Asianet News Malayalam

ഒടുവിൽ സംസ്ഥാനത്ത് മിൽമ പാൽ വിലകൂട്ടി; ലിറ്ററിന് കൂട്ടിയത് 4 രൂപ, തീരുമാനം ഇന്നത്തെ മിൽമ ഡയറക്ടർ ബോർഡിൽ

Faseela Moidu — Wed, 20 May 2026 14:05:17 +0530

തിരുവനന്തപുരം: സംസ്ഥാനത്ത് മിൽമ പാൽ വിലകൂട്ടി. ലിറ്ററിന് 4 രൂപയാണ് കൂട്ടിയത്. ഇന്ന് ചേർന്ന മിൽമ ഡയറക്ടർ ബോർഡിലാണ് തീരുമാനം. ജൂൺ ഒന്നുമുതൽ വില പ്രാബല്യത്തിൽ വരും. നേരത്തെ, പാൽവില കൂട്ടുമെന്ന് വിവരം പുറത്തുവന്നിരുന്നു. ലിറ്ററിന് നാല് മുതൽ ആറ് രൂപ വരെ കൂട്ടണമെന്നായിരുന്നു മിൽമയുടെ ആവശ്യം. പാൽവില കൂട്ടി കർഷകരെ സഹായിക്കണമെന്ന് മേഖല യൂണിയനുകൾ നിരന്തരം ആവശ്യപ്പെട്ടിരുന്നു. തെരഞ്ഞെടുപ്പായതിനാൽ വില വ‌ർധനയ്ക്ക് സർക്കാർ അനുമതി നൽകിയിരുന്നില്ല. മിൽമയുടെ നിരന്തര ആവശ്യം പരിഗണിച്ചാണ് പാൽവില കൂട്ടാനുള്ള അനുമതി നൽകിയത്.

വോള്‍ സ്ട്രീറ്റിനെ ഞെട്ടിച്ച ഡോണാള്‍ഡ് ട്രംപ്; വീണ്ടും വന്‍ വിവാദത്തിൽ, 90 ദിവസത്തിനിടെ നടത്തിയത് 3,700 ഓഹരി ഇടപാടുകള്‍!

Sangeetha KS — Mon, 18 May 2026 16:27:35 +0530

അമേരിക്കന്‍ പ്രസിഡന്റ് ഡോണാള്‍ഡ് ട്രംപ് വീണ്ടും വലിയൊരു സാമ്പത്തിക വിവാദത്തില്‍ അകപ്പെട്ടിരിക്കുകയാണ്. ട്രംപും അദ്ദേഹത്തിന്റെ സാമ്പത്തിക ഉപദേശകരും ചേര്‍ന്ന് നടത്തിയ വന്‍തോതിലുള്ള ഓഹരി ഇടപാടുകളാണ് ഇപ്പോള്‍ വിവാദമായിരിക്കുന്നത്. 2026-ന്റെ ആദ്യ മൂന്ന് മാസങ്ങളില്‍ മാത്രം മൂവായിരത്തി എഴുന്നൂറിലധികം ഓഹരി ഇടപാടുകളാണ് ഇവര്‍ നടത്തിയത്. യുഎസ് സര്‍ക്കാരിന്റെ നയങ്ങളും തീരുമാനങ്ങളും നേരിട്ട് ബാധിക്കുന്ന വന്‍കിട കമ്പനികളുടെ ഓഹരികളാണ് ഇതില്‍ ഭൂരിഭാഗവും എന്നതാണ് വിവാദത്തിന് വഴിവച്ചിരിക്കുന്നത്. ബ്ലൂംബെര്‍ഗ് പുറത്തുവിട്ട വിവരങ്ങളിലാണ് ഞെട്ടിക്കുന്ന ഈ കണക്കുകളുള്ളത്. അമേരിക്കയിലെ ഏറ്റവും വലിയ ടെക്‌നോളജി, ഫിനാന്‍സ്, വ്യോമയാന കമ്പനികളുടെ കോടിക്കണക്കിന് രൂപയുടെ ഓഹരികളാണ് ഈ ചുരുങ്ങിയ കാലയളവില്‍ വാങ്ങിക്കൂട്ടുകയും വില്‍ക്കുകയും ചെയ്തത്.

വോള്‍ സ്ട്രീറ്റിനെ ഞെട്ടിച്ച 'വേഗത'

ലളിതമായി പറഞ്ഞാല്‍, ജനുവരി മുതല്‍ മാര്‍ച്ച് വരെയുള്ള കാലയളവില്‍ പ്രതിദിനം ശരാശരി 40-ലധികം ഓഹരി ഇടപാടുകള്‍ ട്രംപ് നടത്തിയിട്ടുണ്ട്! 2025-ന്റെ അവസാന മൂന്ന് മാസങ്ങളില്‍ വെറും 380 ഇടപാടുകള്‍ മാത്രം നടന്ന സ്ഥാനത്താണ് ഈ വന്‍ കുതിച്ചുചാട്ടം. ഓഹരി വിപണിയിലെ വമ്പന്മാര്‍ പോലും ഇതിനെ അവിശ്വസനീയതയോടെയാണ് കാണുന്നത്.

ഇത്രയും ചുരുങ്ങിയ കാലയളവില്‍ ഒരു യുഎസ് പ്രസിഡന്റ് ഇത്രയധികം ഓഹരി വ്യാപാരം നടത്തുന്നത് മുന്‍പെങ്ങും കേട്ടുകേള്‍വിയില്ലാത്തതാണെന്ന് മറ്റ് പ്രമുഖ വിപണി വിദഗ്ധരും സാക്ഷ്യപ്പെടുത്തുന്നു. 40 വര്‍ഷത്തെ തന്റെ അനുഭവസമ്പത്തില്‍ ഇത്തരമൊന്ന് കണ്ടിട്ടില്ലെന്നാണ് 'ദി വെല്‍ത്ത് അലയന്‍സ്' മാനേജിംഗ് ഡയറക്ടര്‍ എറിക് ഡിറ്റണ്‍ വ്യക്തമാക്കിയത്. കോടികളുടെ നിക്ഷേപം ഈ വമ്പന്‍ കമ്പനികളില്‍ എന്‍വിഡിയ , മൈക്രോസോഫ്റ്റ് , ആമസോണ്‍ , ബോയിംഗ് തുടങ്ങിയ വന്‍കിട കമ്പനികളുടെ ഓഹരികളിലാണ് പണം നിക്ഷേപിക്കപ്പെട്ടത്.

വന്‍ നിക്ഷേപങ്ങള്‍: എന്‍വിഡിയ, ഒറാക്കിള്‍, മൈക്രോസോഫ്റ്റ്, ബോയിംഗ്, കോസ്റ്റ്‌കോ എന്നീ കമ്പനികളില്‍ ഓരോന്നിലും ചുരുങ്ങിയത് 10 ലക്ഷം ഡോളറിന്റെ ഓഹരികളെങ്കിലും ട്രംപ് വാങ്ങിയിട്ടുണ്ട്.

വന്‍ വില്‍പ്പന: ഫെബ്രുവരി 10-ന് മാത്രം മൈക്രോസോഫ്റ്റ്, മെറ്റാ, ആമസോണ്‍ എന്നീ കമ്പനികളിലെ ഓഹരികള്‍ വിറ്റ് 50 ലക്ഷം മുതല്‍ 2.5 കോടി ഡോളര്‍ വരെ ട്രംപ് സ്വന്തമാക്കി.

മറ്റ് കമ്പനികള്‍: യൂബര്‍, ഇബേ, അബോട്ട് ലബോറട്ടറീസ്, എടി ആന്‍ഡ് ടി, ഡോളര്‍ ട്രീ എന്നിവയ്ക്കൊപ്പം വിനോദ മേഖലയിലെ വമ്പന്മാരായ നെറ്റ്ഫ്‌ലിക്‌സ്, വാര്‍ണര്‍ ബ്രദേഴ്‌സ്, പാരാമൗണ്ട് ഗ്ലോബല്‍ എന്നിവയും ഈ ഇടപാടുകളുടെ പട്ടികയിലുണ്ട്.

എന്തുകൊണ്ടാണ് ഇത് വിവാദമാകുന്നത്?

ഈ കമ്പനികളില്‍ പലതും യുഎസ് സര്‍ക്കാരിന്റെ നയങ്ങളെയും അന്താരാഷ്ട്ര തീരുമാനങ്ങളെയും നേരിട്ട് ആശ്രയിച്ചു മുന്നോട്ട് പോകുന്നവയാണ്.

എന്‍വിഡിയ: ചൈനയിലേക്ക് അത്യാധുനിക എഐ ചിപ്പുകള്‍ കയറ്റുമതി ചെയ്യാന്‍ ഇവര്‍ക്ക് യുഎസ് സര്‍ക്കാരിന്റെ പ്രത്യേക അനുമതി വേണം.

ബോയിംഗ്: യുഎസ് സര്‍ക്കാരിന്റെ പ്രതിരോധ, ബഹിരാകാശ കരാറുകളെ ആശ്രയിച്ചാണ് ഇവര്‍ പ്രവര്‍ത്തിക്കുന്നത്.

ടെക് കമ്പനികള്‍: മൈക്രോസോഫ്റ്റ്, ആമസോണ്‍, മെറ്റാ തുടങ്ങിയ കമ്പനികള്‍ എപ്പോഴും സര്‍ക്കാരിന്റെ കുത്തക വിരുദ്ധ അന്വേഷണങ്ങള്‍ക്കും എഐ നിയന്ത്രണങ്ങള്‍ക്കും വിധേയമാകാറുണ്ട്.

ഒരു രാജ്യത്തിന്റെ പ്രസിഡന്റ് പദവിയിലിരിക്കുന്ന വ്യക്തി ഇത്തരം കമ്പനികളുടെ ഓഹരികളില്‍ വ്യാപാരം നടത്തുമ്പോള്‍ അത് നിയമവിരുദ്ധമല്ലെങ്കില്‍ പോലും വലിയ ധാര്‍മ്മിക ചോദ്യങ്ങള്‍ ഉയര്‍ത്തുന്നു. മുന്‍ പ്രസിഡന്റുമാരായ ജോര്‍ജ്ജ് എച്ച്.ഡബ്ല്യു. ബുഷ്, ബില്‍ ക്ലിന്റണ്‍ എന്നിവര്‍ തങ്ങളുടെ ബിസിനസ്സുകള്‍ സ്വതന്ത്രമായ 'ബ്ലൈന്‍ഡ് ട്രസ്റ്റുകള്‍ക്ക്' കൈമാറിയാണ് ഭരണം നടത്തിയിരുന്നത്. എന്നാല്‍ ട്രംപ് തന്റെ ബിസിനസ്സുകള്‍ പൂര്‍ണ്ണമായി ഒഴിവാക്കുകയോ സ്വതന്ത്ര ട്രസ്റ്റിന് നല്‍കുകയോ ചെയ്തിട്ടില്ല. നിലവില്‍ ട്രംപിന്റെ മക്കളാണ് ട്രംപ് ഓര്‍ഗനൈസേഷന്റെ വലിയൊരു ഭാഗം നിയന്ത്രിക്കുന്നത്.

ഇറാന്‍ പരാമര്‍ശവും ദുരൂഹമായ ഓഹരി ബെറ്റുകളും

മാസങ്ങള്‍ക്ക് മുമ്പ് വിപണിയില്‍ നടന്ന മറ്റൊരു സംഭവവും ഇതോടൊപ്പം ചര്‍ച്ചയാകുന്നുണ്ട്. ഇറാനുമായുള്ള ചര്‍ച്ചകളില്‍ പുരോഗതിയുണ്ടെന്ന് ട്രംപ് പരസ്യമായി പ്രസ്താവിക്കുന്നതിന് തൊട്ടുമുമ്പ്, വിപണിയില്‍ എണ്ണവില ഇടിയുമെന്നും യുഎസ് ഓഹരി വിപണി ഉയരുമെന്നും പ്രവചിച്ചുകൊണ്ട് ചില വ്യാപാരികള്‍ വന്‍തോതില്‍ ബെറ്റ് വെച്ചിരുന്നു. പ്രസ്താവന വന്നയുടന്‍ കൃത്യമായി വിപണിയില്‍ എണ്ണവില താഴുകയും ഓഹരി വിപണി കുതിച്ചുയരുകയും ചെയ്തു. ട്രംപിന് ഇതില്‍ നേരിട്ട് പങ്കുണ്ടെന്നതിന് തെളിവുകളില്ലെങ്കിലും ഔദ്യോഗിക വിവരങ്ങള്‍ ചോര്‍ന്നതാണോ എന്ന സംശയം വിപണിയില്‍ ശക്തമാണ്.

കുഷ്‌നറുടെ ഗള്‍ഫ് ബന്ധങ്ങളും നിഴലില്‍

ട്രംപിന്റെ മരുമകനും മിഡില്‍ ഈസ്റ്റ് പ്രത്യേക ദൂതനുമായ ജാരെഡ് കുഷ്‌നറുടെ സാമ്പത്തിക ഇടപാടുകളും ഈ വിവാദത്തിന് ആക്കം കൂട്ടുന്നു. കുഷ്‌നറുടെ ഇന്‍വെസ്റ്റ്മെന്റ് കമ്പനിയായ 'അഫിനിറ്റി പാര്‍ട്ണേഴ്സ്', സൗദി അറേബ്യ ഉള്‍പ്പെടെയുള്ള ഗള്‍ഫ് രാജ്യങ്ങളുടെ കോടിക്കണക്കിന് രൂപയുടെ ഫണ്ടുകളാണ് കൈകാര്യം ചെയ്യുന്നത്. ഒരു വശത്ത് ഗള്‍ഫ് രാജ്യങ്ങളുമായി നയതന്ത്ര ചര്‍ച്ചകള്‍ നടത്തുമ്പോള്‍ മറുവശത്ത് സ്വകാര്യ ബിസിനസ്സ് കൊണ്ടുപോകുന്നത് തെറ്റായ കീഴ്വഴക്കമാണെന്ന് വിമര്‍ശകര്‍ ചൂണ്ടിക്കാണിക്കുന്നു. കുഷ്‌നര്‍ക്കെതിരെയും തെറ്റായ കാര്യങ്ങള്‍ ചെയ്തതിന് തെളിവുകളില്ലെങ്കിലും ഈ പദവികള്‍ തമ്മിലുള്ള ബന്ധം സൂക്ഷ്മമായി പരിശോധിക്കപ്പെടേണ്ടതുണ്ടെന്നാണ് സാമ്പത്തിക നിരീക്ഷകരുടെ അഭിപ്രായം.

ആരോപണങ്ങള്‍ തള്ളി വൈറ്റ് ഹൗസ്

എന്നാല്‍ ഉയര്‍ന്നുവന്ന ആരോപണങ്ങളെല്ലാം വൈറ്റ് ഹൗസ് പൂര്‍ണ്ണമായി തള്ളിക്കളഞ്ഞു. ട്രംപ് അമേരിക്കന്‍ ജനതയുടെ നന്മയ്ക്ക് വേണ്ടി മാത്രമാണ് പ്രവര്‍ത്തിക്കുന്നതെന്നും യാതൊരുവിധ താത്പര്യ വൈരുദ്ധ്യവുമില്ലെന്നും വൈറ്റ് ഹൗസ് വക്താവ് വ്യക്തമാക്കി. ട്രംപിന്റെ നിക്ഷേപങ്ങള്‍ കൈകാര്യം ചെയ്യുന്നത് പുറത്തുനിന്നുള്ള സ്വതന്ത്ര സാമ്പത്തിക സ്ഥാപനങ്ങളാണെന്നും ട്രംപോ കുടുംബമോ ഇതില്‍ നേരിട്ട് ഇടപെടുന്നില്ലെന്നും ട്രംപ് ഓര്‍ഗനൈസേഷനും അറിയിച്ചു. ചില ഓഹരി വിവരങ്ങള്‍ സര്‍ക്കാരില്‍ സമര്‍പ്പിക്കാന്‍ വൈകിയതിനാലുള്ള ചെറിയ പിഴകള്‍ (ഒരു ഫയലിംഗിന് 200 ഡോളര്‍ വീതം) മാത്രമാണ് നിലവിലുള്ളതെന്നാണ് അവരുടെ വിശദീകരണം.എന്തായാലും, ഔദ്യോഗിക പദവിയിലിരിക്കുന്ന ഒരു യുഎസ് പ്രസിഡന്റ് ഇത്തരം ഓഹരി ഇടപാടുകള്‍ നടത്തുന്നത് ശരിയാണോ എന്ന കാര്യത്തില്‍ വാഷിംഗ്ടണില്‍ ഇപ്പോള്‍ രാഷ്ട്രീയ പോരാട്ടം മുറുകുകയാണ്.

ഈ വർഷം മാത്രം ജോലി നഷ്ടമായത് ഒരുലക്ഷത്തിലേറെ ടെക്കികൾക്ക്, എച്ച് 1 ബി വിസയിലേറെയും ഇന്ത്യക്കാർ, വലിയ ആശങ്ക

Web Desk — Thu, 21 May 2026 12:42:22 +0530

ന്യൂയോർക്ക്: അമേരിക്കയിൽ ദീർഘകാലം ജോലി ചെയ്ത് ഗ്രീൻ കാർഡിനായുള്ള കാത്തിരിക്കുന്ന നിരവധി ഇന്ത്യക്കാർക്ക് തിരിച്ചടിയായി ലേ ഓഫ്. എച്ച് 1 ബി വിസയിൽ അമേരിക്കയിൽ കഴിയുന്ന ഇവർക്ക് വിസ ചട്ടങ്ങൾ പ്രകാരം ജോലി നഷ്ടപ്പെട്ടാൽ പുതിയൊരു ജോലി കണ്ടെത്താനോ അല്ലെങ്കിൽ രാജ്യം വിടാനോ വെറും 60 ദിവസത്തെ സമയം മാത്രമാണ് യുഎസ് ഇമിഗ്രേഷൻ വകുപ്പ് അനുവദിക്കുന്നത്. വർഷങ്ങളായി അമേരിക്കയിൽ താമസിച്ച് വായ്പയെടുത്ത് വീട് വാങ്ങിയവരും മക്കൾ ജനിച്ചതും വളർന്നതും അമേരിക്കയിലായതുമായ നിരവധി കുടുംബങ്ങൾ ഇതോടെ എങ്ങോട്ട് പോകണമെന്നറിയാത്ത അവസ്ഥയിലാണുള്ളത്. ജോലി ഇല്ലാതായതോടെ കുട്ടികളുടെ സ്കൂൾ പ്രവേശനം, കനത്ത ഭവന വായ്പ തിരിച്ചടവുകൾ, ഇമിഗ്രേഷൻ രേഖകൾ ശരിയാക്കൽ, ആരോഗ്യ ഇൻഷുറൻസ് പരിരക്ഷ തുടങ്ങിയവയെല്ലാം ഈ കുടുംബങ്ങൾക്ക് പെട്ടെന്ന് നഷ്ടമാകുന്ന സ്ഥിതിയാണ്.

അമേരിക്കയിലെ പ്രമുഖ ടെക് കമ്പനികളായ മെറ്റ, ആമസോൺ, ഒറാക്കിൾ തുടങ്ങിയവയിൽ അടുത്തിടെയുണ്ടായ വൻതോതിലുള്ള തൊഴിൽ വെട്ടിക്കുറയ്ക്കലുകൾ പ്രഖ്യാപിച്ച് നടപ്പിലാക്കിയിരുന്നു. ലേ ഓഫ് സംബന്ധിയായ ഒറ്റ ഇമെയിൽ വഴി ഇവരുടെ വർഷങ്ങളായുള്ള കരിയർ, സ്വന്തമാക്കിയ വീടുകൾ, കുട്ടികളുടെ വിദ്യാഭ്യാസം, രാജ്യത്ത് തുടരാനുള്ള നിയമപരമായ അവകാശം എന്നിവയെല്ലാം പെട്ടെന്ന് തന്നെ ഇല്ലാതാകുന്ന അവസ്ഥയാണ് നിലവിലുള്ളത്.എന്നാൽ നിലവിലെ മന്ദഗതിയിലുള്ള തൊഴിൽ വിപണിയിൽ ഇത്രയും ചുരുങ്ങിയ ദിവസങ്ങൾക്കുള്ളിൽ പുതിയൊരു സ്പോൺസറെ കണ്ടെത്തുക എന്നത് അങ്ങേയറ്റം പ്രയാസകരമാണ്. ഈ 60 ദിവസത്തെ സമയപരിധി കഴിഞ്ഞിട്ടും ജോലി കണ്ടെത്താൻ സാധിച്ചില്ലെങ്കിൽ ഇവർക്ക് അമേരിക്ക വിടേണ്ടി വരും. ഈ പ്രതിസന്ധി മറികടക്കാനും അമേരിക്കയിൽ തുടരാൻ കൂടുതൽ സമയം സമ്പാദിക്കാനുമായി പല ജീവനക്കാരും താൽക്കാലികമായി ബി 2 വിസിറ്റർ വിസയിലേക്ക് മാറാൻ ശ്രമിക്കുന്നുണ്ട്. ഈ വിസയിലേക്ക് മാറാൻ സാധിച്ചാൽ ആറ് മാസം വരെ അമേരിക്കയിൽ തുടരാൻ അനുവാദം ലഭിക്കും. എന്നാൽ നിലവിലെ കർശനമായ ഇമിഗ്രേഷൻ അന്തരീക്ഷത്തിൽ ഈ വഴിയും വലിയ പ്രതിസന്ധിയിലാണ്.

ഇമിഗ്രേഷൻ വിദഗ്ധർ വ്യക്തമാക്കുന്നതനുസരിച്ച്, എച്ച് 1ബി വിസയിൽ നിന്ന് ബി2 വിസയിലേക്ക് മാറാൻ അപേക്ഷിക്കുന്നവരോട് അമേരിക്കൻ അധികൃതർ മുൻപില്ലാത്ത വിധം കടുത്ത രേഖകളും അധിക പേപ്പർവർക്കുകളും ആവശ്യപ്പെടുന്നുണ്ട്. കൂടാതെ ഇത്തരം അപേക്ഷകൾ നിരസിക്കപ്പെടുന്നതും വൻതോതിൽ വർദ്ധിച്ചിട്ടുണ്ട്. ഈ പ്രക്രിയ നിയമപരമാണെങ്കിൽ പോലും നിലവിലെ സാഹചര്യത്തിൽ ഇതിന് അനുമതി ലഭിക്കുന്നത് വളരെ ബുദ്ധിമുട്ടേറിയ കാര്യമായി മാറിയിരിക്കുന്നു. സാങ്കേതിക മേഖലയിലെ വൻതോതിലുള്ള പ്രതിസന്ധിയാണ് ഈ വിസ പ്രശ്നം ഇത്രത്തോളം രൂക്ഷമാക്കിയത്. ഈ വർഷം ഇതുവരെ മാത്രം ലോകമെമ്പാടുമുള്ള 144ലധികം പ്രമുഖ കമ്പനികളിൽ നിന്നായി 110000-ത്തിലധികം ജീവനക്കാർക്ക് തൊഴിൽ നഷ്ടപ്പെട്ടിട്ടുണ്ട്. ഇതിൽ ഭൂരിഭാഗവും എച്ച്1ബി വിസയുള്ളവരും അതിൽ തന്നെ ഭൂരിപക്ഷവും ഇന്ത്യക്കാരുമാണ്.

യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിന്റെ കണക്കുകൾ പ്രകാരം എച്ച് 1ബി വിസ അപേക്ഷകളിൽ ഭൂരിഭാഗവും നേടുന്നത് ഇന്ത്യക്കാരാണ്. സാങ്കേതിക വിദ്യമേഖലയിലെ എഐ ആശ്രയത്വമാണ് ഇന്ത്യൻ പ്രൊഫഷണലുകൾക്ക് വലിയൊരു തിരിച്ചടിയായി മാറിയിരിക്കുന്നത്. കൂടുതൽ സുസ്ഥിരമായ ഇമിഗ്രേഷൻ വ്യവസ്ഥകളുള്ള കാനഡ, യൂറോപ്യൻ രാജ്യങ്ങൾ എന്നിവടങ്ങളിലേക്ക് മാറാനാണ് ഇപ്പോൾ പലരും മുൻഗണന നൽകുന്നത്. കാനഡയുടെ എക്സ്പ്രസ് എൻട്രി, ഗ്ലോബൽ ടാലന്റ് സ്ട്രീം തുടങ്ങിയ പദ്ധതികൾ വഴി അങ്ങോട്ട് മാറാൻ പലരും തയ്യാറെടുക്കുന്നു. ആർട്ടിഫിഷ്യൽ ഇന്റലിജൻസ് സാങ്കേതികവിദ്യയ്ക്ക് കൂടുതൽ പ്രാധാന്യം നൽകുന്നതിനായി മെറ്റ പോലെയുള്ള വൻകിട കമ്പനികൾ തങ്ങളുടെ എഞ്ചിനീയറിംഗ്, പ്രൊഡക്ട് ഡിവിഷനുകൾ പുനഃസംഘടിപ്പിക്കുന്നതിന്റെ ഭാഗമായാണ് ഈ പുതിയ ലേ-ഓഫുകൾ നടത്തിക്കൊണ്ടിരിക്കുന്നത്.

ഏഷ്യാനെറ്റ് ന്യൂസ് ലൈവ് വീഡിയോ കാണാം

രാജ്യത്ത് അഞ്ച് മണിക്കൂർ നേരം ഡെലിവറി ജീവനക്കാർ പണിമുടക്കും; പ്രതിഷേധം ഇന്ധനവില വർധനവിനെതിരെ

Deepu Divakaran — Sat, 16 May 2026 08:39:07 +0530

ദില്ലി: ഇന്ധനവില വർധനവിലും കുറഞ്ഞ വേതന നിരക്കിലും പ്രതിഷേധിച്ച് രാജ്യവ്യാപക പണിമുടക്കിന് ആഹ്വാനം ചെയ്ത് ഡെലിവറി ജീവനക്കാർ. ശനിയാഴ്ച ഉച്ചയ്ക്ക് 12 മണിമുതൽ വൈകുന്നേരം അഞ്ച് മണിവരെ ഡെലിവറി ജീവനക്കാർ പണിമുടക്കും. ഗിഗ് ആൻ്റ് പ്ലാറ്റ്ഫോം സർവീസസ് വർക്കേഴ്സ് യൂണിയൻ ആണ് പണിമുടക്കിന് ആഹ്വാനം ചെയ്തത്. പെട്രോൾ, ഡീസൽ വില വർധനവ് മൂലം വരുമാനം നേടാൻ വലിയ ബുദ്ധിമുട്ട് നേരിടുന്നുവെന്ന് ചൂണ്ടിക്കാട്ടിയാണ് പണിമുടക്ക് പ്രഖ്യാപിച്ചത്. മുഴുവൻ ആപ്പ് അധിഷ്ഠിത സർവീസുകളും നിർത്തിവെച്ച് ജീവനക്കാർ പണിമുടക്കിൻ്റെ ഭാഗമാകണമെന്നും സംഘടന ആഹ്വാനം ചെയ്തു.

ശനിയാഴ്ച ഉച്ചയ്ക്ക് 12 മണിമുതൽ വൈകുന്നേരം അഞ്ചുമണിവരെ ആപ്പ് അധിഷ്ഠിത സർവീസുകൾ താൽക്കാലികമായി നിർത്തിവെച്ച് മുഴുവൻ ഡെലവറി ജീവനക്കാരും പണിമുടക്കിൻ്റെ ഭാഗമാകണമെന്ന് എക്സിൽ പങ്കുവെച്ച പോസ്റ്റിൽ ഗിഗ് ആൻ്റ് പ്ലാറ്റ്ഫോം സർവീസസ് വർക്കേഴ്സ് യൂണിയൻ ആഹ്വാനം ചെയ്തു. ഇന്ധനവില വർധനവിലും കുറഞ്ഞ വേതന നിരക്കിലും പ്രതിഷേധിച്ചാണ് പണിമുടക്ക് നടത്തുന്നതെന്നും സംഘടന പോസ്റ്റിൽ അറിയിച്ചു.

ആഗോള സംഭവവികാസങ്ങളെ തുടർന്ന് രാജ്യത്ത് പെട്രോൾ, ഡീസൽ വിലയിൽ വർധന ഉണ്ടായതിന് പിന്നാലെയാണ് ഡെലിവറി ജീവനക്കാർ പ്രതിഷേധത്തിന് ആഹ്വാനം ചെയ്തത്. പെട്രോളിനും ഡീസലിനും ലിറ്ററിന് മൂന്നുരൂപ വീതമാണ് വർധിപ്പിച്ചത്.

പശ്ചിമേഷ്യൻ സംഘർഷത്തിൻ്റെ പശ്ചാത്തലത്തിൽ ക്രൂഡ് ഓയിൽ വിലയിൽ ഉണ്ടാകുന്ന വർധനയാണ് ഇന്ത്യയിൽ ഇന്ധനവില വർധനയ്ക്ക് ഇടയാക്കിയത്. സംഘർഷത്തിന് മുൻപ് ക്രൂഡ് ഓയിൽ വില ബാരലിന് 70 ഡോളറായിരുന്നെങ്കിൽ ഇപ്പോഴിത് 105 ഡോളറിൽ എത്തി. ഇതോടെ വില വർധിപ്പിക്കാതെ നിവൃത്തിയില്ലെന്ന നിലപാട് രാജ്യത്തെ എണ്ണക്കമ്പനികൾ സ്വീകരിക്കുകയായിരുന്നു. ഇന്ധനവിലയിലെ മാറ്റം സാധാരണക്കാർക്കടക്കം വലിയ പ്രതിസന്ധിയാണ് സൃഷ്ടിക്കുക.

ഇനി കൂടുതൽ മധുരം! ജോർജ് ബുഷ് തുടങ്ങി വച്ച 'മാംഗോ ഡിപ്ലോമസി'യുടെ കഥ, ഇന്ത്യൻ മാമ്പഴങ്ങൾ സിയാറ്റിലിൽ എത്തി

Sangeetha KS — Mon, 18 May 2026 14:13:35 +0530

സിയാറ്റിൽ: ഇന്ത്യക്കാരുടെ പ്രിയപ്പെട്ട മാമ്പഴമായ കേസർ (Kesar) കടൽ കടന്നെത്തിയത് ആഘോഷമാക്കി യുഎസിലെ വിപണി. ഇന്ത്യയും അമേരിക്കയും തമ്മിലുള്ള സാംസ്കാരിക കൈമാറ്റത്തിന്റെയും ദൃഢമാകുന്ന നയതന്ത്ര ബന്ധത്തിന്റെയും പുതിയൊരു അധ്യായമായാണ് ഈ നേട്ടത്തെ ഇരു രാജ്യങ്ങളും വിലയിരുത്തുന്നത്. 'മാംഗോ ഡിപ്ലോമസി' (മാമ്പഴ നയതന്ത്രം) എന്നാണ് സിയാറ്റിലിലെ ഇന്ത്യൻ കോൺസുലേറ്റ് ജനറൽ ഇതിനെ വിശേഷിപ്പിച്ചത്. പ്രശസ്ത അമേരിക്കൻ മാധ്യമമായ ഫോക്സ് 13 ന്യൂസിന്റെ “ഗുഡ് ഡേ സിയാറ്റിൽ” എന്ന ജനപ്രിയ മോണിംഗ് ഷോയിലൂടെയാണ് ഇന്ത്യൻ മാമ്പഴങ്ങളുടെ വരവ് ഔദ്യോഗികമായി ലോകത്തെ അറിയിച്ചത്. ഇന്ത്യയിലെ വൈവിധ്യമാർന്ന മാമ്പഴങ്ങളെയും അവ അമേരിക്കൻ വിപണിയിൽ എത്തിച്ചേർന്നതിന് പിന്നിലെ വലിയ കഥകളെയും കുറിച്ചുള്ള പ്രത്യേക ദൃശ്യങ്ങളും ഈ പരിപാടിയിൽ ഉൾപ്പെടുത്തിയിരുന്നു.

Kesar Mangoes premiere on Fox 13 News!As a prelude to the arrival of mangoes from India in Seattle stores this weekend, Fox 13 News featured a special segment on their morning show, “Good Day Seattle.”Please do watch!Video Credit: @fox13seattle @AmbVMKwatra… pic.twitter.com/rdDxS8yxxi

— India In Seattle (@IndiainSeattle) May 16, 2026

ഇന്ത്യക്കാർക്ക് മാമ്പഴം വെറുമൊരു ഫലമല്ലെന്നും കുട്ടിക്കാലത്തെ ഓർമ്മകളും കുടുംബാംഗങ്ങൾ ഒരുമിച്ചിരുന്നു പങ്കിടുന്ന സ്നേഹവമാണെന്നും സിയാറ്റിലിലെ ഇന്ത്യൻ കോൺസുൽ ജനറൽ പ്രകാശ് ഗുപ്ത പരിപാടിയിൽ പറഞ്ഞു. മുൻ അമേരിക്കൻ പ്രസിഡന്റ് ജോർജ്ജ് ഡബ്ല്യു. ബുഷിന്റെ 2006 ലെ ഇന്ത്യൻ സന്ദർശനവും അദ്ദേഹം ഓർമിച്ചു. അന്ന് ഇന്ത്യയിലെ പ്രശസ്തമായ അൽഫോൺസോ മാമ്പഴം രുചിച്ച ബുഷ് ഇതിന്റെ അസാധ്യ രുചിയെ ഏറെ പ്രശംസിച്ചിരുന്നുവെന്നും പറഞ്ഞു. തുടർന്ന് 2007 മുതലാണ് ഇന്ത്യൻ മാമ്പഴങ്ങൾക്ക് അമേരിക്കൻ വിപണിയിലേക്ക് ഔദ്യോഗികമായി വഴിതുറന്നതെന്നും അദ്ദേഹം കൂട്ടിച്ചേർത്തു.

ഒരു വർഷം നീണ്ട നിരന്തര പരിശ്രമം

സിയാറ്റിലിലെ വിപണിയിൽ ഇന്ത്യൻ മാമ്പഴങ്ങൾക്ക് വൻ പ്രചാരം നൽകാൻ കഴിഞ്ഞ ഒരു വർഷമായി ഇന്ത്യൻ കോൺസുലേറ്റ് നിരന്തരമായ ശ്രമങ്ങൾ നടത്തിവരികയായിരുന്നു. കഴിഞ്ഞ വർഷം ദശേരി (Dasheri), ചൗസ (Chausa), കേസർ (Kesar), ലാംഗ്ര (Langra) എന്നീ നാല് പ്രീമിയം ഇനം മാമ്പഴങ്ങൾ ഉൾപ്പെടുത്തിക്കൊണ്ട് കോൺസുലേറ്റ് സിയാറ്റിലിൽ ഒരു 'മാമ്പഴ രുചിമേള' സംഘടിപ്പിച്ചിരുന്നു. ഇവിടുത്തെ പ്രമുഖ വിതരണക്കാരും തദ്ദേശീയരും ഈ മേളയിൽ പങ്കെടുത്ത് ഇന്ത്യൻ മാമ്പഴങ്ങളുടെ രുചിയറിഞ്ഞു. തുടർന്ന് പ്രദേശത്തെ പ്രമുഖ സൂപ്പർമാർക്കറ്റുകളുമായും യു.എസ് റീട്ടെയിൽ ശൃംഖലകളുമായും നടത്തിയ ചർച്ചകളുടെ ഫലമായാണ് ഇപ്പോൾ കേസർ മാമ്പഴങ്ങൾ സിയാറ്റിലിലെ ജനങ്ങളിലേക്ക് നേരിട്ടെത്തുന്നത്.

ഇന്ത്യൻ മാമ്പഴം വൻകിട മാളുകളിലേക്കും

ഗ്രേറ്റർ സിയാറ്റിൽ മേഖലയിലെ ഇന്ത്യൻ ഗ്രോസറി സ്റ്റോറുകൾക്ക് പുറമെ, അമേരിക്കയിലെ വൻകിട റീട്ടെയിൽ ഭീമന്മാരായ കോസ്റ്റ്കോ (Costco) ഔട്ട്ലെറ്റുകളിലും ഈ വാരത്തോടെ കേസർ മാമ്പഴങ്ങൾ ലഭ്യമായിത്തുടങ്ങും. സിയാറ്റിൽ, കിർക്ക്‌ലാൻഡ്, റെഡ്മണ്ട് എന്നീ പ്രദേശങ്ങളിലെ കോസ്റ്റ്കോ സ്റ്റോറുകളിലാണ് ആദ്യഘട്ടത്തിൽ ഇവ വിപണിയിലെത്തുക. അമേരിക്കയിലെ ഇന്ത്യൻ പ്രവാസികൾക്കിടയിലും തദ്ദേശീയരായ അമേരിക്കൻ ഉപഭോക്താക്കൾക്കിടയിലും ഈ വാർത്ത വലിയ ആവേശമാണ് സൃഷ്ടിച്ചിരിക്കുന്നത്. ഇന്ത്യയും അമേരിക്കയും തമ്മിലുള്ള ജനകീയ ബന്ധത്തിന്റെ പുതിയൊരു പ്രതീകമായി ഇന്ത്യൻ മാമ്പഴങ്ങൾ മാറിക്കഴിഞ്ഞു.

ടെലിഫോൺ അലവൻസ് 11000 രൂപ, അതിഥി സൽക്കാ‍രത്തിന് 8000 രൂപ; എംഎൽഎമാരുടെ ശമ്പളവും ആനുകൂല്യങ്ങളും അറിയാം

Sangeetha KS — Thu, 21 May 2026 12:33:33 +0530

പതിനാറാം കേരള നിയമസഭയിലെ എംഎൽഎമാരുടെ സത്യപ്രതിജ്ഞയാണ് ഇന്ന് നടക്കുന്നത്. ഓരോ മണ്ഡലത്തിലെയും ജനപ്രതിനിധി എന്ന നിലയിൽ ഇവ‍‌ർക്ക് ഒരുപാട് രാഷ്ട്രീയ ഉത്തരവാദിത്തങ്ങളും ഏൽക്കേണ്ടി വരുന്ന 5 വ‍ർഷങ്ങളാണ് ഇനി വരുന്നത്. എംഎൽഎമാരുടെ വ്യക്തിപരമായ ജീവിതത്തെ സംബന്ധിച്ചും ഇനി ഒരുപാട് മാറ്റങ്ങളുടെ കാലമാണ്. മണ്ഡലങ്ങളിൽ ജനപ്രതിനിധികളുടെ ശബ്ദമാകുന്നതിന് എംഎൽഎമാ‍ർക്ക് സ‍ർക്കാ‍രിൽ നിന്ന് ശമ്പളവും ആനുകൂല്യങ്ങളും ലഭിക്കും. അതെന്തൊക്കെയാണെന്ന് നോക്കാം.

എംഎൽഎമാ‍ർക്ക് അടിസ്ഥാന ശമ്പളമായി 2000 രൂപയാണ് ലഭിക്കുക. മാസാമാസം മണ്ഡല അലവൻസ് ആയി 25000 രൂപയും ലഭിക്കും. ടെലിഫോൺ അലവൻസ് ആയി 11,000 രൂപയും ഇൻഫ‍‌ർമേഷൻ അലവൻസ് ആയി 4000 രൂപയും സ‍ർക്കാ‍‌ർ അനുവദിച്ചിട്ടുണ്ട്. ഇത് കൂടാതെ അതിഥി സൽക്കാ‍ര അലവൻസ് ആയി 8000 രൂപ എംഎൽഎമാ‍രുടെ കീശയിലേക്കെത്തും. മാസം തോറും യാത്രാബത്തയായി 2000 രൂപയും ഉണ്ട്. ഇങ്ങനെ, ആകെ ഒരു എംഎൽഎക്ക് ഒരു മാസം ശമ്പളമായി ലഭിക്കുക 70,000 രൂപയാണ്.

ഇനി, ഇത് കൂടാതെ കേരളത്തിലോ മറ്റു സംസ്ഥാനങ്ങളിലോ പോകുന്നതിന് പെട്രോൾ അലവൻസായി കിലോമിറ്ററിന് 10 രൂപ വെച്ചും ലഭിക്കും. കെഎസ്ആർടിസിയിൽ സൗജന്യ യാത്ര, 40 ലക്ഷം രൂപയുടെ അപകട ഇൻഷ്വറൻസും, സ്റ്റാഫ് അലവൻസായി 20,000 രൂപയും, പലിശ രഹിത വാഹന ലോണുകൾ എന്നിവയാണ് ലഭിക്കുക.

അതേസമയം തമിഴ്നാട്ടിൽ പ്രതിപക്ഷ ഭരണപക്ഷ ഐക്യത്തിൽ എംഎൽഎമാരുടെ മാസശമ്പളം 55000 രൂപയിൽ നിന്നും ഉയർത്തി 105000 രൂപയിലേക്ക് ഉയർത്തിയിരുന്നു. തെലങ്കാനയിലാണ് എംഎൽഎമാർക്ക് ഏറ്റവും ഉയർന്ന ശമ്പളം നൽകുന്നത്. 250,000 രൂപയാണ് പ്രതിമാസ ശമ്പളം. ഏറ്റവും കുറഞ്ഞ ശമ്പളം ത്രിപുരയിലും മേഘാലയിലുമാണ്. 20,000 രൂപ മാത്രമാണ് ഈ സംസ്ഥാനങ്ങളിൽ എംഎൽഎമാരുടെ ശമ്പളം. ഡൽഹി, മധ്യപ്രദേശ് എന്നിവിടങ്ങളിൽ 2,10,00 രൂപയും, ബിഹാറിൽ 1,65,000 രൂപയും, മഹാരാഷ്ട്ര 1,60,000 രൂപയുമാണ് ലഭിക്കുന്നത്.

2020 ൽ എത്തിയത് 3,875 സഞ്ചാരികള്‍, 2024 ൽ 68,328 പേരെത്തി! 47 ശതമാനം വ‍ർധനവ്, ലക്ഷദ്വീപിലേക്ക് ടൂറിസ്റ്റുകളുടെ പ്രവാഹം

Sangeetha KS — Tue, 19 May 2026 16:10:00 +0530

ആഭ്യന്തര വിനോദസഞ്ചാരികള്‍ക്കിടയില്‍ പ്രിയമേറിയതോടെ ലക്ഷദ്വീപിലെത്തുന്ന വിനോദസഞ്ചാരികളുടെ എണ്ണത്തില്‍ വന്‍ വര്‍ധന. 2020-ല്‍ വെറും 3,875 സഞ്ചാരികള്‍ മാത്രമാണ് ദ്വീപിലെത്തിയത്. 2023-ല്‍ സഞ്ചാരികളുടെ എണ്ണം 46,551 ആയി ഉയര്‍ന്നു. 2024-ല്‍ സര്‍വകാല റെക്കോര്‍ഡിട്ടുകൊണ്ട് 68,328 സഞ്ചാരികള്‍ ലക്ഷദ്വീപിലെത്തി. വെറും ഒരു വര്‍ഷത്തിനിടെ (2023 മുതല്‍ 2024 വരെ) ലക്ഷദ്വീപിലെത്തിയ സഞ്ചാരികളുടെ എണ്ണത്തില്‍ 47 ശതമാനത്തോളം വര്‍ധനവാണ് രേഖപ്പെടുത്തിയത്.

2024 ജനുവരിയില്‍ പ്രധാനമന്ത്രി നരേന്ദ്ര മോദി ലക്ഷദ്വീപ് സന്ദര്‍ശിക്കുകയും അവിടുത്തെ മനോഹരമായ കടല്‍ത്തീരങ്ങളുടെ ചിത്രങ്ങളും വീഡിയോകളും സോഷ്യല്‍ മീഡിയയില്‍ പങ്കുവെക്കുകയും ചെയ്തത് വൈറലായിരുന്നു. എന്നാല്‍ ഇതിന് പിന്നാലെ മാലിദ്വീപിലെ ചില മന്ത്രിമാര്‍ പ്രധാനമന്ത്രിക്കെതിരെ സോഷ്യല്‍ മീഡിയയിലൂടെ അധിക്ഷേപ പരാമര്‍ശങ്ങളുമായി രംഗത്തെത്തി. ഇത് ഇന്ത്യയില്‍ വലിയ ജനരോഷത്തിന് കാരണമാവുകയും മാലിദ്വീപ് ബഹിഷ്‌കരിക്കാനും പകരം ലക്ഷദ്വീപിലേക്ക് യാത്ര ചെയ്യാനും ആവശ്യപ്പെട്ട് രാജ്യവ്യാപകമായി വലിയ ക്യാമ്പെയ്ൻ ആരംഭിക്കുകയും ചെയ്തു. പ്രമുഖ വ്യക്തികളും ഇന്‍ഫ്‌ലുവന്‍സര്‍മാരും ട്രാവല്‍ പ്ലാറ്റ്ഫോമുകളും ഈ കാമ്പെയ്ന്‍ ഏറ്റെടുത്തതോടെ, ലക്ഷദ്വീപ് പെട്ടെന്ന് ഒരു ദേശീയ ടൂറിസം കേന്ദ്രമായി മാറി.

തിരിച്ചടി നേരിട്ട് മാലിദ്വീപ്

ഇന്ത്യക്കാര്‍ ലക്ഷദ്വീപിലേക്ക് ഒഴുക്കിയപ്പോള്‍ മാലിദ്വീപ് ടൂറിസത്തിന് അത് വലിയ തിരിച്ചടിയായി മാറി. 2023-ല്‍ മാലിദ്വീപില്‍ പോയ ഇന്ത്യന്‍ സഞ്ചാരികള്‍ 2,09,193 ആയിരുന്നത് 2024-ല്‍ 1,30,805 ആയി കുത്തനെ കുറഞ്ഞു. അതായത്, ഒരൊറ്റ വര്‍ഷം കൊണ്ട് ഇന്ത്യന്‍ സഞ്ചാരികളുടെ എണ്ണത്തില്‍ 37.5 ശതമാനം ഇടിവ് രേഖപ്പെടുത്തി. മാലിദ്വീപിന്റെ ഏറ്റവും വലിയ ടൂറിസം വിപണിയായിരുന്നു ഇന്ത്യ.

2026-ല്‍ സമര്‍പ്പിച്ച വിവരാവകാശ അപേക്ഷയ്ക്ക് മറുപടിയായി 2024 വരെയുള്ള വ്യക്തമായ ടൂറിസം കണക്കുകള്‍ സര്‍ക്കാര്‍ നല്‍കിയിട്ടുണ്ടെങ്കിലും 2025-ലെ കണക്കുകള്‍ ഇതുവരെ പങ്കുവെച്ചിട്ടില്ല.

ഒടിടിയിൽ നടക്കുന്നത് വമ്പൻ നിയമയുദ്ധം! കാരണം ഷാരൂഖ് ഖാന്റേയും അമിതാഭ് ബച്ചന്റെയും ചിത്രങ്ങൾ, ജിയോസ്റ്റാറും സീ എന്റർടൈൻമെന്റും നേർക്കുനേർ

Sangeetha KS — Sat, 16 May 2026 17:13:06 +0530

ഇന്ത്യയിലെ പ്രമുഖ ഒ ടി ടി പ്ലാറ്റ്ഫോമുകളായ ജിയോസ്റ്റാറും (JioStar) സീ എന്റർടൈൻമെന്റും (Zee Entertainment) തമ്മിലുള്ള നിയമപോരാട്ടം പുതിയ തലത്തിലേക്ക്. തങ്ങൾക്ക് സംപ്രേക്ഷണാവകാശമുള്ള നിരവധി ബോളിവുഡ് ചിത്രങ്ങൾ സീ ടിവി നിയമവിരുദ്ധമായി സംപ്രേക്ഷണം ചെയ്തെന്ന് ആരോപിച്ച് റിലയൻസ്- ഡിസ്നി സഖ്യത്തിന്റെ മാധ്യമ സംരംഭമായ ജിയോസ്റ്റാർ നിയമനടപടി ആരംഭിച്ചതായി റോയിട്ടേഴ്സ് റിപ്പോർട്ട് ചെയ്യുന്നു.

ദില്ലി ഹൈക്കോടതി ലീഗൽ സർവീസസ് കമ്മിറ്റിക്ക് മുമ്പാകെ മേയ് 4 ന് ആണ് ജിയോസ്റ്റാർ ഹർജി സമർപ്പിച്ചത്. കഴിഞ്ഞ വർഷം തങ്ങൾക്ക് സംപ്രേഷണാവകാശമുള്ള 12 ബോളിവുഡ് ചിത്രങ്ങൾ 20 തവണയോളം സീ അനുമതിയില്ലാതെ ടെലികാസ്റ്റ് ചെയ്തെന്നാണ് ജിയോസ്റ്റാറിന്റെ ആരോപണം. ഷാരൂഖ് ഖാൻ, ആമിർ ഖാൻ, അമിതാഭ് ബച്ചൻ തുടങ്ങിയ പ്രമുഖ താരങ്ങളുടെ ബിഗ് ബജറ്റ് ചിത്രങ്ങളാണ് ഇതിൽ ഉൾപ്പെട്ടിരിക്കുന്നത്. ആമിർ ഖാന്റെ സൂപ്പർഹിറ്റ് ചിത്രം 'ദംഗൽ', ക്ലാസിക് ചിത്രങ്ങളായ 'ദീവാർ', 'ത്രിദേവ്' എന്നിവ ഇതിൽപ്പെടുന്നു.

250 കോടി രൂപയുടെ നഷ്ടപരിഹാരം?

120 പേജുള്ള ഹർജിയിൽ സീ എന്റർടൈൻമെന്റിനെ ഒരു 'സ്ഥിരം നിയമലംഘകൻ' (Habitual Infringer) എന്നാണ് ജിയോസ്റ്റാർ വിശേഷിപ്പിച്ചിരിക്കുന്നത്. ഈ പകർപ്പവകാശ ലംഘനത്തിന് ഏകദേശം 250 കോടിയിലധികം രൂപ ജിയോസ്റ്റാർ നഷ്ടപരിഹാരമായി ആവശ്യപ്പെട്ടേക്കുമെന്നാണ് ഈ രംഗത്തുനിന്നുള്ള സൂചനകൾ. എന്നാൽ, ചില ചിത്രങ്ങളുടെ കാര്യത്തിൽ തങ്ങൾക്ക് നിർമ്മാണ കമ്പനികളിൽ നിന്ന് കൃത്യമായ അനുമതി ലഭിച്ചിട്ടുണ്ടെന്നാണ് സീ ഗ്രൂപ്പ് വാദിക്കുന്നത്.

നിലവിൽ കേസ് തുട‍‌ർ വാദങ്ങൾക്കായി ദില്ലി ഹൈക്കോടതി ലീഗൽ സർവീസസ് കമ്മിറ്റിയുടെ പരിഗണനയിലാണ്. വരും ദിവസങ്ങളിൽ മധ്യസ്ഥതയിലൂടെ പരിഹാരമായില്ലെങ്കിൽ വിഷയം കോടതിയിലേക്ക് നീങ്ങും. മേയ് 25 ന് കമ്മിറ്റിക്ക് മുന്നിൽ ഹാജരാകാൻ സീ എന്റർടൈൻമെന്റിനോട് ആവശ്യപ്പെട്ടിട്ടുണ്ട്.

മാധ്യമരംഗത്തെ വമ്പന്മാർ തമ്മിലുള്ള പോര്

ഇന്ത്യൻ വിനോദ വ്യവസായ രംഗത്തെ ഏറ്റവും വലിയ രണ്ട് കമ്പനികൾ തമ്മിലുള്ള പോരാട്ടം ഇതാദ്യമായല്ല. നേരത്തെ തകർന്നടിഞ്ഞ ഒരു ക്രിക്കറ്റ് സംപ്രേക്ഷണ കരാറുമായി ബന്ധപ്പെട്ട് ലണ്ടനിൽ ഇരുകമ്പനികളും തമ്മിൽ ഒരു ബില്യൺ ഡോളറിന്റെ (ഏകദേശം 8,300 കോടി രൂപ) നിയമപോരാട്ടം നടക്കുന്നുണ്ട്. ഇതിനു പുറമേ, കഴിഞ്ഞ ഏപ്രിൽ മാസത്തിൽ ജിയോസ്റ്റാർ തങ്ങളുടെ അനുമതിയില്ലാതെ പാട്ടുകൾ ഉപയോഗിച്ചു എന്ന് കാണിച്ച് സീ ഗ്രൂപ്പ് 3 മില്യൺ ഡോളറിന്റെ മറ്റൊരു കേസും നൽകിയിരുന്നു. ഇതിന് പിന്നാലെയാണ് ഇപ്പോൾ സിനിമകളുടെ അവകാശം ഉന്നയിച്ച് ജിയോസ്റ്റാറിന്റെ തിരിച്ചടി.

2024 ൽ റിലയൻസും വാൾട്ട് ഡിസ്നിയും ഒന്നിച്ച് 8.5 ബില്യൺ ഡോളറിന്റെ ലയനത്തിലൂടെ രൂപീകരിച്ചതാണ് ജിയോസ്റ്റാർ. നിലവിൽ രാജ്യത്തെ ഏറ്റവും വലിയ ഒ ടി ടി പ്ലാറ്റ്ഫോമാണിത്. ഇന്ത്യൻ വിനോദ വിപണിയിലെ തങ്ങളുടെ മേധാവിത്വം നിലനിർത്താനും പക‍ർപ്പവകാശം സംരക്ഷിക്കാനും കമ്പനികൾ തമ്മിൽ നടത്തുന്ന കടുത്ത മത്സരത്തിന്റെ നേർക്കാഴ്ചയാണ് ഈ പുതിയ നിയമയുദ്ധം.

റോക്കറ്റും ഉപഗ്രഹ ഇന്റർനെറ്റും തുണച്ചു, സമ്പന്നരിൽ ലോകത്ത് ആരും എത്തിപ്പെടാത്ത 'ട്രില്ല്യണയർ' നേട്ടത്തിനരികെ മസ്ക്

Sangeetha KS — Thu, 21 May 2026 16:49:08 +0530

ലോകത്തിലെ ആദ്യ ട്രില്ല്യണയർ ആകാൻ ഇലോൺ മസ്ക്. സ്പേസ് എക്സ് ഐപിഒ പൂർത്തിയായാൽ മസ്കിൻ്റെ സമ്പത്തിൽ വൻ കുതിപ്പുണ്ടാകും. 1.25 ട്രില്യൺ ഡോളറാണ് സ്പേസ് എക്സ് സ്വയം കണക്കാക്കുന്ന മൂല്യം. മസ്കിൻ്റെ കൈയ്യിലുള്ള ഓഹരികളുടെ മൂല്യം 600 ബില്യൺ ഡോളറാകും. ടെസ്ലയുടെ കൂടി ഉടമയായ മസ്കിന് ഇതിന് പുറമേ 500 ബില്യൺ ഡോളർ ആസ്തിയുണ്ട്. സ്പേസ് എക്സ് ഓഹരിമൂല്യവും ചേരുമ്പോൾ ആകെ സമ്പത്ത് ഒരു ട്രില്യണിന് മുകളിലേക്ക് കടക്കുകയാണ്. റോക്കറ്റ് നിർമ്മാണം, സ്റ്റാർലിങ്ക് ഉപഗ്രഹ ഇന്റർനെറ്റ് സേവനം എന്നിവയ്ക്ക് പുറമെ മസ്‌കിന്റെ ആർട്ടിഫിഷ്യൽ ഇന്റലിജൻസ് കമ്പനിയായ xAI-യും ഇപ്പോൾ സ്‌പേസ് എക്‌സിന്റെ കീഴിലാണ് പ്രവർത്തിക്കുന്നത്.

അതേ സമയം, രഹസ്യമായി സൂക്ഷിച്ചിരുന്ന കമ്പനിയുടെ സാമ്പത്തിക വിവരങ്ങൾ ഐപിഒ രേഖകളിലൂടെ ആദ്യമായി പുറത്തുവന്നു. കഴിഞ്ഞ വർഷം 18.6 ബില്യൺ ഡോളർ വരുമാനം നേടിയെങ്കിലും 4.9 ബില്യൺ ഡോളറിന്റെ അറ്റനഷ്ടമാണ് കമ്പനി രേഖപ്പെടുത്തിയത്. ഈ വർഷത്തെ ആദ്യ മൂന്ന് മാസങ്ങളിൽ 4.7 ബില്യൺ ഡോളറിന്റെ വിൽപ്പന നടത്തിയെങ്കിലും 4.3 ബില്യൺ ഡോളർ നഷ്ടം തുടരുകയാണ്. നിലവിൽ റോക്കറ്റുകളും മറ്റ് ഉപകരണങ്ങളുമായി 102 ബില്യൺ ഡോളറിന്റെ ആസ്തി കമ്പനിക്കുണ്ടെങ്കിലും, 60.5 ബില്യൺ ഡോളറിന്റെ കടബാധ്യതയുമുണ്ട്. എന്നാൽ ഇത്തരം വൻകിട പദ്ധതികൾ ഐപിഒ ഘട്ടത്തിൽ പോലും നഷ്ടത്തിലാകുന്നത് സ്വാഭാവികമാണെന്നും കമ്പനിയുടെ ഭാവി സാധ്യതകൾ വളരെ വലുതാണെന്നും വിദഗ്ധർ ചൂണ്ടിക്കാണിക്കുന്നു.

കേന്ദ്ര സര്‍ക്കാരിന് റിസര്‍വ് ബാങ്കിന്റെ വമ്പന്‍ 'ലോട്ടറി'; ഇത്തവണ ലഭിക്കുക റെക്കോര്‍ഡ് ലാഭവിഹിതം, 3 ലക്ഷം കോടി രൂപ കൈമാറുമെന്ന് റിപ്പോർട്ട്

Sangeetha KS — Wed, 20 May 2026 13:37:25 +0530

ആഗോള സാമ്പത്തിക പ്രതിസന്ധികള്‍ക്കും ഇന്ധനവില വര്‍ധനവിനുമിടയില്‍ കേന്ദ്ര സര്‍ക്കാരിന് വലിയൊരു ആശ്വാസമെത്തുന്നു. റിസര്‍വ് ബാങ്ക് തങ്ങളുടെ ലാഭവിഹിതമായി ഇത്തവണ റെക്കോര്‍ഡ് തുക സര്‍ക്കാരിന് കൈമാറിയേക്കുമെന്ന് ബ്ലൂംബെര്‍ഗ് റിപ്പോര്‍ട്ട് ചെയ്യുന്നു. വരാനിരിക്കുന്ന സാമ്പത്തിക വര്‍ഷത്തില്‍ സര്‍ക്കാരിന്റെ സാമ്പത്തിക ബാധ്യതകള്‍ കുറയ്ക്കാന്‍ ഈ തുക വലിയൊരു താങ്ങാകും. സാമ്പത്തിക വിദഗ്ധരുടെ വിലയിരുത്തല്‍ അനുസരിച്ച് ഏകദേശം 3 ലക്ഷം കോടി രൂപയാകും ആര്‍ബിഐ കേന്ദ്രത്തിന് കൈമാറുക. കഴിഞ്ഞ വര്‍ഷം നല്‍കിയ റെക്കോര്‍ഡ് തുകയായ 2.7 ലക്ഷം കോടി രൂപയേക്കാള്‍ കൂടുതലാണിത്. സാമ്പത്തിക വര്‍ഷത്തില്‍ റിസര്‍വ് ബാങ്കിന് ലഭിക്കുന്ന വരുമാനത്തില്‍ നിന്നാണ് ഈ 'ലാഭവിഹിതം' സര്‍ക്കാരിന് നല്‍കുന്നത്. ലാഭവിഹിതം കൈമാറുന്നതിന് അംഗീകാരം നല്‍കാനായി ആര്‍ബിഐ ബോര്‍ഡ് വെള്ളിയാഴ്ച യോഗം ചേരും. കൃത്യമായ തുക ഇതുവരെ പ്രഖ്യാപിച്ചിട്ടില്ലെങ്കിലും, ചില റിപ്പോര്‍ട്ടുകള്‍ പ്രകാരം ഇത് 3.4 ലക്ഷം കോടി രൂപ വരെയാകാനും സാധ്യതയുണ്ട്.

എന്തുകൊണ്ടാണ് ഇത്തവണ വലിയ തുക ലഭിക്കുന്നത്?

വിദേശനാണ്യ ശേഖരത്തിലെ നിക്ഷേപങ്ങള്‍, ബോണ്ടുകള്‍, കറന്‍സി മാനേജ്മെന്റ് തുടങ്ങിയ നിരവധി മാര്‍ഗങ്ങളിലൂടെയാണ് റിസര്‍വ് ബാങ്ക് വരുമാനം കണ്ടെത്തുന്നത്. 2026 സാമ്പത്തിക വര്‍ഷംനആര്‍ബിഐയെ സംബന്ധിച്ച് സാമ്പത്തികമായി മികച്ച നേട്ടങ്ങളുടെ വര്‍ഷമായിരുന്നു എന്നാണ് വിദഗ്ധര്‍ ചൂണ്ടിക്കാട്ടുന്നത്. വിദേശനാണ്യ വ്യാപാരത്തില്‍ നിന്നുള്ള ലാഭം, ആഗോളതലത്തില്‍ ഉയര്‍ന്ന പലിശനിരക്കുകള്‍, സ്വര്‍ണ്ണവിലയിലുണ്ടായ കുതിപ്പ് എന്നിവയെല്ലാം റിസര്‍വ് ബാങ്കിന്റെ വരുമാനം ഗണ്യമായി വര്‍ദ്ധിപ്പിച്ചു.ലളിതമായി പറഞ്ഞാല്‍, റിസര്‍വ് ബാങ്കിന് തങ്ങളുടെ സ്വന്തം ആവശ്യങ്ങള്‍ക്കും കരുതല്‍ ധനത്തിനും വേണ്ടതിലും കൂടുതല്‍ വരുമാനം ലഭിക്കുമ്പോള്‍, ആ അധിക തുക സര്‍ക്കാരിന് കൈമാറുകയാണ് പതിവ്. ഇത്തവണ സര്‍ക്കാരിന് കൈമാറാന്‍ കഴിയുന്ന അധിക തുക സാധാരണയേക്കാള്‍ വളരെ വലുതായിരിക്കുമെന്നാണ് വിലയിരുത്തല്‍.

സര്‍ക്കാരിന് ഈ തുക നിര്‍ണായകമാകുന്നത് എന്തുകൊണ്ട്?

നികുതി വര്‍ദ്ധിപ്പിക്കുകയോ കൂടുതല്‍ കടമെടുക്കുകയോ ചെയ്യാതെ തന്നെ സര്‍ക്കാരിന് വലിയൊരു തുക ലഭിക്കുന്നു എന്നതാണ് ഇതിന്റെ ഏറ്റവും വലിയ നേട്ടം. നിലവിലെ സാഹചര്യത്തില്‍ ഈ തുക സര്‍ക്കാരിന് വളരെ അത്യാവശ്യവുമാണ്. ഇറാന്‍ സംഘര്‍ഷം ഉള്‍പ്പെടെയുള്ള ആഗോള പ്രശ്‌നങ്ങള്‍ വലിയ തോതിലുള്ള ഇന്ധനവില വര്‍ദ്ധനവിന് കാരണമായിട്ടുണ്ട്. ഊര്‍ജ്ജ ആവശ്യങ്ങള്‍ക്കായി പ്രധാനമായും ഇറക്കുമതിയെ ആശ്രയിക്കുന്ന ഇന്ത്യയ്ക്ക് ഇത് വലിയ തിരിച്ചടിയാണ്. വിലക്കയറ്റത്തിനും സര്‍ക്കാരിന്റെ സാമ്പത്തിക ബാധ്യതകള്‍ക്കും ഇത് കാരണമാകാം. ഏകദേശം 3 ലക്ഷം കോടി രൂപ അധികമായി ലഭിക്കുന്നത് സര്‍ക്കാരിന്റെ ദൈനംദിന ചെലവുകള്‍ നിയന്ത്രിക്കാനും, ക്ഷേമപദ്ധതികള്‍ മുടക്കമില്ലാതെ കൊണ്ടുപോകാനും, ബജറ്റ് കമ്മി കുറയ്ക്കാനും വലിയ തോതില്‍ സഹായിക്കും. ചുരുക്കത്തില്‍, അനിശ്ചിതത്വങ്ങള്‍ നിറഞ്ഞ ഈ സമയത്ത് സര്‍ക്കാരിനൊരു വലിയ സാമ്പത്തിക കരുത്തായി ഈ തുക മാറും.

എന്താണ് കണ്ടിന്‍ജന്‍സി ബഫര്‍? ഇതിന്റെ പ്രാധാന്യമെന്ത്?

സര്‍ക്കാരിന് ലാഭവിഹിതം കൈമാറുന്നതിന് മുന്‍പ്, അപ്രതീക്ഷിതമായുണ്ടാകുന്ന സാമ്പത്തിക പ്രതിസന്ധികളെയോ ആഘാതങ്ങളെയോ നേരിടാന്‍ റിസര്‍വ് ബാങ്ക് മാറ്റിവെക്കുന്ന കരുതല്‍ ധനമാണ് 'കണ്ടിന്‍ജന്‍സി ബഫര്‍'.കഴിഞ്ഞ വര്‍ഷം ആര്‍ബിഐയുടെ മൊത്തം ആസ്തിയുടെ 7.5 ശതമാനമാണ് ഈ കരുതല്‍ ധനമായി മാറ്റിവെച്ചത്. നിയമപ്രകാരം അനുവദനീയമായ പരമാവധി നിരക്കാണിത് (4.5% മുതല്‍ 7.5% വരെയാണ് ഇതിന്റെ പരിധി). ആഗോളതലത്തിലുള്ള സാമ്പത്തിക അനിശ്ചിതത്വങ്ങള്‍ തുടരുന്നതിനാല്‍, ഈ വര്‍ഷവും ഈ ബഫര്‍ നിരക്ക് ഉയര്‍ന്ന പരിധിയായ 7.5 ശതമാനത്തില്‍ തന്നെ നിലനിര്‍ത്താനാണ് സാധ്യത. എന്നാലും, ഇതിനുശേഷവും കേന്ദ്ര സര്‍ക്കാരിന് റെക്കോര്‍ഡ് തുക ലാഭവിഹിതമായി നല്‍കാന്‍ റിസര്‍വ് ബാങ്കിന് സാധിക്കുമെന്നാണ് വിദഗ്ധര്‍ പറയുന്നത്.

ഒറ്റ ഓർഡറിന് 44 രൂപ വരെ കൂടും! ഓൺലൈൻ ഭക്ഷണം വാങ്ങുന്നത് ഇനി സാധാരണക്കാർക്ക് താങ്ങില്ല?

Sangeetha KS — Wed, 20 May 2026 15:34:41 +0530

ഇനി ഓണ്‍ലൈന്‍ വഴി ഭക്ഷണം ഓര്‍ഡര്‍ ചെയ്യുമ്പോള്‍ ചെലവ് കൂടും. ഇറാന്‍ യുദ്ധത്തെ തുടര്‍ന്നുണ്ടായ അസംസ്‌കൃത എണ്ണ പ്രതിസന്ധിയും ഇന്ധനവില വര്‍ധനയും കാരണം സ്വിഗ്ഗി, സൊമാറ്റോ തുടങ്ങിയ ഓണ്‍ലൈന്‍ ഭക്ഷണ വിതരണ പ്ലാറ്റ്ഫോമുകളുടെ നിരക്കുകള്‍ വരും ദിവസങ്ങളില്‍ ഉയര്‍ന്നേക്കുമെന്നാണ് സൂചന. സൊമാറ്റോയുടെ മാതൃ കമ്പനിയായ ഇറ്റേണല്‍, സ്വിഗ്ഗി എന്നിവയുള്‍പ്പെടെയുള്ള ഫുഡ് ഡെലിവറി, ക്വിക്ക് കൊമേഴ്സ് പ്ലാറ്റ്ഫോമുകള്‍ക്ക് വരും ദിവസങ്ങളില്‍ ചെലവ് കൂടുമെന്ന് പ്രമുഖ സാമ്പത്തിക ഗവേഷണ സ്ഥാപനമായ ഇലാര കാപ്പിറ്റലിന്റെ റിപ്പോര്‍ട്ടില്‍ പറയുന്നു.

ഒരു ഓര്‍ഡറിന് എത്ര രൂപ കൂടും?

അസംസ്‌കൃത എണ്ണവിലയിലെ വര്‍ധന കാരണം അടുത്തിടെ ഇന്ധനവിലയില്‍ ലിറ്ററിന് 4 രൂപയോളം വര്‍ധനവുണ്ടായിട്ടുണ്ട്. ഇത് പെട്രോള്‍, ഡീസല്‍ വിലയില്‍ ഏകദേശം 4 ശതമാനത്തിന്റെ വര്‍ധനവാണ് ഉണ്ടാക്കിയത്. ഈ 4 ശതമാനം ഇന്ധനവില വര്‍ധനവ് ഓരോ ഓര്‍ഡറിലും ഏകദേശം 44 പൈസയുടെ അധിക ബാധ്യത വരുത്തിവെക്കുമെന്നാണ് ഇലാര കാപ്പിറ്റല്‍ വിലയിരുത്തുന്നത്.നിലവിലെ സാഹചര്യത്തില്‍ ഇന്ധനവില വര്‍ധനവിനെ തുടര്‍ന്ന് ഡെലിവറി തൊഴിലാളികള്‍ കൂടുതല്‍ തുക ആവശ്യപ്പെട്ടാലും, കമ്പനികളുടെ വരുമാനത്തെ ഇത് തല്‍ക്കാലം വലിയ രീതിയില്‍ ബാധിക്കാനിടയില്ലെന്നും റിപ്പോര്‍ട്ടില്‍ വ്യക്തമാക്കുന്നു.

നിലവിലെ ഡെലിവറി ചെലവ് :

റിപ്പോര്‍ട്ട് അനുസരിച്ച് കമ്പനികള്‍ക്ക് നിലവില്‍ ഒരു ഓര്‍ഡറിന് വരുന്ന ശരാശരി ഡെലിവറി ചെലവ് എങ്ങനെയാണെന്ന് നോക്കാം. ക്വിക്ക് കൊമേഴ്സ് ഓര്‍ഡറുകള്‍ക്ക് ശരാശരി 35 മുതല്‍ 50 രൂപ വരെയാണ് ചാർജ് വരുന്നത്. ഫുഡ് ഡെലിവറി ഓര്‍ഡറുകള്‍ക്ക് ശരാശരി 55 മുതല്‍ 60 രൂപ വരെ ആകും. ഇറ്റേണലിൽ മൊത്തത്തിലുള്ള ശരാശരി കണക്കാക്കിയാല്‍ ഒരു ഓര്‍ഡറിന് 45 രൂപയോളം വരും. സ്വിഗ്ഗിയിൽ മൊത്തത്തിലുള്ള ശരാശരി കണക്കാക്കിയാല്‍ ഒരു ഓര്‍ഡറിന് 55 രൂപയാണ് അധിക ചെലവ് വരുന്നത്. ഒരു ഡെലിവറിക്ക് വരുന്ന ആകെ ചെലവിന്റെ 20 ശതമാനത്തോളം വരുന്നത് ഇന്ധനച്ചെലവാണ്. അതായത്, നിലവില്‍ ഒരു ഓര്‍ഡറിന് ഏകദേശം 9 മുതല്‍ 10 രൂപ വരെ ഇന്ധനത്തിനായി മാത്രം ചെലവാകുന്നുണ്ട്. ഇതാണ് ഇന്ധനവില കൂടുന്നത് കമ്പനികള്‍ക്ക് മേല്‍ സമ്മര്‍ദ്ദമുണ്ടാക്കുന്നത്.

പ്രതിഷേധവുമായി ഡെലിവറി തൊഴിലാളികള്‍

ഇന്ധനവില വര്‍ധനവ് ഡെലിവറി നടത്തുന്ന തൊഴിലാളികളുടെ വരുമാനത്തെ നേരിട്ട് ബാധിക്കുമെന്ന ആശങ്ക ശക്തമാണ്. ഇന്ധനവില കൂടിയതോടെ കിലോമീറ്ററിന് ലഭിക്കുന്ന സര്‍വീസ് നിരക്ക് ഉടന്‍ വര്‍ധിപ്പിക്കണമെന്ന് ആവശ്യപ്പെട്ട് 'ഗിഗ് ആന്‍ഡ് പ്ലാറ്റ്ഫോം സര്‍വീസ് വര്‍ക്കേഴ്സ് യൂണിയന്‍' കഴിഞ്ഞ ആഴ്ച രംഗത്തെത്തിയിരുന്നു. ഇതിന്റെ ഭാഗമായി 5 മണിക്കൂര്‍ ആപ്പ് അധിഷ്ഠിത സേവനങ്ങള്‍ നിര്‍ത്തിവെച്ച് അവര്‍ പ്രതിഷേധവും പ്രഖ്യാപിച്ചിരുന്നു.

ദിനംപ്രതിയുള്ള വരുമാനത്തിനായി ബൈക്കുകളെയും സ്‌കൂട്ടറുകളെയും ആശ്രയിക്കുന്ന രാജ്യത്തെ ഏകദേശം 1.2 കോടിയോളം വരുന്ന ഗിഗ് തൊഴിലാളികളെ ഇന്ധനവില വര്‍ധനവ് സാരമായി ബാധിക്കുമെന്ന് യൂണിയന്‍ മുന്നറിയിപ്പ് നല്‍കുന്നു. ഇന്ധനച്ചെലവിനും വാഹനത്തിന്റെ അറ്റകുറ്റപ്പണികള്‍ക്കും ആനുപാതികമായി വരുമാനം വര്‍ധിച്ചില്ലെങ്കില്‍ പല തൊഴിലാളികളും ഈ മേഖല ഉപേക്ഷിക്കാന്‍ നിര്‍ബന്ധിതരാകുമെന്നും യൂണിയന്‍ വ്യക്തമാക്കുന്നു.

കേരളം കടുത്ത പ്രതിസന്ധിയിലേക്ക്? തെരഞ്ഞെടുപ്പ് കഴിഞ്ഞ് പുതിയ സർക്കാർ അധികാരത്തിലേറിയിട്ടും വോട്ട് ചെയ്യാൻ പോയ അതിഥി തൊഴിലാളികൾ തിരിച്ചെത്തിയില്ല!

Web Desk — Tue, 19 May 2026 12:53:18 +0530

സംസ്ഥാനത്തെ നിര്‍മ്മാണ മേഖലയിലടക്കം തൊഴിലാളി ക്ഷാമം രൂക്ഷമാകുകയാണ്. അതിഥി തൊഴിലാളികള്‍ കൂട്ടത്തോടെ വോട്ട് ചെയ്യാനായി സ്വദേശങ്ങളിലേക്ക് പോയി മടങ്ങിയെത്താത്തതാണ് പ്രതിസന്ധിക്ക് കാരണം. നിര്‍മ്മാണ മേഖലക്ക് പുറമേ ഹോട്ടല്‍, പ്ലൈവുഡ് തുടങ്ങി സര്‍വ്വ മേഖലകളേയും പ്രതിസന്ധി ബാധിച്ചിട്ടുണ്ട്. സംസ്ഥാനത്തെ നിര്‍മ്മാണ മേഖലയില്‍ തൊണ്ണൂറ് ശതമാനത്തിലേറെയും ജോലി ചെയ്യുന്നത് അതിഥി തൊഴിലാളികളാണ്. ബംഗാള്‍, ബീഹാര്‍ എന്നിവിടങ്ങളില്‍ നിന്നുള്ളവരാണ് ഇതില്‍ കൂടുതലും. വോട്ട് ചെയ്യാനായി ബംഗാളിലേക്ക് മിക്കവരും പോയത് ഏപ്രില്‍ ആദ്യ വാരം. അന്നു തൊട്ട് നിര്‍മ്മാണ മേഖലയുടെ താളം തെറ്റി. ഒന്നരമാസത്തിലേറെയായി ആ പ്രതിസന്ധി തുടരുകയാണ്. കോണ്‍ക്രീറ്റ് ,തേപ്പ്, പടവ് തുടങ്ങിയ ജോലികളൊക്കെ മുടങ്ങി.

കരാറുകാര്‍ തൊഴിലാളികളെ ബന്ധപ്പെടുന്നുണ്ടെങ്കിലും എപ്പോള്‍ മടങ്ങിയെത്തുമെന്ന കാര്യത്തില്‍ അനിശ്ചിതത്ത്വമുണ്ട്. ഇതിൽ ചെറുകിട കരാറുകാരാണ് ഏറെ പ്രതിസന്ധിയിലായിരിക്കുന്നത്. നിശ്ചിത സമയത്തിനുള്ളില്‍ നിര്‍‍മ്മാണം തീര്‍ത്തു നല്‍കാമെന്ന് ഉറപ്പ് നല്‍കിയ ഇവര്‍ വന്‍ നഷ്ടം സഹിക്കുകയാണ്. ഏറ്റെടുത്ത കരാര്‍ ജോലികളില്‍ മലയാളികള്‍ ചെയ്യുന്ന ഇലക്ട്രിക്ക്, പ്ലംബിങ്ങ് പോലുള്ളവ മാത്രമാണ് നടക്കുന്നത്. സമാന പ്രതിസന്ധിയിലൂടെയാണ് പ്ലൈവുഡ് മേഖലയും കടന്നു പോകുന്നത്. പെരുന്നാളിന് ശേഷം തൊഴിലാളികൾ മടങ്ങിയെത്തിയില്ലെങ്കിൽ സ്ഥിതി കൂടുതൽ രൂക്ഷമാകും.

വിദേശികളുടെ ഗ്ലാസിലും ഇനി 'ഇന്ത്യന്‍ ടച്ച്'; ആഗോള വിപണി കീഴടക്കാന്‍ ഈ പ്രമുഖ ഇന്ത്യന്‍ ബിയര്‍ ബ്രാന്‍ഡുകള്‍

Sangeetha KS — Sat, 16 May 2026 15:31:47 +0530

ആഗോള വിപണിയില്‍ ശക്തമാകാനുള്ള ശ്രമത്തില്‍ ഇന്ത്യയിലെ ബിയര്‍ ബ്രാന്റുകള്‍. കിംഗ്ഫിഷര്‍, ബിറ 91, ബീയങ്, ഗോഡ്ഫാദര്‍, മെഡൂസ തുടങ്ങിയ ഇന്ത്യന്‍ ബ്രാന്‍ഡുകള്‍ ആഗോള വിപണിയില്‍ തങ്ങളുടെ സാന്നിധ്യം ഉറപ്പിക്കാനുള്ള തയ്യാറെടുപ്പിലാണ്. ആഗോള ബിയര്‍ വിപണിയില്‍ വലിയ മാറ്റങ്ങളാണ് സംഭവിക്കുന്നത്. 2024 ല്‍ ഏകദേശം 839.31 ബില്യണ്‍ ഡോളറായിരുന്ന ആഗോള വിപണി, 2030 ആകുമ്പോഴേക്കും 1,248.3 ബില്യണ്‍ ഡോളറില്‍ എത്തുമെന്നാണ് കണക്കാക്കുന്നത്. 6.8 ശതമാനം വാര്‍ഷിക വളര്‍ച്ചയാണ് ഈ മേഖലയില്‍ പ്രതീക്ഷിക്കുന്നത്. ഈ വലിയ വിപണിയിലേക്കാണ് ഇന്ത്യന്‍ ബ്രാന്‍ഡുകള്‍ കണ്ണ് വെക്കുന്നത്.

എന്തുകൊണ്ട് വിദേശ വിപണി?

ഇന്ത്യന്‍ ഉപഭോക്താക്കളുടെ താല്‍പര്യങ്ങളില്‍ വന്ന മാറ്റമാണ് ഈ പുതിയ നീക്കത്തിന് പിന്നില്‍. പണ്ട് 'സ്‌ട്രോങ്ങ്' ബിയറുകള്‍ക്ക് പിന്നാലെ പോയിരുന്നവര്‍ ഇന്ന് പ്രീമിയം, സ്മൂത്ത് ബിയറുകളിലേക്കും ക്രാഫ്റ്റ് ബിയറുകളിലേക്കും മാറിയിരിക്കുന്നു. നിലവാരമുള്ള ബിയറുകള്‍ നിര്‍മ്മിക്കുന്നതിലും ബ്രാന്‍ഡിംഗ് നടത്തുന്നതിലും ഇന്ത്യന്‍ കമ്പനികള്‍ കൈവരിച്ച വൈദഗ്ധ്യം വിദേശ വിപണിയില്‍ അവര്‍ക്ക് ആത്മവിശ്വാസം നല്‍കുന്നു.

ഗള്‍ഫ് രാജ്യങ്ങള്‍ പ്രധാന ലക്ഷ്യം: വിദേശ വിപണിയിലേക്ക് കടക്കുമ്പോള്‍ ഇന്ത്യന്‍ ബ്രാന്‍ഡുകള്‍ ആദ്യം തിരഞ്ഞെടുക്കുന്നത് ഗള്‍ഫ് മേഖലയാണ്. ഇന്ത്യക്കാരുമായുള്ള വൈകാരിക ബന്ധവും സമാനമായ രുചി താല്പര്യങ്ങളുമാണ് ഇതിന് കാരണം.

പ്രവാസികളുടെ പിന്തുണ: ലോകമെമ്പാടുമുള്ള ഇന്ത്യന്‍ പ്രവാസികള്‍ ഈ ബ്രാന്‍ഡുകളുടെ ആദ്യകാല അംബാസഡര്‍മാരായി മാറുന്നു. ഇത് പുതിയ വിപണികളില്‍ വേരൂന്നാന്‍ കമ്പനികളെ സഹായിക്കുന്നു.

വെല്ലുവിളികള്‍ കുറവല്ല

വിദേശത്തേക്ക് മദ്യം കയറ്റുമതി ചെയ്യുന്നത് അത്ര എളുപ്പമല്ല. ഓരോ രാജ്യത്തിനും അതിന്റേതായ നിയമങ്ങളും നിയന്ത്രണങ്ങളുമുണ്ട്. ലൈസന്‍സ്, ലേബലിംഗ്, ഇറക്കുമതി തീരുവ, പരസ്യ നിയന്ത്രണങ്ങള്‍ എന്നിവ വലിയ വെല്ലുവിളിയാണ്. ഇത് മറികടക്കാന്‍ പ്രാദേശിക കമ്പനികളുമായി ഇന്ത്യന്‍ ബ്രാന്‍ഡുകള്‍ കൈകോര്‍ക്കണം.ബിയറിന്റെ ഗുണനിലവാരം മാറാതെ വിദേശ രാജ്യങ്ങളിലെ വിപണികളില്‍ എത്തിക്കാന്‍ ശക്തമായ വിതരണ ശൃംഖല ആവശ്യമാണ്.

തായ്ലന്‍ഡിലേക്ക് പറക്കാന്‍ പ്ലാനുണ്ടോ? വലിയ മാറ്റം വരുന്നു; ഫ്രീ വിസ കാലാവധി പകുതിയായി കുറക്കും, സഞ്ചാരികള്‍ക്ക് തിരിച്ചടി

Sangeetha KS — Wed, 20 May 2026 14:38:11 +0530

ഇന്ത്യക്കാരുടെ പ്രിയപ്പെട്ട വിദേശ വിനോദസഞ്ചാര കേന്ദ്രങ്ങളിലൊന്നായ തായ്ലന്‍ഡ് തങ്ങളുടെ വിസ നയങ്ങളില്‍ വലിയ മാറ്റത്തിനൊരുങ്ങുന്നു. കോവിഡിന് ശേഷമുള്ള ടൂറിസം മേഖലയുടെ വീണ്ടെടുപ്പിനായി ഏര്‍പ്പെടുത്തിയ 60 ദിവസത്തെ സൗജന്യ വിസ ആനുകൂല്യം തായ്ലന്‍ഡ് നിര്‍ത്തലാക്കുകയാണ്. വിദേശികള്‍ ഉള്‍പ്പെടുന്ന കുറ്റകൃത്യങ്ങളും അനധികൃത ജോലികളും വര്‍ദ്ധിച്ച പശ്ചാത്തലത്തിലാണ് ഈ കര്‍ശന നടപടി. പുതിയ നിയമപ്രകാരം സൗജന്യ വിസ കാലാവധി 30 ദിവസമായി ചുരുങ്ങും. ഓസ്ട്രേലിയ, സിംഗപ്പൂര്‍, അമേരിക്ക തുടങ്ങിയ രാജ്യങ്ങളില്‍ നിന്നുള്ള സഞ്ചാരികള്‍ക്ക് ഇനി 30 ദിവസം മാത്രമേ വിസയില്ലാതെ തങ്ങാനാകൂ. ചില രാജ്യക്കാര്‍ക്ക് 'വിസ ഓണ്‍ അറൈവല്‍' രീതി വീണ്ടും നിര്‍ബന്ധമാക്കിയേക്കും.

ഇന്ത്യന്‍ സഞ്ചാരികളെ ബാധിക്കുമോ?

നിലവില്‍ ഇന്ത്യക്കാര്‍ക്ക് തായ്ലന്‍ഡില്‍ 60 ദിവസത്തെ സൗജന്യ വിസ ആനുകൂല്യം ലഭിക്കുന്നുണ്ട്. പുതിയ പരിഷ്‌കാരത്തില്‍ ഇന്ത്യയിലെ സഞ്ചാരികള്‍ക്കുള്ള അവസ്ഥ എന്തായിരിക്കുമെന്നതില്‍ തായ് അധികൃതര്‍ ഇതുവരെ ഔദ്യോഗികമായി വ്യക്തത വരുത്തിയിട്ടില്ല. എങ്കിലും ഈ മാറ്റങ്ങള്‍ ഇന്ത്യന്‍ സഞ്ചാരികളും ടൂറിസം മേഖലയും അതീവ ഉറ്റുനോക്കുകയാണ്.

കുറഞ്ഞ ചെലവിലുള്ള അന്താരാഷ്ട്ര യാത്രകള്‍, ഡെസ്റ്റിനേഷന്‍ വെഡ്ഡിംഗുകള്‍, ഗ്രൂപ്പ് ടൂറിസം, നൈറ്റ് ലൈഫ് എന്നിവ കാരണം സമീപകാലത്ത് തായ്ലന്‍ഡിന്റെ ഏറ്റവും വലിയ വിനോദസഞ്ചാര വിപണിയായി ഇന്ത്യ മാറിയിരുന്നു. ബാങ്കോക്ക്, ഫുക്കറ്റ്, പട്ടായ തുടങ്ങിയ പ്രമുഖ തായ് ടൂറിസ്റ്റ് കേന്ദ്രങ്ങളിലേക്ക് ഇന്ത്യന്‍ നഗരങ്ങളില്‍ നിന്നുള്ള നേരിട്ടുള്ള വിമാന സര്‍വീസുകളും വര്‍ദ്ധിച്ചിരുന്നു. 2024-ലാണ് തായ്ലന്‍ഡ് തങ്ങളുടെ സൗജന്യ വിസ സൗകര്യം 57 രാജ്യങ്ങളില്‍ നിന്ന് 93 രാജ്യങ്ങളിലേക്ക് വ്യാപിപ്പിച്ചത്. ഇന്ത്യക്കാര്‍ക്ക് ഇത് ഏറെ സൗകര്യപ്രദമായിരുന്നു. എന്നാല്‍, ഈ ഉദാരമായ വിസ നിയമങ്ങള്‍ വിസ കാലാവധി കഴിഞ്ഞും രാജ്യത്ത് തുടരുന്നവരും തദ്ദേശീയര്‍ക്കായി മാറ്റിവെച്ചിരിക്കുന്ന തൊഴില്‍ മേഖലകളില്‍ അനധികൃതമായി ജോലി ചെയ്യുന്നവരും കൂടുന്നതായി തായ് അധികൃതര്‍ വ്യക്തമാക്കുന്നു.

ടൂറിസം മേഖലയില്‍ ആശങ്ക

തായ്ലന്‍ഡ് സമ്പദ്വ്യവസ്ഥയുടെ അഞ്ചിലൊന്നും ടൂറിസം മേഖലയെ ആശ്രയിച്ചാണ് നിലനില്‍ക്കുന്നത്. കോവിഡിന് മുന്‍പുള്ള അവസ്ഥയിലേക്ക് ഇവിടുത്തെ ടൂറിസം മേഖല ഇനിയും പൂര്‍ണ്ണമായി തിരിച്ചെത്തിയിട്ടില്ല. പുതിയ സാഹചര്യത്തില്‍ തായ്ലന്‍ഡിന്റെ സാമ്പത്തിക ആസൂത്രണ ഏജന്‍സി 2026-ലെ വിദേശ വിനോദസഞ്ചാരികളുടെ വരവ് സംബന്ധിച്ച പ്രവചനം 3.5 കോടിയില്‍ നിന്ന് 3.2 കോടിയായി കുറച്ചിട്ടുണ്ട്. തുടര്‍ച്ചയായ രണ്ടാം വര്‍ഷമാണ് സഞ്ചാരികളുടെ എണ്ണത്തില്‍ ഇടിവ് രേഖപ്പെടുത്തുന്നത്.

എൽപിജി ഉപഭോക്താക്കളുടെ ഏജൻസി മാറ്റാൻ എണ്ണ കമ്പനികൾക്ക് അധികാരമുണ്ടെന്ന് ഹൈക്കോടതി

Web Desk — Wed, 20 May 2026 17:03:15 +0530

കൊച്ചി: പാചകവാതക ഉപഭോക്താക്കളെ ഒരു വിതരണ ഏജൻസിയിൽ നിന്ന് മറ്റൊന്നിലേക്ക് മാറ്റാൻ എണ്ണക്കമ്പനികൾക്ക് അധികാരമുണ്ടെന്ന് ഹൈക്കോടതി വ്യക്തമാക്കി. ഉപഭോക്താക്കൾക്ക് തടസ്സമില്ലാതെ പാചകവാതക വിതരണം ഉറപ്പാക്കുക എന്നതാണ് പ്രധാന പരിഗണനയെന്നും കോടതി നിരീക്ഷിച്ചു. എൽപിജി വിതരണക്കാർ എണ്ണ കമ്പനികളുടെ ഏജന്റുമാരാണെന്നും വിതരണ സംവിധാനത്തിന്റെ കാര്യക്ഷമത ഉറപ്പാക്കുന്നതിനായി കമ്പനികൾക്ക് നയപരമായ തീരുമാനങ്ങൾ എടുക്കാമെന്നും ജസ്റ്റിസ് എംഎ അബ്ദുൾ ഹക്കിം വ്യക്തമാക്കി.

ഉപഭോക്താക്കളെ വിവിധ ഏജൻസികൾക്കിടയിൽ പുനർവിതരണം ചെയ്യുന്നതിനായി എണ്ണ കമ്പനികൾ കഴിഞ്ഞ വർഷം രൂപവത്കരിച്ച നയം ചോദ്യം ചെയ്ത് ഓൾ ഇന്ത്യ എൽപിജി ഡിസ്ട്രിബ്യൂട്ടേഴ്സ് അസോസിയേഷൻ കേരള സർക്കിൾ നൽകിയ ഹർജികളിലാണ് കോടതി വിധി. സിംഗിൾ ബെഞ്ച് ഹർജികൾ തള്ളിക്കൊണ്ടാണ് നിലപാട് വ്യക്തമാക്കിയത്.

ഒരു ഏജൻസിക്ക് കീഴിൽ സിലിണ്ടർ റീഫില്ലിങ്ങിന് പരിധി നിശ്ചയിക്കുകയും അധികമുള്ള ഉപഭോക്താക്കളെ സമീപ ഏജൻസികളിലേക്ക് മാറ്റുകയും ചെയ്യുന്നതായിരുന്നു പുതിയ നയം. ഇത് തങ്ങളുടെ ലാഭത്തെ ബാധിക്കുമെന്നായിരുന്നു വിതരണക്കാരുടെ വാദം.എന്നാൽ വിതരണക്കാരുടെ സാമ്പത്തിക താത്പര്യങ്ങളേക്കാൾ ഉപഭോക്താക്കളുടെ സൗകര്യവും ഗ്യാസ് വിതരണത്തിന്റെ കാര്യക്ഷമതയുമാണ് മുൻഗണന ലഭിക്കേണ്ടതെന്ന് ഹൈക്കോടതി ചൂണ്ടിക്കാണിച്ചു.

സകല വഴിയും തേടി ആർബിഐ, ലക്ഷ്യം രൂപയുടെ തകര്‍ച്ച തടയുക; പലിശ നിരക്കിൽ മാറ്റം വരുമോ?

Sangeetha KS — Thu, 21 May 2026 14:04:58 +0530

ഡോളറിനെതിരെ രൂപയുടെ മൂല്യം ചരിത്രത്തിലെ ഏറ്റവും വലിയ തകര്‍ച്ച നേരിടുന്ന സാഹചര്യത്തില്‍, രൂപയെ പിടിച്ചുനിര്‍ത്താന്‍ ലഭ്യമായ എല്ലാ വഴികളും തേടി റിസര്‍വ് ബാങ്ക്. പലിശ നിരക്ക് വര്‍ധിപ്പിക്കുക, കറന്‍സി സ്വാപ്പുകള്‍ വ്യാപിപ്പിക്കുക, വിദേശ നിക്ഷേപകരില്‍ നിന്നും പ്രവാസി ഇന്ത്യക്കാരില്‍ നിന്നും കൂടുതല്‍ ഡോളര്‍ ആകര്‍ഷിക്കുക തുടങ്ങിയ നിര്‍ണായക തീരുമാനങ്ങള്‍ ആര്‍ബിഐയുടെ സജീവ പരിഗണനയിലുണ്ടെന്നാണ് റിപ്പോര്‍ട്ടുകള്‍.

ഈയാഴ്ച ഡോളറിനെതിരെ രൂപയുടെ വിനിമയ മൂല്യം 97-ന് അടുത്തെത്തിയിരുന്നു. ഈ അടിയന്തര സാഹചര്യത്തില്‍ ആര്‍ബിഐ ഗവര്‍ണര്‍ സഞ്ജയ് മല്‍ഹോത്രയുടെ നേതൃത്വത്തില്‍ ഉന്നത ഉദ്യോഗസ്ഥര്‍ തുടര്‍ച്ചയായി യോഗങ്ങള്‍ ചേര്‍ന്ന് സ്ഥിതിഗതികള്‍ വിലയിരുത്തിയിട്ടുണ്ട്. ഔദ്യോഗിക വിവരങ്ങള്‍ പുറത്തുവിട്ടിട്ടില്ലെങ്കിലും, രൂപയുടെ തകര്‍ച്ച എത്രയും വേഗം തടയുക എന്നതാണ് ആര്‍ബിഐയുടെ ഇപ്പോഴത്തെ പ്രധാന ലക്ഷ്യമെന്നും ഇതിനായി എന്ത് നടപടിയെടുക്കാനും ബാങ്ക് തയ്യാറാണെന്നുമാണ് അടുത്ത വൃത്തങ്ങള്‍ നല്‍കുന്ന സൂചന.

പലിശ നിരക്ക് ഉടന്‍ കൂട്ടിയേക്കും

പലിശ നിരക്കുകള്‍ വര്‍ധിപ്പിക്കുക എന്നതാണ് പരിഗണനയിലുള്ള പ്രധാന മാര്‍ഗങ്ങളിലൊന്ന്. നിലവില്‍ 5.25 ശതമാനമാണ് അടിസ്ഥാന പലിശ നിരക്ക് (റിപ്പോ നിരക്ക്). ജൂണ്‍ 3 മുതല്‍ 5 വരെയാണ് ആര്‍ബിഐയുടെ പണനയ സമിതിയുടെ അടുത്ത യോഗം നടക്കേണ്ടത്. എന്നാല്‍ 2022 മേയ് മാസത്തില്‍ ചെയ്തതുപോലെ, യോഗത്തിന് കാത്തുനില്‍ക്കാതെ അടിയന്തരമായി പലിശ നിരക്കില്‍ മാറ്റം വരുത്താന്‍ സാധ്യതയുണ്ട്. വിലക്കയറ്റം രൂക്ഷമാകുന്നതിനാല്‍ വരും മാസങ്ങളില്‍ പലിശ നിരക്ക് കൂട്ടുമെന്ന് സാമ്പത്തിക വിദഗ്ധരും മുന്‍കൂട്ടി കാണുന്നുണ്ട്.

അമേരിക്കയും ഇന്ത്യയും തമ്മിലുള്ള പലിശ നിരക്കുകളിലെ വ്യത്യാസം കഴിഞ്ഞ ഒരു ദശാബ്ദത്തിനിടയിലെ ഏറ്റവും കുറഞ്ഞ നിരക്കിലാണ് ഇപ്പോഴുള്ളത്. കടമെടുപ്പ് നിരക്കുകള്‍ ഉയര്‍ത്തിയാല്‍ അത് കൂടുതല്‍ വിദേശ നിക്ഷേപകരെ ഇന്ത്യയിലേക്ക് ആകര്‍ഷിക്കാന്‍ സഹായിക്കും. ഈ വര്‍ഷം ഇന്ത്യന്‍ ഓഹരി വിപണിയില്‍ നിന്ന് വിദേശ നിക്ഷേപകര്‍ വന്‍തോതില്‍ പണം പിന്‍വലിക്കുകയാണ്. കഴിഞ്ഞ വര്‍ഷം അവര്‍ പിന്‍വലിച്ച 1900 കോടി ഡോളര്‍ എന്ന റെക്കോര്‍ഡ് തുക ഈ വര്‍ഷം ഇതിനോടകം തന്നെ മറികടന്നിട്ടുണ്ട്.

പ്രവാസികളില്‍ പ്രതീക്ഷ; ലക്ഷ്യം 5000 കോടി ഡോളര്‍

വിദേശത്തുനിന്ന് ഡോളര്‍ സമാഹരിക്കുന്നതിന്റെ ഭാഗമായി പ്രവാസി ഇന്ത്യക്കാര്‍ക്കായി പ്രത്യേക ബാങ്ക് നിക്ഷേപ പദ്ധതികള്‍ കൊണ്ടുവരാനും ആര്‍ബിഐ ആലോചിക്കുന്നുണ്ട്. 2013-ല്‍ സമാനമായ രീതിയില്‍ വിദേശ നിക്ഷേപം ആകര്‍ഷിക്കാന്‍ ഇന്ത്യ പ്രത്യേക പദ്ധതികള്‍ പ്രഖ്യാപിച്ചിരുന്നു. അന്ന് ഏകദേശം 3000 കോടി ഡോളറാണ് സമാഹരിച്ചതെങ്കില്‍, ഇത്തവണ പുതിയ പദ്ധതികളിലൂടെ 5000 കോടി ഡോളറെങ്കിലും സമാഹരിക്കാനാകുമെന്നാണ് ആര്‍ബിഐയുടെ കണക്കുകൂട്ടല്‍. ഇതിനുപുറമെ സര്‍ക്കാരിന്റെ തീരുമാനപ്രകാരം വിദേശ വിപണിയില്‍ സോവറിന്‍ ഡോളര്‍ ബോണ്ടുകള്‍ ഇറക്കാനും പദ്ധതിയുണ്ട്.

ഇന്ത്യന്‍ സമ്പദ്വ്യവസ്ഥ ഭദ്രം

രൂപയുടെ മൂല്യം പ്രതീക്ഷിച്ചതിലും വേഗത്തിലാണ് ഇടിയുന്നത്. എന്നാല്‍ ഇന്ത്യയുടെ സാമ്പത്തിക അടിത്തറയും ബാങ്കിംഗ് സംവിധാനവും വളരെ ശക്തമാണെന്നും, ഈ കരുത്ത് വിനിമയ നിരക്കില്‍ വേണ്ടവിധം പ്രതിഫലിക്കുന്നില്ലെന്നുമാണ് വിലയിരുത്തല്‍. ഇതിനിടെ, ബാങ്കിംഗ് മേഖലയില്‍ പണലഭ്യത ഉറപ്പാക്കാനും ഡോളര്‍ കരുതല്‍ ശേഖരം വര്‍ധിപ്പിക്കാനുമായി ബുധനാഴ്ച ആര്‍ബിഐ 500 കോടി ഡോളറിന്റെ കറന്‍സി സ്വാപ്പ് ലേലം പ്രഖ്യാപിച്ചിരുന്നു. വരും ദിവസങ്ങളില്‍ ഇത്തരം കൂടുതല്‍ ലേലങ്ങള്‍ നടന്നേക്കാമെന്നും വിവരമുണ്ട്. വാര്‍ത്തകളോട് പ്രതികരിക്കാന്‍ ആര്‍ബിഐ ഇതുവരെ ഔദ്യോഗികമായി തയ്യാറായിട്ടില്ല.

മുഖ്യന് ശമ്പളവും അലവൻസും ചേർത്ത് 1,85,000, മറ്റ് മന്ത്രിമാർക്കോ? ആജീവനാന്തം പെന്‍ഷൻ അടക്കം ആനുകൂല്യങ്ങൾ, എല്ലാം അറിയാം

Sangeetha KS — Mon, 18 May 2026 11:31:29 +0530

തിരുവനന്തപുരം: 10 വർഷത്തെ ഭരണത്തിന് ശേഷം ടീം യുഡിഎഫിനെ നയിച്ച വി ഡി സതീശൻ കേരള മുഖ്യമന്ത്രിയായും മറ്റ് 20 അംഗങ്ങൾ മന്ത്രിമാരായും സത്യപ്രതിജ്ഞ ചെയ്തിരിക്കുകയാണ്. അതത് വകുപ്പുകളിൽ കൃത്യമായ ഇടപെടലുകൾ നടത്തിയും, നിയമസഭയിൽ പ്രതിപക്ഷത്തിന്റെ ശക്തമായ ചോദ്യങ്ങൾ നേരിട്ടും ജനങ്ങളുടെ ക്ഷേമം പരിഗണിച്ചും മുന്നോട്ട് കൊണ്ട് പോകേണ്ടവരേണ്ടാണ് ഈ മന്ത്രിമാർ. കാബിനറ്റ് പദവിയിലിരിക്കുന്ന മന്ത്രിമാർക്ക് മാസാമാസം സർക്കാരിൽ നിന്ന് ലഭിക്കുന്ന ശമ്പളവും ആനുകൂല്യങ്ങളും നോക്കാം.

മന്ത്രിമാർക്ക് വെറും 2000 രൂപയാണ് അടിസ്ഥാന ശമ്പളം. എന്നാൽ, ക്ഷാമബത്ത (ഡിഎ) ആയി 38,429 രൂപ മാസാമാസം ലഭിക്കും. മണ്ഡല അലവൻസ് ആയി 40,000 രൂപയാണ് അനുവദിച്ചിരിക്കുന്നത്. യാത്രാ അലവൻസിനായി മന്ത്രിമാർക്ക് 17,000 രൂപയും ലഭിക്കും. ഒരു മാസം ആകെ മന്ത്രിമാരുടെ ശമ്പളം 97,429 രൂപയാണ്. ഇത് കൂടാതെ മന്ത്രിമാർക്കെല്ലാം സകുടുംബം പൂർണ ചികിത്സാ പരിരക്ഷയും ലഭിക്കും. വെഹിക്കിൾ അഡ്വാൻസ് ആയി 10 ലക്ഷം രൂപ, ഹൗസ് അഡ്വാൻസ് ആയി 20 ലക്ഷം രൂപ എന്നിങ്ങനെയും ആനുകൂല്യങ്ങൾ. ഇത് കൂടാതെ മന്ത്രിമാർക്ക് സ്വന്തമായി ഒരു ഔദ്യോഗിക വസതിയും, കാറും, പൈലറ്റ് വാഹനവും ലഭിക്കും.

മുഖ്യമന്ത്രിയുടെ ശമ്പളവും ആനുകൂല്യങ്ങളും

മുഖ്യമന്ത്രിയാകുമ്പോൾ വി ഡി സതീശന് പ്രതിമാസം അടിസ്ഥാന ശമ്പളവും അലവൻസുകളും ചേ‍ർത്ത് 1,85,000 രൂപയാണ് ശമ്പളമായി ലഭിക്കുകയെന്നാണ് റിപ്പോ‍ർട്ടുകൾ പറയുന്നത്. ഇതിന് പുറമേ യാത്രയ്ക്കായി ഔദ്യോഗിക വാഹനവും അകമ്പടിക്കായി പൈലറ്റ് വാഹനങ്ങളും ലഭിക്കും. മാത്രമല്ല, കേരളത്തിലെ മുഖ്യമന്ത്രിക്ക് ട്രെയിന്‍-വിമാന യാത്രകള്‍ക്ക് പ്രത്യേത യാത്രാ അലവന്‍സുകളും സൗകര്യങ്ങളുമുണ്ട്. മുഖ്യമന്ത്രിക്കും കുടുംബത്തിനും പൂര്‍ണമായ സൗജന്യ ചികിത്സയാണ് ലഭിക്കുക. ഇനി, 5 വ‍‌‍ർഷം കഴിഞ്ഞ് മുഖ്യമന്ത്രി കാലാവധി പൂര്‍ത്തിയാക്കിയാലും ആജീവനാന്തം പെന്‍ഷനും ലഭിക്കും. താമസത്തിന് ക്ലിഫ് ഹൗസാണ് മുഖ്യമന്ത്രിയുടെ ഔദ്യോഗിക വസതി. സ‍ർക്കാ‌ർ നൽകുന്ന ഈ ബംഗ്ലാവിന് 24 മണിക്കൂര്‍ കര്‍ശനമായ സുരക്ഷയും ഉണ്ടായിരിക്കും.

വാങ്ങുന്നത് ഫ്രൂട്ട് ജ്യൂസ് എന്ന് കരുതി, ഉള്ളില്‍ വോഡ്ക! ടെട്രാ പാക്കുകളിലെ മദ്യവില്‍പ്പനയ്ക്കെതിരെ സുപ്രീം കോടതി

Sangeetha KS — Thu, 21 May 2026 16:21:31 +0530

ഗ്ലാസ് ബോട്ടിലുകളുടെ ക്ഷാമം മറികടക്കാന്‍ മറ്റ് വഴികള്‍ തേടുന്ന മദ്യ കമ്പനികളുടെ ശ്രമങ്ങള്‍ക്ക് തുടക്കത്തില്‍ തന്നെ തിരിച്ചടി. ഇത്തരം പാക്കേജിംഗുകള്‍ ഉപഭോക്താക്കളെ തെറ്റിദ്ധരിപ്പിക്കുമെന്നും പ്രായപൂര്‍ത്തിയാകാത്തവരില്‍ മദ്യപാന ശീലം കൂട്ടാന്‍ കാരണമാകുമെന്നും സുപ്രീം കോടതി നിരീക്ഷിച്ചു. കാണുമ്പോള്‍ ഫ്രൂട്ട് ജ്യൂസ് പാക്കറ്റ് പോലെ തോന്നിപ്പിക്കുന്ന 'ടെട്രാ പാക്കുകളിലും' ചെറിയ സാഷെകളിലും മദ്യം വില്‍ക്കുന്നത് നിരോധിക്കണമെന്ന ഹര്‍ജിയില്‍ കേന്ദ്ര സര്‍ക്കാരിന്റെ മറുപടി തേടിയിരിക്കുകയാണ് സുപ്രീം കോടതി. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചാണ് കേന്ദ്ര സര്‍ക്കാരിനും വിവിധ സംസ്ഥാനങ്ങളിലെ എക്‌സൈസ് വകുപ്പുകള്‍ക്കും നോട്ടീസ് അയച്ചത്. 'കമ്മ്യൂണിറ്റി എഗെയ്ന്‍സ്റ്റ് ഡ്രങ്കണ്‍ ഡ്രൈവിംഗ്' എന്ന സന്നദ്ധ സംഘടന നല്‍കിയ ഹര്‍ജിയിലാണ് സുപ്രീം കോടതിയുടെ ഈ നടപടി.

ജ്യൂസ് പാക്കറ്റോ അതോ മദ്യമോ?

പുകയില ഉല്‍പന്നങ്ങളില്‍ നല്‍കുന്നത് പോലെ ഇത്തരം മദ്യപാനീയങ്ങളില്‍ വ്യക്തമായ മുന്നറിയിപ്പുകള്‍ ഉണ്ടാകാറില്ലെന്ന് ഹര്‍ജിക്കാര്‍ക്ക് വേണ്ടി ഹാജരായ അഡ്വ. വിപിന്‍ നായര്‍ കോടതിയെ ബോധിപ്പിച്ചു. പുറത്തുനിന്ന് നോക്കിയാല്‍ സാധാരണ ഫ്രൂട്ട് ജ്യൂസ് പാക്കറ്റുകള്‍ പോലെയാണ് ഇവ ഇരിക്കുന്നത്. ആപ്പിളിന്റെ ചിത്രങ്ങളും 'ചില്ലി മാംഗോ വോഡ്ക' പോലുള്ള ആകര്‍ഷകമായ ലേബലുകളുമാണ് ഇവയില്‍ ഉണ്ടാകുക. എന്നാല്‍ ഉള്ളില്‍ വോഡ്ക പോലെയുള്ള വീര്യമേറിയ മദ്യമായിരിക്കും. ഇത് ഉപഭോക്താക്കളെ പൂര്‍ണ്ണമായും വഴിതെറ്റിക്കാന്‍ ലക്ഷ്യമിട്ടുള്ള രൂപകല്‍പ്പനയാണെന്ന് ഹര്‍ജിക്കാര്‍ വാദിച്ചു.

ഹര്‍ജിയിലെ പ്രധാന ആവശ്യങ്ങള്‍

ടെട്രാ പാക്കുകളിലും സാഷെകളിലും മദ്യം വില്‍ക്കുന്നത് നിരോധിക്കാന്‍ എല്ലാ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും ബാധകമായ ഒരു ഏകീകൃത നയം കൊണ്ടുവരാന്‍ കേന്ദ്ര സര്‍ക്കാരിന് നിര്‍ദ്ദേശം നല്‍കണമെന്ന് ഹര്‍ജിയില്‍ ആവശ്യപ്പെടുന്നു.കൂടാതെ, മദ്യം കുപ്പികളിലാക്കുന്ന പ്രക്രിയയ്ക്ക് കൃത്യമായ ഒരു മാനദണ്ഡം കൊണ്ടുവരണം. മദ്യവില്‍പ്പന ഗ്ലാസ് കുപ്പികളിലോ അല്ലെങ്കില്‍ മദ്യമാണെന്ന് വ്യക്തമായി തിരിച്ചറിയാന്‍ കഴിയുന്ന മറ്റ് കണ്ടെയ്‌നറുകളിലോ മാത്രമായി പരിമിതപ്പെടുത്തണമെന്നും സംഘടന ആവശ്യപ്പെട്ടു.

ടെട്രാ പാക്കുകളിലെ മദ്യവില്‍പ്പനയെ സുപ്രീം കോടതി വിമര്‍ശിക്കുന്നത് ഇതാദ്യമായല്ല. മുന്‍പ് 2025 നവംബറില്‍ രണ്ട് വിസ്‌കി ബ്രാന്‍ഡുകള്‍ തമ്മിലുള്ള ട്രേഡ്മാര്‍ക്ക് തര്‍ക്കം പരിഗണിക്കുന്നതിനിടയിലും കോടതി സമാനമായ ആശങ്ക പ്രകടിപ്പിച്ചിരുന്നു. വിപണിയില്‍ ടെട്രാ പാക്കുകളില്‍ മദ്യം വില്‍ക്കുന്നത് വ്യാപകമാകുന്നതിനെ അന്ന് വിമര്‍ശിച്ച കോടതി, ഈ പാക്കറ്റുകള്‍ക്ക് ഫ്രൂട്ട് ജ്യൂസ് കാര്‍ട്ടണുകളോട് സാദൃശ്യമുണ്ടെന്ന് പ്രത്യേകം ചൂണ്ടിക്കാണിച്ചിരുന്നു.

ഇന്ത്യയെ കാത്തിരിക്കുന്നതെന്ത്? ഇന്ധന വില ഇനിയും കൂടുമോ? ഡോളര്‍ 100 കടക്കാനും സാധ്യത; മുന്നറിയിപ്പുമായി ഗീതാ ഗോപിനാഥ്

Sangeetha KS — Thu, 21 May 2026 15:39:18 +0530

പശ്ചിമേഷ്യയിലെ സംഘര്‍ഷങ്ങള്‍ ജൂണ്‍ മാസത്തിലും തുടര്‍ന്നാല്‍ ഇന്ത്യയില്‍ ഇന്ധനവില ഇനിയും കുതിച്ചുയര്‍ന്നേക്കുമെന്ന് മുന്‍ ഐഎംഎഫ് ഡെപ്യൂട്ടി മാനേജിംഗ് ഡയറക്ടറും സാമ്പത്തിക വിദഗ്ധയുമായ ഗീതാ ഗോപിനാഥ്. ഇത് രാജ്യത്ത് ഉയര്‍ന്ന വിലക്കയറ്റത്തിനും സാമ്പത്തിക വളര്‍ച്ചാ നിരക്ക് കുറയുന്നതിനും കാരണമായേക്കുമെന്നും അവര്‍ മുന്നറിയിപ്പ് നല്‍കി. പശ്ചിമേഷ്യന്‍ പ്രതിസന്ധി കേവലം വിലവര്‍ധനവില്‍ ഒതുങ്ങുന്നില്ലെന്നും, ഇത് ആഗോളതലത്തില്‍ ഇന്ധനം, എല്‍പിജി, എല്‍എന്‍ജി, വളം എന്നിവയുടെ വിതരണത്തെത്തന്നെ ബാധിക്കുന്ന വലിയൊരു പ്രതിസന്ധിയായി മാറിയിരിക്കുകയാണെന്നും അവര്‍ ചൂണ്ടിക്കാട്ടി.

ആവശ്യത്തിന് സാധനങ്ങള്‍ കിട്ടാനില്ലാത്ത അവസ്ഥയാണ് ഇപ്പോഴുള്ളത്. ഇന്ധനത്തിനായി മിഡില്‍ ഈസ്റ്റിനെ ഏറെ ആശ്രയിക്കുന്ന ഇന്ത്യയെ ഈ ക്ഷാമം കാര്യമായി ബാധിക്കുന്നുണ്ടെന്നും ഗീതാ ഗോപിനാഥ് പറഞ്ഞു. ഹോര്‍മുസ് കടലിടുക്കിലെ തര്‍ക്കങ്ങള്‍ കാരണം ആഗോള ഇന്ധന വിതരണം തടസപ്പെട്ടിരിക്കുകയാണ്. ഇത് പല രാജ്യങ്ങളെയും തങ്ങളുടെ കരുതല്‍ ശേഖരത്തെ ആശ്രയിക്കാന്‍ നിര്‍ബന്ധിതരാക്കുന്നു.

ക്രൂഡ് ഓയില്‍ വില 140 ഡോളറിലേക്ക്?

നിലവിലെ സാഹചര്യത്തില്‍ വിതരണ തടസം ജൂണ്‍ മാസത്തിലും തുടരുകയാണെങ്കില്‍ കാര്യങ്ങള്‍ കൂടുതല്‍ സങ്കീര്‍ണമാകും. നിലവില്‍ അന്താരാഷ്ട്ര വിപണിയില്‍ ക്രൂഡ് ഓയില്‍ വില ബാരലിന് 110 ഡോളര്‍ എന്ന നിരക്കിലാണ്. ഈ വിലയില്‍ തന്നെ തുടരണമെങ്കില്‍ പോലും വിപണിയില്‍ വലിയ തോതില്‍ ഡിമാന്‍ഡ് കുറയേണ്ടതുണ്ട്. എന്നാല്‍ ജൂണ്‍ മാസത്തോടെ ക്രൂഡ് ഓയില്‍ വില ബാരലിന് 140 ഡോളറിനടുത്തേക്ക് ഉയരാനാണ് സാധ്യതയെന്ന് ഗീതാ ഗോപിനാഥ് വിലയിരുത്തുന്നു. അമേരിക്ക ഇടപെട്ട് ഹോര്‍മുസ് കടലിടുക്ക് തുറക്കുമെന്ന് പല രാജ്യങ്ങളും പ്രതീക്ഷിക്കുന്നുണ്ടെങ്കിലും, ഇപ്പോള്‍ ഒരു ധാരണയിലെത്തിയാല്‍ പോലും വിതരണം സാധാരണ നിലയിലാകാന്‍ രണ്ടോ മൂന്നോ മാസമെടുക്കും.

പെട്രോള്‍, ഡീസല്‍ വില ഇനിയും കൂടും

ഇന്ത്യയില്‍ ഇനിയും ഇന്ധനവില കൂടുമോ എന്ന ചോദ്യത്തിന്, ഇത് ഇന്ത്യയുടെ നിയന്ത്രണത്തിലല്ലാത്ത ബാഹ്യ പ്രതിസന്ധിയായതിനാല്‍ സര്‍ക്കാരിന് മറ്റ് വഴികളില്ലെന്നായിരുന്നു അവരുടെ മറുപടി. വില കൂടുന്നത് ആളുകളുടെ ഇന്ധന ഉപയോഗത്തില്‍ സ്വാഭാവികമായ മാറ്റം വരുത്താന്‍ സഹായിക്കും. എന്നാല്‍ ഈ പ്രതിസന്ധിയുടെ ഭാരം സര്‍ക്കാര്‍ മാത്രം ചുമക്കേണ്ടതില്ല. ഒരു വശത്ത് ധനക്കമ്മി അല്പം കൂടുന്നത് സഹിച്ചും, മറുവശത്ത് വിലവര്‍ധനവിന്റെ ഒരു പങ്ക് ജനങ്ങളിലേക്കും കമ്പനികളിലേക്കും പങ്കുവെച്ചും വേണം സര്‍ക്കാര്‍ മുന്നോട്ട് പോകാന്‍. വരും മാസങ്ങളില്‍ വിലക്കയറ്റത്തിന്റെ നിരക്ക് രാജ്യത്ത് ക്രമേണ ഉയരുമെന്നും അവര്‍ മുന്നറിയിപ്പ് നല്‍കി.

രൂപയുടെ മൂല്യം 100 കടന്നാലും ഭയക്കേണ്ടതില്ല

കഴിഞ്ഞ ഫെബ്രുവരിയില്‍ ഡോളറിനെതിരെ 91 എന്ന നിലയിലായിരുന്ന ഇന്ത്യന്‍ രൂപയുടെ മൂല്യം ഇപ്പോള്‍ 97-ന് അടുത്തെത്തിയിരിക്കുകയാണ്. എന്നാല്‍ രൂപയുടെ മൂല്യം 100 തൊടുമോ എന്ന കാര്യത്തില്‍ അമിതമായി ആശങ്കപ്പെടേണ്ടതില്ലെന്ന് ഗീതാ ഗോപിനാഥ് പറഞ്ഞു. വിനിമയ നിരക്കിന്റെ കൃത്യമായ സംഖ്യയല്ല പ്രധാനം. മറിച്ച് രാജ്യത്തെ തൊഴിലവസരങ്ങള്‍, വിലക്കയറ്റം, ഉല്‍പ്പാദനം എന്നിവയ്ക്കാണ് പ്രാധാന്യം നല്‍കേണ്ടതെന്നും അവർ പറയുന്നു.

രൂപയുടെ മൂല്യം ഇടിയുന്നത് വിദേശ സാധനങ്ങളുടെ വില കൂട്ടുമെങ്കിലും, അത് ഇറക്കുമതി കുറയ്ക്കാന്‍ ഇന്ത്യയെ സഹായിക്കും. വിപണിയില്‍ ആര്‍ബിഐ അമിതമായി ഇടപെടുന്നത് നല്ലതല്ല. ഇന്ത്യയ്ക്ക് നിലവില്‍ 70,000 കോടി ശക്തമായ വിദേശനാണ്യ കരുതല്‍ ശേഖരമുണ്ടെങ്കിലും അത് പരിമിതമാണ്. വിപണി നിലനിര്‍ത്താന്‍ ഡോളര്‍ അമിതമായി ഒഴുക്കിയാല്‍ കരുതല്‍ ശേഖരം നഷ്ടപ്പെടുകയേ ഉള്ളൂവെന്നും അവര്‍ വ്യക്തമാക്കി.

പാവപ്പെട്ടവര്‍ക്കും ചെറുകിട സംരംഭകര്‍ക്കും സഹായം നല്‍കണം

പ്രതിസന്ധി ഘട്ടങ്ങളില്‍ ജനങ്ങള്‍ സ്വയം നിയന്ത്രണം പാലിക്കണമെന്ന സര്‍ക്കാരിന്റെ നിലപാടിനെ പിന്തുണയ്ക്കുമ്പോഴും, ഇതിന്റെ മുഴുവന്‍ ഭാരവും സാധാരണക്കാരുടെ മേല്‍ അടിച്ചേല്‍പ്പിക്കരുതെന്ന് ഗീതാ ഗോപിനാഥ് ഓര്‍മ്മിപ്പിച്ചു. പ്രതിസന്ധി നേരിടുന്ന പാവപ്പെട്ട കുടുംബങ്ങള്‍ക്കും ഇടത്തരം കുടുംബങ്ങള്‍ക്കും നേരിട്ട് പണം ബാങ്ക് അക്കൗണ്ടുകളില്‍ എത്തിക്കുന്ന പദ്ധതികള്‍ സര്‍ക്കാര്‍ നടപ്പിലാക്കണം. ഉയര്‍ന്ന ഇന്ധനച്ചെലവ് കാരണം പ്രതിസന്ധിയിലായ ചെറുകിട സംരംഭങ്ങള്‍ക്ക് സാമ്പത്തിക സഹായവും സര്‍ക്കാര്‍ ഗ്യാരന്റിയുള്ള വായ്പകളും നല്‍കണമെന്നും അവര്‍ നിര്‍ദ്ദേശിച്ചു.

ഇന്ത്യയ്ക്ക് കരുത്തുണ്ട്; പരിഭ്രാന്തി വേണ്ട

വലിയ വെല്ലുവിളികള്‍ മുന്നിലുണ്ടെങ്കിലും ഇന്ത്യ കടുത്ത സാമ്പത്തിക തകര്‍ച്ചയിലേക്ക് പോവുകയാണെന്ന വാദങ്ങളെ ഗീതാ ഗോപിനാഥ് തള്ളി. ഇന്ത്യയില്‍ ഇപ്പോഴും ആഭ്യന്തര ആവശ്യങ്ങള്‍ ശക്തമാണ്. പൊതു അടിസ്ഥാന സൗകര്യ വികസനങ്ങള്‍ക്കായുള്ള ചെലവഴിക്കലുകളും വലിയ വിദേശനാണ്യ ശേഖരവും ഇന്ത്യയുടെ കരുത്താണ്. എങ്കിലും, വിദേശ നിക്ഷേപം ആകര്‍ഷിക്കുന്നതില്‍ ഇന്ത്യ ഇപ്പോഴും ചില വെല്ലുവിളികള്‍ നേരിടുന്നുണ്ട്. കോവിഡ് കാലത്തെ പ്രതിസന്ധികളുമായി ഇതിനെ താരതമ്യം ചെയ്യുന്നത് പൂര്‍ണമായും തെറ്റാണെന്ന് പറയാനാകില്ല. എണ്ണവില 140 ഡോളറില്‍ തുടര്‍ന്നാല്‍ അത് ഇന്ത്യയ്ക്ക് മാത്രമല്ല, ലോകത്തിന് തന്നെ വലിയ പ്രതിസന്ധിയാണ്. എങ്കിലും നിലവില്‍ പരിഭ്രാന്തരാകേണ്ട യാതൊരു സാഹചര്യവുമില്ലെന്നും, പ്രധാനമന്ത്രി പറഞ്ഞതുപോലെ മാറ്റങ്ങളോട് പൊരുത്തപ്പെടേണ്ട സമയമാണിതെന്നും അവര്‍ കൂട്ടിച്ചേര്‍ത്തു.

ആരാണ് ഗീതാ ഗോപിനാഥ്?

ആഗോള തലത്തില്‍ അറിയപ്പെടുന്ന മലയാളിയായ സാമ്പത്തിക വിദഗ്ധയാണ് ഗീതാ ഗോപിനാഥ്. ഹാര്‍വാര്‍ഡ് പ്രൊഫസറായ ഗീത മുന്‍ ഐഎംഎഫ് ഡെപ്യൂട്ടി മാനേജിംഗ് ഡയറക്ടറുമാണ്. 2016-ല്‍ ഒന്നാം പിണറായി വിജയന്‍ സര്‍ക്കാരിന്റെ കാലത്ത് മുഖ്യമന്ത്രിയുടെ സാമ്പത്തിക ഉപദേശകയായി ഗീതാ ഗോപിനാഥ് നിയമിക്കപ്പെട്ടിരുന്നു. ആഗോളതലത്തിലുള്ള സാമ്പത്തിക വികസന മാതൃകകള്‍ കേരളത്തിന് അനുയോജ്യമായ രീതിയില്‍ നടപ്പിലാക്കാന്‍ സഹായിക്കുക എന്നതായിരുന്നു ഈ പദവിയിലൂടെ ലക്ഷ്യമിട്ടത്. രണ്ട് വര്‍ഷത്തോളം അവര്‍ ഈ പദവിയില്‍ തുടര്‍ന്നു. 2018 ഒക്ടോബറില്‍ അന്താരാഷ്ട്ര നാണയ നിധി ചീഫ് ഇക്കണോമിസ്റ്റായി നിയമിതയായതിനെ തുടര്‍ന്ന് അവര്‍ കേരള മുഖ്യമന്ത്രിയുടെ ഉപദേശക സ്ഥാനം ഔദ്യോഗികമായി ഒഴിഞ്ഞു.

ഇന്ത്യ- യുകെ സ്വതന്ത്ര വ്യാപാര കരാര്‍: യാഥാർത്ഥ്യമാക്കാൻ തിടുക്കം കൂട്ടി യുകെ സ്‌കോച്ച് വിസ്‌കി അസോസിയേഷന്‍

Sangeetha KS — Wed, 20 May 2026 16:40:34 +0530

ഇന്ത്യയും യുകെയും തമ്മിലുള്ള സ്വതന്ത്ര വ്യാപാര കരാര്‍ എത്രയും വേഗം യാഥാര്‍ത്ഥ്യമാക്കണമെന്ന ആവശ്യവുമായി യുകെയിലെ സ്‌കോച്ച് വിസ്‌കി അസോസിയേഷന്‍. കരാര്‍ പ്രാബല്യത്തില്‍ വരുന്നതോടെ വരും വര്‍ഷങ്ങളില്‍ ഇന്ത്യയിലേക്ക് വന്‍തോതില്‍ വിസ്‌കി കയറ്റുമതി ചെയ്യാനാകുമെന്നാണ് ഇവരുടെ പ്രതീക്ഷ. കഴിഞ്ഞ വര്‍ഷം ജൂലൈയില്‍ ഇന്ത്യന്‍ പ്രധാനമന്ത്രി നരേന്ദ്ര മോദിയുടെ യുകെ സന്ദര്‍ശന വേളയിലാണ് 'ഇന്ത്യ-യുകെ സമഗ്ര സാമ്പത്തിക-വ്യാപാര കരാറിന്' ഇരുരാജ്യങ്ങളും അംഗീകാരം നല്‍കിയത്. ഈ വര്‍ഷം ഇത് യുകെ പാര്‍ലമെന്റിന്റെ അനുമതി നേടുകയും ചെയ്തു. കരാര്‍ പ്രകാരം ഇന്ത്യയില്‍ നിന്നുള്ള 99 ശതമാനം ഉല്‍പ്പന്നങ്ങള്‍ക്കും ബ്രിട്ടീഷ് വിപണിയില്‍ നികുതി ഒഴിവാക്കുമ്പോള്‍, പകരമായി ബ്രിട്ടനില്‍ നിന്നുള്ള കാറുകള്‍ക്കും വിസ്‌കിക്കും ഇന്ത്യ നികുതി ഇളവ് നല്‍കും.

വിസ്‌കിക്ക് വില കുറയും; യുകെയ്ക്ക് വന്‍ നേട്ടം

വ്യാപാര കരാര്‍ യാഥാര്‍ത്ഥ്യമാകുന്നതോടെ ഇന്ത്യ ചുമത്തുന്ന ഉയര്‍ന്ന ഇറക്കുമതി നികുതിയില്‍ വന്‍ കുറവുണ്ടാകും. നിലവില്‍ 150 ശതമാനമുള്ള ഇറക്കുമതി നികുതി കരാര്‍ വരുന്നതോടെ പകുതിയായി കുറയും. അടുത്ത 10 വര്‍ഷത്തിനുള്ളില്‍ ഇത് 40 ശതമാനമായി വീണ്ടും താഴുമെന്നാണ് കണക്കുകള്‍.

സ്റ്റീല്‍ ഇറക്കുമതിയിലെ 'കുരുക്ക്'

വരാനിരിക്കുന്ന ജൂലൈ മാസം മുതല്‍ യുകെ നടപ്പിലാക്കാന്‍ പോകുന്ന സ്റ്റീല്‍ ഇറക്കുമതി നിയന്ത്രണങ്ങളാണ് ഇപ്പോള്‍ കരാറിന് തടസമായിരിക്കുന്നത്. ഈ നിയന്ത്രണം അനുസരിച്ച് നികുതിയില്ലാതെ യുകെയിലേക്ക് സ്റ്റീല്‍ ഇറക്കുമതി ചെയ്യുന്നതിന് പരിധിയുണ്ടാകും. കരാര്‍ ചര്‍ച്ച ചെയ്യുന്ന സമയത്ത് യുകെയുടെ ഈ പുതിയ സ്റ്റീല്‍ നയം കണക്കിലെടുത്തിരുന്നില്ലെന്ന് ഇന്ത്യന്‍ വാണിജ്യ സെക്രട്ടറി രാജേഷ് അഗര്‍വാള്‍ വ്യക്തമാക്കി. എങ്കിലും, ഇന്ത്യ-യുകെ വ്യാപാര കരാര്‍ എത്രയും വേഗം ഔദ്യോഗികമായി യാഥാര്‍ത്ഥ്യമാക്കാന്‍ സ്റ്റീല്‍ വിഷയത്തില്‍ ഇരുരാജ്യങ്ങളും ചേര്‍ന്ന് വ്യത്യസ്തവും ക്രിയാത്മകവുമായ ഒരു പരിഹാരം കണ്ടെത്താന്‍ ശ്രമിക്കുകയാണെന്നും അദ്ദേഹം കൂട്ടിച്ചേര്‍ത്തു.