Asianet News Malayalam

148 ഡോളറിന്റെ അഡ്വന്റ് കലണ്ടർ വൻ വിവാദത്തിൽ: പണം തിരികെ നൽകാനൊരുങ്ങി കിം കർദാഷിയാന്റെ 'സ്കിംസ്'

Web Desk — Mon, 09 Nov 2026 12:14:19 +0530

കിം കർദാഷിയാന്റെ ഉടമസ്ഥതയിലുള്ള ജനപ്രിയ ഫാഷൻ ബ്രാൻഡായ 'സ്കിംസ്' വൻ വിവാദത്തിൽ. തങ്ങളുടെ പുതിയ അഡ്വന്റ് കലണ്ടറുമായി ബന്ധപ്പെട്ട് ഉയർന്ന രൂക്ഷവിമർശനങ്ങൾക്ക് പിന്നാലെ ഉപഭോക്താക്കൾക്ക് പണം തിരികെ നൽകി വിവാദങ്ങളിൽ നിന്നും തലയൂരാനാണ് ബ്രാൻഡ് ഇപ്പോൾ ശ്രമിക്കുന്നത്. 148 ഡോളർ അതായത് ഏകദേശം 13,000 രൂപ വിലയുള്ള കലണ്ടറിൽ ഹെയർ ടൈകളും കീചെയിനും പോലുള്ള ചെറിയ ആക്സസറികൾ മാത്രമാണ് ഉള്ളതെന്ന് കണ്ടെത്തിയതോടെയാണ് സാമൂഹിക മാധ്യമങ്ങളിൽ വൻ വിമർശനം ഉയർന്നത്.

ക്രിസ്മസ് ആഘോഷങ്ങളുടെ ഭാഗമായി ഡിസംബറിലെ ആദ്യ ദിനങ്ങൾ എണ്ണിത്തിട്ടപ്പെടുത്താൻ ഉപയോഗിക്കുന്ന പ്രത്യേക സമ്മാനപ്പെട്ടിയുടെ രൂപത്തിലുള്ള കലണ്ടറാണ് 'അഡ്വന്റ് കലണ്ടർ'. 'ആക്സസറീസ് അഡ്വന്റ് കലണ്ടർ' എന്ന പേരിൽ അമേരിക്കയിലാണ് സ്കിംസ് ഇത് വിപണിയിലെത്തിച്ചത്. 12 സമ്മാനപ്പെട്ടികളാണ് ഇതിൽ അടങ്ങിയിരിക്കുന്നത്. ഓരോ പെട്ടിയിലും ഉപഭോക്തക്കൾ‍ക്കായി സമ്മാനങ്ങൾ കരുതിയിട്ടുണ്ടാകും.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

എന്നാൽ, സ്കിംസ് വിചാരിച്ച രീതിയിലുള്ള പ്രതികരണമല്ല ഉപഭോക്താക്കളുടെ ഭാഗത്തു നിന്നും 'ആക്സസറീസ് അഡ്വന്റ് കലണ്ടറി'ന് ലഭിച്ചത്. കിടക്കയുടെ അടിയിൽനിന്നും കാറിന്റെ സീറ്റിനിടയിൽനിന്നും ലഭിക്കുന്ന തരത്തിലുള്ള നിസ്സാര വസ്തുക്കളാണ് ഇത്രയും ഉയർന്ന തുകയ്ക്ക് സ്കിംസ് നൽകിയതെന്നാണ് ഉപഭോക്താക്കളുടെ പ്രധാന പരാതി. ഒരു ഫാഷൻ ബ്രാൻഡ് ആയിരുന്നിട്ടും, വസ്ത്രങ്ങളൊന്നും ഉൾപ്പെടുത്താതെ ഗുണനിലവാരം കുറഞ്ഞ ഹെയർ ക്ലിപ്പുകൾ, ഹെഡ്ബാൻഡ്, സാറ്റിൻ സ്ക്രഞ്ചി, സ്കിംസ് ബ്രാൻഡഡ് കീചെയിൻ തുടങ്ങിയ ആക്സസറികൾ മാത്രം ഉൾപ്പെടുത്തിയത് വലിയ പരിഹാസങ്ങൾക്കും വഴിവെച്ചു.

വിമർശനങ്ങൾ കണക്കിലെടുത്ത് ഉൽപ്പന്നം വാങ്ങിയ എല്ലാ ഉപഭോക്താക്കൾക്കും 150 ഡോളർ റീഫണ്ട് നൽകുമെന്ന് സ്കിംസ് ഔദ്യോഗികമായി അറിയിച്ചു. ഉൽപ്പന്നം കമ്പനിക്ക് തിരികെ നൽകുന്നവർക്ക് തുക അവരുടെ ബാങ്ക് അക്കൗണ്ടിലേക്ക് നൽകും. ഉൽപ്പന്നം കൈവശം വയ്ക്കാൻ ആഗ്രഹിക്കുന്നവർക്ക് ഭാവിയിൽ സ്കിംസിന്റെ ഉൽപ്പന്നങ്ങൾ വാങ്ങാനായി 150 ഡോളറിന്റെ 'സ്റ്റോർ ക്രെഡിറ്റും' ലഭ്യമാക്കുമെന്ന് വ്യക്തമാക്കുന്ന ഇമെയിൽ സന്ദേശങ്ങൾ കമ്പനി ഉപഭോക്താക്കൾക്ക് അയച്ചുതുടങ്ങിയിട്ടുണ്ട്.

£158 btw https://t.co/gMqSIxcl3w

— ˙˙ molls (@venusiiaa) November 6, 2026

നിലവിൽ സ്കിംസിന്റെ ഔദ്യോഗിക വെബ്സൈറ്റിൽനിന്ന് ഈ കലണ്ടർ പിൻവലിച്ചിട്ടുണ്ട്. 2019 -ൽ സ്ഥാപിതമായ സ്കിംസ് ചുരുങ്ങിയ കാലം കൊണ്ട് ലോകശ്രദ്ധ നേടിയെങ്കിലും ഈ വിവാദത്തിൽ കിം കർദാഷിയാൻ ഇതുവരെ പരസ്യ പ്രതികരണങ്ങൾ നടത്തിയിട്ടില്ല.

മകളുടെ ജീവനെടുത്ത അപകടം; നിയമം ലംഘിക്കുന്നവരെ പിടികൂടാൻ ദിവസവും റോഡിൽ കാവലിരുന്ന് പിതാവ്

Web Desk — Mon, 09 Nov 2026 15:00:55 +0530

ഒൻപതു വയസ്സുകാരിയായ മകളുടെ ജീവനെടുത്ത വാഹനാപകടത്തിന് പിന്നാലെ, ഗതാഗത നിയമം പാലിക്കാത്തവർക്കെതിരെ ഒറ്റയാൾ പോരാട്ടവുമായി ഒരു പിതാവ്. തെക്കുകിഴക്കൻ ചൈനയിലെ ജിയാങ്‌സി പ്രവിശ്യയിലാണ് സംഭവം. അപകടകരമായ രീതിയിൽ വാഹനമോടിക്കുന്നവരെ കണ്ടെത്തി അധികൃതർക്ക് മുന്നിലെത്തിക്കാൻ വു ഷിഷെങ് എന്ന പിതാവാണ് ദിവസവും തിരക്കേറിയ ജംങ്ഷനുകളിൽ കാവലിരിക്കുന്നത്.

കഴിഞ്ഞ ഓഗസ്റ്റ് ഒന്നിനായിരുന്നു വു ഷിഷെങിന്റെ ജീവിതം തകർത്ത ആ ദുരന്തം നടന്നത്. ഭാര്യ രണ്ടു പെൺമക്കളുമായി ഇലക്ട്രിക് സ്കൂട്ടറിൽ സഞ്ചരിക്കുമ്പോൾ, ജംങ്ഷനിൽ വെച്ച് ഒരു ടിപ്പർ ലോറി ഇവരെ ഇടിക്കുകയായിരുന്നു. ഒൻപതു വയസ്സുകാരിയായ മൂത്ത മകൾ സിജിൻ സംഭവസ്ഥലത്തുതന്നെ മരിച്ചു. ഭാര്യയ്ക്കും അഞ്ചു വയസ്സുകാരിയായ ഇളയ മകൾക്കും ഗുരുതരമായി പരിക്കേറ്റു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

പൊലീസ് നടത്തിയ അന്വേഷണത്തിൽ ലോറി അനുവദനീയമായതിനെക്കാൾ 92 ശതമാനം അധികഭാരം കയറ്റിയിരുന്നതായും വാഹനത്തിന്റെ ബ്രേക്കുകൾക്ക് തകരാറുണ്ടായിരുന്നതായും കണ്ടെത്തി. അപകടത്തിൽ ഡ്രൈവർ കുറ്റക്കാരനാണെന്ന് പൊലീസ് സ്ഥിരീകരിച്ചു. തന്റെ മകളുടെ ശരീരഭാരത്തിന്റെ ഏകദേശം 2,000 മടങ്ങ് ഭാരമാണ് ലോറിയിൽ ഉണ്ടായിരുന്നതെന്ന് വു വേദനയോടെ ഓർക്കുന്നു.

എന്നാൽ, അപകടത്തിന് കാരണക്കാരായ ട്രക്കിങ് കമ്പനിക്കും നിർമാണ കരാറുകാരനും എതിരെ ക്രിമിനൽ നടപടികൾ സ്വീകരിക്കാൻ മതിയായ തെളിവുകളില്ലെന്ന അധികൃതരുടെ നിലപാട് വുവിനെ നിരാശനാക്കി. ഇതോടെ സ്വന്തം ബിസിനസ് താൽക്കാലികമായി നിർത്തിവെച്ച്, ഗതാഗത നിയമലംഘനങ്ങൾ കണ്ടെത്താൻ മുഴുവൻ സമയവും പ്രവർത്തിക്കാൻ അദ്ദേഹം തീരുമാനിക്കുകയായിരുന്നു.

സ്കൂളുകൾക്കും കളിസ്ഥലങ്ങൾക്കും സമീപമുള്ള തിരക്കേറിയ ജംങ്ഷനുകളിലാണ് ഇപ്പോൾ വുവിന്റെ നിരീക്ഷണം. ടിപ്പർ ലോറികൾ, കോൺക്രീറ്റ് മിക്സറുകൾ, ചരക്കുവാഹനങ്ങൾ എന്നിവയുടെ നിയമലംഘനങ്ങൾ അദ്ദേഹം ക്യാമറയിൽ പകർത്തുന്നു. തെറ്റായ ദിശയിൽ വാഹനമോടിക്കൽ, സിഗ്നൽ മറികടക്കൽ, അമിതഭാരം കയറ്റൽ, നമ്പർ പ്ലേറ്റുകൾ മറച്ചുവെക്കൽ തുടങ്ങിയവ കണ്ടെത്തി ദൃശ്യങ്ങൾ ട്രാഫിക് പൊലീസിന് കൈമാറുന്നതിനൊപ്പം സാമൂഹിക മാധ്യമങ്ങളിലും അദ്ദേഹം പങ്കുവെക്കുന്നുണ്ട്. ഇതുവരെ ഇരുപതിലേറെ ഭാരവാഹനങ്ങളുടെ നിയമലംഘനങ്ങളാണ് അദ്ദേഹം ഇങ്ങനെ വെളിച്ചത്തുകൊണ്ടുവന്നത്.

"വലത്തോട്ട് തിരിയുന്നതിന് മുമ്പ് വാഹനം പൂർണമായി നിർത്തണമെന്ന നിയമം ഡ്രൈവർ കൃത്യമായി പാലിച്ചിരുന്നെങ്കിൽ എന്റെ കുഞ്ഞ് ഇന്നും ജീവനോടെ ഉണ്ടാകുമായിരുന്നു" വു പറയുന്നു. ചൈന ജസ്റ്റിസ് ബിഗ് ഡാറ്റ ഇൻസ്റ്റിറ്റ്യൂട്ടിന്റെ കണക്കുകൾ പ്രകാരം, ചൈനയിൽ മരണത്തിനോ പരിക്കുകൾക്കോ കാരണമാകുന്ന റോഡപകടങ്ങളിൽ 32 ശതമാനത്തിലും ഭാരവാഹനങ്ങളാണ് ഉൾപ്പെടുന്നത്.

നവംബർ രണ്ടിന് നടന്ന വിചാരണയിൽ അപകടമുണ്ടാക്കിയ ഡ്രൈവർ കുറ്റം നിഷേധിക്കുകയും വുവിന്റെ ഭാര്യയുടെ അശ്രദ്ധയാണ് അപകടത്തിന് കാരണമെന്ന് ആരോപിക്കുകയും ചെയ്തു. ഡ്രൈവർക്കും വാഹനത്തിന്റെ ഇൻഷുറൻസ് കമ്പനിക്കും നിർമാണ കരാറുകാരനും ഗതാഗത കമ്പനിക്കുമെതിരെ സിവിൽ കേസ് ഫയൽ ചെയ്ത് നഷ്ടപരിഹാരം തേടാനാണ് വുവിന്റെ തീരുമാനം.

വിമാനത്തിന്റെ നിരക്ക് കണ്ട് ട്രെയിനിന് ടിക്കറ്റെടുത്തു, ആകെ പാളി, വൈകിയത് 8 മണിക്കൂർ; പോസ്റ്റുമായി യുവാവ്

Web Desk — Sun, 08 Nov 2026 14:29:37 +0530

പലപ്പോഴും ആഘോഷസമയങ്ങളിൽ ഇന്ത്യയിലെ ട്രെയിനിലെ തിരക്ക് അല്പം കഠിനമാണ്. അതോടൊപ്പം ട്രെയിൻ വൈകുകയും ചെയ്താൽ പറയേണ്ട അല്ലേ? അതുപോലെ, ദീപാവലി ആഘോഷങ്ങൾക്കായി കുടുംബത്തോടൊപ്പം നടത്തിയ ട്രെയിൻ യാത്ര എട്ടു മണിക്കൂറോളം വൈകിയതിനെ തുടർന്ന് ഒരു സി.ഇ.ഒ പങ്കുവച്ച പോസ്റ്റാണ് ഇപ്പോൾ ശ്രദ്ധിക്കപ്പെടുന്നത്. ഇൻഡോറിൽ നിന്ന് ലഖ്‌നൗവിലേക്ക് യാത്ര ചെയ്ത അനുഭവമാണ് വൈഭവ് ജെയിൻ എന്ന യുവാവ് എക്സിൽ (ട്വിറ്റർ) ഷെയർ ചെയ്തത്.

ഫെസ്റ്റിവൽ സീസണിൽ വിമാനത്തിന്റെ നിരക്ക് കുത്തനെ ഉയർന്നതിനെ തുടർന്നാണ് വൈഭവ് ജെയിനും കുടുംബവും ഇൻഡോർ - ലഖ്‌നൗ മഹാകാൽ എക്സ്പ്രസിൽ ടിക്കറ്റ് ബുക്ക് ചെയ്തത്. കാറില്‍ വരാനുള്ള ഓപ്ഷനുണ്ടായിരുന്നു. എന്നാല്‍, തങ്ങളുടെ രണ്ടു വയസ്സുള്ള മകൾക്ക് ട്രെയിൻ യാത്ര ഒരു നല്ല അനുഭവമായിരിക്കുമെന്നും ഇവർ കരുതി. അങ്ങനെയാണ് ട്രെയിനിന് ടിക്കറ്റ് എടുക്കുന്നത്. എന്നാൽ, ഏകദേശം 14 മണിക്കൂർ കൊണ്ട് പൂർത്തിയാകേണ്ട യാത്ര 7.5 മണിക്കൂറിലധികം വൈകിയാണ് ലക്ഷ്യസ്ഥാനത്ത് എത്തിയത്.

വിമാനയാത്രയ്ക്ക് പകരം ട്രെയിനുകളിലേക്ക് ആളുകളെ ആകർഷിക്കാൻ പിന്നെങ്ങനെ റെയിൽവേയ്ക്ക് കഴിയുമെന്നും യുവാവ് ചോദിക്കുന്നു.

This #Diwali we opted to travel to our home #Lucknow from #indore by train.

Of course, one reason being flights being super expensive.

So we booked our tickets by Mahakal Express (20414).

We had an alternative to drive by car, but thought it would be a good experience for our 2 year old daughter also to travel by train.

But this is already running 7.5 hours late. And we are yet to reach our destination.

In today's world, 8 hours delay is huge. Total journey time 14 hours and train late 8 hours.

How is Indian #Railways thinking to compete with airlines? Complete management

Regretting the decision now.

@RailMinIndia

— Vaibhav Jain, CFA, CMT (@vaibhavjain_vj) November 7, 2026

വൈഭവിന്റെ കുറിപ്പ് സാമൂഹിക മാധ്യമങ്ങളിൽ ശ്രദ്ധിക്കപ്പെട്ടതോടെ നിരവധിപ്പേർ അതിന് കമന്റുകളുമായി രംഗത്തെത്തുകയും ചെയ്തു. മഹാകാൽ എക്സ്പ്രസ് യാത്ര ആരംഭിച്ചപ്പോൾ തന്നെ 6 മണിക്കൂറോളം വൈകിയിരുന്നതായും, സർവീസ് തുടങ്ങിയ ശേഷം 2.5 മണിക്കൂർ മാത്രമാണ് വൈകിയതെന്നും ചിലർ കമന്റ് ചെയ്തു. ദുരന്തോ എക്സ്പ്രസ് പോലെയുള്ള ട്രെയിനുകൾ ഇതിലും 10 മണിക്കൂറിലധികം വൈകാറുണ്ടെന്നായിരുന്നു മറ്റ് ചിലർ പരിഹാസത്തോടെ കുറിച്ചത്.

സമുദ്രത്തിൽ അലഞ്ഞുതിരിഞ്ഞത് 100 ദിവസം; ആമകളെയും പക്ഷികളെയും ഭക്ഷിച്ച് അത്ഭുതകരമായ അതിജീവനം

Web Desk — Tue, 10 Nov 2026 12:44:23 +0530

ഏകദേശം 100 ദിവസത്തോളം പസഫിക് സമുദ്രത്തിൽ അകപ്പെട്ടുപോയ അഞ്ചുപേർ അത്ഭുതകരമായി ജീവിതത്തിലേക്ക്. രണ്ട് കൗമാരക്കാരുൾപ്പെടെ അഞ്ചുപേരടങ്ങുന്ന സംഘം കടലിൽ അതിജീവിച്ചത് കടലാമകളെയും പക്ഷികളെയും ഭക്ഷിച്ചും മഴവെള്ളം കുടിച്ചുമാണെന്ന് ന്യൂയോർക്ക് ടൈംസ് റിപ്പോർട്ട് ചെയ്തു. മൈക്രോനേഷ്യയിലെ ദ്വീപുകൾക്കിടയിൽ ഒരു മണിക്കൂർ മാത്രം നീളുന്ന യാത്രയ്ക്കായി പുറപ്പെട്ട ഇവർ സഞ്ചരിച്ചിരുന്ന ചെറുബോട്ട് വഴിതെറ്റി കടലിൽ അകപ്പെടുകയായിരുന്നു. അതിനിടെ കുടുംബത്തിലെ നാല് അംഗങ്ങൾക്ക് ജീവൻ നഷ്ടപ്പെടുകയും ചെയ്തു.

മൈക്രോനേഷ്യയിലെ ദ്വീപുകൾക്കിടയിൽ സാധനങ്ങൾ വാങ്ങുന്നതിനുവേണ്ടി ജൂലൈ 30-നാണ് ടെഡ്‌വിൻസൺ പോളും കുടുംബാംഗങ്ങളും ഉൾപ്പെടെ ഒൻപതുപേരടങ്ങുന്ന സംഘം 20 അടി നീളമുള്ള ചെറിയ ബോട്ടിൽ യാത്ര തിരിച്ചത്. എന്നാൽ, യാത്രയ്ക്കിടെ വീശിയടിച്ച ശക്തമായ കൊടുങ്കാറ്റിൽ അകപ്പെട്ട് ബോട്ടിന്റെ നിയന്ത്രണം നഷ്ടമാവുകയും ഇന്ധനം തീർന്ന് ബോട്ട് സമുദ്രത്തിലേക്ക് ഒഴുകിപ്പോവുകയുമായിരുന്നു.

കടലിൽ അകപ്പെട്ട ഇവർ രക്ഷാപ്രവർത്തകരുടെ ശ്രദ്ധയിൽപ്പെടാനായി അടുത്തു കൂടെ കടന്നുപോയ കപ്പലുകൾക്കും വിമാനങ്ങൾക്കും കൈവീശി സൂചനകൾ നൽകിയെങ്കിലും ആരുടെയും കണ്ണിൽപ്പെട്ടില്ല.

നാളുകൾ നീണ്ട ആഴക്കടലിലെ അലച്ചിലിനിടയിൽ വിശപ്പും നിർജ്ജലീകരണവും താങ്ങാനാവാതെ സംഘത്തിലെ ഒരു കുട്ടിയുൾപ്പെടെ നാലുപേർ മരണത്തിന് കീഴടങ്ങി. മരിച്ച പ്രിയപ്പെട്ടവരുടെ മൃതദേഹങ്ങൾ വിങ്ങുന്ന മനസ്സോടെ സമുദ്രത്തിലേക്ക് തള്ളേണ്ടിവന്നു അവർക്ക്.

3,000 മൈൽ അകലെ കര

ഏകദേശം 100 ദിവസത്തോളം സമുദ്രത്തിൽ അലഞ്ഞുതിരിഞ്ഞ ബോട്ട് 3,000 മൈലിലധികം ദൂരം താണ്ടി ഒടുവിൽ നവംബർ ഒന്നിനാണ് കിരിബാത്തിയിലെ ഫാനിങ് ദ്വീപിന്റെ പവിഴപ്പുറ്റുകൾ നിറഞ്ഞ തീരത്തടിഞ്ഞത്. തീരത്ത് തട്ടി ബോട്ട് തകർന്നതോടെ, അതിജീവിച്ച മൂന്ന് പുരുഷന്മാരും രണ്ട് കൗമാരക്കാരും ഉൾപ്പെടുന്ന അഞ്ചംഗ സംഘം പള്ളിമണിയുടെ ശബ്ദം പിന്തുടർന്ന് അടുത്തുള്ള ഗ്രാമത്തിലേക്ക് നടന്നെത്തുകയായിരുന്നു.

കടുത്ത പോഷകാഹാരക്കുറവും നിർജ്ജലീകരണവും മൂലം തളർന്നവശരായി തുണിപോലുമില്ലാതെ എത്തിയ ഇവരെ ആദ്യം ഗ്രാമവാസികൾ മദ്യപിച്ചെത്തിയവരാണെന്നാണ് തെറ്റിദ്ധരിച്ചത്. എന്നാൽ, ഇവരുടെ അവസ്ഥ മനസ്സിലാക്കിയ പള്ളിയിലെ പാസ്റ്റർ ഇവരെ ഏറ്റെടുത്ത് പ്രാഥമിക പരിചരണങ്ങൾ നൽകുകയായിരുന്നു.

ആരോഗ്യനിലയിൽ പുരോഗതി

നിലവിൽ നഴ്സിങ് ഓഫീസർ പൗകിൻ ടൊറോറോയുടെ മേൽനോട്ടത്തിൽ ചികിത്സയിൽ കഴിയുന്ന ഇവർ ആരോഗ്യം വീണ്ടെടുത്തു വരികയാണ്. ഇവർ ഭക്ഷണത്തോടും ചികിത്സയോടും നന്നായി പ്രതികരിക്കുന്നുണ്ടെന്ന് ആരോഗ്യപ്രവർത്തകർ അറിയിച്ചു. അതിജീവിച്ചവരെ സ്വന്തം നാട്ടിലേക്ക് തിരിച്ചെത്തിക്കുന്നതിനായി കിരിബാത്തി സർക്കാരുമായി ചർച്ചകൾ ആരംഭിച്ചതായി ചൂക്ക് ഗവർണർ അലക്സാണ്ടർ നറൂഹ് സ്ഥിരീകരിച്ചു.

കണ്ടുപഠിക്കണം; ഹൈജംപ്, ട്രിപ്പിൾ ജംപ്... 6 ഇനങ്ങൾ, 91 -കാരി നേടിയത് 6 ലോകറെക്കോർഡുകൾ!

Web Desk — Mon, 09 Nov 2026 12:55:31 +0530

പ്രായം വെറുമൊരു നമ്പർ മാത്രം! പറഞ്ഞുപറഞ്ഞ് ക്ലീഷേയായ വാക്കുകളാണല്ലേ? എന്നാൽ, ചിലരുടെ കാര്യത്തിൽ അതെത്ര പറഞ്ഞാലും അധികമാകില്ല. അത് സ്വന്തം ജീവിതത്തിലൂടെ തെളിയിക്കുകയാണ് അമേരിക്കയിലെ വെർമോണ്ടിൽ നിന്നുള്ള 91 -കാരിയായ ഫ്ലോറൻസ് മെയ്‌ലർ. 60 -ാം വയസ്സിൽ മാത്രം അത്‌ലറ്റിക്സിലേക്ക് ചുവടുവെച്ച ഫ്ലോറൻസ്, ഇന്ന് വേൾഡ് മാസ്റ്റേഴ്സ് അത്‌ലറ്റിക്സിന്റെ ആറ് ലോകറെക്കോർഡുകൾ തിരുത്തിക്കുറിച്ചാണ് കായികലോകത്തെ അത്ഭുതപ്പെടുത്തുന്നത്.

60-ാം വയസ്സിലെ തുടക്കം

ഒരു സുഹൃത്തിന്റെ നിർബന്ധത്തിന് വഴങ്ങി 60-ാം വയസ്സിലാണ് ഫ്ലോറൻസ് അത്‍ലറ്റിക്സിലേക്ക് വരുന്നത്. വെർമോണ്ട് സീനിയർ ഗെയിംസിൽ ലോംഗ് ജംപിൽ പങ്കെടുക്കാൻ സുഹൃത്തായ ബാർബറ ജോർദാൻ ക്ഷണിച്ചതാണ് ഇവരുടെ ജീവിതത്തിൽ വഴിത്തിരിവായത്. തുടർന്ന് 20 വർഷത്തോളം ഇരുവരും ഒരുമിച്ച് പരിശീലനം നടത്തുകയും മത്സരങ്ങളിൽ പങ്കെടുക്കുകയും ചെയ്തു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

എന്നാൽ, 2020 -ൽ കാൻസർ ബാധയെത്തുടർന്ന് 85 -ാം വയസ്സിൽ ബാർബറ അന്തരിച്ചു. എങ്കിലും, പരിശീലനം പ്രയാസകരമാകുമ്പോൾ തനിക്ക് മുന്നോട്ട് പോകാനുള്ള കരുത്ത് ബാർബറയുടെ ഓർമ്മകളാണെന്ന് ഫ്ലോറൻസ് പറയുന്നു. "പരിശീലനം നടത്തുമ്പോൾ ഞങ്ങൾ പരസ്പരം ചോദ്യം ചെയ്യുകയും പോരായ്മകൾ ചൂണ്ടിക്കാണിക്കുകയും ചെയ്യുമായിരുന്നു. ഇപ്പോൾ ഒറ്റയ്ക്ക് പരിശീലിക്കുന്നത് എളുപ്പമല്ല, എങ്കിലും ബാർബറയുടെ ഓർമ്മകൾ എന്നെ മുന്നോട്ട് നയിക്കുന്നു" ഫ്ലോറൻസ് പറയുന്നു.

6 ലോകറെക്കോർഡുകൾ

90 മുതൽ 94 വരെയുള്ള പ്രായക്കാരുടെ വിഭാഗത്തിലാണ് ഫ്ലോറൻസിന്റെ റെക്കോർഡുകൾ. 2,000 മീറ്റർ സ്റ്റീപ്പിൾചേസ്, 80 മീറ്റർ ഹർഡിൽസ്, പോൾ വോൾട്ട്, ഹൈജംപ്, ട്രിപ്പിൾ ജംപ്, പെന്റാത്‌ലൺ എന്നീ ആറ് ഇനങ്ങളിലാണ് ഈ 91-കാരി ലോകറെക്കോർഡ് സ്ഥാപിച്ചിരിക്കുന്നത്.

'Never too late' എന്നാണ് തന്റെ ജീവിതാനുഭവത്തിൽ നിന്നും ഫ്ലോറൻസിന് ഈ ലോകത്തോട് പറയാനുള്ളത്. മറ്റു അത്‌ലറ്റുകൾ തന്നിൽ നിന്ന് പ്രചോദനം ഉൾക്കൊള്ളുന്നു എന്ന് പറയുമ്പോൾ വലിയ സന്തോഷവും സംതൃപ്തിയും തോന്നാറുണ്ടെന്നും അവർ കൂട്ടിച്ചേർക്കുന്നു.

പസഫിക് സമുദ്രത്തിൽ 9 മണിക്കൂർ; വീണത് ക്രൂയിസ് ഷിപ്പില്‍ നിന്ന്? പിയാനിസ്റ്റിനെ രക്ഷപ്പെടുത്തി മത്സ്യത്തൊഴിലാളികൾ

Web Desk — Mon, 09 Nov 2026 16:03:37 +0530

അമേരിക്കയിലെ കാലിഫോർണിയ തീരത്തുനിന്ന് ഏകദേശം 20 മൈൽ അകലെ പസഫിക് സമുദ്രത്തിൽ ഒൻപത് മണിക്കൂറോളം അകപ്പെട്ടുപോയ ക്രൂയിസ് കപ്പലിലെ പിയാനിസ്റ്റിനെ മത്സ്യത്തൊഴിലാളികൾ അത്ഭുതകരമായി രക്ഷപ്പെടുത്തി. മത്സ്യബന്ധനം കഴിഞ്ഞ് മടങ്ങുകയായിരുന്ന രണ്ടുപേരാണ് കടലിൽ ഇയാളെ കണ്ടെത്തിയത്.

നവംബർ ആറിനായിരുന്നു സംഭവം. ലോസ് ആഞ്ചലസ് കൗണ്ടിയിലെ കാറ്റലീന ദ്വീപിന് സമീപം മാർലിൻ മത്സ്യങ്ങളെ പിടിക്കാൻ പോയ സീൻ നോർട്ടൺ, ഗ്രാന്റ് ഗാരറ്റ് എന്നിവർ മടങ്ങുമ്പോഴാണ് കടലിൽ ഒരാൾ കിടക്കുന്നത് ബോട്ടിന്റെ ക്യാപ്റ്റന്റെ ശ്രദ്ധയിൽപ്പെടുന്നത്. തുടർന്ന് ബോട്ട് നിർത്തി പരിശോധിച്ചപ്പോഴാണ് നീന്താൻ പോലും കഴിയാത്ത അവസ്ഥയിൽ പ്രയാസപ്പെടുന്നയാളെ കണ്ടത്. ഇവർ ഉടൻതന്നെ ഇയാളുടെ ഇരുകൈകളിലും പിടിച്ച് ബോട്ടിലേക്ക് വലിച്ചുകയറ്റുകയായിരുന്നു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

പിന്നാലെ അടിയന്തര സന്ദേശം കൈമാറുകയും ന്യൂപോർട്ട് ബീച്ചിലെ ലൈഫ് ഗാർഡുകൾ സ്ഥലത്തെത്തി തുടർസഹായങ്ങൾ നൽകുകയും ചെയ്തു. ഉടൻതന്നെ ആശുപത്രിയിലെത്തിച്ച ഇയാൾ അപകടനില തരണം ചെയ്തതായി യുഎസ് കോസ്റ്റ് ഗാർഡ് അറിയിച്ചു. മിയാമി ആസ്ഥാനമായി പ്രവർത്തിക്കുന്ന റോയൽ കരീബിയൻ കമ്പനിയുടെ 'ഒവേഷൻ ഓഫ് ദ സീസ്' എന്ന ക്രൂയിസ് കപ്പലിലെ പിയാനിസ്റ്റാണ് രക്ഷപ്പെട്ട വ്യക്തി.

രക്ഷപ്പെടുത്തിയപ്പോൾ കടുത്ത ആഘാതത്തിലായിരുന്ന ഇയാൾ, കൈപിടിച്ച് കയറ്റിയപ്പോൾ നന്ദി പറഞ്ഞു, ഞാൻ മരിച്ചുപോകുമെന്ന് കരുതി എന്നും ഇയാൾ പറഞ്ഞതായും രക്ഷാപ്രവർത്തകർ പറഞ്ഞു. തീരത്തുനിന്ന് ഏറെ അകലെ സമുദ്രത്തിന്റെ നടുവിലാണ് ഇയാൾ ഉണ്ടായിരുന്നതെന്ന് ന്യൂപോർട്ട് ബീച്ച് ലൈഫ് ഗാർഡ് ബറ്റാലിയൻ ചീഫ് ആദം യസെൻഡ വ്യക്തമാക്കി.

സംഭവം സ്ഥിരീകരിച്ച റോയൽ കരീബിയൻ ഗ്രൂപ്പ് തങ്ങളുടെ ജീവനക്കാരന് ആവശ്യമായ എല്ലാ സഹായങ്ങളും നൽകിവരികയാണെന്ന് അറിയിച്ചു. ഇദ്ദേഹത്തിന്റെ സ്വകാര്യത മാനിച്ച് കൂടുതൽ വിവരങ്ങൾ പുറത്തുവിട്ടിട്ടില്ല. പിയാനിസ്റ്റ് എങ്ങനെയാണ് കപ്പലിൽനിന്ന് കടലിലേക്ക് വീണതെന്ന കാര്യത്തിൽ യുഎസ് കോസ്റ്റ് ഗാർഡ് അന്വേഷണം നടത്തിവരികയാണ്.

പൗരനെന്ന് തെറ്റിദ്ധരിപ്പിച്ച് വോട്ട് ചെയ്തു; ഇന്ത്യക്കാരനെതിരായ കേസിൽ 'എഐ വാദവും'; അഭിഭാഷകരെ രൂക്ഷമായി വിമർശിച്ച് യുഎസ് ജഡ്ജി

Web Desk — Sun, 08 Nov 2026 17:56:24 +0530

ഇന്ത്യയിൽ പൗരത്വ വിവാദം ഇനിയും കെട്ടടങ്ങിയിട്ടില്ല. തെരഞ്ഞെടുപ്പ് അട്ടിമറിക്കാൻ പലരുടെയും പൗരത്വം എടുത്ത് കളയുകയും മറ്റ് ചിലർക്ക് നൽകുകയും ചെയ്തെന്നാണ് പ്രതിപക്ഷത്തിന്‍റെ ആരോപണം. ഇന്ത്യയിൽ എസ്ഐആർ വിവാദങ്ങൾ സജീവമായ സമയത്താണ് വിചിത്രമായൊരു കേസ് യുഎസിൽ നിന്നും പുറത്ത് വന്നത്. പൗരനാണെന്ന് തെറ്റായി അവകാശപ്പെട്ട ഒരു ഇന്ത്യൻ വംശജൻ യുഎസ് തെരഞ്ഞെടുപ്പിൽ വോട്ട് ചെതെന്നായിരുന്നു ആ കേസ്. കേസിനിടെ കോടതിയിൽ നിർമിതബുദ്ധി ഉപയോഗിച്ച് തയ്യാറാക്കിയ വാദങ്ങൾ സമർപ്പിച്ച മൂന്ന് അഭിഭാഷകർക്കെതിരെ രൂക്ഷവിമർശനവുമായി അമേരിക്കൻ ഫെഡറൽ ജഡ്ജി രംഗത്തെത്തി. ഇന്ത്യൻ വംശജനായ പ്രതിയുടെ കേസിൽ സമർപ്പിച്ച ഹർജികളെയാണ് ജഡ്ജി മാർക്ക് പിറ്റ്മാൻ 'ബ്ലാറ്റന്‍റ് എഐ സ്ലോപ്പ്' (വ്യക്തമായ എഐ ചവറ്) എന്ന് വിശേഷിപ്പിച്ചത്. അഭിഭാഷകർക്കെതിരെ നടപടിയുണ്ടാകാമെന്നും അദ്ദേഹം മുന്നറിയിപ്പ് നൽകി.

വോട്ടറെന്ന് തെറ്റായി രേഖ നൽകി

70 -കാരനായ ഖൽവിന്ദർ സിങ് ഭേംഗുരയെ അമേരിക്കൻ പൗരനാണെന്ന് തെറ്റായി അവകാശപ്പെട്ട് വോട്ടർപട്ടികയിൽ പേര് ചേർക്കുകയും 2024 -ലെ ഫെഡറൽ തെരഞ്ഞെടുപ്പിൽ നിയമവിരുദ്ധമായി വോട്ട് ചെയ്യുകയും ചെയ്ത കേസിൽ ഒക്ടോബർ 27 -നാണ് കുറ്റക്കാരനായി കണ്ടെത്തിയത്. അമേരിക്കയിൽ സ്ഥിരതാമസത്തിന് നിയമപരമായ അനുമതിയുള്ളയാളാണ് അദ്ദേഹം.

A federal judge chastised attorneys representing a noncitizen convicted of voting in a federal election for using artificial intelligence in a motion to release their client from detention pending sentencing. https://t.co/oB4ZgdoFWS

— Bloomberg Law (@BLaw) November 5, 2026

ശിക്ഷാവിധിക്ക് മുമ്പ് കസ്റ്റഡിയിൽ തുടരേണ്ടതില്ലെന്ന് ആവശ്യപ്പെട്ട് അഭിഭാഷകരായ മരിയോ ഹെറേര, നിക്കോൾ നോക്സ്, വിൻസെന്‍റ് റെനെ കാരിസാലസ് എന്നിവർ കോടതിയെ സമീപിച്ചു. ശിക്ഷാനിർദേശങ്ങൾ പ്രകാരം പൂജ്യം മുതൽ ആറുമാസം വരെയാണ് തടവുശിക്ഷ ലഭിക്കാവുന്നതെന്നായിരുന്നു ഇവരുടെ വാദം. ഹർജിയുടെ ചില ഭാഗങ്ങൾ ജനറേറ്റീവ് എഐയുടെ സഹായത്തോടെ തയ്യാറാക്കിയതാണെന്നും അവർ വെളിപ്പെടുത്തിയിരുന്നു.

രൂക്ഷമായി വിമർശിച്ച് കോടതി

എന്നാൽ, നിയമവ്യവസ്ഥയെക്കുറിച്ചുള്ള അഭിഭാഷകരുടെ വ്യാഖ്യാനം തീർത്തും തെറ്റാണെന്ന് ജഡ്ജി വിമർശിച്ചു. എഐയെ ആശ്രയിച്ച് ഹർജികൾ തയ്യാറാക്കുന്നത് ഉത്തരവാദിത്വമില്ലാത്ത നിയമപ്രവർത്തനത്തിന്‍റെ ഉദാഹരണമാണെന്നും അദ്ദേഹം ചൂണ്ടിക്കാട്ടി. 'ചാറ്റ്ജിപിടി ഉപയോഗിച്ചുള്ള പ്രതിരോധം' നേരിടേണ്ടിവരുന്ന പ്രോസിക്യൂട്ടർമാരോട് സഹതാപമുണ്ടെന്നും ജഡ്ജി പറഞ്ഞു.

ആവശ്യമില്ലാത്ത ഹർജികൾ ഇനിയും സമർപ്പിച്ചാൽ പിഴ ഉൾപ്പെടെയുള്ള നടപടികൾ സ്വീകരിക്കുമെന്നും നോർത്ത് ടെക്സസിൽ അഭിഭാഷകവൃത്തി നടത്തുന്നതിന് നിയന്ത്രണം ഏർപ്പെടുത്താമെന്നും മുന്നറിയിപ്പുണ്ട്. എന്നാൽ എഐ ഉപയോഗിച്ചത് കോടതി ചട്ടങ്ങളുടെ ലംഘനമല്ലെന്നാണ് അഭിഭാഷകരുടെ നിലപാട്. ഹർജികൾ തങ്ങൾ പരിശോധിച്ച് അന്തിമമാക്കിയതാണെന്നും അവർ വിശദീകരിച്ചു. ഭേംഗുരയുടെ ശിക്ഷാവിധി 2027 ഫെബ്രുവരി 11 -നാണ് നിശ്ചയിച്ചിരിക്കുന്നത്.

അധിനിവേശത്തിന്‍റെ മുറിവുണങ്ങുമോ? ഓക്സ്ഫഡ് മ്യൂസിയത്തിൽനിന്ന് നാഗാ പൂർവികരുടെ ഭൗതികാവശിഷ്ടങ്ങൾ ജന്മനാട്ടിലേക്ക്

Web Desk — Tue, 10 Nov 2026 17:55:01 +0530

ബ്രിട്ടീഷ് കൊളോണിയൽ ഭരണകാലത്ത് ഇന്ത്യയിൽനിന്ന് കൊണ്ടുപോയ നാഗാ വംശജരായ 39 പേരുടെ ഭൗതികാവശിഷ്ടങ്ങൾ ഓക്സ്ഫഡ് സർവകലാശാലയ്ക്ക് കീഴിലുള്ള പിറ്റ് റിവേഴ്സ് മ്യൂസിയം നാഗാ സമുദായത്തിന് കൈമാറി. മ്യാന്മാറുമായി അതിർത്തി പങ്കിടുന്ന വടക്കുകിഴക്കൻ സംസ്ഥാനമായ നാഗാലാൻഡിൽനിന്ന് മുപ്പതോളം പ്രതിനിധികളാണ് ചരിത്രപരമായ ഈ നിമിഷത്തിന് സാക്ഷ്യം വഹിക്കാൻ ബ്രിട്ടനിലെത്തിയത്.

തലയോട്ടിയുൾപ്പെടുന്ന 'പൂർവികരുടെ അവശിഷ്ടങ്ങൾ'

ലോകത്ത് നാഗാ സംസ്കാരവുമായി ബന്ധപ്പെട്ട ഏറ്റവും വലിയ ശേഖരം സൂക്ഷിക്കുന്നത് ഓക്സ്ഫഡ് മ്യൂസിയമാണ്. ആറായിരത്തോളം വസ്തുക്കളടങ്ങുന്ന ഈ ശേഖരത്തിൽനിന്നാണ് പ്രധാനമായും തലയോട്ടികൾ ഉൾപ്പെടുന്ന 'പൂർവികരുടെ അവശിഷ്ടങ്ങൾ' ഇപ്പോൾ നാഗാ ജനതയ്ക്ക് ഔദ്യോഗികമായി ലഭിച്ചിരിക്കുന്നത്.

മറ്റ് സംസ്കാരങ്ങളിൽനിന്ന്, പ്രത്യേകിച്ച് മനുഷ്യരുടെ ഭൗതികാവശിഷ്ടങ്ങൾ ഉൾപ്പെടെയുള്ളവ, പാശ്ചാത്യ മ്യൂസിയങ്ങൾ എങ്ങനെയാണ് ശേഖരിച്ചതെന്ന് പുനഃപരിശോധിക്കുകയും ചിലത് തിരികെ നൽകുകയും ചെയ്യുന്ന സാഹചര്യത്തിലാണ് പിറ്റ് റിവേഴ്സ് മ്യൂസിയത്തിന്‍റെ ഈ കൈമാറ്റം. 19 -ാം നൂറ്റാണ്ടിൽ സ്ഥാപിതമായ ഈ നരവംശശാസ്ത്ര മ്യൂസിയം, ഓസ്‌ട്രേലിയ, ന്യൂസിലാൻഡ്, അമേരിക്ക എന്നിവിടങ്ങളിലെ ഗോത്രവിഭാഗങ്ങളുടെ ഭൗതികാവശിഷ്ടങ്ങൾ ഇതിനുമുമ്പ് തിരികെ നൽകിയിട്ടുണ്ട്.

Oxford returns Naga ancestral remains

39 Naga remains return from Britain

Nearly 30 representatives travel from Nagaland

@BislaDiksha gets you more https://t.co/PLguan7xlM

— WION (@WIONews) November 10, 2026

‘ചരിത്രപരമായ നിമിഷം’

കൈമാറ്റച്ചടങ്ങിൽ മ്യൂസിയം ഡയറക്ടർ ലോറ വാൻ ബ്രൂഖോവൻ ഈ ദിവസത്തെ ‘ചരിത്രപരമായ നിമിഷം’ എന്ന് വിശേഷിപ്പിച്ചു. 2020 -ലാണ് മനുഷ്യരുടെ ഭൗതികാവശിഷ്ടങ്ങൾ മ്യൂസിയത്തിലെ പ്രദർശനങ്ങളിൽനിന്ന് പൂർണമായി ഒഴിവാക്കാൻ പിറ്റ് റിവേഴ്സ് മ്യൂസിയം തയ്യാറായത്. ഇപ്പോഴും ഏകദേശം 2,700-ഓളം മനുഷ്യാവശിഷ്ടങ്ങൾ മ്യൂസിയത്തിന്‍റെ സംഭരണശാലയിലുണ്ടെന്ന് എഎഫ്‌പിയോട് സംസാരിക്കവെ ഡയറക്ടർ വെളിപ്പെടുത്തി. വ്യത്യസ്തമായ ധാർമിക കാഴ്ചപ്പാടുകളുണ്ടായിരുന്ന ഒരു കാലഘട്ടത്തിലാണ് ഇവ ശേഖരിക്കപ്പെട്ടതെന്നും ഇന്നത്തെ കാലത്തെ മാനദണ്ഡങ്ങൾ വച്ച് നോക്കുമ്പോൾ അത്തരം നടപടികൾ അങ്ങേയറ്റം പ്രശ്നഭരിതമായിരുന്നുവെന്നും അവർ കൂട്ടിച്ചേർത്തു.

ചരിത്രത്തിന്‍റെ നീതികേട് ഇനിയും ബാക്കി

1910 -നും 1940 -നും ഇടയിലാണ് ഭൂരിഭാഗം നാഗാ അവശിഷ്ടങ്ങളും ഓക്സ്ഫഡിൽ എത്തിയത്. നരവംശശാസ്ത്രജ്ഞർ കൂടിയായിരുന്ന രണ്ട് ബ്രിട്ടീഷ് കൊളോണിയൽ ഭരണാധികാരികളാണ് ഇവയിൽ ഭൂരിഭാഗവും ശേഖരിച്ചത്. ലണ്ടനിലെത്തിയ നാഗാ പ്രതിനിധിസംഘം ഈ അവശിഷ്ടങ്ങൾ ശേഖരിച്ച ബ്രിട്ടീഷ് ഉദ്യോഗസ്ഥരുടെ പിൻതലമുറക്കാരെയും സന്ദർശിച്ചു. "സ്വന്തം പിതാവിന്‍റെയോ മുത്തച്ഛന്‍റെയോ തലയോട്ടി മറ്റൊരാൾക്ക് സമ്മാനമായി നൽകാൻ ആരും തയ്യാറാകില്ല. അതിനാൽ ചരിത്രത്തിൽ നടന്ന നീതികേടുകളെക്കുറിച്ച് നിരവധി ചോദ്യങ്ങൾ ബാക്കിയാകുന്നുണ്ട്," നാഗാ നേതാവ് തെജാവോ വിഹിന്യൂനോ വ്യക്തമാക്കി.

നാഗാ സമുദായത്തിൽ മുൻകാലങ്ങളിൽ ശത്രുക്കളുടെ തല വെട്ടിയെടുക്കുന്ന 'ശിരച്ഛേദന' രീതി നിലനിന്നിരുന്നുവെങ്കിലും, സ്വന്തം ഗോത്രത്തലവന്മാരുടെ തലയോട്ടികൾ ഗ്രാമങ്ങൾക്ക് നടുവിൽ ആദരവോടെ സൂക്ഷിക്കുന്ന ആചാരവും ഉണ്ടായിരുന്നുവെന്ന് ലോത്ത-നാഗാ സമുദായാംഗവും നരവംശശാസ്ത്രജ്ഞയുമായ ഡോളി കിക്കോൺ ചൂണ്ടിക്കാണിക്കുന്നു. ഇപ്പോൾ തിരികെ നൽകിയവയിൽ ഒരു ഗോത്രത്തലവന്‍റെ തലയോട്ടി ഉൾപ്പെടുന്നുണ്ട്. സ്വന്തം മണ്ണിലേക്ക് തിരിച്ചെത്തുന്ന ഈ പൂർവികരുടെ ഭൗതികാവശിഷ്ടങ്ങൾ പൂർണ ആദരവോടെ സംസ്കരിക്കാനാണ് നാഗാ സമുദായത്തിന്‍റെ തീരുമാനം.

കട ഉദ്ഘാടനത്തിന് ഒരു യൂറോയ്ക്ക് കബാബ്; പിന്നാലെ സംഘർഷം, ഒടുവിൽ തിരക്ക് നിയന്ത്രിക്കാൻ 100 പോലീസും ഹെലികോപ്റ്ററും സജ്ജമാക്കി ജർമ്മൻ നഗരം

Web Desk — Tue, 10 Nov 2026 18:49:35 +0530

ഫാസ്റ്റ് ഫുഡ് റെസ്റ്റോറന്‍റിന്‍റെ ഉദ്ഘാടനത്തോടനുബന്ധിച്ച് ഒരു യൂറോയ്ക്ക് കബാബ് നൽകുമെന്ന പരസ്യത്തിന് പിന്നാലെ ജനക്കൂട്ടം ഇരച്ചെത്തി. ഒടുവിൽ തിരക്ക് നിയന്ത്രണാതീതമായതോടെ ജർമൻ നഗരമായ ഡോർട്ട്മുണ്ടിൽ സംഘർഷം. ജനക്കൂട്ടത്തെ പിരിച്ചുവിടാൻ നൂറോളം പൊലീസുകാരെയും ഹെലികോപ്റ്ററിനെയുമാണ് നഗരത്തിൽ വിന്യസിച്ചതെന്ന് റിപ്പോർട്ടുകൾ.

കബാബ് വെറും ഒരു യൂറോയ്ക്ക്!

പുതുതായി ആരംഭിച്ച ഫാസ്റ്റ് ഫുഡ് റെസ്റ്റോറന്‍റിന്‍റെ പ്രചാരണാർത്ഥമാണ് ഉടമ പ്രത്യേക ഓഫർ പ്രഖ്യാപിച്ചത്. സാധാരണയായി 7.50 മുതൽ 9 യൂറോ വരെ വിലയുള്ള കബാബ് കേവലം ഒരു യൂറോയ്ക്ക് വിൽക്കുമെന്നായിരുന്നു വാഗ്ദാനം. ഓഫർ വിവരം അറിഞ്ഞ് മുതിർന്നവരും കുട്ടികളും അടക്കം വൻ ജനക്കൂട്ടം കടയ്ക്ക് മുന്നിലേക്ക് എത്തിയതോടെ കാര്യങ്ങൾ കൈവിട്ടുപോയി.

A €1 döner kebab deal in the German city of Dortmund turned into a riot after hundreds gathered.

When police tried to clear the area, they were pelted with rocks and bottles.

Police called reinforcements and a helicopter to control the crowds.

The New Germany. https://t.co/qnKBbH2Jlo

— Remix News & Views (@RMXnews) November 9, 2026

ആദ്യം സ്ഥിതിഗതികൾ ശാന്തമാക്കാൻ കടയുടമ സ്വകാര്യ സുരക്ഷാ ജീവനക്കാരെ നിയോഗിച്ചിരുന്നെങ്കിലും തിരക്ക് നിയന്ത്രിക്കാൻ അവർക്ക് സാധിച്ചില്ല. തുടർന്നാണ് ഉടമ പൊലീസിന്‍റെ സഹായം തേടിയത്. കടയ്ക്ക് മുന്നിൽ ഏകദേശം 300 -ഓളം പേർ തടിച്ചുകൂടിയെന്നാണ് പൊലീസിന്‍റെ കണക്കെങ്കിൽ, ആയിരത്തിലധികം ആളുകൾ എത്തിയെന്നാണ് ഉടമ അവകാശപ്പെടുന്നത്.

Stadtbild Dortmund, wenn ein Dönerladen mit 1-€-Döner eröffnet https://t.co/KXfqtTvTy1

— ColdJack (@TheColdJack) November 9, 2026

ഒടുവിൽ ഹെലികോപ്റ്ററും

പൊലീസുകാർക്ക് നേരെ ജനക്കൂട്ടത്തിൽ ചിലർ കല്ലുകളും കുപ്പികളും പടക്കങ്ങളും എറിയാൻ തുടങ്ങിയതോടെ പ്രദേശം സംഘർഷഭരിതമായി. സ്ഥിതി വഷളായതിനെ തുടർന്ന് കൂടുതൽ പൊലീസ് സംഘം സ്ഥലത്തെത്തുകയും നിരീക്ഷണത്തിനായി ഹെലികോപ്റ്റർ രംഗത്തിറക്കുകയുമായിരുന്നു.

സംഭവവുമായി ബന്ധപ്പെട്ട് നിരവധി പേരെ പൊലീസ് അറസ്റ്റ് ചെയ്തിട്ടുണ്ട്. ഒരാളിൽ നിന്ന് വെടിയുണ്ടകളില്ലാത്ത ഒരു തോക്ക് കണ്ടെത്തിയതായും റിപ്പോർട്ടുകളുണ്ട്. പൊതുമുതൽ നശിപ്പിക്കൽ, സമാധാനാന്തരീക്ഷം തകർക്കൽ തുടങ്ങിയ കുറ്റങ്ങൾ ചുമത്തി ഇവർക്കെതിരെ കേസ് എടുത്തു. അതേസമയം, ആവശ്യത്തിന് സുരക്ഷയൊരുക്കാതെ ഓഫർ പ്രഖ്യാപിച്ച് സംഘർഷത്തിന് വഴിവെച്ച കടയുടമയ്‌ക്കെതിരെ നിയമനടപടി സ്വീകരിക്കുമോയെന്ന കാര്യത്തിൽ പൊലീസ് നിലപാട് വ്യക്തമാക്കിയിട്ടില്ല.

ചാരന്മാരെ വേണം! പരസ്യം നൽകി അർജന്‍റീന; 24 മണിക്കൂറിനുള്ളിൽ അപേക്ഷിച്ചത് 40,000 -ത്തിലേറെ പേർ!

Web Desk — Sun, 08 Nov 2026 21:03:51 +0530

ചാരന്മാരാകാൻ താൽപര്യമുള്ളവരെ തേടി പരസ്യം നൽകി അർജന്‍റീനയുടെ രഹസ്യാന്വേഷണ ഏജൻസി. പരസ്യം പുറത്തുവന്ന് വെറും 24 മണിക്കൂറിനുള്ളിൽ 40,000 -ത്തിലേറെ അപേക്ഷകളാണ് ഏജൻസിക്ക് ലഭിച്ചതെന്ന് റിപ്പോർട്ട്. രാജ്യത്തിന്‍റെ ചരിത്രത്തിൽ ആദ്യമായാണ് പൊതുജനങ്ങളിൽനിന്ന് നേരിട്ട് രഹസ്യാന്വേഷണ ഉദ്യോഗസ്ഥരെ നിയമിക്കാൻ അപേക്ഷ ക്ഷണിക്കുന്നത്.

ചാരനാകാൻ താത്പര്യമുണ്ടോ?

അർജന്‍റീനയുടെ സ്റ്റേറ്റ് ഇന്‍റലിജൻസ് സെക്രട്ടേറിയറ്റ് (SIDE) നവംബർ മൂന്നിനാണ് പുതിയ റിക്രൂട്ട്മെന്‍റ് ക്യാംപയിൻ ആരംഭിച്ചത്. ബ്യൂണസ് അയേഴ്സ് നഗരത്തിലും സർവകലാശാലകൾക്ക് സമീപവും അമേരിക്കയിലെ പ്രശസ്തമായ അങ്കിൾ സാം റിക്രൂട്ട്മെന്‍റ് പരസ്യത്തിന്‍റെ മാതൃകയിലുള്ള പോസ്റ്ററുകൾ സ്ഥാപിച്ചു. 'മികച്ചവരെ തേടുന്നു' എന്നതായിരുന്നു പരസ്യത്തിലെ സന്ദേശം. യോഗ്യതയുള്ളവരെ കണ്ടെത്തുന്നതിനും രഹസ്യാന്വേഷണ സംവിധാനത്തെ കൂടുതൽ സുതാര്യവും പ്രൊഫഷണലുമാക്കുന്നതിനുമാണ് നീക്കമെന്ന് ഏജൻസി വ്യക്തമാക്കി.

Por primera vez en la historia, abrimos un concurso público para ingresar al Cuerpo de Inteligencia de la Nación.

Esta medida forma parte del proceso de transparencia y profesionalización del Sistema de Inteligencia Nacional, con una carrera basada en el mérito, la formación y los resultados.

https://t.co/T9T1dzpO7T

— Secretaría de Inteligencia (@SIDE_Argentina) November 3, 2026

യോഗ്യത സെക്കൻഡറി വിദ്യാഭ്യാസം

മുൻപ് രഹസ്യാന്വേഷണ മേഖലയിലോ സുരക്ഷാ വിഭാഗത്തിലോ പ്രവർത്തിച്ച പരിചയം നിർബന്ധമില്ല. അർജന്‍റീനൻ പൗരത്വവും സെക്കൻഡറി വിദ്യാഭ്യാസ യോഗ്യതയും ഉള്ളവർക്ക് അപേക്ഷിക്കാം. ബ്യൂണസ് അയേഴ്സിലേക്ക് താമസം മാറാനും തയ്യാറായിരിക്കണം. വൈദ്യപരിശോധന, ശാരീരികക്ഷമതാ പരിശോധന, മാനസിക പരിശോധന, പശ്ചാത്തല പരിശോധന എന്നിവയും തെരഞ്ഞെടുപ്പിന്‍റെ ഭാഗമാണ്.

സ്ട്രാറ്റജിക് അനാലിസിസ്, സൈബർ ഇന്‍റലിജൻസ്, സാങ്കേതികവിദ്യ, വിദേശഭാഷകൾ, പ്രാദേശിക പഠനം, ഓപ്പറേഷൻസ്, കൗണ്ടർ ഇന്‍റലിജൻസ് തുടങ്ങിയ മേഖലകളിലെ വിദഗ്ധരെയാണ് ഏജൻസി തേടുന്നത്. പ്രൊഫൈൽ പരിശോധനയ്ക്കും ഓൺലൈൻ പൊതുവിജ്ഞാന പരീക്ഷയ്ക്കും ശേഷം എഴുത്തുപരീക്ഷ, അഭിമുഖം, ശാരീരിക-മാനസിക പരിശോധനകൾ എന്നിവയുണ്ടാകും. തെരഞ്ഞെടുക്കപ്പെടുന്നവർക്ക് നാഷണൽ ഇന്‍റലിജൻസ് സ്കൂളിൽ പരിശീലനം ലഭിക്കും. എന്നാൽ, പരിശീലനം പൂർത്തിയാക്കുന്നത് നിയമനം ഉറപ്പാക്കുന്നില്ല.

അപകടസാധ്യതയുള്ള ജോലിയെന്ന്!

നവംബർ 30 വരെയാണ് അപേക്ഷ സ്വീകരിക്കുന്നത്. ഒഴിവുകളുടെ എണ്ണമോ ശമ്പളമോ ഏജൻസി വെളിപ്പെടുത്തിയിട്ടില്ല. ജോലിക്ക് നിശ്ചിത സമയമില്ലെന്നും കടുത്ത വെല്ലുവിളികളും യഥാർഥ അപകടസാധ്യതകളുമുണ്ടെന്നും ഏജൻസി മുന്നറിയിപ്പ് നൽകിയിട്ടുണ്ട്. പരസ്യത്തിലൂടെ ഉദ്യോഗാർഥികളെ തേടുന്ന രീതി രഹസ്യാന്വേഷണ ഏജൻസിക്ക് അനുയോജ്യമാണോയെന്ന വിമർശനവും ഇതിനകം ഉയർന്നു കഴിഞ്ഞു.

'തമാശയ്ക്ക്... ഞങ്ങൾ നല്ല കുട്ടികൾ'; ബോട്ട് ഗൈഡിനെ നടുക്കടലിലേക്ക് തട്ടിയിട്ട് ഇസ്രയേലി വിനോദ സഞ്ചാരി, വീഡിയോ വൈറൽ, വിവാദം

Web Desk — Tue, 10 Nov 2026 16:49:22 +0530

ശ്രീലങ്കയിൽ വിനോദ സഞ്ചാരത്തിനിടെ ബോട്ടിലുണ്ടായിരുന്ന പ്രാദേശിക ഗൈഡിനെ കടലിലേക്ക് തള്ളിയിട്ട് ഇസ്രയേൽ വിനോദ സഞ്ചാരികൾ. സംഭവത്തിന്‍റെ ദൃശ്യങ്ങൾ സമൂഹ മാധ്യമങ്ങളിൽ വൈറലായതോടെ ഇസ്രയേലി വിനോദ സഞ്ചാരികൾക്ക് നേരെ വ്യാപക വിമർശനം. എന്നാൽ, ഗൈഡിനെ കടലിലേക്ക് തള്ളിയിട്ടത് വെറുമൊരു തമാശയ്ക്കായിരുന്നുവെന്നും അയാൾക്ക് പരിക്കേറ്റിട്ടില്ലെന്നുമാണ് വിനോദ സഞ്ചാരികളുടെ വിശദീകരണം.

ഗൈഡിനെ തള്ളിയിട്ടത് നടുക്കടലിൽ!

കടലിലൂടെ ബോട്ടിൽ യാത്ര ചെയ്യുന്നതിനിടെ വെള്ളം കുടിച്ചുകൊണ്ടിരുന്ന ഗൈഡിനെ സംഘത്തിലുണ്ടായിരുന്ന ഒരാൾ പെട്ടെന്ന് വെള്ളത്തിലേക്ക് തള്ളിയിടുന്നത് സമൂഹ മാധ്യമങ്ങളിൽ വ്യാപകമായി പ്രചരിക്കുന്ന വീഡിയോകളിൽ കാണാം. ഈ സമയം മറ്റുള്ളവർ സംഭവം കണ്ട് ചിരിക്കുന്നതും തങ്ങളുടെ മൊബൈൽ ഫോണിൽ ദൃശ്യങ്ങൾ പകർത്തുന്നതും വീഡിയോയിൽ കാണാം. അതേസമയം സംഭവത്തിന്‍റെ കൃത്യമായ സ്ഥലമോ തീയതിയോ ഗൈഡിന്‍റെ വ്യക്തിവിവരങ്ങളോ ഇതുവരെ സ്ഥിരീകരിച്ചിട്ടില്ല.

ISRAELI tourists FILM themselves PUSHING SRI LANKAN worker OFF BOAT and INTO WATER — LAUGHING

Say 'IT WAS a JOKE' and they didn't 'MEAN TO BE MEAN'

'We're ENLISTING in a MONTH. We're GOOD KIDS. We don't deserve this HATE' https://t.co/j7gkKP6rzD

— RT (@RT_com) November 8, 2026

'എല്ലാമൊരു തമാശ, ഞങ്ങൾ നല്ല കുട്ടികൾ'

ഇസ്രയേലി മാധ്യമപ്രവർത്തകനും സാമൂഹിക പ്രവർത്തകനുമായ ഡാനിയൽ അമ്രം പങ്കുവെച്ച പ്രതികരണത്തിലാണ് വിനോദ സഞ്ചാരികൾ തങ്ങളുടെ ഭാഗം വിശദീകരിച്ചത്. ഗൈഡിന് തങ്ങളുടെ തമാശയെക്കുറിച്ച് അറിയാമായിരുന്നുവെന്നും അയാളും അതിൽ പങ്കാളിയായിരുന്നുവെന്നുമാണ് ഇവരുടെ അവകാശവാദം. അപമാനിക്കാനോ ഉപദ്രവിക്കാനോ ഉദ്ദേശിച്ചിരുന്നില്ലെന്നും ഗൈഡിന് കുഴപ്പമൊന്നുമില്ലെന്നും അവർ പറഞ്ഞു. 'അതൊരു തമാശയായിരുന്നു, ഞങ്ങൾ നല്ല കുട്ടികളാണ്. ഒരു മാസത്തിനുള്ളിൽ സൈനികസേവനത്തിന് ചേരാനിരിക്കുകയാണ്. ഇത്രയധികം വിദ്വേഷം അർഹിക്കുന്നില്ല' എന്നും സംഘം പ്രതികരിച്ചതായി റിപ്പോർട്ടുണ്ട്.

ഔദ്ധ്യോഗിക വിശദീകരണമില്ല

അതേസമയം, ഗൈഡിന്‍റെ സമ്മതത്തോടെയാണോ സംഭവം നടന്നതെന്ന കാര്യത്തിൽ വ്യക്തതയില്ല. ഗൈഡിന്‍റെ നേരിട്ടുള്ള പ്രതികരണവും പുറത്തുവന്നിട്ടില്ല. ബോട്ടിന്‍റെ സുരക്ഷാ നിബന്ധനകൾ പാലിച്ചിരുന്നോയെന്ന കാര്യത്തിലും സ്ഥിരീകരണമില്ല. വീഡിയോയ്ക്ക് പിന്നാലെ ശ്രീലങ്കൻ ടൂറിസം അതോറിറ്റിയുടെ ബോട്ട് സുരക്ഷാ മാർഗനിർദേശങ്ങൾ വീണ്ടും ചർച്ചയായി. എന്നാൽ, നിയമലംഘനം നടന്നതായി ഔദ്യോഗിക സ്ഥിരീകരണമൊന്നും പുറത്ത് വന്നിട്ടില്ല.

യുഎസ് തെരഞ്ഞെടുപ്പ്; അടിതെറ്റി വീണ് ട്രംപും റിപബ്ലിക്കൻസും, ചരിത്ര വിജയം സ്വന്തമാക്കി ഡെമോക്രാറ്റുകൾ

Alakananda R — Mon, 09 Nov 2026 10:10:01 +0530

അമേരിക്കൻ തെരഞ്ഞെടുപ്പിൽ ഇങ്ങനെയൊരു വിജയം ഡമോക്രാറ്റുകൾ പോലും പ്രതീക്ഷിച്ചിരിക്കില്ല. കോൺഗ്രസിലെ രണ്ട് സഭകളും ഡമോക്രാറ്റുകൾ കൊണ്ടുപോയി. ജനപ്രതിനിധിസഭയും സെനറ്റും. കാലാകാലമായി റിപബ്ലിക്കൻ ചുവപ്പായിരുന്ന സംസ്ഥാനങ്ങൾ നീലയിൽ കുതിർന്നു. പലതും ചരിത്രം കുറിക്കുന്ന വിജയങ്ങളാണ്. ആദ്യത്തെ ആഫ്രിക്കൻ - അമേരിക്കൻ വനിതാ ഗവർണർ, സെനറ്റിലേക്കുള്ള ആദ്യത്തെ മുസ്ലിം അംഗം, സ്വവർഗാനുരാഗി സെനറ്റംഗമായതും ആദ്യം. സഹകരിക്കുമെന്നാണ് ട്രംപിന്‍റെ പ്രതികരണം. പക്ഷേ, എന്തുപറ്റിയെന്ന ചിന്തകളും വിശകലനങ്ങളും തുടങ്ങിക്കഴിഞ്ഞു റിപബ്ലിക്കൻ പാർട്ടിക്കുള്ളിൽ തന്നെ. പ്രസിഡന്‍റിൽ നിന്ന് അകലം പാലിച്ചവർപോലും തോറ്റു. ഇറാൻ യുദ്ധത്തെ കുറ്റം പറയുന്നു റിപബ്ലിക്കൻ അംഗങ്ങൾ. സാമ്പത്തികമാണ് പ്രശ്നമെന്ന അഭിപ്രായവുമുണ്ട്. പക്ഷേ, പരമ്പരാഗത റിപബ്ലിക്കൻ സംസ്ഥാനങ്ങൾ പോലും കൂറുമാറിയതിന്‍റെ അർത്ഥം വ്യക്തമായിട്ടില്ല പാർട്ടിക്ക്.

ഒഴുകിപ്പരന്ന നീല

നീലയങ്ങനെ പരന്നൊഴുകിപ്പടർന്നത് എങ്ങനെയെന്ന ആലോചന തീർന്നിട്ടില്ല. ട്രംപ് പറന്നുനടന്നാണ് റാലികളിൽ പങ്കെടുത്തത്. ഈ പ്രായത്തിലെ ഒരാൾക്ക് സാധാരണഗതിയിൽ അസാധ്യമായ കാര്യം. എന്നിട്ടും ട്രംപ് പിന്തുണച്ച സ്ഥാനാർത്ഥികൾ തോറ്റു. ട്രംപിനോട് അകലം പാലിച്ചവരും തോറ്റു. റിപബ്ലിക്കൻ പാർട്ടിക്ക് അധികാരം നഷ്ടപ്പെട്ടത്, ഒരു തലമുറക്കാലത്തേക്കാളും അധികാരം നിലനിർത്തിയ ഇടങ്ങളിലാണ്. Rust Belt ട്രംപിനൊപ്പമേ നിന്നിട്ടുള്ളു. വ്യവസായങ്ങൾ തുരുമ്പിച്ചയിടങ്ങളിൽ അവ വീണ്ടെടുക്കും എന്നുറപ്പ് നൽകിയ ട്രംപിനൊപ്പമായിരുന്നു വോട്ടർമാർ. ഇല്ലിനോയി മുതൽ വിസ്കോൺസിൻ വരെ. അത് പോയി. കനേഡിയൻ അതിർത്തി മുതൽ ടെക്സസ് വരെ നീളുന്ന Great Plains -ഉം ട്രംപിനെ പിന്തുണച്ച് പോരുന്നു. ഇത്തവണഅതും പോയി.

കൻസസ് ഡമോക്രാറ്റുകൾക്ക് അവസാനം കിട്ടിയത് 1930 -കളിലാണ്. സൗത്ത് കരോലൈനയിലെ സെനറ്റ് സീറ്റ് നഷ്ടപ്പെട്ടത് 1960 -കളിൽ. ടെക്സസിലെ ചുവപ്പ് ഒരുകാലത്തും മായില്ലെന്ന് വിചാരിച്ചിരുന്നു ഡമോക്രാറ്റുകളും. 1990 -കൾക്ക് ശേഷം ടെക്സസ് അവർക്ക് കിട്ടിയിട്ടില്ല. ഉൾപ്രദേശങ്ങളിലും ലറ്റീനോകൾക്കിടയിലും കിട്ടിയിരുന്നതെല്ലാം അപ്പാടെ പോയി. മധ്യമേഖലയിൽ ഡമോക്രാറ്റുകൾക്ക് ജീവൻ വച്ചു. അയോവ, മിഷിഗൻ, മിനസോട്ട, ഒഹായോ എന്നിവിടങ്ങളിൽ ഗവർണർ സ്ഥാനവും സെനറ്റും ഡമോക്രാറ്റുകൾ നേടി. റിപബ്ലിക്കൻ പാർട്ടി, അതിർത്തികൾ പുനർനിർണയിച്ച് ആധിപത്യം നേടാൻ ശ്രമിച്ചിരുന്നു. ഫലിച്ചില്ലെന്നുവേണം കരുതാൻ. കോടീശ്വരനായ ഇലൺ മസ്ക് റിപബ്ലിക്കൻ പാർട്ടിക്ക് നൽകിയ 168 മില്യൻ ഡോളറിനും ടെക്സസിൽ അധികാരം ഉറപ്പിക്കാനായില്ല. ഫണ്ടിന്‍റെ കാര്യത്തിൽ വളരെപ്പിന്നിലായിരുന്നു ഡമോക്രാറ്റ് പാർട്ടി. മസ്ക് എല്ലാംകൂടി ബില്യനുകളാണ് നൽകിയത്. തന്‍റെ പേര് ബാലറ്റിലുണ്ടായിരുന്നെങ്കിൽ പാർട്ടി തോൽക്കില്ലായിരുന്നു എന്നാണ് തെരഞ്ഞെടുപ്പ് ഫലത്തോടുള്ള പ്രസിഡന്‍റിന്‍റെ പ്രതികരണം.

തോറ്റുപോയ റിപബ്ലിക്കന്മാർ

ടെക്സസിൽ സെനറ്റ് സീറ്റും ഗവർണർ സ്ഥാനവും നേടിയത് ഡമോക്രാറ്റുകളാണ്. സെനറ്ററായത് ജെയിംസ് തലാരിക്ക (James Talarica). ഗവർണറായത് ഗിന ഹിനോജോസ (Gina Hinojosa), ഗവർണറാകുന്ന ആദ്യത്തെ ലറ്റീനോ വംശജ. കൻസസിനും കിട്ടി ഡമോക്രാറ്റിക് സെനറ്ററെ. ഏതാണ്ടൊരു നൂറ്റാണ്ടിന് ശേഷമുള്ള വിജയം. സ്പീക്കറാവുക ഹക്കീം ജെഫ്രീസ് (Hakeem Jeffries) ആണ്. Great American Comeback എന്ന് വിശേഷിപ്പിച്ചു ജെഫ്രീസ്.

30 വർഷം മെയ്ൻ ( Maine) സെനറ്റായിരുന്ന സൂസൻ കോളിൻസിന്‍റെ (Susan Collins) തോൽവി റിപബ്ലിക്കൻ പാർട്ടിയെ ഞെട്ടിച്ചു. ആ സ്ഥാനനഷ്ടം പാർട്ടിയുടെ തോൽവിയുടെ വ്യാപ്തി സൂചിപ്പിച്ചു. ട്രംപിൽ നിന്ന് അകലം പാലിച്ചിട്ടും കോളിൻസിന് വിജയിക്കാനായില്ല.

അയോവ, ഒഹായോ, നോർത്ത് കരോലൈന എന്നിവയെല്ലാം പിടിച്ചെടുത്തു ഡമോക്രാറ്റുകൾ. 1964 ൽ നഷ്ടപ്പെട്ട സൗത്ത് കരോലൈനയും തിരികെപ്പിടിച്ചു. റിപബ്ലിക്കൻ സെനറ്റർ ലിൻഡ്സെ ഗ്രഹാം (Lindsay Graham) മരിച്ചതോടെ, ഗ്രഹാമിന്‍റെ സഹോദരിയാണ് മത്സരരംഗത്തിറങ്ങിയത്. ട്രംപ് നേരിട്ട് തെരഞ്ഞെടുത്ത സ്ഥാനാർത്ഥി. അങ്ങനെ പ്രസിഡന്‍റ് നേരിട്ട് തെരഞ്ഞെടുത്ത, പിന്തുണച്ച പലരും തോറ്റുവെന്നതാണ് സത്യം. ജോർജിയ, ടെക്സസ്, ഒക്കെ ഉദാഹരണങ്ങളാണ്.

ഒഹായോവിൽ വിവേക് രാമസ്വാമി ഇറക്കിയ പ്രചാരണവീഡിയോ വിവാദമായിട്ടും ട്രംപ് പിന്തുണച്ചതും അടിതെറ്റിച്ചുവെന്ന് വേണം കരുതാൻ. ടെക്സസിൽ ട്രംപിന്‍റെ സ്ഥാനാർത്ഥി പാക്സ്റ്റൺ (Paxton) ആണ്. അതും കൈവിട്ടുപോയി. മസ്കിന്‍റെ കോടികളും വെറുതേയായി. തെരഞ്ഞെടുപ്പുഫലം ഏതാണ്ട് വ്യക്തമായശേഷം ട്രൂത്ത് സോഷ്യലിൽ ട്രംപിന്‍റെ അക്കൗണ്ട് നിശബ്ദമായി. മൂന്നുമണിക്കൂറോളം നീണ്ടു. പിന്നെ വന്നത് 'സ്വന്തം പേരില്ലാത്തതിന്‍റെ പേരിലെ തോൽവി' എന്ന അവകാശവാദമാണ്. പക്ഷേ, ഉത്തരവാദിത്തം ഏറ്റെടുത്തില്ല. ഇറാൻ യുദ്ധമല്ല കാരണം, ചുങ്കങ്ങളുമല്ല, അതൊക്കെ ചെറിയ കാരണങ്ങൾ മാത്രം, സ്ഥാനാർത്ഥികളാണ് കാരണമെന്ന് തർക്കിച്ച് ഉറപ്പിച്ചു പ്രസിഡന്‍റ്.

ചില അട്ടിമറികൾ

സെനറ്റിലെ ആദ്യത്തെ മുസ്ലിം അംഗമാവുകയാണ് അബ്ദുൾ എൽ-സയീദ് (Abdul El-Sayed). മിഷിഗൺ നിർണായക സംസ്ഥാനമാണ്. ജോ ബൈഡനൊപ്പമായിരുന്നു 2020 -ൽ. 2024 പക്ഷേ ട്രംപിനൊപ്പമായി. മുസ്ലിം ജനസംഖ്യ ഏറ്റവും കൂടുതലുള്ള സംസ്ഥാനം കൂടിയാണ് മിഷിഗൺ. ചില നഗരങ്ങളിൽ അത് 60 ശതമാനത്തോളമാണ്. രാജ്യത്തെ ഏറ്റവും വലിയ മുസ്ലിം പള്ളിയും മിഷിഗണിലെ ഡിയർബോണിലാണ് (Dearborn). 2024 -ലെ വിജയം പക്ഷേ, ട്രംപിന് ആവർത്തിക്കാനായില്ല. വേറെയും പലതുമുണ്ട് ഈ തെരഞ്ഞെടുപ്പിലെ ചരിത്രം കുറിച്ച വിജയങ്ങൾ.

5 ആഫ്രോ അമേരിക്കൻ വംശജർ ഗവർണർമാരായി. ഇത്രയും നാൾ അത് മൂന്നുവരെയേ എത്തിയിട്ടുള്ളു. 2008 -ൽ അത് രണ്ടായിരുന്നു. പിന്നെ മൂന്നായി. ഇപ്പോൾ 5 ഉം. ആദ്യത്തെ ലറ്റീനോ ഗവർണറും ഇത്തവണത്തെ ചരിത്രമാണ്. സ്വവർഗാനുരാഗിയായ ആദ്യത്തെ പുരുഷസെനറ്ററായി ക്രിസ് പാപ്പാസ് (Chris Pappas). ജനപ്രതിനിധി സഭാംഗമായിരുന്നു ഇതുവരെ. LGBTQ വനിതാ സെനറ്റർ നേരത്തെയുണ്ട്, ടാമി ബാൾഡ്വിൻ (Tammy Baldwin).

വനിതാ ഗവർണർമാരുടെ എണ്ണം കൂടി, 17 ആയി. കൻസസ് അലാസ്ക കൂടിയായാൽ എണ്ണം കൂടും. ജോർജിയയിൽ ആഫ്രോ അമേരിക്കൻ വംശജ ആദ്യമായി ഗവർണ സ്ഥാനത്തെത്തി. അറ്റ്ലാന്‍റയിലെ മേയറായിരുന്ന കെയ്‌ഷ ലാൻസ് ബോട്ടംസ് (Keisha Lance Bottoms). ആദ്യത്തെ തദ്ദേശീയ ഗവർണറെ കിട്ടിയത് ന്യൂ മെക്സിക്കോയ്ക്കാണ്, ഡെബ് ഹാലാൻഡ് (Deb Haaland). ടെക്സസിൽ നാലാമൂഴത്തിന് ഒരുങ്ങിയിരുന്ന ഗ്രെഗ് ആബട്ടിന് തോൽവിയൊരു ഞെട്ടലായി. പകരം ലറ്റീനോ വംശജ ആദ്യമായി അധികാരത്തിലെത്തുകയാണ്. 100 മില്യൺ ഫണ്ടിന്‍റെ ശക്തിയുമായായാണ് ആബട്ട് മത്സരിച്ചത്. ഏറ്റവും പണമൊഴുകിയ തെര‌ഞ്ഞെടുപ്പ് പ്രചാരണമെന്ന റെക്കോർഡ് ടെക്സസിനാണ്. മസ്കിന്‍റെ പണം കിട്ടിയത് റിപബ്ലിക്കൻ പാർട്ടിക്ക്. പക്ഷേ, ജയിച്ചത് ഡമോക്രാറ്റായ ജെയിംസ് ടലറിക്കോ (James Talarico). മസ്ക്, തന്‍റെ കണക്കുകൂട്ടൽ തെറ്റിയെന്ന് പോസ്റ്റുമിട്ടു.

എൽ സായിദിന്‍റെ നന്ദി പ്രസംഗം

അതിർത്തി പുനർനിർണയിച്ച് ഭരണം പിടിക്കാൻ റിപബ്ലിക്കൻ പാർട്ടി ശ്രമിച്ച 15 ഡിസ്ട്രിക്റ്റുകളും ഡമോക്രാറ്റുകൾ നിലനിർത്തി. നാല് സീറ്റ് കൂടുതലും പിടിച്ചെടുത്തു. ഏറ്റവും കൂടുതൽ ചർച്ചചെയ്യപ്പെട്ടത് മിഷിഗനിൽ എൽ സായിദിന്‍റെ (El Sayed) വിജയമാണ്. റിപബ്ലിക്കനായ മൈക് റോജേഴ്സിനെയാണ് സയിദ് തോൽപ്പിച്ചത്. അവസാനനിമിഷം സയിദിനുള്ള പിന്തുണ പിൻവലിച്ചിരുന്നു ഡമോക്രാറ്റായ ഹാലി സ്റ്റീവൻസ് (Haley Stevens), എന്നിട്ട് റോജേഴ്സിന് പിന്തുണ അറിയിച്ചു. അത് വിവാദമായി. ഡമോക്രാറ്റുകൾ, പാലം വലിച്ചുവെന്ന് കുറ്റപ്പെടുത്തി. അത് പക്ഷേ ഫലത്തിൽ പ്രതിഫലിച്ചില്ല. എൽ സയിദിനെ 'ജിഹാദിസ്റ്റ്' എന്നുവിളിച്ച് ആക്ഷേപിച്ചിട്ടുണ്ട് ട്രംപ്. അത് കോളിളക്കമുണ്ടാക്കുകയും ചെയ്തു.

വിജയിച്ചപ്പോൾ അതിനെല്ലാം മറുപടി പറഞ്ഞു എൽ സായിദ്. എൽ സായിദിന്‍റെ വിജയ പ്രസംഗത്തിലെ പല വാചകങ്ങളും പ്രയോഗങ്ങളും സോഷ്യൽ മീഡിയയിൽ ആവർത്തിച്ച് പ്രത്യക്ഷപ്പെട്ടു. വിജയപ്രസംഗം സാധാരണ വോട്ടർമാർക്കും അണികൾക്കുമുള്ള നന്ദി അറിയിക്കാനും മുന്നിലുള്ള ലക്ഷ്യങ്ങൾ വിശദീകരിക്കാനുമാണ് സാധാരണ സ്ഥാനാർത്ഥികൾ വിനിയോഗിക്കുക. പക്ഷേ, സായിദ് അതിൽ വ്യത്യസ്തനായി. അതിൽ ചില വിമർശനങ്ങൾ നേരിട്ടെങ്കിലും. തന്‍റെ വിജയം 'രുചികരമായ വൈരുദ്ധ്യം' എന്ന് വിശേഷിപ്പിച്ചു സായിദ്.

തന്‍റെ പേര് ഉച്ചരിക്കാൻ കഴിയാത്ത പ്രസിഡന്‍റ് ഇനി തന്നെ സെനറ്റർ എന്നുവിളിച്ചാൽ മതിയെന്ന് പരിഹാസിച്ചു. കൈയടിച്ച് ചിരിച്ച് കൊണ്ട് ജെ ഡി വാൻസിനെ 'ഹബീബീ' എന്ന അറബി വാക്കിൽ അഭിസംബോധന. ഇൻഷാള്ളയ്ക്ക് (Inshallah) പകരം ഇനി അൽഹംദുലില്ല (Alhamdulilla) എന്ന് പറയാമെന്ന് അടുത്തത്. അതും വലതുപക്ഷത്തെ പേരെടുത്ത് പരിഹസിച്ച് കൊണ്ട്. തന്നെ സെനറ്ററായി സത്യപ്രതിജ്ഞ ചെയ്യിക്കേണ്ടിവരുമല്ലോ വാൻസ്. 'Wolverine 1, Buckeye 0' എന്ന് അടുത്ത വാചകം. അതൊരു കോളജ് ഫുട്ബോൾ എതിരാളിക്കഥയാണ്. എൽ സായിദ് പഠിച്ച മിഷിഗൺ കോളജിലെ ഫുട്ബോൾ ടീമാണ് വോൾവറിൻ (Wolverine). വാൻസ് പഠിച്ച ഒഹായോ യൂണിവേഴ്സിറ്റിയിലെ ഫുട്ബോൾ ടീമാണ് ബക്കി (Buckeye). ചരിത്രത്തിലിടം നേടിയ ശത്രുക്കളാണ് രണ്ട് ടീമും. അതാണ് എൽ സായിദ് ഉദ്ദേശിച്ചത്.

തെരഞ്ഞെടുപ്പ് പ്രചാരണകാലത്ത് വാൻസ്, സായിദിനെ രൂക്ഷമായി ആക്രമിക്കുകയും ചെയ്തിരുന്നു. അറബി വാക്കുകൾ വേറെയും ഉപയോഗിച്ചു സായിദ്. മെറ്റൽ ഡിറ്റക്ടറിലൂടെ കടന്നുപോകേണ്ടി വരുന്ന ഒരേയൊരു സെനറ്ററായിരിക്കും സായിദ് എന്ന ട്രംപിന്‍റെ പരിഹാസത്തിനും മറുപടി നൽകി സായിദ്. 'പ്രസിഡന്‍റ് ലൈ ഡിറ്റക്ടറിന് (Lie Detector - നുണ പരിശോധനാ ഉപകരണം) മുന്നിലിരിക്കൂ, താൻ മെറ്റൽ ഡിറ്റക്ടറിലൂടെ കടക്കാം' എന്നായി. തന്‍റെ മതവിശ്വാസവും, പലസ്തീൻ അനുകൂല നിലപാടും ഈജിപ്ഷ്യൻ വംശപാരമ്പര്യവും തുറന്ന് പറഞ്ഞ് തന്നെയായിരുന്നു സായിദിന്‍റെ പ്രചാരണം. ഡോക്ടർ കൂടിയാണ് അബ്ദുൾ റഹ്മാൻ മുഹമ്മദ് എൽ സയീദ് (Abdul Rahman Mohammed El Sayed). ഭാര്യ ഇന്ത്യൻ വംശജയാണ്.

എന്തുകൊണ്ട് തോറ്റു? റിപബ്ലിക്കൻ തോൽവിയുടെ കാരണങ്ങൾ, ഉയരുന്ന വാദങ്ങൾ, വീറ്റോ പ്രയോഗിക്കുമെന്ന് ട്രംപ്

Alakananda R — Tue, 10 Nov 2026 17:21:34 +0530

ജനപ്രതിനിധിസഭയും സെനറ്റും നേടിയ ഡമോക്രാറ്റുകൾ ഇനി അധികം സമയം കളയില്ലെന്നുറപ്പാണ്. ട്രംപിന്‍റെ നയങ്ങൾ അംഗീകരിക്കില്ല. അന്വേഷണങ്ങൾ ഉറപ്പാണ്. ഇംപീച്ച്മെന്‍റ് സാധ്യതയും തെളിയുന്നു. ട്രംപിന് മാത്രമല്ല പഴി, പ്രതിരോധ സെക്രട്ടറി പീറ്റ് ഹെഗ്സെതിനും നേരെയും വാളെടുക്കാനാണ് സാധ്യത. വീറ്റോയായിരിക്കും ഇനി തന്‍റെ നയമെന്ന് ട്രംപ് വ്യക്തമാക്കിയതേോടെ ഏറ്റുമുട്ടലുകൾ രൂക്ഷമാകും എന്നുറപ്പുമായി.

ഇനി 'വീറ്റോ'യെന്ന് ട്രംപ്

അധികാരം പ്രസിഡന്‍റിന്‍റെ കൈയിൽ തന്നെയാണ്. എക്സിക്യൂട്ടിവ് അധികാരം, കോൺഗ്രസിന്‍റെ അനുമതി വേണ്ടാത്ത തീരുമാനങ്ങൾ ഇത്രയും വിനിയോഗിച്ചിട്ടുള്ള പ്രസിഡന്‍റുമാരും കുറവാണ്. അതിന്‍റെ പരിധി കടക്കാൻ വരെ തയ്യാറാണ് താനും. അങ്ങനെയെടുത്ത തീരുമാനങ്ങളാണ് ചുങ്കം ചുമത്തലും വെനിസ്വേല , ഇറാൻ സൈനിക നടപടികളും. റിപബ്ലിക്കൻ ഭൂരിപക്ഷമുണ്ടായിരുന്നിട്ടും കോൺഗ്രസിന്‍റെ അനുവാദം പ്രസിഡന്‍റ് വാങ്ങിയില്ല. ഫെഡറൽ ചെലവ് വെട്ടിക്കുറച്ചതും ഇതേവഴി തന്നെ. അതുതന്നെ ഇനിയും തുടരാം. നിയമം വഴി തടുക്കാൻ കോൺഗ്രസ് ശ്രമിച്ചാൽ, പ്രസിഡന്‍റിന് വീറ്റോ അധികാരം പ്രയോഗിക്കാം. വീറ്റോ മറികടക്കാൻ ഡമോക്രാറ്റുകൾക്ക്, ഇപ്പോഴുള്ള ഭൂരിപക്ഷം പോര. ഇതെല്ലാം ഒരുവശം.

തോൽവിയുടെ കാരണങ്ങൾ

മറുവശമുണ്ട്. ഇത്രയും നാൾ റിപബ്ലിക്കൻ പാർട്ടിയെ മുഷ്ടിക്കുള്ളിലാക്കിയിരുന്ന പ്രസിഡന്‍റിന് പക്ഷേ, ഇനിയത് കഴിഞ്ഞേക്കില്ലെന്നാണ് മറുപക്ഷ വാദം. കാരണം, ഡമോക്രാറ്റുകളുടെ എതിർപ്പ് മാത്രമല്ല, റിപബ്ലിക്കൻ പാർട്ടിയിലെ തന്നെ വിമതസ്വരങ്ങളാണ്. അത് അടുത്തകാലത്തായി അത് കൂടിയിട്ടുണ്ട്. വൈസ് പ്രസിഡന്‍റ് ജെഡി വാൻസ് തന്നെ പോസ്റ്റിട്ടത് ഇറാൻ യുദ്ധമാണ് പരാജയ കാരണമെന്ന് വ്യക്തമായി പറഞ്ഞിട്ടാണ്. ഇനിയെന്ത് ? എന്നതിൽ ചർച്ച തുടങ്ങേണ്ടത് ഈ തിരിച്ചറിവിൽ നിന്നാണെന്നും. വിമർശനം കൂടുതൽ നേരിടുന്നത് പീറ്റ് ഹെഗ്സെത്താണ്. ഹെഗ്സെത്തിനെ മാറ്റണോ എന്ന് പ്രസിഡന്‍റ് ആലോചിച്ച് തുടങ്ങിയെന്നാണ് റിപ്പോർട്ടുകൾ.

ഇറാൻ യുദ്ധം

ഇതൊക്കെയാണെങ്കിലും വിദേശനയത്തിൽ പ്രസിഡന്‍റിന്‍റേത് തന്നെയാവും അവസാനവാക്ക്. ഇറാൻ യുദ്ധത്തിലുൾപ്പടെ. കാര്യങ്ങൾ ഇറാൻ സൂക്ഷ്മമായി നിരീക്ഷിക്കുന്നുണ്ട്. തെരഞ്ഞെടുപ്പിന് ശേഷം ഇറാനുമേൽ വീണ്ടും ആക്രമണം രൂക്ഷമാക്കുമെന്ന സൂചനകളുണ്ടായിരുന്നു നേരത്തെതന്നെ. തെരഞ്ഞെടുപ്പിന്‍റെ തലേദിവസം ആക്രമിക്കയും ചെയ്തു. പക്ഷേ, ഇനിയുമാവഴി തന്നെ സ്വീകരിക്കാൻ തീരുമാനിക്കുമോ എന്നുറപ്പില്ല.

യുദ്ധംകാരണമുണ്ടായ വിലക്കയറ്റമാണ് റിപബ്ലിക്കൻ തോൽവിക്ക് ഒരു കാരണമായി വിലയിരുത്തപ്പെടുന്നത്. 3.7 ശതമാനമാണ് ഈ വർഷം കൂടിയത്. നാണ്യപ്പെരുപ്പം കുടുംബ ബജറ്റുകളുടെ താളം തെറ്റിച്ചു. അഭിപ്രായ സർവേകളിൽ, ജനം പഴിച്ചത് പ്രസിഡന്‍റിനെയാണ്. ഇറാൻ യുദ്ധത്തോട് തന്നെയും എതിർപ്പാണ് കൂടുതൽ. യുദ്ധങ്ങളിനിയുണ്ടാവില്ല എന്ന പ്രചാരണവാക്യം പാലിച്ചില്ല പ്രസിഡന്‍റ് എന്ന് ജനം ആരോപിക്കുന്നു. യുക്രെയ്ൻ യുദ്ധവും ഇതിനോട് കൂട്ടിക്കെട്ടി തന്നെയാണ് ജനം കാണുന്നത്.

കുടിയേറ്റ വിരുദ്ധത

രണ്ടുവർഷം മുമ്പ് ട്രംപിനൊപ്പം നിന്ന ഹിസ്പാനിക്, ആഫ്രോ - അമേരിക്കൻ വംശജർ ഇത്തവണ കൂറുമാറിയതും തോൽവിക്ക് കാരണമായി. കുടിയേറ്റ വിരുദ്ധ നടപടികൾ തന്നെയാണ് അതിന്‍റെ പ്രധാന കാരണം. പ്രത്യേകിച്ച് ടെക്സസിലും മിഷിഗണിലും. 'It is the Economy Stupid' എന്ന പ്രസിദ്ധ വാക്യം ഇത്തവണ തെറ്റി. ഇക്കഴിഞ്ഞ രണ്ടുവർഷമായി തൊഴിലില്ലായ്മ അത്ര കൂടുതലായിരുന്നില്ല, സമ്പദ് രംഗം അത്ര മോശമമായിരുന്നില്ല, എഐ വിപ്ലവം മറ്റൊരുതരത്തിൽ സാമ്പത്തിക കുതിപ്പിനും കാരണമായിരുന്നു. സമ്പദ്‍രംഗം ഇപ്പോഴും കുഴപ്പത്തിലല്ല.

നാണ്യപ്പെരുപ്പം, തൊഴിലവസരം

പക്ഷേ, ഇറാൻ യുദ്ധം വന്നതോടെ നാണ്യപ്പെരുപ്പവും ഇന്ധനവിലക്കയറ്റവും അവശ്യസാധനങ്ങളുടെ വിലക്കയറ്റവും ഒക്കെകൂടി സാധാരണക്കാരെ ശ്വാസംമുട്ടിച്ചു. സമ്പന്നരെ വലുതായി ബാധിച്ചുമില്ല. അമേരിക്കൻ സ്വപ്നം മരിച്ചുവെന്നാണ് പൊതുപക്ഷം. തൊഴിലവസരങ്ങളും കുറഞ്ഞു.

പൊലീസ് കസ്റ്റഡിയിലുണ്ടായിരുന്ന ഒരു കോടിയിലധികം മോഷ്ടിച്ചു; മുൻ വനിതാ ഡിറ്റക്ടീവിന് 4 വർഷം തടവ്!

Web Desk — Tue, 10 Nov 2026 14:04:58 +0530

പൊലീസ് കസ്റ്റഡിയിലുണ്ടായിരുന്ന പണം മോഷ്ടിച്ച കേസിൽ മുൻ ബ്രിട്ടീഷ് വനിതാ ഡിറ്റക്ടീവിന് നാല് വർഷവും രണ്ട് മാസവും തടവുശിക്ഷ. മിഷേൽ ക്രിസ്റ്റി റീസൺ ആണ് 85,000 പൗണ്ടിലധികം മോഷ്ടിച്ചതിന് ശിക്ഷിക്കപ്പെട്ടത്. ഇന്ത്യൻ രൂപയിൽ ഏകദേശം 1.02 കോടി രൂപ വരുമിത്. മയക്കുമരുന്ന് സംഘങ്ങളെക്കുറിച്ച് അന്വേഷണം നടത്തിയിരുന്ന പ്രത്യേക അന്വേഷണ വിഭാഗത്തിൽ എവിഡൻസ് ഓഫീസറായി ജോലി ചെയ്തിരുന്ന കാലത്താണ് ഇവർ പണം മോഷ്ടിച്ചത്. ഏകദേശം നാല് വർഷത്തോളം ഇവർ ഈ തട്ടിപ്പ് തുടർന്നു.

എങ്ങനെയാണ് മോഷണം കണ്ടെത്തിയത്?

ഡെർബിഷെയർ പൊലീസ് പുറത്തിറക്കിയ പ്രസ്താവന പ്രകാരം, മയക്കുമരുന്ന് സംഘങ്ങളെക്കുറിച്ച് അന്വേഷിച്ചിരുന്ന പ്രത്യേക സംഘത്തിൽ ഡിറ്റക്ടീവ് കോൺസ്റ്റബിളായിരിക്കെയാണ് മിഷേൽ പണം മോഷ്ടിച്ചത്. ലക്ഷക്കണക്കിന് പൗണ്ട് സൂക്ഷിച്ചിരുന്ന പൊലീസ് സുരക്ഷാ അറയിലേക്ക് പ്രവേശനാനുമതിയുണ്ടായിരുന്ന ചുരുക്കം ചില ഉദ്യോഗസ്ഥരിൽ ഒരാളായിരുന്നു ഇവർ.

ആദ്യഘട്ടത്തിൽ 15,000 പൗണ്ടാണ് ഇവർ മോഷ്ടിച്ചത്. ആരും മോഷണം ശ്രദ്ധിച്ചില്ലെന്ന് മനസ്സിലാക്കിയതോടെ പിന്നീട് സ്ഥിരമായി പണം എടുത്തുതുടങ്ങി. 2025 ഡിസംബറിൽ പൊലീസ് സേനയിൽനിന്ന് വിരമിക്കുന്നതുവരെ ഇത് തുടർന്നു.

എന്നാൽ, ഇവർ സേന വിട്ടശേഷം വരാനിരിക്കുന്ന ഒരു കോടതി നടപടിക്കുള്ള തയ്യാറെടുപ്പിനിടെയാണ് പണത്തിന്റെ കുറവ് ഉദ്യോഗസ്ഥരുടെ ശ്രദ്ധയിൽപ്പെട്ടത്. തുടർന്ന് നടത്തിയ അന്വേഷണത്തിനിടെ ഡെർബിയിലെ സെന്റ് മേരീസ് വാർഫ് പൊലീസ് സ്റ്റേഷനിൽവെച്ച് പണം മോഷ്ടിച്ചതായി മിഷേൽ സമ്മതിക്കുകയായിരുന്നു.

നവംബർ 9 -ന് മാൻസ്ഫീൽഡ് മജിസ്‌ട്രേറ്റ്‌സ് ആൻഡ് കൗണ്ടി കോടതിയിൽ ഹാജരായ മിഷേൽ മോഷണക്കുറ്റവും ഔദ്യോഗിക പദവി ദുരുപയോഗം ചെയ്തതിനുള്ള കുറ്റവും സമ്മതിച്ചു. തുടർന്ന് നാല് വർഷവും രണ്ട് മാസവും തടവുശിക്ഷ വിധിക്കുകയായിരുന്നു.

വ്യക്തിപരമായ സാമ്പത്തിക ബാധ്യതകൾ തീർക്കാനാണ് പണം മോഷ്ടിച്ചതെന്നായിരുന്നു അന്വേഷണ ഉദ്യോഗസ്ഥരോട് മിഷേൽ ആദ്യം പറഞ്ഞത്. എന്നാൽ, പിന്നീട് നടത്തിയ അന്വേഷണത്തിൽ കാർ വാങ്ങാനും അവധിക്കാല യാത്ര നടത്താനും ഇവർ മോഷ്ടിച്ച പണം ചെലവഴിച്ചതായി കണ്ടെത്തി.

'ഇന്ത്യ എന്നാൽ മനുഷ്യരാണ്, സ്ഥലങ്ങളല്ല'; ഒരു വർഷത്തെ ഇന്ത്യൻ ജീവിതം നൽകിയ പാഠം! മടങ്ങിപ്പോകുമ്പോൾ ഹൃദയസ്പർശിയായ വീഡിയോയുമായി സഞ്ചാരി

Web Desk — Sun, 08 Nov 2026 21:26:00 +0530

ഒരു വർഷം ഇന്ത്യയിൽ താമസിച്ചതിലൂടെ ജീവിതത്തെക്കുറിച്ചുള്ള തന്‍റെ കാഴ്ചപ്പാട് തന്നെ മാറിയെന്ന് വെളിപ്പെടുത്തി വിദേശ സഞ്ചാരിയായ ലൂക്കാസ്. ഇന്ത്യയിൽനിന്ന് മടങ്ങുന്നതിന് മുന്നോടിയായി ദില്ലി വിമാനത്താവളത്തിൽവെച്ച് ചിത്രീകരിച്ച വിഡിയോയിലാണ് ഇന്ത്യയിലെ അനുഭവങ്ങളും താൻ പഠിച്ച പാഠങ്ങളും അദ്ദേഹം പങ്കുവെച്ചത്. 'ഒരു സ്ഥലത്തിന്‍റെ ഏറ്റവും വലിയ പ്രത്യേകത അവിടുത്തെ മനുഷ്യരാണ്' എന്ന ലൂക്കാസിന്‍റെ വാക്കുകൾ സമൂഹ മാധ്യമങ്ങളിൽ വലിയ ശ്രദ്ധ നേടി.

ആദ്യകാല അസ്വസ്ഥതകൾ

ഇന്ത്യയിലെത്തിയ ആദ്യദിവസങ്ങളിൽ ഗതാഗതക്കുരുക്കും കടുത്ത ചൂടും തന്നെ ഏറെ അസ്വസ്ഥനാക്കിയിരുന്നുവെന്ന് ലൂക്കാസ് ഓർത്തെടുക്കുന്നു. എന്നാൽ സാഹചര്യങ്ങളുമായി പൊരുത്തപ്പെടാൻ അധികസമയം വേണ്ടിവന്നില്ല. ക്രമേണ ഇന്ത്യയുടെ ജീവിതരീതിയും വൈവിധ്യങ്ങളും മനസ്സിലാക്കാൻ കഴിഞ്ഞെന്നും അദ്ദേഹം കൂട്ടിച്ചേർത്തു.

View this post on Instagram

A post shared by Lukas (@viewfromlukas)

സന്തോഷവും ദേഷ്യവും സങ്കടവും ഒരേസമയം അനുഭവിക്കാവുന്ന രാജ്യമാണ് ഇന്ത്യയെന്നാണ് അദ്ദേഹത്തിന്‍റെ നിരീക്ഷണം. ചിലപ്പോൾ ഒരേ തെരുവിൽ, ഒരേ മിനിറ്റിൽ പോലും വ്യത്യസ്ത വികാരങ്ങൾ അനുഭവിക്കാനാകും. ഇന്ത്യയിലെ ജനങ്ങൾ തങ്ങളുടെ ഭക്ഷണവും വീടുകളും സംസ്കാരവും ജീവിതരീതിയും അദ്ദേഹത്തിന് പരിചയപ്പെടുത്തി. ഈ അനുഭവങ്ങളാണ് തനിക്ക് ഇന്ത്യയിലെ താമസത്തെ അവിസ്മരണീയമാക്കിയതെന്നും ലൂക്കാസ് കൂട്ടിച്ചേർക്കുന്നു.

സ്വന്തം താത്പര്യങ്ങൾ തന്നെ മാറി

തുടക്കത്തിൽ ഓരോ കാര്യവും കാണാൻ മനോഹരമാണോ എന്നായിരുന്നു അദ്ദേഹം ചിന്തിച്ചിരുന്നത്. എന്നാൽ, പിന്നീട് അത് മനസ്സിന് സന്തോഷം നൽകുന്നുണ്ടോ എന്നതിലേക്ക് ചിന്ത മാറി. ഇന്ത്യയിൽനിന്ന് ലഭിച്ച ഏറ്റവും വലിയ പാഠങ്ങളിലൊന്നായി ലൂക്കാസ് ഇതിനെ വിശേഷിപ്പിക്കുന്നു. ഒരു രാജ്യത്തെ ഓർത്തുവെക്കുന്നത് അവിടുത്തെ സ്ഥലങ്ങളുടെ പേരിലല്ല, പരിചയപ്പെട്ട മനുഷ്യരുടെയും അവരോടൊപ്പമുള്ള നിമിഷങ്ങളുടെയും പേരിലാണെന്ന് അദ്ദേഹം പറഞ്ഞു. ഇന്ത്യയ്ക്ക് നന്ദി അറിയിച്ച ലൂക്കാസ് വൈകാതെ വീണ്ടും സന്ദർശിക്കാനാകുമെന്ന പ്രതീക്ഷയും പങ്കുവെച്ചു.

മഴ കുറഞ്ഞു, എഥനോൾ ഉത്പാദനം കൂടി,ഈ സാമ്പത്തിക വർഷം അരി ഉത്പാദനം കുറയുമെന്ന് കേന്ദ്ര കൃഷി മന്ത്രാലയം

Elsa TJ — Tue, 10 Nov 2026 12:45:33 +0530

ഡൽഹി: രാജ്യത്ത് ഈ സാമ്പത്തിക വർഷം അരി ഉത്പാദനം കുറയുമെന്ന് കേന്ദ്ര കൃഷി മന്ത്രാലയം. പതിറ്റാണ്ടിന് ശേഷമാണ് രാജ്യത്ത് അരി ഉത്പാദനം കുറയുന്നത്.2025-26 ൽ 15.4 കോടി ടൺ അരി നമ്മൾ ഉൽപ്പാദിപ്പിച്ചു. ഈ വർഷം ഇത് 14.7 കോടി ടണ്ണായി കുറയുമെന്നാണു നിഗമനം. മഴ കുറഞ്ഞതും ഇ-20 പെട്രോളിനു വേണ്ടിയുള്ള എഥനോൾ ഉൽപാദനവും അരി ഉത്പാദനത്തെ ബാധിച്ചു. എഥനോൾ ഉൽപാദിപ്പിക്കാൻ കരിമ്പും ചോളവും കൂടാതെ ഫുഡ് കോർപറേഷന്റെ സ്റ്റോക്കിലുള്ള അരിയും ഉപയോഗിക്കുന്നുണ്ട്. രാജ്യത്ത് അരിവില കൂടാനുള്ള ഒരു കാരണവും ഇതാണ്. പത്തു വർഷം മുൻപ് അരിയുടെ ശരാശരി വില 27 രൂപ മാത്രമായിരുന്നു. ഇന്നത്തെ ഓൺലൈൻ മാർക്കറ്റ് വില നോക്കിയാൽ ബ്രാൻഡഡ് മട്ട വടി അരിയുടെ വില കിലോയ്ക്ക് 56 രൂപ മുതൽ 85 രൂപവരെ ആണ്. പൊന്നി ബ്രാൻഡഡ് അരിയുടെ വില 65 രൂപ മുതൽ 101 രൂപവരെയാണ്.

ഏഷ്യാനെറ്റ് ന്യൂസ് ലൈവ് കാണാം

ഇരുസ്ഥാനാർത്ഥികൾക്കും 671 വോട്ട് വീതം! ഒടുവിൽ പെറുവിൽ മേയറിനെ തീരുമാനിച്ചത് ടോസിട്ട്!

Web Desk — Sun, 08 Nov 2026 18:29:31 +0530

തെരഞ്ഞെടുപ്പിൽ രണ്ട് സ്ഥാനാർഥികൾക്കും ഒരേ വോട്ട് ലഭിക്കുകയെന്നത് അത്യപൂർവ്വതയുള്ള ഒന്നാണ്. എന്നാൽ, ഏറ്റവും കുടുതൽ വോട്ട് രണ്ട് പേർക്ക് തുല്യമായി വന്നാൽ എന്താകും ചെയ്യുകയെന്ന് ആലോചിച്ചിട്ടുണ്ടോ? എന്നാൽ, അങ്ങനെയൊരു അവസ്ഥ തെക്കേ അമേരിക്കൻ രാജ്യമായ പെറുവിലെ ഒരു തെരഞ്ഞെടുപ്പിൽ സംഭവിച്ചു. വീണ്ടുമൊരു തെരഞ്ഞെടുപ്പ് എന്നായിരിക്കും പലരും പ്രതീക്ഷിച്ചത്. എന്നാൽ വ്യത്യസ്തമായൊരു തീരുമാനമായിരുന്നു അവിടെ നടന്നത്. 671 വോട്ടുകൾ വീതം നേടി രണ്ട് സ്ഥാനാർഥികളും സമനില പാലിച്ചതോടെ ഒടുവിൽ ടോസിട്ട് വിജയിയെ തീരുമാനിച്ചു.

രണ്ട് സ്ഥാനാർത്ഥികൾക്ക് 671 വോട്ടുകൾ വീതം!

പെറുവിലെ പുനോ മേഖലയിലുള്ള കോനിമ ജില്ലയിലാണ് സംഭവം. ഒക്ടോബർ നാലിന് നടന്ന തദ്ദേശ തെരഞ്ഞെടുപ്പിൽ സോമോസ് പെറു (Somos Perú) പാർട്ടിയുടെ റൂബൻ ക്വിസ്പെ കപഹാനയും (Rubén Quispe Capajaña), പായിസ് പരാ ടോഡോസ് (País Para Todos) പാർട്ടിയുടെ സലോമിനോ മമാനി ക്വിസ്പെയും (Salomino Mamani Quispe) 671 വോട്ടുകൾ വീതമാണ് നേടിയത്. ആകെ സാധുവായ വോട്ടുകളുടെ 27.739 ശതമാനവും ഇരുവർക്കും ലഭിച്ചെന്ന് റിപ്പോർട്ടുകൾ. വോട്ടർമാർക്ക് രണ്ട് പേരെയും അത്രയ്ക്ക് കാര്യമായിരുന്നെന്ന് പിന്നീട് സമൂഹ മാധ്യമ ഉപയോക്താക്കൾ കുറിച്ചു.

Uma moeda decidiu quem será o próximo prefeito de Conima, distrito da região de Puno, no Peru. A disputa terminou empatada e precisou ser resolvida no cara ou coroa, conforme prevê a legislação eleitoral do país.

️ Os candidatos Rubén Quispe, do partido Somos Perú, e Salomino Mamani, do País para Todos, receberam exatamente 671 votos cada na eleição municipal de 4 de outubro. Após a apuração de 100% das atas, as autoridades realizaram o sorteio nesta quarta-feira (4).

Quispe escolheu o verso da moeda de um sol e saiu vencedor. Após o resultado, afirmou que agora pretende trabalhar pela população local.

No Peru, a legislação determina que empates eleitorais sejam resolvidos por sorteio, que pode ser feito com o lançamento de uma moeda ou com o sorteio de bolinhas.

Reprodução /

— O Bairrista (@O_Bairrista) November 5, 2026

വിജയിയെ തീരുമാനിച്ചത് ടോസിട്ട്

സമനില പരിഹരിക്കാൻ നവംബർ നാലിന് ഹുവാൻകാനെയിലെ പ്രത്യേക തെരഞ്ഞെടുപ്പ് ജൂറിക്ക് (JEE) കീഴിൽ പൊതുജനങ്ങളുടെ സാന്നിധ്യത്തിൽ നറുക്കെടുപ്പ് നടത്തി. ഒരു സോൾ മൂല്യമുള്ള പെറുവിയൻ നാണയമാണ് ഇതിനായി ഉപയോഗിച്ചത്. നാണയത്തിന്‍റെ മറുവശം (സീൽ) തെരഞ്ഞെടുത്തിരുന്ന ക്വിസ്പെയ്ക്ക് അനുകൂലമായാണ് ഫലം വന്നത്. ഇതോടെ അദ്ദേഹം കോനിമയുടെ അടുത്ത മേയറായി തെരഞ്ഞെടുക്കപ്പെട്ടു. വിജയത്തിന് പിന്നാലെ, ജയിക്കണമെന്നത് തന്‍റെ ആഗ്രഹമായിരുന്നെന്നും ദൈവമാണ് തീരുമാനിച്ചതെന്നുമായിരുന്നു ക്വിസ്പെ മാധ്യമങ്ങളോട് പ്രതികരിച്ചത്.

മൂട്ടയുള്ള ഹോട്ടലുകളേതെല്ലാം, അറിയാനായി ആപ്പ് നിർമ്മിച്ച് ചൈനീസ് യുവാവ്, പരാതിയും വ്യാപകം

Web Desk — Tue, 10 Nov 2026 10:41:50 +0530

ചൈനയിലെ ഹോട്ടലുകളിൽ മൂട്ടകളെ കണ്ടെത്താനും അവയെക്കുറിച്ച് വിവരങ്ങൾ പങ്കുവെക്കാനുമായി ഒരുക്കിയ ഡിജിറ്റൽ മാപ്പ് ആപ്പ് ജനശ്രദ്ധ നേടുന്നു. എന്നാൽ, ആപ്പിൽ തെറ്റായ വിവരങ്ങൾ പ്രത്യക്ഷപ്പെടുന്നത് തങ്ങളുടെ പ്രതിച്ഛായയെ ബാധിക്കുന്നുവെന്ന പരാതിയുമായി ഹോട്ടൽ ഉടമകളും രംഗത്തെത്തിയിട്ടുണ്ട്.

സെപ്റ്റംബർ 21-ന് പ്രവർത്തനം ആരംഭിച്ച ആപ്പിന് ഇതിനകം രണ്ടു ലക്ഷത്തിലധികം ഉപയോക്താക്കളുണ്ട്. ചൈനയിലെമ്പാടുമുള്ള അറുന്നൂറിലധികം ഹോട്ടലുകളിലാണ് ആപ്പിലൂടെ ഉപയോക്താക്കൾ മൂട്ട ശല്യം റിപ്പോർട്ട് ചെയ്തിരിക്കുന്നത്.

ആദ്യഘട്ടത്തിൽ ഫോട്ടോയോ മറ്റ് തെളിവുകളോ ഇല്ലാതെ തന്നെ ഉപയോക്താക്കൾക്ക് മൂട്ടയുള്ള ഹോട്ടലുകൾ മാപ്പിൽ അടയാളപ്പെടുത്താമായിരുന്നു. എന്നാൽ, ഇത് വ്യാജ പരാതികൾക്ക് വഴിവെക്കുന്നുവെന്ന ഹോട്ടൽ ഉടമകളുടെ പ്രതിഷേധത്തെ തുടർന്ന് ഒക്ടോബറിൽ ആപ്പിന്റെ പ്രവർത്തനം രണ്ടുതവണ താൽക്കാലികമായി നിർത്തിവെക്കേണ്ടി വന്നു.

ഇതേതുടർന്ന്, പരാതികൾ നൽകാൻ കൃത്യമായ തെളിവുകൾ നിർബന്ധമാക്കിക്കൊണ്ട് ആപ്പിന്റെ ഫൗണ്ടറായ വാങ് പുതിയ മാറ്റങ്ങൾ വരുത്തി. ഫോട്ടോകളിലെ ചെറുജീവികൾ മൂട്ടകൾ തന്നെയാണോ എന്ന് രണ്ടുപേരുടെ സഹായത്തോടെ സ്വയം പരിശോധിച്ച് ഉറപ്പുവരുത്തിയ ശേഷമാണ് ഇപ്പോൾ വിവരങ്ങൾ മാപ്പിൽ ഉൾപ്പെടുത്തുന്നത്. ‌

എഐ സാങ്കേതികവിദ്യയിൽ നിർമ്മിച്ച ആപ്പ്

ഒരു മാനുഫാക്ചറിംഗ് കമ്പനിയിലെ എഞ്ചിനീയറായ വാങ് ആണ് ഈ ആപ്പ് വികസിപ്പിച്ചത്. മുൻപ് പ്രോഗ്രാമിംഗ് പരിചയമില്ലാതിരുന്ന അദ്ദേഹം കോഡിംഗിനായി ആർട്ടിഫിഷ്യൽ ഇന്റലിജൻസ് (AI) ഉപയോഗിച്ചാണ് ജൂലൈ മാസത്തിൽ ആപ്പ് നിർമ്മിച്ചുതുടങ്ങിയത്. വേനൽക്കാലത്ത് വീട് മാറുന്നതിനിടെ പ്രാണിയുടെ കടിയേറ്റതാണ് ഇത്തരമൊരു ആശയത്തിലേക്ക് അദ്ദേഹത്തെ നയിച്ചത്.

ഹോട്ടലുകളിലെ മൂട്ടകളെക്കുറിച്ചുള്ള വിവരങ്ങൾ പലയിടങ്ങളിലായി ചിതറിക്കിടക്കുന്നതിനാൽ യാത്രക്കാർക്ക് അവ കണ്ടെത്താൻ ബുദ്ധിമുട്ടായിരുന്നു. വിവരങ്ങൾ എളുപ്പത്തിൽ പങ്കുവെക്കാനുള്ള ഒരു പ്ലാറ്റ്‌ഫോം നൽകുകയാണ് താൻ ചെയ്തതെന്ന് വാങ് പറഞ്ഞു. ഒറ്റയ്ക്ക് നിർമ്മിച്ചതായതിനാൽ ആപ്പ് പൂർണ്ണമല്ലെന്നും, വിവരങ്ങൾ ശേഖരിക്കാനും പരിശോധിക്കാനും പൊതുജനങ്ങൾ സഹായിക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു.

വ്യാജ പരാതികളും അപ്പീലുകളും

തങ്ങൾക്കെതിരെ നൽകിയ തെറ്റായ റിപ്പോർട്ടുകൾക്കെതിരെ ഇതുവരെ നാല് ഹോട്ടലുകൾ ആപ്പിലൂടെ അപ്പീൽ നൽകിയിട്ടുണ്ട്. ഒരു ഹോട്ടലിൽ തങ്ങിയപ്പോൾ മൂട്ടയുടെ കടിയേറ്റെന്ന് ആരോപിച്ച് ഒരു അതിഥി 3,000 യുവാൻ (ഏകദേശം 42,210 രൂപ) റീഫണ്ട് ആവശ്യപ്പെട്ട സംഭവം ഹോട്ടൽ മാനേജർ വ്യക്തമാക്കി. തുടർന്ന് മുറിയും മറ്റ് 23 മുറികളും പരിശോധിച്ചെങ്കിലും മൂട്ടകളെയോ അവയുടെ മുട്ടകളെയോ കണ്ടെത്താനായില്ല. തുടർന്ന് ഈ പരിശോധനാ റിപ്പോർട്ട് സമർപ്പിച്ചതോടെ ആപ്പിൽ നിന്ന് ഹോട്ടലിനെതിരെയുള്ള പരാതി നീക്കം ചെയ്തു.

തന്നെ വിഷം തന്ന് കൊല്ലാനുള്ള പദ്ധതിക്ക് ഭാര്യയെ സഹായിച്ചത് ചാറ്റ്ജിപിടി; ഓപ്പൺഎഐക്കെതിരെ കേസുമായി യുവാവ്

Web Desk — Tue, 10 Nov 2026 08:26:59 +0530

തന്നെക്കൊല്ലാൻ ഭാര്യ നടത്തിയ ഗൂഢാലോചനയിൽ ചാറ്റ്ജിപിടിക്കും പങ്കുണ്ടെന്ന് കാണിച്ച് ഓപ്പൺഎഐക്കെതിരെ കേസ് കൊടുത്ത് യുവാവ്. കൊല്ലാനുള്ള ഗൂഢാലോചനയ്ക്ക് സാങ്കേതിക സഹായം നൽകിയത് ഓപ്പൺഎഐയുടെ ചാറ്റ്ബോട്ടായ ചാറ്റ്ജിപിടി ആണെന്ന് ആരോപിച്ചാണ് വടക്കൻ കരോലിന സ്വദേശിയായ ജെയിംസ് ഗേറ്റ്സ് കോടതിയെ സമീപിച്ചിരിക്കുന്നത്. ഓപ്പൺഎഐക്കും കമ്പനി സി.ഇ.ഒ സാം ആൾട്ട്മാനുമെതിരെ സാൻ ഫ്രാൻസിസ്കോ കൗണ്ടി സുപ്പീരിയർ കോടതിയിലാണ് കേസ് ഫയൽ ചെയ്തത്.

കഴിഞ്ഞ വർഷം ഭാര്യ വിഷം നൽകി കൊല്ലാൻ ശ്രമിച്ചെങ്കിലും ജെയിംസ് അത്ഭുതകരമായി രക്ഷപ്പെടുകയായിരുന്നു. സംഭവത്തിൽ ജെയിംസിന്റെ ഭാര്യ ഷെറിൽ ഗേറ്റ്സിനെതിരെ വധശ്രമത്തിന് കേസെടുത്തിട്ടുണ്ട്.

'പെട്ടെന്ന് അവൾ എനിക്ക് തീർത്തും അപരിചിതയായ ഒരാളായി മാറി. ഒടുവിൽ ഞാൻ അവൾക്ക് കൊല്ലേണ്ട ഒരാളായും മാറി. ഏകദേശം ഒരു വർഷത്തോളം അവൾ എന്തിനാണ് ഇങ്ങനെ ചെയ്തതെന്ന് എനിക്ക് മനസ്സിലായിരുന്നില്ല. എന്നാൽ, അവളുടെ ചാറ്റ് ഹിസ്റ്ററി വായിച്ചു നോക്കിയപ്പോഴാണ് കാര്യങ്ങൾ വ്യക്തമായത്. അവൾ ഒറ്റയ്ക്കായിരുന്നില്ല ഇതൊക്കെ ചെയ്തത്' എന്നാണ് ജെയിംസ് തന്റെ അഭിഭാഷകർ വഴി പുറത്തുവിട്ട പ്രസ്താവനയിൽ പറയുന്നത്.

കേസ് വിവരങ്ങൾ അനുസരിച്ച്, 2025 -ൽ ഷെറിൽ ചാറ്റ്ജിപിടിയുമായി നൂറുകണക്കിന് സംഭാഷണങ്ങൾ നടത്തിയിരുന്നു. ജോലി, കുട്ടികളുടെ കാര്യങ്ങൾ, മരുന്നുകളുടെ അളവ്, ദാമ്പത്യ പ്രശ്നങ്ങൾ എന്നിവയിലെല്ലാം ചാറ്റ്ജിപിടിയുടെ ഉപദേശം തേടിയ ഷെറിൽ, ക്രമേണ ഇതിനെ തന്റെ ഏറ്റവും അടുത്ത സുഹൃത്തായി കാണാൻ തുടങ്ങി. ദാമ്പത്യ ജീവിതത്തെക്കുറിച്ചുള്ള ചർച്ചകൾ പിന്നീട് ഭർത്താവിനെ വിഷം കൊടുത്ത് കൊല്ലുന്നതിനുള്ള കൃത്യമായ പദ്ധതികളിലേക്ക് വഴിമാറുകയായിരുന്നു. ചാറ്റ്ജിപിടി ഷെറിലിന്റെ ഭയങ്ങളെ ന്യായീകരിക്കുകയും തെറ്റിദ്ധാരണകൾ വർദ്ധിപ്പിക്കുകയും ചെയ്ത് കൊലപാതകത്തിനുള്ള പദ്ധതിക്ക് രൂപം നൽകാൻ സഹായിച്ചതായി അഭിഭാഷകർ ആരോപിക്കുന്നു.

ഭർത്താവിന്റെ ശരീരഭാരത്തിന് അനുയോജ്യമായ വിഷത്തിന്റെ അളവ്, അത് നൽകേണ്ട രീതികൾ, തെളിവ് നശിപ്പിക്കൽ തുടങ്ങിയ വിവരങ്ങൾ ചാറ്റ്ജിപിടി നൽകിയെന്നാണ് ഹർജിയിൽ പറയുന്നത്. 2025 ജൂലൈയിൽ ജെയിംസിന് കടുത്ത ഹൃദയസംബന്ധമായ ബുദ്ധിമുട്ടുകളും വയറുവേദനയും തളർച്ചയും അനുഭവപ്പെട്ടിരുന്നു. പിന്നീട് ഭാര്യ എഴുതിയ ഒരു കുറിപ്പ് കണ്ടെത്തിയതോടെയാണ് തനിക്ക് വിഷം തന്നിരിക്കുന്നതായി ജെയിംസ് തിരിച്ചറിയുന്നത്. അരളി, വിവിധ മരുന്നുകൾ, ചാറ്റ്ജിപിടി ലോഗ് ഔട്ട് ചെയ്യാനും സംഭാഷണങ്ങൾ മായ്ക്കാനുമുള്ള നിർദ്ദേശങ്ങൾ എന്നിവയെല്ലാം ഈ കുറിപ്പിൽ ഉണ്ടായിരുന്നു.

നെഗ്ലിജെന്റ് ഡിസൈൻ, മുന്നറിയിപ്പ് നൽകുന്നതിൽ വന്ന പരാജയം, മാനസിക പീഡനം എന്നിവയടക്കം ഒമ്പത് പ്രധാന ആരോപണങ്ങളാണ് കേസിൽ ഓപ്പൺഎഐയ്ക്കെതിരെ ഉന്നയിച്ചിരിക്കുന്നത്. എന്നാൽ, സുരക്ഷയ്ക്കാണ് തങ്ങൾ മുൻഗണന നൽകുന്നതെന്നും ആരോപണവിധേയയായ ഉപയോക്താവിനെ പ്ലാറ്റ്‌ഫോമിൽ നിന്ന് വിലക്കിയിട്ടുണ്ടെന്നും അന്വേഷണ ഏജൻസികൾക്ക് ആവശ്യമായ വിവരങ്ങൾ നൽകിയിട്ടുണ്ടെന്നും ഓപ്പൺഎഐ വക്താവ് അറിയിച്ചു.

തെറ്റായ മറുപടികളും ഉപദേശങ്ങളും മൂലം മുൻപും ഓപ്പൺഎഐ സമാനമായ നിയമനടപടികൾ നേരിട്ടിട്ടുണ്ട്.

ദീപാവലി രംഗോലി അബദ്ധത്തിൽ ചവിട്ടി, അല്പം മാഞ്ഞുപോയി, പിന്നാലെ ഡെലിവറി ബോയ് ചെയ്തത്; മനം കവർന്ന് വീഡിയോ

Web Desk — Sun, 08 Nov 2026 13:23:29 +0530

ദീപാവലി ആഘോഷങ്ങളുടെ ഭാഗമായി വീടുകളുടെ മുന്നിൽ മനോഹരമായ രംഗോലികൾ വരയ്ക്കുന്നത് പതിവാണ്. എന്നാൽ, താൻ ഏറെ കഷ്ടപ്പെട്ട് വരച്ച രംഗോലി അല്പം മാഞ്ഞുപോയത് കണ്ടാണ് ദൃഷ്ടി എന്ന യുവതി അത്ഭുതപ്പെട്ടത്. ഇതെങ്ങനെ സംഭവിച്ചു എന്ന് അവർക്ക് മനസിലായില്ല. ഒടുവിൽ അതറിയാനായി വീടിന് മുന്നിലെ സിസിടിവി ദൃശ്യങ്ങൾ പരിശോധിച്ചപ്പോഴാണ് ആ കൗതുകകരമായ കാഴ്ച അവരുടെ കണ്ണിൽ പെട്ടത്.

ഫ്ലിപ്കാർട്ടിന്റെ ഡെലിവറി ഏജന്റ് ഓർഡർ നൽകി മടങ്ങുന്നതിനിടെ അബദ്ധത്തിൽ രംഗോലിയുടെ അരികിൽ ചവിട്ടുകയായിരുന്നു. കോലം അല്പം മാഞ്ഞു എന്ന് മനസ്സിലായതോടെ അയാൾ അവിടെനിന്ന് മടങ്ങിപ്പോകാൻ തയ്യാറായില്ല. താഴെയിരുന്ന് തന്റെ കൈകൾ കൊണ്ട് ആ രംഗോലി പരമാവധി ഭംഗിയായി വീണ്ടും വൃത്തിയാക്കിയ ശേഷമാണ് അയാൾ മടങ്ങിയത്.

'അബദ്ധത്തിൽ സംഭവിച്ചതാണെങ്കിലും, അത് നന്നാക്കാൻ അയാൾ കാണിച്ച ആ മനസ്സ് എന്നെ ഏറെ സ്പർശിച്ചു. ആരും പറയാതെ തന്നെ ഓരോ ചെറിയ വിശദാംശങ്ങളും ശ്രദ്ധിച്ച് അയാൾ അത് ശരിയാക്കാൻ ശ്രമിച്ചു. ആരാണെങ്കിലും അദ്ദേഹത്തിന് എന്റെ നന്ദി' എന്ന് ദൃഷ്ടി കുറിച്ചു.

View this post on Instagram

A post shared by Drashtiiiiii (@drashtiisthisyouu)

ഡെലിവറി ബോയിയുടെ പ്രവൃത്തിയെ പ്രശംസിച്ച് നിരവധിയാളുകളാണ് പോസ്റ്റിന് കമന്റുകളിടുന്നത്. ഉപഭോക്താവ് പരാതിപ്പെടുമോ എന്ന ഭയം കൊണ്ടാകാം അവൻ അത് ചെയ്തതെന്നും, അടുത്ത സ്ഥലത്ത് എത്തുമ്പോൾ വൈകിയതിന് വഴക്ക് കേൾക്കാൻ സാധ്യതയുണ്ടായിട്ടും അതിന് സമയം കണ്ടെത്തിയത് അഭിനന്ദനാർഹമാണെന്നും ആളുകൾ കുറിച്ചു. അബദ്ധം പറ്റിയിട്ടും അത് തിരുത്താൻ കാണിച്ച യുവാവിന്റെ പ്രൊഫഷണലിസവും ആത്മാർത്ഥതയും ആളുകളെ എന്തായാലും ആകർഷിച്ചിട്ടുണ്ട്.