Asianet News Malayalam

ബഹിരാകാശ സഞ്ചാരികൾ റീഡ് വൈസ്മാനും വിക്ടർ ഗ്ലോവറും വിരമിച്ചു

Anusree A — Thu, 10 Sep 2026 12:54:15 +0530

വാഷിംഗ്ടൺ: ചന്ദ്രനെ വലംവെച്ച് ചരിത്രം കുറിച്ച നാസയുടെ ആർട്ടെമിസ് 2 (Artemis II) ദൗത്യത്തിലെ മുഖ്യ ബഹിരാകാശ സഞ്ചാരികൾ സജീവ ദൗത്യങ്ങളിൽ നിന്ന് പടിയിറങ്ങി. ദൗത്യത്തിന്റെ കമാൻഡർ റീഡ് വൈസ്‌മാൻ, പൈലറ്റ് വിക്ടർ ഗ്ലോവർ എന്നിവരാണ് നാസയുടെ സജീവ ബഹിരാകാശ പ്രവർത്തനങ്ങളിൽ നിന്നും വിരമിച്ചത്.

ഇനിമുതൽ 'ആസ്ട്രനോട്ട് എമരിറ്റസ്' (Astronaut Emeritus) പദവിയിലാകും ഇരുവരും നാസയ്ക്കൊപ്പം പ്രവർത്തിക്കുക. ഭാവിയിലെ ചാന്ദ്ര ദൗത്യങ്ങൾക്കായി പുതിയ തലമുറയിലെ സഞ്ചാരികളെയും ഉദ്യോഗസ്ഥരെയും പരിശീലിപ്പിക്കുന്നതിനും മാർഗ്ഗനിർദ്ദേശം നൽകുന്നതിനുമുള്ള ചുമതലയാണ് ഇവർ ഇനി വഹിക്കുക.

നാലംഗ ആർട്ടെമിസ് 2 സംഘത്തിൽ ഇനി നാസയുടെ സർവീസിൽ ബാക്കിയുള്ള ഏക അംഗം മിഷൻ സ്പെഷ്യലിസ്റ്റ് ക്രിസ്റ്റീന കോച്ച് മാത്രമാണ്. ഈ ദൗത്യത്തിൽ കാനഡയെ പ്രതിനിധീകരിച്ച ജെറമി ഹാൻസൻ നേരത്തെ കനേഡിയൻ സ്പേസ് ഏജൻസിയിലെ സജീവ സേവനത്തിൽ നിന്ന് വിരമിക്കൽ പ്രഖ്യാപിച്ചിരുന്നു.

ഐഎസ്ആർഒയുടെ ഭാവിയിൽ ജീവനക്കാർ കടുത്ത ആശങ്കയിൽ: ചെയർമാന് കത്തയച്ച് ജീവനക്കാരുടെ ഒൻപത് സംഘടനകൾ

Kiran Gangadharan — Sun, 06 Sep 2026 07:43:43 +0530

ദില്ലി: ഇന്ത്യൻ ബഹിരാകാശ രംഗത്തേക്ക് കൂടുതൽ സ്വകാര്യ നിക്ഷേപം ആകർഷിക്കാനുള്ള കേന്ദ്ര സർക്കാരിൻ്റെ നീക്കത്തിൽ ഐഎസ്ആർഒ ജീവനക്കാർ കടുത്ത ആശങ്കയിൽ. കേന്ദ്ര സർക്കാർ നയത്തിൽ ആശങ്ക അറിയിച്ച് ജീവനക്കാരുടെ ഒൻപത് സംഘടനകൾ ഐഎസ്ആർഒ ചെയർമാന് കത്തെഴുതി. ബഹിരാകാശ മേഖലയിൽ സ്വകാര്യ പങ്കാളിത്തം അനുവദിക്കാൻ തുടങ്ങിയതിന് ശേഷം ആദ്യമായാണ് ജീവനക്കാർ ഇത്ര ശക്തമായി സംഘടിച്ച് രംഗത്ത് വരുന്നത്. വാണിജ്യ ആവശ്യങ്ങൾക്ക് സ്വകാര്യ പങ്കാളിത്തമാകാമെങ്കിലും ഐഎസ്ആർഒ പൊതുമേഖലാ സ്ഥാപനമായി നിലനിൽക്കണമെന്ന വികാരമാണ് കത്തിലെ ഉള്ളടക്കം.

ഐഎസ്ആർഒ വികസിപ്പിച്ചെടുത്ത സാങ്കേതികവിദ്യകൾ ദേശീയ സ്വത്താണ്. വിക്ഷേപണ വാഹന നിർമ്മാണവും പ്രവർത്തനങ്ങളും സ്വകാര്യ മേഖലയ്ക്ക് കൈമാറി ഐഎസ്ആർഒയെ കേവലം ഗവേഷണ സ്ഥാപനമായി ചുരുക്കുന്ന നയം അംഗീകരിക്കാനാവില്ല. ഐഎസ്ആർഒ ഇനി വിക്ഷേപണ വാഹനങ്ങൾ നിർമ്മിക്കില്ലെന്ന ഇൻ-സ്പേസ് ചെയർമാൻ പവൻ ഗോയങ്കെയുടെ പ്രസ്താവന ചൂണ്ടിക്കാട്ടിയാണ് സംഘടനകൾ രേഖാമൂലമുള്ള വ്യക്തത തേടിയത്. ഇത് കേന്ദ്ര സർക്കാരിന്റെയോ ബഹിരാകാശ കമ്മീഷന്റെയോ അംഗീകൃത തീരുമാനമാണോ എന്നും, പിഎസ്എൽവി, എൽവിഎം-3, എസ്എസ്എൽവി തുടങ്ങിയ മുൻനിര റോക്കറ്റുകളുടെ രൂപകൽപ്പന, നിർമ്മാണം, വിക്ഷേപണം എന്നിവ ഇനി ഐഎസ്ആർഒയുടെ ചുമതലയിൽ ഉണ്ടാകുമോ ഇല്ലയോ എന്ന് വ്യക്തമാക്കണമെന്നും നിവേദനത്തിൽ ആവശ്യപ്പെടുന്നുണ്ട്.

പുതിയ റോക്കറ്റ്/ഉപഗ്രഹ നിർമ്മാണങ്ങളിൽ നിന്നും ഐഎസ്ആർഒ പിന്മാറിയാൽ സ്ഥാപനത്തിലെ ജോലികൾ കുറയും. സാങ്കേതിക-ശാസ്ത്രജ്ഞ-ഭരണ വിഭാഗങ്ങളിലെ തസ്തികകൾ വെട്ടിക്കുറയ്ക്കപ്പെടും. ഇത് ഇപ്പോഴുള്ള ജീവനക്കാരുടെ സ്ഥാനക്കയറ്റത്തെയും പുതിയ സ്ഥിരം നിയമനങ്ങളെയും ദോഷകരമായി ബാധിക്കും. ഇതിനെല്ലാം പുറമെ പൊതുജനങ്ങളുടെ നികുതിപ്പണം കൊണ്ട് നിർമ്മിച്ച സാങ്കേതിക വിദ്യകൾ സ്വകാര്യ കമ്പനികൾക്ക് കൈമാറ്റം ചെയ്യപ്പെടുന്നതിന്റെ മാനദണ്ഡങ്ങൾ വ്യക്തമാക്കണമെന്നും ജീവനക്കാർ ആവശ്യപ്പെടുന്നു. ഐഎസ്ആർഒ സ്റ്റാഫ് അസോസിയേഷൻ, എസ്.എ.സി എംപ്ലോയീസ് വെൽഫെയർ അസോസിയേഷൻ ഉൾപ്പെടെയുള്ള 9 പ്രധാന സംഘടനകൾ ഒപ്പിട്ട നിവേദനത്തിന് രേഖാമൂലം മറുപടി ലഭിച്ച ശേഷം തുടർനടപടികൾ സ്വീകരിക്കാനാണ് തീരുമാനം.

സ്വകാര്യവത്കരിക്കുമെന്ന പ്രചരണം തെറ്റെന്ന് ഐഎസ്ആർഒയുടെ വിശദീകരണം

Elsa TJ — Sun, 06 Sep 2026 22:08:26 +0530

ഡൽഹി: ഐഎസ്ആർഒയെ സ്വകാര്യവത്കരിക്കുമെന്ന പ്രചരണം തെറ്റെന്ന് ഐഎസ്ആർഒയുടെ വിശദീകരണം. ഐഎസ്ആർഒയുടെ പ്രാധാന്യം ഒരിക്കലും കുറയില്ലെന്ന് ഔദ്യോഗിക വിശദീകരണം. ഐഎസ്ആർഒ നേതൃത്വം നൽകുന്ന ദേശീയ ബഹിരാകാശ ആവാസവ്യവസ്ഥ നിർമ്മിക്കുകയാണ് ലക്ഷ്യം. ഇസ്രൊ വലിയ ദൗത്യങ്ങളിലേക്ക് ശ്രദ്ധ തിരിക്കുകയാണെന്നും വിശദീകരണം വ്യക്തമാക്കുന്നത്. ഇൻസ്പേസ് സർക്കാർ ഇതര സംവിധാനങ്ങളുടെ പങ്കാളിത്തം ഏകോപിപ്പിക്കും. എൻസിൽ സാങ്കേതിക വിദ്യയുടെ വാണിജ്യവത്കരണം നടത്തും. പുതിയ ബഹിരാകാശ നയം വിപണിയെ വളർത്തിയെന്നും ഇസ്രൊ ഔദ്യോഗിക പോസ്റ്റ് വിശദമാക്കുന്നത്. സ്വന്തം ബഹിരാകാശ നിലയവും, ചാന്ദ്ര ദൗത്യങ്ങളും അടക്കം വലിയ ലക്ഷ്യങ്ങളിലേക്ക് ഇസ്രൊ മുന്നേറുമെന്നും വിശദീകരണം വ്യക്തമാക്കുന്നു.

ഇന്ത്യൻ ബഹിരാകാശ രംഗത്തേക്ക് കൂടുതൽ സ്വകാര്യ നിക്ഷേപം ആകർഷിക്കാനുള്ള കേന്ദ്ര സർക്കാരിൻ്റെ നീക്കത്തിൽ ഐഎസ്ആർഒ ജീവനക്കാർ കടുത്ത ആശങ്ക പ്രകടിപ്പിച്ചിരുന്നു. കേന്ദ്ര സർക്കാർ നയത്തിൽ ആശങ്ക അറിയിച്ച് ജീവനക്കാരുടെ ഒൻപത് സംഘടനകൾ ഐഎസ്ആർഒ ചെയർമാന് കത്തെഴുതിയിരുന്നു. ഈ പശ്ചാത്തലത്തിലാണ് ഐഎസ്ആർഒയുടെ വിശദീകരണമെത്തുന്നത്. ബഹിരാകാശ മേഖലയിൽ സ്വകാര്യ പങ്കാളിത്തം അനുവദിക്കാൻ തുടങ്ങിയതിന് ശേഷം ആദ്യമായാണ് ജീവനക്കാർ ഇത്ര ശക്തമായി സംഘടിച്ച് രംഗത്ത് വന്നത്. വാണിജ്യ ആവശ്യങ്ങൾക്ക് സ്വകാര്യ പങ്കാളിത്തമാകാമെങ്കിലും ഐഎസ്ആർഒ പൊതുമേഖലാ സ്ഥാപനമായി നിലനിൽക്കണമെന്ന വികാരമായിരുന്നു കത്തിലെ ഉള്ളടക്കം.

ഏഷ്യാനെറ്റ് ന്യൂസ് ലൈവ് കാണാം

ജാപ്പനീസ് മാധ്യമപ്രവർത്തകനും ബഹിരാകാശ സഞ്ചാരിയുമായ ടൊയോഹിരോ അകിയാമ അന്തരിച്ചു

Kiran Gangadharan — Tue, 01 Sep 2026 11:18:10 +0530

ദില്ലി: പ്രശസ്ത ജാപ്പനീസ് മാധ്യമപ്രവർത്തകനും ബഹിരാകാശ സഞ്ചാരിയുമായ ടൊയോഹിരോ അകിയാമ അന്തരിച്ചു. 84 വയസായിരുന്നു. വാർദ്ധക്യസഹജമായ അസുഖങ്ങളെ തുടർന്നായിരുന്നു അന്ത്യം. 1990 ഡിസംബറിലാണ് അദ്ദേഹം സോവിയറ്റ് യൂണിയന്റെ സോയൂസ് ബോണറ്റിൽ ബഹിരാകാശത്തേക്ക് പറന്നുയർന്ന് ചരിത്രത്തിലിടം നേടിയത്.

ടോക്കിയോ ബ്രോഡ്കാസ്റ്റിംഗ് സിസ്റ്റത്തിൽ (TBS) മാധ്യമപ്രവർത്തകനായിരുന്ന അകിയാമയെ, സ്ഥാപനത്തിന്റെ 40-ാം വാർഷിക ആഘോഷങ്ങളുടെ ഭാഗമായാണ് സോവിയറ്റ് യൂണിയനുമായി സഹകരിച്ച് ബഹിരാകാശത്തേക്ക് അയച്ചത്. സോവിയറ്റ് യൂണിയന്റെ 'മിർ' ബഹിരാകാശ നിലയത്തിൽ ഏഴ് ദിവസത്തിലേറെ ചെലവഴിച്ച അദ്ദേഹം, ബഹിരാകാശത്തുനിന്ന് തത്സമയ വാർത്താ സംപ്രേക്ഷണം നടത്തിയ ലോകത്തിലെ ആദ്യത്തെ മാധ്യമപ്രവർത്തകൻ കൂടിയാണ്.

ബഹിരാകാശ ദൗത്യത്തിനു ശേഷം മാധ്യമപ്രവർത്തന രംഗത്തുനിന്ന് വിരമിച്ച അകിയാമ, ജപ്പാനിലെ ഫുകുഷിമയിൽ ജൈവകർഷകനായി പ്രവർത്തിച്ചു വരികയായിരുന്നു. പിന്നീട് പ്രകൃതിദുരന്തത്തെ തുടർന്ന് കൃഷി ഉപേക്ഷിക്കേണ്ടിവന്ന അദ്ദേഹം ക്യോട്ടോ സർവകലാശാലയിൽ അധ്യാപകനായും സേവനമനുഷ്ഠിച്ചിട്ടുണ്ട്.

`സൂക്ഷിച്ചില്ലെങ്കിൽ മനുഷ്യരാശിക്കാകെ ഭീഷണിയായേക്കും'; എഐ വികസനത്തിൻ്റെ അപകടം അവതരിപ്പിച്ച് പ്രധാന എഐ കമ്പനി മേധാവിമാർ

Aishwarya S Babu — Thu, 24 Sep 2026 18:14:14 +0530

എഐ വികസനത്തിൻ്റെ അപകടം യുഎൻ സുരക്ഷാ കൗൺസിലിന് മുമ്പാകെ അവതരിപ്പിച്ച് പ്രധാന എഐ കമ്പനി മേധാവിമാർ. സൂക്ഷിച്ചില്ലെങ്കിൽ മനുഷ്യരാശിക്കാകെ എഐ ഭീഷണിയായേക്കുമെന്ന മുന്നറിയിപ്പാണ് സുരക്ഷാ കൗൺസിൽ മുന്നാകെ ആവർത്തിക്കപ്പെട്ടത്. സുരക്ഷാ കൗൺസിൽ അംഗങ്ങളായ രാജ്യങ്ങളുടെ വിദേശകാര്യ മന്ത്രിമാർക്ക് മുമ്പാകെ ആന്ത്രോപിക് സിഇഒ ഡാരിയോ അമോദി, ഓപ്പൺ എഐ മേധാവി സാം ആൾട്ട്മാൻ, ഹഗ്ഗിംഗ് ഫേസ് സഹസ്ഥാപകൻ ക്ലെമൻ്റ് ഡെലാൻഗ്യു എന്നിവർ സംസാരിച്ചു.

എഐ ഒരേ സമയം ആഗോള സാധ്യതയും ആഗോള ഭീഷണിയുമാണെന്ന് ഡാരിയോ അമോദിയും വിഷയത്തിൽ ആഗോള സഹകരണം വേണമെന്ന് സാം ആൾട്ട്മാനും സമിതിക്ക് മുമ്പാകെ നിലപാടെടുത്തു. ഫ്രാൻസ് മുൻകൈ എടുത്താണ് യോഗം നടത്തിയത്. എഐ നിയന്ത്രണ ആവശ്യങ്ങൾ ട്രംപ് പലവട്ടം തള്ളിയതിന് ശേഷമാണ് യുഎന്നിൽ വച്ച് തന്നെയുള്ള കമ്പനി മേധാവിമാരുടെ പ്രഖ്യാപനം.

എഐ രംഗത്ത് അസാധാരണ നീക്കങ്ങൾ! പുതിയ മോഡലുകൾ പതുക്കെയാക്കണമെന്ന് ഡാരിയോ അമൊഡെ, പിന്തുണച്ച് മസ്കും ആൾട്ട്മാനും

Web Desk — Sat, 12 Sep 2026 23:03:59 +0530

ന്യൂയോർക്ക്: എഐ വികസനത്തിന് പുതിയ മാർഗരേഖ മുന്നോട്ട് വച്ച് ആന്ത്രോപിക് മേധാവി ഡാരിയോ അമൊഡെ. പുതിയ മോഡലുകളുടെ റിലീസ് മന്ദഗതിയിലാക്കണമെന്ന് അമൊഡെ അഭിപ്രായപ്പെട്ടു. എഐ വികസനത്തിൽ സുരക്ഷ ഉറപ്പാക്കാൻ മൂന്ന് നിർദേശങ്ങൾ അദ്ദേഹം മുന്നോട്ടുവെച്ചു. കമ്പനികള്‍ എഐ മോഡലുകൾ പരിശോധിക്കാൻ പുറത്ത് നിന്നുള്ള നിരീക്ഷകർക്ക് അനുമതി നൽകണം. ജനാധിപത്യ രാജ്യങ്ങളിലെ സർക്കാരുകളുമായി ചേർന്ന് എഐ ഉപയോഗ സുരക്ഷ ഉറപ്പാക്കണം. ആഗോളതലത്തിൽ രാജ്യങ്ങൾ തമ്മിൽ എഐ നയങ്ങൾ രൂപപ്പെടുത്താൻ സഹകരിക്കണമെന്നാണ് നിർദേശം.

ആദ്യ പടിയായി ആന്ത്രോപിക്ക് പുറത്ത് നിന്നുള്ള നിരീക്ഷകർക്ക് കമ്പനിയുടെ മോഡലുകളിലേക്ക് സമ്പൂർണ്ണ ആക്സസ് നൽകും. മറ്റ് കമ്പനികളും ഈ പാത പിന്തുടരാൻ തയ്യാറാകണമെന്ന് ഡാരിയോ ആവശ്യപ്പെട്ടു. ഡാരിയോയുടെ പുതിയ നിർദ്ദേശങ്ങൾ വരുന്നത് ആയുധ നിർമ്മാണത്തിനടക്കം എഐ മോഡലുകള്‍ ഉപയോഗിക്കാൻ ശ്രമിച്ചുവെന്ന കമ്പനിയുടെ തന്നെ വെളിപ്പെടുത്തലിന് പിന്നാലെയാണെന്നതും ശ്രദ്ധേയം. ഡാരിയോയുടെ നിലപാടിന് പിന്തുണ പ്രഖ്യാപിച്ച് ഗ്രോക് ഉടമ ഇലോൺ മസ്ക് രംഗത്തെത്തി. പിന്തുണച്ച് ഓപ്പൺഎഐ മേധാവി സാം ആൾട്ട്മാനും രംഗത്തെത്തി. ഡാരിയോയുടെ അഭിപ്രായങ്ങളോട് യോജിക്കുന്നുവെന്ന് ആൾട്ട്മാൻ പറഞ്ഞു. കുറച്ചു ആഴ്ച്ചകളായി വിഷയം കമ്പനി ചർച്ച ചെയുന്നുവെന്നും അദ്ദേഹം വ്യക്തമാക്കി.

വര്‍ഷങ്ങൾ കഴി‍ഞ്ഞിട്ടും നിലയ്ക്കാത്ത പ്രകമ്പനം; ഉത്തര കൊറിയയുടെ ആണവ പരീക്ഷണ കേന്ദ്രത്തിൽ തുടർച്ചയായ ഭൂചലനങ്ങൾ, അപൂര്‍വ്വമെന്ന് റിപ്പോര്‍ട്ട്

Prabeesh PP — Fri, 18 Sep 2026 11:11:25 +0530

പ്യോങ്യാങ്: ഉത്തര കൊറിയയുടെ ആണവ പരീക്ഷണം ഭൂമിയുടെ സ്വാഭാവിക ഘടനയിൽ ദീർഘകാല പ്രത്യാഘാതങ്ങൾ സൃഷ്ടിച്ചേക്കാമെന്ന് റിപ്പോര്‍ട്ട്. 2017ൽ നടന്ന പരീക്ഷണത്തിന് ശേഷം വർഷങ്ങൾ പിന്നിട്ടിട്ടും ഇതിന്റെ പ്രകമ്പനങ്ങൾ പൂർണ്ണമായും അവസാനിച്ചിട്ടില്ല. ഉത്തര കൊറിയയുടെ പ്രധാന ആണവ പരീക്ഷണ കേന്ദ്രമായ പുങ്ഗെ-രിയിലാണ്ശാ സ്ത്രജ്ഞർ ഈ അസാധാരണമായ ഭൂചലനങ്ങൾ കണ്ടെത്തിയത്. സാധാരണഗതിയിൽ ഭൂമിക്കടിയിൽ ഒരു വലിയ സ്ഫോടനം നടന്നാൽ അതിന് പിന്നാലെ കുറച്ചു കാലത്തേക്ക് മാത്രമാണ് ഇത്തരം ചലനങ്ങൾ ഉണ്ടാകാറുള്ളത്. എന്നാൽ പുങ്ഗെ-രിയിലെ കാര്യങ്ങൾ തികച്ചും വ്യത്യസ്തമാണെന്ന് പുതിയ റിപ്പോർട്ടുകൾ സൂചിപ്പിക്കുന്നു;

പരീക്ഷണം കഴിഞ്ഞ് വർഷങ്ങൾ പലതു കഴിഞ്ഞിട്ടും ഈ പ്രദേശത്ത് തുടർച്ചയായ ഭൂകമ്പ സമാനമായ ചലനങ്ങൾ അനുഭവപ്പെടുന്നുണ്ട്. ഇത് ശാസ്ത്രലോകത്തെ സംബന്ധിച്ചിടത്തോളം വലിയൊരു ചോദ്യചിഹ്നമായി മാറിയിരിക്കുകയാണ്. സ്ഫോടനങ്ങൾക്ക് ശേഷമുള്ള ഭൂമിയുടെ മാറ്റങ്ങളെക്കുറിച്ചുള്ള മുൻ ധാരണകളെ തിരുത്തിക്കുറിക്കുന്നതാണ് ഈ പുതിയ കണ്ടെത്തൽ. 2017ൽ നടന്ന ആ വലിയ പരീക്ഷണത്തിന് ശേഷം വർഷങ്ങൾ പിന്നിട്ടിട്ടും ഭൂമി ശാന്തമായിട്ടില്ല എന്നത് ശ്രദ്ധേയമാണ്. സാധാരണയായി മാസങ്ങൾക്കുള്ളിൽ അവസാനിക്കേണ്ട പ്രകമ്പനങ്ങളാണ് വർഷങ്ങളോളം നീണ്ടുനിൽക്കുന്നത്.

പുങ്ഗെ-രിയിലെ അസാധാരണ പ്രതിഭാസം

ആണവ പരീക്ഷണങ്ങൾക്കായി ഉത്തര കൊറിയ ഉപയോഗിച്ചിരുന്ന പ്രധാന സ്ഥലമാണ് പുങ്ഗെ-രി. 2017ലെ പരീക്ഷണമാണ് ഈ പ്രദേശത്തെ ഭൂപ്രകൃതിയെ ഇത്രത്തോളം അസ്ഥിരപ്പെടുത്തിയതെന്നാണ് പുതിയ റിപ്പോർട്ടുകൾ വ്യക്തമാക്കുന്നത്. ദീർഘകാലമായി തുടരുന്ന ഈ പ്രകമ്പനങ്ങൾ സാധാരണ സ്ഫോടനങ്ങൾക്ക് ശേഷം കാണുന്ന പാറ്റേണുകളിൽ നിന്ന് പൂർണ്ണമായും വ്യതിചലിക്കുന്നതാണ്. ശാസ്ത്രജ്ഞർ നടത്തിയ നിരന്തരമായ നിരീക്ഷണങ്ങളിലൂടെയാണ് ഈ മാറ്റങ്ങൾ കൃത്യമായി തിരിച്ചറിഞ്ഞത്. ഒരു വലിയ സ്ഫോടനത്തിന് ശേഷം ഭൂമി പതിയെ അതിന്റെ പഴയ അവസ്ഥയിലേക്ക് മടങ്ങുന്നതാണ് സ്വാഭാവിക പ്രക്രിയ. എന്നാൽ പുങ്ഗെ-രിയിലെ ഇപ്പോഴത്തെ അവസ്ഥ ഇതിന് നേർവിപരീതമാണെന്ന് ഗവേഷകർ സാക്ഷ്യപ്പെടുത്തുന്നു. വർഷങ്ങൾ കഴിഞ്ഞിട്ടും ഭൂമിക്കടിയിലെ അസ്ഥിരത തുടരുകയാണെന്ന് ശാസ്ത്രജ്ഞർ ചൂണ്ടിക്കാണിക്കുന്നു.

മാറുന്ന പാറ്റേണുകളും ശാസ്ത്രലോകവും

സ്ഫോടനങ്ങൾക്ക് ശേഷമുള്ള ഭൂചലനങ്ങളുടെ സ്വഭാവം പഠിക്കുന്ന ഗവേഷകർക്ക് ഈ പുതിയ കണ്ടെത്തൽ നൽകുന്ന വിവരങ്ങൾ ഏറെ നിര്‍ണായകമാണ്. 2017ലെ സംഭവത്തിന് ശേഷം രേഖപ്പെടുത്തിയ വിവരങ്ങൾ സൂക്ഷ്മമായി പരിശോധിക്കുമ്പോഴാണ് ഈ ദീർഘകാല പ്രകമ്പനങ്ങളുടെ യഥാർത്ഥ വ്യാപ്തി മനസ്സിലാകുന്നത്. സാധാരണ സ്ഫോടനങ്ങൾക്ക് ശേഷമുള്ള പാറ്റേണുകളിൽ നിന്ന് ഈ ചലനങ്ങൾ വ്യത്യാസപ്പെട്ടിരിക്കുന്നത് എന്തുകൊണ്ടാണെന്നത് ശാസ്ത്രജ്ഞർ വിലയിരുത്തുന്നുണ്ട്. 2017ലെ പരീക്ഷണത്തിന്റെ തീവ്രതയാകാം ഇത്രയും വർഷങ്ങൾ കഴിഞ്ഞിട്ടും പ്രകമ്പനങ്ങൾ തുടരാൻ കാരണമെന്നാണ് ലഭ്യമായ വിവരങ്ങളിൽ നിന്ന് മനസ്സിലാക്കാൻ സാധിക്കുന്നത്.

മറ്റ് പരീക്ഷണ കേന്ദ്രങ്ങളിൽ നിന്ന് വ്യത്യസ്തമായി പുങ്ഗെ-രിയിൽ മാത്രം എന്തുകൊണ്ട് ഇങ്ങനെ സംഭവിക്കുന്നു എന്നത് കൂടുതൽ പഠനങ്ങൾക്ക് വിധേയമാക്കേണ്ടതുണ്ട്. ദീർഘകാലം നീണ്ടുനിൽക്കുന്ന ഇത്തരം ഭൂചലനങ്ങൾ ശാസ്ത്രലോകത്തിന് പുതിയ വെല്ലുവിളികൾ ഉയർത്തുന്നുണ്ട്. പുങ്ഗെ-രിയിലെ ഈ അസാധാരണമായ ഭൂചലനങ്ങൾ വരും ദിവസങ്ങളിലും വലിയ ചർച്ചകൾക്ക് വഴിയൊരുക്കും. ശാസ്ത്രജ്ഞരുടെ ഈ പുതിയ കണ്ടെത്തൽ അന്താരാഷ്ട്ര തലത്തിലും വലിയ ശ്രദ്ധ നേടുന്നുണ്ട്. വരും നാളുകളിൽ കൂടുതൽ വിശദമായ പഠനങ്ങൾ ഈ മേഖലയിൽ നടക്കുമെന്നാണ് പ്രതീക്ഷിക്കുന്നത്.

ബെപികൊളംബോ: ബുധന്‍റെ രഹസ്യങ്ങൾ ചുരുളഴിയുമോ?

Prashobh Prasannan — Fri, 04 Sep 2026 08:21:10 +0530

സൗരയൂഥത്തിലെ ഏറ്റവും ചെറുതും ഇന്നും കാര്യമായി പര്യവേക്ഷണം ചെയ്യപ്പെടാത്തതുമായ ഗ്രഹമാണ് ബുധൻ. വലുപ്പത്തിൽ ചെറുതാണെങ്കിലും ശാസ്ത്രലോകത്തിന് മുന്നിൽ നിരവധി വലിയ ചോദ്യങ്ങളാണ് ബുധൻ ഉയർത്തുന്നത്. ഈ രഹസ്യങ്ങൾക്ക് ഉത്തരം തേടി രണ്ട് ബഹിരാകാശ പേടകങ്ങൾ ഉടൻ തന്നെ ഗ്രഹത്തെ ചുറ്റിയുള്ള ശാസ്ത്രീയ നിരീക്ഷണങ്ങൾ ശക്തമാക്കും. യൂറോപ്യൻ ബഹിരാകാശ ഏജൻസിയും ജപ്പാൻ എറോസ്പേസ് എക്സ്പ്ലൊറേഷൻ ഏജൻസിയും സംയുക്തമായി നടത്തുന്ന ബെപികൊളംബോ ദൗത്യമാണ് ഇതിന് പിന്നിൽ. 2018 ഒക്ടോബറിൽ വിക്ഷേപിച്ച ദൗത്യം എട്ട് വർഷത്തോളം നീണ്ട യാത്രയ്ക്കൊടുവിലാണ് ബുധനിലേക്ക് എത്തുന്നത്.

ബുധന്‍റെ രഹസ്യങ്ങൾ തേടി

ബുധനെ ഇതുവരെ സന്ദർശിച്ചിട്ടുള്ളത് രണ്ട് ബഹിരാകാശ ദൗത്യങ്ങൾ മാത്രമാണ്. നാസയുടെ മറീനർ 10 1974ലും 1975ലും മൂന്ന് തവണ ബുധനരികിലൂടെ പറന്നു. ഗ്രഹത്തിന്റെ ഗർത്തങ്ങളും വിള്ളലുകളുമുള്ള ഉപരിതലത്തെക്കുറിച്ചുള്ള ആദ്യ വിശദമായ വിവരങ്ങൾ അന്ന് ലഭിച്ചു. ബുധന് അത്യന്തം നേർത്ത അന്തരീക്ഷവും കാന്തികമേഖലയും ഉണ്ടെന്നും കണ്ടെത്തി. പിന്നീട് 2011ൽ നാസയുടെ മെസഞ്ചർ ബുധന്റെ ഭ്രമണപഥത്തിലെത്തി. നാല് വർഷത്തോളം നടത്തിയ നിരീക്ഷണത്തിലൂടെ ഗ്രഹത്തിന്റെ മുഴുവൻ ഉപരിതലവും ആദ്യമായി ശാസ്ത്രജ്ഞർക്ക് വിശദമായി പഠിക്കാനായി. എന്നാൽ മെസഞ്ചറിനും ബുധന്റെ എല്ലാ രഹസ്യങ്ങളും കണ്ടെത്താനായില്ല. ഗ്രഹത്തിന്റെ തെക്കൻ അർധഗോളത്തെക്കുറിച്ചുള്ള വിവരങ്ങൾ താരതമ്യേന കുറവായിരുന്നു. അതുകൊണ്ടുതന്നെ ബെപികൊളംബോയുടെ വരവിന് വലിയ പ്രാധാന്യമുണ്ട്.

രണ്ട് പേടകങ്ങൾ, വ്യത്യസ്ത ദൗത്യങ്ങൾ

ബെപികൊളംബോ ദൗത്യം രണ്ട് സ്വതന്ത്ര പേടകങ്ങളായാണ് പ്രവർത്തിക്കുക. യൂറോപ്പിന്റെ മെർക്കുറി പ്ലാനറ്ററി ഓർബിറ്റർ ബുധന്റെ ഉപരിതലത്തെ കേന്ദ്രീകരിച്ചായിരിക്കും പഠനം നടത്തുക. ഉപരിതലത്തിന്റെ ഭൂപ്രകൃതി, ധാതുക്കൾ, ഗുരുത്വാകർഷണ മേഖല, അഗ്നിപർവത നിക്ഷേപങ്ങൾ എന്നിവ വിശദമായി പരിശോധിക്കും. ബുധന്റെ ഉപരിതലത്തിൽ കണ്ടെത്തിയ വിചിത്രമായ കുഴികൾ, ശാസ്ത്രജ്ഞർ ‘ഹോളോസ്’ എന്ന് വിളിക്കുന്ന ഘടനകൾ, പ്രത്യേക ശ്രദ്ധയോടെ പഠിക്കും. ജപ്പാന്റെ മെർക്കുറി മാഗ്നറ്റോസ്ഫെറിക് ഓർബിറ്ററായ മിയോ ബുധന്റെ ചുറ്റുപാടുകളെ കേന്ദ്രീകരിച്ചായിരിക്കും പ്രവർത്തിക്കുക. ഗ്രഹത്തിന്റെ കാന്തികമണ്ഡലം, നേർത്ത അന്തരീക്ഷം, സമീപപ്രദേശങ്ങളിലെ പൊടിപടലങ്ങൾ എന്നിവയാണ് പ്രധാന പഠനവിഷയങ്ങൾ.

ജലമഞ്ഞിന്റെ സാന്നിധ്യവും പരിശോധിക്കും

ബുധന്റെ ധ്രുവപ്രദേശങ്ങളിലെ സ്ഥിരമായി നിഴലിൽ കഴിയുന്ന ആഴമേറിയ ഗർത്തങ്ങളിൽ ജലമഞ്ഞ് നിലനിൽക്കുന്നുണ്ടെന്നാണ് ശാസ്ത്രജ്ഞരുടെ നിഗമനം. ഈ പ്രദേശങ്ങൾ ബെപികൊളംബോ കൂടുതൽ കൃത്യതയോടെ നിരീക്ഷിക്കും. ബുധന്റെ തെക്കൻ അർധഗോളത്തെക്കുറിച്ചുള്ള കൂടുതൽ വിവരങ്ങൾ ലഭിക്കുന്നതോടെ മെസഞ്ചർ ദൗത്യത്തിൽ ഉണ്ടായിരുന്ന വടക്കൻ മേഖലയിലേക്കുള്ള നിരീക്ഷണ മുൻതൂക്കവും കുറയ്ക്കാനാകും.

ബുധൻ എങ്ങനെ രൂപപ്പെട്ടു?

ബുധന്റെ ഉപരിതലത്തിലെ ധാതുക്കളും മൂലകങ്ങളും കൂടുതൽ കൃത്യമായി തിരിച്ചറിയുകയാണ് ശാസ്ത്രജ്ഞരുടെ മറ്റൊരു പ്രധാന ലക്ഷ്യം. മെസഞ്ചറിന് നേരിട്ട പ്രധാന പരിമിതികളിലൊന്ന് ബുധന്റെ പാറകളിൽ ഇരുമ്പിന്റെ അളവ് വളരെ കുറവായിരുന്നതാണ്.

ബെപികൊളംബോയിലെ പുതിയ സാങ്കേതികവിദ്യകൾ ഇരുമ്പിന്റെ സാന്നിധ്യം കുറഞ്ഞ പാറകളെയും കൂടുതൽ കൃത്യമായി പഠിക്കാൻ സഹായിക്കും. ഇതിലൂടെ ബുധൻ എങ്ങനെ രൂപപ്പെട്ടു എന്നതിനെക്കുറിച്ചും അതുവഴി സൗരയൂഥത്തിന്റെ രൂപീകരണത്തെക്കുറിച്ചും പുതിയ സൂചനകൾ ലഭിക്കുമെന്നാണ് പ്രതീക്ഷ. എട്ട് വർഷത്തെ യാത്രയ്ക്കൊടുവിൽ ബുധന്റെ ഭ്രമണപഥത്തിൽ ശാസ്ത്രീയ പ്രവർത്തനങ്ങൾ പൂർണതോതിൽ ആരംഭിക്കുമ്പോൾ, ഇതുവരെ ലഭിക്കാത്ത നിരവധി ഉത്തരങ്ങളാണ് ശാസ്ത്രലോകം പ്രതീക്ഷിക്കുന്നത്. സൂര്യനോട് ഏറ്റവും അടുത്ത ഈ ചെറുഗ്രഹം ഒളിപ്പിച്ചുവെച്ചിരിക്കുന്ന വലിയ രഹസ്യങ്ങൾ ബെപികൊളംബോ വെളിപ്പെടുത്തുമോ എന്നതാണ് ഇനി കാത്തിരിക്കേണ്ടത്.

ചരിത്രമെഴുതി ജർമ്മൻ ബഹിരാകാശ സ്റ്റാർട്ടപ്പ്: ഇസാർ എയറോസ്പേസിന്റെ റോക്കറ്റ് വിക്ഷേപണം വിജയം

Web Desk — Sun, 06 Sep 2026 07:04:38 +0530

ബെർലിൻ: യൂറോപ്യൻ ഭൂഖണ്ഡത്തിനുള്ളിൽ നിന്നുള്ള ആദ്യത്തെ വിജയകരമായ ഓർബിറ്റൽ ബഹിരാകാശ വിക്ഷേപണം നടത്തി ജർമ്മൻ ബഹിരാകാശ സ്റ്റാർട്ടപ്പായ ഇസാർ എയറോസ്പേസ് ചരിത്രം കുറിച്ചു. നോർവേയിലെ ആൻഡോയ സ്പേസ് പോർട്ടിൽ നിന്നാണ് കമ്പനിയുടെ 'സ്പെക്ട്രം' റോക്കറ്റ് വിജയകരമായി വിക്ഷേപിച്ചത്. 2025-ൽ നടത്തിയ കമ്പനിയുടെ ആദ്യ വിക്ഷേപണ ശ്രമം പരാജയപ്പെട്ടിരുന്നെങ്കിലും, പോരായ്മകൾ പരിഹരിച്ച് രണ്ടാം ദൗത്യത്തിൽ കമ്പനി തകർപ്പൻ വിജയം സ്വന്തമാക്കുകയായിരുന്നു.

യൂറോപ്യൻ ബഹിരാകാശ മേഖലയ്ക്ക് ഏറെ നിർണായകമാണ് ഈ നേട്ടം. യൂറോപ്യൻ ബഹിരാകാശ ഏജൻസിയുടെ പ്രശസ്തമായ ഏരിയൻ (Areane) റോക്കറ്റുകൾ വിക്ഷേപിക്കുന്നത് തെക്കേ അമേരിക്കൻ ഭൂഖണ്ഡത്തിൽ സ്ഥിതി ചെയ്യുന്ന ഫ്രഞ്ച് ഗയാനയിലെ കുറൂവിൽ നിന്നാണ്. എന്നാൽ സ്വന്തം ഭൂഖണ്ഡത്തിനുള്ളിൽ നിന്ന് തന്നെ വിജയകരമായി ഒരു ബഹിരാകാശ ദൗത്യം പൂർത്തിയാക്കാൻ സാധിച്ചത് യൂറോപ്പിന്റെ റോക്കറ്റ് വിക്ഷേപണ രംഗത്ത് പുതിയൊരു ചരിത്ര അധ്യായത്തിനാണ് തുടക്കമിട്ടിരിക്കുന്നത്.

നെഞ്ചിനുള്ളിൽ തീയാണ്..! ചൊവ്വയുടെ ഹൃദയത്തിൽ പുകഞ്ഞുകത്തുന്ന അഗ്നിയുടെ രഹസ്യം

Prashobh Prasannan — Tue, 01 Sep 2026 08:34:36 +0530

ചൊവ്വയുടെ ഉപരിതലത്തിന് അടിയിൽ വൻ താപ അസാധാരണത കണ്ടെത്തി ശാസ്ത്രജ്ഞർ. ചുവന്ന ഗ്രഹത്തിന്റെ ദക്ഷിണാർധഗോളത്തിന് താഴെയുള്ള ഉൾഭാഗം ഉത്തരാർധഗോളത്തേക്കാൾ 390 മുതൽ 750 ഡിഗ്രി ഫാരൻഹീറ്റ് വരെ, അതായത് 200 മുതൽ 400 ഡിഗ്രി സെൽഷ്യസ് വരെ ചൂടേറിയതാണെന്നാണ് പുതിയ പഠനം വ്യക്തമാക്കുന്നത്. ചൊവ്വയുടെ വടക്കും തെക്കും തമ്മിലുള്ള വലിയ വ്യത്യാസത്തിന് പിന്നിലെ രഹസ്യം കൂടുതൽ സങ്കീർണമാക്കുന്നതാണ് ഈ കണ്ടെത്തൽ. ചൊവ്വയുടെ വടക്കുഭാഗം താരതമ്യേന പരന്ന താഴ്ന്ന പ്രദേശങ്ങളാൽ നിറഞ്ഞിരിക്കുമ്പോൾ തെക്ക് കുഴികളും ഗർത്തങ്ങളും നിറഞ്ഞ ഉയർന്ന പ്രദേശങ്ങളാണ്.

ചൊവ്വയുടെ ഉള്ളിൽ എന്താണ് സംഭവിക്കുന്നത്?

ഗ്രഹങ്ങളുടെ ഉൾഭാഗം പൊതുവെ ഗോളാകൃതിയിൽ ഒരേ സ്വഭാവമുള്ളതായിരിക്കുമെന്നാണ് ശാസ്ത്രജ്ഞർ സാധാരണ കരുതുന്നത്. എന്നാൽ ചൊവ്വയുടെ കാര്യത്തിൽ ഇത് ശരിയാകണമെന്നില്ലെന്നാണ് പുതിയ പഠനം സൂചിപ്പിക്കുന്നത്. അലക്സാണ്ടർ ബെർണിന്റെ നേതൃത്വത്തിലുള്ള ഗവേഷക സംഘമാണ് ചൊവ്വയുടെ ഉൾഭാഗത്തെ താപനിലയിൽ ഇത്ര വലിയ വ്യത്യാസം കണ്ടെത്തിയത്. കാലിഫോർണിയ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്നുള്ള ബെർൺ ഇപ്പോൾ അരിസോണ സർവകലാശാലയുമായി ബന്ധപ്പെട്ടാണ് പ്രവർത്തിക്കുന്നത്.

മൂന്ന് നാസ ബഹിരാകാശ പേടകങ്ങളുടെ വിവരങ്ങൾ പരിശോധിച്ചു

നാസയുടെ മാർസ് ഗ്ലോബൽ സർവേയർ, മാർസ് ഒഡിസി, മാർസ് റിക്കണൈസൻസ് ഓർബിറ്റർ എന്നീ മൂന്ന് ബഹിരാകാശ പേടകങ്ങളിൽ നിന്നുള്ള പഴയ വിവരങ്ങളാണ് ഗവേഷകർ വീണ്ടും പരിശോധിച്ചത്. ചൊവ്വയെ ചുറ്റിപ്പറ്റിയുള്ള ഇവയുടെ ഭ്രമണവേഗത്തിൽ ഉണ്ടായ സൂക്ഷ്മമായ വ്യതിയാനങ്ങളാണ് പ്രധാനമായും പഠിച്ചത്. ചൊവ്വയുടെ ഗുരുത്വാകർഷണ മണ്ഡലത്തിലെ വ്യത്യാസങ്ങൾ മനസിലാക്കാൻ ഇതിലൂടെ സാധിച്ചു. അലക്സാണ്ടർ ബെർൺ വികസിപ്പിച്ചെടുത്ത ‘ടൈഡൽ ടോമോഗ്രഫി’ എന്ന രീതിയാണ് ഇതിനായി ഉപയോഗിച്ചത്. ചൊവ്വ സൂര്യനെ ചുറ്റുന്ന ദീർഘവൃത്താകൃതിയിലുള്ള ഭ്രമണപഥത്തിനിടെ സൂര്യന്റെ ഗുരുത്വാകർഷണത്തിൽ ഉണ്ടാകുന്ന വ്യത്യാസങ്ങളും ഈ രീതിയിൽ കണക്കിലെടുത്തു.

തെക്കൻ ഭാഗത്ത് ഭാഗികമായി ഉരുകിയ പാളിയോ?

ഗവേഷകരുടെ കണക്കുകൂട്ടൽ പ്രകാരം ചൊവ്വയുടെ ദക്ഷിണാർധഗോളത്തിന് താഴെയുള്ള മാന്റിൽ ഉത്തരഭാഗത്തേക്കാൾ 200 മുതൽ 400 ഡിഗ്രി സെൽഷ്യസ് വരെ ചൂടേറിയതാണ്. ഇത്രയും ഉയർന്ന താപനില കാരണം ദക്ഷിണ ഭാഗത്തെ മാന്റിൽ ഇപ്പോഴും ഭാഗികമായി ഉരുകിയ നിലയിലായിരിക്കാനുള്ള സാധ്യതയും ശാസ്ത്രജ്ഞർ മുന്നോട്ടുവയ്ക്കുന്നു. ഇത് ചൊവ്വയുടെ വാസയോഗ്യതയെയും ഗ്രഹത്തിൽ അഗ്നിപർവത പ്രവർത്തനങ്ങൾ എത്രകാലം തുടർന്നുവെന്നതിനെയും കുറിച്ചുള്ള ധാരണകളെ സ്വാധീനിച്ചേക്കാം.

വടക്കും തെക്കും ഇത്ര വ്യത്യാസം എന്തുകൊണ്ട്?

ചൊവ്വയുടെ ഉത്തരഭാഗത്ത് വിശാലമായ താഴ്ന്ന സമതല പ്രദേശങ്ങളാണ് കാണപ്പെടുന്നത്. അതേസമയം ദക്ഷിണഭാഗത്തെ പുറംതോട് ശരാശരി 25 കിലോമീറ്റർ വരെ കട്ടിയുള്ളതും ഗർത്തങ്ങൾ നിറഞ്ഞ ഉയർന്ന പ്രദേശങ്ങളാൽ സമ്പന്നവുമാണ്. ചൊവ്വയുടെ വടക്കൻ താഴ്ന്ന പ്രദേശങ്ങളിൽ ഒരുകാലത്ത് വലിയൊരു സമുദ്രം ഉണ്ടായിരുന്നിരിക്കാമെന്നും ശാസ്ത്രജ്ഞർ കരുതുന്നു. വടക്കും തെക്കും തമ്മിലുള്ള ഈ വ്യത്യാസം ചൊവ്വയിലെ ജലചംക്രമണവും ജലാശയങ്ങൾ രൂപപ്പെട്ട രീതിയും മനസിലാക്കുന്നതിന് നിർണായകമാണെന്ന് ഗവേഷകർ പറയുന്നു.

ഇൻസൈറ്റ് ദൗത്യത്തിലെ കണ്ടെത്തലുകൾക്കും വിശദീകരണം

ചൊവ്വയുടെ ഉൾഭാഗത്തെക്കുറിച്ചുള്ള പുതിയ കണ്ടെത്തൽ നാസയുടെ ഇൻസൈറ്റ് ദൗത്യത്തിലെ ചില നിരീക്ഷണങ്ങൾക്കും പുതിയ വിശദീകരണം നൽകുന്നു. 2022 ഡിസംബറിൽ ദൗത്യം അവസാനിപ്പിക്കുന്നതിന് മുമ്പ് ഇൻസൈറ്റ് ലാൻഡറിൽ ഘടിപ്പിച്ച ഭൂകമ്പമാപിനി ചൊവ്വയുടെ തെക്കുഭാഗത്ത് ഭൂകമ്പ തരംഗങ്ങൾ കൂടുതൽ വേഗത്തിൽ ക്ഷയിക്കുന്നതായി കണ്ടെത്തിയിരുന്നു. തെക്കൻ ഭാഗത്തെ ഉയർന്ന താപനിലയാണ് ഇതിന് കാരണമാകുന്നതെന്നാണ് പുതിയ പഠനം സൂചിപ്പിക്കുന്നത്.

നാല് ബില്യൺ വർഷം മുമ്പുണ്ടായ കാന്തിക മണ്ഡലം

ചൊവ്വയ്ക്ക് ഇന്ന് ആഗോള കാന്തിക മണ്ഡലമില്ല. എന്നാൽ നാല് ബില്യൺ വർഷങ്ങൾക്ക് മുമ്പ് ചൊവ്വയ്ക്ക് കാന്തിക മണ്ഡലം ഉണ്ടായിരുന്നുവെന്നാണ് ശാസ്ത്രജ്ഞരുടെ വിലയിരുത്തൽ. ദക്ഷിണ മാന്റിലിൽ നിന്ന് ചൂട് മുകളിലേക്ക് ഉയർന്ന് ഇരുമ്പ് അടങ്ങിയ ധാതുക്കളുടെ ‘ക്യൂറി താപനില’യ്ക്കു മുകളിലേക്ക് പുറംതോടിനെ ചൂടാക്കിയിരുന്നെങ്കിൽ, അവയിൽ ഇന്ന് കാണുന്ന കാന്തിക അവശിഷ്ടങ്ങൾക്ക് കാരണമായിരിക്കാം.

ഭീമൻ ആഘാതമോ കാരണം?

ചൊവ്വയുടെ വടക്ക്-തെക്ക് വ്യത്യാസത്തിന് പിന്നിലെ യഥാർഥ കാരണം ഇപ്പോഴും വ്യക്തമല്ല. നാല് ബില്യൺ വർഷത്തിലേറെ മുമ്പ് ചൊവ്വയുടെ വടക്കുഭാഗത്ത് ഉണ്ടായ ഒരു ഭീമൻ ആഘാതമാണ് ഇതിന് കാരണമെന്നതാണ് പ്രധാന സിദ്ധാന്തങ്ങളിലൊന്ന്. ഇത്തരമൊരു ആഘാതം വടക്കുഭാഗത്ത് വലിയൊരു ആഘാത ഗർത്തം സൃഷ്ടിക്കുകയും അവിടെയുള്ള ആന്തരിക ചൂട് പുറത്തേക്ക് ഒഴുകാൻ സഹായിക്കുകയും ചെയ്തിരിക്കാം. ഇതുവഴി വടക്കൻ മാന്റിൽ തെക്കൻ ഭാഗത്തേക്കാൾ വേഗത്തിൽ തണുത്തിരിക്കാമെന്നാണ് നിഗമനം. മറ്റൊരു സാധ്യത തെക്കൻ ഭാഗത്തെ കട്ടിയുള്ള പുറംതോട് ചൂട് പുറത്തേക്ക് പോകുന്നത് തടഞ്ഞതാകാമെന്നാണ്. ഭാവിയിൽ കൂടുതൽ കൃത്യതയുള്ള ഗുരുത്വാകർഷണ വിവരങ്ങളിലൂടെ ഈ സിദ്ധാന്തങ്ങൾ പരിശോധിക്കാനാകുമെന്ന് ഗവേഷകർ പറയുന്നു.

മറ്റ് ഗ്രഹങ്ങളിലും ഉപയോഗിക്കാം

ചൊവ്വയുടെ ഉൾഭാഗത്തെ പഠിക്കാൻ ഉപയോഗിച്ച ‘ടൈഡൽ ടോമോഗ്രഫി’ സാങ്കേതികവിദ്യ ഭാവിയിൽ മറ്റ് ഗ്രഹങ്ങളെയും പഠിക്കാൻ ഉപയോഗിക്കാനാകുമെന്നാണ് ശാസ്ത്രജ്ഞരുടെ പ്രതീക്ഷ. ബുധൻ മുതൽ വ്യാഴത്തിന്റെ വലിയ ഉപഗ്രഹങ്ങൾ വരെയുള്ള വിവിധ ആകാശഗോളങ്ങളുടെ ആന്തരിക ഘടന മനസിലാക്കാൻ ഈ രീതി സഹായിച്ചേക്കും. ചൊവ്വയിലെ ഈ താപ അസാധാരണതയെക്കുറിച്ചുള്ള പഠനം ഓഗസ്റ്റ് 27ന് ‘നേച്ചർ’ ജേണലിലാണ് പ്രസിദ്ധീകരിച്ചത്.

മരണത്തിന് തൊട്ടുമുമ്പുള്ള ആ വെളിച്ചം! മരിക്കുന്ന നക്ഷത്രത്തിന്റെ അവസാന സെക്കൻഡുകൾ ഭൂമിയിൽ കണ്ടു!

Prashobh Prasannan — Sun, 30 Aug 2026 13:38:53 +0530

ഭൂമിയിൽ നിന്ന് ഏകദേശം 50 കോടി പ്രകാശവർഷം അകലെയുള്ള ഒരു ഗാലക്സിയിൽ ഭീമൻ നക്ഷത്രം പൊട്ടിത്തെറിച്ച് സൂപ്പർനോവയായ നിമിഷങ്ങൾ ജ്യോതിശാസ്ത്രജ്ഞർ ആദ്യമായി ഇത്ര വ്യക്തമായി രേഖപ്പെടുത്തി. നക്ഷത്രത്തിന്റെ മരണത്തിന്റെ തുടക്കമറിയിച്ച അതിസൂക്ഷ്മമായ എക്‌സ്-റേ പ്രകാശവും തുടർന്ന് നടന്ന സൂപ്പർനോവ സ്ഫോടനവും ഒരുമിച്ച് നിരീക്ഷിക്കാൻ കഴിഞ്ഞതാണ് ഈ കണ്ടെത്തലിന്റെ പ്രത്യേകത. സാധാരണയായി ഏതാനും സെക്കൻഡുകൾ മുതൽ മണിക്കൂറുകൾ വരെ മാത്രം നീണ്ടുനിൽക്കുന്ന ഇത്തരം എക്‌സ്-റേ സിഗ്നലുകൾ കണ്ടെത്തുക അത്യപൂർവമാണ്.

ചൈനയുടെ ഐൻസ്റ്റൈൻ പ്രോബ് കണ്ടെത്തിയ ആദ്യ സൂചന

2026 മാർച്ചിലാണ് ചൈനയുടെ ഐൻസ്റ്റൈൻ പ്രോബ് ബഹിരാകാശ ദൗത്യം ഒരു ക്ഷണിക എക്‌സ്-റേ പ്രകാശം കണ്ടെത്തിയത്. തുടർന്ന് വിവിധ ബഹിരാകാശ, ഭൗമ ദൂരദർശിനികൾ നടത്തിയ നിരീക്ഷണങ്ങളിൽ ഇത് പിന്നീട് എസ്.എൻ. 2026 ജി.എസ്.എഫ് എന്ന പേരിൽ അറിയപ്പെട്ട ബ്രോഡ് ലൈൻഡ് ടൈപ്പ് ഐ.സി സൂപ്പർനോവയാണെന്ന് സ്ഥിരീകരിച്ചു.

സൂര്യനെക്കാൾ 20 മടങ്ങ് ഭാരമുള്ള നക്ഷത്രം

ഗവേഷകരുടെ കണ്ടെത്തലുകൾ പ്രകാരം, സൂര്യനെക്കാൾ ഏകദേശം 20 മടങ്ങ് ഭാരം ഉണ്ടായിരുന്ന ഒരു വുൾഫ്–റായറ്റ് നക്ഷത്രമാണ് പൊട്ടിത്തെറിച്ചത്. ജീവിതാവസാനത്തിന് മുമ്പ് ഈ നക്ഷത്രം ഹൈഡ്രജനും ഹീലിയവും അടങ്ങിയ പുറംപാളികൾ നഷ്ടപ്പെടുത്തിയിരുന്നു. തുടർന്ന് കാർബണും ഓക്സിജനും കൂടുതലുള്ള കേന്ദ്രഭാഗം തകർന്നുവീണതോടെയാണ് സൂപ്പർനോവ സ്ഫോടനം ഉണ്ടായത്.

സ്ഫോടനത്തിന് മുമ്പ് പലതവണ ദ്രവ്യം പുറത്തേക്ക്

നക്ഷത്രത്തെ ചുറ്റിപ്പറ്റി ഒന്നിലധികം വാതകപാളികൾ ഉണ്ടായിരുന്നതായും ഗവേഷകർ കണ്ടെത്തി. സ്ഫോടനത്തിന് തൊട്ടുമുമ്പ് നക്ഷത്രം പല ഘട്ടങ്ങളിലായി വൻതോതിൽ ദ്രവ്യം പുറത്തേക്ക് തള്ളിയതിന്റെ തെളിവുകളാണ് ഇവ. നക്ഷത്രത്തിന്റെ അവസാന ജീവിതഘട്ടത്തിൽ നടന്ന അതിശക്തമായ മാറ്റങ്ങളെക്കുറിച്ച് കൂടുതൽ വ്യക്തമായ ചിത്രം ഇതിലൂടെ ലഭിക്കുന്നുവെന്നാണ് ശാസ്ത്രജ്ഞരുടെ വിലയിരുത്തൽ.

ഗാമാ കിരണ വിസ്ഫോടനമില്ല, അതാണ് അമ്പരപ്പ്

ഇത്തരം ബ്രോഡ് ലൈൻഡ് ടൈപ്പ് ഐ.സി സൂപ്പർനോവകൾ സാധാരണയായി പ്രകാശവേഗത്തോട് അടുത്ത വേഗത്തിൽ സഞ്ചരിക്കുന്ന ജെറ്റുകളും അതിശക്തമായ ഗാമാ കിരണ വിസ്ഫോടനങ്ങളും സൃഷ്ടിക്കാറുണ്ട്. എന്നാൽ ഈ സൂപ്പർനോവയിൽ അത്തരം ജെറ്റുകളോ ഗാമാ കിരണ വിസ്ഫോടനങ്ങളോ കണ്ടെത്താനായില്ല. എന്നിരുന്നാലും സ്ഫോടനം അതീവ ഊർജസ്വലമായിരുന്നുവെന്നാണ് നിരീക്ഷണങ്ങൾ വ്യക്തമാക്കുന്നത്.

നക്ഷത്രങ്ങളുടെ മരണത്തെക്കുറിച്ചുള്ള ധാരണകൾക്ക് പുതിയ വഴിത്തിരിവ്

എക്‌സ്-റേ ഷോക്ക് ബ്രേക്ക്‌ഔട്ട്, സൂപ്പർനോവ സ്ഫോടനം, നക്ഷത്രം മുമ്പ് പുറത്തേക്ക് തള്ളിയ ദ്രവ്യങ്ങളുമായുള്ള പ്രതിപ്രവർത്തനം എന്നിവയെ ഒരുമിച്ച് പഠിക്കാൻ ഈ നിരീക്ഷണം സഹായിച്ചുവെന്ന് ഗവേഷണ സംഘത്തിന് നേതൃത്വം നൽകിയ ജില്യൻ റാസ്റ്റിനേജ്‌ഡ് വ്യക്തമാക്കി. നക്ഷത്രങ്ങളുടെ അവസാന നിമിഷങ്ങളിലെ സ്വഭാവവും സൂപ്പർനോവ സ്ഫോടനങ്ങളുടെ വൈവിധ്യവും കൂടുതൽ മനസ്സിലാക്കാൻ ഈ കണ്ടെത്തൽ നിർണായകമാകുമെന്നാണ് ഗവേഷകരുടെ പ്രതീക്ഷ.

ട്രെൻഡിന് ഒപ്പം പായുമ്പോൾ നിയന്ത്രണമാകാം, ഒരു എഐ ചിത്രം പരിസ്ഥിതിയിൽ സൃഷ്ടിക്കുന്ന ആഘാതം ഇതാണ്

Elsa TJ — Thu, 10 Sep 2026 10:42:24 +0530

തിരുവനന്തപുരം: ചാറ്റ് ജിപിടിക്കോ സമാനമായ എഐ ടൂളുകൾ ഉപയോഗിച്ച് ഒരു ഇമേജ് സൃഷ്ടിച്ചെടുക്കാൻ വേണ്ടി വരുന്നത് വിരലിൽ എണ്ണാവുന്ന നിമിഷങ്ങൾ മാത്രമാണ്. എന്നാൽ ഉപഭോക്താക്കൾ നൽകുന്ന ഓരോ പ്രോംപ്റ്റും അനുസരിച്ച് ചിത്രമുണ്ടാക്കുമ്പോൾ അത് പ്രകൃതിയിൽ സൃഷ്ടിക്കുന്ന ആഘാതത്തേക്കുറിച്ച് അറിയാമോ? ആഗോളതലത്തിൽ എഐ അടിസ്ഥാന സൌകര്യങ്ങളൊരുക്കുന്ന ഡാറ്റാ സെന്ററുകൾ ഉപയോഗിക്കുന്നത് ദശലക്ഷക്കണക്കിന് വീടുകളിലെ വൈദ്യുതി ഉപയോഗത്തിന് സമാനമായ നിലയിലുള്ള ഊർജ്ജ ഉപഭോഗമാണ്. യുണൈറ്റഡ് നാഷൻസ് നൽകുന്ന വിവരങ്ങൾ അനുസരിച്ച് എഐ ഡാറ്റ സെന്ററുകൾ 2030ഓടെ ഉപയോഗിക്കുന്ന വൈദ്യുതിയുടെ അളവ് പാകിസ്ഥാൻ, ബംഗ്ലാദേശ്, നൈജീരിയ എന്നീ രാജ്യങ്ങളിലെ ആകെ ഉപയോഗത്തിന്റെ മൂന്ന് മടങ്ങാവും എന്നാണ്. 650 ദശലക്ഷം വീടുകളിലെ ആകെ ഉപയോഗമാണ് ഈ ഊർജ്ജ ഉപഭോഗമെന്നാണ് യുഎൻ വ്യക്തമാക്കുന്ന്. ഈ നൂറ്റാണ്ടിന്റെ അവസാനത്തോടെ എഐ പ്രവർത്തനങ്ങൾക്കായുള്ള ജല ഉപഭോഗം കോടിക്കണക്കിന് ആളുകളുടെ ദൈനംദിന ആവശ്യങ്ങൾക്ക് തുല്യമായി മാറും. കൂടാതെ ഇതിനായി ഉപയോഗിക്കപ്പെടുന്ന ഭൂമിയുടെ അളവ് കൂറ്റൻ മെട്രോപൊളിറ്റൻ നഗരങ്ങളുടെ വിസ്തൃതിയേക്കാൾ വലുതായിരിക്കും.

കാര്യമൊക്കെ ട്രെന്റ് തന്നെ! പക്ഷെ സൂക്ഷിച്ചില്ലെങ്കിൽ പണി കിട്ടും, 80കളിലെ വിന്റേജ് വൈറൽ ട്രെന്റിൽ ശ്രദ്ധിക്കേണ്ട കാര്യങ്ങൾ

എഐ ഉപയോഗിച്ച് ഒരു ചിത്രം നിർമ്മിക്കുമ്പോൾ സംഭവിക്കുന്നത് സാധാരണ ഡിജിറ്റൽ ഫോട്ടോയെടുക്കുന്നത് പോലെയുള്ള ലളിതമായ ഒരു കാര്യവുമല്ല. ടെക്സ്റ്റ് നിർദ്ദേശങ്ങൾ മനസ്സിലാക്കി അതിനനുസരിച്ച് ചിത്രം നിർമ്മിക്കാൻ കൂറ്റൻ ഡാറ്റാ സെന്ററുകളിലെ അയ്യായിരക്കണക്കിന് ഉയർന്ന ശേഷിയുള്ള ജിപിയു പ്രൊസസറുകൾ ഒരേസമയം പ്രവർത്തിക്കേണ്ടി വരുന്നുണ്ട്. എംഐടി ടെക്നോളജിയിലെ ഗവേഷകരുടെയും പഠനങ്ങൾ അനുസരിച്ച്, ഉയർന്ന ക്വാളിറ്റിയുള്ള ഒരു എഐ ചിത്രം നിർമ്മിക്കുന്നതിന് ഒരു സ്മാർട്ട്‌ഫോൺ പൂർണ്ണമായി ചാർജ് ചെയ്യാൻ ആവശ്യമായത്രയും ഊർജ്ജം ആവശ്യമായി വരുന്നുണ്ട്. കൂടാതെ, ഈ കൂറ്റൻ പ്രൊസസറുകൾ തുടർച്ചയായി പ്രവർത്തിക്കുമ്പോൾ ഉണ്ടാകുന്ന അമിതമായ ചൂട് കുറയ്ക്കുന്നതിനായി ഡാറ്റാ സെന്ററുകളിൽ വൻതോതിൽ കുടിവെള്ളം തണുപ്പിക്കൽ ആവശ്യങ്ങൾക്കായി ഉപയോഗിക്കുന്നുണ്ട്. അതിനാൽ ഊർജ്ജ ഉപഭോഗത്തിന് പുറമെ അപൂർവ്വമായ ജലസ്രോതസ്സുകളുടെ നഷ്ടവും ഇതിലൂടെ സംഭവിക്കുന്നു. ഈ ഡാറ്റാ സെന്ററുകൾ പ്രവർത്തിക്കാൻ ആവശ്യമായ ഭൂരിഭാഗം വൈദ്യുതിയും ഇപ്പോഴും ഫോസിൽ ഇന്ധനങ്ങൾ ഉപയോഗിച്ചാണ് ഉത്പാദിപ്പിക്കുന്നത്.

പൂക്കികളായി മന്ത്രിമാരും! സർവ്വം എഐ മയം, വൈറലായി എ ഐ കാരിക്കേച്ചർ

എൺപത്തിയെട്ട് വ്യത്യസ്ത എഐ മോഡലുകളിലായി ചോദ്യങ്ങൾക്ക് ഉത്തരം നൽകൽ, ടെക്സ്റ്റ് നിർമ്മാണം, ചിത്രങ്ങളുടെ തരംതിരിക്കൽ, ചിത്രങ്ങൾ നിർമ്മിക്കൽ തുടങ്ങിയ പത്ത് പ്രമുഖ പ്രവർത്തനങ്ങൾ നിരീക്ഷിച്ചാണ് ഈ പഠനം നടത്തിയത്. മെഷീൻ പ്രവർത്തിക്കുമ്പോൾ ഉപയോഗിക്കുന്ന ഊർജ്ജം കണക്കാക്കാൻ പ്രത്യേക സോഫ്റ്റ്‌വെയർ ഉപകരണം ഉപയോഗിച്ചാണ് പഠനങ്ങൾ നടന്നത്.ഈ പഠനത്തിൽ ഏറ്റവും കൂടുതൽ ഊർജ്ജവും കാർബൺ ഉദ്‌വമനവും രേഖപ്പെടുത്തിയത് എഐ ഉപയോഗിച്ച് ചിത്രങ്ങൾ നിർമ്മിക്കുന്ന പ്രക്രിയയിലാണ്. സ്റ്റേബിൾ ഡിഫ്യൂഷൻ എക്സ്എൽ പോലുള്ള ശക്തമായ മോഡലുകൾ ഉപയോഗിച്ച് ആയിരം ചിത്രങ്ങൾ നിർമ്മിക്കുമ്പോൾ പുറന്തള്ളപ്പെടുന്ന കാർബൺ ഡയോക്സൈഡിന്റെ അളവ്, സാധാരണ പെട്രോൾ കാറിൽ ഏകദേശം നാല് മൈലിലധികം(ഏകദേശം 6.44 കിലോമീറ്റർ) ദൂരം യാത്ര ചെയ്യുമ്പോൾ ഉണ്ടാകുന്ന കാർബൺ പുറന്തള്ളലിന് തുല്യമാണ്. ഇതുമൂലം ലളിതമെന്ന് തോന്നുന്ന ചിത്രത്തിന്റെ നിർമ്മാണം പോലും അന്തരീക്ഷത്തിലേക്ക് വലിയ തോതിൽ കാർബൺ പുറം തള്ളുന്നതിന് കാരണമാകുന്നുണ്ട്. ട്രെൻഡുകളുടെ പിന്നാലെ പോയി മനോഹരമായ ഒരു ചിത്രം എഐ വഴിയുണ്ടാക്കുന്നത് ഹാനികരമല്ലെന്ന് തോന്നുമെങ്കിലും ഇതിന് പിന്നിലെ ഡിജിറ്റൽ കാർബൺ പാദമുദ്ര ഒട്ടും നിസാരമല്ലെന്നാണ് പഠനങ്ങൾ വിശദമാക്കുന്നത്.

എൽനിനോ വർഷമാണെന്ന് മുന്നറിയിപ്പ് ലഭിച്ചിട്ടും മുന്നൊരുക്കമുണ്ടായില്ല, വൈദ്യുതി വകുപ്പിൽ ഗുരുതര വീഴ്ചയെന്ന് കെ കൃഷ്ണൻ കുട്ടി

എഐ അടിസ്ഥാന സൗകര്യങ്ങളുടെ പരിസ്ഥിതി ആഘാതങ്ങൾ ലോകമെമ്പാടും ഒരുപോലെയല്ല അനുഭവപ്പെടുന്നത്. സാങ്കേതികവിദ്യയുടെ പ്രയോജനം ആഗോളതലത്തിൽ ലഭ്യമാകുമ്പോഴും അതിന്റെ പരിസ്ഥിതി ആഘാതവും ചെലവുകളും ചില പ്രത്യേക പ്രദേശങ്ങളിൽ മാത്രമായി കേന്ദ്രീകരിക്കപ്പെടുന്നു. ചില രാജ്യങ്ങളിൽ ദേശീയ വൈദ്യുതോപയോഗത്തിന്റെ വലിയൊരു ഭാഗം ഡാറ്റാ സെന്ററുകൾ കവർന്നെടുക്കുമ്പോൾ, കടുത്ത വരൾച്ചയുള്ള പ്രദേശങ്ങളിൽ പോലും ഇവ വൻതോതിൽ കുടിവെള്ളം ഊറ്റിയെടുക്കുന്നു. കൂടാതെ, ഉയർന്നുവരുന്ന അനാവശ്യ ഇ-മാലിന്യങ്ങളുടെ ഭാരം സുരക്ഷിതമായി മാലിന്യ സംസ്കരണം നടത്താൻ ശേഷിയില്ലാത്ത സാമ്പത്തികമായി പിന്നാക്കെ നിൽക്കുന്ന രാജ്യങ്ങളിലേക്ക് തള്ളപ്പെടാനുള്ള സാധ്യതയും കൂടുതലാണ്.

80കളിലെ വിന്റേജ് വൈറൽ ട്രെന്റിൽ ശ്രദ്ധിക്കേണ്ട കാര്യങ്ങൾ | 80s Trend | Instagram Trend

നിലവിൽ എഐ സാങ്കേതികവിദ്യയ്ക്ക് ആവശ്യമായ കമ്പ്യൂട്ടിംഗ് ശേഷിയുടെ തൊണ്ണൂറ് ശതമാനത്തിലധികവും അമേരിക്കയിലും ചൈനയിലും മാത്രമായി കേന്ദ്രീകരിച്ചിരിക്കുകയാണ്. നൂറ്റമ്പതിലധികം രാജ്യങ്ങൾക്ക് സ്വന്തമായി കാര്യമായ എഐ അടിസ്ഥാന സൗകര്യങ്ങളില്ല. സാമ്പത്തിക അവസരങ്ങൾ നിഷേധിക്കപ്പെടുകയും എന്നാൽ മറ്റുള്ളവരുടെ സാങ്കേതിക വളർച്ചയ്ക്കായി സ്വന്തം നാടിന്റെ പരിസ്ഥിതി നശിപ്പിക്കപ്പെടുകയും ചെയ്യുന്ന കടുത്ത അനീതിയാണ് ഇതിലൂടെ ഉണ്ടാകുന്നത്. അതിനാൽ തന്നെ ഇത്തരത്തിലുള്ള സാങ്കേതികവിദ്യകൾ അനാവശ്യമായി ഉപയോഗിക്കുന്നത് നിയന്ത്രിക്കേണ്ടതുണ്ടെന്ന ഓർമ്മപ്പെടുത്തലാണ് പഠനങ്ങൾ വിശദമാക്കുന്നത്.

ഏഷ്യാനെറ്റ് ന്യൂസ് ലൈവ് കാണാം

'ഐഎസ്ആർഒ സ്വകാര്യവത്കരിക്കില്ല'; പ്രചാരണങ്ങൾ തള്ളി ചെയർമാൻ, ജീവനക്കാർ ആശങ്കപ്പെടേണ്ട കാര്യമില്ലെന്ന് വി നാരായണൻ

Web Desk — Tue, 08 Sep 2026 22:14:35 +0530

ബെംഗളൂരു: ഐഎസ്ആർഒ ജീവനക്കാരുടെ സംഘടനകളുടെ കത്തിന് പിന്നാലെ എല്ലാ ഇസ്രൊ കേന്ദ്രങ്ങളിലെയും ജീവനക്കാരുമായി പ്രത്യേക വീഡിയോ കോൺഫ്രൻസ് നടത്തി ചെയർമാൻ വി നാരായണൻ. ഐഎസ്ആർഒ സ്വകാര്യവത്കരിക്കില്ലെന്നും ജീവനക്കാർക്ക് ആശങ്ക വേണ്ടെന്നും പ്രത്യേക സന്ദേശത്തിൽ ചെയർമാൻ വ്യക്തമാക്കി. തൊഴിൽ നഷ്ടമുണ്ടാകില്ല, ആനുകൂല്യങ്ങൾ നഷ്ടപ്പെടില്ല എന്നീ ഉറപ്പുകള്‍ നൽകിയ ചെയർമാൻ നാരായണൻ, ഐഎസ്ആർഒ സർക്കാർ സംവിധാനമാണെന്നും പ്രധാനമന്ത്രിയുടെ മാർഗനിർദ്ദേശമനുസരിച്ചാണ് മുന്നോട്ടുള്ള യാത്രയെന്നും വ്യക്തമാക്കി.

ജീവനക്കാരുടെ തൊഴിൽ മികവിന് സാമ്പത്തികമായി കൂടി പ്രതിഫലം നൽകുന്ന പെർഫോമൻസ് റിലേറ്റഡ് ഇൻസെന്റീവ് സ്കീം തുടരുമെന്നും ചെയർമാൻ ജീവനക്കാർക്ക് വാക്ക് നൽകി. ആൾക്ഷാമം പരിഹരിക്കാൻ പുതിയ നിയമനങ്ങൾക്കുള്ള നടപടികൾ തുടരുകയാണെന്നും ഇന്ന് നാരായണൻ വ്യക്തമാക്കി. ഇന്ന് രാവിലെ 11.30യ്ക്കായിരുന്നു ആഭ്യന്തര വീഡിയോ കോൺഫ്രൻസ് വഴിയുള്ള നാരായണൻ്റെ അഭിസംബോധന. വിക്ഷേപണ വാഹന സാങ്കേതിക വിദ്യയടക്കം സ്വകാര്യമേഖലയ്ക്ക് കൈമാറാൻ ഇൻസ്പേസ് താൽപര്യപത്രം ക്ഷണിക്കുകയും ഇസ്രൊ ഇത്തരം ജോലികളിൽ നിന്ന് പിന്‍മാറുമെന്ന് ഇൻസ്പേസ് മേധാവി പ്രഖ്യാപിക്കുകയും ചെയ്തതിന് പിന്നാലെയാണ് ജീവനക്കാരുടെ സംഘടന ചെയർമാന് ആശങ്കയറിയിച്ച് കത്തെഴുതിയത്.

തമോഗർത്തത്തിന്റെ ‘വിശപ്പ്’ കുറയുന്നത് എന്തുകൊണ്ട്? നക്ഷത്രങ്ങളുടെ കറക്കമാണ് കാരണമെന്ന് പുതിയ പഠനം

Prashobh Prasannan — Wed, 02 Sep 2026 08:32:08 +0530

അതിഭീമമായ തമോഗർത്തങ്ങൾക്ക് സമീപമെത്തുന്ന ചില നക്ഷത്രങ്ങൾ പൂർണമായും നശിക്കാതെ രക്ഷപ്പെടാറുണ്ട്. എന്നാൽ ഓരോ തവണയും തമോഗർത്തം വലിച്ചെടുക്കുമ്പോൾ ഉണ്ടാകുന്ന പ്രകാശവിസ്ഫോടനത്തിന് തീവ്രത കുറഞ്ഞുവരുന്നത് എന്തുകൊണ്ടാണെന്ന ചോദ്യത്തിന് പുതിയ പഠനം ഉത്തരം കണ്ടെത്തിയേക്കുന്നു. നക്ഷത്രം സ്വയം എത്ര വേഗത്തിൽ കറങ്ങുന്നു എന്നതും മറ്റൊരു നക്ഷത്ര പങ്കാളിയെ നഷ്‍ടപ്പെടുന്നതുമാകാം ഇതിന് പിന്നിലെ കാരണമെന്നാണ് ഗവേഷകർ പറയുന്നത്.

നക്ഷത്രത്തെ ‘സ്‍പാഗെറ്റി’യാക്കുന്ന തമോഗർത്തം

ഓരോ ഗാലക്സിയുടെയും കേന്ദ്രത്തിലുള്ള അതിഭീമമായ തമോഗർത്തങ്ങൾക്ക് സമീപമെത്തുന്ന ചില നക്ഷത്രങ്ങൾ അതിശക്തമായ ഗുരുത്വാകർഷണ, വേലിയേറ്റ ബലങ്ങൾക്ക് ഇരയാകുന്നു. ഇതോടെ നക്ഷത്രം നീണ്ടുനീണ്ട ഒരു നൂൽപോലുള്ള ഘടനയായി മാറുന്നു. ‘സ്പഗെറ്റിഫിക്കേഷൻ’ എന്നാണ് ഈ പ്രക്രിയ അറിയപ്പെടുന്നത്. നക്ഷത്രത്തിൽ നിന്നുള്ള പ്ലാസ്‍മ തമോഗർത്തത്തിന് ചുറ്റും ചുറ്റിപ്പറ്റി ക്രമേണ തമോഗർത്തത്തിലേക്ക് പതിക്കുന്നു. ഇതിന്റെ ഒരു ഭാഗം പ്രകാശത്തിന്റെ വേഗതയോട് അടുത്ത വേഗത്തിൽ സഞ്ചരിക്കുന്ന ജെറ്റുകളായും പുറത്തേക്ക് തള്ളപ്പെടാം. ഇത്തരം സംഭവങ്ങളെയാണ് ‘ടൈഡൽ ഡിസ്റപ്ഷൻ ഇവന്റുകൾ’ അഥവാ ടി.ഡി.ഇകൾ എന്ന് വിളിക്കുന്നത്. എന്നാൽ എല്ലാ നക്ഷത്രങ്ങളും പൂർണമായും നശിക്കണമെന്നില്ല.

തമോഗർത്തം പലതവണ ‘വലിച്ചെടുക്കുമ്പോൾ’

ചില നക്ഷത്രങ്ങൾ തമോഗർത്തത്തിന് വളരെ അടുത്തുകൂടി കടന്നുപോകും. തമോഗർത്തത്തിന് അവയിൽ നിന്ന് വാതകവും മറ്റ് വസ്തുക്കളും വലിച്ചെടുക്കാൻ സാധിക്കുമെങ്കിലും നക്ഷത്രത്തെ പൂർണമായും നശിപ്പിക്കാൻ കഴിയില്ല. ഇത്തരം നക്ഷത്രങ്ങൾ പിന്നീട് വീണ്ടും തമോഗർത്തത്തെ ചുറ്റി സഞ്ചരിക്കുകയും ഓരോ തവണയും കുറച്ച് വസ്‍തു

നഷ്‍ടപ്പെടുത്തുകയും ചെയ്യും. ‘റിപ്പീറ്റിങ് പാർഷ്യൽ ടൈഡൽ ഡിസ്റപ്ഷൻ ഇവന്റ്’ അഥവാ ആർപിടിഡിഇ എന്നാണ് ഈ പ്രതിഭാസം അറിയപ്പെടുന്നത്. ഓരോ കൂടിക്കാഴ്ചയിലും തമോഗർത്തത്തിന് സമീപത്ത് നിന്ന് ശക്തമായ പ്രകാശവിസ്ഫോടനം അഥവാ ഫ്ലെയർ ഉണ്ടാകും. എന്നാൽ ആർപിടിഡിഇകളിൽ തുടർച്ചയായ ഫ്ലെയറുകളുടെ തീവ്രത കുറഞ്ഞുവരുന്നതായി ശാസ്ത്രജ്ഞർ കണ്ടെത്തിയിരുന്നു. ഇതിന്റെ കാരണം ഏറെക്കാലമായി വ്യക്തമായിരുന്നില്ല.

നക്ഷത്രത്തിന്‍റെ കറക്കം നിർണായകം

സിറാക്യൂസ് സർവകലാശാലയിലെ അനന്യ ബന്ദോപാധ്യായുടെ നേതൃത്വത്തിലുള്ള ഗവേഷകസംഘമാണ് ഈ പ്രതിഭാസത്തിന് പുതിയ വിശദീകരണം മുന്നോട്ടുവച്ചത്. നക്ഷത്രത്തിന്റെ ആന്തരിക ഘടനയും പിണ്ഡവും ഇതിനകം തന്നെ തമോഗർത്തത്തിന് എത്രത്തോളം വസ്‍തു നഷ്‍ടപ്പെടുമെന്ന് സ്വാധീനിക്കുന്നതായി ഗവേഷകർ കണ്ടെത്തിയിരുന്നു.

കുറഞ്ഞ പിണ്ഡമുള്ള നക്ഷത്രത്തെ മൃദുവായ മെറിംഗിനോട് ഉപമിക്കാം. അതിനാൽ തമോഗർത്തത്തിന്റെ വേലിയേറ്റ ബലങ്ങൾക്ക് ഇത് കൂടുതൽ എളുപ്പത്തിൽ വഴങ്ങുകയും ആന്തരിക ഭാഗങ്ങളിൽ നിന്നുപോലും കൂടുതൽ വസ്‍തു നഷ്‍ടപ്പെടുകയും ചെയ്യും. അതേസമയം, ഉയർന്ന പിണ്ഡമുള്ള നക്ഷത്രത്തിന് ഉള്ളി പോലെയുള്ള പാളികളുള്ള ഘടനയാണ്. തമോഗർത്തം സമീപത്തുകൂടി കടന്നുപോകുമ്പോൾ പുറംപാളികൾ നഷ്ടപ്പെടും. എന്നാൽ കേന്ദ്രഭാഗം ശക്തമായി നിലനിൽക്കും. അതിനാൽ ഓരോ കൂടിക്കാഴ്ചയിലും നീക്കം ചെയ്യാൻ ലഭ്യമായ വസ്തുവിന്റെ അളവ് കുറഞ്ഞുവരും. എന്നാൽ ഇത് മാത്രം നാല് ആർപിടിഡിഇകളിൽ കാണപ്പെടുന്ന ഫ്ലെയറുകളുടെ ക്രമാനുഗതമായ മങ്ങലിനെ പൂർണമായി വിശദീകരിക്കുന്നില്ല.

ഓരോ കൂടിക്കാഴ്ചയിലും നക്ഷത്രം കൂടുതൽ വേഗത്തിൽ കറങ്ങും

തമോഗർത്തം നക്ഷത്രത്തിന് മേൽ ചെലുത്തുന്ന ടോർക്ക് അതിന്റെ കറക്കത്തിന്റെ വേഗം ഓരോ കൂടിക്കാഴ്ചയിലും വർധിപ്പിക്കുമെന്ന് ഗവേഷകരുടെ മുൻ പഠനങ്ങൾ കണ്ടെത്തിയിരുന്നു. ഇതോടെ ഓരോ തവണയും നക്ഷത്രം തമോഗർത്തത്തെ ചുറ്റി സഞ്ചരിക്കാൻ എടുക്കുന്ന സമയം കുറയും. നക്ഷത്രത്തിൽ നിന്ന് വീഴുന്ന വസ്‍തുവിന്റെ അളവ് കുറയുന്നുണ്ടെങ്കിലും കൂടിക്കാഴ്ചകൾ കൂടുതൽ വേഗത്തിൽ നടക്കുന്നതിനാൽ ഫ്ലെയറുകളുടെ തീവ്രത തുടർച്ചയായി നിലനിർത്താൻ സാധിക്കും. അപ്പോൾ ഫ്ലെയറുകൾ മങ്ങണമെങ്കിൽ മറ്റൊരു ഘടകം കൂടി ആവശ്യമാണ്.

ആദ്യം മുതൽ വേഗത്തിൽ കറങ്ങുന്ന നക്ഷത്രം

തമോഗർത്തവുമായി ആദ്യ കൂടിക്കാഴ്ചയ്ക്ക് മുമ്പുതന്നെ നക്ഷത്രം അതിവേഗത്തിൽ കറങ്ങുകയായിരുന്നെങ്കിൽ കാര്യങ്ങൾ വ്യത്യസ്‍തമാകും. തമോഗർത്തം ചെലുത്തുന്ന ടോർക്ക് അതിന്റെ കറക്കവേഗം പിന്നീട് കാര്യമായി വർധിപ്പിക്കില്ല. അതിനാൽ കൂടിക്കാഴ്ചകൾക്കിടയിലുള്ള ഇടവേള കുറയില്ല. നക്ഷത്രത്തിൽ നിന്ന് ഓരോ തവണയും കുറച്ച് വസ്തു മാത്രമേ തമോഗർത്തത്തിന് ലഭിക്കൂ. ഇതോടെ തുടർച്ചയായ ഫ്ലെയറുകളുടെ തീവ്രത ക്രമേണ കുറഞ്ഞുവരും.

പക്ഷേ നക്ഷത്രം ആദ്യമേ ഇത്ര വേഗത്തിൽ കറങ്ങാൻ കാരണം എന്താണ്? രഹസ്യത്തിന് പിന്നിൽ ‘ബൈനറി’ നക്ഷത്രങ്ങൾ?

ഇതിന് ഉത്തരം നക്ഷത്രങ്ങളുടെ ഇരട്ട സംവിധാനങ്ങളിലാകാമെന്നാണ് ഗവേഷകർ കരുതുന്നത്. ഭൂരിഭാഗം നക്ഷത്രങ്ങളും ഒറ്റയ്ക്കല്ല, മറിച്ച് ബൈനറി സംവിധാനങ്ങളിൽ മറ്റൊരു നക്ഷത്രത്തിനൊപ്പം സഞ്ചരിക്കാറുണ്ട്. ഒരു ബൈനറി നക്ഷത്രസംവിധാനം അതിഭീമമായ തമോഗർത്തത്തിന് സമീപമെത്തുമ്പോൾ തമോഗർത്തത്തിന്റെ ശക്തമായ ഗുരുത്വാകർഷണം ആ രണ്ട് നക്ഷത്രങ്ങളെയും വേർപെടുത്തിയേക്കാം. ‘ഹിൽസ് ക്യാപ്ചർ’ എന്നറിയപ്പെടുന്ന ഈ പ്രക്രിയയിൽ ഒരു നക്ഷത്രം പുറത്തേക്ക് തെറിച്ചുപോകുകയും മറ്റൊന്ന് തമോഗർത്തത്തിന്റെ ഗുരുത്വാകർഷണത്തിൽ കുടുങ്ങുകയും ചെയ്യും. ഇരുനക്ഷത്രങ്ങളും പരസ്പരം വളരെ അടുത്ത് ഭ്രമണം ചെയ്തിരുന്നെങ്കിൽ, വേർപിരിയലിനും പിടിച്ചെടുക്കലിനും ശേഷം തമോഗർത്തത്തിന് ചുറ്റുമുള്ള നക്ഷത്രം അതിവേഗം കറങ്ങുന്ന അവസ്ഥയിൽ തുടരാം. ഏതാനും മാസങ്ങൾകൊണ്ട് തമോഗർത്തത്തെ ഒരുതവണ ചുറ്റുന്നത്ര അടുത്ത ഭ്രമണപഥത്തിലും അത് എത്താം.

ക്ഷീരപഥത്തിലും ഇതിന്റെ സൂചനകളുണ്ട്

ഈ കണ്ടെത്തലിന് നമ്മുടെ സ്വന്തം ക്ഷീരപഥവുമായി ബന്ധപ്പെട്ട പ്രാധാന്യവുമുണ്ട്. ക്ഷീരപഥത്തിന്റെ കേന്ദ്രത്തിലുള്ള അതിഭീമമായ തമോഗർത്തമായ സാജിറ്റേറിയസ് എ നിലവിൽ ആർപിടിഡിഇയ്ക്ക് വിധേയമാകുന്നില്ലെങ്കിലും അതിന് ചുറ്റും നിരവധി അതിവേഗ നക്ഷത്രങ്ങൾ സഞ്ചരിക്കുന്നുണ്ട്. ഇവ എങ്ങനെ തമോഗർത്തത്തിന് ഇത്ര അടുത്തുള്ള ഭ്രമണപഥങ്ങളിൽ എത്തിയെന്നതിന് പുതിയ പഠനം വിശദീകരണം നൽകാൻ സഹായിച്ചേക്കാം.

“ഈ വിചിത്രമായ പ്രതിഭാസങ്ങളെല്ലാം ഒരു അടിസ്ഥാന സംഭവത്തിലൂടെ വിശദീകരിക്കാനാകും. അതായത്, ഒരു ബൈനറി നക്ഷത്രസംവിധാനത്തിന്റെ വേലിയേറ്റ നാശവും അതിലെ ഒരു നക്ഷത്രത്തെ തമോഗർത്തം പിടിച്ചെടുക്കുന്നതും,” ഗവേഷകസംഘാംഗം എറിക് കോഗ്ലിൻ പറഞ്ഞു. സിറാക്യൂസ് സർവകലാശാലയിലെ ഗവേഷകരുടെ പഠനം ഓഗസ്റ്റ് 18ന് ‘ദ ആസ്ട്രോഫിസിക്കൽ ജേണലിൽ’ പ്രസിദ്ധീകരിച്ചിട്ടുണ്ട്.

ആർട്ടിഫിഷ്യൽ ഇന്‍റലിജൻസ്: മനുഷ്യരാശിയുടെ അന്ത്യം അടുത്തെത്തിയോ?

Prashobh Prasannan — Mon, 14 Sep 2026 12:01:46 +0530

ആർട്ടിഫിഷ്യൽ ഇന്‍റലിജൻസ് അഥവാ നിർമ്മിത ബുദ്ധിയുടെ അതിവേഗ വളർച്ച മനുഷ്യരാശിക്ക് വലിയ ഭീഷണിയാകുമെന്ന മുന്നറിയിപ്പുമായി ഓപ്പൺഎഐ സുരക്ഷാ ഗവേഷകൻ മാർക്കസ് വില്യംസ്. നിർമിത ബുദ്ധിക്ക് കർശന നിയന്ത്രണങ്ങൾ ഏർപ്പെടുത്തുകയോ മുൻനിര നിർമിത ബുദ്ധി സംവിധാനങ്ങളുടെ വികസനം ഏകോപിതമായി മന്ദഗതിയിലാക്കുകയോ ചെയ്തില്ലെങ്കിൽ അടുത്ത ഏതാനും വർഷങ്ങൾക്കുള്ളിൽ മനുഷ്യവംശം തന്നെ ഇല്ലാതാകാൻ സാധ്യതയുണ്ടെന്നാണ് വില്യംസിന്റെ മുന്നറിയിപ്പ്.

നിയന്ത്രണമില്ലെങ്കിൽ വൻ ദുരന്തമെന്ന് മുന്നറിയിപ്പ്

എക്സിൽ പങ്കുവെച്ച കുറിപ്പിലാണ് മാർക്കസ് വില്യംസ് നിർമിത ബുദ്ധിയുടെ അപകടസാധ്യതയെക്കുറിച്ച് മുന്നറിയിപ്പ് നൽകിയത്. നിർമിത ബുദ്ധിക്ക് നിയന്ത്രണങ്ങൾ ഏർപ്പെടുത്തുകയോ വിവിധ നിർമിത ബുദ്ധി കമ്പനികൾ തമ്മിൽ ധാരണയിലെത്തി വികസനം മന്ദഗതിയിലാക്കുകയോ വേണമെന്നാണ് അദ്ദേഹത്തിന്റെ ആവശ്യം. “ഇത്തരം നിയന്ത്രണമോ ഏകോപിതമായ വികസന മന്ദഗതിയോ ഇല്ലെങ്കിൽ അടുത്ത ഏതാനും വർഷങ്ങൾക്കുള്ളിൽ മനുഷ്യവംശം ഇല്ലാതാകാൻ സാധ്യത വളരെ കൂടുതലാണ്,” എന്നായിരുന്നു വില്യംസിന്റെ പ്രതികരണം.

‘മൂന്ന് വർഷത്തിനുള്ളിൽ സാധ്യത 70%’

വില്യംസിന്റെ കുറിപ്പിന് താഴെ വന്ന ഒരു ചോദ്യത്തിന് മറുപടിയായാണ് കൂടുതൽ ഗുരുതരമായ പ്രവചനം അദ്ദേഹം നടത്തിയത്. അടുത്ത മൂന്ന് വർഷത്തിനുള്ളിൽ മനുഷ്യവംശം ഇല്ലാതാകാനുള്ള സാധ്യത 70 ശതമാനമാണെന്നാണ് വില്യംസ് പറഞ്ഞത്. അതേസമയം, നിർമിത ബുദ്ധിക്ക് ആവശ്യമായ നിയന്ത്രണങ്ങൾ കൊണ്ടുവരാനും വികസനത്തിന്റെ വേഗം കുറയ്ക്കാനും ഇപ്പോഴും സാധിക്കുമെന്ന പ്രതീക്ഷയും അദ്ദേഹം പങ്കുവച്ചു.

‘സൂപ്പർഇന്റലിജൻസ് നിയന്ത്രണം നഷ്ടപ്പെടുത്തും’

അതിനിടെ മുൻ യുഎസ് സർക്കാർ സാങ്കേതിക ഉപദേഷ്ടാവായ പോൾ ക്രിസ്റ്റ്യാനോ ഓപ്പൺഎഐയുടെ ലാഭേച്ഛയില്ലാത്ത സ്ഥാപനത്തിന്റെ ബോർഡിലും സുരക്ഷാ സമിതിയിലും ചേരുന്നതായി കമ്പനി അറിയിച്ചു. നിർമിത ബുദ്ധിയുടെ കഴിവുകൾ അതിവേഗം വർധിക്കുന്നത് സമീപഭാവിയിൽ തന്നെ നിയന്ത്രണം പൂർണമായി നഷ്ടപ്പെടുന്നതിലേക്ക് നയിക്കാനുള്ള ഗൗരവമേറിയ സാധ്യതയുണ്ടെന്ന് ക്രിസ്റ്റ്യാനോ പറഞ്ഞു. മനുഷ്യരുടെ താൽപര്യങ്ങളുമായി നിർമിത ബുദ്ധിയുടെ ലക്ഷ്യങ്ങൾ പൊരുത്തപ്പെടുന്നുവെന്ന് ഉറപ്പാക്കാൻ നിർമിത ബുദ്ധി മേഖല ഒന്നിച്ച് പ്രവർത്തിക്കണമെന്നും അദ്ദേഹം ആവശ്യപ്പെട്ടു.

‘ഭൂരിഭാഗം മനുഷ്യരും മരിച്ചേക്കാം’

കൂടുതൽ ശക്തമായ നിയന്ത്രണ സംവിധാനങ്ങളില്ലാതെ മനുഷ്യബുദ്ധിയെ മറികടക്കുന്ന തരത്തിലുള്ള നിർമിത ബുദ്ധി വികസിപ്പിച്ചാൽ അതിന്റെ നിയന്ത്രണം എന്നെന്നേക്കുമായി നഷ്ടപ്പെടാമെന്നും ക്രിസ്റ്റ്യാനോ മുന്നറിയിപ്പ് നൽകി. “അങ്ങനെ സംഭവിച്ചാൽ ഭൂരിഭാഗം മനുഷ്യരും മരിച്ചേക്കാം,” എന്നും അദ്ദേഹം വ്യക്തമാക്കി. ഓപ്പൺഎഐ ഉൾപ്പെടെയുള്ള നിർമിത ബുദ്ധി മേഖല നിലവിൽ ഈ അപകടസാധ്യത സ്വീകാര്യമായ തലത്തിലേക്ക് കുറയ്ക്കുന്നതിനുള്ള നടപടികൾ സ്വീകരിക്കുന്നില്ലെന്നും ക്രിസ്റ്റ്യാനോ അഭിപ്രായപ്പെട്ടു.

ആന്ത്രോപിക്കിലും ആശങ്ക ശക്തം

നിർമിത ബുദ്ധിയുടെ അപകടസാധ്യത സംബന്ധിച്ച് ആന്ത്രോപിക്കിലെ സുരക്ഷാ ഗവേഷകരും സമാന മുന്നറിയിപ്പുകൾ നൽകിയിട്ടുണ്ട്. അടുത്ത 10 വർഷത്തിനുള്ളിൽ നിർമിത ബുദ്ധിക്ക് “എല്ലാ മനുഷ്യരെയും കൊല്ലാൻ” 10 ശതമാനത്തിലേറെ സാധ്യതയുണ്ടെന്നാണ് ആന്ത്രോപിക്കിലെ അലൈൻമെന്റ് ഗവേഷകനായ ഇവാൻ ഹ്യൂബിംഗറിന്റെ വിലയിരുത്തൽ.

നിയന്ത്രണം വിട്ട എഐ ഏജന്റുമാർ

അതിനിടെ, നിർമിത ബുദ്ധി ഏജന്റുമാർ നിയന്ത്രണാതീതമായി പ്രവർത്തിച്ച സംഭവങ്ങളും പുറത്തുവന്നിട്ടുണ്ട്. ഏകദേശം 700 നിർമിത ബുദ്ധി ഏജന്റുമാർ യുഎസ് കമ്പനിയായ ഹഗ്ഗിങ് ഫേസിനെ ലക്ഷ്യമിട്ട് ഹാക്കിങ് ശ്രമം നടത്തിയതായി ഓപ്പൺഎഐ നേരത്തെ വെളിപ്പെടുത്തിയിരുന്നു. ആയിരക്കണക്കിന് ഓപ്പൺഎഐ ഏജന്റുമാർ ജർമൻ വെബ്സൈറ്റ് അനധികൃതമായി ഉപയോഗിച്ച് സന്ദേശങ്ങൾ കൈമാറിയ സംഭവവും റിപ്പോർട്ട് ചെയ്തിട്ടുണ്ട്. ആന്ത്രോപിക്കിന്റെ ക്ലോഡ് നിർമിത ബുദ്ധി മാതൃകയുടെ പരിശീലന പതിപ്പ് തേർഡ് പാർട്ടി സംവിധാനങ്ങളിൽ പ്രവേശിച്ച സംഭവവും റിപ്പോർട്ട് ചെയ്യപ്പെട്ടിരുന്നു. നിർമിത ബുദ്ധിയുടെ കഴിവുകൾ അതിവേഗം വളരുന്നതിനിടെ ഇത്തരം സംഭവങ്ങൾ ആശങ്ക വർധിപ്പിക്കുകയാണ്.

ചന്ദ്രനിലെ പൊടിയിൽ ഒളിഞ്ഞിരിക്കുന്നത് അന്യഗ്രഹ രഹസ്യങ്ങളോ?

Prashobh Prasannan — Wed, 16 Sep 2026 08:59:56 +0530

ചന്ദ്രന്റെ ഉപരിതലത്തിൽ കോടിക്കണക്കിന് വർഷങ്ങളായി അടിഞ്ഞുകൂടിയ പൊടിയിൽ അന്യഗ്രഹ സാങ്കേതികവിദ്യയുടെ സൂക്ഷ്മ അടയാളങ്ങൾ ഒളിഞ്ഞിരിക്കാമെന്ന പുതിയ സാധ്യത മുന്നോട്ടുവച്ച് ശാസ്ത്രജ്ഞർ. ചന്ദ്രനിലെ പൊടിയിൽ ‘മൈക്രോസ്കോപിക് ടെക്നോസിഗ്നേച്ചറുകൾ’ കണ്ടെത്താൻ ശ്രമിക്കണമെന്നാണ് നിർദേശം. എന്നാൽ ഇത് നിലവിൽ ഒരു ശാസ്ത്രീയ അനുമാനം മാത്രമാണ്. പഠനം ഇതുവരെ പിയർ റിവ്യൂ പൂർത്തിയാക്കിയിട്ടില്ല. ആഗസ്റ്റിൽ ആർകൈവിൽ പ്രസിദ്ധീകരിച്ച പഠനം ഇന്റർനാഷണൽ ജേണൽ ഓഫ് ആസ്ട്രോബയോളജിയിൽ പ്രസിദ്ധീകരിക്കുന്നതിനുള്ള അവലോകന ഘട്ടത്തിലാണ്.

ചന്ദ്രനിൽ സൂക്ഷ്‍മ സാങ്കേതിക അടയാളങ്ങളോ?

സെറ്റി ഇൻസ്റ്റിറ്റ്യൂട്ട് പറയുന്നതനുസരിച്ച്, അന്യഗ്രഹ സാങ്കേതികവിദ്യയുടെ ഭാഗമായേക്കാവുന്ന വളരെ ചെറിയ എൻജിനീയർ ചെയ്ത കണങ്ങളെയാണ് ടെക്നോസിഗ്നേച്ചറുകൾ എന്ന് വിശേഷിപ്പിക്കുന്നത്. ഇത്തരം കണങ്ങൾ നക്ഷത്രാന്തര ബഹിരാകാശത്ത് നിന്ന് സഞ്ചരിച്ച് പിന്നീട് ചന്ദ്രനിൽ അടിഞ്ഞുകൂടിയതാകാമെന്നാണ് പഠനത്തിന്റെ ആശയം. പഠനത്തിന് നേതൃത്വം നൽകുന്നത് സെറ്റി ഇൻസ്റ്റിറ്റ്യൂട്ട് അഫിലിയേറ്റ് സയന്റിസ്റ്റ് ലൂയിസ് പിനോൾട്ടാണ്. “ചന്ദ്രൻ കോടിക്കണക്കിന് വർഷങ്ങളായി ബഹിരാകാശത്ത് നിന്നുള്ള വസ്തുക്കൾ നിശ്ശബ്ദമായി ശേഖരിച്ചുകൊണ്ടിരിക്കുകയാണ്. അവയിൽ പലതും ചന്ദ്രനേക്കാൾ കോടിക്കണക്കിന് വർഷം പഴക്കമുള്ളതായിരിക്കാം,” പിനോൾട്ട് പറഞ്ഞു. മനുഷ്യർ ആകാശത്തേക്ക് നോക്കിത്തുടങ്ങുന്നതിന് വളരെ മുമ്പ് നിലനിന്നിരുന്ന സാങ്കേതികവിദ്യകളുടെ സൂക്ഷ്‍മ അവശിഷ്‍ടങ്ങൾ ഈ ശേഖരത്തിൽ ഉണ്ടോയെന്നാണ് പരിശോധിക്കുന്നതെന്നും അദ്ദേഹം വ്യക്തമാക്കി.

അന്യഗ്രഹ ജീവികളെ കണ്ടെത്തിയില്ലെങ്കിലും പ്രയോജനം

ചന്ദ്രനിൽ അന്യഗ്രഹ സാങ്കേതികവിദ്യയുടെ തെളിവുകൾ കണ്ടെത്തിയില്ലെങ്കിലും ഈ ഗവേഷണത്തിന് ശാസ്ത്രീയ പ്രാധാന്യമുണ്ടാകുമെന്ന് സെറ്റി ഇൻസ്റ്റിറ്റ്യൂട്ട് പറയുന്നു. നക്ഷത്രാന്തര ബഹിരാകാശത്തിലൂടെ പൊടി എങ്ങനെ സഞ്ചരിക്കുന്നു, അത് ചന്ദ്രന്റെ ഭൗമശാസ്ത്രത്തിലും ആഘാത പഠനങ്ങളിലും എങ്ങനെ സ്വാധീനം ചെലുത്തുന്നു തുടങ്ങിയ കാര്യങ്ങൾ മനസ്സിലാക്കാൻ ഗവേഷണം സഹായിച്ചേക്കാം. അതേസമയം, പഠനം അന്യഗ്രഹ സാങ്കേതികവിദ്യയുടെ തെളിവുകളൊന്നും റിപ്പോർട്ട് ചെയ്യുന്നില്ലെന്നും സെറ്റി ഇൻസ്റ്റിറ്റ്യൂട്ട് വ്യക്തമാക്കി. ഇത്തരം സൂക്ഷ്‍മ ടെക്നോസിഗ്നേച്ചറുകൾക്കായുള്ള തിരച്ചിൽ ശാസ്ത്രീയമായി പരീക്ഷിക്കാനാകുമെന്നാണ് പഠനം കാണിക്കുന്നതെന്നും സ്ഥാപനം പറയുന്നു.

ചന്ദ്രനിൽ നിന്ന് സാമ്പിളുകൾ എത്തും

നാസയുടെ നേതൃത്വത്തിലുള്ള ആർട്ടെമിസ് ദൗത്യങ്ങളും ചൈനയുടെ ചാങ്'ഇ റോബോട്ടിക് ദൗത്യങ്ങളും ഭാവിയിൽ ചന്ദ്രനിൽ നിന്ന് സാമ്പിളുകൾ ഭൂമിയിലെത്തിക്കാൻ അവസരമൊരുക്കും. 2030ഓടെ മനുഷ്യരെ ചന്ദ്രനിലെത്തിക്കാനും ചൈന ലക്ഷ്യമിടുന്നുണ്ട്. ഈ ദൗത്യങ്ങളിലൂടെ ലഭിക്കുന്ന ചന്ദ്രനിലെ മണ്ണും പൊടിയും ഇത്തരം ഗവേഷണങ്ങൾക്ക് ഉപയോഗിക്കാനാകും.

എഐയും മൈക്രോസ്കോപ്പുകളും ഉപയോഗിക്കും

സൈദ്ധാന്തികമായി ഇത്തരം കണങ്ങൾ ഒരു നക്ഷത്രവ്യവസ്ഥയിൽ നിന്ന് മറ്റൊന്നിലേക്ക് സഞ്ചരിക്കുകയും ദീർഘകാലം നിലനിൽക്കുകയും പിന്നീട് ചന്ദ്രന്റെ ഉപരിതലത്തിൽ പതിക്കുകയും ചെയ്യാം. അത്തരം കണങ്ങൾ കണ്ടെത്തിയാൽ എഐ സഹായത്തോടെയുള്ള ഇമേജിങ്, വസ്‍തു വിശകലനം, മൈക്രോസ്കോപ്പിക് പരിശോധന തുടങ്ങിയ വിവിധ സാങ്കേതികവിദ്യകൾ ഉപയോഗിച്ച് വിശദമായി പരിശോധിക്കാനാണ് ഗവേഷകരുടെ പദ്ധതി.

ചന്ദ്രന്റെ പൊടി ഒരു ‘ആർക്കൈവ്’

ഭൂമിയെ അപേക്ഷിച്ച് ചന്ദ്രന്റെ ഭൂമിശാസ്ത്രപരമായ മാറ്റങ്ങൾ വളരെ മന്ദഗതിയിലാണ്. ചന്ദ്രനിൽ ഒഴുകുന്ന വെള്ളമോ ഭൂമിയിലേതുപോലുള്ള കാര്യമായ അന്തരീക്ഷമോ ഇല്ല. ഏകദേശം നാല് ബില്യൺ വർഷമായി ചന്ദ്രൻ ബഹിരാകാശത്ത് നിന്നുള്ള പൊടി ശേഖരിച്ചുകൊണ്ടിരിക്കുകയാണ്. ഏകദേശം 4.5 ബില്യൺ വർഷങ്ങൾക്ക് മുമ്പാണ് സൗരയൂഥം രൂപപ്പെട്ടതെന്നാണ് നിലവിലെ ശാസ്ത്രീയ ധാരണ. അതിനാൽ സൗരയൂഥത്തിൽ നിന്നും നക്ഷത്രാന്തര ബഹിരാകാശത്തുനിന്നും എത്തിയ വസ്‍തുക്കളുടെ ഒരു സ്വാഭാവിക ശേഖരമായി ചന്ദ്രന്റെ ഉപരിതലത്തെ കാണാമെന്നാണ് ഗവേഷകരുടെ വിലയിരുത്തൽ.

ഒരു ഘനമീറ്റർ മണ്ണ് പരിശോധിക്കും

ആദ്യഘട്ടത്തിൽ ഏകദേശം 35 ക്യുബിക് അടി അഥവാ ഒരു ഘനമീറ്റർ ചന്ദ്രന്റെ റെഗോലിത്ത് പരിശോധിക്കാനാണ് ഗവേഷകരുടെ ലക്ഷ്യം. ഏകദേശം ഒരു ഫ്രിഡ്ജിന്റെ വലുപ്പത്തോളം വരുന്ന അളവാണിത്. വിവിധ ഉപകരണങ്ങൾ ഉപയോഗിച്ച് സൂക്ഷ്മമായ പരിശോധനകൾ നടത്തുകയും ക്ഷീരപഥത്തിൽ സാങ്കേതിക നാഗരികതകൾ ഉൽപ്പാദിപ്പിച്ചിട്ടുണ്ടാകാവുന്ന ദീർഘകാലം നിലനിൽക്കുന്ന കൃത്രിമ വസ്‍തുക്കളുടെ അളവിനെക്കുറിച്ച് കൂടുതൽ വ്യക്തമായ പരിധികൾ കണ്ടെത്തുകയുമാണ് ലക്ഷ്യം. അന്യഗ്രഹ സാങ്കേതിക അടയാളങ്ങൾ കണ്ടെത്താനായില്ലെങ്കിലും ചന്ദ്രനിലെ സാമ്പിളുകൾ പഠിക്കുന്നതിനുള്ള പുതിയ രീതികൾ വികസിപ്പിക്കാനും സൗരയൂഥത്തെക്കുറിച്ചുള്ള കൂടുതൽ വിവരങ്ങൾ കണ്ടെത്താനും ഈ ഗവേഷണം സഹായിക്കുമെന്ന് സെറ്റി ഇൻസ്റ്റിറ്റ്യൂട്ട് പ്രസിഡന്റ് ബിൽ ഡയമണ്ട് പറഞ്ഞു.

എട്ട് മാസത്തിന് ശേഷം ഐഎസ്ആർഒയുടെ നിർണായക വിക്ഷേപണം; ജിഎസ്എൽവി എഫ് 17 ദൗത്യത്തിനായുള്ള കൗണ്ട്‌ഡൗൺ ആരംഭിച്ചു

Aishwarya S Babu — Thu, 03 Sep 2026 18:47:15 +0530

ശ്രീഹരിക്കോട്ട: നീണ്ട എട്ട് മാസത്തെ ഇടവേളയ്ക്ക് ശേഷമുള്ള ഐഎസ്ആർഒയുടെ വിക്ഷേപണ ദൗത്യത്തിന് ഇനി മണിക്കൂറുകള്‍ മാത്രം. ജിഎസ്എൽവി എഫ് 17 ദൗത്യത്തിനായുള്ള കൗണ്ട് ഡൗൺ ശ്രീഹരിക്കോട്ട സതീഷ് ധവാൻ സ്പേസ് സെന്ററിൽ പുരോഗമിക്കുന്നു. നാളെ പുലർച്ചെ 2:55നാണ് വിക്ഷേപണം. അത്യാധുനിക ഭൗമ നിരീക്ഷണ ഉപഗ്രഹമായ GISAT നെയാണ് ഈ ദൗത്യത്തിലൂടെ ബഹിരാകാശത്തേക്ക് അയക്കുന്നത്.

ജനുവരിയിലെ പിഎസ്എൽവി സി 62 പരാജയത്തിന് ശേഷമുള്ള ആദ്യ ഐഎസ്ആർഒ വിക്ഷേപണമാണ് ഇത്. ഇരുപത്തിയേഴര മണിക്കൂർ നീളുന്ന കൗണ്ട് ഡൗണിന് ഇന്നലെ രാത്രി 11:25ന് തുടക്കമായി. ഇഒഎസ് 5 എന്ന കോഡ് നാമം നൽകിയിരിക്കുന്ന ജിയോ ഇമേജിംഗ് സാറ്റലൈറ്റ് വൺ എ രാജ്യ സുരക്ഷ മുതൽ ദുരന്തനിവാരണം വരെ വിവിധ മേഖലകളിൽ മുതൽക്കൂട്ടാകേണ്ട ഉപഗ്രഹമാണ്. ഭൂസ്ഥിര പരിക്രമണ പഥത്തിൽ നിന്ന് മുഴുവൻ സമയം ഇന്ത്യൻ ഉപഭൂഖണ്ഡത്തെ നിരീക്ഷിക്കുകയാണ് ഉപഗ്രഹത്തിന്റെ ദൗത്യം. 2021 ആഗസ്റ്റ് 12ന് ഇതേ ഉപഗ്രത്തെ വിക്ഷേപിക്കാൻ നടന്ന ജിഎസ്എൽവി എഫ് 10 ദൗത്യം പരാജയപ്പെട്ടിരുന്നു. അതിന് പകരം നിർമ്മിച്ചതാണ് പുത്തൻ പേടകം.

2367 കിലോഗ്രാം ഭാരമുള്ള ഉപഗ്രഹത്തെ നേരിട്ട് ജിയോ ട്രാൻസ്ഫർ ഓർബിറ്റിലേക്കയക്കാൻ ജിഎസ്എൽവിക്കാകില്ല. പകരം അതിനൽപ്പം താഴെ വെച്ചാകും റോക്കറ്റും ഉപഗ്രഹവും വേർപ്പെടുക. ശേഷിക്കുന്ന ദൂരം ഉപഗ്രഹം സ്വന്തം പ്രൊപ്പൽഷൻ സംവിധാനമുപയോഗിച്ച് താണ്ടും. റോക്കറ്റും ഉപഗ്രഹവും വളരെ നേരത്തെ തന്നെ തയാറായിരുന്നുവെങ്കിലും പിഎസ്എൽവി പരാജയത്തിന് പിന്നാലെ ഐഎസ്ആർഒയുടെ എല്ലാ ദൗത്യങ്ങളും നിർത്തിവെക്കുകയായിരുന്നു.

ജൂൺ അവസാനമോ ജൂലൈ ആദ്യമോ ദൗത്യം നടത്താൻ ശ്രമിച്ചെങ്കിലും അന്ന് കേന്ദ്ര അനുമതി കിട്ടിയില്ല. പ്രശ്നമുണ്ടായ പിഎസ്എൽവിയുടെ മൂന്നാഘട്ടവുമായി നേരിട്ട് ബന്ധമുള്ള ഘട്ടങ്ങളൊന്നും ജിഎസ്എൽവിയിൽ ഇല്ല. ഈ ദൗത്യം വിജയകരമായി പൂർത്തിയായാൽ തൊട്ടുപിന്നാലെ ഗഗൻയാൻ ആദ്യ ആളില്ലാ ദൗത്യം നടത്താനാണ് ഇസ്രൊയുടെ തീരുമാനം. ഉപഗ്രഹ വികസന കേന്ദ്രമായ യുആർഎസ്‍സിയിൽ നിന്നുള്ള കൂട്ട വിആർഎസ് അപേക്ഷകളടക്കം പ്രതിസന്ധി നേരിടുന്ന ഇസ്രൊയ്ക്ക് വിക്ഷേപണ വിജയം ആത്മവിശ്വാസം തിരിച്ചുപിടിക്കാൻ അത്യാവശ്യമാണ്.

ചാരിക്ലോയുടെ വളയങ്ങൾ: ജെയിംസ് വെബ് കണ്ടെത്തിയ രഹസ്യം

Prashobh Prasannan — Mon, 14 Sep 2026 09:25:38 +0530

സൗരയൂഥത്തിലെ അതിസൂക്ഷ്മമായ ആകാശവസ്തുവായ ചാരിക്ലോയുടെ വളയങ്ങളിൽ മാറ്റങ്ങൾ സംഭവിക്കുന്നതായി കണ്ടെത്തി ജെയിംസ് വെബ് ബഹിരാകാശ ദൂരദർശിനി. ശനിയുടെ വളയങ്ങളാണ് സൗരയൂഥത്തിൽ ഏറ്റവും പ്രശസ്തം. എന്നാൽ, വളരെ ചെറിയ ആകാശവസ്തുക്കൾക്കും വളയങ്ങൾ ഉണ്ടാകാമെന്നും അവയിൽ കാലക്രമേണ മാറ്റങ്ങൾ സംഭവിക്കാമെന്നും പുതിയ പഠനം വ്യക്തമാക്കുന്നു.

ശനിക്കും യുറാനസിനും ഇടയിൽ ചാരിക്ലോ

സൂര്യനെ ചുറ്റുന്ന ചാരിക്ലോ ശനിക്കും യുറാനസിനും ഇടയിലാണ് സ്ഥിതി ചെയ്യുന്നത്. ഭൂമിയും സൂര്യനും തമ്മിലുള്ള ശരാശരി അകലത്തിന്റെ ഏകദേശം 17 മടങ്ങ് ദൂരത്താണ് ചാരിക്ലോയുടെ സ്ഥാനം. വെറും 250 കിലോമീറ്റർ മാത്രം വ്യാസമുള്ള ഈ ആകാശവസ്‍തു സെന്റോർ വിഭാഗത്തിൽപ്പെടുന്നു. ചാരിക്ലോയ്ക്ക് രണ്ട് സാന്ദ്രമായ വളയങ്ങളാണുള്ളത്. 2013-ലാണ് ചാരിക്ലോയ്ക്ക് വളയങ്ങളുണ്ടെന്ന് ആദ്യമായി കണ്ടെത്തിയത്. വ്യാഴം, ശനി, യുറാനസ്, നെപ്റ്റ്യൂൺ തുടങ്ങിയ ഗ്രഹങ്ങൾക്കും വളയങ്ങളുണ്ട്. എന്നാൽ ചാരിക്ലോയെക്കാൾ ചെറിയ ആകാശവസ്തുവായ കൈറോണിനും വളയങ്ങളുണ്ടെന്ന കണ്ടെത്തൽ, ചെറിയ വസ്‍തുക്കൾക്കും ഇത്തരം വളയങ്ങൾ രൂപപ്പെടാമെന്നതിന്റെ തെളിവാണ്.

അകത്തെ വളയം കൂടുതൽ സാന്ദ്രം

ഇൻസ്റ്റിറ്റ്യൂട്ട് ഓഫ് ആസ്ട്രോഫിസിക്സ് ഓഫ് ആൻഡലൂസിയയിലെ ഗവേഷകരുടെ നേതൃത്വത്തിലുള്ള സംഘമാണ് പുതിയ പഠനം നടത്തിയത്. 2022 ഒക്ടോബറിൽ ജെയിംസ് വെബ് ബഹിരാകാശ ദൂരദർശിനി ഉപയോഗിച്ച് ചാരിക്ലോയെ നിരീക്ഷിച്ചു. നക്ഷത്രം ഒരു ആകാശവസ്തുവിന് പിന്നിലാകുകയോ ആകാശവസ്തു നക്ഷത്രത്തിന് മുന്നിലൂടെ കടന്നുപോകുകയോ ചെയ്യുമ്പോൾ നക്ഷത്രപ്രകാശത്തിൽ ഉണ്ടാകുന്ന മാറ്റം അളക്കുന്ന നക്ഷത്ര മറയൽ നിരീക്ഷണ രീതിയാണ് ഗവേഷകർ ഉപയോഗിച്ചത്. കഴിഞ്ഞ പത്ത് വർഷത്തിനിടെ നടത്തിയ മറ്റ് നിരീക്ഷണങ്ങളിലെ വിവരങ്ങളുമായി പുതിയ നിരീക്ഷണഫലങ്ങൾ താരതമ്യം ചെയ്തപ്പോഴാണ് നിർണായകമായ മാറ്റം കണ്ടെത്തിയത്. ചാരിക്ലോയുടെ അകത്തെ വളയത്തിന്റെ പ്രകാശം തടയാനുള്ള ശേഷി ഗണ്യമായി വർധിച്ചപ്പോൾ പുറത്തെ വളയത്തിന്റെ സാന്ദ്രത കുറഞ്ഞതായി കണ്ടെത്തി.

വളയങ്ങളുടെ മാറ്റത്തിന് കാരണം എന്ത്?

ചെറിയ ആകാശവസ്തുക്കളുടെ വളയങ്ങൾ താരതമ്യേന സ്ഥിരതയുള്ളവയായിരിക്കുമെന്നാണ് ഇതുവരെ കരുതിയിരുന്നത്. എന്നാൽ പുതിയ കണ്ടെത്തൽ ഈ ധാരണയെ ചോദ്യം ചെയ്യുകയാണ്. വളയങ്ങൾ എങ്ങനെയാണ് രൂപപ്പെടുന്നത്, അവ കാലക്രമേണ എങ്ങനെയാണ് മാറുന്നത്, അവയെ സ്ഥിരതയോടെ നിലനിർത്തുന്ന സംവിധാനങ്ങൾ ഏതൊക്കെയാണ് തുടങ്ങിയ കാര്യങ്ങൾ വീണ്ടും പരിശോധിക്കേണ്ട സാഹചര്യമാണിപ്പോൾ ഉണ്ടായിരിക്കുന്നത്. എന്നാൽ ചാരിക്ലോയുടെ വളയങ്ങളിൽ മാറ്റം സംഭവിക്കുന്നതിന് പിന്നിലെ കൃത്യമായ കാരണം എന്താണെന്ന് ഇതുവരെ കണ്ടെത്താനായിട്ടില്ല.

അതീവ കൃത്യതയുള്ള നിരീക്ഷണം

ചാരിക്ലോയുടെ ഭ്രമണപഥം, പശ്ചാത്തല നക്ഷത്രത്തിന്റെ സ്ഥാനം, ജെയിംസ് വെബ് ദൂരദർശിനിയുടെ സഞ്ചാരപഥം എന്നിവ കൃത്യമായി നിർണയിച്ചാണ് നിരീക്ഷണം നടത്തിയത്. യൂറോപ്യൻ ബഹിരാകാശ ഏജൻസിയുടെ ഗയ ദൗത്യത്തിൽ നിന്നുള്ള വിവരങ്ങളും ഇതിനായി ഉപയോഗിച്ചു. ഭൂമിയിൽ നിന്ന് ഏകദേശം 1.5 ദശലക്ഷം കിലോമീറ്റർ അകലെയുള്ള എൽ2 ലഗ്രാഞ്ച് മേഖലയുടെ പരിസരത്താണ് ജെയിംസ് വെബ് ദൂരദർശിനി സഞ്ചരിക്കുന്നത്. നിരീക്ഷണസമയത്ത് ദൂരദർശിനിയെ അപേക്ഷിച്ച് ചാരിക്ലോ മണിക്കൂറിൽ ഏകദേശം 5,600 മൈൽ, അതായത് സെക്കൻഡിൽ 2.5 കിലോമീറ്റർ വേഗത്തിലാണ് സഞ്ചരിച്ചിരുന്നത്.

താരതമ്യേന കുറഞ്ഞ വേഗതയിൽ നടന്ന ഈ നക്ഷത്ര മറയൽ നിരീക്ഷണം ചാരിക്ലോയുടെ വളയങ്ങളെ ഇതുവരെ ലഭിക്കാത്തത്ര വിശദമായി പഠിക്കാൻ ഗവേഷകരെ സഹായിച്ചു. ചാരിക്ലോ വളരെ ചെറുതും ഭൂമിയിൽ നിന്ന് ഏറെ അകലെയുമായതിനാൽ ജെയിംസ് വെബ് ദൂരദർശിനിക്ക് പോലും അതിന്റെ വളയങ്ങളെ നേരിട്ട് ചിത്രീകരിക്കാൻ കഴിയില്ല. അതിനാൽ നക്ഷത്ര മറയൽ നിരീക്ഷണങ്ങളാണ് നിലവിൽ വളയങ്ങളെക്കുറിച്ച് പഠിക്കാനുള്ള പ്രധാന മാർഗം. പഠനഫലങ്ങൾ സെപ്റ്റംബർ 9ന് സയൻസ് അഡ്വാൻസസ് ജേണലിൽ പ്രസിദ്ധീകരിച്ചു.

ശുക്രൻ സ്വന്തം 'ചന്ദ്രനെ' വിഴുങ്ങിയോ? ഭൂമിയുടെ അപരൻ 'സിംഗിൾ' ആയതിന് കാരണം കണ്ടെത്തി ശാസ്ത്രജ്ഞർ

Prashobh Prasannan — Wed, 09 Sep 2026 08:43:02 +0530

ഭൂമിയുടെ ഇരട്ടഗ്രഹമെന്ന് അറിയപ്പെടുന്ന ശുക്രന് എന്തുകൊണ്ടാണ് സ്വന്തമായി ഒരു ചന്ദ്രനില്ലാത്തത്? വർഷങ്ങളായി ശാസ്ത്രലോകത്തെ കുഴക്കുന്ന ഈ ചോദ്യത്തിന് പുതിയൊരു ഉത്തരം ലഭിച്ചേക്കുകയാണ്. ശുക്രന് ഒരുകാലത്ത് ഒരു സ്വാഭാവിക ഉപഗ്രഹം ഉണ്ടായിരുന്നിരിക്കാമെന്നും പിന്നീട് അത് ഗ്രഹത്തിന്റെ ഗുരുത്വാകർഷണത്തിൽ അകപ്പെട്ട് നശിച്ചിരിക്കാമെന്നുമാണ് പുതിയ പഠനം സൂചിപ്പിക്കുന്നത്.

വലുപ്പം, പിണ്ഡം, പാറകളാൽ നിർമ്മിതമായ ഘടന, സൂര്യനിൽ നിന്നുള്ള ദൂരം തുടങ്ങിയ കാര്യങ്ങളിൽ ശുക്രന് ഭൂമിയുമായി വലിയ സാമ്യമുണ്ട്. എന്നാൽ ഉപരിതലത്തിലെ അതിശക്തമായ ചൂട്, ഉയർന്ന മർദം, മണിക്കൂറിൽ വലിയ വേഗത്തിൽ വീശുന്ന കാറ്റ്, സൾഫ്യൂറിക് ആസിഡ് അടങ്ങിയ മേഘങ്ങൾ തുടങ്ങിയവ ശുക്രനെ ഭൂമിയിൽ നിന്ന് തികച്ചും വ്യത്യസ്‍തമാക്കുന്നു.

ഉപഗ്രഹമില്ലാത്ത രണ്ട് ഗ്രഹങ്ങൾ

ഭൂമിക്ക് വലിയൊരു ചന്ദ്രൻ സ്ഥിരം കൂട്ടായുണ്ടെങ്കിലും വീനസിന് ഒരു ഉപഗ്രഹം പോലുമില്ല. സൗരയൂഥത്തിൽ സ്വാഭാവിക ഉപഗ്രഹങ്ങളില്ലാത്ത രണ്ട് ഗ്രഹങ്ങളാണ് ശുക്രനും ബുധനും. ശുക്രന് ആദ്യം മുതലേ ഉപഗ്രഹം ഇല്ലായിരുന്നോ, അതോ ഒരുകാലത്ത് ചന്ദ്രനുണ്ടായിരുന്നെങ്കിലും പിന്നീട് നഷ്‍ടപ്പെട്ടതാണോ എന്ന ചോദ്യത്തിനാണ് ഗവേഷകർ ഉത്തരം തേടിയത്.

കോടിക്കണക്കിന് വർഷങ്ങളുടെ ചലനം പരിശോധിച്ചു

കാലിഫോർണിയ സർവകലാശാലയിലെ റിവർസൈഡ് ക്യാമ്പസിലെ ഗവേഷകനായ സ്റ്റീഫൻ ആർ കെയ്ൻ നേതൃത്വം നൽകിയ സംഘമാണ് വീനസിന്റെ സാങ്കൽപ്പിക ഉപഗ്രഹത്തിന് എന്ത് സംഭവിച്ചിരിക്കാമെന്ന് കണ്ടെത്താൻ കമ്പ്യൂട്ടർ മാതൃക തയ്യാറാക്കിയത്. വീനസ്, സാങ്കൽപ്പിക ചന്ദ്രൻ, സൂര്യൻ എന്നിവയ്ക്കിടയിലെ ഗുരുത്വാകർഷണ ബന്ധമാണ് ഗവേഷകർ പരിശോധിച്ചത്. കോടിക്കണക്കിന് വർഷങ്ങളിലേക്കുള്ള ഈ ചലനം കണക്കാക്കിയപ്പോഴാണ് നിർണായകമായ വിവരങ്ങൾ ലഭിച്ചത്. ഭൂമിയിലെ ചന്ദ്രനെപ്പോലെ വീനസിന്റെ ചന്ദ്രൻ സുരക്ഷിതമായി പുറത്തേക്ക് അകന്നുപോകണമെന്നില്ലെന്നാണ് സിമുലേഷൻ വ്യക്തമാക്കിയത്. പകരം, പല സാഹചര്യങ്ങളിലും ഉപഗ്രഹം പിന്നീട് ദിശമാറ്റി വീനസിലേക്ക് തന്നെ അടുക്കും.

ഒടുവിൽ വീനസ് ചന്ദ്രനെ വിഴുങ്ങും!

വീനസിലേക്ക് അടുക്കുന്ന ഉപഗ്രഹം ഒടുവിൽ ഗ്രഹത്തിന്റെ ശക്തമായ ഗുരുത്വാകർഷണത്തിൽ പിളർന്നുപോകും. അതായത്, ഒരുകാലത്ത് വീനസിന് ചന്ദ്രനുണ്ടായിരുന്നെങ്കിൽ അത് ഗ്രഹത്തിൽ നിന്ന് അകന്നുപോകുന്നതിന് പകരം വീനസിലേക്ക് തന്നെ തിരിച്ചെത്തി നശിച്ചിരിക്കാമെന്നാണ് പഠനത്തിലെ പ്രധാന നിഗമനം. ചന്ദ്രന് വലിയ പിണ്ഡമുണ്ടായിരുന്നാലും അതിന് രക്ഷപ്പെടാൻ കഴിയണമെന്നില്ല. വലിയ ഉപഗ്രഹം വീനസിന്റെ ഭ്രമണത്തിൽ നിന്ന് ഊർജം കൂടുതൽ കാര്യക്ഷമമായി വലിച്ചെടുക്കുന്നതിനാൽ അതിന്റെ നാശം കൂടുതൽ വേഗത്തിലാകാമെന്നും ഗവേഷകർ കണ്ടെത്തി.

ചില സാഹചര്യങ്ങളിൽ ചന്ദ്രന് രക്ഷപ്പെടാമായിരുന്നു

എന്നാൽ എല്ലാ സാഹചര്യങ്ങളിലും വീനസിന്റെ ചന്ദ്രൻ നശിക്കണമെന്നില്ല. ചന്ദ്രൻ രൂപപ്പെട്ട സമയത്ത് വീനസ് വളരെ വേഗത്തിൽ കറങ്ങുന്ന ഗ്രഹമായിരിക്കണം. അന്ന് വീനസിലെ ഒരു ദിവസം 12 മണിക്കൂറിൽ താഴെ ആയിരിക്കണമെന്നാണ് ഗവേഷകരുടെ കണക്ക്. അതോടൊപ്പം ഉപഗ്രഹത്തിന്റെ പിണ്ഡം നമ്മുടെ ചന്ദ്രന്റേതിനേക്കാൾ വളരെ കൂടുതലായിരിക്കാനും പാടില്ല. ഈ പ്രത്യേക സാഹചര്യങ്ങളിൽ ഉപഗ്രഹം വീനസിൽ നിന്ന് പുറത്തേക്ക് നീങ്ങി സ്ഥിരതയുള്ള ഭ്രമണപഥത്തിൽ തുടരാൻ കഴിയുമായിരുന്നു. എന്നാൽ ആദ്യകാല വീനസിനെക്കുറിച്ചുള്ള നിലവിലെ ശാസ്ത്രീയ ധാരണകളുമായി ഈ സാഹചര്യങ്ങൾ പൂർണമായി പൊരുത്തപ്പെടുന്നില്ല.

നേരിട്ടുള്ള തെളിവ് കണ്ടെത്തുക ബുദ്ധിമുട്ട്

വീനസ് ശരിക്കും സ്വന്തം ചന്ദ്രനെ വിഴുങ്ങിയെന്നതിന് നേരിട്ടുള്ള തെളിവ് കണ്ടെത്തുക എളുപ്പമല്ല. കോടിക്കണക്കിന് വർഷങ്ങൾക്ക് മുമ്പ് ഉപഗ്രഹം നശിച്ചിട്ടുണ്ടെങ്കിൽ അതിന്റെ വ്യക്തമായ അവശിഷ്‍ടങ്ങൾ ഇന്ന് കണ്ടെത്താൻ കഴിയണമെന്നില്ല. എന്നാൽ ഉപഗ്രഹം തകർന്നതിനെ തുടർന്ന് അതിന്റെ അവശിഷ്‍ടങ്ങൾ ശുക്രന്റെ ഉപരിതലത്തിലോ അന്തരീക്ഷത്തിലോ പതിച്ചിട്ടുണ്ടെങ്കിൽ അവിടെ ചില രാസ അടയാളങ്ങൾ അവശേഷിച്ചിരിക്കാം. ഭാവിയിലെ ബഹിരാകാശ ദൗത്യങ്ങൾക്ക് ഇത്തരം സൂചനകൾ കണ്ടെത്താനായേക്കും.

ഭാവിയിലെ ദൗത്യങ്ങൾ നിർണായകം

നാസയുടെ ഡാവിഞ്ചി ദൗത്യം ശുക്രന്റെ അന്തരീക്ഷത്തെ കൂടുതൽ വിശദമായി പഠിക്കാനാണ് ലക്ഷ്യമിടുന്നത്. അന്തരീക്ഷത്തിലെ വിവിധ ഘടകങ്ങളെക്കുറിച്ചുള്ള കൂടുതൽ വിവരങ്ങൾ ലഭിക്കുന്നതോടെ വീനസിന്റെ ആന്തരിക ഘടനയെക്കുറിച്ചും ശാസ്ത്രജ്ഞർക്ക് കൂടുതൽ വ്യക്തത ലഭിക്കും. ഇത് വീനസിന്റെ ചന്ദ്രൻ എങ്ങനെ നശിച്ചിരിക്കാമെന്നതിനെക്കുറിച്ചുള്ള കമ്പ്യൂട്ടർ മാതൃകകൾ കൂടുതൽ കൃത്യമാക്കാനും സഹായിക്കും.

സൗരയൂഥത്തിന് പുറത്തും പരിശോധന നടത്താം

ഈ കണ്ടെത്തലിന് സൗരയൂഥത്തിന് പുറത്തുള്ള ഗ്രഹങ്ങളുടെ പഠനത്തിലും പ്രാധാന്യമുണ്ട്. സാവധാനത്തിൽ കറങ്ങുന്ന വീനസിനെപ്പോലുള്ള ഗ്രഹങ്ങൾക്ക് വലിയ ചന്ദ്രന്മാർ സാധാരണയായി ഉണ്ടാകില്ലെന്ന പ്രവചനമാണ് ഗവേഷകർ മുന്നോട്ടുവയ്ക്കുന്നത്. ഭാവിയിൽ മറ്റു നക്ഷത്രങ്ങളെ ചുറ്റുന്ന ഗ്രഹങ്ങളിലെ ചന്ദ്രന്മാരെ കണ്ടെത്താൻ കഴിയുമ്പോൾ ഈ സിദ്ധാന്തം യഥാർഥ വിവരങ്ങളുമായി താരതമ്യം ചെയ്യാനും സാധിക്കും. വീനസിന് മാത്രമല്ല, ബുധനും ചൊവ്വയും ഉൾപ്പെടെയുള്ള ഗ്രഹങ്ങളിൽ സമാനമായ ചന്ദ്രൻ-നാശ സാഹചര്യങ്ങൾ ഉണ്ടായിട്ടുണ്ടോയെന്നും പഠിക്കാനാണ് ഗവേഷകരുടെ അടുത്ത നീക്കം. പഠനത്തിന്റെ പ്രീ-പിയർ-റിവ്യൂ പതിപ്പ് ആർകൈവിൽ പ്രസിദ്ധീകരിച്ചിട്ടുണ്ട്.

കുതിച്ച് ജിഎസ്എൽവി എഫ് 17, വിക്ഷേപണം വിജയം; നിർണായക ദൗത്യം വിജയത്തിലെത്തിച്ച് ഐഎസ്ആർഒ

Sithara Sreelayam — Fri, 04 Sep 2026 03:58:08 +0530

ശ്രീഹരിക്കോട്ട: ജിഎസ്എൽവി എഫ് 17 ശ്രീഹരിക്കോട്ടയിൽ നിന്ന് വിക്ഷേപിച്ചു. ദൗത്യം വിജയിച്ചതോടെ വലിയൊരു തിരിച്ചുവരവാണ് ഐഎസ്ആർഒ നടത്തിയത്. ജിഎസ്എൽവിയുടെ പത്തൊമ്പതാം ദൗത്യമാണിത്. നീണ്ട എട്ട് മാസത്തെ ഇടവേളയ്ക്ക് ശേഷം ഐഎസ്ആർഒ വിജയ വഴിയിൽ തിരിച്ചെത്തിയിരിക്കുകയാണ്. സെപ്റ്റംബർ 4ന് പുലർച്ചെ 2.55നായിരുന്നു വിക്ഷേപണം. അത്യാധുനിക ഭൗമ നിരീക്ഷണ ഉപഗ്രഹത്തെയാണ് ഈ ദൗത്യത്തിലൂടെ ബഹിരാകാശത്തേക്ക് അയച്ചത്.

ജനുവരിയിലെ പിഎസ്എൽവി സി 62 പരാജയത്തിന് ശേഷമുള്ള ആദ്യ ഐഎസ്ആർഒ വിക്ഷേപണമാണ് ജിഎസ്എൽവിയുടെ 19ആം ദൗത്യം. ഇരുപത്തിയേഴര മണിക്കൂർ നീളുന്ന കൗണ്ട് ഡൗണിന് കഴിഞ്ഞ ദിവസം രാത്രി 11:25നാണ് തുടക്കമായത്. ഇഒഎസ് 5 എന്ന കോഡ് നാമം നൽകിയിരിക്കുന്ന ജിയോ ഇമേജിംഗ് സാറ്റലൈറ്റ് വൺ എ രാജ്യ സുരക്ഷ മുതൽ ദുരന്തനിവാരണം വരെ വിവിധ മേഖലകളിൽ മുതൽക്കൂട്ടാകേണ്ട ഉപഗ്രഹമാണ്. ഭൂസ്ഥിര പരിക്രമണപഥത്തിൽ നിന്ന് മുഴുവൻ സമയം ഇന്ത്യൻ ഉപഭൂഖണ്ഡത്തെ നിരീക്ഷിക്കുകയാണ് ഉപഗ്രഹത്തിന്റെ ദൗത്യം. 2021 ആഗസ്റ്റ് 12ന് ഇതേ ഉപഗ്രത്തെ വിക്ഷേപിക്കാൻ നടന്ന ജിഎസ്എൽവി എഫ് 10 ദൗത്യം പരാജയപ്പെട്ടിരുന്നു. അതിന് പകരം നിർമ്മിച്ചതാണ് പുത്തൻ പേടകം.

2367 കിലോഗ്രാം ഭാരമുള്ള ഉപഗ്രഹത്തെ നേരിട്ട് ജിയോ ട്രാൻസ്ഫർ ഓർബിറ്റിലേക്കയക്കാൻ ജിഎസ്എൽവിക്കാകില്ല, പകരം അതിനൽപ്പം താഴെ വച്ചാണ് റോക്കറ്റും ഉപഗ്രഹവും വേർപ്പെട്ടത്. ശേഷിക്കുന്ന ദൂരം ഉപഗ്രഹം സ്വന്തം പ്രൊപ്പൽഷൻ സംവിധാനമുപയോഗിച്ച് താണ്ടും. റോക്കറ്റും ഉപഗ്രഹവും വളരെ നേരത്തെ തന്നെ തയ്യാറായിരുന്നുവെങ്കിലും പിഎസ്എൽവി പരാജയത്തിന് പിന്നാലെ ഐഎസ്ആർഒയുടെ എല്ലാ ദൗത്യങ്ങളും നിർത്തിവയ്ക്കുകയായിരുന്നു. ജൂൺ അവസാനമോ ജൂലൈ ആദ്യമോ ദൗത്യം നടത്താൻ ശ്രമിച്ചെങ്കിലും അന്ന് കേന്ദ്ര അനുമതി കിട്ടിയില്ല.

പ്രശ്നമുണ്ടായ പിഎസ്എൽവിയുടെ മൂന്നാം ഘട്ടവുമായി നേരിട്ട് ബന്ധമുള്ള ഘട്ടങ്ങളൊന്നും ജിഎസ്എൽവിയിൽ ഇല്ല. ഈ ദൗത്യം വിജയകരമായി പൂർത്തിയായാൽ തൊട്ടുപിന്നാലെ ഗഗൻയാൻ എന്ന ആദ്യ ആളില്ലാ ദൗത്യം നടത്താനാണ് ഇസ്രൊയുടെ തീരുമാനം. ഗഗൻയാൻ ആദ്യ ദൗത്യം ഈ കലണ്ടർ വർഷം തന്നെ നടത്തുമെന്ന് ഐഎസ്ആർഒ ചെയ്ർമാൻ വി നാരായണൻ പറഞ്ഞു. മാർച്ചിന് മുൻപ് 6 വിക്ഷേപണം കൂടി നടത്തുമെന്നും അദ്ദേഹം പറഞ്ഞു.