Asianet News Malayalam

ഇനി ആഞ്ചലോട്ടി വന്നാലും കാര്യമുണ്ടാകില്ല; യുണൈറ്റഡിന്റെ പ്രശ്നം മെന്റാലിറ്റി

Hari Krishnan M — Mon, 02 Nov 2026 14:37:33 +0530

മാഞ്ചസ്റ്റ‍ര്‍ യുണൈറ്റഡ് ആരാധക‍ര്‍ മടുത്തിരിക്കുന്നു. എത്രനാളിങ്ങനെയെന്ന ചോദ്യത്തിന് ഇന്ന് എന്നത്തേക്കാള്‍ തെളിച്ചമുണ്ട്. ബേണ്‍മോത്തിനോട് ഓള്‍ഡ് ട്രാഫോ‍‍ഡില്‍ സംഭവിച്ച ദുരന്തസമാനമായ 90 മിനുറ്റുകള്‍ക്കും സ്റ്റാംഫോഡ് ബ്രിഡ്‌ജില്‍ ചെല്‍സിക്കെതിരായ തോല്‍വിക്ക് ശേഷവും സമാനമായൊരു കാഴ്ചയുണ്ടായി. അത് ഫൈനല്‍ വിസിലിന് ശേഷം ടണലിലൂടെ മടങ്ങുന്ന മൈക്കില്‍ കാരിക്കിനോടും താരങ്ങളോടുമുള്ള ആരാധകരുടെ സമീപനമായിരുന്നു. കാരിക്കിനവ‍‍ര്‍ പൂ‍‍ര്‍ണ പിന്തുണ പ്രഖ്യാപിച്ചു. പക്ഷേ യുണൈറ്റഡിന്റെ ആ വിഖ്യാത ജഴ്സിയണിഞ്ഞവരെയെല്ലാം കാത്തിരുന്നത് കൂവലുകളും, ഉടമകളോട് പ്രതിഷേധവും അമർഷവും.

സീസണിലെ യൂണൈറ്റഡിന്റെ തോല്‍വികള്‍ക്ക് ശേഷം അന്താരാഷ്ട്ര മാധ്യമങ്ങളിലെ കായിക പേജുകളില്‍ പ്രത്യക്ഷപ്പെടുന്ന ഒരു ചോദ്യമുണ്ട്. മാനേജര്‍ സ്ഥാനത്ത് കാരിക്കിന് ഇനി എത്ര നാളെന്ന്, അല്ലെങ്കില്‍ കാരിക്കിന്റെ മുന്നില്‍‍ ഇനി എന്ത് എന്ന്. ചെല്‍സിക്കെതിരായ പരാജയത്തിന് ശേഷം ആ ചോദ്യം കാരിക്കിനെ നേരിട്ട് തേടിയെത്തി. ആശങ്കകളുണ്ടായിരുന്നില്ല, യെസ് എന്നായിരുന്നു അയാളുടെ ഉത്തരം. ക്ലബ്ബുകള്‍ പരാജയപ്പെടുമ്പോള്‍ ആദ്യ ഇരയാകുന്നത് മാനേജര്‍മാരാണല്ലോ, ടീമിനുള്ളിലെ പ്രശ്നങ്ങളൊ താരങ്ങളുടെ മെന്റാലിറ്റിക്കോ അവിടെ ശിക്ഷ ലഭിക്കാറില്ല.

ബലികൊടുക്കപ്പെട്ടവരുടെ ഇടയിലേക്ക് ചേര്‍ക്കപ്പെടേണ്ടവനാണോ കാരിക്ക്, അയാളാണോ യുണൈറ്റഡിന്റെ പ്രശ്നം. അലക്സ് ഫെര്‍ഗൂസണും മാറ്റ് ബസ്ബിയുമൊക്കെ ചേര്‍ന്ന് കെട്ടിപ്പടുത്ത സാമ്രാജ്യമാണ്, റയാൻ ഗിഗ്സും ബോബി കാള്‍ട്ടണും വെയിൻ റൂണിയും ക്രിസ്റ്റ്യാനൊ റൊണാള്‍ഡോയും ഉള്‍പ്പെടെയുള്ളവ‍ര്‍ വിയ‍ര്‍പ്പൊഴുക്കി വെട്ടിപ്പിടിച്ചതാണ് എല്ലാം. അത്തരമൊരു ചരിത്രം പേറുന്ന യുണൈറ്റഡ് പ്രീമിയര്‍ ലീഗില്‍ എവിടെയാണ് ഇന്നെന്ന് ചോദിച്ചാല്‍ ഒരുപാട് താഴേക്ക് നോക്കേണ്ടതുണ്ട്, 17 സ്ഥാനത്ത്. കളിച്ച മത്സരങ്ങളുടെ എണ്ണത്തിനൊപ്പം പോലും പോയിന്റില്ലാതെ.

അതിന‍ര്‍ത്ഥം കാരിക്ക് മാത്രമല്ല പ്രശ്നമെന്നാണ്. യുണൈറ്റഡ് ആരാധ‍കര്‍ ഒരു ജയം അനുഭവിച്ചിട്ട് ഏറെക്കുറെ ഒരു മാസമാകുന്നു. സെപ്റ്റംബ‍ര്‍ 11ന് ചാമ്പ്യൻസ് ലീഗില്‍ താരതമ്യേന ശക്തരല്ലാത്ത സബായ്ക്ക് എതിരെയായിരുന്നു അവസാന ജയം. ശേഷം ഒൻപത് മത്സരങ്ങള്‍, പത്ത് പേരായി ചുരുങ്ങിയ സിറ്റിയോട് തോല്‍വി. സീസണില്‍ തോല്‍വികളുടെ പരമ്പരയുമായി എത്തിയ ടോട്ടൻഹാമിനോട് സമനില, അവരും കളിച്ചത് 10 പേരായിട്ടായിരുന്നുവെന്ന് ഓര്‍ക്കണം.

ചാമ്പ്യൻസ് ലീഗില്‍ അത്ലറ്റിക്കൊ മാഡ്രിഡിനോടുള്ള പരാജയം പ്രതീക്ഷിച്ചതായിരുന്നു, പക്ഷേ സെസ്ക് ഫാബ്രിഗാസിന്റെ കോമോ യുണൈറ്റഡിനെ തീ‍ര്‍ത്തുകളഞ്ഞു, 4-1. ഇതിന്റെയെല്ലാം ഉത്തരവാദികളെ തിരഞ്ഞ് പോകുമ്പോള്‍ ആദ്യ പ്രതിക്കൂട്ടിലേക്ക് കയറി നില്‍ക്കേണ്ടത് ബ്രൂണോ ഫെര്‍ണാണ്ടസാണ്. പ്രീമിയര്‍ ലീഗില്‍ കഴിഞ്ഞ സീസണിലെ ഏറ്റവും മികച്ച താരം, ഒരു സീസണില്‍ ഏറ്റവുമധികം അസിസ്റ്റെന്ന റേക്കോര്‍ഡും ഒപ്പമുണ്ടായിരുന്നു. എന്നാല്‍ ഈ സീസണില്‍ ബ്രൂണോയുടെ ബൂട്ടുകളില്‍ നിന്ന് പിറന്നത് ഒരേയൊരു അസിസ്റ്റ് മാത്രമാണ്.

നായകനായി അയാള്‍ എന്ത് ചെയ്യുന്നുവെന്നതാണ് ഏറ്റവും പ്രസക്തിയുള്ള വിഷയം. യൂണൈറ്റഡ് പിന്നിലാകുമ്പോള്‍ അല്ലെങ്കില്‍ തോല്‍വിക്ക് അരികിലേക്ക് നീങ്ങുമ്പോള്‍ എല്ലാം നഷ്ടപ്പെട്ട് കീഴടങ്ങനൊരുങ്ങുന്ന സൈന്യാധിപന്റെ ശരീരഭാഷയാണ് അയാള്‍ക്ക്. മത്സരം തിരിച്ചുപിടിക്കണമെന്ന മെന്റാലിറ്റി ഒരു ഘട്ടത്തിലും ബ്രൂണോയില്‍ നിന്നുണ്ടാകുന്നില്ല. ഫ്രസ്ട്രേറ്റഡായതുകൊണ്ട് ജയിക്കാനാകുമോ...ക്രിസ്റ്റ്യാനോയും റൂണിയും ടെവസുമൊക്കെ നിറഞ്ഞാടിയ കാലം ഓര്‍മയില്ല, ഒന്നോ രണ്ടോ ഗോള്‍ വഴങ്ങിയാലും ചത്തിട്ടാണെങ്കിലും കളി തിരിച്ചുപിടിക്കുന്ന ഫെര്‍ഗൂസണിന്റെ കുട്ടികള്‍. പീക്ക് യൂണൈറ്റഡ് മെന്റാലിറ്റി.

യുണൈറ്റഡ് ജഴ്സി അണിയുന്ന ആര്‍ക്കെങ്കിലും അത്തരമൊരു മെന്റാലിറ്റിയുണ്ടോയെന്നത് സംശയമാണിന്ന്. ബ്രൂണോ കഴിഞ്ഞാല്‍ അടുത്തത് ലിസാൻഡ്രൊ മാര്‍ട്ടിനസാണ്. 2026 ലോകകപ്പില്‍ കേപ് വേര്‍ദേയ്ക്ക് എതിരെ ജനറേഷണല്‍ അപ്സ്റ്റിലേക്ക് പോകുമായിരുന്ന അര്‍ജന്റീനയെ തിരിച്ചുകൊണ്ടുവന്ന മാര്‍ട്ടിനസിന്റെ ബൂട്ടുകളായിരുന്നു. അതേ മാര്‍ട്ടിനസിനാല്‍ ഇന്ന് യുണൈറ്റഡ് തോല്‍വികള്‍ ക്ഷണിച്ചുവരുത്തുകയാണ്. മൈതനത്തെ ഡിഷൻ മേക്കിങ്, റെക്ക്‌‌ലസായുള്ള നീക്കങ്ങള്‍, ഡിസിപ്ലിനില്ലായ്മ, പ്രതിരോധത്തിലെ പിഴവുകള്‍ വേറെയും.

ഫുള്‍ഹാമിനെതിരെ ഓണ്‍ ഗോള്‍, ടോട്ടൻഹാമിനെതിരെ മോശം പൊസിഷനിങ്. ചെല്‍സിക്കെതിരായ മത്സരം മാര്‍ട്ടിനസിന്റെ സീസണിനെ കൂടുതല്‍ വേസ്റ്റാക്കുകയായിരുന്നു. ചെല്‍സിയുടെ ആദ്യ ഗോള്‍ മോര്‍ഗൻ റോജേര്‍സ് നേടുമ്പോള്‍ അതിന് അനുവദിച്ചത് മാര്‍ട്ടിനസായിരുന്നു. ഫ്രീയായി ബോക്സിനുള്ളിലേക്ക് ഓടാൻ റോജേര്‍സിന് അവസരം നല്‍കി, ഫലം ഗോള്‍. തൊട്ടുപിന്നാലെ ഈ ഫ്രസ്ട്രേഷൻ തീര്‍ക്കുന്നത് റോജേര്‍സിനെ ഫൗള്‍ ചെയ്താണ്, പലതവണ ചെല്‍സി താരത്തെ ഡ്രാഗ് ചെയ്ത് വീഴ്ത്താൻ ശ്രമം നടത്തിയാണ് യെലൊ കാര്‍ഡ് വാങ്ങിയത്.

ഇവിടം കൊണ്ട് അവസാനിച്ചില്ല. യെലോ കാര്‍ഡ് വാങ്ങിയ ശേഷം കുറച്ചുകൂടി ഇന്റലിജന്റായി കളിക്കുക എന്നതായിരുന്നില്ല മാര്‍ട്ടിനസിന്റെ തീരുമാനം. 63-ാം മിനുറ്റില്‍ ബോക്സിനുള്ളില്‍ ഫൊഫാനയുടെ മുഖത്ത് കൈമുട്ടുകൊണ്ട് ഫൗള്‍ ചെയ്തു, ചെല്‍സിക്ക് പെനാലിറ്റി, മാര്‍ട്ടിനസിന് രണ്ടാം യെല്ലോ, റെഡ് കാര്‍ഡ്. 10 പേരായി ടീമിനെ ദുര്‍ബലമാക്കിയിട്ട് മടക്കം.

ഇവര്‍ രണ്ടും മാത്രമല്ല, ഡിഫൻസീവിലെ പിഴവുകള്‍ വേറെയുമുണ്ട്. മിഡ് ഫീല്‍ഡും ഡിഫൻസും തമ്മിലുള്ള സ്പേസ്, പൊസിഷനിങ്, കോര്‍ഡിനേഷൻ ഇല്ലായ്മ, ഫോമിന്റെ അഭാവം അങ്ങനെയെല്ലാം. ടാക്റ്റിക്കലിയുള്ള പോരായ്മകള്‍ വേറെയും. ഹൈ പ്രെസ് ചെയ്ത് കളിക്കുമ്പോള്‍ യുണൈറ്റഡിന്റെ മധ്യനിരയ്ക്കൊ ഡിഫൻസിനൊ അതിനെ പിന്തുണയ്ക്കാനാകുന്നില്ല, ഓപ്പോണന്റ് പ്രെസ് ബീറ്റ് ചെയ്ത് കഴിയുന്ന നിമിഷം യുണൈറ്റഡ് എക്സ്പോസ്ഡാവുകയാണ്. കൃത്യമായൊരു ഐഡന്റിന്റി തന്നെയില്ലെന്ന് പറയാം. അന്തരീക്ഷം അത്ര മോശമാകുമ്പോള്‍ എങ്ങനെ ഒരു സിസ്റ്റം ബില്‍ഡ് ചെയ്യാൻ കാരിക്കിന് കഴിയും.

ഹാർദിക്ക് പാണ്ഡ്യ പഞ്ചാബിലേക്ക്? പകരം അർഷദീപ്! മുംബൈക്ക് ഈ ഡീല്‍ ലാഭമോ?

Hari Krishnan M — Wed, 04 Nov 2026 15:00:43 +0530

ഇനി ക്യാപ്റ്റനായി തുടരാൻ അനുവദിക്കില്ലെന്ന് മുംബൈ ഇന്ത്യൻസ് തീരുമാനിച്ചു കഴിഞ്ഞു, ട്രേഡ് സാധ്യമായില്ലെങ്കില്‍ രോഹിത് ശർമയ്ക്ക് കീഴില്‍ കളിക്കാമെന്ന് സമ്മതവും മൂളേണ്ടതായി വന്നു. എന്നാല്‍ അത്രയും ഓറ ഹാർദിക്ക് പാണ്ഡ്യക്ക് നഷ്ടപ്പെടുത്തേണ്ടി വരില്ലെന്നാണ് ഏറ്റവും പുതിയ ട്രേഡ് റൂമറുകള്‍ സൂചിപ്പിക്കുന്നത്.

ചെന്നൈ സൂപ്പർ കിങ്സ്, രാജസ്ഥാൻ റോയല്‍സ്, കൊല്‍ക്കത്ത നൈറ്റ് റൈഡേഴ്‌സ്. ഈ മൂന്ന് ടീമുകളായിരുന്നു ഹാർദിക്കിനായുള്ള റേസില്‍ മുന്നിലുണ്ടായിരുന്നതായി ക്രിക്കറ്റ് സർക്കിളുകളില്‍ ഉയർന്ന് കേട്ടത്. പ്രത്യേകിച്ചും ചെന്നൈ. എന്നാല്‍, ഇന്ത്യൻ ഓള്‍ റൗണ്ടര്‍ പഞ്ചാബ് കിങ്സിന്റെ ജഴ്‌സിയണിയാനുള്ള സാധ്യതയാണ് നിലവില്‍. മുംബൈയും പഞ്ചാബും ഇക്കാര്യത്തില്‍ സമവായത്തിലെത്തിയതായാണ് സ്പോര്‍ട്ട്‌സ്റ്റാ‍ര്‍ റിപ്പോര്‍ട്ട് ചെയ്യുന്നത്. ഹാ‍ര്‍ദിക്കിന് പകരം പേസ് ബൗളറായ അ‍ര്‍ഷദീപ് സിങ്ങിനേയും മലയാളി താരം വിഷ്ണു വിനോദിനേയും പഞ്ചാബ് വിട്ടുനില്‍കിയേക്കും. ഈ പ്ലയ‍ര്‍ എക്‌സ്‌ചേഞ്ച് ഇരു ടീമുകള്‍ക്കും എത്രത്തോളം ഗുണകരമാണ്.

ഹാര്‍ദിക്കിനെപ്പോലൊരു ഓള്‍ റൗണ്ടറെ നഷ്ടമാകുക എന്നത് ഏതൊരു സംഘത്തെ സംബന്ധിച്ചും അത്ര ശുഭകരമായ ഒന്നല്ല. പക്ഷേ, ഹാര്‍ദിക്കിന്റെ കീഴിലെ മൂന്ന് സീസണുകള്‍ പരിശോധിക്കുമ്പോള്‍ മുംബൈക്ക് ഈ മാറ്റം അനിവാര്യമായിരുന്നുവെന്ന് വേണം കണക്കാക്കാൻ. മൂന്നില്‍ രണ്ട് സീസണിലും പോയിന്റ് പട്ടികയുടെ അടിത്തട്ടിലായിരുന്നു മുൻ ചാമ്പ്യന്മാര്‍. കിരീടമില്ലാത്ത സീസണുകളുടെ എണ്ണം ആറായും ഉയര്‍ന്നു. ടീമിന്റെ ഒത്തൊരുമയില്ലായ്മ പ്രകടനത്തെ സാരമായി തന്നെ ബാധിക്കുകയും ചെയ്തു, ഹാര്‍ദിക്കെന്ന നായകന് ടീമിനെ ഒന്നിച്ചുകൊണ്ടുപോകാൻ കഴിയില്ലെന്ന് വ്യക്തമാകുകയും ചെയ്തു.

പഞ്ചാബിലേക്ക് എത്തുമ്പോള്‍ ഹാര്‍ദിക്കിന് ക്യാപ്റ്റൻസി മോഹം ഉപേക്ഷിക്കേണ്ടതായി വരും, കാരണം ഇന്ത്യയുടെ ടി20 ക്യാപ്റ്റൻ ശ്രേയസ് അയ്യരാണ് അവരെ നയിക്കുന്നത്. എന്നാല്‍, ഹാര്‍ദിക്കിന്റെ വരവ് പഞ്ചാബിന്റെ ഡെപ്ത് വര്‍ധിപ്പിക്കുമെന്നതില്‍ തര്‍ക്കമില്ല, പ്രത്യേകിച്ചും ലോവര്‍ ഓര്‍ഡറില്‍, ശശാങ്ക് സിങ്ങിനൊപ്പമാണ് ഹാര്‍ദിക്ക് ചേരുന്നത്. റോയല്‍ ചലഞ്ചേഴ്സ് ബെംഗളൂരുവിന് ടിം ഡേവിഡും റൊമാരിയോ ഷെപ്പേഡും എന്നപോലെ ഒരു ദ്വയം.

പഞ്ചാബിന്റെ പ്രധാന ഓള്‍ റൗണ്ടര്‍ മാര്‍ക്കസ് സ്റ്റോയിനിസാണ്. താരത്തിന്റെ സ്ഥിരതയില്ലായ്മയും ഫോമും പ്രായവുമൊക്കെ പരിഗണിക്കുമ്പോള്‍ ഹാര്‍ദിക്കിലൂടെ ഒരു പെര്‍ഫെക്റ്റ് റീപ്ലേസ്മെന്റും ലഭിക്കും. ഹാര്‍ദിക്കിനെ ടീമില്‍ ഉള്‍പ്പെടുത്തുമ്പോള്‍ സ്റ്റോയിനിസിന് പകരം മറ്റൊരു വിദേശതാരത്തെ ഉപയോഗിക്കാനും റിക്കി പോണ്ടിങ്ങിന് കഴിയും. ഒരുവശത്ത് ഹാര്‍ദിക്കിന്റെ വരവ് വലിയ നേട്ടമായി കണക്കാക്കാമെങ്കിലും അര്‍ഷദീപിനെ കൈമാറുന്നതോടെ മറുവശത്ത് ബൗളിങ്ങിനെ ദുര്‍ബലപ്പെടുന്നുണ്ട്.

മാര്‍ക്കൊ യാൻസണ്‍ - അര്‍ഷദീപ് കൂട്ടുകെട്ടായിരുന്നു പഞ്ചാബിന്റെ പ്രധാന ശക്തികളിലൊന്ന്. പവര്‍പ്ലേയിലും ഡെത്തിലും ഒരുപോലെ എഫക്റ്റീവായ രണ്ട് ബൗളര്‍മാര്‍. കഴിഞ്ഞ സീസണില്‍ ഇരുവരും അല്‍പ്പമൊന്ന് നിറം മങ്ങിയെങ്കിലും നിലവില്‍ മികച്ച ഫോമിലാണ്, യാൻ ടെസ്റ്റ് ക്രിക്കറ്റിലെ ഒന്നാം നമ്പ‍ര്‍ ബൗളറും ഓള്‍ റൗണ്ടറുമാണ്, അര്‍ഷദീപ് ടി20യില്‍ ഇന്ത്യയുടെ ലീഡിങ് വിക്കറ്റ് ടേക്കറും. വരും സീസണില്‍ പീക്കിലേക്ക് എത്താൻ സാധ്യതയുണ്ടായിരുന്ന ബൗളിങ് ഡുവോ.

എന്നാല്‍ ഇവിടെ മുംബൈക്ക് മുൻതൂക്കം ലഭിക്കുന്നുണ്ട്. ട്രെൻ ബോള്‍ട്ടിനെ രാജസ്ഥാൻ റോയല്‍സിന് വിട്ടുനല്‍കിയ ശേഷമായിരുന്നു മുംബൈയുടെ ബൗളിങ് യൂണിറ്റ് ദുര്‍ബലമായത്. 2025ല്‍ താരത്തെ തിരിച്ചെത്തിച്ചെങ്കിലും കഴിഞ്ഞ സീസണില്‍ ബോള്‍ട്ടിന്റെ പ്രകടനം ശരാശരിക്കും താഴെയായിരുന്നു. അഞ്ച് മത്സരങ്ങളില്‍ മാത്രമാണ് കളിച്ചതും, നേടിയതാകട്ടെ രണ്ട് വിക്കറ്റും, എക്കോണമി 12ന് അടുത്തുമെത്തി. അശ്വനി കുമാറിനെ പകരക്കാരനായി ഉപയോഗിച്ചെങ്കിലും താരത്തിന്റെ പരിചയസമ്പത്തിലെ കുറവ് നിര്‍ണായക ഘട്ടങ്ങളില്‍ മുംബൈക്ക് തിരിച്ചടിയായിരുന്നു. അതുകൊണ്ട് തന്നെ അര്‍ഷദീപിന്റെ വരവ് മുംബൈയുടെ വലിയൊരു പ്രതിസന്ധിക്ക് പരിഹാരമാകും.

ജസ്പ്രിത് ബുമ്രയ്ക്കൊപ്പം അര്‍ഷദീപ്. ടി20 ഫോര്‍മാറ്റില്‍ ഇന്ത്യക്കായി ഏറ്റവുമധികം വിക്കറ്റ് നേടിയ രണ്ട് പേര്‍. കഴിഞ്ഞ രണ്ട് ടി20 ലോകകിരീടനേട്ടങ്ങളിലും ഇരുവരുടേയും ഓവറുകളായിരുന്നു ഏറ്റവും നിര്‍ണായകമായത്. 2024ലെ വിജയത്തില്‍ അര്‍ഷദീപിന്റേയും ബുമ്രയുടേയും അവസാന നാല് ഓവറുകളില്‍നിന്നായി ദക്ഷിണാഫ്രിക്കയ്ക്ക് സ്കോര്‍ ചെയ്യാൻ കഴിഞ്ഞ് കേവലം 18 റണ്‍സ് മാത്രമാണ്. ഈ ലക്ഷ്വറിയാണ് മുംബൈക്ക് ലഭിക്കാൻ പോകുന്നത്.

ആറ് വര്‍ഷത്തെ കിരീടവരള്‍ച്ച അവസാനിപ്പിക്കാൻ അടിമുടി ഉടച്ചുവാര്‍ക്കുകയാണ് മുംബൈ, പരിശീലകസംഘത്തില്‍ ഉള്‍പ്പെടെ മാറ്റങ്ങള്‍ സംഭവിച്ച് കഴിഞ്ഞു. അര്‍ഷദീപിന്റെ എൻട്രി മുംബൈയുടെ സാധ്യതകള്‍ ഒന്നുകൂടി ഉയര്‍ത്തും. ബുമ്രയേയും അര്‍ഷദീപിനേയും എപ്പോള്‍ ഉപയോഗിക്കണമെന്നതില്‍ കൃത്യമായ ബോധ്യമുള്ള രോഹിത് ശര്‍മ നായകനായിക്കൂടി എത്തിയാല്‍ പിന്നെ പറയേണ്ടതില്ലല്ലോ.

ഇനി വിഷ്ണു വിനോദ്, നേരത്തെ മുംബൈയുടെ ഭാഗമായിരുന്ന വിഷ്ണുവിന്റെ വരവ് മുംബൈയുടെ ബാറ്റിങ് ഡെപ്തും വര്‍ധിപ്പിക്കും. മുഹമ്മദ് ഷമിക്കെതിരെ വിഷ്ണു നേടിയ സിക്സ് ഐപിഎല്ലിലെ തന്നെ ഏറ്റവും മികച്ച ഷോട്ടുകളില്‍ ഒന്നായിരുന്നു. താരത്തിന്റെ ക്വാളിറ്റി വ്യക്തമാക്കിയ മൊമന്റ്. ഹാര്‍ദിക്കിന്റെ ട്രേഡും മുംബൈയുടെ പുതിയ നീക്കങ്ങളുമെല്ലാം കണക്കാക്കുമ്പോള്‍ ഒരു കാര്യം ഉറപ്പിക്കാം, മുംബൈ ഇന്ത്യൻസ് ഈസ് ബാക്ക്.

ഓരോ പന്തും പോരാട്ടമായിരുന്നു ഷമിക്ക്; പരിക്കുകളോട് പൊരുതി ഉയർന്ന കരിയര്‍

Hari Krishnan M — Sat, 07 Nov 2026 14:59:07 +0530

13 വർഷത്തിനിപ്പുറം ലോകം കാണാതെ വിയര്‍പ്പൊഴുക്കിയ ആ ഗ്രൗണ്ടില്‍ അയാള്‍ നിന്നു. കൈകളില്‍ മറ്റൊരു നവംബര്‍ ആറിന് ഈഡൻ ഗാര്‍ഡൻസില്‍ വച്ച് ഇഷാന്ത് ശര്‍മ കൈമാറിയ ടെസ്റ്റ് ക്യാപും ഒരു റെഡ് ബോളുമുണ്ടായിരുന്നു. ക്രിക്കറ്റ് ദൈവം ഇന്ത്യൻ കുപ്പായത്തില്‍ അവസാനമായി ഇഡനില്‍ ഇറങ്ങിയ അതേ ദിവസമാണ് അയാളുടെ അരങ്ങേറ്റത്തിനും കളമൊരുങ്ങിയത്.

ഇടറിയ ശബ്ദത്തോടെ പറഞ്ഞുതുടങ്ങി, പറഞ്ഞുപറഞ്ഞൊടുവില്‍ ആ ക്യാപും ബോളും നെഞ്ചോട് ചേര്‍ത്തു. ഈ ക്യാപ്, ഈ ബോള്‍. ഇവയാണ് എന്നെ മുഹമ്മദ് ഷമിയാക്കിയത്. ജീവിതത്തിലെ ഉയര്‍ച്ചകള്‍ക്കും താഴ്ചകള്‍ക്കുമിടിയില്‍ ഞാൻ വീണുപോയിട്ടുണ്ട്, മുറിവേറ്റിട്ടുണ്ട്, ഒരുപാട് വേദന അനുഭവിച്ചിട്ടുണ്ട്. പക്ഷേ, അവിടെ നിന്നെല്ലാം ഇന്ത്യക്ക് വേണ്ടി ഞാൻ ഉയര്‍ത്ത് എഴുന്നേറ്റിറ്റുണ്ട്.

ഇതേ ദിവസമാണ് എല്ലാം തുടങ്ങിയത്, ഈ ദിവസം തന്നെ അവസാനിപ്പിക്കുകയാണ്. ശുക്രിയ ടെസ്റ്റ് ക്രിക്കറ്റ്. അയാള്‍ അവസാനിപ്പിച്ചു...കാത്തിരുന്ന, ആഗ്രഹിച്ച തിരിച്ചുവരവില്ലാതെ ടെസ്റ്റ് കരിയറിന് അവസാനം...

മൂന്നരവര്‍ഷത്തോളമായി ഇന്ത്യയുടെ ടെസ്റ്റ് ജഴ്സിയില്‍ ഷമി അവസാനമായി പ്രത്യക്ഷപ്പെട്ടത്, ലോക ടെസ്റ്റ് ചാമ്പ്യൻഷിപ്പ് ഫൈനലില്‍ ഓസ്ട്രേലിയക്ക് എതിരെയായിരുന്നു, അന്നും കീഴടങ്ങാൻ മനസില്ലാതെയാണ് അയാള്‍ മടങ്ങിയത് പോലും.

യെസ്, ഷമിയുടെ കരിയറും എറിഞ്ഞ ഓരോ പന്തും പോരാട്ടമായിരുന്നു. മുഹമ്മദ് ഷമിയെന്ന പേരുകൊണ്ട് മാത്രം നേരിടേണ്ടി വന്ന അധിക്ഷപേങ്ങളോട്, പരിക്കുകളോട്, വ്യക്തിജീവിതത്തിലെ പ്രശ്നങ്ങളോട്...അങ്ങനെ ഒരു താരത്തിന്റെ മനോവീര്യം ഇല്ലാതാക്കാൻ കഴിയുന്ന പലതിലൂടെയും കടന്നുപോകേണ്ടി വന്നിരുന്നു. പക്ഷേ അതൊന്നും മൈതാനത്തേക്ക് ചുവടുവെക്കുമ്പോള്‍ അയാളെ ബാധിച്ചിട്ടില്ല.

ഈഡനിലെ ഡെബ്യുവില്‍ 118 റണ്‍സ് മാത്രം വഴങ്ങി ഒൻപത് വിക്കറ്റായിരുന്നു ഷമി നേടിയത്, അന്ന് സച്ചിൻ സച്ചിൻ എന്നുള്ള ചാന്റുകള്‍ ഷമി ഷമി എന്ന് പരിവര്‍ത്തനപ്പെടുത്താൻ ആ പ്രകടനത്തിന് സാധിച്ചിരുന്നു. അത്രത്തോളെ സ്പെഷ്യലായിരുന്നു അയാള്‍.

റണ്ണപ്പ്, ആക്ഷൻ, സിം പൊസിഷൻ...എല്ലാം പെര്‍ഫെക്റ്റെന്നപോലെ. വിക്കറ്റില്‍ നിന്ന് ലഭിക്കുന്ന ചെറിയൊരു പിന്തുണയെപ്പോലും പരാമാവധി പ്രയോജനപ്പെടുത്താനുള്ള വൈഭവം, ന്യൂബോളില്‍ സ്വിങ്ങ് ചെയ്യിക്കും, ഓള്‍ഡ് ബോളില്‍ റിവേഴ്സ് സ്വിങ്ങിലൂടെ വെല്‍ സെറ്റില്‍ഡായുള്ള ബാറ്ററുടെ സ്റ്റമ്പുകള്‍പ്പോലും തെറിപ്പിക്കും, സീ പൊസിഷൻ കൃത്യമായി നിലനിര്‍ത്തിയും തുടര്‍ച്ചയായി ഓരേ ലെങ്തില്‍ ഹിറ്റ് ചെയ്തും ബാറ്റര്‍മാരെ പരീക്ഷിക്കും, പ്രൈം ഷമി.

പേസിന് അനുകൂലവും പ്രതികൂലവുമായുള്ള വിക്കറ്റുകളില്‍ ഷമിക്ക് ഇത് സാധിച്ചുവെന്നതിന്റെ തെളിവാണ് 64 മത്സരങ്ങളില്‍ നിന്ന് മാത്രം നേടിയ 229 വിക്കറ്റുകള്‍.

2018-19 വര്‍ഷത്തില്‍ ബോര്‍ഡര്‍ ഗവാസ്കര്‍ ട്രോഫി ഓര്‍മയില്ലെ. ചരിത്രത്തിലാദ്യമായി ഓസ്ട്രേലിയൻ മണ്ണില്‍ ഇന്ത്യ ടെസ്റ്റ് പരമ്പര സ്വന്തമാക്കിയത്, വിരാട് കോലിയുടെ വിഖ്യാത സംഘം. ഇന്ത്യയുടെ ടെസ്റ്റ് ചരിത്രം പരിശോധിക്കുമ്പോള്‍ ഇതിഹാസങ്ങള്‍ പറയുന്ന ഒരു കാര്യമുണ്ട്, കോലിക്ക് കീഴിലായിരുന്നു ഇന്ത്യയുടെ പേസ് ബൗളിങ് ഏറ്റവും ലീഥലായി കാണപ്പെട്ടതെന്ന്. വിദേശ വിക്കറ്റുകളില്‍പ്പോലും എതിര്‍ ടീമിനെ ഡൊമിനേറ്റ് ചെയ്യുന്ന സംഘം. അതിലെ പ്രധാനിയായിരുന്നു ഷമി.

ഓസീസ് പര്യടനത്തില്‍ പേര്‍ത്തിലെ ആറ് വിക്കറ്റ് പ്രകടനം ഉള്‍പ്പെടെ 16 വിക്കറ്റുകളായിരുന്നു ഷമിയുടെ നേട്ടം. മിച്ചല്‍ സ്റ്റാര്‍ക്ക്, പാറ്റ് കമ്മിൻസ്, ജോഷ് ഹേസല്‍വുഡ് എന്നിവരേക്കാള്‍ മുകളില്‍. ജസ്പ്രിത് ബുമ്ര കഴിഞ്ഞാല്‍ ഏറ്റവും മികച്ച സ്ട്രൈക്ക് റേറ്റും ശരാശരിയുമുള്ള പേസറും അന്ന് ഷമിയായിരുന്നു. ഓസ്ട്രേലിയൻ മൈതാനങ്ങള്‍ മാത്രമായിരുന്നോ ഷമി കീഴടക്കിയത്, അല്ല. 2018ലെ ജോഹന്നാസ്ബര്‍ഗ് ടെസ്റ്റ്. രണ്ടാം ഇന്നിങ്സില്‍ 28 റണ്‍സ് വഴങ്ങി ഷമി നേടിയ അഞ്ച് വിക്കറ്റുകളായിരുന്നു ഇന്ത്യയെ വിജയത്തിലേക്ക് നയിച്ചത്. മൂന്ന് വര്‍ഷത്തിന് ശേഷം സെഞ്ചൂറിയനിലും ഇതേ പ്രകടനം ആവര്‍ത്തിച്ചു.

സൗത്ത് ആഫ്രിക്ക, ഇംഗ്ലണ്ട്, ന്യൂസിലൻഡ്, ഓസ്ട്രേലിയ - സെന രാജ്യങ്ങളിലൊക്കെയും ഷമിയുടെ ഡൊമിനേഷൻ കണ്ടിട്ടുണ്ട്. പക്ഷേ, ഇതെല്ലാം ഓര്‍മിക്കപ്പെടുമ്പോഴും പറയാതെ പോകാൻ കഴിയായത്ത ഒന്നുണ്ട്. ബാറ്റുകൊണ്ട് അയാള്‍ ഇന്ത്യയുടെ വാലറ്റത്ത് നടത്തിയ ചെറുത്തുനില്‍പ്പുകള്‍.

കോലിപ്പട ലോര്‍ഡ്സ് ഇംഗ്ലണ്ടിനൊരു നരകമാക്കി മാറ്റിക്കൊടുത്ത മത്സരം, 2021 ലോര്‍ഡ്സ് ടെസ്റ്റ്. ഇന്ത്യക്കെതിരെ 27 റണ്‍സിന്റെ ഒന്നാം ഇന്നിങ്സ് ലീഡായിരുന്നു ഇംഗ്ലണ്ട് അന്ന് നേടിയത്. രണ്ടാം ഇന്നിങ്സില്‍ 194-7 എന്ന നിലയില്‍ ഇന്ത്യ തകര്‍ച്ച നേരിടുമ്പോഴാണ് ഷമി ക്രീസിലെത്തുന്നത്, 86-ാം ഓവറില്‍, വൈകാതെ എട്ടാം വിക്കറ്റും ഇന്ത്യക്ക് നഷ്ടമായി. അപ്പോള്‍ ഇന്ത്യയുടെ ലീഡ് 182 മാത്രമാണ്. ശേഷം ലോര്‍ഡ്സ് കണ്ടത് ബുമ്രയെ കൂട്ടുപിടിച്ച് ഷമി നടത്തിയ പോരാട്ടമായിരുന്നു.

റോബിൻസണ്‍, മാര്‍ക്ക് വുഡ്, സാം കറണ്‍, മൊയിൻ അലി, ജെയിംസ് ആൻഡേഴ്സണ്‍. ജോ റൂട്ട് പന്ത് കൈമാറിയ ഒരു ബൗളര്‍ക്കും ഷമി നിശ്ചയദാര്‍ഢ്യത്തെ മറികടക്കാൻ കഴിഞ്ഞിരുന്നില്ല. യെസ്, ബീറ്റണായിരുന്നു പല പന്തുകളില്‍, എങ്കിലും തുടര്‍ന്നു. ഇംഗ്ലണ്ടിന്റെ എക്കാലത്തെയും മികച്ച പേസ് ബൗളറായ ആൻഡേഴ്സണിനെതിരെ മിഡ് വിക്കറ്റിന് മുകളിലൂടെയൊരു ഫ്ലിക്കുണ്ടായിരുന്നു, ലോര്‍ഡ്സ് മുഴുവനും ഹര്‍ഷാരവത്തോടെയായിരുന്നു ആ ഷോട്ടിനെ ബഹുമാനിച്ചത് പോലും.

ക്രീസുവിട്ടിറങ്ങി മൊയിൻ അലിയുടെ പന്ത് 92 മിറ്റര്‍ നിക്ഷേപിച്ചാണ് അര്‍ദ്ധ സെഞ്ചുറി തികച്ചത്. സെഞ്ചുറിയോളം തന്നെ വലിപ്പമുള്ള ഒരു ഫിഫ്റ്റി. ആറ് ഫോറും ഒരു സിക്സും ഉള്‍പ്പെടെ 70 പന്തില്‍ 56 റണ്‍സ്. ബുമ്രയുമായി ചേര്‍ന്ന് ക്രീസില്‍ നിലകൊണ്ടത് 20 ഓവറുകളാണ്, ഇംഗ്ലണ്ടുകാരുടെ ക്ഷമയെ പരീക്ഷിച്ച 120 പന്തുകള്‍. വേര്‍പിരായത്ത കൂട്ടുകെട്ട് സ്കോര്‍കാര്‍ഡിലേക്ക് ചേര്‍ത്തത് 89 റണ്‍സ്, കോലി ഡിക്ലറേഷൻ പ്രഖ്യാപിക്കുമ്പോള്‍ ഇന്ത്യയുടെ ലീഡ് 271 ആയിരുന്നു, പിന്നീട് സംഭവിച്ചതൊക്കെ ചരിത്രത്താളുകളിലുണ്ട്.

എന്നാല്‍, പിന്നീടുള്ള യാത്ര അത്ര മനോഹരമായിരുന്നില്ല ഷമിക്ക്. വൈറ്റ് ബോളില്‍ സക്സസ് നേടുമ്പോഴും റെഡ് ബോളില്‍ തിളങ്ങാന കഴിയാതെ പോയി, പിന്നാലെ പരിക്കുകളും റീഹാബുമൊക്കെയായി കടന്നുപോയ നാളുകള്‍, സെലക്ടര്‍മാരുമായുള്ള തീരാത്ത കലഹങ്ങള്‍...ഒടുവില്‍ ആഗ്രഹിച്ച തിരിച്ചുവരവില്ലാതെ പടിയിറക്കം...

വിക്കറ്റ് കോളത്തിലെ അക്കങ്ങള്‍ നോക്കിയാല്‍ ഷമിയുടെ കരിയര്‍ ഇതിഹാസതുല്യമാണോയെന്ന് സംശയം ഉയര്‍ന്നേക്കാം, പക്ഷേ അയാളുടെ ഓരോ പന്തുകളും നല്‍കിയ ഈ ജനതയ്ക്ക് നല്‍കിയ പ്രതീക്ഷയും സമ്മാനിച്ച വിജയങ്ങളും അതിനുമൊക്കെ എത്രയോ മുകളിലായിരുന്നു...

ഓള്‍ റൗണ്ട് ഫ്ലോപ്പായി അക്സ‍ര്‍ പട്ടേല്‍! ഗംഭീര്‍ ഇനിയും പിന്തുണയ്ക്കുമോ? ‌‌

Hari Krishnan M — Sat, 31 Oct 2026 13:24:58 +0530

സഞ്ജു സാംസണോ അഭിഷേക് ശ‍‍‍ര്‍മയോ അല്ലെങ്കില്‍ ഇഷാൻ കിഷനോ പരാജയപ്പെട്ടാല്‍ മാറ്റി പരീക്ഷിക്കാൻ ഗൗതം ഗംഭീര്‍ തയാറാണ്, അല്ലെങ്കില്‍ അതിന് അനുയോജ്യമായ ടാലന്റുകളെ കണ്ടെത്താൻ ഇന്ത്യക്ക് സാധിച്ചിട്ടുണ്ട്. എന്നാല്‍, മറ്റ് പൊസിഷനുകളിലെ കാര്യങ്ങള്‍ അങ്ങനെയാണോ? 2024 ടി20 ലോകകപ്പോടെ രവീന്ദ്ര ജഡേജ പടിയിറങ്ങിയപ്പോള്‍ പകരക്കാരാൻ ആര് എന്നതില്‍ ആ‍ര്‍ക്കും സംശയമുണ്ടായിരുന്നില്ല, ആ ടൂർണമെന്റില്‍ തന്നെ മൂല്യം തെളിയിച്ചൊരാള്‍, അക്സര്‍ പട്ടേല്‍. പക്ഷേ നിലവില്‍ ഇന്ത്യയുടെ ടി20 നിരയിലെ ഏറ്റവും ദുര്‍ബലമായ സാന്നിധ്യമാകുകയാണ് അക്സ‍ർ.

ഓള്‍ റൗണ്ടറെന്ന ലേബലാണ് ഒരു പ്രോപ്പര്‍ ബാറ്ററെയോ ബൗളറെയോ ഉപയോഗിക്കാതെ അക്സറിന് മാനേജ്മെന്റ് മുൻതൂക്കം നല്‍കുന്നതിന് പിന്നിലെ കാരണം. എന്നാല്‍, തന്റെ റോളിനോട് നീതി പുലർത്താൻ അക്സറിന് സാധിക്കുന്നുണ്ടോ. 2026ലെ താരത്തിന്റെ പ്രകടനം പരിശോധിക്കുമ്പോള്‍ അല്ലാ എന്ന് തന്നെയാണ് ഉത്തരം.

ടി20 ലോകകപ്പിന് മുൻപ് നടന്ന ന്യൂസിലൻഡ് പരമ്പരയില്‍ ബാറ്റുകൊണ്ട് പരാജയപ്പെട്ടെങ്കിലും നാല് വിക്കറ്റുകള്‍ നേടിയിരുന്നു. ലോകകപ്പിലും സമാനമായിരുന്നു സ്ഥിതി. നാല് ഇന്നിങ്സുകളില്‍ നിന്ന് 16 റണ്‍സ്, ഇതില്‍ രണ്ട് ഗോള്‍ഡൻ ഡക്കുകള്‍ ഉള്‍പ്പെടുന്നു. മറുവശത്ത് ബൗളിങ്ങില്‍ അക്സറിന്റെ സംഭാവന നി‍ര്‍ണായകമായിരുന്നു. ഫൈനലില്‍ ന്യൂസിലൻഡിനെതിരെ നേടിയ മൂന്ന് വിക്കറ്റുകള്‍ ഉള്‍പ്പെടെ ആകെ 11 തവണ ബാറ്റര്‍മാരെ ഡഗൗട്ടിലേക്ക് മടക്കാൻ ഇടം കയ്യൻ സ്പിന്ന‍ര്‍ക്ക് കഴിഞ്ഞു. ലോകകപ്പിന് ശേഷമാണ് അക്സറിന്റെ ഡൗണ്‍ഫാള്‍ ആരംഭിക്കുന്നത്.

അയര്‍ലൻഡ് പര്യടനത്തില്‍ 85 സ്ട്രൈക്ക് റേറ്റിലാണ് രണ്ട് മത്സരങ്ങളിലുമായി 29 റണ്‍സ് നേടിയത്, ഒപ്പം രണ്ട് വിക്കറ്റുകളും. ഇംഗ്ലണ്ടില്‍ ബാറ്റുകൊണ്ട് ഒരു മത്സരത്തില്‍പ്പോലും തന്റെ സ്കോര്‍ 10 കടത്താൻ അക്സറിന് സാധിച്ചിരുന്നില്ല, നാല് ഒറ്റയക്ക സ്കോറുകള്‍. നോട്ടിങ്ഹാം ടി20 ഒഴികെയുള്ള മത്സരങ്ങളില്‍ സ്ട്രൈക്ക് റേറ്റ് 80നും താഴെ. ഇവിടെ പന്തുകൊണ്ടും അക്സര്‍ നിറം മങ്ങുകയായിരുന്നു. 11.14 ആയിരുന്നു പരമ്പരയിലെ അക്സറിന്റെ എക്കോണമി, സതാംപ്റ്റണിലും ബ്രിസ്റ്റോളിലും വിക്കറ്റ്ലസും. പര്യടനത്തിലെ ആകെ നേട്ടം 19 റണ്‍സും രണ്ട് വിക്കറ്റും.

അഫ്ഗാൻ പരമ്പരയിലും ഏഷ്യൻ ഗെയിംസിലേയും ബൗളിങ് പ്രകടനങ്ങള്‍ അക്സറിന്റെ ടീമിലെ സ്ഥാനം സുരക്ഷിതമാക്കുകയായിരുന്നു. അപ്പോഴും ബാറ്റുകൊണ്ട് എന്ത് ചെയ്തുവെന്ന ചോദ്യം ബാക്കിയാണ്. അക്സറിന്റെ ഫോം ഇല്ലായ്മയെ ഒരുപരിധി വരെ രക്ഷിക്കുന്നത് ഇന്ത്യയുടെ ടോപ് ഓ‍ര്‍ഡറിന്റെ പ്രകടനമാണ്. എന്നാല്‍, അക്സറിന്റെ പ്രകടനം അനിവാര്യമായ സാഹചര്യങ്ങളില്‍പ്പോലും ഒരു നല്ല ഇന്നിങ്സുണ്ടാകുന്നില്ല. റണ്ണൊഴുകിയ വിൻഡീസ് പരമ്പരയിലെ അക്സറിന്റെ സ്ട്രൈക്ക് റേറ്റ് 121 മാത്രമായിരുന്നു.

നിലവില്‍ പുരോഗമിക്കുന്ന ന്യൂസിലൻഡ് പര്യടനത്തിലും അക്സറിന്റെ പ്രകടനങ്ങളില്‍ മാറ്റമില്ല. എല്ലാം തിരിച്ചുപിടിക്കാനുള്ള അവസരമായിരുന്നു ഓക്ക്‌ലൻഡ് ടി20. ടോപ് ഓര്‍ഡര്‍ തകരുകയും വലിയൊരു ടോട്ടല്‍ മുന്നില്‍ നില്‍ക്കുകയും ചെയ്യുന്ന പശ്ചാത്തലം. തന്റെ വാല്യു തെളിയിക്കാൻ ഇതിലും മികച്ച ഒരു അവസരം അക്സറിന് ലഭിക്കാനില്ലായിരുന്നു, പക്ഷേ ഒൻപത് പന്തില്‍ ഏഴ് റണ്‍സെടുത്ത് മടങ്ങേണ്ടി വന്നു, അതും മോശം ഷോട്ടില്‍. പരമ്പരയില്‍ ആകെ മൂന്ന് വിക്കറ്റുകളാണ് അക്സര്‍ ഇതുവരെ നേടിയത്.

2026ലെ അക്സറിന്റെ ആകെയുള്ള സ്റ്റാറ്റ്സ് പരിശോധിക്കാം. ബാറ്റിങ്ങില്‍ 31 മത്സരങ്ങളില്‍ 21 ഇന്നിങ്സുകളില്‍ നിന്ന് 148 റണ്‍സ്, ശരാശരി 8.71, സ്ട്രൈക്ക് റേറ്റ് 105. വിദേശത്തും ഇന്ത്യയിലും അക്സറിനോളം അവസരം ലഭിച്ച മറ്റ് താരങ്ങള്‍ ചുരുക്കമാണ്. ബൗളിങ്ങില്‍ 34 വിക്കറ്റുകള്‍, എക്കോണമി 9 ആണ്. സമീപകാലത്ത് റണ്‍സ് ആവോണം വഴങ്ങുന്ന അക്സറിനെയാണ് മൈതാനത്ത് കാണുന്നത്, ന്യൂസിലൻഡ് പരമ്പയില്‍ തന്നെ രണ്ട് തവണ എക്കോണമി 12 താണ്ടിയിട്ടുണ്ട്. വീൻഡിസിനെതിരായ റാഞ്ചി ടി20യില്‍ 19 ആയിരുന്നു എക്കോണമി.

അക്സറിന്റെ ഈ പ്രകടനങ്ങള്‍ ഇന്ത്യയെ വലിയൊരു ടാക്റ്റിക്കല്‍ ക്രൈസിസിലേക്കാണ് നയിക്കുന്നത്. നിലവില്‍ ഇന്ത്യ മൂന്ന് പ്രോപ്പര്‍ ബൗളര്‍മാരെയും മൂന്ന് ഓള്‍ റൗണ്ടര്‍മാരെയും ഉപയോഗിച്ചാണ് ഇലവൻ ഒരുക്കുന്നത്. അക്സര്‍ പട്ടേലും നമൻ ധീറും നിതീഷ് കുമാ‍ര്‍ റെഡ്ഡിയുമാണ് ഓള്‍ റൗണ്ടര്‍മാര്‍. എന്നാല്‍ മൂവരില്‍ രണ്ട് ഡിപ്പാര്‍ട്ട്മെന്റിലും നിരന്തരം മോശം ഫോമില്‍ തുടരുന്ന അക്സറാണ്. എന്തുകൊണ്ട് ഒരു പ്രോപ്പര്‍ ബൗളറെ ഇന്ത്യക്ക് പകരം ഉപയോഗിച്ചുകൂട എന്ന ചോദ്യത്തിന് ഇവിടെ പ്രസക്തിയുണ്ട്. പ്രത്യേകിച്ചും ബാറ്റര്‍മാര്‍ ഹൈലി അഗ്രസീവായി തുടരുന്ന ഈ കാലത്ത്.

ഹാര്‍ദിക്കിന്റെ അഭാവം ഇന്ത്യയെ എത്രത്തോലം ബാധിക്കുന്നുണ്ട് എന്നതിന്റെ തെളിവുകൂടിയാണ് ഈ പ്രതിസന്ധി. അക്സറിന് നിരന്തരം അവസരം കൊടുക്കുകയും വിക്കറ്റ് ടേക്കിങ് എബിലിറ്റിയുള്ള കുല്‍ദീപ് യാദവും വരുണ്‍ ചക്രവര്‍ത്തിയുമൊക്കെ ഡഗൗട്ടിലിരിക്കുകയും ചെയ്യുന്നു...

നടുക്കടലില്‍ ഹാർദിക്ക്, രോഹിത് വരുന്നു; ഒത്തുതീർപ്പ് എങ്ങനെ സാധ്യമായി?

Hari Krishnan M — Fri, 30 Oct 2026 17:37:01 +0530

മൂന്ന് സീസണുകള്‍ക്കൊടുവില്‍ മുംബൈ ഇന്ത്യൻസ് മാനേജ്മെന്റ് തിരുത്തുകയാണ്, അയാളിലേക്ക് തന്നെ മടങ്ങിപ്പോകാൻ തീരുമാനിച്ചിരിക്കുന്നു. എല്ലാം നേടിക്കൊടുത്തവനിലേക്ക്, ഐപിഎല്ലിന്റെ സിംഹാസനത്തില്‍ അവരെ വാഴിച്ചവനിലേക്ക്, ബ്ലൂ ആൻഡ് ഗോള്‍ഡ് ജഴ്‌സിക്ക് ഐതിഹാസിക നല്‍കിയവനിലേക്ക്, വാംഖഡയുടെ ഉടയോനിലേക്ക്. രോഹിത് ഗുരുനാഥ് ശര്‍മ ഒരിക്കല്‍ക്കൂടി മുംബൈ ഇന്ത്യൻസിനെ നയിക്കാൻ ഒരുങ്ങുന്നു.

മുംബൈ മാനേജ്മെന്റിന്റെ ഈ തീരുമാനം ശരിയോ തെറ്റോയെന്ന് കാലം തെളിയിക്കട്ടെ. പക്ഷേ, ഒന്നുറപ്പാണ്, മുംബൈ ഡ്രെസിങ് റൂമിലെ ഭിന്നതകളെല്ലാം അവസാനിപ്പിക്കാനുറച്ചുതന്നെയാണ് പുതിയ നീക്കം. കാരണം അത്രത്തോളം മോശം അന്തരീക്ഷവും പ്രകനവുമായിരുന്നു ഹാര്‍ദിക്ക് പാണ്ഡ്യയുടെ കീഴില്‍ മുംബൈയുടേത്. മാനേജ്മെന്റിനെപ്പോലും വെറുപ്പിച്ച മൂന്ന് വര്‍ഷങ്ങളാണ് പിന്നിട്ടുപോയത്. കളത്തിന് പുറത്ത് മുംബൈക്ക് സംഭവിച്ചതെന്താണ്? ക്യാപ്റ്റൻസി സാഗ മാനേജ്മെന്റ് അവസാനിപ്പിച്ചത് എങ്ങനെയാണ്?

ഹാർദിക്കിന്റെ വരവും ക്യാപ്റ്റൻസി ഡിമാൻഡുമെല്ലാം കഴിഞ്ഞ കഥകളാണ്. പക്ഷേ 2026 സീസണ്‍, ഇവിടെയായിരുന്നു എല്ലാം കൈവിട്ട് പോയത്. 2026 സീസണിലെ മുംബൈയുടെ സ്ക്വാഡ്, ഐപിഎല്ലിലെ തന്നെ ഏറ്റവും മികച്ചതായിരുന്നു. എല്ലാ പൊസിഷനിലും ബാക്ക് അപ്പായി തന്നെ ഉണ്ടായിരുന്നത് ഹൈ ക്വാളിറ്റി എസ്റ്റാബ്ലിഷ്‌ഡായ താരങ്ങളായിരുന്നു. പക്ഷേ, നാലേ നാല് ജയങ്ങളില്‍, പോയിന്റ് പട്ടികയില്‍ ഒൻപതാം സ്ഥാനത്ത് മുംബൈക്ക് സീസണ്‍ അവസാനിപ്പിക്കേണ്ടി വന്നു.

ടീം ഉടമയായ ആകാശ് അമ്പാനി മത്സരം മുഴുവൻ പൂർത്തിയാകും മുൻപ് ഫ്രസ്ട്രേറ്റഡായി എഴുന്നേറ്റ് പോകുകയും ആരാധകരോട് മടങ്ങാൻ ആവശ്യപ്പെടുകയും ചെയ്യുന്ന രംഗങ്ങളും പോയ സീസണില്‍ കണ്ടു. സീസണിന്റെ പാതിയില്‍ വെച്ച് ഹാർദിക്കിന് പരിക്കേല്‍ക്കുന്നു, ‍മത്സരങ്ങളില്‍ നിന്ന് വിട്ടുനില്‍ക്കുന്നു...അങ്ങനെ പലതും കണ്ടു ക്രിക്കറ്റ് ലോകം. എല്ലാം നല്‍കിയ സൂചന ഒന്നുമാത്രമായിരുന്നു, മുംബൈയുടെ ഡ്രസിങ് റൂമില്‍ കാര്യങ്ങള്‍ അത്ര ശുഭകരമല്ല എന്ന്.

മാനേജ്മെന്റ് ആദ്യ നീക്കം നടത്തുന്നതും ഇവിടെയാണ്. ഹാർദിക്കിനെ നായകസ്ഥാനത്ത് തുടരാൻ അനുവദിക്കേണ്ടതില്ല എന്ന തീരുമാനം മാനേജ്മെന്റ് സ്വീകരിച്ചു. മിഡ് സീസണില്‍ രോഹിതിനെ നായകനായി തിരിച്ചു കൊണ്ടുവരികയായിരുന്നു ലക്ഷ്യം. പക്ഷേ, അത് സംഭവിച്ചില്ല. പകരം, സൂര്യകുമാർ യാദവിനായിരുന്നു താല്‍ക്കാലിക ചുമതല, ശേഷം ജസ്പ്രിത് ബുമ്രയും. 2027 സീസണിന് മുന്നോടിയായി പുതിയ നായകൻ വരുമെന്നതും ഉറപ്പായി.

സൂര്യയും ബുമ്രയും, ഭാവി താരമായി കണക്കാക്കപ്പെടുന്ന തിലക് വർമ ഉള്ളപ്പോഴും മാനേജ്മെന്റിന്റെ തീരുമാനം രോഹിത് തന്നെയായിരുന്നു. എന്നാല്‍, രോഹിത് നിർദേശിച്ചത് തിലകിനേയും. എന്നാല്‍ രോഹിത് തന്റെ തീരുമാനം വ്യക്തമാക്കിയിട്ടും മാനേജ്മെന്റ് രോഹിത് തന്നെ വേണമെന്ന നിലപാട് തുടരുകയായിരുന്നു. നീണ്ട ‍ചർച്ചകള്‍ക്കൊടുവില്‍ രോഹിത് സമ്മതിക്കുകയും ചെയ്തു. ന്യൂസിലൻഡ് പര്യടനത്തിനായി രോഹിത് തിരിക്കും മുൻപാണ് തീരുമാനം അന്തിമമായത്.

നിലവില്‍ മുംബൈയുടെ കോച്ചിങ് സ്റ്റാഫില്‍ വലിയ മാറ്റങ്ങള്‍ സംഭവിച്ചിട്ടുണ്ട്. എല്ലാം രോഹിതിന്റെ നി‍ര്‍ദേശപ്രകാരമാണെന്നാണ് റിപ്പോര്‍ട്ടുകള്‍.

ഹെഡ് കോച്ചായി കീറോണ്‍ പൊള്ളാര്‍ഡ്, ബൗളിങ് പരിശീലകനായി മിച്ചല്‍ മക്ലെനഗൻ, ഫീല്‍ഡിങ് പരിശീലകനായി ടി ദിലീപ്, ബാറ്റിങ് പരിശീലകനായി റോബിൻ ഉത്തപ്പ, ഡെവലപ്മെന്റ് ബൗളിങ് കോച്ചായി ദവാല്‍ കുല്‍ക്കര്‍ണി. ഉത്തപ്പയും ദിലീപും ഒഴികെയുള്ളവരെല്ലാം രോഹിതിന്റെ കീഴില്‍ മുംബൈക്കായി കളിച്ചിട്ടുള്ളവരാണ്. ഉത്തപ്പയും രോഹിതുമാകട്ടെ 2007 ടി20 ലോകകപ്പ് നേടിയ ഇന്ത്യൻ ടീമിലെ യുവതാരങ്ങളായിരുന്നു, അന്നുമുതലുള്ള സൗഹൃദമാണ്.

ദിലീപ് 2023 ഏകദിന ലോകകപ്പിലും 2024, 2026 ടി ലോകകപ്പുകളിലും ഇന്ത്യയുടെ ഫീല്‍ഡിങ് പരിശീലകനായി സേവനമനുഷ്ടിച്ചതാണ്. രോഹിതിന്റെ നിര്‍ദേശപ്രകാരമായിരുന്നു ദിലീപിന്റെ കോണ്‍ട്രാക്റ്റ് ബിസിസിഐ നീട്ടിനല്‍കിയതും. അങ്ങനെ രോഹിതിന്റേതായൊരു ടീമാണ് മുംബൈയുടെ പരിശീലക സംഘം.

ഹാര്‍ദിക്കിന് നായകസ്ഥാനം നല്‍കിയപ്പോള്‍ പരോക്ഷമായി പ്രതികരിച്ചവരാണ് സൂര്യയും ബുമ്രയും. എന്നാല്‍, രോഹിത് വരുന്നതോടെ ഇരുവര്‍ക്കും അത്തരം പ്രശ്നങ്ങളുണ്ടാകാനുള്ള സാധ്യതകളും നിലനില്‍ക്കുന്നില്ല. ഇനിയുള്ളത് ഹാര്‍ദിക്കാണ്. താരവുമായി ബന്ധപ്പെട്ട് നിരവധി ട്രേ‍ഡ് റൂമറുകള് ഉയരുന്നുണ്ട്. എന്നാല്‍, മുംബൈക്ക് കൂടി അനുയോജ്യമായ ഒരു ഡീല്‍ ലഭിച്ചില്ല എങ്കില്‍ ട്രേഡ് സാധ്യമായേക്കില്ല. അങ്ങനെയെങ്കില്‍ ഹാര്‍ദിക്ക് മുംബൈയില്‍ തന്നെ തുടരേണ്ടതായും വരും.

മുംബൈയിലേക്ക് മടങ്ങി വരുമ്പോള്‍ ഹാര്‍ദിക്കിന്റെ ഡിമാൻഡ് ക്യാപ്റ്റൻസിയായിരുന്നു. അത് ഇല്ലാതെ താരം ടീമില്‍ തുടരുമോയെന്നതിലാണ് ആകാംഷ. പുറത്തുവരുന്ന റിപ്പോര്‍ട്ടുകള്‍ പ്രകാരം ട്രേഡ് നടന്നില്ലായെങ്കില്‍ രോഹിതിന്റെ കീഴില്‍ കളിക്കാമെന്ന് ഹാര്‍ദിക്ക് സന്നദ്ധത അറിയിച്ചിട്ടുണ്ട്. ഇനി മുംബൈയുടെ തീരുമാനം ശരിയാണോയെന്നതാണ്.

2027 സീസണിലേക്കായിരിക്കും രോഹിത് നായകനായി എത്തുക. 2028ല്‍ മെഗാ താരലേലം വരാനിരിക്കുകയാണ്. ടീമിനെ ഉടച്ചുവാര്‍ക്കാൻ അവസരമുണ്ട്. അപ്പോഴേക്കും ഭാവി മുൻനി‍ര്‍ത്തി പുതിയൊരു താരത്തെ അവതരിപ്പിക്കാൻ കഴിയും. തിലക് എന്ന ഓപ്ഷൻ അപ്പോഴുമുണ്ടാകും...അതൊ മറ്റൊരാളിലേക്ക് മുംബൈ എത്തുമോയെന്നതും കാത്തിരുന്ന് കാണാം...

വിട്ടുകൊടുക്കാൻ ഒരുക്കമല്ല! സൂര്യകുമാ‍ര്‍ യാദവ് ഒന്നില്‍ നിന്ന് തുടങ്ങുന്നു

Hari Krishnan M — Wed, 11 Nov 2026 15:45:27 +0530

ഇന്ത്യൻ ക്രിക്കറ്റ് ചരിത്രത്തിലെ ഏറ്റവും ക്രൂരമായ തീരുമാനം ഏതായിരുന്നു, ചൂണ്ടിക്കാണിക്കാനും അല്‍പ്പം നീറ്റലോടെ ഓര്‍ത്തെടുക്കാനും ഒരുപാടുണ്ടാകും. എങ്കിലും 2026 ടി20 ലോകകിരീടത്തിലേക്ക് ഇന്ത്യയെ നയിച്ച സൂര്യകുമാര്‍ യാദവിനെ ടീമില്‍ നിന്ന് തന്നെ ഒഴിവാക്കിയ അത്രയും ഏതെങ്കിലും വരുമോ..

എന്നാല്‍ അയാളൊരു തിരിച്ചുവരവിന് ഒരുങ്ങുകയാണ്...ഒരുപക്ഷേ വീണ്ടെടുപ്പ് സാധ്യമാകുമോയെന്ന് പോലും അറിയാത്തൊരു ശ്രമം...അനിശ്ചിതത്വത്തിലേക്ക് നീങ്ങുമെന്ന് തോന്നിച്ച കരിയറില്‍ ഒരു അവസരം തേടിയെത്തിയിരിക്കുന്നു. സെയ്ദ് മുഷ്താഖ് അലി ട്രോഫിക്കുള്ള മുംബൈയുടെ സംഘത്തിലൊരിടം, അവരെ നയിക്കാൻ തിരഞ്ഞെടുക്കപ്പെട്ടിരിക്കുന്നതും അയാള്‍ തന്നെയാണ്...അഹമ്മദാബാദിലെ കിരീടരാവിന് ശേഷം ഇന്ത്യൻ ജഴ്‌സി പൂര്‍ണമായും നിഷേധിക്കപ്പെട്ട അതേ സൂര്യകുമാര്‍...

സൂര്യകുമാറിന് സെയ്‌ദ് മുഷ്താഖ് അലി ട്രോഫി എത്രത്തോളം പ്രധാനപ്പെട്ടതാണെന്ന് അറിയാൻ കഴിഞ്ഞ ദിവസം മുംബൈയില്‍ നടന്ന ഇവന്റിലെ അയാളുടെ വാക്കുകള്‍ ശ്രദ്ധിച്ചാല്‍ മതിയാകും.

ടി20 ലോകകപ്പിന് ശേഷമുള്ള സമയം പ്രയാസകരമായിരുന്നു. ആ യാഥാര്‍ത്ഥ്യത്തില്‍ നിന്ന് ഒളിച്ചോടാൻ ഞാൻ ആഗ്രഹിക്കുന്നില്ല. സ്വയം സത്യസന്ധത പുലര്‍ത്താൻ സാധിച്ചില്ലെങ്കില്‍ എങ്ങനെ സന്തോഷത്തോടെ മുന്നോട്ട് പോകാൻ കഴിയും. ഒരു കാര്യമെ അന്നെല്ലാം ചിന്തിച്ചുള്ളു, ഞാൻ എങ്ങനെയാണ് ക്രിക്കറ്റ് കളിക്കാൻ ആരംഭിച്ചതെന്ന്. ആ പാഷനേറ്റായുള്ള കാലത്തെ മനോഭാവത്തിലേക്ക് എത്താനുള്ള ശ്രമങ്ങളായിരുന്നു പിന്നീട്, അതാണ് ഞാൻ ഇപ്പോള്‍ ചെയ്യുന്നതും, ലക്ഷ്യം മുംബൈയെ ജേതാക്കളാക്കുക എന്നതാണ്, സൂര്യകുമാര്‍ പറഞ്ഞു...

വൈഭവ് സൂര്യവംശിയും അഭിഷേക് ശര്‍മയുമൊക്കെ ടി20 ക്രിക്കറ്റിന്റെ അഗ്രസീവ് മുഖങ്ങളാകും മുൻപ് ഇന്ത്യക്ക് ലഭിച്ച ആദ്യ ടി20 പ്രൊഡക്റ്റായിരുന്നു സൂര്യകുമാര്‍. ലോക ഒന്നാം നമ്പര്‍ ടി20 ബാറ്ററിലേക്കുള്ള സൂര്യകുമാറിന്റെ വളര്‍ച്ച പോലും അതിവേഗത്തിലായിരുന്നു. എന്നാല്‍, രോഹിത് ശര്‍മയുടെ വിരമിക്കലും, ശേഷം ലഭിച്ച ക്യാപ്റ്റൻസിയിലും ക്രിക്കറ്റ് ലോകം കണ്ടത് സൂര്യകുമാറിന്റെ മറ്റൊരു പതിപ്പായിരുന്നു. ആരും ഒരിക്കലും പ്രതീക്ഷിക്കാത്ത ഡൗണ്‍ഫാള്‍.

2024ല്‍ ശരാശരി 26 മാത്രം, തൊട്ടടുത്ത വര്‍ഷത്തിലെ ശരാശരി കേവലം 13 മാത്രമായി. സ്ട്രൈക്ക് റേറ്റ് 123ലേക്ക് കൂപ്പുകുത്തിയപ്പോള്‍ ഒരു അര്‍ദ്ധ സെഞ്ചുറിപോലും ഉണ്ടായില്ല. എന്നാല്‍ 2024, 25 വര്‍ഷങ്ങളെ അപേക്ഷിച്ച് 2026 മുൻ ഇന്ത്യൻ നായകന് ഭേദപ്പെട്ടതായിരുന്നു. ന്യൂസിലൻഡ് പരമ്പരയില്‍ തിളങ്ങുന്നു, ശേഷം ലോകകപ്പില്‍ ഭേദപ്പെട്ട പ്രകടനം. സൂര്യയുടെ തിരിച്ചുവരവ് സംഭവിക്കുമെന്ന തോന്നല്‍ ജനിക്കുമ്പോഴാണ് ഐപിഎല്ലില്‍ പൂര്‍ണമായും പരാജയപ്പെടുന്നതും. സീസണിലാകെ നേടിയത് രണ്ട് അര്‍ദ്ധ സെഞ്ചുറികള്‍ മാത്രം.

നായകനായതിന് ശേഷമുള്ള അന്താരാഷ്ട്ര കരിയര്‍ പരിശോധിച്ചാല്‍ 52 മത്സരങ്ങളില്‍ നിന്ന് 1232 റണ്‍സാണ് നേട്ടം. ഒരു സെഞ്ചുറിയും എട്ട് അര്‍ദ്ധ ശതകങ്ങളും. എന്നാല്‍, രോഹിതിന് കീഴില്‍ കേവലം 37 മത്സരങ്ങളില്‍ നിന്ന് ഇതിലും റണ്‍സ് സ്കോര്‍ ചെയ്യാൻ സൂര്യകുമാറിന് കഴിഞ്ഞിരുന്നു. 1281 റണ്‍സ്, 12 ഫിഫ്റ്റി, ഒരു സെഞ്ചുറി. ശരാശരിയിലും സ്ട്രൈക്ക് റേറ്റിലുമൊക്കെ വലിയ വ്യത്യാസവും കാണാൻ കഴിയും. ക്യാപ്റ്റനല്ലായിരുന്നെങ്കില്‍ പലപ്പോഴും സൂര്യയുടെ സ്ഥാനം ടീമിന് പുറത്താകുമായിരുന്നു, പ്രത്യേകിച്ചും 2025ല്‍.

രണ്ട് വര്‍ഷത്തെ സൂര്യയുടെ മോശം പ്രകടനത്തിനൊടുവിലാണ് ബിസിസിഐ ആ തീരുമാനത്തിലേക്ക് എത്തുന്നത്. ശ്രേയസ് അയ്യര്‍ അടുത്ത ചോയിസാണെന്നത് ഉറപ്പുമായിരുന്നു. എപ്പോഴെന്നത് മാത്രമായിരുന്നു ആകാംഷ. പക്ഷേ, ടീമില്‍ നിന്ന് പൂര്‍ണമായും ഒഴിവാക്കാം എന്ന മാനേജ്മെന്റിന്റെ തീരുമാനം അപ്രതീക്ഷിതമായിരുന്നു. ക്രിക്കറ്റ് ആരാധകര്‍ക്കും സൂര്യക്കും, ഏകദേശം രണ്ട് മാസത്തോളം സൂര്യയെ സ്റ്റക്കായി നിര്‍ത്തി ബിസിസിഐയുടെ നീക്കം.

ശ്രേയസ് നായകനായി വരുമ്പോള്‍ സ്വഭാവികമായും അവശേഷിക്കുന്ന ഏക ടോപ് ഓര്‍ഡര്‍ സ്പോട്ട് സൂര്യയുടേതാണ്. ബിസിസിഐയുടെ ഭാഗത്തുനിന്ന് നോക്കുമ്പോള്‍ സൂര്യയേക്കാള്‍ ഫോമിലുമാണ് ശ്രേയസ്. ബാറ്റിങ് ലൈനപ്പില്‍ സൂര്യയെ ഉള്‍ക്കൊള്ളിക്കാൻ സാധിക്കുന്ന ഒരു പൊസിഷനുമുണ്ടായിരുന്നില്ല. അഭിഷേക്, സഞ്ജു, സൂര്യവംശി, ഇഷാൻ, തിലക് തുടങ്ങി നീണ്ട നിരതന്നെയുണ്ടായിരുന്നു അപ്പോള്‍...ലോകകപ്പിന് ശേഷം ഒരു പരമ്പര പോലും നല്‍കാതെയുള്ള പുറത്താക്കലാണ് ക്രൂരമായിപ്പോയത്..

പക്ഷേ, എല്ലാം ഒന്നില്‍ നിന്ന് സൂര്യ തുടങ്ങുകയാണ്, സെയ്ദ് മുഷ്താഖ് അലി, ശേഷം ഐപിഎല്‍...ഒരു റിഡംഷൻ ഉണ്ടാകട്ടെ...ലോകകിരീടം നേടിത്തന്ന നായകൻ അത് അര്‍ഹിക്കുന്നുണ്ട്...എന്നിരുന്നാലും ഇന്ത്യൻ ടീമിലേക്ക് തിരിച്ചെത്തുക എന്ന പ്രയാസകരമാണ്, യാഥാര്‍ത്ഥ്യവും. ബൗളിങ് ലൈനപ്പിലേക്ക് ഭുവനേശ്വര്‍ കുമാര്‍ വന്നതുപോലെയല്ല ബാറ്റിങ്ങ് ലൈനപ്പിലെ സ്ഥിതി. അസാധാരണമായ ഇന്നിങ്സുകളുടെ നീണ്ട നിര സൂര്യക്ക് വേണ്ടി വരും നീലക്കുപ്പായം ഒരിക്കല്‍ക്കൂടി അണിയാൻ...കാത്തിരിക്കാം കാലം കാത്തുവെച്ചിരിക്കുന്നത് അറിയാൻ

മാസ്റ്റർക്ലാസ് ഇന്നിങ്സ്; എല്ലാവരും വീണ ഈഡൻ പാ‍ര്‍ക്ക് കോലി കീഴടക്കിയത് എങ്ങനെ?

Hari Krishnan M — Thu, 05 Nov 2026 12:04:41 +0530

ഈഡൻ പാർക്ക്, ഒരുപക്ഷേ ലോക ക്രിക്കറ്റില്‍ തന്നെ ബാറ്റിങ് ഏറ്റവും ദുഷ്കരമായ മൈതാനങ്ങളിലൊന്ന്. അണ്‍ ഈവൻ ബൗണ്‍സ്, മൂവ്മെന്റ്, വിൻഡ്, ഓവര്‍കാസ്റ്റ് കണ്ടീഷൻ...സാഹചര്യങ്ങള്‍ പരിചിതമായ ന്യൂസിലൻഡ് ബാറ്റര്‍മാര്‍ക്ക് പോലും അതിജീവിക്കാൻ കഴിയുന്നില്ല.

ബൗണ്‍സിനെ നേരിടാൻ പുള്‍ ഷോട്ടായിരുന്നു അവരുടെ ടോപ് ഓര്‍ഡറിന്റെ തിരഞ്ഞെടുപ്പ്, വില്‍ യങ്ങും ടിം സെയ്‌ഫ‍ര്‍ട്ടും നിക്കോള്‍സും ഉള്‍പ്പെടെ നാല് ന്യൂസിലൻഡ് ബാറ്റര്‍മാര്‍ തങ്ങളുടെ വിക്കറ്റ് നഷ്ടപ്പെടുത്തിയതും ആ ഒരൊറ്റ ഷോട്ടിലായിരുന്നു.

ഇത് കിവി നിരയില്‍ മാത്രം ഒതുങ്ങി നിന്നില്ല, പുതുതലമുറയിലെ ഏറ്റവും മികച്ച പുള്ളര്‍മാരിലൊളായ ശുഭ്മാൻ ഗില്‍. ഇന്ത്യൻ നായകന്റെ 56 പന്തുകള്‍ നീണ്ട അച്ചടക്കത്തോടെയുള്ള ബാറ്റിങ്ങ് അവസാനിപ്പിക്കുന്നതും അതേ പുള്‍ ഷോട്ടാണ്. അക്സര്‍ പട്ടേലിനും ശ്രേയസ് അയ്യ‍ര്‍ക്കും ബൗണ്‍സിനെ ടാക്കിള്‍ ചെയ്യാൻ കഴിയുന്നുണ്ടായിരുന്നില്ല. അതിന് സാധിക്കുമായിരുന്നൊരാള്‍ ആദ്യ ഓവറില്‍ തന്നെ മടങ്ങിയിരുന്നു, രോഹിത് ശര്‍മ.

ഓക്ക്‌ലൻഡില്‍ ബാറ്റെടുത്തവരൊക്കെയും ആ 22 വാരയില്‍ പരാജയപ്പെടുകയായിരുന്നു. പക്ഷേ, ഒരാള്‍ മാത്രം കീഴ്പ്പെടാൻ തയാറായിരുന്നില്ല.

രണ്ട് ദിവസമെയായിട്ടുള്ളു ന്യൂസിലൻഡില്‍ കാലുകുത്തിയിട്ട്, മണിക്കൂറുകള്‍ മാത്രം ഒതുങ്ങി നിന്ന് നെറ്റ് പരിശീലനം. കഴിഞ്ഞ ഒന്നരപതിറ്റാണ്ടിനിടെ ആ ബാറ്റിനെ പരീക്ഷിച്ച ചുരുക്കം ചില മൈതാനങ്ങളെയുള്ളു, അതില്‍ ഒന്നാണ് ഈഡൻ പാര്‍ക്കും. ഏകദിന കരിയര്‍ ശരാശരി ആറുപതിനടുത്താണെങ്കില്‍ ഈഡൻ പാര്‍ക്കിലത് 19 മാത്രമാണ്. പന്തെടുത്തവരില്‍ കെയില്‍ ജാമിസണുണ്ട്, അയാള്‍ക്കെതിരെ മികച്ച റെക്കോര്‍ഡ് കൈവശമുള്ളയാള്‍.

When the going gets tough, the tough get going എന്നൊരു പറച്ചിലുണ്ട്. അതിന്റെ ഏറ്റവും ഒടുവിലത്തെ ഉദാഹരണം എന്താണെന്ന് അറിയണമെങ്കില്‍ ഇന്ത്യ-ന്യൂസിലൻഡ് ഏകദിനത്തിന്റെ സ്കോര്‍കാര്‍ഡ് പരിശോധിച്ചാല്‍ മതിയാകും. ക്രീസിലെത്തിയ 17 പേരില്‍ ഒരാള്‍ക്ക് മാത്രമാണ് ആ മൈതാനത്ത് ഡൊമിനേറ്റ് ചെയ്യാനായത്. ദ വണ്‍, ദ കിങ്, വിരാട് കോലി.

ഏകദിന ഫോര്‍മാറ്റിലേക്ക് മാത്രമായി കരിയര്‍ ചുരുങ്ങിയതിന് ശേഷമുള്ള കോലി, ഹൈലി അഗ്രസീവായുള്ള തുടക്കങ്ങളാണ് പുതിയ വേര്‍ഷനിലെ പ്രത്യേകതകളിലൊന്ന്. ന്യൂസിലൻഡിലെ ബൗണ്‍സിയായ വിക്കറ്റുകളില്‍ അല്‍പ്പം കരുതലുണ്ടാകുമെന്നാണ് കരുതിയത്, പക്ഷേ അതുണ്ടായില്ല. എങ്കിലും കോലി പരീക്ഷിക്കപ്പെടാതിരുന്നില്ല ഈഡൻ പാര്‍ക്കില്‍. ജാമിസണ്‍ ഏഴ് തവണയാണ് കോലിയുടെ ഷോട്ട് സെലക്ഷനെ വെല്ലുവിളിച്ചത്, ജേക്കബ് ഡഫി രണ്ട് പ്രാവശ്യവും.

ആദ്യം നേരിട്ട 25 പന്തില്‍ പത്ത് ഫാള്‍സ് ഷോട്ടുകളുണ്ടായി. ഫോര്‍ച്ചൂണ്‍ ഫേവേഴ്‌സ് ദ ബ്രേവ് എന്ന് പറയുന്നതുപോലെ 29 റണ്‍സ് കോലി സ്കോര്‍ ചെയ്തു. ഒൻപതാം ഓവറിലെ അഞ്ചാം പന്തില്‍ ബ്ലെയര്‍ ടിക്ക്‌നറുടെ ഗുഡ് ലെങ്ത് ഡെലിവെറിയില്‍ ഒരു ഡ്രൈവുണ്ടായിരുന്നു, ഷോര്‍ട്ട് എക്സ്ട്രാ കവറിനും മിഡ് ഓഫിനും ഇടയിലൂടെ പന്തിനെ പറഞ്ഞയച്ച മൊമെന്റ്. കരിയറിന്റെ പീക്കിലുള്ള ഒരാള്‍ക്ക് മാത്രം സാധിക്കുന്ന ഷോട്ടെന്ന് തോന്നിച്ചു. യെസ്, കോലി ഈസ് ഓള്‍വെയിസ് അറ്റ് ഹിസ് പീക്ക്.

ഇതേസമയത്ത് ഗില്‍ വെല്‍ കണ്‍ട്രോള്‍ഡായാണ് കാണപ്പെട്ടത്. പക്ഷേ, അതുവരെയുള്ള ഗില്ലിന്റെ സമ്പാദ്യം 30 പന്തില്‍ നിന്ന് 17 റണ്‍സായിരുന്നു. ഇവിടെയാണ് മഴമൂലമുള്ള ആദ്യ ബ്രേക്ക് സംഭവിക്കുന്നത്. ശേഷം കോലി ഓക്ക്‌ലൻഡ് സാക്ഷ്യം വഹിച്ചത് ഒരു കോലി മാസ്റ്റര്‍ ക്ലാസ് തന്നെയായിരുന്നു. 13-ാം ഓവറിലെ അഞ്ചാം പന്തില്‍ ജാമിസണ്‍ കോലിക്കൊരു ബൗണ്‍സര്‍ കാത്തുവെച്ചു, മിഡ് വിക്കറ്റിലൂടെയാണ് ആ പന്ത് സഞ്ചരിച്ചത്, മറ്റ് ബാറ്റര്‍മാരെക്കാള്‍ അധികസമയം കോലിക്ക് ലഭിക്കുന്നതുപോലെ.

തൊട്ടടുത്ത ഓവറില്‍ സമാന ഡെലിവറി ടിക്ക്‌നറിന്റെ കൈകളില്‍ നിന്ന്. ഇക്കുറി പന്ത് പിച്ച് ചെയ്തതിന് ശേഷം അല്‍പ്പം കൂടി ബൗണ്‍സ് ചെയ്തു. പൊസിഷനിങ്ങിലും ഫീറ്റ് മൂവ്മെന്റിലും ഹാൻഡ് ഐ കോര്‍ഡിനേഷനിലുമെല്ലാം കോലി തന്റെ വേഗത കാണിച്ച മൊമെന്റ്. മിഡ് വിക്കറ്റിന് മുകളിലൂടെ സിക്സ്. ഐ ആം ഹിയര്‍ ടു ഡൊമിനേറ്റ് എന്നായിരുന്നു ആ ഷോട്ടിന്റെ സന്ദേശം പോലും, ഷോട്ടിലെ സാറ്റിസ്‌ഫാക്ഷൻ ഒരു ചെറുപുഞ്ചിരിയോടെ കോലി തന്നെ പ്രകടമാക്കി.

ഭൂരിഭാഗം ബാറ്റര്‍മാരും പുള്‍ഷോട്ടില്‍ പരാജയപ്പെട്ടപ്പോള്‍ അല്ലെങ്കില്‍ പുള്‍ ചെയ്യാൻ മടിച്ചപ്പോഴാണ് കോലിയുടെ ഈ ഇന്നിങ്സ്. പുള്‍ ഷോട്ടില്‍ നിന്ന് മാത്രം അഞ്ച് ഫോറും ഒരു സിക്സും...ഇത് ബൗണ്ടറി മാത്രം, അല്ലാതെ നേടിയ റണ്‍സ് വേറെ. 51 പന്തില്‍ 13 ഫോറും ഒരു സിക്സും ഉള്‍പ്പെടെ 74 റണ്‍സ്. മറ്റൊരു ബാറ്റര്‍ക്ക് പോലും 40 താണ്ടാൻ കഴിയാതെ പോയപ്പോഴാണ് 145 സ്ട്രൈക്ക് റേറ്റില്‍ കോലി ഇത്തരമൊരു പ്രകടനം പുറത്തെടുത്തത്. 2027 ഏകദിന ലോകകപ്പില്‍ കോലി ഇന്ത്യയ്ക്ക് എന്തുകൊണ്ട് അനിവാര്യമാണ് എന്ന ചോദ്യത്തിനും ആശങ്കകള്‍ക്കുമുള്ള ഉത്തരം കൂടിയായിരുന്നു ഈ ഇന്നിങ്സ്.

ബാഴ്സലോണയെ തൂക്കി! ഇനി കാണാൻ പോകുന്നത് റയൽ മാഡ്രിഡിന്റെ മാസ് കംബാക്കോ?

Hari Krishnan M — Thu, 29 Oct 2026 14:57:25 +0530

നിങ്ങളാരും ലൂനിനെക്കുറിച്ച് എന്നോട് ചോദിച്ചില്ല, ഒരുപക്ഷേ ഞങ്ങള്‍ പരാജയപ്പെട്ടിരുന്നെങ്കില്‍ നിങ്ങള്‍ തീര്‍ച്ചയായും ചോദിക്കുമായിരുന്നു...എല്‍ ക്ലാസിക്കോയിലെ വിജയത്തിനെ ശേഷം വാര്‍ത്താസമ്മേളനത്തിനിടെ മാധ്യമ പ്രവര്‍ത്തകരോട് തന്റെ തനതുശൈലിയില്‍ ഹോസെ മൗറിഞ്ഞ്യോ ഇങ്ങനെ പറഞ്ഞിരുന്നു.

ക്യാമ്പ് നൗവില്‍ ഫൈനല്‍ വിസില്‍ മുഴങ്ങുമ്പോള്‍ മൗറിഞ്ഞ്യോ ആദ്യമെത്തിയതും ലൂനിന്റെ അടുത്തേക്കായിരുന്നു. അയാള്‍ ലൂനിനെ ആശ്ലേഷിച്ചു. നാക്ക് പുറത്തേക്കിട്ട്, സ്ലൈഡ് ചെയ്തുള്ള ടിപ്പിക്കല്‍ മൗറിഞ്ഞ്യോ സെലിബ്രേഷേക്കാള്‍ ആഴമുണ്ടായിരുന്നു ആ നിമിഷത്തിന്. എന്തുകൊണ്ടെന്നാല്‍ മൗറീഞ്ഞ്യോയുടെ തീരുമാനങ്ങള്‍ പൂര്‍ണമായും വിജയിച്ച രാത്രിയായിരുന്നു അത്, ലൂനിന്റെ വരവും പ്രകടനവുമായിരുന്നു നിര്‍ണായകമായതും. ജെറാഡ് മാര്‍ട്ടിന്റെ ക്ലോസ് റേഞ്ച് ഹെഡര്‍ ഉള്‍പ്പെടെ നാല് സേവുകള്‍. റയല്‍ ഈസ് ബാക്ക് എന്ന് തോന്നിപ്പിച്ച 90 മിനുറ്റുകള്‍.

ഹൻസി ഫ്ലിക്കിന്റെ കളരിയില്‍ പീക്ക് ചെയ്യുന്ന ബാഴ്സയെ കീഴടക്കുമ്പോള്‍ ആരാധകരുടെ മനസില്‍ ഒരു ചോദ്യമാണുള്ളത്. ക്യാമ്പ് നൗവില്‍ മുഴങ്ങിയത് റയലിന്റെ തിരിച്ചുവരവിന്റെ കാഹളമാണോയെന്ന്.

മെട്രൊപൊളിറ്റാനോയില്‍ അത്ലറ്റിക്കൊ മാഡ്രിഡിനോടേറ്റ പരാജയം, റയല്‍ ബെറ്റിസിനോട് വഴങ്ങിയ അപ്രതീക്ഷിത തോല്‍വി. മൗറിഞ്ഞ്യോയുടെ കാലത്തും ടീമിന്റെ പ്രകടനത്തില്‍ ചോദ്യമുയരാൻ അധിക സമയമൊന്നും ആവശ്യമായി വന്നിരുന്നില്ല. പക്ഷേ, ആ തോല്‍വികള്‍ തിരുത്തലിന്റെ തുടക്കമായിരുന്നു, മൗറിഞ്ഞ്യോ തന്റെ സിസ്റ്റത്തില്‍ നിരന്തരം പരീക്ഷണങ്ങള്‍ നടത്തി. അത് ഒന്നൊ രണ്ടോ പൊസിഷനില്‍ മാത്രം ഒതുങ്ങിയില്ല, ഒടുവില്‍ എല്‍ ക്ലാസിക്കോയില്‍ ഫലം കണ്ടു.

മാറ്റത്തിന്റെ ചലനങ്ങള്‍ തുടങ്ങുന്നത് ഇടതുവിങ്ങില്‍ നിന്നാണ്. യാൻ ഡിയോമൻഡെ. ബാഴ്സയ്ക്ക് എതിരെ റയല്‍ നിരയില്‍ ഏറ്റവുമധികം ടച്ചുകളുണ്ടായിരുന്നത് ഡിയോമൻഡെയ്ക്കായിരുന്നു, 66 എണ്ണം. വിങ്ങില്‍ ഡിയോമൻഡെ എത്രത്തോളം ക്രിയേറ്റീവായിരുന്നുവെന്നത് മാത്രമല്ല, ഓഫ് പൊസഷനില്‍ പ്രെസിങ്ങിലും ഡീപായിറങ്ങി ഡിഫൻഡ് ചെയ്യുന്നതിലും മടി കാണിച്ചില്ല. വിനീഷ്യസില്‍ നിന്ന് ലഭിക്കാത്ത ഡിഫൻസീവ് സപ്പോര്‍ട്ട് ലെഫ്റ്റ് ബാക്കിന് നല്‍കാൻ യുവതാരത്തിന് സാധിച്ചു.

എട്ട് ഇന്റ‍ര്‍വൻഷൻസ് ഡിയോമൻഡയുടെ പേരിലുണ്ടായിരുന്നു. ഡിയോമൻഡയുടെ ബൂട്ടുകളില്‍ നിന്നായിരുന്നു എംബാപെയുടെ ആദ്യ ഗോളിന് കാരണമായ നീക്കം സംഭവിച്ചതും. മൂന്ന് ബാഴ്സ താരങ്ങള്‍ ശ്രമിച്ചിട്ടുപോലും ഡിയോമൻഡയെ തടയാൻ സാധിച്ചിരുന്നില്ല. സമാനമായിരുന്നു റൈറ്റ് വിങ്ങില്‍ ആര്‍ദ ഗൂളറിന്റെ പ്രകടനവും.

നിലവില്‍ ലോക ഫുട്ബോളിലെ തന്നെ ഏറ്റവും മികച്ച രണ്ട് താരങ്ങള്‍ അണിനിരക്കുന്നതാണ് ബാഴ്സയുടെ മിഡ് ഫീല്‍ഡ്, റോഡ്രിയും പെഡ്രിയും. എന്നാല്‍ ഇരുവരേയും ഔട്ട് ക്ലാസ് ചെയ്തത് ജൂഡ് ബെല്ലിങ്ഹാമിന്റെ കാലുകളിലായിരുന്നു. റോഡ്രിയെ കൃത്യമായി മാര്‍ക്ക് ചെയ്തും പന്ത് നിയന്ത്രിക്കാൻ അനുവദിക്കാതെയും ബെല്ലിങ്ഹാം നടത്തിയ ക്ലാസിക്ക് ഡിസ്പ്ലെ. റയലിന്റെ വിജയഗോളിലേക്ക് നയിച്ച ബെല്ലിങ്ഹാമിന്റെ മനോഹരമായ ടേണ്‍, മൂന്ന് ബാഴ്സ താരങ്ങളായിരുന്നു ട്രയാങ്കിള്‍ ഷേപ്പില്‍ പ്രെസ് ചെയ്തതെന്ന് ഓര്‍ക്കണം.

അവിടെ നിന്ന് കമവിംഗ നടത്തിയ റണ്‍. മോശം ഫോമിന്റെ പേരില്‍ റയല്‍ ആരാധകരുടെ വിമര്‍ശനം ആവോളമേറ്റ താരം. പകരക്കാരനായി 79-ാം മിനുറ്റിലെത്തിയതാണ് ഗോളിന് വഴിയൊരുക്കിയത്. ആരാധകരുടെ ആത്മവിശ്വാസം നേടിയെടുക്കാൻ സാധിച്ച പ്രകടനം. ചുവാമെനിയും ബെര്‍ണാദോയും ചേര്‍ന്ന ഡബിള്‍ പിവട്ട്. ബാഴ്സ മത്സരം നിയന്ത്രിക്കുമ്പോള്‍പ്പോലും ഇരുവരും നല്‍കിയ ഡിഫൻസീവ് കോണ്‍ട്രിബ്യൂഷൻസിനെ എടുത്ത് പറയാതിരിക്കാൻ കഴിയില്ല. പ്രത്യേകിച്ചും സില്‍വ പെഡ്രിയെ മാര്‍ക്ക് ചെയ്തത്.

സെന്റര്‍ ബാക്കായ ഡീൻ ഹൗസൻ, സീസണിലെ താരത്തിന്റെ ഏറ്റവും മികച്ച പെര്‍ഫോമൻസ്, 19 ഡിഫൻസീവ് ഇന്റര്‍വെൻഷൻസ്. ലെഫ്റ്റ് ബാക്കില്‍ കുക്കുറേയ ലമീൻ യമാലിനെ പൂര്‍ണമായും നിശബ്ദമാക്കി നിര്‍ത്തി. പലകുറി തന്റെ പൊസിഷൻ മാറ്റി റയലിന്റെ പ്രതിരോധം പൊളിക്കാൻ യമാല്‍ ശ്രമിച്ചപ്പോഴും കുക്കുറേയ കൃത്യമായി ട്രാക്ക് ചെയ്യുന്നുണ്ടായിരുന്നു. ഒപ്പം കൊനാറ്റെയും ഡംഫ്രിസും. റൈറ്റ് ബാക്കില്‍ വാല്‍വെര്‍ദെ, പരിക്ക് വെച്ചാണ് താരം കളിച്ചത്, ക്യാൻസലോയ്ക്ക് എതിരെ നടത്തിയ ടാക്കിള്‍ ഓക്കെ എല്‍ ക്ലാസിക്കോകളിലെ ഏറ്റവും മികച്ചവയില്‍ ഒന്നായി അടയാളപ്പെടുത്താനാകുന്നതാണ്.

താരങ്ങളുടെ വ്യക്തിഗത പ്രകടനങ്ങള്‍ക്കൊപ്പം റയല്‍ മത്സരത്തിലുടനീളം പാലിച്ച ടാക്റ്റിക്കല്‍ ഡിസിപ്ലിൻ, അതായിരുന്നു ബാഴ്സയെ ഔട്ട്പ്ലെ ചെയ്തത്. ബാഴ്സ താരങ്ങളുടെ മുന്നേറ്റങ്ങളില്‍ മിഡ് ഫീല്‍ഡും ഡിഫൻസും ഒരു പോലെ ലൈൻ കീപ്പ് ചെയ്ത് പാസിങ് ഓപ്ഷനുകളെല്ലാം അടച്ചു. 62 ശതമാനം പന്തടക്കമുണ്ടായിട്ടും രണ്ട് വലിയ അവസരങ്ങള്‍ മാത്രമാണ് ബാഴ്സയ്ക്ക് സൃഷ്ടിക്കാൻ കഴിഞ്ഞതുപോലും. റയല്‍ എത്രത്തോളം കാപ്പബിള്‍ ആണ് എന്ന് തെളിയിക്കപ്പെട്ട മത്സരം കൂടിയായിരുന്നു എല്‍ ക്ലാസിക്കോ. ടൈറ്റില്‍ റേസില്‍ ഞങ്ങളുമുണ്ടെന്ന പ്രഖ്യാപനം നടത്താൻ മൗറിഞ്ഞ്യോയ്ക്ക് കഴിഞ്ഞിട്ടുമുണ്ട്.

എന്താ അടി! ബീസ്റ്റ് മോഡില്‍ അഭിഷേകും വൈഭവും; കിവികളുടെ ചിറകരിഞ്ഞ് ഇന്ത്യ

Hari Krishnan M — Tue, 27 Oct 2026 18:12:32 +0530

വൈഭവ് സൂര്യവംശിയാണ് തുടങ്ങിയത്, തീര്‍ത്തത് നമൻ ധീറും. ഇതിനിടെയില്‍ ഒരാള്‍, 38 പന്തുകള്‍. ആൻ അബ്സല്യൂട്ട് മെയ്ഹം.

ഷോര്‍ട്ട് ബോള്‍, ഹാര്‍ഡ് ലെങ്ത്, ഗുഡ് ലെങ്ത്, ഫുള്‍, യോര്‍ക്കര്‍...ലൈനിലെ മാറ്റങ്ങളും പേസ് വേരിയേഷനുകളുമെല്ലാം പരീക്ഷിച്ചു കഴിഞ്ഞിരിക്കുന്നു...ക്രിക്കറ്റ് പുസ്തകങ്ങളില്‍ എഴുതിവെച്ചതൊക്കെയും അവര്‍ പുറത്തെടുത്തു, സാന്റനറിന്റെ സംഘത്തിന്റെ കൈകളില്‍ ഇനിയൊന്നും ബാക്കിയില്ലെന്ന് തന്നെ പറയാം. വെല്ലിങ്ടണിലെ വിക്കറ്റില്‍ തൊട്ട പന്തുകള്‍ക്കൊക്കെയും ആ ബാറ്റൊരു നിയോഗമെ കല്‍പ്പിച്ച് നല്‍കിയുള്ളു, ബൗണ്ടറിയിലേക്ക് കുതിക്കുക...

ഇവിടെ മുന്നിലേക്ക് എത്തുന്ന പന്തുകളുടെ വേഗമോ എറിയുന്നവരുടെ വലുപ്പച്ചെറുപ്പമോ ബാധകമായിരുന്നില്ല. ന്യൂസിലൻഡ് ബൗളര്‍മാരുടെ എക്കോണമി കണ്ട് നിങ്ങള്‍ക്ക് സഹതാപം തോന്നിയാല്‍ തെറ്റ് പറയാൻ കഴിയില്ല, അത്രത്തോളം നിസഹായരായിരുന്നു അവര്‍. He was brutal. No mercy. No brakes. Just Abhishek Sharma.

വെല്ലിങ്ടണില്‍ ന്യൂസിലൻഡ് ഇന്നിങ്സ് അവസാനിക്കുമ്പോള്‍ സാന്റനറിന് ആത്മവിശ്വാസമുണ്ടായിരുന്നു. 199 അത്ര മോശം സ്കോറുമായിരുന്നില്ല, കാരണം തന്റെ ബൗളിങ് യൂണിറ്റിന്റെ ക്വാളിറ്റിയില്‍ അയാള്‍ക്ക് ബോധ്യമുണ്ടായിരുന്നു. പക്ഷേ, ‍ഡഗൗട്ടില്‍ നിന്ന് ഗൗതം ഗംഭീറൊരു മാസ്റ്റര്‍സ്ട്രോക്ക് നടത്തി. വൈഭവിനെ അഭിഷേകിനൊപ്പം അയച്ചു. Two great forces together, that's how unstoppable begins.

കിവികള്‍ക്ക് പരിചിതമായ സാഹചര്യങ്ങളായിരിക്കാം, പക്ഷേ ഡൊമിനേറ്റ് ചെയ്യാൻ ഒരുങ്ങിയായിരുന്നു ഇരുവരും ക്രീസിലേക്ക് എത്തിയത്. ക്രൈസ്റ്റ് ചർച്ചില്‍ നിശബ്ദമായ തന്റെ ബാറ്റിന് ക്ഷീണം മാറ്റണമായിരുന്നു വൈഭവിന്. ജേക്കബ് ഡഫിയുടെ ലെങ്ത് ബോള്‍ മിഡ് ഓണിന് മുകളിലൂടെ ബൗണ്ടറിയിലേക്ക്. വൈഭവിനെ തീര്‍ക്കാൻ ഇംഗ്ലണ്ടില്‍ ആര്‍ച്ചര്‍ പ്രയോഗിച്ച അതേ മാര്‍ഗം ഡഫിയും സ്വീകരിക്കാനൊരുങ്ങി, ഷോര്‍ട്ട് ബോള്‍.

15 വയസുകാരൻ തന്റെ ദൗര്‍ബല്യങ്ങളെ തിരുത്തുകയാണ്, ലെഗ് സൈഡിലേക്ക് ഒരു ചുവട് മാറി തേഡ് മാന് മുകളിലൂടെ മൈതാനം തൊടാതെ പന്ത് സഞ്ചരിച്ചു, ശേഷം ഒരു സിംഗിള്‍. അഭിഷേക്. വൈകിപ്പിച്ചില്ല. ഡഫി വീണ്ടുമൊരു ഷോര്‍ട്ട് ബോള്‍, ഹി ബാക്ക്ഡ് എവെ, ദെൻ വെന്റ് ഡൗണ്‍ ദ ട്രാക്ക്, ആൻഡ് സ്മാഷ്‌ഡ് ഓവര്‍ കവര്‍ പോയിന്റ്. തന്റെ ട്രേഡ് മാര്‍ക്ക് സ്റ്റൈലില്‍ തുടക്കം. 26 റണ്‍സിലാണ് ആദ്യ ഓവര്‍ ഇന്ത്യ അവസാനിപ്പിക്കുന്നത്, അതൊരു മുന്നറിയിപ്പായിരുന്നു.

അഭിഷേകിന്റെ ഓഫ് സൈഡ് ഡൊമിനൻസ് അറിഞ്ഞ് തന്നെ സാന്റനര്‍ വലവിരിച്ചു, ഡീപില്‍ ബെവൊണ്‍ ജേക്കബ്‌സ്. ഒരുതരം വെല്ലുവിളിയായിരുന്നു അത്. അത് അഭിഷേക് സ്വീകിരിക്കുക മാത്രമല്ല, മില്‍നെയുടെ ഫുള്‍ ലെങ്ത് പന്ത് ജേക്കബ്‌സിന്റെ തലയ്ക്ക് മുകളിലൂടെ റോപ്പുകള്‍ക്കപ്പുറം നിക്ഷേപിച്ചു, ശേഷം രണ്ട് ഷോര്‍ട്ട് ഓഫ് ദ ലെങ്ത് ഡെലിവറി കവറിലേക്ക്. ഫലത്തില്‍ ഒരു വ്യത്യാസം മാത്രം, ഒന്ന് സിക്സും മറ്റൊന്ന് ഫോറും.

ഉടൻ തന്നെ ബൗളിങ് ഷിഫ്റ്റ് നടത്തി സാന്റനര്‍. അഭിഷേകിന്റേയും വൈഭവിന്റെയും സ്കോറിങ്ങിന് തടയിടാൻ ഓഫ് സ്പിന്നര്‍, മിച്ചല്‍ ബ്രേസ്‌വല്‍. ഫോര്‍, സിക്സ്, ഫോര്‍, വണ്‍. അഭിഷേക് തന്റെ ഊഴം അവസാനിപ്പിച്ചു. ബ്രേസ്‌വല്‍ ലൈനും ലെങ്തുമെല്ലാം തുടരെ മാറ്റിയെങ്കിലും അഭിഷേക് കവര്‍ റീജിയൻ എക്സ്പ്ലോയിറ്റ് ചെയ്തുകൊണ്ടേയിരുന്നു. സ്കോര്‍ബോര്‍ഡില്‍ 50 കടക്കാൻ ഇന്ത്യക്ക് ആവശ്യമായി വന്നത് കേവലം 14 പന്തുകള്‍ മാത്രം. വൈഭവ് ഒരിക്കല്‍ക്കൂടി ബ്രേസ്‌വെല്ലിനെ തലതാഴ്ത്തി മടങ്ങാൻ പ്രേരിപ്പിച്ചിട്ടാണ് ഓവര്‍ അവസാനിപ്പിക്കുന്നത്, 21 റണ്‍സ് ആകെ.

നാലാം ഓവര്‍, നാലാം ബൗളിങ് ചേയ്ഞ്ച്. ബട്ട് സെയിം സ്റ്റോറി. കെയില്‍ ജാമിസണിനെ ഓഫ് സൈഡിലും ലെഗ് സൈഡിലും ഒരുപോലെ ഡൊമിനേറ്റ് ചെയ്യുന്ന അഭിഷേകിന്റെ ബാറ്റ്. 15 പന്തില്‍ അര്‍ദ്ധ സെഞ്ചുറി. വലം കയ്യൻ പേസറുടെ ഓവറും 20 തൊട്ടു. കമന്ററി ബോക്സില്‍ ഇരുന്ന് ഇയാൻ സ്മിത്ത് പറയുന്നുണ്ടായിരുന്നു പവര്‍പ്ലേയില്‍ സ്കോര്‍ 100ലെത്തിയേക്കുമെന്ന്. പവര്‍പ്ലേ അവസാനിക്കാൻ കാത്തുനിന്നില്ല, അഞ്ചാം ഓവര്‍ അവസാനിക്കുമ്പോള്‍ ഇന്ത്യ മൂന്നക്കം തൊട്ടു.

പവര്‍പ്ലേയിലെ അവസാന ഓവര്‍, അഭിഷേക് വൈഭവിനോട് ഒന്നേ പറഞ്ഞുള്ളു, ഗോ ഫോര്‍ യുവര്‍ ഷോട്ട്സ്. ഫലം മൂന്ന് ഫോറും ഒരു സിക്സും, അഭിഷേകിന് സമാനമായി ഓഫ് സൈഡായിരുന്നു വൈഭവിന്റെ ടാര്‍ഗറ്റും. ഇന്നിങ്സ് ആരംഭിക്കുമ്പോള്‍ ഇന്ത്യയുടെ റിക്വേഡ് റണ്‍റേറ്റ് പത്തിന് തൊട്ടരികിലായിരുന്നെങ്കില്‍, പവര്‍പ്ലേ തീരുമ്പോഴത് അഞ്ചിലേക്ക് വീണു. 118 റണ്‍സ്, അന്താരാഷ്ട്ര ക്രിക്കറ്റിലെ ഏറ്റവും ഉയര്‍ന്ന പവര്‍പ്ലേ സ്കോര്‍. സ്വന്തം മണ്ണില്‍ മാത്രമെ ഇന്ത്യക്ക് ഡൊമിനേറ്റ് ചെയ്യാൻ കഴിയുവെന്ന വിമര്‍ശിച്ചവര്‍ക്കൊക്കെ നിശബ്ദതപാലിക്കാം ഇനി.

എന്നാല്‍ ഫീല്‍ഡിങ് ആനുകൂല്യങ്ങള്‍ എല്ലാം എടുത്തുമാറ്റപ്പെട്ടപ്പോഴും അഭിഷേകിന്റെ ശൈലിക്ക് മാറ്റമുണ്ടായില്ല. ബ്രേസ്‌വെല്ലിനെ തുടരെ ഗ്യാലറിയിലേക്ക് അയച്ചു. ഫിഷറിന് മുന്നില്‍ വൈഭവ് കീഴടങ്ങിയപ്പോഴും നിര്‍ത്താൻ ഒരുക്കമായിരുന്നില്ല. മിഡ് വിക്കറ്റും ഡീപ് മിഡ് വിക്കറ്റും താണ്ടിയ രണ്ട് സിക്സറുകള്‍. 10-ാം ഓവറിലെ മൂന്നാം പന്ത് ഷോര്‍ട്ട് ഫൈനിലേക്ക് തിരിച്ചുവിട്ട് സെഞ്ചുറി, 35 പന്തില്‍.

ശേഷം, ഹെല്‍മെറ്റൂരി വിക്കറ്റില്‍ ഇരുന്നു. മെഡിറ്റേഷൻ പൊസില്‍ ഒരു സെലിബ്രേഷൻ. The storm passed. The calm took over for a second.

ടി20യില്‍ ഇന്ത്യക്കായി ഏറ്റവുമധിക സെഞ്ചുറികള്‍, 11. മറികടന്നത് സാക്ഷാല്‍ വിരാട് കോഹ്ലിയെ. അന്താരാഷ്ട്ര ക്രിക്കറ്റിലെ നാലാം ശതകം. പിന്നാലെ നേരിട്ട രണ്ട് പന്തുകളും റോപ്പ് കടത്തിയാണ് ഇന്നിങ്സ് അവസാനം തൊട്ടത്. 38 പന്തില്ർ 113 റണ്‍സ്. ഒൻപത് ഫോറും 11 സിക്സും. അതായത് 20 പന്തുകളിലും ബൗണ്ടറി. സഞ്ജുവും ശ്രേയസും വീണെങ്കിലും 13.2 ഓവറില്‍ ഇന്ത്യ വിജയം നേടിയെടുത്തു, പരമ്പരയും. ദാറ്റ് വാസ് സം ബാറ്റിങ് ആൻഡ് ചെയ്സിങ്.

കിഷൻ വന്നു, വൈഭവിനെ ഒഴിവാക്കി, ഗംഭീറിന്റെ പിന്തുണ സഞ്ജുവിന്; കാരണമുണ്ട്

Hari Krishnan M — Fri, 30 Oct 2026 14:02:17 +0530

ന്യൂസിലിൻഡിനെതിരായ നാലാം ടി20ക്ക് ഓക്ക്‌ലൻഡില്‍ കളം ഒരുങ്ങും മുൻപ് തന്നെ ഇഷാൻ കിഷൻ തന്റെ മടങ്ങിവരവിന്റെ സൂചനകള്‍ നല്‍കിയിരുന്നു. അപ്പോള്‍ ഒരു ചോദ്യമാണ് മുന്നിലുണ്ടായിരുന്നത്, പലപ്പോഴും ഉയര്‍ന്നുകേട്ട ആ ആശയക്കുഴപ്പം. സഞ്ജു സാംസണിന്റെ ഭാവി ഇനി എന്തായിരിക്കുമെന്ന്. അങ്ങനെയൊരു ആശങ്കയ്ക്കുള്ളതെല്ലാം വെല്ലിങ്ടണില്‍ അഭിഷേക് ശര്‍മയും വൈഭവ് സൂര്യവംശിയും ബാക്കിവെച്ചിരുന്നല്ലോ...

പക്ഷേ, ടോസ് വിജയിച്ച ശേഷം ശ്രേയസ് അയ്യര്‍ ഇന്ത്യൻ ടീമിന്റെ നിലപാട് പ്രഖ്യാപിച്ചു. ഇഷാൻ കിഷൻ കംസ് ബാക്ക് ഇൻ ഫോര്‍ വൈഭവ് സൂര്യവംശി. ഇതിന്റെ സാരാംശം ഇങ്ങനെയായിരുന്നു, സഞ്ജുവായിരിക്കും ഇന്ത്യയുടെ ഫസ്റ്റ് ചോയിസ് ഓപ്പണറെന്ന്, അതില്‍ അടുത്തെങ്ങും മാറ്റമുണ്ടാകില്ല...കാരണം ആ സ്ഥാനം അയാള്‍ നേടിയെടുത്തതിന് പിന്നില്‍ ലോകകിരീടത്തിന്റെ തിളക്കമുണ്ട്...

വെല്ലിങ്ടണില്‍ അഭിഷേക് - വൈഭവ് കൂട്ടുകെട്ട് പടുത്തുയര്‍ത്തിയത് അന്താരാഷ്ട്ര ടി20 ചരിത്രത്തിലെ തന്നെ ഏറ്റവും വലിയ പവര്‍പ്ലേ സ്കോററായിരുന്നു, 118 റണ്‍സ്. ബ്രൂട്ടല്‍ ഹിറ്റിങ്ങിന്റെ പര്യായമായി മാറിയ ആറ് ഓവറുകള്‍. പക്ഷേ, അവിടെ ടീമിന്റെ തീരുമാനത്തിനൊപ്പം നിന്ന് തന്റെ കരിയറിന് പുതുജീവൻ നല്‍കിയ ഓപ്പണിങ് സ്ഥാനം വിട്ടുനല്‍കി മൂന്നാം നമ്പറിലേക്കിറങ്ങിയത് സഞ്ജുവായിരുന്നു. മത്സരശേഷം അഭിനന്ദനങ്ങള്‍ ഒരുപാട് തേടിയെത്തിങ്കിലും പവര്‍പ്ലേയ്ക്ക് ശേഷം ക്രീസിലെത്തിയ സഞ്ജുവിന് ഇന്ത്യയുടെ വിജയം ഉറപ്പിക്കാനാകാതെയാണ് മടങ്ങേണ്ടി വന്നത്.

കാരണം മൂന്നാം നമ്പറെന്ന സഞ്ജുവിന്റെ ശൈലിക്ക് യോജിച്ചതല്ല. ഈ പൊസിഷനില്‍ കരിയറിലുടനീളം സക്സസ് നേടിയെടുക്കാൻ സഞ്ജുവിന് കഴിഞ്ഞിട്ടില്ല എന്നത് വസ്തുതയായും മുന്നിലുണ്ട്. എട്ട് ഇന്നിങ്സുകളിലാണ് സഞ്ജു മൂന്നാം നമ്പറില്‍ ഇന്ത്യക്കായി ബാറ്റ് ചെയ്തിട്ടുള്ളത്. ഒരു അര്‍ദ്ധ സെഞ്ചുറിയടക്കം 118 റണ്‍സ് മാത്രമാണ് നേട്ടം. ശരാശരി 14, സ്ട്രൈക്ക് റേറ്റ് 120നും താഴെ. എന്നാല്‍ ഓപ്പണറായി 43 ഇന്നിങ്സുകളില്‍ നിന്ന് 10 സ്ട്രൈക്ക് റേറ്റില്‍ 1334 റണ്‍സ് നേടി. മൂന്ന് സെഞ്ചുറിയും ഒരു അര്‍ദ്ധ ശതകവുമുണ്ട്.

സ്ട്രൈക്ക് റേറ്റും ശരാശരിയുമെടുത്താല്‍ ലോക ഒന്നാം നമ്പര്‍ ടി20 ബാറ്ററായ അഭിഷേകിന് തൊട്ടടുത്താണ് സഞ്ജു. ഇതിനൊപ്പം ചേര്‍ത്തുവെക്കേണ്ടത് സമീപകാലത്തെ സഞ്ജുവിന്റെ പ്രകടനമാണ്. കഴിഞ്ഞ എട്ട് മത്സരങ്ങളില്‍ മൂന്ന് അര്‍ദ്ധ സെഞ്ചുറികളാണ് വലം കയ്യൻ ബാറ്റര്‍ നേടിയത്. വിൻ‍ഡീസ് പരമ്പരയില്‍ രണ്ടെണ്ണം. ഇതിനെല്ലാം ഉപരി ക്രൈസ്റ്റ് ചര്‍ച്ചിലെ ഒന്നാം ടി20യില്‍ ഇന്ത്യ ചരിത്ര വിജയം നേടുമ്പോള്‍ അതിന് അടിത്തറ പാകിയതും സഞ്ജുവിന്റെ ഇന്നിങ്സായിരുന്നു. എട്ട് ഫോറും നാല് സിക്സും ഉള്‍പ്പെടെ 33 പന്തില്‍ 67 റണ്‍സ്.

ഇന്ത്യയിലെ സാഹചര്യങ്ങളില്‍ മാത്രമെ സഞ്ജുവിന് തിളങ്ങാനാകുവെന്ന വിമര്‍ശനം ഉയര്‍ത്തിയവര്‍ക്കുള്ള മറുപടി കൂടിയായിരുന്നു ക്രൈസ്റ്റ് ചര്‍ച്ചിലെ റണ്‍വേട്ട. ഇതെല്ലാം വിസ്മരിച്ചുകൊണ്ട് സഞ്ജുവിനെ തഴയുക എന്നത് ടീം മാനേജ്മെന്റിന് സാധിക്കുന്ന കാര്യമല്ലെന്ന് ഗൗതം ഗംഭീര്‍ വ്യക്തമാക്കിയിട്ടുണ്ട്, നായകൻ ശ്രേയസും ഗംഭീറിന്റെ നിലപാടിനൊപ്പമാണ്. ഇതിനെല്ലാം പുറമെ മറ്റൊന്നുകൂടിയുണ്ട്. 2028 ടി20 ലോകകപ്പ്. ആ പ്രൊജക്റ്റിലേക്കുള്ള ആദ്യ പടികൂടിയാണ് നിലവില്‍ പുരോഗമിക്കുന്ന ന്യൂസിലൻഡ് പര്യടനം. കാരണം 2028 ഒക്ടോബറില്‍ ആരംഭിക്കുന്ന ടൂര്‍ണമെന്റിന് ആതിഥേയത്വം വഹിക്കുന്നത് ഓസ്ട്രേലിയയും ന്യൂസിലൻഡുമാണ്.

അതുകൊണ്ട് തന്നെ ഈ പരമ്പരയിലെ പ്രകടനം ടീം സെലക്ഷനില്‍ നിര്‍ണായക പങ്കുവഹിക്കാൻ സാധ്യതയുമുണ്ട്. ലോകകപ്പ് പോലൊരു വലിയ ടൂര്‍ണമെന്റില്‍, ഹൈ പ്രഷര്‍ സാഹചര്യങ്ങളില്‍ മികവ് തെളിയിക്കാൻ കഴിയണം. ഹൈ പ്രഷറില്ലാത്ത മത്സരങ്ങളില്‍ വലിയ സ്കോര്‍ നേടുന്നതും പ്രഷറുള്ള മത്സരങ്ങളില്‍ തിളങ്ങുന്നതും തമ്മില്‍ വ്യത്യാസമുണ്ട്. 2026 ടി20 ലോകകപ്പില്‍ സഞ്ജുവിന്റെ മൂന്ന് അര്‍ദ്ധ സെഞ്ചുറികളും വന്നത് അത്തരം മത്സരങ്ങളിലായിരുന്നു, ക്രൈസ്റ്റ് ചര്‍ച്ച് ടി20യും ഹൈ പ്രഷര്‍ ഗെയിമായിരുന്നു.

വൈഭവിന്റെ ഹൈലി അഗ്രസീവ് അപ്രോച്ച് ഒരുവശത്ത് നില്‍ക്കുമ്പോഴും സഞ്ജുവിനെ മാനേജ്മെന്റ് ബാക്ക് ചെയ്യുന്നതിന്റെ കാരണവും ഇതാണ്. പ്രഷര്‍ അബ്സോര്‍ബ് ചെയ്ത് മാച്ച് വിന്നിങ് പെര്‍ഫോമൻസ് പുറത്തെടുക്കാനുള്ള എബിലിറ്റി.

നിസ്വാർത്ഥതയുടെ പര്യായം; തീരുമാനങ്ങള്‍ക്കൊണ്ട് ടീമിനായി കളിക്കുന്ന സഞ്ജു സാംസണ്‍

Hari Krishnan M — Thu, 29 Oct 2026 14:48:28 +0530

True greatness isn't just about runs and records, it's about putting the team first - ഒരു കളിക്കാരന്റെ യഥാർത്ഥ മഹത്വം തിരിച്ചറിയുന്നത് റണ്‍സിലൂടെയും റെക്കോര്‍ഡുകളിലൂടെയും മാത്രമല്ല, മറിച്ച് അയാള്‍ തന്റെ വ്യക്തിഗത നേട്ടങ്ങള്‍ക്ക് മുകളില്‍ ടീമിന് എത്രത്തോളം മുൻഗണന നല്‍കുന്നുവെന്ന് കൂടി മനസിലാക്കുമ്പോഴാണ്...

വെല്ലിങ്ടണില്‍ അഭിഷേക് ശര്‍മയും വൈഭവ് സൂര്യവംശിയും ചേര്‍ന്ന് ന്യൂസിലൻഡ് ബൗളര്‍മാര്‍ക്ക് ബ്രൂട്ടല്‍ ഹിറ്റിങ്ങിന്റെ പുതിയൊരു അധ്യായം പഠിപ്പിച്ചുകൊടുക്കുമ്പോള്‍ ഡഗൗട്ടില്‍ തന്റെ കരിയറിന് വളമായ ഓപ്പണിങ് സ്ഥാനം തൃജിച്ചുകൊണ്ടൊരാള്‍ ഉണ്ടായിരുന്നു, സഞ്ജു വിശ്വനാഥ് സാംസണ്‍. മത്സരശേഷം വാഴ്ത്തുപാട്ടുകള്‍ തന്നെ തേടിയെത്തുമ്പോഴും അഭിഷേകിന് പറയാനുണ്ടായിരുന്നത് സഞ്ജുവിനെക്കുറിച്ചായിരുന്നു.

പരിചിതമായ ഒരു ബാറ്റിങ് പൊസിഷൻ വിട്ടുനല്‍കുക എന്നത് എളുപ്പമുള്ള കാര്യമല്ല. സഞ്ജു ഭായ് അദ്ദേഹത്തിന്റെ നിസ്വാര്‍ത്ഥമായ മനോഭാവമാണ് കാണിച്ചത്, അഭിഷേക് പറഞ്ഞു. തന്റെ പ്രിയ ശിഷ്യന്റെ അസാധാരണമായ ഇന്നിങ്സിനെ അഭിനന്ദിക്കുമ്പോഴും യുവരാജ് സിങ് സഞ്ജുവിന്റെ ത്യാഗത്തെ വിസ്മരിച്ചിരുന്നില്ല. Hats off to Sanju Samson, playing at no. 3 as a complete team man എന്നായിരുന്നു യുവി എക്‌സില്‍ കുറിച്ചത്.

ഒപ്പണിങ് സ്ലോട്ടിലേക്ക് കടുത്ത മത്സരം നടക്കുമ്പോള്‍, തന്റെ സ്ഥാനം നഷ്ടമാകാനുള്ള സാധ്യതകള്‍ പോലും ഉയര്‍ന്ന് നില്‍ക്കുമ്പോഴായിരുന്നു സഞ്ജുവിന്റെ ഈ തീരുമാനം. ഇന്ത്യൻ ക്രിക്കറ്റ് ടീമില്‍ സഞ്ജുവിനോളം കയ്യടികള്‍ അര്‍ഹിക്കുന്ന മറ്റൊരു താരം ഉണ്ടാകില്ല. 2023 ഏകദിന ലോകകപ്പില്‍ രോഹിത് ശര്‍മ ടീമിന് മുൻതൂക്കം നല്‍കി തനിക്ക് അനായാസം നേടിയെടുക്കാൻ കഴിയുമായിരുന്ന സെഞ്ചുറികളും അര്‍ദ്ധ ശതകങ്ങളും ബലികൊടുത്തത് ഓര്‍മയില്ലേ. ഒരുപക്ഷേ അതിനൊപ്പം ചേര്‍ത്തുവെക്കാം സഞ്ജുവിന്റെ കരിയറിനേയും.

ഇവിടെ എടുത്തുപറയേണ്ടത് മറ്റൊന്നാണ്. പവര്‍പ്ലേയുടെ ആനുകൂല്യം പരമാവധി പ്രയോജനപ്പെടുത്തി ഇന്നിങ്സിന് അടിത്തറയിടുന്നതാണ് സഞ്ജുവിന്റെ ശൈലി. ഫീല്‍ഡിങ് ആനൂകൂല്യങ്ങള്‍ ഒഴിവാക്കിയാലും അതേ ടെമ്പൊ തുടരാൻ കഴിയുമെന്ന് സഞ്ജു 2026 ടി20 ലോകകപ്പില്‍ മൂന്ന് തവണ തെളിയിച്ചതുമാണ്. പക്ഷേ, മൂന്നാം നമ്പറിലേക്ക് ചുവടുമാറുമ്പോള്‍ സാഹചര്യങ്ങള്‍ വ്യത്യസ്തമാണ്. ഇവിടെ പരിശോധിക്കേണ്ടത് സഞ്ജുവിന് ഈ പൊസിഷനില്‍ സക്സസ് ഉണ്ടോയെന്നതാണ്.

എട്ട് ഇന്നിങ്സുകളിലാണ് സഞ്ജു മൂന്നാം നമ്പറില്‍ ബാറ്റ് ചെയ്തിട്ടുള്ളത്. ഒരു അര്‍ദ്ധ സെഞ്ചുറിയടക്കം 118 റണ്‍സ് മാത്രമാണ് നേട്ടം. ശരാശരി 14, സ്ട്രൈക്ക് റേറ്റ് 120നും താഴെ. ഇനി ഓപ്പണറായുള്ള കണക്കുകള്‍ പരിശോധിക്കാം. 43 ഇന്നിങ്സുകള്‍, മൂന്ന് സെഞ്ചുറി, ഒൻപത് അര്‍ദ്ധ ശതകം. 180 സ്ട്രൈക്ക് റേറ്റില്‍ 1334 റണ്‍സ്. സ്ട്രൈക്ക് റേറ്റിലും ശരാശരിയിലും അഭിഷേകിനേക്കാള്‍ അല്‍പ്പം മാത്രമാണ് പുറകിലുള്ളതും. തനിക്ക് കൂടുതല്‍ പരാജയം സംഭവിച്ചിട്ടുള്ള മൂന്നാം നമ്പറിലേക്കാണ് സഞ്ജു ഇറങ്ങിയിരിക്കുന്നത്. അഭിഷേക് പറഞ്ഞതുപോലെ, ദാറ്റ് ഷോസ് ഹിസ് ക്യാരക്റ്റ‍ര്‍.

അഭിഷേക്, സഞ്ജു, വൈഭവ്, ഇഷാൻ കിഷാൻ. ഇത് ഇന്ത്യൻ ക്രിക്കറ്റ് മാനേജ്മെന്റിനെ സംബന്ധിച്ച് ഒരു ഡിലമ അല്ല. മറിച്ച് ഒരു ലക്ഷ്വറിയാണ്. എതിര്‍ ടീമിനെ പവര്‍പ്ലേയില്‍ തന്നെ മത്സരത്തില്‍ നിന്ന് തുടച്ചുമാറ്റാൻ കഴിയുന്ന നാല് താരങ്ങള്‍, നാല് പേരും ഓപ്പണര്‍മാരും. വൈഭവിനേയും സഞ്ജുവിനേയും സാഹചര്യങ്ങള്‍ക്ക് അനുസരിച്ച് ഉപയോഗിക്കാൻ ഇന്ത്യക്ക് സാധിക്കും. ക്രൈസ്റ്റ് ചര്‍ച്ചിലെ സ്വിങ്ങിങ് കണ്ടീഷനില്‍ സഞ്ജുവിനേയും വെല്ലിങ്ടണില്‍ വൈഭവിനെ ഇറക്കിയതും ഉദാഹരണമായി പറയാം.

ഇഷാൻ ഏത് പൊസിഷനിലും ഒരുപോലെ തിളങ്ങുമെന്ന് സമീപകാലത്ത് തെളിയിച്ചിട്ടുണ്ട്, ഇഷാന്റെ ഫ്ലെക്സിബിലിറ്റി ഇന്ത്യയുടെ മറ്റൊരു പോസിറ്റീവാണ്. ഇവിടെ പരസ്പരം നല്‍കുന്ന പിന്തുണയാണ് വിജയത്തിന്റെ ആധാരം. സഞ്ജു അഗ്രസീവ് മോഡിലേക്ക് ഷിഫ്റ്റ് ചെയ്യുമ്പോള്‍ അഭിഷേക് സെക്കൻഡ് ഫിഡിലായി മാറാറുണ്ട്. ലോകകപ്പില്‍ സഞ്ജു ഫോമിലേക്ക് ഉയര്‍ന്നപ്പോള്‍ സപ്പോര്‍ട്ട് നല്‍കാൻ ഇഷാൻ തയാറായതുപോലെ. വൈഭവ് സൂര്യവംശി ഇക്വേഷനിലേക്ക് വരുമ്പോഴാണ് രണ്ട് എൻഡുകളിലും അഗ്രസീവ് ക്രിക്കറ്റ് കാണാനാകുന്നത്.

സെലക്ഷനിലെ ആശയക്കുഴപ്പങ്ങളും വിമര്‍ശനങ്ങളും ആരാധകര്‍ക്കിടയിലുണ്ടാകും, എന്നാല്‍ മാനേജ്മെന്റിനെ സംബന്ധിച്ചിടത്തോളം അഗ്രസീവ് അപ്രോച്ചില്‍ വിട്ടുവീഴ്ച ചെയ്യാതെ തന്നെ ഈ മാറ്റങ്ങളെല്ലാം നടപ്പാക്കാനാകും. ഇന്ത്യക്ക് മറ്റ് ടീമുകള്‍ക്ക് മുകളില്‍ ലഭിക്കുന്ന എഡ്ജും ഇതാണ്. The focus is on winning matches, not personal milestones.

അര്‍ഷദീപ് വരുന്നു, ഇനി ബുമ്രയ്ക്കൊപ്പം! കംബാക്കിനുറച്ച് മുംബൈ ഇന്ത്യൻസ്

Hari Krishnan M — Sun, 08 Nov 2026 13:03:25 +0530

അന്തരീക്ഷത്തില്‍പ്പോലും ക്രിക്കറ്റ് തുടിക്കുന്ന വാംഖഡെ. 2027 ഐപിഎല്‍ സീസണിലെ ആദ്യ മത്സരം. ടോസ് വിജയിച്ച നായകൻ രോഹിത് ശര്‍മ ബൗളിങ് തിരഞ്ഞെടുക്കുന്നു. നീലപുതച്ച ഗ്യാലറിയുടെ ആരവങ്ങള്‍ക്കിടയില്‍ ഗാര്‍വാരെ പവലിയൻ എൻഡില്‍ നിന്ന് അര്‍ഷദീപ് സിങ്, മനോഹരമായൊരു ഇൻസ്വിങ്ങര്‍ ഓഫ് സ്റ്റമ്പിനെ നിലം പതിപ്പിക്കുകയാണ്, ശേഷം ടാറ്റ എൻഡില്‍ നിന്ന് സാക്ഷാല്‍ ജസ്പ്രിത് ബുമ്ര...പീക്ക്...

മുംബൈ ഇന്ത്യൻസിനെ പരാജയപ്പെടുത്തണമെങ്കില്‍ 16 ഓവറുകള്‍ മാത്രമാണ് നിങ്ങള്‍ക്ക് മുന്നിലുള്ളതെന്ന് പറയാറുണ്ട്, അവശേഷിക്കുന്ന നാല് ഓവറുകള്‍ ബുമ്രയുടേയതാണ്. ആ പറച്ചിലിന് ഒരുമാറ്റം വരാൻ പോകുന്നു, ഇനി ബുമ്രയുടെ നാല് ഓവറിനൊപ്പം ഒരു സ്പെല്ലുകൂടി അതിജീവിക്കണം, ന്യൂബോളിലും ഡെത്തിലും. യെസ്, വിഖ്യാതമായ ആ ബ്ലൂ ആൻഡ് ഗോള്‍ഡ് ജഴ്സി അര്‍ഷദീപ് സിങ് അണിയാൻ പോകുന്നു...മുംബൈ ഈസ് കുക്കിങ് വെല്‍...

അര്‍ഷദീപിന്റെ വരവ് മുംബൈയെ എത്രത്തോളം ശക്തരാക്കുന്നുവെന്ന് ചോദിച്ചാല്‍ അതിന് ഒരു ഉത്തരമെയുള്ളു. മുംബൈ അവരുടെ ഏറ്റവും മികച്ച കാലത്തിലേക്ക് മടങ്ങിപ്പോകൻ ഒരുങ്ങുന്നു. ഭംഗിവാക്കല്ല ഇത്.

അഞ്ച് തവണ കിരീടം ചൂടിയ മുംബൈ ഇന്ത്യൻസിന്റെ ഡൗണ്‍ഫാളിന്റെ കാരണം തേടിപ്പോകുമ്പോള്‍ അത് എത്തി നില്‍ക്കുന്നത് ബൗളിങ് നിരയിലേക്കാണ്. പ്രത്യേകിച്ചും 2021 സീസണിന് ശേഷം, ബുമ്ര-ട്രെന്റ് ബോള്‍ട്ട് ദ്വയം വേര്‍പിരിഞ്ഞതിന് ശേഷം. ഇവിടെ ബോള്‍ട്ടിന് മുൻപും മുംബൈ ഡൊമിനേറ്റ് ചെയ്തിട്ടില്ലേ എന്ന ചോദ്യം ഉയര്‍ന്നേക്കാം, പക്ഷേ ബോള്‍ട്ടിന്റെ പടിയിറക്കത്തിന് പിന്നാലെ ഒരു ക്വാളിറ്റി ലെഫ്റ്റ് ആം പേസറെ മുംബൈക്ക് കണ്ടെത്താൻ കഴിഞ്ഞിരുന്നില്ല. ബോള്‍ട്ടിന് മുൻപ്, മിച്ചല്‍ ജോണ്‍സണും മിച്ചല്‍ മക്‌ലനഗനുമൊക്കെ മുംബൈക്കൊപ്പമുണ്ടായിരുന്നു.

ഇതോടെ ബുമ്രയെന്ന ഒറ്റപ്പേരിലേക്ക് മാത്രം ബൗളിങ് നിര ചുരുങ്ങിയ സീസണുകളായിരുന്നു പിന്നീട് മുംബൈക്കുണ്ടായത്. എന്നാല്‍, 2025 സീസണിന് മുന്നോടിയായി നടന്ന താരലേലത്തില്‍ ബോള്‍ട്ടിനേയും ഒപ്പം ഐപിഎല്ലിലെ തന്നെ ഏറ്റവും മികച്ച ന്യൂ ബോളര്‍മാരിലൊരാളായ ദീപക് ചാഹറിനെയും മുംബൈ നേടുന്നു. ബോള്‍ട്ട് 2025ല്‍ മികവ് പുലര്‍ത്തിയെങ്കിലും കഴിഞ്ഞ സീസണില്‍ പൂര്‍ണമായും പരാജയപ്പെട്ടു, ചാഹറിനാകട്ടെ രണ്ട് എഡിഷനിലും ഇംപാക്റ്റുണ്ടാക്കാൻ സാധിച്ചതുമില്ല.

2026ലെ ബോള്‍ട്ടിന്റെ എക്കോണമി 11.6 ആണ്, ചാഹറിന്റേത് 10.4 ഉം. ഇരുവരും കൂടെ നേടിയത് 13 വിക്കറ്റുകളും. ഇവിടേക്കാണ് അര്‍ഷദീപ് എത്തുന്നത്. അന്താരാഷ്ട്ര ടി20യിലെ ഇന്ത്യയുടെ ലീഡിങ് വിക്കറ്റ് ടേക്കര്‍, ബുമ്ര കഴിഞ്ഞാല്‍ ഫോര്‍മാറ്റിലെ ഏറ്റവും മികച്ച ഇന്ത്യ പേസറും അര്‍ഷദീപാണ്. എന്നാല്‍, സമീപകാലത്തെ വിക്കറ്റ് ടേക്കറെന്ന നിലയില്‍ അര്‍ഷദീപ് തിളങ്ങുന്നുണ്ടെങ്കിലും ഹൈലി എക്സ്പെൻസീവായാണ് കാണുന്നത്. ദേശീയ കുപ്പായത്തില്‍ ശ്രേയസ് അയ്യറിനും സൂര്യകുമാര്‍ യാദവിനും കീഴില്‍ ഇതായിരുന്നു സ്ഥിതി.

ഐപിഎല്ലിലും വ്യത്യസ്തമായിരുന്നില്ല, 2026ല്‍ 10.21 എക്കോണമിയില്‍ 14 വിക്കറ്റുകള്‍ മാത്രമാണ് നേടാനായതും. പഞ്ചാബിന്റെ ഹോം സ്റ്റേഡിയത്തിലെ വിക്കറ്റ് ബാറ്റിങ്ങിന് അനുകൂലമായതും ഐപിഎല്ലിലെ ഫ്ലാറ്റ് പിച്ചുകളുടെ എണ്ണം വര്‍ധിച്ചതുമൊക്കെ കാരണമായി ചൂണ്ടിക്കാണിക്കാം. ഇവിടെയാണ് മുംബൈയിലേക്ക് വരുമ്പോള്‍ കാര്യങ്ങള്‍ മാറിമറിയാൻ പോകുന്നത്. അത് വിക്കറ്റിന്റെ കാര്യത്തില്‍ അല്ല, മറിച്ച് ക്യാപ്റ്റൻസിയുടെ ഇംപാക്റ്റിലാണ്.

രോഹിത് മുംബൈയുടെ നായകനായി മടങ്ങിയെത്തുമെന്ന കാര്യം ഏറെക്കുറെ ഉറപ്പായിക്കഴിഞ്ഞു. അര്‍ഷദീപിന്റെ അന്താരാഷ്ട്ര കരിയറെടുത്താല്‍ ഏറ്റവും മികച്ച കാലഘട്ടം രോഹിതിന് കീഴിലായിരുന്നു. 27 മത്സരങ്ങളില്‍ നിന്ന് 48 വിക്കറ്റുകള്‍. എക്കോണമി കേവലം 7.8 മാത്രമാണ്. ഒരു കളിയില്‍ ശരാശരി രണ്ട് വിക്കറ്റോളം വീഴ്ത്താൻ അര്‍ഷദീപിന് സാധിക്കുന്നുണ്ട്. താരത്തിന്റെ മികവും എങ്ങനെ ഉപയോഗിക്കണമെന്നതില്‍ കൃത്യമായ ധാരണ രോഹിതിനുണ്ടായിരുന്നു. 2024 ടി20 ലോകകപ്പ് ഫൈനല്‍ ഉദാഹരണമായി കാണാൻ കഴിയും.

സൂര്യക്ക് കീഴില്‍ 38 മത്സരങ്ങളില്‍ നിന്നാണ് 53 വിക്കറ്റ്, എക്കോണമി ഒൻപതിന് മുകളില്‍. ശ്രേയസിനൊപ്പം 20 ടി20യാണ് ഇതുവരെ കളിച്ചത്, നേടിയതാകട്ടെ 24 വിക്കറ്റും, ഇവിടെയും ഒരു ഓവറില്‍ ഒൻപത് റണ്‍സിന് മുകളില്‍ വിട്ടുനല്‍കുന്നുണ്ട്. രോഹിതിന്റെ കീഴിലെ അര്‍ഷദീപ് ഈസ് സംതിങ് എല്‍സ് എന്ന് വ്യക്തമാക്കുന്നതാണ് ഈ കണക്കുകളൊക്കെയും. ബുമ്ര-അര്‍ഷദീപ്. ഇന്ത്യയുടെ ഏറ്റവും മികച്ച ന്യൂബോള്‍, ഡെത്ത് ബൗളര്‍മാര്‍ രോഹിതിന്റെ ക്യാപ്റ്റൻസിയില്‍...

ഹാര്‍ദിക്കിന്റെ പടിയിറക്കം മുംബൈ ഡ്രെസിങ് റൂമിലെ പ്രശ്നങ്ങള്‍ക്കൊക്കെയും പരിഹാരവും കണ്ടെത്താൻ സഹായിച്ചേക്കും, ടോപ് ലെവലിലേക്ക് മടങ്ങിയെത്താനുള്ള ആത്മവിശ്വാസം രോഹിതിന്റെ നേതൃത്വം നല്‍കുമെന്നതില്‍ സംശയമില്ല. കാണാൻ പോകുന്നത് മുംബൈയുടെ കംബാക്ക് തന്നെ...

ഐപിഎല്‍ ജനുവരിയിലേക്ക്? അന്താരാഷ്ട്ര കലണ്ടർ പൊളിക്കുമോ ഐസിസി? വെല്ലുവിളികള്‍

Hari Krishnan M — Thu, 12 Nov 2026 15:40:30 +0530

ഐപിഎല്‍ ജനുവരിയിലേക്ക് മാറ്റണം, അല്ലെങ്കില്‍ ഒക്ബോർ മുതല്‍ ഏപ്രില്‍ വരെയുള്ള സമയങ്ങളില്‍ വെല്‍ സ്ട്രക്‌ചേഡായൊരു ലോങ്ങര്‍ ടൂര്‍ണമെന്റ്! ഐപിഎല്ലിന്റെ മുൻ ചെയർമാൻ ലളിത് മോഡി മുന്നോട്ട് വെച്ചിരിക്കുന്ന ആശയത്തിന് കൊല്‍ക്കത്ത നൈറ്റ് റൈഡേഴ്‌സിന്റേയും പഞ്ചാബ് കിങ്സിന്റേയും ഉടമകള്‍ പിന്തുണ പ്രഖ്യാപിച്ചു കഴിഞ്ഞു. അന്താരാഷ്ട്ര കലണ്ടറിനെ തന്നെ ഉടച്ചുവാര്‍ക്കേണ്ടി വരുന്ന ഈ മാറ്റം അനിവാര്യമാണോ, നീക്കത്തിന് പിന്നിലെ കാരണവും വെല്ലുവിളികളും പരിശോധിക്കാം.

ഐപിഎല്‍ ഇന്ന് കേവലമൊരു ടി20 ലീഗ് മാത്രമല്ല. ലോകക്രിക്കറ്റില്‍ തന്നെ ഏറ്റവും സ്വാധീനം ചെലുത്തുന്ന ടൂർണമെന്റാണ്, അത് ക്രിക്കറ്റിന്റെ കാര്യത്തില്‍ ഒതുങ്ങുന്നതല്ല, വാണിജ്യപരമായും. അന്താരാഷ്ട്ര കലണ്ടറില്‍ സുപ്രധാനമായൊരു സ്ഥാനം ലീഗ് നേടിയെടുത്തിട്ടുണ്ട് എന്ന അവകാശവാദങ്ങളും ഉയരുന്നുണ്ട്. നിലവില്‍ മാര്‍ച്ച്-ഏപ്രില്‍-മേയ് മാസങ്ങളിലായാണ് ഐപിഎല്‍ നടക്കുന്നത്. പക്ഷേ, ഈ മാസങ്ങളിലെ ഏറ്റവും വലിയ വെല്ലുവിളി കാലാവസ്ഥയാണ്. പല സംസ്ഥാനങ്ങളിലും അതികഠിനമായ ചൂട് ആരംഭിക്കുന്ന സമയം, ഒപ്പം മഴയുടെ സാധ്യതകളുമുണ്ട്.

ഐപിഎല്ലിന് ആതിഥേയത്വം വഹിക്കുന്ന പ്രധാന നഗരങ്ങളായ ഡല്‍ഹി, അഹമ്മദാബാദ്, ജയ്‌പൂര്‍, ലഖ്നൗ, ഹൈദരാബാദ്, ചെന്നൈ തുടങ്ങിയ നഗരങ്ങളില്‍ ചൂട് വര്‍ധിക്കുന്ന സമയത്തിലാണ് ഐപിഎല്‍ നടക്കുന്നത്. പ്രത്യേകിച്ചും ഉച്ചയ്ക്ക് ശേഷമുള്ള മത്സരങ്ങള്‍ ആരാധകര്‍ക്കും താരങ്ങള്‍ക്കും ഒരുപോലെ ബുദ്ധിമുട്ടേറിയതാണ്. കഴിഞ്ഞ രണ്ട് മൂന്ന് സീസണുകളിലായി വിദേശ താരങ്ങള്‍ പലപ്പോഴും ഇടവേളകള്‍ എടുക്കുന്നതും നനഞ്ഞ ടവലും ഐസ് ബാഗുമൊക്കെ നിരന്തരം ഉപയോഗിക്കുന്നതായും കണ്ടിരുന്നു. താരങ്ങളെ ശാരീരികക്ഷമതയെ തന്നെ ബാധിക്കാൻ സാധ്യതയുള്ളതരം കാലാവസ്ഥ.

രാത്രികാല മത്സരങ്ങളില്‍ ഈ പ്രശ്നം നേരിടുന്നില്ലെങ്കിലും താരങ്ങള്‍ പരിശീലിക്കേണ്ടതും ഇതേ ചൂടില്‍ തന്നെയാണ്. ചില നഗരങ്ങളില്‍ ചൂട് ഉയര്‍ന്ന് നില്‍ക്കുമ്പോള്‍ മറ്റിടങ്ങളില്‍ മഴയുടെ ഭീഷണിയും ഉണ്ടാകാറുണ്ട്. മാറി മാറി വരുന്ന കാലാവസ്ഥയില്‍ മൈതാനം മത്സരയോഗ്യമാക്കി നിലനിര്‍ത്തുക എന്നത് ഗ്രൗണ്ട് സ്റ്റാഫുകളെ സംബന്ധിച്ചും എളുപ്പമുള്ള ഒന്നല്ല. ചുരിക്കിപ്പറയുകയാണെങ്കില്‍ ഇന്ത്യയിലെ കാലാവസ്ഥ നിലവില്‍ അണ്‍പ്രഡിക്റ്റബിളാണ്, മത്സരങ്ങള്‍ നഷ്ടമാകാനും അത് ടൂ‍ര്‍ണമെന്റിന്റെ സ്വഭാവികമായുള്ള മുന്നോട്ട് പോക്കിനെ തടസപ്പെടുത്തുകയും ചെയ്യുന്നു.

ജനുവരി - ഫെബ്രുവരി മാസങ്ങളിലേക്ക് ടൂര്‍ണമെന്റ് ഷിഫ്റ്റ് ചെയ്യുമ്പോഴും പ്രശ്നങ്ങള്‍ ഇല്ലാതാകുന്നില്ല. വിന്റ‍ര്‍ ഫോഗ്, ഡ്യൂ, തണുപ്പ് തുടങ്ങിയവയൊക്കെയുണ്ടാകും. എന്നിരുന്നാലും മാര്‍ച്ച് - മേയ് മാസങ്ങളിലേതിനേക്കാളും മികച്ച കാലവസ്ഥയായിരിക്കും. മുംബൈ, അഹമ്മദാബാദ് നഗരങ്ങളില്‍ ഡ്യൂവിന്റെ പ്രശ്നമുണ്ടാകാം, ഡല്‍ഹിയിലും ലഖ്നൗവിലും ഫോഗും. ഹൈദരാബാദ്, ചെന്നൈ, ബെംഗളൂരു എന്നിവിടങ്ങളില്‍ അനുയോജ്യമായ സാഹചര്യങ്ങളുമായിരിക്കും. ഡല്‍ഹി, മൊഹാലി, ലഖ്നൗ എന്നീ സ്റ്റേഡിയങ്ങളില്‍ മഞ്ഞുവീഴ്ച്ചയും ഫോഗും മൂലം കാഴ്ചാപരിമിധികളും ഉണ്ടായേക്കാം.

അതുകൊണ്ട് തന്നെ ചില മൈതാനങ്ങളിലേക്ക് മാത്രം മത്സരങ്ങള്‍ ചുരുക്കേണ്ടി വന്നേക്കാം. പ്രത്യേകിച്ചും രാത്രി മത്സരങ്ങള്‍. കഠിനമായ ചൂടുള്ള കാലവസ്ഥയില്‍ മത്സരങ്ങള്‍ നടക്കുന്നതിനേക്കാള്‍ കാണികളെ ആകര്‍ഷിക്കുന്നതും ജനവുവരി വിൻഡോയായിരിക്കും. ഇത്തരം ഘടകങ്ങളൊക്കെ അനുകൂലമാകുമ്പോള്‍ മറുവശത്ത് വലിയ പ്രതിസന്ധികളുണ്ട്. നിര്‍ണായകമായ അന്താരാഷ്ട്ര - ആഭ്യന്തര മത്സരങ്ങള്‍ ഐസിസിയും ബോര്‍ഡുകളും നിശ്ചയിച്ചിരിക്കുന്നത് ജനുവരി, ഫെബ്രുവരി മാസങ്ങളിലാണ്.

ഓസ്ട്രേലിയ, ദക്ഷിണാഫ്രിക്ക, ന്യൂസിലൻഡ്, ഇംഗ്ലണ്ട് എന്നീ ബിഗ് ഫൈവിലെ രാജ്യങ്ങളെ തന്നെ എടുക്കാം.

ഓസ്ട്രേലിയ, ലോക ക്രിക്കറ്റിലെ ഏറ്റവും ഡൊമിനേറ്റിങ്ങായൊരു സംഘം. ക്രിക്കറ്റ് ഓസ്ട്രേലിയയെ സംബന്ധിച്ച് ഏറ്റവും പ്രാധാന്യമുള്ള മാസങ്ങളാണ് ജനുവരി, ഫെബ്രുവരി. ബോക്സിങ് ഡേ ടെസ്റ്റ്, സിഡ്നി ആതിഥേയത്വം വഹിക്കുന്ന ന്യൂ ഇയര്‍ ടെസ്റ്റ്, ബിഗ് ബാഷ് ലീഗ്, മറ്റ് അന്താരാഷട്ര പരമ്പരകള്‍...ബോര്‍ഡിന് വാണിജ്യപരമായ നേട്ടമുണ്ടാകുന്ന സീസണ്‍. ഉദാഹരണത്തിന്, ഡിസംബര്‍-ജനുവരി മാസങ്ങളില്‍ ഓസ്ട്രേലിയക്ക് ദക്ഷിണാഫ്രിക്കയുമായി പരമ്പരയുണ്ടെന്ന് കരുതുക.

ദേശീയ ടീമില്‍ നിന്ന് ഐപിഎല്ലിനായി അവര്‍ വരേണ്ട സാഹചര്യമുണ്ടാകാം, അല്ലെങ്കില്‍ ഓസീസ് താരങ്ങള്‍ ഇല്ലാതെ ഐപിഎല്‍ നടക്കേണ്ടി വന്നേക്കാം, പ്രത്യേക എൻഓസി താരങ്ങള്‍ക്ക് ക്രിക്കറ്റ് ഓസ്ട്രേലിയ നല്‍കേണ്ടതായും വരും...അങ്ങനെ പല സാഹചര്യങ്ങള്‍. ഐപിഎല്‍ ജനുവരിയിലേക്ക് വന്നാല്‍, അത് ബിഗ് ബാഷ് ലീഗിനേയും ബാധിക്കും.

ഇനി ദക്ഷിണാഫ്രിക്കയുടെ കാര്യമെടുക്കാം. സൗത്ത് ആഫ്രിക്കയുടെ ടി20 ലീഗായ എസ്എ20 നടക്കുന്നത് ജനുവരി ഫെബ്രുവരി മാസങ്ങളിലാണ്. ഐപിഎല്ലിലെ തന്നെ നിരവധി ഫ്രാഞ്ചൈസികള്‍ക്ക് എസ്എ20യില്‍ ടീമുകളുണ്ട്. മുംബൈയുടെ എംഐ കേപ് ടൗണ്‍, ചെന്നൈയുടെ ജോബര്‍ഗ് സൂപ്പര്‍ കിങ്സ്, രാജസ്ഥാന്റെ പാള്‍ റോയല്‍സ്, ഹൈദരാബാദിന്റെ സണ്‍റൈസേഴ്സ് ഈസ്റ്റേണ്‍ കേപ്, ഡല്‍ഹിയുടെ പ്രിറ്റോറിയ ക്യാപിറ്റല്‍സ്...ഐപിഎല്‍ ജനുവരിയിലേക്ക് മാറ്റിയാല്‍ ഫ്രാഞ്ചൈസികള്‍ക്ക് തന്നെ ഇതൊരു വെല്ലുവിളിയായേക്കാം.

രണ്ട് ലീഗിലും കളിക്കുന്ന താരങ്ങളെ എങ്ങനെ മാനേജ് ചെയ്യും, എസ്എ20യുടെ കൊമേഷ്യല്‍ സക്സസ് എത്രത്തോളമാകും...ഇത്തരം ചോദ്യങ്ങള്‍ നിലനില്‍ക്കുന്നു. ബിസിസിഐക്ക് വഴങ്ങേണ്ടി വന്നാല്‍ സ്വന്തം ലീഗിനെ ബലികൊടുക്കേണ്ടതായും വരും ദക്ഷിണാഫ്രിക്കയ്ക്ക്.

ന്യൂസിലൻഡ്, കിവികളെ സംബന്ധിച്ച് അന്താരാഷ്ട്ര മത്സരങ്ങളാണ് കൂടുതല്‍. ഐപിഎല്‍ ഈ വിൻഡോയിലേക്ക് മാറ്റിയാല്‍ ബോര്‍ഡിന് താരങ്ങളെ വിട്ടുകൊടുക്കേണ്ടതായി വരും. ഇത് ടീമിന്റെ പ്രകടനത്തെ ബാധിക്കാനുള്ള സാധ്യതയും നിലനില്‍ക്കുന്നു. ഇംഗ്ലണ്ടിന്റെ കാര്യത്തില്‍ മാത്രമാണ് ആശ്വാസം. ഇംഗ്ലണ്ടില്‍ വിന്റര്‍ സീസണായതിനാല്‍ അവര്‍ ആതിഥേയത്വം വഹിക്കുന്ന പരമ്പരകള്‍ ഉണ്ടാകില്ല, പകരം ടൂറുകളാണ്.

അന്താരാഷ്ട്ര കലണ്ടറിന്റെ അതേ പ്രാധാന്യത്തോടെ കാണേണ്ട മറ്റൊന്ന് ഇന്ത്യയുടെ ആഭ്യന്തര ക്രിക്കറ്റ് കലണ്ടറാണ്. വിജയ് ഹസാരെയും രഞ്ജി ട്രോഫിയുമൊക്കെ ഉള്‍പ്പെടുന്ന പീരിയഡ്. ഏജ് കാറ്റഗറി ടൂര്‍ണമെന്റുകള്‍ വേറെയുമുണ്ട്. ബിസിസിഐ ആഭ്യന്തര ക്രിക്കറ്റിനെ മറ്റ് മാസങ്ങളിലേക്ക് പറിച്ച് നട്ടേക്കും, കാരണം വാണിജ്യപരമായി കൂടുതല്‍ നേട്ടമുണ്ടാകുന്നതായി കണക്കാക്കപ്പെടുന്നത് ഐപിഎല്ലാണ്.

ബിസിസിഐയുടെ ഈ പദ്ധതി ഐസിസി അംഗീകരിക്കുകയാണെങ്കില്‍ മറ്റ് ബോര്‍ഡുകളൊക്കെയും ഐപിഎല്ലിനായി പല മാറ്റങ്ങളും വരുത്തേണ്ടതായി വരും. അന്താരാഷ്ട്ര കലണ്ടറിനെ തന്നെ പൊളിച്ചെഴുതേണ്ട സ്ഥിതിയിലേക്ക് കാര്യങ്ങളെത്തും. മറ്റ് ബോര്‍ഡുകള്‍ അംഗീകരിക്കാൻ തയാറായില്ലെങ്കില്‍ പല സുപ്രധാന താരങ്ങളില്ലാതെ ഐപിഎല്‍ നടക്കേണ്ടി വരും. ഇന്ത്യൻ താരങ്ങളെ മാത്രം ആശ്രയിക്കുന്ന ഒരു ലീഗല്ല ഐപിഎല്‍ എന്നത് യാഥാര്‍ത്ഥ്യമായി നിലനില്‍ക്കുന്നുണ്ട്. ട്രാവിസ് ഹെഡും പാറ്റ് കമ്മിൻസും ജോഫ്ര ആര്‍ച്ചറും ഗ്ലെൻ ഫിലിപ്സുമൊന്നുമില്ലാത്ത ഐപിഎല്‍ ഒന്ന് ചിന്തിച്ചുനോക്കു.

ഒക്ടോബര്‍ - എപ്രില്‍ മാസങ്ങള്‍ക്കിടയില്‍ ടൂര്‍ണമെന്റ് സംഘടിപ്പിക്കണമെങ്കില്‍ അത് എളുപ്പമുള്ള ഒന്നായി കാണാനാകില്ല. ലീഗ് വിശാലമാക്കേണ്ടതായി വരും, കൂടുതല്‍ മത്സരങ്ങള്‍, ഇടക്ക് അന്താരാഷ്ട്ര മത്സരങ്ങള്‍ക്കായി ഇടവേള. ഫുട്ബോള്‍ ലീഗുകളൊക്കെ സ്വീകരിക്കുന്ന അതേ രീതിയിലേക്ക് മാറണം. പക്ഷേ, രണ്ട് മാസത്തെ തുടര്‍ച്ചയായ മത്സരങ്ങളും ആവേശവും നല്‍കാൻ ഈ ഘടനയ്ക്ക് സാധിക്കുമോയെന്ന ആശങ്ക ഇവിടെയുണ്ട്. മാര്‍ച്ച് ആദ്യം തന്നെ ടൂര്‍ണമെന്റ് ആരംഭിച്ച്, സമയക്രമത്തില്‍ മാറ്റം വരുത്തി കാലവസ്ഥാ വെല്ലുവിളികളെ അതിജീവിക്കുകയായിരിക്കും ചുരുങ്ങിയകാലത്തേക്കിങ്കിലും അനുയോജ്യമായ മാര്‍ഗം.

ഐപിഎല്‍ : ബ്രെവിസിനെ ചെന്നൈ കൈവിടുമോ? ട്രേഡില്‍ വമ്പൻ നീക്കവുമായി ടീമുകള്‍

Hari Krishnan M — Tue, 10 Nov 2026 11:55:28 +0530

ബ്ലോക്‌ബസ്റ്റർ ട്രേഡുകള്‍, സർപ്രൈസിങ് റീട്ടെൻഷനുകള്‍, അണ്‍എക്‌സ്പെക്റ്റഡ് റീലീസുകള്‍. ഐപിഎല്ലിന്റെ 20-ാം സീസണിന് മുന്നോടിയായി ഫ്രാഞ്ചൈസികള്‍ കളത്തിന് പുറത്ത് കരുത്ത് തെളിയിക്കുകയാണ്. ഡെഡ്‌ലൈൻ അവസാനിക്കാൻ ഇനി ഏഴ് ദിവസം മാത്രമാണ് ബാക്കി. ഇതുവരെ ഔദ്യോഗികമായ ഡീലുകള്‍, ഇനി നടക്കാൻ സാധ്യതയുള്ള താരകൈമാറ്റങ്ങള്‍, എല്ലാം വിശദമായി പരിശോധിക്കാം.

2027 സീസണിന് മുന്നോടിയായി നടന്ന ആദ്യ ട്രേഡ് ലഖ്നൗ സൂപ്പര്‍ ജയന്റ്സും ഡല്‍ഹി ക്യാപിറ്റല്‍സും തമ്മിലായിരുന്നു. റിഷഭ് പന്ത് ബാക്ക് ടു ഡല്‍ഹി. പകരം ഡല്‍ഹി ലഖ്നൗവിന് കൈമാറിയത് കുല്‍ദീപ് യാദവിനെ. 15 കോടി രൂപയ്ക്കാണ് പന്തിനെ ഡല്‍ഹി സ്വന്തമാക്കുന്നത്, 13.5 കോടി രൂപയായിരുന്നു കുല്‍ദീപിന്റെ ട്രേഡ് മൂല്യം.

ഇരു സംഘങ്ങള്‍ക്കും വലിയ നഷ്ടമില്ലാത്ത ഒരു ഡീല്‍. ഒരു നാലാം നമ്പർ ബാറ്ററുടെ അഭാവമായിരുന്നു ഡല്‍ഹിയെ കഴിഞ്ഞ സീസണില്‍ വലച്ചത്. നായകൻ അക്സര്‍ പട്ടേല്‍ ഉള്‍പ്പെടെയുള്ള താരങ്ങളെ ഉപയോഗിച്ച് പരീക്ഷണം നടത്തിയെങ്കിലും മധ്യനിരയ്ക്ക് സ്റ്റബിലിറ്റി കൊണ്ടുവരാൻ കഴിഞ്ഞില്ല. എന്നാല്‍ പന്ത് വരുന്നതോടെ ആ പോരായ്മ നികത്തപ്പെടും. മറുവശത്ത് ലഖ്നൗവിന്റെ ബൗളിങ് നിര കുല്‍ദീപിന്റെ വരവോടെ കൂടുതല്‍ ശക്തമാകും, ദിഗ്വേഷ് റാത്തിക്കൊപ്പം കുല്‍ദീപെന്ന വിക്കറ്റ് ടേക്കര്‍ കൂടി ചേരുമ്പോള്‍ ലഖ്നൗവിന് ലഭിക്കുന്നത് സോളിഡായൊരു ബൗളിങ് യൂണിറ്റിനെയാണ്.

മറുവശത്ത് ബൗളിങ്ങിനെ ദുര്‍ബലമാക്കുന്ന മറ്റൊരു ട്രേഡില്‍ ഡല്‍ഹി ഭാഗമായി. അത് ഇടം കയ്യൻ പേസറായ ടി നടരാജനെ സണ്‍റൈസേഴ്സ് ഹൈദരാബാദിന് കൈമാറിയതാണ്. അഞ്ച് കോടി രൂപയ്ക്കാണ് ഹൈദരാബാദ് തങ്ങളുടെ മുൻതാരം കൂടിയായിരുന്ന നടരാജനെ തിരിച്ചെത്തിയത്. പകരം, വലം കയ്യൻ സ്പിന്നറായ സീഷൻ അൻസാരിയെയാണ് ലഭിച്ചത്.

ഡല്‍ഹിയെ സംബന്ധിച്ച് ഇതൊരു മികച്ച ഡീലല്ലാത്തതിന്റെ പ്രധാന കാരണം, മിച്ചല്‍ സ്റ്റാര്‍ക്കാണ്. ഡല്‍ഹിയുടെ ഏറ്റവും മികച്ച പേസറാണ് സ്റ്റാര്‍ക്ക്, എന്നാല്‍ വരും സീസണില്‍ സ്റ്റാര്‍ക്കിന്റെ അവൈലബിലിറ്റി സംബന്ധിച്ച് വ്യക്തതയില്ല. സ്റ്റാര്‍ക്കിനെ റീപ്ലേസ് ചെയ്യാൻ കഴിയുന്ന ഐഡിയല്‍ ചോയിസായിരുന്നു നടരാജൻ. താരത്തിന്റെ ക്വാളിറ്റി എത്രത്തോളമാണെന്നത് പറയേണ്ടതില്ല. ഈ ഒരു അവസരമാണ് ട്രേഡിലൂടെ ഡല്‍ഹി നഷ്ടപ്പെടുത്തിയിരിക്കുന്നത്.

ഇതുവരെ ഔദ്യോഗികമായ ട്രേഡുകളില്‍ ഏറ്റവുമധികം താരങ്ങള്‍ ഉള്‍പ്പെട്ടിരിക്കുന്നത് ഹൈദരാബാദും ചെന്നൈ സൂപ്പര്‍ കിങ്സും തമ്മിലുള്ളതാണ്, നാല് പേര്‍. ലിയാം ലിവിങ്സ്റ്റണും ജാക്ക് എഡ്‌വേഡ്‌സുമാണ് ചെന്നൈക്കൊപ്പം ചേര്‍ന്നത്. അതേസമയം, ഖലീല്‍ അഹമ്മദും നാഥാൻ എല്ലിസും ഹൈദരാബാദിലേക്കും ചേക്കേറി. എന്തുകൊണ്ട് ലിവിങ്സ്റ്റണ്‍ എന്ന ചോദ്യത്തിന് ഉത്തരമാണ് മറ്റൊരു ട്രേ‍ഡ് റൂമര്‍. രവീന്ദ്ര ജഡേജയുടെ പകരക്കാരനെ കണ്ടെത്താനുള്ള ശ്രമത്തിലാണ് ചെന്നൈ, അക്സര്‍ പട്ടേലില്‍ ഈ സാധ്യത അവര്‍ കാണുന്നുവെന്നാണ് സൂചന.

അക്സറും ഡിവാള്‍ഡ് ബ്രെവിസും ഉള്‍പ്പെട്ട ഡീലാണ് സംഭവിക്കാൻ പോകുന്നതെന്നാണ് റിപ്പോര്‍ട്ടുകള്‍. അങ്ങനെയെങ്കില്‍ ബ്രെവിസിന്റെ റീപ്ലേസ്മെന്റായായിരിക്കാം ലിവിങ്സറ്റണ്‍. എന്നാല്‍, ഇതില്‍ സ്ഥിരീകരണം ഇതുവരെ ഉണ്ടായിട്ടില്ല. എല്ലിസിന്റേയും ഖലീലിന്റേയും വരവിന് പിന്നിലും കൃത്യമായ കണക്കുകൂട്ടലുകളുണ്ട്. ഹൈദരാബാദ് നായകൻ പാറ്റ് കമ്മിൻസിന്റെ പാങ്കാളിത്തവും സീസണ്‍ മുഴുവൻ പ്രതീക്ഷിക്കേണ്ടതില്ല, അതുകൊണ്ട് ഇരുവരുടേയും വരവ് ഹൈദരാബാിന്റെ പേസ് നിരയെ ശക്തിപ്പെടുത്താൻ സഹായിക്കും.

പക്ഷേ, ബ്ലോക്ബസ്റ്റര്‍ ട്രേഡ് ഇതൊന്നുമല്ല. അത് മുംബൈ ഇന്ത്യൻസും പഞ്ചാബ് കിങ്സും തമ്മിലാണ്. ഹാര്‍ദിക്ക് പാണ്ഡ്യ - അര്‍ഷദീപ് സിങ്. ട്രേഡിന്റെ അന്തിമ ഘട്ടത്തിലേക്ക് കടന്നതായാണ് ഔദ്യോഗിക വിവരങ്ങള്‍. സംഭവിച്ചാല്‍, ചരിത്രത്തിലെ തന്നെ ഏറ്റവും വലിയ ട്രേഡുകളിലൊന്നായി മാറും. ഇരുടീമുകള്‍ക്കും ഗുണകരമായ കൈമാറ്റം. അര്‍ഷദീപിന്റെ വരവ് മുംബൈയുടെ ബൗളിങ് യൂണിറ്റിലെ പ്രശ്നനങ്ങള്‍ക്ക് പരിഹാരമാകും, ന്യൂബോളിലും ഡെത്തിലും ഒരുപോലെ തിളങ്ങുന്ന ഒരു ബൗളറുടെ അഭാവം മുംബൈക്കുണ്ടായിരുന്നു.

ട്രെന്റ് ബോള്‍ട്ടിനും ദീപക് ചാഹറിനും ഫോം നഷ്ടമായതായിരുന്നു മുംബൈയുടെ വീഴ്ചയുടെ പ്രധാന കാരണങ്ങളിലൊന്ന്. അര്‍ഷദീപ് ജസ്പ്രിത് ബുമ്രയ്ക്കൊപ്പം ചേരുന്നതോടെ ഇന്ത്യക്ക് രണ്ട് ടി20 ലോകകിരീടങ്ങള്‍ നേടിക്കൊടുത്ത ഐക്കോണിക്ക് ഡുവോയെ ബ്ലൂ ആൻഡ് ഗോള്‍ഡില്‍ കാണാം. മറുവശത്ത് ഹാര്‍ദിക്കിന്റെ പടിയിറക്കം അനിവാര്യവും ഒഴിവാക്കാൻ കഴിയാത്തതുമാണെന്ന് കഴിഞ്ഞ മൂന്ന് സീസണുകള്‍ തെളിയിച്ചതാണ്. മാച്ച് വിന്നറും എക്സ് ഫാക്ടറുമായ ഹാര്‍ദിക്കിന്റെ എൻട്രി പഞ്ചാബിനെ ഒന്നുകൂടി ബ്രൂട്ടലാക്കും.

മാര്‍ക്കസ് സ്റ്റോയിനിസെന്ന ഓള്‍ റൗണ്ടറുടെ സാന്നിധ്യം അവിടെയുണ്ട്. പക്ഷേ, താരത്തിന്റെ സ്ഥിരതയില്ലായ്മയും മോശം ഫോമുമൊക്കെ പരിഗണിക്കുമ്പോള്‍ ഹാര്‍ദിക്ക് പെര്‍ഫെക്റ്റ് റീപ്ലേസ്മെന്റാണ്. ഹാര്‍ദിക്ക് ഒരു ടീമിന് നല്‍കുന്ന ബാലൻസ് എത്രത്തോളമാണെന്ന് എടുത്ത് പറയേണ്ടതില്ല. ഇവിടെ ഹാര്‍ദിക്ക് നേരിടുന്ന ഒരേയൊരു സെറ്റ്ബാക്ക് കഴിഞ്ഞ അഞ്ച് വര്‍ഷമായി അനുഭവിച്ച ക്യാപ്റ്റൻസി ഉണ്ടാകില്ല എന്നത് മാത്രമാണ്.

രോഹിതിന്റെ ലക്ഷ്യം ലോകകപ്പ്! മുംബൈ ഇന്ത്യൻസ് ക്യാപ്റ്റൻസി ഉചിതമായ തീരുമാനമോ?

Hari Krishnan M — Sat, 31 Oct 2026 13:18:47 +0530

ഹാർദിക്ക് പാണ്ഡ്യയുടെ റീഎൻട്രി, ക്യാപ്റ്റൻസി ഡിമാൻഡും. വൈകാതെ രോഹിത് ശർമയെ നായകസ്ഥാനത്തുനിന്ന് മുംബൈ ഇന്ത്യൻസ് നീക്കം ചെയ്യുകയാണ്. ഇവിടെ ആദ്യ പകുതി അവസാനിക്കുന്നു. രണ്ടാം പകുതി ആരംഭിക്കുന്നത് രോഹിതിന്റെ കീഴില്‍ ഇന്ത്യ 2024 ടി20 ലോകകിരീടം ഉയർത്തുന്നിടത്താണ്, ശേഷം 2025ല്‍ മറ്റൊരു ഐസിസി ടൈറ്റില്‍, ചാമ്പ്യൻസ് ട്രോഫി.

രോഹിതിന്റെ ക്യാപ്റ്റൻസി കരിയർ ഐതിഹാസികമാകുമ്പോള്‍ മറുവശത്ത് കരുത്തുറ്റ ഒരു ടീമുണ്ടായിട്ടും ഹാർദിക്കെന്ന നായകൻ പരാജയപ്പെടുകയാണ്. മൂന്ന് രണ്ട് സീസണിലും പോയിന്റ് പട്ടികയുടെ അടിത്തട്ടില്‍. എല്ലാത്തിനും ഒടുവില്‍ രോഹിതിനോട് മാനേജ്മെന്റിന്റെ അഭ്യർത്ഥന, ക്യാപ്റ്റൻ സ്ഥാനം ഏറ്റെടുക്കണമെന്ന്. പിന്നീടെന്താണ് സംഭവിക്കുന്നത്.

മുംബൈയുടെ പരിശീലകസംഘം ഉടച്ചുവാർക്കപ്പെടുകയാണ്, വന്നവരെല്ലാം രോഹിതിന്റെ പ്രിയപ്പെട്ടവർ. പൊള്ളാർഡ്, ഉത്തപ്പ, മക്ലെനഗൻ, കുല്‍ക്കർണി, ടി ദീലീപ്. ട്രേഡ് സാധ്യമായില്ലെങ്കില്‍ രോഹിതിന്റെ കീഴില്‍ കളിക്കാമെന്ന് ഹാർദിക്ക് വരെ സമ്മതിച്ചിരിക്കുന്നു. കാലം എല്ലാം തിരുത്തിയത് പോലെ. അബ്‌സല്യൂട്ട് സിനിമ.

മൈതാനത്തിന് പുറത്ത് മുംബൈ ഇന്ത്യൻസില്‍ സംഭവിച്ചതിനെല്ലാം സിനിമാറ്റിക്ക് ഇവന്റുകളുടെ സ്റ്റൈലുണ്ട്. ഔദ്യോഗിക പ്രഖ്യാപനം വന്നിട്ടില്ല, എങ്കിലും 2027 ഐപിഎല്‍ സീസണില്‍ രോഹിത് മുംബൈയെ നയിക്കുമെന്നാണ് സൂചനകള്‍. പ്രായത്തെയോ രോഹിതെന്ന നായകന്റെ എബിലിറ്റികളെയോ ചോദ്യം ചെയ്യുന്നില്സ. പക്ഷേ, രോഹിതിനെ നായകനാക്കുക എന്ന തീരുമാനം ഉചിതമാണോ എന്ന് പരിശോധിക്കേണ്ടതുണ്ട്

2027 ഐപിഎല്‍ പുരോഗമിക്കുമ്പോള്‍ രോഹിതിന്റെ പ്രായം 40 കടക്കും. രോഹിത് മുംബൈയുടെ ബ്ലൂ ആൻഡ് ഗോള്‍ഡില്‍ എത്ര കാലം ഇനിയും കളിക്കുമെന്നതില്‍ വ്യക്തതയില്ല. ടീം പ്രതിസന്ധിയിലൂടെ കടന്നുപോകുമ്പോള്‍ ഷോർട്ട് ടേം സൊലൂഷനാണോ വേണ്ടതെന്നാണ് ചോദ്യം. പക്ഷേ, ഇവിടെ മാനേജ്മെന്റ് കണ്ട മറ്റൊരു കാര്യമുണ്ട്.

ഹാർദിക്കിന്റെ കീഴില്‍ മുംബൈ ഇനി കളിക്കേണ്ടതില്ല എന്ന് മാനേജ്മെന്റ് ഉറപ്പാക്കി കഴിഞ്ഞു. പകരമാര്, ഉത്തരം നിരവധിയുണ്ട്. 2026 ടി20 ലോകകപ്പ് ഇന്ത്യക്ക് നേടിത്തന്ന സൂര്യകുമാര്‍ യാദവ്, മറ്റ് സീനിയർ താരങ്ങളായ ജസ്പ്രിത് ബുമ്രയും മിച്ചല്‍ സാന്റനറും, ഒപ്പം ഭാവിതാരമായി വിലയിരുത്തപ്പെടുന്ന തിലക് വർമ.

നിലവില്‍ ആഭ്യന്തര സര്‍ക്യൂട്ടുകളില്‍ നിന്ന് പോലും തഴയപ്പെട്ട് നില്‍ക്കുന്ന താരമാണ് സൂര്യ. ബുമ്രയാകട്ടെ പരിക്ക് നിരന്തരം വേട്ടയാടുന്നൊരാള്‍. സാന്റനര്‍ വിദേശ താരമായതിനാല്‍ ടീമില്‍ സ്ഥിരസാന്നിധ്യമാകാനുള്ള സാധ്യതയും വിരളമാണ്. മുംബൈയുടെ ഭാവി പരിശോധിക്കുമ്പോള്‍ ഏറ്റവും ഉചിതമായ തിരഞ്ഞെടുപ്പ് തിലകാണ്, നിലവില്‍ ഇന്ത്യൻ ടി20 ടീമിന്റെ വൈസ് ക്യാപ്റ്റൻ. രോഹിത് മാനേജ്മെന്റിന് നിര്‍ദേശിച്ച പേരും തിലകിന്റേതായിരുന്നു. പക്ഷേ, മാനേജ്മെന്റ് അതിന് തയാറായില്ല.

അതിനും ചില കാരണങ്ങളുണ്ട്. മുംബൈയെ ഐപിഎല്ലിലെ തന്നെ ഏറ്റവും സ്റ്റാർ സ്റ്റഡഡായ ടീമാണ്. കൂടുതലും സീനിയര്‍ താരങ്ങള്‍ ഉള്‍പ്പെട്ട സംഘം. രോഹിതിനെ മാറ്റി ഹാർദിക്കിനെ നായകനാക്കിയപ്പോള്‍ സംഭവിച്ചതെന്തൊക്കെയാണെന്ന് കഴിഞ്ഞ മൂന്ന് സീസണിലേക്ക് തിരിഞ്ഞുനോക്കിയാല്‍ കാണാനാകും. അതുപോലെ ഒന്നുകൂടി ആവർത്തിക്കുക എന്നത് അഞ്ച് കിരീടങ്ങളുള്ള ഫ്രാഞ്ചൈസിയെ സംബന്ധിച്ച് നാണക്കേടുളവാക്കുന്നതാണ്.

രോഹിത് നായകനായി മടങ്ങിയെത്തുമ്പോള്‍ അത്തരം പ്രശ്നങ്ങളെയൊക്കെ മറികടക്കാൻ മാനേജ്മെന്റിന് സാധിക്കും. 2027 സീസണിലേക്ക് മാത്രമായിരിക്കും ഒരുപക്ഷേ രോഹിത് നായകനായി എത്തുക, 2028 സീസണിന് മുന്നോടിയായി മെഗാ ലേലം നടക്കാനിരിക്കുകയാണ്. ടീമിനെ ഉടച്ചുവാര്‍ക്കാനും പുതിയ നായകനെ കണ്ടെത്താനും ലേലത്തിലൂടെ കഴിഞ്ഞേക്കും. രോഹിതിന്റെ നായകപദവിയെ ഒരു ഷോർട്ട് ടേം ക്രൈസിസ് മാനേജരായും കാണാനാകും. തിലകാണ് ഭാവി നായകനെങ്കില്‍ ഗ്രൂം ചെയ്തെടുക്കാനും രോഹിതിനാകും.

എന്നാല്‍ ഇത് രോഹിതിന് അത്ര പോസീറ്റീവായ കാര്യമാണോയെന്നാണ് മറ്റൊരു ചോദ്യം. കരിയറിന്റെ സായാഹ്നത്തിലേക്ക് എത്തുന്ന രോഹിതിന്റെ അള്‍ട്ടിമേറ്റ് ഗോള്‍ എന്താണെന്ന് വ്യക്തമാണ്, അത് 2027 ഏകദിന ലോകകപ്പാണ്, ഐപിഎല്‍ 2027 അല്ല. കഴിഞ്ഞ ഐപിഎല്ലിനിടെയാണ് രോഹിതിന്റെ ഹാം സ്ട്രീങ് ഇഞ്ചുറി സംഭവിക്കുന്നത്, ശേഷം മത്സരങ്ങള്‍ നഷ്ടമാകുകയും പിന്നീട് ടീമിലേക്ക് തിരിച്ചെത്തിയപ്പോള്‍ ഇംപാക്റ്റ് പ്ലെയറായാണ് രോഹിത് കളിച്ചതും.

ടി20, ടെസ്റ്റ് ഫോർമാറ്റുകളില്‍ നിന്ന് വിരമിച്ചതിനാലും ഏകദിന പരമ്പരകള്‍ക്കിടയില്‍ ലഭിക്കുന്ന ഇടവേളയും രോഹിതിന്റെ ഇഞ്ചുറി സാധ്യതകള്‍ കുറയ്ക്കുന്ന ഘടകമാണ്, കാരണം വർക്ക് ലോഡ് കുറവാണ്. മാസങ്ങള്‍ കൂടുമ്പോഴാണ് ഒരു പരമ്പര. പക്ഷേ ഐപിഎല്ലിലേക്ക് വരുമ്പോള്‍ രണ്ട് മാസത്തില്‍ തന്നെ 14 മുതല്‍ 17 മത്സരങ്ങള്‍ വരെ കളിക്കേണ്ടി വന്നേക്കാം. നായകനായാല്‍ ഇംപാക്റ്റ് പ്ലെയറായി തുടരാനും കഴിയില്ല. തുടര്‍ച്ചയായുള്ള മത്സരങ്ങള്‍ രോഹിതിന്റെ ഫിറ്റ്നസിനെ ബാധിക്കുമോയെന്ന ആശങ്കയാണ് ഇവിടെ ഉയരുന്നത്.

2027 ഏകദിന ലോകകപ്പ് ഒക്ടോബർ ആദ്യ വാരമാണ് ആരംഭിക്കുന്നത്. ഐപിഎല്‍ അവസാനിക്കുന്നത് മേയിലാകാനാണ് സാധ്യത. നാല് മാസത്തിന്റെ ഇടവേളയാണുള്ളത്. ഗുരുതരമായ പരിക്കുകളെന്തെങ്കിലും സംഭവിച്ചാല്‍ രോഹിതിന് ആ വലിയ ലക്ഷ്യത്തിലേക്കുള്ള യാത്ര പൂർത്തിയാക്കാതെ കളം വിടേണ്ടതായും വരും.

പോരാട്ടങ്ങള്‍ അയാള്‍ അവസാനിപ്പിച്ചിരിക്കുന്നു; ഒരു ഫുട്ബോള്‍ കാലവും

Hari Krishnan M — Fri, 06 Nov 2026 14:56:40 +0530

സാന്റോ ആന്റോണിയോ, മദീര. ആ തെരുവില്‍ നിന്ന് ആരംഭിച്ച യാത്ര, വലിയൊരു മുറിയില്‍, ഒരു വെള്ളക്കടലാസില്‍ അവസാനിച്ചിരിക്കുന്നു...

ഇതിനിടയില്‍ 23 വര്‍ഷങ്ങള്‍, യൂറോപ്പിന്റെ തെക്കുപടിഞ്ഞാറുള്ളൊരു രാജ്യത്തിനായി ഒരുവൻ വിശ്രമമില്ലാതെ വിയര്‍പ്പൊഴുക്കിയ രണ്ട് പതിറ്റാണ്ടിന്റെ കഥ. ഒന്നുമില്ലായ്മയില്‍ നിന്നുള്ള ഉയിര്‍പ്പിന്റെ കഥയ്ക്ക് ഇന്ധനമായത് ഒരു അമ്മയുടെ കഷ്ടതകളായിരുന്നു, പട്ടിണിയായിരുന്നു, ദാരിദ്ര്യം മൂലം ഉറക്കം നഷ്ടപ്പെട്ട രാത്രികളായിരുന്നു, കാലം തന്നില്‍ നിന്ന് വേര്‍പെടുത്തിയ പിതാവിന്റെ സ്വപ്നങ്ങള്‍ സാക്ഷാത്കരിക്കാനുള്ള പ്രയ്ത്നമായിരുന്നു, പരാജയപ്പെടാൻ ഒരുക്കമല്ലാത്തൊരു മനസായിരുന്നു, രണ്ടാമനാണെന്ന് പലകുറി ലോകം പറഞ്ഞപ്പോഴും തിരുത്താനുറച്ചിറങ്ങിയ കാലുകളായിരുന്നു...തന്റെ വിധിയും ഭാവിയും ഭാഗ്യവും നിര്‍ഭാഗ്യവുമൊക്കെ സ്വയം നിര്‍വചിക്കാനുള്ള മനോഭാവമായിരുന്നു...

ഓഗസ്റ്റ് 20, 2003. ചാവേസിലെ മുൻസിപ്പല്‍ സ്റ്റേഡിയത്തില്‍ പൊര്‍ച്ചുഗല്‍ - കസാക്ക്സ്ഥാൻ സൗഹൃദ മത്സരം രണ്ടാം പകുതിയിലേക്ക് കടക്കുകയാണ്. സൈഡ് ലൈനില്‍ സബ്സ്റ്റിറ്റ്യൂഷൻ ബോര്‍ഡ് ഉയര്‍ന്നു. ലൂയിസ് സ്കോളാരി ആ തീരുമാനമെടുത്തു, വൈകാതെ തന്റെ നിയോഗം പൂര്‍ത്തിയാക്കി ഫിഗോ വഴിമാറിക്കൊടുത്തു, പകരമിറങ്ങുന്നത് ഒരു 16-ാം നമ്പര്‍ ജഴ്സിക്കാരനാണ്...

45 മിനുറ്റ്, 12 ഡ്രിബിള്‍, റോ പേസ്, സ്റ്റെപ്പ് ഓവറുകള്‍, ഹി വാസ് സംതിങ് എല്‍സ്, ഫിയര്‍ലെസ് ആൻഡ് അണ്‍സ്റ്റോപ്പബിള്‍...ഫുട്ബോള്‍ ഭൂപടത്തില്‍ പോര്‍ച്ചുഗലിനെ അടയാളപ്പെടുത്താൻ ഇടതുവിങ്ങില്‍ ഒരാള്‍ തിരഞ്ഞെടുക്കപ്പെട്ടു ആ രാത്രിയില്‍, ഫിഗോയ്ക്ക് ശേഷം ആര് എന്ന ആ ജനതയുടെ ചോദ്യത്തിന് ഉത്തരം. ക്രിസ്റ്റ്യാനൊ റൊണാള്‍ഡൊ ഡൊസ് സാന്റോസ് അവിയേറൊ.

അവിടെ നിന്ന് 204 ദിവസം നീണ്ട കാത്തിരിപ്പ്, എന്തിനായിരുന്നു, ആദ്യ അന്താരാഷ്ട്ര ഗോളിന്റെ മധുരമൊന്ന് അറിയാൻ. തന്റെ വരവ് പ്രഖ്യാപിക്കാൻ ക്രിസ്റ്റ്യാനൊ തിരഞ്ഞെടുത്ത ടൂര്‍ണമെന്റ്, 2004 യൂറോ. അന്നാ ഗോളിന് വഴിയൊരുക്കിയതും ഫിഗോയായിരുന്നു, കോര്‍ണറില്‍ നിന്ന് ബോക്സിലേക്ക് എത്തിയ പന്തിന്റെ വേഗവും ദിശയും മനസിലാക്കി വായുവിലേക്ക് ഉയര്‍ന്ന് ചാടി തലകൊണ്ട് വലയ്ക്കുള്ളിലേക്ക് പറഞ്ഞയച്ചു, 90+3, അതായിരുന്നു സമയം.

ആ യൂറോയ്ക്ക് ഒടുവില്‍ ലിസ്ബണിലെ മൈതാനത്ത് വിങ്ങിപ്പൊട്ടേണ്ടി വന്നിരിക്കാം ആ പത്തൊൻപത് കാരന്. എങ്കിലും ആ 90+3ല്‍ നിന്ന് ടൊറോന്റോ സ്റ്റേഡിയത്തില്‍ ക്രൊയേഷ്യക്കെതിരെ 68-ാം മിനുറ്റില്‍ പെനാലിറ്റി ലക്ഷ്യത്തിലെത്തിക്കുന്നതിനും ഇടയില്‍ അയാള്‍ വിങ്ങറായും പ്ലേ മേക്കറായും സ്ട്രൈക്കറായും പലവേഷങ്ങള്‍ കെട്ടിയാടി, പോർച്ചുഗലിനായി ജയിക്കുക എന്ന ലക്ഷ്യം മാത്രമായിരുന്നു ആ മനുഷ്യനെ മുന്നോട്ട് നയിച്ചത്, ശരാശരിയില്‍ ഒതുങ്ങിയ ഒരു സംഘത്തിനായി അയാള്‍ നടത്തിയ ഒറ്റയാള്‍ പോരാട്ടങ്ങളായിരുന്നു കൂടുതലും...

സ്നൈഡറും വാൻ പേഴ്സിയും റോബനുമൊക്കെ നിരന്ന് നിന്ന ഡച്ചുപടയ്ക്കെതിരെ 2012 യൂറോയില്‍. 11 -ാം മിനുറ്റില്‍ പിന്നിലായ പോർച്ചുഗലിനെ തിരിച്ചുകൊണ്ടുവന്ന രണ്ട് ഗോളുകള്‍. ഇരുപകുതിയിലും വ്യത്യസ്ത ഹെയർസ്റ്റൈലുകളിലെത്തി സമ്മർദമെന്തെന്ന് ചോദിച്ചുകൊണ്ട് ഖാർകീവിലെ മൈതാനത്ത് സ്ലൈഡ് ചെയ്തൊരു സെലിബ്രേഷനുണ്ടായിരുന്നു...

2013ലെ ലോകകപ്പ് ക്വാളിഫയറില്‍ സ്ലാട്ടാൻ ഇബ്രഹാമോവിച്ചിന്റെ വെല്ലുവിളികളെ അയാളുടെ മണ്ണില്‍വെച്ച് തന്നെ കുഴിച്ചുമൂടിയ സ്റ്റോക്ക്‌ഹോം ഹാട്രിക്ക്. ഓള്‍ഡ് ട്രാഫോഡിലും സാന്റിയാഗോ ബെർണബ്യൂവിലും ചുവപ്പിലും വെള്ളയിലും വ്യക്തിഗത നേട്ടങ്ങള്‍ ആഘോഷിക്കപ്പെടുമ്പോള്‍ മറുവശത്ത് നിന്ന് അതിലും ഉറക്കെ വിമര്‍ശകര്‍ ചോദിച്ചു, പോര്‍ച്ചുഗലിനായി നിങ്ങള്‍ എന്ത് നേടിയെന്ന്.

2016 യൂറോ. ഗ്രൂപ്പ് എഫില്‍ ഹംഗറിക്കെതിരായ ബാക്ക് ഹീല്‍, പിന്നാലെ ഹെഡർ, മത്സരത്തില്‍ ആകെ മൂന്ന് ഗോള്‍ കോണ്‍ട്രിബ്യൂഷനുകള്‍. സെമി ഫൈനലില്‍ വെയില്‍സിനെതിരെ ഏരിയല്‍ ഡൊമിൻസ്, വിജയമുറപ്പിച്ച നാനിയുടെ ഗോളിന് വഴിയൊരുക്കിയതും അതേ കാലുകള്‍. ഒടുവില്‍ പോർച്ചുഗല്‍ ജഴ്‌സിയിലയാള്‍ ഒരുകിരീടത്തിന് തൊട്ടരികല്‍ ഒരിക്കല്‍ക്കൂടി അയാളെത്തി. കാലത്തിന്റെ ക്രൂരതയോ കളിദൈവങ്ങള്‍ കണ്ണടച്ചതോയെന്ന് അറിയില്ല, 25-ാം മിനുറ്റില്‍ ദിമിത്രി പയേറ്റിന്റെ കാലുകള്‍ക്കിടയിലമര്‍ന്ന് മൈതാനം വിടേണ്ടി വന്നു...

പക്ഷേ, ക്രിസ്റ്റ്യാനോയെന്ന താരം മാത്രമായിരുന്നു മൈതാനത്തിന് പുറത്തേക്ക് പോയത്, അയാളിലെ നായകൻ കുമ്മായവരയ്ക്കപ്പുറത്ത് കാല്‍മുട്ടിനെ ബാൻഡേജില്‍ പൊതിഞ്ഞ് കളിമെനയുന്നുണ്ടായിരുന്നു. ഫെർണാണ്ടോ സാന്റോസ് നിശബ്ദനായി നിന്ന നിമിഷങ്ങളില്‍പ്പോലും ആ 11 പേരിലേക്ക് അയാള്‍ നല്‍കിയ ഊർജം. അത് 109-ാം മിനുറ്റില്‍ എഡറിന്റെ കാലുകളിലേക്ക് പ്രവാഹിക്കപ്പെട്ടു, ഫ്രഞ്ച് പടയോട്ടത്തിന് അവസാനം കാണുമ്പോള്‍ 25-ാം മിനുറ്റിലെ നിരാശയുടെ കണ്ണുനീരിന് 120-ാം മിനുറ്റില്‍ ആനന്ദത്തിന്റെ തിളക്കമുണ്ടായി...

എട്ട് പതിറ്റാണ്ടോളം പിന്നിട്ട പോർച്ചുഗലിന്റെ ഫുട്ബോള്‍ ചരിത്രത്തില്‍ ആദ്യമായൊരു കിരീടം, യുസേബിയോക്കും ഫിഗോയ്ക്കും സാധിക്കാതെ പോയത്...കാലവും ഇതിഹാസങ്ങളും സാക്ഷി അയാള്‍ക്ക് യൂറോപ്പിന്റെ നെറുകയിലേക്ക്...

എല്ലാം അവസാനിക്കാറാകുന്നുവെന്ന് ഒളിഞ്ഞും തെളിഞ്ഞും പലരും പറഞ്ഞു തുടങ്ങിയ കാലം കൂടിയായിരുന്നുവത്. തെളിയിക്കാൻ ഒന്നും ബാക്കിയില്ലപ്പോഴും, പക്ഷേ തന്റെ ശരീരത്തിനോടും മനസിനോടും എതിരാളികളോടും പോരുതി അയാള്‍ മറ്റൊരു ഐതിഹാസികമായ പതിറ്റാണ്ടിന് കൂടെ അവിടെ തുടക്കമിടുകയായിരുന്നു, കാത്തുവെച്ചതൊക്കെയും പീക്ക് സംഭവങ്ങള്‍. 2018 ജൂണ്‍ 15, സോച്ചി.

ലോകകപ്പിലെ പോർച്ചുഗലിന്റെ ആദ്യ മത്സരം. എതിരാളികള്‍ സ്പെയിൻ. സെര്‍ജിയോ റാമോസ്, പിക്വെ, ഇനിയേസ്റ്റ, ഇസ്കോ, ഡിയേഗൊ കോസ്റ്റാ...അങ്ങനെ ഇതിഹാസങ്ങളും കളിമെനയുന്നവരും നിരന്നങ്ങനെ നിന്നു. ഫുട്ബോള്‍ മൈതാനം ഒറ്റയാൻ കീഴടക്കുന്നത് കണ്ടിട്ടുണ്ടോ...അതായിരുന്നു അക്ഷരാര്‍ത്ഥത്തില്‍ അന്ന് സംഭവിച്ചത്.

കോസ്റ്റയും ക്രിസ്റ്റ്യാനോയും കൊമ്പുകോര്‍ത്തൊടുവില്‍ നാച്ചോ പോർച്ചുഗലിനെ തളച്ചെന്ന് കരുതി. 88-ാം മിനുറ്റ്. ബോക്സിന് പുറത്ത് കാലുകള്‍ അകത്തി ദീര്‍ഘനിശ്വാസമെടുത്ത് കൈകള്‍ തളര്‍ത്തി കണ്ണടച്ചയാള്‍ ഗോള്‍ പോസ്റ്റിലേക്ക് നോക്കി നിന്നു. വലം കാലില്‍ നിന്ന് തൊടുന്ന ഷോട്ട് ബുസ്ക്വറ്റ്‌സിന്റേയും പിക്വെയുടേയും ഉയർന്നുള്ള പ്രതിരോധത്തെ വകഞ്ഞുമാറ്റി ബോക്സിന്റെ വലതുമൂലയിലേക്ക് പറന്നിറങ്ങി, ഡി ഹെയ സത്ബ്ദനായി കാണപ്പെട്ടു.

സോച്ചി ഇരമ്പിയാർക്കുമ്പോള്‍ കൈകള്‍ വിടർത്തി ക്രിസ്റ്റ്യാനോ ആ മൈതാനത്തുകൂടി പറക്കുകയായിരുന്നു...ജീനിയസ് എന്ന് വിളിക്കാൻ രണ്ടാമതൊന്ന് ആലോചിക്കേണ്ടി വന്നില്ല കമന്ററിബോക്സില്‍ കളിപറയാൻ ഇരുന്നവർക്ക്...

ലയണല്‍ മെസി അനശ്വരതപുല്‍കിയപ്പോള്‍ 2022 ലോകകപ്പ് ദുഖങ്ങള്‍ മാത്രം നിറഞ്ഞതായിരുന്നു ക്രിസ്റ്റ്യാനോയ്ക്ക്. അപ്പോഴും പരാജയപ്പെട്ടവനായി മടങ്ങാൻ ഒരുക്കമായിരുന്നില്ല. അയാളുടെ വിധി കുറിക്കാൻ അവസാനം തുനിഞ്ഞത് ലമീൻ യമാലായിരുന്നു, അലയൻസ് അറീനയില്‍ യമാലിന് അയാള്‍ സമ്മാനിച്ചത് കരിയറിലുടനീളം വേട്ടയാടാൻ പോന്നൊരു ദിവസമായിരുന്നു..അങ്ങനെയെത്രയെത്ര മൊമന്റുകള്‍...ജയിച്ചുവെന്ന് നിങ്ങള്‍ക്ക് വിശ്വസിക്കണമെങ്കില്‍ ക്രിസ്റ്റ്യാനോയുടെ കാലുകള്‍ നിശ്ചലമാകണം, അത് മറക്കാതിരിക്കുക...

പടിയിറക്കത്തിന് സമയമായെന്ന് ശരീരം പറഞ്ഞപ്പോഴും പോരാടി നിന്നു അമേരിക്കൻ ഐക്യനാടുകളില്‍. ആറാം തവണയും തലകുനിച്ച് കണ്ണീരണിഞ്ഞാണ് മൈതാനം വിട്ടത്...പിന്നീട് കണ്ടതൊക്കെയും ലോകഫുട്ബോളിലെ ഇതിഹാസം അര്‍ഹിക്കാത്ത ദിവസങ്ങളായിരുന്നു...കലഹം, പടിയിറക്കം...

സാന്റോ ആന്റോണിയോ, മദീര. ആ തെരുവില്‍ നിന്ന് ആരംഭിച്ച യാത്ര, വലിയൊരു മുറിയില്‍, ഒരു വെള്ളക്കടലാസില്‍ അവസാനിപ്പിക്കാൻ തീരുമാനിച്ചു, അയാള്‍ കരഞ്ഞില്ല, ഒരു തുള്ളി കണ്ണുനീര്‍ പൊഴിച്ചില്ല...

പകരമയാള്‍ പറഞ്ഞു, ഗോളുകള്‍ മായും, ട്രോഫികളുടെ യാത്ര മ്യൂസിയങ്ങളില്‍ അവസാനിക്കും, റെക്കോര്ഡുകള് തകര്‍ക്കപ്പെടും....പക്ഷേ കാലത്തിന് മായിക്കാനാകാത്ത ഒന്നുണ്ട്, മനുഷ്യരുടെ ഹൃദയത്തിലുള്ള സ്ഥാനം...

നിങ്ങളുടെ ഏഴാം നമ്പര്‍ ജഴ്‌സിയണിഞ്ഞ് തലമുറകള്‍ ഇനിയും മൈതാനങ്ങളിലേക്ക് എത്തും, നിങ്ങളുടെ ഐക്കോണിക്കായ ഫ്രീകിക്ക് സ്റ്റാൻഡ് അനുകരിക്കപ്പെടുത്തും, സൂ മൂഴക്കങ്ങള്‍ ആവര്‍ത്തിക്കപ്പെടും...അത് കാല്‍പ്പന്തുള്ളകാലത്തോളം തുടരും...ഒബ്രിഗാദോ ക്രിസ്റ്റ്യാനോ....

ആർക്കാണ് കണ്‍സിസ്റ്റൻസിയുള്ളത്? സഞ്ജുവിനെ മാത്രം വിമർശിച്ചാല്‍ മതിയോ?

Hari Krishnan M — Sun, 01 Nov 2026 17:52:28 +0530

ജസ്റ്റിസ് 100 ശതമാനം, പെര്‍ഫോമൻസ് പൂജ്യം. ന്യൂസിലൻഡിനെതിരായ ടി20 പരമ്പരയ്ക്ക് ശേഷം സഞ്ജുവിനെതിരെ സമൂഹമാധ്യമങ്ങളില്‍ ഉയര്‍ന്ന പരിഹാസങ്ങളിലൊന്നാണിത്. ശരിയാണ്, അവസാന രണ്ട് മത്സരങ്ങളില്‍ ഒറ്റയക്ക സ്കോറിലാണ് പുറത്തായത്. എന്നാല്‍, വൈഭവ് സൂര്യവംശിക്ക് അവസരം നിഷേധിക്കപ്പെടുന്നുവെന്ന ഒരു കാരണം കൊണ്ട് ഇത്രയധികം വിമർശിക്കേണ്ടതുണ്ടോ. അങ്ങനെ കരുതുന്നുണ്ടെങ്കില്‍ അവരോട് ഒരു ചോദ്യമണുള്ളത്. ന്യൂസിലൻഡ് പര്യടനത്തില്‍ കണ്‍സിസ്റ്റന്റായി ബാറ്റുകൊണ്ട് മികവ് പുലർത്തിയ എത്ര പേരുണ്ട് ഇന്ത്യൻ ടീമില്‍?

ഇന്ത്യയുടെ ബാറ്റിങ് ലൈനപ്പില്‍ അഞ്ച് മത്സരങ്ങളിലും ക്രീസിലെത്തിയത് അഭിഷേക് ശർമ, സഞ്ജു, ശ്രേയസ് അയ്യർ, തിലക് വർമ, നമൻ ധീർ എന്നിവരാണ്. നീതീഷ് നാലും ഇഷാനും അക്സറും മൂന്ന് വീതവം ടി20കളിലും ബാറ്റ് ചെയ്തു, വൈഭവ് ക്രൈസ്റ്റ്‌ചർച്ചിലും വെല്ലിങ്ടണിലും. ഫിനിഷർ റോളിലെത്തിയ നമൻ ധീർ മാത്രമാണ് പരമ്പരയിലെ എല്ലാ മത്സരങ്ങളിലും നിരാശപ്പെടുത്താതെ കോണ്‍ട്രിബ്യൂട്ട് ചെയ്ത താരം, അഞ്ച് മത്സരങ്ങളില്‍ നിന്ന് 200 സ്ട്രൈക്ക് റേറ്റില്‍ 138 റണ്‍സ്. ഇന്ത്യൻ ബാറ്റർമാരില്‍ സെക്കൻഡ് ടോപ് സ്കോറര്‍.

ഇന്ത്യയുടെ ടോപ് സ്കോററായ അഭിഷേക് ശർമ. വെല്ലിങ്ടണില്‍ 38 പന്തില്‍ നേടി 113 റണ്‍സ് മാറ്റി നിർത്തിയാല്‍ പര്യടനത്തിലെ അഭിഷേകിന്റെ നേട്ടം 86 റണ്‍സാണ്. ക്രൈസ്റ്റ് ചർച്ചിലെ രണ്ടാം ടി20യിലും ഓക്ക്‌ലൻഡിലും ഹാമില്‍ട്ടണിലും ന്യൂബോളില്‍ താരം സ്ട്രഗിള്‍ ചെയ്തിരുന്നു. അഞ്ചാം ടി20യില്‍ ഒഴികെ മറ്റെല്ലാ ഇന്നിങ്സുകളിലും തന്റെ സ്കോര്‍ 25 കടത്താൻ ഇടം കയ്യൻ ബാറ്റർക്ക് സാധിച്ചു. ഇംപാക്റ്റ്‌ഫുള്ളായ ഇന്നിങ്സ് സെഞ്ചുറിയാണ്.

ഇനി നായകൻ ശ്രേയസ് അയ്യര്‍, 126 റണ്‍സാണ് പര്യടനത്തിലെ ആകെ നേട്ടം. ഹാമില്‍ട്ടണില്‍ അര്‍ദ്ധ സെഞ്ചുറി. എട്ട് മത്സരങ്ങള്‍ക്ക് ശേഷമാണ് ശ്രേയസ് തന്റെ സ്കോര്‍ 50ലെത്തിക്കുന്നത്. ആദ്യ ടി20യില്‍ 28 പന്തില്‍ 42 റണ്‍സുമായി റണ്‍ചെയ്‌സില്‍ നിർണായക പങ്ക് വഹിക്കാൻ ശ്രേയസിന് കഴിഞ്ഞിരുന്നു. മറ്റ് മൂന്നിലും ശ്രേയസിന്റെ ക്രീസിലെ സാന്നിധ്യമൊരു ഷോർട്ട് സ്റ്റേയായിരുന്നു.

രണ്ടാം ടി20യില്‍ പരാജയത്തിന്റെ വക്കില്‍ നിന്ന് ഇന്ത്യയെ കൈപിടിച്ചുകയറ്റിയ അസാധാരണമായ ഇന്നിങ്സാണ് തിലക് വർമയ്ക്ക് പര്യടനത്തില്‍ ഓർത്തുവെക്കാനുള്ളത്. അഞ്ച് കളികളില്‍ നിന്ന് 122 സ്ട്രൈക്ക് റേറ്റില്‍ 99 റണ്‍സാണ് തിലകിന്റെ സമ്പാദ്യം. ഇനി ഇഷാൻ കിഷനിലേക്ക് എത്തിയാല്‍ അവസാന ടി20യില്‍ അർദ്ധ ശതകം, മറ്റ് രണ്ട് ടി20കളിലെ സ്കോറുകള്‍ പൂജ്യവും ഒന്നുമാണ്. വൈഭവിന് തിളങ്ങാനായത് വെല്ലിങ്ടണില്‍, 19 പന്തില്‍ 45 റണ്‍സ്. അക്സര്‍ പട്ടേലിനാകട്ടെ ബാറ്ററെന്ന ലേബലില്‍ ഓർത്തുവെക്കാൻ ഒന്നുമുണ്ടായിരുന്നില്ല, ആകെ 42 റണ്‍സ്.

നമനേയും അഭിഷേകിനെയും മാറ്റിനിർത്തിയാല്‍ ഇന്ത്യയുടെ ബാറ്റിങ് ലൈനപ്പില്‍ ഒന്നിലധികം മത്സരങ്ങളില്‍ ഇംപാക്റ്റ്‌ഫുള്ളായ കോണ്‍ട്രിബ്യൂഷൻ നല്‍കിയവരില്ലാ എന്ന് കാണാനാകും. സമാനമാണ് സഞ്ജുവിന്റെ സ്ഥിതിയും. അഞ്ച് കളികളില്‍ നിന്ന് 142 സ്ട്രൈക്ക് റേറ്റില്‍ 107 റണ്‍സാണ് പരമ്പരയില്‍ സ്കോര്‍ ചെയ്തത്. ക്രൈസ്റ്റ് ചര്‍ച്ചിലെ ആദ്യ ടി20യില്‍ നേടിയ അർദ്ധ സെഞ്ചുറി, 33 പന്തില്‍ 67 റണ്‍സ്. ഇന്ത്യൻ വിജയത്തില്‍ നിർണായകമായ ഇന്നിങ്സ്.

പിന്നീട് ബാറ്റ് ചെയ്ത നാല് മത്സരങ്ങളില്‍ 40 റണ്‍സ്, മൂന്നാം ടി20യില്‍ വൈഭവിനായി ഓപ്പണിങ് സ്ഥാനം വിട്ടുനല്‍കുകയും ചെയ്യേണ്ടതായി വന്നു. മറ്റെല്ലാ ബാറ്റർമാരെയും പരിഗണിക്കുമ്പോള്‍ സഞ്ജുവിന്റെ പ്രകടനവും ശരാശരിയില്‍ തന്നെയാണ് ഒതുങ്ങിയത്. ഓവർസീസ് കണ്ടീഷനുകളില്‍ ആരും അത്ര എക്സ്ട്രാ ഓർഡിനറിയായിരുന്നില്ല എന്ന വസ്തുതകൂടി ചേർത്ത് വെക്കുമ്പോള്‍ നേരിടുന്ന വിമർശനങ്ങള്‍ സഞ്ജു അർഹിക്കുന്നില്ല എന്ന് ബോധ്യമാകും.

എന്നാല്‍, ഇന്ത്യയെ സംബന്ധിച്ച് ഈ പരമ്പരയ്ക്ക് പ്രാധാന്യമുണ്ടായിരുന്നു. അത് 2028 ടി20 ലോകകപ്പാണ്. ടൂർണെന്റിന് സഹ ആതിഥേയത്വം വഹിക്കുന്ന രാജ്യങ്ങളിലൊന്ന് ന്യൂസിലൻഡാണ്. അതുകൊണ്ട് ന്യൂസിലൻഡിലെ സാഹചര്യങ്ങളില്‍ തിളങ്ങാൻ കഴിയുന്നവർക്ക് തീർച്ചയായും ലോകകപ്പ് ടീം സെലക്ഷനില്‍ മുൻതൂക്കമുണ്ടാകുമായിരുന്നു. ഇവിടെയാണ് സഞ്ജു ഉള്‍പ്പെടെയുള്ള ഭൂരിഭാഗം ബാറ്റർമാരും പരാജയപ്പെട്ടത്.

ഇനി ഇന്ത്യയുടെ അടുത്ത പരമ്പര ഡിസംബറില്‍ ശ്രീലങ്കയ്ക്ക് എതിരെയാണ്, മൂന്ന് മത്സരങ്ങള്‍. രാജ്‌കോട്ടിലും കട്ടക്കിലും പൂനെയിലുമാണ് മത്സരങ്ങള്‍.

പ്രശ്നം കാരിക്ക് മാത്രമോ? മാഞ്ചസ്റ്റർ യുണൈറ്റഡിന്റെ വീഴ്ചയ്ക്ക് പിന്നില്‍ എന്തെല്ലാം?

Hari Krishnan M — Fri, 13 Nov 2026 15:44:03 +0530

12 വ‍ര്‍ഷത്തിനിടെ 11 പരിശീലകര്‍, പ്രശ്നം ഉടമകളുടേതോ താരങ്ങളുടേയോ അതോ പരിശീലകരുടെ തന്നെയോ...വീണ്ടും വീണ്ടും സമാന പ്രശ്നങ്ങളിലൂടെ മാഞ്ചസ്റ്റര്‍ യുണൈറ്റഡ് കടന്നുപോകുമ്പോള്‍ ഇക്കുറി ബലിയാടായത് മൈക്കല്‍ കാരിക്ക്. ഏത് കാരിക്ക്, ക്ലബ്ബ് ഇതിഹാസങ്ങളിലൊരാള്‍, പോയിന്റ് പട്ടികയുടെ അടിത്തട്ടില്‍ നിന്ന് മൂന്നാം സ്ഥാനത്തേക്ക് എത്തിച്ച് പ്രതാപകാലത്തിന്റെ ഓര്‍മകളും പ്രതീക്ഷയും നല്‍കിയ വ്യക്തി. യുണൈറ്റഡിന്റെ മാനേജറായി കാരിക്ക് രണ്ട് വര്‍ഷത്തെ കരാറില്‍ ഒപ്പിട്ടിട്ട് ആറ് മാസമെ ആകുന്നുള്ളു. യഥാര്‍ത്ഥത്തില്‍ കാരിക്കിന്റെയും യുണൈറ്റഡിന്റെയും വീഴ്ചയുടെ കാരണമെന്താണ്?

കഴിഞ്ഞ സീസണില്‍ താല്‍ക്കാലിക പരിശീലകനായി കാരിക്ക് ചുമതലയേറ്റതിന് ശേഷം യുണൈറ്റഡ് 17 മത്സരങ്ങളാണ് കളിച്ചത്, 12ലും വിജയം. സമാനകാലയളവില്‍ പ്രീമിയര്‍ ലീഗില്‍ ഇത്രത്തോളം സക്‌സസ്‌ഫുള്ളായ ഒരു മാനേജർ ഉണ്ടായിരുന്നില്ല. കാരിക്കിന്റെ സിസ്റ്റം അന്ന് എങ്ങനെയായിരുന്നുവെന്ന് നോക്കാം. എതിരാളികളെ പന്ത് കൈവശം വെക്കാൻ അനുവദിച്ചത് പെർഫെക്റ്റ് കൗണ്ടറുകളിലൂടെ ഗോള്‍ കണ്ടെത്തുകയും കോംപാക്റ്റായി മിഡ് ഫില്‍ഡിനേയും ഡിഫൻസിനേയും ഒരുക്കി പ്രതിരോധിക്കുകയുമായിരുന്നു.

എന്നാല്‍ കാരിക്ക് ഈ സീസണില്‍ സ്വീകരിച്ച സമീപനം അല്‍പ്പം വ്യത്യസ്തമായിരുന്നു. ഗെയിമിനെ കൂടുതല്‍ കണ്‍ട്രോള്‍ ചെയ്തുള്ള രീതി. പക്ഷേ, ഇതിന് അനുയോജ്യമായ പ്ലെയര്‍ സ്ട്രെങ്ത് യുണൈറ്റഡിന് ഉണ്ടായിരുന്നോ, അല്ലെങ്കില്‍ ഈ സമീപനത്തിന് യോജിച്ച താരങ്ങള്‍ ഫോമിലായിരുന്നോ, പരിക്കേറ്റ താരങ്ങളുടെ എണ്ണം കൂടി വര്‍ധിച്ച പശ്ചാത്തലത്തില്‍ക്കൂടി ചിന്തിക്കേണ്ടതുണ്ട്. ഇവിടെ ഏറ്റവും നിര്‍ണായകമാകേണ്ടിയിരുന്നത് ബ്രൂണോ ഫെര്‍ണാണ്ടസായിരുന്നു. കാരിക്കിന്റെ സിസ്റ്റത്തിലെ ക്രിയേറ്റര്‍, കാരിക്കിന്റെ മാത്രമല്ല, ഏത് പരിശീലകൻ ചുമതലയേറ്റെടുത്താലും ബ്രൂണോ തന്നെയായണ് ഏറെക്കാലമായി ആ ഉത്തരവാദിത്തം നിറവേറ്റുന്നത്.

കഴിഞ്ഞ സീസണില്‍ 21 അസിസ്റ്റുമായി പ്രീമിയര്‍ ലീഗില്‍ ബ്രൂണോ ചരിത്രമെഴുതുമ്പോള്‍ ഇതില്‍ 12 എണ്ണവും കാരിക്കിന്റെ കീഴിലായിരുന്നു. എന്നാല്‍ ഈ സീസണില്‍ രണ്ട് അസിസ്റ്റുകള്‍ മാത്രമാണ് ബ്രൂണോയുടെ ബൂട്ടുകളില്‍ നിന്ന് യുണൈറ്റഡിന് ലഭിച്ചത്. ഒരു ഘട്ടത്തിലും ബ്രൂണോ തന്റെ ലെവലിലേക്ക് ഉയര്‍ന്നതായി തോന്നിച്ചിട്ടില്ല, കാരിക്കിന്റെ ടാക്റ്റിക്സിനെതിരെ തുറന്നടിക്കുകയും ചെയ്തു ബ്രൂണോ, പിന്നാലെ ബ്രൂണോയെ കാരിക്ക് ഡഗൗട്ടിലിരുത്തി. ടീമിലെ ഏറ്റവും മികച്ച താരവും പരിശീലകനും തമ്മില്‍ ടെൻഷൻ രൂപപ്പെട്ടാല്‍ അത് ടീമിനൊരിക്കലും ഗുണം ചെയ്യുന്ന ഒന്നല്ല.

ഇതിനൊപ്പം ചൂണ്ടിക്കാണിക്കേണ്ടത് ലിസാൻഡ്രൊ മാര്‍ട്ടിനസിന്റെ തുറന്നടിക്കലുകളും കളത്തിലെ വീഴ്ചകളുമാണ്. കളികൊണ്ട് തലക്കെട്ടുകളില്‍ ഇടംപിടിക്കാൻ കഴിയാതെ പോയെങ്കില്‍ പ്രതികരണങ്ങള്‍ക്കൊണ്ട് ലിസാൻഡ്രോയ്ക്ക് അതിന് സാധിച്ചിട്ടുണ്ട്. അതുകൊണ്ട് യുണൈറ്റഡും ലിസാൻഡ്രോയും ഒരുപോലെ പ്രതിരോധത്തിലുമായിട്ടുണ്ട്. പുതിയ പരിശീലകന്റെ ഏറ്റവും ആദ്യത്തെ ശ്രമം തന്നെ ഡ്രെസിങ് റൂമില്‍ അച്ചടക്കം കൊണ്ടുവരിക എന്നതായിരിക്കും.

താരങ്ങളുടെ പരിക്ക് കാരിക്കിന് മുന്നിലെ ഓപ്ഷനുകളുടെ എണ്ണം കുറച്ചിരുന്നു, പ്രത്യേകിച്ചും ലൂക്ക് ഷോയുടേയും പാ‍ട്രിക്ക് ഡോര്‍ഗുവിന്റെയും. എങ്കിലും താരങ്ങളെ ഉപയോഗിച്ച രീതിയില്‍ കാരിക്കിന് വീഴ്ച സംഭവിച്ചിട്ടുണ്ട്. പ്രത്യേകിച്ചും ഫോമിലല്ലാത്ത ഡിയേഗൊ ഡലോട്ടിനെ ലെഫ്റ്റ് ബാക്കിലും ലെനി യോറോയെ റൈറ്റ് ബാക്കിലും, കൃത്യമായൊരു മിഡ് ഫീല്‍ഡ് കോമ്പിനേഷനും സീസണില്‍ കണ്ടെത്തുന്നതില്‍ കാരിക്കിന് സാധിച്ചിരുന്നില്ല. ഇതിന്റെയെല്ലാം കാരണം ട്രാൻസ്‌ഫര്‍ വിൻഡോയില്‍ സംഭവിച്ച വീഴ്ചകളാണ്, കഴിഞ്ഞ പത്ത് വ‍ര്‍ഷത്തോളമായി സംഭവിക്കുന്ന വീഴ്ചകള്‍.

കാരിക്കിലൂടെ യുണൈറ്റഡ് തിരിച്ചുവരുന്നുവെന്ന കൃത്യമായ സൂചനകളുണ്ടായിട്ടും മികച്ച താരങ്ങളെ ടീമിലെത്തിക്കാൻ കഴിഞ്ഞില്ല. പ്രത്യേകിച്ചും കാരിക്ക് ആവശ്യപ്പെട്ട താരങ്ങള്‍, അവരുടെ ബാക്കപ്പുകള്‍. സ്ക്വാഡ് മാനേജ്മെന്റിന്റെ കാര്യത്തില്‍ യുണൈറ്റഡ് പ്രീമിയര്‍ ലീഗ് എക്‌സ്പെക്റ്റേഷനില്‍ നിന്ന് ഒരുപാട് പിന്നിലാണെന്ന് പറയേണ്ടി വരും.

മധ്യനിര ശക്തിപ്പെടുത്താൻ ഏകദേശം 150 മില്യൺ പൗണ്ട് ചെലവഴിച്ച് കാർലോസ് ബാലേബ, യൂറി ടൈലമാൻസ്, ആൻഡ്രേ സാന്റോസ് എന്നിവരെ ടീമിലെത്തിച്ചെങ്കിലും അത് ശരിവെക്കുന്ന പ്രകടനങ്ങള്‍ ഉണ്ടായിട്ടില്ല. കാസെമിറോ ക്ലബ് വിട്ടതും മാനുവൽ ഉഗാർട്ടെയ്ക്ക് പരിക്ക് പറ്റിയതുമൊക്കെ മധ്യനിരയുടെ പോരായ്മകള്‍ എടുത്തുകാണിച്ചു. കാസിമിറോയുടെ അതേ ലെവലില്‍ കളിക്കാൻ കഴിയുന്ന ഒരു താരത്തെ പോലും കണ്ടെത്താൻ യുണൈറ്റഡിന്റെ മാനേജ്മെന്റിനായില്ല.

പരിശീലകൻ ആവശ്യപ്പെടുന്ന താരങ്ങളെ നല്‍കുന്നില്ല. ഒപ്പം മറ്റ് താരങ്ങളുടെ പരിക്ക്, സുപ്രധാന താരങ്ങളുടെ ഫോം ഇല്ലായ്മ. ഇവിടെ ഒരു പരിശീകന് പരിമിതികള്‍ ഇല്ലേ...യുണൈറ്റഡ് ആരാധകര്‍ എന്തുകൊണ്ട് കാരിക്കിനെ പിന്തുണയ്ക്കുകയും മാനേജ്മെന്റിനേയും താരങ്ങളേയും പരിഹസിക്കുകയും ചെയ്യുന്നുവെന്നത് ഉടമകള്‍ മനസിലാക്കേണ്ടിയിരിക്കുന്നു. അല്ലെങ്കില്‍ ഈ സര്‍ക്കിള്‍ തുടരും.

ഇനി കിങ്‌സ് മോഡില്‍ ഹാർദിക്ക് പാണ്ഡ്യ; മുംബൈയുടെ അവസ്ഥയാകുമോ പഞ്ചാബിനും?

Hari Krishnan M — Wed, 11 Nov 2026 15:42:17 +0530

പിന്നിട്ട മൂന്ന് സീസണുകളില്‍ സംഭവിച്ചതൊക്കെ വാംഖഡെയില്‍ തന്നെ ഉപേക്ഷിച്ചിരിക്കുന്നു. ഹാ‍ര്‍ദിക്ക് പാണ്ഡ്യ പുതിയൊരു അധ്യായം ആരംഭിക്കുകയാണ്. ഇനി പഞ്ചാബ് കിങ്സിന്റെ ചുവപ്പില്‍, ശ്രേയസ് അയ്യറിന്റെ കീഴില്‍, റിക്കി പോണ്ടിങ്ങിന്റെ ശിക്ഷണത്തില്‍. നീണ്ട അഞ്ച് വർഷത്തെ ഇടവേളയ്ക്ക് ശേഷം ക്യാപ്റ്റൻസി ഭാരമില്ലാതെ ഹാർദിക്ക് പാണ്ഡ്യ കളത്തിലെത്തുകയാണ്. ഇന്ത്യൻ ഓള്‍ റൗണ്ടര്‍ക്ക് യോജിച്ച സംഘമാണോ പഞ്ചാബ്?

മുംബൈ ഡ്രെസിങ് റൂമിലെ ഭിന്നതകള്‍ കളത്തിലും പ്രതിഫലിച്ചപ്പോള്‍ ഹാര്‍ദിക്ക് ചെപ്പോക്കിലേക്ക് ചേക്കേറുമെന്നായിരുന്നു എല്ലാവരും കരുതിയത്. അയാള്‍ക്ക് ഏറ്റവും പ്രിയപ്പെട്ട മഹി ഭായിക്കൊപ്പം ചെന്നൈ സൂപ്പര്‍ കിങ്സില്‍. താരത്തിന്റെ ട്രേഡുമായി ബന്ധപ്പെട്ട് ഏറ്റവുമധികം ഉയര്‍ന്ന് കേട്ടതും ചെന്നൈയുടെ പേര് തന്നെയായിരുന്നു. എന്നാല്‍, എന്തൊക്കെയൊ കാരണത്താല്‍ മുംബൈയും ചെന്നൈയും തമ്മിലുള്ള ചര്‍ച്ചകള്‍ പുരോഗമിക്കാതെ അവസാനിച്ചു. ചെന്നൈക്കും പഞ്ചാബിനുമൊപ്പം ഹാര്‍ദിക്കിനായി രാജസ്ഥാൻ റോയല്‍സും കളത്തിലുണ്ടായിരുന്നു.

ഒടുവില്‍, മുംബൈ അര്‍ഷദീപ് സിങ്ങിലൂടെ തങ്ങളുടെ ദൗര്‍ബല്യങ്ങള്‍ നികത്താനുറച്ചപ്പോള്‍ ഡീല്‍ സാധ്യമായി. ഹാര്‍ദിക്കിനേയും പഞ്ചാബിനേയും സംബന്ധിച്ച് ഈ ട്രേഡ് മികച്ചതാകാണമെങ്കില്‍ ഒരൊറ്റ കണ്ടീഷനാണുള്ളത്. താരം നൂറ് ശതമാനവും ഫിറ്റായിരിക്കണം. പവർ ഹിറ്റർ കൂടിയായ മിഡില്‍ ഓർഡര്‍ ബാറ്റർ, ഇന്ത്യൻ സീം ബൗളിങ് ഓപ്ഷൻ, ഐപിഎല്‍ നോക്കൗട്ടുകളിലെ പരിചയസമ്പത്ത്, ബാറ്റിങ്ങ്, ബൗളിങ് ലൈനപ്പുകള്‍ക്ക് കൃത്യമായ ബാലൻസ് നല്‍കാൻ കഴിയുന്ന പ്രൂവണ്‍ പ്ലെയര്‍. പഞ്ചാബിന് ആവശ്യമുള്ളതെല്ലാം ഹാര്‍ദിക്ക് എന്ന പേരിന് നേര്‍ക്കുണ്ട്.

2026 ഐപിഎല്‍ പഞ്ചാബ് നേരിട്ട പ്രധാന വെല്ലുവിളികളിലൊന്ന് മധ്യനിരയുടെ സ്കോറിങ് പേസിലുണ്ടായ ഇടിവാണ്. പ്രഭ്‌സിമ്രാൻ സിങ്ങും പ്രിയാൻഷ് ആര്യയും നല്‍കുന്ന മികച്ച തുടക്കങ്ങള്‍ ഇന്നിങ്സിലുടനീളം ആവര്‍ത്തിക്കാൻ കഴിയാതെ പോയി. ശ്രേയസിന് ബാറ്റുകൊണ്ട് കോണ്‍ട്രിബ്യൂട്ട് ചെയ്യാൻ കഴിഞ്ഞില്ലെങ്കില്‍ ക്രൈസിസ് മാനേജ് ചെയ്യാൻ കഴിയാതെ പോകുന്ന മിഡില്‍ ഓര്‍ഡര്‍. പ്രിയാൻഷ്, പ്രഭ്‌സിമ്രാൻ, കൂപ്പര്‍ കനോലി, ശ്രേയസ് എന്നിവരടങ്ങുന്നതാണ് പഞ്ചാബിന്റെ ടോപ് ഓര്‍ഡര്‍. ശേഷം കഴിഞ്ഞ സീസണില്‍ പ്രത്യക്ഷപ്പെട്ടത് സൂര്യാൻഷ് ഷെഡ്‌ഗെ, ശശാങ്ക് സിങ്, അസ്മത്തുള്ള ഒമ‍‍ര്‍സായി അല്ലെങ്കില്‍ മാര്‍ക്കസ് സ്റ്റോയിനിസായിരുന്നു.

ശശാങ്കും ഒമര്‍സായിയും പരാജയപ്പെട്ടപ്പോള്‍ സ്റ്റോയിനിസും സൂര്യാൻഷും ഭേദപ്പെട്ട പ്രകടനം പുറത്തെടുത്തു. ഇവിടെ അഞ്ചാം നമ്പറിലേക്ക് ഹാര്‍ദിക്ക് എത്തുകയാണെങ്കില്‍ ലോവര്‍ ഓര്‍ഡര്‍ സോളിഡാകും, സ്റ്റോയിനിസും സൂര്യാൻഷോ വഴിമാറിക്കൊടുക്കേണ്ടി വന്നേക്കാം. മധ്യഓവറുകളില്‍ സ്പിന്നര്‍മാരെ ഡൊമിനേറ്റ് ചെയ്യാനും ഡെത്തില്‍ പേസിനെതിരെ സ്കോര്‍ ചെയ്യാനും ടോപ് ഓര്‍ഡര്‍ കൊളാപ്സായാല്‍ ഇന്നിങ്സിനെ ബില്‍ഡ് ചെയ്യാനും ഹാര്‍ദിക്കിന് വൈഭവമുണ്ട്. ശശാങ്ക് ടീമിലുള്ള പശ്ചാത്തലത്തില്‍ ഒരു ഫിനിഷറായി മാത്രം നിലകൊള്ളേണ്ടതായും വരില്ല.

ബൗളിങ് ഡിപ്പാര്‍ട്ട്മെന്റിലേക്ക് വന്നാല്‍ അര്‍ഷദീപിനെപ്പോലൊരു ഐക്കോണിക്ക് താരത്തെ കൈവിട്ടാണ് ഹാര്‍ദിക്കിനെ പഞ്ചാബ് ടീമിലെത്തിച്ചിരിക്കുന്നത്. കഴിഞ്ഞ സീസണിലെ രണ്ടാം പകുതി പൂര്‍ണമായും പഞ്ചാബിന് നഷ്ടമായതിനാല്‍ പ്ലേ ഓഫിലെത്താൻ കഴിഞ്ഞിരുന്നില്ല. സീം മൂവ്മെന്റ് ലഭിക്കുന്ന വിക്കറ്റുകളില്‍ ന്യൂബോള്‍ ഓപ്ഷനാണ് ഹാര്‍ദിക്ക്, മിഡില്‍ ഓവറിലും ഉപയോഗിക്കാനാകും, പവര്‍പ്ലേയില്‍ അനുകൂലമായ സാഹചര്യമല്ലെങ്കില്‍ എക്സ്പെൻസീവാകുമെന്ന് മാത്രം. ഹാര്‍ദിക്കിന്റേ സാന്നിധ്യം ഒരു സ്പെഷ്യലിസ്റ്റ് ബൗളറെയോ ബാറ്ററെയോ ഉള്‍പ്പെടുത്താൻ മാനേജ്മെന്റിനെ സഹായിക്കുകയും ചെയ്യും.

രണ്ട് ഡിപ്പാര്‍ട്ട്മെന്റുകളിലും കോണ്‍ട്രിബ്യൂട്ട് ചെയ്യാൻ കഴിയുമെന്ന് പറയുമ്പോഴും ആശങ്കപ്പെടുത്തുന്ന ചിലതുമുണ്ട്. താരത്തിന്റെ ഫോമും ഫിറ്റ്നസും. കഴിഞ്ഞ സീസണില്‍ 10 മത്സരങ്ങളില്‍ നിന്ന് 206 റണ്‍സായിരുന്നു ഹാര്‍ദിക്കിന്റെ ആകെ നേട്ടം, നേടിയ 10 വിക്കറ്റാകട്ടെ 11.43 എക്കോണമിയിലും. ഒരു പ്രീമിയം ഓള്‍ റൗണ്ടറില്‍ നിന്ന് പ്രതീക്ഷിക്കുന്ന നമ്പറുകളല്ല ഇത്, ഇതിലും മികവ് പുലര്‍ത്താൻ കഴിഞ്ഞ സീസണില്‍ സ്റ്റോയിനിസിന് സാധിച്ചിരുന്നു. ഹാര്‍ദിക്കിന്റെ നാല് ഓവര്‍ ക്വാട്ട പൂര്‍ത്തിയാക്കാൻ കഴിയുമോയെന്നതാണ് പ്രസക്തമായ ചോദ്യം.

മുംബൈക്കായി 2026 സീസണില്‍ 10 മത്സരങ്ങള്‍ കളിച്ച ഹാര്‍ദിക്ക് ഒൻപതിലും പന്തെറിഞ്ഞിരുന്നു. എന്നാല്‍ നാല് ഓവര്‍ എറിഞ്ഞത് രണ്ട് ടി20കളില്‍ മാത്രമായിരുന്നു, റോയല്‍ ചലഞ്ചേഴ്സ് ബെംഗളൂരുവിനും സണ്‍റൈസേഴ്സ് ഹൈദരാബാദിനുമെതിരെ. സീസണില്‍ ശരാശരി ഒരു മത്സരത്തില്‍ 2.3 ഓവറാണ് ഹാ‍ര്‍ദിക്ക് എറിഞ്ഞിട്ടുള്ളതും. എല്ലാ മത്സരത്തിലും നാല് ഓവര്‍ എറിയാനാകുന്ന ഫിറ്റ്നസിലേക്ക് താരം എത്തിയിട്ടില്ല എന്ന് വേണം മനസിലാക്കാൻ. ടൂര്‍ണമെന്റിനിടെ പരിക്കേല്‍ക്കുകയും ചെയ്തിരുന്നു. ഇതുവരെ പൂര്‍ണമായും ഫിറ്റ്നസ് വീണ്ടെടുത്തിട്ടുമില്ല.

അടുത്ത ഐപിഎല്ലിലായിരിക്കും ഹാര്‍ദിക്ക് കോമ്പറ്റീറ്റീവ് ക്രിക്കറ്റിലേക്ക് മടങ്ങിയെത്തുക എന്ന സൂചനകളാണ് പുറത്ത് വന്നിട്ടുള്ളതും. ഹാര്‍ദിക്കിന്റെ കരിയര്‍ ഉടനീളം പരിശോധിച്ചാല്‍ പരിക്കും തിരിച്ചുവരവുകളും നിറഞ്ഞതാണ്, എന്നാല്‍ ഇടവേളയില്ലാതെ ദീര്‍ഘകാലം കളത്തില്‍ തുടരാനും കഴിഞ്ഞിട്ടില്ല. പ്രത്യേകിച്ചും പരിക്ക് ഗുരതരമായതിന് ശേഷം. ഇത് പഞ്ചാബിനെ സംബന്ധിച്ച് അല്‍പ്പം തിരിച്ചടി നേരിടുന്ന ഘടകമാണ്. പ്രത്യേകിച്ചും പരിക്കില്‍ നിന്ന് മടങ്ങിയെത്തുന്ന ഹാര്‍ദിക്കിന് എത്രത്തോളം മികവ് പുലര്‍ത്താൻ കഴിയുമെന്ന ചോദ്യവും അവശേഷിക്കെ.

പക്ഷേ, 100 ശതമാനം ഫിറ്റ്നസോടുകൂടിയാണ് ഹാര്‍ദിക്കിന്റെ തിരിച്ചുവരവെങ്കില്‍ പഞ്ചാബിന്റെ ഏറ്റഴും മികച്ച സൈനിങ്ങായും ഹാര്‍ദിക്കിന്റെ പേര് രേഖപ്പെടുത്തും.

ശ്രേയസ് അയ്യർ എന്ന നായകൻ പോരെ? ഇത്രയധികം വിമർശനങ്ങള്‍ അർഹിക്കുന്നുണ്ടോ?

Hari Krishnan M — Mon, 02 Nov 2026 14:46:39 +0530

സൂര്യകുമാര്‍ യാദവ് തന്റെ ടി20 ക്യാപ്റ്റൻസി കരിയറിലൂടനീളം വഴങ്ങിയത് എട്ട് തോല്‍വികളാണ്, രോഹിത് ശര്‍മ 12. സൂര്യ 52 മത്സരങ്ങളിലാണ് ഇന്ത്യയെ നയിച്ചത്, രോഹിത് 62ഉം. എന്നാല്‍, ശ്രേയസ് അയ്യറിന് കീഴില്‍ ഇതിനോടകം തന്നെ 10 പരാജയങ്ങള്‍ സംഭവിച്ചു, 26 മത്സരങ്ങളില്‍ നിന്ന്. അഡ്രസ് ചെയ്യാതെ പോകാൻ കഴിയുന്നൊരു വ്യത്യാസമല്ല ഇത്. മൂന്ന് തവണ ഐപിഎല്‍ ഫൈനലില്‍ എത്തുകയും ഒരു പ്രാവശ്യം കിരീടവും നേടി തെളിയിച്ച ശ്രേയസിനെ ഈ തോല്‍വികളുടെ അടിസ്ഥാനത്തില്‍ അളക്കേണ്ടതുണ്ടോ? അന്താരാഷ്ട്ര ക്രിക്കറ്റില്‍ ശ്രേയസ് എന്ന നായകൻ നേരിടുന്ന പ്രതിസന്ധികളെന്തൊക്കെയാണ്? പരിശോധിക്കാം.

ന്യൂസിലൻഡിനെതിരായ ടി20 പരമ്പരയ്ക്ക് ശേഷം മുഖ്യപരിശീലകൻ ഗൗതം ഗംഭീറിനോട് സ്വാഭാവികമായും ശ്രേയിസിന്റെ ക്യാപ്റ്റൻസിയുമായി ബന്ധപ്പെട്ട ചോദ്യം ഉയര്‍ന്നു. എന്നാല്‍ തന്റെ നായകന് പൂ‍ര്‍ണ പിന്തുണ കൊടുക്കുക എന്ന ഉത്തരവാദിത്തം മാത്രമല്ല ഗംഭീര്‍ നിര്‍വഹിച്ചത്, മറിച്ച് ശ്രേയസിനെ അഭിനന്ദിക്കുകയും ചെയ്തു.

പരിചയസമ്പന്നത കുറഞ്ഞ ബൗളിങ് നിരയുള്ള ഒരു സംഘത്തെ മികച്ച രീതിയില്‍ നയിക്കാൻ ശ്രേയസിന് സാധിച്ചു. ഒരു നായകന്റെ വിജയം, ബൗളര്‍മാരും ബാറ്റര്‍മാരും എങ്ങനെ കളിക്കുന്നുവെന്നതിനെ കൂടി ആശ്രയിച്ചാണിരിക്കുന്നത്, നിലവിലെ സാഹചര്യം പരിഗണിക്കുമ്പോള്‍ ശ്രേയസ് അസാധാരണമായാണ് കാര്യങ്ങള്‍ കൈകാര്യം ചെയ്യുന്നത്, ഇതായിരുന്നു ഗംഭീറിന്റെ വാക്കുകള്‍.

നായക ചുമതല ഏറ്റെടുക്കുമ്പോള്‍ തന്നെ ശ്രേയസ് വ്യക്തമാക്കിയൊരു കാര്യമുണ്ട്. ഇന്ത്യയുടെ ടി20 ടീം ഒരു പരിവര്‍ത്തന ഘട്ടത്തിലാണ് എന്നത്. ബിസിസിഐയുടെ അടുത്ത ലക്ഷ്യം തീര്‍ച്ചയായും 2028 ടി20 ലോകകപ്പാണ്, ഹാട്രിക്ക് കിരീടമെന്ന അപൂര്‍വതയിലേക്കുള്ള യാത്ര. അതിനായൊരു സ്ക്വാഡിനെ തയാറാക്കുകയാണ് നിലവില്‍. പക്ഷേ, ഇവിടെ ശ്രേയസ് നേരിടുന്ന പ്രധാന വെല്ലുവിളി സുപ്രധാന താരങ്ങളുടെ അഭാവം പരിക്ക് എന്നിവയാണ്, ഇതിനൊപ്പം കൃത്യമായൊരു ബൗളിങ് കോമ്പിനേഷൻ കണ്ടെത്താനുള്ള പരീക്ഷണങ്ങളും.

ന്യൂസിലൻഡില്‍ ഇന്ത്യക്ക് അവസാന ടി20 വരെയും കൃത്യമായൊരു ബൗളിങ് ലൈനപ്പ് ഒരുക്കാൻ കഴിഞ്ഞിരുന്നില്ല. അന്താരാഷ്ട്ര ക്രിക്കറ്റില്‍ മതിയായ എക്‌സ്‌പീരിയൻസില്ലാത്ത മായങ്ക് യാദവ്, പ്രിൻസ് യാദവ് എന്നീവരായിരുന്നു അര്‍ഷദീപ് സിങ്ങിന് പിന്തുണ ആയി ടീമിലുണ്ടായിരുന്നത്, ഒപ്പം നീണ്ട ഇടവേളയ്ക്ക് ശേഷം ടീമിലേക്ക് മടങ്ങിയെത്തിയ ഭുവനേശ്വര്‍ കുമാര്‍. ഈ പേസ് ബൗളിങ് ലൈനപ്പില്‍ സ്ഥിര സാന്നിധ്യമായി തുടര്‍ന്നത് അര്‍ഷദീപ് സിങ്ങ് മാത്രമാണ്. എക്‌സപ്റ്റ് അര്‍ഷദീപ്, ഇന്ത്യയുടെ പേസ് നിരയിലെ എല്ലാവരുടേയും എക്കോണമി 10ന് മുകളിലുമായിരുന്നു.

ഇനി സ്പിൻ നിരയിലേക്ക് വരാം. ഇന്ത്യയുടെ വിക്കറ്റ് ടേക്കിങ് ബൗളര്‍മാരായ കുല്‍ദീപ് യാദവിനേയും വരുണ്‍ ചക്രവര്‍ത്തിയേയും ടീമില്‍ പുറത്തിരുത്തിയായിരുന്നു പരമ്പരയിലെ ആദ്യ നാല് മത്സരങ്ങളിലും ഇന്ത്യ മൈതാനത്തിറങ്ങിയത്. ഹാമില്‍ട്ടണ്‍ ടി20യില്‍ മാത്രമാണ് വരുണിനെ ഉള്‍പ്പെടുത്തിയത്, അപ്പോഴും കുല്‍ദീപ് ഡഗൗട്ടില്‍ തുടര്‍ന്നു. ഏക സ്പിന്നറായി അക്സര്‍ പട്ടേലും. പരമ്പരയില്‍ ഇന്ത്യ ഓള്‍ റൗണ്ടര്‍മാര്‍ക്ക് പ്രധാന്യം കൊടുത്ത് ബൗളിങ് ഡെപ്ത് കുറച്ചുമായിരുന്നു ഇലവനൊരുക്കിയത്. നിതീഷ് കുമാ‍ര്‍ റെഡ്ഡി, നമൻ ധീര്‍, അക്സര്‍ എന്നിവരായിരുന്നു ഓള്‍ റൗണ്ടര്‍മാര്‍.

ഇതുകൊണ്ട് തന്നെ ഇംപാക്റ്റ്ഫുള്ളായ, അല്ലെങ്കില്‍ വിക്കറ്റ് ടേക്കിങ് ബൗളര്‍മാരെ ഉപയോഗിക്കുന്നതില്‍ ശ്രേയസിന് പരിമിധികളുണ്ടായിരുന്നു. ഭുവിയുടെ തിരിച്ചുവരവ് നിരാശപ്പെടുത്തിയതും ഒരു കാരണമായി ചൂണ്ടിക്കാണിക്കാൻ കഴിയും. ഈ സാഹചര്യത്തിലും ഇന്ത്യ പരമ്പര സ്വന്തമാക്കിയെന്ന വസ്തുത വിസ്മരിച്ചുകൂട. ഹൈ റിസ്ക്ക്, ഹൈ റിവാര്‍ഡ് ഫിലോസഫിയിലാണ് ഇന്ത്യ ഏറെക്കാലമായി ടി20 കളിക്കുന്നത്. അതുകൊണ്ട് തന്നെ അപ്സ് ആൻഡ് ഡൗണ്‍സ് പ്രതീക്ഷിക്കുന്നതാണ് ഗംഭീര്‍ തന്നെ വ്യക്തമാക്കിയിട്ടുമുണ്ട്.

ബൗളിങ് ലൈനപ്പിലെ പരീക്ഷണങ്ങള്‍ക്കൊപ്പം ചേര്‍ത്തുവെക്കേണ്ടത് മാര്‍ക്യു താരങ്ങളുടെ അസാന്നിധ്യമാണ്. ജസ്പ്രിത് ബുമ്രയും ഹാര്‍ദിക്ക് പാണ്ഡ്യയും. ഇരുവരേയും റീപ്ലേസ് ചെയ്യുകയെന്നാണ് പ്രയാസമാണ്. പ്രത്യേകിച്ചും ബുമ്രയെ, ബുമ്രയുടെ ലെവലില്‍ പ്രിൻസോ മായങ്കോ അര്‍ഷദീപോ എറിയണമെന്ന് പ്രതീക്ഷവെക്കാനാകില്ല. ജനറേഷണലായുള്ള ടാലിന്റിനെ മറ്റ് താരങ്ങളുമായി താരതമ്യം ചെയ്യുന്നതില്‍ തന്നെ ലോജിക്കില്ലായ്മ നിലനില്‍ക്കുന്നു. ബുമ്രയുടെ സാന്നിധ്യം ബൗളിങ്ങില്‍ ഇന്ത്യക്ക് നല്‍കുന്ന ഡെപ്ത് ചെറുതല്ലയെന്നതിന്റെ ഉദാഹരണമാണ് രണ്ട് ടി20 ലോകകിരീടങ്ങള്‍, ഹാര്‍ദിക്ക് നല്‍കുന്ന ബാലൻസ് മറ്റൊരു താരത്തിന് നല്‍കാൻ കഴിയുന്നതുമല്ല.

സൂര്യയുടെ വിജയങ്ങള്‍ക്ക് പിന്നില്‍ ബുമ്രയുടെ സംഭാവന നിര്‍ണായകമായിരുന്നു, പ്രത്യേകിച്ചും 2026 ലോകകപ്പില്‍. ഹൈ സ്കോറിങ് ഗെയിമുകള്‍ ഇന്ത്യ പലപ്പോഴും തിരിച്ചുപിടിച്ചത് ബുമ്രയുടെ നാല് ഓവറിലായിരുന്നു. മറുവശത്ത് രോഹിതിന്റെ ടാക്റ്റിക്കല്‍ സുപ്പീരിയോരിറ്റി ബുമ്രയില്ലാതെയും വിജയം നേടിയെടുക്കാൻ അയാളെ പ്രാപ്തനാക്കിയിട്ടുണ്ട്.

ശ്രേയസിന്റെ കീഴില്‍ എതിരാളികള്‍ ഹൈ സ്കോറുകള്‍ പടുത്തുയര്‍ത്തുന്നുണ്ടാകാം. ബാറ്റിങ്ങിനെ പൂര്‍ണമായും പിന്തുണയ്ക്കുന്ന വിക്കറ്റുകളില്‍ അത് ഇനിയും സംഭവിച്ചേക്കാം. എക്സ് ഫാക്ടറുകളുടെ അഭാവം അത്തരം മത്സരങ്ങളില്‍ ഇന്ത്യയ്ക്ക് തിരിച്ചടിയും നല്‍കിയേക്കാം, ഇന്ത്യക്ക് അനുകൂലവുമായേക്കാം. പാര്‍ട്ട് ഓഫ് മോഡേണ്‍ ടി20.

ശ്രേയസിനെ വിമര്‍ശിക്കുമ്പോള്‍, അല്ലെങ്കില്‍ ഈ തോല്‍വികളില്‍ അയാളെ അളക്കുമ്പോള്‍ ഇത്തരം വസ്തുതകള്‍ക്കൂടി പരിഗണിക്കേണ്ടതുണ്ട്. കൂടുതല്‍ യുവതാരങ്ങളെ ഉപയോഗിച്ചാണ് ഇന്ത്യ ഇന്ന് കളിക്കുന്നത്, 2028 ലോകകപ്പിലേക്ക് ഒരു ഇലവനെ ഷേപ്പ് ചെയ്യുക എന്നതാണ് ലക്ഷ്യം. ബുമ്രയുടേയും ഹാര്‍ദിക്കിന്റേയും അഭാവത്തില്‍പ്പോലും ജയിക്കാൻ കഴിയുന്ന ഒരു സംഘത്തെ. അത് എത്രത്തോളം സാധ്യമാകുമെന്നത് കാത്തിരുന്ന് കാണേണ്ടതാണ്.