Asianet News Malayalam

ഇബി-5 വിസയ്ക്ക് ഇനി ചെലവേറും; യുഎസിൽ ഫീസ് കുത്തനെ കൂട്ടുന്നു, ഇന്ത്യൻ നിക്ഷേപകർ അറിയേണ്ട കാര്യങ്ങൾ

Sangeetha KS — Fri, 02 Oct 2026 14:53:47 +0530

യുഎസിൽ ഗ്രീൻ കാർഡ് നേടാൻ നിക്ഷേപകരെ സഹായിക്കുന്ന ഇബി-5 വിസാ പദ്ധതിയുടെ വിവിധ ഫീസുകൾ കുത്തനെ ഉയരുന്നു. 2026 നവംബർ 30 മുതൽ പുതുക്കിയ നിരക്കുകൾ പ്രാബല്യത്തിൽ വരും. യുഎസ് പൗരത്വ-കുടിയേറ്റ സേവന വിഭാഗമാണ് ഫീസ് വർധന പ്രഖ്യാപിച്ചത്. ഇന്ത്യയിൽ നിന്നുള്ള നിരവധി നിക്ഷേപകരും കുടുംബങ്ങളും ഗ്രീൻ കാർഡ് നേടുന്നതിനായി ഇബി-5 പദ്ധതിയെ ആശ്രയിക്കുന്ന സാഹചര്യത്തിൽ പുതിയ തീരുമാനം ശ്രദ്ധേയമാണ്.

ഐ-526 ഫീസ് ഇരട്ടിയിലേറെ

വ്യക്തിഗത നിക്ഷേപകർ സമർപ്പിക്കുന്ന ഫോം ഐ-526ന്റെ ഫീസ് 3,675 ഡോളറിൽ നിന്ന് 7,615 ഡോളറായി ഉയരും. അതായത്, ഫീസിൽ വലിയ വർധനയാണ് ഉണ്ടാകുന്നത്. പ്രാദേശിക കേന്ദ്രം വഴി നിക്ഷേപം നടത്തുന്നവർ സമർപ്പിക്കുന്ന ഫോം ഐ-526ഇയുടെ ഫീസ് 3,675 ഡോളറിൽ നിന്ന് 7,850 ഡോളറായും ഉയരും. ഇതിന് പുറമെ പ്രാരംഭ ഐ-526, ഐ-526ഇ അപേക്ഷകൾക്ക് 75 ഡോളറിന്റെ സാങ്കേതിക ഫീസും നൽകണം.

ഗ്രീൻ കാർഡ് വ്യവസ്ഥ നീക്കുന്നതിനും അധിക ചെലവ്

ഇബി-5 നിക്ഷേപത്തിലൂടെ ലഭിക്കുന്ന ഗ്രീൻ കാർഡിലെ വ്യവസ്ഥകൾ നീക്കം ചെയ്യുന്നതിനുള്ള ഫോം ഐ-829ന്റെ ഫീസും വർധിക്കും. നിലവിലെ 3,750 ഡോളറിൽ നിന്ന് ഇത് 5,000 ഡോളറായി ഉയരും. ഐ-526ഇ അപേക്ഷകരിൽ നിന്ന് ഈടാക്കുന്ന ഇന്റഗ്രിറ്റി ഫണ്ട് ഫീസ് 1,000 ഡോളറിൽ നിന്ന് 1,100 ഡോളറായും മാറും.

പ്രാദേശിക കേന്ദ്രങ്ങൾക്കും വൻ ഫീസ് വർധന

പ്രാദേശിക കേന്ദ്ര പദവി നേടുന്നതിനുള്ള ഫോം ഐ-956ന്റെ ഫീസ് 17,795 ഡോളറിൽ നിന്ന് 44,115 ഡോളറായി ഉയരും. അതേസമയം, ഒരു വാണിജ്യ സംരംഭത്തിലെ നിക്ഷേപത്തിന് അംഗീകാരം നേടുന്നതിനുള്ള ഫോം ഐ-956എഫ്ന്റെ ഫീസ് 17,795 ഡോളറിൽ നിന്ന് 42,675 ഡോളറാകും.

ഒരു ഫീസിന് മാത്രം കുറവ്

പുതിയ നിരക്കുകളിൽ ഭൂരിഭാഗവും ഉയരുമ്പോൾ ഫോം ഐ-956ജിയുടെ വാർഷിക ഫീസിൽ കുറവുണ്ടാകും. നിലവിലെ 3,035 ഡോളറിൽ നിന്ന് ഇത് 2,165 ഡോളറായി കുറയും. കൂടാതെ, പഴയ ഐ-526 അപേക്ഷകളിൽ ചില ഭേദഗതികൾ വരുത്തുന്ന നിക്ഷേപകർക്കായി പുതിയ ഫോം ഐ-527 അവതരിപ്പിക്കും. ഇതിന്റെ ഫീസ് 10,330 ഡോളറായിരിക്കും.

ഫീസ് വർധനയ്ക്ക് കാരണം എന്ത്?

യുഎസ് പൗരത്വ-കുടിയേറ്റ സേവന വിഭാഗത്തിന്റെ വിശദീകരണമനുസരിച്ച്, ഏജൻസിയുടെ പ്രവർത്തനങ്ങൾക്ക് പ്രധാനമായും അപേക്ഷാ ഫീസുകളാണ് സാമ്പത്തിക സഹായം നൽകുന്നത്. അപേക്ഷകൾ പരിശോധിക്കൽ, പശ്ചാത്തല പരിശോധന, യോഗ്യത ഉറപ്പാക്കൽ, തട്ടിപ്പ് കണ്ടെത്തൽ, ഇബി-5 പദ്ധതിയുടെ നടത്തിപ്പ് തുടങ്ങിയ ചെലവുകൾ നികത്തുന്നതിനാണ് ഫീസ് വർധന. പുതിയ നിരക്കുകൾ നവംബർ 30 മുതൽ പ്രാബല്യത്തിൽ വരുന്നതിനാൽ ഇബി-5 അപേക്ഷ സമർപ്പിക്കാൻ ഒരുങ്ങുന്ന നിക്ഷേപകർ അപേക്ഷാ സമയക്രമവും ബാധകമായ ഫീസും യുഎസ് പൗരത്വ-കുടിയേറ്റ സേവന വിഭാഗത്തിന്റെ ഔദ്യോഗിക വിവരങ്ങളുമായി പരിശോധിക്കുന്നത് പ്രധാനമാണ്.

പ്രവാസികളടക്കമുള്ള യാത്രക്കാർക്ക് കനത്ത തിരിച്ചടി: ടിക്കറ്റ് നിരക്ക് കുത്തനെ കൂട്ടി ഇൻഡിഗോ, വർധനവ് നാളെ മുതൽ

Sangeetha KS — Mon, 05 Oct 2026 16:14:10 +0530

ദില്ലി: രാജ്യത്തെ ഏറ്റവും വലിയ വിമാനക്കമ്പനിയായ ഇന്‍ഡിഗോ ആഭ്യന്തര രാജ്യാന്തര വിമാന യാത്ര നിരക്ക് കൂട്ടി. ആഭ്യന്തര യാത്രകൾക്ക് 100 മുതൽ 350 രൂപ വരെയാണ് വർധന. ഇന്ന് അർധരാത്രിമുതൽ പുതിയ നിരക്കുകൾ പ്രാബല്യത്തിൽ വരും. വിമാന ഇന്ധന വില കുതിച്ചുയർന്നതാണ് നിരക്ക് വർധിപ്പിക്കാൻ കാരണമെന്ന് ഇൻഡിഗോ വ്യക്തമാക്കി. ആഭ്യന്തര സര്‍വീസുകളില്‍ യാത്രാദൂരത്തിന് അനുസരിച്ചാണ് നിരക്ക് കൂട്ടിയത്. 500 കിലോമീറ്റര്‍ വരെയുള്ള യാത്രയ്ക്ക് 375 രൂപയും 501 മുതല്‍ 1000 കിലോമീറ്റര്‍ വരെ 600 രൂപയുമാണ് പുതുക്കിയ ചാര്‍ജ്.

2000 കിലോമീറ്ററിന് മുകളിലുള്ള യാത്രയ്ക്ക് 1300 രൂപയും ഇന്ധന ചാര്‍ജായി നല്‍കണം. നേരത്തെ ഇത് യഥാക്രമം 275 ഉം 400 ഉം 950 ഉം ആയിരുന്നു. ഇന്ത്യയിൽ ലിറ്ററിന് 137 രൂപയാണ് വിമാന ഇന്ധന വില. ഒക്ടോബറിൽ ഇന്ധന വില 16 രൂപ കൂട്ടിയിരുന്നു. പത്തുവർഷത്തിനിടെയുളള ഏറ്റവും ഉയർന്ന നിരക്കാണ് വിമാന ഇന്ധനത്തിനായി കമ്പനികൾ ചെലവഴിക്കുന്നതെന്ന് ഇൻഡിഗോ ചൂണ്ടിക്കാട്ടി.

സമാനമായി രാജ്യാന്തര യാത്രകൾക്ക് റൂട്ടിനും ദൂരത്തിനും അനുസരിച്ച് 1000 രൂപ മുതല്‍ 10000 രൂപ വരെയായി സ്ലാബുകളിൽ വർധനവുണ്ടായിട്ടുണ്ട്. സാർക്ക് രാജ്യങ്ങളിലേക്കുള്ള 500 കിലോമീറ്ററിൽ താഴെയുള്ള യാത്രകൾക്ക് 500 രൂപയും, അതിനു മുകളിലുള്ള ദൂരത്തിന് 1,000 രൂപയുമാണ് സർചാർജ്. മലയാളി പ്രവാസികൾ ഏറെയുള്ള മിഡിൽ ഈസ്റ്റ്, ജിസിസി രാജ്യങ്ങൾ, തെക്കുകിഴക്കൻ ഏഷ്യ, വടക്കുകിഴക്കൻ ഏഷ്യ എന്നിവിടങ്ങളിലേക്കുള്ള യാത്രകൾക്ക് 5,500 രൂപയും, ആഫ്രിക്കൻ രാജ്യങ്ങളിലേക്ക് 6,000 രൂപയും അധികം ഈടാക്കും. യൂറോപ്പിലേക്കുള്ള ദീർഘദൂര സർവീസുകൾക്കാണ് ഏറ്റവും ഉയർന്ന തുകയായ 10,000 രൂപ സർചാർജ് പ്രഖ്യാപിച്ചിരിക്കുന്നത്.

കഴിഞ്ഞ മാസത്തെ അപേക്ഷിച്ച് വിമാന ഇന്ധനവിലയിൽ 14 ശതമാനത്തിലധികം വർധനവുണ്ടായെന്നും കഴിഞ്ഞ ഒരു പതിറ്റാണ്ടിലെ ഏറ്റവും ഉയർന്ന നിരക്കുകളിലൊന്നിലേക്കാണ് എടിഎഫ് വില എത്തി നിൽക്കുന്നതെന്നും ഇൻഡിഗോ വ്യക്തമാക്കി. വിമാനക്കമ്പനികളുടെ പ്രവർത്തനച്ചെലവിന്റെ വലിയൊരു പങ്കും ഇന്ധനത്തിനായാണ് മാറ്റിവെക്കുന്നത് എന്നതിനാൽ, നിലവിലെ വിലവർധനവ് കമ്പനിയുടെ സാമ്പത്തിക ഘടനയെയും ദൈനംദിന സർവീസുകളെയും പ്രതികൂലമായി ബാധിച്ച സാഹചര്യത്തിലാണ് സർചാർജ് ഏർപ്പെടുത്താൻ നിർബന്ധിതരായതെന്നും കമ്പനി പത്രക്കുറിപ്പിലൂടെ അറിയിച്ചു. ഇൻഡിഗോ നിരക്ക് വർധിപ്പിച്ചതോടെ മറ്റ് വിമാനക്കമ്പനികളും വൈകാതെ സമാനമായ തീരുമാനത്തിലേക്ക് നീങ്ങിയേക്കാനാണ് സാധ്യത.

ഓര്‍ഡര്‍ ചെയ്യാത്ത പാര്‍സല്‍ വരും, ഒടിപി ചോദിക്കും; ആളുകളെ വീഴ്ത്തുന്ന സൈബര്‍ തട്ടിപ്പുകള്‍ അറിയാം

Sangeetha KS — Sat, 03 Oct 2026 14:36:10 +0530

ഇന്ത്യയില്‍ സൈബര്‍ തട്ടിപ്പുകള്‍ ദിനംപ്രതി വര്‍ദ്ധിച്ചുവരികയാണ്. വ്യാജ മെസ്സേജുകളും കോളുകളും തിരിച്ചറിയാന്‍ ആര്‍ക്കും കഴിയാത്ത അവസ്ഥയാണ്. ഭയവും സമ്മര്‍ദ്ദവും ഉപയോഗിച്ച് വളരെ സമര്‍ത്ഥമായാണ് തട്ടിപ്പുകാര്‍ ആളുകളെ വലയിലാക്കുന്നത്. ഇത്തരക്കാരുടെ പുതിയ രീതി ഏറെ ചർച്ചകൾക്ക് വഴിവക്കുന്നുണ്ട്.

ഓര്‍ഡര്‍ ചെയ്യാത്ത ഒരു ക്യാഷ് ഓണ്‍ ഡെലിവറി- ഓര്‍ഡര്‍ ക്യാന്‍സല്‍ ചെയ്യാന്‍ ഒടിപി പറയണം എന്ന് ആവശ്യപ്പെട്ട് വരുന്നതാണ് പുതിയ തന്ത്രം. ഉല്‍പ്പന്നം ഓര്‍ഡര്‍ ചെയ്തില്ലെന്ന് പറയുമ്പോഴാണ് ക്യാന്‍സലേഷന്‍ ഒടിപി വേണമെന്ന് പറയുന്നത്. ശല്യം ഒഴിവാക്കാന്‍ ഒടിപി പറഞ്ഞുകൊടുത്ത് ഡെലിവറി ഏജന്റിനെ മടക്കി അയക്കുമ്പോഴാണ് ബാങ്ക് അക്കൗണ്ടുകള്‍ കാലിയാക്കാന്‍ തട്ടിപ്പുകാര്‍ ഉപയോഗിക്കുന്ന പുതിയ തന്ത്രമാണിതെന്ന് മനസിലാകുന്നത്.

ബാങ്ക് അക്കൗണ്ട് പാസ്വേര്‍ഡുകളും യുപിഐ പിന്‍ നമ്പറുകളും മാറ്റിയില്ലെങ്കില്‍ പണം മുഴുവന്‍ നഷ്ടമാകും. ഐഐടി മദ്രാസിലെ ഗവേഷകര്‍ നടത്തിയ പുതിയ പഠനമനുസരിച്ച്, സാങ്കേതികവിദ്യ നന്നായി അറിയാവുന്നവരും ഉന്നത വിദ്യാഭ്യാസം നേടിയവരും സാമ്പത്തിക സൈബര്‍ തട്ടിപ്പുകള്‍ക്ക് ഇരയാകുന്നുണ്ട്. ഭയം, സമ്മര്‍ദ്ദം, തീരുമാനങ്ങളെടുക്കാനുള്ള വെപ്രാളം തുടങ്ങിയവ മുതലെടുത്താണ് തട്ടിപ്പുകാര്‍ ഇവരെ വലയിലാക്കുന്നത്. ഇത്തരം സാഹചര്യങ്ങളില്‍ ശരിയായ രീതിയില്‍ ചിന്തിക്കാനുള്ള നമ്മുടെ കഴിവ് വരെ നഷ്ടപ്പെടുന്നു.

കേന്ദ്ര ആഭ്യന്തര മന്ത്രാലയത്തിന്റെ കണക്കുകള്‍ ഈ പ്രശ്‌നത്തിന്റെ വ്യാപ്തി വ്യക്തമാക്കുന്നു. 2021 നും 2025 നും ഇടയില്‍ നാഷണല്‍ സൈബര്‍ ക്രൈം റിപ്പോര്‍ട്ടിങ് പോര്‍ട്ടലില്‍ 65.89 ലക്ഷത്തിലധികം സാമ്പത്തിക തട്ടിപ്പ് പരാതികളാണ് ലഭിച്ചത്. ഇതിലൂടെ ഇന്ത്യക്കാര്‍ക്ക് നഷ്ടപ്പെട്ടത് 55,050 കോടിയിലധികം രൂപയാണ്! 2021-ല്‍ 2.62 ലക്ഷം പരാതികളിലായി 551 കോടി രൂപ നഷ്ടപ്പെട്ട സ്ഥാനത്ത്, 2025-ല്‍ പരാതികളുടെ എണ്ണം 24.02 ലക്ഷമായും നഷ്ടപ്പെട്ട തുക 22,495 കോടി രൂപയായും കുത്തനെ ഉയര്‍ന്നു.

ഇനി ഇവരുടെ പ്രധാന തട്ടിപ്പ് രീതികള്‍ ഏതൊക്കെയാണെന്ന് നോക്കാം. ഡിജിറ്റല്‍ അറസ്റ്റ് തട്ടിപ്പുകള്‍, കൊറിയര്‍ അല്ലെങ്കില്‍ പാര്‍സല്‍ തട്ടിപ്പുകള്‍, യുപിഐ കളക്ട് റിക്വസ്റ്റ് തട്ടിപ്പുകള്‍, കെവൈസി അപ്ഡേറ്റ് തട്ടിപ്പുകള്‍, ഇന്‍വെസ്റ്റ്മെന്റ്/സ്റ്റോക്ക് ട്രേഡിങ് തട്ടിപ്പുകള്‍ എന്നിവയാണ് അവ.

നമുക്കെന്തൊക്കെ കാര്യങ്ങൾ ശ്രദ്ധിക്കാമെന്ന് നോക്കാം. ബാങ്ക് വിവരങ്ങളും പാസ്വേര്‍ഡുകളും അതീവ രഹസ്യമായി സൂക്ഷിക്കുക. സുരക്ഷിതമല്ലാത്തതും അപരിചിതവുമായ ലിങ്കുകളില്‍ ക്ലിക്ക് ചെയ്യാതിരിക്കുക. സംശയാസ്പദമായ എന്തെങ്കിലും ശ്രദ്ധയില്‍പ്പെട്ടാല്‍ ഉടന്‍ തന്നെ ദേശീയ ഹെല്‍പ്പ് ലൈന്‍ നമ്പറായ 1930-ല്‍ വിളിക്കുകയോ നാഷണല്‍ സൈബര്‍ ക്രൈം പോര്‍ട്ടലില്‍ റിപ്പോര്‍ട്ട് ചെയ്യുകയോ വേണം.

ഇനി ഇതിന് ചില മുൻകരുതലുകൾ എടുക്കാം. എല്ലാ അക്കൗണ്ടുകള്‍ക്കും മള്‍ട്ടി-ഫാക്ടര്‍ ഓതന്റിക്കേഷന്‍ ഉപയോഗിക്കുക. ഒടിപി ആരുമായും പങ്കുവെക്കാതിരിക്കുക.തട്ടിപ്പിനിരയായാല്‍ മെസ്സേജുകളുടെയും ട്രാന്‍സാക്ഷന്‍ രസീതുകളുടെയും തട്ടിപ്പുകാരുടെ നമ്പറുകളുടെയും സ്‌ക്രീന്‍ഷോട്ടുകള്‍ സൂക്ഷിക്കുക. അധികാരികളെ അറിയിക്കുന്നതുവരെ രേഖകളൊന്നുംം നശിപ്പിക്കരുത്. അക്കൗണ്ട് പാസ്വേര്‍ഡുകള്‍ ഉടന്‍ മാറ്റുകയും ചെയ്യുക.

ഇപ്പോൾ നടക്കുന്നന പാര്‍സല്‍ തട്ടിപ്പില്‍ എന്തൊക്കെ കാര്യങ്ങൾ ശ്രദ്ധിക്കാമെന്ന് നോക്കാം. ഓര്‍ഡര്‍ ചെയ്യാത്ത സാധനങ്ങള്‍ക്ക് ആരെങ്കിലും ഡെലിവറി ക്യാന്‍സലേഷന്‍ ഒടിപി ചോദിച്ചാല്‍ ഒരു കാരണവശാലും നല്‍കരുത്. സാധനം വേണ്ടെന്നും ഉറപ്പിച്ച് പറയുക. വ്യാജ ക്യാഷ് ഓണ്‍ ഡെലിവറി പാര്‍സലുകള്‍ നല്‍കി അക്കൗണ്ട് വിവരങ്ങള്‍ ചോര്‍ത്തുന്ന രീതിയാണിത്. തട്ടിപ്പുകാര്‍ എപ്പോഴും സംശയം തോന്നുന്ന രീതിയിലാകില്ല നിങ്ങളെ സമീപിക്കുക. വളരെ വിശ്വസനീയവും എന്നാല്‍ അടിയന്തരമായി ചെയ്യേണ്ടതുമായ കാര്യങ്ങളാണെന്ന വ്യാജേനയാകും അവരുടെ ഇടപെടലുകള്‍. അതിനാല്‍ ഒരു ഒടിപി നല്‍കുന്നതിനോ ലിങ്കില്‍ ക്ലിക്ക് ചെയ്യുന്നതിനോ പണം അയക്കുന്നതിനോ മുന്‍പ് ഒരു നിമിഷം നിര്‍ത്തി കൃത്യമായി പരിശോധിക്കാന്‍ മറക്കാതിരിക്കുക.

മെസി ഇവിടേക്ക് വന്നില്ലെങ്കിലും, മെസിയുടെ നാട്ടിലെ പൗരനാകാം; കോടികള്‍ മുടക്കിയാല്‍ അര്‍ജന്റീനയില്‍ പൗരത്വം

Sangeetha KS — Tue, 06 Oct 2026 13:03:17 +0530

സാമ്പത്തിക പ്രതിസന്ധി മറികടക്കാനും വിദേശ നിക്ഷേപം ആകര്‍ഷിക്കാനുമായി പുതിയ പൗരത്വ പദ്ധതി പ്രഖ്യാപിച്ച് അര്‍ജന്റീന. രാജ്യത്തിന്റെ സാമ്പത്തിക ഭദ്രത ഉറപ്പാക്കുകയാണ് ഇതിലൂടെ ലക്ഷ്യമിടുന്നത്. പാരീസില്‍ വെച്ചാണ് ഈ പദ്ധതിയുടെ പ്രഖ്യാപനം നടന്നത്. ഈ വര്‍ഷം അവസാനത്തോടെ പദ്ധതി പ്രാബല്യത്തില്‍ വരുമെന്നാണ് പ്രതീക്ഷിക്കുന്നത്. വിദേശികള്‍ക്ക് പൗരത്വം നേടാന്‍ പ്രധാനമായും രണ്ട് വഴികളാണ് സര്‍ക്കാര്‍ മുന്നോട്ടുവെക്കുന്നത്.

ആദ്യ വഴി: ട്രഷറിയിലേക്ക് പണം അടയ്ക്കാം

ആദ്യത്തെ രീതി പ്രകാരം പൗരത്വത്തിനായി അപേക്ഷിക്കുന്ന വ്യക്തി 3,50,000 ഡോളര്‍ (ഏകദേശം 3.37 കോടി രൂപ) അര്‍ജന്റീനയുടെ ദേശീയ ട്രഷറിയിലേക്ക് അടയ്ക്കണം. ഈ തുക തിരികെ ലഭിക്കില്ല. ഭാര്യക്കോ ഭര്‍ത്താവിനോ ഒപ്പം പൗരത്വം ലഭിക്കാന്‍ ഒരു ലക്ഷം ഡോളര്‍ കൂടി അധികമായി നല്‍കണം. 18 വയസ്സില്‍ താഴെയുള്ള ഓരോ കുട്ടിക്കും 25,000 ഡോളര്‍ വീതവുമാണ് അടയ്‌ക്കേണ്ടത്. അതായത്, നാല് പേരുള്ള ഒരു കുടുംബത്തിന് ഈ വഴിയിലൂടെ പൗരത്വം നേടണമെങ്കില്‍ 5 ലക്ഷം ഡോളര്‍ (ഏകദേശം 4.82 കോടി രൂപ) ചെലവാക്കേണ്ടി വരും.

രണ്ടാമത്തെ വഴി: സര്‍ക്കാര്‍ ബോണ്ട് വാങ്ങാം

8 ലക്ഷം ഡോളറിന്റെ (ഏകദേശം 7.71 കോടി രൂപ) സര്‍ക്കാര്‍ ബോണ്ട് വാങ്ങുക എന്നതാണ് രണ്ടാമത്തെ വഴി. പൗരത്വ പദ്ധതിക്കായി മാത്രമായിരിക്കും ഈ പ്രത്യേക ബോണ്ടുകള്‍ ഇറക്കുക. ഈ രണ്ട് വഴികളിലൂടെയും ലഭിക്കുന്ന തുക രാജ്യത്തിന്റെ സാമ്പത്തിക നില മെച്ചപ്പെടുത്താന്‍ ഉപയോഗിക്കുമെന്ന് അര്‍ജന്റീനയുടെ സാമ്പത്തിക മന്ത്രാലയം വ്യക്തമാക്കി.

പണം നല്‍കിയാല്‍ ഉടന്‍ പൗരത്വം കിട്ടുമോ?

കോടികള്‍ മുടക്കിയാലും പൗരത്വം അത്ര എളുപ്പത്തില്‍ ലഭിക്കില്ല. അപേക്ഷകര്‍ക്ക് രാജ്യസുരക്ഷയെ ബാധിക്കുന്ന പ്രശ്‌നങ്ങളുണ്ടോയെന്നും സാമ്പത്തിക ഇടപാടുകള്‍ സുതാര്യമാണോയെന്നും കര്‍ശനമായി പരിശോധിക്കും. കള്ളപ്പണം വെളുപ്പിക്കുന്നത് തടയാനുള്ള മുന്‍കരുതലുകളും സര്‍ക്കാര്‍ സ്വീകരിക്കും. രാജ്യത്തിന്റെ സാമ്പത്തിക സുതാര്യതയും അര്‍ജന്റീന പൗരത്വത്തിന്റെ മൂല്യവും കാത്തുസൂക്ഷിക്കാനാണിത്. അപേക്ഷിച്ചാല്‍ എത്ര കാലം കൊണ്ട് പൗരത്വം ലഭിക്കുമെന്ന കാര്യം സര്‍ക്കാര്‍ ഇതുവരെ വ്യക്തമാക്കിയിട്ടില്ല.

ലക്ഷ്യം വിദേശ നിക്ഷേപം; ഒപ്പം രാഷ്ട്രീയ എതിര്‍പ്പുകളും

വിദേശ നിക്ഷേപം ആകര്‍ഷിക്കാനുള്ള പ്രസിഡന്റ് ഹാവിയര്‍ മിലേയിയുടെ വിശാലമായ പദ്ധതികളുടെ ഭാഗമായാണ് പുതിയ പൗരത്വ നിയമവും വരുന്നത്. നികുതി ഇളവുകള്‍, തൊഴില്‍ നിയമങ്ങളിലെ മാറ്റങ്ങള്‍ എന്നിവയിലൂടെ അന്താരാഷ്ട്ര ബിസിനസുകളെ ആകര്‍ഷിക്കാനാണ് മിലേയി സര്‍ക്കാര്‍ ശ്രമിക്കുന്നത്. എന്നാല്‍ ഈ പൗരത്വ പദ്ധതിക്ക് രാജ്യത്തിനകത്ത് വലിയ രാഷ്ട്രീയ എതിര്‍പ്പുകള്‍ നേരിടേണ്ടി വന്നേക്കാം. അടുത്ത വര്‍ഷം അര്‍ജന്റീനയില്‍ പ്രസിഡന്റ് തിരഞ്ഞെടുപ്പ് നടക്കാനിരിക്കുകയാണ്. രാജ്യത്ത് വിദേശികളുടെ പങ്കാളിത്തം വര്‍ധിപ്പിക്കുന്ന നയങ്ങള്‍ക്കെതിരെ പ്രതിപക്ഷം ഇതിനകം തന്നെ ശക്തമായി രംഗത്തെത്തിയിട്ടുണ്ട്. വിദേശികള്‍ക്ക് കൃഷിഭൂമി വാങ്ങാന്‍ അനുമതി നല്‍കുന്നതിലെ ആശങ്കകളും, ശതകോടീശ്വരനായ നിക്ഷേപകന്‍ പീറ്റര്‍ തിയേല്‍ ബ്യൂണസ് ഐറിസില്‍ എത്തിയതിനെത്തുടര്‍ന്നുണ്ടായ വിവാദങ്ങളും നിലനില്‍ക്കുന്നുണ്ട്. അതുകൊണ്ട് തന്നെ പുതിയ പൗരത്വ പദ്ധതി വിദേശ മൂലധനം ആകര്‍ഷിക്കാനുള്ള ഒരു മികച്ച നീക്കമാണെങ്കിലും രാഷ്ട്രീയമായി വലിയ വെല്ലുവിളികള്‍ നിറഞ്ഞതാണ്.

ഇന്ത്യൻ സിനിമയിൽ ആദ്യം! യഥാർത്ഥ ഹ്യൂമനോയിഡ് റോബോട്ട് സിനിമയുടെ കേന്ദ്ര കഥാപാത്രമാകുന്നു,കന്നഡ ചിത്രം 'ലംബോദര 2.0'

Sangeetha KS — Tue, 06 Oct 2026 15:20:37 +0530

ബെംഗളൂരു: വിഷ്വൽ ഇഫക്റ്റുകളോ (CGI) അഭിനേതാക്കളോ ഇല്ലാതെ, ഒരു യഥാർത്ഥ ഹ്യൂമനോയിഡ് റോബോട്ട് ഒരു സിനിമയിലെ പ്രധാന കഥാപാത്രമാകുന്ന സിനിമ അണിയറയിൽ ഒരുങ്ങുന്നുവെന്ന വാർത്തകളാണ് പുറത്ത് വരുന്നത്. ഇന്ത്യൻ സിനിമാ ചരിത്രത്തിൽ ആദ്യമായി കന്നടയിൽ ആണ് സിനിമയിറങ്ങുക. പ്രശസ്ത കന്നഡ സംവിധായകൻ സിമ്പിൾ സുനി സംവിധാനം ചെയ്യുന്ന പുതിയ ചിത്രമായ 'ലംബോദര 2.0' (Lambodhar 2.0) ലാണ് 'ജിയ' (Jia) എന്ന ഹ്യൂമനോയിഡ് റോബോട്ട് അഭിനേതാവായി എത്തുന്നത്. ബെംഗളൂരു ആസ്ഥാനമായി പ്രവർത്തിക്കുന്ന 'മച്ചാനി റോബോട്ടിക്സ്' (Machani Robotics) എന്ന സ്ഥാപനമാണ് ജിയ എന്ന റോബോട്ടിനെ വികസിപ്പിച്ചെടുത്തത്.

View this post on Instagram

A post shared by Su Ni (@simplesuni)

ഒരു സയൻസ് ഫിക്ഷൻ സോഷ്യൽ ത്രില്ലറായി ഒരുങ്ങുന്ന ഈ ചിത്രം മാസ് പ്രൊഡക്ഷൻസിന്റെ ബാനറിൽ അനിൽ ഷെട്ടിയാണ് നിർമ്മിക്കുന്നത്. ബോളിവുഡ് താരം കുനാൽ കപൂർ കന്നഡ സിനിമയിൽ അരങ്ങേറ്റം കുറിക്കുന്ന ചിത്രം കൂടിയാണിത്. അനിൽ ഷെട്ടി, സാച്ചി ബിന്ദ്ര, മേഘ്‌ന ഗാവോങ്കർ എന്നിവരും പ്രധാന വേഷങ്ങളിലെത്തുന്നു.

ജെൻ സി (Gen Z) തലമുറയുടെ ജീവിതവും സോഷ്യൽ മീഡിയയുടെ സ്വാധീനവും നിർമിത ബുദ്ധിയും (Artificial Intelligence) പ്രമേയമാക്കിയാണ് ചിത്രം നിർമ്മിച്ചിരിക്കുന്നത്. ഈ വർഷം ജനുവരിയിൽ ചിത്രീകരണം ആരംഭിച്ച 'ലംബോദര 2.0' യുടെ ചിത്രീകരണം അടുത്തിടെ പൂർത്തിയായി. എന്നാൽ സിനിമയുടെ തിയേറ്റർ റിലീസ് തീയതി നിർമ്മാതാക്കൾ ഇതുവരെ പുറത്തുവിട്ടിട്ടില്ല. വിഎഫ്എക്സ് സാങ്കേതികവിദ്യ ഉപയോഗിച്ച് റോബോട്ടുകളെ കാണിച്ചിട്ടുള്ള കഥകളിൽ നിന്ന് വ്യത്യസ്തമായി, യഥാർത്ഥ റോബോട്ട് തത്സമയം അഭിനയിക്കുന്നുവെന്ന പ്രത്യേകത ചിത്രം റിലീസിനെത്തും മുൻപേ തന്നെ വലിയ ചർച്ചയാകുന്നുണ്ട്.

ഫോർബ്സ് ഇന്ത്യ 2026: 7 മലയാളികൾ ലിസ്റ്റിൽ, ഏറ്റവും സമ്പന്നനായ വ്യക്തിഗത മലയാളിയായി എം എ യൂസഫലി

Sangeetha KS — Fri, 02 Oct 2026 16:46:00 +0530

2026ലെ ഏറ്റവും സമ്പന്നരായ ഇന്ത്യക്കാരുടെ പട്ടിക പ്രസിദ്ധീകരിച്ച് ഫോർബ്സ് മാഗസിൻ. ഗൗതം അദാനി (112.7 ബില്യൺ ഡോളർ), മുകേഷ് അംബാനി (86.3 ബില്യൺ ഡോളർ), സാവിത്രി ജിൻഡൽ (39.8 ബില്യൺ ഡോളർ), ലക്ഷ്മി മിത്തൽ (34.7 ബില്യൺ ഡോളർ), സുനിൽ മിത്തൽ ( 32.9 ബില്യൺ ഡോളർ) എന്നിവരാണ് ആദ്യ പട്ടികയിലെ ആദ്യ അഞ്ച് സ്ഥാനക്കാർ.

7 മലയാളികൾ പട്ടികയിൽ ഇടം നേടി. ലുലു ഗ്രൂപ്പ് ചെയർമാൻ എം.എ യൂസഫലിയാണ് ഏറ്റവും സമ്പന്നനായ വ്യക്തിഗത മലയാളി. 55,500 കോടി രൂപയാണ് (5.75 ബില്യൺ ഡോളർ) യൂസഫലിയുടെ ആസ്തി. ആകെ റാങ്കിൽ 47ആം സ്ഥാനത്താണ് അദേഹം. 88,605 കോടിയുടെ (9.2 ബില്യൺ ഡോളർ) ആസ്തിയുമായി മുത്തൂറ്റ് കുടുംബമാണ് ഏറ്റവും സമ്പന്ന കുടുംബം. പട്ടികയിൽ 24ആം സ്ഥാനത്താണ് മുത്തൂറ്റ് കുടുംബം.

52,000 കോടി ആസ്തിയുമായി ജോയ് ആലുക്കാസ് (5.4 ബില്യൺ ഡോളർ, ), 39,500 കോ‌ടി ആസ്തിയുമായി രവി പിള്ള ( 4.1 ബില്യൺ ഡോളർ ), 38,500 കോടി ആസ്തിയുമായി സണ്ണി വർക്കി (4 ബില്യൺ ഡോളർ), 37,600 കോടി ആസ്തിയുമായി പിഎൻസി മേനോൻ (3.9 ബില്യൺ ഡോളർ), 34,200 കോടി ആസ്തിയുമായി ടി.എസ് കല്യാണരാമൻ (3.55 ബില്യൺ ഡോളർ) എന്നിവരാണ് പട്ടികയിലുള്ള മലയാളികൾ.

സൈറസ് പൂനാവാല (28.4 ബില്യൺ ഡോളർ), ശിവ് നാടാർ (27.4 ബില്യൺ ഡോളർ), ദിലീപ് സാംഗ്വി ആൻഡ് ഫാമിലി (26.3 ബില്യൺ ഡോളർ), കുമാർ ബിർള (23.2 ബില്യൺ ഡോളർ), ഹിന്ദുജ ഫാമിലി (21.2 ബില്യൺ ഡോളർ) എന്നിവരാണ് ആദ്യ പത്തിൽ ഇടം നേടിയ മറ്റുള്ളവർ.

വിമാനത്താവളത്തിലെ കൺവെയർ ബെൽറ്റിൽ നിന്ന് കിട്ടിയ പെട്ടി പൊട്ടിയ നിലയിലാണോ? നഷ്ടപരിഹാരം വാങ്ങാൻ എയർപോർട്ടിൽ ചെയ്യേണ്ട കാര്യങ്ങൾ എന്തൊക്കെ?

Sangeetha KS — Fri, 02 Oct 2026 16:15:18 +0530

ഫ്ലൈറ്റിൽ യാത്ര ചെയ്യുന്നവരെ സംബന്ധിച്ച് അവരെ ഏറ്റവും കൂടുതൽ ടെൻഷനിലാക്കുന്ന ഒരു കാര്യം ആണ് ലഗേജ്. പ്രത്യേകിച്ച് വിദേശ യാത്രയൊക്കെ കഴിഞ്ഞ് നാട്ടിലേക്ക് മടങ്ങുന്നവരെ സംബന്ധിച്ച് പ്രിയപ്പെട്ടവർക്കുള്ള സമ്മാനങ്ങളാകും പെട്ടി മുഴുവനും. കൺവോയർ ബെൽറ്റിൽ കറങ്ങി വരുന്ന സ്യൂട്ട് കേസിനോ ബാഗിനോ കേടൊന്നും സംഭവിച്ചിട്ടില്ലല്ലോ എന്നാകും നമ്മൾ ആദ്യം നോക്കുക. ഇനി, എന്തെങ്കിലും സാഹചര്യങ്ങൾ കൊണ്ട് നിങ്ങളുടെ പെട്ടിക്ക് കേടുപാടുകൾ സംഭവിച്ചു എന്ന് തന്നെ കരുതുക. നമുക്ക് എന്ത് ചെയ്യാം?

ഇത്തരം അടിയന്തര സാഹചര്യത്തിൽ എന്ത് ചെയ്യണമെന്ന് കൃത്യമായി അറിഞ്ഞിരുന്നാൽ വിമാനക്കമ്പനികളിൽ നിന്ന് അർഹമായ നഷ്ടപരിഹാരം പൂർണമായും നേടിയെടുക്കാൻ നമുക്ക് സാധിക്കും. ലഗേജ് കയ്യിൽക്കിട്ടിയ ഉടൻ തന്നെ കൃത്യമായി പരിശോധിക്കുകയാണ് ആദ്യം വേണ്ടത്. ഇത് ഏറ്റവും പ്രധാനപ്പെട്ട സ്റ്റെപ് കൂടിയാണ്. പ്രശ്നം ഉണ്ടെന്ന് കണ്ടാൽ അവിടെ വച്ച് തന്നെ ഫോണിൽ പെട്ടിയുടെ ഫോട്ടോ എടുത്ത് വയ്ക്കുക. പെട്ടിയിലെ ടാഗുൾപ്പെടെ കാണാവുന്ന തരത്തിലായിരിക്കണം ഇത്.

അത് പോലെ, എന്തെങ്കിലും തരത്തിലുള്ള കേടുപാടുകൾ ശ്രദ്ധയിൽപ്പെട്ടാൽ ഒരു കാരണവശാലും വിമാനത്താവളത്തിന്റെ എക്സിറ്റ് ഗേറ്റിന് പുറത്തേക്ക് കടക്കരുത്. എയർപോർട്ടിൽ നിന്ന് പുറത്തുപോയിക്കഴിഞ്ഞാൽ ഈ തകരാർ യാത്രയ്ക്കിടയിലാണ് സംഭവിച്ചതെന്ന് തെളിയിക്കാൻ വലിയ ബുദ്ധിമുട്ടായിരിക്കും. അതിനാൽ, ടെർമിനലിൽ തന്നെയുള്ള ബാഗേജ് സർവ്വീസസ് ഓഫീസിൽ ഉടൻ തന്നെ വിവരമറിയിക്കുക.

ഇനി, അവിടെയുള്ള ഉദ്യോഗസ്ഥർ നൽകുന്ന പ്രോപ്പർട്ടി ഇറഗുലാരിറ്റി റിപ്പോർട്ട് (PIR) എന്ന ഫോം ശ്രദ്ധാപൂർവം പൂരിപ്പിച്ചു നൽകണം. യാത്രയുടെ വിവരങ്ങൾ, ലഗേജ് ടാഗ് നമ്പർ, തകരാറിന്റെ സ്വഭാവം എന്നിവ രേഖപ്പെടുത്തുന്ന ഈ ഫോമാണ് നിങ്ങളുടെ ക്ലെയിം പ്രൊസസ്സ് ചെയ്യാനുള്ള പ്രാഥമിക രേഖ. പൂരിപ്പിച്ച ഫോമിന്റെ ഒരു പകർപ്പും റിപ്പോർട്ട് നമ്പറും കൈവശം കരുതാൻ പ്രത്യേകം ശ്രദ്ധിക്കണം. ഇതിനോടൊപ്പം തന്നെ തകരാറിലായ ബാഗിന്റെയും, ബാഗിലെ ക്ലെയിം ടാഗിന്റെയും, ബോർഡിങ് പാസിന്റെയും വ്യക്തമായ ഫോട്ടോകളും വീഡിയോകളും മൊബൈലിൽ പകർത്തി വെക്കുകയും വേണം. ഇത് ചെയ്ത ശേഷം മാത്രമേ എയർ പോർട്ടിലെ എക്സിറ്റ് ഗേറ്റ് കടക്കാൻ പാടുള്ളൂ.

എയർപോർട്ടിലെ പ്രാഥമിക നടപടികൾ പൂർത്തിയാക്കിയ ശേഷം, ഏഴ് ദിവസത്തിനുള്ളിൽ വിമാനക്കമ്പനിയുടെ ഔദ്യോഗിക ഇമെയിൽ വഴിയോ വെബ്‌സൈറ്റ് പോർട്ടൽ വഴിയോ നഷ്ടപരിഹാരത്തിനായി ഔദ്യോഗികമായി അപേക്ഷ സമർപ്പിക്കുകയും ചെയ്യാം. ഇന്ത്യയ്ക്കകത്തുള്ള യാത്രയാണെങ്കിൽ ഡിജിസിഎ (DGCA) മാനദണ്ഡങ്ങൾ പ്രകാരവും, അന്താരാഷ്ട്ര യാത്രയാണെങ്കിൽ മോൺട്രിയൽ കൺവെൻഷൻ ചട്ടങ്ങൾ പ്രകാരവുമാണ് നഷ്ടപരിഹാര തുക കണക്കാക്കുന്നത്. ബാഗ് നന്നാക്കിയെടുക്കാൻ സാധിക്കുന്നതാണെങ്കിൽ അതിനുള്ള ചെലവോ, കേടായതാണെങ്കിൽ പുതിയൊരു ബാഗിന്റെ വിലയോ നൽകാൻ വിമാനക്കമ്പനി ബാധ്യസ്ഥരാണ്.

എന്നാൽ എല്ലാ കേടുപാടുകൾക്കും നഷ്ടപരിഹാരം ലഭിക്കണമെന്നില്ല എന്ന കാര്യവും ഓർക്കേണ്ടതുണ്ട്. ബാഗിൽ അമിതമായി സാധനങ്ങൾ കുത്തിനിറച്ച് സിപ് പൊട്ടുകയോ ബാഗ് കീറുകയോ ചെയ്താൽ കമ്പനികൾ അതിന് ഉത്തരവാദികളാകില്ല. കൂടാതെ സാധാരണ യാത്രകളിൽ സംഭവിക്കാവുന്ന ചെറിയ രീതിയിലുള്ള പോറലുകൾക്കും നഷ്ടപരിഹാരം ലഭിക്കില്ല. അതിനാൽ ചെക്ക്- ഇൻ ലഗേജിനുള്ളിൽ വിലപിടിപ്പുള്ള വസ്തുക്കളോ പണമോ സൂക്ഷിക്കാതിരിക്കാൻ യാത്രക്കാർ എപ്പോഴും ശ്രദ്ധിക്കണം.

വിമാനക്കമ്പനിയുടെ ഭാഗത്തുനിന്ന് കാര്യമായ പ്രതികരണം ലഭിക്കാതിരിക്കുകയോ ക്ലെയിം നിരസിക്കുകയോ ചെയ്യുന്ന സാഹചര്യത്തിൽ ഉപഭോക്താക്കൾക്ക് കേന്ദ്ര വ്യോമയാന മന്ത്രാലയത്തിന്റെ 'എയർസേവ' (AirSewa) പോർട്ടൽ വഴി അടുത്ത പടിയായി ഓൺലൈനായി പരാതിപ്പെടാവുന്നതാണ്. ഇവിടെയും പരിഹാരമായില്ലെങ്കിൽ ആവശ്യമായ തെളിവുകൾ സഹിതം കൺസ്യൂമർ കോർട്ടിനെ സമീപിക്കാം.

കടം മുഴുവന്‍ വീട്ടിയെന്ന വിജയ് മല്യയുടെ വാദം പൊളിച്ച് എസ്ബിഐ; ഇനിയും നല്‍കാനുള്ളത് 8,752 കോടി രൂപ

Sangeetha KS — Sat, 03 Oct 2026 12:48:17 +0530

ബാങ്കുകള്‍ക്ക് നല്‍കാനുള്ള വായ്പാ കുടിശിക മുഴുവന്‍ തിരികെ നല്‍കിയെന്ന വ്യവസായി വിജയ് മല്യയുടെ വാദം പൊളിച്ച് എസ്.ബി.ഐ. ഓഗസ്റ്റ് 31-ലെ കണക്കുകള്‍ പ്രകാരം മല്യ ഇനിയും 8,752 കോടി രൂപ ബാങ്കുകള്‍ക്ക് നല്‍കാനുണ്ടെന്ന് എസ്.ബി.ഐയുടെ നേതൃത്വത്തിലുള്ള ബാങ്ക് കണ്‍സോര്‍ഷ്യം ബോംബെ ഹൈക്കോടതിയെ അറിയിച്ചിരിക്കുകയാണ്.

ഇത് വരെ 10,270 കോടി രൂപ ബാങ്കുകള്‍ക്ക് നല്‍കിയെന്നും, താന്‍ കടം വാങ്ങിയതിലും കൂടുതല്‍ തുക ബാങ്കുകള്‍ ഈടാക്കിക്കഴിഞ്ഞെന്നുമാണ് പൂട്ടിയ കിങ്ഫിഷര്‍ എയര്‍ലൈന്‍സിന്റെ സ്ഥാപകനും യുണൈറ്റഡ് ബ്രൂവറീസ് ഗ്രൂപ്പ് മുന്‍ ചെയര്‍മാനുമായിരുന്ന വിജയ് മല്യ അവകാശപ്പെട്ടിരുന്നത്. എന്നാല്‍ ഈ വാദങ്ങള്‍ പൂര്‍ണമായും തെറ്റാണെന്ന് ബാങ്കുകള്‍ കോടതിയില്‍ സമര്‍പ്പിച്ച സത്യവാങ്മൂലത്തില്‍ വ്യക്തമാക്കുന്നതായി എക്കണോമിക് ടൈംസ് റിപ്പോര്‍ട്ട് ചെയ്യുന്നു.

യഥാര്‍ഥ കണക്കുകള്‍ ഇങ്ങനെ

ഡെറ്റ് റിക്കവറി ട്രിബ്യൂണലില്‍ കേസ് ഫയല്‍ ചെയ്യുന്നതിന് മുന്‍പ് തന്നെ 544.58 കോടി രൂപ ബാങ്കുകള്‍ ഈടാക്കിയിരുന്നു. ഇതിനുപുറമെ, ബാങ്ക് കണ്‍സോര്‍ഷ്യം നല്‍കിയ ഒരു ബോണ്ട് വ്യവസ്ഥയുടെ അടിസ്ഥാനത്തില്‍ ഡെറ്റ് റിക്കവറി ഓഫീസര്‍ 10,270 കോടി രൂപ 'താല്‍ക്കാലികമായി' തിരിച്ചുപിടിച്ചിട്ടുണ്ടെന്നും സത്യവാങ്മൂലത്തില്‍ പറയുന്നു.

എന്നാല്‍, ഈ വര്‍ഷം ജനുവരിയിലെ കണക്കനുസരിച്ച് നിയമപരമായ മറ്റ് ചെലവുകള്‍ ഒഴിവാക്കിയാല്‍ പോലും 8,135.63 കോടി രൂപ കൂടി ബാങ്കുകള്‍ക്ക് കിട്ടാനുണ്ടായിരുന്നു. ഈ കുടിശികത്തുക ഓഗസ്റ്റ് 31 ആയപ്പോഴേക്കും 8,751.86 കോടി രൂപയായി ഉയര്‍ന്നുവെന്നാണ് ബാങ്കുകളുടെ വിശദീകരണം. ഇതുവരെ സ്വത്തുക്കള്‍ വഴി ലഭിച്ച തുകയുണ്ടെങ്കിലും, നിയമപരമായി ഇനിയും വലിയൊരു തുക മല്യയില്‍ നിന്ന് ഈടാക്കാന്‍ ബാക്കി നില്‍ക്കുന്നുണ്ടെന്ന് ബാങ്ക് വൃത്തങ്ങള്‍ ചൂണ്ടിക്കാട്ടുന്നു. മാത്രമല്ല, മല്യയുടെ പേരില്‍ പിടിച്ചെടുത്ത പല ഓഹരികളും വില്‍ക്കാതെ ഇപ്പോഴും നിലനിര്‍ത്തിയിട്ടുണ്ടെന്നും ബാങ്കുകള്‍ കോടതിയെ അറിയിച്ചു.

കേസ് റദ്ദാക്കണമെന്ന ഹര്‍ജിക്ക് തിരിച്ചടി

താന്‍ ബാങ്കുകള്‍ക്ക് നല്‍കാനുള്ള മുഴുവന്‍ തുകയും തിരിച്ചുപിടിച്ചതിനാല്‍, തനിക്കെതിരെയുള്ള ക്രിമിനല്‍ കേസുകള്‍ റദ്ദാക്കണമെന്ന് ആവശ്യപ്പെട്ട് 2020-ല്‍ മല്യ ഹൈക്കോടതിയെ സമീപിച്ചിരുന്നു. ഈ കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റ് നേരത്തെ തന്നെ മറുപടി നല്‍കിയിട്ടുണ്ട്. കഴിഞ്ഞ മാസം കേസ് പരിഗണിച്ച ഹൈക്കോടതി, മല്യയുടെ വാദങ്ങള്‍ക്ക് മറുപടി നല്‍കാന്‍ എസ്.ബി.ഐയോട് നിര്‍ദേശിച്ചിരുന്നു.

തുടര്‍ന്ന്, കള്ളപ്പണം വെളുപ്പിക്കല്‍ കേസ് റദ്ദാക്കണമെന്ന മല്യയുടെ ഹര്‍ജിക്ക് മറുപടിയായാണ് എസ്.ബി.ഐ ഇപ്പോള്‍ പുതിയ സത്യവാങ്മൂലം സമര്‍പ്പിച്ചത്. 2019 ഡിസംബര്‍ 31-ലെ ഉത്തരവിനെതിരെ മല്യ നല്‍കിയ ഹര്‍ജി അടിസ്ഥാനരഹിതമാണെന്നും അത് തള്ളണമെന്നും കണ്‍സോര്‍ഷ്യം ആവശ്യപ്പെട്ടു.

കുരുക്കായി ക്രിമിനല്‍ കേസുകളും

മല്യയ്‌ക്കെതിരെ രണ്ട് വ്യത്യസ്ത തലങ്ങളിലുള്ള നിയമനടപടികളാണ് ഇപ്പോള്‍ പുരോഗമിക്കുന്നത്. കിട്ടാനുള്ള പണം തിരിച്ചുപിടിക്കാന്‍ ഡെറ്റ് റിക്കവറി ട്രിബ്യൂണല്‍ വഴിയും സ്വത്തുക്കള്‍ വിറ്റഴിച്ചും ബാങ്കുകള്‍ നടത്തുന്ന ശ്രമങ്ങളാണ് ആദ്യത്തേത്. രണ്ടാമത്തേത് സി.ബി.ഐയും ഇ.ഡിയും നടത്തുന്ന ക്രിമിനല്‍ അന്വേഷണങ്ങളാണ്. കിങ്ഫിഷര്‍ എയര്‍ലൈന്‍സിന് നല്‍കിയ വായ്പകളുമായി ബന്ധപ്പെട്ട് ബാങ്ക് തട്ടിപ്പ്, കള്ളപ്പണം വെളുപ്പിക്കല്‍, ഗൂഢാലോചന തുടങ്ങിയ ഗുരുതരമായ കുറ്റങ്ങളാണ് ഏജന്‍സികള്‍ ചുമത്തിയിട്ടുള്ളത്.

മല്യയുടെ 14,132 കോടി രൂപ വിലമതിക്കുന്ന സ്വത്തുക്കള്‍ എസ്.ബി.ഐക്ക് കൈമാറിയിട്ടുണ്ടെന്ന് ഇ.ഡി നേരത്തെ വ്യക്തമാക്കിയിരുന്നു. എന്നാല്‍ ഈ പണം ലഭിക്കുന്നത് കേവലം സിവില്‍ കേസുകള്‍ തീര്‍പ്പാക്കാന്‍ മാത്രമെ സഹായിക്കൂവെന്നും, കള്ളപ്പണം വെളുപ്പിക്കല്‍ നിരോധന നിയമപ്രകാരമുള്ള ക്രിമിനല്‍ നടപടികളില്‍ നിന്ന് പ്രതിയായ മല്യയെ ഒഴിവാക്കാന്‍ ഇത് കാരണമല്ലെന്നും ഇ.ഡി നിലപാടെടുത്തു. ഈ കേസില്‍ ഒക്ടോബര്‍ 13-ന് ബോംബെ ഹൈക്കോടതി വീണ്ടും വാദം കേള്‍ക്കും.

ഇന്ത്യയുടെ ബ്രഹ്‌മോസ് വാങ്ങാന്‍ വിദേശ രാജ്യങ്ങളുടെ ക്യൂ; കയറ്റുമതി 5760 കോടി രൂപ കടക്കുമെന്ന് പ്രതിരോധ സെക്രട്ടറി

Sangeetha KS — Sat, 03 Oct 2026 12:27:46 +0530

ഇന്ത്യയുടെ പ്രതിരോധ കയറ്റുമതി മേഖലയില്‍ ചരിത്രം കുറിച്ച് ബ്രഹ്‌മോസ് മിസൈലുകള്‍. ലോകവിപണിയില്‍ ബ്രഹ്‌മോസിന് വന്‍ ഡിമാന്‍ഡാണുള്ളതെന്നും, മിസൈല്‍ കയറ്റുമതി 600 മില്യണ്‍ ഡോളര്‍ (ഏകദേശം 5760 കോടി രൂപ) കടക്കുമെന്നാണ് പ്രതീക്ഷിക്കുന്നതെന്നും പ്രതിരോധ സെക്രട്ടറി രാജേഷ് കുമാര്‍ സിംഗ് വ്യക്തമാക്കി. 'ഓപ്പറേഷന്‍ സിന്ദൂര്‍' വഴി യുദ്ധമുഖത്ത് ബ്രഹ്‌മോസ് അതിന്റെ മികവ് തെളിയിച്ചതാണെന്നും, സുഖോയ് വിമാനങ്ങളില്‍ നിന്നുള്ള എയര്‍-ലോഞ്ച് പതിപ്പ് വലിയ വിജയമാണെന്നും അദ്ദേഹം പറഞ്ഞു.

ഏറ്റവും ഉയര്‍ന്ന നിലവാരത്തിലുള്ള ഈ സ്ട്രാറ്റജിക് സിസ്റ്റത്തിന് വിപണിയില്‍ വന്‍ സാധ്യതകളാണുള്ളതെന്നും, ഇന്ത്യയുടെ പ്രതിരോധ കയറ്റുമതിയുടെ നെടുംതൂണായി ബ്രഹ്‌മോസ് മാറുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്‍ത്തു.

ആരൊക്കെയാണ് ബ്രഹ്‌മോസ് വാങ്ങുന്നത്?

ദക്ഷിണേഷ്യന്‍ രാജ്യങ്ങളായ ഫിലിപ്പീന്‍സ്, ഇന്തോനേഷ്യ, വിയറ്റ്‌നാം എന്നീ മൂന്ന് രാജ്യങ്ങളുമായാണ് ഇന്ത്യ പ്രധാനമായും ബ്രഹ്‌മോസ് കരാറുകളില്‍ ഏര്‍പ്പെട്ടിരിക്കുന്നത്.

ഫിലിപ്പീന്‍സ്: 2022-ല്‍ ബ്രഹ്‌മോസ് വാങ്ങുന്ന ആദ്യ രാജ്യമായി ഫിലിപ്പീന്‍സ് മാറി. 330 മില്യണ്‍ ഡോളറിന്റെ (3168 കോടി രൂപ) മിസൈലുകള്‍ ഇന്ത്യ അവര്‍ക്ക് കൈമാറിക്കഴിഞ്ഞു.

വിയറ്റ്‌നാം: ഈ വര്‍ഷം മെയ് മാസത്തിലാണ് വിയറ്റ്‌നാമുമായി കരാറിലെത്തിയത്. തുടക്കത്തില്‍ 100 മില്യണ്‍ ഡോളറിന്റെ (960 കോടി രൂപ) കയറ്റുമതിയാണ് പ്രതീക്ഷിക്കുന്നത്.

ഇന്തോനേഷ്യ: ബ്രഹ്‌മോസിനൊപ്പം അസ്ത്ര മിസൈലുകളും ഇന്ത്യ ഇന്തോനേഷ്യയ്ക്ക് നല്‍കും. ഏകദേശം 200 മില്യണ്‍ ഡോളറിന്റെ (1920 കോടി രൂപ) ഇടപാടാണിത്. ഇന്‍ഡോ- പസഫിക് മേഖലയിലെ മൂന്നാമത്തെ വലിയ കരാറാണിത്.

യു.എ.ഇ ഉള്‍പ്പെടെ മറ്റ് അര ഡസനോളം രാജ്യങ്ങളും ബ്രഹ്‌മോസ് വാങ്ങാന്‍ താല്പര്യം പ്രകടിപ്പിച്ചിട്ടുണ്ടെന്നും സൂചനകളുണ്ട്.

എന്തുകൊണ്ട് ബ്രഹ്‌മോസിന് ഇത്ര ഡിമാന്‍ഡ്?

ഇന്ത്യയും റഷ്യയും സംയുക്തമായി വികസിപ്പിച്ച് ബ്രഹ്‌മോസ് എയ്റോസ്പേസ് പ്രൈവറ്റ് ലിമിറ്റഡ് നിര്‍മ്മിക്കുന്ന സൂപ്പര്‍സോണിക് ക്രൂയിസ് മിസൈലാണ് ബ്രഹ്‌മോസ്. ലോകത്തിലെ ഏറ്റവും വേഗതയേറിയ ക്രൂയിസ് മിസൈലുകളിലൊന്നാണിത്. കര, കടല്‍, ആകാശം എന്നീ മൂന്ന് പ്ലാറ്റ്ഫോമുകളില്‍ നിന്നും ഇത് വിക്ഷേപിക്കാന്‍ സാധിക്കും.

ഇന്‍ഡോ-പസഫിക് മേഖലയില്‍ ചൈനയുടെ കടന്നുകയറ്റം വര്‍ദ്ധിക്കുന്നതാണ് ഫിലിപ്പീന്‍സ്, ഇന്തോനേഷ്യ, വിയറ്റ്‌നാം തുടങ്ങിയ രാജ്യങ്ങളെ ബ്രഹ്‌മോസ് വാങ്ങാന്‍ പ്രേരിപ്പിക്കുന്നത്. ദക്ഷിണ ചൈനാ കടലിലെ തര്‍ക്കപ്രദേശങ്ങള്‍ സംരക്ഷിക്കാന്‍ നാവികസേനയുടെ കരുത്ത് കുറഞ്ഞ ഈ രാജ്യങ്ങള്‍ക്ക് ബ്രഹ്‌മോസ് വലിയൊരു മുതല്‍ക്കൂട്ടാണ്.

ഇന്ത്യയുടെ പ്രതിരോധ കയറ്റുമതിയിലെ കുതിപ്പ്

ബ്രഹ്‌മോസിന് പുറമെ ആര്‍ട്ടിലറി ഗണ്ണുകള്‍, ഡി.ആര്‍.ഡി.ഒ സാങ്കേതികവിദ്യയിലുള്ള മറ്റ് ഉല്‍പ്പന്നങ്ങള്‍, ആകാശ് സര്‍ഫസ്-ടു-എയര്‍ മിസൈലുകള്‍ എന്നിവയ്ക്കും വിദേശ രാജ്യങ്ങളില്‍ വലിയ ആവശ്യക്കാരുണ്ട്. ഇന്ത്യയുടെ പ്രതിരോധ ഉപകരണങ്ങള്‍ ഇപ്പോള്‍ 80-ലധികം രാജ്യങ്ങളിലേക്കാണ് കയറ്റുമതി ചെയ്യുന്നത്. 2025-26 സാമ്പത്തിക വര്‍ഷത്തില്‍ പ്രതിരോധ കയറ്റുമതി സര്‍വകാല റെക്കോര്‍ഡായ 38,424 കോടി രൂപയിലെത്തി. മുന്‍ വര്‍ഷത്തെ 23,622 കോടി രൂപയില്‍ നിന്ന് 14,802 കോടി രൂപയുടെ (62.66%) വമ്പന്‍ വര്‍ദ്ധനവാണിത്.

കാത്തിരിക്കുന്നത് വൻ മാറ്റങ്ങൾ? ആർബിഐയുടെ മൂന്ന് ദിവസത്തെ ധനനയ അവലോകന യോഗം ഇന്ന് മുതൽ

Sangeetha KS — Mon, 05 Oct 2026 14:41:31 +0530

റിസർവ് ബാങ്കിന്റെ പണനയ അവലോകയോഗം തുടങ്ങി. മൂന്ന് ദിവസത്തെ യോഗത്തിൽ റിപ്പോ നിരക്ക് കാല്‍ ശതമാനം ഉയര്‍ത്തിയേക്കുമെന്നാണ് സൂചനകൾ. മൂന്ന് വർഷത്തിനിടെയുളള ആദ്യ നിരക്ക് വർധനവാകുമിത്. പണപ്പെരുപ്പ നിരക്കിലെ വർധന, രൂപയുടെ മൂല്യമിടിവ്, ആഗോള വിപണിയിലെ ക്രൂഡ് വിലവർധനയും നിരക്ക് വർധനയ്ക്ക് കാരണമാകുന്നുണ്ട്. ഓഗസ്റ്റിലെ നയ അവലോകനത്തിൽ ആർ.ബി.ഐ. റിപ്പോ നിരക്ക് മാറ്റമില്ലാതെ 5.25 ശതമാനത്തിൽ നിലനിർത്തുകയും 'നിഷ്പക്ഷ' നിലപാട് തുടരുകയും ചെയ്തിരുന്നു. എന്നാൽ നിലവിലെ 5.25 ശതമാനം 5.50 ശതമാനമായി ഉയർത്താനും ഡിസംബറിൽ വീണ്ടും റിപ്പോ ഉയരാനുമുളള സാധ്യതയാണ് സാമ്പത്തിക വിദഗ്ദർ പങ്കുവയ്ക്കുന്നത്. ഇതോടെ വിവിധ വായ്പകളുടെ പലിശനിരക്ക് ഉയർന്നേക്കും. ഭവന, വാഹന വായ്പയെടുത്തവർക്ക് ഇത് തിരിച്ചടിയാകും. അതെ സമയം സ്ഥിര നിക്ഷേപങ്ങൾക്ക് കൂടുതൽ പലിശ ലഭിക്കും.

റിസർവ് ബാങ്ക് ഗവർണർ സഞ്ജയ് മൽഹോത്രയുടെ അധ്യക്ഷതയിൽ ചേരുന്ന ആറംഗ സമിതി രാജ്യത്തെ നിലവിലെ സങ്കീർണ്ണമായ സാമ്പത്തിക സാഹചര്യങ്ങൾ സമഗ്രമായി വിലയിരുത്തും. ഒക്ടോബർ 7-നാണ് ബാങ്കിന്റെ പുതിയ വായ്പാനയം സംബന്ധിച്ച ഔദ്യോഗിക പ്രഖ്യാപനം ഉണ്ടാകുക.

കഴിഞ്ഞ അവലോകന യോഗങ്ങളിലും റിപ്പോ നിരക്ക് 5.25 ശതമാനത്തിൽ മാറ്റമില്ലാതെ നിലനിർത്താനാണ് ആർബിഐ തീരുമാനിച്ചിരുന്നത്. 2025-ൽ ആകെ 125 ബേസിസ് പോയിന്റിന്റെ കുറവ് വരുത്തിയ ശേഷമായിരുന്നു റിസർവ് ബാങ്ക് തുടർച്ചയായി റിപ്പോ മാറ്റമില്ലാതെ തുടർന്നിരുന്നത്. എന്നാൽ, നിലവിൽ ആഭ്യന്തര പണപ്പെരുപ്പത്തിലുണ്ടായ വർധനവും ആഗോള സാമ്പത്തിക പ്രതിസന്ധികളും ആർബിഐക്ക് മുന്നിൽ വലിയ വെല്ലുവിളിയാണ് ഉയർത്തുന്നത്. ഇതിന്റെ ഭാഗമായി വരും ദിവസങ്ങളിൽ പലിശനിരക്ക് ഉയർത്താൻ ആർബിഐ നിർബന്ധിതരായേക്കുമെന്നാണ് സാമ്പത്തിക ലോകം കരുതുന്നത്.

പശ്ചിമേഷ്യയിലെ സംഘർഷങ്ങൾ കടുത്തതോടെ ബ്രെന്റ് ക്രൂഡ് ഓയിൽ വില ബാരലിന് 100 ഡോളറിന് മുകളിലേക്ക് കുതിച്ചുയർന്നു. വർധിച്ചുവരുന്ന ഇന്ധനച്ചെലവ് ഗതാഗതച്ചെലവ് കൂട്ടാനും, അതുവഴി നിത്യോപയോഗ സാധനങ്ങളുടെ വിലക്കയറ്റത്തിന് കാരണമാകാനും സാധ്യതയേറെയാണ്. അതോടൊപ്പം ഇന്ത്യൻ രൂപ നേരിടുന്ന മൂല്യത്തകർച്ചയും ആഗോളതലത്തിൽ മറ്റ് കേന്ദ്ര ബാങ്കുകൾ പലിശനിരക്കുകൾ ഉയർന്ന നിലയിൽ നിലനിർത്തുന്നതും റിസർവ് ബാങ്കിന് മേൽ കടുത്ത സമ്മർദ്ദം സൃഷ്ടിക്കുന്നുണ്ട്. ഒക്ടോബർ 7-ലെ പ്രഖ്യാപനം സാമ്പത്തിക രംഗത്തിനും ഓഹരി വിപണിക്കും ഒരുപോലെ നിർണായകമായിരിക്കും.

ബാങ്ക് വായ്പയെടുത്തവരുടെ ഭാരം കൂടുമോ...? റിസർവ് ബാങ്കിന്റെ വായ്പാ നയം ഇന്ന്, റിപ്പോ നിരക്ക് വർധിക്കാൻ സാധ്യത

Web Desk — Wed, 07 Oct 2026 06:31:01 +0530

ദില്ലി: റിസർവ് ബാങ്കിന്റെ വായ്പാ നയ പ്രഖ്യാപനം ഇന്ന് നടക്കും. മൂന്ന് വർഷത്തിന് ശേഷം റിപ്പോ നിരക്കിൽ വർധനവുണ്ടാകുമെന്നാണ് സാമ്പത്തിക വിദഗ്ദർ നൽകുന്ന സൂചന. റിപ്പോ നിരക്ക് നിലവിലെ 5.25 ൽ നിന്ന് 5.50 ആക്കി ഉയർത്താനാണ് സാധ്യത. ഇതോടെ വായ്പയെടുത്തവരുടെ ഇഎംഐ ഭാരം കൂടും. നാല് വർഷത്തിനിടയിലെ ആദ്യത്തെ റിപ്പോ നിരക്ക് വർദ്ധനവിന്റെ പ്രതീക്ഷകൾ വർദ്ധിച്ചുവരുന്ന സാഹചര്യത്തിലാണ് തിങ്കളാഴ്ച ആരംഭിക്കുന്ന മൂന്ന് ദിവസത്തെ മോണിറ്ററി പോളിസി കമ്മിറ്റി (എംപിസി) യോഗത്തിനായി റിസർവ് ബാങ്ക് ഓഫ് ഇന്ത്യ (ആർബിഐ) ഉദ്യോഗസ്ഥർ യോഗം ചേർന്നത്.

2025 ൽ 125 ബേസിസ് പോയിന്റുകൾ നിരക്കുകൾ കുറച്ചതിന് ശേഷം തുടർച്ചയായ നാല് പോളിസി മീറ്റിംഗുകളിൽ സെൻട്രൽ ബാങ്ക് റിപ്പോ നിരക്ക് 5.25 ശതമാനമായി നിലനിർത്തി. വർധിച്ചുവരുന്ന പണപ്പെരുപ്പ അപകടസാധ്യതകളും ക്രൂഡ് ഓയിൽ വിലയിലെ വർധനവും സെൻട്രൽ ബാങ്ക് പണ നിയന്ത്രണത്തിലേക്ക് മാറുമെന്ന പ്രതീക്ഷകളെ ശക്തിപ്പെടുത്തുന്നതിനിടയിലാണ് ഏറ്റവും പുതിയ ആർബിഐ എംപിസി യോഗം. ഇന്ന് രാവിലെ പത്തിന് ആർ‌ബി‌ഐ ഗവർണർ സഞ്ജയ് മൽഹോത്ര ധനനയ പ്രസ്താവന നടത്തും. ഒക്ടോബറിൽ ആർ‌ബി‌ഐ റിപ്പോ നിരക്ക് 25 ബേസിസ് പോയിന്റുകൾ ഉയർത്തുമെന്നും 2027 സാമ്പത്തിക വർഷത്തിൽ കൂടുതൽ വർധനവ് വരുത്തുമെന്നുമാണ് സാമ്പത്തിക വിദഗ്ധർ നൽകുന്ന സൂചന.

റിപ്പോ നിരക്കുയർത്തി റിസർവ് ബാങ്ക്, ഭവന-വാഹന വായ്പയെടുത്തവർക്ക് പലിശ ഭാരം കൂടും

Web Desk — Wed, 07 Oct 2026 10:21:02 +0530

ദില്ലി: റിപ്പോ നിരക്ക് കൂട്ടി റിസർവ് ബാങ്ക്. 25 ബേസിസ് പോയിന്റ് കൂട്ടി നിരക്ക് 5.50 ശതമാനമായി ഉയർത്തി. റിപ്പോ നിരക്ക് കൂട്ടിയതോടെ ഭവന, വാഹന വായ്പകളുടെ പലിശ നിരക്കുയരും. റിസർവ് ബാങ്കിന്റെ വായ്പാ നയ പ്രഖ്യാപനത്തിലാണ് നിരക്ക് കൂട്ടിയതായി അറിയിച്ചത്. മൂന്ന് വർഷത്തിന് ശേഷമാണ് റിപ്പോ നിരക്കിൽ വർധനവുണ്ടാകുന്നത്. റിപ്പോ നിരക്ക് നിലവിലെ 5.25 ൽ നിന്നാണ് 5.50 ആക്കി ഉയർത്തിയത്. ഇതോടെ വായ്പയെടുത്തവരുടെ ഇഎംഐ ഭാരം കൂടും.

2025 ൽ 125 ബേസിസ് പോയിന്റുകൾ നിരക്കുകൾ കുറച്ചതിന് ശേഷം തുടർച്ചയായ നാല് പോളിസി മീറ്റിംഗുകളിൽ സെൻട്രൽ ബാങ്ക് റിപ്പോ നിരക്ക് 5.25 ശതമാനമായി നിലനിർത്തിയിരുന്നു. വർധിച്ചുവരുന്ന പണപ്പെരുപ്പ അപകടസാധ്യതകളും ക്രൂഡ് ഓയിൽ വിലയിലെ വർധനവും സെൻട്രൽ ബാങ്ക് പണ നിയന്ത്രണത്തിലേക്ക് മാറുമെന്ന പ്രതീക്ഷകളെ ശക്തിപ്പെടുത്തുന്നതിനിടയിലാണ് ഏറ്റവും പുതിയ ആർബിഐ എംപിസി യോഗം ചേർന്നത്. 2027 സാമ്പത്തിക വർഷത്തിൽ കൂടുതൽ വർധനവ് വരുത്തുമെന്നുമാണ് സാമ്പത്തിക വിദഗ്ധർ നൽകുന്ന സൂചന.

ഐപിഒയ്ക്ക് പിന്നാലെ ജീവനക്കാർക്ക് വൻ നേട്ടം; പണമായും ഓഹരിയായും ജീവനക്കാർക്ക് ലഭിക്കുക 96 ലക്ഷം രൂപ വരെ!

Sangeetha KS — Fri, 02 Oct 2026 12:23:53 +0530

ആർട്ടിഫിഷ്യൽ ഇന്‍റലിജൻസ് അധിഷ്ഠിത ഡാറ്റാ സെന്റർ മേഖലയിലെ വൻ വളർച്ചയ്ക്കിടെ ജീവനക്കാർക്ക് വലിയ സാമ്പത്തിക ആനുകൂല്യം പ്രഖ്യാപിച്ച് ഡാറ്റാ സെന്റർ ഇൻഫ്രാസ്‍ട്രക്ചർ കമ്പനിയായ ആക്‌സലറേഷൻ ഹോൾഡിങ്സ്. കമ്പനിയുടെ പ്രാരംഭ ഓഹരി വിൽപ്പനയ്ക്ക് പിന്നാലെ ഓരോ ജീവനക്കാരനും കുറഞ്ഞത് 100,000 ഡോളർ, ഏകദേശം 96 ലക്ഷം രൂപ, വീതം ലഭിക്കും.

അടുത്ത രണ്ട് വർഷത്തിനിടെ അഞ്ച് അല്ലെങ്കിൽ ആറ് ഘട്ടങ്ങളായിട്ടാകും ജീവനക്കാർക്ക് ഈ ആനുകൂല്യം നൽകുക. ജീവനക്കാരെ കമ്പനിയിൽ തുടരാൻ പ്രോത്സാഹിപ്പിക്കുക എന്ന ലക്ഷ്യവും ഇതിന് പിന്നിലുണ്ട്. ബ്ലൂംബെർഗ് റിപ്പോർട്ട് അനുസരിച്ചാണ് ഇക്കാര്യം പുറത്തുവന്നത്.

പണം മാത്രമല്ല, ഓഹരികളും ലഭിക്കും

ഓരോ ജീവനക്കാരനും ലഭിക്കുന്ന 100,000 ഡോളറിന്റെ പാക്കേജ് മുഴുവനായും പണമായിരിക്കണമെന്നില്ല. വിപണി സാഹചര്യങ്ങൾ അനുസരിച്ച് പണം, ആക്‌സലറേഷൻ കമ്പനിയുടെ ഓഹരികൾ, ജീവനക്കാരുടെ വിരമിക്കൽ സമ്പാദ്യത്തിലേക്കുള്ള സംഭാവന എന്നിവയുടെ രൂപത്തിലായിരിക്കും തുക നൽകുക. ഓരോ ഘട്ടത്തിലെയും ആനുകൂല്യം സ്വകാര്യ ഇക്വിറ്റി സ്ഥാപനമായ ഒളിമ്പസ് പാർട്ണേഴ്സ് കമ്പനിയിലെ തങ്ങളുടെ ഓഹരിയുടെ ഒരു ഭാഗം വിൽക്കുന്നതുമായി ബന്ധിപ്പിച്ചിരിക്കുന്നു. ഒളിമ്പസ് പാർട്ണേഴ്സ് ഓഹരി വിറ്റഴിക്കുന്നതിനനുസരിച്ചായിരിക്കും ജീവനക്കാർക്കുള്ള ആനുകൂല്യവും വിതരണം ചെയ്യുക.

ഡാറ്റാ സെന്റർ മേഖലയിലെ വൻ വളർച്ച

ഡാറ്റാ സെന്ററുകൾക്കുള്ളിൽ ഉപയോഗിക്കുന്ന വൈദ്യുതി വിതരണ സംവിധാനങ്ങൾ, കൂളിങ് ഉപകരണങ്ങൾ, ഘടനാപരമായ സംവിധാനങ്ങൾ തുടങ്ങിയവയാണ് ആക്‌സലറേഷൻ ഹോൾഡിങ്സ് നിർമിക്കുന്നത്. ഇവയുടെ ഇൻസ്റ്റലേഷൻ സേവനങ്ങളും കമ്പനി നൽകുന്നുണ്ട്. ആർട്ടിഫിഷ്യൽ ഇന്‍റലിജൻസിന്‍റെ അതിവേഗ വളർച്ചയോടെ ഡാറ്റാ സെന്ററുകളുടെ ശേഷി വർധിപ്പിക്കുന്നതിനുള്ള നിക്ഷേപം ഉയർന്നതാണ് കമ്പനിയുടെ വളർച്ചയ്ക്ക് പ്രധാന കാരണം.

മൈക്കൽ റുബിയേരയും ഷോൺ റുബിയേരയും ചേർന്ന് 2017ലാണ് കമ്പനി സ്ഥാപിച്ചത്. 2021ൽ മൂന്ന് മില്യൺ ഡോളറിൽ താഴെയായിരുന്ന കമ്പനിയുടെ വരുമാനം 2025ൽ 447.8 മില്യൺ ഡോളറായി ഉയർന്നതായി റോയിട്ടേഴ്സിനെ ഉദ്ദരിച്ച് ഇന്ത്യാ ടുഡേ റിപ്പോർട്ട് ചെയ്യുന്നു.

1,700ലധികം ജീവനക്കാർ

ഐപിഒയ്ക്ക് മുന്നോടിയായി സ്ഥാപകർ പുറത്തിറക്കിയ കത്തിൽ കമ്പനിയിൽ 1,700ലധികം ജീവനക്കാരുണ്ടെന്ന് വ്യക്തമാക്കിയിരുന്നു. കഴിഞ്ഞ അഞ്ച് വർഷത്തിനിടെ 1,700ലധികം പേരെ നിയമിച്ചതായും കമ്പനിയുടെ നിർമ്മാണ സൗകര്യങ്ങളുടെ വിസ്തീർണം 20,000 ചതുരശ്ര അടിയിൽ നിന്ന് ഏകദേശം 1.1 ദശലക്ഷം ചതുരശ്ര അടിയായി വർധിപ്പിച്ചതായും കമ്പനി അറിയിച്ചു.

540 മില്യൺ ഡോളർ സമാഹരിച്ചു

ആക്‌സലറേഷൻ ഹോൾഡിങ്സ് ഐപിഒയിൽ ഒരു ഓഹരിക്ക് 18 ഡോളർ എന്ന നിരക്കിലാണ് വില നിശ്ചയിച്ചത്. ആകെ 30 മില്യൺ ഓഹരികളാണ് വിൽപ്പന നടത്തിയത്. ഇതിൽ 10 മില്യൺ ഓഹരികൾ കമ്പനി നേരിട്ടാണ് വിൽപ്പന നടത്തിയത്. ഒളിമ്പസ് പാർട്ണേഴ്സുമായി ബന്ധപ്പെട്ട ഓഹരി ഉടമകൾ 20 മില്യൺ ഓഹരികളും വിറ്റു. ഇതിലൂടെ ആകെ 540 മില്യൺ ഡോളർ സമാഹരിച്ചു.

ഓഹരി വ്യാപാരം ആരംഭിച്ചത് നാസ്ഡാക്കിൽ

സെപ്റ്റംബർ 30ന് നാസ്ഡാക്കിൽ കമ്പനിയുടെ ഓഹരി വ്യാപാരം ആരംഭിച്ചു. എസിസിവി എന്ന ടിക്കർ ചിഹ്നത്തിലാണ് ഓഹരി ലിസ്റ്റ് ചെയ്തത്. എന്നാൽ ആദ്യ വ്യാപാരത്തിൽ ഓഹരി വില 17.55 ഡോളറിലാണ് തുറന്നത്. ഇത് 18 ഡോളറിന്റെ ഐപിഒ വിലയേക്കാൾ ഏകദേശം 2.5% കുറവാണ്. ഇതോടെ കമ്പനിയുടെ മൂല്യം ഏകദേശം 3.9 ബില്യൺ ഡോളറായി. എഐ സേവനങ്ങൾക്കാവശ്യമായ അടിസ്ഥാന സൗകര്യങ്ങളിൽ നിക്ഷേപം വർധിക്കുന്ന സാഹചര്യത്തിലാണ് കമ്പനിയുടെ ഐപിഒ. എഐ സംവിധാനങ്ങളുടെ വ്യാപനത്തിനൊപ്പം ഡാറ്റാ സെന്ററുകളിൽ വൈദ്യുതി, കൂളിങ്, മറ്റ് അടിസ്ഥാന സൗകര്യങ്ങൾ എന്നിവയ്ക്കുള്ള ആവശ്യകതയും ഉയർന്നിട്ടുണ്ട്. ഈ മേഖലയിൽ നിക്ഷേപം വർധിക്കുന്നതിന്റെ ഗുണം ലഭിക്കുമെന്ന പ്രതീക്ഷയിലാണ് ആക്‌സലറേഷൻ ഹോൾഡിങ്സ്.

റിലയന്‍സിന് ആശ്വാസ പ്രഖ്യാപനവുമായി ഡൽഹി ഹൈക്കോടതി; 'കാമ്പ' എനര്‍ജി ഡ്രിങ്ക് ലേബലില്‍ തന്നെ വില്‍ക്കാം

Sangeetha KS — Tue, 06 Oct 2026 15:31:00 +0530

റിലയന്‍സിന്റെ കൂൾഡ്രിങ്ക്സ് ബ്രാന്‍ഡായ 'കാമ്പ'-'എനര്‍ജി ഡ്രിങ്ക്' എന്ന ലേബലില്‍ തന്നെ വില്‍ക്കാന്‍ ഡൽഹി ഹൈക്കോടതി അനുമതി നല്‍കി. എനര്‍ജി ഡ്രിങ്ക് എന്ന പേര് ഉപയോഗിക്കുന്നത് വിലക്കിക്കൊണ്ടുള്ള ഭക്ഷ്യസുരക്ഷാ അതോറിറ്റിയുടെ നടപടി തങ്ങളുടെ ബിസിനസിനെ വലിയ രീതിയില്‍ ബാധിച്ചതായി കമ്പനി നേരത്തെ കോടതിയെ അറിയിച്ചിരുന്നു. ഇതിന് പിന്നാലെയാണ് കോടതിയുടെ സുപ്രധാന ഉത്തരവ്.

ഉയര്‍ന്ന അളവില്‍ കഫീന്‍ അടങ്ങിയ പാനീയങ്ങള്‍ 'എനര്‍ജി ഡ്രിങ്ക്' എന്ന പേരില്‍ വില്‍ക്കുന്നത് നിരോധിച്ചുകൊണ്ട് ജൂണ്‍ 30-നാണ് എഫ്.എസ്.എസ്.എ.ഐ ഉത്തരവിറക്കിയത്. ഇതിനെതിരെ റിലയന്‍സ് നല്‍കിയ ഹര്‍ജിയിലാണ് കോടതി ഇപ്പോള്‍ ഇളവ് അനുവദിച്ചിരിക്കുന്നത്.

തെറ്റുതിരുത്താന്‍ സമയമുണ്ടെന്ന് കോടതി

റിലയന്‍സിന് മുന്‍കൂര്‍ നോട്ടീസ് നല്‍കാതെ എന്തിനാണ് ഇത്തരമൊരു വിലക്ക് ഏര്‍പ്പെടുത്തിയതെന്ന് കോടതി എഫ്.എസ്.എസ്.എ.ഐയോട് ചോദിച്ചു. ചെയ്ത തെറ്റ് തിരുത്താന്‍ എപ്പോഴും സമയമുണ്ടെന്നും കോടതി ഏജന്‍സിയെ ഓര്‍മ്മിപ്പിച്ചു. കേസ് വീണ്ടും നവംബര്‍ അഞ്ചിന് കോടതി പരിഗണിക്കും. റിലയന്‍സിന് പുറമെ ആഗോള ഭീമന്മാരായ പെപ്സികോ, മോണ്‍സ്റ്റര്‍ ബെവറേജ് എന്നിവരും എഫ്.എസ്.എസ്.എ.ഐയുടെ ഈ ഉത്തരവിനെതിരെ കഴിഞ്ഞയാഴ്ച കോടതിയെ സമീപിച്ചിരുന്നു. ഓസ്ട്രിയന്‍ കമ്പനിയായ റെഡ് ബുള്‍ 'എനര്‍ജി ഡ്രിങ്ക്' എന്ന് ഉപയോഗിക്കാന്‍ നേരത്തെ തന്നെ കോടതിയില്‍ നിന്ന് പ്രത്യേക അനുമതി വാങ്ങിയിരുന്നു.

ആരോഗ്യപ്രശ്‌നങ്ങള്‍ ചൂണ്ടിക്കാട്ടി രാജ്യത്തുടനീളം ഭക്ഷ്യസുരക്ഷാ അതോറിറ്റി നടത്തുന്ന കര്‍ശന പരിശോധനകളുടെ ഭാഗമായാണ് ഈ ലേബല്‍ വിലക്കും വന്നത്. ഈ വര്‍ഷം നിരവധി റെയ്ഡുകളും പുതിയ മുന്നറിയിപ്പ് ലേബലുകള്‍ നിര്‍ബന്ധമാക്കുന്നതുള്‍പ്പെടെയുള്ള നടപടികളും അതോറിറ്റി സ്വീകരിച്ചിരുന്നു. എന്നാല്‍ ഈ വിഷയത്തില്‍ എഫ്.എസ്.എസ്.എ.ഐ ഇതുവരെ ഔദ്യോഗികമായി പ്രതികരിച്ചിട്ടില്ല.

ഒഴിവായത് കോടികളുടെ നഷ്ടം

ഒക്ടോബറില്‍ കോടതിയില്‍ സമര്‍പ്പിച്ച രേഖകള്‍ പ്രകാരം കോടിക്കണക്കിന് രൂപയുടെ ഉല്‍പ്പന്നങ്ങളാണ് റിലയന്‍സിന്റെ പക്കലുള്ളത്. 'എനര്‍ജി ഡ്രിങ്ക്' എന്ന് രേഖപ്പെടുത്തിയ 16.8 കോടി ക്യാനുകളും 12 കോടി പ്ലാസ്റ്റിക് കുപ്പികളുമാണ് വില്‍പ്പനയ്ക്ക് തയ്യാറായിട്ടുള്ളത്. ഇതിന് പുറമെ 40 കോടി ക്യാനുകള്‍ക്കും 36 കോടി കുപ്പികള്‍ക്കുമുള്ള പാക്കിങ് കവറുകളും പ്രിന്റ് ചെയ്ത് വെച്ചിട്ടുണ്ട്.

വിലക്ക് വന്നതോടെ സംസ്ഥാന സര്‍ക്കാരുകള്‍ റിലയന്‍സിന്റെ സ്റ്റോക്കുകള്‍ പിടിച്ചെടുക്കുകയും, ഇ-കൊമേഴ്സ് പ്ലാറ്റ്ഫോമുകളില്‍ നിന്ന് ഉല്‍പ്പന്നങ്ങള്‍ നീക്കം ചെയ്യാന്‍ ആവശ്യപ്പെടുകയും ചെയ്തിരുന്നു. ഇത് തങ്ങളുടെ ബിസിനസിനെ സാരമായി ബാധിച്ചുവെന്ന് റിലയന്‍സ് കോടതിയില്‍ വ്യക്തമാക്കിയിരുന്നു.

ചൈനീസ് ഉല്‍പന്നങ്ങളില്‍ കുടുങ്ങിയോ ഇന്ത്യ? ഇന്ത്യ നിയന്ത്രിച്ചപ്പോഴും ഒഴുകി ചൈനീസ് ഉല്‍പ്പന്നങ്ങള്‍

Sangeetha KS — Tue, 06 Oct 2026 16:35:38 +0530

2020 ല്‍ ഗല്‍വാന്‍ താഴ്വരയിലെ ഏറ്റുമുട്ടലിനെ തുടര്‍ന്ന് ഇന്ത്യയും ചൈന തമ്മിലുള്ള നയതന്ത്ര ബന്ധം പൂര്‍ണമായി തകര്‍ന്നിരുന്നു. ഇന്ത്യ ചൈനീസ് ആപ്പുകളായ ടിക് ടോക്ക് അടക്കമുള്ളവ നിരോധിക്കുകയും ആന്റി ഡംപിങ് തീരുവ ചുമത്തുകയും ചെയ്തു. എന്നാല്‍ ഇതിന് ശേഷം വ്യാപാരക്കമ്മി കുറയുന്നതിന് പകരം കുത്തനെ കൂടുകയാണ് ചെയ്തത്. 2020-ല്‍ 44 ബില്യണ്‍ ഡോളറായിരുന്ന വ്യാപാരക്കമ്മി ഈ വര്‍ഷം 112 ബില്യണ്‍ ഡോളറെന്ന ഞെട്ടിക്കുന്ന സംഖ്യയിലെത്തി.

രാഷ്ട്രീയ, സുരക്ഷാ, നിക്ഷേപ ബന്ധങ്ങള്‍ ഏറ്റവും താഴ്ന്ന നിലയിലായിരുന്നപ്പോഴും ചൈനയോടുള്ള ഇന്ത്യയുടെ സാമ്പത്തിക ആശ്രയത്വം വര്‍ദ്ധിക്കുകയാണുണ്ടായതെന്ന് വാഷിംഗ്ടണ്‍ ആസ്ഥാനമായുള്ള ഏഷ്യ സൊസൈറ്റി പോളിസി ഇന്‍സ്റ്റിറ്റ്യൂട്ടിലെ ഗവേഷകന്‍ കെവിന്‍ സോങ്‌ഷെ ലീ വ്യക്തമാക്കുന്നു. കോവിഡിന് മുമ്പുള്ള കാലത്തേക്കാള്‍ കയറ്റുമതി കുറഞ്ഞു നില്‍ക്കുമ്പോഴാണ് ചൈനയില്‍ നിന്നുള്ള ഇറക്കുമതി ഇരട്ടിയായത്. ഇറക്കുമതി ഈ വേഗത്തില്‍ തുടര്‍ന്നാല്‍ വ്യാപാരക്കമ്മി 134 ബില്യണ്‍ ഡോളറിലേക്ക് ഉയര്‍ന്നേക്കാം. ഇത് ഇന്ത്യന്‍ വ്യവസായ മേഖലയില്‍ ചൈനയ്ക്ക് കൂടുതല്‍ സ്വാധീനം നല്‍കും.

സെപ്റ്റംബറില്‍ ഡല്‍ഹിയില്‍ നടന്ന ബ്രിക്‌സ് ഉച്ചകോടിയുടെ ഇടവേളയില്‍ പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷി ജിന്‍പിംഗും കൂടിക്കാഴ്ച നടത്തുകയും ഈ വ്യാപാര അസമത്വം പരിഹരിക്കുമെന്ന് പ്രഖ്യാപിക്കുകയും ചെയ്തിരുന്നു.

ലോകത്തിലെ ഐഫോണുകളുടെ കാല്‍ഭാഗത്തിലധികവും ഇപ്പോള്‍ ഇന്ത്യയിലാണ് നിര്‍മ്മിക്കുന്നത്. എന്നാല്‍ ഇവ നിര്‍മ്മാണത്തേക്കാളേറെ മറ്റ് രാജ്യങ്ങളില്‍ നിന്നുള്ള യന്ത്രഭാഗങ്ങള്‍ കൂട്ടിയിണക്കുന്ന പ്രക്രിയ മാത്രമാണെന്നും ഇതിനാവശ്യമായ ഭാഗങ്ങള്‍ പ്രധാനമായും വരുന്നത് ചൈനയില്‍ നിന്നാണെന്നും വിദഗ്ധര്‍ ചൂണ്ടിക്കാണിക്കുന്നു.

വ്യവസായിക യന്ത്രങ്ങള്‍, ബാറ്ററി ഘടകങ്ങള്‍, കെമിക്കലുകള്‍, സോളാര്‍ സെല്ലുകള്‍ എന്നിവയുടെ കാര്യത്തിലും സ്ഥിതി ഇതുതന്നെ. ഒബ്‌സര്‍വര്‍ റിസര്‍ച്ച് ഫൗണ്ടേഷന്റെ കണക്കനുസരിച്ച്, ഇന്ത്യ ചൈനയില്‍ നിന്ന് ഇറക്കുമതി ചെയ്യുന്നതില്‍ 36 ശതമാനവും ഇലക്ട്രിക്കല്‍ യന്ത്രങ്ങളും ഇലക്ട്രോണിക്‌സുകളുമാണ്. മെഷിനറികളും മെക്കാനിക്കല്‍ ഉപകരണങ്ങളും 21.7 ശതമാനം വരും. ഓര്‍ഗാനിക് കെമിക്കലുകള്‍ക്കും പ്ലാസ്റ്റിക്കിനും വലിയ പങ്കുണ്ട്. ഇവയുടെ വിതരണം തടസ്സപ്പെട്ടാല്‍ അത് ഉപഭോഗത്തെ മാത്രമല്ല, രാജ്യത്തെ ഉല്‍പ്പാദന മേഖലയെത്തന്നെ നിശ്ചലമാക്കും

ചൈനയുടെ തന്ത്രവും പാശ്ചാത്യ രാജ്യങ്ങളുടെ വിലക്കും

സ്റ്റീല്‍, സോളാര്‍ പാനലുകള്‍, ഇലക്ട്രിക് വാഹനങ്ങള്‍ എന്നിവയില്‍ ചൈനയില്‍ ആവശ്യത്തിലധികം ഉല്‍പ്പാദനം നടക്കുന്നുണ്ട്. എന്നാല്‍ സ്വന്തം നാട്ടിലെ സാമ്പത്തിക മന്ദഗതി കാരണം ഇവ വിറ്റഴിക്കാനാവുന്നില്ല. അതിനാല്‍ അവര്‍ ഉല്‍പന്നങ്ങള്‍ വിലകുറച്ച് വിദേശ വിപണികളിലേക്ക് തള്ളുകയാണ്. ചൈനയുടെ വ്യാപാര മിച്ചം തുടര്‍ച്ചയായ രണ്ടാം വര്‍ഷവും 1 ട്രില്യണ്‍ ഡോളറിന് മുകളിലെത്തുമെന്നാണ് പ്രതീക്ഷിക്കുന്നത്. പാശ്ചാത്യ രാജ്യങ്ങള്‍ ചൈനീസ് ഉല്‍പന്നങ്ങള്‍ക്ക് വന്‍തോതില്‍ നികുതി ചുമത്തുന്നതും നിയന്ത്രണങ്ങള്‍ ഏര്‍പ്പെടുത്തുന്നതും കാരണം ഈ ഉല്‍പന്നങ്ങളില്‍ ഭൂരിഭാഗവും ഇന്ത്യയിലേക്കാണ് ഒഴുകിയെത്തുന്നത്.

മറുവശത്ത്, ഇന്ത്യന്‍ കമ്പനികള്‍ക്ക് ചൈനീസ് വിപണിയില്‍ പ്രവേശിക്കുന്നത് എളുപ്പമല്ല. അവിടെ ഉയര്‍ന്ന നികുതിയും മറ്റ് തടസങ്ങളുമുണ്ട്. വിപണി തുറന്നു നല്‍കാന്‍ ചൈന തയ്യാറായില്ലെങ്കില്‍ രാഷ്ട്രീയ ബന്ധം മെച്ചപ്പെട്ടാലും സാമ്പത്തിക ആശ്രയത്വം മാറ്റമില്ലാതെ തുടരുമെന്ന് കെവിന്‍ ലീ പറയുന്നു. ഇന്ത്യയിലെ നിര്‍മ്മാണ മേഖല ശക്തിപ്പെടുത്തുകയാണ് ഇതിനുള്ള ദീര്‍ഘകാല പരിഹാരം. എന്നാല്‍ ഇതിന് കുറഞ്ഞ ചെലവില്‍ വൈദ്യുതി, വായ്പ, മെച്ചപ്പെട്ട ഗതാഗത സൗകര്യങ്ങള്‍, സുസ്ഥിരമായ നിയമങ്ങള്‍ എന്നിവ അത്യാവശ്യമാണ്.

ഇന്ത്യ-യുകെ വ്യാപാര കരാർ: സ്‌കോച്ച് വിസ്‌കികൾക്ക് വിലകുറഞ്ഞു; ഇന്ത്യൻ ബ്രാൻഡുകൾക്ക് കടുത്ത വെല്ലുവിളി

Sangeetha KS — Sat, 03 Oct 2026 15:32:56 +0530

ഇന്ത്യ- യുകെ സ്വതന്ത്ര വ്യാപാര കരാര്‍ നിലവില്‍ വന്നതിന് പിന്നാലെ സ്‌കോച്ച് വിസ്‌കികളുടെ വിലയില്‍ വലിയ കുറവ് വന്നതോടെ, ഇന്ത്യന്‍ വിസ്‌കികളും വിദേശ സ്‌കോച്ച് വിസ്‌കികളും തമ്മിലുള്ള വിലയിലെ അന്തരം ഗണ്യമായി കുറയുകയാണ്. ഇന്ത്യന്‍ വിസ്‌കി നിര്‍മ്മാതാക്കള്‍ക്ക് ഇത് വിപണിയില്‍ കടുത്ത വെല്ലുവിളിയാണ് സൃഷ്ടിക്കുന്നത്.

ഉദാഹരണത്തിന് കര്‍ണാടകയില്‍ 750 മില്ലി റെഡ് ലേബലിന്റെ വില 2,810 രൂപയില്‍ നിന്ന് 2,620 രൂപയായി കുറഞ്ഞു. ബ്ലാക്ക് ലേബലിന്റെ വില 4,005 രൂപയില്‍ നിന്ന് 3,645 രൂപയായും കുറഞ്ഞു. ബ്ലാക്ക് ആന്‍ഡ് വൈറ്റിന് 2,365 രൂപയാണ് നിലവിലെ വില. അതായത്, വെറും 255 രൂപ കൂടി അധികം നല്‍കിയാല്‍ ഉപഭോക്താക്കള്‍ക്ക് റെഡ് ലേബല്‍ വാങ്ങാം എന്ന സ്ഥിതിയാണുള്ളത്. കൂടാതെ ജെ ആന്‍ഡ് ബി വിസ്‌കിയുടെ വില 2,835 രൂപയില്‍ നിന്ന് ഒറ്റയടിക്ക് 1,375 രൂപയായി കുറഞ്ഞു

വില കുറയാന്‍ കാരണമെന്ത്?

ഇന്ത്യ- യുകെ വ്യാപാരക്കരാറിന്റെ ഭാഗമായി വിസ്‌കിയുടെ ഇറക്കുമതി തീരുവ 150 ശതമാനത്തില്‍ നിന്ന് 75 ശതമാനമായി പകുതിയായി കുറച്ചതാണ് ഈ വലിയ വിലക്കുറവിന് പ്രധാന കാരണം. കൂടാതെ വിവിധ സംസ്ഥാനങ്ങളിലെ നികുതികളും, മദ്യം എവിടെ വെച്ച് കുപ്പിയിലാക്കുന്നു എന്നതും വിലയെ സ്വാധീനിക്കുന്നുണ്ട്. വിലക്കുറവ് ആദ്യം നടപ്പിലാക്കിയ ഡിയാജിയോ, ഏഴ് സംസ്ഥാനങ്ങളില്‍ ഇതിനകം പുതിയ വിലകള്‍ നിലവില്‍ വന്നതായി അറിയിച്ചു. മറ്റ് നാല് വിപണികളില്‍ കൂടി മാറ്റങ്ങള്‍ ഉടന്‍ നടപ്പിലാക്കും. എന്നാല്‍ ഡല്‍ഹിയിലും ഹരിയാനയിലും നിലവില്‍ വിലയില്‍ മാറ്റം വന്നിട്ടില്ല.

ഇന്ത്യന്‍ സിംഗിള്‍ മാള്‍ട്ടുകളും കടുത്ത മത്സരത്തില്‍

വിലയിലെ ഈ മാറ്റങ്ങള്‍ ഇന്ത്യന്‍ വിസ്‌കികളെ വലിയ രീതിയില്‍ ബാധിക്കുന്നുണ്ട്. 750 മില്ലി വുഡ്ബേണ്‍സ് വിസ്‌കിക്ക് 2,500 രൂപയും, ഇന്ത്യന്‍ സിംഗിള്‍ മാള്‍ട്ടായ പോള്‍ ജോണ്‍ നിര്‍വാണയ്ക്ക് 2,360 രൂപയുമാണ് നിലവിലെ വില. സിംഗിള്‍ മാള്‍ട്ടുകള്‍ തമ്മിലുള്ള മത്സരവും വിപണിയില്‍ കടുക്കുകയാണ്. ഗ്ലെന്‍ഫിഡിച്ച് 12-ന് 5,610 രൂപയില്‍ നിന്ന് 5,275 രൂപയായി വില കുറഞ്ഞിട്ടുണ്ട്. അമൃത് അമാല്‍ഗം 500 മില്ലിക്ക് 2,000 രൂപയാണ് വില.

പശ്ചിമേഷ്യൻ പ്രതിസന്ധി: കടുത്ത സാമ്പത്തിക ഞെരുക്കത്തിൽ വിമാനക്കമ്പനികൾ; കേന്ദ്രത്തിന്റെ അടിയന്തര സഹായം തേടി എഫ്.ഐ.എ

Sangeetha KS — Tue, 06 Oct 2026 13:44:28 +0530

ദില്ലി: പശ്ചിമേഷ്യയിൽ തുടരുന്ന സംഘർഷവും വ്യോമപാതകളിലെ നിയന്ത്രണങ്ങളും കാരണമുണ്ടായ ഉയർന്ന പ്രവർത്തനച്ചെലവ് രാജ്യത്തെ പ്രമുഖ വിമാനക്കമ്പനികളെ കടുത്ത സാമ്പത്തിക പ്രതിസന്ധിയിലാക്കുകയാണ്. സ്ഥിതിഗതികൾ പരിഹരിക്കുന്നതിനായി കേന്ദ്ര വ്യോമയാന മന്ത്രി കിഞ്ചരാപ്പു രാംമോഹൻ നായിഡുവിന് അടിയന്തര ഇടപെടൽ അഭ്യർത്ഥിച്ച് എയർ ഇന്ത്യ, ഇൻഡിഗോ, സ്പൈസ് ജെറ്റ് എന്നിവയുടെ കൂട്ടായ്മയായ ഫെഡറേഷൻ ഓഫ് ഇന്ത്യൻ എയർലൈൻസ് (എഫ്.ഐ.എ) കത്തയച്ചു.

സെപ്റ്റംബർ 25-ന് അയച്ച കത്തിൽ, വ്യോമപാത തിരിച്ച് വിട്ടതിനെത്തുടർന്നുള്ള അധിക ദൂരം, വിമാന ഇന്ധന (ATF) വിലയിലെ അമിത വർധനവ്, ഇന്ത്യൻ രൂപയുടെ മൂല്യത്തകർച്ച എന്നിവയാണ് കമ്പനികൾ പ്രധാന വെല്ലുവിളികളായി ചൂണ്ടിക്കാണിക്കുന്നത്. വ്യോമപാത ദീർഘിച്ചതോടെ ഇന്ധന ഉപഭോഗവും ജീവനക്കാരുടെ ചെലവും ഉയർന്നു. കൂടാതെ ലീസ്, ഇൻഷുറൻസ് തുകകൾ ഡോളറിലാണ് അടയ്ക്കേണ്ടത് എന്നതിനാൽ രൂപയുടെ മൂല്യത്തകർച്ചയും തിരിച്ചടിയായി.

ടിക്കറ്റുകൾ നേരത്തെ തന്നെ വിറ്റഴിച്ചതിനാൽ പെട്ടെന്ന് യാത്രാനിരക്ക് വർധിപ്പിച്ച് തുക ഈടാക്കാനും കമ്പനികൾക്ക് സാധിക്കുന്നില്ല.സാധാരണയായി മൊത്തം ചെലവിന്റെ 30- 40 ശതമാനം വന്നിരുന്ന ഇന്ധനച്ചെലവ് നിലവിൽ 55- 60 ശതമാനമായി ഉയർന്നിട്ടുണ്ട്. അന്താരാഷ്ട്ര വിപണിയിൽ ബ്രെന്റ് ക്രൂഡ് വില ബാരലിന് 72 ഡോളറിൽ നിന്ന് 118 ഡോളറായി ഉയർന്നപ്പോൾ എ.ടി.എഫ് വില ബാരലിന് 260.24 ഡോളർ വരെ എത്തിയ ശേഷം നിലവിൽ 175.33 ഡോളറിലാണ് നൽക്കുന്നത്.

പ്രശ്നങ്ങൾ പരിഹരിക്കാൻ ആഭ്യന്തര സർവീസുകൾക്കായി മുൻപ് അനുവദിച്ച 25 ശതമാനം ലാന്റിംഗ്- പാർക്കിംഗ് ചാർജ് ഇളവ് ദീർഘിപ്പിച്ചു നൽകണമെന്ന് വിമാനക്കമ്പനികൾ അഭ്യർത്ഥിച്ചു. ഇതോടൊപ്പം, ആഭ്യന്തര എ.ടി.എഫ് വിലനിർണ്ണയം അന്താരാഷ്ട്ര മാനദണ്ഡങ്ങൾക്ക് പകരം 'കോസ്റ്റ്-പ്ലസ് മോഡലിലേക്ക്' മാറ്റണമെന്നും 11 ശതമാനം വരുന്ന എക്സൈസ് ഡ്യൂട്ടി നിശ്ചിത നിരക്കിലേക്ക് ക്രമീകരിക്കണമെന്നും ആവശ്യപ്പെട്ടിട്ടുണ്ട്. ദില്ലി, മഹാരാഷ്ട്ര സർക്കാരുകൾ നൽകുന്ന 7% വാറ്റ് ഇളവ് തുടർന്നും നൽകണമെന്നും മറ്റ് പ്രമുഖ സംസ്ഥാനങ്ങളിലും സമാന ഇളവുകൾ ഏർപ്പെടുത്തണമെന്നും സംഘടന ആവശ്യമുന്നയിച്ചു. കൃത്യസമയത്ത് സർക്കാരിന്റെ ഭാഗത്തു നിന്ന് സാമ്പത്തിക സഹായങ്ങൾ ലഭ്യമായില്ലെങ്കിൽ ലാഭകരമല്ലാത്ത പല സർവീസുകളും നിർത്തിവെക്കാൻ വിമാനക്കമ്പനികൾ നിർബന്ധിതരായേക്കുമെന്നാണ് എഫ്.ഐ.എ മുന്നറിയിപ്പ് നൽകുന്നത്.

എല്‍ നിനോ വില്ലനാകും; ലോകം കടുത്ത ഭക്ഷ്യപ്രതിസന്ധിയിലേക്ക്, അരിക്കും കാപ്പിക്കും പാമോയിലിനും വെളിച്ചെണ്ണയ്ക്കും വില കുതിച്ചുയരും

Sangeetha KS — Mon, 05 Oct 2026 17:24:53 +0530

എല്‍ നിനോ കരുത്താര്‍ജിക്കുന്നതോടെ ലോകം കടുത്ത ഭക്ഷ്യപ്രതിസന്ധിയിലേക്ക് നീങ്ങുമെന്ന് വിദഗ്ധരുടെ മുന്നറിയിപ്പ്. കാപ്പി, പാമോയില്‍ തുടങ്ങിയ നിത്യോപയോഗ സാധനങ്ങളുടെ വില കുതിച്ചുയരും. യുദ്ധം മൂലം വിതരണ ശൃംഖല തകര്‍ന്നിരിക്കുന്ന ഈ സമയത്ത് എല്‍ നിനോ കൂടി വരുന്നത് വലിയ പ്രതിസന്ധിയാണ് സൃഷ്ടിക്കുക. ഈ വര്‍ഷം അവസാനത്തോടെ എല്‍ നിനോ അതിന്റെ പാരമ്യത്തിലെത്തുമെന്നാണ് പ്രവചനം.

വളത്തിന്റെ ക്ഷാമം, മോശം വിളവ്, കാലാവസ്ഥാ വ്യതിയാനങ്ങള്‍ എന്നിവയെ നേരിടാന്‍ ശേഷി കുറവായതിനാല്‍ വികസ്വര രാജ്യങ്ങളെയാകും ഇത് ഏറ്റവും രൂക്ഷമായി ബാധിക്കുക. കിഴക്കന്‍, ദക്ഷിണ ആഫ്രിക്കന്‍ രാജ്യങ്ങളില്‍ എല്‍ നിനോ പ്രാദേശികമായി വലിയ ഭക്ഷ്യക്ഷാമത്തിന് കാരണമാകും. പസഫിക് സമുദ്രോപരിതലത്തിലെ താപനില അസാധാരണമായി വര്‍ധിക്കുന്ന കാലാവസ്ഥാ മാറ്റമാണ് എല്‍ നിനോ. ഓസ്‌ട്രേലിയ ഉള്‍പ്പെടെയുള്ള രാജ്യങ്ങളില്‍ കൊടും വരള്‍ച്ചയും കിഴക്കന്‍ ആഫ്രിക്കയില്‍ പ്രളയവും ലോകമെമ്പാടും കടുത്ത ചൂടും ഇത് സമ്മാനിക്കും. ഭൂമിശാസ്ത്രപരമായ പ്രത്യേകതകള്‍ കാരണം കാപ്പി, പാമോയില്‍ ഉല്‍പ്പാദിപ്പിക്കുന്ന രാജ്യങ്ങളെ എല്‍ നിനോ വലിയ രീതിയില്‍ ബാധിക്കും.

ലോകത്തെ പ്രധാന കാപ്പി ഉല്‍പ്പാദകരായ ബ്രസീലിലും വിയറ്റ്‌നാമിലും മധ്യ അമേരിക്കയിലും മഴയുടെ ലഭ്യതയില്‍ വലിയ മാറ്റങ്ങളുണ്ടാകും. പാമോയില്‍ വന്‍തോതില്‍ ഉല്‍പ്പാദിപ്പിക്കുന്ന ഇന്തൊനീഷ്യ ഇതിനോടകം തന്നെ എല്‍ നിനോയുമായി ബന്ധപ്പെട്ട വരള്‍ച്ചയുടെ പിടിയിലാണ്. ഇവിടെ മഴ ലഭിക്കേണ്ട സമയത്ത് കൊടും വരള്‍ച്ചയും കാട്ടുതീയുമാണ് അനുഭവപ്പെടുന്നത്. 2015-16 കാലഘട്ടത്തിലുണ്ടായ സൂപ്പര്‍ എല്‍ നിനോ സമയത്തെ കാട്ടുതീയ്ക്ക് സമാനമായ അവസ്ഥയാണ് ഇന്തൊനീഷ്യയില്‍ ഇപ്പോഴുള്ളത്. ഇത് പാമോയില്‍ ഉല്‍പ്പാദനത്തെ സാരമായി ബാധിക്കും. പാമോയിലിന് ക്ഷാമം നേരിടുന്നത് അമേരിക്ക ഉള്‍പ്പെടെയുള്ള രാജ്യങ്ങളില്‍ മറ്റ് ഉല്‍പ്പന്നങ്ങളുടെ വിലക്കയറ്റത്തിനും കാരണമാകും. സ്വന്തമായി മികച്ച കാര്‍ഷിക ഉല്‍പ്പാദനം ഉള്ളതിനാല്‍ അമേരിക്കയില്‍ ഭക്ഷ്യക്ഷാമം ഉണ്ടാകില്ലെങ്കിലും, 2026-2027 കാലഘട്ടത്തില്‍ അവിടെയും ഇത്തരം ഉല്‍പ്പന്നങ്ങള്‍ക്ക് വില കൂടും.

പ്രതിസന്ധി ഇരട്ടിയാക്കി യുദ്ധങ്ങളും

യുദ്ധങ്ങളും വ്യാപാര നിയന്ത്രണങ്ങളും എല്‍ നിനോയും ചേരുന്നതോടെ ആഗോള തലത്തില്‍ ഭക്ഷ്യവിലകള്‍ കുതിച്ചുയരുകയാണെന്ന് യുഎന്‍ ഫുഡ് ആന്‍ഡ് അഗ്രികള്‍ച്ചര്‍ ഓര്‍ഗനൈസേഷന്റെ ചീഫ് ഇക്കണോമിസ്റ്റ് മാക്‌സിമോ ടൊറേറോ പറയുന്നു. ഇറാന്‍- ഇസ്രയേല്‍- യുഎസ് സംഘര്‍ഷങ്ങള്‍ പെട്രോള്‍, ഡീസല്‍ വില വര്‍ധിപ്പിക്കുന്നതിനൊപ്പം രാസവളങ്ങളുടെ വിതരണത്തെയും ബാധിക്കുന്നുണ്ട്. അമേരിക്കയും മറ്റ് രാജ്യങ്ങളും ഏര്‍പ്പെടുത്തിയ വ്യാപാര നിയന്ത്രണങ്ങളും പ്രതിസന്ധി രൂക്ഷമാക്കുന്നു.

ഇന്ത്യയുടെ അരിയും ഓസ്‌ട്രേലിയയുടെ ഗോതമ്പും

എല്‍ നിനോ ഇതിനോടകം തന്നെ ഭക്ഷ്യോല്‍പ്പാദനത്തില്‍ വലിയ ഇടിവ് വരുത്തിയിട്ടുണ്ട്. മഴ കുറഞ്ഞത് ഇന്ത്യയിലെ നെല്‍കൃഷിയെ സാരമായി ബാധിച്ചു. ചൂടും വരള്‍ച്ചയും കാരണം ഓസ്‌ട്രേലിയയുടെ ഗോതമ്പ് ഉല്‍പ്പാദനവും കുറയുമെന്നാണ് കണക്കുകൂട്ടല്‍. ആഭ്യന്തര ഭക്ഷ്യസുരക്ഷയെ കരുതി ഇന്ത്യ അരി കയറ്റുമതി നിയന്ത്രിച്ചാല്‍ ആഗോള വിപണിയില്‍ അരിവില കുത്തനെ ഉയരും. എല്‍ നിനോ വന്ന് മാസങ്ങള്‍ക്ക് ശേഷമായിരിക്കും പലപ്പോഴും ഭക്ഷ്യവിലകളില്‍ മാറ്റം പ്രകടമാകുക . പാമോയില്‍, വെളിച്ചെണ്ണ, കാപ്പി തുടങ്ങിയ ഉഷ്ണമേഖലാ ഉല്‍പ്പന്നങ്ങള്‍ക്കാണ് വില ഏറ്റവും കൂടുതല്‍ വര്‍ധിക്കുക. വികസിത രാജ്യങ്ങളെ കാലാവസ്ഥാ മാറ്റം കാര്യമായി ബാധിക്കാത്തതിനാല്‍ ആഗോളതലത്തില്‍ ധാന്യവിളകളുടെ വിലയെ എല്‍ നിനോ കാര്യമായി ബാധിക്കാറില്ല.

ഇന്ത്യന്‍ ആശുപത്രികളില്‍ ഒഴുകിയെത്തിയത് 96,000 കോടിയുടെ വിദേശ നിക്ഷേപം; ചികില്‍സാ ചെലവ് കൂട്ടുന്നെന്ന് ആരോപണം

Sangeetha KS — Mon, 05 Oct 2026 16:07:33 +0530

കഴിഞ്ഞ അഞ്ചു വര്‍ഷത്തിനിടെ രാജ്യത്തെ സ്വകാര്യ ആശുപത്രികളിലേക്ക് വിദേശ നിക്ഷേപകര്‍ ഒഴുക്കിയത് 1000 കോടി ഡോളറെന്ന് റിപ്പോര്‍ട്ട് (ഏകദേശം 96,000 കോടി രൂപ). വിദേശ ഫണ്ടുകള്‍ എത്തിയതോടെ പുതിയ കെട്ടിടങ്ങളും അത്യാധുനിക സംവിധാനങ്ങളുമായി ആശുപത്രികള്‍ മുഖം മിനുക്കി. ബ്ലാക്ക്‌സ്റ്റോണ്‍, കെകെആര്‍, ടിപിജി, ജനറല്‍ അറ്റ്‌ലാന്റിക് തുടങ്ങിയ വമ്പന്‍ ആഗോള നിക്ഷേപകരാണ് കഴിഞ്ഞ കുറച്ചു വര്‍ഷങ്ങളായി ഇന്ത്യന്‍ ആശുപത്രികളില്‍ പണം മുടക്കിയിരിക്കുന്നത്. രാജ്യത്തെ മൊത്തം ആശുപത്രി കിടക്കകളുടെ 5 ശതമാനത്തില്‍ താഴെ മാത്രമാണ് ഈ വന്‍കിട കോര്‍പ്പറേറ്റ് ഗ്രൂപ്പുകളുടെ കയ്യിലുള്ളതെങ്കിലും ഉയര്‍ന്ന ലാഭം കിട്ടുന്ന ഹൃദ്രോഗം, കാന്‍സര്‍ തുടങ്ങിയ ചികിത്സാ വിഭാഗങ്ങളില്‍ ഇവരുടെ സമ്പൂര്‍ണ്ണ ആധിപത്യമാണ്.

ഇതോടെ ആശുപത്രികളുടെ വരുമാനവും മൂല്യവും കുത്തനെ വര്‍ദ്ധിച്ചു. എന്നാല്‍ വിദേശ മൂലധനം നിയന്ത്രണമില്ലാതെ ഒഴുകിയെത്തുന്നത് ഇടത്തരം ആശുപത്രികളെ വമ്പന്മാര്‍ വിഴുങ്ങാന്‍ കാരണമാകുന്നുവെന്ന് അടുത്തിടെ ഒരു പാര്‍ലമെന്ററി സമിതി മുന്നറിയിപ്പ് നല്‍കിയിരുന്നു. ആരോഗ്യമേഖലയിലെ വിദേശ നിക്ഷേപ ചട്ടങ്ങള്‍ പുനഃപരിശോധിക്കണമെന്നും വില നിയന്ത്രണങ്ങള്‍ ഏര്‍പ്പെടുത്തണമെന്നും സമിതി ശുപാര്‍ശ ചെയ്തു.

ആശുപത്രികളും ഇന്‍ഷുറന്‍സ് കമ്പനികളും തമ്മില്‍ പോര്

വന്‍കിട ആശുപത്രികള്‍ ബില്ല് കുത്തനെ കൂട്ടുകയാണെന്നും അനാവശ്യമായി ചെലവേറിയ ചികിത്സകള്‍ (ഉദാഹരണത്തിന് റോബോട്ടിക് സര്‍ജറികള്‍) അടിച്ചേല്‍പ്പിക്കുകയാണെന്നുമാണ് ഇന്‍ഷുറന്‍സ് കമ്പനികള്‍ ആരോപിക്കുന്നത്. എന്നാല്‍ ഇന്‍ഷുറന്‍സ് കമ്പനികള്‍ തുക നല്‍കാന്‍ വൈകുന്നതും കുറഞ്ഞ തുക മാത്രം അനുവദിക്കുന്നതുമാണ് തങ്ങളുടെ പ്രവര്‍ത്തനത്തെ ബാധിക്കുന്നതെന്ന് ആശുപത്രി മാനേജ്മെന്റുകള്‍ തിരിച്ചടിക്കുന്നു.

എന്തുകൊണ്ട് ഇന്ത്യ?

ഇന്ത്യയില്‍ 1000 പേര്‍ക്ക് 1.3 ആശുപത്രി കിടക്കകള്‍ മാത്രമാണുള്ളത്. വികസിത രാജ്യങ്ങളെ അപേക്ഷിച്ച് വളരെ പരിതാപകരമായ അവസ്ഥയാണിത്. ജീവിതശൈലീ രോഗങ്ങള്‍ കൂടിയതോടെ വിദഗ്ധ ചികിത്സയ്ക്കുള്ള ആവശ്യകതയും വര്‍ദ്ധിച്ചു. ഈ സാഹചര്യമാണ് വിദേശ നിക്ഷേപകരെ ആകര്‍ഷിച്ചത്. മികച്ച സൗകര്യങ്ങളൊരുക്കാന്‍ 3200 കോടി ഡോളറിന്റെ (ഏകദേശം 3 ലക്ഷം കോടി രൂപ) നിക്ഷേപമെങ്കിലും ഇന്ത്യയ്ക്ക് ആവശ്യമുണ്ടെന്നാണ് 2021-ലെ കണക്കുകള്‍ വ്യക്തമാക്കുന്നത്.

കേരളത്തിലെ ആശുപത്രികളും വിദേശ നിക്ഷേപവും

2024 ജൂലൈയില്‍ കേരളത്തിലെ പ്രമുഖ ആശുപത്രിയായ ബേബി മെമ്മോറിയലില്‍ കെകെആര്‍ നിക്ഷേപം നടത്തിയിരുന്നു. 1000 കിടക്കകളുണ്ടായിരുന്ന ആശുപത്രി ഏറ്റെടുക്കലുകളിലൂടെ വലിയ വളര്‍ച്ച നേടി. 2026 സാമ്പത്തിക വര്‍ഷത്തില്‍ 600 കോടി രൂപയുടെ വരുമാനമാണ് അവര്‍ ലക്ഷ്യമിടുന്നത്. ഇതിനുപുറമെ 140 കോടി ഡോളറിന് (ഏകദേശം 13,440 കോടി രൂപ) സ്വീഡിഷ് ഗ്രൂപ്പായ മെഡിക്കോവറിന്റെ ഇന്ത്യന്‍ ആശുപത്രികളും കെകെആര്‍ ഏറ്റെടുത്തു. ഇതോടെ ദക്ഷിണേന്ത്യയില്‍ മാത്രം അവര്‍ക്ക് 10,000 കിടക്കകളാകും.

കീശ കീറി രോഗികള്‍

ഇന്ത്യയിലെ മെഡിക്കല്‍ പണപ്പെരുപ്പം പ്രതിവര്‍ഷം 13% എന്ന നിരക്കിലാണ് കുതിക്കുന്നത്. സര്‍ക്കാര്‍ ആശുപത്രികളെ അപേക്ഷിച്ച് സ്വകാര്യ ആശുപത്രികളില്‍ അഞ്ചു മുതല്‍ പത്തിരട്ടി വരെയാണ് ചികിത്സാച്ചെലവ്. ഇന്‍ഷുറന്‍സ് ഉണ്ടെങ്കില്‍ പോലും മുഴുവന്‍ തുകയും ലഭിക്കാത്ത അവസ്ഥയാണ്. ചികിത്സാച്ചെലവ് ഇങ്ങനെ കുതിച്ചുയരുകയും ഇന്‍ഷുറന്‍സ് സാധാരണക്കാര്‍ക്ക് താങ്ങാനാവാത്ത അവസ്ഥയിലേക്ക് മാറുകയും ചെയ്താല്‍, സര്‍ക്കാര്‍ ആനുകൂല്യങ്ങള്‍ ലഭിക്കാത്ത ഇടത്തരക്കാരാകും ഇതിന്റെ ഏറ്റവും വലിയ ഇരകളെന്ന് വിദഗ്ധര്‍ ഓര്‍മ്മിപ്പിക്കുന്നു.

കേരളത്തിലേക്ക് കൂടുതൽ വിദേശ നിക്ഷേപം ആകര്‍ഷിക്കാന്‍ പദ്ധതിയുമായി സർക്കാർ; 5 നഗരങ്ങളിൽ കേരള ഡെസ്‌കുകള്‍ ആരംഭിക്കും

Sangeetha KS — Sat, 03 Oct 2026 13:05:15 +0530

തിരുവനന്തപുരം: വിദേശ നിക്ഷേപങ്ങൾ കേരളത്തിലേക്ക് കൂടുതൽ ആകർഷിക്കുന്നതിനും പ്രവാസി മലയാളികളുടെ ബിസിനസ് ശൃംഖലകളെ കൃത്യമായി പ്രയോജനപ്പെടുത്തുന്നതിനുമായി പ്രമുഖ ആഗോള നഗരങ്ങളിൽ ‘കേരള ഡെസ്കുകൾ’ ആരംഭിക്കാൻ സംസ്ഥാന സർക്കാരിന്റെ അനുമതി. സർക്കാരിന്റെ 100 ദിന കർമ്മപദ്ധതിയുടെ ഭാഗമായി വ്യവസായ വകുപ്പ് പുറപ്പെടുവിച്ച ഉത്തരവ് പ്രകാരം ദുബായ്, ലണ്ടൻ, ന്യൂയോർക്ക്, സിംഗപ്പൂർ, ടോക്യോ എന്നീ അഞ്ച് നഗരങ്ങളിലാണ് ആദ്യഘട്ടത്തിൽ ഈ ഡെസ്കുകൾ പ്രവർത്തിക്കുക. പ്രവാസി സമൂഹത്തിൽ നിന്നുള്ള പിന്തുണ പണമയയ്ക്കലിൽ മാത്രം ഒതുക്കാതെ, നിക്ഷേപ അധിഷ്ഠിത വളർച്ചയിലേക്ക് വഴികാട്ടുകയാണ് ഇതിന്റെ പ്രധാന ലക്ഷ്യമെന്ന് വൃത്തങ്ങൾ പറഞ്ഞു.

സംസ്ഥാന സർക്കാരിന് യാതൊരു വിധ സാമ്പത്തിക ബാധ്യതയും ഉണ്ടാക്കാത്ത രീതിയിലാണ് പദ്ധതി വിഭാവനം ചെയ്തിരിക്കുന്നത്. അതത് നഗരങ്ങളിലെ അംഗീകൃത പ്രവാസി സംഘടനകളുടെ സഹകരണത്തോടെ സന്നദ്ധ അടിസ്ഥാനത്തിൽ പ്രവർത്തിക്കുന്ന ഈ ഡെസ്കുകൾ വഴി ലഭ്യമാകുന്ന നിക്ഷേപ താൽപ്പര്യങ്ങൾ KSIDC-യുടെ 'ഇൻവെസ്റ്റ് കേരള സെൽ' വഴി സിംഗിൾ വിൻഡോ സംവിധാനത്തിലൂടെ വേഗത്തിൽ യാഥാർത്ഥ്യമാക്കും. പ്രവാസി വ്യവസായികളെയും പുതിയ നിക്ഷേപകരെയും ഏകോപിപ്പിച്ച് കേരളത്തിന്റെ വ്യവസായ രംഗത്ത് വൻ കുതിച്ചുചാട്ടം സൃഷ്ടിക്കാൻ ഈ നീക്കം സഹായിക്കുമെന്നാണ് സർക്കാർ വിലയിരുത്തുന്നത്.