Asianet News Malayalam

ജോലി പോയാലും ജീവിക്കണം; സാമ്പത്തിക സ്വാതന്ത്ര്യം നേടാന്‍ ശ്രദ്ധിക്കേണ്ട 5 കാര്യങ്ങള്‍

Sangeetha KS — Tue, 06 Oct 2026 16:49:42 +0530

മാസാദ്യം ശമ്പളം വരുന്നു, ബില്ലുകള്‍ അടയ്ക്കുന്നു, ചെറിയൊരു തുക നിക്ഷേപിക്കുന്നു... അടുത്ത മാസവും ഇതേ രീതി തുടരുന്നു. എന്നാല്‍ 'സാമ്പത്തിക സ്വാതന്ത്ര്യം'കൈവരിക്കുന്നതോടെ ഈ സമവാക്യത്തിന് മാറ്റം വരുന്നു. ജോലി നഷ്ടപ്പെടുകയോ അല്ലെങ്കില്‍ ജോലി ഉപേക്ഷിക്കുകയോ ചെയ്താലും നിങ്ങളുടെ ജീവിത രീതിയെയോ ദീര്‍ഘകാല ലക്ഷ്യങ്ങളെയോ അത് പെട്ടെന്ന് ബാധിക്കാത്ത അവസ്ഥയാണിത്. തുടര്‍ന്നും ജോലി ചെയ്യണോ വേണ്ടയോ എന്നത് നിങ്ങളുടെ മാത്രം തീരുമാനമായിരിക്കും. അടുത്ത മാസത്തെ ചെലവുകളെക്കുറിച്ച് ആശങ്കപ്പെടാതെ ഒരു കരിയര്‍ ബ്രേക്ക് എടുക്കാനോ, ജോലി മാറാനോ, അല്ലെങ്കില്‍ ജോലി പൂര്‍ണമായി നിര്‍ത്താനോ ഈ സാമ്പത്തിക സുരക്ഷിതത്വം നിങ്ങളെ സഹായിക്കും.

എന്നാല്‍, വന്‍തുക നിക്ഷേപമായി മാറ്റിവെക്കുന്നത് കൊണ്ട് മാത്രം ഈ ഘട്ടത്തിലേക്ക് എത്തുവാന്‍ സാധിക്കില്ല. അതിനായി ശ്രദ്ധിക്കേണ്ട 5 പ്രധാന കാര്യങ്ങള്‍ ഇതാ

യഥാര്‍ത്ഥ ജീവിതച്ചെലവ് മനസിലാക്കുക

ഒരു കോടിയോ അഞ്ച് കോടിയോ സമ്പാദിക്കണം എന്ന തരത്തിലുള്ള കൃത്യമല്ലാത്ത ലക്ഷ്യങ്ങള്‍ക്ക് പകരം, നിങ്ങളുടെ നിലവിലെ ചെലവുകളെ അടിസ്ഥാനമാക്കി പ്ലാനിംഗ് തുടങ്ങുക. വീട്ടുചെലവ്, പലവ്യഞ്ജനം, കറന്റ്/വാട്ടര്‍ ബില്ലുകള്‍, ഇന്‍ഷുറന്‍സ്, കുട്ടികളുടെ പഠനച്ചെലവ്, യാത്രകള്‍, മറ്റ് സ്ഥിരച്ചെലവുകള്‍ എന്നിവ കൃത്യമായി കണക്കാക്കുക. ഇതില്‍ ഒഴിവാക്കാന്‍ പറ്റാത്ത ചെലവുകളും ആവശ്യമെങ്കില്‍ വെട്ടിച്ചുരുക്കാവുന്ന ചെലവുകളും തരംതിരിക്കാം. നിക്ഷേപങ്ങളിലൂടെ ഭാവിയില്‍ എത്ര വരുമാനം കണ്ടെത്തണം എന്നതിനെക്കുറിച്ച് ഇത് വ്യക്തമായ ധാരണ നല്‍കും.

എമര്‍ജന്‍സി ഫണ്ട്

ജോലി നഷ്ടപ്പെടല്‍, ചികിത്സാ ചെലവുകള്‍ അല്ലെങ്കില്‍ മറ്റ് അപ്രതീക്ഷിത ആവശ്യങ്ങള്‍ എന്നിവയ്ക്കായി ഒരു എമര്‍ജന്‍സി ഫണ്ട് കരുതിവെക്കണം. കുറഞ്ഞത് 3 മാസത്തെ ജീവിതച്ചെലവിന് ആവശ്യമായ തുക കരുതിവെക്കാനാണ് വിദഗ്ധര്‍ നിര്‍ദ്ദേശിക്കുന്നത്.

ഉയര്‍ന്ന പലിശയുള്ള കടങ്ങള്‍ കുറയ്ക്കുക

പ്രതിമാസ വരുമാനത്തിന്റെ വലിയൊരു പങ്ക് വായ്പാ തിരിച്ചടവുകള്‍ക്കായി മാറ്റിവെക്കേണ്ടി വന്നാല്‍ സാമ്പത്തിക സ്വാതന്ത്ര്യം നേടുക പ്രയാസമാണ്. ക്രെഡിറ്റ് കാര്‍ഡ് കുടിശിക, ഉയര്‍ന്ന പലിശയുള്ള വ്യക്തിഗത വായ്പകള്‍ എന്നിവ ആദ്യം തീര്‍ക്കാന്‍ ശ്രദ്ധിക്കുക. സമ്പാദ്യം ഉണ്ടാക്കിയെടുക്കാന്‍ ഹോം ലോണുകള്‍ പൂര്‍ണ്ണമായി അടച്ചുതീര്‍ക്കണമെന്ന് നിര്‍ബന്ധമില്ല, എന്നാല്‍ നിങ്ങളുടെ മൊത്തത്തിലുള്ള കടബാധ്യതകള്‍ നിയന്ത്രണവിധേയമായിരിക്കണം. മാസം തോറുമുള്ള വായ്പാ ബാധ്യതകള്‍ കുറയുന്തോറും, ശമ്പളത്തിന് പകരം കണ്ടെത്തേണ്ടി വരുന്ന വരുമാനത്തിന്റെ അളവും കുറയും.

സേവിംഗ്‌സ് മാത്രമല്ല, നിക്ഷേപങ്ങളും വളര്‍ത്തുക

ബാങ്കില്‍ പണം സൂക്ഷിക്കുന്നത് സുരക്ഷിതത്വം നല്‍കുമെങ്കിലും, സാമ്പത്തിക സ്വാതന്ത്ര്യം കൈവരിക്കാന്‍ പണം കാലക്രമേണ വളരേണ്ടതുണ്ട്. പണം എന്ന് ആവശ്യമുണ്ട്, എത്രത്തോളം റിസ്‌ക് എടുക്കാന്‍ സാധിക്കും എന്നതിനെ അടിസ്ഥാനമാക്കിയായിരിക്കണം നിക്ഷേപങ്ങള്‍ തിരഞ്ഞെടുക്കേണ്ടത്. ദീര്‍ഘകാല ആവശ്യങ്ങള്‍ക്കുള്ള പണം കൂടുതല്‍ വളര്‍ച്ച നല്‍കുന്ന അസറ്റുകളിലും, ഉടന്‍ ആവശ്യമുള്ള പണം വിപണിയിലെ മാറ്റങ്ങള്‍ ബാധിക്കാത്ത സുരക്ഷിതമായ മാര്‍ഗ്ഗങ്ങളിലും നിക്ഷേപിക്കാം.

വരുമാനത്തിന് ഒന്നിലധികം മാര്‍ഗങ്ങള്‍ കണ്ടെത്തുക

എല്ലാ കാര്യങ്ങള്‍ക്കുമായി ഒരൊറ്റ ശമ്പളത്തെ മാത്രം ആശ്രയിക്കാതിരിക്കുന്നത് സാമ്പത്തിക സ്വാതന്ത്ര്യം എളുപ്പമാക്കും. പലിശ, ഡിവിഡന്റുകള്‍, വാടക വരുമാനം, റിട്ടയര്‍മെന്റ് ആനുകൂല്യങ്ങള്‍ എന്നിവയിലൂടെ വരുമാനം കണ്ടെത്താം. സ്ഥിരം ജോലി ഉപേക്ഷിച്ച ശേഷവും കണ്‍സള്‍ട്ടിംഗ്, ഫ്രീലാന്‍സിംഗ് അല്ലെങ്കില്‍ ചെറിയ ബിസിനസുകള്‍ എന്നിവയിലൂടെ വരുമാനം കണ്ടെത്തുന്നവരുമുണ്ട്. ചുരുക്കത്തില്‍, സാമ്പത്തിക സ്വാതന്ത്ര്യം എന്നത് സമയത്തിന് മുന്‍പേയുള്ള വിരമിക്കല്‍ എന്ന് മാത്രം അര്‍ത്ഥമാക്കുന്നില്ല, മറിച്ച് ആശങ്കകളില്ലാത്ത സാമ്പത്തിക ഭാവിയാണ് നല്‍കുന്നത്.

ക്രെഡിറ്റ് കാർഡിലെ '45 ദിവസത്തെ ഫ്രീ ടൈം' ശരിക്കും ഉപകാരമാണോ? ഉപയോഗിക്കുന്നവര്‍ അറിഞ്ഞിരിക്കേണ്ട കാര്യങ്ങള്‍

Sangeetha KS — Fri, 09 Oct 2026 12:57:51 +0530

ക്രെഡിറ്റ് കാര്‍ഡുകള്‍ ഉപയോഗിക്കുന്നവര്‍ എപ്പോഴും കേള്‍ക്കുന്ന ഒന്നാണ് '45 ദിവസത്തെ പലിശരഹിത കാലയളവ്' ലഭിക്കുമെന്ന്. എന്നാല്‍ ഏത് സാധനം വാങ്ങിയാലും കൃത്യം 45 ദിവസം പലിശയില്ലാതെ സമയം ലഭിക്കുമെന്നല്ല ഇതിനര്‍ഥം. പര്‍ച്ചേസ് നടത്തിയ തീയതി മുതല്‍ ബില്‍ അടയ്‌ക്കേണ്ട അവസാന തീയതിവരെയുള്ള സമയമാണിത്. ബില്ലിലെ മുഴുവന്‍ തുകയും അടച്ചുതീര്‍ക്കുകയാണെങ്കില്‍ മാത്രമേ ഈ ആനുകൂല്യം ലഭിക്കൂ.

എങ്ങനെയാണ് ഈ 45 ദിവസം കണക്കാക്കുന്നത്?

ഉദാഹരണത്തിന്, ക്രെഡിറ്റ് കാര്‍ഡിന്റെ ബില്ലിംഗ് സൈക്കിള്‍എല്ലാ മാസവും 10-ാം തീയതിയാണ് അവസാനിക്കുന്നതെന്നിരിക്കട്ടെ. ബില്‍ അടയ്ക്കാനുള്ള അവസാന തീയതി ഏകദേശം 15 ദിവസത്തിന് ശേഷവുമായിരിക്കും. 11-ാം തീയതിയാണ് ഒരു പര്‍ച്ചേസ് നടത്തുന്നതെങ്കില്‍, അത് അടുത്ത മാസത്തെ ബില്ലിലേ ഉള്‍പ്പെടുകയുള്ളൂ. അതിനാല്‍ പണമടയ്ക്കാന്‍ ഏകദേശം 45 ദിവസത്തോളം സമയം ലഭിക്കും. എന്നാല്‍ അതേ പര്‍ച്ചേസ് 9-ാം തീയതിയാണ് നടത്തുന്നതെങ്കിലോ? ബില്ലിംഗ് സൈക്കിള്‍ അവസാനിക്കാന്‍ പോകുന്ന സമയമായതിനാല്‍ നിങ്ങളുടെ പലിശരഹിതമായ സമയവും വളരെ കുറവായിരിക്കും.

അതുകൊണ്ടാണ് ഒരേ ക്രെഡിറ്റ് കാര്‍ഡില്‍ നടത്തുന്ന രണ്ട് പര്‍ച്ചേസുകള്‍ക്ക് പണമടയ്ക്കാന്‍ വ്യത്യസ്ത സമയം ലഭിക്കുന്നത്. പുതിയ ബില്ലിംഗ് സൈക്കിള്‍ തുടങ്ങുന്ന സമയത്താണ് നിങ്ങള്‍ പര്‍ച്ചേസ് നടത്തുന്നതെങ്കില്‍ കൂടുതല്‍ സമയം ലഭിക്കും. കൃത്യമായ തീയതികള്‍ അറിയാന്‍ കാര്‍ഡിന്റെ സ്റ്റേറ്റ്‌മെന്റ് പരിശോധിക്കുന്നതാണ് ഏറ്റവും നല്ലത്.

എന്താണ് ഇതിന്റെ ഗുണം?

ശരിയായ രീതിയില്‍ ഉപയോഗിച്ചാല്‍ ഇതൊരു മികച്ച സൗകര്യമാണ്. കയ്യില്‍ പണമില്ലാത്ത സമയത്ത് സാധനങ്ങള്‍ വാങ്ങാനും, അടുത്ത മാസം ശമ്പളം ലഭിക്കുമ്പോള്‍ പലിശയില്ലാതെ ആ തുക അടച്ചുതീര്‍ക്കാനും ഇത് സഹായിക്കുന്നു. വലിയ തുകയ്ക്ക് സാധനങ്ങള്‍ വാങ്ങുമ്പോള്‍ വ്യക്തിഗത വായ്പകളെയോ മറ്റ് പലിശയുള്ള കടങ്ങളെയോ ആശ്രയിക്കാതെ തന്നെ കാര്യം നടക്കും.

മുഴുവന്‍ തുകയും അടച്ചില്ലെങ്കില്‍ എന്ത് സംഭവിക്കും?

മുഴുവന്‍ തുകയും അടച്ചു തീര്‍ത്താല്‍ മാത്രമേ പലിശരഹിത ആനുകൂല്യം ലഭിക്കൂ എന്നതാണ് ഇതിലെ ഏറ്റവും പ്രധാനപ്പെട്ട നിബന്ധന. പണമടയ്ക്കാനുള്ള അവസാന തീയതിക്കുള്ളില്‍ മുഴുവന്‍ തുകയും അടച്ചില്ലെങ്കില്‍, പലിശരഹിത ആനുകൂല്യം നഷ്ടപ്പെടുമെന്ന് ആര്‍ബിഐ വ്യക്തമാക്കുന്നു. അങ്ങനെ വന്നാല്‍, അടച്ച തുകയോ റീഫണ്ടുകളോ ഉണ്ടെങ്കില്‍ അവ കുറച്ച ശേഷം, സാധനം വാങ്ങിയ തീയതി മുതല്‍ തന്നെ ബാക്കി നില്‍ക്കുന്ന തുകയ്ക്ക് പലിശ ഈടാക്കും.

ഇവിടെയാണ് 'മിനിമം ഡ്യൂ' എന്ന കെണിയില്‍ പലരും വീഴുന്നത്. ബില്ലിലെ മിനിമം തുക മാത്രം അടച്ചാല്‍ പിഴ ഒഴിവാക്കാം എന്ന് മാത്രമേയുള്ളൂ. അതുകൊണ്ട് പലിശയില്‍ നിന്ന് രക്ഷപ്പെടാനാകില്ല. മിനിമം തുക മാത്രം അടച്ച് മാസങ്ങളോളമോ വര്‍ഷങ്ങളോളമോ കടം നീട്ടിക്കൊണ്ടുപോകുന്നത് വലിയ പലിശ ബാധ്യതയുണ്ടാക്കുമെന്ന് ഉപഭോക്താക്കള്‍ക്ക് മുന്നറിയിപ്പ് നല്‍കാന്‍ കാര്‍ഡ് നല്‍കുന്ന സ്ഥാപനങ്ങള്‍ക്ക് ആര്‍ബിഐ നിര്‍ദ്ദേശം നല്‍കിയിട്ടുണ്ട്.

ജിഎസ്ടി യോഗത്തിൽ നിർണായക തീരുമാനങ്ങൾ, അറസ്റ്റ് ചെയ്യാനുള്ള അധികാരം ഒഴിവാക്കി

Web Desk — Thu, 08 Oct 2026 18:15:47 +0530

ദില്ലി: നിർണായക നിദേശങ്ങളുമായി ജിഎസ്ടി കൗൺസിൽ യോഗം. നിയമത്തിൻ്റെ പരിധിയിൽനിന്ന് അറസ്റ്റ് ചെയ്യാനുള്ള അധികാരം ഒഴിവാക്കി. വ്യാഴാഴ്ച ചേർന്ന കൗൺസിൽ യോഗത്തിലാണ് തീരുമാനം. നിയമത്തിലെ കുറഞ്ഞ ശിക്ഷയും ഒഴിവാക്കിയ യോഗം, പ്രോസിക്യൂഷൻ പരിധി ഒരു കോടി രൂപയിൽ നിന്ന് അഞ്ച് കോടി രൂപയായി ഉയർത്തി. ഇതോടൊപ്പം പിഴയും, തടവ് ശിക്ഷയും രണ്ടും അനുഭവിക്കേണ്ട കേസുകൾ കോടതി വിവേചനാധികാരത്തിന് വിട്ടു. പൊതുപിഴ 25,000 രൂപയിൽ നിന്ന് 10,000 രൂപയായി കുറച്ചു. ജിഎസ്ടി വൈകി ഫയൽ ചെയ്യുക, തെറ്റുകൾ വരുത്തുക, പണമടക്കാൻ വൈകുക എന്നിവക്ക് ഇനി പലിശയും ആനുപാതിക പിഴയും മാത്രം നൽകിയാൽ മതി. മറ്റ് നടപടികൾ കൗൺസിൽ യോഗം ഒഴിവാക്കി. കേന്ദ്ര ധനമന്ത്രി നിർമല സീതാരാമന്റെ അധ്യക്ഷതയിൽ ചേർന്ന യോഗത്തിൽ സംസ്ഥാങ്ങളിലെ ധനമന്ത്രിമാർ പങ്കെടുത്തു. മുഖ്യമന്ത്രി വി.ഡി. സതീശനും പങ്കെടുത്തു.

കേരളത്തിൽ സ്വർണവില കുറഞ്ഞു; ഇന്നത്തെ സ്വർണം, വെള്ളി വില അറിയാം

Web Desk — Wed, 07 Oct 2026 11:03:36 +0530

തിരുവനന്തപുരം: സംസ്ഥാനത്ത് സ്വർണവില കുറഞ്ഞു. 22 കാരറ്റ് സ്വർണത്തിന് 60 രൂപയാണ് കുറഞ്ഞത്. ഇതോടെ ഒക്ടോബർ ഏഴ് ബുധനാഴ്ച രാവിലെ സ്വർണവില ഗ്രാമിന് 13710 രൂപയും പവന് 1,09,680 രൂപയുമായി. കഴിഞ്ഞദിവസം ഉച്ചയ്ക്ക് സ്വർണവില ഗ്രാമിന് 13770 രൂപയായി ഉയർന്നിരുന്നു. ഇതിനുപിന്നാലെയാണ് ബുധനാഴ്ച രാവിലെ സ്വർണവില കുറഞ്ഞത്.

18 കാരറ്റ് സ്വർണത്തിന് ബുധനാഴ്ച ഗ്രാമിന് 50 രൂപ കുറഞ്ഞു. ഗ്രാമിന് 11,265 രൂപയും പവന് 90,120 രൂപയുമാണ് ബുധനാഴ്ച രാവിലെയുള്ള വില. 14 സ്വർണത്തിന് 40 രൂപ കുറഞ്ഞ് ഗ്രാമിന് 8775 രൂപയായി. പവന് 70,200 രൂപയും. 9 കാരറ്റ് സ്വർണത്തിന് 25 രൂപയാണ് കുറഞ്ഞത്. ബുധനാഴ്ച രാവിലെ 9 കാരറ്റ് സ്വർണത്തിന് 5660 രൂപയാണ് വില. പവന് 45280 രൂപയും. വെള്ളി വിലയിൽ ബുധനാഴ്ച മാറ്റമില്ല. ഗ്രാമിന് 235 രൂപയാണ് വില.

ഭിന്നശേഷിക്കാര്‍ക്ക് താങ്ങായി ആരോഗ്യ ഇന്‍ഷുറന്‍സുകള്‍; പോളിസികള്‍ എടുക്കുമ്പോള്‍ ഇക്കാര്യങ്ങള്‍ ശ്രദ്ധിക്കാം

Sangeetha KS — Fri, 09 Oct 2026 11:17:46 +0530

ഇന്ത്യയില്‍ കോടിക്കണക്കിന് ആളുകളാണ് വിവിധ തരത്തിലുള്ള ശാരീരിക- മാനസിക വെല്ലുവിളികള്‍ നേരിട്ട് ജീവിക്കുന്നത്. മറ്റുള്ളവര്‍ക്ക് പലപ്പോഴും മനസിലാകാത്ത നിരവധി പ്രതിസന്ധികളാണ് ഇവര്‍ ഓരോ ദിവസവും മറികടക്കുന്നത്. ഭിന്നശേഷി എന്നത് വെറുമൊരു ആരോഗ്യപ്രശ്‌നം മാത്രമല്ല, അവര്‍ക്ക് കൂടി അര്‍ഹതപ്പെട്ട തുല്യനീതിയുടെയും പരിഗണനയുടെയും വിഷയം കൂടിയാണ്.

ഏറ്റവും പുതിയ സെന്‍സസ് പ്രകാരം ഇന്ത്യയിലെ ജനസംഖ്യയുടെ 2.21 ശതമാനം പേര്‍ ഭിന്നശേഷിക്കാരാണ്. അതായത് ഏകദേശം 2.68 കോടി ജനങ്ങള്‍! ഇത്രയധികം ആളുകള്‍ക്ക് കൃത്യവും നിരന്തരവുമായ പ്രത്യേക വൈദ്യസഹായം ആവശ്യമാണ്. കൃത്യമായ സംവിധാനങ്ങളില്ലെങ്കില്‍, ഇവരുടെ ചികിത്സാച്ചെലവുകള്‍ കുടുംബങ്ങള്‍ക്ക് താങ്ങാനാവാത്ത സാമ്പത്തിക ബാധ്യതയായി മാറും. ഈ സാഹചര്യത്തിലാണ് ഭിന്നശേഷിക്കാര്‍ക്കായി പ്രത്യേകം തയ്യാറാക്കിയിട്ടുള്ള ആരോഗ്യ ഇന്‍ഷുറന്‍സ് പോളിസികളുടെ പ്രസക്തി വര്‍ധിക്കുന്നത്. വലിയ ആശുപത്രി ചെലവുകളില്‍ നിന്ന് സംരക്ഷണം നല്‍കാനും അവര്‍ക്ക് അന്തസോടെ ജീവിക്കാനും ഇത്തരം ഇന്‍ഷുറന്‍സ് പദ്ധതികള്‍ സഹായിക്കും.

ഭിന്നശേഷിക്കാര്‍ക്കുള്ള സ്വകാര്യ ഇന്‍ഷുറന്‍സ് പരിരക്ഷ

2016-ലെ റൈറ്റ്‌സ് ഓഫ് പേഴ്‌സണ്‍സ് വിത്ത് ഡിസെബിലിറ്റീസ് ആക്ട് പ്രകാരവും, എയ്ഡ്‌സ് ബാധിതര്‍ക്കും ആരോഗ്യ ഇന്‍ഷുറന്‍സ് പരിരക്ഷ അവകാശമായിത്തന്നെ ഉറപ്പാക്കുന്നുണ്ട്. ഭിന്നശേഷിക്കാര്‍ നേരിടുന്ന ബുദ്ധിമുട്ടുകള്‍ മനസ്സിലാക്കി, അവരുടെ ചികിത്സാ ആവശ്യങ്ങള്‍ക്കും സാമ്പത്തിക സുരക്ഷയ്ക്കും അനുയോജ്യമായ പോളിസികള്‍ ഇന്ന് പല ഇന്ത്യന്‍ സ്വകാര്യ ഇന്‍ഷുറന്‍സ് കമ്പനികളും നല്‍കുന്നുണ്ട്.

ആശുപത്രി ചെലവുകള്‍ (റൂം വാടക, ഐസിയു ചാര്‍ജ്, ഡോക്ടര്‍മാരുടെ ഫീസ്), മരുന്നുകള്‍, പരിശോധനകള്‍, ശസ്ത്രക്രിയകള്‍ എന്നിവയ്ക്ക് ഇത്തരം പോളിസികള്‍ വഴി പരിരക്ഷ ലഭിക്കും. ഇതിന് പുറമെ ആയുഷ് ചികിത്സകള്‍, തിമിര ശസ്ത്രക്രിയ, ആശുപത്രി വാസത്തിന് മുന്‍പും ശേഷവുമുള്ള ചെലവുകള്‍, ആംബുലന്‍സ് സേവനം, കൂടാതെ റോബോട്ടിക് സര്‍ജറി, സ്റ്റെം സെല്‍ ചികിത്സ തുടങ്ങിയ ആധുനിക ചികിത്സകള്‍ക്കും കവറേജ് ലഭിക്കുന്നതാണ്. നിശ്ചിത കാത്തിരിപ്പ് കാലാവധിക്ക് ശേഷം നിലവിലുള്ള ഭിന്നശേഷിയുമായി ബന്ധപ്പെട്ട അടിയന്തര ചികിത്സകള്‍ക്കും ഈ പോളിസികളില്‍ പരിരക്ഷ ലഭിക്കും.

പോളിസി എടുക്കുന്നതിന് മുന്‍പ് അതില്‍ ഉള്‍പ്പെടാത്ത കാര്യങ്ങളെക്കുറിച്ചും അറിഞ്ഞിരിക്കേണ്ടതുണ്ട്. നിലവിലുള്ള അസുഖങ്ങള്‍ക്ക് ആദ്യത്തെ 24 മുതല്‍ 36 മാസം വരെ പരിരക്ഷ ലഭിക്കില്ല. ഹെര്‍ണിയ, തിമിരം, സന്ധിവാതം, ജന്മനായുള്ള വൈകല്യങ്ങള്‍ തുടങ്ങിയവയ്ക്ക് 24 മാസത്തെ കാത്തിരിപ്പ് കാലാവധിയുണ്ട്. പോളിസി എടുത്ത ആദ്യത്തെ 30 ദിവസത്തിനുള്ളില്‍ വരുന്ന ചികിത്സകള്‍ക്ക് (അപകടങ്ങള്‍ ഒഴികെ) കവറേജ് ലഭിക്കില്ല. സൗന്ദര്യവര്‍ദ്ധക ശസ്ത്രക്രിയകള്‍, അമിതവണ്ണത്തിനുള്ള ചികിത്സ, വന്ധ്യതാ ചികിത്സ, പ്രസവ സംബന്ധമായ ചെലവുകള്‍, മദ്യപാനമോ മയക്കുമരുന്നോ മൂലമുള്ള അസുഖങ്ങള്‍ എന്നിവ പോളിസിയില്‍ ഉള്‍പ്പെടില്ല. ഇതൊക്കെയാണെങ്കിലും ഇന്‍ഷുറന്‍സ് ആനുകൂല്യം ലഭിക്കാന്‍ അടിസ്ഥാനപരമായി വേണ്ട ഒരു കാര്യമുണ്ട് - അംഗീകൃത അതോറിറ്റി നല്‍കുന്ന സാധുവായ ഡിസെബിലിറ്റി സര്‍ട്ടിഫിക്കറ്റ്. ഇത് നിര്‍ബന്ധമായും ഹാജരാക്കിയാല്‍ മാത്രമേ ഭിന്നശേഷിക്കാര്‍ക്ക് ആരോഗ്യ ഇന്‍ഷുറന്‍സ് പരിരക്ഷ ലഭ്യമാകൂ.

സര്‍ക്കാരിന്റെ 'നിരാമയ' ആരോഗ്യ ഇന്‍ഷുറന്‍സ് പദ്ധതി

സ്വകാര്യ പോളിസികള്‍ക്ക് പുറമെ, ഭിന്നശേഷിക്കാര്‍ക്ക് പ്രയോജനപ്പെടുത്താവുന്ന ഒന്നാണ് കേന്ദ്ര സര്‍ക്കാരിന്റെ 'നിരാമയ' ആരോഗ്യ ഇന്‍ഷുറന്‍സ് പദ്ധതി. കേന്ദ്ര സാമൂഹ്യനീതി ശാക്തീകരണ മന്ത്രാലയത്തിന് കീഴിലുള്ള ഭിന്നശേഷി ശാക്തീകരണ വകുപ്പാണ് ഇത് നടപ്പിലാക്കുന്നത്. ഓട്ടിസം, സെറിബ്രല്‍ പാള്‍സി, ബുദ്ധിമാന്ദ്യം, എന്നിവ ഉള്ളവര്‍ക്ക് താങ്ങാവുന്ന നിരക്കില്‍ ഇന്‍ഷുറന്‍സ് നല്‍കുക എന്നതാണ് ഇതിന്റെ പ്രധാന ലക്ഷ്യം.

കവറേജ്: ഒരു വര്‍ഷത്തേക്ക് 1,00,000 രൂപ വരെയുള്ള ചികിത്സാ ആനുകൂല്യങ്ങളാണ് ഇതില്‍ ലഭിക്കുക. എല്ലാ വര്‍ഷവും പോളിസി പുതുക്കേണ്ടതാണ്. ശസ്ത്രക്രിയകള്‍ മുതല്‍ രോഗപ്രതിരോധത്തിനായുള്ള പരിശോധനകള്‍ക്ക് വരെ സാമ്പത്തിക സഹായം ഉറപ്പാക്കാന്‍ ഇതിലൂടെ സാധിക്കും. 1999-ലെ നാഷണല്‍ ട്രസ്റ്റ് ആക്ട് പ്രകാരമുള്ള സാധുവായ ഡിസെബിലിറ്റി സര്‍ട്ടിഫിക്കറ്റ് ഉള്ളവര്‍ക്കാണ് ഈ പദ്ധതിയില്‍ ചേരാന്‍ അര്‍ഹതയുള്ളത്.

ഓര്‍മ്മയുണ്ടോ ആ കാലം? 90's കിഡ്സിന്റെ 'ഓര്‍ക്കുട്ട്' വീണ്ടും വരുന്നു? പിന്തുണ തേടി സ്ഥാപകന്‍

Sangeetha KS — Fri, 09 Oct 2026 15:56:43 +0530

2000 ങ്ങളുടെ തുടക്കത്തില്‍ ഇന്റര്‍നെറ്റ് ലോകത്തെ ഹരം പിടിപ്പിച്ച ജനപ്രിയ സോഷ്യല്‍ മീഡിയ പ്ലാറ്റ്ഫോമായ 'ഓര്‍ക്കുട്ട്' തിരിച്ചെത്തുന്നു. പഴയതുപോലെ സൗഹൃദങ്ങള്‍ക്കും കൂട്ടായ്മകള്‍ക്കും മനുഷ്യര്‍ തമ്മിലുള്ള യഥാര്‍ത്ഥ ബന്ധങ്ങള്‍ക്കും മുന്‍ഗണന നല്‍കിക്കൊണ്ട് ഓര്‍ക്കുട്ട് തിരികെ കൊണ്ടുവരാന്‍ ഒരുങ്ങുകയാണ് സ്ഥാപകനായ ഓര്‍ക്കുട്ട് ബുയൂക്കോക്ടെന്‍. ഇതിനായി അദ്ദേഹം ഇന്റര്‍നെറ്റ് ഉപയോക്താക്കളുടെ പിന്തുണ തേടിയിരിക്കുകയാണ്. എന്നാല്‍ എന്നാണ് പുതിയ പ്ലാറ്റ്ഫോം പുറത്തിറങ്ങുകയെന്ന തീയതി അദ്ദേഹം വെളിപ്പെടുത്തിയിട്ടില്ല.

‘സോഷ്യല്‍ മീഡിയയ്ക്ക് വഴിപിഴച്ചു’: തുറന്ന കത്തുമായി സ്ഥാപകന്‍

ഓര്‍ക്കുട്ടിന്റെ ഔദ്യോഗിക വെബ്‌സൈറ്റില്‍ പ്രസിദ്ധീകരിച്ച ഒരു തുറന്ന കത്തിലാണ് പ്ലാറ്റ്ഫോം തിരികെ കൊണ്ടുവരാനുള്ള കാരണം അദ്ദേഹം വ്യക്തമാക്കുന്നത്. കഴിഞ്ഞ രണ്ട് പതിറ്റാണ്ടായി സോഷ്യല്‍ മീഡിയയിലുണ്ടായ മാറ്റങ്ങളെ അദ്ദേഹം കത്തില്‍ രൂക്ഷമായി വിമര്‍ശിച്ചു. ഇന്നത്തെ സോഷ്യല്‍ മീഡിയ പ്ലാറ്റ്ഫോമുകള്‍ യഥാര്‍ത്ഥ ബന്ധങ്ങളേക്കാള്‍ ഉപയോക്താക്കളുടെ ശ്രദ്ധ പിടിച്ചുപറ്റുന്നതിനാണ് മുന്‍ഗണന നല്‍കുന്നതെന്ന് അദ്ദേഹം കുറ്റപ്പെടുത്തി.

ഇന്റര്‍നെറ്റ് മനുഷ്യത്വപരമായിരുന്ന ഒരു കാലത്തെക്കുറിച്ചും അദ്ദേഹം കത്തില്‍ ഓര്‍ത്തെടുത്തു. അന്ന് മറ്റൊരു ഭൂഖണ്ഡത്തിലുള്ള അപരിചിതനില്‍ നിന്നുള്ള ഒരു സന്ദേശം മാന്ത്രികത പോലെയായിരുന്നുവെന്ന് അദ്ദേഹം പറയുന്നു. കുറച്ചു നേരത്തേക്കാണെങ്കിലും അത് നല്‍കിയിരുന്ന സന്തോഷം ചെറുതല്ലായിരുന്നു, കാരണം അവ യഥാര്‍ത്ഥമായിരുന്നു. എന്നാല്‍ ഇന്ന് യഥാര്‍ത്ഥ ബന്ധങ്ങള്‍ക്ക് പകരം അല്‍ഗോരിതങ്ങളെയാണ് സോഷ്യല്‍ മീഡിയ ആശ്രയിക്കുന്നത്. ഇന്നത്തെ തലമുറ കടുത്ത ഉത്കണ്ഠയും ഏകാന്തതയും അനുഭവിക്കുന്നതില്‍ അതിശയിക്കാനില്ലെന്നും അദ്ദേഹം കൂട്ടിച്ചേര്‍ത്തു.

ഗൂഗിള്‍ എഞ്ചിനീയറായ ഓര്‍ക്കുട്ട് ബുയൂക്കോക്ടെന്‍ സൃഷ്ടിച്ച ഓര്‍ക്കുട്ട്, ഗൂഗിളിന്റെ ഉടമസ്ഥതയിലുള്ള ആദ്യകാല സോഷ്യല്‍ നെറ്റ്വര്‍ക്കിംഗ് പ്ലാറ്റ്ഫോമായിരുന്നു. 2004 ജനുവരിയിലാണ് ഇത് ആരംഭിച്ചത്. ഇന്ത്യ, ബ്രസീല്‍ തുടങ്ങിയ രാജ്യങ്ങളില്‍ ഓര്‍ക്കുട്ടിന് വലിയ സ്വീകാര്യത ലഭിച്ചിരുന്നു. പ്രൊഫൈലുകള്‍, കമ്മ്യൂണിറ്റികള്‍, ടെസ്റ്റിമോണിയലുകള്‍ എന്നിവയിലൂടെ ആളുകള്‍ തമ്മില്‍ വലിയ ബന്ധം സ്ഥാപിക്കാന്‍ ഇതിലൂടെ കഴിഞ്ഞിരുന്നു. എന്നാല്‍ ഫെയ്സ്ബുക്ക്, ഇന്‍സ്റ്റാഗ്രാം തുടങ്ങിയ മറ്റ് സോഷ്യല്‍ മീഡിയ സൈറ്റുകള്‍ക്ക് ജനപ്രീതി വര്‍ദ്ധിച്ചതോടെ 2014 സെപ്റ്റംബറില്‍ ഗൂഗിള്‍ ഓര്‍ക്കുട്ട് പൂര്‍ണ്ണമായും നിര്‍ത്തലാക്കുകയായിരുന്നു. നീണ്ട 10 വര്‍ഷങ്ങള്‍ക്കിപ്പുറമാണ് ഇപ്പോഴത്തെ ഈ പുതിയ നീക്കം.

ബാങ്ക് വായ്പയെടുത്തവരുടെ ഭാരം കൂടുമോ...? റിസർവ് ബാങ്കിന്റെ വായ്പാ നയം ഇന്ന്, റിപ്പോ നിരക്ക് വർധിക്കാൻ സാധ്യത

Web Desk — Wed, 07 Oct 2026 06:31:01 +0530

ദില്ലി: റിസർവ് ബാങ്കിന്റെ വായ്പാ നയ പ്രഖ്യാപനം ഇന്ന് നടക്കും. മൂന്ന് വർഷത്തിന് ശേഷം റിപ്പോ നിരക്കിൽ വർധനവുണ്ടാകുമെന്നാണ് സാമ്പത്തിക വിദഗ്ദർ നൽകുന്ന സൂചന. റിപ്പോ നിരക്ക് നിലവിലെ 5.25 ൽ നിന്ന് 5.50 ആക്കി ഉയർത്താനാണ് സാധ്യത. ഇതോടെ വായ്പയെടുത്തവരുടെ ഇഎംഐ ഭാരം കൂടും. നാല് വർഷത്തിനിടയിലെ ആദ്യത്തെ റിപ്പോ നിരക്ക് വർദ്ധനവിന്റെ പ്രതീക്ഷകൾ വർദ്ധിച്ചുവരുന്ന സാഹചര്യത്തിലാണ് തിങ്കളാഴ്ച ആരംഭിക്കുന്ന മൂന്ന് ദിവസത്തെ മോണിറ്ററി പോളിസി കമ്മിറ്റി (എംപിസി) യോഗത്തിനായി റിസർവ് ബാങ്ക് ഓഫ് ഇന്ത്യ (ആർബിഐ) ഉദ്യോഗസ്ഥർ യോഗം ചേർന്നത്.

2025 ൽ 125 ബേസിസ് പോയിന്റുകൾ നിരക്കുകൾ കുറച്ചതിന് ശേഷം തുടർച്ചയായ നാല് പോളിസി മീറ്റിംഗുകളിൽ സെൻട്രൽ ബാങ്ക് റിപ്പോ നിരക്ക് 5.25 ശതമാനമായി നിലനിർത്തി. വർധിച്ചുവരുന്ന പണപ്പെരുപ്പ അപകടസാധ്യതകളും ക്രൂഡ് ഓയിൽ വിലയിലെ വർധനവും സെൻട്രൽ ബാങ്ക് പണ നിയന്ത്രണത്തിലേക്ക് മാറുമെന്ന പ്രതീക്ഷകളെ ശക്തിപ്പെടുത്തുന്നതിനിടയിലാണ് ഏറ്റവും പുതിയ ആർബിഐ എംപിസി യോഗം. ഇന്ന് രാവിലെ പത്തിന് ആർ‌ബി‌ഐ ഗവർണർ സഞ്ജയ് മൽഹോത്ര ധനനയ പ്രസ്താവന നടത്തും. ഒക്ടോബറിൽ ആർ‌ബി‌ഐ റിപ്പോ നിരക്ക് 25 ബേസിസ് പോയിന്റുകൾ ഉയർത്തുമെന്നും 2027 സാമ്പത്തിക വർഷത്തിൽ കൂടുതൽ വർധനവ് വരുത്തുമെന്നുമാണ് സാമ്പത്തിക വിദഗ്ധർ നൽകുന്ന സൂചന.

റിപ്പോ നിരക്ക് വർധന: എഫ്ഡി പലിശ എന്ന് മുതൽ വര്‍ധിക്കും? കാര്യമായ നേട്ടം പ്രതീക്ഷിക്കണോ? നിക്ഷേപകര്‍ അറിയേണ്ടതെല്ലാം...

Sangeetha KS — Fri, 09 Oct 2026 12:14:35 +0530

റിസര്‍വ് ബാങ്ക് ഓഫ് ഇന്ത്യയുടെ പണനയ സമിതി റിപ്പോ നിരക്ക് 25 ബേസിസ് പോയിന്റ് വര്‍ധിപ്പിച്ചതോടെ നിക്ഷേപങ്ങളുടെ പലിശ നിരക്ക് വരും മാസങ്ങളില്‍ ഉയര്‍ന്നേക്കും. റിപ്പോ നിരക്ക് കൂടിയെങ്കിലും ബാങ്കുകള്‍ ഒറ്റയടിക്ക് എഫ്ഡി പലിശ നിരക്ക് കൂട്ടാന്‍ സാധ്യതയില്ല. വായ്പാ ആവശ്യകതയും വിപണിയിലെ പണലഭ്യതയും വിലയിരുത്തിയ ശേഷമേ ബാങ്കുകള്‍ പലിശ നിരക്കുകളില്‍ മാറ്റം വരുത്തുകയുള്ളൂ. നിലവില്‍ രാജ്യത്തെ മുന്‍നിര ബാങ്കുകള്‍ 6.30 ശതമാനം മുതല്‍ 6.65 ശതമാനം വരെയാണ് സ്ഥിരനിക്ഷേപങ്ങള്‍ക്ക് പലിശ നല്‍കുന്നത്. പൊതുമേഖലാ ബാങ്കുകളേക്കാള്‍ അല്പം ഉയര്‍ന്ന പലിശ നല്‍കുന്നത് സ്വകാര്യ ബാങ്കുകളാണ്.

പലിശ നിരക്ക് ഉയരാന്‍ കാരണം എന്ത്?

റിപ്പോ നിരക്ക് ഉയരുന്നതോടെ ബാങ്കുകള്‍ക്ക് ഫണ്ട് കണ്ടെത്താനുള്ള ചിലവ് വര്‍ധിക്കും. ഇത് കൂടുതല്‍ നിക്ഷേപങ്ങള്‍ ആകര്‍ഷിക്കാന്‍ ബാങ്കുകളെ പ്രേരിപ്പിക്കും. ഇതിനായി വരും മാസങ്ങളില്‍ ബാങ്കുകള്‍ എഫ്ഡി നിരക്കുകള്‍ ഉയര്‍ത്താന്‍ സാധ്യതയുണ്ട്. ചെറിയ ബാങ്കുകളും അതിവേഗം വളരാന്‍ ലക്ഷ്യമിടുന്ന ബാങ്കുകളുമായിരിക്കും ആദ്യം പലിശ കൂട്ടുക. വലിയ ബാങ്കുകള്‍ പതുക്കെയെ ഈ മാറ്റങ്ങള്‍ നടപ്പിലാക്കൂ.

നിക്ഷേപകര്‍ ഇപ്പോള്‍ എന്ത് ചെയ്യണം?

ദീര്‍ഘകാല നിക്ഷേപങ്ങള്‍ ഒഴിവാക്കുക: ഒറ്റയടിക്ക് പണം മുഴുവന്‍ നീണ്ട കാലയളവിലേക്ക് നിക്ഷേപിക്കാതെ, വ്യത്യസ്ത കാലാവധിയുള്ള എഫ്ഡികളിലായി നിക്ഷേപിക്കുക.

നിരക്കുകള്‍ നിരീക്ഷിക്കുക: പുതിയതായി പണം നിക്ഷേപിക്കുന്നതിന് മുമ്പ് ബാങ്കുകളും എന്‍ബിഎഫ്‌സികളുംനല്‍കുന്ന പുതിയ പലിശ നിരക്കുകള്‍ കൃത്യമായി താരതമ്യം ചെയ്യുക.

മുതിര്‍ന്ന പൗരന്മാര്‍ക്കുള്ള ആനുകൂല്യങ്ങള്‍: മുതിര്‍ന്ന പൗരന്മാര്‍ക്ക് എഫ്ഡികള്‍ക്ക് എല്ലായ്‌പ്പോഴും അധിക പലിശ ലഭിക്കാറുണ്ട്. ഈ സ്‌കീമുകള്‍ പരിശോധിച്ച് ഉറപ്പുവരുത്തുക.

ചുരുക്കത്തില്‍, ഒറ്റയടിക്ക് മാറ്റങ്ങള്‍ വന്നില്ലെങ്കിലും ഈ നിരക്ക് വര്‍ധനവ് സ്ഥിരനിക്ഷേപകര്‍ക്ക് മികച്ച നേട്ടം നല്‍കും. എഫ്ഡി പലിശ കൂട്ടാന്‍ ബാങ്കുകള്‍ അല്പം സമയമെടുത്തേക്കാം. എന്നാല്‍ ക്ഷമയോടെ കാത്തിരുന്ന് കൃത്യമായ സമയത്ത് നിക്ഷേപം നടത്തിയാല്‍ മികച്ച ലാഭം സ്വന്തമാക്കാന്‍ സാധിക്കും.

എഐ തൊഴിലാളികളെ ബാധിക്കുമോ? ഉത്തരവുമായി ജെഫ് ബെസോസ്; 'ഭാവിയിൽ ആഴ്ചയിൽ 3 ദിവസം ജോലി ചെയ്താൽ മതിയാകും'

Sangeetha KS — Fri, 09 Oct 2026 14:31:09 +0530

നിർമ്മിത ബുദ്ധി (AI) ജനങ്ങളുടെ തൊഴിലിനെയും സാമ്പത്തിക സ്ഥിതിയെയും മാറ്റിമറിക്കുമെന്ന് ആമസോൺ സ്ഥാപകൻ ജെഫ് ബെസോസ്. എഐ നൽകുന്ന ഉയർന്ന ഉത്പാദനക്ഷമത മൂലം ഭാവിയിൽ ആളുകൾക്ക് ആഴ്ചയിൽ വെറും മൂന്ന് ദിവസം മാത്രം ജോലി ചെയ്ത് കുടുംബം പുലർത്താൻ കഴിഞ്ഞേക്കുമെന്നും, രണ്ട് പേർ ജോലി ചെയ്യുന്ന കുടുംബങ്ങൾക്ക് ഒരാളുടെ വരുമാനം കൊണ്ട് മാത്രം ജീവിക്കാൻ സാധിക്കുമെന്നും ബെസോസ് പറയുന്നു. ഫോഗ്സ് ന്യൂസ് അവതാരകൻ ബ്രെറ്റ് ബെയറുമായുള്ള അഭിമുഖത്തിലാണ് ജെഫ് ബെസോസ് ഇക്കാര്യം പങ്കുവെച്ചത്.

ഉത്പാദനക്ഷമത വർധിക്കുന്നതോടെ ആളുകൾ ഒന്നിലധികം ജോലികൾ ചെയ്യേണ്ട അവസ്ഥ ഒഴിവാകുമെന്നും, ഇത് തൊഴിലുടമകൾക്ക് ജീവനക്കാരെ കണ്ടെത്തുന്നത് കൂടുതൽ പ്രയാസകരമാക്കുമെന്നും ബെസോസ് കൂട്ടിച്ചേർത്തു. എന്നാൽ 2025 അവസാനത്തിനു ശേഷം ആമസോൺ ഏകദേശം 30,000 കോർപ്പറേറ്റ് ജീവനക്കാരെ പിരിച്ചുവിട്ടത് ചൂണ്ടിക്കാണിച്ചപ്പോൾ, കോവിഡ് കാലത്ത് കമ്പനി നടത്തിയ വൻ നിയമനങ്ങളാണ് ഇതിന് കാരണമെന്നും എഐ തൊഴിലവസരങ്ങൾ ഇല്ലാതാക്കുമെന്ന ഭയത്തോട് താൻ യോജിക്കുന്നില്ലെന്നും അദ്ദേഹം വ്യക്തമാക്കി. എഐ സാങ്കേതികവിദ്യ വികസിപ്പിക്കുന്ന 'പ്രൊമിത്യൂസ്' (Prometheus) എന്ന കമ്പനിയുടെ സഹസ്ഥാപകൻ കൂടിയാണ് നിലവിൽ ജെഫ് ബെസോസ്. എഐ നിക്ഷേപങ്ങൾ പുറം പോച്ച് മാത്രമുള്ള ഒരു ഫിനാൻഷ്യൽ ബബിൾ മാത്രമാണോ എന്ന ചോദ്യത്തിന്, ഉപയോഗപ്രദമായ കണ്ടുപിടുത്തങ്ങൾ പ്രതിസന്ധികളെ അതിജീവിച്ച് നിലനിൽക്കുമെന്നാണ് അദ്ദേഹം പ്രതികരിച്ചത്.

റിപ്പോ നിരക്കുയർത്തി റിസർവ് ബാങ്ക്, ഭവന-വാഹന വായ്പയെടുത്തവർക്ക് പലിശ ഭാരം കൂടും

Web Desk — Wed, 07 Oct 2026 12:33:35 +0530

ദില്ലി: റിപ്പോ നിരക്ക് കൂട്ടി റിസർവ് ബാങ്ക്. 25 ബേസിസ് പോയിന്റ് കൂട്ടി നിരക്ക് 5.50 ശതമാനമായി ഉയർത്തി. റിപ്പോ നിരക്ക് കൂട്ടിയതോടെ ഭവന, വാഹന വായ്പകളുടെ പലിശ നിരക്കുയരും. റിസർവ് ബാങ്കിന്റെ വായ്പാ നയ പ്രഖ്യാപനത്തിലാണ് നിരക്ക് കൂട്ടിയതായി അറിയിച്ചത്. മൂന്ന് വർഷത്തിന് ശേഷമാണ് റിപ്പോ നിരക്കിൽ വർധനവുണ്ടാകുന്നത്. റിപ്പോ നിരക്ക് നിലവിലെ 5.25 ൽ നിന്നാണ് 5.50 ആക്കി ഉയർത്തിയത്. ഇതോടെ വായ്പയെടുത്തവരുടെ ഇഎംഐ ഭാരം കൂടും.

2025 ൽ 125 ബേസിസ് പോയിന്റുകൾ നിരക്കുകൾ കുറച്ചതിന് ശേഷം തുടർച്ചയായ നാല് പോളിസി മീറ്റിംഗുകളിൽ സെൻട്രൽ ബാങ്ക് റിപ്പോ നിരക്ക് 5.25 ശതമാനമായി നിലനിർത്തിയിരുന്നു. വർധിച്ചുവരുന്ന പണപ്പെരുപ്പ അപകടസാധ്യതകളും ക്രൂഡ് ഓയിൽ വിലയിലെ വർധനവും സെൻട്രൽ ബാങ്ക് പണ നിയന്ത്രണത്തിലേക്ക് മാറുമെന്ന പ്രതീക്ഷകളെ ശക്തിപ്പെടുത്തുന്നതിനിടയിലാണ് ഏറ്റവും പുതിയ ആർബിഐ എംപിസി യോഗം ചേർന്നത്. 2027 സാമ്പത്തിക വർഷത്തിൽ കൂടുതൽ വർധനവ് വരുത്തുമെന്നുമാണ് സാമ്പത്തിക വിദഗ്ധർ നൽകുന്ന സൂചന.

പശ്ചിമേഷ്യൻ യുദ്ധത്തെ തുടർന്നുള്ള ക്രൂഡോയിൽ വിലവർധന, വരൾച്ചയിൽ കുറയുന്ന കാർഷികോൽപാദനം, രൂപയുടെ മൂല്യതകർച്ച. രാജ്യത്തെ പണപ്പെരുപ്പം സഹനപരിധിയായ 4 ശതമാനത്തിലുമുയർന്നതോടെയാണ് ആർ ബി ഐ ഇടപെടൽ. ബാങ്കുകളിൽ സ്ഥിര നിക്ഷേപമുളളവർക്കും പുതുതായി നിക്ഷേപത്തിനൊരുങ്ങുന്നവർക്കും നിരക്ക് വർധന നേട്ടമാകും. സാമ്പത്തിക സാഹചര്യം അനുസരിച്ച് പലിശനിരക്കുകൾ ഉയർത്തുന്ന നിഷ്പക്ഷ നിലപാടിൽ നിന്ന് പലിശ കൂട്ടുകയോ നിലനിർത്തുകയോ ചെയ്യുന്ന രീതിയിലേക്ക് കടന്നതായി ആർ ബി ഐ ഗവർണർ സഞ്ജയ് മൽഹോത്ര വ്യക്തമാക്കി. പലിശനിരക്കുയർത്തിയെങ്കിലും ജിഡിപി കുതിക്കുമെന്നാണ് ആർ ബി ഐ അനുമാനം. 7.1 ശതമാനമാണ് ആർബിഐ കണക്കാക്കുന്ന ജിഡിപി വളർച്ചാ നിരക്ക്. ലോകബാങ്കും ഇതേ വള‍ർച്ച നിരക്ക് പ്രവചിച്ചിരുന്നു. പണപ്പെരുപ്പം ഇനിയും കൂടുമെന്ന പ്രവചനം പലിശനിരക്ക് അടുത്ത യോഗത്തിലും കൂട്ടുമെന്നതിന്റെ സൂചനയാണ്. ഇതിനിടെ രണ്ട് ദിവസത്തെ നേട്ടത്തിന് ശേഷം ഇന്ത്യൻ ഓഹരിവിപണി ഇടിഞ്ഞു.

റിലയന്‍സിന് ആശ്വാസ പ്രഖ്യാപനവുമായി ഡൽഹി ഹൈക്കോടതി; 'കാമ്പ' എനര്‍ജി ഡ്രിങ്ക് ലേബലില്‍ തന്നെ വില്‍ക്കാം

Sangeetha KS — Tue, 06 Oct 2026 15:31:00 +0530

റിലയന്‍സിന്റെ കൂൾഡ്രിങ്ക്സ് ബ്രാന്‍ഡായ 'കാമ്പ'-'എനര്‍ജി ഡ്രിങ്ക്' എന്ന ലേബലില്‍ തന്നെ വില്‍ക്കാന്‍ ഡൽഹി ഹൈക്കോടതി അനുമതി നല്‍കി. എനര്‍ജി ഡ്രിങ്ക് എന്ന പേര് ഉപയോഗിക്കുന്നത് വിലക്കിക്കൊണ്ടുള്ള ഭക്ഷ്യസുരക്ഷാ അതോറിറ്റിയുടെ നടപടി തങ്ങളുടെ ബിസിനസിനെ വലിയ രീതിയില്‍ ബാധിച്ചതായി കമ്പനി നേരത്തെ കോടതിയെ അറിയിച്ചിരുന്നു. ഇതിന് പിന്നാലെയാണ് കോടതിയുടെ സുപ്രധാന ഉത്തരവ്.

ഉയര്‍ന്ന അളവില്‍ കഫീന്‍ അടങ്ങിയ പാനീയങ്ങള്‍ 'എനര്‍ജി ഡ്രിങ്ക്' എന്ന പേരില്‍ വില്‍ക്കുന്നത് നിരോധിച്ചുകൊണ്ട് ജൂണ്‍ 30-നാണ് എഫ്.എസ്.എസ്.എ.ഐ ഉത്തരവിറക്കിയത്. ഇതിനെതിരെ റിലയന്‍സ് നല്‍കിയ ഹര്‍ജിയിലാണ് കോടതി ഇപ്പോള്‍ ഇളവ് അനുവദിച്ചിരിക്കുന്നത്.

തെറ്റുതിരുത്താന്‍ സമയമുണ്ടെന്ന് കോടതി

റിലയന്‍സിന് മുന്‍കൂര്‍ നോട്ടീസ് നല്‍കാതെ എന്തിനാണ് ഇത്തരമൊരു വിലക്ക് ഏര്‍പ്പെടുത്തിയതെന്ന് കോടതി എഫ്.എസ്.എസ്.എ.ഐയോട് ചോദിച്ചു. ചെയ്ത തെറ്റ് തിരുത്താന്‍ എപ്പോഴും സമയമുണ്ടെന്നും കോടതി ഏജന്‍സിയെ ഓര്‍മ്മിപ്പിച്ചു. കേസ് വീണ്ടും നവംബര്‍ അഞ്ചിന് കോടതി പരിഗണിക്കും. റിലയന്‍സിന് പുറമെ ആഗോള ഭീമന്മാരായ പെപ്സികോ, മോണ്‍സ്റ്റര്‍ ബെവറേജ് എന്നിവരും എഫ്.എസ്.എസ്.എ.ഐയുടെ ഈ ഉത്തരവിനെതിരെ കഴിഞ്ഞയാഴ്ച കോടതിയെ സമീപിച്ചിരുന്നു. ഓസ്ട്രിയന്‍ കമ്പനിയായ റെഡ് ബുള്‍ 'എനര്‍ജി ഡ്രിങ്ക്' എന്ന് ഉപയോഗിക്കാന്‍ നേരത്തെ തന്നെ കോടതിയില്‍ നിന്ന് പ്രത്യേക അനുമതി വാങ്ങിയിരുന്നു.

ആരോഗ്യപ്രശ്‌നങ്ങള്‍ ചൂണ്ടിക്കാട്ടി രാജ്യത്തുടനീളം ഭക്ഷ്യസുരക്ഷാ അതോറിറ്റി നടത്തുന്ന കര്‍ശന പരിശോധനകളുടെ ഭാഗമായാണ് ഈ ലേബല്‍ വിലക്കും വന്നത്. ഈ വര്‍ഷം നിരവധി റെയ്ഡുകളും പുതിയ മുന്നറിയിപ്പ് ലേബലുകള്‍ നിര്‍ബന്ധമാക്കുന്നതുള്‍പ്പെടെയുള്ള നടപടികളും അതോറിറ്റി സ്വീകരിച്ചിരുന്നു. എന്നാല്‍ ഈ വിഷയത്തില്‍ എഫ്.എസ്.എസ്.എ.ഐ ഇതുവരെ ഔദ്യോഗികമായി പ്രതികരിച്ചിട്ടില്ല.

ഒഴിവായത് കോടികളുടെ നഷ്ടം

ഒക്ടോബറില്‍ കോടതിയില്‍ സമര്‍പ്പിച്ച രേഖകള്‍ പ്രകാരം കോടിക്കണക്കിന് രൂപയുടെ ഉല്‍പ്പന്നങ്ങളാണ് റിലയന്‍സിന്റെ പക്കലുള്ളത്. 'എനര്‍ജി ഡ്രിങ്ക്' എന്ന് രേഖപ്പെടുത്തിയ 16.8 കോടി ക്യാനുകളും 12 കോടി പ്ലാസ്റ്റിക് കുപ്പികളുമാണ് വില്‍പ്പനയ്ക്ക് തയ്യാറായിട്ടുള്ളത്. ഇതിന് പുറമെ 40 കോടി ക്യാനുകള്‍ക്കും 36 കോടി കുപ്പികള്‍ക്കുമുള്ള പാക്കിങ് കവറുകളും പ്രിന്റ് ചെയ്ത് വെച്ചിട്ടുണ്ട്.

വിലക്ക് വന്നതോടെ സംസ്ഥാന സര്‍ക്കാരുകള്‍ റിലയന്‍സിന്റെ സ്റ്റോക്കുകള്‍ പിടിച്ചെടുക്കുകയും, ഇ-കൊമേഴ്സ് പ്ലാറ്റ്ഫോമുകളില്‍ നിന്ന് ഉല്‍പ്പന്നങ്ങള്‍ നീക്കം ചെയ്യാന്‍ ആവശ്യപ്പെടുകയും ചെയ്തിരുന്നു. ഇത് തങ്ങളുടെ ബിസിനസിനെ സാരമായി ബാധിച്ചുവെന്ന് റിലയന്‍സ് കോടതിയില്‍ വ്യക്തമാക്കിയിരുന്നു.

ചൈനീസ് ഉല്‍പന്നങ്ങളില്‍ കുടുങ്ങിയോ ഇന്ത്യ? ഇന്ത്യ നിയന്ത്രിച്ചപ്പോഴും ഒഴുകി ചൈനീസ് ഉല്‍പ്പന്നങ്ങള്‍

Sangeetha KS — Tue, 06 Oct 2026 16:35:38 +0530

2020 ല്‍ ഗല്‍വാന്‍ താഴ്വരയിലെ ഏറ്റുമുട്ടലിനെ തുടര്‍ന്ന് ഇന്ത്യയും ചൈന തമ്മിലുള്ള നയതന്ത്ര ബന്ധം പൂര്‍ണമായി തകര്‍ന്നിരുന്നു. ഇന്ത്യ ചൈനീസ് ആപ്പുകളായ ടിക് ടോക്ക് അടക്കമുള്ളവ നിരോധിക്കുകയും ആന്റി ഡംപിങ് തീരുവ ചുമത്തുകയും ചെയ്തു. എന്നാല്‍ ഇതിന് ശേഷം വ്യാപാരക്കമ്മി കുറയുന്നതിന് പകരം കുത്തനെ കൂടുകയാണ് ചെയ്തത്. 2020-ല്‍ 44 ബില്യണ്‍ ഡോളറായിരുന്ന വ്യാപാരക്കമ്മി ഈ വര്‍ഷം 112 ബില്യണ്‍ ഡോളറെന്ന ഞെട്ടിക്കുന്ന സംഖ്യയിലെത്തി.

രാഷ്ട്രീയ, സുരക്ഷാ, നിക്ഷേപ ബന്ധങ്ങള്‍ ഏറ്റവും താഴ്ന്ന നിലയിലായിരുന്നപ്പോഴും ചൈനയോടുള്ള ഇന്ത്യയുടെ സാമ്പത്തിക ആശ്രയത്വം വര്‍ദ്ധിക്കുകയാണുണ്ടായതെന്ന് വാഷിംഗ്ടണ്‍ ആസ്ഥാനമായുള്ള ഏഷ്യ സൊസൈറ്റി പോളിസി ഇന്‍സ്റ്റിറ്റ്യൂട്ടിലെ ഗവേഷകന്‍ കെവിന്‍ സോങ്‌ഷെ ലീ വ്യക്തമാക്കുന്നു. കോവിഡിന് മുമ്പുള്ള കാലത്തേക്കാള്‍ കയറ്റുമതി കുറഞ്ഞു നില്‍ക്കുമ്പോഴാണ് ചൈനയില്‍ നിന്നുള്ള ഇറക്കുമതി ഇരട്ടിയായത്. ഇറക്കുമതി ഈ വേഗത്തില്‍ തുടര്‍ന്നാല്‍ വ്യാപാരക്കമ്മി 134 ബില്യണ്‍ ഡോളറിലേക്ക് ഉയര്‍ന്നേക്കാം. ഇത് ഇന്ത്യന്‍ വ്യവസായ മേഖലയില്‍ ചൈനയ്ക്ക് കൂടുതല്‍ സ്വാധീനം നല്‍കും.

സെപ്റ്റംബറില്‍ ഡല്‍ഹിയില്‍ നടന്ന ബ്രിക്‌സ് ഉച്ചകോടിയുടെ ഇടവേളയില്‍ പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷി ജിന്‍പിംഗും കൂടിക്കാഴ്ച നടത്തുകയും ഈ വ്യാപാര അസമത്വം പരിഹരിക്കുമെന്ന് പ്രഖ്യാപിക്കുകയും ചെയ്തിരുന്നു.

ലോകത്തിലെ ഐഫോണുകളുടെ കാല്‍ഭാഗത്തിലധികവും ഇപ്പോള്‍ ഇന്ത്യയിലാണ് നിര്‍മ്മിക്കുന്നത്. എന്നാല്‍ ഇവ നിര്‍മ്മാണത്തേക്കാളേറെ മറ്റ് രാജ്യങ്ങളില്‍ നിന്നുള്ള യന്ത്രഭാഗങ്ങള്‍ കൂട്ടിയിണക്കുന്ന പ്രക്രിയ മാത്രമാണെന്നും ഇതിനാവശ്യമായ ഭാഗങ്ങള്‍ പ്രധാനമായും വരുന്നത് ചൈനയില്‍ നിന്നാണെന്നും വിദഗ്ധര്‍ ചൂണ്ടിക്കാണിക്കുന്നു.

വ്യവസായിക യന്ത്രങ്ങള്‍, ബാറ്ററി ഘടകങ്ങള്‍, കെമിക്കലുകള്‍, സോളാര്‍ സെല്ലുകള്‍ എന്നിവയുടെ കാര്യത്തിലും സ്ഥിതി ഇതുതന്നെ. ഒബ്‌സര്‍വര്‍ റിസര്‍ച്ച് ഫൗണ്ടേഷന്റെ കണക്കനുസരിച്ച്, ഇന്ത്യ ചൈനയില്‍ നിന്ന് ഇറക്കുമതി ചെയ്യുന്നതില്‍ 36 ശതമാനവും ഇലക്ട്രിക്കല്‍ യന്ത്രങ്ങളും ഇലക്ട്രോണിക്‌സുകളുമാണ്. മെഷിനറികളും മെക്കാനിക്കല്‍ ഉപകരണങ്ങളും 21.7 ശതമാനം വരും. ഓര്‍ഗാനിക് കെമിക്കലുകള്‍ക്കും പ്ലാസ്റ്റിക്കിനും വലിയ പങ്കുണ്ട്. ഇവയുടെ വിതരണം തടസ്സപ്പെട്ടാല്‍ അത് ഉപഭോഗത്തെ മാത്രമല്ല, രാജ്യത്തെ ഉല്‍പ്പാദന മേഖലയെത്തന്നെ നിശ്ചലമാക്കും

ചൈനയുടെ തന്ത്രവും പാശ്ചാത്യ രാജ്യങ്ങളുടെ വിലക്കും

സ്റ്റീല്‍, സോളാര്‍ പാനലുകള്‍, ഇലക്ട്രിക് വാഹനങ്ങള്‍ എന്നിവയില്‍ ചൈനയില്‍ ആവശ്യത്തിലധികം ഉല്‍പ്പാദനം നടക്കുന്നുണ്ട്. എന്നാല്‍ സ്വന്തം നാട്ടിലെ സാമ്പത്തിക മന്ദഗതി കാരണം ഇവ വിറ്റഴിക്കാനാവുന്നില്ല. അതിനാല്‍ അവര്‍ ഉല്‍പന്നങ്ങള്‍ വിലകുറച്ച് വിദേശ വിപണികളിലേക്ക് തള്ളുകയാണ്. ചൈനയുടെ വ്യാപാര മിച്ചം തുടര്‍ച്ചയായ രണ്ടാം വര്‍ഷവും 1 ട്രില്യണ്‍ ഡോളറിന് മുകളിലെത്തുമെന്നാണ് പ്രതീക്ഷിക്കുന്നത്. പാശ്ചാത്യ രാജ്യങ്ങള്‍ ചൈനീസ് ഉല്‍പന്നങ്ങള്‍ക്ക് വന്‍തോതില്‍ നികുതി ചുമത്തുന്നതും നിയന്ത്രണങ്ങള്‍ ഏര്‍പ്പെടുത്തുന്നതും കാരണം ഈ ഉല്‍പന്നങ്ങളില്‍ ഭൂരിഭാഗവും ഇന്ത്യയിലേക്കാണ് ഒഴുകിയെത്തുന്നത്.

മറുവശത്ത്, ഇന്ത്യന്‍ കമ്പനികള്‍ക്ക് ചൈനീസ് വിപണിയില്‍ പ്രവേശിക്കുന്നത് എളുപ്പമല്ല. അവിടെ ഉയര്‍ന്ന നികുതിയും മറ്റ് തടസങ്ങളുമുണ്ട്. വിപണി തുറന്നു നല്‍കാന്‍ ചൈന തയ്യാറായില്ലെങ്കില്‍ രാഷ്ട്രീയ ബന്ധം മെച്ചപ്പെട്ടാലും സാമ്പത്തിക ആശ്രയത്വം മാറ്റമില്ലാതെ തുടരുമെന്ന് കെവിന്‍ ലീ പറയുന്നു. ഇന്ത്യയിലെ നിര്‍മ്മാണ മേഖല ശക്തിപ്പെടുത്തുകയാണ് ഇതിനുള്ള ദീര്‍ഘകാല പരിഹാരം. എന്നാല്‍ ഇതിന് കുറഞ്ഞ ചെലവില്‍ വൈദ്യുതി, വായ്പ, മെച്ചപ്പെട്ട ഗതാഗത സൗകര്യങ്ങള്‍, സുസ്ഥിരമായ നിയമങ്ങള്‍ എന്നിവ അത്യാവശ്യമാണ്.

കേരളത്തിൽ സ്വർണ വിലയിൽ വർധനവ്; ഇന്നത്തെ നിരക്കറിയാം

Sangeetha KS — Fri, 09 Oct 2026 09:48:07 +0530

തിരുവനന്തപുരം: സംസ്ഥാനത്ത് സ്വ‌‍‌ർണ വിലയിൽ വ‍ർധനവ്. ഇന്ന് 22 കാരറ്റ് ഒരു ഗ്രാം സ്വ‍ർണത്തിന് 105 രൂപയാണ് കൂടിയിരിക്കുന്നത്. ഇതോടെ സ്വ‍‌ർണം ഗ്രാമിന് 13,815 രൂപയും പവന് 1,10,520 രൂപയും ആയതായി കേരളാ ഗോൾഡ് ആന്റ് സിൽവ‍‍ർ മെ‌ർച്ചന്റ്സ് അസോസിയേഷൻ അറിയിച്ചു. ഇന്നലെ സംസ്ഥാനത്ത് സ്വ‍‌ർണ വിലയിൽ മാറ്റമില്ലാതെ തുടരുകയായിരുന്നു. അതിന് ശേഷമാണ് ഒറ്റയടിക്ക് പവന് 840 രൂപയോളം വർധിച്ചിരിക്കുന്നത്. അതേ സമയം സംസ്ഥാനത്ത് വെള്ളി വില മാറ്റമില്ലാതെ തുടരുകയാണ്. ഇന്ന് വെള്ളി ഗ്രാമിന് 235 രൂപയിലും പവന് 2,350 രൂപയിലുമാണ് വ്യാപാരം നടക്കുന്നത്.

കഴിഞ്ഞ 10 ദിവസങ്ങളിലെ സ്വർണ നിരക്ക്

ഒക്ടോബ‍‌ർ 9- 1,10,520 രൂപ

ഒക്ടോബ‍ർ 8- 1,09,680 രൂപ

ഒക്ടോബ‍‌ർ 7- 1,09,680 രൂപ

ഒക്ടോബർ 6- 1,09,280 രൂപ

ഒക്ടോബർ 5- 1,09,400 രൂപ

ഒക്ടോബർ 4- 1,09,400 രൂപ

ഒക്ടോബർ 3- 1,09,400 രൂപ

ഒക്ടോബർ 2- 1,10,200 രൂപ

ഒക്ടോബർ 1- 1,09,440 രൂപ

സെപ്റ്റംബർ 30- 1,09,680 രൂപ

സെപ്റ്റംബർ 29- 1,09,120 രൂപ

പുതിയ കാർ വാങ്ങാനൊരുങ്ങുകയാണോ? അടിമുടി അറിയണം ഇൻഷുറൻസ് പോളിസികളെപ്പറ്റി!

Sangeetha KS — Tue, 06 Oct 2026 16:00:51 +0530

ഉത്സവകാലം എത്തിയതോടെ പുതിയ കാറുകൾ വാങ്ങുന്നവരുടെ എണ്ണത്തിൽ വൻ വർധനവാണ് ഉണ്ടാകുന്നത്. കാർ സ്വന്തമാക്കുമ്പോൾ അതിനുള്ള ഫിനാൻസിങ് ഓപ്ഷനുകൾ തെരഞ്ഞെടുക്കുന്നതിനൊപ്പം തന്നെ പ്രധാനമാണ് ഇൻഷുറൻസ് വിവരങ്ങളും കൃത്യമായി മനസിലാക്കുക എന്നത്. ഇന്ത്യയിൽ കാർ ഇൻഷുറൻസ് എന്നത് നിയമപരമായ ബാധ്യത എന്നതിലുപരി, വാഹനത്തിനുണ്ടാകുന്ന അപ്രതീക്ഷിത സാമ്പത്തിക നഷ്ടങ്ങളിൽ നിന്ന് സംരക്ഷണം നൽകുന്ന പ്രധാന കവറേജ് കൂടിയാണ്.

വാഹനത്തിന്റെ മോഡലും തരവും അനുസരിച്ച് ഇൻഷുറൻസ് പ്രീമിയത്തിൽ മാറ്റങ്ങൾ വരാറുണ്ട്. പ്രത്യേകിച്ച് എസ്‌.യു.വി വിഭാഗത്തിലുള്ള ഡീസൽ വാഹനങ്ങൾക്ക് ഒരു വർഷത്തെ സ്വന്തം വാഹനത്തിനുള്ള പരിരക്ഷ, മൂന്ന് വർഷത്തെ തേർഡ് പാർട്ടി കവറേജ്, അധിക ആഡ്-ഓണുകൾ എന്നിവയടക്കം ഇൻഷുറൻസ് തുക 40,000 രൂപയ്ക്ക് മുകളിൽ വരാൻ സാധ്യതയുണ്ട്. അതിനാൽ പുതിയ കാർ വാങ്ങുമ്പോൾ ഇൻഷുറൻസ് രേഖകളിൽ ഒപ്പുവെക്കുന്നതിന് മുൻപ് പ്രീമിയത്തിന്റെ ഘടന വ്യക്തമായി മനസിലാക്കേണ്ടതുണ്ട്.

ഒരു പുതിയ കാർ ഇൻഷുറൻസ് പ്രീമിയത്തിൽ സ്വന്തം വാഹനത്തിനുണ്ടാകുന്ന കേടുപാടുകൾക്കുള്ള തുകയും തേർഡ് പാർട്ടി കവറേജും ഓപ്ഷണൽ ആഡ്-ഓണുകളും ഉൾപ്പെടുന്നു. ഇൻഷുറൻസ് കമ്പനി നിർണ്ണയിക്കുന്ന വാഹനത്തിന്റെ പരമാവധി മൂല്യമായ ഐ.ഡി.വി (Insured Declared Value - IDV) കാറിന്റെ എക്സ്-ഷോറൂം വിലയുടെ 95 ശതമാനം വരെ ലഭിക്കും. വാഹനം പൂർണമായി നഷ്ടപ്പെടുകയോ മോഷ്ടിക്കപ്പെടുകയോ ചെയ്യുമ്പോൾ ലഭിക്കുന്ന പരമാവധി തുകയാണിത്.

ഇൻഷുറൻസ് എടുക്കുമ്പോൾ ആവശ്യമായ ആഡ്- ഓണുകൾ മാത്രം തെരഞ്ഞെടുക്കാൻ ഉടമകൾ ശ്രദ്ധിക്കണം. വാഹന ഭാഗങ്ങൾ മാറ്റിവെക്കുമ്പോൾ ഉണ്ടാകുന്ന തേയ്മാന ചെലവുകൾ ഒഴിവാക്കാൻ സീറോ ഡിപ്രിസിയേഷൻ കവർ സഹായിക്കും. വാഹനം നഷ്ടപ്പെട്ടാൽ വാങ്ങിയ വില തന്നെ തിരികെ ലഭിക്കാൻ റിട്ടേൺ ടു ഇൻവോയ്സ് ഉപകരിക്കുമ്പോൾ, വെള്ളക്കെട്ടുള്ള പ്രദേശങ്ങളിലുള്ളവർക്ക് എഞ്ചിൻ പ്രൊട്ടക്ഷനും യാത്രകൾ കൂടുതൽ ചെയ്യുന്നവർക്ക് റോഡ്‌സൈഡ് അസിസ്റ്റൻസും സഹായകരമാണ്. എന്നാൽ ടയർ പ്രൊട്ടക്ഷൻ, കീ റീപ്ലേസ്‌മെന്റ് തുടങ്ങിയവ ആവശ്യമെങ്കിൽ മാത്രം ഉൾപ്പെടുത്തിയാൽ മതിയാകും. കാർ ഡീലർമാർ നൽകുന്ന പാക്കേജ് അതുപോലെ സ്വീകരിക്കുന്നതിന് പകരം വിവിധ കമ്പനികളുടെ പോളിസികൾ തമ്മിൽ താരതമ്യം ചെയ്യുന്നത് പ്രീമിയം തുക ലാഭിക്കാൻ സഹായിക്കും.

കുറഞ്ഞ പ്രീമിയം വാഗ്ദാനം ചെയ്യുന്ന പോളിസികളിൽ പലപ്പോഴും കുറഞ്ഞ ഐ.ഡി.വിയോ അല്ലെങ്കിൽ ക്ലെയിം സമയത്ത് ഉയർന്ന കൈയ്യിൽ നിന്നുള്ള ചെലവുകളോ ഉണ്ടാകാൻ സാധ്യതയുണ്ട്. അതുപോലെ അപകടങ്ങൾ സംഭവിച്ചാൽ എതിർകക്ഷിയുമായി തർക്കത്തിൽ ഏർപ്പെടാതെ സുരക്ഷിത സ്ഥാനത്തേക്ക് മാറുകയും, വാഹനം, ഡ്രൈവർ, ഇൻഷുറൻസ് വിവരങ്ങൾ പരസ്പരം കൈമാറുകയും വേണം. ഡ്രൈവിംഗ് ലൈസൻസ്, ആർ.സി, എഫ്.ഐ.ആർ, ക്ലെയിം ഫോം, അപകടസ്ഥലത്തെ ചിത്രങ്ങൾ എന്നിവ സഹിതം പോലീസിലും ഇൻഷുറൻസ് കമ്പനിയിലും വിവരമറിയിച്ച് സർവേയർ പരിശോധനയ്ക്ക് ശേഷമേ റിപ്പയറിംഗ് ജോലികൾ ആരംഭിക്കാവൂ.

ഇന്ത്യയുടെ ശബ്‍ദമാകാൻ ഈ ആഗോള എഐ കമ്പനി വരുന്നു!

Prashobh Prasannan — Thu, 08 Oct 2026 11:30:24 +0530

ഇന്ത്യയിൽ വൻ നിക്ഷേപത്തിന് ഒരുങ്ങി ലണ്ടൻ ആസ്ഥാനമായ എഐ വോയ്സ് കമ്പനിയായ ഇലവൻലാബ്സ്. ഇന്ത്യയിലെ പ്രവർത്തനങ്ങൾക്കായി കോടിക്കണക്കിന് ഡോളർ നിക്ഷേപിക്കുമെന്നും വർഷാവസാനത്തോടെ രാജ്യത്ത് 100 അംഗങ്ങളുള്ള ടീമിനെ രൂപീകരിക്കുമെന്നും കമ്പനി അറിയിച്ചു. അമേരിക്കയ്ക്ക് പുറത്തുള്ള ഇലവൻലാബ്സിന്റെ ഏറ്റവും വലിയ വിപണിയാണ് ഇന്ത്യ. ഇന്ത്യയിലെ പ്രവർത്തനങ്ങൾക്കായി ‘നൂറുകണക്കിന് മില്യൺ ഡോളർ’ നിക്ഷേപിക്കാനാണ് പദ്ധതിയെന്ന് ഇലവൻലാബ്സ് സഹസ്ഥാപകൻ മാറ്റി സ്റ്റാനിഷെവ്സ്കി പറഞ്ഞു. വോയ്സ് എഐ രംഗത്ത് ഇന്ത്യക്ക് ആഗോള തലത്തിൽ നേതൃത്വം നൽകാനാകുമെന്നും ഇന്ത്യയെ വോയ്സ് എഐയുടെ പരീക്ഷണശാലയാക്കി മാറ്റാൻ കഴിയുമെന്നും അദ്ദേഹം പറഞ്ഞു.

ഇന്ത്യൻ ഭാഷകൾക്ക് പ്രാധാന്യം

ഇന്ത്യൻ ഭാഷകൾക്ക് അനുസൃതമായി എഐ വോയ്സ് മോഡലുകൾ അടിസ്ഥാനതലത്തിൽ തന്നെ വികസിപ്പിക്കാനാണ് കമ്പനിയുടെ പദ്ധതി. ആദ്യ മോഡൽ പുറത്തിറക്കിയപ്പോൾ തന്നെ ഹിന്ദിക്ക് വലിയ പ്രാധാന്യം നൽകിയിരുന്നുവെന്നും ഇന്ത്യൻ ഭാഷകൾക്ക് പിന്തുണ നൽകുന്നതിനായി തുടക്കം മുതൽ തന്നെ സാങ്കേതിക ഘടന ക്രമീകരിച്ചിരുന്നുവെന്നും സ്റ്റാനിഷെവ്‍സ്‍കി വ്യക്തമാക്കി. ഇംഗ്ലീഷ് ഭാഷയിൽ ആദ്യം മോഡൽ വികസിപ്പിച്ച് പിന്നീട് മറ്റ് ഭാഷകളിലേക്ക് എത്തിക്കുന്ന രീതിക്ക് പകരം പ്രാദേശികമായി തന്നെ സാങ്കേതികവിദ്യ വികസിപ്പിക്കണമെന്നാണ് കമ്പനിയുടെ നിലപാട്. നിലവിൽ 14 ഇന്ത്യൻ ഭാഷകൾ ഇലവൻലാബ്‍സ് പിന്തുണയ്ക്കുന്നുണ്ട്. 22 ഭാഷകൾ കൂടി ഉൾപ്പെടുത്താനുള്ള പ്രവർത്തനങ്ങളും പുരോഗമിക്കുകയാണ്.

ഇന്ത്യയിൽ 25,000ത്തിലധികം ഉപയോക്താക്കൾ

ഇന്ത്യയിൽ 250 സ്ഥാപനങ്ങളുമായി കമ്പനി പ്രവർത്തിക്കുന്നതായി ഇലവൻലാബ്‍സ് ജനറൽ മാനേജറും ഇന്ത്യാ വിഭാഗം മേധാവിയുമായ കാർത്തിക് രാജാറാം പറഞ്ഞു. 14 ഇന്ത്യൻ ഭാഷകളിലായി പ്രതിവർഷം 100 മില്യൺ എഐ ഏജന്റ് സംഭാഷണങ്ങൾ നടക്കുന്നുണ്ടെന്നും അദ്ദേഹം വ്യക്തമാക്കി. ഇന്ത്യയിൽ പ്രതിമാസം 25,000ത്തിലധികം ഡെവലപ്പർമാരും സ്ഥാപനങ്ങളും കമ്പനിയുടെ എപിഐ ഉപയോഗിക്കുന്നുണ്ട്. കഴിഞ്ഞ ഒരു വർഷത്തിനിടെ ഇത് ഏകദേശം 2.5 മടങ്ങ് വർധിച്ചതായും രാജാറാം പറഞ്ഞു. ഫിസിക്സ്വാല, ഹാവെൽസ്, റേസർപേ എന്നിവയ്ക്ക് പുറമെ മീശോ, അർബൻ കമ്പനി, കാർസ്24, 99 ഏക്കേഴ്സ്, ടിവിഎസ് മോട്ടോർ, മഹീന്ദ്ര, ഐഡിഎഫ്സി ഫസ്റ്റ് ബാങ്ക് തുടങ്ങിയവയും കമ്പനിയുടെ ഉപഭോക്താക്കളാണ്.

എന്താണ് ഇലവൻലാബ്സ്?

2022ൽ മാറ്റി സ്റ്റാനിഷെവ്സ്കിയും പിയോട്ടർ ഡബ്കോവ്സ്കിയും ചേർന്ന് സ്ഥാപിച്ച കമ്പനിയാണ് ഇലവൻലാബ്സ്. എഴുത്തിനെ ശബ്ദമാക്കി മാറ്റുക, ശബ്ദം പകർത്തുക, മനുഷ്യരുമായി സംഭാഷണം നടത്താൻ കഴിയുന്ന എഐ ഏജന്റുകൾ വികസിപ്പിക്കുക തുടങ്ങിയ സാങ്കേതികവിദ്യകളാണ് കമ്പനി ഒരുക്കുന്നത്. ഉപഭോക്തൃ സേവനം, റീഫണ്ട് നടപടികൾ, ഇൻഷുറൻസ് പോളിസി പുതുക്കൽ തുടങ്ങിയ വിവിധ ആവശ്യങ്ങൾക്കായി കമ്പനിയുടെ സാങ്കേതികവിദ്യ ഉപയോഗിക്കുന്നുണ്ട്. ഇന്ത്യൻ ശബ്ദങ്ങളും ഉച്ചാരണരീതികളും പരിഗണിച്ചാണ് എഐ ഏജന്റുകൾ വികസിപ്പിക്കുന്നതെന്നും കമ്പനി അറിയിച്ചു.

കർണാടകയിലും പ്രത്യേക പദ്ധതി

കർണാടക ഇന്നൊവേഷൻ ആൻഡ് ടെക്നോളജി സൊസൈറ്റിയുമായി ഇലവൻലാബ്സ് ധാരണാപത്രവും ഒപ്പുവച്ചു. വൺ മില്യൺ വോയ്സസ് പദ്ധതിയുടെ ഭാഗമായി സംസ്ഥാന സർക്കാർ കണ്ടെത്തുന്ന അർഹരായവർക്ക് സൗജന്യ ആജീവനാന്ത ലൈസൻസുകൾ നൽകും. വായ, തൊണ്ട എന്നിവിടങ്ങളിലെ അർബുദം, എഎൽഎസ്, മറ്റ് നാഡീസംബന്ധമായ രോഗങ്ങൾ എന്നിവ കാരണം സംസാരശേഷി നഷ്ടപ്പെട്ടവർക്ക് സ്വന്തം ശബ്ദത്തിന് സമാനമായ കൃത്രിമ ശബ്ദത്തിലൂടെ ആശയവിനിമയം നടത്താൻ സഹായിക്കുന്നതാണ് പദ്ധതി. കന്നഡയിലും ഈ സൗകര്യം ലഭ്യമാക്കും. മൈസൂരിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് സ്പീച്ച് ആൻഡ് ഹിയറിങ്ങുമായി സഹകരിച്ച് പദ്ധതി നടപ്പാക്കാനുള്ള നടപടികളും പുരോഗമിക്കുകയാണ്. സംസാരശേഷി, കേൾവിശേഷി, ശബ്ദം എന്നിവ നഷ്ടപ്പെട്ടവർക്കായി വോയ്സ് സാങ്കേതികവിദ്യ കൂടുതൽ ലഭ്യമാക്കുന്നതിനായി മറ്റ് സ്ഥാപനങ്ങളുമായും ഇലവൻലാബ്സ് ധാരണയിലെത്തിയിട്ടുണ്ട്.

ഇന്ത്യയിൽ ആഗോള എഐ കമ്പനികളുടെ സാന്നിധ്യം ശക്തമാകുന്നതിനിടെയാണ് ഇലവൻലാബ്സിന്റെ പുതിയ നീക്കം. ഓപ്പൺഎഐ, ആന്ത്രോപിക് എന്നിവ ഇന്ത്യയിൽ ഓഫീസുകൾ തുറക്കുകയും പ്രാദേശിക പങ്കാളിത്തം വർധിപ്പിക്കുകയും ചെയ്തിട്ടുണ്ട്. ആമസോൺ, മൈക്രോസോഫ്റ്റ്, ഗൂഗിൾ തുടങ്ങിയ കമ്പനികളും എഐ, ക്ലൗഡ്, ഡാറ്റാ സെന്റർ മേഖലകളിൽ ഇന്ത്യയിലെ നിക്ഷേപം ശക്തമാക്കുകയാണ്.

സുന്ദർ പിച്ചൈയെ മറികടന്ന് ആന്ത്രോപിക് സിഇഒ! ഡാരിയോ അമോഡെയിയുടെ പ്രതിഫലം ഞെട്ടിക്കും

Prashobh Prasannan — Wed, 07 Oct 2026 14:58:02 +0530

സിലിക്കൺ വാലിയിലെ ഏറ്റവും ഉയർന്ന പ്രതിഫലം വാങ്ങുന്ന സിഇഒമാരുടെ പട്ടികയിൽ ഇടംപിടിച്ച് ആന്ത്രോപിക് സിഇഒ ഡാരിയോ അമോഡെയി. 2025ൽ ഡാരിയോയ്ക്ക് ലഭിച്ച ആകെ പ്രതിഫലം ഗൂഗിൾ സിഇഒ സുന്ദർ പിച്ചൈയുടേതിനേക്കാൾ കൂടുതലാണെന്നാണ് റിപ്പോർട്ട്. ആന്ത്രോപിക് സമർപ്പിച്ച പ്രാഥമിക ഓഹരി വിൽപ്പന രേഖകളിലാണ് ഡാരിയോയുടെ പ്രതിഫലവുമായി ബന്ധപ്പെട്ട വിവരങ്ങൾ പുറത്തുവന്നത്. 2025ൽ ഡാരിയോയ്ക്ക് ആകെ 18 മില്യൺ ഡോളറാണ് പ്രതിഫലമായി ലഭിച്ചത്. എന്നാൽ ഇതിൽ ഭൂരിഭാഗവും ഓഹരികളും ഓഹരിയുമായി ബന്ധപ്പെട്ട മറ്റ് ആനുകൂല്യങ്ങളുമാണ്. അദ്ദേഹത്തിന്റെ യഥാർഥ ശമ്പളം 1.4 മില്യൺ ഡോളറായിരുന്നു.

സഹോദരിക്കും കോടികളുടെ പ്രതിഫലം

ഡാരിയോ അമോഡെയിയുടെ സഹോദരിയും ആന്ത്രോപിക് പ്രസിഡന്റുമായ ഡാനിയേല അമോഡെയിക്ക് 2025ൽ 16.4 മില്യൺ ഡോളറാണ് ആകെ പ്രതിഫലമായി ലഭിച്ചത്. ഇവിടെയും ഓഹരികളും ഓഹരി ഓപ്ഷനുകളുമാണ് പ്രതിഫലത്തിന്റെ വലിയൊരു ഭാഗം. ഡാരിയോയുടെയും ഡാനിയേലയുടെയും വാർഷിക ശമ്പളം ജൂലൈയിൽ 1.4 മില്യൺ ഡോളറായി ഇരട്ടിയാക്കിയിരുന്നു. ഇതിന് പുറമെ ഇരുവർക്കും ഈ വർഷം അധിക നിയന്ത്രിത ഓഹരി യൂണിറ്റുകളും ആന്ത്രോപിക്കിന്റെ ഡയറക്ടർ ബോർഡ് അനുവദിച്ചിട്ടുണ്ട്. ഇതിൽ ചിലത് കമ്പനിയിലെ തുടർച്ചയായ സേവനവുമായി ബന്ധപ്പെട്ടതാണ്. മറ്റുചില ആനുകൂല്യങ്ങൾ കമ്പനിയുടെ പ്രാഥമിക ഓഹരി വിൽപ്പനയുമായി ബന്ധപ്പെട്ടവയാണ്.

സുന്ദർ പിച്ചൈയുടെ പ്രതിഫലം എത്ര?

2025ൽ ആൽഫബെറ്റ് സിഇഒ സുന്ദർ പിച്ചൈക്ക് റിപ്പോർട്ട് ചെയ്ത ആകെ പ്രതിഫലം 10.9 മില്യൺ ഡോളറായിരുന്നു. ആമസോൺ സിഇഒ ആൻഡി ജാസിക്ക് ലഭിച്ചത് 2.1 മില്യൺ ഡോളറും. എന്നാൽ ഓഹരി ആനുകൂല്യങ്ങളുടെ മാറുന്ന മൂല്യം കൂടി കണക്കിലെടുക്കുമ്പോൾ ചിത്രം വ്യത്യസ്തമാണ്. പിച്ചൈയുടെ ആകെ പ്രതിഫലത്തിന്റെ മൂല്യം 213.9 മില്യൺ ഡോളറായും ജാസിയുടേത് 13.2 മില്യൺ ഡോളറായും ഉയരും. അതുകൊണ്ടുതന്നെ ഡാരിയോയുടെ 18 മില്യൺ ഡോളർ പ്രതിഫലം പിച്ചൈയുടേതിനേക്കാൾ കൂടുതലാണെന്ന് പറയുമ്പോൾ, ഇരുവരുടെയും ആകെ സമ്പത്തിന്റെ മൂല്യം ഇതിന്റെ അടിസ്ഥാനത്തിൽ മാത്രം താരതമ്യം ചെയ്യാനാകില്ല.

ആന്ത്രോപിക്കിന്റെ ഓഹരികൾ നിർണായകം

സ്ഥാപക സിഇഒമാരുടെ സമ്പത്തിന്റെ വലിയൊരു ഭാഗം പലപ്പോഴും വാർഷിക ശമ്പളത്തിൽ നിന്നല്ല, അവർ കമ്പനിയിൽ കൈവശം വച്ചിരിക്കുന്ന ഓഹരികളിൽ നിന്നാണ് ഉണ്ടാകുന്നത്. അതിനാൽ ആന്ത്രോപിക് ഓഹരി വിപണിയിൽ ലിസ്റ്റ് ചെയ്തതിന് ശേഷമുള്ള കമ്പനിയുടെ പ്രകടനം ഡാരിയോയുടെയും മറ്റ് സ്ഥാപകരുടെയും സമ്പത്തിൽ വലിയ സ്വാധീനം ചെലുത്തിയേക്കാം.

രണ്ട് ട്രില്യൺ ഡോളർ മൂല്യം ലക്ഷ്യമിട്ട് ആന്ത്രോപിക്

ഡാരിയോ അമോഡെയിയുടെ പ്രതിഫല വിവരങ്ങൾ പുറത്തുവന്നത് ആന്ത്രോപിക് പ്രാഥമിക ഓഹരി വിൽപ്പനയ്ക്ക് ഒരുങ്ങുന്നതിനിടെയാണ്. റോയിട്ടേഴ്സ് റിപ്പോർട്ട് ചെയ്ത കമ്പനിയുടെ പ്രോസ്പെക്ടസ് പ്രകാരം, ഈ വർഷം ശരത്കാലത്തോടെ തന്നെ ആന്ത്രോപിക് ഓഹരി വിപണിയിൽ പ്രവേശിച്ചേക്കും. കമ്പനിയുടെ മൂല്യം 2 ട്രില്യൺ ഡോളറിന് മുകളിലെത്താനുള്ള സാധ്യതയും റിപ്പോർട്ടിലുണ്ട്. ക്ലോഡ് എന്ന എഐ സേവനത്തിന്റെ നിർമാതാക്കളാണ് ആന്ത്രോപിക്.

എഐ കമ്പനികളിലെ ഉയർന്ന പ്രതിഫലം

എഐ മേഖലയിലെ കമ്പനികൾ ഉന്നത ഉദ്യോഗസ്ഥർക്ക് നൽകുന്ന പ്രതിഫലത്തിലെ വ്യത്യാസവും കണക്കുകൾ വ്യക്തമാക്കുന്നു. 2025ൽ ഒറാക്കിൾ സഹസിഇഒ ക്ലേട്ടൺ മഗോയർക്കിന് 627.5 മില്യൺ ഡോളറാണ് പ്രതിഫലമായി ലഭിച്ചത്. അതേസമയം ടെസ്‌ല സിഇഒ ഇലോൺ മസ്കിന് സ്പേസ് എക്സ് ഓഹരി വിപണിയിൽ പ്രവേശിക്കുന്നതിന് മുമ്പ് സിഇഒ എന്ന നിലയിൽ ലഭിച്ച പ്രതിഫലം വെറും 54,080 ഡോളറായിരുന്നു.

സമ്പത്തിന്റെ വലിയൊരു ഭാഗം ജീവകാരുണ്യ പ്രവർത്തനങ്ങൾക്ക്

ഡാരിയോ, ഡാനിയേല അമോഡെയി സഹോദരങ്ങൾ ഉൾപ്പെടെ ആന്ത്രോപിക്കിന്റെ മറ്റ് സഹസ്ഥാപകരും തങ്ങളുടെ വ്യക്തിഗത ആന്ത്രോപിക് ഓഹരികളുടെ 80 ശതമാനം ജീവകാരുണ്യ പ്രവർത്തനങ്ങൾക്കായി മാറ്റിവയ്ക്കുമെന്ന് പ്രഖ്യാപിച്ചിട്ടുണ്ട്. കമ്പനിയുടെ വളർച്ചയ്ക്കൊപ്പം ഈ ഓഹരികളുടെ മൂല്യം ഉയരുകയാണെങ്കിൽ, ജീവകാരുണ്യ പ്രവർത്തനങ്ങൾക്കായി മാറ്റിവയ്ക്കുന്ന തുകയും ഗണ്യമായി വർധിച്ചേക്കും.

യാത്രക്കാരുടെ ശ്രദ്ധയ്ക്ക്; ഇൻഡിഗോയ്ക്ക് പിന്നാലെ വിമാന ടിക്കറ്റ് നിരക്ക് വർധിപ്പിച്ച് എയർ ഇന്ത്യയും!

Sangeetha KS — Fri, 09 Oct 2026 10:19:01 +0530

ദില്ലി: വ്യോമയാന ഇന്ധന വിലയിലുണ്ടായ തുടർച്ചയായ വർധനവിനെ തുടർന്ന് ആഭ്യന്തര, അന്താരാഷ്ട്ര വിമാന സർവീസുകളുടെ ഫ്യുവൽ സർചാർജ് വർധിപ്പിച്ച് എയർ ഇന്ത്യയും എയർ ഇന്ത്യ എക്സ്പ്രസും. ആഗോള വിപണിയിൽ എണ്ണവിലയിലുണ്ടായ വ്യതിയാനവും പ്രവർത്തനച്ചെലവ് ഉയർന്നതുമാണ് നിരക്ക് വർധനവിന് കാരണം. കുറച്ചു ദിവസങ്ങൾക്ക് മുൻപ് ഇൻഡിഗോയും ഇന്ധന സർചാർജ് പരിഷ്കരിച്ചിരുന്നു. ഇതിന് പിന്നാലെയാണ് ഇപ്പോൾ ടാറ്റാ ഗ്രൂപ്പിന് കീഴിലുള്ള എയർ ഇന്ത്യയും എയർ ഇന്ത്യ എക്സ്പ്രസും യാത്രാനിരക്ക് കൂട്ടാൻ തീരുമാനിച്ചിരിക്കുന്നത്.

പുതിയ നിരക്കുകൾ പ്രകാരം ആഭ്യന്തര സർവീസുകളിൽ 1,001 മുതൽ 1,500 കിലോമീറ്റർ വരെയുള്ള യാത്രകൾക്ക് 850 രൂപയും, 1,500 കിലോമീറ്ററിന് മുകളിലുള്ള ദീർഘദൂര യാത്രകൾക്ക് 1,200 രൂപയുമാണ് ഫ്യുവൽ സർചാർജ് ഈടാക്കുക. അന്താരാഷ്ട്ര സർവീസുകളിലും വലിയ വർധനവാണ് വരുത്തിയിട്ടുള്ളത്. നോർത്ത് അമേരിക്കയിലേക്കുള്ള വിമാനങ്ങൾക്ക് 215 യു.എസ് ഡോളറും ഓസ്‌ട്രേലിയയിലേക്ക് 210 യു.എസ് ഡോളറും യുകെ ഉൾപ്പെടെയുള്ള യൂറോപ്യൻ രാജ്യങ്ങളിലേക്കുള്ള സർവീസുകൾക്ക് 135 യു.എസ് ഡോളറുമാണ് പരിഷ്കരിച്ച സർചാർജ്.

ഒക്ടോബർ 9 അർദ്ധരാത്രി മുതൽ എയർ ഇന്ത്യ എക്സ്പ്രസിലും രാവിലെ 11 മണി മുതൽ എയർ ഇന്ത്യയിലും നടത്തുന്ന പുതിയ ബുക്കിംഗുകൾക്ക് പരിഷ്കരിച്ച നിരക്ക് ബാധകമാകും. ഒരു വിമാന സർവീസിന്റെ മൊത്തം പ്രവർത്തനച്ചെലവിന്റെ 40 ശതമാനത്തോളവും വ്യോമയാന ഇന്ധനത്തിനായാണ് ചെലവാകുന്നത്. ഭൗമരാഷ്ട്രീയ സാഹചര്യങ്ങൾ കാരണം വർധിച്ചുവരുന്ന ഈ വലിയ സാമ്പത്തിക ഭാരം ഭാഗികമായി പ്രതിരോധിക്കാനാണ് സർചാർജ് വർധിപ്പിച്ചതെന്ന് എയ‍‌ർ ഇന്ത്യ അറിയിച്ചു. വരും ദിവസങ്ങളിലും ഇന്ധനവില ഇതേ നിലയിൽ തുടരുകയാണെങ്കിൽ യാത്രാനിരക്കുകൾ ഇനിയും ഉയരാനാണ് സാധ്യത.

ഐഫോണുകൾക്ക് വമ്പൻ ഓഫർ; ഈ വിലക്കുറവ് നിങ്ങളെ അമ്പരപ്പിക്കും

Prashobh Prasannan — Wed, 07 Oct 2026 12:39:14 +0530

ഉത്സവ സീസൺ ആരംഭിച്ചതോടെ ഐഫോൺ വാങ്ങാൻ ആഗ്രഹിക്കുന്നവർക്ക് മികച്ച ഓഫറുകളുമായി പ്രമുഖ റീട്ടെയിൽ സ്ഥാപനങ്ങൾ. ആപ്പിളിന്റെ വിവിധ ഐഫോൺ മോഡലുകൾക്ക് ഓൺലൈൻ, ഓഫ്‌ലൈൻ പ്ലാറ്റ്‌ഫോമുകളിൽ വിലക്കുറവ് ലഭ്യമാണ്. റിലയൻസ് ഡിജിറ്റലിന്റെ ഫെസ്റ്റിവൽ ഓഫ് ഇലക്ട്രോണിക്സ് വിൽപ്പനയുടെ ഭാഗമായി ഐഫോൺ മോഡലുകൾക്ക് പ്രത്യേക ഓഫറുകളും പ്രഖ്യാപിച്ചിട്ടുണ്ട്. ഒക്ടോബർ 9ന് ആരംഭിക്കുന്ന വിൽപ്പനയിൽ രാവിലെ 9 മണി മുതൽ ഐഫോൺ ഓഫറുകൾ ലഭ്യമാകും. ഐഫോൺ 15, ഐഫോൺ 16, ഐഫോൺ 17 മോഡലുകൾക്ക് പുറമെ ഐഫോൺ 17 പ്രോ, ഐഫോൺ 17 പ്രോ മാക്സ് മോഡലുകൾക്കും വിവിധ ആനുകൂല്യങ്ങൾ ലഭിക്കും.

ഐഫോൺ 17 ഇനി 68,899 രൂപയ്ക്ക്?

റിലയൻസ് ഡിജിറ്റലിലെ പ്രധാന ഓഫറുകളിലൊന്ന് 256 ജിബി സ്റ്റോറേജുള്ള ഐഫോൺ 17നാണ്. വിൽപ്പന കാലയളവിൽ 79,899 രൂപയ്ക്കാണ് ഫോൺ ലഭിക്കുക. ഇതിന് പുറമെ 3,000 രൂപയുടെ ബാങ്ക് ക്യാഷ്ബാക്കും 8,000 രൂപയുടെ എക്സ്ചേഞ്ച് ബോണസും ലഭിക്കും. ഇവ രണ്ടും ലഭിച്ചാൽ ഫോണിന്റെ ഫലപ്രദമായ വില 68,899 രൂപയായി കുറയും.

ഐഫോൺ 15, ഐഫോൺ 16 വിലയും കുറഞ്ഞു

128 ജിബി ഐഫോൺ 15ന് 59,899 രൂപയാണ് വിൽപ്പന വില. 1,500 രൂപയുടെ ബാങ്ക് ക്യാഷ്ബാക്കും 3,000 രൂപയുടെ എക്സ്ചേഞ്ച് ബോണസും ലഭിക്കുന്നതോടെ ഫലപ്രദമായ വില 55,399 രൂപയായി കുറയും. 128 ജിബി ഐഫോൺ 16നും ഓഫറുണ്ട്. 69,899 രൂപയാണ് വിൽപ്പന വില. 1,500 രൂപയുടെ ബാങ്ക് ക്യാഷ്ബാക്കും 3,000 രൂപയുടെ എക്സ്ചേഞ്ച് ബോണസും ലഭിച്ചാൽ ഫലപ്രദമായ വില 65,399 രൂപയാകും.

ഐഫോൺ 17 പ്രോയ്ക്കും വൻ വിലക്കുറവ്

വില കൂടിയ ഐഫോൺ 17 പ്രോ, ഐഫോൺ 17 പ്രോ മാക്സ് മോഡലുകൾക്കും റിലയൻസ് ഡിജിറ്റൽ പ്രത്യേക ഓഫറുകൾ നൽകുന്നുണ്ട്. 256 ജിബി ഐഫോൺ 17 പ്രോയുടെ യഥാർഥ വില 1,34,900 രൂപയാണ്. 9,910 രൂപയുടെ ഇൻ-സ്റ്റോർ വിലക്കുറവിന് ശേഷം 1,24,990 രൂപയ്ക്ക് ഫോൺ ലഭിക്കും. പഴയ ഐഫോണിന് 55,000 രൂപയുടെ എക്സ്ചേഞ്ച് മൂല്യം ലഭിക്കുകയും 10,000 രൂപയുടെ എക്സ്ചേഞ്ച് ബോണസും 3,000 രൂപയുടെ ക്യാഷ്ബാക്കും ലഭിക്കുകയും ചെയ്താൽ ഫലപ്രദമായ വില 56,990 രൂപയായി കുറയും.

ഐഫോൺ 17 പ്രോ മാക്സും വിലക്കുറവിൽ

256 ജിബി ഐഫോൺ 17 പ്രോ മാക്സിന്റെ വില 1,49,900 രൂപയിൽ നിന്ന് 1,39,990 രൂപയായി കുറയും. എക്സ്ചേഞ്ച് ആനുകൂല്യങ്ങളും ക്യാഷ്ബാക്കും ഉൾപ്പെടുത്തിയാൽ ഫലപ്രദമായ വില 71,990 രൂപയായി കുറയുമെന്ന് റിലയൻസ് ഡിജിറ്റൽ വ്യക്തമാക്കുന്നു.

ഓഫർ ലഭിക്കുന്നതിന് ചില നിബന്ധനകൾ

ഇവ ഫലപ്രദമായ വിലകളാണെന്ന കാര്യം പ്രത്യേകം ശ്രദ്ധിക്കണം. എല്ലാ ഉപഭോക്താക്കൾക്കും ഈ വിലയിൽ നേരിട്ട് ഫോണുകൾ ലഭിക്കണമെന്നില്ല. പ്രോ മോഡലുകളുടെ കണക്കുകൂട്ടലിൽ ഐഫോൺ 15 പ്രോയ്ക്ക് 55,000 രൂപയുടെ എക്സ്ചേഞ്ച് മൂല്യം ലഭിക്കുമെന്നതാണ് പരിഗണിച്ചിരിക്കുന്നത്. യഥാർഥ എക്സ്ചേഞ്ച് വില കൈമാറുന്ന ഫോണിന്റെ മോഡലിനെയും അതിന്റെ നിലവാരത്തെയും ആശ്രയിച്ചിരിക്കും. ബാങ്ക് ക്യാഷ്ബാക്കിനും അർഹതാ നിബന്ധനകൾ ബാധകമാണ്. അതിനാൽ ഫോൺ വാങ്ങുന്നതിന് മുമ്പ് എക്സ്ചേഞ്ച് മൂല്യം, ബാങ്ക് ഓഫറിനുള്ള അർഹത, വിവിധ ഓഫറുകൾ ഒരുമിച്ച് ഉപയോഗിക്കാനാകുമോ തുടങ്ങിയ കാര്യങ്ങൾ പരിശോധിച്ചതിന് ശേഷം അന്തിമ വില കണക്കാക്കുന്നതാണ് ഉചിതം.

എഐക്ക് കടിഞ്ഞാൺ ഇടാൻ ഇന്ത്യ! പുതിയ ചട്ടങ്ങൾ ഒരു മാസത്തിനകം

Prashobh Prasannan — Fri, 09 Oct 2026 11:07:57 +0530

ആർട്ടിഫിഷ്യൽ ഇന്‍റലിജൻസ് (എഐ) സാങ്കേതികവിദ്യയുടെ ഉപയോഗം നിയന്ത്രിക്കുന്നതിനുള്ള ചട്ടങ്ങൾ രൂപീകരിക്കുന്നതിന്റെ ഭാഗമായി ഇന്ത്യ ഒരു മാസത്തിനകം കൺസൾട്ടേഷൻ പേപ്പർ പുറത്തിറക്കും. എഐയുടെ സുരക്ഷിതമായ ഉപയോഗം, ഡീപ്‌ഫേക്കുകൾ, മനുഷ്യകേന്ദ്രീകൃത സമീപനം, നൈപുണ്യ വികസനം എന്നിവയ്ക്കായിരിക്കും നിർദിഷ്ട രേഖയിൽ പ്രധാന പരിഗണന നൽകുകയെന്ന് കേന്ദ്ര ഐടി മന്ത്രി അശ്വിനി വൈഷ്‍ണവ് അറിയിച്ചു. വ്യാഴാഴ്ചയാണ് മന്ത്രി ഇക്കാര്യം വ്യക്തമാക്കിയത്. വാർത്ത പ്രസ് ട്രസ്റ്റ് ഓഫ് ഇന്ത്യയാണ് റിപ്പോർട്ട് ചെയ്തത്.

എഐ സുരക്ഷയ്ക്ക് മുൻഗണന; ഡീപ്‌ഫേക്കുകളും നിരീക്ഷണത്തിൽ

എഐ ഉപയോഗവുമായി ബന്ധപ്പെട്ട സുരക്ഷാ പ്രശ്നങ്ങൾക്കായിരിക്കും പുതിയ നിയന്ത്രണ ചട്ടക്കൂടിൽ പ്രധാന പരിഗണന നൽകുകയെന്ന് അശ്വിനി വൈഷ്‍ണവ് പറഞ്ഞു. എഐ നിയന്ത്രണങ്ങൾ കൊണ്ടുവരേണ്ട സമയം അതിക്രമിച്ചെന്നും വരാനിരിക്കുന്ന ചട്ടങ്ങൾക്ക് അടിത്തറയാകുക കൺസൾട്ടേഷൻ പേപ്പറായിരിക്കുമെന്നും അദ്ദേഹം വ്യക്തമാക്കി. എഐയുടെ സുരക്ഷിതമായ ഉപയോഗം ഉറപ്പാക്കുന്നതിൽ കേന്ദ്രീകരിച്ച് നിയന്ത്രണങ്ങൾ ലക്ഷ്യമിട്ടുള്ള കൺസൾട്ടേഷൻ പേപ്പർ തയ്യാറാക്കാൻ ബന്ധപ്പെട്ട വകുപ്പിനോട് ആവശ്യപ്പെടുമെന്നും മന്ത്രി പറഞ്ഞു. സാങ്കേതികവിദ്യയുടെ വളർച്ചയ്ക്കൊപ്പം അതിന്റെ ദുരുപയോഗം തടയുന്നതും പ്രധാനമാണെന്നാണ് കേന്ദ്രത്തിന്റെ നിലപാട്.

എഐ ഉപയോഗിച്ച് സൃഷ്ടിക്കുന്ന വ്യാജ ചിത്രങ്ങൾ, വീഡിയോകൾ, ശബ്ദരേഖകൾ എന്നിവ ഉൾപ്പെടുന്ന ഡീപ്‌ഫേക്കുകളും സർക്കാരിന്റെ പ്രധാന ആശങ്കകളിലൊന്നാണ്. യഥാർഥവും കൃത്രിമമായി നിർമിച്ചതുമായ ഉള്ളടക്കങ്ങൾ തിരിച്ചറിയുന്നത് കൂടുതൽ പ്രയാസകരമാകുന്ന സാഹചര്യത്തിൽ ഇത്തരം വ്യാജ വിവരങ്ങൾ സമൂഹത്തിൽ വലിയ പ്രശ്നങ്ങൾ സൃഷ്ടിക്കുമെന്ന് മന്ത്രി ചൂണ്ടിക്കാട്ടി.

ഡീപ്‌ഫേക്കുകൾ ജനങ്ങളെ തെറ്റിദ്ധരിപ്പിക്കുകയും തെറ്റായ പ്രചാരണങ്ങൾക്ക് വഴിയൊരുക്കുകയും ചെയ്യുന്നു. ഇത്തരം ഉള്ളടക്കങ്ങൾ വിശ്വസിക്കുന്നതിലൂടെ ആളുകൾ തെറ്റായ തീരുമാനങ്ങളിലേക്ക് നയിക്കപ്പെടാനുള്ള സാധ്യതയുണ്ടെന്നും അദ്ദേഹം പറഞ്ഞു. എഐയുമായി ബന്ധപ്പെട്ട മാനസികാരോഗ്യ പ്രശ്നങ്ങൾ, സൈബർ സുരക്ഷാ ഭീഷണികൾ, ഉപയോക്താക്കളുടെ സുരക്ഷ എന്നിവയും കൂടിയാലോചനയുടെ പരിധിയിൽ വരും.

സാങ്കേതികവിദ്യയും നിയമവും ഒരുമിച്ച്

എഐ നിയന്ത്രണം നിയമങ്ങൾ കൊണ്ടുവരുന്നതിൽ മാത്രം ഒതുക്കാനാകില്ലെന്നാണ് കേന്ദ്രത്തിന്റെ നിലപാട്. സാങ്കേതികവിദ്യയും നിയമപരമായ നിയന്ത്രണങ്ങളും സംയോജിപ്പിക്കുന്ന 'ടെക്നോ-ലീഗൽ' സമീപനമാണ് ഇന്ത്യ സ്വീകരിക്കേണ്ടതെന്ന് അശ്വനി വൈഷ്‍ണവ് വ്യക്തമാക്കി. സൈബർ സുരക്ഷ, ഉപയോക്താക്കൾക്കുണ്ടാകുന്ന ദോഷങ്ങൾ, മാനസികാരോഗ്യ പ്രശ്നങ്ങൾ, ഡീപ്‌ഫേക്കുകൾ തുടങ്ങിയ വിഷയങ്ങളിൽ സാങ്കേതിക വ്യവസായത്തിനും നിർണായക ഉത്തരവാദിത്തമുണ്ടെന്ന് അദ്ദേഹം പറഞ്ഞു. എഐയുടെ സുരക്ഷിതമായ ഉപയോഗം ഉറപ്പാക്കുന്നതിൽ വ്യവസായ മേഖലയ്ക്കാണ് പ്രാഥമിക ഉത്തരവാദിത്തമെന്നും മന്ത്രി കൂട്ടിച്ചേർത്തു.

മനുഷ്യകേന്ദ്രീകൃത എഐ വികസനത്തിന് ഊന്നൽ

എഐയുടെ വളർച്ചയ്ക്കൊപ്പം തൊഴിൽ മേഖലകളിലും സമൂഹത്തിലും ഉണ്ടാകുന്ന മാറ്റങ്ങൾ കൈകാര്യം ചെയ്യുന്നതിനുള്ള നൈപുണ്യ വികസനത്തിനും കൺസൾട്ടേഷൻ പേപ്പർ പ്രാധാന്യം നൽകും. സാങ്കേതികവിദ്യയുടെ പുരോഗതി ജനങ്ങളെ പിന്നിലാക്കുന്ന സാഹചര്യം ഉണ്ടാകരുതെന്നാണ് സർക്കാരിന്റെ നിലപാട്. മാറ്റങ്ങളുടെ കേന്ദ്രബിന്ദുവായി മനുഷ്യരാശിയെ കാണണമെന്നും മന്ത്രി വ്യക്തമാക്കി. വിവിധ മേഖലകളിലെ പങ്കാളികളിൽനിന്ന് അഭിപ്രായങ്ങളും നിർദേശങ്ങളും സ്വീകരിച്ച ശേഷമായിരിക്കും രാജ്യത്തിന്റെ വിപുലമായ എഐ നിയന്ത്രണ ചട്ടക്കൂടിന് രൂപം നൽകുക. ഇതിന്റെ ആദ്യഘട്ടമായ കൺസൾട്ടേഷൻ പേപ്പർ അടുത്ത ഒരു മാസത്തിനുള്ളിൽ പുറത്തിറക്കാനാണ് കേന്ദ്രസർക്കാരിന്റെ നീക്കം.

കടം സര്‍വകാല റെക്കോര്‍ഡില്‍! കടക്കെണിയില്‍ അമര്‍ന്ന് അമേരിക്കന്‍ കര്‍ഷകരെന്ന് റിപ്പോർട്ട്, യഥാർത്ഥ കാരണം എന്ത്?

Sangeetha KS — Fri, 09 Oct 2026 15:41:18 +0530

അമേരിക്കയിലെ കര്‍ഷകര്‍ സര്‍വകാല റെക്കോര്‍ഡ് കടബാധ്യതയില്‍. കൃഷിയിടങ്ങളുടെ ദൈനംദിന നടത്തിപ്പിനും ഉല്‍പ്പാദനത്തിനുമായി അമേരിക്കന്‍ കര്‍ഷകര്‍ വായ്പയെടുക്കുന്ന തുക മുന്‍പത്തെ എല്ലാ റെക്കോര്‍ഡുകളും ഭേദിച്ചിരിക്കുകയാണ്. എന്നാല്‍, യുഎസ് കൃഷി മന്ത്രാലയത്തിന്റെ ഔദ്യോഗിക കണക്കുകളിലുള്ളതിനേക്കാള്‍ വളരെ കൂടുതലാണ് യഥാര്‍ത്ഥ കടബാധ്യതയെന്ന് അന്താരാഷ്ട്ര വാര്‍ത്താ ഏജന്‍സിയായ റോയിട്ടേഴ്‌സ് പുറത്തുവിട്ട റിപ്പോര്‍ട്ടില്‍ വ്യക്തമാക്കുന്നു. ബാങ്കുകള്‍ക്ക് പുറമെ, സ്വകാര്യ കമ്പനികള്‍, കര്‍ഷക സഹകരണ സംഘങ്ങള്‍, യന്ത്രസാമഗ്രി നിര്‍മ്മാതാക്കള്‍, ഫിന്‍ടെക് സ്ഥാപനങ്ങള്‍ എന്നിവരില്‍ നിന്ന് കര്‍ഷകര്‍ വ്യാപകമായി പണം കടമെടുക്കുന്നത് സര്‍ക്കാര്‍ കണക്കുകളില്‍ ഉള്‍പ്പെട്ടിട്ടില്ല.

വിലത്തകര്‍ച്ചയും യുദ്ധവും വിതച്ച പ്രതിസന്ധി

കഴിഞ്ഞ കുറച്ചു വര്‍ഷങ്ങളായി കാര്‍ഷിക ഉല്‍പ്പന്നങ്ങള്‍ക്ക് പ്രതീക്ഷിച്ച വില ലഭിക്കാത്തതും വളത്തിനും വിത്തിനും മറ്റ് ഉല്‍പ്പാദന സാമഗ്രികള്‍ക്കും വില ഉയര്‍ന്നതും കര്‍ഷകരുടെ ലാഭം കുത്തനെ കുറച്ചിരുന്നു. ഇതിന് പിന്നാലെ തുടര്‍ച്ചയായുണ്ടായ മറ്റ് പ്രതിസന്ധികള്‍ കാര്യങ്ങള്‍ കൂടുതല്‍ വഷളാക്കി. ചൈനയുള്‍പ്പെടെയുള്ള ഉപഭോക്തൃ രാജ്യങ്ങളുമായി യുഎസ് നടത്തുന്ന വ്യാപാര തര്‍ക്കങ്ങള്‍ അമേരിക്കന്‍ കാര്‍ഷിക കയറ്റുമതിയെ ബാധിച്ചു. ഇസ്രായേല്‍ - ഇറാന്‍ സംഘര്‍ഷം കാരണം ഇന്ധനത്തിനും വളത്തിനും വിപണിയില്‍ വില കുത്തനെ കൂടിയതും കര്‍ഷകര്ക്ക് തിരിച്ചടിയായി. യുഎസ് കൃഷി മന്ത്രാലയത്തിന്റെ ഏറ്റവും പുതിയ കണക്കുകള്‍ പ്രകാരം, ആകെ കാര്‍ഷിക കടം 2000-ല്‍ 300 ബില്യണ്‍ ഡോളറായിരുന്നത് ഈ വര്‍ഷം 605 ബില്യണ്‍ ഡോളറിലധികമായി (ഏകദേശം 50 ലക്ഷം കോടിയിലധികം രൂപ) ഉയര്‍ന്നു. ചരിത്രത്തിലെ ഏറ്റവും ഉയര്‍ന്ന നിരക്കാണിത്.

ഒരു കുടുംബത്തിന് മാത്രം 42 വായ്പകള്‍!

അമേരിക്കയിലെ 7 ദക്ഷിണ-മധ്യപടിഞ്ഞാറന്‍ സംസ്ഥാനങ്ങളിലായി 52-ലധികം വന്‍കിട കര്‍ഷകരുമായി റോയിട്ടേഴ്‌സ് പ്രതിനിധികൾ നടത്തിയ ഇടപെടലിലാണ് ഈ ഞെട്ടിക്കുന്ന വിവരങ്ങളാണ് പുറത്തുവന്നത്. ഭൂരിഭാഗം കര്‍ഷകര്‍ക്കും 7 മുതല്‍ 10 വരെ വ്യത്യസ്ത വായ്പാ അക്കൗണ്ടുകള്‍ നിലവിലുണ്ട്. ചിലര്‍ക്കിത് 30-ല്‍ അധികമാണ്! ഐയോവയിലെ ഒരു കര്‍ഷക കുടുംബത്തിന് മാത്രം 42 വായ്പാ അക്കൗണ്ടുകള്‍ ആണുള്ളത്. ട്രാക്ടറുകളോ മറ്റ് പുതിയ യന്ത്രങ്ങളോ വാങ്ങുമ്പോഴും ലീസിനെടുക്കുമ്പോഴും ഡീലര്‍മാര്‍ ഓരോന്നിനും വേവ്വേറെ ക്രെഡിറ്റ് അക്കൗണ്ടുകള്‍ നിര്‍ബന്ധമാക്കുന്നതാണ് ഇതിന് കാരണം. ഈ സാഹചര്യം കാര്‍ഷിക മേഖലയെ മാത്രമല്ല, അമേരിക്കയുടെ ആകെയുള്ള സമ്പദ്വ്യവസ്ഥയെ തന്നെ പ്രതികൂലമായി ബാധിക്കുമോ എന്ന ആശങ്കയിലാണ് അധികൃതര്‍.