Asianet News Malayalam

ആമസോൺ ഗ്രേറ്റ് ഇന്ത്യൻ ഫെസ്റ്റിവൽ വരുന്നു; വമ്പൻ ഓഫറുകൾ, തീയതി പ്രഖ്യാപിച്ചു

Prashobh Prasannan — Thu, 24 Sep 2026 11:36:02 +0530

ആമസോണിന്റെ ഈ വർഷത്തെ ഗ്രേറ്റ് ഇന്ത്യൻ ഫെസ്റ്റിവൽ വിൽപ്പനയുടെ തീയതി പ്രഖ്യാപിച്ചു. ഒക്ടോബർ 8 മുതലാണ് വിൽപ്പന ആരംഭിക്കുക. ഫ്ലിപ്‍കാർട്ടിന്റെ ബിഗ് ബില്യൺ ഡേയ്സ് വിൽപ്പനയും ഇതേ ദിവസമാണ് ആരംഭിക്കുന്നത്. പ്രൈം അംഗങ്ങൾക്ക് ഇത്തവണ കൂടുതൽ ആനുകൂല്യങ്ങളാണ് ആമസോൺ പ്രഖ്യാപിച്ചിരിക്കുന്നത്. അധികമായി 10 ശതമാനം വരെ ആനുകൂല്യങ്ങൾ ലഭിക്കുമെന്നാണ് കമ്പനിയുടെ അറിയിപ്പ്. വിൽപ്പനയ്ക്ക് മുന്നോടിയായി നിരവധി ഓഫറുകൾക്കൊപ്പം വിതരണ ശൃംഖല വിപുലീകരണവും സീസണൽ നിയമനങ്ങളും ആമസോൺ പ്രഖ്യാപിച്ചിട്ടുണ്ട്.

എസ്ബിഐ കാർഡ് ഉപയോക്താക്കൾക്ക് 10% ഇളവ്

തിരഞ്ഞെടുത്ത എസ്ബിഐ കാർഡ് ഇടപാടുകൾക്ക് 10% തൽക്ഷണ ഇളവ് ലഭിക്കും. എന്നാൽ വിവിധ ഉൽപ്പന്നങ്ങളിൽ അധിക ആനുകൂല്യങ്ങൾ എങ്ങനെ ലഭ്യമാകുമെന്നതിന്റെ പൂർണ വിവരങ്ങൾ ആമസോൺ പുറത്തുവിട്ടിട്ടില്ല.

സ്‍മാർട്ട്ഫോണുകൾക്ക് പ്രത്യേക ഓഫറുകൾ

ആഗോള മെമ്മറി ക്ഷാമത്തെ തുടർന്ന് സ്മാർട്ട്ഫോൺ വിലയിൽ വർധനയുണ്ടാകുന്ന സാഹചര്യത്തിലാണ് ഇത്തവണത്തെ വിൽപ്പന. ആപ്പിൾ, സാംസങ്, ഗൂഗിൾ തുടങ്ങിയ പ്രമുഖ ബ്രാൻഡുകളുടെ പുതിയതും മുൻനിരയിലുള്ളതുമായ സ്മാർട്ട്ഫോണുകൾക്ക് ആകർഷകമായ വില ലഭിക്കുമെന്നാണ് പ്രതീക്ഷ. സ്മാർട്ട്ഫോണുകൾക്ക് പുറമെ ടെലിവിഷൻ, ഫാഷൻ, സൗന്ദര്യവർധക ഉൽപ്പന്നങ്ങൾ, ഗൃഹോപകരണങ്ങൾ, പലചരക്ക് സാധനങ്ങൾ തുടങ്ങിയ വിഭാഗങ്ങളിലും ഓഫറുകളുണ്ടാകും. വിവിധ ഉൽപ്പന്നങ്ങൾക്ക് ഈ വർഷത്തെ ഏറ്റവും കുറഞ്ഞ വില ലഭിക്കുമെന്നാണ് ആമസോണിന്റെ അവകാശവാദം.

നിരവധി ഡീൽ വിഭാഗങ്ങൾ

ബ്ലോക്ക്ബസ്റ്റർ ഡീൽസ്, ടോപ്പ് 100 ഡീൽസ്, മെഗാ ഡീൽസ്, രാത്രി 8 മണി ഡീൽസ് തുടങ്ങിയ പ്രത്യേക ഓഫറുകൾ വിൽപ്പനയുടെ ഭാഗമാകും. ‘കൂടുതൽ വാങ്ങൂ, കൂടുതൽ ലാഭിക്കൂ’, എക്സ്ചേഞ്ച് മേള, സാമ്പിൾ മാനിയ, ആമസോൺ കോംബോസ് തുടങ്ങിയ ഓഫറുകളും ഉപഭോക്താക്കൾക്ക് ലഭിക്കും. വിവിധ ഉൽപ്പന്ന വിഭാഗങ്ങളിൽ നോ കോസ്റ്റ് ഇഎംഐ, എക്സ്ചേഞ്ച് ഓഫറുകളും ഉണ്ടാകും.

എഐ സഹായത്തോടെ ഷോപ്പിങ്

വിൽപ്പന കാലയളവിൽ എഐ അധിഷ്ഠിത ഷോപ്പിങ് സംവിധാനങ്ങൾക്കും ആമസോൺ പ്രാധാന്യം നൽകുന്നുണ്ട്. ഉൽപ്പന്നങ്ങൾ തമ്മിൽ താരതമ്യം ചെയ്യാനും മുൻകാല വില പരിശോധിക്കാനും അനുയോജ്യമായ ഉൽപ്പന്നങ്ങൾ കണ്ടെത്താനും എഐ സംവിധാനങ്ങൾ സഹായിക്കും. ഉൽപ്പന്ന പേജുകളിലും തിരച്ചിൽ സംവിധാനത്തിലും ലഭ്യമാകുന്ന ഈ ഫീച്ചറുകൾ വഴി ഉപഭോക്താക്കൾക്ക് വാങ്ങുന്നതിന് മുമ്പ് കൂടുതൽ എളുപ്പത്തിൽ താരതമ്യം നടത്താനാകും.

പ്രൈം വീഡിയോയിലും പ്രത്യേക പരിപാടികൾ

പ്രൈം അംഗങ്ങൾക്കായി പ്രൈം വീഡിയോയിൽ പ്രത്യേക ആഘോഷകാല ഉള്ളടക്കങ്ങളും ഒരുക്കിയിട്ടുണ്ട്. വിവിധ വിഭാഗങ്ങളിലും ഭാഷകളിലുമായി ഒറിജിനൽ പരിപാടികൾ ഉൾപ്പെടെയുള്ളവയാണ് ഇതിൽ ഉണ്ടാകുക. എന്നാൽ ഏതൊക്കെ പരിപാടികളാണ് ഉൾപ്പെടുത്തിയിരിക്കുന്നതെന്ന് ആമസോൺ ഇതുവരെ വ്യക്തമാക്കിയിട്ടില്ല.

1.6 ലക്ഷം താൽക്കാലിക തൊഴിലവസരങ്ങൾ

ആഘോഷകാല വിൽപ്പനയ്ക്ക് മുന്നോടിയായി വിതരണ ശൃംഖലയിലും ആമസോൺ വലിയ വിപുലീകരണം പ്രഖ്യാപിച്ചിട്ടുണ്ട്. രാജ്യത്തെ 400 നഗരങ്ങളിലായി പ്രവർത്തന ശൃംഖലയിൽ 1.6 ലക്ഷത്തിലധികം സീസണൽ തൊഴിലവസരങ്ങളാണ് കമ്പനി സൃഷ്ടിച്ചിരിക്കുന്നത്. 20 ഫുൾഫിൽമെന്റ് സെന്ററുകൾ, 6 സോർട്ട് സെന്ററുകൾ, 150 അവസാനഘട്ട വിതരണ കേന്ദ്രങ്ങൾ എന്നിവ കൂടി ഉൾപ്പെടുത്തി കമ്പനിയുടെ ഏറ്റവും വലിയ പ്രവർത്തന ശൃംഖലാ വിപുലീകരണവും പ്രഖ്യാപിച്ചിട്ടുണ്ട്. രാജ്യത്തുടനീളമുള്ള 20 ലക്ഷത്തിലധികം വിൽപ്പനക്കാരെ നിലവിലെ ശൃംഖല പിന്തുണയ്ക്കുന്നു. കഴിഞ്ഞ ഒരു വർഷത്തിനിടെ 3 ലക്ഷത്തിലധികം പുതിയ വിൽപ്പനക്കാർ കൂടി ആമസോൺ പ്ലാറ്റ്‌ഫോമിൽ എത്തിയിട്ടുണ്ട്.

‘നൗ’ സേവനം 100 നഗരങ്ങളിലേക്ക്

ആമസോണിന്റെ അതിവേഗ വിതരണ സേവനമായ ‘നൗ’ നിലവിൽ 60ലധികം നഗരങ്ങളിലെ ദശലക്ഷക്കണക്കിന് ഉപഭോക്താക്കൾക്ക് ലഭ്യമാണ്. ദീപാവലിക്ക് മുമ്പ് സേവനം 100 നഗരങ്ങളിലേക്ക് വ്യാപിപ്പിക്കാനാണ് ആമസോണിന്റെ പദ്ധതി. തങ്ങളുടെ പ്രദേശത്ത് സേവനം ലഭ്യമാണോയെന്ന് അറിയാൻ ആമസോൺ ഷോപ്പിങ് ആപ്പ് തുറന്ന് ‘നൗ’ ബാനർ പരിശോധിക്കാമെന്ന് കമ്പനി അറിയിച്ചു.

വാട്‍സാപ്പിൽ ഇനി തേർഡ് പാർട്ടി എഐ ഏജന്‍റുമാരും; ഐഫോണിൽ പുതിയ ഫീച്ചർ പരീക്ഷണം

Prashobh Prasannan — Thu, 24 Sep 2026 12:46:11 +0530

വാട്‍സാപ്പ് ഉപയോക്താക്കൾക്ക് പുതിയ സേവനവുമായി മെറ്റ. വാട്സാപ്പ് പ്ലാറ്റ്ഫോമിൽ തേർഡ് പാർട്ടി എഐ ഏജന്റുമാരെ ഉൾപ്പെടുത്തുന്നതിനുള്ള ഫീച്ചർ പരീക്ഷിക്കുന്നതായി റിപ്പോർട്ട്. ഉപയോക്താക്കളുമായി ചാറ്റ് ചെയ്യാനും വിവിധ ജോലികൾ ചെയ്യാനും കഴിയുന്ന ഏജന്റുമാരെയാണ് വാട്സാപ്പിൽ അവതരിപ്പിക്കാൻ ഒരുങ്ങുന്നത്. ടെലഗ്രാമിൽ വർഷങ്ങളായി ലഭ്യമായിരുന്ന സമാന സംവിധാനത്തിന് പിന്നാലെയാണ് വാട്സാപ്പിലും തേർഡ് പാർട്ടി ഏജന്റുമാരെ അവതരിപ്പിക്കുന്നത്. ജോലികൾ ക്രമീകരിക്കുക, സന്ദേശങ്ങൾ തയ്യാറാക്കുക, ദിവസത്തെ കാര്യങ്ങൾ ആസൂത്രണം ചെയ്യുക തുടങ്ങിയ ആവശ്യങ്ങൾക്ക് ഇത്തരം ഏജന്റുമാരെ ഉപയോഗിക്കാനാകും.

എങ്ങനെ പ്രവർത്തിക്കും?

ഫീച്ചർ ലഭ്യമാകുന്നതോടെ വാട്സാപ്പിന്റെ ക്രമീകരണങ്ങളിൽ നിന്ന് ഉപയോക്താക്കൾക്ക് ഏജന്റുമാരെ സൃഷ്ടിക്കാനാകും. ഓരോ ഏജന്റിനും പേര് നൽകാനും പ്രൊഫൈൽ ചിത്രം ചേർക്കാനും സാധിക്കും. തുടർന്ന് വാട്സാപ്പ് ഒരു എപിഐ കീ നൽകും. ഏജന്റിന്റെ ഡെവലപ്പർ ഹോസ്റ്റ് ചെയ്യുന്ന സേവനവുമായി ബന്ധിപ്പിക്കാൻ ഈ കീ ഉപയോഗിക്കാം. സജ്ജീകരണം പൂർത്തിയായാൽ സാധാരണ വാട്സാപ്പ് കോൺടാക്ടിനോട് ചാറ്റ് ചെയ്യുന്നതുപോലെ ഏജന്റുമായും സംസാരിക്കാം.

ഒരേസമയം 5 ഏജന്റുമാരെ വരെ

വാട്സാപ്പ് ക്രമീകരണങ്ങളിലൂടെ ഒരു ഉപയോക്താവിന് പരമാവധി 5 ഏജന്റുമാരെ സൃഷ്ടിക്കാൻ സാധിക്കുമെന്നാണ് റിപ്പോർട്ട്. ഓരോ ഏജന്റിനും വ്യത്യസ്ത പേരും പ്രൊഫൈൽ ചിത്രവും നൽകാം. എന്നാൽ ഏജന്റിന് ഉപയോക്താവ് നേരിട്ട് പങ്കുവയ്ക്കുന്ന സന്ദേശങ്ങളും ഉള്ളടക്കങ്ങളും മാത്രമേ വായിക്കാൻ കഴിയൂ. മറ്റ് വ്യക്തിഗത ചാറ്റുകൾ, കോൺടാക്ടുകൾ, ഫോണിൽ സൂക്ഷിച്ചിരിക്കുന്ന മീഡിയ ഫയലുകൾ എന്നിവയിലേക്ക് ഏജന്റിന് പ്രവേശനം ഉണ്ടായിരിക്കില്ല.

ചാറ്റുകൾ എൻഡ്-ടു-എൻഡ് എൻക്രിപ്റ്റഡ് ആയിരിക്കില്ല

സാധാരണ വാട്സാപ്പ് സന്ദേശങ്ങളിൽ നിന്ന് വ്യത്യസ്തമായി, ഈ ഏജന്റുമാരുമായുള്ള ചാറ്റുകൾ എൻഡ്-ടു-എൻഡ് എൻക്രിപ്ഷന് വിധേയമായിരിക്കില്ലെന്നാണ് റിപ്പോർട്ട്. കാരണം ഈ ഏജന്റുമാരെ നിയന്ത്രിക്കുന്നത് തേർഡ് പാർട്ടി ഡെവലപ്പർമാരാണ്. ഇവർക്കുവേണ്ടി മെറ്റയുടെ ഒരു സേവനത്തിലൂടെയാണ് സന്ദേശങ്ങൾ കൈകാര്യം ചെയ്യുന്നത്. കൂടാതെ, എല്ലാ ഏജന്റുകളും നിർബന്ധമായും എഐ അധിഷ്ഠിതമായിരിക്കണമെന്നില്ല. സാധാരണ ബോട്ടുകൾക്കും ഈ സംവിധാനത്തിലൂടെ പ്രവർത്തിക്കാൻ കഴിയും.

ഐഫോണിലും പരീക്ഷണം

ആൻഡ്രോയിഡിനായി വാട്സാപ്പ് നേരത്തെ തന്നെ ഈ ഫീച്ചറിൽ പ്രവർത്തിക്കുന്നതായി റിപ്പോർട്ടുകളുണ്ടായിരുന്നു. ഇപ്പോൾ ഐഫോണിലും ഫീച്ചർ പരീക്ഷിക്കുന്നതായി വാട്സാപ്പ് ഫീച്ചറുകൾ നിരീക്ഷിക്കുന്ന വെബ്സൈറ്റായ വാബീറ്റാഇൻഫോ റിപ്പോർട്ട് ചെയ്യുന്നു. വാട്സാപ്പ് ബീറ്റ പതിപ്പ് 26.37.10.70ൽ ഐഒഎസിനായി ഈ ഫീച്ചർ കണ്ടെത്തിയതായാണ് റിപ്പോർട്ട്. ടെസ്റ്റ്ഫ്ലൈറ്റ് വഴിയാണ് പരീക്ഷണ പതിപ്പ് ലഭ്യമാക്കുന്നത്.

എല്ലാ ഉപയോക്താക്കൾക്കും എന്ന് ലഭിക്കും?

നിലവിൽ തിരഞ്ഞെടുത്ത രാജ്യങ്ങളിലെ പരിമിതമായ ബീറ്റ പരീക്ഷകർക്ക് മാത്രമാണ് ഫീച്ചർ ലഭ്യമാക്കിയിരിക്കുന്നതെന്നാണ് വിവരം. എല്ലാ വാട്സാപ്പ് ഉപയോക്താക്കൾക്കും ഫീച്ചർ എപ്പോൾ ലഭ്യമാകുമെന്ന് മെറ്റ ഇതുവരെ വ്യക്തമാക്കിയിട്ടില്ല. അതേസമയം, അപ്രത്യക്ഷമാകുന്ന സന്ദേശങ്ങളുടെ സംവിധാനം ഈ ഏജന്റ് ചാറ്റുകളിൽ നിലവിൽ ലഭ്യമാകില്ല. ഏജന്റിനെ വിച്ഛേദിക്കാനോ മറ്റൊരു കീ ഉപയോഗിക്കാനോ താൽപര്യമുണ്ടെങ്കിൽ ഉപയോക്താക്കൾക്ക് എപിഐ കീ പുനഃസജ്ജീകരിക്കാനും സാധിക്കും.

ഞെട്ടിക്കാൻ ഒപ്പോ കെ14 പ്ലസ് വരുന്നു; ഫീച്ചറുകൾ അറിയാമോ?

Prashobh Prasannan — Fri, 25 Sep 2026 16:41:56 +0530

മിഡ് റേഞ്ച് സ്‍മാർട്ട്ഫോൺ വിപണിയിൽ പുതിയ മോഡലുമായി ഒപ്പോ. കെ14 പ്ലസ് സ്‍മാർട്ട്ഫോൺ ഇന്ത്യയിൽ സെപ്റ്റംബർ 29ന് അവതരിപ്പിക്കും. ഉച്ചയ്ക്ക് 12 മണിക്കാണ് ലോഞ്ച്. ഫ്ലിപ്‍കാർട്ടിൽ ഒരുക്കിയ പ്രത്യേക മൈക്രോസൈറ്റിലൂടെ ഫോണിന്റെ ഡിസൈൻ ഉൾപ്പെടെയുള്ള പ്രധാന ഫീച്ചറുകൾ ഒപ്പോ പുറത്തുവിട്ടിട്ടുണ്ട്.

കെ സീരീസിലെ നാലാമൻ

ഇന്ത്യയിലെ ഒപ്പോ കെ സീരീസിലെ നാലാമത്തെ സ്‍മാർട്ട്ഫോണായിരിക്കും കെ14 പ്ലസ്. അടുത്തിടെ പുറത്തിറക്കിയ കെ14 ലൈറ്റ്, കെ14 എക്സ് എന്നീ മോഡലുകൾക്ക് പിന്നാലെയാണ് പുതിയ ഫോൺ എത്തുന്നത്. ഫ്ലിപ്‍കാർട്ടിന്റെ ബിഗ് ബില്യൺ ഡേയിസ് വിൽപ്പനയുടെ ഭാഗമായും കെ14 പ്ലസ് ലഭ്യമാകും. ലോഞ്ചിനോട് അനുബന്ധിച്ച് പ്രത്യേക ഓഫറുകളും കമ്പനി പ്രഖ്യാപിക്കുമെന്നാണ് പ്രതീക്ഷിക്കുന്നത്.

144 ഹെർട്സ് അമോലെഡ് ഡിസ്പ്ലേ

6.77 ഇഞ്ച് വലുപ്പമുള്ള 1.5കെ അമോലെഡ് ഡിസ്പ്ലേയാണ് കെ14 പ്ലസിൽ നൽകിയിരിക്കുന്നത്. 144 ഹെർട്സ് റിഫ്രഷ് റേറ്റും 3600 നിറ്റ് വരെ പീക്ക് ബ്രൈറ്റ്നസും ഡിസ്പ്ലേയുടെ പ്രത്യേകതകളാണ്. മീഡിയടെക് ഡൈമെൻസിറ്റി 7360 മാക്സ് ചിപ്സെറ്റാണ് ഫോണിന് കരുത്തേകുന്നത്. 8 ജിബി റാമും 256 ജിബി സ്റ്റോറേജുമുള്ള പതിപ്പാണ് നിലവിൽ സ്ഥിരീകരിച്ചിരിക്കുന്നത്. കളർഒഎസ് 16 ആയിരിക്കും ഫോണിന്റെ ഓപ്പറേറ്റിങ് സിസ്റ്റം.

50 മെഗാപിക്സൽ ക്യാമറ

പിന്നിൽ ഡ്യുവൽ ക്യാമറ സജ്ജീകരണമാണ് ഒപ്പോ നൽകിയിരിക്കുന്നത്. ഒപ്റ്റിക്കൽ ഇമേജ് സ്റ്റെബിലൈസേഷൻ അഥവാ ഒഐഎസ് പിന്തുണയുള്ള 50 മെഗാപിക്സൽ പ്രൈമറി ക്യാമറയാണ് ഇതിലെ പ്രധാന ക്യാമറ. സെൽഫികൾക്കായി 16 മെഗാപിക്സൽ ഫ്രണ്ട് ക്യാമറയും ലഭിക്കും. 4കെ വീഡിയോ റെക്കോർഡിങ്ങിനും ഫോൺ പിന്തുണ നൽകും.

8000 എംഎഎച്ച് ബാറ്ററി

കെ14 പ്ലസിന്റെ പ്രധാന സവിശേഷതകളിലൊന്ന് 8000 എംഎഎച്ച് ബാറ്ററിയാണ്. 45 വാട്ട് ഫാസ്റ്റ് ചാർജിങ് പിന്തുണയോടെയാണ് ബാറ്ററി എത്തുന്നത്. ദീർഘനേരം ഉപയോഗിക്കുമ്പോൾ ഫോൺ ചൂടാകുന്നത് നിയന്ത്രിക്കുന്നതിനായി 5000 ചതുരശ്ര മില്ലിമീറ്റർ വലുപ്പമുള്ള വേപ്പർ ചേംബർ കൂളിങ് സംവിധാനവും നൽകിയിട്ടുണ്ട്.

ഐപി69കെ റേറ്റിങ്ങും സ്റ്റീരിയോ സ്പീക്കറുകളും

ഡ്യുവൽ സ്റ്റീരിയോ സ്പീക്കറുകൾ, ഇൻ-ഡിസ്പ്ലേ ഫിംഗർപ്രിന്റ് സ്‍കാനർ എന്നിവയും കെ14 പ്ലസിലുണ്ടാകും. പൊടിയും വെള്ളവും പ്രതിരോധിക്കുന്ന ഐപി69കെ റേറ്റിങ്ങും ഫോണിനുണ്ട്. ഡാമേജ് പ്രൂഫ് 360 ആർമർ ബോഡി ഡിസൈനും 6 വർഷത്തെ സ്‍മൂത്ത്നെസ് പ്രൊട്ടക്ഷൻ സർട്ടിഫിക്കേഷനും ഫോണിന്റെ മറ്റൊരു പ്രത്യേകതയാണ്.

വില പ്രഖ്യാപിച്ചിട്ടില്ല

കെ14 പ്ലസിന്റെ ഇന്ത്യയിലെ വില ഒപ്പോ ഇതുവരെ പുറത്തുവിട്ടിട്ടില്ല. ഫോണിന്റെ മുഴുവൻ മെമ്മറി വേരിയന്റുകളും കമ്പനി സ്ഥിരീകരിച്ചിട്ടില്ല. ഫ്ലിപ്കാർട്ടിലൂടെ മാത്രമായിരിക്കും വിൽപ്പന. ഫോണിന്റെ നിറങ്ങളുടെ ഔദ്യോഗിക പേരുകളും ഇതുവരെ വെളിപ്പെടുത്തിയിട്ടില്ല. സെപ്റ്റംബർ 29ന് നടക്കുന്ന ലോഞ്ച് ചടങ്ങിൽ വില, വിൽപ്പന ഓഫറുകൾ, മറ്റ് സവിശേഷതകൾ എന്നിവ സംബന്ധിച്ച കൂടുതൽ വിവരങ്ങൾ ഒപ്പോ പുറത്തുവിടും.

`സൂക്ഷിച്ചില്ലെങ്കിൽ മനുഷ്യരാശിക്കാകെ ഭീഷണിയായേക്കും'; എഐ വികസനത്തിൻ്റെ അപകടം അവതരിപ്പിച്ച് പ്രധാന എഐ കമ്പനി മേധാവിമാർ

Aishwarya S Babu — Thu, 24 Sep 2026 18:14:14 +0530

എഐ വികസനത്തിൻ്റെ അപകടം യുഎൻ സുരക്ഷാ കൗൺസിലിന് മുമ്പാകെ അവതരിപ്പിച്ച് പ്രധാന എഐ കമ്പനി മേധാവിമാർ. സൂക്ഷിച്ചില്ലെങ്കിൽ മനുഷ്യരാശിക്കാകെ എഐ ഭീഷണിയായേക്കുമെന്ന മുന്നറിയിപ്പാണ് സുരക്ഷാ കൗൺസിൽ മുന്നാകെ ആവർത്തിക്കപ്പെട്ടത്. സുരക്ഷാ കൗൺസിൽ അംഗങ്ങളായ രാജ്യങ്ങളുടെ വിദേശകാര്യ മന്ത്രിമാർക്ക് മുമ്പാകെ ആന്ത്രോപിക് സിഇഒ ഡാരിയോ അമോദി, ഓപ്പൺ എഐ മേധാവി സാം ആൾട്ട്മാൻ, ഹഗ്ഗിംഗ് ഫേസ് സഹസ്ഥാപകൻ ക്ലെമൻ്റ് ഡെലാൻഗ്യു എന്നിവർ സംസാരിച്ചു.

എഐ ഒരേ സമയം ആഗോള സാധ്യതയും ആഗോള ഭീഷണിയുമാണെന്ന് ഡാരിയോ അമോദിയും വിഷയത്തിൽ ആഗോള സഹകരണം വേണമെന്ന് സാം ആൾട്ട്മാനും സമിതിക്ക് മുമ്പാകെ നിലപാടെടുത്തു. ഫ്രാൻസ് മുൻകൈ എടുത്താണ് യോഗം നടത്തിയത്. എഐ നിയന്ത്രണ ആവശ്യങ്ങൾ ട്രംപ് പലവട്ടം തള്ളിയതിന് ശേഷമാണ് യുഎന്നിൽ വച്ച് തന്നെയുള്ള കമ്പനി മേധാവിമാരുടെ പ്രഖ്യാപനം.

'മേക്ക് ഇൻ ഇന്ത്യ'ക്ക് 12 വർഷം; ഇനി ലക്ഷ്യം സ്മാർട്ട്ഫോണിന്റെ ഉള്ളിലെ ഘടകങ്ങൾ, വമ്പൻ പദ്ധതിയുമായി കേന്ദ്രം

Sangeetha KS — Sat, 26 Sep 2026 10:40:11 +0530

രാജ്യത്തെ മൊബൈൽ ഫോൺ നിർമാണ മേഖലയിൽ കൂടുതൽ സ്വയംപര്യാപ്‍തത ലക്ഷ്യമിട്ട് കേന്ദ്ര സർക്കാർ. മേക്ക് ഇൻ ഇന്ത്യ പദ്ധതിക്ക് 12 വർഷം പൂർത്തിയാകുന്ന ഘട്ടത്തിലാണ് സ്‍മാർട്ട്ഫോൺ നിർമാണത്തിന്റെ അടുത്ത ഘട്ടം സംബന്ധിച്ച് കേന്ദ്ര ഇലക്ട്രോണിക്സ്, ഐടി മന്ത്രി അശ്വിനി വൈഷ്‍ണവ് വിശദീകരണം നൽകിയത്.സ്‍മാർട്ട്ഫോണുകൾ രാജ്യത്ത് അസംബിൾ ചെയ്യുന്നതിൽ മാത്രം ഒതുങ്ങാതെ, അവയ്ക്കുള്ളിലെ വിവിധ ഘടകങ്ങളും ഉപഘടകങ്ങളും നിർമാണ സാമഗ്രികളും രാജ്യത്ത് തന്നെ ഉൽപ്പാദിപ്പിക്കുന്നതിലേക്ക് ഇന്ത്യ കടന്നുവെന്നാണ് മന്ത്രിയുടെ വിശദീകരണം.

മൊബൈൽ നിർമാണം 28 മടങ്ങ് വർധിച്ചു

2014ലാണ് പ്രധാനമന്ത്രി നരേന്ദ്ര മോദി മേക്ക് ഇൻ ഇന്ത്യ പദ്ധതിക്ക് തുടക്കമിട്ടത്. ആഭ്യന്തര ഉൽപ്പാദനശേഷി വർധിപ്പിക്കുക, രാജ്യത്ത് കൂടുതൽ നിക്ഷേപം എത്തിക്കുക, ആഗോള കമ്പനികളെ ഇന്ത്യയിൽ നിർമാണം നടത്താൻ പ്രോത്സാഹിപ്പിക്കുക എന്നിവയായിരുന്നു പദ്ധതിയുടെ പ്രധാന ലക്ഷ്യങ്ങൾ. സർക്കാർ കണക്കുകൾ പ്രകാരം 2014–15ൽ 18,000 കോടി രൂപ ആയിരുന്ന രാജ്യത്തെ മൊബൈൽ ഫോൺ ഉൽപ്പാദനം 2024–25ൽ 5.45 ലക്ഷം കോടിയായി ഉയർന്നു. അതായത് 28 മടങ്ങിന്റെ വർധന. പ്രതിവർഷം 330 ദശലക്ഷത്തിലധികം മൊബൈൽ ഫോണുകൾ നിർമിക്കുന്ന നിലയിലേക്ക് ഇന്ത്യ എത്തിക്കൊണ്ടിരിക്കുകയാണെന്നും കേന്ദ്രം വ്യക്തമാക്കി.

ഇനി ഫോൺ നിർമാണത്തിനുള്ളിലെ ഘടകങ്ങളിലേക്ക്

സ്‍മാർട്ട്ഫോണിൽ നൂറുകണക്കിന് ഘടകങ്ങളാണ് ഉപയോഗിക്കുന്നത്. ഇതിൽ കൂടുതൽ ഘടകങ്ങളും ഉപഘടകങ്ങളും നിർമാണ സാമഗ്രികളും ഇപ്പോൾ ഇന്ത്യയിൽ തന്നെ ഉൽപ്പാദിപ്പിക്കുന്നുണ്ടെന്ന് അശ്വിനി വൈഷ്‍ണവ് പറഞ്ഞു. ഇതോടെ മൊബൈൽ ഫോണുകൾ കൂട്ടിച്ചേർക്കുന്ന പ്രധാന കേന്ദ്രം എന്ന നിലയിൽ നിന്ന് സ്‍മാർട്ട്ഫോൺ ഘടകങ്ങളുടെ സമ്പൂർണ വിതരണ ശൃംഖല വികസിപ്പിക്കുന്ന രാജ്യമായി മാറുകയാണ് ഇന്ത്യയുടെ ലക്ഷ്യം.

ബാറ്ററി നിർമാണത്തിലും മുന്നേറ്റം

മൊബൈൽ ഫോണുകൾക്കാവശ്യമായ ബാറ്ററി സെല്ലുകളുടെ നിർമാണവും ഇന്ത്യയിൽ ആരംഭിച്ചിട്ടുണ്ട്. എന്നാൽ ബാറ്ററി സെൽ നിർമാണത്തിൽ മാത്രം ഒതുങ്ങാതെ സെല്ലുകൾ നിർമിക്കാൻ ആവശ്യമായ വിവിധ വസ്തുക്കളുടെ ഉൽപ്പാദനത്തിലേക്കും രാജ്യം കടക്കുകയാണെന്ന് മന്ത്രി വ്യക്തമാക്കി. ലിഥിയം- അയൺ ബാറ്ററി സെല്ലുകളിൽ ഉപയോഗിക്കുന്ന വിവിധ പാളികളും വസ്തുക്കളും രാജ്യത്ത് തന്നെ നിർമിക്കുന്നതിലേക്കാണ് നീക്കം.

സിന്തറ്റിക് ഗ്രാഫൈറ്റും ഇലക്ട്രോലൈറ്റും ഇന്ത്യയിൽ

ലിഥിയം-അയൺ ബാറ്ററിയുടെ ആനോഡിൽ ഉപയോഗിക്കുന്ന പ്രധാന വസ്തുവായ സിന്തറ്റിക് ഗ്രാഫൈറ്റും രാജ്യത്ത് നിർമിക്കാനുള്ള ശേഷി വികസിപ്പിക്കുകയാണെന്ന് വൈഷ്ണവ് അറിയിച്ചു. ബാറ്ററി സെല്ലുകളിൽ ഉപയോഗിക്കുന്ന ദ്രാവക ഇലക്ട്രോലൈറ്റും ഇന്ത്യയിലെ നിർമാണ ശൃംഖലയുടെ ഭാഗമാകുകയാണ്. ബാറ്ററിയിൽ വൈദ്യുത ചാലകമായി ഉപയോഗിക്കുന്ന അസറ്റിലീൻ ബ്ലാക്കും രാജ്യത്ത് തന്നെ നിർമിക്കുമെന്ന് മന്ത്രി വ്യക്തമാക്കി.

ക്യാമറ മുതൽ സർക്യൂട്ട് ബോർഡ് വരെ

സ്‍മാർട്ട്ഫോണിന്റെ പ്രധാന ഘടകങ്ങളായ ക്യാമറ, ക്യാമറ മൊഡ്യൂൾ, ഡിസ്പ്ലേ, സ്പീക്കർ, കോയിൽ, പ്രിന്റഡ് സർക്യൂട്ട് ബോർഡ്, കണക്ടർ തുടങ്ങിയവയും ഇന്ത്യയിൽ നിർമിക്കുന്നുണ്ടെന്ന് കേന്ദ്രം അറിയിച്ചു. ഇതോടെ സ്മാർട്ട്ഫോൺ നിർമാണത്തിന്റെ വിവിധ ഘട്ടങ്ങളിലേക്കും ആഭ്യന്തര ഉൽപ്പാദനം വ്യാപിക്കുകയാണ്.

ആഗോള സാങ്കേതിക കമ്പനികളും ഇന്ത്യയിലേക്ക്

മേക്ക് ഇൻ ഇന്ത്യയുടെ ഭാഗമായി കഴിഞ്ഞ വർഷങ്ങളിൽ നിരവധി ആഗോള സാങ്കേതിക കമ്പനികൾ ഇന്ത്യയിൽ സ്വന്തം നിർമാണ യൂണിറ്റുകൾ ആരംഭിക്കുകയോ ഇന്ത്യൻ കമ്പനികളുമായി സംയുക്ത സംരംഭങ്ങളിൽ ഏർപ്പെടുകയോ ചെയ്തിട്ടുണ്ട്. മൊബൈൽ ഫോൺ നിർമാണത്തിൽ കൈവരിച്ച വളർച്ചയുടെ അടുത്ത ഘട്ടമായി ഘടക നിർമാണത്തിലും ബാറ്ററി വിതരണ ശൃംഖലയിലും കൂടുതൽ ആഭ്യന്തര ശേഷി വികസിപ്പിക്കുകയാണ് കേന്ദ്രത്തിന്റെ ലക്ഷ്യം. ഇതുവഴി മൊബൈൽ ഫോൺ നിർമാണ മേഖലയിൽ ഇന്ത്യയുടെ ആഭ്യന്തര മൂല്യവർധന കൂടുതൽ ഉയർത്താനാണ് സർക്കാർ നീക്കം.

വരുന്നൂ ഫ്ലിപ്‍കാർട്ട് ബിഗ് ബില്യൺ ഡേയ്സ്; ഐഫോൺ 17 മുതൽ ഗൂഗിൾ പിക്സൽ 11 വരെ വമ്പൻ വിലക്കുറവിൽ

Sangeetha KS — Sat, 26 Sep 2026 16:19:55 +0530

രാജ്യത്തെ ഏറ്റവും വലിയ ഓൺലൈൻ ഷോപ്പിങ് ആഘോഷങ്ങളിലൊന്നായ ഫ്ലിപ്‍കാർട്ട് ബിഗ് ബില്യൺ ഡേയ്സ് വിൽപ്പനയ്ക്ക് തുടക്കമാകുന്നു. 2026ലെ ഉത്സവകാല വിൽപ്പന ഒക്ടോബർ 9ന് ആരംഭിക്കും. സ്‍മാർട്ട്ഫോണുകൾ ഉൾപ്പെടെയുള്ള ഇലക്ട്രോണിക് ഉൽപ്പന്നങ്ങൾക്ക് വൻ വിലക്കുറവുകളും ഓഫറുകളും ലഭ്യമാകുമെന്നാണ് സൂചന. ഫ്ലിപ്കാർട്ട് ഇതിനോടകം തന്നെ വിവിധ സ്മാർട്ട്ഫോണുകളുടെ ഓഫറുകൾ പുറത്തുവിടാൻ തുടങ്ങിയിട്ടുണ്ട്. ആപ്പിൾ, സാംസങ്, ഗൂഗിൾ, മോട്ടറോള, റിയൽമി, വിവോ തുടങ്ങിയ പ്രമുഖ ബ്രാൻഡുകളുടെ പുതിയ മോഡലുകൾക്കൊപ്പം ജനപ്രിയ മുൻനിര, മധ്യനിര ഫോണുകളും വിൽപ്പനയിൽ ഉൾപ്പെടും.

ഒക്ടോബർ 9 മുതൽ വിൽപ്പന

ഫ്ലിപ്‍കാർട്ട് ബിഗ് ബില്യൺ ഡേയ്സ് 2026 വിൽപ്പന ഒക്ടോബർ 9ന് ഔദ്യോഗികമായി ആരംഭിക്കും. എന്നാൽ ഫ്ലിപ്‍കാർട്ട് പ്ലസ്, ഫ്ലിപ്‍കാർട്ട് ബ്ലാക്ക് അംഗങ്ങൾക്കും അർഹരായ ഫ്ലിപ്‍കാർട്ട് ക്രെഡിറ്റ് കാർഡ് ഉപഭോക്താക്കൾക്കും ഒക്ടോബർ 8 മുതൽ നേരത്തേ വിൽപ്പനയിൽ പ്രവേശിക്കാം. വിൽപ്പനയ്ക്ക് മുന്നോടിയായി ചില ഫോണുകളുടെ ആദ്യകാല ഓഫറുകളും ഫ്ലിപ്‍കാർട്ട് പുറത്തുവിട്ടിട്ടുണ്ട്. എന്നാൽ എല്ലാ മോഡലുകളുടെയും അന്തിമ വില ഇതുവരെ പ്രഖ്യാപിച്ചിട്ടില്ല.

ഐഫോൺ 17ന് പ്രത്യേക ഓഫർ

വിൽപ്പനയിൽ ശ്രദ്ധ നേടുന്ന ഫോണുകളിലൊന്നാണ് ഐഫോൺ 17. ഫ്ലിപ്‍കാർട്ടിന്റെ പ്രമോഷനിൽ ഫോണിന്റെ വിൽപ്പന വില 7X,XXX രൂപ നിരക്കിൽ ആയിരിക്കുമെന്ന് സൂചന നൽകിയിട്ടുണ്ട്. എന്നാൽ കൃത്യമായ വില ഇതുവരെ വെളിപ്പെടുത്തിയിട്ടില്ല. ഐഫോൺ 17ന്റെ 256 ജിബി പതിപ്പ് ഇന്ത്യയിൽ പുറത്തിറക്കിയ സമയത്ത് 82,900 രൂപ ആയിരുന്നു പ്രാരംഭ വില. പിന്നീട് ഈ മോഡലിന്റെ ഔദ്യോഗിക വില 99,900 രൂപ ആയി ഉയർന്നു. അതിനാൽ ബിഗ് ബില്യൺ ഡേയ്സ് വിൽപ്പനയിൽ ഫ്ലിപ്‍കാർട്ട് പ്രഖ്യാപിക്കുന്ന 7X,XXX രൂപ വില നിലവിലെ 99,900 രൂപ ഔദ്യോഗിക വിലയുമായി താരതമ്യപ്പെടുത്തേണ്ടതാണ്. അന്തിമ വിൽപ്പന വില കമ്പനി പിന്നീട് മാത്രമേ വ്യക്തമാക്കൂ.

സാംസങ് ഫോണുകൾക്കും ഓഫർ

സാംസങ് ഗാലക്സി എസ്25, സാംസങ് ഗാലക്സി എസ്25 എഫ്ഇ എന്നീ മോഡലുകൾക്കും പ്രത്യേക വിൽപ്പന വില ലഭിക്കും. ഇരു ഫോണുകളും ബിഗ് ബില്യൺ ഡേയ്സ് പ്രമോഷന്റെ ഭാഗമായി ഫ്ലിപ്‍കാർട്ട് ഇതിനകം അവതരിപ്പിച്ചിട്ടുണ്ട്. വിവോ ടി5എക്സ് 5ജി, റിയൽമി പി4 ലൈറ്റ് 5ജി, റിയൽമി പി4 5ജി, മോട്ടറോള സിഗ്നേച്ചർ, മോട്ടോ ജി37 പവർ തുടങ്ങിയ മോഡലുകൾക്കും വിലക്കുറവുണ്ടാകും.

ഗൂഗിൾ പിക്സൽ 11 ഉൾപ്പെടെ നിരവധി മോഡലുകൾ

ഗൂഗിൾ പിക്സൽ 11, ഗൂഗിൾ പിക്സൽ 10എ, എഐ+ നോവ 2 നിയോ 5ജി, സാംസങ് ഗാലക്സി എഫ്70ഇ 5ജി, റിയൽമി പി4എക്സ് 5ജി, ഇൻഫിനിക്സ് ഹോട്ട് 60ഐ 5ജി+, വൺപ്ലസ് എയ്സ് 5ജി, ലാവ വിരാട് വി1 5ജി തുടങ്ങിയ മോഡലുകളും വിൽപ്പനയുടെ പ്രമോഷൻ പട്ടികയിലുണ്ട്. ഒപ്പോ കെ14എക്സ് 5ജി, നത്തിങ് ഫോൺ 4എ തുടങ്ങിയ ഫോണുകൾക്കും ഓഫറുകൾ പ്രതീക്ഷിക്കാം. ബജറ്റ്, മധ്യനിര വിഭാഗങ്ങളിലെ നിരവധി മോഡലുകളും വിൽപ്പനയിൽ ഉൾപ്പെടും.

ബാങ്ക് കാർഡുകൾക്ക് 10% വരെ ഇളവ്

ഫോണുകളുടെ വിലക്കുറവിന് പുറമെ ബാങ്ക് ഓഫറുകളും ഉപഭോക്താക്കൾക്ക് ലഭിക്കും. തിരഞ്ഞെടുത്ത ആക്സിസ് ബാങ്ക്, ഐസിഐസിഐ ബാങ്ക് കാർഡുകൾ ഉപയോഗിക്കുന്നവർക്ക് 10% വരെ തൽക്ഷണ വിലക്കുറവ് ലഭിക്കും. ഫ്ലിപ്‍കാർട്ട് ആക്സിസ് ബാങ്ക് ക്രെഡിറ്റ് കാർഡും ഓഫറിന് അർഹമാണ്. ഫ്ലിപ്കാർട്ടിന്റെ സൂപ്പർ മണി വഴി ആദ്യ ഇടപാട് നടത്തുന്നവർക്ക് 10 ശതമാനം പണം തിരികെ ലഭിക്കുന്ന സൗകര്യവും പ്രഖ്യാപിച്ചിട്ടുണ്ട്. വിവിധ സ്‍മാർട്ട്ഫോണുകളുടെ അന്തിമ വിൽപ്പന വിലകൾ ഫ്ലിപ്‍കാർട്ട് ഇതുവരെ പുറത്തുവിട്ടിട്ടില്ല. വിൽപ്പന ആരംഭിക്കുന്നതിന് മുന്നോടിയായി കൂടുതൽ ഓഫറുകളും വില വിവരങ്ങളും കമ്പനി പുറത്തുവിടുമെന്നാണ് പ്രതീക്ഷിക്കുന്നത്.

ഫ്ലിപ്‍കാർട്ട് ബിഗ് ബില്യൺ ഡേയ്സ് 2026: മോട്ടറോള ഫോണുകൾക്ക് വൻ വിലക്കുറവ്; പുതിയ വിലകൾ അറിയാം

Prabeesh PP — Tue, 29 Sep 2026 20:00:48 +0530

ഫ്ലിപ്‍കാർട്ടിന്റെ ബിഗ് ബില്യൺ ഡേയ്സ് 2026 വിൽപ്പനയ്ക്ക് മുന്നോടിയായി മോട്ടറോളയുടെ വിവിധ സ്മാർട്ട്ഫോൺ മോഡലുകൾക്ക് പ്രത്യേക വില പ്രഖ്യാപിച്ചു. ഒക്ടോബർ 9ന് ആരംഭിക്കുന്ന വിൽപ്പനയിൽ മോട്ടറോള എഡ്‍ജ്, ജി സീരീസ് ഫോണുകൾക്ക് വിലക്കുറവ് ലഭിക്കും. യോഗ്യരായ ഉപഭോക്താക്കൾക്ക് ഒക്ടോബർ 8 മുതൽ നേരത്തെ പ്രവേശനം ലഭിക്കും.

എഡ്‍ജ് 70 ഫ്യൂഷന് 29,999 രൂപ മുതൽ

മോട്ടറോള എഡ്‍ജ് 70 ഫ്യൂഷന്റെ 8 ജിബി റാം + 128 ജിബി സ്റ്റോറേജ് മോഡലിന് വിൽപ്പനയ്ക്കിടെ 29,999 രൂപയായിരിക്കും വില. നിലവിൽ ഈ മോഡലിന്റെ വില 30,999 രൂപയാണ്. 12 ജിബി റാം + 256 ജിബി സ്റ്റോറേജ് പതിപ്പിന് 32,999 രൂപയും 12 ജിബി റാം + 512 ജിബി പതിപ്പിന് 34,999 രൂപയുമായിരിക്കും വില.

എഡ്‍ജ് 70 പ്രോയ്ക്കും വിലക്കുറവ്

മോട്ടറോള എഡ്‍ജ് 70 പ്രോയുടെ 8 ജിബി റാം + 256 ജിബി മോഡൽ 36,999 രൂപയ്ക്ക് ലഭിക്കും. നിലവിലെ 39,999 രൂപയിൽ നിന്നാണ് വില കുറയുന്നത്. 12 ജിബി റാം + 256 ജിബി പതിപ്പിന് 39,999 രൂപയായിരിക്കും വില. മോട്ടറോള എഡ്‍ജ് 70 പ്രോ പ്ലസിന്റെ 12 ജിബി റാം + 256 ജിബി മോഡലിന് 44,999 രൂപയാണ് വിൽപ്പന വില. നിലവിൽ 47,999 രൂപയാണ് ഈ മോഡലിന്റെ വില.

മോട്ടോ ജി37 പവറിനും ഓഫർ

മോട്ടോ ജി37 പവറിന്റെ 4 ജിബി റാം + 64 ജിബി സ്റ്റോറേജ് മോഡൽ 16,999 രൂപയ്ക്ക് ലഭിക്കും. നിലവിലെ 17,249 രൂപയിൽ നിന്നാണ് വില കുറയുന്നത്. 4 ജിബി റാം + 128 ജിബി പതിപ്പിന് 18,999 രൂപയും 8 ജിബി റാം + 128 ജിബി പതിപ്പിന് 24,999 രൂപയുമായിരിക്കും വില.

മോട്ടറോള സിഗ്നേച്ചറിന് 57,499 രൂപ മുതൽ

മോട്ടറോളയുടെ പ്രീമിയം സ്മാർട്ട്ഫോണായ മോട്ടറോള സിഗ്നേച്ചറിനും വിലക്കുറവുണ്ട്. 12 ജിബി റാം + 256 ജിബി മോഡലിന് 57,499 രൂപയായിരിക്കും വിൽപ്പന വില. നിലവിലെ വില 59,999 രൂപയാണ്. 16 ജിബി റാം + 512 ജിബി പതിപ്പിന് 62,499 രൂപ നൽകണം.

ജി06 പവറിനും എഡ്‍ജ് 70 മാക്സിനും ഓഫർ

മോട്ടോ ജി06 പവറിന്റെ 4 ജിബി റാം + 64 ജിബി മോഡൽ 13,999 രൂപയ്ക്ക് ലഭിക്കും. 15,249 രൂപയാണ് നിലവിലെ വില. മോട്ടറോള എഡ്ജ് 70 മാക്സിന്റെ 8 ജിബി റാം + 256 ജിബി മോഡലിന് 51,999 രൂപയായിരിക്കും വില. നിലവിലെ 54,999 രൂപയിൽ നിന്നാണ് വില കുറയുന്നത്. 12 ജിബി റാം + 256 ജിബി മോഡലിന് 56,999 രൂപയായിരിക്കും വില.

ഓഫറുകൾ പരിമിത കാലത്തേക്ക്

പ്രഖ്യാപിച്ചിരിക്കുന്ന വിലക്കുറവുകൾ പരിമിത കാലത്തേക്കാണ് ലഭിക്കുക. സ്റ്റോക്ക് ലഭ്യതയ്ക്കും അനുസരിച്ചായിരിക്കും ഓഫറുകൾ. മിക്ക ഓഫറുകളും ഒക്ടോബർ 9ന് ആരംഭിക്കും. ഒക്ടോബർ 8 മുതൽ തിരഞ്ഞെടുത്ത ഉപഭോക്താക്കൾക്ക് നേരത്തെ പ്രവേശനം ലഭിക്കും. മോട്ടറോള എഡ്ജ് 70 പ്രോ പ്ലസിന്റെ വിലക്കുറവ് സെപ്റ്റംബർ 27 മുതൽ ലഭ്യമാകുമെന്ന് കമ്പനി വ്യക്തമാക്കിയിട്ടുണ്ട്. ബാങ്ക് ഓഫറുകൾ, മുൻകൂർ പണമടയ്ക്കൽ ഓഫറുകൾ, എക്സ്ചേഞ്ച് ഓഫറുകൾ എന്നിവ ഉൾപ്പെടുത്തിയാണ് മുകളിൽ പറഞ്ഞിരിക്കുന്ന വിലകൾ പ്രഖ്യാപിച്ചിരിക്കുന്നത്.

ഫ്ലിപ്‍കാർട്ട് സെയിലിൽ ഈ ഐഫോണുകൾക്ക് അവിശ്വസനീയ ഓഫർ!

Prashobh Prasannan — Wed, 30 Sep 2026 11:11:32 +0530

ഫ്ലിപ്‍കാർട്ടിന്റെ ബിഗ് ബില്യൺ ഡേയിസ് വിൽപ്പനയ്ക്ക് മുന്നോടിയായി പ്രമുഖ സ്‍മാർട്ട്‌ഫോണുകൾക്കുള്ള ഓഫറുകൾ പുറത്തുവന്നു. ഐഫോൺ 17, ഐഫോൺ 15 മോഡലുകൾക്ക് വൻ വിലക്കുറവാണ് ഫ്ലിപ്‍കാർട്ട് പ്രഖ്യാപിച്ചിരിക്കുന്നത്. ബാങ്ക് ഓഫറുകളും എക്സ്ചേഞ്ച് ആനുകൂല്യങ്ങളും കൂടി പ്രയോജനപ്പെടുത്തിയാൽ ഫോണുകൾ കൂടുതൽ കുറഞ്ഞ വിലയിൽ സ്വന്തമാക്കാം.

ഐഫോൺ 17ന് 15000 രൂപ നേരിട്ടുള്ള വിലക്കുറവ്

ആപ്പിൾ അടുത്തിടെ ഇന്ത്യയിൽ ഐഫോൺ 17ന്റെ വില 17000 രൂപ വർധിപ്പിച്ചിരുന്നു. 256 ജിബി സ്റ്റോറേജുള്ള മോഡൽ 82900 രൂപയ്ക്കാണ് ആദ്യം പുറത്തിറക്കിയത്. നിലവിൽ ആപ്പിളിന്റെ ഔദ്യോഗിക വില 99900 രൂപയാണ്. എന്നാൽ ഫ്ലിപ്‍കാർട്ട് ബിഗ് ബില്യൺ ഡേയ്സ് വിൽപ്പനയിൽ ഐഫോൺ 17ന് 84999 രൂപയാണ് വില പ്രഖ്യാപിച്ചിരിക്കുന്നത്. അതായത് ഔദ്യോഗിക വിലയിൽ നിന്ന് 15000 രൂപയുടെ നേരിട്ടുള്ള വിലക്കുറവ് ലഭിക്കും. ക്രെഡിറ്റ് കാർഡോ പഴയ ഫോൺ എക്സ്ചേഞ്ചോ ആവശ്യമില്ലാതെയാണ് ഈ വിലക്കുറവ് ലഭിക്കുക.

ബാങ്ക് ഓഫറും എക്സ്ചേഞ്ച് ബോണസും

ഐസിഐസിഐ ബാങ്ക്, ആക്സിസ് ബാങ്ക് ക്രെഡിറ്റ് കാർഡുകൾ ഉപയോഗിച്ച് ഇടപാട് നടത്തുന്നവർക്ക് 2000 രൂപ അധിക വിലക്കുറവും ലഭിക്കും. ഇതിന് പുറമെ പഴയ ഫോൺ കൈമാറുന്നവർക്ക് 3000 രൂപയുടെ എക്സ്ചേഞ്ച് ബോണസും ലഭിക്കും. ഈ ആനുകൂല്യങ്ങളെല്ലാം പ്രയോജനപ്പെടുത്തിയാൽ ഐഫോൺ 17ന്റെ ഫലപ്രദമായ വില 79999 രൂപയായി കുറയുമെന്ന് ഫ്ലിപ്‍കാർട്ട് വ്യക്തമാക്കുന്നു. ആപ്പിൾ വില വർധിപ്പിക്കുന്നതിന് മുമ്പുണ്ടായിരുന്ന 82900 രൂപയുടെ ലോഞ്ച് വിലയേക്കാൾ താഴെയാണ് ഈ വില.

ഐഫോൺ 15നും വിലക്കുറവ്

പഴയ തലമുറ മോഡലായ ഐഫോൺ 15നും ബിഗ് ബില്യൺ ഡേയ്സ് വിൽപ്പനയിൽ വിലക്കുറവുണ്ട്. നിലവിൽ 74900 രൂപ ഔദ്യോഗിക വിലയുള്ള ഐഫോൺ 15, വിൽപ്പനയ്ക്കിടെ 67999 രൂപയ്ക്ക് ലഭിക്കുമെന്നാണ് ഫ്ലിപ്കാർട്ടിന്റെ പ്രഖ്യാപനം. ഇതിലൂടെ നേരിട്ട് 6901 രൂപയുടെ വിലക്കുറവ് ലഭിക്കും. ഫ്ലിപ്കാർട്ട് ആക്സിസ് ബാങ്ക്, ഫ്ലിപ്കാർട്ട് എസ്ബിഐ ക്രെഡിറ്റ് കാർഡ് ഉപയോഗിക്കുന്നവർക്ക് 5% വരെ ക്യാഷ്ബാക്കും ലഭിക്കും. പരമാവധി 3400 രൂപ വരെയാണ് ക്യാഷ്ബാക്ക്. ഇതിന് പുറമെ 3000 രൂപയുടെ എക്സ്ചേഞ്ച് ബോണസുമുണ്ട്. എല്ലാ ആനുകൂല്യങ്ങളും ചേർത്താൽ ഐഫോൺ 15ന്റെ ഫലപ്രദമായ വില 61599 രൂപയായി കുറയുമെന്ന് ഫ്ലിപ്കാർട്ട് വ്യക്തമാക്കുന്നു.

ഒക്ടോബർ 9 മുതൽ വിൽപ്പന

ഫ്ലിപ്‍കാർട്ട് ബിഗ് ബില്യൺ ഡേയിസ് വിൽപ്പന ഒക്ടോബർ 9ന് ആരംഭിക്കും. ഫ്ലിപ്‍കാർട്ട് പ്ലസ്, ബ്ലാക്ക് അംഗങ്ങൾക്കും അർഹരായ ക്രെഡിറ്റ് കാർഡ് ഉപഭോക്താക്കൾക്കും ഒക്ടോബർ 8 മുതൽ നേരത്തേ പ്രവേശനം ലഭിക്കും. ഗാലക്സി എസ്25 ഉൾപ്പെടെയുള്ള മറ്റ് ജനപ്രിയ സ്മാർട്ട്‌ഫോണുകൾക്കും വിൽപ്പനയിൽ വിലക്കുറവ് പ്രതീക്ഷിക്കുന്നുണ്ട്. പ്രധാന വിൽപ്പന സമയത്ത് ഓഫർ വിലയിലും ലഭ്യതയിലും മാറ്റം വരാൻ സാധ്യതയുള്ളതിനാൽ, വാങ്ങുന്നതിന് മുമ്പ് ഫ്ലിപ്കാർട്ടിലെ അന്തിമ വിലയും ബാങ്ക് ഓഫറുകളുടെ നിബന്ധനകളും പരിശോധിക്കുന്നത് പ്രധാനമാണ്.

ഓപ്പൺഎഐയുടെ പുതിയ ജിപിടി-6 മോഡലുകളിൽ ഒളിപ്പിച്ചതെന്ത്?

Prashobh Prasannan — Fri, 25 Sep 2026 12:43:41 +0530

ആർട്ടിഫിഷ്യൽ ഇന്റലിജൻസ് രംഗത്ത് പുതിയ മോഡലുകളുമായി ഓപ്പൺഎഐ. പ്രൊഫഷണൽ ജോലികൾ, കോഡിങ്, കമ്പ്യൂട്ടർ ഉപയോഗം തുടങ്ങിയ മേഖലകളിൽ കൂടുതൽ കാര്യക്ഷമമായ പ്രവർത്തനം ലക്ഷ്യമിട്ട് ജിപിടി-6 സോൾ, ജിപിടി-6 ലൂണ എന്നീ മോഡലുകളാണ് കമ്പനി അവതരിപ്പിച്ചത്. ഓപ്പൺഎഐയുടെ ഏറ്റവും ശേഷിയേറിയ മോഡലായ ജിപിടി-6 ആസ്ട്രയിൽ ഉൾപ്പെടുത്തിയിരിക്കുന്ന ചില സവിശേഷതകൾ കുറഞ്ഞ ചെലവിൽ ലഭ്യമാക്കുകയാണ് പുതിയ മോഡലുകളിലൂടെ ലക്ഷ്യമിടുന്നത്.

കൂടുതൽ പ്ലാറ്റ്‌ഫോമുകളിൽ ലഭിക്കും

ഓപ്പൺഎഐയുടെ വർക്ക്, കോഡെക്സ് പ്ലാറ്റ്‌ഫോമുകളിലും എപിഐ വഴിയും ജിപിടി-6 സോൾ, ജിപിടി-6 ലൂണ മോഡലുകൾ ലഭ്യമാകും. പ്ലസ്, പ്രോ, ബിസിനസ്, എന്റർപ്രൈസ്, എഡ്യൂ ഉപയോക്താക്കൾക്ക് വർക്ക്, കോഡെക്സ് വഴി മോഡലുകൾ ഉപയോഗിക്കാം. ഫ്രീ, ഗോ ഉപയോക്താക്കൾക്ക് ഡെസ്ക്ടോപ്പ് ആപ്പ് വഴി ജിപിടി-6 ലൂണ ലഭിക്കും. സാധാരണ ചാറ്റ്ജിപിടിയിൽ മോഡലുകൾ നിലവിൽ ലഭ്യമല്ല. എന്നാൽ ഘട്ടംഘട്ടമായി ഇവ അവതരിപ്പിക്കുമെന്ന് ഓപ്പൺഎഐ അറിയിച്ചു.

എപിഐ നിരക്കിൽ 50 ശതമാനം കുറവ്

പുതിയ മോഡലുകളുടെ എപിഐ നിരക്കിലും കാര്യമായ കുറവാണ് കമ്പനി പ്രഖ്യാപിച്ചിരിക്കുന്നത്. ജിപിടി-6 സോളിന് ഒരു ദശലക്ഷം ഇൻപുട്ട് ടോക്കണുകൾക്ക് 2 ഡോളറും ഔട്ട്പുട്ട് ടോക്കണുകൾക്ക് 10 ഡോളറുമാണ് നിരക്ക്. ജിപിടി-6 ലൂണയ്ക്ക് ഒരു ദശലക്ഷം ഇൻപുട്ട് ടോക്കണുകൾക്ക് 0.10 ഡോളറും ഔട്ട്പുട്ട് ടോക്കണുകൾക്ക് 0.50 ഡോളറുമാണ് നിരക്ക്. ജിപിടി-5.6 സോൾ, ജിപിടി-5.6 ലൂണ എന്നിവയുടെ പ്രമോഷണൽ നിരക്കുകളെ അപേക്ഷിച്ച് ഇത് 50 ശതമാനം കുറവാണെന്നാണ് ഓപ്പൺഎഐയുടെ വിശദീകരണം.

പ്രകടനത്തിലും മുന്നേറ്റം

പ്രൊഫഷണൽ ജോലികൾ, കോഡിങ്, കമ്പ്യൂട്ടർ ഉപയോഗം, വസ്തുതാപരത തുടങ്ങിയ മേഖലകളിൽ പുതിയ മോഡലുകൾ മെച്ചപ്പെട്ട പ്രകടനം കാഴ്ചവയ്ക്കുന്നുവെന്നാണ് ഓപ്പൺഎഐയുടെ അവകാശവാദം. ഓട്ടോമേഷൻബെഞ്ച് പരിശോധനയിൽ പരമാവധി ശ്രമനിലയിൽ ജിപിടി-6 സോൾ 33.2 ശതമാനം സ്കോർ നേടി. ക്ലോഡ് ഓപസ് 5 നേടിയ 26.9 ശതമാനത്തേക്കാൾ ഉയർന്ന സ്കോറാണിത്. ഓരോ ടാസ്കിനും ഏകദേശം 0.27 ഡോളറാണ് ചെലവ്.

കോഡിങ്ങിലും മികച്ച പ്രകടനം

ഡീപ്‌സ്വീ പരിശോധനയിൽ ജിപിടി-6 സോൾ 68.8 ശതമാനം സ്കോർ നേടി. ക്ലോഡ് ഫേബിൾ 5 നേടിയ 69.9 ശതമാനത്തിന് അടുത്ത പ്രകടനമാണിത്. എന്നാൽ ഓരോ ടാസ്കിനുമുള്ള ചെലവ് ഏകദേശം 80 ശതമാനം കുറവാണെന്ന് ഓപ്പൺഎഐ പറയുന്നു. ഓപ്പൺഎഐയുടെ കണക്കുകൾ പ്രകാരം, ഓസ്‌വേൾഡ് 2.0 പരിശോധനയിൽ ജിപിടി-6 സോൾ 60.5 ശതമാനം സ്കോർ നേടി. ക്ലോഡ് ഓപസ് 5ന്റെ 60.3 ശതമാനവുമായി താരതമ്യം ചെയ്യുമ്പോൾ നേരിയ മുന്നേറ്റമാണിത്.

പിഴവുകൾ കുറയ്ക്കാനും ലക്ഷ്യം

ആന്തരിക വസ്തുതാപരതാ പരിശോധനയിൽ ജിപിടി-6 സോൾ, ജിപിടി-5.6 സോളിനെ അപേക്ഷിച്ച് പകുതിയോളം പിഴവുകൾ മാത്രമാണ് വരുത്തിയതെന്ന് ഓപ്പൺഎഐ അറിയിച്ചു. ഉയർന്ന ശ്രമനിലയിൽ ജിപിടി-6 ലൂണയ്ക്ക് ജിപിടി-5.6 സോളിനോട് സമാനമായ പ്രകടനം വളരെ കുറഞ്ഞ ചെലവിൽ നൽകാനാകുമെന്നും കമ്പനി അവകാശപ്പെടുന്നു. കൂടുതൽ വ്യക്തമായ മറുപടികൾ, സാങ്കേതിക പദപ്രയോഗങ്ങളുടെ കുറവ്, അനാവശ്യ വിശദാംശങ്ങൾ ഒഴിവാക്കൽ എന്നിവയും പുതിയ മോഡലുകളുടെ പ്രത്യേകതകളായി ഓപ്പൺഎഐ ചൂണ്ടിക്കാട്ടുന്നു.

എഐ മനുഷ്യനെ കീഴടക്കുമോ? ഇലോൺ മസ്‍കിന്‍റെ പുതിയ പ്രവചനം

Prashobh Prasannan — Fri, 25 Sep 2026 12:46:05 +0530

ആർട്ടിഫിഷ്യൽ ഇന്റലിജൻസ് അഥവാ എഐയുടെ വളർച്ചയെക്കുറിച്ച് പുതിയ പ്രവചനവുമായി ടെക് സംരംഭകൻ ഇലോൺ മസ്ക്. അടുത്ത വർഷം അവസാനത്തോടെ, അല്ലെങ്കിൽ പരമാവധി 2028ഓടെ എഐ എല്ലാ മേഖലകളിലും മനുഷ്യരെ മറികടക്കുന്ന നിലയിലെത്തുമെന്നാണ് മസ്കിന്റെ അവകാശവാദം. എഐ ഗവേഷകനായ ഫ്രാൻസ്വാ ഷൊലെ 2021ൽ എക്സിൽ പങ്കുവെച്ച ഒരു കുറിപ്പിനോടുള്ള പ്രതികരണമായാണ് മസ്ക് ഇക്കാര്യം പറഞ്ഞത്. 10 മുതൽ 20 വർഷത്തിനുള്ളിൽ ശാസ്ത്രത്തിന്റെ വിവിധ മേഖലകളിൽ എഐയും കംപ്യൂട്ടർ സാങ്കേതികവിദ്യയും നിർണായക സ്ഥാനത്തെത്തുമെന്ന് ഷൊലെ അന്ന് പ്രവചിച്ചിരുന്നു.

ശാസ്ത്രശാഖകൾ കംപ്യൂട്ടർ ശാസ്ത്രവുമായി ചേരും

ഭൗതികശാസ്ത്രം, രസതന്ത്രം, ജീവശാസ്ത്രം, പുരാവസ്തുശാസ്ത്രം തുടങ്ങിയ ശാസ്ത്രശാഖകളെല്ലാം ഭാവിയിൽ അടിസ്ഥാനപരമായി കംപ്യൂട്ടർ ശാസ്ത്രവുമായി കൂടുതൽ ബന്ധപ്പെട്ട മേഖലകളായി മാറുമെന്നായിരുന്നു ഷൊലെയുടെ വാദം. 2000ൽ ഭൂരിഭാഗം കമ്പനികളും ടെക് കമ്പനികളായി മാറുമെന്ന് പറഞ്ഞിരുന്നെങ്കിൽ ആളുകൾ അത് പരിഹസിച്ചേനെയെന്നും അദ്ദേഹം ചൂണ്ടിക്കാട്ടിയിരുന്നു. എന്നാൽ രണ്ട് പതിറ്റാണ്ടുകൾക്ക് ശേഷം വാൾമാർട്ട്, ഫെഡ്എക്സ് പോലുള്ള കമ്പനികളുടെ പ്രവർത്തനങ്ങളിൽ സോഫ്റ്റ്‌വെയർ നിർണായക പങ്കുവഹിക്കുന്ന സ്ഥിതിയാണുള്ളതെന്നും ഷൊലെ വിശദീകരിച്ചു.

മസ്‍കിന്റെ മറുപടി

2021ലെ തന്റെ പ്രവചനത്തിന് അന്ന് വലിയ വിമർശനം നേരിട്ടിരുന്നെങ്കിലും ഇപ്പോൾ അത് ഓരോ ദിവസവും കൂടുതൽ വ്യക്തമായി യാഥാർഥ്യമാകുന്നതായി തോന്നുന്നുവെന്ന് ഷൊലെ അടുത്തിടെ എക്സിൽ വീണ്ടും കുറിച്ചു. ഇതിന് മറുപടിയായാണ് ഇലോൺ മസ്ക് പ്രവചനം നടത്തിയത്. ഷൊലെയുടെ 10 മുതൽ 20 വർഷം വരെയുള്ള സമയപരിധി പോലും യാഥാസ്ഥിതികമാണെന്നാണ് മസ്‍കിന്റെ അഭിപ്രായം. അടുത്ത വർഷം അവസാനത്തോടെ, അല്ലെങ്കിൽ പരമാവധി 2028ഓടെ എഐ എല്ലാ മേഖലകളെയും മറികടക്കും എന്നാണ് മസ്ക് പറഞ്ഞത്.

പല മേഖലകളിലും എഐയുടെ സാന്നിധ്യം

ശാസ്ത്രത്തിലെ എല്ലാ മേഖലകളിലും എഐ അനിവാര്യമായ ഉപകരണമായി മാറുക എന്നതാണ് ഷൊലെയുടെ പ്രവചനത്തിന്റെ അർഥമെങ്കിൽ അതിന്റെ തുടക്കം ഇതിനകം തന്നെ കാണാനാകുമെന്ന് റിപ്പോർട്ടിൽ പറയുന്നു. സങ്കീർണമായ വിവരങ്ങൾ വിശകലനം ചെയ്യുക, സിമുലേഷനുകൾ നടത്തുക, മനുഷ്യർക്ക് കണ്ടെത്താൻ ബുദ്ധിമുട്ടുള്ള മാതൃകകൾ തിരിച്ചറിയുക തുടങ്ങിയ പ്രവർത്തനങ്ങളിൽ എഐ ഇതിനകം ഉപയോഗിക്കുന്നുണ്ട്. പ്രോട്ടീൻ ഘടനാ പഠനം, പുതിയ വസ്തുക്കളുടെ ഗവേഷണം, കാലാവസ്ഥാ മാതൃക നിർമാണം തുടങ്ങിയ മേഖലകളിലും എഐയുടെ സഹായത്തോടെ മുന്നേറ്റങ്ങൾ നടക്കുന്നുണ്ട്.

മസ്‍കിന്റെ പ്രവചനങ്ങൾ മുമ്പും ചർച്ചയായി

എഐയെക്കുറിച്ച് ഇലോൺ മസ്‍ക് നേരത്തെയും നിരവധി സമയപരിധികൾ മുന്നോട്ടുവച്ചിട്ടുണ്ട്. 2017ൽ എഐ 2060ഓടെ മനുഷ്യരെ എല്ലാ മേഖലകളിലും മറികടക്കുമെന്ന പഠനത്തോട് പ്രതികരിച്ച മസ്‍ക്, ഇത് 2030നും 2040നും ഇടയിൽ തന്നെ സംഭവിക്കാമെന്ന് അഭിപ്രായപ്പെട്ടിരുന്നു. 2024ൽ ഒരു മനുഷ്യന്റെ ബുദ്ധിശേഷിയെ എഐ മറികടക്കുന്നത് 2025 അവസാനത്തോടെ സംഭവിക്കാമെന്നും, അഞ്ച് വർഷത്തിനുള്ളിൽ മനുഷ്യരാശിയുടെ മൊത്തം ബുദ്ധിശേഷിയെയും എഐ മറികടക്കാമെന്നും അദ്ദേഹം പ്രവചിച്ചു. 2026 ജനുവരിയിൽ ദാവോസിൽ നടത്തിയ പ്രസ്‍താവനയിൽ സമയപരിധി വീണ്ടും മുന്നോട്ടുകൊണ്ടുവന്നു. 2026 അവസാനത്തോടെ, അല്ലെങ്കിൽ പരമാവധി 2027ഓടെ എഐ ഏതൊരു മനുഷ്യനേക്കാളും ബുദ്ധിശാലിയാകാമെന്നായിരുന്നു അന്നത്തെ പ്രവചനം. ഇപ്പോൾ ഷൊലെയുടെ കുറിപ്പിനുള്ള മറുപടിയിൽ എല്ലാ മേഖലകളിലും എഐ മികവ് നേടുന്നതിനുള്ള സമയപരിധിയായി 2027 മുതൽ 2028 വരെയാണ് മസ്‍ക് ചൂണ്ടിക്കാട്ടുന്നത്.

ഷവോമി 18 പ്രോ സീരീസ് എത്തി; ഫീച്ചറുകൾ കണ്ട് ഞെട്ടരുത്!

Prashobh Prasannan — Fri, 25 Sep 2026 11:09:40 +0530

ഷവോമിയുടെ ഏറ്റവും പുതിയ മുൻനിര സ്മാർട്ട്ഫോൺ മോഡലുകളായ ഷവോമി 18 പ്രോ, ഷവോമി 18 പ്രോ മാക്സ് എന്നിവ ചൈനയിൽ അവതരിപ്പിച്ചു. മുൻഗാമി മോഡലുകളുടെ ഡിസൈൻ നിലനിർത്തിക്കൊണ്ടാണ് പുതിയ ഫോണുകൾ എത്തിയിരിക്കുന്നത്. പിന്നിൽ രണ്ടാമത്തെ ഡിസ്പ്ലേ ഉൾപ്പെടെയുള്ള പ്രത്യേകതകൾ തുടരുന്നതിനൊപ്പം ഹാർഡ്‌വെയറിലും ക്യാമറയിലും ബാറ്ററിയിലും ശ്രദ്ധേയമായ അപ്‌ഗ്രേഡുകളാണ് കമ്പനി നൽകിയിരിക്കുന്നത്. സ്നാപ്ഡ്രാഗൺ 8 എലൈറ്റ് ജെൻ 6 ശ്രേണിയിലെ ഏറ്റവും പുതിയ ചിപ്പുകളാണ് ഫോണുകൾക്ക് കരുത്തേകുന്നത്. ഇതോടൊപ്പം ഷവോമി പാഡ് 9 പ്രോ, പാഡ് 9 ടാബ്‌ലെറ്റുകളും കമ്പനി പുറത്തിറക്കി. ഈ മാസം ആദ്യം അവതരിപ്പിച്ച പാഡ് 9 പ്രോ മാക്സിനൊപ്പം പുതിയ ടാബ്‌ലെറ്റുകളും ഇനി ഷവോമിയുടെ ടാബ്‌ലെറ്റ് നിരയുടെ ഭാഗമാകും.

6.4 ഇഞ്ച് മുതൽ 6.9 ഇഞ്ച് വരെ അമോലെഡ് ഡിസ്പ്ലേ

ഷവോമി 18 പ്രോയിൽ 6.4 ഇഞ്ച് ഫുൾ എച്ച്‌ഡി പ്ലസ് അമോലെഡ് ഡിസ്പ്ലേയാണ് നൽകിയിരിക്കുന്നത്. 120 ഹെർട്സ് റിഫ്രഷ് റേറ്റ്, 300 ഹെർട്സ് ടച്ച് സാംപ്ലിങ് റേറ്റ്, പരമാവധി 4,000 നിറ്റ്സ് ബ്രൈറ്റ്നസ് എന്നിവയാണ് ഡിസ്പ്ലേയുടെ പ്രത്യേകതകൾ. 18 പ്രോ മാക്സിൽ 6.9 ഇഞ്ച് ഫുൾ എച്ച്‌ഡി പ്ലസ് അമോലെഡ് ഡിസ്പ്ലേയാണ്. 120 ഹെർട്സ് റിഫ്രഷ് റേറ്റ്, 300 ഹെർട്സ് ടച്ച് സാംപ്ലിങ്, 4,000 നിറ്റ്സ് വരെ പരമാവധി ബ്രൈറ്റ്നസ് എന്നിവ ഇവിടെയും ലഭിക്കും. ഇരു ഫോണുകളുടെയും ഡിസ്പ്ലേകൾ ഡി‌സിഐ-പി3 കളർ ഗാമറ്റിനെ പിന്തുണയ്ക്കുന്നു. പുതിയ പ്രൈവസി ഡിസ്പ്ലേ ഫീച്ചറും നൽകിയിട്ടുണ്ട്. സ്ക്രീൻ കാണാനാകുന്ന ആംഗിൾ കുറയ്ക്കുകയും സമീപത്തുള്ളവർ സ്ക്രീനിലേക്ക് നോക്കുന്നത് തടയുകയുമാണ് ഇതിന്റെ ലക്ഷ്യം.

പിന്നിലും അമോലെഡ് സ്ക്രീൻ

ഫോണുകളുടെ പിന്നിൽ രണ്ടാമത്തെ അമോലെഡ് ഡിസ്പ്ലേയും നൽകിയിട്ടുണ്ട്. ഷവോമി 18 പ്രോയിൽ 2.7 ഇഞ്ച് സ്ക്രീനാണെങ്കിൽ 18 പ്രോ മാക്സിൽ 2.9 ഇഞ്ച് സ്ക്രീനാണ്. രണ്ട് പിൻ ഡിസ്പ്ലേകൾക്കും 120 ഹെർട്സ് റിഫ്രഷ് റേറ്റും 4,000 നിറ്റ്സ് വരെ പരമാവധി ബ്രൈറ്റ്നസും ലഭിക്കും.

200 എംപി ക്യാമറകളുടെ കരുത്ത്

ക്യാമറ വിഭാഗത്തിലാണ് ഫോണുകളുടെ പ്രധാന ആകർഷണം. ഇരു മോഡലുകളിലും ട്രിപ്പിൾ പിൻ ക്യാമറ സജ്ജീകരണമാണുള്ളത്. ഒഐഎസ് പിന്തുണയുള്ള 200 എംപി പ്രൈമറി ക്യാമറ, ഒഐഎസ് പിന്തുണയുള്ള 200 എംപി പെരിസ്കോപ്പ് ടെലിഫോട്ടോ ക്യാമറ, 102 ഡിഗ്രി വ്യൂ ഫീൽഡുള്ള 50 എംപി അൾട്രാ വൈഡ് ക്യാമറ എന്നിവയാണ് പിൻഭാഗത്തുള്ളത്. 8കെ റെസല്യൂഷനിൽ 30 എഫ്പിഎസ് വരെ വീഡിയോ റെക്കോർഡ് ചെയ്യാനും സാധിക്കും. സെൽഫികൾക്കും വീഡിയോ കോളുകൾക്കുമായി 50 എംപി മുൻ ക്യാമറയും നൽകിയിട്ടുണ്ട്.

8,500 എംഎഎച്ച് ബാറ്ററി

ബാറ്ററി ശേഷിയിലും ഷവോമി വലിയ മുന്നേറ്റമാണ് നടത്തിയിരിക്കുന്നത്. ഷവോമി 18 പ്രോയിൽ 7,000 എംഎഎച്ച് ബാറ്ററിയാണുള്ളത്. 18 പ്രോ മാക്സിൽ ഇത് 8,500 എംഎഎച്ചായി ഉയരും. രണ്ട് മോഡലുകളും 100 വാട്ട് വയർഡ് ചാർജിങ്ങും 50 വാട്ട് വയർലെസ് ചാർജിങ്ങും പിന്തുണയ്ക്കുന്നു. 27 വാട്ട് വയർഡ് റിവേഴ്സ് ചാർജിങ് സൗകര്യവും ലഭിക്കും. ഇൻ-ഡിസ്പ്ലേ ഫിംഗർപ്രിന്റ് സെൻസർ, ഫേസ് അൺലോക്ക് എന്നിവയും ഫോണുകളിലുണ്ട്. ആൻഡ്രോയിഡ് 17 അടിസ്ഥാനമാക്കിയുള്ള ഷവോമിയുടെ ഹൈപ്പർഒഎസ് 4 ആണ് ഓപ്പറേറ്റിങ് സിസ്റ്റം.

ഷവോമി പാഡ് 9 പ്രോയും പാഡ് 9ഉം

സ്മാർട്ട്ഫോണുകൾക്കൊപ്പം ഷവോമി പാഡ് 9 പ്രോ, പാഡ് 9 എന്നീ ടാബ്‌ലെറ്റുകളും അവതരിപ്പിച്ചു. പാഡ് 9 പ്രോയിൽ 12.5 ഇഞ്ച് എൽസിഡി ഡിസ്പ്ലേയാണ്. 3.2കെ റെസല്യൂഷനും 144 ഹെർട്സ് റിഫ്രഷ് റേറ്റുമുണ്ട്. സ്നാപ്ഡ്രാഗൺ 8 ജെൻ 5 ചിപ്പാണ് ടാബ്‌ലെറ്റിന് കരുത്തേകുന്നത്. 12 ജിബി വരെ റാമും 256 ജിബി വരെ യു‌എഫ്‌എസ് 4.1 സ്റ്റോറേജും ലഭിക്കും.

50 എംപി പിൻ ക്യാമറയും 32 എംപി മുൻ ക്യാമറയുമാണ് നൽകിയിരിക്കുന്നത്. 67 വാട്ട് ഫാസ്റ്റ് ചാർജിങ് പിന്തുണയുള്ള 11,000 എംഎഎച്ച് ബാറ്ററിയാണ് മറ്റൊരു പ്രധാന പ്രത്യേകത. പാഡ് 9ൽ 11.2 ഇഞ്ച് ഡിസ്പ്ലേയാണ്. 3.2കെ റെസല്യൂഷനും 144 ഹെർട്സ് റിഫ്രഷ് റേറ്റുമുണ്ട്. സ്നാപ്ഡ്രാഗൺ 8എസ് ജെൻ 4 ചിപ്പാണ് ഉപയോഗിച്ചിരിക്കുന്നത്. 12 ജിബി വരെ റാമും 256 ജിബി വരെ സ്റ്റോറേജും ലഭിക്കും. 13 എംപി പിൻ ക്യാമറയും 8 എംപി മുൻ ക്യാമറയുമാണ് പാഡ് 9ൽ. 45 വാട്ട് ഫാസ്റ്റ് ചാർജിങ് പിന്തുണയുള്ള 9,720 എംഎഎച്ച് ബാറ്ററിയാണ് നൽകിയിരിക്കുന്നത്.

വില എത്ര?

ഷവോമി 18 പ്രോയുടെ 12 ജിബി റാം, 256 ജിബി സ്റ്റോറേജ് പതിപ്പിന് ചൈനയിൽ വില 5,999 യുവാൻ ആണ്. ഇന്ത്യൻ കറൻസിയിൽ ഏകദേശം ₹86,000 വരും. 12 ജിബി/512 ജിബി പതിപ്പിന് 6,999 യുവാനും 16 ജിബി/512 ജിബി പതിപ്പിന് 7,999 യുവാനുമാണ് വില. 16 ജിബി/1 ടിബി പതിപ്പിന് 8,999 യുവാൻ നൽകണം. സുതാര്യമായ ഡിസൈൻ ഉള്ള 16 ജിബി/1 ടിബി പതിപ്പിന് 9,999 യുവാനാണ് വില.

ഷവോമി 18 പ്രോ മാക്സിന്റെ 12 ജിബി/256 ജിബി പതിപ്പിന് 6,999 യുവാനാണ് വില. 12 ജിബി/512 ജിബി പതിപ്പിന് 7,999 യുവാനും 16 ജിബി/512 ജിബിക്ക് 8,999 യുവാനും വില വരും. 16 ജിബി/1 ടിബി പതിപ്പിന് 9,999 യുവാനും സുതാര്യ പതിപ്പിന് 10,999 യുവാനുമാണ് വില. പാഡ് 9 പ്രോയുടെ വില 3,799 യുവാൻ മുതലാണ്. പാഡ് 9ന്റെ വില 2,999 യുവാൻ മുതലാണ് ആരംഭിക്കുന്നത്. ഇന്ത്യയിലെ വിലയും വിൽപ്പന തീയതിയും സംബന്ധിച്ച് കമ്പനി പിന്നീട് പ്രഖ്യാപനം നടത്തുമെന്നാണ് പ്രതീക്ഷിക്കുന്നത്.

ഒരേ ബർഗറിന് വ്യത്യസ്‍ത വില; മക്‌ഡൊണാൾഡ്‍സിലും എഐയുടെ ‘ഇടപെടൽ’, ബിഗ് മാക്കിന് വ്യത്യസ്‍ത വിലകളെന്ന് റിപ്പോർട്ട്

Sangeetha KS — Wed, 30 Sep 2026 12:02:55 +0530

മക്‌ഡൊണാൾഡ്സിൽ ഒരേ ബർഗറിന് വ്യത്യസ്‍ത സ്ഥലങ്ങളിൽ വ്യത്യസ്‍ത വില. അമേരിക്കയിൽ മെഷീൻ ലേണിങ് സാങ്കേതികവിദ്യ ഉപയോഗിച്ച് റെസ്റ്റോറന്റുകളിലെ മെനു വില നിർദേശിക്കുന്ന സംവിധാനം മക്‌ഡൊണാൾഡ്സ് ഉപയോഗിക്കുന്നതായി റോയിട്ടേഴ്‌സ് റിപ്പോർട്ട്. ഉപഭോക്താക്കളുടെ ഇടപാടുകൾ ഉൾപ്പെടെയുള്ള വലിയ അളവിലുള്ള വിവരങ്ങൾ വിശകലനം ചെയ്താണ് ഓരോ റെസ്റ്റോറന്റിലെയും ഉൽപ്പന്നങ്ങൾക്ക് അനുയോജ്യമായ വില നിർദേശിക്കുന്നതെന്നാണ് റിപ്പോർട്ട്.

എഐ നിർദേശിക്കുന്ന ‘അനുയോജ്യമായ വില’

റോയിട്ടേഴ്‌സ് നടത്തിയ അന്വേഷണത്തിൽ മക്‌ഡൊണാൾഡ്സിന്റെ വിലനിർണയ സംവിധാനത്തിൽ മെഷീൻ ലേണിങ് സാങ്കേതികവിദ്യ ഉപയോഗിക്കുന്നതായി കണ്ടെത്തിയതായി ഇന്ത്യാ ടുഡേ റിപ്പോർട്ട് ചെയ്യുന്നു. ദശലക്ഷക്കണക്കിന് ഇടപാടുകളിൽ നിന്നുള്ള വിവരങ്ങൾ വിശകലനം ചെയ്ത് ഓരോ റെസ്റ്റോറന്റിലെയും മെനു ഇനങ്ങൾക്ക് ‘അനുയോജ്യമായ വില’ നിർദേശിക്കുന്നതാണ് സംവിധാനം. ഒരു പ്രത്യേക പ്രദേശത്തെ ഉപഭോക്താക്കൾ എത്രത്തോളം വില നൽകാൻ തയ്യാറായേക്കാം എന്നതും പരിഗണിക്കുന്ന ഘടകങ്ങളിലൊന്നാണെന്നാണ് റിപ്പോർട്ട്. ഇതോടെ വിവിധ മക്‌ഡൊണാൾഡ്സ് റെസ്റ്റോറന്റുകൾക്കിടയിൽ ഒരേ ഉൽപ്പന്നത്തിന്റെ വിലയിൽ കൂടുതൽ വ്യത്യാസം ഉണ്ടാകുന്ന സാഹചര്യമുണ്ടായതായും റോയിട്ടേഴ്‌സ് പറയുന്നു.

ഒരേ ബിഗ് മാക്കിന് വ്യത്യസ്‍ത വില

കാലിഫോർണിയയിലെ ഫ്രെസ്നോയിലുള്ള മക്‌ഡൊണാൾഡ്സിന്റെ ഒരു കമ്പനി ഉടമസ്ഥതയിലുള്ള റെസ്റ്റോറന്റിൽ ബിഗ് മാക്കിന് 5.69 ഡോളറാണ് വിലയെന്ന് റോയിട്ടേഴ്‌സ് കണ്ടെത്തി. ഇതേ നഗരത്തിലെ ഏകദേശം 2 മൈൽ അകലെയുള്ള മറ്റൊരു കമ്പനി ഉടമസ്ഥതയിലുള്ള റെസ്റ്റോറന്റിൽ അതേ ബർഗറിന് 6.89 ഡോളറായിരുന്നു വില. എന്നാൽ ഈ പ്രത്യേക വില വ്യത്യാസത്തിന് എഐ സംവിധാനം തന്നെയാണ് കാരണമായതെന്ന് സ്ഥിരീകരിക്കാൻ കഴിഞ്ഞിട്ടില്ലെന്നും റോയിട്ടേഴ്‌സ് റിപ്പോർട്ട് വ്യക്തമാക്കുന്നു.

മക്‌ഡൊണാൾഡ്സിന്റെ വിശദീകരണം

അതേസമയം വില നിശ്ചയിക്കുന്നതിൽ അന്തിമ തീരുമാനം ഫ്രാഞ്ചൈസി ഉടമകൾക്കാണെന്നാണ് മക്‌ഡൊണാൾഡ്സിന്റെ വിശദീകരണം. എഐ അധിഷ്ഠിത വിലനിർണയ സംവിധാനം നിർബന്ധിത സംവിധാനമല്ലെന്നും വില നിർദേശിക്കുന്ന ഒരു ഉപകരണം മാത്രമാണെന്നും കമ്പനി പറയുന്നു. എന്നാൽ ചില ഫ്രാഞ്ചൈസി ഉടമകൾ നിർദേശിക്കുന്ന വില പിന്തുടരാൻ കമ്പനിയുടെ ഭാഗത്തുനിന്ന് സമ്മർദം നേരിട്ടതായി റോയിട്ടേഴ്‌സിനോട് പറഞ്ഞിട്ടുണ്ട്. ഫ്രാഞ്ചൈസികൾ നിർദേശിച്ച വില പിന്തുടരാത്ത സാഹചര്യങ്ങളും കമ്പനി രേഖപ്പെടുത്തുന്നതായി അന്വേഷണത്തിൽ കണ്ടെത്തിയതായും റിപ്പോർട്ടിലുണ്ട്.

മത്സരനിയമത്തെക്കുറിച്ചും ആശങ്ക

എഐ അധിഷ്ഠിത വിലനിർണയം മത്സരനിയമവുമായി ബന്ധപ്പെട്ട ചോദ്യങ്ങൾക്കും വഴിവെച്ചിട്ടുണ്ട്. വില നിർദേശിക്കുന്ന സംവിധാനം ഉപയോഗിക്കുമ്പോൾ ഫ്രാഞ്ചൈസി ഉടമകൾ തമ്മിൽ മത്സരിക്കുന്ന സ്ഥാപനങ്ങളായി കണക്കാക്കപ്പെടാമെന്നും അതിനാൽ ആന്റിട്രസ്റ്റ് നിയമങ്ങൾ പാലിക്കേണ്ടതുണ്ടെന്നും മക്‌ഡൊണാൾഡ്സ് മുന്നറിയിപ്പ് നൽകുന്നുണ്ട്. അൽഗോരിതം അടിസ്ഥാനമാക്കിയുള്ള വിലനിർണയ സംവിധാനങ്ങൾ വിപണിയിലെ മത്സരത്തെ ബാധിക്കുന്നുണ്ടോ എന്നതിനെക്കുറിച്ച് അമേരിക്കൻ നിയന്ത്രണ ഏജൻസികളും പരിശോധിച്ചുവരികയാണ്.

ഇന്ത്യയിലും ഇത് വരുമോ?

നിലവിൽ ഇന്ത്യയിലെ മക്‌ഡൊണാൾഡ്സ് റെസ്റ്റോറന്റുകളിൽ ഇതേ എഐ അധിഷ്ഠിത വിലനിർണയ സംവിധാനം ഉപയോഗിക്കുന്നതായി സ്ഥിരീകരിക്കുന്ന വിവരങ്ങളില്ല. വിവിധ റെസ്റ്റോറന്റുകളിൽ വിലയിൽ വ്യത്യാസമുണ്ടാകാമെന്ന് മക്‌ഡൊണാൾഡ്സ് ഇന്ത്യയുടെ നിബന്ധനകളിൽ പറയുന്നുണ്ട്. എന്നാൽ ഒരു പ്രദേശത്തെ ഉപഭോക്താക്കൾ എത്രത്തോളം പണം നൽകാൻ തയ്യാറാണ് എന്നതിന്റെ അടിസ്ഥാനത്തിൽ എഐ ഉപയോഗിച്ച് വില നിർണയിക്കുന്നതിൽ നിന്ന് ഇത് വ്യത്യസ്തമാണ്. ആഗോളതലത്തിൽ ബിസിനസിന്റെ വിവിധ മേഖലകളിൽ എഐ ഉപയോഗം മക്‌ഡൊണാൾഡ്സ് വർധിപ്പിക്കുന്നുണ്ടെങ്കിലും അമേരിക്കയിൽ റിപ്പോർട്ട് ചെയ്ത ഈ വിലനിർണയ സംവിധാനം ഇന്ത്യയിലെ റെസ്റ്റോറന്റുകളിലേക്ക് വ്യാപിപ്പിച്ചതിന് നിലവിൽ തെളിവുകളില്ല.

എഐ മനുഷ്യരാശിക്ക് ഭീഷണിയോ? സാം ആൾട്ട്മാൻ പറയുന്നു

Prashobh Prasannan — Fri, 25 Sep 2026 14:20:39 +0530

ആർട്ടിഫിഷ്യൽ ഇന്റലിജൻസ് അഥവാ എഐയുടെ അതിവേഗ വളർച്ച മനുഷ്യരാശിയുടെ ഭാവിക്ക് ഗുരുതരമായ അപകടം സൃഷ്‍ടിച്ചേക്കാമെന്ന് ഓപ്പൺഎഐ മേധാവി സാം ആൾട്ട്മാൻ. വൈദ്യശാസ്ത്രം, വിദ്യാഭ്യാസം, സാമ്പത്തിക ഉൽപ്പാദനക്ഷമത തുടങ്ങിയ മേഖലകളിൽ എഐ വലിയ മുന്നേറ്റങ്ങൾക്ക് വഴിയൊരുക്കുമെങ്കിലും, കൂടുതൽ ശേഷിയുള്ള എഐ സംവിധാനങ്ങൾ മനുഷ്യരുടെ നിയന്ത്രണത്തിനും മനസ്സിലാക്കലിനും അപ്പുറത്തേക്ക് പോകാനുള്ള സാധ്യതയുണ്ടെന്നാണ് അദ്ദേഹത്തിന്റെ മുന്നറിയിപ്പ്.

ന്യൂയോർക്കിൽ ബുധനാഴ്ച ചേർന്ന ഐക്യരാഷ്ട്രസഭയുടെ സുരക്ഷാ കൗൺസിലിൽ സംസാരിക്കുകയായിരുന്നു ആൾട്ട്മാൻ. എഐ മേഖലയിൽ അടുത്തിടെയുണ്ടായ അതിവേഗ പുരോഗതി വികസനത്തിന്റെ സമയപരിധി കൂടുതൽ ചുരുങ്ങിയതായി തോന്നിക്കുന്നുവെന്നും ഇതോടെ സാങ്കേതികവിദ്യയുടെ ഗുണങ്ങളും അപകടങ്ങളും കൂടുതൽ അടിയന്തരമായ വിഷയങ്ങളായി മാറിയെന്നും അദ്ദേഹം പറഞ്ഞു.

എഐ പുതിയ നവോത്ഥാനമാകുമോ, വ്യവസായ വിപ്ലവമാകുമോ?

എഐയെ മനുഷ്യരാശിക്ക് പുതിയൊരു നവോത്ഥാനത്തിന്റെ തുടക്കമാക്കാനും വലിയ സാമൂഹിക മാറ്റങ്ങൾ സൃഷ്ടിക്കുന്ന വ്യവസായ വിപ്ലവമായി മാറാനും സാധ്യതയുണ്ടെന്ന് ആൾട്ട്മാൻ പറഞ്ഞു.

“നമ്മുടെ മുന്നിൽ ഒരു തിരഞ്ഞെടുപ്പുണ്ട്. എഐ പുതിയൊരു സർഗാത്മകതയുടെയും കണ്ടെത്തലുകളുടെയും നവോത്ഥാനമാകാം. അല്ലെങ്കിൽ വലിയ അസ്ഥിരതയും ആശയക്കുഴപ്പവും സൃഷ്ടിക്കുന്ന പുതിയ വ്യവസായ വിപ്ലവമാകാം,” അദ്ദേഹം പറഞ്ഞു. പുതിയ ഉപകരണങ്ങളും ആശയങ്ങളും സ്ഥാപനങ്ങളും മനുഷ്യരുടെ കഴിവുകളെ വിപുലീകരിച്ച കാലഘട്ടമായിരുന്നു നവോത്ഥാനമെന്നും, നമ്മുടെ കാലത്ത് എഐക്ക് സമാനമായ പങ്ക് വഹിക്കാനാകുമെന്നും ആൾട്ട്മാൻ അഭിപ്രായപ്പെട്ടു.

മനുഷ്യന്‍റെ നിയന്ത്രണം നഷ്‍ടപ്പെടരുത്

എഐയുടെ ഏറ്റവും മികച്ച ഉപയോഗം മനുഷ്യരെ ഒരു വലിയ യന്ത്രത്തിലെ ചെറിയ ഘടകങ്ങളാക്കി മാറ്റുന്നതല്ലെന്നും, ജീവിതത്തിലെ എല്ലാ മേഖലകളും പൂർണമായും യന്ത്രവൽക്കരിക്കുന്നതുമല്ലെന്നും ആൾട്ട്മാൻ പറഞ്ഞു. കൂടുതൽ സങ്കീർണമായിക്കൊണ്ടിരിക്കുന്ന ലോകത്ത് മനുഷ്യർക്ക് കൂടുതൽ സ്വാതന്ത്ര്യവും കഴിവും നൽകുകയാണ് എഐയുടെ ലക്ഷ്യമാകേണ്ടതെന്ന് അദ്ദേഹം വ്യക്തമാക്കി. പഠിക്കാനും സൃഷ്ടിക്കാനും കണ്ടെത്താനും നിർമിക്കാനും സമൂഹത്തിൽ കൂടുതൽ സജീവമായി പങ്കെടുക്കാനും എഐ മനുഷ്യരെ സഹായിക്കണമെന്നും അദ്ദേഹം പറഞ്ഞു. അതേസമയം, എഐയ്ക്ക് ചെയ്യാൻ കഴിയാത്തതും ചെയ്യാൻ പാടില്ലാത്തതുമായ നിരവധി കാര്യങ്ങളുണ്ടെന്നും ആൾട്ട്മാൻ കൂട്ടിച്ചേർത്തു.

എഐ നിയന്ത്രണാതീതമായാൽ എന്ത് സംഭവിക്കും?

എഐയുടെ വളർച്ച തെറ്റായ ദിശയിലേക്ക് പോയാൽ പ്രധാനമായും 2 അപകടസാധ്യതകളുണ്ടെന്നാണ് ആൾട്ട്മാന്റെ വിലയിരുത്തൽ. ഒന്നാമത്തേത്, മനുഷ്യർക്ക് എഐയുടെ ഭാവിയിലുള്ള നിയന്ത്രണം നഷ്ടപ്പെടാനുള്ള സാധ്യതയാണ്. എഐയുടെ വളർച്ച വളരെ വേഗത്തിലാകുകയും സംഭവിക്കുന്നത് എന്താണെന്ന് മനുഷ്യർക്ക് പിന്തുടരാനോ ആവശ്യമായ സമയത്ത് ഇടപെടാനോ കഴിയാത്ത സാഹചര്യം ഉണ്ടാകുകയും ചെയ്യാമെന്ന് അദ്ദേഹം മുന്നറിയിപ്പ് നൽകി. രണ്ടാമത്തെ അപകടം എഐയുടെ ശക്തി വളരെ കുറച്ച് ആളുകളുടെയോ കമ്പനികളുടെയോ രാജ്യങ്ങളുടെയോ കൈകളിൽ കേന്ദ്രീകരിക്കപ്പെടുന്നതാണ്. ഏറ്റവും ശക്തമായ എഐ സംവിധാനങ്ങൾ ഉപയോഗിച്ച് ഒരു വ്യക്തിക്കോ കമ്പനിയ്ക്കോ രാജ്യത്തിനോ സ്വന്തം ആശയങ്ങളും ലോകവീക്ഷണവും മറ്റുള്ളവരിൽ അടിച്ചേൽപ്പിക്കാൻ കഴിയുന്ന സാഹചര്യം ഉണ്ടാകരുതെന്നും അദ്ദേഹം പറഞ്ഞു.

സ്വയം മെച്ചപ്പെടുത്തുന്ന എഐയെക്കുറിച്ച് ആശങ്ക

എഐ സംവിധാനങ്ങൾ സ്വയം മെച്ചപ്പെടുത്താനും ഭാവിയിലെ എഐ പതിപ്പുകളെ വികസിപ്പിക്കുന്ന പ്രക്രിയയെ തന്നെ കൂടുതൽ കാര്യക്ഷമമാക്കാനും ശേഷി നേടുന്ന സാഹചര്യത്തിൽ അപകടസാധ്യത വർധിക്കാമെന്നും ആൾട്ട്മാൻ പറഞ്ഞു. എഐ നിർമിക്കുന്ന പ്രക്രിയ കൂടുതൽ സ്വയം പ്രവർത്തനക്ഷമമാകുന്നതോടെ സാങ്കേതികവിദ്യയുടെ വളർച്ചയുടെ വേഗം അതിവേഗം കൂടാൻ സാധ്യതയുണ്ട്. അതിനാൽ ഇപ്പോഴത്തെ സാഹചര്യം അതീവ ജാഗ്രതയോടെ കൈകാര്യം ചെയ്യേണ്ട സമയമാണെന്നും അദ്ദേഹം വ്യക്തമാക്കി.

മത്സരത്തിന്റെ പേരിൽ സുരക്ഷയിൽ വിട്ടുവീഴ്ച വേണ്ട

എഐ സാങ്കേതികവിദ്യ വലിയ നേട്ടങ്ങൾ നൽകുമെന്ന് കരുതി കമ്പനികൾ അമിതമായ അപകടസാധ്യതകൾ ഏറ്റെടുക്കരുതെന്നും ആൾട്ട്മാൻ ആവശ്യപ്പെട്ടു. പരസ്പര മത്സരത്തിന്റെ സമ്മർദത്തിൽ കമ്പനികൾ തിരക്കിട്ട് തീരുമാനങ്ങൾ എടുക്കുന്നതും ഒഴിവാക്കണം.

ആവശ്യമെങ്കിൽ ഓപ്പൺഎഐ സ്വന്തം പ്രവർത്തനങ്ങൾ മന്ദഗതിയിലാക്കാൻ തയ്യാറാണെന്നും അദ്ദേഹം പറഞ്ഞു. സുരക്ഷ, നിരീക്ഷണം, മനുഷ്യരുടെ താൽപര്യങ്ങളുമായി എഐയുടെ പ്രവർത്തനം പൊരുത്തപ്പെടുന്നുവെന്ന് ഉറപ്പാക്കൽ എന്നിവ സാധ്യമാകുന്ന സാഹചര്യത്തിൽ മാത്രമേ പുതിയ സംവിധാനങ്ങൾ വികസിപ്പിക്കാവൂ എന്നും ആൾട്ട്മാൻ വ്യക്തമാക്കി. ശക്തമായ എഐ സംവിധാനങ്ങൾ മനുഷ്യരുടെ നിയന്ത്രണത്തിൽ തന്നെ തുടരണമെന്നും അദ്ദേഹം ആവശ്യപ്പെട്ടു. എഐയുടെ അപകടസാധ്യതകൾ വിലയിരുത്തുന്നതിനും സുരക്ഷാ സംവിധാനങ്ങൾ പരിശോധിക്കുന്നതിനും മനുഷ്യരുടെ മേൽനോട്ടം ഉറപ്പാക്കുന്നതിനുമായി ദേശീയ, അന്തർദേശീയ മാനദണ്ഡങ്ങൾ രൂപീകരിക്കണമെന്നും അദ്ദേഹം പറഞ്ഞു.

എഐ ഉപയോഗിച്ച് ജൈവായുധ നിർമാണം തടയണം

യുഎൻ സുരക്ഷാ കൗൺസിലിലെ അതേ യോഗത്തിൽ ആന്ത്രോപിക് മേധാവി ഡാരിയോ അമോഡെയിയും എഐ സുരക്ഷയിൽ അന്താരാഷ്ട്ര സഹകരണം ആവശ്യപ്പെട്ടു. എഐ ഉപയോഗിച്ച് ജൈവായുധങ്ങൾ നിർമിക്കുന്നത് നിരോധിക്കുന്നതിനുള്ള അന്താരാഷ്ട്ര ധാരണകളിൽ രാജ്യങ്ങൾ ആദ്യം ശ്രദ്ധ കേന്ദ്രീകരിക്കണമെന്ന് അദ്ദേഹം ആവശ്യപ്പെട്ടു. അത്യാധുനിക എഐ സംവിധാനങ്ങൾക്ക് നിയന്ത്രണം നഷ്ടപ്പെടുന്നതിന്റെയും ദുരുപയോഗം ചെയ്യപ്പെടുന്നതിന്റെയും സാധ്യതകൾ പരിശോധിക്കുന്നതിനുള്ള ആഗോള മാനദണ്ഡങ്ങളും ആവശ്യമാണ്. ആഗോള സുരക്ഷയെ ബാധിക്കുന്ന തരത്തിലുള്ള പ്രധാന എഐ സംഭവങ്ങൾ റിപ്പോർട്ട് ചെയ്യുന്നതിനുള്ള അന്താരാഷ്ട്ര സംവിധാനവും രൂപീകരിക്കണമെന്നും അമോഡെയി ആവശ്യപ്പെട്ടു.

ഇന്ത്യയുടെ എഐ കുതിപ്പിന് കരുത്തേകാൻ ആഗോള കമ്പനിയെത്തുന്നു

Prashobh Prasannan — Mon, 28 Sep 2026 12:02:14 +0530

ആർട്ടിഫിഷ്യൽ ഇന്റലിജൻസ്, ക്ലൗഡ് കംപ്യൂട്ടിങ്, ഡാറ്റാ അധിഷ്ഠിത സാങ്കേതികവിദ്യകൾ എന്നിവയ്ക്കുള്ള ആവശ്യം വർധിക്കുന്ന പശ്ചാത്തലത്തിൽ ഇന്ത്യയിൽ പ്രവർത്തനം ഔദ്യോഗികമായി ആരംഭിച്ച് ഫിൻലൻഡ് ആസ്ഥാനമായ ഡാറ്റ, എഐ കമ്പനിയായ എയ്വൻ. ബെംഗളൂരുവിലാണ് കമ്പനിയുടെ ഇന്ത്യയിലെ ആദ്യ ഓഫീസ് പ്രവർത്തനം ആരംഭിച്ചത്. ഏഷ്യ-പസഫിക് മേഖലയിലെ കൂടുതൽ വിപണികളിലേക്കുള്ള പ്രവർത്തനങ്ങൾ വികസിപ്പിക്കുന്നതിനുള്ള പ്രധാന കേന്ദ്രമായും ഇന്ത്യയെ ഉപയോഗിക്കാനാണ് കമ്പനിയുടെ പദ്ധതി.

ഇന്ത്യയെ പ്രധാന വിപണിയായി കാണുന്നു

കഴിഞ്ഞ കുറച്ചുകാലമായി ഇന്ത്യയിൽ പ്രവർത്തിച്ചുവരുന്ന എയ്വൻ സെപ്റ്റംബർ 24ന് ന്യൂഡൽഹിയിൽ നടന്ന പരിപാടിയിലാണ് രാജ്യത്തെ പ്രവർത്തനങ്ങൾ ഔദ്യോഗികമായി പ്രഖ്യാപിച്ചത്. ഫിൻലൻഡ് എംബസിയുമായി സഹകരിച്ചായിരുന്നു പരിപാടി. ഇന്ത്യയിൽ ഉൽപ്പന്നങ്ങൾ വിൽക്കുന്നതിൽ മാത്രം ഒതുങ്ങുന്നതല്ല കമ്പനിയുടെ വിപുലീകരണ പദ്ധതി. പ്രാദേശിക ജീവനക്കാരുടെ എണ്ണം വർധിപ്പിക്കുകയും ഇന്ത്യയിലെ സാങ്കേതിക സ്ഥാപനങ്ങളുമായി പങ്കാളിത്തം ശക്തമാക്കുകയും ചെയ്യാനാണ് ലക്ഷ്യം. ക്ലൗഡ് അടിസ്ഥാന സൗകര്യങ്ങൾ, ആർട്ടിഫിഷ്യൽ ഇന്റലിജൻസ്, തത്സമയ ഡാറ്റാ വിശകലനം, ആധുനിക ആപ്ലിക്കേഷനുകൾ തുടങ്ങിയ മേഖലകളിൽ കമ്പനികൾ കൂടുതൽ നിക്ഷേപം നടത്തുന്നതാണ് ഇന്ത്യയിലെ സാധ്യതകൾ വർധിപ്പിക്കുന്നതെന്ന് എയ്വൻ വിലയിരുത്തുന്നു.

‘എഐയുടെ അടിസ്ഥാനം ഡാറ്റ’

“എഐയെക്കുറിച്ചുള്ള ചർച്ചകൾ ഒടുവിൽ ഡാറ്റയെക്കുറിച്ചുള്ള ചർച്ചകളാണ്. ഡാറ്റയുടെ അടിസ്ഥാനം വിപുലീകരിക്കാനും വിശ്വസനീയമായും വഴക്കമുള്ളതുമായും പ്രവർത്തിക്കാനും കഴിയുമ്പോഴാണ് സംരംഭങ്ങൾക്ക് വലിയ എഐ ആപ്ലിക്കേഷനുകൾ വികസിപ്പിക്കാൻ സാധിക്കുക,” എയ്വന്റെ ഏഷ്യ-പസഫിക് വിൽപ്പന വിഭാഗം മേധാവി കെൻ മനുജ പറഞ്ഞു. ഡെവലപ്പർമാരുടെ കഴിവ്, ഡിജിറ്റൽ ബിസിനസുകളുടെ വളർച്ച, ക്ലൗഡ് സാങ്കേതികവിദ്യയുടെ വ്യാപനം എന്നിവ ഇന്ത്യയെ ഏഷ്യ-പസഫിക് മേഖലയിലെ പ്രധാന വിപണികളിലൊന്നാക്കി മാറ്റുമെന്നാണ് അദ്ദേഹത്തിന്റെ വിലയിരുത്തൽ.

എന്താണ് എയ്വന്റെ പ്രവർത്തനം?

ബിസിനസ് സ്ഥാപനങ്ങൾ ഡാറ്റ ശേഖരിക്കാനും സംഭരിക്കാനും കൈമാറ്റം ചെയ്യാനും ഉപയോഗിക്കുന്ന സാങ്കേതിക സംവിധാനങ്ങൾ കൈകാര്യം ചെയ്യാൻ സഹായിക്കുന്ന ക്ലൗഡ് ഡാറ്റ അടിസ്ഥാന സൗകര്യ കമ്പനിയാണ് എയ്വൻ. അപ്പാച്ചെ കാഫ്‍ക, പോസ്റ്റ്ഗ്രെഎസ്‌ക്യൂഎൽ, മൈഎസ്‌ക്യൂഎൽ, ക്ലിക്ക്ഹൗസ്, ഓപ്പൺസെർച്ച്, വാൽക്കി, ഡാറ്റാഹബ് തുടങ്ങിയ ഓപ്പൺ സോഴ്സ് സാങ്കേതികവിദ്യകളുടെ നിയന്ത്രിത സേവനങ്ങളാണ് കമ്പനി നൽകുന്നത്. ലളിതമായി പറഞ്ഞാൽ, വലിയ തോതിലുള്ള ഡാറ്റാ സംവിധാനങ്ങൾ പ്രവർത്തിപ്പിക്കുന്നതിനാവശ്യമായ സാങ്കേതിക അടിസ്ഥാന സൗകര്യങ്ങളുടെ വലിയൊരു ഭാഗം കൈകാര്യം ചെയ്യുന്നതിനുള്ള സേവനമാണ് എയ്വൻ നൽകുന്നത്. വിവിധ പ്രധാന ക്ലൗഡ് പ്ലാറ്റ്ഫോമുകളിൽ ഈ സേവനങ്ങൾ ഉപയോഗിക്കാനും ബിസിനസുകൾക്ക് സാധിക്കും.

എഐ വളരുമ്പോൾ ഡാറ്റാ അടിസ്ഥാന സൗകര്യത്തിനും ആവശ്യം

കൂടുതൽ കമ്പനികൾ എഐ സാങ്കേതികവിദ്യ ഉപയോഗിക്കുന്നതോടെ വൻതോതിലുള്ള ഡാറ്റ ശേഖരിക്കുകയും പ്രോസസ് ചെയ്യുകയും തത്സമയം കൈമാറുകയും ചെയ്യേണ്ടിവരും. ഇത്തരം ആവശ്യങ്ങൾക്കുള്ള ഡാറ്റാ അടിസ്ഥാന സൗകര്യമാണ് എയ്വൻ പ്രധാനമായും ലക്ഷ്യമിടുന്നത്. പ്രത്യേകിച്ച് എഐ, തത്സമയ ആപ്ലിക്കേഷനുകൾ എന്നിവയ്ക്കാവശ്യമായ ഡാറ്റാ സംവിധാനങ്ങൾ നിർമിക്കാനും കൈകാര്യം ചെയ്യാനും ഇന്ത്യൻ കമ്പനികളെ സഹായിക്കാനാണ് എയ്വന്റെ പ്രധാന ശ്രദ്ധ.

ഇന്ത്യയിൽ ജീവനക്കാരുടെ എണ്ണം കൂട്ടും

നിലവിൽ ഇന്ത്യയിൽ ഏകദേശം 15 ജീവനക്കാരാണ് എയ്വനുള്ളത്. ബിസിനസ് വികസിക്കുന്നതിനനുസരിച്ച് പ്രാദേശിക ജീവനക്കാരുടെ എണ്ണം വർധിപ്പിക്കാനാണ് കമ്പനിയുടെ പദ്ധതി. വിൽപ്പന, പങ്കാളിത്തം, ഉപഭോക്തൃ സേവനം, സൊല്യൂഷൻസ് എൻജിനീയറിങ് തുടങ്ങിയ മേഖലകളിലായിരിക്കും പ്രധാന നിയമനങ്ങൾ. ബെംഗളൂരുവിലെ സംഘം കമ്പനിയുടെ ആഗോള ജീവനക്കാരുടെ ശൃംഖലയുമായി ചേർന്നായിരിക്കും പ്രവർത്തിക്കുക.

സാങ്കേതിക കമ്പനികളുമായി പങ്കാളിത്തം

ഇന്ത്യയിൽ ക്ലൗഡ് സേവനദാതാക്കൾ, സാങ്കേതിക കമ്പനികൾ, കൺസൾട്ടിങ് സ്ഥാപനങ്ങൾ, സിസ്റ്റംസ് ഇന്റഗ്രേറ്റർമാർ എന്നിവരുമായി സഹകരിക്കാനും എയ്വൻ പദ്ധതിയിടുന്നു. ഇതിന് പുറമെ ഡെവലപ്പർമാരുമായും ഓപ്പൺ സോഴ്സ് സമൂഹങ്ങളുമായും പരിപാടികളിലൂടെയും വിജ്ഞാന പങ്കിടൽ പദ്ധതികളിലൂടെയും ബന്ധം ശക്തമാക്കാനും കമ്പനി ലക്ഷ്യമിടുന്നു. ഇന്ത്യയിലെ എഐ, ക്ലൗഡ്, ഡാറ്റാ അടിസ്ഥാന സൗകര്യ മേഖലകളിലെ വളർച്ചയാണ് എയ്വന്റെ വിപുലീകരണത്തിന് പ്രധാന പ്രേരണ.

വീഡിയോ എഡിറ്റിംഗിൽ വിസ്‍മയമൊരുക്കാൻ അഡോബിന്‍റെ പുതിയ ആപ്പ്

Prashobh Prasannan — Fri, 25 Sep 2026 12:53:56 +0530

മൊബൈൽ ഫോണിൽ വീഡിയോ എഡിറ്റിങ് നടത്തുന്നവർക്കായി പുതിയ ആപ്പുമായി അഡോബ്. ആൻഡ്രോയിഡ് ഫോണുകൾക്കായി അഡോബി പ്രീമിയർ മൊബൈൽ ആപ്പ് ഇന്ത്യയിൽ അവതരിപ്പിച്ചു. ഐഫോണിൽ നേരത്തെ ലഭ്യമായിരുന്ന ആപ്പാണ് ഇപ്പോൾ ആൻഡ്രോയിഡിലേക്കും എത്തുന്നത്. ഗൂഗിൾ പ്ലേ സ്റ്റോറിൽ നിന്ന് സൗജന്യമായി ആപ്പ് ഡൗൺലോഡ് ചെയ്യാം. ഐഫോൺ ഉപയോക്താക്കൾക്ക് ആപ്പ് സ്റ്റോറിലും ലഭ്യമാണ്. മൾട്ടി-ട്രാക്ക് എഡിറ്റിങ്, 4കെ വീഡിയോ കയറ്റുമതി, എഐ അധിഷ്ഠിത ഓഡിയോ സംവിധാനങ്ങൾ, ഫയർഫ്ലൈ അടിസ്ഥാനമാക്കിയ ജനറേറ്റീവ് എഐ സൗകര്യങ്ങൾ എന്നിവയാണ് പ്രധാന ഫീച്ചറുകൾ.

പശ്ചാത്തല ശബ്‍ദം നീക്കം ചെയ്യാൻ എഐ

ആൻഡ്രോയിഡ് പതിപ്പിനൊപ്പം പുതിയ ചില ഫീച്ചറുകളും അഡോബി അവതരിപ്പിച്ചിട്ടുണ്ട്. ഇതിൽ പ്രധാനപ്പെട്ടതാണ് എൻഹാൻസ് ഓഡിയോ. എഐ സാങ്കേതികവിദ്യ ഉപയോഗിച്ച് റെക്കോർഡിങ്ങുകളിലെ പശ്ചാത്തല ശബ്ദം കുറയ്ക്കാനും ശബ്ദത്തിന്റെ വ്യക്തത വർധിപ്പിക്കാനും ഈ സംവിധാനത്തിന് കഴിയും. അഭിമുഖങ്ങൾ, വോയ്സ് ഓവറുകൾ, സമൂഹമാധ്യമങ്ങൾക്കായുള്ള വീഡിയോകൾ എന്നിവ തിരക്കേറിയതോ ശബ്ദമുള്ളതോ ആയ സാഹചര്യങ്ങളിൽ ചിത്രീകരിക്കുന്നവർക്ക് ഈ ഫീച്ചർ പ്രയോജനപ്പെടുമെന്നാണ് അഡോബി പറയുന്നത്.

ഫോണിൽ തന്നെ മൾട്ടി-ട്രാക്ക് എഡിറ്റിങ്

മൊബൈൽ ഉപയോഗിച്ച് നേരിട്ട് വീഡിയോ ചിത്രീകരിച്ച് എഡിറ്റ് ചെയ്ത് പ്രസിദ്ധീകരിക്കാൻ ആഗ്രഹിക്കുന്നവരെ ലക്ഷ്യമിട്ടാണ് ആപ്പ് രൂപകൽപ്പന ചെയ്തിരിക്കുന്നത്. ഫ്രെയിം കൃത്യതയോടെയുള്ള എഡിറ്റിങ്ങിനൊപ്പം മൾട്ടി-ട്രാക്ക് ടൈംലൈൻ സംവിധാനവും ലഭിക്കും. ഒരേ പ്രോജക്ടിൽ വീഡിയോ, സംഗീതം, വോയ്സ് ഓവർ, ടെക്സ്റ്റ്, വിവിധ എഫക്റ്റുകൾ എന്നിവ ഒരുമിച്ച് ക്രമീകരിക്കാം. ടെംപ്ലേറ്റുകൾ, അഡോബി സ്റ്റോക്ക് വിഭവങ്ങൾ, ഉപയോക്താവിന്റെ സ്വന്തം മീഡിയ ഫയലുകൾ എന്നിവയും ഉപയോഗിക്കാം.

പ്രീമിയർ പ്രോയുടെ ലളിത പതിപ്പല്ല

ഡെസ്ക്ടോപ്പിലെ പ്രീമിയർ പ്രോയുടെ പരിമിതപ്പെടുത്തിയ പതിപ്പ് മാത്രമല്ല പ്രീമിയർ മൊബൈൽ എന്നാണ് അഡോബി വ്യക്തമാക്കുന്നത്. മൊബൈൽ ഫോണിൽ ഉള്ളടക്കം സൃഷ്ടിക്കുന്ന രീതിക്ക് അനുസൃതമായാണ് ആപ്പ് വികസിപ്പിച്ചിരിക്കുന്നത്. വലിയ സ്ക്രീനിന്റെ സഹായമില്ലാതെ യാത്രയ്ക്കിടയിലും മറ്റും വേഗത്തിൽ വീഡിയോ എഡിറ്റ് ചെയ്ത് പൂർത്തിയാക്കാൻ കഴിയുന്ന തരത്തിലാണ് സംവിധാനങ്ങൾ ക്രമീകരിച്ചിരിക്കുന്നത്. പ്രീമിയർ പ്രോയിലെ മൾട്ടി-ട്രാക്ക് ടൈംലൈൻ, ഫ്രെയിം കൃത്യതയുള്ള എഡിറ്റിങ് തുടങ്ങിയ സൗകര്യങ്ങൾ മൊബൈൽ സ്ക്രീനിനായി കൂടുതൽ ലളിതവും ഉപയോഗിക്കാൻ എളുപ്പവുമായ രീതിയിൽ മാറ്റിയിട്ടുണ്ട്.

പ്രധാന എഡിറ്റിങ് ഫീച്ചറുകൾ സൗജന്യം

ആൻഡ്രോയിഡിലും ഐഒഎസിലും പ്രീമിയർ മൊബൈൽ ആപ്പ് നിലവിൽ സൗജന്യമായി ഉപയോഗിക്കാം. ഫയർഫ്ലൈ അടിസ്ഥാനമാക്കിയ ജനറേറ്റീവ് ഫിൽ, ഇമേജ്-ടു-വീഡിയോ, സൗണ്ട് എഫക്റ്റുകൾ സൃഷ്ടിക്കൽ തുടങ്ങിയ എഐ സൗകര്യങ്ങളും ആപ്പിലുണ്ട്. എന്നാൽ ചില അധിക ജനറേറ്റീവ് എഐ ഫീച്ചറുകൾക്ക് പ്രത്യേകം നിരക്ക് ഈടാക്കും. അധിക ക്ലൗഡ് സംഭരണത്തിനും പണം നൽകേണ്ടിവരും. അതേസമയം നിർബന്ധിതമായി ലോഗിൻ ചെയ്യുകയോ പണമടച്ച പതിപ്പിലേക്ക് അപ്ഗ്രേഡ് ചെയ്യാൻ ആവശ്യപ്പെടുകയോ ഇല്ലെന്നാണ് അഡോബി വ്യക്തമാക്കുന്നത്. 4കെ വീഡിയോ കയറ്റുമതിക്ക് അധിക നിരക്ക് ഈടാക്കില്ലെന്നും കമ്പനി പറയുന്നു.

കൂടുതൽ ഫീച്ചറുകൾ വരുന്നു

അടുത്ത മാസങ്ങളിൽ പ്രീമിയർ മൊബൈലിലേക്ക് കൂടുതൽ സൗകര്യങ്ങൾ എത്തിക്കാനാണ് അഡോബിയുടെ പദ്ധതി. അഡോബി ഫോണ്ട്സ്, കൂടുതൽ സംഗീത ഓപ്ഷനുകൾ, സംഗീതത്തിന്റെ താളത്തിനനുസരിച്ച് വീഡിയോ സ്വമേധയാ ക്രമീകരിക്കുന്ന ബീറ്റ് ടു സിൻക് തുടങ്ങിയ ഫീച്ചറുകൾ ഇതിൽ ഉൾപ്പെടും. ഇവ സൗജന്യമായി ഉപയോക്താക്കൾക്ക് ലഭ്യമാക്കാനാണ് പദ്ധതിയെന്ന് അഡോബി അറിയിച്ചു.

ഇന്ത്യൻ ഉപയോക്താക്കൾക്ക് പ്രത്യേക പരിഗണന

ഇന്ത്യൻ ഉള്ളടക്ക സ്രഷ്ടാക്കളെ ലക്ഷ്യമിട്ടും അഡോബി പ്രത്യേക പദ്ധതികൾ ഒരുക്കുന്നുണ്ട്. ഇന്ത്യയിലെ ആഘോഷങ്ങളും ഉത്സവങ്ങളും അടിസ്ഥാനമാക്കിയുള്ള പ്രാദേശിക ടെംപ്ലേറ്റുകൾ കൂടുതൽ അവതരിപ്പിക്കും. പ്രാദേശിക ഭാഷകളിലുള്ള ക്യാപ്ഷനുകളും ഘട്ടംഘട്ടമായി അവതരിപ്പിക്കാനാണ് കമ്പനി പദ്ധതിയിടുന്നത്. ആദ്യം ഹിന്ദിയിലാണ് ശ്രദ്ധ കേന്ദ്രീകരിക്കുക. പിന്നീട് മറ്റ് ഇന്ത്യൻ ഭാഷകളിലേക്കും ഈ സൗകര്യം വ്യാപിപ്പിക്കും. ഇന്ത്യൻ ഉപയോക്താക്കളിൽ നിന്നുള്ള പ്രതികരണത്തിന്റെ അടിസ്ഥാനത്തിൽ ഹിങ്ലിഷ് സബ്‌ടൈറ്റിലുകൾക്കുള്ള പിന്തുണയും അഡോബി പരിഗണിക്കുന്നുണ്ട്.

വോയിസ്, എസ്എംഎസ് റീചാർജുകൾക്ക് പുതിയ നിയമം; കുറഞ്ഞ നിരക്കിൽ കൂടുതൽ പ്ലാനുകൾ വരുന്നു

Prashobh Prasannan — Fri, 25 Sep 2026 16:49:58 +0530

മൊബൈൽ ഫോൺ പ്രധാനമായും കോളുകൾക്കും എസ്എംഎസിനുമായി ഉപയോഗിക്കുന്നവർക്ക് ആശ്വാസവാർത്ത. ഇന്റർനെറ്റ് ഡാറ്റ ആവശ്യമില്ലാത്ത ഉപഭോക്താക്കൾക്കായി കൂടുതൽ വോയിസ്, എസ്എംഎസ് മാത്രം ഉൾപ്പെടുന്ന റീചാർജ് പ്ലാനുകൾ അവതരിപ്പിക്കാൻ ടെലികോം കമ്പനികൾക്ക് ടെലികോം റെഗുലേറ്ററി അതോറിറ്റി ഓഫ് ഇന്ത്യ അഥവാ ട്രായ് നിർദേശം നൽകി.

30 ദിവസം വരെ കാലാവധിയുള്ള പ്ലാനുകൾ

2026ലെ ടെലികോം കൺസ്യൂമർ പ്രൊട്ടക്ഷൻ പതിമൂന്നാം ഭേദഗതി ചട്ടങ്ങൾ പ്രകാരം 30 ദിവസം വരെയുള്ള കാലാവധിയുള്ള വോയ്സ്, എസ്എംഎസ് മാത്രം ഉൾപ്പെടുന്ന പ്രത്യേക താരിഫ് വൗച്ചറുകൾ ടെലികോം കമ്പനികൾ അവതരിപ്പിക്കണം. നിലവിലുള്ള താരിഫ് പ്ലാനുകളിൽ ലഭ്യമായ കുറഞ്ഞ കാലാവധിക്ക് അനുസൃതമായ ഓപ്ഷനുകളും കമ്പനികൾ നൽകേണ്ടിവരും. ഡാറ്റ ഉൾപ്പെടുത്താത്തതിനാൽ ഇത്തരം പ്ലാനുകൾക്ക് അതിനനുസരിച്ചുള്ള നിരക്ക് കുറവും ഉണ്ടായിരിക്കണമെന്ന് ട്രായ് നിർദേശിച്ചിട്ടുണ്ട്. ഇതോടെ ഇന്റർനെറ്റ് ഉപയോഗിക്കാത്തവർക്ക് ആവശ്യമില്ലാത്ത ഡാറ്റയ്ക്കായി പണം നൽകേണ്ട സാഹചര്യം ഒഴിവാക്കാനാകും.

മാസത്തിൽ ഒരേ തീയതിയിൽ പുതുക്കാം

30 ദിവസത്തിൽ കൂടുതൽ കാലാവധിയുള്ള കുറഞ്ഞത് ഒരു വോയ്സ്, എസ്എംഎസ് പ്ലാനെങ്കിലും എല്ലാ ടെലികോം കമ്പനികളും നൽകണം. ഈ പ്ലാനുകൾ എല്ലാ മാസവും ഒരേ തീയതിയിൽ പുതുക്കാൻ കഴിയുന്ന തരത്തിലായിരിക്കണം. ഒരു മാസത്തിൽ പുതുക്കേണ്ട തീയതി ഇല്ലെങ്കിൽ, ആ മാസത്തെ അവസാന ദിവസമായിരിക്കും പുതുക്കലിനുള്ള തീയതി. ഉദാഹരണത്തിന്, ഒരു പ്ലാൻ എല്ലാ മാസവും 31ന് പുതുക്കേണ്ടതാണെങ്കിൽ 31 ദിവസമില്ലാത്ത മാസങ്ങളിൽ അവസാന ദിവസത്തിൽ പ്ലാൻ പുതുക്കും.

നിലവിൽ ദീർഘകാല പ്ലാനുകൾ കൂടുതൽ

ടെലികോം കമ്പനികൾ നിലവിൽ നൽകുന്ന വോയ്സ്, എസ്എംഎസ് മാത്രം ഉൾപ്പെടുന്ന പ്ലാനുകളിൽ ഭൂരിഭാഗവും ദീർഘകാല കാലാവധിയുള്ളവയാണെന്ന് ട്രായ് ചൂണ്ടിക്കാട്ടി. 80 അല്ലെങ്കിൽ 84 ദിവസം, 336 അല്ലെങ്കിൽ 365 ദിവസം തുടങ്ങിയ കാലാവധികളിലാണ് ഇത്തരം പ്ലാനുകൾ കൂടുതലായും ലഭിക്കുന്നത്. കുറഞ്ഞ കാലയളവിലേക്ക് റീചാർജ് ചെയ്യാൻ ആഗ്രഹിക്കുന്ന ഉപഭോക്താക്കൾക്ക് ഇതോടെ പരിമിതമായ ഓപ്ഷനുകളാണ് ഉണ്ടായിരുന്നത്. പ്രത്യേകിച്ച് കുറഞ്ഞ വരുമാനമുള്ള ഉപഭോക്താക്കൾക്ക് അവരുടെ ആവശ്യത്തിനും സാമ്പത്തിക സാഹചര്യത്തിനും അനുസരിച്ച് ചെറിയ കാലയളവിലേക്ക് റീചാർജ് ചെയ്യാൻ പുതിയ സംവിധാനം സഹായിക്കുമെന്നാണ് ട്രായ് വ്യക്തമാക്കുന്നത്.

നിലവിലെ പ്ലാൻ നിരക്കുകൾ

നിലവിൽ ജിയോ, എയർടെൽ, വോഡഫോൺ ഐഡിയ എന്നീ കമ്പനികൾ വോയ്സ്, എസ്എംഎസ് മാത്രം ഉൾപ്പെടുന്ന റീചാർജ് പ്ലാനുകൾ നൽകുന്നുണ്ട്. ജിയോയുടെ ത്രൈമാസ പ്ലാനിന് 448 രൂപയും വാർഷിക പ്ലാനിന് 1748 രൂപയുമാണ് നിരക്ക്. എയർടെലും വോഡഫോൺ ഐഡിയയും 1849 രൂപ നിരക്കിൽ വാർഷിക പ്ലാനുകൾ നൽകുന്നു. ഇവയുടെ ത്രൈമാസ പ്ലാനുകൾക്ക് യഥാക്രമം 469 രൂപയും 470 രൂപയുമാണ് നിരക്ക്.

പുതിയ പ്ലാനുകളുടെ വില എത്ര?

ട്രായിയുടെ പുതിയ നിർദേശത്തോടെ നിലവിലുള്ള ദീർഘകാല പ്ലാനുകൾക്ക് പുറമെ കുറഞ്ഞ കാലാവധിയുള്ള കൂടുതൽ റീചാർജ് ഓപ്ഷനുകളും ഉപഭോക്താക്കൾക്ക് ലഭിച്ചേക്കും. എന്നാൽ പുതിയ പ്ലാനുകളുടെ കൃത്യമായ നിരക്കുകൾ ടെലികോം കമ്പനികൾ ഇതുവരെ പ്രഖ്യാപിച്ചിട്ടില്ല. ഡാറ്റ ആവശ്യമില്ലാത്ത ഉപഭോക്താക്കൾക്ക് അവരുടെ ഉപയോഗത്തിനും ബജറ്റിനും അനുസരിച്ച് റീചാർജ് തിരഞ്ഞെടുക്കാൻ പുതിയ സംവിധാനം കൂടുതൽ സൗകര്യം നൽകുമെന്നാണ് പ്രതീക്ഷിക്കുന്നത്.

അസൂസ് ഇ-ഷോപ്പിൽ സുരക്ഷാ വീഴ്ച; വിവരങ്ങൾ അപകടത്തിലോ?

Prashobh Prasannan — Fri, 25 Sep 2026 12:51:00 +0530

പ്രമുഖ ഇലക്ട്രോണിക്സ്, കമ്പ്യൂട്ടർ നിർമാതാക്കളായ അസൂസിന്റെ ഇ-കൊമേഴ്സ് സംവിധാനത്തിൽ അനധികൃത പ്രവേശനം നടന്നതായി റിപ്പോർട്ട്. സംഭവത്തെ തുടർന്ന് ലോകമെമ്പാടുമുള്ള ലക്ഷക്കണക്കിന് ഉപഭോക്താക്കളുടെ വിവരങ്ങൾ അപകടത്തിലായേക്കാമെന്നാണ് സൂചന. അസൂസ് ഇ-ഷോപ്പിൽ രജിസ്റ്റർ ചെയ്ത ഉപഭോക്താക്കൾക്ക് കമ്പനി ഇക്കാര്യം അറിയിച്ചതായി റിപ്പോർട്ടുകൾ പറയുന്നു.

ഉപഭോക്താക്കളുടെ ഏതൊക്കെ വിവരങ്ങളാണ് അപകടത്തിൽ?

അസൂസ് ഇ-ഷോപ്പ് സംവിധാനത്തിന്റെ ഒരു ഭാഗത്ത് അനധികൃത പ്രവേശനം കണ്ടെത്തിയതായി കമ്പനി ഉപഭോക്താക്കൾക്ക് അയച്ച ഇമെയിലിൽ വ്യക്തമാക്കി. നടത്തിയ പ്രാഥമിക അന്വേഷണത്തിൽ ചില ഉപഭോക്താക്കളുടെ ഓർഡർ വിവരങ്ങൾ, ബന്ധപ്പെടാനുള്ള വിവരങ്ങൾ, ഓർഡർ രേഖകൾ എന്നിവ അനധികൃതമായി ആക്സസ് ചെയ്യപ്പെട്ടിരിക്കാമെന്നാണ് കമ്പനി അറിയിച്ചിരിക്കുന്നത്.

എന്നാൽ പേയ്‌മെന്റ് വിവരങ്ങളോ ബാങ്ക് അക്കൗണ്ട് വിവരങ്ങളോ ചോർന്നിട്ടില്ലെന്ന് അസൂസ് വ്യക്തമാക്കി. നിലവിൽ ലഭ്യമായ വിവരങ്ങൾ ദുരുപയോഗം ചെയ്തതായി തെളിവുകളൊന്നും കണ്ടെത്തിയിട്ടില്ലെന്നും ബാധിക്കപ്പെട്ട ഉപഭോക്താക്കൾക്ക് ഏതെങ്കിലും തരത്തിലുള്ള നാശനഷ്ടം സംഭവിച്ചതായി അറിയില്ലെന്നും കമ്പനി അറിയിച്ചു.

നിയന്ത്രിച്ചതായി അസൂസ്

അനധികൃത പ്രവേശനം കണ്ടെത്തിയതിനെ തുടർന്ന് ബാധിക്കപ്പെട്ട സംവിധാനങ്ങൾ സുരക്ഷിതമാക്കുകയും സാഹചര്യം നിയന്ത്രണവിധേയമാക്കുകയും ചെയ്തതായി അസൂസ് വ്യക്തമാക്കി. നിലവിൽ സിസ്റ്റത്തിലേക്ക് തുടർന്നും അനധികൃത പ്രവേശനം നടക്കുന്നതിന്റെ തെളിവുകളൊന്നും കണ്ടെത്തിയിട്ടില്ലെന്നും കമ്പനി അറിയിച്ചു. അതേസമയം, സൈബർ ആക്രമണം എങ്ങനെയാണ് നടന്നതെന്ന് ഇതുവരെ കണ്ടെത്താനായിട്ടില്ല. സംഭവത്തിൽ അന്വേഷണം തുടരുകയാണെന്നും അസൂസ് വ്യക്തമാക്കി.

വ്യാജ സന്ദേശങ്ങളിലൂടെ തട്ടിപ്പിന് സാധ്യത

ചോർന്നേക്കാവുന്ന ഉപഭോക്തൃ വിവരങ്ങൾ ഉപയോഗിച്ച് മൂന്നാം കക്ഷികൾ തട്ടിപ്പ് നടത്താനുള്ള സാധ്യതയുണ്ടെന്നും അസൂസ് മുന്നറിയിപ്പ് നൽകി. അസൂസ് ഉൽപ്പന്നങ്ങൾ, സേവനങ്ങൾ, ഓർഡറുകൾ എന്നിവയുമായി ബന്ധപ്പെട്ടതാണെന്ന് തോന്നിപ്പിക്കുന്ന വ്യാജ ഇമെയിലുകൾ, സന്ദേശങ്ങൾ, ഫോൺ കോളുകൾ എന്നിവയിലൂടെ ഉപഭോക്താക്കളെ കബളിപ്പിക്കാൻ ശ്രമിച്ചേക്കാമെന്നാണ് മുന്നറിയിപ്പ്. അതിനാൽ അസൂസിൽ നിന്നുള്ളതെന്ന് അവകാശപ്പെടുന്ന സംശയാസ്പദമായ സന്ദേശങ്ങളോട് ഉപഭോക്താക്കൾ ജാഗ്രത പാലിക്കണം. പാസ്‌വേഡ്, ഒറ്റത്തവണ പാസ്‌കോഡ്, ബാങ്ക് വിവരങ്ങൾ തുടങ്ങിയവ ആവശ്യപ്പെടുന്ന സന്ദേശങ്ങളോട് പ്രത്യേക ശ്രദ്ധ വേണം.

നേരത്തെയും സൈബർ സുരക്ഷാ സംഭവം

2025 ഡിസംബറിലും അസൂസുമായി ബന്ധപ്പെട്ട മറ്റൊരു സൈബർ സുരക്ഷാ സംഭവം റിപ്പോർട്ട് ചെയ്തിരുന്നു. എവറസ്റ്റ് എന്ന റാൻസംവെയർ സംഘം അസൂസിന്റെ ഒരു വിതരണക്കാരന്റെ സംവിധാനത്തിൽ നിന്ന് 1 ടിബിയിലധികം വിവരങ്ങൾ മോഷ്ടിച്ചതായി അവകാശപ്പെട്ടിരുന്നു. അന്ന് അസൂസ് ഫോണുകളിലെ ചില ക്യാമറാ സോഴ്സ് കോഡുകളാണ് ഈ സംഭവത്തിൽ ബാധിച്ചതെന്ന് കമ്പനി വ്യക്തമാക്കിയിരുന്നു. എന്നാൽ ഉപഭോക്താക്കളുടെ സ്വകാര്യതയെയോ അസൂസ് ഉൽപ്പന്നങ്ങളെയോ സംഭവം ബാധിച്ചിട്ടില്ലെന്നും കമ്പനി അറിയിച്ചിരുന്നു. നിലവിലെ ഇ-ഷോപ്പ് സംഭവത്തിൽ കൃത്യമായി എത്ര ഉപഭോക്താക്കളെയാണ് ബാധിച്ചിട്ടുള്ളതെന്നും ഏതെല്ലാം വിവരങ്ങളാണ് അനധികൃതമായി ആക്സസ് ചെയ്യപ്പെട്ടതെന്നും അന്വേഷണം പൂർത്തിയായ ശേഷമേ വ്യക്തമാകൂ.

ഇന്ത്യയിൽ കുതിച്ചുകയറി സ്‍മാർട്ട്‌ഫോൺ വില; വാങ്ങാൻ ആളില്ല, വിൽപ്പനയിൽ വൻ ഇടിവ്

Prashobh Prasannan — Wed, 30 Sep 2026 12:24:25 +0530

ഇന്ത്യയിൽ സ്‍മാർട്ട്‌ഫോൺ വിലയിൽ വൻ വർധന. 2026ന്റെ ആദ്യ പകുതിയിൽ രാജ്യത്തെ സ്മാർട്ട്‌ഫോണുകളുടെ ശരാശരി വിലയിൽ 16% വർധനയുണ്ടായതായി കൗണ്ടർപോയിന്റ് റിസർച്ചിന്റെ റിപ്പോർട്ട്. വില ഉയർന്നതോടെ കുറഞ്ഞ വിലയുള്ള ഫോണുകളുടെ വിൽപ്പനയിലും വലിയ ഇടിവാണ് രേഖപ്പെടുത്തിയിരിക്കുന്നത്. 10000 രൂപയിൽ താഴെ വിലയുള്ള സ്‍മാർട്ട്‌ഫോണുകളുടെ ഷിപ്പ്‌മെന്റിലാണ് ഏറ്റവും വലിയ തിരിച്ചടി.

318 ഡോളറായി ശരാശരി വില

2026ന്റെ രണ്ടാം പാദത്തിൽ ഇന്ത്യയിൽ വിറ്റ സ്മാർട്ട്‌ഫോണുകളുടെ ശരാശരി വിൽപ്പന വില റെക്കോർഡ് 318 ഡോളറിലെത്തിയതായി കൗണ്ടർപോയിന്റ് വ്യക്തമാക്കി. മെമ്മറി ഘടകങ്ങളുടെ വില വർധിച്ചതും രൂപയുടെ മൂല്യത്തകർച്ചയുമാണ് സ്മാർട്ട്‌ഫോൺ വില ഉയരാനുള്ള പ്രധാന കാരണങ്ങളിലൊന്നായി റിപ്പോർട്ട് ചൂണ്ടിക്കാണിക്കുന്നത്. ഉപഭോക്താക്കൾക്ക് ലഭ്യമായ മെമ്മറി ഘടകങ്ങളുടെ ലഭ്യത കുറഞ്ഞതാണ് വില വർധിക്കാൻ കാരണമായത്. അതേസമയം, രൂപയുടെ മൂല്യം കുറഞ്ഞതോടെ സ്മാർട്ട്‌ഫോൺ നിർമാണത്തിന് ആവശ്യമായ നിർണായക ഘടകങ്ങളുടെ ഇറക്കുമതി ചെലവും ഉയർന്നു.

10000 രൂപയിൽ താഴെയുള്ള ഫോണുകൾക്ക് തിരിച്ചടി

വിലക്കയറ്റത്തിന്റെ ഏറ്റവും വലിയ ആഘാതം നേരിട്ടത് 10000 രൂപയിൽ താഴെ വിലയുള്ള സ്മാർട്ട്‌ഫോണുകളാണ്. ഈ വിഭാഗത്തിലെ ഫോണുകളുടെ ശരാശരി വിലയിൽ 32% വരെ വർധനയുണ്ടായതായി കൗണ്ടർപോയിന്റ് ഡാറ്റ വ്യക്തമാക്കുന്നു. വില ഉയർന്നതിന്റെ പ്രതിഫലനം ഷിപ്പ്‌മെന്റുകളിലും പ്രകടമാണ്. 2026ന്റെ ആദ്യ പകുതിയിൽ 10000 രൂപയിൽ താഴെ വിലയുള്ള എൻട്രി ലെവൽ സ്മാർട്ട്‌ഫോണുകളുടെ ഷിപ്പ്‌മെന്റ് വാർഷികാടിസ്ഥാനത്തിൽ 65% വരെ ഇടിഞ്ഞു.

10000–15000 രൂപ വിഭാഗത്തിലും ഇടിവ്

ഇന്ത്യൻ സ്മാർട്ട്‌ഫോൺ വിപണിയിൽ ചരിത്രപരമായി മികച്ച പ്രകടനം കാഴ്ചവച്ചിരുന്ന 10000–15000 രൂപ വില വിഭാഗത്തിനും തിരിച്ചടി നേരിട്ടു. ഈ വിഭാഗത്തിലെ ഫോണുകളുടെ ഷിപ്പ്‌മെന്റ് 20% കുറഞ്ഞതായാണ് റിപ്പോർട്ട്. അതേസമയം, 20000 രൂപയ്ക്ക് മുകളിൽ വിലയുള്ള സ്മാർട്ട്‌ഫോണുകളുടെ വിൽപ്പനയിൽ വളർച്ച രേഖപ്പെടുത്തി. ഉയർന്ന ലോഞ്ച് വില, പഴയ ഫോൺ കൈമാറ്റത്തിലൂടെ ലഭിക്കുന്ന ആനുകൂല്യങ്ങൾ, നോ-കോസ്റ്റ് ഇഎംഐ തുടങ്ങിയ സൗകര്യങ്ങൾ കൂടുതൽ വിലയുള്ള ഫോണുകൾ വാങ്ങുന്നത് ഉപഭോക്താക്കൾക്ക് എളുപ്പമാക്കിയെന്നാണ് റിപ്പോർട്ടിലെ വിലയിരുത്തൽ.

വൺപ്ലസിന്റെ വിലവർധന താരതമ്യേന കുറവ്

വില വർധനയുടെ ഭാഗമായി ഭൂരിഭാഗം സ്മാർട്ട്‌ഫോൺ ബ്രാൻഡുകളും അധിക ചെലവ് ഉപഭോക്താക്കളിലേക്ക് കൈമാറിയെങ്കിലും വൺപ്ലസ് ഈ പ്രവണതയിൽ നിന്ന് വ്യത്യസ്തമായ നിലപാടാണ് സ്വീകരിച്ചതെന്ന് കൗണ്ടർപോയിന്റ് പറയുന്നു. വൺപ്ലസ് ഫോണുകളുടെ വിലയിൽ ശരാശരി 8% മാത്രമാണ് വർധനയുണ്ടായതെന്ന് റിപ്പോർട്ട് വ്യക്തമാക്കുന്നു. കമ്പനിയുടെ ഏറ്റവും വലിയ ഒറ്റത്തവണ വിലവർധന 12% ആയിരുന്നപ്പോൾ, മറ്റ് ബ്രാൻഡുകളുടെ വിലവർധനയിൽ വലിയ വ്യത്യാസമുണ്ടായിരുന്നുവെന്നും കൗണ്ടർപോയിന്റ് ചൂണ്ടിക്കാട്ടുന്നു. 2026ന്റെ മൂന്നാം പാദത്തിലും സ്മാർട്ട്‌ഫോൺ വിലയിലെ ഈ പ്രവണത തുടരുമെന്നാണ് കൗണ്ടർപോയിന്റിന്റെ പ്രതീക്ഷ. മെമ്മറി ഘടകങ്ങളുടെ വിലയും ഇറക്കുമതി ചെലവും ഉൾപ്പെടെയുള്ള ഘടകങ്ങൾ വിപണിയിൽ തുടർന്നും സ്വാധീനം ചെലുത്തുമെന്നാണ് റിപ്പോർട്ട് വ്യക്തമാക്കുന്നത്.

ആമസോൺ ഗ്രേറ്റ് ഇന്ത്യൻ ഫെസ്റ്റിവൽ 2026: മൊബൈൽ മുതൽ ലാപ്ടോപ്പ് വരെ വമ്പൻ ഓഫറുകൾ; ആദ്യകാല വിൽപ്പന തുടങ്ങി

Sangeetha KS — Tue, 29 Sep 2026 09:59:09 +0530

ആമസോണിന്റെ ഗ്രേറ്റ് ഇന്ത്യൻ ഫെസ്റ്റിവൽ 2026 വിൽപ്പനയ്ക്ക് മുന്നോടിയായി ആദ്യകാല ഓഫറുകൾ ആരംഭിച്ചു. തിരഞ്ഞെടുത്ത ഇലക്ട്രോണിക് ഉൽപ്പന്നങ്ങളിലാണ് നിലവിൽ വിലക്കുറവ് പ്രഖ്യാപിച്ചിരിക്കുന്നത്. ഒക്ടോബർ 8ന് ഔദ്യോഗിക വിൽപ്പന ആരംഭിക്കും.

ലാപ്ടോപ്പുകൾക്ക് വൻ വിലക്കുറവ്

ആപ്പിളിന്റെ മാക്ബുക്ക് നിയോ 71,990 രൂപയ്ക്ക് സ്വന്തമാക്കാം. 7,000 രൂപയുടെ വിലക്കുറവാണ് ഇതിലൂടെ ലഭിക്കുന്നത്. 13 ഇഞ്ച് ഡിസ്പ്ലേയും 256 ജിബി സ്റ്റോറേജുമുള്ള ബേസ് മോഡലിന് സാധാരണയായി 79,990 രൂപ മുതലാണ് വില. അസൂസ് വിവോബുക്ക് 15 (2026) മോഡലിനും ആമസോൺ വിലക്കുറവ് പ്രഖ്യാപിച്ചിട്ടുണ്ട്. 86,990 രൂപ വിലയുള്ള ലാപ്ടോപ്പ് 59,990 രൂപയ്ക്ക് ലഭിക്കും. ഇന്റൽ കോർ 3 പ്രോസസർ, ഇന്റഗ്രേറ്റഡ് ഇന്റൽ ഗ്രാഫിക്സ്, 8 ജിബി റാം, 512 ജിബി എസ്എസ്ഡി എന്നിവയാണ് പ്രധാന സവിശേഷതകൾ. 15.6 ഇഞ്ച് ഫുൾ എച്ച്ഡി ഡിസ്പ്ലേയും ലാപ്ടോപ്പിലുണ്ട്.

സ്മാർട്ട്ഫോണുകൾക്കും ഓഫറുകൾ

വിവിധ സ്മാർട്ട്ഫോൺ മോഡലുകൾക്കും ആദ്യകാല ഓഫറുകൾ ലഭ്യമാണ്. വൺപ്ലസ് എൻ6എക്സ് 18,499 രൂപയ്ക്കും റെഡ്മി 17 5ജി 23,999 രൂപയ്ക്കും സ്വന്തമാക്കാം. ഐക്യൂ ഇസഡ്10 ലൈറ്റ് 5ജി 15,999 രൂപയ്ക്കും ഐക്യൂ നിയോ 10 41,999 രൂപയ്ക്കുമാണ് ലഭിക്കുന്നത്. ബജറ്റ് സ്മാർട്ട്ഫോൺ അന്വേഷിക്കുന്നവർക്ക് ലാവ ബോൾഡ് എൻ2 8,729 രൂപയ്ക്ക് വാങ്ങാം.

സ്മാർട്ട് വാച്ചുകൾക്കും ടിവികൾക്കും വിലക്കുറവ്

വൺപ്ലസ് വാച്ച് 2ആർ 9,999 രൂപയ്ക്ക് ലഭിക്കും. സാംസങ്, ടിസിഎൽ, എൽജി തുടങ്ങിയ ബ്രാൻഡുകളുടെ സ്മാർട്ട് ടിവികൾക്കും വിലക്കുറവുണ്ട്. സാംസങ് റഫ്രിജറേറ്ററുകൾ, ബോഷ് വാഷിങ് മെഷീനുകൾ എന്നിവ ഉൾപ്പെടെയുള്ള ഗൃഹോപകരണങ്ങൾക്കും ഓഫറുകൾ പ്രഖ്യാപിച്ചിട്ടുണ്ട്. ചില ഉൽപ്പന്നങ്ങൾക്ക് 80 ശതമാനം വരെ വിലക്കുറവാണ് ആമസോൺ വാഗ്ദാനം ചെയ്യുന്നത്.

ഒക്ടോബർ 8 മുതൽ വിൽപ്പന

ആമസോൺ ഗ്രേറ്റ് ഇന്ത്യൻ ഫെസ്റ്റിവൽ 2026 ഒക്ടോബർ 8നാണ് ആരംഭിക്കുന്നത്. ആമസോൺ പ്രൈം അംഗങ്ങൾക്ക് വിൽപ്പനയിൽ നേരത്തെ ആക്സസ് ലഭിക്കും. എസ്ബിഐ ക്രെഡിറ്റ് കാർഡുകളും ക്രെഡിറ്റ് കാർഡ് ഇഎംഐ ഇടപാടുകളും ഉപയോഗിക്കുന്ന ഉപഭോക്താക്കൾക്ക് 10 ശതമാനം ഇൻസ്റ്റന്റ് ഡിസ്കൗണ്ടും ലഭിക്കും. ഉൽപ്പന്നങ്ങളുടെ വിലയും ഓഫറുകളുടെ ലഭ്യതയും സ്റ്റോക്കിനും ഓഫർ കാലയളവിനും അനുസരിച്ച് മാറാൻ സാധ്യതയുണ്ട്.

യുഎൻ വെബ്സൈറ്റിൽ 16,000ലേറെ തവണ എഐ ഏജന്റുമാരുടെ ഇടപെടൽ നടത്തിയെന്ന് റിപ്പോര്‍ട്ട്

Prabeesh PP — Tue, 29 Sep 2026 21:28:50 +0530

പൊതുവിവരങ്ങൾ ശേഖരിക്കുന്നതിനിടെ ഓപ്പൺഎഐയുടെ എഐ ഏജന്റുമാർ ഐക്യരാഷ്ട്രസഭയുടെ ഒരു വെബ്സൈറ്റിൽ 16,000 തവണയിലധികം അഭ്യർത്ഥനകൾ നടത്തിയതായി റിപ്പോർട്ട്. മൂന്ന് മാസത്തിനിടെ യുഎൻ വ്യാപാര-വികസന സംഘടനയുടെ സ്ഥിതിവിവരക്കണക്ക് വെബ്സൈറ്റിലേക്കാണ് ഇത്രയധികം അഭ്യർത്ഥനകൾ എത്തിയത്. ഏപ്രിൽ മുതൽ ജൂൺ അവസാനം വരെയുള്ള കാലയളവിലാണ് സംഭവം നടന്നതെന്നാണ് റിപ്പോർട്ടുകൾ. വിവിധ രാജ്യങ്ങൾക്ക് ഉൽപ്പന്നങ്ങളും സേവനങ്ങളും ഉൽപ്പാദിപ്പിക്കാനുള്ള ശേഷി അളക്കുന്ന ഉൽപ്പാദന ശേഷി സൂചികയ്ക്കായുള്ള വിവരങ്ങൾ ശേഖരിക്കാനായിരുന്നു എഐ ഏജന്റുമാരുടെ ശ്രമമെന്നാണ് കരുതുന്നത്.

സുരക്ഷാ നിയന്ത്രണങ്ങൾ മറികടക്കാൻ ശ്രമം

സുരക്ഷാ ഗവേഷകനായ റോവൻ ഹോവാർഡ്-ജോൺസ് ഓൺലൈൻ പ്രവർത്തന രേഖകൾ പരിശോധിച്ചാണ് വിവരങ്ങൾ പുറത്തുകൊണ്ടുവന്നത്. എഐ ഗവേഷണ സ്ഥാപനമായ ട്രാൻസ്‌ലൂസിന്റെ നേരത്തെയുള്ള പഠനത്തെ തുടർന്നായിരുന്നു അന്വേഷണം. പൊതുവിവരങ്ങൾ ശേഖരിക്കുന്നതിൽ മാത്രം എഐ ഏജന്റുമാർ ഒതുങ്ങിയില്ലെന്നാണ് കണ്ടെത്തൽ. സാധാരണ രീതികളിലൂടെ വിവരങ്ങൾ ലഭ്യമാകാതെ വന്നപ്പോൾ വെബ്സൈറ്റിലെ സുരക്ഷാ നിയന്ത്രണങ്ങൾ മറികടക്കാനുള്ള വിവിധ മാർഗങ്ങൾ പരീക്ഷിച്ചതായും റിപ്പോർട്ടിൽ പറയുന്നു. സുരക്ഷാ ഫിൽട്ടർ തങ്ങളുടെ അഭ്യർത്ഥനകൾ തടയുന്നതായി എഐ ഏജന്റുമാർ കരുതിയെന്നും തുടർന്ന് പ്രവർത്തനങ്ങൾ മറച്ചുവയ്ക്കാൻ ശ്രമിച്ചെന്നും ഹോവാർഡ്-ജോൺസ് ദ വെർജിനോട് പറഞ്ഞു.

എക്സ്‌എസ്എസ് ഗെയിം ഉപയോഗിച്ചെന്ന് റിപ്പോർട്ട്

വാൾ സ്ട്രീറ്റ് ജേണലിന്റെ റിപ്പോർട്ട് പ്രകാരം, വെബ്സൈറ്റിലെ നിയന്ത്രണങ്ങൾ മറികടക്കാൻ ഗൂഗിളിന്റെ എക്സ്‌എസ്എസ് ഗെയിം എന്ന പരിശീലന ഉപകരണവും എഐ ഏജന്റുമാർ ഉപയോഗിക്കാൻ ശ്രമിച്ചു. ക്രോസ്-സൈറ്റ് സ്ക്രിപ്റ്റിങ് പോലുള്ള സുരക്ഷാ വീഴ്ചകളെക്കുറിച്ച് പഠിപ്പിക്കുന്നതിനായി രൂപകൽപ്പന ചെയ്ത പരിശീലന ഉപകരണമാണിത്. ഒടുവിൽ വെബ്സൈറ്റ് അധികൃതർ അനുവദിച്ചിട്ടില്ലാത്ത ഒരു സാങ്കേതിക വിദ്യ ഉപയോഗിച്ച് സുരക്ഷാ ഫിൽട്ടർ മറികടന്നതായും റിപ്പോർട്ടിൽ പറയുന്നു. സ്റ്റാൻഫോർഡ് സർവകലാശാലയിലെ സൈബർ സുരക്ഷാ അധ്യാപകൻ അലക്സ് സ്റ്റാമോസ് ഈ പ്രവർത്തനത്തെ അതിർത്തിയോട് ചേർന്ന ഹാക്കിങ് എന്നാണ് വിശേഷിപ്പിച്ചത്. അതേസമയം, റിപ്പോർട്ടുകൾ പ്രകാരം രഹസ്യമായ യുഎൻ വിവരങ്ങൾ എഐ ഏജന്റുമാർ കൈവശപ്പെടുത്തിയതായി സ്ഥിരീകരണമില്ല.

ഓപ്പൺഎഐ അന്വേഷണം ആരംഭിച്ചു

സംഭവവുമായി ബന്ധപ്പെട്ട കണ്ടെത്തലുകൾ പരിശോധിച്ചുവരികയാണെന്ന് ഓപ്പൺഎഐ അറിയിച്ചു. അന്വേഷണത്തെക്കുറിച്ച് വിശദീകരിക്കുന്നതിനായി യുഎന്നുമായി ബന്ധപ്പെടുകയും ചെയ്തു. എഐ മോഡലുകൾ പരിശീലന, പരിശോധന ഘട്ടങ്ങളിൽ എങ്ങനെ പ്രവർത്തിക്കുന്നുവെന്നും കമ്പനി പരിശോധിക്കുന്നുണ്ട്. സംഭവത്തിലെ ഏജന്റുമാരുടെ പ്രവർത്തനത്തിന്റെ വലിയൊരു ഭാഗം പൊതുവെ ലഭ്യമായ വെബ്സൈറ്റുകളിൽ നിന്ന് വിവരങ്ങൾ കണ്ടെത്തി ചോദ്യങ്ങൾക്ക് ഉത്തരം നൽകുന്നതുപോലുള്ള സാധാരണ ഗവേഷണ പ്രവർത്തനങ്ങളായിരുന്നുവെന്നും ഓപ്പൺഎഐ വ്യക്തമാക്കി. എന്നാൽ എഐ ഏജന്റുമാരിൽനിന്ന് വലിയ തോതിൽ അഭ്യർത്ഥനകൾ ലഭിക്കുന്ന വെബ്സൈറ്റുകൾക്ക് ഇതുമൂലം ബുദ്ധിമുട്ടുകൾ ഉണ്ടാകാമെന്നും ഇത്തരം ആശങ്കകൾ ഗൗരവമായി പരിഗണിക്കേണ്ടതുണ്ടെന്നും കമ്പനി സമ്മതിച്ചു.

ഇതിന് മുമ്പും സമാന സംഭവങ്ങൾ

ഓപ്പൺഎഐയുടെ എഐ ഏജന്റുമാരുടെ അപ്രതീക്ഷിത പ്രവർത്തനങ്ങളെക്കുറിച്ചുള്ള റിപ്പോർട്ടുകളുടെ ഏറ്റവും പുതിയ സംഭവമാണിത്. യുഎസ് വാണിജ്യ വകുപ്പ്, സെക്യൂരിറ്റീസ് ആൻഡ് എക്സ്ചേഞ്ച് കമ്മീഷൻ തുടങ്ങിയ സർക്കാർ വെബ്സൈറ്റുകളിൽനിന്ന് വിവരങ്ങൾ ശേഖരിക്കുന്നതിനിടയിലും സമാന പ്രശ്നങ്ങൾ റിപ്പോർട്ട് ചെയ്തിരുന്നു. ഒരു സംഭവത്തിൽ ഓൺലൈനിൽ പരസ്യമായി ലഭ്യമായ ലോഗിൻ വിവരങ്ങൾ കണ്ടെത്തിയ എഐ ഏജന്റ് അവ ഉപയോഗിച്ച് യുഎസ് സെൻസസ് ബ്യൂറോയുടെ വെബ്സൈറ്റിൽ പ്രവേശിച്ച് വിവരങ്ങൾ ശേഖരിച്ചതായാണ് റിപ്പോർട്ട്. മറ്റൊരു സംഭവത്തിൽ സെക്യൂരിറ്റീസ് ആൻഡ് എക്സ്ചേഞ്ച് കമ്മീഷന്റെ വെബ്സൈറ്റിൽനിന്ന് പൊതുവിവരങ്ങൾ ശേഖരിച്ച ഏജന്റ്, ആ വിവരങ്ങൾ ഉപയോഗിക്കുന്നതുമായി ബന്ധപ്പെട്ട നിയന്ത്രണങ്ങൾ അവഗണിച്ച് മറ്റൊരു ഓൺലൈൻ ഫോറത്തിൽ പ്രസിദ്ധീകരിച്ചതായും റിപ്പോർട്ടുകളുണ്ട്.

ഹഗ്ഗിങ് ഫേസിലും പ്രതിസന്ധി

ഓപ്പൺഎഐ എഐ ഏജന്റുമാരുമായി ബന്ധപ്പെട്ട മറ്റൊരു ശ്രദ്ധേയ സംഭവമായിരുന്നു ഹഗ്ഗിങ് ഫേസിലേത്. വിവിധ ജോലികൾ പൂർത്തിയാക്കുന്നതിനിടെ ആയിരക്കണക്കിന് ഓപ്പൺഎഐ ഏജന്റുമാർ ഒരേസമയം സംവിധാനങ്ങളിലേക്ക് പ്രവേശിക്കാൻ ശ്രമിച്ചതായാണ് റിപ്പോർട്ട്. സോഫ്റ്റ്‌വെയർ പാക്കേജുകളുടെ ഓൺലൈൻ ശേഖരമായ റൂബിജെംസിലേക്കും എഐ ഏജന്റുമാർ അമിതമായി അഭ്യർത്ഥനകൾ അയച്ചതായി റിപ്പോർട്ടുകളുണ്ട്. ഇത് സേവനത്തെ തടസ്സപ്പെടുത്തുകയും ചെയ്തു.

സ്വയം പ്രവർത്തിക്കുന്ന എഐ ഏജന്റുമാരുടെ ശേഷിയും അതുമായി ബന്ധപ്പെട്ട സുരക്ഷാ വെല്ലുവിളികളും ഇത്തരം സംഭവങ്ങൾ വീണ്ടും ചർച്ചയാക്കിയിരിക്കുകയാണ്. ശക്തമായ എഐ സംവിധാനങ്ങളെ മനുഷ്യ നിയന്ത്രണത്തിൽ നിലനിർത്തുന്നതിനുള്ള സുരക്ഷാ മാനദണ്ഡങ്ങൾ രൂപപ്പെടുത്താൻ രാജ്യങ്ങൾ സഹകരിക്കണമെന്ന് ഓപ്പൺഎഐ സിഇഒ സാം ആൾട്ട്മാൻ യുഎൻ സുരക്ഷാ കൗൺസിലിൽ ആവശ്യപ്പെട്ടിരുന്നു. എഐ സംവിധാനങ്ങളെ നിയന്ത്രിക്കാൻ കഴിയാത്ത സാഹചര്യം മനുഷ്യരാശിയുടെ ഭാവിക്ക് ഭീഷണിയാകാമെന്നും അദ്ദേഹം മുന്നറിയിപ്പ് നൽകിയിരുന്നു.