Asianet News Malayalam

'ധവളപത്രം ഉമ്മാക്കിയല്ല, എൽഡിഎഫ് സർക്കാറിന് നേരെ പിടിച്ച കണ്ണാടി'; പ്രതിപക്ഷത്തിന് മറുപടിയുമായി വി.ഡി. സതീശന്‍

Web Desk — Thu, 04 Jun 2026 13:56:58 +0530

തിരുവനന്തപുരം: ധവളപത്രം ഉമ്മാക്കിയല്ലെന്നും എൽഡിഎഫ് സർക്കാറിന് നേരെ പിടിച്ച കണ്ണാടിയാണെന്നും മുഖ്യമന്ത്രി. ധവളപത്രമെന്ന് ഉമ്മാക്കി കാണിച്ച് വിരട്ടേണ്ടെന്ന പിണറായി വിജയനറെ പരാമർശത്തിനായിരുന്നു മുഖ്യമന്ത്രിയുടെ മറുപടി. മെയിൽ ട്രഷറിയിൽ 5000 കോടി ഉണ്ടായിരുന്നുവെന്ന ഇടത് പ്രചാരണം ശരിയല്ലെന്നും മെയ് 16ന് ട്രഷറിയിൽ ഉണ്ടായിരുന്നത് 2000 കോടി മാത്രമാണെന്നും വിഡി സതീശൻ സഭയിൽ പറഞ്ഞു സാമ്പത്തികാവസ്ഥയ്ക്ക് മാറ്റം വേണം. കേരളം വളരെ മോശം അവസ്ഥയിലാണെന്നും സതീശന്‍ പറഞ്ഞു. കിഫ്ബി കൊണ്ടുവന്നപ്പോൾ എതിർത്തയാളാണ് ഞാൻ. കിഫ്ബി വായ്പ പലിശ നിരക്ക് കേട്ടാൽ തല കറങ്ങും. സംസ്ഥാനത്തിന്റെ ഗ്യാരന്റിയിലാണ് വായ്പ. കിഫ്ബി കടം ഞങ്ങളുടെ തലയിലാണ് വന്നത്. കിഎഫ്ബി ഒരു പ്രത്യേക സാമ്രാജ്യമായിരുന്നു. ധന വകുപ്പുമായി ബന്ധം ഉണ്ടായിരുന്നില്ല. ജി.സുധാകരൻ കിഫ്ബി കുറവുകൾ മനസ്സിലാക്കിയ ആളാണെന്നും അദ്ദേഹം പറഞ്ഞു.

കിഫ്ബിയിൽ വിദഗ്ദാഭിപ്രായം തേടും. ആർക്കും ദോഷകരമല്ലാത്ത തരത്തിൽ തീരുമാനെടുക്കും. ബിജെപി അദ്ധ്യക്ഷൻ നയപ്രഖ്യാനത്തിൽ നല്ലത് പറഞ്ഞെങ്കിൽ അദ്ദേഹത്തിന് നന്ദിയെന്നും നേമത്ത് എൽഡിഎഫിന്റെ വോട്ടും കുറഞ്ഞുവെന്നും സതീശന്‍ പറഞ്ഞു. ചാത്തന്നൂരിൽ യുഡിഎഫിന് വോട്ട് കൂടി. എൽഡിഎഫിന് കുറഞ്ഞു. കഴകൂട്ടത്ത് എൽഡിഎഫിന് വോട്ട് കുത്തനെ കുറഞ്ഞു. പിണറായി പറയുന്ന വാദം ശരിയെങ്കിൽ സിപിഎം വെള്ളിത്താലത്തിൽ ബിജെപിക്ക് സീറ്റുകൾ നൽകിയെന്നും സതീശന്‍ പറഞ്ഞു. ക്വിറ്റ് ഇന്ത്യ കാലത്ത് കമ്മ്യൂണിസ്റ്റുകാർ ഒറ്റുകാർ ആയിരുന്നെന്ന് വി ഡി സതീശന്‍ ആരോപിച്ചു. സർക്കാരിനെ സൂക്ഷ്മമായി എംഎൽഎമാർ നിരീക്ഷണം നടത്തുന്നു. തെറ്റ് ബോധ്യപ്പെട്ടാൽ തിരുത്തും. വിട്ടുവീഴ്ചയില്ലാത്ത മതേത്വരത്തെ നിലപാട് ആണ് യുഡിഎഫ് സ്വീകരിച്ചത്. വർഗീയത പറയരുതെന്ന് മുഖം നോക്കി പറഞ്ഞു. അതിനുള്ള മറുപടിയാണ് ജനം നൽകിയ വിജയമെന്നും സതീശന്‍ വ്യക്തമാക്കി.

കടത്തിന് മേലെ കടം: സംസ്ഥാനത്തിൻ്റെ കടമെടുപ്പ് പരിധിയും റവന്യൂ കമ്മിയും ആദ്യ നാല് മാസത്തിൽ പകുതിയോളമായി; നികുതി വരുമാനം 13,880.82 കോടി

Web Desk — Mon, 31 Aug 2026 09:18:00 +0530

തിരുവനന്തപുരം: സാമ്പത്തിക വർഷത്തിന്റെ ആദ്യ നാല് മാസത്തിൽ തന്നെ കടമെടുപ്പ് പരിധിയുടെയും റവന്യൂ കമ്മിയുടെയും പകുതിയോളം തൊട്ട് സംസ്ഥാന സർക്കാർ. ഈ സാമ്പത്തിക പ്രതിസന്ധിക്കിടയിലും ഓണച്ചെലവുകൾക്ക് ശേഷം 1,800 കോടി രൂപ കൂടി കടമെടുക്കാൻ സർക്കാർ തീരുമാനിച്ചു. കടപത്രങ്ങൾ വഴിയുള്ള ലേലം ചൊവ്വാഴ്ച ആർ.ബി.ഐയുടെ ഇലക്ട്രോണിക് പ്ലാറ്റ്‌ഫോമിൽ നടക്കും.

ഈ വർഷത്തെ ബജറ്റിൽ പൊതുവിപണിയിൽ നിന്നടക്കം സമാഹരിക്കാൻ ലക്ഷ്യമിട്ട 56,413.06 കോടി രൂപയുടെ 46.91 ശതമാനം തുകയും ആദ്യ നാല് മാസങ്ങളിൽ തന്നെ കേരളം കടമെടുത്തു കഴിഞ്ഞു. 26,461.75 കോടി രൂപയാണ് ഇതുവരെ സമാഹരിച്ചത്. ഇതിന് പുറമെയാണ് പുതിയ 1,800 കോടിയുടെ കടമെടുപ്പ്. ബജറ്റ് കണക്കാക്കിയ റവന്യൂ കമ്മിയുടെ പകുതിയോളവും ഈ ചുരുങ്ങിയ കാലയളവിൽ രേഖപ്പെടുത്തിക്കഴിഞ്ഞു.

ക്ഷേമപെൻഷനുകൾ, ബോണസ്, ഉത്സവബത്ത, വിപണി ഇടപെടലുകൾ എന്നിവയ്ക്കായി പതിനായിരം കോടിയോളം രൂപയാണ് ഓണക്കാലത്ത് ചെലവായത്. ഇതിനായി ഈ മാസം മാത്രം 2,200 കോടി രൂപ നേരത്തെ കടമെടുത്തിരുന്നു. ഓണവിപണി സജീവമാകുന്നതോടെ നികുതി വരുമാനം വർധിക്കുമെന്നും പണം ഖജനാവിലേക്ക് തിരിച്ചെത്തുമെന്നുമുള്ള കണക്കുകൂട്ടലിലാണ് സർക്കാർ പണം വിപണിയിലിറക്കിയത്.

സാമ്പത്തിക വർഷത്തിലെ ആദ്യ നാല് മാസത്തിൽ 13,880.82 കോടി രൂപയാണ് സംസ്ഥാനത്തിന്റെ ജി.എസ്.ടി (GST) വരുമാനം. ഓണക്കാലത്തെ ഭീമമായ ചെലവുകൾക്ക് ശേഷം വിപണിയിലെ ഉണർവ് വരും ദിവസങ്ങളിൽ ജി.എസ്.ടി ഉൾപ്പെടെയുള്ള നികുതി വരുമാനത്തിൽ വലിയ വർധനവുണ്ടാക്കുമെന്ന പ്രതീക്ഷയിലാണ് ധനവകുപ്പ്.

ആശ്വാസമാകുമോ പ്രഖ്യാപനം; റിസര്‍വ് ബാങ്ക് പണനയ സമിതി യോഗം ഇന്ന് മുതല്‍, റിപ്പോ നിരക്ക് മാറിയേക്കില്ലെന്ന് സൂചന

Sangeetha KS — Mon, 03 Aug 2026 15:49:38 +0530

ആഗോളതലത്തില്‍ വിലക്കയറ്റവും ക്രൂഡ് ഓയില്‍ വിലയും വര്‍ധിക്കുന്ന പശ്ചാത്തലത്തില്‍ റിസര്‍വ് ബാങ്കിന്റെ പണനയ സമിതി യോഗം ഇന്ന് മുതല്‍. കഴിഞ്ഞ കുറച്ചുമാസങ്ങളായി ലോകത്തെ പല പ്രമുഖ സെന്‍ട്രല്‍ ബാങ്കുകളും പലിശനിരക്ക് വര്‍ധിപ്പിച്ചെങ്കിലും, ആര്‍ബിഐ ഇത്തവണ റിപ്പോ നിരക്കില്‍ മാറ്റം വരുത്താന്‍ സാധ്യതയില്ലെന്നാണ് സാമ്പത്തിക വിദഗ്ധര്‍ വിലയിരുത്തുന്നത്. പുറത്തുനിന്നുള്ള വെല്ലുവിളികള്‍ ഏറെയുണ്ടെങ്കിലും മറ്റ് രാജ്യങ്ങളെ അപേക്ഷിച്ച് വിലക്കയറ്റം നിയന്ത്രണ വിധേയമാണെന്നതാണ് ഇതിന് കാരണം.

ബുധനാഴ്ച പ്രഖ്യാപിക്കുന്ന പണനയത്തില്‍ പലിശനിരക്ക് മാറ്റമില്ലാതെ തുടരുമെന്ന് റോയിട്ടേഴ്‌സ് നടത്തിയ സര്‍വേയില്‍ പങ്കെടുത്ത 72-ല്‍ 68 സാമ്പത്തിക വിദഗ്ധരും അഭിപ്രായപ്പെട്ടു. നിരക്ക് വര്‍ധനവിന് ഇപ്പോള്‍ സാധ്യതയില്ലെങ്കിലും, ഭാവിയില്‍ വിലക്കയറ്റം വര്‍ധിക്കാന്‍ ഇടയുള്ളതിനാല്‍ റിസര്‍വ് ബാങ്ക് കൂടുതല്‍ ജാഗ്രതയോടെയുള്ള നിലപാടെടുത്തേക്കാം.

ഇന്ത്യയുടെ വഴി വേറിട്ടതാകുന്നത് എന്തുകൊണ്ട്?

അഞ്ച് മാസം മുന്‍പ് ഇറാന്‍ ഉള്‍പ്പെട്ട യുഎസ്- ഇസ്രായേല്‍ സംഘര്‍ഷം ആരംഭിച്ചതിനു ശേഷം യൂറോപ്പ്, ഓസ്ട്രേലിയ, ഇന്തോനേഷ്യ, ഫിലിപ്പീന്‍സ്, സിംഗപ്പൂര്‍, ദക്ഷിണ കൊറിയ, ദക്ഷിണാഫ്രിക്ക തുടങ്ങിയ രാജ്യങ്ങളിലെ സെന്‍ട്രല്‍ ബാങ്കുകള്‍ പലിശ നിരക്ക് വര്‍ധിപ്പിച്ചിരുന്നു. എന്നാല്‍ യുഎസ് ഫെഡറല്‍ റിസര്‍വും ബാങ്ക് ഓഫ് ജപ്പാനും നിരക്കുകളില്‍ മാറ്റം വരുത്തിയിട്ടില്ല. ഈ സാഹചര്യത്തില്‍ ഇന്ത്യയുടെ നില ഭദ്രമാണ്.

ജൂണില്‍ ചില്ലറ വില നാണയപ്പെരുപ്പം 4.38 ശതമാനമായി ഉയര്‍ന്നിരുന്നു. 17 മാസത്തിനിടെ ആദ്യമായാണ് ആര്‍ബിഐയുടെ ലക്ഷ്യമായ 4 ശതമാനത്തിന് മുകളില്‍ ഇത് എത്തുന്നത്. എങ്കിലും, ആര്‍ബിഐയുടെ സുരക്ഷിത പരിധിയായ 2 മുതല്‍ 6 ശതമാനത്തിനുള്ളില്‍ തന്നെയാണ് ഇപ്പോഴും ഇതുള്ളത്. ഭക്ഷ്യ, ഇന്ധന വിലകള്‍ ഒഴിവാക്കിയുള്ള അടിസ്ഥാന നാണയപ്പെരുപ്പവും 4 ശതമാനത്തോട് ചേര്‍ന്നാണ് നില്‍ക്കുന്നത്. അതിനാല്‍ കൂടുതല്‍ കണക്കുകള്‍ വന്നതിന് ശേഷം മാത്രം നിരക്ക് മാറ്റത്തെക്കുറിച്ച് ചിന്തിച്ചാല്‍ മതിയെന്ന നിലപാടിലാണ് ആര്‍ബിഐ. അടിസ്ഥാന നാണയപ്പെരുപ്പം 4.5 ശതമാനത്തിന് മുകളില്‍ തുടര്‍ന്നില്ലെങ്കില്‍ 2026-ല്‍ ഒരു നിരക്ക് വര്‍ധനവിന് സാധ്യതയില്ലെന്ന് സിറ്റി ബാങ്ക് ചീഫ് ഇന്ത്യ ഇക്കണോമിസ്റ്റ് സമീരന്‍ ചക്രവര്‍ത്തി പറഞ്ഞു.

ഭവന വായ്പക്കാരെ കാത്തിരിക്കുന്നത് എന്ത്?

റിപ്പോ നിരക്കില്‍ മാറ്റമില്ലാതെ തുടരുന്നത് ഭവനവായ്പ എടുത്തവര്‍ക്കും വീട് വാങ്ങാന്‍ ഉദ്ദേശിക്കുന്നവര്‍ക്കും വലിയ ആശ്വാസമാകും. ആഗോളതലത്തില്‍ വലിയ അനിശ്ചിതത്വം നിലനില്‍ക്കുമ്പോഴും ഭവന വായ്പാ നിരക്കുകള്‍ വര്‍ധിക്കാതിരിക്കുന്നത് ഗുണം ചെയ്യും.

വില കുത്തനെ ഉയരുന്നു; 10 ലക്ഷം മെട്രിക് ടൺ പഞ്ചസാര ഇറക്കുമതി ചെയ്യാൻ കേന്ദ്ര സർക്കാർ

Web Desk — Thu, 20 Aug 2026 21:19:17 +0530

ദില്ലി: പഞ്ചസാര വില വർധന നിയന്ത്രിക്കാനായി 10 ലക്ഷം മെട്രിക് ടൺ അസംസ്‌കൃത പഞ്ചസാര ഇറക്കുമതി ചെയ്യാൻ കേന്ദ്ര സർക്കാർ. പരിമിത കാലത്തേക്ക് തീരുവ രഹിത ഇറക്കുമതിക്കാണ് അനുമതി. രണ്ടു മാസത്തിനിടെ രാജ്യത്ത് പഞ്ചസാര വില കുതിച്ചുയർന്നിരുന്നു. ഓണക്കാലത്ത് കേരളത്തിൽ പഞ്ചസാരയുടെ വില കിലോക്ക് 59 രൂപ വരെയാണ് ഉയർന്നിരിക്കുന്നത്. ഇത് സർവകാല റെക്കോർഡ് വിലയാണ്. രണ്ടു മാസത്തിനിടെയാണ് കേരളത്തിലെ പഞ്ചസാര വിലക്കയറ്റമുണ്ടായത്. എഥനോൾ നയവും പഞ്ചസാര വില വർധനവിന് കാരണമായി എന്ന് വ്യാപാരികൾ ചൂണ്ടിക്കാട്ടിയിരുന്നു.

എന്തായിരിക്കും സർക്കാർ ജീവനക്കാർക്കായി സതീശൻ ബജറ്റിൽ ഒരുക്കുന്ന വിസ്മയം, ആദ്യ ഗഡു ഡിഎ മുൻകാല പ്രാബല്യത്തോടെ നൽകുമോ?

Web Desk — Sat, 13 Jun 2026 18:04:40 +0530

തിരുവനന്തപുരം: സർക്കാർ ജീവനക്കാർക്കായി ബജറ്റിൽ യുഡിഎഫ് സർക്കാർ വിസ്മയം ഒരുക്കുമെന്നായിരുന്നു മുഖ്യമന്ത്രിയായ ശേഷം വി.ഡി. സതീശൻ സർക്കാർ ജീവനക്കാർക്ക് നൽകിയ വാഗ്ദാനം. എന്നാൽ, പിന്നാലെയിറക്കിയ ധവള പത്രമാകട്ടെ ജീവനക്കാരെ ആശങ്കയിലാക്കുകയും ചെയ്തു. പെൻഷൻ പ്രായം വർധന, ശമ്പള പരിഷ്കരണം, കേന്ദ്രമാതൃകയിൽ പെൻഷൻ, 10 വർഷത്തിലൊരിക്കലാക്കൽ തുടങ്ങിയ നിർദേശങ്ങളാണ് മുന്നോട്ട് വെച്ചത്. എന്നാൽ, പെൻഷൻ പ്രായം കൂട്ടുന്നതിൽ സ്വന്തം മുന്നണിയിൽ നിന്ന് തന്നെ എതിർപ്പുയരുന്നതോടെ പിന്മാറാനാണ് സർക്കാർ തീരുമാനം. അതുകൊണ്ട് തന്നെ ബജറ്റിൽ സർക്കാർ ജീവനക്കാരുടെ പെൻഷൻ പ്രായം ഇത്തവണ കൂട്ടാനിടയില്ല. മെയ് 31 ജീവനക്കാർ കൂട്ടത്തോടെ വിരമിച്ചതിനാൽ പെൻഷൻ പ്രായം കൂട്ടിയാലും ഈ വ‌ർഷം അതിൻറെ സാമ്പത്തിക നേട്ടം ഉണ്ടാകില്ലെന്നാണ് സർക്കാർ വിലയിരുത്തൽ. എന്നാൽ, ആശ്വാസമായി ക്ഷാമബത്ത പ്രഖ്യാപനം വരും. ഒരു ഗഡു ക്ഷാമബത്ത മുൻകാല പ്രാബല്യത്തോടെ നൽകാനുള്ള പ്രഖ്യാപനം ആദ്യ ബജറ്റിലുണ്ടാകുമെന്നാണ് സൂചന. സർക്കാർ ജീവനക്കാർക്ക് 8 ഗഡു ഡി.എ. കുടിശ്ശിക നൽകാനാണ് സർക്കാർ 2026-ൽ ഉത്തരവിറക്കിയത്. 2021 മുതൽ 2025 വരെ അനുവദിച്ച ഡി.എ. വർധനകളുടെ കുടിശ്ശികയാണ് ഇതിൽ ഉൾപ്പെടുന്നത്. ഈ കുടിശ്ശിക 2026–27 സാമ്പത്തിക വർഷം മുതൽ ഘട്ടംഘട്ടമായി നൽകുമെന്നാണ് സർക്കാർ പ്രഖ്യാപിച്ചത്.

പെൻഷൻ പ്രായം കൂട്ടിയാൽ പ്രതിവർഷം ആറായിരം കോടി സർക്കാറിന് നേട്ടമാണമെന്നാണ് ധവളപത്രം പറയുന്നത്. വിരമിച്ചവർക്കുള്ള ആനുകൂല്യം കൊടുക്കുന്നത് ഒഴിവാകും. എന്നാൽ ഇത്തവണ മെയ് 31ന് പിരിഞ്ഞത് 12,360 പേർ. ഇനി പെൻഷൻ പ്രായം 60 ആക്കിയാലും ഇത്തവണ നേട്ടമാകില്ല. പെൻഷൻ് പ്രതിവർഷം വേണ്ടത് റവന്യു വരുമാനത്തിൻറെ 21.5 ശതമാനം. 5.23 ലക്ഷം ജീവനക്കാരിൽ പകുതി സ്റ്റാറ്റ്യൂട്ടറി പെൻഷൻ കാർ . സംസ്ഥാനത്തെ ആയുർ ദൈർഘ്യവും വർദ്ധിപ്പിച്ച ക്ഷാമബത്ത കൊടുക്കേണ്ടതിൻറെ ബാധ്യതയും കണക്കിലെത്താണ് വൈറ്റ് പേപ്പർ ശുപാർശ. ഒപ്പം യുവാക്കളെ വിശ്വാസത്തിലെടുക്കാതെ പെൻഷൻ പ്രായം ഉയർത്തിയാൽ അതിശക്തമായ പ്രതിഷേധം ഉയരുമെന്നതും സർക്കാർ മനസ്സിലാക്കുന്നു. കർണ്ണാടകയിലെ ഡികെ സർക്കാർ മോഡലിൽ യുവാക്കൾക്ക് സ്വകാര്യ സ്ഥാപനങ്ങളിലെ ജോലിക്കായി പ്രത്യേക എംപ്ലോയ്മെൻറ് എക്സ്ചേഞ്ചും പരിഗണിക്കുന്നു.

ഇന്ത്യൻ തൊഴിൽ വിപണിയിൽ 'ജെൻ സി' തരംഗം; പുതിയ ഇ.പി.എഫ്.ഒ അക്കൗണ്ടുകളിൽ 79 ശതമാനവും യുവാക്കൾ

Sangeetha KS — Tue, 15 Sep 2026 17:07:42 +0530

ദില്ലി: ഇന്ത്യയിലെ സംഘടിത തൊഴിൽ മേഖലയുടെ പ്രധാന ചാലകശക്തിയായി 'ജെൻ സി' (Gen Z) യുവതലമുറ മാറുന്നുവെന്ന് റിപ്പോർട്ട്. 2026 സാമ്പത്തിക വർഷത്തിൽ പുതുതായി ആരംഭിച്ച യൂണിഫൈഡ് അക്കൌണ്ട് നമ്പറുകളിൽ 79 ശതമാനവും 18-നും 30-നും ഇടയിൽ പ്രായമുള്ളവരുടേതാണെന്ന് ക്വസ് കോർപ്പിന്റെ (Quess Corp) 'പൾസ് FY2026' റിപ്പോർട്ട് വ്യക്തമാക്കുന്നു.

പ്രധാന വിവരങ്ങൾ ഒറ്റനോട്ടത്തിൽ:

തൊഴിലിലേക്ക് കുതിക്കുന്ന യുവാക്കൾ: പുതിയ യു.എ.എൻ അക്കൗണ്ടുകളിൽ 35 ശതമാനത്തിലധികവും 21-25 പ്രായപരിധിയിലുള്ളവരുടേതാണ്.

വനിതാ പങ്കാളിത്തം: പുതിയ രജിസ്ട്രേഷനുകളിൽ 28 ശതമാനവും സ്ത്രീകളാണ്. അപ്രന്റീസ്ഷിപ്പ് കരാറുകളുടെ 26 ശതമാനവും വനിതകൾക്ക് ലഭിച്ചു.

ചെറിയ നഗരങ്ങളുടെ മുന്നേറ്റം: ആകെ ജീവനക്കാരുടെ 69 ശതമാനവും ടയർ-2, ടയർ-3 നഗരങ്ങളിൽ നിന്നുള്ളവരാണ്. പരമ്പരാഗത മെട്രോ നഗരങ്ങൾക്ക് പുറമെ ചെറിയ നഗരങ്ങളും വൻതോതിൽ തൊഴിൽ കേന്ദ്രങ്ങളാകുന്നു.

വിദ്യാഭ്യാസ യോഗ്യത: പുതിയ ജീവനക്കാരിൽ 96% പേർ പത്താം ക്ലാസും, 61% പേർ പ്ലസ് ടുവോ അതിലധികമോ, 30% പേർ ബിരുദ/ബിരുദാനന്തര ബിരുദവും പൂർത്തിയാക്കിയവരാണ്.

യുവതലമുറ ഗിഗ് (gig) അല്ലെങ്കിൽ അസംഘടിത മേഖലയിലേക്ക് മാറുന്നുവെന്ന പൊതുധാരണയെ തിരുത്തിക്കുറിച്ചാണ് സാമൂഹിക സുരക്ഷ ഉറപ്പുനൽകുന്ന ഫോർമൽ ജോലികളിലേക്ക് അവർ കടന്നുവരുന്നത്. ഓട്ടോമോട്ടീവ് മേഖല കേന്ദ്രീകരിച്ച് നാഷണൽ അപ്രന്റീസ്ഷിപ്പ് പ്രൊമോഷൻ സ്‌കീം (NAPS) വഴി 64,000 അപ്രന്റീസ്ഷിപ്പ് കരാറുകൾ ലഭ്യമാക്കിയതും ഇതിന് ആക്കം കൂട്ടിയെന്നും റിപ്പോർട്ടിൽ പറയുന്നു.

യുപിഐ സേവനങ്ങൾ ഉപഭോക്താക്കൾക്ക് സൗജന്യമായി ലഭിക്കുമെന്ന് പെയ്മെന്റ് കൗൺസിൽ ഓഫ് ഇന്ത്യ

Prajeesh Ram — Fri, 07 Aug 2026 21:37:43 +0530

ദില്ലി: യുപിഐ സേവനങ്ങൾ തുടർന്നും ഉപഭോക്താക്കൾക്ക് സൗജന്യമായി ലഭിക്കുമെന്ന് വ്യക്തമാക്കി പെയ്മെന്റ് കൗൺസിൽ ഓഫ് ഇന്ത്യ. ഇടപാടുകൾക്ക് ചാർജ് ഈടാക്കാൻ പോവുകയാണെന്ന അഭ്യൂഹം ശക്തമായതിന് പിന്നാലെയാണ് പെയ്മെന്റ് കൗൺസിൽ പ്രസ്താവന ഇറക്കിയത്. ഉപഭോക്താക്കൾക്കും, ചെറുകിട കച്ചവടക്കാർക്കും യുപിഐ സേവനം സൗജന്യമായി തുടരും. എന്നാൽ യുപിഐ ഉപയോഗിക്കുന്നവരുടെ എണ്ണം കാര്യമായി വർധിച്ച സാഹ സുസ്ഥിരമായി സേവനം നിലനിർത്തുന്നതിനായി വേണ്ട നടപടികളെ കുറിച്ച് ചർച്ചകൾ നടക്കുന്നുണ്ടെന്നും പെയ്മെന്റ് കൗൺസിൽ പ്രസ്താവനയില്‍ പറയുന്നു.

ഇന്ത്യയുടെ സാമ്പത്തിക വളര്‍ച്ച 7.8 ശതമാനമോ അതോ 2.6 ശതമാനമോ? ജിഡിപി കണക്കുകളില്‍ വാക്‌പോര് മുറുകുന്നു

Sangeetha KS — Fri, 04 Sep 2026 12:52:55 +0530

ഏപ്രില്‍-ജൂണ്‍ പാദത്തില്‍ ഇന്ത്യയുടെ സമ്പദ്വ്യവസ്ഥ 7.8 ശതമാനം വളര്‍ച്ച നേടിയെന്ന ഔദ്യോഗിക കണക്കുകള്‍ പുറത്തുവന്നതിന് പിന്നാലെ രാജ്യത്ത് വലിയ വാദപ്രതിവാദങ്ങള്‍ക്കാണ് തുടക്കമായിരിക്കുന്നത്. കേന്ദ്ര സ്റ്റാറ്റിസ്റ്റിക്‌സ് മന്ത്രാലയം ഓഗസ്റ്റ് 31-നാണ് ഈ കണക്കുകള്‍ പുറത്തുവിട്ടത്. വിദഗ്ധരുടെ പ്രവചനങ്ങളെപ്പോലും മറികടന്നുള്ള ഈ വളര്‍ച്ചയെ പ്രധാനമന്ത്രി നരേന്ദ്ര മോദി 'അതിഗംഭീരമായ നേട്ടം' എന്നാണ് വിശേഷിപ്പിച്ചത്. എന്നാല്‍, ജിഡിപി കണക്കുകളില്‍ കൃത്രിമം കാണിച്ച് പി.ആര്‍ വര്‍ക്കിലൂടെ സര്‍ക്കാര്‍ മുഖം മിനുക്കുകയാണെന്നാണ് കോണ്‍ഗ്രസിന്റെ പ്രധാന ആരോപണം.

മുന്‍ ധനകാര്യ സെക്രട്ടറി സുഭാഷ് ചന്ദ്ര ഗാര്‍ഗിന്റെ വാക്കുകള്‍ ആയുധമാക്കിയാണ് കോണ്‍ഗ്രസ് സര്‍ക്കാരിനെതിരെ രംഗത്തുവന്നിരിക്കുന്നത്. യഥാര്‍ത്ഥത്തില്‍ 2.6 ശതമാനം മാത്രമാണ് വളര്‍ച്ചയെന്നാണ് ഗാര്‍ഗ് പറയുന്നത്. പി.ആര്‍ വര്‍ക്കുകള്‍ക്ക് ജിഡിപി കണക്കുകളെ തിളക്കമുള്ളതാക്കാന്‍ കഴിഞ്ഞേക്കാം, എന്നാല്‍ സമ്പദ്വ്യവസ്ഥയെ അങ്ങനെ നന്നാക്കാന്‍ കഴിയില്ലെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേശ് ഗാര്‍ഗിന്റെ വീഡിയോ പങ്കുവെച്ചുകൊണ്ട് കുറ്റപ്പെടുത്തി.

കഴിഞ്ഞ വര്‍ഷത്തെ ജിഡിപി കണക്കുകളില്‍ മാറ്റം വരുത്തിയിരുന്നില്ലെങ്കില്‍, ഇപ്പോഴത്തെ യഥാര്‍ത്ഥ വളര്‍ച്ച വെറും 2.6 ശതമാനം മാത്രമായി ചുരുങ്ങുമായിരുന്നുവെന്ന് ഗാര്‍ഗ് പ്രതികരിച്ചു. ഇതിനിടെ, ജിഡിപി കണക്കുകള്‍ വെറും 'പത' മാത്രമാണെന്നും സമ്പദ്വ്യവസ്ഥയാണ് യഥാര്‍ത്ഥ ദ്രാവകമെന്നും പരിഹസിച്ച് ഒരു ബിയര്‍ ഗ്ലാസിന്റെ ചിത്രം കെപിസിസിയുടെ ഔദ്യോഗിക ട്വിറ്റര്‍ പേജിലും പങ്കുവെച്ചിരുന്നു.

എന്താണ് സുഭാഷ് ചന്ദ്ര ഗാര്‍ഗ് പറഞ്ഞത്?

സര്‍വീസില്‍ നിന്ന് സ്വയം വിരമിച്ച മുന്‍ വിദേശകാര്യ സെക്രട്ടറി കൂടിയായ ഗാര്‍ഗ്, സര്‍ക്കാരിന്റെ പുതിയ ജിഡിപി കണക്കുകളെ പൂര്‍ണ്ണമായും ചോദ്യം ചെയ്യുകയാണ്. എന്‍ഡിടിവിക്ക് നല്‍കിയ അഭിമുഖത്തിലാണ് അദ്ദേഹം ഈ വാദങ്ങള്‍ ഉന്നയിച്ചത്.

കഴിഞ്ഞ വര്‍ഷത്തെ ഒന്നാം പാദത്തിലെ ജിഡിപി 86 ലക്ഷം കോടി രൂപയില്‍ നിന്ന് 80 ലക്ഷം കോടിയായി സര്‍ക്കാര്‍ താഴേക്ക് വെട്ടിച്ചുരുക്കി. ഇത് ചെയ്തില്ലായിരുന്നുവെങ്കില്‍ നിലവിലെ വളര്‍ച്ച വെറും 2.6 ശതമാനത്തില്‍ ഒതുങ്ങുമായിരുന്നു. കണക്കുകള്‍ പുറത്തുവിട്ട സ്റ്റാറ്റിസ്റ്റിക്‌സ് മന്ത്രാലയം മുന്‍കാല പ്രാബല്യത്തോടെയാണ് 86.05 ലക്ഷം കോടി രൂപയുടെ സ്ഥാനത്ത് 80.00 ലക്ഷം കോടി രൂപയാക്കി മാറ്റിയത്. ഏകദേശം 6.05 ലക്ഷം കോടി രൂപയുടെ കുറവാണിത്. സേവന മേഖലയിലെ കണക്കുകളിലാണ് പ്രധാനമായും ഈ വ്യത്യാസം വരുത്തിയിരിക്കുന്നത്.

86.05 ലക്ഷം കോടിയുടെ പഴയ കണക്കും പുതിയ കണക്കായ 88.27 ലക്ഷം കോടിയും തമ്മില്‍ താരതമ്യം ചെയ്യുമ്പോഴാണ് വളര്‍ച്ച വെറും 2.6 ശതമാനമാകുന്നതെന്നാണ് വിദഗ്ധരുടെ അഭിപ്രായം. മുന്‍പ് 86.05 ലക്ഷം കോടിയെന്ന് രേഖപ്പെടുത്തിയ സ്ഥാനത്താണ് ഇപ്പോള്‍ 80 ലക്ഷം കോടിയെന്ന് മന്ത്രാലയം പറയുന്നത്.

സര്‍ക്കാരിന്റെ വിശദീകരണം

ഗാര്‍ഗിന്റെ ആരോപണങ്ങള്‍ ദൗര്‍ഭാഗ്യകരമാണെന്ന് പ്രതികരിച്ച സര്‍ക്കാര്‍, ഇതിന് വിശദീകരണവും നല്‍കി. ഈ വര്‍ഷത്തെ വളര്‍ച്ചാ നിരക്ക് കൂടുതലാണെന്ന് കാണിക്കാന്‍ കഴിഞ്ഞ വര്‍ഷത്തെ കണക്കുകളില്‍ തിരിമറി നടത്തിയെന്ന വാദം സര്‍ക്കാര്‍ തള്ളി. ഡാറ്റകള്‍ അപ്‌ഡേറ്റ് ചെയ്തതിലൂടെയും അടിസ്ഥാന വര്‍ഷം മാറ്റിയതിലൂടെയും സ്വാഭാവികമായി ഉണ്ടായ വ്യത്യാസമാണിതെന്നാണ് സര്‍ക്കാര്‍ വിശദീകരിക്കുന്നത്.

86.05 ലക്ഷം കോടി രൂപ എന്നത് പഴയ 2011-12 അടിസ്ഥാന വര്‍ഷമായി കണക്കാക്കിയുള്ളതാണ്. എന്നാല്‍ പുതിയ കണക്കുകള്‍ 2022-23 അടിസ്ഥാന വര്‍ഷമാക്കിയുള്ളതാണ്. അതിനാല്‍ ഇവ രണ്ടും തമ്മില്‍ താരതമ്യം ചെയ്യുന്നത് അടിസ്ഥാനരഹിതമാണെന്ന് സര്‍ക്കാര്‍ പറയുന്നു.

2025 ഓഗസ്റ്റ് 29-നാണ് ഒന്നാം പാദത്തിലെ ജിഡിപി ആദ്യം പുറത്തുവിട്ടത്. അന്ന് 2011-12 അടിസ്ഥാന വര്‍ഷമായി കണക്കാക്കിയപ്പോള്‍ ജിഡിപി 86.05 ലക്ഷം കോടിയായിരുന്നു.പിന്നീട് 2026 ഫെബ്രുവരിയില്‍ 2022-23 അടിസ്ഥാന വര്‍ഷമാക്കിക്കൊണ്ടുള്ള പുതിയ ജിഡിപി സീരീസ് സര്‍ക്കാര്‍ അവതരിപ്പിച്ചു. പുതിയ കണക്കുകൂട്ടല്‍ പ്രകാരം ഒന്നാം പാദത്തിലെ ജിഡിപി 80.32 ലക്ഷം കോടിയായി മാറി. പിന്നീട് 2026 ജൂണ്‍ 5-ന് പുതിയ വിവരങ്ങളുടെ അടിസ്ഥാനത്തില്‍ ഇത് 80.44 ലക്ഷം കോടിയായി അപ്‌ഡേറ്റ് ചെയ്തു. ഒടുവില്‍ ഐഐപി പിപിഐ തുടങ്ങിയ പുതിയ സാമ്പത്തിക സൂചികകള്‍ കൂടി ഉള്‍പ്പെടുത്തിയതോടെ ഇത് 80 ലക്ഷം കോടിയായി നിജപ്പെടുത്തി. അതുകൊണ്ട് തന്നെ പുതിയ 2026-27 ഒന്നാം പാദത്തിലെ കണക്കായ 88.27 ലക്ഷം കോടിയെ, പഴയ സിരീസിലെ 86.05 ലക്ഷം കോടിയുമായി താരതമ്യം ചെയ്യാന്‍ കഴിയില്ലെന്നും, 80.32 ലക്ഷം കോടിയുമായാണ് താരതമ്യം ചെയ്യേണ്ടതെന്നും സര്‍ക്കാര്‍ വ്യക്തമാക്കി.

സംശയമുന്നയിച്ച് രഘുറാം രാജനും

മുന്‍ ആര്‍ബിഐ ഗവര്‍ണര്‍ രഘുറാം രാജനും ഈ കണക്കുകളില്‍ സംശയം പ്രകടിപ്പിച്ച് രംഗത്തെത്തി. രാജ്യം ഇത്രയും വേഗത്തില്‍ വളരുകയാണെങ്കില്‍ എന്തുകൊണ്ട് യുവാക്കള്‍ക്ക് മികച്ച തൊഴിലവസരങ്ങള്‍ ലഭിക്കുന്നില്ലെന്ന് അദ്ദേഹം ചോദിച്ചു. 'ഈ വളര്‍ച്ചാ കണക്കുകള്‍ യഥാര്‍ത്ഥമാണോ? വളര്‍ച്ച ഇത്ര വേഗത്തിലാണെങ്കില്‍ എന്തുകൊണ്ട് കൂടുതല്‍ നല്ല തൊഴിലുകള്‍ ഉണ്ടാകുന്നില്ല? സമ്പദ്വ്യവസ്ഥയെക്കുറിച്ച് തന്നെ സംശയമുണ്ടാക്കുന്ന കാര്യങ്ങളാണിത്,' പിടിഐക്ക് നല്‍കിയ അഭിമുഖത്തില്‍ അദ്ദേഹം പറഞ്ഞു.

തിരിച്ചടിച്ച് പിയൂഷ് ഗോയല്‍

പ്രതിപക്ഷ പാര്‍ട്ടികളെയും സുഭാഷ് ഗാര്‍ഗിനെയും രൂക്ഷമായി വിമര്‍ശിച്ച് കേന്ദ്ര വാണിജ്യ വ്യവസായ മന്ത്രി പിയൂഷ് ഗോയലും രംഗത്തെത്തി. ആപ്പിളും ആപ്പിളും തമ്മില്‍ എങ്ങനെ താരതമ്യം ചെയ്യണമെന്ന് പോലും അവര്‍ക്കറിയില്ലെന്നും ജനങ്ങളെ തെറ്റിദ്ധരിപ്പിക്കാനാണ് അവര്‍ ശ്രമിക്കുന്നതെന്നും അദ്ദേഹം കുറ്റപ്പെടുത്തി.

ആഗോള തലത്തില്‍ വലിയ പ്രതിസന്ധികള്‍ നടക്കുമ്പോഴും, വലിയ സമ്പദ്വ്യവസ്ഥകളില്‍ വെച്ച് ഏറ്റവും വേഗത്തില്‍ വളരുന്ന രാജ്യമായി ഇന്ത്യ തുടരുകയാണെന്ന് ഗോയല്‍ പറഞ്ഞു. 'മരുഭൂമിയിലെ മരുപ്പച്ച' പോലെയാണ് ഇന്ത്യയുടെ സമ്പദ്വ്യവസ്ഥയെന്നും അദ്ദേഹം കൂട്ടിച്ചേര്‍ത്തു. സര്‍ക്കാരില്‍ സ്വന്തം കാലാവധി പൂര്‍ത്തിയാക്കാന്‍ കഴിയാതെ പോയ മുന്‍ ധനകാര്യ സെക്രട്ടറിയും മുന്‍ റിസര്‍വ് ബാങ്ക് ഗവര്‍ണറുമാണ് ഇപ്പോള്‍ ഇത്തരത്തിലുള്ള പ്രസ്താവനകളുമായി വന്നിരിക്കുന്നതെന്നും മന്ത്രി പരിഹസിച്ചു.

ഓണത്തിന് ചെലവ് പതിനായിരം കോടി കടന്നു; 1800 കോടി രൂപ കൂടി കടമെടുക്കാൻ സംസ്ഥാന സർക്കാർ

Web Desk — Mon, 31 Aug 2026 06:28:55 +0530

തിരുവനന്തപുരം: സംസ്ഥാന സര്‍ക്കാര്‍ 1800 കോടി രൂപ കൂടി കടമെടുക്കുന്നു. കടപത്രങ്ങളുടെ ലേലം ആര്‍ബിഐയുടെ ഇലക്ട്രോണിക് പ്ലാറ്റ് ഫോം വഴി ചൊവ്വാഴ്ച നടക്കും. ഓണത്തിന് ബോണസ്, ഉത്സവ ബത്ത, ക്ഷേമ പെന്‍ഷൻ ഒരാഴ്ച നേരത്തെ, വിപിണി ഇടപടെലിന് പണം തുടങ്ങി ഓണക്കാല ചെലവ് പതിനായിരം കോടിയോളം രൂപയായതോടെയാണ് വീണ്ടും കടമെടുക്കുന്നത്. ഈ മാസം 2200 കോടി കടം വാങ്ങി. ഓണത്തിന് വിപണി ഉണരുമ്പോള്‍ നികുതി വരുമാനം ഉയരുമെന്ന പ്രതീക്ഷയോടെയാണ് കടം വാങ്ങിയും സര്‍ക്കാര്‍ പണമിറക്കിയത്.

എന്നാൽ ഓണം കഴിഞ്ഞയുടൻ പുതിയ കടം എടുക്കുന്ന സാഹചര്യത്തിലെത്തി. കേരളം ഉള്‍പ്പടെ 15 സംസ്ഥാനങ്ങളുടെ 27,000 കോടിയുടെ കടപത്ര ലേലമാണ് നടത്തുന്നത്. കേരളം സാമ്പത്തിക വര്‍ഷത്തിന്‍റെ ആദ്യ നാലു മാസത്തിൽ തന്നെ 26461.75 കോടി കടമെടുത്തു. ഇത് പൊതു വിപണയിലെ കടമെടുപ്പിൽ ഉള്‍പ്പടെ കണ്ടെത്താൻ ബജറ്റിൽ ഉദ്ദേശിക്കുന്ന 56413.06 കോടിയുടെ 46.91 ശതമാനം വരും. പിന്നാലെയാണ് 1800 കോടി കൂടി കടമെടുക്കുന്നത്.

റവന്യൂ കമ്മിയും ബജറ്റ് കണക്കാക്കിയതിന്‍റെ പകുതിയോളം ആദ്യ നാലു മാസത്തിലായി. അതേ സമയം നാട്ടിലെ ഓണക്കാല ചെലവിന്‍റെ ഗുണ ഖജനാവിന് ഉണ്ടാകുമെന്നാണ് സര്‍ക്കാര്‍ കണക്കു കൂട്ടൽ. ജിഎസ്ടി വരുമാനം ഉള്‍പ്പെടെ ഉയരുമെന്നാണ് പ്രതീക്ഷ. ആദ്യ നാലു മാസത്തിൽ 13880.82 കോടിയാണ് ജിഎസ്ടി വരുമാനം.

വിഡി സതീശൻ സര്‍ക്കാറിന്റെ പുതിയ ബജറ്റിലെ മുഴുവൻ പ്രഖ്യാപനങ്ങളും അറിയാം!

Prabeesh PP — Fri, 19 Jun 2026 11:23:53 +0530

തിരുവനന്തപുരം: 2026 ജനുവരിയിൽ അവതരിപ്പിച്ച ബജറ്റിലെ തെറ്റായ കണക്കുകളെ തുടർന്ന് ഈ സർക്കാർ പുതുക്കിയ ബജറ്റ് അവതരിപ്പിക്കുമ്പോൾ സംസ്ഥാനത്തിന്റെ പ്രതീക്ഷിത വരുമാനത്തിൽ 20,500 കോടി രൂപയുടെ വൻ കുറവാണ് രേഖപ്പെടുത്തിയതെന്ന് ആമുഖമായി വ്യക്തമാക്കിയാണ് വിഡി സതീശൻ ബജറ്റ് അവതരിപ്പിച്ചത് . കഴിഞ്ഞ സർക്കാർ പദ്ധതി ചെലവിലെ യഥാർത്ഥ കണക്കുകൾ മറച്ചുവെക്കാൻ കിഫ്ബിയുടെയും പൊതുമേഖലാ സ്ഥാപനങ്ങളുടെയും കണക്കുകൾ കൂടി ഉൾപ്പെടുത്തി കബളിപ്പിക്കുകയായിരുന്നു എന്ന് ബജറ്റ് ആമുഖത്തിൽ കുറ്റപ്പെടുത്തുന്നു. നിലവിൽ കിഫ്ബിയും സോഷ്യൽ സെക്യൂരിറ്റി കമ്പനിയും ഉൾപ്പെടെ സർക്കാരിന് മേലുള്ള ആകെ സാമ്പത്തിക ബാധ്യത 87,012 കോടി രൂപയാണ്. ജീവനക്കാരുടെ ശമ്പള-പെൻഷൻ പരിഷ്കരണവും ലീവ് സറണ്ടർ ആനുകൂല്യം പുനഃസ്ഥാപിക്കലും നടപ്പാക്കിയാൽ ഇതിലും വലിയ ബാധ്യത സർക്കാർ ഏറ്റെടുക്കേണ്ടി വരുമെന്നും ബജറ്റ് ആമുഖത്തിൽ പറയുന്നു. കേരളം കടുത്ത സാമ്പത്തിക പ്രതിസന്ധിയിലാണെന്ന ധവളപത്രത്തിലെ കണ്ടെത്തലുകളുടെയും പശ്ചിമേഷ്യൻ സംഘർഷം ഉണ്ടാക്കിയ സാമ്പത്തിക ആഘാതത്തിന്റെയും പശ്ചാത്തലത്തിലാണ് ഈ ബജറ്റ് അവതരിപ്പിക്കുന്നത്. കടുത്ത ധനപ്രതിസന്ധിയുണ്ടെങ്കിലും ജനങ്ങൾക്ക് മേൽ അധിക ഭാരം അടിച്ചേൽപ്പിക്കാതെ, നിലവിലെ നികുതി സംവിധാനം കൂടുതൽ കാര്യക്ഷമമാക്കാനുള്ള നടപടികളാണ് സർക്കാർ ലക്ഷ്യമിടുന്നത്.

കടുത്ത സാമ്പത്തിക പരാധീനതകൾക്കിടയിലും 'ഇന്ദിര ഗ്യാരണ്ടി'യിലെ രണ്ട് ഗ്യാരണ്ടികൾ സർക്കാർ നടപ്പിലാക്കി. കൂടാതെ ആശാവർക്കർമാർ ഉൾപ്പെടെയുള്ള സ്കീം വർക്കർമാരുടെ വേതനവും വർദ്ധിപ്പിച്ചിട്ടുണ്ട്. ഡീമോഗ്രാഫിക് ഡിവിഡന്റ് ആയ യുവാക്കളുടെ എണ്ണം കുറയുകയും വയോജനങ്ങളുടെ എണ്ണം കൂടുകയും ചെയ്യുന്ന ഒരു പ്രത്യേക സാഹചര്യത്തിലൂടെയാണ് നിലവിൽ സംസ്ഥാനം കടന്നുപോകുന്നത്. ഈ പ്രത്യേക സാഹചര്യത്തിൽ യുവജനങ്ങൾക്ക് ആവശ്യമായ തൊഴിൽ അവസരങ്ങൾ സൃഷ്ടിക്കാനും വയോജനങ്ങൾക്ക് കൃത്യമായ കൈത്താങ്ങാകാനും സർക്കാർ പ്രതിജ്ഞാബദ്ധമാണെന്നും ബജറ്റ് വ്യക്തമാക്കുന്നു. സാമ്പത്തിക പ്രതിസന്ധികൾ പരിഹരിക്കുന്നതിനായി സംസ്ഥാന സമ്പദ്‌വ്യവസ്ഥയെ ഉത്തേജിപ്പിക്കുക, വിവിധ മേഖലകളിൽ വൻകിട നിക്ഷേപങ്ങൾ ആകർഷിക്കുക, ഖജനാവിലേക്ക് പണം സമാഹരിക്കുക എന്നിവയിലൂടെ ആ സമ്പത്തിന്റെ നീതിപൂർവ്വകമായ വിതരണം ഉറപ്പാക്കുക എന്നതാണ് ഈ പുതുക്കിയ ബജറ്റിന്റെ ലക്ഷ്യം. ഇതിനായി നിരവധി സ്വപ്ന പദ്ധതികളാണ് ബജറ്റിൽ വിഭാവനം ചെയ്യുന്നതെന്നും ബജറ്റ് ആമുഖത്തിൽ വ്യക്തമാക്കുന്നു...

വിഡി സതീശൻ അവതരിപ്പിച്ച ബജറ്റിലെ പ്രഖ്യാപനങ്ങളുടെ പൂര്‍ണരൂപം1. അടിസ്ഥാന സൗകര്യ വികസനവും സാമ്പത്തിക പദ്ധതികളും

മിഷൻ സമുദ്ര: കേരളത്തെ റോഡ്, സമുദ്രം, റെയിൽ, ഉൾനാടൻ ജലപാതകൾ, ഗ്രീൻഫീൽഡ് സിറ്റി എന്നിവയുമായി ബന്ധിപ്പിച്ചു തുറമുഖ നഗരമാക്കാനുള്ള സമഗ്ര പദ്ധതി. ഇതിലൂടെയുണ്ടാകുന്ന തൊഴിലവസരങ്ങളിൽ തീരദേശ ജനതയ്ക്ക് സംവരണം ഉറപ്പാക്കും.

സതേൺ കേരളാ ഇക്കണോമിക് കോറിഡോർ: തിരുവനന്തപുരം, കൊല്ലം, ആലപ്പുഴ ജില്ലകളെ സംയോജിപ്പിച്ചു തന്ത്രപരമായ ഏകീകൃത സാമ്പത്തിക മേഖല സൃഷ്ടിക്കും.

ഏവിയേഷൻ-ലോജിസ്റ്റിക്സ് ഹബ്ബ്: നാല് അന്താരാഷ്ട്ര വിമാനത്താവളങ്ങളെ കേന്ദ്രീകരിച്ച് കേരളത്തെ ദക്ഷിണേന്ത്യയിലെ പ്രധാന ഹബ്ബാക്കും.

ഇൻവെസ്റ്റ് കേരളം സെൽ: നിക്ഷേപകർക്ക് ഭൂമി, നിയമപരമായ അനുമതികൾ, നിക്ഷേപാനന്തര പിന്തുണ എന്നിവ നൽകുന്ന ഏകജാലക സംവിധാനം.

കേരള എം.എസ്.എം.ഇ. ഗ്രോത്ത് സ്കീം: സംസ്ഥാനത്തുടനീളം പതിനായിരത്തോളം പുതിയ എം.എസ്.എം.ഇ സംരംഭങ്ങൾക്ക് റിവോൾവിംഗ് ഫണ്ടും ടെക്നോ-മെന്റർമാരുടെ സഹായവും നൽകും.

സ്പെഷ്യൽ ഇൻവെസ്റ്റ്മെന്റ് സോൺ: ലോകോത്തര അടിസ്ഥാന സൗകര്യങ്ങളും പദ്ധതി വിജയവും ഉറപ്പുനൽകുന്ന പ്രത്യേക സാമ്പത്തിക മേഖല.

ലൈറ്റ് മെട്രോ: തിരുവനന്തപുരം, കോഴിക്കോട് ലൈറ്റ് മെട്രോ പദ്ധതികൾ നടപ്പിലാക്കും.

സാമ്പത്തിക വിഹിതം: 2026-27 വർഷത്തെ പദ്ധതി അടങ്കൽ തുക 30,370 കോടി രൂപയായി പുതുക്കി നിശ്ചയിച്ചു. തദ്ദേശ സ്ഥാപനങ്ങൾക്കുള്ള വികസനഫണ്ട് പദ്ധതി വിഹിതത്തിന്റെ 28.5 ശതമാനമായി ഉയർത്തി.

പ്രവാസി ഇൻവെസ്റ്റ്മെന്റ് ട്രസ്റ്റ് ഫണ്ട്: റെമിറ്റൻസ് ഇക്കോണമിയിൽ നിന്ന് ഇൻവെസ്റ്റ്മെന്റ് ഇക്കോണിയായി മാറാൻ പ്രവാസികളുടെ പങ്കാളിത്തം ഉറപ്പാക്കും.

വ്യവസായ ഹബ്ബുകൾ: പെരുമ്പാവൂരിൽ ഫർണിച്ചർ ഹബ്ബും, അതോടൊപ്പം സ്വർണ്ണ വിനിമയ കേന്ദ്രവും ആഭരണ നിർമ്മാണ പാർക്കും സ്ഥാപിക്കും.

ലാന്റ് മാനേജ്‌മെന്റ് നയം: ഭൂമിയുടെ ലഭ്യതക്കുറവ് പരിഹരിക്കാൻ പഴയ ഭൂനിയമങ്ങൾ കാലാനുസൃതമായി പരിഷ്കരിക്കും.

2. കാർഷിക, ക്ഷീര, തീരദേശ മേഖലകൾ

റബർ താങ്ങുവില: റബറിന്റെ താങ്ങുവില 200 രൂപയിൽ നിന്നും 250 രൂപയായി വർദ്ധിപ്പിക്കും.

ക്ഷീരവികസനം: മൂന്ന് വർഷത്തിനുള്ളിൽ പാലിന്റെ പ്രതിദിന ഉൽപാദനം ഒരു കോടി ലിറ്ററായി ഉയർത്തും.

തീരദേശ ക്ഷേമം: മത്സ്യത്തൊഴിലാളികൾക്കായി ഫിഷറീസ് സബ് പ്ലാൻ ആവിഷ്‌കരിക്കും. മണ്ണെണ്ണ സബ്‌സിഡി 75 രൂപയായി ഉയർത്തും. അപകട ഇൻഷുറൻസ് പുതുക്കും. രക്ഷാപ്രവർത്തനങ്ങൾക്ക് റെസ്‌ക്യൂ ബോട്ടുകളും വനിതകൾക്ക് മത്സ്യ വിപണനത്തിന് 'ഷീ സ്കൂട്ടറുകളും' അനുവദിക്കും. എല്ലാ തീരദേശവാസികൾക്കും പട്ടയം ലഭ്യമാക്കും. മുതലപ്പൊഴി ഹാർബറിന്റെ അപാകതകൾ പരിഹരിക്കും.

കൃഷി സഖി: വനിതാ കർഷക വികസനത്തിനായി പ്രത്യേക പരിപാടി നടപ്പാക്കും.

മറ്റ് പദ്ധതികൾ: മലയോര മേഖലയിൽ ബഹുവിള കൃഷി രീതി പ്രോത്സാഹിപ്പിക്കും, പട്ടയവിതരണ പ്രശ്നങ്ങൾ സമയബന്ധിതമായി പരിഹരിക്കും. യുവാക്കളെ കൃഷിയിലേക്ക് ആകർഷിക്കാൻ പദ്ധതി കൊണ്ടുവരും.

3. വിദ്യാഭ്യാസം, തൊഴിൽ, യുവജന ക്ഷേമം

കേരള നോളജ് വാലി: വിദേശത്തെ ലെഗസി യൂണിവേഴ്‌സിറ്റികളെ ഉൾപ്പെടെ ആകർഷിച്ചു കേരളത്തെ ഉന്നതവിദ്യാഭ്യാസ ലക്ഷ്യസ്ഥാനമാക്കും.

വയനാട് ട്രൈബൽ സർവകലാശാല: ആദിവാസി സമൂഹങ്ങളുടെ സാംസ്കാരിക പൈതൃകവും പരമ്പരാഗത വിജ്ഞാനവും സംരക്ഷിക്കാൻ തദ്ദേശീയ വിജ്ഞാന മേഖലയോടു കൂടി ആരംഭിക്കും.

ഗ്ലോബൽ ജോബ് വാച്ച് ടവർ: മാറിക്കൊണ്ടിരിക്കുന്ന ആഗോള തൊഴിൽ മേഖലയെക്കുറിച്ച് പഠിച്ചു യുവജനങ്ങളെ സജ്ജരാക്കും.

റാഗിങ് വിരുദ്ധ നടപടികൾ: റാഗിങ് തടയാൻ 'Sidharthan Student Distress App', വിദ്യാർത്ഥി ക്ഷേമത്തിനായി 'Sidharthan Anti Ragging & Student Welfare Act' എന്നിവ നടപ്പാക്കും. അക്കാദമിക് വിഷയങ്ങളിൽ അമിത രാഷ്ട്രീയ ഇടപെടൽ ഒഴിവാക്കാൻ അക്കാദമിക് കൗൺസിൽ രൂപീകരിക്കും.

ബഹിരാകാശ ഗവേഷണം: സാറ്റലൈറ്റ് സാങ്കേതികവിദ്യയ്ക്ക് ഊന്നൽ നൽകിയുള്ള ഗവേഷണ സ്ഥാപനങ്ങൾ ആരംഭിക്കും. സ്വകാര്യ സാറ്റലൈറ്റ് നിർമ്മാണ/വിക്ഷേപണ സ്ഥാപനങ്ങൾക്ക് പ്രോത്സാഹനം നൽകും.

മറ്റ് വിദ്യാഭ്യാസ പദ്ധതികൾ: ഉന്നത വിദ്യാഭ്യാസ സ്ഥാപനങ്ങളിലെ റിസർച്ച് സംവിധാനങ്ങൾ ഐഐടി മദ്രാസ് റിസർച്ച് പാർക്ക് മാതൃകയിൽ വിപുലീകരിക്കും. ബിരുദധാരികൾക്ക് വേഗത്തിൽ ജോലി ലഭിക്കാൻ ബ്രിഡ്ജ് പ്രോഗ്രാമുകൾ കൊണ്ടുവരും. 'സെമസ്റ്റർ ഇൻ കേരള' പദ്ധതി പുനരാരംഭിച്ച് അക്കാദമിക് ടൂറിസം ശക്തിപ്പെടുത്തും. കാമ്പസുകളിൽ വിദ്യാർത്ഥി വൈവിധ്യവൽക്കരണത്തിന് പരിഗണന നൽകും. ജവഹർലാൽ നെഹ്‌റു സെന്റർ ഫോർ സയന്റിഫിക് ടെംബർ പദ്ധതി ആവിഷ്കരിക്കും.

4. ആരോഗ്യം, സാമൂഹിക സുരക്ഷ, വയോജന ക്ഷേമം

ഉമ്മൻ ചാണ്ടി ആരോഗ്യ ഇൻഷുറൻസ് പദ്ധതി: എല്ലാ കുടുംബങ്ങൾക്കും 25 ലക്ഷം രൂപ വരെയുള്ള സൗജന്യ ആരോഗ്യ ഇൻഷുറൻസ് നടപ്പിലാക്കാനുള്ള പ്രാരംഭ നടപടികൾ ആരംഭിക്കും.

കേരള ഹെൽത്ത് ആൻഡ് ലൈഫ് സയൻസ് സിറ്റി: ആരോഗ്യ കേന്ദ്രങ്ങളെ ഒരു കുടക്കീഴിൽ കൊണ്ടുവന്ന് കേരളത്തെ പ്രമുഖ മെഡിക്കൽ ഡെസ്റ്റിനേഷനാക്കും. ചികിത്സാ ചെലവുകൾ കുറയ്ക്കാൻ സർക്കാർ ഇടപെടും.

മെഡിക്കൽ കോളേജുകൾ: കാസർഗോഡ്, ഇടുക്കി, വയനാട്, മഞ്ചേരി മെഡിക്കൽ കോളേജുകളുടെ ശോചനീയാവസ്ഥ പരിഹരിക്കും. തിരുവനന്തപുരത്തെ രണ്ടാം മെഡിക്കൽ കോളേജ് പ്രവർത്തനക്ഷമമാക്കും. ഹരിപ്പാട് പുതിയ മെഡിക്കൽ കോളേജ് സ്ഥാപിക്കും. കാരുണ്യ ആരോഗ്യസുരക്ഷാ പദ്ധതിയിലെ കുടിശ്ശിക തീർക്കും.

പ്രത്യേക ഹെൽത്ത് ക്ലസ്റ്ററുകൾ: ആദിവാസി മേഖലകളിൽ ട്രൈബൽ ഹെൽത്ത് ക്ലസ്റ്ററുകളും തീരദേശത്ത് കോസ്റ്റൽ കെയർ യൂണിറ്റുകളും സ്ഥാപിക്കും.

അപൂർവ്വ രോഗങ്ങൾക്കുള്ള സഹായം: എസ്.എം.എ. അടക്കമുള്ള അപൂർവ്വ രോഗങ്ങൾക്ക് മരുന്നുകൾ ലഭ്യമാക്കും. ടൈപ്പ് വൺ പ്രമേഹ ബാധിതരായ കുട്ടികൾക്ക് ഗുണമേന്മയുള്ള ഇൻസുലിനും, ഇൻസുലിൻ പമ്പും, ഗ്ലൂക്കോസ് മോണിറ്ററിംഗ് സെൻസറുകളും നൽകും.

സിൽവർ ഇക്കോണമി: വയോജനങ്ങൾക്ക് ആവശ്യമായ സ്ഥാപനങ്ങൾ, സാമ്പത്തിക സഹായം, സംരംഭകത്വം, വൈദഗ്ദ്ധ്യം എന്നിവ ഉൾപ്പെടുന്ന പദ്ധതി വികസിപ്പിക്കും. അന്താരാഷ്ട്ര മാതൃകയിൽ കെയർ ഗിവർ സർട്ടിഫിക്കറ്റ് കോഴ്‌സുകൾ ആരംഭിക്കും.

പരമ്പരാഗത വ്യവസായങ്ങൾ: സ്ത്രീ തൊഴിലാളികൾ കൂടുതലുള്ള കശുവണ്ടി, കയർ, കൈത്തറി വ്യവസായങ്ങൾക്ക് വേതന സഹായം (Income support scheme) നൽകും. പൂട്ടി കിടക്കുന്ന ഫാക്ടറികൾക്ക് ഒറ്റത്തവണ തീർപ്പാക്കൽ പദ്ധതി നടപ്പാക്കും. ഗിഗ്, ഓൺലൈൻ പ്ലാറ്റ്‌ഫോം തൊഴിലാളികൾക്ക് പ്രത്യേക പദ്ധതികൾ കൊണ്ടുവരും.

മറ്റ് പദ്ധതികൾ: വൺ കേരള കരുതൽ മിഷൻ വഴി ഗുരുതര രോഗബാധിതർക്കും പാവപ്പെട്ടവർക്കും നേരിട്ട് സഹായം എത്തിക്കും. മുൻ യു.ഡി.എഫ് സർക്കാരിന്റെ കാരുണ്യ ബെനവലന്റ് ഫണ്ട്, ശ്രുതിതരംഗം, സ്നേഹപൂർവ്വം, താലോലം, ക്യാൻസർ സുരക്ഷ തുടങ്ങിയ പദ്ധതികളുടെ നടത്തിപ്പ് കാര്യക്ഷമമാക്കും. എൻഡോസൾഫാൻ ദുരിതബാധിത കുടുംബങ്ങളെ സർക്കാർ ഏറ്റെടുക്കും.

5. വിനോദസഞ്ചാരം, കല, സംസ്‌കാരം

ടൂറിസത്തിന് വ്യവസായ പദവി: ടൂറിസത്തെ ഔദ്യോഗികമായി വ്യവസായമായി പ്രഖ്യാപിക്കും. തോട്ടം മേഖലയിൽ കൂടുതൽ സ്ഥലം ടൂറിസത്തിനായി ഉപയോഗിക്കാൻ നിയമഭേദഗതി കൊണ്ടുവരും.

തീർത്ഥാടന ടൂറിസം സർക്യൂട്ട്: അർത്തുങ്കൽ ബസലിക്ക, അമ്പലപ്പുഴ ക്ഷേത്രം, കാക്കഴം പള്ളി, മണ്ണാറശ്ശാല, കൃഷ്ണപുരം കൊട്ടാരം, മാതാ അമൃതാന്ദമയി മഠം, ഓച്ചിറ ക്ഷേത്രം എന്നിവയെ ബന്ധിപ്പിച്ചു പദ്ധതി നടപ്പാക്കും.

അന്തർദേശീയ മാരിടൈം മ്യൂസിയം: സമുദ്രയാത്രാ ചരിത്രം, കപ്പൽ നിർമ്മാണ പാരമ്പര്യം, വാണിജ്യപൈതൃകം എന്നിവ സമന്വയിപ്പിച്ചു സ്ഥാപിക്കും.

ജെ.സി ഡാനിയേൽ ഇന്റർനാഷണൽ ഫിലിം സിറ്റി: കൊച്ചിയിൽ 'ചിത്രനഗരം' സ്ഥാപിക്കും. സിനിമയ്ക്ക് വ്യവസായ പദവി നൽകും.

സ്മാരകങ്ങളും സാംസ്കാരിക പാർക്കുകളും:

കോഴിക്കോട് എം.ടി. വാസുദേവൻ നായരുടെ പേരിൽ കൾച്ചറൽ പാർക്ക്.

തൃശ്ശൂരിൽ സംഗീത സംവിധായകൻ ജോൺസൺ മാസ്റ്ററുടെ പേരിൽ പുതിയ മ്യൂസിക് അക്കാദമി.

കോഴിക്കോട് ഗായകൻ ഉമ്പായിയുടെ നാമധേയത്തിൽ മ്യൂസിക് അക്കാദമി.

ആർട്ടിസ്റ്റ് നമ്പൂതിരി ട്രസ്റ്റിന്റെ സഹായത്തോടെ കൾച്ചറൽ സെന്റർ ആൻഡ് മ്യൂസിയം.

ഡൽഹിയിൽ ശ്രീനാരായണ ഗുരുവിന് പ്രതിമയും സാംസ്‌കാരിക കേന്ദ്രവും.

എറണാകുളത്ത് നടൻ സലിംകുമാറിന് സ്മാരകം.

തിരുവനന്തപുരം പട്ടത്ത് മുൻ മുഖ്യമന്ത്രി ആർ. ശങ്കറിന് സ്മാരക മന്ദിരം.

ചാലക്കുടിയിൽ പനമ്പള്ളി ഗോവിന്ദ മേനോൻ സ്മാരകം.

മറ്റ് പദ്ധതികൾ: കേരളത്തിന്റെ തനതായ പാചക കല ലോകത്തിനു മുന്നിൽ പരിചയപ്പെടുത്താൻ പാചകകലാ ഇന്റസ്റ്റിറ്റ്യൂട്ട് (Culinary Institute) സ്ഥാപിക്കും. അതിരപ്പള്ളിയിൽ ഇക്കോ-ഫ്രണ്ട്‌ലി ഡൈനമിക് ലൈറ്റിംഗ് പദ്ധതി നടപ്പാക്കും. മലബാറിൽ ലോക നിലവാരത്തിലുള്ള ഫുട്‌ബോൾ സ്റ്റേഡിയം നിർമ്മിക്കും. 'ബ്രാൻഡ് കേരളം' വഴി സുഗന്ധവ്യഞ്ജനങ്ങൾ, കയർ, ഹാൻഡ്‌ലൂം ഉൽപ്പന്നങ്ങൾ എന്നിവ ബ്രാൻഡ് ചെയ്യും.

6. ക്രമസമാധാനം, സുരക്ഷ, പരിസ്ഥിതി

സ്ത്രീ-ശിശു സുരക്ഷ: കുട്ടികൾക്കെതിരെയുള്ള അതിക്രമങ്ങളോട് സീറോ ടോളറൻസ് നിലപാട്. സ്ത്രീകൾക്കെതിരെയുള്ള കുറ്റകൃത്യങ്ങൾ തടയാൻ 'മകൾക്കൊപ്പം' പദ്ധതി നടപ്പാക്കും.

ലഹരിവിരുദ്ധ നടപടികൾ: പുതുതലമുറ ലഹരി വസ്തുക്കൾ തിരിച്ചറിയാൻ എല്ലാ എക്‌സൈസ് ഓഫീസുകളിലും ഡ്രഗ് ഡിറ്റക്ഷൻ കിറ്റുകൾ ലഭ്യമാക്കും. 'ഓപ്പറേഷൻ തൂഫാൻ' വ്യാപിപ്പിക്കും.

കേരള ഡിസാസ്റ്റർ റെസിലിയൻസ് സെന്റർ: പ്രകൃതി ദുരന്തങ്ങൾ സംബന്ധിച്ച മുൻകൂട്ടി മുന്നറിയിപ്പ് നൽകുന്ന സംവിധാനങ്ങൾ, കാലാവസ്ഥാ മോഡലിംഗ്, ജിയോ സ്പേഷ്യൽ ഇന്റലിജൻസ് എന്നിവ സമന്വയിപ്പിച്ചു സ്ഥാപിക്കും.

വന്യജീവി സംഘർഷം: മനുഷ്യ-വന്യജീവി സംഘർഷം ലഘൂകരിക്കുന്നതിനായി ആധുനിക സാങ്കേതിക വിദ്യ ഉപയോഗപ്പെടുത്തും, ബജറ്റ് വിഹിതം ഉയർത്തും.

കാർബൺ ന്യൂട്രൽ കേരളം: 2050-ഓടു കൂടി കേരളത്തെ പൂർണ്ണമായും കാർബൺ ന്യൂട്രൽ സംസ്ഥാനമാക്കും. പുനരുപയോഗ ഊർജ്ജ സ്രോതസ്സുകൾ പ്രോത്സാഹിപ്പിച്ചു കേരളത്തെ ഗ്രീൻ ഹൈഡ്രജൻ ഹബ്ബാക്കും.

റോഡ് സംസ്‌കാരം: കാൽനട യാത്രക്കാർക്ക് സുരക്ഷിതത്വം ഉറപ്പാക്കുന്ന സമഗ്രമായ ട്രാഫിക് നയം രൂപീകരിക്കും.

7. ഭരണനിർവ്വഹണം, പട്ടികജാതി-പട്ടികവർഗ്ഗ ക്ഷേമം, ജീവനക്കാരുടെ ആനുകൂല്യങ്ങൾ

പ്രത്യേക സാമ്പത്തിക വിഹിതം: പട്ടികജാതി മേഖലയ്ക്ക് 527.68 കോടി രൂപയും പട്ടികവർഗ്ഗ മേഖലയ്ക്ക് 152.52 കോടി രൂപയും കൂടുതലായി അനുവദിച്ചു. മത്സ്യബന്ധന മേഖലയ്ക്ക് 50 കോടി രൂപ അധികമായി നൽകി.

നിയമ നിർമ്മാണം: എസ്‌സി/എസ്ടി വിഭാഗങ്ങൾക്കായി വകയിരുത്തിയ തുക കൃത്യമായി സമയബന്ധിതമായി വിനിയോഗിക്കുന്നുണ്ടെന്ന് ഉറപ്പുവരുത്താൻ നിയമം കൊണ്ടുവരും. ഇവർക്കായി പുതിയ ഭവന നിർമ്മാണ പദ്ധതിയും സ്പെഷ്യൽ റിക്രൂട്ട്മെന്റും നടത്തും.

ജീവനക്കാരുടെ ആനുകൂല്യങ്ങൾ: സർക്കാർ ജീവനക്കാരുടെ ഡി.എ/ ഡി.ആർ മുടക്കം കൂടാതെ നൽകും. മെഡിസെപ് പരിഷ്‌ക്കരിക്കും. അഷ്വേഡ് പെൻഷൻ പദ്ധതിയിലെ അവ്യക്തത പരിശോധിച്ച് എൻ.പി.എസ് സംവിധാനം പരിഷ്‌ക്കരിക്കും. കെ.യു.ഡബ്ല്യു.ജെ ക്ഷേമപ്രവർത്തനങ്ങൾക്ക് സഹായം നൽകും, നോൺ ജേണലിസ്റ്റ് പെൻഷൻ തുക വർദ്ധിപ്പിക്കും.

തദ്ദേശ ഭരണം & മറ്റു സഹായങ്ങൾ: ഗ്രാമസഭയിൽ നേരിട്ട് പങ്കെടുക്കാൻ സാധിക്കാത്തവർക്ക് ഓൺലൈനായി പങ്കെടുക്കാൻ സൗകര്യം ഒരുക്കും. മഹാത്മാഗാന്ധി തൊഴിലുറപ്പ് പദ്ധതിയുടെ സംസ്ഥാന വിഹിതം 1422.60 കോടി രൂപയായി ഉയർത്തും. സഹകരണ സംഘങ്ങളിലെ നിക്ഷേപം തിരികെ നൽകാൻ നിക്ഷേപ ഗ്യാരന്റി സ്കീമിൽ മാറ്റം വരുത്തും. ഇ-ഗ്രാന്റ് കുടിശ്ശിക സമയബന്ധിതമായി തീർപ്പാക്കും. സംസ്ഥാന സെക്രട്ടേറിയറ്റിനെ രാജ്യത്തെ ഏറ്റവും മികച്ചതാക്കും.

8. പ്രാദേശിക വികസന പാക്കേജുകൾ

വിലങ്ങാട് പാക്കേജ്: ഉരുൾപൊട്ടലിലുണ്ടായ വിലങ്ങാടിന്റെ പുനർനിർമ്മിതിക്കായി പ്രത്യേക പാക്കേജ് പ്രഖ്യാപിച്ചു.

ജില്ലാ പാക്കേജുകൾ: വയനാട്, കാസർഗോഡ്, ഇടുക്കി ജില്ലകൾക്കായുള്ള പ്രത്യേക വികസന പാക്കേജുകൾ ഊർജ്ജിതമായി നടപ്പാക്കും.

സംസ്ഥാനത്ത് നികുതി വരുമാനത്തിൽ കുതിപ്പ്: ആദ്യ അഞ്ച് മാസം കൊണ്ട് 9000 കോടിയിലധികം വർധന; ഒപ്പം കടവും കൂടി

Web Desk — Sun, 13 Sep 2026 06:27:28 +0530

തിരുവനന്തപുരം: സംസ്ഥാനത്ത് നടപ്പുസാമ്പത്തിക വർഷത്തിലെ ആദ്യ അഞ്ചു മാസം സംസ്ഥാന സര്‍ക്കാരിന്‍റെ നികുതി വരുമാനം മുന്‍ വര്‍ഷത്തെ അപേക്ഷിച്ച് ഒന്‍പതിനായിരം കോടിയിലധികം കൂടിയെന്ന് കണക്ക്. ഏപ്രിൽ മുതൽ ഓഗസ്റ്റ് വരെയുള്ള നികുതി വരുമാനത്തിൻ്റെ കണക്കാണ് പുറത്തുവന്നത്. ഓണ വിപണി സജീവമായിരുന്ന കഴിഞ്ഞ മാസം നികുതി വരുമാനം മുന്‍ മാസത്തേക്കാള്‍ 4700 കോടിയാണ് വര്‍ധിച്ചതെന്നാണ് സംസ്ഥാന സർക്കാർ പുറത്തുവിട്ട കണക്ക്. മുന്‍ വര്‍ഷത്തെ ഇതേ സമയത്തേക്കാള്‍ റവന്യൂ കമ്മി കുറഞ്ഞെങ്കിലും കടമെടുപ്പ് കൂടിയെന്നതാണ് മറ്റൊരു സവിശേഷത..

ആദ്യത്തെ അഞ്ച് മാസത്തെ ജിഎസ്ടി വരുമാനം 20,274 കോടി രൂപയാണ്. ബജറ്റ് കണക്കാക്കിയതിന്‍റെ നാൽപത് ശതമാനമാണ് ആദ്യ അഞ്ച് മാസം കൊണ്ട് ഖജനാവിലെത്തിയത്. മുൻ വര്‍ഷം ഇത് 35 ശതമാനമായിരുന്നു. വിൽപന നികുതി ഏതാണ്ട് കഴിഞ്ഞ വര്‍ഷത്തേതു പോലെയാണ്. ആദ്യ 5 മാസം നികുതി വരുമാനം 51578.32 കോടിയാണ്. ഓണം വിപണി തുണച്ചപ്പോള്‍ കഴിഞ്ഞ മാസം 14118 കോടിയാണ് നികുതി പിരിച്ചത്. നികുതിയേതര വരുമാനത്തിൽ മുന്‍ വര്‍ഷത്തെക്കാൾ എട്ടു ശതമാനത്തോളം വര്‍ധനയുണ്ടായി. 7727 കോടിയാണ് പിരിച്ചത്. എന്നാൽ കഴിഞ്ഞ മാസം ഒരു രൂപ പോലും ഗ്രാന്‍ഡായി കിട്ടിയില്ല. റവന്യു കമ്മി ആദ്യ 5 മാസത്തെ ബജറ്റ് കണക്കാക്കിയതിന്‍റെ പകുതിയിലെത്തി, 18688 കോടി. എന്നാൽ കഴിഞ്ഞ വര്‍ഷം ആദ്യ 5 മാസം റവന്യൂ കമ്മി ഇരുപതിനായിരം കോടി രൂപ ആയിരുന്നു. കടമെടുപ്പ് മുന്‍ വര്‍ഷത്തേക്കാള്‍ കൂടി. ആകെ 30560.93 കോടി രൂപയാണ് ആദ്യ അഞ്ച് മാസത്തിലെ കടം. കഴിഞ്ഞ മാസം 4099 കോടി രൂപയാണ് കടമെടുത്തത്. മുന്‍ വര്‍ഷം ആദ്യ 5 മാസം 26974.13 കോടിയാണ് കടമെടുത്തത്. മൂലധന ചെലവും മുൻ വര്‍ഷത്തേക്കാള്‍ കൂടി. 10458 കോടി രൂപയാണ് മൂലധന ചെലവ്

'ചെമ്പിന് തലവര തെളിയുന്നു', ആഗോള വിലയിൽ വലിയ വർധനവ്, ഇന്ത്യക്ക് മുന്നിലുള്ളത് വലിയ കടമ്പ

Sangeetha KS — Tue, 18 Aug 2026 13:08:28 +0530

ഈ ഭൂമി നിലനിന്നു പോകാൻ ഏറ്റവും അനിവാര്യമായ ചില ലോഹങ്ങളെടുത്താൽ അതിൽ ഏറ്റവും ആദ്യ പട്ടികയിൽ ഇടം നേടുന്ന ഒന്നാണ് കോപ്പർ അഥവാ മലയാളികളുടെ ചെമ്പ്. പണ്ടത്തെ പാത്രങ്ങൾ മുതൽ നാണയങ്ങൾ വരെ ചെമ്പ് കൊണ്ടുള്ളതായിരുന്നു എന്ന് പറഞ്ഞാൽ അത് പുതിയ തലമുറക്ക് വിശ്വസിക്കാൻ പ്രയാസമാകും. എന്നാൽ, ഇന്നും ചെമ്പ് നമ്മുടെ ജീവിതത്തിന്റെ അവിഭാജ്യ ഘടകമായിത്തന്നെ നിൽക്കുന്നു. പവർഗ്രിഡുകൾ, ഇലക്ട്രിക് വാഹനങ്ങൾ (EV), പുനരുപയോഗ ഊർജ പദ്ധതികൾ, നിർമ്മിത ബുദ്ധി (AI) അടിസ്ഥാനമാക്കിയുള്ള ഡാറ്റാ സെന്ററുകൾ തുടങ്ങിയ പുതിയ ഊർജ്ജ സമ്പദ്‌വ്യവസ്ഥയുടെ എല്ലാ മേഖലകളിലും ചെമ്പിന്റെ ആവശ്യകത ദിവസം കൂടുന്തോറും കൂടുകയാണ്.

ഇന്ത്യയിലടക്കം ആവശ്യകത കുത്തനെ ഉയർന്നതോടെ ചെമ്പിന്റെ ആഗോള വിലയിൽ വലിയ വർധനവാണ് രേഖപ്പെടുത്തിയിരിക്കുന്നത്. ആഗസ്റ്റ് മാസം മൾട്ടി കമ്മോഡിറ്റി എക്സ്ചേഞ്ചിൽ (MCX) ചെമ്പ് ഫ്യൂച്ചേഴ്സ് വില കിലോഗ്രാമിന് 1,400 രൂപയ്ക്ക് അടുത്തേക്ക് ഉയർന്നു. ലണ്ടൻ മെറ്റൽ എക്സ്ചേഞ്ചിലെ (LME) ആഗോള ചെമ്പ് വിലയും റെക്കോർഡ് നിരക്കുകൾക്ക് അടുത്തായി തുടരുകയാണ്.

ആവശ്യകത പെട്ടെന്ന് ഇത്രയും കൂടിയതെങ്ങനെ?

ഒരു പുതിയ ചെമ്പ് ഖനി നിർമ്മിച്ച് ഉത്പാദനം ആരംഭിക്കുക എന്നത് വർഷങ്ങൾ നീളുന്നതും ചെലവേറിയതുമായ പ്രക്രിയയാണ്. പുതിയ നിക്ഷേപങ്ങൾ കണ്ടെത്തുക, പാരിസ്ഥീതിക അനുമതികൾ നേടുക, അടിസ്ഥാന സൗകര്യമൊരുക്കുക എന്നിവയ്ക്കും സമയമെടുക്കും. അതേസമയം, നിലവിലുള്ള ഖനികളിൽ നിന്നുള്ള അയിരിന്റെ ഗുണനിലവാരം കുറയുന്നതും ഉത്പാദനത്തിലെ തടസങ്ങളും ആഗോള വിതരണത്തെ ബാധിക്കുന്നുണ്ട്.

2025-ലെ 28 ദശലക്ഷം ടണ്ണിൽ നിന്ന് 2040-ഓടെ ആഗോള തലത്തിൽ ചെമ്പിന്റെ ആവശ്യകത 42 ദശലക്ഷം ടണ്ണായി ഉയരുമെന്ന് 'എസ് & പി ഗ്ലോബൽ' (S&P Global) അനുമാനിക്കുന്നു. പ്രധാനമായും ഇലക്ട്രിഫിക്കേഷൻ, ഇലക്ട്രിക് വാഹനങ്ങൾ, ഡാറ്റാ സെന്ററുകൾ എന്നിവയിൽ ആയിരിക്കും 50 ശതമാനത്തോളം വരുന്ന ഈ ആവശ്യകതയുടെ കൂടുതലും പ്രതിഫലിക്കുക. ആവശ്യകത ഏറുമ്പോഴും വിതരണം വർദ്ധിപ്പിക്കാൻ സാധിക്കാത്തത് വിപണിയിൽ വലിയ പ്രതിസന്ധി സൃഷ്ടിക്കുന്നു.

ഇത്രയും വില കൊടുത്ത് ചെമ്പ് വാങ്ങുന്നതെന്ത് കൊണ്ട്?

ചെമ്പ് അസംസ്കൃത വസ്തുവായി ഉപയോഗിക്കുന്ന നിർമ്മാണ കമ്പനികൾക്ക് അതിന്റെ വില കുറയുന്നതുവരെ കാത്തിരിക്കാൻ സാധിക്കില്ല. ഇലക്ട്രിക് വാഹനങ്ങൾ ഉൾപ്പെടെയുള്ളവയുടെ ഓ‍‌ർഡറുകൾ സമയബന്ധിതമായി പൂർത്തിയാക്കാൻ സാധിച്ചില്ലെങ്കിൽ ഉത്പാദനം തടസപ്പെടുകയും കസ്റ്റമേഴ്സിനെ നഷ്ടപ്പെടുകയും ചെയ്യും. വ്യാപാരികൾക്ക് വില കുറയുന്നത് വരെ കാത്തിരിക്കാമെങ്കിലും കേബിൾ, ട്രാൻസ്ഫോർമർ നിർമ്മാതാക്കൾക്ക് തങ്ങളുടെ ഫാക്ടറികൾ പ്രവർത്തിപ്പിക്കാൻ ഉടനടി ചെമ്പ് ആവശ്യമാണ്. അതിനാൽ, ബെഞ്ച്മാർക്ക് നിരക്കിനേക്കാൾ കൂടുതൽ പ്രീമിയം തുക നൽകിയും ചെമ്പ് വാങ്ങാൻ അവർ നിർബന്ധിതരാകുന്നു.

ഇന്ത്യയെ സംബന്ധിച്ച് പ്രശ്നം കുറച്ചുകൂടി സങ്കീർണ്ണമാണ്. ആവശ്യത്തിന് ശുദ്ധീകരിച്ച ചെമ്പ് (Refined Copper) സ്വന്തമായി ഉത്പാദിപ്പിക്കാൻ ഇന്ത്യക്ക് സാധിക്കുന്നില്ല എന്നുള്ളത് ഒരു പോരായ്മയാണ്. ഇങ്ങനെ ഇറക്കുമതിയെ കൂടുതലായി ആശ്രയിക്കുന്നത് ഇന്ത്യയെ ഈ വിലക്കയറ്റം ചില്ലറയൊന്നുമല്ല ബാധിക്കുക.

ഇന്ത്യയുടെ ഭാവിയിൽ ചെമ്പിന്റെ പങ്ക്

ഊർജ പരിവർത്തനത്തിൽ " the new oil- (പുതിയ എണ്ണ)" എന്നാണ് ചെമ്പ് അറിയപ്പെടുന്നത്. 2025 സാമ്പത്തിക വർഷത്തിൽ ഇന്ത്യയിൽ ചെമ്പിന്റെ ആവശ്യകത 9.3% വർധിച്ച് 1.878 ദശലക്ഷം ടണ്ണിലെത്തി. ഇതിൽ കെട്ടിട നിർമ്മാണ മേഖലയ്ക്കാണ് (25%) ഏറ്റവും കൂടുതൽ ചെമ്പ് ആവശ്യമുള്ളത്. വ്യാവസായിക ആവശ്യങ്ങൾ (19%), അടിസ്ഥാന സൗകര്യ വികസനം (17%) എന്നിവയാണ് തൊട്ടുപിന്നിൽ. അതേസമയം സോളാർ, വിൻഡ് പവർ, ഇവി, ബാറ്ററി സ്റ്റോറേജ് തുടങ്ങിയ ഹരിത ഊർജ മേഖലകളിൽ ചെമ്പിന്റെ ഉപയോഗം കഴിഞ്ഞ വർഷത്തിൽ 32% ഉയർന്നുവെങ്കിലും ആകെ ആവശ്യകതയുടെ 4.6% മാത്രമാണിത്. 2026 മേയ് മാസത്തിൽ ഇന്ത്യയിലെ വൈദ്യുതി ആവശ്യകത റെക്കോർഡ് ഭേദിച്ച് 270.8 ജിഗാവാട്ടിൽ (GW) എത്തിയിരുന്നു. രാജ്യത്തിന്റെ വ്യാവസായികവും ഗാർഹികവുമായ വൈദ്യുതി ശൃംഖല വികസിക്കുന്നതിനനുസരിച്ച് വരും വർഷങ്ങളിൽ ഇന്ത്യയിൽ ചെമ്പിന്റെ ആവശ്യകത ഇനിയും കുതിച്ചുയരുമെന്നാണ് സാമ്പത്തിക വിദഗ്ധരുടെ വിലയിരുത്തൽ.

'ഖജനാവിൽ പൂച്ച പെറ്റ് കിടക്കുകയായിരുന്നില്ല'; മുൻ സർക്കാർ ബാക്കിവെച്ചത് 5263 കോടി രൂപയെന്ന് കണക്കുകൾ

Prajeesh Ram — Thu, 04 Jun 2026 11:22:35 +0530

തിരുവനന്തപുരം: 2026 ഏപ്രിലിൽ ഖജനാവിൽ ഉണ്ടായിരുന്നത് 5263 കോടിയെന്ന് കണക്കുകൾ. നേരത്തെ ഖജനാവിൽ പൂച്ച പെറ്റ് കിടക്കുകയായിരുന്നുവെന്നായിരുന്നു മുഖ്യമന്ത്രിയുടെ വാദം. എന്നാൽ, ഖജനാവിൽ 5263 കോടി രൂപ ബാലൻസ് ഉണ്ടെന്ന് മുൻ ധനകാര്യ മന്ത്രി കെ.എൻ. ബാലഗോപാൽ പറഞ്ഞിരുന്നു. ഈ വാദം സാധൂകരിക്കുന്നതാണ് ധവളപത്രത്തിൽ പുറത്തുവന്ന കണക്കുകൾ. സംസ്ഥാനത്തിന്റെ വരുമാനത്തിന്റെ ഏകദേശം 80 ശതമാനവും ശമ്പളം, പെൻഷൻ, പലിശ അടവ് എന്നിവയ്ക്കാണ് ചെലവാകുന്നതെന്ന് ധവളപത്രം. ഈ സാഹചര്യം ദീർഘകാലാടിസ്ഥാനത്തിൽ സാമ്പത്തികമായി നിലനിൽക്കുന്നതല്ലെന്ന് റിപ്പോർട്ട് വിലയിരുത്തുന്നു. സർക്കാർ ജീവനക്കാരുടെ വിരമിക്കൽ പ്രായം കേന്ദ്രസർക്കാരിന്റെ നിലവാരത്തിലേക്ക് ഉയർത്തണമെന്ന് നിർദേശം മുന്നോട്ടുവയ്ക്കുന്നു. നിലവിലെ സാഹചര്യത്തിൽ ഉദ്യോഗസ്ഥർ അനുഭവസമ്പത്ത് പരമാവധി പ്രയോജനപ്പെടുത്താൻ കഴിയുന്ന പ്രായത്തിലാണു വിരമിക്കുന്നത്. വിരമിക്കൽ പ്രായം ഒരു വർഷം വർധിപ്പിക്കുമ്പോൾ സംസ്ഥാനത്തിന് ഏകദേശം 6,000 കോടി രൂപയുടെ വിരമിക്കൽ ആനുകൂല്യച്ചെലവ് ലാഭിക്കാനാകുമെന്നും റിപ്പോർട്ട് പറയുന്നു.

കേന്ദ്രസർക്കാരിനെപ്പോലെ പത്തുവർഷത്തിലൊരിക്കൽ മാത്രം ശമ്പള കമ്മീഷൻ നടപ്പാക്കുന്നതും പരിഗണിക്കാവുന്ന നിർദേശമാണ്. അതോടൊപ്പം സർക്കാർ സേവനങ്ങളുടെ കാര്യക്ഷമതയും ഉത്തരവാദിത്തവും മെച്ചപ്പെടുത്തേണ്ടതുണ്ടെന്നും റിപ്പോർട്ട് ചൂണ്ടിക്കാട്ടുന്നു.

പിഎഫിൽ വമ്പൻ മാറ്റം, പണം പിൻവലിക്കാനുള്ള വ്യവസ്ഥകൾ ലളിതമാക്കി, തൊഴിലാളി വിഹിതം മിനിമം 1800 രൂപ, ബാക്കി നിക്ഷേപം

Web Desk — Thu, 02 Jul 2026 14:16:56 +0530

ദില്ലി: പ്രൊവിഡൻറ് ഫണ്ടിൽ തൊഴിലാളികളും സ്ഥാപനമുടമകളും നിർബന്ധമായും അടക്കേണ്ട വിഹിതം പരമാവധി 1800 രൂപയായി നിശ്ചയിച്ചു. ഇതിനു മുകളിലുള്ള ഏതു തുകയും തൊഴിലാളിയോ സ്ഥാപനമുടമയോ സ്വമേധയാ അടയ്ക്കുന്ന തുകയായി കണക്കാക്കും. തൊഴിലാളി നൽകുന്ന വിഹിതത്തിന് 1800 രൂപക്ക് മേൽ തത്തുല്യ വിഹിതം അടയ്ക്കണോ എന്നത് സ്ഥാപനമുടമക്ക് നിശ്ചയിക്കാം. കൂടുതൽ വിഹിതം അടയ്ക്കുന്നവർക്ക് എപ്പോൾ വേണമെങ്കിലും അത് വേണ്ടെന്നു വെക്കാനുള്ള സ്വാതന്ത്ര്യവും ചട്ടങ്ങളിലെ മാറ്റം നൽകുന്നു.

പ്രൊവിഡൻറ് ഫണ്ടിൽ നിന്ന് പണം പിൻവലിക്കാനുള്ള വ്യവസ്ഥകളും ലളിതമാക്കി. നിലവിൽ 13 കാര്യങ്ങൾക്കായി പിൻവലിക്കാം എന്നത് മൂന്ന് വിഭാഗങ്ങളായി തരം തിരിച്ചു. ചികിത്സ, വിവാഹം, വിദ്യാഭ്യാസം എന്നിവ ഉൾപ്പെടുന്ന അത്യാവശ്യങ്ങൾ, വീട് നിർമ്മാണം, വാങ്ങൽ, സവിശേഷ സാഹചര്യങ്ങൾ എന്നീ മൂന്ന് വിഭാഗങ്ങളിലാവും പണം പിൻവലിക്കാൻ സൗകര്യം ഉണ്ടാകുകയെന്നും ഇപിഎഫ്ഒ അറിയിച്ചു. എട്ടു കോടി അംഗങ്ങളാണ് എംപ്ലോയീസ് പ്രോവിഡൻറ് ഫണ്ടിൽ നിലവിലുള്ളത്.

രാജ്യത്ത് ആഭ്യന്തര വിമാന ടിക്കറ്റ് നിരക്ക് ഉയർന്നേക്കും; തുടർച്ചയായ രണ്ടാം മാസവും വിമാന ഇന്ധനത്തിൻ്റെ വില വർധിപ്പിച്ചു

Kiran Gangadharan — Tue, 01 Sep 2026 10:30:25 +0530

ദില്ലി: ആഗോളവിപണിയിൽ അസംസ്കൃത എണ്ണവില ഉയർന്ന പശ്ചാത്തലത്തിൽ രാജ്യത്ത് വിമാന ഇന്ധന വില വീണ്ടും വർധിപ്പിച്ചു. പൊതുമേഖലാ എണ്ണക്കമ്പനികൾ ലിറ്ററിന് 5.46 ശതമാനം വില വർധിപ്പിച്ചു. ഇതോടെഎവിയേഷന്‍ ടര്‍ബൈന്‍ ഫ്യൂവലിന്റെ വില ലിറ്ററിന് 6.28 രൂപ വർധിച്ച് 121.28 രൂപയായി. തുടർച്ചയായ രണ്ടാം മാസമാണ് വിമാന ഇന്ധനവില വർധിപ്പിക്കുന്നത്. നിലവിലെ സാഹചര്യം തുടരുകയാണെങ്കിൽ വിമാനക്കമ്പനികൾ ടിക്കറ്റ് നിരക്ക് വർധിപ്പിക്കാൻ സാധ്യതയുണ്ട്. യാത്രക്കാരുടെ എണ്ണം, സീറ്റുകളുടെ ലഭ്യത, കമ്പനികൾ തമ്മിലുള്ള മത്സരം എന്നിവ പരിഗണിച്ചായിരിക്കും വിമാനക്കമ്പനികൾ നിരക്കുകളിൽ മാറ്റം വരുത്തുന്നത്. കൂടുതൽ ആവശ്യക്കാരുള്ള പ്രധാന റൂട്ടുകളിൽ ടിക്കറ്റ് നിരക്ക് ഉയരാൻ സാധ്യതയേറെയാണ്.

പശ്ചിമേഷ്യയിലെ സംഘർഷത്തെ തുടർന്ന് ആഗോള വിപണിയിൽ ക്രൂഡ് ഓയിൽ വില ഗണ്യമായി ഉയർന്നതാണ് ഇന്ധനവില വർധിക്കാൻ പ്രധാന കാരണം. ബ്രെന്റ് ക്രൂഡ് ഓയിൽ വില ബാരലിന് 90 ഡോളറിനോട് അടുത്തെത്തിയത് ഇന്ധന സംസ്കരണ ചെലവുകളിൽ വലിയ വർധനവുണ്ടാക്കിയെന്ന് എണ്ണക്കമ്പനികൾ പറയുന്നു. വിമാനക്കമ്പനികളുടെ പ്രവർത്തനച്ചെലവിൽ 35 മുതൽ 40 ശതമാനം വരെ ഇന്ധനച്ചെലവാണ്. അതിനാൽ വിമാന ഇന്ധനവിലയിലുണ്ടാകുന്ന വർധനവ് കമ്പനികളുടെ നടത്തിപ്പിനെ നേരിട്ട് ബാധിക്കും.

യുഎസ് ഫെഡറൽ റിസർവ് പലിശ നിരക്ക് വർധിപ്പിച്ചു; 2023 ജൂലൈയ്ക്ക് ശേഷമുള്ള ആദ്യ നിരക്ക് വർധന, ട്രംപിൻ്റെ നിലപാടിന് തിരിച്ചടി

Deepu Divakaran — Thu, 17 Sep 2026 01:40:26 +0530

വാഷിങ്ടൺ: യുഎസ് കേന്ദ്രബാങ്കായ ഫെഡറൽ റിസർവ് പലിശ നിരക്ക് വർധിപ്പിച്ചു. കേന്ദ്ര ബെഞ്ച്മാർക്ക് പലിശ നിരക്കുകളിൽ 0.25 ശതമാനം വർധിപ്പിച്ച് 3.75 ശതമാനം മുതൽ 4 ശതമാനം വരെയുള്ള പരിധിയിലാക്കി. ഫെഡറൽ റിസർവ് ചെയർമാൻ കെവിൻ വാർഷിന്റെ നേതൃത്വത്തിൽ ചേർന്ന ഫെഡറൽ ഓപ്പൺ മാർക്കറ്റ് കമ്മിറ്റി (FOMC) യുടേതാണ് തീരുമാനം. 2023 ജൂലൈയ്ക്ക് ശേഷം ഇതാദ്യമായാണ് യുഎസ് കേന്ദ്രബാങ്ക് പലിശ നിരക്ക് ഉയർത്തുന്നത്.

മിഡിൽ ഈസ്റ്റിലെ യുദ്ധവും ഉയർന്ന പണപ്പെരുപ്പവും കണക്കിലെടുത്ത് നടപടി. ആർട്ടിഫിഷ്യൽ ഇന്റലിജൻസ് മേഖലയിലെ നിക്ഷേപം ഉൾപ്പെടെയുള്ള സാമ്പത്തിക പ്രവർത്തനങ്ങളും വിലയിരുത്തിയ ശേഷമാണ് ഫെഡറൽ റിസർവ് പലിശനിരക്ക് സംബന്ധിച്ച തീരുമാനം എടുത്തത്. വിലക്കയറ്റം രണ്ട് ശതമാനം എന്ന ലക്ഷ്യത്തിലേക്ക് തിരിച്ചെത്തിക്കുകയാണ് ഫെഡറൽ റിസർവിൻ്റെ പ്രധാന ലക്ഷ്യം. പണപ്പെരുപ്പത്തിൽ കാര്യമായ പുരോഗതി ഉണ്ടായിട്ടില്ലെന്നും വിലക്കയറ്റം നിയന്ത്രിക്കുന്നതിനായി കൂടുതൽ നടപടികൾ ആവശ്യമായി വന്നേക്കാമെന്നും ചെയർമാൻ കെവിൻ വാർഷ് വ്യക്തമാക്കി.

അതേസമയം പലിശ നിരക്ക് വർധിപ്പിച്ചതോടെ ജനങ്ങൾക്ക് വായ്പാ ഭാരം കൂടും. ഭവന വായ്പ, വാഹന വായ്പ, ക്രെഡിറ്റ് കാർഡ് വായ്പ തുടങ്ങിയവയുടെ പലിശയിൽ വർധനയുണ്ടാകും. പലിശ നിരക്ക് വർധിപ്പിച്ച നടപടി യുഎസ് പ്രസിഡൻ്റ് ഡോണാൾഡ് ട്രംപിന്റെ നിലപാടിന് തിരിച്ചടിയാണ്. പലിശ നിരക്കുകൾ കുറയ്ക്കുമെന്ന പ്രതീക്ഷയിൽ ട്രംപ് നിയമിച്ച പുതിയ ഫെഡ് ചെയർമാൻ കെവിൻ വാർഷിന്റെ നടപടിയാണ് വിപരീതമായത്. പണപ്പെരുപ്പം നിയന്ത്രണവിധേയമാകാത്ത പക്ഷം ഈ വർഷം തന്നെ പലിശനിരക്ക് വീണ്ടും ഉയർത്തിയേക്കുമെന്ന സൂചനയും ഫെഡറൽ റിസർവിൻ്റെ പുതിയ നിലപാട് നൽകുന്നുണ്ട്.

യുഎസ് പലിശ നിരക്ക് ഉയരുന്നത് ആഗോള സാമ്പത്തിക വിപണികളിലും പ്രതിഫലിച്ചേക്കാം. യുഎസ് ഡോളറിന് ശക്തി ലഭിക്കാനും നിക്ഷേപകർ യുഎസ് ആസ്തികളിലേക്ക് കൂടുതൽ ശ്രദ്ധ തിരിക്കാനും സാധ്യതയുണ്ട്. ഇത് ഇന്ത്യൻ രൂപയുടെ മൂല്യത്തിലും ഇന്ത്യൻ ഓഹരി വിപണിയിലും സമ്മർദം സൃഷ്ടിച്ചേക്കാം.

ഇന്ത്യയിൽ പെട്രോള്‍, ഡീസല്‍ വിലകള്‍ ഇനി എന്ന് കുറയും? ട്രംപിന്റെ 'സമാധാനത്തിന്' പിന്നാലെ ലോകത്ത് സംഭവിക്കുന്നതെന്ത്?

Sangeetha KS — Tue, 16 Jun 2026 16:40:14 +0530

അമേരിക്കന്‍ പ്രസിഡന്റ് ഡോണള്‍ഡ് ട്രംപ് പ്രഖ്യാപിച്ച അമേരിക്ക- ഇറാന്‍ സമാധാന കരാറിന് പിന്നാലെ ആഗോള വിപണിയില്‍ ക്രൂഡ് ഓയില്‍ വില കുത്തനെ ഇടിഞ്ഞു. ഫെബ്രുവരി 28ന് ആരംഭിച്ച സംഘര്‍ഷത്തെ തുടര്‍ന്ന് ബാരലിന് 126 ഡോളര്‍ വരെ ഉയര്‍ന്ന ബ്രെന്റ് ക്രൂഡ് വില, കരാര്‍ വാര്‍ത്ത പുറത്തുവന്നതിന് പിന്നാലെ മണിക്കൂറുകള്‍ക്കകം 83 ഡോളറിലേക്ക് കൂപ്പുകുത്തി. വില 85 ഡോളറില്‍ താഴെ എത്തിയെങ്കിലും വരും ആഴ്ചകളില്‍ ഇത് പതുക്കെ 90 ഡോളറിന് മുകളിലേക്ക് പോകാന്‍ സാധ്യതയുണ്ടെന്ന് എംകെ ഗ്ലോബലിന്റെ ചീഫ് ഇക്കണോമിസ്റ്റ് മാധവി അറോറ പറയുന്നു.

സംഘര്‍ഷം കാരണം വിതരണം സാധാരണ നിലയിലാകാന്‍ എടുക്കുന്ന കാലതാമസവും, പെട്ടെന്നുണ്ടായ ആവശ്യക്കാരുടെ വര്‍ധനവുമാണ് ഇതിന് കാരണം. അതിനാല്‍ ഹ്രസ്വകാലത്തേക്ക് വില വര്‍ധിക്കാന്‍ തന്നെയാണ് സാധ്യതയെന്ന് അവര്‍ വ്യക്തമാക്കി. വിതരണം തടസ്സപ്പെടുമെന്ന ആശങ്ക ഒഴിഞ്ഞെങ്കിലും ക്രൂഡ് ഓയില്‍, എല്‍എന്‍ജി വിപണികള്‍ പഴയ നിലയിലാകാന്‍ ഇനിയും ആഴ്ചകളോ മാസങ്ങളോ എടുത്തേക്കാമെന്ന് ക്രിസില്‍ ഇന്റലിജന്‍സ് പ്രതികരിച്ചു. സമാധാന കരാര്‍ നടപ്പാക്കുന്നതുമായി ബന്ധപ്പെട്ട അവ്യക്തതകള്‍ വിപണിയില്‍ ഇനിയും ചാഞ്ചാട്ടങ്ങള്‍ക്ക് കാരണമാകുമെന്നാണ് സൂചന.

ഇന്ത്യക്കാര്‍ക്ക് എന്നാണ് ആശ്വാസം ലഭിക്കുക?

2026- 27 സാമ്പത്തിക വര്‍ഷത്തിന്റെ രണ്ടാം പകുതിയോടെ മാത്രമേ വിലയില്‍ കാര്യമായ കുറവുണ്ടാകൂ എന്നാണ് വിദഗ്ധര്‍ വ്യക്തമാക്കുന്നത്. സാമ്പത്തിക വര്‍ഷത്തിന്റെ അവസാനത്തോടെ ക്രൂഡ് ഓയില്‍ വില ബാരലിന് 70 ഡോളറിലേക്ക് എത്തിയേക്കാം. നിലവില്‍ 90 ഡോളര്‍ എന്ന നിരക്കില്‍ തന്നെ തുടരാനാണ് സാധ്യത. 2026 മാര്‍ച്ചില്‍ തുടങ്ങി മേയ് വരെ പെട്രോള്‍, ഡീസല്‍, പാചകവാതകം എന്നിവയിലുണ്ടായ നഷ്ടം ഏകദേശം ഒരു ലക്ഷം കോടി രൂപയാണ്. ക്രൂഡ് വില 90 ഡോളറില്‍ താഴെ നില്‍ക്കുകയാണെങ്കില്‍ ഈ നഷ്ടം ഇനിയും വലിയ രീതിയില്‍ വര്‍ധിക്കില്ല. ക്രൂഡ് വില കുറയുന്നത് ഊര്‍ജ ഇറക്കുമതി ചെലവും ഇന്ധനം വഴിയുള്ള പണപ്പെരുപ്പവും കുറയ്ക്കാന്‍ സഹായിക്കും

ഇറക്കുമതി ചെലവ് കുറയും, സമ്പദ് വ്യവസ്ഥയ്ക്ക് നേട്ടം

ഇന്ത്യ ഉപയോഗിക്കുന്ന ക്രൂഡ് ഓയിലിന്റെ 90 ശതമാനവും ഇറക്കുമതി ചെയ്യുന്നതാണ്. അതുകൊണ്ട് തന്നെ ക്രൂഡ് ഓയില്‍ വില 70 ഡോളറിലേക്ക് എത്തുന്നത് ഇന്ത്യയ്ക്ക് വലിയ നേട്ടമാകും. അമേരിക്ക- ഇറാന്‍ കരാര്‍, ഹോര്‍മുസ് കടലിടുക്കിലൂടെയുള്ള എണ്ണ നീക്കം തടസ്സമില്ലാതെ നടക്കുക, ഒപെക് പ്ലസ് രാജ്യങ്ങള്‍ ഉല്‍പ്പാദനം നിലനിര്‍ത്തുക എന്നിവയെ ആശ്രയിച്ചിരിക്കും ഇത്. വിലക്കുറവ് ഇന്ത്യയുടെ ഇറക്കുമതി ചെലവ് കുറയ്ക്കുകയും വ്യാപാരക്കമ്മി കുറയ്ക്കാന്‍ സഹായിക്കുകയും ചെയ്യും. ഭൗമരാഷ്ട്രീയ ആശങ്കകള്‍ കുറഞ്ഞതോടെ ക്രൂഡ് വില 83 ഡോളറിലേക്ക് എത്തിയപ്പോള്‍ തന്നെ രൂപയുടെ മൂല്യം മെച്ചപ്പെട്ടിരുന്നു. ഗതാഗതം, നിര്‍മ്മാണം, എഫ്.എം.സി.ജി തുടങ്ങിയ മേഖലകളിലെ വിലക്കയറ്റം നിയന്ത്രിക്കാനും ഇത് സര്‍ക്കാരിനും റിസര്‍വ് ബാങ്കിനും സാമ്പത്തിക ഇളവുകള്‍ നല്‍കാനും സഹായിക്കും. എണ്ണക്കമ്പനികള്‍ക്കും ഇത് വലിയ നേട്ടമാണ്.

ഫെബ്രുവരിയെ അപേക്ഷിച്ച് ജൂണില്‍ ചൈനയുടെ എണ്ണ ഇറക്കുമതിയില്‍ 50 ശതമാനം ഇടിവുണ്ടായി. ഇത് വിപണിയില്‍ ഒരു വലിയ കരുതല്‍ ശേഖരം നിലനിര്‍ത്താന്‍ സഹായിച്ചു. കടലിടുക്ക് വീണ്ടും തുറക്കുന്നതോടെ ഈ എണ്ണ ചൈനീസ് വിപണിയിലേക്ക് പോകും. മാത്രമല്ല, മറ്റ് രാജ്യങ്ങളും തങ്ങളുടെ കരുതല്‍ ശേഖരം വര്‍ധിപ്പിക്കാന്‍ തുടങ്ങും. അതിനാല്‍ 2026-ല്‍ ഉല്‍പ്പാദനത്തേക്കാള്‍ കൂടുതല്‍ ആവശ്യക്കാര്‍ എണ്ണയ്ക്ക് ഉണ്ടാകും. 2026-27 സാമ്പത്തിക വര്‍ഷത്തിന്റെ രണ്ടാം പകുതിയോടെ മാത്രമേ വിപണിയില്‍ ആവശ്യത്തിലധികം എണ്ണ ലഭ്യമാകുന്ന സാഹചര്യം ഉണ്ടാകൂ.

ലോകത്ത് ഏറ്റവും കൂടുതൽ സ്വർണ ശേഖരമുള്ള രാജ്യങ്ങളുടെ പട്ടിക പുറത്ത്, വമ്പന്മാർക്കിടയിൽ കരുത്തോടെ ഇന്ത്യയും; ഏറ്റവും മുന്നിൽ അമേരിക്ക

Sangeetha KS — Sat, 27 Jun 2026 12:58:47 +0530

ഡിജിറ്റല്‍ ഇടപാടുകളുടെയും ക്രിപ്‌റ്റോ കറന്‍സികളുടെയും കടന്നുകയറ്റത്തിനിടയിലും, ലോകരാജ്യങ്ങള്‍ക്ക് സാമ്പത്തിക പ്രതിസന്ധികളുണ്ടാകുമ്പോള്‍ വിശ്വസിച്ച് അഭയം പ്രാപിക്കാന്‍ ഇന്നും സ്വര്‍ണം തന്നെയാണ് ആശ്രയം. ആഗോളതലത്തില്‍ സാമ്പത്തിക അനിശ്ചിതാവസ്ഥകള്‍ വര്‍ദ്ധിച്ചുവരുന്ന ഈ സാഹചര്യത്തില്‍, ലോകത്തെ വിവിധ കേന്ദ്ര ബാങ്കുകള്‍ തങ്ങളുടെ സ്വര്‍ണ്ണശേഖരം വീണ്ടും വന്‍തോതില്‍ ഉയര്‍ത്തുകയാണ്. ആഗോളതലത്തിലെ ഔദ്യോഗിക സ്വര്‍ണ്ണശേഖരത്തിന്റെ പുതിയ റാങ്കിങ് വിവരങ്ങള്‍ വ്യക്തമാക്കുന്നത് രാജ്യങ്ങളുടെ സാമ്പത്തിക തന്ത്രങ്ങളുടെ പ്രധാന കേന്ദ്രം ഇന്നും ഈ മഞ്ഞലോഹം തന്നെയാണ് എന്നാണ്.

അമേരിക്കയുടെ ആധിപത്യം, ഒപ്പം യൂറോപ്പും

ഈ പട്ടികയില്‍ അമേരിക്കയാണ് ഏറ്റവും മുന്നില്‍. 8,133.5 ടണ്‍ സ്വര്‍ണ്ണ ശേഖരമാണ് അമേരിക്കയ്ക്കുള്ളത്. ഇത് രണ്ടാം സ്ഥാനത്തുള്ള ജര്‍മ്മനിയുടെ ശേഖരത്തിന്റെ ഇരട്ടിയിലധികമാണ്. മാത്രമല്ല ജര്‍മ്മനി, ഇറ്റലി, ഫ്രാന്‍സ് എന്നീ രാജ്യങ്ങളുടെ ആകെ ശേഖരത്തിന് ഏകദേശം തുല്യവുമാണിത്. അമേരിക്കയും യൂറോപ്പും ചേര്‍ന്നാല്‍ മാത്രം ലോകത്തെ ഔദ്യോഗിക സ്വര്‍ണ്ണശേഖരത്തിന്റെ 60 ശതമാനത്തിലധികം വരും.

പണപ്പെരുപ്പം, കറന്‍സികളുടെ മൂല്യത്തിലുണ്ടാകുന്ന ഏറ്റക്കുറച്ചിലുകള്‍, ഭൗമരാഷ്ട്രീയ പ്രതിസന്ധികള്‍ എന്നിവയ്ക്കെതിരെയുള്ള ഒരു സുരക്ഷിത കവചമായാണ് രാജ്യങ്ങള്‍ സ്വര്‍ണ്ണത്തെ നിലനിര്‍ത്തുന്നത്. ഏറ്റവും വലിയ ശേഖരം പാശ്ചാത്യ രാജ്യങ്ങളിലാണെങ്കിലും, വളര്‍ന്നുവരുന്ന മറ്റ് സമ്പദ്വ്യവസ്ഥകളും ഇപ്പോള്‍ സ്വര്‍ണ്ണം വലിയ തോതില്‍ വാങ്ങിക്കൂട്ടുന്നുണ്ട്.

ഏറ്റവും കൂടുതല്‍ സ്വര്‍ണ്ണശേഖരമുള്ള 10 രാജ്യങ്ങള്‍

1. അമേരിക്ക: 8,133.5 ടണ്‍

2. ജര്‍മ്മനി: 3,351.6 ടണ്‍

3. ഇറ്റലി: 2,451.9 ടണ്‍

4. ഫ്രാന്‍സ്: 2,437.0 ടണ്‍

5. റഷ്യ: 2,333.5 ടണ്‍

6. ചൈന: 2,279.6 ടണ്‍

7. സ്വിറ്റ്സര്‍ലന്‍ഡ്: 1,040.1 ടണ്‍

8. ഇന്ത്യ: 876.2 ടണ്‍

9. ജപ്പാന്‍: 845.9 ടണ്‍

10. തുര്‍ക്കി : 615.0 ടണ്‍

കരുത്തോടെ ഇന്ത്യയും ചൈനയും

ഈ ആഗോള മത്സരത്തില്‍ ഇന്ത്യയും ശ്രദ്ധേയമായ മുന്നേറ്റമാണ് നടത്തുന്നത്. 876.2 ടണ്‍ സ്വര്‍ണ്ണശേഖരവുമായി ഇന്ത്യ ആഗോളതലത്തില്‍ എട്ടാം സ്ഥാനത്താണ്. പല വികസിത രാജ്യങ്ങളെയും പിന്നിലാക്കിയാണ് ഇന്ത്യയുടെ ഈ നേട്ടം. പരമ്പരാഗത കരുതല്‍ ആസ്തികളെ മാത്രം ആശ്രയിക്കുന്നത് കുറയ്ക്കാനും നിക്ഷേപങ്ങള്‍ വൈവിധ്യവത്കരിക്കാനുമായി അടുത്ത കാലത്തായി ഇന്ത്യ സ്വര്‍ണ്ണശേഖരം ഗണ്യമായി വര്‍ദ്ധിപ്പിച്ചിട്ടുണ്ട്.

അതേസമയം ചൈനയുടെ സ്വര്‍ണ്ണശേഖരണവും വലിയ രീതിയില്‍ ശ്രദ്ധിക്കപ്പെടുന്നുണ്ട്. 2019 നും 2024 നും ഇടയില്‍ മാത്രം 331 ടണ്‍ സ്വര്‍ണ്ണമാണ് ചൈന തങ്ങളുടെ ശേഖരത്തിലേക്ക് കൂട്ടിച്ചേര്‍ത്തത്. ഇതോടെ ചൈനയുടെ ആകെ ശേഖരം ഏകദേശം 2,280 ടണ്ണായി ഉയര്‍ന്നു. സാമ്പത്തിക- രാഷ്ട്രീയ ആഘാതങ്ങളില്‍ നിന്ന് സംരക്ഷണം നേടാനായി പോളണ്ട്, തുര്‍ക്കി എന്നീ രാജ്യങ്ങളും തങ്ങളുടെ സ്വര്‍ണ്ണശേഖരം വലിയ തോതില്‍ വര്‍ദ്ധിപ്പിച്ചിട്ടുണ്ട്.

വലിയ രാജ്യങ്ങള്‍ മാത്രമല്ല, ട്രെന്‍ഡ് മാറുന്നു

വന്‍കിട സാമ്പത്തിക ശക്തികള്‍ മാത്രമല്ല ഇപ്പോള്‍ സ്വര്‍ണ്ണം വാങ്ങിക്കൂട്ടുന്നത്. ഉസ്‌ബെക്കിസ്ഥാന്‍, സൗദി അറേബ്യ, കസാക്കിസ്ഥാന്‍, തായ്ലന്‍ഡ്, സിംഗപ്പൂര്‍ തുടങ്ങിയ രാജ്യങ്ങളും തങ്ങളുടെ സ്വര്‍ണ്ണശേഖരം ക്രമമായി ഉയര്‍ത്തുന്നുണ്ട്. മൂല്യം ചോര്‍ന്നുപോകാത്ത ഏറ്റവും മികച്ച സമ്പത്തായി തന്നെയാണ് ഇന്നും ലോകം സ്വര്‍ണ്ണത്തെ കാണുന്നത്. ശക്തമായ വിലയും കേന്ദ്ര ബാങ്കുകളില്‍ നിന്നുള്ള നിരന്തരമായ ആവശ്യകതയും കാരണം ലോകത്തെ ഏറ്റവും പ്രധാനപ്പെട്ട കരുതല്‍ ആസ്തിയായി സ്വര്‍ണ്ണം മാറിയെന്നാണ് സമീപകാല അന്താരാഷ്ട്ര വിലയിരുത്തലുകള്‍ വ്യക്തമാക്കുന്നത്.

80 ശതമാനവും ചെലവാകുന്നത് ശമ്പളത്തിനും പെൻഷനും പലിശക്കും; വിരമിക്കൽ പ്രായം കേന്ദ്ര മാതൃകയിൽ ഉയർത്തണമെന്നും ധവളപത്രം

Web Desk — Thu, 04 Jun 2026 10:35:22 +0530

തിരുവനന്തപുരം: സംസ്ഥാനത്തിന്റെ വരുമാനത്തിന്റെ ഏകദേശം 80 ശതമാനവും ശമ്പളം, പെൻഷൻ, പലിശ അടവ് എന്നിവയ്ക്കാണ് ചെലവാകുന്നതെന്ന് ധവളപത്രം. ഈ സാഹചര്യം ദീർഘകാലാടിസ്ഥാനത്തിൽ സാമ്പത്തികമായി നിലനിൽക്കുന്നതല്ലെന്ന് റിപ്പോർട്ട് വിലയിരുത്തുന്നു. സർക്കാർ ജീവനക്കാരുടെ വിരമിക്കൽ പ്രായം കേന്ദ്രസർക്കാരിന്റെ നിലവാരത്തിലേക്ക് ഉയർത്തണമെന്ന് നിർദേശം മുന്നോട്ടുവയ്ക്കുന്നു. നിലവിലെ സാഹചര്യത്തിൽ ഉദ്യോഗസ്ഥർ അനുഭവസമ്പത്ത് പരമാവധി പ്രയോജനപ്പെടുത്താൻ കഴിയുന്ന പ്രായത്തിലാണു വിരമിക്കുന്നത്. വിരമിക്കൽ പ്രായം ഒരു വർഷം വർധിപ്പിക്കുമ്പോൾ സംസ്ഥാനത്തിന് ഏകദേശം 6,000 കോടി രൂപയുടെ വിരമിക്കൽ ആനുകൂല്യച്ചെലവ് ലാഭിക്കാനാകുമെന്നും റിപ്പോർട്ട് പറയുന്നു.

ഡിജിറ്റലൈസേഷൻ എന്ന പേരിൽ പഴയ ഫോമുകളും നടപടിക്രമങ്ങളും ഓൺലൈനിലേക്ക് മാറ്റുന്നതു മാത്രം പോര. നടപടിക്രമങ്ങൾ ലളിതമാക്കിയും ഉപയോക്തൃസൗഹൃദമാക്കിയും യഥാർത്ഥ ഡിജിറ്റൽ പരിഷ്കാരം നടപ്പാക്കണം. ഇതിനായി എല്ലാ വകുപ്പുകൾക്കും മൂന്ന് മാസത്തിനകം നടപടിക്രമങ്ങൾ ലളിതമാക്കി സമ്പൂർണ ഡിജിറ്റലൈസേഷൻ പൂർത്തിയാക്കാൻ ലക്ഷ്യം നിശ്ചയിക്കണമെന്നും റിപ്പോർട്ട് നിർദേശിക്കുന്നു.

കേരളത്തിന് സ്വന്തം വിമാനം, സഹകരണ മേഖലയിൽ കോ-കേരള, സർക്കാരിനോട് ഇക്കാര്യം ആവശ്യപ്പെട്ടു

Prajeesh Ram — Mon, 29 Jun 2026 16:03:20 +0530

തിരുവനന്തപുരം: സഹകരണ മേഖലയിൽ ആദ്യ വിമാന കമ്പനിയായി കോ കേരള. പുതിയ വിമാന സർവീസിന്റെ പ്രാരംഭ നടപടികളിലേക്കു കടന്നതായി എംവിആർ കാൻസർ സെന്റർ ആൻഡ് റിസർച് ഇൻസ്റ്റിറ്റ്യൂട്ട് ചെയർമാൻ സി.എൻ. വിജയകൃഷ്ണൻ അറിയിച്ചു. ആദ്യം രണ്ട് സർവീസുകളാണ് ആലോചിക്കുന്നതെന്നും അദ്ദേഹം പറഞ്ഞു. സർക്കാരിനോട് ഇക്കാര്യം ആവശ്യപ്പെട്ടിട്ടുണ്ട്. 200 സംഘങ്ങൾ രണ്ടു കോടി രൂപ വീതം മുടക്കും. സർക്കാറിന് ചെലവില്ല. മുഖ്യമന്ത്രി ചെയർമാനാനും സഹകരണ വകുപ്പ് മന്ത്രി വൈസ് ചെയർമാനുമാകും. ലാഭകരമായി നടത്താനാവുമെന്നും അദ്ദേഹം വ്യക്തമാക്കി.

തുടക്കത്തിൽ വിമാനങ്ങൾ വാടകക്ക് എടുക്കും. കേരളത്തിന് വേണ്ടത് ഹൈസ്പീഡ് റെയിൽ അല്ല. മൂന്നാമതൊരു ലൈനാണ് ആവശ്യം. സഹകരണ വകുപ്പ് രക്ഷപ്പെടാൻ 10000 കോടി രൂപ വേണം. ഇതിന് കേന്ദ്രം പ്രത്യേക ഫണ്ട് അനുവദിക്കണം. അതുകൊണ്ട് തന്നെ കേന്ദ്രവുമായി ഗുസ്തിക്ക് പോകരുതെന്നും അദ്ദേഹം വ്യക്തമാക്കി.