Asianet News Malayalam

'മരിച്ച' നക്ഷത്രത്തിന് ചുറ്റും 'സോംബി ഗ്രഹങ്ങൾ'; സൗരയൂഥത്തിന്‍റെ ഭാവിയെക്കുറിച്ച് ഭീതിപ്പെടുത്തുന്ന മുന്നറിയിപ്പുമായി ശാസ്ത്രജ്ഞർ

Prashobh Prasannan — Fri, 30 Oct 2026 09:41:42 +0530

ഭൂമിയിൽനിന്ന് 1,600 പ്രകാശവർഷം അകലെയുള്ള പ്രവർത്തനം നിലച്ച ഒരു വെള്ളക്കുള്ളൻ നക്ഷത്രത്തിന് (White Dwarf) ചുറ്റും രണ്ട് ഗ്രഹങ്ങളുടെ അവശിഷ്‍ടങ്ങൾ കണ്ടെത്തി. നക്ഷത്രത്തിന്റെ മരണം അതിജീവിച്ച ഈ ഗ്രഹാവശിഷ്‍ടങ്ങൾ നമ്മുടെ സൗരയൂഥത്തിന്റെ ഭാവിയെക്കുറിച്ചും നിർണായക സൂചനകൾ നൽകുന്നതായി ഗവേഷകർ പറയുന്നു. ഇറ്റലിയിലെ ട്രിയസ്റ്റെ സർവകലാശാലയിലെ ജ്യോതിശാസ്ത്രജ്ഞനായ നിക്കോള ജെന്റിലെ ഫുസില്ലോയുടെ നേതൃത്വത്തിലുള്ള സംഘം നടത്തിയ പഠനത്തിലാണ് പുതിയ കണ്ടെത്തൽ എന്ന് സ്‍പേസ് ഡോട്ട് കോം റിപ്പോർട്ട് ചെയ്യുന്നു. സൂര്യന്റെ ആയുസ് അവസാനിക്കുമ്പോൾ ഭൂമിക്കും മറ്റ് ഗ്രഹങ്ങൾക്കും എന്ത് സംഭവിക്കുമെന്നതിലേക്കാണ് ഈ കണ്ടെത്തൽ വിരൽചൂണ്ടുന്നത്. ഈ ഗവേഷണഫലം 'നേച്ചർ അസ്ട്രോണമി' എന്ന ശാസ്ത്ര ജേണലിൽ പ്രസിദ്ധീകരിച്ചു.

മരിച്ച നക്ഷത്രത്തിന് ചുറ്റും രണ്ട് 'സോംബി ഗ്രഹങ്ങൾ'

ജെ 1328−1450 എന്നറിയപ്പെടുന്ന വെള്ളക്കുള്ളൻ നക്ഷത്രത്തിന് ചുറ്റുമാണ് വിചിത്രമായ ഗ്രഹാവശിഷ്ടങ്ങൾ കണ്ടെത്തിയത്. നക്ഷത്രത്തിന് ചുറ്റുമുള്ള പൊടിയുടെയും അവശിഷ്ടങ്ങളുടെയും വലയത്തിൽ വ്യക്തമായ വിടവ് കണ്ടെത്തിയതോടെയാണ് രണ്ട് ഗ്രഹങ്ങളുടെ സാന്നിധ്യത്തെക്കുറിച്ചുള്ള സൂചന ലഭിച്ചത്. ഇവയിൽ ഒരു ഗ്രഹാവശിഷ്ടത്തിന് നമ്മുടെ സൗരയൂഥത്തിലെ ഒരു സാധാരണ ഛിന്നഗ്രഹത്തിന്റെ വലുപ്പം മാത്രമാണെന്നാണ് കണക്കാക്കുന്നത്. മറ്റൊന്നിന് ചന്ദ്രനും കുള്ളൻ ഗ്രഹമായ പ്ലൂട്ടോയ്ക്കും ഇടയിലുള്ള വലുപ്പമുണ്ടാകാമെന്നും ഗവേഷകർ വിലയിരുത്തുന്നു. നക്ഷത്രത്തിന്റെ മരണത്തിന് ശേഷവും ഗ്രഹാവശിഷ്ടങ്ങൾ നിലനിൽക്കുന്നതാണ് ഈ കണ്ടെത്തലിന്റെ പ്രത്യേകത. ഇത്തരത്തിലുള്ള ഗ്രഹങ്ങളെ വിശേഷിപ്പിക്കാൻ 'സോംബി ഗ്രഹങ്ങൾ' എന്ന പ്രയോഗമാണ് ഉപയോഗിക്കുന്നത്.

സൂര്യനും ഒരുനാൾ വെള്ളക്കുള്ളനാകും

സൂര്യനെപ്പോലെയുള്ള നക്ഷത്രങ്ങളുടെ കേന്ദ്രത്തിലെ ഹൈഡ്രജൻ ഇന്ധനം തീരുന്നതോടെയാണ് അവയുടെ ജീവിതചക്രത്തിലെ അവസാനഘട്ടം ആരംഭിക്കുന്നത്. ഹൈഡ്രജനെ ഹീലിയമാക്കി മാറ്റുന്ന അണുസംയോജന പ്രക്രിയ നിലയ്ക്കുന്നതോടെ നക്ഷത്രത്തിന്റെ ഉള്ളിലേക്ക് ഗുരുത്വാകർഷണം ചെലുത്തുന്ന സമ്മർദം വർധിക്കുന്നു. തുടർന്ന് നക്ഷത്രത്തിന്റെ കേന്ദ്രഭാഗം ചുരുങ്ങുകയും പുറംപാളികൾ വികസിക്കുകയും ചെയ്യും. ഈ ഘട്ടത്തെയാണ് റെഡ് ജയന്‍റ് അഥവാ ചുവന്ന ഭീമൻഅവസ്ഥ എന്ന് വിളിക്കുന്നത്. ഈ സമയത്ത് നക്ഷത്രത്തിന്റെ വലുപ്പം നൂറുകണക്കിന് മടങ്ങ് വർധിക്കാം. ഏകദേശം അഞ്ച് ബില്യൺ വർഷങ്ങൾക്ക് ശേഷം സൂര്യനും ഈ അവസ്ഥയിലെത്തുമെന്നാണ് ശാസ്ത്രലോകത്തിന്റെ വിലയിരുത്തൽ. അന്ന് സൂര്യൻ വികസിച്ച് ഭൂമിയുൾപ്പെടെയുള്ള ആന്തരിക ഗ്രഹങ്ങളെ വിഴുങ്ങിയേക്കാം.

ഗ്രഹങ്ങളുടെ അവശിഷ്‍ടങ്ങൾ നക്ഷത്രത്തിന് ചുറ്റും

ചുവന്ന ഭീമൻ ഘട്ടം അവസാനിക്കുമ്പോൾ നക്ഷത്രത്തിന്റെ പുറംപാളികൾ ബഹിരാകാശത്തേക്ക് വ്യാപിക്കുകയും കേന്ദ്രഭാഗം വെള്ളക്കുള്ളൻ നക്ഷത്രമായി മാറുകയും ചെയ്യും. ഈ പ്രക്രിയയിൽ നശിച്ചുപോകുന്ന ഗ്രഹങ്ങളുടെ അവശിഷ്ടങ്ങളും നക്ഷത്രത്തിന് ചുറ്റും പൊടിയുടെയും പാറക്കഷണങ്ങളുടെയും രൂപത്തിൽ അവശേഷിക്കാം. എന്നാൽ എല്ലാ ഗ്രഹങ്ങളും പൂർണമായി നശിക്കണമെന്നില്ലെന്നാണ് പുതിയ കണ്ടെത്തൽ വ്യക്തമാക്കുന്നത്. ഇരട്ട അവശിഷ്ട വലയങ്ങളും അതിജീവിച്ചിരിക്കാവുന്ന രണ്ട് ഗ്രഹശകലങ്ങളും ഒരുമിച്ച് കണ്ടെത്തുന്നത് ഇതാദ്യമാണെന്ന് പഠനത്തിന് നേതൃത്വം നൽകിയ ഗവേഷകനായ നിക്കോള ജെന്റിലെ ഫുസില്ലോ വ്യക്തമാക്കി.

ഗ്രഹങ്ങളുടെ രാസഘടനയിലും നിർണായക സൂചനകൾ

യൂറോപ്യൻ ദക്ഷിണ നിരീക്ഷണകേന്ദ്രത്തിന്റെ അതിവലിയ ദൂരദർശിനി ഉപയോഗിച്ചുള്ള നിരീക്ഷണത്തിലാണ് വെള്ളക്കുള്ളൻ നക്ഷത്രത്തിന് ചുറ്റുമുള്ള അവശിഷ്‍ടങ്ങളിൽ കാൽസ്യം, ഓക്സിജൻ, മഗ്നീഷ്യം, ഇരുമ്പ് തുടങ്ങിയ മൂലകങ്ങൾ കണ്ടെത്തിയത്. ഇത് നശിച്ചുപോയ ഗ്രഹങ്ങൾക്ക് നമ്മുടെ സൗരയൂഥത്തിലെ ആന്തരിക പാറഗ്രഹങ്ങളുടേതിന് സമാനമായ ഘടനയുണ്ടായിരുന്നുവെന്ന് സൂചിപ്പിക്കുന്നു. കൂടാതെ അകത്തെയും പുറത്തെയും അവശിഷ്‍ട വലയങ്ങളിലെ രാസഘടന വ്യത്യസ്‍തമാണെന്നും ഗവേഷകർ കണ്ടെത്തി. കുറഞ്ഞത് രണ്ട് ഗ്രഹങ്ങൾ വ്യത്യസ്‍ത ഘടനയുള്ളവയായിരുന്നുവെന്ന സൂചനയാണിത്.

ഭൂമിയുടെ ഭാവിയെക്കുറിച്ചും മുന്നറിയിപ്പ്

വെള്ളക്കുള്ളൻ നക്ഷത്രങ്ങൾക്ക് ചുറ്റുമുള്ള അവശിഷ്ടങ്ങൾ സാധാരണയായി ഒരൊറ്റ പരന്ന വലയമായാണ് കാണപ്പെടാറുള്ളത്. എന്നാൽ ജെ 1328−1450ന് ചുറ്റും വ്യക്തമായ വിടവോടെ രണ്ട് വലയങ്ങൾ കണ്ടെത്തിയത് ഈ സംവിധാനത്തെ വ്യത്യസ്തമാക്കുന്നു. നക്ഷത്രങ്ങളുടെ മരണം ഗ്രഹവ്യവസ്ഥകളെ എത്രത്തോളം സങ്കീർണമാക്കുമെന്ന് മനസിലാക്കാൻ ഈ കണ്ടെത്തൽ സഹായിക്കുമെന്ന് ഗവേഷകർ പറയുന്നു. നമ്മുടെ സൗരയൂഥത്തിനും ഭാവിയിൽ സമാനമായ അവസ്ഥയുണ്ടാകാമെന്ന സൂചനയും ഇതിലുണ്ട്.

ചരിത്രമെഴുതി സ്‌പേസ് എക്‌സ്; സ്റ്റാർഷിപ്പ് തിരിച്ചിറക്കം വിജയം, ബഹിരാകാശ ദൗത്യം നീണ്ടത് 22 മണിക്കൂറിലധികം

Web Desk — Sun, 15 Nov 2026 07:59:02 +0530

സ്‌പേസ് എക്‌സിന്റെ സ്റ്റാർഷിപ്പ് വിജയകരമായി തിരിച്ചിറങ്ങി ചരിത്രം സൃഷ്ടിച്ചു. 22 മണിക്കൂർ നീണ്ട ദൗത്യത്തിന് ശേഷം റോക്കറ്റ് ലോഞ്ച് പാഡിൽ സുരക്ഷിതമായി തിരിച്ചെത്തി. പൂർണ്ണ പുനരുപയോഗ റോക്കറ്റ് എന്ന ലക്ഷ്യത്തിലേക്ക് കൂടുതൽ അടുക്കുകയാണ് സ്‌പേസ് എക്‌സ്.

ഐഫോണും സാംസങ്ങ് ഫോണുകളും കുറഞ്ഞ വിലയിൽ? ആമസോൺ ഓഫറുകൾ അറിയാം

Prashobh Prasannan — Wed, 04 Nov 2026 11:38:58 +0530

പ്രീമിയം സ്‍മാർട്ട്‌ഫോണുകൾ വാങ്ങാൻ ആഗ്രഹിക്കുന്നവർക്ക് സന്തോഷവാർത്ത. ആമസോണിന്റെ ദീപാവലി വിൽപ്പനയിൽ ഐഫോൺ 16, സാംസങ് ഗാലക്‌സി എസ്25 അൾട്ര, ഫോൾഡബിൾ ഫോണുകൾ തുടങ്ങി നിരവധി മോഡലുകൾക്ക് വൻ വിലക്കുറവ്. ബാങ്ക് ഓഫറുകൾ കൂടി പ്രയോജനപ്പെടുത്തിയാൽ ഐഫോൺ 16ന്റെ വില 70,000 രൂപയിൽ താഴെയെത്തും. ഗാലക്‌സി എസ്25 അൾട്ര 87,000 രൂപയിൽ താഴെയും സ്വന്തമാക്കാം. വൺപ്ലസ്, ഓപ്പോ, ഐക്യൂഒഒ തുടങ്ങിയ ബ്രാൻഡുകളുടെ ഫോണുകൾക്കും പ്രത്യേക ഓഫറുകളുണ്ട്.

ഐഫോൺ 16ന് 69,999 രൂപയ്ക്ക് സ്വന്തമാക്കാം

ആപ്പിളിന്റെ ഐഫോൺ 16 വാങ്ങാൻ ആഗ്രഹിക്കുന്നവർക്ക് മികച്ച അവസരമാണ് ആമസോൺ ഒരുക്കിയിരിക്കുന്നത്. 89,900 രൂപയായിരുന്നു ഫോണിന്റെ യഥാർഥ വില. നിലവിൽ 76,999 രൂപയ്ക്കാണ് ആമസോണിൽ ലിസ്റ്റ് ചെയ്തിരിക്കുന്നത്. ഇതിന് പുറമെ എച്ച്ഡിഎഫ്‌സി ബാങ്ക് ക്രെഡിറ്റ് കാർഡ് ഉപയോഗിച്ച് പണമടയ്ക്കുന്നവർക്ക് 7,000 രൂപയുടെ അധിക ഇളവും ലഭിക്കും. ഇതോടെ ഫലത്തിൽ ഫോണിന്റെ വില 69,999 രൂപയായി കുറയും. യഥാർഥ വിലയുമായി താരതമ്യം ചെയ്യുമ്പോൾ 19,901 രൂപയുടെ ലാഭമാണ് ലഭിക്കുന്നത്.

ഗാലക്‌സി എസ്25 അൾട്രയ്ക്ക് 43,000 രൂപയുടെ ലാഭം

സാംസങിന്റെ പ്രീമിയം ഫോണായ ഗാലക്‌സി എസ്25 അൾട്രയ്ക്കും ആമസോണിൽ വൻ വിലക്കുറവുണ്ട്. ഇന്ത്യയിൽ 1,29,999 രൂപയ്ക്ക് അവതരിപ്പിച്ച ഫോൺ നിലവിൽ 94,999 രൂപയ്ക്കാണ് ലഭിക്കുന്നത്. ഏതെങ്കിലും ബാങ്കിന്റെ ക്രെഡിറ്റ് കാർഡ് ഉപയോഗിക്കുന്നവർക്ക് 8,000 രൂപയുടെ അധിക ഇളവും ലഭിക്കും. ഇതോടെ ഫലത്തിൽ വില 86,999 രൂപയായി കുറയും. ലോഞ്ച് വിലയുമായി താരതമ്യം ചെയ്യുമ്പോൾ 43,000 രൂപയുടെ ലാഭമാണ് ലഭിക്കുക. ഫോൾഡബിൾ ഫോൺ വാങ്ങാൻ താൽപ്പര്യമുള്ളവർക്ക് സാംസങ് ഗാലക്‌സി ഇസഡ് ഫോൾഡ് 7 പരിഗണിക്കാം. 1,74,999 രൂപയ്ക്ക് വിപണിയിലെത്തിയ ഈ ഫോൺ ഇപ്പോൾ 1,28,999 രൂപയ്ക്കാണ് ആമസോണിൽ ലിസ്റ്റ് ചെയ്തിരിക്കുന്നത്. അതായത് 46,000 രൂപയുടെ കുറവ്.

വൺപ്ലസ്, ഓപ്പോ ഫോണുകൾക്കും ഓഫർ

പ്രീമിയം വിഭാഗത്തിൽ ഓപ്പോ ഫൈൻഡ് എക്സ്10 5ജി ഫോണിനും ഓഫറുണ്ട്. 1,39,999 രൂപയാണ് യഥാർഥ വില. ആമസോണിൽ ലഭിക്കുന്ന 8,000 രൂപയുടെ കൂപ്പൺ ഇളവ് ഉപയോഗിച്ചാൽ വില കുറയും. പണമടയ്ക്കുന്ന സമയത്ത് കൂപ്പൺ പ്രത്യേകം തിരഞ്ഞെടുക്കേണ്ടതുണ്ട്. വൺപ്ലസ് 15ആർ (16 ജിബി റാം, 512 ജിബി സ്റ്റോറേജ്) 63,999 രൂപയ്ക്കാണ് ലിസ്റ്റ് ചെയ്തിരിക്കുന്നത്. ഇതിന് പുറമെ 2,000 രൂപയുടെ കൂപ്പൺ ഇളവും ലഭ്യമാണ്. വൺപ്ലസ് നോർഡ് സിഇ6 ലൈറ്റ് (8 ജിബി റാം, 128 ജിബി സ്റ്റോറേജ്) 26,499 രൂപയ്ക്കും സ്വന്തമാക്കാം. ഫോണിന്റെ ഔദ്യോഗിക വില 27,499 രൂപയാണ്.

ഐക്യൂഒഒ, റെഡ്‍മി ഫോണുകൾക്കും വിലക്കുറവ്

ഐക്യൂഒഒ ഇസഡ്11 (8 ജിബി റാം, 128 ജിബി സ്റ്റോറേജ്) 39,999 രൂപയ്ക്കാണ് വിൽപ്പനയ്ക്കുള്ളത്. ഇതിന് പുറമെ 4,000 രൂപയുടെ കൂപ്പൺ ഇളവും ആമസോൺ നൽകുന്നുണ്ട്. ബജറ്റ് ഫോണുകൾ വാങ്ങാൻ ആഗ്രഹിക്കുന്നവർക്ക് റെഡ്‍മി 15സി 5ജി പ്രൈം (4 ജിബി റാം, 128 ജിബി സ്റ്റോറേജ്) 15,999 രൂപയ്ക്ക് ലഭിക്കും.

ഓഫറുകൾ ഉടൻ അവസാനിക്കും

ആമസോണിന്റെ വിൽപ്പന പേജ് പ്രകാരം ദീപാവലി ഓഫറുകൾ ഉടൻ അവസാനിക്കും. എന്നാൽ വിൽപ്പന അവസാനിക്കുന്ന കൃത്യമായ തീയതി കമ്പനി വ്യക്തമാക്കിയിട്ടില്ല. ബാങ്ക് ഓഫറുകളും കൂപ്പൺ ഇളവുകളും എല്ലാവർക്കും ഒരുപോലെ ലഭിക്കണമെന്നില്ല. അതിനാൽ ഓർഡർ നൽകുന്നതിന് മുമ്പ് പണമടയ്ക്കുന്ന ഘട്ടത്തിലെ അന്തിമ വിലയും ഓഫറുകളുടെ നിബന്ധനകളും പരിശോധിക്കണം. പുതിയ ഫോൺ വാങ്ങാൻ ആലോചിക്കുന്നവർക്ക് നിലവിലെ ഓഫറുകൾ പ്രയോജനപ്പെടുത്താനുള്ള അവസരമാണിത്. വിൽപ്പന അവസാനിക്കുന്നതിന് മുമ്പ് ഇഷ്‍ടപ്പെട്ട മോഡലുകളുടെ വിലയും ലഭ്യമായ ഇളവുകളും താരതമ്യം ചെയ്യുന്നത് ഗുണകരമാകും.

എഐ ഉപയോഗം പ്രോത്സാഹിപ്പിക്കും, പക്ഷേ ചെലവ് കുറയ്ക്കും! ജീവനക്കാരുടെ എഐ ബജറ്റ് വെട്ടിക്കുറയ്ക്കാനൊരുങ്ങി ആപ്പിള്‍

Sangeetha KS — Sat, 07 Nov 2026 13:03:49 +0530

എല്ലാ ജീവനക്കാരും എഐ കൂടുതല്‍ ഉപയോഗിക്കണമെന്ന് പറയുന്നതിനിടെ, എഐ സേവനങ്ങള്‍ക്കായി ജീവനക്കാര്‍ക്ക് അനുവദിക്കുന്ന തുക വെട്ടിക്കുറയ്ക്കാനൊരുങ്ങി ആപ്പിള്‍. ചെലവ് നിയന്ത്രിക്കുന്നതിന്റെ ഭാഗമായാണ് കമ്പനിയുടെ പുതിയ നീക്കം. മൈക്രോസോഫ്റ്റ്, ടെസ്ല, ഊബര്‍ തുടങ്ങിയ പ്രമുഖ ടെക് കമ്പനികളും എഐ ഉപയോഗം വ്യാപകമാക്കാന്‍ ശ്രമിക്കുന്നതിനൊപ്പം ജീവനക്കാരുടെ എഐ ചെലവുകള്‍ നിയന്ത്രിക്കുന്ന നടപടികളിലേക്ക് നീങ്ങുകയാണ്. തുടക്കത്തില്‍ എഐ ഉപകരണങ്ങള്‍ പരീക്ഷിക്കാനും ജോലികളില്‍ കൂടുതല്‍ ഉപയോഗിക്കാനും ജീവനക്കാരെ പ്രോത്സാഹിപ്പിച്ചിരുന്ന ടെക് കമ്പനികള്‍ ഇപ്പോള്‍ അതിനുള്ള ചെലവ് കൂടുതല്‍ സൂക്ഷ്മമായി പരിശോധിക്കുകയാണ്. എഐ സാങ്കേതികവിദ്യ വ്യാപകമായി ഉപയോഗിക്കുമ്പോള്‍ ഉണ്ടാകുന്ന സാമ്പത്തിക ബാധ്യതയാണ് ഇതിന് പ്രധാന കാരണം.

ഈ നീക്കത്തില്‍ ഏറ്റവും ഒടുവില്‍ എത്തിയിരിക്കുന്നത് ആപ്പിളാണ്. പ്രവര്‍ത്തനച്ചെലവ് കുറയ്ക്കാനുള്ള വിപുലമായ പദ്ധതികളുടെ ഭാഗമായി ജീവനക്കാര്‍ക്ക് എഐ ഉപയോഗിക്കാനായി അനുവദിക്കുന്ന തുകയില്‍ നിയന്ത്രണം ഏര്‍പ്പെടുത്താനാണ് കമ്പനിയുടെ നീക്കമെന്ന് ബ്ലൂംബെര്‍ഗ് റിപ്പോര്‍ട്ട് ചെയ്തു. അതേസമയം, കമ്പനിയുടെ പ്രവര്‍ത്തനങ്ങളില്‍ എഐയ്ക്ക് കൂടുതല്‍ പ്രാധാന്യം നല്‍കാനുള്ള ശ്രമങ്ങളും ആപ്പിള്‍ തുടരുന്നുണ്ട്.

എന്‍ജിനീയറിങ് വിഭാഗത്തിലെ പ്രവര്‍ത്തനങ്ങളും കമ്പനിയുടെ ആഭ്യന്തര സംവിധാനങ്ങളും എഐ ഉപയോഗിച്ച് കൂടുതല്‍ ആധുനികമാക്കാനാണ് ആപ്പിളിന്റെ ശ്രമം. എന്നാല്‍ എഐ സേവനങ്ങള്‍ ഉപയോഗിക്കുന്നതിന് ജീവനക്കാര്‍ ചെലവഴിക്കുന്ന തുക നിയന്ത്രിക്കാനും കമ്പനി ലക്ഷ്യമിടുന്നു. നിലവില്‍ ചില വിഭാഗങ്ങളിലെ ജീവനക്കാര്‍ക്ക് പ്രതിദിനം പരമാവധി 100 ഡോളര്‍ വരെ എഐ സേവനങ്ങള്‍ക്കായി ചെലവഴിക്കാം. എന്നാല്‍ ഈ പരിധി ചില ടീമുകള്‍ക്ക് 25 ഡോളറായി കുറയ്ക്കുന്ന കാര്യം കമ്പനി പരിഗണിക്കുന്നതായാണ് റിപ്പോര്‍ട്ട്. കൂടുതല്‍ തുക ആവശ്യമായ ജീവനക്കാര്‍ക്ക് പ്രത്യേക അനുമതി തേടേണ്ടിവരും. എന്‍ജിനീയറിങ് ടീമുകളിലാണ് ഇപ്പോള്‍ പുതിയ നിയന്ത്രണങ്ങള്‍ പരിഗണിക്കുന്നത്. മറ്റ് ചില വിഭാഗങ്ങളില്‍ ഇത്തരം നിയന്ത്രണങ്ങള്‍ നേരത്തേ തന്നെ നിലവിലുണ്ട്.

ഓപ്പണ്‍എഐയുടെ ചാറ്റ്ജിപിടി, ഗൂഗിളിന്റെ ജെമിനി, ആന്ത്രോപിക്കിന്റെ ക്ലോഡ് തുടങ്ങിയ വിവിധ എഐ മോഡലുകള്‍ ഉപയോഗിക്കാന്‍ ആപ്പിള്‍ ജീവനക്കാര്‍ക്ക് സൗകര്യമുണ്ട്. ജീവനക്കാരുടെ എഐ ഉപയോഗത്തിനുള്ള ചെലവ് നിയന്ത്രിക്കുന്ന ആദ്യ ടെക് കമ്പനിയല്ല ആപ്പിള്‍. മൈക്രോസോഫ്റ്റും ആഭ്യന്തര എഐ ഉപയോഗത്തിനുള്ള ചെലവ് പരിധി കുറച്ചിട്ടുണ്ട്. ഇലോണ്‍ മസ്‌കിന്റെ ടെസ്ലയില്‍ എഐ ഉപകരണങ്ങള്‍ ഉപയോഗിക്കുന്ന ജീവനക്കാര്‍ക്ക് ആഴ്ചയില്‍ പരമാവധി 200 ഡോളര്‍ ചെലവഴിക്കാനാണ് അനുമതി. ഊബര്‍ ടെക്‌നോളജീസ് വ്യക്തിഗത എഐ കോഡിങ് ഉപകരണങ്ങളുടെ ചെലവ് പ്രതിമാസം 1,500 ഡോളറായി പരിമിതപ്പെടുത്തിയിട്ടുണ്ട്. അതേസമയം, മെറ്റ പ്ലാറ്റ്ഫോംസ് ജീവനക്കാര്‍ പുറത്തുനിന്നുള്ള എഐ സേവനങ്ങള്‍ക്കുപകരം കമ്പനി സ്വന്തമായി വികസിപ്പിച്ച എഐ ഉപകരണങ്ങള്‍ ഉപയോഗിക്കണമെന്ന് പ്രോത്സാഹിപ്പിക്കുന്നുണ്ട്.

ചരിത്രമെഴുതി സ്‌പേസ് എക്‌സ്; സ്റ്റാർഷിപ്പ് തിരിച്ചിറക്കം വിജയം, ബഹിരാകാശ ദൗത്യം നീണ്ടത് 22 മണിക്കൂറിലധികം

Sreekutty Chandran — Sun, 15 Nov 2026 08:03:48 +0530

ചരിത്രമെഴുതി സ്‌പേസ് എക്‌സ്. സ്റ്റാർഷിപ്പ് തിരിച്ചിറക്കം വിജയം. റോക്കറ്റ് ലോഞ്ച് പാഡിൽ തിരിച്ചെത്തി. കൂറ്റൻ യന്ത്ര കൈകൾ റോക്കറ്റിനെ പിടിച്ചെടുത്തു. ബഹിരാകാശ ദൗത്യം നീണ്ടത് 22:32 മണിക്കൂർ ആണ്. ഇന്നലെ പുലർച്ചെ 4:17നായിരുന്നു വിക്ഷേപണം. ഇന്ത്യൻ സമയം 2:50ന് ആയിരുന്നു ലാൻഡിംഗ്. 14 വട്ടം ഭൂമിയെ ചുറ്റിയ ശേഷം ആണ് റോക്കറ്റ് തിരിച്ചെത്തിയത്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

സ്റ്റാർഷിപ്പിന്റെ 15ആം പരീക്ഷണം ആയിരുന്നു ഇത്. 26 സ്റ്റാർ ലിങ്ക് ഉപഗ്രഹങ്ങൾ റോക്കറ്റ് ബഹിരാകാശത്ത് എത്തിച്ചു. നിലവിൽ സമ്പൂ‍ർണ്ണ പുനരുപയോഗ റോക്കറ്റ് എന്ന ലക്ഷ്യത്തിലേക്ക് അടുത്തിരിക്കുകയാണ് സ്‌പേസ് എക്‌സ്. ഇത്തവണ ബൂസ്റ്റർ റിക്കവറി കൂടി ജയിച്ചിരുന്നു എങ്കിൽ സമ്പൂർണ ജയം സ്വന്തമായേനെ. റോക്കറ്റ് ഒന്നാം ഘട്ടം ഇന്നലെ കടലിൽ ആണ് ഇറങ്ങിയത്. സ്റ്റാ‍‌ർഷിപ്പ് തിരിച്ചിറക്കിയതിൽ സന്തോഷം പങ്കുവച്ച് എലോൺ മസ്ക്. സ്‌പേസ് എക്സിന് അഭിനന്ദന പ്രവാഹം. സയൻസ് ഫിക്ഷൻ പോലെ തോന്നി എന്ന് സുന്ദ‍ർ പിച്ചൈ.

On Friday, November 13, Starship lifted off from Starbase, Texas on its 15th flight.

On Saturday, November 14, Starship returned to Starbase, Texas, and changed everything → https://t.co/K5XRci6bnw https://t.co/smWs1qSDuZ

— SpaceX (@SpaceX) November 14, 2026

വൺപ്ലസ് 16 ഇന്ത്യയിലേക്ക്; കാത്തിരിക്കുന്നത് വൻ സർപ്രൈസ്

Prashobh Prasannan — Tue, 03 Nov 2026 10:34:17 +0530

പ്രീമിയം സ്മാർട്ട്‌ഫോൺ വിപണിയിൽ പുതിയ നീക്കത്തിനൊരുങ്ങി വൺപ്ലസ്. കമ്പനിയുടെ ഏറ്റവും പുതിയ ഫ്ലാഗ്ഷിപ്പ് മോഡലുകളായ വൺപ്ലസ് 16, വൺപ്ലസ് 16ആർ എന്നിവ ഇന്ത്യയിൽ അവതരിപ്പിച്ചേക്കുമെന്ന് റിപ്പോർട്ടുകൾ. കഴിഞ്ഞ മാസമാണ് ഫോണുകൾ ചൈനയിൽ അവതരിപ്പിച്ചത്. നേരത്തെ വൺപ്ലസ് 16ആർ മാത്രമായിരിക്കും ഇന്ത്യയിലെത്തുകയെന്ന സൂചനകളുണ്ടായിരുന്നെങ്കിലും പുതിയ റിപ്പോർട്ടുകൾ പ്രകാരം ഫ്ലാഗ്ഷിപ്പ് മോഡലായ വൺപ്ലസ് 16നും ഇന്ത്യൻ വിപണിയിൽ എത്താൻ സാധ്യതയുണ്ട്. എന്നാൽ ഫോണിന്റെ വിലയായിരിക്കും പ്രധാന ചർച്ചാവിഷയം. വൺപ്ലസിന്റെ പതിവ് വിലനിലവാരത്തിൽ നിന്ന് ഏറെ ഉയർന്ന് 1.4 ലക്ഷം രൂപ വരെ ഫ്ലാഗ്ഷിപ്പ് മോഡലിന് വിലയുണ്ടാകുമെന്നാണ് സൂചന. ഇതോടെ കൂടുതൽ ചെലവേറിയ പ്രീമിയം സ്‍മാർട്ട്‌ഫോൺ വിഭാഗത്തിലേക്ക് വൺപ്ലസ് കടക്കുമെന്നാണ് വിലയിരുത്തൽ.

വൺപ്ലസ് 16, 16ആർ ഇന്ത്യയിലെത്തുമെന്ന് സൂചന

വൺപ്ലസ് പുതിയ രണ്ട് സ്‍മാർട്ട്‌ഫോണുകളും ഇന്ത്യൻ വിപണിക്കായി വികസിപ്പിക്കുന്നുണ്ടെന്നാണ് ടിപ്‌സ്റ്റർ ദേബയൻ റോയ് (ഗാഡ്‌ജറ്റ്‌സ് ഡാറ്റ) അവകാശപ്പെടുന്നത്. വൺപ്ലസ് 16ആറിന്റെ വികസനം ഉറപ്പാണെന്നും വൺപ്ലസ് 16ന്റെ ഇന്ത്യയിലെ വരവ് ഏതാണ്ട് സ്ഥിരീകരിച്ചിട്ടുണ്ടെന്നുമാണ് അദ്ദേഹത്തിന്റെ സൂചന. ഇതോടെ ആർ സീരീസിൽ മാത്രം ഒതുങ്ങാതെ രണ്ട് മോഡലുകൾ ഒരുമിച്ച് അവതരിപ്പിക്കാൻ കമ്പനി പദ്ധതിയിടുന്നുണ്ടാകാമെന്നാണ് റിപ്പോർട്ടുകൾ.

മറ്റൊരു ടിപ്‌സ്റ്ററായ അഭിഷേക് യാദവും ഇതുസംബന്ധിച്ച സൂചനകൾ പങ്കുവെച്ചിട്ടുണ്ട്. വൺപ്ലസ് 16ന്റെ ആഗോള സോഫ്റ്റ്‌വെയർ മൂന്ന് മോഡൽ നമ്പറുകളിൽ പരീക്ഷിക്കുന്നുണ്ടെന്നാണ് അദ്ദേഹത്തിന്റെ അവകാശവാദം. സീപിഎച്ച്2901, സീപിഎച്ച്2903, സീപിഎച്ച്2905 എന്നിവയാണ് ഈ മോഡൽ നമ്പറുകൾ. ഇന്ത്യയിലും മറ്റ് ചില ഏഷ്യൻ വിപണികളിലും ഫോൺ അവതരിപ്പിച്ചേക്കുമെന്നും റിപ്പോർട്ടുകൾ ഉണ്ട്. അതേസമയം, ഇന്ത്യയിലെ ലോഞ്ച് സംബന്ധിച്ച് വൺപ്ലസ് ഔദ്യോഗിക പ്രഖ്യാപനങ്ങളൊന്നും നടത്തിയിട്ടില്ല.

വൺപ്ലസ് 16ന് വില 1.4 ലക്ഷം രൂപ വരെ?

പുതിയ ഫോണുകളുടെ വില സംബന്ധിച്ച സൂചനകളും പുറത്തുവന്നിട്ടുണ്ട്. വൺപ്ലസ് 16ആറിന് 70,000 രൂപ മുതൽ 75,000 രൂപ വരെയായിരിക്കും പ്രതീക്ഷിക്കുന്ന വില. എന്നാൽ പ്രീമിയം മോഡലായ വൺപ്ലസ് 16ന് ഇന്ത്യയിൽ 1.3 ലക്ഷം രൂപ മുതൽ 1.4 ലക്ഷം രൂപ വരെ വിലയുണ്ടാകാമെന്നാണ് റിപ്പോർട്ട്. താരതമ്യത്തിന്, വൺപ്ലസ് 15 ഇന്ത്യയിൽ അവതരിപ്പിച്ചത് 85,999 രൂപയ്ക്കായിരുന്നു. വൺപ്ലസ് 15ആറിന്റെ പ്രാരംഭ വില 47,999 രൂപയായിരുന്നു. പുതിയ മോഡലുകളുടെ വില ഈ നിരക്കുകളേക്കാൾ ഗണ്യമായി ഉയരാനാണ് സാധ്യത.

വൺപ്ലസ് 16: പ്രതീക്ഷിക്കാവുന്ന ഫീച്ചറുകൾ

ചൈനയിൽ അവതരിപ്പിച്ച വൺപ്ലസ് 16ന്റെ സവിശേഷതകൾ ഫോണിന്റെ പ്രകടനത്തെക്കുറിച്ച് വ്യക്തമായ സൂചന നൽകുന്നുണ്ട്. 5,999 ചൈനീസ് യുവാൻ ആണ് ചൈനയിലെ പ്രാരംഭ വില. ഇന്ത്യൻ രൂപയിൽ ഏകദേശം 86,000 രൂപ വരുമിത്. 6.78 ഇഞ്ച് എൽടിപിഒ ഒഎൽഇഡി ഡിസ്പ്ലേയാണ് ഫോണിലുള്ളത്. പിന്തുണയുള്ള ഗെയിമുകളിൽ 185 ഹെർട്സ് വരെ റിഫ്രഷ് റേറ്റ് ലഭിക്കും. സ്നാപ്ഡ്രാഗൺ 8 എലൈറ്റ് എക്സ്ട്രീം ജെൻ 6 പ്രോസസറാണ് മറ്റൊരു പ്രധാന സവിശേഷത. 9,000 എംഎഎച്ച് ബാറ്ററിയും 100 വാട്ട് വയർഡ് ചാർജിങ്ങും 50 വാട്ട് വയർലെസ് ചാർജിങ്ങും ഫോണിലുണ്ട്. ക്യാമറ വിഭാഗത്തിൽ 200 മെഗാപിക്സൽ പ്രൈമറി സെൻസർ, 3 മടങ്ങ് ഒപ്റ്റിക്കൽ സൂം പിന്തുണയുള്ള 50 മെഗാപിക്സൽ ടെലിഫോട്ടോ ക്യാമറ, 50 മെഗാപിക്സൽ അൾട്രാ വൈഡ് ക്യാമറ എന്നിവയും ഉൾപ്പെടുന്നു.

വൺപ്ലസ് 16ആറിലും കരുത്തുറ്റ ഫീച്ചറുകൾ

വൺപ്ലസ് 16ആറിൽ ചൈനയിൽ അടുത്തിടെ അവതരിപ്പിച്ച എയ്സ് 7 സീരീസിലെ ചില സാങ്കേതിക സവിശേഷതകൾ ഉൾപ്പെടുത്തിയേക്കുമെന്നാണ് സൂചന. സ്നാപ്ഡ്രാഗൺ 8 എലൈറ്റ് ജെൻ 5 ചിപ്‌സെറ്റ്, വലിയ ബാറ്ററി, പ്രത്യേക ടെലിഫോട്ടോ ക്യാമറ എന്നിവ ഫോണിലുണ്ടാകാമെന്നാണ് ചോർച്ചകൾ. എന്നാൽ ക്യാമറ സംവിധാനത്തിലും ഡിസ്പ്ലേ റിഫ്രഷ് റേറ്റിലും സംബന്ധിച്ച റിപ്പോർട്ടുകൾ തമ്മിൽ വ്യത്യാസമുണ്ട്. അതിനാൽ ഫോണിന്റെ അന്തിമ സവിശേഷതകൾ ഇപ്പോൾ ഉറപ്പായിട്ടില്ല. ഇന്ത്യയിലെ ലോഞ്ചും വിലയും സംബന്ധിച്ച ഔദ്യോഗിക വിവരങ്ങൾക്കായി വൺപ്ലസിന്റെ പ്രഖ്യാപനം കാത്തിരിക്കണം.

വിവോ X500 സീരീസ്: ആപ്പിളിനെ നേരിടാൻ പുതിയ പ്രീമിയം ഫോണുകൾ

Prashobh Prasannan — Wed, 11 Nov 2026 17:52:56 +0530

ഇന്ത്യൻ സ്മാർട്ട്ഫോൺ വിപണിയിൽ ആപ്പിളിന് വെല്ലുവിളിയുമായി വിവോയുടെ പുതിയ ഫ്ലാഗ്ഷിപ്പ് സീരീസ് എത്തുന്നു. വിവോ എക്സ്500 സീരീസിന്റെ ഇന്ത്യയിലെ ലോഞ്ച് ഉടൻ ഉണ്ടായേക്കുമെന്നാണ് റിപ്പോർട്ടുകൾ. നവംബർ 25ഓടെ ഫോണുകൾ ഇന്ത്യൻ വിപണിയിലെത്തുമെന്നാണ് സൂചന. ഇതിനിടെ സീരീസിലെ മൂന്ന് മോഡലുകളുടെയും വിലവിവരങ്ങൾ ഓൺലൈനിൽ പുറത്തുവന്നിട്ടുണ്ട്. വിലവിവരങ്ങൾ ശരിയാണെങ്കിൽ ആപ്പിളിന്റെ ഐഫോൺ 18 പ്രോ മോഡലുകളുമായി നേരിട്ടുള്ള മത്സരത്തിനാകും വിവോ ഒരുങ്ങുന്നത്.

വിവോ എക്സ്500 സീരീസ്; പ്രതീക്ഷിക്കുന്ന വില ഇങ്ങനെ

വിവോ എക്സ്500, എക്സ്500 പ്രോ, എക്സ്500 പ്രോ മാക്സ് എന്നിങ്ങനെ മൂന്ന് മോഡലുകളാണ് പുതിയ സീരീസിലുള്ളത്. ടിപ്സ്റ്റർ സഞ്ജു ചൗധരിയുടെ റിപ്പോർട്ട് പ്രകാരം 12 ജിബി റാമും 256 ജിബി സ്റ്റോറേജുമുള്ള വിവോ എക്സ്500 മോഡലിന് 1,19,999 രൂപയായിരിക്കും പ്രതീക്ഷിക്കുന്ന വില.

ഇതേ റാം, സ്റ്റോറേജ് കോൺഫിഗറേഷനിലുള്ള എക്സ്500 പ്രോയ്ക്ക് 1,49,999 രൂപയും എക്സ്500 പ്രോ മാക്സിന് 1,59,999 രൂപയുമാണ് പ്രതീക്ഷിക്കുന്നത്. 12 ജിബി റാമും 512 ജിബി സ്റ്റോറേജുമുള്ള പ്രോ മാക്സ് പതിപ്പിന് 1,79,999 രൂപ വിലയുണ്ടാകുമെന്നും സൂചനയുണ്ട്. ഫോട്ടോഗ്രഫി ആവശ്യങ്ങൾക്കായി പ്രത്യേക ആക്‌സസറികൾ ഉൾപ്പെടുന്ന എക്സ്500 പ്രോ മാക്സ് മാസ്റ്റർ സെറ്റിന് 2,29,999 രൂപയായിരിക്കും വിലയെന്നാണ് റിപ്പോർട്ട്. ഓഫ്‌ലൈൻ സ്റ്റോറുകൾ വഴി പ്രത്യേക വിലക്കിഴിവുകളും ഓഫറുകളും ലഭിച്ചേക്കാമെന്നും ടിപ്സ്റ്റർ അവകാശപ്പെടുന്നു.

നിറങ്ങളിലും വ്യത്യസ്ത ഓപ്ഷനുകൾ

വിവോ എക്സ്500 ബ്ലാക്ക്, റെഡ് നിറങ്ങളിൽ ലഭ്യമായേക്കും. എക്സ്500 പ്രോ, പ്രോ മാക്സ് മോഡലുകൾ ഓറഞ്ച്, ബ്ലാക്ക് നിറങ്ങളിലായിരിക്കും വിപണിയിലെത്തുകയെന്നാണ് സൂചന.

ക്യാമറയ്ക്കും ബാറ്ററിക്കും പ്രാധാന്യം

ചൈനയിൽ നേരത്തെ അവതരിപ്പിച്ച മോഡലുകളുടെ സവിശേഷതകൾ തന്നെയായിരിക്കും ഇന്ത്യയിലെത്തുന്ന ഫോണുകളിലും ഉണ്ടാകുകയെന്നാണ് പ്രതീക്ഷ. 6.59 ഇഞ്ച് അമോലെഡ് ഡിസ്‌പ്ലേയും 144 ഹെർട്സ് റിഫ്രഷ് റേറ്റുമാണ് വിവോ എക്സ്500ന്റെ പ്രധാന പ്രത്യേകതകൾ. മീഡിയടെക് ഡൈമെൻസിറ്റി 9600എം ചിപ്‌സെറ്റിലാണ് ഫോൺ പ്രവർത്തിക്കുന്നത്. 7,500 എംഎഎച്ച് ബാറ്ററിയുള്ള ഫോണിൽ 90 വാട്ട് വയർഡ് ചാർജിങ്ങും 40 വാട്ട് വയർലെസ് ചാർജിങ്ങും ലഭിക്കും. 50 മെഗാപിക്സൽ പ്രൈമറി ക്യാമറ, 64 മെഗാപിക്സൽ ടെലിഫോട്ടോ ക്യാമറ, 50 മെഗാപിക്സൽ അൾട്രാ വൈഡ് ക്യാമറ എന്നിവയും ഉൾപ്പെടുത്തിയിട്ടുണ്ട്.

എക്സ്500 പ്രോയിൽ മികച്ച പെരിസ്‌കോപ്പ് ക്യാമറ

6.36 ഇഞ്ച് എൽടിപിഒ അമോലെഡ് ഡിസ്‌പ്ലേയാണ് എക്സ്500 പ്രോയുടെ പ്രത്യേകത. 144 ഹെർട്സ് റിഫ്രഷ് റേറ്റുള്ള ഫോണിൽ മീഡിയടെക് ഡൈമെൻസിറ്റി 9600 പ്രോ പ്രോസസറാണുള്ളത്. 50 മെഗാപിക്സൽ പ്രൈമറി ക്യാമറ, 64 മെഗാപിക്സൽ പെരിസ്‌കോപ്പ് ടെലിഫോട്ടോ ക്യാമറ, 50 മെഗാപിക്സൽ അൾട്രാ വൈഡ് ക്യാമറ എന്നിവയാണ് ക്യാമറ സവിശേഷതകൾ. 6,510 എംഎഎച്ച് വരെയുള്ള ബാറ്ററിയും 90 വാട്ട് വയർഡ്, 40 വാട്ട് വയർലെസ് ചാർജിങ് പിന്തുണയും ഫോണിലുണ്ടാകും.

200 മെഗാപിക്സൽ ക്യാമറയുമായി പ്രോ മാക്സ്

സീരീസിലെ ഏറ്റവും ഉയർന്ന മോഡലായ എക്സ്500 പ്രോ മാക്സിൽ 6.85 ഇഞ്ച് എൽടിപിഒ അമോലെഡ് ഡിസ്‌പ്ലേയാണുള്ളത്. 2കെ റെസല്യൂഷനും 144 ഹെർട്സ് റിഫ്രഷ് റേറ്റും ഇതിന്റെ പ്രത്യേകതകളാണ്. ഡൈമെൻസിറ്റി 9600 പ്രോ ചിപ്‌സെറ്റിലാണ് ഫോൺ പ്രവർത്തിക്കുന്നത്.

200 മെഗാപിക്സൽ പെരിസ്‌കോപ്പ് ടെലിഫോട്ടോ ക്യാമറയാണ് പ്രധാന ആകർഷണം. 50 മെഗാപിക്സൽ പ്രൈമറി ക്യാമറയും 50 മെഗാപിക്സൽ അൾട്രാ വൈഡ് ക്യാമറയും ഇതിനൊപ്പമുണ്ട്. ചൈനീസ് പതിപ്പിൽ 8,000 എംഎഎച്ച് ബാറ്ററിയാണ് നൽകിയിരിക്കുന്നത്. 90 വാട്ട് വയർഡ്, 40 വാട്ട് വയർലെസ് ചാർജിങ്ങും പിന്തുണയ്ക്കും.

ഇന്ത്യയിലെ ഔദ്യോഗിക വിലയും ലോഞ്ച് തീയതിയും വിവോ പ്രഖ്യാപിച്ചിട്ടില്ല. പുറത്തുവന്ന വിലവിവരങ്ങൾ യാഥാർഥ്യമായാൽ ഇന്ത്യൻ പ്രീമിയം സ്മാർട്ട്ഫോൺ വിപണിയിൽ വിവോ എക്സ്500 സീരീസ് വലിയ ചർച്ചയാകുമെന്നാണ് പ്രതീക്ഷിക്കുന്നത്.

ഐഫോൺ 18ൽ വരാനിരിക്കുന്ന ആറ് വമ്പൻ മാറ്റങ്ങൾ എന്തൊക്കെ?

Prashobh Prasannan — Sun, 01 Nov 2026 11:23:01 +0530

ആപ്പിളിന്റെ അടുത്ത തലമുറ സ്റ്റാൻഡേർഡ് ഐഫോണായ ഐഫോൺ 18 വിപണിയിലെത്താൻ ഒരുങ്ങുന്നതായി റിപ്പോർട്ടുകൾ. 2027ലെ വസന്തകാലത്ത് ഫോൺ അവതരിപ്പിക്കാനാണ് കമ്പനി പദ്ധതിയിടുന്നതെന്നാണ് സൂചന. ഏറ്റവും പുതിയ പ്രോ മോഡലുകളും ഐഫോൺ ഡ്യുവോയും പുറത്തിറക്കിയതിന് പിന്നാലെ ഏതാനും മാസങ്ങൾക്കുള്ളിൽ ഐഫോൺ 18 എത്തുമെന്നാണ് പ്രതീക്ഷിക്കുന്നത്. ഔദ്യോഗിക പ്രഖ്യാപനം ഉണ്ടായിട്ടില്ലെങ്കിലും പുതിയ പ്രോസസർ, കൂടുതൽ റാം, ക്യാമറ ഡിസൈനിലെ മാറ്റം തുടങ്ങി ആറ് പ്രധാന അപ്‌ഗ്രേഡുകളാണ് ഫോണിൽ പ്രതീക്ഷിക്കുന്നത്.

ഐഫോൺ 17ൽ ഉൾപ്പെടുത്തിയിട്ടുള്ള മിക്ക ഹാർഡ്‌വെയർ സവിശേഷതകളും പുതിയ മോഡലിലും തുടർന്നേക്കും. എന്നാൽ പുതിയ തലമുറ ചിപ്പിന്റെ വരവ് പ്രവർത്തനക്ഷമതയിലും ബാറ്ററി കാര്യക്ഷമതയിലും മെച്ചപ്പെടുത്തലുകൾ കൊണ്ടുവരുമെന്നാണ് റിപ്പോർട്ടുകൾ. ക്യാമറ കൺട്രോൾ ബട്ടണിലും ഡിസ്പ്ലേയുടെ ബെസലുകളിലും മാറ്റങ്ങളുണ്ടാകാനും സാധ്യതയുണ്ട്.

ഐഫോൺ 18ൽ പ്രതീക്ഷിക്കുന്ന 6 പ്രധാന മാറ്റങ്ങൾ

1. പുതിയ എ20 പ്രോസസർ

ഐഫോൺ 18ൽ പ്രതീക്ഷിക്കുന്ന ഏറ്റവും വലിയ മാറ്റം എ20 പ്രോസസറാണ്. ടി.എസ്.എം.സിയുടെ 2 നാനോമീറ്റർ നിർമാണ സാങ്കേതികവിദ്യ ഉപയോഗിച്ചായിരിക്കും പുതിയ ചിപ്പ് വികസിപ്പിക്കുന്നതെന്നാണ് സൂചന. ഐഫോൺ 17ലെ എ19 ചിപ്പിനെ അപേക്ഷിച്ച് മികച്ച വേഗതയും കുറഞ്ഞ വൈദ്യുതി ഉപഭോഗവും പുതിയ പ്രോസസർ വാഗ്ദാനം ചെയ്തേക്കും. മുൻഗാമിയെക്കാൾ ഏകദേശം 30 ശതമാനം കൂടുതൽ ഊർജക്ഷമത ലഭിക്കുമെന്നാണ് റിപ്പോർട്ടുകൾ. ഇത് ബാറ്ററി ബാക്കപ്പ് മെച്ചപ്പെടുത്താനും സഹായിക്കും.

2. റാം ശേഷി വർധിക്കും

ഐഫോൺ 18ൽ റാം ശേഷി വർധിപ്പിക്കാനും ആപ്പിൾ പദ്ധതിയിടുന്നതായി റിപ്പോർട്ടുകളുണ്ട്. 12 ജിബി റാം ലഭിക്കുമെന്ന് ചില റിപ്പോർട്ടുകൾ സൂചിപ്പിക്കുമ്പോൾ 9 ജിബിയായിരിക്കുമെന്നാണ് പ്രമുഖ അനലിസ്റ്റായ മിങ്-ചി കുവോയുടെ വിലയിരുത്തൽ. ഐഫോൺ 17ലെ 8 ജിബി റാമിനെക്കാൾ കൂടുതലായിരിക്കും ഇത്. ഒരേസമയം ഒന്നിലധികം ആപ്പുകൾ ഉപയോഗിക്കുന്നതിനും എ.ഐ അധിഷ്ഠിത ഫീച്ചറുകൾ പ്രവർത്തിപ്പിക്കുന്നതിനും അധിക റാം സഹായിക്കും.

3. ക്യാമറ ഡിസൈനിൽ മാറ്റം

ഐഫോൺ 18ന്റെ പിൻഭാഗത്തെ ക്യാമറ ഡിസൈനിൽ മാറ്റമുണ്ടായേക്കും. പ്രോ മോഡലുകളിൽ കണ്ടുവരുന്ന തരത്തിൽ ഫോണിന്റെ പിൻഭാഗത്തിന്റെ മുകൾവശത്ത് കൂടുതൽ വീതിയുള്ള ക്യാമറ പ്ലാറ്റോ ഉൾപ്പെടുത്താനാണ് സാധ്യത. എന്നാൽ ക്യാമറ സെൻസറുകളിൽ വലിയ മാറ്റമുണ്ടാകുമെന്ന് പ്രതീക്ഷിക്കുന്നില്ല. 48 മെഗാപിക്സൽ പ്രൈമറി ക്യാമറയും 48 മെഗാപിക്സൽ അൾട്രാ വൈഡ് ക്യാമറയും തുടർന്നേക്കും.

4. ക്യാമറ കൺട്രോൾ ബട്ടണിന് പുതിയ രൂപം

ക്യാമറ കൺട്രോൾ ബട്ടൺ ഒഴിവാക്കുന്നതിന് പകരം കൂടുതൽ ലളിതമായ സംവിധാനത്തിലേക്ക് മാറ്റാനാണ് ആപ്പിളിന്റെ നീക്കമെന്നാണ് സൂചന. നിലവിലെ ടച്ച് അധിഷ്ഠിത സംവിധാനത്തിന് പകരം പ്രഷർ സെൻസിറ്റീവ് സാങ്കേതികവിദ്യ പുതിയ ബട്ടണിൽ ഉൾപ്പെടുത്തിയേക്കും. വ്യത്യസ്ത സമ്മർദങ്ങൾ ഉപയോഗിച്ച് വിവിധ ക്യാമറ ഫീച്ചറുകൾ പ്രവർത്തിപ്പിക്കാൻ ഇതിലൂടെ സാധിക്കും. നിർമാണച്ചെലവ് കുറയ്ക്കാനും പുതിയ സംവിധാനം സഹായിച്ചേക്കും.

5. ഡിസ്പ്ലേ ബെസലുകൾ കൂടുതൽ കനംകുറയും

ഐഫോൺ 17ൽ അവതരിപ്പിച്ച 6.3 ഇഞ്ച് ഒ.എൽ.ഇ.ഡി ഡിസ്പ്ലേ തന്നെ ഐഫോൺ 18ലും തുടരുമെന്നാണ് റിപ്പോർട്ടുകൾ. എന്നാൽ സ്ക്രീനിന് ചുറ്റുമുള്ള ബെസലുകളുടെ കനം കുറച്ച് കൂടുതൽ മനോഹരമായ രൂപകൽപ്പന നൽകാൻ ആപ്പിൾ ശ്രമിച്ചേക്കും. 120 ഹെർട്സ് പ്രോമോഷൻ റിഫ്രഷ് റേറ്റും തുടരും. അതേസമയം, ഡൈനാമിക് ഐലൻഡ് വലുപ്പം കുറയ്ക്കുമെന്ന മുൻ റിപ്പോർട്ടുകൾ സ്റ്റാൻഡേർഡ് മോഡലിന്റെ കാര്യത്തിൽ ഇപ്പോൾ കുറവ് സാധ്യതയുള്ളതായാണ് വിലയിരുത്തൽ.

6. സിരിയിൽ എ ഐ മാറ്റങ്ങൾ

ഐ.ഒ.എസ് 27 ഓപ്പറേറ്റിങ് സിസ്റ്റത്തോടെയായിരിക്കും ഐഫോൺ 18 എത്തുകയെന്നാണ് സൂചന. ഗൂഗിളിന്റെ ജെമിനി സാങ്കേതികവിദ്യയുടെ സഹായത്തോടെ വികസിപ്പിക്കുന്ന പുതിയ സിരി എ.ഐയും ഇതിൽ ഉൾപ്പെട്ടേക്കും. സ്വാഭാവിക സംഭാഷണരീതിയിലുള്ള നിർദേശങ്ങൾ മനസിലാക്കാനും സ്ക്രീനിൽ കാണുന്ന വിവരങ്ങൾ ഉപയോഗിക്കാനും വിവിധ ആപ്പുകൾക്കിടയിൽ പ്രവർത്തനങ്ങൾ പൂർത്തിയാക്കാനും പുതിയ സിരിക്ക് സാധിക്കുമെന്നാണ് പ്രതീക്ഷ. ഫോട്ടോസ്, മെയിൽ, സഫാരി, ഷോർട്ട്കട്ട്സ് തുടങ്ങിയ ആപ്പുകളിലെ ആപ്പിൾ ഇന്റലിജൻസ് ഫീച്ചറുകളിലും കൂടുതൽ മെച്ചപ്പെടുത്തലുകളുണ്ടായേക്കും.

ഐഫോൺ 18 ലോഞ്ച് എപ്പോൾ? വില എത്രയാകും?

2027ലെ വസന്തകാലത്തായിരിക്കും ഐഫോൺ 18ന്റെ ഔദ്യോഗിക അവതരണമെന്നാണ് റിപ്പോർട്ടുകൾ. മാർച്ചിന് മുമ്പോ ശേഷമോ ഫോൺ വിപണിയിലെത്തിയേക്കും. രണ്ടാം തലമുറ ഐഫോൺ എയറിനും കൂടുതൽ വിലക്കുറവുള്ള ഐഫോൺ 18ഇ മോഡലിനുമൊപ്പം പുതിയ ഐഫോൺ അവതരിപ്പിക്കാനും സാധ്യതയുണ്ട്.

വില സംബന്ധിച്ച് ആപ്പിൾ ഇതുവരെ സൂചനകളൊന്നും നൽകിയിട്ടില്ല. ഐഫോൺ 17ന്റെ പുതുക്കിയ വിലയായ ഏകദേശം 1 ലക്ഷം രൂപയ്ക്ക് ഐഫോൺ 18 എത്തിയേക്കാമെന്നാണ് ഒരു വിലയിരുത്തൽ. എന്നാൽ ഐഫോൺ 17ന്റെ ലോഞ്ച് വിലയായ 79,900 രൂപയിൽ തന്നെ പുതിയ മോഡൽ അവതരിപ്പിക്കാനും ആപ്പിൾ പദ്ധതിയിടുന്നതായി റിപ്പോർട്ടുകളുണ്ട്. ചിപ്പുകളുടെയും മെമ്മറിയുടെയും വില വർധിക്കുന്നത് ഉയർന്ന സ്റ്റോറേജ് വേരിയന്റുകളുടെ വില കൂടാൻ കാരണമായേക്കും.

256 ജിബി സ്റ്റോറേജിൽ തുടക്ക മോഡൽ

സ്റ്റോറേജ് ശേഷിയുടെ കാര്യത്തിലും ഐഫോൺ 17ന്റെ മാതൃക ആപ്പിൾ തുടർന്നേക്കും. ഐഫോൺ 18ന്റെ അടിസ്ഥാന വേരിയന്റിൽ 256 ജിബി സ്റ്റോറേജ് ലഭിക്കുമെന്നാണ് പ്രതീക്ഷ. ഐഫോൺ 17നൊപ്പം 128 ജിബി അടിസ്ഥാന വേരിയന്റ് ഒഴിവാക്കിയ ആപ്പിൾ ഈ മാറ്റം തിരിച്ചുകൊണ്ടുവരാൻ സാധ്യതയില്ലെന്നാണ് സൂചന. ഉയർന്ന സ്റ്റോറേജ് വേരിയന്റായി 512 ജിബി ലഭിച്ചേക്കും. സ്റ്റാൻഡേർഡ് മോഡലിൽ 1 ടി.ബി വേരിയന്റ് പ്രതീക്ഷിക്കുന്നില്ല. അതേസമയം, ഐഫോൺ 18നെക്കുറിച്ച് പുറത്തുവരുന്ന വിവരങ്ങളെല്ലാം ചോർച്ചകളുടെയും പ്രാഥമിക റിപ്പോർട്ടുകളുടെയും അടിസ്ഥാനത്തിലുള്ളതാണ്. ഫോണിന്റെ സവിശേഷതകൾ, വില, ലോഞ്ച് തീയതി എന്നിവ ആപ്പിൾ ഔദ്യോഗികമായി സ്ഥിരീകരിച്ചിട്ടില്ല.

നിങ്ങളുടെ കമ്പ്യൂട്ടറിലെ റാം വെറുതെയാണോ? ആൾട്ട്മാൻ പറയുന്നു

Prashobh Prasannan — Mon, 02 Nov 2026 14:50:58 +0530

ആഗോളതലത്തിൽ റാം (റാൻഡം ആക്സസ് മെമ്മറി) ക്ഷാമം രൂക്ഷമാകുന്നതിനിടെ വിചിത്രമായ അഭിപ്രായവുമായി ഓപ്പൺഎഐ സിഇഒ സാം ആൾട്ട്മാൻ. പേഴ്സണൽ കമ്പ്യൂട്ടറുകളിൽ വലിയ അളവിൽ റാം ഉപയോഗിക്കാതെ സൂക്ഷിക്കുന്നതിനേക്കാൾ അത് എഐ ഡാറ്റാ സെന്ററുകളിൽ പ്രയോജനപ്പെടുത്തുന്നതാണ് ഉചിതമെന്നാണ് അദ്ദേഹത്തിന്റെ അഭിപ്രായം. ലോകത്ത് ലഭ്യമായ പരിമിതമായ മെമ്മറി വിഭവങ്ങൾ കൂടുതൽ കാര്യക്ഷമമായി വിനിയോഗിക്കണമെന്നാണ് ആൾട്ട്മാന്റെ നിലപാട്.

പിസികളിലെ റാം ഉപയോഗത്തെ ചോദ്യം ചെയ്ത് ആൾട്ട്മാൻ

ചീക്കി പിന്റ് പോഡ്‍കാസ്റ്റിൽ സംസാരിക്കുന്നതിനിടെയാണ് ആൾട്ട്മാൻ ഇക്കാര്യം വ്യക്തമാക്കിയത്. സ്വന്തം കമ്പ്യൂട്ടറുകളിൽ തന്നെ എഐ മോഡലുകൾ പ്രവർത്തിപ്പിക്കുന്ന രീതിയായ ലോക്കൽ ഇൻഫറൻസിന്റെ വർധിച്ചുവരുന്ന ജനപ്രീതിയെക്കുറിച്ചും അദ്ദേഹം സംസാരിച്ചു. ഓപ്പൺ സോഴ്‌സ് എഐ മോഡലുകൾ വ്യാപകമായതോടെ പേഴ്സണൽ കമ്പ്യൂട്ടറുകളിൽ തന്നെ എഐ പ്രവർത്തിപ്പിക്കാമെന്ന താൽപര്യം വർധിച്ചിട്ടുണ്ട്. എന്നാൽ ആഗോളതലത്തിൽ മെമ്മറി ക്ഷാമം നിലനിൽക്കുമ്പോൾ ഈ രീതി അനുയോജ്യമല്ലെന്നാണ് ആൾട്ട്മാന്റെ വാദം. ലോകത്ത് ലഭ്യമായ പരിമിതമായ ഡിആർഎഎം മെമ്മറിയുടെ വലിയൊരു ഭാഗം വ്യക്തിഗത കമ്പ്യൂട്ടറുകളിൽ സൂക്ഷിക്കുകയും അതിൽ അഞ്ച് ശതമാനം മാത്രം ഉപയോഗിക്കുകയും ചെയ്യുന്നത് വിഭവങ്ങളുടെ ശരിയായ വിനിയോഗമല്ലെന്ന് അദ്ദേഹം അഭിപ്രായപ്പെട്ടു.

എഐ ഡാറ്റാ സെന്ററുകൾക്ക് കൂടുതൽ റാം ആവശ്യമാണ്

പേഴ്സണൽ കമ്പ്യൂട്ടറുകളിൽ 16 ജിബി, 32 ജിബി എന്നിങ്ങനെ വലിയ അളവിൽ റാം ഉണ്ടെങ്കിലും ദിവസം മുഴുവൻ അതിന്റെ പൂർണശേഷി ഉപയോഗിക്കപ്പെടണമെന്നില്ല. എന്നാൽ ക്ലൗഡ് ഡാറ്റാ സെന്ററുകളിൽ മെമ്മറി ഒന്നിച്ച് ശേഖരിച്ച് ആവശ്യാനുസരണം വിവിധ ഉപയോക്താക്കൾക്കും പ്രവർത്തനങ്ങൾക്കുമായി വിനിയോഗിക്കാനാകും. മെമ്മറി ലഭ്യത പരിമിതമായ സാഹചര്യത്തിൽ ക്ലൗഡ് സംവിധാനങ്ങളിലെ ഉപയോഗം പരമാവധി കാര്യക്ഷമമാക്കുകയാണ് വേണ്ടതെന്നും ആൾട്ട്മാൻ പറഞ്ഞു.

എഐ മേഖലയിലെ വൻതോതിലുള്ള നിക്ഷേപവും മെമ്മറി ആവശ്യകത വർധിപ്പിക്കുന്നുണ്ട്. സ്റ്റാർഗേറ്റ് പദ്ധതിയുടെ ഭാഗമായി നൂതന മെമ്മറി ഉൽപ്പാദനം വിപുലീകരിക്കാൻ 2025 ഒക്ടോബറിൽ സാംസങ്, എസ്‌കെ ഹൈനിക്സ് എന്നീ കമ്പനികളുമായി ഓപ്പൺഎഐ പങ്കാളിത്തം പ്രഖ്യാപിച്ചിരുന്നു. പ്രതിമാസം ഒമ്പതുലക്ഷം ഡിആർഎഎം വേഫർ ഉൽപ്പാദന ശേഷി ലക്ഷ്യമിടുന്നതായും കമ്പനികൾ അറിയിച്ചിരുന്നു.

സ്‍മാർട്ട്‌ഫോൺ വിലയിലും പ്രതിഫലിച്ചേക്കാം

മെമ്മറി ക്ഷാമം ഉപഭോക്തൃ ഇലക്ട്രോണിക്സ് വിപണിയെയും ബാധിക്കുന്നുണ്ട്. 2026ന്റെ നാലാം പാദത്തിൽ പരമ്പരാഗത ഡിആർഎഎം വിലയിൽ 10 മുതൽ 15 ശതമാനം വരെ വർധനയുണ്ടാകുമെന്നാണ് ട്രെൻഡ്‌ഫോഴ്സിന്റെ പ്രവചനം. ആഗോള സ്‍മാർട്ട്‌ഫോൺ കയറ്റുമതിയിൽ ഈ വർഷം 16.7 ശതമാനം ഇടിവുണ്ടാകാമെന്നും ശരാശരി വിൽപ്പനവില 27.6 ശതമാനം ഉയർന്ന് 581 ഡോളറിലെത്താമെന്നും ഐഡിസിയും വിലയിരുത്തുന്നു.

ലോക്കൽ എഐ ഉപയോഗത്തിനും ഗുണങ്ങളുണ്ട്

അതേസമയം, വ്യക്തിഗത കമ്പ്യൂട്ടറുകളിൽ എഐ പ്രവർത്തിപ്പിക്കുന്നതിനും നിരവധി നേട്ടങ്ങളുണ്ട്. ഉപയോക്താക്കളുടെ സ്വകാര്യത സംരക്ഷിക്കാനും ഇന്റർനെറ്റ് കണക്ഷനില്ലാതെ എഐ സേവനങ്ങൾ ഉപയോഗിക്കാനും ഇതിലൂടെ സാധിക്കും. സ്വന്തം വിവരങ്ങളുടെ നിയന്ത്രണവും ഉപയോക്താക്കൾക്ക് ലഭിക്കും. കൂടാതെ, പിസികളിൽ ഉപയോഗിക്കുന്ന റാം നേരിട്ട് എടുത്ത് എഐ സെർവറുകളിലേക്ക് മാറ്റാനാകില്ല. വ്യത്യസ്‍ത ആവശ്യങ്ങൾക്ക് വ്യത്യസ്‍ത തരം മെമ്മറിയാണ് വേണ്ടത്. അതിനാൽ ആൾട്ട്മാന്റെ അഭിപ്രായം മെമ്മറി വിനിയോഗത്തെക്കുറിച്ചുള്ള ചർച്ചകൾക്ക് വഴിതുറക്കുമ്പോഴും വ്യക്തിഗത കമ്പ്യൂട്ടറുകളിലെ റാം ഉപയോഗം അവസാനിപ്പിക്കണമെന്ന പ്രായോഗിക നിർദേശമായി ഇതിനെ കാണാൻ സാധിക്കില്ല.

ഇന്ത്യൻ കമ്പനികൾക്ക് ആശ്വാസം; ഓപ്പൺഎഐയുടെ പുതിയ നീക്കം അറിയാം

Prashobh Prasannan — Sat, 14 Nov 2026 23:18:30 +0530

ഇന്ത്യൻ കമ്പനികൾക്ക് ആശ്വാസമായി നിർണായക പ്രഖ്യാപനവുമായി ഓപ്പൺഎഐ. ആർട്ടിഫിഷ്യൽ ഇന്റലിജൻസ് (എഐ) സേവനങ്ങൾ ഉപയോഗിക്കുമ്പോൾ കമ്പനികളുടെ വിവരങ്ങൾ ഇനി ഇന്ത്യയിൽത്തന്നെ പ്രോസസ് ചെയ്യാനുള്ള സൗകര്യം ഒരുക്കിയിരിക്കുകയാണ് ഓപ്പൺഎഐ. ഇതോടെ ബിസിനസ് സ്ഥാപനങ്ങളുടെ സുപ്രധാന വിവരങ്ങളും എഐ പ്രവർത്തനങ്ങൾക്കായുള്ള കമ്പ്യൂട്ടിങ് പ്രക്രിയയും വിദേശ സെർവറുകളിലേക്ക് അയക്കാതെ രാജ്യത്തിനുള്ളിൽത്തന്നെ കൈകാര്യം ചെയ്യാൻ സാധിക്കും. ഇൻഫറൻസ് എന്നറിയപ്പെടുന്ന എഐ മോഡലിന്റെ കംപ്യൂട്ടിങ് പ്രവർത്തനങ്ങളും ഇനി ഇന്ത്യയിൽത്തന്നെ നടക്കും. സാമ്പത്തിക സേവന മേഖല, ബാങ്കിങ് തുടങ്ങി കർശനമായ വിവര സുരക്ഷാ ചട്ടങ്ങൾ പാലിക്കേണ്ട സ്ഥാപനങ്ങൾക്ക് പുതിയ സംവിധാനം ഏറെ പ്രയോജനപ്പെടുമെന്നാണ് വിലയിരുത്തൽ.

എന്തുകൊണ്ട് ഈ തീരുമാനം നിർണായകം?

ഇന്ത്യയിലെ പല കമ്പനികളും ഇതുവരെ എഐ സാങ്കേതികവിദ്യ പൂർണതോതിൽ ഉപയോഗിക്കാൻ മടിച്ചിരുന്നു. ഉപഭോക്താക്കളുടെ വിവരങ്ങൾ രാജ്യത്തിനുള്ളിൽത്തന്നെ സൂക്ഷിക്കുകയും പ്രോസസ് ചെയ്യുകയും വേണമെന്ന നിബന്ധനകളാണ് ഇതിന് പ്രധാന കാരണം.

പുതിയ എപിഐ ഇൻഫറൻസ് റെസിഡൻസി സംവിധാനത്തിലൂടെ ഈ പ്രതിസന്ധിക്ക് പരിഹാരമാകുമെന്നാണ് ഓപ്പൺഎഐയുടെ വിലയിരുത്തൽ. കമ്പനികൾ നൽകുന്ന വിവരങ്ങളും അവയുടെ അടിസ്ഥാനത്തിൽ എഐ മോഡൽ നടത്തുന്ന കംപ്യൂട്ടിങ് പ്രവർത്തനങ്ങളും ഇന്ത്യയിൽത്തന്നെ നടക്കും. ഇതോടെ വിവരങ്ങൾ രാജ്യത്തിന് പുറത്തേക്ക് പോകുമെന്ന ആശങ്കയില്ലാതെ എഐ സേവനങ്ങൾ ഉപയോഗിക്കാനാകും.

ഓപ്പൺഎഐയുടെ ഇന്ത്യയിലെ എന്റർപ്രൈസ് വിഭാഗം മേധാവി നിതിൻ ബാവൻകുലെ പുതിയ സംവിധാനത്തിന്റെ പ്രാധാന്യം വിശദീകരിച്ചു. സുപ്രധാന ജോലികൾക്കായി എഐ പൂർണതോതിൽ വിന്യസിക്കാൻ ചില ഇന്ത്യൻ കമ്പനികൾക്ക് സാധിച്ചിരുന്നില്ല. വിവരങ്ങൾ രാജ്യത്തിനുള്ളിൽത്തന്നെ പ്രോസസ് ചെയ്യണമെന്ന ആവശ്യമായിരുന്നു പ്രധാന തടസ്സമെന്ന് അദ്ദേഹം പറഞ്ഞു. പുതിയ സംവിധാനം വഴി വിവരങ്ങൾ എവിടെ പ്രോസസ് ചെയ്യപ്പെടുന്നു എന്നതിൽ കമ്പനികൾക്ക് കൂടുതൽ നിയന്ത്രണം ലഭിക്കും. ഇന്ത്യൻ ഡെവലപ്പർമാർക്കും സ്റ്റാർട്ടപ്പുകൾക്കും സ്വന്തം ആവശ്യങ്ങൾക്കും വൻകിട സ്ഥാപനങ്ങളുടെ ആവശ്യങ്ങൾക്കുമായി പുതിയ എഐ അധിഷ്ഠിത സേവനങ്ങൾ വികസിപ്പിക്കാനും ഇത് സഹായിക്കുമെന്നും അദ്ദേഹം കൂട്ടിച്ചേർത്തു.

നിലവിൽ ലഭിക്കുന്ന സേവനങ്ങൾ ഏതെല്ലാം?

ആദ്യഘട്ടത്തിൽ ജിപിടി-6 ലൂണ മോഡലിലാണ് ഇന്ത്യയിലെ പ്രാദേശിക എഐ പ്രോസസിങ് സൗകര്യം ലഭ്യമാകുക. ദൈർഘ്യമേറിയ രേഖകളുടെ സംഗ്രഹം തയ്യാറാക്കുക, മറുപടികൾ എഴുതുക, സ്ഥാപനങ്ങളുടെ ആഭ്യന്തര വിവരങ്ങൾ വിശകലനം ചെയ്യുക തുടങ്ങിയ ടെക്സ്റ്റ് അധിഷ്ഠിത ജോലികൾക്കായി കമ്പനികൾക്ക് ഈ സംവിധാനം ഉപയോഗിക്കാം.

ഓപ്പൺഎഐ പ്ലാറ്റ്ഫോമിൽ പുതിയ എപിഐ പ്രോജക്ട് സൃഷ്ടിച്ച് ഡാറ്റാ സംഭരണത്തിനും പ്രോസസിങ്ങിനും ഇന്ത്യയെ പ്രദേശമായി തിരഞ്ഞെടുക്കുകയാണ് വേണ്ടത്. തുടർന്ന് ഇന്ത്യയ്ക്കായി നൽകിയിട്ടുള്ള പ്രത്യേക റീജിയണൽ എൻഡ്‌പോയിന്റ് ഉപയോഗിക്കാം. നിലവിൽ റെസ്പോൺസസ്, ചാറ്റ് കംപ്ലീഷൻസ് എന്നീ എപിഐകൾ വഴി ജിപിടി-6 ലൂണയുടെ ഇൻപുട്ടും ഔട്ട്പുട്ടും ഈ സംവിധാനത്തിൽ പിന്തുണയ്ക്കുന്നുണ്ട്.

ഇന്ത്യയിലെ എഐ വികസനത്തിന് കൂടുതൽ കരുത്ത്

ഈ വർഷം നേരത്തെ പ്രഖ്യാപിച്ച 'ഓപ്പൺഎഐ ഫോർ ഇന്ത്യ' പദ്ധതിയുടെ ഭാഗമായാണ് പുതിയ നീക്കം. രാജ്യത്ത് എഐ അടിസ്ഥാന സൗകര്യങ്ങൾ വികസിപ്പിക്കുകയും വൻകിട സ്ഥാപനങ്ങൾക്കിടയിൽ എഐ ഉപയോഗം വ്യാപിപ്പിക്കുകയുമാണ് പദ്ധതിയുടെ ലക്ഷ്യം. ഇന്ത്യയിൽത്തന്നെ എഐ ഡാറ്റാ പ്രോസസിങ് സാധ്യമാക്കുന്നതിനായി ടാറ്റ ഗ്രൂപ്പുമായി സഹകരിച്ച് രാജ്യത്ത് എഐ ഡാറ്റാ സെന്ററുകൾ സ്ഥാപിക്കാനുള്ള പദ്ധതിയും ഓപ്പൺഎഐ നേരത്തെ പ്രഖ്യാപിച്ചിരുന്നു. ആമസോൺ വെബ് സർവീസസിന്റെ ബെഡ്റോക്കിലും സമാനമായ പ്രാദേശിക ഡാറ്റാ റെസിഡൻസി സൗകര്യം കമ്പനി അടുത്തിടെ ലഭ്യമാക്കിയിരുന്നു. ഓപ്പൺഎഐയുടെ ആഗോള വിപുലീകരണ പദ്ധതിയിലും ഇന്ത്യയ്ക്ക് നിർണായക സ്ഥാനമാണുള്ളത്. ഓസ്ട്രേലിയ, ജപ്പാൻ എന്നീ രാജ്യങ്ങൾക്കൊപ്പം പ്രാദേശിക എഐ പ്രോസസിങ് സൗകര്യം ലഭ്യമാകുന്ന പ്രധാന വിപണികളിലൊന്നായി ഇന്ത്യയും മാറിയിരിക്കുകയാണ്.

ആ തട്ടിപ്പ് ഇനി നടക്കില്ല; ഇൻസ്റ്റഗ്രാമിൽ കൗമാരക്കാരെ കണ്ടെത്താൻ എഐ

Prashobh Prasannan — Wed, 11 Nov 2026 18:17:57 +0530

കൗമാരക്കാരുടെ സുരക്ഷ ഉറപ്പാക്കാൻ നിർണായക നീക്കവുമായി ഇൻസ്റ്റഗ്രാം. പ്രായം തെറ്റായി രേഖപ്പെടുത്തി അക്കൗണ്ട് ഉപയോഗിക്കുന്ന കൗമാരക്കാരെ കണ്ടെത്താൻ നിർമിതബുദ്ധി (എഐ) സംവിധാനം ആഗോളതലത്തിൽ നടപ്പാക്കാനൊരുങ്ങുകയാണ് ഇൻസ്റ്റഗ്രാമിന്‍റെ മാതൃകമ്പനിയായ മെറ്റ.

എഐയുടെ സഹായത്തോടെ പ്രായം തിരിച്ചറിയുകയും കൗമാരക്കാരുടെ അക്കൗണ്ടുകൾ കൂടുതൽ നിയന്ത്രണങ്ങളുള്ള 'ടീൻ അക്കൗണ്ടുകളിലേക്ക്' മാറ്റുകയുമാണ് ലക്ഷ്യം. അക്കൗണ്ട് ആരംഭിക്കുമ്പോൾ പല കൗമാരക്കാരും കർശന നിയന്ത്രണങ്ങൾ ഒഴിവാക്കാൻ വ്യാജ ജനനത്തീയതിയാണ് നൽകുന്നത്. ഇത്തരത്തിൽ പ്രായപൂർത്തിയായവരാണെന്ന് രേഖപ്പെടുത്തിയിട്ടുണ്ടെങ്കിലും അക്കൗണ്ട് ഉപയോഗിക്കുന്നവർ കൗമാരക്കാരാണോ എന്ന് പുതിയ എഐ സംവിധാനം പരിശോധിക്കും.

പ്രായം കണ്ടെത്തുന്നത് എങ്ങനെ?

ഉപയോക്താവിന്റെ പ്രായം കണക്കാക്കാൻ അവരുടെ ഇൻസ്റ്റഗ്രാം പ്രൊഫൈലിലെ വിവിധ വിവരങ്ങളാണ് മെറ്റയുടെ എഐ പരിശോധിക്കുന്നത്. പോസ്റ്റുകൾ, കമന്റുകൾ, ബയോ, ചിത്രങ്ങൾക്കൊപ്പമുള്ള കുറിപ്പുകൾ എന്നിവ വിശകലനം ചെയ്യും. സ്‍കൂൾ ക്ലാസ്, ജന്മദിന ആഘോഷങ്ങൾ തുടങ്ങിയ പരാമർശങ്ങളും പ്രായം തിരിച്ചറിയാനുള്ള സൂചനകളായി ഉപയോഗിക്കും. ഫോട്ടോകളിലെയും വീഡിയോകളിലെയും ദൃശ്യസൂചനകളും പരിശോധിക്കും. ഒരാളുടെ ഉയരം, അസ്ഥികളുടെ ഘടന തുടങ്ങിയ ശാരീരിക സവിശേഷതകൾ വിശകലനം ചെയ്തും പ്രായം കണക്കാക്കാനാണ് നീക്കം.

ടീൻ അക്കൗണ്ടുകളിൽ നിയന്ത്രണങ്ങൾ കടുപ്പിക്കും

കൗമാരക്കാരുടേതാണെന്ന് സംശയിക്കുന്ന അക്കൗണ്ടുകൾ കൂടുതൽ സുരക്ഷാ നിയന്ത്രണങ്ങളുള്ള ടീൻ അക്കൗണ്ടുകളിലേക്ക് മാറ്റും. ഇത്തരം അക്കൗണ്ടുകൾ സ്വതവേ സ്വകാര്യമായിരിക്കും. ഉപദ്രവകരമായ കമന്റുകൾ സ്വമേധയാ മറയ്ക്കുകയും ചെയ്യും. ഉപയോക്താവ് നേരത്തെ പിന്തുടരുന്നവരിൽ നിന്നോ ബന്ധമുള്ളവരിൽ നിന്നോ മാത്രമേ നേരിട്ടുള്ള സന്ദേശങ്ങൾ സ്വീകരിക്കാൻ കഴിയൂ. ദിവസേന 60 മിനിറ്റ് ഇൻസ്റ്റഗ്രാം ഉപയോഗിച്ചുകഴിഞ്ഞാൽ ആപ്പ് ക്ലോസ് ചെയ്യാനുള്ള റിമൈൻഡറും ലഭിക്കും. രാത്രി 10 മണി മുതൽ രാവിലെ ഏഴുമണി വരെ അറിയിപ്പുകൾ നിശബ്ദമാക്കും. 16 വയസിന് താഴെയുള്ളവർക്ക് രക്ഷിതാക്കളുടെ അനുമതിയില്ലാതെ ഈ നിയന്ത്രണങ്ങൾ ഒഴിവാക്കാനാകില്ല.

നിയമനടപടികൾക്ക് പിന്നാലെ മെറ്റയുടെ നീക്കം

അമേരിക്കയിലെ വിവിധ സംസ്ഥാനങ്ങളിൽ നിന്നുള്ള നിയമനടപടികൾക്ക് പിന്നാലെയാണ് മെറ്റയുടെ പുതിയ നീക്കം. കൗമാരക്കാരുടെ മാനസികാരോഗ്യത്തെയും സുരക്ഷയെയും കമ്പനിയുടെ പ്ലാറ്റ്‌ഫോമുകൾ പ്രതികൂലമായി ബാധിക്കുന്നുവെന്ന ആരോപണത്തെത്തുടർന്ന് 52 ഇരുകക്ഷി അറ്റോർണി ജനറൽമാർ നൽകിയ പരാതികളുമായി ബന്ധപ്പെട്ടാണ് നടപടി.

ഓഗസ്റ്റിൽ അമേരിക്കയിലെ മിക്കവാറും എല്ലാ സംസ്ഥാനങ്ങളുമായും പ്രദേശങ്ങളുമായും മെറ്റ ഒത്തുതീർപ്പിലെത്തിയിരുന്നു. 18 ബില്യൺ ഡോളർ വരെ മൂല്യമുള്ള കരാറുകളാണ് ഇതിന്റെ ഭാഗമായി ഉണ്ടായത്. 13 വയസിന് താഴെയുള്ള കുട്ടികളുടെ അക്കൗണ്ടുകൾ കണ്ടെത്തുന്നതിനും മുതിർന്ന കൗമാരക്കാരെ പ്രായത്തിന് അനുയോജ്യമായ സുരക്ഷിത സംവിധാനങ്ങളിലേക്ക് മാറ്റുന്നതിനും കൂടുതൽ സാങ്കേതികവിദ്യയിൽ നിക്ഷേപം നടത്തുമെന്ന് മെറ്റ അറിയിച്ചു. പുതിയ സുരക്ഷാ സംവിധാനങ്ങളെക്കുറിച്ച് രക്ഷിതാക്കളെ ബോധവത്കരിക്കുന്നതിനായി അമേരിക്കയിലെ രക്ഷിതാക്കൾക്ക് ഇൻസ്റ്റഗ്രാം ഫീഡിൽ പ്രത്യേക വിഡിയോയും പ്രദർശിപ്പിക്കും.

ഫേസ്ബുക്കിലേക്കും ത്രെഡ്‍സിലേക്കും വ്യാപിപ്പിക്കും

ഇൻസ്റ്റഗ്രാമിൽ മാത്രം ഒതുങ്ങുന്നതല്ല പുതിയ സംവിധാനം. ഫേസ്ബുക്കിലും സമാനമായ എഐ പ്രായനിർണയ സാങ്കേതികവിദ്യ നടപ്പാക്കിവരികയാണെന്ന് മെറ്റ വ്യക്തമാക്കി. ഈ വർഷം അവസാനത്തോടെ ത്രെഡ്‍സിലും സമാനമായ സംവിധാനം ആഗോളതലത്തിൽ അവതരിപ്പിക്കാനാണ് കമ്പനിയുടെ പദ്ധതി.

സ്‍മാർട്ട്‌ഫോൺ വില വീണ്ടും കുതിക്കുന്നു; ഈ മാറ്റം അറിഞ്ഞോ?

Prashobh Prasannan — Mon, 02 Nov 2026 12:25:16 +0530

ഇന്ത്യൻ സ്‍മാർട്ട്‌ഫോൺ വിപണിയിൽ വിലവർധന തുടരുന്നു. പ്രമുഖ ആഭ്യന്തര സ്‍മാർട്ട്‌ഫോൺ ബ്രാൻഡായ ലാവയും ഫോണുകളുടെ വില വർധിപ്പിക്കാനൊരുങ്ങുന്നു. നവംബർ 15 മുതൽ ലാവയുടെ സ്‍മാർട്ട്‌ഫോണുകൾക്ക് 3,000 രൂപ വരെ വില കൂടുമെന്ന് കമ്പനി അറിയിച്ചു. ആഗോളതലത്തിൽ തുടരുന്ന മെമ്മറി ചിപ്പ് പ്രതിസന്ധിയാണ് സ്‍മാർട്ട്‌ഫോൺ വിപണിയിലെ വിലവർധനയ്ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്.

നവംബർ 15 മുതൽ പുതിയ വില

വിലവർധന സംബന്ധിച്ച് ഉപഭോക്താക്കൾക്ക് മുൻകൂട്ടി അറിയിപ്പ് നൽകിയിരിക്കുകയാണ് ലാവ. നവംബർ 15 മുതലാണ് പുതിയ വില പ്രാബല്യത്തിൽ വരിക. പരമാവധി 3,000 രൂപയുടെ വർധനയുണ്ടാകുമെന്നാണ് കമ്പനി അറിയിച്ചിരിക്കുന്നത്. എന്നാൽ ഓരോ മോഡലിനും എത്ര രൂപ വീതം വില കൂടുമെന്ന കാര്യത്തിൽ കമ്പനി ഇതുവരെ വ്യക്തത വരുത്തിയിട്ടില്ല.

പൊതുവെ പല സ്മാർട്ട്‌ഫോൺ കമ്പനികളും മുന്നറിയിപ്പില്ലാതെയാണ് വില വർധിപ്പിക്കാറുള്ളത്. എന്നാൽ ലാവ ഏകദേശം 15 ദിവസത്തെ സമയം ഉപഭോക്താക്കൾക്ക് നൽകിയിട്ടുണ്ട്. ഇതോടെ നിലവിലെ വിലയിൽ തന്നെ ലാവ സ്‍മാർട്ട്‌ഫോണുകൾ വാങ്ങാൻ ആഗ്രഹിക്കുന്നവർക്ക് അവസരം ലഭിക്കും.

ഉത്സവകാല ഓഫറുകൾ പ്രയോജനപ്പെടുത്താം

ഉത്സവകാല വിൽപ്പന സജീവമായിരിക്കുന്ന സാഹചര്യത്തിൽ ലാവയുടെ ഫോണുകൾക്ക് നിലവിൽ ആകർഷകമായ ഓഫറുകൾ ലഭ്യമാണെന്നും കമ്പനി വ്യക്തമാക്കി. പ്രമുഖ ഓൺലൈൻ വ്യാപാര പ്ലാറ്റ്‌ഫോമുകളിലും ഓഫ്‌ലൈൻ റീട്ടെയിൽ ശൃംഖലകളിലും ഉത്സവകാല വിലയിലാണ് ലാവ ഉൽപ്പന്നങ്ങൾ ലഭ്യമാകുന്നത്. ഫോൺ അപ്‌ഗ്രേഡ് ചെയ്യാൻ ആഗ്രഹിക്കുന്നവർക്ക് ഇപ്പോഴത്തെ ഓഫറുകൾ പ്രയോജനപ്പെടുത്തി കുറഞ്ഞ വിലയിൽ പുതിയ സ്മാർട്ട്‌ഫോൺ സ്വന്തമാക്കാമെന്നും കമ്പനി അറിയിച്ചു. നവംബർ 15ന് വിലവർധന പ്രാബല്യത്തിൽ വരുന്നതിന് മുമ്പ് ഫോൺ വാങ്ങുന്നത് ഉപഭോക്താക്കൾക്ക് സാമ്പത്തികമായി ഗുണകരമായേക്കും.

സാംസങിനും ആപ്പിളിനും പിന്നാലെ ലാവയും

മെമ്മറി ചിപ്പ് പ്രതിസന്ധിയുടെ പശ്ചാത്തലത്തിൽ സാംസങ്, ആപ്പിൾ തുടങ്ങിയ പ്രമുഖ ബ്രാൻഡുകളും ഇന്ത്യയിൽ സ്മാർട്ട്‌ഫോൺ വില വർധിപ്പിച്ചിട്ടുണ്ട്. സാംസങിന്റെ ഏറ്റവും പുതിയ ഗാലക്‌സി എസ്26 സീരീസിനാണ് വില വർധിപ്പിച്ചത്. സെപ്റ്റംബർ 23 മുതൽ പ്രാബല്യത്തിൽ വന്ന വർധന മോഡലിനും സ്റ്റോറേജ് ശേഷിക്കും അനുസരിച്ച് 15,000 രൂപ മുതൽ 25,000 രൂപ വരെയാണ്. 256 ജിബി സ്റ്റോറേജുള്ള അടിസ്ഥാന ഗാലക്‌സി എസ്26 മോഡലിന്റെ വില 87,999 രൂപയിൽനിന്ന് 1,02,999 രൂപയായി ഉയർന്നു. 1 ടിബി സ്റ്റോറേജുള്ള ഗാലക്‌സി എസ്26 അൾട്രയ്ക്കാണ് 25,000 രൂപയുടെ ഏറ്റവും ഉയർന്ന വിലവർധനയുണ്ടായത്.

ഐഫോൺ 18 പ്രോ സീരീസിനും വില കൂടി

ആപ്പിളിന്റെ ഐഫോൺ 18 പ്രോ മോഡലുകളും മുൻതലമുറ ഫോണുകളെ അപേക്ഷിച്ച് ഉയർന്ന വിലയിലാണ് വിപണിയിലെത്തിയത്. ഐഫോൺ 18 പ്രോയുടെ പ്രാരംഭ വില 1,64,900 രൂപയാണ്. ഐഫോൺ 17 പ്രോയുടെ 1,34,900 രൂപയെന്ന പ്രാരംഭ വിലയുമായി താരതമ്യം ചെയ്യുമ്പോൾ 30,000 രൂപയുടെ വർധനയാണിത്. ഐഫോൺ 18 പ്രോ മാക്സിനും 30,000 രൂപയുടെ വിലവർധനയുണ്ടായി.

അതേസമയം, വൺപ്ലസ് ഓഗസ്റ്റിൽ തിരഞ്ഞെടുത്ത മോഡലുകൾക്ക് 2,000 രൂപ മുതൽ 4,000 രൂപ വരെ വില വർധിപ്പിച്ചിരുന്നു. ഓപ്പോ, വിവോ, റിയൽമി തുടങ്ങിയ ബ്രാൻഡുകളും ചില സ്‍മാർട്ട്‌ഫോൺ മോഡലുകളുടെ വില ഉയർത്തിയിട്ടുണ്ട്. മെമ്മറി ചിപ്പ് പ്രതിസന്ധി തുടരുന്ന സാഹചര്യത്തിൽ വരും ദിവസങ്ങളിലും സ്മാർട്ട്‌ഫോൺ വിപണിയിൽ വിലവർധനയുണ്ടാകുമോയെന്നാണ് ഉപഭോക്താക്കൾ ഉറ്റുനോക്കുന്നത്.

ഐഫോൺ ഡ്യുവോയ്ക്ക് സംഭവിച്ചതെന്ത്? ആപ്പിളിന്‍റെ പ്രതികരണം

Prashobh Prasannan — Sun, 01 Nov 2026 12:23:01 +0530

ആപ്പിളിന്റെ ആദ്യ ഫോൾഡബിൾ സ്മാർട്ട്‌ഫോണായ ഐഫോൺ ഡ്യുവോയുടെ അകത്തെ സ്‌ക്രീനിൽ വിള്ളലുകൾ പ്രത്യക്ഷപ്പെടുന്നതായി പരാതി. പ്രശ്‌നം റിപ്പോർട്ട് ചെയ്യുന്ന ഫോണുകൾ പരിശോധിച്ച് അറ്റകുറ്റപ്പണി നടത്തുകയോ പകരം ഉപകരണം നൽകുകയോ ചെയ്യണമെന്ന് ആപ്പിൾ റീട്ടെയിൽ സ്റ്റോറുകൾക്കും അംഗീകൃത സർവീസ് സെന്ററുകൾക്കും നിർദേശം നൽകി. ആദ്യഘട്ടത്തിൽ ഫോൺ വാങ്ങിയ ചില ഉപഭോക്താക്കളിൽ നിന്നാണ് സ്‌ക്രീൻ തകരാറുമായി ബന്ധപ്പെട്ട പരാതികൾ ഉയരുന്നത്.

ഈ ആഴ്ച പുറത്തിറക്കിയ ആഭ്യന്തര മെമ്മോയിലൂടെയാണ് ആപ്പിൾ പുതിയ നിർദേശങ്ങൾ കൈമാറിയതെന്ന് ടെക്ക് വാർത്താ വെബ്‌സൈറ്റായ മാക്‌റൂമേഴ്‌സ് റിപ്പോർട്ട് ചെയ്യുന്നു. ഐഫോൺ ഡ്യുവോയുടെ വളരെ കുറച്ച് യൂണിറ്റുകളെ മാത്രമാണ് പ്രശ്‌നം ബാധിച്ചിരിക്കുന്നതെന്നാണ് കമ്പനിയുടെ വിശദീകരണം. ഡിസ്‌പ്ലേയിൽ തകരാർ അനുഭവപ്പെടുന്ന ഉപഭോക്താക്കൾ ആപ്പിൾകെയറുമായി ബന്ധപ്പെടണമെന്നും കമ്പനി നേരത്തെ അറിയിച്ചിരുന്നു.

എന്താണ് ഐഫോൺ ഡ്യുവോയുടെ സ്‌ക്രീൻ പൊട്ടാൻ കാരണം?

ഫോൺ ഉപഭോക്താക്കളുടെ കൈകളിലെത്തിയതിന് പിന്നാലെയാണ് അകത്തെ ഡിസ്‌പ്ലേയിൽ വിള്ളലുകളും പ്രകാശമുള്ള വരകളും പ്രത്യക്ഷപ്പെടുന്നതായി പരാതികൾ ഉയർന്നത്. പ്രധാനമായും ഫോണിന്റെ മധ്യഭാഗത്തുള്ള ഹിഞ്ചിന് സമീപമാണ് തകരാറുകൾ റിപ്പോർട്ട് ചെയ്യപ്പെട്ടത്. ഓസ്‌ട്രേലിയയിലെ ഒരു ഉപഭോക്താവിന്റെ ഫോൺ 20 തവണയിൽ താഴെ മാത്രം തുറക്കുകയും അടയ്ക്കുകയും ചെയ്തപ്പോഴേക്കും സ്‌ക്രീനിൽ വിള്ളൽ വീണതായി മാക്‌റൂമേഴ്‌സ് റിപ്പോർട്ട് ചെയ്തു. ഫോണിന് പുറമേ ദൃശ്യമായ കേടുപാടുകളൊന്നും ഉണ്ടായിരുന്നില്ലെന്നും ഉപഭോക്താവ് വ്യക്തമാക്കിയിരുന്നു.

ഹിഞ്ച് സംവിധാനത്തിലെ തകരാറാകാം കാരണമെന്ന് സൂചന

പ്രശ്‌നത്തിന്റെ യഥാർഥ കാരണം ആപ്പിൾ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. എന്നാൽ, റിപ്പയർ വെബ്‌സൈറ്റായ ഐഫിക്‌സിറ്റ് നടത്തിയ പ്രാഥമിക പരിശോധനയിൽ ഹിഞ്ച് സംവിധാനത്തിലെ തകരാറാകാം സ്‌ക്രീൻ പൊട്ടാൻ കാരണമെന്ന സൂചന ലഭിച്ചിട്ടുണ്ട്. ഫോണിന്റെ ഹിഞ്ചിനുള്ളിലെ മധ്യഭാഗത്തുള്ള സപ്പോർട്ട് ബാർ ഫോൺ മടക്കുമ്പോൾ കൃത്യമായി ഉള്ളിലേക്ക് നീങ്ങാത്തതാണ് പ്രശ്‌നമെന്നാണ് ഐഫിക്‌സിറ്റിന്റെ വിലയിരുത്തൽ. ഇത് ഡിസ്‌പ്ലേയുടെ ഒരു പ്രത്യേക ഭാഗത്ത് അമിത സമ്മർദമുണ്ടാക്കുകയും പിന്നീട് വിള്ളലിന് കാരണമാകുകയും ചെയ്യാമെന്നാണ് നിഗമനം. ഹിഞ്ചിന്റെ ഘടന മനസിലാക്കുന്നതിനായി വിവിധ പരിശോധനാ ദൃശ്യങ്ങൾ, പേറ്റന്റുകൾ, സി.ടി. സ്കാനുകൾ എന്നിവ ഉപയോഗിച്ചാണ് ഐഫിക്‌സിറ്റ് ത്രിമാന മാതൃക തയ്യാറാക്കിയത്. എന്നാൽ, ഈ കണ്ടെത്തൽ സാധ്യത മാത്രമാണെന്നും ആപ്പിൾ ഇക്കാര്യം സ്ഥിരീകരിച്ചിട്ടില്ലെന്നും റിപ്പോർട്ടിൽ വ്യക്തമാക്കുന്നു.

സ്‌ക്രീൻ റിപ്പയറിന് ചെലവേറും; 999 ഡോളർ നൽകേണ്ടിവരും

ഐഫോൺ ഡ്യുവോയുടെ അകത്തെ ഡിസ്‌പ്ലേ മാറ്റുന്നത് അത്ര എളുപ്പമുള്ള കാര്യമല്ലെന്നും ഐഫിക്‌സിറ്റ് ചൂണ്ടിക്കാട്ടി. ഇതുവരെ പരിശോധിച്ച ഫോൾഡബിൾ ഫോണുകളിൽ ഏറ്റവും എളുപ്പത്തിൽ അറ്റകുറ്റപ്പണി നടത്താൻ കഴിയുന്ന ഉപകരണങ്ങളിലൊന്നായി ഐഫോൺ ഡ്യുവോയെ വിശേഷിപ്പിച്ചെങ്കിലും റിപ്പയറബിലിറ്റി സ്‌കോറായി 10ൽ 5 മാത്രമാണ് താൽക്കാലികമായി നൽകിയത്. വാറന്റി കാലാവധി കഴിഞ്ഞാൽ അമേരിക്കയിൽ സ്‌ക്രീൻ മാറ്റുന്നതിന് 999 ഡോളർ (ഏകദേശം 94,817 രൂപ) ചെലവാകുമെന്നും റിപ്പോർട്ടിലുണ്ട്.

തിരിച്ചുവിളിക്കൽ നടപടിയില്ല; ഉപഭോക്താക്കൾ ചെയ്യേണ്ടത്

അതേസമയം, സ്‌ക്രീൻ തകരാറുമായി ബന്ധപ്പെട്ട് ആപ്പിൾ ഇതുവരെ ഔദ്യോഗിക തിരിച്ചുവിളിക്കൽ നടപടിയോ പ്രത്യേക റിപ്പയർ പദ്ധതിയോ പ്രഖ്യാപിച്ചിട്ടില്ല. നിലവിലുള്ള പരിശോധനാ, അറ്റകുറ്റപ്പണി നടപടികൾ തന്നെ തുടരാനാണ് സർവീസ് സെന്ററുകൾക്ക് നൽകിയിരിക്കുന്ന നിർദേശം. സ്‌ക്രീനിൽ വിള്ളലുകളോ അസാധാരണമായ പ്രകാശവരകളോ ശ്രദ്ധയിൽപ്പെട്ടാൽ ഉപഭോക്താക്കൾ ആപ്പിൾകെയറുമായോ അംഗീകൃത സർവീസ് സെന്ററുകളുമായോ ബന്ധപ്പെടണം. പരിശോധനയ്ക്ക് ശേഷം കമ്പനിയുടെ നിലവിലുള്ള മാനദണ്ഡങ്ങൾ അനുസരിച്ച് അറ്റകുറ്റപ്പണി നടത്തുകയോ പകരം ഫോൺ നൽകുകയോ ചെയ്യും.

ജീവനക്കാർക്ക് സ്വയം പിരിഞ്ഞുപോകാം; അഞ്ച് രാജ്യങ്ങളിൽ പിരിച്ചുവിടൽ ആനുകൂല്യവുമായി ഗൂഗിൾ, ലക്ഷ്യം ചെലവ് കുറയ്ക്കൽ

Prashobh Prasannan — Sat, 07 Nov 2026 16:12:52 +0530

നിർമിതബുദ്ധി (എഐ) മേഖലയിൽ കൂടുതൽ നിക്ഷേപം നടത്തുന്നതിനിടെ ചെലവുകൾ നിയന്ത്രിക്കാനുള്ള നീക്കവുമായി ഗൂഗിൾ. ഇതിന്റെ ഭാഗമായി അഞ്ച് രാജ്യങ്ങളിലെ ജീവനക്കാർക്ക് സ്വമേധയാ ജോലി രാജിവെച്ച് കമ്പനിയിൽനിന്ന് പിരിഞ്ഞുപോകാനുള്ള അവസരം നൽകുകയാണ് ഗൂഗിൾ. കമ്പനി വിടുന്നവർക്ക് സേവനകാലയളവിന് അനുസരിച്ചുള്ള സാമ്പത്തിക ആനുകൂല്യവും ലഭിക്കും. റോയിട്ടേഴ്സാണ് ഇക്കാര്യം റിപ്പോർട്ട് ചെയ്തത്. കാനഡ, ഫ്രാൻസ്, ജർമനി, ജപ്പാൻ, സ്വിറ്റ്സർലൻഡ് എന്നീ രാജ്യങ്ങളിലെ ജീവനക്കാർക്കാണ് പുതിയ പദ്ധതി ബാധകമാകുന്നത്. ജൂണിലാണ് ഗൂഗിൾ കൂടുതൽ രാജ്യങ്ങളിലേക്ക് പദ്ധതി വ്യാപിപ്പിച്ചത്. എത്ര ജീവനക്കാർ ഈ അവസരം പ്രയോജനപ്പെടുത്തിയെന്ന കാര്യം കമ്പനി വ്യക്തമാക്കിയിട്ടില്ല.

ഡീപ്‌മൈൻഡിനും ഗൂഗിൾ ക്ലൗഡിനും ഇളവ്

ഗൂഗിളിലെ എല്ലാ വിഭാഗം ജീവനക്കാർക്കും ഈ ഓഫർ ലഭ്യമല്ല. കമ്പനിയുടെ നിർമിതബുദ്ധി ഗവേഷണ വിഭാഗമായ ഡീപ്‌മൈൻഡിനെയും ഗൂഗിൾ ക്ലൗഡിനെയും പദ്ധതിയിൽനിന്ന് ഒഴിവാക്കിയിട്ടുണ്ട്. ഈ രണ്ട് വിഭാഗങ്ങളിലും കൂടുതൽ ജീവനക്കാരെ നിയമിക്കേണ്ടതുണ്ടെന്നാണ് കമ്പനിയുടെ വിലയിരുത്തൽ. നിർമിതബുദ്ധി, ക്ലൗഡ് കമ്പ്യൂട്ടിങ് മേഖലകളിൽ കൂടുതൽ ശക്തമാകാനുള്ള ശ്രമത്തിലാണ് ഗൂഗിൾ. അതിനാൽ ഭാവിയിലെ വളർച്ചയ്ക്ക് നിർണായകമെന്ന് കരുതുന്ന വിഭാഗങ്ങളിൽ നിയമനം വർധിപ്പിക്കുമ്പോൾ മറ്റ് ചില മേഖലകളിൽ ജീവനക്കാരുടെ എണ്ണം കുറയ്ക്കുകയോ പുനഃസംഘടിപ്പിക്കുകയോ ചെയ്യാനാണ് നീക്കം. ഗൂഗിളിന്റെ മാതൃകമ്പനിയായ ആൽഫബെറ്റ് നിർമിതബുദ്ധി മേഖലയിലെ നിക്ഷേപം ഗണ്യമായി വർധിപ്പിച്ചിട്ടുണ്ട്. ഇതോടെ നിക്ഷേപങ്ങൾക്കൊപ്പം പ്രവർത്തനച്ചെലവുകളും നിയന്ത്രിക്കേണ്ട സാഹചര്യമാണുള്ളത്.

സ്വിറ്റ്സർലൻഡിൽ ജീവനക്കാർ കമ്പനി വിട്ടുതുടങ്ങി

പദ്ധതിയുടെ ഭാഗമായി സ്വിറ്റ്സർലൻഡിലെ ജീവനക്കാർക്ക് ജൂണിൽ ഓഫർ ലഭിച്ചിരുന്നു. ഇത് സ്വീകരിച്ചവർ ഓഗസ്റ്റ് മുതൽ കമ്പനി വിട്ടുതുടങ്ങിയതായി വിഷയവുമായി ബന്ധപ്പെട്ട വൃത്തങ്ങളെ ഉദ്ധരിച്ച് റിപ്പോർട്ടുകൾ പറയുന്നു. സ്വിറ്റ്സർലൻഡിൽ ഏകദേശം 5,000 ഗൂഗിൾ ജീവനക്കാരാണുള്ളത്. സൂറിച്ചിൽ കമ്പനിയുടെ പ്രധാന എൻജിനീയറിങ് കേന്ദ്രവും പ്രവർത്തിക്കുന്നുണ്ട്. ജോലിയിൽ ചെലവഴിച്ച ഓരോ വർഷത്തിനും ഒരു മാസത്തെ ശമ്പളം എന്ന കണക്കിലാണ് പിരിഞ്ഞുപോകുന്നവർക്ക് ആനുകൂല്യം വാഗ്ദാനം ചെയ്തത്. പരമാവധി 12 മാസത്തെ ശമ്പളമാണ് ലഭിക്കുക. ഏകദേശം 50 ജീവനക്കാരുള്ള ഒരു ടീമിൽനിന്ന് കുറഞ്ഞത് നാല് പേർ ഈ ഓഫർ സ്വീകരിച്ചതായും റിപ്പോർട്ടുകളുണ്ട്.

ജീവനക്കാർക്ക് സ്വമേധയാ പിരിഞ്ഞുപോകാൻ മൈക്രോസോഫ്റ്റും

നിർമിതബുദ്ധി മേഖലയിലെ ചെലവുകൾ വർധിക്കുന്ന സാഹചര്യത്തിൽ ജീവനക്കാരുടെ എണ്ണം പുനഃപരിശോധിക്കുന്ന മറ്റൊരു പ്രമുഖ ടെക് കമ്പനിയാണ് മൈക്രോസോഫ്റ്റ്. അമേരിക്ക, കാനഡ, ഇന്ത്യ, ബ്രിട്ടൻ എന്നീ രാജ്യങ്ങളിലെ ഏകദേശം 60,000 ജീവനക്കാരെ ഉൾക്കൊള്ളാൻ സാധ്യതയുള്ള സ്വമേധയാ പിരിഞ്ഞുപോകൽ പദ്ധതിയാണ് കമ്പനി പ്രഖ്യാപിച്ചിരിക്കുന്നത്. മൈക്രോസോഫ്റ്റിലെ 70-ാം ഗ്രേഡോ അതിൽ താഴെയോ ഉള്ള യോഗ്യരായ ജീവനക്കാർക്കാണ് പദ്ധതിയുടെ ആനുകൂല്യം ലഭിക്കുക. ഇതോടെ കമ്പനിയിലെ ആകെ 2,23,000 ജീവനക്കാരിൽ ഏകദേശം 27 ശതമാനം പേർക്ക് അവസരം ലഭിക്കും. ഓഫർ സ്വീകരിക്കുന്നവർക്ക് ഡിസംബർ അവസാനത്തോടെ കമ്പനിയിൽനിന്ന് പിരിഞ്ഞുപോകാം.

എഐ പ്രവർത്തനങ്ങൾക്കായി ഡാറ്റാ സെന്ററുകളിലും കമ്പ്യൂട്ടിങ് അടിസ്ഥാനസൗകര്യങ്ങളിലും മൈക്രോസോഫ്റ്റ് കോടിക്കണക്കിന് ഡോളറാണ് നിക്ഷേപിക്കുന്നത്. ഇതിന് പിന്നാലെയാണ് ജീവനക്കാർക്ക് സ്വമേധയാ വിരമിക്കാനുള്ള പദ്ധതി പ്രഖ്യാപിച്ചത്. ഏപ്രിലിൽ സ്വമേധയാ വിരമിക്കൽ പദ്ധതി പ്രഖ്യാപിച്ച മൈക്രോസോഫ്റ്റ് ജൂലൈയിൽ 4,800 ജീവനക്കാരെ ബാധിക്കുന്ന തൊഴിൽ വെട്ടിക്കുറയ്ക്കലും നടത്തിയിരുന്നു.

നിർമിതബുദ്ധി മേഖലയിലെ വൻ നിക്ഷേപങ്ങൾ ആഗോള ടെക് കമ്പനികളുടെ തൊഴിൽ ഘടനയിലും ജീവനക്കാരുടെ ആവശ്യകതയിലും വലിയ മാറ്റങ്ങൾ സൃഷ്ടിക്കുന്നതിന്റെ സൂചനയായാണ് ഈ നീക്കങ്ങൾ വിലയിരുത്തപ്പെടുന്നത്.

ഫ്രാൻസിലെ രക്തബാങ്കുകളിലും സൈബർ ആക്രമണം; ഫ്രീസറുകളുടെ താപനില 110 ഡിഗ്രിയിലേക്ക് ഉയർത്തി ഹാക്കർമാർ

Prashobh Prasannan — Fri, 06 Nov 2026 16:35:21 +0530

യൂറോപ്പിൽ സൈബർ ആക്രമണങ്ങൾ കൂടുതൽ ഗുരുതരമാകുന്നു. സൂപ്പർമാർക്കറ്റുകളിലെ ശീതീകരണ സംവിധാനങ്ങൾ ലക്ഷ്യമിട്ടുള്ള ആക്രമണങ്ങൾക്ക് പിന്നാലെ ഫ്രാൻസിലെ രക്തസംഭരണ കേന്ദ്രങ്ങളെയും ഹാക്കർമാർ ലക്ഷ്യമിട്ടു. ദേശീയ രക്തദാന ഏജൻസിയായ എറ്റാബ്ലിസ്മെന്റ് ഫ്രാൻസെ ദു സാങിന്റെ നിയന്ത്രണത്തിലുള്ള കേന്ദ്രങ്ങളിലെ ഫ്രീസറുകളുടെ താപനില വിദൂരമായി മാറ്റിയെന്നാണ് റിപ്പോർട്ടുകൾ. മൈനസ് 30 ഡിഗ്രി സെൽഷ്യസിൽ സൂക്ഷിക്കേണ്ട ഫ്രീസറുകളുടെ താപനില 110 ഡിഗ്രി സെൽഷ്യസിലേക്ക് ഉയർത്തിയതായാണ് വിവരം.

രാത്രിയിൽ താപനില ഉയർന്നു; സമയോചിത ഇടപെടലിൽ വൻ ദുരന്തം ഒഴിവായി

രാത്രികാല ഡ്യൂട്ടിയിലുണ്ടായിരുന്ന സാങ്കേതിക വിദഗ്ധനാണ് ഫ്രീസറുകളിലെ താപനില അസാധാരണമായി ഉയർന്നത് ശ്രദ്ധിച്ചത്. തുടർന്ന് അടിയന്തര സംഘങ്ങൾ ഇടപെട്ടു. ഇതോടെ രക്തസാമ്പിളുകളും ശീതീകരിച്ച പ്ലാസ്മയും നശിക്കുന്നത് ഒഴിവാക്കാനായി. നവംബർ 1നും 2നും ഇടയിലാണ് സൈബർ ആക്രമണം നടന്നത്. സംഭവത്തിൽ ആശുപത്രികളിലേക്കുള്ള രക്തവിതരണത്തെയോ രക്തപ്പകർച്ചാ സേവനങ്ങളെയോ ബാധിച്ചിട്ടില്ലെന്ന് ഫ്രഞ്ച് ആരോഗ്യ മന്ത്രാലയം അറിയിച്ചു. സമയബന്ധിതമായ ഇടപെടലിലൂടെ സാഹചര്യം നിയന്ത്രണവിധേയമാക്കാനായെന്നും അധികൃതർ വ്യക്തമാക്കി.

700 സൂപ്പർമാർക്കറ്റുകളിലും സമാന ആക്രമണം

ഫ്രാൻസിലെ രക്തസംഭരണ കേന്ദ്രങ്ങൾക്ക് നേരെയുണ്ടായ ആക്രമണം ഒറ്റപ്പെട്ട സംഭവമല്ല. യൂറോപ്പിലെ 11 രാജ്യങ്ങളിലെ സൂപ്പർമാർക്കറ്റുകളുടെ ശീതീകരണ സംവിധാനങ്ങൾക്കും സമാനമായ സൈബർ ആക്രമണങ്ങൾ നേരിട്ടിട്ടുണ്ട്. ബെൽജിയം, ജർമനി, അയർലൻഡ്, ഇറ്റലി, നെതർലൻഡ്‌സ്, സ്വീഡൻ, ബ്രിട്ടൻ തുടങ്ങിയ രാജ്യങ്ങളും ഇതിൽ ഉൾപ്പെടുന്നു. കഴിഞ്ഞ മാസം ഫ്രാൻസിലെ 700ഓളം സൂപ്പർമാർക്കറ്റുകളിലെ ശീതീകരണ സംവിധാനങ്ങളുടെ നിയന്ത്രണം ഹാക്കർമാർ കൈക്കലാക്കിയിരുന്നു. മൈനസ് 27 ഡിഗ്രി സെൽഷ്യസിലായിരുന്ന താപനില 50 ഡിഗ്രി സെൽഷ്യസിനു മുകളിലേക്ക് ഉയർത്തി. ഇതോടെ മാംസം, പാലുൽപ്പന്നങ്ങൾ, ശീതീകരിച്ച ഭക്ഷ്യവസ്തുക്കൾ എന്നിവയുൾപ്പെടെ ടൺകണക്കിന് ഉൽപ്പന്നങ്ങൾ നശിച്ചു. ചില സൂപ്പർമാർക്കറ്റുകൾക്ക് 1.30 ലക്ഷം യൂറോയിലധികം നഷ്ടമുണ്ടായതായും റിപ്പോർട്ടുകളുണ്ട്.

കൂൾവേൾഡിന്റെ സംവിധാനങ്ങൾ വഴി കടന്നുകയറ്റം

ഇത്തവണ സൂപ്പർമാർക്കറ്റുകളിൽനിന്ന് ജീവൻ രക്ഷിക്കാൻ നിർണായകമായ രക്തശേഖരങ്ങളിലേക്കാണ് ആക്രമണം വ്യാപിച്ചത്. ഫ്രാൻസിന്റെ ദേശീയ രക്തദാന ഏജൻസിക്കായി ശീതീകരണ സംവിധാനങ്ങൾ പരിപാലിക്കുന്ന കരാറുകാരായ കൂൾവേൾഡിന്റെ സംവിധാനങ്ങൾ വഴിയാണ് ഹാക്കർമാർ കടന്നുകയറിയതെന്നാണ് വിവരം. തുടർന്ന് രക്തസംഭരണ യൂണിറ്റുകളുടെ താപനില നിയന്ത്രണ സംവിധാനങ്ങളിൽ മാറ്റം വരുത്തുകയായിരുന്നു. ആദ്യഘട്ടത്തിൽ ആരോഗ്യപരിശോധനയ്ക്കുള്ള സാധാരണ രക്തസാമ്പിളുകളാണ് ബാധിച്ചതെന്ന് അധികൃതർ അറിയിച്ചിരുന്നു. എന്നാൽ രക്തപ്പകർച്ചയ്ക്കായി ഉപയോഗിക്കുന്ന പ്ലാസ്മയും ഈ കേന്ദ്രങ്ങളിൽ സൂക്ഷിച്ചിരുന്നതായി പിന്നീട് സ്ഥിരീകരിച്ചു.

ആക്രമണത്തിന് പിന്നിൽ ആര്? എഐ ഉപയോഗിച്ചതിന് തെളിവില്ല

നിർമിതബുദ്ധിയുടെ വളർച്ച സൈബർ ആക്രമണങ്ങൾ കൂടുതൽ എളുപ്പത്തിലും വ്യാപകമായും നടത്താൻ സഹായിക്കുമെന്ന ആശങ്കയും ശക്തമാണ്. ഇന്റർനെറ്റുമായി ബന്ധിപ്പിച്ച ശീതീകരണ നിയന്ത്രണ സംവിധാനങ്ങളിലെ സുരക്ഷാവീഴ്ചകളാണ് ഇത്തരം ആക്രമണങ്ങൾക്ക് വഴിയൊരുക്കുന്നത്. കാലഹരണപ്പെട്ട സോഫ്റ്റ്‌വെയറുകളും മതിയായ സുരക്ഷയില്ലാത്ത സംവിധാനങ്ങളും ഹാക്കർമാർക്ക് എളുപ്പത്തിൽ ലക്ഷ്യമിടാൻ കഴിയുന്നവയാണ്. എന്നാൽ ഫ്രാൻസിലെ രക്തസംഭരണ കേന്ദ്രങ്ങൾക്കും സൂപ്പർമാർക്കറ്റുകൾക്കും നേരെയുണ്ടായ ആക്രമണങ്ങളിൽ നിർമിതബുദ്ധി ഉപയോഗിച്ചതിന് ഇതുവരെ തെളിവുകളില്ല.

ആരാണ് ആക്രമണങ്ങൾക്ക് പിന്നിലെന്ന കാര്യത്തിലും വ്യക്തതയില്ല. ഒരു ഹാക്കിങ് സംഘവും ഇതുവരെ ഉത്തരവാദിത്തം ഏറ്റെടുത്തിട്ടില്ല. മോചനദ്രവ്യം ആവശ്യപ്പെട്ടതായും അധികൃതർക്ക് വിവരമില്ല. സാധാരണ ജനജീവിതവുമായി ബന്ധപ്പെട്ട അടിസ്ഥാന സൗകര്യങ്ങൾ പോലും സൈബർ ആക്രമണങ്ങളുടെ ലക്ഷ്യമായി മാറുന്നത് യൂറോപ്പിൽ വലിയ ആശങ്കയാണ് സൃഷ്ടിക്കുന്നത്.

പ്രോട്ടോണിന്‍റെ എഐ നിരീക്ഷണ വിവാദം: സത്യാവസ്ഥ എന്ത്?

Prashobh Prasannan — Sun, 08 Nov 2026 12:49:49 +0530

എഐ (ആർട്ടിഫിഷ്യൽ ഇന്റലിജൻസ്) ഉപയോഗം വർധിപ്പിക്കുന്നതുമായി ബന്ധപ്പെട്ട വിവാദങ്ങളിൽ വിശദീകരണവുമായി സ്വിസ് ടെക് കമ്പനിയായ പ്രോട്ടോൺ. ജീവനക്കാരുടെ ലാപ്‌ടോപ്പുകളിൽ എഐ ഉപയോഗം നിരീക്ഷിക്കാനുള്ള സോഫ്റ്റ്‌വെയർ സ്ഥാപിച്ചിട്ടില്ലെന്നും എഐ ഉപയോഗം വിലയിരുത്താൻ ജീവനക്കാരെ വീണ്ടും അഭിമുഖം ചെയ്യില്ലെന്നും കമ്പനി വ്യക്തമാക്കി. ഇത്തരം അഭിമുഖങ്ങളുടെ പേരിൽ ആരെയും പിരിച്ചുവിടില്ലെന്നും ഉറപ്പുനൽകി.

പ്രോട്ടോൺ മെയിൽ ഉൾപ്പെടെയുള്ള സ്വകാര്യതയ്ക്ക് പ്രാധാന്യം നൽകുന്ന സേവനങ്ങളിലൂടെ ശ്രദ്ധേയമായ കമ്പനിയാണ് പ്രോട്ടോൺ. സോഫ്റ്റ്‌വെയർ എൻജിനീയർമാരുടെ നിയമനം അവസാനിപ്പിച്ച് എഐ അധിഷ്ഠിത പ്രവർത്തനങ്ങൾക്ക് മുൻഗണന നൽകാൻ കമ്പനി ഒരുങ്ങുന്നതായുള്ള റിപ്പോർട്ടുകൾ നേരത്തെ പുറത്തുവന്നിരുന്നു. ജീവനക്കാരുടെ ലാപ്‌ടോപ്പുകളിൽ എഐ ഉപയോഗം നിരീക്ഷിക്കുന്ന സോഫ്റ്റ്‌വെയർ സ്ഥാപിച്ചതായും എഐ ഉപയോഗം വിലയിരുത്താൻ വീണ്ടും അഭിമുഖം നടത്താൻ പദ്ധതിയിട്ടതായും 404 മീഡിയ റിപ്പോർട്ട് ചെയ്തിരുന്നു.

ആരോപണങ്ങൾ നിഷേധിച്ച് പ്രോട്ടോൺ

ഒക്ടോബർ 31ന് എക്സിലൂടെ പുറത്തുവിട്ട പ്രസ്താവനയിലാണ് കമ്പനി ആരോപണങ്ങൾ നിഷേധിച്ചത്. ജീവനക്കാരുടെ ലാപ്‌ടോപ്പുകളിൽ എഐ ഉപയോഗിച്ച് തയ്യാറാക്കുന്ന കോഡിന്റെ അളവ് നിരീക്ഷിക്കുന്ന സോഫ്റ്റ്‌വെയർ സ്ഥാപിച്ചിട്ടില്ലെന്ന് പ്രോട്ടോൺ വ്യക്തമാക്കി. മൊബൈൽ ഡിവൈസ് മാനേജ്‌മെന്റ് (എംഡിഎം) സോഫ്റ്റ്‌വെയറിന്റെ പ്രവർത്തനത്തെക്കുറിച്ചുള്ള തെറ്റിദ്ധാരണയാണ് ഇത്തരം റിപ്പോർട്ടുകൾക്ക് പിന്നിലെന്നും കമ്പനി വിശദീകരിച്ചു.

സുരക്ഷാ നയങ്ങളിൽ കൂടുതൽ സുതാര്യത

എഐ ഉപയോഗം വർധിപ്പിക്കുമ്പോഴും ഉൽപ്പന്നങ്ങളുടെ സുരക്ഷയിൽ വിട്ടുവീഴ്ച ചെയ്യില്ലെന്ന് പ്രോട്ടോൺ അറിയിച്ചു. കഴിഞ്ഞ ഒരു വർഷത്തിനിടെ സുരക്ഷാ പരിശോധനകൾ കൂടുതൽ ശക്തമാക്കിയിട്ടുണ്ട്. കമ്പനിയുടെ ആഭ്യന്തര എഐ നയങ്ങൾ, കോഡ് പരിശോധനാ രീതികൾ, സുരക്ഷാ നടപടിക്രമങ്ങൾ എന്നിവയും പ്രസിദ്ധീകരിക്കും. നിലവിൽ കമ്പനിക്കുള്ളിൽ മാത്രം ഉപയോഗിക്കുന്ന എഐ അസിസ്റ്റന്റായ ലൂമോയുടെ കൂടുതൽ വികസിത പതിപ്പുകൾ ഉൾപ്പെടെയുള്ള ചില ടൂളുകൾ ഓപ്പൺ സോഴ്‌സായി പുറത്തിറക്കാനും പദ്ധതിയുണ്ട്. ജീവനക്കാർക്ക് എവിടെയൊക്കെ എഐ ഉപയോഗിക്കാം, ഏതൊക്കെ സാഹചര്യങ്ങളിൽ ഉപയോഗിക്കാൻ പാടില്ല തുടങ്ങിയ കാര്യങ്ങളും ഇതിലൂടെ വ്യക്തമാക്കും.

എൻജിനീയർമാരുടെ നിയമനത്തിൽ മാറ്റം

പ്രോട്ടോൺ സിഇഒ ആൻഡി യെൻ 2026 കമ്പനിയുടെ എൻജിനീയർമാരെ നിയമിക്കുന്ന അവസാന വർഷമായിരിക്കുമെന്ന് ജീവനക്കാരോട് പറഞ്ഞതായുള്ള റിപ്പോർട്ടുകൾ നേരത്തെ പുറത്തുവന്നിരുന്നു. അടുത്ത വർഷം മുതൽ എഐ ഉപയോഗിച്ച് ഉൽപ്പന്നങ്ങൾ വികസിപ്പിക്കാൻ കഴിവുള്ളവർക്കായിരിക്കും നിയമനത്തിൽ മുൻഗണനയെന്നും റിപ്പോർട്ടുകളുണ്ടായിരുന്നു. കമ്പനിയുടെ ചീഫ് ടെക്നോളജി ഓഫീസർ ബാർട്ട് ബട്‌ലർ, നിലവിൽ കമ്പനിയുടെ കോഡിന്റെ ഏകദേശം 90 ശതമാനവും എഐയാണ് തയ്യാറാക്കുന്നതെന്ന് പറഞ്ഞതായും റിപ്പോർട്ടിലുണ്ടായിരുന്നു. എന്നാൽ എൻജിനീയറിങ് പ്രവർത്തനങ്ങളിൽ എഐയ്ക്ക് കൂടുതൽ പ്രാധാന്യം നൽകാനുള്ള പദ്ധതിയിൽനിന്ന് കമ്പനി പിന്മാറിയിട്ടില്ല. ജീവനക്കാരുടെയും ഉപഭോക്താക്കളുടെയും ആശങ്കകൾ കൃത്യമായി പരിഹരിക്കാൻ കഴിയാത്തതിൽ ഖേദിക്കുന്നതായും പ്രോട്ടോൺ അറിയിച്ചു.

രാജിവെക്കാൻ ജീവനക്കാർക്ക് പണം വാഗ്‍ദാനം ചെയ്ത് മൈക്രോസോഫ്റ്റ്

Prashobh Prasannan — Fri, 30 Oct 2026 11:32:49 +0530

ചെലവ് കുറയ്ക്കുന്നതിനും പ്രവർത്തനരീതികൾ പുനഃസംഘടിപ്പിക്കുന്നതിനുമായി ജീവനക്കാർക്ക് സ്വയം വിരമിക്കൽ ഓഫറുമായി മൈക്രോസോഫ്റ്റ്. ആർട്ടിഫിഷ്യൽ ഇന്റലിജൻസ് മേഖലയിൽ കൂടുതൽ ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് കമ്പനിയുടെ പുതിയ നീക്കം. ഏകദേശം 60,000 ജീവനക്കാർക്കാണ് കമ്പനി സ്വമേധയാ ജോലി ഉപേക്ഷിക്കാനുള്ള അവസരം നൽകിയിരിക്കുന്നത്. എന്നാൽ ഇതിൽ 3,000 പേരോ അതിൽ താഴെയോ മാത്രമേ ഓഫർ സ്വീകരിക്കൂ എന്നാണ് കമ്പനി പ്രതീക്ഷിക്കുന്നത് എന്നാണ് റിപ്പോർട്ടുകൾ.

സാമ്പത്തിക ആനുകൂല്യങ്ങളുമായി സ്വമേധയാ പിരിഞ്ഞുപോകാം

ഒക്ടോബർ 26 തിങ്കളാഴ്ച മൈക്രോസോഫ്റ്റിന്റെ ചീഫ് പീപ്പിൾ ഓഫീസർ എമി കോൾമാൻ ആഭ്യന്തര മെമ്മോയിലൂടെയാണ് പുതിയ പദ്ധതി പ്രഖ്യാപിച്ചത്. വൊളന്ററി എക്സിറ്റ് ഓഫർ എന്ന പേരിലുള്ള പദ്ധതിയിലൂടെ അർഹരായ ജീവനക്കാർക്ക് സാമ്പത്തിക ആനുകൂല്യങ്ങളോടെ കമ്പനിയിൽനിന്ന് സ്വമേധയാ പിരിഞ്ഞുപോകാം. ഇന്ത്യ, അമേരിക്ക, ബ്രിട്ടൻ, കാനഡ എന്നീ രാജ്യങ്ങളിലെ തിരഞ്ഞെടുത്ത ജീവനക്കാർക്കാണ് ഓഫർ ലഭിക്കുക. കമ്പനിയുടെ ആകെ ജീവനക്കാരിൽ നാലിലൊന്നിലധികം വരുന്ന ഏകദേശം 60,000 പേരാണ് പദ്ധതിയുടെ പരിധിയിലുള്ളത്. ജോലി ഉപേക്ഷിക്കുന്നവർക്ക് സാമ്പത്തിക സഹായത്തിനൊപ്പം കരിയർ ആസൂത്രണത്തിനുള്ള പിന്തുണയും കമ്പനി വാഗ്‍ദാനം ചെയ്യുന്നുണ്ട്.

ഓഫർ സ്വീകരിക്കുക 3,000 പേരിൽ താഴെയെന്ന് കമ്പനി

എന്നാൽ ഭൂരിഭാഗം ജീവനക്കാരും ഓഫർ സ്വീകരിക്കില്ലെന്നാണ് മൈക്രോസോഫ്റ്റിന്റെ പ്രതീക്ഷ. 'ബിസിനസ് ഇൻസൈഡർ' റിപ്പോർട്ട് പ്രകാരം, കമ്പനിയുടെ ചീഫ് ഫിനാൻഷ്യൽ ഓഫീസർ എമി ഹുഡ് വളരെ കുറച്ച് ജീവനക്കാർ മാത്രമേ ഈ അവസരം പ്രയോജനപ്പെടുത്തുകയുള്ളൂവെന്ന് വ്യക്തമാക്കിയിട്ടുണ്ട്. മൈക്രോസോഫ്റ്റിലെ വളർച്ചാ സാധ്യതകളാണ് ജീവനക്കാരെ കമ്പനിയിൽ തുടരാൻ പ്രേരിപ്പിക്കുന്നതെന്നാണ് വിലയിരുത്തൽ. 3,000 പേരോ അതിൽ താഴെയോ മാത്രമേ ഓഫർ സ്വീകരിക്കൂവെന്ന് മൈക്രോസോഫ്റ്റ് വക്താവും പ്രസിദ്ധീകരണത്തോട് സ്ഥിരീകരിച്ചിട്ടുണ്ട്. ജീവനക്കാർക്ക് സ്വന്തം താൽപ്പര്യപ്രകാരം കമ്പനിയിൽനിന്ന് പിരിഞ്ഞുപോകാനുള്ള അവസരം നൽകുകയാണ് പദ്ധതിയുടെ ലക്ഷ്യമെന്ന് എമി ഹുഡ് ആഭ്യന്തര സന്ദേശത്തിൽ വ്യക്തമാക്കി.

ആർക്കൊക്കെയാണ് ആനുകൂല്യം ലഭിക്കുക?

അമേരിക്ക, കാനഡ, ഇന്ത്യ, ബ്രിട്ടൻ എന്നിവിടങ്ങളിൽ ജോലി ചെയ്യുന്ന 70-ാം ഗ്രേഡോ അതിൽ താഴെയോ ഉള്ള അർഹരായ ജീവനക്കാർക്കാണ് ഓഫർ ലഭിക്കുക. ഇവിടെ 70 എന്നത് ജീവനക്കാരുടെ പ്രായമോ പ്രവൃത്തിപരിചയമോ അല്ല. കമ്പനിയിലെ തസ്തികകളുടെ ചുമതലയും സീനിയോറിറ്റിയും അടിസ്ഥാനമാക്കിയുള്ള തൊഴിൽ ഗ്രേഡാണിത്. എന്നാൽ എല്ലാ വിഭാഗങ്ങളിലെയും ജീവനക്കാർക്ക് പദ്ധതിയുടെ ആനുകൂല്യം ലഭിക്കില്ല. എക്സ്ബോക്സ്, വിൻഡോസ്, കോപൈലറ്റ്, ധനകാര്യ വിഭാഗങ്ങൾ തുടങ്ങിയവയിലെ തിരഞ്ഞെടുത്ത ടീമുകൾ പദ്ധതിയിൽ ഉൾപ്പെടുന്നുണ്ട്. ഡാറ്റാ സെന്ററുകൾ, വിൽപ്പന, വിപണനം, സൈബർ സുരക്ഷ, ക്വാണ്ടം കമ്പ്യൂട്ടിങ് തുടങ്ങിയ മേഖലകളിലെ ചില ജീവനക്കാർ ഒഴിവാക്കപ്പെട്ടതായും റിപ്പോർട്ടുകളുണ്ട്.

ഡിസംബറോടെ തീരുമാനമെടുക്കണം

ഈ വർഷം ആദ്യം അമേരിക്കയിൽ വിരമിക്കൽ പ്രായമെത്തിയ ജീവനക്കാർക്കായി മൈക്രോസോഫ്റ്റ് സമാനമായ പദ്ധതി പ്രഖ്യാപിച്ചിരുന്നു. അന്ന് ഓഫറിന് അർഹരായ ഏകദേശം 8,750 ജീവനക്കാരിൽ 30 ശതമാനത്തിലധികം പേർ പദ്ധതി സ്വീകരിച്ചു. തുടർന്നുണ്ടായ പിരിച്ചുവിടലുകളുടെ ആഘാതം കുറയ്ക്കാനും ഈ നീക്കം സഹായിച്ചിരുന്നു. എന്നാൽ ഇത്തവണ ഓഫർ സ്വീകരിക്കുന്നവരുടെ എണ്ണം വളരെ കുറവായിരിക്കുമെന്നാണ് കമ്പനിയുടെ കണക്കുകൂട്ടൽ. അർഹരായ ജീവനക്കാരിൽ ഏകദേശം അഞ്ച് ശതമാനം മാത്രമേ പദ്ധതി പ്രയോജനപ്പെടുത്തൂ എന്നാണ് പ്രതീക്ഷിക്കുന്നത്. ഓഫർ സ്വീകരിക്കണോ എന്ന കാര്യത്തിൽ ജീവനക്കാർക്ക് ഡിസംബർ ആദ്യവാരം വരെ തീരുമാനമെടുക്കാം. പദ്ധതി സ്വീകരിക്കുന്നവർ വർഷാവസാനത്തോടെ കമ്പനിയിൽനിന്ന് പിരിഞ്ഞുപോകുമെന്നാണ് റിപ്പോർട്ടുകൾ.

2027 മാർച്ചിൽ മൂന്ന് പുതിയ ഐഫോണുകൾ അവതരിപ്പിക്കാൻ ആപ്പിൾ; ഐഫോൺ 18 ഉൾപ്പെടെ പുതിയ മോഡലുകൾ എത്തും

Prashobh Prasannan — Sat, 14 Nov 2026 23:12:42 +0530

ആപ്പിൾ ആരാധകർ കാത്തിരിക്കുന്ന പുതിയ ഐഫോൺ മോഡലുകൾ 2027ന്റെ തുടക്കത്തിൽ വിപണിയിലെത്തിയേക്കുമെന്ന് റിപ്പോർട്ടുകൾ. ഐഫോൺ 18, ഐഫോൺ 18ഇ, രണ്ടാം തലമുറ ഐഫോൺ എയർ 2 എന്നിവയുൾപ്പെടെ മൂന്ന് മോഡലുകളാണ് കമ്പനി അവതരിപ്പിക്കാനൊരുങ്ങുന്നതെന്നാണ് സൂചന. ഫെബ്രുവരി മുതൽ ഏപ്രിൽ വരെയുള്ള കാലയളവിൽ ലോഞ്ച് നടന്നേക്കും. ഇതിൽ മാർച്ചിനാണ് കൂടുതൽ സാധ്യത കൽപ്പിക്കുന്നത്.

ഈ വർഷത്തെ സെപ്റ്റംബർ ലോഞ്ച് പരിപാടിയിൽ പ്രോ മോഡലുകൾക്കും ആദ്യ ഫോൾഡബിൾ ഐഫോണായ ഐഫോൺ ഡ്യുവോയ്ക്കും മാത്രമായിരിക്കും ആപ്പിൾ പ്രാധാന്യം നൽകുകയെന്നാണ് റിപ്പോർട്ടുകൾ. സാധാരണ ഐഫോൺ മോഡലുകളെ ഒഴിവാക്കുകയല്ല, മറിച്ച് അവയുടെ അവതരണം പ്രത്യേകമായി നടത്താനാണ് കമ്പനിയുടെ നീക്കമെന്നാണ് സൂചന.

ഐഫോൺ 18: ഡിസ്പ്ലേയിലും ബാറ്ററിയിലും വൻ മാറ്റങ്ങൾ?

6.3 ഇഞ്ച് എൽടിപിഒ ഒഎൽഇഡി ഡിസ്പ്ലേയായിരിക്കും ഐഫോൺ 18ൽ ഉണ്ടാകുകയെന്നാണ് റിപ്പോർട്ടുകൾ. 1.5കെ റെസല്യൂഷനും 120 ഹെർട്സ് പ്രോമോഷൻ റിഫ്രഷ് റേറ്റും പ്രതീക്ഷിക്കാം. നിലവിലെ മോഡലിനെക്കാൾ കൂടുതൽ തെളിച്ചവും കുറഞ്ഞ ബെസലുകളുമുള്ള ഡിസ്പ്ലേയായിരിക്കും പുതിയ ഫോണിലേത്. എന്നാൽ പ്രോ മോഡലുകളിലെ ചെറിയ ഡൈനാമിക് ഐലൻഡിന് പകരം നിലവിലെ വലുപ്പത്തിലുള്ള ഡൈനാമിക് ഐലൻഡ് തന്നെയായിരിക്കും നൽകുക. ബാറ്ററിയുടെ കാര്യത്തിലും വലിയ മാറ്റമുണ്ടായേക്കും. ഐഫോൺ 18ൽ 4,430 എംഎഎച്ച് ബാറ്ററി നൽകിയേക്കുമെന്നാണ് സൂചന. ഐഫോൺ 17ലെ 3,692 എംഎഎച്ച് ബാറ്ററിയെ അപേക്ഷിച്ച് ഏകദേശം 20 ശതമാനം വർധനയാണിത്.

ടി‌എസ്‌എം‌സിയുടെ 2 നാനോമീറ്റർ സാങ്കേതികവിദ്യയിൽ നിർമിക്കുന്ന എ20 ചിപ്പായിരിക്കും ഫോണിന് കരുത്തുപകരുക. നിലവിലെ എ19 ചിപ്പിനെക്കാൾ മികച്ച വേഗതയും 30 ശതമാനം വരെ കൂടുതൽ ഊർജക്ഷമതയും പുതിയ ചിപ്പ് നൽകുമെന്നാണ് പ്രതീക്ഷ. 9 ജിബി അല്ലെങ്കിൽ 12 ജിബി റാമും 256 ജിബി, 512 ജിബി സ്റ്റോറേജ് പതിപ്പുകളും ലഭിച്ചേക്കും. പിന്നിൽ 48 മെഗാപിക്സലിന്റെ രണ്ട് ക്യാമറകളായിരിക്കും ഉണ്ടാകുക. മുൻ ക്യാമറ 18 മെഗാപിക്സലോ 24 മെഗാപിക്സലോ ആയിരിക്കാമെന്നാണ് റിപ്പോർട്ടുകൾ. ഐഒഎസ് 27, സി2 മോഡം, ഐപി68 വാട്ടർ ആൻഡ് ഡസ്റ്റ് റെസിസ്റ്റൻസ് എന്നിവയും പ്രതീക്ഷിക്കുന്ന സവിശേഷതകളാണ്.

ഐഫോൺ 18ഇ: കുറഞ്ഞ വിലയിൽ പുതിയ ചിപ്പ്

കൂടുതൽ താങ്ങാനാവുന്ന വിലയിൽ എത്തുന്ന ഐഫോൺ 18ഇയിൽ പ്രധാനമായും പ്രകടനത്തിലായിരിക്കും മാറ്റങ്ങൾ. എ20 ചിപ്പ് തന്നെയായിരിക്കും ഫോണിൽ നൽകിയേക്കുക. 6.1 ഇഞ്ച് ഒഎൽഇഡി ഡിസ്പ്ലേയും 60 ഹെർട്സ് റിഫ്രഷ് റേറ്റും തുടർന്നേക്കും. 48 മെഗാപിക്സലിന്റെ ഒറ്റ പിൻ ക്യാമറയായിരിക്കും പ്രതീക്ഷിക്കുന്നത്. എന്നാൽ മുൻ ക്യാമറ 24 മെഗാപിക്സലിലേക്ക് ഉയർത്തിയേക്കും. 8 ജിബി അല്ലെങ്കിൽ 9 ജിബി റാമും 4,430 എംഎഎച്ച് ബാറ്ററിയും ലഭിച്ചേക്കും. ഡൈനാമിക് ഐലൻഡ് ഉൾപ്പെടുത്തുമോ എന്ന കാര്യത്തിൽ വ്യക്തതയില്ല.

ഐഫോൺ എയർ 2: പുതിയ ക്യാമറയും മികച്ച ബാറ്ററിയും

ഐഫോൺ എയർ 2ൽ രണ്ടാമതൊരു 48 മെഗാപിക്സൽ അൾട്രാ വൈഡ് ക്യാമറ ഉൾപ്പെടുത്തിയേക്കുമെന്നാണ് റിപ്പോർട്ടുകൾ. ബാറ്ററി ലൈഫ് മെച്ചപ്പെടുത്തുന്നതിനൊപ്പം ഡൈനാമിക് ഐലൻഡിന്റെ വലുപ്പം കുറയ്ക്കാനും ആപ്പിൾ ശ്രമിച്ചേക്കും. എ20 പ്രോ ചിപ്പായിരിക്കും കരുത്തുപകരുക. 6.5 ഇഞ്ച് ഡിസ്പ്ലേ, ടൈറ്റാനിയം ബോഡി, 12 ജിബി റാം, 18 മെഗാപിക്സൽ മുൻ ക്യാമറ എന്നിവ തുടർന്നേക്കും. നിലവിലെ മോഡലിനെക്കാൾ 0.4 എംഎം കനം കുറവായിരിക്കുമെന്നും സൂചനയുണ്ട്.

ഇന്ത്യയിലെ വില എത്രയായിരിക്കും?

ഇന്ത്യയിൽ ഐഫോൺ 18ന് 99,900 രൂപ മുതലായിരിക്കും വിലയെന്നാണ് റിപ്പോർട്ടുകൾ. ഐഫോൺ 18ഇയുടെ വില 79,900 രൂപ മുതലും ഐഫോൺ എയർ 2ന്റെ വില 1,49,900 രൂപ മുതലും ആയേക്കും. എന്നാൽ പുതിയ ഐഫോൺ മോഡലുകളെക്കുറിച്ചോ അവയുടെ സവിശേഷതകൾ, വില, ലോഞ്ച് തീയതി എന്നിവയെക്കുറിച്ചോ ആപ്പിൾ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല. അതിനാൽ പുറത്തുവരുന്ന വിവരങ്ങളിൽ മാറ്റങ്ങളുണ്ടാകാനുള്ള സാധ്യതയുമുണ്ട്.

ഇപിഎഫ്ഒയുടെ പുതിയ സേവനം: ഇനി എല്ലാം വാട്‌സ്ആപ്പിൽ!

Prashobh Prasannan — Thu, 05 Nov 2026 11:24:33 +0530

പ്രൊവിഡന്റ് ഫണ്ട് (പിഎഫ്) വരിക്കാർക്ക് ആശ്വാസമായി പുതിയ സേവനവുമായി എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇപിഎഫ്ഒ). ഇനി വാട്‌സ്ആപ്പിലൂടെ പിഎഫ് ബാലൻസ് പരിശോധിക്കാനും പാസ്‌ബുക്ക് വിവരങ്ങൾ അറിയാനും സാധിക്കും. അക്കൗണ്ടിലെ ഏറ്റവും പുതിയ 5 ഇടപാടുകളുടെ വിവരങ്ങളും വാട്‌സ്ആപ്പ് വഴി ലഭ്യമാക്കും. ഞായറാഴ്ചയാണ് ഇപിഎഫ്ഒ പുതിയ സേവനത്തിന് തുടക്കമിട്ടത്.

ഇപിഎഫ്ഒയുടെ 74-ാമത് സ്ഥാപകദിനാഘോഷങ്ങളുടെ ഭാഗമായി കേന്ദ്ര തൊഴിൽ മന്ത്രി മൻസുഖ് മാണ്ഡവ്യയാണ് പുതിയ സേവനം പ്രഖ്യാപിച്ചത്. ഡിജിറ്റൽ സംവിധാനങ്ങളിലൂടെ അംഗങ്ങൾക്ക് സേവനങ്ങൾ കൂടുതൽ എളുപ്പത്തിൽ ലഭ്യമാക്കുന്നതിന്റെ ഭാഗമായാണ് നടപടി.

വാട്‌സ്ആപ്പിൽ ലഭിക്കുക ഈ സേവനങ്ങൾ

ഇപിഎഫ്ഒയുടെ ഔദ്യോഗികമായി സ്ഥിരീകരിച്ച വാട്‌സ്ആപ്പ് സേവനം ഉപയോഗിച്ച് അംഗങ്ങൾക്ക് പിഎഫ് അക്കൗണ്ടിലെ ബാലൻസ് പരിശോധിക്കാം. പാസ്‌ബുക്ക് വിവരങ്ങൾ അറിയുന്നതിനൊപ്പം ഏറ്റവും പുതിയ 5 ഇടപാടുകളുടെ വിവരങ്ങളും ലഭിക്കും. ഇതിനായി ഇപിഎഫ്ഒ ഓഫീസുകൾ സന്ദർശിക്കേണ്ടതില്ലെന്നതാണ് പ്രധാന നേട്ടം. പ്രധാനമന്ത്രി വിക്സിത് ഭാരത് റോസ്ഗാർ യോജന (പിഎംവിബിആർവൈ) പദ്ധതിയുമായി ബന്ധപ്പെട്ട നടപടികൾ പൂർത്തിയാക്കുന്നതിനും അംഗങ്ങൾക്ക് വാട്‌സ്ആപ്പിലൂടെ വ്യക്തിഗത മാർഗനിർദേശങ്ങളും സഹായവും ലഭ്യമാക്കും. ഡിജിറ്റൽ പ്ലാറ്റ്‌ഫോമുകളിലൂടെ ഇപിഎഫ്ഒ സേവനങ്ങൾ ലളിതമാക്കുന്നതിന്റെ ഭാഗമായാണ് പുതിയ സംവിധാനമെന്ന് തൊഴിൽ മന്ത്രാലയം അറിയിച്ചു. നിലവിൽ ഇപിഎഫ്ഒയുടെ വെബ് പോർട്ടൽ വഴിയും സമാനമായ സേവനങ്ങൾ ലഭ്യമാണ്. പുതിയ സംവിധാനം ഇപിഎഫ്ഒ 3.0 പരിഷ്‌കരണങ്ങളുടെ ഭാഗമാണ്.

1,000 രൂപ വരെയുള്ള നിഷ്‌ക്രിയ പിഎഫ് അക്കൗണ്ടുകളിൽ തുക സ്വമേധയാ കൈമാറും

വാട്‌സ്ആപ്പ് സേവനത്തിന് പുറമെ നിഷ്‌ക്രിയ പിഎഫ് അക്കൗണ്ടുകളിലെ തുക സ്വമേധയാ തീർപ്പാക്കുന്നതിനുള്ള സംവിധാനത്തിനും തുടക്കമായി. ആധാർ സ്ഥിരീകരിച്ചിട്ടുള്ളതും 1,000 രൂപയോ അതിൽ താഴെയോ ബാലൻസുള്ളതുമായ നിഷ്‌ക്രിയ പിഎഫ് അക്കൗണ്ടുകൾക്കാണ് ഈ ആനുകൂല്യം ലഭിക്കുക. ഇത്തരം അക്കൗണ്ടുകളിലെ പണം പിൻവലിക്കാൻ അംഗങ്ങൾ പ്രത്യേകമായി ക്ലെയിം സമർപ്പിക്കേണ്ടതില്ല. ആവശ്യമായ തിരിച്ചറിയൽ വിവരങ്ങളും ബാങ്ക് അക്കൗണ്ട് വിവരങ്ങളും പരിശോധിച്ചശേഷം ഇപിഎഫ്ഒ തന്നെ തുക കൈമാറുന്നതിനുള്ള നടപടികൾ ആരംഭിക്കും. അർഹരായവരുടെ ബാങ്ക് അക്കൗണ്ടുകളിലേക്ക് പണം നേരിട്ട് എത്തിക്കും.

ഒരു ലക്ഷം അക്കൗണ്ടുകൾക്ക് പ്രയോജനം

തൊഴിൽ മന്ത്രാലയത്തിന്റെ കണക്കുകൾ പ്രകാരം ഏകദേശം ഒരു ലക്ഷം അക്കൗണ്ടുകൾക്ക് പുതിയ സംവിധാനത്തിന്റെ പ്രയോജനം ലഭിക്കും. ആകെ 5 കോടി രൂപയോളം ഈ അക്കൗണ്ടുകളിലായി വിതരണം ചെയ്യാനാണ് ലക്ഷ്യമിടുന്നത്. ചെറിയ തുകകൾ പിൻവലിക്കാൻ പോലും പ്രത്യേക അപേക്ഷകളും നടപടിക്രമങ്ങളും പൂർത്തിയാക്കേണ്ടിവരുന്ന സാഹചര്യം ഒഴിവാക്കുകയാണ് ഇതിലൂടെ ലക്ഷ്യമിടുന്നത്. പിഎഫ് വരിക്കാർക്ക് അവരുടെ അക്കൗണ്ടിലെ പണം കൂടുതൽ വേഗത്തിലും എളുപ്പത്തിലും ലഭ്യമാക്കാൻ പുതിയ പരിഷ്‌കരണം സഹായിക്കുമെന്നാണ് പ്രതീക്ഷിക്കുന്നത്.

ചെറുകൊമ്പൻ തവളകളുടെ വൈവിധ്യം ഇരട്ടിയിലധികം! പുതിയ തവളയിനങ്ങളെ കണ്ടെത്തി ശാസ്ത്രലോകം, ഹിമാലയം മറഞ്ഞിരിക്കുന്ന ജൈവവൈവിധ്യത്തിന്റെ കേന്ദ്രം

Web Desk — Thu, 12 Nov 2026 18:20:30 +0530

വടക്കുകിഴക്കൻ ഇന്ത്യയിൽ നേരത്തെ അറിവിലുണ്ടായിരുന്നതിനേക്കാൾ ഇരട്ടിയിലധികം ചെറുകൊമ്പൻ തവള ഇനങ്ങളെ കണ്ടെത്തി. ഹിമാലയൻ മേഖലയിൽ മെഗോഫ്രൈനേ (Megophryinae) ഉപകുടുംബത്തിലെ തവളകൾ പരിണാമപരമായി വൈവിധ്യവൽക്കരിക്കപ്പെട്ടതിന്റെ ശ്രദ്ധിക്കപ്പെടാതെപോയ ചരിത്രമാണ് ഈ കണ്ടെത്തൽ. ഹിമാലയ പർവതനിരകളുടെ ഉയർച്ചയും ഏഷ്യൻ മൺസൂൺ വ്യവസ്ഥയുടെ ശക്തിപ്പെടലും ഈ പരിണാമ പ്രക്രിയയുമായി ബന്ധപ്പെട്ടിരിക്കുന്നതായും പഠനം വ്യക്തമാക്കുന്നു.

ഡൽഹി സർവകലാശാലയിലെയും ഹാർവാർഡ് സർവകലാശാലയിലെയും ഇന്ത്യൻ, അമേരിക്കൻ ശാസ്ത്രജ്ഞരുടെ സംഘമാണ് ജിംഗോഫ്രിസ് (Jingophrys) ജനുസ്സിൽപ്പെട്ട അഞ്ച് പുതിയ തവളയിനങ്ങളെ കണ്ടെത്തിയത്. ചെറുകൊമ്പൻ തവളകൾ (Diminutive Horned Frogs) എന്നറിയപ്പെടുന്ന ഇവയെ വടക്കുകിഴക്കൻ ഇന്ത്യയിൽ അഞ്ച് വർഷം നീണ്ടുനിന്ന വിപുലമായ പര്യവേക്ഷണങ്ങളിലൂടെയാണ് കണ്ടെത്തിയത്. ആഗോള ജൈവവൈവിധ്യ ഹോട്ട്സ്പോട്ട് ആയ ഹിമാലയൻ മേഖലയിലാണ് ഈ പ്രദേശം ഉൾപ്പെടുന്നത്.

റോയൽ സൊസൈറ്റി ഓപ്പൺ സയൻസ് (Royal Society Open Science) ജേണലിന്റെ ഏറ്റവും പുതിയ ലക്കത്തിൽ പ്രസിദ്ധീകരിച്ച പഠനം അഞ്ച് പുതിയ തവളയിനങ്ങളെ ഔദ്യോഗികമായി ശാസ്ത്രലോകത്തിന് പരിചയപ്പെടുത്തി. ഇതോടൊപ്പം ഇന്ത്യയിൽ ആദ്യമായി രേഖപ്പെടുത്തുന്ന രണ്ട് ഇനങ്ങളെയും പുതിയ ഇനങ്ങളായിരിക്കാമെന്ന് കരുതുന്ന, ഇതുവരെ പേരുനൽകാത്ത ചില വ്യത്യസ്ത തരത്തെയും കണ്ടെത്തിയിട്ടുണ്ട്. ഡിഎൻഎ ശ്രേണികളെ അടിസ്ഥാനമാക്കിയുള്ള തന്മാത്രാതല പരിണാമപഠനങ്ങൾ, ബാഹ്യശരീരഘടനയുടെ വിശദമായ താരതമ്യപഠനം, ആൺതവളകൾ പെൺതവളകളുമായി ആശയവിനിമയം നടത്താൻ പുറപ്പെടുവിക്കുന്ന സവിശേഷമായ ഇണചേരൽ ശബ്ദങ്ങൾ എന്നിവ ഉൾപ്പെടെ വിവിധ തെളിവുകളുടെ അടിസ്ഥാനത്തിലാണ് ഈ കണ്ടെത്തലുകൾ സ്ഥിരീകരിച്ചത്.

അഞ്ച് പുതിയ ഇനങ്ങളെയും കണ്ടെത്തിയത് ഇന്ത്യയിലെ അരുണാചൽ പ്രദേശിലാണ്. ഇവയിൽ മൂന്നെണ്ണത്തിന് പ്രദേശത്തെ തദ്ദേശീയ സമൂഹങ്ങളുടെയും അവരുടെ ഭാഷയുടെയും പ്രദേശത്തിന്റെയും പേരുകളാണ് നൽകിയിരിക്കുന്നത്.

അരുണാചൽ പ്രദേശിലെ സിറോ താഴ്‌വരയിൽ താമസിക്കുന്ന താനി ഗോത്രസമൂഹത്തെയും അവരുടെ അപതാനി ഭാഷയെയും ആദരിച്ചുകൊണ്ടാണ് താനി കൊമ്പൻ തവളയ്ക്ക് (Jingophrys taniitatii) ഈ പേര് നൽകിയത്. ഗോത്രസമൂഹത്തിന്റെ പേരായ 'താനി' (tanii), തവളകളെയും തവളവർഗങ്ങളെയും സൂചിപ്പിക്കുന്ന പ്രാദേശിക പദമായ 'താതി' (tatii) എന്നിവ ചേർത്താണ് ഈ പേര് രൂപപ്പെടുത്തിയിരിക്കുന്നത്. പഠനത്തിനിടെ ഗോത്രസമൂഹത്തിലെ അംഗങ്ങളിൽനിന്ന് ലഭിച്ച മികച്ച സഹായത്തിനും മാർഗനിർദേശത്തിനും ഗവേഷകർ പ്രത്യേകം നന്ദി രേഖപ്പെടുത്തുന്നു.

പുതുതായി കണ്ടെത്തിയ മറ്റൊരു ഇനമായ Jingophrys tanogogo യുടെ ആമാശയത്തിൽ കരയിലെ ഒച്ചുകളുടെ (land snails) പുറംതോടുകൾ മുഴുവനായി കണ്ടെത്തിയതിന്റെ അടിസ്ഥാനത്തിലാണ് ആ പേര് നൽകിയത്. തവളകളുടെ മാതൃകകളിൽ നടത്തിയ അത്യാധുനിക ത്രിമാന മൈക്രോ-സി.ടി. (3D micro-CT) പരിശോധനയിലൂടെയാണ് ഈ വിവരം കണ്ടെത്തിയത്. ഈ തവളയെ കണ്ടെത്തിയ പ്രദേശത്ത് സംസാരിക്കുന്ന അപതാനി ഭാഷയിൽ ഒച്ചുകളെ വിളിക്കുന്ന പദമാണ് 'തനോഗോഗോ' (tanogogo). അതിനാൽ ഈ ഇനത്തിന് 'ഒച്ചുതീനിക്കൊമ്പൻ തവള' (Snail-eating Horned Frog) എന്ന പൊതുനാമവും നൽകിയിട്ടുണ്ട്. ഇന്ത്യയിൽ ഒച്ചുകളെ ഭക്ഷിക്കുന്നതായി കണ്ടെത്തിയ ആദ്യത്തെ തവളയിനമാണിത്. മാത്രമല്ല, മെഗോഫ്രൈഡേ (Megophryidae) തവളകുടുംബത്തിൽ ഒച്ചുകളെ ഭക്ഷിക്കുന്നതായി രേഖപ്പെടുത്തപ്പെടുന്ന ആദ്യത്തെ ഇനം കൂടിയാണിത്.

അരുണാചൽ പ്രദേശിലെ സിയാങ് മേഖലയോടുള്ള ആദരസൂചകമായാണ് മൂന്നാമത്തെ ഇനത്തിന് സിയാങ് കൊമ്പൻ തവള (Jingophrys siangensis) എന്ന പേര് നൽകിയത്. മറ്റ് രണ്ട് ഇനങ്ങളായ Jingophrys hrdy (ഹാർഡിയുടെ കൊമ്പൻ തവള), Jingophrys wularsoni (വു-ലാർസൺ കൊമ്പൻ തവള) എന്നിവയ്ക്ക് ഹാർവാർഡ് സർവകലാശാലയിലെ ദീർഘകാലമായി ഉരഗ-ഉഭയജീവി ഗവേഷണത്തെയും സംരക്ഷണ ജീവശാസ്ത്രത്തെയും പിന്തുണച്ചുവരുന്ന വ്യക്തികളോടുള്ള ആദരസൂചകമായാണ് പേരുകൾ നൽകിയിരിക്കുന്നത്. ഈ പഠനത്തിന്റെ ഭാഗമായി ഗവേഷകർ പ്രവർത്തിച്ചതും ഹാർവാർഡ് സർവകലാശാലയിലായിരുന്നു.

പുതിയ ഇനങ്ങളുടെയും ഇന്ത്യയിൽ ആദ്യമായി രേഖപ്പെടുത്തിയ ഇനങ്ങളുടെയും കണ്ടെത്തൽ ഇന്ത്യയിൽ അറിയപ്പെട്ടിരുന്ന ചെറുകൊമ്പൻ തവളകളുടെ വൈവിധ്യം ഏഴിരട്ടിയായി വർധിപ്പിക്കുന്നു. അതേസമയം, ജിംഗോഫ്രിസ് ജനുസ്സിൽ അറിയപ്പെട്ടിരുന്ന ഇനങ്ങളുടെ എണ്ണത്തിൽ രണ്ടിരട്ടിയിലധികം വർധനവിനും ഇത് കാരണമായി. വടക്കുകിഴക്കൻ ഇന്ത്യയിലും തെക്കൻ ചൈനയിലുമായി പരിമിതമായ പ്രദേശങ്ങളിൽ കാണപ്പെടുന്ന, വേണ്ടത്ര പഠിക്കപ്പെട്ടിട്ടില്ലാത്ത തവളകളുടെ ഒരു വിഭാഗമാണ് ജിംഗോഫ്രിസ്. ഏഷ്യയിലുടനീളം വ്യാപിച്ചുകിടക്കുന്ന, ഏഷ്യൻ കൊമ്പൻ തവളകൾ എന്നറിയപ്പെടുന്ന മെഗോഫ്രൈഡേ (Megophryidae) കുടുംബത്തിലെ അംഗങ്ങളാണിവ. ഈ തവളകുടുംബത്തിന്റെ ഏറ്റവും വലിയ വൈവിധ്യം തെക്കുകിഴക്കൻ ഏഷ്യൻ പ്രദേശങ്ങളിലാണെന്നാണ് ഇതുവരെയുള്ള ധാരണ. എന്നാൽ, ഈ പുതിയ പഠനം ഹിമാലയൻ മേഖലയിൽ ഇതുവരെ ശ്രദ്ധിക്കപ്പെടാതെപോയ ഒട്ടേറെ തവളയിനങ്ങളുടെ സാന്നിധ്യവും പ്രാദേശികമായി മാത്രം കാണപ്പെടുന്ന ഇനങ്ങളുടെ വൈവിധ്യവും വെളിപ്പെടുത്തുന്നു. ഈ മേഖല മെഗോഫ്രൈഡേ കുടുംബത്തിന്റെ പടിഞ്ഞാറൻ ഭൂമിശാസ്ത്രപരമായ അതിർത്തി കൂടിയാണ്. ഉപകുടുംബതലത്തിൽ നടത്തിയ ഡിഎൻഎ അധിഷ്ഠിത പരിണാമപഠനങ്ങൾ കിഴക്കൻ ഹിമാലയത്തിൽ കൊമ്പൻ തവളകൾ ചരിത്രപരമായി സ്വതന്ത്രമായും അതിവേഗത്തിലും വൈവിധ്യവൽക്കരിക്കപ്പെട്ടതിന്റെ തെളിവുകൾ നൽകുന്നു.

ദശലക്ഷക്കണക്കിന് വർഷങ്ങൾ നീളുന്ന ഭൂമിശാസ്ത്രപരമായ കാലയളവിൽ നടന്ന ഈ പരിണാമ പ്രക്രിയകൾ, യുവ പർവതനിരകളായ ഹിമാലയത്തിന്റെ സജീവമായ ഉയർച്ചയോടും അതിന്റെ ഫലമായി ദക്ഷിണേഷ്യൻ മൺസൂൺ വ്യവസ്ഥ രൂപപ്പെട്ടതിനോടും കാലപരമായി ഒത്തുപോകുന്നതാണ്. ഇന്നും ഇന്ത്യൻ ഉപഭൂഖണ്ഡത്തിന്റെ ഭൂമിശാസ്ത്രത്തിലും സമ്പദ്‌വ്യവസ്ഥയിലും നിർണായക സ്വാധീനം ചെലുത്തുന്ന ഒന്നാണ് ഈ മൺസൂൺ വ്യവസ്ഥ. ഹിമാലയത്തിൽ ഇന്ന് കാണപ്പെടുന്ന സസ്യ-ജന്തു വൈവിധ്യത്തിന്റെ രൂപീകരണത്തിലും ഈ സുപ്രധാന ഭൂമിശാസ്ത്രപരമായ മാറ്റങ്ങൾ നിർണായക പങ്കുവഹിച്ചിട്ടുണ്ട്. ആഗോളതലത്തിൽ ഏറെ പ്രാധാന്യമുള്ള ജൈവവൈവിധ്യ കേന്ദ്രങ്ങളിലൊന്നാണ് ഹിമാലയം.

"വേണ്ടത്ര പഠിക്കപ്പെട്ടിട്ടില്ലാത്ത ജീവിവർഗങ്ങളിൽ, പ്രത്യേകമായ ശാസ്ത്രീയ പഠനങ്ങളുടെ അഭാവം മൂലം ഇനങ്ങളുടെ വൈവിധ്യവും അതിന് പിന്നിലെ പരിണാമ പ്രക്രിയകളും എങ്ങനെ ശ്രദ്ധിക്കപ്പെടാതെ പോകുന്നുവെന്ന് ഞങ്ങളുടെ പഠനം വ്യക്തമാക്കുന്നു. ഉഷ്ണമേഖലാ ഏഷ്യയിലെ വേണ്ടത്ര പഠിക്കപ്പെടാത്ത പ്രദേശങ്ങളിൽ ഒളിഞ്ഞുകിടക്കുന്ന ശ്രദ്ധേയമായ ജൈവവൈവിധ്യം രേഖപ്പെടുത്തുന്നതിന് നേരിട്ടുള്ള ഫീൽഡ് ഗവേഷണവും അത്യാധുനിക ലബോറട്ടറി സാങ്കേതികവിദ്യകളും സംയോജിപ്പിച്ചുള്ള പഠനങ്ങൾ അനിവാര്യമാണെന്നും ഈ കണ്ടെത്തൽ അടിവരയിടുന്നു," പഠനത്തിന് നേതൃത്വം നൽകിയ ഹാർവാർഡ് സർവകലാശാലയിലെ മ്യൂസിയം ഓഫ് കംപാരറ്റീവ് സുവോളജിയിലെ ജൈവവൈവിധ്യ പോസ്റ്റ് ഡോക്ടറൽ ഫെല്ലോ ഡോ. സൊണാലി ഗാർഗ് പറഞ്ഞു.

നേരത്തേ നടന്ന ജൈവഭൂമിശാസ്ത്ര പഠനങ്ങളിൽ വടക്കുകിഴക്കൻ ഇന്ത്യയെ ഇന്ത്യൻ ഉപഭൂഖണ്ഡത്തിനും ഏഷ്യൻ വൻകരയുടെ മറ്റ് ഭാഗങ്ങൾക്കുമിടയിൽ ജീവജാലങ്ങൾ കൈമാറ്റം ചെയ്യപ്പെട്ടിരുന്ന ചരിത്രപരമായ ഒരു കവാടം എന്ന നിലയിലാണ് പ്രധാനമായും വിലയിരുത്തിയിരുന്നത്. എന്നാൽ, പുതിയ പഠനം വടക്കുകിഴക്കൻ ഇന്ത്യയ്ക്ക് തനതായതും സമ്പന്നവും വ്യത്യസ്തവുമായ, ഇതുവരെ തിരിച്ചറിയപ്പെടാതെപോയ ഉഭയജീവി വൈവിധ്യമുണ്ടെന്നും ഈ പ്രദേശം നിർണായകമായ ഒരു ഉഭയജീവി ജൈവവൈവിധ്യ കേന്ദ്രമാണെന്നും വ്യക്തമാക്കുന്നു. ഈ മേഖലയിൽ കൂടുതൽ പ്രത്യേക ഗവേഷണങ്ങളും സംരക്ഷണ പ്രവർത്തനങ്ങളും അനിവാര്യമാണ്. "അരുണാചൽ പ്രദേശ് വേണ്ടത്ര പഠിക്കപ്പെട്ടിട്ടില്ലാത്ത, തനതായതും സമ്പന്നവുമായ തവളവൈവിധ്യം ഒളിപ്പിച്ചുവെച്ചിരിക്കുന്ന പ്രദേശമാണ്. പുതിയ ഇനങ്ങളിൽ ചിലത് വളരെ അപൂർവമായി മാത്രം പുറത്തുവരുന്നവയാണ്. പ്രജനനകാലത്തെ ഏതാനും ദിവസങ്ങളിൽ മാത്രമാണ് ഇവയെ വിദൂര വനമേഖലകളിൽ കാണാൻ കഴിയുന്നത്," ഡൽഹി സർവകലാശാലയിലെ സീനിയർ പ്രൊഫസറും പഠനകാലത്ത് ഹാർവാർഡ് സർവകലാശാലയിലെ റാഡ്ക്ലിഫ് ഫെല്ലോയുമായിരുന്ന പ്രൊഫ. എസ്. ഡി. ബിജു പറഞ്ഞു. പുതുതായി കണ്ടെത്തിയ ഈ ഇനങ്ങളുടെ ജീവശാസ്ത്രപരമായ സവിശേഷതകളും അവയുടെ സംരക്ഷണ ആവശ്യങ്ങളും കൂടുതൽ വ്യക്തമായി മനസ്സിലാക്കുന്നതിന് തുടർപഠനങ്ങൾ ആവശ്യമാണെന്നും അദ്ദേഹം കൂട്ടിച്ചേർത്തു.

സൊണാലി ഗാർഗ്, എസ്. ഡി. ബിജു, ടാഗെ ടാജോ, കെ. രാധാകൃഷ്ണ ഉപാധ്യായ, ജെയിംസ് ഹാങ്കൻ എന്നിവർ ചേർന്നാണ് പഠനം നടത്തിയത്. "ചെറുകൊമ്പൻ തവളകളുടെ ഇരട്ടിയിലധികം മറഞ്ഞുകിടക്കുന്ന വൈവിധ്യം (Megophryinae: Jingophrys): ഹിമാലയത്തിലെ ശ്രദ്ധിക്കപ്പെടാതെപോയ പ്രാദേശിക പരിണാമ പ്രക്രിയ" (Two-fold hidden diversity of diminutive horned frogs (Megophryinae: Jingophrys) highlights overlooked in situ diversification in the Himalaya) എന്ന തലക്കെട്ടിലുള്ള പഠനം 2026 നവംബർ 11-ന് ലണ്ടനിലെ റോയൽ സൊസൈറ്റി പ്രസിദ്ധീകരിക്കുന്ന, വിദഗ്ധ പരിശോധനയിലൂടെ അംഗീകരിക്കപ്പെട്ട ഓപ്പൺ ആക്സസ് ശാസ്ത്രജേണലായ റോയൽ സൊസൈറ്റി ഓപ്പൺ സയൻസിൽ പ്രസിദ്ധീകരിച്ചു.