Asianet News Malayalam

ഐഒഎ തെരഞ്ഞെടുപ്പ്: അട്ടിമറി ആരോപണവുമായി പി.ടി. ഉഷ; അന്താരാഷ്ട്ര ഒളിമ്പിക് കമ്മിറ്റിക്ക് കത്തയച്ചു

Gopalakrishnan C — Wed, 11 Nov 2026 09:39:11 +0530

ദില്ലി: ഇന്ത്യൻ ഒളിമ്പിക് അസോസിയേഷനിലേക്കുള്ള(ഐഒഎ) എസ് ഒ എം തെരഞ്ഞെടുപ്പിൽ ഗുരുതരമായ ക്രമക്കേടുകളും ചട്ടലംഘനങ്ങളും നടന്നതായി ആരോപിച്ചുകൊണ്ട് പ്രസിഡന്‍റ് പി.ടി. ഉഷ അന്താരാഷ്ട്ര ഒളിമ്പിക് കമ്മിറ്റിക്ക് (ഐഒസി) കത്തയച്ചു. തെരഞ്ഞെടുപ്പ് ചുമതലയുണ്ടായിരുന്ന വരണാധികാരി സഞ്ജയ് കെ ശ്രീവാസ്തവ നിഷ്പക്ഷത പുലർത്തിയില്ലെന്നും നടപടികളിൽ പൂർണ്ണമായും പക്ഷപാതപരമായ നിലപാടാണ് സ്വീകരിച്ചതെന്നും ഉഷ ഐഒസി പ്രസിഡന്‍റ് കിര്‍സ്റ്റി കോവെൻട്രിക്ക് അയച്ച മൂന്നേ പേജുള്ള കത്തിൽ കുറ്റപ്പെടുത്തി. വിഷയത്തിൽ ഐഒസിയുടെ അടിയന്തര ഇടപെടലും നിഷ്പക്ഷമായ സ്വതന്ത്ര അന്വേഷണവും വേണമെന്നാണ് ഉഷയുടെ പ്രധാന ആവശ്യം.

തെരഞ്ഞെടുപ്പിൽ മത്സരിച്ച് അഞ്ചാം സ്ഥാനത്തേക്ക് തള്ളപ്പെട്ടതിന് പിന്നാലെയാണ് ഉഷയുടെ ഈ നിർണായക നീക്കം. എന്നാൽ വ്യക്തിപരമായ തോൽവിയുടെ പേരിലല്ല, മറിച്ച് തെരഞ്ഞെടുപ്പ് പ്രക്രിയയിലെ സുതാര്യതയും ഐ.ഒ.എയുടെ സ്വയംഭരണാവകാശവും സംരക്ഷിക്കാനാണ് പരാതി നൽകുന്നതെന്ന് ഉഷ കത്തില്‍ വ്യക്തമാക്കിയിട്ടുണ്ട്.ഒളിമ്പിക് അസോസിയേഷൻ തിരഞ്ഞെടുപ്പിൽ പി ടി ഉഷക്ക് കനത്ത തിരിച്ചടി, അഞ്ജു ബോബി ജോര്‍ജിനും സൈനക്കും മിന്നും ജയംനിലവിലെ എക്സിക്യൂട്ടീവ് കമ്മിറ്റി അംഗങ്ങളായ ഡോള ബാനർജി, യോഗേശ്വർ ദത്ത് എന്നിവരുടെ പേരിൽ വോട്ടർമാർക്കിടയിൽ ഒരു പ്രത്യേക പാനലിനായി വോട്ടുചോദിച്ചുകൊണ്ടുള്ള വാട്സ്ആപ്പ് സന്ദേശങ്ങൾ പ്രചരിച്ചതായി ഉഷ ആരോപിക്കുന്നു. ഇത് തെരഞ്ഞെടുപ്പ് പെരുമാറ്റച്ചട്ടത്തിന്‍റെ വ്യക്തമായ ലംഘനമാണ്. കൂടാതെ വോട്ട് രേഖപ്പെടുത്തിയത് സ്ഥിരീകരിക്കാൻ വോട്ടർമാർക്കു മേൽ സമ്മർദ്ദമുണ്ടായെന്നും, കേന്ദ്ര കായിക മന്ത്രാലയം ഇതിനെക്കുറിച്ച് അന്വേഷിക്കുന്നുണ്ടെന്ന തരത്തിൽ ചിലർ വോട്ടർമാരെ ഭീഷണിപ്പെടുത്തിയെന്നും അവർ കത്തിൽ സൂചിപ്പിക്കുന്നു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

ഈ വിഷയം ഐഒസിയുടെ എത്തിക്സ് ആൻഡ് കോംപ്ലയൻസ് ഓഫീസിനോ എത്തിക്സ് കമ്മീഷനോ കൈമാറി സ്വതന്ത്രമായ അന്വേഷണം നടത്തണമെന്നും ഉഷ ആവശ്യപ്പെട്ടു. 2036-ൽ ഒളിമ്പിക്സിന് വേദിയാകാൻ ശ്രമിക്കുന്ന ഇന്ത്യക്ക് കായിക ഭരണരംഗത്ത് സുതാര്യതയും ആഗോള നിലവാരവും ഉറപ്പാക്കേണ്ടത് അത്യാവശ്യമാണെന്നും അവർ ഓർമ്മിപ്പിച്ചു. സ്വതന്ത്ര അന്വേഷണം ആവശ്യപ്പെടുന്ന ഉഷ നിലവിൽ വിഷയത്തിൽ കോടതിയെ സമീപിക്കാനോ തെരഞ്ഞെടുപ്പ് ഫലം നേരിട്ട് ചോദ്യം ചെയ്യാനോ താൽപര്യപ്പെടുന്നില്ലെന്നാണ് വിവരങ്ങൾ. ഏതെങ്കിലും അസോസിയേഷന്‍റെ പ്രതിനിധിയായി ഐഒഎ ഭാരവാഹിത്വത്തിന് ശ്രമിക്കില്ലെന്നും ഉഷ വ്യക്തമാക്കിയിട്ടുണ്ട്. പി.ടി. ഉഷയുടെ ഈ നീക്കത്തോടെ ഐഒഎക്കുള്ളിലെ ആഭ്യന്തര തർക്കങ്ങളും ചേരിപ്പോരും കൂടുതൽ രൂക്ഷമായിരിക്കുകയാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഇത്തവണ ലക്ഷ്യം തെറ്റിയില്ല, ഒരു വര്‍ഷത്തെ കാത്തിരിപ്പിനൊടുവില്‍ ലക്ഷ്യ സെന്നിന്‌ കിരീടം, ജര്‍മനിയില്‍ പി വി സിന്ധുവും ചാമ്പ്യനായി

Vipulnath P — Mon, 02 Nov 2026 00:31:06 +0530

ന്യൂഡല്‍ഹി: ജര്‍മനിയില്‍ നടന്ന ഹൈലോ ഓപണ്‍ ബാഡ്‌മിന്റണില്‍ ഇന്ത്യക്ക്‌ ഇരട്ടക്കിരീടം. പുരുഷ വിഭാഗത്തില്‍ ലക്ഷ്യ സെന്നും വനിതാ വിഭാഗത്തില്‍ പി വി സിന്ധുവും ജേതാക്കളായി. ഫൈനലില്‍ രണ്ട്‌ പേരും നേരിട്ട ഗെയിമുകള്‍ക്ക്‌ ജയിച്ചു.

ഫൈനലില്‍ ഇന്തോനേഷ്യയുടെ ലോക ആറാം നമ്പര്‍ താരം ജോനാഥന്‍ ക്രിസ്‌റ്റിയെയാണ്‌ ലക്ഷ്യ സെന്‍ തോല്‍പ്പിച്ചത്‌ (21-17, 21-10). പി വി സിന്ധു ഡെന്‍മാര്‍ക്കിന്റെ ലൈന്‍ ക്യേര്‍സ്‌ഫെല്‍ഡിനെ 21-12,21-14 ന്‌ കീഴടക്കി. 39 മിനുട്ടില്‍ സിന്ധു ഫൈനല്‍ ജയിച്ചു. ഈ വര്‍ഷം സിന്ധു നേടുന്ന രണ്ടാമത്തെ ബി ഡബ്ല്യു എഫ്‌ കിരീടമാണിത്‌.

ലക്ഷ്യ സെന്‍ ഒരു വര്‍ഷമായി കിരീടവിജയമില്ലാതെ സമ്മര്‍ദത്തിലാണ്‌. രണ്ടാമത്തെ ഹൈലോ ഓപണ്‍ ട്രോഫി ഉയര്‍ത്തിക്കൊണ്ടാണ്‌ താരം കിരീടവരള്‍ച്ചക്ക്‌ അറുതിവരുത്തിയത്‌. 2025 നവംബറില്‍ ഓസ്‌ട്രേലിയന്‍ ഓപണ്‍ ജേതാവായതിന്‌ ശേഷം ലക്ഷ്യ സെന്നിന്‌ കിരീടപ്പോരില്‍ ലക്ഷ്യം തെറ്റിയിരുന്നു. ഈ വര്‍ഷം ഓള്‍ ഇംഗ്ലണ്ട്‌ ചാമ്പ്യന്‍ഷിപ്പിന്റെ ഫൈനലില്‍ എത്തിയത്‌ മാത്രമാണ്‌ ലക്ഷ്യയുടെ ശ്രദ്ധേയ പ്രകടനം. പരിക്കും ഫോം നഷ്ടവും കാരണം വലഞ്ഞ താരത്തിന്‌ ജര്‍മനിയിലെ കിരീടവിജയം പുത്തന്‍ ഉണര്‍വേകും. ഇന്തോനേഷ്യന്‍ താരം ക്രിസ്‌റ്റിയുമായി നേര്‍ക്കു നേര്‍ വന്ന എട്ടാം മത്സരത്തില്‍ ജയിച്ച ലക്ഷ്യ സെന്‍, ഹെഡ്‌ ടു ഹെഡ്‌ റെക്കോര്‍ഡ്‌ 4-4ന്‌ തുല്യമാക്കുകയും ചെയ്‌തു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

സ്കൂൾ കായികമേള: സമഗ്ര കവറേജിനുള്ള പുരസ്കാരം ഏഷ്യാനെറ്റ് ന്യൂസിന്; 'മിന്നും താരം' പുരസ്കാരം ശ്രീഹരിക്കും അനാമികയ്ക്കും

Prabeesh PP — Sat, 31 Oct 2026 23:14:06 +0530

തിരുവനന്തപുരം: കഴിഞ്ഞ വർഷത്തെ സംസ്ഥാന സ്കൂൾ കായികമേളയിലെ സമഗ്ര കവറേജിനുള്ള പുരസ്കാരം ഏഷ്യാനെറ്റ് ന്യൂസ് സ്വന്തമാക്കി. ചടങ്ങിൽ വിദ്യാഭ്യാസ മന്ത്രി എൻ. ഷംസുദ്ദീൻ പുരസ്കാരം സമ്മാനിച്ചു.

കായികമേളയിലെ പ്രകടനങ്ങളുടെ അടിസ്ഥാനത്തിൽ നൽകുന്ന ഏഷ്യാനെറ്റ് ന്യൂസ് 'മിന്നും താരം' പുരസ്കാരങ്ങൾക്ക് ശ്രീഹരിയും അനാമികയും അർഹരായി. കായികമേളയിലെ മത്സരങ്ങളും കായികതാരങ്ങളുടെ മുന്നേറ്റങ്ങളും കൃത്യമായി ജനങ്ങളിലേക്ക് എത്തിച്ചതിനാണ് ഏഷ്യാനെറ്റ് ന്യൂസിന് മികച്ച മാധ്യമ കവറേജിനുള്ള അംഗീകാരം ലഭിച്ചത്.

ഐഒഎ തെരഞ്ഞെടുപ്പിൽ നാടകീയ നീക്കം; ഐസ് ഹോക്കി ഫെഡറേഷൻ പ്രതിനിധിയായി പി.ടി. ഉഷ ജനറൽ അസംബ്ലിയിലേക്ക്

Aishwarya S Babu — Thu, 12 Nov 2026 20:48:04 +0530

ദില്ലി: ഇന്ത്യൻ ഒളിമ്പിക് അസോസിയേഷൻ (ഐഒഎ) തെരഞ്ഞെടുപ്പിന് മുന്നോടിയായുള്ള അവസാന നിമിഷത്തെ നാടകീയ നീക്കങ്ങൾക്കൊടുവിൽ നിലവിലെ പ്രസിഡന്‍റ് പി.ടി. ഉഷ ജനറൽ അസംബ്ലിയിലെത്തി. വനിതാ പ്രതിനിധി എന്ന നിലയിൽ ഐസ് ഹോക്കി അസോസിയേഷൻ ഓഫ് ഇന്ത്യയുടെ നാമനിർദേശത്തിലൂടെയാണ് ഉഷ ജനറൽ അസംബ്ലിയിലേക്ക് എത്തുന്നത്. ഇതോടെ ഡിസംബർ 5-ന് നടക്കുന്ന എക്സിക്യൂട്ടീവ് കൗൺസിൽ തെരഞ്ഞെടുപ്പിൽ പ്രസിഡന്‍റ് സ്ഥാനത്തേക്ക് വീണ്ടും മത്സരിക്കാനുള്ള സാധ്യതകൾ ഉഷയ്ക്ക് മുന്നിൽ സജീവമായി.

അത്‌ലറ്റിക്സ് ഫെഡറേഷൻ തഴഞ്ഞു; തുണയായി ഐസ് ഹോക്കി

ദേശീയ കായിക ഫെഡറേഷനുകൾക്ക് ജനറൽ അസംബ്ലിയിലേക്കുള്ള തങ്ങളുടെ പ്രതിനിധികളെ നിർദേശിക്കാനുള്ള സമയപരിധി ഇന്ന് അവസാനിച്ചിരുന്നു. നേരത്തെ അത്‌ലറ്റിക്സ് ഫെഡറേഷൻ ഓഫ് ഇന്ത്യയുടെ (എഎഫ്ഐ) പ്രതിനിധി പട്ടികയിൽ ഉഷയുടെ പേര് ഉൾപ്പെട്ടിരുന്നില്ല. കഴിഞ്ഞ ദിവസം നടന്ന സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിംഗ് മെറിറ്റ് (എസ്ഒഎം) തെരഞ്ഞെടുപ്പിൽ പരാജയപ്പെട്ടതോടെ ഭരണസമിതിയിലേക്ക് എത്താൻ ഉഷയ്ക്ക് മുന്നിലുള്ള ഏക വഴി ഏതെങ്കിലും ദേശീയ കായിക ഫെഡറേഷന്‍റെ പ്രതിനിധിയാവുക എന്നതായിരുന്നു. ഐസ് ഹോക്കി ഫെഡറേഷന്‍റെ നാമനിർദേശത്തിലൂടെ ആ കടമ്പ ഉഷ മറികടന്നു.

പ്രമുഖർ ഉൾപ്പെട്ട 60 അംഗ പട്ടിക

30 ദേശീയ കായിക ഫെഡറേഷനുകളിൽ നിന്നായി ഒരു പുരുഷനും ഒരു വനിതയും വീതം ആകെ 60 പ്രതിനിധികളാണ് ജനറൽ അസംബ്ലി പട്ടികയിലുള്ളത്. ബാസ്കറ്റ്ബോൾ ഫെഡറേഷൻ ഓഫ് ഇന്ത്യയുടെ പ്രതിനിധിയായി തമിഴ്നാട് മന്ത്രി ആധവ് അർജുനയും പട്ടികയിൽ ഇടംപിടിച്ചിട്ടുണ്ട്. നേരത്തെ അത്‌ലറ്റ്സ് കമ്മീഷൻ പ്രതിനിധികളായി മലയാളി നീന്തൽ താരം സജൻ പ്രകാശ്, ഭാരോദ്വഹന താരം മീരാഭായ് ചാനു എന്നിവരെ തിരഞ്ഞെടുത്തിരുന്നു.

വരണാധികാരിക്കെതിരെ ഐഒസിക്ക് പരാതി

അതേസമയം, എസ്ഒഎം തെരഞ്ഞെടുപ്പിൽ ഗുരുതരമായ ക്രമക്കേടുകളും ചട്ടലംഘനങ്ങളും നടന്നതായി ആരോപിച്ച് പി.ടി. ഉഷ അന്താരാഷ്ട്ര ഒളിമ്പിക് കമ്മിറ്റിക്ക് (ഐഒസി) കത്തയച്ചിട്ടുണ്ട്. വരണാധികാരി സഞ്ജയ് കെ. ശ്രീവാസ്തവ നിഷ്പക്ഷത പാലിച്ചില്ലെന്നും പക്ഷപാതപരമായ നിലപാടാണ് സ്വീകരിച്ചതെന്നും ഐഒസി പ്രസിഡന്റ് കിർസ്റ്റി കോവെൻട്രിക്ക് അയച്ച മൂന്ന് പേജുള്ള കത്തിൽ ഉഷ കുറ്റപ്പെടുത്തി. വിഷയത്തിൽ ഐഒസിയുടെ അടിയന്തര ഇടപെടലും സ്വതന്ത്ര അന്വേഷണവുമാണ് ഉഷ ആവശ്യപ്പെട്ടിരിക്കുന്നത്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

വനിതാ വിഭാഗം എസ്ഒഎം തെരഞ്ഞെടുപ്പിൽ അഞ്ജു ബോബി ജോർജ് (53 വോട്ട്), റാണി രാംപാൽ (50), ഡോള ബാനർജി (45), സൈന നെഹ്‌വാൾ (43) എന്നിവർ തിരഞ്ഞെടുക്കപ്പെട്ടപ്പോൾ 40 വോട്ടുകൾ നേടിയ ഉഷ അഞ്ചാം സ്ഥാനത്തേക്ക് പിന്തള്ളപ്പെട്ടിരുന്നു. എന്നാൽ വ്യക്തിപരമായ തോൽവിയുടെ പേരിലല്ല, മറിച്ച് തെരഞ്ഞെടുപ്പ് പ്രക്രിയയിലെ സുതാര്യതയും ഐഒഎയുടെ സ്വയംഭരണാവകാശവും സംരക്ഷിക്കാനാണ് പരാതി നൽകുന്നതെന്ന് ഉഷ കത്തിൽ വ്യക്തമാക്കി. കരട് വോട്ടർ പട്ടികയിന്മേലുള്ള പരാതികൾ വെള്ളിയാഴ്ച വൈകിട്ട് 6 മണി വരെ സമർപ്പിക്കാം. നവംബർ 15-ന് അന്തിമ വോട്ടർ പട്ടിക പ്രസിദ്ധീകരിക്കും.

ഒളിമ്പിക് അസോസിയേഷൻ തിരഞ്ഞെടുപ്പിൽ പി ടി ഉഷക്ക് കനത്ത തിരിച്ചടി, അഞ്ജു ബോബി ജോര്‍ജിനും സൈനക്കും മിന്നും ജയം

Vikas rajagopal — Mon, 09 Nov 2026 19:33:27 +0530

ദില്ലി: ഇന്ത്യൻ ഒളിമ്പിക് അസോസിയേഷൻ (ഐഒഎ) ഭരണസമിതി തിരഞ്ഞെടുപ്പിന് മുന്നോടിയായി നടന്ന സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിങ് മെറിറ്റ് (എസ്ഒഎം) വോട്ടെടുപ്പിൽ നിലവിലെ പ്രസിഡന്‍റ് പി.ടി. ഉഷയ്ക്ക് തോൽവി. വാശിയേറിയ പോരാട്ടം നടന്ന വനിതാ വിഭാഗത്തിൽ മൂന്ന് വോട്ടിന് ഉഷ അഞ്ചാം സ്ഥാനത്തായി. വനിതാ വിഭാഗത്തിൽ മത്സരിച്ച ആറു പേരിൽ നിന്ന് ഏറ്റവും കൂടുതൽ വോട്ട് ലഭിച്ച നാല് പേരാണ് ഐഒഎ ജനറൽ കൗൺസിലിലേക്ക് തിരഞ്ഞെടുക്കപ്പെടുക. മലയാളി താരമായ അഞ്ജു ബോബി ജോർജ്, സൈന നെഹ്‌വാൾ, റാണി രാംപാൽ, ഡോള ബാനർജി എന്നിവരാണ് എസ്ഒഎം തെരഞ്ഞെടുപ്പില്‍ ഏറ്റവും കൂടുതല്‍ വോട്ട് നേടി ജനറല്‍ കൗണ്‍സിലെത്തിയത്. ഇതില്‍ അഞ്ജു ബോബി ജോർജ് ആണ് ഏറ്റവും കൂടുതൽ വോട്ടുകൾ നേടി ഒന്നാം സ്ഥാനത്തെത്തിയത്.

മുൻനിര താരങ്ങളായ അഞ്ജു ബോബി ജോർജ്, സൈന നെഹ്‌വാൾ, റാണി രാംപാൽ, ഡോള ബാനർജി എന്നിവർ തിരഞ്ഞെടുക്കപ്പെട്ടതോടെ വോട്ടെടുപ്പിൽ അഞ്ചാം സ്ഥാനത്തേക്ക് പിന്തള്ളപ്പെട്ട പി.ടി. ഉഷ പ്രസിഡന്‍റ് തെരഞ്ഞെടുപ്പിനുള്ള പാനലിന് പുറത്തായി. എസ്‌.ഒ.എം പ്രതിനിധിയായി എത്താൻ കഴിയാതിരുന്നതോടെ ഐ.ഒ.എ പ്രസിഡന്‍റ് സ്ഥാനത്തേക്ക് വീണ്ടും മത്സരിക്കാനുള്ള ഉഷയുടെ സാധ്യതകളും മങ്ങി. പി ടി ഉഷയ്ക്ക് ഇനി ഐഒഎ പ്രസിഡന്‍റ് തെരഞ്ഞെടുപ്പിൽ മത്സരിക്കണമെങ്കിൽ ഏതെങ്കിലും ദേശീയ കായിക സംഘടന അവരുടെ പ്രതിനിധി ആയി നാമനിർദേശം ചെയേണ്ടിവരും.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

നിലവിലെ സാഹചര്യത്തിൽ അതിന്സാ സാധ്യത വളരെ കുറവാണെന്നാണ് വിലയിരുത്തൽ. ബിജെപി നേതൃത്വം ഉഷയ്ക്കായി കടുത്ത നിലപാട് എടുത്തില്ലെങ്കിൽ മുന്നോട്ടുള്ള വഴി അടയും. അങ്ങനെ സംഭവിച്ചാൽ സൈന നെഹ്‌വാളോ ഗഗൻ നരംഗോ ഐഒഎ പ്രസിഡന്‍റ് ആവുമെന്നാണ് കരുതുന്നത്. എന്നാല്‍ ഇന്ത്യൻ ഒളിംപിക് അസോസിയേഷൻ ആയതിനാൽ അവസാന നിമിഷം വരെയും എന്ത് അട്ടിമറിയും സംഭവിക്കാം.

പുരുഷന്മാരുടെ എസ്‌ഒഎം വിഭാഗത്തിൽ മുന്‍ താരങ്ങളായ ഗഗൻ നരംഗ് (ഷൂട്ടിങ്), കമലേഷ് നവിൻചന്ദ്ര മേത്ത (ടേബിൾ ടെന്നീസ്), യോഗേശ്വർ ദത്ത് (ഗുസ്തി), വിജേന്ദർ സിങ് (ബോക്സിങ്) എന്നിവർ നേരത്തെ തന്നെ എതിരില്ലാതെ തിരഞ്ഞെടുക്കപ്പെട്ടിരുന്നു. ആകെയുള്ള 80 അംഗ 'എസ്ഒഎം' പാനലിൽ നിന്നുള്ള വോട്ടർമാരാണ് എട്ട് പ്രതിനിധികളെ (നാല് പുരുഷന്മാരും നാല് വനിതകളും) ഐഒഎ ജനറൽ അസംബ്ലിയിലേക്ക് തിരഞ്ഞെടുക്കുന്നത്. എസ്‌.ഒ.എം പ്രതിനിധികളായി എത്തുന്ന കായികതാരങ്ങൾക്ക് ഡിസംബർ അഞ്ചിന് നടക്കുന്ന ഐ.ഒഎയുടെ പ്രധാന ഭരണസമിതി തിരഞ്ഞെടുപ്പിൽ നിർണായകമായ വോട്ടവകാശവും എക്സിക്യൂട്ടീവ് കൗൺസിലിലേക്ക് മത്സരിക്കാനുള്ള യോഗ്യതയും ലഭിക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ആദ്യം പിന്നിലായി, പിന്നെ തിരിച്ചടിച്ചു; ഏഷ്യൻ ചാമ്പ്യൻസ് ട്രോഫിയിൽ ഇന്ത്യയ്ക്ക് ഹാട്രിക് കിരീടം

Gopalakrishnan C — Thu, 05 Nov 2026 21:20:34 +0530

മൊഹാലി: ഏഷ്യൻ ചാമ്പ്യൻസ് ട്രോഫി ഹോക്കി ഫൈനലിൽ ജപ്പാനെതിരെ ഒരു ഗോളിന് പിന്നില്‍ നിന്നശേഷം ശക്തമായ തിരിച്ചടിച്ച ഇന്ത്യയ്ക്ക് ഹാട്രിക് കിരീടം. കളിയുടെ ആദ്യ മിനിറ്റിൽ തന്നെ ഒരു ഗോളിന് പിന്നിൽ നിന്ന ശേഷം തകർപ്പൻ തിരിച്ചുവരവ് നടത്തിയ ഇന്ത്യ ജപ്പാനെ ഒന്നിനെതിരെ നാലു ഗോളിനാണ് തകര്‍ത്തത്. ജയത്തോടെ ഏഷ്യൻ ചാമ്പ്യൻസ് ട്രോഫിയില്‍ തുടർച്ചയായ മൂന്നാം കിരീടവും ഇന്ത്യ സ്വന്തമാക്കി.

മൊഹാലിയിൽ നടന്ന കിരീടപ്പോരാട്ടത്തിൽ ആക്രമിച്ച് കളിച്ച ജപ്പാനാണ് ആദ്യം മുന്നിലെത്തിയത്. മത്സരത്തിന്‍റെ നാലാം മിനിറ്റിൽ മത്സുമോട്ടോ നേടിയ ഗോളിലൂടെ ജപ്പാൻ ഇന്ത്യയെ ഞെട്ടിച്ചു. സമനിലയ്ക്കായി ഇന്ത്യ പൊരുതിയെങ്കിലും ആദ്യ രണ്ട് ക്വാർട്ടറുകളിലും ജപ്പാന്‍റെ ശക്തമായ പ്രതിരോധ നിരയെ ഭേദിക്കാൻ കഴിഞ്ഞില്ല. 1-0 ന്‍റെ ലീഡുമായി ജപ്പാൻ ഇടവേളയ്ക്ക് പിരിഞ്ഞു.

എന്നാൽ മൂന്നാം ക്വാർട്ടറിന്‍റെ അവസാന ഘട്ടത്തിൽ ഇന്ത്യ മത്സരത്തിലേക്ക് തിരികെ എത്തി. 42-ാം മിനിറ്റിൽ പെനാൽറ്റി കോർണറിനൊടുവിൽ ആദിത്യ ലാലഗെ നൽകിയ മികച്ച ഫ്ലിക്കിൽ നിന്ന് ഷീലാനന്ദ് ലാക്ര ഇന്ത്യയുടെ സമനില ഗോൾ കണ്ടെത്തി. ഈ ഗോൾ മത്സരത്തിന്‍റെ ഗതി പൂർണ്ണമായും ഇന്ത്യയ്ക്ക് അനുകൂലമാക്കി മാറ്റി. അവസാന ക്വാർട്ടറിൽ ഇന്ത്യൻ മുന്നേറ്റനിര ജപ്പാൻ ബോക്സിലേക്ക് ഇരച്ചുകയറുന്ന കാഴ്ചയ്ക്കാണ് മൊഹാലി സാക്ഷ്യം വഹിച്ചത്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

48-ാം മിനിറ്റിൽ ദിൽപ്രീത് സിങ്ങിന്‍റെ മികച്ചൊരു ഫിനിഷിംഗിലൂടെ ഇന്ത്യ ആദ്യമായി ലീഡ് നേടി (2-1). തൊട്ടുപിന്നാലെ 53-ാം മിനിറ്റിൽ പെനാൽറ്റി കോർണർ ലക്ഷ്യത്തിലെത്തിച്ച് ജുഗ്‌രാജ് സിങ് സ്കോർ 3-1 ആക്കി ഉയർത്തി. 54-ാം മിനിറ്റിൽ വിവേക് സാഗർ പ്രസാദ് നാലാം ഗോളും നേടിയതോടെ ഇന്ത്യ തകർപ്പൻ ജയം പൂർത്തിയാക്കി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഐഒഎ തിരഞ്ഞെടുപ്പ്: വനിതാ താരങ്ങൾക്കിടയിൽ വാശിയേറിയ പോരാട്ടം; പി ടി ഉഷയും അഞ്ജു ബോബി ജോർജും മത്സരരംഗത്ത്

Gopalakrishnan C — Sat, 07 Nov 2026 19:58:51 +0530

ദില്ലി: ഇന്ത്യൻ ഒളിമ്പിക് അസോസിയേഷൻ (ഐഒഎ) തിരഞ്ഞെടുപ്പിൽ വനിതാ താരങ്ങൾക്കിടയിൽ കടുത്ത മത്സരത്തിന് കളമൊരുങ്ങുന്നു. ഐഒഎ പ്രസിഡന്‍റ് സ്ഥാനത്ത് ഒരു ഊഴം കൂടി ആഗ്രഹിക്കുന്ന നിലവിലെ അധ്യക്ഷയും മലയാളിയുമായ പി ടി ഉഷയ്ക്ക് ഇത്തവണ കടുത്ത വെല്ലുവിളിയാണ് ഉയരുന്നത്. മറ്റൊരു മലയാളി താരമായ അഞ്ജു ബോബി ജോർജും മുൻ ബാഡ്മിന്‍റൺ താരം സൈന നെഹ്‌വാളും ഉൾപ്പെടെ ആറ് പ്രമുഖ വനിതാ താരങ്ങളാണ് മത്സരരംഗത്തുള്ളത്.

സ്പോർട്സ് പേഴ്‌സൺസ് ഓഫ് ഔട്ട്സ്റ്റാൻഡിംഗ് മെരിറ്റ് (SOM) തിരഞ്ഞെടുപ്പിൽ മത്സരിച്ചു ജയിച്ചാൽ മാത്രമേ ഉഷയ്ക്ക് വീണ്ടും പ്രസിഡന്‍റ് സ്ഥാനത്തേക്ക് മത്സരിക്കാനാകൂ. എന്നാൽ അഞ്ജു ബോബി ജോർജ് മത്സരരംഗത്ത് എത്തിയത് ഉഷയ്ക്ക് വെല്ലുവിളിയായേക്കും. വനിതാ വിഭാഗത്തിൽ മത്സരിക്കുന്ന ആറു പേരിൽ നിന്ന് ഏറ്റവും കൂടുതൽ വോട്ട് ലഭിക്കുന്ന നാല് പേരായിരിക്കും ഐഒഎ ജനറൽ കൗൺസിലിലേക്ക് തിരഞ്ഞെടുക്കപ്പെടുക. വോട്ടെടുപ്പും ഫലപ്രഖ്യാപനവും തിങ്കളാഴ്ച നടക്കും. മുൻ ഹോക്കി ക്യാപ്റ്റൻ റാണി രാംപാൽ,ഡോല ബാനർജി, അനിത പോൾ എന്നിവരാണ് മത്സരരംഗത്തുള്ള മറ്റ് വനിതകൾ.

ഡിസംബർ അഞ്ചിനാണ് ഐഒഎയുടെ പുതിയ ഭരണസമിതിയെ തിരഞ്ഞെടുക്കുന്ന പ്രധാന തിരഞ്ഞെടുപ്പ് നടക്കുന്നത്. ഇതിന് മുന്നോടിയായി നവംബർ ഒൻപതിനാണ് 'എസ്ഒഎം' വോട്ടെടുപ്പ് ക്രമീകരിച്ചിരിക്കുന്നത്. ആകെയുള്ള 80 അംഗ 'എസ്ഒഎം' പാനലിൽ നിന്നുള്ള വോട്ടർമാരാണ് എട്ട് പ്രതിനിധികളെ (നാല് പുരുഷന്മാരും നാല് വനിതകളും) ഐഒഎ ജനറൽ അസംബ്ലിയിലേക്ക് തിരഞ്ഞെടുക്കുന്നത്.ഇങ്ങനെ തിരഞ്ഞെടുക്കപ്പെടുന്ന എട്ട് പേരിൽ നിന്നും രണ്ട് പ്രതിനിധികൾ (ഒരു പുരുഷനും ഒരു വനിതയും) ഐഒഎയുടെ എക്‌സിക്യൂട്ടീവ് കൗൺസിലിലേക്ക് എത്തും. ഇവർക്ക് ഡിസംബറിൽ നടക്കുന്ന പ്രധാന തിരഞ്ഞെടുപ്പിൽ ഐഒഎ അധ്യക്ഷ പദവി അടക്കമുള്ള സ്ഥാനങ്ങളിലേക്ക് മത്സരിക്കാനും അവകാശമുണ്ടായിരിക്കും.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

അതേസമയം, പുരുഷ വിഭാഗത്തിലെ നാല് പ്രതിനിധികൾ മത്സരമില്ലാതെ തിരഞ്ഞെടുക്കപ്പെട്ടു. മുൻ ഷൂട്ടിംഗ് താരം ഗഗൻ നാരംഗ്, ബോക്‌സിംഗ് താരം വിജേന്ദർ സിംഗ്, ഗുസ്തി താരം യോഗേശ്വർ ദത്ത്, ടേബിൾ ടെന്നീസ് താരം കമലേഷ് മേത്ത എന്നിവരാണ് എതിരില്ലാതെ ജനറൽ കൗൺസിലിലെത്തിയത്. ജനറൽ കൗൺസിലിൽ എത്തുന്ന പുരുഷ-വനിതാ പ്രതിനിധികളിൽ നിന്ന് ഓരോരുത്തർ വീതം പിന്നീട് ഐഒഎയുടെ നിർണായകമായ എക്‌സിക്യൂട്ടീവ് കൗൺസിലിലേക്കും തിരഞ്ഞെടുക്കപ്പെടും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

പാലക്കാടിന്റെ നിവേദ്യ കലാധറിന്‌ ഹാട്രിക്ക്‌ സ്വര്‍ണം, തുടരെ രണ്ടാം വര്‍ഷവും മിന്നും പ്രകടനം, ബ്രസീലില്‍ മത്സരിക്കാന്‍ കായിക മേളയുടെ താരം

Vipulnath P — Fri, 30 Oct 2026 17:03:07 +0530

കോഴിക്കോട് : കായിക മേളയില്‍ മൂന്ന്‌ ഇനങ്ങളിലും തുടര്‍ച്ചയായ രണ്ടാം വര്‍ഷവും സ്വര്‍ണം നേടുക. അവസാന സ്‌കൂള്‍ കായിക മേളയില്‍ വ്യക്തിഗത ചാമ്പ്യനാവുക. ഏതൊരു താരവും കൊതിക്കുന്ന പ്രകടനം ! പാലക്കാട്‌ വടവന്നൂര്‍ വി എം ഹയര്‍സെക്കന്‍ഡറി സ്‌കൂളിലെ പ്ലസ്‌ ടു ഹ്യുമാനിറ്റീസ്‌ വിദ്യാര്‍ഥി നിവേദ്യ കലാധര്‍ ആണ്‌ ആ സുവര്‍ണ താരം.

സീനിയര്‍ വിഭാഗം പെണ്‍കുട്ടികളുടെ 1500 മീറ്റര്‍ 400 മീറ്റര്‍ 800 മീറ്റര്‍ ഇനങ്ങളിലാണ് സ്വര്‍ണ്ണം കരസ്ഥമാക്കി മേളയിലെ വ്യക്തിഗത ചാമ്പ്യന്‍ ആയത്. അവസാന ഇനമായ 800 മീറ്ററിലെ ആദ്യ റൗണ്ടില്‍ അവിശ്വസനീയമായ വേഗത്തിലുള്ള പ്രകടനമാണ് നിവേദ്യ പുറത്തെടുത്തിരുന്നത്. കഴിഞ്ഞവര്‍ഷത്തെ ഓര്‍ഡര്‍ ഓഫ് ഇവന്റിനേക്കാളും മികച്ചതായിരുന്നു ഈ വര്‍ഷത്തേതെന്ന് നിവേദ്യ പറയുന്നു. അതിനാലാണ് തനിക്ക് തന്റെ കരിയറിലെ മികച്ച പ്രകടനം പുറത്തെടുക്കാന്‍ സാധിച്ചത്.

കഴിഞ്ഞവര്‍ഷം അടുപ്പിച്ചുള്ള ഇനങ്ങള്‍ വന്നത് പ്രകടനമികവിനെ ബാധിച്ചിരുന്നു. ദേശീയ മീറ്റില്‍ പങ്കെടുക്കാതെയാണ് നിവേദ്യ സംസ്ഥാന സ്‌കൂള്‍ കായികമേളയില്‍ പങ്കെടുത്തത്. അതിന്റെ വിഷമവും നിവേദ്യയുടെ ഉള്ളില്‍ ഉണ്ട്. ദേശീയ മീറ്റില്‍ പങ്കെടുത്തിരുന്നെങ്കില്‍ മെഡല്‍ നേട്ടം ഉറപ്പായിരുന്നു എന്നാണ് നിവേദിയുടെ കോച്ച് പറയുന്നത്. എന്നാല്‍ ദേശീയ മീറ്റില്‍ പങ്കെടുക്കാത്തതിനുള്ള വിഷമം ഡിസംബര്‍ മൂന്നിന് ബ്രസീലില്‍ നടക്കുന്ന 1500 മീറ്റര്‍ അന്തര്‍ദേശീയ മത്സരത്തില്‍ പങ്കെടുക്കുന്നതോടെ മാറുമെന്നാണ് നിവേദ്യ പറയുന്നത്.

അന്തര്‍ദേശീയ മത്സരത്തിനുള്ള തയാറെടുപ്പുകള്‍ ഇതിനകം തുടങ്ങി. രാജ്യത്തെ പ്രതിനിധീകരിച്ച് അന്തര്‍ദേശീയ മത്സരത്തില്‍ ഇറങ്ങുന്നതിന്റെ അഭിമാന നിമിഷം സാക്ഷ്യം വഹിക്കാനാണ് കോച്ച് അജയകുമാര്‍ കാത്തിരിക്കുന്നത്. വടവന്നൂരിലെ തറവാട് ക്ലബ്ബ് സമ്മാനിച്ച സ്‌പൈസ് ധരിച്ചാണ് നിവേദ്യ കഴിഞ്ഞ അഞ്ചുവര്‍ഷം ട്രാക്കില്‍ ഓടിയത്. ബ്രസീലില്‍ നടക്കുന്ന അന്തര്‍ദേശീയ മീറ്റിലും ഈ സ്‌പൈസ് ധരിച്ചായിരിക്കും നിവേദ്യ മാറ്റുരക്കുക. ഇന്ത്യയുടെ ഭാവി കായിക വാഗ്ദാനമായ നിവേദ്യക്ക് പൂര്‍ണ പിന്തുണയുമായി അമ്മ ശാന്തി കൂടെയുണ്ട്.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

കായിക മേളക്കെത്തിയവരെയും കുട്ടിത്താരങ്ങളെയും അഭിവാദ്യം ചെയ്‌ത്‌ രാജ്യത്തിന്റെ അഭിമാന താരങ്ങള്‍

Vipulnath P — Sat, 31 Oct 2026 01:52:55 +0530

കോഴിക്കോട്‌: അന്താരാഷ്ട്ര കായിക മേഖലയില്‍ രാജ്യത്തിന്റെ അഭിമാനമായ നക്ഷത്രതാരങ്ങള്‍ എന്‍ ഐ ടിയിലെ സിന്തറ്റിക്‌ ട്രാക്കില്‍ ഒത്തൊരുമിച്ചപ്പോള്‍ സംസ്ഥാന കായിക മേളയില്‍ ആവേശത്തിന്റെ തിരമാലകള്‍ ആഞ്ഞടിച്ചു. അവര്‍ മേളയെയും വളർന്നുവരുന്ന കുട്ടിത്താരങ്ങളെയും അഭിവാദ്യം ചെയ്തപ്പോൾ സ്റ്റേഡിയം ആവേശക്കടലായി മാറി. ഭാവിയിലെ ചാമ്പ്യന്മാർക്ക് വലിയൊരു പ്രചോദനവും ഊർജ്ജവും പകരുന്നതായിരുന്നു കായികലോകത്തെ പ്രമുഖരുടെ സാന്നിധ്യം.

ലോക അത്‌ലറ്റിക്‌സ് ചാമ്പ്യൻഷിപ്പിൽ മെഡൽ നേടുന്ന ആദ്യ ഇന്ത്യൻ താരവും ഖേൽരത്‌ന-പദ്മശ്രീ പുരസ്‌കാര ജേതാവുമായ അഞ്ജു ബോബി ജോർജ്, ഇന്ത്യൻ ഹോക്കിയുടെ 'ദി ഗ്രേറ്റ് വാൾ' എന്നറിയപ്പെടുന്ന പാരീസ്-ടോക്കിയോ ഒളിമ്പിക്‌സ് മെഡലിസ്റ്റ് പി.ആർ. ശ്രീജേഷ് എന്നിവർക്കൊപ്പം 400 മീറ്റർ ഹർഡിൽസിൽ ഏഷ്യൻ ഗെയിംസ് സ്വർണ്ണമെഡൽ നേടിയ ആദ്യ ഇന്ത്യൻ പുരുഷ താരമായ ജോസഫ് ജെ. എബ്രഹാം, 800, 1500 മീറ്ററുകളിലെ ഏഷ്യൻ ഗെയിംസ് ചാമ്പ്യനായ ഒളിമ്പ്യൻ ജിൻസൺ ജോൺസൺ എന്നിവരും ആവേശനിമിഷങ്ങൾക്ക് സാക്ഷിയാകാൻ ഒന്നിച്ചെത്തി.

ഏഷ്യൻ അത്‌ലറ്റിക് ചാമ്പ്യൻഷിപ്പിലെ സ്വർണ്ണനേട്ടങ്ങളിലൂടെ ഇന്ത്യയുടെ അഭിമാനമായി മാറിയ 'പാലക്കാടൻ കാറ്റ്' പി.യു. ചിത്ര, 4×400 മീറ്റർ റിലേയിലെ ഏഷ്യൻ ചാമ്പ്യൻഷിപ്പ് സ്വർണ്ണമെഡൽ ജേതാവും ഒളിമ്പ്യനുമായ കുഞ്ഞുമുഹമ്മദ്, ഏഷ്യൻ ഗെയിംസ് റിലേ സ്വർണ്ണമെഡൽ ജേതാവായ വി.കെ. വിസ്മയ എന്നിവരും കുട്ടിത്താരങ്ങൾക്ക് നവവഴികൾ കാട്ടിക്കൊണ്ട് വേദിയിൽ അണിനിരന്നു. തങ്ങളുടെ കായിക ജീവിതത്തിലെ പോരാട്ടവീര്യവും അനുഭവസമ്പത്തും ഓർമ്മിപ്പിച്ചുകൊണ്ടാണ് അഭിമാന താരങ്ങൾ മേളയ്ക്കും അതിൽ പങ്കെടുക്കുന്ന നവാഗത കായികപ്രതിഭകൾക്കും ആശംസകൾ നേർന്നത്.

നിശ്ചയദാർഢ്യവും കഠിനാധ്വാനവും ഉണ്ടെങ്കിൽ ലോകത്തിന്റെ ഉച്ചകോടിയിൽ എത്താൻ ഏതൊരു കായികതാരത്തിനും സാധിക്കുമെന്ന വലിയ സന്ദേശം നൽകിയ നിമിഷം, സംസ്ഥാന സ്‌കൂൾ കായികമേളയുടെ ചരിത്രത്തിലെ തന്നെ ഏറ്റവും മനോഹരമായ ഏടുകളിലൊന്നായി മാറി.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

'ആരോപണം ഉന്നയിക്കുന്നവർ തെളിവ് ഹാജരാക്കണം'; പി.ടി. ഉഷയ്ക്ക് മറുപടിയുമായി അഞ്ജു ബോബി ജോർജ്

Vikas rajagopal — Wed, 11 Nov 2026 09:51:49 +0530

ദില്ലി: ഇന്ത്യൻ ഒളിമ്പിക് അസോസിയേഷനിലേക്കുള്ള (ഐ.ഒ.എ) എസ് ഒ എം തെരഞ്ഞെടുപ്പിൽ അട്ടിമറിയും ക്രമക്കേടും നടന്നെന്ന നിലവിലെ പ്രസിഡന്‍റ് പി.ടി. ഉഷയുടെ ആരോപണങ്ങൾക്ക് മറുപടിയുമായി അഞ്ജു ബോബി ജോർജ്. തെരഞ്ഞെടുപ്പിൽ ജയവും തോൽവിയും സ്വാഭാവികമാണെന്നും അത് ഒരുപോലെ അംഗീകരിക്കാൻ എല്ലാവർക്കും സാധിക്കണമെന്നും അഞ്ജു വ്യക്തമാക്കി. ആരോപണങ്ങൾ ഉന്നയിക്കുന്നവർ അതിനുള്ള കൃത്യമായ തെളിവ് ഹാജരാക്കണമെന്നും, എന്തെങ്കിലും പരാതികളുണ്ടെങ്കിൽ ബന്ധപ്പെട്ട ഔദ്യോഗിക സംവിധാനങ്ങളെയാണ് സമീപിക്കേണ്ടതെന്നും അവർ പറഞ്ഞു.ഐഒഎ തെരഞ്ഞെടുപ്പ്: അട്ടിമറി ആരോപണവുമായി പി.ടി. ഉഷ; അന്താരാഷ്ട്ര ഒളിമ്പിക് കമ്മിറ്റിക്ക് കത്തയച്ചു

ഐ.ഒ.എയുടെ 'സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിങ് മെറിറ്റ് (എസ്ഒഎം) തെരഞ്ഞെടുപ്പിൽ ഏറ്റവും കൂടുതൽ വോട്ടുകൾ (53 വോട്ട്) നേടിയാണ് അഞ്ജു ബോബി ജോർജ് വിജയിച്ചത്. ലഭിച്ച വോട്ടുകൾ കായികരംഗത്തെ തന്‍റെ പ്രവർത്തനങ്ങൾക്കുള്ള വലിയ അംഗീകാരമാണെന്ന് അഞ്ജു പ്രതികരിച്ചു. വോട്ടെടുപ്പിൽ ആരൊക്കെയാണ് തനിക്ക് വോട്ട് ചെയ്തതെന്ന് മുൻകൂട്ടി പറയാൻ കഴിയില്ലെന്നും അവർ കൂട്ടിച്ചേർത്തു.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

അതേസമയം, വരാനിരിക്കുന്ന ഐ.ഒ.എ പ്രസിഡന്‍റ് സ്ഥാനത്തേക്ക് മത്സരിക്കാനുള്ള സാധ്യതകൾ അഞ്ജു ബോബി ജോർജ് പൂർണ്ണമായി തള്ളിക്കളഞ്ഞില്ല. വോട്ടെടുപ്പിൽ 40 വോട്ടുകൾ മാത്രം നേടി അഞ്ചാം സ്ഥാനത്തേക്ക് പിന്തള്ളപ്പെട്ട പി.ടി. ഉഷയ്ക്ക് ഭരണസമിതിയിലെ അംഗത്വം നഷ്ടമായതോടെ തിരിച്ചടി നേരിട്ടിരിക്കുകയാണ്. അഞ്ജുവിനു പുറമെ സൈന നെഹ്‌വാൾ, റാണി രാംപാൽ, ഡോള ബാനർജി എന്നിവരാണ് വനിതാ വിഭാഗത്തിൽ നിന്ന് വിജയിച്ച മറ്റു താരങ്ങൾ. തെരഞ്ഞെടുപ്പിനു ശേഷം തനിക്ക് എതിരായി ആസൂത്രിത നീക്കം നടന്നെന്ന ആരോപണവുമായി പി.ടി. ഉഷ രംഗത്തെത്തിയതോടെ ഐ.ഒ.എയിലെ പടലപ്പിണക്കങ്ങൾ പുതിയ തലത്തിലേക്ക് കടന്നിരിക്കുകയാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

2019ന്‌ ശേഷം ആദ്യമായി പത്തനംതിട്ടക്ക്‌ സ്വര്‍ണം, ചേട്ടന്റെ ജഴ്‌സിയിട്ട്‌ കോശിയെറിഞ്ഞപ്പോള്‍ ഒന്നല്ല രണ്ട്‌ മെഡല്‍!

Vipulnath P — Fri, 30 Oct 2026 23:34:59 +0530

കോഴിക്കോട്‌: സംസ്ഥാന സ്‌കൂള്‍ കായിക മേളയില്‍ പത്തനംതിട്ടക്കെന്ത്‌ കാര്യം എന്ന്‌ ഇനിയാരും ചോദിക്കരുത്‌. 2019ന്‌ ശേഷം കായിക മേളയില്‍ പത്തനംതിട്ടയുടെ ആദ്യ സ്വര്‍ണം സീനിയര്‍ ആണ്‍കുട്ടികളുടെ ഷോട്ട്‌പുട്ടില്‍ സംഭവിച്ചു. 15.27 മീറ്റര്‍ ദൂരം എറിഞ്ഞ മാത്യു വര്‍ഗീസ്‌ കോശിയാണ്‌ പത്തനംതിട്ടക്ക്‌ സര്‍പ്രൈസൊരുക്കിയത്‌. മാത്യുവര്‍ഗീസിന്‌ പിറകില്‍ വെള്ളി മെഡല്‍ സ്ഥാനത്ത്‌ ഫിനിഷ്‌ ചെയ്‌തത്‌ കണ്ണൂര്‍ സെന്റ്‌ കോര്‍ണേലിയസ്‌ എച്ച്‌ എസ്‌ കോളയാടിലെ തേജസ്‌ പ്രദീപാണ്‌. കഴിഞ്ഞ വര്‍ഷം സബ്‌ ജൂനിയര്‍ ഷോട്ട്‌പുട്ടില്‍ മാത്യുവിന്‌ വെങ്കലമായിരുന്നു.

കുളനട സ്വദേശിയായ മാത്യുവര്‍ഗീസ്‌ പഞ്ചായത്ത്‌ എച്ച്‌ എസ്‌ എസ്‌ കുളനടയിലെ പ്ലസ്‌ ടു വിദ്യാര്‍ഥിയാണ്‌. മാത്യുവിന്റെ സഹോദരന്‍ ക്രിസ്‌റ്റോ ജോര്‍ജ്‌ കോശി 2023 ല്‍ സംസ്ഥാന കായിക മേളയില്‍ ഷോട്ട്‌ പുട്ടില്‍ മത്സരിച്ചിരുന്നു. അന്ന്‌ പരിക്ക്‌ കാരണം ക്രിസ്റ്റോയ്‌ക്ക്‌ മെഡല്‍ പ്രകടനം കാഴ്‌ചവെക്കാന്‍ സാധിച്ചിരുന്നില്ല. പക്ഷേ, ക്രിസ്റ്റോ അന്ന്‌ മത്സരത്തിന്‌ ഉപയോഗിച്ച ജഴ്‌സി സഹോദരന്‌ കൈമാറി. ആ ജഴ്‌സി ധരിച്ചായിരുന്നു മാത്യു വര്‍ഗീസ്‌ കോഴിക്കോട്‌ എന്‍ ഐ ടി ഗ്രൗണ്ടില്‍ മത്സരിക്കാനിറങ്ങിയത്‌.

ഷോട്ട്‌ പുട്ടില്‍ മാത്രമല്ല, ഡിസ്‌കസ്‌ ത്രോയിലും മാത്യു വര്‍ഗീസ്‌ തിളങ്ങി. 39.86 മീറ്റര്‍ ദുരം കണ്ടെത്തിയ മാത്യു ഡിസ്‌കസ്‌ ത്രോയില്‍ വെള്ളി മെഡല്‍നേടി. ഇതോടെ, കായിക മേളയില്‍ പത്തനംതിട്ടയുടെ രണ്ട്‌ മെഡലുകളും ഒരാളുടെ പേരിലായി. "ചേട്ടന്റെ ജഴ്‌സിയിട്ട്‌ മത്സരിക്കുമ്പോള്‍ ഒരു പ്രത്യേക ആത്മവിശ്വാസം ലഭിക്കാറുണ്ട്‌. അത്‌ ധരിച്ച്‌ മത്സരിച്ചപ്പോള്‍ ജില്ലാ തലങ്ങളില്‍ മുന്നിലെത്താന്‍ സാധിച്ചിരുന്നു. എന്നാല്‍, സംസ്ഥാന തലത്തില്‍ ഇതാദ്യമായിട്ട്‌ മികച്ച റിസള്‍ട്ടുണ്ടായി. പത്തനംതിട്ടയെ മെഡല്‍ പട്ടികയില്‍ എത്തിക്കാന്‍ സാധിച്ചതില്‍ ഏറെ സന്തോഷമുണ്ട"്‌ - മാത്യു വര്‍ഗീസ്‌ കോശി പറഞ്ഞു. മൈലപ്ര ഐ ടി ഐയിലെ അധ്യാപകനായ ബിജു ജോര്‍ജ്‌ കോശിയുടേയും ജയ്‌ മോള്‍ ജോര്‍ജിന്റെയും മകനാണ്‌ മാത്യു വര്‍ഗീസ്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

സംസ്ഥാന സ്‌കൂള്‍ കായിക മേള: സ്‌പോര്‍ട്‌സ്‌ ജേര്‍ണലിസ്‌റ്റ്‌ പുരസ്‌കാരം ശ്രീഹരിക്കും അനാമികയ്‌ക്കും

Vipulnath P — Sat, 31 Oct 2026 20:39:11 +0530

കോഴിക്കോട്: സംസ്ഥാന സ്കൂൾ കായികമേളയോടനുബന്ധിച്ചു കേരള സ്പോർട്സ് ജേര്‍ണലിസ്‌റ്റ്‌ അസോസിയേഷൻ നൽകുന്ന മികച്ച ആൺ അത് ല റ്റിനുള്ള യു. എച്ച്. സിദ്ധിക്ക് മെമ്മോറിയൽ അവാർഡ് തിരുവനന്തപുരം ജിവി രാജ സ്കൂളിലെ ശ്രീഹരി കരിക്കനും പെൺകുട്ടികളുടെ വിഭാഗത്തിൽ പി. ടി. ബേബി മെമ്മോറിയൽ അവാർഡ് അനാമിക അജേഷിനും. കായികമേളയുടെ മുഖ്യ വേദിയായ എൻഐടി സ്റ്റേഡിയത്തിൽ നടന്ന ചടങ്ങിൽ പ്രശസ്ത കായികതാരങ്ങളായ പ്രീജ ശ്രീധരൻ, പി. യു. ചിത്ര, കുഞ്ഞുമുഹമ്മദ് എന്നിവർ ചേർന്ന് ഇരുവർക്കും അവാർഡുകൾ സമ്മാനിച്ചു.

5000 രൂപയും ഫലകവും അടങ്ങുന്നതായിരുന്നു അവാർഡ്. തിരുവനന്തപുരം G. V. രാജ സ്കൂളിലെ ശ്രീഹരി ജൂനിയർ വിഭാഗം 400 മീറ്ററിലും 400 മീറ്റർ ഹർഡിൽസിലും മീറ്റ് റെക്കോർഡോടെ സ്വർണം നേടിയിരുന്നു. ആലപ്പുഴ ചാരമംഗലം ഡിവിഎച്ച്എസ്എസ്സിലെ അനാമിക സീനിയർ പെൺകുട്ടികളുടെ 100 mtr ഹർഡിൽസിൽ മീറ്റ് റിക്കാർഡോടെ സ്വർണം നേടി. കൂടാതെ 4×100, 4×400 മീറ്റർ റിലേകളിൽ സ്വർണ്ണവും 400 മീറ്ററിൽ വെങ്കലവും സ്വന്തമാക്കി.

അത് ലറ്റിക് ഫെഡറേഷൻ ഓഫ് ഇന്ത്യ മുൻ ജോയിൻ സെക്രട്ടറിയും കോച്ചുമായ പി ഐ ബാബു, മുൻ ഇന്ത്യൻ കോച്ച് കെ. എസ്. അജിമോൻ, അത്ലറ്റിക് കോച്ച് ഡോ. ജിമ്മി ജോസഫ്, കായിക മാധ്യമപ്രവർത്തകൻ ജോമിച്ചൻ ജോസ് എന്നിവർ അടങ്ങിയ ജൂറിയാണ് അവാർഡുകൾ തീരുമാനിച്ചത്. ചടങ്ങിൽ കേരള സ്പോർട്സ് ജേർണലിസ്റ്റ്സ് അസോസിയേഷൻ സെക്രട്ടറി സി. കെ. രാജേഷ് കുമാർ അവാർഡ് നേതാക്കളെ പരിചയപ്പെടുത്തി. രക്ഷാധികാരികളായ ജോയ് നായർ, കമാൽ വരദൂർ, കെ. വിശ്വനാഥ്‌, എക്‌സിക്യൂട്ടീവ് അംഗങ്ങളായ ജോബി ജോർജ്, വിനോദ് ദാമോദരൻ മറ്റു അസോസിയേഷൻ അംഗങ്ങൾ കായിക മാധ്യമ പ്രവർത്തകർ, സംഘാടകർ തുടങ്ങിയവർ പങ്കെടുത്തു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഓവറോള്‍ ചാമ്പ്യന്‍ഷിപ്പ്‌ ഉറപ്പിച്ച്‌ തിരുവനന്തപുരം, അത്‌ലറ്റിക്‌സില്‍ മലപ്പുറത്തിന്റെ കുതിപ്പ്‌, സ്‌കൂളുകളില്‍ ഐഡിയല്‍ മുന്നില്‍

Vipulnath P — Sat, 31 Oct 2026 01:15:34 +0530

കോഴിക്കോട്‌: 68 മത്‌ സംസ്ഥാന സ്‌കൂള്‍ കായിക മേളയില്‍ അഞ്ചാം ദിനത്തിലെ മത്സരങ്ങൾ പൂര്‍ത്തിയായപ്പോള്‍ ഓവറോൾ പോയിന്റ് പട്ടികയിൽ തിരുവനന്തപുരം ജില്ലയാണ് മുന്നിൽ. മത്സരങ്ങള്‍ അന്തിമ ഘട്ടത്തിലേക്ക് അടുക്കുമ്പോൾ തിരുവനന്തപുരത്തിന്‌ 2004.3 പോയിന്റുണ്ട്‌. തൃശൂർ 951.3 പോയിന്റുമായി രണ്ടാമതും 887.3 പോയിന്റുമായി മലപ്പുറവും ഇഞ്ചോടിച്ച് പോരാട്ടത്തിലാണ്. കണ്ണൂരും കോഴിക്കോടും നാലും അഞ്ചും സ്ഥാനങ്ങളിൽ പോരാട്ടം തുടരുകയാണ്.

അത്‌ലറ്റിക്‌സില്‍ മലപ്പുറം മുന്നിൽ

അത്‌ലറ്റിക്‌സില്‍ മികച്ച ജില്ലയായി 168.333 പോയിന്റോടെ മലപ്പുറമാണ് നിലവില്‍ മുന്നില്‍. 128.5 പോയിന്റുമായി പാലക്കാട് രണ്ടാമതും, 88 പോയിന്റോടെ തിരുവനന്തപുരവും 76 പോയിന്റുമായി ആലപ്പുഴയും ശക്തമായ പോരാട്ടത്തോടെ പിന്നിലുണ്ട്. 62 പോയിന്റുമായി ആതിഥേയരായ കോഴിക്കോട് ജില്ല മികച്ച പ്രകടനവുമായി മുന്നേറുകയാണ്.

സ്‌കൂള്‍ തലത്തിലുള്ള അതിലറ്റിക്സ് പോരാട്ടത്തില്‍ 71.333 പോയിന്റോടെ മലപ്പുറം കടകശേരി ഐഡിയല്‍ ഇ.എച്ച്.എസ്.എസ് ഒന്നാം സ്ഥാനത്ത് നില്‍ക്കുമ്പോള്‍, വി.എം.എച്ച്.എസ്.എസ് വടവന്നൂരും കെ.എച്ച്.എം.എച്ച്.എസ് അലത്തിയൂരും 34,30 പോയിന്റുകളോടെ അടുത്ത സ്ഥാനങ്ങളില്‍ കനത്ത മത്സരമുയര്‍ത്തുന്നുണ്ട്.

അഞ്ച് ദിനം അഞ്ച് റെക്കോർഡ്

ഈ വർഷത്തെ സംസ്ഥാന സ്കൂൾ കായികമേളയുടെ ആദ്യ അഞ്ച് ദിനങ്ങളിൽ അഞ്ച് മീറ്റ് റെക്കോർഡുകൾ പിറന്നു. ഇന്നത്തെ മത്സരങ്ങൾ ആവേശത്തോടെ അവസാനിപ്പിക്കുന്നതിന് തൊട്ടുമുൻപാണ് അഞ്ചാമത്തെ മീറ്റ് റെക്കോർഡ് പിറന്നത്. 400മീറ്റർ ജൂനിയർ വിഭാഗം ഹഡിൽസിൽ ജി.വി രാജ സ്പോർട്സ് സ്കൂളിലെ ശ്രീഹരി കാരിക്കനാണ് 2025ൽ നേടിയ സ്വന്തം റെക്കോർഡ് 52.44 സെക്കൻഡിൽ മറികടന്ന് പുതിയ മീറ്റ് റെക്കോർഡ് സ്ഥാപിച്ചത്.

സീനിയർ ഗേൾസ് 100 മീറ്റർ ഹർഡിൽസിൽ ആലപ്പുഴ ജില്ലയിലെ അനാമിക അജേഷ് 13.69 സെക്കൻഡിൽ ഫിനിഷ് ചെയ്ത് പുതിയ റെക്കോർഡ് സ്ഥാപിച്ചു. 2018-ൽ അപർണ റോയ് സ്ഥാപിച്ച 13.85 സെക്കൻഡിന്റെ മീറ്റ് റെക്കോർഡാണ് മറികടന്നത്. ജൂനിയർ ബോയ്സ് ലോങ്ജംമ്പിൽ കോട്ടയം ജില്ലയിലെ വിഷ്ണു യാദവ് 7.31 മീറ്റർ ചാടി റെക്കോർഡ് സ്വന്തമാക്കി. 2017-ൽ കെ എം ശ്രീകാന്ത് കുറിച്ച 7.05 മീറ്റർ മീറ്റ് റെക്കോർഡ് ആണ് മറികടന്നത്. സീനിയർ ബോയ്സ് 100 മീറ്ററിൽ ആലപ്പുഴ ജില്ലയിലെ അതുൽ ടി എം 10.63 സെക്കൻഡിൽ ഓടിയെത്തി പുതിയ റെക്കോർഡിട്ടു. 2011-ൽ ജിജിൻ വിജയൻ സ്ഥാപിച്ച 10.70 സെക്കൻഡാണ് മറികടന്നത്. ജൂനിയർ 400 മീറ്റർ ഓട്ടത്തിൽ തിരുവനന്തപുരം ജില്ലയിലെ ശ്രീഹരി കരിക്കൻ 47.84 സെക്കൻഡിൽ റെക്കോർഡ് സ്ഥാപിച്ചു. 2017-ൽ അഭിഷേക് മാത്യു കുറിച്ച 48.88 സെക്കൻഡിന്റെ റെക്കോർഡാണ് തിരുത്തിയത്.

മുഖ്യമന്ത്രിയുടെ 117.5 പവൻ തൂക്കമുള്ള സ്വർണക്കപ്പ് സ്വന്തമാക്കുകയെന്ന ലക്ഷ്യവുമായി 14 ജില്ലകളിൽനിന്നും ഗൾഫ് നാടുകളിൽനിന്നുമെത്തിയ ആയിരക്കണക്കിന് കായികതാരങ്ങളാണ് മേളയുടെ ആവേശം വാനോളമുയർത്തുന്നത്. വ്യക്തിഗത മികവിനൊപ്പം ജില്ലകൾ തമ്മിലുള്ള ഇഞ്ചോടിഞ്ച് പോരാട്ടവും മേളയെ കൂടുതൽ ആവേശകരമാക്കുന്നു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഒളിമ്പിക് അസോസിയേഷൻ തെരഞ്ഞെടുപ്പ്, പ്രതിഷേധവുമായി പി.ടി. ഉഷ ക്യാമ്പ്; പുറത്താക്കാൻ ആസൂത്രിത നീക്കമെന്ന് ആരോപണം

Vikas rajagopal — Tue, 10 Nov 2026 09:57:23 +0530

ദില്ലി: ഇന്ത്യൻ ഒളിമ്പിക് അസോസിയേഷൻ തെരഞ്ഞെടുപ്പുമായി ബന്ധപ്പെട്ട് പിടി ഉഷയും എതിർ വിഭാഗവും തമ്മിലുള്ള ഭിന്നത രൂക്ഷമാകുന്നു. തന്നെ പദവിയിൽ നിന്ന് പുറത്താക്കാൻ ആസൂത്രിത നീക്കങ്ങൾ നടന്നതായി ആരോപിച്ച പി.ടി. ഉഷ ക്യാമ്പ് ശക്തമായ പ്രതിഷേധത്തിലാണ്. വിഷയത്തിൽ പ്രധാനമന്ത്രിക്കും അന്താരാഷ്ട്ര ഒളിമ്പിക് കമ്മിറ്റിക്കും പരാതി നൽകുന്ന കാര്യം ഉഷ ക്യാമ്പിന്‍റെ പരിഗണനയിലുണ്ട്.

പ്രധാനമന്ത്രി നരേന്ദ്ര മോദിയുടെ താത്പര്യപ്രകാരമാണ് എന്ന് തെറ്റിദ്ധരിപ്പിച്ചാണ് പല കായികതാരങ്ങളോടും എതിർ പാനൽ വോട്ട് അഭ്യർത്ഥിച്ചതെന്നും, തെരഞ്ഞെടുപ്പ് ഫലം അട്ടിമറിക്കപ്പെട്ടു എന്ന് സംശയിക്കുന്നതായും ഉഷ ആരോപിക്കുന്നു. തെരഞ്ഞെടുപ്പിൽ മത്സരിക്കാനുള്ള സന്നദ്ധത കേന്ദ്ര ആഭ്യന്തരമന്ത്രി അമിത് ഷായെയും കേന്ദ്ര കായികമന്ത്രിയെയും നേരത്തെ തന്നെ കണ്ട് അറിയിച്ചിരുന്നെന്നും, ആരും തന്നെ മത്സരത്തിൽ നിന്ന് പിന്മാറാൻ ആവശ്യപ്പെട്ടിരുന്നില്ലെന്നും ഉഷ വ്യക്തമാക്കി.

ഉഷയെ ഒഴിവാക്കാൻ കായിക സംഘടനകൾ

അതേസമയം, പിടി ഉഷയെ പൂർണ്ണമായും ഒഴിവാക്കാനുള്ള നീക്കത്തിലാണ് വിവിധ കായിക സംഘടനകൾ എന്നാണ് സൂചന. ഐഒഎ ജനറൽ അസംബ്ലിയിൽ വിവിധ സംഘടനകളുടെ പ്രതിനിധിയാകാൻ ഉഷയെ അനുവദിച്ചേക്കില്ല. അത്ലറ്റിക്സ് ഫെഡറേഷൻ ഓഫ് ഇന്ത്യയുടെ പ്രതിനിധിയായി ഉഷയെ അയക്കില്ലെന്ന് സംഘടന വൃത്തങ്ങൾ ഏഷ്യാനെറ്റ് ന്യൂസിനോട് പറഞ്ഞു.

അതിനിടെ അടുത്ത ഐ.ഒ.എ പ്രസിഡന്‍റ് സ്‌പോർട്‌സ് പേഴ്‌സൺസ് ഓഫ് ഔട്ട്‌സ്റ്റാൻഡിംഗ് മെരിറ്റ് പട്ടികയിൽ നിന്ന് തന്നെ വേണമെന്ന് നിർബന്ധമില്ലെന്ന വാദവും ഒരു വിഭാഗം ഉയർത്തുന്നുണ്ട്.

അടുത്ത അധ്യക്ഷൻ ആര്?

കായികതാരങ്ങളിൽ നിന്നാണ് പ്രസിഡന്‍റിനെ തിരഞ്ഞെടുക്കുന്നതെങ്കിൽ ഗഗൻ നാരംഗ്, സൈന നെഹ്‌വാൾ എന്നിവരുടെ പേരുകളാണ് നിലവിൽ പരിഗണനയിലുള്ളത്. അതോടൊപ്പം, മത്സരിക്കാൻ അത്ലറ്റിക്സ് ഫെഡറേഷൻ ഓഫ് ഇന്ത്യ ഉന്നതരിൽ നിന്ന് മലയാളി താരം അഞ്ജു ബോബി ജോർജിന് മേൽ ശക്തമായ സമ്മർദ്ദമുണ്ട്. എന്നാൽ മത്സരരംഗത്തിറങ്ങുന്ന കാര്യത്തിൽ നിലവിൽ അന്തിമ തീരുമാനമെടുത്തിട്ടില്ലെന്ന് അഞ്ജു ബോബി ജോർജ് ഏഷ്യാനെറ്റ് ന്യൂസിനോട് പറഞ്ഞു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

പഞ്ചാബിലെ ഭക്ഷ്യവിഷബാധ ആരോഗ്യത്തെ ബാധിച്ചു, പരിശീലനം മുടങ്ങി, ഹൈജംപില്‍ സ്വര്‍ണം നേടാന്‍ ആഷ്‌ന നിര്‍ണായക തീരുമാനമെടുത്തു, അത്‌ ക്ലിക്കായി

Web Desk — Fri, 30 Oct 2026 22:46:39 +0530

കോഴിക്കോട്‌: ചില നേട്ടങ്ങള്‍ കൈവരിക്കാന്‍ മറ്റു ചിലത്‌ നമുക്ക്‌ ഉപേക്ഷിക്കേണ്ടി വരും. ആരോഗ്യപ്രശ്‌നങ്ങള്‍ അലട്ടിയതോടെ കായിക മേളയില്‍ ഇടുക്കി സ്വദേശി ആഷ്‌ന കടകശ്ശേരി ഇങ്ങനെ ചിന്തിച്ചു. ഫലമോ, 100 മീറ്റര്‍ ഹര്‍ഡില്‍സ്‌ മത്സരങ്ങളില്‍ നിന്ന്‌ പിന്‍മാറി സീനിയര്‍ പെണ്‍കുട്ടികളുടെ ഹൈജംപില്‍ മാത്രം ആഷ്‌ന ശ്രദ്ധ കേന്ദ്രീകരിച്ചു.1.55 മീറ്റര്‍ ഉയരം ചാടി ആഷ്‌ന വിസ്‌മയിപ്പിച്ചു;സ്വര്‍ണമണിഞ്ഞു.

കടകശ്ശേരി ഐഡിയല്‍ ഇ എച്ച്‌ എസ്‌ എസില്‍ പ്ലസ്‌ വണ്‍ കൊമേഴ്‌സ്‌ വിദ്യാര്‍ഥിയായ ആഷ്‌ന ഭക്ഷ്യവിഷബാധയെ തുടര്‍ന്നുണ്ടായ ആരോഗ്യപ്രശ്‌നങ്ങള്‍ കാരണം വലഞ്ഞിരുന്നു. പഞ്ചാബില്‍ നടന്ന ദേശീയ യൂത്ത്‌ അത്‌ലറ്റിക്‌ മീറ്റിനിടെയായിരുന്നു ഭക്ഷ്യവിഷബാധയേറ്റത്‌. തുടര്‍ന്ന്‌ ഏറെക്കാലം പരിശീലനം മുടങ്ങി.

ഇടയ്‌ക്കിടെ പനിയും മറ്റ്‌ ആരോഗ്യപ്രശ്‌നങ്ങളും അലട്ടിയതോടെ കായിക മേളക്കുള്ള ഒരുക്കം ആരംഭിച്ചത്‌ രണ്ടാഴ്‌ച മുമ്പായിരുന്നു. ഇതോടെ, ഹൈജംപില്‍ മാത്രമായി ശ്രദ്ധ. ഏഴാം ക്ലാസ്‌ മുതല്‍ സംസ്ഥാനതല ഹൈജംപ്‌ മത്സരങ്ങളില്‍ പങ്കെടുക്കുന്ന ആഷ്‌നയ്‌ക്ക്‌ 2022, 2023, 2024 വര്‍ഷങ്ങളില്‍ വെങ്കലമായിരുന്നു. കഴിഞ്ഞ വര്‍ഷം വെള്ളി മെഡലായി ഉയര്‍ന്നു. ഇത്തവണ, പ്രതിസന്ധികള്‍ ഏറെയുണ്ടായിരുന്നെങ്കിലും ആഷ്‌ന സ്വര്‍ണം സ്വന്തമാക്കി. ടോമി ചെറിയാന്‍, നാദിഷ്‌ ചാക്കോ, ഹാരി എന്നിവരാണ്‌ പരിശീലനം നല്‍കിയത്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

പ്രൈം വോളിബോള്‍ ലീഗ്: സീസണ്‍ 5 നവംബര്‍ 30 മുതല്‍ അഹമ്മദാബാദില്‍, വരുന്നത് ലോകോത്തര താരങ്ങള്‍

Web Desk — Wed, 04 Nov 2026 13:59:35 +0530

അഹമ്മദാബാദ്: പ്രൈം വോളിബോള്‍ ലീഗിന്റെ (പിവിഎല്‍) അഞ്ചാം സീസണ്‍ അഹമ്മദാബാദില്‍ അരങ്ങേറും. നരന്‍പുരയിലെ വീര്‍ സവര്‍ക്കര്‍ സ്‌പോര്‍ട്‌സ് കോംപ്ലക്‌സില്‍ 2026 നവംബര്‍ 30 മുതലാണ് മത്സരങ്ങള്‍ ആരംഭിക്കുക. രാജ്യത്തുടനീളം പ്രൊഫഷണല്‍ വോളിബോളിന്റെ സ്വാധീനവും ജനപ്രീതിയും വര്‍ദ്ധിപ്പിക്കുകയെന്ന ലീഗിന്റെ ലക്ഷ്യവുമായി ഒരു മാസം നീണ്ടുനില്‍ക്കുന്ന കായിക മാമാങ്കത്തില്‍ അന്താരാഷ്ട്ര പ്രതിഭകള്‍ക്കൊപ്പം ഇന്ത്യയിലെ മുന്‍നിര വോളിബോള്‍ താരങ്ങളും മാറ്റുരയ്ക്കും.

2030 കോമണ്‍വെല്‍ത്ത് ഗെയിംസിനായുള്ള ഒരുക്കങ്ങളും 2036 ഒളിമ്പിക് ഗെയിംസിന് ആതിഥേയത്വം വഹിക്കാനുള്ള ശ്രമങ്ങളായി അഹമ്മദാബാദ് ഒരു പ്രധാന കായിക കേന്ദ്രമായി സ്വയം ശക്തിപ്പെടുന്നതിനിടെയാണ് പ്രൈം വോളിബോള്‍ ലീഗ് സീസണ്‍ 5 ന്റെ വേദി പ്രഖ്യാപനം. നഗരത്തിന്റെ അന്താരാഷ്ട്ര കായിക അടിസ്ഥാന സൗകര്യങ്ങളുടെ ഭാഗമായി വിഭാവനം ചെയ്ത വീര്‍ സവര്‍ക്കര്‍ സ്‌പോര്‍ട്‌സ് കോംപ്ലക്‌സ്, ഇന്ത്യയിലെ മുന്‍നിര പ്രൊഫഷണല്‍ വോളിബോള്‍ ലീഗിന് അനുയോജ്യമായ വേദിയാണ് ഒരുക്കുന്നത്. കഴിഞ്ഞ സീസണിലെ പോലെ ഇത്തവണയും പത്ത് ടീമുകള്‍ കിരീടത്തിനായി മാറ്റുരയ്ക്കും. അഹമ്മദാബാദ് ഡിഫന്‍ഡേഴ്സ്, ബെംഗളൂരു ടോര്‍പ്പിഡോസ്, കാലിക്കറ്റ് ഹീറോസ്, ചെന്നൈ ബ്ലിറ്റ്‌സ്, ഡല്‍ഹി തൂഫാന്‍സ്, ഗോവ ഗാര്‍ഡിയന്‍സ്, കൊച്ചി ബ്ലൂ സ്‌പൈക്കേഴ്സ്, കൊല്‍ക്കത്ത തണ്ടര്‍ബോള്‍ട്ട്‌സ്, മുംബൈ മിറ്റിയോര്‍സ്, തെലുങ്ക് ബ്ലാക്ക് ഹോക്‌സ് ടീമുകളാണ് മത്സരിക്കുക. ബെംഗളൂരു ടോര്‍പ്പിഡോസ് ആണ് നിലവിലെ ചാമ്പ്യന്മാര്‍.

ഈ വര്‍ഷം ആദ്യം, ഫെഡറേഷന്‍ ഇന്റര്‍നാഷണല്‍ ഡി വോളിബോള്‍ (എഫ്ഐവിബി) ഇന്ത്യയിലെ ഒന്നാം ഡിവിഷന്‍ പ്രൊഫഷണല്‍ വോളിബോള്‍ ലീഗായി പിവിഎലിനെ അംഗീകരിച്ചിരുന്നു. ഇതിനിടയില്‍, 2026 ഏഷ്യന്‍ ഗെയിംസ്, എവിസി കോണ്ടിനെന്റല്‍ കപ്പ് ജപ്പാന്‍, അഹമ്മദാബാദില്‍ നടന്ന എവിസി പുരുഷ കപ്പ് എന്നിവയുള്‍പ്പെടെയുള്ള അന്താരാഷ്ട്ര മത്സരങ്ങളിലെ മികച്ച പ്രകടനങ്ങളെത്തുടര്‍ന്ന് എഫ്ഐവിബി റാങ്കിംഗില്‍ ഇന്ത്യന്‍ പുരുഷ ദേശീയ ടീം ലോക റാങ്കിംഗില്‍ 60-ാം സ്ഥാനത്തുനിന്ന് 42-ാം സ്ഥാനത്തേക്ക് ഉയരുകയും ചെയ്തു.

സീസണ്‍ 5 അഹമ്മദാബാദിലേക്ക് എത്തിക്കുന്നത് ഇന്ത്യയിലുടനീളം പ്രൊഫഷണല്‍ വോളിബോള്‍ വളര്‍ത്താനുള്ള ഞങ്ങളുടെ യാത്രയിലെ മറ്റൊരു സുപ്രധാന ചുവടുവയ്പ്പാണെന്ന്

പ്രൈം വോളിബോള്‍ ലീഗ് സിഇഒ ജോയ് ഭട്ടാചാര്യ പറഞ്ഞു. അഹമ്മദാബാദിന്റെ വളര്‍ന്നുവരുന്ന കായിക അഭിലാഷങ്ങളും ഇന്ത്യന്‍ പുരുഷ ദേശീയ ടീമിന്റെ മുന്നേറ്റവും കണക്കിലെടുക്കുമ്പോള്‍, പിവിഎലിനെ ഈ നഗരത്തിലേക്ക് കൊണ്ടുവരാന്‍ ഏറ്റവും ആവേശകരമായ സമയമാണിതെന്ന് ഞങ്ങള്‍ വിശ്വസിക്കുന്നുവെന്നും അദ്ദേഹം കൂട്ടിച്ചേര്‍ത്തു. പ്രൈം വോളിബോള്‍ ലീഗിനെ അഹമ്മദാബാദിലേക്ക് സ്വാഗതം ചെയ്യുന്നതില്‍ ഞങ്ങള്‍ക്ക് ഏറെ അഭിമാനമുണ്ടെന്ന് അഹമ്മദാബാദ് ഡിഫന്‍ഡേഴ്സ് ഉടമ പ്രവീണ്‍ ചൗധരി പറഞ്ഞു. വീര്‍ സവര്‍ക്കര്‍ സ്‌പോര്‍ട്‌സ് കോംപ്ലക്‌സില്‍ പിവിഎല്‍ സംഘടിപ്പിക്കുന്നത് നഗരത്തിന്റെ കായിക ശേഷി പ്രകടിപ്പിക്കാനുള്ള മറ്റൊരു മികച്ച അവസരമാണെന്ന് ബേസ്ലൈന്‍ വെഞ്ചേഴ്സ് എംഡിയും സഹസ്ഥാപകനും പ്രൈം വോളിബോള്‍ ലീഗ് ഡയറക്ടറുമായ തുഹിന്‍ മിശ്ര പറഞ്ഞു.

സ്കൂൾ കായികമേളയിൽ 2012 പോയിന്റോടെ തിരുവനന്തപുരം ഓവറോൾ ചാമ്പ്യന്മാർ; അത്‌ലറ്റിക്‌സിൽ മലപ്പുറത്തിന് ഹാട്രിക് കിരീടം, അടുത്ത മേള കൊല്ലത്ത്

Prabeesh PP — Sat, 31 Oct 2026 18:03:33 +0530

തിരുവനന്തപുരം: സംസ്ഥാന സ്കൂൾ കായികമേളയിൽ ആധിപത്യം ഉറപ്പിച്ച് തിരുവനന്തപുരം ജില്ല ഓവറോൾ ചാമ്പ്യന്മാരായി. അത്‌ലറ്റിക്‌സിലും ഗെയിംസ് ഇനങ്ങളിലും ഒരുപോലെ മിന്നുന്ന പ്രകടനം കാഴ്ചവെച്ച തിരുവനന്തപുരം 2012 പോയിന്റ് എന്ന റെക്കോർഡ് പോയിന്റോടെയാണ് അഭിമാനകരമായ ഓവറോൾ കിരീടം സ്വന്തമാക്കിയത്.അതേസമയം, അത്‌ലറ്റിക്‌സിൽ മലപ്പുറം ജില്ലയ്ക്ക് തുടർച്ചയായ മൂന്നാം വർഷവും ഹാട്രിക് കിരീടം നേടാനായി. സ്‌കൂളുകളിൽ മലപ്പുറം കടകശേരി ഐഡിയൽ ഇ.എച്ച്.എസ്.എസും, സ്പോർട്സ് ഹോസ്റ്റൽ വിഭാഗത്തിൽ തിരുവനന്തപുരം ജി.വി രാജയും ചാമ്പ്യന്മാരായി. അടുത്ത വർഷത്തെ സംസ്ഥാന സ്കൂൾ കായികമേള കൊല്ലത്ത് വെച്ച് നടത്തുമെന്ന് പുരസ്‌കാര വിതരണ വേളയിൽ പൊതുവിദ്യാഭ്യാസ മന്ത്രി ഔദ്യോഗികമായി പ്രഖ്യാപിച്ചു.

2012 പോയിന്റുമായി തലസ്ഥാനത്തിന്റെ രാജകീയ മുന്നേറ്റം

ഗെയിംസ് മത്സരങ്ങളിലെ വൻ ആധിപത്യമാണ് തിരുവനന്തപുരത്തിന് ചരിത്രപരമായ ഓവറോൾ കിരീടം നേടിക്കൊടുത്തത്. ഓരോ ഇനത്തിലും മികച്ച പോയിന്റുകൾ ശേഖരിച്ച തിരുവനന്തപുരം എതിരാളികളെ ബഹുദൂരം പിന്നിലാക്കിയാണ് 2012 പോയിന്റോടെ ഓവറോൾ ചാമ്പ്യൻമാർക്കുള്ള ട്രോഫി ഏറ്റുവാങ്ങിയത്.

200 പോയിന്റ് കടന്ന് മലപ്പുറം അത്‌ലറ്റിക്‌സ് ചാമ്പ്യന്മാർ

അത്‌ലറ്റിക്‌സ് വിഭാഗത്തിൽ 200 പോയിന്റ് കടക്കുന്ന ഏക ജില്ലയായി മാറിയാണ് മലപ്പുറം മൂന്നാം വർഷവും കിരീടത്തിൽ മുത്തമിട്ടത്. മേളയിലെ അവസാന ഇനമായ സീനിയർ ആൺകുട്ടികളുടെ 4x400 മീറ്റർ റിലേയിൽ മീറ്റ് റെക്കോർഡോടെ സ്വർണം നേടിയാണ് മലപ്പുറം നേട്ടം ആഘോഷമാക്കിയത്. കടക്കശേരി ഐഡിയൽ സ്കൂളിന്റെയും മൂന്നാം ആലത്തിയൂർ KHMH സ്കൂളിന്റെയും മികച്ച പ്രകടനമാണ് മലപ്പുറത്തിന് അത്‌ലറ്റിക്‌സ് കിരീടം കാത്തുസൂക്ഷിക്കാൻ കരുത്തായത്.

പുഴു വിവാദത്തില്‍ കസ്റ്റഡിയിലായ കായികാധ്യാപകന്റെ ശിഷ്യ ഹാമര്‍ത്രോയില്‍ സ്വര്‍ണം നേടി; ഗ്രൗണ്ടില്‍ വേറിട്ട പ്രതിഷേധ പ്രകടനം

Vipulnath P — Sat, 31 Oct 2026 16:40:34 +0530

കോഴിക്കോട്‌: ഭക്ഷണത്തിലെ പുഴുവിവാദവുമായി ബന്ധപ്പെട്ട്‌ കസ്റ്റഡിയിലായ കായികാധ്യാപകന്‍ ജിജോ ജെയിംസിന്‌ കായിക മേളയില്‍ വേറിട്ടൊരു ഐക്യദാര്‍ഢ്യ പ്രഖ്യാപനം. ജൂനിയര്‍ ഗേള്‍സ്‌ ഹാമര്‍ത്രോയില്‍ തുടര്‍ച്ചയായ രണ്ടാം വര്‍ഷവും സ്വര്‍ണം നേടിയ മരിയ അലോഷ്യ ജസ്‌റ്റിനാണ്‌ തന്റെ പ്രിയപ്പെട്ട അധ്യാപകന്‌ വേണ്ടി ശബ്ദമുയര്‍ത്തിയത്‌. 45.91 മീറ്റര്‍ ദൂരം എറിഞ്ഞ്‌ സ്വര്‍ണം ഉറപ്പിച്ചതോടെ മരിയ തന്റെ ഉള്ളിലെ പ്രതിഷേധാഗ്നി ത്രോ ചെയ്‌തു!. ജസ്റ്റിസ്‌ ഫോര്‍ കോച്ച്‌ എന്ന പ്ലക്കാര്‍ഡ്‌ ഉയര്‍ത്തിയായിരുന്നു മരിയ അലോഷ്യ ജസ്‌റ്റിന്‍ തന്റെ കോച്ചിനെതിരായ പോലീസ്‌ നടപടിയോട്‌ പ്രതിഷേധിച്ചത്‌.

ഭക്ഷണത്തില്‍ പുഴുവിനെ കണ്ടുവെന്ന ആരോപണം ഉന്നയിച്ച എറണാകുളം വെസ്റ്റ്‌ വെങ്ങോല ശാലോം വി എച്ച്‌ എസ്‌ എസിലെ കായികാധ്യാപകന്‍ ജിജോ ജെയിംസ്‌ പോലീസ്‌ കസ്‌റ്റഡിയിലാണ്‌. തന്റെ പരിശീലകന്‍ നിരപരാധിയാണെന്നും അദ്ദേഹത്തിന്‌ നീതി ലഭിക്കണമെന്നും മരിയ പറഞ്ഞു. നാല്‌ വര്‍ഷമായി ജിജോ ജെയിംസിന്റെ കീഴിലാണ്‌ മരിയ പരിശീലനം നടത്തുന്നത്‌. എറണാകുളം വെസ്റ്റ്‌ വെങ്ങോല വി എച്ച്‌ എസ്‌ എസിലെ പ്ലസ്‌ വണ്‍ കൊമേഴ്‌സ്‌ വിദ്യാര്‍ഥിനിയാണ്‌ മരിയ. ആലപ്പുഴ കലവൂരാണ്‌ സ്വദേശം. 2024 ലെ മത്സരത്തില്‍ ആറാം സ്ഥാനത്തായിരുന്നു. അമ്മ ഷര്‍ളി നഴ്‌സാണ്‌. അച്ഛന്‍ ജസ്റ്റിന്‍ ആന്റണി.

പുഴുവിവാദത്തില്‍ അധ്യാപകനെതിരെ അന്വേഷണം ഊര്‍ജിതപ്പെടുത്തിയിട്ടുണ്ട്‌. ജിജോ ജെയിംസിന്റെ ഫോണ്‍ അന്വേഷണ സംഘം കസ്‌റ്റഡിയിലെടുത്തു. ഫോണ്‍ ഫൊറന്‍സിക്‌ സയന്‍സ്‌ ലബോറട്ടറിയിലെ സൈബര്‍ വിഭാഗത്തിന്‌ കൈമാറും. അധ്യാപകന്റെ കോള്‍ ഡീറ്റെയില്‍ റെക്കോര്‍ഡും പോലീസ്‌ ശേഖരിച്ചിട്ടുണ്ട്‌. ഊട്ടുപുരയിലെ സി സി ടി വി ദൃശ്യങ്ങളും പരിശോധിക്കും. വളരെ ആസൂത്രിതമായാണ്‌ സംഭവങ്ങള്‍ ടന്നതെന്ന സംശയത്തിന്റെ അടിസ്ഥാനത്തില്‍ ഗൂഢാലോചന സാധ്യതയും അന്വേഷണ സംഘം തള്ളിക്കളയുന്നില്ല.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഇന്ത്യൻ ഒളിമ്പിക് അസോസിയേഷൻ തിരഞ്ഞെടുപ്പ്: പി.ടി ഉഷയെ പുറന്തള്ളാൻ അണിയറ നീക്കം ശക്തം, ഐഒഎയ്ക്ക് പരാതി

Web Desk — Mon, 09 Nov 2026 00:21:45 +0530

ന്യൂഡൽഹി: ഇന്ത്യൻ ഒളിമ്പിക് അസോസിയേഷൻ തിരഞ്ഞെടുപ്പ് നാളെ നടക്കാനിരിക്കെ, നിലവിലെ അധ്യക്ഷയും മുൻ അത്‌ലറ്റുമായ പി.ടി. ഉഷയ്‌ക്കെതിരെ അണിയറയിൽ വൻ ചരടുവലികൾ. മുൻ ആർച്ചർ ഡോള ബാനർജിയുടെ നേതൃത്വത്തിൽ ഉഷയെ പരാജയപ്പെടുത്താൻ നീക്കം നടക്കുന്നതായാണ് പുറത്തുവരുന്ന വിവരങ്ങൾ. പി.ടി. ഉഷയെ പൂർണ്ണമായും ഒഴിവാക്കിക്കൊണ്ടുള്ള പ്രത്യേക പാനൽ രൂപീകരിച്ച് ഡോള ബാനർജി അംഗങ്ങൾക്കിടയിൽ പ്രചരണം ശക്തമാക്കിയിട്ടുണ്ട്. പ്രമുഖ കായികതാരങ്ങളായ അഞ്ജു ബോബി ജോർജ്ജ്, സൈന നെഹ്‌വാൾ എന്നിവരെ ഉൾപ്പെടുത്തിയാണ് ഡോള പാനൽ തയാറാക്കിയിരിക്കുന്നത്.

'ന്യൂ ഭാരത് പാനൽ' എന്ന പേരിൽ ഒരു സന്ദേശം വാട്‌സ്ആപ്പ് വഴി പ്രചരിപ്പിക്കുകയും പാനൽ അംഗങ്ങൾക്ക് അയച്ചുകൊടുക്കുകയും ചെയ്തിട്ടുണ്ടെന്ന് പി.ടി ഉഷ പക്ഷം ആരോപിക്കുന്നു. ഈ സന്ദേശത്തിന്റെ പകർപ്പ് ഏഷ്യാനെറ്റ് ന്യൂസിന് ലഭിച്ചു. ഡോള ബാനർജിക്കെതിരെ ഇന്ത്യൻ ഒളിമ്പിക് അസോസിയേഷൻ ഇലക്ടറൽ ഓഫീസർക്ക് പി.ടി. ഉഷ ഔദ്യോഗികമായി പരാതി നൽകി. തിരഞ്ഞെടുപ്പ് പെരുമാറ്റച്ചട്ടങ്ങൾ ഡോള ലംഘിച്ചെന്നാണ് ഉഷയുടെ പ്രധാന ആരോപണം. അതേസമയം, ഉഷ വിരുദ്ധ ചേരിയും തിരഞ്ഞെടുപ്പ് ഉദ്യോഗസ്ഥർക്ക് പരാതി നൽകിയതായാണ് സൂചന.

നാളെയാണ് ഇന്ത്യൻ ഒളിമ്പിക് അസോസിയേഷനിലെ നാല് സ്ഥാനങ്ങളിലേക്ക് വോട്ടെടുപ്പ് നടക്കുന്നത്. ഈ നാല് സ്ഥാനങ്ങളിലേക്കായി ആറ് മുൻ വനിതാ താരങ്ങളാണ് മത്സരരംഗത്തുള്ളത്. തിരഞ്ഞെടുപ്പിൽ ആകെ 80 കായികതാരങ്ങൾക്കാണ് വോട്ടവകാശമുള്ളത്. നാളത്തെ വോട്ടെടുപ്പിൽ പരാജയപ്പെട്ടാൽ പി.ടി. ഉഷയ്ക്ക് ഇന്ത്യൻ ഒളിമ്പിക് അസോസിയേഷൻ പ്രസിഡന്റ് സ്ഥാനത്തേക്ക് മത്സരിക്കാൻ സാധിക്കില്ല. കഴിഞ്ഞ ദിവസം വരെ മത്സരത്തിൽ പി.ടി. ഉഷയ്ക്ക് വ്യക്തമായ മേൽക്കൈ ഉണ്ടെന്നായിരുന്നു വിലയിരുത്തൽ. എന്നാൽ അവസാന നിമിഷത്തെ അണിയറനീക്കങ്ങൾ വലിയ ആശയക്കുഴപ്പത്തിന് വഴിവെച്ചിട്ടുണ്ട്. ഇതിനിടെ, വോട്ടർമാരായ അംഗങ്ങളെ സ്വാധീനിക്കാൻ ശ്രമങ്ങൾ നടക്കുന്നതായും ആരോപണമുയർന്നിട്ടുണ്ട്. കേരള ഒളിമ്പിക് അസോസിയേഷൻ പ്രസിഡന്റ് സുനിൽ കുമാറിന്റെ നേതൃത്വത്തിലാണ് ഇത്തരം ശ്രമങ്ങൾ നടക്കുന്നതെന്നാണ് പുറത്തുവരുന്ന വിവരം.

യൂത്ത് ഒളിംപിക്‌സ്: ഇന്ത്യക്ക് ചരിത്ര നേട്ടം, നീന്തലില്‍ ധിനിധി ദേശിംഗു രാജ്യത്തിന് ആദ്യ മെഡല്‍ സമ്മാനിച്ചു

Web Desk — Tue, 03 Nov 2026 18:54:54 +0530

ഡാക്കര്‍: ബജാജ് ഫിന്‍സെര്‍വിന്റെ പിന്തുണയോടെ മത്സരിക്കുന്ന ഇന്ത്യന്‍ താരം ധിനിധി ദേശിംഗു യൂത്ത് ഒളിമ്പിക്സ് നീന്തല്‍ മത്സരത്തില്‍ രാജ്യത്തിന് ചരിത്രത്തിലെ ആദ്യ മെഡല്‍ സമ്മാനിച്ചു. ഡാക്കര്‍ 2026 യൂത്ത് ഒളിമ്പിക്സില്‍ വനിതകളുടെ 100 മീറ്റര്‍ ഫ്രീസ്‌റ്റൈലില്‍ 56.27 സെക്കന്‍ഡില്‍ ഫിനിഷ് ചെയ്ത 16കാരി ദേശീയ റെക്കോര്‍ഡോടെ വെങ്കലം നേടി. ക്രൊയേഷ്യയുടെ അന ബൊബനോവിച്ച് (55.89 സെക്കന്‍ഡ്), ന്യൂസിലന്‍ഡിന്റെ അലിസ ലോസണ്‍ (56.13 സെക്കന്‍ഡ്) എന്നിവരാണ് യഥാക്രമം സ്വര്‍ണവും വെള്ളിയും നേടിയത്. യൂത്ത് ഒളിമ്പിക്സ് നീന്തല്‍ ഫൈനലിലെത്തുന്ന ആദ്യ ഇന്ത്യന്‍ വനിതാ താരമെന്ന നേട്ടവും ബെംഗളൂരുവില്‍ നിന്നുള്ള ധിനിധി സ്വന്തമാക്കി.

2024ലെ പാരിസ് ഒളിമ്പിക്സില്‍ ഇന്ത്യയുടെ ഏറ്റവും പ്രായം കുറഞ്ഞ താരമായിരുന്നു ധിനിധി. ഒരിക്കല്‍ നീന്തലിനോട് ഭയമുണ്ടായിരുന്ന താരം ഇന്ന് രാജ്യത്തെ മികച്ച നീന്തല്‍ താരങ്ങളിലൊരാളായി വളര്‍ന്നിരിക്കുകയാണ്. ഈ വര്‍ഷം മുതലാണ് ബജാജ് ഫിന്‍സെര്‍വ് ധിനിധിക്ക് പിന്തുണ നല്‍കിത്തുടങ്ങിയത്. പരിശീലനം, മത്സരങ്ങളില്‍ പങ്കെടുക്കാനുള്ള അവസരങ്ങള്‍, കായിക ഉപകരണങ്ങള്‍, ശാരീരികക്ഷമത, പരിക്കുകള്‍ക്കും കഠിന പരിശീലനത്തിനും ശേഷമുള്ള വീണ്ടെടുക്കല്‍ തുടങ്ങിയ മേഖലകളിലാണ് കമ്പനിയുടെ സഹായം. നീന്തല്‍, ബാഡ്മിന്റണ്‍, ടെന്നീസ് എന്നീ കായിക ഇനങ്ങളിലെ യുവതാരങ്ങളെ ദീര്‍ഘകാലാടിസ്ഥാനത്തില്‍ പിന്തുണയ്ക്കുന്നതിന്റെ ഭാഗമായാണ് ധിനിധിയെയും പദ്ധതിയില്‍ ഉള്‍പ്പെടുത്തിയത്.

ധിനിധിയുടെ ചരിത്രനേട്ടം ഇന്ത്യയുടെ അഭിമാന നിമിഷമാണെന്നും വലിയ സ്വപ്നങ്ങള്‍ കാണുന്ന യുവ കായികതാരങ്ങള്‍ക്ക് ഇത് പ്രചോദനമാകുമെന്നും ബജാജ് ഫിന്‍സെര്‍വ് ലിമിറ്റഡ് ഗ്രൂപ്പ് ചീഫ് മാര്‍ക്കറ്റിങ് ഓഫീസറും ബജാജ് ഫിനാന്‍സ് ലിമിറ്റഡ് ഡിജിറ്റല്‍ പ്ലാറ്റ്ഫോംസ് പ്രസിഡന്റുമായ മാനവ് മിയാന്‍വാള്‍ പറഞ്ഞു. വര്‍ഷങ്ങളുടെ കഠിനാധ്വാനവും ത്യാഗവും അസാധാരണമായ നിശ്ചയദാര്‍ഢ്യവുമാണ് ഈ മെഡല്‍ നേട്ടത്തിന് പിന്നിലെന്നും വ്യക്തിഗത മികവിനൊപ്പം കൂട്ടായ പിന്തുണ ലഭിച്ചാല്‍ ഇന്ത്യന്‍ താരങ്ങള്‍ക്ക് ലോകത്തിലെ മികച്ചവരോട് മത്സരിക്കാനാകുമെന്ന് ധിനിധിയുടെ നേട്ടം തെളിയിക്കുന്നതായും അദ്ദേഹം പറഞ്ഞു. താരത്തിന്റെ കായികയാത്രയില്‍ പങ്കാളികളാകാന്‍ കഴിഞ്ഞതില്‍ അഭിമാനമുണ്ടെന്നും ധിനിധിക്കും കുടുംബത്തിനും പരിശീലകര്‍ക്കും അഭിനന്ദനങ്ങള്‍ അറിയിക്കുന്നതായും അദ്ദേഹം വ്യക്തമാക്കി.

രാജ്യത്ത് ഏതാനും കായിക ഇനങ്ങള്‍ക്കു മാത്രമാണ് വലിയ ശ്രദ്ധയും സാമ്പത്തിക പിന്തുണയും ലഭിക്കുന്നതെന്നും പ്രതിഭയുള്ള നിരവധി യുവതാരങ്ങള്‍ക്ക് കഴിവ് തെളിയിക്കാനുള്ള അവസരങ്ങളും ആവശ്യമായ പിന്തുണയും ലഭിക്കുന്നില്ലെന്നും കമ്പനി ചൂണ്ടിക്കാട്ടി. കരിയറിന്റെ തുടക്കത്തില്‍ തന്നെ താരങ്ങള്‍ക്ക് പിന്തുണ നല്‍കുന്നതിലൂടെ കുടുംബങ്ങളുടെ സാമ്പത്തിക ബാധ്യത കുറയ്ക്കാനും പരിശീലനത്തിലും പ്രകടനം മെച്ചപ്പെടുത്തുന്നതിലും ശ്രദ്ധ കേന്ദ്രീകരിക്കാന്‍ അവരെ സഹായിക്കാനുമാണ് ലക്ഷ്യമിടുന്നത്. ഓരോ മെഡല്‍ നേട്ടത്തിനും പിന്നില്‍ താരത്തിന്റെ വ്യക്തിഗത മികവിനൊപ്പം കുടുംബം, പരിശീലകര്‍, പിന്തുണ നല്‍കുന്നവര്‍ എന്നിവരുടെ കൂട്ടായ പരിശ്രമവുമുണ്ടെന്നും കമ്പനി വ്യക്തമാക്കി.

ധിനിധിക്കു പുറമെ കൂടുതല്‍ നീന്തല്‍ താരങ്ങള്‍ക്കും കമ്പനി പിന്തുണ നല്‍കും. യുവ ബാഡ്മിന്റണ്‍ താരങ്ങളെയും പ്രോത്സാഹിപ്പിക്കുന്നുണ്ട്. തമിഴ്നാട് ടെന്നീസ് അസോസിയേഷനുമായുള്ള സഹകരണത്തിലൂടെ ദിയ രമേഷ് (റാങ്കിങ് 3), ദീപ്ശിഖ വിനയഗമൂര്‍ത്തി (4), സാവിത ഭുവനേശ്വരന്‍ (5), ശ്രീ ശൈലേശ്വരി വെല്‍മണികണ്ഠന്‍ (19) എന്നീ നാല് യുവ ടെന്നീസ് താരങ്ങള്‍ക്കും സഹായം നല്‍കുന്നുണ്ട്. മികച്ച പരിശീലനം, പരിശീലന സൗകര്യങ്ങള്‍, മത്സരാവസരങ്ങള്‍, കായിക ഉപകരണങ്ങള്‍, പോഷകാഹാരം, ഫിറ്റ്‌നസ് പിന്തുണ എന്നിവയ്‌ക്കൊപ്പം യാത്ര, താമസ ചെലവുകള്‍ക്കും കമ്പനി സഹായം നല്‍കുന്നു.