Asianet News Malayalam

അവധിക്കാലം ആഘോഷമാക്കാൻ കെഎസ്ആർടിസി: മെയ് മാസത്തിൽ 30 ബജറ്റ് ടൂർ പാക്കേജുകൾ പ്രഖ്യാപിച്ചു

Kiran Gangadharan — Sun, 26 Apr 2026 14:35:21 +0530

കൊച്ചി: അവധിക്കാലം ആഘോഷമാക്കാൻ കെ.എസ്.ആർ.ടി.സി എറണാകുളം ബജറ്റ് ടൂറിസം സെൽ മെയ് മാസത്തേക്കുള്ള വിനോദയാത്രകളുടെ കലണ്ടർ പുറത്തിറക്കി. മെയ് മാസത്തെ മധ്യവേനൽ അവധിക്കാലം ആഘോഷമാക്കാൻ 30 വ്യത്യസ്ത ടൂർ പാക്കേജുകളാണ് കെ.എസ്.ആർ.ടി.സി ഒരുക്കിയിരിക്കുന്നത്. കുറഞ്ഞ ചിലവിൽ സുരക്ഷിതമായി യാത്ര ചെയ്യാൻ ആഗ്രഹിക്കുന്നവർക്കായാണ് പാക്കേജുകൾ. മലക്കപ്പാറ, ഗവി, മൂന്നാർ, വയനാട്, ഗോവ എന്നിവിടങ്ങളിലേക്ക് ഉൾപ്പെടെ ആകർഷകമായ പാക്കേജുകളാണ് ഇത്തവണ ഉൾപ്പെടുത്തിയിരിക്കുന്നത്. മിക്ക യാത്രകളും പുലർച്ചെ 5:00 നും 6:00 നും ഇടയിൽ ആരംഭിച്ച് രാത്രി 11:00 ഓടെ തിരിച്ചെത്തുന്ന രീതിയിലാണ് ക്രമീകരിച്ചിരിക്കുന്നത്. സീറ്റുകൾ മുൻകൂട്ടി ബുക്ക് ചെയ്യാൻ 9496800024, 8289905075, 9656197395 എന്നീ നമ്പറുകളിൽ ബന്ധപ്പെടുക.

പാക്കേജുകളും നിരക്കുകളും

മെയ് 01 (വെള്ളി): മലക്കപ്പാറ (₹640) / വാഗമൺ - പരുന്തുംപാറ (₹760)
മെയ് 02 (ശനി): മൂന്നാർ - വട്ടവട (₹770) / ചതുരംഗപ്പാറ - മൂന്നാർ (₹670)
മെയ് 03 (ഞായർ): മറയൂർ - കാന്തല്ലൂർ (₹1410 - ജിപ്പ് സഫാരി ഉൾപ്പെടെ) / മാമലക്കണ്ടം - മൂന്നാർ (₹830)
മെയ് 04 (തിങ്കൾ): ഗവി - സത്രം (₹2320 - എൻട്രി, ജീപ്പ്, ഭക്ഷണം ഉൾപ്പെടെ)
മെയ് 09 (ശനി): പുത്തൂർ സൂ - നിലമ്പൂർ മിനി ഊട്ടി (₹890) / മൂന്നാർ - വട്ടവട (₹770)
മെയ് 10 (ഞായർ): ഇടുക്കി - രാമക്കൽമേട് (₹670) / ഇലിക്കൽ കല്ല് - വാഗമൺ (₹560)
മെയ് 14 (വ്യാഴം): വയനാട് - 2 പകൽ / 3 രാത്രി യാത്ര (₹3830)
മെയ് 16 (ശനി): ആലപ്പുഴ ഹൗസ് ബോട്ട് (₹1360) / മറയൂർ - കാന്തല്ലൂർ (₹1410)
മെയ് 17 (ഞായർ): ചതുരംഗപ്പാറ - മൂന്നാർ (₹670) / മാമലക്കണ്ടം - മൂന്നാർ (₹830)
മെയ് 18 (തിങ്കൾ): ഗവി - സത്രം (₹2320 - എൻട്രി, ജീപ്പ്, ഭക്ഷണം ഉൾപ്പെടെ)
മെയ് 20 (ബുധൻ): ഗോവ യാത്ര - 3 ദിവസത്തെ പാക്കേജ് (₹9500)
മെയ് 22 (വെള്ളി): സാംബ്രാണി കോടി - മൺറോ തുരുത്ത് കൊല്ലം ബോട്ടിംഗ് (₹2140)
മെയ് 23 (ശനി): മൂന്നാർ - വട്ടവട (₹770) / മലക്കപ്പാറ (₹640)
മെയ് 24 (ഞായർ): ഇടുക്കി - രാമക്കൽമേട് (₹670) / മറയൂർ - കാന്തല്ലൂർ (₹1410)
മെയ് 26 (ചൊവ്വാ): കേണിച്ചിറ ബാലി - വയനാട് (₹1930)
മെയ് 27 (ബുധൻ): മാമലക്കണ്ടം - മൂന്നാർ (₹830) / മൂന്നാർ - വട്ടവട (₹770)
മെയ് 30 (ശനി): വാഗമൺ - പരുന്തുംപാറ (₹760) / പുത്തൂർ സൂ - നിലമ്പൂർ മിനി ഊട്ടി (₹890)
മെയ് 31 (ഞായർ): ചതുരംഗപ്പാറ - മൂന്നാർ (₹670) / കോഴിക്കോട് കടലുണ്ടി - ബേപ്പൂർ (₹1430)

യാത്രകളിൽ 'പെൺകരുത്ത്'; ഇന്ത്യയിലെ ബസ് യാത്രകളിൽ വൻ കുതിച്ചുചാട്ടം, സോളോ ട്രിപ്പുകളിൽ മുന്നിൽ ജെൻ സി പെൺകുട്ടികൾ

Sreekutty Chandran — Thu, 12 Mar 2026 17:58:54 +0530

ഇന്ത്യൻ നിരത്തുകൾ ഇപ്പോൾ സാക്ഷ്യം വഹിക്കുന്നത് ഒരു വലിയ മാറ്റത്തിനാണ്. യാത്രകൾക്കായി ഇന്ത്യൻ സ്ത്രീകൾ ഇപ്പോൾ ഏറ്റവും കൂടുതൽ ആശ്രയിക്കുന്നത് ബസുകളെയാണെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. റെഡ്ബസ് പുറത്തുവിട്ട ഏറ്റവും പുതിയ 'പിങ്ക് റിപ്പോർട്ട്' പ്രകാരം 2019-ന് ശേഷം സ്ത്രീകളുടെ ബസ് യാത്രകളിൽ 136 ശതമാനത്തിന്റെ വൻ വർധനവാണ് ഉണ്ടായിരിക്കുന്നത്. ഇതിൽ ഏറ്റവും രസകരമായ കാര്യം, തനിച്ച് യാത്ര ചെയ്യാൻ ഇഷ്ടപ്പെടുന്നവരിൽ 68 ശതമാനവും ജെൻ സി പെൺകുട്ടികളാണ് എന്നതാണ്.

ബസ് യാത്രകളിൽ ഇരട്ടി വളർച്ച

ഇന്റർനാഷണൽ വുമൺസ് ഡേയോടനുബന്ധിച്ച് പുറത്തിറക്കിയ ഈ റിപ്പോർട്ട് പ്രകാരം, രാജ്യത്തെ മൊത്തത്തിലുള്ള യാത്രക്കാരുടെ എണ്ണത്തിലെ വർദ്ധന 72 ശതമാനമാണെങ്കിൽ സ്ത്രീകളുടെ യാത്ര നിരക്ക് അതിന്റെ ഇരട്ടിയോളമാണ് വർധിച്ചിരിക്കുന്നത്. ഇന്ന് അന്തർസംസ്ഥാന യാത്രകൾ നടത്തുന്നവരിൽ മൂന്നിലൊന്ന് അതായത് 33 ശതമാനവും സ്ത്രീകളാണ്. 2019-ൽ ഇത് വെറും 23 ശതമാനം മാത്രമായിരുന്നു.

ദക്ഷിണേന്ത്യയിലാണ് സ്ത്രീ യാത്രക്കാർ കൂടുതലെങ്കിലും ഇപ്പോൾ ഉത്തരേന്ത്യയിലും കിഴക്കൻ-പടിഞ്ഞാറൻ സംസ്ഥാനങ്ങളിലും ഈ ട്രെൻഡ് ശക്തമായിക്കൊണ്ടിരിക്കുകയാണെന്നാണ് റിപ്പോർട്ട്. ഇതൊരു താല്കാലിക മാറ്റമല്ല, മറിച്ച് രാജ്യത്തെ ഗതാഗത സംവിധാനത്തിലെ വലിയൊരു ഘടനപരമായ മാറ്റമാണെന്ന് റിപ്പോർട്ട് വ്യക്തമാക്കുന്നു.

സോളോ ട്രിപ്പുകളുടെ 'ജെൻ-സി' വൈബ്

പുതിയ തലമുറയിലെ പെൺകുട്ടികളാണ് ഈ മാറ്റത്തിന് ചുക്കാൻ പിടിക്കുന്നത്. 14 മുതൽ 29 വയസുവരെയുള്ള യാത്രക്കാരുടെ 60 ശതമാനവും. തനിച്ച് യാത്ര ചെയ്യാൻ ആത്മവിശ്വാസം കാണിക്കുന്ന സോളോ ട്രാവലേഴ്സിൽ 68 ശതമാനവും ഈ പ്രായപരിധിയിലുള്ളവരാണ്. ജോലിക്കായോ പഠനത്തിനായോ അല്ലെങ്കിൽ വെറുതെ ഒരു വിനോദയാത്രയ്ക്കായോ ബസുകളെ ആശ്രയിക്കുന്നവരുടെ എണ്ണം കൂടിവരികയാണ്. 500 കിലോമീറ്ററിൽ കൂടുതൽ ദൂരമുള്ള ലോങ്ങ് ഡിസ്റ്റൻസ് യാത്രകൾക്കും സ്ത്രീകൾ ഇപ്പോൾ ധൈര്യപൂർവ്വം ബസുകൾ ബുക്ക് ചെയ്യുന്നുണ്ട്.

ചെറുനഗരങ്ങളുടെ മുന്നേറ്റം

മെട്രോ സിറ്റികളെക്കാൾ ഉപരിയായി ചെറു നഗരങ്ങളിൽ നിന്നുള്ള സ്ത്രീകളാണ് ഈ വളർച്ചയുടെ പ്രധാന ചാലകശക്തി. ഏകദേശം 68 ശതമാനം യാത്രകളും ഇത്തരം ചെറുനഗരങ്ങളിൽ നിന്നാണ് ആരംഭിക്കുന്നത്. കേരളം, അസം, ആന്ധ്രാപ്രദേശ്, പഞ്ചാബ്, തെലങ്കാന തുടങ്ങിയ സംസ്ഥാനങ്ങളാണ് സ്ത്രീ യാത്രക്കാരുടെ കാര്യത്തിൽ മുൻപന്തിയിലുള്ളത്.

സുരക്ഷയും പ്ലാനിംഗും പ്രധാനം

പുരുഷന്മാരെ അപേക്ഷിച്ച് സ്ത്രീകൾ തങ്ങളുടെ യാത്രകൾ വളരെ നേരത്തെ പ്ലാൻ ചെയ്യാറുണ്ട്. റിപ്പോർട്ടിലെ ചില പ്രധാന ബുക്കിംഗ് പാറ്റേണുകളാനുസരിച്ച് 62% സ്ത്രീകളും യാത്രയ്ക്ക് ഒരു ദിവസം മുൻപെങ്കിലും ടിക്കറ്റ് ബുക്ക് ചെയ്യുന്നു. അതിൽ മറ്റ് സ്ത്രീ യാത്രക്കാർ നൽകിയ ഹൈ റേറ്റിംഗ് നോക്കിയാണ് 47% പേരും ബസ് തിരഞ്ഞെടുക്കുന്നത്.

യാത്രയ്ക്കിടയിലെ കംഫർട്ടിനെ ബാധിക്കുന്ന കാര്യങ്ങളിലും സ്ത്രീകൾക്ക് വ്യക്തമായ കാഴ്ചപ്പാടുണ്ട്. ബസ് ജീവനക്കാരുടെ പെരുമാറ്റം, ലൈവ് ട്രാക്കിംഗ്, റെസ്റ്റ് സ്റ്റോപ്പുകളിലെ ശുചിത്വം, ബോർഡിംഗ് പോയിന്റിലെ സുരക്ഷ എന്നിവയ്ക്കാണ് ഇവർ മുൻഗണന നൽകുന്നത്.

ബാലിയും മാലദ്വീപും അല്ല, പോകാം ഗോവയിലെ ഈ 'രഹസ്യ' ബീച്ചുകളിലേക്ക്

Deepu Divakaran — Sun, 03 May 2026 10:21:41 +0530

ഗോവയിലേക്ക് ഒരു യാത്ര പ്ലാൻ ചെയ്യുന്നുണ്ടോ? സ്ഥിരം കേൾക്കുന്ന, ബഹളവും തിരക്കുമുള്ള സ്ഥലങ്ങൾ ഒഴിവാക്കണോ? ഗോവ എന്നാൽ ബാഗയും കലൻഗുട്ടും മാത്രമല്ല. ബാലിക്കും മാലദ്വീപിനും ഒപ്പം നിൽക്കാൻ കഴിയുന്ന ചില കിടിലൻ സ്ഥലങ്ങളും ഇവിടെയുണ്ട്. നല്ല ശുദ്ധമായ വെള്ളവും സ്വർണനിറമുള്ള മണൽത്തരികളും… ഒപ്പം സമാധാനവും. നിങ്ങളുടെ യാത്ര അടിപൊളിയും ഓർമ്മയിൽ തങ്ങിനിൽക്കുന്നതുമാകണമെങ്കിൽ, ഈ 5 രഹസ്യ ബീച്ചുകൾ ഓർത്തുവെച്ചോളൂ.

ബട്ടർഫ്ലൈ ബീച്ച്

ഗോവയിലെ ഏറ്റവും മനോഹരവും തിരക്ക് കുറഞ്ഞതുമായ ബീച്ചുകളിൽ ഒന്നാണിത്. ഇവിടേക്ക് എത്താൻ കുറച്ച് ബുദ്ധിമുട്ടാണ്, അതുതന്നെയാണ് ഈ സ്ഥലത്തെ സ്പെഷ്യലാക്കുന്നതും. ബോട്ടിലോ അല്ലെങ്കിൽ ട്രെക്ക് ചെയ്തോ മാത്രമേ ഇവിടെയെത്താൻ സാധിക്കൂ. നല്ല നീല നിറത്തിലുള്ള വെള്ളവും പച്ചപ്പ് നിറഞ്ഞ ചുറ്റുപാടുകളും ഈ ബീച്ചിനെ അതിമനോഹരമാക്കുന്നു. ഇവിടുത്തെ സൂര്യാസ്തമയ കാഴ്ച വർണനാതീതമാണ്.

ഗാൽഗിബാഗ ബീച്ച്

ശാന്തവും വൃത്തിയുള്ളതുമായ അന്തരീക്ഷത്തിന് പേരുകേട്ടതാണ് ഈ ബീച്ച്. ആമകളുടെ സംരക്ഷണ കേന്ദ്രമായതുകൊണ്ട് ഇതിനെ 'ടർട്ടിൽ ബീച്ച്' എന്നും വിളിക്കാറുണ്ട്. ഇവിടെ വളരെ കുറച്ച് ആളുകളെ ഉണ്ടാകൂ, അതിനാൽ നിങ്ങൾക്ക് പ്രകൃതിയെ പൂർണമായി ആസ്വദിച്ച് വിശ്രമിക്കാം. കപ്പിൾസിനും പ്രകൃതിയെ സ്നേഹിക്കുന്നവർക്കും പറ്റിയ ഒരിടമാണിത്.

കോള ബീച്ച്

ഗോവയിലെ ഏറ്റവും എക്സ്ക്ലൂസീവും അധികമാരും അറിയാത്തതുമായ ഒരിടമാണ് കോള ബീച്ച്. ഈ ബീച്ചിനോട് ചേർന്നുള്ള ഒരു ലഗൂൺ (കായൽ പോലെ കെട്ടിക്കിടക്കുന്ന ജലാശയം) ആണ് ഇവിടുത്തെ പ്രധാന ആകർഷണം. ശാന്തമായ അന്തരീക്ഷവും തെളിഞ്ഞ വെള്ളവും കാരണം നിങ്ങൾ മാലദ്വീപിലാണോ എന്ന് തോന്നിപ്പോകും. ആഡംബരവും സ്വകാര്യതയും ആഗ്രഹിക്കുന്നവർക്ക് ഏറ്റവും മികച്ച ചോയ്സ് ഇതാണ്.

കക്കോലം ബീച്ച്

'ടൈഗർ ബീച്ച്' എന്നും അറിയപ്പെടുന്ന കക്കോലം ബീച്ച് ഒരു ‘ഹിഡൻ ജെം’ ആണ്. ഇവിടേക്ക് എത്താൻ അല്പം സാഹസികതയൊക്കെ കയ്യിൽ വേണം. കുന്നുകളാൽ ചുറ്റപ്പെട്ട ഈ ബീച്ച് അവിശ്വസനീയമാംവിധം ശാന്തവും മനോഹരവുമാണ്. ഇവിടെ തിരക്ക് ഒട്ടുമില്ലാത്തതുകൊണ്ട് നിങ്ങൾക്ക് പൂർണമായും ശാന്തതയോടെ ആസ്വദിക്കാം.

ബെതുൽ ബീച്ച്

സൗത്ത് ഗോവയിൽ സ്ഥിതി ചെയ്യുന്ന ബെതുൽ ബീച്ച്, ശാന്തവും തിരക്കില്ലാത്തതുമായ മറ്റൊരു ഓപ്ഷനാണ്. ഇവിടുത്തെ അന്തരീക്ഷം വളരെ സമാധാനപരവും വൃത്തിയുള്ളതുമാണ്. തദ്ദേശീയരുടെ മീൻപിടിത്തം കാണാനും അവരുടെ ജീവിതരീതി അടുത്തറിയാനും ഇവിടെ അവസരമുണ്ട്. തിരക്കുകളിൽനിന്ന് മാറി സമാധാനം കണ്ടെത്താനാണ് നിങ്ങൾ ആഗ്രഹിക്കുന്നതെങ്കിൽ, തീർച്ചയായും ഈ ബീച്ച് സന്ദർശിക്കണം.

ഗോവയ്ക്ക് പോകാൻ വന്ദേ ഭാരത് വരുന്നൂ, ബെംഗളൂരുവിൽനിന്ന് മംഗളൂരു വഴി സർവീസ്; കേന്ദ്രത്തിൻ്റെ പച്ചക്കൊടി

Deepu Divakaran — Wed, 29 Apr 2026 17:50:29 +0530

ദില്ലി: ബെംഗളൂരുവിൽനിന്ന് മംഗളൂരു വഴി ഗോവയിലേക്ക് പുതിയ വന്ദേ ഭാരത് എക്സ്പ്രസ് ട്രെയിൻ വരുന്നൂ. ബെംഗളൂരുവിനെയും ഗോവയിലെ മാർഗാവിനെയും ബന്ധിപ്പിച്ചുള്ള പുതിയ സർവീസിന് കേന്ദ്രസർക്കാർ അംഗീകാരം നൽകി. കർണാടകത്തിനും തീരമേഖലയായ ഗോവയ്ക്കും ഇടയിലെ റെയിൽ ശൃംഖല ശക്തിപ്പെടുത്തുന്നതിനുള്ള സുപ്രധാന ചുവടുവെപ്പാകും ഇത്. കേന്ദ്ര ബജറ്റിന് മുന്നോടിയായി ഗോവ സർക്കാർ സമർപ്പിച്ച അഭ്യർഥനയെ തുടർന്നാണ് ഇപ്പോഴത്തെ അംഗീകാരം. പുതിയ വന്ദേ ഭാരത് ട്രെയിനിൻ്റെ ഉദ്ഘാടന തീയതിയും വിശദമായ സമയക്രമവും റെയിൽവേ ഉടൻ പുറത്തുവിടുമെന്നാണ് പ്രതീക്ഷിക്കുന്നത്.

പുതിയ വന്ദേ ഭാരത് എക്സ്പ്രസ് ഓടിത്തുടങ്ങുന്നതോടെ, കർണാടകത്തിൻ്റെ തലസ്ഥാന നഗരിയായ ബെംഗളൂരുവും ഗോവയുടെ വാണിജ്യ ഹബ്ബായ മാർഗാവും തമ്മിലുള്ള യാത്രാസമയം ഗണ്യമായി കുറയും. പശ്ചിമ ഘട്ടവും കൊങ്കൺ തീരവും ഉൾക്കൊള്ളുന്ന റൂട്ട് ഹൈ-സ്പീഡ് ട്രെയിനുകളുടെ പ്രവർത്തനങ്ങൾക്ക് വെല്ലുവിളി നിറഞ്ഞതാണെങ്കിലും ഇവയെല്ലാം പരിഹരിച്ചുവെന്നാണ് അധികൃതരുടെ സ്ഥിരീകരണം.

ബെംഗളൂരുവിൽനിന്ന് മംഗളൂരു വഴി ഗോവയിലേക്കുള്ള പുതിയ സർവീസ് അതിവേഗവും സുഖകരവുമായ യാത്ര പ്രദാനം ചെയ്യും. ആധുനിക നിലവാരത്തിലുള്ള സീറ്റുകൾ, കവച് അടക്കമുള്ള പരിഷ്കരിച്ച സുരക്ഷാ സംവിധാനങ്ങൾ, വൈ-ഫൈ, സിസിടിവി നിരീക്ഷണം, ഉ‍യർന്ന പ്രവർത്തന വേഗത എന്നിവ വന്ദേ ഭാരതിൻ്റെ സവിശേഷതകളാണ്. സൗത്ത് വെസ്റ്റേൺ റെയിൽവേ സോണിന് കീഴിലാകും പുതിയ സർവീസ് പ്രവർത്തനം നടത്തുക.

വന്ദേ ഭാരത് ശൃംഖല വിപുലീകരിക്കുന്നു

രാജ്യത്തെ വന്ദേ ഭാരത് ശൃംഖല വിപുലീകരിക്കുന്നതിന്റെ ഭാഗമായാണ് പുതിയ ബെംഗളൂരു - മംഗളൂരു - മഡ്ഗാവ് ട്രെയിൻ സർവീസ് ആരംഭിക്കുന്നതെന്ന് കേന്ദ്ര റെയിൽവേ അശ്വിനി വൈഷ്ണവ് അടുത്തിടെ ബെംഗളൂരുവിൽ നടത്തിയ സന്ദർശനത്തിനിടെ വ്യക്തമാക്കിയിരുന്നു. ഭാവിയിൽ ബെംഗളൂരുവിനും മുംബൈയ്ക്കും ഇടയിൽ ഒരു അതിവേഗ ട്രെയിനും വന്ദേ ഭാരത് സ്ലീപ്പർ സർവീസും ആലോചിക്കുന്നതായും മന്ത്രി സൂചിപ്പിച്ചിട്ടുണ്ട്.

ടൂറിസത്തിനും സാമ്പത്തിക മേഖലയ്ക്കും ഉണ‍ർവേകും

പുതിയ ട്രെയിൻ സ‍ർവീസ് ടൂറിസത്തിനും പ്രാദേശിക സമ്പദ്‍വ്യവസ്ഥയ്ക്കും കരുത്തേകുമെന്നാണ് അധികൃതർ പ്രതീക്ഷിക്കുന്നത്. സാമ്പത്തിക - ടൂറിസം മേഖലകളിൽ നി‍ർണായക പങ്കുവഹിക്കുന്ന മൂന്ന് പ്രധാന കേന്ദ്രങ്ങളെയാണ് ബെംഗളൂരു - മംഗളൂരു - ഗോവ വന്ദേ ഭാരത് ഇടനാഴി ബന്ധിപ്പിക്കുന്നത്. ബെംഗളൂരു രാജ്യത്തിൻ്റെ ടെക്നോളജി - സാമ്പത്തിക ഹബ്ബാകുമ്പോൾ, മംഗളൂരു ബീച്ചുകൾക്കും സാംസ്കാരിക പാരമ്പര്യത്തിനും പേരുകേട്ട പ്രധാന തീരദേശ കവാടമാണ്. ഗോവയാകട്ടെ, രാജ്യത്തെ ജനപ്രിയ ടൂറിസം കേന്ദ്രവും. തീരദേശ കർണാടകത്തിലെയും ഗോവയിലെയും ആരോഗ്യ, ഗതാഗത, ചെറുകിട വ്യവസായ മേഖലയ്ക്കും പുതിയ സർവീസ് പ്രയോജനകരമായേക്കാം.

നന്ദി പറ‍ഞ്ഞ് ഗോവ മുഖ്യമന്ത്രി

ബെംഗളൂരു - മാ‍ർഗാവ് വന്ദേ ഭാരതിന് അംഗീകാരം നൽകിയ കേന്ദ്രസർക്കാരിന് ഗോവ മുഖ്യമന്ത്രി പ്രമോദ് സാവന്ത് നന്ദിയറിയിച്ചു. കേന്ദ്രബജറ്റിന് മുന്നോടിയായി സമ‍ർപ്പിച്ച അഭ്യർഥന യാഥാ‍ർഥ്യമാക്കിയ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്രസർക്കാരിന് നന്ദി അറിയിക്കുന്നതായി മുഖ്യമന്ത്രി പറ‍ഞ്ഞു.

പോക്കറ്റ് കാലിയാവാതെ ഷോപ്പിങ് നടത്താം; ഗോവയിലെ ഈ 7 മാർക്കറ്റുകൾ പൊളിയാണ്!

Deepu Divakaran — Sat, 02 May 2026 17:34:49 +0530

ഗോവ എന്ന് കേൾക്കുമ്പോൾ തന്നെ ബീച്ചുകളും പാർട്ടികളുമാണ് എല്ലാവരുടെയും മനസ്സിലേക്ക് വരുന്നത്. എന്നാൽ വിലപേശി സാധനങ്ങൾ വാങ്ങാൻ ഇഷ്ടപ്പെടുന്നവർക്ക് പറ്റിയ ഒരിടം കൂടിയാണ് ഗോവ. ബൊഹീമിയൻ ഫ്ലീ മാർക്കറ്റുകൾ മുതൽ പ്രാദേശിക ചന്തകൾ വരെ, വസ്ത്രങ്ങൾ, ആഭരണങ്ങൾ, സുവനീറുകൾ, സുഗന്ധവ്യഞ്ജനങ്ങൾ, കരകൗശല വസ്തുക്കൾ എന്നിവയെല്ലാം കുറഞ്ഞ വിലയ്ക്ക് വാങ്ങാൻ ഇവിടെ അവസരമുണ്ട്. നിങ്ങൾക്കും ബജറ്റ് ഷോപ്പിങ് ഇഷ്ടമാണെങ്കിൽ, ഗോവയിൽ സന്ദർശിക്കാൻ പറ്റിയ 7 മികച്ച സ്ട്രീറ്റ് ഷോപ്പിങ് സ്ഥലങ്ങൾ ഇതാ.

1. അഞ്ജുന ഫ്ലീ മാർക്കറ്റ്

ഗോവയിലെ ഏറ്റവും പ്രശസ്തമായ ഷോപ്പിങ് കേന്ദ്രങ്ങളിലൊന്നാണ് അഞ്ജുന ഫ്ലീ മാർക്കറ്റ്. ബൊഹീമിയൻ സ്റ്റൈൽ വസ്ത്രങ്ങൾ, വെള്ളി ആഭരണങ്ങൾ, ഡ്രീംക്യാച്ചറുകൾ, ബീച്ച് വെയറുകൾ, വ്യത്യസ്തമായ സമ്മാനങ്ങൾ എന്നിവയെല്ലാം ഇവിടെ കിട്ടും. ഹിപ്പി സംസ്കാരത്തിൻ്റെ ഒരു ഫീൽ ഇപ്പോഴും ഇവിടെയുണ്ട്. ആഴ്ചയിലൊരിക്കൽ നടക്കുന്ന ഈ മാർക്കറ്റ് ഗോവയിലെ ഏറ്റവും അറിയപ്പെടുന്ന ഫ്ലീ മാർക്കറ്റുകളിൽ ഒന്നാണ്.

2. മപുസ മുനിസിപ്പൽ മാർക്കറ്റ്

ഒരു നാടൻ ഗോവൻ ഷോപ്പിങ് അനുഭവം വേണമെങ്കിൽ നേരെ മപുസ മാർക്കറ്റിലേക്ക് പോകാം. ഇവിടുത്തെ സുഗന്ധവ്യഞ്ജനങ്ങൾ, ഗോവൻ സോസേജുകൾ, കശുവണ്ടി, പ്രാദേശിക പലഹാരങ്ങൾ, കരകൗശല വസ്തുക്കൾ, വിലകുറഞ്ഞ വസ്ത്രങ്ങൾ എന്നിവയെല്ലാം പ്രശസ്തമാണ്. വെള്ളിയാഴ്ച ദിവസങ്ങളിലാണ് ഇവിടെ കുറഞ്ഞ വിലയ്ക്ക് സാധനങ്ങൾ കിട്ടുന്നത്.

3. കലൻഗുട്ട് ബീച്ച് മാർക്കറ്റ്

ഗോവയിലെ ഏറ്റവും തിരക്കേറിയ ബീച്ചുകളിലൊന്നായ കലൻഗുട്ടിന് അടുത്താണ് ഈ മാർക്കറ്റ്. ബീച്ച് വെയറുകൾ, ഫ്ലിപ്പ്-ഫ്ലോപ്പുകൾ, ചിപ്പികൊണ്ടുള്ള ആഭരണങ്ങൾ, ഫ്രിഡ്ജ് മാഗ്നറ്റുകൾ, കളർഫുൾ ബാഗുകൾ എന്നിവയെല്ലാം ഇവിടെ നിന്ന് വേഗത്തിൽ വാങ്ങാം. നല്ലപോലെ വിലപേശിയാൽ കുറഞ്ഞ വിലയ്ക്ക് സാധനങ്ങൾ സ്വന്തമാക്കാം.

4. ദി ഗോവ കളക്ടീവ് ബസാർ

നമ്മുടെ കൊച്ചിയിലൊക്കെ കാണുന്ന പോലത്തെ കുറച്ചുകൂടി സ്റ്റൈലൻ ഫ്ലീ മാർക്കറ്റാണിത്. ഫാഷൻ വസ്ത്രങ്ങൾ, കൈകൊണ്ട് നിർമ്മിച്ച ആഭരണങ്ങൾ, ആർട്ട്, അലങ്കാര വസ്തുക്കൾ, നല്ല ഭക്ഷണം എന്നിവയെല്ലാം ഇവിടെയുണ്ട്. മറ്റ് മാർക്കറ്റുകളെ അപേക്ഷിച്ച് അല്പം വില കൂടുതലാണെങ്കിലും, ശ്രദ്ധിച്ചു തിരഞ്ഞാൽ പോക്കറ്റിനിണങ്ങിയ സാധനങ്ങൾ ഇവിടെ നിന്നും കിട്ടും.

5. ടിബറ്റൻ മാർക്കറ്റ്

ഫാഷൻ പ്രേമികൾക്ക് ഇഷ്ടപ്പെടുന്ന ഒരിടമാണിത്. ജാക്കറ്റുകൾ, വെള്ളി ആഭരണങ്ങൾ, വാലറ്റുകൾ, ചെറിയ സമ്മാനങ്ങൾ, കൈകൊണ്ട് നിർമ്മിച്ച ആക്സസറികൾ എന്നിവയെല്ലാം ഇവിടെ സുലഭമാണ്. ഗോവയിൽനിന്ന് തണുപ്പുകാലത്തേക്കുള്ള വസ്ത്രങ്ങളും എത്‌നിക് സ്റ്റൈൽ ഡ്രസ്സുകളും വാങ്ങാൻ പറ്റിയ മികച്ച സ്ഥലങ്ങളിൽ ഒന്നാണിത്.

6. മഡ്ഗാവ് മാർക്കറ്റ്

സൗത്ത് ഗോവയിലെ ഏറ്റവും തിരക്കേറിയ പരമ്പരാഗത മാർക്കറ്റുകളിൽ ഒന്നാണിത്. പ്രാദേശികമായി വളർത്തിയ പഴങ്ങൾ, തുണിത്തരങ്ങൾ, സെറാമിക് പാത്രങ്ങൾ, സുഗന്ധവ്യഞ്ജനങ്ങൾ, വിലകുറഞ്ഞ വീട്ടുപകരണങ്ങൾ എന്നിവയെല്ലാം ഇവിടെ വിൽക്കുന്നു. ടൂറിസ്റ്റുകളുടെ തിരക്ക് കുറവായതുകൊണ്ട് ഒരു യഥാർത്ഥ ഗോവൻ അനുഭവം ഇവിടെ കിട്ടും.

7. പലോലം മാർക്കറ്റ്

നിങ്ങൾ സൗത്ത് ഗോവയിലാണ് താമസിക്കുന്നതെങ്കിൽ, പലോലത്തെ മാർക്കറ്റുകൾ നിങ്ങൾക്ക് ഇഷ്ടപ്പെടും. ബീച്ച് വെയറുകൾ, ചിപ്പികൊണ്ടുള്ള കരകൗശല വസ്തുക്കൾ, കൈകൊണ്ട് നിർമ്മിച്ച ആഭരണങ്ങൾ, കാഷ്വൽ റിസോർട്ട് വെയറുകൾ എന്നിവയ്‌ക്കെല്ലാം പേരുകേട്ട സ്ഥലമാണിത്. ഇവിടെയും വിലപേശി സാധനങ്ങൾ വാങ്ങാൻ സാധിക്കും.

ഗോവയിൽ ഷോപ്പിങ് നടത്തുമ്പോൾ ശ്രദ്ധിക്കാൻ

വിലപേശാൻ മടിക്കരുത്: കച്ചവടക്കാർ ആദ്യം ടൂറിസ്റ്റ് വിലയായിരിക്കും പറയുന്നത്.

കയ്യിൽ പണം കരുതുക: ചെറിയ കടകളിൽ കാർഡോ യുപിഐയോ സ്വീകരിക്കണമെന്നില്ല.

വൈകുന്നേരം സന്ദർശിക്കുക: മിക്ക മാർക്കറ്റുകളും വൈകുന്നേരങ്ങളിലാണ് കൂടുതൽ സജീവമാകുന്നത്.

ഗുണനിലവാരം പരിശോധിക്കുക: വസ്ത്രങ്ങളോ ബാഗുകളോ വാങ്ങുന്നതിന് മുമ്പ്, സ്റ്റിച്ചിങ്ങും സിപ്പറുകളും പരിശോധിച്ച് ഉറപ്പുവരുത്തുക.

ചുരുക്കത്തിൽ, എല്ലാത്തരം ബജറ്റിലും ഷോപ്പിങ് നടത്താൻ പറ്റിയ ഒരിടമാണ് ഗോവ. ബൊഹീമിയൻ വസ്ത്രങ്ങളോ, സുഗന്ധവ്യഞ്ജനങ്ങളോ, സുവനീറുകളോ എന്തുമാകട്ടെ, പോക്കറ്റ് കാലിയാക്കാതെ ഗോവയിൽ നിന്ന് ഇഷ്ടംപോലെ ഷോപ്പ് ചെയ്യാം.

ബോട്ടുയാത്രയിൽ ലൈഫ് ജാക്കറ്റുകൾ ജീവൻ രക്ഷിക്കണോ? ഇക്കാര്യങ്ങൾ ശ്രദ്ധിക്കാം, കുരുന്നു ജീവനുകൾക്കും കരുതലാവാം

Elsa TJ — Sat, 02 May 2026 17:01:10 +0530

തിരുവനന്തപുരം: മധ്യപ്രദശിലെ ജബൽപൂരിലുണ്ടായ ബോട്ട് അപകടത്തിൽ ഒരു ലൈഫ് ജാക്കറ്റിനുള്ളിൽ മകനെയും ചേർത്ത് പിടിച്ച അമ്മയുടെ മൃതദേഹം കണ്ടെത്തിയത് രാജ്യത്ത് വലിയ രീതിയിൽ ചർച്ചകൾക്ക് കാരണമായിരുന്നു. മകനെയെങ്കിലും രക്ഷിക്കാനുള്ള അമ്മയുടെ വിഫല ശ്രമം എന്ന രീതിയിലാണ് എഐ ചിത്രങ്ങൾ വലിയ രീതിയിൽ സാമൂഹ്യ മാധ്യമങ്ങളിൽ പങ്കുവയ്ക്കുന്നത്. എന്നാൽ ഒരു ലൈഫ് ജാക്കറ്റ് അത് അണിയുന്ന ആളിന് രക്ഷയൊരുക്കണമെങ്കിൽ ചില കാര്യങ്ങൾ ശ്രദ്ധിക്കേണ്ടതുണ്ട്. അല്ലാത്തപക്ഷം നീന്തലറിയാത്തവർക്ക് ലൈഫ് ജാക്കറ്റ് രക്ഷാമാർഗമൊരുക്കിയേക്കില്ലെന്നാണ് അഗ്നിശമനാ സേനാ ഉദ്യോഗസ്ഥർ വിശദമാക്കുന്നത്. ബോട്ട് യാത്രകളിൽ ലൈഫ് ജാക്കറ്റ് യാത്ര ആരംഭിക്കുമ്പോൾ മുതൽ തിരികെ കരയിൽ ബോട്ട് എത്തും വരെ ഉപയോഗിക്കുന്നവരുടെ ശരീരത്തിലുണ്ടാവണം. യാത്രയ്ക്കിടയിൽ ഊരി മാറ്റാനോ അലസമായി തുറന്നിടാനോ പാടുള്ളതല്ല. ബോട്ടിലെ എല്ലാ യാത്രക്കാർക്കും ഒരേ അളവിലുള്ള ലൈഫ് ജാക്കറ്റുകളല്ല ഉപയോഗിക്കേണ്ടത്. ആളുകളുടെ ഭാരത്തിന് അനുസരിച്ചുള്ള ലൈഫ് ജാക്കറ്റാണ് ധരിക്കേണ്ടത്. ഐഎസ് മാനദണ്ഡങ്ങൾ അനുസരിച്ചാണ് ലൈഫ് ജാക്കറ്റുകൾ നിർമ്മിച്ചിരിക്കുന്നത്. 120 കിലോ ഭാരമുള്ളയാൾ 100 കിലോ വരെ ഭാരം താങ്ങുന്ന ലൈഫ് ജാക്കറ്റ് അണിയുന്നത് കൊണ്ട് പ്രയോജനമില്ല.

അളവ് തെറ്റിയുള്ള ലൈഫ് ജാക്കറ്റ് അപകടം വരുത്തിവച്ചേക്കും

കുട്ടികളുടെ കാര്യത്തിലും ഇത് ബാധകമാണ്. കൃത്യമായ അളവിലുള്ള ലൈഫ് ജാക്കറ്റല്ല കുട്ടികൾ ധരിക്കുന്നതെങ്കിൽ കുട്ടികൾ ജലോപരിതലത്തിൽ പൊന്തിക്കിടക്കുമെങ്കിലും വെള്ളത്തിലേക്ക് ഊർന്ന് പോവാനുള്ള സാധ്യത കൂടുതലാണ്. അതിനാൽ തന്നെ കുട്ടികൾക്ക് അവരുടെ അളവിലുള്ള ലൈഫ് ജാക്കറ്റ് ധരിപ്പിക്കേണ്ടത് അതാവശ്യമാണ്. ശരിയായ അളവിലല്ലാത്ത ജാക്കറ്റ് ധരിക്കുന്നത് വെള്ളത്തിൽ വീഴുന്ന സാഹചര്യത്തിൽ ശരീരത്തിൽ നിന്ന് ഊരിപ്പോകാൻ കാരണമായേക്കാം. അതിനാൽ ജാക്കറ്റ് ധരിച്ച ശേഷം അതിലെ ബക്കിളുകളും സ്ട്രാപ്പുകളും മുറുക്കി കൃത്യമാണെന്ന് പരിശോധിക്കണം. പ്രത്യേകിച്ച് കുട്ടികൾക്ക് ജാക്കറ്റ് ധരിപ്പിക്കുമ്പോൾ കാലുകൾക്കിടയിലൂടെയുള്ള സ്ട്രാപ്പുകൾ ഇട്ടിട്ടുണ്ടെന്ന് ഉറപ്പാക്കണം. ജബൽപൂരിലെ അപകടത്തിൽ ബോട്ട് മുങ്ങാൻ തുടങ്ങിയ സാഹചര്യത്തിലാണ് യാത്രക്കാർക്ക് ലൈഫ് ജാക്കറ്റുകൾ എറിഞ്ഞു നൽകിയതെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ഇത് ഗുരുതരമായ സുരക്ഷാ വീഴ്ചയാണെന്നും അഗ്നിരക്ഷാ സേനാ അധികൃതർ വിശദമാക്കുന്നത്. മകനെ രക്ഷിക്കാനുള്ള ശ്രമത്തിനിടെ തന്റെ ലൈഫ് ജാക്കറ്റിനുള്ളിൽ കുഞ്ഞിനെ കൂടി ഉൾപ്പെടുത്തിയതോടെ യുവതി അണിഞ്ഞ ലൈഫ് ജാക്കറ്റ് അതിന്റെ ഭാരപരിധിക്ക് പുറത്തായതാവാം അപകടമുണ്ടായതിന് കാരണമെന്നാണ് അധികൃതർ നിരീക്ഷിക്കുന്നത്.

ലൈഫ് ജാക്കറ്റിന്റെ വാറന്റി

ചില ബോട്ടുകളിൽ യൂണിവേഴ്സൽ സൈസിലുള്ള ലൈഫ് ജാക്കറ്റുകളാണ് ഉപയോഗിക്കുന്നത്. 40 കിലോ മുതൽ 120 കിലോ വരെ ഭാരമാണ് യൂണിവേഴ്സൽ സൈസ് ലൈഫ് ജാക്കറ്റുകൾക്ക് താങ്ങാനാവുക. ബോട്ടുകളിൽ കുട്ടികളുടെ ലൈഫ് ജാക്കറ്റുകളുണ്ടെന്നുള്ളത് ഉറപ്പാക്കേണ്ടത് ഓപ്പറേറ്റർമാരുടെ ഉത്തരവാദിത്തമാണ്. മൂന്ന് മുതൽ അഞ്ച് വർഷം വരെയാണ് മിക്ക ലൈഫ് ജാക്കറ്റ് കമ്പനികളും വാറന്റി നൽകുന്നത്. ഈ കാലയളവിന് ശേഷം കൃത്യമായ പരിശോധന ലൈഫ് ജാക്കറ്റുകൾക്ക് ആവശ്യമാണ്. 2010ലെ കേരള ഉൾനാടൻ ജലയാന ചട്ടങ്ങൾ അനുസരിച്ചാണ് സംസ്ഥാനത്തെ ജലാശയങ്ങളിലെ ബോട്ടുകൾ പ്രവ‍ർത്തിക്കുന്നത്. ഇതനുസരിച്ച് യാത്രാബോട്ടുകൾ, ഹൗസ്ബോട്ടുകൾ, വിനോദസഞ്ചാരത്തിനുള്ള ബോട്ടുകൾ ഇവയിലെല്ലാം അനുവദിക്കപ്പെട്ട യാത്രക്കാ‍ർക്കെല്ലാം ആവശ്യമായ ലൈഫ് ജാക്കറ്റുകൾ ഉണ്ടായിരിക്കണം. കൂടാതെ മൊത്തം യാത്രക്കാരുടെ എണ്ണത്തിൻ്റെ 10 ശതമാനം കുട്ടികൾക്കുള്ള ചെറിയ ലൈഫ് ജാക്കറ്റുകളും ഉണ്ടായിരിക്കണം. ഓരോ ലൈഫ് ജാക്കറ്റിലും രാത്രിയിൽ കാണാൻ സഹായിക്കുന്ന റിഫ്ലക്ടീവ് ടേപ്പും, ഒപ്പം ഒരു വിസിലും ഉണ്ടായിരിക്കണം. ജാക്കറ്റുകൾ കേടായതല്ലെന്നും വെള്ളത്തിൽ പൊങ്ങിക്കിടക്കാൻ ശേഷിയുള്ളതാണെന്നും കൃത്യസമയത്ത് പരിശോധിക്കണം. ഒരു ലൈഫ് ജാക്കറ്റ് ധരിക്കുന്ന ആളിന്റെ അളവിനുള്ളതാണോയെന്ന് മനസിലാക്കാൻ ധരിച്ച് സിപ്പുകളും ബക്കിളുകളും ഇട്ട ശേഷം കൈകൾ ഉയർത്തി നോക്കുക. ജാക്കറ്റ് മുഖത്തേക്ക് തള്ളിക്കയറി വരുന്നുണ്ടെങ്കിൽ അത് ധരിക്കുന്നയാൾക്ക് അയഞ്ഞതാണ് എന്ന് മനസിലാക്കാൻ സാധിക്കും. കേരളത്തിൽ അടക്കം മിക്കയിടങ്ങളിലും കൃത്യമായ ഇടവേളകളിൽ ലൈഫ് ജാക്കറ്റുകളുടെ പ്രവർത്തന ക്ഷമത അടക്കമുള്ളവ പരിശോധിക്കപ്പെടുന്നില്ലെന്നാണ് അഗ്നിശമനാ അധികൃതർ വിലയിരുത്തുന്നത്. അപകടം ഉണ്ടായ ശേഷം കുറച്ച് കാലം പരിശോധനകൾ കർശനമാണെങ്കിലും പിന്നീട് ഇത്തരം പരിശോധനകളിലും പാകപ്പിഴയുണ്ടാവാറുണ്ടെന്നും അധികൃതർ നിരീക്ഷിക്കുന്നത്.

ലൈഫ് ജാക്കറ്റ് ധരിക്കുക എന്നത് നിർദ്ദേശമല്ല, മറിച്ച് ജീവൻ രക്ഷിക്കാനുള്ള ബാധ്യത

യാത്രയിലുടനീളം ലൈഫ് ജാക്കറ്റ് ധരിക്കുക എന്നത് കേവലം ഒരു നിർദ്ദേശമല്ല, മറിച്ച് ജീവൻ രക്ഷിക്കാനുള്ള നിയമപരമായ ബാധ്യതയാണെന്ന് മാരിടൈം ബോർഡ് വ്യക്തമാക്കുന്നത്. പലപ്പോഴും ബോട്ട് അപകടങ്ങളിൽ മരണകാരണമാകുന്നത് ലൈഫ് ജാക്കറ്റിന്റെ അഭാവമോ അല്ലെങ്കിൽ അത് തെറ്റായ രീതിയിൽ ധരിക്കുന്നതോ ആണെന്നും മാരിടൈം ബോർഡ് വിശദമാക്കുന്നത്. യാത്രയ്ക്കിടയിൽ ബോട്ടിന്റെ വശങ്ങളിലേക്ക് ആൾക്കാർ കൂട്ടമായി നിൽക്കുന്നത് ബാലൻസ് തെറ്റാൻ ഇടയാക്കും. ഇത്തരം പ്രവണതകൾ ഒഴിവാക്കി ബോട്ടിന്റെ സന്തുലിതാവസ്ഥ നിലനിർത്താൻ യാത്രക്കാരുടെ ഭാഗത്ത് നിന്നും സഹകരണം ഉണ്ടാവേണ്ടതുണ്ട്. ഇന്ത്യയിലെ നിയമപ്രകാരം ഡി.ജി ഷിപ്പിംഗ് അംഗീകരിച്ച ഗുണനിലവാരമുള്ള ലൈഫ് ജാക്കറ്റുകൾ മാത്രമേ ബോട്ടുകളിൽ ഉപയോഗിക്കാൻ പാടുള്ളൂ. സുരക്ഷാ മുൻകരുതലുകൾ അവഗണിക്കുന്ന ബോട്ടുടമകൾക്കെതിരെയും യാത്രക്കാർക്കെതിരെയും കർശന നിയമനടപടികളെടുക്കാനും അധികൃതർക്ക് സാധിക്കും.

ഏഷ്യാനെറ്റ് ന്യൂസ് ലൈവ് വീഡിയോ കാണാം

ഇന്ത്യയിലുമുണ്ട് ഒരു 'മിനി ഇറാൻ'; കണ്ണാടിയിൽ തീർത്ത അത്ഭുതലോകം, അതിമനോഹരമായ വാസ്തുവിദ്യയും നിർമ്മാണ ശൈലിയും കാണാൻ പോകാം ഇൻഡോറിലേയ്ക്ക്!

Web Desk — Sat, 14 Mar 2026 21:55:42 +0530

ഇൻഡോർ: മധ്യപ്രദേശിലെ ഇൻഡോർ, രുചികരമായ ഭക്ഷണത്തിനും രാജ്യത്തെ ഏറ്റവും വൃത്തിയുള്ള നഗരങ്ങളിലൊന്ന് എന്ന നിലയിലും പ്രശസ്തമാണ്. എന്നാൽ ഈ നഗരത്തിൽ 'മിനി ഇറാൻ' എന്നറിയപ്പെടുന്ന ഒരു ക്ഷേത്രമുണ്ട്. ഹുക്കുംചന്ദ് മാർഗിലുള്ള ഈ കണ്ണാടി ക്ഷേത്രത്തിലേക്ക് (കാഞ്ച് മന്ദിർ) കയറിയാൽ, നമ്മൾ ഇറാനിലെത്തിയതു പോലെ തോന്നും. അതിമനോഹരമായ വാസ്തുവിദ്യയും നിർമ്മാണ ശൈലിയുമാണ് ഈ ക്ഷേത്രത്തിന് 'മിനി ഇറാൻ' എന്ന പേര് നേടിക്കൊടുത്തത്.

ഇറാനിയൻ ശില്പികളുടെ കരവിരുത്

ഇരുപതാം നൂറ്റാണ്ടിന്റെ തുടക്കത്തിൽ നഗരത്തിലെ പ്രമുഖ വ്യവസായിയായിരുന്ന സേഠ് ഹുക്കുംചന്ദ് കസ്ലിവാളാണ് ഈ ക്ഷേത്രം നിർമ്മിച്ചത്. ഏകദേശം 11 വർഷമെടുത്താണ് ഇതിന്റെ പണി പൂർത്തിയാക്കിയത്. ക്ഷേത്രത്തിലെ ഗ്ലാസുകളിൽ ഭൂരിഭാഗവും ബെൽജിയത്തിൽ നിന്ന് ഇറക്കുമതി ചെയ്തതാണ്. എന്നാൽ ഇതിലെ സങ്കീർണ്ണമായ കൊത്തുപണികളും ഡിസൈനുകളും ചെയ്തത് ഇറാനിൽ നിന്നടക്കമുള്ള ശില്പികളാണ്. ക്ഷേത്രത്തിന്റെ ഉൾവശം പേർഷ്യൻ ശൈലിയിലാണ് ഒരുക്കിയിരിക്കുന്നത്. സൂക്ഷ്മമായ കൊത്തുപണികളും ജ്യാമിതീയ രൂപങ്ങളും ഇറാനിലെ കൊട്ടാരങ്ങളെ ഓർമ്മിപ്പിക്കും.

മേൽക്കൂരയിലെ വിസ്മയ ചിത്രങ്ങൾ

ഈ കണ്ണാടി ക്ഷേത്രത്തിന്റെ ഏറ്റവും വലിയ ആകർഷണം അതിൻ്റെ മേൽക്കൂരയാണ്. ഗ്ലാസിൽ മനോഹരമായി കൊത്തിയെടുത്ത വലിയ ചിത്രങ്ങളാണിവിടെയുള്ളത്. വെളിച്ചം തട്ടുമ്പോൾ, മേൽക്കൂര മുഴുവൻ നക്ഷത്രങ്ങളെപ്പോലെ വെട്ടിത്തിളങ്ങും. ഒറ്റനോട്ടത്തിൽ ഇതൊരു സാധാരണ മേൽക്കൂരയാണെന്ന് വിശ്വസിക്കാൻ പ്രയാസമാണ്. ജൈനമത ചിഹ്നങ്ങൾ ഈ അലങ്കാരപ്പണികൾക്കിടയിൽ വളരെ സൂക്ഷ്മമായി ഉൾക്കൊള്ളിച്ചിട്ടുണ്ടെന്നും പറയപ്പെടുന്നു.

ഇൻസ്റ്റഗ്രാമിൽ ഈ പോസ്റ്റ് കാണുക

മധ്യപ്രദേശ് ടൂറിസം (@mptourism) പങ്കുവെച്ച ഒരു പോസ്റ്റ്

ഒരു വിഗ്രഹം, ആയിരം പ്രതിബിംബങ്ങൾ

ഒരു വിഗ്രഹത്തിന്റെ എണ്ണമറ്റ പ്രതിബിംബങ്ങൾ കാണുന്ന രീതിയിലാണ് ക്ഷേത്രത്തിനകത്തെ ഗ്ലാസ് പാളികൾ സ്ഥാപിച്ചിരിക്കുന്നത്. ഇത് സന്ദർശകർക്ക് ഒരു പ്രത്യേക ആത്മീയ അനുഭവം നൽകുന്നു. ഇതൊരു ജൈനക്ഷേത്രമാണ്. ഭഗവാൻ മഹാവീര സ്വാമിയുടെയും മറ്റ് തീർത്ഥങ്കരന്മാരുടെയും വിഗ്രഹങ്ങളാണ് ഇവിടെയുള്ളത്. കണ്ണാടികളിലൂടെയുള്ള ഇവയുടെ പ്രതിബിംബങ്ങൾ ഭക്തർക്ക് സവിശേഷമായ ദൈവീക അനുഭൂതി നൽകുന്നു.

സിമന്റ് ഉപയോഗിക്കാത്ത നിർമ്മിതി

ഈ കണ്ണാടി ക്ഷേത്രത്തിന്റെ മറ്റൊരു അത്ഭുതകരമായ സവിശേഷത, അതിന്റെ നിർമ്മാണത്തിൽ സിമന്റ് ഉപയോഗിച്ചിട്ടില്ല എന്നതാണ്. നിർമ്മാണത്തിന് ചുണ്ണാമ്പാണ് ഉപയോഗിച്ചത്. ഇത് അക്കാലത്തെ പരമ്പരാഗതവും ഈടുനിൽക്കുന്നതുമായ ഒരു രീതിയായിരുന്നു. ക്ഷേത്രത്തിൽ ഫാനുകളോ എസിയോ ഇല്ല, എന്നിട്ടും ഉള്ളിൽ നല്ല തണുപ്പാണ്. ചൂടിനെ പ്രതിരോധിക്കുന്ന പരമ്പരാഗത വാസ്തുവിദ്യയുടെ മികവാണിത്.

ഇന്നും ആകർഷണ കേന്ദ്രം

രാവിലെ 10 മുതൽ വൈകിട്ട് 6 വരെയാണ് ക്ഷേത്രത്തിൽ പൊതുജനങ്ങൾക്ക് പ്രവേശനം. ഇൻഡോർ സന്ദർശിക്കുന്ന വിനോദസഞ്ചാരികളുടെ പട്ടികയിൽ ഈ ക്ഷേത്രത്തിന് ഒരു പ്രത്യേക സ്ഥാനമുണ്ട്. സൂര്യാസ്തമയത്തിന് ശേഷം പ്രത്യേക പൂജകളും ചടങ്ങുകളും ഉള്ളതിനാൽ വിനോദസഞ്ചാരികൾക്ക് പ്രവേശനം പരിമിതപ്പെടുത്തിയിരിക്കുന്നു.

പാലൊഴുകും പോലെ ദൂദ്‌സാഗർ; ഗോവയിലെ ഈ വെള്ളച്ചാട്ടം കാണാതെ പോകരുത്

Deepu Divakaran — Wed, 06 May 2026 13:35:22 +0530

ഗോവ എന്ന് കേൾക്കുമ്പോൾ ബീച്ചും പാർട്ടിയുമാണ് മനസ്സിലേക്ക് വരുന്നതെങ്കിൽ, ആ ധാരണ മാറ്റാൻ സമയമായി. ഗോവ-കർണാടക അതിർത്തിയിൽ, പശ്ചിമഘട്ടത്തിന്റെ ഹൃദയഭാഗത്തായി ഒളിച്ചിരിക്കുന്ന ഒരു അത്ഭുതമുണ്ട് - ദൂദ്‌സാഗർ വെള്ളച്ചാട്ടം. 'പാൽക്കടൽ' എന്ന് അർത്ഥം വരുന്ന ഈ വെള്ളച്ചാട്ടം, 300 മീറ്ററിലധികം ഉയരത്തിൽനിന്ന് നാല് തട്ടുകളായി താഴേക്ക് പതിക്കുമ്പോൾ കാണാൻ ഒരു പ്രത്യേക ഭംഗിയാണ്.

നിങ്ങൾ പ്രകൃതിയെ സ്നേഹിക്കുന്ന ആളാണെങ്കിലും, സാഹസിക യാത്രകൾ ഇഷ്ടപ്പെടുന്ന ആളാണെങ്കിലും, ആദ്യമായി ഗോവയിലേക്ക് വരുന്ന ആളാണെങ്കിലും ദൂദ്‌സാഗർ നിങ്ങളുടെ ലിസ്റ്റിൽ ഉറപ്പായും ഇടംപിടിക്കേണ്ട ഒന്നാണ്. ഈ വെള്ളച്ചാട്ടം ഒരു കാരണവശാലും മിസ്സ് ചെയ്യരുതെന്ന് പറയാൻ 7 കാരണങ്ങളുണ്ട്.

1. ഇന്ത്യയിലെ ഏറ്റവും മനോഹരമായ വെള്ളച്ചാട്ടങ്ങളിൽ ഒന്ന്

ഇന്ത്യയിലെ ഏറ്റവും ഉയരമുള്ള വെള്ളച്ചാട്ടങ്ങളിൽ ഒന്നാണ് ദൂദ്‌സാഗർ. മഴക്കാലത്തും അതിന് ശേഷവുമുള്ള മാസങ്ങളിൽ ഇത് അതിന്റെ പൂർണ ശക്തിയിലായിരിക്കും. പാറക്കെട്ടുകളിലൂടെ പല തട്ടുകളായി വെള്ളം ആർത്തലച്ച് താഴേക്ക് പതിക്കുന്നത് കാണാൻ തന്നെ ഒരു പ്രത്യേക വൈബാണ്.

2. വെള്ളച്ചാട്ടത്തിന് നടുവിലൂടെ ഒരു ട്രെയിൻ പാത

ദൂദ്‌സാഗറിന്റെ തൊട്ടടുത്തുള്ള റെയിൽപാലം അതിമനോഹരമായ കാഴ്ചയാണ്. പാലൊഴുകും പോലെ തോന്നിക്കുന്ന വെള്ളച്ചാട്ടത്തെ പശ്ചാത്തലമാക്കി ചൂളംവിളിച്ച് ട്രെയിൻ കടന്നുപോകുന്നത് ക്യാമറ കണ്ണുകളിൽ ഒപ്പിയെടുക്കാൻ സഞ്ചാരികളുടെ തിരക്കാണ്. ഇവിടെ എത്തുന്ന സഞ്ചാരികൾ ഏറ്റവും കൂടുതൽ പകർത്തിയ ചിത്രങ്ങളിലൊന്നും ഇതുതന്നെയാകാം.

3. യാത്ര തന്നെ ഒരു സാഹസികതയാണ്

ദൂദ്‌സാഗറിലേക്കുള്ള യാത്ര തന്നെയാണ് ഏറ്റവും വലിയ ത്രില്ല്. മിക്കവാറും ആളുകൾ കുലെം അല്ലെങ്കിൽ കാസിൽ റോക്കിൽനിന്ന് ജീപ്പ് സഫാരി വഴിയാണ് ഇവിടേക്ക് എത്തുന്നത്. കാട്ടുവഴികളിലൂടെയും ചെറിയ അരുവികൾ മുറിച്ചുകടന്നുമുള്ള ആ യാത്ര, മൊത്തം ട്രിപ്പിന് ഒരു പ്രത്യേക ഫീൽ നൽകും.

4. പശ്ചിമഘട്ടത്തിന്റെ ജൈവവൈവിധ്യം

ഭഗവാൻ മഹാവീർ വന്യജീവി സങ്കേതത്തിനുള്ളിലാണ് ദൂദ്‌സാഗർ സ്ഥിതി ചെയ്യുന്നത്. അതുകൊണ്ട് തന്നെ ഇവിടം പലതരം സസ്യജന്തുജാലങ്ങളാൽ സമ്പന്നമാണ്. പോകുന്ന വഴിയിൽ കുരങ്ങന്മാരെയും പലതരം കിളികളെയും ചിത്രശലഭങ്ങളെയും കാണാൻ സാധ്യതയുണ്ട്.

5. ഫോട്ടോഗ്രാഫർമാരുടെ സ്വർഗം

ഫോട്ടോ എടുക്കാൻ ഇഷ്ടമുള്ളവർക്ക് ഇതൊരു പറുദീസയാണ്. മഞ്ഞിൽ പൊതിഞ്ഞതുപോലെയുള്ള വെള്ളച്ചാട്ടം, പച്ചപ്പ് നിറഞ്ഞ കാട്, പിന്നെ ആ ട്രെയിൻ പോകുന്ന സീൻ... ഇൻസ്റ്റഗ്രാമിൽ ഇടാൻ ഇതിലും നല്ലൊരു സ്പോട്ട് ഗോവയിൽ വേറെ കാണില്ല.

6. താഴെയുള്ള കുളത്തിൽ നീന്തിത്തുടിക്കാം

വെള്ളച്ചാട്ടത്തിന് താഴെയായി വലിയൊരു കുളമുണ്ട്. സുരക്ഷാ നിർദേശങ്ങൾക്കും കാലാവസ്ഥയ്ക്കും അനുസരിച്ച്, യാത്രയുടെ ക്ഷീണമകറ്റാൻ ഈ തണുത്ത വെള്ളത്തിൽ ഒന്നിറങ്ങിക്കുളിക്കാം. കാലൊന്ന് നനയ്ക്കുന്നത് തന്നെ നല്ലൊരു ഉന്മേഷം നൽകും.

7. ഗോവയുടെ മറ്റൊരു മുഖം

ഗോവ എന്ന് പറഞ്ഞാൽ ബീച്ചുകളും നൈറ്റ് ലൈഫും മാത്രമല്ലെന്ന് കാണിച്ചുതരുന്ന ഒരിടം കൂടിയാണ് ദൂദ്‌സാഗർ. തീരപ്രദേശങ്ങൾക്കപ്പുറം ഗോവയുടെ പച്ചപ്പും പ്രകൃതിഭംഗിയും എത്രത്തോളമുണ്ടെന്ന് ഈ യാത്ര നിങ്ങളെ മനസിലാക്കിത്തരും.

എപ്പോൾ സന്ദർശിക്കണം?

ഒക്ടോബർ മുതൽ ഫെബ്രുവരി വരെയുള്ള സമയമാണ് ഇവിടം സന്ദർശിക്കാൻ ഏറ്റവും നല്ലത്. ഈ സമയത്ത് മഴക്കാലം കഴിഞ്ഞതിനാൽ വെള്ളച്ചാട്ടത്തിന് നല്ല ശക്തിയുണ്ടാകും, എന്നാൽ യാത്ര താരതമ്യേന സുരക്ഷിതവുമായിരിക്കും. കനത്ത മഴക്കാലത്ത് ജീപ്പ് സഫാരികൾക്ക് നിയന്ത്രണങ്ങൾ ഉണ്ടാകാം.

ചില യാത്രാ ടിപ്‌സുകൾ

നല്ല ഗ്രിപ്പുള്ള ഷൂസ് ധരിക്കുക.
ഇലക്ട്രോണിക് സാധനങ്ങൾ നനയാതെ സൂക്ഷിക്കാൻ വാട്ടർപ്രൂഫ് ബാഗുകൾ കരുതുക.
തിരക്ക് ഒഴിവാക്കാൻ കഴിയുന്നത്ര നേരത്തെ യാത്ര തുടങ്ങുക.
ജീപ്പ് സഫാരിയുടെ സമയം മുൻകൂട്ടി ചോദിച്ച് ഉറപ്പുവരുത്തുക.
വനം വകുപ്പിന്റെ സുരക്ഷാ നിർദേശങ്ങൾ കൃത്യമായി പാലിക്കുക.

ദൂദ്‌സാഗറിലേക്കുള്ള യാത്ര വെറുമൊരു കാഴ്ച കാണൽ മാത്രമല്ല, ഇന്ത്യയിലെ ഏറ്റവും ഗംഭീരമായ പ്രകൃതിദൃശ്യങ്ങളിലൊന്നിലേക്കുള്ള മറക്കാനാവാത്ത ഒരു സാഹസിക യാത്രയാണ്. ആർത്തലയ്ക്കുന്ന വെള്ളച്ചാട്ടവും, കാടിനുള്ളിലെ സഫാരിയും, അടിപൊളി ഫോട്ടോകളും, ഉന്മേഷം തരുന്ന കുളിയും... ഗോവയിൽ മറ്റൊരിടത്തും കിട്ടാത്ത അനുഭവമാണ് ദൂദ്‌സാഗർ നൽകുന്നത്. അതുകൊണ്ട്, അടുത്ത തവണ ഗോവയിലേക്ക് ഒരു ട്രിപ്പ് പ്ലാൻ ചെയ്യുമ്പോൾ ദൂദ്‌സാഗർ ലിസ്റ്റിൽ ഇല്ലെങ്കിൽ അത് വലിയൊരു നഷ്ടമായിരിക്കും.

ഇനി ഇ-റിക്ഷ യാത്രയ്ക്ക് ചെലവേറും, രാജ്യതലസ്ഥാനത്ത് വർഷങ്ങൾക്ക് ശേഷം നിരക്ക് മാറ്റം

Deepu Divakaran — Thu, 30 Apr 2026 13:57:40 +0530

ദില്ലി: രാജ്യതലസ്ഥാനത്ത് വർഷങ്ങൾക്ക് ശേഷം ഇലക്ട്രിക് റിക്ഷകളുടെ മിനിമം യാത്രാനിരക്ക് വർധിപ്പിക്കുന്നു. ഇ-റിക്ഷ ഡ്രൈവർമാരുടെ ഫെഡറേഷൻ്റേതാണ് തീരുമാനം. അടുത്ത മാസം മുതൽ മിനിമം നിരക്ക് 20 രൂപയായി വർധിപ്പിക്കാനാണ് തീരുമാനിച്ചിരിക്കുന്നത്. ദില്ലി ഗതാഗത വകുപ്പ് മന്ത്രി പങ്കജ് കുമാർ സിങ്ങുമായി ഇ-റിക്ഷ ഡ്രൈവർമാർ, ഡീലർമാർ, നിർമാതാക്കൾ നടത്തിയ യോഗത്തിന് ശേഷമാണ് നിരക്ക് വർധന സംബന്ധിച്ച പ്രഖ്യാപനമുണ്ടായത്.

ദില്ലിയിൽ 2010 മുതൽ പ്രവർത്തനം നടത്തുന്ന ഇ-റിക്ഷകളുടെ നിരക്കിൽ ഇതുവരെ മാറ്റമുണ്ടായിട്ടില്ലെന്ന് ഫെഡറേഷൻ ചെയർമാൻ അനുജ് ശർമ പറഞ്ഞു. ഇക്കാലയളവിൽ രണ്ടുവട്ടം ഓട്ടോറിക്ഷ നിരക്ക് വർധിപ്പിച്ചിട്ടുണ്ടെങ്കിലും ഇ-റിക്ഷ നിരക്കിൽ മാറ്റമുണ്ടായിട്ടില്ലെന്ന് അദ്ദേഹം ചൂണ്ടിക്കാട്ടി.

നിലവിൽ ആദ്യ രണ്ട് കിലോമീറ്ററിന് 10 രൂപയും തുടർന്നുള്ള കിലോമീറ്ററുകൾക്ക് അഞ്ചുരൂപ വീതവുമാണ് ഇ-റിക്ഷ ഡ്രൈവർമാർ ഈടാക്കുന്നത്. രാജ്യതലസ്ഥാനത്ത് ജീവിതച്ചെലവ് ഉയരുമ്പോൾ 10 രൂപ മിനിമം നിരക്കുകൊണ്ട് പിടിച്ചുനിൽക്കാനാവില്ലെന്ന് ഡ്രൈവർമാരുടെ യൂണിയൻ പറയുന്നു. ദില്ലിയിൽ രണ്ട് ലക്ഷത്തിലധികം ഇ-റിക്ഷകൾ ഔദ്യോഗികമായി രജിസ്റ്റർ ചെയ്തിട്ടുണ്ടെന്നാണ് റിപ്പോർട്ട്. അതേസമയം തന്നെ ഒന്നരലക്ഷത്തിലധികം ഇ-റിക്ഷകൾ രജിസ്ട്രേഷൻ നടത്താതെ ഓടുന്നുണ്ട്.

അതിനിടെ, കമ്പനികൾക്ക് ഒന്നിലധികം ഇ-റിക്ഷകൾ സ്വന്തം പേരിൽ രജിസ്റ്റർ ചെയ്യാൻ അനുവദിച്ചിരുന്ന 2022ലെ സർക്കുലർ ദില്ലി ഗതാഗത വകുപ്പ് പിൻവലിച്ചു. സാമ്പത്തികമായി പിന്നാക്കം നിൽക്കുന്ന വിഭാഗങ്ങളെ ചൂഷണം ചെയ്യുന്നതു കുറച്ച് സ്വയംതൊഴിൽ പ്രോത്സാഹിപ്പിക്കുകയാണ് സർക്കാർ ലക്ഷ്യമെന്ന് മന്ത്രി പങ്ക് കുമാർ സിങ് പറഞ്ഞു. ഇ-റിക്ഷ മേഖല കൈയടക്കി വെക്കുന്നതിലെ അപകടം കുറയ്ക്കുകയും സ്വന്തമായി വാഹനമുള്ള ഡ്രൈവർമാർക്ക് കൂടുതൽ സാമ്പത്തിക അവസരങ്ങൾ ലഭിക്കുകയും ചെയ്യുന്നത് ഈ തീരുമാനത്തിൻ്റെ നേട്ടങ്ങളാണെന്നും മന്ത്രി കൂട്ടിച്ചേർത്തു.

ഗോവയ്ക്ക് പോകാൻ പ്ലാനുണ്ടോ? ഏത് സമയത്ത് പോയാൽ അടിച്ചുപൊളിക്കാം? അറിയേണ്ടതെല്ലാം

Deepu Divakaran — Fri, 01 May 2026 10:18:35 +0530

അപ്പോൾ ഗോവയ്ക്ക് ഒരു ട്രിപ്പ് പോകാൻ തീരുമാനിച്ചു, അല്ലേ? വെറുതെ ടിക്കറ്റ് ബുക്ക് ചെയ്താൽ മാത്രം പോരാ, എപ്പോൾ പോകണം എന്നതാണ് ഏറ്റവും പ്രധാനപ്പെട്ട കാര്യം. മനോഹരമായ ബീച്ചുകൾ, അടിപൊളി നൈറ്റ് ലൈഫ്, പഴയ പോർച്ചുഗീസ് സംസ്കാരത്തിന്റെ ഓർമ്മകൾ... അങ്ങനെ ലോകമെമ്പാടും പ്രശസ്തമാണ് ഗോവ. പക്ഷേ, കാലാവസ്ഥയും തിരക്കും യാത്രാച്ചെലവും നിങ്ങളുടെ ഗോവൻ അനുഭവത്തെ മൊത്തത്തിൽ മാറ്റിമറിക്കും. തെറ്റായ സമയത്താണ് പോകുന്നതെങ്കിൽ ബീച്ചുകളോ യാത്രയോ ഒന്നും ശരിക്ക് ആസ്വദിക്കാൻ കഴിഞ്ഞെന്ന് വരില്ല. അതുകൊണ്ടാണ് എപ്പോഴും സീസണുകൾ മനസ്സിലാക്കി യാത്ര പ്ലാൻ ചെയ്യേണ്ടതിന് പ്രാധാന്യമുള്ളത്.

വിൻ്റർ ഏറ്റവും ബെസ്റ്റ്

നവംബർ മുതൽ ഫെബ്രുവരി വരെയുള്ള സമയമാണ് ഗോവ സന്ദർശിക്കാൻ ഏറ്റവും മികച്ചതായി കണക്കാക്കുന്നത്. ഈ മാസങ്ങളിൽ കാലാവസ്ഥ വളരെ സുഖകരമായിരിക്കും. താപനില 20-30 ഡിഗ്രി സെൽഷ്യസിനിടയിലായിരിക്കും. അതുകൊണ്ട് തന്നെ ബീച്ചിലെ കളികളും മറ്റ് വിനോദങ്ങളുമെല്ലാം ഇരട്ടി ആവേശത്തോടെ ആസ്വദിക്കാം. ക്രിസ്മസ്, ന്യൂ ഇയർ സമയത്ത് ആഘോഷങ്ങളുടെ ഒരു പൂരമായിരിക്കും. പക്ഷേ, ആ സമയത്ത് തിരക്കും ചെലവും ഏറ്റവും കൂടുതലായിരിക്കുമെന്ന് ഓർക്കണം. അടിച്ചുപൊളിച്ച് ആഘോഷിക്കാൻ പറ്റിയ ഒരു ഗോവയാണ് നിങ്ങളുടെ മനസ്സിലുള്ളതെങ്കിൽ ഈ സമയം തിരഞ്ഞെടുക്കാം.

ചൂടുകാലത്ത് പോക്കറ്റ് കാലിയാവില്ല!

മാർച്ച് മുതൽ മെയ് വരെയുള്ള മാസങ്ങളിൽ ഗോവയിൽ ചൂട് കൂടും. താപനില 35 ഡിഗ്രി വരെ ഉയരാം. അതുകൊണ്ട് തന്നെ ഈ സമയത്ത് വിനോദസഞ്ചാരികളുടെ എണ്ണം കുറവായിരിക്കും. ഇതിൻ്റെ പ്രധാന ഗുണം ഹോട്ടലുകളും ഫ്ലൈറ്റ് ടിക്കറ്റുമെല്ലാം കുറഞ്ഞ വിലയിൽ കിട്ടുമെന്നതാണ്. തിരക്കുകളിൽ നിന്നൊഴിഞ്ഞ്, ബജറ്റിലൊതുങ്ങുന്ന ഒരു ശാന്തമായ യാത്രയാണ് നിങ്ങൾ ആഗ്രഹിക്കുന്നതെങ്കിൽ ഈ സമയം തിരഞ്ഞെടുക്കാം. പക്ഷേ, പകൽ സമയത്തെ കറക്കം അൽപം ബുദ്ധിമുട്ടായിരിക്കും. അതുകൊണ്ട് രാവിലെയും വൈകുന്നേരവും യാത്രകൾ പ്ലാൻ ചെയ്യുന്നതാണ് നല്ലത്.

മഴക്കാലത്ത് ഗോവയുടെ മറ്റൊരു മുഖം

ജൂൺ മുതൽ സെപ്റ്റംബർ വരെ ഗോവയിൽ മൺസൂൺ കാലമാണ്. ഈ സമയത്ത് ഗോവയാകെ പച്ചപ്പ് നിറഞ്ഞ് റൊമാന്റിക് മൂഡിലാകും. ബീച്ചിലെ വിനോദങ്ങൾക്ക് പല പരിമിതികളും ഉണ്ടാകുമെങ്കിലും, പ്രകൃതിയെ സ്നേഹിക്കുന്നവർക്ക് ഇതൊരു പ്രത്യേക അനുഭവം തന്നെയായിരിക്കും. കുറഞ്ഞ തിരക്ക്, കുറഞ്ഞ ചെലവ്, ശാന്തമായ അന്തരീക്ഷം എന്നിവയാണ് ഈ സീസണിൻ്റെ പ്രധാന ആകർഷണം. കപ്പിൾസിനും സോളോ ട്രാവലേഴ്സിനും മഴക്കാലത്തെ ഗോവ തീർത്തും വ്യത്യസ്തവും മനോഹരവുമായ ഒരനുഭവമായിരിക്കും സമ്മാനിക്കുക.

തിരക്കുമില്ല, പോക്കറ്റ് കീറുകയുമില്ല

അമിത തിരക്ക് ഒഴിവാക്കുകയും എന്നാൽ നല്ല കാലാവസ്ഥ വേണമെന്നും ആഗ്രഹിക്കുന്നവർക്ക് ഒക്ടോബർ, മാർച്ച് മാസങ്ങൾ തിരഞ്ഞെടുക്കാം. 'ഷോൾഡർ സീസൺ' എന്നറിയപ്പെടുന്ന ഈ സമയത്ത് കാലാവസ്ഥ സുഖകരമായിരിക്കും, അതേസമയം ചെലവുകൾ ഒരുപാട് കൂടുകയുമില്ല. വിനോദസഞ്ചാരികളുടെ വലിയ തിരക്കില്ലാതെ ഗോവയെ ശരിക്കും ആസ്വദിച്ച് കാണാൻ ഈ സമയം നിങ്ങളെ സഹായിക്കും.

അടിപൊളി യാത്രയ്ക്കുള്ള ചില ടിപ്പുകൾ

പ്രധാന സീസണിലാണ് പോകുന്നതെങ്കിൽ ഹോട്ടലുകളും ഫ്ലൈറ്റും മുൻകൂട്ടി ബുക്ക് ചെയ്യാൻ മറക്കരുത്. സൺസ്ക്രീനും കനം കുറഞ്ഞ കോട്ടൺ വസ്ത്രങ്ങളും ബീച്ചിലേക്ക് പോകുമ്പോൾ കയ്യിൽ കരുതണം. ഗോവയിൽ ചുറ്റിക്കറങ്ങാൻ സ്കൂട്ടറോ ബൈക്കോ വാടകയ്ക്ക് എടുക്കുന്നതാണ് ഏറ്റവും എളുപ്പവും ലാഭകരവും. അതുപോലെ, നോർത്ത് ഗോവയുടെ തിരക്കിൽ നിന്ന് മാറി സൗത്ത് ഗോവ കൂടി ആസ്വദിക്കാൻ ശ്രമിക്കുക. അവിടെ നിങ്ങൾക്ക് കൂടുതൽ ശാന്തവും വൃത്തിയുള്ളതുമായ ബീച്ചുകൾ കാണാം.

കീശ കീറാതെ ഗോവയിൽ അടിച്ചുപൊളിക്കാം; ഇതാ ഒരു ബജറ്റ് ട്രാവൽ ഗൈഡ്

Deepu Divakaran — Sun, 03 May 2026 13:27:41 +0530

നമ്മളിൽ പലരുടെയും ഒരു സ്വപ്നമാണ് ഗോവ യാത്ര. ചിലർക്ക് അതൊരു ഹോളിഡേ പ്ലാൻ മാത്രമല്ല, ഒരു വൈബാണ്. ഒരു വശത്ത് അടിപൊളി ബീച്ചുകൾ, മറുവശത്ത് നല്ല റെസ്റ്റോറന്റുകൾ, പിന്നെ പാർട്ടികൾ. അടിച്ചുപൊളിച്ച് റിലാക്സ് ചെയ്യാൻ പറ്റിയ സ്ഥലമെന്ന പേര് ഗോവയ്ക്ക് പണ്ടേയുണ്ട്. പക്ഷെ എല്ലാവരുടെയും പ്രധാന സംശയം ഒന്നാണ്, ഗോവയിൽ പോകാൻ ശരിക്കും എത്ര പണം ചെലവാകും?

ഗോവ ട്രിപ്പിന് ഏകദേശം എത്ര ചെലവാകും?

മൂന്നോ നാലോ ദിവസത്തെ യാത്രയ്ക്ക് ഒരാൾക്ക് വരാൻ സാധ്യതയുള്ള ചെലവിൻ്റെ ഒരു ഏകദേശ കണക്ക് താഴെ കൊടുക്കുന്നു. നിങ്ങൾ തിരഞ്ഞെടുക്കുന്ന സൗകര്യങ്ങൾ അനുസരിച്ച് ഇതിൽ മാറ്റങ്ങൾ വരാം.

ഒരാൾക്കുള്ള ഏകദേശ ചെലവ്

യാത്ര (ബസ്/ട്രെയിൻ): 1,500 - 3,000 രൂപ

ഹോട്ടൽ/ഹോംസ്റ്റേ: 2,000 - 5,000 രൂപ

ഭക്ഷണവും വെള്ളവും: 2,500 - 5,000 രൂപ

വണ്ടി വാടക (സ്കൂട്ടർ/കാർ): 1,500 - 2,500 രൂപ

ആകെ ഏകദേശ ചെലവ്: 7,500 - 15,000 രൂപ

വളരെ കുറഞ്ഞ ബജറ്റിൽ യാത്ര പൂർത്തിയാക്കാനാണ് പ്ലാനെങ്കിൽ, ജൂൺ മുതൽ സെപ്റ്റംബർ വരെയുള്ള മാസങ്ങളിൽ യാത്ര പ്ലാൻ ചെയ്യുക. ഇത് ഗോവയിലെ ഓഫ് സീസണാണ്. അതുകൊണ്ട് തന്നെ പീക്ക് സീസണുമായി താരതമ്യം ചെയ്യുമ്പോൾ എല്ലാത്തിനും ചെലവ് വളരെ കുറവായിരിക്കും.

ഗോവയിൽ കണ്ടിരിക്കേണ്ട സ്ഥലങ്ങൾ

കലൻഗുട്ട്, ബാഗ ബീച്ച്: വാട്ടർ സ്പോർട്സിനും രാത്രി ജീവിതത്തിനും പേരുകേട്ട സ്ഥലങ്ങളാണിത്.

അഞ്ജുന ബീച്ച്: ഇവിടുത്തെ ബുധനാഴ്ചകളിലെ ഫ്ലീ മാർക്കറ്റ് വളരെ പ്രശസ്തമാണ്.

അഗ്വാഡ കോട്ട: കടലിന്റെ മനോഹരമായ കാഴ്ചകൾ ഇവിടെ നിന്ന് ആസ്വദിക്കാം.

ചപ്പോര കോട്ട: 'ദിൽ ചാഹ്താ ഹേ' കോട്ട എന്നും ഇതിന് വിളിപ്പേരുണ്ട്.

പാലോലം ബീച്ച്: വളരെ ശാന്തവും സമാധാനപരവുമായ ഒരിടം.

കോൾവ ബീച്ച്: വെളുത്ത മണൽത്തരികളുള്ള മനോഹരമായ തീരത്തിന് പേരുകേട്ടതാണ്.

ദൂത്‌സാഗർ വെള്ളച്ചാട്ടം: പാൽനുരപോലെ പതഞ്ഞിറങ്ങുന്ന ഈ വെള്ളച്ചാട്ടം കാണാൻ ട്രക്കിങ് അല്ലെങ്കിൽ ജീപ്പ് സഫാരി തന്നെ വേണം.

ചരിത്രപ്രാധാന്യമുള്ള സ്ഥലങ്ങൾ

ബസിലിക്ക ഓഫ് ബോം ജീസസ്: ഇതൊരു പുരാതന പള്ളിയും യുനെസ്കോയുടെ ലോക പൈതൃക കേന്ദ്രവുമാണ്.

മങ്കേഷി ക്ഷേത്രം: ഗോവയിലെ ഏറ്റവും പ്രശസ്തമായ ഹൈന്ദവ ക്ഷേത്രങ്ങളിലൊന്ന്.

ഈ കാര്യങ്ങൾ ശ്രദ്ധിക്കാം

വണ്ടി വാടകയ്ക്ക് എടുക്കുമ്പോൾ

ഗോവയിൽ കറങ്ങിനടക്കാൻ ഏറ്റവും ലാഭകരം സ്കൂട്ടർ വാടകയ്ക്ക് എടുക്കുന്നതാണ്. ഒരു ദിവസത്തേക്ക് സാധാരണയായി 400 മുതൽ 600 രൂപ വരെയാണ് വാടക വരുന്നത്.

മറ്റ് അവശ്യകാര്യങ്ങൾ

ഗോവയിലെ വെയിലിന് നല്ല ചൂടാണ്, അതിനാൽ സൺസ്ക്രീൻ ഉപയോഗിക്കാൻ മറക്കരുത്. ചൂടിൽനിന്ന് രക്ഷനേടാൻ ഇളംനിറത്തിലുള്ള കോട്ടൺ വസ്ത്രങ്ങൾ ധരിക്കുന്നതാണ് നല്ലത്.

ഗോവയിലേക്ക് താമസം മാറുന്നോ? ബീച്ച് ലൈഫിന് മാസം എത്ര രൂപ ചെലവ് വരും?

Deepu Divakaran — Thu, 30 Apr 2026 14:39:50 +0530

ഗോവയിൽ ജീവിക്കാൻ പലരും പ്രതീക്ഷിക്കുന്നതിലും കൂടുതൽ പണം വേണ്ടിവരും. വർധിച്ചുവരുന്ന ആവശ്യകത കാരണം വീട്ടുവാടക, യാത്രാച്ചെലവ്, ദൈനംദിന ചെലവുകൾ എന്നിവയെല്ലാം ഉയരുകയാണ്. ബീച്ച് ലൈഫ് ആകർഷകമാണെങ്കിലും സ്ഥിരതാമസക്കാർക്ക് സാമ്പത്തികമായി വലിയ വെല്ലുവിളിയാണ്.

ഗോവയിലെ മനോഹരമായ ജീവിതശൈലിക്ക് പലപ്പോഴും വലിയ വില നൽകേണ്ടി വരും. വർക്ക് ഫ്രം ഹോം ചെയ്യുന്നവരുടെയും സെക്കൻഡ് ഹോം വാങ്ങുന്നവരുടെയും എണ്ണം കൂടിയതോടെ പ്രശസ്തമായ ബീച്ച് ഏരിയകളിലെ വാടക കുത്തനെ ഉയർന്നു.

നാട്ടിൻപുറങ്ങളിലെ മാർക്കറ്റുകളിൽനിന്ന് സാധനങ്ങൾ വാങ്ങിയാൽ ഒരുപരിധി വരെ ചെലവ് കുറയ്ക്കാം. എന്നാൽ, ടൂറിസ്റ്റ് കേന്ദ്രങ്ങളിലെ ഹോട്ടലുകളിൽനിന്ന് ഭക്ഷണം കഴിക്കുന്നത് മാസ ബജറ്റ് താളം തെറ്റിക്കും.

ഗോവയിലെ പലയിടങ്ങളിലും പൊതുഗതാഗത സൗകര്യം വളരെ കുറവാണ്. അതുകൊണ്ട് സ്വന്തമായി ഒരു വാഹനം അത്യാവശ്യമായി വരും. ഇന്ധനം, ബൈക്ക് വാടക, കാറിന്റെ അറ്റകുറ്റപ്പണി എന്നിവ പ്രതിമാസ ചെലവുകൾ കൂട്ടും.

കടലിനടുത്ത് ശാന്തവും ആരോഗ്യകരവുമായ ഒരു ജീവിതം സ്വപ്നം കണ്ടാണ് പലരും ഗോവയിലേക്ക് വരുന്നത്. എന്നാൽ വെൽനസ്, വിനോദം, സൗഹൃദ കൂട്ടായ്മകൾ എന്നിവയെല്ലാം പ്രതീക്ഷിക്കുന്നതിലും വലിയ സാമ്പത്തിക ഭാരം നൽകിയേക്കാം.

ഇന്ത്യയുടെ നാനാഭാഗത്തുനിന്നുമുള്ള ആളുകളെ ആകർഷിക്കുന്ന ഒരു ജീവിതനിലവാരം ഗോവ വാഗ്ദാനം ചെയ്യുന്നുണ്ട്. എങ്കിലും, ബീച്ചിനരികിലെ ജീവിതമെന്ന സ്വപ്നം യാഥാർത്ഥ്യമാക്കാൻ കൃത്യമായ സാമ്പത്തിക ആസൂത്രണം ആവശ്യമാണ്.

ഗോവയിലേക്ക് വിട്ടാലോ? കൊതിയൂറും 7 കിടിലൻ റെസ്റ്റോറൻ്റുകൾ

Deepu Divakaran — Thu, 30 Apr 2026 10:27:57 +0530

ഗോവൻ യാത്രക്കിടെ തനത് രുചികൾ ആസ്വദിക്കാൻ പ്ലാൻ ഉണ്ടോ? ഫിഷർമാൻസ് വാർഫ്, മാർട്ടിൻസ് കോർണർ പോലുള്ള തനി ഗോവൻ രുചികൾ വിളമ്പുന്ന റെസ്റ്റോറൻ്റുകൾ ഏറെ ഉണ്ട്. ഭക്ഷണപ്രേമികൾ തീർച്ചയായും സന്ദർശിക്കേണ്ട ഗോവയിലെ ഏഴ് റെസ്റ്റോറന്റുകൾ പരിചയപ്പെടാം.

പശ്ചിമഘട്ടത്തിൽ അറബിക്കടലിനാൽ ചുറ്റപ്പെട്ടാണ് ഗോവ സ്ഥിതി ചെയ്യുന്നത്. തെങ്ങിൻ തോപ്പുകൾ, ബീച്ചുകൾ, നൈറ്റ് ലൈഫ്, പോർച്ചുഗീസ്-കൊളോണിയൽ വാസ്തുവിദ്യ എന്നിവയെല്ലാം ഗോവയുടെ ആത്മാവാണ്. ബീച്ച് ഇഷ്ടപ്പെടുന്നവരുടെ സ്വപ്നഭൂമിയാണ് ഗോവ. ഇവയ്ക്കു പുറമേ, ഇവിടുത്തെ ഭക്ഷണ വൈവിധ്യം സഞ്ചാരികളുടെ മനസ്സ് കീഴടക്കും. ഗോവ സന്ദർശിക്കുമ്പോൾ മികച്ച ഭക്ഷണാനുഭവത്തിനായി തീർച്ചയായും പോയിരിക്കേണ്ട ചില കിടിലൻ റെസ്റ്റോറന്റുകൾ പരിചയപ്പെടാം.

ദി ഫിഷർമാൻസ് വാർഫ്

സൗത്ത് ഗോവയിലെ കാവെലോസിമിലാണ് ഈ റെസ്റ്റോറന്റ് മനോഹരമായ ഈ റെസ്റ്റോറൻ്റ് സ്ഥിതിചെയ്യുന്നത്. കടൽക്കാറ്റേറ്റ് ഭക്ഷണം കഴിക്കാൻ പറ്റിയ ഒരിടം. ഇവരുടെ മെനുവിൽ നിറയെ സീഫുഡ് വിഭവങ്ങളാണ്. ഗോവൻ പോയി, റവ ഫ്രൈഡ് പ്രോൺസ് എന്നിവ ഇവിടെയെത്തിയാൽ ഉറപ്പായും പരീക്ഷിക്കണം.

വിനായക് ഫാമിലി റെസ്റ്റോറന്റ്

അസഗാവോയിൽ സ്ഥിതി ചെയ്യുന്ന ഈ റെസ്റ്റോറന്റ് തനി ഗോവൻ രുചികൾക്ക് പേരുകേട്ടതാണ്. നാട്ടുകാരുടെയും വിനോദസഞ്ചാരികളുടെയും ഇഷ്ടസ്ഥലമായതുകൊണ്ട് ഇവിടെ ഉച്ചഭക്ഷണത്തിന് നല്ല തിരക്കായിരിക്കും. അതിനാൽ നേരത്തെ എത്തുന്നത് നല്ലതാണ്.

ഫാറ്റ് ഫിഷ്

2012ൽ ഫാഷൻ ഡിസൈനറായ പൂജ സരിനും റെസ്റ്റോറന്റ് ഉടമ പ്രശാന്ത് കോർഗോങ്കറും ചേർന്നാണ് ഈ സീഫുഡ് ഹബ്ബ് തുടങ്ങിയത്. മത്സ്യ വിഭവങ്ങൾ ഇഷ്ടപ്പെടുന്നവരെ തൃപ്തിപ്പെടുത്തുന്ന ഒരിടം. സീസണൽ ചേരുവകൾ ഉപയോഗിക്കുന്നതുകൊണ്ട് ഇവിടുത്തെ വിഭവങ്ങൾക്ക് രുചി കൂടും. മീനുകൾ, കൊഞ്ച്, കണവ, ഞണ്ട്, ഫിംഗർ ഫുഡ് എന്നിവയുടെ വലിയ നിര തന്നെയുണ്ട്.

ഗൺപൗഡർ

അസഗാവോയിലെ ഈ റെസ്റ്റോറന്റിന് ആ പേര് കിട്ടിയത് 'മിളഗായ് പൊടി' എന്നറിയപ്പെടുന്ന ഗൺപൗഡർ മസാലയിൽ നിന്നാണ്. പ്രോൺ കറി, മീൻ കറി, അപ്പം തുടങ്ങിയ കിടിലൻ സൗത്ത് ഇന്ത്യൻ വിഭവങ്ങൾ ഇവിടെ കിട്ടും.

സീഫുഡ് ജങ്ഷൻ

തനി ഗോവൻ രുചിയും സ്വാദും ഒത്തുചേർന്ന വിഭവങ്ങളാണ് ഇവിടെയുള്ളത്. നൂറ്റാണ്ടിലേറെയായി തങ്ങൾ ഈ രംഗത്തുണ്ടെന്നാണ് സ്ഥാപകർ പറയുന്നത്. മാരിനേറ്റ് ചെയ്ത കണവ, ഫ്രഷ് ഞണ്ട് എന്നിവയെല്ലാം പ്ലേറ്റിലെത്തും. നോർത്ത് ഇന്ത്യൻ, കോണ്ടിനെന്റൽ വിഭവങ്ങൾ ഇഷ്ടപ്പെടുന്നവർക്കായി തന്തൂരി വിഭവങ്ങളും ചൈനീസ് ഫ്യൂഷൻ സ്നാക്ക്സുമുണ്ട്.

ജോട്ട്സ്

പണ്ട് ബോട്ടുകളും വലകളുമുള്ള ഒരു ഫിഷിങ് ഷെഡ് ആയിരുന്നു ഇത്. ജോസും ഭാര്യ എറ്റെൽവിനയും ചേർന്ന് മത്സ്യം പാകം ചെയ്ത് വിൽക്കാൻ തുടങ്ങിയതോടെ സംഗതി ഹിറ്റായി. അങ്ങനെയാണ് ജോട്ട്സ് എന്ന കടലോര റെസ്റ്റോറന്റ് ഉണ്ടാകുന്നത്. പോംഫ്രെറ്റ്, ചെമ്മീൻ, ലോബ്സ്റ്റർ, ഞണ്ട്, കിങ്ഫിഷ് എന്നിവയെല്ലാം റീച്ചാഡോ മസാലയിലോ ബട്ടർ ഗാർലിക്കിലോ ഇവിടെ കിട്ടും. ബീഫ് റോസ്റ്റ്, ബീഫ് അല്ലെങ്കിൽ കോറിസ് ചില്ലി ഫ്രൈ, ബീഫ് കട്ട്ലറ്റ് തുടങ്ങിയ ഗോവൻ വിഭവങ്ങളുമുണ്ട്.

മാർട്ടിൻസ് കോർണർ

1980കളിൽ ഇതൊരു ചെറിയ കടയായിരുന്നു. കാരംസ് കളിക്കാനും സോഫ്റ്റ് ഡ്രിങ്ക്‌സ് കുടിക്കാനും ആളുകൾ ഒത്തുകൂടിയിരുന്ന ഒരിടം. കരാഫിന പെരേരയുടെ സോർപോടലും കോറിസ് പാവോയും പ്രശസ്തമായതോടെ നാല് ടേബിളുകളുള്ള ചെറിയൊരു ഭക്ഷണശാലയായി. പിന്നീട് 300 പേർക്കിരിക്കാവുന്ന വലിയ റെസ്റ്റോറന്റായി വളർന്നു. നാട്ടുകാർക്കും സെലിബ്രിറ്റികൾക്കും ഒരുപോലെ പ്രിയപ്പെട്ട ഇടമാണിത്. ഹോർക്ക് വിന്താലു, ചിക്കൻ ക്സാകുട്ടി, പ്രോൺ കാൽഡിൻ, സാൾട്ടഡ് ടങ് തുടങ്ങിയ ഗോവൻ വിഭവങ്ങളാണ് ഇവിടുത്തെ ആകർഷണം.

പാർട്ടിയും ബഹളവുമില്ലാത്ത ഒരു ലക്ഷ്വറി ഗോവൻ ഹോളിഡേ ആയാലോ? സംഗതി ഇങ്ങനെ

Deepu Divakaran — Fri, 01 May 2026 16:20:09 +0530

ഗോവയിലെ ലക്ഷ്വറി യാത്രകളുടെ സ്വഭാവം മാറുകയാണ്. പാർട്ടികൾക്കും ബഹളങ്ങൾക്കും പകരം ശാന്തമായ താമസവും സ്വകാര്യ ബീച്ചുകളും വെൽനസ് ട്രീറ്റുമെന്റുകളും തേടി ആളുകൾ. രാത്രി ആഘോഷങ്ങൾക്ക് പകരം വിശ്രമത്തിനും ഉന്മേഷത്തോടെയുള്ള പ്രഭാതങ്ങൾക്കും പ്രധാന്യം നൽകുന്നു.

പുതിയ ലക്ഷ്വറി ഗോവയുടെ തുടക്കം കടൽത്തീരത്തെ ശാന്തമായ പ്രഭാതങ്ങളിലാണ്. ആളൊഴിഞ്ഞ തീരങ്ങൾ ഗോവയുടെ മറ്റൊരു മുഖം കാണിച്ചുതരുന്നു.

ഗോവയിലെ ലക്ഷ്വറി യാത്രകളുടെ പുതിയ മുഖമായി സ്വകാര്യ വില്ലകൾ മാറുകയാണ്. ഇത് യാത്രക്കാർക്ക് കൂടുതൽ സ്വകാര്യതയും സൗകര്യങ്ങളും നൽകുന്നു.

ഗോവയിലെ ‘ഫൈൻ ഡൈനിങ്’ ഇപ്പോൾ തിരക്കേറിയ നൈറ്റ് ലൈഫ് കേന്ദ്രങ്ങളിൽ നിന്ന് മാറി. കടൽത്തീരത്തെ മെഴുകുതിരി വെളിച്ചത്തിലുള്ള അത്താഴമാണ് പുതിയ ട്രെൻഡ്.

രാത്രി പാർട്ടികൾക്ക് പകരം സ്പാ ട്രീറ്റ്‌മെന്റുകളും യോഗാ സെഷനുകളും. ക്ഷീണിപ്പിക്കുന്ന അവധിക്കാലമല്ല, ഉന്മേഷം നൽകുന്ന യാത്രകളാണ് യാത്രക്കാർ ഇപ്പോൾ ആഗ്രഹിക്കുന്നത്.

ബഹളങ്ങൾക്ക് പകരം ശാന്തത തേടുന്ന യാത്രക്കാരെയാണ് പുതിയ ഗോവ ആകർഷിക്കുന്നത്. തലേന്നത്തെ ആഘോഷത്തിന്റെ ക്ഷീണം മാറ്റുന്നതിന് പകരം ഉന്മേഷത്തോടെ ഉണരുന്നതാണ് പുതിയ ലക്ഷ്വറി.

പൈതൃക പാതയ്ക്ക് ഇനി മോഡേൺ അപ്ഗ്രേഡ്, പഴമ നിലനിർത്തും; ഇന്ത്യയിലെ ഏക 'റാക്ക് ആൻഡ് പിനിയൻ' റെയിൽവേയുടെ വിശേഷങ്ങൾ

Sivanand C V — Sun, 15 Mar 2026 18:39:48 +0530

നീലഗിരി: നീലഗിരിയുടെ കോടമഞ്ഞും തണുപ്പും വകഞ്ഞുമാറ്റി കൂകിപ്പാഞ്ഞുപോകുന്ന ഊട്ടി ടോയ് ട്രെയിൻ ഒരു വെറും തീവണ്ടിയല്ല, അതൊരു അനുഭവമാണ്. ചരിത്രവും പ്രകൃതിഭംഗിയും എഞ്ചിനീയറിംഗ് അത്ഭുതങ്ങളുമെല്ലാം ഈ യാത്രയിൽ ഒന്നിക്കുന്നു. തേയിലത്തോട്ടങ്ങൾക്കും മനോഹരമായ താഴ്‌വരകൾക്കും നടുവിലൂടെയുള്ള ഈ യാത്ര നമ്മളെ തിരക്കുകളിൽ നിന്ന് മാറ്റി പഴയ കാലത്തേക്ക് കൂട്ടിക്കൊണ്ടുപോകും. ആവി എഞ്ചിന്റെ ശബ്ദവും വളഞ്ഞുപുളഞ്ഞുപോകുന്ന പാളങ്ങളും ഒരു നൊസ്റ്റാൾജിക് ഫീൽ തരും എന്നതിൽ സംശയമില്ല.

ചരിത്രവും നിർമ്മാണവും

നീലഗിരി കുന്നുകളിലേക്ക് ഒരു റെയിൽപാത എന്ന ആശയം ബ്രിട്ടീഷുകാരുടെ കാലത്ത് 1854-ലാണ് ആദ്യമായി വരുന്നത്. 1873-ൽ മദ്രാസ്-കോയമ്പത്തൂർ-മേട്ടുപ്പാളയം പാത തുറന്നതോടെ, അന്നത്തെ നീലഗിരി ജില്ലാ എഞ്ചിനീയറായിരുന്ന ജെ.എൽ.എൽ. മൊറാൻ്റ് ആണ് മലമുകളിലേക്ക് ഒരു റെയിൽപാതയുടെ സാധ്യതകൾ കാര്യമായി പഠിക്കാൻ തുടങ്ങിയത്.

1899-ൽ തുറന്ന ഈ പാതയുടെ നിർമ്മാണം പല ഘട്ടങ്ങളിലായാണ് പൂർത്തിയായത്. 27.34 കിലോമീറ്റർ ദൂരമുള്ള മേട്ടുപ്പാളയം-കൂനൂർ പാത 1989 ജൂൺ 15-ന് തുറന്നു. 17.48 കിലോമീറ്റർ വരുന്ന കൂനൂർ-ഫേൺഹിൽ പാത 1908 സെപ്റ്റംബർ 15-നും, 1.79 കിലോമീറ്റർ വരുന്ന ഫേൺഹിൽ-ഉദഗമണ്ഡലം പാത 1908 ഒക്ടോബർ 15-നും യാത്രക്കാർക്കായി തുറന്നുകൊടുത്തു.

എഞ്ചിനീയറിംഗ് വിസ്മയം

മേട്ടുപ്പാളയത്തിനും ഉദഗമണ്ഡലത്തിനും ഇടയിൽ 16 തുരങ്കങ്ങളും 257 പാലങ്ങളും 209 വളവുകളുമുണ്ട്. ഇന്ത്യയിലെ ഒരേയൊരു 'റാക്ക് ആൻഡ് പിനിയൻ' സിസ്റ്റം ഉപയോഗിക്കുന്ന റെയിൽവേയാണിത്. പൽച്ചക്രങ്ങൾ ഉപയോഗിച്ച് കുത്തനെയുള്ള കയറ്റം കയറാൻ സഹായിക്കുന്ന ഈ സാങ്കേതികവിദ്യയാണ് ഈ പാതയെ ഏഷ്യയിലെ ഏറ്റവും ചെങ്കുത്തായ റെയിൽവേ ലൈനാക്കി മാറ്റുന്നത്. 326 മീറ്റർ ഉയരത്തിൽ നിന്ന് 2203 മീറ്റർ ഉയരത്തിലേക്ക്, മൊത്തം 46 കിലോമീറ്റർ ദൂരമാണ് ഈ ട്രെയിൻ സഞ്ചരിക്കുന്നത്.

എഞ്ചിനുകളും കോച്ചുകളും

മേട്ടുപ്പാളയത്തിനും കൂനൂരിനും ഇടയിൽ ഓടുന്നത് 'എക്സ് ക്ലാസ്' ആവി എഞ്ചിനുകളാണ്. തുടക്കത്തിൽ സ്വിറ്റ്സർലൻഡിൽ നിന്ന് ഇറക്കുമതി ചെയ്തിരുന്ന ഈ എഞ്ചിനുകൾ ഇപ്പോൾ തിരുച്ചിറപ്പള്ളിയിലെ ഗോൾഡൻ റോക്ക് വർക്ക്ഷോപ്പിലാണ് നിർമ്മിക്കുന്നത്. കൂനൂരിനും ഉദഗമണ്ഡലത്തിനും ഇടയിൽ ഡീസൽ എഞ്ചിനുകളാണ് ഉപയോഗിക്കുന്നത്. ഈ എഞ്ചിനുകളുടെയെല്ലാം അറ്റകുറ്റപ്പണികൾ നടക്കുന്നത് കൂനൂരിലെ സ്റ്റീം ലോക്കോ ഷെഡ്ഡിലാണ്.

യാത്രക്കാർക്കായി 27 കോച്ചുകളും, പാളങ്ങളുടെയും മറ്റും അറ്റകുറ്റപ്പണികൾക്ക് ആവശ്യമായ സാധനങ്ങൾ കൊണ്ടുപോകാൻ 13 വാഗണുകളും നീലഗിരി മൗണ്ടൻ റെയിൽവേയുടെ ഭാഗമായുണ്ട്. ഇവയുടെയെല്ലാം പരിപാലനം മേട്ടുപ്പാളയത്തെ കാര്യേജ് & വാഗൺ ഡിപ്പോയിലാണ്.

യുനെസ്കോ അംഗീകാരവും പൈതൃക സംരക്ഷണവും

പഴയ സ്റ്റേഷനുകൾ, സിഗ്നൽ സംവിധാനങ്ങൾ, എഞ്ചിനുകൾ, കോച്ചുകൾ എന്നിവയെല്ലാം വലിയ മാറ്റങ്ങളില്ലാതെ ഇന്നും ഉപയോഗിക്കുന്നതുകൊണ്ടാണ് നീലഗിരി മൗണ്ടൻ റെയിൽവേ ഒരു പൈതൃക അത്ഭുതമായി നിലനിൽക്കുന്നത്. ഇതിന്റെ ഭാഗമായി 2005-ൽ യുനെസ്കോ ഇതിനെ ലോക പൈതൃക പട്ടികയിൽ ഉൾപ്പെടുത്തി. ഈ പൈതൃകം സംരക്ഷിക്കുന്നതിനായി 2015 ഒക്ടോബർ 10-ന് മേട്ടുപ്പാളയത്തും 2018 ജൂൺ 15-ന് ഉദഗമണ്ഡലത്തും മ്യൂസിയങ്ങൾ തുറന്നിട്ടുണ്ട്. ഈ മ്യൂസിയങ്ങൾ വിനോദസഞ്ചാരികളെയും യാത്രക്കാരെയും ഒരുപോലെ ആകർഷിക്കുന്നു.

ട്രെയിൻ സർവീസുകൾ

ദിവസവും മേട്ടുപ്പാളയം-ഉദഗമണ്ഡലം-മേട്ടുപ്പാളയം റൂട്ടിൽ ഒരു സർവീസുണ്ട്. ഇതുകൂടാതെ, കൂനൂരിനും ഉദഗമണ്ഡലത്തിനും ഇടയിൽ ദിവസവും മൂന്ന് ജോഡി ട്രെയിനുകൾ ഓടുന്നുണ്ട്. വേനൽക്കാലത്തും മറ്റ് അവധി ദിവസങ്ങളിലും പ്രത്യേക സർവീസുകളും നടത്താറുണ്ട്.

അമൃത് ഭാരത് പദ്ധതി; പുതിയ മുഖവും പുതിയ സർവീസുകളും

നീലഗിരി മൗണ്ടൻ റെയിൽവേയുടെ ഭാഗമായ മേട്ടുപ്പാളയം, കൂനൂർ, ഉദഗമണ്ഡലം സ്റ്റേഷനുകൾ 'അമൃത് ഭാരത് സ്റ്റേഷൻ' പദ്ധതിക്ക് കീഴിൽ നവീകരിക്കുകയാണ്. സ്റ്റേഷനുകളുടെ പൈതൃക തനിമ നിലനിർത്തിക്കൊണ്ടാണ് നവീകരണം. ഈ പദ്ധതിയുടെ ഭാഗമായി പ്രധാനമന്ത്രി നരേന്ദ്ര മോദി മാർച്ച് 11-ന്, തിരുച്ചിറപ്പള്ളിയിൽ നിന്ന് വീഡിയോ കോൺഫറൻസിംഗിലൂടെ രണ്ട് അമൃത് ഭാരത് എക്സ്പ്രസുകൾ ഉൾപ്പെടെ അഞ്ച് പുതിയ ട്രെയിൻ സർവീസുകൾക്ക് തുടക്കം കുറിച്ചിരുന്നു.

നാഗർകോവിൽ-ചർലപ്പള്ളി അമൃത് ഭാരത് എക്സ്പ്രസ് തെക്കൻ തമിഴ്നാടിനെയും തെലങ്കാനയെയും ബന്ധിപ്പിക്കും. കോയമ്പത്തൂരിലെ വ്യവസായ മേഖലയെ കിഴക്കൻ ഇന്ത്യയിലെ കൽക്കരി-സ്റ്റീൽ ഹൃദയഭൂമിയുമായി ആദ്യമായി നേരിട്ട് ബന്ധിപ്പിക്കുന്നതാണ് പോടന്നൂർ-ധൻബാദ് അമൃത് ഭാരത് എക്സ്പ്രസ്.

രാമേശ്വരം-മംഗളൂരു എക്സ്പ്രസ്, തിരുനെൽവേലി-മംഗളൂരു എക്സ്പ്രസ്, മയിലാടുതുറൈ-തിരുവാരൂർ-കാരൈക്കുടി എന്നിവയാണ് മറ്റ് മൂന്ന് പുതിയ സർവീസുകൾ. ഈ പുതിയ ട്രെയിൻ സർവീസുകൾ ഈ പ്രദേശങ്ങളിലെ ജനങ്ങൾക്ക് വലിയ പ്രയോജനം ചെയ്യുമെന്നാണ് വിലയിരുത്തൽ.

ഗോവയിലെ കിങ്ഫിഷ് റവ ഫ്രൈ; ഈ 7 ഹോട്ടലുകളിൽ കിട്ടും, കിടിലൻ ടേസ്റ്റ്!

Deepu Divakaran — Thu, 30 Apr 2026 13:03:23 +0530

പുറമെ നല്ല മൊരിഞ്ഞ്, അകത്ത് നല്ല ജ്യൂസിയായി, റവയിൽ പൊതിഞ്ഞ ഒരു പ്രത്യേക മസാലക്കൂട്ട്. ഇതാണ് ഗോവയുടെ സ്വന്തം കിങ്ഫിഷ് റവ ഫ്രൈ. 'സുർമായി ഫ്രൈ' എന്നും 'കിങ്ഫിഷ് ഫ്രൈ' എന്നും ഇതിന് പേരുണ്ട്. ഈ വിഭവം കഴിക്കാതെ ഒരു ഗോവൻ യാത്രയും പൂർണമാകില്ല. ഗോവയിൽ ഈ വിഭവം കിട്ടുന്ന ഏറ്റവും മികച്ച 7 സ്ഥലങ്ങൾ പരിചയപ്പെടാം, വില വിവരങ്ങൾ സഹിതം.

1. മാർട്ടിൻസ് കോർണർ സീഫുഡ് റെസ്റ്റോറൻ്റ്

ഏകദേശ വില: 450–650 രൂപ

ഗോവയിലെ ഒരു ലെജൻഡറി ഹോട്ടലാണിത്. സംസ്ഥാനത്തെ ഏറ്റവും രുചികരമായ കിങ്ഫിഷ് റവ ഫ്രൈകളിലൊന്ന് ഇവിടെ കിട്ടും. നല്ല കട്ടിയുള്ള, ഫ്രഷ് മീൻ കഷ്ണങ്ങൾ ക്രിസ്പിയായി വറുത്താണ് ഇവർ നൽകുന്നത്.

2. ദി ഫിഷർമാൻസ് വാർഫ് ഗോവൻ റെസ്റ്റോറൻ്റ്

ഏകദേശ വില: 400–550 രൂപ

പുഴയുടെ തീരത്തുള്ള ഈ ഹോട്ടൽ സീഫുഡിന് പേരുകേട്ടതാണ്. ഇവിടുത്തെ കിങ്ഫിഷ് റവ ഫ്രൈ ടൂറിസ്റ്റുകൾക്കും നാട്ടുകാർക്കും ഒരുപോലെ ഇഷ്ടമാണ്.

3. റിറ്റ്സ് ക്ലാസിക് പനാജിം സീഫുഡ് റെസ്റ്റോറൻ്റ്

ഏകദേശ വില: 350–500 രൂപ

പരമ്പരാഗത ഗോവൻ സീഫുഡിന് പേരുകേട്ട സ്ഥലമാണ് റിറ്റ്സ് ക്ലാസിക്. ഇവിടുത്തെ കിങ്ഫിഷ് റവ ഫ്രൈ, മീൻകറി - ചോറ് കോംബോയ്ക്കൊപ്പം ഒന്നൊന്നര കോമ്പിനേഷനാണ്.

4. മംസ് കിച്ചൻ ഗോവൻ റെസ്റ്റോറൻ്റ്

ഏകദേശ വില: 450–600 രൂപ

കുറച്ചുകൂടി തനത് ഗോവൻ രുചികൾ ഇഷ്ടമുള്ളവർക്ക് മംസ് കിച്ചണിലേക്ക് പോകാം. തനി നാടൻ റെസിപ്പികൾ ഉപയോഗിച്ചാണ് ഇവർ കിങ്ഫിഷ് റവ ഫ്രൈ തയ്യാറാക്കുന്നത്.

5. വിനായക് ഫാമിലി റെസ്റ്റോറന്റ് സീഫുഡ് റെസ്റ്റോറൻ്റ്

ഏകദേശ വില: 300–450 രൂപ

നോർത്ത് ഗോവയിൽ നാട്ടുകാരുടെ പ്രിയപ്പെട്ട ഇടമാണിത്. കുറഞ്ഞ വിലയിൽ നല്ല രുചിയുള്ള സീഫുഡ് ഇവിടെ കിട്ടും. കിങ്ഫിഷ് ഫ്രൈ ഇവിടുത്തെ ഒരു സ്പെഷ്യലാണ്.

6. സീബോപ് ബൈ ദി സീ

ഏകദേശ വില: 450–650 രൂപ

ബീച്ചിന്റെ കാഴ്ചകൾ കണ്ട് കിങ്ഫിഷ് റവ ഫ്രൈ കഴിക്കാൻ പറ്റിയ സ്ഥലമാണിത്. ഫ്രഷ് മത്സ്യത്തിനും ശാന്തമായ അന്തരീക്ഷത്തിനും പേരുകേട്ടതാണ് ഈ കടലോര റെസ്റ്റോറന്റ്.

7. ആനന്ദ് സീ ഫുഡ് ബാർ & റെസ്റ്റോറൻ്റ്, അഞ്ജുന

ഏകദേശ വില: 300–500 രൂപ

നോർത്ത് ഗോവയിലെ ഒരു ‘ഹിഡൻ ജെം’ ആണിത്. നല്ല അളവിൽ, സ്ഥിരതയുള്ള രുചിയിൽ സീഫുഡ് കിട്ടുന്നതുകൊണ്ട് നാട്ടുകാർ നിർദേശിക്കുന്ന ഒരിടം.

ഗോവ കിങ് റവ ഫ്രൈ

ഗോവയിൽ കിങ്ഫിഷ് റവ ഫ്രൈ കഴിക്കാൻ സ്ഥലങ്ങൾക്ക് ഒരു പഞ്ഞവുമില്ല. വലിയ ഹോട്ടലുകൾ മുതൽ ചെറിയ നാടൻ കടകൾ വരെ നീളുന്നു ഈ പട്ടിക. മീനിൻ്റെ വലുപ്പവും മാർക്കറ്റ് വിലയും അനുസരിച്ച് വിലയിൽ മാറ്റങ്ങൾ വരാം. പക്ഷെ മേൽപറഞ്ഞ ഓരോ സ്ഥലത്തും കിട്ടുന്നത് നല്ല ഫ്രഷ് ഗോവൻ സ്റ്റൈൽ ഫിഷ് ഫ്രൈ ആണെന്ന് ഉറപ്പിക്കാം. ഇവിടെ നൽകിയിരിക്കുന്ന വിലകൾ ഏകദേശമാണ്. സീസണും മീനിന്റെ മാർക്കറ്റ് വിലയും അനുസരിച്ച് ഇതിൽ മാറ്റങ്ങൾ വരാം. ഗോവയിലെ പ്രമുഖ സീഫുഡ് റെസ്റ്റോറന്റുകളിലെല്ലാം, പ്രത്യേകിച്ച് തനത് ഗോവൻ വിഭവങ്ങൾ നൽകുന്നയിടങ്ങളിൽ കിങ്ഫിഷ് റവ ഫ്രൈ മെനുവിൽ വ്യാപകമായി കാണാം.

ബജറ്റിൽ ഒതുങ്ങും, രുചിയൂറും; ഗോവയിൽ കറങ്ങുമ്പോൾ ഭക്ഷണം കഴിക്കാൻ പറ്റിയ ഇടങ്ങൾ

Deepu Divakaran — Wed, 29 Apr 2026 17:26:19 +0530

ഗോവൻ യാത്രക്കിടെ പരമ്പരാഗത ഗോവൻ സീഫുഡ് കഴിക്കണോ അല്ലെങ്കിൽ അൽപം റൊമാൻ്റിക്കായി കടലോരത്തിരുന്ന് ഡിന്നർ ആയാലോ? രുചിയും അനുഭവവും സമ്മേളിക്കുന്ന റെസ്റ്റോറൻ്റുകൾ സൗത്ത് ഗോവയിൽ ഏറെയുണ്ട്. ഗോവൻ രുചികൾ ആസ്വദിക്കാനാകുന്ന സൗത്ത് ഗോവയിലെ മികച്ച ഇടങ്ങൾ അറിയാം.

വിശാലമായ കടൽപരപ്പ് കണ്ട് സമാധാനത്തോടെ ഭക്ഷണം കഴിക്കണമെങ്കിൽ കടലോരത്തെ ഈ റെസ്റ്റോറൻ്റ് തിരഞ്ഞെടുക്കാം. സീഫുഡ് പ്ലേറ്ററുകൾക്കും കോക്ക്ടെയ്ലുകൾക്കും പേരുകേട്ട ഈ റെസ്റ്റോറന്റ്, മനോഹരമായ സൂര്യാസ്തമയ കാഴ്ച കണ്ട് രുചികൾ നുണയാൻ പറ്റിയ ഇടം കൂടിയാണ്.

താങ്ങാനാകുന്ന വിലയിൽ രുചിയേറിയ ഗോവൻ, ഇന്ത്യൻ, സീഫുഡ് വിഭവങ്ങൾ ആസ്വദിക്കാൻ പറ്റുന്ന റെസ്റ്റോറന്റാണ് പെൻ്റഗൺ. കുടുംബത്തോടൊപ്പമാണ് ഭക്ഷണം കഴിക്കാൻ പദ്ധതിയിടുന്നതെങ്കിൽ ഇത് മികച്ച ഇടം തന്നെ.

പരമ്പരാഗത ഗോവൻ രുചികൾ ആസ്വദിക്കാനാണ് ആഗ്രഹമെങ്കിൽ കവറ്റിന നിങ്ങൾക്ക് മികച്ച ഡൈനിങ് അനുഭൂതി പകരും. തദ്ദേശീയ രുചികളും ആധുനിക പാചകരീതികളും കോർത്തിണക്കി ഷെഫ് അവിനാഷ് മാ‍ർട്ടിൻസ് ഒരുക്കുന്ന വിഭവങ്ങൾ ഭക്ഷണപ്രേമികൾക്ക് മികച്ച ഒരു ഓപ്ഷൻ തന്നെയാണ്.

ആഡംബര റിസോർട്ടിൽ സ്ഥിതിചെയ്യുന്ന ദ റെഡ് ജി‍ഞ്ചർ സൗത്ത് ഗോവയിൽ ഏഷ്യൻ വിഭവങ്ങൾ ആസ്വദിക്കാൻ പറ്റിയ ഇടമാണ്. സുഷി മുതൽ തായ് കറികൾ വരെ ലഭ്യമാകുന്ന ദ റെഡ് ജിഞ്ചറിലെ ചാരുതയാർന്ന അകത്തളങ്ങളും മികച്ച നിലവാരമുള്ള വിഭവങ്ങളും ഭക്ഷണപ്രേമികൾക്ക് പുതുമയാകും.

ഗോവൻ, സീഫുഡ് വിഭവങ്ങളും കാഴ്ചാനുഭൂതിയും ഒരുമിക്കുന്ന പ്രമുഖ റെസ്റ്റോറൻ്റാണ് ദ ഫിഷർമൻസ് വാ‍ർഫ്. അസ്തമയ സൂര്യനെ കണ്ട് വിഭവങ്ങൾ ആസ്വദിക്കാൻ പറ്റിയ ഇടം. ഇവിടുത്തെ ഞണ്ടും മീൻ കറിയും ചോറുമൊക്കെ നിരവധി പേർക്ക് ഇഷ്ടപ്പെട്ടവയാണ്.

പരമ്പരാഗത ഗോവൻ രുചികൾക്കും സീഫുഡിനും മികച്ച അന്തരീക്ഷത്തിനും പേരുകേട്ടതാണ് മാർട്ടിൻ കോർണർ. ഇവിടുത്തെ പ്രോൺ ബാൽചാവ്, റെച്ചിയാഡോ ഫിഷ്, ക്രാബ് മസാല എന്നിവ 'മസ്റ്റ് ട്രൈ' വിഭവങ്ങളാണ്. ഗോവയിലെ ഐകോണിക് റെസ്റ്റോറൻ്റുകളിൽ ഒന്നാണ് മാ‍ർട്ടിൻസ് കോർണർ.

കടലോരത്ത് ഒരു അടിപൊളി ഡൈനിങ് ആണ് ആഗ്രഹിക്കുന്നതെങ്കിൽ ദ സതേൺ ഡെക്ക് ഒരു പറ്റിയ ഇടമാണ്. സീഫുഡ്, കോക്ക്ടെയിലുകൾ, ഡെസേട്ടുകൾ തുടങ്ങിയവ ഇവിടുത്തെ മെനുവിൽനിന്ന് ഒഴിച്ചുകൂടാനാവാത്ത വിഭവങ്ങളാണ്.

ഗോവയിൽ എത്തി ഇറ്റാലിയൻ രുചികൾ ആസ്വദിക്കാൻ ആഗ്രഹമുണ്ടെങ്കിൽ ഗുഡ്ഫെല്ലാസ് പറ്റിയ ഇടമാണ്. വുഡ് ഫയർഡ് പിസകൾ, ഫെഷ് പാസ്ത, ഇറ്റാലിയൻ രുചികൾ തുടങ്ങിയവ ഗുഡ്ഫെല്ലാസ് വിളമ്പിവരുന്നു. സൗത്ത് ഗോവയിൽ ഗോവൻ ഇതര ഡഡൈനിങ്ങിന് പറ്റിയ ഇടങ്ങളിൽ ഒന്നുകൂടിയാണ് ഇവിടം.

സെസ്റ്റ് കഫെയിലെ ആരോഗ്യപ്രദമായ ബ്രേക്ക്ഫാസ്റ്റും ബ്രഞ്ചും ടൂറിസ്റ്റുകൾക്ക് പ്രിയപ്പെട്ടവയാണ്. സ്മൂത്തി ബൗൾ, ഷക്ഷുക, പാൻകേക്ക്, ആർട്ടിസനൽ കോഫി എന്നിവ ഭക്ഷണപ്രേമികളെ കഫെയിലേക്ക് ആകർഷിക്കുന്നു.

ചിറകുവിരിക്കാൻ നോയിഡ അന്താരാഷ്ട്ര വിമാനത്താവളം; ജൂൺ 15 മുതൽ പ്രവർത്തനമാരംഭിക്കും, ആദ്യം പറന്നുയരുക ഇൻഡിഗോ വിമാനം

Deepu Divakaran — Sat, 02 May 2026 11:37:59 +0530

ദില്ലി: രാജ്യതലസ്ഥാനത്തെയും (എൻസിആർ) വടക്കേ ഇന്ത്യയിലെയും യാത്രക്കാരെ ലക്ഷ്യമിട്ട് നിർമിച്ച നോയിഡ അന്താരാഷ്ട്ര വിമാനത്താവളം ചിറകുവിരിക്കാൻ ഒരുങ്ങുന്നു. ജൂൺ 15 മുതൽ വിമാനത്താവളം പ്രവർത്തനം ആരംഭിക്കുമെന്ന് വിമാനത്താവള അധികൃതർ അറിയിച്ചു. ബ്യൂറോ ഓഫ് സിവിൽ ഏവിയേഷൻ സെക്യൂരിറ്റിയിൽ നിന്നുള്ള അന്തിമാനുമതി ഇക്കഴിഞ്ഞ ഏപ്രിൽ മാസം 27ന് ലഭിച്ചതോടെ ആണ് വിമാനത്താവളത്തിൻ്റെ പ്രവർത്തനം തുടങ്ങാനുള്ള നടപടികളുമായി അധികൃതർ മുന്നോട്ടുനീങ്ങിയത്.

ഉത്തർ പ്രദേശിലെ ജെവാറിൽ സ്ഥിതിചെയ്യുന്ന വിമാനത്താവളത്തിൻ്റെ ഉദ്ഘാടനം പ്രധാനമന്ത്രി നരേന്ദ്ര മോദി മാർച്ച് 28ന് നിർവഹിച്ചിരുന്നു. മാർച്ച് ആറിനാണ് ഡയറക്ടറേറ്റ് ജനറൽ ഓഫ് സിവിൽ ഏവിയേഷനിൽ നിന്നുള്ള അനുമതി വിമാനത്താവളത്തിന് ലഭിച്ചത്.

ചീഫ് ഫിനാൻഷ്യൽ ഓഫീസറായ നിതു സാമ്ര ആണ് നോയിഡ അന്താരാഷ്ട്ര വിമാനത്താവളത്തിൻ്റെ ഇടക്കാല സിഇഒ. നേരത്തെ സ്വിസ് പൗരനായ ക്രിസ്റ്റോഫ് ഷ്നെൽമാൻ ആയിരുന്നു സിഇഒ. വിദേശ പൗരൻ നേതൃത്വം നൽകുന്ന വിമാനത്താവളത്തിന് അന്തിമാനുമതി നൽകാൻ ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി വിസമ്മതിച്ചതോടെ ആണ് ക്രിസ്റ്റോഫ് ഷ്നെൽമാനെ നീക്കിയതും പകരം നിതു സാമ്ര നിയമിച്ചതും.

A major milestone in the journey of Noida International Airport.We are pleased to announce that #NIAirport will commence commercial flight operations from 15th June 2026, opening a new gateway for passengers, airlines and cargo operators in the National Capital Region and North… pic.twitter.com/rQBbnO9TGX

— Noida International Airport (@NIAirport) May 1, 2026

അതേസമയം ജൂൺ 15ന് ഇൻഡിഗോയുടെ വിമാനമാണ് ആദ്യം പറയുന്നുയരുക. പിന്നീട് ആകാശ എയർ, എയർ ഇന്ത്യ എക്സ്പ്രസ് എന്നീ വിമാനക്കമ്പനികളും സർവീസ് ആരംഭിക്കും. റൂട്ടുകളും ഷെഡ്യൂളുകളും സംബന്ധിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല. ആദ്യഘട്ടത്തിൽ ആഭ്യന്തര സർവീസുകളാണ് വിമാനത്താവളം നടത്തുക. ഈ വർഷം അവസാനിക്കുന്നതിന് മുന്നോടിയായി അന്താരാഷ്ട്ര സർവീസുകൾക്കും തുടക്കമാകും. ആദ്യ വർഷം 50 മുതൽ 60 ലക്ഷം വരെ യാത്രക്കാരെ ആണ് വിമാനത്താവള അധികൃതർ പ്രതീക്ഷിക്കുന്നത്.

11,200 കോടി രൂപ ചെലവഴിച്ച് നിർമിച്ച വിമാനത്താവളത്തിൽ ഒരു റൺവേ ആണ് ഉള്ളത്. പ്രതിവർഷം 12 ദശലക്ഷം യാത്രക്കാരെ വരെ കൈകാര്യം ചെയ്യാൻ സാധിക്കുന്ന ഏക പാസഞ്ച‍ർ ടെർമിനലും വിമാനത്താവളത്തിൻ്റെ സവിശേഷതയാണ്. ഭാവിയിൽ പ്രതിവർഷം 70 ദശലക്ഷം യാത്രക്കാരെ കൈകാര്യം ചെയ്യാനുതകുന്ന തലത്തിലേക്ക് വിമാനത്താവളത്തെ ഉയർത്താനാണ് അധികൃതരുടെ പദ്ധതി.

ഗോവൻ ദമ്പതികളുടെ വേറിട്ട സംരംഭം, നാട്ടുകാർക്കും കൈത്താങ്ങ്; ടൂറിസത്തിന് പുതിയ മുഖം നൽകി 'മേക്ക് ഇറ്റ് ഹാപ്പൻ'

Deepu Divakaran — Wed, 29 Apr 2026 16:23:57 +0530

ജീവിതത്തിലെ ചില അനിശ്ചിതത്വങ്ങൾക്കിടയിൽ സ്വന്തം വഴി തേടിയിറങ്ങിയ രണ്ടുപേർ. ഇന്ന് അവരുടെ യാത്ര ഇന്ത്യയിലെ ഏറ്റവും മികച്ച യാത്രാനുഭവങ്ങൾ നൽകുന്ന സംരംഭങ്ങളിലൊന്നായി മാറിയിരിക്കുകയാണ്. ഹെറിറ്റേജ് വാക്കുകളിലൂടെയും നാടൻ ഭക്ഷണം ആസ്വദിച്ചുള്ള യാത്രകളിലൂടെയും തനത് സംസ്കാരം തൊട്ടറിഞ്ഞും 'മേക്ക് ഇറ്റ് ഹാപ്പൻ' എന്ന ഈ ഗോവൻ സംരംഭം ടൂറിസത്തിന് ഒരു പുതിയ മുഖം നൽകുകയാണ്. ഓരോ യാത്രയിലും നാട്ടുകാരെയും അവരുടെ കഥകളെയും ഒപ്പം കൂട്ടിയാണ് ഇവർ മുന്നോട്ടുപോകുന്നത്.

മരിയ വിക്ടർ തുടക്കമിട്ട്, പിന്നീട് മുരളി ശങ്കരൻ കൂടി പങ്കാളിയായ ഈ സ്ഥാപനം ഇതുവരെ 65,000ത്തിലധികം സഞ്ചാരികൾക്ക് ആതിഥേയത്വം വഹിച്ചു. ഗോവ, ബെംഗളൂരു തുടങ്ങിയ സ്ഥലങ്ങളിലെ സാധാരണക്കാർക്ക് മികച്ച വരുമാന മാർഗം കൂടിയാണ് ഇന്ന് 'മേക്ക് ഇറ്റ് ഹാപ്പൻ'.

കോർപറേറ്റ് ജീവിതത്തിൽനിന്ന് യാത്രകളിലേക്ക്

‘മേക്ക് ഇറ്റ് ഹാപ്പൻ’ ഒരു ബ്രാൻഡായി മാറുന്നതിനും മുൻപേ മരിയ വിക്ടറിൻ്റെ യാത്രകൾ തുടങ്ങിയിരുന്നു. മികച്ചൊരു കോർപറേറ്റ് ജോലി ഉണ്ടായിരുന്നെങ്കിലും താൻ ചെയ്യുന്ന ജോലിയിൽ അവർ പൂർണ സംതൃപ്തയായിരുന്നില്ല.

2011ൽ അവർ ജോലി ഉപേക്ഷിച്ച് ഇന്ത്യയിലുടനീളം യാത്രകൾ തുടങ്ങി. ലഡാക്ക്, സ്പിതി മുതൽ നാഗാലാൻഡ്, ഗുജറാത്ത് വരെ അവർ സഞ്ചരിച്ചു. വെറുതെ സ്ഥലങ്ങൾ കാണുന്നതിലുപരി അവിടുത്തെ ആളുകളെയും അവരുടെ ജീവിതരീതികളെയും സംസ്കാരത്തെയും അടുത്തറിയാനായിരുന്നു മരിയയുടെ ശ്രമം. ചെറുസംഘങ്ങളായി യാത്രകൾ സംഘടിപ്പിച്ചു തുടങ്ങിയപ്പോൾ, വെറുതെ സ്ഥലങ്ങൾ കണ്ടുപോകുന്നതിനപ്പുറം ആഴത്തിലുള്ള അനുഭവങ്ങളാണ് ആളുകൾ ആഗ്രഹിക്കുന്നതെന്ന് അവർ തിരിച്ചറിഞ്ഞു.

"യാത്ര എനിക്കൊരിക്കലും സ്ഥലങ്ങൾ കണ്ടുതീർക്കലായിരുന്നില്ല. ലോകത്തെ അടുത്തറിയാനും അതിൽ ലയിച്ചുചേരാനുമുള്ള ഒരവസരമായിരുന്നു അത്"- മരിയ പറയുന്നു. ഈ ചിന്തയിൽ നിന്നാണ് 'മേക്ക് ഇറ്റ് ഹാപ്പൻ' എന്ന ചെറിയ ട്രാവൽ ക്ലബ്ബിന് തുടക്കമിടുന്നത്. നാട്ടുകാരുമായി ചേർന്ന് വ്യത്യസ്തമായ യാത്രാനുഭവങ്ങൾ നൽകുക എന്നതായിരുന്നു ലക്ഷ്യം.

ജീവിതം മാറ്റിമറിച്ച ഗ്രാമീണാനുഭവം

നേപ്പാളിലെ ധംപുസ് ഗ്രാമത്തിലേക്കുള്ള യാത്രയ്ക്കിടെയുണ്ടായ ഒരനുഭവമാണ് മരിയയുടെ ജീവിതത്തിൽ വഴിത്തിരിവായത്. അവിടുത്തെ ഒരു ഷാൾ വിൽപ്പനക്കാരൻ തൻ്റെ ഫോട്ടോ എടുക്കാൻ ആവശ്യപ്പെട്ടുകൊണ്ട് അവരോട് പറഞ്ഞു: "ഞങ്ങൾക്ക് ലോകം കാണാൻ കഴിഞ്ഞില്ലെങ്കിലും ലോകത്തിന് ഞങ്ങളെ കാണാമല്ലോ”.

ആ ഒരൊറ്റ നിമിഷം ടൂറിസത്തെക്കുറിച്ചുള്ള അവരുടെ കാഴ്ചപ്പാട് മാറ്റിമറിച്ചു. യാത്രകൾ സഞ്ചാരികൾക്ക് മാത്രമല്ല, ആതിഥേയത്വം വഹിക്കുന്ന സമൂഹത്തിനും പ്രയോജനകരമാകണമെന്ന് അവർ തിരിച്ചറിഞ്ഞു. അങ്ങനെ, 'മേക്ക് ഇറ്റ് ഹാപ്പൻ' നാട്ടുകാർക്ക് കഥകൾ പറയാനും ആതിഥേയരാകാനും സാംസ്കാരിക അംബാസഡർമാരാകാനുമുള്ള ഒരു വേദിയായി മാറി. പൈതൃകം, ഭക്ഷണം, സംഗീതം, കൃഷി, ദൈനംദിന ജീവിതം എന്നിവയിൽ വേരൂന്നിയ അനുഭവങ്ങൾ കമ്പനി ഒരുക്കാൻ തുടങ്ങി.

ഹിമാലയത്തിൽ ഒന്നിച്ച രണ്ട് വഴികൾ

ഏകദേശം ഇതേ കാലയളവിൽ, ഗെയിമിങ് ഇൻഡസ്ട്രിയിൽ ജോലി ചെയ്തിരുന്ന മുരളി ശങ്കരനും ബാക്ക്പാക്കിങ് യാത്രകളിലൂടെ ഇന്ത്യയെ കണ്ടെത്തുകയായിരുന്നു. ലഹോൾ-സ്പിതിയിൽ വെച്ചുള്ള ഒരു യാത്രയ്ക്കിടെയാണ് ഇരുവരും കണ്ടുമുട്ടുന്നതും യാത്രാ സങ്കൽപ്പങ്ങൾ പങ്കുവെക്കുന്നതും.

2017ഓടെ മുരളി ഔദ്യോഗികമായി കമ്പനിയുടെ സഹസ്ഥാപകനായി. അതോടെ 'മേക്ക് ഇറ്റ് ഹാപ്പൻ' കൂടുതൽ ചിട്ടയായ ഒരു യാത്രാ സംരംഭമായി വളർന്നു. ഇന്ന് ഗോവയിലെ ഫോണ്ടെയ്ൻഹാസിലെ ഹെറിറ്റേജ് വാക്കുകൾ (നമ്മുടെ ഫോർട്ട് കൊച്ചിയിലെ പോലെയുള്ള അനുഭവങ്ങൾ), ദ്വീപുകളിലേക്കുള്ള യാത്രകൾ, ഫുഡ് ട്രെയിലുകൾ, ആർട്ട് വർക്ക്ഷോപ്പുകൾ എന്നിവയുൾപ്പെടെ 50ലധികം അനുഭവങ്ങൾ ഇവർ ഒരുക്കുന്നുണ്ട്.

കഥ പറഞ്ഞ് ജീവിതം പടുത്തുയർത്തുന്നു

ടൂറിസത്തിനപ്പുറം, പ്രാദേശിക സമൂഹങ്ങളിൽ തൊഴിലവസരങ്ങളും അഭിമാനവും സൃഷ്ടിക്കാൻ ഈ സംരംഭത്തിന് കഴിഞ്ഞു. കമ്പനിയുടെ വരുമാനത്തിന്റെ 50 മുതൽ 55 ശതമാനം വരെ നാട്ടുകാരായ പങ്കാളികൾക്കാണ് നൽകുന്നത്. നൂറിലധികം പേർ ഇന്ന് ഈ സംരംഭത്തിൻ്റെ ഭാഗമാണ്.

മഹാമാരിക്കാലത്ത് ജോലി നഷ്ടപ്പെട്ട പവൻ ഗൊറന്റ്‌ലയുടെ ജീവിതം മാറ്റിമറിച്ചത് ഈ സ്ഥാപനമാണ്. "ഇന്ന് ഞാൻ ടൂറുകൾക്ക് നേതൃത്വം നൽകുന്നു, ലോകത്തിന്റെ പല ഭാഗങ്ങളിൽ നിന്നുള്ള ആളുകളെ കാണുന്നു. ഇതൊരിക്കലും ഒരു ജോലിയായി തോന്നുന്നില്ല"- അദ്ദേഹം പറയുന്നു. അടുത്ത ഏതാനും വർഷങ്ങൾക്കുള്ളിൽ ഇന്ത്യയിൽ 20 സ്ഥലങ്ങളിലേക്ക് കൂടി പ്രവർത്തനം വ്യാപിപ്പിക്കാനാണ് സ്ഥാപകർ ലക്ഷ്യമിടുന്നത്. സാംസ്കാരിക പൈതൃകം സംരക്ഷിക്കുന്നതിനും സുസ്ഥിരമായ ഉപജീവനമാർഗങ്ങൾ സൃഷ്ടിക്കുന്നതിനും ഇത്തരം യാത്രാനുഭവങ്ങൾക്ക് കഴിയുമെന്നാണ് ഇവർ വിശ്വസിക്കുന്നത്.

കൈയടിച്ചാൽ കുമിളകൾ വരും, ഗോവയിലെ ഈ അത്ഭുത തടാകം കണ്ടിട്ടുണ്ടോ?

Deepu Divakaran — Sat, 02 May 2026 11:27:32 +0530

ഗോവ എന്ന് കേൾക്കുമ്പോൾ ബീച്ചുകളും പാർട്ടികളുമാണ് ഓർമ്മ വരുന്നതെങ്കിൽ, അതൊന്നുമല്ലാത്ത ഒരു ഗോവയുണ്ട്. അങ്ങനെയൊരു സ്ഥലമാണ് സൗത്ത് ഗോവയിലെ സാംഗ്വേ താലൂക്കിലുള്ള നേത്രാവലി എന്ന ഗ്രാമം. ഇവിടെയാണ് ‘ബുഡ്ബുദ്യഞ്ചി താലി’ എന്നൊരു അത്ഭുത പ്രതിഭാസമുള്ളത്. 'കുമിളകളുടെ തടാകം' എന്നാണ് ഈ പേരിനർത്ഥം. 400 വർഷത്തിലേറെ പഴക്കമുണ്ടെന്ന് കരുതുന്ന ഈ ശുദ്ധജല തടാകത്തിൻ്റെ പ്രത്യേകത ശബ്ദത്തോടുള്ള അതിൻ്റെ പ്രതികരണമാണ്. നിങ്ങൾ കൈയടിക്കുകയോ ഉറക്കെ സംസാരിക്കുകയോ ചെയ്താൽ മതി, ശാന്തമായ ജലോപരിതലത്തിൽനിന്ന് കുമിളകൾ പൊങ്ങിവരാൻ തുടങ്ങും. ഇതൊരു മാന്ത്രിക അനുഭവം പോലെയാണ് സഞ്ചാരികൾക്ക് തോന്നുക.

ശബ്ദത്തോട് പ്രതികരിക്കുന്ന തടാകം

ആദ്യകാഴ്ചയിൽ നമ്മുടെ നാട്ടിലെ പടവുകളുള്ള കുളങ്ങൾ പോലെയാണ് ഈ തടാകം. ചെങ്കല്ലിൽ തീർത്ത ഭിത്തികളും ഭംഗിയായി കൊത്തിയെടുത്ത ഗ്രാനൈറ്റ് പടവുകളും നടുവിലൊരു തട്ടുമൊക്കെയുണ്ട്. ചുറ്റും പച്ചപ്പും സുഗന്ധവ്യഞ്ജന തോട്ടങ്ങളും നിറഞ്ഞ ശാന്തമായ ഒരിടം. എന്നാൽ ശബ്ദമെത്തുന്നതോടെയാണ് ഇവിടുത്തെ യഥാർത്ഥ കൗതുകം തുടങ്ങുന്നത്. ഒരു ചെറിയ കൈയടി പോലും വെള്ളത്തിൽ ചലനങ്ങളുണ്ടാക്കും, കുമിളകൾ വേഗത്തിൽ മുകളിലേക്ക് വരും. ശബ്ദം കൂടുന്നതിന് അനുസരിച്ച് കുമിളകളുടെ എണ്ണവും കൂടും.

ഇവിടെത്തുന്ന സഞ്ചാരികളും നാട്ടുകാരും ഈ കാഴ്ചയിൽ അദ്ഭുതപ്പെട്ട് വീണ്ടും വീണ്ടും കൈയടിക്കുന്നത് കാണാം. കുട്ടികൾക്ക് ഇതൊരു കളിസ്ഥലമാണെങ്കിൽ, ആദ്യമായി ഇവിടെയെത്തുന്നവർക്ക് ഇതൊരു വിസ്മയമാണ്.

നാട്ടുകാരുടെ അനുഭവങ്ങൾ

ബുഡ്ബുദ്യഞ്ചി താലി സന്ദർശിച്ച പലരും ഇതൊരു മറക്കാനാവാത്ത അനുഭവമാണെന്ന് പറയുന്നു. രസകരമായ കാര്യം, ഈ പ്രദേശത്തുള്ള പലർക്കും ഈ തടാകത്തെക്കുറിച്ച് വലിയ അറിവില്ലായിരുന്നു എന്നതാണ്. പതിറ്റാണ്ടുകളായി അടുത്ത് താമസിച്ചിട്ടും ഈയടുത്താണ് ഇങ്ങനെയൊരു സ്ഥലത്തെക്കുറിച്ച് അറിഞ്ഞതെന്ന് ചിലർ സമ്മതിക്കുന്നു. ഗോവയിലെ അധികം അറിയപ്പെടാത്ത ഒരിടം എന്ന ഖ്യാതിക്ക് ഇതും ഒരു കാരണമാണ്.

ശാസ്ത്രമോ വിശ്വാസമോ?

ഈ പ്രതിഭാസത്തിന് പിന്നിൽ ശാസ്ത്രീയമായ കൗതുകങ്ങളും പ്രാദേശിക വിശ്വാസങ്ങളുമുണ്ട്. തടാകത്തിന്റെ അടിത്തട്ടിൽ കാർബൺ ഡയോക്സൈഡ്, സൾഫർ ഡയോക്സൈഡ് പോലുള്ള വാതകങ്ങൾ കുടുങ്ങിക്കിടക്കുന്നുണ്ടാവാം എന്നാണ് വിദഗ്ധർ പറയുന്നത്. ശബ്ദതരംഗങ്ങൾ ഉണ്ടാക്കുന്ന പ്രകമ്പനത്തിൽ ഈ വാതകങ്ങൾ കുമിളകളായി പുറത്തുവരുന്നതാകാം. സാധാരണ ഇത്തരം സാഹചര്യങ്ങളിൽ കാണുന്ന മീഥേൻ വാതകം ആകാൻ സാധ്യതയില്ല, കാരണം തടാകത്തിൽ ധാരാളം മത്സ്യങ്ങളുണ്ട്.

എന്നാൽ നാട്ടുകാരുടെ വിശ്വാസം മറ്റൊരു തരത്തിലാണ്. തടാകത്തിനടിയിൽ ഒരു ദൈവമുണ്ടെന്നും കൈയടിക്കുമ്പോൾ ആ ദൈവം പ്രതികരിക്കുന്നതാണെന്നും ചിലർ വിശ്വസിക്കുന്നു. ഗോപിനാഥ് ക്ഷേത്രത്തിന്റെ സാമീപ്യം കാരണം ഇതിനെ ശ്രീകൃഷ്ണനുമായി ബന്ധപ്പെടുത്തുന്നവരുമുണ്ട്. കൃത്യമായ ഒരു വിശദീകരണം ഇല്ലാത്തതുകൊണ്ട് തന്നെ ഈ നിഗൂഢത ആസ്വദിക്കാനാണ് പലർക്കും ഇഷ്ടം.

ചരിത്രപരവും സാംസ്കാരികവുമായ പ്രാധാന്യം

ബുഡ്ബുദ്യാഞ്ചി താലി ഒരു പ്രകൃതി വിസ്മയം മാത്രമല്ല, ഗോവയുടെ സമ്പന്നമായ സാംസ്കാരിക പൈതൃകത്തിൻ്റെ ഭാഗം കൂടിയാണ്. അടുത്തുള്ള ഗോപിനാഥ് ക്ഷേത്രത്തിന് നൂറ്റാണ്ടുകളുടെ പഴക്കമുണ്ടെന്ന് കരുതപ്പെടുന്നു. ശിലാഹാര, കദംബ രാജവംശങ്ങളുമായി ബന്ധപ്പെട്ട വാസ്തുവിദ്യാ ഘടകങ്ങൾ ഇവിടെ കാണാം. പിന്നീട് രാജാ ജയകേശി ഒന്നാമന്റെ സംഭാവനകളും ഇതിലുണ്ടെന്ന് പറയപ്പെടുന്നു.

ക്ഷേത്രത്തിന് പിന്നിലുള്ള പാറയിൽ കൊത്തിയ ശിവലിംഗങ്ങൾ ഈ സ്ഥലം പണ്ടുമുതലേ പുണ്യമായി കണക്കാക്കപ്പെട്ടിരുന്നു എന്നതിന് തെളിവാണ്. ക്ഷേത്രത്തിന്റെ ലളിതമായ രൂപകൽപനയെ പ്രശസ്തമായ താംബ്ഡി സുർള ക്ഷേത്രവുമായി താരതമ്യം ചെയ്യാറുണ്ട്. ഇവിടുത്തെ യഥാർത്ഥ വിഗ്രഹം ഇപ്പോൾ ഗോവ സ്റ്റേറ്റ് മ്യൂസിയത്തിൽ സൂക്ഷിച്ചിട്ടുണ്ട്.

തിരക്കുകളിൽ നിന്നൊഴിഞ്ഞ് ശാന്തമായ ഒരിടം

ഗോവയിലെ തിരക്കേറിയ ബീച്ചുകളിൽ നിന്നും നൈറ്റ് ലൈഫ് കേന്ദ്രങ്ങളിൽ നിന്നും വ്യത്യസ്തമായി തികച്ചും സമാധാനപരമായ ഒരന്തരീക്ഷമാണ് ഇവിടെയുള്ളത്. അടുത്ത കാലത്തായി റോഡുകളും ഇരിപ്പിടങ്ങളും പോലുള്ള സൗകര്യങ്ങൾ മെച്ചപ്പെട്ടിട്ടുണ്ടെങ്കിലും, ഈ പ്രദേശം അതിന്റെ തനിമ നിലനിർത്തുന്നു. വലിയ ആൾക്കൂട്ടമില്ലാതെ ഈ സ്ഥലത്തിന്റെ ഭംഗി ആസ്വദിക്കാൻ കഴിയുമെന്നതാണ് പ്രധാന ആകർഷണം.

നാച്ചുറൽ സ്പാ അനുഭവം

ഈ തടാകത്തിന്റെ മറ്റൊരു പ്രത്യേകത ഇവിടുത്തെ ചെറിയ മത്സ്യങ്ങളാണ്. വെള്ളത്തിൽ കാലിട്ട് ഇരുന്നാൽ ഈ മത്സ്യങ്ങൾ വന്ന് കാലിലെ മൃതചർമ്മങ്ങൾ കൊത്തി വൃത്തിയാക്കും. ഒരു നാച്ചുറൽ പെഡിക്യൂർ അനുഭവം ആണിത്. ആദ്യം ഇക്കിളിയായി തോന്നുമെങ്കിലും, പലർക്കും ഇത് വളരെ റിലാക്സിങ് ആയ അനുഭവമാണ്.

ബുഡ്ബുദ്യാഞ്ചി താലിയിൽ എങ്ങനെ എത്താം?

വിമാനമാർഗം: ഏറ്റവും അടുത്തുള്ള വിമാനത്താവളം ദബോലിം ആണ്, ഏകദേശം 70 കിലോമീറ്റർ ദൂരം. അവിടെ നിന്ന് ടാക്സിയിലോ വാടക വാഹനങ്ങളിലോ നേത്രാവലിയിലേക്ക് എത്താം.

ട്രെയിൻ മാർഗം: മഡ്ഗാവ് (മർഗോ), കാനക്കോണ എന്നിവയാണ് അടുത്തുള്ള റെയിൽവേ സ്റ്റേഷനുകൾ. പ്രധാന നഗരങ്ങളുമായി ഇവയ്ക്ക് നല്ല ബന്ധമുണ്ട്.

റോഡ് മാർഗം: മർഗോയിൽനിന്ന് ഏകദേശം 45 കിലോമീറ്റർ ദൂരമുണ്ട് നേത്രാവലിയിലേക്ക്. സ്വകാര്യ ടാക്സികൾ, സെൽഫ് ഡ്രൈവ് കാറുകൾ, പ്രാദേശിക ബസുകൾ എന്നിവ ലഭ്യമാണ്. അവസാനത്തെ കുറച്ചു ദൂരം ഗ്രാമീണ റോഡുകളിലൂടെയായിരിക്കും യാത്ര.

തൊട്ടടുത്തുള്ള സ്ഥലം: നേത്രാവലി ഗ്രാമത്തിലെ ഗോപിനാഥ് ക്ഷേത്രത്തിന് അടുത്താണ് ഈ തടാകം.

സന്ദർശിക്കാൻ പറ്റിയ സമയം

ഒക്ടോബർ മുതൽ മാർച്ച് വരെയുള്ള മാസങ്ങളാണ് ഇവിടം സന്ദർശിക്കാൻ ഏറ്റവും അനുയോജ്യം. മൺസൂണിന് ശേഷം പ്രകൃതി കൂടുതൽ മനോഹരമാകുന്ന ഈ സമയത്ത് കാലാവസ്ഥയും മികച്ചതായിരിക്കും. രാവിലെ നേരത്തെയോ വൈകുന്നേരങ്ങളിലോ പോയാൽ തിരക്കില്ലാതെ ഈ സ്ഥലം ആസ്വദിക്കാം.

യാത്രാ ടിപ്പുകൾ

പ്രദേശത്തിന്റെ സ്വാഭാവികത നിലനിർത്താൻ മാലിന്യങ്ങൾ വലിച്ചെറിയാതിരിക്കുകയും നിശബ്ദത പാലിക്കുകയും ചെയ്യുക.
വഴികൾ അത്ര സുഗമമല്ലാത്തതിനാൽ നടക്കാൻ സൗകര്യപ്രദമായ പാദരക്ഷകൾ ധരിക്കുക.
അടുത്ത് കടകൾ കുറവായതിനാൽ വെള്ളവും മറ്റ് അവശ്യസാധനങ്ങളും കയ്യിൽ കരുതുക.
പ്രാദേശിക വിശ്വാസങ്ങളെയും ക്ഷേത്രപരിസരത്തെയും ബഹുമാനിക്കുക.

ശാസ്ത്രമായാലും വിശ്വാസമായാലും, ശബ്ദത്തോട് പ്രതികരിക്കാനുള്ള കഴിവ് ബുഡ്ബുദ്യാഞ്ചി താലിയെ ഗോവയിലെ ഏറ്റവും കൗതുകകരമായ ഒരിടമാക്കി മാറ്റുന്നു. നിഗൂഢതയും ചരിത്രവും പ്രകൃതിഭംഗിയും ഒത്തുചേരുന്ന ഒരപൂർവ അനുഭവമാണ് ഈ തടാകം സഞ്ചാരികൾക്ക് നൽകുന്നത്.