Asianet News Malayalam

"മാസം 1.3 ലക്ഷം രൂപ കിട്ടിയിട്ടും പണം എങ്ങോട്ട് പോകുന്നെന്ന് അറിയില്ല": വൈറലായി യുവാവിന്‍റെ റെഡ്ഡിറ്റ് പോസ്റ്റ്

Web Desk — Fri, 02 Oct 2026 12:48:03 +0530

മാസം ലക്ഷങ്ങൾ ശമ്പളം വാങ്ങുന്നവർക്ക് സാമ്പത്തിക ബുദ്ധിമുട്ടുകൾ ഉണ്ടാകില്ലെന്ന സാമാന്യ ധാരണ തെറ്റാണെന്ന് തെളിയിക്കുകയാണ് ഒരു യുവ ഉദ്യോഗസ്ഥന്‍റെ അനുഭവക്കുറിപ്പ്. പ്രതിമാസം 1.3 ലക്ഷം രൂപ കൈയ്യിൽ കിട്ടിയിട്ടും മാസാന്ത്യത്തിൽ ബാക്കിവെക്കാൻ പണമില്ലാതെ വലയുന്ന ഇദ്ദേഹത്തിന്‍റെ ബജറ്റ് കണക്കുകൾ ഇപ്പോൾ സോഷ്യൽ മീഡിയയിൽ വൈറലാവുകയാണ്.

"ചെറുപ്പത്തിൽ പ്രതിമാസം 1.3 ലക്ഷം രൂപ എന്നത് എനിക്ക് സ്വപ്നം കാണാൻ പോലും കഴിയാത്ത തുകയായിരുന്നു. ഇത്രയും തുക സമ്പാദിച്ചാൽ പിന്നെ പണത്തെക്കുറിച്ച് ആശങ്കപ്പെടേണ്ടി വരില്ലെന്ന് ഞാൻ കരുതുകയും ചെയ്തു. എന്നാൽ, ഇന്ന് ആ പണം എങ്ങോട്ടാണ് പോകുന്നതെന്ന് എനിക്ക് മനസ്സിലാകുന്നില്ല," - യുവാവ് പോസ്റ്റിൽ കുറിച്ചു.

യുവാവിന്‍റെ പ്രതിമാസ ബജറ്റ് കണക്കുകൾ ഇങ്ങനെ:

തന്‍റെ വരുമാനത്തിൽ നിന്ന് ഓരോ മാസവും ഉണ്ടാകുന്ന വിവിധ ചെലവുകളുടെ കൃത്യമായ കണക്കും അദ്ദേഹം പുറത്തുവിട്ടു:

വീട്ടുവാടക: ₹30,000
ഇ.എം.ഐ : ₹15,000
കുടുംബത്തിനായുള്ള ചെലവ്: ₹12,000
എസ്.ഐ.പി / നിക്ഷേപങ്ങൾ: ₹10,000
പലവ്യഞ്ജനങ്ങൾ / ഭക്ഷണം: ₹8,000
യാത്രാചെലവ് / പെട്രോൾ: ₹7,000
കറന്‍റ്, ഇന്‍റർനെറ്റ്, ഫോൺ ബില്ലുകൾ: ₹6,000
ഇൻഷുറൻസ് / വൈദ്യചെലവുകൾ: ₹5,000
വസ്ത്രങ്ങൾ, വീട്ടുസാധനങ്ങൾ: ₹5,000
കാരണമറിയാത്ത യു.പി.ഐ പേയ്‌മെന്റുകൾ: ₹5,000
പുറത്തുനിന്നുള്ള ഭക്ഷണം: ₹4,000
ഒ.ടി.ടി സബ്‌സ്‌ക്രിപ്ഷനുകൾ: ₹3,000
മറ്റ് ചെലവുകൾ : ₹10,000

ആകെ ചെലവ്: ₹1,20,000

My ₹1.3 lakh salary somehow disappears every monthby u/whatandwhy322 in IndiaFinance

മുകളിൽ പറഞ്ഞ ചെലവുകൾക്ക് ശേഷം മാസാന്ത്യത്തിൽ ബാക്കിവരുന്ന 10,000 രൂപ അടിയന്തിര ആവശ്യങ്ങൾക്ക് പോലും തികയുന്നില്ലെന്നാണ് യുവാവ് പറയുന്നത്. "ഇതിനിടയിൽ 250 രൂപയുടെ ഒരു ഭക്ഷണം ഓർഡർ ചെയ്യുമ്പോൾ പോലും സാമ്പത്തികമായി അത് താങ്ങാനാകുമോയെന്ന് എനിക്ക് ചിന്തിക്കേണ്ടി വരുന്നു. വലിയ ആഡംബരങ്ങളൊന്നും എനിക്കില്ല, എന്നാൽ നൂറുകണക്കിന് ചെറിയ ചെലവുകൾ ചേർന്ന് എന്‍റെ ശമ്പളം തീർക്കുകയാണ്. സാമ്പത്തിക ഉത്തരവാദിത്തങ്ങൾ വരുമ്പോഴാണ് ലക്ഷങ്ങൾ ശമ്പളം വാങ്ങുന്നതിലെ യാഥാർത്ഥ്യം ബോധ്യപ്പെടുന്നത്," അദ്ദേഹം കൂട്ടിച്ചേർത്തു.

ഉപദേശങ്ങളുമായി നെറ്റിസെൺസ്

നിരവധി ആളുകളാണ് ഈ പോസ്റ്റിന് പ്രതികരണങ്ങളുമായി രംഗത്തെത്തിയത്. മാസം 3,000 രൂപ സബ്‌സ്‌ക്രിപ്ഷനുകൾക്കായി ചെലവഴിക്കുന്നത് അനാവശ്യമാണെന്നും ആവശ്യത്തിനനുസരിച്ച് മാസത്തിൽ ഒന്നോ രണ്ടോ ഒ.ടി.ടി ആപ്പുകൾ മാത്രം ഉപയോഗിക്കുകയാണ് വേണ്ടതെന്നും ചിലർ ഉപദേശിച്ചു.

പണം എങ്ങോട്ട് പോകുന്നെന്ന് അറിയാൻ 'സ്പെൻഡ് ട്രാക്കിംഗ്' ആപ്പുകൾ ഉപയോഗിക്കാനും, 'മറ്റ് ചെലവുകൾ' എന്ന പേരിൽ മാറ്റിവെക്കുന്ന തുകയ്ക്ക് കൃത്യമായ കണക്ക് സൂക്ഷിക്കാനും മറ്റു ചിലർ നിർദ്ദേശിച്ചു. വാടക, ഇ.എം.ഐ, കുടുംബത്തിനായുള്ള തുക എന്നിവയിലൂടെ മാത്രം 57,000 രൂപയോളം മുൻകൂട്ടി നിശ്ചയിക്കപ്പെട്ട ചെലവാകുന്നുണ്ട്. ഇതിനൊപ്പം മിഡിൽ ക്ലാസ് ശമ്പളത്തിൽ ഉയർന്ന ജീവിതശൈലി നയിക്കാൻ ശ്രമിക്കുന്നതാണ് സാമ്പത്തിക ബുദ്ധിമുട്ടിന് പ്രധാന കാരണമെന്നും ചിലർ ചൂണ്ടിക്കാട്ടി.

‘ക്യാമറ മാറ്റിവയ്ക്കാൻ’പറഞ്ഞിട്ടും ലൈവ് നിർത്തിയില്ല; വിയറ്റ്നാമിൽ കനേഡിയൻ സ്ട്രീമറെ തല്ലി ഇന്ത്യൻ യുവാവ്, വീഡിയോ

Web Desk — Mon, 05 Oct 2026 20:21:11 +0530

വിയറ്റ്നാമിലെ സൈഗോണിലുള്ള 7-ഇലവൻ സ്റ്റോറിൽ ലൈവ് സ്ട്രീമിങ്ങിനിടെ കനേഡിയൻ സ്ട്രീമർ ജോൺ ലൈയ്ക്ക് ഇന്ത്യൻ യുവാവിന്‍റെ അടിയേറ്റ സംഭവം സമൂഹ മാധ്യമങ്ങളിൽ വൈറലാകുന്നു. ജോൺ വാട്സ് ഗോയിംഗ് ഓൺ എന്ന പേരിൽ അറിയപ്പെടുന്ന കിക്ക് സ്ട്രീമറാണ് സംഭവത്തിന്‍റെ ദൃശ്യങ്ങൾ ലൈവായി സംപ്രേഷണം ചെയ്തത്. അപരിചിതരെ ക്യാമറയിൽ പകർത്തുന്നതിന്‍റെ പരിധിയും ഐആർഎൽ സ്ട്രീമർമാരുടെ പെരുമാറ്റവും സംബന്ധിച്ച ചർച്ചയ്ക്കും സംഭവം വഴിവെച്ചു.

പ്രകോപിച്ച് 'ഉള്ളടക്കം' സൃഷ്ടിക്കൽ

വീഡിയോയിൽ ജോൺ രണ്ട് ഇന്ത്യൻ യുവാക്കളെ ക്യാമറയിൽ പകർത്തുന്നതാണ് തുടക്കം. തങ്ങളെ ചിത്രീകരിക്കരുതെന്നും ക്യാമറ മാറ്റിവെക്കണമെന്നും ഇവരിൽ ഒരാൾ പലതവണ ആവശ്യപ്പെടുന്നു. എന്നാൽ, ജോൺ ചിത്രീകരണം തുടരുകയും ഇരുവരുമായി വാക്കുതർക്കത്തിൽ ഏർപ്പെടുകയും ചെയ്തു. ഇതിനിടെ “ഇത് ന്യൂ ദില്ലിയല്ല” എന്ന തരത്തിലുള്ള പരാമർശവും സ്ട്രീമർ നടത്തിയതായി ദൃശ്യങ്ങളിൽ കേൾക്കാം.

തുടർന്ന് യുവാക്കൾ സ്ട്രീമർ തങ്ങളെ പ്രകോപിപ്പിച്ച് അതിൽനിന്ന് ഉള്ളടക്കം ഉണ്ടാക്കുകയാണെന്ന് ആരോപിച്ചു. “നിങ്ങൾ വെറുപ്പ് മോണിറ്റൈസ് ചെയ്യുകയാണ്” എന്നതടക്കമുള്ള പ്രതികരണങ്ങളും വീഡിയോയിൽ കേൾക്കാം. ജോണിനെ സ്റ്റോറിന് പുറത്തേക്ക് പോകാൻ ആവശ്യപ്പെടുകയും ഇതിനിടെ ക്യാമറ മാറ്റിവെക്കാൻ വീണ്ടും വീണ്ടും ഇവർ പറയുകയും ചെയ്തു. തർക്കം രൂക്ഷമായതോടെ ഒരാൾ ജോണിനെ പുറത്തേക്ക് തള്ളുന്നതും വീഡിയോയിൽ കാണാം.

View this post on Instagram

A post shared by The Tatva (@thetatvaindia)

അടി പൊട്ടിയിട്ടും ലൈവ് തുടർന്നു

അതിനിടെ മറ്റൊരു ഇന്ത്യൻ യുവാവ് ജോണിനെ സമീപിച്ച് മുഖത്ത് അടിക്കുകയായിരുന്നു. അടിയേറ്റ ശേഷവും സ്ട്രീമർ ലൈവ് അവസാനിപ്പിച്ചില്ല. തുടർന്ന് നടന്ന വാക്കുതർക്കത്തിനിടെ “ഇവിടെ ആരും ഇന്ത്യക്കാരെ ഇഷ്ടപ്പെടുന്നില്ല” എന്ന തരത്തിലുള്ള പരാമർശവും ജോൺ നടത്തിയതായി റിപ്പോർട്ടുകളുണ്ട്.

സംഭവത്തിന്‍റെ ദൃശ്യങ്ങൾ ദശലക്ഷക്കണക്കിന് കാഴ്ചകൾ നേടിയതോടെ സമൂഹ മാധ്യമങ്ങളിൽ സമ്മിശ്ര പ്രതികരണ ഉണ്ടായത്. അപരിചിതർ ചിത്രീകരിക്കരുതെന്ന് ആവശ്യപ്പെട്ടിട്ടും സ്ട്രീമർ അത് തുടരുന്നതിനെ ചിലർ വിമർശിച്ചു. അതേസമയം, പ്രകോപനമുണ്ടായാലും ശാരീരികമായി ആക്രമിച്ചത് അംഗീകരിക്കാനാകില്ലെന്നായിരുന്നു മറ്റുചിലർ കുറിച്ചത്. ഐആർഎൽ ലൈവ് സ്ട്രീമിങ്ങിൽ സ്വകാര്യതയും ഉള്ളടക്കത്തിനായുള്ള പ്രകോപനവും എത്രത്തോളം അനുവദിക്കാമെന്ന ചർച്ചയ്ക്കാണ് സംഭവം വീണ്ടും തുടക്കമിട്ടിരിക്കുന്നത്.

തുപ്പരുതെന്ന് നിയമം, എന്നിട്ടും 'തുപ്പൽ കോളാമ്പി' വച്ച് മുംബൈ മെട്രോ; അതെങ്ങനെ ശരിയാകുമെന്ന് നെറ്റിസെൺസ്, കുറിപ്പ് വൈറൽ

Web Desk — Thu, 01 Oct 2026 11:18:34 +0530

മുംബൈ മെട്രോ സ്റ്റേഷനിൽ സ്ഥാപിച്ച ‘ടച്ച്‌ലെസ് സ്പിറ്റ് ബിൻ’ സമൂഹ മാധ്യമങ്ങളിൽ വലിയ ചർച്ചയ്ക്ക് വഴിവെച്ചു. പൊതുസ്ഥലത്ത് തുപ്പുന്നത്, പ്രത്യേകിച്ചും മെട്രോ സ്റ്റേഷനിൽ തുപ്പുന്നത് കുറ്റകരമാണ്. 500 രൂപ വരെ ഫൈൻ ഈടാക്കാവുന്ന കുറ്റം. ഈ നിരോധനം നിലനിൽക്കെത്തന്നെ തുപ്പാൻ പ്രത്യേക സംവിധാനം ഒരുക്കിയത് എന്തിനാണെന്ന് നിരവധി സമൂഹ മാധ്യമ ഉപയോക്താക്കൾ ചോദിക്കുന്നു.

മെട്രോയിൽ ഇനി 'തുപ്പൽ കോളാമ്പി'യും

'ലോകത്തിൽ തുപ്പുന്നതിനായി പ്രത്യേകം നിശ്ചയിച്ചിട്ടുള്ള ആദ്യത്തെ സ്ഥലം’ എന്ന പേരിലാണ് ഈ സംവിധാനം അവതരിപ്പിച്ചിരിക്കുന്നത്. 'Ezyspit' എന്ന കമ്പനിയാണ് സ്പിറ്റ് ബിൻ ഒരുക്കിയതെന്നാണ് റിപ്പോർട്ട്. മെട്രോയുടെ ലോഗോയ്ക്കൊപ്പമുള്ള സംവിധാനത്തിൽ 'ഉത്തരവാദിത്തമുള്ളവരാവുക' (Be Responsible) എന്ന സന്ദേശവും എഴുതിയിരിക്കുന്നു. കൈകൊണ്ട് നേരിട്ട് തൊടേണ്ടതില്ലാത്ത രീതിയിലാണ് 'തുപ്പൽ പാത്രം' രൂപകൽപ്പന ചെയ്തിരിക്കുന്നത്. വൈറസുകളെ പത്ത് സെക്കൻഡിനുള്ളിൽ അടച്ചുപൂട്ടുമെന്നാണ് കമ്പനിയുടെ അവകാശവാദം.

My Mumbai MetroNow with dedicated Spitting Zones pic.twitter.com/o8l8sYcbAu

— Zoru Bhathena (@zoru75) September 27, 2026

സിറ്റിസൺ ആക്ടിവിസ്റ്റ് സോറു ഭതേന എക്സിൽ തുപ്പൽ പാത്രത്തിന്‍റെ ചിത്രങ്ങൾ പങ്കുവെച്ചതോടെയാണ് വിഷയം സമൂഹ മാധ്യമങ്ങളിൽ വലിയ ശ്രദ്ധ നേടിയത്. ‘എന്‍റെ മുംബൈ മെട്രോ: ഇനി തുപ്പുന്നതിനായി പ്രത്യേക ഇടങ്ങൾ’ എന്ന കുറിപ്പോടെയാണ് അദ്ദേഹം ചിത്രം പങ്കുവച്ചത്. പിന്നാലെ മെട്രോ സ്റ്റേഷനുകളിൽ സ്പിറ്റ് ബിൻ വേണമോ എന്നതിനെക്കുറിച്ച് സോഷ്യൽ മീഡിയയിൽ വ്യത്യസ്ത പ്രതികരണങ്ങൾ ഉയർന്നു.

രസകരമായ കുറിപ്പുകളുമായി നെറ്റിസെൺസ്

നിയമപ്രകാരം സ്റ്റേഷൻ പരിസരത്ത് തുപ്പുന്നത് നിരോധമുള്ള സ്ഥലമാണ് മുംബൈ മെട്രോ. നിയമം ലംഘിക്കുന്നവർക്ക് 500 രൂപ പിഴ ഈടാക്കാനും നിയമം അനുവദിക്കുന്നു. അതിനാൽ, തുപ്പുന്നത് കുറ്റകരമായ ഒരിടത്ത് തുപ്പാനായി പ്രത്യേക ബിൻ സ്ഥാപിക്കുന്നതിന്‍റെ യുക്തിയെക്കുറിച്ചാണ് സമൂഹ മാധ്യമങ്ങളിൽ പലരും ചോദ്യങ്ങളുന്നയിച്ചത്. അതേസമയം മറ്റ് ചിലർ ചിലർ ഇത് പൊതുസ്ഥലത്തെ വൃത്തിഹീനത കുറയ്ക്കാനുള്ള പ്രായോഗിക മാർഗമാകാമെന്ന് അഭിപ്രായപ്പെട്ടു. മറ്റുചിലർ ഇത്തരം സംവിധാനം തുപ്പുന്ന ശീലം പ്രോത്സാഹിപ്പിക്കുമോയെന്ന ആശങ്ക പങ്കുവച്ചു. മറ്റ് ചിലർ തമാശയായി മുംബൈ മെട്രോ നിയമ ലംഘനം പ്രോത്സാഹിപ്പിച്ച് നിയമപ്രകാരം ഫൈൻ ഈടാക്കാനുള്ള ശ്രമത്തിലാണെന്ന് കുറിച്ചു. മുംബൈ മെട്രോയിലെ ശുചിത്വവും യാത്രക്കാരുടെ പെരുമാറ്റവും സംബന്ധിച്ച വലിയ ചർച്ചയ്ക്കാണ് ഈ ‘സ്പിറ്റ് ബിൻ’ തുടക്കമിട്ടിരിക്കുന്നത്.

'മഴ പെയ്യുന്നു, ആരെങ്കിലും രക്ഷിക്കൂ'; ബെംഗളൂരുവിലെ രക്ഷാപ്രവർത്തനം, 70 ലക്ഷത്തിലേറെ പേർ കണ്ട വീഡിയോ

Web Desk — Fri, 02 Oct 2026 15:41:08 +0530

കനത്ത മഴയിൽ ജനജീവിതം സ്തംഭിച്ച ബംഗളൂരുവിൽ നിന്നുള്ള വേറിട്ടൊരു കാഴ്ച സോഷ്യൽ മീഡിയയിൽ വൈറലായി. മഴയത്ത് ടെറസിൽ കുടുങ്ങിപ്പോയ ഒരു കൂട്ടം പ്ലഷ് പാവകളെ രക്ഷിക്കാനായി നെറ്റിസൺസ് തമാശരൂപേണ രംഗത്തിറങ്ങിയതാണ് ഇപ്പോൾ ഇൻസ്റ്റാഗ്രാമിലെ പ്രധാന ചർച്ചാവിഷയം.

മഴ നനഞ്ഞ പാവകൾ

ടെറസിലെ തുണി ഉണക്കാനിടുന്ന കയറിൽ തൂക്കിയിട്ടിരുന്ന ഏതാനും പഞ്ഞിനിറച്ച പാവകൾ മഴയിൽ കുതിർന്നു കിടക്കുന്ന വീഡിയോയാണ് സോഷ്യൽ മീഡിയയുടെ ശ്രദ്ധ കവർന്നത്. ഉണങ്ങാനായി പുറത്തിട്ട പാവകൾ കനത്ത മഴയിൽ പെട്ടുപോകുകയായിരുന്നു. ഈ കാഴ്ച കണ്ട ഇൻസ്റ്റാഗ്രാം ഉപയോക്താവായ സൂര്യകാന്ത് ശർമ്മ, മഴയോട് പോരാടുന്ന ഈ 'പാവ സംഘത്തെ' രക്ഷിക്കാൻ ഉടൻ തന്നെ ഒരു രക്ഷാപ്രവർത്തക സംഘത്തെ അയക്കണമെന്ന് തമാശയായി കുറിച്ചു.

View this post on Instagram

A post shared by Suryakant Sharma (@suryakant_96)

"ഇന്ന് ബംഗളൂരു കാലാവസ്ഥ ഒരു മുന്നറിയിപ്പും നൽകിയില്ല. ഈ പാവകളുടെ ഉടമസ്ഥനോടാണ്; ജോലിസ്ഥലത്തെ മീറ്റിംഗ് ഒക്കെ മാറ്റിവെച്ച് ആദ്യം ഇവരെ പോയി രക്ഷിക്കൂ!" എന്നായിരുന്നു ശർമ്മ കുറിച്ചത്. "ഉടമസ്ഥൻ ബംഗളൂരു ട്രാഫിക്കിൽ കുടുങ്ങിക്കിടക്കുകയാവും, അതേസമയം ടെറസിൽ സംഭവിക്കുന്നത് നോക്കൂ," എന്നും "ഉടൻ രക്ഷാപ്രവർത്തകരെ അയക്കൂ, അവർക്ക് അധികനേരം നീന്താൻ കഴിയില്ല!" എന്നും വീഡിയോയ്ക്ക് മുകളിൽ കുറിച്ചിരുന്നു.

വീഡിയോ കണ്ടത് 70 ലക്ഷം പേർ

വീഡിയോ പങ്കുവെച്ച് ചുരുങ്ങിയ സമയത്തിനകം തന്നെ 70 ലക്ഷത്തിലധികം ആളുകളാണ് ഇത് കണ്ടത്. "രക്ഷാപ്രവർത്തകർ ബംഗളൂരു ട്രാഫിക്കിൽ കുടുങ്ങിയിട്ടുണ്ടാകും", "അവർ ഒറ്റ നൂലിലാണ് തൂങ്ങിനിൽക്കുന്നത്" തുടങ്ങി നിരവധി തമാശ കമന്‍റുകളാണ് വീഡിയോയ്ക്ക് താഴെ ഉയർന്നത്. തുടർന്ന്, 10 മണിക്കൂർ നീണ്ട കനത്ത മഴയ്ക്ക് ശേഷം ഈ പാവകൾ അതിജീവിച്ചുവെന്ന സന്തോഷവാർത്തയും ശർമ്മ പുതിയ വീഡിയോയിലൂടെ പങ്കുവെച്ചു. രാത്രി മുഴുവൻ പെയ്ത മഴയെ പ്രതിരോധിച്ച് പാവകൾ കയറിൽ തന്നെ പിടിച്ചുനിന്നതായി അദ്ദേഹം അറിയിച്ചു. പാവകൾ സുരക്ഷിതരാണെന്ന അപ്‌ഡേറ്റ് വന്നതോടെ, "ഇന്നലെ മുതൽ ഇതോർത്ത് വിഷമിക്കുകയായിരുന്നു, ഇപ്പോൾ വലിയ ആശ്വാസമായി" എന്ന പ്രതികരണങ്ങളുമായി സോഷ്യൽ മീഡിയ ഉപയോക്താക്കളും ആശ്വാസം പ്രകടിപ്പിച്ചു.

ഇന്ത്യന്‍ പ്രൊഫസർമാരെ അധിക്ഷേപിച്ച് അമേരിക്കക്കാരന്റെ പോസ്റ്റ്; ചുട്ട മറുപടി നൽകി സോഷ്യൽ മീഡിയ

Web Desk — Mon, 05 Oct 2026 08:03:21 +0530

അമേരിക്കയിലെ മോണ്ടാന സ്റ്റേറ്റ് യൂണിവേഴ്സിറ്റിയിലെ ഇന്ത്യൻ വംശജയായ പ്രൊഫസറെയടക്കം ഇന്ത്യക്കാരെ വംശീയമായി അധിക്ഷേപിക്കാൻ ശ്രമിച്ച യുവാവിന് കണക്കിന് മറുപടി നൽകി സോഷ്യൽ മീഡിയ. ലോകപ്രശസ്തമായ ഐഐടിയുടെ അക്കാദമിക മികവ് ചൂണ്ടിക്കാട്ടി ആയിരക്കണക്കിന് ആളുകളാണ് പ്രൊഫസർക്ക് പിന്തുണയുമായി രംഗത്തെത്തിയത്. ‘ഓയിൽഫീൽഡ് റാൻഡോ’ എന്ന പേരിൽ എക്സിലുള്ള അമേരിക്കൻ പൗരനാണ് ഇന്ത്യയിൽ നിന്നുള്ള വിവിധ പ്രൊഫസർമാരെ ലക്ഷ്യമിട്ട് വംശീയ വിദ്വേഷമുള്ള കുറിപ്പ് പങ്കുവെച്ചത്.

മോണ്ടാന സ്റ്റേറ്റ് യൂണിവേഴ്സിറ്റിയിലെ ഇന്ത്യൻ പ്രൊഫസർമാരുടെ പട്ടിക പങ്കുവെച്ച ഇയാൾ, അതിൽ അഗ്രികൾച്ചറൽ പ്രോസസ്സ് എൻജിനീയറിങ് വിഭാഗം അസിസ്റ്റന്റ് പ്രൊഫസർ ഡോ. ശിഖാലി ബാനർജിയുടെ പേരും ഉൾപ്പെടുത്തിയിരുന്നു. ഐഐടി ബോംബെയിൽ നിന്ന് പിഎച്ച്ഡി കരസ്ഥമാക്കിയ വ്യക്തിയാണ് ഡോ. ശിഖാലി ബാനർജി.

അമേരിക്കൻ സർവ്വകലാശാലകളിൽ ഇന്ത്യൻ ഫാക്കൽറ്റികളുടെ എണ്ണം കൂടുതലാണെന്ന് ചൂണ്ടിക്കാണിച്ചുകൊണ്ട് അവരെ പരിഹസിക്കുകയായിരുന്നു പോസ്റ്റിട്ടയാളുടെ ലക്ഷ്യം. എന്നാൽ, സംഭവം ഇയാൾക്ക് തന്നെ തിരിച്ചടിയായിത്തീർന്നു.

പോസ്റ്റ് പുറത്തുവന്ന ഉടൻ തന്നെ ഐഐടി ബോംബെയുടെ ഉന്നത നിലവാരം ചൂണ്ടിക്കാട്ടി നിരവധി പേർ രംഗത്തെത്തി. 'ലോകത്തിൽ പ്രവേശനം കിട്ടാൻ ഏറ്റവും പ്രയാസമേറിയ കോളേജുകളിലൊന്നാണ് ഐഐടി. അവിടത്തെ ഒരു ബിരുദധാരിയെ റിക്രൂട്ട് ചെയ്യാൻ കഴിഞ്ഞത് മോണ്ടാനയ്ക്ക് ലഭിച്ച വലിയൊരു നേട്ടമാണ്' എന്ന് ഡാറ്റാ സയന്റിസ്റ്റായ അർമാൻ ഡോമാലെസ്കി കുറിച്ചു.

Montana State University Professor Shivali Banerjee is a graduate of the Indian Institute of Technology in Bombay. https://t.co/ECB6Fk6xE1

— Oilfield Rando (@Oilfield_Rando) October 3, 2026

ലോകത്തിലെ ഏറ്റവും മികച്ച പ്രതിഭകളിൽ ചിലരാണ് ഐഐടിയിൽ നിന്ന് പുറത്തുവരുന്നതെന്നും, അമേരിക്കയിലെ മോണ്ടാന പോലുള്ള സർവ്വകലാശാലകളിൽ അവർ ജോലി ചെയ്യുന്നത് അമേരിക്കയ്ക്ക് തന്നെ വലിയൊരു നേട്ടമാണെന്നും പലരും പിന്നാലെ കമന്റുകളിൽ കുറിച്ചിട്ടുണ്ട്.

മാത്രമല്ല, ഇയാളുടെ വംശീയ പരാമർശങ്ങൾക്കെതിരെ കടുത്ത വിമർശനമാണ് സോഷ്യൽ മീഡിയയിൽ പോസ്റ്റ് ശ്രദ്ധിക്കപ്പെട്ടതിന് പിന്നാലെ ഉയർന്നത്. എന്നാൽ തന്റെ നിലപാടിൽ ഉറച്ചുനിന്ന ഇയാൾ, ഇന്ത്യയെക്കുറിച്ചും ഇന്ത്യയിലെ ഇതുപോലെയുള്ള ആളുകളെ കുറിച്ചും വീണ്ടും അപകീർത്തികരമായ പരാമർശങ്ങളുമായി രംഗത്തെത്തുകയാണുണ്ടായത്.

കിടപ്പാടം പണയം വച്ചാലും കുഴപ്പമില്ല, എന്റെ ഇഷ്ടം നടക്കണം; ജെൻ സി കസിൻ മാതാപിതാക്കളോട് പറഞ്ഞത്; പോസ്റ്റ്

Web Desk — Sun, 04 Oct 2026 12:18:53 +0530

മറ്റൊരു നഗരത്തിൽ പഠിക്കാനാഗ്രഹിക്കുന്ന തന്റെ ജെൻ സി കസിനെ കുറിച്ച് ഒരു മില്ലേനിയൽ യുവതി പങ്കുവച്ച പോസ്റ്റാണിത്. വലിയ ഫീസ് അടക്കാൻ ബുദ്ധിമുട്ടുള്ള മാതാപിതാക്കളോടുള്ള പെൺകുട്ടിയുടെ സമീപനമാണ് വലിയ ചർച്ചയായി മാറിയിരിക്കുന്നത്. ശീതൾ എന്ന യുവതിയാണ് പോസ്റ്റ് പങ്കുവെച്ചിരിക്കുന്നത്. 'ജെൻ-സി തലമുറയ്ക്ക് ചിലപ്പോൾ വളരെ ബോൾഡായ, എന്നാൽ ഏതാണ്ട് സ്വാർത്ഥമായ മനോഭാവമാണുള്ളത്' എന്നാണ് പോസ്റ്റിന്റെ ക്യാപ്ഷൻ.

മാതാപിതാക്കളുടെ ഏക മകളാണ് പെൺകുട്ടി. ഉയർന്ന കോളേജ് ഫീസും മറ്റ് ചെലവുകളും കാരണം അവൾ വീട്ടിൽ നിന്നു തന്നെ പഠിക്കണമെന്നായിരുന്നു മാതാപിതാക്കളുടെ ആഗ്രഹം. എന്നാൽ, 'നിങ്ങൾ ഞാൻ ആഗ്രഹിക്കുന്ന കോളേജിൽ എന്നെ അയച്ചില്ലെങ്കിൽ ഞാൻ പഠിക്കാൻ പോകുന്നില്ല. വീടു വച്ച് ലോൺ എടുക്കുകയോ അമ്മ ജോലിക്കു പോവുകയോ ചെയ്യൂ, എനിക്ക് അതൊന്നും അറിയണ്ട' എന്നാണ് കസിൻ മാതാപിതാക്കളോട് പറഞ്ഞത്.

ഇതിനുപുറമെ, പഠനം മാത്രമല്ല ജീവിതം ആസ്വദിക്കാനും എക്സ്പ്ലോർ ചെയ്യാനുമാണ് താൻ പോകുന്നതെന്നും, അതിനാൽ എല്ലാ മാസവും ആവശ്യത്തിന് പണം അയച്ചു തരണമെന്നും അവൾ ആവശ്യപ്പെട്ടുവത്രെ. ഒടുവിൽ, മാതാപിതാക്കൾ എല്ലാ കാര്യങ്ങളും ചെയ്യുകയും അവൾക്ക് ആഗ്രഹിച്ച കോളേജിൽ പ്രവേശനം ലഭിക്കുകയും ചെയ്തു. എന്നാൽ, ആവശ്യങ്ങൾ അവിടെയും അവസാനിച്ചില്ല. കോളേജിലേക്ക് പോകുന്നതിന് മുമ്പ് പഴയ സുഹൃത്തുക്കൾക്കായി ഒരു പാർട്ടി നടത്തണമെന്നും അതിനായി പണം വേണമെന്നും അവൾ ആവശ്യപ്പെട്ടു.

'ഒരു മില്ലേനിയൽ എന്ന നിലയിൽ എനിക്ക് ഒരിക്കലും ഇതിന് കഴിയില്ലായിരുന്നു' എന്ന് കുറിച്ചുകൊണ്ടാണ് ശീതൾ പോസ്റ്റ് അവസാനിപ്പിച്ചത്. നിരവധി പേരാണ് കസിന്റെ പെരുമാറ്റത്തെ വിമർശിച്ചും അനുകൂലിച്ചും രംഗത്തെത്തിയത്. മറ്റുള്ളവരുമായി മത്സരിക്കാൻ മാതാപിതാക്കൾ സ്വന്തം സാമ്പത്തിക സ്ഥിതിക്കപ്പുറത്തേക്ക് കഷ്ടപ്പെടുമ്പോഴാണ് കുട്ടികളിൽ ഇത്തരം കാര്യങ്ങൾ സാധാരണമാണെന്ന ചിന്ത വളരുന്നതെന്ന് ഒരാൾ കുറിച്ചു.

Gen Z has such a bold, almost selfish attitude sometimes.

My cousin wanted to study in another city, but her parents wanted her to stay because she’s their only child and the fee was really high.

She basically told them, “If you don’t send me to the college I want, I’m not going. Take a loan against the house or mom can get a job. I don’t care. And make sure you send me enough money every month. I want to explore and enjoy life too, not just study.”

And somehow, her parents managed everything and she got to go.

And before leaving, she casually said, “I also want to throw a party for all my old friends, so I’ll need money for that too.”

As a millennial, I could NEVER.

— Sheetal (@sheetalbytheway) October 2, 2026

ഇത് തികഞ്ഞ ധാർഷ്ട്യവും അഹങ്കാരവുമാണെന്നും, തങ്ങളുടെ മാതാപിതാക്കൾ നഗരത്തിൽ പഠിക്കാൻ പണം തരാതിരുന്നപ്പോൾ കോൾ സെന്ററുകളിൽ രാത്രി ഷിഫ്റ്റിൽ ജോലി ചെയ്താണ് പഠനച്ചെലവുകൾ കണ്ടെത്തിയതെന്നും മറ്റൊരാൾ കുറിച്ചു. അതേസമയം, സ്വന്തമായി ജോലി ചെയ്ത് ജീവിക്കുന്ന ജെൻ-സി കുട്ടികളും ഉണ്ടെന്നും മറ്റൊരാൾ അഭിപ്രായപ്പെട്ടു. വിദേശരാജ്യങ്ങളിലെ ഒക്കെപ്പോലെ 18 വയസാകുമ്പോഴേക്കും ഇൻഡിപെൻഡന്റ് ആകുന്ന തലമുറയാണ് നല്ലത് അല്ലേ?

ഇന്ത്യൻ യുവതിയുടെ 127 മണിക്കൂർ നൃത്തത്തിന്റെ റെക്കോർഡ് തകർക്കാൻ നൈജീരിയൻ യുവാവ്

Web Desk — Wed, 30 Sep 2026 14:07:46 +0530

ഏറ്റവും കൂടുതൽ സമയം നൃത്തം ചെയ്ത് ഗിന്നസ് ലോക റെക്കോർഡ് സ്വന്തമാക്കാനുള്ള കഠിനമായ ദൗത്യത്തിൽ നൈജീരിയൻ നർത്തകൻ. 'ബെൻഡാൻസർ' എന്ന പേരിൽ പ്രശസ്തനായ 33-കാരൻ ബെഞ്ചമിൻ ഡാനിയൽ ഗബ്രിയേലാണ് ഏഴു ദിവസം (168 മണിക്കൂർ) ഇടതടവില്ലാതെ നൃത്തം ചെയ്ത് ചരിത്രം കുറിക്കാൻ ഒരുങ്ങുന്നത്. സെപ്റ്റംബർ 21-ന് നൈജീരിയയിലെ ലാഗോസിലുള്ള ഫ്രീഡം പാർക്കിലാണ് ഈ നൃത്ത മാരത്തോൺ ആരംഭിച്ചത്.

2023-ൽ ഇന്ത്യക്കാരിയായ സൃഷ്ടി സുധീർ ജഗ്താപ് തന്റെ പതിനാറാം വയസ്സിൽ 127 മണിക്കൂർ തുടർച്ചയായി നൃത്തം ചെയ്ത് സ്ഥാപിച്ച ലോക റെക്കോർഡ് തകർക്കാനാണ് ബെഞ്ചമിൻ ലക്ഷ്യമിടുന്നത്. സൃഷ്ടിയുടെ പ്രകടനം ഇന്ത്യൻ ശാസ്ത്രീയ നൃത്തരൂപമായ കഥകിനെ ആസ്പദമാക്കിയുള്ളതായിരുന്നുവെങ്കിൽ, നൈജീരിയൻ പരമ്പരാഗത നൃത്തരൂപങ്ങളും വൈവിധ്യമാർന്ന താളങ്ങളുമാണ് ബെഞ്ചമിൻ തന്റെ ദൗത്യത്തിലുടനീളം പുറത്തെടുത്തത്.

പിന്തുണയുമായി ആയിരങ്ങൾ

റെക്കോർഡ് ശ്രമം ഔദ്യോഗികമായി അംഗീകരിച്ചതായി ഗിന്നസ് അധികൃതർ ഇതുവരെ സ്ഥിരീകരിച്ചിട്ടില്ലെങ്കിലും, ആഫ്രിക്കൻ രാജ്യങ്ങളിലുടനീളം വലിയ തരംഗമാണ് ഈ പ്രകടനം സൃഷ്ടിച്ചിരിക്കുന്നത്. നൂറുകണക്കിന് യുവാക്കൾ നൃത്തം ചെയ്തും ദൃശ്യങ്ങൾ പകർത്തിയും ബെഞ്ചമിന് പിന്തുണയേകി.

18 വർഷത്തെ പ്രൊഫഷണൽ പരിചയം

കഴിഞ്ഞ 18 വർഷമായി പ്രൊഫഷണൽ നർത്തകനായി പ്രവർത്തിക്കുന്ന ബെഞ്ചമിൻ, ഈ നേട്ടം ആഫ്രിക്കൻ നൃത്തകലയെ ലോകത്തിന്റെ നെറുകയിലെത്തിക്കാൻ സഹായിക്കുമെന്ന് പ്രത്യാശ പ്രകടിപ്പിച്ചു. 250-ലധികം വംശീയ വിഭാഗങ്ങൾ വസിക്കുന്ന നൈജീരിയയിലെ സാംസ്കാരിക പാരമ്പര്യം വിളിച്ചോതുന്ന വിവിധ വസ്ത്രങ്ങളണിഞ്ഞാണ് അദ്ദേഹം പ്രകടനം നടത്തിയത്.

168 മണിക്കൂർ പൂർണ്ണ സജ്ജനായി നിൽക്കാൻ കഠിനമായ ശാരീരിക പരിശീലനങ്ങളും പ്രത്യേക ഭക്ഷണക്രമവുമാണ് തങ്ങൾ പിൻതുടർന്നതെന്ന് ബെഞ്ചമിൻ്റെ സംഘം വ്യക്തമാക്കി. കേവലം ശാരീരികക്ഷമത പ്രകടിപ്പിക്കുന്നതിനപ്പുറം നൈജീരിയൻ സംസ്കാരത്തിന്റെ വൈവിധ്യം ലോകത്തിന് കാട്ടിക്കൊടുക്കാനാണ് ഈ ശ്രമമെന്നും അവർ കൂട്ടിച്ചേർത്തു

കൂടുതൽ പണം കൊടുക്കാതെ എയർ ഇന്ത്യയിൽ രണ്ട് തവണ സീറ്റ് അപ്ഗ്രേഡ്; ചെന്നൈക്കാരന്‍റെ ‘സിംപിൾ ഹാക്ക്’ വൈറൽ!

Web Desk — Fri, 02 Oct 2026 09:43:07 +0530

വിമാനയാത്രയിൽ മികച്ച സീറ്റിനായി അധികമായി പണം നൽകേണ്ടി വരുമെന്നതാണ് പൊതുവെയുള്ള ധാരണ. എന്നാൽ, അധിക ചെലവൊന്നുമില്ലാതെ ഒരേ യാത്രയിൽ രണ്ട് തവണ സീറ്റ് അപ്ഗ്രേഡ് ലഭിച്ചുവെന്ന ചെന്നൈ സ്വദേശിയുടെ അവകാശവാദം സമൂഹ മാധ്യമങ്ങളിൽ വൈറലായി. ചെന്നൈക്കാരനായ നാരായണൻ ഹരിഹരൻ എക്സിൽ പങ്കുവച്ച അനുഭവമാണ് വൈറലായത്.

രണ്ട് തവണ സീറ്റ് അപ്ഗ്രേഡ് ചെയ്ത വഴി

എയർ ഇന്ത്യ എക്സ്പ്രസ് വിമാനത്തിൽ നാരായണൻ ഹരിഹരന് ആദ്യം ലഭിച്ചത് 27B സീറ്റായിരുന്നു. എന്നാൽ, ചെക്ക് - ഇൻ കൗണ്ടറിലെ ജീവനക്കാരിയോട് പുഞ്ചിരിച്ച് കൊണ്ട് സംസാരിക്കുകയും, പേര് ഉപയോഗിച്ച് അഭിവാദ്യം ചെയ്യുകയും, ദിവസം എങ്ങനെയുണ്ടെന്ന് ചോദിക്കുകയും ചെയ്ത ശേഷം സീറ്റ് മാറ്റാൻ വിനീതമായി അഭ്യർഥിച്ചെന്നാണ് നാരായണൻ അവകാശപ്പെടുന്നത്. പിന്നാലെ അദ്ദേഹത്തിന് 14F എന്ന എമർജൻസി റോ സീറ്റിലേക്ക് മാറ്റം കിട്ടി. എന്നാൽ അവിടെ കഴിഞ്ഞില്ല.

Free travel hack: Being nice.Was assigned 27B on my flight today. Smiled, used her name, enquired about her day, and politely requested at the check-in counter - moved to emergency row (14F). Tried the same thing at the boarding gate - flew in 1F.The staff deal with tired,… pic.twitter.com/4NBSiK0rtI

— Narayanan Hariharan (@narayananh) September 28, 2026

ബോർഡിങ് ഗേറ്റിലെത്തിയ ശേഷവും സമാനമായ രീതിയിൽ ജീവനക്കാരോട് സംസാരിക്കുകയും വീണ്ടും ഒരിക്കൽ കൂടി സീറ്റ് മാറ്റിക്കിട്ടുമോയെന്ന് അഭ്യർത്ഥിച്ചു. ഇത്തവണ 1F സീറ്റ് ലഭിച്ചെന്ന് അദ്ദേഹം അവകാശപ്പെടുന്നു. ജീവനക്കാർ ദിവസം മുഴുവൻ ക്ഷീണിതരും അസ്വസ്ഥരുമായ യാത്രക്കാരുമായി ഇടപെടുന്നതിനാൽ, മാന്യമായി സംസാരിക്കുന്ന ഒരാളുടെ അഭ്യർഥന പരിഗണിക്കാൻ അവർ കൂടുതൽ തയ്യാറാകാമെന്നാണ് തന്‍റെ അനുഭവം തെളിയിക്കുന്നതെന്ന് നാരായണൻ അഭിപ്രായപ്പെടുന്നു.

'ഇത് സൗജന്യമല്ല, ചോദിച്ചിട്ടല്ലേയെന്ന്...'

നാരായണൻ ഹരിഹരന്‍റെ കുറിപ്പിന് പിന്നാലെ നിരവധി പേരാണ് സമാന അനുഭവങ്ങൾ പങ്കുവച്ചത്. എന്നാൽ, വിമാനത്തിൽ മികച്ച സീറ്റുകൾ ലഭ്യമാണോ, വിമാനത്തിലെ തിരക്കെങ്ങനെയാണ്, എയർലൈൻ നയങ്ങൾ എന്താണ് തുടങ്ങിയ കാര്യങ്ങളും ഇത്തരം അപ്ഗ്രേഡുകളെ സ്വാധീനിക്കാമെന്ന് ചിലർ ചൂണ്ടിക്കാട്ടി. മാന്യമായി സീറ്റ് അപ്ഗ്രേഡ് ചോദിക്കുന്നത് സൗജന്യ അപ്ഗ്രേഡായി കണക്കാക്കാൻ കഴിയില്ലെന്നും മറ്റ് ചിലർ ചൂണ്ടിക്കാട്ടി. ഇത്തരം അനുഭവങ്ങൾ വ്യക്തികളുടെ മറ്റുള്ളവരോട് ഇടപെടാനുള്ള കഴിവിനെ മാത്രം ആശ്രയിച്ചിരിക്കുമെന്നും ചിലർ ചൂണ്ടിക്കാട്ടി.

അതിലായിരുന്നു അച്ഛന്റെ അവസാനത്തെ ചിത്രം, ഒരുപാട് വിഷമിച്ചു, ഡ്രൈവർക്ക് നന്ദി, ദുബായ് അനുഭവം

Web Desk — Mon, 05 Oct 2026 12:52:38 +0530

ദുബായിയില്‍ വച്ചുണ്ടായ ഒരിക്കലും മറക്കാനാവാത്തൊരു അനുഭവം പങ്കുവെച്ച് ഇന്ത്യക്കാരിയായ വർത്തിക ശർമ്മ. യാത്രാമധ്യേ ടാക്സിയിൽ വെച്ച് നഷ്ടപ്പെട്ട വാലറ്റ്, ഒരു രൂപ പോലും നഷ്ടപ്പെടാതെ തിരികെ ലഭിച്ചതിന്റെ സന്തോഷമാണ് ലിങ്ക്ഡ്ഇൻ പോസ്റ്റിലൂടെ വർത്തിക പങ്കുവെച്ചിരിക്കുന്നത്. പണവും കാർഡുകളും നഷ്ടപ്പെട്ടതിനേക്കാളുപരി, വാലറ്റിലുണ്ടായിരുന്ന അച്ഛന്റെ പഴയ ചിത്രം നഷ്ടപ്പെട്ടല്ലോ എന്നതാണ് തന്നെ ഏറെ ആശങ്കപ്പെടുത്തിയതെന്ന് അവർ കുറിച്ചു.

ദുബായിൽ Careem ടാക്സിയിൽ യാത്ര ചെയ്യുന്നതിനിടയിലാണ് വർത്തികയുടെ വാലറ്റ് നഷ്ടപ്പെടുന്നത്. പണവും ബാങ്ക് കാർഡുകളും എളുപ്പത്തിൽ മാറ്റിവാങ്ങാമെങ്കിലും, തന്റെ കൈവശമുണ്ടായിരുന്ന അച്ഛന്റെ അവസാന പാസ്‌പോർട്ട് സൈസ് ഫോട്ടോ ആ വാലറ്റിലുണ്ടായിരുന്നു, അത് നഷ്ടപ്പെട്ടല്ലോ എന്നതാണ് തന്നെ ഏറെ വിഷമിപ്പിച്ചത് എന്ന് വർത്തിക പറയുന്നു. കഴിഞ്ഞ ഡിസംബറിലാണ് വർത്തികയുടെ അച്ഛൻ മരിച്ചത്.

എന്നാൽ ഏതാനും മണിക്കൂറുകൾക്കകം Careem care ടീമിൽ നിന്ന് വർത്തികയ്ക്ക് ആശ്വാസകരമായ ആ ഫോൺവിളിയെത്തി. ടാക്സി ഡ്രൈവർ വാലറ്റ് സുരക്ഷിതമായി സൂക്ഷിച്ചിട്ടുണ്ടെന്നും തിരിച്ചേൽപ്പിക്കാൻ തയ്യാറാണെന്നുമായിരുന്നു സന്ദേശം. വാലറ്റ് തിരികെ ലഭിച്ചപ്പോൾ അതിൽ പണവും കാർഡുകളും മാത്രമല്ല, വിലമതിക്കാനാവാത്ത ആ ഫോട്ടോയും നഷ്ടപ്പെടാതെ സുരക്ഷിതമായി ഉണ്ടായിരുന്നു.

തന്റെ സന്തോഷവും നന്ദിയും അറിയിക്കാൻ ഡ്രൈവർക്ക് ടിപ്പ് നൽകാൻ ശ്രമിച്ചെങ്കിലും അദ്ദേഹം അത് സ്വീകരിക്കാൻ തയ്യാറായില്ല. ദുബായിലെ ജനങ്ങളുടെ സത്യസന്ധതയെയും മനുഷ്യത്വത്തെയും കുറിച്ച് പലപ്പോഴും കേട്ടിട്ടുണ്ടെങ്കിലും, അത് നേരിട്ട് അനുഭവിച്ചറിഞ്ഞതിന്റെ സന്തോഷത്തിലാണ് വര്‍ത്തിക. തങ്ങളുടെ പ്രവൃത്തിയിലൂടെ സഹായിച്ച ഡ്രൈവർക്കും Careem കെയർ ടീമിനും വർത്തിക ഹൃദയം നിറഞ്ഞ നന്ദി അറിയിച്ചു. മനുഷ്യത്വത്തിന് ഇത്രയേറെ വില കൽപ്പിക്കുന്ന ദുബായ് നഗരത്തിന് നന്ദി പറഞ്ഞുകൊണ്ടാണ് വർത്തിക തന്റെ കുറിപ്പ് അവസാനിപ്പിച്ചത്.

ഇന്ത്യയെ തോല്പിക്കാനാവില്ല അമേരിക്കൻ ഹോട്ടലുകളിലെ ബ്രേക്ക്ഫാസ്റ്റിന്; പോസ്റ്റുമായി സംരംഭകൻ

Web Desk — Mon, 05 Oct 2026 11:03:11 +0530

ഇന്ത്യയിലെയും മറ്റ് ഏഷ്യന്‍ രാജ്യങ്ങളിലെയും ആഡംബര ഹോട്ടലുകളിലെ പ്രഭാതഭക്ഷണത്തിന്റെ ആ ഒരു എക്സ്പീരിയൻസ് അമേരിക്കന്‍ ഹോട്ടലുകളിൽ പോലും ലഭിക്കുന്നില്ലെന്ന് ഇന്ത്യൻ സംരംഭകൻ. വിനീത് കെ എന്ന എന്റര്‍പ്രണറുടെ എക്സ് (ട്വിറ്റർ) പോസ്റ്റാണ് ഇപ്പോൾ സാമൂഹിക മാധ്യമങ്ങളിൽ വലിയ ചര്‍ച്ചയായിരിക്കുന്നത്. ഏഷ്യന്‍ രാജ്യങ്ങളിലെ ഹോട്ടലുകള്‍ ഭക്ഷണത്തിന്റെ കാര്യത്തിൽ, പ്രത്യേകിച്ച് ബ്രേക്ക്ഫാസ്റ്റിന്റെ കാര്യത്തിൽ നമ്മെ ഒരുപാട് വഷളാക്കിയിട്ടുണ്ടെന്നാണ് വിനീത് കുറിച്ചത്.

വൈവിധ്യമാര്‍ന്ന വിഭവങ്ങള്‍, ഫ്രെഷ് ഫുഡ്, ലൈവ് കൗണ്ടറുകൾ, ഏഷ്യന്‍, കോണ്ടിനെന്റല്‍ വിഭവങ്ങള്‍, ഡെസേര്‍ട്ടുകള്‍ തുടങ്ങി ആവശ്യപ്പെടുന്നത് എന്തും അവിടെ ലഭ്യമാണെന്ന് അദ്ദേഹം പറഞ്ഞു. താൻ അമേരിക്കയിലെ ഒരു ജെഡബ്ല്യു മാരിയറ്റ് (JW Marriott) ഹോട്ടലിൽ താമസിച്ചപ്പോഴുള്ള അനുഭവം പങ്കുവെച്ചുകൊണ്ടാണ് അദ്ദേഹം ഇക്കാര്യം വ്യക്തമാക്കിയത്. ഏകദേശം 600 ഡോളർ (ഏകദേശം 58,000 രൂപയോളം) വാടകയുള്ള ആ ഹോട്ടലിലെ പ്രഭാതഭക്ഷണത്തിന്റെ അവസ്ഥ വളരെ പരിമിതമായിരുന്നു. കോഫി സെക്ഷനിൽ സ്റ്റാർബക്സ് ലഭിക്കുന്നത് മാത്രമാണ് അവിടെ 'പ്രീമിയം' ആയി തോന്നിയതെന്നും അദ്ദേഹം കൂട്ടിച്ചേര്‍ത്തു.

എന്നാല്‍, ഇന്ത്യയിലും മറ്റ് പല ഏഷ്യന്‍ രാജ്യങ്ങളിലും സമാനമായ തുക നൽകിയാൽ ലഭിക്കുന്ന പ്രഭാതഭക്ഷണം ഒരു വലിയ എക്സ്പീരിയൻസ് തന്നെയാണ്. വിഭവങ്ങളുടെ വൈവിധ്യം കണ്ട് എവിടെ തുടങ്ങണമെന്ന് ഒരാൾ സംശയിച്ചുപോകും. അതേസമയം, 1000 ഡോളറിലധികം വിലയുള്ള അമേരിക്കൻ ഹോട്ടലുകളിൽ മാത്രമേ ഈ എക്സ്പീരിയൻസ് മെച്ചപ്പെടാറുള്ളൂ എന്നും അദ്ദേഹം അഭിപ്രായപ്പെട്ടു.

ഈ പോസ്റ്റിന് താഴെ നിരവധി പേരാണ് അനുകൂലിച്ചും പ്രതികൂലിച്ചും രംഗത്തെത്തിയത്. അമേരിക്കന്‍ ഹോട്ടലുകളിലെ പ്രഭാതഭക്ഷണം സ്‌ക്രാംബിൾഡ് എഗ്ഗ്, റോസ്റ്റഡ് പൊട്ടറ്റോ, ഹാം, ബ്രെഡ്, സലാഡ്, കോണ്‍ഫ്ലക്സ് എന്നിവയിൽ മാത്രമായി ഒതുങ്ങുന്നുവെന്ന് പലരും പറഞ്ഞു. യൂറോപ്പ് ഉൾപ്പടെയുള്ള മറ്റ് രാജ്യങ്ങൾ ഈ കാര്യത്തിൽ അമേരിക്കയേക്കാൾ ഭേദമാണെന്നും അഭിപ്രായങ്ങളുയർന്നു.

Indian and Asian hotels have really spoiled us when it comes to food, especially breakfast.

The variety, the number of options, the fresh food, live counters, Asian dishes, continental choices, desserts. You name it, and they have it.

Now, look at this.

We are staying at a JW Marriott in the US. The property costs around $600 per night. And this is what the breakfast looks like. The difference is huge. Here getting Starbucks in the coffee section is termed as a premium breakfast.

In India and many Asian countries, breakfast at a luxury hotel is an experience in itself. You walk in, look at the spread, and wonder where to even start.

Here, at a similar price point, the options are surprisingly limited. I agree that it’s better above $1000/Day

Of course, food preferences differ across countries, and I understand that. But when you pay this much for a hotel, you naturally expect a certain level of variety and experience.

Travel really makes you appreciate the little things you often take for granted back home.

— Vineeth K (@DealsDhamaka) October 3, 2026

ലോകം ചുറ്റിയിട്ടുള്ള തനിക്ക് ഇന്ത്യന്‍ 5-സ്റ്റാര്‍ ഹോസ്‍പിറ്റാലിറ്റിയോട് കിടപിടിക്കുന്നതായി മറ്റൊന്നും തോന്നിയിട്ടില്ലെന്ന് മറ്റൊരാൾ കുറിച്ചു. എന്നാല്‍‍, ഇന്ത്യയിലെ അത്രയും വിഭവങ്ങൾ വിളമ്പുന്നത് അനാവശ്യമാണ്, ഭക്ഷണം പാഴാക്കലാണ് തുടങ്ങിയ അഭിപ്രായങ്ങളുമായി എത്തിയവരുമുണ്ട്. കൂടാതെ, അമേരിക്കൻ സാഹചര്യത്തിൽ 600 ഡോളർ എന്നത് വലിയൊരു തുകയല്ലെന്നും, അതുകൊണ്ടാകാം പ്രഭാതഭക്ഷണം പരിമിതമായിപ്പോയതെന്നും ചിലർ അഭിപ്രായപ്പെട്ടു.

യാത്രകൾ സ്വന്തം നാട്ടിലെ ചെറിയ കാര്യങ്ങളെപ്പോലും എത്രമാത്രം വിലമതിക്കാൻ പഠിപ്പിക്കുന്നു എന്ന് ഓർമ്മിപ്പിച്ചുകൊണ്ടാണ് വിനീത് തന്റെ പോസ്റ്റ് അവസാനിപ്പിച്ചത്.

‘ഇത് അവസാന തെളിവാകാം…’; അഹമ്മദാബാദ് - മുംബൈ വിമാനത്തിൽ കൊടും ടർബുലൻസ്, കുറിപ്പുമായി ഇൻഫ്ലുവൻസർ

Web Desk — Thu, 01 Oct 2026 14:11:01 +0530

അഹമ്മദാബാദിൽ നിന്ന് മുംബൈയിലേക്ക് പറന്ന വിമാനത്തിൽ നേരിട്ട കടുത്ത ടർബുലൻസിന്‍റെ ദൃശ്യങ്ങൾ പങ്കിട്ട് സമൂഹ മാധ്യമ യാത്രാ ഉള്ളടക്ക സ്രഷ്ടാവ് കാമിയ ജാനി. തന്‍റെ ജീവിതത്തിലെ “ഏറ്റവും കൂടുതൽ ടർബുലൻസ് അനുഭവപ്പെട്ട വിമാനം” എന്ന വിശേഷണത്തോടെയാണ് കാമിയ ഇൻസ്റ്റഗ്രാം സ്റ്റോറിയിലൂടെ അനുഭവം പങ്കുവെച്ചത്. വിമാനത്തിനുള്ളിൽ ശക്തമായി കുലുക്കം അനുഭവപ്പെടുന്നതിന്‍റെ വീഡിയോയും കാമിയ പോസ്റ്റ് ചെയ്തു.

'ഇതൊരു അവസാന തെളിവ്'

“ഫോൺ രക്ഷപ്പെടുകയും ഞാൻ രക്ഷപ്പെടാതിരിക്കുകയും ചെയ്താൽ, ഇത് അവസാന തെളിവായി കരുതുന്നു” എന്ന അർത്ഥത്തിലുള്ള കുറിപ്പോടെയാണ് കാമിയ വീഡിയോ പങ്കുവെച്ചത്. വിമാനയാത്രയുടെ സാഹചര്യം വ്യക്തമാക്കുന്ന ദൃശ്യങ്ങൾ പിന്നീട് സോഷ്യൽ മീഡിയയിൽ ശ്രദ്ധ നേടുകയും ചെയ്തു. കാമിയ ജനപ്രിയ ഭക്ഷണ-യാത്രാ പ്ലാറ്റ്ഫോമായ Curly Tales-ന്‍റെ സ്ഥാപകയാണ്. യാത്രയ്ക്കിടെ മറ്റൊരു പ്രശ്നവും നേരിട്ടതായി കാമിയയുടെ പോസ്റ്റുകൾ സൂചിപ്പിക്കുന്നു. മുംബൈ വിമാനത്താവളത്തിലെ ടെർമിനൽ 2 -ൽ ഇറങ്ങേണ്ടിയിരുന്ന വിമാനം നവി മുംബൈ വിമാനത്താവളത്തിലാണ് ഇറങ്ങിയതെന്ന് അവർ അറിയിച്ചു. തുടർന്ന് യാത്രക്കാരെ വിമാനത്തിൽ നിന്ന് ഇറങ്ങാനോ വീണ്ടും പറന്നുയരാനോ അനുവദിച്ചില്ലെന്നും കാമിയ പോസ്റ്റിൽ കുറിച്ചു.

വിമാനത്തിൽ നിന്ന് തന്നെ 'മറുപടി'

പിന്നീട് വിമാനത്തിനുള്ളിൽ ഇരിക്കുന്ന ചിത്രം പങ്കുവെച്ച കാമിയ, താൻ കൊണ്ടുവരാതിരുന്ന ഐപാഡ് ഓർത്തുപോയെന്നും ഈ സമയത്ത് അത് ഉണ്ടായിരുന്നെങ്കിൽ ഏറെ ജോലി പൂർത്തിയാക്കാമായിരുന്നുവെന്നും കുറിച്ചു. പിന്നാലെ നമ്മുക്ക് നിയന്ത്രിക്കാനാകാത്ത കാര്യങ്ങളെക്കുറിച്ച് ആശങ്കപ്പെടേണ്ടതില്ലെന്ന സന്ദേശവും അവർ പങ്കുവെച്ചു. അതേ വിമാനത്തിലുണ്ടായിരുന്നുവെന്ന് പറഞ്ഞ കാമിനയുടെ ഒരു ഫോളോവർ ആ അനുഭവം ഭയപ്പെടുത്തുന്നതായിരുന്നുവെന്നും വിമാനം വീണ്ടും പറക്കുകയാണെന്നും കാമിയയുടെ സ്റ്റോറിയോട് പ്രതികരിച്ചു. ടെർമിനൽ 2 -ൽ ഇറങ്ങാനുള്ള നാലാമത്തെ ശ്രമമാണ് അതെന്നായിരുന്നു കാമിയ മറുപടി നൽകി. സംഭവത്തിൽ ആരെങ്കിലും പരിക്കേറ്റതായി റിപ്പോർട്ടുകളില്ല. അതേസമയം വിമാനക്കമ്പനിയുടെ പേര് കാമിയ വെളിപ്പെടുത്തിയിട്ടില്ല.

ഗ്യാനേഷ് കുമാറിന്‍റെ രാജി; ജന്തർമന്തറിൽ ശക്തമാകുന്ന പ്രതിഷേധം, അടിച്ചമർത്താൻ പോലീസ്

Web Desk — Mon, 05 Oct 2026 21:30:02 +0530

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഗാന്ധിജയന്തി ദിനത്തിൽ ജന്തർമന്തറിൽ വീണ്ടും പ്രതിഷേധവുമായി പൗരാവകാശ സംഘടനകളെത്തി. സിജെപിയുടെ നേതൃത്വത്തിലാണ് പ്രതിഷേധമെങ്കിലും വിദ്യാർത്ഥി സംഘ‍ടനകളും മുൻ നിരയിൽ തന്നെയുണ്ട്.

നാലാം ദിവസമായ ഇന്ന് എൻഎസ്യുഐയുടെ നേതൃത്വത്തിലായിരുന്നു പ്രതിഷേധ സമരം. ഏഷ്യാനെറ്റ് ന്യൂസ് കാമറാമാൻ അനന്തുപ്രഭ പകർത്തിയ ചിത്രങ്ങൾ കാണാം.

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടാണ് പ്രധാന പ്രക്ഷോഭം. എസ്ഐആർ നടപടിയിലെ ക്രമക്കേടുകൾ ആരോപിച്ചാണ് വിവിധ രാഷ്ട്രീയ, വിദ്യാർത്ഥി, പൗരാവകാശ സംഘടനകൾ മാർച്ച് നടത്തിയത്.

ഗ്യാനേഷ് കുമാറിൻറെ രാജി ആവശ്യപ്പെട്ട് എത്തിയവരെ ജന്തർ മന്തറിലേക്ക് പ്രവേശിപ്പിക്കാൻ പോലും പോലീസ് തയ്യാറായില്ല. എംപിമാർ അടക്കം നേതാക്കളെ പോലീസ് അറസ്റ്റ് ചെയ്ത് നീക്കി.

ദില്ലി പൊലീസ്, വനിതാ പ്രവർത്തകരെയും വനിതാ മാധ്യമ പ്രവർത്തകരെയും എസിപി അടക്കമുള്ള പോലീസ് ഉദ്യോഗസ്ഥർ ലൈംഗികമായി ഉപദ്രവിച്ചെന്നും പരാതികളുയർന്നു.

11 മെട്രോസ്റ്റേഷനുകളും പ്രധാനപ്പെട്ട റോഡുകളും അടച്ചിട്ടും കേന്ദ്രസേനയെ അടക്കം വിന്യസിച്ചുമാണ് പോലീസ് പ്രതിഷേധക്കാരെ തടയുന്നത്. കഴിഞ്ഞ മൂന്ന് ദിവസങ്ങളായി പ്രതിഷേധത്തിനെത്തുന്നവരെ പോലീസ് പാതി വഴിയിൽ നിന്ന് തന്നെ അറസ്റ്റ് ചെയ്ത് നീക്കുന്ന കാഴ്ചയാണ്.

പലയിടത്തും പ്രതിഷേധക്കാരെ കയറ്റിയ വാഹനം തടഞ്ഞ് നിർത്തി പ്രതിഷേധക്കാരെ ഇറക്കിവിടുന്നതും കാണാമായിരുന്നു. ഇന്നത്തെ പ്രതിഷേധത്തിൽ വിദ്യാർത്ഥികൾ പ്രതീകാത്മകമായി മൃതദേഹങ്ങളായി കിടന്നായിരുന്നു പ്രതിഷേധിച്ചത്.

ഇവരെ പോലീസ് തൂക്കിയെടുത്ത് കൊണ്ട് പോകുന്ന ദൃശ്യങ്ങളായിരുന്നു പുറത്ത് വന്നത്. പോലീസ് പ്രതിഷേധക്കാരായ പെൺകുട്ടികളെ അടക്കം റോഡിലൂടെ വലിച്ചിഴച്ചാണ് കൊണ്ട് പോയതെന്ന പ്രതിഷേധക്കാർ ആരോപിച്ചു.

ദില്ലി പോലീസിന്‍റെ അധിക്രമത്തിനെതിരെ കേസ് എടുക്കണമെന്ന് ആവശ്യപ്പെട്ട് പാർലമെന്‍റ് സ്ട്രീറ്റ് പോലീസ് സ്റ്റേഷന് മുന്നിൽ പ്രതിഷേധിച്ച മാധ്യമ പ്രവർത്തകരെയും ദില്ലി പോലീസ് കസ്റ്റഡിയിൽ എടുത്തു.

എൻഎസ്യുഐയുടെ ദേശീയ അധ്യക്ഷൻ വിനോദ് ജാക്കരെ ഉൾപ്പെടെയുള്ളവരെ പോലീസ് ഇന്ന് അറസ്റ്റ് ചെയ്തു. നാളെ ഇന്ത്യാ സഖ്യത്തിന്‍റെ നേതൃത്വത്തിലാണ് ജന്തർമന്ദിറിൽ പ്രതിഷേധം നടക്കുക.

കോർണൽ കൂട്ടബലാത്സംഗക്കേസ്; ആരോപണവിധേയനായ മുൻ വിദ്യാർത്ഥിയെ ജോലിയിൽ നിന്ന് പിരിച്ചുവിട്ടു

Web Desk — Wed, 30 Sep 2026 14:41:22 +0530

2024-ൽ കോർണൽ യൂണിവേഴ്സിറ്റിയിൽ വെച്ച് ലഹരി നല്‍കി യുവതിയെ കൂട്ടബലാത്സംഗം ചെയ്ത കേസിൽ ആരോപണവിധേയനായ മുൻ വിദ്യാർത്ഥിയെ വെൽസ് ഫാർഗോ ബാങ്ക് ജോലിയിൽ നിന്ന് പിരിച്ചുവിട്ടു. നോർത്ത് കരോലിനയിലെ ഷാർലറ്റിലുള്ള ബാങ്ക് ബ്രാഞ്ചിൽ 2022 മുതൽ ജോലി ചെയ്തുവരികയായിരുന്ന ഡീഗോ സരാബിയ എന്നയാളെയാണ് ബാങ്ക് ജോലിയിൽ നിന്ന് നീക്കിയത്. രണ്ട് വർഷം മുമ്പ് കോർണൽ സർവകലാശാലയിലെ ഫ്രാറ്റേണിറ്റി ഹൗസിൽ വെച്ച് യുവതിയോട് ക്രൂരമായ അതിക്രമം കാട്ടിയ കേസിൽ ആരോപണം നേരിടുന്ന ഏഴ് മുൻ വിദ്യാർത്ഥികളിൽ ഒരാളാണ് ഇയാൾ.

ഈ സംഭവത്തിൽ ന്യൂയോർക്ക് പ്രോസിക്യൂട്ടർമാർ ക്രിമിനൽ അന്വേഷണം പുനരാരംഭിച്ചതിന് പിന്നാലെയാണ് സരാബിയക്ക് ജോലി നഷ്ടപ്പെട്ടതെന്ന് അമേരിക്കൻ മാധ്യമമായ 'ടി.എം.സി' റിപ്പോർട്ട് ചെയ്യുന്നു. അക്രമിക്കപ്പെട്ട യുവതി അടുത്തിടെ നൽകിയ സിവിൽ ഹർജിയെത്തുടർന്ന് ജനരോഷം ശക്തമായ പശ്ചാത്തലത്തിലാണ് നടപടി. കോർണൽ യൂണിവേഴ്സിറ്റി ഫ്രാറ്റേണിറ്റി ഹൗസിൽ നടന്നതായി പറയപ്പെടുന്ന അതിക്രമക്കേസിൽ ന്യൂയോർക്ക് സ്റ്റേറ്റ് പ്രോസിക്യൂട്ടർമാർ അന്വേഷണം പുനരാരംഭിച്ചതായി ടോംപ്കിൻസ് കൗണ്ടി ഡിസ്ട്രിക്റ്റ് അറ്റോർണി സ്ഥിരീകരിച്ചു.

ഏഴ് പ്രതികൾക്കെതിരെയുള്ള കേസ് ക്രിമിനൽ കുറ്റപത്രം ചുമത്തുന്നതിനായി ഗ്രാൻഡ് ജൂറിക്ക് മുന്നിൽ സമർപ്പിക്കുമെന്ന് ഡിസ്ട്രിക്റ്റ് അറ്റോർണി മാത്യു വാൻ ഹൗട്ടൻ പ്രസ്താവനയിലൂടെ വ്യക്തമാക്കി. ഡിസ്ട്രിക്റ്റ് അറ്റോർണി നടത്തിയ ഈ പ്രഖ്യാപനത്തിന് തൊട്ടുപിന്നാലെയാണ് സരാബിയയെ പിരിച്ചുവിടാൻ വെൽസ് ഫാർഗോ തീരുമാനിച്ചതെന്ന് റിപ്പോർട്ടുകൾ സൂചിപ്പിക്കുന്നു.

സിവിൽ ഹർജിയിലെ ആരോപണങ്ങൾ

യുവതി നൽകിയ ഹർജിയിൽ, 2024 ഒക്ടോബറിൽ ഐവി ലീഗ് ക്യാമ്പസിലെ 'ചി ഫൈ' ഫ്രാറ്റേണിറ്റി ഹൗസിൽ വെച്ച് നിർബന്ധിച്ച് ലഹരിമരുന്ന് ശ്വസിപ്പിക്കുകയും കഞ്ചാവും മദ്യവും നൽകിയ ശേഷം ലൈംഗികമായി പീഡിപ്പിക്കുകയും ചെയ്തുവെന്ന് ആരോപിക്കുന്നു. 2024 നവംബറിൽ സംഭവം പോലീസിൽ റിപ്പോർട്ട് ചെയ്തിരുന്നെങ്കിലും, കോർണൽ യൂണിവേഴ്സിറ്റി കുറ്റാരോപിതർക്ക് തക്കതായ ശിക്ഷ നൽകിയില്ലെന്നും കേസ് ലഘൂകരിക്കാൻ അവസരം നൽകിയെന്നുമാണ് യുവതി ആരോപിക്കുന്നത്.

എന്നാൽ 2024 നവംബറിൽ യുവതി നൽകിയ ആദ്യ മൊഴിയിൽ നിർബന്ധിത ലഹരി ഉപയോഗമോ കൂട്ടബലാത്സംഗമോ ആരോപിച്ചിരുന്നില്ലെന്നും, പരസ്പര സമ്മതത്തോടെയുള്ള ലൈംഗികബന്ധമാണ് നടന്നതെന്ന രീതിയിലാണ് വിവരം നൽകിയിരുന്നതെന്നും പ്രോസിക്യൂട്ടർമാർ വ്യക്തമാക്കി. എങ്കിലും ലൈംഗിക അതിക്രമങ്ങൾക്ക് ഇരയാകുന്നവർക്ക് മാനസികാഘാതത്തിൽ നിന്ന് പുറത്തുവരാനും സംഭവിച്ച കാര്യങ്ങൾ പൂർണ്ണമായി മനസ്സിലാക്കാനും വർഷങ്ങൾ എടുത്തേക്കാമെന്ന യാഥാർത്ഥ്യം കണക്കിലെടുത്താണ് അന്വേഷണം പുനരാരംഭിക്കുന്നതെന്നും ഡിസ്ട്രിക്റ്റ് അറ്റോർണി കൂട്ടിച്ചേർത്തു.

മകന്‍റെ ഓൺലൈൻ ഗെയിം ആസക്തിയറിയാൻ തുടങ്ങി, 60 -ാം വയസിൽ അമ്മ ലോകപ്രശസ്ത ഗെയിമർ!

Web Desk — Sat, 03 Oct 2026 11:45:21 +0530

ഓൺലൈൻ ഗെയിമുകളിൽ മുഴുകിയിരുന്ന മകനെ വിലക്കാൻ ഇന്‍റർനെറ്റ് കഫേകളിൽ കയറി ബലം പ്രയോഗിച്ച് പുറത്തിറക്കിയിരുന്ന ഒരു അമ്മ, ഇന്ന് അതേ ഗെയിമിംഗ് ലോകത്തെ തരംഗമായി മാറിയിരിക്കുകയാണ്. ദക്ഷിണ ചൈനയിലെ മെയിഷൂ സ്വദേശിയായ 60 -കാരി ഷാങ് ജുവാന്‌ജുവാൻ ആണ് ഓൺലൈൻ ഗെയിമുകളുടെ ലൈവ് സ്ട്രീമിംഗിലൂടെ സോഷ്യൽ മീഡിയയിൽ ശ്രദ്ധനേടുന്നത്.

തുടക്കം, മകന്‍റെ ആസക്തിയുടെ കാരണം അറിയാൻ

ഇന്‍റർനെറ്റ് ലോകത്ത് 'ജുവാൻ അമ്മായി' എന്ന പേരിൽ അറിയപ്പെടുന്ന ഇവരുടെ ഗെയിമിംഗ് ലൈവ് സ്ട്രീമുകൾ കാണാൻ ഇന്ന് പതിനായിരക്കണക്കിന് ആളുകളാണുള്ളത്. പ്രാഥമിക വിദ്യാഭ്യാസം മാത്രം പൂർത്തിയാക്കിയ ഷാങ്, ജീവിത മാർഗ്ഗത്തിനായി സെയിൽസ്, ചൈൽഡ് കെയർ തുടങ്ങി വിവിധ ഇടങ്ങിലായി മണിക്കൂർ അടിസ്ഥാനത്തിൽ ജോലികൾ ചെയ്തിരുന്നു. പത്ത് വർഷം മുമ്പാണ് ഇവർ വിരമിച്ചത്. ഏകദേശം ഇരുപത് വർഷം മുമ്പ് ഹൈസ്കൂളിൽ പഠിക്കുമ്പോൾ മകൻ സുവോഡെയ്ക്ക് ഗെയിമുകളോട് കടുത്ത ആസക്തിയുണ്ടാവുകയും പഠനത്തിൽ പിന്നോക്കം പോവുകയും ചെയ്തു. അന്ന് മകനെ ഓൺലൈൻ ഗെയിമുകളിൽ നിന്നും പിന്തിരിപ്പിക്കാൻ ഏറെ പാടുപെട്ടിരുന്നു ഷാങ്, ഒടുവിൽ മകന് ഇത്തരം ഗെയിമുകളോട് തോന്നുന്ന അമിത ആസക്തിയുടെ കാരണം അറിയാൻ ഷാങ് തീരുമാനിച്ചു. അങ്ങനയാണ് അവർ ഓൺലൈൻ ഗെയിമുകൾ കളിക്കാൻ തീരുമാനിക്കുന്നത്.

Auntie Juan is not for roaming parks in a pack with other aunties doing their choreographed dances. She haven’t learned how to play Mahjong either. Instead, she took up gaming from her son during COVID and is now a streamer who occasionally forgets cooking food for her family if… https://t.co/E19oejThi2

— Angelica ⚛️ (@AngelicaOung) January 30, 2026

ഇന്ന് ഗെയിമിങ്ങിലെ താരം

View this post on Instagram

A post shared by Sixth Tone (@sixthtone)

ആദ്യ ഘട്ടത്തിൽ മകന്‍റെ തന്നെ സഹായത്തോടെയാണ് ഷാങ് ഗെയിമിംഗിലെ പ്രാഥമിക പാഠങ്ങൾ പഠിച്ചെടുത്തത്. കാഴ്ചശക്തിയുടെ കുറവും വേഗതക്കുറവും തുടക്കത്തിൽ വലിയ വെല്ലുവിളിയായിരുന്നു. എന്നാൽ പിന്മാറാൻ തയ്യാറാകാതിരുന്ന ഷാങ്, നിരന്തരമായ പരിശീലനത്തിലൂടെ തന്‍റെ ഗെയിമിംഗ് കഴിവുകൾ മെച്ചപ്പെടുത്തി. 2022-ഓടെ ഷാങ് തന്‍റെ ഗെയിമിംഗ് ലൈവ് സ്ട്രീമിംഗ് ആരംഭിച്ചു. വളരെ ലളിതമായ ഉപകരണങ്ങൾ ഉപയോഗിച്ച് പ്രൊഫഷണൽ കളിക്കാരെപ്പോലെ കളിച്ച് അത്ഭുതപ്പെടുത്തുന്ന ഇവരുടെ വീഡിയോകൾ അതിവേഗമാണ് സമൂഹ മാധ്യമങ്ങളിൽ വൈറലായത്. ഇതുവരെ 8,000-ത്തിലധികം മണിക്കൂറുകൾ ഗെയിമിംഗിൽ ചിലവഴിച്ചിട്ടുള്ള ഇവർ പ്രധാനമായും ഷൂട്ടിംഗ് ഗെയിമുകളിലാണ് ശ്രദ്ധ കേന്ദ്രീകരിക്കുന്നത്. കഴിഞ്ഞ 2024 ഡിസംബറിൽ പ്രശസ്തമായ 'കൗണ്ടർ - സ്ട്രൈക്ക്: ഗ്ലോബൽ ഒഫൻസീവ്' എന്ന ഇ - സ്പോർട്സ് മത്സരത്തിലേക്ക് ക്ഷണിക്കപ്പെട്ടതോടെയാണ് ജുവാൻ അന്താരാഷ്ട്ര തലത്തിൽ ശ്രദ്ധനേടിയത്.

ഓർഡർ ചെയ്യാതെയെത്തിയ പാർസൽ പണം കൊടുത്ത് വാങ്ങി തുറന്നപ്പോൾ 'കീറിപ്പറി‌ഞ്ഞ പഴയൊരു കുർത്ത'! യുവതിയുടെ പരാതി വൈറൽ

Web Desk — Mon, 05 Oct 2026 19:06:05 +0530

ഓൺലൈനായി വാങ്ങിയിട്ടില്ലെന്ന് ഉറപ്പുണ്ടെങ്കിൽ ഓൺലൈനായി ലഭിക്കുന്ന പാർസലുകൾ തുറക്കരുതെന്നതും പ്രത്യേകിച്ചും പണം അടച്ച് അവ കൈപ്പറ്റരുതെന്നുമുള്ള ഒരു അനുഭവം പങ്കുവയ്ക്കപ്പെട്ടപ്പോൾ സമൂഹ മാധ്യമങ്ങളിൽ അത് വൈറലായി. ഓർഡർ ചെയ്യാത്ത ഒരു ക്യാഷ് ഓൺ ഡെലിവറി പാർസൽ വീട്ടിലെത്തിയെന്നും അതിനുള്ളിൽ ഉണ്ടായിരുന്നത് കീറിപ്പറിഞ്ഞ ഉപയോഗിച്ച് ഉപേക്ഷിച്ച ഒരു കുർത്തയാണെന്നും യുവതിയുടെ പരാതി. എഴുത്തുകാരിയും സോഷ്യൽ മീഡിയ ഉപയോക്താവുമായ കിരൺ മൻറാളാണ് സംഭവത്തെക്കുറിച്ച് എക്സിൽ പങ്കുവെച്ചത്. ഡെലിവറി വഴിയെത്തിയ പാർസലിൽ തന്‍റെ പേര്, ഫോൺ നമ്പർ, വിലാസം എന്നിവ കൃത്യമായിരുന്നെങ്കിലും അയച്ചയാളുടെ വ്യക്തമായ വിവരങ്ങളൊന്നും ഉണ്ടായിരുന്നില്ലെന്നും കിരൺ കുറിപ്പിൽ പറയുന്നു.

'ആസൂത്രണം ചെയ്ത തട്ടിപ്പ്'

പാർസൽ ക്യാഷ് ഓൺ ഡെലിവറി ആയിരുന്നതിനാൽ മകൻ പണം നൽകിയ ശേഷമാണ് പാക്കറ്റ് തുറന്നതെന്നും കിരൺ പറഞ്ഞു. എന്നാൽ, താൻ ഇത്തരമൊരു സാധനവും ഓർഡർ ചെയ്തിരുന്നില്ല. പാക്കറ്റ് തുറന്നപ്പോൾ പകുതി കീറിയ നിലയിലുള്ള പഴയ, ഉപയോഗിച്ച ഒരു കുർത്തയാണ് ലഭിച്ചതെന്നും അവർ വ്യക്തമാക്കി. സംഭവത്തെ ‘വിപുലമായി ആസൂത്രണം ചെയ്ത തട്ടിപ്പ്’ എന്നാണ് കിരൺ വിശേഷിപ്പിച്ചത്.

I was subject to an elaborate scam yesterday. Parcel comes home via @delhivery COD. Everything perfect, my name address phone number. But nothing about the sender. My son pays. I have not ordered anything. See what was sent. A half torn used kurta. What they call chindi. Delhivery obviously saying collect your money from sender. I have no clue who the sender is. I wonder how many folks have been scammed this way. Any help will be welcome. It’s a small amount but just the principle of the thing.

— Kiran Manral (@KiranManral) October 4, 2026

പണം നൽകിയ ശേഷം ആരാണ് പാർസൽ അയച്ചതെന്ന് കണ്ടെത്താൻ കഴിയാത്ത അവസ്ഥയാണെന്നും, ഇതുപോലെ എത്ര പേർ തട്ടിപ്പിനിരയായിട്ടുണ്ടാകാമെന്ന ആശങ്കയുണ്ടെന്നും അവർ ചൂണ്ടിക്കാട്ടി. തുക ചെറുതാണെങ്കിലും വിഷയം പണത്തിന്‍റെ മാത്രം കാര്യമല്ലെന്നും കിരൺ വ്യക്തമാക്കുന്നു.

പരിഹാരം കാണുമെന്ന്

കിരണിന്‍റെ സോഷ്യൽ മീഡിയ പോസ്റ്റിന് പിന്നാലെ ഡെലിവറി ഹെൽപ്‌ഡെസ്ക് പ്രതികരണവുമായി രംഗത്തെത്തി. ലഭിച്ച ഷിപ്പ്മെന്‍റിലെ സാധനവും പ്രതീക്ഷിച്ച സാധനവും തമ്മിലുള്ള പൊരുത്തക്കേട് ശ്രദ്ധയിൽപ്പെട്ടതായി കമ്പനി അറിയിച്ചു. സംഭവത്തിൽ ഖേദം പ്രകടിപ്പിച്ച ഡെലിവറി കമ്പനി, വിഷയം പ്രദേശത്തെ പാട്ണർക്ക് കൈമാറിയതായും ഉടൻ പരിഹാരമുണ്ടാകുമെന്നും അവർ ബന്ധപ്പെടുമെന്നും വ്യക്തമാക്കി. അതേസമയം സംഭവം യഥാർഥത്തിൽ തട്ടിപ്പാണോ, അതോ പാർസൽ എവിടെ നിന്നാണ് അയച്ചതെന്നോ നിലവിൽ വ്യക്തമായിട്ടില്ല. എന്നാൽ ഓർഡർ ചെയ്തിട്ടില്ലാത്ത ക്യാഷ് ഓൺ ഡെലിവറി പാർസലുകൾ ലഭിക്കുമ്പോൾ പണം നൽകുന്നതിന് മുമ്പ് ഓർഡറും അയച്ചയാളുടെ വിവരങ്ങളും പരിശോധിക്കണമെന്ന് സമൂഹ മാധ്യമ ഉപയോക്താക്കൾ മുന്നറിയിപ്പ് നൽകുന്നു.

നമുക്ക് പകരം വഴക്കിടാൻ വരെ ആളെ കിട്ടും; ചൈനയിൽ തരംഗമായി 'സ്റ്റാൻഡ്-ഇൻ ഇക്കോണമി'

Web Desk — Sun, 04 Oct 2026 17:07:31 +0530

പാചകം ചെയ്യാനും ആശുപത്രിയിൽ രോഗികൾക്ക് കൂട്ടിരിക്കാനും എന്തിനേറെ, മറ്റുള്ളവരുമായി വഴക്കിടാൻ വരെ ആളുകളെ ലഭ്യമാക്കുന്ന പുതിയൊരു സർവീസ് ചൈനയിൽ ജനപ്രീതി നേടുന്നു. ചെറുപ്പക്കാരായ ചൈനക്കാർ ഒഴിവാക്കാൻ ആഗ്രഹിക്കുന്ന ഡെയിലി ജോലികളും മറ്റും കൈകാര്യം ചെയ്യാൻ പണം വാങ്ങി പകരം ആളെത്തുന്ന ഈ രീതി 'സ്റ്റാൻഡ്-ഇൻ ഇക്കോണമി' (Stand-in economy) എന്ന പേരിലാണ് അറിയപ്പെടുന്നത്.

നമ്മുടെ വീട്ടിലെയും മറ്റും ഉത്തരവാദിത്തങ്ങൾ പൂർത്തിയാക്കാൻ കഴിയാതെ വരുമ്പോൾ, അത്തരം സൗകര്യങ്ങൾക്കായി പണം നൽകാൻ തയ്യാറുള്ള സമയക്കുറവുള്ള യുവാക്കളെ ലക്ഷ്യമിട്ടാണ് ഇത്തരം സേവനങ്ങൾ പ്രവർത്തിക്കുന്നത്.

2024-ൽ ചൈനീസ് മാധ്യമങ്ങളിലൂടെ പുറത്തുവന്ന ഇത് ഇന്ന് വലിയൊരു വിപണിയായി മാറിക്കഴിഞ്ഞു. ചൈനീസ് സോഷ്യൽ മീഡിയ പ്ലാറ്റ്‌ഫോമായ 'റെഡ്നോട്ടി'ൽ സങ്കീർണ്ണമായ ലെഗോ സെറ്റുകൾ കൂട്ടിച്ചേർക്കാനും കരകൗശല വസ്തുക്കൾ നിർമ്മിച്ചു നൽകാനുമായി ആളുകളെ തിരയുന്ന പോസ്റ്റുകൾക്ക് 12 കോടിയിലധികം കാഴ്ചക്കാരാണുണ്ടായത്.

തർക്കങ്ങളിൽ പകരം നിൽക്കൽ

തെക്കൻ ചൈനയിലെ ഗ്വാങ്‌‌ഷൂവിൽ നിന്നുള്ള കോങ് എന്നയാൾ പണം വാങ്ങി മറ്റുള്ളവർക്ക് വേണ്ടി വഴക്കിടുന്ന സര്‍വീസ് തുടങ്ങി വാർത്തകളിൽ ഇടം നേടിയിരുന്നു. ഓൺലൈൻ തർക്കങ്ങൾക്ക് 50 യുവാനും (ഏകദേശം 600 രൂപ), നേരിട്ടുള്ള തർക്കങ്ങൾക്ക് എത്ര സമയമെടുത്താലും 188 യുവാനുമാണ് ഇയാൾ ഈടാക്കുന്നത്. അക്രമത്തിന് പകരം കാര്യങ്ങൾ സമാധാനത്തിലാക്കുന്നതാണ് തന്റെ രീതിയെന്നും ഭീഷണിപ്പെടുത്തൽ, പണം പിരിക്കൽ, കയ്യാങ്കളി എന്നിവ താൻ ഏറ്റെടുക്കാറില്ലെന്നും കോങ് വ്യക്തമാക്കുന്നു.

ഹാംഗ്ഷൂവിലെ മിഹാൻ എന്ന യുവതി അയൽക്കാരുടെ മാലിന്യങ്ങൾ പുറത്തുകളയുന്നതിന് 3 യുവാനും പ്രതിമാസ പാക്കേജിനായി 99 യുവാനും ഈടാക്കി സേവനം തുടങ്ങി. ദിവസങ്ങൾക്കുള്ളിൽ തന്നെ ഇരുപതിലേറെ ഉപഭോക്താക്കളെ ലഭിച്ച ഇവർ പാഴ്സലുകൾ ശേഖരിക്കൽ, അവധിക്കാലത്ത് വളർത്തുപൂച്ചകൾക്ക് തീറ്റ നൽകൽ എന്നിവയിലേക്കും സേവനം വ്യാപിപ്പിച്ചു. പ്രമുഖ ഭക്ഷണശാലകളിൽ വരി നിൽക്കുന്നതിനായി 10 മുതൽ 30 യുവാൻ വരെയാണ് പ്രതിഫലം.

വൈകാരിക പിന്തുണയും കൂട്ടിരിപ്പും

ശാരീരികാധ്വാനം മാത്രമല്ല, വൈകാരികമായ ആവശ്യങ്ങളും ഇത്തരം ഏജൻസികൾ ഏറ്റെടുക്കുന്നുണ്ട്. ഷെജിയാങ്ങിൽ നിന്നുള്ള ഒരു യുവതി ആശുപത്രിയിൽ കഴിയുന്ന രോഗിയെ സന്ദർശിക്കാനും സമ്മാനങ്ങൾ കൈമാറാനുമായി 50 യുവാൻ വാങ്ങി. പ്രായമായവരോടൊപ്പം സമയം ചെലവഴിക്കാനും പാചകത്തിനുമായി രണ്ട് മണിക്കൂറിന് 300 യുവാൻ ഈടാക്കുന്ന സേവനങ്ങളും ലഭ്യമാണ്.

സാമ്പത്തിക വിശകലനം

ഉപഭോക്താക്കൾ പണം നൽകി തങ്ങളുടെ സമയം ലാഭിക്കുന്ന ചൈനയിലെ 'ലേസി ഇക്കോണമി'യുടെ ഒരു തുടർച്ചയായാണ് സാമ്പത്തിക വിദഗ്ദ്ധർ ഇതിനെ വിലയിരുത്തുന്നത്. ഇത്തരം സേവനങ്ങൾ വ്യക്തിപരമായ സൗകര്യങ്ങളും കാര്യക്ഷമതയും വർദ്ധിപ്പിക്കുന്നതിനൊപ്പം പുതിയ തൊഴിലവസരങ്ങൾ സൃഷ്ടിക്കുമെന്നും ജിമേയ് സർവ്വകലാശാലയിലെ അസോസിയേറ്റ് പ്രൊഫസർ ലി നാ ചൂണ്ടിക്കാട്ടുന്നു.

'പണം നൽകി ജീവിതത്തിലെ എല്ലാ നിസ്സാര കാര്യങ്ങളും പരിഹരിക്കാൻ തുടങ്ങുമ്പോൾ നമ്മൾ കൂടുതൽ സ്വാതന്ത്ര്യം നേടുകയാണോ, അതോ ജീവിക്കുക എന്ന അനുഭവത്തിന്റെ ഒരു ഭാഗം നിശ്ശബ്ദമായി ഉപേക്ഷിക്കുകയാണോ?' എന്ന ചോദ്യമാണ് ഈ വിചിത്രമായ പ്രവണതയെക്കുറിച്ച് സോഷ്യൽ മീഡിയയിൽ ഉയരുന്നത്.

പഴയ സാൻട്രോ കാറുള്ള മാനേജരെ പിശുക്കിയെന്ന് വിളിച്ച് കളിയാക്കി, എല്ലാവരേയും ഞെട്ടിച്ച് 46 -ാം വയസ്സിൽ വിരമിച്ചു

Web Desk — Sun, 04 Oct 2026 14:59:32 +0530

കാറും വീടും പെരുമാറ്റവും ഒക്കെ നോക്കി നമ്മൾ ആളുകളെ വിലയിരുത്താറുണ്ട് അല്ലേ? എന്നാൽ, അതിൽ ചില കുഴപ്പങ്ങളൊക്കെയുണ്ട്. അങ്ങനെ ഒരു പോസ്റ്റാണ് അഭിഷേക് സിങ് എന്ന യുവാവ് സോഷ്യൽ മീഡിയയിൽ പങ്കുവെച്ചിരിക്കുന്നത്. തന്റെ പഴയ മാനേജരെക്കുറിച്ചും അവർ ഉപയോഗിച്ചിരുന്ന പഴയ കാറിനെക്കുറിച്ചുമാണ് അഭിഷേക് സോഷ്യൽ മീഡിയയിൽ പോസ്റ്റ് ഷെയർ ചെയ്തിരിക്കുന്നത്.

22 -ാമത്തെ വയസ്സിൽ തന്റെ ആദ്യ ജോലിക്ക് കയറിയ കാലത്താണ് അഭിഷേക് ഈ മാനേജരോടൊപ്പം ജോലി ചെയ്യുന്നത്. അന്ന് അവരുടെ കയ്യിലുണ്ടായിരുന്ന പഴയ ഗ്രേ നിറത്തിലുള്ള ഹ്യുണ്ടായ് സാൻട്രോ കാറിനെക്കുറിച്ച് സഹപ്രവർത്തകർ പലപ്പോഴും തമാശകൾ പറഞ്ഞിരുന്നു.

12 വർഷത്തിലധികം പഴക്കമുള്ള ആ കാറിന് ഒരു പ്രശ്നമുണ്ടായിരുന്നു. വണ്ടി സ്റ്റാർട്ട് ചെയ്യുമ്പോൾ തന്നെ ഒരു പ്രത്യേക ശബ്ദവും കേൾക്കാം. ദിവസവും വൈകുന്നേരം 5 മണിക്ക് മാനേജർ ഓഫീസിൽ നിന്ന് മടങ്ങുമ്പോൾ ഈ ശബ്ദം കേൾക്കാറുണ്ടായിരുന്നെന്നും, ഈ തുരുമ്പെടുത്ത വണ്ടിയുമായി ഇവർ എപ്പോഴാണ് റിട്ടയർ ചെയ്യുക എന്ന് സഹപ്രവർത്തകർ പരിഹസിക്കാറുണ്ടായിരുന്നുവെന്നും അഭിഷേക് ഓർക്കുന്നു.

എന്നാൽ, വർഷങ്ങൾക്ക് ശേഷം ആ മാനേജർ തന്റെ 46 -ാം വയസ്സിൽ ജോലിയിൽ നിന്ന് വിരമിച്ചു എന്നറിഞ്ഞതോടെയാണ് അഭിഷേകിന്റെയും കൂട്ടുകാരുടെയും കാഴ്ചപ്പാട് മാറിയത്.

'ഞങ്ങൾ എല്ലാവരും അവരെ പിശുക്കിയെന്ന് വിളിച്ച് പരിഹസിക്കുമ്പോൾ, അവർ യഥാർത്ഥത്തിൽ അവരുടെ കുടുംബത്തിന്റെ ഭാവി സുരക്ഷിതമാക്കാൻ പണം സേവ് ചെയ്യുകയും നിക്ഷേപിക്കുകയുമായിരുന്നു. ആ തമാശയെല്ലാം ഒടുവിൽ ഞങ്ങൾക്ക് നേരെ തന്നെ തിരിഞ്ഞു' അഭിഷേക് കുറിച്ചു.

I had a female manager in my first company ( HITACHI )... I was 22 then

She always used to come in office in a grey Santro, probably 12+ year old and it has a weird suspension issue.

The car makes a weird woozing sound while picking up initially.

Around 5pm almost everyday, whenever we are in cafeteria and she leaves work we used to hear that sound and people used to laugh around saying " We dont know when will she retire this scrapeyard junk "

Just got to know that she retired at the age of 46

Looks like the joke was on all of us as she was saving and investing for her family's future.

While we all were calling her a miser.

Since then, personally I have decided never to judge anyone because of the car they drive as that's what the folks are choosing to show the outside world by choice.

I actually want one day for people to judge me too car is just 4 years old though ( 6 more years to go to hit 1L odo )

Btw just to reiterate, 45 is the new 60 if you are in IT start your financial planning ASAP

— Abhishek Singh (@ChaiAndMiles) October 3, 2026

ആരുടെയെങ്കിലും കൈവശമുള്ള വാഹനങ്ങൾ കണ്ടോ അവരുടെ ജീവിതശൈലി കണ്ടോ ആരെയും വിലയിരുത്തരുതെന്ന വലിയ പാഠമാണ് ഈ അനുഭവം തനിക്ക് നൽകിയതെന്ന് അഭിഷേക് കൂട്ടിച്ചേർത്തു.

നിരവധി പേരാണ് പോസ്റ്റിന് കമന്റുകൾ നൽകിയത്. 'ഞാൻ 16 വർഷമായി ഒരു കാർ ഉപയോഗിക്കുന്നു, ഇപ്പോൾ എന്റെ പ്രായം 50 ആണ്. സർവീസിന് കൊടുത്തപ്പോൾ അതിന് കംപ്രസ്സർ പ്രശ്നമുണ്ടെന്നാണ് അറിഞ്ഞത്' ഒരാൾ എഴുതി. 'അവർക്ക് അല്പംകൂടി നല്ലൊരു കാർ വാങ്ങി സന്തോഷത്തോടെ ജീവിച്ച് 48-ാം വയസ്സിലും റിട്ടയർ ചെയ്യാമായിരുന്നു' എന്നാണ് മറ്റൊരാൾ കുറിച്ചത്.

ചാറ്റ്‌ബോട്ടിനോടും 'സർ' വിളി; 77 -കാരന്‍റെ എഐ ചാറ്റ് വൈറൽ: "ഭാവിയിൽ എഐ ആക്രമണമുണ്ടായിൽ അദ്ദേഹത്തെ വെറുതെ വിടും!"

Web Desk — Thu, 01 Oct 2026 12:31:00 +0530

വിമാനയാത്രയ്ക്കിടയിൽ കണ്ടുമുട്ടിയ 77 വയസ്സുകാരനായ മുതിർന്ന പൗരന്‍റെ വിശേഷങ്ങൾ പങ്കുവെച്ച് സോഷ്യൽ മീഡിയയിൽ വൈറലാവുകയാണ് ഒരു ഐടി ജീവനക്കാരൻ. ചാറ്റ്ജിപിടിയോട് അദ്ദേഹം കാണിച്ച മാന്യതയും പെരുമാറ്റവുമാണ് ഇപ്പോൾ ഇന്‍റർനെറ്റിൽ വൻ തരംഗമായി മാറിയിരിക്കുന്നത്. @theteknosaur എന്ന എക്സ് അക്കൗണ്ടിലൂടെയാണ് ഈ രസകരമായ സംഭവം പുറത്തുവന്നത്.

'സാർ, ഓക്കെ സാർ, താങ്ക്യു സാർ...'

വിമാനത്തിൽ ഒപ്പമിരുന്ന 77 -കാരനായ യാത്രക്കാരൻ തന്‍റെ മൊബൈൽ ഫോണിൽ അതീവ ശ്രദ്ധയോടെ മുഴുകിയിരിക്കുന്നത് ഐടി ജീവനക്കാരന്‍റെ ശ്രദ്ധയിൽപ്പെട്ടു. 'വർട്ടിക്കൽ ഫാമിംഗ്' എന്ന നൂതന കാർഷിക രീതിയെക്കുറിച്ചുള്ള ബിസിനസ്സ് പ്ലാൻ തയ്യാറാക്കുകയായിരുന്നു അദ്ദേഹം. എന്നാൽ, ടെക് ജീവനക്കാരനെ അതിശയിപ്പിച്ചത് അദ്ദേഹത്തിന്‍റെ ബിസിനസ്സ് പ്ലാൻ മാത്രമല്ല, ചാറ്റ്‌ബോട്ടിനോട് അദ്ദേഹം സംസാരിച്ച രീതിയായിരുന്നു. എഐയോട് ലളിതമായ കമാൻഡുകൾ നൽകുന്നതിന് പകരം, മനുഷ്യരോടെന്ന പോലെ "വളരെ നല്ല മാർഗ്ഗ നിർദ്ദേശം സർ... നന്ദി സർ, രണ്ട് ഫയലുകളും ഡൗൺലോഡ് ചെയ്യട്ടെ സർ..." എന്നിങ്ങനെ അത്യധികം ബഹുമാനത്തോടെയാണ് അദ്ദേഹം മെസ്സേജുകൾ അയച്ചിരുന്നത്.

77 year old grandpa on my flight was cooking up a vertical farming business plan w/ ChatGPT until takeoff. and he calls the AI "sir" the respect!! we yapped the whole flight, now we're besties. this man is more locked in than all of us pic.twitter.com/upRjJhRr9f

— teknosaur (@theteknosaur) September 29, 2026

കുറിപ്പ് വൈറൽ

"എന്‍റെ വിമാനത്തിലുണ്ടായിരുന്ന 77 വയസ്സുള്ള മുത്തശ്ശൻ ടേക്ക് ഓഫ് വരെ ചാറ്റ്ജിപിടിയുടെ സഹായത്തോടെ ബിസിനസ്സ് പ്ലാൻ തയ്യാറാക്കുകയായിരുന്നു. എഐയെ അദ്ദേഹം വിളിക്കുന്നത് 'സർ' എന്നാണ്. എന്തൊരു ബഹുമാനം!! വിമാനയാത്രയിലുടനീളം ഞങ്ങൾ സംസാരിച്ചു, ഇപ്പോൾ ഞങ്ങൾ അടുത്ത സുഹൃത്തുക്കളാണ്," എന്ന് കുറിച്ച് കൊണ്ടാണ് യുവാവ് ഈ ദൃശ്യങ്ങൾ പങ്കുവെച്ചത്. 28 ലക്ഷത്തിലധികം ആളുകളാണ് സോഷ്യൽ മീഡിയയിൽ ഈ പോസ്റ്റ് കണ്ടത്. 25,000-ത്തിലധികം ആളുകൾ പോസ്റ്റ് ലൈക്ക് ചെയ്യുകയും ചെയ്തു. പുതിയ സാങ്കേതികവിദ്യകളെ കൗതുകത്തോടെ പഠിച്ചെടുക്കാനുള്ള അദ്ദേഹത്തിന്‍റെ മനസ്സിനെയും ബഹുമാനത്തോടെയുള്ള പെരുമാറ്റത്തെയും അഭിനന്ദിച്ച് നിരവധി ആളുകളാണ് കുറിപ്പെഴുതിയത്. "എഐയോട് മാന്യമായി സംസാരിക്കുന്നത് ഭാവിയിൽ എഐ ആക്രമണങ്ങളിൽ നിന്ന് രക്ഷപ്പെടാൻ സഹായിക്കും" എന്ന് ചിലർ തമാശ രൂപേണ കുറിച്ചപ്പോൾ, "നമ്മൾ എഐയോട് എങ്ങനെ പ്രതികരിക്കുന്നു എന്നതിനെ ആശ്രയിച്ചാണ് അത് തിരിച്ചും പ്രതികരിക്കുന്നത്" എന്ന് മറ്റു ചിലർ അഭിപ്രായപ്പെട്ടു.

ബെംഗളൂരുവിൽ രണ്ട് മുറി ഫ്ലാറ്റിന് മാസവാടക 70,000 രൂപ വാടക; 4 ലക്ഷം അഡ്വാൻസ്! സോഷ്യൽ മീഡിയയിൽ ചർച്ച

Web Desk — Fri, 02 Oct 2026 14:14:07 +0530

ഐ.ടി തലസ്ഥാനമായ ബെംഗളൂരുവിലെ വീട്ടുവാടക വിപണി എല്ലാ പരിധികളും ലംഘിക്കുന്നുവെന്ന് സമൂഹ മാധ്യമ ഉപയോക്താക്കളുടെ പരാതി. 2 ബിഎച്ച്കെ അപ്പാർട്ട്മെന്‍റിനായി പ്രതിമാസം 70,000 രൂപ വാടകയും 3 മുതൽ 4 ലക്ഷം രൂപ വരെ അഡ്വാൻസും ആവശ്യപ്പെട്ട ഭൂവുടമയുടെ നിലപാടിനെതിരെ സോഷ്യൽ മീഡിയയിൽ വ്യാപക അമർഷമാണ് ഉയരുന്നത്. ഫ്ലാറ്റ് അന്വേഷിച്ച് മടുത്ത ഒരു വാടകക്കാരൻ 'റെഡ്ഡിറ്റിൽ' പങ്കുവെച്ച കുറിപ്പാണ് ഇപ്പോൾ ഇന്‍റർനെറ്റിൽ ചൂടേറിയ ചർച്ചകൾക്ക് വഴിവെച്ചിരിക്കുന്നത്.

'ഫുള്ളി ഫർണിഷ്ഡ്' എന്ന് പരസ്യം; പക്ഷേ, ഉള്ളിൽ ഒന്നുമില്ല!

ഓഫീസിന് സമീപമുള്ള അപ്പാർട്ട്മെന്‍റായതിനാലും, മനോഹരമായ കാഴ്ചകളുള്ള ബാൽക്കണിയും ലിവിങ് റൂമും ഉള്ളതിനാലും ഉയർന്ന തുക നൽകാൻ താൻ തയ്യാറായിരുന്നുവെന്ന് യുവാവ് വ്യക്തമാക്കുന്നു. എന്നാൽ 'ഫുള്ളി ഫർണിഷ്ഡ്' എന്ന് അവകാശപ്പെട്ട ഫ്ലാറ്റിൽ ഒരു ബെഡും രണ്ട് സോഫകളും ചെറിയൊരു ടിവിയും മാത്രമാണുണ്ടായിരുന്നത്. ഫ്രിഡ്ജ്, വാഷിംഗ് മെഷീൻ, ഡൈനിംഗ് ടേബിൾ എന്നിവയൊന്നും ഉണ്ടായിരുന്നില്ലെന്ന് മാത്രമല്ല, രണ്ടാമത്തെ മുറിയിൽ കിടക്ക പോലുമുണ്ടായിരുന്നില്ല. "ഇതിനേക്കാൾ മികച്ച സൗകര്യങ്ങളുള്ള പി.ജികൾ (PG) നഗരത്തിലുണ്ട്" എന്ന് ഇദ്ദേഹം പറയുന്നു.

മെയിന്‍റനൻസ് അടക്കം മാസം 70,000 രൂപ വാടകയും 3 - 4 ലക്ഷം രൂപ അഡ്വാൻസും ആവശ്യപ്പെട്ട ഭൂവുടമ, എല്ലാ വർഷവും 7 - 8 ശതമാനം വാടക വർദ്ധിപ്പിക്കുമെന്നും വ്യവസ്ഥ വെച്ചു. തുടർന്ന് പ്രതിമാസം 65,000 രൂപ വാടകയും 3 മാസത്തെ അഡ്വാൻസും യുവാവ് വാഗ്ദാനം ചെയ്തെങ്കിലും ഉടമ നിരസിച്ചെന്നും കുറിപ്പിൽ പറയുന്നു.

Bangalore's rental market is getting ridiculous.by u/CapSteve4 in bangalorerentals

"2ബിഎച്ച് കെ ഫ്ലാറ്റിന് 70,000 രൂപ നൽകുമ്പോൾ കൊട്ടാരമൊന്നും പ്രതീക്ഷിക്കുന്നില്ല. എങ്കിലും നൽകുന്ന പണത്തിനൊത്ത മൂല്യവും സൗകര്യങ്ങളും ലഭിക്കണം. ഐ.ടി ശമ്പളം വറ്റാത്ത ഉറവയാണെന്ന് കരുതരുത്. നിസ്സാരമായി അധികം നൽകുന്ന തുക നിങ്ങളുടെ സാമ്പത്തിക ഭദ്രതയ്ക്കായി മാറ്റിവെക്കാവുന്നതാണ്." ഇതായിരുന്നു റെഡ്ഡിറ്റിൽ വാടകക്കാരൻ കുറിച്ച വാക്കുകൾ.

അതൊരു ജയിൽ ജീവിതം

റെഡ്ഡിറ്റിൽ ഈ പോസ്റ്റ് വൈറലായതോടെ നിരവധിയാളുകളാണ് ബെംഗളൂരുവിലെ അമിത വാടകയ്ക്കെതിരെ രംഗത്തെത്തിയത്. ബെംഗളൂരുവിൽ ആളുകൾ വിലപേശാൻ തയ്യാറാകാത്തതാണ് ഭൂവുടമകൾ തുക ഉയർത്താൻ കാരണമെന്ന് ചിലർ ചൂണ്ടിക്കാട്ടുന്നു. ഗതാഗതക്കുരുക്ക് കാരണം ഓഫീസിന് അടുത്ത പ്രദേശങ്ങളിൽ താമസിക്കാൻ ആളുകൾ നിർബന്ധിതരാവുകയാണെന്നും, ഇത് ഒരു ജയിൽ ജീവിതത്തിന് തുല്യമാണെന്നും മറ്റൊരാൾ അഭിപ്രായപ്പെട്ടു.

ബെംഗളൂരു സ്വദേശികൾ ഇത്തരം ഭീമമായ തുകകൾ നൽകില്ലെന്നും, ജോലി ആവശ്യങ്ങൾക്കായി മറ്റ് സംസ്ഥാനങ്ങളിൽ നിന്നെത്തുന്നവരെയാണ് ഉടമകൾ ചൂഷണം ചെയ്യുന്നതെന്നും ആരോപണങ്ങൾ ഉയർന്നു. വാടകക്കാരുടെ ഭാഗത്തുനിന്ന് ശക്തമായ പ്രതിരോധവും വിലപേശലും ഉണ്ടായാൽ മാത്രമേ ബെംഗളൂരുവിലെ ഈ അനിയന്ത്രിതമായ വാടകക്കയറ്റത്തിന് തടയിടാനാകൂവെന്നാണ് ഭൂരിഭാഗം ആളുകളുടെയും അഭിപ്രായം.

ശമ്പളം ഇപ്പോഴും 2006 -ലേത് തന്നെ, വാടകയോ 2046 -ലെത്തി; ബെംഗളൂരു യുവാവിന്റെ പോസ്റ്റ്

Web Desk — Mon, 05 Oct 2026 10:33:52 +0530

ബെംഗളൂരുവിലെ ഉയർന്ന വാടകയും സെക്യൂരിറ്റി ഡെപ്പോസിറ്റും നഗരവാസികൾക്ക് വലിയ തലവേദനയാവുകയാണ്. ഇതിനിടയിലാണ് നഗരത്തിലെ ശമ്പളവർധനവും കുതിച്ചുയരുന്ന വാടകയും തമ്മിലുള്ള അന്തരം ചൂണ്ടിക്കാണിച്ചുകൊണ്ട് ഒരു റെഡ്ഡിറ്റ് പോസ്റ്റ് സോഷ്യൽ മീഡിയയിൽ വൈറലായിരിക്കുന്നത്. 'ശമ്പളം 2006 -ൽ തീരുമാനിച്ച അതുപോലെ തന്നെയാണ്, എന്നാൽ ബെംഗളൂരുവിലെ വാടക 2046 കാലഘട്ടത്തിലേത് പോലെയും. ഈ ടൈം പാരാഡോക്സിൽ ആരെങ്കിലും കുടുങ്ങിയിട്ടുണ്ടോ' എന്ന ടൈറ്റിലോടെയാണ് റെഡ്ഡിറ്റിൽ കുറിപ്പ് പങ്കുവെച്ചിരിക്കുന്നത്.

ഇന്ദിരാനഗർ, ന്യൂ തിപ്പസാന്ദ്ര തുടങ്ങിയ മേഖലകളിലെ കോർപ്പറേറ്റ് ശമ്പളവും വാടക നിരക്കുകളും തമ്മിലുള്ള വലിയ അന്തരമാണ് ഈ പോസ്റ്റിൽ കാണുന്നത്. സ്വകാര്യമേഖലയിലെ ശമ്പളം 20 വർഷം മുമ്പുള്ളതുപോലെ മാറ്റമില്ലാതെ തുടരുമ്പോൾ, വീടുടമകൾ ഭാവിയിൽ വാങ്ങേണ്ടുന്നത്രയും വലിയ വാടകയാണ് ആവശ്യപ്പെടുന്നതെന്ന് യുവാവ് കുറിക്കുന്നു.

15 വർഷത്തിലേറെ പഴക്കമുള്ള, രണ്ടാമത്തെ നിലയിലുള്ള ഒരു ബെഡ്റൂം ഫ്ലാറ്റിന് (1BHK) 22,000 മുതൽ 24,000 രൂപ വരെയാണ് വാടക. ഇതിനുപുറമെ ഒന്നര ലക്ഷം രൂപ സെക്യൂരിറ്റി ഡെപ്പോസിറ്റും ആവശ്യപ്പെടുന്നു. നിശ്ചിത സമയത്തുമാത്രം ലഭിക്കുന്ന മുനിസിപ്പൽ വാട്ടർ സപ്ലൈയാണ് മറ്റൊരു പ്രധാന ബുദ്ധിമുട്ട്.

നിരവധിപ്പേരാണ് പോസ്റ്റിന് കമന്റ് നൽകിയത്. അടിസ്ഥാന സൗകര്യങ്ങൾ വികസിക്കുന്നില്ല, ശമ്പളം വേണ്ടുംവിധം കൂടുന്നില്ല. എങ്കിലും വാടകയും സെക്യൂരിറ്റി ഡെപ്പോസിറ്റും കുതിച്ചുയരുകയാണ് എന്ന് തന്നെയാണ് പലരും കമന്റ് നൽകിയിരിക്കുന്നത്. പല വീട്ടുടമകളും ബ്രോക്കർമാരും അടുക്കളയുടെ ഒരു കോണിലുള്ള ചെറിയ ഗ്രാനൈറ്റ് സ്ലാബിനെയാണ് '1BHK അല്ലെങ്കിൽ 1RK' എന്ന് വിളിക്കുന്നത്. വാടകയ്ക്ക് താമസിക്കാൻ ചെല്ലുമ്പോൾ ഫ്ലാറ്റ് പെയിന്റ് ചെയ്തു തരാറില്ലെങ്കിലും മാസം തോറും അതിനായി പണം ഈടാക്കും എന്നാണ് ഒരാൾ കുറിച്ചത്.

Salary is stuck in 2006, but Bengaluru rent is living in 2046. Anyone else trapped in this time paradox?by u/palkumbalkav in bangalorerentals

ബെംഗളൂരുവിലെ കമ്പനികളുമായി ചർച്ച നടത്തുമ്പോൾ നഗരത്തിൽ ജോലി ചെയ്യാൻ 20% അധിക ശമ്പളം വേണമെന്ന് ആവശ്യപ്പെടണമെന്നും, അല്ലെങ്കിൽ ടിയർ-2 നഗരങ്ങളിൽ നിന്ന് ജോലി ചെയ്യാനുള്ള അവസരം ചോദിക്കണമെന്നും ചിലർ അഭിപ്രായപ്പെട്ടു. പല വലിയ സ്ഥാപനങ്ങളും ഈ കാരണം കൊണ്ടുതന്നെ നാഗ്പൂർ, ഭുവനേശ്വർ, കോയമ്പത്തൂർ തുടങ്ങിയ സ്ഥലങ്ങളിലേക്ക് ഓഫീസുകൾ മാറ്റാൻ തുടങ്ങിയിട്ടുണ്ടെന്ന് മറ്റൊരാൾ ചൂണ്ടിക്കാണിച്ചു.

Asianet News Malayalam

"മാസം 1.3 ലക്ഷം രൂപ കിട്ടിയിട്ടും പണം എങ്ങോട്ട് പോകുന്നെന്ന് അറിയില്ല": വൈറലായി യുവാവിന്‍റെ റെഡ്ഡിറ്റ് പോസ്റ്റ്

യുവാവിന്‍റെ പ്രതിമാസ ബജറ്റ് കണക്കുകൾ ഇങ്ങനെ:

ഉപദേശങ്ങളുമായി നെറ്റിസെൺസ്

പ്രകോപിച്ച് 'ഉള്ളടക്കം' സൃഷ്ടിക്കൽ

മെട്രോയിൽ ഇനി 'തുപ്പൽ കോളാമ്പി'യും

രസകരമായ കുറിപ്പുകളുമായി നെറ്റിസെൺസ്

'മഴ പെയ്യുന്നു, ആരെങ്കിലും രക്ഷിക്കൂ'; ബെംഗളൂരുവിലെ രക്ഷാപ്രവർത്തനം, 70 ലക്ഷത്തിലേറെ പേർ കണ്ട വീഡിയോ

മഴ നനഞ്ഞ പാവകൾ

വീഡിയോ കണ്ടത് 70 ലക്ഷം പേർ

ഇന്ത്യന്‍ പ്രൊഫസർമാരെ അധിക്ഷേപിച്ച് അമേരിക്കക്കാരന്റെ പോസ്റ്റ്; ചുട്ട മറുപടി നൽകി സോഷ്യൽ മീഡിയ

കിടപ്പാടം പണയം വച്ചാലും കുഴപ്പമില്ല, എന്റെ ഇഷ്ടം നടക്കണം; ജെൻ സി കസിൻ മാതാപിതാക്കളോട് പറഞ്ഞത്; പോസ്റ്റ്

ഇന്ത്യൻ യുവതിയുടെ 127 മണിക്കൂർ നൃത്തത്തിന്റെ റെക്കോർഡ് തകർക്കാൻ നൈജീരിയൻ യുവാവ്

കൂടുതൽ പണം കൊടുക്കാതെ എയർ ഇന്ത്യയിൽ രണ്ട് തവണ സീറ്റ് അപ്ഗ്രേഡ്; ചെന്നൈക്കാരന്‍റെ ‘സിംപിൾ ഹാക്ക്’ വൈറൽ!

രണ്ട് തവണ സീറ്റ് അപ്ഗ്രേഡ് ചെയ്ത വഴി

'ഇത് സൗജന്യമല്ല, ചോദിച്ചിട്ടല്ലേയെന്ന്...'

അതിലായിരുന്നു അച്ഛന്റെ അവസാനത്തെ ചിത്രം, ഒരുപാട് വിഷമിച്ചു, ഡ്രൈവർക്ക് നന്ദി, ദുബായ് അനുഭവം

ഇന്ത്യയെ തോല്പിക്കാനാവില്ല അമേരിക്കൻ ഹോട്ടലുകളിലെ ബ്രേക്ക്ഫാസ്റ്റിന്; പോസ്റ്റുമായി സംരംഭകൻ

‘ഇത് അവസാന തെളിവാകാം…’; അഹമ്മദാബാദ് - മുംബൈ വിമാനത്തിൽ കൊടും ടർബുലൻസ്, കുറിപ്പുമായി ഇൻഫ്ലുവൻസർ

'ഇതൊരു അവസാന തെളിവ്'

വിമാനത്തിൽ നിന്ന് തന്നെ 'മറുപടി'

ഗ്യാനേഷ് കുമാറിന്‍റെ രാജി; ജന്തർമന്തറിൽ ശക്തമാകുന്ന പ്രതിഷേധം, അടിച്ചമർത്താൻ പോലീസ്

കോർണൽ കൂട്ടബലാത്സംഗക്കേസ്; ആരോപണവിധേയനായ മുൻ വിദ്യാർത്ഥിയെ ജോലിയിൽ നിന്ന് പിരിച്ചുവിട്ടു

മകന്‍റെ ഓൺലൈൻ ഗെയിം ആസക്തിയറിയാൻ തുടങ്ങി, 60 -ാം വയസിൽ അമ്മ ലോകപ്രശസ്ത ഗെയിമർ!

തുടക്കം, മകന്‍റെ ആസക്തിയുടെ കാരണം അറിയാൻ

ഇന്ന് ഗെയിമിങ്ങിലെ താരം

'ആസൂത്രണം ചെയ്ത തട്ടിപ്പ്'

പരിഹാരം കാണുമെന്ന്

നമുക്ക് പകരം വഴക്കിടാൻ വരെ ആളെ കിട്ടും; ചൈനയിൽ തരംഗമായി 'സ്റ്റാൻഡ്-ഇൻ ഇക്കോണമി'

പഴയ സാൻട്രോ കാറുള്ള മാനേജരെ പിശുക്കിയെന്ന് വിളിച്ച് കളിയാക്കി, എല്ലാവരേയും ഞെട്ടിച്ച് 46 -ാം വയസ്സിൽ വിരമിച്ചു

ചാറ്റ്‌ബോട്ടിനോടും 'സർ' വിളി; 77 -കാരന്‍റെ എഐ ചാറ്റ് വൈറൽ: "ഭാവിയിൽ എഐ ആക്രമണമുണ്ടായിൽ അദ്ദേഹത്തെ വെറുതെ വിടും!"

'സാർ, ഓക്കെ സാർ, താങ്ക്യു സാർ...'

കുറിപ്പ് വൈറൽ

ബെംഗളൂരുവിൽ രണ്ട് മുറി ഫ്ലാറ്റിന് മാസവാടക 70,000 രൂപ വാടക; 4 ലക്ഷം അഡ്വാൻസ്! സോഷ്യൽ മീഡിയയിൽ ചർച്ച

'ഫുള്ളി ഫർണിഷ്ഡ്' എന്ന് പരസ്യം; പക്ഷേ, ഉള്ളിൽ ഒന്നുമില്ല!

അതൊരു ജയിൽ ജീവിതം

ശമ്പളം ഇപ്പോഴും 2006 -ലേത് തന്നെ, വാടകയോ 2046 -ലെത്തി; ബെം​ഗളൂരു യുവാവിന്റെ പോസ്റ്റ്

ശമ്പളം ഇപ്പോഴും 2006 -ലേത് തന്നെ, വാടകയോ 2046 -ലെത്തി; ബെംഗളൂരു യുവാവിന്റെ പോസ്റ്റ്