനടുത്തുള്ള പുരയിടത്തിൽ മരിച്ച നിലയിൽ, മൃതദേഹത്തിന് 4 ദിവസത്തെ പഴക്കം

Web Desk — Mon, 12 Oct 2026 15:33:38 +0530

കൊല്ലം: ആയൂരിൽ നിന്നും കാണാതായ ഓട്ടോ ഡ്രൈവറെ മരിച്ച നിലയിൽ കണ്ടെത്തി. ആയൂർ ഓട്ടോ സ്റ്റാൻഡിലെ ഡ്രൈവറായ സുനിൽകുമാറിനെയാണ് വെളിയം അമ്പലക്കരയിലെ ബാറിന് സമീപമുള്ള പുരയിടത്തിൽ മരിച്ച നിലയിൽ കണ്ടെത്തിയത്. കഴിഞ്ഞ ഏഴാം തീയതി മുതൽ സുനിൽകുമാറിനെ കാണാതായിരുന്നു. സുനിലിനായി വ്യാപകമായ തെരച്ചിൽ നടത്തി വരുന്നതിനിടയിലാണ് മൃതദേഹം കണ്ടെത്തിയത്. വിവരമറിഞ്ഞ് പൂയപ്പള്ളി പൊലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. മൃതദേഹത്തിന് ഏകദേശം നാലു ദിവസത്തെ പഴക്കമുണ്ടെന്നാണ് കണക്കാക്കപ്പെടുന്നത്. മരണകാരണം വ്യക്തമായിട്ടില്ല. പോസ്റ്റ്മോർട്ടം നടപടികൾക്ക് ശേഷമാകും ഇക്കാര്യത്തിൽ വ്യക്തത ഉണ്ടാവുക. പൊലീസ് അന്വേഷണം ഊർജിതമാക്കി. മൃതദേഹം പോസ്റ്റ്മോർട്ടത്തിനു ശേഷം ബന്ധുക്കൾക്ക് വിട്ടുനൽകി.

കാട്ടുപന്നി ആക്രമണത്തില്‍ മരണം; കുടുംബത്തിന് 14 ലക്ഷം രൂപ ധനസഹായം

Web Desk — Mon, 12 Oct 2026 14:03:02 +0530

മലപ്പുറം: കിഴക്കേ ചാത്തല്ലൂരില്‍ കാട്ടുപന്നിയുടെ ആക്രമണത്തില്‍ മരിച്ച പി.കെ. ഫാത്തിമയുടെ കുടുംബത്തിന് 14 ലക്ഷം രൂപ ധനസഹായം നല്‍കുമെന്ന് മന്ത്രി പി.കെ. ബഷീര്‍ അറിയിച്ചു. ആക്രമണത്തില്‍ പരിക്കേറ്റവരുടെ ചികിത്സാ ചെലവ് പൂര്‍ണമായും സര്‍ക്കാര്‍ വഹിക്കുമെന്നും മന്ത്രി വ്യക്തമാക്കി. സംഭവം നടന്ന പ്രദേശം സന്ദര്‍ശിച്ച ശേഷമാണ് മന്ത്രി ഇക്കാര്യം അറിയിച്ചത്.

ഞായറാഴ്ച പുലര്‍ച്ചെ നമസ്‌കാരത്തിനായി എത്തിയവര്‍ക്കുനേരെയായിരുന്നു അപ്രതീക്ഷിതമായി കാട്ടുപന്നിയുടെ ആക്രമണമുണ്ടായത്. ആക്രമണത്തില്‍ ഗുരുതരമായി പരിക്കേറ്റ പി.കെ. ഫാത്തിമ പിന്നീട് മരിച്ചു. പ്രദേശത്ത് ഉണ്ടായിരുന്ന പി.ടി. മുഹമ്മദ് അലി, കുനിയമണ്ണന്‍ ഹമീദ്, പി.പി. അബ്ദുല്ല എന്നിവര്‍ക്കും ആക്രമണത്തില്‍ പരിക്കേറ്റു. ഇവര്‍ വിവിധ ആശുപത്രികളില്‍ ചികിത്സയില്‍ തുടരുകയാണ്.

ഫാത്തിമയുടെ വീട്ടിലെത്തിയ മന്ത്രി കുടുംബാംഗങ്ങളെ ആശ്വസിപ്പിച്ചു. കുടുംബത്തിന്റെ ദുഃഖത്തില്‍ പങ്കുചേര്‍ന്ന മന്ത്രി അടിയന്തരമായി ആവശ്യമായ സഹായങ്ങള്‍ ലഭ്യമാക്കുമെന്ന് ഉറപ്പുനല്‍കി. 14 ലക്ഷം രൂപയുടെ ധനസഹായം പ്രഖ്യാപിച്ചത് കുടുംബത്തിന് വലിയ ആശ്വാസമാകുമെന്നാണ് പ്രതീക്ഷ. പരിക്കേറ്റവരുടെ ചികിത്സയില്‍ സാമ്പത്തിക ബുദ്ധിമുട്ട് ഉണ്ടാകാതിരിക്കാനും സര്‍ക്കാര്‍ ഇടപെടല്‍ ഉറപ്പാക്കുമെന്ന് മന്ത്രി പറഞ്ഞു.

തുടര്‍ന്ന് അരീക്കോട്ടെ സ്വകാര്യ ആശുപത്രിയിലും മഞ്ചേരി മെഡിക്കല്‍ കോളജ് ആശുപത്രിയിലും ചികിത്സയില്‍ കഴിയുന്നവരെയും മന്ത്രി സന്ദര്‍ശിച്ചു. പരിക്കേറ്റവരുടെ ആരോഗ്യനില സംബന്ധിച്ച വിവരങ്ങള്‍ ആശുപത്രി അധികൃതരില്‍ നിന്ന് ചോദിച്ചറിഞ്ഞ അദ്ദേഹം ആവശ്യമായ ചികിത്സയും പരിചരണവും ഉറപ്പാക്കാന്‍ നിര്‍ദേശം നല്‍കി.

അതേസമയം, കാട്ടുപന്നിയുടെ ആക്രമണത്തിന് പിന്നാലെ കിഴക്കേ ചാത്തല്ലൂരിലും സമീപ പ്രദേശങ്ങളിലും ആശങ്ക ശക്തമായിട്ടുണ്ട്. പുലര്‍ച്ചെയും രാത്രിയിലും പുറത്തിറങ്ങുന്നവര്‍ക്ക് വന്യമൃഗ ഭീഷണി നിലനില്‍ക്കുന്ന സാഹചര്യത്തില്‍ പ്രദേശത്ത് കൂടുതല്‍ ജാഗ്രത വേണമെന്ന നിര്‍ദേശവും ഉയര്‍ന്നിട്ടുണ്ട്.

പ്രദേശത്ത് ഇനിയും കാട്ടുപന്നികള്‍ ഉണ്ടോയെന്ന് കണ്ടെത്തുന്നതിനായി ഇന്നും നാളെയും ഫോറസ്റ്റ് ഉദ്യോഗസ്ഥരുടെ നേതൃത്വത്തില്‍ പ്രത്യേക പരിശോധന നടത്താന്‍ ഡി.എഫ്.ഒയ്ക്ക് മന്ത്രി നിര്‍ദേശം നല്‍കി. കാട്ടുപന്നികളുടെ സാന്നിധ്യം കണ്ടെത്തുന്ന മേഖലകളില്‍ ആവശ്യമായ തുടര്‍നടപടികള്‍ സ്വീകരിക്കുമെന്നും അധികൃതര്‍ അറിയിച്ചു.

ഒരു ജീവന്‍ നഷ്ടപ്പെടുകയും മൂന്ന് പേര്‍ക്ക് പരിക്കേല്‍ക്കുകയും ചെയ്ത സംഭവത്തിന് പിന്നാലെ കാട്ടുപന്നി ഭീഷണിക്ക് അടിയന്തര പരിഹാരം വേണമെന്ന ആവശ്യവും നാട്ടുകാര്‍ ശക്തമാക്കിയിട്ടുണ്ട്. ജനങ്ങളുടെ സുരക്ഷ ഉറപ്പാക്കുന്നതിനൊപ്പം വന്യമൃഗ ശല്യം നിയന്ത്രിക്കാന്‍ സ്ഥിരമായ നടപടികള്‍ സ്വീകരിക്കണമെന്നാണ് പ്രദേശവാസികളുടെ ആവശ്യം.

പ്രണയത്തിൽ നിന്ന് പിന്മാറി; വർക്കലയിൽ യുവതിക്ക് നേരെ ട്രെയിനിൽ അതിക്രമം

Web Desk — Mon, 12 Oct 2026 13:41:13 +0530

തിരുവനന്തപുരം: പ്രണയബന്ധത്തിൽ നിന്ന് പിന്മാറിയ യുവതിക്ക് നേരെ ട്രെയിനിൽ അതിക്രമമെന്ന് പരാതി. വർക്കല റെയിൽവേ സ്റ്റേഷനിൽ ഒമ്പതാം തീയതി രാത്രിയാണ് സംഭവം നടന്നത്. യുവതിയെ ട്രെയിനിൽ വെച്ച് മർദിക്കുകയും മൊബൈൽ ഫോൺ പിടിച്ച് വാങ്ങിക്കൊണ്ട് പോയി തകർക്കുകയും ചെയ്തുവെന്നാണ് പരാതി. സംഭവത്തിൽ വർക്കല ശിവഗിരി സ്വദേശിയായ ബോബിക്കെതിരെ വർക്കല പൊലീസ് കേസെടുത്തു. ട്രെയിനിൽ വെച്ച് യുവതിയുടെ കൈയിൽ നിന്ന് ഫോൺ പിടിച്ചു വാങ്ങിക്കൊണ്ടുപോയെന്നും പ്ലാറ്റ്ഫോമിൽ വെച്ച് തിരികെ ഫോൺ വാങ്ങാൻ ശ്രമിച്ചപ്പോൾ യുവതിയെ മർദ്ദിച്ചന്നുമാണ് പരാതി. ഫോൺ തിരികെ വാങ്ങാൻ യുവാവിന്റെ വീട്ടിലെത്തിയ സമയത്തും യുവതിയെ ബോബി മർദ്ദിച്ചതായി പരാതിയിൽ പറയുന്നു. സംഭവത്തിൽ പൊലീസ് കേസെടുത്ത് അന്വേഷണം തുടങ്ങി.

അനധികൃത ക്വാറിയില്‍ പരിശോധന; 163 ജെലാറ്റിന്‍ സ്റ്റിക്കുകളും 235 ഷോക്ക് ട്യൂബുകളും പിടിച്ചെടുത്തു, ഒരാൾ പിടിയിൽ

Web Desk — Mon, 12 Oct 2026 12:34:48 +0530

മലപ്പുറം: അനധികൃതമായി പ്രവര്‍ത്തിക്കുന്ന കരിങ്കല്‍ ക്വാറിയില്‍ ഖനനാവശ്യത്തിനായി സൂക്ഷിച്ചിരുന്ന സ്‌ഫോടകവസ്തുക്കള്‍ വേങ്ങര പൊലീസ് പിടിച്ചെടുത്തു. സംഭവവുമായി ബന്ധപ്പെട്ട് ചേറൂര്‍ സ്വദേശി ജാഫര്‍ (36) അറസ്റ്റിലായി. കണ്ണമംഗലം വില്ലേജിലെ മഞ്ഞേഞ്ഞങ്ങര പെരണ്ടക്കല്‍ റോഡില്‍ കൊട്ടേക്കാട്ട് പറമ്പിലുള്ള ക്വാറിയില്‍ നടത്തിയ പരിശോധനയിലാണ് സ്‌ഫോടകവസ്തുക്കള്‍ കണ്ടെത്തിയത്.

രണ്ട് പ്ലാസ്റ്റിക് ചാക്കുകളിലായി സൂക്ഷിച്ചിരുന്ന 163 ജെലാറ്റിന്‍ സ്റ്റിക്കുകളും 235 ഷോക്ക് ട്യൂബുകളുമാണ് പൊലീസ് പിടിച്ചെടുത്തത്. കരിങ്കല്‍ ഖനനത്തിനായി ഉപയോഗിക്കുന്ന സ്‌ഫോടകവസ്തുക്കളാണ് ഇവയെന്നാണ് വിവരം. ക്വാറിയില്‍ അനധികൃതമായി ഖനനം നടത്തുന്നതിനായി ഇവ സൂക്ഷിച്ചിരുന്നുവെന്നാണ് പൊലീസിന്റെ കണ്ടെത്തല്‍.

അനധികൃത ക്വാറികളുടെ പ്രവര്‍ത്തനവും സുരക്ഷാ മാനദണ്ഡങ്ങള്‍ പാലിക്കാതെയുള്ള ഖനനവും സംബന്ധിച്ച പരിശോധനകള്‍ക്കിടെയാണ് നടപടി. ആവശ്യമായ അനുമതികളില്ലാതെ ഖനനം നടത്തുന്നതും സ്‌ഫോടകവസ്തുക്കള്‍ സുരക്ഷിതമല്ലാത്ത രീതിയില്‍ സൂക്ഷിക്കുന്നതും അപകടസാധ്യത വര്‍ധിപ്പിക്കുന്ന സാഹചര്യത്തിലാണ് പൊലീസ് പരിശോധന നടത്തിയത്.

പിടിച്ചെടുത്ത സ്‌ഫോടകവസ്തുക്കള്‍ തുടര്‍നടപടികള്‍ക്കായി പൊലീസ് കസ്റ്റഡിയിലെടുത്തു. സംഭവത്തില്‍ അറസ്റ്റിലായ ജാഫറിനെ കോടതിയില്‍ ഹാജരാക്കിയതിനെ തുടര്‍ന്ന് റിമാന്‍ഡ് ചെയ്തു. ക്വാറിയുടെ പ്രവര്‍ത്തനവുമായി ബന്ധപ്പെട്ട കൂടുതല്‍ വിവരങ്ങള്‍ പരിശോധിക്കുന്നതിന്റെ ഭാഗമായി പൊലീസ് തുടര്‍നടപടികള്‍ സ്വീകരിച്ചുവരികയാണ്.

പാലക്കാട് ലക്കിടിയിൽ സ്വകാര്യബസും സ്കൂട്ടറും കൂട്ടിയിടിച്ച് അപകടം; 12 കാരിക്ക് ദാരുണാന്ത്യം

Web Desk — Mon, 12 Oct 2026 12:29:34 +0530

പാലക്കാട്‌: പാലക്കാട്‌ ലക്കിടിയിൽ സ്വകാര്യബസും സ്കൂട്ടറും തമ്മിൽ കൂട്ടിയിടിച്ച് 12 കാരിക്ക് ദാരുണാന്ത്യം. സ്കൂട്ടറിൽ ഉണ്ടായിരുന്ന 12 കാരി ഫിയാ ഫാത്തിമയാണ് മരിച്ചത്. അഞ്ച് പേരാണ് സ്‌കൂട്ടറിൽ ഉണ്ടായിരുന്നത്. ഫിയാ ഫാത്തിമയുടെ പിതാവ് ആസിഫ് (36), മാതാവ് സുമയ്യ (33), 2 സഹോദരങ്ങൾ ഉൾപ്പെടെയാണ് ഒരു സ്‌കൂട്ടറിൽ യാത്ര ചെയ്തത്. ഇന്ന് രാവിലെ 10 മണിയോടെയാണ് അപകടം ഉണ്ടായത്. പാലക്കാട് ഭാഗത്തുനിന്നും ഒറ്റപ്പാലം ഭാഗത്തേക്ക് വരികയായിരുന്നു സ്വകാര്യ ബസ്. അതേ ദിശയിൽ സഞ്ചരിക്കുകയായിരുന്ന സ്കൂട്ടറിന് പിറകിൽ ഇടിക്കുകയായിരുന്നു. അപകട സ്ഥലത്ത് വെച്ച് തന്നെ 12 കാരി മരണപ്പെട്ടു. പരിക്കേറ്റവരെ കണ്ണിയംപുറത്ത് സ്വകാര്യ ആശുപത്രിയിൽ പ്രവേശിപ്പിച്ചു.

അടൂരിലെ സംഘർഷം: കോൺഗ്രസിലില്ലാത്തയാളാണ് കോൺഗ്രസിനെ നിയന്ത്രിക്കുന്നതെന്ന് പിണറായി വിജയൻ

Prabeesh PP — Mon, 12 Oct 2026 11:35:08 +0530

തിരുവനന്തപുരം: അടൂരിൽ കോൺഗ്രസിൽ ഇല്ലാത്ത ആളാണ് കോൺഗ്രസിനെ നിയന്ത്രിക്കുന്നതെന്ന് പിണറായി വിജയൻ വിമർശിച്ചു. അയാൾ പൊലീസ് ജീപ്പിൽ കയറിയെന്നും എന്നാൽ മന്ത്രിക്ക് അയാൾ ബഹുമാന്യനായിരിക്കുമെന്നും അദ്ദേഹം പരിഹസിച്ചു. അടൂരിൽ ആശുപത്രിയിലുള്ള എസ്.എഫ്.ഐ.ക്കാരെ കയറി ആക്രമിച്ച ശേഷം കേസെടുത്തത് എസ്.എഫ്.ഐ.ക്കാർക്ക് നേരെയാണെന്നും അദ്ദേഹം കുറ്റപ്പെടുത്തി.

അടൂരിലെ സംഘർഷവും പോലീസ് നടപടിയും

അടൂരിൽ എസ്.എഫ്.ഐ - യൂത്ത് കോൺഗ്രസ് പ്രവർത്തകർ തമ്മിലുണ്ടായ കടുത്ത സംഘർഷത്തിൽ പ്രതികൾക്കെതിരെ പോലീസ് കർശന നടപടി സ്വീകരിച്ചു. എസ്.എഫ്.ഐ പ്രവർത്തകരെ മർദിച്ച സംഭവത്തിൽ യൂത്ത് കോൺഗ്രസ് മുൻ സംസ്ഥാന പ്രസിഡന്റ് രാഹുൽ മാങ്കൂട്ടത്തിലിനെ ഒന്നാം പ്രതിയാക്കിയാണ് പോലീസ് കേസെടുത്തിരിക്കുന്നത്.

ഇന്നലെ രാത്രി ഏഴംകുളത്ത് തുടങ്ങി അടൂരിന്റെ വിവിധ ഭാഗങ്ങളിലേക്ക് പടർന്ന സംഘർഷത്തിൽ അടൂർ പോലീസ് ആകെ മൂന്ന് കേസുകളാണ് രജിസ്റ്റർ ചെയ്തിട്ടുള്ളത്. കെ.എസ്.യു. പ്രവർത്തകരെ മർദിച്ച സംഭവത്തിൽ ഡിവൈഎഫ്ഐ, എസ്.എഫ്.ഐ പ്രവർത്തകർക്കെതിരെയും പോലീസ് കേസ് രജിസ്റ്റർ ചെയ്തിട്ടുണ്ട്. അടൂരിലെ സ്വകാര്യ ആശുപത്രി പരിസരത്തുവെച്ചും ഇരുവിഭാഗങ്ങളും തമ്മിൽ ഏറ്റുമുട്ടൽ ഉണ്ടായി. സംഘർഷത്തിനിടെ പ്രദേശത്തെ ഒരു സി.പി.എം. നേതാവിന്റെ കാർ അക്രമികൾ അടിച്ചുതകർത്തിരുന്നു.

15 വയസ്സുകാരനെ വീട്ടിൽ കയറി തട്ടിക്കൊണ്ടുപോയി ഉപദ്രവിച്ചു; രണ്ട് പേർ പിടിയിൽ

Web Desk — Mon, 12 Oct 2026 10:03:05 +0530

കൊച്ചി: ആലുവ കുന്നത്തേരിയിൽ വാടകയ്ക്ക് താമസിക്കുന്ന 15 വയസ്സുകാരനെ വീട്ടിൽ കയറി തട്ടിക്കൊണ്ടുപോയി ഉപദ്രവിച്ച കേസിൽ രണ്ടു പേർ അറസ്റ്റിൽ. കാക്കനാട് വികാസവാണി ഭാഗത്ത് വെളുത്തേടത്ത് പറമ്പിൽ മുൻസിർ (21) ആലുവ മുച്ചംകുളം ചിറമേൽ പറമ്പിൽ വീട്ടിൽ ഷാജഹാൻ ( 23) എന്നിവരെയാണ് ആലുവ സി ഐ പി എം ഷെമീറിൻ്റെ നേതൃത്വത്തിൽ പൊലീസ് അറസ്റ്റ് ചെയ്തത്. പ്രതികളിൽ ഒരാളും 15 വയസ്സുകാരന്റെ സുഹൃത്തും തമ്മിൽ ശത്രുതയിലായിരുന്നു.

ശനിയാഴ്ച ഉച്ചയ്ക്ക് സുഹൃത്തിനെ തിരക്കിയാണ് പ്രതികൾ കുട്ടിയുടെ വീട്ടിലെത്തിയത്. തുടർന്ന് കുട്ടിയെ ബൈക്കിൽ കയറ്റി സംഘം തട്ടിക്കൊണ്ടു പോവുകയായിരുന്നു. കുട്ടിയെ പെരിങ്ങാലയിലെ വീട്ടിൽ കൊണ്ടുപോയി ആക്രമിക്കുകയായിരുന്നു .ബ്ലേഡ് കൊണ്ട് ശരീരത്തിൽ മുറിവേൽപ്പിച്ചു.

കുട്ടിയെ തട്ടി കൊണ്ടുപോയത് അറിഞ്ഞ് കുട്ടിയുടെ അമ്മ ആലുവ പൊലീസിൽ പരാതി നൽകി. പരാതി ലഭിച്ച ഉടനെ പോലീസ് കേസ് രജിസ്റ്റർ ചെയ്തു അന്വേഷണം ആരംഭിച്ചു. കുട്ടിയുടെ അമ്മ പരാതി നൽകിയെന്നറിഞ്ഞ് തട്ടുകൊണ്ടു പോയവർ 15 വയസ്സുകാരനെ കങ്ങരപ്പടിയിലെ ബസ്റ്റോപ്പിന് സമീപം ഇറക്കിവിട്ടു. പൊലീസ് നടത്തിയ ശാസ്ത്രീയ അന്വേഷണത്തിനൊടുവിൽ പ്രതികളെ തിരിച്ചറിഞ്ഞു.

ഇവർ നിരവധി കേസിൽ ഉൾപ്പെട്ടവരാണ് എന്ന് മനസ്സിലാക്കിയ പോലീസ് വിവിധ സംഘങ്ങളായി തിരിഞ്ഞ് അന്വേഷണം ഊർജിതമാക്കി. ശനിയാഴ്ച രാത്രി പള്ളിക്കരയിലെ പമ്പിൽ വാഹനത്തിന് പെട്രോൾ അടിക്കാൻ എത്തിയ സംഘത്തിലെ രണ്ടു പേരെ പോലീസ് വളഞ്ഞു. ചെറുത്തുനിന്ന പ്രതികൾ പോലീസിനെതിരെ കത്തി വീശി. ആക്രമണത്തിൽ പോലീസുകാർക്ക് പരിക്കേറ്റു.

തുടർന്ന് പ്രതികളെ സാഹസികമായി പൊലീസ് അറസ്റ്റ്. ചെയ്യുകയായിരുന്നു. ഒന്നാംപ്രതി 10 കേസുകളിലും, രണ്ടാം പ്രതി 6 കേസുകളിലും ഉൾപ്പെട്ടവരാണ്. പരിക്കേറ്റ കുട്ടി ആശുപത്രിയിൽ ചികിത്സയിലാണ്. പ്രതികൾക്കെതിരെ ജീവപര്യന്തം വരെ ശിക്ഷ ലഭിക്കാവുന്ന വകുപ്പുകൾ ആണ് ചുമത്തിയിട്ടുള്ളത്.

ആലുവ ഡി വൈ എസ് പി ബൈജു പൗലോസിന്റെ മേൽനോട്ടത്തിൽ രൂപീകരിച്ച അന്വേഷണ സംഘത്തിൽ ആലുവ സർക്കിൾ ഇൻസ്പെക്ടർ പി എം ഷമീർ, എസ് ഐ മാരായ ബെന്നി കുര്യാക്കോസ് ,സുരേഷ് കുമാർ സി പി ഒ മാരായ മാഹിൻ ഷാ അബൂബക്കർ, മുഹമ്മദ് ഷാഹിൻ, കെ എം മനോജ് എന്നിവരാണ് ഉണ്ടായിരുന്നത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. തട്ടിക്കൊണ്ടുപോയ സംഘത്തിലെ മൂന്നാമന് വേണ്ടി പൊലീസ് അന്വേഷണം ഊർജിതമാക്കി.

പോലീസ് സ്റ്റേഷനില്‍ ഭീകരാന്തരീക്ഷം സൃഷ്ടിച്ചു, അമ്മയും മകളും അറസ്റ്റില്‍

Web Desk — Mon, 12 Oct 2026 09:47:42 +0530

തൃശൂര്‍: വടക്കാഞ്ചേരി പോലീസ് സ്റ്റേഷനില്‍ ഭീകരാന്തരീക്ഷം സൃഷ്ടിച്ച നിരവധി കേസുകളില്‍ പ്രതിയായ അമ്മയും മകളും അറസ്റ്റില്‍. തൂമാനം ചിറയത്ത് വീട്ടില്‍ ബിന്ദു എന്ന തൂമാനം ബിന്ദുവിനെ(റിനി) യും മകള്‍ സോന (22) യേയുമാണ് പോലീസ് അറസ്റ്റ് ചെയ്തത്. ഹണി ട്രാപ്പ് ഉള്‍പ്പെടെ തൃശൂര്‍ ജില്ലയില്‍ നിരവധി കേസുകളില്‍ ഉള്‍പ്പെട്ട പ്രതികളാണ് ഇരുവരും.

അയല്‍വാസിയെ അസഭ്യം പറഞ്ഞു ഭീഷണിപ്പെടുത്തിയ പരാതി കാര്യം പോലീസ് സ്റ്റേഷനില്‍ സംസാരിക്കുന്നതിനിടയില്‍ എസ്.എച്ച്.ഒ. അനൂപിനെ ഭീഷണിപ്പെടുത്തുകയും അസഭ്യം വിളിക്കുകയും സ്റ്റേഷന്‍ വസ്തുവകകള്‍ക്ക് നാശനഷ്ടമുണ്ടാക്കി സ്റ്റേഷനില്‍ സംഘര്‍ഷം ഉണ്ടാക്കുകയും ചെയ്തു. വനിതാ പോലീസ് ഉദ്യോഗസ്ഥരെ ആക്രമിച്ച് പരുക്കേല്പിച്ചു. പോലീസിന്റെ കൃത്യനിര്‍വഹണത്തിന് തടസം സൃഷ്ടിക്കുകയും ചെയ്ത തൂമാനം ബിന്ദു, മകള്‍ സോന (22) എന്നിവര എസ്.എച്ച്.ഒ. അനൂപ് അറസ്റ്റ് ചെയ്തത്.

കോഴിക്കോട് ട്രെയിൻ തട്ടി മരിച്ചത് വിദ്യാർത്ഥികൾ; മൃതദേഹങ്ങൾ ചിന്നിച്ചിതറി, തിരിച്ചറിഞ്ഞത് മാതാപിതാക്കളെത്തി

Deepu Divakaran — Mon, 12 Oct 2026 06:38:45 +0530

കോഴിക്കോട്: ചേമഞ്ചേരിയിൽ ട്രെയിൻ തട്ടി മരിച്ചത് വിദ്യാർത്ഥികൾ. തിരുവങ്ങൂർ ഹയർ സെക്കൻഡറി സ്കൂൾ ഒമ്പതാം ക്ലാസ് വിദ്യാർത്ഥി അവനിക (14), പ്ലസ് ടു വിദ്യാർത്ഥി തിരുവങ്ങൂർ കോഴിപ്പറമ്പത്ത് പാർത്ഥിബ് (17) എന്നിവരാണ് മരിച്ചത്. ചേമഞ്ചേരി സ്റ്റേഷന് സമീപം മംഗലാപുരം - ചെന്നൈ മെയിൽ തട്ടിയാണ് മരണം.

ഞായറാഴ്ച വൈകിട്ട് 5:45 ഓടെയാണ് സംഭവം. രണ്ട് മൃതദേഹങ്ങളും ചിന്നിച്ചിതറിയ നിലയിലായിരുന്നു. അതുകൊണ്ടുതന്നെ മരിച്ചവരെ തിരിച്ചറിയാൻ സാധിച്ചിരുന്നില്ല. രാത്രി ഏറെ വൈകി ബന്ധുക്കൾ കോഴിക്കോട് മെഡിക്കൽ കോളേജ് മോർച്ചറിയിൽ എത്തിയാണ് മൃതദേഹങ്ങൾ തിരിച്ചറിഞ്ഞതെന്ന് കൊയിലാണ്ടി പൊലീസ് അറിയിച്ചു.

മൃതദേഹങ്ങൾ കോഴിക്കോട് മെഡിക്കൽ കോളേജ് മോർച്ചറിയിലേക്ക് മാറ്റി. ദേശീയപാതയും റെയിൽവേ ട്രാക്കും അടുത്തടുത്തുവരുന്ന ചേമഞ്ചേരി റെയിൽവേ സ്റ്റേഷന് സമീപമായിരുന്നു സംഭവം. അവനിക വികാസ് നോർത്ത് പാണകുളംകുനി സുരേഷ് - റീന ദമ്പതികളുടെ മകളാണ്. തിരുവങ്ങൂർ കോയി പറമ്പത്ത് സുബിഷിൻ്റെയും സുനിഷയുടയും മകനാണ് പാർത്ഥിബ്.

വയനാട്ടിൽ ട്രാവലർ തലകീഴായി മറിഞ്ഞ് രണ്ട് മരണം; അപകടത്തിൽപെട്ടത് മൂന്നാർ വിനോദയാത്ര കഴിഞ്ഞ് മടങ്ങിയ കർണാടക സംഘം

Deepu Divakaran — Mon, 12 Oct 2026 06:34:50 +0530

സുൽത്താൻ ബത്തേരി: വയനാട് സുൽത്താൻ ബത്തേരി 54ൽ ട്രാവലർ തലകീഴായി മറിഞ്ഞ് രണ്ട് മരണം. കർണാടക സ്വദേശി രഞ്ജിത്ത് (40), മൈസൂർ സ്വദേശി ഭരത് എന്നിവരാണ് മരിച്ചത്. കർണാടകത്തിലെ മാണ്ഡ്യ യൂണിവേഴ്സിറ്റിയിലെ പിജി വിദ്യാർത്ഥികൾ സഞ്ചരിച്ച ട്രാവലറാണ് അപകടത്തിൽപെട്ടത്. ട്രാവലർ ഡ്രൈവറായിരുന്നു രഞ്ജിത്ത്. പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ചു.

പുലർച്ചെ ഒന്നേ മുക്കാലോടെ ആണ് അപകടം നടന്നത്. മൂന്നാർ വിനോദയാത്ര കഴിഞ്ഞ് മടങ്ങുകയായിരുന്നു സംഘം. ഫയർ ഫോഴ്സും നാട്ടുകാരും ചേർന്ന് ട്രാവലർ വെട്ടിപ്പൊളിച്ചാണ് ആളുകളെ പുറത്ത് എടുത്തത്. 13 വിദ്യാർത്ഥികൾ, കുക്ക്, ഡ്രൈവർ ഉൾപ്പടെ 15 പേരാണ് സംഘത്തിൽ ഉണ്ടായിരുന്നത്.

ബൈക്കും ടൂറിസ്റ്റ് ബസും കൂട്ടിയിടിച്ചു; കൊച്ചി എയര്‍പോര്‍ട്ട് ജീവനക്കാരന് ദാരുണാന്ത്യം

Deepu Divakaran — Mon, 12 Oct 2026 02:10:13 +0530

തൃശൂര്‍: പെരുമ്പിലാവ് - കുറ്റിപ്പുറം സംസ്ഥാനപാത കടവല്ലൂര്‍ അമ്പലം സ്റ്റോപ്പിന് സമീപം ബൈക്കും ടൂറിസ്റ്റ് ബസും കൂട്ടിയിടിച്ചുണ്ടായ അപകടത്തില്‍ ബൈക്കില്‍ പോയിരുന്ന കൊച്ചി എയര്‍പോര്‍ട്ട് ജീവനക്കാരനായ യുവാവിന് ദാരുണാന്ത്യം. കുറ്റിപ്പുറം പഴവൂര്‍ ചക്കുവളപ്പില്‍ സുധീറിന്റെ മകന്‍ സി വി ജിതിന്‍ (22) ആണ് മരിച്ചത്.

ഞായറാഴ്ച രാത്രി 7:20നായിരുന്നു അപകടം. കുന്നംകുളം ഭാഗത്തുനിന്ന് കുറ്റിപ്പുറം ഭാഗത്തേക്ക് പോവുകയായിരുന്ന ടൂറിസ്റ്റ് ബസുമായി മറ്റൊരു വാഹനത്തെ മറികടന്നെത്തിയ ബുള്ളറ്റ്‌ ബൈക്ക് കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ ജിതിന്‍ സംഭവസ്ഥലത്തുവെച്ചുതന്നെ മരിച്ചു. മൃതദേഹം പെരുമ്പിലാവിലെ സ്വകാര്യ ആശുപത്രിയില്‍ സൂക്ഷിച്ചിരിക്കുകയാണ്.

കുന്നംകുളം പൊലീസ് സ്ഥലത്തെത്തി തുടര്‍നടപടികള്‍ സ്വീകരിച്ചു. അപകടത്തില്‍ ടൂറിസ്റ്റ് ബസിനും ബൈക്കിനും കാര്യമായ കേടുപാടുകള്‍ സംഭവിച്ചിട്ടുണ്ട്. അപകടത്തെ തുടര്‍ന്ന് മേഖലയില്‍ ഭാഗികമായി ഗതാഗതം തടസ്സപ്പെട്ടു. കൊച്ചി എയര്‍പോര്‍ട്ടില്‍ ജീവനക്കാരനായ ജിതിന്‍ എയര്‍ പോര്‍ട്ടിലേക്ക് പോകുംവഴിയാണ് അപകടം സംഭവിച്ചത്. മാതാവ് നിഷ. സഹോദരന്മാര്‍ അഭിനവ്, അഭിനന്ദ്.

പൊലീസ് എത്തിയതറിഞ്ഞ് ടെറസിൽ നിന്ന് ചാടി, രണ്ടു കാലുകൾക്കും ഗുരുതര പരിക്ക്; എംഡിഎംഎ കേസിലെ മുഖ്യ കണ്ണി അറസ്റ്റിൽ

Deepu Divakaran — Mon, 12 Oct 2026 01:54:58 +0530

തിരുവനന്തപുരം: പയറുംമൂട് ബൈപ്പാസിന് സമീപം നിന്ന് കഴിഞ്ഞ മാസം 50 ഗ്രാമോളം എംഡിഎംഎ പിടികൂടിയ സംഭവത്തിൽ മുഖ്യ കണ്ണി അറസ്റ്റിൽ. കോട്ടയം ഓണംതുരുത്ത് വാസ്കോ ജംഗ്ഷന് സമീപം പാറ്റിയാൽ വീട്ടിൽ ജിബിൻ പി ചാക്കോ (35) ആണ് അറസ്റ്റിലായത്. തലസ്ഥാനത്ത് ഒളിവിൽ കഴിഞ്ഞിരുന്ന ഇയാളെ പിടികൂടാൻ പൊലീസ് എത്തിയപ്പോൾ വീടിന്‍റെ ടെറസിൽ നിന്ന് ചാടി രക്ഷപ്പെടാൻ ശ്രമിച്ചു. രണ്ടു കാലുകൾക്കും ഗുരുതര പരുക്കേറ്റ പ്രതിയെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

നിലവിൽ പ്രതി പൊലീസ് നിരീക്ഷണത്തിൽ ചികിത്സയിലാണ്. ഇയാൾക്കെതിരെ കോട്ടയത്ത് 14 ഓളം കേസ് ഉണ്ടെന്നും പിടിയിലാകുന്നത് ആദ്യമാണെന്നും പൊലീസ് പറയുന്നു. മുമ്പ് പിടിയിലായ പ്രതികൾക്ക് ലഹരി എത്തിച്ചു നൽകുന്ന മുഖ്യ കണ്ണിയാണ് ഇയാളെന്ന് വിഴിഞ്ഞം പൊലീസ് പറഞ്ഞു.

കേസിൽ ആനയറ സ്വദേശി വിജയകുമാർ, കഴിഞ്ഞ 29ന് സ്‌കൂട്ടറിൽ കടത്തുകയായിരുന്ന 50 ഗ്രാം എംഡിഎംഎയുമായി പൂന്തുറ മാണിക്യം വിളാകം സ്വദേശി മുജീബ് റഹ്‌മാൻ (32), വിഴിഞ്ഞം ടൗൺഷിപ്പ് കോളനി സ്വദേശി സഹദ് (27) എന്നിവരെ കോവളം കാരോട് ബൈപ്പാസിന്‍റെ വിഴിഞ്ഞം പയറുംമൂട് ഭാഗത്തുവെച്ച് സിറ്റി ഡാൻസാഫ് സംഘം പിടികൂടി വിഴിഞ്ഞം പൊലീസിന് കൈമാറിയിരുന്നു. ഇതിൻ്റെ അന്വേഷണത്തിനിടെയാണ് ജിബിനുമായുള്ള ബന്ധം പുറത്തായത്.

ക്രൂര പീഡനത്തിൽ മനംമടുത്ത് ഭർതൃവീട്ടിൽ 22 കാരി ജീവനൊടുക്കിയ സംഭവത്തിൽ ഭർത്താവ് അറസ്റ്റിൽ; ഗാർഹിക പീഡനം, ആത്മഹത്യാ പ്രേരണയുമടക്കമുള്ള കുറ്റങ്ങൾ ചുമത്തി

Anver Sajad — Mon, 12 Oct 2026 00:38:45 +0530

തൃശൂർ: ചാലക്കുടി പോട്ടയിൽ ഭർതൃവീട്ടിൽ ആത്മഹത്യയ്ക്ക് ശ്രമിച്ച യുവതി മരിച്ച സംഭവത്തിൽ ഭർത്താവ് റിമാൻഡിൽ. തൃശ്ശൂർ പരിയാരം സ്വദേശി 22 കാരി എമിൽഡയാണ് മരിച്ചത്. കേസിൽ അറസ്റ്റിലായ ഭർത്താവ് അഫ്സലിനെതിരെ ആത്മഹത്യാ പ്രേരണ, ഗാർഹിക പീഡനം അടക്കമുള്ള വകുപ്പുകൾ ചുമത്തിയാണ് പൊലീസ് കേസെടുത്തിരിക്കുന്നത്. ഭർത്താവ് തന്നെ നിരന്തരം മർദ്ദിക്കുന്നതായും അഫ്സലുമൊത്ത് ജീവിക്കാൻ കഴിയില്ലെന്നും എമിൽഡ സുഹൃത്തുക്കളെയും അറിയിച്ചിരുന്നു. എമിൽഡ അയച്ച മെസ്സേജുകളും കോൾ റെക്കോർഡുകളും അഫ്സലിനെതിരെ തെളിവായി. ഇതോടെ അഫ്സലിനെ കസ്റ്റഡിയിലെടുത്ത് പൊലീസ് ചോദ്യം ചെയ്തു. പിന്നാലെയാണ് അറസ്റ്റ് ചെയ്ത് റിമാൻഡിലാക്കിയത്. ഇയാൾ ലഹരിക്കടിമയായിരുന്നുവെന്നും സൂചനയുണ്ട്.

സ്ത്രീധനമടക്കം ചോദിച്ചുള്ള ക്രൂര പീഡനം

ദീർഘനാളത്തെ പ്രണയത്തിനൊടുവിൽ പത്തൊമ്പതാം വയസ്സിലാണ് എമിൽഡ, അഫ്സലിനെ വിവാഹം കഴിച്ചത്. കുടുംബത്തിന്റെ എതിർപ്പ് മറികടന്നുള്ള വിവാഹത്തോടെ എമിൽഡയ്ക്ക് സ്വന്തം വീടുമായുള്ള ബന്ധങ്ങളും അറ്റു. ചാലക്കുടി പോട്ടയിലെ അഫ്സലിന്റെ വീട്ടിലായിരുന്നു താമസം. ഒരുമിച്ചുള്ള ജീവിതം തുടങ്ങി വൈകാതെ തന്നെ ഇരുവർക്കും ഇടയിൽ അസ്വാരസ്യങ്ങൾ തുടങ്ങി. അഫ്സൽ, എമിൽഡയെ ഉപദ്രവിക്കുന്നത് പതിവായിരുന്നു. പണവും സ്ത്രീധനം ആവശ്യപ്പെട്ടുമായിരുന്നു പീഡനം. ഭർത്താവ് തന്നെ നിരന്തരം മർദ്ദിക്കുന്നതായും അഫ്സലുമൊത്ത് ജീവിക്കാൻ കഴിയില്ലെന്നും എമിൽഡ സുഹൃത്തുക്കളെയും അറിയിച്ചിരുന്നു. ഇയാൾ ലഹരിക്കടിമയായിരുന്നുവെന്നും വിവരമുണ്ട്. ഈമാസം ആറിനാണ് തന്റെ പിഞ്ചുകുഞ്ഞിന്റെ മുന്നിൽവച്ച് യുവതി ഭർതൃവീട്ടിൽ ജീവനൊടുക്കാൻ ശ്രമിച്ചത്. മുറിക്കുള്ളിൽ കെട്ടിത്തൂങ്ങിയ നിലയിൽ കണ്ടെത്തിയ എമിൽഡയെ ചാലക്കുടിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ഇന്നലെ മരിച്ചു. പിന്നാലെയാണ് ഭർത്താവിനെതിരെ ഗുരുതര ആരോപണവുമായി സുഹൃത്തുക്കൾ രംഗത്തെത്തിയത്. എമിൽഡ അയച്ച മെസ്സേജുകളും കോൾ റെക്കോർഡുകളും അഫ്സലിനെതിരെ തെളിവായി. ഇതോടെ അഫ്സലിനെ കസ്റ്റഡിയിലെടുത്ത് പോലീസ് ചോദ്യം ചെയ്തു. ആത്മഹത്യാപ്രേരണ, ഗാർഹിക പീഡനം അടക്കമുള്ള വകുപ്പുകൾ ചുമത്തിയാണ് 23 കാരൻ അഫ്സലിനെതിരെ കേസെടുത്തിരിക്കുന്നത്. കോടതിയിൽ ഹാജരാക്കിയ അഫ്സൽ നിലവിൽ റിമാൻഡിൽ ആണ്.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. Toll free helpline number: 1056, 0471-2552056)

പത്താം ക്ലാസ് വിദ്യാർത്ഥിനി മരിച്ച നിലയിൽ, സംഭവം തിരുവനന്തപുരം കടയ്ക്കാവൂരിൽ

Deepu Divakaran — Mon, 12 Oct 2026 00:10:21 +0530

തിരുവനന്തപുരം: കടയ്ക്കാവൂരിൽ പത്താം ക്ലാസ് വിദ്യാർത്ഥിനിയെ മരിച്ച നിലയിൽ കണ്ടെത്തി. കടയ്ക്കാവൂർ സ്വദേശി ഷാൻ - അനീഷ ദമ്പതികളുടെ മകൾ സിദ്ധി ആണ് മരിച്ചത്. കിടപ്പുമുറിയിൽ തൂങ്ങിയ നിലയിൽ കണ്ടെത്തിയ കുട്ടിയെ അമ്മ കത്രിക ഉപയോഗിച്ച് കയർ മുറിച്ചുമാറ്റി ആശുപത്രിയിൽ എത്തിക്കുകയായിരുന്നു. എന്നാൽ ആശുപത്രിയിൽ എത്തിക്കുന്നതിന് മുമ്പുതന്നെ മരണം സംഭവിച്ചിരുന്നതായി ഡോക്ടർമാർ അറിയിച്ചു. സ്കൂളിൽ നിന്ന് വിനോദയാത്ര പോകുന്നത് വീട്ടിൽ വിലക്കിയിരുന്നതായി ബന്ധുക്കൾ പറഞ്ഞു. മാതാപിതാക്കൾ നിയമപരമായി വേർപിരിഞ്ഞതിനാൽ സിദ്ധി അമ്മയോടൊപ്പമായിരുന്നു താമസിച്ചിരുന്നത്.

(ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. ടോള്‍ ഫ്രീ നമ്പര്‍: Toll free helpline number: 1056, 0471-2552056)

കള്ളന്മാരുടെ വീട് എന്ന സിനിമയെടുത്ത് പൊളിഞ്ഞ സംവിധായകന്‍ ട്രെയിനിൽ മോഷണം നടത്തിയ കേസിൽ അറസ്റ്റില്‍

Prabeesh PP — Sun, 11 Oct 2026 22:43:21 +0530

തൃശൂര്‍: കള്ളന്മാരുടെ വീട് എന്ന സിനിമയെടുത്ത് പൊളിഞ്ഞ സംവിധായകന്‍ ട്രെയിനിൽ മോഷണം നടത്തിയ കേസിൽ അറസ്റ്റില്‍. പാലക്കാട് കരിമ്പ സ്വദേശി ആറോണി വീട്ടില്‍ കാജാഹുസൈന്‍ (46) ആണ് ഷൊര്‍ണൂര്‍ റെയില്‍വേ പോലീസിന്റെ പിടിയിലായത്. ട്രെയിനുകളില്‍ യാത്രക്കാരുടെ ശ്രദ്ധതിരിച്ച് ലാപ്‌ടോപ്പുകളും മൊബൈല്‍ ഫോണുകളും കവര്‍ച്ച ചെയ്യുന്നതില്‍ പ്രമുഖനാണ് ഇയാളെന്ന് പൊലീസ് പറഞ്ഞു. മണ്ണാര്‍ക്കാട് പൊറ്റശേരി സ്വദേശിയായ യുവതിയുടെ 80000 രൂപയോളം വിലവരുന്ന പുതിയ മൊബൈല്‍ ഫോണ്‍ ട്രെയിനില്‍വെച്ച് മോഷ്ടിച്ച കേസില്‍ നടത്തിയ അന്വേഷണത്തിലാണ് കാജാഹുസൈന്‍ കുടുക്കിയത്. സിസിടിവി ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തില്‍ പ്രതിയെ തിരിച്ചറിഞ്ഞു. മാന്യമായി വസ്ത്രം ധരിച്ച് ട്രെയിനുകളില്‍ യാത്ര ചെയ്യുന്ന പ്രതി, യാത്രക്കാരുടെ ശ്രദ്ധമാറുന്ന സമയത്താണ് മൊബൈല്‍ ഫോണുകളും ലാപ്‌ടോപ്പുകളും തന്ത്രപരമായി കവര്‍ന്നിരുന്നത്.

സെക്കന്‍ഡ് ഹാന്റ് സാധനങ്ങളുടെ ഇടനിലക്കാരനാണെന്ന് വിശ്വസിപ്പിച്ചാണ് കടകളില്‍ മോഷ്ടിച്ച വസ്തുക്കള്‍ ഇയാള്‍ വിറ്റഴിച്ചിരുന്നത്. സംവിധാനം ചെയ്ത് പുറത്തിറക്കിയ സിനിമയില്‍ നിന്നും പ്രതീക്ഷിച്ച നേട്ടം ലഭിക്കാതെ വന്നതോടെയാണ് സാമ്പത്തിക ബാധ്യത തീര്‍ക്കാന്‍ മോഷണത്തിലേക്ക് തിരിഞ്ഞതെന്ന് ഇയാള്‍ പോലീസിനോട് പറഞ്ഞു. ജോലി ആവശ്യങ്ങള്‍ക്കായി സ്ഥിരമായി ട്രെയിനില്‍ യാത്ര ചെയ്യാറുണ്ടായിരുന്ന ഇയാള്‍, സാഹചര്യം നിരീക്ഷിച്ച് ആസൂത്രിതമായാണ് കവര്‍ച്ചകള്‍ നടത്തിയിരുന്നത്.

പോലീസ് പിടിയിലാകാതിരിക്കാന്‍ താടി ഷേവ് ചെയ്ത് രൂപമാറ്റം വരുത്താന്‍ ശ്രദ്ധിച്ചിരുന്നു. മോഷണമുതല്‍ വിറ്റുകിട്ടിയ പണം ഉപയോഗിച്ച് സ്വന്തമായി കഫ്തീരിയ തുടങ്ങാനുള്ള പണിപ്പുരയിലായിരുന്നു ഇയാള്‍. നിലവില്‍ ഷൊര്‍ണൂര്‍ റെയില്‍വേ പോലീസ് രജിസ്റ്റര്‍ ചെയ്ത മൂന്ന് കേസുകളിലെയും കോഴിക്കോട് ഭാഗത്ത് നടന്ന കവര്‍ച്ചകളിലെയും തൊണ്ടി മുതലുകളായ അഞ്ചോളം ലാപ്‌ടോപ്പുകളും മൊബൈല്‍ ഫോണും പോലീസ് കണ്ടെത്തിയിട്ടുണ്ട്. ഷൊര്‍ണൂര്‍ റെയില്‍വേ പോലീസ് എസ്.എച്ച്.ഒ. അനില്‍ മാത്യു, എസ്.ഐമാരായ ഹരിദാസന്‍, മണികണ്ഠന്‍, എസ്.സി.പി.ഒമാരായ സുരേഷ്, സജിത്ത്, നിഷാദ്, ശശിനാരായണന്‍, ഇന്റലിജന്‍സ് എ.എസ്.ഐ സുരേഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.

മാഹി പള്ളിയില്‍ മെഴുകുതിരി കത്തിക്കുന്നതിനിടെ മൂന്ന് വയസ്സുകാരിയുടെ സ്വര്‍ണവള മോഷ്ടിച്ചു, കോട്ടയം സ്വദേശി പിടിയില്‍

Prabeesh PP — Sun, 11 Oct 2026 22:26:55 +0530

കോഴിക്കോട്: മാതാപിതാക്കളോടൊപ്പം മാഹി പള്ളിയിലെത്തിയ മൂന്ന് വയസ്സുകാരിയുടെ സ്വര്‍ണ ഊരിയെടുത്ത കോട്ടയം സ്വദേശിയെ പോലീസ് അറസ്റ്റ് ചെയ്തു. വാടക ക്വാര്‍ട്ടേഴ്‌സില്‍ താമസിച്ചുവരുന്ന കോട്ടയം സ്വദേശി ഷിഹാബിനെയാണ് മാഹി പോലീസ് അറസ്റ്റ് ചെയ്തത്. മാഹി പള്ളിയില്‍ എത്തി മാതാവിന്റെ രൂപക്കൂടിന് മുന്നില്‍ മെഴുകുതിരി കത്തിക്കുന്നതിനിടെ കോഴിക്കോട് നാദാപുരം കല്ലാച്ചിയിലെ കുറ്റ്യേന്റവിട അഭിരാമിന്റെയും ആതിരയുടെയും മകള്‍ മേവ അഭിരാമിന്റെ സ്വര്‍ണവളയാണ് നഷ്ടപ്പെട്ടത്.

ഇന്നലെ രാത്രിയാണ് അഭിരാമും കുടുംബവും മാഹി പള്ളിയില്‍ എത്തിയത്. രാത്രി ഒമ്പതേമുക്കാലോടെ മെഴുകുതിരി കത്തിക്കുമ്പോള്‍ നല്ല തിരക്ക് അനുഭവപ്പെട്ടിരുന്നു. ഇവിടെ നിന്ന് പുറത്തേക്ക് ഇറങ്ങുമ്പോഴാണ് ആരോ വള ഊരിയെടുത്തതായി കുട്ടി അമ്മയോട് പറഞ്ഞത്. കൂടെയുണ്ടായിരുന്ന ബന്ധു കുട്ടി മെഴുകുതിരി കത്തിക്കുന്നതിന്റെ ഫോട്ടോ എടുത്തിരുന്നു. ഇത് പരിശോധിച്ചപ്പോള്‍ ഫോട്ടോയിലുള്ള ഒരാള്‍ സംശയകരമായ സാഹചര്യത്തില്‍ അടുത്ത് നിന്ന് പെരുമാറിയതായി ബോധ്യമായി. തുടര്‍ന്ന് പള്ളി ജീവനക്കാര്‍ സിസിടിവി ദൃശ്യങ്ങള്‍ പരിശോധിച്ചപ്പോഴാണ് ഇയാള്‍ വള ഊരി കടന്നുകളയുന്നത് വ്യക്തമായത്. ഉടന്‍ മാഹി പോലീസ് എത്തി നടത്തിയ അന്വേഷണത്തിലാണ് മാഹി റെയില്‍വേ സ്റ്റേഷനില്‍ നിന്ന് ഷിഹാബിനെ പിടികൂടിയത്.

കോഴിക്കോട്ട് തൊഴിലുറപ്പ് ജോലിക്കിടെ 65-കാരിക്ക് പാമ്പ് കടിയേറ്റു; കാലിൽ കടിച്ചത് മൂർഖൻ

Web Desk — Sun, 11 Oct 2026 22:26:34 +0530

കോഴിക്കോട്: തൊഴിലുറപ്പ് ജോലിക്കിടെ മധ്യവയസ്‌കയ്ക്ക് പാമ്പ് കടിയേറ്റു. പൂനൂര്‍ ചാലില്‍പുറായില്‍ വിമല (65) യ്ക്കാണ് കടിയേറ്റത്. കഴിഞ്ഞ ദിവസം ഉച്ചയോടെ ആഡംബരക്കുന്ന് എന്ന സ്ഥലത്തുവെച്ചായിരുന്നു സംഭവം.

ജോലിസ്ഥലത്തുനിന്നും ഉച്ചഭക്ഷണം കഴിക്കാനായി നടന്നു പോകുമ്പോഴാണ് കാലിന് മൂര്‍ഖന്‍ പാമ്പിന്റെ കടിയേറ്റത്. ഇവരെ ഉടനെ തന്നെ താമരശ്ശേരി താലൂക്ക് ആശുപത്രിയില്‍ എത്തിച്ച് പ്രാഥമിക ചികിത്സ നല്‍കി. തുടര്‍ന്ന് വിദഗ്ധ ചികിത്സക്കായി കോഴിക്കോട് മെഡിക്കല്‍ കോളേജ് ആശുപത്രിയിലേക്ക് മാറ്റി.

കാർ നിർത്താതെ പോയി, പിന്തുടർന്ന് പൊലീസും; കോഴിക്കോട് എൻഐടിക്ക് സമീപം എംഡിഎംഎയുമായി യുവാവും യുവതിയും പിടിയിൽ

അഫീഫ്. എം — Sun, 11 Oct 2026 21:35:47 +0530

കോഴിക്കോട്: ചാത്തമംഗലത്ത് പൊലീസിന്റെ വാഹനപരിശോധനക്കിടെ എം.ഡി.എം.എയുമായി രണ്ടുപേര്‍ പിടിയില്‍. കോഴിക്കോട് പേരാമ്പ്ര സ്വദേശി പള്ളിച്ചാലില്‍ അഫ്‌നാസ്(27, പാലക്കാട് എടത്തനാട്ടുകര കല്ലിങ്ങല്‍ റിന്‍ഷാ ഫാത്തിമ(23) എന്നിവരാണ് കുന്ദമംഗലം പൊലീസിന്റെ പിടിയിലായത്. കഴിഞ്ഞ ദിവസം രാത്രി പത്തരയോടെയാണ് സംഭവം.

ചാത്തമംഗലം എന്‍ഐടിയില്‍ നടക്കുന്ന 'തത്വ-2026'ന്റെ സുരക്ഷയുടെ ഭാഗമായായിട്ടായിരുന്നു എസ്.ഐ ഏലിയാസിന്റെ നേതൃത്വത്തില്‍ വാഹനപരിശോധന നടത്തിയത്. പരിശോധനയ്ക്കിടെ സംശയകരമായ സാഹചര്യത്തില്‍ വന്ന കാറിന് കൈ കാണിച്ചെങ്കിലും പൊലീസിനെ കണ്ടതോടെ കാര്‍ അതിവേഗത്തില്‍ നിര്‍ത്താതെ ഓടിച്ചുപോയി. വാഹനത്തെ പിന്തുടര്‍ന്ന പൊലീസുകാര്‍ പിന്നീട് എന്‍ഐടി മെഗാ ഹോസ്റ്റലിന് സമീപമുള്ള അപ്പാര്‍ട്ട്‌മെന്റിന്റെ പാര്‍ക്കിംഗ് ഏരിയയില്‍ ഇതേ കാര്‍ നിര്‍ത്തിയതായി കണ്ടെത്തി. തുടര്‍ന്ന് നടത്തിയ പരിശോധനയില്‍ വിപണിയില്‍ 50,000 രൂപയോളം വിലവരുന്ന 11.90 ഗ്രാം എംഡിഎംഎ കണ്ടെത്തുകയായിരുന്നു.

കസ്റ്റഡിയിലെടുത്ത ഇരുവരെയും കുന്ദമംഗലം പൊലീസ് സ്റ്റേഷനിലേക്ക് മാറ്റി. കാപ്പ കേസിലെ പ്രതിയായ അഫ്‌നാസിന്റെ പേരില്‍ പതിനൊന്നോളം കേസുകള്‍ നിലവിലുണ്ട്. റിന്‍ഷാ ഫാത്തിമയുടെ പേരിലും മൂന്ന് കേസുകള്‍ നിലവിലുണ്ട്. വിദ്യാര്‍ത്ഥികള്‍ക്ക് ലഹരി വില്‍പന നടത്താന്‍ വേണ്ടിയാണ് രണ്ടുപേരും ചാത്തമംഗലത്ത് എത്തിയതെന്ന് പൊലീസ് പറഞ്ഞു.

ആലുവയിൽ പതിനഞ്ചുകാരനെ തട്ടിക്കൊണ്ടുപോയി ക്രൂരമായി മർദ്ദിച്ച സംഭവം: കാക്കനാട് സ്വദേശികളായ രണ്ട് പേർ പിടിയിൽ

Prabeesh PP — Sun, 11 Oct 2026 20:22:57 +0530

ആലുവ: ആലുവയിൽ പതിനഞ്ചുകാരനെ തട്ടിക്കൊണ്ടുപോയി ക്രൂരമായി മർദ്ദിച്ച സംഭവത്തിൽ രണ്ട് പേരെ ആലുവ പോലീസ് പിടികൂടി. കാക്കനാട് സ്വദേശികളായ മുൻസീർ, ഷാജഹാൻ എന്നിവരാണ് അറസ്റ്റിലായത്.

പതിനഞ്ചുകാരന്റെ സുഹൃത്തിനെ തേടിയാണ് പ്രതികൾ എത്തിയത്. സുഹൃത്ത് എവിടെയാണെന്ന് ചോദിച്ചുകൊണ്ടായിരുന്നു കുട്ടിയെ തട്ടിക്കൊണ്ടുപോയി ക്രൂരമായ മർദ്ദനത്തിനിരയാക്കിയത്. സംഭവത്തിൽ പിടിയിലായ പ്രതികൾക്കെതിരെ പോലീസ് തുടർനടപടികൾ സ്വീകരിച്ചുവരികയാണ്.

തിരുവനന്തപുരത്തിന് ആവേശമായി ബിഎസ്എൻഎൽ മിനി മാരത്തൺ

Elsa TJ — Sun, 11 Oct 2026 19:18:49 +0530

തിരുവനന്തപുരം: ബിഎസ്എൻഎല്ലിന്റെ 26-ാം വാർഷികത്തോടനുബന്ധിച്ച് കേന്ദ്ര ടെലികോം മന്ത്രാലയവുമായി സഹകരിച്ചു സംഘടിപ്പിച്ച മിനി മാരത്തണിന് ആവേശോജ്വലമായ സമാപനം. തിരുവനന്തപുരം പിഎംജി ജങ്ഷനിലെ ബിഎസ്എന്‍എല്‍ കേരള സര്‍ക്കിള്‍ ഓഫീസില്‍ നിന്ന് ആരംഭിച്ച് 5 കിലോമീറ്റർ മാരത്തോണിൽ അറുനൂറോളം പേർ പങ്കെടുത്തു. എട്ട് മുതൽ 14 വയസുവരെ പ്രായമുള്ള കുട്ടികളുടെ വിഭാഗത്തിൽ നിഹാൻ മുഹമ്മദ് ഒന്നാമനായി. ജോയൽ ജോൺ, വിൻസൺ റോയ് എന്നിവർ രണ്ടും മൂന്നും സ്ഥാനങ്ങൾ കരസ്ഥമാക്കി. 15 മുതൽ 45 വരെ പ്രായമുള്ള പുരുഷന്മാരുടെ വിഭാഗത്തിൽ കരൺ സിംഗ് റെക്കോർഡ് നേട്ടത്തോടെ ഒന്നാമതെത്തി.സെൽജിൻ രണ്ടും സോനാറാം ഹെസ്സ മൂന്നും സ്ഥാനങ്ങൾ കരസ്ഥമാക്കി. വനിതാ വിഭാഗത്തിൽ രേഷ്മ ഗോമസ് ഒന്നാമതും റയാൻ. എച്ച് രണ്ടാമതും ബബിത. എസ് മൂന്നാമതും ഫിനിഷ് ചെയ്തു. 45 വയസിനു മുകളിൽ ഉള്ള പുരുഷന്മാരിൽ എസ്. നായർ ഒന്നാമതും ബിജു. എസ്.എൽ രണ്ടാമതും ബെൻറോയ്. എസ്.എസ് മൂന്നാമതും ഫിനിഷ് ചെയ്തു. വനിതാ വിഭാഗത്തിൽ സോയ സിയ ഒന്നാമതെത്തിയപ്പോൾ രേവതി, പ്രിയ എന്നിവർ രണ്ടും മൂന്നും സ്ഥാനങ്ങൾ നേടി.

അര്‍ജ്ജുന അവാര്‍ഡ് ജേതാവ് പത്മശ്രീ കെ.എം. ബീനാമോള്‍ മാരത്തണ്‍ ഫ്ളാഗ് ഓഫ് ചെയ്തു. ഇതുപോലെയുള്ള മാരത്തണുകളിലൂടെയാണ് ഭാവി വാഗ്ദാനങ്ങളെ കണ്ടെത്താൻ സാധിക്കുന്നതെന്നും അതുകൊണ്ടുതന്നെ ഇത്തരം ശ്രമങ്ങൾ അഭിനന്ദനാർഹമാണെന്നും ബീനാമോള്‍ പറഞ്ഞു. മുൻ തിരുവനന്തപുരം ജില്ലാ കളക്ടറും നിലവിലെ ജിഎസ്ടി സ്പെഷ്യൽ കമ്മീഷണറുമായ അനുകുമാരി ഐഎഎസും, രജിസ്ട്രാർ ഓഫ് കോപ്പറേറ്റീവ് സൊസൈറ്റിസ് കേരള അനു. എസ്. നായർ ഐഎഎസും ജേതാക്കൾക്ക് സമ്മാനങ്ങൾ നൽകി. മാരത്തൺ സംഘടിപ്പിക്കാൻ മുൻകൈ എടുത്ത ബിഎസ്എൻഎല്ലിനും കേന്ദ്ര ടെലികോം മന്ത്രാലയത്തിനും അനുകുമാരി ഐഎഎസ് അഭിനന്ദനങൾ അറിയിച്ചു. പ്രായഭേദമന്യ മാരത്തണിൽ പങ്കെടുത്ത എല്ലാവർക്കും ആശംസകൾ നേരുന്നതിനോടൊപ്പം ശാരീരികക്ഷമത എന്നും കാത്ത് സൂക്ഷിക്കണമെന്ന് അനു. എസ്. നായർ സൂചിപ്പിച്ചു.

മാരത്തണില്‍ ഒന്നാം സ്ഥാനം കരസ്ഥമാക്കിയവർക്കു 5,000 രൂപയും രണ്ടാം സ്ഥാനക്കാര്‍ക്ക് 3,000 രൂപയും മൂന്നാം സ്ഥാനക്കാര്‍ക്ക് 2,000 രൂപയും ക്യാഷ് പ്രൈസ് ലഭിച്ചു. അതിനോടൊപ്പം തെരഞ്ഞെടുക്കപ്പെട്ട മത്സരാർഥികൾക്കു പ്രോത്സാഹന സമ്മാനവും നറുക്കെടുപ്പിലൂടെ തെരഞ്ഞെടുത്ത മത്സരാർഥികൾക്കു സമ്മാന കൂപ്പണുകളും ലഭിച്ചു. ഷാജി. ടി.ആർ (ഐടിഎസ്,ഡെപ്യൂട്ടി ഡയറക്ടർ ജനറൽ ടെലികമ്യൂണിക്കേഷൻസ് ഡിപ്പാർട്ടമെന്റ് കേരള, മിനിസ്ട്രി ഓഫ് കമ്മ്യൂണിക്കേഷൻസ്), ജിതേന്ദ്ര പ്രകാശ് (ജനറൽ മാനേജർ, ബിഎസ്എൻഎൽ തിരുവനന്തപുരം), രമേശ്‌രാജ് (ജനറൽ മാനേജർ മൊബൈൽ സർവീസ് ബിഎസ്എൻഎൽ കേരള), ശ്രീജിത്ത്. എസ്.വി (കൺവീനർ, മാരത്തൺ കമ്മിറ്റി) , സുനിൽ ശിവൻ, ശ്രീകേഷ് (മാരത്തൺ കമ്മിറ്റി) എന്നിവരും പരിപാടിയിൽ പങ്കെടുത്തു. മാരത്തൺ ചെയർപേഴ്സൺ മഞ്ജുഷ മേരി മാത്യൂ ചടങ്ങിൽ കൃതജ്ഞത രേഖപ്പെടുത്തി. ശാരീരികക്ഷമത, ഐക്യം, സാമൂഹിക കൂട്ടായ്മ എന്നിവ പ്രോത്സാഹിപ്പിക്കുന്നതിനൊപ്പം ബിഎസ്എന്‍എല്ലിന്റെ സേവനങ്ങളെക്കുറിച്ച് പൊതുജനങ്ങളില്‍ അവബോധം സൃഷ്ടിക്കുക എന്ന ലക്ഷ്യത്തോടെയാണ് 'റണ്‍ ടുഗെദര്‍ വിത്ത് ഹമാരാ ബിഎസ്എന്‍എല്‍' എന്ന മുദ്രാവാക്യത്തോടെ മാരത്തണ്‍ സംഘടിപ്പിച്ചത്

ഏഷ്യാനെറ്റ് ന്യൂസ് ലൈവ് കാണാം

യുവാവ് തോട്ടിൽവീണ് മരിച്ചനിലയിൽ; കണ്ടത് കളിക്കാനെത്തിയ കുട്ടികൾ, ആശുപത്രിയിൽ എത്തിച്ചെങ്കിലും രക്ഷിക്കാനായില്ല

അഫീഫ്. എം — Sun, 11 Oct 2026 19:05:10 +0530

ഹരിപ്പാട്: യുവാവിനെ തോട്ടിൽവീണ് മരിച്ചനിലയിൽ കണ്ടെത്തി. ചിങ്ങോലി മഹേഷ് ഭവനത്തിൽ മോഹനന്റെയും രമയുടെയും മകൻ മഹേഷ് (40) ആണ് മരിച്ചത്. ഞായറാഴ്ച വൈകിട്ട് മൂന്നരയോടെയാണ് സംഭവം.

വീടിന് സമീപമുള്ള വീച്ചുതടത്തിൽ പാലത്തിനടുത്ത് തോട്ടിൽ വീണുകിടന്ന മഹേഷിനെ സമീപത്ത് കളിച്ചുകൊണ്ടിരുന്ന കുട്ടികളാണു കണ്ടത്. തുടർന്ന് നാട്ടുകാർ ചേർന്നു കരയ്‌ക്കെടുത്തു ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം താലൂക്ക് ആശുപത്രി മോർച്ചറിയിൽ. തൃക്കുന്നപ്പുഴ പൊലിസ് മേൽനടപടികൾ സ്വീകരിച്ചു.

അൽഫാം അടുപ്പിൽനിന്ന് തീപടർന്നു; നെടുമങ്ങാട് ഹോട്ടലിൽ തീപ്പിടിത്തം

Web Desk — Sun, 11 Oct 2026 16:25:52 +0530

തിരുവനന്തപുരം: നെടുമങ്ങാട് വാളിക്കോട് ഹോട്ടലിൽ തീപിടിത്തം. അൽഫാം ഉണ്ടാക്കുന്ന അടുപ്പിൽ നിന്ന് ചിമ്മിനിയിലേക്ക് തീ പടർന്നതാണ് പ്രദേശത്ത് പരിഭ്രാന്തി പരത്തിയത്.

ഉച്ചയ്ക്ക് രണ്ട് മണിയോടെയായിരുന്നു സംഭവം. സംസം ഹോട്ടലിലെ അൽഫാം ഗ്രില്ലിങ് അടുപ്പിൽ നിന്നുയർന്ന തീ ചിമ്മിനിയിലൂടെ മുകളിലേക്ക് പടരുകയായിരുന്നു. അടുക്കളയിലെ ജീവനക്കാർ ബഹളം വെച്ചതിനെ തുടർന്ന് ആളുകൾ പരിഭ്രാന്തരായി പുറത്തേക്ക് ഇറങ്ങി ഓടി. പ്രദേശമാകെ പുകയുയർന്നതും രക്ഷാപ്രവർത്തനത്തിന് വെല്ലുവിളിയായി. വിവരമറിഞ്ഞയുടൻ നെടുമങ്ങാട് ഫയർഫോഴ്സ് യൂണിറ്റ് സംഭവസ്ഥലത്തെത്തി. ഹോട്ടലിന്‍റെ മുന്നിൽ നിന്നും വെള്ളം പമ്പ് ചെയ്യാനായതോടെ തീപടരുന്നത് തടയാനായി. തക്ക സമയത്ത് ഫയർഫോഴ്സ് എത്തി തീയണച്ചതിനാൽ വലിയൊരു ദുരന്തം ഒഴിവാകുകയായിരുന്നെന്ന് പ്രദേശവാസികൾ പറഞ്ഞു. ആർക്കും പരിക്കുകളോ മറ്റ് ആളപായമോ ഇല്ല.

മറവി രോഗം ബാധിച്ച 93കാരിക്ക് ഗാർഡിയനായി സഹോദരി; ആറ് മാസത്തിലൊരിക്കൽ ഹൈക്കോടതിയിൽ റിപ്പോർട്ട് നൽകണം

Web Desk — Sun, 11 Oct 2026 14:26:54 +0530

കൊച്ചി: അൽഷിമേഴ്സ് രോഗം ബാധിച്ച് ദൈനംദിന കാര്യങ്ങൾ നിർവഹിക്കാൻ കഴിയാത്ത 93കാരിയായ അവിവാഹിതയുടെ ഗാർഡിയനായി 76കാരിയായ സഹോദരിയെ നിയമിക്കാൻ ഹൈക്കോടതി അനുമതി നൽകി. ബാങ്ക് അക്കൗണ്ട് ഉൾപ്പെടെയുള്ള സാമ്പത്തിക കാര്യങ്ങൾ കൈകാര്യം ചെയ്യാൻ രോഗിക്ക് കഴിയാത്ത സാഹചര്യം പരിഗണിച്ചാണ് കോടതിയുടെ ഇടപെടൽ. ജസ്റ്റിസ് ബെച്ചു കുര്യൻ തോമസാണ് ഉത്തരവിട്ടത്.

കോമയിലുള്ളവർ, ഭിന്നശേഷിക്കാർ, മാനസിക വെല്ലുവിളി നേരിടുന്നവർ എന്നിവരുടെ കാര്യത്തിൽ ഗാർഡിയനെ നിയമിക്കാൻ വിവിധ നിയമങ്ങൾ വ്യവസ്ഥ ചെയ്യുന്നുണ്ട്. എന്നാൽ, മറവിരോഗം ബാധിച്ചവരുടെ കാര്യത്തിൽ നിലവിലെ നിയമങ്ങളിൽ ഇതിന് വ്യക്തമായ വ്യവസ്ഥയില്ല. മെഡിക്കൽ ബോർഡിന്റെ റിപ്പോർട്ട് ഉൾപ്പെടെയുള്ളവ പരിശോധിച്ച ശേഷമാണ് കോടതി സഹോദരിയെ ഗാർഡിയനായി നിയമിക്കാൻ അനുമതി നൽകിയത്.

ഹർജിക്കാരിയും സഹോദരിയും എറണാകുളം കോലഞ്ചേരി സ്വദേശികളാണ്. ഇരുവരും അവിവാഹിതരാണ്. ഗാർഡിയനായി നിയമിക്കപ്പെട്ട സഹോദരി ബാങ്കിലെ പണം എങ്ങനെ വിനിയോഗിക്കുന്നുവെന്നതുൾപ്പെടെയുള്ള കാര്യങ്ങൾ വ്യക്തമാക്കി ആറ് മാസത്തിലൊരിക്കൽ ഹൈക്കോടതിയിൽ റിപ്പോർട്ട് സമർപ്പിക്കണം. പണം നിയമാനുസൃതമായ ആവശ്യങ്ങൾക്കു മാത്രമേ ചെലവഴിക്കാവൂ എന്നും കോടതി നിർദേശിച്ചു.

ഗാർഡിയന്റെ ഭാഗത്തു നിന്ന് ഏതെങ്കിലും തരത്തിലുള്ള ബുദ്ധിമുട്ടുണ്ടാകുന്നതായി പരാതിയുണ്ടെങ്കിൽ ബന്ധുക്കൾക്കോ അടുത്ത സുഹൃത്തുക്കൾക്കോ ഹൈക്കോടതിയെ സമീപിക്കാം. രോഗിയെ സംസ്ഥാനത്തിന് പുറത്തേക്ക് കൊണ്ടുപോകാൻ തീരുമാനിച്ചാൽ ഇക്കാര്യം കോടതിയെ അറിയിക്കുകയും വേണം.

രാഹുൽ മാങ്കൂട്ടത്തിലാണോ പത്തനംതിട്ട എസ്പി? രാഹുലും ഗുണ്ടകളും പ്രശ്നമുണ്ടാക്കുന്നുവെന്ന് സിപിഎം

Web Desk — Sun, 11 Oct 2026 11:26:09 +0530

അടൂർ: രാഹുൽ മാങ്കൂട്ടത്തിൻ്റെ നേതൃത്വത്തിൽ എസ്എഫ്ഐക്കാരെ മർദ്ദിച്ചുവെന്ന് സിപിഎം അടൂർ ഏരിയ സെക്രട്ടറി അഡ്വ. എസ്. മനോജ് ആരോപിച്ചു. രാഹുൽ കമ്പിവടികൊണ്ട് ആക്രമണം നടത്തുകയും സിപിഎം പ്രവർത്തകൻ്റെ കാർ തകർക്കുകയും ചെയ്തു. പത്തനംതിട്ട എസ്പി രാഹുൽ മാങ്കൂട്ടത്തിലാണോയെന്ന് സംശയമുണ്ടെന്നും സിപിഎം നേതാവ് ആരോപിച്ചു. ആരാണ് ഇവിടെ പൊലീസിനെ നിയന്ത്രിക്കുന്നതെന്നും ചോദിച്ചു. യൂത്ത് കോൺഗ്രസോ കോൺഗ്രസോ അല്ല, രാഹുൽ മാങ്കൂട്ടത്തിലും അദ്ദേഹത്തിന്റെ ഗുണ്ടകളുമാണ് പ്രശ്നങ്ങൾ ഉണ്ടാക്കുന്നതെന്നും അഡ്വ. എസ്. മനോജ് കുറ്റപ്പെടുത്തി.

അടൂരിൽ എസ്എഫ്ഐ - യൂത്ത് കോൺഗ്രസ് പ്രവർത്തകരും സംഘർഷമുണ്ടായിരുന്നു. പിന്നാലെ, എസ്എഫ്ഐ പ്രവർത്തകരെ മർദിച്ച സംഭവത്തിൽ യൂത്ത് കോൺഗ്രസ് മുൻ സംസ്ഥാന പ്രസിഡന്‍റ് രാഹുൽ മാങ്കൂട്ടത്തിലിനെ ഒന്നാം പ്രതിയാക്കിയാണ് പോലീസ് കേസെടുത്തു.

ഇന്നലെ രാത്രി ഏഴംകുളത്ത് തുടങ്ങി അടൂരിന്‍റെ വിവിധ ഭാഗങ്ങളിലേക്ക് പടർന്ന സംഘർഷത്തിൽ അടൂർ പോലീസ് ആകെ മൂന്ന് കേസുകളാണ് രജിസ്റ്റർ ചെയ്തിട്ടുള്ളത്. കെഎസ്‌യു പ്രവർത്തകരെ മർദിച്ച സംഭവത്തിൽ ഡിവൈഎഫ്ഐ, എസ്എഫ്ഐ പ്രവർത്തകർക്കെതിരെയും പോലീസ് കേസ് രജിസ്റ്റർ ചെയ്തിട്ടുണ്ട്. അടൂരിലെ സ്വകാര്യ ആശുപത്രി പരിസരത്തുവെച്ചും ഇരുവിഭാഗങ്ങളും തമ്മിൽ ഏറ്റുമുട്ടി. സംഘർഷത്തിനിടെ പ്രദേശത്തെ ഒരു സിപിഎം നേതാവിന്‍റെ കാർ അടിച്ചുതകർത്തിരുന്നു.

രാത്രിയിൽ വാഹനത്തിൽ കറക്കം, ആരാധനാലയങ്ങളിലെ കാണിക്കവഞ്ചികൾ കുത്തിത്തുറന്ന് മോഷണം; മൂന്നുപേർ പിടിയിൽ

Deepu Divakaran — Sun, 11 Oct 2026 09:42:44 +0530

കൊച്ചി: പനങ്ങാട്, നെട്ടൂർ മേഖലകളിലെ ആരാധനാലയങ്ങളിൽ കാണിക്കവഞ്ചികൾ കുത്തിത്തുറന്ന് പണം മോഷ്ടിച്ച കേസിൽ മൂന്നുപേരെ പനങ്ങാട് പൊലീസ് പിടികൂടി. കഴിഞ്ഞ രണ്ടാഴ്ചയായി ക്ഷേത്രങ്ങളും പള്ളികളും കേന്ദ്രീകരിച്ച് നടന്ന മോഷണങ്ങളുമായി ബന്ധപ്പെട്ടാണ് നടപടി.

പള്ളുരുത്തി പെരുമ്പടപ്പ് സ്വദേശി സൈനുദ്ദീൻ അജ്മൽ (18), ഇടക്കൊച്ചി സ്വദേശി മുഹമ്മദ് ആർസം (18), പള്ളുരുത്തിയിൽ വാടകയ്ക്ക് താമസിക്കുന്ന ആലപ്പുഴ സ്വദേശിയായ 17കാരൻ എന്നിവരാണ് പിടിയിലായത്.

മാടവന സെന്റ് സെബാസ്റ്റ്യൻ പള്ളിയിലെ കാണിക്കവഞ്ചി കുത്തിത്തുറന്നാണ് മോഷണ പരമ്പര ആരംഭിച്ചതെന്ന് പൊലീസ് പറഞ്ഞു. രാത്രികാലങ്ങളിൽ ഇരുചക്ര വാഹനങ്ങളിൽ സഞ്ചരിച്ചായിരുന്നു മോഷണം. നെട്ടൂർ തണ്ടശ്ശേരി കോളനിയിലെ ശ്രീദേവി - സുബ്രഹ്മണ്യ ക്ഷേത്രത്തിലെ ഭണ്ഡാരവും സംഘം കുത്തിത്തുറന്നിരുന്നു.

രാത്രി പട്രോളിങ്ങിനിടെ നെട്ടൂർ പാലത്തിന് സമീപത്തുനിന്നാണ് പനങ്ങാട് പൊലീസ് പ്രതികളെ പിടികൂടിയത്. പനങ്ങാട് എസ്എച്ച്ഒ മിഥുൻ മോഹന്റെ നേതൃത്വത്തിൽ രാജേഷ് പി എസ്, സൈജു ദേവസ്യ, എം ശ്രീജിത്ത് എന്നിവരടങ്ങിയ പൊലീസ് സംഘമാണ് പ്രതികളെ പിടികൂടിയത്.

പ്രതിഷേധം കനത്തു, നാട്ടികയിലെ ടോൾപ്പിരിവ് താൽക്കാലികമായി നിർത്തിവെക്കാൻ മന്ത്രിയുടെ നിർദേശം

Web Desk — Sun, 11 Oct 2026 09:32:50 +0530

തൃശൂർ: തൃശൂർ നാട്ടികയിലെ ദേശീയപാതയിൽ ടോൾപ്പിരിവ് താൽക്കാലികമായി നിർത്തിവയ്ക്കാൻ മന്ത്രിയുടെ നിർദേശം. പൊതുമരാമത്ത് മന്ത്രി പി.കെ. ബഷീറാണ് ദേശീയപാത അതോറിറ്റിക്ക് നിർദേശം നൽകിയത്. കളക്ടറും തൃശൂർ റൂറൽ എസ്പിയും അടങ്ങുന്ന ഉദ്യോഗസ്ഥ സംഘം ദേശീയപാതയിൽ പരിശോധന നടത്തി ദേശീയപാതയുടെ നിർമ്മാണ പുരോഗതി വിലയിരുത്തും. ഇവരുടെ റിപ്പോർട്ടിന്റെ അടിസ്ഥാനത്തിലായിരിക്കും തുടർ തീരുമാനമെന്നും മന്ത്രി അറിയിച്ചു. നാട്ടിക ടോൾ പ്ലാസയിൽ ഇന്ന് ടോൾ പിരിവ് നടത്തിയില്ല.

ദേശീയപാത നാട്ടികയിൽ ടോൾ പിരിവ് പുനരാരംഭിക്കുമെന്ന് അറിയിച്ചിരുന്നു. സംസ്ഥാന സർക്കാർ അനുമതി നൽകിയതോടെയാണ് ടോൾ പിരിവ് വീണ്ടും ആരംഭിച്ചത്. ടോൾ പ്ലാസയ്ക്കു സംരക്ഷണം നൽകണമെന്ന് സംസ്ഥാന സർക്കാർ അറിയിച്ചു. ജനകീയ പ്രതിഷേധം കാരണം ടോൾ പിരിവ് നിർത്തിയിരുന്നു. നിർമാണം പൂർത്തിയാകാതെ ടോൾ പിരിവ് അനുവദിക്കില്ലെന്ന് സിപിഎം അറിയിച്ചിരുന്നു. എന്നാൽ, 62 കിലോമീറ്ററിൽ 90 ശതമാനം പണി കഴിഞ്ഞെന്ന് ദേശീയപാത അതോറിറ്റി വിശദീകരിച്ചു. ടോൾ പ്ലാസയിൽ പ്രതിഷേധം ഇന്ന് തുടരും. പ്രതിഷേധം കണക്കിലെടുത്ത് ടോൾ പ്ലാസയ്ക്ക് കനത്ത പൊലീസ് സുരക്ഷ ഒരുക്കി.

ദേശീയപാത നിർമ്മാണം പൂർത്തിയാകാതെയാണ് ചുങ്കം പിരിവ് ആരംഭിക്കുന്നതെന്നാണ് പ്രതിഷേധക്കാരുടെ പ്രധാന ആരോപണം. കാപ്പിരിക്കാട് - കൊടുങ്ങല്ലൂർ ചെയിനേജിൽ ചാവക്കാട് ബൈപ്പാസ്, വാടാനപ്പള്ളി ഫ്ലൈ ഓവർ, ചേറ്റുവ പാലം, എടമുട്ടം അടിപ്പാത, കൊറ്റംകുളം സി.വി. ജങ്ഷൻ പാലം എന്നിവയുടെ നിർമ്മാണം പൂർത്തിയായിട്ടില്ല. പുതുതായി അനുവദിക്കപ്പെട്ട നാട്ടിക, വലപ്പാട് ഹൈസ്കൂൾ, കൈപ്പമംഗലം കൊപ്രക്കളം, ശ്രീനാരായണപുരം പള്ളിനട, ഏങ്ങണ്ടിയൂർ പൊക്കുളങ്ങര, മണത്തല, എടക്കഴിയൂർ, മന്ദലാംകുന്ന് നടപ്പാലങ്ങളുടെ പ്രാരംഭ നിർമ്മാണ പ്രവൃത്തി പോലും ആയിട്ടില്ല. ഇത്രയധികം പ്രവൃത്തികൾ പൂർത്തിയാകാതെയാണ് ദേശീയപാത ടോൾ പിരിവ് ആരംഭിക്കുന്നത്. ഹരിയാനയിലെ സ്കൈലാർക്ക് എന്ന കമ്പനിക്കാണ് പിരിവിന് ടെണ്ടർ നൽകിയിരിക്കുന്നത്. ഈ സ്വകാര്യ സ്ഥാപനത്തിൻ്റെ ജീവനക്കാർ നാട്ടികയിൽ എത്തിയിട്ടുണ്ട്.

ഇംഗ്ലണ്ടിൽ പഠിക്കാൻ പോയ മകളെക്കുറിച്ച് വിവരമില്ലെന്ന് മാതാപിതാക്കളുടെ ഹർജി; ഇടപെട്ട് ഹൈക്കോടതി

Deepu Divakaran — Sun, 11 Oct 2026 09:16:06 +0530

കൊച്ചി: ഇംഗ്ലണ്ടിൽ പഠനത്തിനായി പോയ മകളെക്കുറിച്ച് രണ്ടുവർഷത്തിലേറെയായി വിവരമില്ലെന്ന മാതാപിതാക്കളുടെ ഹർജിയിൽ ഹൈക്കോടതിയുടെ ഇടപെടൽ. യുവതിയുടെ നിലവിലെ സ്ഥിതി അന്വേഷിച്ച് വിവരം അറിയിക്കാൻ ഇന്ത്യൻ ഹൈക്കമ്മീഷനോട് കോടതി നിർദേശിച്ചു. കോഴിക്കോട് സ്വദേശികളായ മാതാപിതാക്കൾ സമർപ്പിച്ച ഹർജിയിൽ ജസ്റ്റിസ് പി വി കുഞ്ഞികൃഷ്ണനാണ് ഇടക്കാല ഉത്തരവ് പുറപ്പെടുവിച്ചത്.

മകൾ ഇംഗ്ലണ്ടിൽ മറ്റൊരാളോടൊപ്പം കഴിയുകയാണെന്നും അവൾ സുരക്ഷിതയാണോ, എവിടെയാണ് താമസിക്കുന്നത്, സ്വന്തം ഇഷ്ടപ്രകാരമാണോ അവിടെ കഴിയുന്നത് തുടങ്ങിയ കാര്യങ്ങളിൽ വ്യക്തത വേണമെന്നും ആവശ്യപ്പെട്ടാണ് മാതാപിതാക്കൾ കോടതിയെ സമീപിച്ചത്.

2024 ജനുവരി എട്ടിനാണ് യുവതി എംബിഎ പഠനത്തിനായി ഇംഗ്ലണ്ടിലേക്ക് പോയത്. ഹർഷ്ദീപ് സിങ് എന്നയാൾ മകളെ നിയമവിരുദ്ധമായി തടഞ്ഞു വെച്ചിരിക്കുകയാണെന്നാണ് ഹർജിക്കാരുടെ ആരോപണം. ഇക്കാര്യം ചൂണ്ടിക്കാണിച്ച് മാതാപിതാക്കൾ ഇന്ത്യൻ ഹൈക്കമ്മീഷനിൽ പരാതി നൽകിയിരുന്നു. എന്നാൽ, യുവതിയും ഹർഷ്ദീപ് സിങ്ങും സന്തോഷത്തോടെ ഒരുമിച്ച് താമസിക്കുകയാണെന്ന മറുപടിയാണ് ഇയാൾ നൽകിയതെന്ന് ഹർജിയിൽ പറയുന്നു.

സ്വയം നിർമിച്ച് സംവിധാനം ചെയ്ത സിനിമ പരാജയപ്പെട്ടു, ഷൊറണൂരിൽ ട്രെയിനിൽ മോഷണം നടത്തിയ സംവിധായകൻ പിടിയിൽ

Web Desk — Sun, 11 Oct 2026 08:58:36 +0530

പാലക്കാട്: ട്രെയിനുകളിൽ കയറി യാത്രക്കാരുടെ ലാപ്ടോപ്പുകളും മൊബൈൽ ഫോണുകളും മോഷ്ടിച്ച സിനിമ സംവിധായകൻ പാലക്കാട്‌ ഷൊർണൂരിൽ പിടിയിൽ. പാലക്കാട് കരിമ്പ സ്വദേശി കാജാ ഹുസൈനാണ് പിടിയിലായത്. അടുത്തിടെ പുറത്തിറങ്ങിയ 'കള്ളന്മാരുടെ വീട്' എന്ന സിനിമയുടെ സംവിധായകനാണ് കാജാ ഹുസൈൻ. സ്വയം നിർമ്മിച്ച് സംവിധാനം ചെയ്ത സിനിമ പരാജയമായതോടെയാണ് ഇയാൾ മോഷണത്തിന് ഇറങ്ങിയത്.

വിഴിഞ്ഞം ഫിഷ്‌ലാൻഡിൽ കടലിൽ പോകാനിരുന്ന മത്സ്യത്തൊഴിലാളികൾ സൂക്ഷിച്ചുവെച്ച 30 ലിറ്റർ പെട്രോൾ മോഷ്ടിച്ച പ്രതി അറസ്റ്റിൽ

Web Desk — Sun, 11 Oct 2026 02:24:35 +0530

തിരുവനന്തപുരം: വിഴിഞ്ഞത്ത് മത്സ്യത്തൊഴിലാളികൾ സൂക്ഷിച്ചിരുന്ന പെട്രോൾ മോഷ്ടിച്ച കേസിൽ യുവാവ് പിടിയിൽ. പള്ളിച്ചൽ സ്വദേശി അഭിജിത്ത് (24) ആണ് വിഴിഞ്ഞം പോലീസിന്റെ പിടിയിലായത്.

രണ്ടു ദിവസം മുൻപ് വിഴിഞ്ഞം ഫിഷ്‌ലാൻഡിലായിരുന്നു കേസിനാസ്പദമായ സംഭവം. മത്സ്യബന്ധനത്തിനായി കടലിൽ കൊണ്ടുപോകാൻ സൂക്ഷിച്ചിരുന്ന 30 ലിറ്റർ പെട്രോളാണ് പ്രതി ഓട്ടോറിക്ഷയിലെത്തി മോഷ്ടിച്ച് കടന്നുകളഞ്ഞത്.

പ്രദേശത്തെ സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞതും പിടികൂടിയതും. അറസ്റ്റിലായ ഇയാൾക്കെതിരെ നിയമപരമായ തുടർനടപടികൾ സ്വീകരിച്ചതായി വിഴിഞ്ഞം പോലീസ് അറിയിച്ചു.

തൃശൂർ പുന്നയൂർ പഞ്ചായത്ത് അംഗത്തിന്റെ വീട്ടിൽ കയറി ആക്രമണം: മൂന്ന് പേർക്കെതിരെ കേസ്

Prabeesh PP — Sat, 10 Oct 2026 22:44:21 +0530

തൃശൂർ: പുന്നയൂർ പഞ്ചായത്ത് അംഗത്തിന്റെ വീട്ടിൽ അതിക്രമിച്ചു കയറി ആക്രമണം നടത്തിയ സംഭവത്തിൽ മൂന്ന് പേർക്കെതിരെ പോലീസ് കേസെടുത്തു. അഞ്ചാം വാർഡ് അംഗവും യു.ഡി.എഫ്. നേതാവുമായ ചമ്മിണിയിൽ രതീഷിന്റെ വീട്ടിലാണ് മൂന്നംഗ സംഘം അതിക്രമം അഴിച്ചുവിട്ടത്. പ്രദേശവാസികളായ മുത്തുസ്വാമി, രതീഷ്, വിഷ്ണു എന്നിവർക്കെതിരെയാണ് വടക്കേക്കാട് പോലീസ് കേസ് രജിസ്റ്റർ ചെയ്തിരിക്കുന്നത്. വ്യാഴാഴ്ച രാത്രിയിലാണ് സംഭവം നടന്നത്.

കുടിവെള്ള വിതരണത്തെച്ചൊല്ലി തർക്കം

പ്രദേശത്തെ കുടിവെള്ള വിതരണവുമായി ബന്ധപ്പെട്ട് വെള്ളം തുറന്നുവിട്ടില്ലെന്ന് ആരോപിച്ചാണ് ഉപഭോക്താക്കളെന്ന് അവകാശപ്പെട്ട് എത്തിയവർ വീട്ടിൽ അതിക്രമം കാണിച്ചത്. അക്രമത്തിൽ വീട്ടിലെ കസേരകളും ചെടിച്ചട്ടികളും സംഘം തകർത്തു.

പിൻവാതിലിലൂടെ ഓടി രക്ഷപ്പെടാൻ ശ്രമം; മകൾക്ക് പരിക്കേറ്റു

സംഭവസമയത്ത് രതീഷിന്റെ ഭാര്യ സിനിയും പത്തു വയസ്സുകാരിയായ മകളും മാത്രമാണ് വീട്ടിലുണ്ടായിരുന്നത്. അക്രമികൾ വീടിന്റെ മുൻവാതിൽ ബലമായി തള്ളുകയും ഭീഷണിപ്പെടുത്തുകയും ചെയ്തു. ഭയന്നുപോയ വീട്ടുകാർ പിൻവാതിലിലൂടെ അടുത്ത വീട്ടിലേക്ക് ഓടി രക്ഷപ്പെടാൻ ശ്രമിക്കുന്നതിനിടെ വീണ് മകളുടെ കാലിന് പരിക്കേറ്റു.

സംഭവത്തിൽ പഞ്ചായത്ത് അംഗം രതീഷ് നൽകിയ പരാതിയിലാണ് വടക്കേക്കാട് പോലീസ് മൂന്ന് പേർക്കെതിരെ കേസെടുത്തത്. പുന്നയൂർ അഞ്ചാം വാർഡിൽ നിന്നും യു.ഡി.എഫ് സ്ഥാനാർത്ഥിയായാണ് രതീഷ് തിരഞ്ഞെടുക്കപ്പെട്ടത്. ജനപ്രതിനിധിയുടെ വീട്ടിൽ കയറി കുടുംബത്തിനുനേരെ നടത്തിയ അതിക്രമത്തിൽ പുന്നയൂർ മണ്ഡലം കോൺഗ്രസ് കമ്മിറ്റി ശക്തമായ പ്രതിഷേധം രേഖപ്പെടുത്തി.

ഗുരുവായൂർ ദർശനം നടത്തി മുഖ്യമന്ത്രി; പ്രത്യേക പരിഗണനകൾ ഒഴിവാക്കി നെയ്‌വിളക്കും തുലാഭാരവും വഴിപാട് നടത്തി മടക്കം

Prabeesh PP — Sat, 10 Oct 2026 22:22:08 +0530

തൃശൂർ: ഗുരുവായൂർ ക്ഷേത്രത്തിൽ ദർശനത്തിനെത്തിയ മുഖ്യമന്ത്രി ഒരിക്കൽ കൂടി പ്രത്യേക പരിഗണനകൾ ഒഴിവാക്കി ദർശനം പൂർത്തിയാക്കി മടങ്ങി. തിരക്കുകളും നിരവധി പ്രോഗ്രാമുകളിൽ പങ്കെടുക്കേണ്ടതുണ്ടെന്നതും കണക്കിലെടുത്താണ് ദർശനം വേഗത്തിലാക്കിയത്. ക്ഷേത്രത്തിൽ നെയ്‌വിളക്കിനായി 4,000 രൂപയാണ് രശീതിയായി അടച്ചത്. കോൺഗ്രസ് ബ്ലോക്ക് സെക്രട്ടറിയും മുൻ ദേവസ്വം ജീവനക്കാരനുമായ ടി.കെ. ഗോപാലകൃഷ്ണൻ എന്ന ചിരകാല സുഹൃത്തിനെയാണ് ദർശനത്തിനായി പണം അടവാക്കാൻ മുഖ്യമന്ത്രി ഏൽപ്പിച്ചത്.

ഗൺമാൻ ഉൾപ്പെടെ 4 പേരാണ് ദർശനം നടത്തിയത്. ഗുരുവായൂരിൽ ഗുരുവായൂരപ്പന്റെ പാലഭിഷേക സമയത്തായിരുന്നു മുഖ്യമന്ത്രിയുടെ ദർശനം. കദളിക്കുലയും നെയ്യും സോപാനത്തിൽ സമർപ്പിച്ച് തൊഴുത അദ്ദേഹം, തുടർന്ന് ഇടത്തരികത്ത്ക്കാവ് ഭഗവതിയെയും ഉപദേവനായ അയ്യപ്പനെയും കാര്യാലയ ഗണപതിയെയും തൊഴുതു. 68 കിലോ പഞ്ചസാരയാണ് തുലാഭാരത്തിനായി ഉപയോഗിച്ചത്. ഇതിനായി 2,800 രൂപ ദേവസ്വത്തിൽ അടച്ചു.

അതിഥി മന്ദിരത്തിലെത്തിയ മുഖ്യമന്ത്രിയെ അഡ്മിനിസ്ട്രേറ്റർ എസ്. ഹരിഗോപാൽ സ്വീകരിച്ചു. പതിവുപോലെ അതിഥി മന്ദിരത്തിൽ നിന്ന് നടന്നുനീങ്ങിയാണ് മുഖ്യമന്ത്രി ദര്‍ശനം നടത്തിയത്. ക്ഷേത്രകവാടത്തിന് മുന്നിൽ ഡെപ്യൂട്ടി അഡ്മിനിസ്ട്രേറ്റർ എം. രാധ അദ്ദേഹത്തെ സ്വീകരിച്ചു. ദർശനത്തിന് പോകുമ്പോഴും തിരിച്ചു വരുമ്പോഴും ഭക്തർ സെൽഫിയെടുക്കാൻ തിരക്ക് കൂട്ടിയെങ്കിലും, ആരെയും നിരാശപ്പെടുത്താതെയാണ് തീർത്ഥാടക നഗരിയിൽ നിന്നും മുഖ്യമന്ത്രി മടങ്ങിയത്.