Asianet News Malayalam

ഏഷ്യൻ ഗെയിംസ് ഭാരോദ്വഹനത്തിൽ ചരിത്രമെഴുതി മീരാബായ് ചാനു; 28 വർഷത്തെ കാത്തിരിപ്പിന് ശേഷം ഇന്ത്യക്ക് വെള്ളിത്തിളക്കം

Gopalakrishnan C — Wed, 23 Sep 2026 14:29:43 +0530

നഗോയ (ജപ്പാൻ): ഏഷ്യൻ ഗെയിംസില്‍ ചരിത്ര മെഡൽ സ്വന്തമാക്കി ഇന്ത്യൻ സൂപ്പർതാരം സാഖോം മീരാബായ് ചാനു. വനിതകളുടെ 49 കിലോഗ്രാം വിഭാഗം ഭാരോദ്വഹനത്തില്‍ വെള്ളി മെഡൽ നേടിയാണ് മീരാബായ് ചാനു ചരിത്രനേട്ടം സ്വന്തമാക്കിയത്. ആകെ 198 കിലോഗ്രാം ഉയർത്തിയാണ് ചാനുവിന്‍റെ നേട്ടം. ഏഷ്യൻ ഗെയിംസ് ഭാരോദ്വഹനത്തില്‍ 28 വർഷത്തെ കാത്തിരിപ്പിനുശേഷമാണ് ഇന്ത്യ മെഡല്‍ നേടുന്നത്. 1998-ൽ ബാങ്കോക്ക് ഏഷ്യൻ ഗെയിംസിൽ കർണം മല്ലേശ്വരി വെള്ളി മെഡൽ നേടിയതിന് ശേഷം ആദ്യമായാണ് ഒരു ഇന്ത്യൻ വെയ്റ്റ്‌ലിഫ്റ്റിംഗ് താരം ഏഷ്യൻ ഗെയിംസിൽ മെഡൽ നേടുന്നത്.

ആകെ 215 കിലോഗ്രാം ഉയർത്തിയ വടക്കൻ കൊറിയയുടെ റീ സോങ് ഗം തുടർച്ചയായ മൂന്നാം ഏഷ്യൻ ഗെയിംസ് സ്വർണം സ്വന്തമാക്കി. 191 കിലോഗ്രാം ഉയർത്തിയ ഇന്തോനേഷ്യയുടെ ലുലുക് ഡയാന തൃ വിജയാനയ്ക്കാണ് വെങ്കലം. സ്നാച്ചിൽ മൂന്ന് ശ്രമങ്ങളും വിജയകരമായി പൂർത്തിയാക്കി 87 കിലോഗ്രാം ഉയർത്തിയാണ് ചാനു പോരാട്ടം തുടങ്ങിയത്. തുടർന്ന് ക്ലീൻ ആൻഡ് ജെർക്കിൽ രണ്ടാം ശ്രമത്തിൽ 111 കിലോഗ്രാം ഉയർത്തിയതോടെ ആകെ 198 കിലോഗ്രാമോടെ ചാനു വെള്ളി മെഡൽ ഉറപ്പിച്ചു. ലോക റെക്കോർഡ് പ്രകടനത്തോടെയാണ് റീ സോങ് ഗം സ്വർണത്തിലേക്ക് എത്തിയത്.

ഒളിമ്പിക്‌സ്, ലോക ചാമ്പ്യൻഷിപ്പ്, കോമൺവെൽത്ത് ഗെയിംസ് (തുടർച്ചയായി മൂന്ന് സ്വർണം) എന്നിവയിലെല്ലാം മെഡൽ തിളക്കമുണ്ടായിരുന്ന ചാനുവിന്റെ കരിയറിൽ ഏഷ്യൻ ഗെയിംസ് മെഡൽ മാത്രം വിട്ടുനിൽക്കുകയായിരുന്നു. 2014 ഇഞ്ചിയോണിൽ ഒൻപതാം സ്ഥാനം, 2018 ജക്കാർത്തയിൽ പരിക്കുമൂലം പിൻമാറ്റം, 2023 ഹാംഗ്ഷൗവിൽ പരിക്കേറ്റ് നാലാം സ്ഥാനം എന്നിങ്ങനെ കയ്പേറിയ അനുഭവങ്ങൾ മാത്രമുണ്ടായിരുന്ന ചാനുവിന് നഗോയയിലെ ഈ മെഡൽ മധുരപ്രതികാരമായി മാറി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

പഴങ്കഥയായി പി ടി ഉഷയുടെ 'ലോസ് ഏഞ്ചൽസ്' റെക്കോർഡ്; നഗോയയിൽ ചരിത്രം കുറിച്ച് വിദ്യ രാമരാജ്

Web Desk — Mon, 28 Sep 2026 19:02:30 +0530

നഗോയ (ജപ്പാൻ): വനിതകളുടെ 400 മീറ്റർ ഹർഡിൽസിൽ ദേശീയ റെക്കോർഡ് തിരുത്തി ഇന്ത്യയുടെ വിദ്യ രാമരാജിന് വെങ്കലം. ഇതിഹാസ താരം പി.ടി. ഉഷയുടെ 42 വർഷം പഴക്കമുള്ള ദേശീയ റെക്കോർഡ് മറികടന്നാണ് 28-കാരിയായ വിദ്യ വെങ്കലം സ്വന്തമാക്കിയത്. 400 മീറ്റർ ഹർഡിൽസ് ഫൈനലിൽ 54.75 സെക്കൻഡിൽ ഫിനിഷ് ചെയ്താണ് വിദ്യ പുതിയ ദേശീയ റെക്കോർഡ് കുറിച്ചത്.

1984-ലെ ലോസ് ഏഞ്ചൽസ് ഒളിമ്പിക്സിൽ പി.ടി. ഉഷ കുറിച്ച 55.42 സെക്കൻഡ് എന്ന റെക്കോർഡാണ് ഇതോടെ പഴങ്കഥയായത്. 2023-ൽ ഹാംഗ്ഷൂവിൽ നടന്ന ഏഷ്യൻ ഗെയിംസിൽ ഉഷയുടെ 55.42 സെക്കൻഡ് എന്ന റെക്കോർഡിനൊപ്പം എത്തുവാൻ വിദ്യയ്ക്ക് സാധിച്ചിരുന്നെങ്കിലും, അത് മറികടക്കാൻ കഴിഞ്ഞിരുന്നില്ല. നഗോയയിൽ തന്‍റെ സമയം 0.67 സെക്കൻഡ് മെച്ചപ്പെടുത്തി, 400 മീറ്റർ ഹർഡിൽസിൽ 55 സെക്കൻഡിൽ താഴെ ഫിനിഷ് ചെയ്യുന്ന ആദ്യ ഇന്ത്യൻ വനിതയായി വിദ്യ മാറി.

18-year-old Mariam Kareem sets a Games Record & Emirati National Record of 54.31s to win 400mH GOLD at the Asian Games! Adelina Zems 54.58 (PB) Vithya Ramraj 54.75 (NR) pic.twitter.com/VhZIQONWz7

— Track & Field Gazette (@TrackGazette) September 28, 2026

നഗോയ ഏഷ്യൻ ഗെയിംസിൽ വിദ്യ നേടുന്ന രണ്ടാമത്തെ മെഡലാണിത്. നേരത്തെ മിക്സഡ് 4x400 മീറ്റർ റിലേയിൽ വെള്ളി മെഡൽ നേടിയ ഇന്ത്യൻ സംഘത്തിലും വിദ്യ പങ്കാളിയായിരുന്നു. തുടർച്ചയായ രണ്ട് ഏഷ്യൻ ഗെയിംസുകളിലും 400 മീറ്റർ ഹർഡിൽസിൽ വെങ്കലം നേടാനും തമിഴ്നാട് താരത്തിനായി. മത്സരത്തിൽ 54.31 സെക്കൻഡിൽ ഫിനിഷ് ചെയ്ത് ഏഷ്യൻ ഗെയിംസ് റെക്കോർഡോടെ യു.എ.ഇയുടെ മറിയം കരീം സ്വർണവും കസാഖ്സ്ഥാന്റെ അഡെലിന സെംസ് (54.58 സെക്കൻഡ്) വെള്ളിയും നേടി. മത്സരത്തിനിറങ്ങിയ മറ്റൊരു ഇന്ത്യൻ താരമായ അനു രാഘവൻ 55.88 സെക്കൻഡിൽ ഫിനിഷ് ചെയ്ത് അഞ്ചാം സ്ഥാനത്തെത്തി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഏഷ്യൻ ഗെയിംസിൽ മലയാളിക്ക് ചരിത്ര മെഡൽ; ഷൂട്ടിംഗിൽ വിദർശ കെ വിനോദിന് വെള്ളി

Web Desk — Sun, 20 Sep 2026 10:08:46 +0530

ടോക്കിയോ: ഏഷ്യൻ ഗെയിംസിൽ മലയാളിക്ക് ചരിത്ര മെഡൽ. ഷൂട്ടിംഗിൽ വിദർശ കെ വിനോദ് വെള്ളി മെഡൽ നേടി. ഏഷ്യൻ ഗെയിംസിൽ ഷൂട്ടിംഗ് മെഡൽ നേടുന്ന ആദ്യ മലയാളിയായിരിക്കുകയാണ് വിദർശ. 10 മീറ്റർ എയർ റൈഫിൾ ടീം ഇനത്തിലാണ് വിദർശയ്ക്ക് മെഡൽ ലഭിച്ചത്. കോഴിക്കോട് തിരുവമ്പാടി സ്വദേശി ആണ് വിദർശ.

വിദർശ അടക്കം മൂന്ന് പേരടങ്ങുന്ന ടീമാണ് മെഡൽ നേടിയത്. വിദർശയുടെ ആദ്യത്തെ ഏഷ്യൻ ഗെയിംസാണിത്. ആദ്യമായി പങ്കെടുത്ത ഏഷ്യൻ ഗെയിംസിൽ തന്നെ മെഡൽ ലഭിച്ചതിൽ ഒരുപാടു സന്തോഷമുണ്ടെന്ന് വിദർശ പറഞ്ഞു. കുടുംബത്തിന്‍റെയും കോച്ചിന്‍റെയുമെല്ലാം പിന്തുണയോടെയാണ് ഇവിടെ വരെ എത്താൻ കഴിഞ്ഞതെന്ന് വിദർശ പറഞ്ഞു. 50 മീറ്റർ റൈഫിൾ ഇനത്തിലും വിദർശ മത്സരിക്കുന്നുണ്ട്. ഇന്നത്തെ മെഡൽ വലിയ ആത്മവിശ്വാസം നൽകുന്നുണ്ടെന്ന് വിദർശ പറഞ്ഞു. കേരളത്തിൽ തുടരാൻ ആഗ്രഹമുണ്ടെന്നും കേരളം ജോലി നൽകിയാൽ സ്വീകരിക്കുമെന്നും വിദർശ പറഞ്ഞു.

2018ൽ എൻ സി സി യിലൂടെയാണ് ഷൂട്ടിംഗിലേക്ക് വന്നതെന്ന് വിദർശ പറഞ്ഞു. 2019ൽ ഇത് പ്രൊഫഷനായി തീരുമാനിച്ചു. ഡൽഹിയിലാണ് പ്രധാനമായും ട്രെയിനിങ് നടക്കുന്നത്. കേരളത്തിൽ വട്ടിയൂർക്കാവ് ഷൂട്ടിംഗ് റെയ്ഞ്ചിൽ പ്രാക്ടീസ് ചെയ്യാൻ സൌകര്യമുണ്ട്. എല്ലാ ജില്ലകളിലും അസോസിയേഷനുകളുണ്ടെന്നും മെമ്പർഷിപ്പ് എടുത്ത് പ്രാക്ടീസ് ചെയ്യാവുന്നതാണെന്നും വിദർശ പറഞ്ഞു.

മെഡല്‍ വെടിവെച്ചിടാന്‍ പുലര്‍ച്ചെ എഴുന്നേറ്റ്‌ 50 കിലോമീറ്റര്‍ യാത്ര! ഇന്ത്യന്‍ ഷൂട്ടര്‍മാര്‍ക്ക്‌ ഏഷ്യാഡില്‍ ദുരിതം, പരാതിപ്പെട്ട്‌ പരിശീലകന്‍

Web Desk — Thu, 17 Sep 2026 20:15:26 +0530

നഗോയ: ഏഷ്യന്‍ ഗെയിംസ്‌ സംഘാടനത്തില്‍ കടുത്ത അതൃപ്‌തി പ്രകടിപ്പിച്ച്‌ ഇന്ത്യയുടെ ഷൂട്ടിംഗ്‌ ടീം. ദീര്‍ഘദൂര യാത്രയും യാത്രാ അസൗകര്യങ്ങളുമാണ്‌ മുപ്പതംഗ ഷൂട്ടിംഗ്‌ സ്‌ക്വാഡിനെ വലയ്‌ക്കുന്നത്‌. ഒളിമ്പിക്‌ മെഡല്‍ ജേതാവായ മനു ഭാക്കര്‍, ഏഷ്യന്‍ ഗെയിംസ്‌ മെഡല്‍ ജേതാവ്‌ ഇഷാ സിംഗ്‌ എന്നിവരെല്ലാം തന്നെ കൃത്യസമയത്ത്‌ പരിശീലനം നടത്താന്‍ കഴിയാത്തതില്‍ അസ്വസ്ഥരാണ്‌.

ഷൂട്ടര്‍മാര്‍ താമസിക്കുന്ന ഹോട്ടലുകളില്‍ നിന്നും മത്സരവേദിയായ ഷൂട്ടിംഗ്‌ റേഞ്ചിലേക്ക്‌ രണ്ട്‌ മണിക്കൂറോളം യാത്ര ചെയ്യണം. ഏകദേശം അമ്പത്‌ കിലോമീറ്റര്‍ ദൂരം ഒരു ദിവസം യാത്ര ചെയ്‌താലേ പരിശീലനം സാധ്യമാകൂ. ഇത്‌ കാരണം, താരങ്ങള്‍ക്ക്‌ പുലര്‍ച്ചെ ഉറക്കം ഉണരേണ്ട അവസ്ഥയാണ്‌. ആറ്‌ മണിയോടെ പ്രഭാതഭക്ഷണം കഴിച്ച്‌ യാത്ര തിരിച്ചാലേ പരിശീലന വേദിയില്‍ നിശ്ചയച്ച സമയത്ത്‌ എത്തിച്ചേരാന്‍ കഴിയൂ. താരങ്ങളെല്ലാം തന്നെ പലയിടങ്ങളിലായിട്ടാണ്‌ താസമിക്കുന്നത്‌. ഗെയിംസ്‌ വില്ലേജ്‌ സംവിധാനങ്ങള്‍ ഐചി-നഗോയ ഏഷ്യാഡില്‍ ഒരുക്കിയിട്ടില്ല.

ഇത്‌ കാരണം, താരങ്ങളെല്ലാം ഒരുമിച്ചെത്തിയാലേ പരിശീലന സ്ഥലത്തേക്ക്‌ യാത്ര തിരിക്കാന്‍ കഴിയൂ. സമയക്രമം പാലിക്കാന്‍ വ്യത്യസ്‌ത ഹോട്ടലുകളില്‍ താമസിക്കുന്ന ഇന്ത്യന്‍ താരങ്ങളെല്ലാം ഒരു ഹോട്ടലില്‍ പ്രഭാതഭക്ഷണത്തിനായി ഒത്തുചേരും. അവിടെ നിന്നാണ്‌ എല്ലാവരും ഒരുമിച്ച്‌ ബസില്‍ യാത്ര തിരിക്കുന്നത്‌. താരങ്ങളെല്ലാം കൃത്യസമയം പാലിക്കാറുണ്ടെങ്കിലും കഴിഞ്ഞ ദിവസം യാത്രക്കായി ഏര്‍പ്പാട്‌ ചെയ്‌ത ബസ്‌ വൈകി. ഇത്‌ ഇന്ത്യന്‍ ഷൂട്ടര്‍മാരുടെ പരിശീലന സമയക്രമത്തിന്റെ താളം തെറ്റിച്ചു. ഈ യാത്രപ്രയാസങ്ങളും താമസസ്ഥലത്തെ അസൗകര്യങ്ങളും നാഷണല്‍ റൈഫിള്‍ അസോസിയേഷന്‍ ഓഫ്‌ ഇന്ത്യയെ അറിയിച്ചിട്ടുണ്ടെന്ന്‌ ഷൂട്ടിംഗ്‌ സംഘത്തിലെ കോച്ച്‌ വ്യക്തമാക്കി. സെപ്‌തംബര്‍ 20 മുതലാണ്‌ ഷൂട്ടിംഗ്‌ മത്സരങ്ങള്‍ ആരംഭിക്കുന്നത്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ക്രിക്കറ്റ്‌ താരമാകാന്‍ കൊതിച്ച മധ്യപ്രദേശുകാരന്‍ സോഫ്‌റ്റ്‌ ടെന്നീസിലൂടെ ഏഷ്യന്‍ ഗെയിംസില്‍ ചരിത്രം സൃഷ്ടിച്ചു, അതാണ്‌ ജയ്‌ മീണ..!

Web Desk — Thu, 24 Sep 2026 00:47:35 +0530

നഗോയ: ജയ്‌ മീണ! വിജയഭേരി മുഴക്കുന്ന ആ പേര്‌, ഐചി നഗോയ ഏഷ്യാഡില്‍ ഇന്ത്യയുടെ അഭിമാനമായി; ചരിത്രമായി. ഏഷ്യന്‍ ഗെയിംസില്‍ ആദ്യമായി സോഫ്‌റ്റ്‌ ടെന്നീസില്‍ ഇന്ത്യ ഒരു മെഡല്‍ സ്വന്തമാക്കിയത്‌ ഇരുപത്തിനാലുകാരനായ ജയ്‌ മീണയിലൂടെ.

സെമിയില്‍ ജപ്പാന്റെ തകുയ കുറോസാകയോട്‌ തോറ്റ മധ്യപ്രദേശുകാരന്‍ രാജ്യത്തിന്‌ വെങ്കല മെഡല്‍ ഉറപ്പാക്കിയിരുന്നു. ഇന്ത്യന്‍ ക്രിക്കറ്റ്‌ ടീമില്‍ കളിക്കുക എന്നതായിരുന്നു മീണയുടെ ബാല്യകാല സ്വപ്‌നം. എന്നാല്‍, പഠിച്ചിരുന്ന സ്‌കൂളിലെ സോഫ്‌റ്റ്‌ ടെന്നീസ്‌ കോര്‍ട്ടില്‍ ബോള്‍ ബോയ്‌ ആയി എത്തിയത്‌ മീണയുടെ ജീവിതത്തില്‍ വഴിത്തിരിവായി. പതിയെ സോഫ്‌റ്റ്‌ ടെന്നീസ്‌ ആയി മീണയുടെ ലോകം. പതിനാലാം വയസ്‌ മുതല്‍ സോഫ്‌റ്റ്‌ ടെന്നീസ്‌ ചാമ്പ്യന്‍ഷിപ്പുകളില്‍ രാജ്യത്തെ പ്രതിനിധാനം ചെയ്യാന്‍ മീണക്ക്‌ അവസരം ലഭിച്ചു.

2022 ല്‍ ഗുജറാത്തില്‍ നടന്ന ദേശീയ ഗെയിംസില്‍ പുരുഷ സിംഗിള്‍സില്‍ സ്വര്‍ണം നേടിയ ജയ്‌ മീണ, 2024 ലെ വേള്‍ഡ്‌ സോഫ്‌റ്റ്‌ ടെന്നീസ്‌ ചാമ്പ്യന്‍ഷിപ്പില്‍ മിക്‌സഡ്‌ ഡബിള്‍സില്‍ വെങ്കലം നേടി. ഇത്‌ സോഫ്‌റ്റ്‌ ടെന്നീസില്‍ ഇന്ത്യയുടെ ആദ്യ വേള്‍ഡ്‌ ചാമ്പ്യന്‍ഷിപ്പ്‌ മെഡലായിരുന്നു. 2025 ല്‍ ദേശീയ ചാമ്പ്യനായ മീണ, ഏഷ്യന്‍ സോഫ്‌റ്റ്‌ ടെന്നീസ്‌ ചാമ്പ്യന്‍ഷിപ്പില്‍ വെങ്കലവും നേടി.

2026 ഏഷ്യന്‍ ഗെയിംസില്‍ മെഡല്‍ ലക്ഷ്യമിട്ടാണ്‌ ഇന്ത്യന്‍ താരം തുടങ്ങിയത്‌. ഗ്രൂപ്പ്‌ ഡി മത്സരത്തില്‍ പാക്കിസ്ഥാന്റെ ഹുസൈന്‍ അറെയ്‌നെ 4-0ന്‌ തകര്‍ത്തു. ക്വാര്‍ട്ടര്‍ ഫൈനലില്‍ ഫിലിപ്പിന്‍സിന്റെ ഷെര്‍വിന്‍ നുഗിറ്റിനെ 4-3 സ്‌കോറിന്‌ തോല്‍പ്പിച്ചു. സെമിയില്‍ ജപ്പാന്റെ ലോക ഒന്നാം നമ്പര്‍ തകൂയ കുറോസാക്കക്കെതിരെ ഗംഭീര പോരാട്ടമാണ്‌ കാഴ്‌ചവെച്ചത്‌. ആദ്യ മൂന്ന്‌ ഗെയിമുകളും നഷ്ടപ്പെട്ട മീണ തുടരെ രണ്ട്‌ ഗെയിമുകള്‍ ജയിച്ച്‌ തിരിച്ചുവരവ്‌ നടത്തി.

എന്നാല്‍, വാശിയേറിയ അവസാന ഗെയിം 45 മിനുട്ട്‌ നീണ്ട പോരാട്ടത്തിനൊടുവില്‍ മീണ കീഴടങ്ങി. കൊറിയ, ജപ്പാന്‍, ചൈന തുടങ്ങിയ രാജ്യങ്ങള്‍ ആധിപത്യം പുലര്‍ത്തുന്ന ഗെയിമാണ്‌ സോഫ്‌റ്റ്‌ ടെന്നീസ്‌. അവിടെ ഒരു ഇന്ത്യന്‍ താരം ഏഷ്യന്‍ ഗെയിംസ്‌ മെഡല്‍ നേടുന്നത്‌ ശുഭസൂചനയാണ്‌. മാത്രമല്ല, ഇതൊരു ഒളിമ്പിക്‌ ഇനമല്ല. അതുകൊണ്ടു തന്നെ ഏഷ്യാഡ്‌ മെഡലിനെ മീണ വിശേഷിപ്പിച്ചത്‌ ഇതൊരു ഒളിമ്പിക്‌ മെഡലിന്‌ തുല്യമെന്നാണ്‌.

2018 ജക്കാര്‍ത്ത ഏഷ്യന്‍ ഗെയിംസിലും 2033 ഹാങ്‌ഷൗ ഏഷ്യന്‍ ഗെയിംസിലും ജയ്‌ മീണ പങ്കെടുത്തിരുന്നെങ്കിലും ക്വാര്‍ട്ടര്‍ ഫൈനലില്‍ പുറത്തായിരുന്നു. മൂന്നാം അവസരത്തില്‍ മീണ മെഡല്‍ സ്വന്തമാക്കി, പുതുചരിതം സൃഷ്ടിച്ചു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഏഷ്യൻ ഗെയിംസ് ഷൂട്ടിംഗ് റേഞ്ചിൽ വീണ്ടും സ്വർണ്ണത്തിളക്കം; ഏഷ്യൻ റെക്കോർഡോടെ കമൽജീതും സുരുചിയും

Gopalakrishnan C — Fri, 25 Sep 2026 09:52:12 +0530

ടോക്കിയോ: ഏഷ്യൻ ഗെയിംസിൽ ഇന്ത്യക്ക് രണ്ടാം സ്വര്‍ണം. 10 മീറ്റർ എയർ പിസ്റ്റൾ മിക്സഡ് ടീം ഇനത്തിൽ ഇന്ത്യയുടെ കമൽജീത് - സുരുചി സഖ്യമാണ് ഇന്ത്യക്ക് ഗെയിംസിലെ രണ്ടാം സ്വര്‍ണം സമ്മാനിച്ചത്. ക്വാളിഫിക്കേഷൻ റൗണ്ട് മുതൽ മികച്ച പ്രകടനം പുറത്തെടുത്ത ഇരുവരും ഫൈനലിൽ 484.6 പോയിന്‍റോടെ ഏഷ്യൻ ഗെയിംസ് റെക്കോർഡ് തകർത്താണ് സ്വർണ്ണമണിഞ്ഞത്. വ്യക്തിഗത മത്സരങ്ങളിലെ നിരാശയ്ക്ക് ശേഷം ടീം ഇനത്തിലാണ് ഇന്ത്യൻ ഷൂട്ടര്‍മാര്‍ മികവ് കാട്ടിയത്.

ഷൂട്ടിംഗില്‍ പുരുഷന്മാരുടെ 50 മീറ്റർ റൈഫിൾ 3 പൊസിഷൻസ് ടീം ഇനത്തിൽ ഇന്ത്യ വെള്ളി മെഡൽ സ്വന്തമാക്കിയിരുന്നു. ഐശ്വരി പ്രതാപ് സിംഗ്, നീരജ് കുമാർ, രുദ്രാങ്ക്ഷ് പാട്ടീൽ എന്നിവരടങ്ങിയ സംഘമാണ് ഇന്ത്യക്കായി വെള്ളി വെടിവെച്ചിട്ടത്. മത്സരത്തിലുടനീളം മുന്നിട്ടുനിന്ന ഇന്ത്യക്ക് സ്റ്റാൻഡിംഗ് പൊസിഷനിൽ രുദ്രാങ്ക്ഷിന് പിഴച്ചതാണ് ചൈനയ്ക്ക് പിന്നിൽ രണ്ടാമതായി ഫിനിഷ് ചെയ്യാൻ ഇടയാക്കിയത്.

ഇതിനുപുറമെ, വ്യക്തിഗത വിഭാഗത്തിൽ ഇന്ത്യയുടെ ഐശ്വരി പ്രതാപ് സിംഗും നീരജ് കുമാറും ഫൈനലിലേക്ക് യോഗ്യത നേടി. ക്വാളിഫയേഷനിൽ 589 പോയിന്‍റോടെ മൂന്നാം സ്ഥാനത്തെത്തിയാണ് ഐശ്വരി പ്രതാപ് ഫൈനലുറപ്പിച്ചത്. ചൈനയുടെ ഴാങ് ചാങ്ഹോംഗ് (593), ദക്ഷിണ കൊറിയയുടെ യങ് സിയുങ്വൂ (592) എന്നിവരാണ് ഒന്നും രണ്ടും സ്ഥാനങ്ങളിൽ ഫിനിഷ് ചെയ്തത്. 588 പോയിന്റോടെ നീരജ് കുമാർ നാലാം സ്ഥാനക്കാരനായാണ് ഫൈനലിലേക്ക് കടന്നത്.

HISTORY MADE: FIRST SHOOTING GOLD FOR INDIA! masterclass from the Aichi Prefectural Shooting Gallery! The sensational duo of Suruchi Inder Singh & Kamaljeet has just destroyed the competition to clinch India’s very FIRST SHOOTING GOLD at the Asian Games 2026! Breaking the… pic.twitter.com/MHPt8Iep4J

— Anil Bansal (@dilseanilbansal) September 25, 2026

ടേബിൾ ടെന്നീസ് മിക്സഡ് ഡബിൾസിൽ ദിയ ചിതാലെ - മാനുഷ് ഷാ സഖ്യവും, സ്‌ക്വാഷ് മിക്സഡ് ഡബിൾസിൽ വെറ്ററൻ താരം ജോഷ്ന ചിന്നപ്പ - വേലവൻ സെന്തിൽകുമാർ സഖ്യവും സെമി ഫൈനലിൽ കടന്ന് മെഡൽ ഉറപ്പിച്ചിട്ടുണ്ട്. ഇനിയുള്ള മത്സരങ്ങളിൽ പുരുഷ-വനിതാ കബഡി ടീമുകൾ സെമി ഫൈനലിൽ പോരാട്ടത്തിനിറങ്ങും. കൂടാതെ അത്‌ലറ്റിക്‌സിൽ വനിതകളുടെ ഷോട്ട്പുട്ട്, പോൾവോൾട്ട്, പുരുഷന്മാരുടെ 10,000 മീറ്റർ, ഹാമർത്രോ എന്നീ പ്രമുഖ ഇനങ്ങളും ഇന്നത്തെ പ്രധാന ആകർഷണങ്ങളാണ്.

ഏഷ്യൻ ഗെയിംസ് മെഡല്‍പട്ടികയില്‍ 85 സ്വര്‍ണവുമായി ചൈനയാണ് ഒന്നാം സ്ഥാനത്ത്. 21 സ്വര്‍ണവുമായി ആതിഥേയരായ ജപ്പാന്‍ രണ്ടാമതും 11 സ്വര്‍ണവുമായി ദക്ഷിണ കൊറിയ മൂന്നാമതുമാണ്. 2 സ്വര്‍ണവും 8 വെളളിയും 9 വെങ്കലവുമടക്കം 19 മെഡലുകളുമായി ഇന്ത്യ പന്ത്രണ്ടാം സ്ഥാനത്താണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ട്രീസ-ഗായത്രി സഖ്യത്തിന്‍റെ പോരാട്ടം പാഴായി; ഏഷ്യൻ ഗെയിംസ് വനിതാ ബാഡ്മിന്‍റണിൽ ജപ്പാനോട് തോറ്റ് ഇന്ത്യ പുറത്ത്

Gopalakrishnan C — Tue, 22 Sep 2026 11:22:17 +0530

ടോക്കിയോ: ഏഷ്യൻ ഗെയിംസ് വനിതാ ബാഡ്മിന്‍റൺ ടീം ഇനത്തിൽ ഇന്ത്യയുടെ പോരാട്ടം ക്വാർട്ടർ ഫൈനലിൽ അവസാനിച്ചു. കരുത്തരായ ജപ്പാനോട് 1-3 എന്ന സ്കോറിന് പരാജയപ്പെട്ടാണ് ഇന്ത്യൻ സംഘം ടൂർണമെന്‍റിൽ നിന്ന് പുറത്തായത്. ആദ്യ സിംഗിൾസ് പോരാട്ടത്തിൽ രണ്ട് തവണ ഒളിമ്പിക് മെഡൽ ജേതാവായ പി. വി. സിന്ധുവും ജപ്പാന്‍റെ അക്കാനെ യമാഗുച്ചിയും തമ്മിൽ ആവേശകരമായ പോരാട്ടമാണ് നടന്നത്. ആദ്യ സെറ്റ് 23-21 ന് നേടി സിന്ധു ഗംഭീര തുടക്കം കുറിച്ചെങ്കിലും, അടുത്ത രണ്ട് സെറ്റുകൾ 18-21, 11-21 എന്ന സ്കോറിന് യമാഗുച്ചി സ്വന്തമാക്കിയതോടെ സിന്ധുവിന് തോൽവി സമ്മതിക്കേണ്ടി വന്നു. ഇതോടെ ജപ്പാൻ 1-0 ന് മുന്നിലെത്തി.

രണ്ടാം മത്സരത്തിൽ ഇറങ്ങിയ ഉന്നതി ഹൂഡ ജപ്പാന്‍റെ തൊമോക്ക മിയാസാക്കിയോട് നേരിട്ടുള്ള സെറ്റുകൾക്ക് (16-21, 18-21) പരാജയപ്പെട്ടു. രണ്ടാം സെറ്റിന്‍റെ ഇടവേളയിൽ 11-4 എന്ന സ്കോറിന് മുന്നിട്ടുനിന്ന ശേഷമാണ് ഉന്നതി മത്സരത്തിലെ ലീഡ് കൈവിട്ടത്. ഉന്നതി കൂടി തോറ്റതോടെ ജപ്പാൻ ലീഡ് 2-0 ആയി ഉയർത്തി.

എന്നാൽ മൂന്നാം മത്സരത്തിൽ മലയാളിയായ ട്രീസ ജോളിയും ഗായത്രി ഗോപീചന്ദും അടങ്ങുന്ന ഡബിൾസ് സഖ്യം ഇന്ത്യക്ക് പ്രതീക്ഷ നൽകി. ലോക മൂന്നാം നമ്പർ സഖ്യമായ യൂക്കി ഫുകുഷിമ - മയൂ മത്സുമോട്ടോ ജോഡിയെ നേരിട്ടുള്ള സെറ്റുകൾക്ക് (21-17, 21-16) അട്ടിമറിച്ച് ട്രീസയും ഗായത്രിയും ചേർന്ന് ഇന്ത്യയുടെ പോരാട്ടം നീട്ടിക്കൊണ്ടുപോയി.

തുടർന്ന് നടന്ന നാലാം മത്സരത്തിൽ 17-കാരിയായ തൻവി ശർമ്മ മുൻ ലോക ചാമ്പ്യൻ നൊസോമി ഒകുഹാരയോട് നേരിട്ടുള്ള സെറ്റുകൾക്ക് (12-21, 10-21) പരാജയപ്പെട്ടതോടെ ഇന്ത്യയുടെ ഏഷ്യൻ ഗെയിംസ് ബാഡ്മിന്റൺ വനിതാ ടീം വിഭാഗത്തിലെ പ്രതീക്ഷകൾ പൂർണ്ണമായി അസ്തമിക്കുകയായിരുന്നു. ഇനി സിംഗിള്‍സ് മത്സരത്തില്‍ ഇന്ത്യൻ വനിതകള്‍ മത്സരിക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഏഷ്യൻ ഗെയിംസ് ലോങ് ജംപിൽ മലയാളിത്തിളക്കം, ആൻസി സോജന് വെള്ളി, ആഘോഷമാക്കി നാട്; സ്വർണം നഷ്ടമായതിൽ ചെറിയ നിരാശയുണ്ടെന്ന് താരം

Anver Sajad — Sun, 27 Sep 2026 18:31:02 +0530

ടോക്യോ: ഏഷ്യൻ ഗെയിംസ് വനിതാ ലോങ് ജംപിൽ മലയാളി താരം ആൻസി സോജന് വെള്ളി മെഡൽ. 6.53 മീറ്റർ ദൂരം ചാടിയാണ് ആൻസി ഈ തിളക്കമാർന്ന നേട്ടം സ്വന്തമാക്കിയത്. വെറും രണ്ട് സെന്റീമീറ്റർ വ്യത്യാസത്തിലാണ് താരത്തിന് സ്വർണം നഷ്ടമായത്. അവസാന ശ്രമത്തിൽ 6.55 മീറ്റർ ചാടിയ ചൈനീസ് താരം ഒന്നാം സ്ഥാനം പിടിച്ചെടുക്കുകയായിരുന്നു. മെഡൽ നേട്ടത്തിൽ സന്തോഷമുണ്ടെന്നും എന്നാൽ 6.60 മീറ്റർ പ്രതീക്ഷിച്ചിരുന്നതിനാൽ സ്വർണം നഷ്ടമായതിൽ ചെറിയ നിരാശയുണ്ടെന്നും ആൻസി സോജൻ പ്രതികരിച്ചു.

വിജയമാഘോഷിച്ച് നാട്

തൃശൂർ നാട്ടികയിലുള്ള ആൻസിയുടെ വീട്ടിലേക്ക് ചരിത്രവിജയം ആഘോഷിക്കാൻ നാടൊന്നാകെ ഒഴുകിയെത്തി. ഏഴ് മീറ്റർ ജംപ് ആയിരുന്നു ആൻസിയുടെ പ്രധാന സ്വപ്നമെന്നും അവിടുത്തെ പ്രതികൂല കാലാവസ്ഥ പ്രകടനത്തെ ചെറിയ രീതിയിൽ ബാധിച്ചെന്നും കുടുംബാംഗങ്ങൾ വ്യക്തമാക്കി.

അതേസമയം, പുരുഷന്മാരുടെ ലോങ് ജംപിൽ മലയാളി താരം എം. ശ്രീശങ്കർ ഫൈനലിലേക്ക് യോഗ്യത നേടിയിട്ടുണ്ട്. മറ്റു അത്‌ലറ്റിക്സ് ഇനങ്ങളിലും ഇന്ത്യ മികച്ച പ്രകടനം തുടരുകയാണ്. സ്ക്വാഷിൽ ഇന്ത്യ രണ്ട് വെള്ളി മെഡലുകൾ സ്വന്തമാക്കി. പുരുഷ വിഭാഗത്തിൽ അഭയ് സിംഗും വനിതാ വിഭാഗത്തിൽ അനാഹത് സിങ്ങുമാണ് വെള്ളി നേടിയത്. വനിതകളുടെ 200 മീറ്ററിൽ ഹരിത ഭദ്രയും ഡെക്കാത്ത്ലോണിൽ തേജസ്വിൻ ശങ്കറും ഇന്ത്യയ്ക്കായി വെങ്കല മെഡലുകൾ അണിഞ്ഞു. വനിതകളുടെ മൂവായിരം മീറ്റർ സ്റ്റീപ്പിൾചേസിലും ഇന്ത്യക്ക് വെങ്കലം ലഭിച്ചു. ഇന്ത്യയുടെ പാറുൾ ചൗധരിയാണ് വെങ്കലം നേടിയത്.

പന്ത്രണ്ടാം വയസില്‍ ദുരനുഭവം, സ്വയംരക്ഷയ്‌ക്കായി ജൂഡോ, മുപ്പത്താറാം വയസില്‍ ഏഷ്യാഡ്‌ മെഡല്‍, പെണ്‍കരുത്തിന്റെ പര്യായമായി സുചിക

Web Desk — Sun, 20 Sep 2026 14:57:24 +0530

ഐചി-നഗോയ ഏഷ്യന്‍ ഗെയിംസില്‍ ഇന്ത്യയുടെ ആദ്യ മെഡല്‍ ഉറപ്പാക്കിയത്‌ സുചിക തരിയാലാണ്‌. വനിതകളുടെ ട്രഡീഷണല്‍ മിക്‌സഡ്‌ മാര്‍ഷ്വല്‍ ആര്‍ട്‌സ്‌ 60 കി.ഗ്രാം വിഭാഗത്തില്‍ സെമിഫൈനലില്‍ പ്രവേശിച്ചതോടെയാണ്‌ സുചിക രാജ്യത്തിന്‌ മെഡലുറപ്പാക്കിയത്‌.

ക്വാര്‍ട്ടര്‍ ഫൈനലില്‍ മംഗോളിയയുടെ അല്‍താന്‍ചിമേഗ്‌ ബൈഗല്‍മയെ 2-0ന്‌ പരാജയപ്പെടുത്തിയാണ്‌ താരം സെമിയിലെത്തിയത്‌. ഏഷ്യന്‍ ഗെയിംസില്‍ ഇതാദ്യമായാണ്‌ മിക്‌സഡ്‌ മാര്‍ഷ്വല്‍ ആര്‍ട്‌സ്‌ ഒരു മത്സര ഇനമായി ഉള്‍പ്പെടുത്തുന്നത്‌. ഈ ഇനത്തില്‍ ഇന്ത്യക്കായി ആദ്യമായി ഏഷ്യാഡ്‌ മെഡല്‍ ഉറപ്പിക്കുന്ന താരം എന്ന ഖ്യാതിയും മുപ്പത്താറുകാരിക്ക്‌ സ്വന്തം.

പീഡനശ്രമത്തെ നേരിട്ടത്‌ തുടക്കം....

ഹരിയാനയില്‍ നിന്നുള്ള സുചികയുടെ സ്‌പോര്‍ട്‌സ്‌ കരിയര്‍ ആരംഭിക്കുന്നത്‌ ജുഡോകയിലൂടെയാണ്‌. പിന്നീട്‌ ജു-ജുത്സുവും കുറാഷും പരിശീലിച്ച സുചിക 2017 മുതല്‍ മിക്‌സഡ്‌ മാര്‍ഷ്വല്‍ ആര്‍ട്‌സ്‌ താരമാണ്‌.

സുചികക്ക്‌ മാര്‍ഷ്വല്‍ ആര്‍ട്‌സിനോട്‌ താത്‌പര്യം വന്നത്‌ ഒരു ദുരനുഭവത്തില്‍ നിന്നാണ്‌. പന്ത്രണ്ടാം വയസില്‍ ഒരു പീഡനശ്രമത്തെ നേരിടേണ്ടി വന്നു. തുടര്‍ന്നാണ്‌ സ്വയം രക്ഷയ്‌ക്കായി ജൂഡോ പഠിക്കാന്‍ തീരുമാനിച്ചത്‌. സ്‌പോര്‍ട്‌സ്‌ ഒരു കരിയറാക്കിയപ്പോള്‍ നിരന്തരം യാത്രകള്‍ ആവശ്യമായി വന്നു. ഇത്‌ പക്ഷേ, വീട്ടിലുള്ളവരുടെ എതിര്‍പ്പിനിടയാക്കി. മുന്‍പൊരു ദുരനുഭവമുണ്ടായത്‌ വീട്ടുകാരെ ആകുലരാക്കിയിരുന്നു. എന്നാല്‍ വൈതരണികളെയെല്ലാം അതിജീവിച്ച്‌ സുചിക രാജ്യത്തെ പ്രധാന ജുഡോക താരമായി മാറി. ഇരുപതിലേറെ അന്താരാഷ്ട്ര മത്സരങ്ങളില്‍ രാജ്യത്തെ പ്രതിനിധാനം ചെയ്‌തു. എട്ട്‌ തവണ ദേശീയ ജൂഡോ ചാമ്പ്യനായ സുചികക്ക്‌ അന്താരാഷ്ട്ര തലത്തിലും മെഡലുകള്‍ ലഭിച്ചു.

കോമണ്‍വെല്‍ത്തില്‍ സ്വര്‍ണം...

2019 കോമണ്‍വെല്‍ത്ത്‌ ജുഡോ ചാമ്പ്യന്‍ഷിപ്പിലും അതേ വര്‍ഷം സൗത്ത്‌ ഏഷ്യന്‍ ഗെയിംസിലും സ്വര്‍ണം നേടിയതാണ്‌ കരിയറിലെ വലിയ നേട്ടം. 2018 കോമണ്‍വെല്‍ത്ത്‌ ഗെയിംസില്‍ വെള്ളിയും നേടിയിരുന്നു. ജു-ജിത്സു ഇനത്തില്‍ 2024 ല്‍ 63 കിലോഗ്രാം വിഭാഗത്തില്‍ ലോകചാമ്പ്യനായിരുന്നു സുചിക. ജുഡോയിലും ജ്യു-ജിത്സുവിലും ഒരുപോലെ തിളങ്ങിയ സുചികക്ക്‌ മിക്‌സഡ്‌ മാര്‍ഷ്വല്‍ ആര്‍ട്‌സ്‌ മത്സര ഇനം വെല്ലുവിളി ആയില്ല. 2017 ല്‍ എംഎംഎയില്‍ അരങ്ങേറിയെങ്കി്‌ലും അതില്‍ തുടര്‍ന്നില്ല. ജുഡോയും ജ്യു-ജിത്സുവും തന്നെയായിരുന്നു പ്രധാന മത്സര ഇനങ്ങള്‍. എന്നാല്‍, 2014 ല്‍ എംഎംഎയിലേക്ക്‌ തിരിച്ചുവന്നു. ബ്രേവ്‌്‌ കോംബാറ്റ്‌ ഫെഡറേഷനുമായി കരാര്‍ ഒപ്പുവെച്ച സുചിക ബഹ്‌റൈനില്‍ മത്സരിക്കാനിറങ്ങി. വിജയത്തോടെ ഗംഭീര തിരിച്ചുവരവായിരുന്നു എം എം എയിലേക്ക്‌ സുചിക നടത്തിയത്‌. അവിടെ മത്സരിച്ചതിന്റെ ഗുണം സുചികക്ക്‌ ഏഷ്യന്‍ ഗെയിംസില്‍ ലഭിച്ചു.

സിഐഎസ്‌എഫ്‌ ഹെഡ്‌ കോണ്‍സ്‌റ്റബിള്‍ ആയിരുന്ന സുചിക ഇപ്പോള്‍ ഹരിയാന കായികവകുപ്പില്‍ ജൂനിയര്‍ കോച്ചായി പ്രവര്‍ത്തിക്കുകയാണ്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഏഷ്യൻ ഗെയിംസ് ഒമ്പതാം ദിനം അത്‌ലറ്റിക്സിൽ മെഡൽ കൊയ്ത്തുമായി ഇന്ത്യ, ജാവലിനിൽ ഇരട്ട മെഡൽ, ശ്രീശങ്കറിന് വെള്ളി

Gopalakrishnan C — Mon, 28 Sep 2026 19:17:37 +0530

നഗോയ (ജപ്പാൻ): ഏഷ്യൻ ഗെയിംസിന്‍റെ ഒമ്പതാം ദിനത്തിൽ ട്രാക്കിലും ഫീൽഡിലും മെഡല്‍ കൊയ്ത്തുമായി ഇന്ത്യൻ താരങ്ങൾ. ഇന്ന് മാത്രം ആറ് മെഡലുകൾ സ്വന്തമാക്കിയതോടെ അത്‌ലറ്റിക്‌സിൽ ഇന്ത്യയുടെ ആകെ മെഡൽ നേട്ടം 19 ആയി ഉയർന്നു. പുരുഷന്മാരുടെ ജാവലിൻ ത്രോയിൽ യഷ് വീർ സിംഗ് വെള്ളിയും രോഹിത് യാദവ് വെങ്കലവും സ്വന്തമാക്കിയപ്പോൾ, ലോങ് ജംപിൽ മലയാളി താരം എം. ശ്രീശങ്കർ വെള്ളി മെഡൽ നേടി.

Congratulations to Murali Sreeshankar on a brilliant Silver Medal in the Men’s Long Jump Final at the Asian Games 2026! #Cheer4Bharat pic.twitter.com/S6hVPBP6C7

— Dr Mansukh Mandaviya (@mansukhmandviya) September 28, 2026

നാലാം ശ്രമത്തിന് ശേഷം കാൽക്കുഴയ്ക്ക് പരിക്കേറ്റെങ്കിലും പൊരുതിനിന്നാണ് ശ്രീശങ്കർ ഇന്ത്യക്കായി വെള്ളി മെഡൽ ഉറപ്പിച്ചത്. വനിതകളുടെ 400 മീറ്റർ ഹർഡിൽസിൽ പി ടി ഉഷയുടെ 42 വർഷം പഴക്കമുള്ള ദേശീയ റെക്കോർഡ് തകർത്ത് വിദ്യ രാമരാജ് വെങ്കലം സ്വന്തമാക്കി. 54.75 സെക്കൻഡിൽ ഫിനിഷ് ചെയ്തായിരുന്നു വിദ്യയുടെ ഈ ചരിത്ര നേട്ടം. പുരുഷന്മാരുടെ 1500 മീറ്ററിൽ ഗുൽവീർ സിംഗ് തന്‍റെ വ്യക്തിഗത മികച്ച സമയത്തോടെ (3:36.72) വെള്ളിയും, വനിതകളുടെ 5000 മീറ്ററിൽ പരുൾ ചൗധരി വെങ്കലവും നേടി.

TRAGIC FALL BUT MURALI SREESHANKAR WALKS AWAY WITH THE SILVERWatch the video for Murali Sreeshankar’s heartbreaking fall — BUT A TRUE CHAMPION. CONGRATULATIONS CHAMP8.07m, just 10cm off gold, #SILVERFORINDIA #MURALISREESHANKAR #AsianGames2026 #Athleticsindia #NNISSports…

— nnis Sports|Asian GamesAthletics (@nnis_sports) September 28, 2026

അതേസമയം, ചില ഇനങ്ങളിൽ ഇന്ത്യക്ക് തലനാരിഴയ്ക്കാണ് മെഡലുകൾ നഷ്ടമായത്. വനിതകളുടെ 4x100 മീറ്റർ റിലേ ഫൈനലിൽ തമന്ന, സ്നേഹ, സുദേഷ്ണ, അബിനയ എന്നിവരടങ്ങിയ ഇന്ത്യൻ സംഘം സീസണിലെ മികച്ച സമയം കുറിച്ചെങ്കിലും നാലാം സ്ഥാനത്താണ് ഫിനിഷ് ചെയ്തത്. മൂന്നാം സ്ഥാനക്കാരുമായി വെറും 0.05 സെക്കൻഡിന്‍റെയും രണ്ടാം സ്ഥാനക്കാരുമായി 0.06 സെക്കൻഡിന്‍റെയും മാത്രം വ്യത്യാസത്തിലാണ് ഇന്ത്യക്ക് റിലേയിൽ മെഡൽ കൈവിട്ടുപോയത്.

വനിതകളുടെ ഡിസ്കസ് ത്രോയിൽ സീമ കാലിരാംന നാലാം സ്ഥാനത്തൊതുങ്ങിയപ്പോൾ, പുരുഷന്മാരുടെ 3000 മീറ്റർ സ്റ്റീപ്പിൾചേസിൽ നിലവിലെ ചാമ്പ്യനായ അവിനാഷ് സാബ്ലെയ്ക്കും കിരീടം നിലനിർത്താനായില്ല; സാബ്ലെയും നാലാം സ്ഥാനത്താണ് ഫിനിഷ് ചെയ്തത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

റോഷിബിന ദേവിയുടെ ഗോള്‍ഡന്‍ സ്വപ്‌നം തടഞ്ഞ്‌ വീണ്ടും ചൈന, തുടരെ രണ്ടാം ഏഷ്യാഡിലും വെള്ളി, പുരുഷ വിഭാഗം തുഴച്ചിലില്‍ ഇന്ത്യക്ക്‌ വെങ്കലം

Web Desk — Thu, 24 Sep 2026 07:50:40 +0530

നഗോയ: ഏഷ്യന്‍ ഗെയിംസ്‌ വനിതകളുടെ വുഷു സാന്‍ഡ 60 കി.ഗ്രാം വിഭാഗത്തില്‍ ഇന്ത്യയുടെ നോറെം റോഷിബിന ദേവിക്ക്‌ വെള്ളി. ഫൈനലില്‍ ചൈനയുടെ ലീ കോങിനോട്‌ പരാജയപ്പെട്ടു. രണ്ട്‌ റൗണ്ടുകളിലും 5-0 എന്ന മാര്‍ജിനിലായിരുന്നു തോല്‍വി. നാല്‌ വര്‍ഷം മുമ്പ്‌ ഹോങ്‌ഷു ഏഷ്യാഡിലും ഇത്‌ തന്നെയായിരുന്നു അവസ്ഥ. ഫൈനല്‍ വരെ മികച്ച പ്രകടനം കാഴ്‌ചവെച്ച റോഷിബിന ചൈനീസ്‌ എതിരാളിക്ക്‌ മുന്നില്‍ നിഷ്‌പ്രഭമായി. 2022 ല്‍ ഷോവി വുവിനോടായിരുന്നു പരാജയപ്പെട്ടത്‌.2018 ജക്കാത്ത ഏഷ്യന്‍ ഗെയിംസില്‍ റോഷിബിന ദേവി ഇതേ ഇനത്തില്‍ വെങ്കല മെഡല്‍ നേടിയിരുന്നു.

ഇത്തവണ ജപ്പാന്‍ ഏഷ്യാഡില്‍ റോഷിബിന തികഞ്ഞ ഫോമിലായിരുന്നു മത്സരങ്ങള്‍ ആരംഭിച്ചത്‌. 2023 ല്‍ ലോക ചാമ്പ്യനായ വിയറ്റ്‌നാമിന്റെ ഗ്യുയെന്‍ തി തു തുയെ മലര്‍ത്തിയടിച്ച ഇന്ത്യക്കാരി സെമിഫൈനലില്‍ ഇന്തോനേഷ്യയുടെ സൂപ്പര്‍ താരം താനിയ കുസുമാനിങ്‌ത്യാസിനെയും കീഴടക്കി. എന്നാല്‍, ഫൈനലില്‍ ചൈനീസ്‌ താരത്തിന്റെ അതിവേഗ നീക്കങ്ങള്‍ക്ക്‌ മുന്നില്‍ റോഷിബിനക്ക്‌ മറുപടിയില്ലാതായി.

മണിപ്പൂര്‍ സ്വദേശിയായ റോഷിബിന ദേവി ഇന്ത്യയിലെ മികച്ച വുഷുതാരങ്ങളില്‍ ഒരാളാണ്‌. റോഷിബിനയുടെ വെള്ളി മെഡല്‍ ജപ്പാന്‍ ഐചി നഗോയ ഏഷ്യാഡില്‍ ഇന്ത്യയുടെ പതിനാലാം മെഡലായി.തുഴച്ചിലിലും ഇന്ത്യ മെഡലണിഞ്ഞു. പുരുഷ വിഭാഗം ഡബിള്‍ സ്‌കള്‍സ്‌ ഫൈനലില്‍ സത്‌നാം സിംഗ്‌-സല്‍മാന്‍ ഖാന്‍ സഖ്യം വെങ്കലം നേടി. ചൈനക്കാണ്‌ സ്വര്‍ണം, ഉസ്‌ബെക്കിസ്ഥാന്‍ വെള്ളി മെഡല്‍ കരസ്ഥമാക്കി.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഏഷ്യൻ ഗെയിംസ്: ഇന്ത്യയുടെ മെ‍ഡല്‍ പ്രതീക്ഷകള്‍ക്ക് കനത്ത തിരിച്ചടി; സാത്വിക്-ചിരാഗ് സഖ്യം ആദ്യ റൗണ്ടിൽ പുറത്ത്

Gopalakrishnan C — Fri, 25 Sep 2026 16:18:44 +0530

ഐച്ചി (ജപ്പാൻ): ഏഷ്യൻ ഗെയിംസ് ബാഡ്മിന്‍റണിൽ നിലവിലെ ചാമ്പ്യന്മാരായ ഇന്ത്യയുടെ സാത്വിക്സായിരാജ് റാങ്കിറെഡ്ഡി-ചിരാഗ് ഷെട്ടി സഖ്യത്തിന് അപ്രതീക്ഷിത തോൽവി. പുരുഷ ഡബിൾസ് ആദ്യ റൗണ്ടിൽ തായ്‌ലൻഡിന്‍റെ പീരത്ചായ് സുഖ്ഫുൻ - പക്കപോൺ തീരാരത്സകുൽ സഖ്യത്തോടാണ് ലോക അഞ്ചാം നമ്പർ ജോഡിയായ ഇന്ത്യൻ സഖ്യം പരാജയപ്പെട്ടത്. ഇച്ചിനോമിയ സിറ്റി മുൻസിപ്പൽ ജിംനേഷ്യത്തിൽ നടന്ന പോരാട്ടത്തിൽ മൂന്ന് സെറ്റുകൾ നീണ്ട പോരാട്ടത്തിനൊടുവിലായിരുന്നു നിലവിലെ സ്വർണ്ണ മെഡൽ ജേതാക്കളുടെ ഞെട്ടിക്കുന്ന തോല്‍വി.

ആദ്യ സെറ്റ് 21-12 എന്ന സ്കോറിന് നേടി സാത്വിക്കും ചിരാഗും മികച്ച തുടക്കമാണ് കുറിച്ചത്. എന്നാൽ തുടർന്നുള്ള രണ്ട് സെറ്റുകളിൽ മികച്ച തിരിച്ചുവരവ് നടത്തിയ ലോക 36-ാം നമ്പർ തായ് സഖ്യം 21-19, 21-14 എന്ന സ്കോറിന് തുടർച്ചയായ സെറ്റുകൾ പിടിച്ചെടുത്ത് വിജയം ഉറപ്പിച്ചു. കഴിഞ്ഞ മാസം ചൈന മാസ്റ്റേഴ്സ് കിരീടം നേടി മികച്ച ഫോമിലായിരുന്ന സാത്വിക്-ചിരാഗ് ജോഡിയിൽ നിന്ന് വലിയ പ്രതീക്ഷകളാണ് ആരാധകർ വച്ചുപുലർത്തിയിരുന്നത്.

ഏഷ്യൻ ഗെയിംസിലെ പുരുഷ ടീം ഇനത്തിൽ ഇന്ത്യ വെങ്കല മെഡൽ നേടിയപ്പോഴും ചൈനയുടെ ലോക ചാമ്പ്യന്മാരായ ലിയാങ് വെയ് കെങ് - വാങ് ചാങ് സഖ്യത്തെ തോൽപ്പിച്ച് ഇരുവരും തിളങ്ങിയിരുന്നു. എന്നാൽ വ്യക്തിഗത ഇനത്തിൽ ആദ്യ റൗണ്ടിൽ തന്നെ പുറത്തായതോടെ കിരീടം നിലനിർത്താനുള്ള ഇന്ത്യൻ സഖ്യത്തിന്‍റെ പ്രതീക്ഷകൾ അസ്തമിച്ചു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഫുട്‌ബോളും ടേബിള്‍ ടെന്നീസും സമന്വയിക്കുന്ന ടെക്‌ബോള്‍, ഏഷ്യന്‍ ഗെയിംസില്‍ ഇന്ത്യ മെഡലിനരികെ

Vipulnath P — Sat, 19 Sep 2026 00:58:53 +0530

നഗോയ: ഏഷ്യന്‍ ഗെയിംസ്‌ ടെക്‌ബാളില്‍ ഇന്ത്യയുടെ ക്വുംസി ജോക്വം ഡിസൂസ ചരിത്ര നേട്ടത്തിനരികില്‍. വനിതാ സിംഗിള്‍സ്‌ സെമിഫൈനലില്‍ പ്രവേശിച്ച ക്വുംസിക്ക്‌ ഒരു ജയം കൂടി നേടിയാല്‍ മെഡലുറപ്പിക്കാം. ഗ്രൂപ്പ്‌ എയില്‍ ജപ്പാന്റെ ടോപ്‌ സീഡ്‌ ഉയ്‌ന സകമോടോയെയും കംബോഡിയയുടെ കോമിയിനെ തോല്‍പ്പിച്ചാണ്‌ ഇന്ത്യന്‍ താരം സെമി ഫൈനല്‍ സ്‌പോട്‌ ഉറപ്പിച്ചത്‌. ഏഷ്യന്‍ ഗെയിംസില്‍ അരങ്ങേറിയ ക്വുംസി ടോപ്‌ സീഡായ ജപ്പാന്റെ ഉയ്‌ന സകാമോട്ടോയെ 2-1നും കംബോഡിയയുടെ കോമിയിനെ 2-0നും തോല്‍പ്പിച്ചാണ്‌ അവസാന നാലില്‍ ഇടംപിടിച്ചത്‌.

നഗോയ സിറ്റി ഹിഗാഷി സ്‌പോര്‍ട്‌സ്‌ സെന്ററില്‍ നടന്ന ജപ്പാനെതിരായ ഗ്രൂപ്പ്‌ എ മത്സരം 43 മി്‌നുട്ടിലാണ്‌ ക്വുംസി ജയിച്ചത്‌. 10-12ന്‌ ആദ്യ സെറ്റ്‌ നഷ്ടമായ ക്വുംസി 12-11, 13-11ന്‌ ഗംഭീര തിരിച്ചുവരവാണ്‌ നടത്തിയത്‌. രണ്ടാം മത്സരത്തില്‍ കംബോഡിയന്‍ താരത്തെ 24 മിനുട്ടിനുള്ളില്‍ കീഴടക്കി ക്വുംസി ഫോം തെളിയിച്ചു. ശനിയാഴ്‌ച നടക്കുന്ന സെമിയില്‍ ഇന്തോനേഷ്യയുടെ സുമയയാണ്‌ എതിരാളി. ജയിച്ചാല്‍, ടെക്‌ബോളില്‍ ഇന്ത്യയുടെ ആദ്യ മെഡല്‍ നേട്ടമായി മാറും ഇത്‌. ഇനി സെമിയില്‍ തോറ്റാലും വെങ്കല മെഡല്‍ പ്ലേ ഓഫ്‌ ക്വുംസിക്ക്‌ കളിക്കാം. അവിടെ ജയിച്ചാലും മെഡലുറപ്പായി. ടെക്‌ബോള്‍ ഉള്‍പ്പടെ ഏഷ്യാഡില്‍ ഇത്തവണ ആറ്‌ പുതിയ ഗെയിമുകളാണ്‌ അരങ്ങേറുന്നത്‌. മിക്‌സഡ്‌ മാര്‍ഷ്വല്‍ ആര്‍ട്‌സ്‌ (എം എം എ), പാഡെല്‍, സര്‍ഫിംഗ്‌, ബിഎംഎക്‌സ്‌ ഫ്രീസ്റ്റൈല്‍, വിര്‍ച്വല്‍ തയ്‌ക്വാന്‍ഡോ എന്നീ കായിക ഇനങ്ങളാണ്‌ ഗെയിംസില്‍ അരങ്ങേറുന്നത്‌.

എന്താണ്‌ ടെക്‌ബോള്‍ ?

ഫുട്‌ബോളും ടേബിള്‍ ടെന്നീസും ചേര്‍ന്ന ഒരു കായിക ഇനമാണിത്‌. ഒരു പ്രത്യേക തരം വളഞ്ഞ മേശയ്‌ക്ക്‌ ഇരുഭാഗത്തു നിന്നും കൈകളും കൈപ്പത്തിയും ഒഴികെയുള്ള ശരീരഭാഗങ്ങള്‍ ഉപയോഗിച്ച്‌ ഫുട്‌ബോള്‍ തട്ടിക്കളിക്കുന്ന ഗെയിമാണിത്‌. 2014 ല്‍ ഫുട്‌ബോളില്‍ തത്‌പരനായ ഗാബൊര്‍ ബൊസാനി, ഗ്യോര്‍ഗി ഗട്ട്യാന്‍, വിക്ടര്‍ ഹൗസാര്‍ എന്നിവരാണ്‌ ടെക്‌ബോള്‍ കണ്ടുപിടിച്ചത്‌. 2017 ല്‍ ബുഡാപെസ്റ്റില്‍ പ്രഥമ ടെക്‌ ബോള്‍ ലോക ചാമ്പ്യന്‍ഷിപ്പ അരങ്ങേറി.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഏഷ്യന്‍ ഗെയിംസ്: വനിതാ ക്രിക്കറ്റില്‍ ബംഗ്ലാദേശിനെ 114 റണ്‍സിന് തകര്‍ത്ത് ഇന്ത്യ ഫൈനലില്‍, കലാശപ്പോര് ശ്രീലങ്കയ്‌ക്കെതിരെ

Asianet News — Sun, 20 Sep 2026 18:17:04 +0530

2026-ലെ ഏഷ്യൻ ഗെയിംസിന്റെ ആദ്യ ദിവസമാണിത്. ജപ്പാനിലെ ഐച്ചി-നഗോയ, ഇന്ന് നടന്ന ഉദ്ഘാടനച്ചടങ്ങിൽ പാരീസ് ഒളിമ്പിക്സിൽ രണ്ട് മെഡലുകൾ നേടിയ മനു ഭാക്കറും, ഹാങ്ചൗ ഏഷ്യൻ ഗെയിംസിൽ സ്വർണം നേടിയ കബഡി താരം പവൻ സെഹ്‌റാവത്തുമാണ് ഇന്ത്യൻ സംഘത്തെ നയിച്ചത്.

ഏഷ്യൻ ഗെയിംസിന് ഭീഷണിയായി 100 കിലോ മീറ്റര്‍ വേഗതയുള്ള ചുഴലിക്കാറ്റ്; കായികതാരങ്ങളെ ഒഴിപ്പിപ്പിക്കാൻ ജപ്പാൻ

Gopalakrishnan C — Fri, 18 Sep 2026 15:20:46 +0530

ടോക്കിയോ: താമസ സൗകര്യവുമായി ബന്ധപ്പെട്ട വിവാദങ്ങൾക്ക് പിന്നാലെ, ജപ്പാനിലെ നഗോയയിൽ നടക്കുന്ന ഏഷ്യൻ ഗെയിംസിന് വില്ലനായി വൻ ചുഴലിക്കാറ്റ്. വരും ദിവസങ്ങളിൽ ഐച്ചി-നഗോയ തീരത്ത് കനത്ത ചുഴലിക്കാറ്റ് വീശിയടിച്ചേക്കുമെന്ന മുന്നറിയിപ്പിനെ തുടർന്ന്, മത്സരങ്ങൾ തടmപ്പെടാനും കായികതാരങ്ങളെ സുരക്ഷിത കേന്ദ്രങ്ങളിലേക്ക് മാറ്റാനും സാധ്യതയുണ്ടെന്ന് അധികൃതർ അറിയിച്ചു.

മണിക്കൂറിൽ 100 കിലോമീറ്റർ വേഗതയിൽ കാറ്റടിച്ചാൽ തീരദേശ നഗരത്തിൽ കഴിയുന്ന താരങ്ങളെ താൽക്കാലികമായി ഒഴിപ്പിക്കേണ്ടി വരും. സെപ്റ്റംബർ 21 ഓടെ 'ദുജുവാൻ' എന്ന ഉഷ്ണമേഖലാ ചുഴലിക്കാറ്റ് നഗോയ മേഖലയിലേക്ക് എത്തിയേക്കും. സാധാരണ മഴയയാണെങ്കിൽ മത്സരങ്ങൾ തുടരുമെന്നും എന്നാൽ പ്രകൃതിദുരന്ത മുന്നറിയിപ്പ് ലഭിച്ചാൽ താരങ്ങളെ സുരക്ഷിതമായി ഒഴിപ്പിക്കാൻ ക്രമീകരണങ്ങൾ ചെയ്തിട്ടുണ്ടെന്നും നഗോയ മേയറും ഗെയിംസ് ഡെപ്യൂട്ടി പ്രസിഡന്‍റുമായ ഇച്ചിറോ ഹിരോസാവ വ്യക്തമാക്കി.

BREAKING: TYPHOON THREAT IN NAGOYA, JAPAN! A typhoon with winds of around 100 km/h could hit Nagoya in 2 days during the Asian Games 2026.Around 4,000 athletes are staying on a cruise ship. What happens if the storm hits? (RevSportz Global) pic.twitter.com/AYBO7gjfpC

— Sports Apna (@sportsapna1) September 18, 2026

നഗരത്തിലെ താമസ സൗകര്യ പ്രതിസന്ധി പരിഹരിക്കാൻ എത്തിച്ച 'കോസ്റ്റ സെറീന' എന്ന ഇറ്റാലിയൻ ആഡംബര കപ്പലിൽ താമസിപ്പിച്ചിരിക്കുന്ന അയ്യായിരത്തോളം താരങ്ങളുടെ സുരക്ഷയ്ക്കായി പ്രത്യേക പദ്ധതിയും തയാറാക്കിയിട്ടുണ്ട്. കാറ്റിന്‍റെ വേഗത വർധിച്ചാൽ കപ്പൽ തീരത്തുനിന്ന് മാറി ആഴക്കടലിലെ സുരക്ഷിത സ്ഥാനത്തേക്ക് മാറ്റും.

വിവാദത്തിലായി ഗെയിംസ് ഗ്രാമം

ഗെയിംസിന്‍റെ ഔദ്യോഗിക ഉദ്ഘാടനത്തിന് തൊട്ടുമുമ്പ് പെയ്ത കനത്ത മഴയിൽ നഗോയയിലെ ചില പ്രദേശങ്ങൾ വെള്ളത്തിനടിയിലാവുകയും ചില മത്സരങ്ങൾ മാറ്റിവെക്കുകയും ചെയ്തിരുന്നു. ഇതിന് പുറമെ താരങ്ങൾക്ക് നൽകിയ താമസസൗകര്യത്തിലെ പോരായ്മകളും വലിയ വിവാദങ്ങൾക്ക് വഴിവെച്ചിട്ടുണ്ട്. ഇത്തവണ പ്രത്യേക ഗെയിംസ് വില്ലേജ് നിർമ്മിക്കുന്നതിന് പകരം ഹോട്ടലുകൾ, താൽക്കാലിക ഷിപ്പിംഗ് കണ്ടെയ്നർ ഹട്ടുകൾ, കോസ്റ്റ സെറീന കപ്പൽ എന്നിവയിലാണ് 17,000-ത്തോളം വരുന്ന കായികതാരങ്ങളെയും ഒഫീഷ്യലുകളെയും താമസിപ്പിച്ചിരിക്കുന്നത്. ഇടുങ്ങിയ മുറികളും ചെറിയ കട്ടിലുകളും വലിയ പ്രതിഷേധത്തിന് ഇടയാക്കി. കപ്പലിൽ മുറികൾ ലഭിക്കാൻ മണിക്കൂറുകളോളം ക്യൂ നിൽക്കേണ്ടി വന്നതായി ഇന്ത്യൻ ടീമും പരാതിപ്പെട്ടിരുന്നു.

എന്നാൽ മത്സരങ്ങൾക്ക് ശേഷം ഭീമമായ തുക ചെലവഴിച്ച് നിർമ്മിച്ച ഗെയിംസ് ഗ്രാമങ്ങൾ ഉപയോഗശൂന്യമായി കിടക്കുന്നത് ഒഴിവാക്കാനാണ് ഇത്തരമൊരു തീരുമാനം എടുത്തതെന്ന് ഒളിമ്പിക് കൗൺസിൽ ഓഫ് ഏഷ്യ പിന്തുണച്ചു. വരും ദിവസങ്ങളിലെ പ്രതികൂല കാലാവസ്ഥ ഏഷ്യൻ ഗെയിംസിന്‍റെ സംഘാടനത്തിന് വൻ വെല്ലുവിളിയാകുമെന്നാണ് വിലയിരുത്തൽ.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഏഷ്യന്‍ ഗെയിംസ്‌ ഹോക്കിയില്‍ ഇന്ത്യന്‍ വനിത ടീമിന്‌ 19 ഗോള്‍ ജയം, ക്രിക്കറ്റ്‌ സെമിയില്‍ ഇന്ത്യ ബാറ്റ്‌ ചെയ്യുന്നു, സ്‌മൃതി പുറത്തായി

Web Desk — Sun, 20 Sep 2026 11:17:43 +0530

നഗോയ: ഏഷ്യന്‍ ഗെയിംസ്‌ വനിതാ ഹോക്കിയില്‍ ഗോള്‍ മഴയോടെ ഇന്ത്യ തുടങ്ങി. ഉസ്‌ബെക്കിസ്ഥാനെ എതിരില്ലാത്ത 19 ഗോളുകള്‍ക്കാണ്‌ പൂള്‍ ബിയിലെ ആദ്യമത്സരത്തില്‍ ഇന്ത്യ തകര്‍ത്തുവിട്ടത്‌. തുടക്കം മുതല്‍ ആക്രമിച്ചു കളിച്ച ഇന്ത്യയുടെ ടോപ്‌ സ്‌കോറര്‍ എട്ട്‌ ഗോളുകള്‍ നേടിയ ദീപികയാണ്‌. 8,22,25,33,36,38,41,54 മിനുട്ടുകളിലായിരുന്നു ദീപികയുടെ സ്‌കോറിംഗ്‌. മിനുട്ടുകളുടെ വ്യത്യാസത്തിലാണ്‌ ദീപിക ഗോളടിച്ചു കൊണ്ടിരുന്നത്‌. ലാല്‍റെസിയാമിയാണ്‌ ആദ്യ ഗോളടിച്ചത്‌. ബല്‍ജീദ്‌, നേഹ, നവനീത്‌ കൗര്‍, ലാല്‍തല്യുയാംഗി, സാക്ഷി റാണ എന്നിവരും സ്‌കോര്‍ ചെയ്‌തു.

വെറ്ററന്‍ ഗോള്‍ കീപ്പര്‍ സവിത പൂനിയയുടെ 320 മത്‌ അന്താരാഷ്ട്ര മത്സരമായിരുന്നു ഇത്‌. മത്സരത്തില്‍ സവിതക്ക്‌ കാര്യമായ അധ്വാനമില്ലായിരുന്നു. മുഴുവന്‍ സമയവും ഉസ്‌ബെക്‌ ഗോള്‍ മുഖത്തായിരുന്നു ഇന്ത്യന്‍ ടീം. തിങ്കളാഴ്‌ച ഇന്തോനേഷ്യക്കെതിരെയാണ്‌ ഇന്ത്യയുടെ രണ്ടാം മത്സരം. ഏഷ്യാഡിലെ രണ്ടാമത്തെ റാങ്കിംഗിലുള്ള ഇന്ത്യന്‍ ടീമിന്‌ സ്വര്‍ണ മെഡല്‍ ലക്ഷ്യമുണ്ട്‌.

വനിതാ ക്രിക്കറ്റ്‌ സെമി: ടോസ്‌ നേടി ഇന്ത്യ

ഏഷ്യന്‍ ഗെയിംസ്‌ വനിതാ ക്രിക്കറ്റ്‌ സെമിഫൈനലില്‍ ബംഗ്ലാദേശിനെതിരെ ഇന്ത്യ ബാറ്റിംഗ്‌ ആരംഭിച്ചു. ടോസ്‌ ജയിച്ച ഇന്ത്യ ബാറ്റിംഗ്‌ തിരഞ്ഞെടുക്കുകയായിരുന്നു. ഏഴ്‌ ഓവറില്‍ ഒരു വിക്കറ്റിന്‌ 74 റണ്‍സെടുത്തിട്ടുണ്ട്‌ ഇന്ത്യ. സ്‌മൃതി മന്ദാനയുടെ വിക്കറ്റാണ്‌ നഷ്ടമായത്‌. 19 പന്തുകളില്‍ അഞ്ച്‌ ഫോറും രണ്ട്‌ സിക്‌സറും ഉള്‍പ്പടെ 37 റണ്‍സെടുത്താണ്‌ സ്‌മൃതി മടങ്ങിയത്‌. ഷഫാലി വര്‍മ 19 പന്തുകളില്‍ 36 റണ്‍സുമായി ക്രീസിലുണ്ട്‌. ഒരു റണ്‍സുമായി ഗുനാലന്‍ കമാലിനിയാണ്‌ ഒപ്പമുള്ളത്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഏഷ്യൻ ഗെയിംസിനായി ജപ്പാനിലെത്തിയ ഇന്ത്യൻ താരങ്ങൾ താമസസൗകര്യത്തിനായി കാത്തിരുന്നത് 14 മണിക്കൂർ

Gopalakrishnan C — Thu, 17 Sep 2026 12:35:26 +0530

ടോക്കിയോ: ജപ്പാനിൽ നടക്കുന്ന ഏഷ്യൻ ഗെയിംസിനെത്തിയ ഇന്ത്യൻ കായിക താരങ്ങൾക്ക് താമസസൗകര്യം ലഭിക്കാൻ മണിക്കൂറുകളോളം കാത്തിരിക്കേണ്ടി വന്നതായി പരാതി. ജപ്പാനിൽ വിമാനമിറങ്ങി ഗെയിംസ് വില്ലേജിലെത്തിയ ഇന്ത്യൻ സംഘത്തിന് 14 മണിക്കൂറിലേറെ കാത്തിരുന്ന ശേഷമാണ് മുറികൾ അനുവദിച്ചു ലഭിച്ചത്.

ലഭ്യമായ മുറികളിൽ പലതും താരങ്ങൾക്ക് പരസ്പരം പങ്കിടേണ്ടി വന്നുവെന്നും ചിലർക്ക് താൽക്കാലികമായി ഹോട്ടലുകളിലേക്ക് മാറേണ്ടി വന്നുവെന്നും റിപ്പോർട്ടുകളുണ്ട്. ഇന്ത്യൻ അത്ലറ്റുകൾക്ക് പുറമെ വിയറ്റ്നാം, ചൈന, ദക്ഷിണ കൊറിയ, തായ്‌ലൻഡ് തുടങ്ങിയ രാജ്യങ്ങളിൽ നിന്നുള്ള കായിക താരങ്ങളും സമാനമായ പ്രതിസന്ധി നേരിട്ടു.പല താരങ്ങളുടെയും കായിക ഉദ്യോഗസ്ഥരുടെയും മുൻകൂട്ടി ബുക്ക് ചെയ്ത റൂമുകൾ റദ്ദാക്കപ്പെട്ട നിലയിലാണ്. വിമാനത്താവളത്തിൽ മണിക്കൂറുകളോളം കാത്തുനിന്ന ശേഷമാണ് ചിലർക്ക് താമസസൗകര്യം ക്രമീകരിച്ചു നൽകിയത്.പ്രതിസന്ധി പരിഹരിക്കാൻ ഇന്ത്യൻ ഷെഫ് ഡി മിഷൻ സ്വന്ത നിലയിൽ 15 അധിക മുറികൾ ഹോട്ടലുകളിൽ ബുക്ക് ചെയ്യുകയായിരുന്നു.

INDIAN ATHLETES LEFT STRANDED IN NAGOYA DURING ASIAN GAMES! Indian athletes reportedly waited for more than 14 hours for accommodation after arriving in Nagoya for the Asian Games.Athletes from Vietnam, China, South Korea and Thailand were also reportedly aCredits -…

— The Khel India (@TheKhelIndia) September 17, 2026

റൂമുകളുടെ കുറവിന് പുറമെ യാത്രാസൗകര്യത്തിലെ പിഴവുകളും പരിശീലനത്തെ ബാധിക്കുന്നുണ്ട്. ഷൂട്ടിങ് സംഘത്തിന് താമസസ്ഥലത്തുനിന്ന് പരിശീലന കേന്ദ്രത്തിലേക്ക് എത്തുവാൻ രണ്ടു മണിക്കൂറിലധികം യാത്ര ചെയ്യേണ്ട അവസ്ഥയാണ്. കൂടാതെ പരിശീലന വേദികളിൽ കുടിവെള്ളമല്ലാതെ മറ്റ് പ്രാഥമിക സൗകര്യങ്ങളൊന്നും ലഭ്യമല്ലെന്നും പരാതിയുണ്ട്.

THAI SEPAK TAKRAW TEAM LEFT WITHOUT ROOMS AT ASIAN GAMESThailand’s national sepak takraw team was reportedly forced to sleep on the floor of a cruise ship lobby after arriving in Nagoya for #AsianGames2026, with their accommodation records reportedly missing.NOT A GOOD… https://t.co/CRZknhTjWf pic.twitter.com/xgkbVlif0r

— The Khel India (@TheKhelIndia) September 17, 2026

ഗെയിംസ് വില്ലേജിലെ മോശം സംഘാടനമാണ് ഇതിന് കാരണമായി ചൂണ്ടിക്കാണിക്കപ്പെടുന്നത്. മുൻ വർഷങ്ങളിലേത് പോലെ എല്ലാവർക്കുമായി ഒരൊറ്റ ഏകീകൃത ഗെയിംസ് വില്ലേജ് ഒരുക്കുന്നതിന് പകരം, ചെലവ് കുറയ്ക്കുന്നതിനായി ക്രൂയിസ് കപ്പലുകളും വൻകിട ഹോട്ടലുകളും ഉൾപ്പെടുന്ന വികേന്ദ്രീകൃത താമസ സംവിധാനങ്ങളാണ് ഇത്തവണ സംഘാടകർ ഒരുക്കിയിരിക്കുന്നത്. 15,000 താരങ്ങളെ പ്രതീക്ഷിച്ചിരുന്ന സ്ഥാനത്ത് പങ്കെടുക്കുന്നവരുടെ എണ്ണം 17,000 ആയി ഉയർന്നതാണ് വിമാനത്താവളത്തിൽ നിന്നും ഗെയിംസ് വില്ലേജിലേക്കുള്ള താരങ്ങളുടെ വരവിലും റൂം അലോട്ട്മെന്‍റിലും വലിയ ആശയക്കുഴപ്പങ്ങൾ ഉണ്ടാക്കിയത്. 45-ഓളം രാജ്യങ്ങളിൽ നിന്നായി പതിനൊന്നായിരത്തിലധികം അത്ലറ്റുകൾ അണിനിരക്കുന്ന 20-ാമത് ഏഷ്യൻ ഗെയിംസ് സെപ്റ്റംബർ 19 മുതൽ ഒക്ടോബർ 4 വരെയാണ് നടക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

കബഡിയിൽ വീണ്ടും ഇന്ത്യയുടെ സർവ്വാധിപത്യം, ഇറാനെ തോൽപ്പിച്ച് പുരുഷ ടീമിന് സ്വർണം; മെഡൽ പട്ടികയിൽ ആദ്യ 10ൽ

Gopalakrishnan C — Sat, 26 Sep 2026 16:04:27 +0530

നാഗോയ (ജപ്പാൻ): ഏഷ്യൻ ഗെയിംസ് കബഡിയിൽ പുരുഷ വിഭാഗത്തിലും സ്വർണനേട്ടവുമായി ഇന്ത്യ. ആവേശം അവസാന മിനിറ്റ് വരെ നീണ്ട ഫൈനൽ പോരാട്ടത്തിൽ കരുത്തരായ ഇറാനെ 40-34 എന്ന സ്കോറിനാണ് ഇന്ത്യ പരാജയപ്പെടുത്തിയത്. ഏഷ്യൻ ഗെയിംസ് പുരുഷ കബഡി ചരിത്രത്തിൽ ഇന്ത്യ നേടുന്ന ഒൻപതാം സ്വർണ്ണമെഡലാണിത്. മത്സരത്തിന്റെ ആദ്യ പകുതിയിൽ ഇറാൻ കടുത്ത വെല്ലുവിളിയാണ് ഉയർത്തിയത്. തിരിച്ചടികളോടെയായിരുന്നു ഇന്ത്യയുടെ തുടക്കം. ആദ്യ പകുതി അവസാനിക്കുമ്പോൾ 18-17 എന്ന സ്കോറിന് ഇറാനായിരുന്നു മുന്നിൽ നിൽന്നിരുന്നത്.

എന്നാൽ രണ്ടാം പകുതിയിൽ ക്യാപ്റ്റൻ സുനിൽ കുമാറിന്‍റെയും അർജുൻ ദേശ്വാളിന്‍റെയും തകർപ്പൻ പ്രകടനത്തോടെ ഇന്ത്യ മത്സരം തിരികെ പിടിക്കുകയായിരുന്നു. അസ്ലം, അർജുൻ ദേശ്വാൾ എന്നിവരുടെ മിന്നൽ റെയ്ഡിംഗും സുമിത്, രാഹുൽ എന്നിവരുടെ പ്രതിരോധ മികവും ചേർന്ന് കളി ഇന്ത്യയുടെ കൈപ്പിടിയിലാക്കി. മത്സരം തീരാൻ രണ്ട് മിനിറ്റ് മാത്രം ബാക്കിനിൽക്കെ ഒൻപത് പോയിന്റിന്റെ കൂറ്റൻ ലീഡ് ഇന്ത്യ സ്വന്തമാക്കിയിരുന്നു.

ഒടുവിൽ 40-34 എന്ന വ്യക്തമായ മാർജിനിൽ വിജയം ഉറപ്പിച്ച് ഇന്ത്യൻ പുരുഷ ടീം ഏഷ്യൻ ഗെയിംസിലെ തങ്ങളുടെ ഒൻപതാം സ്വർണം സ്വന്തമാക്കി.ഇന്ന് നേരത്തെ നടന്ന വനിതാ വിഭാഗം ഫൈനലിലും ഇറാനെ പരാജയപ്പെടുത്തി (37-34) ഇന്ത്യൻ വനിതാ ടീമും സ്വർണ്ണം നേടിയിരുന്നു. കബഡിയിൽ ഇരട്ട സ്വർണ്ണമെന്ന അപൂർവ്വ നേട്ടത്തോടെ ഏഷ്യൻ ഗെയിംസിൽ ഇന്ത്യ തങ്ങളുടെ ആധിപത്യം ഒന്നു കൂടി ഉറപ്പിച്ചു.

കബഡിയിൽ ഇരട്ട സ്വർണം നേടിയതോടെ ഗെയിംസിൽ ഇന്ത്യയുടെ മെഡൽ നേട്ടം 28 ആയി. 4 സ്വര്‍ണവും 11 വെള്ളിയും 13 വെങ്കലവുമടക്കം 28 മെഡലുകള്‍ നേടിയ ഇന്ത്യ മെഡല്‍പ്പട്ടികയില്‍ പത്താം സ്ഥാനത്തേക്ക് ഉയര്‍ന്നു. 105 സ്വര്‍ണവും 39 വെള്ളിയും 25 വെങ്കലവുമടക്കം169 മെഡലുമായി ചൈനയാണ് ഒന്നാമത്. 30 സ്വര്‍ണമടക്കം 120 മെഡലുമായി ജപ്പാൻ രണ്ടാമതും 13 സ്വര്‍ണമടക്കം 69 മെഡലുകളുമായി ദക്ഷിണ കൊറിയ മൂന്നാമതുമാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഏഷ്യൻ ഗെയിംസ്: വിസ്മയമായി വിദര്‍ശ, പുരുഷ മാരത്തണിൽ ചരിത്രം കുറിച്ച് സാവൻ ബർവാൾ; ഇന്ത്യയ്ക്ക് വെള്ളി തിളക്കം

Gopalakrishnan C — Sat, 26 Sep 2026 08:59:11 +0530

നാഗോയ (ജപ്പാൻ): ഏഷ്യൻ ഗെയിംസ് ഷൂട്ടിംഗ് റേഞ്ചിൽ നിന്ന് ഇന്ത്യയ്ക്ക് വീണ്ടും മെഡൽ നേട്ടം. വനിതകളുടെ 50 മീറ്റർ റൈഫിൾ 3 പൊസിഷൻ ടീം ഇനത്തിൽ തിലോത്തമ സെൻ, മലയാളി താരം വിദർശ വിനോദ്, ആഷി ചൗക്‌സി എന്നിവരടങ്ങിയ ഇന്ത്യൻ സഖ്യം വെള്ളി മെഡൽ സ്വന്തമാക്കി. ഏഷ്യൻ ഗെയിംസ് ഷൂട്ടിംഗിൽ ഇന്ത്യയുടെ 11-ാം മെഡലാണിത്.കടുത്ത പോരാട്ടം നടന്ന ഫൈനലിൽ ആകെ 1,763 പോയിന്റുകൾ നേടിയാണ് ഇന്ത്യൻ ടീം രണ്ടാം സ്ഥാനം ഉറപ്പിച്ചത്. 1,773 പോയിന്റോടെ ഗെയിംസ് റെക്കോർഡ് സമനിലയിലാക്കിയ ചൈന സ്വർണം നേടിയപ്പോൾ, 1,754 പോയിന്റോടെ കസാഖിസ്ഥാന് വെങ്കലം കൊണ്ട് തൃപ്തിപ്പെടേണ്ടി വന്നു.

മലയാളി താരമായ വിദർശ വിനോദും തിലോത്തമ സെന്നും മിന്നുന്ന പ്രകടനത്തോടെ വ്യക്തിഗത വിഭാഗം ഫൈനലിലേക്കും യോഗ്യത നേടി. യോഗ്യതാ റൗണ്ടിൽ തിലോത്തമ 590 പോയിന്‍റോടെ മൂന്നാം സ്ഥാനത്തും വിദർശ 588 പോയിന്‍റോടെ ആറാം സ്ഥാനത്തുമെത്തിയാണ് ഫൈനലിൽ പ്രവേശിച്ചത്. 585 പോയിന്‍റുകൾ നേടിയ ആഷി ചൗക്‌സിക്ക് വ്യക്തിഗത ഫൈനൽ യോഗ്യത നേടാനായില്ല. നേരത്തെ വനിതകളുടെ 10 മീറ്റർ എയർ റൈഫിൾ ടീം ഇനത്തിലും വിദര്‍ശ വെള്ളി നേടിയരുന്നു.

പുരുഷന്മാരുടെ മാരത്തൺ ഫൈനലിൽ ഇന്ത്യയുടെ സാവൻ ബർവാൾ ഇന്ത്യക്കായി വെള്ളി മെഡൽ നേടി ചരിത്രം കുറിച്ചു. 2:11:37 മണിക്കൂറിൽ വ്യക്തിഗത മികച്ച സമയം കുറിച്ചാണ് സാവന്‍റെ ഈ നേട്ടം. ഏഷ്യൻ ഗെയിംസ് മാരത്തണിൽ 44 വർഷത്തെ നീണ്ട കാത്തിരിപ്പിനൊടുവിലാണ് ഇന്ത്യ ഒരു മെഡൽ സ്വന്തമാക്കുന്നത്. 1982-ന് ശേഷം ആദ്യമായാണ് ഇന്ത്യ പുരുഷ മാരത്തണിൽ മെഡൽ നേടുന്നത്.

A new National Record and a historic Silver for India! 44 years later, Sawan Barwal puts India back on the Men's Marathon podium at the Asian Games with a sensational :: finish! Watch the 20th Asian Games Aichi-Nagoya LIVE on Sony Sports Network TV channels &… pic.twitter.com/nUAJqoNO0I

— Sony Sports Network (@SonySportsNetwk) September 26, 2026

അതേസമയം, ആർച്ചറിയിൽ അമ്പെയ്ത്ത് വിഭാഗങ്ങളായ കോമ്പൗണ്ട്, റിക്കർവ് ഇനങ്ങളിൽ പുരുഷ-വനിതാ ടീമുകളുടെയും വ്യക്തിഗത വിഭാഗങ്ങളുടെയും യോഗ്യതാ മത്സരങ്ങൾ പുരോഗമിക്കുകയാണ്.ഇന്നത്തെ രണ്ട് വെള്ളി മെഡലുകൾ കൂടി കൂട്ടിച്ചേർത്തതോടെ ഏഷ്യൻ ഗെയിംസിൽ ഇന്ത്യയുടെ ആകെ മെഡൽ നേട്ടം 25 ആയി ഉയർന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഇറാന്‍റെ ശക്തമായ വെല്ലുവിളി മറികടന്ന് ഇന്ത്യൻ വനിതകള്‍, ഏഷ്യൻ ഗെയിംസ് കബഡിയിൽ സ്വർണം

Gopalakrishnan C — Sat, 26 Sep 2026 10:57:39 +0530

നാഗോയ (ജപ്പാൻ): ഏഷ്യൻ ഗെയിംസിൽ ഇന്ത്യയുടെ മെഡൽ വേട്ട തുടരുന്നു. ഏഷ്യൻ ഗെയിംസ് ഏഴാം ദിനം വനിതകളുടെ കബഡിയിൽ ഇന്ത്യ സ്വർണം നേടി. കലാശപ്പോരാട്ടത്തിൽ ഇറാന്‍റെ ശക്തമായ വെല്ലുവിളി അതിജീവിച്ചാണ് ഇന്ത്യൻ വനിതകള്‍ സ്വര്‍ണം നിലനിര്‍ത്തിയത്. ഇഞ്ചോടിഞ്ച് പോരാട്ടത്തിനൊടുവില്‍ 37-34 എന്ന സ്കോറിനാണ് ഇറാന്‍റെ ശക്തമായ വെല്ലുവിളി മറികടന്ന് ഇന്ത്യ സ്വര്‍ണം നേടിയത്. കളിയുടെ ആദ്യ പകുതിയിൽ ഇരു ടീമുകളും ഒപ്പത്തിനൊപ്പം (20-19) പോരാടിയെങ്കിലും, രണ്ടാം പകുതിയിൽ ഇന്ത്യ നടത്തിയ തന്ത്രപരമായ മുന്നേറ്റങ്ങളും നിർണ്ണായകമായ 'ഓൾഔട്ടുകളും' മത്സരത്തിൽ വ്യക്തമായ മേൽക്കോയ്മ നൽകി.

റെയ്ഡിംഗിൽ ഇന്ത്യൻ ക്യാപ്റ്റൻ പുഷ്പ റാണയുടെ ടാക്കിളിംഗിൽ പ്രതിരോധ താരങ്ങളുടെയും സമയബന്ധിതമായ ഇടപെടലുകളാണ് അവസാന നിമിഷങ്ങളിൽ ഇന്ത്യയ്ക്ക് വിജയം ഉറപ്പാക്കിയത്. കബഡി സ്വര്‍ണത്തോടെ ഇതോടെ ഈ ഏഷ്യൻ ഗെയിംസിൽ ഇന്ത്യയുടെ ആകെ സ്വർണ നേട്ടം മൂന്നായി ഉയർന്നു. കബഡിയിൽ പുരുഷ ടീമും ഇന്ന് സ്വര്‍ണമെഡല്‍ പോരാട്ടത്തിനിറങ്ങുന്നുണ്ട്. ഇറാന്‍ തന്നെയാണ് പുരുഷ ഫൈനലിലും ഇന്ത്യയുടെ എതിരാളികള്‍.

Team India’s women put Iran under immense pressure and force an ALL OUT in the first half of the Women's Kabaddi gold medal match! Watch the 20th Asian Games Aichi-Nagoya LIVE on Sony Sports Network TV channels & Sony LIV.#SonySportsNetwork #SonyLIV #AsianGames… pic.twitter.com/ECvOam5kK5

— Sony Sports Network (@SonySportsNetwk) September 26, 2026

നേരത്തെ പുരുഷന്മാരുടെ മാരത്തണിൽ സാവൻ ബർവാളും ഷൂട്ടിംഗിൽ വനിതാ ടീമും വെള്ളി മെഡലുകൾ നേടി തിളങ്ങിയിരുന്നു. ഇതിന് പിന്നാലെ കബഡിയിലും സ്വർണം നേടിയതോടെ ഗെയിംസിൽ ഇന്ത്യയുടെ മെഡൽ നേട്ടം 27 ആയി. 3 സ്വര്‍ണവും 11 വെള്ളിയും 13 വെങ്കലവുമടക്കം 27 മെഡലുകള്‍ നേടിയ ഇന്ത്യ മെഡല്‍പ്പട്ടികയില്‍ 12-ാം സ്ഥാനത്ത് തന്നെയാണ്. 105 സ്വര്‍ണവും 39 വെള്ളിയും 25 വെങ്കലവുമടക്കം169 മെഡലുമായി ചൈനയാണ് ഒന്നാമത്. 30 സ്വര്‍ണമടക്കം 120 മെഡലുമായി ജപ്പാൻ രണ്ടാമതും 13 സ്വര്‍ണമടക്കം 69 മെഡലുകളുമായി ദക്ഷിണ കൊറിയ മൂന്നാമതുമാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക