Asianet News Malayalam

Khalifa REVIEW: ഇനി വരാനുള്ളത് മാമ്പറയ്ക്കൽ അഹ്മദ് അലി; കയ്യടിപ്പിച്ച് പൃഥ്വിയും വൈശാഖും

Web Desk — Thu, 20 Aug 2026 13:54:41 +0530

തിയേറ്ററുകളിൽ പ്രേക്ഷകരെ കൊണ്ട് എങ്ങനെ കയ്യടിപ്പിക്കണമെന്ന് കൃത്യമായി അറിയാവുന്ന സംവിധായകനാണ് വൈശാഖ്. അദ്ദേഹത്തിന്റെ മുൻ സിനിമകൾ തന്നെയാണ് അതിനുള്ള തെളിവ്. ഖലീഫ അത്തരത്തിൽ പക്കാ വൈശാഖ് സിനിമയാണ്. മാമ്പറയ്ക്കൽ ആമിർ അലിയുടെ കഥായാണെങ്കിലും ഖലീഫയുടെ വേരുകൾ നീളുന്നത് മാമ്പറയ്ക്കൽ അഹ്മദ് അലിയിലേക്ക് കൂടിയാണ്. എന്താണ് ഖലീഫയുടെ ലോകം ചർച്ച ചെയ്യുന്നതെന്ന് ചിത്രത്തിന്റെ പുറത്തിറങ്ങിയ അപ്‌ഡേറ്റുകളിലൂടെ പ്രേക്ഷകർക്ക് സംവിധായകൻ സൂചന നൽകിയിട്ടുണ്ട്. അത്തരം പ്രതീക്ഷകളോട് നീതിപുലർത്തുന്ന മേക്കിങ് തന്നെയാണ് ചിത്രത്തിന്റേത്. പൃഥ്വി- മോഹൻലാൽ ആരാധകരെ മാത്രം മുന്നിൽകണ്ടുകൊണ്ടല്ല വൈശാഖ് ചിത്രമൊരുക്കിയത്.

പഴയ സ്വർണ്ണകള്ളകടത്തുകാരൻ മാമ്പാറയ്ക്കൽ അഹ്മദ് അലിയുടെ പാരമ്പര്യം അവിചാരിതമായി തന്റെ കുടുംബത്തിന് മേൽ ചാർത്തപ്പെടുമ്പോൾ രൺജി പണിക്കർ അവതരിപ്പിച്ച യൂനുസ് അലി എന്ന കഥാപാത്രവും കുടുംബവും എങ്ങനെയാണ് അത്തരമൊരു പ്രതിസന്ധിഘട്ടത്തെ തരണം ചെയ്യുന്നതെന്നും അത് പിന്നീട് തങ്ങളുടെ ജീവിതത്തെ എങ്ങനെയാണ് മാറ്റിമറിക്കുന്നതെന്നുമാണ് ഖലീഫയുടെ പ്രമേയം. കഥാപാത്രങ്ങളുടെ പ്രവർത്തികൾക്ക് കൃത്യമായ കാരണങ്ങളും അതിനെ ഭൂതകാലവുമായി ബന്ധപ്പെടുത്തുന്നതും സിനിമ പ്രേക്ഷകനെ കൃത്യമായും എൻഗേജ് ചെയ്ത് നിർത്തുന്നുണ്ട്. തിയേറ്റർ കാഴ്ചയ്ക്ക് വേണ്ടി ഡിസൈൻ ചെയ്തെടുത്ത കഥാപാത്ര നിർമ്മിതികളും, സംഭാഷണങ്ങളും സിനിമയോട് ഫെസ്റ്റിവ് മൂഡ് നിലനിർത്തുന്നുണ്ട്.

ഒരിക്കലും തന്റെ മുത്തച്ഛന്റെ പാത പിന്തുടരാൻ ആഗ്രഹമില്ലെന്ന് പറയുന്ന ആമിർ അലിയുടെ ജീവിതത്തിൽ സംഭവിക്കുന്ന ചെറുതെന്ന് തോന്നിക്കുന്ന എന്നാൽ അയാളുടെ ജീവിതം തന്നെ മാറ്റിമറിക്കുന്ന ഒരു സംഭാവത്തോടെയാണ് ഖലീഫ അതിന്റെ ട്രാക്കിൽ കയറുന്നത്. മാമ്പറയ്ക്കൽ ആമിർ അലി എന്ന കഥാപാത്രമായി പൃഥ്വിരാജിന്റെ പ്രകടനം തന്നെയാണ് ഖലീഫയുടെ ഏറ്റവും വലിയ പോസിറ്റിവ്. പൃഥ്വിയെ പോലെ ഒരു നടനെ എങ്ങനെ ഒരു മാസ് സിനിമയിൽ അവതരിപ്പിക്കാം എന്നുള്ളതിൽ വൈശാഖ് എന്ന സംവിധായകൻ പൂർണമായും വിജയിച്ചുവെന്ന് തന്നെ പറയാവുന്നതാണ്. സിനിമയിൽ സംഘട്ടന രംഗങ്ങൾ തന്നെയാണ് അതിനുള്ള ഏറ്റവും വലിയ തെളിവ്.

സിനിമയെ മുന്നോട്ട് നയിക്കുന്ന ഏറ്റവും വലിയ മറ്റൊരു ഘടകം ജേക്സ് ബിജോയ്‌യുടെ സംഗീതവും പശ്ചാത്തല സംഗീതവുമാണ്. വൈകാരികമായ പല രംഗങ്ങളും മുന്നോട്ട് കൊണ്ടുപോകുന്നതിൽ ജേക്സ് ബിജോയ് വഹിച്ച പങ്ക് ചെറുതല്ല. അതോടൊപ്പം തന്നെ സംഘട്ടന രംഗങ്ങളിലെ മാസ് ബിജിഎം തിയേറ്ററുകളിൽ സൃഷ്ടിക്കുന്ന ഓളവും ചെറുതല്ല. ഖലീഫയുടെ അപ്‌ഡേറ്റുകൾ പുറത്തുവന്നപ്പോൾ മുതൽ ഏറ്റവും കൂടുതൽ ചർച്ചയായ കാര്യമായിരുന്നു മാമ്പാറയ്ക്കൽ അഹ്മദ് അലി എന്ന കഥാപാത്രമായുള്ള മോഹൻലാലിന്റെ കാമിയോ. ഖലീഫയുടെ രണ്ടാം ഭാഗം മാമ്പറയ്ക്കൽ അഹ്മദ് അലിയെ കേന്ദ്രീകരിച്ചാവുമെന്നതും സിനിമയ്ക്ക് മേലുള്ള പ്രതീക്ഷകൾ വാനോളമുയർത്തി. അത്തരം പ്രതീക്ഷകളോടെല്ലാം നീതിപുലർത്തുന്ന അവതരണം തന്നെയായിരുന്നു മാമ്പാറയ്ക്കൽ അഹമ്മദ് അലി എന്ന കഥാപാത്രത്തിന്റേത്. മാമ്പറയ്ക്കൽ അഹമ്മദ് അലി എന്ന കഥാപാത്രം കൊണ്ട് മാത്രം സിനിമയ്ക്കുണ്ടാവുന്ന നേട്ടം ചെറുതല്ല എന്നത് തന്നെയാണ് ആദ്യ ദിനത്തിൽ തിയേറ്ററിലെ പ്രേക്ഷക പ്രതികരണം വ്യക്തമാക്കുന്നത്. ജേക്സ് ബിജോയ്‌യുടെ സംഗീതത്തിനും പശക്‌തല സംഗീതത്തിനുമൊപ്പം ജോമോൻ ടി ജോണിന്റെ ഛായാഗ്രഹണവും സിനിമയ്ക്ക് വലിയ മുതൽകൂട്ടായിരുന്നു. എന്തായാലും ഇത്തവണത്തെ ഓണം സീസൺ ഖലീഫ കൊണ്ടുപോകുമോ എന്നത് തന്നെയാണ് പ്രേക്ഷകർ ഉറ്റുനോക്കുന്ന പ്രധാനപ്പെട്ട കാര്യം.

ആദ്യം പേടിപ്പിക്കും, പിന്നെ അടുപ്പം തോന്നിപ്പിക്കും; 'കറക്കം' റിവ്യൂ

Web Desk — Thu, 28 May 2026 14:49:29 +0530

ഇന്ത്യന്‍ സിനിമയില്‍ത്തന്നെ ഇന്ന് ഏറ്റവുമധികം മിനിമം ഗ്യാരന്‍റി കല്‍പ്പിക്കപ്പെടുന്നവയാണ് ഹൊറര്‍ കോമഡി ചിത്രങ്ങള്‍. പ്രേക്ഷകര്‍ക്ക് കണക്റ്റ് ആവുന്നപക്ഷം ഇത്തരം ചിത്രങ്ങള്‍ വലിയ വിജയങ്ങളാവാനുള്ള സാധ്യത കൂടുതലാണ്. എന്നാല്‍ കോമഡിയും ഹൊററും തമ്മില്‍ മിക്സ് ചെയ്ത് പ്രേക്ഷകരെ പിടിച്ചിരുത്തല്‍ അത്ര എളുപ്പമല്ലെന്ന് മാത്രം. മലയാളത്തില്‍ മുന്‍പ് പലരും പരീക്ഷിച്ച് വിജയിച്ച ആ രസക്കൂട്ട് കണ്ടെത്താനുള്ള ശ്രമമാണ് വേറിട്ട രീതിയില്‍ സംവിധായകന്‍ സുഭാഷ് ലളിത സുബ്രഹ്‍മണ്യന്‍ കറക്കത്തിലൂടെ നടത്തിയിരിക്കുന്നത്.

ജീവിതത്തില്‍ ഭാരിച്ച ലക്ഷ്യങ്ങളൊന്നുമില്ലാതെ അലസമായി മുന്നോട്ട് പോകുന്ന ഒരു കൊച്ചിക്കാരനാണ് ധനുഷ്. ഒരു ഡാന്‍സര്‍ ആയ അയാള്‍ക്ക് ഒരു ഗേള്‍ ഫ്രണ്ടുമുണ്ട്. സാമ്പത്തികമായ പ്രയാസങ്ങളുള്ള കുടുംബത്തിന് വേണ്ടത് ചെയ്യാന്‍ സാധിക്കാത്ത മകനെ മൈക്കിള്‍ ജാസ്കണ്‍ എന്ന് അമ്മ വിളിക്കുന്നത് പരിഹാസച്ചുവയോടെയാണ്. പ്രത്യേകിച്ച് ലക്ഷ്യങ്ങളൊന്നുമില്ലാതെ പോകുന്ന ധനുഷിന്‍റെ ദിനങ്ങളിലേക്ക് അപ്രതീക്ഷിതമായി ചിലര്‍ കടന്നുവരികയാണ്. അവര്‍ ആരൊക്കെയാണെന്നും അത്തരം സാന്നിധ്യങ്ങളില്‍ നിന്ന് എങ്ങനെ രക്ഷപെടാമെന്നുമുള്ള അയാളുടെയും ഈ മിഷനില്‍ ഒപ്പം ചേരുന്ന സുഹൃത്തുക്കളുടെയും കഥയാണ് ഒരു മണിക്കൂര്‍ 44 മിനിറ്റില്‍ സുഭാഷ് ലളിത സുബ്രഹ്‍മണ്യന്‍ ദൃശ്യവത്കരിക്കുന്നത്. ശ്രീനാഥ് ഭാസിയാണ് നായക കഥാപാത്രമായ ധനുഷിനെ അവതരിപ്പിച്ചിരിക്കുന്നത്.

മലയാള സിനിമയെ സംബന്ധിച്ച് ഏറെ സുപരിചിതമായ പശ്ചിമ കൊച്ചിയുടെ ഫ്രെയ്മുകളിലാണ് കറക്കത്തിന്‍റെ തുടക്കം. ഒരു പുതുവത്സരത്തലേന്ന് സുഹൃത്തുക്കള്‍ക്കൊപ്പം ആഘോഷിക്കാനുള്ള വട്ടം കൂട്ടുന്ന ധനുഷിലാണ് ചിത്രം ആരംഭിക്കുന്നത്. സിനിമയുടെ ഒരു പ്രധാന ഭാഗമായ അംബിക എന്ന് പേരായ ലോഡ്ജില്‍ ആരംഭിക്കുന്ന ന്യൂ ഇയര്‍ പാര്‍ട്ടി പക്ഷേ ഒടുവില്‍ ധനുഷിനെ കൊണ്ടെത്തിക്കുന്നത് മറ്റൊരു സ്ഥലത്താണ്. അതിനിടെ അയാള്‍ക്ക് ഒരു സുഹൃത്തിനെയും ലഭിക്കുന്നു. അവിടെ വച്ച് ഉണ്ടാകുന്ന ചില അതീന്ദ്രീയാനുഭവങ്ങള്‍ ആദ്യം തോന്നലെന്ന് കരുതി വിട്ടെങ്കിലും തങ്ങള്‍ ഒരു പ്രശ്നത്തിലാണെന്ന് പതിയെ അവര്‍ തിരിച്ചറിയുന്നു. ഇവിടെയാണ് ചിത്രത്തിന്‍റെ പ്ലോട്ട് രസകരമായിത്തുടങ്ങുന്നത്.

സാധാരണ ഹൊറര്‍ കോമഡി ചിത്രങ്ങളില്‍ നിന്ന് ചില പ്രത്യേകതകളുണ്ട് കറക്കത്തിന്. ഭയപ്പെടുത്തുന്ന ഘടകങ്ങള്‍ കൊണ്ട് സാധാരണ ഭയം മാത്രമാണ് സംവിധായകരും എഴുത്തുകാരും സൃഷ്ടിക്കുന്നതെങ്കില്‍ ഇവിടെ അങ്ങനെയല്ല. ഭയത്തില്‍ നിന്ന് തുടങ്ങി അവസാനം ഇമോഷണല്‍ അറ്റാച്ച്മെന്‍റ് തോന്നിപ്പിക്കുന്ന തരത്തിലാണ് ചിത്രത്തിലെ ഹൊറര്‍ എലമെന്‍റുകള്‍. ചിത്രത്തിന്‍റെ കഥാപരിസരവും അതിനനുസരിച്ച് സംവിധായകന്‍ മാറ്റിയിട്ടുണ്ട്. പശ്ചിമ കൊച്ചിയില്‍ നിന്ന് തുടങ്ങുന്ന ചിത്രം യാത്ര ചെയ്ത് എത്തുന്നത് ഹൈറേഞ്ചിലെ മഞ്ഞുള്ള രാത്രികളിലേക്കാണ്.

ശ്രീനാഥ് ഭാസിയുടെ കംഫര്‍ട്ട് സോണിലുള്ള കഥാപാത്രമാണ് ധനുഷ്. അതിനാല്‍ത്തന്നെ നമുക്ക് വേഗത്തില്‍ കണക്റ്റ് ചെയ്യാനാവുന്ന കഥാപാത്രവുമാണ് ഇത്. ശ്രീനാഥിനൊപ്പം ചിത്രത്തില്‍ ഉടനീളമുള്ള മറ്റൊരു പ്രധാന കഥാപാത്രത്തെ അവതരിപ്പിച്ചിരിക്കുന്നത് പ്രവീണ്‍ ടി ജെ ആണ്. ഫെമിന ജോര്‍ജിന് ഇടവേളയ്ക്ക് ശേഷം ലഭിച്ച ശ്രദ്ധേയ കഥാപാത്രമാണ് ഇതിനെ നായിക. സുപ്രധാന തീരുമാനങ്ങള്‍ എടുത്ത് ധനുഷിന്‍റെ മിഷനൊപ്പം ചേരുന്ന കഥാപാത്രവുമാണ് ഇത്. അഭിറാമും ഷോണ്‍ റോമിയും മിഥൂട്ടിയും ബിജുക്കുട്ടനുമൊക്കെ വേറിട്ട റോളുകളില്‍ എത്തുന്ന ചിത്രത്തില്‍ പ്രേക്ഷകരെ ശരിക്കും രസിപ്പിക്കുന്ന ഒരു ഇന്‍ട്രോ സിദ്ധാര്‍ഥി ഭരതന്‍റേതാണ്. ജോലിയേക്കാള്‍ കൂടുതല്‍ സമയം റീലുകള്‍ കാണാന്‍ ഉപയോഗിക്കുന്ന കുഞ്ചന്‍ നമ്പ്യാര്‍ എന്ന എസ്ഐ കഥാപാത്രമാണ് സിദ്ധാര്‍ഥിന്‍റേത്.

സാങ്കേതിക മേഖലകളിലൊക്കെ നിലവാരം പുലര്‍ത്തുന്ന ചിത്രമാണ് കറക്കം. ചിത്രത്തിന്‍റെ പ്രൊഡക്ഷന്‍ ഡിസൈന്‍ ആണ് എടുത്ത് പറയാന്‍ തോന്നുന്ന ആദ്യ ഘടകം. വിശേഷിച്ചും ചിത്രത്തിലെ ഒരു പ്രധാന കഥാപരിസരമായ അംബിക ലോഡ്ജ്. പ്രേക്ഷകരെ എപ്പോഴും എന്‍ഗേജ് ചെയ്യിച്ച് നിര്‍ത്തേണ്ട ജോലിയാണ് ഒരു ഹൊറര്‍ കോമഡി ചിത്രത്തിന്‍റെ സിനിമാറ്റോഗ്രാഫര്‍ക്ക്. ബബ്ലു അജു അത് ഭംഗിയായി നിര്‍വ്വഹിച്ചിട്ടുണ്ട്. സെമിത്തേരിയുടെയും ഹൈറേഞ്ചിലെ മലഞ്ചെരിവുകളുടെയുമൊക്കെ രാത്രി ദൃശ്യങ്ങള്‍ ചിത്രത്തിന്‍റെ മൂഡ് സെറ്റ് ചെയ്യുന്നതില്‍ സംവിധായകന് നല്‍കുന്ന പിന്തുണ എടുത്ത് പറയണം. മ്യൂസിക്കല്‍ ഹൊറര്‍ കോമഡിയെന്ന് അണിയറക്കാര്‍ വിശേഷിപ്പിച്ചിട്ടുള്ള ചിത്രത്തിന് സംഗീതം പകര്‍ന്നിരിക്കുന്നത് സാം സി എസ് ആണ്. ഇത്തരമൊരു ചിത്രത്തിന് ചേര്‍ന്ന വിധത്തിലുള്ള പശ്ചാത്തല സംഗീതമാണ് സാം നല്‍കിയിരിക്കുന്നത്. വലിയ അവകാശവാദങ്ങളൊന്നുമില്ലാതെ എന്നാല്‍ എന്‍റര്‍ടെയ്ന്‍മെന്‍റ് ഗ്യാരന്‍റിയോടെ എത്തിയിരിക്കുന്ന ചിത്രമാണ് കറക്കം. ഭയത്തില്‍ നിന്ന് രക്ഷപെടാനുള്ള നായകന്‍റെയും കൂട്ടരുടെയും പെടാപ്പാട് നമ്മെ പൊട്ടിച്ചിരിപ്പിക്കും.

വിചാരങ്ങൾക്കപ്പുറം സസ്പെൻസുകൾ കോർത്തിണക്കിയ മെഡിക്കൽ ത്രില്ലർ; 'ഡോസ്' റിവ്യൂ

Web Desk — Fri, 22 May 2026 21:05:33 +0530

പ്രെഡിക്ടബിൾ അല്ലാത്ത സാഹചര്യങ്ങളിലൂടെ സാമാന്യ ബുദ്ധിയെ വെല്ലുവിളിക്കുന്ന സിനിമകൾക്ക് പ്രേക്ഷകർക്കിടയിൽ വലിയ സ്വീകാര്യതയുണ്ട്. ഒരു ത്രില്ലർ സിനിമയുടെ വിജയത്തെ തീരുമാനിക്കുന്ന ഘടകവും ഇത് തന്നെ. പ്രേക്ഷകർക്ക് ഒരുതരത്തിലും പിടിതരാത്ത മെഡിക്കൽ ത്രില്ലർ ചിത്രമാണ് നവാഗതനായ അഭിലാഷ് ആർ നായർ രചനയും സംവിധാനവും നിർവഹിച്ച് സിജു വിൽസൺ, അശ്വിൻ കുമാർ, ജഗദീഷ്, ദൃശ്യ രഘുനാഥ്, കൃഷ കുറുപ്പ് തുടങ്ങിയവർ പ്രധാന താരങ്ങളായ ഡോസ്. ഒരു മൾട്ടി സ്പെഷ്യാലിറ്റി ആശുപത്രിയുടെ പശ്ചാത്തലത്തിൽ നടക്കുന്ന ക്രൈമും അതിനെ ചുറ്റിപ്പറ്റിയുള്ള അന്വേഷണങ്ങളും അവയുടെ നിഗൂഢതകളുമാണ് ഡോസ് കൈകാര്യം ചെയ്യുന്ന വിഷയം. അവിടെ നടക്കുന്ന മരണങ്ങളിലെ അസ്വഭാവികത അന്വേഷിച്ചു പോകുന്ന ചിത്രം ക്രൈം, ഇൻവെസ്റ്റിഗേഷൻ, സൈക്കോളജിക്കൽ ആസ്പെക്ടുകളിലൂടെയും സഞ്ചരിക്കുന്നു.

ഡോ. പ്രകാശ് ഒരു പൾമണോളജിസ്റ്റാണ്, ഭാര്യ രാഗിത ശ്വാസകോശ രോഗവുമായി മല്ലിടുന്നയാളും. ഡോ. അരുന്ധതി പ്രകാശിന്റെ അതേ ആശുപത്രിയിൽ ജോലി ചെയ്യുന്ന കാർഡിയോളജി സർജനാണ്. പ്രകാശും അരുന്ധതിയും മുൻപ് പ്രണയിച്ചിരുന്നവരും ചില കാരണങ്ങളാൽ പിരിയേണ്ടി വന്നവരുമാണ്. ഇരുവരും തങ്ങളുടെ പഴയകാലത്തിൽ നിന്ന് മാറി നിൽക്കാൻ ശ്രമിക്കുന്നതിനിടയിൽ, അവർ ജോലി ചെയ്യുന്ന ആശുപത്രിയിൽ നിരവധി സംഭവങ്ങൾ നടക്കുന്നു. ഒന്നിലധികം രോഗികൾ സമാനമായ രീതിയിൽ മരണപ്പെടുന്നതും ഇതിനു പിന്നാലെയുള്ള അന്വേഷണങ്ങളാണ് ഡോസ് എന്ന് പറയാം.

ഒരു തരത്തിലും പിടിതരാത്ത തിരക്കഥയ്ക്ക് അഭിനേതാക്കളുടെ പ്രകടനങ്ങൾ മികവ് കൂട്ടുന്നുണ്ട്. ഡോ. പ്രകാശ് ആയി സിജു വിൽസണും അരുന്ധതിയായി ദൃശ്യയും എത്തുന്നു. കൃഷ കുറുപ്പാണ് രാഗിതയുടെ കഥാപാത്രത്തെ ആതരിപ്പിക്കുന്നത്. അശ്വിൻ ചിത്രത്തിൽ ഇൻവെസ്റ്റിഗേഷൻ ഓഫീസർ ആണ്. അയാൾ കണ്ടെത്തുന്ന കാര്യങ്ങളാണ് ആശുപത്രിയിലെ ദുരൂഹ മരണങ്ങളുടെ ചുരുളഴിക്കുന്നത്. അയാളുടെ കണ്ടെത്തലുകൾക്കൊപ്പം മാത്രമേ പ്രേക്ഷകർക്കും അതിലേക്കെത്താനാകൂ എന്നതാണ് ചിത്രത്തിൻ്റെ വിജയം.

ത്രില്ലറിനെ പ്ലേസ് ചെയ്യാനുള്ള പശ്ചാത്തലം ഒരുക്കുകയാണ് ആദ്യ പകുതിയിൽ സംവിധായകൻ. പതുക്കെ തുടങ്ങി സെക്കന്റ് ഹാഫിലേക്ക് കടക്കുമ്പോൾ ആണ് സിനിമ അതിൻ്റെ മൊമെന്റം ഷിഫ്റ്റ് ചെയ്യുന്നത്. വ്യത്യസ്തമായ ദിശകളിലേയ്ക്ക് പ്രേക്ഷകരെ നയിക്കാൻ പല ട്രാക്കുകൾ സ്വീകരിച്ചിട്ടുണ്ട് തിരക്കഥ. ത്രില്ലർ ഗണത്തിൽ പെടുത്താവുന്ന സിനിമകളുടെ കുത്തൊഴുക്കുള്ള മലയാള സിനിമയിൽ പുതിയ പരീക്ഷണമാണ് ഡോസ് സ്വീകരിച്ചത്.

വിഷ്ണു പ്രസാദ് ആണ് ഡോസിൻ്റെ ക്യാമറ കൈകാര്യം ചെയ്തിരിക്കുന്നത്. ശ്യാം ശരിധരനാണ് എഡിറ്റർ. സീനുകൾക്ക് പ്രാധാന്യം നൽകി ഒരുക്കിയിരിക്കുന്ന ബാക്ക് ഗ്രൗണ്ട് സ്കോർ കഥാഗതിയെ കൃത്യമായ ഇംപാക്റ്റൊടെ പ്രേക്ഷകരിലെത്തിക്കുന്നുണ്ട്. ഗോപി സുന്ദറിൻ്റെ സംഗീതത്തിൽ മനോഹരമായ ഗാനങ്ങളും ഡോസിലുണ്ട്. മെഡിക്കൽ മേഖലയിൽ നടക്കുന്ന സാധരണമെന്ന് തോന്നാവുന്ന സംഭവങ്ങളിലെ അസ്വഭാവികതകളെക്കുറിച്ച് കൂടി ചിന്തിപ്പിക്കുന്നുണ്ട് ഡോസ്. മടുപ്പിക്കാത്ത ഒരു സസ്പെൻസ് ത്രില്ലർ കാണാൻ ആഗ്രഹിക്കുന്ന പ്രേക്ഷകർക്ക് എന്തായാലും ഡോസ് തിയേറ്ററുകളിൽ പരിഗണിക്കാം.

Mollywood Times REVIEW: ഇത് അഭിനവ് സുന്ദർ നായകിന്റെ 'ലൗ ലെറ്റർ ടു സിനിമ'; മോളിവുഡ് ടൈംസിലൂടെ ഞെട്ടിച്ച് നസ്‌ലെൻ

Web Desk — Fri, 05 Jun 2026 14:57:13 +0530

ആദ്യ ചിത്രമായ 'മുകുന്ദൻ ഉണ്ണി അസോസിയേറ്റ്‌സ്' എന്ന ചിത്രത്തിലൂടെ മലയാള സിനിമയിൽ തന്റേതായ സ്ഥാനമുറപ്പിച്ച സംവിധായകനാണ് അഭിനവ് സുന്ദർ നായക്. നാല് വർഷത്തിന് ശേഷം നസ്‌ലെനെ നായകനാക്കി 'മോളിവുഡ് ടൈംസ്' എന്ന തന്റെ രണ്ടാം ചിത്രവുമായി അഭിനവ് എത്തുമ്പോൾ സ്വാഭാവികമായും പ്രേക്ഷകർക്ക് ഉണ്ടാവുന്ന പ്രതീക്ഷകൾ വാനോളമാണ്. അത്തരം പ്രതീക്ഷകളോടെല്ലാം മോളിവുഡ് ടൈംസ് എന്ന സിനിമ നീതിപുലർത്തിയിട്ടുണ്ട്.

വൈക്കം ഡേവിഡ് എന്ന എഴുത്തുകാരന്റെ ഡെവിൾസ് ഐലന്റ് എന്ന നോവൽ വായിച്ച് സ്വപ്നത്തിൽ കട്ടിലിൽ നിന്നും വീണ് കയ്യൊടിയുന്ന വിനീത് മാധവൻ എന്ന കുഞ്ഞിന്റെ സ്വപ്നവും അവന്റെ സ്വപ്നത്തിലേക്കുള്ള യാത്രകളും അതിനിടയിൽ അവൻ നേരിടുന്ന പ്രതിസന്ധികളുമാണ് സിനിമ ചർച്ച ചെയ്യുന്നത്. എ ഹേറ്റ് ലെറ്റർ ടു സിനിമ എന്ന ടാഗ് ലൈനിനോട് ചിത്രം പൂർണ്ണമായും നീതിപുലർത്തി എന്ന് തന്നെ പറയാം. സിനിമയ്ക്കുള്ളിലെ സിനിമാക്കഥ പറയുന്ന ചിത്രമാണ് മോളിവുഡ് ടൈംസ് എന്ന് പറയുമ്പോഴും, കേവലം കാല്പനികവത്കരിച്ച സിനിമ വ്യവസായത്തിനപ്പുറത്തേക്ക് സിനിമ എന്നതിന്റെ യാഥാർഥ്യവും രാഷ്ട്രീയവും അതിനുള്ളിലെ ഗ്രൂപ്പിസവും എത്രത്തോളം ശക്തമാണെന്നും അത് എങ്ങനെയാണ് താരങ്ങളെയും സംവിധായകരെയും സൃഷ്ടിക്കുന്നതും തകർക്കുന്നതെന്നും സിനിമ മറയില്ലാതെ പ്രേക്ഷകന് കാണിച്ച് തരുന്നു.

വിനീത് മാധവൻ എന്ന കഥാപാത്രമായി നസ്‌ലെന്റെ ഗംഭീര പ്രകടനം തന്നെയാണ് സിനിമയുടെ ഏറ്റവും വലിയ പോസിറ്റിവ്. വിവിധ കാലഘട്ടങ്ങളിൽ വിനീത് മാധവൻ കടന്നുപോവുന്ന മാനസിക സംഘർഷങ്ങൾ വളരെ ആഴത്തിൽ തന്നെ നസ്‌ലെൻ സ്‌ക്രീനിൽ അവതരിപ്പിച്ചിട്ടുണ്ട്. വളരെ സൂക്ഷ്മമായ വൈകാരിക തലങ്ങൾ ഗംഭീരമായാണ് നസ്‌ലെൻ അവതരിപ്പിച്ചിരിക്കുന്നത്. ഒരു നല്ല സംവിധായകൻ ആവണമെങ്കിൽ ആദ്യം നല്ലൊരു മനുഷ്യൻ ആവണം എന്ന ചിന്തയിൽ നിന്നും വിനീത് മാധവൻ പിന്നീട് എത്തിപ്പെടുന്ന തലവും അതിനായി തിരഞ്ഞെടുക്കുന്ന മാർഗ്ഗങ്ങളും സിനിമയെ ആഴത്തിലുള്ള കലാസൃഷ്ടിയാക്കി മാറ്റുന്നത്.

കലയും കലാകാരനും നൈതികതയും

എങ്ങനെയാണ് ഒരു കലാസൃഷ്ടി രൂപപ്പെടുന്നത്, ആരാണ് അതിന്റെ അവകാശി, കലാസൃഷ്ടിക്ക് മുകളിൽ കലാകാരൻ ആഘോഷിക്കപ്പെടുന്നതിലെ നൈതികത, ഒരു കലാസൃഷ്ടി മറ്റൊന്നിന്ന് എങ്ങനെയൊക്കെയാണ് പ്രചോദനമാവുന്നത്, പ്രചോദനം എന്നത് സഹിത്യചോരണമായി മാറുന്നത് എപ്പോഴാണ്, ആശയത്തിലോ ശൈലിയിലോ പ്രചോദനമുൾക്കൊള്ളുമ്പോൾ ചോരണമായി കണക്കാക്കുമോ തുടങ്ങീ നിരവധി ചോദ്യങ്ങൾ കൂടി മുന്നോട്ടുവയ്ക്കുന്ന ചിത്രം കൂടിയാണ് മോളിവുഡ് ടൈംസ്.

ആദ്യ ചിത്രത്തിലേത് പോലെ തന്നെ വിജയം എന്നതിലേക്കുള്ള ഒരു വ്യക്തിയുടെ യാത്രയെ ആണ് മോളിവുഡ് ടൈംസ് പ്രതിനിധീകരിക്കുന്നത്. മുകുന്ദൻ ഉണ്ണി ഒരു മോശം വ്യക്തിയായിരുന്നെങ്കിൽ വിനീത് മാധവ് നല്ല വ്യക്തിയാണ്. തങ്ങളുടെ സ്വപ്നത്തിലേക്ക് ഇരുവരും തിരഞ്ഞെടുക്കുന്ന പാതകളും മാർഗ്ഗങ്ങളുമാണ് ചിന്താതലത്തിൽ ഒന്നായിപോകുന്നത്. പുറമെ കാണുന്ന സൗന്ദര്യമല്ല സിനിമയ്ക്ക് ശരിക്കുമുള്ളതെന്ന പച്ചയായ യാഥാർഥ്യം മറയില്ലാതെ പറയാൻ കാണിച്ച അഭിനവ് സുന്ദർ നായ്കിന്റെ ധൈര്യം ഇന്ന് മലയാളത്തിൽ ആർക്കും ഇല്ലെന്ന തന്നെ പറയേണ്ടി വരും. നിങ്ങൾക്ക് കഴിവ് കൊണ്ട് മാത്രം പിടിച്ച് നിൽക്കാൻ സാധിക്കില്ല, കഴിവിനൊപ്പം ആവശ്യമുള്ള ഒരുപാട് ഘടകങ്ങൾ ഉണ്ടെന്ന് സിനിമ ഓർമ്മപ്പെടുത്തുന്നു. നസ്‌ലെനൊപ്പം തന്നെ സംഗീത് പ്രതാപ്, ഷറഫുദ്ധീൻ, റോഷൻ ഷാനവാസ്, വിനീത് ശ്രീനിവാസൻ തുടങ്ങിയവരും ചിത്രത്തിൽ ഗംഭീര പ്രകടനമാണ് കാഴ്ചവച്ചത്.

സ്റ്റൈൽ, സ്വാഗ് ഗെയിം ആരംഭം, ദുൽഖർ-പെപ്പെ ഷോ; ഐ ആം ഗെയിം റിവ്യൂ

Web Desk — Thu, 03 Sep 2026 15:20:40 +0530

തെലുങ്ക് തമിഴ് ചിത്രങ്ങളുമായി തിരക്കിലായിരുന്ന ദുൽഖർ സൽമാൻ്റെ മലയാളി ആരാധകർക്ക് ലഭിച്ച ഹോം കമിങ് ട്രീറ്റ്. ആർഡിഎക്സ് എന്ന ഹിറ്റ് ചിത്രത്തിനു ശേഷം നഹാസ് ഹിദായത്ത് സംവിധാനം ചെയ്ത 'ഐ ആം ഗെയി'മിൽ ആൻ്റണി വർഗീസ് പെപ്പെയും പ്രധാന വേഷത്തിൽ ഉണ്ട്. കിങ് ഓഫ് കൊത്തയ്ക്ക് ശേഷം മൂന്ന് വർഷങ്ങൾക്കിപ്പുറമാണ് ദുൽഖർ മലയാളത്തിൽ ഒരു സിനിമ ചെയ്യുന്നത്. പീക്ക് ആക്ഷൻ- ഫാൻ്റസി സീക്വൻസുകൾ നൽകുന്ന അഡ്രിനാലിൻ റഷ് ആണ് ഒറ്റവാചകത്തിൽ ചിത്രം.

ദുൽഖറിനെ ഒരു അർബൻ മെട്രോപോളിറ്റ്യൻ ഹീറോ ആയി സങ്കല്പിക്കുക പ്രേക്ഷകർക്ക് എളുപ്പമുള്ള കാര്യമാണ്. അദ്ദേഹത്തിൻ്റെ സ്വാഗും സ്റ്റൈലും ആ രീതിയിൽ ഉപയോഗപ്പെടുത്തി ഗ്രിപ്പിങ് ആയ കഥ പറഞ്ഞിരിക്കുകയാണ് നഹാസ്. ക്രിക്കറ്റ് വാതുവെപ്പിൻ്റെ പശ്ചാത്തലത്തിലാണ് കഥ നടക്കുന്നത്. ഓൺലൈൻ ബെറ്റിങ്ങും അതിൻ്റെ പിന്നാമ്പുറങ്ങളും ചതികളുമൊക്കെ പ്രമേയമാകുന്ന ചിത്രത്തിൽ പ്രൊമോഷൻ മെറ്റീരിയലുകളിലെങ്ങും കാണാത്ത ഫാൻ്റസി എലമെൻ്റ് കടന്നു വരുന്നുണ്ട്.

ഹൈദരാബാദിലെ അതി സമ്പന്നനായ ഡാൻ ജോൺ എന്ന കഥാപാത്രമായാണ് ദുൽഖർ എത്തുന്നത്. അലസനായ, അച്ഛൻ്റെ മുന്നിൽ മിടുക്കനായി കാണിക്കാൻ ഏതുവിധേനയും പണമുണ്ടാക്കാൻ വാതുവയ്പ്പിനിറങ്ങി പുറപ്പെടുന്ന ഡാന് ഒരപകടം സംഭവിക്കുന്നു. അപകടത്തിൽ നിന്ന് അതിജീവിക്കുന്ന ഡാൻ പക്ഷെ പിന്നീട് കടന്നുപോകുന്നത് സമാനതകളില്ലാത്ത സംഭവങ്ങളിലൂടെയാണ്. സിനിമയുടെ വൈകാരിക പശ്ചാത്തലത്തെ സ്ട്രോങ്ങാക്കി നിർത്തി ഫാൻ്റസി എലമെൻ്റുകളെ ചേർത്തൊരുക്കിയ മാജിക് ആണ് ഐ ആം ഗെയിം. അതുതന്നെയാണ് സാധാരണയൊരു കൊമേഷ്യൽ എൻ്റർടെയ്നറിനപ്പുറം ഐ ആം ഗെയിമിനെ കൊണ്ടുനിർത്തുന്നതും.

ആൻ്റണി വർഗീസിൻ്റെ വിക്കി എന്ന കഥാപാത്രം ദുൽഖറിനൊപ്പം തന്നെ നിൽക്കുന്ന നായകകഥാപാത്രമാണ്. ഡിക്യുവിൽ നിന്ന് ഒട്ടും കുറയാത്ത സ്ക്രീൻ ടൈമും ഈ കഥാപാത്രത്തിനു ലഭിക്കുന്നുണ്ട്. നായകന്മാർക്ക് പോന്ന വില്ലനായി കഥയിൽ നിറഞ്ഞു നിൽക്കുകയാണ് മിഷ്കിൻ്റെ ഡേവിഡ്. കയാദു ലോഹർ, സംയുക്ത വിശ്വനാഥൻ, കതിർ എന്നിവരും പ്രധാന താരങ്ങളായുണ്ട്. ഡാനിൻ്റെ സുഹൃത്തായ വിനയ് ഫോർട്ടിൻ്റെ കഥാപാത്രം എത്തുന്നിടത്തെല്ലാം തിയേറ്ററിൽ ചിരിപടരുന്നുണ്ട്. ജേക്സ് ബിജോയിയുടെ സംഗീതമാണ് സിനിമയെ മൊത്തതിൽ എലവേറ്റ് ചെയ്യുന്നത്. ചമൻ ചാക്കോയുടെ എഡിറ്റിങ് ഐ ആം ഗെയിമിന് പേസ് നിശ്ചയിക്കുന്നു.

സംവിധായകൻ നഹാസ് ഹിദായത്തിന്റെ കഥയ്ക്ക് സജീർ ബാബ, ഇസ്മായിൽ അബൂബക്കർ, ബിലാൽ മൊയ്തു എന്നിവർ ചേർന്ന് തിരക്കഥയും സജീർ ബാബയും ആദർശ് സുകുമാരനും ഷബാസ് റഷീദും ചേർന്ന് സംഭാഷണവും രചിച്ചിരിക്കുന്നു. ജിംഷി ഖാലിദിൻ്റെ ക്യാമറയും ചമൻ ചാക്കോയുടെ എഡിറ്റിങ്ങും പ്രേക്ഷകരെ അത്ഭുതപ്പെടുത്തും. അൻപറിവ് മാസ്റ്റേഴ്സ് ആണ് സിനിമയിൽ സംഘട്ടനം ഒരുക്കിയിരിക്കുന്നത്. ഡിക്യു എന്ന താരത്തെയും നടനെയും ഉപയോഗപ്പെടുത്തി നഹാസ് ഒരുക്കിയ മാജിക് ഏതായാലും ഡിക്യു ആരാധകർക്കുള്ള വിഷ്വൽ ട്രീറ്റ് ആകുന്നുണ്ട്. നാടകീയമാകാവുന്ന സന്ദർഭങ്ങളെ കൈയ്യടക്കത്തോടെ കൈകാര്യം ചെയ്ത ഓരോ പ്രകടനങ്ങളെയും അഭിനന്ദിക്കാതെ വയ്യ. ഓണത്തിന് റിലീസ് പ്രഖ്യാപിച്ചിരുന്ന ഐ ആം ഗെയിമിൻ്റെ റിലീസ് പിന്നീട് നീട്ടുകയായിരുന്നു. ആ കാത്തിരിപ്പുകളൊന്നും വെറുതെയായില്ല. ഒരു ഫാൻ്റസി ആക്ഷൻ എൻ്റർടെയ്നറിനായി ഐ ആം ഗെയിമിനു ടിക്കറ്റെടുക്കാം.

'ദളപതി'യുടെ വണ്‍ ലാസ്റ്റ് ഡാന്‍സ്; 'ജനനായകന്‍' റിവ്യൂ

Web Desk — Thu, 23 Jul 2026 12:09:07 +0530

കോളിവുഡില്‍ ഏറ്റവുമധികം ആരാധകരുള്ള സൂപ്പര്‍താരത്തിന്‍റെ അവസാന ചിത്രം. രാഷ്ട്രീയ പ്രവേശനം പ്രഖ്യാപിച്ചതിനൊപ്പമുള്ള വിജയിന്‍റെ വാക്കായിരുന്നു സിനിമാ ജീവിതത്തില്‍ ഇനി ഒരേയൊരു ചിത്രം എന്നത്. അന്ന് മുതല്‍ ഹൈപ്പ് കയറിത്തുടങ്ങിയ ചിത്രമായിരുന്നു എച്ച് വിനോദ് സംവിധാനം ചെയ്ത ജനനായകന്‍. പൊങ്കല്‍ റിലീസ് ആയി എത്തേണ്ടിയിരുന്ന ചിത്രം സെന്‍സര്‍ പ്രതിസന്ധിയില്‍ കുരുങ്ങി ആറ് മാസത്തിനിപ്പുറം തിയറ്ററുകളിലെത്തുമ്പോള്‍ വിജയ് തമിഴ്നാടിന്‍റെ മുഖ്യമന്ത്രി കസേരയിലാണ് എന്നതും കൗതുകം.

തമിഴ്നാട് നിയമസഭാ തിരഞ്ഞെടുപ്പിന് മുന്‍പ് പ്രേക്ഷകരിലേക്ക് എത്തേണ്ടിയിരുന്ന ചിത്രം വിജയിന്‍റെ ഒരു ബിഗ് സ്ക്രീന്‍ വോട്ട് അഭ്യര്‍ഥനയായാണ് അനുഭവപ്പെടുന്നത്. നന്ദമുരി ബാലകൃഷ്ണ നായകനായ തെലുങ്കിലെ വിജയചിത്രം ഭഗവന്ത് കേസരിയുടെ ബേസിക് പ്ലോട്ട് എടുത്താണ് എച്ച് വിനോദ് ജനനായകന് തിരക്കഥ ഒരുക്കിയിരിക്കുന്നത്. ഭഗവന്ത് കേസരിയെ പൂര്‍ണ്ണമായും ഒരു ഇലക്റ്ററല്‍ പൊളിറ്റിക്സ് പശ്ചാത്തലത്തിലേക്ക് കൊണ്ടുവന്നാല്‍ അത് ജനനായകനായി. ദളപതി വെട്രി കൊണ്ടാന്‍ എന്ന മുന്‍ ഐപിഎസ് ഉദ്യേഗസ്ഥനാണ് വിജയിന്‍റെ നായകന്‍. എന്നാല്‍ നായകനെ നാം ആദ്യം കാണുന്നത് ഒരു തടവുപുള്ളിയുടെ വേഷത്തിലും. അയാള്‍ ആരാണെന്നും എന്താണെന്നും എങ്ങനെയാണ് ജയിലില്‍ എത്തിയതെന്നുമുള്ള കാര്യം വൈകാതെ വെളിപ്പെടുത്തുന്നുണ്ട് എച്ച് വിനോദ്. പിന്നാലെ നായകന്‍ ദളപതിക്കൊപ്പം പ്രേക്ഷകരെ കൊണ്ടുപോവുകയാണ് സംവിധായകന്‍.

നായകനൊപ്പം പ്രതിനായകന്മാര്‍ക്കും പ്രാധാന്യമുള്ള ചിത്രമാണ് ജനനായകന്‍. പ്രധാന വില്ലന്‍ ബോബി ഡിയോളിന്‍റെ ജോണ്‍ ഹിംലര്‍ എന്ന അമരീഷ് പൂജാരി ആണെങ്കിലും പ്രകാശ് രാജ് അവതരിപ്പിക്കുന്ന റോജ രംഗസ്വാമിക്കും വലിയ പ്രാധാന്യവും സ്ക്രീന്‍ സ്പേസുമുണ്ട്. ദളപതി വെട്രി കൊണ്ടാനെപ്പോലെ പൊലീസ് പശ്ചാത്തലം ഉണ്ടായിരുന്ന ആളാണ് അമരീഷ് പൂജാരിയും. സാഹചര്യങ്ങള്‍ അയാളെ മറ്റൊരു ദിശയിലേക്ക് നയിച്ചെന്ന് മാത്രം. മുഖ്യമന്ത്രി കസേരയില്‍ ഇരിക്കുന്ന ആളല്ലെങ്കിലും തമിഴ്നാടിന്‍റെ രാഷ്ട്രീയ, അധികാര കേന്ദ്രങ്ങളെയാകെ നിയന്ത്രിക്കുന്ന സൂപ്പര്‍ പവറായി നില്‍ക്കുന്ന റോജ രംഗസ്വാമി എന്ന കഥാപാത്രം രൂപപ്പെടുത്തിയിരിക്കുന്നത് വിജയ് പ്രധാന രാഷ്ട്രീയ പ്രതിയോഗിയായി കാണുന്ന എം കെ സ്റ്റാലിനെ ഉദ്ദേശിച്ചാണെന്ന് ചിത്രം കണ്ടിരിക്കുമ്പോള്‍ തോന്നും. തലമുറകളായി തങ്ങളാണ് അധികാരം കൈയാളുന്നതെന്നും ഇനിയും അങ്ങനെ തന്നെയാവുമെന്നും രംഗസ്വാമി ഒരിടത്ത് പറയുന്നുണ്ട്.

വില്ലന്‍മാരുടെയും നായകന്‍റെയും വിസ്താരമുള്ള പാരലല്‍ ട്രാക്കുകളിലൂടെയാണ് എച്ച് വിനോദ് ജനനായകന്‍റെ കഥ പറഞ്ഞു തുടങ്ങുന്നത്. ആദ്യമാദ്യം പരസ്പരം സ്വാധീനിക്കുന്ന അവര്‍ നേര്‍ക്കുനേരെ വരുന്നിടത്താണ് ചിത്രം കൂടുതല്‍ ചടുലതയിലേക്കുള്ള അതിന്‍റെ ഗിയര്‍ ഷിഫ്റ്റ് ചെയ്യുന്നത്. വിജയ് നിരവധി സിനിമകളില്‍ ചെയ്ത കഥാപാത്രങ്ങളില്‍ നിന്ന് ഏറെയൊന്നും വേറിട്ട് നില്‍ക്കാത്ത വ്യക്തിയാണ് ദളപതി വെട്രി കൊണ്ടാനും. തന്‍റെ പ്രിയപ്പെട്ടവരുടെയും നാടിന്‍റെ തന്നെയും നന്മയ്ക്ക് വേണ്ടി എന്തും ത്യജിക്കാന്‍ സന്നദ്ധനായ ഒരാള്‍. ഒരു അനുജത്തിയായി തന്‍റെ ജീവിതത്തിലേക്ക് എത്തിയ വിജി എന്ന വിജയലക്ഷ്മിയും ദളപതിയും തമ്മിലുള്ള ബോണ്ടിംഗ് ആണ് ചിത്രത്തിന്‍റെ വൈകാരിക പ്രതലം രൂപപ്പെടുത്തുന്നത്. ചിത്രത്തിന്‍റെ കഥയെ മുന്നോട്ട് നയിക്കുന്നതിലും പ്രധാന പങ്ക് ഇവര്‍ക്കിടയിലുള്ള ബന്ധം തന്നെ. മമിത ബൈജുവിന് തമിഴ് പ്രേക്ഷകര്‍ക്കിടയിലുള്ള സ്വാധീനം വ്യക്തമാക്കുന്നുണ്ട് ചിത്രത്തില്‍ അത്രയും പ്രാധാന്യമുള്ള ഈ കാസ്റ്റിംഗ്. പ്രതിനായക കഥാപാത്രത്തിന്‍റെ ഗ്രാവിറ്റി ബോധ്യപ്പെടുത്തുന്ന പ്രകടനമാണ് ബോബി ഡിയോളിന്‍റേത്. പ്രകാശ് രാജിന്‍റെ കഥാപാത്രം നാം മുന്‍പ് കണ്ടുമറന്ന അദ്ദേഹത്തിന്‍റെ പല കഥാപാത്രങ്ങളെയും ഓര്‍മ്മിപ്പിക്കുമെങ്കിലും റോജ രംഗസ്വാമിയായി അദ്ദേഹം നന്നായിട്ടുണ്ട്.

3 മണിക്കൂര്‍ 3 മിനിറ്റ് ദൈര്‍ഘ്യമുള്ള ചിത്രമാണ് ജനനായകന്‍. ഇത്രയും ദൈര്‍ഘ്യം ഉണ്ടായിട്ടും ഉള്‍ക്കൊള്ളാവുന്നതിലുമധികം സബ് പ്ലോട്ടുകള്‍ ചിത്രത്തിലുണ്ട് എന്നത് ന്യൂനതയാണ്. തമിഴ്നാട് നിയമസഭാ തിരഞ്ഞെടുപ്പിന് മുന്‍പ് ഇറങ്ങേണ്ട, വിജയിന്‍റെ അവസാന ചിത്രം എന്ന വലിയ സമ്മര്‍ദ്ദം എച്ച് വിനോദ് നേരിട്ടുവെന്നത് വ്യക്തം. സത്യന്‍ സൂര്യനാണ് ചിത്രത്തിന്‍റെ ഛായാഗ്രഹണം. അനിരുദ്ധ് രവിചന്ദറിന്‍റേതാണ് സംഗീതം. എന്നാല്‍ എപ്പോഴും സാധിക്കുന്നത് പോലെ അനിരുദ്ധിന് ഇക്കുറി ഇംപ്രഷന്‍ ഉണ്ടാക്കാന്‍ സാധിച്ചിട്ടില്ല. ചീഫ് മിനിസ്റ്റര്‍ ദളപതി വിജയ് എന്ന ടൈറ്റില്‍ ആദ്യമായി തെളിയുന്ന ചിത്രമാണ് ജനനായകന്‍. അദ്ദേഹം തന്നെ വ്യക്തമാക്കിയിട്ടുള്ളതനുസരിച്ച് അവസാനത്തേതും. വിജയ് എന്ന എന്‍റര്‍ടെയ്നര്‍ പ്രേക്ഷകര്‍ക്ക് ആരായിരുന്നെന്ന് വ്യക്തമാക്കുന്നതാണ് ചിത്രത്തിന്‍റെ എന്‍ഡ് ക്രെഡിറ്റ്സ്. വലിയ ആരാധകവൃന്ദം അദ്ദേഹത്തെ ബിഗ് സ്ക്രീനില്‍ മിസ് ചെയ്യുമെന്ന് ഉറപ്പാണ്.

ത്രില്ലടിപ്പിച്ച് സൈജു കുറുപ്പും ടീമും; 'ആരം' റിവ്യൂ

Web Desk — Fri, 25 Sep 2026 15:10:07 +0530

മലയാളി സിനിമാപ്രേമികള്‍ക്ക് ഏറെ ഇഷ്ടമുള്ള നടനാണ് സൈജു കുറുപ്പ്. ഫീല്‍ ഗുഡ്, ഹ്യൂമര്‍ വേഷങ്ങളിലെത്തിയാണ് അദ്ദേഹം ലഭിച്ച കൈയടികളില്‍ കൂടുതലും നേടിയിട്ടുള്ളത്. സൈജു കുറുപ്പിനെ ഇതുവരെ കാണാത്ത രീതിയിലുള്ള ഒരു പൊലീസ് റോളില്‍ അവതരിപ്പിക്കുന്ന ചിത്രമാണ് ആരം. രജീഷ് പരമേശ്വരന്‍ സംവിധാനം ചെയ്തിരിക്കുന്ന ചിത്രത്തില്‍ സിഐ ആന്‍റോ ഈപ്പന്‍ എന്ന റോളിലാണ് അദ്ദേഹം എത്തിയിരിക്കുന്നത്. പോസ്റ്ററുകളിലും മറ്റ് പ്രൊമോഷണല്‍ മെറ്റീരിയലുകളിലും നല്‍കപ്പെട്ടിരുന്ന സൂചന പോലെ ഒരു ടഫ് പൊലീസ് റോളില്‍ എത്തുമ്പോള്‍ സൈജു കുറുപ്പിലെ അഭിനേതാവ് എങ്ങനെയുണ്ടാവും എന്നറിയാനുള്ള കൗതുകമായിരുന്നു ആരം എന്ന ചിത്രത്തിന്‍റെ യുഎസ്‍പി.

ഒരു സിംഗിള്‍ പാരന്‍റ് ആണ് ആന്‍റോ ഈപ്പന്‍. തന്‍റെ അസാന്നിധ്യത്തില്‍ മകനെ നോക്കാന്‍ വിശ്വസ്തയായ ഒരു ആയയെ നിയമിച്ചിട്ടുണ്ട് അദ്ദേഹം. ജോലിയില്‍ അങ്ങേയറ്റം കണിശക്കാരനും ടഫും ആണെങ്കില്‍ പേഴ്സണല്‍ ലൈഫില്‍ മകനൊപ്പം സമയം ചിലവഴിക്കാന്‍ ഇഷ്ടപ്പെടുന്ന ലവബിള്‍ ഫാദറാണ് അദ്ദേഹം. മേലുദ്യോഗസ്ഥരുടെ ശുപാര്‍ശകള്‍ ഫോണ്‍ കോള്‍ ആയി എത്തുന്നതിന് മുന്‍പ് തന്‍റെ ബോധ്യത്തിനനുസരിച്ച് ന്യായത്തിന്‍റെ പക്ഷത്ത് നിന്നുകൊണ്ട് എഫ്ഐആര്‍ ഇടാന്‍ ശുഷ്കാന്തി കാട്ടാറുള്ള ആന്‍റോ ഈപ്പന്‍ അതിനാല്‍ത്തന്നെ ചില സീനിയര്‍ ഓഫീസേഴ്സിന്‍റെ കണ്ണിലെ കരടാണ്. കരിയറും മകനുമൊത്തുള്ള പേഴ്സണല്‍ ലൈഫുമൊക്കെയായി നേര്‍രേഖയില്‍ പോകുന്ന അയാളുടെ സാധാരണ ജീവിതത്തില്‍ അപ്രതീക്ഷിതമായി ഒരു സംഭവം നടക്കുകയാണ്. ഇത്രകാലവും അയാള്‍ കൊണ്ടുനടന്ന വിശ്വാസ്യതയെപ്പോലും തകര്‍ക്കുന്ന തുടര്‍ സംഭവങ്ങളാണ് പിന്നീട് അരങ്ങേറുന്നത്. എന്ത് വില കൊടുത്തും ഒരു കേസിലെ യഥാര്‍ഥ പ്രതികളെ വെളിച്ചത്ത് കൊണ്ടുവരിക ആന്‍റോ ഈപ്പനെ സംബന്ധിച്ച് അങ്ങേയറ്റം മൂല്യവത്തായി മാറുന്നു. ആരം എന്ന സിനിമയുടെ പ്ലോട്ട് ഇതാണ്.

സൈജു കുറുപ്പിന്‍റെ റഫ് ആന്‍ഡ് ടഫ് പൊലീസ് വേഷം തന്നെയാണ് ആരത്തിന്‍റെ ഏറ്റവും വലിയ ഹൈലൈറ്റ്. അധികം സിനിമാറ്റിക് ആവാതെ റിയലിസ്റ്റിക് ആയ അവതരണശൈലിയാണ് സംവിധായകന്‍ രജീഷ് പരമേശ്വരന്‍ കൈക്കൊണ്ടിരിക്കുന്നത്. അത് തന്നെയാണ് സിഐ ആന്‍റോ ഈപ്പന്‍റെ ലോകത്തിലേക്ക് നമ്മളെ വേഗത്തില്‍ അടുപ്പിക്കുന്നതും. സിഐ റാങ്കില്‍ ഉള്ള ആളാണെങ്കിലും ഉള്ള് കൊണ്ട് ഒരു സാധാരണക്കാരനായ ആന്‍റോയെ മികച്ച രീതിയില്‍ സ്ക്രീനില്‍ എത്തിച്ചിട്ടുണ്ട് അദ്ദേഹം. അയല്‍പക്കത്തെ ചേട്ടന്‍ ഇമേജില്‍ നിന്നുള്ള സൈജുവിന്‍റെ വഴിമാറി നടത്തം കൂടിയാണ് ഈ കഥാപാത്രം. അത് തന്നെയാവും ഈ പ്രോജക്റ്റിലേക്ക് അദ്ദേഹത്തെ എത്തിച്ചതും. സൈജു കുറുപ്പ് കഴിഞ്ഞാല്‍ ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത് സിദ്ദിഖ്, അഞ്ജു കുര്യന്‍, സുധീഷ്, ഷഹീന്‍ സിദ്ദിഖ് എന്നിവരാണ്. ഇവരെല്ലാവരും പൊലീസ് യൂണിഫോമിലുമാണ്. ഇതില്‍ സൈജു കഴിഞ്ഞാല്‍ അഭിനേതാവ് എന്ന തരത്തില്‍ ഏറ്റവും സ്കോര്‍ ചെയ്യാനുള്ള അവസരം ലഭിച്ചിരിക്കുന്നത് സുധീഷിനാണ്. ഇത്ര കാലത്തെ അഭിനയ പരിചയം തന്നിലെ നടന് എത്തരത്തിലാണ് മുതല്‍ക്കൂട്ടായിരിക്കുന്നതെന്ന് സുധീഷ് സ്ക്രീനില്‍ കാണിച്ചിട്ടുണ്ട്.

ക്രൈം ത്രില്ലര്‍ ഗണത്തില്‍ പെടുന്ന ചിത്രത്തിന് ആ മൂഡ് ഉടനീളം പകര്‍ന്നിരിക്കുന്നതില്‍ ഏറ്റവും വലിയ പങ്ക് വഹിച്ചിരിക്കുന്നത് ഛായാഗ്രാഹകന്‍ ജിത്തു ദാമോദറാണ്. ‘കിനാവള്ളി’ എന്ന ചിത്രത്തിന്റെ രചന നിർവഹിച്ച വിഷ്ണു രാമചന്ദ്രനാണ് ആരത്തിന് തിരക്കഥ ഒരുക്കിയിരിക്കുന്നത്. വി സാജന്‍റെ എഡിറ്റിംഗ് ചിത്രത്തിന്‍റെ ത്രില്ലര്‍ സ്വഭാവത്തെ നന്നായി മിനുക്കിയിട്ടുണ്ട്. രോഹിത് ഗോപാലകൃഷ്ണനാണ് ചിത്രത്തിന് സംഗീതം പകര്‍ന്നിരിക്കുന്നത്. ഒരിടത്ത് പോലും മുഴച്ച് നില്‍ക്കാത്ത രീതിയില്‍ ഈ ത്രില്ലര്‍ ചിത്രത്തിന് ചേര്‍ന്ന രീതിയിലുള്ള സംഗീതമാണ് രോഹിത്തിന്‍റേത്. പൊലീസ് സ്റ്റോറികളും ത്രില്ലറുകളും ഇഷ്ടപ്പെടുന്ന പ്രേക്ഷകരാണ് ആരത്തിന്‍റെ ടാര്‍ഗറ്റ് ഓഡിയന്‍സ്. അത്തരം സിനിമാപ്രേമികളെ നിരാശരാക്കാത്ത രീതിയില്‍ വൃത്തിയായി പാക്ക് ചെയ്ത ത്രില്ലര്‍ ആണ് ആരം.

കേരളക്കര ചുറ്റിക്കറങ്ങും ഈ ഏലിയൻ ! രസച്ചരട് മുറിയാതെ 'പ്ലൂട്ടോ'- റിവ്യു

Web Desk — Thu, 30 Jul 2026 15:24:09 +0530

സയൻസ് ഫിഷൻ ചിത്രം. ഈ ജോണർ കേട്ടാൽ ഹൈ കോൺസെപ്റ്റുള്ള വളരെ സങ്കീർണമായൊരു സിനിമയാകും കാഴ്ചക്കാരന്റെ മനസിൽ ആദ്യം ഓടി വരുന്നത്. എന്നാൽ ആ ധാരണ മാറ്റിയെടുത്ത് ആദ്യാവസനം വരെ രസച്ചരട് പൊട്ടാതെ പ്രേക്ഷകരെ ഒന്നാകെ പൊട്ടിച്ചിരിപ്പിച്ചിരിക്കുകയാണ് പ്ലൂട്ടോ എന്ന ആദിത്യൻ ചന്ദ്രശേഖർ ചിത്രം. പാട്ടും ഡാൻസും ഫൈറ്റുമുള്ള എന്റർടെയ്നറായ ചിത്രത്തിൽ ഒരു ഏലിനും കൂടി പ്രത്യക്ഷപ്പെട്ടാൽ എങ്ങനെ ഉണ്ടാകും? അതാണ് പ്ലൂട്ടോ എന്ന് ചുരുക്കി പറയാം.

എതിരാളിയുടെ അടിയേറ്റ് നിലത്ത് വീണ് കിടക്കുന്ന നായകൻ വിക്കി എന്ന വിഘ്നേഷിലൂടെയാണ് കഥ മുന്നോട്ട് പോകുന്നത്. വിക്കിയ്ക്ക് ആ അടി കിട്ടാൻ കാരണം ആര് ? എന്ത് ? എങ്ങനെ? എന്നതിനുള്ള ഉത്തരമാണ് പിന്നീട് സിനിമ പറയുന്നത്. സുഹൃത്തിനൊപ്പം ചേർന്ന് പല സംരംഭങ്ങളും തുടങ്ങി പൊട്ടി പാളീസായ, വീട്ടുകാർക്ക് ഒരു വിലയും ഇല്ലാത്ത, നല്ലവനായ ഉണ്ണി ചമയുന്ന അനുജനുള്ള, തോൽവി എന്ന് സ്വയവും മറ്റുള്ളവരും വിശേഷിപ്പിക്കുന്ന ആളാണ് വിക്കി. വീട്ടുകാരും നാട്ടുകാരും സുഹൃത്തുക്കളും ഒടുവിൽ പ്രേമിച്ച പെണ്ണ് തന്നെ തള്ളിപ്പറയുന്ന ഘട്ടത്തിൽ വിക്കിയുടെ ജീവിതത്തിലേക്ക് അന്യഗ്രഹത്തിൽ നിന്നും ഒരു സുഹൃത്ത് വരുന്നു. അവനെ അവൻ പ്ലൂട്ടോ എന്ന് വിളിച്ചു. ഭക്ഷണത്തിന് പകരം മദ്യം മാത്രം കുടിക്കുന്ന ഒരു വ്യത്യസ്തനാണ് ഈ പ്ലൂട്ടോ. ഏലിയന് എന്താണ് പവർ എന്നറിയാനും അതിലൂടെ തനിക്ക് രക്ഷപ്പെടാൻ എന്തെങ്കിലും മാർഗം കിട്ടുമോന്ന് അറിയാനും പരിശ്രമിക്കുന്ന വിക്കിയുടെ ജീവിതത്തിൽ പിന്നീട് നടക്കുന്ന കാര്യങ്ങളാണ് ഹ്യൂമറിന്റെ അകമ്പടിയോടെ ചിത്രത്തിൽ അവതരിപ്പിച്ചിരിക്കുന്നത്.

തുടക്കത്തിൽ പറഞ്ഞത് പോലെ ആദ്യം മുതൽ അവസാനം വരെ ചിരി സമ്മാനിക്കുന്ന ചിത്രമാണ് പ്ലൂട്ടോ. അതിനായി വിക്കിക്കും പ്ലൂട്ടോയ്ക്കും ഒപ്പം എത്തുന്നത് ടൈഗർ തമ്പി(അജു വർഗീസ്), ദിനേശ് പ്രഭാകരൻ(ശാസ്ത്രജ്ഞൻ, പ്രൊഫസർ), വിനീത് തട്ടിൽ(ബല്ല) എന്നിവരാണ്. കാണാൻ കലിപ്പനാണെങ്കിലും ചെയ്യുന്നതെല്ലാം മണ്ടത്തരങ്ങളായി പോകുന്ന ടൈഗർ തമ്പിയെ രൂപത്തിലും ഭാവത്തിലും അജു വർഗീസ് മികവുറ്റതാക്കിയിട്ടുണ്ട്. പടത്തിലെ ഏറ്റവും വലിയ ഹൈലൈറ്റ് ഏലിയനായി എത്തുന്ന അൽത്താഫ് തന്നെയാണ്. ഏലിയന്റെ രൂപവും ഭാവവും എല്ലാം കൂടിക്കലർന്ന കഥാപാത്രം മികവുറ്റതാക്കി മാറ്റാൻ അൽത്താഫിന് സാധിച്ചിട്ടുണ്ട്. ഒപ്പം കട്ടയ്ക്ക് വിക്കിയായി എത്തിയ നീരജ് മാധവും ഉണ്ട്. മൃഗ ഡോക്ടറും വിക്കിയുടെ കാമുകിയുമായി എത്തിയത് ആർഷ ബൈജു ആണ്. മീര എന്ന കഥാപാത്രത്തെ ആർഷ മികച്ചതാക്കിയിട്ടുണ്ട്. സോഷ്യൽ മീഡിയ താരങ്ങളായ സുബിൻ ടാർസൻ, നിഹാൽ നിസാം എന്നിവർ തങ്ങളുടെ കഥാപാത്രങ്ങൾ അടിപൊളിയാക്കിയിട്ടുണ്ട്. മലയാളത്തിൽ ഇനിയും നിരവധി കഥാപാത്രങ്ങൾ തങ്ങൾക്ക് ചെയ്യാനാകുമെന്നും ഇവർ ഊട്ടി ഉറപ്പിക്കുന്നു. സഹീർ മുഹമ്മദ്, തുഷാരാ പിള്ള, വിപിൻ അറ്റ്ലി, സച്ചിൻ ജോസഫ് തുടങ്ങി ചെറിയ റോളിൽ എത്തിയവരും മികവുറ്റ പ്രകടനങ്ങൾ കാഴ്ചവച്ചിട്ടുണ്ട്.

കോമഡി ട്രാക്കിൽ മുന്നോട്ട് പോകുന്ന ചിത്രത്തിന്റെ ക്ലൈമാക്സ് തിയറ്ററിൽ ചെറുതല്ലാത്ത ചിരി തന്നെ പ്രേക്ഷകർക്ക് സമ്മാനിച്ചിട്ടുണ്ട്. ആദ്യമദ്യാന്തം പ്രേക്ഷകരെ ബോറടിപ്പിക്കാതെ മുന്നോട്ട് കൊണ്ടുപോയ പ്ലൂട്ടോയുടെ രചന നിർവഹിച്ചത് നിയാസ് മുഹമ്മദാണ്. മികച്ച ദൃശ്യങ്ങൾ സമ്മാനിച്ച ഛായാഗ്രാഹകൻ വിഷ്ണു ശർമ്മയും കയ്യടി അർഹിക്കുന്നുണ്ട്. അർക്കാഡോ ആണ് പ്ലൂട്ടോയുടെ സംഗീത സംവിധായകൻ. സിനിമയുടെ ആത്മാവ് തന്നെ അദ്ദേഹത്തിന്റെ സംഗീതത്തിൽ ഭദ്രമായിരുന്നുവെന്നത് ഉറപ്പാണ്. ആകെമൊത്തത്തിൽ യാതൊരുവിധ കല്ലുകടിയും ഇല്ലാതെ ആദ്യത്യനും കൂട്ടരും അണിയിച്ചൊരുക്കിയ ഈ പ്ലൂട്ടോ, കുടുംബസമേതം കുട്ടികൾക്കൊപ്പം തന്നെ ആസ്വദിക്കാം. ടെൻഷൻ ഫ്രീയായി തന്നെ ആസ്വദിക്കാം.

ഫണ്‍, ഇമോഷണല്‍ റൈഡ്; 'വിശ്വനാഥ് ആന്‍ഡ് സണ്‍സ്' റിവ്യൂ

Web Desk — Fri, 14 Aug 2026 15:26:28 +0530

തെലുങ്ക് യുവനിരയിലെ ശ്രദ്ധേയ സംവിധായകന്‍ വെങ്കി അറ്റ്ലൂരിക്കൊപ്പം ആദ്യമായി സൂര്യ. ഒപ്പം ചുരുങ്ങിയ കാലത്തിനുള്ളില്‍ തെന്നിന്ത്യയൊട്ടാകെയുള്ള പ്രേക്ഷകരുടെ മനം കവര്‍ന്ന മലയാളി താരം മമിത ബൈജു. ലക്കി ഭാസ്കര്‍ എന്ന സാമ്പത്തിക വിജയവും നിരൂപക പ്രശംസയും ഒരുപോലെ നേടിയ, കരിയറില്‍ ഏറ്റവും വലിയ ബ്രേക്ക് നല്‍കിയ സിനിമയ്ക്ക് ശേഷം വെങ്കി അറ്റ്ലൂരി സംവിധാനം ചെയ്യുന്ന ചിത്രം. വിശ്വനാഥ് ആന്‍ഡ് സണ്‍സ് സിനിമാപ്രേമികളുടെ പ്രീ റിലീസ് ശ്രദ്ധ കവരാന്‍ ഇത്രയൊക്കെ ധാരാളമായിരുന്നു. പ്രൊമോഷണല്‍ മെറ്റീരിയലുകളിലൊക്കെ റൊമാന്‍റിക് കോമഡിയുടെ ഛായയുള്ള ഒരു കളര്‍ഫുള്‍, ഫീല്‍ ഗുഡ്, ഫാമിലി എന്‍റര്‍ടെയ്നര്‍ എന്ന തോന്നലാണ് ചിത്രം സൃഷ്ടിച്ചത്. ഒരു മികച്ച താരനിരയ്ക്കും സാങ്കേതിക സംഘത്തിനുമൊപ്പം വെങ്കി അറ്റ്ലൂരി സംവിധാനത്തില്‍ മറ്റൊരു ബെഞ്ച് മാര്‍ക്ക് സൃഷ്ടിച്ചിരിക്കുകയാണ് വിശ്വനാഥ് ആന്‍ഡ് സണ്‍സിലൂടെ.

തന്‍റെ കരിയറിലെ ഏറ്റവും വലിയ വിജയങ്ങളിലൊന്നായ ഗജിനിയിലെ കഥാപാത്രത്തെ ഓര്‍മ്മിപ്പിക്കുന്നതാണ് ഇവിടെ സൂര്യയുടെ കഥാപാത്രത്തിന്‍റെ പേര്. അതില്‍ സഞ്ജയ് രാമസ്വാമിയെങ്കില്‍ ഇവിടെ സഞ്ജയ് വിശ്വനാഥ്. രണ്ട് പേരും വലിയ ബിസിനസ് സാമ്രാജ്യത്തിന്‍റെ ഉടമകളും ജീവിതത്തില്‍ ചില നിഷ്ഠകള്‍ കാത്തുസൂക്ഷിക്കുന്നവരും ചുറ്റുമുള്ളവര്‍ക്ക് നന്മ വരണമെന്ന് ആഗ്രഹിക്കുന്നവരും. അവരിലേക്ക് തികച്ചും വേറിട്ട സാഹചര്യങ്ങളില്‍ ജീവിക്കുന്ന രണ്ട് സ്ത്രീകള്‍ എത്തുന്നിടത്താണ് രണ്ട് സിനിമകളുടെയും പ്ലോട്ട് സൃഷ്ടിക്കപ്പെടുന്നത്. പക്ഷേ അത് വ്യത്യസ്തമായ രീതികളിലൂടെയാണെന്ന് മാത്രം. ഗജിനിയില്‍ റൊമാന്‍സിനാണ് പ്രാധാന്യമെങ്കില്‍ ഇവിടെ അതിനേക്കാള്‍ പ്രാധാന്യം വ്യക്തികള്‍ക്കിടയിലെ ബന്ധങ്ങള്‍ക്കാണ്. നായകനിലോ നായികയിലോ മാത്രം ഫോക്കസ് പോകാതെ വന്ന് പോകുന്ന കഥാപാത്രങ്ങള്‍ക്കൊക്കെയും വ്യക്തിത്വം കൊടുക്കുന്ന വെങ്കി അറ്റ്ലൂരിയുടെ രചനാശൈലി ഇവിടെയും ശ്രദ്ധേയമാണ്.

പാരമ്പര്യമായി കൈകളിലെത്തിയ ബിസിനസ് സാമ്രാജ്യത്തെ പല മടങ്ങ് വളര്‍ത്തിയെടുത്ത ആളാണ് നാല്‍പ്പത്തിരണ്ടുകാരനായ സഞ്ജയ് വിശ്വനാഥ്. എന്നാല്‍ അയാള്‍ അവിവാഹിതനാണ്. അവിവാഹിതനായി തുടരുന്നതില്‍ അയാള്‍ക്ക് ചില കാരണങ്ങളും ബോധ്യങ്ങളുമുണ്ട്. മകന്‍ വിവാഹം കഴിക്കണമെന്നും പേരക്കുട്ടിയെ ഓമനിക്കണമെന്നും അതിയായി ആഗ്രഹിക്കുന്ന അമ്മയുടെ സ്ഥിരം സമ്മര്‍ദ്ദത്തില്‍ കീഴിലുമാണ് അയാളുടെ ദൈനംദിന ജീവിതം മുന്നോട്ട് പോകുന്നത്. ഈ സമ്മര്‍ദ്ദത്തില്‍ നിന്നും മോചനം നേടാനും അമ്മയുടെ ആഗ്രഹം സഫലമാക്കാനും അയാള്‍ ഒരു വഴി ഒടുവില്‍ കണ്ടെത്തുകയാണ്. പ്രശസ്തിയുടെ വെള്ളിവെളിച്ചത്തിലും മാധ്യമശ്രദ്ധയിലും നില്‍ക്കുന്ന ഒരാള്‍ അത്തരത്തില്‍ ഒരു വഴി സ്വീകരിക്കുമ്പോള്‍ അത് അയാളുടെ വ്യക്തിജീവിതത്തില്‍ സൃഷ്ടിക്കുന്ന പ്രശ്നങ്ങളും രസങ്ങളുമൊക്കെ കലര്‍ത്തിയാണ് വെങ്കി അറ്റ്ലൂരി മനോഹരമായ ഒരു ഫാമിലി ഡ്രാമ സൃഷ്ടിച്ചിരിക്കുന്നത്.

തന്റെ കഥാപാത്രങ്ങള്‍ക്ക് ഏറ്റവും അനുയോജ്യരായ താരങ്ങളെയാണ് വെങ്കി അറ്റ്ലൂരി തിരഞ്ഞെടുത്തിരിക്കുന്നത്. സൂര്യയുടെ സഞ്ജയ് വിശ്വനാഥും രാധിക ശരത്കുമാര്‍ അവതരിപ്പിച്ചിരിക്കുന്ന അമ്മയും മമിത ബൈജുവിന്‍റെ മദനകാമേശ്വരി ജ്യോതിലിംഗം എന്ന മാഡിയുമാണ് ചിത്രത്തിലെ ഏറ്റവും പ്രധാനപ്പെട്ട മൂന്ന് കഥാപാത്രങ്ങള്‍. ലൈറ്റ് ഹാര്‍ട്ടഡ് ഫാമിലി എന്‍റര്‍ടെയ്നര്‍ ആണെങ്കിലും വൈകാരികമായ ചില അടിയൊഴുക്കുകള്‍ കഥപറച്ചിലില്‍ ഉടനീളമുള്ള ചിത്രമാണിത്. കോമഡി ഉണ്ടെങ്കിലും അത് അത്ര ലൗഡ് ആവാത്ത, സിറ്റ്വേഷണല്‍ ഹ്യൂമര്‍ ആണ്. സന്ദര്‍ഭങ്ങള്‍ക്കനുസരിച്ച് ഈ മൂന്ന് കഥാപാത്രങ്ങളുടെയും പ്രതികരണങ്ങളിലെ സൂക്ഷ്മ വ്യത്യാസങ്ങളൊക്കെ ചിത്രത്തിന്‍റെ അടിസ്ഥാനമാണ്. ഇത്തരമൊരു ചിത്രത്തില്‍ കഥാപാത്രങ്ങളെ അവതരിപ്പിച്ചിരിക്കുന്ന അഭിനേതാക്കള്‍ക്കിടയിലുള്ള കെമിസ്ട്രി ഏറെ പ്രധാനമാണ്. അതിന് ഇവിടെ പത്തില്‍ പത്ത് മാര്‍ക്കും കൊടുക്കാം. സൂര്യ- മമിത, സൂര്യ- രാധിക ശരത്കുമാര്‍, മമിത- രാധിക ശരത്കുമാര്‍ കെമിസ്ട്രി ഒക്കെയും മനോഹരമായി വര്‍ക്ക് ആയിട്ടുണ്ട്. എലൈറ്റ് ക്ലാസിന്‍റെ ജീവിതമാണ് പറയുന്നതെങ്കിലും അവരുടെ വികാരങ്ങള്‍ അങ്ങേയറ്റം മാനുഷികവും സത്യസന്ധവുമായാണ് വെങ്കി അറ്റ്ലൂരി അവതരിപ്പിച്ചിരിക്കുന്നത്. അതിനാല്‍ത്തന്നെ കഥാപാത്രങ്ങള്‍ക്കൊപ്പം പ്രേക്ഷകര്‍ക്ക് അനായാസം സഞ്ചരിക്കാനാവുന്നു.

സ്ക്രീന്‍ ടൈം കുറവുള്ള കഥാപാത്രങ്ങള്‍ക്ക് പോലും വെങ്കി അറ്റ്ലൂരി എഴുത്തില്‍ കൊടുക്കുന്ന ഒരു ശ്രദ്ധയുണ്ട്. ലക്കി ഭാസ്കര്‍ അടക്കമുള്ള ചിത്രങ്ങളില്‍ കണ്ട ആ മികവ് അദ്ദേഹം ഇവിടെയും ആവര്‍ത്തിക്കുന്നുണ്ട്. ഈ ജോണറില്‍ ഒരു മികച്ച ചിത്രം സൂര്യയുടേതായി പുറത്തിറങ്ങിയിട്ട് ഏറെനാളായി. വലിയ ബിസിനസ് സാമ്രാജ്യത്തിന്‍റെ അധിപനാണെങ്കിലും ചൈല്‍ഡ്‍ഹുഡ് ട്രോമയുടേതായ പ്രശ്നങ്ങള്‍ വ്യക്തിത്വത്തില്‍ കൊണ്ടുനടക്കുന്ന ആളാണ് സഞ്ജയ് വിശ്വനാഥ്. കൈയടക്കമുള്ള പ്രകടനം ആവശ്യപ്പെടുന്ന കഥാപാത്രം. അഭിനേതാവ് എന്ന നിലയിലുള്ള പരിചയം സൂര്യയ്ക്ക് പ്രകടിപ്പിക്കാന്‍ അവസരം നല്‍കിയ കഥാപാത്രമാണ് സഞ്ജയ്. അത് അദ്ദേഹം മനോഹരമായി ചെയ്തിട്ടുണ്ട്. മമിത ബൈജുവിന് ഇതുവരെ ലഭിച്ചതില്‍ ഏറ്റവും മികച്ച കഥാപാത്രങ്ങളിലൊന്നാണ് ചിത്രത്തിലെ മാഡി. പ്രേമലുവിന് ശേഷം അവതരിപ്പിച്ച പല കഥാപാത്രങ്ങളിലും അതിലെ റീനുവിന്റെ ഛായ ഉണ്ടായിരുന്നെങ്കില്‍ ഫ്രഷ്നസ് ഉള്ള കഥാപാത്രമാണ് മാഡി. മാഡിയെ മമിത ഗംഭീരമാക്കിയിട്ടുണ്ട്. തായ് കിളവിയിലൂടെ അടുത്തിടെ വലിയ കൈയടി നേടിയ രാധിക ശരത്കുമാറിനും ലഭിച്ച മികച്ച കഥാപാത്രമാണ് ചിത്രത്തിലേത്. കഥയില്‍ ഏറെ പ്രാധാന്യമുള്ള ഈ കഥാപാത്രത്തെ അവരും മികവാര്‍ന്ന രീതിയില്‍ സ്ക്രീനില്‍ എത്തിച്ചിട്ടുണ്ട്. നീണ്ട ഇടവേളയ്ക്ക് ശേഷം രവീണ ടണ്ഡനെ ഒരു തമിഴ് ചിത്രത്തില്‍ കാണാനായതും വിശ്വനാഥ് ആന്‍ഡ് സണ്‍സിലൂടെയാണ്.

ചിത്രത്തിന്‍റെ കളര്‍ഫുള്‍ ഫ്രെയ്മുകള്‍ നിമിഷ് രവിയുടെ ക്യാമറയിലൂടെയാണ്. ലക്കി ഭാസ്കറിന്‍റെ ഛായാഗ്രഹണവും നിമിഷ് ആയിരുന്നു. വളരെ മിനിമല്‍ ആണ് ചിത്രത്തിന്‍റെ സംഗീതം. ജി വി പ്രകാശ് കുമാര്‍ ആണ് സംഗീത വിഭാഗം കൈകാര്യം ചെയ്തിരിക്കുന്നത്. പ്രധാന ഇമോഷണല്‍ മൊമെന്‍റുകളിലൊക്കെ പശ്ചാത്തല സംഗീതത്തിന്‍റെ അതിപ്രസരം കൊണ്ടുവരുന്ന സമീപകാല രീതിക്ക് പകരം അത്തരം മുഹൂര്‍ത്തങ്ങളില്‍ നിശബ്ദത കൊണ്ടുവന്നിട്ടുണ്ട് വെങ്കി അറ്റ്ലൂരി. അറ്റെന്‍ഷന്‍ സ്പാന്‍ അത്രയും കുറഞ്ഞ കാണികളുടെ ശ്രദ്ധ പിടിക്കാന്‍ വന്‍ വയലന്‍സ് ഉള്ള ക്രൈം, ആക്ഷന്‍ ത്രില്ലറുകളില്‍ അഭയം പ്രാപിക്കുന്ന ഭൂരിപക്ഷം സംവിധായകരില്‍ നിന്നും വഴി മാറി നടക്കുന്നയാളാണ് വെങ്കി അറ്റ്ലൂരി. അദ്ദേഹത്തില്‍ നിന്നും ഇനിയും ഏറെ പ്രതീക്ഷിക്കാന്‍ സാധിക്കുമെന്ന് അടിവരയിടുന്നുണ്ട് വിശ്വനാഥ് ആന്‍ഡ് സണ്‍സ്. ലൈറ്റ് ഹാര്‍ട്ടഡ് ഫാമിലി എന്‍റര്‍ടെയ്നര്‍ ചിത്രങ്ങള്‍ ഇഷ്ടപ്പെടുന്നവരെ ഒട്ടുമേ നിരാശപ്പെടുത്താത്ത ചിത്രമാണിത്. അതിനാല്‍ത്തന്നെ ധൈര്യമായി ടിക്കറ്റ് എടുക്കാം.

കാരിക്കാമുറി ഷണ്മുഖനും ഡിഎസ്പി ബാലഗോപാലും പിന്നയാ പിള്ളേരും!; തിയേറ്ററിൽ ആവേശം തീർത്ത് 'ലോ ആൻഡ് ഓർഡർ'; റിവ്യൂ

Web Desk — Fri, 18 Sep 2026 17:20:24 +0530

മലയാളത്തിലെ എക്കാലത്തെയും വലിയ മാസ്, കൊമേർഷ്യൽ വിജയങ്ങൾക്ക് തൂലിക ചലിപ്പിച്ച രഞ്ജിത്തിൻ്റെ സംവിധാനത്തിൽ നീണ്ട കാലത്തെ ഇടവേളയ്ക്ക് ശേഷം എത്തിയ ചിത്രമാണ് 'ലോ ആൻഡ് ഓർഡർ'. എട്ട് വർഷത്തെ ഇടവേളയ്ക്ക് ശേഷം രഞ്ജിത്ത് ഒരുക്കുന്ന മുഴുനീള ചിത്രത്തിൽ അദ്ദേഹത്തിൻ്റെ തന്നെ ഒരു കൾട്ട് കഥാപാത്രം കാമിയോ വേഷത്തിൽ എത്തുന്നു എന്നത് സിനിമയുടെ ആദ്യ ഘട്ടം മുതലേ പ്രേക്ഷകർക്കിടയിൽ ചർച്ചയുമാണ്. വലിയ താരനിര അവകാശപ്പെടാനില്ലാത്ത സിനിമയുടെ പ്രധാന യുഎസ്പിയും ഇതുതന്നെ.

പേര് സൂചിപ്പിക്കും പോലെ കൊച്ചിയുടെ പശ്ചാത്തലത്തിൽ നടക്കുന്ന ഒരു പൊലീസ് കഥയാണ് 'ലോ ആൻഡ് ഓർഡർ'. ഉദയകൃഷ്ണയുടെ തിരക്കഥയിൽ പ്രകാശ് വർമ്മയും പുതുമുഖങ്ങളായ ഋതുദേവ് അയ്യപ്പൻ, ഷനൂദ് ഇബ്രാഹിം, ഡോൺ മൈക്കിൾ, സജൽ സുദർശനൻ, നിജാദ് ബാബു തോമസ് എന്നിവരുമാണ് പ്രധാന വേഷങ്ങളിൽ. സ്വന്തം മൂല്യങ്ങളിൽ അടിയുറച്ച് ജോലി ചെയ്യുന്ന പൊലീസ് ഉദ്യോഗസ്ഥനാണ് ഡിവൈ.എസ്.പി. ബാലഗോപാൽ എന്ന പ്രകാശ് വർമ്മയുടെ കഥാപാത്രം. ഭാര്യയുടെ കഥാപാത്രത്തെ അവതരിപ്പിക്കുന്നത് അഭിരാമിയാണ്. കൊച്ചിയിലെ ഒരു പ്രധാന ഡ്രഗ് ഡീലർക്കെതിരെ കേസന്വേഷണവുമായി ചെല്ലുമ്പോഴാണ് ഇവരുടെ വ്യക്തി ജീവിതത്തിൽ ഇതുമായി ബന്ധപ്പെട്ട് ഒരു പ്രശ്നമുണ്ടാകുന്നത്.

പൊലീസ് അക്കാദമിയിൽ നിന്ന് പഠിച്ചിറങ്ങി ആദ്യ പോസ്റ്റിങ് നേടുന്ന പൊലീസുകാരാണ് ഋതുദേവ് അയ്യപ്പൻ, ഷനൂദ് ഇബ്രാഹിം, ഡോൺ മൈക്കിൾ, സജൽ സുദർശനൻ, നിജാദ് ബാബു തോമസ് എന്നിവരുടെ കഥാപാത്രങ്ങൾ. ഇവരുടെ വ്യക്തി ജീവിതത്തിലും ഇതേ മയക്കുമരുന്ന് ശൃംഖലയുമായി ബന്ധപ്പെട്ട് ഒരു പ്രശ്നമുണ്ടാകുകയാണ്. തന്റെ ജീവിതം മോശം അവസ്ഥയിലെത്തിച്ചവരെ എതിരിടാൻ ബാലഗോപാലും ഈ യുവ പൊലീസുകാരും തീരുമാനിക്കുന്നതോടെ കഥ പുതിയ ഗതി സ്വീകരിക്കുന്നു. തങ്ങൾക്കും അതീതമായി കാര്യങ്ങൾ പോകുന്നുവെന്ന് തിരിച്ചറിഞ്ഞതോടെ സംഘം കാരിക്കാമുറി ഷണ്മുഖന്റെ സഹായം സ്വീകരിക്കുകയാണ്. തൻ്റെ ജീവിതം മാത്രമല്ല സമൂഹത്തിനു തന്നെ ആപത്തുണ്ടാക്കുന്ന ഈകൂട്ടർക്കെതിരെ ബാലഗോപാൽ നടത്തുന്ന പോരാട്ടമാണ് ‘ലോ ആൻഡ് ഓർഡർ’ എന്ന് പറയാം.

2004ൽ ആണ് രഞ്ജിത്ത് തിരക്കഥയും സംവിധാനവും നിർവഹിച്ച് മമ്മൂട്ടി പ്രധാന വേഷത്തിൽ എത്തിയ 'ബ്ലാക്ക്' തിയേറ്ററുകളിൽ എത്തുന്നത്. അതിലെ കാരിക്കാമുറി ഷണ്മുഖൻ എന്ന കാക്കിയിട്ട ഗുണ്ടാ കഥാപാത്രം പിന്നീട് വലിയ സ്വീകാര്യത നേടി. തുനിഞ്ഞിറങ്ങിയാൽ കേരള പൊലീസ് എന്ത് വിപത്തിനെയും തൂത്തെറിയാൻ പ്രാപ്തമായ ശക്തിയാണെന്ന് പറയുകയാണ് ചിത്രം. 'അമ്പലക്കര തെച്ചിക്കാവിൽ പൂരം' എന്ന ബ്ലാക്കിലെ പോപ്പുലർ പാട്ടിൻ്റെ അകമ്പടിയോടെയാണ് കാരിക്കാമുറി ഷണ്മുഖനെയും സഹായി മമ്മാലിയായി മോഹൻ ജോസിനെയും സംവിധായകൻ അവതരിപ്പിക്കുന്ന്ത്. ഷേർഷാ ഷെരീഫ്, ബോബി കുര്യൻ, വി.കെ. പ്രകാശ്, ദേവൻ, ആനന്ദ് മന്മഥൻ, ഭീമൻ രഘു, സുരേഷ് കൃഷ്ണ, ജോയ് മാത്യു, ജോണി ആന്റണി, ഗായത്രി അശോക്, അജയ് വാസുദേവ്, ശങ്കർ രാമകൃഷ്ണൻ, നന്ദൻ ഉണ്ണി, സാബുമോൻ, നന്ദു ഉൾപ്പെടെ ഒട്ടേറെ താരങ്ങളും ലോ ആൻഡ് ഓർഡറിൽ വേഷമിടുന്നുണ്ട്.സത്യം സിനിമാസ്, മഹാസുബൈർ മൂവി ക്ഷേത്ര എന്നീ ബാനറുകളിൽ പ്രേമചന്ദ്രൻ എ.ജിയും മഹാസുബൈറും ചേർന്നാണ് നിർമ്മാണം. തിരക്കഥാകൃത്ത് ഉദയ്കൃഷ്ണയും ഒരു ചെറിയ വേഷത്തിൽ ചിത്രത്തിലുണ്ട്.

ഉദയ് കൃഷ്ണയുടെ തിരക്കഥ പതിവ് ഫോർമുലകളിൽ ഉള്ളത് തന്നെയാണ്. ഒരു മാസ് എന്റർടെയ്‌നറിന് വേണ്ട ചേരുവകളോടെ അവതരിപ്പിച്ചിരിക്കുകയാണ് അണിയറ പ്രവർത്തകർ. പ്രശാന്ത് രവീന്ദ്രനാണ് ഛായാഗ്രഹണം നിർവഹിച്ചിരിക്കുന്നത്. ചിത്രസംയോജനം മനോജ് കണ്ണോത്തും പശ്ചാത്തലസംഗീതം ബിജിബാലും നിർവഹിച്ചിരിക്കുന്നു. മാസ് എലമെൻ്റുകളെയും സമ്പന്നമായ ഫൈറ്റ് സീക്വൻസുകളെയും സംഗീതം കൂടുതൽ എലവേറ്റ് ചെയ്യുന്നുണ്ട്. ചിത്രത്തിലെ ഗാനങ്ങൾ ഷിബു ചക്രവർത്തിയുടെ വരികൾളിൽ ജോ ഡാനിയൽ സംഗീതം നൽകിയിരിക്കുന്നവയാണ്. ഫാമിലി ഇമോഷനും പൊലീസ് കഥയും ചേർത്ത ലോ ആൻഡ് ഓർഡറിന് കാരിക്കാമുറി ഷണ്മുഖൻ ഒരു മാസ് ആഡ് ഓൺ ആണ്. ആ വരവ് രണ്ടാമതൊന്ന് കാണാൻ ചിത്രത്തിന് ടിക്കറ്റെടുക്കാം.

മനോഹരിയായ വാരണാസി, പ്രകടനങ്ങളിൽ മുന്നേറുന്ന 'ചിന്ന ചിന്ന ആസൈ'; റിവ്യൂ

Gowry Priya J — Fri, 19 Jun 2026 15:40:52 +0530

മധുബാല, ഇന്ദ്രൻസ് എന്നിവരെ കേന്ദ്ര കഥാപാത്രങ്ങളാക്കി വർഷാ വാസുദേവ് സംവിധാനം ചെയ്ത 'ചിന്ന ചിന്ന ആസൈ', മനുഷ്യ ജീവിതത്തെ പൂർണ്ണമാക്കുന്ന 'ചിന്ന ചിന്ന ആസൈ'കളെക്കുറിച്ചാണ്. വാരണാസിയിൽ ഒറ്റപ്പെട്ടുപോകുന്ന ലീല എന്ന തമിഴ് സ്ത്രീയുടെ കഥയാണ് ഒറ്റവാചകത്തിൽ ചിത്രം. ഫീൽ ഗുഡ് എന്ന ഴോൺറയിൽ ആയിരിക്കുമ്പോൾ തന്നെ വൈകാരിക നിമിഷങ്ങൾ സമ്മാനിക്കുന്ന കഥപറച്ചിൽ രീതി. മനോഹരമായ ഒരു ചെറുകഥയോ നോവലോ ഒക്കെ വായിക്കുന്നതു പോലെ മനസറിഞ്ഞു കണ്ടുതീർക്കാവുന്ന രണ്ടു മണിക്കൂർ.

കോഴിക്കോട്ടുകാരൻ റിട്ട. യുപി സ്കൂൾ അധ്യാപകനാണ് ഇന്ദ്രൻസ് അവതരിപ്പിക്കുന്ന മാധവൻ മാഷ്. ബനാറസ് യൂണിവേഴ്സിറ്റിയിൽ കഥക് പഠിക്കുന്ന മകളെ(അപർണ ബാലമുരളി) കാണാൻ വാരണായിസിൽ എത്തുക പതിവാണ്. അങ്ങെയൊരു യാത്രയിലാണ് മധു അവതരിപ്പിക്കുന്ന ലീലയെ മാധവൻ മാഷ് യാദൃശ്ചികമായി കണ്ടുമുട്ടുന്നത്. ജീവിതത്തിൻ്റെ വലിയൊരു ഘട്ടവും കുടുംബത്തിനായി ജീവിച്ചു തീർത്തവരാണ് ഇരുവരും. ചെറുപ്പത്തിൽ അച്ഛൻ പറഞ്ഞു കേട്ട കഥകളിലെ വാരണാസിയിലേയ്ക്ക് മധ്യവയസിൽ ലീലയെത്തുന്നത് അന്നുണ്ടായിരുന്നതു പോലെ ഒരു ദിവസം അവൾക്ക് അവളായി ജീവിക്കാനാണ്. മുമ്പൊരിക്കലും അനുഭവിക്കാത്തവിധം അന്തസ്സും സമാധാനവും പ്രണയവും കരുതലുമെല്ലാം അവളവിടെ അനുഭവിക്കുന്നുണ്ട്.

'ഹോളി ലാൻഡ് ഓഫ് ഡെത്ത്' എന്ന ഫിലോസഫിയാണ് വാരണാസി. മോക്ഷം തേടി ലക്ഷങ്ങൾ ഒഴുകിയെത്തുന്നിടം. ഒരു കഥാപശ്ചാത്തലം മാത്രമായല്ല സംവിധായിക വാരണാസിയെ സെറ്റ് ചെയ്തിരിക്കുന്നത്. മാധവനും ലീലയ്ക്കുമൊപ്പം ഒരു കഥാപാത്രമാണ് അവിടം. ഒറ്റപ്പെടലിൽ നിന്ന്, വേദനകളിൽ നിന്ന് ജീവിതത്തിൽ നിന്ന് തന്നെയുള്ള മോക്ഷം തേടിയാണ് ആളുകൾ വാരണാസിയിൽ എത്തുന്നത്. എന്നാൽ മനുഷ്യരുടെയുള്ളിലെ 'ചിന്ന ചിന്ന ആസൈകളും' അതുപൂർത്തിയാകുമ്പോൾ ലഭിക്കുന്ന മോക്ഷവുമാണ് സിനിമയുടെ ഫിലോസഫി.

മനോഹരമായി ഒപ്പിയെടുത്ത വാരണാസിയും അതിനെ പ്രേക്ഷകരിലേയ്ക്ക് അലിയിച്ച പശ്ചാത്തല സംഗീതവും ഒപ്പം അഭിനേതാക്കളുടെ പ്രകടനങ്ങളുമാണ് ചിത്രത്തെ മനോഹരമാക്കുന്നത്. വാരണാസിയിലെ ഘാട്ടുകളിലാണ് പൂർണ്ണമായും ചിന്ന ചിന്ന ആസൈ കഥപറയുന്നത്. സംഭാഷണങ്ങളിലൂടെ പോകുന്ന കഥ പറച്ചിൽ രീതിയാണ് ആദ്യപകുതിയിൽ സംവിധായിക ഉപയോഗിച്ചിരിക്കുന്നത്. ലീലയെയും മാധവനെയും പരിചയപ്പെടുത്തുകയാണവിടെ.. രണ്ടാം പകുതി നമ്മളറിഞ്ഞ ലീലയും മാധവനും നമുക്ക് മുന്നിൽ ജീവിക്കും. സൗഹൃദവും പ്രണയവും വേർതിരിച്ചെടുക്കാനാകാത്ത നിമിഷങ്ങൾ വർഷയുടെ എഴുത്തിനപ്പുറം കൊണ്ടുചെന്ന് എത്തിച്ചിട്ടുണ്ട് ഇരുവരുടെയും പ്രകടനങ്ങൾ.

ഇന്ദ്രൻസ്, മധുബാല എന്നിവർക്ക് പുറമെ അപർണ്ണ ബാലമുരളി, വിഷ്ണു അഗസ്ത്യ, തമ്പി രാമയ്യ, കാളി വെങ്കട്, ജാഫർ സാദിഖ്, സായ് ജനനി എന്നിവരും കഥാപാത്രങ്ങളാണ്. ജാഫർ സാദിഖ് അവതരിപ്പിക്കുന്ന ഷെട്ടി എന്ന കഥാപാത്രം ചെറിയൊരു നേരത്തേയ്ക്കേ സ്ക്രീനിൽ എത്തുന്നുള്ളൂ. എന്നാൽ മായാത്തൊരു ഇംപാറ്റ് ആ കഥാപാത്രത്തിന് നൽകാനാകുന്നുണ്ട്. അപർണയുടെയും വിഷ്ണു അഗസ്ത്യയുടെയും കഥാപാത്രങ്ങളും ശ്രദ്ധേയമാണ്. സംവിധായിക വർഷ വാസുദേവ് തന്നെയാണ് ചിത്രത്തിൻ്റെ രചന നിർവഹിച്ചിരിക്കുന്നത്. ഫയിസ് സിദ്ധിക് ആണ് ഛായാഗ്രഹണം, ഗോവിന്ദ് വസന്തയുടെ മനോഹരമായ സംഗീതം വാരണാസിക്കും ലീലയുടെയും മാധവൻ്റെയും സൗഹൃദത്തിനും ആഴം നൽകുന്നു. റെക്സൺ ജോസഫ് ആണ് എഡിറ്റിങ് നിർവഹിച്ചിരിക്കുന്നത്. ബാബുജി പ്രൊഡക്ഷൻസിൻ്റെ ബാനറിൽ അഭിജിത് ബാബുജി നിർമ്മിച്ച ചിത്രം വേഫറർ ഫിലിംസ് ആണ് കേരളത്തിൽ വിതരണത്തിനെത്തിക്കുന്നത്.

ആരും പറയാത്ത കഥ പറഞ്ഞുകൊണ്ടല്ല വർഷ വാസുദേവ് സിനിമയെ പ്രേക്ഷകർക്ക് മുന്നിലെത്തിക്കുന്നത്. പകരം ലീലയെയും മാധവനെയും പ്രേക്ഷകരുടെ ഉള്ളുലയ്ക്കുന്ന അനുഭവമായി വിട്ടു തന്നുകൊണ്ടാണ്. വാരണാസിയിൽ വന്ന് മടങ്ങുന്നവർ അവർക്ക് പ്രിയപ്പെട്ടതെന്തെങ്കിലും അവിടെയുപേക്ഷിച്ചാണ് മടങ്ങുകയെന്ന് സിനിമയുടെ ഒരു ഘട്ടത്തിൽ, ഒരു കഥാപാത്രം ലീലയോടും മാധവനോടും പറയുന്നുണ്ട്. ഇരുവരും അവർക്ക് പ്രിയപ്പെട്ട ഒന്നിനെ ഒടുക്കം അവിടെ ഉപേക്ഷിക്കുന്നുമുണ്ട്. വാരണാസിയുടെ ഫിലോസഫിയും സിനിമയുടെ ഫിലോസഫിയും ചേർന്ന് മനോഹരമായൊരു തിയേറ്റർ അനുഭവം 'ചിന്ന ചിന്ന ആസൈ' നൽകുമെന്നുറപ്പ്!

ലൂപ്പിലൊരു കല്യാണയോട്ടം, ചിരിപ്പൂരം തീർക്കുന്ന 'ധൂമകേതു'; റിവ്യൂ

Web Desk — Fri, 25 Sep 2026 17:46:08 +0530

'നെയ്മർ' എന്ന ചിത്രത്തിലൂടെ ശ്രദ്ധേയനായ സുധി മാഡിസൺ സംവിധാനം ചെയ്ത പുതുമയുള്ളൊരു ടൈം ലൂപ്പ് കോമഡി ചിത്രമാണ് ധൂമകേതു. ടൈം ലൂപ്പ് എന്ന് കേൾക്കുമ്പോൾ പ്രേക്ഷകർക്ക് തോന്നാവുന്ന കോമ്പ്ലക്സിറ്റീസ് ഒന്നുമില്ലാതെ സാധാരണക്കാരനായ ഒരാളുടെ ജീവിതത്തിൽ നടക്കുന്ന തീർത്തും സാധാരണമായ ഒരു സംഭവമെന്നോണമാണ് ചിത്രത്തെ അവതരിപ്പിച്ചിരിക്കുന്നത്. തമാശയ്ക്കും ആഘോഷങ്ങൾക്കും പ്രാധാന്യം നൽകി രസകരമായി കണ്ടു തീർക്കാവുന്ന രണ്ടു മണിക്കൂർ നേരത്തെ അനുഭവമാണ് 'ധൂമകേതു'.

സജിൻ ഗോപു അവതരിപ്പിക്കുന്ന കുട്ടനാണ് കേന്ദ്ര കഥാപാത്രം. മുപ്പത്തിയാറ് വയസുകഴിഞ്ഞ കുട്ടൻ ആഗ്രഹിച്ച് ഒരു വിവാഹം കഴിക്കുന്നു. നിഖില വിമൽ അവതരിപ്പിക്കുന്ന ഷർമിളയാണ് വധു. സുന്ദരിയായ വധുവിന് താൻ ചേർന്നയാളാണോ എന്ന ചിന്ത കുട്ടനെ അലട്ടുന്നുണ്ട്. അങ്ങനെ ആകെ പരവശനായി ഒരുപാട് സ്നേഹത്തോടെ വിവാഹദിവസത്തിലേയ്ക്ക് ഉറക്കമുണരുന്ന അയാൾ ആദ്യ രാത്രിക്ക് മുമ്പേ മരണപ്പെടുകയാണ്. ജീവിതത്തിൽ അത്രയും പ്രധാനപ്പെട്ട ആ ഒരു ദിവസം ലൂപ്പ് പോലെ ദിവസങ്ങളോളം കുട്ടൻ്റെ ജീവിതത്തിൽ സംഭവിക്കുന്നു. മുവായിരം വർഷങ്ങൾക്ക് ശേഷം ഒരു ധൂമകേതു കേരളത്തിനു മുകളിൽ ആകാശത്തിലൂടെ പോകുന്നതാണ് കുട്ടൻ്റെ ജീവിതത്തിൽ സംഭവിക്കുന്നതിനൊക്കെയും കാരണമാകുന്നത്. സ്വപ്നമെന്ന് കരുതി ആദ്യ ദിവസമുണരുന്ന കുട്ടൻ ആ കണ്ടതുമുഴുവൻ ദിവസങ്ങളോളം ആവർത്തിച്ചു ജീവിക്കുകയാണ്. കുട്ടൻ്റെ അവസ്ഥയാണ് സിനിമയിലെ കോമഡിയെയും ഇമോഷനെയും ഒരേപോലെ വർക്കാക്കുന്നത്.

അമ്പാനായി പ്രേക്ഷകരുടെ ഇഷ്ടം നേടിയ സജിൻ ഗോപു പൊന്മാനിലൂടെ തീർത്തും ഞെട്ടിച്ചു കളഞ്ഞിരുന്നു. പൊന്മാനു ശേഷം കോമഡിയിലേയ്ക്ക് തിരികെ പോകുന്ന സജിൻ ഗോപു കഥാപാത്രമാണ് ധൂമകേതുവിനെ ലിതിൻ കുമാർ എന്ന കുട്ടൻ. കോമഡിയും മാസും നിറഞ്ഞ നിമിഷങ്ങളാണ് ധൂമകേതുവിനെ മികച്ച തിയേറ്റർ വാച്ച് ആക്കുന്നത്. എന്തിനും കുട്ടൻ്റെ കൂടെനിൽക്കുന്ന സുഹൃത്താണ് ഗണപതി അവതരിപ്പിക്കുന്ന ആൻ്റിക്കുഞ്ഞ്. ഒപ്പം ഷൈൻ ടോം ചാക്കോയുടെ ഒരു ഓവർ ദി ടോപ്പ് പെർഫോമൻസും ചിത്രത്തിൽ കാണാം. മഞ്ജു പിള്ള, നിയാസ് ബക്കർ, സിദ്ദാർഥ് ഭരതൻ തുടങ്ങിയവരാണ് ചിത്രത്തിലെ മറ്റ് പ്രധാന വേഷങ്ങളിലെത്തുന്നത്.

ഒരേ സ്വപ്‌നം പല തവണ വരുമ്പോൾ പ്രേക്ഷകർക്ക് ആ രംഗം പുതുതായി കാണുന്നുവെന്ന തോന്നലുണ്ടാക്കുന്ന വിധത്തിൽ അവതരിപ്പിക്കുക സിനിമയുടെ വിജയത്തിന് പ്രാധമികമായി ആവശ്യമായ കാര്യമാണ്. ആ പുതുമ സിനിമയിലൂടനീളം ഉണ്ടാക്കാനായതാണ് ധൂമകേതുവിൻ്റെ വിജയം. സമീർ താഹിർ, ഷൈജു ഖാലിദ്, സജിൻ അലി, അബ്ബാസ് തിരുനാവായ എന്നിവർ ചേർന്നാണ് ചിത്രം നിർമിച്ചിരിക്കുന്നത്. സോണി ബാബു ആന്റണി, മനു മധുസൂദനൻ എന്നിവർ ചേർന്നാണ് ധൂമകേതുവിന്റെ രചന നിർവഹിച്ചിരിക്കുന്നത്. ബോക്സോഫീസിൽ തരംഗം സൃഷ്ടിച്ച് തുടരുന്ന ബെത്ലഹേം കുടുംബ യൂണിറ്റിന് ശേഷം ഭാവന റിലീസ് വിതരണത്തിന് ച്ച ചിത്രം കൂടിയാണ് ധൂമകേതു. ആഘോഷമായി ഒരു രണ്ടു മണിക്കൂർ തിയേറ്ററിൽ ആസ്വദിക്കാൻ ധൂമകേതുവിന് ടിക്കറ്റെടുക്കാം.

ഗംഭീര ദൃശ്യാനുഭവം, വന്യമായ മനുഷ്യാനുഭവങ്ങളുടെ 'അനന്തൻ കാട്'; റിവ്യൂ

Web Desk — Thu, 25 Jun 2026 16:20:14 +0530

ടിയാന് ശേഷം മുരളി ഗോപിയുടെ തിരക്കഥയിൽ ജിയെൻ കൃഷ്ണകുമാർ ഒരുക്കുന്ന ചിത്രം, പ്രേക്ഷകരെ സംബന്ധിച്ച് അതായിരുന്നു 'അനന്തൻ കാടി'ൻ്റെ യുഎസ്പി. തലസ്ഥാന നഗരിയായ തിരുവനന്തപുരത്ത് കഥ സെറ്റ് ചെയ്യുമ്പോൾ തന്നെ തമിഴ് പശ്ചാത്തലവും കഥയ്ക്ക് നൽകിയിട്ടുണ്ട്. അനന്തപുരി പണ്ടൊരു വലിയ കാടായിരുന്നു. മാനും കടുവയും വിഷപാമ്പും കീരിയും വേട്ടാക്കാരനുമെല്ലാം വാണകാട്. കാലം കടന്നുപോയി കാട് നാടായപ്പോഴും ആ വന്യത പലതരത്തിൽ അവശേഷിക്കുന്നുണ്ട്.

എൺപതുകളുടെ അവസാനവും തൊണ്ണൂറുകളുടെ ആദ്യവും നീണ്ടുനിൽക്കുന്ന പീരിയഡ് സെറ്റപ്പ് ആണ് ചിത്രത്തിന്. അധികാരത്തിലുള്ളവരുടെ ഉപകരണമായി കൂലിത്തല്ലും കൊലയും ചെയ്തിരുന്നവരാണ് ഇന്ദ്രൻസ്, മുരളി ഗോപി, അപ്പാനി ശരത്, ദേവ് മോഹൻ എന്നിവരുടെ സംഘം. ഇവർ പിന്നീട് ഗാനമേള ട്രൂപ്പ് തുടങ്ങി സ്വൈര്യ ജീവിതം നയിക്കുകയാണ്. എന്നാൽ മറ്റുള്ളവർക്കു വേണ്ടി ഇതൊക്കെ ചെയ്തുനടന്നിട്ട് ദാരിദ്ര്യം മാത്രമാണ് ബാക്കി. ഒരു ഘട്ടത്തിൽ, സംഘം മണി എന്ന ആര്യയുടെ തമിഴ് കഥാപാത്രത്തിന് അഭയം നൽകുകയാണ്. മണിയുടെ വരവിനുശേഷം ഇവരുടെ ജീവിതത്തിൽ ഉണ്ടാകുന്ന സംഭവങ്ങളാണ് ചിത്രത്തിൽ പ്രധാനമായും ഉള്ളത്.

ഭരണകൂടങ്ങൾ അവരുടെ ആവശ്യങ്ങൾക്കായി ഉപയോഗിച്ച് ഉപേക്ഷിക്കുന്ന മനുഷ്യരുടെ ജീവിതങ്ങൾ, അവരുടെ നിലനില്പ്, അതിജീവനം. സകലതിനെയും വളമാക്കുന്ന അധികാരവർഗമെന്ന കാട്! ശക്തമായ പ്രമേയത്തിനൊപ്പം എടുത്ത് പറയേണ്ടത് അഭിനേതാക്കളുടെ പ്രകടനങ്ങൾ ആണ്. ആര്യയെ മുഴുനീള കഥാപാത്രമായി അവതരിപ്പിക്കുമ്പോൾ തന്നെ സ്ക്രീൻ സ്പേസ് ഇന്ദ്രൻസ് നയിക്കുന്ന മുരളി ഗോപിക്കും സംഘത്തിനുമാണ്. പ്രതിനായകനായി എത്തുന്ന വിജയരാഘവൻ്റെ കഥാപാത്രവും ശാന്തി ബാലചന്ദ്രൻ, സുനിൽ, നിഖില വിമൽ, അച്യുത് കുമാർ, ശ്രീലത നമ്പൂതിരി തുടങ്ങിയവരുടെ വേഷങ്ങളും അവർ ഭംഗിയാക്കി. അജനീഷ് ലോകനാഥിന്റെ സംഗീതവും എസ്. യുവയുടെ ഛായാഗ്രഹണവും ആർ. ശക്തി ശരവണന്റെ ആക്ഷൻ രംഗങ്ങളും ചിത്രത്തിന് മുതൽക്കൂട്ടായി.

ഏത് നാട്ടിലും വേട്ടക്കാരനും വേട്ടയാടപ്പെടുന്നവനും ഒരേ മുഖമാണെന്ന് പറയും പോലെയാണ് വ്യത്യസ്ത സാഹചര്യങ്ങളിലുള്ള കഥാപാത്രങ്ങളെ അനന്തൻ കാട് അവതരിപ്പിക്കുന്നത്. അധികാരത്തിനൊപ്പം നിൽക്കുന്ന പൊലീസ് ഭീകരതയുടെ ചിത്രീകരണങ്ങൾ സിനിമയിൽ രണ്ടിടത്തു വരുന്നുണ്ട്. കാലഘട്ടത്തെ അടയാളപ്പെടുത്തുന്ന സെറ്റുകളും ആക്ഷൻ രംഗങ്ങളുമെല്ലാം മികവുറ്റതാണ്. മുരളി ഗോപിയുടെ മുൻ തിരക്കഥകൾക്ക് സമാനമായി യഥാർഥ സംഭവങ്ങൾ ചിത്രത്തിന് പ്രചോദനമായിട്ടുണ്ട്.

സിസ്റ്റത്തിൻ്റെ നിർദേശാനുസരണം സാധാരണക്കാരനുമേൽ നടത്തുന്ന പൊലീസ് അതിക്രമങ്ങൾ വിമർശനത്തിനു വിധേയമാക്കുകയാണ് സംവിധായകനും എഴുത്തുകാരനുമിവിടെ. തിരുവനന്തപുരത്തിൻ്റെ പശ്ചാത്തലത്തിൽ ഗുണ്ടാ സംഘങ്ങളുടെ കഥ മുമ്പും മലയാള സിനിമ പറഞ്ഞിട്ടുണ്ട്. എന്നാൽ ഭരണകൂടങ്ങൾ ഉപകരണങ്ങളാക്കുന്ന മനുഷ്യരുടെ കഥയാവുകയാണ് അനന്തൻ കാട്. ലീനിയർ സ്റ്റോറി ടെല്ലിങ് ആണ് ചിത്രത്തിന്. ബിഗ് ക്യാൻവാസിൽ ആക്ഷൻ രംഗങ്ങളും മാസും ഇമോഷനും ചേർന്ന് കണ്ടാസ്വദിക്കാൻ അനന്തൻ കാടിന് ടിക്കറ്റെടുക്കാം. സിനിമ കഴിഞ്ഞ് ഇറങ്ങുമ്പോൾ കഥയും കഥാപാത്രങ്ങളും പ്രേക്ഷകർക്കൊപ്പം വരുമെന്നുറപ്പ്.

പഴുതടച്ചൊരു ത്രില്ലർ ചിത്രം: പാർവതിയും വിജയരാഘവനും നിറഞ്ഞാടിയ 'പ്രഥമ ദൃഷ്ട്യാ കുറ്റക്കാർ'; റിവ്യൂ

Web Desk — Fri, 11 Sep 2026 17:43:59 +0530

പാർവതി തിരുവോത്ത്, വിജയരാഘാൻ എന്നിവരെ കേന്ദ്ര കഥാപാത്രങ്ങളാക്കി ഷഹദ് സംവിധാനം ചെയ്ത 'പ്രഥമ ദൃഷ്ട്യാ കുറ്റക്കാർ' തിരക്കഥയുടെ മികവിൽ ആദ്യാവസാനം പിടിച്ചിരുത്തുന്ന ഒരു ത്രില്ലർ അനുഭവമാണ്. 'പ്രകാശം പറക്കട്ടെ', 'അനുരാഗം' എന്നീ ചിത്രങ്ങൾക്ക് ശേഷം ഷഹദ് ഒരുക്കിയ ചിത്രം ത്രില്ലർ- പ്രൊസീജ്യറൽ ഡ്രാമ ഗണത്തിലുള്ളതാണ്. മൂന്നുമണിക്കൂറിനടുത്ത് ദൈർഘ്യമുള്ള സിനിമയിൽ നിന്ന് ഒരു നിമിഷം പോലും പ്രേക്ഷകരുടെ ശ്രദ്ധ തിരിയാതിരിക്കുന്നത് തിരക്കഥയ്ക്കൊപ്പം അഭിനേതാക്കളുടെയും മികവ്.

കോട്ടയത്തെ നാട്ടകം പൊലീസ് സ്റ്റേഷനിൽ നടക്കുന്ന ഒരു കസ്റ്റഡി കൊലപാതകമാണ് കഥാപശ്ചാത്തലം. സർവീസിലിരിക്കെ മരണപ്പെട്ട ഭർത്താവിൻ്റെ ആശ്രിത നിയമനത്തിലാണ് പാർവതി അവതരിപ്പിക്കുന്ന അലീന പൊലീസ് കോൺസ്റ്റബിൾ ആകുന്നത്. നാട്ടകം ഭാഗത്ത് നടക്കുന്ന കവർച്ചാ പരമ്പരയും പിന്നാലെയുണ്ടാകുന്ന കൊലപാതകവും അന്വേഷിക്കാനാണ് വിജയരാഘവൻ അവതരിപ്പിക്കുന്ന ഡിവൈഎസ്പി ഹാരിസ് മീരാൻ എത്തുന്നത്. സിദ്ധാർഥ് ഭരതൻ, മാത്യു തോമസ്, ഉണ്ണിമായ പ്രസാദ്, പാർവതി എന്നിവരുടെ കഥാപാത്രങ്ങൾക്ക് ഈ കസ്റ്റഡി മരണവുമായി ബന്ധപ്പെടുന്നതും അവർക്കെതിരെയുള്ള അന്വേഷണങ്ങളുമാണ് ചിത്രം പറയുന്നത്.

പി എസ് സുബ്രഹ്മണ്യവും വിജേഷ് തോട്ടിങ്ങലും ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. സീറ്റ് എഡ്ജ് ത്രില്ലിങ് അനുഭവത്തിനപ്പുറം പതിയെ മറനീക്കി വരുന്ന രഹസ്യങ്ങൾ പോലെയാണ് പ്രേക്ഷകർക്ക് ചിത്രത്തെ അനുഭവപ്പെടുക. പൊലീസ് കഥയ്ക്കപ്പുറം പൊലീസുകാരുടെ കഥയായി അവതരിപ്പിച്ചതുകൊണ്ടുതന്നെ ഓരോ കഥാപാത്രങ്ങളുടെയും വൈകാരിക തലം കൂടി ചേർന്നതാണ് പ്രഥമ ദൃഷ്ട്യാ കുറ്റക്കാർ.

മികച്ച സർവീസ് റെക്കോഡ് ഉള്ള ഹാരിസ് മീരാൻ ഈ കേസുമായി മുന്നോട്ട് പോകുമ്പോൾ എതിരെയുള്ളത് മറ്റ് നാല് പൊലീസുകാരാണ്. അവിടെയാണ് കുറ്റാന്വേഷണം മറ്റു വഴിത്തിരിവുകൾ എടുക്കുന്നത്. കസ്റ്റഡി മരണവും തുടർന്നുള്ള അന്വേഷണവുമാണ് പ്രധാന കഥാതന്തു എങ്കിൽ പോലും വിശദാംശങ്ങളോടെയുള്ള കഥപറച്ചിൽ സിനിമയെ മികച്ച ത്രില്ലിങ് അനുഭവമാക്കുന്നു.

വിനയ് ഫോർട്ട്, അസീസ് നെടുമങ്ങാട്, തമിഴ് താരം പാർഥിപൻ എന്നിവരും സിനിമയിൽ പ്രധാനപ്പെട്ട താരങ്ങളാണ്. പൊലീസ് കഥയാകുമ്പോഴും ആദ്യാവസാനം സീരിയസായി കഥപറഞ്ഞുപോകാതെ സാഹചര്യങ്ങളിൽ നിന്നുണ്ടാകുന്ന നർമ്മവും സിനിമയ്ക്ക് കരുത്താണ്. ഒരു താരത്തിൻ്റെയും ഒരു സംവിധായകൻ്റെയും കാമിയോ റോളുകൾ സിനിമയിലുള്ളതും പ്രേക്ഷകർക്ക് കൗതുകമുള്ള കാര്യമാകും. ഒരിടത്തും കഥയ്ക്ക് മുമ്പേ കടന്ന് ചിന്തിച്ചെത്താൻ പ്രേക്ഷകരെ കഥപറച്ചിൽ രീതി അനുവദിക്കുന്നില്ല. വ്യക്തമായ ഡീറ്റെയിലിങ്ങോടെ വിശദമായി കഥപറഞ്ഞു പോകുന്ന ചിത്രത്തിന് ക്യാമറ കൈകാര്യം ചെയ്തിരിക്കുന്നത് റോബി വർഗീസ് രാജാണ്. ചമൻ ചാക്കോ എഡിറ്റിങ് നിർവഹിച്ചിരിക്കുന്നു. മുജീബ് മജീദിൻ്റെ പശ്ചാത്തല സംഗീതം ത്രില്ലർ അനുഭത്തിനു കരുത്തായി.

സിനിമാഭിനയ ജീവിതത്തിൽ 20 വർഷം പിന്നിട്ട പാർവതിയുടെ ആദ്യ പൊലീസ് വേഷമാണ് ചിത്രത്തിലേത്. 11 ഐക്കൺസിൻ്റെ ബാനറിൽ അർജുൻ സെൽവയാണ് നിർമ്മാണം. മലയാള സിനിമാ നിർമ്മാണ രംഗത്തേയ്ക്ക് ചുവടെടുത്ത് വയ്ക്കുന്ന ഈ ബാനറിൻ്റെ ആദ്യ നിർമ്മാണ സംരഭമാണ് പ്രഥമ ദൃഷ്ട്യാ കുറ്റക്കാർ.

കുഞ്ചാക്കോ ബോബൻ്റെയും ലിജോമോളുടെയും അസാമാന്യ പ്രകടനം, ഇതൊരു സ്ലോബേൺ ത്രില്ലർ; 'ഉന്മാദം' റിവ്യൂ

Gowry Priya J — Fri, 31 Jul 2026 15:39:00 +0530

പൊലീസ് കഥകളും ഷാഹി കബീറും ചേർന്നാൽ അതൊരു ഡെഡ്ലി കോമ്പിനേഷനാണെന്ന് ഒരിക്കൽ കൂടി ഉറപ്പിക്കുകയാണ് ഇന്ന് തിയേറ്ററുകളിൽ എത്തിയ ഉന്മാദം. കുഞ്ചാക്കോ ബോബനെ നായകനാക്കി ഷാഹിയുടെ തിരക്കഥയിൽ കിരൺ ദാസ് സംവിധാനം ചെയ്ത ചിത്രം പൊലീസ് കഥയായി മാത്രം ഒതുങ്ങി നിൽക്കുന്നില്ല. മാസ് അല്ലാതെ മനുഷ്യരായ പൊലീസുകാരുടെ കഥ പറയുകയാണ് ഇവിടെയും. എന്നാൽ സൂപ്പർ നാച്ചുറൽ എലമെൻ്റുകളും മനുഷ്യമാനസികാവസ്ഥകളും കലർത്തിയ ഒരു സ്ലോബേൺ സൈക്കോളജിക്കൽ ത്രില്ലറാണ് ചിത്രം.

സിനിമയ്ക്കുള്ളിലെ സിനിമയായാണ് ഉന്മാദത്തെ അവതരിപ്പിച്ചിരിക്കുന്നത്. സിനിമാ മോഹിയായ പൊലീസുകാരനാണ് കുഞ്ചാക്കോ ബോബൻ അവതരിപ്പിക്കുന്ന ഷെല്ലി. മെഡിക്കൽ ലീവുകൾ എടുത്ത് തിരക്കഥയെഴുതുകയാണ് കഥയുടെ തുടക്കത്തിൽ അയാൾ. ലിജോ മോൾ അവതരിപ്പിക്കുന്ന സൗമ്യയെന്ന ഭാര്യയും രണ്ടു മക്കളും അടങ്ങുന്ന കുടുംബം. ഒരു സാഹചര്യത്തിൽ പണിഷ്മെൻ്റ് ട്രാൻസ്ഫർ ലഭിച്ച് കോങ്ങാട് പൊലീസ് സ്റ്റേഷനിൽ ഷെല്ലി എത്തുന്നതോടെയാണ് കഥവികസിക്കുന്നത്. ആ സ്റ്റേഷനു കീഴിൽ ഉണ്ടായ ഒരു കേസുമായി ബന്ധപ്പെട്ട് അവിടത്തെ പൊലീസുകാർക്കിടയിൽ ഒരു വിശ്വാസം നിലനിൽക്കുന്നുണ്ട്. സ്റ്റേഷനിൽ ഒരാളും തൊടാൻ ധൈര്യപ്പെടാത്ത ഒരു കേസ് ഫയൽ. അറിയാതെപോലും അതിൽ തൊട്ടാൽ സമാനമായ കേസുകൾ സ്റ്റേഷൻ പരിധിയിൽ ഉണ്ടാവുകയോ പൊലീസുകാർക്ക് സസ്പെൻഷൻ ലഭിക്കുകയോ കുറഞ്ഞത് യൂണിഫോമിൽ രക്തം പുരളുകയോ എങ്കിലും ചെയ്യുമെന്നാണ് അവിടെയുള്ളവർ വിശ്വസിക്കുന്നത്. അന്ധവിശ്വാസമെന്ന് കരുതിയ ഉദ്യോഗസ്ഥർക്ക് പോലും ആ ഫയലിനെ ചുറ്റിപ്പറ്റിയുള്ള കാര്യങ്ങളിൽ വിശ്വസിക്കേണ്ടിവരുന്നുവെന്ന് കഥകളിലൂടെ ഷല്ലി അറിയുകയാണ്. അതിനെ മുഖവിലയ്ക്കെടുക്കുന്നില്ലെങ്കിലും ഈ സംഭവത്തിൽ തൻ്റെ സിനിമയ്ക്ക് അനിയോജ്യമായ ഒരു തിരക്കഥയുണ്ടെന്ന് തിരിച്ചറിയുകയാണ് അയാൾ.

സിനിമ അതിൻ്റെ താളത്തിൽ പതിയെയാണ് പ്രേക്ഷകർക്ക് മുന്നിൽ ചുരുളഴിയുന്നത്. വലിയ സസ്പെൻസുകളോ ട്വിസ്റ്റുകളോ കൊണ്ടല്ല ഉന്മാദം പ്രേക്ഷകരെ പിടിച്ചിരുത്തുക. കിരൺ ദാസ് എന്ന മികവുറ്റ എഡിറ്ററും സംവിധായകനും സംയോജിച്ചതിൻ്റെ ഗുണമറിയുന്നത് ഇവിടെയാണ്. ഒരു കുറ്റാന്വേഷണ പൊലീസ് കഥയിൽ ഒതുക്കാതെ ഷെല്ലിയുടെയും സൗമ്യയുടെയും ഭാര്യാഭർതൃ ബന്ധം മുതൽ എല്ലാത്തിനും അടിത്തറ പാകി ഷെല്ലിയുടെ ഉന്മാദാവസ്ഥയെ ചുരുളഴിച്ചെടുക്കുകയാണ് ഇവിടെ. വിശ്വാസവും അന്തവിശ്വാസവും മനുഷ്യമാനസികാവസ്ഥയും സംഘർഷങ്ങളുമൊക്കെ ഒരുമിച്ച് കൈകാര്യം ചെയ്യുന്നതുകൊണ്ട് തന്നെ ഉന്മാദത്തെ സംബന്ധിച്ച് എഴുത്തോ എക്സിക്യൂഷനോ എളുപ്പമായ കാര്യമല്ല. എന്നാൽ ഷാഹി കബീറിൻ്റെ തിരക്കഥയിൽ കുഞ്ചാക്കോ ബോബൻ, ലിജോമോൾ എന്നീ പെർഫോമർമാരെ കിരൺ ദാസ് എന്ന 'ഫ്രഷ് ഐ'യിലൂടെ അനുഭവിച്ചറിയുക പ്രേക്ഷകരെ സംബന്ധിച്ച് ഏറ്റവും മികച്ച അനുഭവമാണ്.

ആശയപരമായി കോംപ്ലെക്സ് ആയ കഥാപാത്രങ്ങൾ, പല ലെയറുകളിൽ കഥാപാത്രങ്ങൾക്കൊപ്പം പ്രേക്ഷകനെ കൂടി അനുഭവിപ്പിക്കുന്ന പിരിമുറുക്കം. അതേസമയം റിയലിസ്റ്റിക്കായ കഥാപരിസരങ്ങളെ സിനിമാറ്റിക്കായി അവതരിപ്പിച്ചിരിക്കുന്നു. സുധീഷ്, വിശാഖ് നായർ, സാബു മോൻ, കോട്ടയം നസീർ, ജിജോയ് രാജഗോപാൽ, ഗോകുലൻ, അരുൺ ചെറുകാവിൽ, ഉണ്ണി ലാലു, ഷാജു ശ്രീധർ, കൃഷ്ണപ്രഭ, കിരൺ പീതാംബരൻ, സിദ്ദിഖ്, റെയ്ന രാധാകൃഷ്ണൻ, സിജോയ് വർഗീസ്, വിഘ്നേശ്വർ സുരേഷ് തുടങ്ങി മറ്റ് അഭിനേതാക്കളും തങ്ങളുടെ വേഷങ്ങൾ മികവുറ്റതാക്കി. അർജുൻ സേതുവിൻ്റെ വിഷ്വലുകളും മുജീബ് മജീദിൻ്റെ സംഗീതവും കഥാപരിസരത്തിനും കഥാപാത്രങ്ങൾക്കും ആഴം നൽകുന്നതാണ്. വ്യത്യസ്തമായ പൊലീസ് കഥമാത്രമല്ല തിയേറ്റർ വിട്ടിറങ്ങിയവരെ വിടാതെ പിന്തുടരുന്ന അനുഭവമാകും ഉന്മാദം.

ഒറ്റയാൻ വേട്ട, ഒപ്പം രവി ബസ്റൂർ സംഭവം; കാട്ടാളൻ റിവ്യൂ

Web Desk — Thu, 28 May 2026 14:46:05 +0530

'മോസ്റ്റ് വയലൻ്റ് മൂവി ഇൻ മലയാളം സിനിമ' എന്ന ടാഗ് ലൈനോടെ വന്ന് പാൻ- ഇന്ത്യൻ ബ്ലോക്ക്ബസ്റ്റർ ഹിറ്റടിച്ച മാർക്കോയ്ക്ക് ശേഷം ക്യൂബ്സ് എൻ്റർടെയിന്മെൻസ് നിർമ്മിക്കുന്ന ചിത്രം എന്ന ഐഡറ്റിറ്റിയോടെയാണ് 'കാട്ടാളൻ' തിയേറ്ററുകളിൽ എത്തിയത്. മാസും ആക്ഷനും നിറഞ്ഞ പീക്ക് തിയേറ്റർ അനുഭവത്തിന് രവി ബസ്റൂർ മ്യൂസിക്കിൻ്റെ കരുത്ത്. കാടും ആനക്കൊമ്പ് വേട്ടയുമാണ് കഥാപശ്ചാത്തലം. കാട്ട് കള്ളന്മാർക്കിടയിലെ അധികാര മോഹത്തിന്റെയും പ്രതികാരത്തിന്റെയും കഥയാണ് ഒറ്റ വാചകത്തിൽ കാട്ടാളൻ.

ആൻ്റണി വർഗീസ് പെപ്പെ, ദുഷാര വിജയൻ, സുനിൽ, കബീർ സിംഗ് എന്നിവരെ കേന്ദ്ര കഥാപാത്രങ്ങളാക്കി നവാഗതനായ പോൾ ജോർജ് ആണ് കാട്ടാളൻ സംവിധാനം ചെയ്തിരിക്കുന്നത്. മാസ് മസാല ആക്ഷൻ ഫ്ലിക്കിനു വേണ്ട ചേരുവകളെല്ലാം ചിത്രത്തിലുണ്ട്. ബ്ലാക്കോ വൈറ്റോ എന്നില്ലാതെ, നായകനെന്നോ വില്ലനെന്നോ വേർതിരിക്കാനാകാതെയുള്ള ഗ്രേ ഷേഡ് കഥാപാത്രങ്ങൾ. ആനക്കൊമ്പ് കാർട്ടൽ സ്വന്തമാക്കാൻ പണത്തിനും അധികാരത്തിനു വേണ്ടി നടത്തുന്ന പോരാട്ടങ്ങൾ. അതിനിടയിൽ ബലിയാടാകുന്ന ചില മനുഷ്യരും.

ആനക്കൊല്ലി എന്ന സാങ്കൽപ്പിക ഗ്രാമത്തിന്റെ പശ്ചാത്തലത്തിലാണ് കഥ നടക്കുന്നത്. ആനകളെ കൊന്ന് ആനക്കൊമ്പ് കടത്തുന്ന ഗ്രാമത്തെ സുനിൽ അവതരിപ്പിക്കുന്ന മാരിയുടെ ഗുണ്ടാസംഘമാണ് നിയന്ത്രിക്കുന്നത്. കബീർ ദുഹാൻ സിംഗ് അവതരിപ്പിക്കുന്ന എഡ്ഡി ഈ പ്രദേശം കൈക്കലാക്കി കാർട്ടൽ തൻ്റെ നിയന്ത്രണത്തിലാക്കാനുള്ള ശ്രമങ്ങളിൽ ആണ്. ആന്റണി വർഗീസ് അവതരിപ്പിക്കുന്ന ആൻ്റണി ഇവർക്കിടയിലേയ്ക്ക് വരുമ്പോൾ ആണ് കാട്ടാളൻ്റെ ലോകം വലുതാകുന്നത്.

ജഗദീഷിൻ്റെ വിവരണത്തോടെയാണ് കഥയും പരിസരങ്ങളും പ്രേക്ഷകർക്ക് മനസിലായി തുടങ്ങുന്നത്. ആൻ്റണിക്കൊപ്പം നിൽക്കുന്ന കഥാപാത്രമാണ് ജഗദീഷിൻ്റെ അലി. സാധാരണക്കാരനിൽനിന്ന് നേതാവിലേക്കുള്ള വളർച്ചയാണ് ആൻ്റണി എന്ന കഥാപാത്രത്തിലൂടെ പെപ്പെ സാധ്യമാക്കുന്നത്. അടിച്ചമർത്തപ്പെട്ട തൊഴിലാളിളെ അവർക്കുമുന്നിൽനിന്ന് നയിച്ച് കാർട്ടലിൻ്റെ അധിപതിയാവുകയാണ് ആൻ്റനി. സിനിമയുടെ രണ്ടാം പകുതിയിലാണ് ദുഷാര വിജയൻ എത്തുന്നത്. ഹനാൻ ഷാ, ഹിപ്സ്റ്റർ, അൽഫോൺസ് പുത്രൻ, സിദ്ധിഖ്, ആൻസൺ പോൾ, ഷോൺ ജോയ്, തുടങ്ങിവരും അവരുടെ വേഷങ്ങൾ ഭംഗിയാക്കി. പിന്നെ തിയേറ്ററിൽ കൈയ്യടി തീർക്കുന്ന കാമിയോയും.

സാധാരണ കണ്ടുവരുന്ന മാസ്-ഗ്യാങ്സ്റ്റർ ചിത്രങ്ങളുടെ ഫോർമുല തന്നെയാണ് കാട്ടാളനും. എന്നാൽ സ്റ്റൈലിഷ് ആയ ആക്ഷൻ രംഗങ്ങൾ ആണ് സിനിമയ്ക്ക് മികവ് നൽകുന്നത്. തൻ്റെ സ്ട്രോങ് ഏരിയയായ ആക്ഷൻ രംഗങ്ങൾ പതിവുപോലെ പെപ്പെ മികച്ചതാക്കി. പോൾ ജോർജ് എന്ന നവാഗത സംവിധായകന് കരുത്ത് നൽകുന്നത് സിനിമയുടെ ടോപ്പ് നോച്ച് ടെക്നിക്കൽ ബാക്കപ്പ് ആണ്. പ്രൊഡക്ഷൻ ക്വാളിറ്റിയിൽ വിട്ടുവീഴ്ചയില്ലാതെ മികച്ച തിയേറ്റർ അനുഭവം നൽകുന്നുണ്ട് കാട്ടാളൻ.

'കെജിഎഫ്' ഉൾപ്പെടെയുള്ള പാൻ-ഇന്ത്യൻ സിനിമകളിൽ തൻ്റെ പവർഫുൾ ബാക്ക്ഗ്രൗണ്ട് സ്കോറുകൾ കൊണ്ട് തരംഗം സൃഷ്ടിച്ച രവി ബസ്രൂർ മാർക്കോയ്ക്ക് ശേഷം വിണ്ടും മലയാളത്തിൽ. ആവർത്തന വിരസതയില്ലാത്ത യുണിക്കായ പശ്ചാത്തല സംഗീതം ഓരോ കഥാപാത്രങ്ങൾക്കും നൽകിയിട്ടുണ്ട് അദ്ദേഹം. ആക്ഷൻ സന്തോഷ്-കെച്ച ഖംഫാക്ഡീ ടീം ഒരുക്കിയ ആക്ഷൻ രംഗങ്ങൾ ആണ് കാട്ടാളൻ്റെ മറ്റൊരു ഹൈലൈറ്റ്. രണദിവെ-ചന്ദ്രു സെൽവരാജ്-സുദീപ് എളമൺ എന്നിവരുടെ ഛായാഗ്രഹണവും ഒപ്പം ഷമീർ മുഹമ്മദിൻ്റെ എഡിറ്റിങ്ങും ചേർന്ന് തീർത്ത വിഷ്വൽ ട്രീറ്റ്. കാടിൻ്റെ പശ്ചാത്തലത്തിൽ കാട്ടാളന്മാരുടെ കഥ പറഞ്ഞ ചിത്രം തീർത്തും ഒരു തിയേറ്റർ വാച്ചാണ്.

പ്രകടന മികവിൽ സംഗീത് പ്രതാപും ഷറഫുദ്ദീനും; 'ഇറ്റ്സ് എ മെഡിക്കൽ മിറാക്കിൾ' റിവ്യു

Web Desk — Fri, 18 Sep 2026 14:40:53 +0530

'നേരം' എന്ന സിനിമയിലൂടെ എത്തി 'പ്രേമ'ത്തിലൂടെ വലിയൊരു കരിയർ ബ്രേക്ക് ലഭിച്ച് ഇന്ന് മലയാള സിനിമയിലെ മുൻനിര നടന്മാരിൽ ഒരാളായി മാറിയ ആളാണ് ഷറഫുദ്ദീൻ. വെഡ്ഡിംഗ് വർക്കുകളിൽ എഡിറ്റിങ് ചെയ്ത് പിന്നീട് മലയാള സിനിമയിലെ എഡിറ്റിംഗ് ടേബിളിലേക്കും അവിടെന്ന് നടൻ എന്ന നിലയിലേക്കും എത്തി ഇന്ന് മലയാള സിനിമയിൽ ഒഴിച്ചു കൂടാനാകാത്ത താരമായി വളർന്ന ആളാണ് സംഗീത് പ്രതാപ്. ഈ രണ്ട് പ്രതിഭകളും ഒന്നിച്ചെത്തുന്ന ചിത്രം. ആതാണ് 'ഇറ്റ്സ് എ മെഡിക്കൽ മിറാക്കിൾ' എന്ന ചിത്രത്തിലേക്ക് മലയാളികളെ ആദ്യം അടുപ്പിച്ച പ്രധാനഘടകം. പിന്നീട് വന്ന ഓരോ പ്രൊമോഷൻ മെറ്റീരിയലുകളും പ്രേക്ഷകരിൽ ആവേശവും കൗതുകവും നിറഞ്ഞു. ഒടുവിൽ ശ്യാമിൻ ഗിരീഷ് സംവിധാനം ചെയ്ത ചിത്രം ഇന്ന് തിയറ്ററുകളിൽ എത്തിയപ്പോൾ ആ കാത്തിരിപ്പിന് ഫലം കണ്ടുവെന്നത് വ്യക്തമാണ്.

കോമഡിയിൽ അഗ്രഗണ്യരായ ഷറഫുദ്ദീനും സംഗീതും ഒന്നിച്ചെത്തുമ്പോൾ ഒരു കോമഡി പടമാണ് ഏവരും പ്രതീക്ഷിക്കുന്നതെങ്കിൽ അത് തെറ്റി. അധികം കോമഡികൾ ഇല്ലാതെ വളരെ സീരിയസ് ആയിട്ടുള്ള ത്രെഡ് ആണ് 'ഇറ്റ്സ് എ മെഡിക്കൽ മിറാക്കിൾ'. അത് പ്രേക്ഷകര്‍ക്കൊരു സസ്പെന്‍സ് ആണ്. റൂബൻ വർക്കി എന്ന കഥാപാത്രത്തിലൂടെയാണ് സിനിമയുടെ കഥ മുന്നോട്ട് പോകുന്നത്. സൂരജ്(കോൺസ്റ്റബിൾ സ്പെഷ്യൽ സ്ക്വാഡ്), സൂസൻ അന്ന റോയ്, ആൻസി, ചിത്ര(സ്പെഷ്യൽ ഇൻവെസ്റ്റിഗേഷൻ ഓഫീസർ), ആന്റണി തുടങ്ങിവരാണ് ചിത്രത്തിലെ മറ്റ് പ്രധാന കഥാപാത്രങ്ങൾ.

ആലപ്പുഴയിൽ വച്ച് റൂബന് ഒരപകടം സംഭവിക്കുന്നുണ്ട്. ഇതോടെ രണ്ട് വർഷത്തോളം കോമയിലായ റൂബൻ തിരികെ ജീവിതത്തിലേക്ക് എത്തുന്നത് ഒരു സൂപ്പർ പവറുമായിട്ടാണ്. തന്റെ ചുറ്റുമുള്ള എത്ര ചെറിയ ശബ്ദങ്ങളും കേൾക്കാൻ കഴിയും എന്നതാണ് അത്. ഇതിന് പിന്നാലെ എന്തൊക്കെയാണ് റൂബന്റെ ജീവിതത്തിൽ നടക്കുന്നതെന്നതാണ് ചിത്രത്തിന്റെ പ്രധാന പ്രമേയം. ഒരുവശത്ത് റൂബന് ലഭിച്ച അസാധാരണമായ കേൾവിശക്തിയെ കുറിച്ച് പറയുമ്പോൾ, മറുവശത്ത് പൊലീസിനെ വട്ടം കറപ്പിക്കുന്നൊരാളുടെ കഥയുമാണ് ആദ്യപകുതി മുന്നോട്ട് പോകുന്നത്. രണ്ടാം പകുതിയിൽ കഥ കൂടുതൽ ഇന്‍ട്രസ്റ്റിംഗ് ആകുകയും ക്ലൈമാക്സിലേക്ക് പോകുന്തോറും ആകാംഷ നിലനിർത്തുകയും ചെയ്യുന്നുണ്ട്. അതിൽ തിരക്കഥാകൃത്ത് കൂടിയായ നിലീൻ സാന്ദ്ര കയ്യടി അർഹിക്കുന്നുണ്ട്. സാധാരണയായി ഇത്തരമൊരു കോൺസെപ്റ്റിനെ കോമഡിയിലേക്ക് കൂടി കൊണ്ടുപോകാമെങ്കിലും, അതിനെ വളരെ സീരിയസായും ഗ്രൗണ്ടഡായുമാണ് നിലീൻ സമീപിച്ചിരിക്കുന്നത് എന്നത് ശ്രദ്ധേയമാണ്.

'ഇറ്റ്സ് എ മെഡിക്കൽ മിറാക്കിളി'ൽ എടുത്തുപറയേണ്ടത് അഭിനേതാക്കളുടെ പ്രകടനമാണ്. പ്രത്യേകിച്ച് സംഗീതിന്റേയും ഷറഫുദ്ദീന്റേയും. ഇരുവരും അവരുടെ പതിവ് ഇമേജിൽ നിന്ന് മാറിയുള്ള കഥാപാത്രങ്ങളിലാണ് എത്തിയിരിക്കുന്നത് എന്നത് ഏറെ ശ്രദ്ധേയമാണ്. റൂബനായി സംഗീതും സൂരജ് ആയി ഷറഫുദ്ദീനും ഗംഭീരപ്രകടനം കാഴ്ചവച്ചിട്ടുണ്ട്. അസാമാന്യമായ കേൾവിശക്തി ലഭിക്കുമ്പോൾ ഒരു മനുഷ്യന് എന്തെല്ലാം പ്രശ്നങ്ങളും അസ്വസ്ഥതകളും നേരിടേണ്ടി വരുമെന്നത് യാതൊരുവിധ ഏച്ചുകെട്ടലുകളും ഇല്ലാതെ അവതരിപ്പിച്ച്, ആ അതിജീവനം പ്രേക്ഷകർക്ക് മുന്നിൽ എത്തിക്കാൻ സംഗീതിന് സാധിച്ചുവെന്നത് ചെറുതല്ലാത്തൊരു കാര്യമാണ്. താനൊരു നല്ല പൊട്ടന്‍ഷ്യല്‍ ഉള്ള ആക്ടർ ആണെന്ന് സംഗീത് പ്രൂവ് ചെയ്തുവെന്ന് അര്‍ത്ഥം.

സൂസൻ അന്ന റോയിയായി അഖില ഭാർഗവനും മികച്ച പ്രകടനം കാഴ്ചവച്ചിട്ടുണ്ട്. കോട്ടയം നസീർ, ആനന്ദ് മന്മഥൻ, കിരൺ പീതാംബരൻ, പാർവ്വതി ആർ കൃഷ്ണ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ചെറിയൊരു ശബ്ദം പോലും കേൾക്കാൻ കഴിയുന്ന റൂബൻ നേരിടുന്ന വെല്ലുവിളികൾ സൗണ്ട് എഫക്ട്സിന്റെ സഹായത്തോട വളരെ മികച്ച രീതിയിൽ പ്രേക്ഷകർക്ക് മുന്നിൽ അണിയറപ്രവർത്തകർ എത്തിച്ചിട്ടുണ്ട്. സിനിമയുടെ നട്ടെല്ലും ഈ സൗണ്ട് എഫക്ടും സൗണ്ട് മിക്സിങ്ങും തന്നെയാണ്. അഖിൽ സേവ്യർ(ഛായാഗ്രഹണം), രാകേഷ് ചെറുമഠം(എഡിറ്റർ), മുജീബ് മജീദ്(സംഗീതം), നിക്സൺ ജോർജ്(സൗണ്ട് ഡിസൈൻ) എന്നിവരും വലിയ കയ്യടി അർഹിക്കുന്നുണ്ട്. ആകെമൊത്തതിൽ രസകരമായും കൗതുകത്തോടും ആകാംക്ഷയോടും കണ്ടിരിക്കാവുന്നൊരു എന്റർടെയ്നറാണ് 'ഇറ്റ്സ് എ മെഡിക്കൽ മിറാക്കിൾ'. ഒപ്പം മലയാള സിനിമയ്ക്ക് പുതിയൊരു പരീക്ഷണ ചിത്രവും.

വീണ്ടും 'സീന്‍ മാറ്റി' ചിദംബരം; 'ബാലന്‍' റിവ്യൂ

Web Desk — Fri, 19 Jun 2026 15:19:33 +0530

ആവേശം സംവിധായകന്‍റെ തിരക്കഥയില്‍ മഞ്ഞുമ്മല്‍ ബോയ്സ് സംവിധായകന്‍റെ അടുത്ത ചിത്രം. ബാലന്‍ എന്ന ചിത്രത്തിന് അതിന്‍റെ പ്രഖ്യാപന സമയം മുതല്‍ പ്രേക്ഷകശ്രദ്ധ ലഭിക്കാന്‍ മറ്റൊരു കാരണം വേണ്ടിയിരുന്നില്ല. മഞ്ഞുമ്മല്‍ ബോയ്സ് പോലെ മലയാള സിനിമയുടെ സീന്‍ തന്നെ മാറ്റിയ ഒരു ചിത്രത്തിന് ശേഷം ചിദംബരം ചെയ്യുന്ന സിനിമയേത് എന്ന സിനിമാപ്രേമികളുടെയും കൗതുകകരമായ കാത്തിരിപ്പിനൊടുവില്‍ പ്രഖ്യാപിക്കപ്പെട്ട സര്‍പ്രൈസ് പ്രോജക്റ്റ് ആയിരുന്നു ഇത്. ഛായാഗ്രാഹകന്‍, സംഗീത സംവിധായകന്‍, പ്രൊഡക്ഷന്‍ ഡിസൈനര്‍, എഡിറ്റര്‍ തുടങ്ങി സാങ്കേതിക മേഖലകളില്‍ മഞ്ഞുമ്മലിലെ അതേ ടീമിനെ നിലനിര്‍ത്തിയിരിക്കുന്ന ചിദംബരം ഇക്കുറി പക്ഷേ കേന്ദ്ര കഥാപാത്രങ്ങളാക്കിയിരിക്കുന്നത് പുതുമുഖങ്ങളെയാണ്. മഞ്ഞുമ്മലിലേതുപോലെ തന്നെ ഗണപതിയാണ് കാസ്റ്റിംഗ് ഡയറക്ടര്‍. ജാന്‍.എ.മന്നും മഞ്ഞുമ്മല്‍ ബോയ്സും പോലെ ഇത്തവണയും മനുഷ്യ വികാരങ്ങളിലേക്കാണ് ചിദംബരം ഫോക്കസ് ചെയ്യുന്നത്. അത് മലയാളം ഇന്നുവരെ കണ്ടിട്ടില്ലാത്ത, വേറിട്ടൊരു റൂട്ടിലൂടെയാണ് എന്ന് മാത്രം.

പല ദേശങ്ങളില്‍ പല പേരുകളില്‍ സ്വയം പരിചയപ്പെടുത്തുന്ന ഒരു അമ്മയും അവരുടെ കുഞ്ഞു മകനും. ആരെന്നും എന്തെന്നും ചോദിക്കുന്നവരോട് ഓരോ ഇടങ്ങളില്‍ ഓരോ കഥയും അമ്മ പറയുന്നുണ്ട്. അമ്മ പരിശീലിപ്പിക്കുന്നതുപോലെ മകനും. പലപ്പോഴും തൊട്ടുമുന്‍പ് കണ്ട ആരുടെയെങ്കിലും ഐഡന്‍റിറ്റി സ്വന്തമാക്കിയാണ് ആ സ്ത്രീ മുന്നോട്ട് പോകുന്നത്. പലവിധ തൊഴിലുകള്‍ ചെയ്ത്, എവിടെയും ഉറയ്ക്കാതെ ഒരു പായ്വഞ്ചി കണക്കെ മുന്നോട്ടുപോകുന്ന അവരുടെ കഥയാണ് ബാലന്‍. കേന്ദ്ര കഥാപാത്രങ്ങളെ നമ്മുടെ മുന്നില്‍ അവതരിപ്പിച്ച്, എന്നാല്‍ അവരുടെ ഭൂതകാലത്തെക്കുറിച്ച് അധികം പറയാതെ, വ്യാഖ്യാന സാധ്യതകള്‍ തുറന്നിട്ടുകൊണ്ടാണ് ചിദംബരം ബാലന്‍റെയും അവന്‍റെ അമ്മയുടെയും പിന്നാലെ പോകുന്നത്. ഭൂതകാലത്തില്‍ നിന്നും അകലേയ്ക്ക് ഓടിക്കൊണ്ടിരിക്കുന്ന അവരുടെ ജീവിതത്തില്‍ അപ്രതീക്ഷിതമായി ചില സാഹചര്യങ്ങള്‍ വന്നുചേരുകയാണ്. അത് ആ അമ്മയുടെയും മകന്‍റെയും മുന്നോട്ടുള്ള ജീവിതത്തിന്റെ ദിശ നിശ്ചയിക്കുന്നതാണ് ബാലന്‍ കാണിച്ചുതരുന്നത്.

ജാന്‍.എ.മന്‍, മഞ്ഞുമ്മല്‍ ബോയ്സ് എന്നിവയേക്കാളൊക്കെ കുറച്ചുകൂടി അടിസ്ഥാനപരമായ വികാരങ്ങളാണ് ബാലനിലൂടെ ചിദംബരം പങ്കുവെക്കുന്നത്. അമ്മ- മകന്‍ ബന്ധത്തിലൂന്നി ഒരു മനുഷ്യന്‍റെ വളര്‍ച്ചാ ഘട്ടത്തില്‍ സാഹചര്യങ്ങള്‍ എങ്ങനെയൊക്കെ സ്വാധീനം ചെലുത്തുന്നു എന്നതിന്‍റെ ആവിഷ്കാരം കൂടിയാണ് ചിത്രം. വര്‍ക്കിംഗ് ക്ലാസ് ലൈഫ് സിനിമകളില്‍ എപ്പോഴും നന്നായി അടയാളപ്പെടുത്താറുള്ള ചിദംബരം ഇക്കുറി കുറേക്കൂടി താഴേത്തട്ടിലുള്ള, സമൂഹം കൃത്യമായ അകലം പാലിക്കാന്‍ എപ്പോഴും ശ്രദ്ധിക്കുന്ന മനുഷ്യരെയാണ് അവതരിപ്പിച്ചിരിക്കുന്നത്. കണ്ടിരിക്കെ കാണികളുടെ ഏറ്റവും സെന്‍സിറ്റീവ് ആയ ഇമോഷനെ തൊടുന്ന ചിത്രം എന്താവും അടുത്ത നിമിഷത്തില്‍ ഈ അമ്മയെയും മകനെയും കാത്തിരിക്കുന്നതെന്ന ഭയം കലര്‍ന്ന ത്രില്ലും സൃഷ്ടിക്കുന്നുണ്ട്. അങ്ങനെ ഇമോഷനും ത്രില്ലും അസാധാരണമാംവിധം കലര്‍ത്തിയുള്ളതാണ് ജിത്തു മാധവന്‍റെ തിരക്കഥ.

ആദ്യം കൈയടി അര്‍ഹിക്കുന്ന ഘടകം ചിത്രത്തിന്‍റെ കാസ്റ്റിംഗ് ആണ്. ട്രെയ്‍ലര്‍ വന്നപ്പോഴേ പ്രേക്ഷകരുടെ കണ്ണില്‍ രജിസ്റ്റര്‍ ചെയ്ത അമ്മയും മകനുമായിരുന്നു ഇത്. ബാലനായി ആദിശേഷനും അമ്മയായി ഫര്‍സാന പാലത്തിങ്കലും ഒപ്പം ബാലന്‍റെ കൗമാരഘട്ടം അവതരിപ്പിക്കുന്ന മുഹമ്മദ് സിനാനും. ആദ്യ കാഴ്ചയില്‍ത്തന്നെ ബോധ്യപ്പെടുത്തുക മാത്രമല്ല പ്രകടനത്തിലൂടെയും ഞെട്ടിച്ചിട്ടുണ്ട് ഇവര്‍ മൂന്ന് പേരും. ആഴവും ഭാരവുമുള്ള കോംപ്ലെക്സ് ഇമോഷനുകളിലൂടെ കടന്നുപോകുന്ന ചിത്രത്തെ ഈ മൂന്ന് പുതുമുഖങ്ങളും ചേര്‍ന്നാണ് ഷോള്‍ഡര്‍ ചെയിതിരിക്കുന്നത് എന്നത് അത്ഭുതകരമാണ്. ഇവര്‍ക്കൊപ്പം മറ്റ് കാസ്റ്റിംഗും കൗതുകകരവും കൃത്യമായി ലക്ഷ്യത്തില്‍ എത്തിയവയുമാണ്. ലാല്‍ ജൂനിയറിന്‍റെയും ഗിരീഷ് എഡിയുടെയും പൊലീസുകാര്‍, ബീന ആന്‍റണിയുടെ മുന്‍ തടവുകാരി, ടൊവിനോയുടെ കള്ളന്‍ എന്നിവര്‍ക്കൊപ്പം ചിത്രത്തിലെ ഏറ്റവും രസകരമായ ഭാഗത്തില്‍ വന്നുപോകുന്ന ഒരു മുത്തശ്ശി കഥാപാത്രവും പ്രകടനത്തില്‍ ഞെട്ടിക്കുന്നുണ്ട്.

ഭാഷയുടെ അതിര്‍വരമ്പുകള്‍ക്ക് പുറത്ത് ഏതൊരു സിനിമാപ്രേമിക്കും കണക്റ്റ് ചെയ്യാന്‍ കഴിയുന്ന സിനിമയ്ക്കായി ഒരു ഇന്‍റര്‍നാഷണല്‍ വിഷ്വല്‍ ലാംഗ്വേജ് ആണ് ഷൈജു ഖാലിദ് ഒരുക്കിയിട്ടുള്ളത്. വയനാടിനെയും മറ്റും ഇതുവരെ ഒരു സിനിമയിലും കണ്ടിട്ടില്ലാത്ത തരത്തില്‍ അവതരിപ്പിച്ചിട്ടുണ്ട് ഷൈജു. ഡിജിറ്റലില്‍ ഇരുട്ടിനെ ഏറ്റവും നന്നായി ചിത്രീകരിച്ചിട്ടുള്ള അദ്ദേഹം ഇക്കുറി പകല്‍ ദൃശ്യങ്ങളിലാണ് വിസ്മയിപ്പിച്ചിരിക്കുന്നത്. ക്യാമറയുടെ സാന്നിധ്യം ഒരിക്കലും അറിയിക്കാതെ, അതേസമയം കഥ ആവശ്യപ്പെടുന്ന നിഗൂഢതയുടെ സൗന്ദര്യം ആവോളം പകരുന്നതാണ് ഷൈജുവിന്‍റെ ക്യാമറ. മഞ്ഞുമ്മല്‍ പോലെ തന്നെ ബാലനിലും അതിന്‍റെ അനുഭവത്തെ ലിഫ്റ്റ് ചെയ്യുന്ന ഒരു പ്രധാന ഘടകം സുഷിന്‍ ശ്യാമിന്‍റെ സംഗീതമാണ്. മൂന്ന് ഗാനങ്ങളാണ് ചിത്രത്തില്‍. താക്കോല്‍ എന്ന ഗാനമാണ് ബാലനെക്കുറിച്ച് ഓര്‍ക്കുമ്പോള്‍ ഇനിയങ്ങോട്ട് കാണികളുടെ മനസിലേക്ക് ആദ്യം എത്തുക. പശ്ചാത്തല സംഗീതവും എടുത്ത് പറയണം. കോംപ്ലെക്സ് ആയ മൂഡ് സെറ്റിംഗും അതിന്‍റെ ട്രാവലും ആവശ്യമായ ചിത്രത്തില്‍ സുഷിന്‍റെ പശ്ചാത്തല സംഗീതം ചില്ലറയൊന്നുമല്ല ചിദംബരത്തെ സഹായിച്ചിരിക്കുന്നത്.

മറുഭാഷാ പ്രേക്ഷകരുടെയും കൈയടി നേടുന്ന മലയാള സിനിമയുടെ ഈ നവകാലത്ത് ഏറ്റവും എണ്ണപ്പെടുന്ന ചിത്രങ്ങളുടെ കൂട്ടത്തിലേക്കാണ് ബാലനും ഇടം പിടിക്കുന്നത്. ചിദംബരത്തിന്‍റെ കണ്‍വിക്ഷന്‍ ഫിലിംമേക്കര്‍ എന്ന നിലയിലുള്ള അയാളുടെ വളര്‍ച്ചയെ കൃത്യമായി അടയാളപ്പെടുത്തുന്നുണ്ട്. ദേശാന്തരങ്ങള്‍ അനായാസം സഞ്ചരിക്കാനുള്ള നീക്കിയിരുപ്പ് ഉള്ള ചിത്രമാണ് ബാലന്‍. ഇനി എത്ര സിനിമകള്‍ ചെയ്താലും ചിദംബരത്തിന്‍റെ ഏറ്റവും മികച്ച സിനിമകളിലൊന്നായും വരും കാലങ്ങളില്‍ ബാലന്‍ അവിടെ ഉണ്ടാവും.

പവർഫുൾ ആക്ഷൻ, പവർഫുൾ പെർഫോമൻസ്; ഹീസ്റ്റ് ത്രില്ലറിൽ ഒതുങ്ങാത്ത 'ഐ നോബഡി'; റിവ്യൂ

Web Desk — Thu, 09 Jul 2026 15:56:05 +0530

പൃഥ്വിരാജ് സുകുമാരൻ, പാർവതി തിരുവോത്ത് എന്നിവരെ കേന്ദ്ര കഥാപാത്രങ്ങളാക്കി നിസാം ബഷീർ സംവിധാനം ചെയ്ത സോഷ്യോ പൊളിറ്റിക്കൽ ത്രില്ലർ ചിത്രമാണ് ഐ നോബഡി. റോബിൻഹുഡിനും സപ്തമശ്രീ തസ്കരയ്ക്കും ശേഷം മറ്റൊരു പൃഥ്വി ഹീസ്റ്റ് ത്രില്ലർ പ്രതീക്ഷിച്ചു ചെന്നാൽ അതിലും വലുത് കരുതി വച്ചിട്ടുണ്ട് സിനിമ. തിരുവനന്തപുരമാണ് കഥാപശ്ചാത്തലം. പൃഥ്വിരാജ് അവതരിപ്പിക്കുന്ന രാജീവൻ ഒരു സർക്കാർ ഉദ്യോഗസ്ഥനാണ്. പാർവതി അവതരിപ്പിക്കുന്ന മീരയും രണ്ട് പെണ്മക്കളും അടങ്ങുന്നതാണ് കുടുംബം. ഒരു ബാങ്ക് കവർച്ചയിൽ രാജീവൻ അബദ്ധത്തിൽ സാക്ഷിയാകുന്നതും തുടർന്ന് അയാളുടെ വ്യക്തിജീവിതത്തിൽ ഉണ്ടാകുന്ന പ്രശ്നങ്ങളുമാണ് ചിത്രം.

ബാങ്ക് കവർച്ചയ്ക്ക് സാക്ഷിയായ രാജീവനെ പണവുമായി കടന്നുകളയുന്നതിനിടയിൽ കവർച്ചക്കാർ ബന്ധിയാക്കി കൊണ്ടുപോവുകയാണ്. എന്നാൽ ആ സംഭവത്തോടെ അയാളുടെ ജീവിതം കീഴ്മേൽ മറിയുന്നു. കൊള്ളയ്ക്ക് പിന്നിൽ രാജീവനുമുണ്ടോ എന്ന സംശയങ്ങൾക്ക് പിന്നാലെ അയാൾ സമൂഹത്തിനു മുന്നിൽ ക്രൂശിക്കപ്പെടുകയാണ്. ഒരു സാധാരണക്കാരനെ സിസ്റ്റം 'നോബഡി' എന്ന പരിഗണന മാത്രം നൽകി അവഗണിക്കുമ്പോൾ അയാൾ നടത്തുന്ന പ്രതിരോധമായി ഒറ്റവാചകത്തിൽ ചിത്രത്തെ കാണാം.

ആദ്യ രംഗം മുതൽ ആദ്യ പകുതി അവസാനിക്കും വരെ കണ്ണിമ ചിമ്മാതെ പിടിച്ചിരുത്തുകയാണ് പ്രേക്ഷകരെ ചിത്രം. അത്രമാത്രം ഡീറ്റെയിലിങ്ങോടെ ചടുലമായ ദൃശ്യഭാഷയിൽ രാജീവൻ്റെയും മീരയുടെയും കഥ പറയും. സമൂഹമാധ്യമങ്ങളുടെ തെറ്റായ സ്വാധീനവും ആൾക്കൂട്ടത്തിൻ്റെ മനശാസ്ത്രവും ഒരു പടികൂടി കടന്ന് അതിശയോക്തിപരമായി കൈകാര്യം ചെയ്യാനുള്ള സിനിമാറ്റിക് ലിബേർട്ടി ഐ നോബഡി എടുക്കുന്നുണ്ട്. സസ്പെൻസ് നിറഞ്ഞ മുഹൂർത്തങ്ങൾക്കൊപ്പം ഇവരുടെ വ്യക്തി ജീവിതത്തിലെ വൈകാരിക നിമിഷങ്ങളെ കുടി ചേർത്താണ് ഐ നോബഡിയെ എഴുത്തുകാരൻ ഹൃദയസ്പർശിയാക്കുന്നത്. പ്രധാന താരങ്ങളായ പൃഥ്വിരാജിൻ്റെയും പാർവതി തിരുവോത്തിൻ്റെയും ഓൺസ്ക്രീൻ കെമിസ്ട്രിയും അഭിനയമുഹൂർത്തങ്ങളുമാണ് ആദ്യം എടുത്തു പറയേണ്ടത്. മക്കളായി അഭിനയിച്ച നക്ഷത്രയും ആര്യ ഇസയും അവരുടെ റോളുകളെ ഭംഗിയാക്കി. എഡിറ്റർ റമീസ് എംബി തീരുമാനിച്ച വേഗത്തിനൊപ്പം ജേക്സ് ബിജോയുടെ സംഗീതവും.

രണ്ടാം പകുതിയിലേയ്ക്ക് കടക്കുമ്പോൾ കൂടുതൽ ലെയറുകൾ കൈവരിക്കുകയാണ് ചിത്രം. ഹൈസ്റ്റ് സ്റ്റോറിയായി തുടങ്ങി സോഷ്യോ പൊളിറ്റിക്കൽ ഴോണറിലേയ്ക്ക് മനോഹരമായി സിനിമ നീങ്ങുന്നത് ഇവിടെവച്ചാണ്. ഉദ്വേഗഭരിതമായ മുഹൂർത്തങ്ങളിലൂടെയാണ് കഥയുടനീളം സഞ്ചരിക്കുന്നത്. കേവലമൊരു ഹൈസ്റ്റ് ചിത്രത്തിനപ്പുറം രാജീവനു ചുറ്റുമുള്ള സമൂഹത്തിൻ്റെ കാഴ്ചപ്പാടുകളിലെ വ്യത്യാസത്തെയും എല്ലാത്തിനെയും നിയന്ത്രിക്കാൻ കെല്പുള്ള അജണ്ടകളെയും കുറിച്ചൊക്കെ പരന്നു ചിന്തിക്കുകയാണ് ചിത്രം.

സാങ്കേതിക വശങ്ങളിൽ ഏറെ മുന്നിട്ടുനിൽക്കുകയാണ് ചിത്രം. യാനിക് ബെൻ, കലൈ കിങ്‌സൺ, അമിത് ജോളി ബാസ്റ്റിൻ എന്നിവർ ഒരുക്കിയ ഹൈ വോൾടേജ് ആക്ഷൻ രംഗങ്ങളും കാർ ചേസ് സീനുകളുമായി ത്രില്ലിങ് മൊമെൻ്റുകൾ ഉടനീളം ഐ നോബഡി സമ്മാനിക്കും. സ്റ്റൈലിഷായ ആക്ഷൻ രംഗങ്ങളാൽ സമ്പന്നമായിരിക്കുമ്പോൾ തന്നെ ഒന്നിനൊന്ന് വ്യത്യസ്തമാണ് കൊറിയോഗ്രഫി. ദിനേശ് പുരുഷോത്തമന്റെ ഛായാഗ്രഹണം ഒരു ഹീസ്റ്റ്-ആക്ഷൻ ചിത്രത്തിന് വേണ്ട ദൃശ്യഭാഷ പകർത്തിയിട്ടുണ്ട്.

പൃഥ്വിരാജ് പ്രൊഡക്ഷൻസിൻ്റെയും ഇ4 എസ്ക്പീരിമെൻ്ഋസിൻ്റെയും ബാനറിൽ സുപ്രിയ മേനോനും മുകേഷ് ആർ മേത്തയും സി വി സാരഥിയും ചേർന്നാണ് നിർമ്മാണം. എന്നു നിൻ്റെ മൊയ്ദീൻ, കൂടെ തുടങ്ങിയ ചിത്രങ്ങൾക്ക് ശേഷം പാർവതിയും പൃഥ്വിരാജും വീണ്ടുമൊന്നിക്കുകയാണ് ഐ നോബഡിയിൽ. അശോകൻ, ബീന ആർ ചന്ദ്രൻ, ഹക്കീം ഷാ, മധുപാൽ, ശങ്കർ രാമകൃഷ്ണൻ, നക്ഷത്ര, ഐറാ, നിഷാന്ത് സാഗർ തുടങ്ങിയ താരങ്ങൾ തങ്ങളുടെ കഥാപാത്രങ്ങളെ മികവുറ്റതാക്കി. നിരൂപക-പ്രേക്ഷക പ്രശംസ നേടിയ സൂപ്പർ ഹിറ്റ് മമ്മൂട്ടി ചിത്രമായ 'റോഷാക്ക്’, ആസിഫ് അലിയുടെ ‘കെട്ട്യോളാണെന്റെ മാലാള’ എന്നീ സിനിമകൾക്കു ശേഷം നിസാം ബഷീർ സംവിധാനം ചെയ്ത ചിത്രം, അഡ്വെഞ്ചേഴ്സ് ഓഫ് ഓമനക്കുട്ടൻ, ഇബിലീസ്, റോഷാക്ക് എന്നിവയ്ക്ക് ശേഷം സമീർ അബ്ദുളിൻ്റെ എഴുത്ത്, ഹിറ്റ് മേക്കർ ജേക്സ് ബിജോയുടെ സംഗീതം ഇതൊക്കെ പ്രതീക്ഷിച്ചു തന്നെ ഐ നോബഡിക്ക് ടിക്കറ്റെടുക്കാം.

Toxic Review: ഇത് ടോട്ടൽ യഷ് പാക്കേജ്; 'മുതിർന്നവർക്ക്' വേണ്ടി മാത്രമുള്ള ഒരു ഗീതു മോഹൻദാസ് ചിത്രം

Web Desk — Wed, 26 Aug 2026 15:38:31 +0530

എന്ത് പറഞ്ഞിട്ടാവും ഗീതു മോഹൻദാസ് എന്ന ഡയറക്ടർ യഷ് എന്ന സുപ്രീം സ്റ്റാറിനെ കൺവിൻസ് ചെയ്തിട്ടുണ്ടാകുക— ടോക്സിക് എന്ന ചിത്രം പ്രഖ്യാപിക്കപ്പെട്ടത് മുതൽ സോഷ്യൽ മീഡിയയിൽ ഒറ്റയ്ക്കും തെറ്റയ്ക്കുമായി ധാരാളം കേട്ടിട്ടുള്ള ചോദ്യമാണിത്. ആകെത്തുകയിൽ മൂന്ന് മണിക്കൂറിനപ്പുറം പോയി ഇടയ്ക്കൊക്കെ പ്രേക്ഷകരുടെ ക്ഷമ പരീക്ഷിക്കുമെങ്കിലും, ആദ്യപകുതി കൊണ്ട് തന്നെ ഈ ചോദ്യത്തിന് ഉത്തരം തരാൻ ഗീതു മോഹൻദാസ് എന്ന ഡയറക്ടർക്ക് കഴിഞ്ഞിട്ടുണ്ട്. അടി, ഇടി, വെടി, ചൂട്— എന്ന് വേണ്ട എന്താണോ ഒരു യഷ് ചിത്രത്തിന് വേണ്ട ചേരുവകൾ, അതെല്ലാം അണാ പൈ കുറയാതെ ഡെലിവർ ചെയ്യാൻ ഗീതു ശ്രദ്ധിച്ചിട്ടുണ്ട് എന്ന് പറഞ്ഞാൽ ആദ്യപകുതി കഴിഞ്ഞു.

ആക്ഷൻ, വയലൻസ് എന്നിവയുടെ കാര്യം വരുമ്പോൾ, ക്യാമറക്ക് പിന്നിൽ ഒരു സ്ത്രീയാണ് എന്നതിന്റെ ഒരു സൗജന്യവും ഒരു സമയത്തും ടോക്സിക് തരുന്നില്ല, അല്ലെങ്കിലും അങ്ങനെ ഒരു എടുത്ത് പറച്ചിൽ ആവശ്യമില്ലാത്ത കാലത്താണ് ഗീതു മോഹൻദാസ് ഈ സിനിമ എടുക്കുന്നതും. കഥയും കഥാപരിസരങ്ങളും ഏറെ കണ്ടതാണെങ്കിലും, ലാർജർ ദാൻ ലൈഫ് ഫിഗറുള്ള യഷിനെ പോലെ ഒരു താരത്തെ കയ്യിൽ കിട്ടിയാൽ അത് വെച്ച് എന്തൊക്കെ ചെയ്യാം എന്നൊരു ടെക്സ്റ്റ് ബുക്കാണ് ടോക്സികിന്റെ ആദ്യപകുതി. ഒപ്പം ലേഡി സൂപ്പർ സ്റ്റാറെന്ന് പേരുള്ള നയൻതാരയ്ക്ക് പേരിനൊത്ത ഒരു ട്രിബ്യൂട്ട് കൂടിയാണ് ഗീതു എടുത്ത് വെച്ചിരിക്കുന്നത്. കാരക്ടർ ആർക്കിലും പ്ലേസ്മെന്റിലും ആർക്കും പിന്നിലല്ലാതെ നിന്ന ഗംഗയെ, നയൻതാര സ്വീകരിച്ചത് വെറുതെയല്ല.

സിനിമയ്ക്ക് 18 പ്ലസ് സെൻസർ സർട്ടിഫിക്കറ്റാണ് ലഭിച്ചിരിക്കുന്നത്, ടോക്സിക് - എ ഫെയറി ടെയ്ൽ ഫോർ ഗ്രോൺ അപ് എന്നാണ് സിനിമയുടെ പേര് തന്നെയും. അതുകൊണ്ട് തന്നെ വയലൻസും മസാലയും കൂടിപ്പോയി എന്നതൊരു പരാതി പൊതുവെ ഉയർന്നുവരാൻ സാധ്യതയില്ല.

ഹൈ വോൾട്ടേജ് ആദ്യപകുതിയും മികച്ച രണ്ടാം പകുതിയും ചേർന്ന് ആകെ മൊത്തത്തിൽ യഷിന്റെ ഒരു ആക്ഷൻ പാക്കേജ് തന്നെയാണ് സിനിമ. സ്ക്രീൻ പ്രസൻസ് ആവട്ടെ, ആക്ഷൻ രംഗങ്ങളാവട്ടെ, ടെക്നിക്കൽ ക്വാളിറ്റിയാകട്ടെ, ടോക്സിക് ഗംഭീരമാക്കിയിട്ടുണ്ട്. യഷിനെ റോക്കി ഭായ്ക്ക് ഒപ്പം തന്നെ നിർത്താനായി രാജീവ് രവിയുടെ ക്യാമറയും രവി ബസ്റുറിന്റെ സ്കോറും അറിഞ്ഞ് പണിയെടുത്തിട്ടുണ്ടെങ്കിലും രണ്ടാം പകുതി പലപ്പോഴും രൺബീർ കപൂറിന്റെ അനിമലിനെ പലയിടത്തും ഓർമിപ്പിക്കുന്നുണ്ട് ടോക്സിക്. പ്രശ്നബാധിതമായ കുട്ടിക്കാലവും തുടർന്നുള്ള അതിജീവനവും കഴിഞ്ഞ് എസ്റ്റാബ്ലിഷ് ചെയ്യപ്പെട്ട രായയുടെ കഥാപാത്രം യഷ് എന്ന സൂപ്പർതാരത്തിന് എന്നും ഓർമ്മിക്കപ്പെടാനുള്ളതാണ്. യഷ് ആരാധകർക്കും ചിത്രം സമ്മാനിക്കുന്നത്.

യഷിനും നയൻതാരയ്ക്കും പുറമേ കിയാര അദ്വാനി, ഹുമ ഖുറേഷി, താര സുതാരിയ, രുക്മിണി വസന്ത്, സുദേവ് നായർ തുടങ്ങിയവും പ്രധാന വേഷങ്ങളിൽ തന്നെയുണ്ട്. ഇന്ത്യൻ ഗ്യാങ്സ്റ്റർ - ആക്ഷൻ മോഡിൽ വരുന്ന ടോക്സിക് - എ ഫെയറി ടെയിൽ ഫോർ ഗ്രോൺ അപ്സ് വെങ്കട്ട് കെ. നാരായണയും യഷും ചേർന്നാണ് നിർമ്മിച്ചിരിക്കുന്നത്. യഷും ഗീതു മോഹൻദാസും ചേർന്നാണ് ചിത്രത്തിന്റെ തിരക്കഥ.