Asianet News Malayalam

നെറ്റ്‌വർക്കില്ലെങ്കിലും പേയ്മെന്റ് നടത്താം! യു പി ഐ ടാപ്പ് ആൻഡ് പേയുമായി ആർബിഐ; പ്രധാന ഫീച്ചറുകൾ അറിയാം

Sangeetha KS — Sat, 12 Sep 2026 12:38:36 +0530

ഫോണിൽ ഇന്റർനെറ്റ് കണക്ഷൻ ഇല്ലെങ്കിലും യു പി ഐ വഴി പണമടയ്ക്കാൻ സഹായിക്കുന്ന പുതിയ സംവിധാനം അവതരിപ്പിച്ച് റിസർവ് ബാങ്ക് ഓഫ് ഇന്ത്യ. 'യു പി ഐ ടാപ്പ് ആൻഡ് പേ' (UPI Tap and Pay), എ.ഐ അധിഷ്ഠിത കസ്റ്റമർ സപ്പോർട്ട് പ്ലാറ്റ്‌ഫോമായ 'മൈ യു പി ഐ' (MyUPI) എന്നീ പദ്ധതികളാണ് ആർ ബി ഐ ഗവർണർ സഞ്ജയ് മൽഹോത്ര പ്രഖ്യാപിച്ചത്. ഡിജിറ്റൽ ഇടപാടുകൾ കൂടുതൽ സുരക്ഷിതവും ലളിതവുമാക്കുകയാണ് ഇതിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു. നിലവിൽ രാജ്യത്തെ ഡിജിറ്റൽ ഇടപാടുകളുടെ 89 ശതമാനവും യു പി ഐ വഴിയാണ് നടക്കുന്നത്.

യു പി ഐ ടാപ്പ് ആൻഡ് പേ

കോൺടാക്റ്റ്‌ലെസ് ഡെബിറ്റ്/ക്രെഡിറ്റ് കാർഡുകൾ ഉപയോഗിക്കുന്നതിന് സമാനമായ രീതിയിലാണ് യു പി ഐ ടാപ്പ് ആൻഡ് പേ പ്രവർത്തിക്കുന്നത്. എൻ എഫ്സി സപ്പോർട്ട് ചെയ്യുന്ന സ്മാർട്ട്ഫോണുകൾ അൺലോക്ക് ചെയ്ത്, എൻ എഫ് സി സപ്പോർട്ടുള്ള പി.ഒ.എസ് (POS) മെഷീനിൽ ടാപ്പ് ചെയ്താൽ പണമടയ്ക്കാം. ഈ സമയത്ത് ഉപയോക്താവിന്റെ ഫോണിൽ മൊബൈൽ ഡാറ്റ ആവശ്യമായി വരുന്നില്ല. പി ഒ എസ് മെഷീന്റെ ഇന്റർനെറ്റ് കണക്ഷൻ ഉപയോഗിച്ചാണ് ഇടപാട് പൂർത്തിയാകുന്നത്.

5,000 രൂപ വരെയുള്ള ചെറിയ തുകകളുടെ ഇടപാടുകൾക്ക് യു പി ഐ പിൻ ടൈപ്പ് ചെയ്യേണ്ട ആവശ്യവുമില്ല. എന്നാൽ 5,000 രൂപയ്ക്ക് മുകളിലുള്ള ഇടപാടുകൾക്ക് പിൻ നമ്പർ നൽകേണ്ടിയും വരും. റുപേ ക്രെഡിറ്റ് കാർഡുകൾ ഉൾപ്പെടെയുള്ള എല്ലാ യു പി ഐ ലിങ്ക്ഡ് അക്കൗണ്ടുകൾ വഴിയും ഈ സേവനം ഉപയോഗിക്കാം.

എന്താണ് മൈ യു പി ഐ ?

നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (NPCI) വികസിപ്പിച്ച എ.ഐ സപ്പോർട്ട് ഉള്ള ഉപഭോക്തൃ സേവന പ്ലാറ്റ്‌ഫോമാണ് മൈ യു പി ഐ. എൻ പി സി ഐയുടെ എഫ്.ഐ.എം.ഐ (FiMI) സ്മോൾ ലാംഗ്വേജ് മോഡലിനെ അടിസ്ഥാനമാക്കിയാണ് ഇത് നിർമ്മിച്ചിരിക്കുന്നത്. ഉപയോക്താവിന്റെ അക്കൗണ്ട് ദുരുപയോഗം ചെയ്യപ്പെട്ടതായി സംശയം തോന്നിയാൽ ഉടൻ തന്നെ യു പി ഐ വഴി പണം നഷ്ടപ്പെടുന്നത് തടയാൻ സഹായിക്കുന്ന ഫീച്ചറാണിത്. സ്വന്തം മൊബൈൽ നമ്പർ വഴി യു.പി.ഐ പേയ്‌മെന്റുകൾ ലഭിക്കുന്നത് തടയാൻ ഇതിലൂടെ സാധിക്കും.

ശമ്പളക്കാരുടെ ശ്രദ്ധയ്ക്ക്; ഇപിഎഫ്ഒയിൽ വരുന്നത് വൻ മാറ്റം, പിഎഫ് വിഹിതം നിശ്ചയിക്കുന്നതിനുള്ള ശമ്പള പരിധി മാറ്റി കേന്ദ്ര സർക്കാർ

Sangeetha KS — Wed, 16 Sep 2026 16:40:56 +0530

ദില്ലി: എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷന്റെ (EPFO) നിർബന്ധിത പരിരക്ഷയ്ക്കുള്ള പ്രതിമാസ ശമ്പള പരിധി 15,000 രൂപയിൽ നിന്ന് 25,000 രൂപയായി ഉയർത്താനുള്ള തൊഴിൽ മന്ത്രാലയത്തിന്റെ നിർദ്ദേശത്തിന് കേന്ദ്ര മന്ത്രിസഭയുടെ അംഗീകാരം. ഈ തീരുമാനത്തോടെ 51 ലക്ഷത്തിലധികം അധിക ജീവനക്കാർക്ക് കൂടി നിർബന്ധിത ഇപിഎഫ്ഒ ആനുകൂല്യങ്ങളും സാമൂഹിക സുരക്ഷയും ലഭ്യമാകും.

2014 സെപ്റ്റംബറിലാണ് ഇപിഎഫ്ഒയുടെ ശമ്പള പരിധി അവസാനമായി 15,000 രൂപയാക്കി ഉയർത്തിയത്. വേതന വർദ്ധനവ്, ഉയർന്ന വരുമാനം, സംഘടിത മേഖലയിലെ തൊഴിൽ വികാസം എന്നിവ കണക്കിലെടുത്താണ് കാലാനുസൃതമായ ഈ മാറ്റം.

നിലവിൽ 15,000 രൂപയ്ക്ക് മുകളിൽ തുടക്ക ശമ്പളമുള്ളവർ നിർബന്ധിത ഇപിഎഫ് പരിധിയിൽ വരാറില്ല. പുതിയ തീരുമാനത്തോടെ 15,000 മുതൽ 25,000 രൂപ വരെ ശമ്പളം വാങ്ങുന്ന വൻ വിഭാഗം ജീവനക്കാർക്ക് ഇനി പിഎഫ്, പെൻഷൻ (EPS), ഇൻഷുറൻസ് (EDLI) ആനുകൂല്യങ്ങൾ ഉറപ്പാകും. ജീവനക്കാരുടെ വിരമിക്കൽ കാലത്തെ സാമ്പത്തിക ഭദ്രത ഉറപ്പാക്കാൻ ഇത് സഹായിക്കും. സ്ഥാപനങ്ങൾക്കും വിദഗ്ധ ജീവനക്കാരെ ദീർഘകാലം നിലനിർത്താൻ ഇത് സഹായകരമാകും.

അതേ സമയം, പദ്ധതിക്കായി സർക്കാരിന്റെ വാർഷിക ചെലവ് നിലവിലുള്ള 10,250 കോടി രൂപയിൽ നിന്ന് 11,339 കോടി രൂപയായി ഉയരും. അടുത്ത അഞ്ച് വർഷത്തിനുള്ളിൽ ഏകദേശം 56,696 കോടി രൂപയാണ് ഇതിനായി പ്രതീക്ഷിക്കുന്നത്. നിലവിൽ 7.68 ലക്ഷം സ്ഥാപനങ്ങളിലായി 7.98 കോടി അംഗങ്ങളാണ് ഇപിഎഫ്ഒയിൽ സംഭാവന നൽകുന്നത്. ഇപിഎസ് (EPS) വഴി 82 ലക്ഷത്തോളം പെൻഷൻകാർക്ക് ആനുകൂല്യം ലഭിക്കുന്നുണ്ട്. എക്സ്‌പെൻഡിച്ചർ ഫിനാൻസ് കമ്മിറ്റിയുടെ ശുപാർശയെ തുടർന്ന് വിശദമായ അന്തർ- മന്ത്രാലയ ചർച്ചകൾക്ക് ശേഷമാണ് ഈ സുപ്രധാന തീരുമാനത്തിന് കേന്ദ്ര മന്ത്രിസഭ അംഗീകാരം നൽകിയത്.

പിഎഫ് പണം പിൻവലിക്കുന്നതിൽ വീണ്ടും മാറ്റംവരുത്തി ഇപിഎഫ്ഒ; ജോലി രാജിവെച്ചവർക്കും വിരമിക്കുന്നവർക്കും തുക മുഴുവൻ പിൻവലിക്കാൻ ഒരു വർഷം കാത്തിരിക്കണം

Web Desk — Sat, 26 Sep 2026 10:23:03 +0530

ദില്ലി: ജോലിയിൽ നിന്ന് 55 വയസ് തികയുന്നതിന് മുൻപ് വിരമിക്കുകയോ, ജോലി രാജിവെക്കുകയോ ചെയ്യുന്നവർക്ക് ഇ.പി.എഫ് തുക പിൻവലിക്കുന്നതിൽ 12 മാസം കാത്തിരിക്കണം. എംപ്ലോയീസ് പ്രൊവൈഡന്റ് ഫണ്ട് ഓർഗനൈസേഷൻ്റേതാണ് തീരുമാനം. എന്നാൽ ജോലി ഉപേക്ഷിച്ച് അല്ലെങ്കിൽ വിരമിച്ച ശേഷം 12 മാസത്തിനകം മൊത്തം തുകയുടെ 75 ശതമാനം വരെ പിൻവലിക്കാൻ അംഗങ്ങൾക്ക് സാധിക്കും. സെൻട്രൽ ബോർഡ് ഓഫ് ട്രസ്റ്റീസ് എടുത്ത തീരുമാനത്തെ തുടർന്നാണ് ഇപിഎഫ്ഒ ഇത് സംബന്ധിച്ച വിജ്ഞാപനം പുറപ്പെടുവിച്ചത്.

അതേസമയം, 55 വയസ് പൂർത്തിയായ ശേഷം ജോലിയിൽ നിന്ന് വിരമിക്കുന്നവർക്കും ജോലി രാജിവെക്കുന്നവർക്കും സർവീസിൽ നിന്ന് ഒഴിവാകുന്നതോടെ മുഴുവൻ തുകയും പൂർണ്ണമായി പിൻവലിക്കാൻ സാധിക്കും. തുക 5 ലക്ഷം രൂപയ്ക്ക് മുകളിലാണെങ്കിൽ 7 മുതൽ 10 ദിവസത്തിനകവും, 5 ലക്ഷത്തിൽ താഴെയാണെങ്കിൽ 3 ദിവസത്തിനകവും ബാങ്ക് അക്കൗണ്ടിൽ ലഭ്യമാക്കും. ഇത്തരത്തിൽ തുക പിൻവലിക്കാൻ ആഗ്രഹിക്കുന്നവർക്ക് ഇപിഎഫ്ഒ വെബ്സൈറ്റിൽ രണ്ട് ഓപ്ഷനുകൾ നൽകിയിട്ടുണ്ട്. വിരമിക്കൽ (Retirement), 55 വയസിന് ശേഷം വിരമിക്കൽ (Retirement after 55 years) എന്നിവയാണിവ. 55 വയസിന് ശേഷം വിരമിക്കുന്നവർ തെറ്റാതെ തങ്ങളുടെ ഓപ്ഷൻ തിരഞ്ഞെടുക്കാൻ ശ്രദ്ധിക്കണം. അല്ലെങ്കിൽ 12 മാസം കാത്തിരുന്നാലേ പണം കിട്ടൂവെന്നും ഇപിഎഫ്ഒ ആവശ്യപ്പെടുന്നു.

ജോലിയിൽ നിന്ന് മാറുമ്പോഴും മറ്റും ജീവനക്കാർ ഇ.പി.എഫ് അക്കൗണ്ടിലെ മുഴുവൻ തുകയും ഒറ്റത്തവണയായി പിൻവലിക്കുന്ന പ്രവണത തടയാനാണ് 12 മാസത്തെ നിയന്ത്രണം കൊണ്ടുവന്നതെന്നാണ് ഇപിഎഫ്ഒ വിശദീകരിക്കുന്നത്. പലരും ജോലി മാറുമ്പോൾ തുക മുഴുവനായി പിൻവലിക്കുന്നതിനാൽ വിരമിക്കൽ സമയത്ത് സമ്പാദ്യത്തിൽ വളരെ ചെറിയ തുക മാത്രമാണ് അവശേഷിക്കുന്നത്. റിട്ടയർമെൻ്റ് ഫണ്ട് സുരക്ഷിതമാക്കാനാണ് പുതിയ നിബന്ധനകളെന്ന് ഇപിഎഫ്ഒ ചൂണ്ടിക്കാട്ടുന്നു. തൊഴിൽ അവസാനിപ്പിക്കൽ, 55 വയസ്സിന് ശേഷമുള്ള വിരമിക്കൽ, വിദേശത്തേക്കുള്ള കുടിയേറ്റം, സ്ഥാപനം അടച്ചുപൂട്ടൽ, സ്ഥിരമായ വൈകല്യം തുടങ്ങിയ കാരണങ്ങളാൽ അംഗങ്ങൾക്ക് മുഴുവൻ തുകയും പിൻവലിച്ച് അക്കൗണ്ട് പൂർണ്ണമായി സെറ്റിൽ ചെയ്യാവുന്നതാണ്. 2024-25 വർഷത്തിൽ 52.95 ലക്ഷത്തിലധികം അംഗങ്ങളാണ് അക്കൗണ്ട് സെറ്റിൽ ചെയ്തത്. ഇതിൽ 75 ശതമാനത്തിലധികം പേരും 50,000 രൂപയിൽ താഴെ തുക മാത്രമാണ് കൈപ്പറ്റിയതെന്നും ഇ.പി.എഫ്.ഒ കണക്കുകൾ വ്യക്തമാക്കുന്നു.

നാളെ മുതല്‍ ശമ്പളം നിന്നാല്‍ എന്തുചെയ്യും? എമര്‍ജന്‍സി ഫണ്ട് എത്ര വേണമെന്ന് എങ്ങനെ കണ്ടെത്താം?

Sangeetha KS — Wed, 23 Sep 2026 11:48:29 +0530

നാളെ മുതല്‍ നിങ്ങളുടെ ശമ്പളം നിന്നാല്‍ എങ്ങനെ ജീവിക്കും? പലര്‍ക്കും ഇതിന് വ്യക്തമായ ഉത്തരമില്ല. എമര്‍ജന്‍സി ഫണ്ട് അഥവാ അടിയന്തര ആവശ്യങ്ങള്‍ക്കുള്ള പണം മൂന്ന് മുതല്‍ ആറു മാസത്തെ ചിലവുകള്‍ക്ക് തികയുന്നതായിരിക്കണം എന്ന് നാം കേള്‍ക്കാറുണ്ട്. എന്നാല്‍ യഥാര്‍ത്ഥ ചിലവുകള്‍ എത്രയെന്ന് കൃത്യമായി കണക്കാക്കാതെ പലരും തങ്ങള്‍ക്ക് സുരക്ഷിതമെന്ന് തോന്നുന്ന ഒരു തുക അങ്ങ് ഊഹിച്ച് വെക്കുകയാണ് പതിവ്. ഇതിനൊരു മാറ്റം ആവശ്യമാണ്.

3 മുതല്‍ 6 മാസം വരെ: റിസര്‍വ് ബാങ്ക് പറയുന്നത്

റിസര്‍വ് ബാങ്ക് ഓഫ് ഇന്ത്യയുടെ സാമ്പത്തിക സാക്ഷരതാ രേഖകള്‍ പ്രകാരം, ഒരാള്‍ കുറഞ്ഞത് മൂന്ന് മാസത്തെ ജീവിതച്ചെലവെങ്കിലും എമര്‍ജന്‍സി ഫണ്ടായി മാറ്റി വയ്ക്കണം. എന്നാല്‍ സ്വന്തമായി ബിസിനസ് നടത്തുന്നവര്‍, സ്വയം തൊഴില്‍ ചെയ്യുന്നവര്‍ തുടങ്ങി സ്ഥിരവരുമാനം ഇല്ലാത്ത ആളുകള്‍ക്ക് ആറ് മാസമോ അതില്‍ കൂടുതലോ തുക വേണ്ടി വന്നേക്കാം.

എങ്ങനെ കണക്കാക്കാം?

വാടക, ഭവനവായ്പയുടെ ഇഎംഐ, പലചരക്ക് സാധനങ്ങള്‍, കറന്റ് ബില്‍, കുട്ടികളുടെ സ്‌കൂള്‍ ഫീസ്, ഇന്‍ഷുറന്‍സ് പ്രീമിയം, യാത്രാച്ചെലവ്, മരുന്നുകള്‍ തുടങ്ങി പെട്ടെന്ന് നിര്‍ത്തിവെക്കാന്‍ കഴിയാത്ത എല്ലാ ചിലവുകളും ആദ്യം എഴുതി തയ്യാറാക്കുക. ഉദാഹരണത്തിന്, ഈ ചിലവുകളെല്ലാം കൂടി മാസത്തില്‍ 55,000 രൂപയാണെന്ന് കരുതുക. മൂന്ന് മാസത്തേക്ക് 1.65 ലക്ഷം രൂപയും ആറ് മാസത്തേക്ക് 3.3 ലക്ഷം രൂപയും വേണ്ടിവരും. ഒരു വലിയ തുക വെറുതെ ഊഹിച്ച് തീരുമാനിക്കുന്നതിനേക്കാള്‍ പ്രായോഗികമായ രീതിയാണിത്.

വരുമാനവും ആശ്രിതരും

നിങ്ങളുടെ വരുമാനം അനിശ്ചിതത്വത്തിലാണെങ്കില്‍ ഇതിലും വലിയ തുക ആവശ്യമായി വന്നേക്കാം. കുടുംബത്തില്‍ രണ്ടുപേര്‍ക്ക് ശമ്പളമുണ്ടെങ്കില്‍ അല്പം ചെറിയൊരു എമര്‍ജന്‍സി ഫണ്ട് മതിയാകും. എന്നാല്‍ കുട്ടികളെയോ പ്രായമായ മാതാപിതാക്കളെയോ സംരക്ഷിക്കുന്ന, ഒരാള്‍ മാത്രം ജോലി ചെയ്യുന്ന കുടുംബത്തില്‍ കൂടുതല്‍ തുക കരുതണം. ബിസിനസ്സ് ചെയ്യുന്നവര്‍ക്കും കോണ്‍ട്രാക്ട് അടിസ്ഥാനത്തില്‍ ജോലി ചെയ്യുന്നവര്‍ക്കും പുതിയൊരു വരുമാനം കണ്ടെത്താന്‍ കൂടുതല്‍ സമയം വേണ്ടിവരും എന്നതിനാല്‍ വലിയൊരു തുക തന്നെ കരുതിവെക്കേണ്ടതുണ്ട്.

ലോണുകള്‍ ഉണ്ടെങ്കില്‍ ശ്രദ്ധിക്കുക!

ലോണുകള്‍ ഉണ്ടെങ്കില്‍ കണക്കുകള്‍ മാറും. നിങ്ങള്‍ എല്ലാ മാസവും 30,000 രൂപ ഭവനവായ്പ അടയ്ക്കുന്നുണ്ടെങ്കില്‍, ജോലി പോയാലും ആ ബാധ്യത ഇല്ലാതാകുന്നില്ല. ഇത്തരം ഇഎംഐ തുകകള്‍ ഒഴിവാക്കി എമര്‍ജന്‍സി ഫണ്ട് കണക്കാക്കിയാല്‍, അത് നിങ്ങള്‍ക്ക് തെറ്റായ സുരക്ഷിതത്വബോധം നല്‍കും.

മറ്റു ചിലവുകള്‍ക്ക് വേറെ പണം

വാര്‍ഷിക ഇന്‍ഷുറന്‍സ് പ്രീമിയങ്ങള്‍, സ്‌കൂള്‍ അഡ്മിഷന്‍, അവധിക്കാല യാത്രകള്‍, ഉത്സവങ്ങള്‍, വാഹനങ്ങളുടെ സര്‍വീസ് എന്നിവയ്ക്കായി പ്രത്യേകം തുക മാറ്റി വെക്കുന്നതാണ് ഉചിതം. എമര്‍ജന്‍സി ഫണ്ടില്‍ നിന്ന് ഈ ആവശ്യങ്ങള്‍ക്ക് പണമെടുക്കുന്നത്, യഥാര്‍ത്ഥത്തില്‍ ഒരു പ്രതിസന്ധി വരുമ്പോള്‍ കൈയില്‍ പണമില്ലാത്ത അവസ്ഥയുണ്ടാക്കും.

ചികിത്സാ ചിലവുകള്‍ മറക്കരുത്

ഹെല്‍ത്ത് ഇന്‍ഷുറന്‍സ് ഉണ്ടെങ്കില്‍ പോലും ചികിത്സാ ചിലവുകളെക്കുറിച്ച് ശ്രദ്ധിക്കണം. ഇന്‍ഷുറന്‍സ് പോളിസിയില്‍ എല്ലാ ചിലവുകളും ഉള്‍പ്പെടണമെന്നില്ല. ഇത്തരം സാഹചര്യങ്ങളില്‍ ഇന്‍ഷുറന്‍സ് പരിരക്ഷ ലഭിക്കാത്ത തുക അടയ്ക്കാന്‍ എമര്‍ജന്‍സി ഫണ്ട് സഹായിക്കും. വീടിനോ വാഹനത്തിനോ പെട്ടെന്നുണ്ടാകുന്ന അറ്റകുറ്റപ്പണികള്‍ക്കും ഈ തുക ഉപയോഗിക്കാം.

പണം എവിടെ സൂക്ഷിക്കണം?

എളുപ്പത്തില്‍ പിന്‍വലിക്കാന്‍ കഴിയുന്ന മറ്റൊരു സേവിംഗ്‌സ് അക്കൗണ്ടില്‍ എമര്‍ജന്‍സി ഫണ്ട് സൂക്ഷിക്കാനാണ് ആര്‍ബിഐ നിര്‍ദ്ദേശിക്കുന്നത്. ഉയര്‍ന്ന പലിശ ലഭിക്കുന്നതിനേക്കാള്‍, ആവശ്യമുള്ളപ്പോള്‍ വേഗത്തില്‍ പണം ലഭ്യമാവുക എന്നതാണ് ഇവിടെ പ്രധാനം. ഇനി മറ്റ് ഏതെങ്കിലും നിക്ഷേപ പദ്ധതികളിലാണ് പണം സൂക്ഷിക്കുന്നതെങ്കില്‍, അത് എത്ര വേഗത്തില്‍ പിന്‍വലിക്കാന്‍ കഴിയുമെന്നും അതിലെ വ്യവസ്ഥകള്‍ എന്തൊക്കെയെന്നും കൃത്യമായി മനസിലാക്കിയിരിക്കണം.

എങ്ങനെ തുടങ്ങാം?

മുഴുവന്‍ തുകയും ഒറ്റയടിക്ക് കണ്ടെത്തുക എന്നത് ബുദ്ധിമുട്ടായിരിക്കും. ആദ്യം ഒരു മാസത്തെ ചിലവിനുള്ള തുക മാറ്റി വെച്ച് തുടങ്ങുക. പിന്നീട് അത് സാവധാനം വര്‍ദ്ധിപ്പിക്കുക. ബോണസ്, ടാക്‌സ് റീഫണ്ട് അല്ലെങ്കില്‍ മറ്റ് രീതികളില്‍ ലഭിക്കുന്ന ഒറ്റത്തവണ വരുമാനങ്ങള്‍ ഇതിനായി ഉപയോഗിക്കാം. ഇത് നിങ്ങളുടെ പ്രതിമാസ ബജറ്റിനെ താറുമാറാക്കാതെ ഫണ്ട് വളര്‍ത്താന്‍ സഹായിക്കും.

മാറ്റങ്ങള്‍ വരുമ്പോള്‍ ഫണ്ടും വര്‍ദ്ധിപ്പിക്കുക

ജീവിതച്ചെലവുകളില്‍ വലിയ മാറ്റങ്ങള്‍ വരുമ്പോള്‍ എമര്‍ജന്‍സി ഫണ്ടിലെ തുകയും പുനഃപരിശോധിക്കണം. പുതിയൊരു ലോണ്‍ എടുക്കുമ്പോഴോ, വീട്ടുവാടക കൂടുമ്പോഴോ, കുട്ടി സ്‌കൂളില്‍ പോയി തുടങ്ങുമ്പോഴോ, വരുമാനത്തില്‍ മാറ്റം വരുമ്പോഴോ ഫണ്ടും വര്‍ദ്ധിപ്പിക്കേണ്ടി വരും. നിങ്ങളുടെ അത്യാവശ്യ പ്രതിമാസ ചിലവ് 55,000-ല്‍ നിന്ന് 70,000 രൂപയായി കൂടിയാല്‍, ആറു മാസത്തെ ഫണ്ട് 3.3 ലക്ഷത്തില്‍ നിന്ന് 4.2 ലക്ഷമായി ഉയര്‍ത്തണം.

ലാഭമല്ല, സുരക്ഷയാണ് ലക്ഷ്യം

എമര്‍ജന്‍സി ഫണ്ട് എന്നാല്‍ ലാഭം തരാതെ വെറുതെ കിടക്കുന്ന പണമല്ല. പെട്ടെന്നുണ്ടാകുന്ന സാമ്പത്തിക പ്രതിസന്ധികളില്‍ ഉയര്‍ന്ന പലിശയ്ക്ക് കടമെടുക്കുന്നതില്‍ നിന്നും, തെറ്റായ സമയത്ത് നിങ്ങളുടെ നിക്ഷേപങ്ങള്‍ നഷ്ടത്തില്‍ വില്‍ക്കേണ്ടി വരുന്നതില്‍ നിന്നും നിങ്ങളെ രക്ഷിക്കുന്നത് ഈ തുകയാണ്. വരുമാനം നിലച്ചാലും നിങ്ങളുടെ അത്യാവശ്യ ചിലവുകള്‍ മുടങ്ങാതെ കൊണ്ടുപോകാന്‍ ഒരു എമര്‍ജന്‍സി ഫണ്ട് തീര്‍ച്ചയായും കൂടിയേ തീരൂ.

കൂടുതല്‍ വരുമാനമുള്ളയാള്‍ക്ക് മാത്രം ടേം ഇന്‍ഷുറന്‍സ് മതിയോ? ദമ്പതികള്‍ക്ക് അബദ്ധം പറ്റാതിരിക്കാന്‍ ഈ കാര്യങ്ങള്‍ ശ്രദ്ധിക്കാം

Sangeetha KS — Sat, 19 Sep 2026 15:40:09 +0530

വിവാഹത്തോടെ സാമ്പത്തിക കാര്യങ്ങളിലെ കുടുംബത്തിന്റെ കാഴ്ചപ്പാടുകള്‍ മാറും. ഭവന വായ്പകള്‍, കുട്ടികളുടെ ഭാവി, പ്രായമായ മാതാപിതാക്കളുടെ സംരക്ഷണം, കുടുംബത്തിന്റെ നിത്യച്ചെലവുകള്‍ തുടങ്ങി നിരവധി കാര്യങ്ങള്‍ ദമ്പതികള്‍ക്ക് ശ്രദ്ധിക്കേണ്ടതുണ്ട്. അതിനാല്‍ തന്നെ കുടുംബത്തില്‍ കൂടുതല്‍ വരുമാനമുള്ള ആള്‍ക്ക് മാത്രം ടേം ഇന്‍ഷുറന്‍സ് എടുക്കുക എന്ന പഴയ രീതി മാറ്റേണ്ട സമയമായി. ഓരോരുത്തരുടെയും സാമ്പത്തിക പങ്കാളിത്തം വിലയിരുത്തി, ഒരാളുടെ അസാന്നിധ്യത്തില്‍ കുടുംബം എങ്ങനെ മുന്നോട്ട് പോകും എന്ന് ചിന്തിച്ചുവേണം ഇന്‍ഷുറന്‍സ് തിരഞ്ഞെടുക്കാന്‍.

പ്രത്യേകം പോളിസികള്‍ നല്‍കും കൂടുതല്‍ ഗുണം

ഭാര്യയ്ക്കും ഭര്‍ത്താവിനും വെവ്വേറെ ടേം പ്ലാനുകള്‍ എടുക്കുന്നത് കൂടുതല്‍ ഗുണം ചെയ്യും. ഓരോരുത്തരുടെയും വരുമാനം, സാമ്പത്തിക ബാധ്യതകള്‍, പ്രായം എന്നിവയ്ക്കനുസരിച്ച് കവറേജ് തിരഞ്ഞെടുക്കാന്‍ ഇത് സഹായിക്കും. ശമ്പളം കുറവുള്ളയാളോ അല്ലെങ്കില്‍ ജോലിക്ക് പോകാത്ത പങ്കാളിയോ ആണെങ്കില്‍പ്പോലും അവര്‍ കുടുംബത്തിന് നല്‍കുന്ന സംഭാവനകള്‍ക്ക് വലിയ സാമ്പത്തിക മൂല്യമുണ്ട്.

ഉദാഹരണത്തിന്, ജോലിക്ക് പോകാത്ത പങ്കാളിയാകും കുട്ടികളെയും പ്രായമായ മാതാപിതാക്കളെയും നോക്കുന്നതും വീട്ടുജോലികള്‍ ചെയ്യുന്നതും. ഇവരുടെ അപ്രതീക്ഷിത വിയോഗം കുടുംബത്തിന് വലിയ സാമ്പത്തിക ബാധ്യതയാകും ഉണ്ടാക്കുക. ഈ കാര്യങ്ങള്‍ ചെയ്യാന്‍ പുറത്തുനിന്ന് ഒരാളെ ഏല്‍പ്പിക്കേണ്ടി വരുമ്പോഴുണ്ടാകുന്ന അധികച്ചെലവ് കൂടി ഇന്‍ഷുറന്‍സ് തുക നിശ്ചയിക്കുമ്പോള്‍ കണക്കിലെടുക്കേണ്ടതുണ്ട്.

ശമ്പളം മാത്രം നോക്കി കവറേജ് നിശ്ചയിക്കരുത്

കൂടുതല്‍ ശമ്പളമുള്ളയാള്‍ക്ക് മാത്രം ഇന്‍ഷുറന്‍സ് മതി എന്ന് തീരുമാനിക്കുന്നത് വലിയ അബദ്ധമാണ്. വരുമാനം പ്രധാനമാണെങ്കിലും ഇന്‍ഷുറന്‍സ് കണക്കാക്കാനുള്ള ഒരേയൊരു ഘടകം അതല്ല. നിലവിലുള്ള വായ്പകള്‍, കുട്ടികളുടെ വിദ്യാഭ്യാസം, നിത്യച്ചെലവുകള്‍, ആശ്രിതരായ മാതാപിതാക്കള്‍, ദീര്‍ഘകാല ലക്ഷ്യങ്ങള്‍ എന്നിവയെല്ലാം പരിഗണിക്കണം. ഒരാളുടെ അസാന്നിധ്യത്തില്‍ കുടുംബത്തിന് എത്ര തുക വേണ്ടിവരും എന്ന ചോദ്യമാണ് ഇവിടെ ചോദിക്കേണ്ടത്. ഇതിലൂടെ ദമ്പതികള്‍ക്ക് രണ്ടുപേര്‍ക്കും ആവശ്യമായ ഇന്‍ഷുറന്‍സ് കവറേജ് വ്യത്യസ്തമായിരിക്കും എന്ന് മനസ്സിലാക്കാം.

വ്യത്യസ്ത ആവശ്യങ്ങള്‍ക്ക് പ്രത്യേകം പോളിസികള്‍

ദമ്പതികളുടെ പ്രായം, ആരോഗ്യസ്ഥിതി, വിരമിക്കുന്ന കാലയളവ് എന്നിവ പലപ്പോഴും വ്യത്യസ്തമായിരിക്കും. അതിനാല്‍ രണ്ടുപേരെയും ഒരേ പോളിസിയില്‍ ഉള്‍പ്പെടുത്തുന്നതിന് പകരം, അവരവര്‍ക്ക് അനുയോജ്യമായ പോളിസി കാലയളവും ഇന്‍ഷുറന്‍സ് തുകയും ഉള്‍പ്പെടുന്ന പ്രത്യേകം പോളിസികള്‍ എടുക്കുന്നതാണ് നല്ലത്.

ഭാവിയില്‍ വരുമാനം വര്‍ധിക്കുകയോ, പുതിയ ലോണ്‍ എടുക്കുകയോ, കുടുംബത്തിലേക്ക് പുതിയ അതിഥി എത്തുകയോ ചെയ്യുമ്പോള്‍ കവറേജില്‍ മാറ്റം വരുത്താന്‍ ഇത് എളുപ്പമാക്കും. ഒരാളുടെ പോളിസി മാറ്റുന്നത് മറ്റേയാളുടെ ഇന്‍ഷുറന്‍സ് കവറേജിനെ ബാധിക്കുകയുമില്ല.

ജോയിന്റ് ലൈഫ് കവറേജ് ഗുണകരമാണോ?

രണ്ടുപേര്‍ക്കും കൂടി ഒറ്റ പോളിസി നല്‍കുന്ന ജോയിന്റ് ലൈഫ് ഇന്‍ഷുറന്‍സുകള്‍ ചില കമ്പനികള്‍ നല്‍കുന്നുണ്ട്. രണ്ട് പോളിസികള്‍ക്ക് പകരം ഒന്ന് കൈകാര്യം ചെയ്താല്‍ മതി എന്നത് ഇതിന്റെ ആകര്‍ഷണമാണ്. എന്നാല്‍ ഇതിലെ ആനുകൂല്യങ്ങള്‍, ക്ലെയിം ചെയ്യുന്ന രീതി, പ്രീമിയം തുക, ഒരാളുടെ മരണശേഷം ബാക്കിയുള്ള ആളുടെ കവറേജ് എന്നിവ ഉല്‍പ്പന്നങ്ങള്‍ക്കനുസരിച്ച് മാറും.

ചെലവ് കുറവാണ് അല്ലെങ്കില്‍ കൈകാര്യം ചെയ്യാന്‍ എളുപ്പമാണ് എന്ന് കരുതി മാത്രം ജോയിന്റ് പോളിസികള്‍ തിരഞ്ഞെടുക്കരുത്. വ്യക്തിഗത പോളിസികളുമായി ഇത് താരതമ്യം ചെയ്ത് നോക്കണം. പരസ്യങ്ങള്‍ കണ്ട് പോളിസി എടുക്കാതെ ഐ.ആര്‍.ഡി.എ.ഐ നിഷ്‌കര്‍ഷിക്കുന്ന വ്യവസ്ഥകള്‍ കൃത്യമായി വായിച്ച് മനസ്സിലാക്കണം.

ജീവിതത്തിലെ മാറ്റങ്ങള്‍ക്കനുസരിച്ച് പോളിസി പുതുക്കാം

ടേം ഇന്‍ഷുറന്‍സ് എടുക്കുന്നത് ഒറ്റത്തവണത്തേക്കുള്ള തീരുമാനമായി കാണരുത്. പുതിയ വീടിനായി ലോണ്‍ എടുക്കുമ്പോഴോ, കുട്ടി ജനിക്കുമ്പോഴോ, പുതിയ ജോലി ലഭിക്കുകയോ അല്ലെങ്കില്‍ വരുമാനം ഗണ്യമായി കൂടുമ്പോഴോ ഇന്‍ഷുറന്‍സ് കവറേജും അതിനനുസരിച്ച് പുതുക്കേണ്ടതുണ്ട്.

ഇതോടൊപ്പം നോമിനികളെ കൃത്യമായി ചേര്‍ത്തിട്ടുണ്ടെന്ന് ദമ്പതികള്‍ ഉറപ്പുവരുത്തുക. പോളിസി രേഖകള്‍ എവിടെയാണ് സൂക്ഷിച്ചിരിക്കുന്നതെന്ന് ഇരുവരും അറിഞ്ഞിരിക്കണം. ലൈഫ് ഇന്‍ഷുറന്‍സ് പോളിസിയില്‍ നോമിനേഷന്‍ നിര്‍ബന്ധമാണെന്ന് ഐ.ആര്‍.ഡി.എ.ഐ വ്യക്തമാക്കുന്നുണ്ട്. നിബന്ധനകള്‍ക്ക് വിധേയമായി പോളിസി കാലയളവില്‍ എപ്പോള്‍ വേണമെങ്കിലും നോമിനിയെ മാറ്റാന്‍ സാധിക്കുന്നതാണ്.

ഇഎംഐ അടച്ച് കീശ കാലിയാകുന്നോ? ഭവന വായ്പയുടെ ഭാരം കുറയ്ക്കാന്‍ ചില വഴികള്‍

Sangeetha KS — Tue, 22 Sep 2026 16:04:31 +0530

സ്വന്തമായൊരു വീട് എന്ന സ്വപ്നം സാക്ഷാത്കരിക്കാനാണ് നമ്മളില്‍ പലരും ഭവന വായ്പകള്‍ എടുക്കുന്നത്. എന്നാല്‍ വരുമാനം വര്‍ധിക്കാതിരിക്കുകയും ചിലവുകള്‍ കൂടുകയും, ഒപ്പം വായ്പയുടെ പലിശ നിരക്ക് ഉയരുകയും ചെയ്യുമ്പോള്‍ പ്രതിമാസ അടവ് വലിയൊരു മാനസിക സമ്മര്‍ദ്ദമായി മാറാറുണ്ട്. ഇഎംഐ അടവ് എന്നത് സഹിച്ചേ തീരൂ എന്ന ചിന്ത മാറ്റിവെച്ച്, ഈ സാമ്പത്തിക ഭാരം കുറയ്ക്കാന്‍ എന്തൊക്കെ ചെയ്യാമെന്ന് നോക്കാം.

തുടക്കം എവിടെ നിന്ന്?

എന്തൊക്കെ മാറ്റങ്ങളാണ് വായ്പയില്‍ വന്നിട്ടുള്ളതെന്ന് പരിശോധിക്കുകയാണ് ആദ്യം വേണ്ടത്. നിങ്ങളുടെ ലോണ്‍ സ്റ്റേറ്റ്മെന്റ് എടുത്ത്, അടച്ചുതീര്‍ക്കാനുള്ള ബാക്കി തുക, നിലവിലെ പലിശ നിരക്ക്, ഇഎംഐ, ബാക്കിയുള്ള കാലയളവ് എന്നിവ പരിശോധിക്കുക. ഫ്‌ലോട്ടിങ് റേറ്റില്‍ വായ്പ എടുത്തവരാണെങ്കില്‍ പലിശ നിരക്ക് ഉയരുമ്പോള്‍ ഇഎംഐ തുകയോ വായ്പാ കാലയളവോ അല്ലെങ്കില്‍ ഇവ രണ്ടുമോ വര്‍ധിക്കാന്‍ സാധ്യതയുണ്ട്.

റിസര്‍വ് ബാങ്ക് നല്‍കുന്ന ഓപ്ഷനുകള്‍

പലിശ നിരക്കുകള്‍ മാറുമ്പോള്‍ റിസര്‍വ് ബാങ്കിന്റെ നിര്‍ദേശപ്രകാരം ബാങ്കുകള്‍ ഉപഭോക്താക്കള്‍ക്ക് ചില ഓപ്ഷനുകള്‍ നല്‍കേണ്ടതുണ്ട്. ഇഎംഐ വര്‍ധിപ്പിക്കുക, വായ്പാ കാലാവധി നീട്ടുക, അല്ലെങ്കില്‍ ഇവ രണ്ടും കൂടി ചെയ്യുക, ഫിക്‌സഡ് റേറ്റിലേക്ക് മാറുക, വായ്പയുടെ ഒരു ഭാഗം മുന്‍കൂറായി അടയ്ക്കുക എന്നിവയാണ് ആ ഓപ്ഷനുകള്‍.

കാലാവധി നീട്ടുന്നത് ഗുണകരമാണോ?

വായ്പാ കാലാവധി നീട്ടുന്നത് പ്രതിമാസ ബജറ്റില്‍ അല്‍പം ആശ്വാസം നല്‍കും. ഉദാഹരണത്തിന്, 50 ലക്ഷം രൂപ അടച്ചുതീര്‍ക്കാനുണ്ടെങ്കില്‍, വായ്പാ കാലാവധി നീട്ടുമ്പോള്‍ പ്രതിമാസ ഇഎംഐ ഭാരം കുറയും. എന്നാല്‍ ഇതിലൊരു വലിയ കുരുക്കുണ്ട്. കൂടുതല്‍ കാലം വായ്പ അടക്കേണ്ടി വരുന്നതിനാല്‍ മൊത്തത്തില്‍ നിങ്ങള്‍ അടയ്ക്കുന്ന പലിശയുടെ തുക വളരെ വലുതായിരിക്കും. അതായത് വായ്പയുടെ മൊത്തം ചിലവ് വര്‍ധിക്കും.

മുന്‍കൂറായി അടയ്ക്കാം

കയ്യില്‍ അധികമായി പണമെത്തുകയാണെങ്കില്‍ (ബോണസ് രൂപത്തിലോ, കാലാവധി പൂര്‍ത്തിയായ സ്ഥിരനിക്ഷേപത്തില്‍ നിന്നോ മറ്റോ) വായ്പയുടെ ഒരു ഭാഗം മുന്‍കൂറായി അടയ്ക്കുന്നത് നല്ലതാണ്. ഇത് നിങ്ങളുടെ ഭാവിയിലെ പലിശ ഭാരം കുറയ്ക്കും. എന്നാല്‍ അടിയന്തര ആവശ്യങ്ങള്‍ക്കായി മാറ്റിവെച്ചിട്ടുള്ള തുക ഇതിനായി എടുക്കരുത്.

ബാങ്ക് മാറ്റുന്നതിനെപ്പറ്റി ചിന്തിക്കാം

നിങ്ങള്‍ നിലവില്‍ അടയ്ക്കുന്ന പലിശ നിരക്ക് കൂടുതലാണോ എന്ന് ബാങ്കുമായി സംസാരിച്ച് മനസ്സിലാക്കുക. വലിയ വായ്പാ തുകകളില്‍ ചെറിയൊരു പലിശ വ്യത്യാസം പോലും വലിയ മാറ്റമുണ്ടാക്കും. മറ്റ് ബാങ്കുകള്‍ വളരെ കുറഞ്ഞ പലിശ നിരക്ക് വാഗ്ദാനം ചെയ്യുന്നുണ്ടെങ്കില്‍ വായ്പ അങ്ങോട്ടേക്ക് മാറ്റാവുന്നതാണ്. എന്നാല്‍ ഇതിന് മുന്‍പ് പ്രോസസിങ് ഫീസ്, രേഖകള്‍ ശരിയാക്കാനുള്ള ചിലവ് എന്നിവ കണക്കാക്കണം. പലിശയില്‍ ചെറിയ വ്യത്യാസം മാത്രമേ ഉള്ളൂവെങ്കിലോ, വായ്പ തീരാന്‍ ഏതാനും വര്‍ഷങ്ങള്‍ മാത്രമേ ബാക്കിയുള്ളൂവെങ്കിലോ ബാങ്ക് മാറ്റുന്നത് ലാഭകരമായിരിക്കില്ല.

ഫിക്‌സഡ് റേറ്റിലേക്ക് മാറിയാലോ?

ബാങ്കിന്റെ വ്യവസ്ഥകള്‍ക്ക് വിധേയമായി ഫ്‌ലോട്ടിങ് റേറ്റില്‍ നിന്ന് ഫിക്‌സഡ് റേറ്റിലേക്ക് മാറാനും സാധിക്കും. ഇത് ഇഎംഐ തുക കൃത്യമായി കണക്കാക്കാന്‍ സഹായിക്കുമെങ്കിലും എപ്പോഴും ലാഭകരമാകണമെന്നില്ല. വാഗ്ദാനം ചെയ്യുന്ന പലിശ നിരക്ക്, അത് എത്ര കാലത്തേക്ക് സ്ഥിരമായിരിക്കും, മാറാനുള്ള ചാര്‍ജുകള്‍ എന്നിവ പരിശോധിക്കണം. ഭാവിയില്‍ പലിശ നിരക്ക് കുറയാന്‍ സാധ്യതയുണ്ടെങ്കില്‍, മുന്‍കൂട്ടി ഫിക്‌സഡ് റേറ്റിലേക്ക് മാറുന്നത് നിങ്ങള്‍ക്ക് നഷ്ടമുണ്ടാക്കാം.

ഈ തെറ്റുകള്‍ ചെയ്യരുത്

ഇഎംഐ അടയ്ക്കാന്‍ ബുദ്ധിമുട്ടുമ്പോള്‍ ക്രെഡിറ്റ് കാര്‍ഡുകളോ ഉയര്‍ന്ന പലിശയുള്ള പേഴ്‌സണല്‍ ലോണുകളോ ഉപയോഗിക്കരുത്. ഇത് വലിയ സാമ്പത്തിക ബാധ്യത വരുത്തിവയ്ക്കും. അതിന് പകരം, നിങ്ങളുടെ എല്ലാ പ്രതിമാസ ബാധ്യതകളും പരിശോധിച്ച് ഉയര്‍ന്ന പലിശയുള്ള മറ്റ് വായ്പകള്‍ ഉണ്ടെങ്കില്‍ ആദ്യം അവ അടച്ചുതീര്‍ക്കാന്‍ ശ്രമിക്കുക. ഇത് പ്രതിമാസ ബജറ്റ് മെച്ചപ്പെടുത്താന്‍ സഹായിക്കും.

അടിയന്തര ആവശ്യങ്ങള്‍ക്ക് പണം കരുതുക

കയ്യില്‍ കിട്ടുന്ന അധിക പണം മുഴുവന്‍ ഭവനവായ്പയിലേക്ക് അടയ്ക്കരുത്. അത്യാവശ്യങ്ങള്‍ക്കും അടിയന്തര ഘട്ടങ്ങള്‍ക്കും എപ്പോഴും പണം കയ്യില്‍ കരുതണം. പെട്ടെന്ന് വരുമാനം നിലയ്ക്കുകയോ വലിയൊരു ചിലവ് വരികയോ ചെയ്താല്‍ ഇത് ഉപയോഗിക്കാം.

ബാങ്കുമായി സംസാരിക്കാം

മേല്‍പ്പറഞ്ഞ കാര്യങ്ങളൊക്കെ ചെയ്തിട്ടും കണക്കുകള്‍ ശരിയാകുന്നില്ലെങ്കില്‍ ഇഎംഐ മുടങ്ങുന്നതിന് മുന്‍പ് തന്നെ ബാങ്കുമായി സംസാരിക്കുക. വായ്പ കുടിശ്ശികയാകുന്നതിന് മുന്‍പ് തന്നെ ലഭ്യമായ മറ്റ് പരിഹാരങ്ങളെക്കുറിച്ച് ബാങ്കുമായി ചര്‍ച്ച ചെയ്യുന്നതാണ് എപ്പോഴും നല്ലത്. ഈ മാസത്തെ ഇഎംഐ എങ്ങനെയെങ്കിലും അടയ്ക്കുക എന്നതല്ല, മറിച്ച് കുടുംബ ബജറ്റ് താളംതെറ്റാതെ കൊണ്ടുപോവുക എന്നതാണ് പ്രധാനം.

കുടുംബവുമൊത്ത് ഒരു അവധിക്കാല യാത്രയാണോ? ബുക്കിങ്ങില്‍ പണം ലാഭിക്കാന്‍ ഇതാ ചില വഴികള്‍

Sangeetha KS — Wed, 16 Sep 2026 15:06:16 +0530

കുടുംബത്തോടൊപ്പം ഒരു അവധിക്കാല യാത്ര പ്ലാന്‍ ചെയ്യുകയാണോ? വിമാന ടിക്കറ്റ്, ഹോട്ടല്‍ മുറികള്‍, ലഗേജ്, ഭക്ഷണം, യാത്രാച്ചെലവുകള്‍ എന്നിവയെല്ലാം കൂട്ടുമ്പോള്‍ യാത്രയുടെ ബഡ്ജറ്റ് പലപ്പോഴും നമ്മള്‍ ഉദ്ദേശിച്ചതിലും കൂടും. ബുക്കിങ്ങിനായി നെറ്റില്‍ തിരയുമ്പോള്‍ ആദ്യം കാണുന്ന കുറഞ്ഞ നിരക്ക് കണ്ട് പെട്ടെന്ന് ബുക്ക് ചെയ്യുന്നവരാണ് നമ്മളില്‍ പലരും. എന്നാല്‍ അല്പം ക്ഷമ കാണിച്ചാല്‍ വലിയ തുക ലാഭിക്കാനാകും. സ്‌ക്രീനില്‍ കാണുന്ന ഏറ്റവും ചെറിയ തുകയ്ക്ക് പിന്നാലെ പോകാതെ, യാത്രയുടെ മൊത്തം ചെലവ് താരതമ്യം ചെയ്യുകയാണ് എപ്പോഴും നല്ലത്. ഇതിനായി ശ്രദ്ധിക്കേണ്ട ചില കാര്യങ്ങള്‍ താഴെ പറയുന്നവയാണ്.

യാത്രാ തീയതികളില്‍ മാറ്റം വരുത്താം

യാത്ര തിരിക്കുന്ന തീയതി കൃത്യമായി മുന്‍കൂട്ടി തീരുമാനിക്കാതെ, രണ്ടോ മൂന്നോ ദിവസങ്ങളിലെ വിമാന നിരക്കുകള്‍ കൂടി പരിശോധിക്കുന്നത് ഗുണം ചെയ്യും. ഇതിനായി ഗൂഗിള്‍ ഫ്‌ലൈറ്റ്‌സിലെ കലണ്ടര്‍, പ്രൈസ് ഗ്രാഫ് ഫീച്ചറുകള്‍ ഉപയോഗിക്കാം. നിരക്കുകളില്‍ വലിയ മാറ്റം വരുമ്പോള്‍ അലേര്‍ട്ടുകള്‍ നല്‍കുന്ന പ്രൈസ് ട്രാക്കിങ് സംവിധാനവും ഇതിലുണ്ട്. വാരാന്ത്യങ്ങള്‍, അവധി ദിവസങ്ങള്‍, തിരക്കുള്ള സമയങ്ങള്‍ എന്നിവയ്ക്ക് തൊട്ടുമുമ്പോ ശേഷമോ ഉള്ള ദിവസങ്ങളിലേക്ക് യാത്ര മാറ്റുന്നത് വലിയ സാമ്പത്തിക ലാഭം നല്‍കിയേക്കാം. അതുപോലെ അടുത്തുള്ള മറ്റ് എയര്‍പോര്‍ട്ടുകളിലെ നിരക്കും പരിശോധിക്കുക. എന്നാല്‍ അവിടേക്ക് എത്താനുള്ള യാത്രാച്ചെലവ് ടിക്കറ്റില്‍ ലഭിക്കുന്ന ലാഭത്തേക്കാള്‍ കൂടുതലാണെങ്കില്‍ ഈ മാറ്റം ഒഴിവാക്കണം.

ടിക്കറ്റ് നിരക്ക് മാത്രം നോക്കിയാല്‍ പോരാ

4,999 രൂപയ്ക്ക് കാണുന്ന വിമാന ടിക്കറ്റിന് സീറ്റ് സെലക്ഷനും ലഗേജ് ഫീസും മറ്റ് നിരക്കുകളും കൂടി വരുമ്പോള്‍ ഈ തുകയായിരിക്കില്ല നല്‍കേണ്ടി വരിക. കുറഞ്ഞ നിരക്കിലുള്ള ടിക്കറ്റുകള്‍ തിരഞ്ഞെടുക്കുമ്പോള്‍ സ്വന്തമായി ലഗേജ് കൈകാര്യം ചെയ്യുകയോ മറ്റ് എയര്‍പോര്‍ട്ടുകളില്‍ ഇറങ്ങേണ്ടി വരുന്നതോ ആയ ബുദ്ധിമുട്ടുകള്‍ ഉണ്ടാകാമെന്ന് ഗൂഗിള്‍ ഫ്‌ലൈറ്റ്‌സ് തന്നെ മുന്നറിയിപ്പ് നല്‍കുന്നുണ്ട്. പണം നല്‍കുന്നതിന് മുന്‍പ് ലഗേജ്, സീറ്റ് തുടങ്ങിയ നിങ്ങളുടെ ആവശ്യങ്ങള്‍ക്കുള്ള തുക കൂടി ഉള്‍പ്പെടുത്തി വേണം എയര്‍ലൈനുകളുടെ നിരക്കുകള്‍ താരതമ്യം ചെയ്യാന്‍. ചിലപ്പോള്‍ അടിസ്ഥാന നിരക്ക് അല്പം കൂടുതലുള്ള ടിക്കറ്റുകളാകും ഇതെല്ലാം കൂട്ടുമ്പോള്‍ ഏറ്റവും ലാഭകരമായി മാറുക.

വിമാനക്കമ്പനികളുടെ നിയമങ്ങള്‍ അറിയണം

യാത്രയുടെ കാര്യത്തില്‍ ഉറപ്പില്ലാത്ത അവസ്ഥയാണെങ്കില്‍ ടിക്കറ്റ് റദ്ദാക്കാനും മാറ്റാനുമുള്ള സൗകര്യമുള്ള ടിക്കറ്റുകള്‍ ബുക്ക് ചെയ്യുന്നതാണ് നല്ലത്. ഇതിന് അല്പം തുക കൂടുതല്‍ നല്‍കേണ്ടി വന്നാലും ഭാവിയില്‍ ഇത് ഗുണം ചെയ്യും. വിമാനക്കമ്പനികള്‍ ലഗേജ്, ടിക്കറ്റ് റദ്ദാക്കല്‍, തീയതി മാറ്റല്‍ തുടങ്ങിയവയ്ക്ക് വ്യത്യസ്ത നിരക്കുകളാണ് ഈടാക്കുന്നത്. ഉദാഹരണത്തിന്, എയര്‍ ഇന്ത്യയുടെ ഇപ്പോഴത്തെ ടിക്കറ്റ് നിരക്കുകളില്‍ ഓരോ തരം ടിക്കറ്റിനും വ്യത്യസ്ത റദ്ദാക്കല്‍ ഫീസും തീയതി മാറ്റാനുള്ള ചാര്‍ജുകളുമാണുള്ളത്.

ഹോട്ടല്‍ ബുക്കിങ്ങിലും വേണം ശ്രദ്ധ

ഹോട്ടല്‍ വെബ്‌സൈറ്റുകളിലും ബുക്കിങ് ആപ്പുകളിലും കാണുന്ന ആകര്‍ഷകമായ കുറഞ്ഞ വാടക കണ്ട് മാത്രം റൂമുകള്‍ ബുക്ക് ചെയ്യരുത്. നികുതി, മറ്റ് ഫീസുകള്‍, ഭക്ഷണം എന്നിവയെല്ലാം ഉള്‍പ്പെടുമ്പോള്‍ അവസാനം നല്‍കേണ്ട തുക വര്‍ധിക്കും. അതിനാല്‍ ആദ്യം കാണുന്ന തുകയ്ക്ക് പകരം, മുഴുവന്‍ ദിവസത്തേക്കുമായി അവസാനം നല്‍കേണ്ടി വരുന്ന തുക താരതമ്യം ചെയ്യുക. മുറി കാന്‍സല്‍ ചെയ്യാനുള്ള നിബന്ധനകളും ശ്രദ്ധിക്കണം. ബുക്കിങ് റദ്ദാക്കിയാല്‍ പണം തിരികെ ലഭിക്കാത്ത മുറികള്‍ക്ക് വാടക കുറവായിരിക്കുമെങ്കിലും, യാത്ര മുടങ്ങിയാല്‍ ആ പണം മുഴുവന്‍ നഷ്ടമാകും. യാത്രയുടെ കാര്യത്തില്‍ അല്പം സംശയമുണ്ടെങ്കില്‍, ചെറിയ തുക അധികം നല്‍കിയാലും ബുക്കിങ് മാറ്റാനും റദ്ദാക്കാനും സാധിക്കുന്ന ഫ്‌ലെക്‌സിബിള്‍ റൂമുകള്‍ എടുക്കുന്നതാണ് സാമ്പത്തികമായി ബുദ്ധി.

താമസസ്ഥലം എവിടെയെന്ന് നോക്കണം

പ്രതിദിനം 1,500 രൂപ ലാഭം കിട്ടുന്ന ഹോട്ടലാണ് നിങ്ങള്‍ ബുക്ക് ചെയ്യുന്നതെങ്കില്‍ പോലും, അത് നിങ്ങള്‍ സന്ദര്‍ശിക്കാന്‍ ഉദ്ദേശിക്കുന്ന സ്ഥലങ്ങളില്‍ നിന്ന് ഏറെ അകലെയാണെങ്കില്‍ ഒരു പ്രയോജനവുമില്ല. അങ്ങോട്ടുള്ള ടാക്‌സി കൂലിയും എയര്‍പോര്‍ട്ടിലേക്കുള്ള യാത്രയും നിങ്ങളുടെ സമയവും പണവും നഷ്ടപ്പെടുത്തും. അതിനാല്‍ പ്രാദേശിക യാത്രകളും പ്രഭാതഭക്ഷണവും ഉള്‍പ്പെടെയുള്ള ചെലവുകള്‍ കണക്കാക്കി രണ്ടോ മൂന്നോ ഹോട്ടലുകള്‍ തമ്മില്‍ താരതമ്യം ചെയ്യുക. ഇന്ത്യയിലെ ഹോട്ടലുകളില്‍ ബുക്ക് ചെയ്യുമ്പോള്‍, സ്‌ക്രീനില്‍ കാണിക്കുന്ന തുകയില്‍ ജിഎസ്ടി ഉള്‍പ്പെട്ടിട്ടുണ്ടോ എന്ന് ഉറപ്പുവരുത്തുക. ജിഎസ്ടി കൗണ്‍സിലിന്റെ നിലവിലെ കണക്കുകള്‍ പ്രകാരം പ്രതിദിനം 7,500 രൂപ വരെയുള്ള ഹോട്ടല്‍ മുറികള്‍ക്ക് 12 ശതമാനവും അതിനുമുകളില്‍ 18 ശതമാനവുമാണ് നികുതി.

ഓഫറുകള്‍ക്ക് പിന്നാലെ മാത്രം പോകരുത്

ഡിസ്‌കൗണ്ട് കോഡുകള്‍, വാലറ്റ് ഓഫറുകള്‍, ലോയല്‍റ്റി പോയിന്റുകള്‍, കാര്‍ഡ് പ്രൊമോഷനുകള്‍ എന്നിവയെല്ലാം ചെലവ് കുറയ്ക്കാന്‍ സഹായിക്കും. എന്നാല്‍ ഒരു ഓഫര്‍ ഉപയോഗിക്കാന്‍ വേണ്ടി മാത്രം നിങ്ങളുടെ യാത്രയുടെ തീയതിയോ സ്ഥലമോ മാറ്റരുത്. കേവലം 2,000 രൂപയുടെ ഡിസ്‌കൗണ്ട് കിട്ടുമെന്ന് കരുതി ആവശ്യമില്ലാത്ത ഒരു 20,000 രൂപയുടെ ബുക്കിങ് നടത്തുന്നത് സാമ്പത്തിക ലാഭമല്ല.

ലൈഫ് ഇന്‍ഷുറന്‍സ് ഏജന്റുമാരുടെ കമ്മീഷന് പരിധി നിശ്ചയിക്കാന്‍ ഐആര്‍ഡിഎഐ; പുതിയ നിര്‍ദേശങ്ങള്‍ അറിയാം

Sangeetha KS — Thu, 24 Sep 2026 14:33:39 +0530

ലൈഫ് ഇന്‍ഷുറന്‍സ് പ്രീമിയത്തിന്റെ ഒരു ഭാഗം ഇന്‍ഷുറന്‍സ് പരിരക്ഷയ്ക്കും മറ്റ് ചിലവുകള്‍ക്കുമായി മാറ്റുമ്പോള്‍, മറ്റൊരു ഭാഗം പോളിസി വില്‍ക്കുന്ന ഏജന്റുമാര്‍ക്കും വിതരണക്കാര്‍ക്കുമുള്ള കമ്മീഷനായാണ് പോകുന്നത്. ഇതിനൊരു പരിധി കൊണ്ടുവരാന്‍ ഒരുങ്ങുകയാണ് ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്മെന്റ് അതോറിറ്റി ഓഫ് ഇന്ത്യ. പോളിസിയുടെ സ്വഭാവവും പ്രീമിയം അടയ്ക്കുന്ന കാലാവധിയും അനുസരിച്ച് കമ്മീഷന്‍ നിരക്കുകളില്‍ മാറ്റം വരുത്താനാണ് നിര്‍ദേശം.

ദീര്‍ഘകാല പോളിസികള്‍ക്ക് ഉയര്‍ന്ന കമ്മീഷന്‍

പ്രീമിയം അടയ്ക്കുന്ന കാലാവധിയുടെ അടിസ്ഥാനത്തില്‍ ഇന്‍ഡിവിജ്വല്‍ നോണ്‍- ലിങ്ക്ഡ്, ലിങ്ക്ഡ് ലൈഫ് ഇന്‍ഷുറന്‍സ് പോളിസികള്‍ക്കുള്ള പരമാവധി കമ്മീഷന്‍ പരിധിയാണ് ഐആര്‍ഡിഎഐ നിര്‍ദേശിച്ചിരിക്കുന്നത്.

5 വര്‍ഷത്തില്‍ താഴെ കാലാവധി: വിതരണക്കാര്‍ക്ക് ആദ്യ വര്‍ഷം പരമാവധി 5% കമ്മീഷന്‍; ഏജന്റുമാര്‍ക്ക് 6.25%.

5 വര്‍ഷം കാലാവധി: വിതരണക്കാര്‍ക്ക് 10%; ഏജന്റുമാര്‍ക്ക് 12.5%.

6 മുതല്‍ 8 വര്‍ഷം വരെ: വിതരണക്കാര്‍ക്ക് 14%; ഏജന്റുമാര്‍ക്ക് 17.5%.

9 വര്‍ഷം: വിതരണക്കാര്‍ക്ക് 18%: ഏജന്റുമാര്‍ക്ക് 22.5%.

10 വര്‍ഷമോ അതില്‍ കൂടുതലോ: വിതരണക്കാര്‍ക്ക് 20%; ഏജന്റുമാര്‍ക്ക് 25%.

തുടക്ക കാലങ്ങളില്‍ പോളിസി പുതുക്കുമ്പോള്‍ (റിന്യൂവല്‍ കമ്മീഷന്‍) കുറഞ്ഞ നിരക്ക് മാത്രമേ നല്‍കാവൂ എന്നും ഐആര്‍ഡിഎഐ നിര്‍ദേശിക്കുന്നു.

എന്തുകൊണ്ടാണ് പുതുക്കല്‍ കമ്മീഷന്‍ കുറയ്ക്കുന്നത്?

പുതിയ പോളിസികള്‍ വില്‍ക്കുന്നതില്‍ മാത്രം ഏജന്റുമാരും വിതരണക്കാരും ശ്രദ്ധ കേന്ദ്രീകരിക്കുന്നത് തടയാനാണ് ഐആര്‍ഡിഎഐ ഈ നീക്കം നടത്തുന്നത്. ആദ്യ വര്‍ഷത്തെ ഉയര്‍ന്ന കമ്മീഷന് പിന്നാലെ പോകുന്നതിന് പകരം, ദീര്‍ഘകാലത്തേക്ക് പോളിസി തുടരാന്‍ ഉപഭോക്താക്കളെ പ്രേരിപ്പിക്കുന്ന തരത്തിലാകണം കമ്മീഷന്‍ ഘടനയെന്ന് ഐആര്‍ഡിഎഐ വ്യക്തമാക്കുന്നു.

കൂടാതെ, ഒറ്റത്തവണ പ്രീമിയം അടയ്ക്കുന്ന പോളിസികള്‍ക്കും നികുതി ഇളവുള്ള പ്രൊഡക്റ്റുകള്‍ക്കും കമ്മീഷന്‍ കുറവായിരിക്കണമെന്നും നിര്‍ദേശമുണ്ട്. ഉദാഹരണത്തിന്, സിംഗിള്‍ പ്രീമിയം ഇന്‍ഡിവിജ്വല്‍ സേവിങ്‌സ് പോളിസികള്‍ക്ക് ആദ്യ വര്‍ഷം വിതരണക്കാര്‍ക്ക് 1 ശതമാനവും ഏജന്റുമാര്‍ക്ക് 2 ശതമാനവുമാണ് നിര്‍ദിഷ്ട കമ്മീഷന്‍. സിംഗിള്‍ പ്രീമിയം പ്യുവര്‍-ടേം പോളിസികള്‍ക്കിത് യഥാക്രമം 7.5%, 10% എന്നിങ്ങനെയായിരിക്കും.

ടേം ഇന്‍ഷുറന്‍സിലെ മാറ്റങ്ങള്‍

ഇന്‍ഡിവിജ്വല്‍ പ്യുവര്‍-ടേം ഇന്‍ഷുറന്‍സില്‍, പ്രീമിയം അടയ്ക്കുന്ന രീതിയനുസരിച്ചാണ് കമ്മീഷന്‍ തീരുമാനിക്കുന്നത്:

സിംഗിള്‍ പ്രീമിയം ടേം പോളിസി: ആദ്യ വര്‍ഷം വിതരണക്കാര്‍ക്ക് പരമാവധി 7.5% കമ്മീഷന്‍; ഏജന്റുമാര്‍ക്ക് 10%.

ഒന്നിലധികം വര്‍ഷം പ്രീമിയം അടയ്ക്കുന്ന പോളിസി: ആദ്യ വര്‍ഷം ഉയര്‍ന്ന കമ്മീഷന്‍ ലഭിക്കും (വിതരണക്കാര്‍ക്ക് 25%, ഏജന്റുമാര്‍ക്ക് 30%). എന്നാല്‍ ഇവയുടെ റിന്യൂവല്‍ കമ്മീഷന്‍ യഥാക്രമം 7.5%, 10% എന്നിങ്ങനെയായി പരിമിതപ്പെടുത്താനാണ് നിര്‍ദേശം.

എല്ലാ ആനുകൂല്യങ്ങളും കമ്മീഷനില്‍ ഉള്‍പ്പെടും

ഏജന്റുമാര്‍ക്കും വിതരണക്കാര്‍ക്കും നല്‍കുന്ന ഇന്‍സെന്റീവുകള്‍, അവാര്‍ഡുകള്‍, ചിലവുകള്‍ക്കുള്ള റീഇംബേഴ്‌സ്‌മെന്റുകള്‍, പണമിടപാടല്ലാത്ത മറ്റ് ആനുകൂല്യങ്ങള്‍ എന്നിവയെല്ലാം കമ്മീഷനില്‍ തന്നെ ഉള്‍പ്പെടുത്തണം. ഏത് പേരില്‍ നല്‍കുന്ന പേയ്‌മെന്റായാലും അത് 'കമ്മീഷന്‍' എന്ന പരിധിയില്‍ വരണമെന്ന് ഐആര്‍ഡിഎഐ കര്‍ശന നിര്‍ദേശം നല്‍കുന്നു.

ഇന്‍ഷുറന്‍സ് വിതരണ മേഖലയില്‍ വന്‍ മാറ്റങ്ങള്‍ക്ക് സാധ്യത; ഇന്‍ഷുറന്‍സ് കമ്മീഷനുകളില്‍ വന്‍ വെട്ടിക്കുറവുകളുമായി ഐആര്‍ഡിഎഐ

Sangeetha KS — Fri, 25 Sep 2026 14:37:49 +0530

ഇന്‍ഷുറന്‍സ് പോളിസികള്‍ വില്‍ക്കുന്നവര്‍ക്ക് നല്‍കുന്ന കമ്മീഷനുകള്‍ വലിയ തോതില്‍ വെട്ടിക്കുറയ്ക്കാനുള്ള ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്മെന്റ് അതോറിറ്റി ഓഫ് ഇന്ത്യയുടെ പുതിയ നിര്‍ദേശം ഇന്‍ഷുറന്‍സ് മേഖലയില്‍ വന്‍ മാറ്റങ്ങള്‍ക്ക് വഴിയൊരുക്കും. ഇന്‍ഷുറന്‍സ് വിതരണ മേഖലയുടെ നിലവിലെ രീതികളെ ഇത് കാര്യമായി ബാധിക്കുമെന്നും, പിടിച്ചുനില്‍ക്കാനായി കമ്പനികള്‍ക്ക് പുതിയ സാങ്കേതികവിദ്യകളെയും ഏജന്റുമാരെയും കൂടുതല്‍ ആശ്രയിക്കേണ്ടി വരുമെന്നുമാണ് ഈ രംഗത്തെ വിദഗ്ധര്‍ പറയുന്നത്. നിലവിലുള്ള പല ബിസിനസ് മോഡലുകളും ഇതോടെ പ്രതിസന്ധിയിലാകും.

വരും കാലങ്ങളില്‍ ഇന്‍ഷുറന്‍സ് വിതരണ രംഗത്തുള്ള പലര്‍ക്കും പിടിച്ചുനില്‍ക്കാനാവാത്ത അവസ്ഥ വരുമെന്നും, അതിനാല്‍ അടുത്ത 2-3 വര്‍ഷത്തിനുള്ളില്‍ ലൈഫ് ഇന്‍ഷുറന്‍സ് ബിസിനസില്‍ വലിയ ഇടിവ് സംഭവിച്ചേക്കാമെന്നും ഒരു പ്രമുഖ സ്വകാര്യ ലൈഫ് ഇന്‍ഷുറന്‍സ് കമ്പനിയുടെ സിഇഒ വ്യക്തമാക്കി.

അധ്വാനത്തിന് അനുസരിച്ച് കമ്മീഷന്‍

പോളിസികള്‍ വില്‍ക്കാനും തുടര്‍സേവനങ്ങള്‍ നല്‍കാനുമെടുക്കുന്ന 'അധ്വാനത്തിന്' അനുസരിച്ച് കമ്മീഷന്‍ നല്‍കാനാണ് ഐആര്‍ഡിഎഐയുടെ പുതിയ കരട് നിര്‍ദേശം. ഇതില്‍ സാധാരണ ഏജന്റുമാര്‍ക്കാണ് മുന്‍ഗണന നല്‍കിയിരിക്കുന്നത്. പുതിയ നിര്‍ദേശപ്രകാരം കമ്മീഷന്‍ നിരക്കുകള്‍ ഇങ്ങനെയാകും:

ലൈഫ് ഇന്‍ഷുറന്‍സ് ഏജന്റുമാര്‍: ആദ്യ വര്‍ഷത്തെ പ്രീമിയത്തിന്റെ 6.25% മുതല്‍ 25% വരെ.
ബാങ്കുകള്‍, ബ്രോക്കര്‍മാര്‍, വെബ് അഗ്രിഗേറ്ററുകള്‍ (മറ്റ് ഇടനിലക്കാര്‍): 5% മുതല്‍ 20% വരെ.
ഹെല്‍ത്ത് ഇന്‍ഷുറന്‍സ്: ആദ്യമായി പോളിസി എടുക്കുമ്പോള്‍ വിതരണക്കാര്‍ക്ക് ലഭിക്കുന്ന കമ്മീഷന്‍ 15-20 ശതമാനമായി നിജപ്പെടുത്തും.

പ്രതിസന്ധിയിലാകുന്നത് ആരൊക്കെ?

ഇപ്പോള്‍ ആകെയുള്ള ഇന്‍ഷുറന്‍സ് ബിസിനസിന്റെ 50 ശതമാനവും വരുന്നത് ഏജന്റുമാര്‍ അല്ലാത്തവരില്‍ നിന്നാണ്. ഇതില്‍ തന്നെ 65-70 ശതമാനവും ബാങ്കുകള്‍ വഴിയാണ് (ബാന്‍കാഷുറന്‍സ്). ബാക്കി വരുന്ന 30 ശതമാനം ഇടനിലക്കാരുടെ ബിസിനസ് പുതിയ മാറ്റത്തോടെ പൂര്‍ണ്ണമായും ഇല്ലാതായേക്കാമെന്ന് ഒരു സ്വകാര്യ ഇന്‍ഷുറന്‍സ് കമ്പനി ആശങ്കപ്പെടുന്നു.

ഏറ്റവും ചിലവേറിയ മാര്‍ഗമായി ബാങ്കുകള്‍

സ്വകാര്യ ലൈഫ് ഇന്‍ഷുറന്‍സ് കമ്പനികളുടെ മൊത്തം പ്രീമിയത്തിന്റെ 45 ശതമാനവും വരുന്നത് ബാങ്കുകള്‍ വഴിയുള്ള വില്‍പനയില്‍ നിന്നാണ്. പുതിയ പോളിസികള്‍ക്കും റിന്യൂവലിനുമായി ശരാശരി 10 ശതമാനമാണ് ഇവര്‍ക്ക് കമ്മീഷനായി ലഭിക്കുന്നത്. എന്നാല്‍ ജനറല്‍ ഇന്‍ഷുറന്‍സില്‍ ബാങ്കുകള്‍ വഴി ലഭിക്കുന്നത് 5% പ്രീമിയം മാത്രമാണെങ്കിലും, ശരാശരി 26 ശതമാനത്തോളം ഇവര്‍ കമ്മീഷനായി കൈപ്പറ്റുന്നുണ്ട്.അതേസമയം, ജനറല്‍ ഇന്‍ഷുറന്‍സില്‍ 63 ശതമാനം പ്രീമിയവും കൊണ്ടുവരുന്ന സാധാരണ ഏജന്റുമാര്‍ക്കും ബ്രോക്കര്‍മാര്‍ക്കും ലഭിക്കുന്ന ശരാശരി കമ്മീഷന്‍ 17-18% മാത്രമാണ്.

ഇന്‍ഷുറന്‍സ് വിതരണത്തിലെ ഏറ്റവും ചിലവേറിയ മാര്‍ഗ്ഗമായി ബാങ്കുകള്‍ മാറിയെന്ന് ഐആര്‍ഡിഎഐ വ്യക്തമാക്കി. ഇടപാടുകാരിലേക്ക് എളുപ്പത്തില്‍ എത്താന്‍ കഴിയുമെന്നത് ഉപഭോക്താക്കള്‍ക്ക് കുറഞ്ഞ ചെലവില്‍ മികച്ച സേവനം നല്‍കുന്നതിന് പകരം, കൂടുതല്‍ കമ്മീഷന്‍ നേടാനുള്ള വഴിയായി ബാങ്കുകള്‍ ഇതിനെ മാറ്റുകയാണെന്ന് അതോറിറ്റി വിമര്‍ശിച്ചു.

ഓണ്‍ലൈന്‍ പ്ലാറ്റ്ഫോമുകള്‍ക്ക് തിരിച്ചടി

ഏജന്റുമാരല്ലാത്തവരില്‍ നിന്നുള്ള ബിസിനസ് കുറയുമ്പോള്‍ കമ്പനികള്‍ക്ക് സ്വന്തമായി വിതരണ ശൃംഖലകള്‍ ഉണ്ടാക്കേണ്ടി വരും. തുടക്കത്തില്‍ ഇത് കമ്പനികള്‍ക്ക് സാമ്പത്തിക ബാധ്യതയുണ്ടാക്കുമെന്ന് വിലയിരുത്തപ്പെടുന്നു.

ഹോം ലോൺ എടുക്കാന്‍ പ്ലാനുണ്ടോ? ഇഎംഐ മാറാത്ത ഹൈബ്രിഡ് ലോണുകള്‍ ലാഭകരമാണോ?

Sangeetha KS — Fri, 18 Sep 2026 11:48:48 +0530

ഹോം ലോൺ എടുക്കുന്നവര്‍ക്ക് എപ്പോഴും ഉള്ളൊരു ആശങ്കയാണ് ഭാവിയില്‍ പലിശ നിരക്ക് കൂടുമോ എന്നുള്ളത്. ഇതിനൊരു പരിഹാരമെന്ന നിലയിലാണ് പലരും ഹൈബ്രിഡ് ഹോം ലോണുകളെ ആശ്രയിക്കുന്നത്. വായ്പ എടുത്ത് ആദ്യത്തെ രണ്ടുമുതല്‍ അഞ്ചുവര്‍ഷം വരെ പലിശ നിരക്കും പ്രതിമാസ തിരിച്ചടവും സ്ഥിരമായിരിക്കുകയും, അതിനുശേഷം ഓട്ടോമാറ്റിക്കായി ഫ്‌ലോട്ടിങ് നിരക്കിലേക്ക് മാറുകയും ചെയ്യുന്ന രീതിയാണിത്. തുടക്കത്തില്‍ ഇഎംഐ തുകയില്‍ ഒരു ഉറപ്പ് ആഗ്രഹിക്കുന്നവര്‍ക്ക് ഈ വായ്പകള്‍ ഗുണകരമാകും. എന്നാല്‍ പലിശ നിരക്കിലെ ഏറ്റക്കുറച്ചിലുകളെ നേരിടാന്‍ തയ്യാറുള്ളവര്‍ക്ക് ഫ്‌ലോട്ടിങ് ലോണുകളാണ് കൂടുതല്‍ അനുയോജ്യം.

കൊവിഡിന് ശേഷമുള്ള ഉയര്‍ന്ന നിരക്കായ 6.5 ശതമാനത്തില്‍ നിന്ന് റിപ്പോ നിരക്ക് നിലവില്‍ 125 ബേസിസ് പോയിന്റ് താഴെ നില്‍ക്കുന്ന സാഹചര്യത്തില്‍, ഒരേ ഇഎംഐ ഉറപ്പാക്കുന്ന ഹൈബ്രിഡ് ലോണ്‍ എടുക്കണമോ അതോ ഫ്‌ലോട്ടിങ് നിരക്കുകളില്‍ തന്നെ തുടരണമോ എന്ന ആശയക്കുഴപ്പത്തിലാണ് പലരും.

ഫ്‌ലോട്ടിങ് നിരക്കുകളുടെ ആധിപത്യം

2025-ല്‍ ഇന്ത്യയിലെ ഭവനവായ്പാ വിപണിയുടെ 73.37 ശതമാനവും ഫ്‌ലോട്ടിങ് നിരക്കിലുള്ളവയാണ്. റിപ്പോ നിരക്ക് കുറയുമ്പോള്‍ ഫ്‌ലോട്ടിങ് ലോണുകളില്‍ വേഗത്തില്‍ പലിശ കുറയുമെങ്കിലും ഇത് എപ്പോഴും അത്ര ലാഭകരമാകണമെന്നില്ല. പലിശ നിരക്ക് കൂടുമ്പോള്‍ ബാങ്കുകള്‍ പലപ്പോഴും ഇഎംഐ തുക കൂട്ടുന്നതിന് പകരം വായ്പാ കാലാവധി നീട്ടുകയാണ് ചെയ്യാറുള്ളത്. അതുവഴി ഉപഭോക്താവ് അടയ്‌ക്കേണ്ടി വരുന്ന മൊത്തം പലിശത്തുക വലിയ രീതിയില്‍ വര്‍ധിക്കും.

കണക്കുകള്‍ പറയുന്നത് എന്ത്? ഈ മാറ്റം ലാഭകരമാണോ?

ഒരാള്‍ 25 വര്‍ഷത്തേക്ക് 2 കോടി രൂപ വായ്പയെടുത്തു എന്ന് കരുതുക. ആദ്യത്തെ 36 മാസത്തേക്ക് 7.5% നിരക്കിലാണ് (ഫ്‌ലോട്ടിങ് നിരക്കിനേക്കാള്‍ 5 ബേസിസ് പോയിന്റ് കൂടുതല്‍) ലോണ്‍ എടുത്തതെങ്കില്‍, റിസര്‍വ് ബാങ്ക് ആദ്യ വര്‍ഷത്തില്‍ തന്നെ മൂന്ന് തവണകളായി 25 ബേസിസ് പോയിന്റ് വീതം റിപ്പോ നിരക്ക് വര്‍ധിപ്പിച്ചാല്‍ മാത്രമേ ഉപഭോക്താവിന് 3.98 ലക്ഷം രൂപ പലിശയിനത്തില്‍ ലാഭിക്കാന്‍ സാധിക്കൂ. എന്നാല്‍ നിരക്കുകള്‍ കുറയുകയോ മാറ്റമില്ലാതെ തുടരുകയോ ചെയ്താല്‍ ഈ സാമ്പത്തിക ലാഭം കിട്ടില്ല.

ക്രെഡിറ്റ് സ്‌കോറും മാറാനുള്ള ഫീസും

നിങ്ങള്‍ക്ക് മികച്ച ക്രെഡിറ്റ് സ്‌കോര്‍ ഉണ്ടെങ്കില്‍ വളരെ കുറഞ്ഞ നിരക്കില്‍ തന്നെ ഫ്‌ലോട്ടിങ് ലോണുകള്‍ ലഭിക്കും. ഇത്തരം സാഹചര്യത്തില്‍ പ്രീമിയം നല്‍കി ഹൈബ്രിഡ് ലോണുകള്‍ എടുക്കേണ്ട ആവശ്യമില്ല. എന്നാല്‍ മിതമായ സ്‌കോര്‍ (700-725) ഉള്ളവര്‍ക്ക് ഫ്‌ലോട്ടിങ് നിരക്കുകള്‍ കൂടുതലായിരിക്കും എന്നതിനാല്‍ അവര്‍ക്ക് ഹൈബ്രിഡ് ലോണുകള്‍ തെരഞ്ഞെടുക്കുന്നത് കുറച്ചുകൂടി ആകര്‍ഷകമായിരിക്കും.

ഹൈബ്രിഡ് ലോണ്‍ എടുത്തതിന് ശേഷം പിന്നീട് ഫ്‌ലോട്ടിങ് നിരക്കിലേക്ക് മാറാം എന്ന് കരുതിയാല്‍ വലിയൊരു തുക പിഴയായി നല്‍കേണ്ടി വരും. ഇതിനായി കുടിശ്ശികയുള്ള തുകയുടെ 0.5% മുതല്‍ 4% വരെ ബാങ്കുകള്‍ ഫീസായി ഈടാക്കും. ഇതിനൊപ്പം 18% ജിഎസ്ടിയും നല്‍കണം.

ചുരുക്കത്തില്‍ മിക്കവാറും ആളുകള്‍ക്ക് ഏറ്റവും ലാഭകരം സാധാരണ നിലയിലുള്ള റിപ്പോ ലിങ്ക്ഡ് ഫ്‌ലോട്ടിങ് ലോണുകള്‍ തന്നെയാണ്. എന്നാല്‍, ഭാവിയില്‍ പലിശ നിരക്കിലെ മാറ്റങ്ങള്‍ ഇഎംഐയെ ബാധിക്കരുതെന്ന് നിര്‍ബന്ധമുള്ളവര്‍ക്കും, തുടക്കത്തില്‍ ഫിക്‌സഡ് നിരക്കിനായി അധികം പ്രീമിയം നല്‍കേണ്ടാത്ത സാഹചര്യത്തിലും മാത്രം ഹൈബ്രിഡ് ലോണുകളെക്കുറിച്ച് ചിന്തിക്കുന്നതാണ് നല്ലത്.

റിസ്ക് എടുക്കണ്ട! പണം ബാങ്കിലിടണോ അതോ പോസ്റ്റ് ഓഫീസിലോ? ഉയർന്ന ലാഭം നേടാൻ ശ്രദ്ധിക്കേണ്ട കാര്യങ്ങൾ

Sangeetha KS — Mon, 14 Sep 2026 10:37:45 +0530

ബാങ്ക് ഫിക്സഡ് ഡെപ്പോസിറ്റുകളും പോസ്റ്റ് ഓഫീസ് നിക്ഷേപ പദ്ധതികളും തമ്മിലുള്ള വ്യത്യാസങ്ങളും, ഓരോ പദ്ധതിയുടെയും സവിശേഷതകളും താഴെ വിശദമായി നൽകുന്നു.

പെട്ടെന്ന് കുറച്ചധികം പണം കയ്യിൽ വന്നാൽ, അത് നിക്ഷേപമാക്കുകയാണ് ലക്ഷ്യമെങ്കിൽ നമ്മൾ ആദ്യം ആലോചിക്കുക പണം സ്ഥിര നിക്ഷേപമാക്കാം എന്നാണ്. അതിന് എസ് ബി ഐ പോലുള്ള പ്രമുഖ ബാങ്കുകളെയാണ് നമ്മൾ ആശ്രയിക്കാറുള്ളതും. എന്നാൽ എസ്‌ബിഐ പോലെയുള്ള പ്രമുഖ ബാങ്കുകളേക്കാൾ ഉയർന്ന പലിശ നിരക്കാണ് ഇപ്പോൾ പോസ്റ്റ് ഓഫീസ് നൽകുന്നത്.

പലിശ നിരക്കിലെ വ്യത്യാസം നോക്കാം. ഒരു വർഷത്തെ നിക്ഷേപങ്ങൾക്ക് പോസ്റ്റ് ഓഫീസ് 6.90% പലിശ നൽകുമ്പോൾ, എസ്‌ബിഐ നൽകുന്നത് 6.25% മാത്രമാണ്. അതായത് സാധാരണ നിക്ഷേപകർക്ക് പോസ്റ്റ് ഓഫീസ് നിക്ഷേപങ്ങളിന്മേൽ 0.65% കൂടുതൽ ലാഭം ലഭിക്കും. അതേ സമയം, രണ്ടും പൂർണമായും സുരക്ഷിതമായ നിക്ഷേപ മാർഗങ്ങളാണ്. പോസ്റ്റ് ഓഫീസ് കേന്ദ്രസർക്കാരിന്റെ നേരിട്ടുള്ള നിയന്ത്രണത്തിലും, എസ്‌ബിഐ രാജ്യത്തെ ഏറ്റവും വലിയ പൊതുമേഖലാ ബാങ്കുമാണ്.

നിക്ഷേപകർ എങ്ങനെ തീരുമാനം എടുക്കണം?

ലിക്വിഡിറ്റി (എളുപ്പത്തിൽ പണം ലഭ്യമാകൽ): അടിയന്തര ആവശ്യങ്ങൾക്ക് പണം വേണമെന്നുണ്ടെങ്കിൽ ബാങ്ക് എഫ്‌ഡികളാണ് കൂടുതൽ അനുയോജ്യം. മൊബൈൽ ആപ്പുകൾ വഴിയോ നെറ്റ് ബാങ്കിംഗ് വഴിയോ മിനിറ്റുകൾക്കുള്ളിൽ ബാങ്ക് എഫ്‌ഡി ക്യാൻസൽ ചെയ്ത് പണം അക്കൗണ്ടിലെത്തിക്കാൻ സാധിക്കും.

ദീർഘകാല നിക്ഷേപം: അടുത്ത 1 മുതൽ 5 വർഷത്തേക്ക് പണത്തിന്റെ അടിയന്തര ആവശ്യമില്ലാത്തവർക്ക് പോസ്റ്റ് ഓഫീസ് ടൈം ഡെപ്പോസിറ്റോ എസ് സി എസ് എസ് പദ്ധതിയോ തിരഞ്ഞെടുക്കാം.

ഇനി, കുറച്ച് വലിയ തുകയാണ് കയ്യിലുള്ളതെങ്കിൽ അടിയന്തര ആവശ്യങ്ങൾക്കുള്ള പണം ബാങ്ക് അക്കൗണ്ടിലോ ബാങ്ക് എഫ്‌ഡിയിലോ സൂക്ഷിക്കുകയും, ബാക്കി തുക ഉയർന്ന പലിശ ലഭിക്കുന്ന പോസ്റ്റ് ഓഫീസ് പദ്ധതികളിൽ നിക്ഷേപിക്കുകയും ചെയ്യുന്നതാണ് ഏറ്റവും ലാഭകരമായ രീതി.

ഒക്ടോബര്‍ 15 മുതല്‍ യുപിഐ ഇടപാടുകള്‍ക്ക് സര്‍വീസ് ചാര്‍ജ് വരുമോ? ഉപഭോക്താക്കളെ ബാധിക്കുമോ? അറിയേണ്ടതെല്ലാം

Sangeetha KS — Fri, 25 Sep 2026 16:27:20 +0530

ഒക്ടോബര്‍ 15 മുതല്‍ യുപിഐ പേയ്മെന്റുകളില്‍ സുപ്രധാനമായ ചില മാറ്റങ്ങള്‍ വരികയാണ്. 2,000 രൂപയ്ക്ക് മുകളിലുള്ള ചില ഇടപാടുകള്‍ക്ക് മര്‍ച്ചന്റ് ഡിസ്‌കൗണ്ട് റേറ്റ് അഥവാ സര്‍വീസ് ചാര്‍ജ് ഏര്‍പ്പെടുത്തുന്നു എന്നതാണ് പ്രധാന മാറ്റം. പുതിയ നിയമം സാധാരണക്കാരെ ബാധിക്കുമോ? ആര്‍ക്കൊക്കെയാണ് ഈ ഫീസ് നല്‍കേണ്ടി വരിക? വിശദമായി അറിയാം.

ഉപഭോക്താക്കള്‍ (സാധാരണക്കാര്‍)

യുപിഐ ഉപയോഗിക്കുമ്പോള്‍ ഉപഭോക്താക്കള്‍ ഫീസ് നല്‍കണോ?

വേണ്ട. ഈ ഫീസ് നല്‍കേണ്ടത് കച്ചവടക്കാരാണ്, ഉപഭോക്താക്കളല്ല. സാധനങ്ങള്‍ വാങ്ങുമ്പോള്‍ നിങ്ങള്‍ പണമായി നല്‍കിയാലും കാര്‍ഡ് ഉപയോഗിച്ചാലും യുപിഐ ഉപയോഗിച്ചാലും ഒരേ വില തന്നെ നല്‍കിയാല്‍ മതിയാകും.

സുഹൃത്തുക്കള്‍ക്കോ ബന്ധുക്കള്‍ക്കോ പണം അയക്കുമ്പോള്‍ ചാര്‍ജ് വരുമോ?

ഇല്ല. യുപിഐ പരിധിക്കുള്ളില്‍ നിന്നുകൊണ്ട് വ്യക്തികള്‍ തമ്മില്‍ നടത്തുന്ന ഇത്തരം ഇടപാടുകള്‍ക്ക് യാതൊരു ഫീസും ഈടാക്കില്ല.

ഒടിടി, സിസ്റ്റമാറ്റിക് ഇന്‍വെസ്റ്റ്‌മെന്റ് പ്ലാന്‍, കറന്റ് ബില്‍ എന്നിവയ്ക്കുള്ള യുപിഐ ഓട്ടോപേ സംവിധാനത്തിന് ചാര്‍ജ് നല്‍കണോ?

വേണ്ട. ഇത്തരം പേയ്മെന്റുകള്‍ക്ക് ഉപഭോക്താക്കളോ വ്യാപാരികളോ യാതൊരുവിധ ഫീസും നല്‍കേണ്ടതില്ല.

പ്രതിമാസം 1 ലക്ഷത്തില്‍ താഴെ യുപിഐ വഴി ലഭിക്കുന്ന ചെറുകിട വ്യാപാരികള്‍

ആരാണ് ഈ ചെറുകിട വ്യാപാരികള്‍?

യുപിഐ ക്യുആര്‍ കോഡ് വഴി സ്വന്തം അക്കൗണ്ടിലേക്ക് ഒരു മാസം പരമാവധി ഒരു ലക്ഷം രൂപ വരെ സ്വീകരിക്കുന്ന വഴിയോര കച്ചവടക്കാര്‍ക്ക് ഫീസ് ബാധകമാണോ?

അല്ല. ഈ വിഭാഗത്തിലുള്ള കച്ചവടക്കാര്‍ക്ക് ഒരു ഇടപാട് 2,000 രൂപയ്ക്ക് മുകളിലായാല്‍ പോലും യാതൊരു ഫീസും നല്‍കേണ്ടതില്ല.

മാസവരുമാനം ഒരു ലക്ഷം കഴിഞ്ഞാല്‍ എന്ത് സംഭവിക്കും?

തുടര്‍ച്ചയായ മൂന്ന് മാസം ഒരു ലക്ഷം രൂപയ്ക്ക് മുകളില്‍ യുപിഐ വഴി പണം സ്വീകരിച്ചാല്‍ ഇവരെ ബാങ്കുകള്‍ പി2എം കാറ്റഗറിയിലേക്ക് മാറ്റും. അതിനുശേഷം മാത്രമേ അവര്‍ക്ക് ഫീസ് ബാധകമാകൂ.

പ്രതിമാസം 1 ലക്ഷത്തിന് മുകളില്‍ ലഭിക്കുന്ന വന്‍കിട വ്യാപാരികള്‍

ആരാണ് ഫീസ് നല്‍കേണ്ടത്? എത്രയാണ് തുക?

പി2എം കാറ്റഗറിയില്‍ ഉള്‍പ്പെടുന്ന വലിയ ബിസിനസുകാര്‍ക്കാണ് 2,000 രൂപയ്ക്ക് മുകളിലുള്ള ഇടപാടുകള്‍ക്ക് 0.4 ശതമാനം ഫീസ് നല്‍കേണ്ടി വരിക. 2,000 രൂപ വരെയുള്ള ഇടപാടുകള്‍ക്ക് യാതൊരു ഫീസും നല്‍കേണ്ടതില്ല. 75,000 രൂപയ്ക്ക് മുകളിലുള്ള ഇടപാടുകള്‍ക്ക് ഈടാക്കുന്ന പരമാവധി ഫീസ് 300 രൂപയായി നിജപ്പെടുത്തിയിട്ടുണ്ട്.

എങ്ങനെയാണ് ഇത് ഈടാക്കുന്നത്? ഒരു ഉദാഹരണം നോക്കാം.

ഒരു വലിയ സൂപ്പര്‍ മാര്‍ക്കറ്റില്‍ നടക്കുന്ന മൂന്ന് ഇടപാടുകള്‍ ശ്രദ്ധിക്കുക.

ഉദാ.1: ഒരാള്‍ 1,500 രൂപയുടെ സാധനം വാങ്ങുന്നു. ഇവിടെ തുക 2000-ല്‍ താഴെയായതിനാല്‍ വ്യാപാരി ഫീസ് നല്‍കേണ്ടതില്ല.

ഉദാ. 2: രണ്ടാമതൊരാള്‍ 10,000 രൂപയുടെ സാധനം വാങ്ങുന്നു. തുക 2,000 കഴിഞ്ഞതിനാല്‍ വ്യാപാരി 0.4% തുകയായ 40 രൂപയും അതിന്റെ ജിഎസ്ടിയും യുപിഐ സേവനം നല്‍കുന്ന ബാങ്കിന് നല്‍കണം.

ഉദാ. 3: മൂന്നാമതൊരാള്‍ 1 ലക്ഷം രൂപയുടെ സാധനം വാങ്ങുന്നു. 0.4% പ്രകാരം 400 രൂപ വരും. എന്നാല്‍ 75,000 രൂപയ്ക്ക് മുകളിലുള്ള ഏത് തുകയ്ക്കും പരമാവധി 300 രൂപ മാത്രമേ ഫീസായി ഈടാക്കൂ. അതിനാല്‍ വ്യാപാരി 300 രൂപയും അതിന്റെ ജിഎസ്ടിയും നല്‍കണം. ഈ മൂന്ന് സാഹചര്യങ്ങളിലും ഉപഭോക്താവ് സാധനത്തിന്റെ വില മാത്രം നല്‍കിയാല്‍ മതിയാകും

2,000 രൂപ എന്ന പരിധി ഒരു ദിവസത്തേക്കുള്ളതാണോ?

അല്ല. ഇത് ഓരോ ഇടപാടിനും ഉള്ള പരിധിയാണ്. അതായത്, 2000 രൂപയ്ക്ക് താഴെയുള്ള എത്ര ഇടപാടുകള്‍ വേണമെങ്കിലും വ്യാപാരികള്‍ക്ക് സൗജന്യമായി നടത്താം.

മറ്റ് പ്രധാന വിവരങ്ങള്‍

പ്രത്യേക കാറ്റഗറികള്‍ക്കുള്ള ഇളവ്: റെയില്‍വേ, ടെലികോം, ഇന്‍ഷുറന്‍സ്, ഇന്ധനം, ബില്‍ പേയ്മെന്റുകള്‍, വിദ്യാഭ്യാസ സ്ഥാപനങ്ങള്‍ തുടങ്ങിയ പ്രത്യേക കാറ്റഗറികള്‍ക്ക് 2,000 രൂപയ്ക്ക് മുകളിലുള്ള ഇടപാടുകള്‍ക്ക് ഓരോ ഇടപാടിനും 5 രൂപ മാത്രമായിരിക്കും ഫീസ്.

കാര്‍ഡുകളെക്കാള്‍ ലാഭകരം യുപിഐ: ക്രെഡിറ്റ് കാര്‍ഡുകള്‍ വഴി പണം സ്വീകരിക്കുമ്പോള്‍ വ്യാപാരികള്‍ക്ക് സാധാരണ 1.5% മുതല്‍ 2.5% വരെയും ഡെബിറ്റ് കാര്‍ഡുകള്‍ക്ക് 0.90% വരെയുമാണ് എംഡിആര്‍ നല്‍കേണ്ടി വരുന്നത്. എന്നാല്‍ വലിയ വ്യാപാരികള്‍ക്ക് യുപിഐയില്‍ ഇത് വെറും 0.4 ശതമാനം മാത്രമാണ്.

4.49 ലക്ഷം രൂപയുടെ ഐഫോണ്‍ ഡ്യുവോ വാങ്ങണോ അതോ ആ പണം നിക്ഷേപിക്കണോ? സാമ്പത്തിക വിദഗ്ധര്‍ പറയുന്നത് ഇങ്ങനെ

Sangeetha KS — Tue, 15 Sep 2026 15:32:15 +0530

ഇന്ത്യയില്‍ 4.49 ലക്ഷം രൂപ വിലയുള്ള ഐഫോണ്‍ ഡ്യുവോ 2ടിബി വിപണിയിലെത്തുമ്പോള്‍ പലരുടെയും മനസിലുള്ള ചോദ്യമിതാണ്. ഇത്രയും വലിയ തുക മുടക്കി ഈ ആഡംബര ഫോണ്‍ വാങ്ങണോ? അതോ ആ പണം മറ്റെവിടെയെങ്കിലും നിക്ഷേപിക്കണോ? സാമ്പത്തിക വിദഗ്ധരുടെ അഭിപ്രായത്തില്‍ ഫോണിന്റെ വില മാത്രമല്ല നമ്മള്‍ നോക്കേണ്ടത്, പകരം ആ തുക മറ്റ് എന്തിനെങ്കിലും ഉപയോഗിച്ചാലുള്ള ലാഭം കൂടി പരിഗണിച്ചുവേണം തീരുമാനമെടുക്കാന്‍.

4.49 ലക്ഷം രൂപയുടെ ഫോണ്‍ വാങ്ങണോ?

സമ്പത്ത് വര്‍ധിപ്പിക്കുന്ന കാര്യം ചിന്തിക്കുമ്പോള്‍ ഇതൊരു നിക്ഷേപമല്ല, മറിച്ച് വെറുമൊരു ഉപഭോഗച്ചെലവ മാത്രമാണ്. ഒരു ഇന്‍ഡക്‌സ് ഫണ്ടില്‍ നിക്ഷേപിച്ചാല്‍ ഈ തുകയ്ക്ക് കാലക്രമേണ വലിയ വളര്‍ച്ചയുണ്ടാകും. എന്നാല്‍ ഒരു സ്മാര്‍ട്ട്‌ഫോണിന്റെ മൂല്യം അത് വാങ്ങുന്ന ആ നിമിഷം മുതല്‍ താഴേക്ക് പോകും. എങ്കിലും, കൃത്യമായ ഇന്‍ഷുറന്‍സ്, ദീര്‍ഘകാല നിക്ഷേപങ്ങള്‍, എമര്‍ജന്‍സി ഫണ്ട് എന്നിവ മുന്‍കൂട്ടി ഉറപ്പാക്കിയിട്ടുള്ള ഒരാള്‍ക്ക് സ്വന്തം ഇഷ്ടപ്രകാരം ഈ ഫോണ്‍ വാങ്ങുന്നതില്‍ തെറ്റില്ല.

പകരം ഈ തുക നിക്ഷേപിച്ചാല്‍ എന്ത് സംഭവിക്കും?

ഇന്‍ഡക്‌സ് ഫണ്ടില്‍ നിക്ഷേപിച്ചാല്‍ (11% വാര്‍ഷിക വളര്‍ച്ച നിരക്ക്)

10 വര്‍ഷം കഴിയുമ്പോള്‍: ഏകദേശം 12.7 ലക്ഷം രൂപ
15 വര്‍ഷം കഴിയുമ്പോള്‍: 21.5 ലക്ഷം രൂപ
20 വര്‍ഷം കഴിയുമ്പോള്‍: 36.2 ലക്ഷം രൂപ

ഡൈവേഴ്സിഫൈഡ് ഇക്വിറ്റി ഫണ്ടില്‍ നിക്ഷേപിച്ചാല്‍ (13% വാര്‍ഷിക വളര്‍ച്ച നിരക്ക് പ്രതീക്ഷിച്ചാല്‍)

10 വര്‍ഷം കഴിയുമ്പോള്‍: 15.25 ലക്ഷം രൂപ
15 വര്‍ഷം കഴിയുമ്പോള്‍: 28.1 ലക്ഷം രൂപ
20 വര്‍ഷം കഴിയുമ്പോള്‍: 51.8 ലക്ഷം രൂപ

അതായത്, ഫോണ്‍ വാങ്ങാന്‍ ഇന്ന് നല്‍കുന്ന 4.49 ലക്ഷം രൂപ മാത്രമല്ല നിങ്ങളുടെ നഷ്ടം. ഭാവിയില്‍ അത് നിക്ഷേപത്തിലൂടെ ഉണ്ടാകുമായിരുന്ന വലിയൊരു സമ്പത്ത് കൂടിയാണ്.

വാങ്ങുന്നതിന് മുന്‍പ് സ്വയം ചോദിക്കേണ്ട കാര്യങ്ങള്‍

കയ്യില്‍ ആവശ്യത്തിന് അധികം പണമുള്ളവര്‍ ഈ ഫോണ്‍ വാങ്ങുന്നതില്‍ തെറ്റില്ല. എന്നാല്‍ നിങ്ങളുടെ സമ്പാദ്യത്തിന്റെ വലിയൊരു പങ്കാണ് ഇതിനായി ചെലവാക്കുന്നതെങ്കില്‍ ആ പണം നിക്ഷേപിക്കുന്നതാണ് ബുദ്ധി. ഇത്രയും വലിയൊരു തുക ചെലവാക്കുന്നതിന് മുന്‍പ് താഴെ പറയുന്ന കാര്യങ്ങള്‍ നിങ്ങള്‍ക്ക് ഉണ്ടെന്ന് ഉറപ്പുവരുത്തണം.

6 മുതല്‍ 8 മാസത്തേക്ക് വരെയുള്ള ചെലവുകള്‍ക്കുള്ള എമര്‍ജന്‍സി ഫണ്ട്
ആരോഗ്യ ഇന്‍ഷുറന്‍സും ടേം ഇന്‍ഷുറന്‍സും.
ഉയര്‍ന്ന പലിശയുള്ള കടബാധ്യതകള്‍ ഇല്ലാതിരിക്കുക.
നിങ്ങളുടെ ആകെയുള്ള പ്രതിമാസ ഇഎംഐകളും മറ്റ് ഫിക്‌സഡ് ചെലവുകളും മാസവരുമാനത്തിന്റെ 40-50 ശതമാനത്തില്‍ കൂടാന്‍ പാടില്ല.

ചുരുക്കത്തില്‍ നിങ്ങളുടെ സാമ്പത്തിക ലക്ഷ്യങ്ങളെയോ എമര്‍ജന്‍സി ഫണ്ടിനെയോ ബാധിക്കാത്ത രീതിയില്‍, കയ്യിലുള്ള അധികപ്പണം ഉപയോഗിച്ചാണ് ഐഫോണ്‍ ഡ്യുവോ വാങ്ങുന്നതെങ്കില്‍ അതൊരു മോശം തീരുമാനമല്ല. എന്നാല്‍ നിക്ഷേപിക്കേണ്ടതോ മറ്റ് അത്യാവശ്യങ്ങള്‍ക്ക് ഉപയോഗിക്കേണ്ടതോ ആയ പണമെടുത്താണ് ഫോണ്‍ വാങ്ങുന്നതെങ്കില്‍ വലിയ സാമ്പത്തിക നഷ്ടമായിരിക്കും ഫലം.

കീശ കീറുന്നത് മൊത്തം ശനിയും ഞായറും! വാരാന്ത്യങ്ങളിൽ പണം വാരിയെറിഞ്ഞ് നഗരവാസികൾ

Sangeetha KS — Sat, 12 Sep 2026 17:36:47 +0530

ശനിയും ഞായറും ജോലിയിൽ നിന്ന് വിശ്രമത്തിന് മാത്രമല്ല ഇന്ത്യയിലെ നഗരങ്ങളിൽ താമസിക്കുന്നവർക്ക് അത് ചെലവ് ദിവസം കൂടിയാണെന്നാണ് പുറത്തു വന്ന പുതിയ പഠനം പറയുന്നത്. ഒരു ആഴ്ചയിലെ ആകെ ചെലവിന്റെ 61.5 ശതമാനവും ശനി, ഞായർ ദിവസങ്ങളിലാണ് നടക്കുന്നതെന്നാണ് ഇന്ത്യയിലെ നഗര സമ്പദ്‌വ്യവസ്ഥയെക്കുറിച്ചുള്ള പുതിയ റിപ്പോർട്ടിൽ പറയുന്നത്. നഗരങ്ങളിലെ ഒരു ശരാശരി ഉപഭോക്താവ് പ്രവൃത്തിദിനങ്ങളിൽ 6,724 രൂപ ചെലവഴിക്കുമ്പോൾ, വാരാന്ത്യങ്ങളിൽ ഇത് 10,732 രൂപയായി ഉയരുന്നുണ്ടെന്നും റിപ്പോർട്ടിൽ പറയുന്നു.

പ്രവൃത്തിദിനങ്ങളിൽ ഓഫീസുകളിലേക്കുള്ള യാത്രാച്ചെലവും വീട്ടുസാധനങ്ങളും ആണ് പ്രധാനച്ചെലവുകൾ. എന്നാൽ, വാരാന്ത്യങ്ങളിൽ ജീവിതശൈലിയിലും വിനോദങ്ങളിലുമാണ് ചെലവഴിക്കൽ കുത്തനെ കൂടുന്നത്. ഫാഷൻ, വസ്ത്രങ്ങൾ എന്നിവയ്ക്കുള്ള ചെലവ് സാധാരണ ദിവസങ്ങളിലെ 529 രൂപയിൽ നിന്ന് വാരാന്ത്യങ്ങളിൽ 1,075 രൂപയായി ഇരട്ടിക്കുന്നു. സിനിമ ഉൾപ്പെടെയുള്ള വിനോദങ്ങൾക്കുള്ള ചെലവ് 328 രൂപയിൽ നിന്ന് 662 രൂപയായും, ഇലക്ട്രോണിക്‌സ് ഉൽപ്പന്നങ്ങൾക്കുള്ള ചെലവ് 350 രൂപയിൽ നിന്ന് 695 രൂപയായും ഉയരുന്നുണ്ട്. റെസ്റ്റോറന്റ് ആഹാരത്തിനും ഫുഡ് ഡെലിവറിക്കുമായി വാരാന്ത്യങ്ങളിൽ ഒരു കുടുംബത്തിന് ശരാശരി 959 രൂപയോളം ചെലവാക്കുന്നുണ്ടെന്നും റിപ്പോർട്ടുകൾ പറയുന്നു. ഇതിന് പുറമേ പലചരക്ക് സാധനങ്ങൾ വാങ്ങാൻ 1.64 ഇരട്ടിയും, സൗന്ദര്യ വർദ്ധക വസ്തുക്കൾ വാങ്ങാൻ 1.54 ഇരട്ടിയും വർധനവുണ്ടാകുന്നു.

എന്നാൽ, വാരാന്ത്യങ്ങളിലെ ഈ ചെലവാക്കൽ ട്രെന്റ് വൻകിട മെട്രോ നഗരങ്ങളിൽ മാത്രം ഒതുങ്ങുന്ന ഒന്നല്ലെന്നതാണ് വസ്തുത. പ്രവൃത്തിദിനങ്ങളെ അപേക്ഷിച്ച് വാരാന്ത്യങ്ങളിൽ ഏറ്റവും കൂടുതൽ പണം ചെലവഴിക്കുന്ന നഗരങ്ങളിൽ ഒന്നാമത് ജയ്പൂർ ആണ്. ഉപഭോക്താക്കളുടെ മാസവരുമാനം വർധിക്കുന്നതിനനുസരിച്ച് വാരാന്ത്യങ്ങളിലെ ആഡംബര ചെലവഴിക്കലും കുത്തനെ കൂടുന്നു. പ്രതിമാസം 25,000 രൂപയിൽ താഴെ വരുമാനമുള്ളവർ വാരാന്ത്യങ്ങളിൽ 1.37 ഇരട്ടി മാത്രം അധികം ചെലവഴിക്കുമ്പോൾ, 25,000 മുതൽ 50,000 രൂപ വരെ വരുമാനമുള്ളവരിൽ ഇത് 1.56 ഇരട്ടിയും, 50,000 മുതൽ 1 ലക്ഷം രൂപ വരെ വരുമാനമുള്ളവരിൽ 1.78 ഇരട്ടിയുമാണ്. എന്നാൽ പ്രതിമാസം 1 ലക്ഷം രൂപയ്ക്ക് മുകളിൽ വരുമാനമുള്ളവരുടെ കാര്യമെടുക്കുമ്പോൾ വാരാന്ത്യ ചെലവ് പ്രവൃത്തിദിനങ്ങളേക്കാൾ 2.53 ഇരട്ടിയായി മാറുന്നു. ഇവർ സാധാരണ ദിവസങ്ങളിൽ 8,622 രൂപ ചെലവഴിക്കുമ്പോൾ വാരാന്ത്യങ്ങളിൽ 21,779 രൂപയോളമാണ് ചെലവാക്കുന്നത്.

ടാറ്റാ സൺസും പ്രൈസും (PRICE) ചേർന്ന് 25 നഗരങ്ങളിലെ 6,655 ആളുകൾക്കിടയിൽ നടത്തിയ പഠന റിപ്പോർട്ടാണ് ഇന്ത്യൻ നഗരങ്ങളിലെ മാറുന്ന ഉപഭോഗ സംസ്‌കാരം വ്യക്തമാക്കുന്നത്. പ്രവൃത്തിദിനങ്ങളിൽ സമയം ലഭിക്കാത്തതും എന്നാൽ വാരാന്ത്യങ്ങളിൽ ലഭിക്കുന്ന ഒഴിവുസമയത്ത് ഷോപ്പിംഗിനും കുടുംബത്തോടൊപ്പം സമയം ചെലവഴിക്കാനും ആളുകൾ താല്പര്യം കാണിക്കുന്നതുമാണ് ശനിയും ഞായറും വലിയൊരു സാമ്പത്തിക വിപണിയായി മാറാൻ കാരണം.

ആദ്യത്തെ ഭവനവായ്പ അടച്ച് തീര്‍ന്നിട്ടില്ല! രണ്ടാമതൊരു വീട് കൂടി വാങ്ങാൻ പറ്റുമോ? ഈ കാര്യങ്ങള്‍ ശ്രദ്ധിക്കാം

Sangeetha KS — Thu, 24 Sep 2026 14:53:51 +0530

ആദ്യത്തെ വീടിന്റെ വായ്പ അടച്ചു തീരുന്നതിന് മുന്‍പ് തന്നെ മറ്റൊരു വീട് കൂടി വാങ്ങാന്‍ ആഗ്രഹിക്കുന്നവരാണോ നിങ്ങള്‍? ഒന്നിലധികം ഭവന വായ്പകള്‍ എടുക്കാമെങ്കിലും ഓരോ പുതിയ വായ്പയ്ക്കും ബാങ്കുകളുടെ പ്രത്യേക അനുമതി ആവശ്യമാണ്. ഇതിനായി നിലവിലെ ബാങ്കിനെയോ മറ്റ് ബാങ്കുകളെയോ സമീപിക്കാം. ബുദ്ധിമുട്ടുകളില്ലാതെ വായ്പകള്‍ തിരിച്ചടയ്ക്കാന്‍ നിങ്ങള്‍ക്ക് സാധിക്കുമോ എന്നതിനെ ആശ്രയിച്ചായിരിക്കും ബാങ്കുകള്‍ ലോണ്‍ അനുവദിക്കുക. നിങ്ങളുടെ ശമ്പളം, നിലവിലുള്ള ഇഎംഐകള്‍, ക്രെഡിറ്റ് ഹിസ്റ്ററി, മറ്റ് സാമ്പത്തിക ബാധ്യതകള്‍ എന്നിവയ്ക്കൊപ്പം പ്രായം, ജോലി സ്ഥിരത, വാങ്ങുന്ന പ്രോപ്പര്‍ട്ടി എന്നിവയും ബാങ്കുകള്‍ പരിശോധിക്കും.

രണ്ടാമതൊരു ഭവനവായ്പ എടുക്കുന്നതിന് മുന്‍പ് സ്വയം ചോദിക്കേണ്ട 3 പ്രധാന ചോദ്യങ്ങള്‍

1. അടുത്ത 12 മാസത്തേക്ക് വരുമാനം പൂര്‍ണ്ണമായും നിലച്ചാല്‍, ഈ രണ്ട് പ്രോപ്പര്‍ട്ടികളുടെയും ചെലവുകള്‍ ബുദ്ധിമുട്ടില്ലാതെ കൊണ്ടുപോകാന്‍ സാധിക്കുമോ?

2. അടുത്ത 7 വര്‍ഷത്തേക്ക്‌വാങ്ങുന്ന വസ്തുവിന്റെ വില വര്‍ദ്ധിച്ചില്ലെങ്കിലും, ഈ നിക്ഷേപത്തില്‍ പൂര്‍ണ്ണ തൃപ്തിയുണ്ടാകുമോ?

3. അടുത്ത വര്‍ഷം മികച്ചതൊരു ബിസിനസ്സ് അല്ലെങ്കില്‍ നിക്ഷേപ അവസരം വന്നാല്‍, ഈ ഭവനവായ്പയുടെ ഇഎംഐ കാരണം അതില്‍ പങ്കുചേരാന്‍ സാധിക്കാതെ വരുമോ?

'എനിക്ക് ലോണ്‍ കിട്ടുമോ?' എന്ന ചിന്തയില്‍ നിന്നും 'എനിക്ക് ഈ ലോണ്‍ ബാധ്യതയാകാതെ കൊണ്ടുപോകാന്‍ സാധിക്കുമോ?' എന്ന ചിന്തയിലേക്കാണ് ഈ ചോദ്യങ്ങള്‍ വിരല്‍ ചൂണ്ടുന്നത്. വായ്പ തിരിച്ചടയ്ക്കാനുള്ള കഴിവ് നോക്കിയാണ് ബാങ്ക് ലോണ്‍ നല്‍കുന്നത്. എന്നാല്‍ സാമ്പത്തിക ആസൂത്രണം അതിനും ഒരുപടി മുന്നിലായിരിക്കണം.

1. സാമ്പത്തിക ഭദ്രത ഉറപ്പാക്കുക

മൊത്തം സാമ്പത്തിക ആസ്തിയില്‍ നിന്ന് ബാധ്യതകള്‍ കിഴിച്ച് സാമ്പത്തിക ആസ്തി ആദ്യം കണക്കാക്കുക. തുടര്‍ന്ന് എളുപ്പത്തില്‍ പണമാക്കി മാറ്റാന്‍ സാധിക്കുന്ന നിക്ഷേപങ്ങളെ നിങ്ങളുടെ വാര്‍ഷിക ജീവിതച്ചെലവ് കൊണ്ട് ഹരിക്കുക. ഉദാഹരണത്തിന്: 3 കോടി രൂപ ആസ്തിയും വര്‍ഷത്തില്‍ 30 ലക്ഷം രൂപ ജീവിതച്ചെലവും ഉള്ള ഒരാള്‍ക്ക് അടുത്ത 10 വര്‍ഷത്തേക്കുള്ള ചെലവുകള്‍ക്കുള്ള തുകയുണ്ട്. എന്നാല്‍ മറ്റൊരു പ്രോപ്പര്‍ട്ടി കൂടി വാങ്ങുമ്പോള്‍ നിങ്ങളുടെ ഈ സാമ്പത്തിക ഭദ്രത കുറഞ്ഞേക്കാം (ഇഎംഐ അടയ്ക്കാന്‍ സാധിക്കുന്നതാണെങ്കില്‍ കൂടി ഇത് സംഭവിക്കാം).

2. പെട്ടെന്നെടുക്കാന്‍ കയ്യില്‍ പണമുണ്ടെന്ന് ഉറപ്പാക്കുക

രണ്ടാമതൊരു വസ്തു വാങ്ങുമ്പോള്‍ സമ്പത്തിന്റെ വലിയൊരു ഭാഗം അതില്‍ കുടുങ്ങിക്കിടക്കും. വസ്തു പെട്ടെന്ന് വിറ്റ് പണമാക്കാന്‍ സാധിക്കില്ല. അതിനാല്‍ അടിയന്തര ആവശ്യങ്ങള്‍ക്കും മറ്റ് ചെലവുകള്‍ക്കും കയ്യില്‍ പണമുണ്ടെന്ന് ഉറപ്പാക്കണം.

3. പ്രതിസന്ധി ഘട്ടങ്ങളിലെ തിരിച്ചടവ്

മാസം 3 ലക്ഷം രൂപ വരുമാനമുള്ള ഒരാള്‍ക്ക് രണ്ട് ലോണുകളിലായി 1.5 ലക്ഷം രൂപ ഇഎംഐ വരുമ്പോള്‍ ശമ്പളത്തിന്റെ പകുതിയും അതിനായി ചിലവാകും. പെട്ടെന്ന് വരുമാനം കുറയുകയോ പ്രതീക്ഷിച്ച ബോണസ് ലഭിക്കാതിരിക്കുകയോ ചെയ്താല്‍ ഇത് താങ്ങാന്‍ സാധിക്കുമോ എന്ന് പരിശോധിക്കണം.

4. പണം മറ്റ് ആവശ്യങ്ങള്‍ക്ക് ഉപയോഗിക്കാമോ എന്ന് ചിന്തിക്കുക

50 ലക്ഷം രൂപ ഒരു പ്രോപ്പര്‍ട്ടിയില്‍ നിക്ഷേപിക്കുമ്പോള്‍ മറ്റ് അത്യാവശ്യ കാര്യങ്ങള്‍ക്കായി മാറ്റിവെക്കാന്‍ പണം കുറയും. റിട്ടയര്‍മെന്റ് സേവിങ്‌സ്, കുട്ടികളുടെ വിദ്യാഭ്യാസം, മികച്ച ബിസിനസ്സ് അവസരങ്ങള്‍, അടിയന്തര ഫണ്ട് എന്നിവയുമായി ഈ നിക്ഷേപത്തെ താരതമ്യം ചെയ്യുക.

ഹെല്‍ത്ത് ഇന്‍ഷുറന്‍സ് കൃത്യസമയത്ത് പുതുക്കാന്‍ മറക്കല്ലേ! പോളിസി മുടങ്ങിയാല്‍ വന്‍ നഷ്ടം; ശ്രദ്ധിക്കേണ്ട കാര്യങ്ങള്‍

Sangeetha KS — Sat, 26 Sep 2026 11:27:05 +0530

അപ്രതീക്ഷിതമായി വരുന്ന ആരോഗ്യപ്രശ്‌നങ്ങള്‍ക്കും ചികിത്സാച്ചെലവുകള്‍ക്കും വലിയൊരു ആശ്വാസമാണ് ഹെല്‍ത്ത് ഇന്‍ഷുറന്‍സ്. ഒപ്പം മികച്ച നികുതി ലാഭവും ഇത് നല്‍കുന്നുണ്ട്. എന്നാല്‍ പോളിസി കൃത്യസമയത്ത് പുതുക്കാന്‍ മറന്നാല്‍ കാര്യങ്ങള്‍ വഷളാകും. കാലാവധി തീരുന്നതിന് മുന്‍പ് പുതുക്കിയില്ലെങ്കില്‍ പോളിസി ലാപ്‌സ് ആകാനും, അതുവരെ നേടിയ ആനുകൂല്യങ്ങളും വെയിറ്റിംഗ് പിരിയഡിലെ ഇളവുകളും നഷ്ടപ്പെടാനും ഇത് കാരണമാകും.

പല ഇന്‍ഷുറന്‍സ് കമ്പനികളും 15 മുതല്‍ 30 ദിവസം വരെ 'ഗ്രേസ് പീരിയഡ്' നല്‍കാറുണ്ടെങ്കിലും, ഈ സമയത്തും പുതുക്കിയില്ലെങ്കില്‍ പ്രത്യേകിച്ച് മുന്‍കാല രോഗങ്ങളുള്ളവര്‍ വലിയ അപകടത്തിലാകും. ഒരു സുരക്ഷാ കവചവുമില്ലാത്ത അവസ്ഥയിലേക്കാണ് ഇത് നയിക്കുന്നത്.

പോളിസി പുതുക്കുമ്പോള്‍ ശ്രദ്ധിക്കേണ്ട പ്രധാന കാര്യങ്ങള്‍

തീയതി കൃത്യമായി ഓര്‍ക്കുക: പോളിസി തീരുന്ന തീയതി മുന്‍കൂട്ടി കുറിച്ചുവെക്കുക. അവസാന തീയതി നഷ്ടപ്പെട്ടാല്‍ ഗ്രേസ് പീരിയഡ് ഉപയോഗപ്പെടുത്താം.

മാറ്റങ്ങള്‍ വിലയിരുത്തുക: പ്രായം കൂടുന്നതനുസരിച്ചോ കുടുംബത്തില്‍ പുതിയ അംഗങ്ങള്‍ എത്തുമ്പോഴോ പുതുതായി രോഗങ്ങള്‍ നിര്‍ണ്ണയിക്കപ്പെടുമ്പോഴോ ആവശ്യാനുസരണം കവറേജ് മാറ്റുകയോ എക്‌സ്ട്രാ കവറേജുകള്‍/റൈഡറുകള്‍ ചേര്‍ക്കുകയോ ചെയ്യാം.

തുക വര്‍ദ്ധിപ്പിക്കുക: ചികിത്സാച്ചെലവുകള്‍ കുത്തനെ ഉയരുന്ന സാഹചര്യത്തില്‍ ഇന്‍ഷുറന്‍സ് തുക കാലാനുസൃതമായി കൂട്ടാന്‍ ശ്രദ്ധിക്കുക. വലിയ തുക വര്‍ദ്ധിപ്പിക്കുമ്പോള്‍ ചിലപ്പോള്‍ മെഡിക്കല്‍ പരിശോധനകള്‍ ആവശ്യമായി വരാം.

പുതിയ നിബന്ധനകള്‍ പരിശോധിക്കുക: എക്‌സ്‌ക്ലൂഷനുകള്‍, കവറേജ് നിബന്ധനകള്‍, പ്രീമിയം തുക എന്നിവയിലെ മാറ്റങ്ങള്‍ പുതുക്കുന്നതിന് മുന്‍പ് പരിശോധിക്കുക. ഐആര്‍ഡിഎഐമാര്‍ഗ്ഗനിര്‍ദ്ദേശപ്രകാരം ഘടനാപരമായ മാറ്റങ്ങള്‍ 90 ദിവസങ്ങള്‍ക്ക് മുന്‍പ് കമ്പനികള്‍ അറിയിച്ചിരിക്കണം.

രേഖകള്‍ സൂക്ഷിക്കുക, കുടുംബത്തെ അറിയിക്കുക: പ്രീമിയം അടച്ചതിന്റെ ഡിജിറ്റല്‍ അല്ലെങ്കില്‍ പ്രിന്റഡ് രേഖകള്‍ സുരക്ഷിതമായി സൂക്ഷിക്കുക. അത്യാഹിത ഘട്ടങ്ങളില്‍ വേഗത്തില്‍ ക്ലെയിം ലഭിക്കുന്നതിനായി പോളിസി വിവരങ്ങളും പുതുക്കിയ വിവരങ്ങളും കുടുംബാംഗങ്ങളെ കൃത്യമായി ധരിപ്പിക്കുക.

കാര്‍ ഇന്‍ഷുറന്‍സ് ക്ലെയിം തടസമില്ലാതെ ലഭിക്കണോ? ഈ കാര്യങ്ങള്‍ നിര്‍ബന്ധമായും അറിഞ്ഞിരിക്കണം

Sangeetha KS — Mon, 14 Sep 2026 16:48:16 +0530

വാഹനം അപകടത്തില്‍പ്പെടുമ്പോഴാണ് പലപ്പോഴും ഇന്‍ഷുറന്‍സ് പോളിസിയുടെ യഥാര്‍ഥ മൂല്യം നാം തിരിച്ചറിയുന്നത്. എന്നാല്‍ ചെറിയതാണെങ്കില്‍ പോലും തെറ്റായ വിവരങ്ങള്‍ നല്‍കുന്നത് കാരണം ക്ലെയിം തുക നിരസിക്കപ്പെടാന്‍ സാധ്യതയേറെയാണ്.

ശ്രദ്ധിക്കേണ്ട പ്രധാന കാര്യങ്ങള്‍

അപകട സ്ഥലത്തെ തെളിവുകള്‍: അപകടസ്ഥലത്തിന്റെ ചിത്രങ്ങളും വീഡിയോകളും പകര്‍ത്തി സൂക്ഷിക്കുന്നത് ക്ലെയിം നടപടികള്‍ എളുപ്പമാക്കും

കൃത്യമായ വിവരങ്ങള്‍ നല്‍കുക: വാഹനം വാങ്ങുമ്പോഴും ഇന്‍ഷുറന്‍സ് എടുക്കുമ്പോഴും മുന്‍പത്തെ ക്ലെയിമുകള്‍, നോ ക്ലെയിം ബോണസ്, വാഹനത്തിന്റെ ഉടമസ്ഥാവകാശം, വരുത്തിയ മാറ്റങ്ങള്‍ തുടങ്ങിയ വിവരങ്ങള്‍ കൃത്യമായി വെളിപ്പെടുത്തണം. തെറ്റായ വിവരങ്ങള്‍ നല്‍കുന്നത് ക്ലെയിം നിരസിക്കപ്പെടാനുള്ള പ്രധാന കാരണമാണ്.

സീറോ ഡെപ്രിസിയേഷന്‍ കവറേജ്: സീറോ ഡെപ്രിസിയേഷന്‍ ആഡ്- ഓണ്‍ ഉണ്ടെങ്കിലും സാധാരണ തേയ്മാനങ്ങള്‍ക്ക് കവറേജ് ലഭിക്കില്ല. എന്‍ജിന്‍ ഓയില്‍, കൂളന്റ്, ബ്രേക്ക് ഓയില്‍, നട്ട്, ബോള്‍ട്ട് തുടങ്ങിയ വസ്തുക്കള്‍ക്ക് പ്രത്യേക ആഡ്-ഓണ്‍ എടുക്കേണ്ടതുണ്ട്. എന്‍ജിന്‍, ടയര്‍ സംരക്ഷണത്തിനും പ്രത്യേക കവറേജ് ആവശ്യമാണ്.

ചെറിയ അറ്റകുറ്റപ്പണികള്‍ക്ക് ക്ലെയിം ചെയ്യരുത്: ചെറിയ അറ്റകുറ്റപ്പണികള്‍ക്ക് ക്ലെയിം ചെയ്താല്‍ നോ ക്ലെയിം ബോണസ് നഷ്ടപ്പെടും. റീന്യൂവല്‍ സമയത്ത് 12,000-15,000 രൂപ ബോണസായി ലാഭിക്കാമെന്നിരിക്കെ 8,000-10,000 രൂപയുടെ റിപ്പയറിങ് ക്ലെയിം സ്വന്തം കൈയില്‍ നിന്ന് അടയ്ക്കുന്നതാണ് ലാഭകരം. എന്നാല്‍ 50,000 രൂപ പോലെയുള്ള വലിയ തുകകള്‍ക്ക് ക്ലെയിം നല്‍കാം.

പഴയ കേടുപാടുകള്‍ പുതിയ ക്ലെയിമില്‍ ഉള്‍പ്പെടുത്തരുത്: പുതിയ അപകടത്തില്‍ പഴയ പോറലുകളോ കേടുപാടുകളോ ഉള്‍പ്പെടുത്താന്‍ ശ്രമിച്ചാല്‍ ക്ലെയിം പൂര്‍ണമായും റദ്ദാക്കപ്പെട്ടേക്കാം. പഴയ കേടുപാടുകള്‍ തിരിച്ചറിയാന്‍ സര്‍വേയര്‍മാര്‍ക്ക് സാധിക്കും.

ഉപയോഗിച്ച കാറുകള്‍ വാങ്ങുമ്പോള്‍: വാഹനം മറ്റൊരാളിലേക്ക് കൈമാറുമ്പോള്‍ തേര്‍ഡ് പാര്‍ട്ടി ഇന്‍ഷുറന്‍സ് ഓട്ടോമാറ്റിക്കായി മാറുമെങ്കിലും സ്വന്തം വാഹനത്തിനായുള്ള കവറേജ് പുതിയ ഉടമയുടെ പേരിലേക്ക് മാറ്റേണ്ടതുണ്ട്.

വാഹനം മോഷ്ടിക്കപ്പെട്ടാല്‍: പൊലീസില്‍ എഫ്.ഐ.ആര്‍ രജിസ്റ്റര്‍ ചെയ്യുകയും ഇന്‍ഷുറന്‍സ് കമ്പനിയെയും ആര്‍.ടി.ഒയെയും ഉടന്‍ അറിയിക്കുകയും വേണം. ആര്‍.സി ബുക്കിന്റെ അസലും കാറിന്റെ താക്കോലുകളും നല്‍കാന്‍ വൈകിയാല്‍ പ്രക്രിയ സങ്കീര്‍ണ്ണമാകും.

ടോട്ടല്‍ ലോസ് വാഹനങ്ങള്‍: വാഹനം പൂര്‍ണമായി നശിച്ചതായി പ്രഖ്യാപിച്ചാലും അതിന്റെ അവശിഷ്ടങ്ങള്‍ക്ക് മൂല്യമുണ്ട്. കമ്പനിയുടെ സഹായത്തോടെയോ അല്ലാതെയോ ഇത് വിറ്റഴിക്കാവുന്നതാണ്.

തേര്‍ഡ് പാര്‍ട്ടിയും പേഴ്‌സണല്‍ ആക്‌സിഡന്റ് കവറും: തേര്‍ഡ് പാര്‍ട്ടി ഇന്‍ഷുറന്‍സ് മറ്റുള്ളവര്‍ക്കുണ്ടാകുന്ന നഷ്ടങ്ങള്‍ക്കുള്ളതാണ്. ഓണ്‍-ഡാമേജ് പോളിസി സ്വന്തം വാഹനത്തെ സംരക്ഷിക്കുന്നു. ഉടമയ്ക്ക്/ഡ്രൈവര്‍ക്കുള്ള പേഴ്‌സണല്‍ ആക്‌സിഡന്റ് കവറേജ് 15 ലക്ഷം രൂപയുടേതാണ്, ഇതിന് നിര്‍ബന്ധിത വാര്‍ഷിക പ്രീമിയം 750 രൂപയാണ്.

ജോലി സ്ഥിരമല്ലേ? വരുമാനം നിലച്ചാലും സാമ്പത്തികമായി തളരാതിരിക്കാന്‍ ഇക്കാര്യങ്ങള്‍ ശ്രദ്ധിക്കാം

Sangeetha KS — Thu, 10 Sep 2026 18:26:03 +0530

ജോലി പോകുന്നതും ശമ്പളം മുടങ്ങുന്നതുമെല്ലാം പണ്ട് താല്‍ക്കാലിക ജീവനക്കാരെ മാത്രം ബാധിക്കുന്ന പ്രശ്‌നമായിരുന്നു. എന്നാല്‍ ഇന്നത് ഏത് മേഖലയിലുള്ളവര്‍ക്കും സംഭവിക്കാവുന്ന ഒന്നാണ്. കമ്പനിയുടെ ഘടനാപരമായ മാറ്റങ്ങള്‍, ഒരു പ്രോജക്റ്റ് അവസാനിക്കുന്നത്, അല്ലെങ്കില്‍ കമ്പനിക്കുണ്ടാകുന്ന നഷ്ടങ്ങള്‍ എന്നിങ്ങനെ കാരണങ്ങള്‍ പലതാകാം. വരുമാനം നിന്നാലും നമ്മുടെ നിത്യനിദാന ചെലവുകള്‍ നിലക്കില്ലല്ലോ? വീട്ടുവാടക, ലോണുകളുടെ ഇഎംഐ, പലചരക്ക് സാധനങ്ങള്‍, കുട്ടികളുടെ സ്‌കൂള്‍ ഫീസ്, ഇന്‍ഷുറന്‍സ് പ്രീമിയം എന്നിവയൊക്കെ മുടങ്ങാതെ അടക്കേണ്ടതുണ്ട്. ജോലി എക്കാലത്തേക്കും സുരക്ഷിതമാക്കാന്‍ നമുക്ക് കഴിഞ്ഞില്ലെങ്കിലും, വരുമാനമില്ലാത്ത ഒരു കാലഘട്ടത്തെ നേരിടാന്‍ സാമ്പത്തികമായി തയ്യാറെടുക്കാന്‍ നമുക്ക് തീര്‍ച്ചയായും കഴിയും.

അടിസ്ഥാന ചെലവുകള്‍ കൃത്യമായി കണക്കാക്കുക

നിക്ഷേപങ്ങളെക്കുറിച്ച് ചിന്തിക്കുന്നതിന് മുന്‍പ്, വീട്ടുചെലവുകള്‍ക്ക് പ്രതിമാസം ചുരുങ്ങിയത് എത്ര തുക വേണ്ടിവരുമെന്ന് കണക്കാക്കുക. വീട്ടുവാടക അല്ലെങ്കില്‍ ഹോം ലോണ്‍ ഇഎംഐ, പലചരക്ക് സാധനങ്ങള്‍, കറന്റ് ബില്‍ പോലുള്ള യൂട്ടിലിറ്റി ബില്ലുകള്‍, സ്‌കൂള്‍ ഫീസ്, ഇന്‍ഷുറന്‍സ്, മരുന്നുകള്‍, യാത്രാച്ചെലവുകള്‍ തുടങ്ങി പെട്ടെന്ന് ഒഴിവാക്കാനാവാത്ത കാര്യങ്ങള്‍ക്ക് മുന്‍ഗണന നല്‍കുക. ഇതിലൂടെ ഒരു മാസം ജീവിക്കാന്‍ വേണ്ട ഏറ്റവും കുറഞ്ഞ തുക എത്രയെന്ന് നിങ്ങള്‍ക്ക് കണ്ടെത്താനാകും. പെട്ടെന്ന് ജോലി പോയാല്‍, പുതിയൊരു ജോലി ലഭിക്കുന്നത് വരെയുള്ള കാലയളവില്‍ നിങ്ങളുടെ സമ്പാദ്യത്തില്‍ നിന്ന് എത്ര തുക കണ്ടെത്തേണ്ടി വരും എന്നതിന്റെ ഒരു ഏകദേശ രൂപം ഇതിലൂടെ ലഭിക്കും.

എമര്‍ജന്‍സി ഫണ്ട് കരുതിവെക്കാം

സ്ഥിരവരുമാനമുള്ള ഒരാള്‍ക്ക് ചെറിയൊരു എമര്‍ജന്‍സി ഫണ്ട് മതിയായേക്കാം. എന്നാല്‍ നിങ്ങളുടെ ജോലിയില്‍ അസ്ഥിരതയുണ്ടെങ്കില്‍ കുറച്ചു കൂടി വലിയൊരു തുക എമര്‍ജന്‍സി ഫണ്ടായി കരുതുന്നതാണ് നല്ലത്. ചുരുങ്ങിയത് ആറുമാസത്തെ ചെലവുകള്‍ക്കെങ്കിലുമുള്ള തുക മാറ്റി വെക്കാം. നിങ്ങള്‍ ഹ്രസ്വകാല കരാര്‍ അടിസ്ഥാനത്തില്‍ ജോലി ചെയ്യുന്ന ആളാണെങ്കിലോ, കുടുംബത്തിലെ ഏക വരുമാന മാര്‍ഗ്ഗമാണെങ്കിലോ, പുതിയ ജോലി കണ്ടെത്താന്‍ സമയമെടുക്കുമെന്ന് തോന്നുകയാണെങ്കിലോ 9 മുതല്‍ 12 മാസത്തേക്കുള്ള തുക എമര്‍ജന്‍സി ഫണ്ടായി സൂക്ഷിക്കുന്നതാണ് ഉചിതം. സേവിങ്‌സ് അക്കൗണ്ട്, എളുപ്പത്തില്‍ പിന്‍വലിക്കാവുന്ന ഫിക്‌സഡ് ഡെപ്പോസിറ്റ് തുടങ്ങി പെട്ടെന്ന് പണം ലഭിക്കുന്ന രീതിയിലായിരിക്കണം ഇത് നിക്ഷേപിക്കേണ്ടത്. ഉയര്‍ന്ന പലിശ ലഭിക്കുക എന്നതിലുപരി, ശമ്പളം മുടങ്ങുന്ന സമയത്ത് ബില്ലുകള്‍ അടക്കാന്‍ സഹായിക്കുക എന്നതാണ് ഇതിന്റെ പ്രധാന ലക്ഷ്യം.

പുതിയ വായ്പ എടുക്കുമ്പോള്‍ ശ്രദ്ധിക്കുക

പുതിയ വായ്പ എടുക്കുമ്പോള്‍ പ്രത്യേകം ശ്രദ്ധിക്കണം. വരുമാനത്തിന്റെ വലിയൊരു ഭാഗം ഇഎംഐകളിലേക്ക് പോകുന്നുണ്ടെങ്കില്‍, തൊഴിലില്ലായ്മ ഉണ്ടാക്കുന്ന പ്രതിസന്ധി വലുതായിരിക്കും. പുതിയൊരു ലോണ്‍ എടുക്കുന്നതിന് മുന്‍പ് ശമ്പളമില്ലെങ്കിലും കുറച്ച് മാസങ്ങളോളം ഈ തുക മുടങ്ങാതെ അടക്കാന്‍ സാധിക്കുമോ എന്ന് സ്വയം ചോദിക്കുക. ശമ്പളം വര്‍ദ്ധിച്ചു എന്നത് കൊണ്ട് മാത്രം പ്രതിമാസ ചെലവുകള്‍ വര്‍ദ്ധിപ്പിക്കാതിരിക്കുക.

അതുപോലെ തന്നെ പ്രധാനമാണ് ആരോഗ്യ പരിരക്ഷയും. ഇന്‍ഷുറന്‍സിനായി പൂര്‍ണ്ണമായും തൊഴിലുടമയെ ആശ്രയിക്കരുത്. ജോലി നഷ്ടപ്പെടുമ്പോള്‍ ആ കവറേജും ഇല്ലാതാകുന്നത് വലിയ സാമ്പത്തിക ബുദ്ധിമുട്ടിലേക്ക് നയിക്കും. അതിനാല്‍,സ്വന്തമായൊരു ഹെല്‍ത്ത് ഇന്‍ഷുറന്‍സും, കുടുംബത്തിന് വേണ്ടി ഒരു ടേം ലൈഫ് ഇന്‍ഷുറന്‍സുംഎടുക്കുന്നത് പരിഗണിക്കുക.

ജോലിയിലെ അസ്ഥിരത കാരണം ഭാവിയിലേക്കുള്ള നിക്ഷേപങ്ങള്‍ പൂര്‍ണ്ണമായും നിര്‍ത്തിവെക്കേണ്ടതില്ല. വരുമാനത്തില്‍ ഏറ്റക്കുറച്ചിലുകള്‍ ഉണ്ടെങ്കില്‍ എല്ലാ മാസവും ഒരേ തുക തന്നെ നിക്ഷേപിക്കണമെന്ന് നിര്‍ബന്ധമില്ല. ഒരു ചെറിയ തുക സ്ഥിരമായി നിക്ഷേപിക്കുകയും, വരുമാനം കൂടുതലുള്ള മാസങ്ങളില്‍ കൂടുതല്‍ തുക നിക്ഷേപിക്കാന്‍ ശ്രമിക്കുകയും ചെയ്യാം.

ജോലി നല്ല രീതിയില്‍ നടക്കുമ്പോള്‍ എക്കാലത്തും അങ്ങനെ തന്നെയായിരിക്കും എന്ന് ചിന്തിച്ച് പുതിയ കാര്‍ വാങ്ങാനും വലിയ ലോണുകള്‍ എടുക്കാനും പലരും ശ്രമിക്കാറുണ്ട്. എന്നാല്‍ ഇത്തരം നല്ല സമയങ്ങളില്‍ അധികമായി ലഭിക്കുന്ന പണം എമര്‍ജന്‍സി ഫണ്ടിലേക്ക് മാറ്റാനോ, ഉയര്‍ന്ന പലിശയുള്ള കടങ്ങള്‍ തീര്‍ക്കാനോ ഉപയോഗിക്കുന്നതാണ് ബുദ്ധി. സാമ്പത്തിക ഭദ്രത എന്നത് ഒരു സ്ഥിര ജോലി ഉള്ളത് മാത്രമല്ല; കുറച്ചുമാസത്തേക്ക് വരുമാനം നിലച്ചാലും സാമ്പത്തികമായി തളരാത്ത ഒരു അവസ്ഥയിലെത്തുക എന്നത് കൂടിയാണ്.

വിദേശത്തേക്കാണോ യാത്ര? ക്യൂആര്‍ കോഡ് സ്‌കാന്‍ ചെയ്ത് പണമടയ്ക്കാം, പക്ഷെ ഇക്കാര്യങ്ങള്‍ അറിഞ്ഞുവെക്കുക

Sangeetha KS — Thu, 10 Sep 2026 14:56:00 +0530

നാട്ടിലെ കടകളില്‍ സാധനം വാങ്ങിയാല്‍ മൊബൈലെടുത്ത് ഒരു സ്‌കാന്‍... മിക്ക ഇന്ത്യക്കാര്‍ക്കും ഇന്ന് പണമടയ്ക്കാനുള്ള ഏറ്റവും എളുപ്പവഴിയാണ് യുപിഐ. എന്നാല്‍ വിദേശയാത്രകളിലും ഇതേപോലെ സ്‌കാന്‍ ചെയ്ത് പണമടയ്ക്കാന്‍ കഴിയുമെന്ന് എത്ര പേര്‍ക്കറിയാം?

നാഷണല്‍ പെയ്മെന്റ് കോര്‍പ്പറേഷന്‍ ഓഫ് ഇന്ത്യയുടെ 'യുപിഐ ഗ്ലോബല്‍ അക്‌സെപ്റ്റന്‍സ്' വഴി ഇപ്പോള്‍ വിദേശത്തുള്ള കടകളിലും നമ്മുടെ ഇന്ത്യന്‍ ബാങ്ക് അക്കൗണ്ടില്‍ നിന്ന് നേരിട്ട് പണമടയ്ക്കാം. വിദേശയാത്രകളില്‍ ഇത് വളരെ സൗകര്യപ്രദമാണെങ്കിലും, പൂര്‍ണമായും ഇതിനെ ആശ്രയിക്കുന്നതിന് മുന്‍പ് ചില കാര്യങ്ങള്‍ അറിഞ്ഞിരിക്കണം.

വിദേശത്ത് യുപിഐ എങ്ങനെ ഉപയോഗിക്കാം?

നാട്ടില്‍ സ്‌കാന്‍ ചെയ്യുന്നത് പോലെ തന്നെയാണ് വിദേശത്തും യുപിഐ ഉപയോഗിക്കേണ്ടത്. ആദ്യം നിങ്ങളുടെ ബാങ്കും യുപിഐ ആപ്പും അന്താരാഷ്ട്ര ഇടപാടുകള്‍ക്ക് സപ്പോര്‍ട്ട് ചെയ്യുന്നുണ്ടോ എന്ന് പരിശോധിക്കുക. ഇതിനായി നിങ്ങളുടെ ആപ്പില്‍ 'യുപിഐ ഇന്റര്‍നാഷണല്‍' മുന്‍കൂട്ടി ആക്ടിവേറ്റ് ചെയ്യേണ്ടി വരും.

യുപിഐ സ്വീകരിക്കുന്ന കടകളില്‍ ക്യുആര്‍ കോഡ്‌സ്‌കാന്‍ ചെയ്യാം. പിന്‍ നമ്പര്‍ അടിക്കുന്നതിന് മുന്‍പ്, വിദേശ കറന്‍സിയിലുള്ള തുകയും നിങ്ങളുടെ അക്കൗണ്ടില്‍ നിന്ന് കുറയുന്ന ഇന്ത്യന്‍ രൂപയുടെ തുകയും ഫോണ്‍ സ്‌ക്രീനില്‍ കാണാം. വിനിമയ നിരക്കും മറ്റ് ചാര്‍ജുകളും പരിശോധിച്ച ശേഷം മാത്രം പിന്‍ നമ്പര്‍ നല്‍കുക.

ചില ആപ്പുകളില്‍ നിശ്ചിത സമയത്തേക്ക് മാത്രമേ ഈ സൗകര്യം ലഭിക്കൂ. ഉദാഹരണത്തിന്, ഗൂഗിള്‍ പേയില്‍ഒറ്റത്തവണ ആക്ടിവേറ്റ് ചെയ്താല്‍ 7 ദിവസത്തേക്കാണ് ഈ സൗകര്യം ലഭിക്കുക. ആവശ്യമെങ്കില്‍ പിന്നീട് വീണ്ടും ആക്ടിവേറ്റ് ചെയ്യാം.

എവിടെയൊക്കെ ഉപയോഗിക്കാം?

സര്‍ക്കാര്‍ കണക്കുകള്‍ പ്രകാരം 2026 ഓഗസ്റ്റില്‍ 11 വിദേശ രാജ്യങ്ങളില്‍ യുപിഐ സേവനം ലഭ്യമാണ്. കൂടുതല്‍ രാജ്യങ്ങളിലേക്കും കറന്‍സികളിലേക്കും ഈ സേവനം വ്യാപിപ്പിക്കാന്‍ എന്‍പിസിഐ ശ്രമിക്കുന്നുണ്ട്. എന്നാല്‍ യുപിഐ സപ്പോര്‍ട്ട് ചെയ്യുന്ന രാജ്യത്ത് എത്തിയതുകൊണ്ട് മാത്രം എല്ലാ ഹോട്ടലുകളിലും കടകളിലും ഇത് ഉപയോഗിക്കാന്‍ കഴിഞ്ഞേക്കില്ല. കടകളില്‍ യുപിഐയുടെയോ മറ്റ് സപ്പോര്‍ട്ട് ചെയ്യുന്ന പേയ്മെന്റ് നെറ്റ്വര്‍ക്കുകളുടെയോ ലോഗോ ഉണ്ടോ എന്ന് നോക്കുക. പണമടയ്ക്കുന്നതിന് മുന്‍പ് യുപിഐ സ്വീകരിക്കുമോ എന്ന് ചോദിച്ച് ഉറപ്പുവരുത്തുന്നതാണ് നല്ലത്.

പണമടയ്ക്കുമ്പോള്‍ അധിക ചാര്‍ജ് ഈടാക്കുമോ?

നാട്ടിലെ കടയില്‍ 500 രൂപ സ്‌കാന്‍ ചെയ്ത് നല്‍കുന്നത് പോലെയല്ല വിദേശത്തെ ഇടപാടുകള്‍. വിദേശ കറന്‍സി മാറ്റുന്നതിനുള്ള ചെലവും ബാങ്ക് ചാര്‍ജുകളും ഇതില്‍ ഉള്‍പ്പെടും. ഉദാഹരണത്തിന്, വിദേശത്തെ ഇടപാടുകള്‍ ഇന്ത്യന്‍ രൂപയിലേക്ക് മാറ്റാന്‍ ബാങ്കുകള്‍ ഒരു ഫീസ് ഈടാക്കുമെന്ന് ഗൂഗിള്‍ പേ തന്നെ ഉപയോക്താക്കള്‍ക്ക് മുന്നറിയിപ്പ് നല്‍കുന്നുണ്ട്.

അതുകൊണ്ട് വിദേശത്ത് പണമടയ്ക്കാനുള്ള ഏറ്റവും ചിലവ് കുറഞ്ഞ മാര്‍ഗ്ഗം യുപിഐ ആണെന്ന് തെറ്റിദ്ധരിക്കരുത്. പിന്‍ അടിക്കുന്നതിന് മുന്‍പ് നിങ്ങളുടെ അക്കൗണ്ടില്‍ നിന്നും എത്ര രൂപയാണ് ഈടാക്കുന്നതെന്ന് കൃത്യമായി നോക്കുക. നിങ്ങളുടെ പക്കല്‍ ഫോറെക്‌സ് കാര്‍ഡോ വിദേശ കറന്‍സി ചാര്‍ജുകള്‍ കുറവുള്ള ക്രെഡിറ്റ് കാര്‍ഡോ ഉണ്ടെങ്കില്‍ അതുമായി താരതമ്യം ചെയ്ത് ലാഭകരമായത് ഉപയോഗിക്കുക.

യുപിഐ ഇടപാടുകളിൽ 2000 രൂപക്ക് മുകളിൽ ചാർജ് വരുമോ? സാധാരണക്കാരെ എങ്ങനെ ബാധിക്കും?

Sangeetha KS — Tue, 15 Sep 2026 13:30:38 +0530

കഴിഞ്ഞ ദിവസം യുപിഐ ഇടപാടുകളുമായി ബന്ധപ്പെട്ട് ധനമന്ത്രാലയത്തിന് കീഴിലെ ഡിപ്പാർട്ട്‌മെന്റ് ഓഫ് ഫിനാൻഷ്യൽ സർവീസസ് ഒരു നിർണായക വിജ്ഞാപനം പുറത്തിറക്കിയിരുന്നു. 2000 രൂപക്ക് താഴെയുള്ള യുപിഐ ഇടപാടുകൾക്ക് ചാർജ് ഈടാക്കുന്നില്ലെന്നായിരുന്നു അത്. ഇതിനെ മറ്റൊരു തരത്തിൽ വായിച്ചാൽ, 2000 രൂപക്ക് മുകളിലുള്ള പണമിടപാടുകൾക്ക് ചാർജ് വന്നേക്കും എന്ന് കൂടിയാണ്. എന്നാൽ ഇത് 2000 രൂപക്ക് മുകളിലുള്ള എല്ലാ പണമിടപാടുകൾക്കും ബാധകമാണോ? നോക്കാം.

കേന്ദ്രം പുറത്തിറക്കിയ വിജ്ഞാപനത്തിൽ പറയുന്നത് പ്രകാരം ഇത് എല്ലാ പൊതുജനങ്ങളേയും ബാധിക്കുന്ന ഒന്നല്ല. യു പി ഐ വഴി നടത്തുന്ന പേഴ്സൺ ടു മെർച്ചന്റ്- പി 2 എം ഇടപാടുകൾക്കാണ് ഇത് ബാധകമാകുക. അതായത് വ്യാപാര സ്ഥാപനങ്ങളുമായി ബന്ധപ്പെട്ട് രജിസ്റ്റർ ചെയ്തിട്ടുള്ള അക്കൌണ്ടുകളിലേക്ക് പണമിടപാട് നടത്തുമ്പോഴാണ് ശ്രദ്ധിക്കേണ്ടത്. അതായത് നിങ്ങൾ നിങ്ങളുടെ സുഹൃത്തിനോ കുടുംബാംഗത്തിനോ മറ്റാർക്കെങ്കിലും പണം അയച്ചാൽ നിലവിൽ ഇതിന് ചാർജ് ഇല്ല. നിങ്ങൾ നടത്തിയ ഇടപാടുകളുമായി ബന്ധപ്പെട്ട ഈ സാമ്പത്തിക ഭാരം പോകുന്നത് വ്യാപാരികളിലേക്ക് ആയിരിക്കും. എന്നാൽ, 2,000 രൂപയ്ക്കു മുകളിലുള്ള എല്ലാ ഇടപാടുകൾക്കും വ്യാപാരികളിൽ നിന്ന് ചാർജ് വരുമോയെന്ന കാര്യത്തിനും ഇത് വരെ വ്യക്തതയില്ല.

ധനമന്ത്രാലയം ഇന്നലെ പുറത്തു വിട്ട വിജ്ഞാപനത്തിൽ പറയുന്നത് 2000 രൂപ വരെയുള്ള ഇടപാടുകൾക്കും റൂപേ (RuPay) ഡെബിറ്റ് കാർഡ് വഴിയുള്ള പേയ്‌മെന്റുകൾക്കും യാതൊരുവിധ ചാർജുകളും ഈടാക്കില്ലെന്നാണ്. ധനമന്ത്രാലയത്തിന് കീഴിലെ ഡിപ്പാർട്ട്‌മെന്റ് ഓഫ് ഫിനാൻഷ്യൽ സർവീസസാണ് സെപ്റ്റംബർ 14 മുതൽ പ്രാബല്യത്തിൽ വന്ന ഉത്തരവിറക്കിയത്. 2007-ലെ പേയ്‌മെന്റ് ആൻഡ് സെറ്റിൽമെന്റ് സിസ്റ്റംസ് ആക്ടിലെ സെക്ഷൻ 10A പ്രകാരമുള്ള അധികാരം ഉപയോഗിച്ചാണ് പുതിയ മാറ്റം. ഇനി എത്ര ചാ‍‌ർജ് ഈടാക്കുമെന്നോ എങ്ങനെ കണക്കാക്കുമോ എന്നത് സംബന്ധിച്ചൊന്നുമുള്ള വിവരങ്ങൾ പുറത്ത് വന്നിട്ടില്ല.

ഇതിന് പിന്നിൽ അധികമാർക്കും ഓർമയില്ലാത്ത മറ്റൊരു ചരിത്രം കൂടെയുണ്ട്. 7 വർഷം മുൻപ്, കൃത്യമായിപ്പറഞ്ഞാൽ 2019 അവസാനം വരെ പി2എം ഇടപാടുകൾക്ക് 0.3% വരെ എംഡിആ‍‍‌ർ ഈടാക്കിയിരുന്നു. എം ഡി ആർ എന്നാൽ, എംഡിആർ–മെർച്ചന്റ് ഡിസ്കൗണ്ട് റേറ്റ് എന്നാണ്. ഉയർന്ന യുപിഐ ഇടപാടുകൾക്ക് വ്യാപാരികളിൽ നിന്ന് ചാർജ് ഈടാക്കുന്നതിനെയാണ് ഇങ്ങനെ വിളിക്കുന്നത്. ഇനി നേരത്തെ പറഞ്ഞതിലേക്ക് വരാം. 2019 അവസാനം വരെ പി2എം ഇടപാടിന്റെ 0.3% വരെ തുകയായിരുന്നു എംഡിആർ. എന്നാൽ 2020 ജനുവരി മുതൽ എല്ലാ യുപിഐ ഇടപാടുകളെയും എംഡിആർ പിരിക്കുന്നതിൽ നിന്ന് ഒഴിവാക്കി. ഇതിന് ശേഷം, കഴിഞ്ഞ മാസം എംഡിആർ തിരികെ കൊണ്ടുവരുന്നതിനായി പേയ്മെന്റ് ആൻഡ് സെറ്റിൽമെന്റ് സിസ്റ്റംസ് നിയമത്തിൽ കേന്ദ്രം ഭേദഗതി വരുത്തിയിരുന്നു. വിജ്ഞാപനത്തിൽ പറയുന്നത് അനുസരിച്ച് 2000 രൂപക്ക് താഴെ സീറോ ചാർജ് ആകും എന്നാണ്.

ഇപ്പോഴും ഈ പുതിയ മാറ്റം ഏതെങ്കിലും രീതിയിൽ ഉപഭോക്താവിനെ ബാധിക്കുമോ എന്ന ചോദ്യം നിൽക്കുന്നുണ്ട്. ഇതിനും ഒരു സാധ്യത തള്ളിക്കളയാനാവില്ല. വ്യാപാരികളിൽ നിന്ന് ഈ എംഡിആർ ഈടാക്കുന്നത് ബാങ്കോ സേവനദാതാവോ ആണ്. അപ്പോൾ ഒരു ഷോപ്പിൽ നിന്ന് നമ്മൾ വാങ്ങിക്കുന്ന സാധനങ്ങളുടെ വിലയുടെ ഒരു പങ്ക് അങ്ങോട്ടേക്ക് പോകും. ഇവിടെ വ്യാപാരിയുടെ ലാഭമാണ് അങ്ങോട്ട് ഒഴുകുന്നത്. എംഡിആർ പ്രാബല്യത്തിൽ വന്നാൽ, വ്യാപാരികൾക്ക് ഇത് പാലിക്കേണ്ടിയും വരും. ഈ ഡിജിറ്റൽ യുഗത്തിൽ, യു പി ഐ ഇടപാടുകൾ കടയിൽ നടത്തേണ്ട എന്ന് തറപ്പിച്ച് പറയുന്നത് വ്യാപാരികൾക്ക് സാധ്യവുമല്ല. സ്വാഭാവികമായി വ്യാപാരിക്ക് പിന്നെ ഉള്ള ഒരേ ഒരു വഴിയുള്ളത് ഈ ബാധ്യത ഉപഭോക്താവിലേക്ക് കൂടി പങ്കു വക്കാം എന്നുള്ളതാണ്. പക്ഷെ, എം ആർ പി വച്ചുള്ള സാധനങ്ങൾക്ക് ഇതും സാധ്യമല്ല. എന്തായാലും, വരും ദിവസങ്ങളിൽ ഇത് സംബന്ധിച്ച കൂടുതൽ വിവരങ്ങൾ പുറത്തു വരുമെന്ന് പ്രതീക്ഷിക്കാം....