Asianet News Malayalam

കുവൈത്തിലെ ജലീബ് അൽ ഷുയൂഖിൽ വൻ സുരക്ഷാ പരിശോധന; 386 നിയമലംഘനങ്ങൾ കണ്ടെത്തി, 47 പേർ അറസ്റ്റിൽ

Reshma Vijayan — Mon, 19 Oct 2026 17:52:29 +0530

കുവൈത്ത് സിറ്റി: കുവൈത്തിലെ ജലീബ് അൽ ഷുയൂഖ് പ്രദേശത്ത് ആഭ്യന്തര മന്ത്രാലയം നടത്തിയ വിപുലമായ സുരക്ഷാ പരിശോധനയിൽ 386 നിയമലംഘനങ്ങൾ രേഖപ്പെടുത്തി. വിവിധ കേസുകളിൽ അന്വേഷിച്ചിരുന്ന 47 പേരെ അറസ്റ്റ് ചെയ്തു. പ്രദേശത്തെ നിയമലംഘനങ്ങൾ തടയുന്നതിനും സുരക്ഷ ശക്തമാക്കുന്നതിനുമായി വിവിധ സുരക്ഷാ വിഭാഗങ്ങളുടെ സഹകരണത്തോടെയാണ് പരിശോധന നടത്തിയത്.

താമസനിയമങ്ങളും തൊഴിൽ നിയമങ്ങളും ലംഘിക്കുന്നവരെയും വിവിധ കേസുകളിൽ അധികൃതർ അന്വേഷിക്കുന്നവരെയും കണ്ടെത്തുന്നതിനായിരുന്നു പരിശോധനയിൽ പ്രധാന പരിഗണന. അറസ്റ്റിലായവരെ തുടർ നിയമനടപടികൾക്കായി ബന്ധപ്പെട്ട വിഭാഗങ്ങൾക്ക് കൈമാറി. രാജ്യത്തെ സുരക്ഷ ഉറപ്പാക്കുന്നതിനും നിയമലംഘനങ്ങൾ തടയുന്നതിനുമായി വിവിധ പ്രദേശങ്ങളിൽ പരിശോധനകൾ തുടരുമെന്ന് ആഭ്യന്തര മന്ത്രാലയം അറിയിച്ചു.

കുട്ടികളെ മറയാക്കി മയക്കുമരുന്ന് കച്ചവടം; രഹസ്യ വിവരം ലഭിച്ചതോടെ പരിശോധന, വിദേശ വനിത കുവൈത്തിൽ അറസ്റ്റിൽ

Reshma Vijayan — Mon, 19 Oct 2026 17:07:52 +0530

കുവൈത്ത് സിറ്റി: കുവൈത്തിലെ ജലീബ് അൽ ഷുയൂഖ് പ്രദേശത്ത് കുട്ടികളെ മറയാക്കി മയക്കുമരുന്ന് വിൽപന നടത്തിയ എത്യോപ്യൻ വനിത അറസ്റ്റിൽ. ആവശ്യക്കാർക്കായി നിശ്ചിത സ്ഥലങ്ങളിൽ ഹാഷിഷ് സിഗരറ്റ് ഒളിപ്പിച്ചു വെക്കുന്നതിനിടയിലാണ് ഇവർ പിടിയിലായത്. തുടർന്ന് ഇവരെ കൂടുതൽ അന്വേഷണത്തിനായി ജനറൽ ഡിപ്പാർട്ട്മെന്റ് ഫോർ ഡ്രഗ് കൺട്രോളിന് കൈമാറി.

സുരക്ഷാ ഉദ്യോഗസ്ഥരുടെ ശ്രദ്ധ തിരിക്കുന്നതിനും സംശയം ഒഴിവാക്കുന്നതിനുമായാണ് ഇവർ ലഹരി വസ്തുക്കൾ കൈമാറാൻ പോകുമ്പോൾ കുട്ടികളെ കൂടെ കൂട്ടിയിരുന്നതെന്ന് പൊലീസ് അന്വേഷണത്തിൽ വ്യക്തമായി. രഹസ്യ വിവരത്തെ തുടർന്ന് ഇവരുടെ താമസസ്ഥലത്ത് നടത്തിയ റെയ്ഡിൽ വിൽപനയ്ക്കായി തയ്യാറാക്കി വെച്ചിരുന്ന കൂടുതൽ മയക്കുമരുന്ന് ചേർത്ത സിഗരറ്റുകളും പിടിച്ചെടുത്തിട്ടുണ്ട്.

പിടിയിലായ സമയത്ത് ഇവരുടെ കൂടെ മൂന്ന് കുട്ടികൾ ഉണ്ടായിരുന്നെങ്കിലും അവരുടെ തിരിച്ചറിയൽ രേഖകൾ ഹാജരാക്കാൻ ഇവർക്ക് കഴിഞ്ഞിട്ടില്ല. കുട്ടികളെ കൂടെക്കൂട്ടിയതുമായി ബന്ധപ്പെട്ട സാഹചര്യങ്ങളെക്കുറിച്ചും മയക്കുമരുന്ന് എവിടെ നിന്നാണ് ലഭിച്ചതെന്നതിനെക്കുറിച്ചും പൊലീസ് വിശദമായ അന്വേഷണം ആരംഭിച്ചിട്ടുണ്ട്.

സൗദി അറേബ്യയിൽ വ്യാപക പരിശോധന; ഒരാഴ്ചക്കിടെ പതിനായിരത്തിലേറെ നിയമലംഘനങ്ങൾ കണ്ടെത്തി; 34,834 പ്രവാസികൾക്കെതിരെ നടപടി

Reshma Vijayan — Mon, 19 Oct 2026 16:36:20 +0530

റിയാദ്: സൗദി അറേബ്യയിൽ ഇഖാമ, തൊഴിൽ, അതിർത്തി സുരക്ഷാ നിയമങ്ങൾ ലംഘിച്ചതിന് ഒരാഴ്ചക്കിടെ 13,800ലധികം കേസുകൾ റിപ്പോർട്ട് ചെയ്തു. ഒക്ടോബർ 8 മുതൽ 14 വരെ രാജ്യവ്യാപകമായി നടത്തിയ പരിശോധനയിലാണ് 13,822 നിയമലംഘനങ്ങൾ കണ്ടെത്തിയതെന്ന് സൗദി ആഭ്യന്തര മന്ത്രാലയം അറിയിച്ചു. സൗദി പ്രസ് ഏജൻസിയാണ് വാർത്ത റിപ്പോർട്ട് ചെയ്തത്. നിയമലംഘനങ്ങളിൽ 6,547 എണ്ണം ഇഖാമ നിയമ ലംഘനങ്ങളും, 3,896 എണ്ണം അതിർത്തി സുരക്ഷാ ലംഘനങ്ങളും 3,379 എണ്ണം തൊഴിൽ നിയമ ലംഘനങ്ങളുമാണ്.

കഴിഞ്ഞ ആഴ്ച രാജ്യത്തേക്ക് അനധികൃതമായി പ്രവേശിക്കാൻ ശ്രമിച്ച 2,021 പേരെ അധികൃതർ പിടികൂടി. കൂടാതെ രാജ്യത്ത് നിന്ന് അനധികൃതമായി പുറത്തുകടക്കാൻ ശ്രമിച്ച 28 പേരും അറസ്റ്റിലായിട്ടുണ്ട്. ചട്ടങ്ങൾ ലംഘിച്ച് പ്രവാസികളെ കടത്തുകയോ ഒളിപ്പിക്കുകയോ ജോലിക്ക് സഹായിക്കുകയോ ചെയ്ത 24 പേരും പിടിയിലായവരിൽ ഉൾപ്പെടുന്നു.

ആകെ 34,834 പ്രവാസികളാണ് (32,433 പുരുഷന്മാരും 2,401 സ്ത്രീകളും) നിലവിൽ നിയമാനുസൃതമായ നടപടികൾ നേരിടുന്നത്. ഇതിൽ 20,190 പേർക്ക് യാത്രാ രേഖകൾ ശരിയാക്കുന്നതിനായി അതത് എംബസികളുമായോ കോൺസലേറ്റുകളുമായോ ബന്ധപ്പെടാൻ നിർദ്ദേശം നൽകി. 6,509 പേർക്ക് മടക്കയാത്രക്കുള്ള സൗകര്യങ്ങൾ ഒരുക്കാൻ നിർദ്ദേശം നൽകിയപ്പോൾ, 9,454 പേരെ ഇതിനോടകം നാടുകടത്തിയതായും മന്ത്രാലയം അറിയിച്ചു.

അനധികൃതമായി രാജ്യത്തേക്ക് പ്രവേശിക്കാൻ സഹായിക്കുന്നവർക്കും നിയമലംഘകരെ വാഹനങ്ങളിൽ കടത്തുന്നവർക്കും അഭയവും മറ്റ് സഹായങ്ങളും നൽകുന്നവർക്കും 15 വർഷം വരെ തടവും 10 ലക്ഷം സൗദി റിയാൽ വരെ പിഴയും ലഭിക്കുമെന്ന് ആഭ്യന്തര മന്ത്രാലയം കർശന മുന്നറിയിപ്പ് നൽകി. നിയമലംഘകർക്ക് ഉപയോഗിച്ച വാഹനങ്ങളും അവർക്കായി അഭയം നൽകിയ വസ്തുവകകളും കണ്ടുകെട്ടുന്നതായിരിക്കും. ഇത്തരത്തിലുള്ള കുറ്റകൃത്യങ്ങൾ അറസ്റ്റ് ചെയ്യപ്പെടേണ്ട ഗൗരവമേറിയ കുറ്റങ്ങളാണെന്ന് മന്ത്രാലയം വ്യക്തമാക്കി.

സംശയകരമായ നിയമലംഘനങ്ങൾ ശ്രദ്ധയിൽപ്പെട്ടാൽ പൊതുജനങ്ങൾ ഉടൻ അധികൃതരെ വിവരം അറിയിക്കണമെന്ന് മന്ത്രാലയം അഭ്യർത്ഥിച്ചു. മക്ക, റിയാദ്, കിഴക്കൻ പ്രവിശ്യ എന്നിവിടങ്ങളിൽ 911 എന്ന നമ്പറിലും, സൗദി അറേബ്യയിലെ മറ്റ് പ്രവിശ്യകളിൽ 999 അല്ലെങ്കിൽ 996 എന്നീ നമ്പറുകളിലും വിളിച്ച് പൊതുജനങ്ങൾക്ക് വിവരങ്ങൾ റിപ്പോർട്ട് ചെയ്യാവുന്നതാണ്.

അന്താരാഷ്ട്ര ബ്രാൻഡുകളുടെ പേരിൽ വ്യാജ പെർഫ്യൂം; രഹസ്യ പരിശോധന, കുവൈത്തിൽ 4,000 കുപ്പി പിടിച്ചെടുത്തു, രണ്ട് പ്രവാസികൾ അറസ്റ്റിൽ

Reshma Vijayan — Mon, 19 Oct 2026 16:00:51 +0530

കുവൈത്ത് സിറ്റി: കുവൈത്തിൽ പ്രമുഖ അന്താരാഷ്ട്ര ബ്രാൻഡുകളുടെ പേരിൽ വ്യാജ പെർഫ്യൂമുകൾ നിർമ്മിച്ച് വിൽപ്പന നടത്തിയ രണ്ട് ബംഗ്ലാദേശ് സ്വദേശികളെ ക്രിമിനൽ ഇൻവെസ്റ്റിഗേഷൻ വിഭാഗം അറസ്റ്റ് ചെയ്തു. മംഗഫിൽ നടത്തിയ രഹസ്യ പരിശോധനയിൽ 150 ദിനാർ വിലവരുന്ന മൂന്ന് പെർഫ്യൂം കുപ്പികൾ വെറും 17 ദിനാറിന് വിറ്റ പ്രതിയെയാണ് ആദ്യം പിടികൂടിയത്.

തുടർന്നുള്ള അന്വേഷണത്തിൽ വ്യാജ പെർഫ്യൂമുകൾ നിർമ്മിക്കുകയും സൂക്ഷിക്കുകയും ചെയ്തിരുന്ന അപ്പാർട്ട്മെന്‍റ് കണ്ടെത്തി രണ്ടാമത്തെ പ്രതിയെയും അറസ്റ്റ് ചെയ്തു. പരിശോധനയിൽ വിവിധ പ്രമുഖ ബ്രാൻഡുകളുടെ പേരിലുള്ള ഏകദേശം 4,000 പെർഫ്യൂം കുപ്പികളും സുഗന്ധ എണ്ണകളും ആൽക്കഹോളും പെർഫ്യൂം നിറയ്ക്കുന്നതിനുള്ള ഉപകരണങ്ങളും പിടിച്ചെടുത്തു. ഒറിജിനൽ ബ്രാൻഡുകളുടെ കുപ്പികളിൽ വ്യാജ സുഗന്ധദ്രവ്യങ്ങൾ നിറച്ച് യഥാർത്ഥ ഉൽപ്പന്നങ്ങളെന്ന പേരിലാണ് ഇവർ വിൽപ്പന നടത്തിയിരുന്നത്. അറസ്റ്റിലായ പ്രതികളെയും പിടിച്ചെടുത്ത വസ്തുക്കളും തുടർ നിയമനടപടികൾക്കായി ബന്ധപ്പെട്ട അധികൃതർക്ക് കൈമാറി.

ഷാര്‍ജയിൽ വാഹനാപകടത്തില്‍ പ്രവാസി മലയാളി മരിച്ചു

Reshma Vijayan — Mon, 19 Oct 2026 15:46:45 +0530

ഷാര്‍ജ: യുഎഇയിലെ ഷാര്‍ജയിലുണ്ടായ വാഹനാപകടത്തില്‍ പ്രവാസി മലയാളി മരിച്ചു. മലപ്പുറം മൊറയൂര്‍ സ്വദേശി ചെമ്പരീരി അബ്ദുല്‍ വാജിദ് (32) ആണ് മരിച്ചത്. ഇന്നലെ രാത്രി എട്ടുമണിയോടെയാണ് അപകടം ഉണ്ടായത്. കാര്‍ ട്രാക് മാറുന്നതിനിടെ ട്രക്കില്‍ ഇടിക്കുകയായിരുന്നു. അബുദാബിയില്‍ ജോലി ചെയ്തുവന്ന വാജിദ് കുടുംബ സമേതം ഷാര്‍ജ മേഖലയില്‍ സന്ദര്‍ശനത്തിന് എത്തിയതായിരുന്നു. മൊറയൂര്‍ സ്വദേശി ചെമ്പരീരി അബ്ദുറഹീമിന്‍റെയും കദീജയുടെയും മകനാണ്. അരീക്കോട് കൊല്ലത്തൊടി ഷാക്കിറിന്‍റെ മകള്‍ സനയാണ് ഭാര്യ. മക്കള്‍: ഹെയ്സ് (5), മിറ (2). നടപടികള്‍ പൂര്‍ത്തിയാക്കി മൃതദേഹം ദുബൈ അല്‍ ഖിസൈസ് സോനാപൂര്‍ ഖബര്‍സ്ഥാനില്‍ ഖബറടക്കി.

യുഎഇയിൽ അടുത്ത അഞ്ച് ദിവസം മഴയ്ക്ക് സാധ്യത; ശക്തമായ കാറ്റും മൂടൽമഞ്ഞും, കാലാവസ്ഥ മുന്നറിയിപ്പ്

Reshma Vijayan — Mon, 19 Oct 2026 14:20:43 +0530

ദുബായ്: യുഎഇയിൽ അടുത്ത അഞ്ച് ദിവസങ്ങളിൽ അസ്ഥിരമായ കാലാവസ്ഥയ്ക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി. രാജ്യത്തിന്റെ വിവിധ ഭാഗങ്ങളിൽ ശക്തമായ മഴയ്ക്കും മണിക്കൂറിൽ 50 കിലോമീറ്റർ വരെ വേഗതയുള്ള ശക്തമായ കാറ്റിനും പൊടിപടലങ്ങൾ ഉയർന്നുവരുന്നതിനും സാധ്യതയുണ്ട്.

അന്തരീക്ഷത്തിലുണ്ടാകുന്ന ഉപരിതല ന്യൂനമർദ്ദങ്ങളുടെ സ്വാധീനഫലമായാണ് കാലാവസ്ഥാ വ്യതിയാനം. ഉച്ചയ്ക്ക് ശേഷം രാജ്യത്തിന്റെ കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാൻ സാധ്യതയുണ്ട്. സാധാരണ നിലയിൽ വീശുന്ന കാറ്റ് മേഘാവൃതമായ സമയങ്ങളിൽ ശക്തമായേക്കാം. പർവ്വതമേഖലകളിൽ കാറ്റിന്റെ വേഗത മണിക്കൂറിൽ 45 കിലോമീറ്റർ വരെയും ഉൾപ്രദേശങ്ങളിൽ 40 കിലോമീറ്റർ വരെയും തീരദേശങ്ങളിൽ 35 കിലോമീറ്റർ വരെയും ഉയരാൻ സാധ്യതയുണ്ട്.

രാജ്യത്തിന്റെ ആഭ്യന്തര മേഖലകളിൽ ഉയർന്ന താപനില 42 ഡിഗ്രി സെൽഷ്യസ് വരെ രേഖപ്പെടുത്തിയേക്കാം. തീരദേശങ്ങളിലും ദ്വീപുകളിലും 34 ഡിഗ്രി സെൽഷ്യസ് മുതൽ 39 ഡിഗ്രി സെൽഷ്യസ് വരെയും, പർവ്വതപ്രദേശങ്ങളിൽ 28 ഡിഗ്രി സെൽഷ്യസ് മുതൽ 33 ഡിഗ്രി സെൽഷ്യസ് വരെയുമായിരിക്കും താപനില. രാത്രികാലങ്ങളിലും ചൊവ്വാഴ്ച രാവിലെയോടെയും അന്തരീക്ഷത്തിൽ ഈർപ്പത്തിന്‍റെ അളവ് വർധിക്കും. തീരദേശ മേഖലകളിൽ മൂടൽമഞ്ഞിനും സാധ്യതയുണ്ട്.

ചൊവ്വ, ബുധൻ ദിവസങ്ങളിൽ രാജ്യത്തിന്‍റെ കിഴക്കൻ മേഖലകളിൽ രൂപപ്പെടുന്ന മഴമേഘങ്ങൾ ഉച്ചയോടെ പടിഞ്ഞാറൻ മേഖലകളിലേക്ക് വ്യാപിച്ചേക്കാം. കാറ്റിന്റെ വേഗത മണിക്കൂറിൽ 50 കിലോമീറ്റർ വരെ ഉയരാൻ സാധ്യതയുള്ളതിനാൽ തുറസ്സായ സ്ഥലങ്ങളിൽ കാഴ്ചപരിധി കുറയാൻ സാധ്യതയുണ്ട്. വ്യാഴാഴ്ച ഭാഗികമായി മേഘാവൃതമായ അന്തരീക്ഷമായിരിക്കും. ഉച്ചയ്ക്ക് ശേഷം കിഴക്കൻ, പടിഞ്ഞാറൻ മേഖലകളിൽ മഴ പെയ്തേക്കാം. മണിക്കൂറിൽ 40 കിലോമീറ്റർ വേഗതയിൽ പൊടിക്കാറ്റ് വീശിയടിക്കാൻ സാധ്യതയുണ്ട്. വെള്ളിയാഴ്ച പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും. രാത്രിയിലും ശനിയാഴ്ച രാവിലെയോടെയും പടിഞ്ഞാറൻ തീരദേശങ്ങളിൽ മൂടൽമഞ്ഞ് രൂപപ്പെടാനുള്ള സാധ്യതയുമുണ്ട്.

യുഎഇയിൽ ടാങ്കർ കാറിലിടിച്ച് ഇരുപതുകാരിയായ വിദ്യാർത്ഥിനി മരിച്ചു; സുഹൃത്തിന് പരിക്ക്

Reshma Vijayan — Mon, 19 Oct 2026 13:58:06 +0530

റാസൽഖൈമ: യുഎഇയിലെ അൽ ദൈദ് റോഡിൽ പെട്രോളിയം ഉൽപ്പന്നങ്ങളുമായി വന്ന ടാങ്കർ കാറിലിടിച്ച് 20കാരിയായ എമിറാത്തി വിദ്യാർത്ഥിനി മരിച്ചു. കാർ ഓടിച്ചിരുന്ന സഹപാഠിയായ മറ്റൊരു പെൺകുട്ടിയുടെ കൈയ്ക്ക് പരിക്കേറ്റു. വെള്ളിയാഴ്ചയായിരുന്നു ദാരുണമായ സംഭവം.

അൽ ഐനിലെ യുഎഇ യൂണിവേഴ്‌സിറ്റിയിൽ നിന്ന് പഠനം കഴിഞ്ഞ് റാസൽഖൈമയിലെ വീട്ടിലേക്ക് മടങ്ങുകയായിരുന്നു ഇരുവരും. ഇവർ സഞ്ചരിച്ചിരുന്ന കാറിന്റെ ലെയ്നിലേക്ക് പെട്ടെന്ന് നിയന്ത്രണം വിട്ടെത്തിയ ടാങ്കർ, മരണപ്പെട്ട പെൺകുട്ടി ഇരുന്ന വശത്തേക്ക് ഇടിച്ചുകയറുകയായിരുന്നുവെന്ന് ബന്ധുക്കൾ പറഞ്ഞു. പെൺകുട്ടി സംഭവസ്ഥലത്ത് തന്നെ മരിച്ചു. പരിക്കേറ്റ ഡ്രൈവറെ ഉടൻ തന്നെ ആശുപത്രിയിൽ പ്രവേശിപ്പിച്ചു. ഇവരുടെ നില തൃപ്തികരമാണെന്ന് ആശുപത്രി അധികൃതർ അറിയിച്ചു. മറ്റ് നാല് സഹപാഠികൾക്കൊപ്പം മിനിബസിലായിരുന്നു കൊല്ലപ്പെട്ട പെൺകുട്ടി സാധാരണ വീട്ടിലേക്ക് മടങ്ങിയിരുന്നത്. വെള്ളിയാഴ്ചയും മിനിബസിൽ യാത്ര ചെയ്യാൻ പദ്ധതിയിട്ടിരുന്നെങ്കിലും, സ്വന്തമായി കാറുള്ള സഹപാഠി തനിക്കൊപ്പം യാത്ര ചെയ്യാൻ പെൺകുട്ടിയെ ക്ഷണിക്കുകയായിരുന്നു.

തനിച്ചു യാത്ര ചെയ്യുന്നത് ഒഴിവാക്കാൻ സുഹൃത്തിന്‍റെ നിർബന്ധപ്രകാരമാണ് പെൺകുട്ടി കാറിൽ കൂടെപ്പോകാൻ സമ്മതിച്ചത്. സ്നേഹസമ്പന്നയും മറ്റുള്ളവരെ സഹായിക്കാൻ എപ്പോഴും മുന്നിലുണ്ടായിരുന്ന ആളുമായിരുന്നു മരിച്ച പെൺകുട്ടിയെന്ന് സഹപാഠികളും സുഹൃത്തുക്കളും അനുസ്മരിച്ചു. ചെറുപ്പം മുതൽ ഒന്നിച്ച് പഠിച്ചവരോടോ കൂട്ടുകാരോടോ ഒരിക്കൽ പോലും വഴക്കിടാത്ത ശാന്തസ്വഭാവക്കാരിയായിരുന്നു അവരെന്ന് സുഹൃത്തുക്കൾ പറഞ്ഞു. വെള്ളിയാഴ്ച നമസ്കാരത്തിന് ശേഷം നടന്ന ജനാസ നമസ്കാരത്തിന് ശേഷം മൃതദേഹം അൽ ഒറൈബി ഖബർസ്ഥാനിൽ ഖബറടക്കി.

കടലിൽ അപകടകരമായ കണ്ടെയ്നറുകൾ ഒഴുകിനടക്കുന്നു; ജാഗ്രതാ നിർദേശവുമായി ഒമാൻ

Reshma Vijayan — Mon, 19 Oct 2026 12:16:09 +0530

മസ്‌കറ്റ്: ഒമാനിലെ മുസന്ദം ഗവര്‍ണറേറ്റിലെ റാസ് അല്‍ ശൈഖ് മസൂദ് തീരത്തോട് ചേര്‍ന്ന കടല്‍മേഖലയില്‍ അപകടകരമായ വസ്തുക്കള്‍ അടങ്ങിയ കണ്ടെയ്‌നറുകള്‍ ഒഴുകിനടക്കുന്നതായി മുന്നറിയിപ്പ്. മുസന്ദം ഗവർണറേറ്റിന് സമീപം ചരക്കുകപ്പൽ തകർന്ന് മുങ്ങിയതിനെ തുടർന്നാണ് കണ്ടെയ്നറുകൾ കടലിൽ ഒഴുകിനടക്കുന്നത്. മത്സ്യത്തൊഴിലാളികളും കടൽയാത്രക്കാരും ജാഗ്രത പാലിക്കണമെന്ന് ഒമാൻ ഭരണകൂടം മുന്നറിയിപ്പ് നൽകി. കടലിൽ ചില കണ്ടെയ്നറുകളിൽ അപകടകരമായ വസ്തുക്കൾ അടങ്ങിയിട്ടുണ്ടെന്ന് അധികൃതർ വ്യക്തമാക്കി.

ഒക്ടോബർ 14-നാണ് 'ജിഎഫ്എസ് പ്രൈഡ്' എന്ന ചരക്കുകപ്പൽ കടലിൽ മുങ്ങിയത്. ഇതിനെ തുടർന്ന് കപ്പലിലുണ്ടായിരുന്ന നിരവധി കണ്ടെയ്നറുകൾ കടലിന്‍റെ ഉപരിതലത്തിൽ ഒഴുകാൻ തുടങ്ങി. റാസ് അൽ ശൈഖ് മസൂദ് കടൽതീര പ്രദേശങ്ങൾക്ക് സമീപമുള്ള മേഖലയിലാണ് അപകടമുണ്ടായത്. പ്രദേശത്തുകൂടി സഞ്ചരിക്കുന്ന മത്സ്യത്തൊഴിലാളികളും ബോട്ട് ഓപ്പറേറ്റർമാരും അതീവ ജാഗ്രത പാലിക്കണമെന്ന് ഗതാഗത, വാർത്താവിനിമയ, വിവരസാങ്കേതിക മന്ത്രാലയം ആവശ്യപ്പെട്ടു.

ഒഴുകിനടക്കുന്ന കണ്ടെയ്നറുകളുടെ അടുത്ത് പോകാനോ അവ നീക്കം ചെയ്യാനോ തുറക്കാനോ ശ്രമിക്കരുതെന്ന് അധികൃതർ കർശന നിർദേശം നൽകിയിട്ടുണ്ട്. വിഷവസ്തുക്കളോ അപായകരമായ രാസവസ്തുക്കളോ അടങ്ങിയ കണ്ടെയ്നറുകളുമായി സമ്പർക്കത്തിൽ വരുന്നത് ജീവന് തന്നെ ഭീഷണിയായേക്കാം. കടലിൽ ഒഴുകിനടക്കുന്ന കണ്ടെയ്നറുകൾ കാണുന്നവർ ഉടൻ തന്നെ 7211134 എന്ന നമ്പറിൽ അധികൃതരെ വിവരമറിയിക്കണം. പരിസ്ഥിതിക്കും കടൽയാത്രക്കാരുടെ സുരക്ഷയ്ക്കും ഭീഷണിയാകാത്ത വിധത്തിൽ സ്ഥിതിഗതികൾ നിയന്ത്രണവിധേയമാക്കാൻ ബന്ധപ്പെട്ട വകുപ്പുകളുമായി ചേർന്ന് ശ്രമങ്ങൾ തുടരുകയാണെന്ന് മന്ത്രാലയം അറിയിച്ചു. മത്സ്യത്തൊഴിലാളികളും കടൽമാർഗ്ഗം യാത്ര ചെയ്യുന്നവരും ഔദ്യോഗിക നിർദേശങ്ങൾ കർശനമായി പാലിക്കണമെന്നും ജാഗ്രത കൈവിടരുതെന്നും അധികൃതർ അറിയിച്ചു.

تنويه

تهيب وزارة النقل والاتصالات وتقنية المعلومات بالصيادين ومرتادي البحر بأخذ الحيطة والحذر في المنطقة البحرية المحاذية لرأس الشيخ مسعود بمحافظة مسندم إثر غرق سفينة الحاويات (GFS PRIDE) بتاريخ 14 أكتوبر 2026م، وما نتج عنه من وجود حاويات عائمة، بعضها يحتوي على مواد خطرة.

وتؤكد الوزارة ضرورة عدم الاقتراب من الحاويات أو محاولة التعامل معها، والإبلاغ الفوري عن أي حاوية يتم رصدها عبر الرقم: (7211134).

— وزارة النقل والاتصالات وتقنية المعلومات (@mtcitoman) October 15, 2026

പ്രവാസി ഇന്ത്യാക്കാർക്ക് അടിയന്തിര മുന്നറിയിപ്പുമായി റിയാദിലെ ഇന്ത്യൻ എംബസി; ബാൽക്കണിയിലും ടെറസിലും നിൽക്കരുത്

Web Desk — Sun, 18 Oct 2026 14:27:05 +0530

റിയാദ്: ഹൂതി ആക്രമണം തുടരുന്ന സാഹചര്യത്തിൽ സൗദിയിലുള്ള ഇന്ത്യാക്കാർക്ക് മുന്നറിയിപ്പുമായി റിയാദിലെ ഇന്ത്യൻ എംബസി. പ്രവാസി ഇന്ത്യാക്കാർ കെട്ടിടങ്ങളുടെ ചില്ലുകൾക്കും ജനലുകൾക്കും സമീപവും, വീടുകളുടെ ടെറസിലും ബാൽക്കണിയിലും നിൽക്കരുതെന്നാണ് കർശന നിർദ്ദേശം. അപായസൂചന ലഭിച്ചാൽ അത് പിൻവലിക്കുന്നത് വരെ ആളുകൾ വീടുകളിൽ നിന്നും കെട്ടിടങ്ങളിൽ നിന്നും പുറത്തിറങ്ങരുതെന്നും നിർദേശമുണ്ട്.

വീടിനകത്തോ കെട്ടിടത്തിനകത്തോ ജനനുകളില്ലാത്ത മുറികളുണ്ടെങ്കിൽ ഇതിലേക്ക് മാറണമെന്നും എംബസി അറിയിച്ചു. തുറസായ സ്ഥലങ്ങളിൽ ഉള്ളവർ തൊട്ടടുത്ത കെട്ടിടങ്ങളിലോ സുരക്ഷിതമായ ഇടത്തേക്കോ മാറണം. വ്യോമാക്രമണമോ മറ്റോ നടക്കുമ്പോൾ അതിൻ്റെ ഫോട്ടോയെടുക്കാനും വീഡിയോ പകർത്താനും ശ്രമിക്കരുതെന്ന് ആവശ്യപ്പെട്ട എംബസി ആളുകൾ കൂടി നിൽക്കുന്ന ഇടത്ത് നിൽക്കാതിരിക്കാനും ശ്രദ്ധിക്കണമെന്നും അറിയിച്ചു.

വാഹനമോടിക്കുന്നതിനിടയിൽ അപായ മുന്നറിയിപ്പ് ലഭിച്ചാൽ പാലങ്ങൾക്കും ഉയരമുള്ള കെട്ടിടങ്ങൾക്കും അടുത്തുനിന്ന് മാറി റോഡരികിൽ വാഹനം ഒതുക്കണം. മക്കാ, മദീന, റിയാദ്, കിഴക്കൻ പ്രവിശ്യകളിൽ നിന്ന് 911 എന്ന നമ്പറിലും, മറ്റിടങ്ങളിൽ നിന്ന് 998 എന്ന നമ്പറിലും അടിയന്തിര സഹായത്തിനായി ബന്ധപ്പെടാവുന്നതാണ്. ഹൂതി വിമതർ മിസൈൽ, ഡ്രോൺ ആക്രമണം തുടരുന്നതിനാലാണ് സുരക്ഷാ മുന്നറിയിപ്പ് പുറപ്പെടുവിച്ചത്.

റിയാദിലും ജിദ്ദയിലും 24 മണിക്കൂർ ഹെൽപ്‌ലൈനുകൾ തുറന്നു; പരിഭ്രാന്തരാകരുതെന്ന് പ്രവാസികളോട് ഇന്ത്യൻ അംബാസഡർ

Reshma Vijayan — Sun, 18 Oct 2026 14:26:24 +0530

റിയാദ്: സൗദി അറേബ്യയിലെ നിലവിലെ പ്രത്യേക സാഹചര്യത്തിൽ ഇന്ത്യൻ സമൂഹം യാതൊരു കാരണവശാലും പരിഭ്രാന്തരാകേണ്ടതില്ലെന്നും, ഔദ്യോഗിക വിവരങ്ങളും നിർദേശങ്ങളും മാത്രം പിന്തുടരണമെന്നും സൗദിയിലെ ഇന്ത്യൻ അംബാസഡർ വിപുൽ അഭ്യർഥിച്ചു. റിയാദിലെ ഇന്ത്യൻ എംബസി കോൺഫറൻസ് ഹാളിൽ വിളിച്ചുചേർത്ത കമ്മ്യൂണിറ്റി നേതാക്കളുടെയും സന്നദ്ധപ്രവർത്തകരുടെയും യോഗത്തിൽ സംസാരിക്കുകയായിരുന്നു അദ്ദേഹം. സൗദിയുടെ വിവിധ ഭാഗങ്ങളിൽ നിന്നുള്ള പ്രതിനിധികളും വളണ്ടിയർമാരും നേരിട്ടും ഓൺലൈൻ മാർഗത്തിലൂടെയും യോഗത്തിൽ പങ്കെടുത്തു.

നിലവിൽ ആശങ്കപ്പെടേണ്ട സാഹചര്യമില്ലെന്ന് വ്യക്തമാക്കിയ അംബാസഡർ, എല്ലാവരും സ്വന്തം സുരക്ഷയ്ക്ക് മുൻഗണന നൽകി അധികൃതരുടെ നിർദേശങ്ങൾ കൃത്യമായി പാലിക്കണമെന്ന് ഓർമ്മിപ്പിച്ചു. സ്ഥിരീകരിക്കാത്ത വാർത്തകളും അഭ്യൂഹങ്ങളും സോഷ്യൽ മീഡിയ വഴി പ്രചരിപ്പിക്കരുത്. എംബസിയും സൗദി ഭരണകൂടവും നൽകുന്ന ഔദ്യോഗിക അറിയിപ്പുകളെ മാത്രം ആശ്രയിക്കണമെന്നും അനാവശ്യ ഭീതി പരത്തുന്ന സന്ദേശങ്ങൾ പങ്കുവെക്കരുതെന്നും അദ്ദേഹം കർശന നിർദേശം നൽകി.

ഇന്ത്യൻ സമൂഹത്തിന്റെ സുരക്ഷയും ആവശ്യങ്ങളും ഉറപ്പാക്കാൻ സൗദി ഭരണകൂടവുമായി ചേർന്ന് എംബസി സജീവമായി പ്രവർത്തിച്ചുവരികയാണ്. പ്രവാസികൾക്ക് ആവശ്യമായ സഹായങ്ങളും മാർഗനിർദേശങ്ങളും എപ്പോഴും ലഭ്യമാക്കുന്നതിനായി റിയാദിലെ ഇന്ത്യൻ എംബസിയിലും ജിദ്ദയിലെ ഇന്ത്യൻ കോൺസുലേറ്റിലും 24 മണിക്കൂറും പ്രവർത്തിക്കുന്ന കൺട്രോൾ റൂമുകളും ഹെൽപ് ഡെസ്കുകളും സജ്ജമാക്കിയിട്ടുണ്ട്.

കൺട്രോൾ റൂമുകളിലേക്ക് ലഭിക്കുന്ന കോളുകൾ സ്വീകരിക്കുക, സഹായം തേടുന്നവരുടെ വിവരങ്ങളും ആവശ്യങ്ങളും രേഖപ്പെടുത്തി ബന്ധപ്പെട്ട ഉദ്യോഗസ്ഥരെ അറിയിക്കുക തുടങ്ങിയ ദൗത്യങ്ങളിൽ വളണ്ടിയർമാരുടെ സേവനവും ലഭ്യമാക്കും. പ്രവാസികളിലേക്ക് കൃത്യമായ വിവരങ്ങൾ എത്തിക്കുന്നതിലും സഹായങ്ങൾ ഏകോപിപ്പിക്കുന്നതിലും കമ്മ്യൂണിറ്റി നേതാക്കൾക്കും വളണ്ടിയർമാർക്കും നിർണായക പങ്കുണ്ടെന്ന് യോഗം വിലയിരുത്തി. എംബസിയുടെയും കോൺസുലേറ്റിന്റെയും എല്ലാ പ്രവർത്തനങ്ങൾക്കും പൂർണ പിന്തുണ വാഗ്ദാനം ചെയ്തതായി കമ്മ്യൂണിറ്റി പ്രതിനിധികൾ അറിയിച്ചു.

അംബാസഡർ വിപുലിന് പുറമേ ഡെപ്യൂട്ടി ചീഫ് ഓഫ് മിഷൻ ബഷീർ അഹമ്മദ്, കമ്മ്യൂണിറ്റി വെൽഫെയർ കൗൺസിലർ വൈ. സാബിർ എന്നിവരും യോഗത്തിൽ പങ്കെടുത്തു.

24 മണിക്കൂർ ഹെൽപ്‌ലൈൻ നമ്പറുകൾ:

റിയാദ് ഇന്ത്യൻ എംബസി:

ടോൾ ഫ്രീ നമ്പർ: 800 247 1234

ടെലിഫോൺ: +966 55 441 2016, +966 54 212 6784

വാട്ട്‌സ്ആപ്പ്: +966 53 621 6082

ജിദ്ദ ഇന്ത്യൻ കോൺസുലേറ്റ്:

ടോൾ ഫ്രീ നമ്പർ: 800 244 0003

ലാൻഡ്‌ലൈൻ: +966 12 261 4093

മൊബൈൽ: +966 55 612 2301

വാട്ട്‌സ്ആപ്പ്: +966 53 620 9704

ഫ്ലൈ ദുബായ് വിമാനത്തിലെ ആക്രമണം; യുഎഇയിൽ നിന്ന് ലഭിച്ച കരുതലിനെയും പരിചരണത്തെയും കുറിച്ച് വികാരാധീനനായി സ്മിത്ത് മച്ചാർ

Faseela Moidu — Sun, 18 Oct 2026 11:01:33 +0530

ദുബായ്: ഫ്ലൈ ദുബായ് വിമാനത്തിലെ ആക്രമണത്തിന് ശേഷം യുഎഇയിൽ നിന്ന് ലഭിച്ച കരുതലിനെയും പരിചരണത്തെയും കുറിച്ച് വികാരാധീനനായി ക്യാപ്റ്റൻ സ്മിത്ത് മച്ചാർ. യുഎഇ പ്രസിഡണ്ടിന്റെ പ്രത്യേക നിർദേശ പ്രകാരം അതിവേഗം യുഎഇയിൽ എത്തിച്ചതുൾപ്പെടെ സ്മിത്ത് മച്ചാർ ഓർത്തെടുത്തു. വിമാനത്തിലെ യാത്രക്കാരനായ പ്ലംബറാണോ വിമാനം തകരാതെ നിയന്ത്രിച്ചതെന്ന ചോദ്യത്തിനും സ്മിത്ത് മച്ചാർ മറുപടി നൽകി. പരിക്കുകൾ മാറി ഉടനെ വിമാനം പറത്താൻ വീണ്ടുമെത്തുമെന്ന് സ്മിത്ത് മച്ചാർ പറഞ്ഞു.

അന്താരാഷ്ട്ര മാധ്യമങ്ങളായ ദി നാഷണൽ, സ്കൈ ന്യൂസ് അറേബ്യ എന്നിവയ്ക്ക് നൽകിയ അഭിമുഖങ്ങളിലാണ് സ്മിത്ത് മച്ചാർ മനസ്സു തുറന്നത്. സഹ പൈലറ്റിന്റെ മഴു കൊണ്ടുള്ള വെട്ടേറ്റ് ബോധം മറയുന്നതും, കൈകൊണ്ടു തടുത്തപ്പോൾ കൈ മുറിഞ്ഞതുമെല്ലാം ക്യാപ്റ്റൻ വിവരിച്ചു. വിമാനം മൂക്കു കുത്താൻ തുടങ്ങിയത് തിരിച്ചറിഞ്ഞു. ഇതിനിടയിലാണ് ജീവന്മരണ പോരാട്ടമായി കോക് പിറ്റ് വാതിൽ തുറക്കാൻ തീരുമാനിച്ചത്. ബെൻ ഗുറിയോൻ വിമാനത്താവളത്തിൽ ഇടിച്ചിറക്കാനാണ് സഹപൈലറ്റ് ലക്ഷ്യമിട്ടത് എന്ന് റിപ്പോർട്ടുകളുണ്ടായിരുന്നു. എന്തുകൊണ്ട് ആ സമയം ആക്രമണത്തിന് തെരഞ്ഞെടുത്തു എന്ന ചോദ്യത്തിന്, കാരണമറിയില്ലെന്ന് സ്മിത്ത് മച്ചാർ മറുപടി നൽകി.

വിമാനത്തിലെ യാത്രക്കാരനും ഇസ്രയേലി പൗരനുമായ പ്ലംബറാണോ വിമാനം തകരാതെ രക്ഷിച്ചത് എന്ന ചോദ്യത്തിനും സ്മിത്ത് മച്ചാർ മറുപടി നൽകി. വിമാനത്തിലെ മറ്റൊരു ക്യാപ്റ്റൻ നിയന്ത്രണം ഏറ്റെടുത്തു എന്നത് ജീവനക്കാർ പറയുന്നത് കേട്ടിരുന്നുവെന്നും ബാക്കി കാര്യങ്ങൾ ഊഹിച്ച് പറയാനില്ലെന്നും വ്യക്തമായ മറുപടി. ഉടനെ മടങ്ങി എത്തുമെന്നും വിമാനം പറത്തുമെന്നും പറഞ്ഞ സ്മിത്ത് മച്ചാർ, തനിക്കായി ഇടപെട്ട യുഎഇ പ്രസിഡണ്ടിനെയും രാജ്യം നൽകിയ കരുതലിനെയും കുറിച്ച് പറഞ്ഞപ്പോൾ വികാരാധീനനാവുകയായിരുന്നു.

എമിറേറ്റ്സ് ഡ്രോ ഏറ്റവും പുതിയ ഡ്രോയിൽ 50,000 ഡോളർ സമ്മാനം

Web Desk — Mon, 19 Oct 2026 12:36:07 +0530

ഒക്ടോബർ മാസത്തിലെ ഏറ്റവും പുതിയ ഫാസ്റ്റ്5, ഈസി6, മെഗാ7, വൈൽഡ്5 വിജയിച്ച നമ്പറുകൾ എമിറേറ്റ്സ് ഡ്രോ പ്രഖ്യാപിച്ചു. മൊത്തം 25,007 പേരാണ് വിജയിച്ചത്. മൊത്തം സമ്മാനത്തുക 50,000 ഡോളർ. വിജയികളുടെ വിവരങ്ങൾ ചുവടെ.

ഈസി6

ഈസി6 ഗെയിമിൽ മൊത്തം 570 പേരാണ് വിജയികളായത്. സമ്മാനത്തുകയായി ഇവർ നേടിയത് 29,528 ഡോളറാണ്.

വിജയിച്ച നമ്പറുകൾ - 31, 26, 11, 34, 3, 12

ഫാസ്റ്റ്5

ഫാസ്റ്റ്5 വിജയികളുടെ എണ്ണം 16 ആണ്. മൊത്തം സമ്മാനത്തുക 128 ഡോളർ.

വിജയിച്ച നമ്പറുകൾ - 3, 19, 30, 11, 5

മെഗാ7

മെഗാ7 മത്സരത്തിൽ 674 പേർ വിജയിച്ചു. മൊത്തം സമ്മാനത്തുക 3,984 ഡോളർ.

വിജയിച്ച നമ്പറുകൾ - 2, 8, 27, 32, 35, 3, 37

വൈൽഡ്5

വിജയിച്ച നമ്പറുകൾ - 43, 48, 33, 5, 39

സ്ക്രാച്ച് ഗെയിം

മൊത്തം വിജയികൾ - 23,647

മൊത്തം സമ്മാനത്തുക - 14,419 ഡോളർ

പിക്1, പിക്2

മൊത്തം വിജയികൾ - 100

സമ്മാനത്തുക – 1848 ഡോളർ

സൗദി അറേബ്യൻ ഹെലികോപ്റ്റർ നജ്‌റാനിൽ തകർന്നുവീണ് രണ്ട് ജീവനക്കാർ മരിച്ചു; അപകടകാരണം സാങ്കേതിക തകരാറെന്ന് സഖ്യസേന

Reshma Vijayan — Sun, 18 Oct 2026 16:46:43 +0530

റിയാദ്: സൗദി അറേബ്യയിലെ നജ്‌റാൻ പ്രവിശ്യയിൽ സൗദി നാഷണൽ ഗാർഡിന്‍റെ എച്ച്-6ഐ നിരീക്ഷണ ഹെലികോപ്റ്റർ തകർന്ന് രണ്ട് ഉദ്യോഗസ്ഥർ മരിച്ചു. സാങ്കേതിക തകരാറാണ് അപകടകാരണമെന്ന് യെമനിലെ സൗദി നേതൃത്വത്തിലുള്ള സഖ്യസേന വ്യക്തമാക്കി. സൗദി അറേബ്യയുടെ തെക്കുപടിഞ്ഞാറൻ അതിർത്തി പ്രദേശത്താണ് അപകടമുണ്ടായതെന്ന് സഖ്യസേന ഔദ്യോഗിക വക്താവ് മേജർ ജനറൽ തുർക്കി അൽ-മാലികി അറിയിച്ചു. വ്യോമസേനയിലെ രണ്ട് ഓഫീസർമാരാണ് കൊല്ലപ്പെട്ടതെന്നും അദ്ദേഹം സ്ഥിരീകരിച്ചു. മരിച്ചവരുടെ കുടുംബാംഗങ്ങൾക്ക് അദ്ദേഹം അനുശോചനം രേഖപ്പെടുത്തി.

ഹൂതി വിമതരുടെ ഭാഗത്തുനിന്ന് ഇതുമായി ബന്ധപ്പെട്ട് അവകാശവാദവും ഉയർന്നിട്ടുണ്ട്. തങ്ങൾ സൗദി ഹെലികോപ്റ്റർ വെടിവച്ചിട്ടതായി ഇറാൻ പിന്തുണയുള്ള ഹൂതി സൈനിക വക്താവ് യഹ്യ സരീ അവകാശപ്പെട്ടു. നജ്‌റാൻ അതിർത്തിക്ക് സമീപം വെച്ചാണ് ഹെലികോപ്റ്റർ തകർത്തതെന്നായിരുന്നു ഹൂതികളുടെ വാദം. എന്നാൽ ഹൂതികളുടെ ഈ അവകാശവാദം സൗദി സഖ്യസേന ശക്തമായി തള്ളി. ഹൂതികൾ നുണ പ്രചരിപ്പിക്കുകയാണെന്ന് മേജർ ജനറൽ തുർക്കി അൽ-മാലികി വ്യക്തമാക്കി. സംഭവത്തിന്‍റെ കൂടുതൽ വിവരങ്ങൾ ലഭ്യമായിട്ടില്ല.

പ്രശസ്തമായ ബോയിങ് കമ്പനി വികസിപ്പിച്ചെടുത്തതാണ് ഈ നിരീക്ഷണ ഹെലികോപ്റ്റർ. ചെറിയ വലിപ്പവും താരതമ്യേന കുറഞ്ഞ റഡാർ, ദൃശ്യ സാന്നിധ്യമുള്ളതുമാണ് ഇതിന്റെ പ്രധാന സവിശേഷതകൾ. നഗരങ്ങളിലും പർവ്വത പ്രദേശങ്ങളിലും ഒരുപോലെ മികച്ച രീതിയിൽ പ്രവർത്തിക്കാനും കുത്തനെ അഭ്യാസങ്ങൾ നടത്താനുമുള്ള ഉയർന്ന ശേഷി ഈ ഹെലികോപ്റ്ററിനുണ്ട്. സായുധ നിരീക്ഷണങ്ങൾക്കും പ്രത്യേക സേനയ്ക്ക് അകമ്പടി സേവിക്കുന്നതിനും ഇത് ഏറെ അനുയോജ്യമാണ്. കൂടാതെ, വിപുലമായ സെൻസർ സംവിധാനങ്ങൾ സജ്ജീകരിച്ചിട്ടുള്ളതിനാൽ രാപ്പകലില്ലാതെ ദൗത്യങ്ങൾ നിർവഹിക്കാൻ ഈ ഹെലികോപ്റ്ററിന് സാധിക്കുമെന്നും അധികൃതർ അറിയിച്ചു.

https://t.co/uX3M9vLPBA

— المتحدث الرسمي باسم قوات التحالف (@CJFCSpox) October 18, 2026

357 യാത്രക്കാർ, റൺവേയിൽ ലാൻഡ് ചെയ്യുന്നതിനിടെ എമിറേറ്റ്സ് വിമാനത്തിൽ പക്ഷിയിടിച്ചു

Elsa TJ — Sun, 18 Oct 2026 00:42:46 +0530

ഡൽഹി: റൺവേയിൽ ലാൻഡ് ചെയ്യുന്നതിനിടെ എമിറേറ്റ്സ് വിമാനത്തിൽ പക്ഷിയിടിച്ചു. ദുബായിൽ നിന്ന് ഡൽഹിയിലേക്ക് വന്ന വിമാനത്തിലാണ് ശനിയാഴ്ച ഉച്ച കഴിഞ്ഞ് 3.10ന് പക്ഷിയിടിച്ചത്. ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ ലാൻഡ് ചെയ്യുന്നതിനിടെ പക്ഷിയിടിച്ച് എമിറൈറ്റ്സിന്റെ ബോയിംഗ് 777-300 വിമാനത്തിന്റെ നോസ് കോണിന് സാരമായ തകരാർ സംഭവിച്ചിട്ടുണ്ട്. തകരാർ മൂലം വിമാനത്തിന്റെ മടക്കയാത്ര 15 മണിക്കൂറിലേറെ വൈകും. ഇ കെ 517 എന്ന വിമാനത്തിലാണ് പക്ഷിയിടിച്ചത്. നാളെ രാവിലെ ഏഴ് മണിയോടെ തകരാർ പരിഹരിച്ച് മടങ്ങാനാവുമെന്ന പ്രതീക്ഷയാണ് വിമാന കമ്പനി പങ്കുവച്ചത്. ക്രൂ അംഗങ്ങൾ അടക്കം 357 പേരാണ് സംഭവ സമയത്ത് വിമാനത്തിലുണ്ടായിരുന്നത്. യാത്രക്കാർക്ക് നേരിട്ട കാലതാമസത്തിൽ ഖേദം പ്രകടിപ്പിച്ച വിമാനകമ്പനി താമസ സൌകര്യമടക്കമുള്ളവ ഏർപ്പാടാക്കിയതായും വ്യക്തമാക്കി.

കഴിഞ്ഞ രണ്ട് വർഷത്തോളമായി വിമാനത്തിൽ പക്ഷിയിടിക്കുന്ന സംഭവങ്ങൾ ഡൽഹി വിമാനത്താവളത്തിൽ വർദ്ധിക്കുന്നുണ്ട്. വിമാനത്താവള പരിസരത്ത് മാലിന്യം തള്ളുന്നതും ഇറച്ചി വിതരണ മെഷീൻ സ്ഥാപിച്ചതിനും പിന്നാലെ വിമാനത്താവള പരിസരത്ത് ഇത്തരം സംഭവങ്ങൾ വർദ്ധിക്കുന്നതായാണ് എയർഫീൽഡ് മാനേജ്മെന്‍റ് കമ്മിറ്റി കഴിഞ്ഞ മാസത്തെ മീറ്റിംഗിൽ വിശദമാക്കിയത്.

ഏഷ്യാനെറ്റ് ന്യൂസ് ലൈവ് കാണാം

റിയാദ് ഇന്‍റർനാഷണൽ ഇന്ത്യൻ സ്‌കൂളിൽ ഇന്ന് മുതൽ ക്ലാസുകൾ പുനഃരാരംഭിക്കുന്നു

Reshma Vijayan — Sun, 18 Oct 2026 11:30:47 +0530

റിയാദ്: ഇന്‍റർനാഷണൽ ഇന്ത്യൻ സ്കൂളിൽ ഇന്ന് മുതൽ (ഒക്ടോബർ 18, ഞായർ) നേരിട്ടുള്ള ക്ലാസുകൾ പുനരാരംഭിക്കുമെന്ന് അധികൃതർ അറിയിച്ചു. സൗദി വിദ്യാഭ്യാസ മന്ത്രാലയത്തിന്‍റെ പുതിയ നിർദേശത്തെ തുടർന്നാണ് തീരുമാനം. എല്ലാ വിദ്യാർഥികളും നാളെ മുതൽ സ്കൂളിലെത്തി പതിവ് ക്ലാസുകളിൽ പങ്കെടുക്കണമെന്ന് പ്രിൻസിപ്പൽ മൈമൂന അബ്ബാസ് അറിയിച്ചു. നേരത്തേ അറിയിച്ച പരീക്ഷാ ഷെഡ്യൂൾ പ്രകാരം, ബാക്കിയുള്ള പി.ടി-2/ യു.ടി-2 പരീക്ഷകൾ തിങ്കളാഴ്ച (ഒക്ടോബർ 19) മുതൽ പുനരാരംഭിക്കും. ഒമ്പത് മുതൽ 12 വരെ ക്ലാസുകളിലെ വിദ്യാർഥികൾക്കായി നേരത്തേ നിശ്ചയിച്ചിരുന്ന റിമീഡിയൽ ക്ലാസുകളും ഞായറാഴ്ച മുതൽ ആരംഭിക്കും.വിദ്യാഭ്യാസ മന്ത്രാലയത്തിൽനിന്ന് ലഭിക്കുന്ന നിർദേശങ്ങൾക്കനുസരിച്ച് ആവശ്യമായ അറിയിപ്പുകൾ യഥാസമയം നൽകുമെന്നും സ്കൂൾ അധികൃതർ വാർത്താക്കുറിപ്പിൽ അറിയിച്ചു.

എയർഇന്ത്യയും എയർഇന്ത്യ എക്സ്പ്രസും 24 വരെ സർവീസുകൾ റദ്ദാക്കി

എയർഇന്ത്യയും എയർഇന്ത്യ എക്സ്പ്രസും ജിദ്ദ, ദമ്മാം, റിയാദ് സർവീസുകൾ റദ്ദാക്കിയത് ഒക്ടോബർ 24 വരെ നീട്ടി. ജിദ്ദയും ദമാമും റിയാദും പ്രവാസികൾക്കും ഉംറ തീർത്ഥാടകർക്കും ഏറെ പ്രധാനപ്പെട്ട വിമാനത്താവളങ്ങളാണ്. ഇവിടങ്ങളിലേക്ക് ഇൻഡിഗോ, ആകാസ എയർലൈനുകളുടെ സർവ്വീസുകളും പൂർണമല്ല. അടിയന്തര മടക്കയാത്ര ആവശ്യമുള്ളവർ സമീപ രാജ്യങ്ങളിലേക്ക് യാത്ര ചെയ്യുന്നത് ആലോചിക്കണമെന്ന് ഇന്ത്യൻ എംബസി അറിയിച്ചു.

വെസ്റ്റ് ബാങ്കിൽ യൂറോപ്യൻ നയതന്ത്രജ്ഞർക്ക് നേരെ ആക്രമണവുമായി ഇസ്രയേൽ കുടിയേറ്റക്കാർ

Elsa TJ — Sun, 18 Oct 2026 04:47:40 +0530

വെസ്റ്റ് ബാങ്ക്: വെസ്റ്റ് ബാങ്കിലെ ഒലിവ് വിളവെടുപ്പിൽ പങ്കെടുക്കാനെത്തിയ യൂറോപ്യൻ നയതന്ത്രജ്ഞർ, ഫ്രഞ്ച് മേയർ, ആർച്ച് ബിഷപ്പ് എന്നിവർക്ക് നേരെ ആക്രമണവുമായി ഇസ്രയേൽ കുടിയേറ്റക്കാർ. ഇസ്രായേൽ അധിനിവേശ വെസ്റ്റ് ബാങ്കിലെ തയ്ബെയിലെ ഒലിവ് വിളവെടുപ്പിൽ പങ്കെടുക്കാനെത്തിയവർക്ക് നേരെയാണ് ആക്രമണം നടന്നത്. ആക്രമണത്തിൽ മൂന്ന് പേർക്ക് പരിക്കേൽക്കുകയും നയതന്ത്ര വാഹനത്തിന്റെ ചില്ലുകൾ തകർക്കുകയും ചെയ്തു. പലസ്തീൻകാർ സ്വന്തം ഭൂമിയിൽ നിന്ന് ഒലിവ് വിളവെടുക്കുന്നത് തടയാൻ നടക്കുന്ന ശ്രമങ്ങളുടെ ഭാഗമാണ് അക്രമണം . ഫ്രഞ്ച് നഗരമായ ഓൾനോയ്-അമേരിസിന്റെ മേയറെ നയതന്ത്ര നമ്പറുള്ള വാഹനത്തിലേക്ക് കയറാൻ ശ്രമിക്കവെ മുഖംമൂടി ധരിച്ച ആക്രമികൾ തള്ളിയിടുകയും ആക്രമിക്കുകയുമായിരുന്നു.

നയതന്ത്രജ്ഞർക്ക് സമീപമെത്തുന്നതിന് മുൻപ് പ്രദേശത്തെ തൊഴിലാളികളായ പലസ്തീനികളെ ആക്രമിച്ച കുടിയേറ്റക്കാർ 70 വയസ്സുള്ള ഒരു സ്ത്രീയെ ഉപദ്രവിക്കുകയും ചെയ്തിരുന്നു. ബെൽജിയൻ നയതന്ത്ര സംഘത്തിന്റെ കവചിത വാഹനത്തിന്റെ ജനൽച്ചില്ലുകളും ആക്രമികൾ അടിച്ചുതകർത്തു.മുൻപും പലസ്തീൻകാർക്ക് നേരെ വെസ്റ്റ് ബാങ്കിൽ അക്രമങ്ങൾ നടന്നിട്ടുണ്ടെങ്കിലും വിദേശ നയതന്ത്രജ്ഞരെ ലക്ഷ്യമിടുന്നത് ഇതാദ്യമാണെന്ന് അന്തർദേശീയ മാധ്യമങ്ങൾ റിപ്പോർട്ട് ചെയ്യുന്നത്. സെപ്റ്റംബർ അവസാനത്തോടെ ആരംഭിച്ച ഒലിവ് വിളവെടുപ്പ് സീസണിൽ മാത്രം കുടിയേറ്റക്കാർ 170ലധികം ആക്രമണങ്ങളാണ് നടത്തിയത്. ആക്രമണങ്ങളിൽ നാല് പേർ കൊല്ലപ്പെടുകയും നൂറിലധികം പേർക്ക് പരിക്കേൽക്കുകയും ചെയ്തു. സംഭവത്തിൽ ഇസ്രായേൽ വിദേശകാര്യ മന്ത്രി ഗിദിയോൻ സാർ അപലപിക്കുകയും പൊലീസ് അന്വേഷണം പ്രഖ്യാപിക്കുകയും ചെയ്തിട്ടുണ്ട്.

ഏഷ്യാനെറ്റ് ന്യൂസ് ലൈവ് കാണാം

കുവൈത്തിൽ ചട്ടങ്ങൾ ലംഘിച്ച മൂന്ന് ഇൻഷുറൻസ് ബ്രോക്കറേജ് സ്ഥാപനങ്ങൾക്കെതിരെ നടപടി; നാല് കമ്പനികൾക്ക് മുന്നറിയിപ്പ്

Reshma Vijayan — Sun, 18 Oct 2026 17:52:56 +0530

കുവൈത്ത് സിറ്റി: കുവൈത്തിൽ ചട്ടങ്ങൾ ലംഘിച്ചതിന് മൂന്ന് ഇൻഷുറൻസ് ബ്രോക്കറേജ് സ്ഥാപനങ്ങളെ നിയമനടപടികൾക്കായി പബ്ലിക് പ്രോസിക്യൂഷന് കൈമാറി ഇൻഷുറൻസ് റെഗുലേറ്ററി യൂണിറ്റ്. ഇതിനുപുറമെ, 2019ലെ ഇൻഷുറൻസ് നിയന്ത്രണ നിയമവും അതിന്‍റെ ഭേദഗതികളും ചട്ടങ്ങളും ലംഘിച്ച നാല് ഇൻഷുറൻസ് കമ്പനികൾക്ക് യൂണിറ്റ് മുന്നറിയിപ്പും നൽകിയിട്ടുണ്ട്. പോളിസി ഉടമകളുടെയും ഉപഭോക്താക്കളുടെയും വിപണിയിലെ മറ്റ് പങ്കാളികളുടെയും അവകാശങ്ങൾ സംരക്ഷിക്കുന്നതിന്റെ ഭാഗമായാണ് ഈ നടപടിയെന്ന് അധികൃതർ വ്യക്തമാക്കി.

കമ്പനികൾ അവരുടെ ഭാഗത്തുനിന്നുള്ള വീഴ്ചകൾ തിരുത്തുന്നതിനും, ഭാവിയിൽ സസ്പെൻഷൻ പോലുള്ള കടുത്ത നടപടികൾ ഒഴിവാക്കുന്നതിനുമാണ് നാല് കമ്പനികൾക്ക് മുന്നറിയിപ്പ് നൽകിയിട്ടുള്ളത്. നിബന്ധനകൾ കൃത്യമായി പാലിക്കുന്നുണ്ടെന്ന് ഉറപ്പാക്കാൻ തങ്ങളുടെ മേൽനോട്ടത്തിലുള്ള എല്ലാ സ്ഥാപനങ്ങളും നിയമങ്ങൾ അനുസരിക്കണമെന്ന് ഐആർയു കർശന നിർദ്ദേശം നൽകി. ഇൻഷുറൻസ് വിപണിയിൽ സുതാര്യതയും അച്ചടക്കവും ഉറപ്പാക്കുന്നതിനായി നിയമലംഘനങ്ങൾക്കെതിരെ കർശന നടപടികൾ തുടരുമെന്നും യൂണിറ്റ് വ്യക്തമാക്കി.

ഉപഭോക്താക്കളുടെ അവകാശങ്ങൾ സംരക്ഷിക്കുന്നതാണ് തങ്ങളുടെ പരമപ്രധാനമായ ലക്ഷ്യമെന്ന് ഐആർയു ലീഗൽ അഫയേഴ്സ് ഡിപ്പാർട്ട്മെന്‍റ് ഡയറക്ടർ തലാൽ അൽ-മുഹാരബ് വ്യക്തമാക്കി. നിയമപരമായ ബാധ്യതകൾ ലംഘിക്കുന്നതോ ഉപഭോക്താക്കളുടെ അവകാശങ്ങളെ ഹനിക്കുന്നതോ ആയ ഏതെങ്കിലും സ്ഥാപനങ്ങൾക്കെതിരെ കർശന നിയമനടപടികൾ സ്വീകരിക്കുമെന്നും ഇൻഷുറൻസ് മേഖലയുടെ സുസ്ഥിരതയും വിശ്വാസ്യതയും ഉറപ്പാക്കാൻ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.

ജിദ്ദ വിമാനത്താവളത്തിൽ കസ്റ്റഡിയിലായ മലയാളി നഴ്സ് മോചിതയായി; പിടികൂടിയത് നിരോധിത മരുന്ന് കൈവശം വെച്ചെന്ന സംശയത്തിൽ

Reshma Vijayan — Sun, 18 Oct 2026 10:44:42 +0530

റിയാദ്: സൗദി അറേബ്യയിൽ നിരോധിത മരുന്ന് കൈവശം വെച്ചെന്ന സംശയത്തെ തുടർന്ന് ജിദ്ദ വിമാനത്താവളത്തിൽ പൊലീസ് കസ്റ്റഡിയിലെടുത്ത വയനാട് സ്വദേശിനിയായ നഴ്സ് ഫിലോമിന (32) മോചിതയായി. വിശദമായ അന്വേഷണത്തിൽ ഇവർ നിരപരാധിയാണെന്ന് വ്യക്തമായതിനെ തുടർന്നാണ് അധികൃതർ മോചനം സാധ്യമാക്കിയത്.

വയനാട് സുൽത്താൻ ബത്തേരിക്കടുത്ത് നീലഗിരി ജില്ലാ അതിർത്തിയിലെ അയ്യങ്കൊല്ലി ആനന്ദ് നിവാസ് രവി-ശെൽവി ദമ്പതികളുടെ മകളായ ഫിലോമിന, കഴിഞ്ഞ മൂന്ന് വർഷമായി റിയാദിലെ കിംഗ് ഫഹദ് ആശുപത്രിയിൽ നഴ്സായി ജോലി ചെയ്തുവരികയാണ്. വാർഷികാവധി കഴിഞ്ഞ് ഈ മാസം പത്തിന് ബംഗളൂരുവിൽ നിന്നുള്ള വിമാനത്തിലാണ് അവർ ജിദ്ദ വഴി റിയാദിലേക്ക് മടങ്ങിയത്.

ജിദ്ദയിൽ വിമാനമിറങ്ങിയ ഉടൻ, വിമാനത്താവളത്തിൽ ഉദ്യോഗസ്ഥർ തടഞ്ഞുവെച്ചിരിക്കുകയാണെന്നും ലഗേജ് കൊണ്ടുപോയെന്നും ഫോൺ ആവശ്യപ്പെട്ടതായും കാണിച്ച് ഫിലോമിന തന്റെ പിതാവ് രവിക്കും ഭർത്താവ് ജോണിനും ശബ്ദസന്ദേശം അയച്ചിരുന്നു. ഇതിനുശേഷം ഇവരെക്കുറിച്ച് യാതൊരു വിവരവും ലഭിക്കാതെ വന്നതോടെ കുടുംബം വലിയ ആശങ്കയിലാകുകയും തിരോധാനത്തിൽ പരാതിപ്പെടുകയും ചെയ്യുകയായിരുന്നു.

തുടർന്ന് റിയാദിലെ ആശുപത്രി അധികൃതരുമായും സഹപ്രവർത്തകരുമായും ബന്ധപ്പെട്ടെങ്കിലും ഫിലോമിന ജോലിസ്ഥലത്ത് എത്തിയിട്ടില്ലെന്ന് വ്യക്തമായി. ഇതിനെ തുടർന്ന് കുടുംബം നിയമസഹായം തേടുകയായിരുന്നു. റിയാദ് ഇന്ത്യൻ എംബസിയുടെയും ജിദ്ദ കോൺസുലേറ്റിന്റെയും സാമൂഹ്യ പ്രവർത്തകരുടെയും നേതൃത്വത്തിൽ നടത്തിയ സജീവമായ അന്വേഷണത്തിലാണ് ഫിലോമിന ജിദ്ദ പൊലീസിന്‍റെ കസ്റ്റഡിയിലാണെന്ന വിവരം പുറത്തുവന്നത്.

രാജ്യത്ത് കർശന നിയന്ത്രണമുള്ള മരുന്ന് കൈവശമുണ്ടായതിനെ തുടർന്നാണ് പോലീസ് ഇവരെ കസ്റ്റഡിയിലെടുക്കുകയും തുടർന്ന് ഡ്രഗ്സ് കൺട്രോൾ വിഭാഗത്തിന് കൈമാറുകയും ചെയ്തിരുന്നത്. എന്നാൽ തുടർന്നുള്ള വിശദമായ അന്വേഷണത്തിലും പരിശോധനകളിലും ഫിലോമിനക്കെതിരെയുള്ള സംശയങ്ങൾ ദുരീകരിക്കപ്പെടുകയും, ഇവർക്ക് യാതൊരു വിധത്തിലുള്ള ദുരുദ്ദേശവുമില്ലെന്ന് ബോധ്യപ്പെടുകയും ചെയ്തതോടെ അധികൃതർ മോചനം അനുവദിക്കുകയായിരുന്നു.

കുവൈത്തിൽ ആഭരണ പ്രദർശനത്തിനിടെ വൻ കവർച്ച; 7,000 ദിനാറിന്റെ ആഭരണങ്ങൾ മോഷ്ടിച്ചു; യുവതി അറസ്റ്റിൽ

Reshma Vijayan — Mon, 19 Oct 2026 10:50:42 +0530

കുവൈത്ത് സിറ്റി: കുവൈത്തിൽ ആഭരണ പ്രദർശനത്തിനിടെ ഏകദേശം 7,000 കുവൈത്ത് ദിനാർ വിലമതിക്കുന്ന ആഭരണങ്ങൾ മോഷ്ടിച്ച കേസിൽ യുവതിയെ ക്രിമിനൽ സെക്യൂരിറ്റി വിഭാഗം അറസ്റ്റ് ചെയ്തു. മോഷണം പോയ മുഴുവൻ ആഭരണങ്ങളും പ്രതിയുടെ താമസസ്ഥലത്തുനിന്ന് പൊലീസ് കണ്ടെടുത്തു.

പ്രദർശനത്തിൽ ഒരു ആഭരണ ബ്രാൻഡിന്‍റെ സ്റ്റാൾ വാടകയ്ക്കെടുത്ത് വ്യാപാരം നടത്തിയിരുന്ന ഗൾഫ് സ്വദേശിനിയാണ് ആഭരണങ്ങൾ കാണാതായതായി പൊലീസിൽ പരാതി നൽകിയത്. പ്രദർശനത്തിലെ തിരക്ക് മുതലെടുത്തായിരുന്നു മോഷണം. ആഭരണങ്ങൾ വാങ്ങാനെത്തിയ ഉപഭോക്താവെന്ന വ്യാജേന സ്റ്റാളിലെത്തിയ പ്രതി, ജീവനക്കാരുടെ ശ്രദ്ധ മാറുന്ന സമയങ്ങളിൽ ആഭരണങ്ങൾ കൈക്കലാക്കുകയായിരുന്നുവെന്നാണ് അന്വേഷണത്തിൽ കണ്ടെത്തിയത്.

സംഭവത്തിന്റെ സിസിടിവി ദൃശ്യങ്ങൾ പരിശോധിച്ച ഹവല്ലി ഗവർണറേറ്റിലെ അന്വേഷണ ഉദ്യോഗസ്ഥർ ആധുനിക സാങ്കേതിക സംവിധാനങ്ങളും ബയോമെട്രിക് വിരലടയാള പരിശോധനയും ഉപയോഗിച്ചാണ് പ്രതിയെ തിരിച്ചറിഞ്ഞത്. തുടർന്ന് യുവതി ഉപയോഗിച്ചിരുന്ന വാഹനവും കണ്ടെത്തി.

പൊലീസ് നടത്തിയ അന്വേഷണത്തിനൊടുവിൽ യുവതിയെ പിടികൂടുകയായിരുന്നു. തെളിവുകൾ നിരത്തിയുള്ള ചോദ്യം ചെയ്യലിൽ പ്രതി മോഷണക്കുറ്റം സമ്മതിച്ചതായി സുരക്ഷാ വൃത്തങ്ങൾ അറിയിച്ചു. തുടർന്ന് പ്രതിയുടെ താമസസ്ഥലത്ത് നടത്തിയ പരിശോധനയിൽ ഏകദേശം 7,000 ദിനാർ വിലമതിക്കുന്ന മുഴുവൻ ആഭരണങ്ങളും കണ്ടെടുത്തു. അറസ്റ്റിലായ യുവതിക്കെതിരെ നേരത്തെ ക്രിമിനൽ കേസുകളൊന്നും രജിസ്റ്റർ ചെയ്തിട്ടില്ലെന്നും അധികൃതർ വ്യക്തമാക്കി.

കൂടുതൽ നിയമനടപടികൾക്കായി പ്രതിയെ പബ്ലിക് പ്രോസിക്യൂഷന് കൈമാറി. സിസിടിവി ദൃശ്യങ്ങളും ആധുനിക അന്വേഷണ സാങ്കേതികവിദ്യകളും ഉപയോഗിച്ച് പ്രതിയെ വേഗത്തിൽ തിരിച്ചറിയാനും മോഷണവസ്തുക്കൾ പൂർണമായും വീണ്ടെടുക്കാനും സാധിച്ചതായി സുരക്ഷാ വൃത്തങ്ങൾ അറിയിച്ചു.

ഒമാനിലെ അൽ അവാബിയിൽ വീടിന് തീപിടിച്ച് രണ്ടു മരണം; ആറുപേർക്ക് പരിക്ക്

Reshma Vijayan — Sun, 18 Oct 2026 12:37:10 +0530

മസ്‌കറ്റ്: ഒമാനിലെ സൗത്ത് അൽ ബാത്തിന ഗവർണറേറ്റിലെ അൽ അവാബി വിലായത്തിൽ വീടിന് തീപിടിച്ച് രണ്ടുപേർ മരണപ്പെട്ടു. അപകടത്തിൽ ആറുപേർക്ക് പരിക്കേറ്റു. സിവിൽ ഡിഫൻസ് ആൻഡ് ആംബുലൻസ് സംഘം ഉടൻതന്നെ സ്ഥലത്തെത്തി രക്ഷാപ്രവർത്തനം നടത്തി. പരിക്കേറ്റവരെ അടിയന്തര വൈദ്യസഹായത്തിനായി സമീപത്തെ ആരോഗ്യ കേന്ദ്രങ്ങളിലേക്ക് മാറ്റിയിട്ടുണ്ട്. അപകടത്തിൽ മരണപ്പെട്ടവരുടെ കുടുംബങ്ങളുടെ ദുഃഖത്തിൽ പങ്കുചേരുന്നതായും പരിക്കേറ്റവർ എത്രയും വേഗം സുഖം പ്രാപിക്കട്ടെ എന്ന് ആശംസിക്കുന്നതായും സിവിൽ ഡിഫൻസ് ആൻഡ് ആംബുലൻസ് അതോറിറ്റി അറിയിച്ചു.

ഉംറ തീർഥാടകർ ഉൾപ്പെടെയുള്ള സൗദി യാത്രക്കാർക്ക് പ്രതിസന്ധി നീളും; എയർഇന്ത്യയും എയർഇന്ത്യ എക്സ്പ്രസും 24 വരെ സർവീസുകൾ റദ്ദാക്കി

Web Desk — Sat, 17 Oct 2026 20:21:14 +0530

ദുബായ്: ഹൂത്തികളുടെ ആക്രമണം കാരണം ഉംറ തീർഥാടകർ ഉൾപ്പെടെയുള്ള സൗദി യാത്രക്കാർക്ക് പ്രതിസന്ധി നീളും. എയർഇന്ത്യയും എയർഇന്ത്യ എക്സ്പ്രസും ജിദ്ദ, ദമ്മാം, റിയാദ് സർവീസുകൾ റദ്ദാക്കിയത് ഒക്ടോബർ 24 വരെ നീട്ടി.

ജിദ്ദയും ദമാമും റിയാദും പ്രവാസികൾക്കും ഉംറ തീർത്ഥാടകർക്കും ഏറെ പ്രധാനപ്പെട്ട വിമാനത്താവളങ്ങളാണ്. ഇവിടങ്ങളിലേക്ക് ഇൻഡിഗോ, ആകാസ എയർലൈനുകളുടെ സർവ്വീസുകളും പൂർണമല്ല. അടിയന്തര മടക്കയാത്ര ആവശ്യമുള്ളവർ സമീപ രാജ്യങ്ങളിലേക്ക് യാത്ര ചെയ്യുന്നത് ആലോചിക്കണമെന്ന് ഇന്ത്യൻ എംബസി അറിയിച്ചു.

അതിനിടെ, തുർക്കിക്കും പാക്കിസ്ഥാനും പുറമെ സൗദിക്ക് പിന്തുണയുമായി ഈജിപ്ത് രംഗത്തെത്തുമെന്നാണ് പുതിയ വിവരങ്ങൾ. ഇക്കാര്യത്തിൽ ഈജിപ്ത് പാർലമെന്റ് അടിയന്തര യോഗം ചേർന്ന് തീരുമാനമെടുക്കും. ഹൂത്തികൾക്കെതിരെ സൈനിക നടപടിക്ക് ഇസ്രയേലിന്റെ സഹായ വാഗ്ദാനം സ്വീകരിക്കാൻ സൗദിയെ അമേരിക്ക പ്രേരിപ്പിക്കുമ്പോഴാണ് പുതിയ നീക്കം. ഏദൻ വിമാനത്താവളത്തിലേക്ക് ഹൂത്തികൾ നടത്തിയ മിസൈലാക്രമണത്തിൽ തലനാരിഴയ്ക്കാണ് വൻ ദുരന്തം ഒഴിവായത്. വിമാനത്തിന് അഞ്ഞൂറ് മീറ്റർ അകലെയും റൺവേക്ക് നൂറ് മീറ്റർ അകലെയുമായി രണ്ട് മിസൈലുകൾ പതിച്ചു. അതിനിടെ, ഹോർമൂസിൽ ഒരു കപ്പൽ കൂടി മൈനിൽ തട്ടി തകർന്നതായി ഇറാൻ മാധ്യമങ്ങൾ റിപ്പോർട്ട് ചെയ്തു. സൗദി തീരത്തിന് 68 നോട്ടിക്കൽ മൈൽ അകലെ മറ്റൊരു കപ്പലിന് നേരെ ആക്രമണമുണ്ടായി. കപ്പലുകൾ നിരന്തരരമായി ആക്രമിക്കപ്പെടുമ്പോഴും എല്ലാം റിപ്പോർട്ട് ചെയ്യാൻ കഴിയുന്നില്ലെന്ന് യു.കെ മാരിടൈം ഓർഗനൈസേഷൻ സമ്മതിച്ചു. കപ്പലുകൾ തന്നെ വിവരം നൽകാതെ മറച്ചു വെക്കുന്നുവെന്നാണ് വിശദീകരണം.

‘നൂറക്കും സാറക്കും’ ഇനി പുതുജീവിതം; ഫിജിയിൽ നിന്നുള്ള സയാമീസ് ഇരട്ടകളെ സൗദിയിൽ ശസ്ത്രക്രിയയിലൂടെ വേർപെടുത്തി

Reshma Vijayan — Sun, 18 Oct 2026 17:16:58 +0530

റിയാദ്: കോടിക്കണക്കിന് മനുഷ്യരുടെ പ്രാർഥനകൾക്കും ആകുലതകൾക്കും വിരാമമിട്ട്, ഫിജിയിൽ നിന്നുള്ള സയാമീസ് ഇരട്ടകളായ ‘നൂറയുടെയും സാറയുടെയും’ വേർപെടുത്തൽ ശസ്ത്രക്രിയ വിജയകരമായി പൂർത്തിയായി. ജനനം മുതൽ ഒരേ ശരീരമായി ജീവിച്ച ഈ കുഞ്ഞുങ്ങൾ, സൗദി അറേബ്യയുടെ ആഗോള സയാമീസ് ശസ്ത്രക്രിയ പ്രോഗ്രാമിലൂടെ പുതിയൊരു ജീവിതത്തിലേക്ക് കണ്ണുതുറന്നിരിക്കുകയാണ്. മണിക്കൂറുകൾ നീണ്ട സങ്കീർണമായ മെഡിക്കൽ ദൗത്യത്തിനൊടുവിലാണ് സൗദിയിലെ വിദഗ്ധ ഡോക്ടർമാരുടെ സംഘം ഇവരെ പരസ്പരം വേർപെടുത്തിയത്. ഫിജിയിൽ നിന്നുള്ള സയാമീസ് ഇരട്ടകളെ വേർപെടുത്തുന്ന ചരിത്രത്തിലെ ആദ്യത്തെ ശസ്ത്രക്രിയ കൂടിയാണിത്.

‘ജാസ്ബെല്ല’, ‘ഡെസിസിയ’ എന്നീ പേരുകളിലാണ് ഈ കുഞ്ഞുങ്ങൾ ഇതിനുമുമ്പ് ലോകമറിഞ്ഞിരുന്നത്. ശസ്ത്രക്രിയക്കായി റിയാദിലെത്തിച്ച വേളയിൽ, സൗദി അറേബ്യയോടും ഇവിടുത്തെ മെഡിക്കൽ ടീമിനോടുമുള്ള ആദരസൂചകമായി മാതാപിതാക്കൾ കുഞ്ഞുങ്ങൾക്ക് പുതിയ പേരുകൾ നൽകുകയായിരുന്നു. മെഡിക്കൽ-ശസ്ത്രക്രിയാ സംഘത്തിന്റെ തലവനായ ഡോ. അബ്ദുല്ല അൽ റബീഅയോട് കുട്ടികൾക്ക് അനുയോജ്യമായ പേരുകൾ നിർദേശിക്കാൻ മാതാപിതാക്കൾ അഭ്യർഥിക്കുകയും, അദ്ദേഹത്തിന്റെ നിർദേശപ്രകാരം ‘നൂറ’, ‘സാറ’ എന്ന് പുനർനാമകരണം ചെയ്യുകയുമായിരുന്നു. വെറുമൊരു പേരുമാറ്റത്തിനപ്പുറം, തങ്ങളുടെ മക്കൾക്ക് നവജീവൻ സമ്മാനിച്ച രാജ്യത്തോടുള്ള ഒരു കുടുംബത്തിന്റെ കടപ്പാടും പ്രതീക്ഷയുമായിരുന്നു ഈ ചടങ്ങ്.

സൽമാൻ രാജാവിന്റെയും കിരീടാവകാശി പ്രിൻസ് മുഹമ്മദ് ബിൻ സൽമാന്റെയും പ്രത്യേക നിർദേശത്തെ തുടർന്നാണ് 13 മാസം പ്രായമുള്ള ഇരട്ടകളെ സൗദിയിലെത്തിച്ചത്. അനസ്തേഷ്യ, പീഡിയാട്രിക് സർജറി, പ്ലാസ്റ്റിക് സർജറി, ഓർത്തോപീഡിക് സർജറി, യൂറോളജി എന്നീ വിഭാഗങ്ങളിലെ പ്രമുഖ കൺസൾട്ടന്റുമാരും സ്പെഷ്യലിസ്റ്റുകളും ടെക്നിക്കൽ, നഴ്സിംഗ് സ്റ്റാഫുകളുമടക്കം 34 അംഗ വിദഗ്ധ സംഘമാണ് ഈ സങ്കീർണമായ ശസ്ത്രക്രിയക്ക് നേതൃത്വം നൽകിയത്.

കുവൈത്തിൽ സംരക്ഷിത മേഖലയിൽ അതിക്രമിച്ചുകയറി വേട്ടയാടാൻ ശ്രമിച്ച രണ്ട് പേർ അറസ്റ്റിൽ; വാഹനം കണ്ടുകെട്ടി

Reshma Vijayan — Sun, 18 Oct 2026 16:23:25 +0530

കുവൈത്ത് സിറ്റി: കുവൈത്തിലെ സബാഹ് അൽ-അഹ്മദ് പ്രകൃതി സംരക്ഷിത മേഖലയിൽ നമ്പർ പ്ലേറ്റില്ലാത്ത വാഹനത്തിൽ അതിക്രമിച്ചുകയറി വേട്ടയാടാൻ ശ്രമിച്ച രണ്ട് പേരെ കുവൈത്ത് ആഭ്യന്തര മന്ത്രാലയം അറസ്റ്റ് ചെയ്തു. സംരക്ഷിത പ്രദേശത്തേക്ക് വാഹനം പ്രവേശിക്കുന്നത് കണ്ട് സുരക്ഷാ ജീവനക്കാർ ഉടൻ തന്നെ ഓപ്പറേഷൻസ് റൂമിൽ വിവരം അറിയിക്കുകയായിരുന്നു. തുടർന്ന് ജനറൽ ഡിപ്പാർട്ട്മെന്റ് ഓഫ് എമർജൻസി പൊലീസും ക്രിമിനൽ ഇൻവെസ്റ്റിഗേഷൻ വിഭാഗവും സംയുക്തമായി നടത്തിയ അന്വേഷണത്തിനൊടുവിലാണ് പ്രതികളെ പിടികൂടിയത്.

സംരക്ഷിത മേഖലയിലേക്ക് പ്രവേശിക്കുന്നതിന് മുൻപ് വാഹനത്തിന്‍റെ നമ്പർ പ്ലേറ്റുകൾ പ്രതികൾ അഴിച്ചുമാറ്റിയിരുന്നുവെന്ന് അന്വേഷണത്തിൽ വ്യക്തമായി. ഇവരിൽ നിന്ന് വേട്ടയാടലിന് ഉപയോഗിച്ച ഉപകരണങ്ങളും പിടിച്ചെടുത്തിട്ടുണ്ട്. എൻവയോൺമെന്‍റൽ പൊലീസ് ഇരുവർക്കുമെതിരെ നിയമനടപടികൾ സ്വീകരിക്കുകയും തുടർ നടപടികൾക്കായി ബന്ധപ്പെട്ട അതോറിറ്റിക്ക് കൈമാറുകയും ചെയ്തു. പ്രതികൾ സഞ്ചരിച്ച വാഹനം കണ്ടുകെട്ടുകയും പൊടിച്ച് നശിപ്പിക്കുന്നതിനുള്ള നടപടികൾ സ്വീകരിക്കുകയും ചെയ്തിട്ടുണ്ട്.

കുവൈത്തിലെ പരിസ്ഥിതി സംരക്ഷണ നിയമത്തിലെ 150-ാം വകുപ്പ് പ്രകാരം സംരക്ഷിത മേഖലകളിൽ അതിക്രമിച്ചുകയറുന്നവർക്ക് ഒരു വർഷം വരെ തടവോ 500 ദിനാർ മുതൽ 5,000 ദിനാർ വരെ പിഴയോ അല്ലെങ്കിൽ രണ്ടും കൂടിയോ ശിക്ഷയായി ലഭിക്കാവുന്നതാണ്. കൂടാതെ വേട്ടയാടൽ ഉപകരണങ്ങളും ഉപയോഗിച്ച വാഹനങ്ങളും കണ്ടുകെട്ടാൻ നിയമത്തിൽ വ്യവസ്ഥയുണ്ട്.

25 വർഷത്തിലേറെ നീണ്ട പ്രവാസ ജീവിതം; മലപ്പുറം സ്വദേശി റിയാദിൽ നിര്യാതനായി

Reshma Vijayan — Sun, 18 Oct 2026 12:09:17 +0530

റിയാദ്: പ്രവാസി മലയാളി സൗദി അറേബ്യയിൽ നിര്യാതനായി. മലപ്പുറം പെരിന്തൽമണ്ണ പാലോളിപ്പറമ്പ് സ്വദേശി കണ്ടങ്ങാടത്ത് കമാലുദ്ദീൻ (59) ആണ് റിയാദിൽ മരിച്ചത്. സ്വകാര്യ കമ്പനിയിൽ ജീവനക്കാരനായിരുന്ന കമാൽ 25 വർഷത്തിലധികമായി റിയാദിൽ പ്രവാസിയാണ്. നാല് മാസം മുമ്പാണ് അവസാനമായി അവധിക്ക് നാട്ടിൽ പോയി മടങ്ങിയെത്തിയത്.

പരേതരായ ഉമ്മർകുട്ടിയുടെയും ആമിനയുടെയും മകനാണ്. ഭാര്യ ഖദീജ. മക്കൾ: മുസമ്മിൽ, ഫാത്തിമ, മിഷാൽ. മരണാനന്തര നടപടിക്രമങ്ങൾ പൂർത്തിയാക്കുന്നതിനായി റിയാദ് കെ.എം.സി.സി വെൽഫെയർ വിംഗ് പ്രവർത്തകർ രംഗത്തുണ്ട്. റിയാദ് കെ.എം.സി.സി വെൽഫെയർ വിംഗ് നേതാവ് റഫീഖ് പുല്ലൂർ, മലപ്പുറം ജില്ലാ വെൽഫെയർ വിംഗ് ചെയർമാൻ റഫീഖ് ചെറുമുക്ക്, ജനറൽ കൺവീനർ റിയാസ് തിരൂർക്കാട് എന്നിവരുടെ നേതൃത്വത്തിൽ നസീർ കണ്ണീരി, ജാഫർ വീമ്പൂർ, ഹാഷിം കോട്ടക്കൽ എന്നിവർ നടപടിക്രമങ്ങൾക്ക് പൂർത്തിയാക്കാൻ രംഗത്തുണ്ട്.

രഹസ്യ വിവരം ലഭിച്ചതോടെ പരിശോധന; ആൾതാമസമില്ലാത്ത സ്ഥലത്ത് ചൂതാട്ടം, കുവൈത്തിൽ നാല് പ്രവാസികൾ പിടിയിൽ

Reshma Vijayan — Sun, 18 Oct 2026 15:36:43 +0530

കുവൈത്ത് സിറ്റി: കുവൈത്തിലെ സൽഹിയ പ്രദേശത്ത് ഒഴിഞ്ഞുകിടക്കുന്ന മൈതാനത്ത് ചൂതാട്ടത്തിൽ ഏർപ്പെട്ട നാല് ഏഷ്യൻ പൗരന്മാരെ ക്യാപിറ്റൽ സെക്യൂരിറ്റി പെട്രോൾ സംഘം അറസ്റ്റ് ചെയ്തു. പ്രദേശത്ത് അനധികൃത പ്രവർത്തനങ്ങൾ നടക്കുന്നുണ്ടെന്ന് ലഭിച്ച രഹസ്യ വിവരത്തിന്‍റെ അടിസ്ഥാനത്തിലാണ് സുരക്ഷാ ഉദ്യോഗസ്ഥർ സ്ഥലത്ത് പരിശോധന നടത്തിയത്.

വിവരമറിഞ്ഞയുടൻ ക്യാപിറ്റൽ സെക്യൂരിറ്റി ഡയറക്ടറേറ്റിൽ നിന്നുള്ള പെട്രോൾ സംഘം സ്ഥലത്തെത്തുകയും ചൂതാട്ടത്തിൽ ഏർപ്പെട്ടിരുന്ന നാല് പേരെയും കയ്യോടെ പിടികൂടുകയുമായിരുന്നു. പ്രതികളിൽ നിന്ന് ചൂതാട്ടത്തിന് ഉപയോഗിച്ച പണവും സുരക്ഷാ ഉദ്യോഗസ്ഥർ പിടിച്ചെടുത്തു. പിടികൂടിയ പ്രതികളെയും പിടിച്ചെടുത്ത പണവും മേൽപ്പറഞ്ഞ നിയമനടപടികൾക്കായി ബന്ധപ്പെട്ട അതോറിറ്റികൾക്ക് കൈമാറി. രാജ്യത്ത് ഇത്തരം നിയമവിരുദ്ധ പ്രവർത്തനങ്ങൾ നടത്തുന്നവർക്കെതിരെ കർശന നടപടികൾ തുടരുമെന്നും, നിയമം എല്ലാവർക്കും ഒരുപോലെ ബാധകമാണെന്നും സുരക്ഷാ ഉദ്യോഗസ്ഥർ വ്യക്തമാക്കി.

ഇ-സ്കൂട്ടർ ലംഘനങ്ങൾക്കെതിരെ കടുത്ത നടപടിയുമായി അബുദാബി പൊലീസ്; 10 മാസത്തിനിടെ 9,230-ലധികം വാഹനങ്ങൾ പിടിച്ചെടുത്തു

Reshma Vijayan — Mon, 19 Oct 2026 11:28:29 +0530

അബുദാബി: ഗതാഗത നിയമങ്ങൾ ലംഘിച്ച് സർവീസ് നടത്തിയ 9,237 ഇലക്ട്രിക് സ്കൂട്ടറുകൾ അബുദാബി പൊലീസ് പിടിച്ചെടുത്തു. 2026-ലെ ആദ്യ 10 മാസത്തിനിടയിലാണ് ഇത്രയും വാഹനങ്ങൾ പിടിച്ചെടുത്തത്. പൊതുറോഡുകളിലൂടെയുള്ള യാത്ര, വാഹനങ്ങൾക്കിടയിലൂടെയുള്ള അപകടകരമായ ഡ്രൈവിംഗ്, അനുമതിയില്ലാത്ത പാതകളിലൂടെയുള്ള സർവീസ് എന്നിവ തടയുന്നതിന്റെ ഭാഗമായി പൊലീസ് പരിശോധന ശക്തമാക്കിയിരുന്നു.

ഇ-സ്കൂട്ടർ ഉപയോഗത്തിലെ നിയമലംഘനങ്ങൾ റൈഡർമാരുടെയും മറ്റ് യാത്രക്കാരുടെയും ജീവന് ഒരുപോലെ ഭീഷണിയാണെന്ന് അബുദാബി പൊലീസ് ചൂണ്ടിക്കാട്ടി. ശ്രദ്ധയില്ലാതെയും ഗതാഗത നിയമങ്ങൾ പാലിക്കാതെയും വാഹനം ഓടിക്കുന്നത്, ഹെൽമറ്റ് ധരിക്കാതിരിക്കുന്നത്, മറ്റ് സുരക്ഷാ വസ്ത്രങ്ങളും ഉപകരണങ്ങളും ഉപയോഗിക്കാതിരിക്കുന്നത് എന്നിങ്ങനെ റൈഡർമാർക്കിടയിലെ ഏറ്റവും അപകടകരമായ പ്രവണതകളും പൊലീസ് വ്യക്തമാക്കിയിട്ടുണ്ട്.

ഇത്തരം അശ്രദ്ധമായ പെരുമാറ്റങ്ങൾ ഗുരുതരമായ പരിക്കുകൾക്കും ജീവഹാനിക്കും കാരണമാകുന്ന വാഹനാപകടങ്ങളുടെ സാധ്യത വർദ്ധിപ്പിക്കുന്നു. നിർദ്ദിഷ്ട പാതകളിൽ മാത്രം ഇ-സ്കൂട്ടറുകൾ ഓടിക്കണമെന്നും ഹെൽമറ്റും മറ്റ് സുരക്ഷാ മാനദണ്ഡങ്ങളും കർശനമായി പാലിക്കണമെന്നും അധികൃതർ ആവർത്തിച്ചു വ്യക്തമാക്കി.

അബുദാബിയിൽ പ്രത്യേക അനുമതിയുള്ള മേഖലകളിൽ ഒഴികെ ഇ-സ്കൂട്ടറുകളും മറ്റ് ലാസ്റ്റ്-മൈൽ വാഹനങ്ങളും ഉപയോഗിക്കുന്നത് നിരോധിച്ചിട്ടുണ്ട്. വിലക്കുള്ള സ്ഥലങ്ങളിൽ ഇ-സ്കൂട്ടർ ഓടിച്ചാൽ 500 ദിർഹം പിഴ ഈടാക്കും. കാൽനടയാത്രക്കാർക്കുള്ള പാതകളിലും ജോങ്ങിംഗ് ട്രാക്കുകളിലും ഓടിക്കുന്നത്, ബോർഡുകളോ അടയാളങ്ങളോ വഴി പ്രത്യേകം അനുമതിയില്ലാത്ത നടപ്പാതകളിലൂടെ യാത്ര ചെയ്യുന്നത്, ഇന്റഗ്രേറ്റഡ് ട്രാൻസ്പോർട്ട് സെന്ററിന്റെയും അബുദാബി പൊലീസിന്റെയും അനുമതിയുള്ള വിഭാഗങ്ങൾക്കൊഴികെ, മണിക്കൂറിൽ 60 കിലോമീറ്ററോ അതിൽ കൂടുതലോ വേഗതയുള്ള സെക്കൻഡറി, ടെർഷ്യറി റോഡുകളിൽ പ്രവേശിക്കുന്നത്, സൈക്കിളുകൾക്കോ ഇ-സ്കൂട്ടറുകൾക്കോ പ്രത്യേക ട്രാക്കുകളില്ലാത്ത പാലങ്ങളിലും തുരങ്കങ്ങളിലും ഓടിക്കുന്നത്, താൽക്കാലിക പരിപാടികൾ നടക്കുന്ന സ്ഥലങ്ങൾ ഉൾപ്പെടെ, ഉപയോഗം നിരോധിച്ച് സ്ഥിരമോ താൽക്കാലികമോ ആയ മുന്നറിയിപ്പ് ബോർഡുകൾ സ്ഥാപിച്ചിട്ടുള്ള പ്രദേശങ്ങളിലൂടെ സർവീസ് നടത്തുന്നത് എന്നിവ നിയമലംഘനമാണ്.