Asianet News Malayalam

ഐപിഎല്‍ 2026: പരിക്ക് മാത്രമോ ധോണിയുടെ എൻട്രിക്ക് തടസം, എന്ന് വരും ചെന്നൈയുടെ തല?

Hari Krishnan M — Sun, 10 May 2026 14:23:45 +0530

ചെന്നൈ സൂപ്പര്‍ കിങ്സിന്റെ വിഖ്യാത ജഴ്‌സിയില്‍ അയാളുടെ അവസാന സീസണായിരിക്കുമോ ഇത്? ഇന്ത്യൻ പ്രീമിയർ ലീഗിന്റെ 19-ാം എഡിഷൻ ആരംഭിക്കുന്നതിന് മുൻപ് ക്രിക്കറ്റ് ആരാധകരുടെ മനസില്‍ ഉയർന്ന ചോദ്യമിതായിരുന്നു. ഏഴാം നമ്പർ അണിഞ്ഞ് ആ മനുഷ്യൻ മുന്നില്‍ നിന്ന് നയിക്കുന്നതെ ആ ജനത ഇന്നോളം കണ്ട് ശീലിച്ചിട്ടുള്ളു. റുതുരാജ് ഗെയ്ക്വാദിന് നായകസ്ഥാനം കൈമാറിയത്, സഞ്ജു സാംസണിന്റെ എൻട്രി, ഇതെല്ലാം ആരാധകരുടെ ആശങ്കനിറഞ്ഞ ചോദ്യത്തിന്റ ആഴം വർധിപ്പിച്ചുകൊണ്ടേയിരുന്നു.

എന്നാല്‍, സീസണ്‍ അതിന്റെ ക്ലൈമാക്‌സിലേക്ക് അടുക്കുമ്പോഴും അതിന് ഉത്തരം ലഭിച്ചിട്ടില്ല. ചെപ്പോക്കിന്റെ ഗ്യാലറികള്‍ കാത്തിരിക്കുന്നു, അവര്‍ ഇന്ന് ആര്‍ത്തിരമ്പുന്നത് സഞ്ജുവിനായാണ്. അതിന്റെ യഥാര്‍ത്ഥ അവകാശിക്കായി സീസണില്‍ ഇനി രണ്ട് അവസരങ്ങള്‍ മാത്രമാണുള്ളതും. മഹേന്ദ്ര സിങ് ധോണി എന്തുകൊണ്ട് ചെന്നൈക്കായി കളത്തിലിറങ്ങുന്നില്ല. തലയുടെ എൻട്രിക്കായി എത്രനാള്‍ ഇനിയും കാത്തിരിക്കണം.

നിലവിലെ സാഹചര്യത്തിന്റെ ആധാരം ധോണിക്ക് നേരത്തെ തന്നെയുണ്ടായിരുന്ന പരിക്കാണ്. കാല്‍മുട്ടിന് താഴെയുള്ള പേശിയിലായിരുന്നു മുൻ ഇന്ത്യൻ നായകന് പരിക്കേറ്റിരുന്നത്. അതുകൊണ്ട്, സീസണിലെ ആദ്യ രണ്ട് വാരം ധോണിക്ക് വിശ്രമം നല്‍കുമെന്നായിരുന്നു ടീം മാനേജ്മെനറ് അറിയിച്ചിരുന്നത്. എന്നാല്‍, പ്രീ സീസണ്‍ പ്രാക്റ്റീസിനിടെ പരിക്ക് കൂടുതല്‍ വഷളാവുകയായിരുന്നു. 45-ാം വയസിലേക്ക് കടക്കുന്ന ഇതിഹാസത്തെ തിടുക്കപ്പെട്ട് കളത്തിലെത്തിച്ചാല്‍ സീസണ്‍ പൂര്‍ണമായും നഷ്ടപ്പെടുന്ന അവസ്ഥയിലേക്ക് എത്തുമെന്നായിരുന്നു ചെന്നൈയുടെ മുഖ്യപരിശീലകനായ സ്റ്റീഫൻ ഫ്ലെമിങ് അറിയച്ചത്.

ഡല്‍ഹി ക്യാപിറ്റല്‍സിനെതിരായ എവെ മത്സരത്തിന് ടീമിനൊപ്പം സഞ്ചരിക്കാൻ ധോണി തയാറായിരുന്നില്ല. ശാരീരിക ക്ഷമത വീണ്ടെടുക്കുന്നതിനായി ചെന്നൈയില്‍ തന്നെ തുടരുകയായിരുന്നു താരം. എന്നാല്‍ ധോണി ശാരീരിക ക്ഷമത പൂര്‍ണമായും വീണ്ടെടുത്തുവെന്ന സൂചനകളാണ് റിപ്പോര്‍ട്ടുകള്‍ നല്‍കുന്നത്. അതുകൊണ്ട് ചെന്നൈയുടെ ഹോം മൈതാനമായ ചെപ്പോക്കില്‍ അവശേഷിക്കുന്ന മത്സരങ്ങളില്‍ ധോണിയെ ആരാധകര്‍ പ്രതീക്ഷിക്കുന്നുണ്ട്. ഇത് സംബന്ധിച്ച് ഔദ്യോഗികമായ പ്രഖ്യാപനങ്ങളൊന്നും ടീം മാനേജ്മെന്റിന്റെ ഭാഗത്തുനിന്ന് ഉണ്ടായിട്ടില്ല.

പക്ഷേ, ഫിറ്റ്നസ് വീണ്ടെടുത്താലും ധോണിയെ കളത്തില്‍ പ്രതീക്ഷിക്കാൻ കഴിയുമോയെന്നൊരു ആശങ്കയുമുണ്ട് ആരാധകര്‍ക്കിടയില്‍. ഇതിന് പിന്നില്‍ രണ്ട് കാരണങ്ങളാണ് പ്രധാനമായും ഉയര്‍ന്ന് കേള്‍ക്കുന്നത്. ഒന്ന് താരത്തിന്റെ പരിക്കും പ്രായവുമാണ്. പരിക്കും, ശേഷം പരിക്ക് വഷളായതും തിരിച്ച് വരവ് വൈകിപ്പിച്ചു. ശാരീരിക ക്ഷമതയുടെ കാര്യത്തില്‍ യുവതാരങ്ങളേക്കാള്‍ ഏറെ മുന്നിലുള്ള താരമാണ് ധോണിയെന്നതില്‍ സംശയങ്ങളില്ല. എന്നാല്‍, പരിക്കിന് ശേഷമുള്ള മടങ്ങിവരവ് താരങ്ങളെ സംബന്ധിച്ച് എളുപ്പമുള്ള ഒന്നല്ല, പ്രത്യേകിച്ചും ഐപിഎല്‍ പോലെ ഹൈ ലെവല്‍ ഡിമാൻഡ് ചെയ്യുന്ന ടൂര്‍ണമെന്റില്‍.

ഇതിനോട് ചേര്‍ത്താണ് രണ്ടാമത്തെ കാരണം പറയാനുള്ളത്. രാജസ്ഥാനോടും പഞ്ചാബിനോടും ബെംഗളൂരുവിനോടും തോല്‍വി വഴങ്ങിയാണ് ചെന്നൈ സീസണ്‍ ആരംഭിച്ചത്. എന്നാല്‍ പിന്നീട് നടന്ന ഏഴ് മത്സരത്തില്‍ അഞ്ചിലും ജയിക്കാൻ ചെന്നൈക്ക് സാധിച്ചു. നിലവില്‍ മുംബൈയേയും ഡല്‍ഹിയേയും കീഴടക്കി തുടര്‍ ജയങ്ങളുമായി മുന്നേറുന്നു. ഇനി അവശേഷിക്കുന്നത് നാല് മത്സരങ്ങളാണ്, ഇതില്‍ മൂന്നെണ്ണത്തില്‍ വിജയിക്കാനായാല്‍ 16 പോയിന്റുമായി പ്ലേ ഓഫിന് ആവശ്യമായ സുരക്ഷിത സംഖ്യയിലേക്ക് എത്താൻ മുൻ ചാമ്പ്യന്മാര്‍ക്ക് കഴിയും.

ധോണി ടീമിലേക്ക് മടങ്ങിയെത്തിയാല്‍ ടീമിന്റെ ബാലൻസ് നഷ്ടപ്പെടാനുള്ള സാധ്യതയുണ്ട്. പ്രത്യേകിച്ചും എല്ലാ താരങ്ങളും തന്നെ ഫോമിലേക്ക് ഉയര്‍ന്നുവരുന്ന സാഹചര്യത്തില്‍. നിലവിലെ ചെന്നൈയുടെ ബാറ്റിങ് നിര, സഞ്ജു സാംസണ്‍, റുതുരാജ് ഗെയ്ക്വാദ്, ഉര്‍വില്‍ പട്ടേല്‍, ഡിവാള്‍ഡ് ബ്രെവിസ്, കാര്‍ത്തിക്ക് ശര്‍മ, ശിവം ദുബെ എന്നിങ്ങനെയാണ്, സര്‍ഫറാസ് ഖാനും സാന്നിധ്യമാകാറുണ്ട്. യുവതാരം കാര്‍ത്തിക്ക് ശര്‍മായെയാണ് ലോവര്‍ ഓര്‍ഡറില്‍ ചെന്നൈ പരീക്ഷിക്കുന്നത്. മുംബൈക്കെതിരെ അര്‍ദ്ധ സെഞ്ചുറിയും ഡല്‍ഹിക്കെതിരെ 41 റണ്‍സും കാര്‍ത്തിക്ക് നേടിയിരുന്നു. രണ്ട് മത്സരങ്ങളിലും പുറത്താകാതെയും ക്രീസില്‍ തുടര്‍ന്നു.

ധോണി ടീമിലേക്ക് എത്തിയാല്‍ ഫോമിലുള്ള കാര്‍ത്തിക്ക് പുറത്തിരിക്കേണ്ടി വരും. അല്ലെങ്കില്‍ ഉര്‍വില്‍ പട്ടേലിനെ ഒഴിവാക്കണം, അപ്പോള്‍ ആര് മൂന്നാം നമ്പറില്‍ കളിക്കുമെന്ന ആശയക്കുഴപ്പമുണ്ട്. കാര്‍ത്തിക്കിന് സ്ഥാനക്കയറ്റം നല്‍കിയാലും ബാറ്റിങ് ഓര്‍ഡറിലെ വിന്നിങ് കോമ്പിനേഷൻ പൊളിയും. മറ്റൊരു മാര്‍ഗം, പരിക്കിന്റെ പശ്ചാത്തലത്തില്‍ ധോണി ഇംപാക്റ്റ് പ്ലെയറായി കളത്തിലെത്തുക എന്നതാണ്. അതിന് ചെന്നൈ മാനേജ്മെന്റ് തയാറാകുമോയെന്നാണ് കാണേണ്ടത്. അടുത്ത സീസണിലേക്ക് ധോണിയുണ്ടാകാനുള്ള സാധ്യതയും വിരളമായാണ് വിലയിരുത്തപ്പെടുന്നതും.

ഐപിഎല്‍ 2026: കിരീടമില്ലാത്ത ആറാം സീസണ്‍; മുംബൈയുടെ വീഴ്ചകള്‍ പിന്നിലെ കാരണങ്ങള്‍

Hari Krishnan M — Mon, 11 May 2026 15:13:29 +0530

റോയല്‍ ചലഞ്ചേഴ്‌സ് ബെംഗളൂരുവിനോട് അവസാന പന്തില്‍ പരാജയം രുചിക്കുമ്പോള്‍, ആ തോല്‍വിയുടെ കൈപ്പിനേക്കാള്‍ മുംബൈ ഇന്ത്യൻസ് ആരാധകരെ അലട്ടിയ മറ്റൊന്നുണ്ടായിരുന്നു. പെരുമനേടിക്കൊടുത്ത കിരീടങ്ങളില്‍ ഡെത്ത് ഓവറുകളിലെല്ലാം അത്ഭുതങ്ങള്‍ തീര്‍ത്ത ലസിത് മലിങ്ക നിരാശയോടെ ഒറ്റയ്ക്ക് ഇരിക്കുന്ന കാഴ്ച. എത്രയെത്ര മത്സരങ്ങളാണ് സമാന സാഹചര്യങ്ങളില്‍ നിന്ന് മലിങ്ക നേടിക്കൊടുത്തിട്ടുള്ളത്. താൻ സാക്ഷി മുംബൈ ബൗളര്‍മാര്‍ ആ ലെഗസി നിലനിര്‍ത്താനാകാതെ വീഴുമെന്ന് അയാള്‍ ചിന്തിച്ചിട്ടുണ്ടാകുമോ...

ഒടുവില്‍ അത് സംഭവിച്ചിരിക്കുന്നു, തുടര്‍ച്ചയായ ആറാം വര്‍ഷവും കിരീടമില്ലാതെയുള്ള മടക്കം. അതും ഇനിയും മൂന്ന് മത്സരങ്ങള്‍ ബാക്കി നില്‍ക്കെ. സീസണ്‍ ആരംഭിക്കുന്നതിന് മുൻപ് മുംബൈയുടെ സ്ക്വാഡ് കണ്ട ക്രിക്കറ്റ് പണ്ഡിതന്മാരെല്ലാം ഒരേ സ്വരത്തില്‍ പ്രവചിച്ചു, ഹാര്‍ദിക്ക് പാണ്ഡ്യയുടെ സംഘം ടോപ് ഫോറിലുണ്ടാകുമെന്ന്. അതിന്റെ കാരണം അസാമാന്യ സ്ക്വാഡ് ഡെപ്തായിരുന്നു. പ്ലേയിങ് ഇലവന് ശേഷം, ബെഞ്ചില്‍ അവശേഷിക്കുന്ന താരങ്ങളെക്കൊണ്ട് മറ്റൊരു ടീമിനെ ഒരുക്കാൻ സാധിക്കുമായിരുന്നു മുംബൈക്ക്.

പക്ഷേ, മുൻ ചാമ്പ്യന്മാരുടെ കരുത്ത് കടലാസില്‍ തന്നെ ഒതുങ്ങി. മുംബൈ ഇന്ത്യൻസിന്റെ തിരിച്ചടികള്‍ക്ക് പിന്നിലെ പ്രാധന കാരണങ്ങള്‍ എന്തെല്ലാമാണ്?

കിരീടം നേടിയതും പ്ലേ ഓഫിലെത്തിയ വര്‍ഷങ്ങളും പരിശോധിച്ചാല്‍ കൃത്യമായൊരു പ്ലേയിങ് ഇലവൻ ഉണ്ടായിരുന്നു മുംബൈക്ക്. വിരളമായി മാത്രം പരീക്ഷണങ്ങളും താരങ്ങള്‍ക്ക് വിശ്രമവും. ലീഗ് ഘട്ടത്തിന്റെ അവസാനത്തിലെത്തുമ്പോഴാണ് പല‍ര്ക്കും അവസരങ്ങള്‍പ്പോലും ലഭിച്ചിരുന്നത്. പക്ഷേ, കൈനിറയെ ലോകോത്തര താരങ്ങളുണ്ടായിട്ടും ഇക്കുറി ഒരു ഇലവനെ ചിട്ടപ്പെടുത്താൻ മഹേല ജയവര്‍ധനെയ്ക്കായില്ല. തോല്‍ക്കുമ്പോഴേല്ലാം പരീക്ഷണങ്ങളുടെ പെരുമഴ തന്നെയായിരുന്നു മുംബൈ ഇലവനുകളില്‍. സീസണില്‍ ഏറ്റവുമധികം താരങ്ങളെ പരീക്ഷിച്ച ടീമും മുംബൈ തന്നെയാണ്.

രോഹിത് ശര്‍മയുടെ അഭാവം മുംബൈയുടെ പ്രകടനത്തെ ചെറുതല്ലാതെ ബാധിച്ചിതായി കാണാനാകും. അത് ബാറ്റിങ്ങില്‍ മാത്രമല്ല മൈതാനത്തെ സാന്നിധ്യം കൊണ്ടും. വലം കയ്യൻ ബാറ്റര്‍ നല്‍കുന്ന തുടക്കമായിരുന്നു ആദ്യ മത്സരങ്ങളില്‍ മുംബൈയെ ബാറ്റിങ് തകര്‍ച്ചകള്‍ ഒഴിവാക്കാൻ സഹായിച്ചത്. എന്നാല്‍, പേശിക്കേറ്റ പരിക്ക് മൂലം അഞ്ച് മത്സരങ്ങളാണ് രോഹിതിന് നഷ്ടമായത്. മുംബൈ ബാറ്റര്‍മാരുടെ പട്ടികയെടുത്താല്‍ റിയാൻ റിക്കല്‍ട്ടണൊപ്പം ഏറ്റവും സ്ഥിരതയും സ്ട്രൈക്ക് റേറ്റുമുള്ള താരം മുൻ നായകനാണ്.

രോഹിതിനൊപ്പം ട്രെൻ ബോള്‍ട്ട്, മിച്ചല്‍ സാന്റനര്‍, നായകൻ ഹാര്‍ദിക്ക് പാണ്ഡ്യ, ക്വിന്റണ്‍ ഡി കോക്ക് തുടങ്ങിയ പ്രധാന താരങ്ങള്‍ക്കെല്ലാം പരിക്കുകളേറ്റതും ചേര്‍ത്ത് വെക്കാം. ഇതില്‍ സാന്റനറിന് സീസണ്‍ പൂര്‍ണമായും നഷ്ടമാകുകയും ചെയ്തു. രോഹിതിന്റെ അഭാവത്തിന്റെ ആഘാതം ഇരട്ടിക്കുന്നതായിരുന്നു മുംബൈ നിരയിലെ കോര്‍ താരങ്ങളുടെ ഫോമിലും സ്ഥിരതയിലുമുണ്ടായ വീഴ്ച. സൂര്യകുമാര്‍ യാദവ്, ഹാര്‍ദിക്ക്, തിലക് വര്‍മ, ജസ്പ്രിത് ബുമ്ര എന്നിവര്‍.

2025 എഡിഷനില്‍ എഴുന്നൂറിലധികം റണ്‍സ് നേടിയ സൂര്യയുടെ ഈ സീസണിലെ നേട്ടം 200 പോലും കടന്നിട്ടില്ല, ഒറ്റയക്ക സ്കോറുകളുടെ നീണ്ട നിര തന്നെയുണ്ട് സൂര്യയുടെ പേരില്‍. ഇന്ത്യയുടെ പ്രീമിയം ഓള്‍ റൗണ്ടറും നായകനും കൂടിയായ ഹാര്‍ദിക്കാവട്ടെ ബാറ്റിങ്ങിലും ബൗളിങ്ങിലും നിരാശ മാത്രമാണ് സമ്മാനിക്കുന്നത്. നാല് വിക്കറ്റും 146 റണ്‍സും, എക്കോണമി 12ന് തൊട്ടരികില്‍.

ബുമ്രയാകട്ടെ സീസണിലാകെ നേടിയത് മൂന്ന് വിക്കറ്റുകളാണ്, എക്കോണമിയില്‍ മാത്രമാണ് മികച്ച് നില്‍ക്കുന്നത്. ഐപിഎല്‍ കരിയറിലെ തന്നെ ബുമ്രയുടെ ഏറ്റവും മോശം സീസണുകളിലൊന്നായാണ് 2026ന് അടയാളപ്പെടുത്തുന്നത്. ടി20യിലെ ഇന്ത്യയുടെ സ്റ്റാര്‍ബോയ് പരിവേഷം നേടിയ തിലക് വര്‍മ. ബെംഗളൂരുവിനെതിരെ നേടിയ അര്‍ദ്ധ സെഞ്ചുറിയും ഗുജറാത്ത് ടൈറ്റൻസിനെതിരായ ശതകവും മാറ്റി നിര്‍ത്തിയാല്‍ തിലകിന്റെ സ്ഥിതിയും സൂര്യകുമാറില്‍ നിന്ന് വ്യത്യസ്തമല്ല.

ഇത്തരം പോരായ്മകളെല്ലാം നിലനില്‍ക്കെയാണ് ഹാര്‍ദിക്കിന്റെ ക്യാപ്റ്റൻസി അവസരത്തിന് ഒത്ത് ഉയരാതിരുന്നത്. സീസണില്‍ പല മത്സരങ്ങളിലും ക്ലൂലെസായി ഹാര്‍ദിക്കിനെ കാണപ്പെട്ടു, സഹതാരങ്ങളുടെ എടുത്ത് പോലും അമര്‍ഷത്തോടെ പെരുമാറുന്ന ശൈലി. ചെന്നൈ സൂപ്പര്‍ കിങ്സിനെതിരായ ആദ്യ മത്സരത്തില്‍ തനിക്ക് രണ്ട് ഓവറുകള്‍ ബാക്കിയുണ്ടായിരുന്നിട്ടും അവസാന ഓവറുകള്‍ പരിചയസമ്പത്ത് കുറഞ്ഞ താരത്തിന് നല്‍കി. ഇംപാക്റ്റ് പ്ലെയറായി എത്തിയ താരത്തെ ഹാര്‍ദിക്ക് ഉപയോഗിക്കാത്ത സാഹചര്യം വരെ ഉണ്ടായി.

ബോള്‍ഡായി ഹാര്‍ദിക്ക് എടുത്ത തീരുമാനങ്ങളൊക്കെ തിരിച്ചടിയാകുന്നതാണ് മൈതാനത്ത് കണ്ടത്. ഹാര്‍ദിക്കിന് കീഴില്‍ 37 മത്സരങ്ങള്‍ കളിച്ച മുംബൈ 22ലും പരാജയപ്പെട്ടു. കിരീടകാലം സൃഷ്ടിക്കാനെത്തി ടീമിന്റെ ലെഗസി തന്നെ അപ്രത്യക്ഷമാക്കുന്നു ഹാര്‍ദിക്ക് എന്ന രൂക്ഷ വിമര്‍ശനം ഉയരുന്നുണ്ട്. അടുത്ത സീസണില്‍ മുംബൈ മാനേജ്മെന്റ് കടുത്ത തീരുമാനങ്ങള്‍ക്ക് ഒരുങ്ങിയാലും അത്ഭുതപ്പെടാനില്ല.

ഐപിഎല്‍ 2026: എറിഞ്ഞിടും, അടിച്ചെടുക്കും, ഒരേയൊരു ഭുവനേശ്വർ കുമാര്‍; ബെംഗളൂരുവിന്റെ സ്റ്റാർ

Hari Krishnan M — Mon, 11 May 2026 15:19:50 +0530

രാജ് ബാവയുടെ നീണ്ട ശ്രമത്തിനൊടുവില്‍ റൊമാരിയോ ഷെപ്പേഡ് തിലക് വര്‍മയുടെ കരങ്ങളില്‍ വിശ്രമിക്കുകയാണ്. മുംബൈ ഇന്ത്യൻസ് ഒരുപടി മുന്നോട്ട് കുതിക്കാൻ ഒരുങ്ങിയ നിമിഷം.

റോയല്‍ ചലഞ്ചേഴ്‌സ് ബെംഗളൂരുവിനും വിജയത്തിനുമിടയില്‍ അപ്പോള്‍ മൂന്ന് പന്തുകളും ഒൻപത് റണ്‍സും. ഷഹീദ് വീര്‍ നാരായൻ സിങ് അന്താരാഷ്ട്ര സ്റ്റേഡിയത്തില്‍ നിശബ്ദമായിരുന്ന ആര്‍സിബി ആരാധകരുടെ കണ്ണുകള്‍ ആ കൈകളിലേക്ക് ഒരിക്കല്‍ക്കൂടി ഉറ്റുനോക്കുകയാണ്.

സാഹചര്യം മറിച്ചായിരുന്നെങ്കില്‍ അനായാസം വിജയതീരത്തിലേക്ക് ആ സംഘത്തെ അയാള്‍ എത്തിക്കുമായിരുന്നു. പക്ഷേ, 22 വാരയ്ക്ക് അരികിലേക്ക് നടക്കുമ്പോള്‍ മറ്റൊന്നായിരുന്നു ദൗത്യം. ബാറ്റുകൊണ്ട് ടീമിനെ തലപ്പത്ത് എത്തിക്കണം.

ടു പേസ്‌ഡായ ആ വിക്കറ്റില്‍ നാല് ഓവര്‍ അളന്നുമുറിച്ചെറിഞ്ഞതിന്റെ തഴക്കുമുണ്ടായിരുന്നു ഭുവനേശ്വര്‍ കുമാറിന് അപ്പോള്‍. അതിനാല്‍ തന്നെ രാജ് ബാവയെന്ന യുവതാരത്തിന് ഏതറ്റം വരെ പോകാൻ കഴിയുമെന്ന ബോധ്യവുമുണ്ട്. വലം കയ്യൻ പേസര്‍ ഭുവിക്കെതിരെ ആദ്യമൊരു ഷോര്‍ട്ട് ബോളിന് ശ്രമിച്ചു, വൈഡ്. ശേഷം ഔട്ട് സൈഡ് ഓഫ് സ്റ്റമ്പ് ലൈനില്‍ ഒരു ഫുള്‍ ലെങ്ത് ഡെലിവറി. അതായിരുന്നു അയാള്‍ പ്രതീക്ഷിച്ച, കാത്തിരുന്ന മൊമന്റ്.

ഓഫ് സ്റ്റമ്പിനപ്പുറത്തേക്ക് ചുവടുമാറ്റി ഡീപ് കവറിന് മുകളിലൂടെ ഭുവിയുടെ ഒരു ലോഫ്റ്റഡ് ഷോട്ട്. ബൗണ്ടറിയില്‍ നിലയുറപ്പിച്ച നമൻ ധീര്‍ തന്റെ ശരീരത്തെ മുഴുവൻ എടുത്തുയര്‍ത്തിയെങ്കിലും പന്തിനെ തടയാനായില്ല, സിക്സ്. മുംബൈ ക്യാമ്പില്‍ അസ്വസ്ഥനായി മുഖ്യപരിശീലകൻ മഹേല ജയവര്‍ധന, മറുവശത്ത് ബെംഗളൂരു ഡഗൗട്ടില്‍ ആവേശം അലതല്ലിച്ച് വിരാട് കോലി. ബെംഗളൂരു വിജയം ഏറെക്കുറെ ഉറപ്പിച്ചു ഇവിടെ. അത് വൈകാതെ സംഭവിക്കുകയും ചെയ്തു.

ഐപിഎല്ലില്‍ ഭുവി അവസാനം നേടിയ സിക്‌സില്‍ നിന്ന് ഈ മൊമന്റിലേക്കുള്ള ദൂരം പതിറ്റാണ്ടാണ്. 2016ല്‍ സണ്‍റൈസേഴ്‌സ് ഹൈദരാബാദിന്റെ ഭാഗമായിരിക്കെ റൈസിങ് പൂനെ സൂപ്പര്‍ ജയന്റ്സിനെതിരെയായിരുന്നു ആ നിമിഷം. തന്റെ ശരീരത്തിനോട് മല്ലിട്ട് കൃണാല്‍ പാണ്ഡ്യ പുറത്തെടുത്ത അസാധാരണമായ ഇന്നിങ്സിന് അര്‍ഹിച്ച ക്ലൈമാക്സ് ഭുവി റായ്‌പൂരിലൊരുക്കി. ബാറ്റുകൊണ്ടും ഹീറോയായ മത്സരത്തില്‍ പന്തുകൊണ്ട് സീസണിലെ ഏറ്റവും മികച്ച പ്രകടനങ്ങളിലൊന്നായിരുന്നു ഭുവിയില്‍ നിന്നുണ്ടായതും.

ടു പേസ്‌ഡായ വിക്കറ്റില്‍ ഡിസിപ്ലിൻ എത്രത്തോളം പ്രധാനപ്പെട്ടതാണെന്ന് ഭുവനേശ്വര്‍ ഓരോ പന്തുകള്‍ക്കൊണ്ടും തെളിയിക്കുകയായിരുന്നു. എറിഞ്ഞ പന്തുകളില്‍ ഏറിയതും ഹിറ്റ് ചെയ്തത് ഗുഡ് ലെങ്തില്‍. നേടിയ നാലില്‍ മൂന്ന് വിക്കറ്റുകളും ഗുഡ് ലെങ്തില്‍ നിന്നായിരുന്നു, മറുവശത്ത് ഭുവിക്ക് സമാനമായി പന്തെറിഞ്ഞ മുംബൈ ഇന്ത്യൻസ് താരം കോര്‍ബിൻ ബോഷിനും വിജയമുണ്ടായി. നാല് ഓവറില്‍ 23 റണ്‍സ് വഴങ്ങി നാല് വിക്കറ്റുകളായിരുന്നു ഭുവിയുടെ നേട്ടം.

രോഹിത് ശര്‍മ - റയാൻ റിക്കല്‍ട്ടണ്‍ സഖ്യം - ടൂര്‍ണമെന്റില്‍ മൂന്ന് തവണ മാത്രമാണ് സഖ്യം ഞായറാഴ്ച വരെ മുംബൈക്കായി ഓപ്പണ്‍ ചെയ്തിട്ടുള്ളത്. അതില്‍ രണ്ട് പ്രാവശ്യവും കൂട്ടുകെട്ട് 100 കടന്നിരുന്നു. ബെംഗളൂരുവിനെ സംബന്ധിച്ച് ഏറ്റവും നിര്‍ണായകമായ രണ്ട് വിക്കറ്റുകള്‍.

ആവശ്യത്തിലധികം ക്രാക്കുകള്‍ ഉണ്ടായിരുന്ന വിക്കറ്റില്‍ റിക്കല്‍ട്ടണ്‍ ഭുവിയുടെ ലെങ്ത് ബോള്‍ മിഡ് ഓഫിന് മുകളിലൂടെ ഉയര്‍ത്തിയടിക്കാൻ ശ്രമിച്ചു, പക്ഷേ പ്രതീക്ഷിച്ചതിലും അധികം ബൗണ്‍സ് സംഭവിച്ചതോടെ പിഴച്ചു. പാട്ടിദാറിന്റെ കൈകളില്‍ മുംബൈ ഓപ്പണറുടെ ഇന്നിങ്സിന് അവസാനം.

ബ്രില്യൻസ് രോഹിതിനെ വീഴ്ത്തിയ പന്തിലായിരുന്നു, ഭുവിക്കെതിരെ ബൗണ്ടറി നേടിയാണ് രോഹിത് തുടങ്ങിയത്. ക്രീസുവിട്ടിറങ്ങി ഭുവിയെ നേരിടുന്നതാണ് രോഹിതിന്റെ ഒരുശൈലി. ഇത് മുൻകൂട്ടിക്കണ്ട ഭുവി മണിക്കൂറില്‍ 116 കിലോ മീറ്റര്‍ വേഗതയില്‍ ഔട്ട്സൈഡ് ഓഫ് സ്റ്റമ്പ് ലൈനില്‍ ഒരു നക്കള്‍ ബോള്‍ എറിഞ്ഞു. ഇതോടെ രോഹിത് തന്റെ ഡ്രൈവ് അല്‍പ്പം നേരത്തെ കളിക്കാൻ നിര്‍ബന്ധിതനായി, ഔട്ട്സൈഡ് എഡ്ജിലേക്ക് നയിക്കുകയും ചെയ്തു. വിക്കറ്റ് കീപ്പര്‍ ജിതേഷ് ശ‍ര്‍മ തന്റെ റോള്‍ ഭംഗിയായി നിര്‍വഹിച്ചതോടെ അപകടകാരിയായ രോഹിത് 10 പന്തില്‍ 22 റണ്‍സുമായി പുറത്ത്.

സൂര്യകുമാറിനെ ഗോള്‍ഡൻ ഡക്കാക്കിയത് ലെങ്ത് ബോളിലും വെല്‍ സെറ്റില്‍ഡായ തിലക് വര്‍മയെ മടക്കിയത് യോര്‍ക്കര്‍ ശ്രമത്തിലൂടെയും, നാല് വിക്കറ്റുകള്‍. 21 ബാറ്റര്‍മാരെ സീസണില്‍ പവലിയനിലേക്ക് ഇതുവരെ മടക്കി, പര്‍പ്പിള്‍ ക്യാപ്പും നേടിയെടുത്തു.

മത്സരത്തിന്റെ ഏത് ഘട്ടത്തിലും എഫക്റ്റീവ്, അതാണ് ഭുവിയുടെ ഈ സീസണിലെ സവിശേഷത. പവര്‍പ്ലേയില്‍ എക്കോണമി ഏഴ് മാത്രം, മധ്യ ഓവറുകളില്‍ 8.4, ഡെത്തില്‍ 7.8. ബാറ്റര്‍മാരുടെ പറുദീസകളില്‍ പന്തെറിഞ്ഞാണ് ഈ നേട്ടമെന്നും ഓര്‍ക്കേണ്ടതുണ്ട്.

ഐപിഎല്‍ 2026: ഇനി ബുമ്ര നയിക്കട്ടെ, ഓറ തിരിച്ചുപിടിച്ച് മുംബൈ ഇന്ത്യൻസ്

Hari Krishnan M — Fri, 15 May 2026 14:12:10 +0530

I didn't think that I will be a Test captain before becoming MI captain -

മുംബൈ ഇന്ത്യൻസിനെ നയിക്കാൻ അവസരം ലഭിക്കും മുൻപ് ടെസ്റ്റ് ടീമിന്റെ നായകനാകാൻ കഴിയുമെന്ന് ഞാൻ കരുതിയിരുന്നില്ല. മുംബൈക്കൊപ്പം 156 മത്സരങ്ങള്‍, യുവതാരമായി എത്തി ഇതിഹാസമായി തുടരുന്ന കരിയറില്‍ ഒടുവില്‍ അയാളെത്തേടി അര്‍ഹിച്ച ദിനമെത്തി ധരംശാലയില്‍. വിഖ്യാതമായ ബ്ലു ആൻഡ് ഗോള്‍ഡില്‍ ആ സംഘത്തെ നയിക്കാനുള്ള ഉത്തരവാദിത്തം ജസ്പ്രിത് ബുമ്രയ്ക്ക്. ടോസ് വേളയില്‍ പറഞ്ഞവസാനിപ്പിച്ച ആ വാചകത്തില്‍ ഉണ്ടായിരുന്നു എത്രത്തോളം ബുമ്ര അത് ആഗ്രഹിച്ചുവെന്ന്.

ഹാര്‍ദിക്ക് പാണ്ഡ്യയുടെ അപ്രതീക്ഷിത റീ എൻട്രിയും പരിക്കുകളും ബുമ്രയെ അകറ്റി നിര്‍ത്തുകയായിരുന്നു ആ കസേരയില്‍ നിന്ന്. പക്ഷേ, ലഭിച്ച ഏക അവസരത്തില്‍ തനിക്ക് എന്ത് സാധിക്കുമെന്ന് മൈതാനത്ത് തെളിയിക്കുകയായിരുന്നു ബുമ്രയെന്ന നായകൻ. അത് മാനേജ്മെന്റിന് ഒരുതരം ഓര്‍മപ്പെടുത്തല്‍ കൂടിയായിരുന്നു. അവര്‍ എന്താണ് നഷ്ടപ്പെടുത്തിയത് എന്നത് ബോധ്യപ്പെടുത്താൻ ലഭിച്ച അവസരം പൂര്‍ണമായും വിനിയോഗിച്ചു.

ബൗളിങ് റോട്ടേഷനുകള്‍, ഫീല്‍ഡ് പ്ലേസ്മെന്റ് തുടങ്ങി ബുമ്ര കളം വാണപ്പോള്‍ മുംബൈ നിരയില്‍ സീസണില്‍ ഉടനീളം പ്രത്യക്ഷമാകാതിരുന്ന ഊര്‍ജം പ്രകടമായി. ഒരു ടീമിന്റെ നായകനായി ബൗളര്‍ വരുമ്പോള്‍ ലഭിക്കുന്ന മുൻതൂക്കങ്ങളായി ക്രിക്കറ്റ് പണ്ഡിതര്‍ ചൂണ്ടിക്കാണിക്കുന്ന ചിലതുണ്ട്. അതില്‍ ഏറ്റവും പ്രധാനപ്പെട്ടത് വിക്കറ്റിന്റെ സ്വഭാവം അതിവേഗം മനസിലാക്കി അത് അനുസരിച്ച് തന്ത്രം മെനയാൻ സാധിക്കുമെന്നതാണ്. പ്രത്യേകിച്ചും ബൗളര്‍മാരെ ഉപയോഗിക്കുന്ന വിധം, വര്‍ക്ക്‌ലോഡ് മാനേജ്മെന്റ് ആണ് ഇതില്‍ ഏറ്റവും നിര്‍ണായകം.

വിക്കറ്റുകള്‍ സെറ്റ് ചെയ്ത് വീഴ്ത്തുന്നതിന് അനുയോജ്യമായി ഫീല്‍ഡ് ഒരുക്കുകയൊക്കെ കൂടുതല്‍ എളുപ്പവുമാകുന്നു. മത്സരത്തിന്റെ സാഹചര്യത്തിന് അനുസരിച്ച് സ്വന്തം സ്പെല്‍ തിട്ടപ്പെടുത്താനുള്ള സ്വാതന്ത്ര്യവും ലഭിക്കുന്നു. ബാറ്റര്‍മാര്‍ നായകന്മാരാകുമ്പോള്‍ ഇത് സംഭവിക്കുന്നില്ല എന്നല്ല മേല്‍പ്പറഞ്ഞതുകൊണ്ട് അര്‍ത്ഥമാക്കുന്നത്. ബൗളര്‍മാരുടെ ക്യാപ്റ്റനാകുകയാണ് പ്രധാനം. എം എസ് ധോണിയും രോഹിത് ശര്‍മയുമൊക്കെ കിരീടങ്ങള്‍ വാരിക്കൂട്ടിയതിന് പിന്നിലെ കാരണവും അതുതെന്നായാണ്.

ഇന്നലെ മുംബൈ ഏഴ് ബൗളര്‍മാരെയാണ് പരീക്ഷിച്ചത്. ഹാര്‍ദിക്ക് പാണ്ഡ്യയൊ സൂര്യകുമാര്‍ യാദവോ സീസണില്‍ തുനിയാത്ത ഒന്ന്. രഘു ശര്‍മയും വില്‍ ജാക്സുമായിരുന്നു മുംബൈ നിരയിലെ സ്പിന്നര്‍മാര്‍, ഇരുവര്‍ക്കും വിക്കറ്റില്‍ നിന്ന് കാര്യമായ സഹായം ലഭിക്കുന്നുണ്ടായിരുന്നില്ല, പവര്‍പ്ലേയ്ക്ക് ശേഷമായിരുന്നു രണ്ടുപേരെയും ഉപയോഗിച്ചത്. പ്രഭ്‌സിമ്രാനും കനോലിയും അനായാസം ഇരുവരേയും നേരിട്ടതോടെ ബുമ്ര പേസര്‍മാരിലേക്ക് തന്നെ ചുവടുമാറി.

പിന്നാലെ ശാ‍ര്‍ദൂല്‍ താക്കൂറും റോയല്‍ ചലഞ്ചേഴ്സ് ബെംഗളൂരുവിനെതിരെ വിജയം കൈവിട്ട രാജ് ബാവയേയും എത്തിച്ച് വീഴ്ത്തിയത് മൂന്ന് വിക്കറ്റുകള്‍. രണ്ട് പേര്‍ വെല്‍ സെറ്റില്‍ഡായ പ്രഭ്‌സിമ്രാനും കനോലിയും. മറ്റൊരാള്‍ പഞ്ചാബ് നായകനും മുംബൈക്കെതിരെ മികച്ച റെക്കോര്‍ഡുള്ള ശ്രേയസ് അയ്യരും. ഈ മൂന്ന് വിക്കറ്റുകളായിരുന്നു മധ്യഓവറുകളിലെ പഞ്ചാബിന്റെ റണ്ണൊഴുക്ക് തടഞ്ഞതും. അവസാന മൂന്ന് ഓവറുകള്‍ മാറ്റി നിര്‍ത്തിയാല്‍ മുംബൈ ബൗളര്‍മാര്‍ ഏറ്റവും ഡിസിപ്ലിൻഡായി പന്തെറിഞ്ഞ മത്സരം കൂടിയായിരുന്നു പഞ്ചാബിനെതിരായത്.

ബുമ്ര നിരന്തരം ബൗളര്‍മാരുമായി ആശയവിനിമയം നടത്തുന്നത് പലകുറി മൈതാനത്ത് കണ്ടു. ലൈനിലും ലെങ്തിലുമെല്ലാം അത് പ്രകടമായിരുന്നു. 17 ഓവറുകളാണ് മുംബൈ പേസര്‍ എറിഞ്ഞത്, അതായത് 102 പന്തുകള്‍. 26 ഫുള്‍ ലെങ്ത് പന്തുകളും, 47 ഗുഡ് ലെങ്ത് പന്തുകളും, 29 ഷോര്‍ട്ട് ബോളുകളും. 9.2 എക്കോണമിയില്‍ എട്ട് വിക്കറ്റുകള്‍. ഇതില്‍ നാലും വീണത് ഗുഡ് ലെങ്തിലായിരുന്നു. എറിഞ്ഞ പന്തുകളില്‍ ഏറെക്കുറെ പകുതിയോളം ഹിറ്റ് ചെയ്തത് ഗുഡ് ലെങ്തിലായിരുന്നു. ഏറ്റവും ക്രൂഷ്യലായ മധ്യഓവറുകളില്‍ 80 റണ്‍സിന് അഞ്ച് വിക്കറ്റുകളാണ് പഞ്ചാബിന് നഷ്ടമായത്. മുംബൈക്ക് സീസണിലുടനീളം നഷ്ടമായ ആധിപത്യം. ഒടുവില്‍ തിലക് വിജയം ഉറപ്പിക്കുകയും ചെയ്തു.

ഭാവിയിലൊ തുടര്‍ന്നോ മുംബൈയുടെ നായകസ്ഥാനം ബുമ്രയിലേക്ക് എത്തുമോയെന്ന് അറിയില്ല. സാധ്യതപോലും വിരളമായിരിക്കാം. ഹാര്‍ദിക്കിന്റേയും സൂര്യകുമാ‍ര്‍ യാദവിന്റേയും അഭാവത്തിലാണ് ബുമ്രയിലേക്ക് ഉത്തരവാദിത്തം എത്തിയത്, അളന്ന് നോക്കിയാല്‍ പട്ടികയിലെ മൂന്നാമൻ. പക്ഷേ, ഹാര്‍ദിക്കിനോ സൂര്യക്കൊ ബൗളര്‍മാരില്‍ നിന്ന് പുറത്തെടുപ്പിക്കാൻ കഴിയാത്തത് ബുമ്രയ്ക്ക് സാധിച്ചിട്ടുണ്ട്. അത് പരിഗണിക്കുമോ മാനേജ്മെന്റെന്ന് കണ്ടറിയാം.

ഐപിഎല്‍: ധോണിയെപ്പോലെയാകുമെന്ന് ഗോയങ്ക, തൊട്ടതെല്ലാം പിഴച്ച് പന്തും; വീഴ്ചയ്ക്ക് പിന്നിലെന്ത്?

Hari Krishnan M — Tue, 05 May 2026 15:28:29 +0530

എം എസ് ധോണിയേയും രോഹിത് ശ‍ര്‍മയേയും പോലെ ഐപിഎല്‍ ചരിത്രത്തിലെ ഐതിഹാസിക ക്യാപ്റ്റന്മാരിലൊരാളാകും റിഷഭ് പന്തും. 27 കോടി രൂപയ്ക്ക് ടീമിലെത്തിച്ച പന്തിനെക്കുറിച്ചുള്ള ലഖ്നൗ സൂപ്പര്‍ ജയന്റ്സ് ഉടമ സഞ്ജീവ് ഗോയങ്കയുടെ പ്രതീക്ഷയായിരുന്നു ഇത്. പഞ്ചാബ് കിങ്സ് തനിക്ക് താല്‍പ്പര്യമുള്ള ടീമല്ലെന്നും അവര്‍ തന്നെ വാങ്ങുമോയെന്ന ഭയമുണ്ടായിരുന്നെന്നും പന്തും അന്ന് പറഞ്ഞുവെച്ചു. പ്രതീക്ഷയും പരിഹാസങ്ങളും ആത്മവിശ്വാസവുമെല്ലാം നിറഞ്ഞൊരു സംഭാഷണമായിരുന്നു ഇരുവരും തമ്മില്‍ സംഭവിച്ചതും.

പ്രതീക്ഷകളും തിരഞ്ഞെടുപ്പുകളുമെല്ലാം വ്യക്തിപരമാണ്, പരിഹാസങ്ങള്‍ക്കുള്ള മറുപടി പലകുറി പഞ്ചാബും നല്‍കിക്കഴിഞ്ഞു. എന്നാല്‍, പ്രകടമാക്കിയ ആത്മവിശ്വാസം മൈതാനത്ത് പ്രതിഫലിപ്പിക്കാൻ പന്തിന് ഇതുവരെ സാധിച്ചിട്ടില്ല എന്നതാണ് ലഖ്നൗവിന്റെ കഴിഞ്ഞ രണ്ട് സീസണുകള്‍ പരിശോധിക്കുമ്പോള്‍ വ്യക്തമാകുന്നത്. അത് നായകനായി മാത്രമല്ല താരമെന്ന നിലയിലും. ഈ വീഴ്ചകള്‍ വൈകാതെ പന്തിനെ ഇന്ത്യൻ ടീമിന്റെ പുറത്തേക്കും എത്തിച്ചേക്കുമെന്ന സൂചനകളും അന്തരീക്ഷത്തില്‍ നിറഞ്ഞുനില്‍ക്കുന്നുണ്ട്.

27 കോടി രൂപയുടെ മൂല്യം പന്ത് എന്ന താരത്തേയും നായകനേയും സമ്മര്‍ദത്തിലാക്കുന്നുണ്ടോ. അതോ നായകസമ്മര്‍ദമാണോ ഇടം കയ്യൻ ബാറ്ററുടെ മോശം പ്രകടനങ്ങളുടെ ആധാരം.

ആദ്യം റിഷഭ് പന്ത് എന്ന നായകനിലേക്ക് വരാം. മൂന്ന് സീസണുകളില്‍ ഡല്‍ഹി ക്യാപിറ്റല്‍സിനേയും നിലവില്‍ രണ്ട് സീസണുകളായി ലഖ്നൗവിന്റേയും അമരത്ത് പന്തുണ്ട്. ഡല്‍ഹിയെ 43 മത്സരങ്ങളില്‍ നയിച്ചപ്പോള്‍ 23 ജയം നേടാൻ സാധിച്ചു, വിജയശതമാനം 50ന് മുകളിലാണ്. പന്തിന്റെ കീഴില്‍ 23 മത്സരങ്ങളിലാണ് ഇതുവരെ ലഖ്നൗ കളത്തിലിറങ്ങിയത്, എട്ട് ജയങ്ങള്‍ മാത്രം. വിജയശതമാനം 34ലാണ് എത്തി നില്‍ക്കുന്നത്. 2026 എഡിഷനില്‍ ഒൻപത് മത്സരങ്ങളില്‍ നിന്ന് രണ്ട് ജയം മാത്രം. തുടരെ ആറ് തോല്‍വി വഴങ്ങിയിപ്പോള്‍ പോയിന്റ് പട്ടികയില്‍ ഏറ്റവും അവസാന സ്ഥാനത്തും.

ക്യാപ്റ്റൻസി ഭാരം പന്ത് എന്ന ബാറ്ററെ ബാധിച്ചിട്ടുണ്ടോയെന്നും പരിശോധിക്കാം. ഡല്‍ഹിക്കായി മൂന്ന് സീസണുകള്‍ നയിച്ചപ്പോള്‍ 1205 റണ്‍സ് ഇടം കയ്യൻ വിക്കറ്റ് കീപ്പര്‍ സ്കോര്‍ ചെയ്തു. ശരാശരി 35 ആണ്. സ്ട്രൈക്ക് റേറ്റ് 143. ഇക്കാലയളവില്‍ ആറ് അര്‍ദ്ധ സെഞ്ചുറികളും പന്ത് കുറിച്ചു.

ഇനി ലഖ്നൗവിനൊപ്പമുള്ള രണ്ട് സീസണുകള്‍. 2025ല്‍ 13 ഇന്നിങ്സുകളില്‍ നിന്ന് 269 റണ്‍സ്, മുഖം രക്ഷിച്ചത് സീസണിലെ അവസാന മത്സരത്തില്‍ നേടിയ സെഞ്ചുറിയാണ്, 118 റണ്‍സ്. അതിനപ്പുറം ടീമിനോ പന്തിനോ ഓര്‍ത്തുവെക്കാൻ ഒന്നുമുണ്ടായിരുന്നില്ല. അല്‍പ്പം മെച്ചപ്പെട്ട സ്ഥിതിയാണ് നടപ്പ് സീസണില്‍. ഒൻപത് ഇന്നിങ്സുകളില്‍ നിന്ന് 204 റണ്‍സ്. സ്ട്രൈക്ക് റേറ്റ് 130ന് താഴെ വീണിരിക്കുന്നു.

ട്വന്റി 20യുടെ പുതിയ സഞ്ചാരം ഏത് ദിശയിലേക്കാണ് എന്ന് വ്യക്തമാണ്. 200ന് മുകളില്‍ സ്ട്രൈക്ക് റേറ്റില്‍ ബാറ്റ് ചെയ്യുന്ന അഭിഷേക് ശര്‍മയും വൈഭവ് സൂര്യവംശയുമൊക്കെ ഫോര്‍മാറ്റിനെ വാഴുന്ന കാലം. ഒപ്പമോടിയെത്താൻ അതേ മോഡിലേക്ക് ഷിഫ്റ്റ് ചെയ്യുന്ന രോഹിത് ശര്‍മയും വിരാട് കോലിയുമൊക്ക. ഇവിടെയാണ് റിഷഭ് പന്തിന്റ എങ്ങുമെത്താത്ത ഇന്നിങ്സുകള്‍ സ്ഥിരം കാഴ്ചയാകുന്നത്. 27 കോടിയുടെ, അല്ലെങ്കില്‍ നായകസമ്മര്‍ദം മാത്രമല്ല നിലവില്‍ പന്തിന്റെ തലയ്ക്ക് മുകളിലുള്ളത്.

ഏകദിന, ടി20 ഫോര്‍മാറ്റുകളില്‍ ഇന്ത്യൻ ടീമിലേക്ക് മടങ്ങിയെത്തുക എന്ന വലിയ ദൗത്യം മുന്നിലുണ്ട്. അത് എളുപ്പമുള്ള കാര്യമല്ല. നിലവിലെ സാഹചര്യത്തില്‍ അത് സാധ്യമാകണമെങ്കില്‍ പന്തിന്റെ കൈവശം അസാധാരണ പ്രകടനങ്ങളുടെ ഒരു നിര തന്നെ ആവശ്യമാണ്. ടി20 ടീമിലേക്ക് പന്തിന്റെ മുന്നിലെ തടസമായി നില്‍ക്കുന്നത് പ്രധാനമായും രണ്ട് പേരുകളാണ്, ഒന്ന് സഞ്ജു സാംസണും മറ്റൊരാള്‍ ഇഷാൻ കിഷനും. ഇരുവരും ഇന്ത്യയുടെ ടി20 ലോകകപ്പിലെ വിജയശില്‍പ്പികള്‍, ടോപ് സ്കോറര്‍മാര്‍.

ഐപിഎല്ലിലും സമാന ഫോം തുടരുകയാണ് ഇരുവരും. ഇഷാനാണ് സഞ്ജുവിനേക്കാള്‍ ഫോമിലുള്ളതും. ഇടം കയ്യൻ ബാറ്ററായതുകൊണ്ട് തന്നെ ഇഷാനുമായാണ് പന്തിന്റെ ‍ഡയറക്റ്റ് മത്സരവും. ഇനി ഏകദിന ടീമിലേക്ക് വന്നാലും വ്യത്യസ്തമല്ല കാര്യങ്ങള്‍. 2023 ഏഷ്യ കപ്പ് മുതല്‍ കെ എല്‍ രാഹുലാണ് ടീമിലെ ഫസ്റ്റ് ചോയിസ് വിക്കറ്റ് കീപ്പര്‍, അതിനൊരു മാറ്റം രണ്ട് വര്‍ഷത്തിനിപ്പുറവുമില്ല. സെക്കൻഡ് ചോയിസായി സഞ്ജുവിനെ പരിഗണിക്കുന്നതായാണ് റിപ്പോര്‍ട്ടുകള്‍, ലോങ് ഇന്നിങ്സുകള്‍ കളിക്കാനും സമ്മര്‍ദ സാഹചര്യത്തില്‍ മാച്ച് വിന്നറാകാനുമുള്ള സഞ്ജുവിന്റെ മികവ് തന്നെ കാരണം.

ഇതെല്ലാം റിഷഭ് പന്തിന്റെ കരിയറിനെ തുലാസിലാക്കുന്ന ഘടകങ്ങളാണ്. ടെസ്റ്റില്‍ മാത്രമാണ് പന്ത് സേഫ് സോണില്‍ നില്‍ക്കുന്നത്. ടി20യിലേക്കും ഏകദിനത്തിലേക്കും മടങ്ങിയെത്തുന്നതിന് ഐപിഎല്ലിലെ പ്രകടനം നിര്‍ണായകമാണ്, അതിനാല്‍ വിക്കറ്റ് വലിച്ചെറിയാതെയുള്ള ഗെയിം പ്ലാൻ നടപ്പിലാക്കാനുള്ള ശ്രമങ്ങളാണ് കൂടുതലും താരം നടത്തുന്നത്, എന്നാല്‍ ഇത്തരം ശ്രമങ്ങള്‍ക്ക് പ്രതീക്ഷിക്കുന്ന അന്ത്യമുണ്ടാകുന്നുമില്ല.

ടി20 ലോകകപ്പും തൂക്കാൻ ഹർമൻപ്രീതും സംഘവും, ഇന്ത്യൻ ടീം എത്രത്തോളം ശക്തമാണ്?

Hari Krishnan M — Sun, 03 May 2026 13:31:13 +0530

നവംബര്‍ 02, 2025. തലമുറകള്‍ക്കായി ഹര്‍മൻപ്രീത് കൗറും സംഘവും ഒരു നിമിഷമൊരുക്കി. ഇതിഹാസങ്ങള്‍ക്ക് പൂര്‍ത്തികരിക്കാൻ കഴിയാത്ത ആ വലിയ ദൗത്യം, സ്വപ്നം ഡിവൈ പാട്ടീലില്‍ പൂര്‍ണമാക്കി. സെഞ്ചൂറിയനിലും ലോ‍ര്‍ഡ്‌സിലും കാലം നിഷേധിച്ച ഏകദിന ലോകകപ്പ് കിരീടത്തില്‍ ഒടുവില്‍ ത്രിവര്‍ണം ചാര്‍ത്തപ്പെട്ടു അന്ന്.

മറ്റൊരു ലോകകപ്പിനൊരുങ്ങുകയാണ് ഹര്‍മൻപ്രീതിന്റെ ഇന്ത്യ, ഇംഗ്ലണ്ടിലെ മണ്ണില്‍, ടി20 കിരീടമാണ് മുന്നില്‍. വലിയ ടൂര്‍ണമെന്റുകള്‍ ജയിക്കാനുള്ള, അവസാന കടമ്പയും കടക്കാനുള്ള രസക്കൂട്ട് അമോല്‍ മജുംദാറിന്റെ കുട്ടികള്‍ക്ക് ഇന്നറിയാം. 2020ല്‍ മെല്‍ബണില്‍ ഓസ്ട്രേലിയക്ക് മുന്നില്‍ വീണുപോയതിന് പകരമൊരു ദിവസം കണ്ടത്തേണ്ടതുണ്ട്. ടൂര്‍ണമെന്റിന് ഒരുമാസത്തിലധികം അവശേഷിക്കെ ടീം പ്രഖ്യാപനം ബിസിസിഐ നടത്തിയിരിക്കുന്നു. എത്രത്തോളം ശക്തരാണ് ഇന്ത്യ.

ടൂര്‍ണമെന്റിന്റെ ഒൻപത് എഡിഷനുകളുടെ ചരിത്രത്തില്‍ നാല് തവണ സെമി ഫൈനലിലും ഒരു പ്രാവശ്യം കലാശപ്പോരിലുമെത്താൻ ഇന്ത്യക്കായിട്ടുണ്ട്. ടോപ് ഫൈവ് ടീമുകളെയെടുത്താല്‍ ടി20 കിരീടമില്ലാത്തത് ഇന്ത്യയ്ക്കും ദക്ഷിണാഫ്രിക്കയ്ക്കും മാത്രവും. സോളിഡായുള്ള ഓപ്പണിങ് കൂട്ടുകെട്ട്, സ്‌മൃതി മന്ദാനയും ഷഫാലി വര്‍മയും, മധ്യനിരയില്‍ പരിചയസമ്പത്തുള്ള മാച്ച് വിന്നേഴ്‌സ് - ജെമീമ റോഡ്രിഗസ്, ഹര്‍മൻപ്രീത് കൗര്‍, ദീപ്തി ശര്‍മ. ഫിനിഷറായി റിച്ച ഘോഷും. പേസ് നിരയില്‍ ക്രാന്തി ഗൗഡ്, രേണുക സിങ്, അരുന്ധതി റെഡ്ഡി, പ്രധാന സ്പിന്നര്‍മാരായി ദീപ്തിക്കൊപ്പം ശ്രയങ്ക പാട്ടീലും ശ്രീചരണിയുമുണ്ട്.

പക്ഷേ, നാല് താരങ്ങളുടെ കാര്യത്തിലെ തിരഞ്ഞെടുപ്പാണ് ചോദ്യമായി മുന്നിലുള്ളത്. ടി20 ടീമിലേക്ക് മടങ്ങിയെത്തിയ ഇടം കയ്യൻ സ്പിൻ ഓള്‍ റൗണ്ടറായ രാധാ യദവും സെക്കൻഡ് വിക്കറ്റ് കീപ്പറായുള്ള യാസ്തിക ഭാട്ടിയയും. ഇതുവരെ അന്താരാഷ്ട്ര തലത്തില്‍ അരങ്ങേറിയിട്ടില്ലാത്ത പേസ് ബൗളര്‍ നന്ദിനി ശര്‍മ. അമൻജോത് കൗറിന്റെ അഭാവം ടീമിന്റെ ബാലൻസിനെ ബാധിക്കുന്ന ഒന്നാണ്, പകരം അവസരം ഒരുങ്ങിയിരിക്കുന്നത് ഭാര്‍തി ഫൂല്‍മാലിക്കാണ്.

ആദ്യം നന്ദിനി ശര്‍മയിലേക്ക് വരാം. കഴിഞ്ഞ വനിത പ്രീമിയര്‍ ലീഗിലെ ഏറ്റവും മികച്ച പേസര്‍മാരിലൊരാളായിരുന്നു നന്ദിനി. 10 മത്സരങ്ങളില്‍ നിന്ന് 17 വിക്കറ്റുകള്‍. എക്കോണമി ഒൻപതിന് താഴെയാണ്. ടി20 ലോകകപ്പ് ടീമില്‍ ഇടം നേടിയ മറ്റൊരു പേസര്‍ക്കും നന്ദിനിക്കൊപ്പമെത്താനായിട്ടില്ല. ഗുജറാത്ത് ജയന്റ്സിനെതിരെ ഹാട്രിക്ക് ഉള്‍പ്പെടെ അഞ്ച് വിക്കറ്റുകള്‍ നേടാനും നന്ദിനിക്ക് സാധിച്ചിരുന്നു പിന്നിട്ട സീസണില്‍. സോഫി ഡിവൈൻ, ആഷ്‌ ഗാ‍ര്‍ഡനര്‍, റിച്ച തുടങ്ങി ടി20യിലെ കൂറ്റനടിക്കാരെയെല്ലാം മടക്കിയ പാഠമാണ് അന്താരാഷ്ട്ര തലത്തിലേക്ക് അവസരം തുറന്ന് നല്‍കിയിരിക്കുന്നതും.

അമൻജോതിന്റെ റീപ്ലേസ്മെന്റായാണ് ഫൂല്‍മാലിയെ ടീമില്‍ ഉള്‍പ്പെടുത്തിയിരിക്കുന്നത്. മീഡിയം പേസറാണെങ്കിലും ഡബ്ല്യുപിഎല്ലിലോ അല്ലെങ്കില്‍ അന്താരാഷ്ട്ര തലത്തിലൊ പന്തെറിഞ്ഞിട്ടില്ല താരം ഇതുവരെ. അമൻജോതിന്റെ ഏറ്റവും വലിയ പോസിറ്റീവ് സമ്മര്‍ദ സാഹചര്യങ്ങളില്‍ ബാറ്റുകൊണ്ടും പന്തുകൊണ്ടും തിളങ്ങാൻ കഴിയുമെന്നതാണ്, ഇതിന് പുറമെ ഫീല്‍ഡിങ്ങ്. ഇന്ത്യൻ ടീമിലെ ഏറ്റവും മികച്ച ബൗണ്ടറി റൈഡറാണ് അമൻജോത്, ഒരുമത്സരത്തില്‍ കുറഞ്ഞത് 10 റണ്‍സെങ്കിലും സേവ് ചെയ്യാൻ സാധിക്കുന്നൊരാള്‍.

ഐഡിയല്‍ റീപ്ലേസ്മെന്റ് അല്ലെങ്കിലും ബാറ്റുകൊണ്ട് തിളങ്ങാൻ ഫൂല്‍മാലിക്കാകും. 2025, 26 സീസണുകളില്‍ താരത്തിന്റെ സ്ട്രൈക്ക് റേറ്റ് 172ഉം 146ഉമാണ്. അതും ലോവര്‍ മിഡില്‍ ഓര്‍ഡറില്‍ ക്രീസിലെത്തി. ഇതായിരിക്കാം സെലക്ടര്‍മാരുടെ കണ്ണ് പതിക്കാനുള്ള കാരണവും. വിക്കറ്റ് ടേക്കിങ് എബിലിറ്റി നഷ്ടമായതായിരുന്നു രാധാ യാദവിന് ടി20 ടീമില്‍ തിരിച്ചടിയായത്. മറുവശത്ത് ഇടം കയ്യൻ സ്പിന്നറായ ശ്രീചരണി ഫസ്റ്റ് ചോയിസായി ഉയര്‍ന്ന് വരികയും ചെയ്തു. ഐപിഎല്ലിലും കേവലം രണ്ട് വിക്കറ്റ് മാത്രമാണ് രാധയ്ക്ക് നേടാനായത്.

പക്ഷേ, ഇന്ത്യ എയ്ക്കായും ആഭ്യന്തര ക്രിക്കറ്റിലും തിളങ്ങാൻ ഇടം കയ്യൻ സ്പിന്നറിനായിട്ടുണ്ട്. ശ്രീചരണിയെ മറികടന്ന് അന്തിമ ഇലവനില്‍ എത്താനാകുമോയെന്നത് സംശയമാണ്. പരിക്കില്‍ നിന്ന് മുക്തി നേടിയെത്തുന്ന യാസ്തികയെ ടോപ് ഓര്‍ഡര്‍ ബാറ്ററായും ഉപയോഗിക്കാൻ കഴിയും. ബാക്കപ്പായായിരിക്കും ഇംഗ്ലണ്ടിലേക്ക് യാസ്തികയും വണ്ടികയറുക. എല്ലാം കൊണ്ടും ഏറെക്കുറെ സന്തുലിതമായ സംഘം. ഹര്‍മൻപ്രീതിന്റെ കീഴില്‍ അഞ്ചാം ടി20 ലോകകപ്പിനാണ് ഇന്ത്യ ഇറങ്ങുന്നത്, 2020ലെ മുറിവും ഉണക്കേണ്ടതുണ്ട്. ജൂണ്‍ 24നാണ് ഇന്ത്യയുടെ ആദ്യ മത്സരം, പാക്കിസ്ഥാനാണ് എതിരാളികള്‍.

ഐപിഎല്‍ 2026: കോലിയെ നിഷ്പ്രഭമാക്കിയ പ്രിൻസ് ഡെലിവറി, ഏകദിനത്തിലേക്ക് എൻട്രിയുണ്ടോ?

Hari Krishnan M — Fri, 08 May 2026 15:41:34 +0530

അബ്‌സല്യൂട്ട് പെര്‍ഫെക്ഷൻ!

ആ പന്ത് രണ്ട് പതിറ്റാണ്ടോളമാകുന്ന തന്റെ അനുഭവസമ്പത്തിനെ വെല്ലുവിളിച്ചതിന്റെ ആശ്ചര്യം ആയാളുടെ ശരീരഭാഷയിലുണ്ടായിരുന്നു, ഒരു നിമിഷം വിക്കറ്റിലേക്ക് നോക്കി, തലകുനിച്ചു മെല്ലെ നടന്നു, അപ്പോഴും അയാള്‍ക്ക് വിശ്വസിക്കാനാകുന്നുണ്ടായിരുന്നില്ല.

1110 ദിവസത്തെ ഇടവേളയ്ക്ക് ശേഷം ഒരു ഐപിഎല്‍ രാവില്‍ രാജാവ്, വിരാട് കോലി പൂജ്യത്തില്‍ വീണിരിക്കുന്നു. അതും ഒരു ചെയ്‌സ് ദിനത്തില്‍. ആ അത്ഭുതപന്തെറിഞ്ഞ ബൗളറുടെ പേര്, പ്രിൻസ് യാദവ്.

രണ്ടാം ഓവറിലായിരുന്നു പ്രിൻസിന് റിഷഭ് പന്ത് ബോള്‍ കൈമാറിയത്. ഗുഡ് ലെങ്തില്‍ ഹിറ്റ് ചെയ്ത പന്തൊരു ഔട്ട് സ്വിങ്ങറായിരുന്നു, കോലി പന്തിനെ ഓഫ് സൈഡിലേക്ക് പ്രതിരോധിച്ചു. അടുത്ത ഡെലിവെറി. മണിക്കൂറില്‍ 140.4 കിലോമീറ്റര്‍ വേഗതയില്‍ സഞ്ചരിച്ച പന്ത് സമാന ലെങ്തിലാണ് പിച്ച് ചെയ്തത്. കോലിയുടെ കണക്കുകൂട്ടലുകള്‍ പിഴയ്ക്കുന്നതും ഇവിടെയാണ്.

ഔട്ട് സ്വിങ്ങര്‍ പ്രതീക്ഷിച്ച് ഡിഫൻഡ് ചെയ്യാൻ ഒരുങ്ങിയ കോലിക്ക് പ്രിൻസ് നല്‍കിയതൊരു ഇൻസ്വിങ്ങര്‍. 1.4 ഡിഗ്രിയിലധികം സ്വിങ് ചെയ്ത പന്ത് കോലിയുടെ ബാറ്റിനും പാഡിനുമിടയിലൂടെ സഞ്ചരിച്ച് ഓഫ് സ്റ്റമ്പ് തെറിപ്പിച്ചു. പിന്നാലെ, പ്രിൻസ് അന്തരീക്ഷത്തിലേക്ക് ഉയര്‍ന്ന് ചാടി കോലിയുടെ വിക്കറ്റ് ആഘോഷിച്ചു. ഒരു ബാറ്ററെ സംബന്ധിച്ച് ഏറ്റവും ഇൻസള്‍ട്ടിങ്ങായ മൊമന്റുകളിലൊന്നാണ് സ്റ്റമ്പ് വിക്കറ്റിനപ്പുറം സഞ്ചരിച്ച് മൈതാനത്ത് പതിക്കുന്നത്. കോലിയുടെ കാര്യത്തില്‍ സംഭവിച്ചതും ഇതായിരുന്നു.

മത്സരശേഷം പ്രിൻസ് നടത്തിയ പ്രതികരണമായിരുന്നു കോലിയുടെ വിക്കറ്റിലേക്ക് വഴിവെച്ചത് കോലിതന്നെയാണ് എന്ന യാഥാര്‍ത്ഥ്യം ലോകം അറിഞ്ഞത്. ലഖ്നൗ സൂപ്പര്‍ ജയന്റ്സും റോയല്‍ ചലഞ്ചേഴ്‌സ് ബെംഗളൂരുവും തമ്മിലുള്ള സീസണിലെ ആദ്യ മത്സരത്തിന് ശേഷം പ്രിൻസിന് കോലി ചില ഉപദേശങ്ങള്‍ നല്‍കിയിരുന്നു. അതില്‍ ഏറ്റവും പ്രധാനപ്പെട്ടത് പന്തെറിയുമ്പോള്‍ ലെങ്തില്‍ സ്ഥിരത പാലിക്കുന്നത് സംബന്ധിച്ചായിരുന്നു.

ഒരു നിശ്ചിത ലെങ്തില്‍ പന്തിന് മൂവ്മെന്റ് ലഭിക്കുന്നുണ്ടെങ്കില്‍ ആ ലെങ്ത് തന്നെ തുടരുക എന്നതായിരുന്നു കോലി നല്‍കിയ ഉപദേശം. അത് കോലിക്കെതിരെ തന്നെ കൃത്യമായി താരം പ്രയോഗിക്കുകയും ചെയ്തു, വിക്കറ്റും ലഭിച്ചു. പ്രിൻസ് യാദവിനെ സംബന്ധിച്ച് അയാളുടെ കരിയറിലെ തന്നെ ഏറ്റവും നിര്‍ണായകമായ ഐപിഎല്‍ ടൂര്‍ണമെന്റിലൂടെയാണ് കടന്നുപോകുന്നത്. ഒരു ബ്രേക്ക് ഔട്ട് സീസണ്‍ എന്ന് തന്നെ വിലയിരുത്താം.

വിരാട് കോലിക്കും രോഹിത് ശര്‍മയ്ക്കുമൊപ്പം 2027 ഏകദിന ലോകകപ്പ് കളിക്കണമെന്നത് തന്റെ സ്വപ്നമാണെന്നും അവര്‍ക്കായി കിരീടം നേടണമെന്നും പ്രിൻസ് പറഞ്ഞിട്ട് ദിവസങ്ങളെയാകുന്നുള്ളു. ആ ലക്ഷ്യത്തിലേക്ക് അടുക്കണമെങ്കില്‍ ഏകദിന ടീമിലേക്ക് അവസരം ലഭിച്ചേ മതിയാകു, അത് നേടിയെടുക്കാൻ പ്രിൻസിന് സാധിക്കുമോയെന്നതാണ് ചോദ്യം.

24 വയസ് മാത്രമുള്ള പ്രിൻസ് യാദവിന്റെ രണ്ടാം ഐപിഎല്‍ സീസണാണിത്. പത്ത് മത്സരങ്ങളില്‍ നിന്ന് 16 വിക്കറ്റുകള്‍ താരം ഇതുവരെ നേടിയിട്ടുണ്ട്. പർപ്പിള്‍ ക്യാപ് പോരാട്ടത്തില്‍ മൂന്നാം സ്ഥാനത്ത്, ആദ്യ രണ്ടിലുള്ളവരുടെ പേരില്‍ 17 വിക്കറ്റുകളാണുള്ളതെന്നും ഓര്‍ക്കേണ്ടതുണ്ട്. വിരാട് കോലി, കൂപ്പ‍ര്‍ കനോലി, ഫില്‍ സാള്‍ട്ട്, രജത് പാട്ടിദാര്‍, ശുഭ്മാൻ ഗില്‍, ഫിൻ അലൻ, ഇഷാൻ കിഷൻ എന്നിങ്ങനെ ഫോര്‍മാറ്റിലേയും ലോകക്രിക്കറ്റിലേയും മികച്ച ബാറ്റര്‍മാരെയെല്ലാം മടക്കാൻ പ്രിൻസിന്റെ പന്തുകള്‍ക്ക് കഴിഞ്ഞിട്ടുണ്ട്.

വിക്കറ്റുകള്‍ക്കപ്പുറം പ്രിൻസിന്റെ മികവ് വ്യക്തമാക്കുന്നത് എക്കോണമിയിലാണ്. 8.08 എക്കോണമിയിലാണ് പ്രിൻസ് പന്തെറിയുന്നത്. 30 ഓവറിലധികം എറിഞ്ഞ പേസര്‍മാരുടെ പട്ടികയെടുത്താല്‍ രണ്ട് പേര്‍ മാത്രമെ പ്രിൻസിന് മുന്നിലുള്ളു. അത് ഭുവനേശ്വര്‍ കുമാറും മുഹമ്മദ് സിറാജുമാണ്. ഭുവിയുടെ എക്കോണമി 7.6 ആണ്, സിറാജിന്റേത് എട്ടും. മുഹമ്മദ് ഷമിയും ജസ്പ്രിത് ബുമ്രയും ജോഫ്ര ആര്‍ച്ചറുമെല്ലാം പ്രിൻസ് യാദവിന് പിന്നിലാണ് വിക്കറ്റിന്റെ കാര്യത്തിലും എക്കോണമിയിലും.

ഇവരേക്കാള്‍ എല്ലാം മികച്ചതാണ് പ്രിൻസ് എന്നതല്ല വാദം, പക്ഷേ ബാറ്റിങ് പറുദീസകളായി മാറുന്ന ഐപിഎല്‍ മൈതാനങ്ങളില്‍ ലോകക്രിക്കറ്റില്‍ പേരെടുത്ത ബൗളര്‍മാരേക്കാള്‍ മികവ് പുലര്‍ത്താൻ പ്രിൻസ് യാദവിന് സാധിക്കുന്നുണ്ട്.

പക്ഷേ, ഏകദിന ടീമിലേക്ക് എത്താൻ പ്രിൻസിന് സാധിക്കുമോയെന്നതില്‍ സംശയങ്ങളുണ്ട്. കാരണം ദക്ഷിണാഫ്രിക്കയിലെ വിക്കറ്റുകളില്‍ ഹാര്‍ഡ് ലെങ്ത് കണ്‍സിസ്റ്റന്റായി എറിയാൻ കഴിയുന്ന താരങ്ങളെയാണ് ബിസിസിഐ തിരഞ്ഞെടുക്കാൻ സാധ്യത. ഹര്‍ഷിത് റാണ, പ്രസിദ്ധ് കൃഷ്ണ, സിറാജ് എന്നീ വലം കയ്യൻ പേസര്‍മാര്‍ ജസ്പ്രിത് ബുമ്രയ്ക്കൊപ്പം ഇതിനോടകം തന്നെ ഇടം കണ്ടെത്തിയിട്ടുണ്ട്. വിദേശപര്യടങ്ങളിലെല്ലാം തന്നെ ഇന്ത്യ ഉപയോഗിക്കുന്നത് ഈ പേസ് നിരയെയാണ് താനും. ഈ ഐപിഎല്‍ സീസണ്‍ മേല്‍പ്പറഞ്ഞ പേരുകളെയെല്ലാം മറികടക്കാൻ കഴിയുന്ന ഒരു പ്രകടനം പുറത്തെടുത്താല്‍ അസാധ്യമല്ല ഒന്നും.

ഐപിഎല്‍ 2026: അടയാത്ത പ്ലേ ഓഫ് വാതില്‍, പത്ത് ടീമിനും അവസരം; സാധ്യതകള്‍ എങ്ങനെ?

Hari Krishnan M — Fri, 08 May 2026 15:46:53 +0530

ഐപിഎല്‍ അതിന്റെ ഏറ്റവും പീക്ക് വീക്കിലേക്ക് കടക്കുകയാണ്. കൊല്‍ക്കത്ത നൈറ്റ് റൈഡേഴ്‌സ് ഒഴികെയുള്ള ടീമുകള്‍ 10 റൗണ്ടുകള്‍ പൂര്‍ത്തിയാക്കിയിരിക്കുന്നു. എന്നാല്‍, ഒരു സംഘത്തിന് പോലും ടോപ് ഫോര്‍ ഉറപ്പിക്കാനായിട്ടില്ല. ആര്‍ക്കാണ് കൂടുതല്‍ മുൻതൂക്കം എന്ന് ചോദിച്ചാല്‍ ഒന്നാമതുള്ള സണ്‍റൈസേഴ്‌‌സ് ഹൈദരാബാദിനും പത്താമതുള്ള ലഖ്നൗ സൂപ്പര്‍ ജയന്റ്‌സിനും ഇപ്പോഴും ആദ്യ നാലിലെത്താൻ കഴിയും എന്നാണ് ഉത്തരം. പ്ലേ ഓഫ് സാധ്യതകള്‍ പരിശോധിക്കാം.

11 മത്സരങ്ങളില്‍ നിന്ന് ഏഴ് ജയം ഉള്‍പ്പെടെ 14 പോയിന്റുമായി ഹൈദരാബാദാണ് പോയിന്റ് പട്ടികയില്‍ ഒന്നാമത്. അവശേഷിക്കുന്ന മൂന്ന് മത്സരങ്ങള്‍ ഗുജറാത്ത് ടൈറ്റൻസ്, ചെന്നൈ സൂപ്പര്‍ കിങ്സ്, റോയല്‍ ചലഞ്ചേഴ്സ് ബെംഗളൂരു എന്നീ ടീമുകള്‍ക്കെതിരെ. മൂന്നില്‍ ഒരു ജയം നേടിയാല്‍ 16 എന്ന സുരക്ഷിത സംഖ്യയിലേക്ക് എത്താൻ ഹൈദരാബാദിനാകും. പ്ലേ ഓഫ് ഉറപ്പിക്കാം, കൂടുതല്‍ ജയങ്ങള്‍ ആദ്യ രണ്ട് സ്ഥാനത്തേക്കും നയിക്കും.

രണ്ടാം സ്ഥാനത്തുള്ള പ‍ഞ്ചാബിന് 13 പോയിന്റാണുള്ളത്. നാല് മത്സരങ്ങള്‍ ഇനിയും ബാക്കിയുണ്ട്. പോസിറ്റീവ് നെറ്റ് റണ്‍റേറ്റിന്റെ ആനുകൂല്യമുള്ളതുകൊണ്ട് ആദ്യ രണ്ട് സ്ഥാനങ്ങളിലൊന്ന് ഉറപ്പിക്കാൻ പഞ്ചാബിന് മുന്നില്‍ സുവര്‍ണാവസരമാണ് ഒരുങ്ങിയിരിക്കുന്നത്. ഇനി രണ്ട് ജയങ്ങള്‍ക്കൂടിയുണ്ടെങ്കില്‍ ആദ്യ നാലില്‍ പഞ്ചാബുണ്ടാകും. ഡല്‍ഹി ക്യാപിറ്റല്‍സ്, മുംബൈ ഇന്ത്യൻസ്, ബെംഗളൂരു, ലഖ്നൗ എന്നിവരാണ് എതിരാളികള്‍.

പത്ത് ടീമുകളില്‍ ഏറ്റവും മികച്ച നെറ്റ് റണ്‍റേറ്റുള്ള സംഘമാണ് ബെംഗളൂരു. നാല് മത്സരങ്ങള്‍ അവശേഷിക്കെ 12 പോയിന്റുണ്ട് രജത് പാട്ടിദാറിനും കൂട്ടര്‍ക്കും. മുബൈ, കൊല്‍ക്കത്ത, പഞ്ചാബ്, ഹൈദരാബാദ് എന്നീ ടീമുകളുമായാണ് ഇനിയുള്ള മത്സരങ്ങള്‍. ഹൈദരാബാദിനും പഞ്ചാബിനും സമാനമായി രണ്ട് ജയങ്ങള്‍ നിലവിലെ ചാമ്പ്യന്മാരെ സേഫ് സോണിലെത്തിക്കും.

ബെംഗളൂരുവിനൊപ്പം 12 പോയിന്റുണ്ടെങ്കിലും രാജസ്ഥാൻ റോയല്‍സിന്റേയും ഗുജറാത്ത് ടൈറ്റൻസിന്റേയും നെറ്റ് റണ്‍റേറ്റ് മൈനസിലാണ് നിലവില്‍. ടോപ് ഫൈവിലുള്ള എല്ലാ ടീമുകള്‍ക്കും പ്ലേ ഓഫ് സാധ്യതകള്‍ ഏറെക്കുറെ സന്തുലിതമായി നില്‍ക്കുന്ന പശ്ചാത്തലത്തില്‍ ബാക്കിയുള്ള മത്സരങ്ങളിലെല്ലാം വലിയ മാര്‍ജിനില്‍ ജയിക്കേണ്ടതുണ്ട് രാജസ്ഥാനും ഗുജറാത്തിനും. ഇരുവരുടേയും അടുത്ത മത്സരം നേര്‍ക്കുനേരാണ്, നിര്‍ണായകമാകും.

അഞ്ച് തവണ കിരീടം ചൂടിയ ചെന്നൈ സൂപ്പര്‍ കിങ്സ്, 10 മത്സരങ്ങളില്‍ നിന്ന് 10 പോയിന്റ്. അവശേഷിക്കുന്ന നാല് മത്സരങ്ങളില്‍ മൂന്നും ജയിക്കണം ചെന്നൈക്ക് പ്ലേ ഓഫ് സാധ്യതകള്‍ സജീവമാക്കാൻ. ലഖ്നൗവായി രണ്ട് പോരാട്ടങ്ങള്‍ ബാക്കിയുണ്ട്. മറ്റ് രണ്ട് മത്സരങ്ങള്‍ ഗുജറാത്തും ഹൈദരാബാദുമായാണ്. 14 പോയിന്റില്‍ മറ്റ് ടീമുകള്‍ എത്തി നില്‍ക്കുന്ന ഒരു സിനാറിയോ ഉണ്ടായാല്‍ പോസിറ്റീവ് നെറ്റ് റണ്‍റേറ്റുള്ള ചെന്നൈക്ക് മുൻതൂക്കവും ലഭിക്കാം.

ഡല്‍ഹി ക്യാപിറ്റല്‍സിനെ സംബന്ധിച്ച് അവശേഷിക്കുന്ന എല്ലാ മത്സരങ്ങളും ജയിക്കേണ്ടതുണ്ട്. ഏറ്റവും മോശം നെറ്റ് റണ്‍റേറ്റുള്ള ടീമുകളില്‍ ഒന്നായതുകൊണ്ട് തന്നെ എളുപ്പമല്ല. നാല് മത്സരങ്ങളാണ് ഡല്‍ഹിക്ക് ബാക്കിയുള്ളത്.

കൊല്‍ക്കത്തയ്ക്ക് മുന്നിലുള്ള അഞ്ച് മത്സരങ്ങളും ജയിക്കുകയാണെങ്കില്‍ 17 പോയിന്റാകും. പ്ലേ ഓഫ് പ്രവേശനം ബുദ്ധിമുട്ടാകില്ല. ഒരു പരാജയം ഏറ്റുവാങ്ങേണ്ടി വന്നാല്‍ 15ലേക്ക് ചുരുങ്ങും പോയിന്റ്. നെറ്റ് റണ്‍റേറ്റ് പ്രധാന റോള്‍ വഹിക്കുന്ന അവസ്ഥയുണ്ടാകുന്നത് മുന്നില്‍ക്കണ്ട് വലിയ ജയങ്ങള്‍ നേടേണ്ടതുണ്ട് മുൻ ചാമ്പ്യന്മാര്‍ക്ക്.

അഞ്ച് കിരീടങ്ങളുടെ പ്രതാപമുള്ള മുംബൈ ഇന്ത്യൻസ് ഒൻപതാമതാണ്. അവശേഷിക്കുന്ന നാല് മത്സരങ്ങള്‍ ജയിച്ചാലും മുംബൈയുടെ പോയിന്റ് നില 14ല്‍ മാത്രമെ എത്തുകയുള്ളു. എല്ലാ മത്സരങ്ങളും ജയിച്ചാല്‍ മാത്രം പോര മറ്റ് ടീമുകളുടെ സഹായവും വേണം മുംബൈക്ക്. പ്രത്യേകിച്ചും 12 പോയിന്റ് വീതമുള്ള ടീമുകള്‍ തോല്‍ക്കേണ്ടതായി വരും. പഞ്ചാബും കൊല്‍ക്കത്തയും രാജസ്ഥാനുമാണ് ഇനി എതിരാളികള്‍.

ലഖ്നൗവിന് കണക്കുകളില്‍ സാധ്യതയുണ്ടെങ്കിലും ഏറെക്കുറെ സീസണ്‍ അവസാനിച്ച സ്ഥിതിയാണ്. എല്ലാ മത്സരങ്ങളും ജയിച്ചാലും 14 പോയിന്റ് മാത്രമെ ലഭിക്കു. പക്ഷേ, മോശം നെറ്റ് റണ്‍റേറ്റ് ടീമിനെ തുണയ്ക്കുന്ന ഘടകമല്ല.

ഐപിഎല്‍ 2026: ഇനിയും ബാല്യമുണ്ടെന്ന് ഭുവി, ഒപ്പം ഹേസല്‍വുഡും; ഡല്‍ഹിക്ക് നരകമായി പവർപ്ലേ

Hari Krishnan M — Tue, 28 Apr 2026 15:08:32 +0530

സാഹില്‍ പരഖ്. ഷെയിൻ വോണിന്റെ സ്വപ്നസംഘം ഐപിഎല്‍ കിരീടം ഉയര്‍ത്തിയതിന് ഏഴാം ദിനമാണ് ജനനം. ഒരുപക്ഷേ സാഹിലിന്റെ ജീവിതത്തിലെ ഏറ്റവും സുപ്രധാന ദിനമായിരുന്നിരിക്കാം പോയ രാത്രി. ഡല്‍ഹി ക്യാപിറ്റല്‍സ് ജഴ്സിയില്‍ ക്രിക്കറ്റ് ഭൂപടത്തിലേക്ക് ചുവടുവെക്കാൻ കാലമൊരുക്കിയ അവസരം.

അവിടേക്കൊരു ഇൻസ്വിങ് യോര്‍ക്കറെത്തി. രണ്ട് പതിറ്റാണ്ടിന്റെ പരിചയസമ്പത്ത് ആവാഹിച്ചെത്തിയൊരു ഡെലിവെറി. അന്തരീക്ഷത്തില്‍ നിന്ന് തന്നെ തിരിഞ്ഞ ആ പന്ത്, സാഹിലിന്റെ ബാറ്റിനേയും കാലുകളേയും പൂര്‍ണമായും നിഷ്പ്രഭമാക്കി മിഡില്‍ സ്റ്റമ്പില്‍ പതിക്കുന്നു. ആല്‍പ്പം ക്രൂരമായിപ്പോയില്ലെ എന്ന് തോന്നിയേക്കാം. എന്നാല്‍, സ്വിങ് ബൗളിങ്ങിന്റെ എല്ലാ മനോഹാരതയും നിറഞ്ഞതായിരുന്നു ആ നിമിഷം.

ഒരു 13 വര്‍ഷം മുൻപാണ്. ചെന്നൈയിലെ എം ചിദംബരം സ്റ്റേഡിയം. പാക്കിസ്ഥാനെതിരെ 228 റണ്‍സ് പ്രതിരോധിക്കാൻ ഇറങ്ങുമ്പോള്‍ എം എസ് ധോണി ഓപ്പണിങ് ഓവര്‍ കൈമാറുന്നത് ഒരു അരങ്ങേറ്റക്കാരനാണ്. സ്ട്രൈക്കില്‍ മുഹമ്മദ് ഹഫീസ്. ഔട്ട്സൈഡ് ഓഫ് സ്റ്റമ്പ് ലൈനില്‍ പിച്ച് ചെയ്ത് പന്ത് തന്റെ ബാറ്റിനെ ഒരു തരത്തിലും വെല്ലുവിളിക്കില്ലെന്ന് ഉറപ്പുള്ളപോലെ ഹഫീസ് ലീവ് ചെയ്യാനൊരുങ്ങി.

ഹഫീസിന്റെ കണക്കുകൂട്ടലുകളെയെല്ലാം അവിടെ പിഴയ്ക്കുകയാണ്. മണിക്കൂറില്‍ 131.5 കിലോ മീറ്റര്‍ മാത്രം വേഗതയിലെത്തിയ പന്ത് അയാളെ അത്ഭുതപ്പെടുത്തിക്കൊണ്ട് ഓഫ് സ്റ്റമ്പ് തെറിപ്പിച്ചിരിക്കുന്നു, അസാധ്യമായൊരു ഇൻസ്വിങ്ങര്‍, ചെപ്പോക്കിന്റെ ഗ്യാലറി ആര്‍ത്തിരമ്പുമ്പോള്‍ സ്റ്റമ്പ് വിക്കറ്റിനപ്പുറം മൈതാനത്ത് വിശ്രമിക്കുകയായിരുന്നു. കവിതപോലൊരു കാഴ്ച.

സാഹലിന്റെ മിഡില്‍ സ്റ്റമ്പും ഹഫീസിന്റെ ഓഫ് സ്റ്റമ്പും, ഒരു വ്യാഴവട്ടക്കാലത്തിലധികം ദൂരമുണ്ട് ഈ രണ്ട് നിമിഷങ്ങള്‍ക്കിടയില്‍. പക്ഷേ, രണ്ട് ഡെലിവറികളും ഒരാളുടെ കൈകളില്‍ നിന്നായിരുന്നു, സ്വിങ് മാന്ത്രികൻ ഭുവനേശ്വര്‍ കുമാര്‍.

ഒരു മാര്‍ക്യു ക്ലാഷൊന്നുമായിരുന്നില്ല തിങ്കളാഴ്ച അരങ്ങൊരുങ്ങിയത്, അരുണ്‍ ജയ്റ്റ്ലി സ്റ്റേഡിയം നിറയാൻ കാരണം ആ പേര് മാത്രമായിരുന്നു, വിരാട് കോലി. അയാളുടെ കൗമാരത്തിനും യവ്വനത്തിനും ഒടുവില്‍ ഐതിഹാസിക കരിയറിനും അധാരമായ മണ്ണ്. പക്ഷേ, അവിടെ സംഭവിച്ചത് പ്രതീക്ഷിച്ചതോന്നുമായിരുന്നില്ല. തങ്ങളെ പന്തുകള്‍ തേടിയെത്തുന്ന നിമിഷത്തിനായി കൊതിച്ചിരുന്ന ഗ്യാലറിയുടെ മുന്നില്‍, മോഡേണ്‍ ടി20 ക്രിക്കറ്റിന്റെ തിരക്കഥ പൊളിച്ചെഴുതുകയായിരുന്നു അവര്‍, ഭുവിയും ഒപ്പം ജോഷ് ഹേസല്‍വുഡും.

രണ്ട് ദിവസം മുൻപ് 20 ഓവറില്‍ 264 റണ്‍സ് സ്കോര്‍ ചെയ്ത് ടി20 ക്രിക്കറ്റില്‍ തങ്ങളുടെ പരമാവധിയെന്തെന്ന് കാണിച്ചുതന്ന അതേ ബാറ്റിങ് നിര. സ്വന്തം മൈതാനത്ത് ഒരു പിച്ചിനിപ്പുറം ബാറ്റ് ചെയ്യാനിറങ്ങിയപ്പോള്‍ അക്ഷരാര്‍ത്ഥത്തില്‍ നരകം കാണുകയായിരുന്നില്ലെ. ഭുവിയുടേയും ഹേസല്‍വുഡിന്റേയും ക്വാളിറ്റി ബൗളിങ് ഒരുവശത്ത് നില്‍ക്കുന്നുണ്ട്. എന്നിരുന്നാലും ഡല്‍ഹിയുടെ തകര്‍ച്ചയ്ക്ക് പിന്നിലെ കാരണം അത് മാത്രമാണെന്ന് എഴുതിത്തള്ളാനാകില്ല.

നാല് ഓവര്‍ അവസാനിക്കുമ്പോള്‍ എട്ട് റണ്‍സിന് ആറ് വിക്കറ്റ് എന്ന നിലയിലേക്ക് വീഴാൻ മാത്രം ആ പിച്ചില്‍ ഭൂതങ്ങളുണ്ടായിരുന്നോ എന്ന് ചോദിച്ചാല്‍, ഇല്ലാ എന്നാണ് ഉത്തരം. ഓസ്ട്രേലിയയിലെ വിക്കറ്റുകള്‍പ്പോലെ പേസര്‍മാറുടെ പറുദീസയായിരുന്നോ എന്ന് സംശയിച്ചാല്‍, അല്ലാ എന്നാണ് മറുപടി. ഇത്തരമൊരു വിക്കറ്റ് ഒരുക്കിയതിന്റെ പേരില്‍ ക്യുറേറ്റര്‍മാര്‍ വിമര്‍ശനം നേരിടേണ്ടി വരുമോയെന്ന് ആശങ്കയുണ്ടായാല്‍, അതിനും സാധ്യതയില്ലെന്ന് ഉറച്ച് പറയാം. It was a proper wicket, a balanced one.

പന്തുകള്‍ക്ക് അർഹിക്കുന്ന ബഹുമാനം കൊടുത്ത് നേരിട്ടാല്‍ സ്കോർ ചെയ്യാൻ കഴിയുന്ന സ്വിങ്ങും പേസും മാത്രമായിരുന്നു അരുണ്‍ ജയ്റ്റ്‌ലിയിലെ വിക്കറ്റ് സമ്മാനിച്ചത്. ലോകക്രിക്കറ്റിലെ വലിയ പേരുകള്‍ അഞ്ച് റണ്‍സ് പോലും നേടാനാകാതെ മടങ്ങുന്നതും കണ്ടു. രാഹുലിനേയും നിതീഷ് റാണയേയും മടക്കുന്നത് ഹേസല്‍വുഡിന്റെ കാച്ചിക്കുറിക്കുയുള്ള ഷോർട്ട് ഓഫ് ദ ലെങ്ത് പന്തുകളാണ്. സ്റ്റബ്‌സിനേയും അക്‌സറിനേയും ഭുവി പുറത്താക്കുന്നത് ഔട്ട് സ്വിങ്ങറിലൂടെ. റിസ്വി ഹേസല്‍വുഡിന് കീഴടങ്ങുന്നതും ഔട്ട് സ്വിങ്ങറില്‍ തന്നെ, പക്ഷേ ഈ മൂന്ന് ഔട്ട് സ്വിങ്ങറുകള്‍ക്കും നേരിയ മൂവ്മെന്റ് മാത്രമാണുണ്ടായത്.

ഇവിടെയാണ് ബാറ്റിങ് പറുദീസകളില്‍ ശീലിച്ച ഡല്‍ഹി ബാറ്റർമാരുടെ കാല്‍ക്കുലേഷനുകള്‍ പൂർണമായും പിഴയ്ക്കുന്നത്. അല്‍പ്പം സ്വിങ്ങും ബൗണ്‍സുമുള്ള വിക്കറ്റുകളില്‍ സമാനസമീപനം ഉപയോഗിച്ചാല്‍ സംഭവിക്കുന്നത് ബൗണ്ടറികളായിരിക്കില്ല എന്ന ബോധ്യമുണ്ടായിരിക്കുന്നു. 13 ഫാള്‍സ് ഷോട്ടുകളാണ് ഡല്‍ഹി ബാറ്റര്‍മാരില്‍ നിന്നുണ്ടായത്, പവര്‍പ്ലേയില്‍ മാത്രം, വീണത് ആറ് വിക്കറ്റുകളും. ടെസ്റ്റ് മാച്ച് ലെങ്തുകള്‍ ഐപിഎല്ലില്‍ പലപ്പോഴും ബൗളര്‍മാര്‍ക്ക് വിജയം സമ്മാനിച്ചിട്ടുണ്ട്, ബെംഗളൂരു - ഡല്‍ഹി മത്സരം അതിന്റെ ക്ലാസിക്ക് ഉദാഹരണങ്ങളിലൊന്നുമായി.

250 റണ്‍സ് കടക്കുന്ന മത്സരങ്ങള്‍ ഇനിയും ഉണ്ടായേക്കും, 35 പന്തുകളില്‍ സെഞ്ചുറികളും പിറക്കും, വിനോദ-വാണിജ്യമൂല്യങ്ങള്‍ ഉയര്‍ത്തുന്ന ഹൈ സ്കോറിങ്ങ് ത്രില്ലറുകളും ജനിക്കും. പക്ഷേ, അത്തരം മത്സരങ്ങള്‍ക്ക് പിന്നില്‍ ബാറ്റര്‍മാരുടെ മികവിനേക്കാള്‍ മുകളില്‍ പിച്ചുകളാണ് നിര്‍ണായക പങ്ക് വഹിക്കുക എന്ന് മാത്രം.

ഐപിഎല്‍ 2026: തിരിച്ചുവരവില്‍ 'തെറ്റി'! ഹാർദിക്ക് മുംബൈയില്‍ നിന്ന് പുറത്തേക്കോ?

Hari Krishnan M — Fri, 15 May 2026 14:25:41 +0530

തുടങ്ങേണ്ടത് 2023 നവംബര്‍ 27ല്‍ നിന്നാണ്...

ഹാര്‍ദിക്ക് പാണ്ഡ്യ മുംബൈ ഇന്ത്യൻസിലേക്ക് തിരികെയെത്തും, രോഹിത് ശര്‍മയുടെ നായകസ്ഥാനം നഷ്ടപ്പെടും. അന്തരീക്ഷത്തിലുണ്ടായിരുന്ന ഈ അഭ്യൂഹം 2023 നവംബ‍ര്‍ അവസാനം യാഥാര്‍ത്ഥ്യമായി. ശേഷം രണ്ട് മുംബൈ താരങ്ങളുടെ പ്രതികരണങ്ങളായിരുന്നു പ്രധാനമായും ശ്രദ്ധ നേടിയത്.

ചിലപ്പോഴൊക്കെ നിശബ്ദതയാണ് ഏറ്റവും മികച്ച മറുപടിയെന്ന ക്വോട്ട് പങ്കുവെച്ച ജസ്പ്രിത് ബുമ്ര. ഹൃദയഭേദകമെന്ന് കുറിട്ട സൂര്യകുമാര്‍ യാദവ്. സീസണുകളോളം ടീമിന്റെ നെടുംതൂണുകളായിട്ടും മാറ്റിനിര്‍ത്തപ്പെട്ടതിന്റെ നീരസം മറച്ചുവെക്കാൻ ഇരുവരും തയാറായില്ല. സൂപ്പര്‍ താരങ്ങളാല്‍ സമ്പന്നമായ മുംബൈയുടെ ഡ്രൈസിങ് റൂമായിരിക്കും ഹാര്‍ദിക്കിന് മുന്നിലെ ഏറ്റവും വലിയ വെല്ലുവിളിയെന്നായിരുന്നു കായികപണ്ഡിതരെല്ലാം പ്രവചിച്ചത്.

പക്ഷേ, അത് മാത്രമായിരുന്നില്ല സംഭവിച്ചത്. മുംബൈയുടെ ഹോം മൈതാനമായ വാംഖഡെ ഹാര്‍ദിക്കിന് ഒരു നരകമാക്കി മാറ്റി ആരാധകര്‍. അഞ്ച് കിരീടങ്ങള്‍ നേടിത്തന്ന നായകനെ പിഴുതെറിഞ്ഞ മാനേജ്മെന്റിനുകൂടിയുള്ള താക്കീതായിരുന്നു ഗ്യാലറിയില്‍ ഉയര്‍ന്നത്. കയ്യടികള്‍ തിരിച്ചുപിടിക്കാൻ ഹാര്‍ദിക്കിന് 2024 ടി20 ലോകകപ്പ് നേടേണ്ടി വന്നു.

മൂന്ന് സീസണുകള്‍ക്കിപ്പുറം ഒരിക്കല്‍ക്കൂടി വാംഖഡെയുടെ ഗ്യാലറികള്‍ ഹാര്‍ദിക്കിനും മാനേജ്മെന്റിനും ചില സൂചനകള്‍ നല്‍കുകയാണിപ്പോള്‍. ഹാര്‍ദിക്ക് നായകസ്ഥാനം ഏറ്റെടുത്തതിന് ശേഷം ടീമിന്റെ പ്രകടനത്തിലുണ്ടായ ഇടിവ്, മൈതാനത്ത് സംഭവിക്കുന്ന ഒത്തൊരുമയില്ലായ്മ, ഡ്രെസിങ് റൂമിലെ പിരിമുറുക്കങ്ങള്‍ എല്ലാമാണ് ഇതിന്റെ അടിസ്ഥാനം. ഫോര്‍മാറ്റിലെ സൂപ്പര്‍ താരങ്ങളെല്ലാം ഒരു കുടക്കീഴിലായിട്ടും പ്ലേ ഓഫിന്റെ പടിക്കല്‍പ്പോലും എത്താൻ മുംബൈക്ക് സാധിച്ചിട്ടില്ല.

ഹാര്‍ദിക്കിന്റെ കീഴില്‍ ആദ്യ സീസണില്‍ പത്താം സ്ഥാനത്തായിരുന്നു മുംബൈയുടെ സ്ഥാനം. പക്ഷേ, 2025ല്‍ ഉജ്വല തിരിച്ചുവരവ് നടത്താൻ മുംബൈക്കായി, ക്വാളിഫയര്‍ രണ്ട് വരെ കുതിപ്പ് നടത്തി. എന്നാല്‍ വീണ്ടും പോയിന്റ് പട്ടികയുടെ അടിത്തട്ടിലേക്ക് മടക്കം. 2026 സീസണെടുത്താല്‍ ജയിച്ച് തുടങ്ങിയ സംഘത്തിന് പിന്നീട് ജയം എന്തെന്നറിയാൻ ദീര്‍ഘനാള്‍ കാത്തിരിക്കേണ്ടി വന്നു.

രോഹിത് ശര്‍മ ഉള്‍പ്പെടെയുള്ള സുപ്രധാന താരങ്ങള്‍ക്കേറ്റ പരിക്ക്, കൃത്യമായൊരു ഇലവനെ കണ്ടെത്താൻ കഴിയാതെ പോയത്, വിദേശതാരങ്ങളെ ഉപയോഗിക്കുന്നതിലെ വീഴ്ച, സൂപ്പര്‍സ്റ്റാറുകളുടെ മോശം ഫോമും സ്ഥിരതയില്ലായ്മയുമെല്ലാം വീഴ്ചയുടെ കാരണങ്ങളായി നിരത്താൻ കഴിയും. മുംബൈയുടെ നിറങ്ങളില്‍ ഹാര്‍ദിക്ക് കളത്തിലെത്തിയിട്ട് മൂന്ന് മത്സരങ്ങളാകുന്നു, ചെന്നൈ സൂപ്പര്‍ കിങ്സിനെതിരായ എവെ മത്സരത്തിലാണ് അവസാനമായി ഹാര്‍ദിക്ക് മൈതാനത്തിറങ്ങിയത്.

പുറം വേദനയാണ് കാരണമെന്നാണ് മാനേജ്മെന്റ് പറയുന്നത്. ഇന്ത്യയുടെ പ്രീമിയം ഓള്‍ റൗണ്ടര്‍ പുറത്തിനേറ്റ പരിക്ക് മൂലം രണ്ട് വാരമായി കളത്തിന് പുറത്തിരിക്കുന്നു. ഇത് മുംബൈ ഇന്ത്യൻസിനെ മാത്രം ബാധിക്കുന്ന ഒന്നല്ല, ഇന്ത്യയുടെ ഭാവി പദ്ധതികളേയും ബാധിക്കുന്നതാണ്. ഗുരുതരമാണെങ്കില്‍ ബിസിസിഐയുടെ ഇടപെടലുണ്ടാകുകയും ദേശീയ ക്രിക്കറ്റ് അക്കാദമിയിലേക്ക് ഹാര്‍ദിക്ക് എത്തേണ്ട സമയവുമായി. എന്നാല്‍, താരം പരിശീലനത്തിന് എത്തുന്ന സാഹചര്യങ്ങളും കാണാനാകും.

എല്ലാം കണക്കാക്കുമ്പോള്‍ മുംബൈ ഇന്ത്യൻസിലെ ഹാര്‍ദിക്കിന്റെ ഭാവിയിലേക്കാണ് കാര്യങ്ങളെത്തുന്നത്. ഗുജറാത്ത് ടൈറ്റൻസിന്റെ നായകനായി ആദ്യ സീസണില്‍ തന്നെ കിരീടം, പിന്നാലെ ഫൈനലിലുമെത്തി. രണ്ട് സീസണുകളുടെ ആയുസില്‍ ഹാര്‍ദിക്കെന്ന നായകനെ അളന്നായിരുന്നു മുംബൈ മാനേജ്മെന്റ്, ഫ്രാഞ്ചൈസിയുടെ ഭാവി മുന്നില്‍ക്കണ്ട് താരത്തെ തിരികെയെത്തിച്ചത്. പ്രതീക്ഷിച്ച ഫലമുണ്ടായില്ല എന്നത് മാത്രമല്ല, തിരിച്ചടികളാണ് കൂടുതലായും സംഭവിച്ചത്. നയിച്ച 37 മത്സരത്തില്‍ 22ലും പരാജയം, ഫ്രാഞ്ചൈസിയുടെ ചരിത്രത്തിലെ ഏറ്റവും മോശം നായകനിലേക്കുള്ള യാത്രയിലാണ് ഹാര്‍ദിക്ക്.

ആറ് വര്‍ഷമായി മുംബൈയുടെ ഷെല്‍ഫില്‍ ഒരു ഐപിഎല്‍ കിരീടമെത്തിയിട്ട്. ടൂര്‍ണമെന്റിലാദ്യമായാണ് ഇത്ര ദൈര്‍ഘ്യമുള്ള വരള്‍ച്ച സംഭവിക്കുന്നത്. സൂര്യകുമാര്‍ യാദവിനും ജസ്പ്രിത് ബുമ്രയ്ക്കും കീഴില്‍ മുംബൈ മെച്ചപ്പെട്ട പ്രകടനം നടത്തുകയും ചെയ്യുന്നു. ഹാര്‍ദിക്ക് ഇല്ലാതെയിറങ്ങിയ മൂന്ന് മത്സരങ്ങളില്‍ രണ്ടിലും മുംബൈക്ക് ജയം, ബെംഗളൂരുവിനെതിരായ മത്സരം കൈവിട്ടത് അവസാന ഓവറിലുമായിരുന്നു. സീസണ്‍ മികച്ച രീതിയില്‍ അവസാനിപ്പിക്കാൻ ഒരുങ്ങുകയാണ് മുംബൈയെന്ന് സൂചനകളാണ് മൈതാനത്തെ പ്രകടനങ്ങള്‍ വ്യക്തമാക്കുന്നത്.

ഹാര്‍ദിക്കിന്റെ മറ്റൊരു ട്രേഡ് വൈകാതെ നടക്കുമെന്നാണ് സൂചനകളും. ചെന്നൈക്കെതിരായ മത്സരത്തിന് ശേഷം സിഇഒ കാശി വിശ്വനാഥനുമായി ഹാര്‍ദിക്ക് നടത്തിയ ദീര്‍ഘസംഭാഷണമെല്ലാം ഉദാഹരിച്ചുകൊണ്ടാണ് അന്തരീക്ഷത്തില്‍ അഭ്യൂഹങ്ങള്‍ നില്‍ക്കുന്നത്.

സീസണിനൊടുവില്‍ വലിയൊരു ലീഡര്‍ഷിപ്പ് ഷിഫ്റ്റിന് മുംബൈ തയാറായേക്കും. സൂര്യകുമാര്‍, ജസ്പ്രിത് ബുമ്ര എന്നീ വലിയ പേരുകളുണ്ട്, ഒപ്പം തിലക് വര്‍മയും. ഹാര്‍ദിക്കിനപ്പുറത്തേക്ക് മുംബൈ ചിന്തിക്കാൻ ഒരുങ്ങുകയാണെങ്കില്‍ ഈ ഓപ്ഷനുകളാണ് മുൻപിലുള്ളത്. കിരീടമില്ലാതെ മറ്റൊരു സീസണ്‍ കൂടി സങ്കല്‍പ്പിക്കാൻ മാനേജ്മെന്റിനും കഴിയില്ല, അതുകൊണ്ട് തീരുമാനങ്ങള്‍ക്ക് കടുപ്പമേറും, അത് എന്തൊക്കെയെന്ന് കാത്തിരുന്ന് തന്നെ അറിയാം.

ഐപിഎല്‍ 2026: തൊട്ടതെല്ലാം പിഴച്ച് അക്‌സറും, ക്യാപ്റ്റൻസി ഭാരം ഓള്‍റൗണ്ടര്‍ക്കും തിരിച്ചടിയോ?

Hari Krishnan M — Sat, 09 May 2026 15:13:09 +0530

അക്‌സ‍ര്‍ പട്ടേല്‍സ് ഡിസ്ട്രസ് ഡേ ഈസ് ഓവര്‍!

ഔട്ട്സൈഡ് ഓഫ് സ്റ്റമ്പ് ലൈനിലെത്തിയ വൈഭവ് അറോറയുടെ പന്ത് പുള്‍ ചെയ്തു അക്‌സര്‍ പട്ടേല്‍. അരുണ്‍ ജയ്‌റ്റ്ലി സ്റ്റേഡിയത്തിലെ ഡല്‍ഹി ആരാധകര്‍ ആ ബാറ്റില്‍ നിന്ന് ബൗണ്ടറികള്‍ മാത്രമെ അപ്പോള്‍ പ്രതീക്ഷക്ഷിക്കുന്നുണ്ടായിരുന്നുള്ളു. കാരണം, റണ്‍സ് വിട്ടുനല്‍കാൻ താല്‍പ്പര്യമില്ലാതിരുന്ന കൊല്‍ക്കത്ത ബൗളര്‍മാര്‍ക്ക് മുന്നില്‍ നിലയില്ലാകയത്തില്‍ അകപ്പെട്ടതുപോലെയായിരുന്നു അക്‌സര്‍ അതുവരെ.

പക്ഷേ, ഡീപ് മി‍ഡ് വിക്കറ്റില്‍ അനുകൂല്‍ റോയിയുടെ കഠിനാധ്വാനം ഫലം കാണുകയാണ്. അനുകൂലിന്റെ ഉജ്വലമായൊരു ക്യാച്ചില്‍ അക്‌സറിന്റെ ഇന്നിങ്സിന് തിരശീല വീണു. അല്ല, മൈതാനത്തെ അക്‌സറിന്റെ ദുഷ്കരമായ 42 മിനുറ്റുകള്‍ക്ക് അവസാനമാകുകയായിരുന്നു. 22 പന്തുകള്‍ നേരിട്ട ഇടം കയ്യൻ ബാറ്റര്‍ക്ക് സ്കോര്‍ ചെയ്യാനായത് 11 റണ്‍സ് മാത്രം. ഒരു ബൗണ്ടറിപോലും കണ്ടെത്താൻ അക്‌സറിന്റെ ബാറ്റിന് സാധിച്ചില്ല. കമന്ററി ബോക്‌സിലിരുന്ന ഹര്‍ഷ ബോഗ്ലെ പറഞ്ഞു, അക്‌സ‍ര്‍ പട്ടേല്‍സ് ഡിസ്ട്രസ് ഡേ ഈസ് ഓവര്‍!

ഈ ഒരുവാചകം അക്‌സറിന്റെയും ഡല്‍ഹി ക്യാപിറ്റല്‍സിന്റെയും സീസണിന്റെ ആകെ തുകയാണെന്നും പറയാൻ കഴിയും. മൂന്ന് ഫോര്‍മാറ്റിലും ഇന്ത്യയുടെ പ്രീമിയം ഓള്‍ റൗണ്ടര്‍മാരിലൊരാളാണ് അക്‌സര്‍. കരിയറിന്റെ അസ്തമയത്തോട് അടുക്കുന്ന രവീന്ദ്ര ജഡേജയുടെ പകരക്കാരനെ ബിസിസിഐ കാണുന്നത് അക്‌സറിലാണ്. എന്നാല്‍, സീസണിലെ അക്‌സറിന്റെ പ്രകടനങ്ങള്‍ ശരാശരിക്കും താഴെയാണ് നിലവില്‍.

11 മത്സരങ്ങളിലായി എട്ട് ഇന്നിങ്സുകളിലാണ് അക്‌സറിന് ബാറ്റ് ചെയ്യാൻ അവസരം ലഭിച്ചത്. ആകെ നേടിയത് 44 റണ്‍സാണ്. ശരാശരി 6.28, സ്ട്രൈക്ക് റേറ്റ് 74. നിലവില്‍ ഏകദിന ഫോര്‍മാറ്റില്‍പ്പോലും ഇത്രയും കുറവ് സ്ട്രൈക്ക് റേറ്റില്‍ ബാറ്റ് ചെയ്യുന്ന താരങ്ങള്‍ ചുരുക്കമാണ്. ഇവിടെയാണ് ലോകകത്തിലെ ഏറ്റവും മികച്ച ടി20 ലീഗുകളിലൊന്നായ ഐപിഎല്ലിലെ അക്സറിന്റെ പ്രകടനം.

എട്ട് ഇന്നിങ്സുകളില്‍ ആറ് തവണയും അക്സര്‍ പുറത്തായത് ഒറ്റയക്ക സ്കോറുകളിലുമാണ്. ഈ സന്ദര്‍ഭങ്ങളിലൊന്നും തന്റെ സ്കോര്‍ രണ്ട് കടത്താനോ ആറ് പന്തിലധികം അതിജീവിക്കാനോ ഡല്‍ഹിയുടെ നായകന് സാധിച്ചിട്ടുമില്ല. റോയല്‍ ചലഞ്ചേഴ്‌സ് ബെംഗളൂരുവിനെതിരെ 19 പന്തില്‍ നേടിയ 26 റണ്‍സാണ് സീസണിലെ അക്‌സറിന്റെ ഉയര്‍ന്ന സ്കോര്‍. ടൂര്‍ണമെന്റിലുടനീളം 59 പന്തുകള്‍ നേരിട്ട അക്‌സര്‍ സ്കോര്‍ ചെയ്തത് മൂന്ന് ഫോര്‍ മാത്രം, ഒരു സിക്‌സ് പോലും താരത്തില്‍നിന്നുണ്ടായിട്ടില്ല.

കഴിഞ്ഞ സീസണില്‍ ഡല്‍ഹി മധ്യനിരയിലെ പ്രധാന സാന്നിധ്യമായിരുന്നു അക്‌സര്‍. 11 ഇന്നിങ്സുകളില്‍ നിന്ന് 157 സ്ട്രൈക്ക് റേറ്റില്‍ 263 റണ്‍സായിരുന്നു നേട്ടം. ഇത്തവണ, ബാറ്റുകൊണ്ട് അക്‌സറിന് സംഭാവന നല്‍കാൻ കഴിയാത്തത് ഡല്‍ഹിയുടെ ഫലങ്ങളേയും സ്വാധീനിച്ചിട്ടുണ്ട്. ബാറ്റിങ്ങില്‍ നിറം മങ്ങുമ്പോഴും ബൗളിങ്ങില്‍ ഭേദപ്പെട്ട പ്രകടനം പുറത്തെടുക്കാൻ ഇടം കയ്യൻ സ്പിന്നര്‍ക്കായിട്ടുണ്ട്. 11 മത്സരങ്ങളില്‍ നിന്ന് എട്ട് എക്കോണമിയില്‍ 10 വിക്കറ്റുകള്‍ നേടി.

ഗുജറാത്ത് ടൈറ്റൻസിനും ബെംഗളൂരുവിനുമെതിരായ രണ്ട് മത്സരങ്ങളില്‍ മാത്രമാണ് വിക്കറ്റ് എടുക്കാതിരുന്നത്. ഗുജറാത്തിനെതിരെ മൂന്നും ബെംഗളൂരുവിനെതിരെ ഒരോവറുമാണ് എറിഞ്ഞതും. ആറ് മത്സരങ്ങളിലും അക്‌സറിന്റെ എക്കോണമി ഏഴിലും താഴെയാണ്. അതും ബാറ്റിങ്ങിന് അനുകൂലമായ വിക്കറ്റുകളിലാണ് താരം എതിരാളികളുടെ സ്കോറിങ്ങിന് തടയിട്ടത്.

സമാനമായിരുന്നു ടി20 ലോകകപ്പിലേയും സ്ഥിതി, ബാറ്റിങ്ങില്‍ കാര്യമായ സംഭാവന നല്‍കാൻ അക്‌സറിന് സാധിച്ചിരുന്നില്ല, എന്നാല്‍ ബൗളിങ്ങില്‍ 11 വിക്കറ്റുകളുമായി തിളങ്ങി. ഇന്ത്യയുടെ വിക്കറ്റ് ടേക്കര്‍മാരില്‍ ജസ്പ്രിത് ബുമ്രയ്ക്കും വരുണ്‍ ചക്രവര്‍ത്തിക്കും പിന്നിലായിരുന്നു അക്‌സര്‍.

പക്ഷേ, ബാറ്റിങ്ങിലെ അക്‌സറിന്റെ മോശം ഫോം ആശങ്ക നല്‍കുന്നതാണ്. 2024 ടി20 ലോകകപ്പ് കിരീടം ഇന്ത്യ നേടുമ്പോള്‍ മധ്യനിരയില്‍ അക്‌സര്‍ പുറത്തെടുത്ത പ്രകടനങ്ങള്‍ നിര്‍ണായകമായിരുന്നു. ചാമ്പ്യൻസ് ട്രോഫിയിലും ഇത് ആവര്‍ത്തിച്ചു. പക്ഷേ, നിലവിലെ പശ്ചാത്തലത്തില്‍ 2027 ഏകദിന ലോകകപ്പാണ് ഇന്ത്യക്ക് മുന്നിലുള്ള പ്രധാനലക്ഷ്യം. അവിടേക്ക് സ്പിൻ ഓള്‍റൗണ്ടറായി ആര് എന്ന ചോദ്യമാണ് സെലക്ടര്‍മാര്‍ക്ക് മുന്നിലുള്ളത്.

ജഡേജയാകട്ടെ സീസണില്‍ അക്സറിനേക്കാള്‍ മികവ് പുലര്‍ത്തുന്നുണ്ട്. രാജസ്ഥാൻ സമ്മര്‍ദത്തിലായ സാഹചര്യത്തില്‍ ക്രീസിലെത്തി രക്ഷകന്റെ റോള്‍ വഹിക്കാനായിട്ടുണ്ട്. 50 ശരാശരിയില്‍ 152 റണ്‍സും 7.7 എക്കോണമിയില്‍ ഏഴ് വിക്കറ്റും ജഡേജ നേടി. അതുകൊണ്ട് ‍ഡല്‍ഹിയുടെ പ്ലേ ഓഫ് സാധ്യതകള്‍ മങ്ങിയ പശ്ചാത്തലത്തില്‍ അക്സറിന് ഫോം തിരിച്ചുപിടിക്കാനുള്ള അവസരമാണ് അവശേഷിക്കുന്ന മത്സരങ്ങള്‍. അത് താരത്തിന്റ അന്തരാഷ്ട്ര കരിയറിലും നിര്‍ണായകമാകും.

ഐപിഎല്‍ 2026: കോ‍ര്‍ താരങ്ങളെല്ലാം ഫോം ഔട്ട്, ഇനിയെപ്പോള്‍! മുംബൈയുടെ കഥ കഴിഞ്ഞോ?

Hari Krishnan M — Sun, 03 May 2026 13:24:03 +0530

ഔട്ട് സൈഡ് ഓഫ് സ്റ്റമ്പ് ലൈനില്‍ ട്രെൻ ബോള്‍ട്ടിന്റെ ഒരു ഫുള്‍ ലെങ്ത് ഡെലിവെറി. 20 വയസുകാരനായ കാര്‍ത്തിക്ക് ശര്‍മ ഷോര്‍ട്ട് തേഡിന് മുകളിലൂടെ സ്കൂപ്പ് ചെയ്ത് പന്തിനെ ബൗണ്ടറിയിലേക്ക് നയിക്കുകയാണ്. ചിരവൈരികള്‍ക്ക് മുകളിലെ ലീഗ് ഡബിളില്‍ ചെപ്പോക്കിലെ ആരവം പൊടുന്നനെ ഇരട്ടിച്ചു. കാര്‍ത്തിക്കും നായകൻ റുതുരാജ് ഗെയ്ക്വാദും ജയം ആഘോഷിക്കുമ്പോള്‍ മറുവശത്ത് ഹാര്‍ദിക്ക് പാണ്ഡ്യയുടെ സംഘം ഉത്തരങ്ങള്‍ തേടുകയായിരുന്നു. ആ ടീമിന് സുവര്‍ണകാലം സമ്മാനിച്ച, ആറാം കിരീടം ഉറപ്പ് നല്‍കിയ രോഹിത് ശര്‍മയുടേയും കിറോണ്‍ പോള്ളാര്‍ഡിന്റേയും ലസിത് മലിങ്കയുടെയെല്ലാം ശരീരഭാഷ ഒന്നായിരുന്നു, നിരാശ. മുംബൈയുടെ സീസണ്‍ അവസാനിച്ചോ.

മത്സരശേഷമുള്ള പ്രതികരണത്തില്‍ സാധാരണയായി ഉയര്‍ത്തുന്ന വിമർശനങ്ങള്‍ ഹാര്‍ദിക്ക് മാറ്റിവെച്ചു. ഈ രാത്രി മാത്രമല്ല, സീസണിലുടനീളം തങ്ങള്‍ക്ക് മികവ് പുലര്‍ത്താനായില്ല എന്ന് അയാള്‍ മടികൂടാതെ സമ്മതിച്ചു, എതിരാളികളേക്കാള്‍ ഒരുപടി പിന്നിലായിരുന്നുവെന്ന് പറഞ്ഞുവെച്ചു. ഒൻപത് മത്സരങ്ങള്‍, ഏഴ് തോല്‍വി, പട്ടികയില്‍ ഒൻപതാം സ്ഥാനത്ത്. പ്ലേ ഓഫ് എന്നത് മുംബൈ ഇന്ത്യൻസിന് ഇന്ന് വിദൂരമായൊരു സ്വപ്നം മാത്രമാണ്. തിട്ടപ്പെടുത്തിയെടുക്കാനാകുന്നതിലും അധികമാണ് പോരായ്മകളുടെ പട്ടിക. മുംബൈയുടെ എക്കാലത്തേയും കരുത്ത് അവരുടെ കോര്‍ ടീമാണ്, കിരീടങ്ങള്‍ സമ്മാനിച്ചപ്പോഴെല്ലാം അവരുടെ സംഭാവന വലുതായിരുന്നു.

സീസണിലെ മുംബൈയുടെ കോർ ടീമിനെ നോക്കാം. ബാറ്റിങ്ങില്‍ രോഹിത് ശർമ, സൂര്യകുമാര്‍ യാദവ്, തിലക് വർമ, ഹാർദിക്ക് പാണ്ഡ്യ. നാല് താരങ്ങളും ടി20 ലോകകപ്പ് വിജയികള്‍. ബൗളിങ്ങില്‍ ജസ്പ്രിത് ബുമ്രയും ട്രെൻ ബോള്‍ട്ടുമാണ് പ്രധാന അസ്ത്രങ്ങള്‍. ശരാശരിയും സ്ട്രൈക്ക് റേറ്റുമൊക്കെ തിട്ടപ്പെടുത്തി നോക്കിയാല്‍ രോഹിത് ആയിരുന്നു ഏറ്റവും സ്ഥിരത പുലര്‍ത്തിയ താരം, എന്നാല്‍ മുൻനായകന്റെ പരുക്ക് ടീമിന്റെ ബാലൻസിനെ ആകെ ബാധിക്കുന്നതാണ് സീസണില്‍ കണ്ടത്. ഇതിനാല്‍ ഓപ്പണിങ്ങില്‍ തന്നെ പലവിധ പരീക്ഷണങ്ങള്‍ നടത്തി പരാജയപ്പെടേണ്ടി വന്നു. മുംബൈക്ക് മികച്ച തുടക്കം ലഭിച്ച മത്സരങ്ങള്‍പ്പോലും വിരളമായിരുന്നു.

നായകൻ ഹാര്‍ദിക്ക്, ചെന്നൈക്കെതിരെ 23 പന്തില്‍ 18 റണ്‍സായിരുന്നു ഹാര്‍ദിക്കിന്റെ സംഭാവന. ജേമി ഓവര്‍ട്ടണിന്റെ ഹൈ പേസ് പന്തുകളെ നേരിടാൻ പോലും കഴിയാതെ ഹാര്‍ദിക്ക് നിസഹായനാകുന്നത് പലകുറി കണ്ടു. മുംബൈ നായകന്റെ സീസണിന്റെ ആകെത്തുക കൂടിയായിരുന്നു ചെപ്പോക്കില്‍. മുംബൈ നിരയില്‍ ബാറ്റര്‍മാരെയെടുത്താല്‍ ഏറ്റവും മോശം സ്ട്രൈക്ക് റേറ്റ്, അഞ്ച് മത്സരങ്ങളില്‍ കൂടുതല്‍ കളിച്ച ബൗളര്‍മാരില്‍ മോശം എക്കോണമി. നാല് വിക്കറ്റും 146 റണ്‍സുമാണ് സീസണിലെ ആകെ നേട്ടം. ക്യാപ്റ്റൻസിയിലെ വീഴ്ചകള്‍ക്ക് പുറമെയാണ് താരമെന്ന നിലയിലേയും പരാജയം.

ചെന്നൈ സൂപ്പര്‍ കിങ്സിനെതിരെ ഡഗൗട്ടിലിരിക്കുന്ന രോഹിതിന്റെ നിര്‍ദേശം പിന്തുടര്‍ന്നതായിരുന്നു ഉര്‍വില്‍ പട്ടേലിന്റെ വിക്കറ്റിലേക്ക് പോലും നയിച്ചത്. നായകനായി മുന്നില്‍ നിന്ന് ടീമിനെ നയിക്കാൻ സീസണില്‍ ഒരു ഘട്ടത്തിലും ഹാര്‍ദിക്കിന് കഴിഞ്ഞിട്ടില്ല. ചെന്നൈക്കെതിരായ ആദ്യ മത്സരത്തില്‍ തനിക്ക് രണ്ട് ഓവര്‍ ബാക്കിയുണ്ടായിട്ടും നിര്‍ണായകമായ അവസാന ഓവറുകള്‍ യുവതാരത്തിന് കൈമാറിയ ഹാര്‍ദിക്കിന് തീരുമാനത്തിന് രൂക്ഷ വിമര്‍ശനം നേരിട്ടിരുന്നു.

മുംബൈയുടെ നിറങ്ങളിലെ ഏറ്റവും മോശം സീസണിലൂടെയാണ് സൂര്യകുമാര്‍ കടന്നുപോകുന്നത്. ലഭിച്ച തുടക്കങ്ങളൊന്നും ഉപയോഗിക്കാനാകതെ എതിരാളികള്‍ വിരിക്കുന്ന വലയില്‍ ചെന്നുവീഴുന്ന സൂര്യ. റണ്‍സിന്റെ അഭാവം നികത്തുന്നതിനായി തന്റെ പ്രിയപ്പെട്ട സ്കൂപ്പ് ഷോട്ടുകളെ മാത്രം ആശ്രയിക്കുന്നത് സീസണിലുടനീളം സൂര്യക്ക് തിരിച്ചടിയായിട്ടുണ്ട്. താരം എന്തുകൊണ്ട് സ്ട്രെയിറ്റ് ബാറ്റ് ഉപോയിഗിക്കാൻ തയാറാകുന്നില്ല എന്ന ചോദ്യം മുൻതാരങ്ങള്‍പ്പോലും ഉയര്‍ത്തുന്നു. ഒരു അര്‍ദ്ധ സെഞ്ചുറി മാത്രമാണ് നേട്ടം, 183 റണ്‍സും.

ഗുജറാത്തിനെതിരെ നേടിയ സെഞ്ചുറി മാറ്റി നിര്‍ത്തിയാല്‍ സൂര്യകുമാര്‍ യാദവിനേക്കാള്‍ മോശം നമ്പറുകളാണ് തിലകിന്റെ നേര്‍ക്കുള്ളത്. അഞ്ച് ഒറ്റയക്ക സ്കോറുകള്‍, 25 കടന്നത് സെഞ്ചുറിയുള്‍പ്പടെ രണ്ട് തവണ മാത്രം. റയാൻ റിക്കല്‍ട്ടണും നമൻ ധീറും മാത്രമാണ് ബാറ്റിങ്ങില്‍ പ്രതീക്ഷക്കൊത്ത് ഉയരുന്നത്. ഐപിഎല്‍ ചരിത്രത്തിലെ തന്നെ ഏറ്റവും മികച്ച രണ്ട് ബൗളര്‍മാര്‍. മത്സരത്തിന്റെ ഏത് സാഹചര്യത്തിലും ഉപയോഗിക്കാൻ കഴിയുന്നവര്‍, ബുമ്രയും ബോള്‍ട്ടും.

ഒൻപത് കളികളില്‍ നിന്ന് 283 റണ്‍സ് വഴങ്ങി മൂന്ന് വിക്കറ്റാണ് ബുമ്രയുടെ സമ്പാദ്യം. അഞ്ച് മത്സരങ്ങളില്‍ നിന്ന് 188 റണ്‍സാണ് ബോള്‍ട്ടിനെതിരെ എതിരാളികള്‍ നേടിയത്. വീഴ്ത്തിയത് രണ്ട് വിക്കറ്റ് മാത്രം. ബുമ്രയുടെ എക്കോണമി 8.6 ആണ്, കഴിഞ്ഞ പത്ത് വര്‍ഷത്തിനിടെ ഏറ്റവും മോശം. ബോള്‍ട്ടിന്റെ ഐപിഎല്‍ കരിയറിലാദ്യമായി എക്കോണമി പത്തും കടന്നു ഇക്കുറി. ഗസൻഫാറല്ലാതെ ഒരു വിക്കറ്റ് ടേക്കിങ് ബൗളര്‍ മുംബൈ നിരയിലില്ല.

ഒരുടീമിലെ പ്രധാന താരങ്ങളെല്ലാം ഫോം വീണ്ടെടുക്കാതെ ഒൻപത് മത്സരങ്ങള്‍. അവിശ്വസനീയമായൊരു വീഴ്ചയാണ് മുംബൈയുടെ കാര്യത്തില്‍ സംഭവിക്കുന്നത്. ഇനി അഞ്ച് മത്സരങ്ങളാണ് മുംബൈക്ക് അവശേഷിക്കുന്നത്. ലഖ്നൗ സൂപ്പര്‍ ജയന്റ്സ്, റോയല്‍ ചലഞ്ചേഴ്സ് ബെംഗളൂരു, പഞ്ചാബ് കിങ്സ്, കൊല്‍ക്കത്ത നൈറ്റ് റൈഡേഴ്സ്, രാജസ്ഥാൻ റോയല്‍സ്. അഞ്ചും ജയിച്ചാല്‍ പോലും പ്ലേ ഓഫിലെത്തുക അസാധ്യമാണ്, പ്രത്യേകിച്ചും ടോപ് ഫോറിലുള്ള ടീമുകളുടെ ഫോം പരിഗണിക്കുമ്പോള്‍.

ഐപിഎല്‍ 2026: സഞ്ജുവല്ലാതെ മറ്റാര്! അരുണ്‍ ജയ്‌റ്റ്‌ലിയിൽ ചേട്ടന്റെ മാസ്റ്റര്‍ക്ലാസ്, കരിയറിൻ ഉച്ചം

Hari Krishnan M — Wed, 06 May 2026 14:25:08 +0530

ആ വിക്കറ്റില്‍ വിയര്‍പ്പുതുള്ളികള്‍ വീഴ്ത്തി അധ്വാനിക്കാതെ ഒരു റണ്‍സ് പോലും സ്കോര്‍ബോര്‍ഡിലേക്ക് ചേര്‍ക്കാനാകുമായിരുന്നില്ല. മൂന്നക്കം തൊട്ടപ്പോഴൊക്കെ തുണച്ച 22 വാരയായിരുന്നില്ല ഡല്‍ഹി ക്യാപിറ്റല്‍സ് അയാള്‍ക്ക് മുന്നില്‍ വിരിച്ചത്, വെല്ലുവിളിക്കാൻ തന്നെയായിരുന്നു. 156 എന്ന വിജയലക്ഷ്യം ചെറുതല്ലാത്ത ദൂരമാണ്, അവിടേക്ക് എത്താൻ തന്റെ സ്വഭാവിക ചേതനകളെ അടക്കിവെച്ചേ മതിയാകു. അതിനയാള്‍ക്ക് കഴിയുമോ?

അരുണ്‍ ജയ്റ്റ്‌ലിയുടെ ആകാശം അർദ്ധരാത്രിക്ക് വഴിമാറുമ്പോള്‍ പരാജയത്തിന്റെ പക്ഷത്ത് നില്‍ക്കേണ്ടി വന്നാല്‍, അവസാന നാലിലേക്ക് ചുവടുവെക്കുക പ്രയാസമാകും. അങ്ങനെ സംഭവിച്ചാല്‍ നേരിട്ടതും പാഴാക്കിയതുമായ ഓരോ പന്തും വേട്ടയാടും കണക്കുചോദിക്കാനെത്തും, അതുകൊണ്ട് കീഴടങ്ങാനാകില്ല.

തമിഴ്‌മണ്ണില്‍ പുതിയ തലൈവൻ ഉരുവായിരിക്കുന്നു, അതേ മണ്ണിനായി, ആ ജനതയ്ക്കായി മറ്റൊരാള്‍ അല്‍പ്പം അകലെ, വിശ്വസ്തനായൊരു പോരാളിയുടെ വേഷമണിയുകയാണ്. പുതിയ തലയ്ക്കായും ആ മണ്ണൊരുങ്ങും വൈകാതെ. ആ നിമിഷം ഉറപ്പിക്കുന്നതായിരുന്നു അരുണ്‍ ജയ്റ്റ്‌ലിയിലെ ഇന്നിങ്സ്. അവിടെ ഒരു പേര് മാത്രം, സഞ്ജു വിശ്വനാഥ് സാംസണ്‍.

ചെന്നൈ സ്പിന്നർമാരെ വിക്കറ്റ് ആവോളം സഹായിച്ചതായിരുന്നു രണ്ടാം ഓവറില്‍ തന്നെ പന്തെടുക്കാൻ ഡല്‍ഹി നായകൻ അക്‌സര്‍ പട്ടേലിനെ പ്രേരിപ്പിച്ചത്. ഔട്ട് സൈഡ് ഓഫ് സ്റ്റമ്പ് ലൈനില്‍ വന്ന പന്തില്‍ ചുവടുമാറിയൊരു ഇൻസൈഡ് ഔട്ട് ലോഫ്റ്റ്. സഞ്ജുവിന്റെ ബാറ്റ് ആ പന്തിനെ ഒന്നു തഴുകിയെന്ന് മാത്രമെ തോന്നിച്ചൊള്ളു, പന്ത് നിക്ഷേപിക്കപ്പെടുന്നത് എക്‌സ്ട്രാ കവറിന് മുകളിലൂടെ ബൗണ്ടറി റോപ്പുകള്‍ക്ക് അപ്പുറമാണ്, ലവ്‌ലി വണ്‍. ചെന്നൈ ഡഗൗട്ടില്‍ ആ ഷോട്ടിന്റെ അതിശയം ഇങ്ങനെ നിറഞ്ഞുനില്‍ക്കുന്നുണ്ടായിരുന്നു അപ്പോള്‍.

ഈ നിമിഷത്തിന് മുൻപും ശേഷവും നായകൻ റുതുരാജ് ഗെയ്ക്വാദിനെ മിച്ചല്‍ സ്റ്റാർക്കും ലുംഗി എൻഗിഡിയും ചേർന്ന് ആവോളം പരീക്ഷിക്കുകയായിരുന്നു. 13 പന്തില്‍ ആറ് റണ്‍സ്, മടക്കം. ഉര്‍വില്‍ പട്ടേലിന്റെ ക്യാമിയോയും അവസാനിച്ചതോടെ ചെന്നൈ ഏഴ് ഓവറില്‍ 49-2. സാഹചര്യങ്ങള്‍ ആവശ്യപ്പെടുന്ന ചട്ടക്കൂടിലേക്ക് ഒതുങ്ങാൻ സഞ്ജു നിര്‍ബന്ധിതനാകുകയാണ്.

സ്ട്രൈക്ക് റൊട്ടേറ്റ് ചെയ്യുക പോലും എളുപ്പമായിരുന്നില്ല, തന്റെ നിമിഷങ്ങളും പന്തുകളും തിരഞ്ഞെടുക്കണം, അതായിരുന്നു ഏറ്റവും നിര്‍ണായകം. ഇവിടെ പിച്ചിനോട് മല്ലിടുകയായിരുന്നില്ല സഞ്ജുവെന്ന് പറയാം, പകരം അയാള്‍ തന്റെ ടൈമിങ്ങില്‍ വിശ്വസിച്ച് മൈതാനത്തെ ദൂരവും അളന്നൊരു മാച്ച് വിന്നിങ്സ് ഇന്നിങ്സിന്റെ ടെമ്പ്ലേറ്റ് സൃഷ്ടിക്കുകയായിരുന്നു.

അക്‌സറിനെതിരായ ആ സിക്‌സ് നേരിട്ട മൂന്നാം പന്തിലാണ്. ശേഷം സഞ്ജുവിന്റെ ബാറ്റില്‍ നിന്നൊരു ബൗണ്ടറി ജനിക്കുന്നത് 20-ാം പന്തിലാണ്. കുല്‍ദീപ് യാദവിനെതിരെ ഡീപ് മിഡ് വിക്കറ്റിലേക്കൊരു സിക്‌സ്. കുല്‍ദീപിനേയും നടരാജനേയുമായിരുന്നു പിച്ചിലെ ഭൂതങ്ങളെ മറികടക്കാൻ സഞ്ജു തിരഞ്ഞെടുത്തതും. നടരാജന്റെ ബാക്ക് ഓഫ് ദ ലെങ്ത്, ലെങ്ത് ഡെലിവറികള്‍ അവസാനിച്ചത് ഫോറിലാണ്.

കുല്‍ദീപിന് കൂടുതല്‍ വിക്കറ്റുകള്‍ ലഭിക്കുന്നത് രണ്ട് പന്തുകളിലാണ്. ഒന്ന് ടോസ്‌ഡ് അപ്പ്, മറ്റൊന്ന് ക്വിക്കര്‍ വണ്‍സ്. 12-ാം ഓവറില്‍ സഞ്ജു നേരിട്ട രണ്ടാം പന്തൊരു ടോസ്‌ഡ് അപ്പ് ഡെലിവറിയായിരുന്നു, കാത്തിരുന്ന് ലോങ് ഓണിന് മുകളിലൂടെ ഒരു ലോങ് ഡിസ്റ്റൻസ് ഡിപ്പോസിറ്റ്. ശേഷം, വന്നത് ക്വിക്കര്‍ വണ്‍, ഡീപ് മിഡ് വിക്കറ്റിലൂടെ വീണ്ടുമൊരു സിക്‌സ്. ശേഷമൊരു ബൗണ്ടറി കൂടി, സിംഗിള്‍ എടുത്ത് അര്‍ദ്ധ സെഞ്ചുറിയും ആ ഓവറില്‍ തികച്ചു, 32 പന്തില്‍.

പവര്‍പ്ലേയില്‍ സ്വീകരിച്ച കരുതല്‍ മിച്ചല്‍ സ്റ്റാര്‍ക്ക് പിന്നീടെത്തിയപ്പോഴുണ്ടായില്ല. കവറിലൂടെയും ഡീപ് തേഡിലൂടേയും കണ്‍ട്രോള്‍ഡായ രണ്ട് ഹിറ്റുകള്‍, ബൗണ്ടറി. പക്ഷേ, 14-ാം ഓവറില്‍ എൻഗിഡി സഞ്ജുവിന്റെ ബാറ്റിനെ നിശബ്ദമാക്കി നിര്‍ത്തുകയാണ്. ആ നിശബ്ദതയെ നടരാജന്റ ഓവറില്‍ കാല്‍ക്കുലേറ്റ് ചെയ്ത് തരണം ചെയ്യുന്നു. രണ്ട് സിക്‌സും ഒരു ഫോറും ഉള്‍പ്പെടെ 19 റണ്‍സ് നേരിട്ട അഞ്ച് പന്തില്‍.

എൻഗിഡിയെറിഞ്ഞ 16-ാം ഓവറിലെ മൂന്നാം പന്ത്. സഞ്ജുവിന്റെ ഫോം, ക്ലാസ്, ടൈമിങ്, പ്ലേസ്മെന്റ് എല്ലാം കൂടി സമന്വയിച്ച ഒരു മൊമന്റ് സംഭവിച്ചു. ഓട്ട്സൈഡ് ഓഫ് സ്റ്റമ്പ് ലൈനിലെത്തിയ പന്തിനെ കവറിലേക്ക് ഡ്രൈവ് ചെയ്ത് ബൗണ്ടറി. ആ നിമിഷത്തിന് ശേഷം ഹര്‍ഷ ഭോഗ്‌ലെ ഒരു വാചകം പറഞ്ഞു, ചിലസമയങ്ങളില്‍ വാക്കുകള്‍ ആവശ്യമില്ല, ആസ്വദിക്കുക. അത്രമേല്‍ മനോഹരമായൊരു ഷോട്ട്.

സഞ്ജുവിന്റെ മറ്റൊരു സെഞ്ചുറിക്കായി ഗ്യാലറി ആര്‍ത്തിരമ്പിത്തുടങ്ങിയിരുന്നു അപ്പോഴേക്കും. ആവശ്യമായ റണ്‍സും ഓവറുകളും ബാക്കിയുണ്ട്. പക്ഷേ, അയാള്‍ തിരഞ്ഞെടുത്തത് മറ്റൊന്നായിരുന്നു. മികച്ച രീതിയില്‍ ബാറ്റ് ചെയ്തുകൊണ്ടിരുന്ന കാര്‍ത്തിക്ക് ശര്‍മയ്ക്കായി സ്ട്രൈക്ക് കൈമാറിക്കൊണ്ടേയിരുന്നു, ഒടുവില്‍ കാര്‍ക്കിക്ക് തന്നെ വിന്നിങ് റണ്‍ നേടുമ്പോള്‍ സെഞ്ചുറിയേക്കാള്‍ വലിപ്പമുള്ളൊരു ഇന്നിങ്സ് സഞ്ജുവില്‍ നിന്നുണ്ടായി. 52 പന്തില്‍ 87 റണ്‍സ്, ഏഴ് ഫോറും ആറ് സിക്‌സും. ഓറഞ്ച് ക്യാപ് പോരില്‍ സാക്ഷാല്‍ വിരാട് കോലിയേയും ശുഭ്മാൻ ഗില്ലിനേയും മറികടന്ന് കുതിപ്പ്.

മത്സരശേഷം റുതുരാജ് പറഞ്ഞു സഞ്ജുവാണ് ഈ ടീമിന്റെ നട്ടെല്ലെന്ന്. പക്ഷേ, അയാളുടെ വലുപ്പം അതിനപ്പുറമായിരുന്നു. സെഞ്ചുറിയടിക്കാമായിരുന്നില്ലെ എന്ന ഹര്‍ഷയുടെ ചോദ്യത്തിന് സഞ്ജുവൊരു മറുപടി നല്‍കി. മൂന്നക്കത്തിലേക്ക് എത്തണമെങ്കില്‍ ഞാൻ സ്വാര്‍ത്ഥത കാണിക്കണമായിരുന്നു, ടീമിന്റെ വിജയത്തിനാണ് മുൻഗണന കൊടുത്തത്. കാര്‍ത്തിക്ക് നന്നായി ബാറ്റ് ചെയ്യുന്നുണ്ടായിരുന്നു, സിംഗിള്‍ ആവശ്യപ്പെടാൻ തോന്നിയില്ല.

സഞ്ജു തിളങ്ങിയ എല്ലാ മത്സരങ്ങളിലും ചെന്നൈ ജയിച്ചിരിക്കുന്നു, തമിഴ്‌മണ്ണില്‍ പുതിയ തലൈവൻ ഉരുവായിരിക്കുന്നു, പുതിയ തലയ്ക്കായും ആ മണ്ണൊരുങ്ങും വൈകാതെ. അവിടെ ഒരു പേര് മാത്രം, സഞ്ജു വിശ്വനാഥ് സാംസണ്‍. കരിയറിൻ ഉച്ചം.

ഐപിഎല്‍ 2026: ഫിനിഷർ റോള്‍ വഴങ്ങാത്തതോ ശിവം ദുബെയുടെ മോശം ഫോമിന്റെ കാരണം?

Hari Krishnan M — Sat, 02 May 2026 13:16:00 +0530

കൈവിട്ടുതുടങ്ങി എന്ന് തോന്നിച്ച കരിയര്‍ തിരിച്ചുപിടിക്കുന്നത് 2022ലാണ്. ചെന്നൈ സൂപ്പര്‍ കിങ്സിന്റെ വിഖ്യാത ജഴ്‌സി ആദ്യമായി അണിഞ്ഞ വര്‍ഷം. ചെപ്പോക്കിന്റെ ഗ്യാലറികളില്‍ ഇടവേളകളില്ലാതെ പന്തെത്തിക്കാൻ പോന്നൊരാള്‍. മുൻനിര തകര്‍ന്നാലും നിമിഷനേരം കൊണ്ട് ധോണിപ്പടയ്ക്കായി കളിതിരിച്ചുപിടിക്കുന്ന ബാറ്റ്. ഇതിഹാസതാരം യുവരാജ് സിങ്ങിനെ ഓര്‍മിപ്പിക്കും വിധമുള്ള ശൈലി. അയാളെ ചെന്നൈ ആരാധകര്‍ വിശേഷിപ്പിച്ചത് സിക്‌സ് ഹിറ്റിങ് മിഷീൻ അധവാ ആറുച്ചാമിയെന്നാണ്, ശിവം ദുബെ.

സഞ്ജു സാംസണും ആയുഷ് മാത്രെയും ഒഴികെയുള്ള ചെന്നൈ ബാറ്റര്‍മാരെല്ലാം സീസണില്‍ പരാജയപ്പെട്ടപ്പോള്‍ ആ കൂട്ടത്തില്‍ ഒട്ടും പ്രതീക്ഷിക്കാത്ത പേരായിരുന്നു ദുബെയുടേത്. കാരണം, മധ്യനിരയിലും ഫിനിഷര്‍ റോളിലുമെത്തി ടി20 ലോകകപ്പില്‍ നടത്തിയ പ്രകടനങ്ങളായിരുന്നു. സഞ്ജു സാംസണിന് പിന്നിലായി ഏറ്റവും മികച്ച ശരാശരിയുള്ള ഇന്ത്യൻ ബാറ്റര്‍. സഞ്ജുവും ഇഷാനും കഴിഞ്ഞാല്‍ മികച്ച സ്ട്രൈക്ക് റേറ്റും കൂടുതല്‍ സിക്സും ദുബെയുടെ പേരിലായിരുന്നു. ടോപ് ഓര്‍ഡര്‍ ബാറ്ററുമല്ല, പവര്‍പ്ലേയുടെ ആനുകൂല്യം അസ്വദിച്ചുമല്ല ഈ നേട്ടം.

സമാന റോളില്‍ ചെന്നൈയുടെ നിറങ്ങളിലും ലോകകപ്പിലെ പ്രകടനം ദുബെ ആവര്‍ത്തിക്കുമെന്നാണ് കരുതിയിരുന്നെങ്കിലും നേര്‍വിപരീതമായി കാര്യങ്ങള്‍. എട്ട് കളികളില്‍ നിന്ന് ഇതുവരെയുള്ള നേട്ടം 150 റണ്‍സാണ്. സ്ട്രൈക്ക് റേറ്റിലുണ്ടായ കാര്യമായ ഇടിവാണ് പ്രധാനപ്പെട്ട ആശങ്ക, 140 മാത്രം. പ്രഹരശേഷി 150ന് മുകളിലുള്ളത് രണ്ടേ രണ്ട് മത്സരങ്ങളില്‍ മാത്രവും.

ചെന്നൈയിലെത്തിയ വര്‍ഷം മുതല്‍ മുതല്‍ ഓരോ സീസണിലും ദുബെ നേടിയ സിക്സറുകളുടെ എണ്ണം 16, 35. 28, 21 എന്നിങ്ങനയാണ്. 55 മത്സരങ്ങളില്‍ നിന്ന് 100 സിക്‌സറുകള്‍. രണ്ട് സിക്‌സറുകള്‍ ഏറെക്കുറെ ഉറപ്പ്. പക്ഷേ, ഈ സീസണില്‍ ദുബെ 107 പന്തുകള്‍ നേരിട്ടപ്പോള്‍ സിക്‌സറുകള്‍ ആറ് മാത്രമാണ്. സീസണിലെ ദുബെയുടെ റോള്‍ ഫിനിഷറുടേതാണെന്ന് ഉറപ്പിക്കാം, അതിന്റെ സൂചനയാണ് താരം ബാറ്റ് കൂടുതലായും ബാറ്റ് ചെയ്ത പൊസീഷനും ക്രീസിലെത്തിയ സാഹചര്യങ്ങളും. നാല് മത്സരങ്ങളില്‍ ആറാമനായി, മൂന്നെണ്ണത്തില്‍ നാലാം സ്ഥാനത്ത്, ഒരു പ്രാവശ്യം ഏഴാമതും.

പഞ്ചാബിനും ഡല്‍ഹിക്കും മുംബൈക്കുമെതിരെയാണ് നാലാം സ്ഥാനത്തിറങ്ങിയത്. ഇതില്‍ പഞ്ചാബിനും ഡല്‍ഹിക്കുമെതിരായ മത്സരങ്ങളില്‍ ടോപ് ഓര്‍ഡര്‍ തിളങ്ങിയിരുന്നു, ഐഡിയലായിരുന്നു ദുബെ ക്രീസിലെത്തിയ സാഹചര്യവും. പക്ഷേ മുംബൈക്കെതിരെ സഞ്ജു സാംസണ്‍ ഒരു വശത്ത് നിലയുറപ്പിക്കുകയും ഹാര്‍ദിക്ക് സ്പിന്നര്‍മാരെ ഉപയോഗിക്കുകയും ചെയ്യുന്നുവെന്ന് കണ്ടാണ് മാനേജ്മെന്റ് ദുബെയെ പ്രൊമോട്ട് ചെയ്തത്. എന്നാല്‍, ഗസൻഫാറിന്റെ ലൈൻ ജഡ്‌ജ് ചെയ്യാതെ വൈഡ് സ്ലോഗിന് ശ്രമിച്ച് ദുബെ പുറത്താവുകയായിരുന്നു.

ആറാം സ്ഥാനത്ത് ഫിനിഷര്‍ റോളിലെത്തിയപ്പോഴൊന്നും കാര്യമായ ഇംപാക്റ്റുണ്ടാക്കാനും സാധിച്ചില്ല. ഇവിടെ പ്രധാനമായും ചൂണ്ടിക്കാണിക്കേണ്ടത് തന്റെ കരുത്ത് ഉപയോഗിക്കാൻ കഴിയുന്ന സമയത്തല്ല താരം എത്തുന്നത് എന്നതാണ്. ദുബെ ഒരു സ്പിൻ ബാഷറാണ്, സമീപകാലത്താണ് പേസര്‍മാര്‍ക്ക് മുകളിലും ആധിപത്യം സ്ഥാപിക്കാൻ തുടങ്ങിയത്, പ്രത്യേകിച്ചും ബാറ്റിങ്ങിന് അനുകൂലമായ വിക്കറ്റുകളില്‍. ചെന്നൈയുടെ പരിശീലന വീഡിയോകള്‍ പരിശോധിച്ചാല്‍ കൂടുതലായും പേസര്‍മാരെ നേരിടുന്ന ദുബെയെ കാണാനുമാകും.

സ്വഭാവികമായും ഒരു മധ്യനിര ബാറ്ററായെത്തി സ്പിന്നര്‍മാരെ ഇക്വേഷനില്‍ നിന്നേ തുടച്ചുനീക്കുന്ന ദുബെയായിരുന്നു 2025 എഡിഷനില്‍ കണ്ടത്. എന്നാല്‍, ഇക്കുറി വിക്കറ്റിന്റെ സ്വഭാവം മനസിലാക്കി തന്റെ ഗെയിം സെറ്റ് ചെയ്യാൻ കഴിയുന്ന പശ്ചാത്തലത്തിലല്ല ദുബെ ക്രീസിലെത്തുന്നത്. നേരിടുന്ന എല്ലാ പന്തുകളിലും തന്നെ സിക്‌സ് ഡിമാൻഡ് ചെയ്യപ്പെടുന്ന സാഹചര്യത്തിലാണ്. അതായത് ഒരു സ്പിൻ ഹിറ്ററില്‍ നിന്ന് ഫിനിഷറിലേക്ക്. ദുബെയ്ക്ക് ചുരുങ്ങിയ മത്സരങ്ങള്‍ക്കൊണ്ട് ഈ റോളിലേക്ക് പൊരുത്തപ്പെടാനായിട്ടില്ല എന്നാണ് പ്രകടനങ്ങള്‍ നല്‍കുന്ന സൂചന.

ഏറ്റവും ഒടുവില്‍ ദുബെ ക്രീസിലെത്തിയത് ഗുജറാത്തിനെതിരെയാണ്. ആറാമനായി. അതും ഒൻപതാം ഓവറില്‍. ആവശ്യമായ സമയമെല്ലാം ഉണ്ടായിട്ടും, മൂന്ന് ലൈഫ് ലഭിച്ചിട്ടും 17 പന്തില്‍ 22 റണ്‍സായിരുന്നു ആകെ നേട്ടം. മധ്യനിരയില്‍ സര്‍ഫറാസ് ഖാൻ, ഡിവാള്‍ഡ് ബ്രെവിസ് തുടങ്ങിയ അഗ്രസീവ് ബാറ്റര്‍മാരുടെ സാന്നിധ്യവും ദുബെയെ ഹോള്‍ഡ് ചെയ്യാൻ മാനേജ്മെന്റിനെ പ്രേരിപ്പിക്കുന്ന ഘടകങ്ങളായി വിലയിരുത്താം. എം എസ് ധോണിയുടെ അഭാവം ദുബെയെന്ന ഫിനിഷറുടെ ഉത്തരവാദിത്തം കൂട്ടുകയും ചെയ്തിട്ടുണ്ട്.

ചെന്നൈയെ സംബന്ധിച്ച് സഞ്ജു സാംസണ്‍ ക്രീസില്‍ നിലകൊണ്ട മത്സരങ്ങളിലൊഴികെ വലിയൊരു ഫിനിഷിങ് നടത്താൻ സാധിച്ചിട്ടില്ല. കാരണം ആ റോള്‍ വഹിക്കുന്ന ഒരു പ്രോപ്പര്‍ താരമില്ല. റിങ്കു സിങ്, ടിം ഡേവിഡ് പോലെയുള്ള താരങ്ങള്‍. ഇവിടേക്കാണ് ദുബെയെത്തുന്നത്. മധ്യനിര ബാറ്റര്‍മാരാല്‍ സമ്പന്നമായ ചെന്നൈയുടെ ബാറ്റിങ് നിരയുടെ പോരായ്മകൂടിയാണിത്. പക്ഷേ, ദുബെ ഫോം തിരിച്ചുപിടിക്കേണ്ടത് ചെന്നൈയെ സംബന്ധിച്ച് നിര്‍ണായകമാണ്, പ്രത്യേകിച്ചും ഇനി ഓരോ മത്സരങ്ങളും പ്ലേ ഓഫിന് സമാനമായിരിക്കെ.

ഐപിഎല്‍ 2026: ഗുജറാത്തിനായി ഗില്ലിന്റെ 'പവര്‍പ്ലേ'; ടി20 ടീമില്‍ തിരിച്ചെത്തുമോ?

Hari Krishnan M — Sun, 10 May 2026 14:31:07 +0530

തന്റെ രണ്ടാം ഓവര്‍ എറിയാൻ ചെറിയ ഇടവേളയ്ക്ക് ശേഷം ജോഫ്ര ആര്‍ച്ചര്‍ എത്തുകയാണ്. സീസണിലെ തന്നെ ഏറ്റവും മികച്ച പവര്‍പ്ലേ ബൗളര്‍. അഞ്ചാം ഓവര്‍. ശുഭ്മാൻ ഗില്‍ അതുവരെ അഞ്ച് പന്തുകള്‍ മാത്രമാണ് നേരിട്ടത്, ഏഴ് റണ്‍സും, സ്ട്രൈക്ക് റേറ്റ് 140.

പക്ഷേ, ആ ഓവര്‍ അവസാനിക്കുമ്പോള്‍ ജയ്‌പൂരിലെ ആര്‍ച്ചറിന്റെ ദുരിതം ഇരട്ടിക്കുകയായിരുന്നു. ഗില്‍ തന്റെ ക്ലാസും ടൈമിങ്ങും സ്ട്രോക്ക്‌പ്ലേയുമെല്ലാം ഡിസ്‌പ്ലെ ചെയ്ത മൂന്ന് പന്തുകളുണ്ടായിരുന്നു ഓവറില്‍. കവര്‍, മിഡ് ഓഫ്, സ്ട്രെയിറ്റ് ഡൗണ്‍ ദ ഗ്രൗണ്ട്, രണ്ട് ഫോറും ഒരു സിക്‌സും. വലം കയ്യൻ പേസര്‍ ആറ് പന്തുകള്‍ പൂര്‍ത്തിയാക്കുമ്പോള്‍ ഗില്ലിന്റെ സ്ട്രൈക്ക് റേറ്റ് 140ല്‍ നിന്ന് 200 തൊട്ടു. 11 പന്തില്‍ 22 റണ്‍സായി ഗുജറാത്ത് നായകന്റെ പേരില്‍.

അവിടെ അവസാനിച്ചില്ല. പവര്‍പ്ലേ രാജസ്ഥാൻ റോയല്‍സ് എറിഞ്ഞ് തീര്‍ക്കുമ്പോള്‍ സ്ട്രൈക്ക് റേറ്റ് ഒരുപടി കൂടി ഉയര്‍ന്ന് 213ല്‍ എത്തി. ദാറ്റ്സ് ശുഭ്മാൻ ഗില്‍ ഫോര്‍ യു.

2026 ഐപിഎല്‍ സീസണ്‍ പരിശോധിച്ചാല്‍ പവ‍ര്‍പ്ലേയിലെ പവര്‍ ഹിറ്റര്‍മാരുടെ പട്ടികയില്‍ ഗില്ലിന്റെ പേര് പ്രതീക്ഷിക്കുന്നവര്‍ തന്നെ ചുരുക്കമായിരിക്കും. കാരണം, അഗ്രസീവ് സമീപനമല്ല ഗില്ലിന്റെ മന്ത്ര. മറിച്ച് വെല്‍ കണ്‍ട്രോള്‍ഡായ ഷോട്ട് മേക്കിങ്ങാണ്. പക്ഷേ, സീസണില്‍ പവര്‍പ്ലേ ഘട്ടത്തില്‍ മികച്ച സ്ട്രൈക്ക് റേറ്റുള്ള ബാറ്റര്‍മാരുടെ പട്ടികയെടുത്താല്‍ അവിടെ ഗില്ലിന്റെ സാന്നിധ്യമുണ്ട്.

പ്രിയാൻഷ് ആര്യ, വൈഭവ് സൂര്യവംശി, അഭിഷേക് ശര്‍മ, ദേവദത്ത് പടിക്കല്‍ എന്നിവര്‍ ഭരിക്കുന്ന പട്ടികയില്‍ ഇഷാൻ കിഷനോ സഞ്ജു സാംസണോ വിരാട് കോലിയോ പോലുമില്ല. പക്ഷേ ഏഴാമനായി ഗില്ലുണ്ട്. ആദ്യ ആറ് ഓവറുകളിലെ ഗില്ലിന്റെ സ്ട്രൈക്ക് റേറ്റ് 174 ആണ്. അഞ്ച്, ആറ് സ്ഥാനങ്ങളിലുള്ള ട്രാവിസ് ഹെഡ്, പ്രഭ്‌സിമ്രാൻ സിങ് എന്നിവരുമായുള്ള അന്തരം നേരിയത് മാത്രവും. ഗില്ലിന് പിന്നിലായി മുംബൈ ഇന്ത്യൻസ് ഓപ്പണര്‍മാരായ റയാൻ റിക്കല്‍ട്ടണും രോഹിത് ശര്‍മയും, ശേഷം ഡല്‍ഹി ക്യാപിറ്റല്‍സിന്റെ പാതും നിസങ്ക.

11 മത്സരങ്ങളില്‍ നിന്ന് ഏഴ് ജയവുമായി പ്ലേ ഓഫിന്റെ പടിവാതില്‍ക്കലാണ് ഗുജറാത്ത്. മുന്നേറ്റത്തിന് പിന്നിലെ കാരണം ബൗളര്‍മാരുടെ മികവ് മാത്രമല്ല. ഗില്ലും സായ് സുദര്‍ശനും നല്‍കുന്ന തുടക്കങ്ങള്‍ തന്നെയാണ്. പ്രത്യേകിച്ചും ഗില്‍. കളിച്ച പത്ത് മത്സരങ്ങളില്‍ ആറിലും ഗുജറാത്തിന് മികച്ച പവര്‍പ്ലേ നല്‍കാൻ ഗില്ലിന് കഴിഞ്ഞിട്ടുണ്ട്.

പഞ്ചാബ് കിങ്സിനെതിരെ 16 പന്തില്‍ 28, ലഖ്നൗ സൂപ്പര്‍ ജയന്റ്സിനെതിരെ 21, കൊല്‍ക്കത്ത നൈറ്റ് റൈഡേഴ്‌സിനെതിരെ 15 പന്തില്‍ 34, ചെന്നൈ സൂപ്പര്‍ കിങ്സിനെതിരെ 22 പന്തില്‍ 32, റോയല്‍ ചലഞ്ചേഴ്‌സ് ബെംഗളൂരുവിനെതിരെ 18 പന്തില്‍ 43, ഒടുവില്‍ രാജസ്ഥാനെതിരെ 15 പന്തില്‍ 32 റണ്‍സും ഗില്‍ പവര്‍പ്ലേയില്‍ നേടി. ഇതില്‍ മൂന്ന് സന്ദര്‍ഭങ്ങളിലും ഗില്‍ ബാറ്റ് ചെയ്തത് 200ന് മുകളില്‍ സ്ട്രൈക്ക് റേറ്റിലായിരുന്നു. ആദ്യം ബാറ്റ് ചെയ്തപ്പോഴും ചെയ്ത് ചെയ്യുമ്പോഴുമെല്ലാം ഇത് ആവര്‍ത്തിക്കുകയും ചെയ്തിരുന്നു.

സീസണില്‍ ആകെ 10 മത്സരങ്ങളിലാണ് ഗില്‍ ക്രീസിലെത്തിയത്. നാല് അര്‍ദ്ധ സെഞ്ചുറി ഉള്‍പ്പെടെ 462 റണ്‍സുമായി ഓറഞ്ച് ക്യാപ് പോരാട്ടത്തില്‍ നാലാം സ്ഥാനത്തുമുണ്ട് ഗില്‍. സ്ട്രൈക്ക് റേറ്റിന്റെ പേരില്‍ ശിക്ഷിക്കപ്പെടുന്ന ഗില്‍ പവര്‍പ്ലേയില്‍ തിളങ്ങുന്നുണ്ടെങ്കിലും സീസണിലെ ആകെ സ്ട്രൈക്ക് റേറ്റ് പരിശോധിക്കുമ്പോള്‍ 160 മാത്രമാണ്. അതായത് പവര്‍പ്ലേയ്ക്ക് ശേഷമുള്ള ഘട്ടത്തില്‍ ഗില്ലിന്റെ പ്രഹരശേഷം 150ന് താഴേക്ക് പോകുന്നുവെന്ന് ചുരുക്കം. ഗുജറാത്തിന്റെ വിജയങ്ങളില്‍ താരത്തിന്റെ ലോങ് ഇന്നിങ്സുകള്‍ സഹായകമാകുന്നതുകൊണ്ട് അതിനെ പഴിക്കേണ്ടതില്ല.

പക്ഷേ, ഇന്ത്യയുടെ ടി20 ടീമിലേക്കാണ് ഒരു മടക്കം ഗില്‍ ലക്ഷ്യമിടുന്നതെങ്കില്‍ ഇത് മതിയേക്കില്ല. സഞ്ജു സാംസണിനാണ് ഗില്‍ സ്ഥാനം ഒഴിഞ്ഞ് നല്‍കേണ്ടി വന്നത്. ഗില്ലിന് സമാനമായി ടൂര്‍ണമെന്റില്‍ ലോങ് ഇന്നിങ്സുകള്‍ കളിക്കുന്ന താരമാണ് സഞ്ജുവും. പക്ഷേ, സഞ്ജുവിന്റെ സ്ട്രൈക്ക് റേറ്റ് ഇന്നിങ്സിന് ഒടുവില്‍ ഇരുന്നൂറിന് മുകളിലോ അടുത്തായിരിക്കും. അതുകൊണ്ട് ഇംപാക്റ്റും വലുതാണ്. പവര്‍പ്ലേയിലെ മികവുകൊണ്ട് മാത്രം ഗില്ലിന് ഇന്ത്യൻ ടീമിലെ പവര്‍ തിരിച്ചുപിടിക്കാനായേക്കില്ല. മാച്ച് വിന്നിങ്ങായുള്ള ഇന്നിങ്സുകള്‍ ഉയര്‍ന്ന സ്ട്രൈക്ക് റേറ്റിലുണ്ടാകണം.

ഐപിഎല്‍ 2026: 'കൈവിട്ടു' കളയുന്ന ജയങ്ങള്‍, സെക്കന്റ് ഹാഫില്‍ പഞ്ചാബിന് സംഭവിക്കുന്നത്

Hari Krishnan M — Thu, 07 May 2026 14:08:53 +0530

ഒരു രസകരമായ സംഭവം ആദ്യം, ഏപ്രില്‍ 19ന് നടന്ന പഞ്ചാബ് കിങ്സ് - ലഖ്നൗ സൂപ്പര്‍ ജയന്റ്സ് മത്സരം. പഞ്ചാബിന്റെ 54 റണ്‍സ് ജയത്തിന് പിന്നാലെ മുലൻപൂരിലെ മൈതാനത്ത് ഒരു കാഴ്ചയുണ്ടായി. പഞ്ചാബ് നായകൻ ശ്രേയസ് അയ്യര്‍ സഹതാരം ശശാങ്ക് സിങ്ങിന്റെ മുഖം തൊപ്പി ഉപയോഗിച്ച് മറച്ചുകൊണ്ട് പരിശീലകൻ റിക്കി പോണ്ടിങ്ങിന്റെ അരികിലേക്ക് നടക്കുന്നു. രണ്ട് പേരുടെ മുഖത്തും ചിരിമാത്രം.

ആ മത്സരത്തില്‍ രണ്ട് അനായാസ ക്യാച്ചുകളായിരുന്നു ശശാങ്ക് കൈവിട്ടുകളഞ്ഞത്. പക്ഷേ, അത് പഞ്ചാബിന്റെ ജയത്തെ തടയാൻ പോന്നതായിരുന്നില്ല. ശശാങ്കിനെ രൂക്ഷമായി വിമര്‍ശിക്കാതെ ചേര്‍ത്ത് പിടിച്ച നായകനും പരിശീലകനും, ഉദാഹരണമായി ചൂണ്ടിക്കാണിക്കാൻ കഴിയുന്നൊരു നിമിഷം കൂടിയായിരുന്നു അത്.

പക്ഷേ, ബുധനാഴ്ച സണ്‍റൈസേഴ്സ് ഹൈദരാബാദിനെതിരായ മത്സരത്തിന് ശേഷം കാര്യങ്ങള്‍ അത്രത്തോളം രസകരമായിരുന്നില്ല. ഇഷാൻ കിഷന്റേയും ഹെൻറിച്ച് ക്ലാസന്റേയും നിര്‍ണായകമായ ക്യാച്ചുകള്‍ കൈവിട്ടതിലൂടെ പഞ്ചാബ് തുടര്‍ച്ചയായ മൂന്നാം തോല്‍വിയിലേക്ക് വീണു. The biggest setback എന്നാണ് ശ്രേയസ് മത്സരശേഷം നഷ്ട്ടപ്പെടുത്തിയ ക്യാച്ചുകളെക്കുറിച്ച് പറഞ്ഞത്. ടൂർണമെന്റിലുടനീളം തുടരുന്ന ഈ ക്യാഴ്‌ചയെ പോണ്ടിങ്ങും തൊടാതെ വിട്ടില്ല.

ഐപിഎല്ലിന്റെ ആദ്യ പകുതിയില്‍ ഒരു തോല്‍വി പോലും വഴങ്ങാത്ത ശ്രേയസിന്റെ സംഘം. ഒന്നാം സ്ഥാനം നഷ്ടപ്പെട്ട് ഹൈദരാബാദിന്റെ പിന്നിലാകുമ്പോള്‍ അതിന്റെ കാരണം ഒന്നേയുള്ളു, ക്യാച്ചുകള്‍. നേടിയ ആധിപത്യം കൈവിട്ടുകളയുകയാണോ പഞ്ചാബ്.

നായൻ എത്രത്തോളം മികച്ചതാണെങ്കിലും ടി20യിലെ തന്നെ ഏറ്റവും മികച്ച താരങ്ങളുണ്ടെങ്കിലും എതിരാളികളെ വീഴ്‌ത്താൻ ലഭിക്കുന്ന അവസരങ്ങള്‍ പ്രയോജനപ്പെടുത്താൻ കഴിയുന്നില്ല എങ്കില്‍ തോല്‍വിയുടെ പക്ഷത്ത് തന്നെ നില്‍ക്കേണ്ടി വരും. പഞ്ചാബിന്റെ കാര്യത്തില്‍ അതിന്റെ ഏറ്റവും വലിയ ഉദാഹരണമാകുകയായിരുന്നു സണ്‍റൈസേഴ്‌സ് ഹൈദരാബാദിനെതിരായ മത്സരം.

ട്രാവിസ് ഹെഡിനേയും അഭിഷേക് ശർമയേയും പുറത്താക്കി പഞ്ചാബ് മത്സരത്തിലേക്ക് തിരിച്ചുവരുകയായിരുന്നു. എട്ടാം ഓവറിലെ ആദ്യ പന്ത്, ലോക്കി ഫെർഗൂസണിന്റെ ഷോർട്ട് ബോള്‍ ഉയർത്തിയടിക്കാനുള്ള ഇഷാൻ കിഷന്റെ ശ്രമം. ഡീപ് സ്ക്വയർ ലെഗിലേക്ക് സഞ്ചരിച്ച പന്തിനെ കയ്യിലൊതുക്കാൻ കൂപ്പർ കനോലി തയാറായി. അനായാസമായൊരു ക്യാച്ചെന്ന് തോന്നിച്ചു, പക്ഷേ കനോലിക്ക് പിഴിച്ചു. ഈ നിമിഷം ഇഷാന്റെ സ്കോർ കേവലം ഒൻപത് പന്തില്‍ ഒൻപത് റണ്‍സ്.

അടുത്ത അവസരം സൃഷ്ടിക്കുന്ന യുസുവേന്ദ്ര ചഹലാണ്, ബാറ്റർ ഹെൻറിച്ച് ക്ലാസൻ. ചഹലിന്റെ ഫുള്‍ ലെങ്ത് പന്തില്‍ ഒരു ടോപ് എഡ്‌ജ് സംഭവിക്കുന്നു. ഡീപ് സ്ക്വയര്‍ ലെഗിലുണ്ടായിരുന്ന ശശാങ്കിന്റെ കൈകളെ തേടിയെത്തുകയായിരുന്നു പന്ത്. പക്ഷേ, ശശാങ്കിന് ആ നിമിഷം തന്റേതാക്കാൻ കഴിഞ്ഞില്ല, താരത്തിന്റെ കൈകളില്‍ നിന്ന് വഴുതിപ്പോയ പന്ത് ബൗണ്ടറി റോപ്പും കടന്നു. വിശ്വസിക്കാനാകാതെ വിക്കറ്റില്‍ ഇരുന്നുപോയി ചഹല്‍, സമാനമായിരുന്നു ശ്രേയസിന്റേയും പോണ്ടിങ്ങിന്റേയും മുഖഭാവം. ക്ലാസന്റെ സമ്പാദ്യം അപ്പോള്‍ ഒൻപത് റണ്‍സ് മാത്രമായിരുന്നു.

അധികം വൈകാതെ വീണ്ടും വിക്കറ്റിന് വഴിയൊരുക്കി ചഹല്‍, 11-ാം ഓവറില്‍. ഇക്കുറി വലയില്‍ വീണത് കിഷനായിരുന്നു. ഡീപ് സ്ക്വയര്‍ ലെഗില്‍ ക്യാച്ച് പാഴാക്കിയ ലോക്കി ഫെര്‍ഗൂസണ്‍. ഓവറിലെ അവസാന പന്തില്‍ ഇഷാനെ മടക്കാൻ മറ്റൊരു വാതില്‍ക്കൂടി ചഹല്‍ തുറന്ന് നല്‍കി. ഇക്കുറി സ്റ്റമ്പിങ് അവസരം പാഴാക്കി പ്രഭ്‌സിമ്രാൻ സിങ് ആ വാതിലും അടച്ചു. 19, 20 സ്കോറുകളില്‍ നില്‍ക്കെ ഇഷാന് ജീവൻ ലഭിച്ചു, ആകെ മൂന്ന് തവണ.

ഇഷാൻ പഞ്ചാബിനെതിരെ ഒടുവില്‍ പുറത്താകുമ്പോള്‍ സ്കോര്‍ 32 പന്തില്‍ 55 റണ്‍സ്. ഹെൻറിച്ച് ക്ലാസൻ ഔട്ടാകാതുന്നത് ഇന്നിങ്സിലെ അവസാന പന്തിലാണ്. 43 പന്തില്‍ 69 റണ്‍സായിരുന്നു വലം കയ്യൻ ബാറ്ററുടെ സമ്പാദ്യം. ഇരുവരേയും പുറത്താക്കാൻ കഴിഞ്ഞിരുന്നെങ്കില്‍ കുറഞ്ഞ് ഒരു 30 റണ്‍സിന്റെ അഭാവം ഹൈദരാബാദിന്റെ ടോട്ടലിലുണ്ടാകുമായിരുന്നു.

പത്ത് മത്സരങ്ങളില്‍ നിന്ന് ഇതുവരെ 16 ക്യാച്ചുകളാണ് പഞ്ചാബ് കൈവിട്ടത്. സീസണില്‍ ഇത്രയും ക്യാച്ചുകള്‍ വിട്ട മറ്റൊരു ടീം ചെന്നൈ സൂപ്പർ കിങ്സാണ്. ക്യാച്ചിങ് എഫിഷൻസി നോക്കിയാല്‍ ഏറ്റവും മോശം പഞ്ചാബ് തന്നെയാണ്, 71.4 ശതമാനം. ശശാങ്ക് മാത്രം പാഴാക്കിയത് അഞ്ച് ക്യാച്ചുകളാണ്. സീസണിലെ ഏറ്റവും നിർണായകമായ ഘട്ടത്തിലേക്കാണ് പഞ്ചാബ് കടക്കുന്നത്. വിജയവഴിയില്‍ തിരിച്ചെത്താൻ തിരുത്തേണ്ടത് ബാറ്റിങ്ങിലേയും ബൗളിങ്ങിലേയും പോരായ്മകളല്ല, അത് ഫീല്‍ഡിങ്ങിലേതാണ്. പോണ്ടിങ് സൂചിപ്പിച്ചതുപോലെ ഇതൊരു വൈറസ് പോലെ തുടര്‍ന്നാല്‍ എളുപ്പമാകില്ല ഒന്നും.

ഐപിഎല്‍ 2026: ഹിറ്റ്മാൻ ഈസ് ബാക്ക്, വാംഖഡയില്‍ മുംബൈയുടെ പ്രതാപം വീണ്ടെടുത്ത് രോഹിത്

Hari Krishnan M — Tue, 05 May 2026 15:24:37 +0530

വാംഖഡയിലെ കസേരകള്‍ പലതും ഒഴിഞ്ഞുകിടക്കുകയായിരുന്നു. സ്വന്തം മണ്ണില്‍ പോലും കാലുറപ്പിക്കാൻ ആ സംഘത്തിനായിട്ടില്ല എന്നതുതന്നെ കാരണം. പ്രതീക്ഷകളുടെ ഭാരമില്ലാതെ ശാന്തതപാലിച്ചിരുന്ന ഗ്യാലറി. സൂര്യകുമാര്‍ യാദവ് ആ വാചകം പറഞ്ഞ് അവസാനിപ്പിക്കുമ്പോള്‍ പൊടുന്നനെ ആരവം ഉയര്‍ന്നു. ‘Our very own Rohit Sharma is back’.

22 ദിവസങ്ങള്‍ക്ക് മുൻപാണ് അയാള്‍ പരുക്കേറ്റ്, തന്റെ ഉയര്‍ച്ച താഴ്ചകള്‍ക്ക് എല്ലാം സാക്ഷിയായ മൈതാനത്ത് നിന്ന് തലകുനിച്ച് മടങ്ങിയത്. ഈ വലിയ ഇടവേളയില്‍ താൻ കെട്ടിപ്പടുത്ത സാമ്രാജ്യം തകര്‍ന്ന് വീഴുന്നത് നിസഹായനായി ഡഗൗട്ടിലിരുന്നു വീക്ഷിക്കുന്ന ആ മനുഷ്യനെ പലകുറി ലോകം കണ്ടു. അയാളുടെ തിരിച്ചുവരവിനോളം മുംബൈ ആരാധകര്‍ മറ്റൊന്നും ആഗ്രഹിച്ചിട്ടുണ്ടായിരുന്നില്ല. ഒടുവില്‍ അയാള്‍ ബാറ്റെടുത്തു, മുംബൈക്ക് നഷ്ടപ്പെട്ടതെല്ലാം തിരിച്ചുപിടിക്കാനായിരുന്നു അത്. മുംബൈ ച രാജ, രോഹിത് ശര്‍മ.

ക്രീസിലേക്ക് എത്താൻ എത്രത്തോളം രോഹിത് ആഗ്രഹിച്ചുവെന്നത് രണ്ടാം ഓവറിലെ രണ്ടാം പന്തിലാണ് വ്യക്തമായത്. ഔട്ട് സൈഡ് ഓഫ് സ്റ്റമ്പ് ലൈനിലെത്തിയ ലെങ്ത് ബോളില്‍ ഔട്ട്സൈഡ് എഡ്ജിലൂടെയാണ് രോഹിതിന് ബൗണ്ടറി ലഭിക്കുന്നത്. മിഡില്‍ ചെയ്യാൻ കഴിയാത്തതിന്റെ വല്ലാത്തൊരു അമര്‍ഷം ഇതിഹാസത്തിന്റെ മുഖത്ത് പ്രതിഫലിച്ചു. റണ്‍ദാഹമുള്ള വിരാട് കോലിയിലൊക്കെ മാത്രം കണ്ടുശീലിച്ച ഒന്ന്.

ഇടം കയ്യൻ പേസര്‍മാരൊടുള്ള രോഹിതിന്റെ ദൗര്‍ബല്യം അറിയാവുന്ന റിഷഭ് പന്ത് ആദ്യ നാല് ഓവറിനിടെ മൊഹ്സിൻ ഖാനെ രണ്ട് തവണ ദൗത്യം ഏല്‍പ്പിച്ചു. പ്രിൻസ് യാദവിന്റെ കണിശതയും ചേര്‍ന്നതോടെ രോഹിത് തന്റെ അഗ്രസീവ് മനോഭാവത്തില്‍ നിന്ന് സമ്യമനത്തിന്റെ പാതയിലൂന്നി. ആദ്യം നേരിട്ട 15 പന്തില്‍ 15 റണ്‍സ് മാത്രം, റയാൻ റിക്കല്‍ട്ടണ്‍ തന്റെ പീക്ക് ഫോമിന്റെ ആസ്വാദനം തുടര്‍ന്നത് അയാളിലെ സമ്മര്‍ദം കുറച്ചു.

നിലയുറപ്പിച്ചുകഴിഞ്ഞാല്‍ അനായസം ഗിയര്‍ ഷിഫ്റ്റ് ചെയ്യാൻ കഴിയുന്ന, അതിവേഗം ലെങ്ത് പിക്ക് ചെയ്യാൻ സാധിക്കുന്ന, മറ്റ് ബാറ്റര്‍മാരേക്കാള്‍ ഒരു സെക്കൻഡ് അധികം ലഭിക്കുന്ന രോഹിത്. വാംഖഡെ ആ 15 പന്തുകള്‍ക്ക് ശേഷം കണ്ടത് അതായിരുന്നു. പവര്‍പ്ലേയിലെ അവസാന ഓവര്‍ എറിയാൻ വന്ന ആവേശ് ഖാനായിരുന്നു. തുടരെ രണ്ട് ബൗണ്ടറികള്‍ വഴങ്ങിയശേഷം തന്റെ വജ്രായുധമായ സ്ലോ ബോള്‍ ആവേശ് പ്രയോഗിച്ചു.

ആ പന്ത് ബാറ്റിലേക്ക് എത്തുന്നതിനായി കാത്തിരുന്ന് രോഹിത് തന്റെ ട്രേഡ് മാര്‍ക്ക് പുള്‍ഷോട്ട് പുറത്തെടുത്തു. മിഡ് വിക്കറ്റിന് മുകളിലൂടെ പന്ത് നീലക്കടലില്‍, ആവേശിന്റെ യോര്‍ക്കര്‍ ശ്രമം ഫുള്‍ ടോസില്‍ കലാശിച്ചപ്പോള്‍ പന്ത് വിശ്രമിച്ചത് ബാക്ക്‌വേഡ് സ്ക്വയറില്‍. 21 റണ്‍സായിരുന്നു രോഹിത് ഒറ്റ ഓവറില്‍ സ്കോര്‍ ചെയ്തത്. 15 പന്തില്‍ 15ല്‍ നിന്ന് 20 പന്തില്‍ 36ലേക്ക്. പവര്‍പ്ലേയിലെ സ്ട്രൈക്ക് റേറ്റ് 180.

പവര്‍പ്ലേയ്ക്ക് ശേഷം രോഹിതിന്റെ സ്കോറിങ്ങ് വേഗത തെല്ലും കുറഞ്ഞില്ല. മണിമാരൻ സിദ്ധാര്‍ത്ഥിനെതിരെ ലോങ് ഓണിന് മുകളിലൂടെ സിക്‌സ് നേടിയാണ് അര്‍ദ്ധ സെഞ്ചുറിയിലേക്ക് എത്തുന്നത്. സീസണിലെ രണ്ടാം അര്‍ദ്ധ ശതകം, 27 പന്തുകളില്‍. മുഹമ്മദ് ഷമിയെറിഞ്ഞ 12-ാം ഓവറില്‍ രോഹിത് നേടിയ ബൗണ്ടറി. അതായിരുന്നു പ്യുവര്‍ വര്‍ക്ക് ഓഫ് ആര്‍ട്ട് എന്ന് വിളിക്കാൻ പറ്റുന്ന ഒന്ന്.

മണിക്കൂറില്‍ 128 കിലോ മീറ്ററില്‍ മാത്രമെത്തിയ ഒരു ഷോര്‍ട്ട് ബോള്‍. രോഹിതിന്റെ തലയ്ക്കൊപ്പമാണ് പിച്ച് ചെയ്ത പന്ത് ഉയര്‍ന്നത്. ഫീല്‍ഡിനെ കൃത്യമായും മനസിലാക്കി രോഹിത് ആ പന്ത് ലേറ്റ് ആയി പ്ലേ ചെയ്ത് ബാക്ക് വേഡ് സ്ക്വയര്‍ ലെഗിലൂടെ ബൗണ്ടറി നേടുന്നു. റോപ്പ് ലക്ഷ്യമാക്കി പന്ത് കുതിക്കുമ്പോള്‍ ഷമിയുടെ മുഖത്ത് തന്റെ മികച്ച ഡെലിവറിയെ മറികടന്നതിന്റെ ഒരു ഭാവമായിരുന്നു. കമന്ററി ബോക്‌സിലിരുന്ന് രോഹിതിന്റെ റിസ്റ്റ് വര്‍ക്കിനെ വാഴ്ത്തി സുനില്‍ ഗവാസ്ക്കര്‍.

13-ാം ഓവറില്‍ ആവേശിനെതിരെ എക്‌സ്ട്രാ കവറിന് മുകളിലൂടെ നേടിയ ലോഫ്റ്റഡ് ഡ്രൈവ് സിക്‌സ് മറ്റൊരു ഉദാഹരണം. റിക്കല്‍ട്ടണിന്റെ വിക്കറ്റില്‍ പോലും രോഹിത് നിര്‍ത്തിയില്ല. ഒടുവില്‍ സിദ്ധാര്‍ത്ഥിന് വിക്കറ്റ് നല്‍കി അര്‍ഹിച്ച സെഞ്ചുറിക്ക് അരികില്‍ വീഴുമ്പോള്‍ സമ്പാദ്യം 44 പന്തില്‍ 84 റണ്‍സ്. പവര്‍പ്ലേയിലെ സ്ട്രൈക്ക് റേറ്റ് 180 ആയിരുന്നെങ്കില്‍ ശേഷം 200 ആയി ഉയര്‍ന്നു. 24 പന്തില്‍ 48 റണ്‍സാണ് പവര്‍പ്ലേയ്ക്ക് ശേഷമുള്ള നേട്ടം.

മുംബൈയുടെ ജയം ഉറപ്പിച്ച ശേഷമാണ് രോഹിത് മടങ്ങുന്നത്, വാംഖഡയുടെ സര്‍വാരവങ്ങളും ഏറ്റുവാങ്ങി രോഹിത് മടങ്ങുമ്പോള്‍ മുംബൈ ആരാധകര്‍ ഒരുപോലെ ചിന്തിച്ചു. രോഹിത് ആ അഞ്ച് മത്സരങ്ങളും കളിച്ചിരുന്നുവെങ്കില്‍ എന്ന്. മുംബൈ തങ്ങളുടെ ചരിത്രത്തില്‍ പിന്തുടര്‍ന്ന് ജയിക്കുന്ന ഏറ്റവും വലിയ ലക്ഷ്യങ്ങള്‍ രണ്ടും ഇക്കുറിയായിരുന്നു, രണ്ട് സന്ദര്‍ഭങ്ങളിലും രോഹിതിന്റേയും റിക്കല്‍ട്ടണിന്റേയും കൂട്ടുകെട്ടായിരുന്നു വിജയത്തിന്റെ ആധാരം.

സീസണില്‍ കളിച്ചത് അഞ്ച് മത്സരങ്ങള്‍ മാത്രം, രണ്ട് അര്‍ദ്ധ സെഞ്ചുറി ഉള്‍പ്പെടെ 221 റണ്‍സ്. ശരാശരി 55 ആണ്, സ്ട്രൈക്ക് റേറ്റ് 174ല്‍ എത്തി നില്‍ക്കുന്നു. പിന്നിട്ട സീസണുകള്‍ പരിശോധിച്ചാല്‍ രോഹിതിന്റെ ഏറ്റവും മികച്ച പ്രകടനം.

ഐപിഎല്‍ 2026: തീരാത്ത ഓവറുകള്‍! അര്‍ഷദീപിന്റെ ഫോം പഞ്ചാബിന് ആശങ്കയാണോ?

Hari Krishnan M — Thu, 07 May 2026 14:33:23 +0530

ഐപിഎല്ലില്‍ പഞ്ചാബ് കിങ്സിന്റെ അപരാജിത മുന്നേറ്റങ്ങളുടെ ആധാരം ബാറ്റിങ് നിരയായിരുന്നു. ടൂര്‍ണമെന്റിലെ തന്നെ ഏറ്റവും മികച്ച ബാറ്റിങ് യൂണിറ്റുകളില്‍ ഒന്ന്. ശ്രേയസ് അയ്യര്‍ നയിക്കുന്ന നീണ്ട നിര അല്‍പ്പമൊന്ന് വെല്ലുവിളിക്കപ്പെടുന്ന് രാജസ്ഥാൻ റോയല്‍സിനെതിരെയായിരുന്നു, പിന്നീട് ഗുജറാത്തിനോടും. ബൗളിങ് ദൗര്‍ബല്യങ്ങളെ വിസ്മരിക്കാൻ തക്കവണ്ണം മികവ് പുലര്‍ത്താൻ പ്രിയാൻഷ് ആര്യ മുതല്‍ മാര്‍ക്കൊ യാൻസണ്‍ വരെയുള്ളവര്‍ക്ക് കഴിഞ്ഞിരുന്നു. പക്ഷേ, ബാറ്റിങ് നിര വീണപ്പോള്‍ ഒരിക്കല്‍പ്പോലും കരുത്തായി ഉയര്‍ത്തെഴുന്നേല്‍ക്കാൻ ബൗളര്‍മാര്‍ക്കായില്ല.

മൂന്ന് തുടര്‍തോല്‍വികളുടെ കാരണം തിരയുമ്പോള്‍ ഫീല്‍ഡിങ്ങിലെ പിഴവുകള്‍ക്കൊപ്പം മുന്നില്‍ നില്‍ക്കുന്നതാണ് ബൗളര്‍മാരുടെ മോശം ഫോം. ആ ബൗളിങ് നിരയെ നയിക്കുന്നത് ഇന്ത്യയുടെ പ്രീമിയം ടി20 പേസറായ അര്‍ഷദീപ് സിങ്. സീസണിലെ 10 മത്സരങ്ങള്‍ പിന്നിടുമ്പോഴും അര്‍ഷദീപിന് തന്റെ താളം തിരികെ പിടിക്കാൻ കഴിഞ്ഞിട്ടില്ല. 11 വിക്കറ്റുകള്‍ മാത്രമാണ് ഇടം കയ്യൻ പേസര്‍ക്ക് പഞ്ചാബിനായി നേടാനായത്. ന്യൂബോളിലും ഡെത്തിലും ഒരേപോലെ വൈഭവമുള്ള അര്‍ഷദീപിന് രണ്ട് ഘട്ടത്തിലും തിളങ്ങനായത് ചുരുക്കം അവസരങ്ങളില്‍ മാത്രമാണ്.

അര്‍ഷദീപിന്റെ എക്കോണമിയാണ് ഏറ്റവും അമ്പരപ്പിക്കുന്നത്. അരങ്ങേറ്റ സീസണായ 2019ന് ശേഷമുള്ള ഏറ്റവും മോശം കണക്കുകള്‍. 10.4 ആണ് ടൂര്‍ണമെന്റിലെ താരത്തിന്റെ എക്കോണമി. 2025 എഡിഷനില് 16 ഇന്നിങ്സുകളില്‍ നിന്ന് 8.8 എക്കോണമിയില്‍ 21 വിക്കറ്റുകളെടുത്ത് പഞ്ചാബിന്റെ ഫൈനല്‍ യാത്രയ്ക്ക് ഇന്ധനമായ താരമാണ്, ടൂര്‍ണമെന്റ് അവസാന ഘട്ടത്തിലേക്ക് എത്തുമ്പോഴും തന്റെ പേരിനൊത്ത് ഉയരാനാകാതെ തുടരുന്നത്.

സീസണില്‍ 10 മത്സരങ്ങളില്‍ നിന്ന് 22 വൈഡുകള്‍ അര്‍ഷദീപ് എറിഞ്ഞു. ഈ കണക്കുകളില്‍ അര്‍ഷദീപ് തന്നെയാണ് മുൻപന്തിയില്‍. 17 വൈഡുകള്‍ എറിഞ്ഞ സണ്‍റൈസേഴ്സ് ഹൈദരാബാദ് താരം ഇഷാൻ മലിങ്കയാണ് രണ്ടാമതുള്ളത്. 38 ഓവറുകളാണ് ആകെ എറിഞ്ഞിട്ടുള്ളത്, അതായത് 228 ലീഗല്‍ ഡെലിവെറികള്‍. ഇതിന് പുറമെ 22 വൈഡുകളും. അതായത് എറിഞ്ഞ പന്തുകളുടെ ഏറെക്കുറെ പത്ത് ശതമാനത്തോളം വൈഡുകളെന്ന് ചുരുക്കിപ്പറയാം.

ന്യൂബോളില്‍ വിക്കറ്റെടുക്കാൻ കഴിയാതെ പോകുന്നുവെന്നതാണ് അര്‍ഷദീപിന്റെ പ്രകടനങ്ങളില്‍ പ്രധാന തിരിച്ചടിയായി കാണാൻ സാധിക്കുന്നത്. ന്യൂബോളില്‍ വിക്കറ്റ് ലഭിച്ച സന്ദര്‍ഭങ്ങളില്‍ തന്റെ സ്പെല്‍ മികച്ച രീതിയില്‍ അവസാനിപ്പിക്കാൻ അര്‍ഷദീപിന് കഴിഞ്ഞിട്ടുമുണ്ട്. മുംബൈ ഇന്ത്യൻസിനും ഗുജറാത്ത് ടൈറ്റൻസിനും എതിരായ മത്സരങ്ങള്‍ ഉദാഹരണമാണ്.

മുംബൈക്കെതിരെ തന്റെ രണ്ടാം ഓവറില്‍ തന്നെ റിയാൻ റിക്കല്‍ട്ടണിനേയും സൂര്യകുമാര്‍ യാദവിനേയും അര്‍ഷദീപ് മടക്കി, സ്പെല്‍ അവസാനിക്കുന്നത് നാല് ഓവറില്‍ 22 റണ്‍സിന് മൂന്ന് വിക്കറ്റില്‍. ശുഭ്മാൻ ഗില്ലിനെ എറിഞ്ഞ മൂന്നാം പന്തില്‍ പുറത്താക്കിയാണ് ഗുജറാത്തിനെതിരെ അര്‍ഷദീപ് തുടങ്ങുന്നത്. നാല് ഓവറില്‍ 24 റണ്‍സ് വഴങ്ങി രണ്ട് വിക്കറ്റായിരുന്നു മത്സരത്തിലെ കണക്കുകള്‍. ആകെ നേടിയ 11 വിക്കറ്റുകളില്‍ അഞ്ചെണ്ണവും ന്യൂബോളില്‍ തിളങ്ങിയ മത്സരങ്ങളില്‍.

ന്യൂബോളില്‍ എന്തുകൊണ്ട് അര്‍ഷദീപ് ഉള്‍പ്പെടെയുള്ള താരങ്ങള്‍ക്ക് തിളങ്ങാനാകുന്നില്ല എന്നത് ചോദ്യമാണ്. അര്‍ഷദീപ് മാത്രമല്ല, പഞ്ചാബിലെ തന്നെ സഹതാരമായ മാര്‍ക്കൊ യാൻസണ്‍, ജസ്പ്രിത് ബുമ്ര തുടങ്ങി നിരവധി ഉദാഹരണങ്ങള്‍ ബാക്കിയുണ്ട്. മുഹമ്മദ് സിറാജ്, കഗിസൊ റാബാഡ, ജോഫ്ര അര്‍ച്ചര്‍, ഭുവനേശ്വര്‍ കുമാര്‍, ജോഷ് ഹേസല്‍വുഡ് എന്നിങ്ങനെ പവര്‍പ്ലേയില്‍ ആധിപത്യം സ്ഥാപിക്കുന്നവരുമുണ്ട്. തുടക്കത്തിലെ താളം കണ്ടെത്താനായില്ലെങ്കില്‍ പൂര്‍ണമായും മത്സരം കൈവിടുന്ന സ്ഥിതിയാണ് ആദ്യം പറഞ്ഞ പേരുകാരുടെ പ്രകടനങ്ങള്‍, പ്രത്യേകിച്ചും ബാറ്റിങ്ങിന് അനുകൂലമായ വിക്കറ്റുകളില്‍.

അര്‍ഷദീപിന്റേയും ബുമ്രയുടേയും കാര്യം പരിശോധിക്കുകയാണെങ്കില്‍ മാസങ്ങള്‍ക്ക് മുൻഫ് ടി20 ലോകകപ്പില്‍ ഉജ്വല പ്രകടനം പുറത്തെടുത്തവരാണ്. ബുമ്ര ടൂര്‍ണമെന്റിലെ തന്നെ ടോപ് വിക്കറ്റ് ടേക്കറായിരുന്നു, എക്കോണമി 6.6. അര്‍ഷദീപ് ഒൻപത് വിക്കറ്റുകളും നേടിയിരുന്നു, 8.8 എക്കോണമിയില്‍. ശേഷം വന്ന ഐപിഎല്ലിലാണ് തിളങ്ങാതെ പോകുന്നതും. രവിശാസ്ത്രി ചൂണ്ടിക്കാണിച്ചതുപോലെ ഇരുവരും മനുഷ്യരാണ്, മോശം ദിവസങ്ങള്‍ ഉണ്ടാകാം, പക്ഷേ തിരിച്ചുവരവ് പ്രധാനമാണ്.

ഐപിഎല്‍ 2026: അപ്‌ഗ്രേഡ് ചെയ്ത് രാഹുല്‍, ഇന്ത്യയുടെ ടി20 ടീമിലേക്ക് മടങ്ങിയെത്തുമോ കെ എല്‍?

Hari Krishnan M — Sat, 02 May 2026 13:09:05 +0530

വ്യക്തിഗതനേട്ടങ്ങള്‍ക്കപ്പുറം ടീമിന് മുൻതൂക്കം നല്‍കുന്ന താരങ്ങളാണ് അനിവാര്യം. ലഖ്നൗ സൂപ്പ‍ര്‍ ജയന്റ്സ് ഉടമയായ സ‌ഞ്ജീവ് ഗോയങ്ക വ‍ര്‍ഷങ്ങള്‍ക്ക് മുൻപ് കെ എല്‍ രാഹുലിനെതിരെ തൊടുത്ത ഒളിയമ്പായിരുന്നു ഇത്. സീസണുകള്‍ക്കിപ്പുറം ടി20 ഫോര്‍മാറ്റിലെ തന്റെ ഫിലോസഫിയെ ഉടച്ചുവാര്‍ത്ത് പുതിയൊരു വേര്‍ഷനെ കണ്ടെത്തിയിരിക്കുന്നു രാഹുല്‍. അതിന്റെ അടയാളമാണ് കൈവശമിരിക്കുന്ന ഓറഞ്ച് ക്യാപ്. ഒൻപത് മത്സരങ്ങളില്‍ നിന്ന് 433 റണ്‍സുമായി അഭിഷേക് ശര്‍മയോടും വൈഭവ് സൂര്യവംശിയോടുമൊക്കെ മല്ലിടുന്ന സീനിയര്‍. ഇന്ത്യയുടെ ടി20 സൈഡിലേക്ക് രാഹുലിനൊരു മടങ്ങിവരവ് സാധ്യമാണോ.

67 പന്തില്‍ 152 റണ്‍‍സ് ഇവിടെ നിന്ന് തുടങ്ങാം, ഐപിഎല്ലിന്റെ ചരിത്രത്തില്‍ ഒരു ഇന്ത്യൻ താരത്തിന്റെ പേരിന് നേര്‍ക്ക് ഈ നമ്പര്‍ തെളിയുമെങ്കില്‍, അത് രാഹുലായിരിക്കുമെന്ന് ആരും കരുതിയിട്ടുണ്ടാകില്ല. ഇത്തരമൊരു സ്കോര്‍ സംഭവിക്കണമെങ്കില്‍ അഗ്രസീവായ സമീപനം കൊണ്ട് മാത്രമെ സാധിക്കുവെന്നും ഒരു ധാരണയുണ്ടായിരുന്നു. പക്ഷേ, അരുണ്‍ ജയ്റ്റ്‌ലി സ്റ്റേഡിയത്തില്‍ പ്രോപ്പര്‍ ക്രിക്കറ്റിങ് ഷോട്ടുകള്‍ക്കൊണ്ട് ക്ലാസ് ഒട്ടും ചോരാതെയായിരുന്നു രാഹുല്‍ തന്റെ ഇന്നിങ്സ് പടുത്തുയര്‍ത്തിയത്.

പഞ്ചാബ് കിങ്സിനെതിരായ അസാധരണമായ പ്രകടനത്തിന് ശേഷം രാഹുല്‍ നടത്തിയ പ്രതികരണം അക്കാലമത്രയും തന്നെ തുണച്ച ഗെയിം പ്ലാനിനെ പ്രതിരോധിച്ചുകൊണ്ടായിരുന്നില്ല. പുതുതലമുറയുടെ ടി20ക്കൊപ്പം സഞ്ചരിക്കാൻ ഉറച്ചായിരുന്നു. ടി20 വ്യത്യസ്തമായിരുന്ന സമയമുണ്ടായിരുന്നു, ഓപ്പണറെന്ന നിലയില്‍ അല്‍പ്പം സമയമെടുക്കാനുള്ള സാവകാശം ലഭിച്ചിരുന്നു. ഇന്ന് പവര്‍പ്ലേ ഏറെ പ്രധാനപ്പെട്ടതാണ്, അടുത്ത ഓവറില്‍ സ്കോര്‍ ചെയ്യാമെന്ന് ചിന്തിക്കാനുള്ള സാധ്യത പോലുമില്ല. ആ മാനസികാവസ്ഥയിലേക്ക് അല്‍പ്പം ശ്രമകരമായെങ്കിലും ഞാനും എത്തിയിരിക്കുന്നു, ഇതായിരുന്നു രാഹുലിന്റെ വാക്കുകള്‍.

2022 ടി20 ലോകകപ്പില്‍ രോഹിത് ശര്‍മയ്ക്കൊപ്പം ഓപ്പണിങ്ങിനിറങ്ങുമ്പോള്‍ രാഹുല്‍ നേരിട്ടിരുന്ന വലിയൊരു പരിഹാസമുണ്ടായിരുന്നു. രാഹുലാണ് സ്ട്രൈക്ക് എടുക്കുന്നതെങ്കില്‍ ആദ്യ ഓവര്‍ മെയിഡനായിരിക്കുമെന്ന്. നാല് വര്‍ഷങ്ങള്‍ക്കിപ്പുറം വെള്ളിയാഴ്ച രാജസ്ഥാൻ റോയല്‍സിനെതിരെ ആദ്യ പന്ത് നേരിട്ട് കഴിഞ്ഞപ്പോള്‍ രാഹുലിന്റെ സ്ട്രൈക്ക് റേറ്റ് 400 തൊട്ടിരുന്നു. നന്ദ്രെ ബര്‍ഗറിന്റെ ബാക്ക് ഓഫ് ദ ലെങ്ത് പന്തില്‍ ബാക്ക് ഫൂട്ടില്‍ മനോഹരമായൊരു ഷോട്ട്. സീസണിലെ ഏറ്റവും മികച്ച പവര്‍പ്ലേ ബൗളറായ ജോഫ്ര ആര്‍ച്ചറിനെതിരെ നേരിട്ട രണ്ടാം പന്തില്‍ സ്ക്വയര്‍ ലെഗിന് മുകളിലൂടെ സിക്സും.

എല്ലാ ടെക്സ്റ്റ് ബുക്ക് ഷോട്ടുകളും കൈവശമുള്ള, ബാക്ക് ഫൂട്ടിലും ഫ്രണ്ട് ഫൂട്ടിലും ഒരേപോലെ വൈഭവമുള്ള രാഹുല്‍ ഒടുവില്‍ ടി20യെന്ന ഫോര്‍മാറ്റിനേയും പൂര്‍ണമായും ഉള്‍ക്കൊള്ളാൻ തയാറായിരിക്കുന്നു. സീസണില്‍ രണ്ടക്കം കടന്ന രാഹുലിന്റെ ഇന്നിങ്സുകള്‍ പരിശോധിക്കാം. ഗുജറാത്ത് ടൈറ്റൻസിനെതിരെ 52 പന്തില്‍ 92 റണ്‍സ്, സ്ട്രൈക്ക് റേറ്റ് 176. ചെന്നൈക്കെതിരെ 10 പന്തില്‍ 18 റണ്‍സ്, സ്ട്രൈക്ക് റേറ്റ് 180. ബെംഗളൂരുവിനെതിരെ അര്‍ദ്ധ ശതകം, സ്ട്രൈക്ക് റേറ്റ് 167. ഹൈദരാബാദിനെതിരെ 160ഉം ഡല്‍ഹിക്കെതിരെ 226ഉം ആയിരുന്നു പ്രഹരശേഷി. ഒടുവില്‍ രാജസ്ഥാനെതിരെ 187.

ക്യാപ്റ്റൻസി സമ്മര്‍ദമില്ലാതെ കൂടുതല്‍ ക്ലാരിറ്റിയോടെ ബാറ്റ് ചെയ്യുന്ന രാഹുല്‍. വിരാട് കോലി കഴിഞ്ഞാല്‍ ഒരുപക്ഷേ, ഐപിഎല്ലിലെ ഏറ്റവും മികച്ച ചേസറായിക്കൂടി പരിഗണിക്കാൻ കഴിയുന്ന താരമാണ് രാഹുല്‍. ടൂര്‍ണമെന്റിന്റെ ചരിത്രത്തിലെ ഏറ്റവും സ്ഥിരതയുള്ള ബാറ്റര്‍മാരിലൊരാള്‍. എന്നിരുന്നാലും തന്റെ ഗെയിം അപ്ഗ്രേഡ് ചെയ്തതുകൊണ്ട് മാത്രം രാഹുലിന് ടി20 ടീമിലേക്ക് മടങ്ങിവരാൻ കഴിയുമോ. നിലവിലെ സാഹചര്യത്തില്‍ സാധ്യതകള്‍ വിരളമാണെന്ന് വേണം കരുതാൻ. പ്രത്യേകിച്ചും രാഹുല്‍ ഒരു മുൻനിര ബാറ്റര്‍കൂടി ആയതിനാല്‍.

സ്ട്രൈക്ക് റേറ്റില്‍ തന്റെ നില മെച്ചപ്പെടുത്തിയെങ്കിലും അഭിഷേക് ശര്‍മ, സഞ്ജു സാംസണ്‍, ഇഷാൻ കിഷൻ, വൈഭവ് സൂര്യവംശി, പ്രിയാൻഷ് ആര്യ, പ്രഭ്‌സിമ്രാൻ സിങ് എന്നീ പേരുകള്‍ മറികടക്കാനുള്ള പ്രകടനം രാഹുല്‍ പുറത്തെടുത്തിട്ടുണ്ടോയെന്നത് ചോദ്യമാണ്. അഭിഷേക്-സഞ്ജു-ഇഷാൻ ത്രയത്തിന് ശേഷം മാത്രമായിരിക്കും പുതുപേരുകള്‍ക്ക് അവസരം പോലും ഒരുങ്ങുക. മൂവരുടേയും സമീപകാലത്തെ പ്രകടനങ്ങളെ മാറ്റി നിര്‍ത്താനാകുകയുമില്ല. ടി20 ലോകകപ്പിലെ മാത്രമല്ല, നിലവില്‍ ഐപിഎല്ലിലും മൂന്ന് ബാറ്റര്‍മാരും റെഡ് ഹോട്ട് ഫോമിലാണ്.

പക്ഷേ, ഏകദിന ഫോ‍ര്‍മാറ്റിലെ തന്റെ സ്ഥാനത്തിന് യാതൊരു വെല്ലുവിളിയും ഉണ്ടാകില്ല എന്ന് ഉറപ്പിക്കാൻ രാഹുലിന് ഐപിഎല്ലിലെ പ്രകടനങ്ങള്‍ക്കൊണ്ട് സാധിച്ചേക്കും. 2027 ലോകകപ്പിനൊരുങ്ങുന്ന ഇന്ത്യൻ നിരയിലെ പ്രധാനിയായിരിക്കും രാഹുലെന്നതില്‍ നിലവിലെ സാഹചര്യത്തില്‍ തര്‍ക്കമില്ലാത്ത ഒന്നാണ്. അതുകൊണ്ട്, താരത്തിന്റെ പ്രകടനങ്ങള്‍ പാഴാകില്ല.

റിഷഭ് പന്ത് വേണ്ട, ഇനി സഞ്ജുവിന്റെ ഊഴം; ഏകദിന കുപ്പായത്തില്‍ റീ എൻട്രിയോ?

Hari Krishnan M — Fri, 01 May 2026 14:32:04 +0530

ബോളണ്ട് പാർക്കില്‍ ആ ദിവസം സായാഹ്നത്തോട് അടുക്കുകയാണ്. ഏകദിന ലോകകപ്പ് ഫൈനലിന്റെ മുറിവുണങ്ങിയിട്ടില്ല അപ്പോഴും. ദക്ഷിണാഫ്രിക്കയ്ക്ക് എതിരായ സീരീസ് ഡിസൈഡർ, തിലക് വർമയെ കൂട്ടുപിടിച്ചയാള്‍ ഇന്ത്യയെ കരകയറ്റുന്നു.

വെല്‍ കാല്‍ക്കുലേറ്റാഡായൊരു ഇന്നിങ്സ്, സെഞ്ചുറി. ആ ബാറ്റിന്റെ കരുത്തില്‍, പ്രതികൂലമായ സാഹചര്യത്തിലും ഇന്ത്യ ഭേദപ്പെട്ട സ്കോറിലേക്ക് എത്തുകയാണ്, ഒടുവില്‍ 78 റണ്‍സിന്റെ ഭീമൻ ജയവും. താൻ ഒരു ടി20 പ്രൊഡക്റ്റ് മാത്രമല്ലെന്നും തനിക്ക് ഏകദിന ഫോർമാറ്റില്‍ പലരുടേയും പകരക്കാരനാകാനും സാധിക്കുമെന്ന് തെളിയിച്ചത് അന്നായിരുന്നു. എന്നാല്‍, ശേഷമൊരിക്കലും ഏകദിന കുപ്പായം അയാള്‍ക്കായി ഒരുങ്ങിയില്ല.

പിന്നീട് സമ്മർദം കൊടുമുടികയറിയപ്പോള്‍ ഇന്ത്യക്ക് ആ ബാറ്റ് തുണയാകുന്നത് വർഷങ്ങള്‍ക്കിപ്പുറമാണ്, ഒന്നല്ല മൂന്ന് വട്ടം, അത് അവസാനിക്കുന്നത് ഇന്ത്യ വിശ്വം കീഴടക്കുമ്പോഴും. പതിറ്റാണ്ട് നീണ്ട കരിയറില്‍ അയാള്‍ തന്റെ മികവിനോടും കാലം അയാളോടും നീതിപുലര്‍ത്തി. സഞ്ജു വിശ്വനാഥ് സാംസണ്‍. ഇന്ന് മറ്റ് പേരുകള്‍ക്കായി അയാളെ മാറ്റി നിര്‍ത്തുക അസാധ്യമായ ഒന്നാണ്, അതിന്റെ സൂചനകള്‍ പുറത്തുവന്നുകൊണ്ടേയിരിക്കുന്നു.

ഇതിഹാസങ്ങളുടെ വലിയ ലക്ഷ്യം സാക്ഷാത്കരിക്കാൻ ഒരു സംഘത്തെ ഒരുക്കുന്നുണ്ട് ബിസിസിഐ. അവിടെ സഞ്ജു സാംസണ്‍ എന്ന് പേരുണ്ടായേക്കും. അതിന് വ്യക്തമായ ചില കാരണങ്ങളുമുണ്ട്. ദീര്‍ഘകാലമായി ഇന്ത്യയുടെ വിക്കറ്റ് കീപ്പര്‍ ബാറ്റർ കെ എല്‍ രാഹുലാണ്. കൃത്യമായി പറഞ്ഞാല്‍ 2023 ഏഷ്യ കപ്പ് മുതല്‍, രാഹുലിന് പിന്നില്‍ രണ്ടാം ഓപ്ഷനായി ഇടം കയ്യൻ ബാറ്ററുകൂടിയായ റിഷഭ് പന്തും. നിലവില്‍ ഇന്ത്യയുടെ ഏകദിന ടീമിന്റെ ഭാഗമാണെങ്കിലും ഫോര്‍മാറ്റില്‍ പന്ത് മൈതാനത്തിറങ്ങിയിട്ട് രണ്ട് വർഷത്തോളമാകുന്നു.

ശ്രീലങ്കയ്ക്ക് എതിരെയായിരുന്നു അവസാനമായി ഏകദിനത്തില്‍ പന്ത് പ്രത്യക്ഷപ്പെട്ടത്. 2024 ഓഗസ്റ്റില്‍, ഒൻപത് പന്തില്‍ ആറ് റണ്‍സ്, ഇതായിരുന്നു നേട്ടം. പന്തിന്റെ ടി20 കരിയറിന് താത്‌കാലിക ഫുള്‍ സ്റ്റോപ്പ് വീണതും ഈ പര്യടനത്തില്‍ തന്നെയാണ്. ടി20യിലേക്ക് പന്തിന്റെ മടക്കം ചരുങ്ങിയ കാലത്തേക്കെങ്കിലും ഏറെക്കുറെ അസാധ്യമാണ്.

2027 ഏകദിന ലോകകപ്പിനായി ഒരുങ്ങുന്ന ഇന്ത്യൻ ടീമിലേക്ക് തിരികെയെത്താൻ പന്തിന് ലഭിച്ച അവസരമാണ് ഐപിഎല്‍, എന്നാല്‍ ടൂർണമെന്റില്‍ തന്റെ പ്രതിഭയുടെ നിഴല്‍ മാത്രമാണ് പന്ത്. എട്ട് കളികളില്‍ നിന്ന് 189 റണ്‍സാണ് നേട്ടം, സ്ട്രൈക്ക് റേറ്റ് 130ലും താഴെ നില്‍ക്കുന്നു. പന്തിന്റെ മോശം ഫോമില്ലായ്‌മ മാത്രമാണോ സഞ്ജുവിന് വഴിയൊരുങ്ങുന്നതിന്റെ കാരണം, അല്ലാ എന്ന് അടിവരയിട്ട് പറയാനാകും.

ടി20 പോലെ ഒരു ഓവറില്‍ കളി തിരിക്കാൻ പറ്റുന്ന ഫോർമാറ്റല്ല ഏകദിനം. ഇവിടെ ഇന്നിങ്സ് ബില്‍ഡ് ചെയ്യാനുള്ള മികവിനാണ് മുൻതൂക്കം. അത് സഞ്ജുവിനുണ്ടോയെന്ന ചോദ്യം ഉയര്‍ന്നാല്‍ അഞ്ച് വർഷം മുൻപും ഉണ്ടെന്ന് തന്നെയാണ് ഉത്തരം. പക്ഷേ, അത് തെളിയിക്കപ്പെടാൻ 2026 ടി20 ലോകകപ്പ് വരെ വൈകിയെന്ന് മാത്രം. അഗ്രസീവായി ബാറ്റ് ചെയ്ത് വിക്കറ്റ് വലിച്ചെറിയുന്നുവെന്ന പഴി സഞ്ജു ഇന്ന് കേള്‍ക്കുന്നില്ല, മറിച്ച് ഇന്ന് ആ പേരിന് ഇന്ത്യൻ ടീമിലെ ഏറ്റവും മൂല്യമുള്ള താരമെന്ന് കൂടി അർത്ഥമുണ്ട്.

മത്സരസാഹചര്യവും വിക്കറ്റിന്റെ സ്വഭാവവും പൂർണമായി മനസിലാക്കി തന്റെ ഗെയിം പ്ലാൻ ചെയ്യുന്ന സഞ്ജുവിനെയാണ് സമീപകാലത്ത് കാണാനാകുന്നത്. അത് എത്രത്തോളം ഇന്ത്യക്ക് മുതല്‍ക്കൂട്ടായി എന്നതിന്റെ തെളിവാണ് ടി20 ലോകകിരീടം. ടീമിനെ ഒറ്റയ്ക്ക് ചുമലിലേറ്റി ജയിപ്പിക്കാൻ കഴിയുന്ന മാച്ച് വിന്നര്‍, അതും കേവലമൊരു ബിലാറ്ററല്‍ സീരീസിലല്ല തെളിയിക്കപ്പെട്ടത്, ഒരു ജനതയുടെ പ്രതീക്ഷകളുടെ ഭാരം മുഴുവനുമുള്ള ലോകകപ്പില്‍.

വലിയ ടൂര്‍ണമെന്റുകള്‍ വിജയിപ്പിക്കാൻ കഴിയുന്ന താരങ്ങളുടെ സാന്നിധ്യം ലോകകപ്പിനിറങ്ങുന്ന ഇന്ത്യക്ക് ഏറെ പ്രധാനപ്പെട്ടതാണ്. ഇവിടെയാണ് സഞ്ജു മറ്റാരേക്കാള്‍ മുൻതൂക്കം നേടുന്നതും. ഇതിനെ സഹായിക്കുന്നതാണ് ഏകദിന ഫോർമാറ്റിലെ സഞ്ജുവിന്റെ പ്രകടനങ്ങളും നിലവിലെ ഫോമും. ഏകദിനത്തില്‍ 14 ഇന്നിങ്സുകളില്‍ മാത്രമാണ് സഞ്ജു ബാറ്റ് ചെയ്തിട്ടുള്ളത്. മൂന്ന് അര്‍ദ്ധ സെഞ്ചുറിയും ഒരു ശതകവും ഉള്‍പ്പെടെ 510. ശരാശരി 56 ആണ്, സ്ട്രൈക്ക് റേറ്റ് നൂറിന് തൊട്ടരികിലും.

ഫോം പരിശോധിച്ചാല്‍ ചെന്നൈ സൂപ്പര്‍ കിങ്സ് എന്ന ടീമിന്റെ നെടും തൂണാണ് സഞ്ജു. ഇതിനോടകം തന്നെ രണ്ട് സെഞ്ചുറികള്‍, രണ്ട് ബിഗ് ഇന്നിങ്സുകള്‍ എന്ന് പറയാം. താരം തിളങ്ങിയ മത്സരങ്ങളില്‍ മാത്രമാണ് ചെന്നൈ ജയിച്ചിട്ടുള്ളതും. ഇതെല്ലാം സഞ്ജുവിനെ തുണയ്ക്കുന്ന ഘടകങ്ങളാകുന്നു. പക്ഷേ, ടീമില്‍ ഇടം പിടിച്ചാലും കളത്തിലെത്താനാകുമോയെന്നതില്‍ സംശയങ്ങളുണ്ട്. മുൻനിരയിലും മധ്യനിരയിലും അത്രത്തോളം വലിയ പേരുകളാണുള്ളത്. അതിനയെല്ലാം മറികടക്കണമെങ്കില്‍ ലഭിക്കുന്ന അവസരങ്ങളിലെല്ലാം തിളങ്ങേണ്ടി വന്നേക്കാം.

അഫ്‌ഗാനിസ്ഥാൻ, ഇംഗ്ലണ്ട്, വെസ്റ്റ് ഇൻഡീസ്, ശ്രീലങ്ക, സിംബാബ്‌വെ എന്നീ ടീമുകള്‍ക്കെതിരായാണ് ഇന്ത്യയുടെ ഏകദിന പരമ്പരകള്‍. ഇതില്‍ ചുരുങ്ങിയ പരമ്പരകളിലെങ്കിലും സുപ്രധാന താരങ്ങള്‍ക്ക് വിശ്രമം നല്‍കി മറ്റുള്ളവര്‍ക്ക് അവസരം നല്‍കിയേക്കും. സഞ്ജുവിന്റെ സാധ്യതകള്‍ ഉയരുന്നതും ഇവിടെയായിരിക്കും.