Asianet News Malayalam

മാപ്പ് പറഞ്ഞാലും തൃപ്തി അടയാത്തവർ മനുഷ്യരാകുന്നത് എങ്ങനെ?; പേളി മാണിയെ പിന്തുണച്ച് ആർജെ അഞ്ജലി

Nithya G Robinson — Wed, 29 Jul 2026 14:10:21 +0530

ദില്ലിയിലെ വിദ്യാർത്ഥി പ്രക്ഷോഭത്തിൽ പങ്കുവെച്ച അഭിപ്രായവുമായി ബന്ധപ്പെട്ട് അവതാരകയും നടിയും ഇൻഫ്ളുവൻസറുമായ പേളി മാണി പങ്കുവെച്ച കുറിപ്പിനെതിരെ സമൂഹമാധ്യമങ്ങളിൽ വ്യാപക വിമർശനം ഉയർന്നിരുന്നു. പിന്നാലെ കഴിഞ്ഞ ദിവസം പേളി വിശദീകരണവും നൽകി. മെച്ചപ്പെട്ട മനുഷ്യനാകാൻ താൻ ശ്രമിക്കുമെന്നും, താൻ ആത്മാര്‍ത്ഥമായും മനസില്‍ തട്ടിയെഴുതിയതിനെ ഇത്രയും നെഗറ്റീവായി വ്യാഖ്യാനിച്ചത് ഭയങ്കര വിഷമമായെന്നും എല്ലാ പാർട്ടിയും തനിക്ക് ഇഷ്ടമാണെന്നും പേളി പറഞ്ഞിരുന്നു. എന്നാൽ ഈ വിശദീകരണത്തിനും നിരവധി നെഗറ്റീവ് കമന്റുകളാണ് വന്നത്. തതവസരത്തിൽ പേളിയെ പിന്തുണച്ച് രംഗത്ത് എത്തിയിരിക്കുകയാണ് ആർജെ അഞ്ജലി.

മാപ്പ് പറഞ്ഞാലും തൃപ്തി അടയാത്തവർ മനുഷ്യരാകുന്നത് എങ്ങനെയാണെന്ന് ചോദിച്ച അഞ്ജലി, രാഷ്ട്രീയം വേറെ ആകാം. പറഞ്ഞതിൽ തെറ്റുണ്ടാകാമെന്നും പക്ഷേ മാപ്പിന് ഒരർത്ഥമെ ഉള്ളൂവെന്നും പറഞ്ഞു. "സദാ ചിരിച്ചു മാത്രം (കാലിൻ ചുവട്ടിലെ മണ്ണ് മാറി പോയാലും )കണ്ടിട്ടുള്ളവർ ആണ്, അപ്പോളജി പറയുമ്പോഴും ഇത്രയധികം ചോദ്യം ചെയ്യപ്പെടുന്നത്. ചിരിച്ചു കൊണ്ട് അപ്പോളജി പറയാനാകില്ലല്ലോ ?ചിരി വരാത്ത,അതിനെ പിടിച്ചു കെട്ടിയ മുഖം തന്നെ അപ്പോളജി. തെറ്റ് പറ്റാത്ത മനുഷ്യരുണ്ടോ ? മാപ്പ് പറഞ്ഞാലും തൃപ്തി അടയാത്തവർ മനുഷ്യരാകുന്നത് എങ്ങനെയാണ് ??? രാഷ്ട്രീയം വേറെ ആകാം. പറഞ്ഞതിൽ തെറ്റുണ്ടാകാം. മാപ്പ്..അതിന് പക്ഷെ തെറ്റ് പറ്റിയതായി സമ്മതിച്ചു എന്ന ഒരേ ഒരു അർഥമേ ഉണ്ടാകൂ", എന്നായിരുന്നു ആർജെ അഞ്ജലിയുടെ വാക്കുകൾ.

പേളിയു‌ടെ ക്ഷമാപണത്തിൽ ആത്മാർത്ഥതയില്ല എന്നാണ് പലരും കമന്റ് ബോക്സിൽ കുറിക്കുന്നത്. ഈ ക്ലാരിഫിക്കേഷൻ പോലും സത്യസന്ധമായി തോന്നുന്നില്ല എന്ന് തോന്നുന്നവരും ഉണ്ട്. "ആ പോസ്റ്റ് ഇട്ടതേ എനിക്ക് ഓര്‍മയുള്ളൂ. ഇട്ട് കുറച്ച് നേരത്തേക്ക് എല്ലാം ഓക്കെയായിരുന്നു. പത്ത് മണിയ്ക്കാണ് പോസ്റ്റ് ചെയ്യുന്നത്. എന്തിട്ടാലും നല്ല വശവും ചീത്ത വശവും കാണുന്നവരുണ്ടാകും. ഭൂരിപക്ഷം പേരും കണ്ടത് നല്ല വശമാണ്. കുറച്ച് സമയം കഴിഞ്ഞതും ഞാന്‍ സ്വപ്‌നത്തില്‍ പോലും ചിന്തിക്കാത്ത വ്യാഖ്യാനങ്ങള്‍ വരാന്‍ തുടങ്ങി. ഞാന്‍ അങ്ങനൊന്നും എഴുതിയില്ലല്ലോ, ഇതല്ലല്ലോ ഞാന്‍ ഉദ്ദേശിച്ചത് എന്ന് ചിന്തിച്ചു. വീട്ടില്‍ പോകൂവെന്ന് പറയുന്നത് പോലും സുരക്ഷിതരായിരിക്കണേ എന്ന് പറയുന്നതിന്റെ കൂടെയാണ്. ഇത് നിര്‍ത്തി വീട്ടില്‍ പോകണം എന്നല്ല പറയുന്നത്. അത് പറയാന്‍ ഞാന്‍ ആരുമല്ല. ഞാന്‍ പറയേണ്ട ഒരാവശ്യവും എനിക്കില്ല", എന്നിങ്ങനെ നിരവധി കാര്യങ്ങളാണ് പേളി മാണി വിശദീകരണ വീഡിയോയിൽ പറഞ്ഞത്.

'ഞാൻ അവരുടെ ഇടയിൽ പിആർ വർക്ക് ചെയ്തിട്ടുണ്ടായിരുന്നു'; ജോജുവിന്റെ ആരോപണങ്ങൾക്ക് പരോക്ഷ മറുപടി?; ചർച്ചയായി കുഞ്ചാക്കോ ബോബന്റെ വാക്കുകൾ

Web Desk — Sun, 26 Jul 2026 10:47:49 +0530

തനിക്കെതിരെ മലയാളത്തിലെ പ്രമുഖ നടനും ഭാര്യയും നെഗറ്റിവ് പി.ആർ വർക്ക് ചെയ്യുന്നുണ്ടെന്ന നടൻ ജോജു ജോർജിന്റെ ആരോപണം വലിയ ചർച്ചകൾക്കാണ് വഴിതെളിച്ചത്. തന്റെ ഏറ്റവും പുതിയ ചിത്രമായ വരവുമായി ബന്ധപ്പെട്ടായിരുന്നു ജോജുവിന്റെ പ്രതികരണം. ഇതിന് പിന്നാലെ അവതാരകൻ മിഥുന്റെ ഭാര്യയും സോഷ്യൽ മീഡിയ കണ്ടന്റ് ക്രിയേറ്ററുമായ ലക്ഷ്മി മേനോൻ ജോജു പറഞ്ഞ നടൻ ആരാണെന്ന തരത്തിലുള്ള സൂചനകൾ നൽകികൊണ്ട് ഇൻസ്റ്റാഗ്രാം സ്റ്റോറി പങ്കുവച്ചിരുന്നു. ജോജുവിനെ പിന്തുണച്ചുകൊണ്ട് ' ഇത് ആ പെൺകോന്തന്റെയും അവളുടെയും സ്ഥിരം പരിപാടിയാണ്, നമ്മൾ ഇതിനും മുകളിൽ അല്ലേ ചേട്ടാ' എന്നായിരുന്നു ലക്ഷ്മി തന്റെ ഇൻസ്റ്റഗ്രാം സ്റ്റോറിൽ കുറിച്ചത്. എന്നാൽ പങ്കുവച്ച് നിമിഷങ്ങൾക്കകം ലക്ഷ്മി തന്റെ സ്റ്റോറി ഡിലീറ്റ് ചെയ്യുകയുണ്ടായി.

ഇതിന് പിന്നാലെ റെഡിറ്റ്, എക്സ് അടക്കമുള്ള സമൂഹമാധ്യമങ്ങളിൽ ജോജു പറഞ്ഞ നടൻ ആരാണെന്ന തരത്തിലുള്ള ചർച്ചകളും സജീവമായി. കുഞ്ചാക്കോ ബോബൻ ആണ് ജോജു പറഞ്ഞ നടൻ എന്ന തരത്തിലായിരുന്നു റെഡിറ്റ് ചർച്ചകൾ. എന്നാൽ ജോജുവോ കുഞ്ചാക്കോ ബോബനോ ഇതുമായി ബന്ധപ്പെട്ട് പ്രതികരണങ്ങൾ ഒന്നും തന്നെ നടത്തിയിരുന്നില്ല. ഇപ്പോഴിതാ ജോജുവുമായി ബന്ധപ്പെടുത്തി തനിക്കെതിരെ ഉയരുന്ന ആരോപണങ്ങളിൽ പരോക്ഷമായി മറുപടി നൽകിയിരിക്കുകയാണ് കുഞ്ചാക്കോ ബോബൻ. റിപ്പോർട്ടർ ഫിലിംസിന് നൽകിയ അഭിമുഖത്തിലായിരുന്നു കുഞ്ചാക്കോ ബോബന്റെ പ്രതികരണം.

സിനിമയിൽ അഭിനയിച്ച രണ്ട് കുട്ടികൾ കുഞ്ചാക്കോ ബോബനോടൊപ്പമുള്ള സെറ്റിലെ നിമിഷങ്ങളെ പുകഴ്ത്തി പറഞ്ഞത് കേട്ടുവെന്നും, എങ്ങനെയായിരുന്നു അവരുമായുള്ള അനുഭവം എന്ന അവതാരകയുടെ ചോദ്യത്തിന് മറുപടി പറയുകയായിരുന്നു താരം. താൻ അവരുടെ ഇടയിൽ നല്ലപോലെ പിആർ വർക്ക് ചെയ്തിട്ടുണ്ടെന്നായിരുന്നു കുഞ്ചാക്കോ ബോബന്റെ മറുപടി. 'പിആറിന്റെ കാര്യത്തിൽ ചാക്കോച്ചനെ കഴിഞ്ഞേയുള്ളൂ ആരും എന്നാണ്' ഇതിന് പിന്നാലെ നടൻ സാബുമോന്റെ പ്രതികരണം. "ഓരോ സമയത്തും അതിനുള്ളത് അവർക്ക് (പിആർ ചെയ്യുന്നവർക്ക്) അങ്ങോട്ട് കൊടുക്കും, ഇപ്പോൾ തന്നെ പിആർ വർക്ക് ഓൺലൈനിൽ ആരംഭിച്ചിട്ടുണ്ട് " എന്നും സാബുമോൻ കൂട്ടിച്ചേർക്കുന്നുണ്ട്.

'എന്റെ പിന്നിലെ സ്ത്രീ ശക്തി, എന്റെ കരുത്ത് നീയാണ്'; ആരതി പൊടിയെ കുറിച്ച് റോബിൻ രാധാകൃഷ്ണൻ

Nithya G Robinson — Wed, 02 Sep 2026 19:01:22 +0530

ബിഗ് ബോസ് മലയാളം മുൻ താരം ഡോ. റോബിൻ രാധാകൃഷ്ണൻ തന്റെ ഭാര്യയും ഡിസൈനറുമായ ആരതി പൊടിയെക്കുറിച്ച് പങ്കുവെച്ച വാക്കുകളാണ് സോഷ്യൽ മീഡിയയിൽ ശ്രദ്ധനേടുന്നു. ജീവിതത്തിലെ പ്രതിസന്ധി ഘട്ടങ്ങളിൽ തനിക്ക് കരുത്തായി കൂടെ നിന്നതിന് ആരതിക്ക് നന്ദി പറയുകയും ചെയ്തിട്ടുണ്ട് റോബിൻ.

"ലോകം എന്റെ ശക്തി മാത്രമേ കാണുന്നുള്ളൂ, പക്ഷേ അതിന്റെ പിന്നിലുള്ള സ്ത്രീയെ എനിക്ക് മാത്രമേ അറിയൂ. എന്റെ കഷ്ടപ്പാടുകളിലും ബുദ്ധിമുട്ടുകളിലും നീ എന്നെ തനിച്ചാക്കിയില്ല. ഞാൻ പൂർണ്ണമായും തളർന്നുപോയപ്പോൾ എനിക്ക് കരുത്തായത് നീയാണ്. നീ എന്റെ ഭാര്യ മാത്രമല്ല, എന്റെ സമാധാനവും ഏറ്റവും വലിയ പിന്തുണയുമാണ്. ഏറ്റവും ആവശ്യമുള്ള സമയത്ത് കൂടെ നിന്നതിന് നന്ദി. ഐ ലവ് യു, പൊടി.", എന്നായിരുന്നു റോബിൻ രാധാകൃഷ്ണന്റെ വാക്കുകൾ. ഇതിന് ലവ് യു ടു എന്നായിരുന്നു ആരതിയുടെ മറുപടി. ആരതിയ്ക്ക് ഒപ്പമുള്ള മനോഹരമായൊരു ഫോട്ടോയും റോബിൻപങ്കുവച്ചിട്ടുണ്ട്.

ഏതാനും നാളുകൾക്ക് മുൻപ് ആയിരുന്നു റോബിന്റെ അമ്മയുടെ വിയോഗം. ഏറെ നാളായി അർബുദ രോഗബാധിതയായിരുന്നു. 2026 മാർച്ച് 25ന് അമ്മയ്ക്ക് സ്റ്റേജ് 4 എൻഡോമെട്രിയൽ കാർസിനോമ എന്ന കാൻസർ ഉണ്ടെന്ന് കണ്ടെത്തുകയായിരുന്നു. ധീരമായ പോരാട്ടത്തിനൊടുവിൽ, 2026 ജൂലൈ 3ന് പുലർച്ചെ ഒരു മണിയോടെ അമ്മ മരിക്കുകയായിരുന്നു. 'അമ്മയുടെ ശരീരത്തെ കീഴടക്കിയെങ്കിലും, അമ്മയുടെ കരുത്തിനെയോ സ്നേഹത്തെയോ കീഴടക്കാൻ അതിന് ഒരിക്കലും കഴിഞ്ഞില്ല. അമ്മ എന്നെന്നേക്കുമായി ഞങ്ങളുടെ മനസിൽ നിലകൊള്ളും. അമ്മയുടെ ഓർമ്മകൾ ഞങ്ങൾക്ക് വഴികാട്ടിയാവുകയും, ആ സ്നേഹം ജീവിതകാലം മുഴുവൻ ഞങ്ങളോടൊപ്പം ഉണ്ടാവുകയും ചെയ്യും', എന്നായിരുന്നു അന്ന് റോബിൻ സോഷ്യൽ മീഡിയയിൽ കുറിച്ചിരുന്നത്.

16 വർഷത്തെ കാത്തിരിപ്പിനൊടുവിൽ കിട്ടിയ സ്വപ്നക്കൂട്; കൊച്ചിൻ ഹനീഫയുടെ വീട്ടിലെത്തി മമ്മൂട്ടി

Nithya G Robinson — Sat, 01 Aug 2026 16:25:17 +0530

മലയാള സിനിമയിൽ ഒരിക്കലും പകരം വയ്ക്കാനില്ലാത്ത നടനാണ് കൊച്ചിൻ ഹനീഫ. സ്വന്തം വീടെന്ന കാലങ്ങളായുന്ന സ്വപ്നം ബാക്കിയാക്കിയായിരുന്നു അദ്ദേഹം കാലയവനികയ്ക്കുള്ളിൽ മറഞ്ഞത്. ആ സ്വപ്നം ഒടുവിൽ ജൂലൈ 26ന് യാഥാർത്ഥ്യമാകുകയും ചെയ്തു. 16 വർഷത്തെ വാടക വീട്ടിലെ താമസം അവസാനിപ്പിച്ച് നടന്റെ കുടുംബം സ്വന്തം വീട്ടിലേക്ക് താമസം മാറി. ഇപ്പോഴിതാ പ്രിയ സുഹൃത്തിന്റെ സ്വപ്നക്കൂട് കാണാനായി മമ്മൂട്ടി എത്തിയിരിക്കുകയാണ്.

ഭാര്യ സുൽഫത്തും നിർമാതാവ് ആന്റോ ജോസഫും മമ്മൂട്ടിക്കൊപ്പം ഉണ്ടായിരുന്നു. ഹനീഫയുടെ രണ്ട് ഇരട്ടക്കുട്ടികളെ ചേർത്തണച്ചും വീടെല്ലാം ചുറ്റി നടന്ന് കണ്ടും കുശലം പറഞ്ഞും ഏതാനും സമയം ചെലവഴിച്ച ശേഷമാണ് മമ്മൂട്ടി തിരികെ പോന്നത്. വെണ്ണലയിലെ അംബേദ്കർ റോഡിലാണ് ‘കൊച്ചിൻ ഹനീഫാസ് എ.ബി. മൻസിൽ’ സ്ഥിതി ചെയ്യുന്നത്. ഹനീഫയുടെ മരണ ശേഷം മമ്മൂട്ടി, ദിലീപ് അടക്കമുള്ളവര്‍ സഹായിക്കാന്‍ ഉണ്ടായിരുന്നുവെങ്കിലും സ്വന്തം വീട് തങ്ങളുടെ അധ്വാനം കൊണ്ട് വേണമെന്നത് വീട്ടുകാരുടെ ആഗ്രഹമായിരുന്നു. അത് യാഥാര്‍ത്ഥ്യമാകാന്‍ 16 വര്‍ഷം എടുത്തുവെന്ന് മാത്രം.

കൊച്ചിൻ ഹനീഫയുമായി വളരെ അടുത്ത ബന്ധമായിരുന്ന ആളായിരുന്നു മമ്മൂട്ടി. സിനിമയിലെ ഏറ്റവും വലിയ സൗഹൃദം. “ഇവർ എന്തുകൊണ്ട് സഹോദരൻമാരായി ജനിച്ചില്ല എന്ന് മാത്രമേ എനിക്ക് പറയാനുള്ളൂ. അത്രമാത്രം സ്നേഹം മമ്മൂക്കക്ക് ഹനീഫിക്കയോടുണ്ട്. അതിന്റെ ഇരട്ടി ഫനീഫിക്ക പ്രകടിപ്പിച്ചിരുന്നു. അതുകൊണ്ടാണ് അദ്ദേഹം മരിച്ചപ്പോൾ ഒരു കൊച്ചുകുഞ്ഞിനെ പോലെ മമ്മൂക്ക പൊട്ടിക്കരഞ്ഞത്. അവസാനം വരെ ആരോഗ്യസ്ഥിതി മോശമാണെന്ന് ഹനീഫ ഇക്ക ആരോടും പറഞ്ഞിരുന്നില്ല. അതും പറഞ്ഞായിരുന്നു മമ്മൂക്ക അന്ന് കരഞ്ഞത്. എന്നോടെങ്കിലും പറയാമായിരുന്നില്ലേ ഞാനെവിടെയെങ്കിലും കൊണ്ട് പോയി ചികിത്സിച്ചേനെയെന്ന്”, എന്നാണ് ഒരിക്കല്‍ മുകേഷ് ഇവരുടെ സൗഹൃദത്തെ കുറിച്ച് പറഞ്ഞത്.

'ചിലര്‍ ചിരിച്ചുകൊണ്ട് കഴുത്തറുക്കും, വി.ഡി സർ അങ്ങനെയല്ല'; മുഖ്യമന്ത്രിയെ കുറിച്ച് ധ്യാൻ ശ്രീനിവാസൻ

Nithya G Robinson — Sun, 02 Aug 2026 22:32:48 +0530

മലയാളികൾക്ക് ഏറെ പ്രിയങ്കരനായ നടനാണ് ധ്യാൻ ശ്രീനിവാസൻ. ഇന്റർവ്യൂ സ്റ്റാർ എന്ന് മലയാളികൾ ഓമനപ്പേരിട്ട് വിളിക്കുന്ന ധ്യാനിന്റെ വേദികളിലെ പ്രസംഗങ്ങൾ ഏറെ ശ്രദ്ധിക്കപ്പെടാറുണ്ട്. അടുത്തിടെ കേരളത്തിലെ മുഖ്യമന്ത്രിയായി താൻ അധികാരത്തിലേറുമ്പോൾ മുന്നിൽ നവ്യ ഉണ്ടാവണമെന്ന് പറഞ്ഞ ധ്യാനിന്റെ വാക്കുകൾ ഏറെ വൈറലായിരുന്നു. ഇപ്പോഴിതാ വീണ്ടും സിഎം പരാമാർശവുമായി ധ്യാൻ എത്തിയിരിക്കുകയാണ്. ഒപ്പം മുഖ്യമന്ത്രി വിഡി സതീശനെ കുറിച്ചും ധ്യാൻ സംസാരിക്കുന്നുണ്ട്.

'ഞാന്‍ സിഎം ആവണമെന്ന് പറഞ്ഞത് വെറുതെയാണ്. തമാശയ്ക്ക് പറഞ്ഞ കാര്യമാണ്. ഞാന്‍ സിഎം ആവണമെന്ന് പറഞ്ഞപ്പോള്‍ ഹൈബി ചേട്ടന്‍(ഹൈബി ഈഡൻ) എന്നെ നോക്കി ചിരിച്ചു. എനിക്ക് അദ്ദേഹത്തോട് പറയാനുള്ളത്. നിങ്ങള്‍ മുഖ്യമന്ത്രി ആവുമ്പോള്‍ ഞാന്‍ പ്രതിപക്ഷ നേതാവ് ആയിക്കോളാം. അതുകൊണ്ട് ടെന്‍ഷന്‍ വേണ്ട', എന്നായിരുന്നു ഒരു ജ്വല്ലറി ഉദ്ഘാടന വേദിയിൽ ധ്യാൻ പറ‍ഞ്ഞത്.

'നമ്മുടെ മുഖ്യമന്ത്രിയെ കുറിച്ച് രണ്ട് വാക്ക് പറഞ്ഞേ മതിയാവൂ. അദ്ദേഹം പ്രതിപക്ഷ നേതാവായിരുന്ന സമയത്ത് നമ്മള്‍ ഒരുമിച്ച് ഒരു വേദി പങ്കിട്ടിരുന്നു. മനസിന്‍റെ സൂചികയാണ് അല്ലെങ്കില്‍ മുഖത്തിന്‍റെ സൂചികയാണ് മനസ്. ചില ആള്‍ക്കാരുടെ മനസില്‍ ഉള്ളതെല്ലാം തന്നെ മുഖത്ത് വരും. മനസില്‍ എന്താണോ ഉള്ളത് അത് മുഖത്ത് കാണാം.

ദേഷ്യവും വിഷമവും എല്ലാം. ചില ആള്‍ക്കാര്‍ ചിരിച്ചുകൊണ്ട് കഴുത്തറുക്കും. അങ്ങനെ ഉള്ള ആള്‍ക്കാരെ നമ്മള്‍ കണ്ടിട്ടുണ്ടാവും. അങ്ങനെയുള്ളവരുണ്ട്. പക്ഷേ മനസില്‍ ഉള്ളതെല്ലാം തുറന്നുപറയുകയും അല്ലെങ്കില്‍ മനസിലുള്ളത് മുഖത്ത് കാണിക്കുന്ന ഞാന്‍ കണ്ട ചുരുക്കം ചില പേരില്‍ ഒരാളാണ് സിഎം വിഡി സതീശന്‍ സര്‍', എന്നും ധ്യാൻ ശ്രീനിവാസൻ കൂട്ടിച്ചേർത്തു.

യഷിനൊപ്പമുള്ള ഫോട്ടോയുമായി വേടൻ

Nithya G Robinson — Sun, 09 Aug 2026 16:31:27 +0530

നടൻ യഷിനൊപ്പമുള്ള ഫോട്ടോകൾ പങ്കിട്ട് റാപ്പർ വേടൻ. വേദയിലേക്ക് യഷാണ് വേടനെ കൈ കൊടുത്ത് കയറ്റുന്നത്. ശേഷം ഇരുവരും ആലിംഗനം ചെയ്യുന്ന വീഡിയോയുംവേടൻ പങ്കിട്ടിട്ടുണ്ട്. പിന്നാലെ ഇരുവരോടുമുള്ള സ്നേഹം പങ്കിട്ട് നിരവധിപേർ കമന്റുകൾ പങ്കിട്ടിട്ടുണ്ട്.

അതേസമയം, തെന്നിന്ത്യൻ സിനിമാസ്വാദകർ ഒന്നടങ്കം കാത്തിരിക്കുന്ന യഷ് ചിത്രം ടോക്സിക്കിന്റെ ട്രെയിലർ കഴിഞ്ഞ ദിവസം റിലീസ് ചെയ്തു. ആക്ഷനും ഇമോഷനും വയലൻസിനും പ്രാധാന്യമുള്ളൊരു സിനിമയാകും ഇതെന്നാണ് ട്രെയിലർ നൽകുന്ന സൂചന. ചിത്രത്തില്‍ ഇരട്ട വേഷത്തിലാകും യാഷെന്നും സൂചനയും ട്രെയിലർ നല്‍കുന്നുണ്ട്. ഓഗസ്റ്റ് 26ന് ചിത്രം ആഗോളതലത്തിൽ തിയേറ്ററുകളിൽ എത്തും.

ടോക്സിക് ലോകത്തെ ആദ്യമായി പരിചയപ്പെടുത്തുമ്പോൾ, യാഷ് സ്വയം പിന്നിലേക്ക് നീങ്ങി, ചിത്രത്തിലെ വനിതാ കഥാപാത്രങ്ങളായ കിയാര അദ്വാനി, നയൻതാര, ഹുമ ഖുറേഷി, രുക്മിണി വസന്ത്, താര സുതാര്യ എന്നിവരെ മുൻനിരയിലേക്കു കൊണ്ടുവന്നത് ശ്രദ്ധേയമായിരുന്നു. കഥയും കഥാപാത്രങ്ങളും മുൻതൂക്കം നൽകുന്ന, ആഖ്യാനമാണ് ടോക്സിക് എന്നതിന്റെ ആദ്യ സൂചന അതായിരുന്നു. ഇപ്പോൾ, ആ ലോകത്തിന്റെ കേന്ദ്ര ശക്തി അരങ്ങേറ്റം കുറിക്കുന്ന കഥാപാത്രമായി റായയും കടന്നുവരുമ്പോൾ ടോക്സിനെക്കുറിച്ചുള്ള ആരാധകരുടെ പ്രതീക്ഷകൾ പതിന്മടങ്ങു വർദ്ധിക്കുന്നു.

യാഷും ഗീതു മോഹൻദാസും ചേർന്ന് തിരക്കഥ രചിച്ച്, ഗീതു മോഹൻദാസ് സംവിധാനം ചെയ്യുന്ന ചിത്രം കന്നഡയിലും ഇംഗ്ലീഷിലും ഒരേസമയം ചിത്രീകരിച്ചിട്ടുണ്ട്. ഹിന്ദി, തെലുങ്ക്, തമിഴ്, മലയാളം ഉൾപ്പെടെ നിരവധി ഭാഷകളിൽ ഡബ്ബ് പതിപ്പുകൾ ഒരുക്കുന്ന ചിത്രം, ആഗോള പ്രേക്ഷകരെയാണ് ലക്ഷ്യമിടുന്നത്. സാങ്കേതികമായി മികച്ചൊരു ടീമും ചിത്രത്തിനുണ്ട്. ദേശീയ അവാർഡ് ജേതാവായ രാജീവ് രവി (ഛായാഗ്രഹണം), രവി ബസ്രൂർ (സംഗീതം), ഉജ്വൽ കുൽക്കർണി (എഡിറ്റിംഗ്), ടി.പി. അബിദ് (പ്രൊഡക്ഷൻ ഡിസൈൻ). ആക്ഷൻ രംഗങ്ങൾ ഹോളിവുഡ് ആക്ഷൻ ഡയറക്ടർ ജെ.ജെ. പെറി (ജോൺ വിക്ക്), ദേശീയ അവാർഡ് ജേതാക്കളായ അൻപറിവ് ഒപ്പം കേച ഖംഫാക്ഡി എന്നിവർ ചേർന്നാണ് ഒരുക്കുന്നത്. വെങ്കട് കെ. നാരായണയും യാഷും ചേർന്ന് KVN പ്രൊഡക്ഷൻസ്, മോൺസ്റ്റർ മൈൻഡ് ക്രിയേഷൻസ് എന്നീ ബാനറുകളിൽ നിർമ്മിക്കുന്ന ടോക്സിക്, പിആര്‍ഒ പ്രതീഷ് ശേഖർ ആണ്.

ജയസൂര്യയുടെ 'കത്തിമുന'യിൽ റോജിൻ ! 'ചതിക്കാത്ത ചന്തു'വിലെ കത്തി സീൻ ഓർമിപ്പിച്ച് കമന്റ് ബോക്സ്

Nithya G Robinson — Tue, 01 Sep 2026 16:35:31 +0530

മലയാള സിനിമാസ്വാദകർ കഴിഞ്ഞ കുറച്ച് വർഷങ്ങളായി കാത്തിരിക്കുന്ന സിനിമയാണ് കത്തനാർ. ഹോം എന്ന സൂപ്പർ ഹിറ്റ് ചിത്രത്തിന് ശേഷം റോജിൻ തോമസ് സംവിധാനം ചെയ്യുന്ന ചിത്രം മലയാള സിനിമ കണ്ട ഏറ്റവും വലിയ കാൻവാസിലാണ് ഒരുക്കിയിരിക്കുന്നതും. അടുത്തിടെ പുറത്തിറങ്ങിയ കത്തനാറിന്റെ ട്രെയിലർ ചെറുതല്ലാത്ത ആവേശം തന്നെ പ്രേക്ഷകർക്ക് സമ്മാനിച്ചിട്ടുണ്ട്. സിനിമ എന്നാകും തിയറ്ററിൽ എത്തുക എന്ന കാര്യത്തിൽ ഇതുവരെ തീരുമാനമാകാത്തത് ചെറുതല്ലാത്ത നിരാശയും സിനിമാസ്വാദകർക്കിടയിൽ ഉണ്ടായിട്ടുണ്ട്. തതവസരത്തിൽ ജയസൂര്യ പങ്കുവച്ചൊരു പോസ്റ്റ് ഏറെ വൈറൽ ആയിരിക്കുകയാണ്.

സംവിധായകൻ റോജിനൊപ്പമുള്ള ഫോട്ടോയാണ് ജയസൂര്യ പങ്കുവച്ചിരിക്കുന്നത്. റോജിന്റെ കഴുത്തിൽ കത്തിവച്ചുനിൽക്കുന്ന ജയസൂര്യയെ ഫോട്ടോയിൽ കാണാം. 'നീ കത്തനാർ ഇറക്കുന്നോ... അതോ ഞാൻ കത്തി ഇറക്കണോ.. ?', എന്നൊരു ക്യാപ്ഷനും ജയസൂര്യ നൽകിയിട്ടുണ്ട്. പോസ്റ്റ് പുറത്തുവന്നതിന് പിന്നാലെ കമന്റുകളും നിറഞ്ഞു. ചതിക്കാത്ത ചന്തു എന്ന ചിത്രത്തിൽ ജയസൂര്യയും കൃഷ്ണകുമാറും തമ്മിലുള്ള സംഘട്ടന രംഗത്തിൽ കത്തി കുത്തുന്ന സീനിനെ ഓർമിപ്പിക്കുന്നുവെന്നാണ് പലരും കമന്റ് ചെയ്തിട്ടുള്ളത്. ഒപ്പം സിനിമ കാണാനായുള്ള ആളുകളുടെ ആകാംക്ഷ നിറഞ്ഞ കമന്റുകളും കാണാം.

212 ദിവസവും 18 മാസവും കൊണ്ട് ചിത്രീകരിച്ച സിനിമയാണ് കത്തനാർ. മലയാളത്തിലെ ഏറ്റവും വലിയ മുതൽ മുടക്കുള്ള ചിത്രം നിർമിക്കുന്നത് ഗോകുലം മൂവീസിന്റെ ബാനറിൽ ഗോകുലം ഗോപാലനാണ്. 75 കോടിയാണ് ബജറ്റെന്നാണ് റിപ്പോർട്ടുകൾ. മലയാളം, ഹിന്ദി, തമിഴ്, തെലുങ്ക്, കന്നഡ, ഇംഗ്ലിഷ്, ബംഗാളി, ചൈനീസ്, ഫ്രഞ്ച്, കൊറിയൻ, ഇറ്റാലിയൻ, റഷ്യൻ, ഇൻഡോനേഷ്യൻ, ജാപ്പനീസ്, ജർമൻ തട്അങ്ങീ 15 ഭാഷകളിലാകും സിനിമ റിലീസ് ചെയ്യുക. ചിത്രം പോസ്റ്റ് പ്രൊഡക്ഷൻ സ്റ്റേജിലാണെന്നും വൈകാതെ സിനിമ റിലീസ് ചെയ്യുമെന്നും കഴിഞ്ഞ ദിവസം ഐഡിയ സ്റ്റാർ സിംഗർ സീസൺ 10 ഫിനാലെയിൽ വച്ച് ജയസൂര്യ പറഞ്ഞിരുന്നു.

'ഞങ്ങടെ അങ്കിളാ..'; ചില ആലിംഗനങ്ങൾ വാക്കുകൾക്കതീതം, നിഷ്കളങ്ക സ്നേഹത്തിൽ കണ്ണുനിറഞ്ഞ് ചാക്കോച്ചൻ

Nithya G Robinson — Mon, 03 Aug 2026 11:51:56 +0530

അനിയത്തി പ്രാവ് എന്ന ചിത്രത്തിലൂടെ വെള്ളിത്തിരയിൽ എത്തി ഇന്ന് മലയാള സിനിമയിൽ ഒഴിച്ചുകൂടാനാകാത്ത നടനായി മുൻനിരയിൽ തന്നെ നിൽക്കുന്ന താരമാണ് കുഞ്ചാക്കോ ബോബൻ. ഒരുകാലത്ത് മലയാളത്തിന്റെ ചോക്ലേറ്റ് ഹീറോ ആയിരുന്ന കുഞ്ചാക്കോ, തനിക്ക് ക്യാരക്ടർ റോളുകളും നന്നായി വഴങ്ങുമെന്ന് ഇതിനകം തെളിയിച്ചു കഴിഞ്ഞു. ഉന്മാദം എന്ന സിനിമയാണ് ചാക്കോച്ചന്റേതായി ഏറ്റവും ഒടുവിൽ തിയറ്റിൽ എത്തിയ ചിത്രം. സിനിമ തിയറ്ററുകളിൽ മുന്നേറുന്നതിനിടെ കുഞ്ചാക്കോയും കെവിൻ എന്ന കൊച്ചുമിടുക്കനും തമ്മിലുള്ള വീഡിയോകൾ സോഷ്യൽ മീഡിയയിൽ വ്യാപകമായി പ്രചരിക്കുകയാണ്.

ലോകത്തിലെ ഏറ്റവും മായമില്ലാത്ത, കാപട്യമില്ലാത്ത ഒന്നാണ് കുട്ടികളുടെ സ്നേഹം. അത്രമേൽ ആർദ്രമായ ഒരു സ്നേഹമായിരുന്നു വീഡിയോയിൽ കാണാൻ സാധിച്ചത്. ഒപ്പറേഷൻ തൂഫാനുമായി ബന്ധപ്പെട്ട് ആലപ്പുഴയിലെ ലിയോ തേർട്ടീന്ത് സ്കൂളിൽ എത്തിയതായിരുന്നു കുഞ്ചാക്കോ ബോബൻ. വേദിയിൽ വച്ച് കെവിനാണ് അദ്ദേഹത്തിന് പൂവ് കൊടുത്ത് സ്വാഗതം ചെയ്തത്. ഒപ്പം അദ്ദേഹത്തെ കെട്ടിപിടിക്കുകയും ചെയ്തു.

ശേഷം വേദിയ്ക്ക് മുന്നിലിരുന്ന കുഞ്ചാക്കോയുടെ അടുത്ത് എത്തിയ കെവിൻ, കെട്ടിപ്പിടിക്കും ഉമ്മകൾ വച്ചും നടനോടുള്ള തന്റെ സ്നേഹം പ്രകടിപ്പിച്ചു. ഇത് ഞങ്ങടെ അങ്കിളാ.. എന്ന് എല്ലാവരോടുമായി ഉറക്കെ കെവിൻ പറയുന്നുമുണ്ട്. കൊച്ചു മിടുക്കന്റെ നിഷ്കളങ്ക സ്നേഹത്തിന് മുന്നിൽ ചാക്കോച്ചത് സങ്കടം സഹിക്കാൻ പറ്റിയില്ല. കുറച്ചുനേരത്തേക്ക് അദ്ദേഹം സൈലൻറ് ആയി. പിന്നാലെ കണ്ണുനിറഞ്ഞ കുഞ്ചാക്കോയേയും നമുക്ക് കാണാനാകും.

View this post on Instagram

A post shared by KUNCHACKO BOBAN (@kunchacko_online_editor_123)

വീഡിയോ പുറത്തുവന്നതിന് പിന്നാലെ നിരവധി പേരാണ് സ്നേഹ കമന്റുകളുമായി രംഗത്ത് എത്തിയത്. "ചാക്കോച്ചൻ കരഞ്ഞപ്പോൾ ഞാനും കരഞ്ഞു, കാലം എത്ര മാറിയാലും ഇപ്പോഴും നന്മയുള്ള ആളുകള്‍ ഉണ്ടല്ലോ, ഇതാണ് സത്യമായ സ്നേഹം, പാവം മോൻ അവന്റെ ഉള്ളിൽ ഉള്ളതാണ് പുറത്ത് വന്നത്, ഓരോ തവണ കാണുമ്പോഴും മനസ്സിൽ ഒരു വിങ്ങൽ, അറിയാതെ കണ്ണ് നിറയുന്നു, ചാക്കോച്ചന്റെ ആ കരച്ചിൽ കാണുമ്പോൾ ആരായാലും കരഞ്ഞു പോക്കും. ചങ്ക് പോലെ കാണുന്ന കുഞ്ഞുങ്ങളുടെ സ്നേഹം കാണുമ്പോൾ, നമ്മക്കും കണ്ണ് നിറഞ്ഞു പോക്കും, ഏത് അവാർഡിനെക്കാളും വലുത്", എന്നിങ്ങനെ പോകുന്നു കമന്റുകൾ.

'സെല്‍ഫി എങ്ങനെയെടുക്കുമെന്ന് ഫോണുകള്‍ അറിയുന്നതിനും മുന്‍പേ'; മമ്മൂട്ടിയുടെ 17 വര്‍ഷം മുന്‍പത്തെ സെല്‍ഫി പങ്കുവച്ച് ആഷിക് അബു

Web Desk — Sat, 01 Aug 2026 13:22:35 +0530

ടെക്നോളജിയിലെ പുതുമകളോട് ഏറെ താല്‍പര്യം സൂക്ഷിക്കുന്ന ആളാണ് മമ്മൂട്ടി. പുതിയ ക്യാമറകളും മൊബൈല്‍ ഫോണുകളുമൊക്കെ വിപണിയില്‍ എത്തിയാലുടന്‍ അദ്ദേഹത്തിന്‍റെ ശേഖരത്തിലേക്ക് എത്താറുണ്ട്. പരിചയക്കാര്‍ക്ക് അവയെക്കുറിച്ച് വിശദീകരിക്കാനും അദ്ദേഹത്തിന് ഏറെയിഷ്ടമാണ്. ഇപ്പോഴിതാ അദ്ദേഹം എടുത്ത പഴയൊരു സെല്‍ഫി പങ്കുവച്ചിരിക്കുകയാണ് സംവിധായകന്‍ ആഷിക് അബു. മമ്മൂട്ടി നായകനായ ഡാഡി കൂള്‍ എന്ന ചിത്രത്തിലൂടെയായിരുന്നു ആഷിക് അബുവിന്‍റെ സംവിധാന അരങ്ങേറ്റം. കൊച്ചിയും ഹോങ്കോങുമായിരുന്നു ചിത്രത്തിന്‍റെ പ്രധാന ലൊക്കേഷനുകള്‍. ഹോങ്കോങ് ലൊക്കേഷനില്‍ വച്ച് എടുത്തതെന്ന് കരുതുന്ന മമ്മൂട്ടിയുടെ സെല്‍ഫിയാണ് ആഷിക് അബു തന്‍റെ സോഷ്യല്‍ മീഡിയ അക്കൗണ്ടിലൂടെ പങ്കുവച്ചിരിക്കുന്നത്. ചിത്രത്തില്‍ മമ്മൂട്ടി അവതരിപ്പിച്ച സിഐ ആന്‍റണി സൈമണിന്‍റെ മകനായി അഭിനയിച്ച മാസ്റ്റര്‍ ധനഞ്ജയിനെയും ഈ സെല്‍ഫിയില്‍ കാണാം.

സെല്‍ഫികള്‍ എങ്ങനെ എടുക്കുമെന്ന് ഫോണുകള്‍ മനസിലാക്കുന്നതിനും മുന്‍പേ. 2009: ഫ്രണ്ട് ക്യാമറയോ പ്രിവ്യൂവോ ഇല്ലാതിരുന്ന കാലം, ചിത്രത്തിനൊപ്പം ആഷിക് അബു കുറിച്ചു. അതേസമയം ഡാഡി കൂള്‍ കൂടാതെ മറ്റൊരു ചിത്രത്തിന് വേണ്ടി മാത്രമേ ആഷിക് അബുവും മമ്മൂട്ടിയും ഒരുമിച്ച് പ്രവര്‍ത്തിച്ചിട്ടുള്ളൂ. 2014 ല്‍ പുറത്തെത്തിയ ഗ്യാങ്സ്റ്റര്‍ ആയിരുന്നു അത്. എന്നാല്‍ ബോക്സ് ഓഫീസില്‍ വന്‍ പരാജയമായിരുന്നു ഈ ചിത്രം. റൈഫിള്‍ ക്ലബ്ബ് ആണ് ആഷിക് അബുവിന്‍റേതായി അവസാനം പ്രദര്‍ശനത്തിനെത്തിയ ചിത്രം. ആക്ഷന്‍ കോമഡി ഗണത്തില്‍ പെടുന്ന ചിത്രത്തിന്‍റെ റിലീസ് 2024 ഡിസംബറില്‍ ആയിരുന്നു.

ദിലീഷ് പോത്തന്‍, വാണി വിശ്വനാഥ്, വിജയരാഘവന്‍, വിനീത് കുമാര്‍ തുടങ്ങിയവര്‍ക്കൊപ്പം ബോളിവുഡ് സംവിധായകന്‍ അനുരാഗ് കശ്യപും ചിത്രത്തില്‍ പ്രധാന കഥാപാത്രങ്ങളെ അവതരിപ്പിച്ചിരുന്നു. സംവിധാനത്തിന് പുറമെ ചിത്രത്തിന്‍റെ ഛായാഗ്രഹണം നിര്‍വ്വഹിച്ചതും അനുരാഗ് കശ്യപ് ആയിരുന്നു.

അതേസമയം മഹേഷ് നാരായണന്‍ സംവിധാനം ചെയ്ത പേട്രിയറ്റ് ആണ് മമ്മൂട്ടിയുടേതായി അവസാനം പ്രദര്‍ശനത്തിനെത്തിയത്. മോഹന്‍ലാല്‍, ഫഹദ് ഫാസില്‍, നയന്‍താര തുടങ്ങി വലിയ താരനിരയും ഈ ചിത്രത്തില്‍ ഉണ്ടായിരുന്നു. മലയാളത്തില്‍ അടൂര്‍ ഗോപാലകൃഷ്ണന്‍റെ പദയാത്ര, തമിഴില്‍ രാജ്കുമാര്‍ പെരിയസാമി സംവിധാനം ചെയ്യുന്ന ഓം എന്നിവയാണ് മമ്മൂട്ടിയുടെ വരാനിരിക്കുന്ന റിലീസുകള്‍. അമരന്‍ അടക്കമുള്ള ചിത്രങ്ങള്‍ ഒരുക്കിയ രാജ്കുമാറിന്‍റെ ഓമില്‍ ധനുഷ് ആണ് നായകന്‍. മമ്മൂട്ടിയുടേത് പ്രധാന കഥാപാത്രമാണ്.

'ഇത് ചെയ്തവന് ഒരു കുതിരപവൻ', ബിഗ് സ്ക്രീനിൽ കാണാനാകാത്ത 'ഇടയ കന്യക', എ ഐ വീഡിയോ വൈറൽ

Nithya G Robinson — Fri, 04 Sep 2026 09:15:00 +0530

നിവിൻ പോളി നായകനായി എത്തിയ ‘ബെത്‌ലഹേം കുടുംബ യൂണിറ്റ്’ ആണ് സിനിമാ ലോകത്തെ പുതിയ ചർച്ച. റിലീസ് ദിനത്തെ ആദ്യത്തെ ഷോ മുതൽ പ്രേക്ഷക സ്വീകാര്യതയും മൗത്ത് പബ്ലിസിറ്റിയും ലഭിച്ച ചിത്രം ബോക്സ് ഓഫീസിൽ വൻ നേട്ടം കൊയ്യുകയാണ്. റിപ്പോർട്ടുകൾ പ്രകാരം കേരളത്തിൽ മാത്രം 100 കോടി വൈകാതെ ചിത്രം തൊടും. ബെത്‌ലഹേം കുടുംബ യൂണിറ്റ് റിലീസ് ചെയ്ത ദിവസം മുതൽ പുനർജന്മം ലഭിച്ചൊരു പാട്ടാണ് 'യവന കഥയിൽ..' എന്ന ഗാനം. 30 വർഷങ്ങൾക്ക് മുൻപ് റിലീസ് ചെയ്യാതെ പോയ അന്ന എന്ന ചിത്രത്തിലെ ഈ ഗാനം ഇപ്പോൾ സോഷ്യൽ മീഡിയ റീലുകളിലെ താരമാണ്.

തതവസരത്തിൽ ബിഗ് സ്ക്രീനിൽ കാണാനാകാതെ പോയ 'യവന കഥയിലി'ന്റെ ദൃശ്യാവിഷ്കാരം സോഷ്യൽ മീഡിയയിൽ ശ്രദ്ധനേടിയിരിക്കുകയാണ്. എഐ ഉപയോഗിച്ചാണ് വീഡിയോ തയ്യാറാക്കിയിരിക്കുന്നത്. അന്നയിൽ നടനായിരുന്ന അരവിന്ദ് സ്വാമിയാണ് ഗാനരംഗത്തും ഉള്ളത്. നായികയായി രേവതിയെ ആണ് ഉൾപ്പെടുത്തിയിരിക്കുന്നത്. മനോഹരമായ വിഷ്വൽസും മേക്കിങ്ങും ആയെത്തിയ എഐ വീഡിയോ മലയാളികൾ ഒന്നടങ്കം ഏറ്റെടുത്തു കഴിഞ്ഞു. രേവതിയ്ക്ക് പകരം മീനയെ ഉൾപ്പെടുത്തിയും വീഡിയോകൾ വന്നിട്ടുണ്ട്. 'ഇത് ചെയ്തവന് ഒരു കുതിരപവൻ' എന്നാണ് പ്രശംസാ കമന്റുകളിൽ മലയാളികൾ കുറിച്ചിരിക്കുന്നത്.

ഔസേപ്പച്ചൻ സംഗീതം നൽകിയ ഗാനമാണ് യവന കഥയിൽ. ഷിബു ചക്രവർത്തിയായിരുന്നു രചന. 'യഥാര്‍ത്ഥത്തില്‍ ഞങ്ങള്‍ ഉണ്ടാക്കിയ പാട്ട് ഇതായിരുന്നില്ല. ഒരു ലവ് സോംഗ് വേണം. വേറൊരു ട്യൂൺ ആയിരുന്നു ഔസേപ്പച്ചന്‍ ആദ്യം ഇട്ടത്. അതിന് ഞാന്‍ എഴുതിയത് 'കറുകപ്പുല്‍ മേട്ടിലെ ഇടയ പെണ്‍കൊടിയേ..' എന്നാണ്. എല്ലാവര്‍ക്കും ഇഷ്ടമായെങ്കിലും എനിക്കൊരു തൃപ്തിക്കുറവ് ഉണ്ടായി. പിന്നീട് അത് മാറ്റി യവന കഥയിൽ വരികയായിരുന്നു', എന്നായിരുന്നു പാട്ടിനെ കുറിച്ച് ഷിബു ചക്രവർത്തി പറഞ്ഞത്.

'58ൽ നിന്നും 75 കിലോയിലേക്ക്, മൂഡ് സ്വിങ്സിന്‍റെയും നിരാശയുടെയും ദിനങ്ങൾ'; ട്രാൻസ്ഫോമേഷനെ കുറിച്ച് നിമിഷ

Nithya G Robinson — Sun, 30 Aug 2026 13:08:43 +0530

കഥാപാത്രങ്ങൾക്കായി ശരീരത്തിൽ ട്രാൻസ്ഫോർമേഷൻസ് നടത്തുന്ന താരങ്ങളുടെ വാർത്തകൾ പലപ്പോഴും പുറത്തുവന്നിട്ടുണ്ട്. അത്തരത്തിലൊരു ട്രാൻസ്ഫോർമേഷൻ നടത്തിയിരിക്കുകയാണ് നടി നിമിഷ സജയൻ. ‘ബബിത സിങ് റിപ്പോർട്ടിങ്’ എന്ന ഹിന്ദി ചിത്രത്തിനുവേണ്ടി നിമിഷ ശരീരഭാരം കൂട്ടുകയായിരുന്നു. 14 കിലോയാണ് താരം കൂട്ടിയത്. സിനിമയ്ക്ക് ശേഷം ശരീരഭാരം പഴയത് പോലെ ആക്കുകയും ചെയ്തിട്ടുണ്ട്. ഈ ഫോട്ടോകളും നിമിഷ സോഷ്യൽ മീഡിയയിൽ പങ്കുവച്ചിട്ടുണ്ട്.

നിമിഷ സജയന്റെ വാക്കുകൾ ഇങ്ങനെ

കഥാപാത്രത്തിനായി ഏകദേശം 14 കിലോയോളമാണ് ഞാൻ കൂട്ടിയത് (58 കിലോയിൽ നിന്നും 72 കിലോയിലേക്ക്). എന്നാൽ ഇതിനുശേഷമുള്ള ശരീരഭാരം കുറയ്ക്കൽ യാത്ര തികച്ചും വ്യത്യസ്തമായ മറ്റൊരു കഥയായിരുന്നു. ആദ്യത്തെ 10 ദിവസങ്ങൾ ഏറ്റവും കഠിനമേറിയതായിരുന്നു. ഉറക്കമില്ലായ്മ, മൂഡ് സ്വിങ്സ്, ക്ഷീണം, നിരാശ... എനിക്കിത് ചെയ്യാൻ കഴിയില്ലെന്ന് ആത്മാർത്ഥമായി തോന്നിയ ഒരുപാട് നിമിഷങ്ങൾ. എനിക്ക് ഇനി ഇത് ചെയ്യാൻ കഴിയില്ലെന്ന് പറഞ്ഞ് ട്രെയിനറുടെ മുന്നിലിരുന്ന് ഞാൻ പൊട്ടിക്കരഞ്ഞ ദിവസങ്ങൾ ഉണ്ടായിരുന്നു. അലി ഷിഫാസ്(ട്രെയിനർ) ഇല്ലായിരുന്നെങ്കിൽ ഞാനീ ശ്രമം എപ്പോഴേ ഉപേക്ഷിച്ചേനെ. ഈ യാത്രയിലുടനീളം നിങ്ങൾ എനിക്ക് താങ്ങായി നിന്നു. എനിക്ക് അധിക സമ്മർദ്ദം തോന്നിയപ്പോൾ നിങ്ങൾ എന്നെ മുന്നോട്ട് നയിച്ചു, ഉപേക്ഷിക്കണമെന്ന് ഞാൻ ആഗ്രഹിച്ചപ്പോൾ എന്നെ പ്രോത്സാഹിപ്പിച്ചു, ഈ ഉദ്യമത്തിൽ ക്ഷമയോടെ വിശ്വസിക്കാൻ ‍എന്നെ ഓർമിപ്പിച്ചു.

എന്റെ മോശം ദിവസങ്ങളിൽ നിങ്ങൾ എന്നെ ഒരിക്കലും കുറ്റപ്പെടുത്തുകയോ ബുദ്ധിമുട്ടുകൾ നേരിട്ടതിന് കുറ്റബോധം തോന്നിപ്പിക്കുകയോ ചെയ്തില്ല. പകരം എല്ലാ ദിവസവും എനിക്ക് പിന്തുണയുമായി ഒപ്പമുണ്ടായിരുന്നു. കടുത്ത നിരാശയും ക്ഷീണവും കാരണം എല്ലാം ഉപേക്ഷിക്കാൻ ഞാൻ തയ്യാറായ ദിവസങ്ങളുണ്ടായിരുന്നു. എന്നാൽ എങ്ങനെയെങ്കിലും, അടുത്ത ദിവസം വീണ്ടും വരാനും പോരാടാനും നിങ്ങൾ എന്നെ പ്രേരിപ്പിച്ചു. തിരിഞ്ഞുനോക്കുമ്പോൾ ശരീരഭാരം കുറയ്ക്കുന്നത് മാത്രമായിരുന്നില്ല ഈ യാത്ര. ഇത് ക്ഷമയെക്കുറിച്ചും, വിശ്വാസത്തെക്കുറിച്ചും, അതിലുപരിയായി ശരിയായ ഒരു വ്യക്തി ഒപ്പമുണ്ടാകുന്നതിനെക്കുറിച്ചുമുള്ള പാഠമായിരുന്നു. നിങ്ങൾ എന്റെ പോരാട്ടം വളരെ എളുപ്പമാക്കി. എന്റെ ഏറ്റവും നല്ല പരിശീലകനും എന്റെ ഏറ്റവും വലിയ ചിയർ ലീഡറും എന്റെ പിന്തുണാ സംവിധാനവും നിങ്ങളാണ്. ഞാൻ എന്നിൽ വിശ്വസിക്കാതിരുന്ന ദിവസങ്ങളിൽ പോലും എന്നിൽ വിശ്വസിച്ചതിന് ഷിഫുക്കയ്ക്ക് നന്ദി. നിങ്ങൾ ഇല്ലാതെ ഇത് ചെയ്യാൻ കഴിയുമായിരുന്നില്ല.

'കൂടെ ഉണ്ടാവും..', മമ്മൂക്കയുടെ ജീവിതത്തിലെ ഏറ്റവും വലിയ ഭാഗ്യം, അതവർ തന്നെയാണ്'- വൈറൽ

Nithya G Robinson — Mon, 03 Aug 2026 12:44:11 +0530

മലയാളത്തിന്റെ പ്രിയ താരമാണ് മമ്മൂട്ടി. കാലങ്ങളായുള്ള അഭിനയ ജീവിതത്തിൽ ഒട്ടനവധി വ്യത്യസ്ത വേഷങ്ങളിൽ എത്തി മലയാളികളെ ഞെട്ടിച്ച മമ്മൂട്ടിയുടെ ഏറ്റവും വലിയ പിന്തുണ ഭാര്യ സുൽഫത്താണ്. എന്തിനും ഏതിനും മമ്മൂട്ടിയുടെ നിഴലായി കൂടെ നടക്കുന്ന സുൽഫത്തിനെ കുറിച്ച് കൊച്ചിൻ ഹനീഫയുടെ ഭാര്യാസഹോദരൻ ഫിറോസ് മാളിയക്കൽ പറഞ്ഞ വാക്കുകൾ ഇപ്പോൾ ശ്രദ്ധനേടുകയാണ്. 16 വർഷത്തെ വാടക വീട്ടിലെ ജീവിതത്തിന് ശേഷം കൊച്ചിൻ ഹനീഫയുടെ കുടുംബം കഴിഞ്ഞ മാസം സ്വന്തം വീട്ടിലേക്ക് താമസം മാറിയിരുന്നു. മമ്മൂട്ടിയും സുൽഫത്തും വീട് സന്ദർശനത്തിനും എത്തി. ഇതേകുറിച്ചാണ് ഫിറോസ് പറയുന്നത്.

ഫിറോസ് മാളിയക്കലിന്റെ വാക്കുകൾ ഇങ്ങനെ

കൊച്ചിന്‍ ഹനീഫയുടെ പുതിയ വീട് സന്ദര്‍ശിച്ച മമ്മൂക്കയും കുടുംബവും. എല്ലാവരും മമ്മൂക്കയെ ഫോക്കസ് ചെയ്തപ്പോള്‍ എന്‍റെ ശ്രദ്ധപോയത് മറ്റൊരു വ്യക്തിയിലേക്കാണ്. ഇന്ത്യയിലെ മെഗാ സ്റ്റാര്‍, ഇന്ത്യയിലെ മോസ്റ്റ് ഹാന്‍സം ഹീറോയുടെ ഭാര്യ. നിഴല്‍ പോലെ മമ്മൂക്കയുടെ കൂടെ നടക്കുന്ന, അവരുടെ എളിമ, സിമ്പ്ലിസിറ്റി, വസ്ത്രധാരണ, സംസാരം, പരിചരണം ഒന്നും പറയാന്‍ വാക്കുകളില്ല. എന്നെ കണ്ട ഉടന്‍ തന്നെ പെങ്ങളെ ചേര്‍ത്ത് പിടിക്കണമെന്ന് പറഞ്ഞു. മമ്മൂക്ക കുട്ടികളുമായി ഫോട്ടോ എടുക്കുന്ന സമയത്ത് ഞാനാണ് വീഡിയോ എടുത്തത്. അറിയാതെ അവരിലേക്ക് പോയി. കാരണം മക്കളേ ഒന്നുകൂടി ചേര്‍ത്ത് പിടിക്കൂവെന്ന് അവര്‍ പറയുന്നുണ്ടായിരുന്നു. മമ്മൂക്ക സെല്‍ഫി എടുക്കുന്ന സമയത്ത് ഓടി വന്ന് മക്കളെ കെട്ടിപ്പിടിച്ചു. പോകുന്ന സമയത്ത് സമ്മാനങ്ങള്‍ കൊടുത്തു. എന്‍റെ പെങ്ങളോട് ആശ്വാസത്തോടെ പറഞ്ഞു 'കൂടെ ഉണ്ടാവും ഞാനും മമ്മൂക്കയും'.

ഇറങ്ങുന്ന സമയത്ത് ആന്‍റോ അറിയാതെ ഭാഭി എന്ന് വിളിച്ചപ്പോള്‍ അറിയാതെ എന്‍റെ ഉള്ളും വിളിച്ച് പോയി 'ഭാഭി ശ്രദ്ധിച്ച് ഇറങ്ങണേ' എന്ന്. മമ്മൂക്ക ഒരു അഭിമുഖത്തില്‍ പറഞ്ഞിട്ടുണ്ടായിരുന്നു അമ്മയെ പോലെ തന്നെ നമ്മുടെ ഭാര്യയേയും ബഹുമാനിക്കണം, സ്നേഹിക്കണം എന്ന്. ഭാര്യ ആണ് പിന്നീട് അമ്മയാകുന്നത് എന്ന്. എന്‍റെ ഏറ്റവും ഇഷ്ടപ്പെട്ട, സുന്ദരിയായ പെണ്ണ് അതെന്‍റെ ഭാര്യ ആണെന്നും മമ്മൂക്ക പറഞ്ഞിരുന്നു. തീര്‍ച്ചയായും അവരുടെ സ്നേഹവും കെയറും സന്തോഷവും കണ്ട സമയത്ത് മമ്മൂക്കയുടെ ഭാഗ്യം അവര്‍ തന്നെയാണ് എന്ന് മനസിലായി. രണ്ട് പേര്‍ക്കും ദീര്‍ഘായുസ് നേരുന്നു.

ഒടുവിലത് സംഭവിച്ചു! 'ഹാപ്പി ബർത്ത് ഡേ ചാലു'; മമ്മൂട്ടിയുടെ പോസ്റ്റ് വൈറൽ, ഫോൺ ദുൽഖറിന്റേലെന്ന് കമന്റുകൾ

Nithya G Robinson — Tue, 28 Jul 2026 17:12:58 +0530

ഏറെ കാലമായി മലയാള സിനിമയിൽ നിറഞ്ഞു നിൽക്കുന്ന താരമാണ് നടൻ മമ്മൂട്ടി. തോണിക്കാരനായി എത്തി പിന്നീട് മലയാള സിനിമയുടെ നെടുംതൂണുകളിൽ ഒരാളായി മാറിയ മമ്മൂട്ടിയുടെ സോഷ്യൽ മീഡിയ പോസ്റ്റുകൾ എപ്പോഴും ഏറെ വൈറലാകാറുണ്ട്. പ്രത്യേകിച്ച് ക്ലാസി സ്റ്റൈലിഷ് ലുക്കിലുള്ള അദ്ദേഹത്തിന്റെ ഫോട്ടോകൾ. അത്തരത്തിൽ മമ്മൂട്ടി പങ്കിട്ടൊരു പോസ്റ്റാണ് കണ്ണടച്ച് തുറക്കുന്ന വേഗത്തിൽ സോഷ്യൽ മീഡിയയിൽ വൈറലായി മാറിയിരിക്കുന്നത്.

മകൻ ദുൽഖർ സൽമാന് പിറന്നാൾ ആശംസിച്ച് കൊണ്ടുള്ളതാണ് ഫോട്ടോ. 'ഹാപ്പി ബര്‍ത്ത് ഡേ ചാലു' എന്നാണ് ക്യാപ്ഷന്‍. ഇതിലെ ഏറ്റവും വലിയ കൗതുകം എന്തെന്നാൽ ഇതാദ്യമായിട്ടാണ് ദുൽഖറിന്റെ പിറന്നാളിന് മമ്മൂട്ടി ഒരു പോസ്റ്റിടുന്നത്. ദുൽഖർ സിനിമയിൽ എത്തിയ നാളുമുതൽ മകന്റെ സിനിമയെ പ്രമോട്ട് ചെയ്യുകയോ ഫോട്ടോകൾ പങ്കിടുകയോ മമ്മൂട്ടി ചെയ്തിരുന്നില്ല. അതുകൊണ്ട് തന്നെ ഈ പോസ്റ്റ് വളരെ കൗതുകത്തോടെയാണ് ആരാധകരും മലയാളികളും ഏറ്റെടുത്തിരിക്കുന്നത്. നിരവധി താരങ്ങളാണ് പോസ്റ്റിന് താഴെ ആശംസകൾ അറിയിച്ച് രംഗത്ത് എത്തിയത്.

മമ്മൂട്ടിയുടെ ഫോൺ ദുൽഖറിന്റെ കയ്യിലാണോ എന്ന് സംശയം പ്രകടിപ്പിക്കുന്നവരെയാണ് പോസ്റ്റിന് താഴെ കാണാൻ സാധിക്കുക. "ഇത് ഡിക്യൂ തന്നെ ഇട്ടതാണോ എന്നൊരു സംശയം, വീണ്ടും അച്ഛന്റെ ഫോൺ മകൻ അടിച്ചു മാറ്റി, ഇത് കൊള്ളാലോ പുതിയ ആചാരങ്ങളൊക്കെ, ഫ്രെയിമിൻ ആരൊക്കെ ഉണ്ടെങ്കിലും നമ്മുടെ കണ്ണ് നേരെ പോകുന്നത് മമ്മൂക്കയിലേക്ക്, നിങ്ങൾ ഈ സൈസ് എടുക്കാത്തതാണല്ലോ ഇക്കാ, ചാർലിയും ചേട്ടൻ ബിലാലും, പിറന്നാൾ ആശംസ പോസ്റ്റ് ദുൽഖർ തന്നെ പോസ്റ്റിയതായിരിക്കാനുള്ള സാധ്യതയും തള്ളിക്കളയാനാവില്ല, ഇക്കയുടെ ഫോൺ അടിച്ചു മാറ്റി, പിറന്നാൾ ആശംസകൾ DQ... പക്ഷെ അടാർ ലുക്കിൽ ഇവിടെയും മമ്മൂക്ക സ്കോർ ചെയ്തു", എന്നിങ്ങനെ പോകുന്നു കമന്റുകൾ.

9 വയസ് പ്രായവ്യത്യാസം, മൃണാൾ ഠാക്കൂറും യശ്വസി ജെയ്‌സ്വാളും പ്രണയത്തിലോ?; വൈറലായി കഫേയിൽ നിന്നുള്ള വീഡിയോ

Web Desk — Tue, 28 Jul 2026 09:13:50 +0530

അടുത്തിടെ തെന്നിന്ത്യൻ സൂപ്പർ താരം ധനുഷുമായുള്ള പ്രണയ വാർത്തകളിൽ നിറഞ്ഞുനിന്ന വ്യക്തിയായിരുന്നു ബോളിവുഡ് താരം മൃണാൾ ഠാക്കൂർ. ഒരിടയ്ക്ക് ധനുഷും മൃണാളും വിവാഹം കഴിക്കാക്കാൻ പോവുകയാണെന്ന തരത്തിലുള്ള വാർത്തകൾ വരെ ബോളിവുഡ് മാധ്യമങ്ങൾ റിപ്പോർട്ട് ചെയ്തിരുന്നു. എന്നാൽ ഇത്തരം ഗോസിപ്പുകളെയെല്ലാം മൃണാൾ ഠാക്കൂറിന്റെ വൃത്തങ്ങൾ തള്ളിക്കളഞ്ഞിരുന്നു. എന്നാൽ ഇപ്പോഴിതാ വീണ്ടും അത്തരമൊരു പ്രണയവാർത്തയ്ക്ക് തുടക്കം കുറിച്ചിരിക്കുകയാണ് മൃണാൾ ഠാക്കൂർ. മൃണാൾ ഠാക്കൂറും ഇന്ത്യൻ ക്രിക്കറ്റിലെ യുവതാരമായ യശ്വസി ജെയ്‌സ്വാളും പ്രണയത്തിലാണെന്ന റിപ്പോർട്ടുകളാണ് ബോളിവുഡിൽ നിന്നും വരുന്നത്.

ഇരുവരെയും മുബൈയിലെ ബാന്ദ്ര വെസ്റ്റിലെ കഫെയിൽ ഒരുമിച്ച് കണ്ടതോടെയാണ് പാപ്പരാസികൾ എക്സ് അടക്കമുള്ള സമൂഹമാധ്യമങ്ങളിൽ ഇതിന്റെ വീഡിയോ പങ്കുവയ്ക്കാൻ തുടങ്ങിയത്. കഫെയിൽ നിന്ന് ജയ്‌സ്വാൾ ഇറങ്ങിവന്നതിന് കുറച്ച് നിമിഷങ്ങൾക്ക് ശേഷം മൃണാളും പുറത്തിറങ്ങുന്നതും കാണാം. എന്നാൽ ഇരുവരും ഒരുമിച്ചിരിക്കുന്നതായോ മറ്റോ ഉള്ള ചിത്രങ്ങളോ വീഡിയോകളോ ഇല്ല. സമൂഹമാധ്യമങ്ങളിൽ വീഡിയോ ചർച്ചയായതിന് പിന്നാലെ ഇരുവരുടെയും പ്രായവും ചർച്ചയായിട്ടുണ്ട്. 24 വയസ്സാണ് യശ്വസി ജയ്‌സ്വാളിന്. എന്നാൽ മൃണാൾ ഠാക്കൂറിന് 33 വയസാണ് പ്രായം.

അതേസമയം പ്രണയവാർത്തകളിൽ ഇരുവരും ഇതുവരെ യാതൊരു വിധ പ്രതികരണങ്ങളും നടത്തിയിട്ടില്ല. നിലവിൽ ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിന്റെ താരമാണ് യശ്വസി ജയ്‌സ്വാൾ. നേരത്തെ മൃണാൾ ഠാക്കൂറിന്റെ സൺ ഓഫ് സർദാർ 2 എന്ന ചിത്രത്തിന്റെ പ്രീമിയറിന് ധനുഷും മൃണാളും ഒരുമിച്ചെത്തിയതും, ധനുഷിന്റെ തേരെ ഇഷ്‌ക് മേം എന്ന ചിത്രത്തിന്റെ പാക്കപ്പ് പാർട്ടിക്ക് മൃണാൾ എത്തിയതും വലിയ ചർച്ചയായതോടെയാണ് ഇരുവരും പ്രണയത്തിലാണെന്നുള്ള അഭ്യൂഹങ്ങൾ പരന്നത്. എന്നാൽ പിന്നീട് ഇരുവരും വേർപിരിഞ്ഞുവെന്ന റിപ്പോർട്ടുകളും പുറത്തുവന്നിരുന്നു. എന്തായാലും ബോളിവുഡിലും ക്രിക്കറ്റിലും പുതിയ താരപ്രണയത്തിനാണോ മൃണാളും ജയ്‌സ്വാളും തുടക്കമിടുന്നത് എന്നാണ് പ്രേക്ഷകർ ഉറ്റുനോക്കുന്നത്.

വൈറലായി സൗഭാഗ്യയുടെ 'കല്യാണി' വേർഷൻ

Nithya G Robinson — Sat, 08 Aug 2026 15:55:02 +0530

സമൂഹമാധ്യമങ്ങളിൽ തരംഗമായ 'കല്യാണി' പാട്ടിന് നൃത്തച്ചുവടുകളുമായി നടിയും നർത്തകിയും ഇൻഫ്ളുവൻസറുമായ സൗഭാഗ്യ വെങ്കിടേഷ്. കറുപ്പ് നിറമുളള വസ്ത്രമണിഞ്ഞാണ് സൗഭാഗ്യയുടെ ഡാൻസ്. 'ഒരു കുട്ടിയുടെ അമ്മയായ കല്യാണി' എന്ന അടിക്കുറിപ്പോടെയാണ് സൗഭാഗ്യ വീഡിയോ പോസ്റ്റ് ചെയ്തിരിക്കുന്നത്. പോസ്റ്റ് ചെയ്ത് മണിക്കൂറുകൾക്കകം ഒരു മില്യനിനേറെ ആളുകളാണ് വീഡിയോ കണ്ടത്. സെലിബ്രിറ്റികളടക്കം നിരവധിപ്പേര്‍ വീഡിയോയില്‍ ലൈക്കും കമന്റും ചെയ്തിട്ടുണ്ട്. എല്ലാത്തരം ഡാൻസും സൗഭാഗ്യക്ക് വഴങ്ങുമെന്നും ഒന്നിലേറെ തവണ വീഡിയോ കണ്ടു എന്നുമാണ് ആരാധകർ കമന്റ് ചെയ്യുന്നത്. ദിനം പ്രതി സൗഭാഗ്യയുടെ കോൺഫിഡൻസ് ലെവൽ കൂടുകയാണെന്നും കണ്ടാൽ ഒരു കുട്ടിയുടെ അമ്മയാണെന്ന് പറയുകയേ ഇല്ലെന്നും ചിലർ പറയുന്നു.

സമൂഹമാധ്യമങ്ങളിൽ അടുത്തിടെ ഹിറ്റ് ആയ പാട്ടാണ് 'കല്യാണി'. 2025 ൽ പുറത്തിറങ്ങിയ ഈ ആൽബത്തിന്റെ പുതിയ പതിപ്പ് അണിയറപ്രവർത്തകർ വീണ്ടും ഇറക്കുകയായിരുന്നു. പുതിയ പതിപ്പിൽ ശ്രേയ ഘോഷാലും പാടുന്നുണ്ട്. ഒറിജിനല്‍ ട്രാക്ക് പാടിയ അര്‍ജുന്‍, കെഡിഎസ്, ഫിഫ്റ്റി 4, റോൺ എന്നിവർക്കൊപ്പമാണ് ശ്രേയ ഘോഷാലും ഗാനം ആലപിക്കുന്നത്. സാനിയ അയ്യപ്പനാണ് പുതിയ പതിപ്പിലെ നൃത്ത രംഗത്തിൽ പ്രത്യക്ഷപ്പെടുന്നത്. സെലിബ്രിറ്റികളടക്കം നിരവധിപ്പേരാണ് ‘കല്യാണി’യുടെ റീമിക്സിന് റീൽ ചെയ്യുന്നത്. 51 മില്യൻ കാഴ്ചക്കാരെയും കടന്ന് തരംഗമാവുകയാണ് ഈ ഗാനം. സുഹാസ് മൊയ്തീനും റാപ്പർ ഫിഫ്റ്റി 4ഉം റോണും ചേർന്നാണ് ഗാനത്തിന് വരികളെഴുതിയത്.

അഭിനേത്രി, നര്‍ത്തകി, സോഷ്യല്‍ മീഡിയ താരം എന്നി നിലകളിലെല്ലാം പ്രശസ്തയാണ് നടിയും നര്‍ത്തകിയുമായ താര കല്യാണിന്റെ മകള്‍ സൗഭാഗ്യ. നടനും സോഷ്യല്‍ മീഡിയ താരവുമായ അര്‍ജുന്‍ സോമശേഖരനാണ് സൗഭാഗ്യയുടെ ഭര്‍ത്താവ്. ഇരുവര്‍ക്കും സുദര്‍ശന എന്ന ഒരു മകളുണ്ട്.

ഏറെ നാളത്തെ സ്വപ്നം, ഒടുവിൽ സാധ്യമാക്കി കിച്ചു സുധി; ആശംസകളുമായി കൊല്ലം കളക്ടർ

Nithya G Robinson — Sat, 01 Aug 2026 22:31:03 +0530

കുട്ടിക്കാലം മുതൽ ഭൂരിഭാഗം മലയാളികൾക്കും സുപരിചിതനായ ആളാണ് കിച്ചു എന്ന രാഹുൽ ദാസ്. അന്തരിച്ച കലാകാരൻ കൊല്ലം സുധിയുടെ മൂത്ത മകനാണ് കിച്ചു. സുധിയുടെ വിയോഗ ശേഷം അച്ഛന്റെ വീട്ടിൽ താമസമാക്കിയ കിച്ചു അവിടെ നിന്നാണ് പഠിച്ചതും. സ്വന്തമായി യുട്യൂബ് ചാനലും നടത്തുന്ന കിച്ചുവിന്റെ ഏറ്റവും വലിയ സ്വപ്നം ഇന്ന് യാഥാർത്ഥ്യമായിരിക്കുകയാണ്. ഏതാനും നാളുകൾക്ക് മുൻപ് താനൊരു ബിസിനിസ് ആരംഭിക്കുന്നുവെന്ന് കിച്ചു പറഞ്ഞിരുന്നു. അതിന്റെ വെബ്സൈറ്റ് ആണ് ഇന്ന് ലോഞ്ചായിരിക്കുന്നത്.

ഓണ്‍ലൈന്‍ ക്ലോത്തിംഗ് ബ്രാന്‍ഡ് ആണ് കിച്ചു ആരംഭിച്ചിരിക്കുന്നത്. loopzy by kichu എന്നാണ് പേര്. ഇതിന്റെ വെബ്സൈറ്റ് ഡൊമയ്ൻ കൊല്ലം കളക്ടര്‍ ആനി ജൂല തോമസ് നിർവഹിച്ചു. ഒപ്പം കിച്ചുവിന് ആശംസകളും കളക്ടർ അറിയിച്ചു. തന്റെ ബന്ധുക്കൾക്കും സുഹൃത്തുക്കൾക്കും ഒപ്പമായിരുന്നു കിച്ചു വെബ്സൈറ്റ് ലോഞ്ചിനായി എത്തിയത്. "ഈ പ്രായത്തിൽ അവൻ ഒരു ബിസിനസ് തുടങ്ങി. എല്ലാവരും ഒന്ന് സഹകരിച്ച് ബ്രാൻഡ് ഒന്ന് വിജയിപ്പിക്കണം. അവൻ രക്ഷപ്പെടട്ടെ. നമ്മളൊക്കെ കൂടെയുണ്ട്", എന്നായിരുന്നു കിച്ചുവിന്റെ വല്യച്ഛൻ മാധ്യമങ്ങളോട് പറഞ്ഞത്. വളരെയധികം സന്തോഷം എന്നായിരുന്നു കിച്ചുവിന്റെ പ്രതികരണം.

കിച്ചുവിന്റെ തുടക്കത്തെ പ്രശംസിച്ചും പിന്തുണച്ചും നിരവധി പേരാണ് കമന്റുകളിലൂടെ രംഗത്ത് എത്തിയത്. "വളരെ ഉയരങ്ങളിൽ എത്താൻ സർവ്വേശ്വരൻ അനുഗ്രഹിക്കട്ടെ, എന്റെ പൊന്നുമോൻ ഉയരങ്ങളിൽ എത്തട്ടെ, അടിപൊളി ആണ്, കിച്ചു മോൻ ഉയരങ്ങളിൽ എത്തട്ടെ. അവൻ ഒരുപാട് അനുഭവിച്ചു ഈ പ്രായത്തിൽ തന്നെ. അതിൽ നിന്നെല്ലാം ജന്മം നൽകിയ അമ്മയും അച്ഛനും ഒന്നുമില്ല. അവന്റ മുഖത്തെ സന്തോഷം. ആ ചിരി ഒരിക്കലും മായാതെ മങ്ങാതെ നിൽക്കട്ടെ. ദൈവം അനുഗ്രഹിക്കട്ടെ, നമുക്ക് കിട്ടുന്ന ഫെയിം അംഗീകാരം ജനപിന്തുണ ഒക്കെ അഹങ്കരിക്കാനോ വന്ന വഴി മറന്നു ആഭാസം കാണിക്കാനോ നിക്കാതെ ഇങ്ങനെയുള്ള അവസരങ്ങൾക്ക് വേണ്ടിയും പ്രയോജനപ്പെടുത്താം... അഭിനന്ദനങ്ങൾ. നല്ലൊരു ഭാവി ഉണ്ടാവട്ടെ, ഒരുപാട് ഉയരങ്ങളിൽ എത്തട്ടെ. നല്ല മോനാണ്. എല്ലാ സൗഭാഗ്യങ്ങളും അനുഭവിക്കാൻ കഴിയട്ടെ പ്രാർത്ഥനയിൽ ഉണ്ടാവും", എന്നിങ്ങനെ പോകുന്നു കമന്റുകൾ.

'മുഖ്യമന്ത്രി വരുന്നിടത്ത് മാന്യമായി വസ്ത്രം ധരിക്കണം' യുവ നടിക്കെതിരെ തെസ്നി ഖാൻ, '100% കറക്റ്റ്' എന്ന് കമന്റുകൾ

Nithya G Robinson — Mon, 03 Aug 2026 07:51:37 +0530

കേരളം മഴക്കെടുതിയിൽ മുങ്ങുന്നതിനിടെ കഴിഞ്ഞ ദിവസം മുഖ്യമന്ത്രി വിഡി സതീശൻ ജ്വല്ലറി ഉദ്ഘാടനത്തിന് പോയത് ഏറെ വിമർശനങ്ങൾക്ക് വഴിവച്ചിരുന്നു. ഇതിന്റെ വീഡിയോകളും ഫോട്ടോകളും ശ്രദ്ധിക്കപ്പെടുകയും ചെയ്തു. ഇതിലൊരു വീഡിയോയ്ക്ക് താഴെ നടി തെസ്നി ഖാൻ കുറിച്ച കമന്റ് ആണ് ഇപ്പോൾ സോഷ്യൽ മീഡിയയിലെ ചർച്ചാ വിഷയം. യുവ നടി ഐശ്വര്യ ചന്ദ്രൻ, മുഖ്യമന്ത്രിക്കൊപ്പം ഫോട്ടോ എടുക്കുന്ന വീഡിയോയ്ക്ക് താഴെ ആയിരുന്നു കമന്റ്.

ഇപ്പോഴത്തെ ജനറേഷന് ഇഷ്ടമുള്ള രീതിയിൽ നടക്കാമെന്നും അതിനുള്ള അവകാശമുണ്ടെന്നും പറഞ്ഞ തെസ്നി ഖാൻ, മുഖ്യമന്ത്രി വരുന്ന സദസിൽ മാന്യമായി വസ്ത്രം ധരിക്കണമെന്നും പറഞ്ഞു. 'എനിക്ക് പലപ്പോഴും തോന്നുന്ന ഒരു കാര്യമാണ്. തെറ്റാണോ ശരിയാണോ എന്ന് അറിയില്ല. ഇപ്പോഴത്തെ ജനറേഷൻ പിള്ളേർക്ക് എങ്ങനെ വേണമെങ്കിലും നടക്കാം. അതിനുള്ള പെർമിഷനും അവകാശവും ഉണ്ട്. പക്ഷേ ഒരു മുഖ്യമന്ത്രി വരുന്ന സദസ്സിൽ, ഒരു നല്ല സ്റ്റാൻഡേർഡ് ഉള്ള സദസ്സിൽ മാന്യമായി ഡ്രസ്സ് ധരിച്ചുവരുകയാണെങ്കിൽ അതൊരു നല്ല കാര്യമായിരുന്നു', എന്നായിരുന്നു തെസ്നി ഖാന്റെ കമന്റ്.

ഇതിന്റെ സ്ക്രീൻ ഷോട്ടുകൾ പുറത്തുവന്നതിന് പിന്നാലെ നിരവധി പേരാണ് തെസ്നി ഖാന്റെ പരാമർശത്തെ പിന്തുണച്ച് കൊണ്ട് രംഗത്ത് എത്തിയത്. 'ഇവർ പറഞ്ഞത് 100% ശരിയാണ്, പൊതുവേദികളിൽ മാന്യമായ വസ്ത്രം ധരിക്കണമെന്ന് നിയമം കൊണ്ടുവരണം, മാന്യമായി വസ്ത്രം ധരിക്കേണ്ടത് നല്ല വ്യക്തിത്വത്തിന്റെ ഭാഗമാണ്. വൈകൃത ഭാവം ഉള്ളവർക്ക് ഇതൊക്കെ ഉൾകൊള്ളാൻ പ്രയാസവുമാണ്, ഇതിൽ തെറ്റ് പറയാൻ പറ്റില്ല. മുഖ്യമന്ത്രി എന്ന് അല്ല പബ്ലിക് ഇടാൻ പറ്റിയ വേഷം ആണോ, തെസ്നി പറഞ്ഞത് 100% കറക്റ്റ്', എന്നിങ്ങനെ പോകുന്നു കമന്റുകൾ. അതേസമയം, തെസ്നി ഖാനെ വിമർശിക്കുന്നവരും ധാരാളമാണ്.

'സ്കൂൾ കാലം തൊട്ട് സിനിമ സ്വപ്നം കാണാൻ കാരണക്കാരന്‍'; മമ്മൂട്ടിയെ കുറിച്ച് നിവിൻ പോളി

Nithya G Robinson — Mon, 07 Sep 2026 14:41:33 +0530

മലയാളത്തിന്റെ മെഗാസ്റ്റാർ മമ്മൂട്ടിയ്ക്ക് പിറന്നാൾ ആശംസയുമായി നടൻ നിവിൻ പോളി. സ്കൂള്‍ കാലം മുതല്‍ സിനിമ സ്വപ്നം കാണാൻ കാരണം മമ്മൂക്ക ആണെന്ന് പറഞ്ഞ നിവിൻ പോളി, ഒരുമിച്ച് അഭിനയിക്കുക എന്നത് ഇന്നും വലിയൊരു സ്വപ്നമാണെന്നും പറയുന്നു. മമ്മൂട്ടിയ്ക്ക് ഒപ്പമുള്ള ഫോട്ടോയും നിവിൻ പങ്കിട്ടിട്ടുണ്ട്.

"എന്റെ സ്കൂൾ കാലം മുതൽ, സിനിമയെ കുറിച്ച് സ്വപ്നം കണ്ടിട്ടുണ്ടെങ്കിൽ അതിന് കാരണം നിങ്ങളായിരുന്നു. നിങ്ങളോടൊപ്പം ഒരു സിനിമ ചെയ്യുക എന്നത് ഞാൻ ഇപ്പോഴും മുറുകെപ്പിടിക്കുന്ന ഒരു സ്വപ്നമാണ്. നിങ്ങളുടെ അസാധാരണമായ പ്രകടനങ്ങൾ കൊണ്ട് ഞങ്ങളെ അത്ഭുതപ്പെടുത്തുന്നത് തുടർന്ന് കൊണ്ടേയിരിക്കൂ. എപ്പോഴും ഞങ്ങൾക്ക് ഒരു പ്രചോദനമായിരിക്കുക. ജന്മദിനാശംസകൾ, മമ്മൂക്കാ...", എന്നായിരുന്നു നിവിൻ പോളിയുടെ വാക്കുകൾ.

അതേസമയം, നിവിൻ പോളിയുടെ ബെത്‌ലഹേം കുടുംബ യൂണിറ്റ് തിയറ്ററുകളിൽ വിജയകരമായി പ്രദർശനം തുടരുകയാണ്. ഗിരീഷ് എഡി സംവിധാനം ചെയ്ത ചിത്രമാണിത്. നിവിൻ പോളിയും മമിത ബൈജുവും നായികനായകന്മാരായി എത്തിയ ചിത്രം ബോക്സ് ഓഫീസിൽ 250 കോടിയടുപ്പിച്ച് നേടി പ്രദർശനം തുടരുകയാണ്. ഭാവന സ്റ്റുഡിയോസ് നിർമിക്കുന്ന ആറാമത്തെ ചിത്രവുമാണ് ബെത്‌ലഹേം കുടുംബ യൂണിറ്റ്. സൂപ്പർ ഹിറ്റായ 'പ്രേമലു'വിനുശേഷം ഭാവന സ്റ്റുഡിയോസ് നിർമ്മിക്കുന്ന ചിത്രമെന്ന പ്രത്യേകതയും 'ബത്‍ലഹേം കുടുംബ യൂണിറ്റി'ന് ഉണ്ട്. സംഗീത് പ്രതാപ്, സുരേഷ് കൃഷ്ണ, ബിന്ദു പണിക്കർ, വിനയ് ഫോർട്ട്, റോഷൻ ഷാനവാസ്, ശ്യാം മോഹൻ, ഷമീർ ഖാൻ, ശ്രിന്ദ, പാർവതി അയ്യപ്പദാസ്, മീനാക്ഷി രവീന്ദ്രൻ തുടങ്ങി വലിയൊരു താരനിര തന്നെയാണ് ചിത്രത്തിലുള്ളത്. നിലവിൽ തമിഴ്, തെലുങ്ക് പതിപ്പുകളും പ്രദർശനം ആരംഭിച്ചിട്ടുണ്ട്.

'എന്‍റെ മോള്‍ക്ക് 18 പവൻ പൊന്നുണ്ട്, അത് 20 ആക്കണം, പിഷാരടി ഞെട്ടി'; തഗ്ഗടിച്ച് മമ്മൂട്ടി, കാലുതൊട്ട് വണങ്ങി ഭാവന

Nithya G Robinson — Fri, 31 Jul 2026 11:56:39 +0530

കഴിഞ്ഞ അഞ്ച് പതിറ്റാണ്ടിലേറെയായി മലയാള സിനിമയിൽ നിറഞ്ഞു നിൽക്കുകയാണ് നടൻ മമ്മൂട്ടി. തോണിക്കാരനായി ബിഗ് സ്ക്രീനിൽ എത്തി ഇന്ന് ആരാധകരുടെ പ്രിയപ്പെട്ട മമ്മൂക്കയായി വിളങ്ങുന്ന താരം ചെയ്ത് വയ്ക്കുന്ന ഓരോ കഥാപാത്രങ്ങളും കണ്ട് ഓരോരുത്തരുടേയും മനം നിറയുന്ന കാഴ്ചയാണ് സമീപകാലത്തായി കണ്ടുവരുന്നത്. മമ്മൂട്ടിയുടെ സന്തത സഹചാരിയായിരുന്ന നടൻ രമേഷ് പിഷാരടി ഇന്ന് പാലക്കാട് എംഎൽഎ ആണ്. എംഎൽഎ ആയ ശേഷം മമ്മൂട്ടിയും പിഷാരടിയും ഒരുമിച്ച് പങ്കെടുത്തൊരു പരിപാടിയായിരുന്നു. ആനന്ദ് ടിവി ഫിലിം അവാർഡ്.

ആ പ്രോഗ്രാം ഇപ്പോൾ ടിവിയിൽ സംപ്രേഷണം ചെയ്യാൻ പോവുകയാണ്. ഓഗസ്റ്റ് 9 ഞായറാഴ്ച രാത്രി 7 മണി മുതൽ ഏഷ്യാനെറ്റിലാണ് സംപ്രേഷണം. ഇതോട് അനുബന്ധിച്ച് പുറത്തുവന്ന പ്രൊമോ വീഡിയോകൾ ഇപ്പോൾ ഏറെ ശ്രദ്ധനേടിയിരിക്കുകയാണ്. മമ്മൂട്ടിയും പിഷാരടിയും തമ്മിലുള്ളൊരു സംഭാഷണത്തിന്റെ ഏതാനും ഭാഗങ്ങൾ ഉൾപ്പെടുത്തിയുള്ളതാണ് ഒരു പ്രൊമോ. "ഞാന്‍ വെറും സിനിമ നടന്‍ മാത്രമാണ്. ഞാന്‍ ഏതായാലും എംഎല്‍എ ഒന്നുമല്ല. ഇപ്പോ ചില്ലറ സഹായങ്ങളൊന്നും അല്ല ആളുകള്‍ പിഷാരടിയോട് ചോദിക്കുന്നത്. എന്‍റെ മോള്‍ക്ക് 18 പവന്‍റെ പൊന്ന് ഞാന്‍ വാങ്ങി വച്ചിട്ടുണ്ട്. രണ്ടും കൂടി കൂട്ടി അത് 20 ആക്കണം. പിഷാരടി ഞെട്ടി. അല്ല സാറ് തരണ്ട. ആ മമ്മൂട്ടി സാറിനോട് പറഞ്ഞാല്‍ മതി", എന്നായിരുന്നു മമ്മൂട്ടി പിഷാരടി നിൽക്കെ സ്റ്റേജിൽ വച്ച് പറഞ്ഞത്.

മറ്റൊരു പ്രൊമോ ഭാവനയുടേതാണ്. ഒപ്പം മമ്മൂട്ടിയും ഉണ്ട്. "ഞാനൊരു നാല്, അഞ്ച് വർഷം മലയാള സിനിമയിൽ നിന്നും ബ്രേക്ക് എടുത്തിരുന്നു. അങ്ങനെ ബ്രേക്കെടുത്ത സമയത്ത് വന്ന ഒന്ന് രണ്ട് ഫോൺ കോളുകളിൽ ആദ്യത്തേത് മമ്മൂക്കയുടെ ഒരു സിനിമയിൽ നിന്നായിരുന്നു. എന്റെ മനസിൽ ശരിക്കും കാല് തൊട്ട് അനുഗ്രഹം വാങ്ങിക്കണം എന്ന് തോന്നിയ വളരെ ചുരുക്കം ചിലരെ ഉള്ളൂ. അത് മമ്മൂക്കയാണ്", എന്നായിരുന്നു മമ്മൂട്ടിയ്ക്ക് മുന്നിൽ വച്ച് ഭാവന പറഞ്ഞത്. ഈ രണ്ട് പ്രൊമോ വീഡിയോകളും ഇപ്പോൾ ഏറെ ശ്രദ്ധനേടിയിട്ടുണ്ട്.

ബോഡി ഷെയ്മിങ്ങും ലൈംഗിക പരാമർശവും; യുവാവിന്റെ അക്കൗണ്ട് പൂട്ടിച്ച് നടി അന്ന രാജൻ

Nithya G Robinson — Wed, 29 Jul 2026 08:18:15 +0530

തനിക്കെതിരെ ബോഡി ഷെയ്മിങ്ങും ലൈംഗിക പരാമർശവും നടത്തിയ ആളുടെ സോഷ്യൽ മീഡിയ അക്കൗണ്ട് പൂട്ടിച്ച് നടി അന്ന രാജൻ. നടി തന്നെയാണ് ഇക്കാര്യം അറിയിച്ചിരിക്കുന്നത്. വ്യൂവ്സിന് വേണ്ടി മറ്റൊരാളുടെ പേരോ ഉള്ളടക്കമോ ഉപയോഗിക്കുന്നതിന് മുൻപ് നന്നായി ആലോചിക്കണമെന്നും തനിക്കെതിരെ മോശം പരാമർശങ്ങൾ നടത്തിയാൽ മുന്നറിയിപ്പൊന്നും ഇല്ലാതെ തന്നെ നിയമനടപടികളുമായി താൻ മുന്നോട്ട് പോകുമെന്നും അന്ന രാജൻ താക്കീത് നൽകി.

"ഇത്തരം നാടകങ്ങളിലൊന്നും താൽപ്പര്യമുള്ള ആളല്ല ഞാൻ. ഓൺലൈനിൽ ശ്രദ്ധ നേടാൻ ശ്രമിക്കുന്നവരെക്കുറിച്ച് എനിക്ക് ഒട്ടും ശ്രദ്ധയുമില്ല. എന്നെ വച്ചുള്ള കണ്ടന്റുകൾ ചില യൂട്യൂബുകാർ പങ്കുവെച്ചിട്ടുണ്ട്. എന്നാൽ അതൊക്കെ കേവലം വിനോദത്തിനോ അല്ലെങ്കിൽ നിരാശ തീർക്കാനോ വേണ്ടിയുള്ളതാണെന്ന് കരുതി ഞാൻ അവ അവഗണിക്കുകയാണ് പതിവ്. എങ്കിലും, ആരെങ്കിലും അതിരുകൾ ലംഘിച്ച് ഉപദ്രവിക്കാനോ, അപകീർത്തിപ്പെടുത്താനോ, അല്ലെങ്കിൽ പ്രത്യേകമായി ലക്ഷ്യം വെച്ചുള്ള അധിക്ഷേപമോ നടത്തിയാൽ, ഇനി മുന്നറിയിപ്പുകൾ നൽകുന്നതല്ല. ഞാൻ ഉചിതമായ നിയമനടപടികൾ തന്നെ സ്വീകരിക്കും. ബന്ധപ്പെട്ട അധികാരികൾ വഴി വിഷയം മുന്നോട്ട് കൊണ്ടുപോകുകയും ചെയ്യും. വ്യൂവ്സിന് വേണ്ടി മറ്റൊരാളുടെ പേരോ ഉള്ളടക്കമോ ഉപയോഗിക്കുന്നതിന് മുൻപ് നന്നായി ആലോചിക്കണം. ഉത്തരവാദിത്തം പ്രധാനമാണ്", എന്നായിരുന്നു അന്ന രാജന്റെ വാക്കുകൾ.

നേരത്തെ തന്റെ ഫോട്ടോയെ അശ്ലീതലനിറച്ച് എഡിറ്റ് ചെയ്തതിനെതിരെ അന്ന രാജൻ രംഗത്ത് എത്തിയിരുന്നു. “ഈ ഫോട്ടോ ദുരുദ്ദേശത്തോടെ എഡിറ്റ് ചെയ്ത്, അശ്ലീലവും അപകീർത്തിപരവുമായ രീതിയിൽ പോസ്റ്റ് ചെയ്തത് എന്റെ അന്തസിനെ കളങ്കപ്പെടുത്താനാണ്. ഇത് ലജ്ജാകരവും ഒരിക്കലും അംഗീകരിക്കാനാവാത്തതും എന്റെ സ്വകാര്യതയുടേയും അന്തസിന്റേയും ഗുരുതരമായ ലംഘനമാണ്. ഈ അക്കൗണ്ട് ഞാൻ ഇൻസ്റ്റാഗ്രാമിൽ റിപ്പോർട്ട് അടിച്ചിട്ടുണ്ട്. ബന്ധപ്പെട്ട നിയമങ്ങൾ പ്രകാരം പൊലീസിൽ പരാതി നൽകും. ഇത്തരത്തിൽ ഫോട്ടോ എഡിറ്റ് ചെയ്ത, പ്രചരിപ്പിച്ച വ്യക്തികൾക്കെതിരെ നിയമനടപടി സ്വീകരിക്കും. നീതി ലഭിക്കുന്നത് വരെ ഞാൻ ഇതിനോട് പോരാടുക തന്നെ ചെയ്യും. ഇത്തരം അധിക്ഷേപകരമായ കാര്യങ്ങൾ സപ്പോർട്ട് ചെയ്യുകയോ ഷെയർ ചെയ്യുകയോ ചെയ്യരുതെന്ന് അഭ്യർത്ഥിക്കുന്നു”, എന്നായിരുന്നു അന്ന് അന്ന കുറിച്ചിരുന്നത്.