Asianet News Malayalam

1.87 ലക്ഷം രൂപയ്ക്ക് ഗൂഗിളിന്‍റെ പുതിയ ഫോൾഡബിൾ; 8 ഇഞ്ച് ഡിസ്‌പ്ലേ, 16 ജിബി റാം, 5 ക്യാമറകൾ!

Prashobh Prasannan — Thu, 13 Aug 2026 12:20:20 +0530

ഗൂഗിളിന്‍റെ പുതിയ തലമുറ ഫോൾഡബിൾ സ്‍മാർട്ട്‌ഫോണായ പിക്‌സൽ 11 പ്രോ ഫോൾഡ് ഇന്ത്യയിൽ അവതരിപ്പിച്ചു. 8 ഇഞ്ച് സൂപ്പർ ആക്ച്വ ഫ്ലെക്‌സ് ഡിസ്‌പ്ലേ, പുതിയ ടെൻസർ ജി6 ചിപ്‌സെറ്റ്, ട്രിപ്പിൾ പിൻ ക്യാമറ സംവിധാനം എന്നിവയാണ് ഫോണിന്റെ പ്രധാന സവിശേഷതകൾ. പിക്‌സൽ 11, പിക്‌സൽ 11 പ്രോ, പിക്‌സൽ 11 പ്രോ എക്‌സ്എൽ, പിക്‌സൽ വാച്ച് 5 എന്നിവയ്ക്കൊപ്പമാണ് പുതിയ ഫോൾഡബിൾ ഫോൺ ഇന്ത്യയിലും മറ്റ് ആഗോള വിപണികളിലും അവതരിപ്പിച്ചത്.

വില 1,86,999 രൂപ

ഇന്ത്യയിൽ 16 ജിബി റാമും 512 ജിബി ഇന്റേണൽ സ്റ്റോറേജുമുള്ള ഒരൊറ്റ പതിപ്പിലാണ് പിക്‌സൽ 11 പ്രോ ഫോൾഡ് എത്തുന്നത്. 1,86,999 രൂപയാണ് വില. ഒലീവ് നിറത്തിലുള്ള മോഡൽ മാത്രമാണ് നിലവിൽ ലഭ്യമാകുന്നത്. ഫ്ലിപ്കാർട്ട്, ഗൂഗിൾ ഇന്ത്യയുടെ ഓൺലൈൻ സ്റ്റോർ എന്നിവ വഴി ഫോൺ മുൻകൂട്ടി ഓർഡർ ചെയ്യാം.

8 ഇഞ്ച് സൂപ്പർ ആക്ച്വ ഫ്ലെക്‌സ് ഡിസ്‌പ്ലേ

8 ഇഞ്ച് ഒഎൽഇഡി സൂപ്പർ ആക്ച്വ ഫ്ലെക്‌സ് ഡിസ്‌പ്ലേയാണ് ഫോണിന്റെ പ്രധാന ആകർഷണം. 2,076 x 2,152 പിക്സൽ റെസല്യൂഷൻ, 120 ഹെർട്സ് വരെ റിഫ്രഷ് നിരക്ക്, 3,600 നിറ്റ്‌സ് വരെ പരമാവധി തെളിച്ചം, എച്ച്ഡിആർ പിന്തുണ എന്നിവയുണ്ട്. പുറത്ത് 6.5 ഇഞ്ച് ഒഎൽഇഡി സൂപ്പർ ആക്ച്വ കവർ ഡിസ്‌പ്ലേയും നൽകിയിട്ടുണ്ട്. ഇതിലും 120 ഹെർട്സ് റിഫ്രഷ് നിരക്കും 3,600 നിറ്റ്‌സ് വരെ പരമാവധി തെളിച്ചവും ലഭിക്കും.

ടെൻസർ ജി6 ചിപ്പിന്റെ കരുത്ത്

ഗൂഗിളിന്റെ പുതിയ ടെൻസർ ജി6 ചിപ്‌സെറ്റിലാണ് പിക്‌സൽ 11 പ്രോ ഫോൾഡ് പ്രവർത്തിക്കുന്നത്. സുരക്ഷയ്ക്കായി ടൈറ്റൻ എം3 സുരക്ഷാ കോപ്രോസസറും നൽകിയിട്ടുണ്ട്. ആൻഡ്രോയിഡ് 17 ആണ് ഫോണിലെ ഓപ്പറേറ്റിങ് സിസ്റ്റം. ഏഴ് വർഷത്തെ ഓപ്പറേറ്റിങ് സിസ്റ്റം അപ്‌ഡേറ്റുകൾക്കും സുരക്ഷാ അപ്‌ഡേറ്റുകൾക്കും പിക്‌സൽ ഡ്രോപ്പ് അപ്‌ഡേറ്റുകൾക്കും ഗൂഗിൾ വാഗ്ദാനം നൽകുന്നു.

48 മെഗാപിക്സൽ പ്രധാന ക്യാമറ

ട്രിപ്പിൾ പിൻ ക്യാമറ സംവിധാനമാണ് ഫോണിലുള്ളത്. 48 മെഗാപിക്സൽ പ്രധാന ക്യാമറയ്ക്കൊപ്പം 10.5 മെഗാപിക്സൽ അൾട്രാവൈഡ് ക്യാമറയും 10.8 മെഗാപിക്സൽ ടെലിഫോട്ടോ ക്യാമറയുമുണ്ട്. ടെലിഫോട്ടോ ക്യാമറ 5 മടങ്ങ് വരെ ഒപ്റ്റിക്കൽ സൂമും 30 മടങ്ങ് വരെ ഡിജിറ്റൽ സൂമും പിന്തുണയ്ക്കുന്നു. കവർ ഡിസ്‌പ്ലേയിലും അകത്തെ ഫോൾഡബിൾ സ്‌ക്രീനിലും 10 മെഗാപിക്സൽ വീതമുള്ള സെൽഫി ക്യാമറകളുണ്ട്. 4കെ നിലവാരത്തിൽ സെക്കൻഡിൽ 60 ഫ്രെയിം വരെ വീഡിയോ റെക്കോർഡ് ചെയ്യാനും സാധിക്കും.

4,806 എംഎഎച്ച് ബാറ്ററി

4,806 എംഎഎച്ച് ബാറ്ററിയാണ് പിക്‌സൽ 11 പ്രോ ഫോൾഡിലുള്ളത്. 30 വാട്ട് ചാർജർ ഉപയോഗിച്ച് ഏകദേശം 30 മിനിറ്റിൽ 50 ശതമാനം വരെ ബാറ്ററി ചാർജ് ചെയ്യാനാകുമെന്ന് ഗൂഗിൾ അവകാശപ്പെടുന്നു. 25 വാട്ട് വരെ വയർലെസ് ഫാസ്റ്റ് ചാർജിങ്ങും ഫോണിൽ ലഭ്യമാണ്. ഒരു തവണ ചാർജ് ചെയ്താൽ 24 മണിക്കൂറിലധികം ബാറ്ററി ഉപയോഗം ലഭിക്കുമെന്നും കമ്പനി പറയുന്നു.

ഐപി68 റേറ്റിങ്ങും പുതിയ സൗകര്യങ്ങളും

പൊടിയും വെള്ളവും പ്രതിരോധിക്കുന്ന ഐപി68 റേറ്റിങ് ഫോണിനുണ്ട്. 5ജി, 4ജി എൽടിഇ, വൈഫൈ 7, ബ്ലൂടൂത്ത് 6, എൻഎഫ്സി, യുഎസ്ബി ടൈപ്പ്-സി, ജിപിഎസ്, ഗ്ലോനാസ്, ഗലീലിയോ, ബെയ്‌ദൂ, ക്യുസെഡ്എസ്എസ്, നാവിക് തുടങ്ങിയ കണക്റ്റിവിറ്റി സൗകര്യങ്ങളും ലഭ്യമാണ്. ഗൂഗിളിന്റെ പുതിയ ഹൈലൈറ്റ് ഇൻഡിക്കേറ്റർ ഉൾപ്പെടെയുള്ള സ്മാർട്ട് സൗകര്യങ്ങളും ഫോണിലുണ്ട്. വശത്ത് ഘടിപ്പിച്ച ഫിംഗർപ്രിന്റ് സെൻസറാണ് സുരക്ഷയ്ക്കായി നൽകിയിരിക്കുന്നത്. മടക്കിയ നിലയിൽ 155.2 x 76 x 10.1 മില്ലിമീറ്ററും നിവർത്തിയ നിലയിൽ 155.2 x 150.4 x 5 മില്ലിമീറ്ററുമാണ് ഫോണിന്റെ വലുപ്പം. ഏകദേശം 239 ഗ്രാം ഭാരമുള്ള പിക്‌സൽ 11 പ്രോ ഫോൾഡ് പ്രീമിയം ഫോൾഡബിൾ സ്മാർട്ട്‌ഫോൺ വിഭാഗത്തിലാണ് ഗൂഗിൾ അവതരിപ്പിച്ചിരിക്കുന്നത്.

20 ലക്ഷം തമോദ്വാരങ്ങളും നക്ഷത്രാവശിഷ്‍ടങ്ങളും! പ്രപഞ്ചത്തിന്‍റെ പുതിയ ഭൂപടം പുറത്ത്

Prashobh Prasannan — Wed, 12 Aug 2026 08:09:29 +0530

പ്രപഞ്ചത്തിന്‍റെ അതിതീവ്ര ഊർജസ്വല മേഖലകളെക്കുറിച്ചുള്ള പഠനത്തിൽ നിർണായക മുന്നേറ്റവുമായി ശാസ്ത്രജ്ഞർ. ജർമൻ നേതൃത്വത്തിലുള്ള ഇറോസിറ്റ എക്സ്-റേ ടെലിസ്കോപ്പ് പുറത്തുവിട്ട രണ്ടാമത്തെ പ്രധാന പൊതുഡാറ്റാ റിലീസിൽ ഏകദേശം 20 ലക്ഷം എക്സ്-റേ സ്രോതസുകളാണ് ഉൾപ്പെട്ടിരിക്കുന്നത്. അതിഭീമൻ തമോദ്വാരങ്ങൾ, ഗാലക്സി ക്ലസ്റ്ററുകൾ, നക്ഷത്രങ്ങൾ തുടങ്ങി വിവിധ തരത്തിലുള്ള അത്യപൂർവ ആകാശ പ്രതിഭാസങ്ങളുടെ വിവരങ്ങളാണ് പുതിയ ഡാറ്റാസെറ്റിലുള്ളത്.

തമോദ്വാരങ്ങളുടെ വളർച്ച പഠിക്കാൻ പുതിയ ഡാറ്റ

ഡിആർ2 എന്ന് വിളിക്കുന്ന ഈ വിപുലമായ ഡാറ്റാസെറ്റ് തമോദ്വാരങ്ങൾ എങ്ങനെ വളരുന്നു, ഗാലക്സികൾ എങ്ങനെ പരിണമിക്കുന്നു, പ്രപഞ്ചത്തിലെ ഏറ്റവും വലിയ ഘടനകൾ എങ്ങനെ രൂപപ്പെട്ടു തുടങ്ങിയ നിർണായക ചോദ്യങ്ങൾക്ക് ഉത്തരം കണ്ടെത്താൻ ജ്യോതിശാസ്ത്രജ്ഞരെ സഹായിക്കും. ഇറോസിറ്റ ഉപകരണത്തിന്റെ ഗ്രൗണ്ട് സെഗ്മെന്റ് മാനേജറും ഡിആർ2 പ്രസിദ്ധീകരണത്തിന്റെ പ്രധാന രചയിതാവുമായ മിറിയം ഇ. റാമോസ്-സെജയുടെ അഭിപ്രായത്തിൽ, ഇതുവരെ ലഭിച്ച എക്സ്-റേ ആകാശത്തിന്റെ ഏറ്റവും മികച്ച ശേഖരമാണ് ഡിആർ2. പ്രപഞ്ചത്തിലെ വിവിധ ആകാശവസ്‍തുക്കളെ വലിയ തോതിൽ സ്ഥിതിവിവരക്കണക്കുകളുടെ അടിസ്ഥാനത്തിൽ പഠിക്കാൻ ഈ ഡാറ്റ വഴിയൊരുക്കുമെന്നും അവർ പറഞ്ഞു.

556 ദിവസത്തെ നിരീക്ഷണം

ഇറോസിറ്റ നടത്തിയ ആദ്യ മൂന്ന് സമ്പൂർണ ആകാശ സർവേകളിൽ 556 ദിവസങ്ങളിലായി ശേഖരിച്ച നിരീക്ഷണങ്ങളാണ് പുതിയ ഡാറ്റയിൽ ഉൾപ്പെടുത്തിയിരിക്കുന്നത്. നേരത്തെയുള്ള സർവേകൾക്ക് കണ്ടെത്താൻ കഴിയാതിരുന്ന വളരെ മങ്ങിയ എക്സ്-റേ സ്രോതസുകളെപ്പോലും തിരിച്ചറിയാൻ ഇതിലൂടെ ശാസ്ത്രജ്ഞർക്ക് കഴിഞ്ഞു. ഏകദേശം 20 ലക്ഷം സ്രോതസ്സുകളിൽ 19 ലക്ഷത്തിലധികവും പോയിന്റ് സ്രോതസുകളാണ്. ദൂരെയുള്ള ഗാലക്സികളുടെ കേന്ദ്രഭാഗത്ത് സജീവമായി ദ്രവ്യം വിഴുങ്ങുന്ന അതിഭീമൻ തമോദ്വാരങ്ങളും ക്ഷീരപഥത്തിലെ നക്ഷത്രങ്ങളുമാണ് ഇവയിൽ ഭൂരിഭാഗവും.

ഗാലക്സി ക്ലസ്റ്ററുകളും സൂപ്പർനോവ അവശിഷ്‍ടങ്ങളും

വ്യാപിച്ചുകിടക്കുന്ന ആകാശവസ്‍തുക്കളാണ് ഏകദേശം 64,000 സ്രോതസുകൾ. വലിയ ഗാലക്സി ക്ലസ്റ്ററുകൾ, സമീപ ഗാലക്സികൾ, പൊട്ടിത്തെറിച്ച നക്ഷത്രങ്ങളുടെ പ്രകാശിക്കുന്ന അവശിഷ്‍ടങ്ങൾ എന്നിവ ഇതിൽ ഉൾപ്പെടുന്നു. പ്രപഞ്ചത്തിലെ ഏറ്റവും വലിയ ഘടനകളുടെ വിതരണത്തെ മനസിലാക്കാൻ ഗാലക്സി ക്ലസ്റ്ററുകൾക്ക് പ്രത്യേക പ്രാധാന്യമുണ്ട്. ഡാർക്ക് മാറ്ററും ഡാർക്ക് എനർജിയും പ്രപഞ്ചത്തിന്റെ പരിണാമത്തിൽ ചെലുത്തുന്ന സ്വാധീനം പഠിക്കാനും ഇവ സഹായിക്കും.

എക്സ്-റേയിൽ തെളിയുന്നത് പ്രപഞ്ചത്തിന്റെ തീവ്ര മേഖലകൾ

ദൃശ്യപ്രകാശത്തിൽ നിന്ന് വ്യത്യസ്‍തമായി എക്സ്-റേ നിരീക്ഷണങ്ങളിലൂടെ പ്രപഞ്ചത്തിലെ ഏറ്റവും ശക്തമായ ഊർജപ്രവർത്തനങ്ങൾ കണ്ടെത്താൻ കഴിയും. തമോദ്വാരത്തിലേക്ക് ചുറ്റിപ്പാഞ്ഞ് വീഴുന്ന ദ്രവ്യം ഇവന്റ് ഹൊറൈസൺ കടക്കുന്നതിന് മുമ്പ് ദശലക്ഷക്കണക്കിന് ഡിഗ്രി വരെ ചൂടാകാം. ന്യൂട്രോൺ നക്ഷത്രങ്ങൾ, സൂപ്പർനോവ അവശിഷ്‍ടങ്ങൾ, ഗാലക്സി ക്ലസ്റ്ററുകളിൽ നിറഞ്ഞുകിടക്കുന്ന അത്യുച്ച താപനിലയിലുള്ള വാതക ശേഖരങ്ങൾ എന്നിവയും ശക്തമായ എക്സ്-റേ വികിരണം പുറപ്പെടുവിക്കുന്നു.

88 ശതമാനവും സജീവ തമോദ്വാരങ്ങളുള്ള ഗാലക്സികൾ

പുതിയ കാറ്റലോഗിൽ നിരവധി എക്സ്-റേ സ്രോതസ്സുകളുടെ ഒപ്റ്റിക്കൽ, ഇൻഫ്രാറെഡ് വിവരങ്ങളും ഉൾപ്പെടുത്തിയിട്ടുണ്ട്. ഇതിലൂടെ ഓരോ സ്രോതസും സമീപ നക്ഷത്രമാണോ, ദൂരെയുള്ള ഗാലക്സിയാണോ, സജീവമായ അതിഭീമൻ തമോദ്വാരമാണോ തുടങ്ങിയ കാര്യങ്ങൾ തിരിച്ചറിയാൻ കഴിയും. ഇത്തരത്തിൽ തിരിച്ചറിയൽ പൂർത്തിയായ സ്രോതസ്സുകളിൽ ഏകദേശം 88 ശതമാനവും സജീവമായി ദ്രവ്യം വിഴുങ്ങുന്ന അതിഭീമൻ തമോദ്വാരങ്ങളുള്ള ദൂരെയുള്ള ഗാലക്സികളാണെന്നാണ് കണ്ടെത്തൽ.

2028ൽ അടുത്ത ഡാറ്റാ റിലീസ്

എക്സ്-റേ സ്രോതസ്സുകളെ മറ്റ് തരംഗദൈർഘ്യങ്ങളിലെ വിവരങ്ങളുമായി ബന്ധിപ്പിക്കുന്നതിലൂടെ ഈ ആകാശവസ്തുക്കളുടെ സ്വഭാവവും പ്രപഞ്ചത്തിലെ അവയുടെ സ്ഥാനവും കൂടുതൽ കൃത്യമായി മനസ്സിലാക്കാൻ കഴിയുമെന്ന് ശാസ്ത്രജ്ഞർ പറയുന്നു. ഇറോസിറ്റ 2022ന്റെ തുടക്കത്തിൽ ശാസ്ത്രീയ നിരീക്ഷണങ്ങൾ നിർത്തിയെങ്കിലും അതിന് മുമ്പ് നടത്തിയ മതിയായ ആകാശ സർവേകൾ ഭാവിയിലെ ഡാറ്റാ റിലീസുകൾക്ക് സഹായകമാകും. അടുത്ത ഡാറ്റാ റിലീസായ ഡിആർ3 2028ൽ പുറത്തിറക്കാനാണ് ഗവേഷകരുടെ പദ്ധതി.

വൺപ്ലസ് നോർഡ് 6 വിലയിൽ വൻ ഇടിവ്; 11,000 രൂപ വരെ ലാഭിക്കാം, ഓഫർ ഇങ്ങനെ

Prashobh Prasannan — Wed, 12 Aug 2026 11:09:10 +0530

വിലക്കുറവുമായി വൺപ്ലസ് നോർഡ് 6. സ്വാതന്ത്ര്യദിന വിൽപ്പനയുടെ ഭാഗമായി വൺപ്ലസ് പ്രഖ്യാപിച്ചിരിക്കുന്ന ഓഫറിലാണ് നോർഡ് 6ന് വൻ ഇളവ് ലഭിക്കുന്നത്. 8 ജിബി റാം, 256 ജിബി സ്റ്റോറേജ് വേരിയന്‍റിന് 44,499 രൂപ ആണ് നിലവിലെ വില. ബാങ്ക് ഓഫർ കൂടി പ്രയോജനപ്പെടുത്തിയാൽ പരമാവധി 11,000 രൂപ വരെ ലാഭിക്കാനാകും.

44,499 രൂപയ്ക്ക് വൺപ്ലസ് നോർഡ് 6

52,999 രൂപ ആയിരുന്ന എംആർപിയിൽ നിന്നാണ് നോർഡ് 6ന്റെ വില 44,499 രൂപ ആയി കുറഞ്ഞിരിക്കുന്നത്. ഇതിന് പുറമെ തിരഞ്ഞെടുക്കപ്പെട്ട ബാങ്കുകളുടെ ക്രെഡിറ്റ് കാർഡ് ഇഎംഐ ഇടപാടുകൾക്ക് 2,500 രൂപ വരെ ഇൻസ്റ്റന്റ് ഡിസ്‍കൌണ്ടും ലഭിക്കും. എച്ച്ഡിഎഫ്‍സി ബാങ്ക്, ഐസിഐസിഐ ബാങ്ക്, കൊട്ടക് മഹീന്ദ്ര ബാങ്ക്, ഐഡിഎഫ്സിഐ ബാങ്ക്, ഇൻഡസ്ഇൻഡ് ബാങ്ക് എന്നിവയുടെ യോഗ്യമായ ക്രെഡിറ്റ് കാർഡ് ഇഎംഐ ഇടപാടുകളിലാണ് 2,500 രൂപ വരെ ബാങ്ക് ഓഫർ ലഭിക്കുക. ആക്സിസ് ബാങ്ക് ക്രെഡിറ്റ് കാർഡ് ഉപഭോക്താക്കൾക്ക് ഇഎംഐ ഇടപാടിൽ 2,500 രൂപ വരെയും നോൺ-ഇഎംഐ ഇടപാടിൽ 2,000 രൂപ വരെയും ഇളവ് ലഭിക്കും.

മൂന്ന് നിറങ്ങളിൽ ഫോൺ

ഫ്രെഷ് മിന്റ്, ക്വിക്ക് സിൽവർ, പിച്ച് ബ്ലാക്ക് എന്നീ മൂന്ന് നിറങ്ങളിലാണ് വൺപ്ലസ് നോർഡ് 6 ലഭിക്കുന്നത്. പുറത്തിറക്കിയ സമയത്തെ വിലയുമായി താരതമ്യം ചെയ്യുമ്പോൾ പിന്നീട് ഫോണിന് വില വർധിച്ചിരുന്നെങ്കിലും പുതിയ ഓഫർ ഉപഭോക്താക്കൾക്ക് വീണ്ടും ആകർഷകമായ വിലയിൽ ഫോൺ സ്വന്തമാക്കാനുള്ള അവസരമാണ് നൽകുന്നത്.

165 ഹെർട്സ് അമോലെഡ് ഡിസ്പ്ലേ

6.78 ഇഞ്ച് 1.5കെ അമോലെഡ് ഡിസ്പ്ലേയാണ് ഫോണിലെ പ്രധാന ആകർഷണം. 165 ഹെർട്സ് റിഫ്രഷ് റേറ്റ്, 3,600 നിറ്റ്സ് വരെ പീക്ക് ബ്രൈറ്റ്നസ്, എച്ച്ഡിആർ പിന്തുണ എന്നിവയും ലഭിക്കും. നനഞ്ഞ കൈകളിലും സ്ക്രീൻ പ്രതികരണം മെച്ചപ്പെടുത്തുന്ന അക്വാ ടച്ച് 2.0 സാങ്കേതികവിദ്യയും ഫോണിലുണ്ട്.

സ്നാപ്ഡ്രാഗൺ ചിപ്സെറ്റും 9000 എംഎഎച്ച് ബാറ്ററിയും

സ്നാപ്ഡ്രാഗൺ 8എസ് ജെൻ 4 ചിപ്സെറ്റാണ് വൺപ്ലസ് നോർഡ് 6ന് കരുത്തേകുന്നത്. എൽപിഡിഡിആർ5എക്സ് റാമും യുഎഫ്എസ് 4.1 സ്റ്റോറേജും ചേർന്നതിനാൽ ഗെയിമിങ് ഉൾപ്പെടെയുള്ള ആവശ്യകതയേറിയ പ്രവർത്തനങ്ങൾ സുഗമമായി കൈകാര്യം ചെയ്യാൻ ഫോണിന് കഴിയും. ഫോണിന്റെ ഏറ്റവും വലിയ പ്രത്യേകത 9,000 എംഎഎച്ച് ബാറ്ററിയാണ്. സാധാരണ ഉപയോഗത്തിൽ രണ്ട് ദിവസത്തോട് അടുത്ത ബാറ്ററി ബാക്കപ്പ് ലഭിക്കും എന്നാണ് റിപ്പോർട്ടുകൾ. 80 വാട്ട് ഫാസ്റ്റ് ചാർജിങ് പിന്തുണയും ഇതിനുണ്ട്.

ക്യാമറ എങ്ങനെയുണ്ട്?

50 മെഗാപിക്സൽ പ്രധാന ക്യാമറയാണ് ഫോണിലുള്ളത്. പകൽസമയത്തെ ഫോട്ടോഗ്രഫിക്കും സോഷ്യൽമീഡിയയ്ക്കായി ചിത്രങ്ങളും വീഡിയോകളും പകർത്തുന്നതിനും ക്യാമറ മതിയായ പ്രകടനം നൽകും. എന്നാൽ ക്യാമറയാണ് നോർഡ് 6ന്റെ പ്രധാന ശക്തിയെന്ന് പറയാനാകില്ല.

വാങ്ങാൻ പറ്റിയ സമയമോ?

ഡിസ്പ്ലേ, ഗെയിമിങ് പ്രകടനം, ബാറ്ററി ലൈഫ് എന്നിവയ്ക്ക് മുൻഗണന നൽകുന്നവർക്ക് പുതിയ ഓഫർ നോർഡ് 6നെ ശ്രദ്ധേയമായ ഓപ്ഷനാക്കുന്നു. പരമാവധി ബാങ്ക് ഓഫർ ലഭിച്ചാൽ ഏകദേശം 42,000 രൂപയ്ക്ക് ഫോൺ സ്വന്തമാക്കാം. എന്നാൽ ബാങ്ക് ഓഫറുകൾ കാർഡിനും ഇടപാട് രീതിക്കും അനുസരിച്ച് മാറുന്നതിനാൽ വാങ്ങുന്നതിന് മുമ്പ് ഓഫറിന്റെ യോഗ്യത പരിശോധിക്കുന്നത് മികച്ചതാണ്.

ലൂണാർ ബേസ് പദ്ധതിയിലേക്ക് ഐഎസ്ആർഒയെ ക്ഷണിച്ച് നാസ; ചാന്ദ്രനിലയ നിർമാണത്തിൽ സഹകരിക്കാം

Sumam Thomas — Tue, 11 Aug 2026 16:08:38 +0530

ലൂണാർ ബേസ് പദ്ധതിയിലേക്ക് ഐഎസ്ആർഒയെ ക്ഷണിച്ച് നാസ. ആ‍ർട്ടെമിസ് പദ്ധതിയുടെ ഭാഗമായി ചന്ദ്രോപരിതലത്തിൽ സ്ഥാപിക്കുന്ന നിലയത്തിൽ ഭാഗമാകാനും നിലയത്തിന്റെ നിർമ്മാണമടക്കം കാര്യങ്ങളിൽ സഹകരിക്കാനുമാണ് ക്ഷണം. നേരത്തെ തന്നെ അമേരിക്കയുടെ ആർട്ടെമിസ് അക്കോർഡ്സിൽ ഇന്ത്യ ഒപ്പിട്ടിരുന്നു. നാസ - ഐഎസ്ആർഒ സിന്തറ്റിക് അപേർച്ചർ റഡാർ അടക്കം ദൗത്യങ്ങളിൽ ഉണ്ടായ സഹകരണത്തിന്റെ തുടർച്ചയായാണ് ചാന്ദ്ര നിലയത്തിന്റെ ഭാഗമാകാനുള്ള ക്ഷണം. ഇന്ത്യ - യുഎസ് സിവിൽ സ്പേസ് ജോയിന്റ് വർക്കിംഗ് ഗ്രൂപ്പന്റെ ഒമ്പതാം യോഗത്തിൽ വച്ചായിരുന്നു ക്ഷണം. ആഗസ്റ്റ് അഞ്ചിനും ആറിനും ബെംഗളൂരുവിലെ ഇസ്രൊ ആസ്ഥാനത്ത് വച്ചായിരുന്നു ഈ യോഗം. ബഹിരാകാശ രംഗത്ത് സഹകരിക്കാനുള്ള ചർച്ചകൾ തുടരാൻ ഇരു ഭാഗങ്ങളും തമ്മിൽ ധാരണയായി.

പിക്സൽ 11 വരുന്നു! 120X സൂം മുതൽ ടെൻസർ G6 വരെ; ഗൂഗിൾ ഒളിപ്പിച്ച 10 പ്രധാന മാറ്റങ്ങൾ

Prashobh Prasannan — Wed, 12 Aug 2026 09:14:48 +0530

ഗൂഗിളിന്റെ അടുത്ത തലമുറ പിക്സൽ സ്‍മാർട്ട്ഫോണുകൾ ഇന്നെത്തും. ന്യൂയോർക്കിൽ നടക്കുന്ന മെയ്ഡ് ബൈ ഗൂഗിൾ പരിപാടിയിലാണ് പിക്സൽ 11 സീരീസ് അവതരിപ്പിക്കുക. ഇന്ത്യയിൽ ഇത് ഓഗസ്റ്റ് 13ന് പുലർച്ചെ 3:30നാകും നടക്കുക. ട്രെവർ നോഹ അവതാരകനാകുന്ന പരിപാടിയിൽ സ്റ്റീഫൻ കറിയും അലക്സ് കൂപ്പറും പ്രത്യേക അതിഥികളായി പങ്കെടുക്കും. പിക്സൽ 11 പ്രോ, പിക്സൽ 11 പ്രോ ഫോൾഡ്, പിക്സൽ വാച്ച് 5 എന്നിവയുടെ വരവ് ഗൂഗിൾ ഇതിനകം സ്ഥിരീകരിക്കുകയും ടീസ് ചെയ്യുകയും ചെയ്തിട്ടുണ്ട്. പിക്സൽ 11, പിക്സൽ 11 പ്രോ, പിക്സൽ 11 പ്രോ എക്സ്എൽ, പിക്സൽ 11 പ്രോ ഫോൾഡ് എന്നിങ്ങനെ 4 ഫോണുകളാണ് ഇത്തവണ പ്രതീക്ഷിക്കുന്നത്. പ്രോസസർ, ക്യാമറ, സ്റ്റോറേജ്, ഡിസൈൻ, വില തുടങ്ങിയ മേഖലകളിൽ കാര്യമായ മാറ്റങ്ങൾ ഉണ്ടായേക്കുമെന്നാണ് ചോർന്ന വിവരങ്ങൾ സൂചിപ്പിക്കുന്നത്.

1. പിക്സൽ 11ന് വില കൂടിയേക്കും

പിക്സൽ 11 സീരീസിലെ ഏറ്റവും വലിയ മാറ്റങ്ങളിലൊന്ന് വിലയിലായിരിക്കുമെന്നാണ് റിപ്പോർട്ടുകൾ. പിക്സൽ 11ന് 899 ഡോളർ മുതൽ വില ആരംഭിച്ചേക്കും. പിക്സൽ 11 പ്രോ, പ്രോ എക്സ്എൽ, പ്രോ ഫോൾഡ് മോഡലുകൾക്ക് യഥാക്രമം 1,099 ഡോളർ, 1,299 ഡോളർ, 1,899 ഡോളർ വില വരുമെന്നാണ് സൂചന. ഇന്ത്യയിൽ പിക്സൽ 11ന് ഏകദേശം 89,999 രൂപയും പിക്സൽ 11 പ്രോ, പ്രോ എക്സ്എൽ മോഡലുകൾക്ക് യഥാക്രമം 1,19,999 രൂപയും 1,34,999 രൂപയും വില വന്നേക്കാം. പ്രോ ഫോൾഡിന്റെ വില 1.8 ലക്ഷം രൂപയിലേക്ക് ഉയർന്നേക്കുമെന്നും റിപ്പോർട്ടുകളുണ്ട്.

2. പുതിയ ഹൈലൈറ്റ് എൽഇഡി

പിക്സൽ 11ന്റെ ക്യാമറ ബാറിൽ പുതിയ മൾട്ടി-കളർ എൽഇഡി മൊഡ്യൂൾ ഉൾപ്പെടുത്തിയേക്കും. ഹൈലൈറ്റ് എന്ന പേരിൽ അറിയപ്പെടുന്ന ഈ സംവിധാനം നേരത്തെ പിക്സൽ ഗ്ലോ എന്ന പേരിലും റിപ്പോർട്ട് ചെയ്യപ്പെട്ടിരുന്നു. അറിയിപ്പുകൾ, ചാർജിങ്, ജെമിനി അധിഷ്‍ഠിത ഇടപെടലുകൾ തുടങ്ങിയവയുടെ ഭാഗമായി എൽഇഡി പ്രകാശിക്കുമെന്നാണ് സൂചന.

3. ടെൻസർ ജി6 ചിപ്പ്സെറ്റ്

പിക്സൽ 11 സീരീസിലെ 4 മോഡലുകൾക്കും ഗൂഗിളിന്റെ പുതിയ ടെൻസർ ജി6 പ്രോസസർ കരുത്തേകുമെന്നാണ് റിപ്പോർട്ടുകൾ. ടിഎസ്എംസിയുടെ 2 നാനോമീറ്റർ നിർമ്മാണ സാങ്കേതികവിദ്യ ഉപയോഗിച്ചായിരിക്കും ചിപ്പ് നിർമ്മിക്കുകയെന്നാണ് സൂചന. പുതിയ പവർവിആർ ജിപിയുവും മീഡിയടെക് എം90 മോഡവും ലഭിച്ചേക്കും.

4. പ്രോ മോഡലുകളിൽ റാം കുറയുമോ?

സാധാരണയായി പുതിയ തലമുറ ഫോണുകളിൽ റാം വർധിക്കാറുണ്ടെങ്കിലും പിക്സൽ 11 പ്രോ, പ്രോ എക്സ്എൽ മോഡലുകളിൽ ഇതിന് വിപരീതമായ മാറ്റമുണ്ടായേക്കാം. അടിസ്ഥാന പ്രോ മോഡലുകളിൽ 16 ജിബിക്ക് പകരം 12 ജിബി റാം നൽകാൻ ഗൂഗിൾ ഒരുങ്ങുന്നതായാണ് റിപ്പോർട്ട്. ഉയർന്ന റാം ശേഷിയുള്ള വേരിയന്റുകളും പ്രതീക്ഷിക്കുന്നുണ്ട്. പ്രോ ഫോൾഡിലും 12 ജിബി, 16 ജിബി റാം ഓപ്ഷനുകൾ ലഭിച്ചേക്കാം.

5. 256 ജിബി അടിസ്ഥാന സ്റ്റോറേജ്

പിക്സൽ 11 സീരീസിൽ 128 ജിബി സ്റ്റോറേജ് ഒഴിവാക്കി 256 ജിബിയെ അടിസ്ഥാന സ്റ്റോറേജ് ഓപ്ഷനാക്കാൻ ഗൂഗിൾ പദ്ധതിയിടുന്നതായാണ് സൂചന. പ്രോ ഫോൾഡിൽ 256 ജിബി, 512 ജിബി, 1 ടിബി എന്നിങ്ങനെ 3 സ്റ്റോറേജ് ഓപ്ഷനുകൾ ലഭിച്ചേക്കും.

6. പുതിയ നിറങ്ങൾ

പിക്സൽ 11 സീരീസിൽ പുതിയ കളർ ഓപ്ഷനുകളും എത്തിയേക്കും. സാധാരണ പിക്സൽ 11 ഹിബിസ്കസ്, ഫ്രോസ്റ്റ്, ഒബ്സിഡിയൻ, പിസ്റ്റാഷിയോ നിറങ്ങളിൽ ലഭിച്ചേക്കും. പ്രോ മോഡലുകൾ ഒലീവ്, ഒബ്സിഡിയൻ, കാന്യൺ, ഫോഗ് നിറങ്ങളിലും പ്രോ ഫോൾഡ് ഒബ്സിഡിയൻ, ഒലീവ് നിറങ്ങളിലും എത്തിയേക്കുമെന്നാണ് റിപ്പോർട്ട്.

7. ഡിസ്പ്ലേയിലും മാറ്റങ്ങൾ

സാധാരണ പിക്സൽ 11ൽ 6.3 ഇഞ്ച് ഒഎൽഇഡി ഡിസ്പ്ലേയും 120 ഹെർട്സ് റിഫ്രഷ് റേറ്റും തുടർന്നേക്കും. പിക്സൽ 11 പ്രോയിലും 6.3 ഇഞ്ച് ഡിസ്പ്ലേയായിരിക്കും ലഭിക്കുക. അതേസമയം, പ്രോ എക്സ്എല്ലിൽ 6.8 ഇഞ്ച് സ്ക്രീൻ പ്രതീക്ഷിക്കുന്നു. പ്രോ ഫോൾഡിൽ 6.5 ഇഞ്ച് പുറം ഡിസ്പ്ലേയും 8 ഇഞ്ച് അകത്തെ ഡിസ്പ്ലേയുമുള്ള ഡ്യുവൽ സ്ക്രീൻ സംവിധാനം തുടരും. രണ്ട് ഡിസ്പ്ലേകൾക്കും 120 ഹെർട്സ് റിഫ്രഷ് റേറ്റ് ലഭിച്ചേക്കും.

8. സാധാരണ പിക്സൽ 11ൽ ടെലിഫോട്ടോ ക്യാമറ ഒഴിവാക്കിയേക്കും

പിക്സൽ 11ന്റെ ക്യാമറ വിഭാഗത്തിൽ വലിയ മാറ്റം വരുത്തിയേക്കുമെന്നാണ് റിപ്പോർട്ടുകൾ. ടെലിഫോട്ടോ ക്യാമറ ഒഴിവാക്കി 48 മെഗാപിക്സൽ പ്രധാന ക്യാമറയും 13 മെഗാപിക്സൽ അൾട്രാ വൈഡ് ക്യാമറയും നൽകാൻ ഗൂഗിൾ പദ്ധതിയിടുന്നതായാണ് സൂചന. സൂപ്പർ റെസ് സൂം വഴി 30 മടങ്ങ് വരെ സൂം ലഭിച്ചേക്കും.

9. പ്രോ മോഡലുകളിൽ 120 മടങ്ങ് സൂം

കമ്പ്യൂട്ടേഷണൽ ഫോട്ടോഗ്രഫിയിൽ കൂടുതൽ മുന്നേറ്റം കൊണ്ടുവരാനും ഗൂഗിൾ ഒരുങ്ങുന്നതായി റിപ്പോർട്ടുണ്ട്. പിക്സൽ 11 പ്രോ, പ്രോ എക്സ്എൽ മോഡലുകളിൽ എഐ സഹായത്തോടെയുള്ള 120 മടങ്ങ് വരെ സൂം ലഭിച്ചേക്കും. മുൻ തലമുറയിലെ 100 മടങ്ങ് സൂമിനേക്കാൾ വലിയ മുന്നേറ്റമായിരിക്കും ഇത്.

10. ബാറ്ററിയിലും ചാർജിങ്ങിലും മാറ്റം

പിക്സൽ 11ൽ 4,985 എംഎഎച്ച് ബാറ്ററിയാണ് പ്രതീക്ഷിക്കുന്നത്. പ്രോ, പ്രോ എക്സ്എൽ, പ്രോ ഫോൾഡ് മോഡലുകളിൽ യഥാക്രമം 4,850 എംഎഎച്ച്, 5,115 എംഎഎച്ച്, 4,806 എംഎഎച്ച് ബാറ്ററികൾ ലഭിച്ചേക്കും. പ്രോ എക്സ്എല്ലിൽ 45 വാട്ട് വയർഡ് ചാർജിങ്ങും പ്രോ ഫോൾഡിൽ 30 വാട്ട് ചാർജിങ്ങും ലഭിച്ചേക്കും. പ്രോ മോഡലുകളിലും ഫോൾഡബിൾ മോഡലിലും ക്യു2 വയർലെസ് ചാർജിങ് പിന്തുണയും പ്രതീക്ഷിക്കുന്നു.

പിക്സൽ വാച്ച് 5നും അരങ്ങേറ്റം

പിക്സൽ 11 സീരീസിനൊപ്പം ഗൂഗിൾ പിക്സൽ വാച്ച് 5നും അവതരിപ്പിച്ചേക്കും. ഇതിന് പുറമെ മറ്റ് ഹാർഡ്വെയർ ഉൽപ്പന്നങ്ങളും മെയ്ഡ് ബൈ ഗൂഗിൾ പരിപാടിയിൽ കമ്പനി പ്രഖ്യാപിച്ചേക്കുമെന്നാണ് റിപ്പോർട്ടുകൾ. ഔദ്യോഗിക ലോഞ്ചിന് ഇനി 2 ദിവസം മാത്രം ശേഷിക്കെ, പിക്സൽ 11 സീരീസിന്റെ വിലയും മറ്റ് സവിശേഷതകളും സംബന്ധിച്ച അന്തിമ വിവരങ്ങൾ അറിയാൻ കാത്തിരിക്കുകയാണ് ടെക് ലോകം.

ആർട്ടെമിസ് ലൂണാർ ബേസ് പദ്ധതി: ഐഎസ്ആർഒയെ ക്ഷണിച്ച് നാസ

Web Desk — Tue, 11 Aug 2026 16:24:21 +0530

ബെംഗളൂരു: ലൂണാർ ബേസ് പദ്ധതിയിലേക്ക് ഐഎസ്ആർഒയെ ക്ഷണിച്ച് നാസ. ആ‍ർട്ടെമിസ് പദ്ധതിയുടെ ഭാഗമായി ചന്ദ്രോപരിതലത്തിൽ സ്ഥാപിക്കുന്ന നിലയത്തിൽ ഭാഗമാകാനും നിലയത്തിന്റെ നിർമ്മാണമടക്കം കാര്യങ്ങളിൽ സഹകരിക്കാനുമാണ് ക്ഷണം. നേരത്തെ തന്നെ അമേരിക്കയുടെ ആർട്ടെമിസ് അക്കോർഡ്സിൽ ഇന്ത്യ ഒപ്പിട്ടിരുന്നു. നാസ-ഐഎസ്ആർഒ സിന്തറ്റിക് അപേർച്ചർ റഡാർ അടക്കം ദൗത്യങ്ങളിൽ ഉണ്ടായ സഹകരണത്തിന്റെ തുടർച്ചയായാണ് ചാന്ദ്ര നിലയത്തിന്റെ ഭാഗമാകാനുള്ള ക്ഷണം. ഇന്ത്യ-യുഎസ് സിവിൽ സ്പേസ് ജോയിന്റ് വർക്കിംഗ് ഗ്രൂപ്പന്റെ ഒമ്പതാം യോഗത്തിൽ വച്ചായിരന്നു ക്ഷണം. ആഗസ്റ്റ് അഞ്ചിനും ആറിനും ബെംഗളൂരുവിലെ ഇസ്രൊ ആസ്ഥാനത്ത് വച്ചായിരുന്നു ഈ യോഗം. ബഹിരാകാശ രംഗത്ത് സഹകരിക്കാനുള്ള ചർച്ചകൾ തുടരാൻ ഇരു ഭാഗങ്ങളും തമ്മിൽ ധാരണയായി.

ഫോൺ തന്നെ ക്യാമറാമാൻ! മുകളിൽ നിന്ന് പുറത്തുവരുന്ന റോബോട്ടിക് ക്യാമറയുമായി ഹോണർ ഫോൺ

Prashobh Prasannan — Thu, 13 Aug 2026 14:38:34 +0530

സ്‍മാർട്ട്ഫോൺ ക്യാമറ സാങ്കേതികവിദ്യയിൽ പുതിയ പരീക്ഷണവുമായി ഹോണർ. മുകളിൽ നിന്ന് പുറത്തേക്ക് ഉയർന്നുവരുന്ന റോബോട്ടിക് ജിംബൽ ക്യാമറയുമായി ഹോണർ റോബോട്ട് ഫോൺ ചൈനീസ് വിപണിയിൽ അവതരിപ്പിച്ചു. 200 മെഗാപിക്സൽ പ്രധാന ക്യാമറ ഉൾപ്പെടുന്ന ഈ സംവിധാനം ട്രൈപോഡിന്റെ സഹായമില്ലാതെ കൈകളുടെ ഉപയോഗമില്ലാതെ വീഡിയോ ചിത്രീകരിക്കാൻ സഹായിക്കും. വീഡിയോ എടുക്കുമ്പോൾ വ്യക്തിയെ കൃത്യമായി ഫ്രെയിമിൽ നിലനിർത്തുന്നതിനായി കൃത്രിമ ബുദ്ധി അധിഷ്‍ഠിത സബ്‍ജക്ട് ട്രാക്കിങ് സംവിധാനവും ഫോണിലുണ്ട്. സ്‍നാപ്ഡ്രാഗൺ 8 എലൈറ്റ് ജെൻ 5 പ്രോസസറാണ് ഫോണിന്റെ കരുത്ത്. പരമാവധി 16 ജിബി റാമും 1 ടിബി സ്റ്റോറേജും ഫോണിലുണ്ട്.

6.31 ഇഞ്ച് ഓഎൽഇഡി ഡിസ്പ്ലേ

മാജിക് ഒഎസ് 10 അടിസ്ഥാനമാക്കി പ്രവർത്തിക്കുന്ന ഡ്യുവൽ സിം ഫോണിൽ 6.31 ഇഞ്ച് ഓഎൽഇഡി ഡിസ്പ്ലേയാണുള്ളത്. 1,216 × 2,640 പിക്സൽ റെസല്യൂഷനും 460 പിപിഐ പിക്സൽ സാന്ദ്രതയും ഡിസ്പ്ലേയ്ക്കുണ്ട്. 120 ഹെർട്‍സ് അഡാപ്റ്റീവ് റിഫ്രഷ് റേറ്റുള്ള സ്ക്രീനിന് പരമാവധി 6,800 നിറ്റ്സ് വരെ എച്ച്ഡിആർ പ്രകാശതീവ്രത ലഭിക്കുമെന്ന് കമ്പനി അവകാശപ്പെടുന്നു. സ്‍നാപ്ഡ്രാഗൺ 8 എലൈറ്റ് ജെൻ 5 ഒക്ടാകോർ പ്രോസസറിനൊപ്പം അഡ്രിനോ 840 ജിപിയുവും ഫോണിലുണ്ട്. 16 ജിബി എൽപിഡിഡിആർ5എക്സ് റാമും 1 ടിബി ഇന്റേണൽ സ്റ്റോറേജുമാണ് ഉയർന്ന പതിപ്പിലുള്ളത്.

200 മെഗാപിക്സൽ ക്യാമറ

റോബോട്ട് ഫോണിന്റെ പ്രധാന ആകർഷണം ക്യാമറ സംവിധാനമാണ്. പിന്നിൽ മൂന്ന് ക്യാമറകളാണുള്ളത്. 1/1.28 ഇഞ്ച് സിഎംഒഎസ് സെൻസറുള്ള 200 മെഗാപിക്സൽ പ്രധാന ക്യാമറയാണ് ഇതിൽ പ്രധാനം. എഫ്/1.6 അപ്പർച്ചറുള്ള പ്രധാന ക്യാമറയ്ക്ക് 23 എംഎം തുല്യമായ ജിംബൽ സ്റ്റബിലൈസേഷനുമുണ്ട്. 200 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറയാണ് രണ്ടാമത്തേത്. 2.7 മടങ്ങ് ഒപ്റ്റിക്കൽ സൂമും പരമാവധി 200 മടങ്ങ് ഡിജിറ്റൽ സൂമും ഇതിലുണ്ട്. 122 ഡിഗ്രി ദൃശ്യപരിധിയുള്ള 50 മെഗാപിക്സൽ അൾട്രാ വൈഡ് ക്യാമറയാണ് മൂന്നാമത്തേത്. മുൻവശത്ത് 90 ഡിഗ്രി ദൃശ്യപരിധിയുള്ള 50 മെഗാപിക്സൽ സെൽഫി ക്യാമറയുണ്ട്.

മുകളിലെത്തുന്ന റോബോട്ടിക് ക്യാമറ

ഫോണിന്റെ മുകൾഭാഗത്ത് ഘടിപ്പിച്ചിരിക്കുന്ന റോബോട്ടിക് ജിംബൽ ക്യാമറയാണ് ഏറ്റവും വ്യത്യസ്തമായ സവിശേഷത. വീഡിയോ ചിത്രീകരിക്കുമ്പോൾ ക്യാമറയ്ക്ക് ചുറ്റും തിരിഞ്ഞ് വിഷയത്തെ പിന്തുടരാൻ കഴിയും. മൂന്ന് ആക്സിസുകളിലുള്ള മെക്കാനിക്കൽ ജിംബൽ സ്റ്റബിലൈസേഷനാണ് ക്യാമറയ്ക്കുള്ളത്. കൃത്രിമ ബുദ്ധിയുടെ സഹായത്തോടെ വ്യക്തിയെയോ വിഷയത്തെയോ തിരിച്ചറിഞ്ഞ് തുടർച്ചയായി ഫ്രെയിമിൽ നിലനിർത്താനും സംവിധാനത്തിന് കഴിയും. പിന്നിലെ ക്യാമറ ഉപയോഗിച്ച് 120 എഫ്പിഎസിൽ 4കെ വീഡിയോ റെക്കോർഡ് ചെയ്യാം. മുൻ ക്യാമറയിൽ 60 എഫ്പിഎസിൽ 4കെ വീഡിയോ ചിത്രീകരിക്കാനും സാധിക്കും. റോബോട്ടിക് ക്യാമറ സാങ്കേതികവിദ്യയ്ക്കായി ഹോണർ അരിയുമായി സഹകരിച്ചാണ് ഫോൺ വികസിപ്പിച്ചിരിക്കുന്നത്.

കണക്റ്റിവിറ്റിയിലും മുന്നിൽ

5ജി, വൈഫൈ 7, ബ്ലൂടൂത്ത് 6.0, എൻഎഫ്സി, യുഎസ്ബി ടൈപ്പ്–സി, ജിപിഎസ്, നാവിക്, ഗലീലിയോ, ഗ്ലോനാസ്, ഇൻഫ്രാറെഡ് റിമോട്ട് കൺട്രോൾ തുടങ്ങിയ കണക്റ്റിവിറ്റി സംവിധാനങ്ങൾ ഫോണിലുണ്ട്. സ്റ്റീരിയോ സ്പീക്കറുകളും കൃത്രിമ ബുദ്ധി അധിഷ്ഠിത ശബ്ദനിയന്ത്രണമുള്ള 4 മൈക്രോഫോണുകളും നൽകിയിട്ടുണ്ട്. 3ഡി അൾട്രാസോണിക് ഫിംഗർപ്രിന്റ് സെൻസറാണ് സുരക്ഷയ്ക്കായി ഉപയോഗിക്കുന്നത്. ആക്സിലറോമീറ്റർ, ജൈറോസ്കോപ്പ്, കോംപസ്, പ്രോക്സിമിറ്റി സെൻസർ, ഹാൾ സെൻസർ, എക്സ്–ആക്സിസ് ലീനിയർ മോട്ടോർ എന്നിവയും ഫോണിലുണ്ട്.

7,060 എംഎഎച്ച് ബാറ്ററി

7,060 എംഎഎച്ച് ശേഷിയുള്ള ബാറ്ററിയാണ് ഹോണർ റോബോട്ട് ഫോണിലുള്ളത്. 120 വാട്ട് വയേർഡ് ഫാസ്റ്റ് ചാർജിങ്, 50 വാട്ട് വയർലെസ് ചാർജിങ്, വയർലെസ് റിവേഴ്സ് ചാർജിങ് എന്നിവയും പിന്തുണയ്ക്കുന്നു. 151.43 × 72.86 × 9.59 മില്ലിമീറ്ററാണ് ഫോണിന്റെ അളവ്. ഏകദേശം 248 ഗ്രാം ഭാരമുണ്ട്. റോബോട്ടിക് ജിംബൽ ക്യാമറ, അതിശക്തമായ ക്യാമറ സജ്ജീകരണം, വലിയ ബാറ്ററി, ഉയർന്ന നിലവാരമുള്ള പ്രോസസർ എന്നിവയിലൂടെ പ്രീമിയം സ്മാർട്ട്ഫോൺ വിപണിയിൽ വേറിട്ട സ്ഥാനം നേടാനാണ് ഹോണറിന്റെ ശ്രമം.

വില

12 ജിബി റാമും 512 ജിബി സ്റ്റോറേജുമുള്ള അടിസ്ഥാന മോഡലിന് ചൈനയിൽ 9,999 ചൈനീസ് യുവാനാണ് വില. ഏകദേശം 1,41,000 രൂപയാണിത്. 16 ജിബി റാമും 1 ടിബി സ്റ്റോറേജുമുള്ള ഉയർന്ന പതിപ്പിന് 12,999 ചൈനീസ് യുവാനാണ് വില. ഏകദേശം 1,83,000 രൂപ വരും. മൂൺ ഷാഡോ ഗ്രേ, സ്റ്റാർ ട്രെയിൽ സിൽവർ എന്നീ നിറങ്ങളിലാണ് ഫോൺ എത്തുന്നത്. റോബോട്ട് ഫോൺ എന്ന ആശയം ഹോണർ കഴിഞ്ഞ വർഷം തന്നെ അവതരിപ്പിച്ചിരുന്നു. ഈ വർഷം നടന്ന മൊബൈൽ വേൾഡ് കോൺഗ്രസ് 2026-ലും ഫോൺ പ്രദർശിപ്പിച്ചിരുന്നു.

ഭാര്യ 45 ദിവസം മുമ്പേ ലീവ് പറഞ്ഞിട്ടും മാനേജർ സമ്മതിച്ചില്ല; ടെക്കിയുടെ റെഡ്ഡിറ്റ് പോസ്റ്റ് വൈറൽ!

Prashobh Prasannan — Thu, 13 Aug 2026 13:45:39 +0530

അവധി എടുക്കാൻ ആഴ്ചകൾക്ക് മുമ്പ് അപേക്ഷ നൽകിയാലും മാനേജറുടെ അനുമതി ലഭിച്ചില്ലെന്ന പരാതിയുമായി ടെക്കിയുടെ സോഷ്യൽ മീഡിയ പോസ്റ്റ് വൈറലാകുന്നു. ഇന്ത്യൻ ടെക്നോളജി കമ്പനിയിൽ ജോലി ചെയ്യുന്ന ഭാര്യയ്ക്ക് 45 ദിവസത്തിലേറെ മുൻപ് അവധിക്ക് അപേക്ഷിച്ചിട്ടും മാനേജർ അനുമതി നിഷേധിക്കുകയാണെന്നാണ് ടെക്കി റെഡ്ഡിറ്റിലൂടെ പങ്കുവച്ചത്. ഡെവലപ്പേഴ്സ് ഇന്ത്യ എന്ന റെഡിറ്റ് കൂട്ടായ്മയിലാണ് ഹിസ്റ്റോറിക്കൽ ഡേ 364 എന്ന പേരിലുള്ള ഉപയോക്താവ് അനുഭവം പങ്കുവച്ചത്. ഏകദേശം ഒന്നര മാസത്തിന് ശേഷം കുടുംബത്തോടൊപ്പം അവധിക്ക് പോകാനാണ് പദ്ധതിയിട്ടിരുന്നതെന്നും ഇതിനായി ഭാര്യ നേരത്തെ തന്നെ മാനേജറെ അറിയിച്ചിരുന്നുവെന്നും അദ്ദേഹം പറഞ്ഞു.

‘45 ദിവസത്തിലേറെ മുൻപ് അറിയിച്ചിരുന്നു’

ഭാര്യ ജോലി ചെയ്യുന്ന സ്ഥാപനം വലിയ ഇന്ത്യൻ ഐടി സേവന കമ്പനികളുടെ വിഭാഗത്തിൽപ്പെടുന്നതാണെന്ന് ടെക്കി പറയുന്നു. യാത്രയ്ക്ക് ഒന്നര മാസം മുമ്പ് തന്നെ അവധിയുടെ വിവരം മാനേജരെയും ടീം ലീഡിനെയും അറിയിച്ചിരുന്നു. എന്നാൽ ഇത്രയും നേരത്തെ അറിയിച്ചിട്ടും മാനേജർ അവധി അനുവദിക്കാൻ തയ്യാറായില്ലെന്നാണ് പരാതി. യാത്രയുടെ തീയതി മാറ്റണമെന്നാണ് മാനേജർ ആവശ്യപ്പെട്ടതെന്നും ടെക്കി പറഞ്ഞു.

യാത്ര ബുക്ക് ചെയ്തുകഴിഞ്ഞു

അവധി തീയതികൾ മാറ്റുന്നത് എളുപ്പമല്ലെന്നും കുടുംബം ഇതിനകം യാത്രയ്ക്കുള്ള ബുക്കിങ്ങുകൾ പൂർത്തിയാക്കിയെന്നും ടെക്കി വ്യക്തമാക്കി. തീയതികളിൽ മാറ്റം വരുത്തിയാൽ അധിക ചെലവും മറ്റ് അസൗകര്യങ്ങളും ഉണ്ടാകുമെന്നും അദ്ദേഹം പറഞ്ഞു. അതിനാൽ തന്നെ നേരത്തെ അറിയിച്ച അവധി നിഷേധിക്കുന്നത് തങ്ങളെ ബുദ്ധിമുട്ടിലാക്കിയെന്നും പോസ്റ്റിൽ പറയുന്നു.

‘ജോലി നിർണായകമല്ല’

ഭാര്യ അഞ്ച് വർഷത്തിലേറെയായി സ്ഥാപനത്തിൽ ജോലി ചെയ്യുന്നയാളാണെന്നും മതിയായ ലീവ് ബാലൻസ് ഉണ്ടെന്നും ടെക്കി പറഞ്ഞു. അവർ കൈകാര്യം ചെയ്യുന്ന ജോലികൾ കമ്പനിയുടെ നിർണായക പ്രവർത്തനങ്ങളുമായി നേരിട്ട് ബന്ധപ്പെട്ടതല്ലെന്നും കുറച്ച് ദിവസത്തേക്ക് മാറ്റിവയ്ക്കാൻ കഴിയുന്നതാണെന്നും അദ്ദേഹം അവകാശപ്പെട്ടു. അടിയന്തരമായി എന്തെങ്കിലും ജോലി വന്നാൽ സ്ലാക്കിലൂടെയോ വാട്സ്ആപ്പിലൂടെയോ ബന്ധപ്പെടാൻ തയ്യാറാണെന്നും ഭാര്യ ടീം അംഗങ്ങളെ അറിയിച്ചിരുന്നുവെന്നും ടെക്കി പറയുന്നു. അടിസ്ഥാന ജോലികൾ കൈകാര്യം ചെയ്യാൻ ഒരു ഇന്റേണിനും സാധിക്കുമെന്നായിരുന്നു അദ്ദേഹത്തിന്റെ വാദം. എന്നിട്ടും മാനേജർ നിലപാട് മാറ്റാൻ തയ്യാറായില്ലെന്നാണ് പരാതി.

‘അവധി ഒരു ചർച്ചയാക്കുന്നു’

അവധി അനുവദിക്കുന്നതിന് പകരം മാനേജർ അതിനെ ഒരുതരം ‘ചർച്ച’യായി മാറ്റുകയാണെന്നും ടെക്കി ആരോപിച്ചു. ഇന്ത്യൻ ജോലിസ്ഥലങ്ങളിൽ ഇത്തരം സമീപനം അസാധാരണമല്ലെന്നും സമാനമായ സേവനാധിഷ്ഠിത കമ്പനികളിൽ താൻ ജോലി ചെയ്തിട്ടുണ്ടെന്നും അദ്ദേഹം പറഞ്ഞു. തുടർന്ന് എന്താണ് ചെയ്യേണ്ടതെന്ന് റെഡ്ഡിറ്റ് ഉപയോക്താക്കളോട് അദ്ദേഹം ചോദിച്ചു. യാത്രയുടെ തീയതികൾ നേരത്തെ ബുക്ക് ചെയ്തതാണെന്ന് മാനേജറോട് വീണ്ടും വ്യക്തമാക്കണമോ, അതോ വിഷയം എച്ച്ആർ വിഭാഗത്തിലേക്ക് കൈമാറണമോ എന്നായിരുന്നു ചോദ്യം.

‘അവധി ആവശ്യപ്പെടേണ്ടതില്ല’

പോസ്റ്റിന് താഴെ നിരവധി പേരാണ് തങ്ങളുടെ അഭിപ്രായങ്ങൾ പങ്കുവച്ചത്. ജീവനക്കാർക്ക് അനുവദിച്ചിട്ടുള്ള അവധി എടുക്കുന്നത് അവകാശമാണെന്നും അതിനാൽ അവധി ‘അപേക്ഷിക്കുന്നതിന്’ പകരം മുൻകൂട്ടി വിവരം നൽകുന്നതാണ് ശരിയെന്നും ഒരാൾ അഭിപ്രായപ്പെട്ടു. മറ്റൊരാൾ മാനേജറോട് അവധിയുടെ കാരണം വിശദീകരിക്കേണ്ട ആവശ്യമില്ലെന്നും യാത്രയോ കുടുംബകാര്യങ്ങളോ പോലുള്ള വ്യക്തിപരമായ കാര്യങ്ങൾക്ക് ജീവനക്കാർക്ക് അവധി എടുക്കാമെന്നും അഭിപ്രായപ്പെട്ടു.

‘ജോലി മാറുന്നതാണ് നല്ലത്’

മാനേജർമാർ ജീവനക്കാരുടെ അവധിയോട് അനാവശ്യമായി എതിർപ്പ് കാണിക്കുന്നതായി ചിലർ ആരോപിച്ചു. മറ്റൊരു റെഡ്ഡിറ്റ് ഉപയോക്താവ് ഇത്തരം സാഹചര്യങ്ങൾ ആവർത്തിക്കുന്നുണ്ടെങ്കിൽ ജോലി മാറുന്നതിനെക്കുറിച്ച് ആലോചിക്കണമെന്നും നിർദേശിച്ചു. ‘ജീവിതം വളരെ ചെറുതാണ്, ഇത്തരം കാര്യങ്ങളുമായി നിരന്തരം പൊരുതേണ്ടി വരുന്നത് ഒഴിവാക്കാൻ ജോലി മാറുക’ എന്നായിരുന്നു മറ്റൊരാളുടെ പ്രതികരണം. അതേസമയം, ജീവനക്കാരുടെ അവകാശങ്ങൾ, അവധി നയം, മാനേജറുടെ അധികാരം എന്നിവ സംബന്ധിച്ച കൃത്യമായ നടപടികൾ ഓരോ സ്ഥാപനത്തിന്റെയും തൊഴിൽനയവും കരാറും അനുസരിച്ച് വ്യത്യാസപ്പെടാം. റെഡ്ഡിറ്റിലെ പ്രതികരണങ്ങൾ വ്യക്തിഗത അനുഭവങ്ങളും അഭിപ്രായങ്ങളുമാണ്.

സാംസങ് അൾട്രയ്ക്ക് 40,000 രൂപയുടെ കിഴിവ്; ഇപ്പോൾ വാങ്ങണോ?

Prashobh Prasannan — Tue, 11 Aug 2026 15:50:52 +0530

ആമസോണിന്റെ ഗ്രേറ്റ് ഫ്രീഡം സെയിലിൽ സാംസങിന്റെ പ്രീമിയം സ്‍മാർട്ട്ഫോണുകൾക്ക് വൻ വിലക്കുറവ്. ഗാലക്സി എസ്25 അൾട്രയ്ക്ക് 40,000 രൂപ വരെയും പുതിയ ഗാലക്സി എസ്26 അൾട്രയ്ക്ക് 15,000 രൂപ വരെയും ആനുകൂല്യം ലഭിക്കും. ഒരു ലക്ഷത്തിൽ താഴെ വിലയിൽ മുൻനിര സാംസങ് ഫോൺ സ്വന്തമാക്കാൻ ആഗ്രഹിക്കുന്നവർക്ക് എസ്25 അൾട്രയുടെ ഓഫർ ഏറെ ശ്രദ്ധേയമാണ്.

എസ്25 അൾട്രയ്ക്ക് 40,000 രൂപ വരെ ലാഭം

ഗ്രേറ്റ് ഫ്രീഡം സെയിലിൽ ഗാലക്സി എസ്25 അൾട്ര ആമസോണിൽ നിലവിൽ 94,999 രൂപയ്ക്കാണ് ലഭിക്കുന്നത്. ഇന്ത്യയിൽ 1,29,999 രൂപയ്ക്കാണ് ഫോൺ അവതരിപ്പിച്ചത്. അതായത് നേരിട്ട് 35,000 രൂപയുടെ വിലക്കുറവാണ് ഇപ്പോൾ ലഭിക്കുന്നത്. ഇതിന് പുറമെ, തിരഞ്ഞെടുക്കപ്പെട്ട ബാങ്കിന്റെ ക്രെഡിറ്റ് കാർഡ് ഉപയോഗിച്ച് വാങ്ങുമ്പോൾ 5,000 രൂപയുടെ അധിക തൽക്ഷണ ഇളവും ലഭിക്കും. ഈ ബാങ്ക് ഓഫറിന് അർഹതയുള്ളവർക്ക് ആകെ 40,000 രൂപ വരെ ലാഭിക്കാം. പ്രധാനമായി, 35,000 രൂപയുടെ വിലക്കുറവ് ബാങ്ക് ഓഫറിനെ ആശ്രയിച്ചുള്ളതല്ല. അതുകൊണ്ടുതന്നെ ഒരു ലക്ഷം രൂപയിൽ താഴെ ചെലവഴിച്ച് മുൻനിര സാംസങ് ഫോൺ സ്വന്തമാക്കാൻ ആഗ്രഹിക്കുന്നവർക്ക് എസ്25 അൾട്ര മികച്ചൊരു തിരഞ്ഞെടുപ്പായി മാറുന്നു.

മികച്ച സവിശേഷതകളുമായി എസ്25 അൾട്ര

പ്രീമിയം നിലവാരത്തിലുള്ള വലിയ ഡിസ്‌പ്ലേ, ശക്തമായ മുൻനിര ഹാർഡ്‌വെയർ, എസ് പെൻ പിന്തുണ, വൈവിധ്യമാർന്ന ക്യാമറ സംവിധാനം എന്നിവയാണ് എസ്25 അൾട്രയുടെ പ്രധാന സവിശേഷതകൾ. പഴയ പ്രീമിയം സ്മാർട്ട്ഫോണിൽ നിന്ന് പുതിയ ഫോണിലേക്ക് മാറാൻ ആഗ്രഹിക്കുന്നവർക്ക് ഇപ്പോഴും മികച്ച പ്രകടനം നൽകാൻ എസ്25 അൾട്രയ്ക്ക് കഴിയും. നിലവിലെ വില കൂടി പരിഗണിക്കുമ്പോൾ ഫോൺ കൂടുതൽ ആകർഷകമാകുന്നു.

എസ്26 അൾട്രയ്ക്കും വിലക്കുറവ്

പുതിയ ഗാലക്സി എസ്26 അൾട്രയും ആമസോണിൽ വിലക്കുറവിൽ ലഭ്യമാണ്. 1,39,999 രൂപയായിരുന്നു ഫോണിന്റെ ഇന്ത്യയിലെ അവതരണ വില. നിലവിൽ 1,24,999 രൂപയ്ക്കാണ് ഫോൺ ലിസ്റ്റ് ചെയ്തിരിക്കുന്നത്. അതായത് നേരിട്ട് 15,000 രൂപയുടെ വിലക്കുറവ്. നോ കോസ്റ്റ് ഇഎംഐ തിരഞ്ഞെടുക്കുന്ന ഉപഭോക്താക്കൾക്ക് 15,345 രൂപ വരെ അധിക ആനുകൂല്യം ലഭിക്കുമെന്നും ആമസോൺ വ്യക്തമാക്കുന്നു. എന്നാൽ പേയ്‌മെന്റ് രീതിയും ഉപഭോക്താവിന്റെ അർഹതയും അനുസരിച്ച് ആനുകൂല്യത്തിൽ മാറ്റമുണ്ടാകാം. അതിനാൽ ഓർഡർ നൽകുന്നതിന് മുമ്പ് അന്തിമ വില പരിശോധിക്കുന്നത് പ്രധാനമാണ്.

പുതിയ ഹാർഡ്‌വെയറും സ്വകാര്യതാ ഡിസ്‌പ്ലേയും

എസ്25 അൾട്രയെ അപേക്ഷിച്ച് വേഗതയേറിയ പ്രോസസർ, വേഗത്തിലുള്ള ചാർജിങ്, ക്യാമറ സംവിധാനത്തിലെ മെച്ചപ്പെടുത്തലുകൾ എന്നിവയാണ് എസ്26 അൾട്രയുടെ പ്രധാന നേട്ടങ്ങൾ. സ്വകാര്യതാ ഡിസ്‌പ്ലേയാണ് ഫോണിലെ ശ്രദ്ധേയമായ പുതിയ സവിശേഷതകളിലൊന്ന്. ഫോണിന് സമീപം നിൽക്കുന്നവർക്കോ ഇരിക്കുന്നവർക്കോ സ്‌ക്രീനിലെ വിവരങ്ങൾ എളുപ്പത്തിൽ കാണാൻ കഴിയാത്തവിധം ഡിസ്‌പ്ലേ രൂപകൽപ്പന ചെയ്തതാണ് ഈ സംവിധാനം. തിരക്കേറിയ സ്ഥലങ്ങളിൽ സ്ഥിരമായി ഫോൺ ഉപയോഗിക്കുന്നവർക്ക് ഇത് പ്രായോഗികമായൊരു സവിശേഷതയാകാം.

എസ്25 അൾട്രയോ എസ്26 അൾട്രയോ?

ഒരുലക്ഷം രൂപയിൽ താഴെ ബജറ്റിൽ ഫോൺ വാങ്ങാനാണ് ഉദ്ദേശിക്കുന്നതെങ്കിൽ 94,999 രൂപയുടെ എസ്25 അൾട്രയാണ് കൂടുതൽ ആകർഷകമായ തിരഞ്ഞെടുപ്പ്. മുൻനിര നിലവാരത്തിലുള്ള പ്രകടനവും മികച്ച ക്യാമറയും എസ് പെൻ പിന്തുണയും ഉൾപ്പെടെ നിരവധി സവിശേഷതകൾ ഇപ്പോഴും ഫോണിലുണ്ട്. അതേസമയം പണത്തെക്കുറിച്ച് വലിയ ആശങ്കയില്ലെന്നും സാംസങിന്റെ ഏറ്റവും പുതിയ അൾട്ര മോഡൽ തന്നെ വേണമെന്നും ആഗ്രഹിക്കുന്നവർക്ക് എസ്26 അൾട്ര പരിഗണിക്കാം. പുതിയ ഹാർഡ്‌വെയർ, വേഗത്തിലുള്ള ചാർജിങ്, ക്യാമറ മെച്ചപ്പെടുത്തലുകൾ, സ്വകാര്യതാ ഡിസ്‌പ്ലേ തുടങ്ങിയ അധിക സവിശേഷതകൾ ഇതിലുണ്ട്.

എസ്27 അൾട്രയ്ക്കായി കാത്തിരിക്കണോ?

ഇപ്പോൾ ഫോൺ വാങ്ങേണ്ട അടിയന്തര സാഹചര്യമില്ലാത്തവർക്ക് മറ്റൊരു സാധ്യത കൂടിയുണ്ട്. സാംസങ് ഭാവിയിൽ ഗാലക്സി എസ്27 അൾട്ര അവതരിപ്പിക്കുമെന്നാണ് പ്രതീക്ഷിക്കുന്നത്. 5,200 എംഎഎച്ച് മുതൽ 5,500 എംഎഎച്ച് വരെ ശേഷിയുള്ള സിലിക്കൺ-കാർബൺ ബാറ്ററി, 16 മെഗാപിക്സൽ സെൽഫി ക്യാമറ, മെച്ചപ്പെടുത്തിയ 200 മെഗാപിക്സൽ പ്രധാന ക്യാമറ, പുതിയ 50 മെഗാപിക്സൽ അൾട്രാ വൈഡ് ആംഗിൾ, ടെലിഫോട്ടോ ക്യാമറകൾ എന്നിവ എസ്27 അൾട്രയിൽ എത്തിയേക്കുമെന്നാണ് റിപ്പോർട്ടുകൾ. പുതിയ സ്‌നാപ്ഡ്രാഗൺ 8 എലൈറ്റ് ജെൻ 6 പ്രോ ഫോർ ഗാലക്സി ചിപ്‌സെറ്റും പുതിയ ‘പോളർ ഐഡി’ തിരിച്ചറിയൽ സംവിധാനവും ഫോണിൽ ലഭിച്ചേക്കുമെന്നും അഭ്യൂഹങ്ങളുണ്ട്.

എന്നാൽ എസ്27 അൾട്രയുമായി ബന്ധപ്പെട്ട ഈ വിവരങ്ങളെല്ലാം നിലവിൽ ചോർന്ന വിവരങ്ങളും അഭ്യൂഹങ്ങളും മാത്രമാണ്. ഔദ്യോഗികമായി സ്ഥിരീകരിച്ച സവിശേഷതകളല്ല. നേരത്തെ റിപ്പോർട്ട് ചെയ്തിരുന്ന എൽപിഡിഡിആർ6 റാമും യുഎഫ്എസ് 5.0 സ്റ്റോറേജും ഉൾപ്പെടെയുള്ള ചില നവീകരണങ്ങൾ ഒഴിവാക്കിയേക്കുമെന്നും പുതിയ റിപ്പോർട്ടുകളുണ്ട്. അതിനാൽ ഇപ്പോൾ തന്നെ പ്രീമിയം സാംസങ് ഫോൺ വാങ്ങണമെങ്കിൽ 94,999 രൂപയുടെ ഗാലക്സി എസ്25 അൾട്രയാണ് കൂടുതൽ മികച്ച ഡീൽ. ഏറ്റവും പുതിയ മോഡലാണ് ആവശ്യമെങ്കിൽ എസ്26 അൾട്ര തിരഞ്ഞെടുക്കാം. നിലവിലെ ഫോൺ തൃപ്തികരമായി പ്രവർത്തിക്കുന്നുണ്ടെങ്കിൽ എസ്27 അൾട്രയ്ക്കായി കാത്തിരിക്കുന്നതും പരിഗണിക്കാവുന്നതാണ്.

ഐഫോൺ മുതൽ സാംസങ്ങ് വരെ വില കുത്തനെ കുറഞ്ഞു! ആമസോൺ സെയിലിലെ വമ്പൻ ഡീലുകൾ

Prashobh Prasannan — Wed, 12 Aug 2026 08:47:28 +0530

സ്വാതന്ത്ര്യദിനത്തോട് അനുബന്ധിച്ച് ആമസോണിൽ നടക്കുന്ന ഗ്രേറ്റ് ഫ്രീഡം സെയിൽ 2026 അവസാന ഘട്ടത്തിലേക്ക്. പ്രൈം അംഗങ്ങൾക്കും നോൺ-പ്രൈം അംഗങ്ങൾക്കും ലഭ്യമായ വിൽപ്പനയിൽ പ്രമുഖ സ്‍മാർട്ട്ഫോൺ ബ്രാൻഡുകൾക്ക് വൻ വിലക്കുറവാണ് ലഭിക്കുന്നത്. ആപ്പിൾ, സാംസങ്, ഗൂഗിൾ, വിവോ, മോട്ടറോള, വൺപ്ലസ് തുടങ്ങിയ ബ്രാൻഡുകളുടെ വിവിധ മോഡലുകൾ ഓഫർ വിലയിൽ സ്വന്തമാക്കാം.

പ്രീമിയം ഫോണുകൾക്ക് വൻ വിലക്കുറവ്

പ്രീമിയം സ്മാർട്ട്ഫോൺ വാങ്ങാൻ പദ്ധതിയിടുന്നവർക്ക് ഇത്തവണത്തെ വിൽപ്പന ശ്രദ്ധേയമായ അവസരമാണ്. സാംസങ് ഗാലക്സി എസ്25 അൾട്രായുടെ വില 94,999 രൂപയിൽ നിന്ന് 89,999 രൂപയായി കുറഞ്ഞിട്ടുണ്ട്. 1,19,999 രൂപ വിലയുണ്ടായിരുന്ന വിവോ എക്സ്300 എഫ്ഇ 5ജി 89,999 രൂപയ്ക്കാണ് ഇപ്പോൾ ലഭിക്കുന്നത്. 256 ജിബി സ്റ്റോറേജുള്ള ഐഫോൺ എയറിനും കാര്യമായ വിലക്കുറവുണ്ട്. 1,19,900 രൂപ വിലയുണ്ടായിരുന്ന ഫോൺ 97,900 രൂപയ്ക്ക് ലഭ്യമാണ്.

ഫോൾഡബിൾ ഫോണിനും ഓഫർ

സാംസങിന്റെ പ്രീമിയം ഫോൾഡബിൾ മോഡലായ ഗാലക്സി ഇസഡ് ഫോൾഡ് 8 അൾട്രാ 5ജിക്കും വിൽപ്പനയിൽ വില കുറഞ്ഞിട്ടുണ്ട്. 2,24,999 രൂപ വിലയുണ്ടായിരുന്ന ഫോൺ 1,99,999 രൂപയ്ക്കാണ് ലഭ്യമാകുന്നത്. അതേസമയം, 1,66,899 രൂപ വിലയുള്ള ഐഫോൺ 17 പ്രോ മാക്സ് 256 ജിബി മോഡലിന് നിലവിലെ ഓഫർ വില 1,56,399 രൂപയാണ്.

മിഡ് റേഞ്ച് ഫോണുകൾക്കും മികച്ച ഡീലുകൾ

പ്രീമിയം വിഭാഗത്തിന് പുറമെ മിഡ് റേഞ്ച് വിഭാഗത്തിലും ശ്രദ്ധേയമായ ഓഫറുകളുണ്ട്. 94,999 രൂപ വിലയുണ്ടായിരുന്ന മോട്ടറോള എഡ്ജ് 70 മാക്സ് 5ജി ഇപ്പോൾ 58,959 രൂപയ്ക്ക് ലഭിക്കും. ഗൂഗിൾ പിക്സൽ 10ന്റെ വിലയും കുറഞ്ഞിട്ടുണ്ട്. 79,999 രൂപയിൽ നിന്ന് 66,250 രൂപയായാണ് മോഡലിന്റെ വില താഴ്ന്നത്.

എസ്26 അൾട്രായ്ക്കും വിലക്കുറവ്

സാംസങ് ഗാലക്സി എസ്26 അൾട്രാ 5ജി വാങ്ങാൻ ആഗ്രഹിക്കുന്നവർക്കും വിൽപ്പനയിൽ മികച്ച അവസരമുണ്ട്. 1,69,999 രൂപ വിലയുണ്ടായിരുന്ന ഫോൺ 1,24,999 രൂപയ്ക്ക് ലഭ്യമാണ്. വൺപ്ലസ് 15നും വിലക്കുറവുണ്ട്. 89,999 രൂപയുടെ മോഡൽ 85,999 രൂപയ്ക്കാണ് ഇപ്പോൾ ലഭിക്കുന്നത്.

ബാങ്ക് ഓഫറുകളും ലഭിക്കും

നേരിട്ടുള്ള വിലക്കുറവിന് പുറമെ തിരഞ്ഞെടുത്ത ഉൽപ്പന്നങ്ങൾക്ക് എച്ച്ഡിഎഫ്സി ബാങ്ക് ക്രെഡിറ്റ് കാർഡ്, ഈസി ഇഎംഐ ഇടപാടുകൾ വഴി 10 ശതമാനം വരെ ഇൻസ്റ്റന്റ് ഡിസ്‍കൌണ്ടും ലഭിക്കും. നോ-കോസ്റ്റ് ഇഎംഐ, ക്യാഷ്ബാക്ക്, കൂപ്പൺ ഡിസ്കൗണ്ട്, ഗിഫ്റ്റ് കാർഡ് തുടങ്ങിയ അധിക ആനുകൂല്യങ്ങളും ഉൽപ്പന്നങ്ങൾക്കനുസരിച്ച് ലഭ്യമാണ്.

ആമസോൺ പേ ഉപയോക്താക്കൾക്കും നേട്ടം

ആമസോൺ പേ ഉപയോഗിക്കുന്നവർക്ക് അധിക സേവിംഗ്സ് ലഭിക്കാനുള്ള അവസരവുമുണ്ട്. ആമസോൺ പേ ഐസിഐസിഐ ക്രെഡിറ്റ് കാർഡ് ഉടമകൾക്ക് യോഗ്യമായ ഇടപാടുകളിൽ ക്യാഷ്ബാക്കും റിവാർഡുകളും ലഭിക്കും. ഉപഭോക്താവിന്റെ പ്രദേശം അനുസരിച്ച് ചില സ്മാർട്ട്ഫോണുകൾക്ക് അതേ ദിവസം ഡെലിവറി സൗകര്യവും ലഭ്യമാണ്. വിൽപ്പന അവസാനിക്കുന്നതിന് മുമ്പ് ഇഷ്ടപ്പെട്ട മോഡലുകളുടെ നിലവിലെ വിലയും ലഭ്യമായ ബാങ്ക് ഓഫറുകളും പരിശോധിച്ച് വാങ്ങുന്നതാണ് ഉചിതം.

ആകാശത്ത് പച്ച തീഗോളം; ക്യാമറയിൽ പതിഞ്ഞത് അമ്പരപ്പിക്കും ദൃശ്യങ്ങൾ

Prashobh Prasannan — Thu, 13 Aug 2026 08:24:45 +0530

രാത്രിയാകാശത്ത് പച്ചനിറത്തിൽ തിളങ്ങി സഞ്ചരിച്ച വാൽനക്ഷത്രത്തിന്റെ അതിമനോഹര ദൃശ്യം ക്യാമറയിൽ പകർത്തി ജ്യോതിശാസ്ത്ര ഫോട്ടോഗ്രാഫർമാർ. നമീബിയയിലെ ഫാം ടിവോളിയിൽ നിന്ന് ജെറാൾഡ് റീമാനും മൈക്കൽ ജേഗറും ചേർന്ന് പകർത്തിയ ചിത്രമാണ് ഇപ്പോൾ ശ്രദ്ധ നേടുന്നത്. ഓഗസ്റ്റ് 8-നാണ് ചിത്രം പകർത്തിയത്.

220പി മക്നോട്ട്

ചിത്രത്തിലുള്ളത് 220പി മക്നോട്ട് എന്ന വാൽനക്ഷത്രമാണ്. ഓസ്ട്രേലിയൻ ജ്യോതിശാസ്ത്രജ്ഞനായ റോബർട്ട് എച്ച്. മക്നോട്ട് കണ്ടെത്തിയ ഈ വാൽനക്ഷത്രം ഏകദേശം 5.5 വർഷം കൂടുമ്പോഴാണ് സൂര്യനെ ചുറ്റി ഒരു ഭ്രമണം പൂർത്തിയാക്കുന്നത്. കഴിഞ്ഞ ജൂണിൽ വാൽനക്ഷത്രം സൂര്യനോട് ഏറ്റവും അടുത്തുള്ള സ്ഥാനമായ പെരിഹീലിയനിലെത്തി. ഇതിന് പിന്നാലെ വാൽനക്ഷത്രത്തിൽ ശക്തമായ പ്രകാശവിസ്ഫോടനം ഉണ്ടായി. ഇതോടെ സാധാരണ നിലയേക്കാൾ ഏകദേശം 8,000 മടങ്ങ് വരെ പ്രകാശം വർധിച്ചതായി റിപ്പോർട്ടുകൾ പറയുന്നു.

വീണ്ടും പ്രകാശത്തിൽ

ഓഗസ്റ്റിലും വാൽനക്ഷത്രത്തിൽ ശക്തമായ പ്രകാശവർധനയുണ്ടായി. സാധാരണ നിലയേക്കാൾ ഏകദേശം 600 മടങ്ങ് വരെ തെളിച്ചം വർധിച്ചതോടെയാണ് ജ്യോതിശാസ്ത്ര ഫോട്ടോഗ്രാഫർമാർക്ക് ഇതിന്റെ അപൂർവ ദൃശ്യം പകർത്താൻ സാധിച്ചത്. വാൽനക്ഷത്രം പച്ചനിറത്തിൽ തിളങ്ങുന്നതും ചിത്രത്തിന്റെ പ്രത്യേകതയാണ്. വാൽനക്ഷത്രത്തിന് ചുറ്റുമുള്ള വാതകങ്ങളിലും പൊടിപടലങ്ങളിലും സൂര്യപ്രകാശം ചെലുത്തുന്ന സ്വാധീനമാണ് ഈ നിറത്തിന് പിന്നിൽ.

അത്യാധുനിക ഉപകരണങ്ങൾ

12 ഇഞ്ച് വലുപ്പമുള്ള ആസ്ട്രോഗ്രാഫ് ദൂരദർശിനിയും ഇസഡ്ഡബ്ല്യുഒ എഎസ്ഐ 6200 എംഎം പ്രോ ക്യാമറയും ഉപയോഗിച്ചാണ് ചിത്രം പകർത്തിയത്. ദീർഘനേരം നടത്തിയ വിവിധ വർണങ്ങളിലുള്ള പ്രകാശ നിരീക്ഷണങ്ങൾ സംയോജിപ്പിച്ചാണ് വാൽനക്ഷത്രത്തിന്റെ സൂക്ഷ്മമായ ഘടനകൾ പോലും വ്യക്തമായി കാണുന്ന ചിത്രം തയ്യാറാക്കിയത്.

അപൂർവമായ ആകാശക്കാഴ്ച

രാത്രിയാകാശത്ത് ഒരു വാൽനക്ഷത്രത്തെ നേരിട്ട് കാണുന്നത് തന്നെ അപൂർവമാണ്. പല വാൽനക്ഷത്രങ്ങളും വളരെ മങ്ങിയതായതിനാൽ നഗ്നനേത്രങ്ങൾക്ക് കാണാൻ സാധിക്കാറില്ല. ദൂരദർശിനിയുടെ സഹായത്തോടെ പോലും ഇവയെ കണ്ടെത്തുന്നത് പലപ്പോഴും ബുദ്ധിമുട്ടാണ്. അതിനാൽ തന്നെ 220പി മക്നോട്ടിന്റെ തിളക്കവും പച്ചനിറത്തിലുള്ള വാതകപടലങ്ങളും നീണ്ട വാലും വ്യക്തമായി പതിഞ്ഞ ഈ ചിത്രം ജ്യോതിശാസ്ത്ര പ്രേമികൾക്ക് ഏറെ കൗതുകം നൽകുന്നതാണ്.

വാൽനക്ഷത്രത്തിൽ നിന്ന് ‘കൊള്ളിമീനുകൾ’ എങ്ങനെ?

വാൽനക്ഷത്രങ്ങൾ സൂര്യനെ ചുറ്റുമ്പോൾ അവയുടെ പിന്നിൽ പൊടിയും ചെറുകണങ്ങളും അവശേഷിക്കാറുണ്ട്. ഭൂമി ഇത്തരം കണങ്ങളുടെ പാതയിലൂടെ കടന്നുപോകുമ്പോൾ അവ ഭൂമിയുടെ അന്തരീക്ഷത്തിലേക്ക് അതിവേഗത്തിൽ പ്രവേശിക്കുകയും ചൂടുപിടിച്ച് പ്രകാശിക്കുകയും ചെയ്യും. രാത്രിയാകാശത്ത് നാം കാണുന്ന ‘കൊള്ളിമീനുകൾ’ അഥവാ ഉൽക്കകളാണ് ഇവ.

പെർസീഡ്‍സ് ഉൽക്കാവർഷവും സജീവം

ഇതിനിടെ വർഷംതോറും ആകാശത്ത് ദൃശ്യമാകുന്ന പെർസീഡ്‍സ് ഉൽക്കാവർഷവും സജീവമാണ്. സ്വിഫ്റ്റ്–ടട്ടിൽ എന്ന വാൽനക്ഷത്രം അവശേഷിപ്പിച്ച പൊടിപടലങ്ങളിലൂടെയാണ് ഭൂമി കടന്നുപോകുന്നത്. പ്രകാശം കുറഞ്ഞ ഇരുണ്ട ആകാശത്തിന് കീഴിൽ മണിക്കൂറിൽ നിരവധി ഉൽക്കകളെ കാണാൻ സാധിക്കും. അനുകൂലമായ സാഹചര്യങ്ങളിൽ മണിക്കൂറിൽ 100ഓളം ‘കൊള്ളിമീനുകൾ’ വരെ കാണാൻ സാധിക്കും എന്നാണ് ജ്യോതിശാസ്ത്ര നിരീക്ഷകർ പറയുന്നത്.

ഗൂഗിൾ പിക്സൽ 11 സീരീസ് എത്തി; പുതിയ ടെൻസർ G6, എഐ ഫീച്ചറുകൾ ഉൾപ്പെടെ വമ്പൻ അപ്ഗ്രേഡ്

Prashobh Prasannan — Thu, 13 Aug 2026 08:08:54 +0530

ഗൂഗിളിന്റെ ഏറ്റവും പുതിയ പിക്‌സൽ സീരീസ് സ്‍മാർട്ട്‌ഫോണുകൾ ഇന്ത്യയിൽ അവതരിപ്പിച്ചു. പിക്‌സൽ 11, പിക്‌സൽ 11 പ്രോ, പിക്‌സൽ 11 പ്രോ എക്‌സ്എൽ എന്നീ മൂന്ന് മോഡലുകളാണ് വിപണിയിലെത്തിയത്. പുതിയ ടെൻസർ ജി6 പ്രോസസറാണ് മൂന്ന് ഫോണുകളുടെയും പ്രധാന കരുത്ത്. പിക്‌സൽ 11 പ്രോ, പിക്‌സൽ 11 പ്രോ എക്‌സ്എൽ മോഡലുകളിൽ പുതിയ ഹൈലൈറ്റ് സൗകര്യവും നൽകിയിട്ടുണ്ട്.

പിക്‌സൽ 11ന് വില 89,999 രൂപ മുതൽ

12 ജിബി റാമും 256 ജിബി സ്റ്റോറേജുമുള്ള പിക്‌സൽ 11ന്റെ അടിസ്ഥാന പതിപ്പിന് 89,999 രൂപയാണ് വില. 12 ജിബി റാമും 512 ജിബി സ്റ്റോറേജുമുള്ള ഉയർന്ന പതിപ്പിന് 1,04,999 രൂപയാണ് വില. പിസ്റ്റാഷിയോ, ഹൈബിസ്‍കസ്, ഫ്രോസ്റ്റ്, ഒബ്‍സിഡിയൻ എന്നീ നിറങ്ങളിൽ ഫോൺ ലഭിക്കും.

പിക്‌സൽ 11 പ്രോയുടെ വില

12 ജിബി റാമും 256 ജിബി സ്റ്റോറേജുമുള്ള പിക്‌സൽ 11 പ്രോയ്ക്ക് 1,19,999 രൂപയാണ് വില. 12 ജിബി റാമും 512 ജിബി സ്റ്റോറേജുമുള്ള പതിപ്പിന് 1,34,999 രൂപ നൽകണം. കാന്യൺ, ഫോഗ്, ഒലീവ്, പൂർണമായും മാറ്റ് ഫിനിഷുള്ള ഒബ്‍സിഡിയൻ എന്നീ നിറങ്ങളിലാണ് പിക്‌സൽ 11 പ്രോ ലഭിക്കുക.

പിക്‌സൽ 11 പ്രോ എക്‌സ്എൽ

പിക്‌സൽ 11 പ്രോ എക്‌സ്എല്ലിന്റെ 12 ജിബി റാം, 256 ജിബി സ്റ്റോറേജ് പതിപ്പിന് 1,34,999 രൂപയാണ് വില. 12 ജിബി റാമും 512 ജിബി സ്റ്റോറേജുമുള്ള ഉയർന്ന പതിപ്പിന് 1,49,999 രൂപയാണ് വില. പിക്‌സൽ 11 പ്രോയിലെ അതേ നിറങ്ങളിലാണ് പ്രോ എക്‌സ്എല്ലും എത്തുന്നത്.

ഓഗസ്റ്റ് 20 മുതൽ വിൽപ്പന

മൂന്ന് ഫോണുകളുടെയും വിൽപ്പന ഓഗസ്റ്റ് 20 മുതൽ ആരംഭിക്കും. ഗൂഗിൾ സ്റ്റോർ, ഫ്ലിപ്കാർട്ട്, മറ്റ് അംഗീകൃത റീട്ടെയിൽ പങ്കാളികൾ എന്നിവ വഴി ഫോണുകൾ വാങ്ങാം. പുതിയ പിക്‌സൽസ്‍നാപ്പ് കേസ് 4,900 രൂപയ്ക്കും പിക്‌സൽസ്‍നാപ്പ് ചാർജർ 4,500 രൂപയ്ക്കും പിക്‌സൽസ്‍നാപ്പ് റിങ് സ്റ്റാൻഡ് 2,979 രൂപയ്ക്കും ലഭിക്കും. എച്ച്‌ഡിഎഫ്‌സി ബാങ്ക് ക്രെഡിറ്റ് കാർഡ് ഇഎംഐ ഇടപാടുകൾക്ക് 10,000 രൂപ വരെ തൽക്ഷണ ഇളവും 24 മാസം വരെ നോ-കോസ്റ്റ് ഇഎംഐ സൗകര്യവും ലഭിക്കും. 9,000 രൂപ വരെ എക്‌സ്‌ചേഞ്ച് ബോണസും കമ്പനി വാഗ്ദാനം ചെയ്യുന്നുണ്ട്. ഫോണുകൾക്കൊപ്പം 6 മാസത്തെ ഗൂഗിൾ എഐ പ്രോ സബ്‌സ്‌ക്രിപ്ഷനും ലഭിക്കും.

പിക്‌സൽ 11ന്റെ സവിശേഷതകൾ

എഡ്‍ജ്-ടു-എഡ്‍ജ് ഗ്ലാസ് ക്യാമറ ബാറാണ് പിക്‌സൽ 11ന്റെ ഡിസൈൻ പ്രത്യേകത. മുൻ തലമുറ മോഡലുകളെ അപേക്ഷിച്ച് ക്യാമറ ബാറിന്റെ കനം 40 ശതമാനം കുറച്ചതായി ഗൂഗിൾ അവകാശപ്പെടുന്നു. 6.3 ഇഞ്ച് ഫുൾ എച്ച്‌ഡി പ്ലസ് അമോലെഡ് ഡിസ്‌പ്ലേയാണ് ഫോണിലുള്ളത്. 120 ഹെർട്സ് വരെ റിഫ്രഷ് നിരക്കും 3,000 നിറ്റ്‌സ് വരെ പരമാവധി തെളിച്ചവും ലഭിക്കും. കോർണിങ് ഗൊറില്ല ഗ്ലാസ് വിക്ടസ് 2 സംരക്ഷണവും നൽകിയിട്ടുണ്ട്. ടെൻസർ ജി6 പ്രോസസറിനൊപ്പം ടൈറ്റൻ എം3 സുരക്ഷാ ചിപ്പും ഫോണിലുണ്ട്. 12 ജിബി എൽപിഡിഡിആർ5എക്‌സ് റാമും 512 ജിബി വരെ സ്റ്റോറേജുമാണ് ലഭിക്കുക.

ട്രിപ്പിൾ ക്യാമറ സംവിധാനം

48 മെഗാപിക്സൽ പ്രധാന ക്യാമറ, 13 മെഗാപിക്സൽ അൾട്രാവൈഡ് ക്യാമറ, 10.8 മെഗാപിക്സൽ 5 മടങ്ങ് ടെലിഫോട്ടോ ക്യാമറ എന്നിവ അടങ്ങുന്നതാണ് പിൻ ക്യാമറ സംവിധാനം. മുൻവശത്ത് 10.5 മെഗാപിക്സൽ സെൽഫി ക്യാമറയുണ്ട്. ആൻഡ്രോയിഡ് 17 ആണ് ഓപ്പറേറ്റിങ് സിസ്റ്റം. അൾട്രാസോണിക് ഇൻ-ഡിസ്‌പ്ലേ ഫിംഗർപ്രിന്റ് സെൻസറും ഐപി68 പൊടി-ജല പ്രതിരോധവും ഫോണിനുണ്ട്. 4,985 എംഎഎച്ച് ബാറ്ററിയാണ് പിക്‌സൽ 11ൽ. 30 വാട്ട് വയർഡ് ചാർജിങ്ങിനും 25 വാട്ട് ക്യൂഐ 2.2 പിക്‌സൽസ്നാപ്പ് വയർലെസ് ചാർജിങ്ങിനും പിന്തുണയുണ്ട്.

പിക്‌സൽ 11 പ്രോയിൽ പുതിയ ഹൈലൈറ്റ്

പിക്‌സൽ 11 പ്രോ, പിക്‌സൽ 11 പ്രോ എക്‌സ്എൽ മോഡലുകളിലെ പ്രധാന പുതിയ സൗകര്യമാണ് ഹൈലൈറ്റ്. സന്ദർഭാനുസൃത അറിയിപ്പുകൾ നൽകുന്ന സംവിധാനമാണിത്. പിൻ ക്യാമറ ഫ്ലാഷിന് ചുറ്റുമുള്ള എൽഇഡി ലൈറ്റുകൾ ഉപയോഗിച്ച് വിവിധ രീതിയിലുള്ള പ്രകാശസൂചനകൾ നൽകാൻ സാധിക്കും. ഫോൺ താഴെ വച്ചിരിക്കുന്ന സമയത്തും ഈ സൂചനകൾ കാണാം. ജെമിനി ശബ്‍ദ നിർദേശം കേൾക്കുകയാണോ, മറുപടി തയ്യാറാക്കുകയാണോ, മറുപടി നൽകുകയാണോ എന്നതും ഹൈലൈറ്റ് വഴി അറിയാം. വരുന്ന കോളുകളിൽ പ്രധാനപ്പെട്ട കോൺടാക്റ്റുകൾക്ക് വ്യത്യസ്‍ത നിറങ്ങൾ നൽകാനും സാധിക്കും.

പ്രോ മോഡലുകളുടെ ഡിസ്‌പ്ലേ

പിക്‌സൽ 11 പ്രോയിൽ 6.3 ഇഞ്ച് 1.5കെ എൽടിപിഒ അമോലെഡ് ഡിസ്‌പ്ലേയാണ് നൽകിയിരിക്കുന്നത്. 2,856 x 1,280 പിക്സൽ റെസല്യൂഷനാണ് ഡിസ്‌പ്ലേയ്ക്കുള്ളത്. പിക്‌സൽ 11 പ്രോ എക്‌സ്എല്ലിൽ 6.8 ഇഞ്ച് ക്യുഎച്ച്ഡി പ്ലസ് അമോലെഡ് ഡിസ്‌പ്ലേയാണ്. 1,344 x 2,992 പിക്സൽ റെസല്യൂഷനുണ്ട്. രണ്ട് മോഡലുകളിലും 3,600 നിറ്റ്‌സ് വരെ പരമാവധി തെളിച്ചവും 120 ഹെർട്‍സ് അഡാപ്റ്റീവ് റിഫ്രഷ് നിരക്കും കോർണിങ് ഗൊറില്ല ഗ്ലാസ് വിക്ടസ് 2 സംരക്ഷണവും ലഭിക്കും.

50 മെഗാപിക്സൽ പ്രധാന ക്യാമറ

പിക്‌സൽ 11 പ്രോ, പിക്‌സൽ 11 പ്രോ എക്‌സ്എൽ മോഡലുകളിൽ ട്രിപ്പിൾ പിൻ ക്യാമറ സംവിധാനമാണുള്ളത്. 50 മെഗാപിക്സൽ പ്രധാന ക്യാമറയ്ക്കൊപ്പം 48 മെഗാപിക്സൽ അൾട്രാവൈഡ് ക്യാമറയും 48 മെഗാപിക്സൽ ടെലിഫോട്ടോ ക്യാമറയും നൽകിയിട്ടുണ്ട്. ടെലിഫോട്ടോ ക്യാമറ 5 മടങ്ങ് ഒപ്റ്റിക്കൽ സൂമും 120 മടങ്ങ് ഡിജിറ്റൽ സൂമും പിന്തുണയ്ക്കുന്നു. മുൻവശത്ത് 42 മെഗാപിക്സൽ സെൽഫി ക്യാമറയാണ് നൽകിയിരിക്കുന്നത്.

ബാറ്ററിയിലും വ്യത്യാസം

പിക്‌സൽ 11 പ്രോയിൽ 4,840 എംഎഎച്ച് ബാറ്ററിയും പിക്‌സൽ 11 പ്രോ എക്‌സ്എല്ലിൽ 5,115 എംഎഎച്ച് ബാറ്ററിയുമാണുള്ളത്. രണ്ട് മോഡലുകളും 30 വാട്ട് വയർഡ് ചാർജിങ്ങും 25 വാട്ട് ക്യൂഐ 2.2 പിക്‌സൽസ്‍നാപ്പ് വയർലെസ് ചാർജിങ്ങും പിന്തുണയ്ക്കുന്നു. അൾട്രാസോണിക് ഇൻ-ഡിസ്‌പ്ലേ ഫിംഗർപ്രിന്റ് സെൻസർ, ഐപി68 പൊടി-ജല പ്രതിരോധം, 5ജി, വൈഫൈ, എൻഎഫ്‍സി, യുഎസ്ബി ടൈപ്പ്-സി 3.2 പോർട്ട്, ഗ്ലോനാസ്, ഗലീലിയോ, ബെയ്‌ദൂ, നാവിക് തുടങ്ങിയ സൗകര്യങ്ങളും രണ്ട് പ്രോ മോഡലുകളിലുമുണ്ട്. പിക്‌സൽ 11 പ്രോയ്ക്ക് 152.7 x 71.9 x 8.4 മില്ലിമീറ്റർ വലുപ്പവും 204 ഗ്രാം ഭാരവുമാണ്. പിക്‌സൽ 11 പ്രോ എക്‌സ്എല്ലിന് 162.7 x 76.5 x 8.5 മില്ലിമീറ്റർ വലുപ്പവും 226 ഗ്രാം ഭാരവുമുണ്ട്.

ആ ചുവന്ന ബിന്ദുക്കളുടെ നിഗൂഢ രഹസ്യങ്ങളുടെ ചുരുളഴിയുന്നു? പ്രപഞ്ചത്തിന്‍റെ ആദ്യകാലത്തെ ബ്ലാക്ക് ഹോൾ സ്റ്റാർ കണ്ടെത്തി

Prashobh Prasannan — Thu, 13 Aug 2026 09:20:45 +0530

മഹാവിസ്ഫോടനത്തിന് ശേഷം 660 ദശലക്ഷം വർഷം പൂർത്തിയാകുന്നതിന് മുമ്പ് നിലനിന്നിരുന്ന പ്രപഞ്ചത്തിലെ ഏറ്റവും അകലെയുള്ള ‘ബ്ലാക്ക് ഹോൾ സ്റ്റാർ’ കണ്ടെത്തിയതായി ശാസ്ത്രജ്ഞർ. പ്രപഞ്ചത്തിന്റെ ആദ്യകാല ചിത്രങ്ങളിൽ ജെയിംസ് വെബ് ബഹിരാകാശ ദൂരദർശിനി കണ്ടെത്തിയ നിഗൂഢമായ ‘ലിറ്റിൽ റെഡ് ഡോട്ടുകൾ’ എന്നറിയപ്പെടുന്ന വസ്‍തുക്കളുടെ ഉത്ഭവത്തെക്കുറിച്ച് നിർണായക സൂചന നൽകുന്നതാണ് ഈ പുതിയ കണ്ടെത്തൽ എന്നാണ് ഗവേഷകർ പറയുന്നത്.

എന്താണ് ‘ലിറ്റിൽ റെഡ് ഡോട്ടുകൾ’?

2022-ലാണ് ജെയിംസ് വെബ് ദൂരദർശിനിയുടെ ചിത്രങ്ങളിൽ വിചിത്രമായ ചുവന്ന പ്രകാശബിന്ദുക്കളെ ശാസ്ത്രജ്ഞർ ആദ്യമായി തിരിച്ചറിഞ്ഞത്. വലുപ്പത്തിൽ ചെറുതായി തോന്നുന്ന ഇവ യഥാർഥത്തിൽ അതിവേഗം വളരുന്ന അതിഭീമൻ തമോദ്വാരങ്ങളായിരിക്കാമെന്നാണ് നിലവിലെ ശാസ്ത്രീയ നിഗമനം. വലിയ വാതകപടലങ്ങൾക്കുള്ളിൽ മറഞ്ഞിരിക്കുന്ന തമോദ്വാരങ്ങളാണ് ഇവയെന്നാണ് കരുതുന്നത്. ചുവന്ന ഭീമൻ നക്ഷത്രങ്ങളെപ്പോലെ തണുത്തതും ചുവപ്പുനിറമുള്ളതുമായ പ്രകാശ സ്പെക്ട്രമാണ് ഇവയ്ക്കുള്ളത്. ചില ‘ലിറ്റിൽ റെഡ് ഡോട്ടുകൾ’ ഏകദേശം 12 ബില്യൺ വർഷം മുമ്പ് നിലനിന്നിരുന്ന യുവ ഗാലക്സികളുടെ കേന്ദ്രഭാഗത്താണെന്നും സമീപകാല നിരീക്ഷണങ്ങളിൽ കണ്ടെത്തിയിരുന്നു. എന്നാൽ ഇത്രയും ദൂരെയുള്ളതും മങ്ങിയതുമായ വസ്‍തുക്കളുടെ പ്രകാശവും അവയ്ക്ക് ചുറ്റുമുള്ള ഗാലക്സിയുടെ പ്രകാശവും വേർതിരിച്ചറിയുന്നത് ഏറെ ബുദ്ധിമുട്ടാണ്.

പുതിയ കണ്ടെത്തൽ നിർണായകം

ജെയിംസ് വെബ് ദൂരദർശിനി ഉപയോഗിച്ച് നടത്തിയ ‘മിറാജ് ഓർ മിറക്കിൾ’ സർവേയിലാണ് പുതിയ ‘ബ്ലാക്ക് ഹോൾ സ്റ്റാർ’ കണ്ടെത്തിയത്. മോം–ബിഎച്ച്–1 എന്നാണ് ഇതിന് നൽകിയിരിക്കുന്ന പേര്. സ്വന്തമായി നിലനിൽക്കുന്ന ‘നേക്കഡ് ബ്ലാക്ക് ഹോൾ സ്റ്റാർ’ എന്ന വിഭാഗത്തിലെ ഏറ്റവും മികച്ച ഉദാഹരണമായാണ് ശാസ്ത്രജ്ഞർ ഇതിനെ വിശേഷിപ്പിക്കുന്നത്. അതായത്, വളർന്നുവരുന്ന ഒരു ഗാലക്സിക്കുള്ളിൽ സ്ഥിതി ചെയ്യുന്നതിന് പകരം സ്വതന്ത്രമായാണ് ഇത് നിലനിൽക്കുന്നതെന്നാണ് കരുതുന്നത്.

വാതകപടലത്തിനുള്ളിലെ തമോദ്വാരം

മോം–ബിഎച്ച്–1ന്റെ കേന്ദ്രത്തിലുള്ള തമോദ്വാരത്തിലേക്ക് വാതകം വീണുകൊണ്ടിരിക്കുകയാണ്. ഈ പ്രക്രിയയിൽ വലിയ അളവിൽ ഊർജവും പ്രകാശവും ഉൽപ്പാദിപ്പിക്കപ്പെടുന്നു. എന്നാൽ ചുറ്റുമുള്ള കട്ടിയേറിയ വാതകപടലം കാരണം തമോദ്വാരത്തെ നേരിട്ട് കാണാൻ കഴിയില്ല. തമോദ്വാരത്തിൽ നിന്നുള്ള ഊർജം ചുറ്റുമുള്ള വാതകപടലത്തെ പ്രകാശിപ്പിക്കുന്നതിനാലാണ് ഈ വസ്‍തു പുറത്തുനിന്ന് തിളങ്ങുന്നതായി കാണപ്പെടുന്നത്. സൂര്യന്റെ ഉള്ളിൽ ഉൽപ്പാദിപ്പിക്കുന്ന ഊർജം അതിന്റെ പുറംപാളികളെ പ്രകാശിപ്പിക്കുന്നതുമായി ഇതിനെ താരതമ്യം ചെയ്യാം. മോം സർവേയ്ക്ക് നേതൃത്വം നൽകിയ റൊഹൻ നായിഡുവിന്റെ നേതൃത്വത്തിലുള്ള സംഘം കണ്ടെത്തിയ സ്പെക്ട്രം ആദ്യകാല പ്രപഞ്ചത്തിൽ രൂപപ്പെടുന്ന തമോദ്വാരത്തെ വാതകപടലം പൊതിഞ്ഞിരിക്കുന്നതിനുള്ള ഏറ്റവും ശക്തമായ തെളിവാണെന്നാണ് ഗവേഷകർ പറയുന്നത്.

യുവ ഗാലക്സിയുമായി കൂട്ടിയിടിക്കാൻ ഒരുങ്ങുന്നു

മോം–ബിഎച്ച്–1ന്റെ മറ്റൊരു പ്രത്യേകത, അതേ റെഡ്‌ഷിഫ്റ്റിലുള്ള ഒരു യുവ ഗാലക്സിക്ക് സമീപമാണ് ഇത് സ്ഥിതി ചെയ്യുന്നത് എന്നതാണ്. ശാസ്ത്രജ്ഞരുടെ കണക്കനുസരിച്ച് ഏകദേശം 100 ദശലക്ഷം വർഷങ്ങൾക്കുള്ളിൽ ഈ ബ്ലാക്ക് ഹോൾ സ്റ്റാർ ആ ഗാലക്സിയുമായി കൂട്ടിയിടിച്ച് ലയിക്കാനിടയുണ്ട്. മോം–ബിഎച്ച്–1 ഗാലക്സിയുമായി ലയിച്ച ശേഷം അതിന്റെ സ്പെക്ട്രം എങ്ങനെയായിരിക്കുമെന്ന് ഗവേഷകർ മാതൃകയാക്കി പരിശോധിച്ചു. ഇതിനുശേഷം ലഭിക്കുന്ന പ്രകാശരൂപം ജെയിംസ് വെബ് ദൂരദർശിനി ഇതിനകം കണ്ടെത്തിയിട്ടുള്ള ‘ലിറ്റിൽ റെഡ് ഡോട്ടുകളുമായി’ വളരെ സാമ്യമുള്ളതായിരിക്കുമെന്ന് പഠനം വ്യക്തമാക്കുന്നു.

‘ലിറ്റിൽ റെഡ് ഡോട്ടുകളുടെ’ രഹസ്യത്തിലേക്ക് ഉത്തരം

‘ലിറ്റിൽ റെഡ് ഡോട്ടുകളുടെ’ കേന്ദ്രത്തിലുള്ള തമോദ്വാര ഘടകത്തെ മനസിലാക്കാൻ മോം–ബിഎച്ച്–1 ഒരു മോഡലായി ഉപയോഗിക്കാമെന്ന് ശാസ്ത്രജ്ഞർ പറയുന്നു. ഇത്തരം ബ്ലാക്ക് ഹോൾ സ്റ്റാറുകൾ യുവ ഗാലക്സികളിൽ സ്ഥിതി ചെയ്യുകയാണെങ്കിൽ, അവ ഭാവിയിൽ രൂപപ്പെടുന്ന കുഞ്ഞൻ ക്വാസാറുകളുടെ കേന്ദ്ര എഞ്ചിനുകളായി പ്രവർത്തിച്ചേക്കാമെന്നാണ് ഗവേഷകരുടെ നിഗമനം. ചില ‘ലിറ്റിൽ റെഡ് ഡോട്ടുകളിൽ’ പിന്നീട് നടത്തിയ നിരീക്ഷണങ്ങളിൽ തമോദ്വാരത്തിന് ചുറ്റുമുള്ള വാതകപടലം പതുക്കെ വിഘടിക്കുന്നതായി കണ്ടെത്തിയിരുന്നു. ഇതോടെ തമോദ്വാരവും അതിലേക്ക് വീഴുന്ന വാതകത്തിൽ നിന്ന് ഉൽപ്പാദിപ്പിക്കുന്ന എക്സ്–റേ വികിരണങ്ങളും പുറത്തേക്ക് ദൃശ്യമാകുന്നു.

അതിവേഗം വളരുന്ന തമോദ്വാരങ്ങൾ

ഇത്തരം തമോദ്വാരങ്ങൾ വളരെ വേഗത്തിൽ വളരുന്നതായാണ് ശാസ്ത്രജ്ഞർ കരുതുന്നത്. തമോദ്വാരത്തിന് ചുറ്റുമുള്ള വാതകവും മറ്റ് വസ്‍തുക്കളും അതിവേഗം അതിലേക്ക് വീഴുമ്പോൾ വൻതോതിൽ ഊർജം പുറത്തുവരും. ഇതോടെ ചുറ്റുപാടുകൾ അതീവ പ്രകാശമാനമാകുകയും ക്വാസാറുകൾ രൂപപ്പെടുകയും ചെയ്യാം. പ്രപഞ്ചത്തിന്റെ ആദ്യകാലത്ത് ഇത്രയും വലിയ തമോദ്വാരങ്ങൾ എങ്ങനെയാണ് ഇത്ര വേഗത്തിൽ രൂപപ്പെട്ടതെന്ന ചോദ്യത്തിന് കൃത്യമായ ഉത്തരം കണ്ടെത്തുക ജ്യോതിശാസ്ത്രത്തിലെ പ്രധാന വെല്ലുവിളികളിലൊന്നാണ്.

ജെയിംസ് വെബിന്റെ നിർണായക ദൗത്യം

അതിഭീമൻ തമോദ്വാരങ്ങൾ ഗാലക്സികൾക്ക് മുമ്പ് രൂപപ്പെട്ടതാണോ, അതോ ഗാലക്സികൾക്കൊപ്പം വളർന്നതാണോ എന്നത് കണ്ടെത്തുക ജെയിംസ് വെബ് ദൂരദർശിനിയുടെ പ്രധാന ശാസ്ത്രീയ ലക്ഷ്യങ്ങളിലൊന്നായിരുന്നു. ലിറ്റിൽ റെഡ് ഡോട്ടുകളുടെയും ബ്ലാക്ക് ഹോൾ സ്റ്റാറുകളുടെയും പഠനം അതിവേഗം മുന്നേറുകയാണ്. കഴിഞ്ഞ രണ്ടോ മൂന്നോ വർഷത്തിനിടെ ഈ വിഷയത്തിൽ ഏകദേശം 1,000 ഗവേഷണ പ്രബന്ധങ്ങളും പ്രീപ്രിന്റുകളും പുറത്തുവന്നതായി ഗവേഷകർ ചൂണ്ടിക്കാട്ടുന്നു. മഹാവിസ്ഫോടനത്തിന് പിന്നാലെയുള്ള പ്രപഞ്ചത്തെ നേരിട്ട് നിരീക്ഷിക്കാൻ ജെയിംസ് വെബ് ദൂരദർശിനിക്ക് കഴിയുന്നതോടെ, തമോദ്വാരങ്ങളുടെ രൂപീകരണത്തെക്കുറിച്ചുള്ള നിരവധി പഴയ സിദ്ധാന്തങ്ങൾ പരിശോധിക്കാൻ ശാസ്ത്രജ്ഞർക്ക് അവസരം ലഭിച്ചിരിക്കുകയാണ്. പുതിയ കണ്ടെത്തൽ ഓഗസ്റ്റ് 13-ന് നേച്ചർ ജേണലിൽ പ്രസിദ്ധീകരിച്ചിട്ടുണ്ട്.

തലയോട്ടി തുറക്കാതെ തലച്ചോറിൽ 10 മിനിറ്റിൽ ചിപ്പ് ഇംപ്ലാന്‍റ് ചെയ്യാം; പുതിയ സാങ്കേതികവിദ്യ വികസിപ്പിച്ച് ചൈന

Sangeetha KS — Fri, 14 Aug 2026 13:03:11 +0530

തലയോട്ടി തുറക്കാതെ തന്നെ തലച്ചോറിൽ ബ്രെയിൻ- കമ്പ്യൂട്ടർ ഇന്റർഫേസ് അഥവാ ബിസിഐ ഘടിപ്പിക്കാനുള്ള സാങ്കേതികവിദ്യ വികസിപ്പിച്ച് ചൈന. കഴുത്തിലെ രക്തക്കുഴലിലൂടെ ഉപകരണം തലച്ചോറിലെത്തിച്ച് ഘടിപ്പിക്കുന്ന രീതിയാണ് പരീക്ഷിക്കുന്നത്. പരമ്പരാഗത മസ്‍തിഷ്‍ക ശസ്ത്രക്രിയകളെ അപേക്ഷിച്ച് കൂടുതൽ വേഗത്തിലും കുറഞ്ഞ ഇടപെടലോടെയും ഇംപ്ലാന്റ് ചെയ്യാൻ ഈ സാങ്കേതികവിദ്യ സഹായിക്കുമെന്നാണ് ഗവേഷകരുടെ പ്രതീക്ഷ.

ഷാങ്ഹായ് ആസ്ഥാനമായി പ്രവർത്തിക്കുന്ന സ്റ്റെയർമെടഡ് ടെക്നോളജിയും ചൈനീസ് അക്കാദമി ഓഫ് സയൻസസിലെ ഗവേഷകരും ചേർന്നാണ് സംവിധാനം വികസിപ്പിക്കുന്നത്. തലയോട്ടി തുറന്ന് തലച്ചോറിലെത്തുന്നതിന് പകരം കഴുത്തിലെ രക്തക്കുഴലിലൂടെ ഉപകരണം കടത്തിവിടുകയാണ് ചെയ്യുന്നത്. രക്തക്കുഴലുകളുടെ ശൃംഖലയിലൂടെ തലച്ചോറിലെ നിർദ്ദിഷ്‍ട ഭാഗത്തെത്തിച്ച ശേഷം രക്തക്കുഴലിന്റെ പുറംഭിത്തിയിൽ ഉപകരണം ഉറപ്പിക്കും.

നിലവിൽ പരീക്ഷണം ആടുകളിൽ

സ്റ്റെയർമെഡ് കഴിഞ്ഞ ഡിസംബറിലാണ് പദ്ധതിയെക്കുറിച്ച് ആദ്യമായി വിവരങ്ങൾ പുറത്തുവിട്ടത്. ഇതുവരെ ആടുകളിലാണ് സാങ്കേതികവിദ്യ പരീക്ഷിച്ചിരിക്കുന്നത്. മനുഷ്യരിൽ പരീക്ഷണം ആരംഭിച്ചിട്ടില്ല. അതിനാൽ 10 മിനിറ്റിനുള്ളിൽ ഇംപ്ലാന്റ് ചെയ്യാം എന്ന വാദം നിലവിൽ ഗവേഷണഘട്ടത്തിലെ ലക്ഷ്യവും പരീക്ഷണഫലവും മാത്രമാണ്. രോഗികൾക്ക് ലഭ്യമായ ചികിത്സാരീതിയായി ഇത് മാറിയിട്ടില്ല.

തലയോട്ടി തുറക്കേണ്ടതില്ല

നിലവിലുള്ള പല ബിസിഐ സംവിധാനങ്ങളിലും തലയോട്ടി തുറന്ന് തലച്ചോറിന്റെ കോർട്ടക്സിനുള്ളിലോ മുകളിലോ ഇലക്ട്രോഡുകൾ സ്ഥാപിക്കുകയാണ് ചെയ്യുന്നത്. ഇലോൺ മസ്‍കിന്‍റെ ന്യൂറാലിങ്കും സമാനമായ ശസ്ത്രക്രിയാ രീതിയാണ് ഉപയോഗിക്കുന്നത്. ചൈനീസ് ഗവേഷകർ പരീക്ഷിക്കുന്ന രീതിയിൽ ശരീരത്തിലെ സ്വാഭാവിക രക്തക്കുഴൽ ശൃംഖലയെ തലച്ചോറിലേക്കുള്ള വഴിയായി ഉപയോഗിക്കുകയാണ് ലക്ഷ്യം. വലിയ മസ്‍തിഷ്‍ക ശസ്ത്രക്രിയയുമായി ബന്ധപ്പെട്ട ആഘാതവും അപകടസാധ്യതകളും കുറയ്ക്കാൻ ഇത് സഹായിക്കുമെന്നാണ് പ്രതീക്ഷിക്കുന്നത്.

മനുഷ്യരിലും പരീക്ഷണം

ബീജിങ്ങിലെ ക്യാപിറ്റൽ മെഡിക്കൽ സർവകലാശാലയ്ക്ക് കീഴിലുള്ള ഷുവാൻവു ആശുപത്രിയിലെ ഗവേഷകരും രക്തക്കുഴലുകളിലൂടെ ബിസിഐ ഘടിപ്പിക്കുന്ന രീതി പഠിക്കുന്നുണ്ട്. തലച്ചോറിലെ വെനസ് സൈനസുകളെ ഉപയോഗിക്കുന്ന രീതിയിലാണ് ഇവരുടെ ഗവേഷണം. പരിചയസമ്പന്നനായ ശസ്ത്രക്രിയ വിദഗ്ധന് ഉപകരണം 10 മിനിറ്റിനുള്ളിൽ സ്ഥാപിക്കാൻ കഴിയുമെന്നാണ് ആശുപത്രിയിലെ ഡോക്ടർ ഡുവാൻ വാൻറു പറയുന്നത്. ഇതുവരെ വലിയ സുരക്ഷാ പ്രശ്‍നങ്ങളൊന്നും കണ്ടെത്തിയിട്ടില്ലെന്നും ഒരു മാസത്തിനുള്ളിൽ ഉപകരണം നീക്കം ചെയ്യാനും സാധിക്കുമെന്നും അദ്ദേഹം വ്യക്തമാക്കി.

പക്ഷാഘാതം ബാധിച്ചവർക്ക് സഹായകരമാകുമോ?

തലച്ചോറിൽ നിന്നുള്ള വൈദ്യുത സിഗ്നലുകളെ കമ്പ്യൂട്ടറുകൾക്കും മറ്റ് ഇലക്ട്രോണിക് ഉപകരണങ്ങൾക്കും മനസിലാകുന്ന കമാൻഡുകളാക്കി മാറ്റുകയാണ് ബിസിഐ സാങ്കേതികവിദ്യയുടെ പ്രധാന ലക്ഷ്യം. ഗുരുതരമായ പക്ഷാഘാതം ബാധിച്ചവർക്ക് ചിന്തകളിലൂടെ ഉപകരണങ്ങൾ നിയന്ത്രിക്കാനും ആശയവിനിമയം നടത്താനും കൂടുതൽ സ്വാതന്ത്ര്യം നേടാനും ഭാവിയിൽ ഇത് സഹായിച്ചേക്കും. സ്റ്റെയർമെഡ് വികസിപ്പിച്ച ശസ്ത്രക്രിയയിലൂടെ ഘടിപ്പിക്കുന്ന ബിസിഐ ഉപയോഗിച്ച് ഒരു രോഗി ചൈനീസ് ഇ-കൊമേഴ്സ് പ്ലാറ്റ്ഫോമായ ജെഡി ഡോട്ട് കോമിൽ ഉപഭോക്താക്കൾക്ക് സേവനം നൽകുകയും പ്രതിമാസം ഏകദേശം 1,800 യുവാൻ വരുമാനം നേടുകയും ചെയ്തതായി കമ്പനി നേരത്തെ അവകാശപ്പെട്ടിരുന്നു.

വൻ നിക്ഷേപവുമായി സ്റ്റെയർമെഡ്

ന്യൂറോ ടെക്നോളജി മേഖലയിൽ ചൈന കൂടുതൽ ശ്രദ്ധ കേന്ദ്രീകരിക്കുന്നതിനിടെ സ്റ്റെയർമെഡിന് വലിയ നിക്ഷേപവും ലഭിച്ചിട്ടുണ്ട്. കഴിഞ്ഞ ഒരു വർഷത്തിനിടെ കമ്പനിക്ക് ലഭിച്ച ഫണ്ടിംഗ് 1.1 ബില്യൺ യുവാൻ കവിഞ്ഞതായി കമ്പനി അറിയിച്ചു. അലിബാബ, ടെൻസെന്റ് തുടങ്ങിയ കമ്പനികളും നിക്ഷേപകരിൽ ഉൾപ്പെടുന്നു.

അമേരിക്കയിലും സമാന പരീക്ഷണം

അതേസമയം രക്തക്കുഴലിലൂടെ ബിസിഐ തലച്ചോറിലെത്തിക്കുന്ന ആശയം ചൈനയിൽ മാത്രം ഒതുങ്ങുന്നതല്ല. അമേരിക്കൻ കമ്പനിയായ സിൻക്രോണും ഓസ്ട്രേലിയയിലും അമേരിക്കയിലും രോഗികളിൽ കഴുത്തിലെ ജഗുലാർ സിരയിലൂടെ ബിസിഐ ഘടിപ്പിച്ച് പരീക്ഷണം നടത്തിയിട്ടുണ്ട്. എന്നാൽ ദീർഘകാലത്തേക്ക് ഈ ഇംപ്ലാന്റുകൾ എത്രത്തോളം സുരക്ഷിതമായും വിശ്വസനീയമായും പ്രവർത്തിക്കുമെന്നതാണ് പ്രധാന ചോദ്യം. മൃഗങ്ങളിലെ പരീക്ഷണങ്ങൾ മാത്രം മനുഷ്യരിലെ ഫലപ്രാപ്‍തി ഉറപ്പാക്കുന്നില്ല. ഉപകരണം കൃത്യമായി സ്ഥാപിക്കാനും സ്ഥിരതയോടെ നിലനിർത്താനും ഗുരുതരമായ ആരോഗ്യപ്രശ്നങ്ങളില്ലാതെ ഉപയോഗപ്രദമായ തലച്ചോർ സിഗ്നലുകൾ ശേഖരിക്കാനും കഴിയുമോയെന്ന് മനുഷ്യരിലെ ക്ലിനിക്കൽ പരീക്ഷണങ്ങളിലൂടെ വ്യക്തമാകേണ്ടതുണ്ട്.

വില 40,000 രൂപയിൽ താഴെ! 7,050mAh ബാറ്ററിയുമായി ഐക്യൂ ഇസഡ്11; ഓഗസ്റ്റ് 20ന് ലോഞ്ച്

Prashobh Prasannan — Wed, 12 Aug 2026 10:20:05 +0530

ഐക്യൂ ഇസഡ്11 ഇന്ത്യയിലെ വില 40,000 രൂപയിൽ താഴെ; 20ന് ലോഞ്ച്, വമ്പൻ ബാറ്ററിയും അമോലെഡ് ഡിസ്പ്ലേയും

ഐക്യൂവിന്റെ പുതിയ ഇസഡ് സീരീസ് സ്മാർട്ട്ഫോണായ ഐക്യൂ ഇസഡ്11 ഇന്ത്യയിൽ അവതരിപ്പിക്കാനൊരുങ്ങുന്നു. ഓഗസ്റ്റ് 20നാണ് ഫോൺ രാജ്യത്ത് ഔദ്യോഗികമായി അവതരിപ്പിക്കുക. ലോഞ്ചിന് മുന്നോടിയായി ഫോണിന്റെ വില, ഡിസ്പ്ലേ, ബാറ്ററി തുടങ്ങിയ പ്രധാന സവിശേഷതകൾ കമ്പനി പുറത്തുവിട്ടു. ഐക്യൂ ഇസഡ്11ന് നിരവധി എഐ അധിഷ്ഠിത ഫീച്ചറുകളും ലഭിക്കുമെന്ന് കമ്പനി സ്ഥിരീകരിച്ചിട്ടുണ്ട്. രണ്ട് കളർ ഓപ്ഷനുകളിലായിരിക്കും ഫോൺ ഇന്ത്യയിലെത്തുക. മീഡിയടെക് ഡൈമെൻസിറ്റി 7500 ടർബോ ചിപ്പ്സെറ്റായിരിക്കും ഫോണിന് കരുത്തേകുക.

വില 40,000 രൂപയിൽ താഴെ

ഐക്യൂ എക്സിൽ പങ്കുവച്ച ഔദ്യോഗിക ടീസറുകൾ പ്രകാരം ഐക്യൂ ഇസഡ്11ന്റെ ഇന്ത്യയിലെ വില 40,000 രൂപയിൽ താഴെയായിരിക്കും. ഈ വില പരിധിയിൽ റെഡ്മി ടർബോ 5, മോട്ടറോള എഡ്‍ജ് 70 പ്രോ തുടങ്ങിയ സ്മാർട്ട്ഫോണുകളുമായിട്ടായിരിക്കും ഐക്യൂ ഇസഡ്11 പ്രധാനമായും മത്സരിക്കുക. ഐക്യൂ ഇസഡ്11ന്റെ ചൈനീസ് പതിപ്പ് ഈ വർഷം മാർച്ചിലാണ് പുറത്തിറങ്ങിയത്. 8 ജിബി റാമും 256 ജിബി സ്റ്റോറേജുമുള്ള അടിസ്ഥാന മോഡലിന് 2,299 ചൈനീസ് യുവാൻ, ഏകദേശം 31,200 രൂപയായിരുന്നു വില.

1.5കെ റെസല്യൂഷനുള്ള അമോലെഡ് ഡിസ്പ്ലേ

6.8 ഇഞ്ച് വലിപ്പമുള്ള വളഞ്ഞ അമോലെഡ് ഡിസ്പ്ലേയാണ് ഐക്യൂ ഇസഡ്11ൽ നൽകിയിരിക്കുന്നത്. 1.5കെ റെസല്യൂഷനും 93.82 ശതമാനം സ്ക്രീൻ-ടു-ബോഡി അനുപാതവും ഡിസ്പ്ലേയ്ക്കുണ്ട്. 144 ഹെർട്സ് റിഫ്രഷ് റേറ്റും 5,000 നിറ്റ്സ് പീക്ക് ബ്രൈറ്റ്നസും ഡിസ്പ്ലേയുടെ പ്രധാന സവിശേഷതകളാണ്. ഗെയിമിങ്, വീഡിയോ സ്ട്രീമിങ് തുടങ്ങിയ ആവശ്യങ്ങൾക്ക് ഉയർന്ന റിഫ്രഷ് റേറ്റ് സഹായകമാകും.

കണ്ണുകളുടെ സംരക്ഷണത്തിനും ഫീച്ചറുകൾ

ഉപയോക്താക്കളുടെ കണ്ണുകളുടെ സംരക്ഷണം ലക്ഷ്യമിട്ട് നിരവധി ഡിസ്പ്ലേ ഫീച്ചറുകളും ഐക്യൂ ഉൾപ്പെടുത്തിയിട്ടുണ്ട്. കണ്ണുകൾക്ക് ഉണ്ടാകുന്ന സമ്മർദം കുറയ്ക്കാൻ ക്രമീകരിക്കാവുന്ന കംഫർട്ട് ലെവലുകളുള്ള ഐ പ്രൊട്ടക്ഷൻ മോഡ് ലഭിക്കും. കൂടാതെ നീല വെളിച്ചത്തിന്റെ എക്സ്പോഷർ കുറയ്ക്കുന്നതിനായി കൂടുതൽ ചൂടുള്ള നിറങ്ങൾ നൽകുന്ന സ്ലീപ്പ് കംഫർട്ട് മോഡും ഫോണിലുണ്ടാകും. സ്ക്രീൻ ഉപയോഗിക്കുന്ന സമയത്തിനനുസരിച്ച് ബ്രൈറ്റ്നസ് ക്രമീകരിക്കുന്ന ആന്റി-ഫാറ്റീഗ് ബ്രൈറ്റ്നസ് അഡ്ജസ്റ്റ്മെന്റ് ഫീച്ചറും ഐക്യൂ ഇസഡ്11ൽ ഉൾപ്പെടുത്തിയിട്ടുണ്ട്.

എഐ ഫീച്ചറുകൾ ധാരാളം

നിരവധി എഐ അധിഷ്ഠിത ഫീച്ചറുകളുമായാണ് ഐക്യൂ ഇസഡ്11 എത്തുന്നത്. എഐ ക്യാപ്ഷൻസ്, എഐ ക്രിയേഷൻ, എഐ റൂട്ടിങ്, സർക്കിൾ ടു സെർച്ച് തുടങ്ങിയ സൗകര്യങ്ങൾ ഫോണിൽ ലഭിക്കും. ദൈനംദിന ഉപയോഗം കൂടുതൽ എളുപ്പമാക്കുന്നതിനൊപ്പം വിവരങ്ങൾ തിരയാനും ഉള്ളടക്കം സൃഷ്ടിക്കാനും ഈ എഐ ഫീച്ചറുകൾ സഹായിക്കുമെന്നാണ് പ്രതീക്ഷിക്കുന്നത്.

7,050 എംഎഎച്ച് ബാറ്ററി

ഐക്യൂ ഇസഡ്11ൽ 7,050 എംഎഎച്ച് ശേഷിയുള്ള ബാറ്ററിയായിരിക്കും നൽകുക. എന്നാൽ ചൈനീസ് പതിപ്പിൽ 9,020 എംഎഎച്ച് ശേഷിയുള്ള ബാറ്ററിയാണ് നൽകിയിരിക്കുന്നത്. ഇന്ത്യൻ പതിപ്പിലെ ബാറ്ററി ശേഷി ചൈനീസ് മോഡലിനെ അപേക്ഷിച്ച് കുറവാണെങ്കിലും വലിയ ശേഷിയുള്ള ബാറ്ററി തന്നെയാണ് പുതിയ ഫോണിന്റെ പ്രധാന ആകർഷണങ്ങളിലൊന്ന്.

ഓഗസ്റ്റ് 20ന് ഇന്ത്യയിൽ

മീഡിയടെക് ഡൈമെൻസിറ്റി 7500 ടർബോ ചിപ്പ്സെറ്റാണ് ഐക്യൂ ഇസഡ്11ൽ ഉപയോഗിക്കുന്നതെന്ന് കമ്പനി നേരത്തെ സ്ഥിരീകരിച്ചിരുന്നു. ഓഗസ്റ്റ് 20നാണ് ഇന്ത്യയിലെ ഔദ്യോഗിക ലോഞ്ച്. ആമസോൺ വഴിയായിരിക്കും ഫോണിന്റെ വിൽപ്പന. ഓറോറ ഗ്രീൻ, സെലസ്റ്റിയൽ ബ്ലൂ എന്നീ 2 നിറങ്ങളിലാണ് ഐക്യൂ ഇസഡ്11 ഇന്ത്യയിൽ ലഭ്യമാകുക.

200MP ക്യാമറയുമായി വിവോ എക്സ്500 സീരീസ്; ഡിസൈൻ, ഡിസ്പ്ലേ, ക്യാമറ വിവരങ്ങൾ ചോർന്നു

Prashobh Prasannan — Wed, 12 Aug 2026 09:40:50 +0530

വിവോയുടെ പുതിയ എക്സ്500 സീരീസിനെക്കുറിച്ചുള്ള കൂടുതൽ വിവരങ്ങൾ പുറത്ത്. ഫോണുകളുടെ ഡിസൈൻ, ഡിസ്പ്ലേ, ക്യാമറ സവിശേഷതകൾ സംബന്ധിച്ച വിവരങ്ങളാണ് ഏറ്റവും പുതിയ ചോർച്ചയിലൂടെ പുറത്തുവന്നിരിക്കുന്നത്. സ്റ്റാൻഡേർഡ് മോഡലിനും പ്രോ മോഡലുകൾക്കും വ്യത്യസ്തമായ പിൻ ക്യാമറ ഡിസൈൻ ആയിരിക്കുമെന്നാണ് സൂചന. വിവോ ഇതുവരെ എക്സ്500 സീരീസിനെ ഔദ്യോഗികമായി സ്ഥിരീകരിച്ചിട്ടില്ല. എന്നാൽ നേരത്തെ പുറത്തുവന്ന റിപ്പോർട്ടുകൾക്ക് പിന്നാലെയാണ് പുതിയ വിവരങ്ങളും എത്തിയിരിക്കുന്നത്. സെപ്റ്റംബറിൽ സീരീസ് അവതരിപ്പിച്ചേക്കുമെന്നാണ് റിപ്പോർട്ടുകൾ.

എക്സ്500ന് വ്യത്യസ്‍ത ക്യാമറ ഡിസൈൻ

ചൈനീസ് ടിപ്സ്റ്റർ ഡിജിറ്റൽ ചാറ്റ് സ്റ്റേഷൻ വെയ്ബോയിൽ പങ്കുവച്ച വിവരങ്ങൾ പ്രകാരം, സാധാരണ വിവോ എക്സ്500 മോഡലിൽ വലിയ വൃത്താകൃതിയിലുള്ള പിൻ ക്യാമറ യൂണിറ്റായിരിക്കും ഉണ്ടാവുക. ഫോണിന്റെ പിൻഭാഗത്തിന്റെ മുകൾഭാഗത്ത് ഇടതുവശത്തായിരിക്കും ഈ ക്യാമറ യൂണിറ്റ് സ്ഥാപിക്കുക എന്നാണ് സൂചന. 6.59 ഇഞ്ച് വലിപ്പമുള്ള ഫ്ലാറ്റ് ഡിസ്പ്ലേയും എക്സ്500ൽ നൽകിയേക്കും.

പ്രോ മോഡലുകൾക്ക് മധ്യഭാഗത്ത് ക്യാമറ

എക്സ്500 പ്രോ സീരീസിൽ ക്യാമറ ഡിസൈനിൽ മാറ്റമുണ്ടാകുമെന്നാണ് റിപ്പോർട്ട്. വൃത്താകൃതിയിലുള്ള ക്യാമറ മൊഡ്യൂൾ ഫോണിന്റെ പിൻഭാഗത്തിന്റെ മധ്യഭാഗത്തായിരിക്കും സ്ഥാപിക്കുകയെന്നാണ് വിവരം. 6.37 ഇഞ്ച്, 6.85 ഇഞ്ച് എന്നിങ്ങനെ രണ്ട് ഡിസ്പ്ലേ വലിപ്പങ്ങൾ പ്രോ മോഡലുകളിൽ പരിഗണിക്കുന്നതായാണ് റിപ്പോർട്ട്. നേർത്ത ബെസലുകളും കൂടുതൽ വൃത്താകൃതിയിലുള്ള കോണുകളും ഡിസ്പ്ലേയിൽ നൽകിയേക്കും. 1.5കെ, 2കെ റെസല്യൂഷനുകൾക്കൊപ്പം 144 ഹെർട്സ് വരെ റിഫ്രഷ് റേറ്റ് ലഭിക്കാനും സാധ്യതയുണ്ട്.

ചിപ്പിലും വലിയ മാറ്റം

എക്സ്500 പ്രോ മോഡലുകളിൽ 2 നാനോമീറ്റർ ചിപ്പുകളും സാധാരണ എക്സ്500ൽ 3 നാനോമീറ്റർ പ്രോസസറും ഉപയോഗിച്ചേക്കുമെന്നാണ് പുതിയ റിപ്പോർട്ട്. നേരത്തെ പുറത്തുവന്ന വിവരങ്ങൾ അനുസരിച്ച് എക്സ്500, എക്സ്500 പ്രോ മോഡലുകളിൽ മീഡിയടെക് ഡൈമെൻസിറ്റി 9600, ഡൈമെൻസിറ്റി 9600 പ്രോ ചിപ്പുകൾ ഉപയോഗിച്ചേക്കുമെന്നും സൂചനയുണ്ടായിരുന്നു.

എക്സ്500ൽ 50 മെഗാപിക്സൽ പ്രധാന ക്യാമറ

സാധാരണ എക്സ്500 മോഡലിൽ 50 മെഗാപിക്സൽ സോണി പ്രധാന ക്യാമറ നൽകിയേക്കും. ഇതിന് പുറമെ 50 മെഗാപിക്സൽ അൾട്രാ വൈഡ് ക്യാമറയും 64 മെഗാപിക്സൽ പെരിസ്കോപ്പ് ടെലിഫോട്ടോ സെൻസറും ലഭിച്ചേക്കാം. 70 മില്ലിമീറ്റർ തുല്യമായ ഫോക്കൽ ലെങ്തുള്ള ടെലിഫോട്ടോ ക്യാമറയിൽ മാക്രോ ഫോട്ടോഗ്രഫി സൗകര്യവും ഉൾപ്പെടുത്തിയേക്കുമെന്നാണ് റിപ്പോർട്ട്.

പ്രോ മോഡലിലും 50 മെഗാപിക്സൽ ക്യാമറ

വിവോ എക്സ്500 പ്രോയിൽ 1/1.28 ഇഞ്ച് വലിപ്പമുള്ള സെൻസറും ലോഫിക് സാങ്കേതികവിദ്യയുമുള്ള 50 മെഗാപിക്സൽ പ്രധാന ക്യാമറ നൽകിയേക്കും. 50 മെഗാപിക്സൽ അൾട്രാ വൈഡ് ക്യാമറയ്ക്കൊപ്പം 3 മടങ്ങ് ഒപ്റ്റിക്കൽ സൂം പിന്തുണയുള്ള 64 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറയും പ്രതീക്ഷിക്കുന്നു.

പ്രോ മാക്സിൽ 200 മെഗാപിക്സൽ ക്യാമറ

സീരീസിലെ ഏറ്റവും ഉയർന്ന മോഡലായ വിവോ എക്സ്500 പ്രോ മാക്സിൽ 200 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറ നൽകിയേക്കുമെന്നാണ് റിപ്പോർട്ട്. 50 മെഗാപിക്സൽ സോണി എൽവൈടി-828 പ്രധാന സെൻസർ, 50 മെഗാപിക്സൽ അൾട്രാ വൈഡ് ക്യാമറ, മറ്റൊരു 50 മെഗാപിക്സൽ ടെലിഫോട്ടോ ക്യാമറ എന്നിവയും ഈ മോഡലിൽ ഉൾപ്പെട്ടേക്കും. പ്രോ മോഡലുകളിലെ ക്യാമറയിൽ ലോഫിക് സാങ്കേതികവിദ്യ ഉപയോഗിക്കുന്നതായും റിപ്പോർട്ടുണ്ട്. വളരെ തെളിച്ചമുള്ളതും ഇരുണ്ടതുമായ ഭാഗങ്ങൾ ഒരേസമയം ഉൾപ്പെടുന്ന ദൃശ്യങ്ങളിൽ കൂടുതൽ വിശദാംശങ്ങൾ നിലനിർത്താൻ ഈ സാങ്കേതികവിദ്യ സഹായിക്കുമെന്നാണ് വിലയിരുത്തൽ.

സെപ്റ്റംബറിൽ എത്തുമോ?

വിവോ എക്സ്500, എക്സ്500ഇ, എക്സ്500 പ്രോ, എക്സ്500 പ്രോ മാക്സ് എന്നീ മോഡലുകൾ ഉൾപ്പെടുന്നതായിരിക്കും പുതിയ സീരീസ് എന്നാണ് റിപ്പോർട്ടുകൾ. വ്യത്യസ്‍ത ഡിസ്പ്ലേ വലിപ്പങ്ങളും ഹാർഡ്‍വെയർ സവിശേഷതകളുമുള്ള നിരവധി മോഡലുകൾ സീരീസിൽ ഉൾപ്പെടാനാണ് സാധ്യത. ഔദ്യോഗിക ലോഞ്ച് തീയതി വിവോ ഇതുവരെ പ്രഖ്യാപിച്ചിട്ടില്ലെങ്കിലും സെപ്റ്റംബറിൽ എക്സ്500 സീരീസ് അവതരിപ്പിച്ചേക്കുമെന്നാണ് സൂചന. ആഗോള വിപണിയിലെ മോഡലുകൾ ഇതിനകം സർട്ടിഫിക്കേഷൻ ഡാറ്റാബേസുകളിൽ പ്രത്യക്ഷപ്പെട്ടതായും റിപ്പോർട്ടുകളുണ്ട്.

കറുപ്പഴകിൽ ഹൈറൈഡർ: എയ്റോ ബ്ലാക്ക് എഡിഷൻ എത്തി

Prashobh Prasannan — Thu, 13 Aug 2026 15:26:06 +0530

ടൊയോട്ട കിർലോസ്‍കർ മോട്ടോർ അർബൻ ക്രൂയിസർ ഹൈറൈഡറിന്റെ പുതിയ ലിമിറ്റഡ് എഡിഷൻ സ്റ്റൈലിംഗ് പാക്കേജ് അവതരിപ്പിച്ചു. ‘ഹൈറൈഡർ എയ്റോ ബ്ലാക്ക് എഡിഷൻ’ എന്ന പേരിലാണ് പുതിയ പതിപ്പ് വിപണിയിലെത്തുന്നത്. എസ്‌യുവിക്ക് കൂടുതൽ സ്പോർട്ടി, പ്രീമിയം ലുക്ക് നൽകുന്ന കറുപ്പ് തീമിലുള്ള ഡിസൈൻ മാറ്റങ്ങളാണ് പുതിയ എഡിഷന്റെ പ്രധാന പ്രത്യേകത.

31,999 രൂപയ്ക്ക് എയ്റോ ബ്ലാക്ക് പാക്കേജ്

എയ്റോ ബ്ലാക്ക് എഡിഷന്റെ സ്റ്റൈലിംഗ് പാക്കേജിന് 31,999 രൂപയാണ് വില. ഇത് വാഹനത്തിന്റെ മൊത്തം വിലയല്ല. മിഡ്‌നൈറ്റ് ബ്ലാക്ക് നിറത്തിലുള്ള ജി, വി വേരിയന്റുകളിലാണ് പാക്കേജ് ലഭ്യമാകുക. നിയോ ഡ്രൈവ്, സ്ട്രോങ് ഹൈബ്രിഡ് പവർട്രെയിനുകളിലും ഇത് തിരഞ്ഞെടുക്കാം.

കറുത്ത ലുക്കിൽ കൂടുതൽ മാറ്റങ്ങൾ

ഹൈറൈഡറിന്റെ പുറംഭാഗത്താണ് പ്രധാനമായും മാറ്റങ്ങൾ വരുത്തിയിരിക്കുന്നത്. മുൻ ഗ്രിൽ അപ്പർ ഗാർണിഷ്, മുൻ സ്പോയിലർ, ഹെഡ്‌ലാംപ് ഗാർണിഷ്, ടെയിൽഗേറ്റ് ഗാർണിഷ്, പിൻ സ്പോയിലർ എന്നിവ പുതിയ പാക്കേജിന്റെ ഭാഗമാണ്. കൂടാതെ പ്രത്യേക ‘എയ്റോ ബ്ലാക്ക്’ ലിമിറ്റഡ് എഡിഷൻ ബാഡ്ജും വാഹനത്തിന് ലഭിക്കും. ഇതിന് പുറമെ ഡീലർ തലത്തിൽ ലഭ്യമാകുന്ന ‘ഓൾ ബ്ലാക്ക് പാക്കേജ്’ അധിക ചെലവിൽ ഉപഭോക്താക്കൾക്ക് തിരഞ്ഞെടുക്കാം. വാഹനത്തിന്റെ കറുപ്പ് തീം കൂടുതൽ വിപുലമാക്കുകയാണ് ഇതിലൂടെ ലക്ഷ്യമിടുന്നത്.

എൻജിനിൽ മാറ്റമില്ല

എയ്റോ ബ്ലാക്ക് എഡിഷനിൽ മെക്കാനിക്കൽ മാറ്റങ്ങളൊന്നും വരുത്തിയിട്ടില്ല. സ്ട്രോങ് ഹൈബ്രിഡ് പതിപ്പിൽ 1.5 ലിറ്റർ ടി.എൻ.ജി.എ അറ്റ്കിൻസൺ സൈക്കിൾ പെട്രോൾ എൻജിനാണ് ഉപയോഗിക്കുന്നത്. 92 ബി.എച്ച്.പി കരുത്തുള്ള എൻജിനൊപ്പം 79 ബി.എച്ച്.പി കരുത്തുള്ള ഇലക്ട്രിക് മോട്ടോറും 177.6 വി ലിഥിയം അയൺ ബാറ്ററി പാക്കുമുണ്ട്. സംയുക്തമായി 114 ബി.എച്ച്.പി കരുത്താണ് ലഭിക്കുന്നത്. ഇ-സി.വി.ടി ഗിയർബോക്സാണ് ട്രാൻസ്മിഷൻ. കമ്പനി അവകാശപ്പെടുന്ന ഇന്ധനക്ഷമത 27.97 കിലോമീറ്റർ/ലിറ്റർ ആണ്.

നിയോ ഡ്രൈവ് പതിപ്പിലും ലഭിക്കും

1.5 ലിറ്റർ കെ15സി പെട്രോൾ എൻജിനാണ് നിയോ ഡ്രൈവ് പതിപ്പിൽ ഉപയോഗിക്കുന്നത്. 103 ബി.എച്ച്.പി കരുത്തും 137 എൻ.എം ടോർക്കുമാണ് ഈ എൻജിൻ നൽകുന്നത്. 5-സ്പീഡ് മാനുവൽ, 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്സ് ഓപ്ഷനുകൾ ലഭ്യമാണ്. മാനുവൽ പതിപ്പിൽ ഓൾ-വീൽ ഡ്രൈവ് സംവിധാനവും ലഭിക്കും. അതേസമയം എയ്റോ ബ്ലാക്ക് എഡിഷന്റെ പ്രധാന മാറ്റങ്ങൾ ഡിസൈനിലും പുറംഭാഗത്തെ അലങ്കാര ഘടകങ്ങളിലുമാണ്.

റോഡ് പ്രസൻസ് കൂട്ടാൻ പുതിയ ലുക്ക്

ഹൈറൈഡറിന്റെ സ്റ്റൈലിഷ് ഡിസൈൻ, സാങ്കേതികവിദ്യ, സൗകര്യങ്ങൾ എന്നിവയ്ക്കൊപ്പം കൂടുതൽ വ്യത്യസ്തമായ ഡിസൈൻ നൽകുകയാണ് എയ്റോ ബ്ലാക്ക് എഡിഷനിലൂടെ ടൊയോട്ട ലക്ഷ്യമിടുന്നത്. കറുപ്പ് തീമിലുള്ള പുതിയ സ്റ്റൈലിംഗ് വാഹനത്തിന് കൂടുതൽ പ്രീമിയം സ്വഭാവവും റോഡ് പ്രസൻസും നൽകുമെന്നാണ് കമ്പനിയുടെ വിലയിരുത്തൽ. ലിമിറ്റഡ് എഡിഷനായതിനാൽ ലഭ്യത സ്റ്റോക്കിനും ഡീലർഷിപ്പിനും അനുസരിച്ചായിരിക്കും. നിലവിലുള്ള പവർട്രെയിനുകൾ തന്നെ നിലനിർത്തിക്കൊണ്ട് കൂടുതൽ ആകർഷകമായ രൂപഭാവം നൽകുന്ന പതിപ്പായാണ് പുതിയ എയ്റോ ബ്ലാക്ക് എഡിഷനെ ടൊയോട്ട അവതരിപ്പിച്ചിരിക്കുന്നത്.

സ്പേസ് എക്സിന് 45 ലക്ഷം കോടി വരുമാനമോ? 2028ലേക്കുള്ള ഇലോൺ മസ്‍കിന്‍റെ വമ്പൻ പ്ലാൻ പുറത്ത്!

Prashobh Prasannan — Wed, 12 Aug 2026 07:25:06 +0530

റോക്കറ്റ് വിക്ഷേപണ രംഗത്ത് ലോകത്തെ തന്നെ അമ്പരപ്പിച്ച സ്പേസ് എക്സ് ഇനി ആർട്ടിഫിഷ്യൽ ഇന്‍റലിജൻസ് രംഗത്തും വൻ ശക്തിയായി മാറാനൊരുങ്ങുന്നു. 2028ഓടെ കമ്പനിക്ക് 500 ബില്യൺ ഡോളർ വരെ വാർഷിക വരുമാനം നേടാൻ കഴിയുമെന്നാണ് സ്ഥാപകനും സിഇഒയുമായ ഇലോൺ മസ്‍കിന്റെ പ്രവചനം. ഫാൽക്കൺ 9, ഫാൽക്കൺ ഹെവി റോക്കറ്റുകളുടെ വിക്ഷേപണവും തിരിച്ചിറക്കലും, ഡ്രാഗൺ ബഹിരാകാശ പേടകം വഴി ബഹിരാകാശ സഞ്ചാരികളെ അയക്കുന്നതുമാണ് സ്പേസ് എക്സിന്റെ പ്രധാന പ്രവർത്തനങ്ങൾ. എന്നാൽ എഐയിലേക്കുള്ള കമ്പനിയുടെ മാറ്റം ഇപ്പോൾ അതിവേഗം പുരോഗമിക്കുകയാണെന്നാണ് മസ്‍ക് വ്യക്തമാക്കിയത്.

എഐ വരുമാനം ഉടൻ ഒന്നാമതെത്തും

ഓഗസ്റ്റ് 11ന് ജീവനക്കാർക്കായി നടത്തിയ പ്രസംഗത്തിൽ സ്പേസ് എക്സിന്റെ എഐ വരുമാനം സെപ്റ്റംബറോടെ കമ്പനിയുടെ മറ്റ് എല്ലാ വരുമാന സ്രോതസുകളെയും മറികടക്കുമെന്ന് മസ്‍ക് പറഞ്ഞു. ഈ വർഷത്തെ നാലാം പാദത്തിൽ എഐയിൽ നിന്നുള്ള വരുമാനം സ്പേസ് എക്സിന്റെ മറ്റ് ബിസിനസുകളേക്കാൾ വലിയ തോതിൽ ഉയരുമെന്നും അദ്ദേഹം വ്യക്തമാക്കി. ഇതോടെ കമ്പനിയുടെ ഭാവിയിൽ എഐയ്ക്ക് നിർണായക സ്ഥാനമാണ് ലഭിക്കുകയെന്നും മസ്‍ക് പറഞ്ഞു.

എക്സ് എഐ ഏറ്റെടുത്തതിന് പിന്നാലെ

ഈ വർഷം ആദ്യം മസ്‍ക് 2023ൽ സ്ഥാപിച്ച എക്സ് എഐ എന്ന സ്റ്റാർട്ടപ്പിനെ സ്പേസ് എക്സ് ഏറ്റെടുത്തിരുന്നു. ഗ്രോക് എന്ന എഐ ചാറ്റ്ബോട്ടിന്റെ നിർമാതാക്കളായ എക്സ് എഐ ടെന്നസിയിലെ കൊളോസസ് എന്ന ശക്തമായ സൂപ്പർകമ്പ്യൂട്ടർ ശൃംഖലയും പ്രവർത്തിപ്പിക്കുന്നുണ്ട്. എക്സ് എഐ ഏറ്റെടുത്തതോടെ സ്പേസ് എക്സിന്റെ എഐ രംഗത്തെ ഇടപെടൽ കൂടുതൽ ശക്തമായി.

10 ജിഗാവാട്ട് എഐ കംപ്യൂട്ടിങ്

അടുത്ത വർഷം അവസാനത്തോടെ 10 ജിഗാവാട്ട് എഐ കംപ്യൂട്ടിങ് ശേഷി പ്രവർത്തനക്ഷമമാക്കുകയാണ് സ്പേസ് എക്സിന്റെ ലക്ഷ്യമെന്ന് മസ്‍ക് പറഞ്ഞു. നിലവിൽ കമ്പനിക്ക് ഏകദേശം 1.4 ജിഗാവാട്ട് ശേഷിയാണുള്ളത്. ടെക് കമ്പനികൾക്കും എഐ ലാബുകൾക്കും ഈ കംപ്യൂട്ടിങ് ശേഷി സ്പേസ് എക്സ് നൽകുന്നുണ്ട്. ഒരു വാട്ടിന് 30 മുതൽ 50 ഡോളർ വരെ മൂല്യം ലഭിക്കുമെന്നാണ് മസ്‍കിന്റെ കണക്കുകൂട്ടൽ. 10 ജിഗാവാട്ട് എഐ ശേഷി അടുത്ത വർഷം അവസാനത്തോടെ പ്രവർത്തനക്ഷമമായാൽ പ്രതിവർഷം 300 മുതൽ 500 ബില്യൺ ഡോളർ വരെ വരുമാനം നേടാൻ കഴിയുമെന്നും അദ്ദേഹം പറഞ്ഞു.

എഐ ബിസിനസിന് പിന്നാലെ ടെറാഫാബ്

എഐ രംഗത്തെ വിപുലീകരണത്തിന്റെ ഭാഗമായി ടെക്സസിൽ ടെറാഫാബ് എന്ന പേരിൽ വലിയൊരു വ്യവസായ സമുച്ചയം നിർമിക്കാനുള്ള പദ്ധതിയും സ്പേസ് എക്സ് പ്രഖ്യാപിച്ചിട്ടുണ്ട്. ടെസ്‍ലയുമായി ചേർന്നുള്ള സംയുക്ത പദ്ധതിയായിരിക്കും ഇത്. വിവിധ ആവശ്യങ്ങൾക്കുള്ള അത്യാധുനിക സെമികണ്ടക്ടർ ചിപ്പുകൾ നിർമിക്കുകയാണ് പദ്ധതിയുടെ ലക്ഷ്യം.

സ്റ്റാർമൈൻഡ് ഉപഗ്രഹങ്ങളും ലക്ഷ്യം

സ്പേസ് എക്സിന്റെ എഐ പദ്ധതികളിലെ മറ്റൊരു പ്രധാന ഘടകമാണ് സ്റ്റാർമൈൻഡ്. വരും വർഷങ്ങളിൽ 1 മില്യൺ സ്റ്റാർമൈൻഡ് എഐ ഉപഗ്രഹങ്ങൾ താഴ്ന്ന ഭ്രമണപഥത്തിൽ എത്തിക്കാനാണ് കമ്പനിയുടെ പദ്ധതി. വികസനത്തിലിരിക്കുന്ന പൂർണമായും പുനരുപയോഗിക്കാവുന്ന സ്റ്റാർഷിപ്പ് റോക്കറ്റ് ഉപയോഗിച്ചായിരിക്കും ഉപഗ്രഹങ്ങൾ വിക്ഷേപിക്കുക.

ചന്ദ്രനിലും എഐ ഡാറ്റാ സെന്ററുകൾ

ദീർഘകാല പദ്ധതികൾ അതിലും വലുതാണ്. ചന്ദ്രനിൽ ഫാക്ടറികൾ സ്ഥാപിച്ച് ഭൂമിക്ക് പുറത്തുള്ള ഡാറ്റാ സെന്ററുകൾ നിർമിക്കാനാണ് സ്പേസ് എക്സ് ലക്ഷ്യമിടുന്നത്. ചന്ദ്രോപരിതലത്തിൽ നിന്ന് വൈദ്യുതകാന്തിക മാസ് ഡ്രൈവറുകൾ ഉപയോഗിച്ച് ഉപഗ്രഹങ്ങളെ ബഹിരാകാശത്തേക്ക് വിക്ഷേപിക്കാനും കമ്പനി പദ്ധതിയിടുന്നു. ഉയർന്ന ശക്തിയുള്ള റെയിൽ ഗൺ പോലെയുള്ള സംവിധാനമായിരിക്കും ഇത്.

28.5 ട്രില്യൺ ഡോളറിന്റെ വിപണി

ഐപിഒയ്ക്ക് മുന്നോടിയായി സമർപ്പിച്ച രേഖകളിൽ സ്പേസ് എക്സ് ഭാവിയിൽ ലക്ഷ്യമിടുന്ന ആകെ വിപണി 28.5 ട്രില്യൺ ഡോളറാണെന്ന് വ്യക്തമാക്കിയിരുന്നു. ഇതിൽ ഏകദേശം 23 ട്രില്യൺ ഡോളറും എഐ മേഖലയുമായി ബന്ധപ്പെട്ടതാണ്. താരതമ്യം ചെയ്യുമ്പോൾ, കഴിഞ്ഞ വർഷം അമേരിക്കയുടെ മൊത്തം ആഭ്യന്തര ഉൽപ്പാദനം ഏകദേശം 30.8 ട്രില്യൺ ഡോളറായിരുന്നു.

മനുഷ്യരാശിയെ മറ്റ് ഗ്രഹങ്ങളിലേക്ക് എത്തിക്കണം

പണത്തിനുവേണ്ടി മാത്രമല്ല എഐ രംഗത്തേക്ക് കടക്കുന്നതെന്നും മസ്‍ക് പറഞ്ഞു. മനുഷ്യരാശിയെ സഹായിക്കുകയും മറ്റ് ഗ്രഹങ്ങളിലേക്കും നക്ഷത്രവ്യവസ്ഥകളിലേക്കും എത്തിക്കാൻ സഹായിക്കുകയും ചെയ്യുന്ന എഐയാണ് താൻ ആഗ്രഹിക്കുന്നതെന്നും അദ്ദേഹം വ്യക്തമാക്കി. സ്പേസ് എക്സിന്റെ എഐ ഹാർഡ്വെയറിനൊപ്പം എഐ സോഫ്റ്റ്വെയറും വിജയിക്കേണ്ടത് അത്യാവശ്യമാണെന്നും മസ്‍ക് പറഞ്ഞു. മനുഷ്യരാശിയുടെ താൽപര്യങ്ങൾ മുൻനിർത്തുന്ന എഐ സൃഷ്‍ടിക്കുകയാണ് ലക്ഷ്യമെന്നും അദ്ദേഹം കൂട്ടിച്ചേർത്തു.

ചന്ദ്രനിലേക്കും ചൊവ്വയിലേക്കും ജീവനക്കാർക്ക് യാത്ര

സ്പേസ് എക്സിലെ ജീവനക്കാർക്ക് ഭാവിയിൽ ചന്ദ്രനിലേക്കോ ചൊവ്വയിലേക്കോ യാത്ര ചെയ്യാനുള്ള അവസരം ലഭിക്കുമെന്നും മസ്‍ക് വാഗ്ദാനം ചെയ്തു. എഐ, റോബോട്ടിക്സ്, ബഹിരാകാശ പര്യവേക്ഷണം എന്നിവയെ ഒരുമിച്ച് മുന്നോട്ട് കൊണ്ടുപോകുന്ന കമ്പനിയായാണ് സ്പേസ് എക്സിന്റെ ഭാവി മസ്‍ക് വിഭാവനം ചെയ്യുന്നത്. പദ്ധതികൾ വിജയിച്ചാൽ ലോകത്തിലെ ഏറ്റവും വലിയ ടെക്, ബഹിരാകാശ കമ്പനികളിലൊന്നായി സ്പേസ് എക്സിന്റെ മൂല്യവും വരുമാനവും പുതിയ ഉയരങ്ങളിലെത്തിയേക്കും.

9,070mAh ബാറ്ററി, 200MP ക്യാമറ, 185Hz ഡിസ്പ്ലേ; റെഡ്‍മിയുടെ പുതിയ ഫോൺ എത്തി!

Prashobh Prasannan — Thu, 13 Aug 2026 14:20:46 +0530

ഷവോമിയുടെ കീഴിലുള്ള റെഡ്‍മി പുതിയ കെ100 സീരീസിലെ രണ്ട് സ്മാർട്ട്ഫോണുകൾ ചൈനയിൽ അവതരിപ്പിച്ചു. റെഡ്മി കെ100 പ്രോ, റെഡ്മി കെ100 പ്രോ മാക്സ് എന്നീ മോഡലുകളാണ് വിപണിയിലെത്തിയത്. 185 ഹെർട്സ് റിഫ്രഷ് റേറ്റുള്ള ഓഎൽഇഡി ഡിസ്പ്ലേ, സ്നാപ്ഡ്രാഗൺ 8 എലൈറ്റ് ജെൻ 5 വി–സീരീസ് ചിപ്സെറ്റ്, 200 മെഗാപിക്സൽ പ്രധാന ക്യാമറ എന്നിവയാണ് ഫോണുകളുടെ പ്രധാന സവിശേഷതകൾ.

കഴിഞ്ഞ വർഷം പുറത്തിറങ്ങിയ കെ90 പ്രോയ്ക്ക് പിന്നാലെയാണ് പുതിയ മോഡലുകൾ എത്തുന്നത്. ഗെയിമിങ്, പ്രകടനം എന്നിവയ്ക്ക് കൂടുതൽ പ്രാധാന്യം നൽകുന്ന റെഡ്മിയുടെ ഫോണുകളെന്ന നിലയിലാണ് കെ സീരീസ് അറിയപ്പെടുന്നത്. വലിയ ബാറ്ററിയും വേഗമേറിയ ഡിസ്പ്ലേയുമുൾപ്പെടെ നിരവധി അപ്ഗ്രേഡുകളാണ് പുതിയ മോഡലുകളിൽ കമ്പനി നൽകിയിരിക്കുന്നത്. ഇന്ത്യൻ വിപണിയിൽ കെ100 പ്രോ, കെ100 പ്രോ മാക്സ് എന്നിവ എപ്പോൾ അവതരിപ്പിക്കുമെന്ന കാര്യം റെഡ്‍മി വ്യക്തമാക്കിയിട്ടില്ല.

കെ100 പ്രോ മാക്സിൽ 185 ഹെർട്സ് ഡിസ്പ്ലേ

റെഡ്‍മി കെ100 പ്രോ മാക്സിൽ 6.9 ഇഞ്ച് ഫ്ലാറ്റ് ഓഎൽഇഡി ഡിസ്പ്ലേയാണുള്ളത്. 2,608 × 1,200 പിക്സൽ റെസല്യൂഷനുള്ള സ്ക്രീനിൽ 185 ഹെർട്സ് റിഫ്രഷ് റേറ്റ് ലഭിക്കും. എം11 ലുമിനസന്റ് മെറ്റീരിയൽ ഉപയോഗിച്ചുള്ള ഡിസ്പ്ലേയാണ് ഫോണിലുള്ളത്. ഉയർന്ന റിഫ്രഷ് റേറ്റ് കാരണം സ്ക്രോളിങ്ങും ഗെയിമിങ്ങും കൂടുതൽ സുഗമമായ അനുഭവം നൽകുമെന്നാണ് കമ്പനി അവകാശപ്പെടുന്നത്.

സ്നാപ്ഡ്രാഗൺ 8 എലൈറ്റ് ജെൻ 5 വി–സീരീസ്

സ്നാപ്ഡ്രാഗൺ 8 എലൈറ്റ് ജെൻ 5 വി–സീരീസ് ചിപ്സെറ്റാണ് കെ100 പ്രോ മാക്സിന്റെ കരുത്ത്. ഉയർന്ന പ്രകടനത്തിൽ ഫോൺ ഉപയോഗിക്കുമ്പോൾ ഉണ്ടാകുന്ന ചൂട് നിയന്ത്രിക്കുന്നതിനായി 6,300 ചതുരശ്ര മില്ലിമീറ്റർ വലുപ്പമുള്ള കൂളിങ് ചേംബറും നൽകിയിട്ടുണ്ട്. ഗെയിമിങ് ഉൾപ്പെടെയുള്ള കനത്ത ഉപയോഗത്തിനിടെ പ്രകടനം നിലനിർത്താൻ ഈ സംവിധാനത്തിന് സാധിക്കുമെന്നാണ് പ്രതീക്ഷ.

200 മെഗാപിക്സൽ ക്യാമറ

ക്യാമറ വിഭാഗത്തിലും കെ100 പ്രോ മാക്സ് ശ്രദ്ധേയമാണ്. ഒപ്റ്റിക്കൽ ഇമേജ് സ്റ്റബിലൈസേഷൻ സംവിധാനമുള്ള 200 മെഗാപിക്സൽ പ്രധാന ക്യാമറയാണ് പിന്നിൽ. ഇതിനൊപ്പം 50 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറയും 50 മെഗാപിക്സൽ അൾട്രാ വൈഡ് ക്യാമറയുമുണ്ട്. സെൽഫികൾക്കായി 32 മെഗാപിക്സൽ മുൻ ക്യാമറയും നൽകിയിട്ടുണ്ട്.

9,070 എംഎഎച്ച് ബാറ്ററി

ഫോണിന്റെ ഏറ്റവും വലിയ പ്രത്യേകതകളിലൊന്ന് ബാറ്ററിയാണ്. 9,070 എംഎഎച്ച് ശേഷിയുള്ള ബാറ്ററിയാണ് കെ100 പ്രോ മാക്സിൽ നൽകിയിരിക്കുന്നത്. 100 വാട്ട് വയേർഡ് ഫാസ്റ്റ് ചാർജിങ്ങും 50 വാട്ട് വയർലെസ് ചാർജിങ്ങും ഫോണിലുണ്ട്. വയർഡ്, വയർലെസ് റിവേഴ്സ് ചാർജിങ് സംവിധാനവും പിന്തുണയ്ക്കുന്നതിനാൽ മറ്റ് ഉപകരണങ്ങൾ ചാർജ് ചെയ്യാനും ഫോൺ ഉപയോഗിക്കാം.

കെ100 പ്രോയിൽ 185 ഹെർട്സ് സ്ക്രീൻ

സീരീസിലെ താരതമ്യേന ചെറിയ മോഡലാണ് റെഡ്മി കെ100 പ്രോ. 6.59 ഇഞ്ച് ഓഎൽഇഡി ഡിസ്പ്ലേയാണ് ഫോണിലുള്ളത്. 2,510 × 1,156 പിക്സൽ റെസല്യൂഷനും 185 ഹെർട്സ് റിഫ്രഷ് റേറ്റുമുണ്ട്. സ്നാപ്ഡ്രാഗൺ 8 എലൈറ്റ് ജെൻ 5 വി–സീരീസ് ചിപ്സെറ്റാണ് ഈ മോഡലിലും ഉപയോഗിച്ചിരിക്കുന്നത്. ഗെയിമിങ് പ്രകടനം മെച്ചപ്പെടുത്തുന്നതിനും ഫ്രെയിം സ്ഥിരത നിലനിർത്തുന്നതിനുമായി പ്രത്യേക കൃത്രിമ ബുദ്ധി അധിഷ്ഠിത ഗെയിമിങ് ഡിസ്പ്ലേ ചിപ്പും നൽകിയിട്ടുണ്ട്.

ട്രിപ്പിൾ ക്യാമറ സംവിധാനം

200 മെഗാപിക്സൽ പ്രധാന ക്യാമറ, 50 മെഗാപിക്സൽ ടെലിഫോട്ടോ ക്യാമറ, 8 മെഗാപിക്സൽ അൾട്രാ വൈഡ് ക്യാമറ എന്നിവയാണ് കെ100 പ്രോയിലെ പിൻ ക്യാമറകൾ. 32 മെഗാപിക്സൽ മുൻ ക്യാമറയും 10 സെന്റിമീറ്റർ ദൂരത്തിൽ നിന്നുള്ള ക്ലോസ്–അപ്പ് ചിത്രങ്ങൾക്കായി ടെലിഫോട്ടോ മാക്രോ ലെൻസും ഫോണിലുണ്ട്.

8,580 എംഎഎച്ച് ബാറ്ററി

കെ100 പ്രോയിൽ 8,580 എംഎഎച്ച് ബാറ്ററിയാണ് നൽകിയിരിക്കുന്നത്. 100 വാട്ട് വയേർഡ് ചാർജിങ്ങും 50 വാട്ട് വയർലെസ് ചാർജിങ്ങും ഈ മോഡലിലും ലഭിക്കും. ഇരുഫോണുകൾക്കും ഐപി66, ഐപി68, ഐപി69 പൊടി–ജല പ്രതിരോധ സർട്ടിഫിക്കേഷനുകളുണ്ട്. ആൻഡ്രോയിഡ് 16 അടിസ്ഥാനമാക്കിയുള്ള ഹൈപ്പർഒഎസ് 3.0 ആണ് ഫോണുകളിൽ മുൻകൂട്ടി ഇൻസ്റ്റാൾ ചെയ്തിരിക്കുന്നത്.

വില എത്ര?

ചൈനയിൽ റെഡ്‍മി കെ100 പ്രോയുടെ അടിസ്ഥാന വില 3,699 ചൈനീസ് യുവാനാണ്. ഏകദേശം 52,400 രൂപ വരും. 12 ജിബി റാമും 256 ജിബി സ്റ്റോറേജുമുള്ള കെ100 പ്രോ മാക്സിന്റെ വില 4,499 ചൈനീസ് യുവാനാണ്. ഏകദേശം 63,700 രൂപ വരും. ഇന്ത്യൻ വിപണിയിലെ വിലയും ലഭ്യതയും സംബന്ധിച്ച് റെഡ്മി ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല.

മോട്ടറോള ഫോൺ ഉപയോഗിക്കുന്നവരാണോ? കിടിലൻ വാർത്ത; ഈ 50ൽ അധികം ഫോണുകളിലേക്ക് ആൻഡ്രോയിഡ് 17 എത്തുന്നു!

Prashobh Prasannan — Thu, 13 Aug 2026 13:31:53 +0530

മോട്ടറോള സ്‍മാർട്ട്ഫോൺ ഉപയോക്താക്കൾക്ക് സന്തോഷവാർത്ത. നിലവിലെതും അടുത്തിടെ പുറത്തിറങ്ങിയതുമായ 50-ലേറെ സ്മാർട്ട്ഫോൺ മോഡലുകളിലേക്ക് ആൻഡ്രോയിഡ് 17 അപ്ഡേറ്റ് എത്തിക്കാനുള്ള നടപടികൾ കമ്പനി ആരംഭിച്ചു. മോട്ടറോള എഡ്ജ് 2025-ലേക്ക് സ്ഥിരതയുള്ള അപ്ഡേറ്റ് ലഭിച്ചുതുടങ്ങിയതായാണ് റിപ്പോർട്ടുകൾ. പുതിയ റേസർ, എഡ്‍ജ് മോഡലുകൾക്കാണ് അപ്ഡേറ്റിൽ മുൻഗണന ലഭിക്കുക. മറ്റ് യോഗ്യമായ മോഡലുകളിലേക്കും വരും ആഴ്ചകളിലും മാസങ്ങളിലുമായി ഘട്ടംഘട്ടമായി ആൻഡ്രോയിഡ് 17 എത്തും.

ആൻഡ്രോയിഡ് 17 ലഭിക്കുന്ന മോട്ടറോള ഫോണുകൾ

ലെനോവോയുടെ ബ്ലോഗ് പോസ്റ്റിൽ നൽകിയ വിവരങ്ങൾ പ്രകാരം 2024, 2025, 2026 വർഷങ്ങളിൽ പുറത്തിറങ്ങിയ നിരവധി മോട്ടറോള മോഡലുകൾ ആൻഡ്രോയിഡ് 17 അപ്ഡേറ്റിന് അർഹമാണ്.

റേസർ സീരീസ്

മോട്ടറോള സിഗ്നേച്ചർ, റേസർ 70 അൾട്രാ, റേസർ 70 പ്ലസ്, റേസർ 70, റേസർ അൾട്രാ 2026, റേസർ പ്ലസ് 2026, റേസർ 2026, റേസർ ഫോൾഡ് 2026, റേസർ ഫോൾഡ് 2025, റേസർ 60 അൾട്രാ, റേസർ 60എസ്, റേസർ 60ഡി, റേസർ 60, റേസർ അൾട്രാ 2025, റേസർ പ്ലസ് 2025, റേസർ 2025, റേസർ 50 അൾട്രാ, റേസർ പ്ലസ് 2024 എന്നിവയ്ക്ക് അപ്ഡേറ്റ് ലഭിക്കും.

എഡ്‍ജ് സീരീസ്

എഡ്‍ജ് 2026, എഡ്‍ജ് 70 പ്രോ പ്ലസ്, എഡ്‍ജ് 70 പ്രോ, എഡ്‍ജ് 70 മാക്സ്, എഡ്‍ജ് 70 നിയോ, എഡ്‍ജ് 70 പ്ലസ്, എഡ്‍ജ് 70 ഫ്യൂഷൻ പ്ലസ്, എഡ്‍ജ് 70 ഫ്യൂഷൻ, എഡ്‍ജ് 70, എഡ്‍ജ് 2025, എഡ്‍ജ് 60 സ്റ്റൈലസ്, എഡ്‍ജ് 60 പ്രോ, എഡ്‍ജ് 60 ഫ്യൂഷൻ, എഡ്‍ജ് 60, എഡ്‍ജ് 50 അൾട്രാ എന്നീ മോഡലുകൾ പട്ടികയിലുണ്ട്.

മോട്ടോ ജി സീരീസ്

മോട്ടോ ജി സ്റ്റൈലസ് 2026, ജി പവർ 2026, ജി പ്ലേ 2026, ജി 2026, ജി 2025, ജി പവർ 2025, ജി സ്റ്റൈലസ് 2025, ജി മാക്സ്, ജി87, ജി86, ജി86 പവർ, ജി77, ജി77 പവർ, ജി67, ജി57, ജി57 പവർ, ജി47, ജി37, ജി37 പവർ എന്നിവയ്ക്കും ആൻഡ്രോയിഡ് 17 ലഭിക്കും.

ഘട്ടംഘട്ടമായി അപ്ഡേറ്റ്

പട്ടികയിൽ ഉൾപ്പെട്ട എല്ലാ ഫോണുകളിലും ഒരേസമയം അപ്ഡേറ്റ് ലഭിക്കില്ല. മോട്ടറോള എഡ്ജ് 2025-ൽ സ്ഥിരതയുള്ള ആൻഡ്രോയിഡ് 17 അപ്ഡേറ്റ് ഇതിനകം ലഭിച്ചുതുടങ്ങിയിട്ടുണ്ട്. മറ്റ് മോഡലുകളിലേക്ക് വരും ആഴ്ചകളിൽ ഘട്ടംഘട്ടമായാണ് അപ്ഡേറ്റ് എത്തുക. അതിനാൽ പട്ടികയിൽ ഫോൺ ഉൾപ്പെട്ടിട്ടുണ്ടെന്നത് ഉടൻ തന്നെ അപ്ഡേറ്റ് ലഭിക്കുമെന്നതിന് ഉറപ്പല്ല. ഫോൺ മോഡൽ, വിപണി, കാരിയർ തുടങ്ങിയവ അനുസരിച്ച് അപ്ഡേറ്റ് ലഭിക്കുന്ന സമയത്തിൽ വ്യത്യാസമുണ്ടാകാം.

എന്തൊക്കെയാണ് പുതിയ മാറ്റങ്ങൾ?

ആൻഡ്രോയിഡ് 17-ൽ മൾട്ടിടാസ്‍കിംങ്, വിൻഡോ മാനേജ്മെന്റ്, വലിയ സ്ക്രീനുകൾക്കുള്ള പിന്തുണ എന്നിവയിൽ മെച്ചപ്പെടുത്തലുകൾ പ്രതീക്ഷിക്കുന്നു. മോട്ടറോളയുടെ റേസർ ഫോൾഡബിൾ ഫോണുകളിൽ ഈ മാറ്റങ്ങൾ കൂടുതൽ പ്രയോജനപ്പെടുമെന്നാണ് വിലയിരുത്തൽ. ഒരേസമയം ഒന്നിലധികം ആപ്പുകൾ ഉപയോഗിക്കുന്നതിനും വലിയ ഡിസ്പ്ലേയുടെ സാധ്യതകൾ കൂടുതൽ പ്രയോജനപ്പെടുത്തുന്നതിനും പുതിയ സോഫ്റ്റ്‌വെയർ മാറ്റങ്ങൾ സഹായിച്ചേക്കും.

എങ്ങനെ അപ്ഡേറ്റ് പരിശോധിക്കാം?

ഫോണിൽ ആൻഡ്രോയിഡ് 17 അപ്ഡേറ്റ് ലഭിച്ചിട്ടുണ്ടോയെന്ന് പരിശോധിക്കാൻ ക്രമീകരണങ്ങൾ > സിസ്റ്റം > സിസ്റ്റം അപ്ഡേറ്റുകൾ എന്ന വിഭാഗത്തിലേക്ക് പോകുക. അപ്ഡേറ്റ് ഇൻസ്റ്റാൾ ചെയ്യുന്നതിന് മുമ്പ് ഫോൺ മതിയായ രീതിയിൽ ചാർജ് ചെയ്തിട്ടുണ്ടെന്ന് ഉറപ്പാക്കാനും വൈഫൈ ഉപയോഗിക്കാനും പ്രധാനപ്പെട്ട വിവരങ്ങൾ ബാക്കപ്പ് ചെയ്യാനും മോട്ടറോള നിർദേശിക്കുന്നു.