Asianet News Malayalam

റെക്കോര്‍ഡ് ലിസ്റ്റില്‍ ഇടം പിടിച്ച് ശുഭ്മാന്‍ ഗില്‍; രോഹിത്തിന് ശേഷം ഒന്നിലധികം ഇരട്ട സെഞ്ചുറികള്‍ നേടുന്ന താരം

Web Desk — Wed, 30 Sep 2026 22:26:38 +0530

ഗുവാഹത്തി: ബര്‍സപര ക്രിക്കറ്റ് സ്റ്റേഡിയത്തില്‍ വെസ്റ്റ് ഇന്‍ഡീസിനെതിരായ രണ്ടാം ഏകദിനത്തില്‍ ചരിത്രമെഴുതി ഇന്ത്യന്‍ ക്യാപ്റ്റന്‍ ശുഭ്മാന്‍ ഗില്‍. ഏകദിന ക്രിക്കറ്റില്‍ രണ്ട് ഇരട്ട സെഞ്ചുറികള്‍ നേടുന്ന ലോകത്തിലെ രണ്ടാമത്തെ മാത്രം താരമെന്ന റെക്കോര്‍ഡാണ് 27 കാരനായ ഗില്‍ സ്വന്തമാക്കിയത്. 2023 ജനുവരിയില്‍ ഹൈദരാബാദില്‍ ന്യൂസിലന്‍ഡിനെതിരെയായിരുന്നു ഗില്ലിന്റെ കരിയറിലെ ആദ്യ ഏകദിന ഇരട്ട സെഞ്ച്വറി. ഇപ്പോള്‍ വിന്‍ഡീസിനെതിരെ അതേ നേട്ടം താരം ആവര്‍ത്തിച്ചിരിക്കുന്നു.

ഏകദിനത്തില്‍ മൂന്ന് ഇരട്ട സെഞ്ചുറികള്‍ നേടിയിട്ടുള്ള രോഹിത് ശര്‍മ്മ മാത്രമാണ് നിലവില്‍ ഈ പട്ടികയില്‍ ഗില്ലിന് മുന്നിലുള്ളത്. ശ്രീലങ്കയ്‌ക്കെതിരെ രണ്ടും ഓസ്‌ട്രേലിയക്കെതിരെ ഒന്നും ഇരട്ട സെഞ്ച്വറികളാണ് രോഹിത് നേടിയിട്ടുള്ളത്. നിലവിലെ മികച്ച ഫോം തുടരുകയാണെങ്കില്‍ രോഹിത്തിന്റെ റെക്കോര്‍ഡിനൊപ്പമെത്താനോ മറികടക്കാനോ ഗില്ലിന് സാധിച്ചേക്കും. ഏകദിന ക്രിക്കറ്റില്‍ ഏറ്റവും വേഗത്തില്‍ ഇരട്ട സെഞ്ചുറി പൂര്‍ത്തിയാക്കുന്ന താരമാകാനും ഗില്ലിന് സാധിച്ചു. എട്ട് സിക്‌സും 26 ഫോറും ഉള്‍പ്പെടുന്നതാണ് ഗില്ലിന്റെ ഇന്നിംഗ്‌സ്.

117 പന്തിലാണ് ഗില്‍ ഇരട്ട സെഞ്ചുറി നേടിയത്. 2022ല്‍ ബംഗ്ലാദേശിനെതിരെ 126 പന്തില്‍ ഡബ്ബിള്‍ സെഞ്ചുറി നേടിയ ഇന്ത്യയുടെ തന്നെ ഇഷാന്‍ കിഷനെയാണ് ഗില്‍ പിന്തള്ളിയത്. ഗ്ലെന്‍ മാക്‌സ്‌വെല്‍ (128 പന്തുകള്‍), പതും നിസ്സങ്ക (136), ക്രിസ് ഗെയ്ല്‍ (138) എന്നിവരാണ് തുടര്‍ന്നുള്ള സ്ഥാനങ്ങളില്‍. നേരത്തെ രോഹിത്തിനൊപ്പം ഓപ്പണിംഗ് വിക്കറ്റില്‍ 255 റണ്‍സ് ചേര്‍ക്കാനും ഗില്ലിന് സാധിച്ചിരുന്നു. രോഹിത് 101 റണ്‍സെടുത്ത് പുറത്തായി. രോഹിത് പുറത്തായ ശേഷം വിരാട് കോഹ്ലിക്കൊപ്പം ചേര്‍ന്ന് 35 പന്തില്‍ 65 റണ്‍സിന്റെ കൂട്ടുകെട്ടും ഗില്‍ പടുത്തുയര്‍പ്പിച്ചു. കഴിഞ്ഞ മത്സരത്തിലെ സെഞ്ചുറി തിളക്കത്തില്‍ ഇറങ്ങിയ കോലി 19 പന്തില്‍ 29 റണ്‍സെടുത്ത് മടങ്ങി. തുടര്‍ന്ന് റുതുരാജ് ഗെയ്കവാദിനെ (37 പന്തില്‍ 31) കൂട്ടുപിടിച്ച് ഗില്‍ ഇന്ത്യ എട്ട് വിക്കറ്റ് വിജയത്തിലേക്ക് നയിച്ചു.

406 റണ്‍സ് വിജയലക്ഷ്യം 43.3 ഓവറിലാണ് ഇന്ത്യ മറികടന്നത്. ഇതോടെ മൂന്ന് മത്സരങ്ങളുടെ ഏകദിന പരമ്പര ഇന്ത്യ സ്വന്തമാക്കുകയും ചെയ്തു. നേരത്തെ അമീര്‍ ജാംഗൂ (114), ജോണ്‍ കാംപെല്‍ (101), ഷായ് ഹോപ്പ് (104) എന്നിവരുടെ സെഞ്ചുറികളാണ് വിന്‍ഡീസിനെ കൂറ്റന്‍ സ്‌കോറിലേക്ക് നയിച്ചത്. ഏകദിന ചരിത്രത്തില്‍ ആദ്യമായിട്ടാണ് വിന്‍ഡീസ് 400 റണ്‍സ് നേടുന്നത്. ഏഴ് വിക്കറ്റുകള്‍ സന്ദര്‍ശകര്‍ക്ക് നഷ്ടമായി.

ശുഭ്മാന്‍ ഗില്ലിന് ഇരട്ട സെഞ്ചുറി, രോഹിത്തിന് ശതകം; വിന്‍ഡീസിന്റെ 406 റണ്‍സ് വിജയലക്ഷ്യം രണ്ട് വിക്കറ്റ് നഷ്ടത്തില്‍ മറികടന്ന് ഇന്ത്യ

Web Desk — Wed, 30 Sep 2026 22:12:10 +0530

ഗുവാഹത്തി: വെസ്റ്റ് ഇന്‍ഡീസിനെതിരെ രണ്ടാം ഏകദിനത്തില്‍ 406 റണ്‍സിന്റെ കൂറ്റന്‍ വിജയലക്ഷ്യം രണ്ട് വിക്കറ്റ് മാത്രം നഷ്ടത്തില്‍ മറികടന്ന് ടീം ഇന്ത്യ. ശുഭ്മാന്‍ ഗില്ലിന്റെ (133 പന്തില്‍ പുറത്താവാതെ 223) ഇരട്ട സെഞ്ചുറിയും രോഹിത് ശര്‍മയുടെ (101) സെഞ്ചുറിയുമാണ് ഇന്ത്യക്ക് അവിശ്വസനീയ വിജയം സമ്മാനിച്ചത്. 43.3 ഓവറില്‍ ഇന്ത്യ ലക്ഷ്യം മറികടക്കുകയായിരുന്നു. ഇതോടെ മൂന്ന് മത്സരങ്ങളുടെ ഏകദിന പരമ്പര ഇന്ത്യ സ്വന്തമാക്കുകയും ചെയ്തു. നേരത്തെ അമീര്‍ ജാംഗൂ (114), ജോണ്‍ കാംപെല്‍ (101), ഷായ് ഹോപ്പ് (104) എന്നിവരുടെ സെഞ്ചുറികളാണ് വിന്‍ഡീസിനെ കൂറ്റന്‍ സ്‌കോറിലേക്ക് നയിച്ചത്. ഏകദിന ചരിത്രത്തില്‍ ആദ്യമായിട്ടാണ് വിന്‍ഡീസ് 400 റണ്‍സ് നേടുന്നത്. ഏഴ് വിക്കറ്റുകള്‍ സന്ദര്‍ശകര്‍ക്ക് നഷ്ടമായി.

രോഹിത് - ഗില്‍ സഖ്യം മികച്ച തുടക്കമാണ് ഇന്ത്യക്ക് നല്‍കിയത്. ഇരുവരും ഒന്നാം വിക്കറ്റില്‍ തന്നെ 255 റണ്‍സ് ചേര്‍ത്തു. അടുത്തിടെ വിമര്‍ശനങ്ങള്‍ നേരിട്ട രോഹിത് സെഞ്ചുറിയോടെ തന്നെ മറുപടി നല്‍കി. 27-ാം ഓവറില്‍ രോഹിത് പുറത്താവുമ്പോള്‍ 75 പന്തില്‍ 101 റണ്‍സ് നേടിയിരുന്നു. ആറ് സിക്‌സും 10 ഫോറും ഉള്‍പ്പെടുന്നതായിരുന്നു ഇന്നിംഗ്‌സ്. തന്നെ 35-ാം ഏകദിന സെഞ്ചുറി പൂര്‍ത്തിയാക്കിയ രോഹിത്, ജയ്ഡന്‍ സീല്‍സിന്റെ പന്തില്‍ വിക്കറ്റിന് മുന്നില്‍ കുടുങ്ങുകയായിരുന്നു. തുടര്‍ന്നെത്തിയ വിരാട് 19 പന്തില്‍ 29 റണ്‍സുമായി മടങ്ങി. എന്നാല്‍ ഗില്‍-റുതുരാജ് ഗെയ്കവാദ് (37 പന്തില്‍ 31) സഖ്യം ഇന്ത്യയെ വിജയത്തിലേക്ക് നയിച്ചു.

117 പന്തില്‍ നിന്നാണ് ഗില്‍ ഇരട്ട സെഞ്ചുറി പൂര്‍ത്തിയാക്കിയത്. ഏകദിന ക്രിക്കറ്റിലെ വേഗമേറിയ ഇരട്ട സെഞ്ചുറിയാണിത്. 24 ഫോറിന്റേയും ഏഴ് സിക്‌സിന്റേയും അകമ്പടി ഗില്ലിന്റെ ഇരട്ട സെഞ്ചുറിക്കുണ്ടായിരുന്നു. ഒന്നാകെ 26 ഫോറും എട്ട് സിക്‌സുമാണ് ഗില്‍ നേടിയത്.

നേരത്തെ, തുടക്കത്തില്‍ തന്നെ വിന്‍ഡീസിന് ഓപ്പണര്‍ കീസി കാര്‍ട്ടിയുടെ (9) വിക്കറ്റ് നഷ്ടമായിരുന്നു. പരിക്കേറ്റ് ജസ്റ്റിന്‍ ഗ്രീവ്‌സിന് പകരം ഓപ്പണറായെത്തിയ താരത്തെ പ്രസിദ്ധ് കൃഷ്ണ, നമന്‍ ധിറിന്റെ കൈകളിലെത്തിക്കുകയായിരുന്നു. തുടര്‍ന്ന് കാംപെല്‍ - ഹോപ്പ് സഖ്യം 110 റണ്‍സ് കൂട്ടിചേര്‍ത്തു. ഇതിനിടെ കാംപെല്‍ സെഞ്ചുറിയും പൂര്‍ത്തിയാക്കി. 68 പന്തുകള്‍ മാത്രം നേരിട്ട താരം അഞ്ച് സിക്‌സും ഒമ്പത് ഫോറും ഉള്‍പ്പെടെയാണ് 101 റണ്‍സ് നേടിയത്.

തുടര്‍ന്നെത്തിയ ജാംഗൂ ഉത്തരവാദിത്തം ഏറ്റെടുത്തു. ക്യാപ്റ്റന്‍ ഹോപ്പിനൊപ്പം 182 റണ്‍സ് ചേര്‍ക്കാന്‍ അദ്ദേഹത്തിന് സാധിച്ചു. 40-ാം ഓവറിന്റെ അവസാന പന്തിലാണ് കൂട്ടുകെട്ട് പൊളിഞ്ഞത്. കുല്‍ദീപ് യാദവിന്റെ പന്തില്‍ അക്വിബ് നബിക്ക് ക്യാച്ച് നല്‍കി ഹോപ്പ് മടങ്ങി. 94 പന്തുകള്‍ നേരിട്ട താരം മൂന്ന് സിക്‌സും എട്ട് ഫോറും നേടിയിരുന്നു. പിന്നാലെ വിന്‍ഡീസിന്റെ ഇന്നിംഗ്‌സിന് വേഗം കുറയുകയാണ് ചെയ്തത്. ഷെഫാനെ റുതര്‍ഫോര്‍ഡ് (0) നേരിട്ട ആദ്യ പന്തില്‍ തന്നെ മടങ്ങി. ബ്രാറിനായിരുന്നു വിക്കറ്റ്.

ഇതിനിടെ സെഞ്ചുറി പൂര്‍ത്തിയാക്കിയ ജാംഗൂ 43-ാം ഓവറിലും പുറത്തായി. ജഡേജയുടെ പന്തില്‍ റുതുരാജ് ഗെയ്ക്വാദിന് ക്യാച്ച്. കീമോ പോള്‍ (3), അല്‍സാരി ജോസഫ് (8) എന്നിവര്‍ക്ക് തിളങ്ങാന്‍ കഴിയാതെ പോയി. റോസ്റ്റണ്‍ ചേസിനാവട്ടെ (25 പന്തില്‍ 29) അവസാന ഓവറുകളില്‍ വലിയ ഷോട്ടുകള്‍ കളിക്കാന്‍ കഴിഞ്ഞതുമില്ല. ഷമാര്‍ ജോസഫ് (8 പന്തില്‍ 14) ചേസിനൊപ്പം പുറത്താവാതെ നിന്നു. കുല്‍ദീപ് യാദവ്, രവീന്ദ്ര ജഡേജ, ഗുര്‍നൂര്‍ ബ്രാര്‍ എന്നിവര്‍ രണ്ട് വിക്കറ്റുകള്‍ വീതം വീഴ്ത്തി. 10 ഓവര്‍ എറിഞ്ഞ ബ്രാര്‍ 96 റണ്‍സ് വഴങ്ങി. ജഡേജ 75 റണ്‍സും കുല്‍ദീപ് 65ഉം വിട്ടുകൊടുത്തു. 8.5 ഓവര്‍ എറിഞ്ഞ അരങ്ങേറ്റക്കാരന്‍ അക്വിബ് നബി 84 റണ്‍സാണ് വഴങ്ങിയത്.

ഏഷ്യന്‍ ഗെയിംസ് ക്രിക്കറ്റില്‍ ഇന്ത്യ-ശ്രീലങ്ക സെമി ഫൈനല്‍ മഴയെടുക്കുമോ? കാലാവസ്ഥാ പ്രവചനം ഇങ്ങനെ

Web Desk — Wed, 30 Sep 2026 21:43:25 +0530

ടോക്കിയോ: ഏഷ്യന്‍ ഗെയിംസ് പുരുഷ ക്രിക്കറ്റ് മത്സരങ്ങളില്‍ മഴ തിരിച്ചടിയായിരുന്നു. ക്വാര്‍ട്ടര്‍ ഫൈനല്‍ മത്സരങ്ങളെല്ലാം മോശം കാലാവസ്ഥ കാരണം തടസ്സപ്പെട്ടു. നി്ഷിനിലെ കൊറോഗി സ്‌പോര്‍ട്‌സ് പാര്‍ക്കില്‍ അഫ്ഗാനിസ്ഥാനെതിരെ നടക്കേണ്ടിയിരുന്ന ഇന്ത്യയുടെ ക്വാര്‍ട്ടര്‍ ഫൈനല്‍ മത്സരം മഴമൂലം ഒരു പന്ത് പോലും എറിയാനാകാതെ ഉപേക്ഷിച്ചു. തുടര്‍ന്നാണ് ഇന്ത്യ സെമിഫൈനലിലേക്ക് മുന്നേറിയത്. ഈ മത്സരം മാത്രമല്ല, മറ്റ് മൂന്ന് ക്വാര്‍ട്ടര്‍ ഫൈനല്‍ മത്സരങ്ങളും മഴ കൊണ്ടുപോയി. നാളെ ഇന്ത്യയും ശ്രീലങ്കയും തമ്മിലുള്ള സെമിഫൈനല്‍ മത്സരം നടക്കാനിരിക്കെ, എല്ലാവരുടെയും ശ്രദ്ധ നിഷിനിലെ കാലാവസ്ഥയിലാണ്.

അക്യുവെതര്‍ റിപ്പോര്‍ട്ട് അനുസരിച്ച്, മത്സരത്തിനിടയില്‍ മഴ പെയ്യാന്‍ സാധ്യത വളരെ കുറവാണ്. കാലാവസ്ഥ അനുകൂലമായിരിക്കുമെന്നാണ് പ്രതീക്ഷിക്കുന്നത്. അന്തരീക്ഷ താപനില ഏകദേശം 30 ഡിഗ്രി സെല്‍ഷ്യല്‍ ആയിരിക്കും, മഴ പെയ്യാന്‍ വെറും ഒരു ശതമാനം മാത്രമാണ് സാധ്യത. സെമിഫൈനല്‍ മത്സരവും മഴമൂലം ഉപേക്ഷിക്കേണ്ടി വന്നാല്‍ ഐസിസി ടി20 റാങ്കിംഗില്‍ ശ്രീലങ്കയേക്കാള്‍ ഉയര്‍ന്ന റാങ്കിലുള്ള ഇന്ത്യ ഫൈനലിലേക്ക് മുന്നേറും. 2022-ലെ ഏഷ്യന്‍ ഗെയിംസില്‍ അഫ്ഗാനിസ്ഥാനോട് തോറ്റ് ശ്രീലങ്ക ക്വാര്‍ട്ടര്‍ ഫൈനല്‍ ഘട്ടത്തില്‍ പുറത്തായിരുന്നു.

ചൊവ്വാഴ്ച മലേഷ്യക്കെതിരെ നടക്കേണ്ടിയിരുന്ന ബംഗ്ലാദേശിന്റെ ക്വാര്‍ട്ടര്‍ ഫൈനലും മഴമൂലം ഉപേക്ഷിച്ചിരുന്നു. മറ്റൊരു സെമിഫൈനലില്‍ ബംഗ്ലാദേശ് പാകിസ്ഥാനെ നേരിടും. രണ്ട് സെമിഫൈനല്‍ മത്സരങ്ങളും നാളെയാണ് നിശ്ചയിച്ചിരിക്കുന്നത്. ആദ്യ സെമിയില്‍ ബംഗ്ലാദേശും പാകിസ്ഥാനും ഏറ്റുമുട്ടുമ്പോള്‍, അന്നേ ദിവസം തന്നെ നടക്കുന്ന രണ്ടാമത്തെ സെമിയില്‍ ഇന്ത്യ ശ്രീലങ്കയെ നേരിടും. ഹാന്‍ങ്ഷുവില്‍ നടന്ന 2023-ലെ ഏഷ്യന്‍ ഗെയിംസ് പുരുഷ ക്രിക്കറ്റ് മത്സരത്തില്‍ നേടിയ സ്വര്‍ണ്ണ മെഡല്‍ നിലനിര്‍ത്താനാണ് ഇന്ത്യ ലക്ഷ്യമിടുന്നത്.

അന്ന് അഫ്ഗാനിസ്ഥാനെതിരായ ഫൈനല്‍ മത്സരം മഴമൂലം ഉപേക്ഷിച്ചതിനെത്തുടര്‍ന്ന് ഉയര്‍ന്ന റാങ്കുള്ള ടീം എന്ന നിലയിലാണ് ഇന്ത്യക്ക് സ്വര്‍ണ്ണ മെഡല്‍ ലഭിച്ചത്. അതേസമയം, ഐച്ചി-നഗോയയില്‍ നടന്ന ഏഷ്യന്‍ ഗെയിംസില്‍ ഇന്ത്യന്‍ വനിതാ ക്രിക്കറ്റ് ടീം തങ്ങളുടെ കിരീടം നിലനിര്‍ത്തിയിട്ടുണ്ട്. ഹര്‍മന്‍പ്രീത് കൗര്‍ നയിച്ച ഇന്ത്യന്‍ ടീം ഫൈനലില്‍ ശ്രീലങ്കയെ 147 റണ്‍സിന് പരാജയപ്പെടുത്തിയാണ് സ്വര്‍ണ്ണ മെഡല്‍ സ്വന്തമാക്കിയത്.

ഗില്ലിന് പിന്നാലെ രോഹിത് ശര്‍മയ്ക്കും സെഞ്ചുറി, തുടര്‍ന്ന് മടക്കം; വിന്‍ഡീസിന്റെ കൂറ്റന്‍ വിജയലക്ഷ്യത്തിനെതിരെ ഇന്ത്യ ശക്തമായ നിലയില്‍

Web Desk — Wed, 30 Sep 2026 21:03:52 +0530

ഗുവാഹത്തി: 2025ലെ ഓസ്‌ട്രേലിയക്കെതിരായ ഏകദിന പരമ്പര മുതല്‍ ഇന്ത്യന്‍ താരം രോഹിത് ശര്‍മ കടുത്ത മാധ്യമ പരിശോധനകളെയാണ് നേരിട്ടുകൊണ്ടിരിക്കുന്നത്. അന്താരാഷ്ട്ര ക്രിക്കറ്റിലെ അദ്ദേഹത്തിന്റെ അവസാന പരമ്പരയായിരിക്കാം ഇതെന്ന തരത്തിലുള്ള റിപ്പോര്‍ട്ടുകള്‍ പലതും പുറത്തുവന്നിരുന്നു. എന്നാല്‍ വെസ്റ്റ് ഇന്‍ഡീസിനെതിരെ രണ്ടാം ഏകദിനത്തിലെ സെഞ്ചുറിയോടെ സെലക്ടര്‍മാരുടെയും വിശ്വാസം നേടിയെടുക്കാന്‍ ഹിറ്റ്മാന് സാധിച്ചു. ഗുവാഹത്തിയില്‍ 75 പന്തില്‍ 101 റണ്‍സ് നേടി പുറത്താവുകയായിരുന്നു താരം. ഏകദിനത്തില്‍ രോഹിത്തിന്റെ കരിയറിലെ 35-ാം ഏകദിന സെഞ്ച്വറിയാണിത്.

വെസ്റ്റ് ഇന്‍ഡീസിനെതിരായ പരമ്പരയ്ക്ക് മുന്നോടിയായും രോഹിത്തിന്റെ മോശം ഫോമിനെയും സ്ഥിരതയെയും കുറിച്ച് ചര്‍ച്ചകള്‍ ഉയര്‍ന്നിരുന്നു. ആദ്യ ഏകദിനത്തില്‍ മികച്ച തുടക്കം നല്‍കിയ രോഹിത്, രണ്ടാം മത്സരത്തില്‍ വെറും 72 പന്തുകളിലാണ് സെഞ്ചുറി പൂര്‍ത്തിയാക്കിയത്. കഴിഞ്ഞ മൂന്ന് ഏകദിനങ്ങളില്‍ രോഹിത് നേടുന്ന രണ്ടാമത്തെ സെഞ്ച്വറിയാണിത്. മത്സരത്തിന്റെ തുടക്കം മുതല്‍ ആധിപത്യം പുലര്‍ത്തിയ താരം 32 പന്തില്‍ തന്നെ അര്‍ദ്ധസെഞ്ച്വറിയിലെത്തി. ഇന്നിങ്‌സിനിടയില്‍ നാല് കൂറ്റന്‍ സിക്‌സറുകള്‍ പറത്തിയ രോഹിത് നാട്ടില്‍ 200 ഏകദിന സിക്‌സറുകള്‍ നേടുന്ന ലോകത്തിലെ ആദ്യ ക്രിക്കറ്റ് താരമെന്ന ചരിത്രനേട്ടവും സ്വന്തമാക്കി. ഗില്ലിനൊപ്പം 255 റണ്‍സ് ചേര്‍ത്താണ് രോഹിത് മടങ്ങിയത്.

ഏകദിനത്തില്‍ ഏറ്റവും കൂടുതല്‍ സെഞ്ചുറികള്‍ നേടിയവരുടെ പട്ടികയില്‍ സച്ചിന്‍ ടെണ്ടുല്‍ക്കര്‍ക്കും വിരാട് കോലിക്കും പിന്നില്‍ മൂന്നാം സ്ഥാനത്താണ് അദ്ദേഹം. കോലി 55 സെഞ്ചുറികളോടെ ഒന്നാമതും, 49 സെഞ്ച്വറികളോടെ സച്ചിന്‍ രണ്ടാമതുമുണ്ട്. മത്സരത്തില്‍ 84 വ്യക്തിഗത സ്‌കോറില്‍ നില്‍ക്കെ കീസി കാര്‍ട്ടി രോഹിത്തിന്റെ ക്യാച്ച് പാഴാക്കിയത് താരത്തിന് തുണയായി. തുടര്‍ന്ന് 26-ാം ഓവറിലാണ് താരം മൂന്നക്കം തികച്ചത്.

ഗില്ലിനും സെഞ്ചുറി

ഇന്ത്യന്‍ ക്യാപ്റ്റന്‍ ശുഭ്മാന്‍ ഗില്ലും മത്സരത്തില്‍ തകര്‍പ്പന്‍ പ്രകടനമാണ് കാഴ്ചവെച്ചത്. വെറും 62 പന്തുകളില്‍ നിന്നാണ് താരം സെഞ്ച്വറി തികച്ചത്. തുടക്കത്തില്‍ അല്‍പ്പം സമയം എടുത്തുവെങ്കിലും പിന്നീട് വെടിക്കെട്ട് ബാറ്റിംഗാണ് ഗില്‍ പുറത്തെടുത്തത്. 11 ഫോറുകളുടെയും 5 സിക്‌സറുകളുടെയും അകമ്പടിയോടെയാണ് അദ്ദേഹം സെഞ്ച്വറി പൂര്‍ത്തിയാക്കിയത്. നിലവില്‍ 153 റണ്‍സുമായി അദ്ദേഹം ക്രീസിലുണ്ട്. വിരാട് കോലിയാണ് (2) ഗില്ലിന് കൂട്ട്. വിന്‍ഡീസ് ഉയര്‍ത്തിയ 406 റണ്‍സ് വിജയലക്ഷ്യം പിന്തുടരുന്ന ഇന്ത്യ ഒടുവില്‍ വിവരം ലഭിക്കുമ്പോള്‍ 28 ഓവറില്‍ ഒന്നിന് 271 എന്ന സുരക്ഷിത നിലയിലാണ്.

അരങ്ങേറ്റ മത്സരത്തില്‍ മോശം റെക്കോര്‍ഡ് സ്വന്തമാക്കി അക്വിബ് നബി; ഏറ്റവും കൂടുതല്‍ റണ്‍സ് വഴങ്ങുന്ന ഇന്ത്യന്‍ താരം

Web Desk — Wed, 30 Sep 2026 20:43:24 +0530

ഗുവാഹത്തി: വെസ്റ്റ് ഇന്‍ഡീസിനെതിരായ രണ്ടാം ഏകദിനത്തിലൂടെ കാശ്മീര്‍ പേസര്‍ അക്വിബ് നബി അന്താരാഷ്ട്ര ക്രിക്കറ്റില്‍ അരങ്ങേറ്റം കുറിച്ചിരുന്നു. കഴിഞ്ഞ രഞ്ജി ട്രോഫി സീസണില്‍ ഏറ്റവും കൂടുതല്‍ വിക്കറ്റുകള്‍ വീഴ്ത്തി തിളങ്ങിയതോടെയാണ് 29 കാരനായ നബി ദേശീയ ടീമിന്റെ പരിഗണനയിലേക്ക് എത്തിയത്. റെഡ്-ബോള്‍ ക്രിക്കറ്റിലൂടെയാണ് നബി അരങ്ങേറ്റം കുറിക്കുമെന്ന് കരുതിയിരുന്നതെങ്കിലും, ജസ്പ്രീത് ബുംറയും മറ്റ് പ്രധാന പേസര്‍മാരും ലഭ്യമല്ലാത്ത സാഹചര്യത്തിലാണ് താരത്തിന് അവസരം ലഭിച്ചത്.

എന്നാല്‍ ഈ അവസരം മുതലാക്കാന്‍ താരത്തിന് സാധിച്ചില്ല. മത്സരത്തില്‍ 8.5 ഓവര്‍ പന്തറിഞ്ഞ നബി 84 റണ്‍സ് വിട്ടുകൊടുക്കുകയും, ഏകദിന അരങ്ങേറ്റത്തില്‍ ഏറ്റവും കൂടുതല്‍ റണ്‍സ് വഴങ്ങുന്ന ഇന്ത്യന്‍ ബോളര്‍ എന്ന മോശം റെക്കോര്‍ഡ് സ്വന്തമാക്കുകയും ചെയ്തു. 1975-ല്‍ ലോര്‍ഡ്‌സില്‍ ഇംഗ്ലണ്ടിനെതിരെ 11 ഓവറില്‍ 83 റണ്‍സ് വഴങ്ങിയ കര്‍സന്‍ ഘാവ്രിയുടെ പേരിലുണ്ടായിരുന്ന റെക്കോര്‍ഡാണ് നബി സ്വന്തം പേരിലാക്കിയത്. മത്സരത്തില്‍ 9.50 ഇക്കോണമിയിലാണ് നബി പന്തറിഞ്ഞത്.

നാഴികക്കല്ല് പിന്നിട്ട് രോഹിത് ശര്‍മ

ഇതിനിടയില്‍ ഏകദിന ക്രിക്കറ്റില്‍ 12,000 റണ്‍സ് എന്ന നാഴികക്കല്ലും ഈ മുംബൈ താരം പിന്നിട്ടു. ഈ നേട്ടത്തിലെത്താന്‍ 73 റണ്‍സ് ആവശ്യമായിരുന്ന രോഹിത്, വെറും 54 പന്തുകള്‍ കൊണ്ടാണ് ഈ ലക്ഷ്യം മറികടന്നത്. സച്ചിന്‍ ടെണ്ടുല്‍ക്കര്‍ക്കും വിരാട് കോലിക്കും ശേഷം ഈ നേട്ടം കൈവരിക്കുന്ന മൂന്നാമത്തെ മാത്രം ഇന്ത്യന്‍ താരമാണ് രോഹിത്. ലോകത്തിലെ ഏഴാമത്തെ താരവുമായി രോഹിത് മാറിയിരിക്കുകയാണ്. ഏറ്റവും വേഗത്തില്‍ 12000 ക്ലബിലെത്തുന്ന രണ്ടാമത്തെ താരമാണ് രോഹിത്. 282 ഇന്നിംഗ്്‌സില്‍ നിന്നാണ് നേട്ടം. 242 ഇന്നിംഗ്‌സില്‍ ഇത്രയും റണ്‍സ് നേടിയ കോലിയാണ് ഒന്നാമത്. സച്ചിന്‍ (300 ഇന്നിംഗ്‌സ്), റിക്കി പോണ്ടിംഗ് (314), കുമാര്‍ സംഗക്കാര (336), സനത് ജയസൂര്യ (379), മഹേല ജയവര്‍ധനെ (399) എന്നിവര്‍ പിന്നില്‍.

50 റണ്‍സിനിടെ നാല് സിക്‌സറുകളാണ് രോഹിത് പറത്തിയത്. അതില്‍ നാലാമത്തെ സിക്‌സര്‍ നാട്ടില്‍ അദ്ദേഹത്തിന്റെ 200-ാം ഏകദിന സിക്‌സറുകൂടിയായി മാറി. ക്രിക്കറ്റ് ചരിത്രത്തില്‍ ഈ നേട്ടം കൈവരിക്കുന്ന ആദ്യ താരമാണ് രോഹിത്. ഏകദിന ക്രിക്കറ്റില്‍ ഏറ്റവും കൂടുതല്‍ സിക്‌സറുകള്‍ അടിച്ചെന്ന റെക്കോര്‍ഡ് ഇതിനകം സ്വന്തമാക്കിയിട്ടുള്ള താരം, തന്റെ കരിയറില്‍ മറ്റൊരു ചരിത്രനേട്ടം കൂടി ചേര്‍ത്തിരിക്കുകയാണ്.

സച്ചിനും കോലിക്കും പിന്നാലെ അപൂര്‍വ നാഴികക്കല്ല് പിന്നിട്ട് രോഹിത് ശര്‍മ; സിക്‌സറുകളുടെ കാര്യത്തിലും നേട്ടം

Web Desk — Wed, 30 Sep 2026 20:27:19 +0530

ഗുവാഹത്തി: ബര്‍സപര ക്രിക്കറ്റ് സ്റ്റേഡിയത്തില്‍ വെസ്റ്റ് ഇന്‍ഡീസിനെതിരായ രണ്ടാം ഏകദിനത്തില്‍ തകര്‍പ്പന്‍ പ്രകടനവുമായി ഇന്ത്യന്‍ താരം രോഹിത് ശര്‍മ. ആദ്യം ബാറ്റ് ചെയ്ത വെസ്റ്റ് ഇന്‍ഡീസ് 405 റണ്‍സിന്റെ വലിയ വിജയലക്ഷ്യമാണ് ഇന്ത്യക്ക് മുന്നില്‍ വെച്ചതെങ്കിലും, തകര്‍പ്പന്‍ ബാറ്റിംഗിലൂടെ ഇന്ത്യയ്ക്ക് മികച്ച തുടക്കമാണ് രോഹിത് നല്‍കിയത്. തുടര്‍ച്ചയായ സിക്‌സറുകളോടെ 32 പന്തില്‍ അര്‍ദ്ധസെഞ്ച്വറി പൂര്‍ത്തിയാക്കിയ രോഹിത്, ഒരറ്റത്ത് ക്യാപ്റ്റന്‍ ശുഭ്മാന്‍ ഗില്ലിന്റെ മികച്ച പിന്തുണയോടെ കളം നിറഞ്ഞു.

റെക്കോഡ് ചേസ്

ഏകദിനത്തില്‍ ഇന്ത്യ ഇതുവരെ പിന്തുടര്‍ന്നു വിജയിച്ച ഏറ്റവും ഉയര്‍ന്ന ലക്ഷ്യം 360 റണ്‍സാണ് (2013ല്‍ ഓസ്‌ട്രേലിയക്കെതിരെ). ആ മത്സരത്തില്‍ രോഹിതും കോലിയും സെഞ്ച്വറി നേടിയിരുന്നു.

സൂപ്പര്‍ ലീഗില്‍ ആദ്യ ജയം തേടി തൃശൂര്‍ മാജിക്‌ എഫ്‌ സി, വിജയക്കുതിപ്പിന്‌ ഫോഴ്‌സ കൊച്ചി

Web Desk — Wed, 30 Sep 2026 20:12:35 +0530

തൃശൂർ: സൂപ്പർ ലീഗ് കേരളയുടെ രണ്ടാം റൗണ്ട് മത്സരങ്ങൾക്ക് വ്യാഴാഴ്ച തൃശൂർ കോർപ്പറേഷൻ സ്റ്റേഡിയത്തിൽ തുടക്കം. തൃശൂർ മാജിക് എഫ് സി സ്വന്തം തട്ടകത്തിലെ ആദ്യ മത്സരത്തിൽ ഫോഴ്സ കൊച്ചി എഫ്‌ സിയെ നേരിടും.

കണ്ണൂർ ജവഹർ സ്റ്റേഡിയത്തിൽ നടന്ന സീസണിലെ ആദ്യ മത്സരത്തിൽ കണ്ണൂർ വാരിയേഴ്സ് എഫ്‌ സിയോട് ഒരു ഗോളിന് തോറ്റ തൃശൂർ മാജിക് എഫ് സി, സ്വന്തം ആരാധകർക്ക് മുന്നിൽ ശക്തമായി തിരിച്ചുവരാനുള്ള തയ്യാറെടുപ്പിലാണ്‌. സ്പാനിഷ് താരം അസിയർ ഗോമസിന്റെ ഗോളിനാണ് തൃശൂർ കണ്ണൂരിന് മുന്നിൽ കീഴടങ്ങിയത്.

ആദ്യ മത്സരത്തിൽ അവസാന നിമിഷത്തിൽ നേടിയ ആവേശകരമായ വിജയത്തിന്റെ കരുത്തുമായാണ് ഫോഴ്സ കൊച്ചി എഫ്‌ സി രണ്ടാം മത്സരത്തിന് ബൂട്ട് കെട്ടുന്നത്. കലൂർ ജവഹർലാൽ നെഹ്‌റു സ്റ്റേഡിയത്തിൽ കരുത്തരായ മലപ്പുറം എഫ്‌ സിക്കെതിരെ നേടിയ അവിസ്മരണീയ വിജയം ഫോഴ്‌സ കൊച്ചിയുടെ ആത്മവിശ്വാസം ഉയർത്തിയിട്ടുണ്ട്. ഇഞ്ചുറി സമയത്ത് രാഹുൽ രാജു നേടിയ ലോങ് റേഞ്ച് ഗോളാണ് മലപ്പുറത്തിന് എതിരെ കൊച്ചിക്ക് വിജയം സമ്മാനിച്ചത്.

തൃശൂർ - കൊച്ചി മത്സരത്തിന്റെ ടിക്കറ്റുകൾ superleaguekerala.com/tickets എന്ന വെബ്സൈറ്റിൽ ഓൺലൈനായി ലഭ്യമാണ്. തൃശൂർ കോർപ്പറേഷൻ സ്റ്റേഡിയത്തിന് പുറത്തുള്ള ബോക്സ് ഓഫീസിലും ടിക്കറ്റുകൾ ലഭിക്കും.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ബാറ്റര്‍മാര്‍ക്കും ബൗളര്‍മാര്‍ക്കും ഒരുപോലെ ആധിപത്യം; ക്രിക്കറ്റ് നിയമങ്ങളിലെ മാറ്റം വ്യാഴ്‌ഴച്ച മുതല്‍ പ്രാബല്യത്തില്‍

Web Desk — Wed, 30 Sep 2026 20:09:34 +0530

ദില്ലി: ക്രിക്കറ്റില്‍ ബാറ്റര്‍മാര്‍ക്കും ബൗളര്‍മാര്‍ക്കും ഒരുപോലെ ആധിപത്യം വേണമെന്ന് മേരിലോണ്‍ ക്രിക്കറ്റ് ക്ലബ്ബ് (എംസിസി) ഹെഡ് ഓഫ് ക്രിക്കറ്റ് ഫ്രേസര്‍ സ്റ്റുവര്‍ട്ട് ബുധനാഴ്ച വ്യക്തമാക്കി. ബാറ്റിംഗിന്റെ ആധിപത്യം വര്‍ദ്ധിച്ചുവരുന്ന സാഹചര്യം മുന്‍നിര്‍ത്തി ഫീല്‍ഡിംഗ് ടീമിന് കൂടുതല്‍ ആനുകൂല്യം നല്‍കുന്ന തരത്തിലാണ് ക്രിക്കറ്റ് നിയമങ്ങളുടെ പുതിയ പതിപ്പ് തയ്യാറാക്കിയിരിക്കുന്നതെന്ന് അദ്ദേഹം ചൂണ്ടിക്കാണിച്ചു. ഡല്‍ഹി ആന്‍ഡ് ഡിസ്ട്രിക്റ്റ് ക്രിക്കറ്റ് അസോസിയേഷന്റെ (ഡിഡിസിഎ) ആഭിമുഖ്യത്തില്‍ നടന്ന അമ്പയേഴ്സ് വര്‍ക്ക്ഷോപ്പില്‍ സംസാരിക്കുകയായിരുന്നു അദ്ദേഹം.

'കളിയുടെ സന്തുലിതാവസ്ഥ ക്രിക്കറ്റിന് അത്യന്താപേക്ഷിതമാണ്. ബാറ്റിന്റെ ആധിപത്യം കുറയ്ക്കുന്നതിനായി 2017-ല്‍ ഞങ്ങള്‍ ബാറ്റുകളുടെ വലുപ്പം കുറച്ചിരുന്നു.' പിടിഐ വാര്‍ത്താ ഏജന്‍സിക്ക് നല്‍കിയ അഭിമുഖത്തില്‍ സ്റ്റുവര്‍ട്ട് പറഞ്ഞു. ബാറ്റ് ചെയ്യുന്നവരുടെ കരുത്ത് വര്‍ദ്ധിച്ചതും അവര്‍ ജിമ്മില്‍ കഠിനാധ്വാനം ചെയ്യുന്നതും ആക്രമണോത്സുകമായ പുതിയ ബാറ്റിംഗ് ശൈലി സ്വീകരിക്കുന്നതും അവരുടെ ആധിപത്യത്തിന് കാരണമാകുന്നുണ്ടെന്നും അദ്ദേഹം കൂട്ടിച്ചേര്‍ത്തു.

ഒക്ടോബര്‍ 1 മുതല്‍ നിലവില്‍ വരുന്ന ക്രിക്കറ്റ് നിയമങ്ങളുടെ പുതിയ പതിപ്പില്‍ 73 മാറ്റങ്ങളാണ് ഉള്‍പ്പെടുത്തിയിരിക്കുന്നത്. റെഡ് ബോള്‍ ക്രിക്കറ്റിലെ ഏറ്റവും പ്രധാനപ്പെട്ട ഒരു നിയമഭേദഗതി പ്രകാരം, ദിവസത്തെ കളിയുടെ അവസാന ഓവറില്‍ വിക്കറ്റ് വീണാലും പുതിയ ബാറ്റര്‍ ക്രീസിലെത്തേണ്ടി വരും. പുതിയ നിയമപ്രകാരം, വിക്കറ്റ് വീണ ഉടന്‍ കളി അവസാനിക്കുന്നതിന് പകരം പുതിയ ബാറ്റര്‍ ആ ഓവറിലെ ബാക്കി പന്തുകള്‍ നേരിടേണ്ടി വരും. വൈകിയാണെങ്കിലും വിക്കറ്റ് വീഴ്ത്തുന്ന ഫീല്‍ഡിംഗ് ടീമിന് അതൊരു വലിയ നേട്ടമായിരിക്കുമെന്ന് സ്റ്റുവര്‍ട്ട് വ്യക്തമാക്കി.

ഐസിസിയുമായി സഹകരിച്ച് എംസിസി

കളിയുടെ നിയമങ്ങള്‍ രൂപീകരിക്കുന്നതില്‍ എംസിസി അന്താരാഷ്ട്ര ക്രിക്കറ്റ് കൗണ്‍സിലുമായി ചേര്‍ന്ന് പ്രവര്‍ത്തിക്കുന്നുണ്ടെന്ന് സ്റ്റുവര്‍ട്ട് പറഞ്ഞു. ക്രിക്കറ്റ് നിയമങ്ങള്‍ സങ്കീര്‍ണ്ണമാണെന്ന് സമ്മതിച്ച അദ്ദേഹം, അവ കൂടുതല്‍ ലളിതമാക്കാനും എല്ലാവരിലേക്കും എത്തിക്കാനുമുള്ള ശ്രമങ്ങള്‍ നടന്നു വരികയാണെന്നും വ്യക്തമാക്കി. ഇതിന്റെ ഭാഗമായി എംസിസി ആദ്യമായി ഐസിസിയുമായി ചേര്‍ന്ന് ക്രിക്കറ്റ് നിയമങ്ങള്‍ വിവിധ ഭാഷകളിലേക്ക് വിവര്‍ത്തനം ചെയ്തിട്ടുണ്ട്. ഇംഗ്ലീഷ്, ഹിന്ദി, ഉറുദു എന്നീ ഭാഷകളിലുള്ള പുതിയ 'ലോസ് ഓഫ് ക്രിക്കറ്റ്' ആപ്പ് ബുധനാഴ്ച പുറത്തിറക്കി. ബംഗാളി, കന്നഡ പതിപ്പുകള്‍ ഈ ആഴ്ച തന്നെ പുറത്തിറങ്ങും.

മൂന്ന് താരങ്ങള്‍ക്ക് സെഞ്ചുറി; ഇന്ത്യക്കെതിരെ രണ്ടാം ഏകദിനത്തില്‍ 400 കടന്ന് വെസ്റ്റ് ഇന്‍ഡീസ്

Web Desk — Wed, 30 Sep 2026 18:35:24 +0530

ഗുവാഹത്തി: വെസ്റ്റ് ഇന്‍ഡീസിനെതിരെ രണ്ടാം ഏകദിനത്തില്‍ ഇന്ത്യക്ക് 406 റണ്‍സിന്റെ കൂറ്റന്‍ വിജയലക്ഷ്യം. അമീര്‍ ജാംഗൂ (114), ജോണ്‍ കാംപെല്‍ (101), ഷായ് ഹോപ്പ് (104) എന്നിവരുടെ സെഞ്ചുറികളാണ് വിന്‍ഡീസിനെ കൂറ്റന്‍ സ്‌കോറിലേക്ക് നയിച്ചത്. ഏകദിന ചരിത്രത്തില്‍ ആദ്യമായിട്ടാണ് വിന്‍ഡീസ് 400 റണ്‍സ് നേടുന്നത്. ഏഴ് വിക്കറ്റുകള്‍ സന്ദര്‍ശകര്‍ക്ക് നഷ്ടമായി. കുല്‍ദീപ് യാദവ്, രവീന്ദ്ര ജഡേജ, ഗുര്‍നൂര്‍ ബ്രാര്‍ എന്നിവര്‍ രണ്ട് വിക്കറ്റുകള്‍ വീതം വീഴ്ത്തി. മൂന്ന് മത്സരങ്ങളുടെ പരമ്പരയില്‍ ഇന്ത്യ നിലവില്‍ 1-0ത്തിന് മുന്നിലാണ്.

തുടക്കത്തില്‍ തന്നെ വിന്‍ഡീസിന് ഓപ്പണര്‍ കീസി കാര്‍ട്ടിയുടെ (9) വിക്കറ്റ് നഷ്ടമായിരുന്നു. പരിക്കേറ്റ് ജസ്റ്റിന്‍ ഗ്രീവ്‌സിന് പകരം ഓപ്പണറായെത്തിയ താരത്തെ പ്രസിദ്ധ് കൃഷ്ണ, നമന്‍ ധിറിന്റെ കൈകളിലെത്തിക്കുകയായിരുന്നു. തുടര്‍ന്ന് കാംപെല്‍ - ഹോപ്പ് സഖ്യം 110 റണ്‍സ് കൂട്ടിചേര്‍ത്തു. ഇതിനിടെ കാംപെല്‍ സെഞ്ചുറിയും പൂര്‍ത്തിയാക്കി. 68 പന്തുകള്‍ മാത്രം നേരിട്ട താരം അഞ്ച് സിക്‌സും ഒമ്പത് ഫോറും ഉള്‍പ്പെടെയാണ് 101 റണ്‍സ് നേടിയത്.

തുടര്‍ന്നെത്തിയ ജാംഗൂ ഉത്തരവാദിത്തം ഏറ്റെടുത്തു. ക്യാപ്റ്റന്‍ ഹോപ്പിനൊപ്പം 182 റണ്‍സ് ചേര്‍ക്കാന്‍ ജാംഗൂന് സാധിച്ചു. 40-ാം ഓവറിന്റെ അവസാന പന്തിലാണ് കൂട്ടുകെട്ട് പൊളിഞ്ഞത്. കുല്‍ദീപ് യാദവിന്റെ പന്തില്‍ അക്വിബ് നബിക്ക് ക്യാച്ച് നല്‍കി ഹോപ്പ് മടങ്ങി. 94 പന്തുകള്‍ നേരിട്ട താരം മൂന്ന് സിക്‌സും എട്ട് ഫോറും നേടിയിരുന്നു. പിന്നാലെ വിന്‍ഡീസിന്റെ ഇന്നിംഗ്‌സിന് വേഗം കുറയുകയാണ് ചെയ്തത്. ഷെഫാനെ റുതര്‍ഫോര്‍ഡ് (0) നേരിട്ട ആദ്യ പന്തില്‍ തന്നെ മടങ്ങി. ബ്രാറിനായിരുന്നു വിക്കറ്റ്.

ഇതിനിടെ സെഞ്ചുറി പൂര്‍ത്തിയാക്കിയ ജാംഗൂ 43-ാം ഓവറിലും പുറത്തായി. ജഡേജയുടെ പന്തില്‍ റുതുരാജ് ഗെയ്ക്വാദിന് ക്യാച്ച്. കീമോ പോള്‍ (3), അല്‍സാരി ജോസഫ് (8) എന്നിവര്‍ക്ക് തിളങ്ങാന്‍ കഴിയാതെ പോയി. റോസ്റ്റണ്‍ ചേസിനാവട്ടെ (25 പന്തില്‍ 29) അവസാന ഓവറുകളില്‍ വലിയ ഷോട്ടുകള്‍ കളിക്കാന്‍ കഴിഞ്ഞതുമില്ല. ഷമാര്‍ ജോസഫ് (8 പന്തില്‍ 14) ചേസിനൊപ്പം പുറത്താവാതെ നിന്നു. 10 ഓവര്‍ എറിഞ്ഞ ബ്രാര്‍ 96 റണ്‍സ് വഴങ്ങി. ജഡേജ 75 റണ്‍സും കുല്‍ദീപ് 65ഉം വിട്ടുകൊടുത്തു. 8.5 ഓവര്‍ എറിഞ്ഞ അരങ്ങേറ്റക്കാരന്‍ അക്വിബ് നബി 84 റണ്‍സാണ് വഴങ്ങിയത്.

ഐസിസി റാങ്കിംഗില്‍ സ്ഥാനം മെച്ചപ്പെടുത്തി വിരാട് കോലി; ആദ്യ നാലില്‍ മൂന്നും ഇന്ത്യന്‍ താരങ്ങള്‍

Web Desk — Wed, 30 Sep 2026 19:33:48 +0530

ദുബായ്: വെസ്റ്റ് ഇന്‍ഡീസിനെതിരായ ആദ്യ ഏകദിനത്തിലെ തകര്‍പ്പന്‍ സെഞ്ച്വറിയുടെ (പുറത്താകാതെ നേടിയ 139*) കരുത്തില്‍ ഇന്ത്യന്‍ താരം വിരാട് കോലി പുതിയ ഐസിസി ഏകദിന ബാറ്റിംഗ് റാങ്കിംഗില്‍ രണ്ടാം സ്ഥാനത്തേക്ക് മുന്നേറി. കരിയറിലെ 55-ാം ഏകദിന സെഞ്ച്വറിയും (ആകെയുള്ള 86-ാം അന്താരാഷ്ട്ര സെഞ്ച്വറി) സ്വന്തമാക്കിയ കോലി 796 റേറ്റിംഗ് പോയന്റുകളോടെയാണ് ഒരു സ്ഥാനം മെച്ചപ്പെടുത്തിയത്.

അതേ മത്സരത്തില്‍ സെഞ്ച്വറി നേടിയ മറ്റൊരു ഇന്ത്യന്‍ താരമായ ശുഭ്മാന്‍ ഗില്‍ തന്നെയാണ് റാങ്കിംഗില്‍ ഒന്നാം സ്ഥാനം നിലനിര്‍ത്തിയിരിക്കുന്നത്. 816 റേറ്റിംഗ് പോയന്റുകളുള്ള ഗില്ലാണ് പട്ടികയില്‍ തലപ്പത്ത്. 794 പോയന്റുള്ള ന്യൂസിലന്‍ഡിന്റെ ഡാരില്‍ മിച്ചല്‍ മൂന്നാം സ്ഥാനത്തുണ്ട്. മുന്‍ ഇന്ത്യന്‍ ക്യാപ്റ്റന്‍ രോഹിത് ശര്‍മ 719 പോയന്റോടെ നാലാം സ്ഥാനത്താണ്.

മറ്റ് രാജ്യങ്ങളിലെ താരങ്ങളുടെ പ്രകടനങ്ങളും റാങ്കിംഗില്‍ മാറ്റങ്ങളുണ്ടാക്കിയിട്ടുണ്ട്. ഇംഗ്ലണ്ടിനെതിരെയുള്ള പരമ്പരയില്‍ ലീഡ്‌സില്‍ വെച്ച് 121 റണ്‍സ് നേടിയ ശ്രീലങ്കന്‍ താരം കുശാല്‍ മെന്‍ഡിസ് മൂന്ന് സ്ഥാനങ്ങള്‍ കയറി കരിയറിലെ ഏറ്റവും മികച്ച ഏഴാം സ്ഥാനത്തെത്തി (674 റേറ്റിംഗ് പോയന്റ്). ഓവലില്‍ നടന്ന മത്സരത്തില്‍ അര്‍ദ്ധസെഞ്ച്വറി നേടിയ ഇംഗ്ലണ്ടിന്റെ ഹാരി ബ്രൂക്ക് ഒരു സ്ഥാനം മെച്ചപ്പെടുത്തി 11-ാം സ്ഥാനത്തേക്ക് (650) എത്തി. അയര്‍ലന്‍ഡിന്റെ ഹാരി ടെക്ടറുടെ തൊട്ടുപിന്നിലാണ് ഹാരി ബ്രൂക്കിപ്പോള്‍.

ദക്ഷിണാഫ്രിക്കയില്‍ ഓസ്‌ട്രേലിയക്കെതിരെ സെഞ്ച്വറി നേടിയ ക്യാപ്റ്റന്‍ ടെംബ ബാവുമ 10 സ്ഥാനങ്ങള്‍ കയറി 32-ാം സ്ഥാനത്തെത്തി (556). മികച്ച പ്രകടനം തുടരുന്ന മാത്യു ബ്രീറ്റ്‌സ്‌കെ 19 സ്ഥാനങ്ങള്‍ മെച്ചപ്പെടുത്തി 21-ാം സ്ഥാനത്തേക്കും (607) ഉയര്‍ന്നു. രണ്ടാം ഏകദിനത്തില്‍ 93 പന്തില്‍ 142 റണ്‍സടിച്ച ദക്ഷിണാഫ്രിക്കയുടെ ഡേവിഡ് മില്ലര്‍ റാങ്കിംഗില്‍ 41-ാം സ്ഥാനത്തേക്ക് കയറി.

വിജയത്തോടെ ഒമാന്‍ പര്യടനത്തിന് അവസാനമിട്ട് കേരളം; ടി20 മത്സരത്തില്‍ ഒമാനെ തോല്‍ിച്ചത് 25 റണ്‍സിന്

Web Desk — Wed, 30 Sep 2026 17:58:30 +0530

മസ്‌ക്കറ്റ്: ഒമാന്‍ പര്യടനത്തിലെ അവസാന മത്സരത്തിലും കേരളത്തിന് വിജയം. ട്വന്റി-20 മത്സരത്തില്‍ 25 റണ്‍സിനാണ് കേരളം ഒമാനെ പരാജയപ്പെടുത്തിയത്. ആദ്യം ബാറ്റ് ചെയ്ത കേരളം 20 ഓവറില്‍ ഏഴ് വിക്കറ്റ് നഷ്ടത്തില്‍ 215 റണ്‍സെടുത്തു. മറുപടി ബാറ്റിങ്ങിനിറങ്ങിയ ഒമാന്‍ 18.4 ഓവറില്‍ 190 റണ്‍സിന് ഓള്‍ഔട്ടായി. ക്യാപ്റ്റന്‍ കൃഷ്ണപ്രസാദിന്റെയും രോഹന്‍ നായരുടെയും ഉജ്ജ്വല ബാറ്റിങ്ങും അഖില്‍ സ്‌കറിയയുടെ അഞ്ച് വിക്കറ്റ് പ്രകടനവുമാണ് കേരളത്തിന് വിജയമൊരുക്കിയത്. കേരളം - 20 ഓവറില്‍ 215/7, ഒമാന്‍ 18.4 ഓവറില്‍ 190

ആദ്യം ബാറ്റ് ചെയ്ത കേരളത്തിന് തുടക്കത്തില്‍ തന്നെ ഒരു റണ്‍സെടുത്ത ഗോവിന്ദ് ദേവ് പൈയുടെ വിക്കറ്റ് നഷ്ടമായി. എന്നാല്‍ രണ്ടാം വിക്കറ്റില്‍ ഒന്നിച്ച ക്യാപ്റ്റന്‍ കൃഷ്ണപ്രസാദും രോഹന്‍ നായരും ചേര്‍ന്ന തകര്‍പ്പന്‍ കൂട്ടുകെട്ടാണ് കേരളത്തിന് മികച്ച സ്‌കോര്‍ സമ്മാനിച്ചത്. തകര്‍ത്തടിച്ച ഇരുവരും ചേര്‍ന്ന് 48 പന്തുകളില്‍ 95 റണ്‍സ് കൂട്ടിച്ചേര്‍ത്തു. കൃഷ്ണപ്രസാദ് 37 പന്തുകളില്‍ ആറ് ഫോറും നാല് സിക്‌സുമടക്കം 63 റണ്‍സെടുത്തു. രോഹന്‍ നായര്‍ 31 പന്തുകളില്‍ മൂന്ന് ഫോറും അഞ്ച് സിക്‌സുമടക്കം 58 റണ്‍സ് നേടി.

നിഖില്‍ തോട്ടത്ത് 20 പന്തുകളില്‍ നിന്ന് 36 റണ്‍സും അബ്ദുള്‍ ബാസിദ് 12 പന്തുകളില്‍ നിന്ന് 24 റണ്‍സും നേടി. ഏഴ് പന്തുകളില്‍ നിന്ന് 20 റണ്‍സുമായി പുറത്താകാതെ നിന്ന നിഖില്‍ മുരളീധരന്റെ ഇന്നിങ്‌സും ശ്രദ്ധേയമായി. ഒമാന് വേണ്ടി ജി.എല്‍. യശസ് മൂന്നും ഫര്‍മാന്‍ രണ്ടും വിക്കറ്റുകള്‍ വീഴ്ത്തി.

മറുപടി ബാറ്റിങ്ങിനിറങ്ങിയ ഒമാന് 61 റണ്‍സെടുക്കുന്നതിനിടെ നാല് വിക്കറ്റുകള്‍ നഷ്ടമായി. എന്നാല്‍ മധ്യനിരയില്‍ ക്യാപ്റ്റന്‍ സിക്രിയ ഇസ്ലാമും ഉസ്മാന്‍ അഫ്രീദിയും ചേര്‍ന്നുള്ള കൂട്ടുകെട്ട് ഒമാന് പ്രതീക്ഷ നല്‍കി. ഇരുവരും ചേര്‍ന്ന് 58 റണ്‍സ് കൂട്ടിച്ചേര്‍ത്തു. സിക്രിയ ഇസ്ലാം 27 പന്തുകളില്‍ നിന്ന് 60-ഉം ഉസ്മാന്‍ അഫ്രീദി 19 പന്തുകളില്‍ നിന്ന് 45-ഉം റണ്‍സ് നേടി. എന്നാല്‍ ഇരുവരെയും പുറത്താക്കി നിഖില്‍ കേരളത്തിന് നിര്‍ണ്ണായക വഴിത്തിരിവ് സമ്മാനിച്ചപ്പോള്‍, വാലറ്റത്തെ തകര്‍ത്തെറിഞ്ഞ് അഖില്‍ സ്‌കറിയ ടീമിനെ വിജയത്തിലെത്തിച്ചു. അഖില്‍ സ്‌കറിയ അഞ്ചും നിഖില്‍ മുരളീധരനും കാര്‍ത്തിക് ബാലചന്ദ്രനും രണ്ട് വിക്കറ്റ് വീതവും വീഴ്ത്തി.

പര്യടനത്തിലുടനീളം ഒരേയൊരു മത്സരത്തില്‍ മാത്രമാണ് കേരളം തോല്‍വി വഴങ്ങിയത്. കേരളവും ഒമാനും മുംബൈയും പങ്കെടുത്ത ഇന്‍വിറ്റേഷന്‍ ടൂര്‍ണമെന്റിലും കേരളം തന്നെയായിരുന്നു ജേതാക്കള്‍.

പരിക്കിനെ തുടര്‍ന്ന് ബ്രസീല്‍ താരം റാഫിന്യ പുറത്ത്; ഇന്ത്യയുമായുള്ള മത്സരത്തില്‍ നിന്ന് പിന്മാറി

Web Desk — Wed, 30 Sep 2026 17:47:47 +0530

ബ്രിസ്‌ബേന്‍: ഇന്ത്യയ്ക്കെതിരായ ചരിത്രപരമായ ആദ്യ സീനിയര്‍ അന്താരാഷ്ട്ര സൗഹൃദ മത്സരത്തിന് മുന്നേ ബ്രസീലിന് തിരിച്ചടി. ഒക്ടോബര്‍ 3-ന് കൊല്‍ക്കത്തയില്‍ നടക്കാനിരിക്കുന്ന മത്സരത്തില്‍ ബാഴ്‌സലോണയുടെ സ്റ്റാര്‍ ഫോര്‍വേഡ് റാഫിന്യ കളിക്കില്ല. ഓസ്‌ട്രേലിയക്കെതിരായ മത്സരത്തിനിടയില്‍ തുടയ്ക്ക് പരിക്കേറ്റതിനെ തുടര്‍ന്ന് താരത്തെ ബ്രസീല്‍ സ്‌ക്വാഡില്‍ നിന്ന് ഒഴിവാക്കി. ഓസ്‌ട്രേലിയക്കെതിരായ രണ്ടാം മത്സരത്തിന്റെ ആദ്യ പകുതിയിലാണ് റാഫിന്യക്ക് പരിക്കേറ്റത്. പെനാല്‍റ്റിയിലൂടെ ഒരു ഗോള്‍ നേടുകയും ചെയ്ത താരം, മുന്‍കരുതലിന്റെ ഭാഗമായി രണ്ടാം പകുതിയില്‍ കളത്തിലിറങ്ങിയിരുന്നില്ല.

തുടര്‍ന്ന് നടത്തിയ പരിശോധനയില്‍ താരത്തിന്റെ വലത് തുടയുടെ പിന്‍ഭാഗത്ത് ചെറിയ തോതില്‍ പേശിയില്‍ നീര്‍ക്കെട്ട് ഉള്ളതായി ബ്രസീലിയന്‍ ഫുട്‌ബോള്‍ കോണ്‍ഫെഡറേഷന്‍ സ്ഥിരീകരിച്ചു. പരിക്ക് ഗുരുതരമല്ലെങ്കിലും മുന്‍പും ഇതേ ഭാഗത്ത് പരിക്കേറ്റ ചരിത്രമുള്ളതിനാല്‍ ബ്രസീല്‍ ടീം റിസ്‌ക് എടുക്കാന്‍ തയ്യാറായില്ല. ചികിത്സയ്ക്കായി താരം ഉടന്‍ ബാഴ്‌സലോണയിലേക്ക് മടങ്ങും. ഇന്ത്യക്കെതിരായ മത്സരത്തിനായി പകരക്കാരനെ ടീമില്‍ ഉള്‍പ്പെടുത്തിയിട്ടില്ല. ഒക്ടോബര്‍ 1-ന് കൊല്‍ക്കത്തയിലാണ് മത്സരം.

റാഫിന്യയുടെ പിന്മാറ്റം ഇന്ത്യന്‍ ആരാധകര്‍ക്ക് നിരാശയാണെങ്കിലും, കാര്‍ലോ ആഞ്ചലോട്ടിയുടെ കീഴിലുള്ള ബ്രസീല്‍ നിരയില്‍ വിനീഷ്യസ് ജൂനിയര്‍, എന്‍ട്രിക്, ബ്രൂണോ ഗിമാറസ്, മാര്‍ക്വിഞ്ഞോസ് തുടങ്ങിയ സൂപ്പര്‍ താരങ്ങള്‍ അണിനിരക്കുന്നുണ്ട്.

ഇന്ത്യയുടെ ചരിത്രപരമായ പോരാട്ടം

ലോകകപ്പ് ടീമുകള്‍ക്കെതിരെയുള്ള മത്സരങ്ങളുടെ ആദ്യ ഘട്ടത്തില്‍ ഇന്ത്യ മികച്ച തുടക്കമാണ് നേടിയത്. സെപ്റ്റംബര്‍ 26ന് ബെംഗളൂരുവില്‍ നടന്ന മത്സരത്തില്‍ ഖാലിദ് ജമീലിന്റെ കീഴിലുള്ള ഇന്ത്യന്‍ ടീം പനാമയെ 1-1 സമനിലയില്‍ തളച്ചു. റയാന്‍ വില്യംസ് ഇന്ത്യക്കായി ഗോള്‍ നേടിയപ്പോള്‍, ഒമര്‍ വലെന്‍സിയയിലൂടെ പനാമ തിരിച്ചടിച്ചു. എന്നാല്‍ ഇന്ത്യയുടെ അടുത്ത ദൗത്യം ഇതിലും കഠിനമാണ്. ഒക്ടോബര്‍ 3-ന് ബ്രസീലിനെയും, തുടര്‍ന്ന് ഒക്ടോബര്‍ 6-ന് ഉറുഗ്വെയെയും കൊല്‍ക്കത്തയില്‍ ഇന്ത്യ നേരിടും.

കാര്യവട്ടത്തിന് മറുപടി ഗുവാഹത്തിയിൽ, കാംപ്ബെല്ലിന്‍റെ റെക്കോർഡ് സെഞ്ചുറിയിൽ വിൻഡീസ് കൂറ്റന്‍ സ്കോറിലേക്ക്

Gopalakrishnan C — Wed, 30 Sep 2026 15:58:35 +0530

ഗുവാഹത്തി: ഇന്ത്യയ്‌ക്കെതിരായ രണ്ടാം ഏകദിന മത്സരത്തിൽ വെടിക്കെട്ട് തുടക്കവുമായി വെസ്റ്റ് ഇന്‍ഡീസ്. ടോസ് നഷ്ടമായി ആദ്യം ബാറ്റ് ചെയ്യുന്ന വിന്‍ഡീസ് ഒടുവില്‍ വിവരം ലഭിക്കുമ്പോള്‍ 26 ഓവറില്‍ 2 വിക്കറ്റ് നഷ്ടത്തില്‍ 207 റണ്‍സെന്ന ശക്തമായ നിലയിലാണ്. 53 റണ്‍സുമായി ക്യാപ്റ്റൻ ഷായ് ഹോപ്പും 31 റണ്‍സോടെ അമീര്‍ ജാംഗൂവുമാണ് ക്രീസില്‍. വെടിക്കെട്ട് സെഞ്ചുറി നേടിയ ഓപ്പണര്‍ ജോണ്‍ കാംപ്‌ബെല്ലിന്‍റെയും(101) 9 റണ്‍സെടുത്ത കീസി കാര്‍ട്ടിയുടെയും വിക്കറ്റുകളാണ് വിന്‍ഡീസിന് നഷ്ടമായത്. ഗുര്‍നൂര്‍ ബ്രാറിനും പ്രസിദ്ധ് കൃഷ്ണക്കുമാണ് വിക്കറ്റ്.

ടോസ് നഷ്ടത്തിന് പിന്നാലെ ക്രീസിലിറങ്ങിയ വിന്‍ഡീസിന് ഓപ്പണര്‍മാരായ ജോണ്‍ കാംപ്ബെല്ലും ജസ്റ്റിന്‍ ഗ്രീവ്സിന്‍റെ അസാന്നിധ്യത്തില്‍ ഓപ്പണറായി ഇറങ്ങിയ കീസി കാര്‍ട്ടിയും നല്ല തുടക്കമാണ് നല്‍കിയത്. അരങ്ങേറ്റതാരം ആഖിബ് നബിയെ തുടക്കം മുതല്‍ കണക്കിന് ശിക്ഷിച്ച ജോണ്‍ കാംപ്ബെല്‍-കീസ് കാര്‍ട്ടി സഖ്യം ഓപ്പണിംഗ് വിക്കറ്റില്‍ 5 ഓവറില്‍ 37 റണ്‍സെടുത്തശേഷമാണ് വേര്‍പിരിഞ്ഞത്. കീസി കാര്‍ട്ടിയെ പുറത്താക്കിയ പ്രസിദ്ധ് കൃഷ്ണയാണ് ഇന്ത്യക്ക് ആദ്യ ബ്രേക്ക്ത്രൂ നല്‍കിയത്.

In the air... and in comes a diving Naman Dhir ✈️Prasidh Krishna with the opening breakthrough ☝️Updates ▶️ https://t.co/6XCYRtZLAi#TeamIndia | #INDvWI | @mflone_ | @prasidh43 pic.twitter.com/QrcMAljwHE

— BCCI (@BCCI) September 30, 2026

എന്നാല്‍ രണ്ടാം വിക്കറ്റില്‍ ഒത്തുചേര്‍ന്ന ഷായ് ഹോപ്പ് കാംപ്ബെല്ലിന് മികച്ച പിന്തുണ നല്‍കിയതോടെ വിന്‍ഡീസ് സ്കോര്‍ കുതിച്ചു. 29 പന്തില്‍ അര്‍ധസെഞ്ചുറി തികച്ച കാംപ്ബെല്‍ ഇന്ത്യക്കെതിരെ വിന്‍ഡീസ് താരത്തിന്‍റെ അതിവേഗ അര്‍ധസെഞ്ചുറിയുടെ റെക്കോര്‍ഡ് സ്വന്തമാക്കി. 30 പന്തില്‍ അര്‍ധസെഞ്ചുറി തികച്ച ക്രിസ് ഗെയ്‌ലിന്‍റെ റെക്കോര്‍ഡാണ് കാംപ്ബെല്‍ തകര്‍ത്തത്.

John Campbell Gets To His Hundred In Just 65 Balls The Fastest ODI Ton By A West Indian Vs India ‍ pic.twitter.com/yXvBxI5McX

— Cricket Dani (@CricketDani56) September 30, 2026

അര്‍ധസെഞ്ചുറിക്ക് ശേഷവും തകര്‍ത്തടിച്ച കാംപ്ബെല്‍ പവര്‍ പ്ലേയില്‍ വിന്‍ഡീസിനെ 96 റണ്‍സിലെത്തിച്ചു. ഒരു ടെസ്റ്റ് രാജ്യത്തിനെതിരെ വിന്‍ഡീസ് നേടുന്ന ഏറ്റവും ഉയര്‍ന്ന പവര്‍ പ്ലേ സ്കോറാണിത്. പവര്‍ പ്ലേയില്‍ വിന്‍ഡീസ് നേടിയ 96 റണ്‍സില്‍ 69 റണ്‍സും കാംപ്ബെല്ലിന്‍റെ ബാറ്റില്‍ നിന്നായിരുന്നു. 65 പന്തില്‍ സെഞ്ചുറി തികച്ച കാംപ്ബെല്‍ ഇന്ത്യക്കെതിരെ വിന്‍ഡീസ് താരത്തിന്‍റെ വേഗമേറിയ സെഞ്ചുറിയുടെയും റെക്കോര്‍ഡ് സ്വന്തമാക്കി. 1999ൽ ഇന്ത്യക്കെതിരെ റിക്കാര്‍ഡോ പവൽ 72 പന്തില്‍ സെഞ്ചുറി നേടിയതിന്‍റെ റെക്കോര്‍ഡാണ് കാംപ്ബെല്‍ തകര്‍ത്തത്.

FASTEST FIFTY! John Campbell brings up his half-century in just 28 balls! pic.twitter.com/6XN59jUWI7

— Rehan 56 (@imrehan056) September 30, 2026

വിന്‍ഡീസ് താരത്തിന്‍റെ വേഗമേറിയ അഞ്ചാമത്തെ ഏകദിന സെഞ്ചുറിയുമാണിത്. സെഞ്ചുറിക്ക് പിന്നാലെ ഗുര്‍നൂര്‍ ബ്രാറിന്‍റെ പന്തില്‍ നമൻ ധിറിന് ക്യാച്ച് നല്‍കി കാംപ്ബെല്‍ മടങ്ങിയത് ഇന്ത്യക്ക് ആശ്വാസമായി. ആദ്യ മത്സരത്തില്‍ സെഞ്ചുറി നേടിയ ജസ്റ്റിന്‍ ഗ്രീവ്സ് പരിക്കുമൂലം പുറത്തിരുന്ന മത്സരത്തില്‍ കീസി കാര്‍ട്ടിയാണ് കാംപ്ബെല്ലിനൊപ്പം ഓപ്പണ്‍ ചെയ്തത്. കാര്യവട്ടത്ത് നടന്ന ആദ്യ മത്സരത്തിലും കാംപ്ബെല്‍ അര്‍ധസെഞ്ചുറി നേടി തിളങ്ങിയിരുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഗോള്‍, അസിസ്റ്റ്, ലോകകിരീടം; ബലോണ്‍ ഡി ഓര്‍ ലമീൻ യമാല്‍ ഉറപ്പിച്ചോ?

Hari Krishnan M — Wed, 30 Sep 2026 15:38:27 +0530

ദീ‍ര്‍ഘകാലമായി ഞാൻ ബാലോണ്‍ ഡി ഓര്‍ നേടാൻ കഴിയുന്ന നിലവാരത്തിലാണ് കളിക്കുന്നത്, ഇത്തവണ പുരസ്കാരത്തിന് അര്‍ഹനുമാണ്, സ്പാനിഷ് യുവതാരം ലമീൻ യമാലിന്റെ വാക്കുകളാണ്. അവകാശവാദം ഉന്നയിച്ചുകൊണ്ടുള്ള യമാലിന്റെ ഈ പ്രസ്താവനയ്ക്ക് എതിരെ ഉയര്‍ന്ന വിമര്‍ശനങ്ങള്‍ക്ക് അല്‍പ്പം കട്ടി കൂടുതലുമായിരുന്നു. തനിക്കെതിരെ ശബ്ദമുയര്‍ത്തിയവര്‍ക്കായി സെവിയ്യയിലെ മൈതാനം യമാല്‍ മാറ്റിവെച്ചു ഇന്നലെ. യുവേഫ നേഷൻസ് ലീഗില്‍ ക്രൊയേഷ്യക്കെതിരായ മത്സരത്തില്‍ ആ ഇടം കാല്‍ കളം ഭരിച്ചപ്പോള്‍ പേരിന് നേര്‍ക്ക് വീണത് രണ്ട് ഗോളും ഒരു അസിസ്റ്റും.

ബാലോണ്‍ ഡി ഓറില്‍ പരിഗണിക്കപ്പെടാത്ത ഈ പ്രകടനങ്ങള്‍ക്കൊണ്ട് യമാലിന് വോട്ടിങ്ങില്‍ സ്വാധീനം ചെലുത്താൻ കഴിയുമോ, സുവര്‍ണഗോളം ആ കൈകളിലെത്താനുള്ള സാധ്യത എത്രത്തോളമാണ്.

മൂന്ന് പ്രധാന ക്രൈറ്റീരിയയാണ് ഫ്രാൻസ് ഫുട്ബോള്‍ നിശ്ചയിച്ചിരിക്കുന്നത്. ഒന്ന്, വ്യക്തിഗത പ്രകടനവും സ്വാധീനവും. രണ്ട്, ക്ലബ്ബിനും രാജ്യത്തിനുമൊപ്പമുള്ള കിരീടങ്ങളും ആ നേട്ടങ്ങളിലെ താരത്തിന്റെ പ്രധാന്യവും. മൂന്ന്, ക്ലാസ് ആൻഡ് ഫെയര്‍ പ്ലേ. മൈതാനത്തെ പെരുമാറ്റം, സ്പോര്‍ട്ട്സ്മാൻഷിപ്പ് എന്നിവ. 2025 ഓഗസ്റ്റ് മുതല്‍ 2026 ജൂലൈ വരെയുള്ള കാലയളവാണ് പരിഗണിക്കുന്നതും. ബാഴ്സലോണയ്ക്കൊപ്പമുള്ള ക്ലബ്ബ് സീസണിലെ യമാലിന്റെ പ്രകടനവും സ്പെയിനൊപ്പമുള്ള ലോകകപ്പുമാണ് ഇവിടെ ഏറ്റവും പ്രാധാന്യം കല്‍പ്പിക്കപ്പെടുന്നത്.

ബാഴ്സലോണയില്‍ ഹൻസി ഫ്ലിക്കിന്റെ സിസ്റ്റത്തിലെ വിങ്ങര്‍ മാത്രമല്ല യമാല്‍. അവരുടെ അറ്റാക്കിങ് സ്ട്രക്ചറിലെ ഏറ്റവും നിര്‍ണായകമായ താരമാണ്. മോസ്റ്റ് ഇൻഫ്ലുവൻഷ്യല്‍ പ്ലെയര്‍ ഓണ്‍ ദ പിച്ച്. വലതുവിങ്ങില്‍ നിന്ന് ബോക്സിലേക്കുള്ള മൂവുകള്‍, വണ്‍ ഓണ്‍ വണ്‍ സിറ്റുവേഷൻസിലെ മികവ്, ഫൈനല്‍ തേഡിലെ അണ്‍പ്രെഡിക്റ്റബിലിറ്റി, ചാൻസുകള്‍ സൃഷ്ടിക്കുന്നത്, എതിര്‍ പ്രതിരോധനിരയെ സ്ട്രെച്ച് ചെയ്യിക്കാനും തന്നിലേക്ക് എത്തിച്ച് സഹതാരങ്ങള്‍ക്ക് സ്പേസ് നേടിക്കൊടുക്കാനുമുള്ള വൈഭവം...അങ്ങനെ നീളുന്നു യമാല്‍ എന്ന അര്‍ക്കിടെക്റ്റിന്റെ ഇംപാക്റ്റ്.

കഴിഞ്ഞ സീസണില്‍ ലാ ലിഗയിലെ മികച്ച താരമായി തിരഞ്ഞെടുക്കുമ്പോള്‍ 27 ഗോള്‍ കോണ്‍ട്രിബ്യൂഷനായിരുന്നു യമാലിന്റെ പേരിലുണ്ടായിരുന്നത്. 16 ഗോളുകളും 11 അസിസ്റ്റും. ബാഴ്സയെ കിരീടം നിലനിര്‍ത്താൻ സഹായിച്ചത് യമാലിന്റെ ബൂട്ടുകളായിരുന്നു. യുവേഫ ചാമ്പ്യൻസ് ലീഗിലാണെങ്കില്‍ 10 ഗോളും ഏഴ് അസിസ്റ്റും നേടി. ഒരു അറ്റാക്കിങ് പ്ലെയറിനെ സംബന്ധിച്ച് ചാമ്പ്യൻസ് ലീഗിലെ ഈ കണക്കുകള്‍ എലൈറ്റ് ലൈവലില്‍ തന്നെയാണ്. പക്ഷേ, ഇവിടെ യമാല്‍ തിരിച്ചടി നേരിടുന്ന ഒരു ഘടകം കൂടിയുണ്ട്.

അത് ചാമ്പ്യൻസ് ലീഗിലെ ബാഴ്സയുടെ പ്രകടനമാണ്. ക്വാര്‍ട്ടര്‍ ഫൈനലില്‍ ഫ്ലിക്കിന്റെ സംഘം പുറത്താവുകയായിരുന്നു. ബാലോണ്‍ ഡി ഓറില്‍ ഏറ്റവും നിര്‍ണായകമായ ടൂര്‍ണമെന്റുകളിലൊന്നാണ് ചാമ്പ്യൻസ് ലീഗ്. സ്പെയിനില്‍ മാത്രമായി ഒതുങ്ങി നില്‍ക്കുന്നതാണ് ക്ലബ്ബ് തലത്തിലെ യമാലിന്റെ പ്രകടനങ്ങള്‍. ഈ ഒരു വസ്തുത മുന്നിലുണ്ടെങ്കിലും ലോകകപ്പ് നടക്കുന്ന വര്‍ഷങ്ങളില്‍ മറ്റെന്തിനേക്കാള്‍ മുൻതൂക്കം ലോകകപ്പിന് തന്നെയായിരിക്കും. യമാലിന്റെ പ്രസ്താവനയ്ക്ക് പിന്നിലെ ആത്മവിശ്വാസവും ലോകകപ്പാണ്.

ലോകകപ്പില്‍ എട്ട് മത്സരങ്ങളില്‍ നിന്നായി 615 മിനുറ്റുകളാണ് സ്പെയിനിനുവേണ്ടി യമാല്‍ കളിച്ചത്. ടൂര്‍ണമെന്റില്‍ ഒരു ഗോള്‍ മാത്രമാണ് യമാല്‍ നേടിയത്. ഗോളുകളുടെ എണ്ണത്തിനേക്കാള്‍ വലുതായിരുന്നു യമാല്‍ മൈതാനത്ത് ചെലുത്തിയ സ്വാധീനം. സ്പെയിനിന്റെ അറ്റാക്കിങ് പ്ലേയില്‍ യമാലിന്റെ ഡിസിഷൻ മേക്കിങ്ങും എതിര്‍ ഡിഫൻസിനെ സ്ട്രെച്ച് ചെയ്യാനുള്ള കഴിവുമെല്ലാം ഏറെ നിര്‍ണായകമായിരുന്നു.

ടൂര്‍ണമെന്റിലെ ഫേവറൈറ്റ്സായിരുന്നു ഫ്രാൻസിനെതിരെ സ്പെയിനെ ലീഡിലേക്ക് എത്തിച്ച പെനാലിറ്റി നേടിക്കൊടുത്തതും യമാലായിരുന്നു. ഫൈനലിലെ പ്രകടനമെടുത്താല്‍ ഒരു ബിഗ് ചാൻസ്, കീ പാസുകള്‍, നാല് ഷോട്ടുകള്‍, ഡിഫൻസീവ് കോണ്‍ട്രിബ്യൂഷൻസ്...ഫെറാൻ ടോറസിന്റെ വിജയഗോള്‍ ജനിക്കുന്നത് വലതുവിങ്ങില്‍ യമാലിന്റെ ബൂട്ടില്‍ നിന്നാണ്, ശേഷമാണ് പെഡ്രൊ പോറോയിലേക്കും നിക്കോ വില്യംസിലേക്കും പന്തെത്തുന്നത്. യമാലിലേക്ക് അര്‍ജന്റീനൻ പ്രതിരോധന നിര കൂടുതല്‍ ശ്രദ്ധ കേന്ദ്രീകരിച്ചതും ഗോളിലേക്ക് വഴിവെച്ചു.

എന്നിരുന്നാലും ലോകകപ്പിലെ ഏറ്റവും മികച്ച താരം യമാലായിരുന്നില്ല, സ്പെയിന്റെ റോഡ്രിയായിരുന്നു. എംബാപെ ഗോള്‍ഡൻ ബൂട്ടും സ്വന്തമാക്കി. കുബാര്‍സി യുവതാരവും. പക്ഷേ, ബാഴ്സലോണ, ലാ ലിഗ, ചാമ്പ്യൻസ് ലീഗ്, സ്പെയിൻ, ലോകകപ്പ് - ഈ ടോട്ടല്‍ ഇക്വേഷൻ നോക്കുമ്പോള്‍ യമാലിന് സാധ്യതയുണ്ട്.

ഇനി നടപ്പ് സീസണിന്റെ സ്വാധീനം. ലാ ലിഗയില്‍ ഏഴ് മത്സരങ്ങളില്‍ നിന്ന് ഏഴ് ഗോളും നാല് അസിസ്റ്റും. ചാമ്പ്യൻസ് ലീഗില്‍ ഒരു ഗോളും രണ്ട് അസിസ്റ്റും. നേഷൻസ് ലീഗില്‍ രണ്ട് മത്സരങ്ങളില്‍ മൂന്ന് ഗോളും ഒരു അസിസ്റ്റും. ആകെ 10 മത്സരങ്ങളില്‍ നിന്ന് 18 ഗോള്‍ കോണ്‍ട്രിബ്യൂഷൻസ്. ബലോണ്‍ ദി ഓറിന് പരിഗണിക്കപ്പെടില്ലെങ്കിലും യമാലിന്റെ നിലവിലെ പ്രകടനങ്ങള്‍ വോട്ടിങ്ങിനെ സ്വാധീനിക്കാൻ കെല്‍പ്പുള്ളതാണ്.

ബലോണ്‍ ഡി ഓറിന്റെ മൂന്ന് ക്രൈറ്റീരയകളും യമാലിന്റെ കാര്യത്തില്‍ അനുകൂലമാണ്. യമാലിന് കടുത്ത വെല്ലുവിളി ഉയര്‍ത്തുന്ന ഹാരി കെയിനും കിലിയൻ എംബാപയും ഗോളടിയുടെ കാര്യത്തില്‍ ലോകകപ്പിലും ക്ലബ്ബ് തലത്തിലും വലിയ ഇംപാക്റ്റുണ്ടാക്കിയ താരങ്ങളാണ്. എംബാപെ ലോകകപ്പിന്റെ ചരിത്രത്തിലെ ടോപ് സ്കോററാകുകയും രണ്ടാം തവണയും ടൂര്‍ണമെന്റിലെ ഗോള്‍ഡൻ ബൂട്ട് നേടുകയും ചെയ്തു, ചാമ്പ്യൻസ് ലീഗിലും ടോപ് സ്കോററായി. കെയിനാകട്ടെ യൂറോപ്പിലെ ടോപ് സ്കോറര്‍. ഇരുവരുടേയും സാധ്യതകള്‍ കുറയ്ക്കുന്നത് കിരീടങ്ങളുടെ അഭാവമാണ്...

യമാലാകട്ടെ 2025 ബലോണ്‍ ഡി ഓര്‍ റാങ്കിങ്ങില്‍ രണ്ടാം സ്ഥാനത്ത് എത്തിയിരുന്നു, അതിലും മികച്ച നേട്ടവുമായാണ് ഇക്കുറി എത്തുന്നതും...അതുകൊണ്ട് യമാലിന് സാധ്യതയേറെയാണ്...

ഏഷ്യൻ ഗെയിംസിൽ ഇന്ത്യക്ക് സുവര്‍ണദിനം, ആർച്ചറിയിലും ഷൂട്ടിംഗിലുമടക്കം 4 സ്വര്‍ണം; മെഡല്‍ പട്ടികയില്‍ വമ്പന്‍ കുതിപ്പ്

Gopalakrishnan C — Wed, 30 Sep 2026 15:31:58 +0530

നഗോയ (ജപ്പാൻ): ഏഷ്യൻ ഗെയിംസിന്‍റെ പതിനൊന്നാം ദിനത്തിൽ ഇന്ത്യയുടെ സ്വർണ്ണ വേട്ട. കോംപൗണ്ട് ആർച്ചറിയിലെ മൂന്ന് സ്വർണ്ണ മെഡലുകളും സ്വന്തമാക്കി ഇന്ത്യ ക്ലീൻ സ്വീപ്പ് പൂർത്തിയാക്കി. വനിതകളുടെ കോംപൗണ്ട് ടീം ഇനത്തിൽ ചൈനയെ 238-234 എന്ന സ്കോറിന് തോൽപ്പിച്ചാണ് ഇന്ത്യൻ വനിതാ സംഘം ആര്‍ച്ചറിയിലെ സ്വർണ്ണ വേട്ടയ്ക്ക് തുടക്കമിട്ടത്. ദക്ഷിണ കൊറിയയുടെ ലോക റെക്കോർഡിനൊപ്പമെത്തിയ പ്രകടനത്തോടെയാണ് ഇന്ത്യ സ്വർണ്ണം നിലനിർത്തിയത്.

പിന്നാലെ കോംപൗണ്ട് മിക്സ്ഡ് ടീം സ്വർണ്ണം നേടുകയും തകർപ്പൻ ജയത്തോടെ 2028 ലോസ് ഏയ്ഞ്ചൽസ് ഒളിമ്പിക്സിലേക്കുള്ള യോഗ്യത ഉറപ്പിക്കുകയും ചെയ്തു. ഫൈനലിൽ ചൈനയെ തകർത്ത് പുരുഷ കോംപൗണ്ട് ടീമും സ്വർണ്ണം നേടിയതോടെ ആർച്ചറിയിൽ ഇന്ത്യൻ സംഘം സ്വപ്നസമാനമായ ഹാട്രിക് തികച്ചു. ഷൂട്ടിംഗ് ട്രാപ്പ് മിക്സ്ഡ് ടീം ഫൈനലിൽ നീരു ദണ്ഡ - കൈനൻ ചെനായി സഖ്യം ഇന്ത്യയ്ക്കായി മറ്റൊരു സ്വർണം കൂടി സമ്മാനിച്ചു. മത്സരത്തിന്‍റെ തുടക്കത്തിൽ പിഴവുകൾ വരുത്തിയെങ്കിലും പിന്നീട് ശക്തമായി തിരിച്ചുവന്ന ഇന്ത്യൻ സഖ്യം ഖത്തറിനെ ഒരൊറ്റ പോയിന്‍റിന് മറികടന്നാണ് ഒന്നാമതെത്തിയത്. നീരു ദണ്ഡ രണ്ട് ദിവസത്തിനിടെ നേടുന്ന രണ്ടാം സ്വർണ്ണ മെഡലാണിത്.

A golden salute to Kushal Dalal, Sahil Rajesh Jadhav & Ganesh Maniratnam Thirumuru for clinching GOLD in the Compound Men’s Team event at #AsianGames2026!Our archers continue to hit the bullseye with brilliance and consistency—securing India’s 3rd GOLD in Archery! … pic.twitter.com/u2ZLwQWLax

— Kiren Rijiju (@KirenRijiju) September 30, 2026

ബോക്സിംഗ് റിംഗിൽ വനിതകളുടെ 60 കിലോഗ്രാം സെമിഫൈനലിൽ കടുത്ത പോരാട്ടത്തിനൊടുവിൽ തോൽവി വഴങ്ങിയ പ്രിയ ഘംഗാസ് വെങ്കല മെഡൽ സ്വന്തമാക്കി. അതേസമയം, 75 കിലോഗ്രാം വിഭാഗത്തിൽ നാറ്റാലിയ ബോഗ്ദാനോവയെ 3-2 ന് തകർത്ത് ഇന്ത്യയുടെ സ്റ്റാർ ബോക്സർ ലൗലിന ബോർഗോഹെയ്ൻ ഫൈനലിൽ കടന്ന് മെഡൽ ഉറപ്പിച്ചു. വനിതാ സ്ക്വാഷ് ടീമും സെമിഫൈനലിലേക്ക് മുന്നേറി മെഡൽ ഉറപ്പിച്ചിട്ടുണ്ട്.

! Kushal Dalal, Sahil Jadhav and Ganesh Thirumuru add another Gold to India’s archery haul at Aichi-Nagoya 2026! Watch the 20th Asian Games Aichi-Nagoya 2026, LIVE on Sony Sports Network TV channels & Sony LIV.… pic.twitter.com/w8r39n0OFj

— Sony Sports Network (@SonySportsNetwk) September 30, 2026

ജുഡോ 48 കിലോഗ്രാം റിപ്പഷാജിൽ മത്സരിച്ച അസ്മിത ഡേയ്ക്ക് വെങ്കല മെഡൽ മത്സരത്തിൽ തോൽവി വഴങ്ങേണ്ടി വന്നു. ആർച്ചറിയിലെയും ഷൂട്ടിംഗിലെയും സുവർണ്ണ നേട്ടങ്ങളോടെ ഏഷ്യൻ ഗെയിംസ് മെഡൽ പട്ടികയിൽ ഇന്ത്യ വലിയ കുതിപ്പാണ് നടത്തിയിരിക്കുന്നത്. ഇന്ന് നാലു സ്വര്‍ണം കൂടി നേടിയതോടെ ഏഷ്യൻ ഗെയിംസില്‍ ഇന്ത്യയുടെ സ്വര്‍ണനേട്ടം ഇരട്ടയക്കം തൊട്ടു.10 സ്വര്‍ണവും 21 വെള്ളിയും 28 വെങ്കലവുമടക്കം 59 മെഡലുകളുമായി ഏഴാം സ്ഥാനത്താണ് ഇന്ത്യയിപ്പോള്‍.149 സ്വര്‍ണവും 66 വെള്ളിയും 54 വെങ്കലവുമടക്കം 269 മെഡലുകളുമായി ചൈന തന്നെയാണ് ഒന്നാമത്. 46 സ്വര്‍ണമടക്കം 191 മെഡലുകളുമായി ആതിഥേയരായ ജപ്പാന്‍ രണ്ടാമതും 24 സ്വര്‍ണമടക്കം 99 മെഡലുകളുമായി ദക്ഷിണ കൊറിയ മൂന്നാം സ്ഥാനത്തുമാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

സ്വന്തമായി സ്റ്റേഡിയം മുതല്‍ പദ്ധതികള്‍; കേരള ബ്ലാസ്റ്റേഴ്‌സ് ഇന്റർനാഷണലാകുന്നോ?

Hari Krishnan M — Wed, 30 Sep 2026 15:26:34 +0530

കിരീടമില്ലാത്ത 12 വർഷങ്ങള്‍, സാമ്പത്തിക പ്രതിസന്ധി, ആരാധകരും മാനേജ്മെന്റും തമ്മിലുള്ള ശീതയുദ്ധങ്ങള്‍, നിറഞ്ഞ ഗ്യാലറികള്‍ ഒഴിഞ്ഞ സീസണുകള്‍...അങ്ങനെ മൈതാനത്തെ ദുഖങ്ങളുടെ നീണ്ട നിര പറയാനുണ്ട് കേരള ബ്ലാസ്റ്റേഴ്‌സിന്. ആ അധ്യായം അടയുകയാണ്, കൊമ്പന്റെ തുമ്പിക്കൈ പിടിക്കാൻ യുഎഇ ആസ്ഥാനമായുള്ള സ്പോർട്‌സ് ടെക് കണ്‍സോഷ്യമായ അല്‍ ഫുർസാൻ ഒരുങ്ങിക്കഴിഞ്ഞു. ക്ലബ്ബിന്റെ ഓപ്പറേഷണല്‍ പങ്കാളിയായ ഓഫിയോ സ്പോർട്ടിയും. ബ്ലാസ്റ്റേഴ്‌സിന്റെ പുതുകാലത്തിനാണോ തുടക്കമാകുന്നത്.

ഐഎസ്എല്ലിന്റെ പുതിയ സീസണ്‍ ആരംഭിക്കാൻ ദിവസങ്ങള്‍ മാത്രം ബാക്കി നില്‍ക്കെയാണ് അനിശ്ചിതത്വങ്ങള്‍ അവസാനിപ്പിച്ചുകൊണ്ടുള്ള ഈ കൈമാറ്റം. ഹൈദരാബാദ് ആസ്ഥാനമായ മാഗ്നം സ്പോർട്‌സില്‍ നിന്നാണ് 100 ശതമാനം ഓഹരികളും യുഎഇ രാജകുടുംബാംഗമായ ഷെയ്ഖ് അഹമ്മദ് ബിൻ ഫൈസല്‍ അല്‍ ഖാസിമിയുടെ നേതൃത്വത്തിലുള്ള അല്‍ ഫുർസാനിലേക്ക് എത്തുന്നത്. ഘട്ടം ഘട്ടമായായിരിക്കും കൈമാറ്റം പൂർത്തിയാക്കുക. പുതിയ ഉടമകള്‍ ഏറ്റെടുത്ത പശ്ചാത്തലത്തില്‍ ഗ്യാലറികളിലേക്ക് മടങ്ങിയെത്തുമെന്ന് ആരാധകക്കൂട്ടായ്മയായ മഞ്ഞപ്പടയും വ്യക്തമാക്കിയിട്ടുണ്ട്.

ഇതെല്ലാം ഒരുവശത്ത് നില്‍ക്കട്ടെ, ആഗോള തലത്തില്‍ പ്രീതി നേടിയ ബ്ലാസ്റ്റേഴ്‌സ് എന്ന ക്ലബ്ബിന്റെയും അവരുടെ ആരാധകരുടേയും ഏറ്റവും വലിയ ലക്ഷ്യം ഒരു കിരീടമാണ്. കഴിഞ്ഞ മാനേജ്മെന്റിനെ ഒരു സമ്പൂർണ പരാജയമാണെന്ന് വിലയിരുത്താൻ സാധിക്കില്ലെങ്കിലും കിരീടത്തിന്റെ അഭാവം ക്ലബ്ബിന്റെ സാമ്പത്തികമായുള്ള വളർച്ചയെ ബാധിച്ച ഘടകങ്ങളിലൊന്നാണ്. പ്രത്യേകിച്ചും കഴിഞ്ഞ കുറച്ച് സീസണുകളിലെ ക്ലബ്ബിന്റെ ദയനീയമായ പ്രകടനങ്ങള്‍.

ഇവാൻ വുകുമനോവിച്ച് കാലത്തിന് ശേഷം ബ്ലാസ്റ്റേഴ്‌സിന് കളത്തില്‍ കാര്യമായ ഇംപാക്റ്റുണ്ടാക്കാൻ സാധിച്ചിട്ടുമില്ല. ബ്ലാസ്റ്റേഴ്‌സിന്റെ ഐക്കണുകളായ താരങ്ങള്‍ വരെ ക്ലബ്ബ് വിടേണ്ടതായി വന്നു. സാമ്പത്തിക പ്രതിസന്ധിയിലൂടെ ക്ലബ്ബ് കടന്നുപോകുന്ന പശ്ചാത്തലത്തില്‍ കരാറുകള്‍ പുതുക്കാൻ കഴിയാതെയാണ് പല താരങ്ങള്‍ക്കും മറ്റ് ടീമുകളിലേക്ക് ചേക്കേറേണ്ടിപ്പോലും വന്നത്. നിലവില്‍ അഡ്രിയാൻ ലൂണ മാത്രമാണ് മടങ്ങിയെത്തിയിട്ടുള്ളത്. ആഷ്‌ലി വെസ്റ്റ്‌വുഡ് പരിശീലകനായും തുടരുമെന്ന് ക്ലബ്ബ് അധികൃതർ അറിയിച്ചിട്ടുണ്ട്.

വെസ്റ്റ്‌വുഡും ലൂണയും മാത്രം മതിയോ കിരീടത്തിലേക്ക് എത്താൻ എന്നതാണ് ചോദ്യം. പുതിയ മാനേജ്മെന്റിന്റെ മുന്നിലെ ഏറ്റവും വലിയ വെല്ലുവിളിയും അത് തന്നെയാണ്. ഓരോ പൊസിഷനിലേക്ക് താരങ്ങളെ എത്തിക്കുക എന്നത്. നിലവില്‍ ലൂണ ഉള്‍പ്പെടെ 13 താരങ്ങള്‍ മാത്രമാണ് ബ്ലാസ്റ്റേഴ്‌സിനൊപ്പമുള്ളത്. 2026-27 സീസണിലേക്കുള്ള സ്ക്വാഡ് പ്രഖ്യാപനം ഉടൻ ഉണ്ടായേക്കുമെന്നാണ് വിവരം.

പക്ഷേ ഒരു മുഴുസീസണിനുള്ള സ്ക്വാഡിനെ ചുരുങ്ങിയ സമയം കൊണ്ട് തയാറാക്കുക എന്ന കടമ്പ അപ്പോഴും ബാക്കിയാണ്, പുതിയ സീസണിലേക്ക് താത്കാലികമായൊരു സ്ക്വാഡിനെ ഒരുക്കിയാലും ഭാവിയിലേക്ക് നോക്കുമ്പോള്‍ താരങ്ങളുടെ കരാറുകള്‍, വിദേശ താരങ്ങള്‍, ഇന്ത്യൻ താരങ്ങള്‍, കോച്ചിങ് സ്റ്റാഫ്, സ്കൗട്ടിങ് ടീം, ട്രെയിനിങ് ഫസിലിറ്റികള്‍...അങ്ങനെ നീളുന്നു ടിക്കിടേണ്ട കോളങ്ങള്‍. താരങ്ങളെ ഉയര്‍ന്ന തുക കൊടുത്തു കൊണ്ടുവന്ന് പ്രതീക്ഷ നല്‍കുന്ന ക്ലബ്ബുകളുടെ സ്റ്റാറ്റര്‍ജിയായിരിക്കുമോ പുതിയ മാനേജ്മെന്റും സ്വീകരിക്കുക അതോ കൃത്യമായ സ്കൗട്ടിങ്ങിലൂടെ റിക്രൂട്ട് ചെയ്ത് പ്ലെയര്‍ ഡെവലപ്പ്മെന്റിലൂടെയുള്ള പദ്ധതിയായിരിക്കുമോയെന്നതും ആകാംഷയോടെ നോക്കിക്കാണേണ്ടതാണ്.

ഐഎസ്എല്‍ മാത്രമല്ല പുതിയ മാനേജ്മെന്റിന്റെ ലക്ഷ്യമെന്നാണ് മനസിലാക്കേണ്ടത്. സ്വന്തമായി സ്റ്റേഡിയം, അക്കാദമികള്‍, കൊമേഷ്യല്‍ ഡെവലപ്മെന്റ് അങ്ങനെ ഒരു എക്കോ സിസ്റ്റം തന്നെ സൃഷ്ടിക്കാനാണ് ഒരുക്കം. ഇത് ക്ലബ്ബിന്റെ സാമ്പത്തിക വളര്‍ച്ചയെ സഹായിക്കുന്ന ഘടകമാണ്. സ്വന്തമായൊരു സ്റ്റേഡിയമുണ്ടെങ്കില്‍ റവന്യൂവില്‍ കാര്യമായ വര്‍ധനയുണ്ടാകും. നിലവില്‍ കൊച്ചിയിലെ ജവഹര്‍ലാല്‍ നെഹ്രു സ്റ്റേഡിയമാണ് ബ്ലാസ്റ്റേഴ്‌സിന്റെ ഹോം. ഏകദേശം അരലക്ഷത്തിലധികം ആരാധക‍ര്‍ ശരാശരിയായി എത്താറുണ്ട് ബ്ലാസ്റ്റേഴ്‌സിന്റെ മത്സരങ്ങള്‍ക്കായി.

ബ്ലാസ്റ്റേഴ്‌സിന്റെ കരുത്ത് അവരുടെ ഈ ആരാധകര്‍ തന്നെയാണ്. ബ്ലാസ്റ്റേഴ്‌സ് ആരാധകര്‍ക്കായി മെമ്പര്‍ഷിപ്പ് ഉള്‍പ്പെടെയുള്ള പദ്ധതികള്‍ ആലോചനയിലുണ്ടെന്ന് ഓഫിയോ അധികൃതര്‍ വ്യക്തമാക്കിയിട്ടുണ്ട്. ഇത് വലിയൊരു കൊമേഷ്യല്‍ ഗ്രോത്തിലേക്ക് നയിക്കാൻ ഇടയുണ്ട്. പ്രീമിയം മെമ്പര്‍ഷിപ്പ്, ഔദ്യോഗിക ജഴ്‌സി, ട്രെയിനിങ് കിറ്റുകള്‍, ബ്ലാസ്റ്റേഴ്‌സിന്റെ ലൈഫ് സ്റ്റൈല്‍ വെയറുകള്‍, ഫാൻ സോണുകള്‍, ഇവന്റുകള്‍...അങ്ങനെ നീളുന്നു സാധ്യതകളുടെ പട്ടിക.

പെട്ടൊന്നൊരു ഷിഫ്റ്റ് പ്രതീക്ഷിക്കേണ്ടതില്ല, വളരെ സ്റ്റഡിയായുള്ള ഗ്രോത്തിനായി ഗ്രാസ്റൂട്ട് ലെവലില്‍ നിന്നാണ് ആരംഭിക്കേണ്ടത്. ഒന്നുമില്ലായ്മയില്‍ കൂടെനിന്ന ആരാധകര്‍ ട്രാൻസിഷൻ ഫേസിലും കൈവിടില്ല എന്ന ആത്മവിശ്വാസം പുതിയ ഉടമകള്‍ക്കുണ്ടാകും. എത്രത്തോളം നിക്ഷേപിക്കാൻ അല്‍ ഫുര്‍സാൻ തയാറാകുമെന്നതിനെ ആശ്രയിച്ചായിരിക്കും എല്ലാം.

ഉടമസ്ഥാവകാശത്തിന്റെ മാറ്റത്തിന് ശേഷം വളര്‍ന്ന ക്ലബ്ബുകളുടെ എണ്ണം ചെറുതല്ല. ഐഎസ്എല്ലില്‍ തന്നെ മുംബൈ സിറ്റി ഉദാഹരണമാണ്, ആഗോള തലത്തില്‍ ഫ്രഞ്ച് ക്ലബ്ബായ പാരിസ് സെന്റ് ജര്‍മനുമുണ്ട്. അതുപോലൊരു വളര്‍ച്ചയ്ക്ക് കൂടെയാണ് ബ്ലാസ്റ്റേഴ്‌സിന്റെ ചുവടുവെപ്പെന്നുവേണം മനസിലാക്കാൻ. അങ്ങനെയെങ്കില്‍ ഒരു ഗെയിം ചെയ്ഞ്ചറാകും ഈ ഔണര്‍ഷിപ്പ് ഷിഫ്റ്റ്.

രണ്ടാം ഏകദിനത്തിലും ഇന്ത്യക്ക് നിര്‍ണായക ടോസ്, 4 മാറ്റങ്ങളോടെ വിന്‍ഡീസ്, ഇന്ത്യൻ ടീമില്‍ ഒരു മാറ്റം

Gopalakrishnan C — Wed, 30 Sep 2026 13:54:23 +0530

ഗുവാഹത്തി: വെസ്റ്റ് ഇന്‍ഡീസിനെതിരായ ഏകദിന പരമ്പരയിലെ രണ്ടാം മത്സരത്തിലും ടോസ് നേടിയ ഇന്ത്യ ഫീല്‍ഡിംഗ് തെരഞ്ഞെടുത്തു. കാര്യവട്ടത്ത് ആദ്യ മത്സരം കളിച്ച ടീമില്‍ ഒരു മാറ്റവുമായാണ് ഇന്ത്യ രണ്ടാം മത്സരത്തിനിറങ്ങുന്നത്. ഓള്‍ റൗണ്ടര്‍ നിതീഷ് കുമാര്‍ റെഡ്ഡിക്ക് പകരം പേസര്‍ ആഖിബ് നബി ഇന്ത്യയുടെ പ്ലേയിംഗ് ഇലവനിലെത്തി. അതേസമയം, ആദ്യ മത്സരം തോറ്റ ടീമില്‍ മൂന്ന് മാറ്റങ്ങളോടെയാണ് വിൻഡീസ് ഇറങ്ങുന്നത്. ആദ്യ മത്സരത്തില്‍ സെഞ്ചുറി നേടിയ ജസ്റ്റിന്‍ ഗ്രീവ്‌സ് പരിക്കിനെ തുടര്‍ന്ന് പുറത്തായപ്പോള്‍ ജ്യുവൽ ആന്‍ഡ്ര്യു, മാത്യു ഫോര്‍ഡ്, ഗുഡകേഷ് മോടി എന്നിവരും പ്ലേയിംഗ് ഇലവനില്‍ നിന്ന് പുറത്തായി. പകരക്കാരായി ഷമര്‍ ജോസഫ്, വിറ്റല്‍ ലോസ്, കീമോ പോള്‍ എന്നിവ‍ർ വിന്‍ഡീസിന്‍റെ പ്ലേയിംഗ് ഇലവനിലെത്തി.

Toss #TeamIndia have won the toss and elected to bowl first in the 2️⃣nd ODI.Updates ▶️ https://t.co/6XCYRtZLAi#INDvWI | @mflone_ pic.twitter.com/F7QLtGTYxJ

— BCCI (@BCCI) September 30, 2026

ഗുവാഹത്തിയിലെ ബർസപാര സ്റ്റേഡിയത്തിലെ പിച്ച് മുൻ മത്സരവേദിയെ അപേക്ഷിച്ച് കൂടുതൽ പുല്ലുള്ളതാണെന്നും പച്ചപ്പു നിറഞ്ഞ പ്രതലമായതിനാൽ തുടക്കത്തിൽ ഫാസ്റ്റ് ബൗളർമാർക്ക് മികച്ച പിന്തുണ ലഭിക്കുമെന്നാണ് പ്രതീക്ഷിക്കുന്നതെന്നും ഗിൽ വ്യക്തമാക്കി. ആദ്യ മത്സരത്തിൽ തുടക്കത്തിലെ സമ്മർദ്ദം അതിജീവിച്ച് ടീം നടത്തിയ ശക്തമായ തിരിച്ചുവരവിൽ സംതൃപ്തി പ്രകടിപ്പിച്ച നായകൻ, ഗുവാഹത്തിയിലെ കടുത്ത ചൂടും ഉയർന്ന ഈർപ്പവും പേസർമാർക്ക് വലിയ വെല്ലുവിളിയാകുമെന്നും കൂട്ടിച്ചേർത്തു.

Team India win the toss and elects to bowl first! Auqib Nabi makes his debut while Nitish Kumar Reddy misses out. #INDvWI 2nd ODI | LIVE NOW https://t.co/hOOhJILBTl pic.twitter.com/2YBEfuLsSw

— Star Sports (@StarSportsIndia) September 30, 2026

വെസ്റ്റ് ഇൻഡീസ് പ്ലേയിംഗ് ഇലവൻ: ജോൺ കാംപ്‌ബെൽ, കീസി കാർട്ടി, ഷായ് ഹോപ്പ് (വിക്കറ്റ് കീപ്പർ/ക്യാപ്റ്റൻ), ആമിർ ജംഗൂ, ഷെറഫെയ്ൻ റൂഥർഫോർഡ്, റോസ്റ്റൺ ചേസ്, കീമോ പോൾ, അൽസാരി ജോസഫ്, ഷമാർ ജോസഫ്, ജെയ്ഡൻ സീൽസ്, വിറ്റെൽ ലോസ്

ഇന്ത്യ പ്ലേയിംഗ് ഇലവൻ: രോഹിത് ശർമ്മ, ശുഭ്മൻ ഗിൽ (ക്യാപ്റ്റൻ), വിരാട് കോഹ്‌ലി, രുതുരാജ് ഗെയ്ക്‌വാദ്, കെ.എൽ. രാഹുൽ (വിക്കറ്റ് കീപ്പർ), നമൻ ധീർ, രവീന്ദ്ര ജഡേജ, ആഖിബ് നബി, ഗുർനൂർ ബ്രാർ, കുൽദീപ് യാദവ്, പ്രസിദ്ധ് കൃഷ്ണ.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ആൻസി സോജനെതിരായ സൈബർ ആക്രമണത്തിൽ ശക്തമായ പ്രതിഷേധവുമായി കേരള അത്‌ലറ്റിക്സ് അസോസിയേഷൻ

Elsa TJ — Wed, 30 Sep 2026 13:08:50 +0530

തിരുവനന്തപുരം: മലയാളി അത്ലെറ്റ് ആൻസി സോജനെതിരായ സൈബർ ആക്രമണത്തിൽ ശക്തമായ പ്രതിഷേധവുമായി കേരള അത്‌ലറ്റിക്സ് അസോസിയേഷൻ. ആൻസിയെ വ്യക്തിപരമായ പരിഹാസങ്ങളിലൂടെ അപമാനിക്കുന്നത് അംഗീകരിക്കാനാകില്ല. ആൻസി നേട്ടത്തിലെത്തിയത് കഠിനാധ്വാനവും അർപ്പണ ബോധവും കൊണ്ടാണെന്ന് വ്യക്തമാക്കിയ അസോസിയേഷൻ #standwithancy ക്യാമ്പയിനും ആഹ്വാനം ചെയ്‌തിട്ടുണ്ട്. ഏഷ്യൻ ഗെയിംസിൽ ലോംഗ് ജംപിൽ വെള്ളി മെഡൽ നേട്ടത്തിന് പിന്നാലെ മത്സര സമയത്ത് ആൻസി ധരിച്ചിരുന്ന ആഭരണങ്ങൾ, ഹെയർസ്റ്റൈൽ, മേക്കപ്പ് എന്നിവയെ കുറിച്ചാണ് സാമൂഹ്യ മാധ്യമങ്ങളിൽ വിമർശനം ശക്തമായത്. ആഭരണങ്ങൾ അഴിച്ചുവെച്ച് ചാടിയിരുന്നെങ്കിൽ സ്വർണം കിട്ടുമായിരുന്നു എന്ന രീതിയിൽ വിമർശനം രൂക്ഷമായതോടെ ആൻസിയും കുടുംബവും ശക്തമായ ഭാഷയിൽ പ്രതികരിക്കുകയും ചെയ്തിരുന്നു.

ഇത്തരം സ്റ്റൈലുകൾ ട്രാക്കിൽ ആൻസിയുടെ ആത്മവിശ്വാസം കൂട്ടാനാണ് സഹായിക്കുന്നതെന്നാണ് ആൻസിയുടെ സഹോദരി പ്രതികരിച്ചത്. അധ്വാനത്തെ മാനിച്ചില്ലെങ്കിലും നിന്ദിക്കരുതെന്നും മാലയിട്ടുകൊണ്ടാണ് താൻ അഞ്ജു ബോബി ജോർജിന്റെ 22 വർഷം പഴക്കമുള്ള ദേശീയ റെക്കോർഡ് തകർത്തതെന്നും ആൻസിയും പ്രതികരിച്ചിരുന്നു.

ഏഷ്യാനെറ്റ് ന്യൂസ് ലൈവ് കാണാം

സഹീർ ഖാനെ മുഖ്യ പരിശീലകനാക്കിയതിന് പിന്നാലെ പുതിയ ബൗളിംഗ് കോച്ചിനെ പ്രഖ്യാപിച്ച് ചെന്നൈ സൂപ്പര്‍ കിംഗ്സ്

Gopalakrishnan C — Wed, 30 Sep 2026 12:36:19 +0530

ചെന്നൈ: ഐപിഎൽ സീസണിന് മുന്നോടിയായി പരിശീലക നിരയിൽ അഴിച്ചുപണി തുടർന്ന് ചെന്നൈ സൂപ്പർ കിംഗ്സ്. സ്റ്റീഫൻ ഫ്ലെമിംഗിന് പകരം പുതിയ പരിശീലകനായി സഹീർ ഖാനെ നിയമിച്ചതിന് പിന്നാലെ, മുൻ ഇന്ത്യൻ പേസർ മോഹിത് ശർമയെ ടീമിന്‍റെ പുതിയ ബൗളിംഗ് കോച്ചായി നിയമിക്കുമെന്ന് സിഎസ്കെ സിഇഒ കാശി വിശ്വനാഥൻ വ്യക്തമാക്കി. സഹീർ ഖാന്‍റെ നിർദ്ദേശപ്രകാരമാണ് മോഹിതിനെ ബൗളിംഗ് കോച്ചായി തിരഞ്ഞെടുത്തത്.

കഴിഞ്ഞ ഡിസംബറിലാണ് 38-കാരനായ മോഹിത് ശർമ പ്രൊഫഷണൽ ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചത്. നിലവിലെ ബൗളിംഗ് കൺസൾട്ടന്‍റ് എറിക് സിമ്മൺസിന് പകരമാണോ മോഹിത് എത്തുന്നത് എന്ന കാര്യത്തിൽ വ്യക്തത വന്നിട്ടില്ല. ബാറ്റിംഗ് കോച്ച് മൈക്കൽ ഹസി ഓസ്ട്രേലിയൻ ദേശീയ ടീമിലേക്ക് മടങ്ങുന്നതിനാൽ ബാറ്റിംഗ് പരിശീലകന്‍റെ കാര്യത്തിലും ഉടൻ തീരുമാനമുണ്ടാകും.

ഇന്ത്യക്കായി 34 മത്സരങ്ങൾ കളിച്ചിട്ടുള്ള മോഹിത്, 20 മത്സരങ്ങളിലും എം.എസ്. ധോണിയുടെ ക്യാപ്റ്റൻസിക്ക് കീഴിലാണ് കളിച്ചത്. 2015ലെ ഏകദിന ലോകകപ്പ് ടീമിലും മോഹിത് അംഗമായിരുന്നു. 2013-ൽ സിഎസ്കെയിലൂടെ ഐപിഎല്ലിൽ അരങ്ങേറ്റം കുറിച്ച മോഹിത്, മൂന്ന് സീസണുകളിൽ നിന്നായി 57 വിക്കറ്റുകൾ നേടി തിളങ്ങി. പിന്നീട് പഞ്ചാബ് കിംഗ്സ്, ഗുജറാത്ത് ടൈറ്റൻസ്, ഡൽഹി ക്യാപിറ്റൽസ് ടീമുകൾക്കായും കളിച്ചു. 2023 സീസണിൽ ഗുജറാത്ത് ടൈറ്റൻസിനായി 27 വിക്കറ്റുകൾ വീഴ്ത്തി മികച്ച തിരിച്ചുവരവാണ് താരം നടത്തിയത്.

സഹീർ ഖാന്‍റെയും മോഹിത് ശർമ്മയുടെയും വരവോടെ സിഎസ്കെയെ വീണ്ടും പഴയതുപോലെ ഒരു 'ബൗളിംഗ് ഫസ്റ്റ്' ടീമാക്കാനാണ് മാനേജ്‌മെന്‍റ് ലക്ഷ്യമിടുന്നത്. മോഹിതിന്‍റെ അനുഭവസമ്പത്ത് സിഎസ്കെയുടെ യുവ പേസർമാർക്ക് വലിയ കരുത്താകുമെന്നാണ് പ്രതീക്ഷിക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

‘പുറത്തുനിന്ന് അഭിപ്രായം പറയാൻ എളുപ്പമാണ്'; ഏകദിന ടീമിലെ അവഗണനയെക്കുറിച്ച് മനസു തുറന്ന് റിഷഭ് പന്ത്

Gopalakrishnan C — Wed, 30 Sep 2026 11:45:07 +0530

മുംബൈ: ഇന്ത്യൻ ഏകദിന ടീമിൽ നിന്ന് തുടർച്ചയായി തഴയപ്പെടുന്നതിന്‍റെ വിഷമം പരസ്യമാക്കി വിക്കറ്റ് കീപ്പർ ബാറ്റർ റിഷഭ് പന്ത്. വിൻഡീസിനെതിരായ ഏകദിന പരമ്പരയ്ക്കുള്ള ടീമിൽ നിന്നും പുറത്താക്കപ്പെട്ടതിന് പിന്നാലെയാണ് ബിസിനസ് ഓഫ് സ്പോർട്സ് പോഡ്‌കാസ്റ്റിൽ റിഷഭ് പന്ത് മനസു തുറന്നത്. പുറത്തിരിക്കേണ്ടി വരുമ്പോൾ വിഷമം തോന്നുന്നത് സ്വാഭാവികമാണെന്നും എന്നാൽ കായികതാരമെന്ന നിലയിൽ തിരിച്ചുവരവ് ഉറപ്പാണെന്നും റിഷഭ് പന്ത് പറഞ്ഞു.

2024 ഓഗസ്റ്റ് 7-നാണ് റിഷഭ് പന്ത് ഇന്ത്യയ്ക്കായി അവസാനമായിഏകദിനത്തിൽ കളിച്ചത്. ടെസ്റ്റ് ക്രിക്കറ്റിൽ തന്‍റേതായ സ്ഥാനം കെട്ടിപ്പടുത്തെങ്കിലും വൈറ്റ് ബോള്‍ ക്രിക്കറ്റിൽ പന്തിന് പ്രതീക്ഷിച്ചത്ര തിളങ്ങാനായിരുന്നില്ല. 31 ഏകദിനങ്ങളിൽ നിന്ന് 33.50 ശരാശരിയിൽ 871 റൺസ് മാത്രമാണ് പന്തിന് നേടിയത്. 2022-ൽ ഇംഗ്ലണ്ടിനെതിരെ നേടിയ പുറത്താകാതെ നേടിയ 125 റൺസാണ് ഏകദിനത്തിലെ ഏക സെഞ്ചുറി.

കാര്യങ്ങൾ വിചാരിച്ചതുപോലെ നടക്കാതെ വരുമ്പോൾ തീർച്ചയായും സങ്കടം തോന്നും. പക്ഷേ ഒരു കായികതാരത്തിന്‍റെ ചിന്താഗതി എപ്പോഴും തിരിച്ചുവരവിലാണ് ശ്രദ്ധ കേന്ദ്രീകരിക്കുന്നത്. തിരിച്ചടികൾ ജീവിതത്തിന്‍റെ ഭാഗമാണ്. പുറത്തുനിന്ന് അഭിപ്രായങ്ങൾ പറയാൻ വളരെ എളുപ്പമാണ്, എന്നാൽ കാര്യങ്ങൾ ശരിയായ വഴിയിലെത്താൻ ആളുകൾ കുറച്ചുകൂടി കാത്തിരിക്കണമെന്നും പന്ത് വ്യക്തമാക്കി.

കാറപകടത്തെ തുടർന്ന് ഒരു വർഷത്തോളം കളിക്കളത്തിൽ നിന്ന് മാറിനിൽക്കേണ്ടി വന്നതാണ് പന്തിന് തിരിച്ചടിയായത്. ഈ സമയത്ത് കെ.എൽ രാഹുൽ ഇന്ത്യയുടെ പ്രധാന വിക്കറ്റ് കീപ്പർ ബാറ്ററായി മാറി. ഇഷാൻ കിഷൻ, ധ്രുവ് ജുറെൽ എന്നിവരും സെലക്ടർമാരുടെ മുൻഗണനാ പട്ടികയിൽ മുന്നിലെത്തിയതോടെ പന്തിന് ഏകദിന ടീമിലേക്കുള്ള വാതിലുകൾ അടയുകയായിരുന്നു. ഇറാനി കപ്പിനുള്ള റെസ്റ്റ് ഓഫ് ഇന്ത്യ ടീമിന്‍റെ ക്യാപ്റ്റനായി തിരഞ്ഞെടുക്കപ്പെട്ടെങ്കിലും ഇന്ത്യൻ ഏകദിന ജേഴ്സിയിലേക്ക് തിരിച്ചെത്തുക തന്നെയാണ് തന്‍റെ പ്രധാന ലക്ഷ്യമെന്ന് പന്ത് ഉറപ്പിച്ചുപറയുന്നു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

സ്പോർട്സുമായി ബന്ധമുള്ളവർ ഇങ്ങനെ ചെയ്യില്ല, സൈബർ ആക്രമണത്തിനെതിരെ തുറന്നടിച്ച് ആൻസി സോജൻ

Elsa TJ — Wed, 30 Sep 2026 11:40:18 +0530

ടോക്കിയോ: സൈബർ ആക്രമണത്തിനെതിരെ തുറന്നടിച്ച് ആൻസി സോജൻ. മാലയിടുന്നതിനെ ചൊല്ലിയുള്ള വിമർശനം തോന്നിവാസം. സ്പോർട്സുമായി ബന്ധമുള്ളവർ ഇങ്ങനെ ചെയ്യില്ല. വ്യാജ ഐഡികളിൽ നിന്നാണ് ആക്രമണം. സ്വന്തം അക്കൌണ്ടിൽ പറയാനുള്ള ധൈര്യം ഇവർക്ക് ഇല്ല. മെഡൽ കിട്ടിയ ഇനം ഏതാണെന്നു പോലും ഇവർക്ക് അറിയില്ല. തന്റെ അധ്വാനത്തെ മാനിച്ചില്ലെങ്കിലും നിന്ദിക്കരുത്. മറ്റൊരു രാജ്യത്തും ഇത്‌ നടക്കില്ല. രാജ്യസ്നേഹികൾ എങ്കിൽ രാജ്യത്തിന്റെ മെഡൽജേതാവിനെ അവഹേളിക്കില്ല.

എത്രയോ അന്താരാഷ്ട്ര താരങ്ങൾ മാലയിട്ട് ഓടുന്നു. അത്രയും പോലും ബോധം ഇല്ലാത്തവർ ആണിത്. മാലയിട്ടാണ് അഞ്ജുവിന്റെ ദേശീയ റെക്കോർഡ് തകർത്തത്. അത് തന്റെ ആത്മവിശ്വാസത്തിന്റെ ഭാഗം ആണ്. സ്കൂൾകാലത്ത് വളകൾ ഇട്ട് മത്സരിച്ചിരുന്നു. വളകളുടെ ശബ്ദം കേൾക്കുന്നത് താൻ അസ്വദിച്ചിരുന്നു. മുൻപ് മൽസരത്തിനായി മുടി മുറിച്ചതാണ്. ഇപ്പോൾ ഇത്‌ തനിക്ക്‌ സൗകര്യം ആണ്. ഇതിന്റെ പേരിൽ ഒന്നും താൻ തളരില്ലെന്നും ആൻസി ഏഷ്യാനെറ്റ് ന്യൂസിനോട് പ്രതികരിച്ചു.

ഏഷ്യാനെറ്റ് ന്യൂസ് ലൈവ് കാണാം

ചീഫ് സെലക്ടർ സ്ഥാനത്തു നിന്ന് അജിത് അഗാർക്കർ പടിയിറങ്ങുന്നു; പകരക്കാരനെ കണ്ടെത്തി ബിസിസിഐ

Gopalakrishnan C — Wed, 30 Sep 2026 10:41:51 +0530

ഗുവാഹത്തി: അജിത് അഗാർക്കർ ഇന്ത്യൻ ക്രിക്കറ്റ് ടീമിന്‍റെ ചീഫ് സെലക്ടർ പദവിയിൽ നിന്ന് സ്ഥാനമൊഴിയുന്നതോടെ, മുൻ ഇടങ്കയ്യൻ സ്പിന്നർ പ്രഗ്യാൻ ഓജ അടുത്ത ചീഫ് സെലക്ടറാകാൻ സാധ്യതയെന്ന് റിപ്പോർട്ട്. 39-കാരനായ പ്രഗ്യാൻ ഓജ നിലവിൽ നാലംഗ സെലക്ഷൻ കമ്മിറ്റിയുടെ ഇടക്കാല ചീഫ് സെലക്ടറായി പ്രവർത്തിച്ചു വരികയാണ്. ഇന്ത്യയും വെസ്റ്റ് ഇൻഡീസും തമ്മിലുള്ള രണ്ടാം ഏകദിനത്തിന് മുന്നോടിയായി ചൊവ്വാഴ്ച ഗുവാഹത്തിയിലെ ബർസപാര സ്റ്റേഡിയത്തിൽ വെച്ച് ഇന്ത്യൻ പരിശീലകൻ ഗൗതം ഗംഭീറുമായി നാലംഗ സെലക്ഷൻ കമ്മിറ്റി ദീർഘനേരം ചർച്ച നടത്തിയിരുന്നു.

ശിവസുന്ദർ ദാസ്, അജയ് രാത്ര, ആർ.പി. സിങ് എന്നിവരും പ്രഗ്യാൻ ഓജയ്ക്കൊപ്പം യോഗത്തിൽ പങ്കെടുത്തു. എന്നാൽ സ്ഥാനമൊഴിയുന്ന ചീഫ് സെലക്ടർ അജിത് അഗാർക്കർ ഈ യോഗത്തിൽ ഉണ്ടായിരുന്നില്ല. തിരുവനന്തപുരത്തെ ഒന്നാം ഏകദിനത്തിന് ശേഷം ഗുവാഹത്തിയിലെത്തിയ ഇന്ത്യൻ ടീം വിശ്രമത്തിലായിരുന്ന സമയത്താണ് സെലക്ടർമാരും പരിശീലകനും തമ്മിൽ കൂടിക്കാഴ്ച നടത്തിയത്. ഒരു പരമ്പരയ്ക്കിടെ സെലക്ഷൻ കമ്മിറ്റി അംഗങ്ങൾ മുഴുവനായി ഒത്തുചേരുന്നത് അപൂർവ്വമാണ്. വരാനിരിക്കുന്ന ന്യൂസിലൻഡ് പര്യടനത്തിനുള്ള ടീം തിരഞ്ഞെടുപ്പും കളിക്കാരുടെ ജോലിഭാരം ക്രമീകരിക്കലുമായിരുന്നു ചർച്ചയിലെ പ്രധാന ചര്‍ച്ചാ വിഷയം.

ഇന്ത്യക്കായി 24 ടെസ്റ്റ് മത്സരങ്ങളിൽ നിന്ന് 113 വിക്കറ്റുകൾ നേടിയിട്ടുള്ള താരമാണ് പ്രഗ്യാൻ ഓജ. നിലവിലെ സെലക്ഷൻ കമ്മിറ്റിയിൽ ഏറ്റവും കൂടുതൽ ടെസ്റ്റ് മത്സരങ്ങൾ കളിച്ച പരിചയസമ്പത്താണ് ഓജയ്ക്ക് അനുകൂലമാകുന്നത്. അഗാർക്കർ സ്ഥാനമൊഴിഞ്ഞതോടെ താൽക്കാലിക ചുമതലയേറ്റെടുത്ത ഓജയ്ക്ക് വൈകാതെ തന്നെ സ്ഥിരം ചീഫ് സെലക്ടറായി ചുമതല ലഭിച്ചേക്കും. ഒക്ടോബർ 22 മുതൽ നവംബർ 27 വരെ നീളുന്ന ന്യൂസിലൻഡ് പര്യടനമാണ് സെലക്ഷൻ കമ്മിറ്റിക്ക് മുന്നിലുള്ള പ്രധാന വെല്ലുവിളി. പര്യടനത്തിൽ അഞ്ച് ടി20, അഞ്ച് ഏകദിനം, രണ്ട് ടെസ്റ്റ് മത്സരങ്ങൾ എന്നിവ ഇന്ത്യ കളിക്കും.

കൂടാതെ ഒക്ടോബർ 24-ന് ആരംഭിക്കുന്ന ഇന്ത്യ 'എ' ടീമിന്റെ ന്യൂസിലൻഡ് പര്യടനത്തിനുള്ള ടീമിനെയും പ്രഖ്യാപിക്കേണ്ടതുണ്ട്. മത്സരങ്ങൾ അടുപ്പിച്ചായതിനാൽ പ്രമുഖ താരങ്ങളുടെ ജോലിഭാരം ക്രമീകരിക്കുന്നതിലാകും സെലക്ടർമാരും പരിശീലകൻ ഗൗതം ഗംഭീറും പ്രധാനമായും ശ്രദ്ധ കേന്ദ്രീകരിക്കുക. 2027 ഏകദിന ലോകകപ്പിനുള്ള മികച്ച ടീം കോമ്പിനേഷൻ കണ്ടെത്താനുള്ള നീക്കങ്ങൾ കൂടിയാകും വരാനിരിക്കുന്ന പരമ്പരകളിലൂടെ സെലക്ടർമാർ ലക്ഷ്യമിടുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഷൂട്ട് ഓഫിൽ കൊറിയയെ വീഴ്ത്തി, ഏഷ്യൻ ഗെയിംസില്‍ രണ്ടാം സ്വര്‍ണം അമ്പെയ്തിട്ട് ആര്‍ച്ചറി ടീം

Gopalakrishnan C — Wed, 30 Sep 2026 10:13:19 +0530

നഗോയ: ഏഷ്യൻ ഗെയിംസിൽ അമ്പെയ്ത്ത് ഇന്ത്യയുടെ സ്വർണ്ണവേട്ട തുടരുന്നു.മിക്സ്ഡ് ടീം കോമ്പൗണ്ട് ഫൈനലിൽ ശക്തരായ ദക്ഷിണ കൊറിയയെ നാടകീയമായ ഷൂട്ട് ഓഫിൽ കീഴടക്കി ഇന്ത്യയുടെ തനിപർത്തി ചികിത - സാഹിൽ രാജേഷ് യാദവ് സഖ്യം സ്വർണം നേടി. ഇന്ന് അമ്പെയ്ത്തിൽ ഇന്ത്യ നേടുന്ന രണ്ടാമത്തെ സ്വര്‍ണമാണിത്.

കടുത്ത പോരാട്ടം കണ്ട ഫൈനലിൽ ഇരുടീമുകളും നിശ്ചിത പോയിന്‍റുകളിൽ സമനില പാലിച്ചതോടെയാണ് വിജയികളെ കണ്ടെത്താൻ ഷൂട്ട് ഓഫ് വേണ്ടിവന്നത്. സമ്മർദ്ദ നിമിഷങ്ങളിൽ പതറാതെ കൃത്യതയോടെ അമ്പെയ്യ്ത ചികിതയും സാഹിലും കൊറിയൻ എതിരാളികളെ മറികടന്ന് ഇന്ത്യയെ പോഡിയത്തിന്‍റെ മുകളിലെത്തിക്കുകയായിരുന്നു.

भारतीय तीरंदाजों ने कमाल कर दिखाया है !!Congratulations to compound mixed archery team of Sahil Jadhav and Chikitha Taniparthi on winning gold medal in #AsianGames2026 #Cheer4India https://t.co/9xw2kLnukF pic.twitter.com/nFd7ttDCa4

— Kiren Rijiju (@KirenRijiju) September 30, 2026

അതേസമയം, ഏഷ്യൻ ഗെയിംസ് സ്ക്വാഷിലും ഇന്ത്യ മെഡൽ ഉറപ്പിച്ചിട്ടുണ്ട്. വനിതകളുടെ ടീം ഇനത്തിൽ മികച്ച പ്രകടനം പുറത്തെടുത്ത ഇന്ത്യൻ സംഘം സെമിഫൈനലിലേക്ക് മുന്നേറിയാണ് മെഡൽ ഉറപ്പിച്ചത്. അമ്പെയ്ത്തിലെ സ്വർണ്ണനേട്ടവും സ്ക്വാഷിലെ മെഡൽ ഉറപ്പും ഗെയിംസിൽ ഇന്ത്യയുടെ മെഡൽ വേട്ടയ്ക്ക് കൂടുതൽ കരുത്ത് പകർന്നിരിക്കുകയാണ്. 8 സ്വര്‍ണവും 21 വെള്ളിയും 26 വെങ്കലവും അടക്കം 55 മെഡലുകളുമായി മെഡല്‍ പട്ടികയില്‍ ഒമ്പതാം സ്ഥാനത്താണ് ഇന്ത്യയിപ്പോള്‍.

143 സ്വര്‍ണവും 62 വെള്ളിയും 51 വെങ്കലവുമടക്കം 256 മെഡലുകളുമായി ചൈന തന്നെയാണ് ഒന്നാമത്. 45 സ്വര്‍ണമടക്കം 185 മെഡലുകളുമായി ആതിഥേയരായ ജപ്പാന്‍ രണ്ടാമതും 24 സ്വര്‍ണമടക്കം 95 മെഡലുകളുമായി ദക്ഷിണ കൊറിയ മൂന്നാം സ്ഥനത്തുമാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഗ്യാലറി വീണ്ടും മഞ്ഞക്കടലാകും; കേരള ബ്ലാസ്റ്റേഴ്സ് ഉടമകൾ മാറിയതിന് പിന്നാലെ ബഹിഷ്കരണം പിൻവലിച്ച് മഞ്ഞപ്പട

Gopalakrishnan C — Wed, 30 Sep 2026 09:52:38 +0530

കൊച്ചി: കേരള ബ്ലാസ്റ്റേഴ്സിന്‍റെ ഉടമസ്ഥാവകാശം മാറിയതിന് പിന്നാലെ ക്ലബ്ബിനെതിരെയുള്ള ബഹിഷ്കരണം പിൻവലിച്ച് ആരാധക കൂട്ടായ്മയായ മഞ്ഞപ്പട. വരാനിരിക്കുന്ന ഐഎസ്എൽ സീസണിൽ ടീമിന് പിന്തുണയുമായി സ്റ്റേഡിയങ്ങളിലേക്ക് മടങ്ങിയെത്തുമെന്ന് മഞ്ഞപ്പട സോഷ്യൽ മീഡിയയിലൂടെ അറിയിച്ചു. ക്ലബ്ബിലുണ്ടായ നിർണായകമായ മാനേജ്‌മെന്‍റ് മാറ്റങ്ങളെയും പുതിയ തുടക്കത്തെയും ആരാധകർ പ്രതീക്ഷയോടെയാണ് നോക്കിക്കാണുന്നത്.

സ്പോർട്ടിങ് ഡയറക്ടറെ മാറ്റിയ പുതിയ മാനേജ്‌മെന്റിന്‍റെ തീരുമാനത്തെ മഞ്ഞപ്പട പൂർണ്ണമായും സ്വാഗതം ചെയ്തു. പുതിയ മാനേജ്‌മെന്‍റിന് കീഴിൽ ക്ലബ്ബിന് മികച്ച ഫുട്ബോൾ ഘടനയും ദീർഘകാല പദ്ധതികളും ഒരുക്കാൻ കഴിയുമെന്നാണ് പ്രതീക്ഷയെന്നും അവർ പോസ്റ്റിൽ വ്യക്തമാക്കി. എന്നാൽ, ക്ലബ്ബിന്‍റെ സിഇഒ പദവിയിൽ മാറ്റമില്ലാതെ തുടരുന്നതിൽ മഞ്ഞപ്പട പരസ്യമായി നീരസം പ്രകടിപ്പിച്ചിട്ടുണ്ട്. മാനേജ്‌മെന്‍റിൽ വരുത്തിയ മറ്റ് മാറ്റങ്ങൾ ആശ്വാസകരമാണെങ്കിലും സിഇഒ തുടരുന്നത് ആരാധകർക്കിടയിൽ അതൃപ്തി ഉണ്ടാക്കുന്നുണ്ട്.

യുഎഇ ആസ്ഥാനമായുള്ള അൽ ഫുർസാൻ ഗ്രൂപ്പ് ബ്ലാസ്റ്റേഴ്സിന്‍റെ മുഴുവൻ ഓഹരികളും സ്വന്തമാക്കുകയും ആരാധകരുമായുള്ള തർക്കങ്ങൾ പരിഹരിക്കുമെന്ന് ഉറപ്പുനൽകുകയും ചെയ്തതിന് തൊട്ടുപിന്നാലെയാണ് മഞ്ഞപ്പടയുടെ ഈ തീരുമാനം. ഇതോടെ, പുതിയ സീസണിൽ കൊച്ചി കലൂർ സ്റ്റേഡിയത്തിലെ ഗാലറികൾ വീണ്ടും മഞ്ഞക്കടലായി മാറുമെന്നുറപ്പായി. ഇന്ത്യൻ സൂപ്പർ ലീഗ് പുതിയ സീസൺ ആരംഭിക്കാൻ ദിവസങ്ങൾ മാത്രം ബാക്കി നിൽക്കെയാണ്, ആരാധകരെ ആവേശത്തിലാഴ്ത്തി കേരള ബ്ലാസ്റ്റേഴ്സിന്‍റെ ഉടമസ്ഥാവകാശത്തിൽ നിർണായക മാറ്റം പ്രഖ്യാപിച്ചത്.

We stood. We spoke.Now, we move forward.! pic.twitter.com/8Z38LdOFcM

— Manjappada (@kbfc_manjappada) September 29, 2026

യുഎഇ ആസ്ഥാനമായി പ്രവർത്തിക്കുന്ന പ്രമുഖ കൺസോർഷ്യമായ അൽ ഫുർസാൻ ഗ്രൂപ്പാണ് കേരള ബ്ലാസ്റ്റേഴ്സ് എഫ്‌സിയുടെ മുഴുവൻ ഓഹരികളും സ്വന്തമാക്കിയത്. കൊച്ചിയിൽ വിളിച്ചുചേർത്ത വാർത്താസമ്മേളനത്തിലാണ് പുതിയ മാനേജ്‌മെന്റ് ഈ പ്രഖ്യാപനം നടത്തിയത്.മുൻ ഉടമകളായ മാഗ്നം സ്‌‌പോർട്സിൽ നിന്നാണ് അൽ ഫുർസാൻ ക്ലബ് പൂർണ്ണമായും വാങ്ങിയത്.ക്ലബ്ബിന്റെ ദൈനംദിന പ്രവർത്തനങ്ങളും നിയന്ത്രണവും മലയാളികളുടെ ഉടമസ്ഥതയിലുള്ള ഓഫിയോ സ്പോർട്ടി ആയിരിക്കും നിർവ്വഹിക്കുക.ആരാധകർ ഏറെ ആകാംക്ഷയോടെ കാത്തിരുന്ന സൂപ്പർ താരം അഡ്രിയാൺ ലൂണ ടീമിൽ തുടരുമെന്ന് പുതിയ മാനേജ്‌മെന്റ് ഉറപ്പുനൽകിയിട്ടുണ്ട്. മുഖ്യ പരിശീലകനായി ആഷ്ലി വെസ്റ്റ്‌വുഡ് തന്നെ ടീമിനെ നയിക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ലോകറെക്കോര്‍ഡ്‌ പ്രകടനം, സ്വര്‍ണം അമ്പെയ്‌തിട്ട്‌ ഇന്ത്യന്‍ വനിതകള്‍, ഫൈനലില്‍ ചൈനയെ കീഴടക്കി

Web Desk — Wed, 30 Sep 2026 09:24:03 +0530

നഗോയ: ഏഷ്യന്‍ ഗെയിംസില്‍ ഇന്ത്യന്‍ വനിതകള്‍ സ്വര്‍ണം അമ്പെയ്‌തിട്ടു. കോമ്പൗണ്ട്‌ ആര്‍ചറിയിലാണ്‌ ഇന്ത്യ ചാമ്പ്യന്‍പട്ടം നിലനിര്‍ത്തിയത്‌. ജ്യോതി സുരേഖ വെന്നം, ചികിത തനിപര്‍തി, പ്രിതിക പ്രദീപ്‌ എന്നീ ത്രയങ്ങളാണ്‌ ഇന്ത്യക്കായി കോമ്പൗണ്ട്‌ ആര്‍ചറിയില്‍ മത്സരിച്ചത്‌. സ്വര്‍ണ മെഡല്‍ പോരില്‍ ചൈന ഉയര്‍ത്തിയ വെല്ലുവിളി 238-234 മാര്‍ജിനില്‍ മറികടന്നു. ഇതാകട്ടെ, കൊറിയന്‍ ടീം സ്ഥാപിച്ച ലോകറെക്കോര്‍ഡ്‌ പ്രകടനത്തിനൊപ്പമാണ്‌.

ഐചി നഗോയ ഏഷ്യന്‍ ഗെയിംസില്‍ ഇന്ത്യ നേടുന്ന ഏഴാമത്തെ സ്വര്‍ണമാണിത്‌. സെമി ഫൈനലില്‍ ഇന്ത്യ ദക്ഷിണ കൊറിയയെയാണ്‌ തോല്‍പ്പിച്ചത്‌. അതും ആവേശകരമായ പോരാട്ടമായിരുന്നു. 234-233 മാര്‍ജിനിലായിരുന്നു ജയം. വെങ്കല മെഡല്‍ മത്സരത്തില്‍ കൊറിയ ചൈനീസ്‌ തായ്‌പേയിയെ തോല്‍പ്പിച്ചു.

2023 ഏഷ്യാഡിലും വനിതകളുടെ കോമ്പൗണ്ട്‌ ആര്‍ചെറിയില്‍ ഇന്ത്യന്‍ വനിതകള്‍ക്ക്‌ എതിരില്ലായിരുന്നു. ജപ്പാനില്‍ ഏറ്റവും സാധ്യത കല്‌പിക്കപ്പെട്ട ടീം കൊറിയയുടേതായിരുന്നു. എന്നാല്‍, സെമിയില്‍ ഇഞ്ചോടിഞ്ച്‌ പോരില്‍ ഇന്ത്യ ജയിച്ചതോടെ ഫൈനലിലും ആ ആത്മവിശ്വാസം ഗുണം ചെയ്‌തു.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ചൈനയെ അമ്പെയ്ത് വീഴ്ത്തി വനിതകള്‍, ഏഷ്യൻ ഗെയിംസ് അമ്പെയ്ത്തിൽ റെക്കോർഡോടെ ഇന്ത്യക്ക് സ്വർണം

Gopalakrishnan C — Wed, 30 Sep 2026 09:14:37 +0530

നഗോയ: ഏഷ്യൻ ഗെയിംസ് അമ്പെയ്ത്തില്‍ ഇന്ത്യക്ക് സ്വര്‍ണം. വനിതകളുടെ കോമ്പൗണ്ട് ടീം ഇനത്തിൽ ചൈനയെ തോൽപിച്ചാണ് ഇന്ത്യയുടെ ജ്യോതി സുരേഖ വെന്നം, ചികിത തനിപർത്തി, പൃഥിക പ്രദീപ് എന്നിവരടങ്ങിയ സംഘം സ്വർണം നേടിയത്. ചൈനയ്ക്കെതിരായ ഫൈനലില്‍ ലോകറെക്കോർഡിനൊപ്പമെത്തുന്ന പ്രകടനത്തോടെയാണ് (238-234) ഇന്ത്യൻ വനിതകൾ രാജ്യത്തിന്‍റെ അഭിമാനമായത്.

വ്യക്തിഗത ഇനത്തിൽ കൊറിയൻ താരം കാങ് യോൺ-സിയോയോട് പരാജയപ്പെട്ടതിന്‍റെ നിരാശ മറികടക്കുന്ന പ്രകടനമായിരുന്നു ജ്യോതി സുരേഖ ഫൈനലില്‍ കാഴ്ചവെച്ചത്. യുവതാരങ്ങളായ ചികിതയുടെയും പൃഥികയുടെയും മികച്ച പിന്തുണ കൂടിയായപ്പോൾ ചൈനക്ക് മറുപടിയുണ്ടായിരുന്നില്ല. മത്സരത്തിന്‍റെ തുടക്കം മുതൽ ഇന്ത്യൻ സംഘം ആധിപത്യം സ്ഥാപിച്ചു. ആദ്യ റൗണ്ടിൽ പെര്‍ഫെക്ട് 10 നേടി ഇന്ത്യ 60-58 ന് മുന്നിലെത്തി. രണ്ടാം ഘട്ടത്തിലും ഇതേ മികവ് നിലനിർത്തിയ ഇന്ത്യ 178-176 എന്ന ലീഡോടെ അവസാന റൗണ്ടിലേക്ക് കടന്നു.

A beautiful way to start of this Day with Gold in compound archeryJyothi might not be able to win in individual medals in this edition but helped n women's team to deliver Goldafter beating at the finals by 238-234Congratulations to Chikitha & Prithika as well https://t.co/z6XC2S1GAs pic.twitter.com/9wKSswhUKN

— Amit Kumar De (@AmitK98infinite) September 30, 2026

സമ്മർദ്ദത്തിൽ ചൈനീസ് താരങ്ങൾ ലക്ഷ്യം തെറ്റിയപ്പോൾ ഇന്ത്യൻ സംഘം ആറ് പെർഫെക്റ്റ് 10 പോയിന്‍റുകൾ നേടി ആധിപത്യം ഉറപ്പിച്ചു. ഫൈനലിന് മുൻപ് ശക്തരായ ദക്ഷിണ കൊറിയക്കെതിരായ സെമിഫൈനൽ മത്സരം കടുത്ത പോരാട്ടത്തിനാണ് സാക്ഷ്യം വഹിച്ചത്. ആദ്യ ഘട്ടത്തിൽ ഇരുടീമുകളും 59-59 എന്ന നിലയിൽ ഒപ്പത്തിനൊപ്പമായിരുന്നു. എന്നാൽ രണ്ടാം ഘട്ടത്തിൽ 59-56 എന്ന സ്കോറിൽ ഇന്ത്യ മുന്നിലെത്തി. മൂന്നാം ഘട്ടത്തിൽ ചില പിഴവുകൾ സംഭവിച്ചെങ്കിലും അവാസന നിമിഷങ്ങളിൽ പതറാതെ പൊരുതിയ ഇന്ത്യ 234-233 എന്ന സ്കോറിന് കൊറിയയെ മറികടന്ന് ഫൈനലിലേക്ക് മുന്നേറി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

പിന്തുണ നഷ്ടമായി മൊഹ്സിൻ നഖ്‌വി; ഏഷ്യൻ ക്രിക്കറ്റ് കൗൺസിൽ അധ്യക്ഷനാകാൻ മുന്‍ ബംഗ്ലാദേശ് നായകൻ തമീം ഇഖ്ബാൽ

Gopalakrishnan C — Wed, 30 Sep 2026 08:05:39 +0530

ദുബായ്: ഏഷ്യൻ ക്രിക്കറ്റ് കൗൺസിൽ പ്രസിഡന്‍റ്(എസിസി) സ്ഥാനത്തുനിന്ന് പാകിസ്ഥാൻ ക്രിക്കറ്റ് ബോർഡ് അധ്യക്ഷനും പാക് ആഭ്യന്തര മന്ത്രിയുമായ മൊഹ്സിൻ നഖ്‌വിക്ക് പിന്തുണ നഷ്ടമായതായി റിപ്പോര്‍ട്ട്. കാലാവധി നീട്ടിയെടുക്കാൻ ശ്രമങ്ങൾ നടത്തുന്നുണ്ടെങ്കിലും, നഖ്‌‌വിക്ക് ഏഷ്യൻ ക്രിക്കറ്റിലെ പ്രമുഖ രാജ്യങ്ങളുടെ പിന്തുണ ഇല്ലെന്നാണ് റിപ്പോര്‍ട്ടുകള്‍. അതേസമയം, ബംഗ്ലാദേശ് ക്രിക്കറ്റ് ബോർഡ്(ബിസിബി) പ്രസിഡന്‍റും മുൻ നായകനുമായ തമീം ഇഖ്ബാൽ നഖ്‌വിക്ക് പകരം അടുത്ത എസിസി അധ്യക്ഷനായി ചുമതലയേൽക്കുമെന്നും സൂചനയുണ്ട്.

രണ്ടുവർഷത്തെ കാലാവധിയാണ് എസിസി പ്രസിഡന്‍റ് സ്ഥാനത്തിനുള്ളത്. ഇന്ത്യ, പാകിസ്ഥാൻ, ശ്രീലങ്ക, ബംഗ്ലാദേശ്, അഫ്ഗാനിസ്ഥാൻ എന്നീ അഞ്ച് പൂർണ അംഗരാജ്യങ്ങൾക്കിടയിൽ ഊഴമനുസരിച്ചാണ് അധ്യക്ഷ സ്ഥാനം കൈമാറുന്നത്. നിലവിലെ കാലാവധി പൂർത്തിയാകുന്ന പശ്ചാത്തലത്തിൽ സമയം നീട്ടിയെടുക്കാൻ നഖ്‌വി നീക്കം നടത്തിയെങ്കിലും, അഞ്ചിൽ മൂന്ന് അംഗരാജ്യങ്ങളും അതിനെ എതിർക്കുകയായിരുന്നു. എസിസി വാർഷിക പൊതുയോഗം വരെ പ്രസിഡന്‍റായി തുടരാൻ നഖ്‌വി ശ്രമിച്ചേക്കുമെങ്കിലും അത് നടപ്പിലാകാൻ സാധ്യതയില്ലെന്ന് ക്രിക്ബസ് റിപ്പോർട്ട് ചെയ്തു. മുമ്പ് ബിസിസിഐ സെക്രട്ടറിയായിരുന്ന ജയ് ഷാ എല്ലാ രാജ്യങ്ങളുടെയും ഐക്യകണ്ഠമായ പിന്തുണയോടെ മൂന്ന് വർഷം (2022-2024) പ്രസിഡന്‍റായി സേവനമനുഷ്ഠിച്ചിരുന്നു. എന്നാൽ നഖ്‌വിയുടെ കാര്യത്തിൽ അത്തരം ഐക്യം കൗൺസിലിൽ നിലവിലില്ല.

വിവാദങ്ങളും ഇന്ത്യയുമായുള്ള ഭിന്നതയും

ഏഷ്യയിലെ ക്രിക്കറ്റ് വളർച്ചയ്ക്ക് നേതൃത്വം നൽകേണ്ട എസിസി, നഖ്‌വിയുടെ ഭരണകാലത്ത് രാഷ്ട്രീയ നാടകങ്ങളുടെ വേദിയായി മാറിയെന്ന വിമർശനം ശക്തമാണ്. പുരുഷ-വനിതാ ഏഷ്യാ കപ്പ് കിരീടധാരണ ചടങ്ങുകളിൽ ഇന്ത്യ കിരീടം ഏറ്റുവാങ്ങാൻ വിസമ്മതിച്ചത് വലിയ വിവാദമായിരുന്നു. ട്രോഫി കൈമാറാൻ മറ്റാരെയും അനുവദിക്കില്ലെന്ന് നഖ്‌വി വാശിപിടിച്ചതാണ് സ്ഥിതി വഷളാക്കിയത്. ഇന്ത്യ-ബംഗ്ലാദേശ് ക്രിക്കറ്റ് തർക്കങ്ങൾക്കിടയിലും, മുസ്തഫിസുർ റഹ്മാൻ വിവാദത്തെത്തുടർന്ന് ബംഗ്ലാദേശ് ടി20 ലോകകപ്പിൽ നിന്ന് പിന്മാറിയപ്പോഴും നഖ്‌വിയുടെ ഇടപെടലുകൾ ചർച്ചയായിരുന്നു.

ബംഗ്ലാദേശിന്‍റെ അടുത്ത ഊഴത്തിൽ ബിസിബി അധ്യക്ഷൻ തമീം ഇഖ്ബാൽ എസിസി തലപ്പത്തേക്ക് എത്തുന്നത് ഇന്ത്യയ്ക്ക് ഏറെ ആശ്വാസകരമാണ്. ഇന്ത്യയുമായി നല്ല ബന്ധം പുലർത്താൻ ആഗ്രഹിക്കുന്ന തമീം, മുൻപ് ബംഗ്ലാദേശ് ലോകകപ്പിൽ നിന്ന് പിന്മാറാൻ പാടില്ലായിരുന്നു എന്ന നിലപാടുകാരനാണ്. തമീം എസിസി പ്രസിഡന്റാകുന്നതോടെ ഇന്ത്യയുമായുള്ള ബന്ധം മെച്ചപ്പെടുകയും ഏഷ്യൻ ക്രിക്കറ്റിൽ ഭരണപരമായ സ്ഥിരത കൈവരികയും ചെയ്യുമെന്നാണ് വിലയിരുത്തപ്പെടുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

പണി പാളിയോ മിസ്‌റ്റര്‍ ചൗബേ? ഇന്ത്യ-ബ്രസീല്‍ ടിക്കറ്റ്‌ വില്‌പന ശോകം, ബഗാന്‍ വിറ്റത്‌ 90 ടിക്കറ്റുകള്‍, മുഹമ്മദന്‍സ്‌ 12 ടിക്കറ്റുകള്‍ !!

Vipulnath P — Wed, 30 Sep 2026 01:37:03 +0530

കൊല്‍ക്കത്ത: ഇന്ത്യ-ബ്രസീല്‍ അന്താരാഷ്ട്ര സൗഹൃദ ഫുട്‌ബോള്‍ മത്സരത്തിന്റെ ടിക്കറ്റ്‌ വില്‍പ്പനയില്‍ അഖിലേന്ത്യാ ഫുട്‌ബോള്‍ ഫെഡറേഷന്‌ (എ ഐ എഫ്‌ എഫ്‌) തിരിച്ചടി. ഒക്ടോബര്‍ മൂന്നിന്‌ നടക്കുന്ന മത്സരത്തിന്റെ ടിക്കറ്റ്‌ വില്‍പ്പന മോഹന്‍ബഗാന്‍, ഈസ്‌റ്റ്‌ബംഗാള്‍, മുഹമ്മദന്‍ സ്‌പോര്‍ട്ടിംഗ്‌, ഇന്ത്യന്‍ ഫുട്‌ബോള്‍ അസോസിയേഷന്‍ (ഐ എഫ്‌ എ) എന്നിവയിലൂടെ സൗജന്യ നിരക്കില്‍ നല്‍കുമെന്ന്‌ അഖിലേന്ത്യാ ഫുട്‌ബോള്‍ ഫെഡറേഷന്‍ പ്രസിഡന്റ്‌ കല്യാണ്‍ ചൗബേ പ്രഖ്യാപിച്ചിരുന്നു. ഉള്‍ക്കാഴ്‌ചയില്ലാത്ത ഈ നീക്കം പിഴച്ചുവെന്നാണ്‌ ദ ടെലഗ്രാഫ്‌ റിപ്പോര്‍ട്ട്‌ ചെയ്‌തത്‌. ഐ എഫ്‌ എക്ക്‌ 2000 ടിക്കറ്റുകളാണ്‌ അനുവദിച്ചിരുന്നത്‌. എന്നാല്‍, തിങ്കളാഴ്‌ച വൈകീട്ട്‌ വരെയുള്ള കണക്കുകള്‍ പ്രകാരം അഫിലിയേറ്റഡ്‌ യൂനിറ്റുകളില്‍ നിന്ന്‌ ഐ എഫ്‌ എക്ക്‌ മുന്നില്‍ എത്തിയ ടിക്കറ്റ്‌ അപേക്ഷ 24 എണ്ണം മാത്രം. ഐ എഫ്‌ എക്ക്‌ 315 അഫിലിയേറ്റഡ്‌ യൂനിറ്റുകളാണുള്ളത്‌.

മോഹന്‍ബഗാന്‌ അനുവദിച്ച 6000 ടിക്കറ്റുകളില്‍ 90 എണ്ണം മാത്രമാണ്‌ വിറ്റഴിക്കപ്പെട്ടത്‌. ഈസ്റ്റ്‌ബംഗാളിന്‌ ലഭിച്ച 4000 ടിക്കറ്റുകളില്‍ 400 ടിക്കറ്റുകള്‍ വിറ്റു പോയിട്ടുണ്ട്‌. മുഹമ്മദന്‍ സ്‌പോര്‍ട്ടിംഗ്‌ വഴിയുള്ള ടിക്കറ്റ്‌ വില്‍പന ശോകമാണ്‌. 3000 ടിക്കറ്റുകളില്‍ 12 ടിക്കറ്റുകള്‍ മാത്രമാണ്‌ തിങ്കള്‍ വൈകുന്നേരം വരെ വിറ്റഴിക്കപ്പെട്ടത്‌. ആറായിരം രൂപയുടെ ടിക്കറ്റിന്‌ പത്ത്‌ ശതമാനം കിഴിവ്‌ നല്‍കിയാല്‍ 5400 രൂപയ്‌ക്ക്‌ വാങ്ങിക്കാം. എന്നാല്‍, മത്സരത്തിന്റെ കരാര്‍ ഏറ്റെടുത്ത ഓണ്‍ലൈന്‍ ആപ്പില്‍ കുറഞ്ഞ നിരക്കിലുള്ള ടിക്കറ്റുകള്‍ ലഭ്യമായതോടെ എ ഐ എഫ്‌ എഫിന്റെ ടിക്കറ്റ്‌ വില്‍പന മന്ദഗതിയിലായി. 3500 രൂപയ്‌ക്കാണ്‌ ഓണ്‍ലൈനില്‍ ടിക്കറ്റ്‌ വില്‌പന നടക്കുന്നത്‌. യുക്തിയുള്ളവര്‍ കുറഞ്ഞ വിലക്ക്‌ ടിക്കറ്റ്‌ വാങ്ങാനല്ലേ ശ്രമിക്കുകയെന്ന്‌ ഒരു ക്ലബ്ബ്‌ ഭാരവാഹി ചോദിച്ചു.

ബ്രസീല്‍, ഉറുഗ്വെ മത്സരങ്ങളുടെ പ്രധാന സ്‌പോണ്‍സര്‍മാരായ സ്‌റ്റൈല്‍ബസാര്‍ ഒരു പ്രമോകോഡ്‌ ഉപയോഗിച്ച്‌ ഒന്ന്‌ വാങ്ങിയാല്‍ ഒന്ന്‌ സൗജന്യം എന്ന ഓഫര്‍ അവരുടെ ഇന്‍സ്റ്റഗ്രാംപേജില്‍ പരസ്യം ചെയ്‌തിട്ടുണ്ട്‌. ഇത്‌ അവരുടെ ഉപഭോക്താക്കള്‍ക്ക്‌ മാത്രമായുള്ളതാണ്‌. ടിക്കറ്റുകള്‍ വിറ്റു പോകുന്നില്ലെന്നതിന്റെ തെളിവാണ്‌ ഓണ്‍ലൈന്‍ പ്ലാറ്റ്‌ഫോമില്‍ വന്ന പരസ്യമെന്ന്‌ ക്ലബ്ബ്‌ ഉദ്യോഗസ്ഥരില്‍ ഒരാള്‍ ചൂണ്ടിക്കാട്ടി. എന്നാല്‍, ബ്രസീല്‍-ഇന്ത്യ മത്സരം കാണാന്‍ ആളുണ്ടാകില്ലെന്ന്‌ ഇതിനര്‍ഥമില്ല. അതേസമയം, ടിക്കറ്റെടുത്തവര്‍ എത്രയെന്നോ സൗജന്യമായി പ്രവേശിച്ചവരുടെ എണ്ണവും കൃത്യമായി മനസിലാക്കാന്‍ പ്രയാസമുണ്ട്‌.

ഈ മത്സരം കഴിഞ്ഞ്‌ മൂന്ന്‌ ദിവസത്തിന്‌ ശേഷം നടക്കുന്ന ഉറുഗ്വെ-ഇന്ത്യ മത്സരത്തിന്റെ സ്ഥിതി എന്തായിരിക്കും? ദുര്‍ഗപൂജയുടെ മാസമാണ്‌. ഫുട്‌ബോള്‍ ആരാധകര്‍ക്ക്‌ രണ്ട്‌ മത്സരം കാണുവാന്‍ കാശ്‌ ചെലവഴിക്കുമെന്നത്‌ വിശ്വസിക്കാന്‍ കഴിയില്ലെന്ന്‌ ഫുട്‌ബോള്‍ സംഘാടനം അടുത്തു നിന്ന്‌ നിരീക്ഷിക്കുന്ന ഒരാള്‍ പറഞ്ഞു.ബെംഗളുരുവില്‍ നടന്ന ഇന്ത്യ-പാനമ മത്സരം കാണാനും ആളില്ലായിരുന്നു. ശ്രീ കണ്‌ഠീരവ സ്‌റ്റേഡിയത്തില്‍ ഇന്ത്യയും ലോകകപ്പ്‌ കളിച്ച ടീമും തമ്മിലുള്ള മത്സരം കാണാനെത്തിയത്‌ 9039 പേര്‍ മാത്രം,

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

'ജഡേജയുടെ ബൗളിംഗില്‍ കാര്യമായ പുരോഗതയുണ്ടായി'; ഫോം കണ്ടെത്താന്‍ ബുദ്ധിമുടുന്ന താരത്തെ പിന്തുണച്ച് ടീം മാനേജ്‌മെന്റ്

Web Desk — Tue, 29 Sep 2026 21:15:51 +0530

ഗുവാഹത്തി: ഒരു കാലത്ത് ഇന്ത്യന്‍ ക്രിക്കറ്റിന്റെ എല്ലാ ഫോര്‍മാറ്റുകളിലെയും ഒഴിച്ചുകൂടാനാവാത്ത സാന്നിധ്യമായിരുന്ന രവീന്ദ്ര ജഡേജ. എന്നാലിപ്പോള്‍ ഇന്ത്യയുടെ ഏകദിന ടീമില്‍ ഒരു ഭാരമാവുകയാണ് താരം. കൃത്യതയാര്‍ന്ന ബോളിങ്ങും ഉപയോഗപ്രദമായ ബാറ്റിങ്ങും മികച്ച ഫീല്‍ഡിങ്ങും കൊണ്ട് ഇന്ത്യന്‍ ടീമിന്റെ വിശ്വസ്തനായിരുന്ന താരത്തിന് കഴിഞ്ഞ കുറേ വര്‍ഷങ്ങളായി ഏകദിനത്തില്‍ പഴയ വേഗത നിലനിര്‍ത്താന്‍ സാധിച്ചിട്ടില്ല. വെസ്റ്റ് ഇന്‍ഡീസിനെതിരായ മൂന്ന് മത്സരങ്ങളുള്ള ഏകദിന പരമ്പരയിലെ ആദ്യ മത്സരത്തിലൂടെ ജഡേജ ഇന്ത്യന്‍ പ്ലേയിംഗ് ഇലവനിലേക്ക് തിരിച്ചെത്തിയെങ്കിലും, അദ്ദേഹത്തിന്റെ പ്രകടനം ചോദ്യചിഹ്നമായി മാറി.

തിരുവനന്തപുരത്തെ ഗ്രീന്‍ഫീല്‍ഡ് സ്റ്റേഡിയത്തില്‍ നടന്ന മത്സരത്തില്‍ തന്റെ 10 ഓവറുകള്‍ പൂര്‍ത്തിയാക്കിയ ജഡേജ 54 റണ്‍സ് വഴങ്ങിയെങ്കിലും ഒരു വിക്കറ്റ് പോലും വീഴ്ത്താന്‍ സാധിച്ചില്ല. ആദ്യ 20 ഓവറുകളില്‍ വെസ്റ്റ് ഇന്‍ഡീസ് 135/0 എന്ന നിലയില്‍ മികച്ച കൂട്ടുകെട്ട് പടുത്തുയര്‍ത്തുമ്പോള്‍ ജഡേജയ്ക്ക് എതിരാളികളെ പ്രതിരോധത്തിലാക്കാന്‍ കഴിഞ്ഞിരുന്നില്ല. പിന്നീട് കുല്‍ദീപ് യാദവാണ് മത്സരത്തിന്റെ ഗതി മാറ്റിയത്. ഈ പ്രകടനം ജഡേജയുടെ മോശം റെക്കോര്‍ഡുകളുടെ തുടര്‍ച്ച മാത്രമാണ്. താരം കളിച്ച അവസാന 10 ഏകദിനങ്ങളില്‍ നിന്ന് ആകെ നേടാനായത് വെറും 5 വിക്കറ്റുകള്‍ മാത്രമാണ്.

ഇതില്‍ 4 വിക്കറ്റുകളും 2025 മാര്‍ച്ചില്‍ നടന്ന ചാമ്പ്യന്‍സ് ട്രോഫിയില്‍ ന്യൂസിലന്‍ഡിനും ഓസ്‌ട്രേലിയക്കുമെതിരായ ആദ്യ മൂന്ന് മത്സരങ്ങളിലായിരുന്നു. അതായത്, അവസാന ഏഴ് ഏകദിനങ്ങളില്‍ നിന്ന് ഒരേയൊരു വിക്കറ്റ് മാത്രമാണ് അദ്ദേഹത്തിന് വീഴ്ത്താന്‍ കഴിഞ്ഞത്. വെസ്റ്റ് ഇന്‍ഡീസ് മത്സരത്തിന് തൊട്ടുമുമ്പുള്ള അവസാന മൂന്ന് ഏകദിനങ്ങളില്‍ യഥാക്രമം 0/56, 0/44, 0/41 എന്നിങ്ങനെയായിരുന്നു ജഡേജ പ്രകടനം. മാത്രമല്ല, ഈ മത്സരങ്ങളിലൊന്നും അദ്ദേഹത്തിന് മുഴുവന്‍ 10 ഓവറുകളും എറിയാന്‍ കഴിഞ്ഞിരുന്നില്ല.

ഇന്ത്യന്‍ സെലക്ടര്‍മാരുടെ ലോകകപ്പ് പദ്ധതികളില്‍ ജഡേജ ഇപ്പോള്‍ മുന്‍ഗണനാ പട്ടികയിലില്ല. അക്‌സര്‍ പട്ടേലും വാഷിംഗ്ടണ്‍ സുന്ദറുമാണ് നിലവില്‍ അദ്ദേഹത്തേക്കാള്‍ മുന്നിലുള്ളത്. ഇരുവരും ഏഷ്യന്‍ ഗെയിംസ് ദൗത്യത്തിനായി ടീമിന് പുറത്തായതുകൊണ്ടും, മറ്റ് യുവതാരങ്ങളായ ഹര്‍ഷ് ദൂബെയേക്ക് പരിക്കേറ്റതുകൊണ്ടുമാണ് ജഡേജയ്ക്ക് വീണ്ടും ടീമിലേക്ക് വഴിതുറന്നത്. ഫീല്‍ഡിങ്ങില്‍ ഇന്നും ചുറുചുറുക്കോടെ നിലകൊള്ളുന്നുണ്ടെങ്കിലും ബാറ്റിങ്ങില്‍ വലിയ ചലനങ്ങള്‍ സൃഷ്ടിക്കാന്‍ താരത്തിന് കഴിയുന്നില്ല.

ഏഴാമനായോ അതിനു താഴെയോ ഇറങ്ങി ലോങ് ഹിറ്റുകള്‍ പായിക്കാനും ടീമിനെ ഫിനിഷ് ചെയ്യാനും കഴിഞ്ഞ ആറു വര്‍ഷമായി ഏകദിനത്തില്‍ ഒരു ഫിഫ്റ്റി പോലും നേടാത്ത ജഡേജയ്ക്ക് സാധിക്കുന്നില്ല. എന്നിരുന്നാലും, ജഡേജയുടെ അനുഭവസമ്പത്തിലും ഓള്‍റൗണ്ടര്‍ മികവിലും ടീം മാനേജ്‌മെന്റിന് ഇപ്പോഴും പ്രതീക്ഷയുണ്ട്. രണ്ടാം ഏകദിനത്തിന് മുന്നോടിയായി സംസാരിച്ച സ്പിന്‍ ബോളിങ് കോച്ച് സായ്രാജ് ബഹുതലെ, ജഡേജയെ ഒരു 'യൂട്ടിലിറ്റി പ്ലെയര്‍' എന്നാണ് വിശേഷിപ്പിച്ചത്.

കഴിഞ്ഞ ആറു മാസിത്തിനിടയില്‍ അദ്ദേഹത്തിന്റെ ബോളിങ്ങില്‍ കാര്യമായ പുരോഗതി ഉണ്ടായിട്ടുണ്ടെന്നും, ലങ്കന്‍ പര്യടനത്തിലെ ടെസ്റ്റ് പരമ്പരയിലും അദ്ദേഹം മികച്ച പ്രകടനം പുറത്തെടുത്തിട്ടുണ്ടെന്നും കോച്ച് പറഞ്ഞു. അക്‌സറും വാഷിംഗ്ടണും ടീമില്‍ തിരിച്ചെത്തിയാല്‍ മികച്ച പ്രകടനത്തിന്റെ അടിസ്ഥാനത്തിലാകും അന്തിമ തിരഞ്ഞെടുപ്പ് നടക്കുക എന്നും അദ്ദേഹം സൂചിപ്പിച്ചു.

കേരള ബ്ലാസ്റ്റേഴ്‌സിന്റെ 100 ശതമാനം ഓഹരികളും കൈമാറി; പുതിയ ഉടമകള്‍ യുഎഇയില്‍ നിന്ന്, ഔദ്യോഗിക പ്രഖ്യാപനം ഉടന്‍

Web Desk — Tue, 29 Sep 2026 20:29:01 +0530

കൊച്ചി: ഇന്ത്യന്‍ സൂപ്പര്‍ ലീഗ് ക്ലബ്ബായ കേരള ബ്ലാസ്റ്റേഴ്‌സിന്റെ മുഴുവന്‍ ഓഹരികളും കൈമാറിയതായി സ്ഥിരീകരിച്ചു മാഗ്നം സ്‌പോര്‍ട്‌സ്. യുഎഇയിലെ അല്‍ ഫുര്‍സാന്‍ സ്‌പോര്‍ട്‌സ് ഇന്‍വെസ്റ്റ്‌മെന്റ് ഗ്രൂപ്പ്, ഉടമ ഷെയ്ഖ് അഹമ്മദ് ബിന്‍ ഫൈസല്‍ അല്‍ ഖാസിമിയാണ് ബ്ലാസ്റ്റേഴ്‌സിനെ സ്വന്തമാക്കിയിരിക്കുന്നത്. നിലവിലെ ഉടമകളായ മാഗ്‌നം സ്‌പോര്‍ട്‌സ് പ്രൈവറ്റ് ലിമിറ്റഡ് ക്ലബ്ബിന്റെ 100 ശതമാനം ഓഹരികളും വില്‍ക്കുന്നതിനുള്ള അന്തിമ കരാറില്‍ ഒപ്പുവെച്ചു. പുതിയ ഉടമസ്ഥരെ ക്ലബ് ഔദ്യോഗികമായി പ്രഖ്യാപിച്ചിട്ടില്ലെങ്കിലും, വൈകാതെ പ്രഖ്യാപനമുണ്ടാകും.

2026-27 സീസണിലുടനീളം ഘട്ടം ഘട്ടമായാണ് ഈ ഉടമസ്ഥത മാറ്റം പൂര്‍ത്തിയാക്കുകയെന്ന് കേരള ബ്ലാസ്റ്റേഴ്‌സ് ഔദ്യോഗിക പ്രസ്താവനയിലൂടെ അറിയിച്ചു. ഈ മാറ്റത്തിന്റെ ഇടവേളകളില്‍ ക്ലബ്ബിന്റെ ദൈനംദിന പ്രവര്‍ത്തനങ്ങള്‍ക്കോ, പങ്കാളികള്‍ക്കും ആരാധകര്‍ക്കും നല്‍കിയിട്ടുള്ള വാഗ്ദാനങ്ങള്‍ക്കോ യാതൊരു തടസ്സവും ഉണ്ടാകില്ല. പുതിയ ഉടമകള്‍ ക്രമേണ ദൈനംദിന പ്രവര്‍ത്തനങ്ങളുടെ ചുമതല ഏറ്റെടുക്കുമെന്നും, ക്ലബ്ബിന്റെ പുതിയ കാര്യങ്ങള്‍ യഥാസമയം ഔദ്യോഗികമായി അറിയിക്കുമെന്നും ക്ലബ് വ്യക്തമാക്കി.

കേരളത്തില്‍ ഫുട്‌ബോള്‍ വേരോടിക്കാന്‍ തുടങ്ങിയ ഈ സംരംഭം ഇന്ന് പ്രതീക്ഷിച്ചതിലും വലിയൊരു വികാരമായി മാറിയെന്ന് മാഗ്നം സ്‌പോര്‍ട്‌സ് അധികൃതര്‍ പറഞ്ഞു. കേരള ജനതയോടും ക്ലബ്ബിനോടുള്ള വൈകാരിക അടുപ്പം മനസ്സിലാക്കിക്കൊണ്ടുതന്നെയാണ് ഈ തീരുമാനം എടുത്തത്. ഭാവിയിലെ മാറ്റങ്ങളെ ഉള്‍ക്കൊണ്ട് ക്ലബ്ബിന് കൂടുതല്‍ വളര്‍ച്ച കൈവരിക്കാന്‍ സാധിക്കുന്ന ശക്തമായ അടിത്തറയോടെയാണ് തങ്ങള്‍ പടിയിറങ്ങുന്നതെന്നും അവര്‍ കൂട്ടിച്ചേര്‍ത്തു.

കേരള ബ്ലാസ്റ്റേഴ്‌സിന് പുറമെ മറ്റ് ചില ഐഎസ്എല്‍ ക്ലബ്ബുകളും സമാനമായ ഉടമസ്ഥമാറ്റങ്ങള്‍ക്ക് സാക്ഷ്യം വഹിച്ചിട്ടുണ്ട്. ഡല്‍ഹി ആസ്ഥാനമായുള്ള ബി സി ജിന്‍ഡാല്‍ ഗ്രൂപ്പിന്റെ ഭാഗമായ ജിന്‍ഡാല്‍ ഫുട്‌ബോള്‍ പ്രൈവറ്റ് ലിമിറ്റഡ് 2024-ല്‍ ഹൈദരാബാദ് എഫ്സിയുടെ സ്‌പോര്‍ട്ടിങ് ലൈസന്‍സ് സ്വന്തമാക്കുകയും, പിന്നീട് ക്ലബ് ഡല്‍ഹിയിലേക്ക് മാറ്റി സ്‌പോര്‍ട്ടിങ് ക്ലബ് ഡല്‍ഹി എന്ന് പുനര്‍നാമകരണം ചെയ്യുകയും ചെയ്തിരുന്നു.

2026 ഓഗസ്റ്റില്‍ ടാറ്റാ സ്റ്റീല്‍, ജംഷെഡ്പൂര്‍ എഫ്സിയുടെ 100 ശതമാനം ഓഹരികളും ഗോവ ആസ്ഥാനമായുള്ള ചര്‍ച്ചില്‍ ബ്രദേഴ്‌സ് സ്‌പോര്‍ട്‌സ് ക്ലബ്ബിന് നാമമാത്രമായ തുകയ്ക്ക് കൈമാറിയിരുന്നു. ഇതില്‍ സ്‌പോര്‍ട്ടിങ് ലൈസന്‍സും 12 കളിക്കാരുടെയും രണ്ട് പരിശീലകരുടെയും കരാറുകളും ഉള്‍പ്പെട്ടിരുന്നു.

'ചുരുക്കം ചിലര്‍ക്ക് മാത്രം കഴിയുന്നത്'; വിരാട് കോലിയുടെ ചരിത്രനേട്ടത്തെ പ്രശംസിച്ച് കപില്‍ ദേവ്

Web Desk — Tue, 29 Sep 2026 20:25:15 +0530

ദില്ലി: ഏകദിന ക്രിക്കറ്റില്‍ 15,000 റണ്‍സ് എന്ന ചരിത്ര നാഴികക്കല്ല് പിന്നിട്ട വിരാട് കോലിയുടെ അസാധാരണ നേട്ടത്തെ വാനോളം പുകഴ്ത്തി മുന്‍ ഇന്ത്യന്‍ ലോകകപ്പ് നായകന്‍ കപില്‍ ദേവ്. കോലിയുടെ പ്രതിഭയും കളിയോടുള്ള അഭിനിവേശവുമാണ് അദ്ദേഹത്തെ ഇതിഹാസ താരങ്ങളുടെ നിരയിലെത്തിച്ചതെന്ന് കപില്‍ എടുത്തുപറഞ്ഞു. കരിയറിലുടനീളം 60-നടുത്തുള്ള ബാറ്റിംഗ് ശരാശരി നിലനിര്‍ത്താന്‍ ലോകത്ത് ചുരുക്കം ചിലര്‍ക്ക് മാത്രമേ സാധിച്ചിട്ടുള്ളൂ എന്ന് അദ്ദേഹം കൂട്ടിച്ചേര്‍ത്തു.

വെസ്റ്റ് ഇന്‍ഡീസിനെതിരായ ആദ്യ ഏകദിനത്തില്‍ പുറത്താകാതെ 88 പന്തുകളില്‍ 139 റണ്‍സ് കോലി നേടിയിരുന്നു. 10 ഫോറും 9 സിക്‌സറുമടക്കം 157.95 സ്‌ട്രൈക്ക് റേറ്റിലാണ് കോലി ഇത്രയും റണ്‍സ് അടിച്ചെടുത്തത്. ഇതിനിടെ 15,000 ക്ലബിലെത്തുകയും ചെയ്തു. സച്ചിന്‍ ടെണ്ടുല്‍ക്കറിന് ശേഷം ഏകദിനത്തില്‍ 15,000 റണ്‍സ് ക്ലബ്ബില്‍ ഇടംനേടുന്ന രണ്ടാമത്തെ മാത്രം താരമാണ് വിരാട് കോലി. 315 ഏകദിനങ്ങളിലെ 303 ഇന്നിങ്‌സുകളില്‍ നിന്നായി 59.13 ശരാശരിയില്‍ 15,080 റണ്‍സാണ് താരം നേടിയിട്ടുള്ളത്. ഇതില്‍ 55 സെഞ്ച്വറികളും 79 അര്‍ദ്ധസെഞ്ച്വറികളും ഉള്‍പ്പെടുന്നു. 183 റണ്‍സാണ് ഉയര്‍ന്ന സ്‌കോര്‍.

ലിസ്റ്റ് എ ക്രിക്കറ്റില്‍ സച്ചിന്‍ ടെണ്ടുല്‍ക്കറുടെ റെക്കോര്‍ഡിനൊപ്പം (60 സെഞ്ച്വറികള്‍) എത്താനും കോലിക്ക് സാധിച്ചിരുന്നു. ഹോം ഗ്രൗണ്ടില്‍ ഏറ്റവും കൂടുതല്‍ ഏകദിന സെഞ്ച്വറികള്‍ നേടിയ സച്ചിന്റെ റെക്കോര്‍ഡിനൊപ്പവും (42 സെഞ്ച്വറികള്‍) കോലി എത്തിക്കഴിഞ്ഞു. നാട്ടില്‍ 7,000 ഏകദിന റണ്‍സ് തികയ്ക്കുന്ന ആദ്യ ക്രിക്കറ്റ് താരമെന്ന റെക്കോര്‍ഡും കോലി സ്വന്തമാക്കി (6,976 റണ്‍സ് നേടിയ സച്ചിന്റെ റെക്കോര്‍ഡാണ് താരം മറികടന്നത്). 131 ഏകദിനങ്ങളില്‍ നിന്ന് 63.69 ശരാശരിയില്‍ 7,006 റണ്‍സാണ് കോലി സ്വന്തമാക്കിയത്.

അതേസമയം, ഏഷ്യന്‍ ഗെയിംസില്‍ പങ്കെടുക്കുന്ന ഇന്ത്യന്‍ പുരുഷ-വനിതാ ക്രിക്കറ്റ് ടീമുകള്‍ക്ക് കപില്‍ ദേവ് ആശംസകള്‍ നേര്‍ന്നു. ശ്രേയസ് അയ്യര്‍ നയിക്കുന്ന പുരുഷ ടീം ഇതിനോടകം സെമിഫൈനലില്‍ പ്രവേശിച്ചിട്ടുണ്ട്. മള്‍ട്ടി-സ്‌പോര്‍ട്ട് ഇവന്റുകളില്‍ ക്രിക്കറ്റ് ഉള്‍പ്പെടുത്തുന്നതും രാജ്യത്തിനായി മെഡലുകള്‍ സംഭാവന ചെയ്യുന്നതും ഏറെ പ്രധാനപ്പെട്ടതാണെന്ന് കപില്‍ ദേവ് അഭിപ്രായപ്പെട്ടു.

ഐസിസി റാങ്കിങ്ങില്‍ ചരിത്രനേട്ടവുമായി ഇന്ത്യന്‍ താരം ശ്രീ ചരണി; സ്മൃതി മന്ദാന ആദ്യ അഞ്ചില്‍ തിരിച്ചെത്തി

Web Desk — Tue, 29 Sep 2026 20:02:54 +0530

ദുബായ്: ഐസിസി വനിതാ ടി20 ബോളിങ് റാങ്കിങ്ങില്‍ എക്കാലത്തെയും ഉയര്‍ന്ന റേറ്റിംഗ് പോയിന്റ് സ്വന്തമാക്കി ഇന്ത്യന്‍ സ്പിന്നര്‍ ശ്രീ ചരണി. ഏഷ്യന്‍ ഗെയിംസിലെയും ഏഷ്യ കപ്പിലെയും മികച്ച പ്രകടനങ്ങളുടെ പിന്‍ബലത്തില്‍ കരിയറിലെ ഏറ്റവും മികച്ച റേറ്റിങ് പോയിന്റായ 817 ആണ് താരം സ്വന്തമാക്കിയത്. 2018 നവംബറില്‍ ഓസ്ട്രേലിയയുടെ മേഗന്‍ ഷട്ട് സ്ഥാപിച്ച 806 റേറ്റിങ് പോയിന്റുകള്‍ എന്ന റെക്കോര്‍ഡാണ് ചരണി ഇപ്പോള്‍ മറികടന്നിരിക്കുന്നത്. ഏഷ്യ കപ്പില്‍ 12 വിക്കറ്റുകള്‍ വീഴ്ത്തിയ താരം, ശ്രീലങ്കയ്ക്കെതിരായ ഫൈനലില്‍ 4/20 പ്രകടനത്തിലൂടെ ഇന്ത്യക്ക് കിരീടം നേടിക്കൊടുക്കുന്നതില്‍ നിര്‍ണായക പങ്കുവേഹിച്ചു.

തുടര്‍ന്ന് ഏഷ്യന്‍ ഗെയിംസില്‍ ജപ്പാനെതിരെ 4/10 എന്ന കരിയര്‍ ബെസ്റ്റ് പ്രകടനവും താരം പുറത്തെടുത്തു. ശ്രീലങ്കയ്ക്കെതിരായ ഫൈനലിലും വിക്കറ്റുകള്‍ വീഴ്ത്തിയതോടെയാണ് ചരണി റെക്കോര്‍ഡ് റേറ്റിങ് സ്വന്തമാക്കിയത്. അതേസമയം, ടി20 ബൗളിംഗ് റാങ്കിംഗില്‍ 754 പോയിന്റോടെ ഇന്ത്യയുടെ ദീപ്തി ശര്‍മ്മ രണ്ടാം സ്ഥാനത്ത് തുടരുന്നു. ഏഷ്യന്‍ ഗെയിംസ് ഫൈനലില്‍ ശ്രീലങ്കയ്ക്കെതിരെ 79 നേടിയ ഓപ്പണിങ് ബാറ്റര്‍ സ്മൃതി മന്ധാന ടി20 ബാറ്റിങ് റാങ്കിങ്ങില്‍ ആദ്യ അഞ്ചില്‍ തിരിച്ചെത്തി.

സിംബാബ്വെ-വെസ്റ്റ് ഇന്‍ഡീസ് ഏകദിന പരമ്പരയിലെ പ്രകടനങ്ങള്‍ റാങ്കിങ്ങില്‍ വലിയ മാറ്റങ്ങളുണ്ടാക്കി. ആദ്യ ഏകദിനത്തില്‍ തകര്‍പ്പന്‍ സെഞ്ച്വറി (182 റണ്‍സ്) നേടിയ വെസ്റ്റ് ഇന്‍ഡീസിന്റെ ഹെയ്‌ലി മാത്യൂസ് ബാറ്റിങ് റാങ്കിങ്ങില്‍ നാലാം സ്ഥാനത്തേക്ക് മുന്നേറി. സിംബാബ്വെയുടെ ന്യാഷ ഗ്വാഞ്ചുര ബോളിങ് റാങ്കിങ്ങില്‍ 156-ാം സ്ഥാനത്തേക്കും, മോഡെസ്റ്റര്‍ മുപാചികുവ ബാറ്റിങ് റാങ്കിങ്ങില്‍ 40-ാം സ്ഥാനത്തേക്കും കയറി.

ഏകദിന ബാറ്റിങ് റാങ്കിങ്ങില്‍ ഇന്ത്യയുടെ സ്മൃതി മന്ധാനയാണ് ഒന്നാം സ്ഥാനത്ത് (790 പോയിന്റ്). ഓസ്‌ട്രേലിയയുടെ അലാന കിങ് (ഏകദിന ബൗളിംഗ്്), ബേത് മൂണി (ടി20 ബാറ്റിങ്), ആഷ്ലി ഗാര്‍ഡ്‌നര്‍ (ഏകദിന ഓള്‍റൗണ്ടര്‍), ഹെയ്‌ലി മാത്യൂസ് (ടി20 ഓള്‍റൗണ്ടര്‍) എന്നിവരും അതത് വിഭാഗങ്ങളില്‍ തലപ്പത്ത് തുടരുന്നു.

'എന്റെ ഫോണ്‍ തിരികെ തരൂ'; നാഷണല്‍ സൈബര്‍ ക്രൈം ഇന്‍വെസ്റ്റിഗേഷന്‍ ഏജന്‍സിക്ക് കത്തയച്ച് പാക് താരം മുഹമ്മദ് റിസ്വാന്‍

Web Desk — Tue, 29 Sep 2026 19:38:38 +0530

ഇസ്ലമാബാദ്: ഇംഗ്ലണ്ടിനെതിരായ ടെസ്റ്റ് പരമ്പരയിലെ ദയനീയ തോല്‍വിക്കും ഡ്രസ്സിങ് റൂം വിവരങ്ങള്‍ ചോര്‍ന്നതുമായ വിവാദങ്ങള്‍ക്കും പിന്നാലെ നടപടികള്‍ നേരിടുന്ന പാകിസ്ഥാന്‍ വിക്കറ്റ് കീപ്പര്‍ മുഹമ്മദ് റിസ്വാന്‍ നാഷണല്‍ സൈബര്‍ ക്രൈം ഇന്‍വെസ്റ്റിഗേഷന്‍ ഏജന്‍സിക്ക് കത്തയച്ചു. തന്റെ ഫോണ്‍ തിരികെ നല്‍കണമെന്നും തനിക്കെതിരെയുള്ള അന്വേഷണത്തിന്റെ യഥാര്‍ത്ഥ കാരണം വ്യക്തമാക്കണമെന്നും ആവശ്യപ്പെട്ടാണ് റിസ്വാന്‍ കത്തയച്ചിരിക്കുന്നത്.

ഇംഗ്ലണ്ടിനെതിരായ ലോര്‍ഡ്‌സ് ടെസ്റ്റിന് പിന്നാലെ ഓഗസ്റ്റ് 31-നാണ് റിസ്വാന്റെ ഫോണ്‍ അന്വേഷണ ഏജന്‍സി പിടിച്ചെടുത്തത്. മൂന്ന് മണിക്കൂറിനുള്ളില്‍ ഫോണ്‍ തിരികെ നല്‍കുമെന്നറിയിച്ചിരുന്നെങ്കിലും ഇതുവരെ അത് ലഭിച്ചിട്ടില്ല. ഈ പശ്ചാത്തലത്തിലാണ് ലാഹോര്‍ ഹൈക്കോടതിയുടെ പുതിയ ഉത്തരവിന്റെ അടിസ്ഥാനത്തില്‍ റിസ്വാന്‍ ഔദ്യോഗികമായി കത്തയച്ചത്. എന്‍സിസിഐയുടെ അന്വേഷണാധികാരത്തെ ചോദ്യം ചെയ്തുകൊണ്ട് റിസ്വാന്‍ നല്‍കിയ ഹര്‍ജി കോടതി തള്ളിയിരുന്നെങ്കിലും, താരത്തെ അനാവശ്യമായി ബുദ്ധിമുട്ടിക്കരുതെന്നും ഫോണ്‍ വീണ്ടെടുക്കാന്‍ കോടതിയെ സമീപിക്കാമെന്നും ഹൈക്കോടതി നിര്‍ദ്ദേശിച്ചിരുന്നു.

ഇംഗ്ലണ്ട് പര്യടനത്തിനിടെ പാക് ടീമില്‍ സാമ്പത്തിക ഇടപാടുകള്‍ നടന്നുവെന്ന സംശയത്തെ തുടര്‍ന്നാണ് അന്വേഷണം. പരമ്പരയ്ക്കിടെ മോശം പ്രകടനം കാഴ്ചവെച്ചതിനെ തുടര്‍ന്ന് റിസ്വാന്‍, ഇമാം ഉള്‍ ഉള്‍പ്പെടെ ഏഴ് കളിക്കാരെ പിസിബി നാട്ടിലേക്ക് തിരിച്ചുവിളിച്ച് ആഭ്യന്തര അന്വേഷണത്തിന് ഉത്തരവിട്ടിരുന്നു. ഇതിന്റെ തുടര്‍ച്ചയായാണ് ഇപ്പോള്‍ എന്‍സിസിഐയുടെ അന്വേഷണവും ഫോണ്‍ പിടിച്ചെടുക്കലും നടന്നിരിക്കുന്നത്.

ഓസ്‌ട്രേലിയയെ വീഴ്ത്തി ബ്രസീല്‍; വിജയമുറപ്പിച്ചത് മത്സരത്തിന്റെ അവസാന നിമിഷങ്ങളിലെ ഗോളുകള്‍

Web Desk — Tue, 29 Sep 2026 19:22:01 +0530

സിഡ്‌നി: ബ്രിസ്‌ബേനില്‍ നടന്ന ആവേശകരമായ സൗഹൃദ മത്സരത്തില്‍ ഓസ്‌ട്രേലിയയെ 4-2 ന് പരാജയപ്പെടുത്തി ബ്രസീല്‍. 52,000-ത്തിലധികം കാണികള്‍ സ്റ്റേഡിയത്തില്‍ സാക്ഷ്യം വഹിച്ച മത്സരത്തില്‍, അവസാന നിമിഷങ്ങളില്‍ നേടിയ രണ്ട് ഗോളുകളുടെ കരുത്തിലാണ് അഞ്ച് തവണ ലോക ചാമ്പ്യന്‍മാരായ ബ്രസീല്‍ വിജയം പിടിച്ചെടുത്തത്. ടൗണ്‍സ്വില്ലെയില്‍ നടന്ന ആദ്യ മത്സരത്തില്‍ അവസാന നിമിഷം നേടിയ ഗോളിലൂടെ സമനില വഴങ്ങേണ്ടി വന്ന ബ്രസീല്‍, ഈ മത്സരത്തില്‍ മികച്ച പ്രകടനമാണ് പുറത്തെടുത്തത്.

മത്സരം തുടങ്ങി മൂന്നാം മിനിറ്റില്‍ ഫുള്‍ ബാക്ക് വാന്‍ഡേഴ്‌സണിലൂടെ ബ്രസീല്‍ ആദ്യ ഗോള്‍ നേടി ലീഡ് എടുത്തു. മത്സരത്തിലേക്ക് ശക്തമായി തിരിച്ചുവന്ന ഓസ്‌ട്രേലിയ 28-ാം മിനിറ്റില്‍ അലസ്സാന്‍ഡ്രോ സര്‍ക്കാറ്റിയിലൂടെ സമനില പിടിച്ചു. തുടര്‍ന്ന് 33-ാം മിനിറ്റില്‍ കോണര്‍ മെറ്റ്കാഫ് തൊടുത്ത ശക്തമായ ഷോട്ടിലൂടെ ഓസ്‌ട്രേലിയ 2-1 ന് മുന്നിലെത്തി. ആദ്യ പകുതി അവസാനിക്കുന്നതിന് മുന്‍പ് ഡാനിലോയെ ഫൗള്‍ ചെയ്തതിന് ലഭിച്ച പെനാല്‍റ്റി ലക്ഷ്യത്തിലെത്തിച്ച് ബ്രസീല്‍ ക്യാപ്റ്റന്‍ റാഫിഞ്ഞ ടീമിനെ ഒപ്പമെത്തിച്ചു.

മത്സരത്തിന്റെ അവസാന ഘട്ടങ്ങളില്‍ ബ്രസീല്‍ കൂടുതല്‍ കരുത്തുകാട്ടി. എന്‍ഡ്രിക് നല്‍കിയ പന്തില്‍ നിന്ന് ബ്രൂണോ ഗിമാറസ് ബ്രസീലിന് ലീഡ് സമ്മാനിച്ചു. തുടര്‍ന്ന് വിനീഷ്യസ് ജൂനിയര്‍ പെനാല്‍റ്റിലൂടെ ഗോള്‍ നേടിയതോടെ ബ്രസീലിന്റെ വിജയം ഉറപ്പായി.

ബിസിസിഐ ജൂനിയര്‍ സെലക്ഷന്‍ കമ്മിറ്റിയിലേക്ക് അപേക്ഷിച്ച് മുന്‍ ഇന്ത്യന്‍ പേസര്‍ പ്രവീണ്‍ കുമാര്‍

Web Desk — Tue, 29 Sep 2026 19:13:43 +0530

മുംബൈ: ബിസിസിഐയുടെ ജൂനിയര്‍ സെലക്ഷന്‍ കമ്മിറ്റിയിലേക്ക് അപേക്ഷയുമായി മുന്‍ ഇന്ത്യന്‍ പേസര്‍ പ്രവീണ്‍ കുമാര്‍ രംഗത്ത്. ക്രിക്കറ്റിന് തന്റേതായ സംഭാവനകള്‍ നല്‍കുക എന്ന ലക്ഷ്യത്തോടെയാണ് 39 കാരനായ താരം പുതിയ ദൗത്യത്തിനായി മുന്നോട്ട് വന്നിരിക്കുന്നത്. മുന്‍പ് പരിശീലകനായും ഉത്തര്‍പ്രദേശ് ക്രിക്കറ്റ് അസോസിയേഷനില്‍ സെലക്ടറായും പ്രവര്‍ത്തിച്ചിട്ടുള്ള പരിചയസമ്പത്തുമായാണ് പ്രവീണ്‍ കുമാറിന്റെ കടന്നുവരവ്.

2007-നും 2012-നും ഇടയില്‍ ഇന്ത്യക്കായി 6 ടെസ്റ്റുകളും 68 ഏകദിനങ്ങളും 10 ടി20 മത്സരങ്ങളും കളിച്ചിട്ടുള്ള പ്രവീണ്‍ കുമാര്‍ 2018-ലാണ് അന്താരാഷ്ട്ര ക്രിക്കറ്റില്‍ നിന്നും വിരമിച്ചത്. സെന്‍ട്രല്‍ സോണില്‍ നിന്നുള്ള അദ്ദേഹത്തിന് കടുത്ത മത്സരമാണ് നേരിടേണ്ടി വരുന്നത്. സുദീപ് ത്യാഗി, ആഷിഷ് വിന്‍സ്റ്റണ്‍ സൈദി തുടങ്ങിയ മുന്‍ താരങ്ങളും ഇതേ മേഖലയില്‍ നിന്ന് അപേക്ഷ സമര്‍പ്പിച്ചിട്ടുണ്ട്. വെസ്റ്റ് സോണില്‍ നിന്ന് മുന്‍ ഇന്ത്യന്‍ ഓഫ് സ്പിന്നര്‍ രമേഷ് പവാറും രംഗത്തുണ്ട്.

ഓഗസ്റ്റ് 24-നാണ് ബിസിസിഐ പുതിയ സെലക്ടര്‍മാരെ നിയമിക്കുന്നതിനായുള്ള അപേക്ഷകള്‍ ക്ഷണിച്ചത്. എസ് ശരത് നയിക്കുന്ന നിലവിലെ കമ്മിറ്റിക്ക് പകരമായാണ് പുതിയ പാനല്‍ എത്തുന്നത്. അഞ്ച് ഒഴിവുകളിലേക്കാണ് അപേക്ഷ ക്ഷണിച്ചിട്ടുള്ളത്. അണ്ടര്‍-22 വരെയുള്ള പ്രായപരിധിയിലുള്ള ജൂനിയര്‍ ടീമുകളെ തിരഞ്ഞെടുക്കുക, യുവതാരങ്ങളില്‍ മികച്ച ധാര്‍മ്മിക മൂല്യങ്ങള്‍ വളര്‍ത്തുക, ഒത്തുകളി വിരുദ്ധ ബോധവല്‍ക്കരണം നല്‍കുക തുടങ്ങിയ ചുമതലകളും പുതിയ കമ്മിറ്റിക്കുണ്ടാകും.

ഷുഹൈബ് അക്തറിന് നിര്‍ണായക ചുമതല; ഇംഗ്ലണ്ടിനെതിരായ തോല്‍വിക്ക് പിന്നാലെ പാകിസ്ഥാന്‍ ക്രിക്കറ്റ് ബോര്‍ഡില്‍ അഴിച്ചുപണി

Web Desk — Tue, 29 Sep 2026 18:45:38 +0530

ഇസ്ലാമാബാദ്: ഇംഗ്ലണ്ട് പര്യടനത്തിലെ ദയനീയ പ്രകടനത്തിന് പിന്നാലെ പാകിസ്ഥാന്‍ ക്രിക്കറ്റ് ബോര്‍ഡില്‍ വലിയ അഴിച്ചുപണികള്‍ക്ക് ഒരുങ്ങി ബോര്‍ഡ് ചെയര്‍മാന്‍ മൊഹ്സിന്‍ നഖ്വി. ഇതിന്റെ ഭാഗമായി മുന്‍ പാക് സൂപ്പര്‍ ഫാസ്റ്റ് ബൗളര്‍ ശുഐബ് അക്തര്‍ പിസിബിയില്‍ നിര്‍ണായക ചുമതലയേറ്റേക്കുമെന്ന് സൂചന.

കഴിഞ്ഞയാഴ്ച ഇസ്ലാമാബാദില്‍ വെച്ച് ശുഐബ് അക്തറും പിസിബി ചെയര്‍മാന്‍ മൊഹ്സിന്‍ നഖ്വിയും തമ്മില്‍ കൂടിക്കാഴ്ച നടത്തിയതായി ബോര്‍ഡുമായി അടുത്ത വൃത്തങ്ങള്‍ അറിയിച്ചു. പാകിസ്ഥാന്‍ ക്രിക്കറ്റിന്റെ ഉന്നമനത്തിനായി തന്റെ ആശയങ്ങളും നിര്‍ദ്ദേശങ്ങളും അക്തര്‍ ചെയര്‍മാനുമായി പങ്കുവെച്ചിട്ടുണ്ട്. മുന്‍കാലങ്ങളില്‍ പിസിബിയുടെ കടുത്ത വിമര്‍ശകനായിരുന്ന അക്തര്‍, തന്റെ ജ്യേഷ്ഠന്റെ വിയോഗവേളയില്‍ നഖ്വി നല്‍കിയ പിന്തുണയോടെയാണ് ബോര്‍ഡുമായി അടുക്കുന്നത്. നാഷണല്‍ ക്രിക്കറ്റ് അക്കാദമിയും പരിശീലന ക്യാമ്പുകളും സന്ദര്‍ശിക്കാന്‍ ചെയര്‍മാന്‍ അദ്ദേഹത്തെ ക്ഷണിക്കുകയും ചെയ്തിരുന്നു.

അതേസമയം, ഇംഗ്ലണ്ടിനെതിരായ ടെസ്റ്റ് പരമ്പരയില്‍ ചരിത്രത്തില്‍ ആദ്യമായി സമ്പൂര്‍ണ്ണ തോല്‍വി (0-3) ഏറ്റുവാങ്ങിയതിന്റെ പശ്ചാത്തലത്തിലാണ് പിസിബിയുടെ ഈ പുതിയ നീക്കങ്ങള്‍. ദേശീയ പുരുഷ, വനിതാ, ജൂനിയര്‍ ടീമുകളുടെ പ്രകടനം മെച്ചപ്പെടുത്തുന്നതിനായി വിദേശ പരിശീലകരെയും കണ്‍സള്‍ട്ടന്റുകളെയും നിയമിക്കാനും ബോര്‍ഡ് പദ്ധതിയിടുന്നുണ്ട്. വനിതാ ടീമിനായി സ്ഥിരമായ ഒരു മുഖ്യ പരിശീലകനെ കണ്ടെത്താനുള്ള ശ്രമങ്ങളും പുരോഗമിക്കുകയാണെന്ന് വൃത്തങ്ങള്‍ വ്യക്തമാക്കി.

ഏഷ്യന്‍ ഗെയിംസ്‌ അത്‌ലറ്റിക്‌സില്‍ ഇന്ത്യക്ക്‌ സ്വര്‍ണം, അഭിമാന നേട്ടം വനിതകളുടെ റിലേയില്‍

Web Desk — Tue, 29 Sep 2026 18:38:53 +0530

നഗോയ: ഏഷ്യന്‍ ഗെയിംസ്‌ അത്‌ലറ്റിക്‌സില്‍ ഇന്ത്യക്ക്‌ ആദ്യ സ്വര്‍ണം. വനിതകളുടെ 4-400 മീറ്റര്‍ റിലേയിലാണ്‌ അഭിമാന നേട്ടം. കിരണ്‍, പൂവമ്മ, പ്രാച്യ, വിത്യാ രാംരാജ്‌ എന്നിവരാണ്‌ റിലേയില്‍ സ്വര്‍ണക്കുതിപ്പ്‌ നടത്തിയത്‌. മൂന്ന്‌ മിനുട്ട്‌ 29.69 സെക്കന്‍ഡിലാണ്‌ ഫിനിഷ്‌ ചെയ്‌തത്‌. ബഹ്‌റൈന്‍ വെള്ളിയും ചൈന വെങ്കലവും നേടി.

പുരുഷ വിഭാഗം 4-400 മീറ്റര്‍ റിലേയില്‍ ഇന്ത്യക്ക്‌ വെങ്കല മെഡല്‍. മലയാളി താരം മനു, ധരംവീര്‍ ചൗധരി, വിശാല്‍, രാജേഷ്‌ രമേഷ്‌ എന്നിവരാണ്‌ മത്സരിച്ചത്‌. മൂന്ന്‌ മിനിറ്റ്‌ 01.61 സെക്കന്‍ഡിലാണ്‌ ഫിനിഷ്‌ ചെയ്‌തത്‌. ജപ്പാന്‍ സ്വര്‍ണവും, ഖത്തര്‍ വെള്ളിയും നേടി.

വനിതകളുടെ ട്രാപ്‌ ഷൂട്ടിംഗില്‍ ഇന്ത്യയുടെ നീരു ദണ്ഡ ചരിത്രം കുറിച്ചിരുന്നു. ട്രാപ്‌ ഷൂട്ടിംഗ്‌ വനിതകളുടെ വ്യക്തിഗത ഇനത്തില്‍ ഇന്ത്യയുടെ ആദ്യ ഏഷ്യന്‍ ഗെയിംസ്‌ മെഡല്‍ നീരു സ്വന്തം പേരിലാക്കി. അതാകട്ടെ, ഏഷ്യന്‍ റെക്കോര്‍ഡോടെയാണ്‌ നേടിയത്‌. ചൈനയുടെ യുനോങ്‌ സണ്‍ വെള്ളിയും കുവൈത്തിന്റെ ഹാജറ അബ്ദുല്‍മാലിക്‌ വെങ്കലവും നേടി. ജപ്പാന്‍ ഏഷ്യാഡില്‍ ഇന്ത്യയുടെ അഞ്ചാം സ്വര്‍ണ മെഡലായിരുന്നു ഇത്‌. അതുപോലെ, ഈ ഏഷ്യന്‍ ഗെയിംസിലെ ഇന്ത്യയുടെ ആദ്യത്തെ വ്യക്തിഗത സ്വര്‍ണം കൂടിയാണി്‌.

ഏഷ്യന്‍ ഗെയിംസ്‌ പുരുഷന്‍മാരുടെ 5000 മീറ്റര്‍ ഓട്ടത്തില്‍ ഗുല്‍വീര്‍ സിംഗ്‌ വെങ്കലം നേടി. 13 മിനുട്ട്‌ 32.75 സെക്കന്‍ഡിലാണ്‌ ഫിനിഷിംഗ്‌. ഐചി നഗോയ ഏഷ്യാഡില്‍ ദീര്‍ഘദൂര ഓട്ടത്തില്‍ ഗുല്‍വീറിന്റെ മൂന്നാംവെങ്കല മെഡലാണിത്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌:https://www.youtube.com/live/s0LLVQeMmtU?si=31j3tChnat66QzkK

'ലോകകപ്പിന്റെ പ്രാധാന്യം അദ്ദേഹത്തിന് നന്നായി അറിയാം'; വിരാട് കോലിയുമായുള്ള ബന്ധത്തെക്കുറിച്ച് രോഹിത് ശര്‍മ

Web Desk — Tue, 29 Sep 2026 18:27:30 +0530

ഗുവാഹത്തി: ഏകദേശം രണ്ട് പതിറ്റാണ്ടുകളായി ഇന്ത്യന്‍ ക്രിക്കറ്റിന്റെ നെടുംതൂണുകളാണ് രോഹിത് ശര്‍മയും വിരാട് കോലിയും. ഒന്നിച്ച് കളിച്ചും, നയിച്ചും, വിജയങ്ങള്‍ ആഘോഷിച്ചും, ഒടുവില്‍ കരിയറിന്റെ സായാഹ്നത്തിലേക്ക് കടക്കുമ്പോഴും തങ്ങള്‍ തമ്മിലുള്ള സൗഹൃദത്തിന് യാതൊരു മാറ്റവും വന്നിട്ടില്ലെന്ന് രോഹിത് ശര്‍മ വ്യക്തമാക്കി. ജിയോസ്റ്റാറിന് നല്‍കിയ അഭിമുഖത്തിലാണ് രോഹിത് തന്റെ ഉറ്റ സുഹൃത്തിനെക്കുറിച്ചും സഹതാരത്തെക്കുറിച്ചും മനസ്സ് തുറന്നത്.

തങ്ങളെക്കുറിച്ചുള്ള 'റോ-കോ' എന്ന ജനപ്രിയ വിളിപ്പേര് ടിവിയില്‍ കാണുമ്പോള്‍ പരസ്പരം നോക്കി ചിരിക്കാറുണ്ടെന്ന് രോഹിത് പറയുന്നു. 'ആളുകള്‍ക്ക് ഗോസിപ്പുകള്‍ വേണമല്ലോ, അതുകൊണ്ട് അങ്ങനെയൊക്കെ നടക്കട്ടെ,' അദ്ദേഹം തമാശയായി പറഞ്ഞു. 2007-ല്‍ രോഹിത്തും 2008-ല്‍ കോലിയും അരങ്ങേറ്റം കുറിച്ചതുമുതല്‍ ഇവരുടെ കരിയര്‍ ഇന്ത്യന്‍ ക്രിക്കറ്റുമായി ഇഴചേര്‍ന്നു കിടക്കുകയാണ്.

കളിക്കളത്തിലെ വ്യത്യസ്ത ശൈലികള്‍ക്കപ്പുറം, ടീമിനായി തങ്ങളുടെ ഏറ്റവും മികച്ചത് നല്‍കുക എന്ന ലക്ഷ്യത്തില്‍ ഇരുവരും എപ്പോഴും ഒറ്റക്കെട്ടാണെന്ന് രോഹിത് ഓര്‍മ്മിപ്പിച്ചു. കോലിയുടെ ടെസ്റ്റ് ക്യാപ്റ്റന്‍സിയെയും അദ്ദേഹം വാനോളം പ്രശംസിച്ചു. തന്റെ ബാറ്റിംഗിലെ പോരായ്മകളെക്കുറിച്ച് കോലിയും തന്റെ പ്രകടനങ്ങളെക്കുറിച്ച് താനും പരസ്പരം ചര്‍ച്ച ചെയ്യാറുണ്ടെന്നും രോഹിത് വെളിപ്പെടുത്തി.

2027-ലെ ഏകദിന ലോകകപ്പിനെക്കുറിച്ചോ അതിനായുള്ള ഒരുക്കങ്ങളെക്കുറിച്ചോ കോലിയോട് പ്രത്യേകം സംസാരിക്കേണ്ടതില്ലെന്ന് രോഹിത് വ്യക്തമാക്കി. 'അദ്ദേഹം വര്‍ഷങ്ങളായി കളിക്കുന്നയാളാണ്. ലോകകപ്പിന്റെ പ്രാധാന്യം അദ്ദേഹത്തിന് നന്നായി അറിയാം.' രോഹിത് പറഞ്ഞു.

വ്യത്യസ്ത വ്യക്തിത്വങ്ങളും ശൈലികളും ആണെങ്കിലും, ഇന്ത്യയെ ജയിപ്പിക്കുക എന്ന ഒരേയൊരു ലക്ഷ്യത്തോടെയാണ് ഇരുവരും ഇപ്പോഴും മുന്നോട്ട് പോകുന്നത്. വിരാട് കോലി ലണ്ടനിലേക്ക് മാറിയതുകൊണ്ട് ഇപ്പോള്‍ കാണുന്നത് കുറവാണെങ്കിലും, പരസ്പരമുള്ള ആദരവും സൗഹൃദവും ഒട്ടും കുറഞ്ഞിട്ടില്ലെന്ന് രോഹിത് കൂട്ടിച്ചേര്‍ത്തു.

ഹസ്‌തദാനമില്ല, പതാക കൈമാറ്റമില്ല, ഇസ്രയേലിന്റെ ദേശീയ ഗാനത്തെ അവഗണിച്ചു, അയര്‍ലന്‍ഡ്‌ ഫുട്‌ബോള്‍ ടീമിന്റെ പ്രതിഷേധം ആഗോള ചര്‍ച്ചയായി

Vipulnath P — Tue, 29 Sep 2026 18:17:00 +0530

ഗാസയിലെ മനുഷ്യക്കുരുതി നടത്തിയ ഇസ്രയേലിനോടുള്ള പ്രതിഷേധം യുവേഫ നേഷന്‍സ്‌ ലീഗ്‌ ഫുട്‌ബോള്‍ വേദിയില്‍ ആളിക്കത്തി. ഇസ്രയേല്‍ താരങ്ങള്‍ക്ക്‌ ഹസ്‌തദാനം നിരസിച്ചും, കറുത്ത ആംബാന്‍ഡ്‌ ധരിച്ചും ഇസ്രയേല്‍ ദേശീയ ഗാനത്തോട്‌ വിയോജിപ്പ്‌ പ്രകടിപ്പിച്ചും മത്സരത്തിലുടനീളം അയര്‍ലന്‍ഡ്‌ കളിക്കാര്‍ ശക്തമായ പ്രതിഷേധമാണ്‌ അഴിച്ചുവിട്ടത്‌. പോരാത്തതിന്‌ എതിരില്ലാത്ത മൂന്ന്‌ ഗോളുകള്‍ക്ക്‌ ഇസ്രയേലിനെ തകര്‍ത്തുവിടുകയും ചെയ്‌തു. ഹംഗറിയിലെ ഡെബ്രെസെനില്‍ നടന്ന മത്സരത്തില്‍ അയര്‍ലന്‍ഡ്‌ താരങ്ങള്‍ നടത്തിയ പ്രതിഷേധ പ്രകടനങ്ങള്‍ കായിക ലോകത്ത്‌ വലിയ ചര്‍ച്ചയായിരിക്കുകയാണ്‌.

ഇസ്രയേലിനെതിരായ മത്സരം ബഹിഷ്‌കരിക്കാനായിരുന്നു അയര്‍ലന്‍ഡ്‌ ടീമിന്റെ ആദ്യ വികാരം. ഐറിഷ്‌ റിസര്‍വ്‌ ഗോള്‍ കീപ്പര്‍ ഗാവിന്‍ ബാസുനു ടീമില്‍ നിന്നും സ്വയം പിന്‍മാറി തന്റെ പ്രതിഷേധം അറിയിച്ചിരുന്നു. എന്നാല്‍, യുവേഫയുടെ കടുത്ത വിലക്കുകളും സാമ്പത്തിക പിഴകളും ഒഴിവാക്കാന്‍ അയര്‍ലന്‍ഡ്‌ ടീം മത്സരം പൂര്‍ണമായി ബഹിഷ്‌കരിക്കാതിരിക്കുകയായിരുന്നു. അതേസമയം, മത്സര വേദിയില്‍ ശക്തമായ പ്രതിഷേധം രേഖപ്പെടുത്തുകയും ചെയ്‌തു.

കളി ആരംഭിക്കുന്നതിന്‌ മുമ്പുള്ള ഹസ്‌തദാന ചടങ്ങ്‌ അയര്‍ലന്‍ഡ്‌ താരങ്ങള്‍ പൂര്‍ണമായും ഒഴിവാക്കി. അയര്‍ലന്‍ഡ്‌ ക്യാപ്‌റ്റന്‍ ധാരാ ഒഷീ മാച്ച്‌ റഫറിമാര്‍ക്ക്‌ കൈകൊടുത്തെങ്കിലും ഇസ്രയേല്‍ ക്യാപ്‌റ്റന്‍ മാനര്‍ സോളമന്‌ കൈ കൊടുക്കാന്‍ തയ്യാറായില്ല. എതിര്‍ ടീം ക്യാപ്‌റ്റനുമായി സംസാരിക്കുമ്പോള്‍ രണ്ട്‌ കൈകളും പിറകിലേക്കായി പിടിച്ചു നില്‍ക്കുകയായിരുന്നു ധാരാ ഒഷീ ചെയ്‌തത്‌. കൂടാതെ, പരമ്പരാഗത ചടങ്ങായ ഇരുടീമുകളുടെ പതാക കൈമാറ്റവും ഒഴിവാക്കി.

ഇസ്രയേല്‍ സൈനിക നടപടികളില്‍ ഗാസയില്‍ കൊല ചെയ്യപ്പെട്ടവരോടുള്ള ആദരസൂചകമായ ഐറിഷ്‌ താരങ്ങള്‍ കറുത്ത ആംബാന്‍ഡ്‌ ധരിച്ചാണ്‌ കളത്തിലിറങ്ങിയത്‌. ദേശീയ ഗാന വേളയിലും പ്രതിഷേധം അലയടിച്ചു. ഇസ്രയേലിന്റെ ദേശീയ ഗാനം ആലപിച്ച സമയത്ത്‌ അയര്‍ലന്‍ഡ്‌ താരങ്ങള്‍ തലതാഴ്‌ത്തിപ്പിടിച്ച്‌ തങ്ങളുടെ വിയോജിപ്പ്‌ പരസ്യമായി പ്രകടിപ്പിച്ചു. പാവപ്പെട്ട മനുഷ്യരെ കൊന്നൊടുക്കുന്നത്‌ മാപ്പര്‍ഹിക്കാത്ത കുറ്റമാണ്‌ എന്ന്‌ പറഞ്ഞു കൊണ്ടായിരുന്നു ഇസ്രയേലുമായുള്ള മത്സരത്തിനുള്ള ടീമില്‍ നിന്ന്‌ റിസര്‍വ്‌ ഗോള്‍ കീപ്പറായ ഗവിന്‍ ബസുനോ സ്വയം പിന്‍മാറിയത്‌.

അയര്‍ലന്‍ഡിന്‌ പുറമെ, തുര്‍ക്കി, സ്‌കോട്‌ലന്‍ഡ്‌, സ്ലോവേനിയ, നോര്‍വെ തുടങ്ങിയ രാജ്യങ്ങള്‍ ഇസ്രായേലില്‍ പോയി കളിക്കാന്‍ വിസമ്മതിക്കുകയോ, ഇസ്രയേലിനെ അന്താരാഷ്ട്ര ഫുട്‌ബോളില്‍ നിന്ന്‌ പൂര്‍ണമായി വിലക്കണമെന്നും ഔദ്യോഗികമായി ആവശ്യപ്പെട്ടിരുന്നു. സുരക്ഷാ കാരണങ്ങളാലും ഇസ്രയേലിന്റെ രാഷ്ട്രീയ നിലപാടുകളോടുമുള്ള വിയോജിപ്പും കാരണം ഇസ്രയേല്‍ ടീമിന്‌ ആതിഥേയത്വം വഹിക്കാന്‍ ബെല്‍ജിയം എതിര്‍പ്പ്‌ പ്രകടിപ്പിച്ചിരുന്നു. തുടര്‍ന്ന്‌ ആ മത്സരം ഹംഗറിയിലേക്ക്‌ മാറ്റേണ്ടി വന്നു.

ഇസ്രയേലിനെ ഫിഫയില്‍ നിന്ന്‌ സസ്‌പെന്‍ഡ്‌ ചെയ്യാനും അന്താരാഷ്ട്ര മത്സരങ്ങളില്‍ നിന്ന്‌ പുറത്താക്കാനും പന്ത്രണ്ടിലേറെ പശ്ചിമേഷ്യന്‍ ഫുട്‌ബോള്‍ അസോസിയേഷനുകള്‍ ഔദ്യോഗിക കത്തയച്ചിരുന്നു. ഇസ്രയേലിനെതിരെ ശക്തമായി പ്രതിഷേധിക്കുന്ന ഫുട്‌ബോള്‍ ആരാധക സംഘം സെല്‍റ്റിക്‌ എഫ്‌ സിയുടേതാണ്‌. യുവേഫയുടെ വിലക്കുകള്‍ വകവെക്കാതെ സ്‌കോട്ടിഷ്‌ ക്ലബ്ബിന്റെ ആരാധക സംഘമായ ഗ്രീന്‍ ബ്രിഗേഡ്‌ ചാമ്പ്യന്‍സ്‌ ലീഗ്‌ മത്സരങ്ങളില്‍ ഫലസ്‌തീന്‌ ഐക്യദാര്‍ഢ്യം അറിയിച്ച്‌ പതാകകള്‍ ഉയര്‍ത്താറുണ്ട്‌.

ഇസ്രയേലിന്‌ ചുവപ്പ്‌ കാര്‍ഡ്‌ കാണിക്കൂ എന്നെഴുതിയ കൂറ്റന്‍ ബാനറുകള്‍ ഗ്രീന്‍ ബ്രിഗേഡ്‌ സ്ഥാപിക്കുകയും ചെയ്‌തു. ആരാധകരെ നിലയ്‌ക്കു നിര്‍ത്താത്തിന്‌ സെല്‍റ്റിക്‌ എഫ്‌ സിക്ക്‌ യുവേഫ വലിയ തുക പിഴ ചുമത്തുക പതിവാണ്‌. ഗ്രീന്‍ ബ്രിഗേഡ്‌ വിട്ടുകൊടുക്കില്ല, ആ പിഴത്തുക പിരിച്ചെടുത്ത്‌ ക്ലബ്ബിനും ഫലസ്‌തീന്‍ ചാരിറ്റിപ്രവര്‍ത്തനങ്ങള്‍ക്കായും വീതിച്ചു നല്‍കും.

2023 ഒക്ടോബറില്‍ ആരംഭിച്ച യുദ്ധത്തില്‍ ഗാസയ്‌ക്ക്‌ സംഭവിച്ച നാശനഷ്ടങ്ങള്‍ അതിഭീകരമാണ്‌. എഴുപത്തയ്യായിരത്തോളം ഫലസ്‌തീനികള്‍ കൊല്ലപ്പെട്ടിട്ടുണ്ട്‌. പകുതിയിലേറെയും സ്‌ത്രീകളും കുട്ടികളുമാണ്‌. രണ്ട്‌ ലക്ഷത്തോളം പേര്‍ ഗുരുതരമായി പരിക്കേറ്റ്‌ കഴിയുന്നു, പലരും ചികിത്സ പോലും സാധ്യമല്ലാത്ത ഇടങ്ങളില്‍ മരണത്തോട്‌ മല്ലിടുകയാണ്‌. യുദ്ധത്തിന്റെ നൈതികത പോലുമില്ലാതെ ആരോഗ്യകേന്ദ്രങ്ങളും സ്‌കൂളുകളും പൂര്‍ണമായും തകര്‍പ്പെട്ടു.

വീടുകളില്‍ നിന്ന്‌ കൂട്ടപ്പലായനമാണ്‌. അഭയാര്‍ഥി കേന്ദ്രങ്ങളില്‍ മരുന്നും ഭക്ഷണവും പോലും എത്തുന്നില്ല. പകര്‍ച്ചവ്യാധികള്‍ പടരുന്നു. ഈ സാഹചര്യത്തില്‍ ഫുട്‌ബോള്‍ ലോകത്ത്‌ നിന്ന്‌ വലിയ പ്രതിഷേധങ്ങള്‍ ഇനിയും ഉയരും. പ്രമുഖ ഫുട്‌ബോള്‍ താരങ്ങളായ കരീം ബെന്‍സിമ, റിയാദ്‌ മഹ്‌റെസ്‌, ഹക്കിം സിയെച്‌, ബാഴ്‌സയുടെ യുവതാരം ലാമില്‍ യമാല്‍ എന്നിവര്‍ ഫലസ്‌തീന്‍ ജനതയ്‌ക്ക്‌ ഐക്യദാര്‍ഢ്യം അറിയിച്ചവരാണ്‌. വരുമാനത്തിന്റെ ഒരു വിഹിതം ഗാസയെ സഹായിക്കാന്‍ മാറ്റിവെക്കുന്നുവെന്നതും ശ്രദ്ധേയം.

റഷ്യ-ഉക്രെയിന്‍ യുദ്ധത്തിന്റെ പശ്ചാത്തലത്തില്‍ റഷ്യന്‍ ഫുട്‌ബോള്‍ ടീമിനെ ഫിഫയും യുവേഫയും കളിയില്‍ നിന്ന്‌ പൂര്‍ണമായി വിലക്കിയിരുന്നു. എന്നാല്‍, ഗാസയില്‍ വംശഹത്യക്ക്‌ നേതൃത്വം നല്‍കുന്ന ഇസ്രായേലിനെ ഫിഫയും യുവേഫയും ഇനിയും ശിക്ഷിച്ചിട്ടില്ല. ഇസ്രയേലിന്‌ ചുവപ്പ്‌ കാര്‍ഡ്‌ കാണിക്കൂ എന്ന കൂറ്റന്‍ ബാനറുകള്‍ മത്സവേദികളില്‍ മാത്രമല്ല, ലോകമെമ്പാടുമുള്ള ഫുട്‌ബോള്‍ പ്രേമികളുടെ ഹൃദയത്തിലും ശക്തമായി ഉയരുന്നുണ്ട്‌...

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

പാക്കിസ്ഥാന്‍ ക്രിക്കറ്റിനെ രക്ഷിക്കാന്‍ അക്തര്‍ വരുന്നു, ക്രിക്കറ്റ്‌ ബോര്‍ഡില്‍ നിര്‍ണായക റോള്‍ ലഭിച്ചേക്കും, കൂടിക്കാഴ്‌ചകള്‍ പൂര്‍ത്തിയായി

Web Desk — Tue, 29 Sep 2026 17:19:44 +0530

ഇസ്ലാമാബാദ്‌: പാക്കിസ്ഥാന്‍ ക്രിക്കറ്റ്‌ ബോര്‍ഡിലെ നിര്‍ണായക സ്ഥാനത്തേക്ക്‌ മുന്‍ പേസര്‍ ശുഐബ്‌ അക്തര്‍ എത്തിയേക്കുമെന്ന്‌ സൂചന. പി സി ബി ചെയര്‍മാന്‍ മുഹ്‌സിന്‍ നഖ്വിയുമായി കഴിഞ്ഞാഴ്‌ചയില്‍ രണ്ട്‌ കൂടിക്കാഴ്‌ചകള്‍ അക്തര്‍ നടത്തിയിരുന്നു. ഇത്‌ പൂര്‍ണമായും പാക്‌ ക്രിക്കറ്റുമായി ബന്ധപ്പെട്ടതായിരുന്നുവെന്നാണ്‌ പി സി ബിയിലെ ഉന്നതര്‍ വ്യക്തമാക്കുന്നത്‌.

ഇംഗ്ലണ്ട്‌ പര്യടനത്തിലെ പാക്കിസ്ഥാന്‍ ടീമിന്റെ മോശം പ്രകടനത്തെ തുടര്‍ന്ന്‌, ക്രിക്കറ്റ്‌ ഭരണ സമിതിയിലും സെലക്ഷന്‍ സമിതിയിലും വലിയ മാറ്റങ്ങള്‍ വരുത്താന്‍ ബോര്‍ഡ്‌ തീരുമാനിച്ചിട്ടുണ്ട്‌. ഇതിന്റെ ഭാഗമായിട്ടാണ്‌ ഇസ്ലാമാബാദില്‍ മൊഹ്‌സിന്‍ നഖ്‌ വിയുമായി അക്തര്‍ വിശദമായ കൂടിക്കാഴ്‌ച നടത്തിയതെന്ന്‌ വാര്‍ത്താ ഏജന്‍സിയായ പി ടി ഐ റിപ്പോര്‍ട്ട്‌ ചെയ്‌തു.

പാക്‌ ടീമിന്റെ ചീഫ്‌ സെലക്ടര്‍ സ്ഥാനത്തേക്ക്‌ മുന്‍പ്‌ അക്തറിനെ പരിഗണിച്ചിരുന്നെങ്കിലും, പാക്‌ ക്രിക്കറ്റ്‌ ബോര്‍ഡിന്റെ കടുത്ത വിമര്‍ശകനായ അക്തര്‍ താത്‌പര്യം പ്രകടിപ്പിച്ചിരുന്നില്ല. ഇപ്പോള്‍ പാക്‌ ക്രിക്കറ്റ്‌ ബോര്‍ഡ്‌ ചെയര്‍മാനുമായി അക്തര്‍ അടുത്ത ബന്ധം സൂക്ഷിക്കുന്നുണ്ട്‌. പാക്‌ ക്രിക്കറ്റിന്റെ നിലവാരം ഉയര്‍ത്താന്‍ അക്തര്‍ മുന്നോട്ട്‌ വെക്കുന്ന നിര്‍ദേശങ്ങള്‍ കേള്‍ക്കാന്‍ പി സി ബി ചെയര്‍മാന്‍ സമയം കണ്ടെത്തുന്നുവെന്നത്‌ വലിയ സൂചനയാണ്‌. ഇംഗ്ലണ്ടിനെതിരെയുള്ള പരമ്പരയിലെ കനത്ത തോല്‍വിക്ക്‌ പിന്നാലെ പാക്കിസ്ഥാന്‍ സെലക്ഷന്‍ കമ്മിറ്റിയില്‍ നിന്നും മുന്‍ ക്യാപ്‌റ്റ്‌# മിസ്‌ബാ ഉല്‍ ഹഖ്‌ രാജിവെച്ചിരുന്നു. നിലവിലെ ചീഫ്‌ സെലക്ടര്‍ അക്വുബ്‌ ജാവേദിനെ മാറ്റാനും പി സി ബി ഒരുങ്ങുകയാണെന്ന്‌ റിപ്പോര്‍ട്ടുണ്ട്‌.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

ഇന്ത്യയുടെ വല കുലുക്കി ബ്രസീലിന്‌ ജയമൊരുക്കിയ വിനീഷ്യസിനെ അറിയുമോ? ഇന്ത്യയില്‍ ടോപ്‌ സ്‌കോററായ ചരിത്രവും റയല്‍ മാഡ്രിഡ്‌ താരത്തിനുണ്ട്‌

Vipulnath P — Tue, 29 Sep 2026 15:57:18 +0530

വിനീഷ്യസ്‌ ജൂനിയര്‍, റഫീഞ്ഞ, മാര്‍ക്വൂഞ്ഞോസ്‌, ഗബ്രിയേല്‍, എന്‍ഡ്രിക്‌ എന്നിവര്‍ കൊല്‍ക്കത്തയിലെ സാള്‍ട്ട്‌ ലേക്ക്‌ സ്‌റ്റേഡിയത്തില്‍ പന്ത്‌ തട്ടാനൊരുങ്ങുന്നു. ഒക്ടോബര്‍ മൂന്നിന്‌ നടക്കുന്ന ബ്രസീല്‍-ഇന്ത്യ അന്താരാഷ്ട്ര സൗഹൃദ മത്സരം ഫുട്‌ബോള്‍ പ്രേമികള്‍ക്ക്‌ പുത്തന്‍ അനുഭവമായിരിക്കും.ബ്രസീലിന്റെ സൂപ്പര്‍താരം വിനീഷ്യസിന്‌ പക്ഷേ, ഇന്ത്യന്‍ മണ്ണില്‍ കളിക്കാനിറങ്ങുന്നത്‌ പുത്തന്‍ അനുഭവമല്ല.

വിനീഷ്യസ്‌ ഗോവയില്‍...

2016 ഒക്ടോബറില്‍ വിനീഷ്യസ്‌ ബ്രസീലിന്റെ അണ്ടര്‍ 17 ടീമിനൊപ്പം ഗോവയില്‍ വന്നിട്ടുണ്ട്‌. ബ്രിക്‌സ്‌ അണ്ടര്‍ 17 ഫുട്‌ബോള്‍ കപ്പ്‌ കളിക്കാന്‍. അന്ന്‌ ഏറ്റവും ശ്രദ്ധേയനായ ടീനേജ്‌ സെന്‍സേഷന്‍ ആയിരുന്നു വിനീഷ്യസ്‌. വമ്പന്‍ ക്ലബ്ബുകള്‍ യുവ താരത്തെ നോട്ടമിട്ടു കൊണ്ടിരിക്കുന്ന കാലം. ഇന്ത്യ, ദക്ഷിണാഫ്രിക്ക, റഷ്യ, ചൈന ടീമുകള്‍ മത്സരിച്ച ബ്രിക്‌സ്‌ കപ്പില്‍ ബ്രസീലാണ്‌ ജേതാക്കളായത്‌. ടൂര്‍ണമെന്റില്‍ തിളങ്ങഇയ ഫ്‌ളമെംഗോ യൂത്ത്‌ അക്കാദമിയൂടെ താരത്തിനെ തേടി സ്‌പാനിഷ്‌ ക്ലബ്ബ്‌ റയല്‍ മാഡ്രിഡ്‌ രംഗത്ത്‌ വന്നു. 2017 ല്‍ വിനീഷ്യസ്‌ 46 ദശലക്ഷം യൂറോയുടെ ട്രാന്‍സ്‌ഫറില്‍ റയല്‍ മാഡ്രിഡില്‍ ചേര്‍ന്നു.

ഇന്ത്യക്കെതിരെ ഗോളടിച്ച്‌ വിനീഷ്യസ്‌..

ബ്രിക്‌സ്‌ അണ്ടര്‍ 17 ഫുട്‌ബോള്‍ കപ്പില്‍ നാല്‌ ഗോളുകളുമായി വിനീഷ്യസ്‌ ജൂനിയര്‍ ടോപ്‌ സ്‌കോറര്‍ ആയി. ബ്രസീല്‍ എല്ലാ മത്സരവും ജയിച്ചാണ്‌ ചാമ്പ്യന്‍മാരായത്‌. ഇന്ത്യക്കെതിരെ ഗ്രൂപ്പ്‌ മത്സരത്തില്‍ വിനീഷ്യസ്‌ ഗോളടിച്ചിരുന്നു. ബ്രസീല്‍ 3-1നാണ്‌ ഇന്ത്യയെ പരാജയപ്പെടുത്തിയത്‌. 82 ാം മിനുട്ടിലായിരുന്നു വിനീഷ്യസിന്റെ ഗോളടി. 2017 ല്‍ ഇന്ത്യയില്‍ നടന്ന ഫിഫ അണ്ടര്‍ 17 ലോകകപ്പിലും വിനീഷ്യസ്‌ കളിക്കേണ്ടതായിരുന്നു. എന്നാല്‍, റയല്‍ മാഡ്രിഡ്‌ ക്ലബ്ബ്‌ താരത്തെ വിട്ടുനല്‍കാന്‍ തയ്യാറായില്ല.

വിനീഷ്യസിന്റെ സമീപകാല ഫോം...

ഫിഫ ലോകകപ്പില്‍ നാല്‌ ഗോളുകള്‍ നേടിയ വിനീഷ്യസിന്‌ ബ്രസീല്‍ പ്രീക്വാര്‍ട്ടറില്‍ പുറത്തായത്‌ തിരിച്ചടിയായി. തകര്‍പ്പന്‍ ഫോമില്‍ കളിച്ച വിനീഷ്യസിന്‌ ടൂര്‍ണമെന്റിലെ താരമാകാനുള്ള സാധ്യത വരെ കല്‌പിക്കപ്പെട്ടിരുന്നു. ലോകകപ്പിലെ ഫോം ക്ലബ്ബ്‌ സീസണില്‍ റയല്‍ മാഡ്രിഡിനായി പുറത്തെടുക്കാന്‍ വിനീഷ്യസിന്‌ കഴിയുന്നില്ല.

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

വിൻഡീസിനെതിരായ ഏകദിന പരമ്പര സ്വന്തമാക്കാൻ ഇന്ത്യ നാളെ ഇറങ്ങും, ടീമിൽ മാറ്റം ഉറപ്പ്, സാധ്യതാ ഇലവൻ അറിയാം

Gopalakrishnan C — Tue, 29 Sep 2026 13:35:07 +0530

ഗുവാഹത്തി: വെസ്റ്റ് ഇൻഡീസിനെതിരായ ഏകദിന പരമ്പരയിലെ രണ്ടാം പോരാട്ടത്തിനായി ഇന്ത്യ നാളെ ഗുവാഹത്തിയിലെ ബർസപാര ക്രിക്കറ്റ് സ്റ്റേഡിയത്തിൽ ഇറങ്ങും. തിരുവനന്തപുരത്ത് നടന്ന ആദ്യ മത്സരത്തിൽ നേടിയ എട്ട് വിക്കറ്റിന്‍റെ തകർപ്പൻ ജയത്തിന്‍റെ ആത്മവിശ്വാസത്തിൽ ഇറങ്ങുന്ന ശുഭ്മൻ ഗില്ലും സംഘവും പരമ്പര സ്വന്തമാക്കുക എന്ന ലക്ഷ്യത്തോടെയാണ് നാളെ ഇറങ്ങുന്നത്.

ആദ്യ മത്സരത്തിൽ വിരാട് കോലിയുടെയും നായകൻ ശുഭ്മൻ ഗില്ലിന്‍റെയും സെഞ്ചുറികളുടെ കരുത്തിലാണ് ഇന്ത്യ വിൻഡീസ് ഉയർത്തിയ 296 റൺസ് വിജയലക്ഷ്യം അനായാസം മറികടന്നത്. തിരുവനന്തപുരത്ത് ഓപ്പണർമാരുടെ സെഞ്ചുറി കൂട്ടുകെട്ടിലൂടെ വെസ്റ്റ് ഇൻഡീസ് കൂറ്റൻ സ്കോറിലേക്ക് നീങ്ങുമെന്ന് കരുതിയെങ്കിലും, 40 റൺസിന് നാല് വിക്കറ്റ് വീഴ്ത്തിയ കുൽദീപ് യാദവിന്‍റെ സ്പെല്ലാണ് സന്ദർശകരെ 295/7 റൺസിൽ തളച്ചിട്ടത്.

പ്ലെയിംഗ് ഇലവനിൽ മാറ്റമുണ്ടാകുമോ

പരമ്പരയിൽ 1-0 ന് മുന്നിലെത്തിയ ഇന്ത്യ രണ്ടാം മത്സരത്തിനുള്ള പ്ലേയിംഗ് ഇലവനില്‍ മാറ്റം വരുത്തുമോ എന്നതാണ് ആരാധകർ ഉറ്റുനോക്കുന്നത്. തിരുവനന്തപുരത്ത് എട്ട് ബാറ്റിംഗ് ഓപ്ഷനുകളും മൂന്ന് സ്പെഷ്യലിസ്റ്റ് ബൗളർമാരുമായാണ് ഇന്ത്യ ഇറങ്ങിയത്. എന്നാൽ ടോപ്പ് ഓർഡർ ബാറ്റർമാർ തന്നെ കളി അവസാനിപ്പിച്ചതിനാൽ ബാറ്റിംഗ് നിരക്ക് കൂടുതല്‍ പരീക്ഷണങ്ങള്‍ നേരിടേണ്ടിവന്നില്ല.

ബൗളിംഗിൽ ഓൾ റൗണ്ടർ നിതീഷ് കുമാര്‍ റെഡ്ഡിയുടെ മോശം പ്രകടനമാണ് കാര്യവട്ടത്ത് ഇന്ത്യക്ക് തിരിച്ചടിയായത്. പ്രസിദ്ധിനൊപ്പം ന്യൂബോള്‍ എറിയാനെത്തിയ നിതീഷ് ആദ്യ ഓവറിൽ തന്നെ 18 റൺസ് വഴങ്ങിയിരുന്നു. മത്സരത്തില്‍ 5 ഓവറിൽ 45 റൺസാണ് നിതീഷ് വിട്ടുകൊടുത്തത്. ഹാർദിക് പാണ്ഡ്യയുടെ അഭാവത്തിൽ 2027 ഏകദിന ലോകകപ്പ് ലക്ഷ്യമിട്ട് നിതീഷിനെ വളർത്തിയെടുക്കാൻ മാനേജ്‌മെന്‍റ് ആഗ്രഹിക്കുന്നുണ്ടെങ്കിലും, ജസ്പ്രീത് ബുംറ ഏഷ്യൻ ഗെയിംസ് ടീമിലുള്ളതിനാൽ പേസ് നിരയ്ക്ക് കരുത്തു കൂട്ടാൻ മുഹമ്മദ് സിറാജിനെ നാളെ പ്ലേയിംഗ് ഇലവനിൽ ഉൾപ്പെടുത്തിയേക്കും.

അതേസമയം, അരങ്ങേറ്റ മത്സരത്തിൽ അഞ്ച് ഓവറിൽ 33 റൺസ് വഴങ്ങിയ ഓൾ റൗണ്ടർ നമൻ ധിറിന് ബാറ്റ് ചെയ്യാൻ അവസരം ലഭിച്ചിരുന്നില്ല. ഒരു മത്സരത്തിന് ശേഷം താരത്തെ മാറ്റാൻ സാധ്യത കുറവാണ്. അനുഭവസമ്പത്തുള്ള മുഹമ്മദ് സിറാജ് ടീമിലേക്ക് തിരിച്ചെത്തുകയാണെങ്കിൽ നിതീഷ് റെഡ്ഡിയാകും പുറത്തിരിക്കേണ്ടി വരിക എന്നാണ് സൂചന.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഏഷ്യൻ ഗെയിംസ് ക്രിക്കറ്റ്, സെമിയും മഴ മുടക്കിയാൽ ഫൈനലില്‍ ആരെത്തും, ഇന്ത്യ-പാക് സ്വപ്ന ഫൈനലിന് സാധ്യത

Gopalakrishnan C — Tue, 29 Sep 2026 12:30:45 +0530

നാഗോയ: ഏഷ്യൻ ഗെയിംസ് പുരുഷ ക്രിക്കറ്റിൽ ക്വാര്‍ട്ടര്‍ പോരാട്ടങ്ങളെല്ലാം മഴമൂലം ഉപേക്ഷിക്കപ്പെട്ടതോടെ വ്യാഴാഴ്ച നടക്കുന്ന സെമിയില്‍ ഇന്ത്യയും ശ്രീലങ്കയും പാകിസ്ഥാനും ബംഗ്ലാദേശും ഏറ്റുമുട്ടാനൊരുങ്ങുകയാണ്. ഇന്ന് ജപ്പാനിലെ നിഷിനിൽ നടക്കേണ്ടിയിരുന്ന ശ്രീലങ്ക - നേപ്പാൾ, ബംഗ്ലാദേശ് - മലേഷ്യ ക്വാർട്ടർ ഫൈനൽ മത്സരങ്ങൾ ടോസ് പോലും സാധ്യമാകാതെ ഉപേക്ഷിക്കുകയായിരുന്നു. ഇതോടെ ഐസിസി ടി20 റാങ്കിംഗിൽ മുന്നിലുള്ളതിന്‍റെ ആനുകൂല്യത്തിൽ ഇന്ത്യക്കും പാകിസ്ഥാനുമൊപ്പം ശ്രീലങ്കയും ബംഗ്ലാദേശും സെമി ഫൈനലിലേക്ക് യോഗ്യത നേടി.

ഇന്ത്യ-പാക് ഫൈനൽ

ഐച്ചി-നാഗോയ മേഖലയിൽ തുടർച്ചയായി പെയ്യുന്ന കനത്ത മഴ വരും ദിവസങ്ങളിലും തുടരുമെന്നാണ് കാലാവസ്ഥാ പ്രവചനം. വ്യാഴാഴ്ച നടക്കേണ്ട സെമി ഫൈനൽ ദിനത്തിൽ 60 ശതമാനവും ഒക്ടോബർ 3-ന് നടക്കുന്ന ഫൈനൽ ദിനത്തിൽ 40 ശതമാനവും മഴയ്ക്ക് സാധ്യതയുണ്ട്. വ്യാഴാഴ്ചത്തെ സെമി ഫൈനൽ മത്സരങ്ങളും മഴമൂലം ഉപേക്ഷിക്കേണ്ടി വന്നാൽ, മികച്ച ടി20 റാങ്കിംഗിന്‍റെ കരുത്തിൽ ഇന്ത്യയും പാകിസ്ഥാനും നേരിട്ട് ഫൈനലിലേക്ക് യോഗ്യത നേടും. കായിക പ്രേമികൾ കൊതിക്കുന്ന ഇന്ത്യ-പാകിസ്ഥാൻ കലാശപ്പോരിലേക്ക് കാര്യങ്ങളെത്തിക്കാൻ ഇത് വഴിയൊരുക്കുമെങ്കിലും, ഫൈനൽ ദിനത്തിലും മഴ തുടർന്നാൽ ഒരു പന്ത് പോലും എറിയാതെ ടൂർണമെന്‍റ് അവസാനിച്ചേക്കാം.

കഴിഞ്ഞ ഏഷ്യൻ ഗെയിംസിൽ അഫ്ഗാനിസ്ഥാനെതിരായ ഫൈനൽ മത്സരം മഴമൂലം ഉപേക്ഷിച്ചപ്പോൾ ഉയർന്ന സീഡിംഗ് ഉള്ള ടീമെന്ന നിലയിൽ ഇന്ത്യയ്ക്കാണ് സ്വർണം ലഭിച്ചത്. എന്നാൽ 2026 ഗെയിംസിൽ നിയമത്തിൽ മാറ്റം വരുത്തിയിട്ടുണ്ട്. പുതിയ നിയമപ്രകാരം ഫൈനൽ മത്സരവും മഴയിൽ കഴുകിപ്പോയാൽ ഇന്ത്യയും പാകിസ്ഥാനും സ്വർണ്ണം പങ്കിടേണ്ടി വരും. സമീപകാലത്തെ രാഷ്ട്രീയ-കായിക സാഹചര്യങ്ങൾ കണക്കിലെടുക്കുമ്പോൾ ഇത് അപൂർവ മെഡൽദാന ചടങ്ങായി മാറും.

കഴിഞ്ഞ വർഷം ഏപ്രിലിലുണ്ടായ പഹൽഗാം ഭീകരാക്രമണത്തെ തുടർന്ന് ഇരുരാജ്യങ്ങളും തമ്മിലുള്ള നയതന്ത്ര ബന്ധം കൂടുതൽ വഷളായിരുന്നു. തുടർന്ന് പാകിസ്ഥാനെതിരായ മത്സരങ്ങൾക്ക് ശേഷം ഹസ്തദാനം നൽകാതിരിക്കാൻ ഇന്ത്യൻ താരങ്ങൾ ശ്രദ്ധിച്ചിരുന്നു. കൂടാതെ, ഏഷ്യൻ ക്രിക്കറ്റ് കൗൺസിൽ (എസിസി) പ്രസിഡന്‍റും പാക് മന്ത്രിയുമായ മൊഹ്സിൻ നഖ്വിയിൽ നിന്ന് ട്രോഫികളും മെഡലുകളും വാങ്ങാനും ഇന്ത്യൻ ടീമുകൾ വിസമ്മതിച്ചിരുന്നു. അതിനാൽ, ഫൈനൽ മഴയിൽ ഒലിച്ചുപോയാൽ മെഡല്‍ പോഡിയത്തിൽ ഒന്നിച്ച് നിൽക്കേണ്ടി വരുന്നത് ഇരുടീമുകൾക്കും പുതിയ അനുഭവമായിരിക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

അത്ര അഗ്രസീവല്ല, ക്ഷമയാണ് കൂടുതല്‍! ശൈലിമാറ്റം രോഹിതിനെ തുണയ്ക്കുന്നുണ്ടോ?

Hari Krishnan M — Tue, 29 Sep 2026 13:05:33 +0530

ഇന്ത്യൻ ക്രിക്കറ്റിന്റെ ഡിഎൻഎ തന്നെ തിരുത്തിയ ഒരു മനോഭാവം, അതിന്റെ പേര് രോഹിത് ശ‍‍ര്‍മ എന്നാണ്. വിരാട് കോലിയില്‍ നിങ്ങള്‍ക്ക് ആ സമീപനത്തിന്റെ പുതിയൊരു പതിപ്പ് കാണാം, കൂടുതല്‍ അഗ്രസീവും കണ്‍ട്രോള്‍ഡുമായൊരു വേര്‍ഷൻ. എന്നാല്‍, രോഹിതിലോ. ഇന്ന് രോഹിതിന്റെ ഇന്നിങ്സുകളില്‍ കരുതലും ക്ഷമയുമാണ് പ്രകടമാകുന്നത്. ലോകക്രിക്കറ്റില്‍ ഇന്ത്യൻ ടീമിനെ ഒരു പവര്‍ഹൗസാക്കി മാറ്റിയ ഫിയര്‍ലസ് ബാറ്റിങ് രോഹിത് എന്തുകൊണ്ട് മാറ്റിവെച്ചു. അതൊരു ശരിയായ തീരുമാനമായിരുന്നോ?

2025 ചാമ്പ്യൻസ് ട്രോഫി ഫൈനലിന് ശേഷമാണ് രോഹിത് തന്റെ എ ഗെയിം ഷിഫ്റ്റ് ചെയ്തത്. കൃത്യമായി പറഞ്ഞാല്‍ ക്യാപ്റ്റൻസി നഷ്ടമായതിന് ശേഷം. 2023 ഏകദിന ലോകകപ്പില്‍ ആരംഭിച്ച ആ സെല്‍ഫ്‌ലസ് ക്രിക്കറ്റ് ചാമ്പ്യൻസ് ട്രോഫി നേടിക്കൊടുക്കുന്നത് വരെ തുടർന്നു. ശേഷം നടന്ന ഓസ്ട്രേലിയൻ പര്യടനം മുതലാണ് മാറ്റം. ഇത് കൂടുതല്‍ വിസിബിളാകുന്നത് ബാറ്റിങ്ങിന് പ്രതികൂലമായ വിക്കറ്റുകളിലുമാണ്. തന്റെ കരിയറിലുടനീളം രോഹിത് അറിയപ്പെട്ടിരുന്ന ബിഗ് ഇന്നിങ്സുകള്‍ കളിക്കാൻ കാപ്പബിലിറ്റിയുള്ള താരമായാണ്.

ഫോർമാറ്റിലെ മൂന്ന് ഇരട്ടസെഞ്ചുറികളും നിരവധി 150 പ്ലസ് സ്കോറുകളും ഉദാഹരണമാണ്. എന്നാല്‍, ടീമിന് മുൻഗണന നല്‍കി രോഹിത് തന്റെ വിക്കറ്റിനെ ബലികൊടുക്കാൻ തീരുമാനിച്ച കാലം മുതല്‍ അത്തരം ഇന്നിങ്സുകളും അഭാവമുണ്ട്. 2019 ലോകകപ്പില്‍ അഞ്ച് സെഞ്ചുറി നേടിയ രോഹിതിന് 2023ല്‍ ഒരു ശതകം മാത്രമാണ് കുറിക്കാനായത്. ഇതിനിടയില്‍ 130-150 റേയ്ഞ്ച് സ്ട്രൈക്ക് റേറ്റില്‍ താരത്തിന്റെ നിരവധി 40 പ്ലസ് സ്കോറുകളും കാണാൻ കഴിയും. പക്ഷേ, രോഹിതിന്റെ ശൈലി മാറ്റത്തിന് ശേഷമോ.

കഴിഞ്ഞ അഞ്ച് ഏകദിനങ്ങളെടുക്കാം. വിൻഡീസിനെതിരെ നേരിട്ട ആദ്യ പത്ത് പന്തില്‍ പത്ത് റണ്‍സ്, സ്ട്രൈക്ക് റേറ്റ് നൂറും ഡോട്ട് ബോളുകള്‍ എഴുമാണ്. ഇംഗ്ലണ്ടിനെതിരായ മൂന്നാം ഏകദിനത്തില്‍ പന്തില്‍ എട്ട് റണ്‍സ്. അഞ്ച് ഡോട്ട് ബോളുകള്‍. കാർഡിഫില്‍ ഒൻപത് റണ്‍സ്, ആറ് ഡോട്ട് ബോളുകള്‍. ബിർമിങ്ഹാമില്‍ നാല് റണ്‍സും ഏഴ് ഡോട്ടും. അഫ്ഗാനിസ്ഥാനെതിരെ ഒൻപത് റണ്‍സ്, ഏഴ് ഡോട്ട്. ആകെ 50 പന്തുകളില്‍ 40 റണ്‍സ് സ്ട്രൈക്ക് റേറ്റ് 80ലുമാണ് എത്തി നില്‍ക്കുന്നത്. അറ്റാക്കിങ് ഷോട്ടുകളുടെ ശതമാനം തീരെക്കുറഞ്ഞു എന്നത് മാത്രമല്ല, ബൗണ്ടറികളുടെ എണ്ണവും കുറഞ്ഞു.

മേല്‍പ്പറഞ്ഞ 50 പന്തുകളില്‍ ഒരു സിക്സ് പോലും രോഹിതിന്റെ ബാറ്റില്‍ നിന്ന് പിറന്നിട്ടില്ല. ആകെ നേടിയത് അഞ്ച് ഫോറുകളാണ്. ഈ സെയിം പാറ്റേണ്‍ കോലിയുടെ ശൈലിയില്‍ ദീര്‍ഘനാളായി കാണുന്നതാണ്, പ്രത്യേകിച്ചും ചാമ്പ്യൻസ് ട്രോഫിക്ക് മുൻപ്. ഈ ഷിഫ്റ്റ് രോഹിതിനെ സഹായിച്ചിട്ടുണ്ടോയെന്ന് ചോദിച്ചാല്‍ പൂര്‍ണമായും ഉണ്ട് എന്ന് പറയാൻ കഴിയില്ല.

ചാമ്പ്യൻസ് ട്രോഫിക്ക് ശേഷം 24 ഏകദിനങ്ങളാണ് രോഹിത് കളിച്ചിട്ടുള്ളത്. 1061 റണ്‍സാണ് നേട്ടം. ശരാശരി 46 ആണെങ്കില്‍ സ്ട്രൈക്ക് റേറ്റ് നൂറും തൊട്ടിട്ടുണ്ട്. ഇവിടെ ഏറ്റവും വലിയ മാറ്റം രോഹിത് ഓരോ ഇന്നിങ്സിലും നേരിടുന്ന പന്തുകളും ശരാശരി എണ്ണം വര്‍ധിച്ചിട്ടുണ്ട് എന്നതാണ്. 2025 മുതല്‍ കാര്യവട്ടം ഏകദിനം വരെയുള്ള കണക്കുകളെടുത്താല്‍ ഒരു ഇന്നിങ്സില്‍ നേരിടുന്നത് 44 പന്തുകളാണ്. 2023-24 വര്‍ഷങ്ങളില്‍ ഇത് 39 ആയിരുന്നു, 120 സ്ട്രൈക്ക് റേറ്റില്‍ 1412 റണ്‍സ് നേടാനും കഴിഞ്ഞിരുന്നു രോഹിതിന്.

ശൈലി മാറ്റത്തിന് ശേഷം രോഹിത് നേരിടുന്ന വെല്ലുവിളി ലഭിക്കുന്ന തുടക്കങ്ങള്‍ കണ്‍വേര്‍ട്ട് ചെയ്യാനാകുന്നില്ല എന്നത് മാത്രമാണ്. ചാമ്പ്യൻസ് ട്രോഫിക്ക് ശേഷം ഏകദിനത്തില്‍ രോഹിത് ഒരു തവണ മാത്രമാണ് പത്തില്‍ താഴെ പുറത്തായിട്ടുള്ളത്. സ്ട്രഗിള്‍ ചെയ്ത ഇന്നിങ്സുകള്‍ പോലും ചുരുക്കമാണ്. മികച്ച റിഥത്തിലേക്ക് എത്തി, വെല്‍ സെറ്റില്‍ഡാകുമ്പോഴാണ് പുറത്താകുന്നതും. ഇവിടെ കാണേണ്ടത് റിസ്ക്ക് കുറക്കുമ്പോള്‍ രോഹിതിന്റെ ഇന്നിങ്സില്‍ ഡോട്ട് ബോളുകള്‍ വര്‍ധിക്കുന്നു, അതിനെ മറികടക്കാനായി ഏരിയല്‍ ഷോട്ടുകള്‍ക്ക് തയാറാകും.

കാര്യവട്ടം ഏകദിനം ഉദാഹരണമാണ്, ഗില്ലിനേക്കാള്‍ ഫ്ലോയില്‍ ബാറ്റ് ചെയ്തിരുന്നത് രോഹിതായിരുന്നു, എന്നാല്‍ അവസാനം നേരിട്ട 11 പന്തുകളില്‍ ഒന്നില്‍പ്പോലും ബൗണ്ടറി നേടാൻ രോഹിതിന് സാധിച്ചിരുന്നില്ല. ഇതോടെ അല്‍സാരി ജോസഫിന്റെ ഓവറില്‍ ഏരിയല്‍ ഷോട്ടുകള്‍ക്ക് ഒരുങ്ങി. ഇത് മനസിലാക്കി വിൻഡീസ് ഒരുക്കിയ കെണിയില്‍ ചെന്ന് വീഴുകയുമായിരുന്നു. എന്നാല്‍, ലഭിക്കുന്ന തു‍ടക്കങ്ങള്‍ കൃത്യമായി രോഹിത് ഉപയോഗിക്കേണ്ടതുണ്ട്. പ്രത്യേകിച്ചും ഏകദിന ലോകകപ്പ് വരാനിരിക്കുന്ന പശ്ചാത്തലത്തിലും ജയ്സ്വാള്‍ കാത്തിരിക്കുന്ന സാഹചര്യത്തിലും.

5 വിക്കറ്റുമായി വിഘ്നേഷ് പുത്തൂർ; ഒമാനെതിരെ 66 റൺസിന്‍റെ വമ്പൻ വിജയവുമായി കേരളം

Gopalakrishnan C — Tue, 29 Sep 2026 11:26:22 +0530

തിരുവനന്തപുരം: വിഘ്നേഷ് പുത്തൂരിന്‍റെ അഞ്ച് വിക്കറ്റ് മികവിൽ ഒമാനെതിരെ 66 റൺസിന്‍റെ തകർപ്പൻ ജയം നേടി കേരളം. ആദ്യം ബാറ്റ് ചെയ്ത കേരളം ഉയർത്തിയ 217 റൺസ് വിജയലക്ഷ്യം പിന്തുടർന്ന ഒമാൻ 38.5 ഓവറിൽ 150 റൺസിന് ഓൾഔട്ടാവുകയായിരുന്നു. ടോസ് നേടി ബാറ്റിംഗ് തിരഞ്ഞെടുത്ത കേരളത്തിന് മികച്ച തുടക്കമാണ് ഓപ്പണർമാരായ ഗോവിന്ദ് ദേവ് പൈയും കൃഷ്ണപ്രസാദും ചേർന്ന് നൽകിയത്. ഒന്നാം വിക്കറ്റിൽ ഇരുവരും ചേർന്ന് 73 റൺസ് കൂട്ടിച്ചേർത്തു.

31 റൺസെടുത്ത കൃഷ്ണപ്രസാദ് റണ്ണൗട്ടായെങ്കിലും മറുവശത്ത് ഗോവിന്ദ് ദേവ് പൈ ഉറച്ചുനിന്നു. 77 പന്തിൽ 10 ഫോറും ഒരു സിക്സുമടക്കം 75 റൺസാണ് ഗോവിന്ദ് നേടിയത്. എന്നാൽ ഗോവിന്ദ് പുറത്തായതിന് പിന്നാലെ കേരളത്തിന്‍റെ മധ്യനിര തകർന്നു. അർജുൻ (12), അബ്ദുൾ ബാസിദ് (0), കാർത്തിക് ബി നായർ (2) എന്നിവർ വേഗത്തിൽ പുറത്തായതോടെ കേരളം 6 വിക്കറ്റിന് 150 റൺസ് എന്ന നിലയിലേക്ക് വീണു. തുടർന്ന് തകർപ്പൻ അർധ സെഞ്ചുറിയുമായി പുറത്താകാതെ നിന്ന അഖിൽ സ്കറിയയാണ് (63 പന്തിൽ 59) കേരളത്തെ 50 ഓവറിൽ 9 വിക്കറ്റ് നഷ്ടത്തിൽ 216 റൺസെന്ന ഭേദപ്പെട്ട സ്കോറിലെത്തിച്ചത്. ഒമാന് വേണ്ടി ഹസ്നെയ്ൻ അലി ഷാ നാലും അബ്ദുൾ ഖാൻ ഖാലിക് രണ്ടും വിക്കറ്റുകൾ വീഴ്ത്തി.

മറുപടി ബാറ്റിംഗിനിറങ്ങിയ ഒമാന് തുടക്കം മുതലേ കേരള ബൗളർമാർക്ക് മുന്നിൽ താളം കണ്ടെത്താനായില്ല. എസ്. കരൺ (39), വിനായക് ശുക്ല (33), ജതീന്ദർ സിങ് (28) എന്നിവർ മാത്രമാണ് ചെറുത്തുനിന്നത്. ഒരു ഘട്ടത്തിൽ 5 വിക്കറ്റിന് 139 റൺസെന്ന നിലയിലായിരുന്ന ഒമാൻ, അവസാന 11 റൺസ് കൂട്ടിച്ചേർക്കുന്നതിനിടെ ശേഷിച്ച 5 വിക്കറ്റുകളും നഷ്ടമായി തകരുകയായിരുന്നു. 7.5 ഓവറിൽ 37 റൺസ് മാത്രം വിട്ടുകൊടുത്ത് 5 വിക്കറ്റ് വീഴ്ത്തിയ സ്പിന്നർ വിഘ്നേഷ് പുത്തൂരാണ് ഒമാൻ ബാറ്റിംഗ് നിരയുടെ നട്ടെല്ലൊടിച്ചത്. ബിജു നാരായണൻ, കാർത്തിക് ബി. നായർ, അഖിൽ സ്കറിയ എന്നിവർ ഓരോ വിക്കറ്റ് വീതം വീഴ്ത്തി വിഘ്നേഷിന് മികച്ച പിന്തുണ നൽകി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

യുവേഫ നേഷൻസ് ലീഗ്: ഒലീസെ 'മാജിക്'; ബെൽജിയത്തെ വീഴ്ത്തി ഫ്രാൻസ്, തുർക്കിയെ തുരത്തി ഇറ്റലിയുടെ തിരിച്ചുവരവ്

Gopalakrishnan C — Tue, 29 Sep 2026 10:18:34 +0530

ബ്രസല്‍സ്: യുവേഫ നേഷൻസ് ലീഗ് ഫുട്ബോളിൽ പുതിയ പരിശീലകൻ സിനദിൻ സിദാന്‍റെ കീഴിൽ ഫ്രാൻസിന് തുടർച്ചയായ രണ്ടാം വിജയം. ബ്രസെൽസിൽ നടന്ന ഗ്രൂപ്പ് എ പോരാട്ടത്തിൽ ഏകപക്ഷീയമായ ഒരു ഗോളിനാണ് ഫ്രാൻസ് ബെൽജിയത്തെ പരാജയപ്പെടുത്തിയത്. കളി തീരാൻ രണ്ടു മിനിറ്റ് മാത്രം ബാക്കിനിൽക്കെ പകരക്കാരനായി ഇറങ്ങിയ മൈക്കൽ ഒലീസെ നേടിയ തകർപ്പൻ ഗോളാണ് ഫ്രാൻസിന് നിർണായക വിജയം സമ്മാനിച്ചത്.

പരിക്കുമൂലം നായകൻ കിലിയൻ എംബാപ്പെയില്ലാതെയാണ് ഗ്രൗണ്ടിലിറങ്ങിയതെങ്കിലും മത്സരത്തിൽ കൂടുതൽ അവസരങ്ങൾ സൃഷ്ടിക്കാൻ ഫ്രാൻസിനായി. 77-ാം മിനിറ്റിൽ ബ്രാഡ്‌ലി ബാർക്കോളയ്ക്ക് പകരക്കാരനായി ഇറങ്ങിയ ഒലീസെ, സ്വന്തം പകുതിയിൽ നിന്ന് പന്തുമായി മുന്നേറി 88-ാം മിനിറ്റിൽ ബോക്സിന് പുറത്തുനിന്ന് തൊടുത്ത ലോംഗ് റേഞ്ചർ ബെൽജിയൻ ഗോൾകീപ്പർ സെനെ ലാംമെൻസിനെ കാഴ്ചക്കാരനാക്കി വലയിൽ പതിക്കുകയായിരുന്നു. ജയത്തോടെ രണ്ടു കളികളിൽ നിന്ന് ആറ് പോയിന്‍റോടെ ഫ്രാൻസ് ഗ്രൂപ്പിൽ ഒന്നാം സ്ഥാനത്ത് തുടരുന്നു.

I'm still not over this Michael Olise goal. https://t.co/yQbbbl1AR8

— 10 (@Kylian) September 28, 2026

ZIDANE EN FOLIE SUR LE BUT D’OLISE ! pic.twitter.com/8NDWro7X7h

— Téléfoot (@telefoot_TF1) September 28, 2026

തുര്‍ക്കിയെ തുരത്തി ഇറ്റലി

ഗ്രൂപ്പിലെ മറ്റൊരു മത്സരത്തിൽ ഇറ്റലി ഒന്നിനെതിരെ നാല് ഗോളുകൾക്ക് തുർക്കിയെ തകർത്തുവിട്ടു. ആദ്യ മത്സരത്തിൽ ബെൽജിയത്തോടേറ്റ തോൽവിക്ക് ശേഷമുള്ള ഇറ്റലിയുടെ ശക്തമായ തിരിച്ചുവരവാണിത്. കനത്ത മഴയിൽ ബുർസയിൽ നടന്ന മത്സരത്തിന്‍റെ ആദ്യ 30 മിനിറ്റിൽ തന്നെ മൂന്ന് ഗോളുകൾ നേടി ഇറ്റലി ആധിപത്യം ഉറപ്പിച്ചു. അലസാന്ദ്രോ ബസ്റ്റോണി, ഡേവിഡ് ഫ്രറ്റേസി, മൈക്കൽ ഖയോഡെ, പിയോ എസ്പോസിറ്റോ എന്നിവരാണ് ഇറ്റലിക്കായി വലകുലുക്കിയത്. ബാരിഷ് യിൽമാസ് തുർക്കിയുടെ ആശ്വാസ ഗോൾ നേടി. മത്സരത്തിൽ സഹോദരങ്ങളായ പിയോ എസ്പോസിറ്റോയും സെബാസ്റ്റ്യാനോ എസ്പോസിറ്റോയും ഇറ്റലിക്കായി ഒരുമിച്ച് ആദ്യ ഇലവനിൽ അണിനിരന്ന് ചരിത്ര നേട്ടവും കുറിച്ചു.

മറ്റു മത്സരങ്ങളില്‍ സ്വീഡൻ 3-1 ന് പോളണ്ടിനെയും ബോസ്നിയ ഹെർസഗോവിന 4-2 ന് റൊമാനിയയെയും പരാജയപ്പെടുത്തി. നോർത്തേൺ അയർലൻഡ് - ഹംഗറി മത്സരവും (0-0), ജോർജിയ - ഉക്രെയ്ൻ പോരാട്ടവും (0-0) സമനിലയിൽ അവസാനിച്ചു. മോണ്ടെനെഗ്രോ 3-2 ന് അർമേനിയയെ തോൽപ്പിച്ചപ്പോൾ ലാത്വിയ - സൈപ്രസ് മത്സരം (0-0) സമനിലയിൽ അവസാനിച്ചു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

അർഷാദ് നദീം വീണു; ജാവലിനിൽ ചരിത്ര സ്വർണം എറിഞ്ഞിട്ട് ശ്രീലങ്കയുടെ റുമേഷ് പതിരഗെ

Gopalakrishnan C — Tue, 29 Sep 2026 09:55:10 +0530

നാഗോയ: ഏഷ്യൻ ഗെയിംസ് പുരുഷന്മാരുടെ ജാവലിൻ ത്രോയിൽ പാകിസ്ഥാന്‍റെ ഒളിമ്പിക് ചാമ്പ്യൻ അർഷാദ് നദീമിന് വീണ്ടും നിരാശ. ഈ സീസണിലെ മികച്ച പ്രകടനം പുറത്തെടുത്തിട്ടും മെഡൽ പട്ടികയിൽ ഇടംപിടിക്കാൻ നദീമിന് കഴിഞ്ഞില്ല. എന്നാൽ, ചരിത്ര നേട്ടത്തോടെ ശ്രീലങ്കയുടെ റുമേഷ് തരംഗ പതിരഗെ ഏഷ്യൻ ഗെയിംസ് ജാവലിനിൽ സ്വർണം സ്വന്തമാക്കുന്ന ആദ്യ ലങ്കൻ താരമായി മാറി. 88.55 മീറ്റർ ദൂരം കണ്ടെത്തിയാണ് 23-കാരനായ റുമേഷ് സ്വർണം കരസ്ഥമാക്കിയത്.

കനത്ത മഴയും മോശം കാലാവസ്ഥയും കാരണം കടുത്ത വെല്ലുവിളി നിറഞ്ഞ മത്സരത്തിലാണ് റുമേഷ് ചരിത്ര വിജയം നേടിയത്. തുടക്കത്തിൽ പതറിയ റുമേഷ് ആദ്യ ശ്രമത്തിൽ 73.53 മീറ്ററും തുടർന്ന് 83.34 മീറ്ററുമാണ് എറിഞ്ഞത്. പകുതി വഴിയിൽ ഇന്ത്യയുടെ യഷ്വീർ സിംഗിനും രോഹിത് യാദവിനും പിന്നിലായിരുന്ന റുമേഷ്, പിന്നീട് മിന്നും തിരിച്ചുവരവ് നടത്തി. നാലാം ശ്രമത്തിൽ 88.33 മീറ്റർ കണ്ടെത്തി ഒന്നാമതെത്തിയ താരം, തന്‍റെ അവസാന ശ്രമത്തിൽ 88.55 മീറ്റർ എറിഞ്ഞ് സ്വർണം ഉറപ്പിക്കുകയായിരുന്നു.

റുമേഷ് പത്തിരഗെയെ സംബന്ധിച്ച് ഇത് സ്വപ്നസമാനമായ സീസണാണ്. ഈ വർഷം കോമൺവെൽത്ത് ഗെയിംസിലും സ്വർണം നേടിയ റുമേഷ്, ഡയമണ്ട് ലീഗ് ഫൈനലും അഞ്ച് മത്സരങ്ങളും ജയിച്ച് ആധിപത്യം പുലർത്തിയിരുന്നു. ജൂണിൽ റോമിൽ കുറിച്ച 92.62 മീറ്ററാണ് ഈ വർഷത്തെ ലോകത്തിലെ ഏറ്റവും മികച്ച ദൂരവും ശ്രീലങ്കൻ ദേശീയ റെക്കോർഡും.

നിരാശപ്പെടുത്തി അർഷാദ് നദീം

മറുവശത്ത്, സീസണിലെ തന്‍റെ മികച്ച ദൂരമായ 80.29 മീറ്റർ കണ്ടെത്തിയെങ്കിലും നാലാം സ്ഥാനത്ത് ഫിനിഷ് ചെയ്യാനേ അർഷാദ് നദീമിന് സാധിച്ചുള്ളൂ. ആദ്യ ശ്രമത്തിൽ 76.69 മീറ്റർ എറിഞ്ഞ നദീമിന്റെ രണ്ടാമത്തെയും അവസാന മൂന്ന് ശ്രമങ്ങളും ഫൗളിൽ കലാശിച്ചു. തന്റെ ഫോം വീണ്ടെടുക്കാൻ ഗ്ലാസ്ഗോ കോമൺവെൽത്ത് ഗെയിംസിലെ മോശം പ്രകടനത്തിന് ശേഷം ലൊസാനെ ഡയമണ്ട് ലീഗിൽ നിന്ന് പിന്മാറുകയും ദക്ഷിണാഫ്രിക്കയിൽ പ്രത്യേക പരിശീലനം നടത്തുകയും ചെയ്തിരുന്നെങ്കിലും ഏഷ്യൻ ഗെയിംസിലും പോഡിയത്തിലെത്താൻ ഒളിമ്പിക് ചാമ്പ്യന് കഴിഞ്ഞില്ല. നീരജ് ചോപ്രയുടെ അഭാവത്തിലും ഇന്ത്യയുടെ യഷ്‌വീർ സിംഗ് വെള്ളിയും രോഹിത് യാദവ് വെങ്കലവും നേടി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

ഏഷ്യൻ ഗെയിംസ് ക്രിക്കറ്റ്: ക്വാർട്ടർ ഫൈനലുകളെല്ലാം മഴ കൊണ്ടുപോയി; സെമിയിൽ ഇന്ത്യയുടെ എതിരാളികളായി

Gopalakrishnan C — Tue, 29 Sep 2026 09:02:15 +0530

നാഗോയ: ഏഷ്യൻ ഗെയിംസ് പുരുഷ ക്രിക്കറ്റ് സെമി ഫൈനലിൽ ഇന്ത്യ ശ്രീലങ്കയെ നേരിടും. ഇന്ന് നാഗോയയിലെ കൊറോഗി സ്‌പോർട്‌സ് പാർക്കിൽ നടക്കേണ്ടിയിരുന്ന ശ്രീലങ്ക - നേപ്പാൾ ക്വാർട്ടർ ഫൈനൽ മത്സരം കനത്ത മഴയെ ടോസ് പോലും സാധ്യമാകാതെ ഉപേക്ഷിച്ചതോടെയാണ് സെമി ഫൈനൽ ചിത്രം വ്യക്തമായത്. ഇതോടെ ഐസിസി ടി20 റാങ്കിംഗിൽ മുന്നിലുള്ളതിന്‍റെ ആനുകൂല്യത്തിൽ ശ്രീലങ്ക സെമി ഫൈനലിലേക്ക് യോഗ്യത നേടി.

നിലവിൽ ശ്രീലങ്ക റാങ്കിംഗിൽ ഒൻപതാം സ്ഥാനത്തും നേപ്പാൾ 14-ാം സ്ഥാനത്തുമാണ്. ഇന്ന് നടക്കേണ്ടിയിരുന്ന ബംഗ്ലാദേശ്-മലേഷ്യ നാലാം ക്വാര്‍ട്ടറും ടോസ് പോലും സാധ്യമാകാതെ ഉപേക്ഷിച്ചിരുന്നു. ഇതോടെ റാങ്കിംഗിന്‍റെ ബലത്തില്‍ ബംഗ്ലാദേശും സെമിയിലെത്തി. ഹോങ്കോംഗിനെതിരായ മത്സരം ഉപേക്ഷിച്ചതിനെ തുടർന്ന് ഉയർന്ന പാകിസ്ഥാനും നേരത്തെ സെമി ഉറപ്പിച്ചിരുന്നു. വ്യാഴാഴ്ച നടക്കുന്ന ആദ്യ സെമിയിൽ ഇന്ത്യ ശ്രീലങ്കയെയും രണ്ടാം സെമിയിൽ പാകിസ്ഥാൻ ബംഗ്ലാദേശിനെയും നേരിടും.

ഏഷ്യൻ ഗെയിംസിലെ നാല് പുരുഷ ക്വാർട്ടർ ഫൈനൽ മത്സരങ്ങളും മോശം കാലാവസ്ഥ കാരണം ഒരു പന്ത് പോലും എറിയാനാകാതെയാണ് ഉപേക്ഷിക്കേണ്ടിവന്നത്. തിങ്കളാഴ്ച അഫ്ഗാനിസ്ഥാനെതിരെയുള്ള ക്വാർട്ടർ ഫൈനൽ മത്സരം മഴമൂലം ഉപേക്ഷിച്ചതിനെ തുടർന്ന് നിലവിലെ ചാമ്പ്യന്മാരായ ഇന്ത്യ നേരത്തെ തന്നെ സെമി ഉറപ്പിച്ചിരുന്നു. ഐസിസി ടി20 റാങ്കിംഗിൽ ഇന്ത്യ ഒന്നാം സ്ഥാനത്തും അഫ്ഗാനിസ്ഥാൻ പത്താം സ്ഥാനത്തുമാണ്.

കഴിഞ്ഞ കുറച്ചു ദിവസങ്ങളായി നാഗോയയിൽ തുടർച്ചയായി മഴ പെയ്യുന്നത് മത്സരങ്ങളെ പ്രതികൂലമായി ബാധിക്കുന്നുണ്ട്. ശനിയാഴ്ച നടന്ന ഗ്രൂപ്പ് ഘട്ടത്തിലെ നേപ്പാൾ - ജപ്പാൻ മത്സരവും മഴ തടസപ്പെടുത്തിയിരുന്നു. 15 ഓവറാക്കി ചുരുക്കിയ മത്സരത്തിൽ നേപ്പാൾ നാല് വിക്കറ്റ് നഷ്ടത്തിൽ 149 റൺസെടുത്തെങ്കിലും പിന്നീട് മഴ വീണ്ടും കനത്തതോടെ ജപ്പാന് ബാറ്റിംഗ് ആരംഭിക്കാൻ കഴിഞ്ഞില്ല. അഫ്ഗാനിസ്ഥാനെ അഞ്ച് വിക്കറ്റിന് തോൽപ്പിച്ച് നേപ്പാള്‍ കരുത്തുകാട്ടിയിരുന്നു. ഏഷ്യൻ ഗെയിംസിൽ ഇന്ത്യക്ക് ഇതുവരെ ഒരു മത്സരത്തില്‍ പോലും ഗ്രൗണ്ടില്‍ ഇറങ്ങാനായിട്ടില്ല. വെസ്റ്റ് ഇൻഡീസിനെതിരായ ഏകദിന പരമ്പരയുടെ ഭാഗമായി പ്രധാന പരിശീലകൻ ഗൗതം ഗംഭീർ ഒപ്പമില്ലാത്തതിനാൽ വിവിഎസ് ലക്ഷ്മണാണ് ഇന്ത്യൻ ടീമിന്‍റെ പരിശീലകചുമതല വഹിക്കുന്നത്. ശ്രേയസ് അയ്യർ നയിക്കുന്ന ഇന്ത്യൻ സംഘത്തിൽ ജസ്പ്രീത് ബുംറ ഉൾപ്പെടെയുള്ള പരിചയസമ്പന്നരായ താരങ്ങളും 15-കാരൻ വൈഭവ് സൂര്യവംശിയുമുണ്ട്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'കാര്യവട്ടം കണ്ടത് കോലിയുടെ ആറാട്ട്, ഇനി രോഹിത്തിന്‍റെ ഊഴം'; ഹിറ്റ്‌മാനെക്കുറിച്ച് വൻ പ്രവചനവുമായി സദഗോപൻ രമേഷ്

Gopalakrishnan C — Tue, 29 Sep 2026 07:45:49 +0530

ഗുവാഹത്തി: വെസ്റ്റ് ഇൻഡീസിനെതിരായ ഏകദിന പരമ്പരയിലെ ആദ്യ മത്സരത്തില്‍ വിരാട് കോലി സെഞ്ചുറി നേടി റെക്കോര്‍ഡിട്ടതിന് പിന്നാലെ വമ്പന്‍ പ്രവചനവുമായി മുന്‍ ഇന്ത്യൻ ഓപ്പണര്‍ സദഗോപന്‍ രമേഷ്. വരും മത്സരങ്ങളിൽ മുൻ നായകൻ രോഹിത് ശർമയും സെഞ്ചുറി നേടുമെന്ന് സദഗോപൻ രമേഷ് പ്രവചിച്ചു. കാര്യവട്ടം ഗ്രീൻഫീല്‍ഡ് സ്റ്റേഡിയത്തില്‍ നടന്ന പരമ്പരയിലെ ആദ്യ മത്സരത്തിൽ വിരാട് കോലി പുറത്താകാതെ 139 റൺസ് നേടി റെക്കോര്‍ഡിട്ടതിന് പിന്നാലെയാണ് രമേഷിന്‍റെ ഈ പ്രതികരണം.

ആദ്യ മത്സരത്തിൽ രോഹിത് 35 പന്തിൽ 32 റൺസെടുത്ത് പുറത്തായെങ്കിലും, തൊട്ടുമുമ്പത്തെ ഇംഗ്ലണ്ടിനെതിരായ മത്സരത്തിൽ താരം 138 റൺസ് നേടിയിരുന്നു. രോഹിതും കോലിയും തമ്മിലുള്ള ആരോഗ്യകരമായ മത്സരവും ഒത്തുചേരലുമാണ് ഇന്ത്യയുടെ കരുത്തെന്ന് രമേഷ് ചൂണ്ടിക്കാട്ടി. ഇന്ത്യയുടെ കഴിഞ്ഞ രണ്ട് ഏകദിന മത്സരങ്ങൾ പരിശോധിച്ചാൽ, ഒന്നിൽ രോഹിതും മറ്റൊന്നിൽ വിരാടും സെഞ്ചുറി നേടി. ഒരാൾക്ക് ഫോം കിട്ടിയാൽ അത് മറ്റയാളിലേക്കും പടരും. അതിനാൽ പരമ്പരയിലെ ബാക്കി രണ്ട് മത്സരങ്ങളിൽ ഒന്നിൽ രോഹിതും തീർച്ചയായും സെഞ്ചുറി നേടും. ഇവരിൽ ഒരാൾ സെഞ്ചുറി നേടിയാൽ അടുത്ത പരമ്പരയിൽ മറ്റേയാളും അതിനായി ശ്രമിക്കും. ഇരുവരും പരസ്പരം ഊർജ്ജം ഉൾക്കൊണ്ടാണ് മുന്നേറുന്നതെന്നും സദഗോപൻ രമേഷ് തന്‍റെ ഇൻസ്റ്റാഗ്രാം പേജിൽ കുറിച്ചു.

ആദ്യ മത്സരത്തിൽ 55-ാം ഏകദിന സെഞ്ചുറിയും 15,000 ഏകദിന റൺസും പൂർത്തിയാക്കിയ വിരാട് കോലിയുടെ ഫോമിനെയും രമേഷ് വാനോളം പുകഴ്ത്തി. വിൻഡീസ് പരമ്പര കഴിയുന്നതിന് മുമ്പ് കോലി എതിർ ബൗളർമാരെ പൂർണമായും തകർത്തെറിയുമെന്നും, പരിക്കേറ്റ പുലികളെപ്പോലെയാണ് രോഹിതും കോലിയും ബാറ്റ് ചെയ്യുന്നതെന്നും രമേഷ് കൂട്ടിച്ചേർത്തു. മൂന്ന് മത്സരങ്ങളടങ്ങിയ പരമ്പരയിലെ രണ്ടാം ഏകദിനം ബുധനാഴ്ച ഗുവാഹത്തിയിലെ ബർസപാര സ്റ്റേഡിയത്തിൽ നടക്കും. ആദ്യ മത്സരം ജയിച്ച ഇന്ത്യ പരമ്പരയിൽ 1-0ന് മുന്നിലാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക

'കേരളത്തിൽ ജോലി ലഭിച്ചാൽ സ്വീകരിക്കും', സർക്കാർ വാഗ്ദാനത്തിൽ സന്തോഷമെന്ന് ഏഷ്യൻ ഗെയിംസ് മെഡൽ ജേതാവ് വിദർശ വിനോദ്

Gopalakrishnan C — Tue, 29 Sep 2026 07:05:08 +0530

തിരുവനന്തപുരം: ഏഷ്യൻ ഗെയിംസിൽ മെഡൽ നേടുന്ന മലയാളികൾക്ക്‌ ജോലി നൽകുമെന്ന സംസ്ഥാന സർക്കാർ വാഗ്‌ദാനം സന്തോഷം പകരുന്നുവെന്ന്‌ വിദർശ കെ വിനോദ്‌. ഏഷ്യൻഗെയിംസിൽ രണ്ട്‌ വെള്ളി മെഡലുകൾ നേടിയശേഷം തിരുവനന്തപുരത്തെത്തിയ അവർ കേസരി സ്‌മാരക ജേണലിസ്റ്റ് ട്രസ്‌റ്റിന്‍റെ മുഖാമുഖത്തിൽ സംസാരിക്കുകയായിരുന്നു.

കേരളത്തിൽനിന്ന്‌ ജോലി വാഗ്‌ദാനം ലഭിച്ചാൽ സ്വീകരിക്കും. കേരളത്തിൽ നിന്ന്‌ ഇനിയും ഷൂട്ടിങ്‌ താരങ്ങൾ ഉയർന്നുവരണം. ഏഷ്യൻ ഗെയിംസിൽ മെഡൽ നേടിയ ആദ്യ ഇന്ത്യൻ വനിത താനാണ്‌ എന്നതിൽ അഭിമാനിക്കുന്നതായും അവർ പറഞ്ഞു. പ്രതിസന്ധികൾ നേരിടാനാകാത്തതുകൊണ്ടാണ്‌ ഷൂട്ടിങ് രംഗത്തേക്ക്‌ അധികം ആളുകൾ കടന്നുവരാത്തത്‌. മത്സരത്തിനും പരിശീലനത്തിനും ഉൾപ്പെടെ വലിയ സാമ്പത്തിച്ചെലവുണ്ടാകും. അത്‌ കണ്ടെത്തുക എന്നത്‌ രക്ഷിതാക്കളുടെ ബാധ്യതയായി മാറുന്നതോടെ അവർക്ക്‌ മക്കളെ പ്രോത്സാഹിപ്പിക്കാൻ കഴിയാതെ വരുന്നുണ്ട്‌. താനും അത്തരം ബുന്ധിമുട്ടുകളിലൂടെ കടന്നുവന്നയാളാണ്‌–വിദർശ പറഞ്ഞു.

സ്വർണം വെള്ളി എന്നതിലല്ല, രണ്ട്‌ മെഡൽ നേടാനായതിൽ ഏറെ അഭിമാനമുണ്ട്‌. പക്ഷേ, മെഡൽ ഏറ്റുവാങ്ങുമ്പോൾ ഇന്ത്യൻ പതാക രണ്ടാമത്‌ കണ്ടപ്പോൾ സങ്കടമായി. രാജ്യത്തിനെ ഒന്നാമത്‌ എത്തിക്കുക എന്നതാണ്‌ ലക്ഷ്യമിട്ടിരുന്നത്‌. ലോക ചാമ്പ്യൻഷിപ്പിൽ സ്വർണം നേടാനുള്ള പരിശ്രമത്തിലാണ്‌. കേരള പത്രപ്രവർത്തക യൂണിയൻ ജില്ലാ പ്രസിഡന്റ്‌ ഷില്ലർ സ്‌റ്റീഫൻ, സെക്രട്ടറി അനുപമ ജി നായർ എന്നിവർ ചേർന്ന്‌ വിദർശയെ അനുമോദിച്ചു.

വിദർശയുടെ ഭർത്താവ്‌ മനു എസ്. രവി, വിദർശയുടെ പിതാവ് വിനോദ്, മാതാവ് അനിത, കേരള സ്റ്റേറ്റ് റൈഫിൾ അസോസിയേഷൻ സെക്രട്ടറി വി.സി. ജയിംസ് എന്നിവർ സന്നിഹിതരായിരുന്നു. വിദർശയ്ക്ക് കേരള റൈഫിൾ അസോസിയേഷൻ ഒരു ലക്ഷം രൂപ പാരിതോഷികം നൽകുമെന്ന് വി.സി. ജയിംസ് പറഞ്ഞു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക