Asianet News Malayalam

വിമാന ജനലിൽ ഗണപതി ചിത്രം; ‘നോ ഫ്ലൈ ലിസ്റ്റ്’ ലിസ്റ്റിൽ ഉൾപ്പെടുത്തമെന്ന് നെറ്റിസെൺസ്, യാഥാർത്ഥ്യം മറ്റൊന്നെന്ന് ചിത്രകാരി

Web Desk — Wed, 23 Sep 2026 22:43:11 +0530

വിമാനയാത്രയ്ക്കിടെ വിമാനത്തിന്‍റെ ജനലിൽ ഗണപതിയുടെ ചിത്രം വരയ്ക്കുന്ന കലാകാരിയുടെ വീഡിയോ സോഷ്യൽ മീഡിയയിൽ വൈറലായതോടെ വലിയ വിമർശനം. ഇന്ത്യൻ ആർട്ടിസ്റ്റ് മിതാലി സാലുങ്കെയാണ് വീഡിയോ ഇൻസ്റ്റഗ്രാമിൽ പങ്കുവെച്ചത്. വിമാനത്തിന്‍റെ ജനൽ തന്നെയാണ് ചിത്രരചനയ്ക്കായി ഉപയോഗിച്ചതെന്നായിരുന്നു വീഡിയോ കണ്ട പലരുടെയും ധാരണ. ഇതോടെ വിമാനം നശിപ്പിച്ചെന്നടക്കമുള്ള വിമർശങ്ങളുയർന്നു.

'നോ ഫ്ലൈ ലിസ്റ്റിൽ' ഉൾപ്പെടുത്തണം

യാത്രയ്ക്കിടെ ഗണപതിയെ വരയ്ക്കുന്ന വീഡിയോ മിതാലി തന്നെയാണ് പങ്കുവെച്ചത്. ആദ്യം ചിത്രത്തിന്‍റെ രൂപരേഖ വരയ്ക്കുകയും പിന്നീട് നിറങ്ങൾ ചേർത്ത് ഗണപതിയുടെ ചിത്രം പൂർത്തിയാക്കുകയും ചെയ്യുന്നത് ദൃശ്യങ്ങളിൽ കാണാം. “യാത്ര ചെയ്യുമ്പോൾ പുതിയൊരു ക്യാൻവസ് കണ്ടെത്തി” എന്ന തരത്തിലുള്ള കുറിപ്പോടെയാണ് വീഡിയോ പങ്കുവെച്ചത്. വീഡിയോ എക്സിൽ പ്രചരിച്ചതോടെ നിരവധി പേർ വിമർശനവുമായി രംഗത്തെത്തി. വിമാനത്തിന്‍റെ സ്വത്ത് നശിപ്പിച്ചതിന് നടപടി വേണമെന്നും, ‘നോ ഫ്ലൈ ലിസ്റ്റിൽ’ ഉൾപ്പെടുത്തണമെന്നും ചിലർ അഭിപ്രായപ്പെട്ടു. വിമാനത്തിന്‍റെ ജനൽ മറയ്ക്കുന്നത് ടേക്ക് ഓഫിനും ലാൻഡിങ്ങിനും സുരക്ഷാ പ്രശ്നങ്ങൾ സൃഷ്ടിക്കാമെന്ന ആശങ്ക പോലും ചിലർ പങ്കുവെച്ചു.

View this post on Instagram

A post shared by 1st Indian Luxurious Live Wedding Painter (@liveindianpainter)

'സത്യമറിയണം'

എന്നാൽ, വിമർശനം ശക്തമായതോടെ മിതാലി വിശദീകരണവുമായി രംഗത്തെത്തി. വിമാനത്തിന്‍റെ ജനലിൽ നേരിട്ട് ചിത്രം വരച്ചിട്ടില്ലെന്നും സുതാര്യമായ ഒരു ഷീറ്റിലാണ് പെയിന്‍റിങ് ചെയ്തതെന്നും അവർ വ്യക്തമാക്കി. ചിത്രമടങ്ങിയ സുതാര്യ ഷീറ്റ് കൈയിൽ പിടിച്ചുനിൽക്കുന്ന ഫോട്ടോയും തെളിവായി പങ്കുവെച്ചു. അതിനാൽ വീഡിയോയിൽ തോന്നിയതുപോലെ വിമാനത്തിന്‍റെ ജനലിൽ നേരിട്ട് പെയിന്‍റ് ചെയ്തതല്ലെന്നാണ് മിതാലിയുടെ വിശദീകരണം. മിതാലി സാലുങ്കെയും ചേതൻ അദ്വിർക്കറും ചേർന്നുള്ള ‘ലൈവ് ഇന്ത്യൻ പെയിന്‍റർ’ എന്ന ആർട്ട് കൂട്ടായ്മയാണ് ലൈവ് പെയിന്‍റിംഗ് പരിപാടികൾ നടത്തുന്നത്.

സ്റ്റാർബക്സിൽ നിന്നും 500 രൂപ മുടക്കി വാങ്ങിയ ഡ്രിങ്ക്സിൽ ചത്ത ഈച്ച; വീഡിയോയുമായി യുവതി

Web Desk — Fri, 25 Sep 2026 13:15:29 +0530

ഡെൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ ടെർമിനൽ 1-ലുള്ള സ്റ്റാർബക്സിൽ നിന്ന് ഏകദേശം 500 രൂപ മുടക്കി വാങ്ങിയ ഡ്രിങ്ക്സിൽ ചത്ത ഈച്ച. ശിഖ എന്ന യുവതിയാണ് തനിക്ക് കിട്ടിയ ഡ്രിങ്ക്സിൽ ചത്ത ഈച്ചയുണ്ടായിരുന്നതായി ആരോപിച്ച് വീഡിയോ ഷെയർ ചെയ്തിരിക്കുന്നത്. പാനീയത്തിൽ ഈച്ച കിടക്കുന്നതിന്റെ ദൃശ്യങ്ങൾ ഉൾപ്പെടുത്തിയാണ് ശിഖ ഇൻസ്റ്റാഗ്രാമിൽ പോസ്റ്റ് പങ്കുവെച്ചത്.

സ്റ്റാർബക്സിനെയും സ്റ്റാർബക്സ് ഇന്ത്യയെയും ടാഗ് ചെയ്തുകൊണ്ട്, 'ഞങ്ങൾക്ക് ഉത്തരം വേണം, നിങ്ങൾ 500 രൂപ കൊടുക്കുമ്പോൾ നിങ്ങൾക്ക് ലഭിക്കുന്നത് ഇതാണ്! എവിടെയാണ് ശുചിത്വം?' എന്ന് അവർ കുറിച്ചിരിക്കുന്നതും കാണാം. കൂടാതെ, വീഡിയോയിൽ അവർ തുക്കാറാം മുണ്ടെ സർ എവിടെയാണെന്ന് ചോദിക്കുകയും, ഡ്രിങ്ക്സിൽ ചത്ത ഈച്ച കിടക്കുന്നത് കാണിച്ചുകൊണ്ട് സ്റ്റാർബക്സിനോട് വിശദീകരണം ആവശ്യപ്പെടുകയും ചെയ്തു. ഇത്രയും വലിയൊരു ബ്രാൻഡിൽ നിന്ന് ഇത്തരത്തിലുള്ള അനുഭവം താൻ പ്രതീക്ഷിച്ചിരുന്നില്ലെന്നും അവർ വ്യക്തമാക്കി.

സംഭവം ചര്‍ച്ചയായതോടെ സ്റ്റാർബക്സ് ഇന്ത്യ കമന്റ് ബോക്സിൽ മറുപടി നൽകി. 'Hi thatsheengirl, ഈ കാര്യത്തിൽ ഞങ്ങൾ ഖേദിക്കുന്നു. ദയവായി നിങ്ങളുടെ കോൺടാക്റ്റ് നമ്പർ ഇൻബോക്സ് ചെയ്യുക. ഞങ്ങളുടെ കസ്റ്റമർ കെയർ ടീം നിങ്ങളെ ബന്ധപ്പെടുന്നതാണ്' എന്നായിരുന്നു കമന്റ്.

View this post on Instagram

A post shared by SHIKHA | Content Creator (@thatsheengirl)

വീഡിയോ വൈറലായതിന് പിന്നാലെ നിരവധി ട്രോളുകളും രസകരമായ കമന്റുകളുമാണ് സോഷ്യൽ മീഡിയയിൽ ഉണ്ടായത്. 'എക്സോട്ടിക് ചേരുവകൾ അടങ്ങിയ പുതിയ ഫ്ലേവർ ആണിത്' എന്നാണ് ചിലർ കമന്റ് നൽകിയത്. മറ്റൊരാൾ പറഞ്ഞത്, 'ചോദിക്കാതെ തന്നെ കുറച്ച് പ്രോട്ടീൻ കൂടി ചേർത്ത് നിങ്ങളുടെ ആരോഗ്യകാര്യത്തിൽ അവർ ശ്രദ്ധിക്കുന്നു' എന്നാണ്.

സമ്പത്ത് കാട്ടി വീഡിയോ പങ്കുവച്ചു, പിന്നാലെ യൂട്യൂബറുടെ വീട്ടിൽ മോഷണം; 118 പവനും പണവും കവർന്നു, വീഡിയോ

Web Desk — Fri, 25 Sep 2026 18:09:47 +0530

സന്തോഷം പങ്കുവച്ചാൽ കൂടുതൽ സന്തോഷം എന്നല്ലേ ചൊല്ല്? എന്നാൽ അതൊരു ചൊല്ല് മാത്രമാണെന്ന് നഗ‍ർകോവിലിനടുത്തിള്ള ദമ്പതിമാർ. അത്തരമൊരു സന്തോഷ പങ്കിടൽ വലിയൊരു നഷ്ടമാണ് ദമ്പതിമാർക്ക് സമ്മാനിച്ചത്. വീട്ടിൽ സൂക്ഷിച്ച പണത്തിന്‍റെയും സ്വർണത്തിന്‍റെയും വീഡിയോ പങ്കുവച്ച യുട്യൂബർ ദമ്പതിമാരുടെ വീട്ടിൽ കള്ളൻ കയറുകയും സമ്പത്ത് മുഴുവനും മോഷ്ടിക്കുകയും ചെയ്തു.

പൂജാ മുറിയിൽ അഞ്ചൂറിന്‍റെ നോട്ടുകെട്ടുകൾ

കന്യാകുമാരിക്കടുത്ത് നാഗർകോവിലിലെ തമ്മട്ടുകോണത്ത് വിഐപി ഗാർഡനിലെ താമസക്കാരായ പ്രശസ്ത യൂട്യൂബർ ദമ്പതിമാരായ വിനോദ് കുമാറിന്‍റെയും മധുമിതയുടെയും വീട്ടിലാണ് സംഭവം നടന്നത്. മധുമിത അടുത്തിടെ തന്‍റെ പൂജാമുറിയിൽ തങ്ങളുടെ സമ്പത്ത് പ്രദ‍ർശിപ്പിച്ച് കൊണ്ട് ഒരു വീഡിയോ യൂട്യൂബിൽ പങ്കുവച്ചിരുന്നു.

പൂജാമുറിയിൽ അഞ്ചൂറിന്‍റെ നോട്ടുകൾ കൂട്ടിയിട്ട് അതിന് മുന്നിൽ നിന്നും പ്രാർത്ഥിക്കുന്നതായിരുന്നു വീഡിയോ. മറ്റൊരു വീഡിയോയിൽ അഞ്ചൂറിന്‍റെ നോട്ടുകെട്ടുകൾ കിടക്കയിൽ കൂട്ടിയിട്ട നിലയിലായിരുന്നു. വീഡിയോ പങ്കുവച്ചതിന് പിന്നാലെയാണ് കവർച്ച നടന്നതെന്ന് റിപ്പോർട്ടുകൾ പറയുന്നു. യൂട്യൂബ് വീഡിയോ കണ്ടെത്തിയ കള്ളൻ വീട്ടിൽ നിന്നും കൊണ്ട് പോയത് 118 പവൻ സ്വർ‍ണവും പണവും!

അതീവസുരക്ഷാ മേഖല, പക്ഷേ...

സിസിടിവി അടക്കമുള്ള വിഐപി ഗാർഡനിലെ അതീവ സുരക്ഷാ മേഖലയിൽ താമസിക്കുന്ന ഇവരുടെ വീടിന്‍റെ പിൻവാതിൽ തകർത്താണ് കള്ളൻ അകത്ത് കയറിയത്. വീട്ടുകാർ മോഷണം അറിഞ്ഞത് പിറ്റേന്ന് രാവിലെ. പിന്നാലെ ദമ്പതികൾ പോലീസിൽ പരാതി നൽകി. രാജക്കമംഗലം പോലീസ് കേസെടുത്ത് അന്വേഷണം ആരംഭിച്ചു. സിസിടിവി, ഫോൺ കോളുകൾ എന്നിവ ഉൾപ്പെടെ കേന്ദ്രീകരിച്ചുള്ള ശക്തമായ അന്വേഷണത്തിലാണ് പോലീസ് .

വഴിമുടക്കി കടുവയുടെ ഉച്ചമയക്കം; 'റോഡ് ബ്ലോക്ക്' വീഡിയോ വൈറൽ

Web Desk — Wed, 23 Sep 2026 14:45:34 +0530

രാജസ്ഥാനിലെ പ്രശസ്തമായ രൺതംബോർ നാഷണൽ പാർക്കിൽ നടന്ന ഒരു സാധാരണ വൈൽഡ് ലൈഫ് സഫാരിയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. അതിനൊരു കാരണമുണ്ട്, സഫാരി പാതയുടെ നടുവിൽ ഒരു കടുവ ഉച്ചമയക്കത്തിലാണ്. എലീന എന്ന വിദേശ വിനോദസഞ്ചാരിയാണ് ഈ കൗതുകക്കാഴ്ച ഇൻസ്റ്റഗ്രാമിൽ പങ്കുവെച്ചത്. സഫാരി ജിപ്സികൾ ഒന്നടങ്കം വരിവരിയായി വഴിയിൽ കിടക്കുന്നതും, കടുവ വഴിയിൽ നിന്ന് മാറുന്നതിനായി വിനോദസഞ്ചാരികൾ കാത്തിരിക്കുന്നതും വീഡിയോയിൽ കാണാം. സഞ്ചാരികളെ ഒട്ടും ഗൗനിക്കാതെ മൺപാതയിൽ സുഖമായി കിടന്നുറങ്ങുന്ന കടുവ, അല്പസമയത്തിന് ശേഷം എഴുന്നേറ്റ് ദേഹമൊന്ന് നിവർത്തി ശാന്തനായി കാട്ടിലേക്ക് നടന്നുപോവുകയായിരുന്നു.

'ഇന്ത്യയിലെ സാധാരണ കാഴ്ച... ഒരു ഗതാഗതക്കുരുക്ക്! പക്ഷേ കാരണം ഒരു കടുവയാണെന്ന് മാത്രം' എന്ന കുറിപ്പോടെയാണ് എലീന വീഡിയോ പങ്കുവെച്ചത്. 'രൺതംബോറിൽ ഞങ്ങൾ കാണുന്ന മൂന്നാമത്തെ കടുവയാണിത്. ഇത്തവണ കക്ഷി വഴിക്ക് നടുവിൽ തന്നെ ഉറങ്ങാൻ തീരുമാനിച്ചു. മുപ്പതോളം ജിപ്സികളും ആളുകളുടെ ബഹളവും ക്യാമറകളും അടക്കിപ്പിടിച്ച സംസാരങ്ങളുമെല്ലാം അതിന് ചുറ്റുമുണ്ടായിരുന്നു. എല്ലാവരും 200 കിലോയോളം ഭാരമുള്ള ആ കടുവയെ അടുത്തുകാണാൻ ശ്രമിക്കുകയായിരുന്നു. ഒടുവിൽ അത് എഴുന്നേറ്റ് എന്റെ വീട്ടിലെ പൂച്ചയെപ്പോലെ ദേഹമൊന്ന് നിവർത്തി, ഞങ്ങളെയൊന്നും വകവെക്കാതെ കാട്ടിലേക്ക് നടന്നുപോയി' എലീന കൂട്ടിച്ചേർത്തു.

View this post on Instagram

A post shared by Elena I Travel addict (@elen_d.ream)

6,17,000 -ത്തിലധികം കാഴ്ചക്കാരെയും 25,000 -ത്തിലധികം ലൈക്കുകളുമാണ് ഈ വീഡിയോയ്ക്ക് ലഭിച്ചത്. കടുവയുടെ ഈ സ്വഭാവത്തെക്കുറിച്ച് രസകരമായ കമന്റുകളുമായി നിരവധി പേരാണ് രംഗത്തെത്തിയത്. 'റോഡ് തന്റെ സ്വന്തമാണെന്ന് വ്യക്തമാക്കാൻ വേണ്ടിയാണ് കടുവ മനഃപൂർവം വഴി തടഞ്ഞിരുന്നത്' എന്ന് ഒരാൾ കുറിച്ചു. 'നിങ്ങൾ എന്റെ അതിർത്തിയിലാണ് നിൽക്കുന്നത്, അതുകൊണ്ട് കാത്തുനിൽക്കൂ. നിങ്ങൾ പോകണോ അതോ നിൽക്കണോ എന്ന് ഞാൻ തീരുമാനിക്കാം' എന്നായിരുന്നു വേറൊരു കമന്റ്.

ദില്ലിയിൽ ബൈക്കിനെ മീറ്ററുകളോളം വലിച്ചിഴച്ച് കാർ! 73 -കാരനായ ഡ്രൈവർ അറസ്റ്റിൽ, വീഡിയോ

Web Desk — Sun, 20 Sep 2026 18:47:10 +0530

ദില്ലിയിലെ ആർകെ പുരത്ത് കാറിടിച്ച് ബൈക്ക് മീറ്ററുകളോളം റോഡിലൂടെ വലിച്ചിഴച്ച സംഭവത്തിന്‍റെ ദൃശ്യങ്ങൾ സോഷ്യൽ മീഡിയയിൽ വൈറലായി. സംഭവത്തിൽ 73 -കാരനായ കാർ ഡ്രൈവറെ പൊലീസ് അറസ്റ്റ് ചെയ്തു. സെപ്റ്റംബർ 17 വ്യാഴാഴ്ച രാത്രി 10.22 ഓടെയാണ് സംഭവം നടന്നതെന്ന് ദില്ലി പൊലീസ് പറയുന്നു.

ബൈക്കിനെ വലിച്ചിഴച്ച് കാർ

വസന്ത് കുഞ്ച് സ്വദേശിയായ വേണു ഗോപാൽ എന്നയാളാണ് അറസ്റ്റിലായത്. അദ്ദേഹം ഓടിച്ചിരുന്ന നീല നിറത്തിലുള്ള ഹോണ്ട അമേസ് റോഡരികിൽ നിർത്തിയിട്ടിരുന്ന തനിഷ് ടോകാസിന്‍റെ മോട്ടോർ സൈക്കിളിൽ ഇടിക്കുകയായിരുന്നു. ഇടിയുടെ ആഘാതത്തിൽ തനിഷ് ബൈക്കിൽ നിന്ന് തെറിച്ച് വീണെങ്കിലും കാര്യമായി പരിക്കേൽക്കാതെ രക്ഷപ്പെട്ടു.

CAR DRAGS BIKE FOR SEVERAL METRES IN DELHI’S RK PURAMA video from RK Puram, Delhi shows a car dragging a motorcycle trapped underneath it on Africa Avenue Road.The incident took place on September 17. Delhi Police said the motorcycle rider fell after the car hit his parked… pic.twitter.com/Dkfx8CEXQu

— contentkikamii (@contentkikamii) September 18, 2026

എന്നാൽ, അപകടത്തിന് പിന്നാലെ കാർ നിർത്താതെ മുന്നോട്ട് നീങ്ങുകയും ബൈക്ക് കാറിനടിയിൽ കുടുങ്ങി ഏതാനും മീറ്ററുകളോളം വലിച്ചിഴയ്ക്കുകയും ചെയ്തു. പിന്നാലെ സംഭവ സ്ഥലത്തുണ്ടായിരുന്നവർ ഇടപെട്ട് കാർ തടഞ്ഞ് നിർത്തി. ഇതിനിടെ ആരോ പകർത്തിയ ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് സംഭവം വ്യാപക ശ്രദ്ധ നേടിയത്. വീഡിയോയിൽ ബൈക്ക് കാറിൽ കുടുങ്ങിയ നിലയിൽ റോഡിലൂടെ വലിച്ചിഴയ്ക്കപ്പെടുന്നത് വ്യക്തമായി കാണാം.

അറസ്റ്റ്

സംഭവത്തിന് പിന്നാലെ പൊലീസ് വേണു ഗോപാലിനെ അറസ്റ്റ് ചെയ്യുകയും ഹോണ്ട അമേസ് കസ്റ്റഡിയിലെടുക്കുകയും ചെയ്തു. ഭാരതീയ ന്യായ സംഹിതയിലെ പ്രസക്തമായ വകുപ്പുകൾ പ്രകാരം ഇയാൾക്കെതിരെ എഫ്ഐആർ രജിസ്റ്റർ ചെയ്തെന്ന് റിപ്പോർട്ടുകൾ പറയുന്നു. അപകടത്തിന് പിന്നാലെ ഡ്രൈവറെ വൈദ്യപരിശോധനയ്ക്ക് വിധേയനാക്കിയെങ്കിലും ഇയാൾ മദ്യപിച്ചതിന്‍റെ തെളിവ് ലഭിച്ചില്ലെന്ന് പൊലീസ് പറയുന്നു. അതേസമയം മറ്റെന്തെങ്കിലും ലഹരി ഉപയോഗിച്ചോയെന്ന് വ്യക്തമല്ല. അപകടത്തിലേക്ക് നയിച്ച സാഹചര്യങ്ങൾ പരിശോധിക്കുകയാണെന്ന് പോലീസ് അറിയിച്ചു.

'രണ്ട് കപ്പലുകൾ, രണ്ട് ദിശകൾ… നടുക്കടലിൽ അച്ഛനെ കണ്ട് മകൻ'! അപൂർവ കൂടിക്കാഴ്ചയുടെ വീഡിയോ വൈറൽ

Web Desk — Sun, 20 Sep 2026 20:56:41 +0530

കടലിന്‍റെ വിശാലതയിൽ രണ്ട് കപ്പലുകൾ വിപരീത ദിശകളിലേക്ക് സഞ്ചരിക്കുന്ന രണ്ട് കപ്പലുകൾ. അപ്രതീക്ഷിതമായി അടുത്തുവരുന്ന കപ്പൽ ശ്രദ്ധയിൽപ്പെട്ടപ്പോൾ അതിലൊരാൾക്ക് തോന്നിയത് അത് മറ്റൊരു സാധാരണ കപ്പലായിരിക്കുമെന്നാണ്. എന്നാൽ, കപ്പലിന്‍റെ വിവരങ്ങളും യാത്രാമാർഗവും പരിശോധിച്ചതോടെ ആ നാവികൻ ഒരു സത്യം തിരിച്ചറിഞ്ഞു. മറുവശത്തുനിന്ന് വരുന്നത് സ്വന്തം അച്ഛൻ സഞ്ചരിക്കുന്ന കപ്പലാണെന്ന്!

അച്ഛനെ കണ്ടത് നടുക്കടലിൽ!

റുഷീൽ സരൺ എന്ന നാവികനാണ് ഈ അപൂർവ അച്ഛൻ - മകൻ കൂടിക്കാഴ്ചയുടെ ദൃശ്യങ്ങൾ ഇൻസ്റ്റഗ്രാമിൽ പങ്കുവെച്ചത്. റുഷീൽ വടക്കോട്ട് സഞ്ചരിക്കുമ്പോഴായിരുന്നു തെക്കോട്ട് നീങ്ങുന്ന വലിയ കപ്പൽ ശ്രദ്ധയിൽപ്പെട്ടത്. ചാർട്ടുകളും കപ്പലിന്‍റെ വിവരങ്ങളും പരിശോധിച്ചപ്പോഴാണ് അച്ഛൻ അതിലുണ്ടെന്ന് റുഷീലിന് മനസ്സിലായത്. തുടർന്ന് കടലിന്‍റെ നടുവിൽ ഇരുവരും പരസ്പരം കണ്ടുമുട്ടുകയായിരുന്നു. “ജീവിതത്തിലെ ഏറ്റവും ഓർമിക്കപ്പെടുന്ന അച്ഛൻ - മകൻ നിമിഷങ്ങളിലൊന്ന് നടുക്കടലിലായിരുന്നു. ” റുഷീൽ വീഡിയോയിൽ പറയുന്നു. രണ്ട് തലമുറകളിലെ നാവികർ, രണ്ട് കപ്പലുകൾ, രണ്ട് വ്യത്യസ്ത യാത്രകൾ. എന്നാൽ ഒരേ സമുദ്രം അവരെ അപ്രതീക്ഷിതമായി ഒരിടത്ത് എത്തിച്ചു. ഒരു അപൂർവ്വ കൂടിക്കാഴ്ച!

View this post on Instagram

A post shared by Rusheel Saran (@rusheel_saran)

'വ്യത്യസ്ത ദിശകളിൽ ഒരേ സമുദ്രത്തിൽ....'

അച്ഛൻ പറഞ്ഞ ഒരു വാക്കും റുഷീലിനെ ഏറെ സ്പർശിച്ചു. "അച്ഛൻ പറഞ്ഞ ഒരു കാര്യം എന്‍റെ മനസ്സിൽ ആഴത്തിൽ പതിഞ്ഞുപോയി. 'ഈ വിശാലമായ ശൂന്യതയിൽ എവിടെയോ വെച്ച്, വ്യത്യസ്ത ദിശകളിലേക്ക് യാത്ര ചെയ്യുന്ന ഒരു അച്ഛനും മകനും പരസ്പരം കണ്ടെത്തി; ഒരേ സമുദ്രത്താൽ അവർ തമ്മിൽ ബന്ധിപ്പിക്കപ്പെടുകയും ചെയ്തു'," അദ്ദേഹം പറയുന്നു. വഴി കാണിച്ചുതന്ന വ്യക്തിയോടൊപ്പമുള്ള യാത്ര ഒരിക്കലും അവസാനിക്കുന്നില്ലെന്ന ചിന്തയാകാം അച്ഛൻ പങ്കുവയ്ക്കാൻ ശ്രമിച്ചതെന്നും റുഷീൽ പങ്കുവെച്ചു. വീഡിയോ സോഷ്യൽ മീഡിയയിൽ വൈറലായതോടെ നിരവധി പേരാണ് ഈ നിമിഷത്തെ ഹൃദയസ്പർശിയായതെന്നും ജീവിതത്തിൽ ഒരിക്കൽ മാത്രം സംഭവിക്കാവുന്ന അനുഭവമാണെന്നും പ്രതികരിച്ചത്. ചില നാവികരും സമാനമായ അനുഭവങ്ങൾ പങ്കുവെച്ചു.

ഒരു നല്ല വീടില്ലാതെ വളർന്നവന് മാത്രം മനസിലാകുന്ന സന്തോഷം; അമ്മയ്ക്കും അച്ഛനും സ്വപ്നവീട് സമ്മാനിച്ച് യുവാവ്

Web Desk — Fri, 25 Sep 2026 09:16:46 +0530

ഒരു വീടില്ലാതെ വളരുന്നവർക്ക് സ്വന്തം വീട് എന്നത് ഏറെക്കാലമായി കാണുന്ന ഒരു വലിയ സ്വപ്നത്തിന്റെ സാക്ഷാത്കാരമാണ്. പൂനെയിൽ നിന്നുള്ള റാപ്പറും ഹിപ്-ഹോപ്പ് ആർട്ടിസ്റ്റുമായ ഹരീഷ് താക്കൂർ തന്റെ മാതാപിതാക്കൾക്ക് പുതിയ വീട് വാങ്ങി നൽകിക്കൊണ്ടാണ് ആ കുട്ടിക്കാലത്തെ വലിയ സ്വപ്നം യാഥാർത്ഥ്യമാക്കിയിരിക്കുന്നത്. ഇൻസ്റ്റഗ്രാമിലൂടെയാണ് ഹരീഷ് ഈ സന്തോഷവാർത്ത പങ്കുവെച്ചത്.

ഒരു ലോവർ മിഡിൽ ക്ലാസ് കുടുംബത്തിൽ ജനിച്ച ഹരീഷ്, മാതാപിതാക്കൾക്കും നാല് സഹോദരങ്ങൾക്കുമൊപ്പം 25 വർഷത്തോളം കഴിഞ്ഞത് വെറും 10x10 വലിപ്പമുള്ള ഒരു ചെറിയ മുറിയിലായിരുന്നു. കുടുംബത്തിന് ആവശ്യമുള്ളതെല്ലാം നൽകാൻ അച്ഛൻ കഠിനാധ്വാനം ചെയ്തെങ്കിലും, സാമ്പത്തിക ബുദ്ധിമുട്ടുകൾ കാരണം അക്കാലത്ത് സ്വന്തമായി ഒരു വീട് വാങ്ങാൻ സാധിച്ചില്ല.

'അതുകൊണ്ട് കുട്ടിയായിരിക്കുമ്പോൾ ഞാൻ എനിക്ക് തന്നെ ഒരു വാഗ്ദാനം നൽകി... ഒരു ദിവസം ഞാൻ എന്റെ മാതാപിതാക്കൾക്ക് അവരുടെയാ സ്വപ്നവീട് വാങ്ങി നൽകും' ഹരീഷ് കുറിച്ചു. വർഷങ്ങളുടെ കഠിനാധ്വാനവും മാതാപിതാക്കളുടെ അനുഗ്രഹവും കൊണ്ട് ഒടുവിൽ താൻ ആ വാക്ക് പാലിച്ചതായി ഹരീഷ് പറയുന്നു. 'ഞാൻ വീട്ടിലേക്ക് കയറിവരുമ്പോഴെല്ലാം മാതാപിതാക്കളുടെ പേരുകൾ പതിപ്പിച്ച നെയിം ബോർഡ് കാണുന്നത് ഇപ്പോഴും വിശ്വസിക്കാൻ കഴിയുന്നില്ല' അദ്ദേഹം കൂട്ടിച്ചേർത്തു. 'ഓരോ ഗല്ലി ബോയിക്കും ഈ ദിവസം കാണാൻ കഴിയട്ടെയെന്ന് ഞാൻ ആശ്രഹിക്കുന്നു' എന്നും അദ്ദേഹം പറയുന്നു.

View this post on Instagram

A post shared by HotFix | Harish Thakur (@itshotfix)

നിരവധിപ്പേരാണ് ഹരീഷിനെ അഭിനന്ദിച്ചുകൊണ്ട് പോസ്റ്റിന് കമന്റുകൾ നൽകിയത്. 'നിങ്ങളുടെ മാതാപിതാക്കൾക്ക് അഭിമാനിക്കാവുന്ന നിമിഷമാണിത്', 'സഹോദരാ, നിങ്ങളോട് വലിയ ബഹുമാനം. നിരവധി അഭിനന്ദനങ്ങൾ, ഇനിയും വലിയ വിജയങ്ങൾ ഉണ്ടാകട്ടെ', 'തീർത്തും അഭിമാനകരമായ നിമിഷം. ചില വിജയങ്ങൾ ഒരു അപരിചിതന്റേതായാൽ പോലും സ്വന്തം വിജയം പോലെ തോന്നും', 'സ്വന്തമായി ഒരു വീടില്ലാത്ത കുടുംബത്തിൽ വളർന്നവർക്ക് അറിയാം ഈ നിമിഷത്തിന്റെ ആഴം. ഇതൊരു വീട് മാത്രമല്ല, സുരക്ഷിതത്വവും ജീവിതാഭിലാഷങ്ങളുടെ സാക്ഷാത്കാരവുമാണ്' തുടങ്ങിയ കമന്റുകളാണ് വീഡിയോയ്ക്ക് വരുന്നത്.

കുടുംബ കോടതി കെട്ടിടത്തിൽ നിന്നും യുവതി താഴേക്ക്... വീണതോ ചാടിയതോ?; സിസിടിവി ദൃശ്യങ്ങൾ വൈറൽ

Web Desk — Fri, 25 Sep 2026 19:17:52 +0530

ഡെറാഡൂണിലെ കുടുംബകോടതി കെട്ടിടത്തിൽ നിന്ന് യുവതി താഴേക്ക് വീണ് പരിക്കേറ്റ സംഭവത്തിന്‍റെ സിസിടിവി ദൃശ്യങ്ങൾ സമൂഹ മാധ്യമങ്ങളിൽ വ്യാപകമായി പ്രചരിക്കുന്നു. ബുധനാഴ്ച നടന്ന സംഭവത്തിൽ വലതുകൈയ്ക്ക് ഒടിവേറ്റ യുവതിയെ ചികിത്സയ്ക്കായി സർക്കാർ ഡൂൺ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. അതേസമയം യുവതി മനഃപൂർവം ചാടിയതാണോ അതോ അബദ്ധത്തിൽ വീണതാണോയെന്ന കാര്യത്തിൽ പോലീസ് ഇതുവരെ സ്ഥിരീകരണം നൽകിയിട്ടില്ലെന്ന് റിപ്പോർട്ടുകൾ പറയുന്നു.

ചാടിയതോ അതോ വീണതോ?

കോടതി വളപ്പിലെ സിസിടിവി ദൃശ്യങ്ങളിൽ യുവതി പെട്ടെന്ന് ഫ്രെയിമിലേക്ക് എത്തുന്നതും തുടർന്ന് റെയിലിങ്ങിന് സമീപത്തേക്ക് നീങ്ങുന്നതും കാണാം. പിന്നാലെ ഒരു വനിതാ പോലീസ് ഉദ്യോഗസ്ഥയും യുവതിയുടെ അടുത്തേക്ക് എത്തുന്നതും ദൃശ്യങ്ങളിൽ വ്യക്തമാണ്. എന്നാൽ ഉദ്യോഗസ്ഥയ്ക്ക് ഇടപെടാൻ കഴിയുന്നതിന് മുമ്പ് യുവതി താഴേക്ക് വീഴുകയായിരുന്നു. ഈ സമയം അഭിഭാഷകരടക്കം ചിലർ നിന്നിരുന്നതിനിടേയിലേക്കാണ് യുവതി പാഞ്ഞെത്തിയതും റെയിലിങ്ങിന് മുകളിലൂടെ താഴേയ്ക്ക് വീണതും.

Dehradun | Woman Jumps from Court BuildingMeenakshi a resident of Vijay Colony (New Cantt Road), Dehradun has reportedly been involved in a family dispute case with her husband, Sanjeev Kumar which is pending before the courtOn Wednesday, the woman reportedly jumped from… pic.twitter.com/bp2liEVfWs

— Sahil chabra (@sahii199) September 24, 2026

സംഭവത്തിന് പിന്നാലെ അഭിഭാഷകരും മറ്റ് ആളുകളും റെയിലിങ്ങിന് സമീപത്തേക്ക് ഓടിയെത്തുന്നതും ദൃശ്യങ്ങളിൽ വ്യക്തമാണ്. രണ്ടാമത്തെ ദൃശ്യങ്ങളിൽ യുവതി താഴെത്തെ നിലയിൽ വീണ് കിടക്കുന്നതും കാണാം. വിജയ് കോളനി, ന്യൂ കാന്‍റ് റോഡ് സ്വദേശിനിയായ യുവതി ഭർത്താവ് സഞ്ജീവ് കുമാറുമായുള്ള കുടുംബ തർക്കവുമായി ബന്ധപ്പെട്ട കേസിനായി കോടതിയിലെത്തിയതെന്ന് റിപ്പോർട്ടുകൾ പറയുന്നു. ഏറെക്കാലമായി കുടുംബപ്രശ്നം നേരിടുന്ന യുവതിയോട് സംഭവത്തിന് ശേഷം പോലീസ് സംസാരിക്കാൻ ശ്രമിച്ചെങ്കിലും പരിക്കുകൾ കാരണം മൊഴി നൽകാൻ കഴിഞ്ഞില്ലെന്ന് സിറ്റി എസ്പി ശേഖർ സുവാൽ അറിയിച്ചു.

വിവാഹ മോചന ഹർജിയുമായി കോടതിയിൽ

കോടതി രേഖകൾ പ്രകാരം 2019 ഒക്ടോബർ 8 -നാണ് യുവതി ഹരിയാന സ്വദേശിയെ വിവാഹം കഴിച്ചത്. പിന്നീട് വിവാഹ മോചന ഹർജി ഫയൽ ചെയ്ത ഇവർ ഭർത്താവിൽ നിന്ന് പ്രതിമാസ ജീവനാംശം ആവശ്യപ്പെട്ട് കുടുംബ കോടതിയെ സമീപിച്ചു. ഇതിനെ തുടർന്ന് മാസം 5,000 രൂപ നൽകാൻ കോടതി ഉത്തരവിട്ടിരുന്നു. 48 മാസത്തെ കുടിശ്ശികയായി 2.40 ലക്ഷം രൂപയും ബാങ്ക് അക്കൗണ്ടിലേക്ക് സ്ഥിരമായി തുകയും അടയ്ക്കണമെന്നും കോടതി ആവശ്യപ്പെട്ടിരുന്നു. അതേസമയം സംഭവത്തിന്‍റെ യഥാർഥ കാരണം അന്വേഷിക്കുകയാണെന്ന് പോലീസ് അറിയിച്ചു.

'ഇന്ത്യക്കാരെ സിവിക് സെൻസ് എങ്ങനെ പഠിപ്പിക്കും?' വന്ദേ ഭാരതിൽ മാലിന്യം തള്ളി യാത്രക്കാർ, ചോദ്യവുമായി ഹർഷ് ഗോയങ്ക, വീഡിയോ

Web Desk — Fri, 25 Sep 2026 15:55:13 +0530

അത്യാധുനിക സൗകര്യങ്ങളുള്ള വന്ദേ ഭാരത് ട്രെയിനുകളിലെ യാത്രക്കാരുടെ പെരുമാറ്റത്തെ ചോദ്യം ചെയ്ത് വ്യവസായി ഹർഷ് ഗോയങ്ക രംഗത്ത്. ട്രെയിനിനുള്ളിൽ യാത്രക്കാർ മാലിന്യം വലിച്ചെറിയുന്നതിന്‍റെ ദൃശ്യങ്ങൾ പങ്കുവെച്ചാണ് അദ്ദേഹം ഇന്ത്യക്കാരുടെ സിവിക് സെൻസിനെക്കുറിച്ച് ചോദ്യമുയർത്തിയത്. സെപ്റ്റംബർ 25 -നാണ് ഗോയങ്ക തന്‍റെ എക്സ് ഹാന്‍റിലിൽ വീഡിയോ പങ്കുവെച്ചത്.

അതിവേഗം, വൃത്തിയുള്ളത്

അതിവേഗവും ആധുനികവും സൗകര്യപ്രദവുമായ യാത്രാനുഭവമാണ് വന്ദേ ഭാരത് നൽകുന്നതെന്ന് വീഡിയോയുടെ ആദ്യ പകുതിയിൽ പറയുന്നു. എന്നാൽ രണ്ടാം പകുതിയിൽ യാത്രക്കാർ വൃത്തികേടാക്കായി ട്രെയിനിന്‍റെ ദൃശ്യങ്ങളാണുള്ളത്. യാത്രക്കാർക്ക് സീറ്റിൽ തന്നെ പ്രഭാതഭക്ഷണവും ലഘുഭക്ഷണങ്ങളും പത്രങ്ങളും മറ്റും എത്തിക്കുന്നതും വൃത്തിയുള്ള ടേയ്ലന്‍റും വീഡിയോയിൽ കാണാം. ഭക്ഷണം കഴിച്ചശേഷം ട്രേകളും ജീവനക്കാർ തന്നെ ശേഖരിക്കുന്നതും ആവശ്യമെങ്കിൽ മാലിന്യവും അവ‍ർ തന്നെ ശേഖരിക്കുകയും ചെയ്യുന്നു. ഇതിനൊന്നിനും യാത്രക്കാർ തങ്ങളുടെ സീറ്റിൽ നിന്നും എഴുന്നേൽക്കേണ്ടത് പോലുമില്ല.

How to teach our people civic sense pic.twitter.com/ZEreYIlGW2

— Harsh Goenka (@hvgoenka) September 23, 2026

പക്ഷേ, യാത്രക്കാരുടെ സിവിക് സെന്‍സ്...

എന്നാൽ, ഇതിന് പിന്നാലെ യാത്രക്കാരുടെ ഭാഗത്ത് നിന്നുള്ള ‘സംഭാവന’യാണ് ഗോയങ്ക ചൂണ്ടിക്കാട്ടുന്നത്. ഭക്ഷണപ്പൊതികളുടെ കവറുകൾ സീറ്റ് പോക്കറ്റിലിടുക, പാനീയങ്ങളുടെ കാനുകളും വെള്ളക്കുപ്പികളും തറയിലും സീറ്റുകളിലും ഉപേക്ഷിക്കുക, പത്രങ്ങൾ പോലും തറയിൽ വലിച്ചെറിയുക തുടങ്ങിയ മോശം പ്രവണതകളാണ് യാത്രക്കാരിൽ നിന്നുമുണ്ടാകുന്നതെന്ന് വീഡിയോയിൽ പരാമർശിക്കുന്നു. വീഡിയോ പങ്കുവച്ച് കൊണ്ട് “നമ്മുടെ ആളുകളെ എങ്ങനെ സിവിക് സെൻസ് പഠിപ്പിക്കും?” എന്ന് ചോദ്യം ഹർഷ് ഗോയങ്ക ഉയർത്തുന്നു.

വേണം അല്പം പൗരബോധം

അദ്ദേഹത്തിന്‍റെ പോസ്റ്റ് വളരെ വേഗം സമൂഹ മാധ്യമങ്ങളിൽ വൈറലായി. പിന്നാലെ വലിയൊരു ചർച്ച തന്നെ നടന്നു. അടിസ്ഥാന സൗകര്യങ്ങൾ മാത്രം വികസിപ്പിച്ചാൽ പോരെന്നും പൊതുസ്ഥലങ്ങൾ ഉത്തരവാദിത്തത്തോടെ ഉപയോഗിക്കാനുള്ള ശീലം ജനങ്ങളിൽ വളർത്തണമെന്നും പലരും അഭിപ്രായപ്പെട്ടു. സിവിക് സെൻസ് വിദ്യാഭ്യാസത്തിന്‍റെ ഭാഗമാക്കണമെന്ന നിർദേശവും ചിലർ ഉയർത്തി. ലോകോത്തര സൗകര്യങ്ങൾ ഒരുക്കുന്നതിനൊപ്പം അവ സംരക്ഷിക്കാനുള്ള ഉത്തരവാദിത്തവും പൗരന്മാർ ഏറ്റെടുക്കണമെന്ന് ചർച്ചയിൽ ഉയർന്നുവന്നു.

നദിയുടെ കുത്തൊഴുക്കിൽപ്പെട്ട് ആനക്കുട്ടി, വള്ളത്തിൽ കയറ്റി രക്ഷപ്പെടുത്തി മത്സ്യത്തൊഴിലാളികൾ; പശ്ചിമ ബംഗാളിൽ നിന്നുള്ള വീഡിയോ വൈറൽ

Web Desk — Wed, 23 Sep 2026 18:21:48 +0530

പശ്ചിമ ബംഗാളിലെ ജൽപായ്ഗുരി ജില്ലയിലൂടെ കുത്തിയൊഴുകുന്ന ടീസ്ത നദിയിലെ ശക്തമായ അടിയൊഴുക്കിൽപ്പെട്ട് മരണത്തോട് മല്ലിട്ട ആനക്കുട്ടിയെ ജീവിതത്തിലേക്ക് കൈ പിടിച്ച് കയറ്റി മത്സ്യത്തൊഴിലാളികൾ. ഗജോൽഡോഗ മേഖലയ്ക്ക് സമീപം നദി മുറിച്ചുകടക്കുന്നതിനിടയിലാണ് അമ്മയാനയിൽ നിന്നും കൂട്ടം തെറ്റി ഏതാനും ദിവസങ്ങൾ മാത്രം പ്രായമുള്ള ആനക്കുട്ടി നദിയുടെ കുത്തൊഴുക്കിൽ അകപ്പെട്ടത്. നദിയിലൂടെ ആനക്കുട്ടി ഏതാണ്ട് മൂന്ന് കിലോമീറ്ററോളം ദുരം ഒഴുകിയ ശേഷമാണ് മത്സ്യത്തൊഴിലാളികൾക്ക് രക്ഷപ്പെടുത്താൻ കഴിഞ്ഞതെന്ന് റിപ്പോർട്ടുകൾ പറയുന്നു.

നദിയുടെ കുത്തൊഴുക്കിപ്പെട്ട് ആനക്കൂട്ടി

ആനക്കുട്ടി നദിയിലൂടെ ഒഴുകിപ്പോകുന്നത് നദീതീരത്തുണ്ടായിരുന്ന മത്സ്യത്തൊഴിലാളികളുടെ കണ്ണിൽപ്പെട്ടു. പിന്നാലെ തങ്ങളുടെ ജീവൻ പോലും പണയം വച്ച് അവർ തങ്ങളുടെ ചെറുവള്ളം ശക്തമായ കുത്തോഴുക്കിലേക്ക് ഇറക്കി. ഏറെ നേരെ തുഴഞ്ഞ് അവർ നദിയുടെ മധ്യത്തിലൂടെ ഒഴുകിപോകുന്ന ആനക്കുട്ടിക്ക് അടുത്തെത്തുകയും അതിസാഹസീകമായി അവനെ തങ്ങളുടെ ചെറുവള്ളത്തിലേക്ക് പിടിച്ച് കയറ്റുകയുമായിരുന്നു. ഇതിനിടെ ഏതാണ്ട് മൂന്ന് കിലോമീറ്ററോളം ദൂരം നദിയിലൂടെ മത്സ്യത്തൊഴിലാളികൾക്ക് തങ്ങളുടെ വള്ളം തുഴയേണ്ടിവന്നു. അത്രയേറെ ദൂരം നദിയിലൂടെ ഒഴുകിയ ആനക്കുട്ടി അതിനകം അവശനായിക്കഴിഞ്ഞിരുന്നു. ഒടുവിൽ വള്ളത്തിൽ കയറ്റിയ ആനക്കുട്ടിയെ കരക്കെത്തിച്ചു.

What an incredible rescue of a newborn elephant calf swept away by the Teesta River! The courage, compassion and quick thinking of local fishermen, combined with the swift response of the Baikunthapur Forest Division, deserve immense appreciation. Together, they successfully… pic.twitter.com/uEyqQKTRXp

— Supriya Sahu IAS (@supriyasahuias) September 22, 2026

A newborn elephant calf was swept nearly 5 km downstream by Teesta’s strong currents. Our Forest team, with help of local fishermen, rescued the drowning calf and reunited it with its mother.A beautiful story of rescue and reunion. #elephant #wildlife #IFS #forest #teesta pic.twitter.com/rvq7fpyMd2

— Mudit Kumar Verma IFS (@MuditKVerma) September 21, 2026

കുഞ്ഞിനെയും കൊണ്ട് കാടുകയറി അമ്മയാന

തുടർന്ന് മത്സത്തൊഴിലാളികൾ വിവരം വനംവകുപ്പ് അധികൃതരെ അറിയിച്ചു. പിന്നാലെ കത്താംബാരി റേഞ്ച് ഉദ്യോഗസ്ഥരുടെ നേതൃത്വത്തിൽ നടത്തിയ സമാനതകളില്ലാത്ത പരിശ്രമത്തിനൊടുവിൽ അമ്മയാനയെ കണ്ടെത്തി. ഏതാണ്ട്. രണ്ട് മണിക്കൂറിലധികം നീണ്ട ശ്രമങ്ങൾക്ക് ശേഷം ആനക്കുട്ടിയെ സുരക്ഷിതമായി അമ്മയുടെ അരികിലെത്തിച്ചു. കുഞ്ഞിനെ വാരിപ്പുണർന്ന് മുലയൂട്ടിയ ശേഷം അമ്മയാനയും കുട്ടിയും സുരക്ഷിതമായി കാടുകയറി. മനുഷ്യത്വത്തിന്‍റെയും പ്രകൃതിയോടുള്ള സ്നേഹത്തിന്‍റെയും വലിയ ഉദാഹരണമായി ഈ സംഭവം. മത്സ്യത്തൊഴിലാളികൾ തന്നെ പകർത്തിയ സംഭവത്തിന്‍റെ വീഡിയോ സമൂഹ മാധ്യമങ്ങളിൽ വൈറലായി.

അമ്മയുടെ വേർപാടിന് ശേഷം ജോലി ഉപേക്ഷിച്ചു; 80 -കാരനായ പിതാവിനൊപ്പം യാത്ര ചെയ്ത് മകൻ, ആദ്യ വിമാനയാത്ര വൈറൽ

Web Desk — Mon, 21 Sep 2026 15:58:31 +0530

പ്രിയപ്പെട്ടവർക്കൊപ്പം ചെലവഴിക്കാൻ ജീവിതം വളരെ ചെറുതാണെന്ന തിരിച്ചറിവിലാണ് ശ്രീകാന്ത് പാണ്ഡെ എന്ന യുവാവ് തന്റെ ജോലി ഉപേക്ഷിച്ചത്. കാൻസർ ബാധിതയായിരുന്ന അമ്മയെ നഷ്ടപ്പെട്ട ശേഷമായിരുന്നു ഈ തീരുമാനം. ഇന്ന്, തന്റെ 80 -കാരനായ പിതാവിന്റെ ആഗ്രഹങ്ങൾ ഓരോന്നായി സാക്ഷാത്കരിക്കാൻ അദ്ദേഹത്തോടൊപ്പം യാത്ര ചെയ്യുകയാണ് ശ്രീകാന്ത്. പിതാവ് ജീവിതത്തിൽ ആദ്യമായി വിമാനത്തിൽ കയറുന്നതിന്റെയും, വിമാനം കണ്ടപ്പോഴുണ്ടായ അദ്ദേഹത്തിന്റെ കൗതുകം നിറഞ്ഞ പ്രതികരണങ്ങളുടെയും ദൃശ്യങ്ങൾ ശ്രീകാന്ത് ഇൻസ്റ്റാഗ്രാമിലൂടെ പങ്കുവെച്ചു. വിമാനത്തിലെ വിൻഡോ സീറ്റിലിരുന്ന് പുറത്തെ കാഴ്ചകൾ ആസ്വദിക്കുന്ന പിതാവിന്റെ മനോഹര നിമിഷങ്ങളും വീഡിയോയിലുണ്ട്.

'സാക്ഷാത്കരിക്കാൻ 80 വർഷമെടുത്ത ഒരു സ്വപ്നം...' എന്ന അടിക്കുറിപ്പോടെയാണ് ശ്രീകാന്ത് ഈ വീഡിയോ പങ്കുവെച്ചത്. അച്ഛനും മകനും തമ്മിലുള്ള ഊഷ്മളമായ സ്നേഹബന്ധം സോഷ്യൽ മീഡിയ ഏറ്റെടുത്തു കഴിഞ്ഞു. നിരവധി ആളുകളാണ് വീഡിയോയ്ക്ക് താഴെ ആശംസകളുമായി എത്തിയത്. 'എന്റെ മാതാപിതാക്കളെയും ഇതുപോലെ വിമാനത്തിൽ കൊണ്ടുപോകണമെന്നത് തന്നെയാണ് എന്റെയും സ്വപ്നം' എന്ന് ഒരാൾ കമന്റിൽ കുറിച്ചു. 'ഇതുപോലൊരു മകനെ ലഭിക്കുന്നത് അപൂർവ്വമായ കാര്യമാണ്' എന്നായിരുന്നു മറ്റൊരാളുടെ കമന്റ്. വിമാനത്തിലെ ജീവനക്കാർ അദ്ദേഹത്തെ ബഹുമാനത്തോടെ സ്വീകരിച്ചതും, അദ്ദേഹം അത്രതന്നെ സ്നേഹത്തോടെ തിരികെ പ്രതികരിച്ചതും തങ്ങളെ ഏറെ ആകർഷിച്ചുവെന്നും മറ്റു ചിലർ അഭിപ്രായപ്പെട്ടു.

View this post on Instagram

A post shared by Bhukkhad Musafir | Shrikant Pandey (@bhukkhad_musafir)

ഈ സംഭവം നമ്മെ ഓർമ്മിപ്പിക്കുന്നത് ജീവിതത്തിന്റെ ഏറ്റവും വലിയ യാഥാർത്ഥ്യമാണ്. പണത്തേക്കാളും കരിയറിനേക്കാളും പ്രധാനം പ്രിയപ്പെട്ടവർക്കൊപ്പം ചെലവഴിക്കുന്ന നിമിഷങ്ങളാണ്. പ്രിയപ്പെട്ടവർ കൂടെയുള്ളപ്പോൾ കൂടുതൽ കൂടുതൽ ചേർന്നു നിൽക്കുക. കൂടുതൽ കൂടുതൽ കരുതുക. കൊച്ചു കൊച്ചു സന്തോഷങ്ങൾ പരസ്പരം പങ്കുവെക്കുമ്പോഴാണ് ജീവിതം കൂടുതൽ അർത്ഥപൂർണ്ണമാകുന്നത് അല്ലേ?

ഇതോ ഹീറോയിസം? കൂറ്റൻ പെരുമ്പാമ്പിനെ കഴുത്തിന് പിടിച്ച് സ്കൂട്ടറിന്‍റെ പിന്നിൽ തിരിഞ്ഞ് ഇരുന്ന് യുവാവ്, വീഡിയോ

Web Desk — Sun, 20 Sep 2026 15:45:45 +0530

ഹൈദരാബാദിൽ കൂറ്റൻ പെരുമ്പാമ്പ് കൈയിൽ ചുറ്റിയ നിലയിലുള്ള യുവാവിന്‍റെ വീഡ‍ിയോ സമൂഹ മാധ്യമങ്ങളിൽ വൈറലായി. വീഡിയോയിൽ ഇയാൾ കൈയിൽ ചുറ്റിയ പാമ്പുമായി സ്കൂട്ടറിന് പിന്നിൽ തിരിഞ്ഞ് ഇരുന്ന് പോകുന്ന ദൃശ്യങ്ങളുമുണ്ടായിരുന്നു. വീഡിയോ വൈറലായതിന് പിന്നാലെ യുവാവിന്‍റെ ഹീറോയിസത്തെ വിമർശിച്ച് നിരവധി പേർ രംഗത്തെത്തി. ഇതേസമയം ഹൈദരാബാദിലെ ഐടി കമ്പനിയ്ക്ക് സമീപത്ത് കണ്ട പാമ്പിനെ യുവാവ് പിടികൂടുയായിരുന്നെന്ന് വീഡിയോയ്ക്ക് ഒപ്പമുള്ള കുറിപ്പിൽ പറയുന്നു.

യുവാവിന് രൂക്ഷ വിമ‍ർശനം

യുവാവ് പാമ്പിനെ പിടികൂടിയതിന് പിന്നാലെ പാമ്പ് ഇയാളുടെ കൈയിൽ ചുറ്റിവരിയുകയായിരുന്നുവെന്നാണ് റിപ്പോർട്ട്. അതേസമയം പാമ്പുമായി ഇയാൾ എന്തിനാണ് സ്കൂട്ടിറിന്‍റെ പിന്നിൽ തിരിഞ്ഞ് ഇരുന്നതെന്ന് വ്യക്തമല്ല. അതേസമയം യുവാവ് പാമ്പിനെ അനായാസമായി കൈകാര്യം ചെയ്ത രീതിയെ നിരവധി പേർ അഭിനന്ദിച്ചു. എന്നാൽ, സുരക്ഷാ ഉപകരണങ്ങളൊന്നുമില്ലാതെ കൂറ്റൻ പെരുമ്പാമ്പിനെ പിടികൂടിയതിനെ വിമർശിച്ച് ചിലരും രംഗത്തെത്തി. യുവാവ് ഔദ്യോഗിക പാമ്പുപിടിത്ത സംഘത്തിന്‍റെ ഭാഗമായിരുന്നോയെന്ന കാര്യത്തിൽ വ്യക്തതയില്ലെന്ന് റിപ്പോർട്ടുകൾ പറയുന്നു.

#HyderabadPython spotted near Durgam Cheruvu in HyderabadA large python was spotted in front of IT companies near Durgam Cheruvu.The python was caught by a snake catcher and shifted to a safe location.#Python #Telangana #DurgamCheruvu #Hyderabad pic.twitter.com/0nVFgxbmFE

— NewsMeter (@NewsMeter_In) September 18, 2026

നടപടി ആവശ്യപ്പെട്ട് നെറ്റിസെൺസ്

ഐടി ക്യാമ്പസിന് സമീപം പെരുമ്പാമ്പിനെ കണ്ടത്തിയപ്പോൾ, പരിശീലനം ലഭിച്ച പാമ്പുപിടിത്തക്കാരെയോ വന്യജീവി ഉദ്യോഗസ്ഥരെയോ ബന്ധപ്പെട്ടിരുന്നോ എന്ന കാര്യത്തിൽ സ്ഥിരീകരണമില്ല. അതുപോലെ തന്നെ പെരുമ്പാമ്പിനെ ഇയാൾ എവിടെയാണ് വിട്ടയച്ചതെന്ന കാര്യത്തിലും യാതൊരു വിവരവും ലഭ്യമല്ല. പാമ്പുമായ സ്കൂട്ടറിൽ ഇയാൾ തിരഞ്ഞിരുന്നതിനെതിരെയും നിരവധി പേർ രംഗത്തെത്തി. പരിശീലനമില്ലാതെ പാമ്പുകളെ കൈകാര്യം ചെയ്യുന്നത് മനുഷ്യർക്കും പാമ്പിനും അപകടകരമാണെന്ന വനം വകുപ്പിന്‍റെ നിർദ്ദേശം ഇയാൾ പാലിച്ചില്ലെന്നും ചിലർ ചൂണ്ടിക്കാട്ടി. മറ്റ് ചിലർ പാമ്പിനെ അശാസ്ത്രീയമായി കൈകാര്യം ചെയ്ത ഇയാൾക്കെതിരെ നടപടി വേണമെന്നും ആവശ്യപ്പെട്ടു.

കണ്ണിൽച്ചോരയില്ലാത്ത പണിയായിപ്പോയി; വാടകയ്ക്ക് കൊടുത്ത വീടിന്റെ ഒരവസ്ഥ! വീഡിയോയുമായി യുവതി

Web Desk — Wed, 23 Sep 2026 09:46:20 +0530

വാടകയ്ക്ക് വീട് നൽകുമ്പോൾ പല ഉടമകളും പറയുന്ന കാര്യമാണ് വീട് നന്നായി സൂക്ഷിക്കണേ എന്ന്. എന്നാൽ, അങ്ങനെ വാടകയ്ക്ക് നൽകിയ പുതിയ ഫുള്ളി ഫർണിഷ്ഡ് വീട് മോശമായ അവസ്ഥയിലാക്കിയെന്ന് കാണിച്ച് ഉടമയായ ഡോ. ക്ഷിതി സോണി പങ്കുവെച്ച വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ഒരു വർഷം മുമ്പ് മാത്രം വാടകയ്ക്ക് നൽകിയ വീടിന്റെയും സാധനങ്ങളുടെയും അവസ്ഥ കണ്ട് താൻ ഞെട്ടിപ്പോയെന്നാണ് ഇവർ പറയുന്നത്.

ഇൻസ്റ്റഗ്രാമിൽ പങ്കുവെച്ച വീഡിയോയിൽ വീടിന്റെയും വീട്ടിലെ സാധനങ്ങളുടെയും തകർന്ന അവസ്ഥ ഇവർ ചൂണ്ടിക്കാണിക്കുന്നുണ്ട്. വാഷിംഗ് മെഷീൻ, ഫ്രിഡ്ജ്, സോഫ, ഡ്രോയറുകൾ, സീലിംഗ്, ബാൽക്കണി എന്നിവയെല്ലാം അതിദയനീയമായ അവസ്ഥയിലാണ്. ഭാവിയിൽ തന്റെ കുടുംബത്തിന് താമസിക്കാൻ കൂടി ഉപകരിക്കുമെന്ന കരുതലോടെയാണ് എല്ലാ സാധനങ്ങളും പുതിയത് വാങ്ങി വീട് ഫർണിഷ് ചെയ്ത് നൽകിയതെന്ന് ഇവർ പറഞ്ഞു.

പുതിയതായി നൽകിയ ഗോദ്‌റേജ് ഫ്രിഡ്ജും വാഷിംഗ് മെഷീനും തകർത്ത നിലയിലാണ്. വാഷിംഗ് മെഷീന്റെ ഭാഗങ്ങൾ ഇളകി കിടക്കുകയാണ്. സോഫ പൂർണ്ണമായും നശിച്ചു. ഡ്രോയറുകൾ അടയാത്ത വിധം കേടായിരിക്കുന്നു. സീലിംഗ് ഷീറ്റുകൾക്കും ബാൽക്കണിക്കും കേടുപാടുകൾ പറ്റിയിട്ടുണ്ട്. വീട് വളരെ വൃത്തിഹീനമായ രീതിയിലാണ് ഉള്ളത്.

പെൺകുട്ടികളാണ് വീട് വാടകയ്ക്കെടുത്തിരുന്നത് എന്നതിനാൽ വീട് നന്നായി നോക്കുമെന്നാണ് കരുതിയതെന്നും എന്നാൽ വലിയ നിരാശയാണ് ഉണ്ടായതെന്നും ഇവർ പറയുന്നു. 'വാടക നൽകുന്നുണ്ടെന്ന് കരുതി വീട് തോന്നുംപടി ഉപയോഗിക്കാനുള്ളതല്ല'. വാടക വാങ്ങുന്നുണ്ടെന്ന പേരിൽ വസ്തുക്കൾ ഉപയോഗിച്ച് നശിപ്പിക്കാൻ കഴിയില്ലെന്നും അവർ കൂട്ടിച്ചേർത്തു.

View this post on Instagram

A post shared by DrKshiti Soni (@kshitii_soni)

നിരവധിപ്പേരാണ് പോസ്റ്റിന് കമന്റുകൾ നൽകിയത്. ‌'വാടക നൽകുന്നുണ്ടെന്ന് കരുതി ഒരാളുടെ സ്വത്ത് നശിപ്പിക്കാൻ അവകാശമില്ല', വാടകക്കാർ വീടിനോട് ഒരു ബഹുമാനമൊക്കെ കാണിക്കണം', 'ഇതുകൊണ്ടാണ് ഉടമകൾ വലിയ തുക സെക്യൂരിറ്റി ഡെപ്പോസിറ്റായി ആവശ്യപ്പെടുന്നത്' തുടങ്ങി നിരവധി കമന്റുകളാണ് വീഡിയോയ്ക്ക് താഴെ വന്നിരിക്കുന്നത്.

കുട്ടികളുടെ കൂടെ നിൽക്കണം, മാതാപിതാക്കളെ നോക്കണം, എയർഫോഴ്സിലെ ജോലിയുപേക്ഷിച്ച് ക്ലോത്തിംഗ് ബ്രാൻഡ്

Web Desk — Fri, 25 Sep 2026 12:36:40 +0530

രാജ്യസേവനത്തിന് ശേഷം കുടുംബത്തോടൊപ്പം കൂടുതൽ സമയം ചെലവഴിക്കാൻ വേണ്ടി ജോലി രാജി വച്ച് എയർ ഫോഴ്സ് മുൻ ഉദ്യോഗസ്ഥ. സ്വന്തം നാട്ടിൽ ക്ലോത്തിംഗ് ബ്രാൻഡ് ആരംഭിക്കുകയായിരുന്നു ഡെറാഡൂൺ സ്വദേശിനിയായ ഇവർ. @thefaujifounder എന്ന ഇൻസ്റ്റാഗ്രാം ഹാൻഡിലിലൂടെയാണ് ഇവർ തന്റെ ജീവിതത്തിലെ ഈ വലിയ മാറ്റത്തെക്കുറിച്ച് തുറന്നുപറഞ്ഞത്.

വ്യോമസേനയിൽ നിന്ന് സംരംഭകയിലേക്ക്

14 വർഷം ഷോർട്ട് സർവീസ് കമ്മീഷൻ (SSC) ഓഫീസറായിട്ടുള്ള സേവനത്തിന് ശേഷമാണ് ഇവർ വ്യോമസേന വിട്ടത്. മക്കളുടെ അടുത്തായിരിക്കാനും, പ്രായമാകുന്ന മാതാപിതാക്കളെ നോക്കാനും, കുടുംബത്തോടൊപ്പം കൂടുതൽ സമയം ചെലവഴിക്കാനും വേണ്ടിയാണത്രെ അവർ ഈ തീരുമാനം എടുത്തത്.

ഫാഷൻ ഡിസൈനിങ്ങിൽ വലിയ സ്വപ്നങ്ങളൊന്നും തനിക്കില്ലായിരുന്നു എന്നും കുട്ടിക്കാലം മുതൽ അത്തരമൊരു ആഗ്രഹമില്ലായിരുന്നു എന്നും യുവതി പറയുന്നു. എന്നാൽ, കുടുംബത്തിനൊപ്പം നിൽക്കുക എന്നത് മാത്രമായിരുന്നു ജോലി ഉപേക്ഷിച്ച് നാട്ടിലേക്ക് തിരികെ വരാനുള്ള കാരണമെന്നാണ് ഇവർ വ്യക്തമാക്കുന്നത്. വീടിന് വെറും 100 മീറ്റർ അകലെയാണ് ഇവർ തന്റെ പുതിയ സ്റ്റോർ ആരംഭിച്ചിരിക്കുന്നത്.

View this post on Instagram

A post shared by Call me Ashh (@thefaujifounder)

'ചിലപ്പോൾ കുടുംബത്തെയും, നമ്മുടെ വേരുകളെയും, അവനവന്റെ സന്തോഷത്തെയും, തിരഞ്ഞെടുക്കുന്നത് ജീവിതത്തിലെ ഏറ്റവും വലിയ കരിയർ തീരുമാനമായി മാറിയേക്കാം' എന്നാണ് ഈ മുൻ വ്യോമസേന ഉദ്യോഗസ്ഥ തന്റെ ഇൻസ്റ്റാഗ്രാം പോസ്റ്റിൽ കുറിച്ചത്. എന്തായാലും, ഇത്തരത്തിൽ ഒരു തീരുമാനമെടുക്കണമെങ്കിൽ അതിന് വലിയ ധൈര്യം തന്നെ വേണം എന്നാണ് സോഷ്യൽ മീഡിയയുടെ അഭിപ്രായം. 'സൈന്യത്തിൽ നിന്ന് സംരംഭകയിലേക്കുള്ള വഴി എളുപ്പമല്ല', 'കുടുംബത്തോടൊപ്പം ചെലവഴിക്കുന്ന സമയത്തിന് വിലമതിക്കാനാവില്ല' എന്നിങ്ങനെ നിരവധി കമന്റുകളാണ് യുവതിയുടെ പോസ്റ്റിന് ഇൻസ്റ്റഗ്രാമിൽ ലഭിച്ചു കൊണ്ടിരിക്കുന്നത്.

മേശയിലും കസേരയിലും ഓടിനടന്ന് എലികൾ! രാജ്കോട്ടിലെ മക്‌ഡൊണാൾഡ്സിൽ നിന്നുള്ള ദൃശ്യങ്ങൾ വൈറൽ, പക്ഷേ പിഴ വെറും 3,000 രൂപ, വീഡിയോ

Web Desk — Wed, 23 Sep 2026 18:58:41 +0530

മക്‌ഡൊണാൾഡ്സ് ഔട്ട്‌ലെറ്റിൽ ഉപഭോക്താക്കൾക്കായി ഒരുക്കിയ മേശകളിലും കസേരകളും എലികൾ ഓടിനടക്കുന്ന ദൃശ്യങ്ങൾ പുറത്തുവന്നതോടെ രാജ്കോട്ടിലെ മക്‌ഡൊണാൾഡ്സ് ഔട്ട്‌ലെറ്റ് വിവാദത്തിപ്പെട്ടു. ഇവിടെ ഭക്ഷണം കഴിക്കാനെത്തിയ ഒരു ഉപഭോക്താവ് പകർത്തിയ വീഡിയോ സമൂഹ മാധ്യമങ്ങളിൽ വ്യാപകമായി പ്രചരിപ്പിക്കപ്പെട്ടു. പിന്നാലെ രാജ്കോട്ട് മുനിസിപ്പൽ കോർപ്പറേഷന്‍റെ ഭക്ഷ്യസുരക്ഷാ വിഭാഗം സ്ഥാപനത്തിൽ പരിശോധന നടത്തി. സംഭവത്തിൽ ഔട്ട്‌ലെറ്റിന് 3,000 രൂപ പിഴ ചുമത്തിയെന്ന് റിപ്പോർട്ട്.

എലി പുറത്ത് നിന്നും എത്തിയതെന്ന് അധികൃതർ

ഗ്രീൻലാൻഡ് ചൗക്കിലുള്ള മക്‌ഡൊണാൾഡ്സ് ഔട്ട്‌ലെറ്റിലാണ് സംഭവം നടന്നത്. ഹാർഡ് കാസിൽ റെസ്റ്റോറന്‍റ് പ്രൈവറ്റ് ലിമിറ്റഡാണ് സ്ഥാപനം നടത്തുന്നത്. ഔട്ട്ലെറ്റിൽ നിരവധി ഉപഭോക്താക്കൾ ഇരിക്കുമ്പോൾ തന്നെ അവിടുത്തെ മേശകളിലും കസേരകളിലും രണ്ട് എലികൾ ഒരു ഭയവുമില്ലാതെ ഓടി നടക്കുന്നത് വീഡിയോയിൽ കാണാം. ഗ്ലാസ് പാർട്ടീഷൻ ഉപയോഗിച്ച് വേർതിരിച്ചിരിക്കുന്ന ഔട്ട്‌ലെറ്റിലെ പാർട്ടി ഏരിയയിലാണ് എലികളെ കണ്ടെത്തിയതെന്ന് മുനിസിപ്പൽ ഹെൽത്ത് ഓഫീസർ ജയേഷ് വക്കാണി പിന്നീട് മാധ്യമങ്ങളോട് വിശദീകരിച്ചു.

Rats moving around tables and benches at a McDonald’s outlet near Greenland Chowkdi in Rajkot. The Rajkot Municipal Corporation’s food department inspected the outlet and found a hygiene lapse in the dining area.The restaurant was fined Rs. 3,000 because of poor cleanliness in… pic.twitter.com/u6sAzipHN5

— SK Chakraborty (@sanjoychakra) September 22, 2026

എലികൾ പുറത്ത് നിന്നും വന്നതാകാമെന്നാണ് അദ്ദേഹം മാധ്യമങ്ങളോട് പറഞ്ഞത്. ഒപ്പം തങ്ങളുടെ പരിശോധനയിൽ ഔട്ട്‌ലെറ്റിനുള്ളിൽ ഗുരുതരമായ ശുചിത്വ വീഴ്ച കണ്ടെത്തിയില്ലെന്നും അദ്ദേഹം പ്രത്യേകം എടുത്തുപറഞ്ഞു. എന്നാൽ ഭക്ഷണശാലകളിൽ ഫലപ്രദമായ കീടനിയന്ത്രണം ഉറപ്പാക്കേണ്ടതിന്‍റെ പ്രാധാന്യം സംഭവം ചൂണ്ടിക്കാട്ടുന്നതായും അദ്ദേഹം കൂട്ടിച്ചേർത്തു.

Hello @grok. Is this correct Rats found in the McDonald's outlet in Rajkot pic.twitter.com/lyJnk6sIhz

— Wynner (@wynnner) September 22, 2026

നിരവധി സ്ഥാപനങ്ങളിൽ പരിശോധന

പരിശോധനയുടെ ഭാഗമായി ടോൺഡ് മിൽക്ക്, സ്ട്രോബെറി ഫ്രൂട്ട് ക്രഷ് എന്നിവയുടെ സാമ്പിളുകളും അധികൃതർ ശേഖരിച്ചു. ഭക്ഷ്യസുരക്ഷാ നിയമപ്രകാരമുള്ള പരിശോധനയ്ക്കായി ഇവ ലബോറട്ടറിയിലേക്ക് അയച്ചിട്ടുണ്ടെന്നും അധികൃതർ അറിയിച്ചു. രാജ്കോട്ടിൽ നടന്ന വിപുലമായ ഭക്ഷ്യസുരക്ഷാ പരിശോധനയുടെ ഭാഗമായിരുന്നു നടപടി. ആകെ 53 ഭക്ഷണശാലകൾ, ഹോസ്റ്റലുകൾ, കാന്‍റീനുകൾ എന്നിവയും പരിശോധയിൽ ഉൾപ്പെട്ടു. ഏകദേശം 65 കിലോഗ്രാം പഴകിയതും ഭക്ഷ്യയോഗ്യമല്ലാത്തതുമായ ഭക്ഷണം കണ്ടെത്തി നശിപ്പിച്ചെന്നും റിപ്പോർട്ടിൽ പറയുന്നു. വിവിധ വീഴ്ചകളുടെ പേരിൽ 18 സ്ഥാപനങ്ങൾക്ക് നോട്ടീസ് നൽകി. പരിശോധനയിൽ ആകെ ₹17,000 പിഴയും ഈടാക്കി.

ജോലിസ്ഥലത്തെ എന്റെ ആദ്യത്തെ ഫ്രണ്ട്; സെക്യൂരിറ്റി ജീവനക്കാരനോടുള്ള സൗഹൃദത്തെ കുറിച്ച് യുവതി

Web Desk — Mon, 21 Sep 2026 12:39:15 +0530

പുതിയ നഗരം, പുതിയ ജോലിസ്ഥലം... ഇതൊക്കെ നമ്മിൽ പലപ്പോഴും പരിഭ്രമവും ആശങ്കയും ഒക്കെ ഉണ്ടാക്കാറുണ്ട്. ആകെ അപരചിതത്വം നിറഞ്ഞതായിരിക്കും അന്തരീക്ഷം. എന്നാൽ, ഗോവയിൽ നിന്ന് പൂനെയിലേക്ക് ജോലി തേടിയെത്തിയ കോമൾ കൊത്തവാല എന്ന യുവതിയുടെ ആ ഭയം മാറ്റിയത് അവിചാരിതമായി ലഭിച്ച ഒരു സൗഹൃദമാണ്. ഓഫീസിലെ സെക്യൂരിറ്റി ജീവനക്കാരനുമായുള്ള ആത്മബന്ധത്തെക്കുറിച്ച് കോമൾ സാമൂഹിക മാധ്യമങ്ങളിൽ പങ്കുവെച്ച പോസ്റ്റാണ് ഇപ്പോൾ ശ്രദ്ധനേടുന്നത്.

സൗഹൃദത്തിന്റെ തുടക്കം

പുതിയ ഓഫീസിലെ ആദ്യത്തെ ദിവസം രണ്ട് മൂന്ന് ലഗേജ് ബാഗുകളുമായാണ് കോമൾ എത്തിയത്. ലഗേജുകൾ ഓഫീസിനുള്ളിലേക്ക് കൊണ്ടുപോകാൻ കഴിയാത്തതിനാൽ അവ സെക്യൂരിറ്റി ജീവനക്കാരനോട് അവിടെ സൂക്ഷിക്കാമോ എന്ന് അവൾ ചോദിച്ചു. ഒരു മടിയും കൂടാതെ അദ്ദേഹം അത് സമ്മതിക്കുകയും ദിവസം മുഴുവൻ ആ ബാഗുകൾ സൂക്ഷിക്കുകയും ചെയ്തു. അന്നുമുതൽ ഇരുവരും ദിവസവും പരസ്പരം സ്നേഹത്തോടെ അഭിവാദ്യം ചെയ്യാൻ തുടങ്ങി. പിന്നീട് ആ സംഭാഷണങ്ങൾ ജോലിയെക്കുറിച്ചും പൂനെയിലെ ജീവിതത്തെക്കുറിച്ചുമുള്ള വിശേഷങ്ങളിലേക്ക് വഴിമാറി.

സെക്യൂരിറ്റി ജീവനക്കാരുടെ കഠിനമായ ജോലി സാഹചര്യങ്ങളെക്കുറിച്ചും കോമൾ ഓർത്തു. അവർക്ക് സാധാരണയായി അവധികളോ ശനിയാഴ്ചകളോ ഉണ്ടാകാറില്ലെന്നും, നാട്ടിലേക്ക് പോകുമ്പോൾ മാത്രമാണ് അവധി ലഭിക്കാറുള്ളതെന്നും അവൾ ചൂണ്ടിക്കാട്ടി. വ്യത്യസ്തരായ മനുഷ്യരുടെ ജീവിതാനുഭവങ്ങളെക്കുറിച്ച് ചിന്തിക്കാൻ ഈ സൗഹൃദം തന്നെ പ്രേരിപ്പിച്ചതായും കോമൾ പറയുന്നു.

View this post on Instagram

A post shared by Komal Kothawale (@life.with.koko.mp4)

സാധാരണയായി വൈകിയാണ് കോമൾ ഓഫീസിൽ നിന്ന് മടങ്ങാറുള്ളത്. എന്നാൽ, നാട്ടിലേക്ക് യാത്ര തിരിക്കേണ്ടി വന്നതിനാൽ ഒരു ദിവസം അവൾ നേരത്തെ ഇറങ്ങി. തന്നെ നേരത്തെ കാണുമ്പോൾ സെക്യൂരിറ്റി ജീവനക്കാരൻ അത്ഭുതപ്പെടുമെന്ന് തോന്നിയതിനാൽ തന്നെ ആ രംഗവും അവൾ ക്യാമറയിൽ പകർത്തിയിട്ടുണ്ട്. തന്റെ സന്തോഷത്തിൽ അദ്ദേഹം പങ്കുചേർന്നതായി കോമൾ പറയുന്നു. ചുറ്റുമുള്ള മനുഷ്യരുമായി സംസാരിക്കുന്നതിന്റെ പ്രാധാന്യവും മറ്റുള്ളവരുടെ ജീവിതത്തിലെ ബുദ്ധിമുട്ടുകളെക്കുറിച്ചും ഈ അനുഭവം തന്നെ ഓർമ്മിപ്പിച്ചതായി കോമൾ കൂട്ടിച്ചേർത്തു. നിരവധിപ്പേരാണ് ഈ സൗഹൃദത്തിൽ സ്നേഹം പ്രകടിപ്പിച്ചുകൊണ്ട് പോസ്റ്റിന് കമന്റുകൾ നൽകിയത്.

സിഡ്‌നിയിലെ ജീവിതച്ചെലവ് വെളിപ്പെടുത്തി സൈക്കോളജിസ്റ്റ്; സമ്പാദ്യം ലക്ഷങ്ങൾ, എങ്കിലും ഇന്ത്യയിലേക്ക് മടങ്ങുന്നെന്ന്, വീഡിയോ

Web Desk — Thu, 24 Sep 2026 14:07:34 +0530

ഓസ്‌ട്രേലിയയിലെ ഉയർന്ന വരുമാനവും ആഡംബര ജീവിതവും ഉപേക്ഷിച്ച് മാതൃരാജ്യത്തേക്ക് മടങ്ങാനൊരുങ്ങി പ്രവാസി സൈക്കോളജിസ്റ്റ്. ഓസ്‌ട്രേലിയയിലെ സിഡ്‌നിയിൽ കൗൺസിലിംഗ് സൈക്കോളജിസ്റ്റായി സേവനമനുഷ്ഠിക്കുന്ന ദിവ്യാജ് ഗൗതം ആണ് സിഡ്‌നിയിലെ തന്‍റെ പ്രതിമാസ ജീവിതച്ചെലവുകളും വരുമാനവും ഇൻസ്റ്റാഗ്രാമിലൂടെ പരസ്യപ്പെടുത്തിയത്. "സിഡ്‌നി വിടാൻ ഇനി 18 ദിവസങ്ങൾ മാത്രം" എന്ന അടിക്കുറിപ്പോടെ ദിവ്യാജ് ഗൗതം പങ്കുവെച്ച വീഡിയോയിൽ, ഓസ്‌ട്രേലിയയിലെ ജീവിതം അവസാനിപ്പിച്ച് താൻ ഇന്ത്യയിലേക്ക് മടങ്ങുകയാണെന്ന് സ്ഥിരീകരിച്ചു.

34,000 രൂപയിൽ നിന്ന് 6.7 ലക്ഷം രൂപയിലേക്ക്

ഓസ്‌ട്രേലിയയിലെത്തിയ തുടക്ക കാലത്ത് നിസ്സാര വേതനത്തിനാണ് താൻ ജോലി ചെയ്തിരുന്നതെന്ന് അദ്ദേഹം വെളിപ്പെടുത്തുന്നു. ആദ്യ ജോലി: ഇന്ത്യൻ ഗ്രോസറി സ്റ്റോറിൽ ആഴ്ചയിൽ ആറ് ദിവസം ജോലി ചെയ്തു. പ്രതിവാര വരുമാനം ഏകദേശം 500 ഓസ്‌ട്രേലിയൻ ഡോളർ (34,000 ഇന്ത്യൻ രൂപ). രണ്ടാം ഘട്ടം: മൂന്ന് മാസങ്ങൾക്ക് ശേഷം റീട്ടെയിൽ മേഖലയിലേക്ക് മാറി. വരുമാനം ആഴ്ചയിൽ 1,100 ഡോളറായി (75,000 ഇന്ത്യൻ രൂപ) ഉയർന്നു. ഇതിനൊപ്പം 'സൈക്കോസോഷ്യൽ റിസ്ക് കൺസൾട്ടന്‍റായി' സ്വന്തമായി പ്രാക്ടീസ് ആരംഭിച്ചു. ഒരു ക്ലയന്‍റിൽ നിന്ന് പ്രതിമാസം 3,000 ഡോളർ (ഏകദേശം 2 ലക്ഷം രൂപ) വരെ ഈടാക്കിയിരുന്നു. തന്‍റെ കരിയറിന്‍റെ ഉച്ചസ്ഥായിയിൽ പ്രതിമാസം 10,000 ഡോളർ (6.7 ലക്ഷം രൂപ) വരെ സമ്പാദിച്ചിരുന്നെന്ന് ഗൗതം വെളിപ്പെടുത്തുന്നു. ഇക്കാലത്ത് നികുതി കിഴിച്ച ശേഷം പ്രതിമാസം 7,500 ഡോളർ (ഏകദേശം 5 ലക്ഷം രൂപ) അദ്ദേഹത്തിന് കൈയ്യിൽ ലഭിച്ചിരുന്നു.

View this post on Instagram

A post shared by Div | Counselling Psychologist (@psych.actually)

പ്രതിമാസം ചെലവ് 2.6 ലക്ഷം!

സിഡ്‌നിയിലെ പ്രതിമാസ ചെലവുകൾ ആകെ 2.6 ലക്ഷം രൂപയാണന്നാണ് ഇദ്ദേഹം പറയുന്നത്. വീട്ടുവാടക: 2,400 ഓസ്‌ട്രേലിയൻ ഡോളർ (1.62 ലക്ഷം രൂപ). ഗ്രോസറി (പലചരക്ക് സാധനങ്ങൾ): 500 ഓസ്‌ട്രേലിയൻ ഡോളർ (34,000 രൂപ). വൈദ്യുതി, ഗ്യാസ്, വെള്ളം: 350 ഓസ്‌ട്രേലിയൻ ഡോളർ (24,000 രൂപ). സൗഹൃദകൂട്ടായ്മകളും വിനോദവും: 500 - 600 ഓസ്‌ട്രേലിയൻ ഡോളർ (34,000 - 40,000 രൂപ) ജിം അംഗത്വം: 100 ഓസ്‌ട്രേലിയൻ ഡോളർ (7,000 രൂപ) . പ്രതിമാസ ചെലവുകൾ കഴിഞ്ഞ് ഓരോ മാസവും 3,600 ഓസ്‌ട്രേലിയൻ ഡോളറോളം (ഏകദേശം 2.4 ലക്ഷം രൂപ) സമ്പാദിക്കാൻ തനിക്ക് സാധിച്ചിരുന്നതായി അദ്ദേഹം വ്യക്തമാക്കി. ഉയർന്ന വരുമാനവും മികച്ച സമ്പാദ്യവും ഉണ്ടായിട്ടും എന്തുകൊണ്ടാണ് ഓസ്‌ട്രേലിയ വിടുന്നതെന്ന സോഷ്യൽ മീഡിയ ഉപയോക്താക്കളുടെ ചോദ്യത്തിന് ഗൗതം വ്യക്തമായ മറുപടി നൽകുന്നു, "കുറച്ചുകാലമായി നാട്ടിലേക്ക് മടങ്ങുന്നതിനെക്കുറിച്ച് ചിന്തിക്കുകയായിരുന്നു. ഇന്ത്യയിലെ മനഃശാസ്ത്ര മേഖലയിൽ സ്വന്തമായി പുതിയൊരു സംരംഭം കെട്ടിപ്പടുക്കാനാണ് ഞാൻ ലക്ഷ്യമിടുന്നത്." എന്നായിരുന്നു അദ്ദേഹത്തിന്‍റെ മറുപടി.

എപ്പോഴും നടക്കാനാവുന്ന നല്ല നടപ്പാതകൾ വേണം; വിദേശയാത്ര കഴിഞ്ഞെത്തിയ ബെംഗളൂരു യുവാവിന്റെ പോസ്റ്റ്

Web Desk — Mon, 21 Sep 2026 14:06:49 +0530

വിദേശയാത്രയ്ക്കു ശേഷം നഗരജീവിതത്തെക്കുറിച്ചുള്ള കാഴ്ചപ്പാട് തന്നെ മാറിയ അനുഭവം പങ്കുവെച്ച് ബെംഗളൂരു സ്വദേശിയായ യുവാവ്. ദിവസവും നടക്കാൻ സാധിക്കുന്ന നല്ല നടപ്പാതകൾ പോലുള്ള ചെറിയ കാര്യങ്ങൾ എത്രത്തോളം പ്രധാനമാണെന്ന് വിദേശത്തുനിന്ന് മടങ്ങിയെത്തിയ ശേഷമാണ് മനസ്സിലായതെന്ന് ഭരത് ജെയിൻ എന്ന യുവാവ് പങ്കുവെച്ച വീഡിയോയിൽ പറയുന്നു.

നഗരത്തിലെ പാർക്കിംഗ് ബുദ്ധിമുട്ടുകളെയോ കാറിനെയോ ആശ്രയിക്കാതെ ഷോപ്പിംഗ് മാളുകളിലേക്ക് നടന്നുപോകാൻ കഴിയുന്ന ലളിതമായൊരു ജീവിതസാഹചര്യമാണ് ബെംഗളൂരുവിൽ താൻ ആഗ്രഹിക്കുന്നതെന്ന് ഭരത് വ്യക്തമാക്കി. 'സമീപകാലത്ത് നടത്തിയ വിദേശയാത്രയ്ക്കിടയിൽ രണ്ടു മൂന്ന് കിലോമീറ്റർ ദൂരം വരെ യാതൊരു ബുദ്ധിമുട്ടുമില്ലാതെ എനിക്ക് നടന്നുപോകാൻ കഴിഞ്ഞിരുന്നു. കാർ വേണോ, എവിടെ പാർക്ക് ചെയ്യണം, എങ്ങനെ തിരികെ എത്തും എന്നതിനെക്കുറിച്ചൊന്നും അവിടെ ചിന്തിക്കേണ്ടി വന്നില്ല. എപ്പോൾ വേണമെങ്കിലും സ്വതന്ത്രമായി ഇറങ്ങി നടക്കാമെന്ന അവസ്ഥ ഒരു മനുഷ്യനെന്ന നിലയിൽ ഏറെ സന്തോഷം നൽകിയ അനുഭവമായിരുന്നു' ഭരത് പറഞ്ഞു.

നടക്കാൻ അനുയോജ്യമായ തെരുവുകളും സുരക്ഷിതമായ പൊതുവിടങ്ങളും നഗരവാസികളുടെ ദൈനംദിന ജീവിതത്തെ എത്രത്തോളം പോസിറ്റീവായി സ്വാധീനിക്കുന്നുണ്ടെന്ന് വ്യക്തമാക്കുന്നതാണ് ഇദ്ദേഹത്തിന്റെ പോസ്റ്റ്. സോഷ്യൽ മീഡിയയിൽ വീഡിയോയ്ക്ക് വലിയ പിന്തുണയാണ് ലഭിക്കുന്നത്. നിരവധി ആളുകളാണ് ഭരതിന്റെ അഭിപ്രായത്തെ പിന്തുണച്ച് കമന്റുകളുമായി രംഗത്തെത്തിയത്.

View this post on Instagram

A post shared by Bharath jain (@ibharathj)

'ജീവിതത്തിലെ കൊച്ചു കൊച്ചു കാര്യങ്ങളിലാണ് നമ്മൾ യഥാർത്ഥ സന്തോഷം കണ്ടെത്തുന്നത്' എന്ന് ഒരാൾ കുറിച്ചപ്പോൾ, 'വളരെ പ്രസക്തമായ കാര്യമാണ് ഇദ്ദേഹം പറഞ്ഞിരിക്കുന്നത്' എന്നായിരുന്നു മറ്റൊരാളുടെ പ്രതികരണം. ആളുകൾ ലളിതമായ ഇത്തരം കാര്യങ്ങൾക്ക് പ്രാധാന്യം നൽകുന്നത് കാണുന്നത് ഏറെ ആശ്വാസകരമാണെന്നും പലരും അഭിപ്രായപ്പെട്ടു.

മാസം 75,000 രൂപ വരുമാനം, ഓട്ടോ ഡ്രൈവർ മകളുടെ സ്കൂൾ ഫീസായി നൽകുന്നത് 1.4 ലക്ഷം!

Web Desk — Wed, 23 Sep 2026 11:44:43 +0530

തന്റെ ഏക മകൾക്ക് മികച്ച ഭാവി ഉറപ്പാക്കാൻ മാതാപിതാക്കൾ ചെയ്യുന്ന ത്യാഗത്തിന്റെ കഥയാണ് ഇപ്പോൾ സാമൂഹിക മാധ്യമങ്ങളിൽ വൈറലാകുന്നത്. മാസം 75,000 രൂപ വരുമാനമുള്ള ഒരു ഓട്ടോ ഡ്രൈവർ, മകളുടെ സ്കൂൾ ഫീസിനായി മാത്രം വർഷം തോറും 1.4 ലക്ഷം രൂപയാണ് (മാസം ഏകദേശം 11,000 രൂപയിലധികം) ചിലവഴിക്കുന്നത്. ഒരു ഫിനാൻഷ്യൽ സർവീസസ് കമ്പനിയുടെ ഇൻസ്റ്റാഗ്രാം പേജിലാണ് ഈ ഹൃദയസ്പർശിയായ വീഡിയോ പ്രത്യക്ഷപ്പെട്ടത്.

വീഡിയോയിൽ പ്രതിമാസ വരുമാനം എത്രയാണെന്ന ചോദ്യത്തിന് 75,000 രൂപയെന്ന് ഡ്രൈവർ മറുപടി നൽകുന്നത് കാണാം. ഗ്യാസ്, ഓട്ടോ ഇഎംഐ, കുടുംബച്ചെലവുകൾ എന്നിവയാണ് പ്രധാന ചെലവുകൾ. താൻ വിദ്യാഭ്യാസമില്ലാത്തയാളാണെന്നും, എന്നാൽ മകൾക്ക് മികച്ച ഒരു ജീവിതം നൽകാനായി അവളെ ഒരു നല്ല സ്കൂളിലാണ് പഠിപ്പിക്കുന്നതെന്നും അദ്ദേഹം പറയുന്നു.

View this post on Instagram

A post shared by Rayi | Goalhive Financial Services Pvt Ltd | ARN Reg No - 307650 (@rayi.app)

എന്നാൽ, ഈ ഉയർന്ന വിദ്യാഭ്യാസച്ചെലവ് അദ്ദേഹത്തെ കടുത്ത സാമ്പത്തിക പ്രതിസന്ധിയിലാക്കുന്നുണ്ട്. സമ്പാദ്യം എന്ന് പറയാൻ ഒന്നുമില്ലാത്തതിനാൽ പലപ്പോഴും കുടുംബത്തിന്റെ ആവശ്യങ്ങൾക്കായി കടം വാങ്ങേണ്ടി വരുന്ന അവസ്ഥയാണ് വീഡിയോ ശ്രദ്ധിക്കപ്പെട്ടതോടെ നിരവധിപ്പേരാണ് കമന്റുകളുമായി എത്തിയത്. 'സ്കൂൾ മാറ്റിവെച്ച് മകളുടെ കോളേജ് പഠനത്തിനായി മാസം 5,000 മുതൽ 10,000 രൂപ വരെ നിക്ഷേപിച്ചാൽ ഭാവിയിൽ ഇദ്ദേഹത്തിന് കടം വാങ്ങേണ്ടി വരില്ല' എന്നാണ് ഒരാൾ കുറിച്ചത്. 'എന്റെ പിതാവ് നല്ല രീതിയിൽ സമ്പാദിച്ചിരുന്നെങ്കിലും, പ്രതിവർഷം 10,000 രൂപ മാത്രം ഫീസുള്ള ഒരു സെമി-ഗവൺമെന്റ് സ്കൂളിലാണ് ഞാൻ പഠിച്ചത്. ഇന്ന് ഞാൻ ഒരു ഡോക്ടറാണ്. ഉയർന്ന ഫീസുള്ള സ്കൂളുകൾക്ക് പിന്നാലെ പോകുന്നത് എന്തിനാണെന്ന് എനിക്ക് മനസ്സിലാകുന്നില്ല' എന്നായിരുന്നു മറ്റൊരാളുടെ അഭിപ്രായം.

'തനിക്ക് ഒരു മകളേ ഉള്ളൂവെന്നും അവൾക്കായി താൽക്കാലികമായി എന്തുചെയ്യാനും തയ്യാറാണെന്ന് അദ്ദേഹം പറയുമ്പോൾ മനസ്സലിഞ്ഞുപോകുന്നു. ഈ മനുഷ്യന് കൂടുതൽ സ്നേഹം ലഭിക്കട്ടെ' എന്ന് മറ്റൊരാൾ കുറിച്ചു.

കോണ്ടും ഉപയോഗിക്കുന്നതെങ്ങനെ? വെള്ളരിക്ക ഉപയോഗിച്ച് വിദശീകരിക്കുന്ന ബീഹാർ അധ്യാപകന്‍റെ ‘റീപ്രൊഡക്ടീവ് ഹെൽത്ത്’ക്ലാസ് വൈറൽ

Web Desk — Fri, 25 Sep 2026 20:51:37 +0530

ബീഹാറിലെ ഒരു ബയോളജി അധ്യാപകൻ ക്ലാസിൽ പ്രത്യുത്പാദന ആരോഗ്യവും ലൈംഗിക വിദ്യാഭ്യാസവും പഠിപ്പിച്ച രീതി സമൂഹ മാധ്യമങ്ങളിൽ വലിയ ചർച്ചയ്ക്ക് വഴിവെച്ചു. കോണ്ടം എങ്ങനെ ശരിയായി ഉപയോഗിക്കണമെന്ന് വിശദീകരിക്കാൻ വെള്ളരിക്ക ഉപയോഗിച്ചുള്ള പ്രായോഗിക ഡെമോൺസ്ട്രേഷനാണ് അധ്യാപകൻ നടത്തിയത്. ഇതിന്‍റെ വീഡിയോ സമൂഹ മാധ്യമങ്ങളിൽ വൈറലായതോടെ അനുകൂലിച്ചും വിമർശിച്ചും നിരവധി പേർ രംഗത്തെത്തി. വീഡിയോയ്ക്ക് ഇതിനകം ഏകദേശം രണ്ട് കോടി കാഴ്ചകൾ ലഭിച്ചു.

വെള്ളരിക്കയും കോണ്ടവും

ചന്ദൻ കുമാർ പണ്ഡിറ്റ് എന്ന അധ്യാപകനാണ് വീഡിയോയിൽ ക്ലാസ് എടുക്കുന്നത്. ഇൻസ്റ്റഗ്രാമിൽ ‘India’s Viral Biology Sir’ എന്ന് സ്വയം വിശേഷിപ്പിക്കുന്ന അദ്ദേഹത്തിന് 25,000-ത്തിലധികം ഫോളോവേഴ്സുണ്ട്. കോണ്ടം ഉപയോഗിക്കുന്ന രീതി വെള്ളരിക്ക ഉപയോഗിച്ച് വിശദീകരിക്കുന്നതിനൊപ്പം, ലൈംഗികമായി പകരുന്ന അണുബാധകളിൽ (STI) നിന്ന് സംരക്ഷണം നേടുന്നതിലും ഗർഭനിരോധനത്തിലും കോണ്ടത്തിനുള്ള പങ്കും അദ്ദേഹം വിശദീകരിക്കുന്നു.

തന്‍റെ പോസ്റ്റിനൊപ്പം ഇത് വിദ്യാഭ്യാസ ആവശ്യത്തിനായുള്ള വീഡിയോയാണെന്നും ബയോളജി സിലബസിലെ ‘Reproductive Health & Birth Control’ വിഷയമാണ് പ്രായോഗികമായി വിശദീകരിക്കുന്നതെന്നും ചന്ദൻ വ്യക്തമാക്കി. ഇത്തരം സെൻസിറ്റീവ് വിഷയങ്ങൾ പുസ്തകത്തിൽ മാത്രം ഒതുക്കാതെ ലളിതവും പ്രായോഗികവുമായ രീതിയിൽ പഠിപ്പിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.

സമ്മിശ്ര പ്രതികരണം

വീഡിയോയെ അനുകൂലിച്ചവർ വിദ്യാർഥികൾക്ക് ലൈംഗികാരോഗ്യം സംബന്ധിച്ച ശരിയായ അറിവ് നൽകേണ്ടതിന്റെ ആവശ്യകത ചൂണ്ടിക്കാട്ടി. എന്നാൽ, ചിലർ ക്ലാസ് മുറിയിലെ ഈ രീതിയെ വിമർശിച്ചു. വിദ്യാർഥികൾക്ക് അസ്വസ്ഥതയുണ്ടാകാമെന്നും ഇത്തരം വിഷയങ്ങൾ കൈകാര്യം ചെയ്യുന്നതിൽ കൂടുതൽ നിയന്ത്രണം വേണമെന്നും ചിലർ അഭിപ്രായപ്പെട്ടു. ചിലർ ആൺ-പെൺ വിദ്യാർഥികൾക്ക് പ്രത്യേകം ക്ലാസുകൾ വേണമെന്ന അഭിപ്രായമായിരുന്നു പങ്കുവച്ചത്.

Asianet News Malayalam

'നോ ഫ്ലൈ ലിസ്റ്റിൽ' ഉൾപ്പെടുത്തണം

'സത്യമറിയണം'

സ്റ്റാർബക്സിൽ നിന്നും 500 രൂപ മുടക്കി വാങ്ങിയ ഡ്രിങ്ക്സിൽ ചത്ത ഈച്ച; വീഡിയോയുമായി യുവതി

സമ്പത്ത് കാട്ടി വീഡിയോ പങ്കുവച്ചു, പിന്നാലെ യൂട്യൂബറുടെ വീട്ടിൽ മോഷണം; 118 പവനും പണവും കവർന്നു, വീഡിയോ

പൂജാ മുറിയിൽ അഞ്ചൂറിന്‍റെ നോട്ടുകെട്ടുകൾ

അതീവസുരക്ഷാ മേഖല, പക്ഷേ...

വഴിമുടക്കി കടുവയുടെ ഉച്ചമയക്കം; 'റോഡ് ബ്ലോക്ക്' വീഡിയോ വൈറൽ

ദില്ലിയിൽ ബൈക്കിനെ മീറ്ററുകളോളം വലിച്ചിഴച്ച് കാർ! 73 -കാരനായ ഡ്രൈവർ അറസ്റ്റിൽ, വീഡിയോ

ബൈക്കിനെ വലിച്ചിഴച്ച് കാർ

അറസ്റ്റ്

'രണ്ട് കപ്പലുകൾ, രണ്ട് ദിശകൾ… നടുക്കടലിൽ അച്ഛനെ കണ്ട് മകൻ'! അപൂർവ കൂടിക്കാഴ്ചയുടെ വീഡിയോ വൈറൽ

അച്ഛനെ കണ്ടത് നടുക്കടലിൽ!

ഒരു നല്ല വീടില്ലാതെ വളർന്നവന് മാത്രം മനസിലാകുന്ന സന്തോഷം; അമ്മയ്ക്കും അച്ഛനും സ്വപ്നവീട് സമ്മാനിച്ച് യുവാവ്

കുടുംബ കോടതി കെട്ടിടത്തിൽ നിന്നും യുവതി താഴേക്ക്... വീണതോ ചാടിയതോ?; സിസിടിവി ദൃശ്യങ്ങൾ വൈറൽ

ചാടിയതോ അതോ വീണതോ?

വിവാഹ മോചന ഹർജിയുമായി കോടതിയിൽ

അതിവേഗം, വൃത്തിയുള്ളത്

പക്ഷേ, യാത്രക്കാരുടെ സിവിക് സെന്‍സ്...

വേണം അല്പം പൗരബോധം

നദിയുടെ കുത്തൊഴുക്കിപ്പെട്ട് ആനക്കൂട്ടി

കുഞ്ഞിനെയും കൊണ്ട് കാടുകയറി അമ്മയാന

അമ്മയുടെ വേർപാടിന് ശേഷം ജോലി ഉപേക്ഷിച്ചു; 80 -കാരനായ പിതാവിനൊപ്പം യാത്ര ചെയ്ത് മകൻ, ആദ്യ വിമാനയാത്ര വൈറൽ

യുവാവിന് രൂക്ഷ വിമ‍ർശനം

നടപടി ആവശ്യപ്പെട്ട് നെറ്റിസെൺസ്

കണ്ണിൽച്ചോരയില്ലാത്ത പണിയായിപ്പോയി; വാടകയ്ക്ക് കൊടുത്ത വീടിന്റെ ഒരവസ്ഥ! വീഡിയോയുമായി യുവതി

കുട്ടികളുടെ കൂടെ നിൽക്കണം, മാതാപിതാക്കളെ നോക്കണം, എയർഫോഴ്സിലെ ജോലിയുപേക്ഷിച്ച് ക്ലോത്തിം​ഗ് ബ്രാൻഡ്

എലി പുറത്ത് നിന്നും എത്തിയതെന്ന് അധികൃതർ

നിരവധി സ്ഥാപനങ്ങളിൽ പരിശോധന

ജോലിസ്ഥലത്തെ എന്റെ ആദ്യത്തെ ഫ്രണ്ട്; സെക്യൂരിറ്റി ജീവനക്കാരനോടുള്ള സൗഹൃദത്തെ കുറിച്ച് യുവതി

34,000 രൂപയിൽ നിന്ന് 6.7 ലക്ഷം രൂപയിലേക്ക്

പ്രതിമാസം ചെലവ് 2.6 ലക്ഷം!

എപ്പോഴും നടക്കാനാവുന്ന നല്ല നടപ്പാതകൾ വേണം; വിദേശയാത്ര കഴിഞ്ഞെത്തിയ ബെം​ഗളൂരു യുവാവിന്റെ പോസ്റ്റ്

മാസം 75,000 രൂപ വരുമാനം, ഓട്ടോ ഡ്രൈവർ മകളുടെ സ്കൂൾ ഫീസായി നൽകുന്നത് 1.4 ലക്ഷം!

വെള്ളരിക്കയും കോണ്ടവും

സമ്മിശ്ര പ്രതികരണം

കുട്ടികളുടെ കൂടെ നിൽക്കണം, മാതാപിതാക്കളെ നോക്കണം, എയർഫോഴ്സിലെ ജോലിയുപേക്ഷിച്ച് ക്ലോത്തിംഗ് ബ്രാൻഡ്

എപ്പോഴും നടക്കാനാവുന്ന നല്ല നടപ്പാതകൾ വേണം; വിദേശയാത്ര കഴിഞ്ഞെത്തിയ ബെംഗളൂരു യുവാവിന്റെ പോസ്റ്റ്