Asianet News Malayalam

എംബാപെയും കൈവിട്ടു, നൈക്കി തകർന്നതെങ്ങനെ? തിരിച്ചുവരവ് ഇനിയുണ്ടോ?

Hari Krishnan M — Sun, 20 Sep 2026 15:25:32 +0530

തന്റെ അടുക്കളയിലെ വാഫിള്‍ അയണ്‍ ഉപയോഗിച്ച് ബില്‍ ബോവ്‌മാൻ നടത്തിയൊരു പരീക്ഷണം. അവിടെ നിന്നായിരുന്നു നൈക്കിയുടെ ആദ്യ ട്രാക്ക് ഷൂവായ മൂണ്‍ ഷൂവിന്റെ ജനനം. പിന്നീട് മൈതാനങ്ങളും വീഥികളുമെല്ലാം കീഴടക്കിയൊരു ചരിത്രമുണ്ട് ഫില്‍ നൈറ്റും ബോവ്‌മാനും ചേർന്ന് ആരംഭിച്ച ആ ഉദ്യമത്തിന്. മൈക്കല്‍ ജോർദാന്റെയും ക്രിസ്റ്റ്യാനൊ റൊണാള്‍ഡോയുടേയും സെറീന വില്യംസിന്റെയും ടൈഗർ വുഡ്‌സിന്റേയുമൊക്കെ കാലുകളില്‍ ആ സ്വൂഷ് ലോഗൊ പതിപ്പിച്ചവർ തങ്ങളുടെ ബ്രാൻഡിനെ കായികലോകത്തിന്റെ മുഖമാക്കി മാറ്റുകയായിരുന്നു. ജസ്റ്റ് ഡു ഇറ്റ് എന്ന നൈക്കിയുടെ ടാഗ് ലൈൻ പരിചതമല്ലാത്തവര്‍ പോലും ചുരുക്കമാകാം.

നൈക്കി തങ്ങളുടെ അത്‌ലീറ്റുകള്‍ക്കൊക്കെയും നല്‍കിയത് കേവലം ഷൂവായിരുന്നില്ല. അതില്‍ അവരുടെ ജീവിത കഥകൂടി തുന്നിച്ചേർത്തിരുന്നു. നൈക്കി എയർ ജോർദാനും നൈക്കി സിആര്‍സെവനുമൊക്കെ ഉദാഹരങ്ങളാണ്. ആ നൈക്കിയിന്ന് വിപണിയില്‍, അവരുടെ ചരിത്രത്തിലെ ഏറ്റവും വലിയ തകർച്ചയിലേക്ക് കൂപ്പുകുത്തുകയാണ്. പുതുകാലത്ത് നൈക്കിയുടെ മുഖം ഫ്രഞ്ച് ഫുട്ബോള്‍ താരമായ കിലിയൻ എംബാപെയും അവരെ കൈവിട്ടിരിക്കുന്നു...നൈക്കിയുടെ തകർച്ചയ്ക്ക് പിന്നിലെ കാരണങ്ങളെന്തെല്ലാമാണ്, അവർക്കൊരു തിരിച്ചുവരവ് സാധ്യമാണോ?

വീഴ്ചയുടെ തുടക്കം നൈക്കിയുടെ ഒരു നീക്കത്തില്‍ നിന്നാണ്. ദീർഘകാലമായി റീട്ടെയിലേഴ്‌സ് മുഖേനെയായിരുന്നു കൂടുതലായും നൈക്കിയുടെ പ്രൊഡക്റ്റുകള്‍ വിപണിയിലേക്ക് എത്തിയിരുന്നത്. ഫൂട്ട് ലോക്കര്‍, ജെഡി സ്പോർട്ട്‌സ്, മറ്റ് സാധാരണ ഷോപ്പുകളെല്ലാം ഇവയില്‍ ഉള്‍പ്പെട്ടു. എന്നാല്‍ ഉപഭോക്തകളിലേക്ക് നേരിട്ടെത്താമെന്ന തീരുമാനം ബ്രാൻഡ് സ്വീകരിച്ചു. ഔദ്യോഗിക സ്റ്റോർ, വെബ്സൈറ്റ്, ആപ്ലിക്കേഷൻ തുടങ്ങിയവയിലൂടെ മാത്രമായി വില്‍പ്പന.

ഇതൊരു മോശം സമീപനമായി കാണാനാകില്ല. ഉപഭോക്താക്കളുമായി നേരിട്ടുള്ള ബന്ധം, അവരുടെ വിവരങ്ങള്‍ തുടങ്ങി എല്ലാ നിയന്ത്രണവും നൈക്കിയിലേക്ക് തന്നെ എത്തിക്കാനായിരുന്നു ചുവടുമാറ്റം. പക്ഷേ, ഇത് വഴിവെച്ചത് മറ്റ് ബ്രാൻഡുകളുടെ വളർച്ചയിലേക്കായിരുന്നു. റീട്ടെയില്‍ ഷോപ്പുകളിലെ നൈക്കിയുടെ സ്പേസ് ന്യൂബാലൻസ്, ഹൊക്ക, ഓണ്‍, ഏസിക്‌സ്, ബ്രൂക്ക്‌സ് പോലുള്ള ബ്രാൻഡുകള്‍ കയ്യടക്കി. ഒരുകാലത്ത് നൈക്കിയുടെ ഡയറക്റ്റ് കൊമ്പറ്റീറ്റേഴ്‌‌സ് പോലുമായിരുന്നില്ലെ ഇവരൊക്കെയും.

കോവിഡ് കാലം നൈക്കിയുടെ സാഹചര്യം കൂടുതല്‍ സങ്കീര്‍ണമാക്കിയ ഒന്നായിരുന്നു. ആളുകള്‍ ശരീരത്തിന്റെ ആരോഗ്യത്തിന് പരിഗണന നല്‍കിത്തുടങ്ങി, വ്യായാമം ജീവിതത്തിന്റെ ഭാഗമാക്കി മാറ്റി, പ്രത്യേകിച്ചും റണ്ണിങ്. ഒരു റണ്ണങ് കള്‍ച്ചർ തന്നെ ആഗോളതലത്തില്‍ രൂപപ്പെട്ടു. ഇവിടെ ആളുകള്‍ പ്രധാനമായും കാലുകളുടെ കംഫര്‍ട്ടിനാണ് മുൻഗണന നല്‍കിയത്. നൈക്കിയെ വിപണിയില്‍ നിലനിര്‍ത്തിയിരുന്നത് അവരുടെ ഇന്നവേഷൻ കൂടിയായിരുന്നു.

ഇവിടെ നൈക്കി പിന്നോട്ട് പോയപ്പോള്‍, ഹൊക്ക കുഷ്യനിങ്ങിന് പ്രധാന്യം കൊടുത്ത് പ്രൊഡക്റ്റുകള്‍ പുറത്തിറക്കി, ഏസിക്‌സ് അവരുടെ ഷൂകളുടെ പെർഫോര്‍മൻസ് വർധിപ്പിച്ചു, ഓണ്‍ പുതിയ സാങ്കേതികവിദ്യ സ്വീകരിച്ചു, ന്യൂബാലൻസിന് റണ്ണേഴ്‌സിനിടയില്‍ പ്രീതി കൂടിവന്നു, ഷൂകള്‍ കൂടുതല്‍ ലൈറ്റ് വെയിറ്റായി മാറുകയായിരുന്നു. നൈക്കിയും ഒപ്പമോടിയിരുന്നു, പക്ഷേ റീട്ടെയിലേഴ്‌സിനെ ഒഴിവാക്കിയുള്ള സമീപനം കസ്റ്റമേഴ്‌സിനെ അകറ്റുകയായിരുന്നു.

കൂടാതെ ലൈഫ് സ്റ്റൈല്‍ സ്നീക്കേഴ്‌സില്‍ ശ്രദ്ധ കേന്ദ്രീകരിച്ചു നൈക്കി. പക്ഷേ, അവിടെയും ഇന്നവേഷന്റെ അഭാവമുണ്ടായി. കളറില്‍ മാത്രം മാറ്റം വരുത്തി ഒരേ മോഡലുകള്‍ വിപണിയിലിറക്കി. ഇത് സ്നീക്കര്‍ പ്രേമികളെ മടുപ്പിച്ച നീക്കമായിരുന്നുവെന്ന് പറയാം. ഇതോടെ നൈക്കി ഓഫറുകള്‍ നല്‍കാൻ തുടങ്ങി, 20, 30, 40 ശതമാനം എന്നിങ്ങനെ. നൈക്കി വലിയ ഓഫറുകള്‍ നല്‍കുക എന്നത് വിരളമായി സംഭവിക്കുന്ന ഒന്നായിരുന്നു. 10 ശതമാനത്തില്‍ നിന്ന് 20തിലേക്ക് ഓഫര്‍ ഉയര്‍ന്നപ്പോള്‍ കസ്റ്റമേഴ്‌സ് മറ്റൊരു സാധ്യതകൂടി കാണാൻ ആരംഭിച്ചു. കാത്തിരുന്നാല്‍ ഇനിയും ഓഫര്‍ വര്‍ധിക്കുമെന്നത്.

2025ൽ നൈക്കിയുടെ ഗ്ലോബല്‍ സ്പോര്‍ട്ട്‌സ് ഫൂട്ട്‌വെയര്‍ മാര്‍ക്കറ്റ് ഷെയര്‍ ഏകദേശം 22.9 ശതമാനമായി കുറഞ്ഞുവെന്നാണ് കണക്കുകള്‍. 2025 സാമ്പത്തിക വർഷത്തിൽ നൈക്കിയുടെ വരുമാനത്തില്‍ ഏകദേശം 10 ശതമാനം ഇടിവാണ് രേഖപ്പെടുത്തിയത്. നൈക്കിയുടെ പ്രധാന മാര്‍ക്കറ്റുകളിലൊന്ന് ചൈനയായിരുന്നു. റീട്ടെയിലേഴ്‌സിനെ വെട്ടിയത് ചൈനയിലും പ്രതിഫലിച്ചു. പ്രാധേശിക ബ്രാൻഡുകളായ ലി നിങ്ങും ആന്റയുമൊക്കെ നൈക്കിക്കുമേല്‍ വളര്‍ന്നു അവിടെ. സ്വഭാവികമായും നൈക്കിയുടെ പ്രധാന്യം ഇടിയുകയും ചെയ്തു.

ഇനി നൈക്കിക്ക് തിരിച്ചുവരാൻ സാധിക്കുമോയെന്ന ചോദ്യം. നൈക്കിക്കൊപ്പം പതിറ്റാണ്ടുകളായി ഉണ്ടായിരുന്ന ഏലിയട്ട് ഹില്ലിന്റെ സിഇഒ ആയുള്ള തിരിച്ചുവരവാണ് പ്രതീക്ഷ. 2024ല്‍ ചുമതലയേറ്റ ഹില്‍ സ്പോര്‍ട്‌സ് കേന്ദ്രീകൃതമാക്കി ബ്രാൻഡിനെ മാറ്റിത്തുടങ്ങി. അതായത് റണ്ണിങ്ങ്, ഫുട്ബോള്‍, ബാസ്ക്കറ്റ്ബോള്‍ എന്നിങ്ങനെ, നേരത്തെ അങ്ങനെയായിരുന്നില്ല. ഓരോ മേഖലയ്ക്കും അനിവാര്യമായ മാറ്റങ്ങള്‍ കൊണ്ടുവരികയാണ് ഇതിലൂടെയുള്ള ലക്ഷ്യം. റീട്ടെയിലേഴ്‌സുമായുള്ള ബന്ധം മെച്ചപ്പെടുത്താനുള്ള ശ്രമങ്ങളും ഹില്‍ നടത്തി, അത് വരുമാനത്തില്‍ പ്രതിഫലിക്കുന്നുമുണ്ട്.

റണ്ണിങ് സെഗ്മന്റിലൂടെ മാര്‍ക്കറ്റ് തിരിച്ചുപിടിക്കുകയാണ് നൈക്കിയുടെ പ്രധാന തന്ത്രങ്ങളിലൊന്ന്. പക്ഷേ അത് എളുപ്പമുള്ള ഒന്നല്ല. നൈക്കിക്ക് മുകളില്‍ ഓണും എസിക്‌സും ന്യൂബാലൻസുമൊക്കെ സെഗ്മെന്റില്‍ ആധിപത്യം നേടിയിട്ടുണ്ട്. ഫുട്ബോളിലും ബാസ്ക്കറ്റ്ബോളിലുമൊക്കെ അഡിഡാസാണ് ഇന്ന് ടോപ് ബ്രാൻഡ്. ലൈഫ് സ്റ്റൈലിലേക്ക് എത്തിയാല്‍ അഡിഡാസിനൊപ്പം ന്യൂബാലൻസുമുണ്ട്. അതുകൊണ്ട് നഷ്ടപ്പെട്ട കസ്റ്റമേഴ്‌സിനെ തിരികെപ്പിടിക്കുക നൈക്കിക്ക് എളുപ്പമുള്ള ഒന്നായിരിക്കില്ല, എന്നാല്‍ ബുദ്ധിമുട്ടുള്ള ഒന്നുമല്ല.

നൈക്കിക്ക് ഇപ്പോഴും ആഗോളതലത്തില്‍ വലിയ സ്വീകാര്യതയുണ്ട് എന്നതാണ് ഒന്നാമത്തെ കാരണം. ഒപ്പം ലോകത്തിലെ ടോപ് അത്‌ലീറ്റുകളുമായുള്ള പാര്‍ട്ടണര്‍ഷിപ്പ്, മാര്‍ക്കറ്റിങ് എബിലിറ്റി, ഫുട്ബോളിലും ബാസ്ക്കറ്റ്ബോളിലും ദീര്‍ഘകാലമായുള്ള വിശ്വാസ്യത. നൈക്കിയായതുകൊണ്ട് പ്രൊഡക്റ്റ് വാങ്ങാമെന്ന ചിന്താഗതിയില്‍ നിന്ന് വ്യതിചലിച്ചിട്ടുണ്ട് കായികസമൂഹം, കാരണം മറ്റ് ബ്രാൻഡുകളുടെ ഇന്നോവെഷനുകള്‍ കസ്റ്റമേഴ്‌സിനെ അത്രത്തോളം സാറ്റിസ്‌ഫൈ ചെയ്തിട്ടുണ്ട്. അത് തിരികെപ്പിടിക്കുകയാണ് ഏറ്റവും പ്രധാനപ്പെട്ട ഘടകം.

ജപ്പാനെന്ത് ലോകചാമ്പ്യന്മാര്‍, വിറപ്പിച്ചു വിട്ടു! തലമുറകള്‍ ഓര്‍ത്തുവെക്കും പോരാട്ടം

Hari Krishnan M — Tue, 22 Sep 2026 16:43:39 +0530

ഹിരോഷിമയും നഗസാക്കിയും അനുഭവിച്ചതാണ്, അതിജീവിച്ചതാണ്, എണ്ണിയാലൊടുങ്ങാത്തത്ര പ്രകൃതി ദുരന്തങ്ങളും താണ്ടിയ മനുഷ്യരാണ്. പിന്നെയാണോ ഒരു അഭിഷേക് ശര്‍മയും സഞ്ജു സാംസണും ഇഷാൻ കിഷനും.

സാനൊ അന്താരാഷ്ട്ര ക്രിക്കറ്റ് സ്റ്റേഡിയത്തിലേക്ക് ഉറ്റുനോക്കിയ ഏതൊരു ക്രിക്കറ്റ് ആരാധകരും ഒരുനിമിഷം ആഗ്രഹിച്ചിട്ടുണ്ടാവണം ജപ്പാൻ ജയിച്ചിരുന്നെങ്കിലെന്ന്. അത്രത്തോളമുണ്ടായിരുന്നു അവരുടെ ചെറുത്തുനില്‍പ്പും പോരാട്ടവീര്യവും. അഞ്ച് ഓവറില്‍ ഇന്ത്യയെ 32 റണ്‍സിലൊതുക്കിയ അസാധാരണ പ്രകടനം, ലോകക്രിക്കറ്റിലെ മോസ്റ്റ് എക്സ്പ്ലോസീവ് ട്രയോയെ ഒരേ ഒരു ബൗണ്ടറിയിലൊതുക്കിയ കണിശത. ജപ്പാൻ ക്രിക്കറ്റ് ഫോര്‍ യു.

രണ്ട് ദിവസങ്ങള്‍ക്ക് മുൻപ് ഇന്ത്യയും ജപ്പാനും തമ്മിലുള്ള സൗഹൃദ മത്സരത്തിനുള്ള മൈതാനത്തിന്റെ ചിത്രങ്ങള്‍ പുറത്തുവന്നപ്പോള്‍. സോഷ്യല്‍ മീഡിയയുടെ നിരീക്ഷണം ഇങ്ങനെയായിരുന്നു. ഈ ഗ്രൗണ്ടില്‍ അഭിഷേകും സഞ്ജും ഇരട്ടസെഞ്ചുറിയടിച്ചാല്‍പ്പോലും അത്ഭുതപ്പെടേണ്ടതില്ലെന്ന്.

ഒടുവില്‍ കാര്‍മേഘങ്ങളൊക്കെയും നീങ്ങി അഞ്ച് ഓവര്‍ മത്സരത്തിന് കളം ഒരുങ്ങി സഞ്ജുവും അഭിഷേകും ബാറ്റ് ചെയ്യാനിറങ്ങുമ്പോഴും കരുതിയത് ഇന്ത്യ കുറഞ്ഞത് 100 റണ്‍സെങ്കിലും സ്കോര്‍ ചെയ്യുമെന്നായിരുന്നു.

സഞ്ജുവായിരുന്നു സ്ട്രൈക്കില്‍, ചാ‍ര്‍ളി ഹാര ഹിൻസെ എറിഞ്ഞ ആദ്യ പന്തിലുണ്ടായിരുന്നു സൂചന. ഡ്രിഫ്റ്റ് ചെയ്ത് ലെഗ് സ്റ്റമ്പിനെ തേടിയെത്തിയ പന്തിനെ പ്രതിരോധിക്കുകയല്ലാതെ സഞ്ജുവിന് നിര്‍വാഹമുണ്ടായിരുന്നില്ല. മൂന്നാം പന്ത് സഞ്ജുവിന്റെ മിഡല്‍ സ്റ്റമ്പിനെ നിലം പതിപ്പിക്കുമെന്നോര്‍ത്തു. നാലാം പന്തില്‍ ആശ്വാസത്തിനൊരു ബൗണ്ടറി മലയാളി താരത്തിന്റെ ബാറ്റില്‍ നിന്ന്, പിന്നീടൊരു സിംഗിള്‍.

ശേഷമാണ് ഹിൻസെയുടെ ക്രിക്കറ്റ് കരിയറിലെ തന്നെ ഏറ്റവും സുവര്‍ണമായ നിമിഷം സംഭവിക്കുന്നത്. ലെഗ് സ്റ്റമ്പിനെ ലക്ഷ്യമാക്കിയെത്തിയ പന്തില്‍ അഭിഷേകിന്റെ സ്വീപ്പ് ഷോട്ട് ശ്രമം, ടോപ് എഡ്ജ്. ഷോര്‍ട്ട് ഫൈനില്‍ ഷോ സൂഗയുടെ കൈകളില്‍ ഭദ്രമായി പന്ത് വിശ്രമിച്ചു. 30 പന്തില്‍ സെഞ്ചുറിയുമായി എത്തിയ അഭിഷേക് ഗോള്‍ഡൻ ഡക്ക്.

അടുത്തത് സഞ്ജുവിന്റെ ഊഴമായിരുന്നു, ഇബ്രാഹിം തക്കഹാഷിയുടെ ഫ്ലൈറ്റഡ് ഡെലിവെറി ജഡ്ജ് ചെയ്യുന്നതിലെ പിഴവ്. ഡീപ് മിഡ് വിക്കറ്റില്‍ ബെഞ്ജമിന്റെ വെല്‍ ജഡ്ജ്ഡ് ക്യാച്ചു. അഫ്ഗാനിസ്ഥാനെതിരെ ദിവസങ്ങള്‍ക്ക് മുൻപ് പവര്‍പ്ലേയില്‍ മാത്രം 100 റണ്‍സ് അടിച്ചുകൂട്ടിയ അഭിഷേക് - സ‍‍ഞ്ജു സഖ്യത്തിന്റെ ആകെ സമ്പദ്യം ഒൻപത് റണ്‍സ്. ലോക ഒന്നാം നമ്പര്‍ ടി20 ബാറ്ററായ ഇഷാൻ കിഷനാകട്ടെ നേരിട്ട ആറ് പന്തില്‍ നേടാനായത് മൂന്ന് റണ്‍സ്, ബെഞ്ചമിന്റേയും തക്കഹാഷിയുടേയും പന്തുകള്‍ ഇഷാനെ വെള്ളം കുടുപ്പിച്ചന്ന് തന്നെ പറയാം.

തിലക് വര്‍മയും ശ്രേയസ് അയ്യരും ടോപ് ത്രീയുടെ തുടര്‍ച്ചയായിരുന്നു. അവസാന ഓവറില്‍ ശ്രേയസ് നടത്തിയ പോരാട്ടം ഇന്ത്യയുടെ സ്കോര്‍ 30 കടത്തി. ഇന്ത്യൻ ബാറ്റര്‍മാരില്‍ സ്ട്രൈക്ക് റേറ്റിന് നൂറിന് മുകളിലുണ്ടായിരുന്നത് സഞ്ജുവിനും ശ്രേയസിനും മാത്രം, ബാക്കിയെല്ലാവരുടേതും 50ല്‍ താഴെ. ക്രിക്കറ്റ് പുസ്തകങ്ങളിലെ എല്ലാ ഷോട്ടുകളും കൈവശമുള്ളവരാണെന്ന് ഓര്‍ക്കം. ഇന്ത്യ 32ല്‍ ഒതുക്കി മടങ്ങിയ മൊമന്റ്, ജപ്പാൻ താരങ്ങളെല്ലാം പരസ്പരം ഹൈ ഫൈവ് നല്‍കിയാണ് ‍ഡഗൗട്ടിലേക്ക് മടങ്ങിയത്. ലോകകപ്പ് ജയിച്ചപോലൊരു സന്തോഷം.

ജപ്പാൻ ഇന്നിങ്സിലെ ആദ്യ രണ്ട് ഓവര്‍ പൂര്‍ത്തിയാകുമ്പോള്‍ ഇന്ത്യ അനായാസം ജയിക്കുമെന്ന് തോന്നിട്ടു. എട്ട് റണ്‍സിന് രണ്ട് വിക്കറ്റ് നഷ്ടം, അക്സര്‍ പട്ടേലിനും വാഷിങ്ടണ്‍ സുന്ദറിനും നന്ദി. എന്നാല്‍ രവി ബിഷ്ണോയ് എറിഞ്ഞ മൂന്നാം ഓവറില്‍ ജപ്പാൻ നായകൻ കെൻഡല്‍ ഫ്ലെമിങ്ങും ബെഞ്ചമിനും ചേര്‍ന്ന് പത്ത് റണ്‍സ് കണ്ടെത്തി. സുന്ദര്‍ എറിഞ്ഞ നാലാം ഓവറില്‍ ഏഴ് റണ്‍സും, കെൻഡല്‍ മടങ്ങിയെങ്കിലും എട്ട് റണ്‍സിന്റെ ദൂരം മാത്രമായിരുന്നു ജപ്പാന് ആ ചരിത്ര നിമിഷത്തിലേക്ക് ബാക്കിയുണ്ടായിരുന്നത്.

അക്സറിന്റെ ആദ്യ പന്തൊരു ‍ഡോട്ട്, ശേഷം ബെഞ്ചമിൻ സിംഗിള്‍ നേടുന്നു. മത്സരത്തിലെ തന്നെ ഏറ്റവും നാടകീയമായ നിമിഷങ്ങളുടെ തുടക്കം ഇവിടെയാണ്. അലക്സാണ്ടര്‍ ഷിറായ് അക്സറിനെതിരെ റിവേഴ്സ് സ്വീപ്പിന് ശ്രമിക്കുന്നു, അമ്പയര്‍ വൈഡ് വിളിച്ചു. അടുത്ത പന്തിലും സമാനമായി സംഭവിച്ചു, ഇക്കുറിയും വൈഡ് വിളിക്കപ്പെട്ടു. എന്നാല്‍, സഞ്ജുവും അക്സറും ശ്രേയസും അടക്കമുള്ള ഇന്ത്യൻ താരങ്ങള്‍ അസ്വസ്ഥരായി കാണപ്പെട്ടു. തോല്‍വി മുന്നിലപ്പോള്‍ തെളിഞ്ഞ് നില്‍ക്കുന്നുണ്ടായിരുന്നെന്ന് ഓര്‍ക്കണം...

ശ്രേയസ് സ്ക്വയര്‍ ലെഗ് അമ്പയര്‍ ക്രിസ് ബ്രൗണുമായി സംസാരിക്കുകയും അമ്പയറുടെ തീരുമാനം തിരുത്തുകയും ചെയ്തു. ഇന്ത്യൻ ടീമിന്റെ സമ്മ‍ര്ദത്തിന് കീഴ്പ്പെടേണ്ടി വന്നും അമ്പയറിന് എന്ന് പറയാം, റീപ്ലെയില്ലാതെ തേഡ് അമ്പയറുടെ സഹായമില്ലാതൊരു തിരുത്തല്. സൗഹൃദ മത്സരത്തിന്റെ സൗഹൃദാന്തരീക്ഷം അല്‍പ്പം കുറഞ്ഞതുപോലെ. ഒടുവില്‍ ജപ്പാനും വിജയത്തിനുമിടയില്‍ നാല് റണ്‍സ് മാത്രം, അലക്സാണ്ടറിന് അക്സറിന്റെ പരിചയസമ്പത്തിന് മുന്നില്‍ കീഴടങ്ങേണ്ടി വന്നു, ഇന്ത്യക്ക് രണ്ട് റണ്‍സ് ജയം.

മോശം അമ്പയറിങ്ങും സ്ലോ ഔട്ട് ഫീല്‍ഡും സ്പിൻ ഫ്രണ്ട്ലി വിക്കറ്റുമൊക്കെയായിരിക്കാം. പക്ഷേ, ജപ്പാന് അഭിമാനിക്കാൻ കഴിയുന്നതാണ് സാനോയില്‍ സംഭവിച്ചത്, തലമുറകള്‍ക്ക് ഓര്‍ത്തുവെക്കാൻ, പ്രചോദനമാകാൻ സാധിക്കുന്നൊരു പരാജയം, ജയത്തോളം തന്നെ പ്രാധാന്യമുള്ളത്. ഇന്ത്യൻ ക്രിക്കറ്റിനേയും ആരാധകരേയും മുള്‍മുനയില്‍ നിര്‍ത്തിയ 60 പന്തുകള്‍ സമ്മാനിച്ച സംഘം.

രണ്ട് ഫിഫ്റ്റി, ഗംഭീറിന്റെ കുറ്റസമ്മതം! സഞ്ജുവിനെ പുറത്താക്കാൻ വന്നവർ വിശ്രമിച്ചോളൂ

Hari Krishnan M — Sat, 19 Sep 2026 12:45:58 +0530

കണ്‍സിസ്റ്റൻസിയില്‍ വിമ‍ര്‍ശനവുമായി എത്തിയവര്‍ക്ക് രണ്ട് അര്‍ദ്ധ സെഞ്ചുറികള്‍. ഒടുവില്‍ ഗൗതം ഗംഭീറിന്റെ കുറ്റസമ്മതവും. സഞ്ജു സാംസണ്‍ എന്ന പേര് മായ്ക്കാനൊരുങ്ങിയവര്‍ക്കൊക്കെ ഇനി അല്‍പ്പം വിശ്രമിക്കാം. അഫ്ഗാനിസ്ഥാനെതിരായ ടി20 പരമ്പര അവസാനിക്കുമ്പോള്‍ പറയാൻ ഇത്രമാത്രമാണുള്ളത്. ചെയ്തുവെച്ചതും ചെയ്യുന്നതുമൊക്കെ അങ്ങനെ മറന്നുകളയാൻ എളുപ്പമുള്ളതല്ല.

തന്റെ പരിശീലക കരിയറിലെ ഏറ്റവും ബുദ്ധിമുട്ടുളവാക്കിയ തീരുമാനമായിട്ടാണ് സഞ്ജുവിനെ ഇംഗ്ലണ്ട് പര്യടനത്തിനിടെ ബെഞ്ചില്‍ ഇരുത്തിയതിനെക്കുറിച്ച് ഗംഭീര്‍ പറഞ്ഞത്. പിന്നിട്ട രണ്ട് വര്‍ഷങ്ങളിലെ പ്രകടനം പരിഗണിക്കുമ്പോള്‍ മറ്റൊരാള്‍ക്ക് വേണ്ടി സഞ്ജുവിനെ രണ്ടാമനാക്കാൻ ഒരിക്കലും സാധിക്കില്ലെന്നും അയാള്‍ എടുത്ത് പറയുന്നുണ്ട്. അഫ്ഗാനിസ്ഥാനെതിരായ രണ്ട് ഇന്നിങ്സുകള്‍, അവ മാത്രം പരിശോധിച്ചാല്‍ മതിയാകും സഞ്ജു തുടരേണ്ടതിന്റെ അനിവാര്യത അറിയാൻ.

സമ്മര്‍ദത്തെ സഞ്ജുവിനോളം അബ്സോര്‍ബ് ചെയ്യാൻ കഴിയുന്ന താരങ്ങള്‍ ഇന്ന് ഇന്ത്യൻ ക്രിക്കറ്റില്‍ തന്നെ ചുരുക്കമാണ്. കാരണം, എന്നും സമ്മര്‍ദത്തിന്റെ തീച്ചൂളയ്ക്ക് നടുവിലായിരുന്നു സഞ്ജു കരിയര്‍ പടുത്തുയര്‍ത്തിയത്. അതിന്റെ ഒടുവിലത്തെ ഉദാഹരണമാണ് അഫ്ഗാനെതിരായ ആദ്യ അര്‍ദ്ധ സെഞ്ചുറി. ടീമിലെ സ്ഥാനത്തില്‍ ചോദ്യമുയരവെയാണ് ക്രീസിലേക്ക് എത്തുന്നത്. വൈഭവ് സൂര്യവംശി ഡഗൗട്ടില്‍ കാത്തിരിക്കുന്നുണ്ട്. നേരിട്ട ആദ്യ എട്ട് പന്തില്‍ സ്കോര്‍ ചെയ്തത് കേവലം നാല് റണ്‍സാണ്.

ടി20 ക്രിക്കറ്റിലെ ഏറ്റവും നിര്‍ണായകമായ ഘട്ടമാണ് പവര്‍പ്ലേ, ഇവിടെയാണ് സഞ്ജു എട്ട് പന്തുകള്‍ നേരിട്ടിട്ടും ഒരു ബൗണ്ടറി പോലും നേടാതെ തുടര്‍ന്നത്. പുറത്തായാല്‍ ഇന്ത്യൻ ടീമിന്റെ ടി20 സ്ക്വാഡിലേക്ക് അടുത്തെങ്ങും ഒരു എൻട്രി പോലും പ്രതീക്ഷിക്കേണ്ടതില്ല. പിന്നീട് സംഭവിക്കുന്ന ഷിഫ്റ്റ്, അവിടെയാണ് സ‍ഞ്ജു വൈറ്റല്‍ ആകുന്നത്. ആ എട്ട് പന്തുകള്‍ക്ക് ശേഷം പവര്‍പ്ലേയില്‍ 11 ഡെലിവെറികളാണ് സഞ്ജു നേരിട്ടത്, അതില്‍ ഒൻപതും ബൗണ്ടറികളായിരുന്നു, ആറ് ഫോറും മൂന്ന് സിക്സും.

പവര്‍പ്ലേയ്ക്ക് പിന്നാലെ മൂന്ന് പന്തുകളാണ് ഫേസ് ചെയ്തത്, അതില്‍ രണ്ടിലും ബൗണ്ടറി, മൂന്നാം പന്തില്‍ പുറത്താകുന്നുത്. അവസാന നേരിട്ട എട്ട് പന്തില്‍ തുടരെ ഏഴ് ബൗണ്ടറികളുണ്ടെന്നോര്‍ക്കണം. റാഷിദ് ഖാനും മുഹമ്മദ് നബിക്കുമെതിരായ സ്ട്രൈക്ക് റേറ്റ് 300ന് മുകളിലായിരുന്നു. അസ്മത്തുള്ള ഒമര്‍സായിക്കെതിരെ 230. ആദ്യ എട്ട് പന്തിലെ സ്ട്രൈക്ക് റേറ്റ് അൻപതിലായിരുന്നെങ്കില്‍ ഇന്നിങ്സ അവസാനിക്കുമ്പോള്‍ 259 ആയിരുന്നു.

ഇനി മൂന്നാം ടി20യിലെ അര്‍ദ്ധ ശതകത്തിലേക്ക് വരാം. ആദ്യ ഫിഫ്റ്റിയില്‍ നിന്നും തീര്‍ത്തും വ്യത്യസ്തമായ ഇന്നിങ്സ്. അഭിഷേക് ശര്‍മ ഫുള്‍ ഫ്ലോയില്‍ ബാറ്റ് ചെയ്യുമ്പോള്‍ അതിന്റെ തുടര്‍ച്ചയ്ക്ക് പ്രധാന്യം കൊടുക്കുന്ന സമീപനമായിരുന്നു സഞ്ജു സ്വീകരിച്ചത്. അഭിഷേകിന് പരമാവധി സ്ട്രൈക്ക് കൈമാറുക എന്നതായിരുന്നു ലക്ഷ്യം. ഇടവേളകളില്‍ മാത്രം ബൗണ്ടറികളും കണ്ടെത്തിയിരുന്നു. ഒരു ബാറ്റിങ് പാര്‍ട്ട്ണര്‍ എങ്ങനെയായിരിക്കണമെന്നതിന്റെ ക്ലാസിക്ക് ഉദാഹരണങ്ങളിലൊന്ന്.

തന്റെ ഹിറ്റിങ് ആര്‍ക്കില്‍ വരുന്ന പന്തുകള്‍, അല്ലെങ്കില്‍ സ്കോര്‍ ചെയ്യാൻ കഴിയമായിരുന്നു ഡെലിവെറികളില്‍പ്പോലും സഞ്ജു അഭിഷേകിന് സ്ട്രൈക്ക് കൈമാറുന്നതായി കണ്ടു. അഭിഷേകിന്റെ സ്ട്രൈക്ക് റേറ്റിനേയും സഞ്ജുവിന്റെയും വെച്ച് വലിയ താരതമ്യങ്ങളും പരിഹാസങ്ങളും മത്സരശേഷമുണ്ടായി. പക്ഷേ, സഞ്ജു സെക്കൻ ഫിഡിലായി തുടരാൻ തീരുമാനിച്ചതാണ് അഭിഷേകിന്റെ ചരിത്രനേട്ടതിന് വഴിയൊരുങ്ങിയത്.

രോഹിത് ശര്‍മ ഏകദിന കരിയറിലെ ഏറ്റവും ഉയര്‍ന്ന സ്കോറായ 264ലേക്ക് എത്തിയ ഇന്നിങ്സ് ഓര്‍മയില്ലെ. അന്ന്, രോഹിതിനായി നിരന്തരം സ്ട്രൈക്ക് കൈമാറിയ ഒരാളുണ്ടായിരുന്നു, റോബിൻ ഉത്തപ്പ. രോഹിതിന്റെ ഇന്നിങ്സിനൊപ്പം ഓര്‍ത്തുവെക്കേണ്ടതുതന്നെയാണ് ഉത്തപ്പയുടെ പിന്തുണയും. ഉത്തപ്പ അന്ന് ക്രീസിലെത്തുമ്പോള്‍ രോഹിതിന്റെ സ്കോര്‍ 129 പന്തില്‍ 154 ആയിരുന്നു. രോഹിത് അടുത്ത 110 റണ്‍സെടുക്കുന്നതിനിടെ ഉത്തപ്പയുടെ നേട്ടം 16 പന്തുകളില്‍ 16 ആണ്. സെല്‍ഫ്‌ലെസ്.

അഭിഷേക് അസാധാരണമായ ബാറ്റിങ് പുറത്തെടുത്തിട്ടും സഞ്ജു 141 സ്ട്രൈക്ക് റേറ്റില്‍ അര്‍ദ്ധ സെഞ്ചുറി കുറിച്ചു. നാല് സിക്സും രണ്ട് ഫോറും ഉള്‍പ്പെടെ. അഫ്ഗാൻ പരമ്പരയിലെ സഞ്ജുവിന്റെ നേട്ടമാകട്ടെ മൂന്ന് മത്സരങ്ങളില്‍ നിന്ന് 117 റണ്‍സ്, സ്ട്രൈക്ക് റേറ്റ് 180 ആണ്. സീരീസിലെ ടോപ് സ്കോറര്‍മാരില്‍ രണ്ടാമൻ, അഭിഷേകിന് പിന്നില്‍.

ഇനി വെസ്റ്റ് ഇൻഡീസിനെതിരായ പരമ്പരയാണ്. അഞ്ച് ടി20 മത്സരങ്ങള്‍. ടീമിലെ സഞ്ജുവിന്റെ സാന്നിധ്യം ഉറപ്പിക്കുന്നുണ്ട് ഗംഭീര്‍, പക്ഷേ മറ്റൊന്നുകൂടി ഒപ്പം ചേര്‍ക്കുന്നുമുണ്ട്. അത് ബാറ്റിങ് ഫോം ആണ്. ഫോം നിലനിര്‍ത്തുക തന്നെയാണ് പ്രധാനം, കാരണം അത്രയും ഡൊമിനേറ്റിങ് ക്രിക്കറ്റാണ് ഇന്ത്യയിപ്പോള്‍ പുറത്തെടുക്കുന്നത്. കണ്‍സിസ്റ്റന്റാകണം, റണ്‍സ് സ്കോര്‍ ചെയ്യുന്നത് ഉയര്‍ന്ന സ്ട്രൈക്ക് റേറ്റിലുമാകണം. എങ്കിലെ അന്തിമ ഇലവനില്‍ സ്ഥാനം നിലനിര്‍ത്താൻ കഴിയൂ.

രോഹിതിന്റെ കാര്യത്തില്‍ അഗാർക്കർ ശരിയോ? ജയ്‌സ്വാളിനായി വഴിമാറിക്കൊടുക്കണോ?

Hari Krishnan M — Wed, 23 Sep 2026 12:21:32 +0530

രോഹിത് ശർമ ഓർ യശസ്വി ജയ്സ്വാള്‍. ചീഫ് സെലക്ടർ അജിത് അഗാർക്കറിന്റെ ഉത്തരം ജയ്സ്വാള്‍ എന്നായിരുന്നു. ബിസിസിഐയുടേത് രോഹിതും, അതിന് നിലവിലെ സാഹചര്യത്തില്‍ എന്ന വിശദീകരണം കൂടി ചേർക്കേണ്ടതുണ്ട്. 2027 ഏകദിന ലോകകപ്പ്, ലക്ഷ്യം അതാണ്. അവിടേയ്ക്ക് ഒരുപാട് ദൂരമുണ്ടെന്നും നോക്കാമെന്നുമാണ് രോഹിതിന്റെ ഒടുവിലത്തെ പ്രതികരണം. ജയ്‌സ്വാളിനായി രോഹിത് വഴിമാറിക്കൊടുക്കേണ്ടതുണ്ടോ? പരിശോധിക്കാം.

രോഹിതിന്റെ നിലവിലെ ഫോമിനേക്കുറിച്ചോ ശാരീരിക ക്ഷമതയെക്കുറിച്ചോ ആശങ്കകളില്ല. കഴിഞ്ഞ അഞ്ച് ഏകദിനങ്ങളില്‍ നിന്ന് ഒരു സെഞ്ചുറിയും ഒരു അർദ്ധ ശതകവും ഉള്‍പ്പെടെ 302 റണ്‍സാണ് വലം കയ്യൻ ബാറ്റര്‍ നേടിയത്. ശരാശരി 60 ആണ്, കരിയര്‍ ശരാശരിയേക്കാള്‍ മുകളില്‍. 2027 ലോകകപ്പ് ലക്ഷ്യമാക്കി 15 കിലോയോളം ശരീരഭാരം കുറച്ചതും ഇംഗ്ലണ്ടില്‍ ഔട്ടർ സര്‍ക്കിളില്‍ ഒരു യുവതാരത്തിന്റെ മെയ്‌വഴക്കത്തോടെ ഫീല്‍ഡ് ചെയ്യുന്ന രോഹിതിനെയുമൊക്കെ കണ്ടതാണ്. പക്ഷേ, ഒരുവർഷത്തിനപ്പുറവും ഇത് ആവര്‍ത്തിക്കാൻ രോഹിതിനാകുമോയെന്നതാണ് സുപ്രധാനമായ ചോദ്യം.

കായിക താരങ്ങളെക്കുറിച്ച് സംസാരിക്കുമ്പോള്‍ പ്രായം ഒരു ഘടകമല്ലെന്ന് പറയാറുണ്ട്, പക്ഷേ ഇവിടെ രോഹിതിന്റെ പ്രായവും ശാരീരിക ക്ഷമതയും പരിശോധിക്കേണ്ടതുണ്ട്, അതിന് വ്യക്തമായ കാരണങ്ങളുണ്ട്. 2027 ഒക്ടോബര്‍ നാലിനാണ് ഏകദിന ലോകകപ്പിന് തുടക്കമാകുന്നത്. നിലവില്‍ 39 പിന്നിട്ട രോഹിതിനപ്പോള്‍ 40 വയസും ആറ് മാസവുമാകും. കഴിഞ്ഞ ഐപിഎല്ലില്‍ രോഹിതിന് ഹാംസ്ട്രിങ് ഇഞ്ചുറി സംഭവിക്കുകയും നാല് മത്സരങ്ങളില്‍ വിശ്രമം നല്‍കേണ്ടതായും വന്നു. മടങ്ങിവന്ന രോഹിത് ഇംപാക്റ്റ് സബ്ബായാണ് ടൂർണമെന്റ് പൂർത്തിയാക്കിയത്.

അഫ്ഗാനിസ്ഥാനെതിരെയും ഇംഗ്ലണ്ട് പര്യടനത്തിലും രോഹിത് ലോങ് ഇന്നിങ്സുകള്‍ക്കിടെ ആ ഇഞ്ചുറി മൂലമുള്ള ബുദ്ധിമുട്ടുകള്‍ പലപ്പോഴും പ്രകടിപ്പിച്ചിരുന്നു. 2027 ലോകകപ്പിന്റെ ഫോര്‍മാറ്റ് പരിശോധിക്കുകയാണെങ്കില്‍, ഇന്ത്യ ഫൈനല്‍ വരെ എത്തുകയാണെങ്കില്‍ 13 മത്സരങ്ങളാണുണ്ടാകുക. 48 ദിവസത്തിനിടെയാണ് ഇത്രയും മത്സരങ്ങള്‍. നിലവില്‍ ടെസ്റ്റ്, ടി20 ഫോർമാറ്റില്‍ നിന്ന് വിരമിച്ചതിനാല്‍ രോഹിതിന് മതിയായ വിശ്രമം ലഭിക്കുന്നുണ്ട്, മാസങ്ങളുടെ ഇടവേളയിലോണ് രണ്ടോ മൂന്നോ ഏകദിനങ്ങള്‍ കളിക്കുന്നത്.

പക്ഷേ, ലോകകപ്പിലേക്ക് വരുമ്പോള്‍ മത്സരക്രമം സമാനമല്ല. ശരീരം പൂർണമായും സജ്ജമായിരിക്കണം. ഐപിഎല്ലിലേപോലെ 20 ഓവര്‍ ബാറ്റ് ചെയ്താല്‍ പോര, 100 ഓവര്‍ മൈതാനത്തുണ്ടാകണം. 41 ലേക്ക് എത്തുന്ന രോഹിതിന് അതിന് കഴിയുമോയെന്നതാണ് സെലക്ടർമാരുടെ പ്രധാന ആശങ്ക. ഇതിനാലാണ് ഇംഗ്ലണ്ട് പര്യടനത്തിന് മുന്നോടിയായി രോഹിതിന് സൂചന നല്‍കാൻ അവർ തയാറായത്. പക്ഷേ, രോഹിതിന്റെ ലോര്‍ഡ്‌സിലെ സെഞ്ചുറിയും ആരാധകപ്രതിഷേധവുമെല്ലാം ബിസിസിഐയെക്കൊണ്ട് തന്നെ തിരുത്തി പറയിക്കുകയും ചെയ്തു.

എന്തുകൊണ്ടാണ് സെലക്ടർമാർ ഇംഗ്ലണ്ട് പര്യടനത്തിന് മുൻപ് രോഹിതിനപ്പുറം തങ്ങള്‍ ചിന്തിക്കുന്നുവെന്ന് വ്യക്തമാക്കിയത്. രോഹിതിന് ഏകദിന ലോകകപ്പിലേക്ക് എത്താനായില്ലെങ്കില്‍ ഇന്ത്യക്ക് മുന്നിലുള്ള ഓപ്ഷൻ യശസ്വി ജയ്സ്വാളാണ്. പക്ഷേ, ഏകദിന ഫോർമാറ്റില്‍ ജയ്സ്വാളിന് മതിയായ പരിചയസമ്പത്തില്ല. ടെസ്റ്റിലെ ഇന്ത്യയുടെ സ്ഥിരം ഓപ്പണറായ ജയ്സ്വാള്‍ കരിയറില്‍ ഇതുവരെ ആറ് ഏകദിനങ്ങള്‍ മാത്രമാണ് കളിച്ചിട്ടുള്ളത്. 71 ശരാശരിയില്‍ 285 റണ്‍സാണ് ഇടം കയ്യൻ ബാറ്ററുടെ നേട്ടം.

അഫ്ഗാനിസ്ഥാനെതിരെയായിരുന്നു യുവതാരം അവസാനമായി ഏകദിനകുപ്പായമണിഞ്ഞത്, സെഞ്ചുറിയിലാണ് ഇന്നിങ്സ് അവസാനിച്ചതും. ജയ്സ്വാളിനെയാണ് 2027 ലോകകപ്പില്‍ ഇന്ത്യ ഓപ്പണറാക്കാൻ തീരുമാനിച്ചിരിക്കുന്നതെങ്കില്‍ മതിയായ അവസരം അനിവാര്യമാണ്. കുറഞ്ഞതൊരു 10-15 മത്സരങ്ങളിലെങ്കിലും അന്തിമ ഇലവന്റെ ഭാഗമാക്കേണ്ടതായും വരും. ടോപ് റാങ്കിങ് ടീമുകള്‍ക്കെതിരെ ജയ്സ്വാളിന് കാര്യമായ എക്‌സ്‌പീരിയൻസ് ഫോര്‍മാറ്റിലില്ല. ഇംഗ്ലണ്ടിനെതിരെ ഒന്നും, ദക്ഷിണാഫ്രിക്കയ്ക്ക് എതിരെ രണ്ടും ഏകദിനങ്ങളാണ് താരം കളിച്ചിട്ടുള്ളത്.

ജയ്സ്വാളിനെ മുൻനിർത്തിയാണ് ബിസിസിഐ പദ്ധതി തയാറാക്കുന്നതെങ്കില്‍ രോഹിത് തുടരുന്നത് അതിനെ സഹായിക്കുന്നതല്ല. ജയ്സ്വാള്‍ പുറത്തിരിക്കും തോറും സാധ്യതകള്‍ കുറഞ്ഞും വരും. ലോകകപ്പിലേക്ക് എത്തുമ്പോള്‍ രോഹിതിനെ തുണയ്ക്കുന്ന ഘടകം, ലോകകപ്പിലെ അയാളുടെ അസാധാരണമായ പ്രകടനങ്ങളാണ്. 2019 ലോകകപ്പിന്റെ ടോപ് സ്കോറര്‍, 2023ല്‍ അഞ്ഞൂറ് റണ്‍സിലധികം, അതും 120ന് മുകളില്‍ സ്ട്രൈക്ക് റേറ്റില്‍. ടൂര്‍ണമെന്റിന്റെ സമ്മര്‍ദങ്ങളൊന്നുമില്ലാതെ ബാറ്റ് ചെയ്യാൻ കഴിയുമെന്ന് രോഹിത് പലകുറി തെളിയിച്ചതാണ്.

ജയ്സ്വാളിന്റെ കേസിലേക്ക് വരുമ്പോള്‍ ഒരു ബിഗ് ടൂര്‍ണമെന്റ് എക്‌സ്‌പീരിയൻസിന്റെ അഭാവമുണ്ട്. താരം ഇതുവരെ ഇന്ത്യയുടെ സീനിയര്‍ ടീമിനൊപ്പം ഒരു ഐസിസി ടൂര്‍ണമെന്റ് കളിച്ചിട്ടില്ല. 2024 ടി20 ലോകകപ്പിലും 2025 ചാമ്പ്യൻസ് ട്രോഫി സ്ക്വാഡിലും അംഗമായിരുന്നെങ്കിലും അന്തിമ ഇലവനിലേക്ക് എത്തിയിരുന്നില്ല. രോഹിത് - ജയ്സ്വാള്‍ സാഗയ്ക്ക് പരിഹാരം കണ്ടെത്തണമെങ്കില്‍ വരുന്ന ഏകദിന പരമ്പരകളില്‍ ഇരുവര്‍ക്കും കൃത്യമായ അവസരങ്ങള്‍ നല്‍കേണ്ടതായി വരും. അതിന് എത്രത്തോളം സാധിക്കുമെന്നത് ചോദ്യമാണ്.

രോഹിതിനെ സംബന്ധിച്ച് ഓരോ പരമ്പരയും ഓഡിറ്റ് ചെയ്യപ്പെടും. ഫോം ഏറെ നിര്‍ണായകമാണ്, ഫിറ്റ്നസിന് അതിലേറെ പ്രാധാന്യമുണ്ടാകും. ഇരുവരേയും ടീമില്‍ ഉള്‍പ്പെടുത്തുകയാണെങ്കില്‍ ജയ്സ്വാള്‍ ബാക്ക് അപ്പ് ഓപ്പണറായായിരിക്കും ഉണ്ടാകുക. എന്ത് തീരുമാനമാണെങ്കിലും ബിസിസിഐ അതിന് ഉടൻ സ്വീകരിക്കേണ്ടതുണ്ട്. ഇല്ലെങ്കില്‍ ജയ്സ്വാളിന് മതിയായ അവസരവും ലഭിക്കില്ല, രോഹിതില്‍ ആശയക്കുഴപ്പം തീരാതെ തുടരുകയും ചെയ്യും.

അടിച്ച അടിയില്‍ വിമർശകർക്ക് ബട്ടർഫ്ലൈ ഇഫക്റ്റ്! ഡല്‍ഹിയില്‍ സഞ്ജുവിന്റെ ക്വന്റലടി

Hari Krishnan M — Wed, 16 Sep 2026 12:37:45 +0530

എട്ട് പന്തുകള്‍ നേരിട്ടിരിക്കുന്നു, ആ പേരിന് നേര്‍ക്ക് നാല് റണ്‍സ് മാത്രം. മറുവശത്ത് അഭിഷേക് ശര്‍മയുടെ ബാറ്റ് ബീസ്റ്റ് മോഡില്‍ തുടരുകയാണ്. സമ്മർദത്തിന്റെ പിരിമുറക്കം അന്തരീക്ഷത്തില്‍ ആവോളമുണ്ട്, വൈഭവിന് വേണ്ടി വഴിമാറിക്കൊടുക്കാൻ നിർദേശിക്കുന്നുവരുണ്ട്, വിരമിക്കൂവെന്ന് പറഞ്ഞ് പരിഹസിക്കുന്നവര്‍ വേറെയും. എല്ലാം നിശബ്ദമാക്കാൻ, മറികടക്കാൻ ഒരു ഇന്നിങ്സ് മതിയാകും. ഒരു ജനതയുടെ പ്രതീക്ഷകളുടെ മുഴുവൻ ഭാരവും ചുമന്ന ബാറ്റാണ്, കരിയറിനെ നിർണയിക്കാൻ പോകുന്ന ഒരു രാത്രിയുടെ വെല്ലുവിളി അത്രത്തോളമുണ്ടാകുമോ...അത് സംഭവിച്ചെ മതിയാകു...

ഒരു പകലിന് മുൻപ് തന്റെ കരിയർ തുലാസിലേക്ക് തള്ളിവിട്ട അസ്‌മത്തുള്ള ഒമര്‍സായി. ലെഗ് സ്റ്റമ്പ് ലൈനില്‍ ഒരു ഷോര്‍ട്ട് ബോള്‍, മറുപടി ഫൈൻ ലെഗിലേക്കൊരു പുള്‍ ഷോട്ട്, ബൗണ്ടറി. വീണപ്പോഴൊക്കെയും എഴുന്നേല്‍ക്കാൻ ഒരു അവസരം പോലും നല്‍കാത്തവരോട് പോരാടി പടുത്തുയര്‍ത്ത കരിയറാണ്, ഒരിക്കല്‍ക്കൂടി അയാള്‍ ഉയര്‍പ്പിനൊരുങ്ങുകയാണ്. സഞ്ജു വിശ്വനാഥ് സാംസണ്‍.

ഒരു ഓവറിന്റെ ഇടവേളയ്ക്ക് ശേഷം ഒമ‍ര്‍സായി വീണ്ടും. മിഡില്‍ സ്റ്റമ്പിനെ ലക്ഷ്യമാക്കിയൊരു ഫുള്‍ ലെങ്ത് ഡെലിവെറി. ഫ്രണ്ട് ഫൂട്ട് ക്ലിയര്‍ ചെയ്ത് സ്ട്രെയിറ്റ് ഡൗണ്‍ ദ ഗ്രൗണ്ട് ബൗണ്ടറി. ശേഷം ഫൈൻ ലെഗിലേക്ക് ഒരു ഫ്ലിക്ക്, സിക്സ്. പിന്നാലെ ഔട്ട് സൈഡ് ഓഫ് സ്റ്റമ്പ് ലൈനിലെത്തിയ ഫുള്‍ ലെങ്ത് പന്തില്‍ കവറിന് മുകളിലൂടെയൊരു ക്ലാസിക്ക് ലോഫ്റ്റഡ് ഡ്രൈവ്. ഓവറിലെ അവസാന പന്തും ബൗണ്ടറി കടത്തി 19 റണ്‍സാണ് ഒമര്‍സായിയുടെ ഓവറില്‍ സഞ്ജു സ്കോര്‍ ബോര്‍ഡിലേക്ക് ചേര്‍ത്തത്.

ഓവര്‍ ആരംഭിക്കും മുൻപ് അഭിഷേകിന്റെ സ്കോര്‍ 14 പന്തില്‍ 25 റണ്‍സും സഞ്ജുവിന്റെത് 10 പന്തില്‍ എട്ട് റണ്‍സുമായിരുന്നു. എന്നാല്‍, അഞ്ചാം ഓവര്‍ അവസാനിക്കുമ്പോള്‍ സഞ്ജു 15 പന്തില്‍ 27ലേക്കുയര്‍ന്നു, അഭിഷേക്ക് 26ലും. എ ക്ലാസിക്ക് സഞ്ജു ഗിയര്‍ ഷിഫ്റ്റ്. പവര്‍പ്ലേയുടെ അവസാന ഓവര്‍ ഇബ്രാഹി സദ്രാൻ ഏല്‍പ്പിച്ചത് മുഹമ്മദ് നബിയെയായിരുന്നു. സിക്സറോടെ അഭിഷേക് വരവേറ്റു, ശേഷം സഞ്ജുവിന് സ്ട്രൈക്ക് കൈമാറി.

സഞ്ജു എത്രത്തോളം ഫീല്‍ഡിനെ മനസിലാക്കിയാണ് കളിക്കുന്നതെന്നതിന്റെ ഉദാഹരണമായിരുന്നു നബിയുടെ ഓവര്‍. യോര്‍ക്കറായിരുന്നു സഞ്ജുവിന് ആദ്യം നബി കാത്തുവെച്ചത്, എന്നാല്‍ അല്‍പ്പം പിഴച്ചു. വിക്കറ്റില്‍ മുട്ടുറപ്പിച്ചൊരു സ്ലോഗ് സ്വീപ്പ്, ഡീപ് മിഡ് വിക്കറ്റിന് മുകളിലൂടെയൊരു സിക്സ്. പിന്നാലെ നേരിട്ട ലെങ്ത് ബോള്‍ മിഡ് ഓഫിലൂടെ ബൗണ്ടറിയിലേക്ക്, പ്യുവര്‍ ടൈമിങ്. വിഡ്ത് ലഭിച്ച പന്ത് കവറിലൂടെ അതിവേഗം സഞ്ചരിച്ചു.

ഒടുവില്‍ ലോങ് ഓഫിലേക്ക് ബാക്ക് ഫൂട്ടില്‍ ഒരു സിക്സര്‍ കൂടി നേടി പവര്‍പ്ലേ അവസാനിപ്പിക്കുമ്പോള്‍ ഇന്ത്യയുടെ സ്കോര്‍ 82, സഞ്ജു 19 പന്തില്‍ 47. കമന്ററി ബോക്സിലിരുന്ന് സഞ്ജയ് മഞ്ജരേക്കറിന് ഒന്നേ പറയാനുണ്ടായിരുന്നുള്ളു, സഞ്ജു സാംസണ്‍ ഈസ് ബാക്ക്.

റാഷിദ് ഖാന്റെയായിരുന്നു അടുത്ത ഊഴം. അഭിഷേക് ശര്‍മയെ പുറത്താക്കിയ ആത്മവിശ്വാസത്തിലെത്തിയ റാഷിദിനെ നേരിട്ട ആദ്യ പന്തില്‍ തന്നെ ബൗണ്ടറിയിലേക്ക് പറഞ്ഞയച്ച് അര്‍ദ്ധ ശതകം തികച്ചു. അതും കേവലം 20 പന്തുകളില്‍. അന്താരാഷ്ട്ര കരിയറിലെ സഞ്ജു ഏറ്റവും വേഗമേറിയ ഫിഫ്റ്റി. ബാറ്റുയര്‍ത്തിയൊരു ചെറു ചിരിയും. കം ബാക്ക് ഡണ്‍.

അന്താരാഷ്ട്ര ടി20യിൽ ഓപ്പണറായി 1,000 റൺസ് എന്ന നാഴികക്കല്ലിലേക്ക് എത്തുന്ന അഞ്ചാമത്തെ മാത്രം ഇന്ത്യൻ താരമാകാനും സഞ്ജുവിനായി. അതും 181 എന്ന ഭീമമായ സ്ട്രൈക്ക് റേറ്റില്‍. രോഹിത് ശർമ്മ, കെ. എൽ. രാഹുൽ, ശിഖർ ധവാൻ, അഭിഷേക് ശർമ്മ എന്നിവരാണ് ഈ നേട്ടം കൈവരിച്ച മറ്റ് താരങ്ങൾ.

റാഷിദിന്റെ ഷോര്‍ട്ട് ബോളില്‍ ഒരു സിക്സുകൂടി, ഇക്കുറി മിഡ് വിക്കറ്റിലേക്ക്. ഒരു വലിയ ഇന്നിങ്സിലേക്ക് നയിക്കാമായിരുന്നു, 13 ഓവര്‍ അപ്പോഴും ബാക്കിയുണ്ട്. എന്നാല്‍, റാഷിദിന് മുന്നില്‍ കീഴടങ്ങേണ്ടി വന്നു. 22 പന്തില്‍ 57 റണ്‍സ്. ഏഴ് ഫോറും നാല് സിക്സും. എട്ട് പന്തില്‍ നാല് റണ്‍സിന് ശേഷം നേരിട്ട 14 പന്തില്‍ 53 റണ്‍സ്. ഇന്നിങ്സ് സ്ട്രൈക്ക് റേറ്റ് 259. ഫോം ഈസ് ടമ്പററി, ക്ലാസ് ഈസ് പെര്‍മെനന്റ്.

വൈഭവിന് അവസരം നിഷേധിച്ച് സഞ്ജുവിനെ ഓപ്പണറാക്കിയപ്പോള്‍ ടെലിവിഷൻ ചാനല്‍ മാറ്റി സിനിമ കാണാൻ തയാറായ ഒരു മുൻ ഇന്ത്യൻ താരമുണ്ടായിരുന്നു, കൃഷ്ണമചാരി ശ്രീകാന്ത്. സഞ്ജു പറഞ്ഞത് ആവര്‍ത്തിക്കുകയാണ്, വിമര്‍ശനങ്ങളെ നിശ്ബ്ദമാക്കി ആത്മവിശ്വാസത്തോടെ തുടരനാണ് ശ്രമിക്കുന്നത്. ഞാൻ വരും ഉയര്‍ന്ന സ്ട്രൈക്ക് റേറ്റില്‍ തന്നെ സ്കോര്‍ ചെയ്യും. ഞാൻ പരാജയപ്പെടുമായിരിക്കും, കൂടുതല്‍ വിമര്‍ശനങ്ങള്‍ കേള്‍ക്കേണ്ടി വരുമായിരിക്കും. എല്ലാത്തിനേയും മറികടക്കാനുള്ള അനുഭവസമ്പത്തും പക്വതയുമുണ്ട്, that’s the way we are built in Indian cricket. സഞ്ജു തുടരും...15 വയസുകാരനോടുള്ള പോരാട്ടവും...

മാറ്റമില്ലാതെ മാഞ്ചസ്റ്റർ യുണൈറ്റഡ്, കാരിക്കിനും പറ്റില്ലെ? യഥാർത്ഥ പ്രശ്നമെന്താണ്?

Hari Krishnan M — Thu, 24 Sep 2026 13:19:35 +0530

ഓള്‍ഡ് ട്രാഫോര്‍ഡില്‍ രണ്ട് - പൂജ്യത്തിന് മുന്നില്‍ നിന്ന ശേഷം മാഞ്ചസ്റ്റർ യുണൈറ്റഡ് പരാജയപ്പെടുന്നത് കണ്ടിട്ടുണ്ടോ...നാലരപതിറ്റാണ്ടോളമായിരുന്നു അങ്ങനെയൊരു കാഴ്ച യുണൈറ്റഡ് ആരാധകർക്ക് മുന്നിലെത്തിയിട്ട്. കരബാവ് കപ്പിന്റെ മൂന്നാം റൗണ്ടില്‍ ബ്രൈറ്റണ്‍ ആ നീണ്ട ഇടവേള അവസാനിപ്പിച്ചു. പ്രതാപകാലം വീണ്ടെടുത്ത് തരുമെന്ന് പ്രതീക്ഷവെച്ച മൈക്കിള്‍ കാരിക്കിന്റെ കീഴില്‍ തന്നെ അത് സംഭവിച്ചിരിക്കുന്നു.

ഇന്ററിം മാനേജരായി കാരിക്ക് യൂണൈറ്റഡിനായി സൈഡ് ലൈനപ്പുറം നിലയുറപ്പിച്ചതില്‍പ്പിന്നെ കഴിഞ്ഞ സീസണില്‍ യുണൈറ്റഡിനോളം പോയിന്റുകള്‍ വാരിക്കൂട്ടി ടീമില്ല. ഇക്കുറിയോ, അഞ്ച് മത്സരങ്ങളില്‍ നിന്ന് അഞ്ച് പോയിന്റുമായി പ്രീമിയര്‍ ലീഗില്‍ 12-ാം സ്ഥാനം. ചാമ്പ്യൻസ് ലീഗില്‍ സബായെ കീഴടക്കിയത് മാത്രമാണ് ഒരു വലിയ വിജയമായി ചൂണ്ടിക്കാണിക്കുനുള്ളത്. എലൈറ്റ് ടീമായ കണക്കാക്കാൻ കഴിയുന്ന സംഘമല്ല സബാ. യഥാര്‍ത്ഥത്തില്‍ യുണൈറ്റഡിന്റെ പ്രശ്നമെന്താണ്?

യുണൈറ്റഡിന്റെ പ്രതിരോധനിര. ലൂക്ക് ഷോ, ലിസാൻഡ്രൊ മാർട്ടിനസ്, ഹാരി മഗ്വയർ, ഡിയോഗൊ ഡലോട്ട്. ബാക്ക് ലൈനിലേക്കാണ് വിമർശനങ്ങളെല്ലാം ഉയരുന്നത്. പ്രീമിയർ ലീഗില്‍ ഏറ്റവും കുറവ് ഷോട്ടുകള്‍ വഴങ്ങിയ ടീമുകളിലൊന്നാണ് യുണൈറ്റഡ്. ഇവിടെ സുപ്രധാനമായത്, തൊടുക്കുന്ന ഷോട്ടുകളില്‍ പകുതിയോളവും ഓണ്‍ ടാർഗറ്റിലെത്തിക്കാൻ എതിരാളികള്‍ക്ക് കഴിയുന്നുണ്ട് എന്നതാണ്. പ്രത്യേകിച്ചും പെനാലിറ്റി ബോക്സിനുള്ളില്‍.

ഫുള്‍ഹാമിനെതിരായ മത്സരം തന്നെയെടുക്കാം. സീസണില്‍ ഒരു ജയം പോലും നേടാനാകാത്ത സംഘമാണ് ആല്‍വാരോ ആർബലോവയുടെ ഫുള്‍ഹാം. യുണൈറ്റഡിനെതിരെ 11 ഷോട്ടുകളാണ് ഫുള്‍ഹാം എടുത്തത് ആറും ഓണ്‍ ടാർഗറ്റായിരുന്നു, എതിർ താരങ്ങളെ മാര്‍ക്ക് ചെയ്യാതെ പന്തിലേക്ക് ഫോക്കസ് ചെയ്യുമ്പോള്‍ കാരിക്കിന്റെ ഡിഫൻസീവ് ഷേപ്പ് തന്നെ നഷ്ടപ്പെടുന്നുണ്ട്. നേരത്തെ പറഞ്ഞതുപോലെ പെനാലിറ്റി ബോക്സിനുള്ളിലും പുറത്തും. ഇത് എതിര്‍ ടീമിലെ വിങ്ങര്‍മാര്‍ക്കും ക്രിയേറ്റീവ് മിഡ് ഫീല്‍ഡേഴ്സിനും ആവശ്യത്തിലധികം സ്പേസ് നല്‍കുന്ന ഘടകമാണ്.

ലോ ബ്ലോക്കിലും കൗണ്ടര്‍ അറ്റാക്കിങ്ങിലും വളരെ കംഫര്‍ട്ടബിളായി കളിക്കാൻ കഴിയുന്ന യുണൈറ്റഡിന്റെ താളം തെറ്റുന്നത് ഹൈ പ്രെസിങ്ങിന് ശ്രമിക്കുമ്പോഴാണ്. കൃത്യമായൊരു ഫോക്കസില്ലാതെ ആശയക്കുഴപ്പത്തിലാകുന്നത് പോലെ, വെഥ‍ര്‍ ടു പ്രേസ് ഓര്‍ ഡിഫൻഡ് എന്നതില്‍. പ്രേസിങ്ങില്‍ വീഴ്ച സംഭവിച്ചാല്‍ ഓപ്പണന്റിന് ഗ്രൗണ്ട് പൂര്‍ണമായും വിട്ടുനല്‍കുന്നതുപോലെയാണ് സാഹചര്യം.

മറ്റൊന്ന് ഒരു ക്രിയേറ്ററുടെ അഭാവവും ബ്രൂണോയിലെ ഓവര്‍ ഡിപ്പൻഡൻസുമാണ്. പോള്‍ സ്കോള്‍സ്, ‍ബോബി കാള്‍ട്ടണ്‍, യുവാൻ മാറ്റ, പോള്‍ പോഗ്ബ തുടങ്ങിയ മികച്ച മിഡ് ഫീല്‍ഡര്‍മാരുടെ സാന്നിധ്യമുണ്ടായിരുന്ന യുണൈറ്റഡിന് ഇന്ന് നിരത്തിവെക്കാൻ ബ്രൂണോയ്ക്ക് അപ്പുറം ഒരു പേരില്ല. ദ അത്ലറ്റിക്ക് പുറത്തുവിട്ട കണക്കുകള്‍ പ്രകാരം കഴിഞ്ഞ ഓഗസ്റ്റ് മുതല്‍ യുണൈറ്റഡ് താരങ്ങളുടെ അസിസ്റ്റുകളില്‍ 44 ശതമാനവും ബ്രൂണോയുടെ പേരിലാണ്, ബിഗ് ചാൻസ് ക്രിയേറ്റഡിലും 40ന് മുകളിലാണ് പോര്‍ച്ചുഗല്‍ താരത്തിന്റെ സംഭാവന.

ഇതിന്റെ അര്‍ത്ഥം ബ്രൂണോയാണ് കോര്‍ എന്ന് മാത്രമല്ല, ബ്രൂണോ നിറം മങ്ങിയാല്‍ യുണൈറ്റഡിന് താളമില്ല എന്നുകൂടിയാണ്. താരം ഔട്ട് ഓഫ് ഫോം ആകുന്ന ദിവസങ്ങളില്‍ റെസ്പോണ്‍സിബിലിറ്റി ഏറ്റെടുക്കുന്നതില്‍ സഹതാരങ്ങളും പിന്നോട്ടാണ്, റാഷ്ഫോര്‍ഡിനെപ്പോലൊരു താരം തിരികെ വന്നപ്പോഴും ഇതില്‍ മാറ്റമുണ്ടാകുന്നില്ല എന്നത് മറ്റൊരു പോരായ്മ.

ഇനി യുണൈറ്റഡിന്റെ അറ്റാക്കിങ് ലൈനപ്പിലെ കണ്‍ഫ്യൂഷനുകള്‍. മാത്തയോസ് കൂന്യ, ബെഞ്ചമിൻ സെസ്കോ, എംബൂമോ, അമാദ്...അഞ്ച് പേരും അഞ്ച് തരത്തിലുള്ള അഡ്വാന്റേജസാണ് കാരിക്കിന് നല്‍കുന്നത്. ഇവര്‍ കളത്തിലുള്ളപ്പോള്‍ ഏത് തരത്തില്‍ ടാക്റ്റിക്കലി ഷിഫ്റ്റ് ചെയ്യണമെന്നതിലും ക്ലാരിറ്റിയുണ്ടാകേണ്ടതുണ്ട്. എംബുമോ പേസിന് മുൻഗണന നല്‍കുകയാണെങ്കില്‍ മധ്യനിരയില്‍ നിന്ന് ത്രൂ ബോളുകള്‍ എത്തണം, സെസ്കോയാണെങ്കില്‍ ഏരിയല്‍ ബോളുകള്‍ക്ക് പ്രാധാന്യം കൊടുക്കാം...ക്യൂന്യയും റാഷ്ഫോര്‍ഡും അല്‍പ്പം കൂടി ഫ്ലെക്സിബിളുമാണ്.

ഇതിനൊപ്പം ചേര്‍ത്തുവെക്കേണ്ടത് ഫൈനല്‍ തേഡിലെ ഡിസിഷൻ മേക്കിങ്ങിലെ പാളിച്ചകളാണ്. ഔട്ട് സൈഡ് ബോക്സ് ഷോട്ടുകള്‍ കൂടുതലായും യുണൈറ്റഡ് താരങ്ങള്‍ തിരഞ്ഞെടുക്കുന്നത് സീസണിലെ ഒരു പ്രവണതയാണ്. അതിപ്പോള്‍ പെനാലിറ്റി ബോക്സിലേക്ക് പാസ് നല്‍കാനുള്ള അവസരം ഉണ്ടെങ്കില്‍പ്പോലും. ഫുള്‍ ഹാമിനെതിരായ കൂന്യയുടെ വിന്നിങ് ഗോള്‍ പോലും ഉദാഹരണമായി കാണാനാകും.

ഇന്ററിം മാനേജര്‍ കാലം പോലെ കാരിക്കിന് ഇക്കുറി എളുപ്പമാകില്ല. ചാമ്പ്യൻസ് ലീഗ് മുന്നിലുണ്ട്. നേരിടുന്ന ടീമുകള്‍ പ്രീമിയര്‍ ലീഗില്‍ മാത്രം ഒതുങ്ങുന്നതുമല്ല. കാരിക്കിന്റെ റിയല്‍ ടെസ്റ്റ് ഇനിയാണ്...

ഏഷ്യാഡില്‍ മെഡല്‍ നീന്തിയെടുക്കാന്‍ നടന്‍ മാധവന്റെ മകന്‍ വേദാന്ത്‌

Vipulnath P — Sat, 19 Sep 2026 08:02:41 +0530

ജപ്പാനിലെ ഐചി നഗോയ ഏഷ്യന്‍ ഗെയിംസില്‍ പങ്കെടുക്കുന്ന ഇന്ത്യന്‍ സ്‌ക്വാഡില്‍ സിനിമാ ലോകവുമായി ബന്ധമുള്ള ഒരു കായിക താരമുണ്ട്‌. സിനിമാ ലോകത്ത്‌ മാഡി എന്ന വിളിപ്പേരില്‍ അറിയപ്പെടുന്ന പത്മശ്രീ ജേതാവ്‌ ആര്‍ മാധവന്റെ മകന്‍ വേദാന്ത്‌ മാധവനാണ്‌ ആ താരം. ഏഷ്യാഡിനുള്ള ഇന്ത്യയുടെ നീന്തല്‍ സ്‌ക്വാഡിലെ അംഗമാണ്‌ 21 കാരനായ വേദാന്ത്‌.ഏഷ്യന്‍ ഗെയിംസ്‌ നീന്തലില്‍ മൂന്ന്‌ ഇനങ്ങളിലാണ്‌ വേദാന്ത്‌ മത്സരിക്കുന്നത്‌. 200 മീറ്റര്‍ ഫ്രീസ്റ്റൈല്‍, 200 മീറ്റര്‍ ബാക്‌സ്‌ട്രോക്ക്‌, 4-200 മീറ്റര്‍ ഫ്രീസ്റ്റൈല്‍ റിലേ എന്നിവയാണ്‌ വേദാന്തിന്റെ മത്സര ഇനങ്ങള്‍. കരിയറിന്റെ തുടക്കം മുതലേ വേദാന്ത്‌ ശ്രദ്ധ നല്‍കിയിരുന്നത്‌ ദീര്‍ഘദൂര മത്സരങ്ങള്‍ക്കായിരുന്നു. എന്നാല്‍, പതിവിന്‌ വിപരീതമായി കൂടുതല്‍ വേഗത ആവശ്യമുള്ള ഷോര്‍ട്ട്‌ റേസുകളില്‍ മത്സരിക്കേണ്ടി വരുന്നതാണ്‌ വേദാന്ത്‌ നേരിടുന്ന വെല്ലുവിളി.

ഒളിമ്പ്യന്‍ താരങ്ങളായ ശ്രീഹരി നടരാജ്‌, സജന്‍ പ്രകാശ്‌ എന്നിവരുള്‍പ്പെടുന്ന നീന്തല്‍ സ്‌ക്വാഡില്‍ അംഗമായ വേദാന്ത്‌ ഏത്‌ വെല്ലുവിളിയും ഏറ്റെടുക്കാനുള്ള മാനസികാവസ്ഥയിലാണ്‌. അതിനൊരു കാരണം, നീന്തല്‍ താരമായി മാറാനുള്ള തീരുമാനം മാതാപിതാക്കളുടേതോ മറ്റാരുടേതുമല്ലായിരുന്നു. അത്‌ വേദാന്തിന്റെ പാഷനേറ്റ്‌ ഡിസിഷനായിരുന്നു - രാജ്യത്തിന്‌ വേണ്ടി അന്താരാഷ്ട്ര സര്‍ക്യൂട്ടില്‍ മെഡല്‍ നേടുന്ന ഒരു നീന്തല്‍ താരമായി മാറുക എന്നത്‌. അഅതുകൊണ്ടു തന്നെ ലോംഗ്‌ റേസില്‍ നിന്ന്‌ ഷോര്‍ട്‌ റേസിലേക്കുള്ള മാറ്റം പോലും വലിയ അവസരമായിട്ടാണ്‌ വേദാന്ത്‌ കാണുന്നത്‌.

സിനിമയിലെ മുന്‍നിര താരത്തിന്റെ മകനായിട്ടും ആ പശ്ചാത്തലത്തിലൊന്നും അഭിരമിക്കാതെ വേദാന്ത്‌ തന്റേതായ ഒരു ലോകം തിരഞ്ഞെടുക്കുകയായിരുന്നു. അതാണ്‌, സ്‌പോര്‍ട്‌സ്‌ കരിയര്‍. സ്‌കൂളില്‍ പഠിക്കുന്ന കാലത്ത്‌ തന്നെ വേദാന്ത്‌ നീന്തല്‍ മത്സരങ്ങളില്‍ പങ്കെടുക്കുമായിരുന്നു. തന്നെക്കാള്‍ പ്രായം കൂടിയവരോട്‌ മത്സരിച്ച്‌ ജയിക്കാന്‍ കഴിഞ്ഞതോടെ വേദാന്തിന്റെ ആത്മവിശ്വാസം വര്‍ധിച്ചു. നീന്തല്‍ ഒരു കരിയറായി തിരഞ്ഞെടുത്ത വേദാന്തിന്‌ മാധവനും ഭാര്യ സരിതയും പൂര്‍ണ പിന്തുണ നല്‍കുകയായിരുന്നു.

സിനിമകളില്‍ നിന്ന്‌ അവധിയെടുത്ത്‌ മാധവന്‍

കഠിനമായ അച്ചടക്കമാണ്‌ തന്റെ മകനില്‍ നടന്‍ മാധവന്‍ ദര്‍ശിച്ച ഏറ്റവും വലിയ ഗുണം. പുലര്‍ച്ചെ നാല്‌ മണിക്ക്‌ ആരംഭിക്കുന്ന കഠിനമായ പരിശീലനം, ചിട്ടയോടെയുള്ള ഭക്ഷണക്രമം, അനാവശ്യ കൂട്ടുകെട്ടുകളില്ലാത്തത്‌, രാത്രി വൈകിയുള്ള വിനോദങ്ങളില്‍ നിന്നുള്ള വിട്ടുനില്‍ക്കല്‍ എന്നിവയെല്ലാം വേദാന്ത്‌ സ്വയം തെരഞ്ഞെടുത്ത വഴികളാണ്‌. ഒരു സന്യാസിയെ പോലെയുള്ള മകന്റെ അച്ചടക്കമാണ്‌ അവനെ ഒരു അന്താരാഷ്ട്ര താരമാക്കി മാറ്റിയതെന്ന്‌ മാധവന്‍ തെല്ലൊരു അഭിമാനത്തോടെ പറഞ്ഞിട്ടുണ്ട്‌.മകന്‍ ഇഷ്ടപ്പെട്ട്‌ തെരഞ്ഞെടുത്ത കരിയറിന്‌ എല്ലാ വിധ പിന്തുണയും നല്‍കാന്‍ മാധവന്‍ ഒരുക്കമായിരുന്നു. അതിന്‌ വേണ്ടി തന്റെ സിനിമാ തിരക്കുകള്‍ പോലും മാധവന്‍ ക്രമീകരിച്ചു. കോവിഡ്‌ കാലത്തായിരുന്നു വേദാന്തിന്റെ കരിയറിലെ ഏറെ നിര്‍ണായകമായ തീരുമാനം മാതാപിതാക്കള്‍ സ്വീകരിച്ചത്‌. മഹാമാരിയുടെ സമയത്ത്‌ ഇന്ത്യയിലെ നീന്തല്‍ കുളങ്ങളെല്ലാം അടച്ചിട്ടത്‌ വേദാന്തിന്റെ പരിശീലനം മുടക്കി.

മകന്‍ സ്വപ്‌നം കാണുന്ന അന്താരാഷ്ട്ര കരിയറിനെ ബാധിക്കുമെന്ന്‌ മനസിലാക്കിയ മാധവന്‍ മുംബൈയില്‍ നിന്ന്‌ ദുബൈയിലേക്ക്‌ താമസം മാറാന്‍ തീരുമാനിച്ചു. ഇത്‌ വേദാന്തിന്റെ കരിയറിന്‌ ഏറെ ഗുണം ചെയ്‌തു. ജൂണില്‍ നടന്ന ദേശീയ ചാമ്പ്യന്‍ഷിപ്പില്‍ 200 മീറ്റര്‍ ഫ്രീസ്റ്റൈലില്‍ തന്റെ കരിയറിലെ ഏറ്റവും മികച്ച സമയം കുറിച്ചാണ്‌ വേദാന്ത്‌ ഇന്ത്യന്‍ ടീമിലേക്ക്‌ തെരെഞ്ഞെടുക്കപ്പെട്ടത്‌. ദീര്‍ഘദൂര മത്സരങ്ങളില്‍ നിന്ന്‌ സ്‌പ്രിന്റ്‌ ഇനങ്ങളിലേക്കുള്ള മാറ്റം ഉള്‍ക്കൊള്ളാന്‍ വെയ്‌റ്റി ട്രെയ്‌നിംഗ്‌, കാലുകളുടെ മസില്‍ സ്‌ട്രെംക്തനിംഗ്‌, കര്‍ശനമായ ഡയറ്റ്‌ എന്നിവയില്‍ ശ്രദ്ധ കേന്ദ്രീകരിച്ചിരിക്കുകയാണ്‌ വേദാന്ത്‌.

ഇന്ത്യക്കാരുടെ ജനിതകം അത്രമോശമല്ല..

ഒരു കായിക താരത്തിന്‌ വേണ്ട ആത്മവിശ്വാസവും അറിവും ഗുരുക്കന്‍മാരില്‍ നിന്നും അനുഭവങ്ങളില്‍ നിന്നും വായനയിലൂടെയുമെല്ലാം വേദാന്ത്‌ സ്വായത്തമാക്കിയിട്ടുണ്ട്‌. അടുത്തിടെ ഒരു അഭിമുഖത്തില്‍ വേദാന്ത്‌ ഇന്ത്യക്കാരുടെ ജനിതക ഘടനയെ കുറിച്ച്‌ സംസാരിച്ചത്‌ ഏറെ ശ്രദ്ധേയമായിരുന്നു.ജനിതകപരമായി വളരെ മികച്ചവരാണ്‌ ഇന്ത്യക്കാര്‍, അതുകൊണ്ടു തന്നെ മികച്ച കഴിവുകള്‍ പുറത്തെടുക്കാന്‍ ചില കാര്യങ്ങളില്‍ ഒന്ന്‌ ജാഗ്രത കാണിച്ചാല്‍ മതി. ഭക്ഷണക്രമം, അച്ചടക്കം, പ്രചോദനം എന്നിവയുണ്ടെങ്കില്‍ ഇന്ത്യയില്‍ നിന്ന്‌ മികച്ച കായിക താരങ്ങളുണ്ടാകുമെന്നാണ്‌ വേദാന്തിന്റെ നിരീക്ഷണം. കായിക മേഖലയില്‍ എന്നല്ല മറ്റേത്‌ മേഖലയിലും ഇന്ത്യക്കാരെ പിറകോട്ട്‌ വലിക്കുന്നത്‌ തെറ്റായ ഭക്ഷണ രീതിയാണെന്ന്‌ വേദാന്ത്‌ സമര്‍ഥിക്കുന്നത്‌ ഇന്ത്യന്‍ ഫുഡ്‌ സയന്‍സ്‌ വിദഗ്‌ധനും എഴുത്തുകാരനുമായ അശോക്‌ കൃഷിനെ ഫോളെ ചെയ്‌തുള്ള അറിവുകളോടെയാണ്‌.

പരിണാമപ്രക്രിയയുടെ ഫലമായി ഇന്ത്യക്കാരുടെ ശരീരത്തില്‍ കൊഴുപ്പ്‌ കൂടുതല്‍ സംഭരിക്കപ്പെടുന്നുണ്ട്‌. ഏഷ്യന്‍ ഇന്ത്യന്‍ ഫിനോടൈപ്പ്‌, അഥവാ തിന്‍ ഫാറ്റ്‌ ബോഡി ടൈപ്പ്‌ എന്നാണ്‌ ഈ പ്രവണത അറിയപ്പെടുന്നത്‌. ആയിരക്കണക്കിന്‌ വര്‍ഷങ്ങള്‍ക്ക്‌ മുമ്പ്‌ വേട്ടയാടി ഭക്ഷണം കണ്ടെത്തുന്ന രീതിയില്‍ നിന്ന്‌ കൃഷിയിലേക്കുള്ള മാറ്റത്തിന്‌ ശേഷമാണ്‌ നമ്മുടെ ശരീരം ഇത്തരത്തില്‍ പരിണമിച്ചതെന്ന്‌ അശോക്‌ കൃഷിനെ ഉദ്ധരിച്ച്‌ വേദാന്ത്‌ പറയുന്നു. കഴിഞ്ഞ കുറച്ച്‌ നൂറ്റാണ്ടുകളായി എല്‍ നിനോ സതേണ്‍ ഒസിലേഷന്‍ എന്ന കാലാവസ്ഥ പ്രതിഭാസം കാരണം മണ്‍സൂണ്‍ മഴ അപ്രവചനീയമായി മാറി. ഇത്‌ കൃഷിയെ ബാധിച്ചു.

ഇതോടെ, കാര്യമായ പേശീബലം വളര്‍ത്തുന്നതിന്‌ പകരം ആന്തരികാവയവങ്ങള്‍ക്ക്‌ ചുറ്റിലും ശരീരം കൊഴുപ്പിനെ ശേഖരിച്ചു വെക്കാന്‍ തുടങ്ങി. ഇത്‌ തലമുറകളായി ആവര്‍ത്തിച്ചുണ്ടായ ക്ഷാമങ്ങളെ അതിജീവിക്കാന്‍ മനുഷ്യരെ സഹായിച്ചു. അതുകൊണ്ടു തന്നെ, കഠിനമായി അധ്വാനിക്കുകയും കൃത്യമായ ഭക്ഷണക്രമീകരണം കൊണ്ടുവരികയും ചെയ്‌താല്‍ ഇന്ത്യക്കാര്‍ക്ക്‌ അവരുടെ ജനിതക ഗുണങ്ങളെ കുറച്ചെങ്കിലും ഉപയോഗപ്പെടുത്താന്‍ സാധിച്ചേക്കുമെന്ന്‌ വേദാന്ത്‌ വിലയിരുത്തുന്നു.

വിദേശ താരങ്ങള്‍ സ്വര്‍ണമെഡല്‍ നേടുമ്പോള്‍, ഇന്ത്യന്‍ താരങ്ങള്‍ക്ക്‌ ജനിതകമായി കായിക കരുത്തില്ലെന്ന്‌ പറഞ്ഞ്‌ മാറിയിരിക്കുന്ന ജനറേഷനെയല്ല വേദാന്ത്‌ പ്രതിനിധാനം ചെയ്യുന്നത്‌. അയാള്‍ കഠിനമായി അധ്വാനിക്കുന്നു, പുലര്‍ച്ചെ നാല്‌ മണിക്കെഴുന്നേറ്റ്‌ പരിശീലനം ആരംഭിക്കുന്നു...രാജ്യത്തിന്റെ അഭിമാനമാകാന്‍ ജീവിതം മാറ്റിവെച്ചിരിക്കുന്നു...ഏഷ്യന്‍ ഗെയിംസ്‌ നീന്തലില്‍ പന്ത്രണ്ട്‌ വര്‍ഷങ്ങള്‍ക്ക്‌ ശേഷം വേദാന്തിലൂടെ ഇന്ത്യ മെഡല്‍ പോഡിയത്തില്‍ തിരിച്ചെത്തുമോ എന്ന്‌ നമുക്ക്‌ കാത്തിരുന്ന്‌ കാണാം...

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

അത്ര അഗ്രസീവല്ല, ക്ഷമയാണ് കൂടുതല്‍! ശൈലിമാറ്റം രോഹിതിനെ തുണയ്ക്കുന്നുണ്ടോ?

Hari Krishnan M — Tue, 29 Sep 2026 13:05:33 +0530

ഇന്ത്യൻ ക്രിക്കറ്റിന്റെ ഡിഎൻഎ തന്നെ തിരുത്തിയ ഒരു മനോഭാവം, അതിന്റെ പേര് രോഹിത് ശ‍‍ര്‍മ എന്നാണ്. വിരാട് കോലിയില്‍ നിങ്ങള്‍ക്ക് ആ സമീപനത്തിന്റെ പുതിയൊരു പതിപ്പ് കാണാം, കൂടുതല്‍ അഗ്രസീവും കണ്‍ട്രോള്‍ഡുമായൊരു വേര്‍ഷൻ. എന്നാല്‍, രോഹിതിലോ. ഇന്ന് രോഹിതിന്റെ ഇന്നിങ്സുകളില്‍ കരുതലും ക്ഷമയുമാണ് പ്രകടമാകുന്നത്. ലോകക്രിക്കറ്റില്‍ ഇന്ത്യൻ ടീമിനെ ഒരു പവര്‍ഹൗസാക്കി മാറ്റിയ ഫിയര്‍ലസ് ബാറ്റിങ് രോഹിത് എന്തുകൊണ്ട് മാറ്റിവെച്ചു. അതൊരു ശരിയായ തീരുമാനമായിരുന്നോ?

2025 ചാമ്പ്യൻസ് ട്രോഫി ഫൈനലിന് ശേഷമാണ് രോഹിത് തന്റെ എ ഗെയിം ഷിഫ്റ്റ് ചെയ്തത്. കൃത്യമായി പറഞ്ഞാല്‍ ക്യാപ്റ്റൻസി നഷ്ടമായതിന് ശേഷം. 2023 ഏകദിന ലോകകപ്പില്‍ ആരംഭിച്ച ആ സെല്‍ഫ്‌ലസ് ക്രിക്കറ്റ് ചാമ്പ്യൻസ് ട്രോഫി നേടിക്കൊടുക്കുന്നത് വരെ തുടർന്നു. ശേഷം നടന്ന ഓസ്ട്രേലിയൻ പര്യടനം മുതലാണ് മാറ്റം. ഇത് കൂടുതല്‍ വിസിബിളാകുന്നത് ബാറ്റിങ്ങിന് പ്രതികൂലമായ വിക്കറ്റുകളിലുമാണ്. തന്റെ കരിയറിലുടനീളം രോഹിത് അറിയപ്പെട്ടിരുന്ന ബിഗ് ഇന്നിങ്സുകള്‍ കളിക്കാൻ കാപ്പബിലിറ്റിയുള്ള താരമായാണ്.

ഫോർമാറ്റിലെ മൂന്ന് ഇരട്ടസെഞ്ചുറികളും നിരവധി 150 പ്ലസ് സ്കോറുകളും ഉദാഹരണമാണ്. എന്നാല്‍, ടീമിന് മുൻഗണന നല്‍കി രോഹിത് തന്റെ വിക്കറ്റിനെ ബലികൊടുക്കാൻ തീരുമാനിച്ച കാലം മുതല്‍ അത്തരം ഇന്നിങ്സുകളും അഭാവമുണ്ട്. 2019 ലോകകപ്പില്‍ അഞ്ച് സെഞ്ചുറി നേടിയ രോഹിതിന് 2023ല്‍ ഒരു ശതകം മാത്രമാണ് കുറിക്കാനായത്. ഇതിനിടയില്‍ 130-150 റേയ്ഞ്ച് സ്ട്രൈക്ക് റേറ്റില്‍ താരത്തിന്റെ നിരവധി 40 പ്ലസ് സ്കോറുകളും കാണാൻ കഴിയും. പക്ഷേ, രോഹിതിന്റെ ശൈലി മാറ്റത്തിന് ശേഷമോ.

കഴിഞ്ഞ അഞ്ച് ഏകദിനങ്ങളെടുക്കാം. വിൻഡീസിനെതിരെ നേരിട്ട ആദ്യ പത്ത് പന്തില്‍ പത്ത് റണ്‍സ്, സ്ട്രൈക്ക് റേറ്റ് നൂറും ഡോട്ട് ബോളുകള്‍ എഴുമാണ്. ഇംഗ്ലണ്ടിനെതിരായ മൂന്നാം ഏകദിനത്തില്‍ പന്തില്‍ എട്ട് റണ്‍സ്. അഞ്ച് ഡോട്ട് ബോളുകള്‍. കാർഡിഫില്‍ ഒൻപത് റണ്‍സ്, ആറ് ഡോട്ട് ബോളുകള്‍. ബിർമിങ്ഹാമില്‍ നാല് റണ്‍സും ഏഴ് ഡോട്ടും. അഫ്ഗാനിസ്ഥാനെതിരെ ഒൻപത് റണ്‍സ്, ഏഴ് ഡോട്ട്. ആകെ 50 പന്തുകളില്‍ 40 റണ്‍സ് സ്ട്രൈക്ക് റേറ്റ് 80ലുമാണ് എത്തി നില്‍ക്കുന്നത്. അറ്റാക്കിങ് ഷോട്ടുകളുടെ ശതമാനം തീരെക്കുറഞ്ഞു എന്നത് മാത്രമല്ല, ബൗണ്ടറികളുടെ എണ്ണവും കുറഞ്ഞു.

മേല്‍പ്പറഞ്ഞ 50 പന്തുകളില്‍ ഒരു സിക്സ് പോലും രോഹിതിന്റെ ബാറ്റില്‍ നിന്ന് പിറന്നിട്ടില്ല. ആകെ നേടിയത് അഞ്ച് ഫോറുകളാണ്. ഈ സെയിം പാറ്റേണ്‍ കോലിയുടെ ശൈലിയില്‍ ദീര്‍ഘനാളായി കാണുന്നതാണ്, പ്രത്യേകിച്ചും ചാമ്പ്യൻസ് ട്രോഫിക്ക് മുൻപ്. ഈ ഷിഫ്റ്റ് രോഹിതിനെ സഹായിച്ചിട്ടുണ്ടോയെന്ന് ചോദിച്ചാല്‍ പൂര്‍ണമായും ഉണ്ട് എന്ന് പറയാൻ കഴിയില്ല.

ചാമ്പ്യൻസ് ട്രോഫിക്ക് ശേഷം 24 ഏകദിനങ്ങളാണ് രോഹിത് കളിച്ചിട്ടുള്ളത്. 1061 റണ്‍സാണ് നേട്ടം. ശരാശരി 46 ആണെങ്കില്‍ സ്ട്രൈക്ക് റേറ്റ് നൂറും തൊട്ടിട്ടുണ്ട്. ഇവിടെ ഏറ്റവും വലിയ മാറ്റം രോഹിത് ഓരോ ഇന്നിങ്സിലും നേരിടുന്ന പന്തുകളും ശരാശരി എണ്ണം വര്‍ധിച്ചിട്ടുണ്ട് എന്നതാണ്. 2025 മുതല്‍ കാര്യവട്ടം ഏകദിനം വരെയുള്ള കണക്കുകളെടുത്താല്‍ ഒരു ഇന്നിങ്സില്‍ നേരിടുന്നത് 44 പന്തുകളാണ്. 2023-24 വര്‍ഷങ്ങളില്‍ ഇത് 39 ആയിരുന്നു, 120 സ്ട്രൈക്ക് റേറ്റില്‍ 1412 റണ്‍സ് നേടാനും കഴിഞ്ഞിരുന്നു രോഹിതിന്.

ശൈലി മാറ്റത്തിന് ശേഷം രോഹിത് നേരിടുന്ന വെല്ലുവിളി ലഭിക്കുന്ന തുടക്കങ്ങള്‍ കണ്‍വേര്‍ട്ട് ചെയ്യാനാകുന്നില്ല എന്നത് മാത്രമാണ്. ചാമ്പ്യൻസ് ട്രോഫിക്ക് ശേഷം ഏകദിനത്തില്‍ രോഹിത് ഒരു തവണ മാത്രമാണ് പത്തില്‍ താഴെ പുറത്തായിട്ടുള്ളത്. സ്ട്രഗിള്‍ ചെയ്ത ഇന്നിങ്സുകള്‍ പോലും ചുരുക്കമാണ്. മികച്ച റിഥത്തിലേക്ക് എത്തി, വെല്‍ സെറ്റില്‍ഡാകുമ്പോഴാണ് പുറത്താകുന്നതും. ഇവിടെ കാണേണ്ടത് റിസ്ക്ക് കുറക്കുമ്പോള്‍ രോഹിതിന്റെ ഇന്നിങ്സില്‍ ഡോട്ട് ബോളുകള്‍ വര്‍ധിക്കുന്നു, അതിനെ മറികടക്കാനായി ഏരിയല്‍ ഷോട്ടുകള്‍ക്ക് തയാറാകും.

കാര്യവട്ടം ഏകദിനം ഉദാഹരണമാണ്, ഗില്ലിനേക്കാള്‍ ഫ്ലോയില്‍ ബാറ്റ് ചെയ്തിരുന്നത് രോഹിതായിരുന്നു, എന്നാല്‍ അവസാനം നേരിട്ട 11 പന്തുകളില്‍ ഒന്നില്‍പ്പോലും ബൗണ്ടറി നേടാൻ രോഹിതിന് സാധിച്ചിരുന്നില്ല. ഇതോടെ അല്‍സാരി ജോസഫിന്റെ ഓവറില്‍ ഏരിയല്‍ ഷോട്ടുകള്‍ക്ക് ഒരുങ്ങി. ഇത് മനസിലാക്കി വിൻഡീസ് ഒരുക്കിയ കെണിയില്‍ ചെന്ന് വീഴുകയുമായിരുന്നു. എന്നാല്‍, ലഭിക്കുന്ന തു‍ടക്കങ്ങള്‍ കൃത്യമായി രോഹിത് ഉപയോഗിക്കേണ്ടതുണ്ട്. പ്രത്യേകിച്ചും ഏകദിന ലോകകപ്പ് വരാനിരിക്കുന്ന പശ്ചാത്തലത്തിലും ജയ്സ്വാള്‍ കാത്തിരിക്കുന്ന സാഹചര്യത്തിലും.

കമ്പനി പേക്ഷിച്ചു, ഒരു തലമുറ ഏറ്റെടുത്തു; ഇഎ ക്രിക്കറ്റ് 07-ന് എന്ത് സംഭവിച്ചു?

Hari Krishnan M — Fri, 25 Sep 2026 12:32:30 +0530

എസ് ടെൻഡഹർ, വി സേവെയ്, ആർ ദ്രവിയ, ഡി ദെനിയർ, യെവെരെയ് സിങ്...ഈ പേരുകളൊക്കെയും ക്രിക്കറ്റ് ആരാധകർക്ക് കേവലം ഓർമ മാത്രമല്ല, അവരുടെ നൊസ്റ്റാള്‍ജിയ കൂടിയാണ്. ബാറ്റുയർത്തി നില്‍ക്കുന്ന ആൻഡ്രു ഫ്രിന്റോഫിനെ പുറം ചട്ടയാക്കിയെത്തി, കമ്പ്യൂട്ടര്‍ സ്ക്രീനുകള്‍ക്ക് മുന്നില്‍ ക്രിക്കറ്റ് പ്രേമികളെ മണിക്കൂറുകളോളം പിടിച്ചിരുത്തിയ, നാട്ടിൻപുറത്തെ ഇന്റർനെറ്റ് കഫേയിലേക്ക് ഒരു തലമുറയെ ഓടിച്ച ആ ഒജി ഗെയിം. ഒരിക്കല്‍ കളിച്ചവര്‍പ്പോലും മറക്കാനിടയില്ലാത്തൊരു എക്‌സ്പീരിയൻസ്. ഇ എ ക്രിക്കറ്റ് 07.

90കളുടെ മധ്യത്തിലാണ് ഇഎ ക്രിക്കറ്റിന്റെ ടൈം ലൈൻ ആരംഭിക്കുന്നത്. അവസാന വേർഷൻ പുറത്തിറങ്ങിയതാകട്ടെ 2006 നവംബറിലും. രണ്ട് പതിറ്റാണ്ടോളമായിട്ടും ഇന്നും ഈ ഗെയിം ആഘോഷിക്കപ്പെടുന്നുണ്ട്, പല പുതിയ വേർഷനുകളില്‍ ക്രിക്കറ്റ് സര്‍ക്കിളുകളില്‍ നമുക്ക് കാണാനും സാധിക്കും. എന്തായിരുന്നു ഇഎ ക്രിക്കറ്റ് 07നെ വ്യത്യസ്തമാക്കിയത്, എന്തുകൊണ്ട് ഗെയിമിന് തുടര്‍ച്ചയുണ്ടായില്ല.

ഇഎ കാനഡയും എച്ച്ബി സ്റ്റുഡിയോസും ചേര്‍ന്ന് ഡെവലപ്പ് ചെയ്ത ഇഎ ക്രിക്കറ്റ് 07 ഗെയിമിങ് കമ്മ്യൂണിറ്റിക്ക് മുന്നിലെത്തുന്നത് നേരത്തെ സൂചിപ്പിച്ചതുപോലെ 2006ലാണ്. 2006-07 ക്രിക്കറ്റ് സീസണ്‍ ആസ്പദമാക്കിയായിരുന്നു ഗെയിം രൂപപ്പെടുത്തിയത്. പ്രത്യേകിച്ചും ആഷസ് ക്രിക്കറ്റ്. എന്തുകൊണ്ടാണ് ഗെയിമിന് ഇത്ര പ്രീതി ലഭിച്ചുവെന്നതിനുള്ള ഒരു ഉത്തരം വ്യത്യസ്തമായ ഗെയിം മോഡുകള്‍ അവൈലബിള്‍ ആയിരുന്നു എന്നതാണ്.

അഞ്ച്, പത്ത്, 20, 50 ഓവറുകള്‍, ആഷസ് ഉള്‍പ്പെടെയുള്ള ടെസ്റ്റ് മത്സരങ്ങള്‍ വരെ കളിക്കാൻ സാധിക്കുമായിരുന്നു. ടി20 ക്രിക്കറ്റ് ഒരു വിപ്ലവമാകുന്നതിന് മുൻപാണെന്നും കണക്കാക്കേണ്ടതുണ്ട്. ഒപ്പം ഓസ്ട്രേലിയ, ഇംഗ്ലണ്ട് തുടങ്ങിയ രാജ്യങ്ങളിലെ കൗണ്ടി ക്രിക്കറ്റും ലോകകപ്പിന് സമാനമായ ഇന്റ‍ര്‍നാഷണല്‍ ടൂര്‍ണമെന്റും. ഓസ്ട്രേലിയ, ഇന്ത്യ, ഇംഗ്ലണ്ട്, ദക്ഷിണാഫ്രിക്ക മുതല്‍ ബ‍ര്‍മൂഡവരെയുള്ള 18 അന്താരാഷ്ട്ര ടീമുകളും.

ഇതുമാത്രമല്ല, പിച്ച്, സ്റ്റേഡിയം, കാലാവസ്ഥ, ഡിഫിക്കല്‍റ്റി ലെവല്‍ തുടങ്ങിയവയെല്ലാം തിരഞ്ഞെടുക്കാനുള്ള ഓപ്ഷനും ഇഎ ക്രിക്കറ്റ് നല്‍കി. ഈഡൻ ഗാര്‍ഡൻസും ലോര്‍ഡ്‌സും മെല്‍ബണും ഉള്‍പ്പെടെ ഇരുപതിലധികം സ്റ്റേഡിയങ്ങളായിരുന്നു ഉള്‍പ്പെടുത്തിയിരുന്നത്. 2007 ഏകദിന ലോകകപ്പിലെ എട്ട് പ്രധാന വേദികളും ഗെയിമിന്റെ ഭാഗമായി.

ഏറ്റവും ആക‍ര്‍ഷകമായ ഘടകം ഗെയിമിന്റെ പൂർണമായ നിയന്ത്രണം പ്ലെയറിന് തന്നെയായിരുന്നു എന്നതാണ്. ബൗള്‍ ചെയ്യുകയാണെങ്കില്‍ പന്തിന്റെ പേസ്, ലെങ്ത്, സ്വിങ്, മൂവ്മെന്റ് എല്ലാം കളിക്കുന്നയാള്‍ക്ക് തന്നെ നിശ്ചയിക്കാൻ സാധിക്കും. ബാറ്റിങ്ങിലാണെങ്കില്‍ ഫൂട്ട് മൂവ്മെന്റ്, ഷോട്ട് സെലക്ഷൻ, ആ ഷോട്ടിന്റെ ഡയറക്ഷൻ, പവര്‍ എന്നിവയും. ശരിക്കും ഒരു കവര്‍ ഡ്രൈവ് കളിക്കുകയാണെങ്കില്‍ അതിന്റെ പൂര്‍ണമായ സാറ്റിസ്ഫാക്ഷൻ ലഭിക്കുന്നതുപോലെയായിരുന്നു ഗെയിംപ്ലേ.

ഇന്ത്യയിലെ ക്രിക്കറ്റ് ആരാധക‍ര്‍ക്ക് ഗെയിം പ്രിയപ്പെട്ടതാക്കിയത് മറ്റൊന്നും കൊണ്ടല്ല. ഇന്ത്യൻ ക്രിക്കറ്റിലെ ഗോള്‍ഡൻ ജനറേഷൻ എന്ന് വിശേഷിപ്പിക്കപ്പെടുന്ന കാലഘട്ടത്തിലെ താരങ്ങളെല്ലാം ഗെയിമിലുണ്ടായിരുന്നു. സച്ചിൻ, സേവാഗ്, ഗാംഗുലി, ദ്രാവിജ്, ലക്ഷ്മണ്‍, ധോനി, യുവരാജ്, സഹീര്‍ ഖാൻ, ശ്രീശാന്ത്, കുംബ്ലെ...അങ്ങനെ നീളുന്നു പേരുകള്‍. എന്നാല്‍ ഇവരൊന്നും യഥാര്‍ത്ഥ പേരിലായിരുന്നില്ല ഗെയിമില്‍.

സച്ചിൻ തെൻഡുല്‍ക്കറിന് എസ് ടെൻഡഹര്‍, സൗരവ് ഗാംഗുലിക്ക് എസ് ഗുംഗ്‌ലി, രാഹുല്‍ ദ്രാവിഡിന് ആ‍ര്‍ ദ്രവിയ, ഹ‍ര്‍ഭജന് ഹുര്‍വജ് സിങ്, മുഹമ്മദ് കൈഫിന് എം കെഫ്, ഇ‍ര്‍ഫാൻ പത്താന് ഐ പാ‍ര്‍ത്തൻ എന്നൊക്കെയായിരുന്നു. ഇതിന്റെ കാരണം പ്ലെയര്‍ ലൈസൻസ് ലഭിക്കാത്തതാണ്. ഓസ്ട്രേലിയ, ഇംഗ്ലണ്ട്, ദക്ഷിണാഫ്രിക്ക, ന്യൂസിലൻഡ് എന്നീ ടീമുകളുടെ മാത്രമാണ് ഔദ്യോഗിക ലൈസൻസ് ഇഎയ്ക്ക് ഉണ്ടായിരുന്നത്. ഗെയിം കളിച്ചവര്‍ക്ക് അറിയാം ഇന്ത്യൻ ടീമിന്റെ ലോഗോ ആയി നല്‍കിയിട്ടുള്ളത് ബിസിസിഐയുടെ ഔദ്യോഗിക ലോഗൊ ആയിരുന്നില്ല.

ഇതുതന്നെയാണ് ഗെയിമിന്റെ തുടര്‍ച്ച സംഭവിക്കാത്തതിന്റെ പ്രധാന കാരണങ്ങളിലൊന്ന്. ഇന്ന് ഗെയിം പുറത്തിറക്കണമെങ്കില്‍ ഐസിസിയുടെ റൈറ്റ്സ്, ക്രിക്കറ്റ് ബോര്‍ഡുകളുടെ റൈറ്റ്സ്, ഐപിഎല്‍ ഉള്‍പ്പെടെയുള്ള വിവിധ ഫ്രാഞ്ചൈസ് ലീഗുകളുടെ റൈറ്റ്സ്, ടീമുകളുടേയും താരങ്ങളുടേയും സ്റ്റേഡിയങ്ങളുടേയും റൈറ്റസ്...അങ്ങനെ നീളുന്നു കടമ്പകള്‍.

ഇന്നത്തെ സാഹചര്യം പരിശോധിക്കുമ്പോള്‍ ഇന്ത്യയെ ഒഴിവാക്കി ഒരു ക്രിക്കറ്റ് ഗെയിം ആരംഭിക്കുക എന്നത് എളുപ്പമല്ല. ഗെയിമിന്റെ സക്സസ് പൂര്‍ണമായും തന്നെ ഡിപ്പൻഡ് ചെയ്തിരിക്കുന്നത് ഇന്ത്യൻ ക്രിക്കറ്റിനെ ആയിരിക്കും, പ്രധാനമായും ലോകത്തിലെ ഏറ്റവും വലിയ ടി20 ലീഗായ ഐപിഎല്‍ ഇല്ലാതെ ഒരു ഗെയിം ഇഎയ്ക്ക് പുറത്തിറക്കാനാകുമോ. ഇന്ത്യൻ ടീമിന്റെ ലൈസൻസ് ലഭിക്കുക എന്നത് എളുപ്പമല്ല, നിലവില്‍ വൻതുക തന്നെ നല്‍കേണ്ടതായും വരും. ഇങ്ങനെ ഓരോ രാജ്യങ്ങളുടേതും. ഇത് ഗെയിമിന്റെ പ്രൊഡക്ഷൻ കോസ്റ്റ് ഉയര്‍ത്തുന്ന ഘടകമാണ്.

ഇതിന് പുറമെ എക്സ്പെക്റ്റേഷൻസ്. റിയലിസ്റ്റിക്ക് ഗ്രാഫിക്സ്, കരീര് മോഡുകള്‍, ഓണ്‍ലൈൻ മള്‍ട്ടിപ്ലെയര്, കമന്ററി, ലീഗുകളൊക്കെയും ആരാധകര്‍ ആഗ്രഹിക്കുന്നുണ്ടാകും. അത് മീറ്റ് ചെയ്യുകയും എളുപ്പമല്ല, പ്രത്യേകിച്ചും ലൈസൻസ് ലഭിച്ചില്ല എങ്കില്‍. പക്ഷേ, ഇതൊന്നുമില്ലാതിരുന്നിട്ടും റെവലൂഷണറിയായുള്ള ഗ്രാഫിക്സിന്റെ അഭാവത്തിലും ഇഎ ക്രിക്കറ്റിന് ഇന്നും ജനപ്രീതിയുണ്ട്. അതിനും കൃത്യമായ കാരണമുണ്ട്.

ഇഎ ഗെയിം അവസാനിപ്പിച്ചെങ്കിലും അത് കളിച്ചുകൊണ്ടിരുന്നവര്‍ നിര്‍ത്താൻ ഒരുക്കമായിരുന്നില്ല. ഗെയിമില്‍ മോഡിഫിക്കേഷൻ നടത്താൻ സാധിക്കുമെന്ന കണ്ടെത്തലാണ് ഇതിന്റെ ആധാരം. താരങ്ങളുടെ മുഖം മാറ്റം, പുതിയ കിറ്റുകള്‍ അവതരിപ്പിക്കാം, സ്ക്വാഡ് അപ്ഡേറ്റ് ചെയ്യാം, പുതിയ ബാറ്റ്, ബോള്‍, ടൂര്‍ണമെന്റുകള്‍ തുടങ്ങിയവയെല്ലാം മോഡിഫൈ ചെയ്ത് ഉപയോഗിക്കാൻ ആരംഭിച്ചു. ഇതോടെ ഐപിഎല്‍ വരെ ഇഎ ക്രിക്കറ്റ് 07ല്‍ കളിക്കാമെന്നായി. ഇതായിരുന്നു യഥാര്‍ത്ഥത്തില്‍ വിപ്ലവം.

ഇഎ ക്രിക്കറ്റ് 07 ഒരു ഗെയിം മാത്രമായിരുന്നില്ല, ഒരു തലമുറയുടെ ക്രിക്കറ്റിനോടുള്ള ആവേശമായിരുന്നു. ഇന്നും തുടരുന്ന ആവേശം...

സൈക്ലിംഗ്‌ പരിശീലനം നടത്തിയതിന്‌ നാട്ടുകാര്‍ കല്ലെറിഞ്ഞു, ഫാരിബയും സഹോദരിയും ഇന്ന്‌ രാജ്യാന്തര താരങ്ങള്‍!

Web Desk — Thu, 24 Sep 2026 21:02:47 +0530

ഫാരിബ ഹാഷിമി - അതൊരു വെറും പേരല്ല, താലിബാന്‍ ഭരണകൂടം അഫ്‌ഗാനിസ്ഥാനിലെ സ്‌ത്രീകള്‍ക്ക്‌ നിഷേധിച്ച സ്വാതന്ത്ര്യം വീണ്ടെടുക്കാന്‍ ലോകം കാണ്‍കെ പോരാട്ടം നടത്തുന്ന വിപ്ലവകാരിയുടെ നാമധേയമാണത്‌.ജപ്പാനിലെ ഐചി നഗോയ ഏഷ്യന്‍ ഗെയിംസില്‍ വനിതകളുടെ സൈക്ലിംഗില്‍ വ്യക്തിഗത റോഡ്‌ റേസില്‍ വെള്ളി മെഡല്‍ നേടിയ ഫാരിബ ഹാഷിമിയെന്ന ഇരുപത്തിമൂന്നുകാരിയുടെ സ്ഥാനം ഈ ലോകത്തിന്റെ നെറുകയിലാണ്‌.

അഫ്‌ഗാനിസ്ഥാനിലെ ഫര്യാബ്‌ പ്രവിശ്യയിലാണ്‌ ഫാരിബ ജനിച്ചത്‌. പതിനഞ്ചാമത്തെ വയസിലാണ്‌ ഫാരിബക്ക്‌ സൈക്ലിംഗില്‍ കമ്പം തോന്നിയത്‌. നാട്ടില്‍ പെണ്‍കുട്ടികള്‍ സൈക്കിള്‍ ചവിട്ടുന്നത്‌ എതിര്‍ക്കപ്പെട്ടിരുന്നതിനാല്‍ വേഷം മാറിയും പുരുഷന്‍മാരെ പോലെ വസ്‌ത്രംധരിച്ചും മുഖംമൂടി ധരിച്ചുമാണ്‌ ഫാരിബയും സഹോദരി യുല്‍ദൂസും പരിശീലനം നടത്തിയിരുന്നത്‌. പ്രാദേശിക എതിര്‍പ്പുകളെ അവഗണിച്ച്‌ ഈ സഹോദരിമാര്‍ റോഡിലൂടെ സൈക്കിള്‍ ചവിട്ടുന്നത്‌ ശ്രദ്ധയില്‍ പെട്ടപ്പോള്‍ കാറിടിപ്പിച്ച്‌ അപായപ്പെടുത്താന്‍ പോലും ശ്രമമുണ്ടായി. പലപ്പോഴും നാട്ടുകാര്‍ ഇവരെ കല്ലെറിഞ്ഞു.

2021 ല്‍ താലിബാന്‍ അഫ്‌ഗാനിസ്ഥാന്റെ ഭരണം പിടിച്ചെടുത്തതോടെ ഫാരിബയും സഹോദരിയും അവരുടെ കായിക സ്വപ്‌നങ്ങള്‍ ഉപേക്ഷിക്കേണ്ട അവസ്ഥയിലായി. അപ്പോഴാണ്‌, മുന്‍ ഇറ്റാലിയന്‍ സൈക്ലിംഗ്‌ ചാമ്പ്യനായ അലസാന്ദ്ര കാപ്പെലോട്ടോ ദൈവദൂതനെ പോലെ സഹായഹസ്‌തം നീട്ടുന്നത്‌. ജനിച്ച നാടും വീടും ഉപേക്ഷിച്ച്‌, കുടുംബാംഗങ്ങളെ ഇനിയെന്ന്‌ കാണാന്‍ സാധിക്കുമെന്നറിയാതെ അഫ്‌ഗാന്‍ സഹോദരിമാര്‍ രാജ്യം വിടാന്‍ തീരുമാനിച്ചു.അമ്മയില്‍ നിന്ന്‌ അകന്ന്‌ കഴിയേണ്ടി വരുമെന്നത്‌ ഫാരിബയെ വല്ലാതെ അലട്ടി. സൈക്ലിംഗ്‌ കാരണം സഹോദരി സഹോദരന്‍മാരില്‍ നിന്ന്‌ വേര്‍പിരിയേണ്ടി വരുമെന്ന്‌ ഫാരിബ ഒരിക്കലും കരുതിയിരുന്നില്ല. അന്താരാഷ്ട്ര സൈക്ലിംഗ്‌ രംഗത്തുള്ള ബന്ധങ്ങള്‍ വഴി, ഇറ്റലിയിലേക്കുള്ള ഒരു ഒഴിപ്പിക്കല്‍ വിമാനത്തില്‍ അവര്‍ക്ക്‌ സീറ്റുകള്‍ ലഭിച്ചു.

1997 ല്‍ റോഡ്‌ സൈക്ലിംഗ്‌ ചാമ്പ്യനായ അലെസാന്ദ്ര കാപ്പെല്ലോട്ടോയുടെ സഹായത്തോടെ അവര്‍ ഇറ്റലിയിലേക്ക്‌ പലായനം ചെയ്‌തു. ഇറ്റലിയിലെത്തിയ ശേഷം സഹോദരിമാര്‍ ഒരു പ്രോഫഷണല്‍ സൈക്ലിംഗ്‌ ടീമില്‍ ചേരുകയും ആദ്യമായി ഔദ്യോകിക പരിശീലനം നേടുകയും ചെയ്‌തു. മുമ്പൊരിക്കലും സാധ്യമാകാത്ത വിധം തങ്ങളുടെ കഴിവുകള്‍ മെച്ചപ്പെടുത്താന്‍ അവരെ സഹായിച്ച, ജീവിതം തന്നെ മാറ്റിമറിച്ച ഒരു അനുഭവമായിരുന്നു അത്‌.

അഫ്‌ഗാനിസ്ഥാനില്‍ സഹോദരിമാര്‍ക്ക്‌ പ്രൊഫഷണല്‍ പരിശീലനം ലഭിച്ചിരുന്നില്ല. സൈക്കിളെടുത്ത്‌ ഓടിക്കുക എന്നത്‌ മാത്രമായിരുന്നു അവര്‍ ചെയ്‌തിരുന്നത്‌. കുടുംബത്തെയും നാടിനേയും ഉപേക്ഷിക്കേണ്ടി വന്നത്‌ അങ്ങേയറ്റം വേദനാജനകമായിരുന്നെങ്കിലും, അന്താരാഷ്ട്ര തലത്തില്‍ മത്സരിക്കുക എന്ന സ്വപ്‌നത്തില്‍ ഫാരിബ ഉറച്ചു നിന്നു. ആ തീരുമാനം പിന്നീടവരെ അഭൂതപൂര്‍വമായ നേട്ടങ്ങളിലേക്ക്‌ നയിച്ചു.2022 ല്‍ സ്വിറ്റ്‌സര്‍ലന്‍ഡില്‍ വെച്ച്‌ നടന്ന അഫ്‌ഗാന്‍ നാഷണല്‍ റോഡ്‌ റേസ്‌ ചാമ്പ്യന്‍ഷിപ്പില്‍ ഫാരിബ ചാമ്പ്യനായി. അതൊരു തുടക്കമായിരുന്നു. രണ്ട്‌ വര്‍ഷങ്ങള്‍ക്ക്‌ ശേഷം സഹോദരി യു്‌ല്‍ദൂസിനൊപ്പം പാരിസ്‌ ഒളിംപിക്‌സില്‍ അഫ്‌ഗാനിസ്ഥാനെ പ്രതിനിധീകരിച്ച്‌ മത്സരിച്ചത്‌ ചരിത്ര സംഭവമായി.

ജിറോ ഡി ഇറ്റാലിയ എന്ന പ്രശസ്‌തമായ അന്താരാഷ്ട്ര സൈക്ലിംഗ്‌ റേസില്‍ മത്സരിക്കുന്ന ആദ്യ അഫ്‌ഗാന്‍ വനിതയായി ഫാരിബ മാറി. ആ ഘട്ടത്തിലും ഫാരിബയുടെ മനസിലേക്ക്‌ ഓടി വന്നത്‌ പ്രാദേശികമായ സാമുഹിക കീഴ്‌വഴക്കങ്ങള്‍ പിന്തുടരുന്ന അവരുടെ കുടുംബത്തെ കുറിച്ചുള്ള ഓര്‍മകളാണ്‌. പെണ്‍മക്കളുടെ വ്യത്യസ്‌തമായ അഭിലാഷത്തെ കുറിച്ച്‌ അറിഞ്ഞപ്പോള്‍ കുടുംബം അവരോട്‌ അത്‌ ഉപേക്ഷിക്കാനാണ്‌ ആവശ്യപ്പെട്ടത്‌. സൈക്ലിംഗ്‌ നിര്‍ത്താന്‍ ഫാരിബക്ക്‌ മുന്നറിയിപ്പ്‌ നല്‍കി. എന്നാല്‍, സാമൂഹിക വിലക്കുകളെ വെല്ലുവിളിക്കാന്‍ മാത്രം മൂല്യമുള്ള ഒരു അഭിനിവേശമാണ്‌ താന്‍ കണ്ടെത്തിയതെന്ന തിരിച്ചറിവില്‍ ഫാരിബ തന്റെ സഹോദരിയേയും ചേര്‍ത്തുപിടിച്ച്‌ മുന്നോട്ട്‌ പോയി.

ഇപ്പോഴിതാ, ഏഷ്യന്‍ ഗെയി്‌ംസിലും ഫാരിബ തന്റെ ചരിത്ര സാന്നിധ്യം അറിയിച്ചിരിക്കുന്നു. അഫ്‌ഗാനിലെ സ്‌ത്രീകള്‍ താലിബാന്‍ ഭരണത്തിന്‌ കീഴില്‍ അടിച്ചമര്‍ത്തപ്പെട്ടവരായി കഴിയുമ്പോള്‍, ആ രാജ്യത്തിന്റെ സാമൂഹിക വ്യവസ്ഥിതിയോട്‌, തങ്ങളെ കല്ലെറിഞ്ഞവരോട്‌, ഫാരിബയും യുല്‍ദുസും പറയുന്നത്‌ മറ്റൊന്നുമല്ല - ആകാശത്തില്‍ സര്‍വസ്വാതന്ത്ര്യത്തോടെ പറക്കുന്ന പറവകളെ പോലെ, ഞങ്ങള്‍ ഈ ലോകത്ത്‌ ജീവിക്കുന്നു. അഫ്‌ഗാനിസ്ഥാന്റെ അസ്‌തിത്വത്തില്‍ നിന്നു കൊണ്ട്‌, ലോകം മുഴുവന്‍ ഞങ്ങള്‍ സൈക്കിള്‍ ചവിട്ടുന്നു...അഫ്‌ഗാനിലെ സ്‌ത്രീകള്‍ക്ക്‌ സ്വാതന്ത്ര്യത്തോട്‌ അടങ്ങാത്ത മോഹം തോന്നിപ്പിക്കും വിധം ആ സഹോദരിമാര്‍ പാറിപ്പറക്കുന്നു....

ഏഷ്യാനെറ്റ്‌ ന്യൂസ്‌ ലൈവ്‌ ലിങ്ക്‌: https://www.youtube.com/live/s0LLVQeMmtU?si=31j3tChnat66QzkK

റയല്‍ റെഡിയല്ലേ, ചാമ്പ്യൻസ് ലീഗും തൂക്കും? യൂറോപ്പ് കത്തിക്കാൻ ഫ്ലിക്കിന്റെ ബാഴ്സ

Hari Krishnan M — Sat, 19 Sep 2026 12:50:42 +0530

രണ്ട് വര്‍ഷം മുൻപ് ഒരു ബാഗും തൂക്കി ബാഴ്സലോണയിലേക്ക് ജര്‍മനിയില്‍ നിന്ന് വന്നൊരു മനുഷ്യൻ. ക്യാമ്പ് നൗവിലെ സൈഡ് ലൈനപ്പുറം നില്‍ക്കുകയാണ്.

ബാഴ്‌സലോണയും റേസിങ് സാന്റാൻഡറും തമ്മിലുള്ള മത്സരം 89-ാം മിനുറ്റിലേക്ക് കടക്കുന്നു. ഇടതുഫ്ലാങ്കിലൂടെ രണ്ട് പ്രതിരോധതാരങ്ങളെ മറികടന്ന് കരിം അഡയ്‌മീയുടെ മുന്നേറ്റമാണ്. ബോക്സിനുള്ളിലെക്കുള്ള കുതിപ്പിനൊപ്പം സമാന്തരമായി ലമീൻ യമാലും നീങ്ങുന്നുണ്ട്. ഷോട്ടുതിര്‍ക്കുമെന്ന തോന്നല്‍ ജനിപ്പിച്ചതിന് ശേഷം യമാലിലേക്കൊരു അഡയ്‌മിയുടെ പാസ്, യൂലെൻ അഗിറെസബാലയുടെ ചുവടിന്റെ വേഗതയെ മറികടന്ന് യമാലിന്റെ ഫിനിഷ്, ഗോള്‍.

ശേഷം ഇരുകൈകളും വിടര്‍ത്തി ബോക്സിനുള്ളില്‍ ആശ്വാസത്തോടെ അഡയ്‌മീ വീണു, തൊട്ടപ്പുറത്ത് യമാലും സമാനമായ രീതിയില്‍ ആശ്വാസം കണ്ടെത്തുന്നുണ്ടായിരുന്നു. രണ്ട് വര്‍ഷത്തോളമായി താൻ മൂര്‍ച്ച വര്‍ധിപ്പിച്ചുകൊണ്ടിരുന്ന ആ ഫ്രണ്ട് ലൈന്‍ അത് ഉന്നതിതൊടുന്നത് അയാള്‍ നോക്കിനില്‍ക്കുന്നുണ്ടായിരുന്നു അപ്പോള്‍, ഹൻസി ഫ്ലിക്ക്.

ഒറ്റ ഹാൻഡ് ബാഗുമായി എത്തിയ അയാളെ അന്ന് ബാഴ്‌സലോണക്കാര്‍പ്പോലും അത്ര പ്രതീക്ഷയോടെയായിരുന്നില്ല വരവേറ്റത്. എന്നാല്‍ ഇന്ന് ഹൻസി ഫ്ലിക്കിന്റെ കീഴില്‍ ബാഴ്‌സലോണ നടത്തുന്നത് അവരുടെ ക്ലബ്ബ് ചരിത്രത്തിലെ തന്നെ ഏറ്റവും വലിയ കുതിപ്പാണ്. ചാമ്പ്യൻസ് ലീഗിലും ലാ ലിഗയിലുമായി ഏഴ് മത്സരങ്ങള്‍. എതിര്‍ ഗോള്‍വലയില്‍ പന്തെത്തിയത് 33 തവണയാണ്. ഏഴ് തുടര്‍ ജയങ്ങളോടെ ബാഴ്സ ഒരു സീസണ്‍ തുടങ്ങുന്നത് തന്നെ ആദ്യമായാണെന്നോ‍ര്‍ക്കണം.

റേസിങ് സാന്റാൻഡര്‍ മധ്യനിര താരം സെര്‍ഹിയൊ കനാലസ് പറഞ്ഞതുപോലെ, ഇറ്റ് ഈസ് മാഡ്‌നസ്. ഫ്ലിക്കിന് കീഴിലെ ഏറ്റവും ശക്തമായ ബാഴ്‌സലോണ ഇക്കുറിയാണോയെന്നൊരു ചോദ്യമുയര്‍ന്നാല്‍ അതേയെന്നായിരിക്കും ഉത്തരം നല്‍കേണ്ടിവരിക. റേസിങ് സാന്റാൻഡറിനെതിരെ 60-ാം മിനുറ്റില്‍ മിഡ് ഫീല്‍ മാസ്ട്രേകളായ പെഡ്രിയേയും റോഡ്രിയേയും തിരിച്ചുവിളിച്ചത് തന്നെ ഒരുതരം മുന്നറിയിപ്പ് പോലെയായിരുന്നു. ഏറ്റവും മികച്ച താരങ്ങള്‍ കളത്തിലില്ലെങ്കില്‍പ്പോലും അനായാസം ജയിക്കാൻ തങ്ങള്‍ക്ക് കഴിയുമെന്ന് ഫ്ലിക്ക് നല്‍കുന്ന സന്ദേശം.

ഹൂലിയൻ ആല്‍വാരസ് എന്ന ലക്ഷ്യം സാധ്യമായില്ലെങ്കിലും അഡ‌യ്‌മീയേയും അന്തണി ഗോര്‍ഡനേയും എത്തിച്ചും, റഫീഞ്ഞ്യയെ സെൻട്രല്‍ സ്ട്രൈക്കറാക്കിയും ഫ്ലിക്കൊരുക്കിയ ഫ്രണ്ട് ലൈൻ. ഏഴ് മത്സരങ്ങളില്‍ നിന്ന് 11 ഗോളുകളാണ് റഫീഞ്ഞ്യ ഇതിനോടകം സ്കോര്‍ ചെയ്തിട്ടുള്ളത്. റഫീഞ്ഞ്യയുടെ അഡാപ്റ്റബിലിറ്റി തന്നെയാണ് ഫ്ലിക്കിന്റെ സിസ്റ്റത്തിലെ ഏറ്റവും പോസിറ്റീവായ ഘടകം. സ്ട്രൈക്കറില്ലാതെ സീസണ്‍ തുടങ്ങിയ ബാഴ്സയെങ്ങനെ 33 ഗോളടിച്ചതില്‍ റഫീഞ്ഞ്യയുടെ ബൂട്ടുകളാണ് പ്രധാനി. അത് ഗോളടിയില്‍ മാത്രമല്ല. ബോക്സിനകത്തും പുറത്തും നടത്തുന്ന റണ്ണുകള്‍, എതിര്‍ ഡിഫൻസിനെ സ്ട്രെച്ച് ചെയ്യിക്കാനുള്ള മികവ്, പ്രെസിങ്ങ്...ഇതിലൂടെ മറ്റ് താരങ്ങള്‍ക്ക് കളിമെനയാനുള്ള മൈതാനം റഫീഞ്ഞ്യ ഒരുക്കിക്കൊടുക്കുന്നുണ്ട്.

ഗോര്‍ഡനാകട്ടെ നാല് അസിസ്റ്റുകള്‍ ലാ ലിഗയില്‍ സ്വന്തം പേരില്‍ ചേര്‍ത്തിട്ടുണ്ട്. അഡെയ്മി മൂന്ന് വീതം ഗോളും അസിസ്റ്റും. റേസിങ് സാന്റാൻഡറിനെതിരെ യമാലിന്റെ അസിസ്റ്റ് മാത്രമായിരുന്നില്ല, രണ്ട് പെനാലിറ്റികളും നേടിയെടുക്കാൻ താരത്തിന് കഴിഞ്ഞു. 22 മില്യണ്‍ യൂറോ മൂല്യം അഡയ്‌മീക്ക് അല്‍പ്പം കുറവല്ലെയെന്ന ചര്‍ച്ചകള്‍ ഫുട്ബോള്‍ സര്‍ക്കിളുകളില്‍ ഇപ്പോള്‍ തന്നെയുണ്ട്. ഓല്‍മൊ, ഗാവി, ഗബ്രിയേല്‍ ജീസ്യൂസ്, ഫെര്‍മിൻ ലോപസ്...എന്നിങ്ങനെ ഒരുനിര വേറെയും.

ഇതിനെല്ലാം ഒപ്പം ചേര്‍ത്തുവെക്കേണ്ടത് ലമീൻ യമാലിന്റെ ഫോമാണ്. ലാ ലിഗയിലും ചാമ്പ്യൻസ് ലീഗിലുമായി എട്ട് ഗോളുകളും നാല് അസിസ്റ്റുകളും യമാലിന്റെ പേരിലുണ്ട്. ഈ സീസണിലെ ബലോണ്‍ ഡി ഓര്‍ പുരസ്കാരം ക്യാമ്പ് നൗവിലേക്ക് എത്തിയേക്കുമെന്ന സൂചനകളാണ് റഫീഞ്ഞ്യയും യമാലും നല്‍കുന്നത്. ചാമ്പ്യൻസ് ലീഗ് എന്ന സ്വപ്നം സാക്ഷാത്കരിക്കുന്നതിന് ഒരുപാട് അകലത്തിലല്ല ബാഴ്സ പന്തുതട്ടുന്നതെന്നാണ് സീസണിന്റെ തുടക്കം നല്‍കുന്ന സൂചനയും. റോഡ്രിയുടെ വരവ് ആ ലക്ഷ്യത്തിന് ഇന്ധനം പകരുന്നതുമാണ്.

പൂര്‍ണമായും ബാഴ്സയുടെ സിസ്റ്റത്തിലേക്ക് റോഡ്രി അഡാപ്റ്റായിട്ടില്ല. എന്നിട്ടും അസാധാരണമായാണ് ബാഴ്സയുടെ മുന്നേറ്റം. അതിപ്പോള്‍ മുന്നേറ്റത്തിലാകട്ടെ, മധ്യനിരയിലാകട്ടെ, പ്രതിരോധത്തിലാകട്ടം. സഹതാരങ്ങളുടെ എബിലിറ്റികള്‍ പൂര്‍ണമായും റോഡ്രിയെന്ന ജീനിയസ് മനസിലാക്കിത്തുടങ്ങുന്ന ഘട്ടത്തില്‍ ബാഴ്സയുടെ ഗെയിം ഇനിയും ലിഫ്റ്റ് ചെയ്യപ്പെടാനാണ് സാധ്യത. പ്രതിരോധത്തിലെ അല്‍പ്പമുള്ള പാളിച്ചകളെല്ലാം നികത്താൻ റോഡ്രിക്ക് കഴിയും. പിന്നീട് ബാഴ്സയുടെ അള്‍ട്ടിമേറ്റ് ഡൊമിനേഷനായിരിക്കും യൂറോപ്പിനെ കാത്തിരിക്കുന്നത്.

അരമണിക്കൂറില്‍ അഫ്ഗാൻ തീര്‍ന്നു, രോഹിതും! ഡല്‍ഹിയില്‍ അഭിഷേക് ശര്‍മയുടെ തൂഫാൻ

Hari Krishnan M — Fri, 18 Sep 2026 15:47:23 +0530

അഫ്ഗാനിസ്ഥാനെതിരായ മൂന്നാം ടി20ക്കുള്ള ഇന്ത്യയുടെ അന്തിമ ഇലവനെ പ്രഖ്യാപിച്ചപ്പോള്‍ പലരും നെറ്റി ചുളിച്ചു. കാരണം, എല്ലാവരുടേയും പ്രതീക്ഷയില്‍ ആ 15 വയസുകാരന് ഇടമുണ്ടായിരുന്നു, വൈഭവ് സൂര്യവംശി. അവൻ അഫ്ഗാൻ ബൗളര്‍മാരെ അരുണ്‍ ജയ്റ്റ്‌ലി സ്റ്റേഡിയത്തിന്റെ അതിര്‍ത്തി കടത്തുന്നത് കാണണമായിരുന്നു അവര്‍ക്ക്...

എന്നാല്‍ ഗൗതം ഗംഭീറും ശ്രേയസ് അയ്യരും ഓപ്പണിങ്ങ് കൂട്ടുകെട്ട് തുടരട്ടെ എന്ന നിലപാടിലായിരുന്നു. ഇടം കയ്യൻ ബാറ്ററായി അയാള്‍ മതിയെന്ന്. ഏത് അയാള്‍.

ഫെബ്രുവരി ഏഴ്, 2026. ടി20 ലോകകപ്പിലെ ഇന്ത്യയുടെ ആദ്യ മത്സരം. സൂര്യകുമാര്‍ യാദവിന്റെ സംഘത്തിലെ ഏറ്റവും മികച്ച ടി20 ബാറ്ററുടെ ബാറ്റ് നിശബ്ദമായി തുടങ്ങിയ ശനിയാഴ്ച. അന്ന് മുതല്‍ സെപ്തംബര്‍ വരെ ആ പേരിന് ചുറ്റും വിമര്‍ശനങ്ങളുടെ കുത്തൊഴുക്കായിരുന്നു. ഓഫ് സ്പിൻ ട്രാപ്പില്‍ നിരന്തരം വീഴുന്നു, ഒപ്പം ഇൻകണ്‍സിസ്റ്റൻസി, രണ്ടക്കം പോലും കടക്കാനാകാതെയുള്ള സ്ട്രഗിള്‍, സഞ്ജു സാംസണിനെ തഴയുമ്പോള്‍ എന്തുകൊണ്ട് അയാള്‍ക്ക് അത് ബാധകമാകുന്നില്ല എന്ന ആശയക്കുഴപ്പം...

ഒരിക്കല്‍പ്പോലും ആ പേരിനെ തള്ളിപ്പറയാൻ ടീം മാനേജ്മെന്റ് തയാറായിട്ടേയില്ല, ആ പേരിന് എന്താണിത്ര പ്രത്യേകതയെന്ന ചോദ്യത്തിന്റെ ശബ്ദമേറിക്കോണ്ടേയിരുന്നു...

അതിന് ഉത്തരം തേടിയവര്‍ക്കായി ഒരു നിമിഷം. സെപ്തംബര്‍ 17, രാത്രി 8.17. നിങ്ങള്‍ക്ക് അരുണ്‍ ജയ്റ്റ്ലി സ്റ്റേഡിയത്തിലേക്ക് നോക്കം. അവിടെ നിറഞ്ഞ് കവിഞ്ഞ ഗ്യാലറിയിലെ ഓരോരുത്തരും അയാള്‍ക്കായി എഴുന്നേറ്റ് നില്‍ക്കുന്നതായി കാണാം. ആ ജനാരവത്തിന്റെ നടുവില്‍ പെയ്തവസാനിച്ചൊരു പേമാരിപോലെ അയാള്‍ നടന്നുനീങ്ങുന്നുണ്ട്...അഭിഷേക് ശര്‍മ.

34 പന്തുകള്‍, 11 സിക്സ്, ഒൻപത് ഫോര്‍. സ്ട്രൈക്ക് റേറ്റ് 317. കഴിഞ്ഞ ആറ് മാസത്തോളമായി തനിക്കെതിരെ ഉയര്‍ന്ന എല്ലാ ചോദ്യങ്ങള്‍ക്കും വിമര്‍ശനങ്ങള്‍ക്കും സംശയങ്ങള്‍ക്കും ബാറ്റുകൊണ്ട് മറുപടി പറയാൻ അഭിഷേക് തിരഞ്ഞെടുത്ത ദിനം.

ഡിഫൻസീവ് ഷോട്ടില്‍ ആരംഭം. ശേഷം ഫസല്‍ഹഖ് ഫറൂഖിയുടെ ഹാഫ് വോളിയില്‍ എക്സ്ട്രാ കവറിന് മുകളിലൂടെ ബൗണ്ടറി. അസ്മത്തുള്ള ഒമര്‍സായിയെ വരവേറ്റത് രണ്ട് സിക്സും ഒരു ഫോറും നല്‍കിയാണ്, ക്രീസുവിട്ടിറങ്ങി സ്വീപ്പര്‍ കവറിന് മുകളിലൂടെയുള്ള ക്ലാസിക്ക് അഭിഷേക് ഷോട്ടും ഉള്‍പ്പെട്ടു.

ഫറൂഖിയുടെ രണ്ടാം വരവില്‍ നേരിട്ട ആദ്യ പന്ത് ലോഫ്റ്റ് ചെയ്ത് സൈറ്റ് സ്ക്രീനിനപ്പറും, ടൈമിങ് ആൻഡ് എക്സിക്യൂഷന്റെ ഉദാഹരണമെന്ന് സഞ്ജയ് മഞ്ജരേക്കര്‍ പറഞ്ഞുവെച്ചു. 22 റണ്‍സാണ് ഫറൂഖിയുടെ രണ്ടാം ഓവറില്‍ അഭിഷേക് സ്കോര്‍ബോര്‍ഡിലേക്ക് ചേര്‍ത്തത്.

ഇബ്രാഹിം സദ്രാന് സ്പിന്നിലേക്ക് ഷിഫ്റ്റ് ചെയ്യാൻ ഒന്നുകൂടി ആലോചിക്കേണ്ടി വന്നില്ല. ഓഫ് സ്പിന്നറായ മുജീബ് ഉര്‍ റഹ്മാനായിരുന്നു ആദ്യം, ശേഷം മുഹമ്മദ് നബി. മൂന്നാമനായി റാഷിദ് ഖാൻ. മൂന്ന് ഓവറില്‍ സഞ്ജു - അഭിഷേക് സഖ്യം നേടിയത് 55 റണ്‍സ്. പവര്‍പ്ലേ അവസാനിക്കുമ്പോള്‍ ഇന്ത്യയുടെ സ്കോര്‍ 100ലെത്തിച്ചു അഭിഷേക്, ടി20 ക്രിക്കറ്റ് ചരിത്രത്തില്‍ ഇന്ത്യ ആദ്യമായാണ് ഈ നേട്ടത്തിലേക്ക് എത്തുന്നത്. 22 പന്തില്‍ 76 റണ്‍സായിരുന്നു ഇടം കയ്യൻ ബാറ്ററുടെ സംഭാവന. ഇൻസെയിൻ ഹിറ്റിങ്ങ് എന്നൊക്കെ പറയാം, ബാറ്റ് സ്വിങ്ങ്, ടൈമിങ് - ഇറ്റ് വാസ് പെര്‍ഫെക്റ്റ്.

അഭിഷേകിന്റെ ഇന്നിങ്സിന് വളമായത് സഞ്ജുവിന്റെ സ്ട്രൈക്ക് കൈമാറ്റങ്ങളായിരുന്നു. ടോപ് ഫോമിലുള്ള ഒരു താരത്തിന് എങ്ങനെ ഒരു ബാറ്റിങ് പാര്‍ട്ടണര്‍ പിന്തുണ നല്‍കണമെന്നതിന്റെ ഉദാഹരണമാകുകയായിരുന്നു സഞ്ജു. തനിക്ക് ഡൊമിനേറ്റ് ചെയ്യാൻ കഴിയുന്ന പന്തുകളില്‍പ്പോലും സഞ്ജു സിംഗിള്‍ എടുക്കാൻ തയാറാകുകയായിരുന്നു.

പവര്‍പ്ലേ പൂര്‍ണമാകുമ്പോള്‍ അറിയേണ്ടത് ഒന്ന് മാത്രമായിരുന്നു, രോഹിത് ശര്‍മയുടെ ആ റെക്കോര്‍ഡ് തകരുമോയെന്ന്. 35 പന്തില്‍ നേടിയ ആ സെഞ്ചുറി. രണ്ട് ഓവറിനപ്പുറം അബ്ദുള്ള അഹമ്മദ്സായിയുടെ പന്ത് ലോങ് ഓഫിലേക്ക് പറഞ്ഞയച്ച് അഭിഷേക് രോഹിതിന്റെ പേര് റെക്കോര്‍ഡ് പുസ്തകങ്ങളില്‍ തിരുത്തി. 30-ാം പന്തില്‍ മൂന്നക്കം. ഒരു ടെസ്റ്റ് പ്ലെയിങ് നേഷൻ താരത്തിന്റെ ഏറ്റവും വേഗമേറിയത്. ശേഷം ഹെല്‍മെറ്റൂരി വിക്കറ്റില്‍ മെഡിറ്റേഷൻ പോസില്‍ ഒരു ഇരിപ്പുണ്ടായിരുന്നു.

ഓഫ് സ്പിന്നര്‍മാരാണ് അഭിഷേകിന്റെ പ്രധാനവെല്ലുവിളിയെന്ന വിമര്‍ശനമുണ്ടായിരുന്നു, ഇതും പഴങ്കഥയാകുകയാണ്. മുജീബിനെതിരെ അഞ്ച് പന്തില്‍ 17 റണ്‍സ്. മുഹമ്മദ് നബിക്കെതിരെ മൂന്ന് പന്തില്‍ 16 റണ്‍സ്. സ്ട്രൈക്ക് റേറ്റ് 533 ആയിരുന്നു നബിക്കെതിരെ. റാഷിദ് ഖാന് പോലും രക്ഷയുണ്ടായില്ല ഡല്‍ഹിയില്‍. അഭിഷേക് നേരിട്ട ബൗളര്‍മാരിര്‍ സ്ട്രൈക്ക് റേറ്റ് മൂന്നൂറില്‍ താഴെ ഉണ്ടായിരുന്നത് അഹമ്മദ്സായിക്ക് മാത്രമായിരുന്നു, അതും 200 ആയിരുന്നുവെന്ന് ഓര്‍ക്കണം. സ്കോറില്‍ 94 ശതമാനം റണ്‍സും ബൗണ്ടറിയില്‍ നിന്ന് മാത്രം.

സഞ്ജുവും അഭിഷേകും തുടരും...വൈഭവ് അല്‍പ്പം കൂടി കാത്തിരിക്കേണ്ടി വരും...

രാജാവിന് വഴിയൊരുക്ക്! കോലി എന്തുകൊണ്ട് ഓട്ടോമാറ്റിക്ക് ചോയ്‌സാകുന്നു?

Hari Krishnan M — Thu, 24 Sep 2026 13:15:32 +0530

വിരാട് കോഹ്ലി, രോഹിത് ശ‍‍ര്‍മ. ഒപ്പം 2027 ഏകദിന ലോകകപ്പും. സമീപകാലത്ത് ഇന്ത്യൻ ക്രിക്കറ്റില്‍ ഇത്രത്തോളം ചര്‍ച്ച ചെയ്യപ്പെട്ട മറ്റൊരു വിഷയമുണ്ടാകില്ല. രോഹിത് ഓരോ മത്സരത്തിലും, പരമ്പരയിലും ഓഡിറ്റ് ചെയ്യപ്പെടുമ്പോള്‍ കോഹ്ലിക്ക് അത്രത്തോളം പരീക്ഷണം നേരിടേണ്ടിയും വരുന്നില്ല. ദക്ഷിണാഫ്രിക്കയും സിംബാബ്‌വെയും നമീബിയയും ആതിഥേയത്വം വഹിക്കുന്ന ടൂ‍ര്‍ണമെന്റില്‍ കോഹ്ലി എന്തുകൊണ്ടൊരു ഓട്ടോമാറ്റിക്ക് ചോയിസാകുന്നു.

Gill is very fortunate that he's got the likes of Rohit and Virat to help him on the field and off the field as well. കളത്തിനകത്തും പുറത്തും സഹായത്തിനായി രോഹിതിനേയും വിരാടിനേയും പോലുള്ളവരെ ലഭിച്ചത് ഗില്ലിന്റെ ഭാഗ്യമാണ്. ഇന്ത്യൻ ക്രിക്കറ്റ് ടീമിന്റെ മുഖ്യപരിശീലകനായ ഗൗതം ഗംഭീറിന്റെ വാക്കുകളാണ്. ഇതൊരു ചെറിയ സൂചനയാണ്. 2027 ലോകകപ്പില്‍ ഇതിഹാസങ്ങളെ പ്രതീക്ഷിക്കാമെന്ന്. പക്ഷേ, ഇവിടെ 90 ശതമാനവും ഉറപ്പുള്ളത് കോഹ്‌ലിയുടെ കാര്യത്തിലാകും.

ഒന്ന് കോഹ്ലിയുടെ അസാധാരണ ഫോമാണ്. ടെസ്റ്റ്, ടി20 ഫോ‍ര്‍മാറ്റുകളില്‍ നിന്നും വിരമിച്ച കോഹ്ലിയുടെ ഏകദിനത്തിലെ നമ്പറുകള്‍ നിലവില്‍ ലോക ക്രിക്കറ്റിലെ തന്നെ ഏറ്റവും മികച്ചതാണ്. 2026ല്‍ ആറ് ഏകദിനങ്ങളിലാണ് കോഹ്ലി ഇന്ത്യക്കായി ക്രീസിലെത്തിയത്. മൂന്ന് അര്‍ദ്ധ സെഞ്ചുറികള്‍, ഒരു ശതകം. 64 ശരാശരിയില്‍ 384 റണ്‍സ്. സ്ട്രൈക്ക് റേറ്റ് നൂറും കടന്ന് 106 തൊട്ടിരിക്കുന്നു.

തന്റെ കരിയറിലുടനീളം സ്വീകരിച്ച കരുതല്‍ സമീപനമല്ല കോഹ്ലി ഇന്ന് മൈതാനങ്ങളില്‍ പുറത്തെടുക്കുന്നത്, മറിച്ച് അഗ്രസീവ് ക്രിക്കറ്റാണ്. ഇത് കോഹ്ലിക്ക് സക്‌സസ് നല്‍കുന്നുമുണ്ട് എന്നതാണ് പ്രധാനപ്പെട്ട ഘടകം. If I'm arriving somewhere I'll arrive at 120% എന്നാണ് കോഹ്ലി തന്നെ ഒരിക്കല്‍ പറഞ്ഞിട്ടുള്ളത്. അത് ശാരീരിക ക്ഷമതയില്‍ മാത്രമല്ല, മാനസികമായും എല്ലാത്തരത്തിലും അയാള്‍ തയാറാണ് എന്ന് തന്നെയാണ് അര്‍ത്ഥം.

കോഹ്ലിക്ക് മുൻതൂക്കം നല്‍കുന്ന മറ്റൊരു ഘടകം പ്രായവും കായികക്ഷമതയുമാണ്. നിലവില്‍ 37 വയസും 323 ദിവസവുമാണ് കോഹ്ലിയുടെ പ്രായം. ലോകകപ്പ് ആരംഭിക്കുമ്പോള്‍ കോഹ്ലിയുടെ പ്രായം 38 ന്റെ അവസാനങ്ങളിലായിരിക്കും. സമീപകാലത്തൊന്നും കാര്യമായ പരിക്കുകളൊന്നും താരത്തിന് സംഭവിച്ചിട്ടുമില്ല. ഇന്ത്യൻ ക്രിക്കറ്റില്‍ ഫിറ്റ്നസിന്റെ കാര്യത്തില്‍ വിപ്ലവം സൃഷ്ടിച്ച വ്യക്തിയാണ് കോഹ്ലി. അത് പലതാരങ്ങളും തുറന്നുപറഞ്ഞിട്ടുമുണ്ട്. ഒരു ഓവറിലെ ആറ് പന്തിലും ട്രിപ്പിളോടിയെടുക്കാൻ കഴിയുന്ന ഇന്ത്യൻ താരമുണ്ടോയെന്ന് ചോദിച്ചാല്‍ കോഹ്ലിയെന്ന് മാത്രമായിരിക്കും ഉത്തരം.

ദക്ഷിണാഫ്രിക്കയിലേയും സിംബാബ്‌വയിലേയും കോഹ്ലിയുടെ റെക്കോര്‍ഡ് പരിശോധിച്ചാല്‍ തന്നെ വ്യക്തമാണ് എത്രത്തോളം വാല്യുബിള്‍ ആണ് കോഹ്ലിയുടെ പ്രസൻസ് എന്ന്. ദക്ഷിണാഫ്രിക്കയില്‍ 18 ഇന്നിങ്സുകളില്‍ നിന്ന് 993 റണ്‍സ്. ശരാശരി 76 ആണ്, മൂന്ന് സെഞ്ചുറിയും ആറ് അര്‍ദ്ധ സെഞ്ചുറികളുമുണ്ട്. ഇനി സിംബാബ്‌വയിലെ മൈതാനങ്ങളിലേക്ക് എത്തിയാല്‍ ഏഴ് ഇന്നിങ്സുകളില്‍ നിന്ന് 365 റണ്‍സ്. ശരാശരി അറുപതാണ്, ഇതില്‍ നാല് ഇന്നിങ്സിലും 50 പ്ലസ് സ്കോര്‍ ചെയ്യാൻ കോഹ്ലിക്ക് കഴിഞ്ഞിട്ടുമുണ്ട്.

ലോകകപ്പിലെ കോഹ്ലിയുടെ പ്രകടനങ്ങളും പ്രഷര്‍ അബ്സോര്‍ബ് ചെയ്യാനുള്ള വൈഭവമൊക്കെ ഒന്ന് തിരിഞ്ഞുനോക്കിയാല്‍ അറിയാം...ലോകകപ്പ് ചരിത്രത്തിലെ രണ്ടാമത്തെ ടോപ് സ്കോററാണ് കോഹ്ലി, സച്ചിൻ തെൻഡുല്‍ക്കറിന് പിന്നില്‍...അഞ്ച് സെഞ്ചുറിയും 12 അര്‍ദ്ധ സെഞ്ചുറിയുമുണ്ട് ടൂര്‍ണമെന്റില്‍. കോഹ്ലി മികച്ച ഫോമിലല്ലെങ്കില്‍പ്പോലും ടീമില്‍ ഉള്‍പ്പെടാനുള്ള സാധ്യതയേറെയാണ്.

എന്നാല്‍ രോഹിതിന്റെ കാര്യം വ്യത്യസ്തമാണ്. താരം മികച്ച ഫോമിലാണ് എന്നതില്‍ രണ്ട് അഭിപ്രായമില്ല. ലോര്‍ഡ്സിലെ സെഞ്ചുറി എല്ലാ വിമര്‍ശനങ്ങള്‍ക്കുമുള്ള മറുപടിയായിരുന്നു. ഫോം അല്ല പ്രധാന ഘടകം, കായികക്ഷമതയാണ്, ലോകകപ്പെത്തുമ്പോഴേക്കും രോഹിതിന്റെ പ്രായം 40 കടക്കും. ഐപിഎല്ലിനിടെ ഹാംസ്ട്രിങ്ങ് ഇഞ്ചുറി പറ്റിയ രോഹിതിന് നാല് മാത്സരങ്ങള്‍ നഷ്ടമായിരുന്നു. ഇന്ത്യൻ ടീമിനൊപ്പമുള്ള ഏകദിന മത്സരങ്ങളിലും താരം പരിക്ക് മൂലം സ്ട്രഗിള്‍ ചെയ്യുന്നത് പലകുറി കണ്ടു.

2027 ലോകകപ്പിന്റെ ഫോര്‍മാറ്റ് പരിശോധിക്കുകയാണെങ്കില്‍, ഇന്ത്യ ഫൈനല്‍ വരെ എത്തുകയാണെങ്കില്‍ 13 മത്സരങ്ങളാണുണ്ടാകുക. 48 ദിവസത്തിനിടെയാണ് ഇത്രയും മത്സരങ്ങള്‍. രോഹിതിന്റെ ശരീരം അദ്ദേഹത്തെ അനുവദിക്കുമോയെന്നതില്‍ മാത്രമാണ് നിലവിലെ ആശങ്ക. അതിന് രോഹിതിന് കഴിയുമെങ്കില്‍ രണ്ടാമതൊരു പേരുതേടി പോകേണ്ടതില്ല ബിസിസിഐ, ലോകകപ്പുകളിലെ രോഹിതിന്റെ മികവ് തന്നെ കാരണം. മിസ്റ്റര്‍ വേള്‍ഡ് കപ്പ് എന്ന് വിളിക്കാൻ കഴിയുന്ന ഇന്നിങ്സുകളാണ് രോഹിത് പുറത്തെടുത്തിട്ടുള്ളത്.

2019 ലോകകപ്പിന്റെ ടോപ് സ്കോറര്‍, 2023ല്‍ അഞ്ഞൂറ് റണ്‍സിലധികം, അതും 120ന് മുകളില്‍ സ്ട്രൈക്ക് റേറ്റില്‍. ടൂര്‍ണമെന്റിന്റെ സമ്മര്‍ദങ്ങളൊന്നുമില്ലാതെ ബാറ്റ് ചെയ്യാൻ കഴിയുമെന്ന് രോഹിത് പലകുറി തെളിയിച്ചതാണ്. അതുകൊണ്ട് വെസ്റ്റ് ഇൻഡീസിനെതിരായ പരമ്പര കോഹ്ലിയേക്കാള്‍ നിര്‍ണായകമാകുക രോഹിതിന് തന്നെയാകും, കോഹ്ലിക്കും പരീക്ഷണം തന്നെയാണ്. യശസ്വി ജയ്സ്വാള്‍ നല്‍കുന്ന സമ്മര്‍ദത്തേയും രോഹിതിന് മറികടക്കേണ്ടതുണ്ട്.

അണ്‍സ്റ്റോപ്പബിള്‍! കാര്യവട്ടത്ത് കോലിയുടെ 'പുതിയ വേർഷൻ'; എന്തൊരു ഇന്നിങ്സ്...

Hari Krishnan M — Mon, 28 Sep 2026 14:07:16 +0530

I promised myself I'm going to play positively because I can...

ഡീപ് സ്ക്വയര്‍ ലെഗില്‍ നിന്ന് ജൂവല്‍ ആൻഡ്രു രോഹിത് ശര്‍മയുടെ മടക്കം ഉറപ്പാക്കിയ നിമിഷം. നിശബ്ദതയില്‍ നിന്ന് പൊടുന്നനെ കാര്യവട്ടത്തിന്റെ ഗ്യാലറികള്‍ ആരവങ്ങളായി പരിവര്‍ത്തനപ്പെട്ടു. ഏകദിന ചരിത്രത്തില്‍ താനിതുവരെ വീഴാത്ത ആ മണ്ണിലേക്ക് അയാളുടെ ചുവടുവെപ്പ്...അവിടെ ആ പേര് നിലയ്ക്കാതെ ഉരുവിട്ടുകൊണ്ടേയിരിക്കുകയാണ്...

തെളിയിക്കാനൊ നേടിയെടുക്കാനോ ഇനിയൊന്നും ബാക്കിയില്ല, ആയുസിന്റെ പാതിയിലധികവും നല്‍കി കെട്ടിപ്പടുത്ത സാമ്രാജ്യത്തില്‍ അയാളുടെ സിംഹാസനത്തെ വെല്ലുവിളിക്കാൻപ്പോലും ഒരാള്‍ ഇല്ല...എന്നിട്ടും കരിയറിന്റെ സായാഹ്നത്തില്‍ അയാള്‍ തന്റെ ഏറ്റവും മികച്ച വേര്‍ഷൻ അണ്‍ലീഷ് ചെയ്യുകയാണ്...

അല്‍സാരി ജോസഫിന്റെ കൈകളില്‍ നിന്ന് മണിക്കൂറില്‍ 145 കിലോ മീറ്റര്‍ വേഗതയിലൊരു പന്ത് നെഞ്ചിന് നേര്‍ക്ക്. പുള്‍ ചെയാനുള്ള ശ്രമത്തിനിടെ പന്ത് ടോപ് എഡ്ജ് ചെയ്ത് ഷായ് ഹോപ്പിന്റെ തലയ്ക്ക് മുകളിലൂടെ ബൗണ്ടറിക്കപ്പുറം...നേരിട്ട മൂന്നാം പന്തില്‍ ആദ്യ സിക്സ്. ഇവിടെ നിന്ന് അയാള്‍ തുടങ്ങുകയാണ്...വിരാട് കോഹ്ലി.

കഴിഞ്ഞ ഒരു വര്‍ഷം പരിശോധിച്ചാല്‍, നേരിടുന്ന ആദ്യ പത്ത് പന്തിനുള്ളില്‍ തന്നെ ഒന്നോ രണ്ടോ സിക്സ് കണ്ടെത്തി ബൗളര്‍മാരെ ടേക്ക് ഓണ്‍ ചെയ്യുന്നതാണ് കോഹ്ലിയുടെ ശൈലി. ഹൈലി അഗ്രസീവായി, അതേ സമയം വെല്‍ കണ്‍ട്രോള്‍ഡുമായി. ഈ ബാലൻസ് കണ്ടെത്തുക എളുപ്പമല്ല, രോഹിതിനെ വിക്കറ്റിലേക്ക് നയിക്കുന്നതും ശുഭ്മാൻ ഗില്‍ ഏരിയല്‍ ഷോട്ടുകള്‍ കളിക്കാൻ തയാറാകാത്തതും ഒരുപരിധിവരെ ആ ബാലൻസ് കണ്ടെത്താൻ കഴിയാത്തതാണ്. This is what experience brings to the table: 18 years in the middle.

18-ാം ഓവറിലെ അഞ്ചാം പന്തില്‍ ഗുദാകേഷ് മോത്തി കോഹ്ലിയെ ഒന്ന് പരീക്ഷിച്ചു, അതുവരെ മോത്തി എറിഞ്ഞ പന്തുകളുടെ വേഗത വളരെ കുറവും ലെങ്ത് ഏറെക്കുറെ സമാനവുമായിരുന്നു. മണിക്കൂറില്‍ 80 കിലോ മീറ്ററില്‍ നിന്ന് 92ലേക്കൊരു ഷിഫ്റ്റ്, ഗുഡ് ലെങ്ത് ഡെലിവെറി. കോഹ്ലി അതിവേഗം ലെങ്ത് പിക്ക് ചെയ്യുക മാത്രമായിരുന്നില്ല, ബാക്ക് ഫൂട്ടില്‍ ബാക്ക് വേഡ് പോയിന്റിനും ഷോട്ട് തേഡിനും ഇടയിലൂടെ മനോഹരമായൊരു കട്ട് ഷോട്ടിലൂടെ ബൗണ്ടറിയും കണ്ടെത്തി, പ്യുവര്‍ ക്ലാസ്.

മാത്യു ഫോര്‍ഡെയുടെ ഫുള്‍ ലെങ്തില്‍ ഒരു ഫ്ലിക്ക്. കോഹ്ലിയെ മൂന്ന് തവണ പുറത്താക്കിയ ചരിത്രമുള്ള അല്‍സാരിയെ നിരന്തരം ഷായ് ഹോപ് ഉപയോഗിക്കുകയായിരുന്നു. തന്റെ ആയുധപ്പുരയിലെ എല്ലാ അസ്ത്രങ്ങളും അല്‍സാരി പ്രയോഗിച്ചു, പക്ഷേ കോഹ്ലിയെ ഔട്ട്പ്ലേ ചെയ്യുക എന്നത് അസാധ്യമായിരുന്നു. തന്റെ രണ്ടാം സ്പെല്ലിനെത്തിയ അല്‍സാരിയുടെ ഗുഡ് ലെങ്ത് ഡെലിവെറിയില്‍ ഒരു സ്ട്രെയിറ്റ് ഡൗണ്‍ ദ ഗ്രൗണ്ട് സിക്സ്. എ ഷോട്ട് ഓഫ് എ കിംഗ്. 40 പന്തില്‍ അര്‍ദ്ധ സെഞ്ചുറി.

2025 ചാമ്പ്യൻസ് ട്രോഫിക്ക് ശേഷം 100 സ്ട്രൈക്ക് റേറ്റിന് മുകളില്‍ കോഹ്ലി നേടുന്ന ആറാമത്തെ അര്‍ദ്ധ ശതകമാണിത്. അല്‍സാരിയുടെ ഷോര്‍ട്ട് ബോളുകളെല്ലാം ബൗണ്ടറി റോപ്പുകള്‍ താണ്ടിക്കൊണ്ടേയിരുന്നു. അല്‍സാരിയെ മിഡ് വിക്കറ്റിലേക്ക് അയച്ച് ഏകദിന ഫോര്‍മാറ്റില്‍ 15000 റണ്‍സ്, കേവലം 303 ഇന്നിങ്സുകളില്‍ നിന്ന്, സച്ചിന് തെൻഡുല്‍ക്കറിന് ആവശ്യമായി വന്നത് 377 ഇന്നിങ്സുകളായിരുന്നുവെന്ന് ഓര്‍ക്കണം. ഇൻസെയിൻ നമ്പേഴ്സ്.

അര്‍ദ്ധ ശതകത്തിന് ശേഷം കോഹ്ലി തന്റെ ഇന്നിങ്സ് ടോപ് ഗിയറിലേക്ക് ഷിഫ്റ്റ് ചെയ്യുകയായിരുന്നു. മറുവശത്ത് ഷായ് ഹോപ്പിന്റെ ബൗളിങ് സംഘം അയാള്‍ക്ക് മുന്നില്‍ പൂര്‍ണമായും കീഴടങ്ങുകയും ചെയ്തു. സെഞ്ചുറിയോട് അടുക്കുമ്പോള്‍ സമ്മര്‍ദത്തിലേക്ക് വീഴുന്ന വിരാട് കോഹ്ലി എന്ന പരിഹാസത്തെ പഴങ്കഥയാക്കി മോത്തിക്കെതിരെ ക്രീസുവിട്ടിറങ്ങി ലോങ് ഓണിലേക്കൊരു പടുകൂറ്റൻ സിക്സ്. ഫോര്‍മാറ്റിലെ 55-ാം ശതകം. കമന്ററി ബോക്സിലിരുന്ന ഹര്‍ഷ ബോഗ്ലെ പറഞ്ഞു. and the news from Virat Kohli to everybody else is, I am still here, I am not going anywhere. Yes, Virat Kohli is here to stay and there's nothing anyone can do about it.

കാര്യവട്ടത്തെ മനുഷ്യാരവത്തിന്റെ ആദരമെല്ലാം അയാള്‍ ഹെല്‍മെറ്റൂരി ബാറ്റ് ഉയര്‍ത്തി സ്വീകരിച്ചു. മൈതാനത്തെ രണ്ടാം ഏകദിന സെഞ്ചുറി, വിൻഡീസിനെതിരെ നാഴികക്കല്ലിലേക്ക് എത്തുന്നത് പത്താം തവണ...അര്‍ദ്ധ സെഞ്ചുറിയില്‍ നിന്ന് ശതകത്തിലേക്ക് എത്താൻ എടുത്തത് 34 പന്തുകള്‍ മാത്രം, ഇടയില്‍ നാല് സിക്സും മൂന്ന് ഫോറും.

എല്ലാത്തിലും ഉപരി അതിശയിപ്പിച്ച മറ്റൊന്ന്, 39-ാം ഓവറിലെ അഞ്ചാം പന്തിലായിരുന്നു. മിഡ് ഓണിലേക്ക് റുതുരാജിന്റെ ഒരു ഫ്ലിക്ക്, ഡബിളില്‍ ഒതുക്കാൻ റുതുവിന്റെ ശ്രമം ഉണ്ടായിരുന്നെങ്കിലും ട്രിപ്പിളിനായി കോഹ്ലി കുതിച്ചു, 75 ഓവറിലധികമായി മൈതാനത്ത് തുടരുന്ന താരം, കാലാവസ്ഥയാകട്ടെ ശരീരത്തെ തളര്‍ത്തുന്ന തരത്തിലും, പ്രായം 38ലേക്ക് എത്തുന്നു. വിരാട് കോഹ്ലിയുടെ ഫിറ്റ്നസിന്റെ പീക്ക് ക്രിക്കറ്റ് ലോകം കണ്ട നിമിഷം...

സെഞ്ചുറിക്ക് ശേഷം കോഹ്ലിക്ക് കാര്യങ്ങള്‍ കൂടുതല്‍ അനായാസമായിരുന്നു. ഇന്ത്യയെ വിജയത്തിലേക്ക് എത്തിക്കാൻ അയാള്‍ക്ക് വേണ്ടി വന്നത് കേവലം 14 പന്തുകള്‍ക്കൂടി. ഇതില്‍ ഏഴ് പന്തും ബൗണ്ടറി, നാല് ഫോറും മൂന്ന് സിക്സും. കേയ്സി കാര്‍ട്ടിയുടെ ലെഗ് സ്റ്റമ്പിനെ ലക്ഷ്യമാക്കിയെത്തിയ പന്ത് ഫൈൻ ലെഗില്‍ നിക്ഷേപിച്ച് സിക്സിലൂടെ തന്നെ ഫിനിഷ് ചെയ്യുന്നു.

88 പന്തില്‍ 139 റണ്‍സ്. 10 ഫോറും ഒൻപത് സിക്സും. സ്ട്രൈക്ക് റേറ്റ് 157. കഴിഞ്ഞ 10 ഏകദിനങ്ങളിലെ വിരാട് കോഹ്ലിയുടെ സ്കോറുകള്‍ പരിശോധിച്ചാല്‍ നാല് വീതും സെഞ്ചുറികളും അർദ്ധ ശതകങ്ങളും. 2027 ഏകദിന ലോകകപ്പിനുള്ള ഇന്ത്യൻ ടീമിലെ ആദ്യ പേര് അയാളുടേത് മാത്രമായിരിക്കും, വിരാട് കിങ് കോഹ്ലി.

നേരിട്ടത് അനീതി മാത്രം! സഞ്ജുവിന്റെ സ്ഥിരതയെ സംശയിക്കുന്നവർ അറിയേണ്ട ചില വസ്തുതകള്‍

Hari Krishnan M — Thu, 17 Sep 2026 13:35:32 +0530

Sanju's ability was never in doubt, consistency was, സഞ്ജുവിന്റെ മികവില്‍ ഒരിക്കലും സംശയങ്ങളുണ്ടായിരുന്നില്ല. പക്ഷേ സ്ഥിരതയിലാണ് ആശങ്ക. അഫ്ഗാനിസ്ഥാനെതിരായ രണ്ടാം ടി20ക്ക് ശേഷം മുൻ ഇന്ത്യൻ താരം മുഹമ്മദ് കൈഫിന്റെ വാക്കുകളാണിത്. 22 പന്തില്‍ 57 റണ്‍സ്, സ്ട്രൈക്ക് റേറ്റ് 259. ഒരു ടോപ് ക്ലാസ് - അഗ്രസീവ് ഇന്നിങ്സ്, ഫോര്‍മാറ്റിന്റെ ഉന്നതിയിലേക്ക് ടീമിനെ ഒറ്റയ്ക്ക് ചുമന്നെത്തിച്ചത് ഓര്‍ത്തെടുക്കാൻ ഒരുപാട് പിന്നോട്ട് പോകേണ്ടതുമില്ല. പക്ഷേ, കണ്‍സിസ്റ്റൻസിയുടെ പേരില്‍ ഒരോ മത്സരങ്ങള്‍ക്ക് ശേഷവും ഓഡിറ്റ് ചെയ്യപ്പെടുന്നു, അത് സ്കോര്‍ ചെയ്യുന്ന റണ്‍സിന്റെ അടിസ്ഥാനത്തില്‍പ്പോലുമല്ലെന്ന് ഓര്‍ക്കണം.

ഒരു അര്‍ദ്ധ സെഞ്ചുറിയോ ശതകമോ, അല്ലെങ്കില്‍ മികച്ച ഒരു ഇന്നിങ്സോ കാഴ്വെച്ചാല്‍ അടുത്ത അഞ്ച് മത്സരങ്ങളില്‍ ഒറ്റയക്കത്തിലാകും പുറത്താകുക എന്ന പ്രവചനത്തിലേക്കാണ് പല പണ്ഡിതരും എത്തുന്നത്. സഞ്ജുവിന്റെ കണ്‍സിസ്റ്റൻസിയെ ചോദ്യം ചെയ്യുന്നവര്‍ അറിഞ്ഞിരിക്കേണ്ട ചിലതുണ്ട്.

സഞ്ജുവിന്റെ അന്താരാഷ്ട്ര ടി20 കരിയറിന് തുടക്കമാകുന്നത് 2015 ജൂലൈ 19നാണ്, സിംബാബ്‌വെയ്ക്ക് എതിരെ ഹരാരയില്‍. 19 റണ്‍സായിരുന്നു നേട്ടം. തന്റെ രണ്ടാം മത്സരത്തിനായി കാത്തിരിക്കേണ്ടി വന്നത് അഞ്ച് വര്‍ഷമാണ്. ശ്രീലങ്കയ്ക്ക് എതിരായ മൂന്ന് മത്സരങ്ങളുള്ള പരമ്പരയില്‍ ഒരു അവസരം. രണ്ട് മത്സരത്തിന്റെ ഇടവേളയിലാണ് ഐപിഎല്ലിലെ വളര്‍ച്ച, ഇന്ത്യയിലെ ഏറ്റവും മികച്ച യുവതാരമെന്ന് ഖ്യാതി നേടിയെടുക്കാൻ അനായാസം കഴിഞ്ഞ സമയം.

ഇക്കാലയളവിലാണ് ഇന്നത്തെ ഇന്ത്യയുടെ മുഖ്യപരിശീലകനായ ഗൗതം ഗംഭീര്‍ സഞ്ജുവിനായി വെല്ലുവിളികള്‍പ്പോലും സമൂഹമാധ്യമങ്ങളിലൂടെ നടത്തിയത്. Sanju Samson is not just the best wicketkeeper batsmen in India but the best young batsman in India! Anyone up for debate? എന്നായിരുന്നു ആദ്യ ട്വീറ്റ്. ഒരാഴ്ചയ്ക്ക് ശേഷം ഒന്നുകൂടി ,Sanju Samson doesn’t need to be next anyone. He will be ‘the’ Sanju Samson of Indian Cricket. ഇതിനെല്ലാം കാരണമായത് പഞ്ചാബ് കിങ്സിനെതിരായ ഇന്നിങ്സാണ്, 224 റണ്‍സ് പിന്തുടരവെ 42 പന്തില്‍ 85 റണ്‍സുമായി കളിയിലെ താരമായത് സഞ്ജുവായിരുന്നു.

ശ്രീലങ്കയ്ക്ക് എതിരായ ഒരു മത്സരത്തിന് ശേഷം ന്യൂസിലൻഡ് പര്യടനത്തില്‍ അഞ്ചി ടി20കളില്‍ രണ്ട് എണ്ണം. ഈ മൂന്ന് അവസരത്തിലും സഞ്ജുവിന് പ്രതീക്ഷിക്കൊത്ത് തിളങ്ങാൻ കഴിഞ്ഞില്ല. പിന്നാലെ നടന്ന ഓസ്ട്രേലിയൻ പര്യടനത്തില്‍ പൂര്‍ണസ്വാതന്ത്ര്യം വലം കയ്യൻ ബാറ്റര്‍ക്ക് നല്‍കി മാനേജ്മെന്റ്, 23, 15, 10 എന്നിങ്ങനെയായിരുന്നു സ്കോര്‍.

2021ല്‍ ഇന്ത്യ 12 ടി20 മത്സരങ്ങളാണ് കളിച്ചത്, സഞ്ജു ഭാഗമായത് മൂന്ന് മത്സരങ്ങളില്‍, ശ്രീലങ്കയ്ക്ക് എതിരെ. ലങ്കൻ പര്യടനത്തിലും സഞ്ജുവിന് തിളങ്ങാൻ കഴിയാതെ പോയി. ഇതുവരെയുള്ള സഞ്ജുവിന്റെ എല്ലാ മത്സരങ്ങളും വിദേശത്തായിരുന്നു. ആദ്യമായി സഞ്ജുവൊരു അന്താരാഷ്ട്ര ടി20 ഇന്ത്യയില്‍ കളിക്കുന്നത് 2022ലാണ്, 40 ടി20കളാണ് ആ വര്‍ഷം ഇന്ത്യ കളിച്ചത്. അഞ്ച് മത്സരങ്ങളിലാണ് സഞ്ജുവിനെ പരിഗണിച്ചത്. അഞ്ചിലും സഞ്ജു നിരാശപ്പെടുത്തിയില്ല, 179 റണ്‍സ് നേടി.

പക്ഷേ, ശേഷം നടന്ന ടി20 ലോകകപ്പില്‍ സഞ്ജുവിന് സ്ഥാനമുണ്ടായില്ല. 2023ലും പരമ്പരകളിലെ ചുരുക്കം മത്സരങ്ങളില്‍ സഞ്ജുവിന്റെ കരിയര്‍ ഒതുങ്ങി. ടീമില്‍ തനിക്ക് കൃത്യമായൊരു സ്ഥാനം ലഭിക്കുമെന്നുറപ്പില്ലാതെ ഗസ്റ്റ് റോളില്‍ എട്ട് വര്‍ഷങ്ങള്‍. 2024 ലോകകപ്പ് ടീമില്‍ ഭാഗമായെങ്കിലും അവസരം ലഭിച്ചില്ല. എങ്കിലും രോഹിത് ശര്‍മയുടേയും വിരാട് കോലിയുടേയും പടിയിറക്കം സഞ്ജുവിന് സ്ഥിരസാന്നിധ്യം ഒരുക്കിക്കൊടുത്തു.

ബംഗ്ലാദേശിനും ദക്ഷിണാഫ്രിക്കയ്ക്കുമെതിരെ നേടിയ സെഞ്ചുറികള്‍ അത് ശരിവെക്കുകയും ചെയ്തു. എല്ലാം ശരിയായ ദിശയിലെന്ന് തോന്നിച്ചപ്പോഴാണ് ശുഭ്മാൻ ഗില്ലിന്റെ രണ്ടാം വരവും പിൻനിരയിലേക്ക് ഇറങ്ങേണ്ടി വന്നതും. ഗില്ലിന്റെ അഭാവത്തില്‍ മാത്രമാണ് സഞ്ജു ഓപ്പണറായതെന്ന് അഗാര്‍ക്കറിന്റെ പ്രഖ്യാപനവും വന്നു. ഒരു തരത്തില്‍ സഞ്ജുവിന്റെ നേട്ടങ്ങളെ റദ്ദ് ചെയ്യുകയായിരുന്നു അഗാര്‍ക്കര്‍.

പക്ഷേ ദക്ഷിണാഫ്രിക്കയ്ക്ക് എതിരായ ഒറ്റ ഇന്നിങ്സ് ലോകകപ്പ് ടീമില്‍ എത്തിക്കുന്നു, പിന്നാലെ ന്യൂസിലൻഡ് പരമ്പരയില്‍ അമ്പേ പരാജയം...തീര്‍ന്നുവെന്ന് കരുതിയ ഇടത്തുനിന്ന് സംഭവിച്ചതൊക്കെയും ക്രിക്കറ്റ് ഉള്ളടിത്തോളം കാലം ഓര്‍മിക്കുന്ന ഇന്നിങ്സുകളായിരുന്നു, ചരിത്രത്തിലെ ഏറ്റവും വലിയ കംബാക്ക്. ഇനി സഞ്ജുവിന്റെ സ്ഥാനത്തില്‍ ചോദ്യമുയരില്ല എന്ന് തോന്നിച്ചപ്പോഴാണ് ഒരിക്കല്‍ക്കൂടി പുറത്തിരിക്കേണ്ടി വന്നത്. വൈഭവിനായി വഴിമാറിക്കോടുക്കേണ്ട സാഹചര്യമുണ്ടായതും.

സഞ്ജുവിന്റെ ടി20 കരിയര്‍ മുഴുവനായും പരിശോധിച്ചാല്‍ ഒരു പീക്ക് കണ്‍സിസ്റ്റൻസി കാണാൻ കഴിഞ്ഞേക്കില്ല. പക്ഷേ, അതിനൊരു മറുവശം കൂടിയുണ്ട്, സഞ്ജുവില്‍ എത്രകാലം ടിം മാനേജ്മെന്റ് വിശ്വാസം അ‍‍‍ര്‍പ്പിച്ചിട്ടുണ്ട് എന്ന ചോദ്യം. സീനിയര്‍ താരങ്ങള്‍ക്ക് വിശ്രമം കൊടുക്കാനായി മാത്രം ടീമില്‍ എത്തിയിരുന്ന ബാറ്റര്‍. സൂര്യകുമാര്‍ യാദവിന്റെ കീഴിലാണ് സഞ്ജുവിന്റെ കരിയറിനൊരു കിക്കോഫ് പോലും ലഭിച്ചത്, അതും അരങ്ങേറിയിട്ട് ഒരു പതിറ്റാണ്ട് ആകുമ്പോള്‍. അവസരം കാര്യമായി ലഭിച്ചാല്‍ അല്ലെ കണ്‍സിസ്റ്റൻസി തെളിയിക്കാനാകുവെന്ന ചോദ്യത്തിന് പ്രസക്തിയുണ്ട്.

ഇനി പുറത്താകുന്ന രീതികളും ഷോട്ടുകളും, സഞ്ജു പ്രതിരോധത്തിന് മുതിര്‍ന്ന് പുറത്തായ ചുരുക്കം സാഹചര്യങ്ങളെ ഉദാഹരിക്കാൻ പോലുമുണ്ടാകു. ഫിയര്‍ലെസായി കളിക്കുക എന്നതാണ് നിലപാട്, അതില്‍ നിന്ന് പിന്നോട്ട് പോകാൻ തയാറായിട്ടുമില്ല, തയാറാകുകയുമില്ലെന്നാണ് അയാള്‍ വ്യക്തമാക്കുന്നതും. I take the chances knowing that if I fail again, I will be facing a lot of noise again, But I think that is the way we are built here in Indian cricket, and I just go out there and try to score maximum and contribute.

അഫ്ഗാനിസ്ഥാനെതിരായ അര്‍ദ്ധ ശതകം സഞ്ജുവിന്റെ സ്ഥാനത്തിനുറപ്പ് നല്‍കുന്നതാണോയെന്ന് ചോദിച്ചാല്‍ കൃത്യമായൊരു ഉത്തരമില്ല. അടുത്ത പരമ്പരയിലേക്ക് മാത്രമൊരു ഉറപ്പെന്ന് പറയാം. മല്ലിടേണ്ടത് വൈഭവ് സൂര്യവംശിയോടാണ്, പോരാട്ടം തുടരും..

ബാഴ്സയുടെ മുന്നിലൊന്നും പോകണ്ട! ഈ സീസണിലും റയല്‍ മാഡ്രിഡിന്റെ കാര്യം കഷ്ടം

Hari Krishnan M — Tue, 22 Sep 2026 16:26:50 +0530

മാഡ്രിഡ് ഡര്‍ബിക്ക് ശേഷം റയലിനോട് ഒന്നേ പറയാനുള്ളു, ഈ കളികൊണ്ട് ബാഴ്സലോണയുടെ മുന്നിലേക്കൊന്നും ചെല്ലരുത്, ഹൻസി ഫ്ലിക്കിന്റെ പിള്ളേര്‍ തലമുറകളെ വേട്ടയാടാൻ കെല്‍പ്പുള്ള 90 മിനുറ്റുകളായിരിക്കും സമ്മാനിക്കുക. റോഡ്രിയെ ലഭിച്ചിരുന്നെങ്കിലെന്ന് മാഡ്രിഡ് ആരാധകര്‍ കൊതിക്കുന്നുണ്ടാകുമിപ്പോള്‍.

ഡെര്‍ബിക്ക് പിന്നാലെയുള്ള ഹോസെ മൗറിഞ്ഞ്യോയുടേയും ഡിയേഗൊ സിമിയോണിയുടേയും പ്രതികരണങ്ങള്‍ നോക്കൂ. നമുക്ക് ഈ പത്രസമ്മേളനം ഒഴിവാക്കാം, കാരണം, കളിയുടെ സാംരാംശം ഇവിടെ തന്നെയുണ്ട്. അത്ലറ്റിക്കൊ മാഡ്രിഡ് താരങ്ങള്‍ക്ക് ചുവപ്പുകാര്‍ഡ് ലഭിക്കേണ്ട ഫൗളുകളുടെ ചിത്രം ഉയര്‍ത്തിപ്പിടിച്ച് മൗറിഞ്ഞ്യോ പറഞ്ഞു. റയല്‍ മാഡ്രിഡിന്റെ പരിശീലക കുപ്പായം വീണ്ടും അണിഞ്ഞതില്‍ പിന്നെ ശാന്തനായി മാത്രം കണ്ടിരുന്ന മൗറിഞ്ഞ്യോ ആ മുഖംമൂടി എടുത്ത് മാറ്റിയിരിക്കുന്നു, അയാള്‍ തന്റെ ക്ലാസിക്ക് ശൈലിയിലേക്ക് മടങ്ങിയിട്ടുണ്ട്.

സിമിയോണിയുടെ വാക്കുകളിലായിരുന്നു യഥാര്‍ത്ഥത്തില്‍ കളിയുടെ സാംരാംശം ഉണ്ടായിരുന്നത്. കൂട്ടായ പ്രയത്നത്തിലൂടെ കളി പൂര്‍ണമായും ഞങ്ങള്‍ നിയന്ത്രിച്ചു. റയലിന്റെ പ്രതിരോധത്തിലേയും മധ്യനിരയിലേയും ദൗര്‍ബല്യങ്ങള്‍ പൂര്‍ണമായും ഉപയോഗിച്ചായിരുന്നു അത്ലറ്റിക്കൊ പെനാലിറ്റി നേടിയെടുത്തതും രണ്ടാം ഗോള്‍ കണ്ടെത്തിയതും. സാബി അലോൻസൊയ്ക്കും ആല്‍വാരോ ആര്‍ബലോവയ്ക്കും സാധിക്കാത്തത് സാക്ഷാത്കരിക്കാനാണ് ഫ്ലോറന്റീനോ പെരേസ് മൗറീഞ്ഞ്യോയെ എത്തിച്ചത്, പക്ഷെ റയലിന്റെ പ്രശ്നങ്ങള്‍ക്കൊന്നും ഇതുവരെ പരിഹാരമായിട്ടില്ല.

2025 സെപ്റ്റംബര്‍ 27, അന്ന് മെട്രൊപൊളിറ്റാനോയില്‍ രണ്ടിനെതിരെ അഞ്ച് ഗോളുകള്‍ക്കായിരുന്നു റയല്‍ അത്ലറ്റിക്കോയോട് പരാജയപ്പെട്ടത്. മാഡ്രിഡ് ഡര്‍ബിയില്‍ സമീപകാലത്ത് നേരിട്ട ഏറ്റവും വലിയ തോല്‍വി. സാബിയുടെ സിസ്റ്റത്തിലെ അതേ പോരായ്മകള്‍ തന്നെയാണ് മൗറിഞ്ഞ്യോ വരച്ച കളത്തിലും പ്രതിഫലിച്ചത്. മിഡ് ഫീല്‍ഡിലെ നിയന്ത്രണമില്ലായ്മ. ടോണി ക്രൂസ് - ലൂക്ക് മോഡ്രിച്ച് ദ്വയത്തിന്റെ അഭാവത്തിന്റെ ഇംപാക്റ്റും റോഡ്രി എന്തുകൊണ്ട് റയലിന് അനിവാര്യമായിരുന്നുവെന്നതിന്റെ ഉത്തരവും മാഡ്രിഡ് ഡര്‍ബിയിലുണ്ടായിരുന്നു.

കിലിയൻ എംബാപെ, വിനീഷ്യസ് ജൂനിയര്‍, ജൂഡ് ബെല്ലിങ്ഹാം, ആര്‍ദ ഗൂളര്‍, വാല്‍വെര്‍ദെ...അറ്റാക്കിങ് എബിലിറ്റിയുള്ള അഞ്ച് താരങ്ങളാണ് റയലിന്റെ ഇലവനില്‍ അത്ലറ്റിക്കോയ്ക്ക് എതിരെ ഉണ്ടായിരുന്നത്. മിഡ് ഫീല്‍ഡില്‍ കളിയുടെ ടെംപൊ നിശ്ചിയിക്കുന്നതാര് എന്ന് ചോദിച്ചാല്‍ കൃത്യമായൊരു പേര് ചൂണ്ടിക്കാണിക്കാൻ ഇന്ന് റയലിനില്ല എന്ന് പറയേണ്ടി വരും. ചുവാമേനി തന്റെ പീക്ക് ഫോമിലേക്ക് ഉയരാത്തതും ഒരു കാരണമായി ചൂണ്ടിക്കാണിക്കാം.

റയലിന് സമാനമായി ഗലാക്റ്റിക്കൊ പേരുകളാല്‍ നിറഞ്ഞതായിരുന്നില്ല അത്ലറ്റിക്കോയുടെ നിര. അവിടെയൊരു എംബാപെയും ബെല്ലിങ്ഹാമോ അല്ലെങ്കില്‍ വിനീഷ്യസൊ ഉണ്ടായിരുന്നില്ല. 65 ശതമാനം പന്തടക്കവും 12 ഷോട്ടുകളുമാണ് റയലിനെതിരെ അത്ലറ്റിക്കോയ്ക്ക് ഉണ്ടായിരുന്നത്. കുക്കുറേയയും ചുവാമേനിയും അണിനിരന്ന റയലിന്റെ ഇടതുവശത്തുകൂടിയായിരുന്നു അത്ലറ്റിക്കോയുടെ രണ്ട് ഗോളുകള്‍ക്കും കാരണമായ നീക്കങ്ങള്‍ സംഭവിച്ചത്. ജോനാഥൻ ഡേവിഡിന്റെ ഗോള്‍ മാത്രമെടുത്ത് പരിശോധിക്കാം.

സിമിയോണി ബോക്സിനുള്ളിലേക്ക് ക്രോസ് നല്‍കുമ്പോള്‍ ആ ലൈനില്‍ നാല് മാഡ്രിഡ് താരങ്ങളെ കാണാം. ബോക്സിനുള്ളില്‍ മൂന്ന് പേരും പുറത്ത് സിമിയോണിയെ പ്രതിരോധിക്കാൻ കുക്കുറേയയും. പെനാലിറ്റി ബോക്സിനുള്ളില്‍ മൂന്ന് താരങ്ങളുണ്ടായിട്ടും ജോനാഥൻ ഡേവിഡ് സ്വതന്ത്രനായിരുന്നു. അയാളെ മാര്‍ക്ക് ചെയ്യാൻ ഒരു റയല്‍ താരം പോലും തയാറായിരുന്നില്ല. ലാ ലിഗ പോയിന്റ് പട്ടികയില്‍ നാലാം സ്ഥാനത്താണ് റയലെങ്കില്‍ അത് അര്‍ഹിക്കുന്നത് തന്നെയാണ്. കാരണം, മാഡ്രിഡ് ഡര്‍ബിയില്‍ മാത്രം ഒതുങ്ങുന്നതായിരുന്നില്ല സീസണിലെ വീഴ്ചകള്‍.

എല്‍ചീയെ പരാജയപ്പെടുത്തന്നത് സ്റ്റോപ്പേജ് ടൈമില്‍ കാര്‍ലോസ് എസ്പി നേടിയ ഗോളിലാണ്, റയോ വയക്കാനോയെ 4-1ന് കീഴടക്കിയിട്ടുണ്ടാകാം, പക്ഷേ 18 ഷോട്ടുകള്‍ ഉതിര്‍ക്കാൻ അവരെ അനുവദിച്ചു. ഇന്റര്‍ മിലാനെതിരെ തിബൊ കോര്‍ട്ടുവായുടെ കരങ്ങളില്ലായിരുന്നെങ്കില്‍ തോല്‍വിയോടെ ചാമ്പ്യൻസ് ലീഗിന് തുടക്കമിടേണ്ടി വരുമായിരുന്നു. ഇന്ററിനെതിരെ നേടിയ രണ്ട് ഗോളുകളും അവരുടെ പിഴവില്‍ നിന്നുമായിരുന്നു. റയല്‍ ബെറ്റിസിനോട് പരാജയം, എസ്പാനിയോളിനെ മറികടക്കുന്നതും എസ്പിയുടെ അവസാന നിമിഷത്തിലെ ഗോളില്‍.

ശരിയാണ് കഴിഞ്ഞ സീസണില്‍ നിന്ന് ചില മാറ്റങ്ങള്‍ സംഭവിച്ചിട്ടുണ്ട്. വിനിയും എംബാപെയും പ്രേസ് ചെയ്യാൻ ആരംഭിച്ചു, ബെല്ലിങ്ഹാമിന് കൂടുതല്‍ സ്വതന്ത്ര്യം ലഭിച്ചു...പക്ഷേ അപ്പോഴും മിഡ് ഫീല്‍ഡില്‍ കളി നിയന്ത്രിക്കുക എന്ന ഉത്തരവാദിത്തം പേറാൻ ആരുമില്ല. ട്രാൻസ്ഫര്‍ വിൻഡോയില്‍ മുന്നേറ്റത്തിലും പ്രതിരോധത്തിലും റയല്‍ ശ്രദ്ധ കേന്ദ്രീകരിച്ചപ്പോള്‍ മധ്യനിരയിലേക്ക് എത്തിച്ചത് ബെര്‍ണാദൊ സില്‍വയെയാണ്. 90 മിനുറ്റുകള്‍ പൂര്‍ണമായും ബെര്‍ണാദോയെ ഉപയോഗിക്കാനാകില്ല എന്ന വസ്തുത മുന്നില്‍ നില്‍ക്കെയായിരുന്നു ഈ നീക്കം. വേള്‍ഡ് ക്ലാസ് മിഡ് ഫീല്‍ഡുമായി ലീഗ് ഭരിച്ചിരുന്ന റയല്‍, ഇന്ന് ഏഴ് മത്സരങ്ങള്‍ പിന്നിടുമ്പോള്‍ തന്നെ രണ്ട് തോല്‍വിയുമായി തങ്ങള്‍ ദുര്‍ബലരാണെന്ന് തെളിയിക്കുകയാണ്. ജയിച്ച മത്സരങ്ങളുടെ കാര്യം നേരത്തെ പറഞ്ഞല്ലോ...

മൗറിഞ്ഞ്യോയ്ക്ക് എല്ലാം ചിട്ടപ്പെടുത്തിയെടുക്കാൻ സമയമുണ്ട്. ഇന്റര്‍നാഷണല്‍ ബ്രേക്കാണ് നിലവില്‍. റയലിന്റെ അടുത്ത മത്സരം ഒക്ടോബര്‍ 11നാണ്. വിയ്യാറയലിനെതിരെ. പോരായ്മകള്‍ക്ക് പരിഹാരം കണ്ടില്ലെങ്കില്‍ ലാ ലിഗ കിരീടത്തിലേക്ക് എത്തുക പ്രയാസകരമായിരിക്കും.

എലൈറ്റ് ബൗള‍ർ ബെഞ്ചില്‍! സിറാജിനെ പുറത്തിരുത്തുന്നതിന് എന്ത് ന്യായമാണുള്ളത്?

Hari Krishnan M — Mon, 28 Sep 2026 14:10:23 +0530

ആദ്യ വിക്കറ്റിനായി കാര്യവട്ടം എകദിനത്തില്‍ ഇന്ത്യ എറിയേണ്ടി വന്നത് 116 പന്തുകളാണ്. ജോണ്‍ കാംപ്ബല്‍ - ജസ്റ്റിൻ ഗ്രീവ്സ് സഖ്യത്തിന് മുന്നിലേക്ക് ഒരു സ്പെല്ലിന് ബാല്യമുള്ള എല്ലാവരേയും ഗില്‍ പറഞ്ഞയച്ചു, പ്രസിദ്ധ് കൃഷ്ണ മുതല്‍ നമൻ ധീര്‍ വരെ. എന്നാല്‍, വെസ്റ്റ് ഇൻഡീസിന്റെ റണ്‍ റേറ്റ് എഴും എട്ടുമൊക്കെ താണ്ടിക്കൊണ്ടേയിരുന്നു. അപ്പോഴെല്ലാം ഒരാള്‍ നിരന്തരം വെള്ളവും ടവലുമൊക്കെയായി ഗ്രൗണ്ടിലേക്ക് ഓടിയെത്തുന്നുണ്ട്, ചുറ്റും വലം വെക്കുന്നുണ്ട്. ഇന്ത്യയുടെ ന്യൂബോള്‍ വിക്കറ്റ് വരള്‍ച്ച അവസാനിപ്പിക്കാൻ കെല്‍പ്പുണ്ടെന്ന് പലകുറി തെളിയിച്ചവൻ. മുഹമ്മദ് സിറാജ്. പുറത്തിരിക്കേണ്ടവനാണോ സിറാജ്?

38 ഏകദിന മത്സരങ്ങളുടെ പരിചയസമ്പത്തായിരുന്നു ആകെ കാംപ്‌ബലിനും ഗ്രീവ്സിനും ചേർന്നുണ്ടായിരുന്നത്. ലോക ക്രിക്കറ്റിലെ ടോപ് 20 ഒഡിഐ ബാറ്റർമാരുടെ പട്ടികയില്‍പ്പോലും ഇരുവരും ഉണ്ടാകില്ല. വിക്കറ്റിന്റെ ആനുകൂല്യവും ഇന്ത്യൻ ബൗളര്‍മാരുടെ ഇൻകണ്‍സിസ്റ്റൻസിയും ഉപയോഗിച്ച് ആദ്യ പത്ത് ഓവറില്‍ 85 റണ്‍സാണ് സഖ്യം സ്കോര്‍ബോര്‍ഡിലേക്ക് ചേര്‍ത്തത്. ഒരു ഘട്ടത്തില്‍ വിൻഡീസിന്റെ പ്രൊജക്റ്റഡ് സ്കോര്‍ പോലും 375നും 400നും ഇടയിലായിരുന്നു. കുല്‍ദീപ് യാദവിന്റെ ബ്രില്യൻസിന് പ്രസിദ്ധ് കൃഷ്ണയ്ക്കും സംഘത്തിനും നന്ദി പറയാം.

2027 ഏകദിന ലോകകപ്പ് ലക്ഷ്യമാക്കി ബൗളിങ് യൂണിറ്റ് പടുത്തുയര്‍ത്തുകയാണ് ഗൗതം ഗംഭീര്‍. ബാറ്റ് ചെയ്യാൻ കഴിയുന്ന എട്ട് താരങ്ങളുണ്ടാകണമെന്നാണ് കരുതുന്നതെന്ന് ശുഭ്മാൻ ഗില്ലും പറയുന്നു. ഇന്നലെ ഇന്ത്യയുടെ ലൈനപ്പില്‍ മൂന്ന് പേസര്‍മാരായിരുന്നു, പ്രസിദ്ധ്, നിതീഷ് കുമാ‍ര്‍ റെഡ്ഡി, ഗുര്‍ണൂര്‍ ബ്രാര്‍. 25 ഓവറാണ് സഖ്യം എറിഞ്ഞത്. 6.6 റണ്‍റേറ്റില്‍ വഴങ്ങിയത് 165 റണ്‍സ്. എടുത്ത മൂന്ന് വിക്കറ്റില്‍ രണ്ടും വിൻഡീസിന്റെ ലോവര്‍ ഓര്‍ഡര്‍ ബാറ്റര്‍മാരും. കാര്യവട്ടത്തെ ഇന്ത്യയുടെ പേസ് നിരയിലേക്ക് നോക്കിയാല്‍ പരിചയസമ്പത്തിന്റെ കോളം ശൂന്യമായി കിടക്കും.

എന്തുകൊണ്ട് സിറാജിനെ പുറത്തിരുത്തുന്നു എന്ന ചോദ്യത്തിന് പ്രാധാന്യമേറുന്നതും ഇവിടെയാണ്. ഇന്ത്യയിലേയും വിദേശത്തെയും വിക്കറ്റുകളില്‍ സമീപകാലത്തെ ഇന്ത്യൻ പേസര്‍മാരുടെ പ്രകടനമെടുത്താല്‍ ടോപ് ലെവലില്‍ പരിഗണിക്കാൻ പറ്റുന്ന രണ്ട് പേരെ ഉണ്ടാകു. ഒന്ന് ജസ്പ്രിത് ബുമ്രയും മറ്റൊരാള്‍ സിറാജും. ബുമ്രയുടെ എലൈറ്റ് ലെവലില്‍ നിന്ന് ഒരുപാട് അകലത്തിലല്ല സിറാജ്. എന്നിട്ടും താരത്തെ കൃത്യമായി ഉപയോഗിക്കാൻ തയാറാകുന്നില്ല.

2023 ലോകകപ്പ് ഫൈനലിന് ശേഷം സിറാജ് ആകെ ഒൻപത് ഏകദിനങ്ങളാണ് കളിച്ചിട്ടുള്ളത്. ടി20 ക്രിക്കറ്റിന്റെ സ്വാധീനം മൂലം ഏകദിന ഫോർമാറ്റിലെ റണ്ണൊഴുക്ക് വർധിക്കുമ്പോഴും ഹൈലി എക്കണോമിക്കലാണ് സിറാജ്, പ്രത്യേകിച്ചും പവർപ്ലേകളില്‍. കളിച്ച ഒൻപത് ഏകദിനത്തില്‍ ഒന്നില്‍ മാത്രമാണ് എക്കോണമി 5.2 പോലും കടന്നിട്ടുള്ളത്. ഓസ്ട്രേലിയൻ പര്യടനത്തിലെ മൂന്ന് ഏകദിനത്തിലും സിറാജ് തന്റെ മികവ് തെളിയിച്ചിരുന്നു. ട്രാവിസ് ഹെഡിന്റെ ഉള്‍പ്പെടെ വിക്കറ്റും താരത്തിന് നേടാൻ കഴിഞ്ഞിരുന്നു.

സമാനകാലയളവില്‍ പന്തെടുത്തവരുടെ എക്കോണമിയും പരിശോധിക്കേണ്ടതാണ്, വിക്കറ്റ് ടേക്കിങ് എബിലിറ്റിയും. ദക്ഷിണാഫ്രിക്ക, സിംബാബ്‌വെ, നമീബിയ എന്നീ രാജ്യങ്ങളിലായി നടക്കുന്ന ലോകകപ്പില്‍ ബൗണ്‍സി വിക്കറ്റില്‍ ഹാർഡായി ഹിറ്റ് ചെയ്യാൻ കഴിയുന്ന ബൗളര്‍മാര്‍ക്കാണ് ഇന്ത്യ കൂടുതല്‍ പ്രാധാന്യം നല്‍കുന്നത്. പ്രസിദ്ധ് കൃഷ്ണ, ഹര്‍ഷിത് റാണ, ആവേശ് ഖാൻ, ബ്രാര്‍ തുടങ്ങിയവ‍ക്ക് മുൻതൂക്കം ലഭിക്കുന്നതിന്റെ കാരണവും ഇത് തന്നെയാണ്.

സമാനമായി പന്തെറിയാൻ കഴിയുമെന്ന് തെളിയിച്ചിട്ടുള്ള പേസറാണ് സിറാജ്. ബോര്‍ഡര്‍ ഗവാസ്കര്‍ ട്രോഫിയും ആൻഡേഴ്‌സണ്‍ ടെൻഡുല്‍ക്കര്‍ ട്രോഫിയുമൊക്കെ ഉദാഹരണമായി കരുതാം.2023 ഏഷ്യ കപ്പ് ഫൈനലില്‍ ശ്രീലങ്കയ്ക്ക് എതിരായ പ്രകടനം മാത്രം മതിയാകും സിറാജ് ന്യൂബോളില്‍ എത്രത്തോളം അപകടകാരിയാണെന്ന് മനസിലാക്കാൻ. അന്ന് പവര്‍പ്ലേയില്‍ മാത്രം അഞ്ച് റണ്‍സ് വഴങ്ങി അഞ്ച് വിക്കറ്റെടുക്കാൻ സിറാജിന് കഴിഞ്ഞിരുന്നു.

ന്യൂബോളില്‍ ഇത്രത്തോളം കാപ്പബിളായുള്ള സിറാജിന്റെ സാന്നിധ്യമുള്ളപ്പോഴാണ് ഇന്ത്യ പ്രസിദ്ധിനേയും നിതീഷ് കുമാറിനേയും ബ്രാറിനെയുമൊക്കെ പരീക്ഷിക്കുന്നതും റണ്‍സ് ആവോളം വഴങ്ങുന്നതും. അസാധാരണമായ വര്‍ക്ക് റേറ്റുള്ള സിറാജ് പുറത്തിരിക്കേണ്ടവനല്ല എന്ന് പറയാൻ ഇതില്‍ക്കൂടുതല്‍ എന്ത് വേണം. ലോകകപ്പ് മുന്നില്‍ക്കണ്ട് പരീക്ഷണങ്ങളോട് പരീക്ഷണമാണ് ഗംഭീര്‍, പ്രത്യേകിച്ചും പേസ് നിരയില്‍. യുവതാരങ്ങള്‍ക്ക് ആവശ്യത്തിന് ഗെയിം ടൈം കൊടുക്കുക എന്നതായിരിക്കാം ലക്ഷ്യം. പക്ഷേ, അതൊന്നും ആവശ്യമില്ലാത്തൊരാള്‍ ഒപ്പമുള്ളപ്പോഴാണ് ഈ സമീപനം.

സിറ്റിയുടെ പ്രീമിയർ ലീഗ് കിരീടങ്ങൾ തിരിച്ചെടുക്കുമോ? ക്ലബ്ബിന്റെ ഭാവിയെന്ത്?

Hari Krishnan M — Sat, 26 Sep 2026 16:03:20 +0530

ഒരു ക്ലബ്ബിന്റെ സുവർണകാലം മുഴുവൻ ഒറ്റ പകലില്‍ റദ്ദ് ചെയ്യപ്പെടുക എന്നത് ചിന്തിക്കാൻ കഴിയുന്നതാണോ? മൂന്ന് പ്രീമിയര്‍ ലീഗ് കിരീടങ്ങള്‍, ഒരു എഫ് എ കപ്പ്, മൂന്ന് കരബാവ് കപ്പ് - കഴിഞ്ഞ ഒന്നരപതിറ്റാണ്ടില്‍ ഷെല്‍ഫിലെത്തിയ പല ടൈറ്റിലുകളും നഷ്ടപ്പെട്ടേക്കാം...ലീഗില്‍ നിന്ന് പുറത്തുപോകേണ്ടിയും വന്നേക്കാം. മാഞ്ചസ്റ്റർ സിറ്റി ആരാധകരുടെ വിദൂരമായ ദുസ്വപ്നങ്ങളില്‍ പോലും വരാൻ സാധ്യതയില്ലാത്ത ഒരു വെള്ളിയാഴ്ച സംഭവിച്ചിരിക്കുന്നു. എല്ലാത്തിന്റെയും കാരണം ക്ലബ്ബിന്റെ സാമ്പത്തിക ക്രമക്കേടുകള്‍.

പ്രീമിയർ ലീഗിന്റെ സാമ്പത്തിക ചട്ടങ്ങൾ ലംഘിച്ചതുമായി ബന്ധപ്പെട്ട് സിറ്റിക്കെതിരെ ചുമത്തിയ 115 കുറ്റങ്ങളില്‍ 114 എണ്ണവും നിലനില്‍ക്കുന്നതാണെന്നാണ് കണ്ടെത്തല്‍. ഇംഗ്ലീഷ് ഫുട്ബോള്‍ ചരിത്രത്തിലെ തന്നെ ഏറ്റവും വലിയ നിയമപോരാട്ടത്തിനൊടുവിലാണ് സിറ്റി കുറ്റക്കാരാണെന്ന് കണ്ടെത്തിയിരിക്കുന്നത്. സിറ്റിക്കെതിരായ കുറ്റകൃത്യങ്ങള്‍ എന്തെല്ലാമാണ്, ഈ വീഴ്ചയിലേക്ക് സിറ്റിയെ നയിച്ച സാഹചര്യം, ക്ലബ്ബിന്റെ ഭാവി ഇനിയെന്തായിരിക്കും, വിശദമായി പരിശോധിക്കാം.

98ല്‍ മൂന്നാം ഡിവിഷനിലേക്ക് വരെ പിന്തള്ളപ്പട്ട സിറ്റിയുടെ മൈതാനത്തെ ദുരിതം അവസാനിക്കുന്നത് 2008ലാണ്. ഷെയ്‌ഖ് മൻസൂർ ബി സായദ് ബിൻ സുല്‍ത്താൻ അല്‍ നയാൻ നേതൃത്വത്തിലുള്ള അബുദാബി യുണൈറ്റഡ് ഗ്രൂപ്പ് ക്ലബ്ബിന്റെ ഉടമസ്ഥാവകാശത്തിന്റെ 80 ശതമാനത്തിലധികം ഓഹരികള്‍ ഏറ്റെടുത്തതോടെ. ആരാണ് ഈ ഷെയ്ഖ് മൻസൂർ. നിലവില്‍ യുഎഇയുടെ വൈസ് പ്രസിഡന്റും ഡെപ്യൂട്ടി പ്രൈം മിനിസ്റ്ററുമാണ്. യുഎഇ പ്രസിഡന്റും അബുദാബിയുടെ ഭരണാധികാരിയുമായ മുഹമ്മദ് ബിൻ സായദ് അല്‍ നയാൻ ഷെയ്ഖ് മൻസൂറിന്റെ സഹോദരനുമാണ്. 397 ബില്യണ്‍ യുഎസ് ഡോളറാണ് ഇവരുടെ ആസ്തി.

അബുദാബി യുണൈറ്റഡ് ഗ്രൂപ്പ് ഏറ്റെടുത്തതോടെ സിറ്റിയിലേക്ക് സൂപ്പര്‍ താരങ്ങളുടെ ഒഴുക്കായി. അന്നത്തെ റെക്കോര്‍ഡ് തുകയ്ക്ക് ബ്രസീലിയൻ താരം റോബീന്യൊ എത്തി, 2010ല്‍ 100 മില്യണ്‍ പൗണ്ടാണ് താരങ്ങളെ എത്തിക്കാൻ ചിലവഴിച്ചത്, കാര്‍ലോസ് ടെവസും അഡബയോറുമൊക്കെ ക്ലബ്ബിലെത്തിയത് ഇക്കാലത്താണ്. റൊബേര്‍ട്ടോ മാച്ചീനി പരിശീലകനായി, ബലോട്ടല്ലി, യായ ടൂറെ, ഡേവിഡ് സില്‍വ അങ്ങനെ ലോകഫുട്ബോളിലെ വലിയ പേരുകളെല്ലാം സിറ്റിയുടെ നീലയില്‍ എഴുതപ്പെട്ടു...

1976ന് ശേഷമുള്ള ആദ്യ ട്രോഫി സിറ്റിയുടെ ഷെൽഫിലെത്തി, 2011ല്‍ എഫ്എകപ്പ്, ക്ലബ്ബ് ഇതിഹാസമായി പിന്നീട് മാറി സെര്‍ജിയോ അഗ്യൂറോയെ സിറ്റി സൈൻ ചെയ്യുന്നതും 2011ലാണ്...സിറ്റിയുടെ അതിശയിപ്പിക്കുന്ന വളര്‍ച്ച ഇവിടെ നിന്നായിരുന്നു, പെപ് ഗ്വാര്‍ഡിയോള യുഗത്തിനും വൈകാതെ തുടക്കമായി...ട്രെബിള്‍, ചാമ്പ്യൻസ് ലീഗ്, യൂറോപ്പിലെ എലൈറ്റ് ക്ലബ്ബായുള്ള വളര്‍ച്ച...റോഡ്രി, ഹാളണ്ട്,...കമ്പ്ലീറ്റ് ഡൊമിനേഷൻ...

2018ലാണ് ടേണിങ് പോയിന്റ്. ജർമ്മൻ മാധ്യമമായ 'ഡെർ സ്പീഗൽ' പ്രസിദ്ധീകരിച്ച റിപ്പോര്‍ട്ടുകളില്‍ നിന്നാണ് കേസുകളുടെ തുടക്കം. 'ഫുട്ബോൾ ലീക്സ്' എന്ന വിസിൽബ്ലോവർ പ്ലാറ്റ്‌ഫോം നൽകിയ സിറ്റിയുടെ ഇന്റേണല്‍ ഡോക്കുമെന്റ്സിന്റെ അടിസ്ഥാനത്തിലായിരുന്നു റിപ്പോര്‍ട്ടുകള്‍, 'ഫിനാൻഷ്യൽ ഫെയർ പ്ലേ' ചട്ടങ്ങൾ മറികടക്കുന്നതിനായി സിറ്റി പല വാണിജ്യ കരാറുകളുടെയും മൂല്യത്തിൽ കൃത്രിമം കാണിച്ചതായിരുന്നു ആദ്യത്തെ ആരോപണം.

എത്തിഹാദ്, എറ്റിസലാ തുടങ്ങിയ കമ്പനികളിൽ നിന്നുള്ള സ്പോണ്‍സ‍ര്‍ഷിപ്പ് വരുമാനമായി ആയി കാണിച്ച തുകകൾ യഥാർത്ഥത്തിൽ അബുദാബി യുണൈറ്റ് ഗ്രൂപ്പിന്റെ നേരിട്ടുള്ള നിക്ഷേപമാണെന്നായിരുന്നു പുറത്തുവന്ന രേഖകള്‍. ഇത് സാമ്പത്തിക ക്രമക്കേടില്‍ നിന്ന് രക്ഷപ്പെടാൻ വേണ്ടി ചെയ്തതായാണ് ആരോപണം. ഇതിനോടൊപ്പം സിറ്റിയുടെ പരിശീലകനായിരിക്കെ മാൻചീനിയ്ക്ക് ഷെയ്ഖ് മൻസൂറിന്റെ ഉടമസ്ഥതയിലുള്ള യുഎഇ ക്ലബ്ബായ എല്‍ ജസൈറയുടെ കണ്‍സള്‍ട്ടന്റായി സേവനമനുഷ്ടിച്ചതിനും പണം നല്‍കിയിരുന്നതായും ആരോപണമുണ്ട്.

റിപ്പോര്‍ട്ടുകളുടെ അടിസ്ഥാനത്തില്‍ യുറോപ്യൻ ഫുട്ബോള്‍ ഭരണസമിതിയായ യുവേഫ അന്വേഷണം പ്രഖ്യാപിക്കുകയും ചെയ്തു. അന്ന് മുതല്‍ അന്വേഷണത്തോട് സഹകരിക്കുന്ന സമീപനമായിരുന്നില്ല സിറ്റിയുടേത്, യുവേഫയുടെ നടപടിക്കെതിരെ അപ്പീല്‍ ചെയ്തെങ്കിലും കായിക തര്‍ക്കപരിഹാര കോടതി തള്ളുകയായിരുന്നു. ഇതോടെ രണ്ട് വര്‍ഷത്തെ വിലക്ക് സിറ്റിക്ക് യുവേഫ പ്രഖ്യാപിച്ചു, യൂറോപ്യൻ കോമ്പറ്റീഷനുകളില്‍ നിന്നായിരുന്നു ഇത്, ഒപ്പം 30 മില്യണ്‍ യൂറോയുടെ പിഴയും. പക്ഷേ വിലക്ക് അപ്പീലിലൂടെ നീക്കാൻ സിറ്റിക്ക് കഴിഞ്ഞു.

എന്നാല്‍, സിറ്റിയുടെ ക്രമക്കേടുകളില്‍ പ്രീമിയര്‍ ലീഗ് സ്വതന്ത്രമായി അന്വേഷണം നടത്തുന്നുണ്ടായിരുന്നു, ഈ വിവരങ്ങള്‍ പുറത്ത് വിടുന്നതും ഡെർ സ്പീഗലാണ്. 2023ലാണ് സിറ്റിക്കെതിരെ 115 കുറ്റങ്ങള്‍ കണ്ടെത്തിയത്. ഇതില്‍ 54 എണ്ണവും 2009 മുതല്‍ 18 വരെയുള്ള ക്ലബ്ബിന്റെ കൃത്യമായ സാമ്പത്തിക വിവരങ്ങള്‍ കൈമാറാൻ തയാറാകാത്തതുമായി ബന്ധപ്പെട്ടാണ്.. താരങ്ങള്‍ക്കും മാനേജര്‍മാര്‍ക്കും നല്‍കി തുക സമ്പത്തിച്ചുള്ള കൃത്യമായ കണക്കുകളും നല്‍കിയിട്ടില്ല, ഇതുമായി ബന്ധപ്പെട്ട് 14 കേസുകളാണ്. യുവേഫയുടെ സാമ്പത്തിക നിയമങ്ങള്‍, ഫിനാൻഷ്യല്‍ ഫെയര്‍ ഫ്ലെ റെഗുലേഷനുകള്‍ പാലിക്കാത്തത്, പ്രീമിയര്‍ ലീഗിന്റെ അന്വേഷണവുമായി സഹകരിക്കാത്തതൊക്കെയാണ് മറ്റ് പ്രധാനപ്പെട്ട ചാര്‍ജുകള്‍.

സിറ്റിക്ക് എന്ത് ശിക്ഷയായിരിക്കും ലഭിക്കുക എന്നതില്‍ കൃത്യമായൊരു വ്യക്തതയില്ല. എന്നിരുന്നാലും ചില സാധ്യതകളുണ്ട്. അതില്‍ ഏറ്റവും ഗുരുതരം പ്രീമിയര്‍ ലീഗില്‍ നിന്ന് തഴയപ്പെടാം എന്നതാണ്. സിറ്റിക്ക് പ്രീമിയര്‍ ലീഗ് മെമ്പര്‍ഷിപ്പ് നഷ്ടമാകുകയും ലോവര്‍ ഡിവിഷനിലേക്ക് പിന്തള്ളപ്പെടുകയും ചെയ്താലാണ് ഇത്. മറ്റൊരു തരത്തിലും ഇത് സംഭവിക്കാം. കുറ്റകൃത്യങ്ങളുടെ അടിസ്ഥാനത്തില്‍ സിറ്റിയുടെ പോയിന്റുകള്‍ തിരിച്ചെടുക്കാം, ഇവിടെയും ക്ലബ്ബ് റെലെഗേറ്റ് ചെയ്യപ്പെടാനുള്ള സാധ്യതയുണ്ട്.

മറ്റൊന്ന് സാമ്പത്തിക ക്രമക്കേടുകള്‍ നടത്തിയ 2009 മുതല്‍ 18 വരെയുള്ള കാലത്ത് സിറ്റി നേടിയ കിരീടങ്ങളാണ്. ഏഴ് ടൈറ്റിലുകളാണ് നേടിയിട്ടുള്ളത്. മൂന്ന് പ്രീമിയര്‍ ലീഗ്, ഒരു എഫ് എ കപ്പ്, മൂന്ന് കരബാവ് കപ്പ്. ഇത് തൊട്ട് പിന്നിലെത്തുകയും ഫൈനലില്‍ പരാജയപ്പെട്ട ക്ലബ്ബുകള്‍ക്കും നല്‍കാനും തീരുമാനിക്കാം. ഇതും ഒരു സാധ്യത മാത്രമാണ്. വിധിക്കെതിരെ അപ്പീലിന് ശ്രമിച്ചാലും എത്രകാലമെടുക്കുമെന്നതും പറയാനാകില്ല.

വിനീഷ്യസിനെ കൂവി തോല്‍പ്പിക്കുന്ന റയല്‍ മാഡ്രിഡ് ആരാധകര്‍, എന്താണിത്ര ദേഷ്യം?

Hari Krishnan M — Thu, 17 Sep 2026 13:40:36 +0530

വിനീഷ്യസ് റയല്‍ മാഡ്രിഡിന്റെ അഭിവാജ്യ ഘടകമാണ്, അത് തുടരും. ബെര്‍ണബ്യു അയാള്‍ക്കായി വൈകാതെ കയ്യടിക്കും, കഴിഞ്ഞ ജനുവരിയില്‍ റയലിന്റെ മാനേജറായിരിക്കെ സാബി അലോൻസോ നടത്തിയ പ്രതികരണമാണ്. കാരണം, ലാലിഗയില്‍ റയല്‍ ബെറ്റിസിനെതിരായ മത്സരത്തിനിടെ വിനീഷ്യസിനെതിരെ ഒരുകൂട്ടം റയല്‍ ആരാധകര്‍ കൂവിയാർത്തതായിരുന്നു.

അലോൻസൊ പറഞ്ഞതുപോലെ ബെര്‍ണബ്യൂ വിനിക്കായി കയ്യടിച്ചോ? ഇല്ല. സാബി അലോൻസൊ പടിയിറങ്ങി, ശേഷം ആല്‍വാരോ ആര്‍ബലോവ വന്നു, മടങ്ങി. ഒടുവില്‍ ദ സ്പെഷ്യല്‍ വണ്‍, ഹോസെ മൗറിഞ്ഞ്യോ. എല്‍ചീക്കെതിരായ ലീഗ് മത്സരത്തിലും വിനിക്ക് നേരെ വിസിലുകള്‍ മുഴങ്ങി, സീസണ്‍ ആരംഭിച്ചതുമുതല്‍ ലോസ് ബ്ലാങ്കോസ് ആരാധകർ ബ്രസീലിയൻ താരത്തെ വെറുതെവിട്ടിട്ടില്ല...

സാബി അന്ന് സ്വീകരിച്ച നിലപാട് ഇന്ന് മൗറിഞ്ഞ്യോയ്ക്ക് ആവര്‍ത്തിക്കേണ്ടി വന്നു. കായ്ക്കുന്ന മരത്തിലെ ആളുകള്‍ കല്ലെറിയുവെന്ന പഴഞ്ചൊല്ലുമായാണ് മൗറിഞ്ഞ്യോ വിനിയെ പ്രതിരോധിക്കാൻ ഇറങ്ങിയത്. വിനി റയലിനായ ചെയ്തതൊക്കെയും ഓര്‍മ്മപ്പെടുത്തുകയും ചെയ്തു. എന്താണ് റയല്‍ ആരാധകര്‍ക്ക് വിനിയോട് ഇത്ര വിരോധം.

ക്ലബ്ബ് ഇതിഹാസമായ ക്രിസ്റ്റ്യാനൊ റൊണാള്‍ഡോയ്ക്ക് എതിരെ പോലും വിസിലുകള്‍ മുഴങ്ങിയിട്ടുണ്ട് ബെര്‍ണബ്യൂവിന്റെ കോണുകളില്‍ നിന്ന്. ഇന്ന് ക്ലബ്ബിന്റെ ടോപ് പ്ലയറായ കിലിയൻ എംബാപെയും ആവോളം അനുഭവിച്ചിട്ടുണ്ട് അത്. പക്ഷേ, വിനിയോട് മാത്രം അവസാനിക്കാതെ തുടരുകയാണ്. 382 മത്സരങ്ങളില്‍ നിന്ന് 129 ഗോളും 102 അസിസ്റ്റും. ലോക ഫുട്ബോളിലെ തന്നെ ഏറ്റവും മികച്ച അറ്റാക്കര്‍മാരുടെ പട്ടികയിലേക്ക് എത്തിക്കുന്ന സ്റ്റാറ്റ്സ്.

ഗലാക്റ്റിക്കോകളാല്‍ സമ്പന്നമായ ഒരു ക്ലബ്ബിന്റെ ആരാധകരെ തൃപ്തിപ്പെടുത്തുക എന്നത് എളുപ്പമുള്ള ഒന്നല്ല. ക്രിസ്റ്റ്യാനൊയുടെ പടിയിറക്കത്തിന് ശേഷം ഒരു സൂപ്പര്‍ സ്റ്റാറിനായുള്ള ദാഹത്തിലായിരുന്നു ബെര്‍ണബ്യു. അവിടെ ബ്രസീലിയൻ ഫുട്ബോളിന്റെ എല്ലാ ചേരുവകകളുമായാണ് വിനീഷ്യസ് എത്തുന്നത്. പേസ്, ഡ്രിബ്ലിങ്, ക്രിയേറ്റിവിറ്റി - എല്ലാം കൊണ്ടും ക്രിസ്റ്റ്യാനൊയുടെ പകരക്കാരനെ തങ്ങള്‍ക്ക് ലഭിച്ചുവെന്ന് അവര്‍ പൂര്‍ണമായും വിശ്വസിച്ചു.

എന്നാല്‍, വിനി സൃഷ്ടിക്കുന്ന മൊമന്റുകള്‍ ഗോളില്‍ മാത്രം കലാശിക്കാതെപോയ കാലമുണ്ടായിരുന്നു. പ്രത്യേകിച്ചും 2020-21 സീസണില്‍. ഇരുപതോളം മത്സരങ്ങള്‍ സ്കോര്‍ഷീറ്റില്‍ ഇടം പിടിക്കാതെ വിനി തുടര്‍ന്നു. റയലിന്റെ വിഖ്യാത ജഴ്സിയില്‍ ഒരു മുന്നേറ്റ നിര താരത്തിന്റെ കരിയര്‍ ഇത്രത്തോളം ഗോള്‍ ദാരിദ്യത്തിലേക്ക് എത്തുക എന്നത് അപൂര്‍വമാണ്. പരിശീലകരുമായുള്ള ഭിന്നതകളാണ് കാരണമെന്ന് സ്പാനിഷ് മാധ്യമങ്ങള്‍ എഴുതിത്തുടങ്ങിയെങ്കിലും വിനിയെ സമ്മര്‍ദത്തിലേക്ക് തള്ളിവിട്ടത് മറ്റൊന്നായിരുന്നു. പരിഹാസം, മാഡ്രിഡ് ആരാധകരില്‍ നിന്നുണ്ടായ പരിഹാസം.

മാഡ്രിഡില്‍ തുടരാനുള്ള വിനിയുടെ അര്‍ഹതയെപ്പോലും ചോദ്യം ചെയ്തവരുണ്ടായി. എന്നാല്‍, കാര്‍ലൊ ആഞ്ചലോട്ടിയുടെ വരവോടെയാണ് എല്ലാം മാറിമറിയുന്നത്. ഡ്രിബിളുകള്‍ ഗോളുകളായി പരിണമിച്ചുതുടങ്ങി, 2022 ചാമ്പ്യൻസ് ലീഗ് ഫൈനലില്‍ ലിവര്‍പൂളിനെതിരെ ഗോള്‍.

ഈ ഘട്ടത്തില്‍ തന്നെയാണ് സ്പാനിഷ് മൈതാനങ്ങളില്‍ നിന്ന് വംശീയ അധിക്ഷേപങ്ങള്‍ നേരിട്ടുകൊണ്ടേയിരുന്നത്. മാധ്യമങ്ങള്‍ക്ക് മുന്നില്‍ വന്ന് പൊട്ടിക്കരഞ്ഞ വിനിയുടെ ദൃശ്യങ്ങള്‍ ഫുട്ബോളിലെ തന്നെ ഓര്‍ക്കാനാഗ്രഹിക്കാത്ത അധ്യായങ്ങളിലൊന്നാണ്. ക്ലബ്ബിന്റേയും ആരാധകരുടേയും പൂര്‍ണമായുള്ള പിന്തുണ വിനിയെ ആത്മവിശ്വാസം വീണ്ടെടുക്കാൻ പ്രാപ്തമാക്കുകയും ചെയ്തു.

2023-24 സീസണില്‍ 24 ഗോളുകളും 11 അസിസ്റ്റും നേടി. ചാമ്പ്യൻസ് ലീഗ് ഫൈനലില്‍ ബൊറൂസിയ ഡോര്‍ട്ട്മുണ്ടിനെതിരെയും ഗോള്‍. വിനിയും റയല്‍ ആരാധകരും തമ്മിലുള്ള ബന്ധം ഊഷ്മളമായിരുന്ന കാലം. എന്നാല്‍ ആ വര്‍ഷം ബലോണ്‍ ഡി ഓര്‍ നഷ്ടമായത് താരത്തെ ബാധിച്ചതുപോലെയായിരുന്നു പിന്നീടുള്ള മത്സരങ്ങള്‍. വീണ്ടും ഗോള്‍ വരള്‍ച്ചയിലേക്ക്.

സീസണില്‍ 58 മത്സരങ്ങളില്‍ നിന്ന് 22 ഗോള്‍ മാത്രം, 19 അസിസ്റ്റുമുണ്ടായി. 41 ഗോള്‍ കോണ്‍ട്രിബ്യൂഷൻ ചെറിയ സ്റ്റാറ്റസല്ല, പക്ഷേ റയല്‍ ആരാധകരെ സംബന്ധിച്ച് അങ്ങനെയല്ല. ചാമ്പ്യൻസ് ലീഗ് നോക്കൗട്ടില്‍ ഒരു ഗോളുമായിരുന്നു സൂപ്പര്‍ താരത്തിന്റെ പേരിലുണ്ടായിരുന്നത്. ബലോണ്‍ ഡി ഓര്‍ നേടാനായിരുന്നെങ്കില്‍ വിനിയുടെ ക്ലബ്ബ് സ്റ്റാറ്റസ് തന്നെ മറ്റൊരു തലത്തിലേക്ക് എത്തുമായിരുന്നു. സാബി അലോൻസോയുമായുള്ള ഭിന്നതകളാണ് ആരാധകരെ വിനിയില്‍ നിന്ന് ഏറെക്കുറെ പൂര്‍ണമായും തന്നെ അകറ്റിയത്.

റയല്‍ മാഡ്രിഡിന്റെ ഇതിഹാസങ്ങളില്‍ ഒരാളാണ് സാബി, അയാള്‍ക്ക് ക്ലബ്ബിനോടുള്ള പാഷൻ എടുത്ത് പറയേണ്ടതില്ല, ഒപ്പം സ്പെയിനിനൊപ്പം ലോകകിരീടം നേടിയ സംഘത്തിലെ അംഗം. അതുകൊണ്ട് വിനിക്ക് മുകളില്‍ തന്നെയായിരുന്നു റയല്‍ ആരാധകര്‍ക്ക് സാബി. എല്‍ ക്ലാസിക്കോയില്‍ സബ്ബ് ചെയ്തതിന് സാബിയോട് വിനി കയര്‍ത്ത സംഭവമൊന്നും അവര്‍ മറക്കാനുമിടയില്ല. സാബിയുടെ സിസ്റ്റം എംബാപെ കേന്ദ്രീകൃതമായിരുന്നുവെന്നതും വിനിയെ അസ്വസ്ഥനാക്കിയ ഘടകമായാണ് വിലയിരുത്തപ്പെടുന്നത്. സാബിക്ക് കീഴില്‍ ഏഴ് ഗോളുകള്‍ മാത്രമാണ് വിനി സ്കോര്‍ ചെയ്തത്.

സാബിയുടെ പടിയിറക്കത്തിന് പിന്നാലെയുള്ള റയലിന്റെ ആദ്യ മത്സരത്തില്‍ വിനിയുടെ കാലുകളിലേക്ക് പന്തെത്തിയപ്പൊഴെല്ലാം ബെര്‍ണബ്യു കൂകിയാര്‍ക്കുകയായിരുന്നു. കാരണം മാഡ്രിഡ് ആരാധകര്‍ക്ക് സാബിയില്‍ അത്രത്തോളം വിശ്വാസമുണ്ടായിരുന്നുവെന്നത് തന്നെ. സാബി ക്ലബ്ബ് വിടാനുള്ള കാരണമായി ഒരുവിഭാഗം ഇന്നും വിനിയെയാണ് കാണുന്നത്പോലും. ശേഷം ഇതുവരെയുള്ള ബെര്‍ണബ്യൂവിലെ മത്സരങ്ങളിലെല്ലാം വിനിക്കെതിരെ ശബ്ദമുയര്‍ന്നിട്ടുണ്ട്.

ആഴ്സണലുമായുള്ള കരാര്‍ ചര്‍ച്ചകളും റയലുമായി സമവായത്തിലെത്താൻ വൈകിയതുമൊക്കെ ആരാധകരെ അസ്വസ്ഥരാക്കിയിട്ടുണ്ട്. സീസണില്‍ ഏഴ് മത്സരങ്ങളില്‍ നിന്ന് ഒരു ഗോള്‍ മാത്രമാണ് വിനിക്ക് നേടാനായിട്ടുള്ളത്. ആരാധകരെ തിരികെപ്പിടിക്കണമെങ്കില്‍ വിനിയുടെ ബൂട്ടുകള്‍ 2024ലേക്കാള്‍ മികവിലേക്ക് ഉയരേണ്ടി വരും.

'ഓട്ടോക്കാരന്റെ മകൾ അല്ലേ, എന്താകാൻ...'; പരിഹസിച്ചവരുടെ വായടപ്പിച്ച് വെള്ളിത്തിളക്കത്തിൽ ആൻസി സോജൻ

Web Desk — Sun, 27 Sep 2026 21:50:43 +0530

കായികരംഗത്ത് തനിക്ക് നേരെ ഉയർന്ന പരിഹാസങ്ങൾക്കും അവഗണനകൾക്കും കളിക്കളത്തിലെ മികച്ച പ്രകടനം കൊണ്ട് മറുപടി നൽകി ഇന്ത്യൻ ലോങ് ജംപ് താരം ആൻസി സോജൻ. ഏഷ്യൻ ഗെയിംസിലെ മെഡൽ നേട്ടത്തിന് പിന്നാലെ തന്റെ കഠിനാധ്വാനത്തിന്റെയും സമർപ്പണത്തിന്റെയും കഥ പങ്കുവെക്കുകയായിരുന്നു താരം. "ഒന്നും ആകില്ലെന്ന് പറഞ്ഞ് എന്നെ തള്ളിക്കളഞ്ഞവർ ഒരുപാടാണ്. 'ഓട്ടോക്കാരന്റെ മകൾ അല്ലേ, ഇവളൊക്കെ എന്താകാൻ' എന്ന് ചോദിച്ച് പരിഹസിച്ചവരുണ്ട്. എന്നാൽ ഇന്ന് അവർ വിചാരിച്ചതിനും അപ്പുറത്തേക്ക് വളരാൻ എനിക്ക് സാധിച്ചു. അതിന് പിന്നിൽ കഠിനാധ്വാനവും ദൈവാനുഗ്രഹവും മാത്രമാണ്. ലക്ഷ്യം ഉറപ്പിച്ചു അധ്വാനിച്ചാൽ തീർച്ചയായും ഫലമുണ്ടാകും," ആൻസി പറഞ്ഞു.

വെള്ളി മെഡൽ നേടാനായതിൽ സന്തോഷമുണ്ടെങ്കിലും സ്വർണം കൈവിട്ടുപോയതിൽ ചെറിയ നിരാശയുണ്ടെന്ന് ആൻസി വ്യക്തമാക്കി. മത്സരദിവസം തന്റെ ഏറ്റവും മികച്ച ദിവസമായിരുന്നില്ലെന്നും പ്രതികൂല കാലാവസ്ഥ പ്രകടനത്തെ ബാധിച്ചെന്നും താരം കൂട്ടിച്ചേർത്തു. 6.60 മീറ്ററാണ് മത്സരത്തിൽ പ്രതീക്ഷിച്ചിരുന്നതെങ്കിലും അത് മറികടക്കാനായില്ല.ഈ സീസണിലെ മത്സരങ്ങൾ ഇവിടെ അവസാനിക്കുകയാണെന്നും പോരായ്മകൾ പരിഹരിച്ച് അടുത്ത സീസണിൽ കൂടുതൽ ശക്തമായി കളിക്കളത്തിലേക്ക് തിരിച്ചെത്തുമെന്നും ആൻസി ഉറപ്പിച്ചു പറഞ്ഞു.

ആൻസി സോജന് വെള്ളി മെഡൽ

ഏഷ്യൻ ഗെയിംസ് വനിതാ ലോങ് ജംപിൽ മലയാളി താരം ആൻസി സോജന് വെള്ളി മെഡൽ. 6.53 മീറ്റർ ദൂരം ചാടിയാണ് ആൻസി ഈ തിളക്കമാർന്ന നേട്ടം സ്വന്തമാക്കിയത്. വെറും രണ്ട് സെന്റീമീറ്റർ വ്യത്യാസത്തിലാണ് താരത്തിന് സ്വർണം നഷ്ടമായത്. അവസാന ശ്രമത്തിൽ 6.55 മീറ്റർ ചാടിയ ചൈനീസ് താരം ഒന്നാം സ്ഥാനം പിടിച്ചെടുക്കുകയായിരുന്നു.