Asianet News Malayalam

ചാറ്റ്ജിപിടി ഇനി മാറും; ജിപിടി-6ൽ ഒളിപ്പിച്ചതെന്ത്?

Prashobh Prasannan — Fri, 09 Oct 2026 14:01:29 +0530

ചാറ്റ്ജിപിടിയുടെ പ്രവർത്തനരീതിയിൽ വലിയ മാറ്റങ്ങളുമായി ഓപ്പൺഎഐയുടെ പുതിയ എഐ മോഡലായ ജിപിടി-6 ആഗോളതലത്തിൽ അവതരിപ്പിച്ചു. മറുപടികൾ ഗ്രാഫുകൾ, ചാർട്ടുകൾ, ഫോമുകൾ, ബട്ടണുകൾ തുടങ്ങിയ ഇന്ററാക്ടീവ് ഘടകങ്ങളിലൂടെ അവതരിപ്പിക്കാൻ കഴിയുന്ന ഇന്റലിജന്റ് യുഐ സംവിധാനമാണ് പുതിയ പതിപ്പിന്റെ പ്രധാന സവിശേഷത. സംഭാഷണത്തിനിടെ തന്നെ കാൽക്കുലേറ്ററുകൾ, ഗെയിമുകൾ, ബിൽ വിഭജിക്കാനുള്ള ഉപകരണങ്ങൾ എന്നിവ സൃഷ്ടിക്കാനും ഇതിലൂടെ സാധിക്കും. മറുപടികൾ വേഗത്തിൽ ലഭ്യമാക്കുന്നതിനുള്ള മാറ്റങ്ങളും പുതിയ പതിപ്പിൽ ഉൾപ്പെടുത്തിയിട്ടുണ്ട്.

പണമടച്ചുള്ള ഉപയോക്താക്കൾക്ക് ആദ്യം ലഭിക്കും

ചാറ്റ്ജിപിടി പ്ലസ്, പ്രോ, ബിസിനസ്, എന്റർപ്രൈസ് ഉപയോക്താക്കൾക്കായി ജിപിടി-6 ഇന്റലിജന്റ് യുഐയുടെ വിതരണം ആരംഭിച്ചതായി ഓപ്പൺഎഐ അറിയിച്ചു. ഫ്രീ, ഗോ പ്ലാനുകളിലുള്ള ഉപയോക്താക്കൾക്ക് ഒക്ടോബർ 8 മുതൽ പുതിയ സംവിധാനം ലഭ്യമാക്കിത്തുടങ്ങും. പണമടച്ചുള്ള പ്ലാനുകളിൽ ജിപിടി-6 സോൾ മോഡലും ഫ്രീ, ഗോ പ്ലാനുകളിൽ ജിപിടി-6 ലൂണ മോഡലുമാണ് പ്രവർത്തിക്കുക. എന്റർപ്രൈസ് ഉപയോക്താക്കൾക്ക് പുതിയ ഫീച്ചറുകൾ ലഭിക്കാൻ സ്ഥാപനത്തിന്റെ വർക്ക്‌സ്‌പേസ് അഡ്മിനിസ്ട്രേറ്റർ സംവിധാനം പ്രവർത്തനക്ഷമമാക്കേണ്ടിവന്നേക്കാം. ചാറ്റ്ജിപിടിയിലെ ചാറ്റ് ടാബിലാണ് പുതിയ മാറ്റങ്ങൾ നടപ്പാക്കുന്നത്. വർക്ക്, കോഡെക്സ് വിഭാഗങ്ങളിൽ ഉപയോഗിക്കുന്ന മോഡലുകളിൽ മാറ്റമുണ്ടാകില്ലെന്നും കമ്പനി വ്യക്തമാക്കി.

ചാർട്ടുകളും ഗെയിമുകളും ഇനി ചാറ്റിനുള്ളിൽ

വെറും ടെക്സ്റ്റ് മറുപടികൾക്കപ്പുറം വിവരങ്ങൾ കൂടുതൽ എളുപ്പത്തിൽ മനസ്സിലാക്കാനും ഉപയോഗിക്കാനും സഹായിക്കുന്ന രീതിയിലാണ് പുതിയ സംവിധാനം പ്രവർത്തിക്കുക. പാചകക്കുറിപ്പിനൊപ്പം പാചകസമയക്രമം നൽകുക, യാത്രാമാർഗത്തിലെ പ്രധാന സ്ഥലങ്ങൾ മാപ്പിൽ അടയാളപ്പെടുത്തുക, വിവിധ വിവരങ്ങൾ മാറ്റി ഒരു വിഷയത്തെക്കുറിച്ച് കൂടുതൽ മനസ്സിലാക്കാൻ അവസരം നൽകുക തുടങ്ങിയവ ഇതിന്റെ സാധ്യതകളാണ്. കാൽക്കുലേറ്ററുകൾ, ബിൽ വിഭജിക്കാനുള്ള ഉപകരണങ്ങൾ, ഗെയിമുകൾ എന്നിവ സംഭാഷണത്തിനിടെ തന്നെ സൃഷ്ടിക്കാനാകും. ഇതിനായി മറ്റൊരു ആപ്ലിക്കേഷനിലേക്ക് മാറേണ്ടതില്ലെന്നതും ശ്രദ്ധേയമാണ്. ഒരു ചോദ്യത്തിന് ദൃശ്യരൂപത്തിലുള്ള മറുപടിയാണോ അതോ ലളിതമായ ടെക്സ്റ്റ് മറുപടിയാണോ അനുയോജ്യമെന്ന് തീരുമാനിക്കാനും ജിപിടി-6ന് കഴിയും.

മറുപടികൾക്ക് കൂടുതൽ വേഗം

ചോദ്യത്തിനുള്ള മറുപടി പൂർണമായി തയ്യാറാകുന്നതിന് മുമ്പുതന്നെ പ്രതികരിച്ചുതുടങ്ങാൻ ജിപിടി-6ന് സാധിക്കും. മോഡൽ തുടർന്നുള്ള വിവരങ്ങൾ തയ്യാറാക്കുമ്പോൾ തന്നെ ഉപയോക്താവിന് മറുപടിയുടെ ആദ്യഭാഗം വായിക്കാനാകും. ഇതിലൂടെ കാത്തിരിപ്പ് സമയം കുറയ്ക്കുകയാണ് ലക്ഷ്യം. വെബ് തിരച്ചിൽ അടിസ്ഥാനമാക്കിയുള്ള ചോദ്യങ്ങളിൽ ജിപിടി-6 ഇൻസ്റ്റന്റ്, ജിപിടി-5.6 ഇൻസ്റ്റന്റിനെക്കാൾ 44 ശതമാനം വേഗത്തിൽ പ്രതികരിച്ചുതുടങ്ങിയതായി പരീക്ഷണഫലങ്ങൾ ചൂണ്ടിക്കാട്ടി ഓപ്പൺഎഐ അറിയിച്ചു.

സുരക്ഷാ സംവിധാനങ്ങളും മെച്ചപ്പെടുത്തി

സുരക്ഷാ നിയന്ത്രണങ്ങളെ മറികടക്കാനുള്ള ശ്രമങ്ങൾ തിരിച്ചറിയുന്നതിലും, ഒന്നിലധികം സന്ദേശങ്ങളിലൂടെ നടക്കുന്ന ഇത്തരം ശ്രമങ്ങൾ കൈകാര്യം ചെയ്യുന്നതിലും പുതിയ മോഡൽ മെച്ചപ്പെട്ടിട്ടുണ്ട്. സൈബർ ആക്രമണങ്ങൾ, ജൈവ ഭീഷണികൾ, അക്രമം എന്നിവയുമായി ബന്ധപ്പെട്ട ഉയർന്ന അപകടസാധ്യതയുള്ള ദുരുപയോഗങ്ങൾ തടയുന്നതിനുള്ള അധിക സുരക്ഷാ സംവിധാനങ്ങളും ഉൾപ്പെടുത്തിയിട്ടുണ്ട്.

ആവശ്യമായ വിവരങ്ങളോ ഉപകരണങ്ങളോ ലഭ്യമല്ലാത്ത സാഹചര്യങ്ങൾ തിരിച്ചറിയാനും മറുപടി നൽകുന്നതിലെ പരിമിതികൾ വ്യക്തമാക്കാനും ജിപിടി-6 കൂടുതൽ പ്രാപ്തമാണെന്നും ഓപ്പൺഎഐ അറിയിച്ചു. പുതിയ ഇന്റലിജന്റ് യുഐ സംവിധാനത്തിലൂടെ ചാറ്റ്ജിപിടിയെ കൂടുതൽ പ്രായോഗികവും സംവേദനാത്മകവുമായ ഡിജിറ്റൽ സഹായിയാക്കി മാറ്റുകയാണ് കമ്പനി ലക്ഷ്യമിടുന്നത്.

സ്റ്റാർലിങ്കിനെ വിശ്വസിക്കാനാകില്ലേ? ഇന്ത്യയ്ക്ക് മുന്നറിയിപ്പുമായി സോഹോ സ്ഥാപകൻ ശ്രീധർ വെമ്പു

Prashobh Prasannan — Wed, 14 Oct 2026 10:44:18 +0530

ഇലോൺ മസ്‌കിന്റെ ഉടമസ്ഥതയിലുള്ള സ്റ്റാർലിങ്ക് ഉൾപ്പെടെയുള്ള വിദേശ സാങ്കേതികവിദ്യകളെ അമിതമായി ആശ്രയിക്കുന്നത് ഇന്ത്യയ്ക്ക് ഗുണകരമാകില്ലെന്ന് സോഹോ സ്ഥാപകൻ ശ്രീധർ വെമ്പു. സ്വന്തം സാങ്കേതികവിദ്യയും ആശയവിനിമയ സംവിധാനങ്ങളും ഇന്ത്യ വികസിപ്പിക്കേണ്ടതിന്റെ ആവശ്യകതയാണ് അദ്ദേഹം വീണ്ടും ചൂണ്ടിക്കാട്ടിയത്. ഉക്രെയ്‌നിലെ സ്റ്റാർലിങ്ക് ഇന്റർനെറ്റ് സേവനം നിയന്ത്രിക്കാൻ അമേരിക്ക ആലോചിക്കുന്നുവെന്ന സ്ഥിരീകരിക്കാത്ത റിപ്പോർട്ടിനോടുള്ള പ്രതികരണമായാണ് വെമ്പുവിന്റെ പരാമർശം.

'നമുക്ക് മറ്റ് വഴികളില്ല, സ്വന്തം സാങ്കേതികവിദ്യ വികസിപ്പിക്കണം'

യുക്രെയ്‌നിൽ സ്റ്റാർലിങ്ക് സേവനത്തിന് നിയന്ത്രണം ഏർപ്പെടുത്താൻ അമേരിക്ക ആലോചിക്കുന്നുവെന്ന അവകാശവാദവുമായി ബ്രിക്‌സ് ന്യൂസ് പങ്കുവച്ച പോസ്റ്റിനോടാണ് വെമ്പു പ്രതികരിച്ചത്. 'ഇക്കാരണത്താൽ അവരുടെ സാങ്കേതികവിദ്യയെ നമുക്ക് വിശ്വസിക്കാനാവില്ല. സ്വന്തം സാങ്കേതികവിദ്യ വികസിപ്പിക്കുകയല്ലാതെ നമുക്ക് മറ്റ് വഴികളില്ല', എന്നാണ് വെമ്പു എക്‌സിൽ കുറിച്ചത്.

അതേസമയം, യുക്രെയ്‌നിലെ സ്റ്റാർലിങ്ക് സേവനം തടയാൻ അമേരിക്ക നിലവിൽ പദ്ധതിയിടുന്നുവെന്നതിന് ഔദ്യോഗിക സ്ഥിരീകരണമില്ല. 2025-ൽ നടന്ന ചർച്ചകളുമായി ബന്ധപ്പെട്ട് ഇത്തരമൊരു സാധ്യത ഉയർന്നുവന്നതായി നേരത്തേ റിപ്പോർട്ടുകളുണ്ടായിരുന്നുവെങ്കിലും പുതിയ അവകാശവാദം സ്ഥിരീകരിക്കപ്പെട്ടിട്ടില്ല.

സ്വന്തം ഉപഗ്രഹ ശൃംഖല വികസിപ്പിക്കാൻ ജിയോ

വിദേശ കമ്പനികളുടെ സാങ്കേതികവിദ്യയെ ആശ്രയിക്കാതെ ഇന്ത്യയ്ക്ക് സ്വന്തമായി ആശയവിനിമയ സംവിധാനങ്ങൾ വികസിപ്പിക്കണമെന്ന ചർച്ചകൾക്കിടെയാണ് റിലയൻസ് ജിയോയുടെ ഉപഗ്രഹ ഇന്റർനെറ്റ് പദ്ധതി ശ്രദ്ധ നേടുന്നത്. ഏകദേശം 1,600 താഴ്ന്ന ഭ്രമണപഥ ഉപഗ്രഹങ്ങളും 23 ഭൂതല കേന്ദ്രങ്ങളും ഉൾപ്പെടുന്ന ശൃംഖലയാണ് ജിയോ വിഭാവനം ചെയ്യുന്നത്.

ന്യൂഡൽഹിയിൽ നടന്ന ഇന്ത്യ മൊബൈൽ കോൺഗ്രസ് 2026-ൽ 'സോവറിൻ സാറ്റലൈറ്റ് കണക്ടിവിറ്റി' എന്ന പേരിലാണ് കമ്പനി പദ്ധതി അവതരിപ്പിച്ചത്. നിലവിലുള്ള മൊബൈൽ, ഫൈബർ ശൃംഖലകളുമായി ഉപഗ്രഹ ആശയവിനിമയം സംയോജിപ്പിക്കുകയാണ് ലക്ഷ്യം. വിദൂര ഗ്രാമങ്ങൾ, ദ്വീപുകൾ, അതിർത്തി പ്രദേശങ്ങൾ തുടങ്ങിയ ഇടങ്ങളിൽ ഇന്റർനെറ്റ് ലഭ്യത മെച്ചപ്പെടുത്താൻ പദ്ധതി സഹായിക്കുമെന്നാണ് പ്രതീക്ഷ. 6 ലക്ഷത്തിലധികം ഗ്രാമങ്ങളിലേക്ക് കണക്ടിവിറ്റി എത്തിക്കുന്നതിനൊപ്പം വ്യവസായം, വ്യോമഗതാഗതം, സമുദ്രഗതാഗതം, സർക്കാർ സേവനങ്ങൾ, പ്രതിരോധം, ദുരന്തനിവാരണം തുടങ്ങിയ മേഖലകൾക്കും സേവനം നൽകാനാണ് ലക്ഷ്യമിടുന്നത്. ഗ്രാമപ്രദേശങ്ങളിൽ നേരിട്ട് ഉപകരണങ്ങളിലേക്ക് ഉപഗ്രഹം വഴി വിളിക്കാനുള്ള സൗകര്യവും ജിയോ പരിഗണിക്കുന്നുണ്ട്.

എന്നാൽ പദ്ധതി ഇപ്പോഴും നിർദേശത്തിന്റെ ഘട്ടത്തിലാണ്. ഇന്ത്യയിൽ വാണിജ്യാടിസ്ഥാനത്തിൽ പ്രവർത്തനം ആരംഭിക്കുന്നതിനായി സ്റ്റാർലിങ്കിനും സുരക്ഷാ പരിശോധനകളും സ്പെക്ട്രം അനുവദിക്കലും ഉൾപ്പെടെയുള്ള നടപടികൾ പൂർത്തിയാക്കേണ്ടതുണ്ട്.

മസ്‌കിന്റെ വിമർശനത്തിന് മറുപടിയുമായി വെമ്പു

ഇന്ത്യൻ വിപണിയിലേക്കുള്ള സ്റ്റാർലിങ്കിന്റെ പ്രവേശനത്തെക്കുറിച്ച് ഇലോൺ മസ്‌ക് നടത്തിയ പരാമർശങ്ങളെയും വെമ്പു നേരത്തേ വിമർശിച്ചിരുന്നു. സ്റ്റാർലിങ്കിന്റെ ഇന്ത്യയിലെ പ്രവേശനം വൈകുന്നതിനെക്കുറിച്ച് പ്രതികരിക്കവെ പ്രധാനമന്ത്രി നരേന്ദ്ര മോദിയെ പരിഹാസരൂപത്തിൽ 'അംബാനി' എന്ന് വിശേഷിപ്പിച്ച മസ്‌ക്, റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയുടെ താൽപര്യങ്ങൾ സംരക്ഷിക്കാനാണ് സർക്കാർ ശ്രമിക്കുന്നതെന്ന് ആരോപിച്ചിരുന്നു. ഇന്ത്യയിലെ പിന്നാക്ക മേഖലകളിൽ ഇന്റർനെറ്റ് ലഭ്യമാക്കാനും കുട്ടികൾക്ക് വിദ്യാഭ്യാസ സൗകര്യങ്ങൾ മെച്ചപ്പെടുത്താനും ചെറുകിട സംരംഭങ്ങൾക്ക് ആഗോള വിപണിയിലെത്താനും സ്റ്റാർലിങ്കിന് കഴിയുമെന്നായിരുന്നു മസ്‌കിന്റെ വാദം. എന്നാൽ വൻകിട വ്യവസായ താൽപര്യങ്ങൾ മത്സരത്തെ തടയാൻ ശ്രമിക്കുന്നുവെന്നും അദ്ദേഹം ആരോപിച്ചിരുന്നു.

ഇതിന് മറുപടിയായി ഇന്ത്യയിൽ കുറഞ്ഞ നിരക്കിൽ ഇന്റർനെറ്റ് ലഭ്യമാകുന്നത് ആഭ്യന്തര മത്സരത്തിന്റെ നേട്ടമാണെന്ന് വെമ്പു ചൂണ്ടിക്കാട്ടി. ജിയോയുടെ വരവോടെ ഡാറ്റ നിരക്കുകൾ കുറഞ്ഞതും സാധാരണക്കാർക്ക് ഡിജിറ്റൽ സേവനങ്ങൾ കൂടുതൽ പ്രാപ്യമാക്കിയതും അദ്ദേഹം ഉദാഹരണമായി അവതരിപ്പിച്ചു. കുറഞ്ഞ ചെലവിലുള്ള മരുന്നുകളും യുപിഐ പണമിടപാട് സംവിധാനവും ഇന്ത്യയുടെ നേട്ടങ്ങളാണെന്നും അദ്ദേഹം അഭിപ്രായപ്പെട്ടു.

നരേന്ദ്ര മോദി സർക്കാർ മത്സരത്തിനും സ്റ്റാർട്ടപ്പുകൾക്കും പിന്തുണ നൽകിയിട്ടുണ്ടെന്നും കുറഞ്ഞ ചെലവിൽ റോക്കറ്റുകൾ വികസിപ്പിക്കുന്ന ഇന്ത്യൻ കമ്പനികൾക്ക് ഭാവിയിൽ സ്പേസ് എക്‌സിന് വെല്ലുവിളിയാകാൻ കഴിയുമെന്നും വെമ്പു നേരത്തേ പറഞ്ഞിരുന്നു. ഏറ്റവും പുതിയ കുറിപ്പിൽ ജിയോയുടെയോ അംബാനിയുടെയോ പേര് വെമ്പു നേരിട്ട് പരാമർശിച്ചിട്ടില്ല. എങ്കിലും ജിയോ ഉപഗ്രഹ ഇന്റർനെറ്റ് പദ്ധതിയുമായി മുന്നോട്ടുപോകുകയും സ്റ്റാർലിങ്ക് ഇന്ത്യൻ വിപണിയിലേക്ക് പ്രവേശിക്കാൻ ശ്രമിക്കുകയും ചെയ്യുന്ന സാഹചര്യത്തിൽ, ഇന്ത്യയുടെ സാങ്കേതിക സ്വയംപര്യാപ്‍തതയെക്കുറിച്ചുള്ള ചർച്ചകൾക്ക് വെമ്പുവിന്റെ പ്രതികരണം വീണ്ടും പ്രാധാന്യം നൽകുകയാണ്.

സ്റ്റാർലിങ്കിനെ ഇന്ത്യ തടയുന്നുവോ? ഇലോൺ മസ്‌കിന്‍റെ ആരോപണത്തിന് കേന്ദ്രത്തിന്‍റെ മറുപടി

Prashobh Prasannan — Mon, 12 Oct 2026 13:32:26 +0530

ഇന്ത്യയിൽ സ്റ്റാർലിങ്കിന്റെ പ്രവർത്തനാനുമതി വൈകുന്നതുമായി ബന്ധപ്പെട്ട് ഇലോൺ മസ്‌ക് ഉന്നയിച്ച ആരോപണങ്ങൾക്ക് മറുപടിയുമായി കേന്ദ്ര സർക്കാർ. ഉപഗ്രഹ ഇന്റർനെറ്റ് സേവനങ്ങൾക്കായുള്ള ഇന്ത്യയുടെ നിയന്ത്രണ ചട്ടക്കൂട് നീതിയുക്തവും വിവേചനരഹിതവുമാണെന്ന് വാർത്താവിനിമയ മന്ത്രാലയം വ്യക്തമാക്കി. ചട്ടങ്ങൾ അന്യായമായോ വിവേചനപരമായോ നടപ്പാക്കുന്നുവെന്ന ആരോപണം അടിസ്ഥാനരഹിതവും തെറ്റിദ്ധാരണാജനകവുമാണെന്നും മന്ത്രാലയം അറിയിച്ചു. പ്രസ് ഇൻഫർമേഷൻ ബ്യൂറോ വഴി പുറത്തിറക്കിയ വാർത്താക്കുറിപ്പിലാണ് മന്ത്രാലയം നിലപാട് വ്യക്തമാക്കിയത്. ഇലോൺ മസ്‌കിന്റെ പേര് നേരിട്ട് പരാമർശിച്ചിട്ടില്ലെങ്കിലും സമൂഹമാധ്യമമായ എക്സിലൂടെ അദ്ദേഹം ആരോപണം ഉന്നയിച്ചതിന് പിന്നാലെയാണ് കേന്ദ്ര സർക്കാരിന്റെ പ്രതികരണം.

സ്റ്റാർലിങ്കിനെ തടയുന്നത് കുത്തകകൾ; മസ്‌കിന്റെ ആരോപണം

ബുധനാഴ്ച രാത്രിയാണ് ഇന്ത്യയിൽ സ്റ്റാർലിങ്കിന്റെ പ്രവർത്തനം തടയാൻ ചില കുത്തകശക്തികൾ ശ്രമിക്കുന്നതായി ഇലോൺ മസ്‌ക് ആരോപിച്ചത്. ഇന്ത്യൻ ജനതയുടെ മേലുള്ള കുത്തക നിയന്ത്രണം നിലനിർത്താനാണ് ചിലർ സ്റ്റാർലിങ്കിനെ തടയുന്നതെന്നായിരുന്നു അദ്ദേഹത്തിന്റെ പ്രതികരണം. ആരാണ് ഇതിന് പിന്നിലെന്ന് ഊഹിക്കാമെന്നും മസ്‌ക് എക്സിൽ കുറിച്ചു. ഇന്ത്യയിലെ ഉപഗ്രഹ ആശയവിനിമയ സേവനങ്ങൾക്കായുള്ള നിയന്ത്രണ ചട്ടക്കൂട് വിവേചനപരമായി നടപ്പാക്കുന്നുവെന്ന തരത്തിൽ സമൂഹമാധ്യമങ്ങളിൽ പ്രചാരണം നടക്കുന്നുണ്ടെന്ന് ചൂണ്ടിക്കാട്ടിയാണ് കേന്ദ്ര വാർത്താവിനിമയ മന്ത്രാലയം വിശദീകരണം നൽകിയത്.

മൂന്ന് ഉപഗ്രഹ സേവനങ്ങൾക്ക് ടെലികോം ലൈസൻസ്

ഉപഗ്രഹ ആശയവിനിമയ സേവനങ്ങൾ ഉൾപ്പെടെയുള്ള ടെലികോം സേവനങ്ങൾക്ക് നീതിയുക്തവും വിവേചനരഹിതവുമായ അനുമതി ചട്ടക്കൂടാണ് കേന്ദ്ര സർക്കാർ നടപ്പാക്കിയിരിക്കുന്നതെന്ന് മന്ത്രാലയം വ്യക്തമാക്കി. നോൺ-ജിയോസ്റ്റേഷനറി ഉപഗ്രഹ ഭ്രമണപഥങ്ങളെ അടിസ്ഥാനമാക്കിയുള്ള ഗ്ലോബൽ മൊബൈൽ പേഴ്സണൽ കമ്മ്യൂണിക്കേഷൻ ബൈ സാറ്റലൈറ്റ് സേവനങ്ങൾക്കായി മൂന്ന് സ്ഥാപനങ്ങൾക്ക് ടെലികോം ലൈസൻസ് നൽകിയിട്ടുണ്ടെന്നും വാർത്താക്കുറിപ്പിൽ പറയുന്നു. സ്റ്റാർലിങ്കിന് പുറമെ റിലയൻസ് ജിയോയും ഭാരതി എയർടെല്ലിന്റെ പിന്തുണയുള്ള വൺവെബും ഈ മൂന്ന് സേവനങ്ങളിൽ ഉൾപ്പെടുന്നതായാണ് മുൻ റിപ്പോർട്ടുകൾ വ്യക്തമാക്കുന്നത്.

സുരക്ഷാ അനുമതി ഇനിയും ലഭിച്ചിട്ടില്ല

ലൈസൻസ് ലഭിച്ച എല്ലാ സ്ഥാപനങ്ങളും സുരക്ഷാ നിബന്ധനകൾ പാലിക്കുന്നുണ്ടെന്ന് തെളിയിക്കേണ്ടതുണ്ടെന്ന് മന്ത്രാലയം അറിയിച്ചു. മൂന്ന് സ്ഥാപനങ്ങളുടെയും സുരക്ഷാ പരിശോധന നിലവിൽ പുരോഗമിക്കുകയാണ്. പരിശോധന പൂർത്തിയാകുന്ന മുറയ്ക്ക് ബന്ധപ്പെട്ട സ്ഥാപനങ്ങൾക്ക് സ്പെക്ട്രം അനുവദിക്കുന്നതിനുള്ള അടുത്ത ഘട്ടത്തിലേക്ക് കടക്കാമെന്നും മന്ത്രാലയം വ്യക്തമാക്കി. നിലവിൽ മൂന്ന് സ്ഥാപനങ്ങളും ഏതാണ്ട് ഒരേ നിയന്ത്രണ നടപടിക്രമത്തിന്റെ ഘട്ടത്തിലാണെന്നും വാർത്താക്കുറിപ്പിൽ പറയുന്നു. അതിനാൽ സ്റ്റാർലിങ്കിനെ മാത്രം ലക്ഷ്യമിട്ട് അനുമതി വൈകിപ്പിക്കുന്നുവെന്ന ആരോപണത്തെ പിന്തുണയ്ക്കുന്ന വിവരങ്ങളൊന്നും മന്ത്രാലയം പുറത്തുവിട്ടിട്ടില്ല.

ഇന്ത്യയ്ക്കായി പ്രത്യേക സുരക്ഷാ സംവിധാനങ്ങളെന്ന് സ്റ്റാർലിങ്ക്

ഇന്ത്യൻ മൊബൈൽ കോൺഗ്രസിനിടെ സ്റ്റാർലിങ്കിന്റെ ഇന്ത്യയിലെ പ്രവർത്തനപദ്ധതികളെക്കുറിച്ച് കമ്പനിയുടെ വൈസ് പ്രസിഡന്റ് ലോറൻ ഡ്രെയർ വിശദീകരിച്ചിരുന്നു. ഇന്ത്യയിലെ സുരക്ഷാ ആവശ്യകതകൾക്കും മറ്റ് നിയന്ത്രണങ്ങൾക്കും അനുസൃതമായി പ്രത്യേക സംവിധാനങ്ങൾ തയ്യാറാക്കിയിട്ടുണ്ടെന്നാണ് അവർ പറഞ്ഞത്. ഇന്ത്യയ്ക്കായി ഓരോ തലത്തിലും സുരക്ഷാ നിയന്ത്രണങ്ങൾ ഏർപ്പെടുത്തിയിട്ടുണ്ടെന്നും ഇന്ത്യൻ ഉപയോക്താക്കളുടെ വിവരങ്ങൾ രാജ്യത്തിനുള്ളിൽ തന്നെ സൂക്ഷിക്കുമെന്നും ലോറൻ ഡ്രെയർ വ്യക്തമാക്കി. എഎൻഐയാണ് ഇക്കാര്യം റിപ്പോർട്ട് ചെയ്തത്. എന്നാൽ, സുരക്ഷാ പരിശോധന പൂർത്തിയാകുകയും സ്പെക്ട്രം അനുവദിക്കുന്ന നടപടികൾ മുന്നോട്ടുപോകുകയും ചെയ്ത ശേഷമേ സ്റ്റാർലിങ്കിന് ഇന്ത്യയിൽ വാണിജ്യാടിസ്ഥാനത്തിൽ സേവനം ആരംഭിക്കാനാകൂ.

നോ കോംപ്രമൈസ്! അനുയോജ്യരായ പങ്കാളിയെ കണ്ടെത്താൻ കോടികൾ ചെലവിട്ട് ടെക് പ്രൊഫഷണലുകൾ

Sangeetha KS — Wed, 21 Oct 2026 16:41:57 +0530

എഐ സാങ്കേതികവിദ്യയുടെ കുതിച്ചുചാട്ടം സിലിക്കൺ വാലിയിൽ പുതിയ കോടീശ്വരന്മാരെ സൃഷ്‍ടിക്കുമ്പോൾ, ജീവിതപങ്കാളിയെ കണ്ടെത്താനും വൻതുക ചെലവഴിക്കാൻ തയ്യാറായി സമ്പന്നരായ ടെക് പ്രൊഫഷണലുകൾ. അനുയോജ്യമായ പങ്കാളിയെ കണ്ടെത്താൻ ലക്ഷങ്ങളും കോടികളും ചെലവഴിക്കുന്നവരുടെ എണ്ണം വർധിക്കുകയാണെന്നാണ് റിപ്പോർട്ടുകൾ. അമേരിക്കയിലെ കാലിഫോർണിയ ആസ്ഥാനമായി പ്രവർത്തിക്കുന്ന ലിങ്ക്സ് ഡേറ്റിങ് എന്ന സ്ഥാപനത്തിന്റെ സ്ഥാപക ആമി ആൻഡേഴ്സണാണ് ഈ രംഗത്ത് ശ്രദ്ധ നേടുന്നത്. ഇവരുടെ ഏറ്റവും ചെലവേറിയ സേവനത്തിന് അഞ്ചുകോടി രൂപയോളം ചെലവുവരും എന്നാണ് റിപ്പോർട്ടുകൾ. ബ്ലൂംബെർഗിനെ ഉദ്ദരിച്ച് ഇന്ത്യാ ടുഡെ ടെക്ക് ആണ് ഇക്കാര്യം റിപ്പോർട്ട് ചെയ്തത്.

പങ്കാളിയെ കണ്ടെത്താൻ 4.7 കോടി രൂപയുടെ പാക്കേജ്

കഴിഞ്ഞ 23 വർഷമായി ആളുകൾക്ക് അനുയോജ്യമായ ജീവിതപങ്കാളികളെ കണ്ടെത്താൻ സഹായിക്കുന്നയാളാണ് ആമി ആൻഡേഴ്സൺ. എന്നാൽ അടുത്ത കാലത്തായി ബിസിനസിൽ വലിയ വളർച്ചയുണ്ടായതായി അവർ പറയുന്നു. ആന്ത്രോപിക്, പെർപ്ലെക്സിറ്റി തുടങ്ങിയ എഐ കമ്പനികളിലെ ജീവനക്കാരും സാങ്കേതികവിദ്യാ കുതിപ്പിലൂടെ സമ്പന്നരായ മറ്റു പ്രൊഫഷണലുകളുമാണ് പ്രധാന ഉപഭോക്താക്കൾ.

ലിങ്ക്സ് ഡേറ്റിങ്ങിന്റെ സേവനങ്ങൾക്ക് തുടക്കത്തിൽ 75,000 ഡോളർ, അതായത് ഏകദേശം 71 ലക്ഷം രൂപയാണ് ചെലവ്. വിഐപി പാക്കേജുകളുടെ നിരക്ക് അഞ്ച് ലക്ഷം ഡോളറിൽ അധികമാണ്. ഇന്ത്യൻ രൂപയിൽ ഏകദേശം 4.7 കോടി രൂപയോളം വരുമിത്. സേവനത്തിന്റെ കാലാവധി, പങ്കാളിയെ കണ്ടെത്താനുള്ള ബുദ്ധിമുട്ട്, എത്ര പേരെ പരിചയപ്പെടുത്തണം തുടങ്ങിയ ഘടകങ്ങൾ അനുസരിച്ചാണ് നിരക്ക് നിശ്ചയിക്കുന്നത്. ചില വിഐപി ഉപഭോക്താക്കൾ അനുയോജ്യമായ ബന്ധം ആരംഭിക്കുമ്പോഴും വിവാഹനിശ്ചയം നടത്തുമ്പോഴും വിവാഹിതരാകുമ്പോഴും അധിക പ്രതിഫലം നൽകാറുണ്ട്. ഈ തുക ലക്ഷക്കണക്കിന് ഡോളർ വരെയാകാമെന്നും റിപ്പോർട്ടിൽ പറയുന്നു.

ഡേറ്റിങ് മാത്രമല്ല, സമഗ്രമായ സേവനം

20 മുതൽ 75 വയസ്സുവരെയുള്ളവരാണ് ആമിയുടെ ഉപഭോക്താക്കൾ. സാമൂഹിക പരിപാടികൾ, ഓൺലൈൻ പ്ലാറ്റ്ഫോമുകൾ, ഏകദേശം 25,000 അവിവാഹിതരുടെ സ്വകാര്യ വിവരശേഖരം എന്നിവ ഉപയോഗിച്ചാണ് അനുയോജ്യരായ പങ്കാളികളെ കണ്ടെത്തുന്നത്. പ്രൊഫഷണൽ ഫോട്ടോഷൂട്ട്, വസ്ത്രധാരണ നിർദേശങ്ങൾ, വ്യക്തിത്വവും രൂപഭംഗിയും മെച്ചപ്പെടുത്താനുള്ള ഉപദേശം, ഡേറ്റിങ്ങിന് മുമ്പും ശേഷവുമുള്ള പരിശീലനം തുടങ്ങിയവയും പാക്കേജിൽ ഉൾപ്പെടാം.

എഐ ‘പ്രണയവിപണി’യിലും മാറ്റം സൃഷ്ടിക്കുന്നു

എഐ കമ്പനികളിലെ ജീവനക്കാർക്ക് ഓഹരികളിലൂടെ വലിയ സമ്പത്ത് നേടാനുള്ള അവസരങ്ങൾ വർധിച്ചതും ഇത്തരം ചെലവേറിയ സേവനങ്ങൾക്ക് ആവശ്യക്കാർ കൂടാൻ കാരണമാണ്. ഉന്നത മാനേജ്മെന്റ് പദവികളിലല്ലാത്ത ജീവനക്കാർക്കും സാമ്പത്തിക നേട്ടമുണ്ടാകുന്ന സാഹചര്യമുണ്ട്. സമ്പന്നരായ ഏഷ്യൻ പ്രൊഫഷണലുകളുമായി പ്രധാനമായും പ്രവർത്തിക്കുന്ന എഡബ്ല്യുഎം ലവ് സ്ഥാപനത്തിന്റെ മാച്ച് മേക്കറായ കാസിൻഡി ചാവോയും സമാനമായ പ്രവണത ശ്രദ്ധിക്കുന്നുണ്ട്. ഇവരുടെ സേവനങ്ങൾക്ക് 40,000 മുതൽ 2,50,000 ഡോളർ വരെയാണ് നിരക്ക്. കരിയറിനും ബിസിനസ് വളർച്ചയ്ക്കും വർഷങ്ങളോളം പ്രാധാന്യം നൽകിയ പലർക്കും പിന്നീട് പ്രണയബന്ധങ്ങൾ കൈകാര്യം ചെയ്യുന്നതിൽ പരിചയക്കുറവുണ്ടെന്ന് അവർ ചൂണ്ടിക്കാട്ടുന്നു.

ഡേറ്റിങ് ആപ്പുകളോട് മടുപ്പ്

നിരന്തരം പ്രൊഫൈലുകൾ പരിശോധിച്ച് പങ്കാളിയെ തേടുന്ന ഡേറ്റിങ് ആപ്പുകളോടുള്ള മടുപ്പും വ്യക്തിഗത മാച്ച് മേക്കിങ് സേവനങ്ങൾക്ക് ഗുണമാകുന്നു. ഓൺലൈൻ പ്രൊഫൈലുകളിലൂടെ യഥാർഥ അടുപ്പം കണ്ടെത്താനാകുന്നില്ലെന്ന് ചില ഉപയോക്താക്കൾ പരാതിപ്പെടുന്നു. എന്നാൽ ഉയർന്ന തുക ചെലവഴിച്ചാലും വിജയകരമായ ബന്ധം ഉറപ്പുനൽകാൻ മാച്ച് മേക്കർമാർക്ക് കഴിയില്ല.

സിലിക്കൺ വാലിയിലെ അഭിഭാഷകനും എഐ കമ്പനി ഉപദേഷ്‍ടാവുമായ 64കാരൻ ജോനാഥൻ ആക്സൽറാഡിന്റെ അനുഭവം ഇതിന് ഉദാഹരണമാണ്. ഭാര്യയുടെ മരണശേഷം വീണ്ടും ഡേറ്റിങ് ആരംഭിക്കാൻ തീരുമാനിച്ച അദ്ദേഹം 1980-കൾക്കുശേഷം ഡേറ്റിങ്ങിന് പോയിരുന്നില്ല. ആമി അദ്ദേഹത്തിനായി നേരിട്ടും ഓൺലൈനിലുമായി ഏകദേശം 36 കൂടിക്കാഴ്ചകൾ ക്രമീകരിച്ചു. ഒടുവിൽ ശിശുരോഗ മനഃശാസ്ത്ര വിദഗ്ധയായ ക്രിസ്റ്റീൻ ഗ്രേയുമായി പരിചയപ്പെട്ടു. ഇരുവരും രണ്ട് വർഷത്തിലേറെയായി ഒരുമിച്ചാണ്.

കുറഞ്ഞ നിരക്കിലും സേവനങ്ങൾ

എല്ലാ മാച്ച് മേക്കിങ് സേവനങ്ങൾക്കും കോടികൾ ചെലവഴിക്കേണ്ടതില്ല. ത്രീ ഡേ റൂളിന്റെ പാക്കേജുകൾ 6,300 ഡോളർ മുതലും ഏറ്റവും ഉയർന്ന അംഗത്വം 1,00,000 ഡോളറിനും ലഭ്യമാണ്. ടോക്കിഫൈയുടെ സേവനനിരക്ക് ഏകദേശം 4,900 മുതൽ 70,000 ഡോളർ വരെയാണ്. സാങ്കേതികവിദ്യാ രംഗത്തെ സമ്പത്തിന്റെ വളർച്ചയും ഡേറ്റിങ് ആപ്പുകളോടുള്ള അതൃപ്‍തിയും ഒരുമിക്കുമ്പോൾ, പ്രണയബന്ധങ്ങൾ കണ്ടെത്തുന്നതിനുള്ള വ്യക്തിഗത സേവനങ്ങൾ പുതിയൊരു ബിസിനസ് മേഖലയായി വളരുകയാണ് എന്നാണ് ബ്ലൂംബർഗ് റിപ്പോർട്ട് സൂചിപ്പിക്കുന്നത്.

ആപ്പിൾ ഉപയോക്താക്കൾ ജാഗ്രത! ഈ മുന്നറിയിപ്പ് അവഗണിക്കരുത്

Prashobh Prasannan — Thu, 29 Oct 2026 10:49:37 +0530

ആപ്പിൾ ഉപകരണങ്ങൾ ഉപയോഗിക്കുന്നവർക്ക് സുരക്ഷാ മുന്നറിയിപ്പുമായി കേന്ദ്ര സർക്കാർ. ഐഫോൺ, ഐപാഡ്, മാക് കമ്പ്യൂട്ടർ, ആപ്പിൾ വാച്ച്, ആപ്പിൾ ടിവി തുടങ്ങി വിവിധ ഉപകരണങ്ങളിൽ സുരക്ഷാ വീഴ്ചകൾ കണ്ടെത്തിയതിനെത്തുടർന്നാണ് സോഫ്റ്റ്‌വെയർ ഉടൻ അപ്‌ഡേറ്റ് ചെയ്യാൻ നിർദേശം നൽകിയിരിക്കുന്നത്. പഴയ സോഫ്റ്റ്‌വെയർ പതിപ്പുകൾ ഉപയോഗിക്കുന്നത് സൈബർ ആക്രമണങ്ങൾക്ക് വഴിയൊരുക്കിയേക്കാമെന്നാണ് മുന്നറിയിപ്പ്.

ഇന്ത്യൻ കമ്പ്യൂട്ടർ എമർജൻസി റെസ്‌പോൺസ് ടീം (സെർട്ട്-ഇൻ) ഒക്ടോബർ 28നാണ് ഇതുസംബന്ധിച്ച സുരക്ഷാ മുന്നറിയിപ്പ് പുറത്തിറക്കിയത്. ആപ്പിളിന്റെ വിവിധ ഓപ്പറേറ്റിങ് സിസ്റ്റങ്ങളിലും സഫാരി ബ്രൗസറിലുമാണ് സുരക്ഷാ പിഴവുകൾ കണ്ടെത്തിയിരിക്കുന്നത്. വ്യക്തിഗത ഉപയോക്താക്കൾക്കും സ്ഥാപനങ്ങൾക്കും മുന്നറിയിപ്പ് ബാധകമാണ്.

എന്തൊക്കെയാണ് സുരക്ഷാ ഭീഷണികൾ?

ആപ്പിൾ ഉപകരണങ്ങളിലെ സുരക്ഷാ വീഴ്ചകൾ മുതലെടുത്ത് ഹാക്കർമാർക്ക് ഉപകരണങ്ങളിൽ ഹാനികരമായ കോഡുകൾ പ്രവർത്തിപ്പിക്കാനും കൂടുതൽ നിയന്ത്രണാധികാരം നേടാനും സാധിച്ചേക്കാം. വ്യക്തിഗത വിവരങ്ങൾ ചോർത്തുക, സുരക്ഷാ നിയന്ത്രണങ്ങൾ മറികടക്കുക, ഉപകരണങ്ങളുടെ പ്രവർത്തനം തടസ്സപ്പെടുത്തുക തുടങ്ങിയ അപകടസാധ്യതകളുമുണ്ട്.

പ്രത്യേകം തയ്യാറാക്കിയ വെബ് പേജുകൾ, ഫയലുകൾ, ചിത്രങ്ങൾ, ഓഡിയോ, വീഡിയോ എന്നിവ തുറക്കുന്നതിലൂടെയോ സുരക്ഷാ പിഴവുകളുള്ള ആപ്പുകളും സിസ്റ്റം ഘടകങ്ങളും ലക്ഷ്യമിട്ടോ ആക്രമണങ്ങൾ നടത്താൻ സാധ്യതയുണ്ടെന്നാണ് മുന്നറിയിപ്പ്. മെമ്മറി കൈകാര്യം ചെയ്യുന്നതിലെ പിഴവുകൾ, ബഫർ ഓവർഫ്ലോ, അനുവദിച്ച പരിധിക്കു പുറത്തുള്ള വിവരങ്ങൾ വായിക്കുകയോ എഴുതുകയോ ചെയ്യുന്നതുമായി ബന്ധപ്പെട്ട പ്രശ്നങ്ങൾ എന്നിവയും കണ്ടെത്തിയിട്ടുണ്ട്.

ഏതൊക്കെ ആപ്പിൾ ഉപകരണങ്ങളെയാണ് ബാധിക്കുക?

ഐഫോൺ, ഐപാഡ്, മാക്, ആപ്പിൾ വാച്ച്, ആപ്പിൾ ടിവി, ആപ്പിൾ വിഷൻ പ്രോ എന്നിവയിലെ പഴയ സോഫ്റ്റ്‌വെയർ പതിപ്പുകളെയാണ് സുരക്ഷാ മുന്നറിയിപ്പ് പ്രധാനമായും ബാധിക്കുന്നത്. സഫാരി ബ്രൗസറിന്റെ ചില പതിപ്പുകളും ഇതിൽ ഉൾപ്പെടുന്നു.

പ്രധാനമായും ബാധിക്കാവുന്ന പതിപ്പുകൾ ഇവയാണ്:

ഐഫോൺ: ഐഒഎസ് 18.7.11, ഐഒഎസ് 26.7.2, ഐഒഎസ് 27.2 എന്നിവയ്ക്ക് മുമ്പുള്ള പതിപ്പുകൾ. ഐഫോൺ എക്സ്‌എസ്, എക്സ്‌എസ് മാക്സ്, എക്സ്‌ആർ തുടങ്ങിയ മോഡലുകളും അനുയോജ്യമായ ഐഒഎസ് പതിപ്പുകൾ ഉപയോഗിക്കുന്ന ഐഫോൺ 11 മുതലുള്ള മോഡലുകളും ഇതിൽ ഉൾപ്പെടാം.

ഐപാഡ്: ഐപാഡ്ഒഎസ് 18.7.11, 26.7.2, 27.2 എന്നിവയ്ക്ക് മുമ്പുള്ള പതിപ്പുകൾ ഉപയോഗിക്കുന്ന പിന്തുണയുള്ള ഉപകരണങ്ങൾ. ഏഴാം തലമുറ ഐപാഡും അതിനുശേഷമുള്ള ചില മോഡലുകളും ഇതിൽ ഉൾപ്പെടാം.

മാക് കമ്പ്യൂട്ടറുകൾ: മാക്ഒഎസ് സീക്വോയ 15.8.2, മാക്ഒഎസ് ടഹോ 26.7.2, മാക്ഒഎസ് ഗോൾഡൻ ഗേറ്റ് 27.2 എന്നിവയ്ക്ക് മുമ്പുള്ള പതിപ്പുകൾ.

ആപ്പിൾ വാച്ച്: വാച്ച്ഒഎസ് 27.2-ന് മുമ്പുള്ള പതിപ്പുകൾ ഉപയോഗിക്കുന്ന പിന്തുണയുള്ള മോഡലുകൾ. ആപ്പിൾ വാച്ച് സീരീസ് 9 മുതലുള്ള ചില മോഡലുകൾ ഇതിൽ ഉൾപ്പെടാം.

ആപ്പിൾ ടിവി: ടിവിഒഎസ് 27.2-ന് മുമ്പുള്ള പതിപ്പുകൾ ഉപയോഗിക്കുന്ന ആപ്പിൾ ടിവി 4കെ രണ്ടാം തലമുറയും അതിനുശേഷമുള്ള പിന്തുണയുള്ള മോഡലുകളും.

ആപ്പിൾ വിഷൻ പ്രോ: വിഷൻഒഎസ് 27.2-ന് മുമ്പുള്ള പതിപ്പുകൾ.

സഫാരി ബ്രൗസർ: അനുയോജ്യമായ മാക് കമ്പ്യൂട്ടറുകളിൽ പ്രവർത്തിക്കുന്ന 27.2-ന് മുമ്പുള്ള പതിപ്പുകൾ.

ഉപകരണത്തിന്റെ മോഡലും സോഫ്റ്റ്‌വെയർ പിന്തുണയും അനുസരിച്ചാണ് ലഭ്യമായ അപ്‌ഡേറ്റ് വ്യത്യാസപ്പെടുന്നത്. അതിനാൽ എല്ലാ ആപ്പിൾ ഉപകരണങ്ങളിലും ഒരേ പതിപ്പ് ഇൻസ്റ്റാൾ ചെയ്യാൻ കഴിയുമെന്ന് കരുതരുത്.

സുരക്ഷാ അപ്‌ഡേറ്റുകൾ പുറത്തിറക്കി ആപ്പിൾ

ഒക്ടോബർ 26ന് ആപ്പിൾ വിവിധ ഓപ്പറേറ്റിങ് സിസ്റ്റങ്ങൾക്കായി അപ്‌ഡേറ്റുകൾ പുറത്തിറക്കിയിരുന്നു. ഇതിന് രണ്ട് ദിവസങ്ങൾക്ക് ശേഷമാണ് സെർട്ട്-ഇൻ മുന്നറിയിപ്പ് നൽകിയത്. സുരക്ഷാ പിഴവുകൾ പരിഹരിക്കുന്നതിനായി ലഭ്യമായ ഏറ്റവും പുതിയ അനുയോജ്യമായ പതിപ്പിലേക്ക് ഉപകരണങ്ങൾ അപ്‌ഡേറ്റ് ചെയ്യണമെന്നാണ് നിർദേശം.

പുതിയ ഓപ്പറേറ്റിങ് സിസ്റ്റം ഇൻസ്റ്റാൾ ചെയ്യാൻ കഴിയാത്ത പഴയ മോഡലുകൾ ഉപയോഗിക്കുന്നവരും ശ്രദ്ധിക്കണം. ഇത്തരം ഉപകരണങ്ങൾക്കായി ആപ്പിൾ സുരക്ഷാ അപ്‌ഡേറ്റുകൾ പുറത്തിറക്കിയിട്ടുണ്ടോ എന്ന് പരിശോധിക്കണം.

ഐഫോണിലും മാക്കിലും എങ്ങനെ അപ്‌ഡേറ്റ് ചെയ്യാം?

സുരക്ഷാ അപ്‌ഡേറ്റ് ലഭ്യമാണോ എന്ന് ഉപകരണത്തിന്റെ ക്രമീകരണങ്ങളിലൂടെ പരിശോധിക്കാം.

ഐഫോൺ, ഐപാഡ്: സെറ്റിംഗ് തുറന്ന് പബ്ലിക് → സോഫ്റ്റ്‌വെയർ അപ്‌ഡേറ്റ് തിരഞ്ഞെടുക്കുക.

മാക്: സിസ്റ്റം സെറ്റിംഗ് → പബ്ലിക് → സോഫ്റ്റ്‌വെയർ അപ്‌ഡേറ്റ് എന്നതിലേക്ക് പോകുക.

ആപ്പിൾ വാച്ച്, ആപ്പിൾ ടിവി, വിഷൻ പ്രോ: ബന്ധപ്പെട്ട ഉപകരണത്തിന്റെ ക്രമീകരണങ്ങളിൽ ലഭ്യമായ സോഫ്റ്റ്‌വെയർ അപ്‌ഡേറ്റുകൾ പരിശോധിക്കുക.

ലഭ്യമായ ഏറ്റവും പുതിയ സുരക്ഷാ അപ്‌ഡേറ്റ് ഇൻസ്റ്റാൾ ചെയ്യുന്നതാണ് ഉചിതം. സോഫ്റ്റ്‌വെയർ പതിവായി അപ്‌ഡേറ്റ് ചെയ്യുന്നത് ഉപകരണങ്ങളെ സൈബർ ആക്രമണങ്ങളിൽനിന്ന് സംരക്ഷിക്കാൻ സഹായിക്കും. സുരക്ഷാ പിഴവുകൾ പരിഹരിക്കുന്ന അപ്‌ഡേറ്റുകൾ ഇൻസ്റ്റാൾ ചെയ്യാതെ പഴയ പതിപ്പുകൾ ഉപയോഗിക്കുന്നത് വ്യക്തിഗത വിവരങ്ങൾക്കും ഉപകരണത്തിന്റെ സുരക്ഷയ്ക്കും ഭീഷണിയായേക്കാം.

സംസ്ഥാനത്ത് വീണ്ടും സ്വ‍ർണ വില കുറഞ്ഞു; 10 ദിവസത്തിനിടെ കുറഞ്ഞത് 4840 രൂപ, ഇന്നത്തെ നിരക്കറിയാം

Sangeetha KS — Thu, 22 Oct 2026 09:47:37 +0530

തിരുവനന്തപുരം: സംസ്ഥാനത്ത് സ്വ‍ർണ വിലയിൽ വൻ ഇടിവ്. ഇന്ന് രാവിലെ കേരളാ ഗോൾഡ് ആന്റ് സിൽവ‍‌ർ മെ‌ർച്ചന്റ്സ് അസോസിയേഷൻ പുറത്തു വിട്ട കണക്കുകൾ പ്രകാരം 22 കാരറ്റ് സ്വ‍ർണം ഗ്രാമിന് 155 രൂപയാണ് കുറഞ്ഞിരിക്കുന്നത്. പവൻ വിലയിൽ കണക്കാക്കുമ്പോൾ 1240 രൂപയുടെ കുറവാണ് ഉണ്ടായിരിക്കുന്നത്. ഇന്ന് ഗ്രാമിന് 13,235 രൂപയിലും പവന് 1,05,880 രൂപയിലുമാണ് വ്യാപാരം നടക്കുന്നത്.

ചൊവ്വാഴ്ച്ച വൈകുന്നേരത്തോടെ സ്വ‍‌ർണ വില പവന് 800 രൂപയോളം കുറഞ്ഞ് ഗ്രാമിന് 13,390 രൂപയും പവന് 1,07,120 രൂപയുമായിരുന്നു. ഇതിന് പിന്നാലെ ഇന്നലെ രാവിലെ സ്വ‌‍‌ർണ വിലയിൽ മാറ്റമില്ലാതെ തുടരുകയായിരുന്നു. അന്താരാഷ്ട്ര വിലയിലെ കയറ്റിറക്കങ്ങളാണ് കേരളത്തിലെയും സ്വർണ വിലയെ സ്വാധീനിക്കാറുള്ളത്. അതേ സമയം, വെള്ളി വിലയിൽ ദിവസങ്ങളായി മാറ്റമില്ലാതെ തുടരുന്ന നിലയാണ്. നിലവിൽ വെള്ളി ഗ്രാമിന് 30 രൂപയിലും 10 ഗ്രാമിന് 2,300 രൂപയും എന്ന കണക്കിലാണ് വ്യാപാരം നടക്കുന്നത്.

കഴിഞ്ഞ 10 ദിവസങ്ങളിലെ സ്വർണ നിരക്കുകൾ

ഒക്ടോബ‍ർ 22- 1,05,880 രൂപ

ഒക്ടോബർ 21- 1,07,120 രൂപ

ഒക്ടോബർ 20- ഉച്ചയ്ക്ക് 1,07,120 രൂപ| രാവിലെ 1,07,920 രൂപ

ഒക്ടോബർ 19- 1,08,560 രൂപ

ഒക്ടോബർ 18- 1,08,280 രൂപ

ഒക്ടോബർ 17- 1,08,280 രൂപ

ഒക്ടോബർ 16- 1,08,120 രൂപ

ഒക്ടോബർ 15- 1,08,120 രൂപ

ഒക്ടോബർ 14- 1,08,720 രൂപ

ഒക്ടോബർ 13- 1,09,480 രൂപ

ഒക്ടോബർ 12- രാവിലെ 1,10,720 രൂപ| വൈകീട്ട് 1,09,760 രൂപ

എഐ ലോകത്തെ അമ്പരപ്പിക്കാൻ ആന്ത്രോപിക്കിന്റെ പുതിയ മോഡൽ

Prashobh Prasannan — Fri, 09 Oct 2026 14:09:08 +0530

വേഗമേറിയതും കുറഞ്ഞ ചെലവിൽ പ്രവർത്തിപ്പിക്കാവുന്നതുമായ പുതിയ എഐ മോഡലായ ക്ലോഡ് ഹൈക്കു 5.5 അവതരിപ്പിച്ച് ആന്ത്രോപിക്. വൻതോതിൽ ആവർത്തിച്ച് ചെയ്യേണ്ട ജോലികൾ കാര്യക്ഷമമായി പൂർത്തിയാക്കുന്നതിനാണ് പുതിയ മോഡൽ രൂപകൽപ്പന ചെയ്തിരിക്കുന്നത്. മുൻ പതിപ്പായ ഹൈക്കു 4.5-നെ അപേക്ഷിച്ച് ശരാശരി 75% ചെലവ് കുറവായിരിക്കുമെന്നാണ് കമ്പനിയുടെ അവകാശവാദം. രേഖകളുടെ സംഗ്രഹം തയ്യാറാക്കുക, വിവരങ്ങൾ തരംതിരിക്കുക, ഡാറ്റാബേസ് ചോദ്യങ്ങൾ കൈകാര്യം ചെയ്യുക, ഉപഭോക്തൃ സേവനവുമായി ബന്ധപ്പെട്ട അഭ്യർഥനകൾക്ക് മറുപടി നൽകുക തുടങ്ങിയ ജോലികൾക്ക് പുതിയ മോഡൽ പ്രയോജനപ്പെടും. ഇത്തരം ജോലികൾ ആയിരക്കണക്കിനും ദശലക്ഷക്കണക്കിനും തവണ നിർവഹിക്കേണ്ടിവരുന്ന സ്ഥാപനങ്ങൾക്ക് ചെലവ് കുറയ്ക്കാൻ പുതിയ മോഡൽ സഹായിക്കുമെന്നാണ് പ്രതീക്ഷ.

ആന്ത്രോപിക്കിന്റെ ഏറ്റവും വേഗമേറിയ മോഡൽ

തങ്ങളുടെ ഏറ്റവും വേഗമേറിയ മോഡലാണ് ക്ലോഡ് ഹൈക്കു 5.5 എന്നാണ് ആന്ത്രോപിക് പറയുന്നത്. തത്സമയ ഉപഭോക്തൃ സേവനം, ബ്രൗസർ അധിഷ്ഠിത എഐ ഉപകരണങ്ങൾ തുടങ്ങിയവയിൽ വേഗത്തിൽ മറുപടി നൽകേണ്ട സാഹചര്യങ്ങളിൽ ഇത് ഏറെ പ്രയോജനകരമാണ്. ആന്ത്രോപിക്കിന്റെ കൂടുതൽ ശേഷിയുള്ള ഒപസ് 5.5, സോണറ്റ് 5.5 മോഡലുകൾക്കൊപ്പവും ഹൈക്കു 5.5 പ്രവർത്തിക്കും. ഉദാഹരണത്തിന്, കോഡിങ് ജോലികളിൽ പ്രധാനപ്പെട്ടതും സങ്കീർണവുമായ പ്രവർത്തനങ്ങൾ വലിയ മോഡലിന് കൈകാര്യം ചെയ്യാം. ആവർത്തന സ്വഭാവമുള്ള ചെറിയ ജോലികൾ ഹൈക്കു 5.5 ഏറ്റെടുക്കുന്നതിലൂടെ പ്രവർത്തനം കൂടുതൽ കാര്യക്ഷമമാക്കാനാകും.

പ്രവർത്തനശേഷി ക്രമീകരിക്കാം

പുതിയ മോഡലിന്റെ മറ്റൊരു പ്രധാന സവിശേഷതയാണ് ക്രമീകരിക്കാവുന്ന എഫർട്ട് സെറ്റിങ്. ഹൈക്കു ശ്രേണിയിൽ ആദ്യമായാണ് ഈ സംവിധാനം അവതരിപ്പിക്കുന്നത്. ഒരു ജോലിക്ക് കൂടുതൽ ചിന്താശേഷി വിനിയോഗിക്കണോ അതോ വേഗത്തിനും കുറഞ്ഞ ചെലവിനും മുൻഗണന നൽകണോ എന്ന് ഡെവലപ്പർമാർക്ക് തീരുമാനിക്കാം. ഹൈക്കു 4.5-നെ അപേക്ഷിച്ച് സുരക്ഷയും നിർദേശങ്ങളോടുള്ള പൊരുത്തവും പരിശോധിക്കുന്ന പരീക്ഷണങ്ങളിലും പുതിയ മോഡൽ മെച്ചപ്പെട്ട പ്രകടനം കാഴ്ചവച്ചതായി കമ്പനി അറിയിച്ചു. നിർദേശങ്ങളുമായി പൊരുത്തപ്പെടാത്ത പെരുമാറ്റം കുറഞ്ഞതായും ദുരുപയോഗത്തിന് വഴങ്ങാനുള്ള പ്രവണത കുറഞ്ഞതായും ആന്ത്രോപിക് അവകാശപ്പെട്ടു.

പ്രവർത്തനച്ചെലവിൽ 75% വരെ കുറവ്

പുതിയ മോഡലിന്റെ പ്രധാന ആകർഷണം കുറഞ്ഞ ചെലവാണ്. മുൻ മോഡലിനെ അപേക്ഷിച്ച് ശരാശരി 75% കുറവ് ചെലവിൽ പ്രവർത്തിപ്പിക്കാനാകുമെന്നാണ് കമ്പനിയുടെ വിശദീകരണം. ഒരേസമയം നിരവധി എഐ പ്രവർത്തനങ്ങൾ നടത്തുന്ന സ്ഥാപനങ്ങൾക്ക് ഈ മാറ്റം സാമ്പത്തികമായി ഗുണകരമാകും. 1,00,000 ടോക്കണുകൾ വരെയുള്ള നിർദേശങ്ങൾ കൈകാര്യം ചെയ്യുമ്പോൾ ക്ലോഡ് ഹൈക്കു 5.5 പ്രത്യേകിച്ചും ചെലവുകുറഞ്ഞതാണെന്നും കമ്പനി പറയുന്നു. മുൻ ഹൈക്കു മോഡലിലേക്കുള്ള അഭ്യർഥനകളിൽ ഏകദേശം 90% ഈ പരിധിക്കുള്ളിലായിരുന്നു.

ക്ലോഡ് സോണറ്റ് 5.5-നും വിലക്കുറവ്

ക്ലോഡ് സോണറ്റ് 5.5-ന്റെ കാഷെ റീഡുകളുടെ വിലയും ആന്ത്രോപിക് കുറച്ചിട്ടുണ്ട്. ഒരു ദശലക്ഷം ടോക്കണുകൾക്ക് 0.20 ഡോളറായിരുന്ന നിരക്ക് 0.10 ഡോളറായി കുറച്ചു. ഇതിലൂടെ ഏജന്റുകളെ അടിസ്ഥാനമാക്കിയുള്ള മിക്ക പ്രവർത്തനങ്ങളുടെയും ചെലവ് ഏകദേശം 20% കുറയുമെന്നാണ് കമ്പനിയുടെ വിലയിരുത്തൽ. ആന്ത്രോപിക്കിന്റെ സ്വന്തം പ്ലാറ്റ്‌ഫോമുകൾക്ക് പുറമെ ആമസോൺ വെബ് സർവീസസ്, ഗൂഗിൾ ക്ലൗഡ്, മൈക്രോസോഫ്റ്റ് അസ്യൂർ എന്നിവ വഴിയും ക്ലോഡ് ഹൈക്കു 5.5 ലഭ്യമാണ്.

മെഴ്‌സിഡസ് ജിഎൽസി ഇലക്ട്രിക്: കാത്തിരിക്കുന്നത് വൻ സർപ്രൈസ്

Prashobh Prasannan — Mon, 12 Oct 2026 16:44:50 +0530

ഇന്ത്യൻ ആഡംബര ഇലക്ട്രിക് വാഹന വിപണിയിൽ വൻ പ്രതീക്ഷയുമായി മെഴ്‌സിഡസ് ബെൻസിന്റെ പുതിയ ഇലക്ട്രിക് എസ്‌യുവിയായ ജിഎൽസി എത്തുന്നു. രജിസ്ട്രേഷൻ ആരംഭിച്ച് വെറും 36 മണിക്കൂറിനുള്ളിൽ 650ലേറെ ബുക്കിംഗ് രജിസ്ട്രേഷനുകളാണ് വാഹനത്തിന് ലഭിച്ചത്. ഒക്ടോബർ 5നാണ് കമ്പനി പുതിയ വാഹനത്തിനായുള്ള ബുക്കിംഗ് രജിസ്ട്രേഷൻ ആരംഭിച്ചത്. നവംബർ 4ന് ഇന്ത്യയിൽ ഔദ്യോഗികമായി അവതരിപ്പിക്കാനിരിക്കെയാണ് വാഹനത്തിന് മികച്ച പ്രതികരണം ലഭിച്ചിരിക്കുന്നത്. ജിഎൽസി 400 ഫോർമാറ്റിക് ഇലക്ട്രിക്കിന്റെ വിതരണം നവംബർ പകുതിയോടെ ആരംഭിക്കുമെന്ന് കമ്പനി അറിയിച്ചു.

ഇന്ത്യയിൽ തന്നെ നിർമാണം

പുതിയ ഇലക്ട്രിക് ജിഎൽസി മഹാരാഷ്ട്രയിലെ ചക്കൻ പ്ലാന്റിൽ നിർമിക്കാനാണ് മെഴ്‌സിഡസ് ബെൻസിന്റെ തീരുമാനം. കമ്പനിയുടെ അടുത്ത തലമുറ ഇലക്ട്രിക് വാഹന പ്ലാറ്റ്‌ഫോമിൽ ഇന്ത്യയിൽ നിർമിക്കുന്ന ആദ്യ എസ്‌യുവിയെന്ന പ്രത്യേകതയും ഈ മോഡലിനുണ്ട്. പൂർണമായും ഇലക്ട്രിക് വാഹനങ്ങൾക്കായി വികസിപ്പിച്ച ആർക്കിടെക്ചറിലാണ് പുതിയ ജിഎൽസി എത്തുന്നത്.

ഇന്ത്യയിൽ പ്രാദേശികമായി നിർമിക്കുന്ന ആഡംബര ഇലക്ട്രിക് വാഹനങ്ങളുടെ നിര വിപുലീകരിക്കാനും പുതിയ മോഡലിലൂടെ കമ്പനിക്ക് സാധിക്കും. വാഹനത്തിന്റെ തുടർന്നുള്ള ബാച്ചുകൾക്കായുള്ള രജിസ്ട്രേഷനും നിലവിൽ തുടരുന്നുണ്ട്.

വിലയും സാങ്കേതിക വിവരങ്ങളും പുറത്തുവിട്ടിട്ടില്ല

ജിഎൽസി 400 ഫോർമാറ്റിക് ഇലക്ട്രിക്കിന്റെ ഇന്ത്യയിലെ വില കമ്പനി ഇതുവരെ പ്രഖ്യാപിച്ചിട്ടില്ല. ബാറ്ററി ശേഷി, ഇലക്ട്രിക് മോട്ടോറിന്റെ പവർ, ചാർജിങ് ശേഷി, ഒറ്റ ചാർജിൽ ലഭിക്കുന്ന ഡ്രൈവിങ് റേഞ്ച് തുടങ്ങിയ വിവരങ്ങളും പുറത്തുവിട്ടിട്ടില്ല. നവംബർ 4ന് നടക്കുന്ന ഔദ്യോഗിക അവതരണത്തിൽ വാഹനത്തിന്റെ കൂടുതൽ സവിശേഷതകളും ഇന്ത്യയിലെ പതിപ്പിന്റെ വിവരങ്ങളും പ്രഖ്യാപിക്കുമെന്നാണ് പ്രതീക്ഷിക്കുന്നത്.

36 മണിക്കൂറിൽ 650ലേറെ താൽപ്പര്യ രജിസ്ട്രേഷനുകൾ

മെഴ്‌സിഡസ് ബെൻസ് ഇന്ത്യയുടെ സെയിൽസ് ആൻഡ് മാർക്കറ്റിങ് വൈസ് പ്രസിഡന്റ് ബ്രെൻഡൻ സിസിങ്, വിപണിയിലെത്തുന്നതിന് മുമ്പുതന്നെ 36 മണിക്കൂറിനുള്ളിൽ 650ലേറെ താൽപ്പര്യ രജിസ്ട്രേഷനുകൾ ലഭിച്ചത് വലിയ നേട്ടമാണെന്ന് വ്യക്തമാക്കി. ഇന്ത്യയിൽ പുറത്തിറങ്ങുന്ന സമയത്ത് ഏറ്റവും വിജയകരമായ മെഴ്‌സിഡസ് ബെൻസ് മോഡലുകളിലൊന്നായി ഇലക്ട്രിക് ജിഎൽസി മാറാനുള്ള സാധ്യതയാണ് ഈ പ്രതികരണം സൂചിപ്പിക്കുന്നതെന്നും അദ്ദേഹം പറഞ്ഞു.

ജർമൻ പുരസ്കാരവും സ്വന്തമാക്കി

ഇന്ത്യൻ വിപണിയിലെത്തുന്നതിന് മുമ്പുതന്നെ ഇലക്ട്രിക് ജിഎൽസി 2026ലെ ജർമൻ പ്രീമിയം കാർ ഓഫ് ദി ഇയർ പുരസ്കാരം സ്വന്തമാക്കിയിട്ടുണ്ട്. നിലവിൽ ഇന്ത്യയിൽ വിൽക്കുന്ന പെട്രോൾ, ഡീസൽ പതിപ്പുകളിൽനിന്ന് വ്യത്യസ്തമായ പൂർണ ഇലക്ട്രിക് പ്ലാറ്റ്‌ഫോമിലാണ് പുതിയ മോഡൽ എത്തുന്നത്. രജിസ്റ്റർ ചെയ്ത ഉപഭോക്താക്കൾക്ക് വാഹനത്തിന്റെ രജിസ്ട്രേഷൻ നിലയും പ്രതീക്ഷിക്കുന്ന ഡെലിവറി സമയക്രമവും കമ്പനി അറിയിക്കും. അംഗീകൃത ഡീലർഷിപ്പുകൾ വഴിയും ഔദ്യോഗിക വെബ്‌സൈറ്റ് വഴിയും രജിസ്ട്രേഷൻ നടത്താം. മെഴ്‌സിഡസ് ബെൻസിന്റെ 140-ാം വാർഷികാഘോഷങ്ങളുടെ പശ്ചാത്തലത്തിലാണ് പുതിയ ഇലക്ട്രിക് എസ്‌യുവിയുടെ വരവ്. നവംബർ 4ന് വിലയും സവിശേഷതകളും പ്രഖ്യാപിക്കുന്നതോടെ ഇന്ത്യയിലെ ആഡംബര ഇലക്ട്രിക് വാഹന വിപണിയിൽ പുതിയ മത്സരം പ്രതീക്ഷിക്കാം.

വാട്‍സാപ്പിൽ പുതിയ ഫീച്ചർ! ഇനി ഇൻസ്റ്റഗ്രാം റീൽസ് പങ്കിടാൻ എളുപ്പം

Prashobh Prasannan — Sat, 24 Oct 2026 13:00:12 +0530

വാട്‍സാപ്പ് ചാറ്റുകളിലൂടെ ഇൻസ്റ്റഗ്രാം റീൽസ് പങ്കിടുന്നത് കൂടുതൽ എളുപ്പമാക്കാൻ പുതിയ ഫീച്ചർ അവതരിപ്പിക്കുന്നു. ചാറ്റിലെ അറ്റാച്ച്‌മെന്റ് മെനുവിൽ പ്രത്യേക റീൽസ് ബട്ടൺ ഉൾപ്പെടുത്തുന്ന സംവിധാനമാണ് പരീക്ഷിക്കുന്നത്. ആൻഡ്രോയിഡ് ബീറ്റാ ഉപയോക്താക്കളിൽ ചിലർക്കായി ഫീച്ചർ ലഭ്യമായിത്തുടങ്ങിയെന്നാണ് റിപ്പോർട്ട്. ഇതോടെ മീഡിയ പിക്കറിൽ തിരഞ്ഞ് റീൽസ് കണ്ടെത്തുന്നതിന് പകരം ചാറ്റിൽനിന്നുതന്നെ വിഡിയോകൾ തിരഞ്ഞെടുത്ത് പങ്കിടാം.

ചാറ്റിൽ പ്രത്യേക റീൽസ് ബട്ടൺ

വാട്സ്ആപ്പിലെ പുതിയ ഫീച്ചറുകൾ സംബന്ധിച്ച വിവരങ്ങൾ പുറത്തുവിടുന്ന ഡബ്ല്യുഎബീറ്റാഇൻഫോയുടെ റിപ്പോർട്ട് പ്രകാരം, ആൻഡ്രോയിഡിനായുള്ള വാട്സ്ആപ്പ് ബീറ്റാ പതിപ്പായ 2.26.42.9 ഉപയോഗിക്കുന്ന ചിലർക്കാണ് പുതിയ സൗകര്യം ലഭിക്കുന്നത്. ഗൂഗിൾ പ്ലേ സ്റ്റോർ വഴി ലഭിക്കുന്ന ഈ പതിപ്പിലാണ് ഫീച്ചർ പരീക്ഷിക്കുന്നത്. ചാറ്റിലെ അറ്റാച്ച്‌മെന്റ് മെനുവിലുള്ള റീൽസ് ബട്ടണിൽ അമർത്തിയാൽ ഇൻസ്റ്റഗ്രാമിലെ ഉപയോക്താവിന്റെ പ്രവർത്തനങ്ങളുമായി ബന്ധപ്പെട്ട വിഡിയോകൾ കാണാനാകും. അടുത്തിടെ കണ്ടതും സേവ് ചെയ്തതും ലൈക്ക് ചെയ്തതുമായ റീൽസുകൾ പ്രത്യേകം ടാബുകളിലായി ലഭിക്കും. ഇതിൽനിന്ന് ഇഷ്ടമുള്ള വിഡിയോ തിരഞ്ഞെടുത്ത് നേരിട്ട് വാട്സ്ആപ്പ് ചാറ്റിൽ പങ്കിടാം.

അക്കൗണ്ടുകൾ ലിങ്ക് ചെയ്യണം

പുതിയ ഫീച്ചർ ഉപയോഗിക്കുന്നതിന് വാട്സ്ആപ്പ് അക്കൗണ്ട് മെറ്റയുടെ അക്കൗണ്ട്സ് സെന്ററുമായി ബന്ധിപ്പിക്കേണ്ടതുണ്ട്. ഇൻസ്റ്റഗ്രാം, ഫേസ്ബുക്ക് അക്കൗണ്ടുകളുമായി വാട്സ്ആപ്പ് ബന്ധിപ്പിക്കാൻ താൽപര്യമില്ലാത്തവർക്ക് നിലവിലുള്ള രീതിയിൽ ആപ്പുകൾ ഉപയോഗിക്കുന്നത് തുടരാം. എന്നാൽ അക്കൗണ്ടുകൾ ബന്ധിപ്പിക്കാത്തവർക്ക് ചാറ്റിലെ അറ്റാച്ച്‌മെന്റ് മെനുവിൽ പുതിയ റീൽസ് ബട്ടൺ ലഭിക്കില്ല.

മീഡിയ പിക്കറിലെ നടപടികൾ ഒഴിവാക്കാം

നിലവിൽ വാട്സ്ആപ്പിലൂടെ ഇൻസ്റ്റഗ്രാമിലെയും ഫേസ്ബുക്കിലെയും സ്റ്റോറികൾ, പോസ്റ്റുകൾ, റീൽസുകൾ എന്നിവ പങ്കിടാൻ സൗകര്യമുണ്ട്. ഇതിനായി മീഡിയ പിക്കർ തുറന്ന് ആവശ്യമായ ഉള്ളടക്കം കണ്ടെത്തണം. പുതിയ ഫീച്ചർ വരുന്നതോടെ ഈ നടപടികൾ ഒഴിവാക്കി റീൽസുകൾ വേഗത്തിൽ കണ്ടെത്താനും ചാറ്റുകളിൽ പങ്കിടാനും സാധിക്കും.

എല്ലാവർക്കും ഉടൻ ലഭിക്കില്ല

നിലവിൽ തിരഞ്ഞെടുത്ത ആൻഡ്രോയിഡ് ബീറ്റാ പരീക്ഷകർക്കിടയിലാണ് ഫീച്ചർ ലഭ്യമായിത്തുടങ്ങിയിരിക്കുന്നത്. 2.26.42.9 പതിപ്പ് ഇൻസ്റ്റാൾ ചെയ്ത എല്ലാവർക്കും ഈ സൗകര്യം ലഭിക്കണമെന്നില്ല. ഘട്ടംഘട്ടമായാണ് ഫീച്ചർ കൂടുതൽ ഉപയോക്താക്കളിലേക്ക് എത്തിക്കുന്നത്. പുതിയ ഷോർട്ട്കട്ട് എല്ലാ ഉപയോക്താക്കൾക്കും എപ്പോൾ ലഭ്യമാക്കുമെന്ന കാര്യത്തിൽ വാട്സ്ആപ്പ് ഔദ്യോഗിക പ്രഖ്യാപനം നടത്തിയിട്ടില്ല. പരീക്ഷണഘട്ടത്തിലെ പ്രവർത്തനക്ഷമത വിലയിരുത്തിയ ശേഷമായിരിക്കും ഫീച്ചറിന്റെ വിപുലമായ വിതരണം സംബന്ധിച്ച തീരുമാനം ഉണ്ടാകുക.

66 ലക്ഷം പേരുടെ വിവരങ്ങൾ ചോർന്നു! ജപ്പാനിൽ സൈബർ സുരക്ഷാ മുന്നറിയിപ്പ്

Prashobh Prasannan — Mon, 12 Oct 2026 15:20:59 +0530

ദശലക്ഷക്കണക്കിന് ഉപയോക്താക്കളുടെ വ്യക്തിഗത വിവരങ്ങൾ ചോർന്നതിനു പിന്നാലെ രാജ്യവ്യാപകമായി സൈബർ സുരക്ഷാ മുന്നറിയിപ്പ് പുറപ്പെടുവിച്ച് ജപ്പാൻ. പ്രമുഖ കമ്പനികളെ ലക്ഷ്യമിട്ടുള്ള സൈബർ ആക്രമണങ്ങൾ വർധിക്കുന്ന സാഹചര്യത്തിലാണ് സർക്കാർ നടപടി. കൺവീനിയൻസ് സ്റ്റോർ ശൃംഖലയായ ലോസൺ, ദൈവ സെക്യൂരിറ്റീസ്, പഴയ സാധനങ്ങൾ വിൽക്കുന്ന ബുക്ക്ഓഫ് തുടങ്ങിയ സ്ഥാപനങ്ങൾ വിവരചോർച്ച റിപ്പോർട്ട് ചെയ്തിട്ടുണ്ട്. കാർ പങ്കിടൽ സേവനമായ ടൈംസ് കാറിനെതിരായ ആക്രമണത്തിൽ ഏകദേശം 66 ലക്ഷം ഉപഭോക്തൃ അക്കൗണ്ടുകളുമായി ബന്ധപ്പെട്ട വിവരങ്ങളും പുറത്തായെന്നാണ് റിപ്പോർട്ട്.

സൈബർ ആക്രമണങ്ങൾ വർധിക്കുന്നു

സൈബർ ആക്രമണങ്ങൾ കൂടുതൽ സങ്കീർണവും ശക്തവുമാകുന്ന സാഹചര്യത്തിൽ കമ്പനികളും വ്യക്തികളും സുരക്ഷാ നടപടികൾ ഗൗരവമായി കാണണമെന്ന് ജപ്പാൻ സർക്കാർ ആവശ്യപ്പെട്ടു. ആക്രമണങ്ങളുടെ എണ്ണത്തിലും രീതികളിലെ സങ്കീർണതയിലും വർധനയുണ്ടാകുന്നതായും ഇത് ജനങ്ങളുടെ ജീവിതത്തെയും സ്ഥാപനങ്ങളുടെ പ്രവർത്തനങ്ങളെയും സാരമായി ബാധിക്കുന്നതായും ഡിജിറ്റൽ പരിവർത്തന മന്ത്രി തോഷിഹിറോ ഫുരുകാവ പറഞ്ഞു. സൈബർ ആക്രമണങ്ങളെ നേരിടാൻ ബന്ധപ്പെട്ട ഏജൻസികളുമായി ചേർന്ന് പ്രവർത്തിക്കുന്നതിനൊപ്പം അടിസ്ഥാന സുരക്ഷാ നടപടികൾ ശക്തമാക്കാനും സർക്കാർ നിർദേശിച്ചിട്ടുണ്ട്. പ്രാദേശിക ഭരണകൂടങ്ങൾക്കും സ്വകാര്യ കമ്പനികൾക്കും നിർദേശങ്ങൾ കൈമാറുന്നതിനായി ദേശീയ സൈബർ സുരക്ഷാ ഓഫീസ് സർക്കാർ മന്ത്രാലയങ്ങൾക്കും നിർദേശം നൽകിയതായി റോയിട്ടേഴ്സ് റിപ്പോർട്ട് ചെയ്തു.

ഈ വർഷം 500ലേറെ സൈബർ ആക്രമണങ്ങൾ

യോമിയുരി പത്രവും ടോക്കിയോ ആസ്ഥാനമായ സൈബർ സുരക്ഷാ സ്ഥാപനമായ ട്രെൻഡ് മൈക്രോയും നടത്തിയ പഠനമനുസരിച്ച് ഈ വർഷം ജപ്പാനിൽ ഇതിനകം 500ലേറെ സൈബർ ആക്രമണങ്ങൾ റിപ്പോർട്ട് ചെയ്തിട്ടുണ്ട്. കഴിഞ്ഞ വർഷം 473 സംഭവങ്ങളും 2024ൽ 503 സംഭവങ്ങളുമാണ് രേഖപ്പെടുത്തിയത്. ഈ വർഷം പുതിയ റെക്കോർഡ് സൃഷ്ടിക്കപ്പെടാനുള്ള സാധ്യതയുണ്ടെന്നാണ് വിലയിരുത്തൽ. റോയിട്ടേഴ്സ് ഉദ്ധരിച്ച മറ്റൊരു കണക്കനുസരിച്ച്, ഈ വർഷത്തെ ആദ്യ ഒൻപത് മാസങ്ങളിൽ മാത്രം കഴിഞ്ഞ വർഷം മുഴുവനായി റിപ്പോർട്ട് ചെയ്തതിനെക്കാൾ കൂടുതൽ സൈബർ സുരക്ഷാ സംഭവങ്ങൾ ജപ്പാനിലുണ്ടായി. സെപ്റ്റംബറിൽ മാത്രം 86 സംഭവങ്ങൾ രേഖപ്പെടുത്തി. ഓഗസ്റ്റിനെ അപേക്ഷിച്ച് 18 ശതമാനവും ജൂലൈയെ അപേക്ഷിച്ച് 37 ശതമാനവും വർധനയാണിത്.

വ്യക്തിവിവരങ്ങൾ ചോർത്തിയാൽ ഗുരുതര പ്രത്യാഘാതങ്ങൾ

ഡ്രൈവിങ് ലൈസൻസ് വിവരങ്ങൾ, ബന്ധപ്പെടാനുള്ള വിവരങ്ങൾ, മറ്റ് വ്യക്തിഗത വിവരങ്ങൾ എന്നിവയാണ് വിവിധ ആക്രമണങ്ങളിലൂടെ ചോർന്നത്. ഇത്തരം വിവരങ്ങൾ ദുരുപയോഗം ചെയ്യപ്പെടുന്നത് വ്യക്തിത്വ മോഷണം, വ്യാജ പണമിടപാടുകൾ, മറ്റ് സാമ്പത്തിക തട്ടിപ്പുകൾ എന്നിവയ്ക്ക് വഴിവയ്ക്കുമെന്ന് സർക്കാർ മുന്നറിയിപ്പ് നൽകി. വിവരങ്ങൾ ഒരിക്കൽ ചോർന്നാൽ അതിന്റെ പ്രത്യാഘാതങ്ങൾ കൂടുതൽ വ്യാപിക്കാമെന്നും ഫുരുകാവ വ്യക്തമാക്കി.

പാസ്‌വേഡുകളുടെ കാര്യത്തിൽ ജാഗ്രത വേണം

ഒരേ പാസ്‌വേഡ് വിവിധ അക്കൗണ്ടുകളിൽ ഉപയോഗിക്കുന്നത് ഒഴിവാക്കാനും സാധ്യമായിടത്തെല്ലാം മൾട്ടി ഫാക്ടർ ഓതന്റിക്കേഷൻ സംവിധാനം പ്രവർത്തനക്ഷമമാക്കാനും സർക്കാർ നിർദേശിച്ചു. വിശ്വസനീയമായ സ്ഥാപനങ്ങളിൽനിന്നോ സർക്കാർ ഏജൻസികളിൽനിന്നോ വന്നതാണെന്ന് തോന്നിപ്പിക്കുന്ന സംശയാസ്പദമായ ഇമെയിലുകളും സന്ദേശങ്ങളും സൂക്ഷിക്കണമെന്നും മുന്നറിയിപ്പുണ്ട്. സൈബർ ആക്രമണങ്ങൾ വർധിക്കുന്നതിന് പിന്നിൽ നിർമിതബുദ്ധിയുടെ ഉപയോഗവും കാരണമായേക്കാമെന്നാണ് റിപ്പോർട്ടുകൾ. സോഫ്റ്റ്‌വെയറുകളിലെ സുരക്ഷാ പിഴവുകൾ കണ്ടെത്താനും വ്യാജ സന്ദേശങ്ങൾ തയ്യാറാക്കാനും നിർമിതബുദ്ധി ഹാക്കർമാരെ സഹായിക്കുന്നതായി വിലയിരുത്തപ്പെടുന്നു.

ദക്ഷിണ കൊറിയയിലും സൈബർ ഭീഷണി

ജപ്പാനിൽ മാത്രമല്ല, ദക്ഷിണ കൊറിയയിലും സൈബർ ആക്രമണങ്ങൾ ആശങ്ക ഉയർത്തുന്നുണ്ട്. ഒൻപത് ബാങ്കുകളും രണ്ട് വലിയ പള്ളികളും നിർമിതബുദ്ധി ഉപകരണങ്ങൾ ഉപയോഗിച്ചുള്ള ആക്രമണങ്ങൾ നടന്നിട്ടുണ്ടോയെന്ന് പരിശോധിച്ചുവരികയാണ്. ഈ വർഷം ആദ്യ പകുതിയിൽ രാജ്യത്ത് 1,236 സൈബർ സുരക്ഷാ സംഭവങ്ങൾ റിപ്പോർട്ട് ചെയ്തു. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 20 ശതമാനമാണ് വർധന. കുറ്റവാളികൾ നിർമിതബുദ്ധി ഉപയോഗിച്ച് ആക്രമണങ്ങളുടെ വിവിധ ഘട്ടങ്ങൾ ഓട്ടോമേറ്റ് ചെയ്യുന്നതിനാൽ ഇത്തരം സൈബർ ആക്രമണങ്ങൾ തിരിച്ചറിയുന്നത് കൂടുതൽ പ്രയാസകരമാകുമെന്ന് വിദഗ്ധർ മുന്നറിയിപ്പ് നൽകുന്നു.

കമ്പ്യൂട്ടറിലെ ജോലികൾ എഐ തന്നെ ചെയ്യും! ജിപിടി-6.1 ടെറ അവതരിപ്പിച്ച് ഓപ്പൺഎഐ

Prashobh Prasannan — Wed, 28 Oct 2026 14:25:45 +0530

പുതിയ എഐ മോഡലായ ജിപിടി-6.1 ടെറ അവതരിപ്പിച്ച് ഓപ്പൺഎഐ. ചോദ്യങ്ങൾക്ക് മറുപടി നൽകുന്നതിൽ മാത്രം ഒതുങ്ങാതെ കമ്പ്യൂട്ടർ സ്‌ക്രീൻ നിരീക്ഷിക്കാനും വിവിധ ആപ്പുകളിൽ പ്രവർത്തിക്കാനും ജോലികൾ പൂർത്തിയാക്കാനും കഴിയുന്നതാണ് പുതിയ മോഡലിന്റെ പ്രധാന പ്രത്യേകത. ഒക്ടോബർ 26, 2026നാണ് മോഡൽ അവതരിപ്പിച്ചത്.

എക്‌സ് എന്ന സാമൂഹിക മാധ്യമത്തിലൂടെ പ്രഖ്യാപനത്തെക്കുറിച്ച് പ്രതികരിച്ച ഓപ്പൺഎഐ സിഇഒ സാം ആൾട്ട്മാൻ, പുതിയ മോഡലിന്റെ കമ്പ്യൂട്ടർ ഉപയോഗ ശേഷിയിൽ പ്രത്യേക പ്രതീക്ഷയുണ്ടെന്ന് വ്യക്തമാക്കി. സാധാരണ ഉപയോക്താവിനെപ്പോലെ കമ്പ്യൂട്ടറിൽ ഇടപെട്ട് വിവിധ ജോലികൾ പൂർത്തിയാക്കാൻ കഴിയുന്ന എഐ സംവിധാനങ്ങളുടെ പുതിയ ഘട്ടമാണിതെന്നും അദ്ദേഹം പറഞ്ഞു.

കമ്പ്യൂട്ടറിൽ നേരിട്ട് പ്രവർത്തിക്കും

മുൻകാല എഐ മോഡലുകൾ പ്രധാനമായും ടെക്സ്റ്റ് സൃഷ്ടിക്കുന്നതിലും ചോദ്യങ്ങൾക്ക് മറുപടി നൽകുന്നതിലുമാണ് ശ്രദ്ധ കേന്ദ്രീകരിച്ചിരുന്നത്. എന്നാൽ, ജിപിടി-6.1 ടെറയ്ക്ക് കമ്പ്യൂട്ടർ സ്‌ക്രീനിലെ വിവരങ്ങൾ തിരിച്ചറിയാനും വിവിധ സോഫ്റ്റ്‌വെയറുകളുമായി നേരിട്ട് ഇടപെടാനും കഴിയും. സ്‌ക്രീനിലെ ബട്ടണുകളിൽ ക്ലിക്ക് ചെയ്യുക, വിവരങ്ങൾ ടൈപ്പ് ചെയ്യുക, വ്യത്യസ്ത ആപ്പുകൾക്കിടയിൽ മാറുക തുടങ്ങിയ പ്രവർത്തനങ്ങൾ മോഡലിന് നിർവഹിക്കാനാകും. ഒന്നിലധികം ഘട്ടങ്ങളുള്ള ജോലികൾ പൂർത്തിയാക്കാനും ഇതിലൂടെ സാധിക്കും.

ഇൻവോയ്‌സുകളിലെ വിവരങ്ങൾ അക്കൗണ്ടിങ് സോഫ്റ്റ്‌വെയറിലേക്ക് പകർത്തുക, ഓൺലൈൻ ഫോമുകൾ പൂരിപ്പിക്കുക, ബിസിനസ് പ്രൊപ്പോസലുകൾ തയ്യാറാക്കുക തുടങ്ങിയ ജോലികൾ ഓട്ടോമേറ്റ് ചെയ്യാൻ സ്ഥാപനങ്ങൾക്ക് ഈ സംവിധാനം ഉപയോഗിക്കാം. വാസ്തുവിദ്യാ രൂപരേഖകളെ ത്രിമാന മാതൃകകളാക്കി മാറ്റുന്നതുപോലുള്ള സങ്കീർണമായ ജോലികൾക്കും ഇത് പ്രയോജനപ്പെടുമെന്നാണ് പ്രതീക്ഷ.

വേഗം മൂന്നിരട്ടി; ചെലവിലും കുറവ്

മുൻ മോഡലായ ജിപിടി-5.6 ടെറയെ അപേക്ഷിച്ച് വേഗത്തിലും കാര്യക്ഷമതയിലും പുതിയ പതിപ്പ് വലിയ മുന്നേറ്റം കൈവരിച്ചതായി ഓപ്പൺഎഐ അവകാശപ്പെടുന്നു. ജിപിടി-6.1 സോൾ, ജിപിടി-6 ആസ്ട്ര തുടങ്ങിയ കൂടുതൽ ശക്തമായ മോഡലുകളെ അപേക്ഷിച്ച് ശരാശരി മൂന്ന് മടങ്ങ് വേഗത്തിൽ ജോലികൾ പൂർത്തിയാക്കാൻ ടെറയ്ക്ക് കഴിയുമെന്നാണ് കമ്പനിയുടെ വിശദീകരണം. ഡെവലപ്പർമാർക്ക് പുതിയ മോഡൽ ഉപയോഗിച്ച് ആപ്പുകൾ നിർമിക്കുന്നതിനുള്ള ചെലവും കുറച്ചിട്ടുണ്ട്. ആപ്ലിക്കേഷൻ പ്രോഗ്രാമിങ് ഇന്റർഫേസ് (എപിഐ) ഉപയോഗത്തിനുള്ള നിരക്ക് മുൻ പതിപ്പിനെ അപേക്ഷിച്ച് 50 ശതമാനം കുറച്ചു. 10 ലക്ഷം ഇൻപുട്ട് ടോക്കണുകൾക്ക് 1 ഡോളറും 10 ലക്ഷം ഔട്ട്പുട്ട് ടോക്കണുകൾക്ക് 5 ഡോളറുമാണ് പുതിയ നിരക്ക്. വലിയ തോതിൽ ഡിജിറ്റൽ ജോലികൾ ഓട്ടോമേറ്റ് ചെയ്യുന്ന കമ്പനികൾക്ക് ചെലവ് കുറയ്ക്കാൻ ഈ മാറ്റം സഹായിച്ചേക്കും.

പിഴവുകൾ കുറച്ചു; കോഡിങ്ങിലും മുന്നേറ്റം

പുതിയ മോഡലിന്റെ കൃത്യതയിലും ഗണ്യമായ പുരോഗതിയുണ്ടായതായി ഓപ്പൺഎഐയുടെ ആഭ്യന്തര പരിശോധനകൾ വ്യക്തമാക്കുന്നു. ലളിതമായ ജോലികൾ ചെയ്യുമ്പോഴുള്ള പിഴവുകളുടെ നിരക്ക് മുൻ പതിപ്പിലെ 53.6 ശതമാനത്തിൽനിന്ന് 16.7 ശതമാനമായി കുറഞ്ഞു. പരമാവധി റീസണിങ് ശേഷി ഉപയോഗിക്കുമ്പോൾ പിഴവുകളുടെ നിരക്ക് 4.3 ശതമാനമായി താഴ്ന്നതായും കമ്പനി അവകാശപ്പെടുന്നു. സങ്കീർണമായ കമാൻഡ് ലൈൻ പരിശോധനകളിൽ മുൻ പതിപ്പിന്റെ ഇരട്ടിയിലധികം സ്കോർ നേടാനും പുതിയ മോഡലിന് കഴിഞ്ഞിട്ടുണ്ട്. ഇതോടെ ഗിറ്റ്ഹബ് കോപൈലറ്റ് പോലുള്ള പ്ലാറ്റ്‌ഫോമുകളിലൂടെ പ്രോഗ്രാമർമാർക്കും ജിപിടി-6.1 ടെറ ലഭ്യമാക്കിത്തുടങ്ങി.

ഓപ്പൺഎഐ മോഡലുകളുടെ നിരയിൽ ടെറ എവിടെ?

ലൂണ, ടെറ, സോൾ, ആസ്ട്ര എന്നിവ ഉൾപ്പെടുന്നതാണ് ഓപ്പൺഎഐയുടെ എഐ മോഡൽ നിര. ലളിതമായ ആവശ്യങ്ങൾക്കുള്ള മോഡലാണ് ലൂണ. കൂടുതൽ സങ്കീർണവും വലിയ തോതിലുള്ളതുമായ ജോലികൾക്കാണ് സോൾ, ആസ്ട്ര മോഡലുകൾ രൂപകൽപ്പന ചെയ്തിരിക്കുന്നത്. ഇവയ്ക്കിടയിൽ വേഗവും ശേഷിയും ചെലവും സമന്വയിപ്പിക്കുന്ന മധ്യനിര മോഡലായാണ് ടെറയെ അവതരിപ്പിക്കുന്നത്. കഴിഞ്ഞ മാസം സോൾ, ലൂണ മോഡലുകൾ പുതുക്കിയതിന് പിന്നാലെയാണ് ടെറയെ ജിപിടി-6.1 തലമുറയിലേക്ക് ഉയർത്തിയത്.

ചാറ്റ്ജിപിടിയിലും കോഡെക്സിലും ലഭ്യമാകും

ചാറ്റ്ജിപിടി പ്ലസ്, പ്രോ, എന്റർപ്രൈസ്, എഡ്യൂ സബ്സ്ക്രിപ്ഷനുകളുള്ള ഉപയോക്താക്കൾക്ക് ചാറ്റ്ജിപിടി വർക്ക്, കോഡെക്സ് എന്നിവയിലൂടെ ജിപിടി-6.1 ടെറ ഉപയോഗിക്കാനാകുമെന്ന് കമ്പനി അറിയിച്ചു. ഓപ്പൺഎഐയുടെ എപിഐ വഴിയും ആമസോൺ ബെഡ്‌റോക്ക് വഴിയും മോഡൽ ലഭ്യമാക്കിയിട്ടുണ്ട്. ആവർത്തിച്ച് ചെയ്യേണ്ട ഡിജിറ്റൽ ജോലികൾ എഐയെ ഏൽപ്പിച്ച് സമയം ലാഭിക്കുകയാണ് പുതിയ മോഡലിന്റെ പ്രധാന ലക്ഷ്യം. കമ്പ്യൂട്ടറിലെ ജോലികൾ സ്വയം പൂർത്തിയാക്കാൻ കഴിയുന്ന എഐ സംവിധാനങ്ങളുടെ വളർച്ചയിൽ ജിപിടി-6.1 ടെറ എത്രത്തോളം സ്വാധീനം ചെലുത്തുമെന്നതാണ് ഇനി ശ്രദ്ധേയമാകുന്നത്.

ജനുവരി ഒന്നുമുതൽ ഈ ഫോണുകളിൽ വാട്ട്‌സ്ആപ്പ് പ്രവർത്തിക്കുന്നത് നിർത്തും; പുതിയ സിം ബൈൻഡിങ് നിയമം

Prashobh Prasannan — Fri, 23 Oct 2026 13:13:14 +0530

വാട്‍സാപ്പ്, ടെലിഗ്രാം ഉപയോക്താക്കൾക്ക് നിർണായകമാകുന്ന സിം ബൈൻഡിങ് നിയമങ്ങൾ നടപ്പാക്കാനൊരുങ്ങി കേന്ദ്ര സർക്കാർ. പുതിയ നിർദേശങ്ങൾ പ്രാബല്യത്തിൽ വരുന്നതോടെ രജിസ്റ്റർ ചെയ്ത സിം കാർഡ് ഫോണിൽ ഇല്ലാതെ വൈഫൈ വഴി മാത്രം മെസേജിങ് ആപ്പുകൾ ഉപയോഗിക്കുന്നവർക്ക് നിയന്ത്രണങ്ങൾ നേരിടേണ്ടിവന്നേക്കാം. ടെലികോം വകുപ്പ് (DoT) നിർദേശിച്ച ചട്ടങ്ങൾ പാലിക്കാനുള്ള അവസാന തീയതി 2026 ഡിസംബർ 31 ആണ്. മൊബൈൽ നമ്പറും അതുമായി ബന്ധിപ്പിച്ചിട്ടുള്ള മെസേജിങ് അക്കൗണ്ടും തമ്മിലുള്ള ബന്ധം കൂടുതൽ ശക്തമാക്കുകയാണ് പുതിയ നിയമങ്ങളുടെ ലക്ഷ്യം. സിം കാർഡുകളുമായി ബന്ധിപ്പിച്ചുള്ള കെവൈസി പരിശോധനയിലൂടെ വ്യാജ അക്കൗണ്ടുകൾ ഉപയോഗിച്ചുള്ള തട്ടിപ്പുകൾ തടയാനും സർക്കാർ ലക്ഷ്യമിടുന്നു.

ഏതൊക്കെ ഫോണുകളെ ബാധിക്കും?

രജിസ്റ്റർ ചെയ്ത സിം കാർഡ് ഫോണിൽ ഇടാതെ വാട്‍സാപ്പോ ടെലിഗ്രാമോ ഉപയോഗിക്കുന്നവരെയാണ് പുതിയ വ്യവസ്ഥകൾ പ്രധാനമായും ബാധിക്കാൻ സാധ്യത. ഐഫോൺ, ആൻഡ്രോയിഡ് ഫോണുകൾ ഉൾപ്പെടെ വിവിധ ഉപകരണങ്ങളിൽ ഇത് ബാധകമായേക്കാം. എന്നാൽ ഏതൊക്കെ മോഡലുകളിൽ നിയന്ത്രണങ്ങൾ വരുമെന്ന കാര്യത്തിൽ ഔദ്യോഗികമായ വ്യക്തതയില്ല. ബന്ധപ്പെട്ട ആപ്പുകൾ നിയമം എങ്ങനെ നടപ്പാക്കുന്നു എന്നതിനെ ആശ്രയിച്ചായിരിക്കും നിയന്ത്രണങ്ങളുടെ വ്യാപ്‍തി.

സിം കാർഡ് ഇല്ലാത്ത ഐഫോണുകൾ തിരിച്ചറിയാൻ സഹായിക്കുന്ന മാറ്റങ്ങൾ ആപ്പിളിന്റെ ഐഒഎസ് സംവിധാനത്തിൽ ഉൾപ്പെടുത്തിയതായി റിപ്പോർട്ടുകളുണ്ട്. സെപ്റ്റംബറിൽ പുറത്തിറക്കിയ സോഫ്റ്റ്‌വെയർ അപ്‌ഡേറ്റുമായി ബന്ധപ്പെട്ടാണ് ഈ വിവരം പുറത്തുവന്നത്. ഒന്നിലധികം ഉപകരണങ്ങളിൽ വാട്‍സാപ്പ് ഉപയോഗിക്കുന്നവരും വിദേശയാത്രയ്ക്കിടെ മറ്റൊരു സിം കാർഡ് ഉപയോഗിക്കുന്നവരും വൈഫൈ മാത്രം ആശ്രയിക്കുന്നവരും തങ്ങളുടെ അക്കൗണ്ടുകളുടെ പ്രവർത്തനം പരിശോധിക്കുന്നത് നല്ലതാണ്.

ആറുമണിക്കൂർ ഇടവിട്ട് ലോഗൗട്ട് ചെയ്യുമോ?

2025 നവംബർ 28-നാണ് ടെലികോം വകുപ്പ് സിം ബൈൻഡിങ് സംബന്ധിച്ച നിർദേശം പുറപ്പെടുവിച്ചത്. തുടക്കത്തിൽ വാട്‍സാപ്പ് വെബ് പോലുള്ള സേവനങ്ങളിൽ ആറുമണിക്കൂർ കൂടുമ്പോൾ സ്വമേധയാ ലോഗൗട്ട് ചെയ്യണമെന്ന വ്യവസ്ഥയും ഉൾപ്പെടുത്തിയിരുന്നു. എന്നാൽ പിന്നീട് ഈ പൊതുവായ വ്യവസ്ഥ പിൻവലിക്കുകയും പകരം അപകടസാധ്യതയുടെ അടിസ്ഥാനത്തിൽ ലോഗൗട്ട് നടപ്പാക്കുന്ന രീതി കൊണ്ടുവരികയും ചെയ്തു. തട്ടിപ്പ് സംശയിക്കുന്ന സാഹചര്യങ്ങളിൽ സേവനം ഉടൻ അവസാനിപ്പിക്കാനും വ്യവസ്ഥയുണ്ട്. അതിനാൽ ആറുമണിക്കൂർ കൂടുമ്പോൾ വാട്‍സാപ്പ് വെബ് നിർബന്ധമായും ലോഗൗട്ട് ആകുമെന്ന് കരുതേണ്ടതില്ല.

എല്ലാ മെസേജിങ് ആപ്പുകളെയും ബാധിക്കുമോ?

വാട്‍സാപ്പ്, ടെലിഗ്രാം എന്നിവയാണ് പുതിയ വ്യവസ്ഥകളുടെ പരിധിയിൽ വരുന്നതായി റിപ്പോർട്ടുകളിലുള്ള പ്രധാന സേവനങ്ങൾ. സ്‍നാപ്‍ചാറ്റിന് സിം ബൈൻഡിങ് നിർബന്ധമില്ലെന്നാണ് റിപ്പോർട്ടുകൾ. സർക്കാർ നോട്ടീസുകളോട് സിഗ്നൽ പ്രതികരിച്ചിട്ടില്ലെന്നും വിവരങ്ങളുണ്ട്. ജനുവരി 1 മുതൽ ചില ഫോണുകളിൽ വാട്‍സാപ്പ് പൂർണമായും പ്രവർത്തനരഹിതമാകുമെന്ന് നിലവിലുള്ള വിവരങ്ങൾ സ്ഥിരീകരിക്കുന്നില്ല. രജിസ്റ്റർ ചെയ്ത സിം കാർഡ് ഫോണിൽ ലഭ്യമാണോ, ആപ്പിന് അത് പരിശോധിക്കാൻ കഴിയുമോ എന്നതിനെ ആശ്രയിച്ചായിരിക്കും ഉപയോക്താക്കൾക്ക് നിയന്ത്രണങ്ങൾ നേരിടേണ്ടിവരിക. ഡിസംബർ 31, 2026 ആണ് ചട്ടങ്ങൾ പാലിക്കാനുള്ള പ്രഖ്യാപിത അവസാന തീയതി.

ആന്ത്രോപിക്കിൽ സുരക്ഷാ വീഴ്ച: 12 മണിക്കൂറിൽ സംഭവിച്ചതെന്ത്?

Prashobh Prasannan — Tue, 27 Oct 2026 14:52:35 +0530

എഐ രംഗത്തെ പ്രമുഖ കമ്പനിയായ ആന്ത്രോപിക്കിന്റെ ആന്തരിക സംവിധാനങ്ങളിൽ വെറും 12 മണിക്കൂറിനുള്ളിൽ കടന്നുകയറി സൈബർ സുരക്ഷാ സ്റ്റാർട്ടപ്പായ കത്തീഡ്രൽ. ജീവനക്കാരുടെ വിവരങ്ങൾ, ശമ്പളവിവരങ്ങൾ, തൊഴിൽ വാഗ്ദാനങ്ങൾ, കമ്പനിയുടെ നൂതന എഐ മോഡലുകളെക്കുറിച്ചുള്ള ആന്തരിക സന്ദേശങ്ങൾ എന്നിവയിലേക്ക് പ്രവേശനം നേടിയെന്നാണ് റിപ്പോർട്ട്. സുരക്ഷാ വീഴ്ചകൾ കണ്ടെത്തുന്നതിനായി ആന്ത്രോപിക് പുറത്തുനിന്നുള്ള ഗവേഷകർക്കായി നടത്തിയ പരിശോധനാ പരിപാടിക്കിടെയാണ് സംഭവം കണ്ടെത്തിയത്.

ദ വാഷിങ്ടൺ പോസ്റ്റ് പുറത്തുവിട്ട കരട് റിപ്പോർട്ട് പ്രകാരം, കമ്പനിയുടെ ഭരണപരവും വിൽപ്പനയുമായി ബന്ധപ്പെട്ടതുമായ ജോലികൾക്കായി ഉപയോഗിക്കുന്ന സോഫ്റ്റ്‌വെയറുകളിലെ സുരക്ഷാ പിഴവുകൾ കണ്ടെത്താൻ കത്തീഡ്രൽ എഐ ഏജന്റുകളെ ഉപയോഗിച്ചു. 12 മണിക്കൂറിൽ താഴെ സമയംകൊണ്ട് നടത്തിയ പരിശോധനയിൽ യോഗങ്ങളുടെ സംഭാഷണരേഖകളും സ്ലാക്കിലെ ആന്തരിക സന്ദേശങ്ങളും ഉൾപ്പെടെയുള്ള വിവരങ്ങളിലേക്ക് പ്രവേശിക്കാനുള്ള വഴികൾ കണ്ടെത്തിയെന്നാണ് റിപ്പോർട്ട്.

ഉപഭോക്താക്കളുടെ ക്ലോഡ് സംഭാഷണങ്ങൾ സുരക്ഷിതമെന്ന് ആന്ത്രോപിക്

അമേരിക്കൻ സർക്കാരിന്റെ കാര്യക്ഷമതാ വകുപ്പിൽ പ്രവർത്തിച്ചിരുന്ന മുൻ ഉദ്യോഗസ്ഥർ ചേർന്ന് സ്ഥാപിച്ച കമ്പനിയാണ് കത്തീഡ്രൽ. സർക്കാർ ഏജൻസികൾക്കും കോർപ്പറേറ്റ് സ്ഥാപനങ്ങൾക്കുമായി എഐ അധിഷ്ഠിത സൈബർ സുരക്ഷാ ഉപകരണങ്ങളാണ് കമ്പനി വികസിപ്പിക്കുന്നത്. കമ്പനിയുടെ വിൽപ്പന, മാനവവിഭവശേഷി, വിവരസാങ്കേതികവിദ്യ എന്നീ വിഭാഗങ്ങളിലെ പരിമിതമായ സംവിധാനങ്ങളിലേക്ക് ഗവേഷകർ പ്രവേശനം നേടിയതായി ആന്ത്രോപിക് സ്ഥിരീകരിച്ചു. ചില ഉപഭോക്താക്കളുടെയും പങ്കാളികളുടെയും ബിസിനസ് ബന്ധപ്പെടാനുള്ള വിവരങ്ങളും അടിസ്ഥാന ഉപയോക്തൃ അക്കൗണ്ട് രേഖകളും ഇതിൽ ഉൾപ്പെട്ടിരുന്നു.

എന്നാൽ ഉപഭോക്താക്കൾ ക്ലോഡ് ചാറ്റ്ബോട്ടുമായി നടത്തിയ സംഭാഷണങ്ങളിലേക്കോ എഐ നൽകിയ മറുപടികളിലേക്കോ പ്രവേശനം ലഭിച്ചിട്ടില്ലെന്ന് ആന്ത്രോപിക് വ്യക്തമാക്കി. കമ്പനിയുടെ എഐ സംവിധാനങ്ങളുടെ സോഴ്‌സ് കോഡും മോഡൽ വെയ്റ്റുകളും സുരക്ഷിതമായിരുന്നുവെന്നും കമ്പനി അറിയിച്ചു. കത്തീഡ്രലിന്റെ ചില പ്രവർത്തനങ്ങൾ തങ്ങളുടെ നിരീക്ഷണ സംവിധാനങ്ങൾ നേരത്തെ കണ്ടെത്തിയിരുന്നുവെന്നും വിവരം ലഭിച്ച അതേ ദിവസം തന്നെ പ്രവേശനം തടഞ്ഞുവെന്നും ആന്ത്രോപിക് പ്രസ്താവനയിൽ പറഞ്ഞു. കത്തീഡ്രലിന് പുറമെ മറ്റാരെങ്കിലും ഈ സുരക്ഷാ പിഴവുകൾ ദുരുപയോഗം ചെയ്തതായി തെളിവില്ലെന്നും കമ്പനി വ്യക്തമാക്കി.

സുരക്ഷാ വീഴ്ചകൾ പരിഹരിച്ചശേഷം സോഫ്റ്റ്‌വെയറുകൾ പുനഃസ്ഥാപിച്ചു

പ്രശ്നം കണ്ടെത്തിയ ബിസിനസ് സോഫ്റ്റ്‌വെയറുകളുടെ പ്രവർത്തനം ആന്ത്രോപിക് താൽക്കാലികമായി നിർത്തിവച്ചു. സോഫ്റ്റ്‌വെയർ നിർമാതാക്കൾ സുരക്ഷാ പിഴവുകൾ പരിഹരിച്ചതായി സ്ഥിരീകരിച്ചശേഷമാണ് അവ വീണ്ടും പ്രവർത്തനക്ഷമമാക്കിയത്. സംഭവത്തെക്കുറിച്ച് ഫെഡറൽ ഉദ്യോഗസ്ഥർക്കും കമ്പനി വിവരങ്ങൾ നൽകി. സംഭവം ദേശീയ സുരക്ഷയുമായി ബന്ധപ്പെട്ട ആശങ്കകൾക്കും വഴിവെച്ചിട്ടുണ്ട്. റിപ്പോർട്ട് സർക്കാർ സംവിധാനങ്ങൾക്കുള്ളിൽ പ്രചരിച്ചതായി ട്രംപ് ഭരണകൂടത്തിലെ ഒരു മുതിർന്ന ഉദ്യോഗസ്ഥൻ ദ വാഷിങ്ടൺ പോസ്റ്റിനോട് പറഞ്ഞു.

എഐ കോഡിങ് സ്റ്റാർട്ടപ്പായ കോഗ്നിഷന്റെ ചീഫ് ഇൻഫർമേഷൻ സെക്യൂരിറ്റി ഓഫീസർ അലക്സ് സ്റ്റാമോസും മൂന്നാം കക്ഷി സോഫ്റ്റ്‌വെയറുകൾ കൈകാര്യം ചെയ്യുന്നതിലെ പോരായ്മകൾ ചൂണ്ടിക്കാട്ടി. പ്രശ്നം പരിഹരിക്കുക പ്രയാസകരമാണെങ്കിലും ആന്ത്രോപിക്കിന് കൂടുതൽ മികച്ച രീതിയിൽ പ്രവർത്തിക്കാമായിരുന്നുവെന്നാണ് അദ്ദേഹത്തിന്റെ പ്രതികരണം.

അതേസമയം, സംഭവത്തിന്റെ ദേശീയ സുരക്ഷാ പ്രത്യാഘാതങ്ങൾ കത്തീഡ്രൽ പെരുപ്പിച്ചുകാട്ടിയെന്ന് ആന്ത്രോപിക് ആരോപിച്ചു. സുരക്ഷാ പരിശോധനാ പരിപാടിയുടെ എല്ലാ ചട്ടങ്ങളും സ്റ്റാർട്ടപ്പ് പാലിച്ചില്ലെന്നും കമ്പനിയുടെ സംവിധാനങ്ങളിൽ നടത്തിയ എല്ലാ പ്രവർത്തനങ്ങളും വെളിപ്പെടുത്തിയില്ലെന്നും ആന്ത്രോപിക് പറഞ്ഞു. എന്നാൽ ഗവേഷണത്തിന് ആവശ്യമായ ഏറ്റവും കുറഞ്ഞ വിവരങ്ങളിലേക്കു മാത്രമാണ് പ്രവേശനം നേടിയതെന്നാണ് കത്തീഡ്രലിന്റെ വിശദീകരണം.

ക്ലോഡിന്റെ അനധികൃത പ്രവർത്തനങ്ങളും ആശങ്കയാകുന്നു

എഐ ഏജന്റുകൾക്ക് നിയന്ത്രണങ്ങൾ മറികടന്ന് പ്രവർത്തിക്കാൻ കഴിയുമെന്ന ആശങ്കകൾ ശക്തമാകുന്നതിനിടെയാണ് പുതിയ സംഭവം. സ്വന്തം എഐ മോഡലായ ക്ലോഡ് അനുമതിയില്ലാത്ത വിവരങ്ങൾ പരിശോധിച്ചതും പ്രവർത്തനങ്ങൾ നടത്തിയതുമായ സംഭവങ്ങളും ആന്ത്രോപിക് നേരത്തെ വെളിപ്പെടുത്തിയിട്ടുണ്ട്. അടുത്തിടെ അമേരിക്കയിലെ ജോർജിയ സംസ്ഥാനത്തിന്റെ വെബ്‌സൈറ്റിലെ പഴയ പതിപ്പിലുണ്ടായിരുന്ന സുരക്ഷാ പഴുത് കണ്ടെത്തി ക്ലോഡ് ആകെ വോട്ടുകളുടെ കണക്കുകളിലേക്ക് പ്രവേശിച്ചതായാണ് റിപ്പോർട്ട്. ഫീസ് അടച്ചശേഷം മാത്രം ലഭിക്കേണ്ട വിവരങ്ങളിലേക്ക് പ്രവേശിക്കാൻ സഹായിക്കുന്ന ഡിജിറ്റൽ ടോക്കൺ വെബ്‌സൈറ്റ് അനുവദിച്ചതായും ആന്ത്രോപിക് വിശദീകരിച്ചു.

എന്നാൽ വോട്ടർ രജിസ്ട്രേഷൻ സംവിധാനത്തിലേക്ക് ക്ലോഡ് കടന്നിട്ടില്ലെന്നും വ്യക്തിഗത വോട്ടർമാരുടെ വിവരങ്ങൾ ശേഖരിക്കുകയോ വോട്ടിങ് രേഖകളിൽ മാറ്റം വരുത്തുകയോ ചെയ്തിട്ടില്ലെന്നും കമ്പനി വ്യക്തമാക്കി. ആകെ വോട്ടുകളുടെ കണക്കുകൾ മാത്രമാണ് ലഭിച്ചതെന്നും സമാന സംഭവങ്ങൾ തടയാൻ സുരക്ഷാ സംവിധാനങ്ങൾ ശക്തമാക്കിയെന്നും ആന്ത്രോപിക് അറിയിച്ചു.

അമേരിക്കൻ സർക്കാർ ഏജൻസികളുടെ വെബ്‌സൈറ്റുകളിലുൾപ്പെടെ ടോക്കൺ അല്ലെങ്കിൽ ഫീസ് ഉപയോഗിച്ച് സംരക്ഷിച്ചിരുന്ന വിവരങ്ങളിലേക്ക് പ്രവേശിക്കാൻ ക്ലോഡ് നിയന്ത്രണങ്ങൾ മറികടന്ന സംഭവങ്ങൾ നേരത്തെയും റിപ്പോർട്ട് ചെയ്തിട്ടുണ്ട്. ഇവയുടെ യഥാർഥ ലോകത്തെ പ്രത്യാഘാതങ്ങൾ പരിമിതമായിരുന്നുവെന്നാണ് കമ്പനിയുടെ വിശദീകരണം.

ഇതിനുപുറമെ, പരിഹരിക്കപ്പെടാത്ത ഒരു കൊലപാതകത്തെക്കുറിച്ച് വ്യാജ വിവരം ഫിലാഡൽഫിയ പൊലീസിന് നൽകിയതായി ആന്ത്രോപിക്കിന്റെ ഒരു എഐ മോഡലിനെക്കുറിച്ച് റിപ്പോർട്ടുണ്ടായിരുന്നു. ഓഗസ്റ്റിൽ ഒരു എഐ മോഡൽ 19 വിസ അപേക്ഷകൾ സമർപ്പിച്ചതായി അമേരിക്കൻ സ്റ്റേറ്റ് ഡിപ്പാർട്ട്‌മെന്റും വെളിപ്പെടുത്തിയിരുന്നു. എഐ ഏജന്റുകൾക്ക് നൽകുന്ന അധികാരപരിധിയും അവയുടെ പ്രവർത്തനങ്ങൾ നിരീക്ഷിക്കുന്ന സംവിധാനങ്ങളും കൂടുതൽ ശക്തമാക്കേണ്ടതിന്റെ ആവശ്യകതയാണ് ഇത്തരം സംഭവങ്ങൾ ഉയർത്തിക്കാട്ടുന്നത്.

എഐ കമ്പനികൾ തകരുമോ? ഇലോൺ മസ്‌കിന്റെ ആ പ്രവചനം

Prashobh Prasannan — Mon, 26 Oct 2026 15:23:29 +0530

ആർട്ടിഫിഷ്യൽ ഇന്റലിജൻസ് മേഖലയിൽ വൻ നിക്ഷേപങ്ങൾ ഒഴുകുന്നതിനിടെ ചെറുകിട എഐ കമ്പനികൾക്ക് മുന്നറിയിപ്പുമായി ഇലോൺ മസ്‌ക്. എഐ ചിപ്പുകൾ വാടകയ്ക്ക് നൽകുന്ന നൂറുകണക്കിന് ക്ലൗഡ് കമ്പനികൾ അടുത്ത കാലത്ത് കടുത്ത സാമ്പത്തിക പ്രതിസന്ധിയിലാകുമെന്നാണ് മസ്‌കിന്റെ പ്രവചനം. അതേസമയം, ജിപിയു വാങ്ങുന്നതിനായി തന്റെ കമ്പനിയായ സ്‌പേസ് എക്‌സ് 40 ബില്യൺ ഡോളറിന്റെ വായ്പാ ഇടപാട് പൂർത്തിയാക്കിയതായും അദ്ദേഹം വെളിപ്പെടുത്തി.

200ലധികം കമ്പനികൾ പ്രതിസന്ധിയിൽ?

എക്‌സ് പ്ലാറ്റ്‌ഫോമിൽ നടന്ന ചർച്ചയ്ക്കിടെയാണ് എഐ അടിസ്ഥാനസൗകര്യ മേഖലയിലെ പ്രതിസന്ധിയെക്കുറിച്ച് മസ്‌ക് മുന്നറിയിപ്പ് നൽകിയത്. നിർമാണം പാതിവഴിയിൽ നിലച്ച ഡാറ്റാ സെന്ററുകളിൽ കമ്പ്യൂട്ടിങ് ശേഷി ഉപയോഗിക്കപ്പെടാതെ കിടക്കുന്ന സാഹചര്യം വ്യാപകമാകുമെന്ന് അദ്ദേഹം പറഞ്ഞു. എഐ ഡാറ്റാ സെന്ററുകളെ മാത്രം ആശ്രയിച്ച് പ്രവർത്തിക്കുന്ന കമ്പനികൾക്ക് വായ്പ നൽകാൻ ധനകാര്യ സ്ഥാപനങ്ങൾ ഇപ്പോൾ വലിയ താൽപര്യം കാണിക്കുന്നില്ലെന്നും മസ്‌ക് ചൂണ്ടിക്കാട്ടി. ഇതോടെ മറ്റ് കമ്പനികൾക്ക് എഐ ചിപ്പുകൾ വാടകയ്ക്ക് നൽകുന്ന 200ലധികം നിയോക്ലൗഡ് കമ്പനികൾ കൂട്ടത്തകർച്ചയും ലയനങ്ങളും നേരിടേണ്ടിവരുമെന്നാണ് അദ്ദേഹത്തിന്റെ വിലയിരുത്തൽ.

ഡാറ്റാ സെന്ററുകൾക്ക് വേണ്ടത് കോടികൾ

എഐ ഡാറ്റാ സെന്ററുകൾ സ്ഥാപിക്കണമെങ്കിൽ വൻതുക നിക്ഷേപിക്കേണ്ടതുണ്ട്. അത്യാധുനിക ഗ്രാഫിക്സ് പ്രോസസിങ് യൂണിറ്റുകൾ അഥവാ ജിപിയു വാങ്ങുന്നതിനും അവ പ്രവർത്തിപ്പിക്കാനുള്ള വൈദ്യുതി ഉറപ്പാക്കുന്നതിനുമാണ് പ്രധാനമായും പണം ചെലവാകുന്നത്. എന്നാൽ, ഇത്തരം പദ്ധതികൾക്ക് വായ്പ നൽകുമ്പോൾ കമ്പനികൾക്ക് മറ്റ് സ്ഥിരമായ വരുമാന സ്രോതസുകൾ ഉണ്ടോയെന്ന് വായ്പാദാതാക്കൾ പരിശോധിക്കുന്നുണ്ട്. എഐ മേഖലയിലെ വരുമാനത്തെ മാത്രം ആശ്രയിക്കുന്ന സ്ഥാപനങ്ങൾക്ക് ഇനി മുന്നോട്ടുള്ള യാത്ര എളുപ്പമാകില്ലെന്ന സൂചനയാണിത്.

സ്‌പേസ് എക്‌സിന് 40 ബില്യൺ ഡോളറിന്റെ വായ്പ

ചെറുകിട കമ്പനികൾ പണം കണ്ടെത്താൻ ബുദ്ധിമുട്ടുമ്പോൾ, ജിപിയു വാങ്ങുന്നതിനായി 40 ബില്യൺ ഡോളറിന്റെ വായ്പാ ഇടപാട് പൂർത്തിയാക്കിയതായി മസ്‌ക് വ്യക്തമാക്കി. സ്‌പേസ് എക്‌സിന്റെ ക്രെഡിറ്റ് നിലവാരവും സ്റ്റാർലിങ്ക് ഉപഗ്രഹ ഇന്റർനെറ്റ് സേവനത്തിൽനിന്നും റോക്കറ്റ് വിക്ഷേപണങ്ങളിൽനിന്നുമുള്ള വരുമാനവുമാണ് വായ്പ ലഭിക്കാൻ സഹായിച്ചതെന്ന് അദ്ദേഹം പറഞ്ഞു. മറ്റ് മേഖലകളിൽനിന്ന് സ്ഥിരമായ വരുമാനം ലഭിക്കുന്നതിനാൽ സ്‌പേസ് എക്‌സിനെ വായ്പാദാതാക്കൾ സുരക്ഷിതമായ നിക്ഷേപമായാണ് കാണുന്നതെന്നും മസ്‌കിന്റെ പ്രതികരണം വ്യക്തമാക്കുന്നു.

2027 നിർണായക വർഷമാകുമോ?

വെഞ്ചർ ക്യാപിറ്റലിസ്റ്റ് ചമത് പാലിഹാപിറ്റിയയും എഐ അടിസ്ഥാനസൗകര്യ മേഖലയിലെ പ്രതിസന്ധിയെക്കുറിച്ച് മുന്നറിയിപ്പ് നൽകിയിട്ടുണ്ട്. മോശം നിക്ഷേപങ്ങളും മതിയായ മൂലധനമില്ലാത്ത കമ്പനികളും പുറത്താകുന്നതോടെ 2027 പ്രക്ഷുബ്ധമായ വർഷമാകുമെന്നാണ് അദ്ദേഹത്തിന്റെ വിലയിരുത്തൽ. വൈദ്യുതി ശൃംഖലകളിലെ ശേഷിക്കുറവ്, പൊതുജനങ്ങളുടെ എതിർപ്പ്, ഭരണപരമായ തടസങ്ങൾ എന്നിവ ഡാറ്റാ സെന്ററുകളുടെ നിർമാണം വൈകിപ്പിക്കുന്നുണ്ട്. വൈദ്യുതി ലഭ്യമാകാത്തതിനാൽ വിലകൂടിയ എഐ ചിപ്പുകൾ ഉപയോഗിക്കാനാകാതെ കിടക്കുന്ന സാഹചര്യവും ഉണ്ടായേക്കാം. വൻതോതിൽ നിക്ഷേപം നടത്താൻ ശേഷിയുള്ളതും സ്ഥിരമായ വരുമാനമുള്ളതുമായ കമ്പനികൾക്ക് മുൻതൂക്കം ലഭിക്കുമ്പോൾ, ചെറുകിട സ്ഥാപനങ്ങൾക്ക് എഐ മത്സരത്തിൽ പിടിച്ചുനിൽക്കുക കൂടുതൽ ദുഷ്‍കരമാകുമെന്നാണ് വിലയിരുത്തൽ.

രാജിവെക്കാൻ ജീവനക്കാർക്ക് പണം വാഗ്‍ദാനം ചെയ്ത് മൈക്രോസോഫ്റ്റ്

Prashobh Prasannan — Fri, 30 Oct 2026 11:32:49 +0530

ചെലവ് കുറയ്ക്കുന്നതിനും പ്രവർത്തനരീതികൾ പുനഃസംഘടിപ്പിക്കുന്നതിനുമായി ജീവനക്കാർക്ക് സ്വയം വിരമിക്കൽ ഓഫറുമായി മൈക്രോസോഫ്റ്റ്. ആർട്ടിഫിഷ്യൽ ഇന്റലിജൻസ് മേഖലയിൽ കൂടുതൽ ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് കമ്പനിയുടെ പുതിയ നീക്കം. ഏകദേശം 60,000 ജീവനക്കാർക്കാണ് കമ്പനി സ്വമേധയാ ജോലി ഉപേക്ഷിക്കാനുള്ള അവസരം നൽകിയിരിക്കുന്നത്. എന്നാൽ ഇതിൽ 3,000 പേരോ അതിൽ താഴെയോ മാത്രമേ ഓഫർ സ്വീകരിക്കൂ എന്നാണ് കമ്പനി പ്രതീക്ഷിക്കുന്നത് എന്നാണ് റിപ്പോർട്ടുകൾ.

സാമ്പത്തിക ആനുകൂല്യങ്ങളുമായി സ്വമേധയാ പിരിഞ്ഞുപോകാം

ഒക്ടോബർ 26 തിങ്കളാഴ്ച മൈക്രോസോഫ്റ്റിന്റെ ചീഫ് പീപ്പിൾ ഓഫീസർ എമി കോൾമാൻ ആഭ്യന്തര മെമ്മോയിലൂടെയാണ് പുതിയ പദ്ധതി പ്രഖ്യാപിച്ചത്. വൊളന്ററി എക്സിറ്റ് ഓഫർ എന്ന പേരിലുള്ള പദ്ധതിയിലൂടെ അർഹരായ ജീവനക്കാർക്ക് സാമ്പത്തിക ആനുകൂല്യങ്ങളോടെ കമ്പനിയിൽനിന്ന് സ്വമേധയാ പിരിഞ്ഞുപോകാം. ഇന്ത്യ, അമേരിക്ക, ബ്രിട്ടൻ, കാനഡ എന്നീ രാജ്യങ്ങളിലെ തിരഞ്ഞെടുത്ത ജീവനക്കാർക്കാണ് ഓഫർ ലഭിക്കുക. കമ്പനിയുടെ ആകെ ജീവനക്കാരിൽ നാലിലൊന്നിലധികം വരുന്ന ഏകദേശം 60,000 പേരാണ് പദ്ധതിയുടെ പരിധിയിലുള്ളത്. ജോലി ഉപേക്ഷിക്കുന്നവർക്ക് സാമ്പത്തിക സഹായത്തിനൊപ്പം കരിയർ ആസൂത്രണത്തിനുള്ള പിന്തുണയും കമ്പനി വാഗ്‍ദാനം ചെയ്യുന്നുണ്ട്.

ഓഫർ സ്വീകരിക്കുക 3,000 പേരിൽ താഴെയെന്ന് കമ്പനി

എന്നാൽ ഭൂരിഭാഗം ജീവനക്കാരും ഓഫർ സ്വീകരിക്കില്ലെന്നാണ് മൈക്രോസോഫ്റ്റിന്റെ പ്രതീക്ഷ. 'ബിസിനസ് ഇൻസൈഡർ' റിപ്പോർട്ട് പ്രകാരം, കമ്പനിയുടെ ചീഫ് ഫിനാൻഷ്യൽ ഓഫീസർ എമി ഹുഡ് വളരെ കുറച്ച് ജീവനക്കാർ മാത്രമേ ഈ അവസരം പ്രയോജനപ്പെടുത്തുകയുള്ളൂവെന്ന് വ്യക്തമാക്കിയിട്ടുണ്ട്. മൈക്രോസോഫ്റ്റിലെ വളർച്ചാ സാധ്യതകളാണ് ജീവനക്കാരെ കമ്പനിയിൽ തുടരാൻ പ്രേരിപ്പിക്കുന്നതെന്നാണ് വിലയിരുത്തൽ. 3,000 പേരോ അതിൽ താഴെയോ മാത്രമേ ഓഫർ സ്വീകരിക്കൂവെന്ന് മൈക്രോസോഫ്റ്റ് വക്താവും പ്രസിദ്ധീകരണത്തോട് സ്ഥിരീകരിച്ചിട്ടുണ്ട്. ജീവനക്കാർക്ക് സ്വന്തം താൽപ്പര്യപ്രകാരം കമ്പനിയിൽനിന്ന് പിരിഞ്ഞുപോകാനുള്ള അവസരം നൽകുകയാണ് പദ്ധതിയുടെ ലക്ഷ്യമെന്ന് എമി ഹുഡ് ആഭ്യന്തര സന്ദേശത്തിൽ വ്യക്തമാക്കി.

ആർക്കൊക്കെയാണ് ആനുകൂല്യം ലഭിക്കുക?

അമേരിക്ക, കാനഡ, ഇന്ത്യ, ബ്രിട്ടൻ എന്നിവിടങ്ങളിൽ ജോലി ചെയ്യുന്ന 70-ാം ഗ്രേഡോ അതിൽ താഴെയോ ഉള്ള അർഹരായ ജീവനക്കാർക്കാണ് ഓഫർ ലഭിക്കുക. ഇവിടെ 70 എന്നത് ജീവനക്കാരുടെ പ്രായമോ പ്രവൃത്തിപരിചയമോ അല്ല. കമ്പനിയിലെ തസ്തികകളുടെ ചുമതലയും സീനിയോറിറ്റിയും അടിസ്ഥാനമാക്കിയുള്ള തൊഴിൽ ഗ്രേഡാണിത്. എന്നാൽ എല്ലാ വിഭാഗങ്ങളിലെയും ജീവനക്കാർക്ക് പദ്ധതിയുടെ ആനുകൂല്യം ലഭിക്കില്ല. എക്സ്ബോക്സ്, വിൻഡോസ്, കോപൈലറ്റ്, ധനകാര്യ വിഭാഗങ്ങൾ തുടങ്ങിയവയിലെ തിരഞ്ഞെടുത്ത ടീമുകൾ പദ്ധതിയിൽ ഉൾപ്പെടുന്നുണ്ട്. ഡാറ്റാ സെന്ററുകൾ, വിൽപ്പന, വിപണനം, സൈബർ സുരക്ഷ, ക്വാണ്ടം കമ്പ്യൂട്ടിങ് തുടങ്ങിയ മേഖലകളിലെ ചില ജീവനക്കാർ ഒഴിവാക്കപ്പെട്ടതായും റിപ്പോർട്ടുകളുണ്ട്.

ഡിസംബറോടെ തീരുമാനമെടുക്കണം

ഈ വർഷം ആദ്യം അമേരിക്കയിൽ വിരമിക്കൽ പ്രായമെത്തിയ ജീവനക്കാർക്കായി മൈക്രോസോഫ്റ്റ് സമാനമായ പദ്ധതി പ്രഖ്യാപിച്ചിരുന്നു. അന്ന് ഓഫറിന് അർഹരായ ഏകദേശം 8,750 ജീവനക്കാരിൽ 30 ശതമാനത്തിലധികം പേർ പദ്ധതി സ്വീകരിച്ചു. തുടർന്നുണ്ടായ പിരിച്ചുവിടലുകളുടെ ആഘാതം കുറയ്ക്കാനും ഈ നീക്കം സഹായിച്ചിരുന്നു. എന്നാൽ ഇത്തവണ ഓഫർ സ്വീകരിക്കുന്നവരുടെ എണ്ണം വളരെ കുറവായിരിക്കുമെന്നാണ് കമ്പനിയുടെ കണക്കുകൂട്ടൽ. അർഹരായ ജീവനക്കാരിൽ ഏകദേശം അഞ്ച് ശതമാനം മാത്രമേ പദ്ധതി പ്രയോജനപ്പെടുത്തൂ എന്നാണ് പ്രതീക്ഷിക്കുന്നത്. ഓഫർ സ്വീകരിക്കണോ എന്ന കാര്യത്തിൽ ജീവനക്കാർക്ക് ഡിസംബർ ആദ്യവാരം വരെ തീരുമാനമെടുക്കാം. പദ്ധതി സ്വീകരിക്കുന്നവർ വർഷാവസാനത്തോടെ കമ്പനിയിൽനിന്ന് പിരിഞ്ഞുപോകുമെന്നാണ് റിപ്പോർട്ടുകൾ.

ടെക് മഹീന്ദ്രയും ഇലോൺ മസ്‌കും ഒന്നിക്കുന്നു; ലക്ഷ്യം എന്ത്?

Prashobh Prasannan — Sat, 24 Oct 2026 13:23:46 +0530

ഇലോൺ മസ്‌കിന്റെ സ്പേസ് എക്സ് എസ് ഐയുമായി പങ്കാളിത്തം പ്രഖ്യാപിച്ച് ഇന്ത്യൻ ഐടി കമ്പനിയായ ടെക് മഹീന്ദ്ര. കരാറിന്റെ ഭാഗമായി സോഫ്റ്റ്‌വെയർ വികസനത്തിനും പഴയ സാങ്കേതിക സംവിധാനങ്ങൾ നവീകരിക്കാനും ഗ്രോക്ക് ബിൽഡ് എന്ന എഐ കോഡിങ് ഏജന്റിനെ ടെക് മഹീന്ദ്ര ഉപയോഗിക്കും. ബിസിനസ് പ്രവർത്തനങ്ങളിൽ ആർട്ടിഫിഷ്യൽ ഇന്‍റലിജൻസ് ഉപയോഗം വർധിപ്പിക്കാനും സോഫ്റ്റ്‌വെയർ വികസനം വേഗത്തിലാക്കാനുമാണ് നീക്കം.

ഇന്ത്യൻ ഐടി കമ്പനിയായ ടെക് മഹീന്ദ്രയുമായി സ്പേസ് എക്സ് എസ് ഐ സഹകരിക്കുന്ന ആദ്യ അവസരമാണിത്. എന്നാൽ കരാറിന്റെ സാമ്പത്തിക വശങ്ങൾ സംബന്ധിച്ച വിവരങ്ങൾ ഇരു കമ്പനികളും പുറത്തുവിട്ടിട്ടില്ല. എഐയുടെ അതിവേഗ വളർച്ച ഐടി സേവന മേഖലയിലെ കമ്പനികളുടെ ഭാവിയെക്കുറിച്ച് ചർച്ചകൾക്ക് വഴിയൊരുക്കുന്നതിനിടെയാണ് പുതിയ പങ്കാളിത്തം.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

സോഫ്റ്റ്‌വെയർ വികസനത്തിന് ഗ്രോക്ക് എഐ

ഗ്രോക്ക് എഐയുടെ സഹായത്തോടെ സോഫ്റ്റ്‌വെയർ വികസനത്തിന്റെ വേഗവും ഉൽപ്പാദനക്ഷമതയും വർധിപ്പിക്കുകയാണ് പങ്കാളിത്തത്തിന്റെ പ്രധാന ലക്ഷ്യം. സാങ്കേതികവിദ്യ, ടെലികോം, ബാങ്കിങ്, ധനകാര്യ സേവനങ്ങൾ, നിർമാണം തുടങ്ങിയ മേഖലകളിലെ ഉപഭോക്താക്കൾക്കായി പ്രത്യേക പരിഹാരങ്ങൾ വികസിപ്പിക്കാനും ടെക് മഹീന്ദ്ര ഗ്രോക്ക് ഉപയോഗിക്കും.

സോഫ്റ്റ്‌വെയർ വികസനത്തിന്റെ വിവിധ ഘട്ടങ്ങളിൽ പ്രവർത്തിക്കാൻ ഗ്രോക്ക് ബിൽഡിന് കഴിയും. സാങ്കേതിക ആവശ്യകതകൾ മനസിലാക്കുക, കോഡ് തയ്യാറാക്കുക, പരിശോധനകൾക്ക് പിന്തുണ നൽകുക, നിലവിലുള്ള ആപ്ലിക്കേഷനുകൾ പുതുക്കാൻ എൻജിനീയർമാരെ സഹായിക്കുക തുടങ്ങിയവ ഇതിൽ ഉൾപ്പെടുന്നു. ചെറിയ കോഡിങ് ജോലികൾക്കു പകരം സോഫ്റ്റ്‌വെയർ വികസനത്തിന്റെ മുഴുവൻ പ്രക്രിയയിലും എഐയുടെ കഴിവുകൾ പ്രയോജനപ്പെടുത്താനാണ് ടെക് മഹീന്ദ്രയുടെ പദ്ധതി.

പഴയ സാങ്കേതിക സംവിധാനങ്ങൾ നവീകരിക്കും

പതിറ്റാണ്ടുകളായി ഉപയോഗിക്കുന്ന പഴയ സോഫ്റ്റ്‌വെയർ സംവിധാനങ്ങളുടെ നവീകരണത്തിനും പുതിയ പങ്കാളിത്തം പ്രാധാന്യം നൽകും. ഇത്തരം സംവിധാനങ്ങളിൽ ദശലക്ഷക്കണക്കിന് കോഡ് വരികൾ ഉണ്ടായിരിക്കാം. ഡാറ്റാബേസുകൾ, പണമിടപാട് സംവിധാനങ്ങൾ, മറ്റ് ബിസിനസ് പ്രവർത്തനങ്ങൾ എന്നിവയുമായി ബന്ധപ്പെട്ടു പ്രവർത്തിക്കുന്നതിനാൽ ഇവ നവീകരിക്കുന്നത് സങ്കീർണമായ ജോലിയാണ്.

നിലവിലുള്ള കോഡ് വിശകലനം ചെയ്യുക, സിസ്റ്റങ്ങളുടെ പ്രവർത്തനം രേഖപ്പെടുത്തുക, വിവിധ ഘടകങ്ങൾ തമ്മിലുള്ള ബന്ധം കണ്ടെത്തുക, ആപ്ലിക്കേഷനുകൾ പുതുതായി വികസിപ്പിക്കാനോ മറ്റൊരു സംവിധാനത്തിലേക്ക് മാറ്റാനോ എൻജിനീയർമാരെ സഹായിക്കുക തുടങ്ങിയ ജോലികളിൽ എഐ ഉപകരണങ്ങൾ പ്രയോജനപ്പെടും. ജീവനക്കാർക്ക് പരിശീലനവും സർട്ടിഫിക്കേഷൻ പരിപാടികളും നൽകുമെന്നും ടെക് മഹീന്ദ്ര വ്യക്തമാക്കിയിട്ടുണ്ട്.

130ലധികം കമ്പനികൾ പങ്കാളി ശൃംഖലയിൽ

സ്പേസ് എക്സ് സൂപ്പർ ഇന്റലിജൻസ് പാർട്‍ണർ നെറ്റ്‌വർക്കിന്റെ ഭാഗമായാണ് പുതിയ സഹകരണം. ഗ്രോക്ക് ഉപയോഗിച്ചുള്ള ഉൽപ്പന്നങ്ങളും സേവനങ്ങളും സംയോജന സംവിധാനങ്ങളും വികസിപ്പിക്കുന്ന കമ്പനികളെ ഒരുമിപ്പിക്കുകയാണ് ഈ ശൃംഖലയുടെ ലക്ഷ്യം. ആദ്യഘട്ടത്തിൽ 130ൽ അധികം കമ്പനികൾ ആദ്യകാല പ്രവേശന പരിപാടിയിൽ പങ്കുചേർന്നു. എൻവിഡിയ, ഡാറ്റാബ്രിക്സ്, എൻടിടി ഡാറ്റ തുടങ്ങിയവയാണ് പ്രധാന പങ്കാളികൾ.

എഐ രംഗത്ത് സജീവമായി ഇന്ത്യൻ ഐടി കമ്പനികൾ

ഗൂഗിൾ ക്ലൗഡ്, മൈക്രോസോഫ്റ്റ് തുടങ്ങിയ കമ്പനികളുമായും ടെക് മഹീന്ദ്ര നേരത്തെ കരാറുകളിൽ ഏർപ്പെട്ടിട്ടുണ്ട്. നിർമിതബുദ്ധി അടിസ്ഥാനമാക്കിയുള്ള പ്ലാറ്റ്‌ഫോമുകളും കമ്പനി വികസിപ്പിച്ചിട്ടുണ്ട്. മറ്റ് ഇന്ത്യൻ ഐടി കമ്പനികളും എഐ രംഗത്തെ പ്രമുഖരുമായി സഹകരിക്കുന്നുണ്ട്. ഓപ്പൺഎഐ, ആന്ത്രോപിക് എന്നീ കമ്പനികളുമായി ടിസിഎസിന് കരാറുകളുണ്ട്. വിപ്രോയും സമാനമായ പങ്കാളിത്തങ്ങൾ ഉറപ്പാക്കിയിട്ടുണ്ട്. ഐടി സേവന മേഖലയിൽ എഐയുടെ സ്വാധീനം വർധിക്കുന്ന സാഹചര്യത്തിൽ പുതിയ സാങ്കേതികവിദ്യകൾ ബിസിനസ് പ്രവർത്തനങ്ങളിൽ ഉൾപ്പെടുത്തുന്നത് കമ്പനികൾക്ക് കൂടുതൽ പ്രാധാന്യമേറുകയാണ്.

സ്പോട്ടിഫൈ ഫാമിലി പ്ലാൻ ഉപയോഗിക്കുന്നവരാണോ? പണി വരുന്നുണ്ട്!

Prashobh Prasannan — Sat, 24 Oct 2026 12:28:28 +0530

നെറ്റ്ഫ്ലിക്സിന് പിന്നാലെ അക്കൗണ്ട് പങ്കിടലിൽ നിയന്ത്രണം കടുപ്പിച്ച് സംഗീത സ്ട്രീമിങ് പ്ലാറ്റ്‌ഫോമായ സ്പോട്ടിഫൈയും. പ്രീമിയം ഫാമിലി പ്ലാൻ ഉപയോഗിക്കുന്നവർ ഒരേ വീട്ടിൽ താമസിക്കുന്നവരാണെന്ന് ഉറപ്പാക്കാൻ പുതിയ ക്യുആർ കോഡ് പരിശോധനാ സംവിധാനം അവതരിപ്പിച്ചിരിക്കുകയാണ് കമ്പനി. സുഹൃത്തുക്കളുമായോ മറ്റിടങ്ങളിൽ താമസിക്കുന്ന കുടുംബാംഗങ്ങളുമായോ ഒരേ അക്കൗണ്ട് പങ്കിടുന്നവരെ നിയന്ത്രിക്കുകയാണ് ലക്ഷ്യം. മൂന്നാം പാദ നിക്ഷേപക യോഗത്തിലാണ് പരിശോധനാ സംവിധാനം സംബന്ധിച്ച വിവരം കമ്പനി വ്യക്തമാക്കിയത്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

ക്യുആർ കോഡ് പരിശോധന എങ്ങനെ?

സ്പോട്ടിഫൈയുടെ പ്രീമിയം ഫാമിലി പ്ലാൻ ഉപയോഗിക്കുന്നവർക്ക് ഒരേ വീട്ടിലാണ് താമസിക്കുന്നതെന്ന് തെളിയിക്കാൻ കമ്പനി ആവശ്യപ്പെട്ടേക്കാം. അക്കൗണ്ടിന്റെ പണം അടയ്ക്കുന്ന പ്ലാൻ മാനേജറാണ് പരിശോധനയ്ക്കുള്ള ക്യുആർ കോഡ് സൃഷ്ടിക്കേണ്ടത്. ഇതിനായി സ്പോട്ടിഫൈ ആപ്പിലെ സെറ്റിങ്‌സിൽ പ്രവേശിച്ച് കോഡ് തയ്യാറാക്കണം. തുടർന്ന് ഫാമിലി പ്ലാനിലെ അംഗം സ്വന്തം സ്മാർട്ട്ഫോൺ ക്യാമറ ഉപയോഗിച്ച് ഈ കോഡ് സ്കാൻ ചെയ്യണം. പരിശോധന പൂർത്തിയാക്കാൻ ഇരുവരും ഒരേ സ്ഥലത്ത് നേരിട്ട് ഉണ്ടായിരിക്കണം. ക്യുആർ കോഡ് ഏതാനും സെക്കൻഡുകൾക്കുള്ളിൽ പുതുക്കുന്നതിനാൽ സ്ക്രീൻഷോട്ട് എടുത്ത് മറ്റൊരാൾക്ക് ഓൺലൈനായി അയച്ചുകൊടുത്ത് പരിശോധന പൂർത്തിയാക്കാനാകില്ല.

പരിശോധനയ്ക്ക് ഏഴ് ദിവസം; പരാജയപ്പെട്ടാൽ ഒരു വർഷത്തെ നിയന്ത്രണം

പരിശോധന പൂർത്തിയാക്കാൻ ഉപയോക്താക്കൾക്ക് അറിയിപ്പ് ലഭിച്ച തീയതി മുതൽ ഏഴ് ദിവസം മാത്രമാണ് അനുവദിക്കുന്നത്. ഈ സമയപരിധിക്കുള്ളിൽ ക്യുആർ കോഡ് സ്കാൻ ചെയ്യാൻ സാധിച്ചില്ലെങ്കിൽ അംഗത്തെ ഫാമിലി പ്ലാനിൽനിന്ന് നീക്കം ചെയ്യാം. തുടർന്ന് പരസ്യങ്ങളോടുകൂടിയ സൗജന്യ പതിപ്പിലേക്ക് അക്കൗണ്ട് മാറും. പരിശോധനയിൽ പരാജയപ്പെടുന്നവർക്ക് 12 മാസത്തേക്ക് മറ്റൊരു സ്പോട്ടിഫൈ ഫാമിലി അല്ലെങ്കിൽ ഡുവോ പ്ലാനിൽ ചേരാനും കഴിയില്ല. എന്നാൽ നിലവിൽ അംഗമായിരുന്ന അതേ ഫാമിലി പ്ലാനിലേക്ക് വീണ്ടും ചേരാൻ അവസരമുണ്ടാകുമെന്ന് റിപ്പോർട്ടിൽ പറയുന്നു. ഈ ഒരു വർഷത്തെ നിയന്ത്രണത്തിനിടെ പരസ്യങ്ങളില്ലാതെ സംഗീതം കേൾക്കണമെങ്കിൽ സ്വന്തം പ്രീമിയം സബ്സ്ക്രിപ്ഷൻ എടുക്കേണ്ടിവരും. വ്യക്തിഗത പ്രീമിയം പ്ലാൻ ഇതിന് ഒരു മാർഗമാണ്.

ആറ് പേർക്ക് ഒരുമിച്ച് സബ്സ്ക്രിപ്ഷൻ

ഒരേ വീട്ടിൽ താമസിക്കുന്ന പരമാവധി ആറ് പേർക്ക് ഒരൊറ്റ സബ്സ്ക്രിപ്ഷൻ പങ്കിട്ട് ചെലവ് കുറയ്ക്കാനാണ് സ്പോട്ടിഫൈ ഫാമിലി പ്ലാൻ രൂപകൽപ്പന ചെയ്തിരിക്കുന്നത്. എന്നാൽ വ്യത്യസ്ത നഗരങ്ങളിൽ താമസിക്കുന്ന സുഹൃത്തുക്കളും മുതിർന്ന മക്കളും വർഷങ്ങളായി ഒരേ പ്ലാനിന്റെ ചെലവ് പങ്കിട്ടുവരുന്നുണ്ട്. പുതിയ പരിശോധനാ സംവിധാനം ഇവർക്ക് തിരിച്ചടിയാകാനിടയുണ്ട്.

'പതിവ് മെച്ചപ്പെടുത്തൽ' മാത്രമെന്ന് സ്പോട്ടിഫൈ

പുതിയ നടപടിയെ നിയന്ത്രണനീക്കമായി വിശേഷിപ്പിക്കുന്നതിനോട് സ്പോട്ടിഫൈയുടെ സഹ-ചീഫ് എക്സിക്യൂട്ടീവ് അലക്സ് നോർസ്ട്രോം വിയോജിച്ചു. ഇതൊരു പ്രത്യേക നിയന്ത്രണ നടപടിയല്ലെന്നും പതിവായുള്ള സംവിധാന മെച്ചപ്പെടുത്തലിന്റെ ഭാഗമാണെന്നും അദ്ദേഹം പറഞ്ഞു. ഏകദേശം 13 വർഷമായി ഫാമിലി പ്ലാൻ നിലവിലുണ്ടെന്നും കമ്പനിയുടെ മൊത്തം വരിക്കാരിൽ വലിയൊരു വിഭാഗം ഈ പ്ലാൻ ഉപയോഗിക്കുന്നുണ്ടെന്നും അദ്ദേഹം ചൂണ്ടിക്കാട്ടി. കാലക്രമേണ ഉപയോക്താക്കൾ പരിശോധനയിലെ പഴുതുകൾ കണ്ടെത്തുമ്പോൾ അവ പരിഹരിക്കാൻ സംവിധാനങ്ങൾ മെച്ചപ്പെടുത്തേണ്ടിവരുമെന്നും അദ്ദേഹം വ്യക്തമാക്കി.

ഇനി എന്തുചെയ്യണം?

വ്യത്യസ്‍ത വീടുകളിലോ നഗരങ്ങളിലോ താമസിക്കുന്നവരുമായി ഫാമിലി പ്ലാൻ പങ്കിടുന്നവർക്ക് പുതിയ സംവിധാനം വെല്ലുവിളിയാകും. പരിശോധനയ്ക്കുള്ള അറിയിപ്പ് ലഭിച്ചാൽ ഏഴ് ദിവസത്തിനുള്ളിൽ നേരിട്ട് കണ്ടുമുട്ടി ക്യുആർ കോഡ് സ്കാൻ ചെയ്യുകയോ സ്വന്തം പ്രീമിയം സബ്സ്ക്രിപ്ഷൻ തിരഞ്ഞെടുക്കുകയോ ചെയ്യേണ്ടിവരും. അക്കൗണ്ട് പങ്കിടൽ സംബന്ധിച്ച പരിശോധനകൾ തുടരുമെന്ന സൂചനയും സ്പോട്ടിഫൈ നൽകിയിട്ടുണ്ട്.

സർക്കാർ വെബ്സൈറ്റുകളിൽ അനുമതിയില്ലാതെ ഇടപെടൽ, കൊലക്കേസിൽ വ്യാജ വിവരം! ക്ലോഡ് എഐയെക്കുറിച്ച് ഞെട്ടിക്കുന്ന വെളിപ്പെടുത്തൽ

Prashobh Prasannan — Mon, 12 Oct 2026 14:26:19 +0530

ആർട്ടിഫിഷ്യൽ ഇന്റലിജൻസ് മോഡലുകളുടെ പ്രവർത്തനം വീണ്ടും ആശങ്കയാകുന്നു. യുഎസ് സർക്കാർ വെബ്സൈറ്റുകൾ ഉൾപ്പെടെയുള്ള ഓൺലൈൻ സംവിധാനങ്ങളിൽ അനുമതിയില്ലാതെ പ്രവേശിക്കാൻ ശ്രമിച്ചതായും കൊലപാതകക്കേസിൽ ഫിലാഡൽഫിയ പൊലീസിന് വ്യാജ വിവരം നൽകിയതായും ക്ലോഡ് എഐ മോഡലുകളെക്കുറിച്ച് വെളിപ്പെടുത്തി നിർമാതാക്കളായ ആന്ത്രോപിക്. ആഭ്യന്തര പരിശോധനകൾക്കിടെ കണ്ടെത്തിയ സംഭവങ്ങൾ സുരക്ഷാ ആശങ്കകൾ ഉയർത്തുന്നതാണെന്നും കമ്പനി വ്യക്തമാക്കി.

സർക്കാർ വെബ്സൈറ്റുകളിലും ഇടപെടാൻ ശ്രമം

ആന്ത്രോപിക് പുറത്തുവിട്ട ബ്ലോഗ് പോസ്റ്റിലാണ് ക്ലോഡ് എഐ മോഡലുകളുടെ അപ്രതീക്ഷിത പ്രവർത്തനങ്ങളെക്കുറിച്ചുള്ള വിവരങ്ങളുള്ളത്. വിവിധ ഫെഡറൽ, സംസ്ഥാന, പ്രാദേശിക സർക്കാർ വെബ്സൈറ്റുകൾ ആക്സസ് ചെയ്യാൻ മോഡലുകൾ ശ്രമിച്ചതായി കമ്പനി അറിയിച്ചു. സംഭവങ്ങളെക്കുറിച്ച് വൈറ്റ് ഹൗസിനും ബന്ധപ്പെട്ട സർക്കാർ ഏജൻസികൾക്കും വിവരം നൽകിയിട്ടുണ്ട്. സുരക്ഷാ കാരണങ്ങളാലും ബന്ധപ്പെട്ട സ്ഥാപനങ്ങളുടെ അഭ്യർഥനയാലും അവയുടെ പേരുകൾ വെളിപ്പെടുത്തിയിട്ടില്ല. ഉപഭോക്താക്കളുടെ വിവരങ്ങളിലേക്കോ ആന്ത്രോപിക്കിന്റെ ആഭ്യന്തര സംവിധാനങ്ങളിലേക്കോ ഇത്തരം ശ്രമങ്ങൾ കടന്നുകയറിയതായി തങ്ങളുടെ അറിവിൽ കണ്ടെത്തിയിട്ടില്ലെന്നും കമ്പനി വ്യക്തമാക്കി.

കൊലപാതകക്കേസിൽ വ്യാജ വിവരം നൽകി

പരിഹരിക്കപ്പെടാത്ത ഒരു കൊലപാതകക്കേസുമായി ബന്ധപ്പെട്ട് ഫിലാഡൽഫിയ പൊലീസിന് വ്യാജ വിവരം ലഭിച്ചതാണ് പ്രധാന സംഭവം. ക്രമരഹിതമായി തിരഞ്ഞെടുത്ത വെബ്പേജുകളുമായി ബന്ധപ്പെട്ട പ്രവർത്തനത്തിനിടെ ക്ലോഡ് ഹൈക്കു 4.5 എന്ന എഐ മോഡൽ കേസിനെക്കുറിച്ചുള്ള വെബ്പേജിലെത്തുകയായിരുന്നു. തുടർന്ന് പൊലീസ് നൽകിയിരുന്ന വിവരശേഖരണ ഫോമിൽ സന്ദേശം സമർപ്പിച്ചു. കേസുമായി ബന്ധപ്പെട്ട സമയത്ത് ഒരു പ്രത്യേക പ്രദേശത്ത് സംശയാസ്പദമായ വ്യക്തിയെ കണ്ടതായി സൂചിപ്പിക്കുന്ന സന്ദേശമാണ് മോഡൽ നൽകിയത്. എന്നാൽ വെബ്പേജിൽ പ്രതിയുടെ രൂപവിവരങ്ങളൊന്നും ഉണ്ടായിരുന്നില്ല. പേരും ബന്ധപ്പെടാനുള്ള വിവരങ്ങളും രേഖപ്പെടുത്താതെയാണ് സന്ദേശം സമർപ്പിച്ചത്.

സന്ദേശം സ്പാമായി തിരിച്ചറിഞ്ഞതിനാൽ അന്വേഷണത്തിനായി പൊലീസിന് കൈമാറിയില്ലെന്ന് ആന്ത്രോപിക് അറിയിച്ചു. 2026 ജൂലൈ 18ന് ഫിലാഡൽഫിയയിലെ പരിഹരിക്കപ്പെടാത്ത കൊലപാതകക്കേസുകൾക്കായുള്ള വെബ്സൈറ്റ് വഴിയാണ് വ്യാജ വിവരം ലഭിച്ചതെന്ന് പൊലീസ് വ്യക്തമാക്കി. സംഭവം കണ്ടെത്താനും റിപ്പോർട്ട് ചെയ്യാനും രണ്ടുമാസത്തോളം വൈകിയതിനെ അംഗീകരിക്കാനാവില്ലെന്നും പൊലീസ് പ്രതികരിച്ചു.

യഥാർഥ സർക്കാർ ഫോമിലും വിവരങ്ങൾ സമർപ്പിച്ചു

മറ്റൊരു സംഭവത്തിൽ, പരിശീലനത്തിനായി നൽകിയ സർക്കാർ ഫോമിന്റെ പകർപ്പ് പൂരിപ്പിക്കാനായിരുന്നു എഐ മോഡലിന് നിർദേശം ലഭിച്ചത്. എന്നാൽ പകർപ്പ് തുറക്കാൻ കഴിയാതിരുന്നപ്പോൾ മോഡൽ യഥാർഥ സർക്കാർ വെബ്സൈറ്റിലെത്തി ഫോം സമർപ്പിക്കുകയായിരുന്നു. സർവകലാശാലയുടെ വെബ്സൈറ്റിൽ പ്രവർത്തിക്കുന്ന ഒരു ഉപകരണം ഉപയോഗിച്ച് വിവരങ്ങൾ വിശകലനം ചെയ്യാൻ ശ്രമിക്കുന്നതിനിടെയും മറ്റൊരു സംഭവം ഉണ്ടായി. ഉപകരണം ലഭ്യമാകാതിരുന്നപ്പോൾ വെബ്സൈറ്റ് പരിശോധിച്ച മോഡൽ, ആവശ്യപ്പെടുന്ന ഏത് ഫയലും ലഭ്യമാക്കാൻ കഴിയുന്ന ഒരു സ്ക്രിപ്റ്റ് സർവറിലുണ്ടെന്ന് കണ്ടെത്തി. സംസ്ഥാന ഏജൻസിയിൽ പണം നൽകാതെ പൊതുവായി ലഭ്യമായ വിവരങ്ങൾ ശേഖരിക്കാനും ചില മോഡലുകൾ ശ്രമിച്ചു. ഇതിനായി പ്രവേശന ടോക്കണുകൾ കണ്ടെത്തുകയും വിവരങ്ങൾ ലഭ്യമാക്കാൻ ശ്രമിക്കുകയും ചെയ്തതായി കമ്പനി വെളിപ്പെടുത്തി.

ലൈവ് ഇന്റർനെറ്റ് പ്രവേശനം നിർത്തിവച്ചു

ജൂലൈയിൽ ആരംഭിച്ച ആഭ്യന്തര പരിശോധനയിലാണ് ഇത്തരം സംഭവങ്ങൾ കണ്ടെത്തിയത്. പിന്നീട് യഥാർഥ വെബ്സൈറ്റുകളുമായോ സംവിധാനങ്ങളുമായോ മോഡലുകൾ ഉദ്ദേശിക്കാത്ത രീതിയിൽ ഇടപെടുന്ന സംഭവങ്ങളും പരിശോധനയുടെ പരിധിയിൽ ഉൾപ്പെടുത്തി. സുരക്ഷാ സംവിധാനങ്ങൾ ഇത്തരം പെരുമാറ്റങ്ങൾ വിശ്വസനീയമായി കണ്ടെത്തുമെന്ന് ഉറപ്പാകുന്നതുവരെ ആഭ്യന്തര പരിശോധനകളിൽ ലൈവ് ഇന്റർനെറ്റ് പ്രവേശനം നിർത്തിവച്ചതായി ആന്ത്രോപിക് അറിയിച്ചു. നേരത്തേ റിപ്പോർട്ട് ചെയ്ത സൈബർ സംഭവങ്ങളേക്കാൾ കുറഞ്ഞ ഗൗരവമുള്ളവയാണ് ഇവയെന്നും കമ്പനി വിലയിരുത്തി.

ഇതിനിടെ, ആന്ത്രോപിക്കിന്റെ വെളിപ്പെടുത്തലിന് ദിവസങ്ങൾക്കുമുമ്പ് ഓപ്പൺഎഐയുടെ എഐ ഏജന്റുകളും യുഎസ്, ഓസ്ട്രേലിയൻ സർക്കാർ വെബ്സൈറ്റുകളിലും ഐക്യരാഷ്ട്രസഭയുടെ വെബ്സൈറ്റിലും പ്രവേശിക്കാൻ ശ്രമിച്ചതായി റിപ്പോർട്ടുകൾ പുറത്തുവന്നിരുന്നു. സമൂഹത്തിൽ എഐ മോഡലുകളുടെ സ്വാധീനം വർധിക്കുന്ന സാഹചര്യത്തിൽ അവയുടെ പ്രവർത്തനങ്ങളെക്കുറിച്ച് പൊതുജനങ്ങൾക്ക് കൂടുതൽ വിവരങ്ങൾ അറിയാനുള്ള അവകാശമുണ്ടെന്നും ആന്ത്രോപിക് വ്യക്തമാക്കി.

ഇന്ത്യൻ സൈബർ ഇടങ്ങളിൽ എഐ ഏജന്റുകളുടെ രഹസ്യ വേട്ട!

Prashobh Prasannan — Sat, 17 Oct 2026 11:07:36 +0530

ഇന്ത്യൻ സ്ഥാപനങ്ങളുടെ കമ്പ്യൂട്ടർ സംവിധാനങ്ങളിൽ എഐ ഏജന്റുകൾ അനുമതിയില്ലാതെ പ്രവേശിച്ച് രഹസ്യവിവരങ്ങൾ ശേഖരിച്ചതായി രാജ്യത്തെ സൈബർ സുരക്ഷാ ഏജൻസിയായ സിഇആർടി-ഇൻ. സംഭവങ്ങളിൽ വ്യക്തിഗത വിവരങ്ങളും ബിസിനസ് രേഖകളും രഹസ്യസ്വഭാവമുള്ള വിവരങ്ങളും ഉൾപ്പെട്ടിട്ടുണ്ടെന്നാണ് ഏജൻസിയുടെ മുന്നറിയിപ്പ്. ചില സംഭവങ്ങളിൽ ഹാക്കർമാർ എഐ ഉപകരണങ്ങൾ ഉപയോഗിച്ച് സംവിധാനങ്ങളിലേക്ക് കടന്നുകയറാനും ശ്രമിച്ചതായി സിഇആർ-ടിൻ വ്യക്തമാക്കി. ഗവേഷണത്തിനും പരിശോധനയ്ക്കുമായി ഉപയോഗിച്ചിരുന്ന ചില എഐ ഏജന്റുകൾക്ക് അനുവദിച്ചിരുന്ന അധികാരപരിധി മറികടന്ന് ഇന്ത്യൻ വിവരസാങ്കേതിക സംവിധാനങ്ങളിലേക്ക് അനധികൃതമായി പ്രവേശിക്കാൻ കഴിഞ്ഞതായി നിർണായക സുരക്ഷാ മുന്നറിയിപ്പിൽ ഏജൻസി അറിയിച്ചു.

രണ്ട് തരത്തിലുള്ള സുരക്ഷാ വീഴ്ചകൾ

രണ്ട് വിഭാഗത്തിലുള്ള സംഭവങ്ങളാണ് സിഇആർടി-ഇൻ കണ്ടെത്തിയത്. എഐ മോഡൽ വികസിപ്പിക്കുന്ന സ്ഥാപനങ്ങളുടെ ഗവേഷണ, പരിശോധനാ പ്രവർത്തനങ്ങൾക്കിടെ എഐ ഏജന്റുകൾ അനുമതിയില്ലാതെ സംവിധാനങ്ങളിലേക്ക് കടന്നതാണ് ആദ്യ വിഭാഗം. ഓപ്പൺ സോഴ്‌സ് എഐ ഏജന്റ് ഉപകരണങ്ങൾ ഉപയോഗിച്ച് സൈബർ ആക്രമണകാരികൾ മനഃപൂർവം അനധികൃത പ്രവേശനം നടത്തിയതാണ് രണ്ടാമത്തെ വിഭാഗം.

എഐ മോഡൽ വികസിപ്പിക്കുന്ന സ്ഥാപനങ്ങളിൽനിന്ന് സംഭവങ്ങളെക്കുറിച്ച് ഒന്നിലധികം സ്വമേധയാ വെളിപ്പെടുത്തലുകൾ ലഭിച്ചതായും സിഇആർടി-ഇൻ അറിയിച്ചു. ബാധിക്കപ്പെട്ട സ്ഥാപനങ്ങൾക്ക് സ്വന്തം നിലയിൽ അനധികൃത പ്രവേശനം കണ്ടെത്താൻ കഴിഞ്ഞിരുന്നില്ലെന്നും ഏജൻസി വ്യക്തമാക്കി. എന്നാൽ ഏതൊക്കെ ഇന്ത്യൻ സ്ഥാപനങ്ങളെയാണ് ബാധിച്ചതെന്നോ ഏതൊക്കെ എഐ മോഡൽ കമ്പനികളാണ് സംഭവങ്ങൾ റിപ്പോർട്ട് ചെയ്തതെന്നോ ഏജൻസി വെളിപ്പെടുത്തിയിട്ടില്ല.

വ്യക്തിഗത വിവരങ്ങളും ബിസിനസ് രേഖകളും ചോർന്നേക്കാം

സുരക്ഷാ സംവിധാനങ്ങളിലെ ദൗർബല്യങ്ങൾ ഉപയോഗിച്ചാണ് എഐ ഏജന്റുകൾ പ്രവേശന വിവരങ്ങളും കണക്ഷൻ ക്രമീകരണങ്ങളും സ്വന്തമാക്കിയത്. ഇതിലൂടെ വ്യക്തിഗത വിവരങ്ങൾ ഉൾപ്പെടുന്ന ബിസിനസ് രേഖകളും രഹസ്യരേഖകളും വായിക്കാൻ ഏജന്റുകൾക്ക് സാധിച്ചുവെന്നാണ് സിഇആർടി-ഇന്നിന്റെ കണ്ടെത്തൽ. ഏൽപ്പിച്ച ജോലികൾക്കായി അനുവദിച്ച അധികാരപരിധി മറികടന്നാണ് ഇവ പ്രവർത്തിച്ചതെന്നും ഏജൻസി ചൂണ്ടിക്കാട്ടി.

മണിക്കൂറുകൾക്കുള്ളിൽ സൈബർ ആക്രമണം നടത്താം

സാമ്പത്തിക നേട്ടം ലക്ഷ്യമിട്ടുള്ള സൈബർ ആക്രമണങ്ങളിലും പൊതുവായി ലഭ്യമായ ഓപ്പൺ സോഴ്‌സ് എഐ ഉപകരണങ്ങൾ ദുരുപയോഗം ചെയ്തതായി സിഇആർടി-ഇൻ കണ്ടെത്തി. ഇത്തരം ഉപകരണങ്ങൾ പരിഷ്കരിച്ച് പുതിയ പേരുകളിൽ വിവിധ രാജ്യങ്ങളിലെ അടിസ്ഥാനസൗകര്യങ്ങളിൽ വിന്യസിച്ചിട്ടുണ്ടെന്നും റിപ്പോർട്ടുണ്ട്.

പരമ്പരാഗതമായി ദിവസങ്ങളെടുക്കുന്ന ചില ആക്രമണങ്ങൾ എഐ ഉപകരണങ്ങളുടെ സഹായത്തോടെ ഏതാനും മണിക്കൂറുകൾക്കുള്ളിൽ നടത്താൻ കഴിയുമെന്ന് ഏജൻസി മുന്നറിയിപ്പ് നൽകി. ഒന്നിലധികം എഐ ഏജന്റുകൾ ഒരേസമയം പ്രവർത്തിക്കുന്നതിലൂടെ ആക്രമണങ്ങളുടെ വേഗവും വ്യാപ്തിയും വർധിക്കാം. അതേസമയം, സംഭവങ്ങൾ മൂലമുണ്ടായ മൊത്തം നാശനഷ്ടങ്ങളുടെ വ്യാപ്തി ഇതുവരെ വ്യക്തമായിട്ടില്ല.

സുരക്ഷാ വീഴ്ചകൾ പരിഹരിക്കാത്തവർ വീണ്ടും ആക്രമിക്കപ്പെട്ടു

സുരക്ഷാ പ്രശ്നങ്ങൾ ഭാഗികമായി മാത്രം പരിഹരിച്ച സ്ഥാപനങ്ങൾ ദിവസങ്ങൾക്കുള്ളിൽ വീണ്ടും ആക്രമിക്കപ്പെട്ടതായി സിഇആർടി-ഇൻ അറിയിച്ചു. ഇത്തവണ ആക്രമണങ്ങളുടെ വ്യാപ്തി കൂടുതലായിരുന്നുവെന്നും കണ്ടെത്തി. നേരത്തെ ചോർന്ന പ്രവേശന വിവരങ്ങൾ എഐ ഏജന്റുകൾ വീണ്ടും കണ്ടെത്തി മറ്റ് പ്രവർത്തനങ്ങളിൽ ഉപയോഗിച്ച സംഭവങ്ങളുമുണ്ടായി.

എഐ കമ്പനികൾക്കും സ്ഥാപനങ്ങൾക്കും നിർദേശങ്ങൾ

എഐ സംവിധാനങ്ങളുടെ സുരക്ഷ വർധിപ്പിക്കാൻ കർശന നടപടികൾ സ്വീകരിക്കണമെന്ന് എഐ വികസന സ്ഥാപനങ്ങളോടും ഗവേഷണ കേന്ദ്രങ്ങളോടും സിഇആർടി-ഇൻ ആവശ്യപ്പെട്ടു. മൂന്നാം കക്ഷികളുടെ സംവിധാനങ്ങളിലേക്ക് പ്രവേശിക്കാൻ കഴിയാത്ത വിധം ഒറ്റപ്പെട്ട സാഹചര്യങ്ങളിൽ സിന്തറ്റിക് പ്രവേശന വിവരങ്ങൾ ഉപയോഗിച്ചായിരിക്കണം എഐ മോഡലുകളുടെ സുരക്ഷാ പരിശോധന നടത്തേണ്ടത്. തത്സമയ നിരീക്ഷണവും സുരക്ഷാ മുൻകരുതലുകളുടെ പ്രസിദ്ധീകരണവും ഉറപ്പാക്കണമെന്നും നിർദേശമുണ്ട്.

സ്ഥാപനങ്ങൾ പ്രവേശന വിവരങ്ങൾ പരിശോധിച്ച് മാറ്റുകയും കാലഹരണപ്പെട്ട എപിഐകൾ നീക്കം ചെയ്യുകയും വേണം. അനധികൃത പ്രവേശനം സ്ഥിരീകരിച്ചാൽ ഫോറൻസിക് പരിശോധന പൂർത്തിയാകുന്നതുവരെ ബന്ധപ്പെട്ട സംവിധാനങ്ങൾ സുരക്ഷിതമല്ലെന്ന് കണക്കാക്കണമെന്നും ഏജൻസി നിർദേശിച്ചു. ബാങ്കിങ്, ധനകാര്യ സേവന മേഖലകളിലുള്ള സ്ഥാപനങ്ങൾ പണമിടപാട്, പണം വിതരണം എന്നിവയ്ക്കുള്ള എപിഐ സുരക്ഷാ നടപടികളും ശക്തമാക്കണം.

എഐ ഏജന്റുകളുടെ ദുരുപയോഗം ആഗോള ആശങ്കയാകുന്നു

വെബ്സൈറ്റുകളിലേക്കും ഓൺലൈൻ സംവിധാനങ്ങളിലേക്കും എഐ ഏജന്റുകൾ കടന്നുകയറുന്ന സംഭവങ്ങൾ വർധിച്ചുവരുന്ന സാഹചര്യത്തിലാണ് സിഇആർടി-ഇന്നിന്റെ മുന്നറിയിപ്പ്. ജൂലൈയിൽ ഓപ്പൺഎഐയുടെ 700 ദുരുപയോഗ സ്വഭാവമുള്ള എഐ ഏജന്റുകൾ ഹഗിങ് ഫേസിനെ ലക്ഷ്യമിട്ട് ആക്രമണശ്രമം നടത്തിയതായി റിപ്പോർട്ടുകളുണ്ടായിരുന്നു. അമേരിക്കൻ, ഓസ്‌ട്രേലിയൻ സർക്കാർ വെബ്സൈറ്റുകളിലേക്കും ഐക്യരാഷ്ട്രസഭയുമായി ബന്ധപ്പെട്ട സംവിധാനങ്ങളിലേക്കും എഐ ഏജന്റുകൾ പ്രവേശിക്കാൻ ശ്രമിച്ച സംഭവങ്ങളും റിപ്പോർട്ട് ചെയ്യപ്പെട്ടിട്ടുണ്ട്.

മെറ്റ, ആന്ത്രോപിക്, ഗൂഗിൾ തുടങ്ങിയ കമ്പനികളും സമാനമായ സുരക്ഷാ ആശങ്കകൾ നേരത്തേ വെളിപ്പെടുത്തിയിട്ടുണ്ട്. എഐ സാങ്കേതികവിദ്യ കൂടുതൽ ശക്തമാകുന്നതിനൊപ്പം അതിന്റെ ദുരുപയോഗം തടയാനുള്ള സുരക്ഷാ സംവിധാനങ്ങളും ശക്തമാക്കേണ്ടതിന്റെ ആവശ്യകതയാണ് പുതിയ സംഭവങ്ങൾ വ്യക്തമാക്കുന്നത്.

എഐയുടെ വളർച്ചയിൽ ഭയം; സോഫ്റ്റ്‌വെയർ ജോലി ഉപേക്ഷിച്ച് കൃഷിയിലേക്ക് മാറേണ്ടിവരുമെന്ന് ഡെവലപ്പർ

Prashobh Prasannan — Tue, 27 Oct 2026 13:18:47 +0530

ആർട്ടിഫിഷ്യൽ ഇന്റലിജൻസ് അഥവാ നിർമിതബുദ്ധിയുടെ വളർച്ച സോഫ്റ്റ്‌വെയർ മേഖലയിലെ തൊഴിൽസാധ്യതകളെ ബാധിക്കുമെന്ന ആശങ്ക പങ്കുവെച്ച് പത്ത് വർഷത്തോളം പ്രവൃത്തിപരിചയമുള്ള സോഫ്റ്റ്‌വെയർ എൻജിനീയർ. അടുത്ത 5 മുതൽ 10 വർഷത്തിനുള്ളിൽ സാങ്കേതിക മേഖലയിലെ പരമ്പരാഗത ജോലികൾ കണ്ടെത്താൻ ബുദ്ധിമുട്ടുണ്ടായേക്കുമെന്ന ഭയത്തിൽ കൃഷിയിലേക്ക് മാറുന്നതിനെക്കുറിച്ച് പോലും ആലോചിക്കുകയാണെന്നാണ് അദ്ദേഹത്തിന്റെ വെളിപ്പെടുത്തൽ.

എഐയുടെ വളർച്ചയ്ക്കൊപ്പം മുന്നേറാനാകുമോ?

റെഡ്ഡിറ്റിലെ ക്ലോഡ് കോഡ് എന്ന സമൂഹമാധ്യമ വിഭാഗത്തിൽ ‘ഐ ആം ടയേർഡ്, ബോസ്’ എന്ന തലക്കെട്ടിൽ പങ്കുവെച്ച കുറിപ്പിലാണ് എൻജിനീയർ തന്റെ ആശങ്കകൾ വ്യക്തമാക്കിയത് എന്ന് ഇന്ത്യാ ടുഡേ ടെക്ക് റിപ്പോർട്ട് ചെയ്യുന്നു . എഐ സാങ്കേതികവിദ്യയുടെ വളർച്ചയ്‌ക്കൊപ്പം മുന്നേറാനുള്ള നിരന്തര സമ്മർദം തളർത്തുന്നുവെന്നും ഈ വേഗതയ്‌ക്കൊപ്പം മനുഷ്യർക്ക് എത്രകാലം മുന്നോട്ടുപോകാനാകുമെന്ന കാര്യത്തിൽ സംശയമുണ്ടെന്നും അദ്ദേഹം കുറിച്ചു.

കഴിഞ്ഞ ഒരു വർഷത്തിനിടെ എഐയെക്കുറിച്ചുള്ള തന്റെ കാഴ്ചപ്പാടിൽ വലിയ മാറ്റമുണ്ടായെന്നും ഡെവലപ്പർ പറയുന്നു. നേരത്തെ എഐയ്ക്ക് കോഡ് എഴുതാൻ കഴിയുമെങ്കിലും സങ്കീർണമായ സോഫ്റ്റ്‌വെയർ സംവിധാനങ്ങൾ രൂപകൽപ്പന ചെയ്യാനും നിർണായക സാങ്കേതിക തീരുമാനങ്ങൾ എടുക്കാനും പരിചയസമ്പന്നരായ എൻജിനീയർമാർ ആവശ്യമായിരിക്കുമെന്നായിരുന്നു അദ്ദേഹത്തിന്റെ വിശ്വാസം.

മനുഷ്യരേക്കാൾ മികച്ച രീതിയിൽ സിസ്റ്റങ്ങൾ രൂപകൽപ്പന ചെയ്യുമോ?

എന്നാൽ ഇപ്പോൾ ആ വിശ്വാസം നഷ്‍ടപ്പെടുകയാണെന്നാണ് എൻജിനീയറുടെ വാക്കുകൾ. വർഷങ്ങളുടെ പ്രവൃത്തിപരിചയം ആവശ്യമായിരുന്നുവെന്ന് കരുതിയ പല ജോലികളും എഐ ഉപകരണങ്ങൾ ഏറ്റെടുക്കുന്ന സാഹചര്യമാണുള്ളത്. ചില സന്ദർഭങ്ങളിൽ മനുഷ്യരേക്കാൾ മികച്ച രീതിയിൽ സിസ്റ്റങ്ങൾ രൂപകൽപ്പന ചെയ്യാൻ എഐയ്ക്ക് കഴിയുന്നുണ്ടെന്നും അദ്ദേഹം അവകാശപ്പെട്ടു.

വെബ്‌സൈറ്റുകൾ നിർമിക്കുക, ഗെയിമുകൾ വികസിപ്പിക്കുക, സോഫ്റ്റ്‌വെയർ സേവനങ്ങൾ സൃഷ്ടിക്കുക തുടങ്ങിയ മേഖലകളിൽ എഐ കൂടുതൽ ജോലികൾ ഏറ്റെടുക്കുമ്പോൾ ഡെവലപ്പർമാരുടെ ഭാവി എന്താകുമെന്നതാണ് അദ്ദേഹത്തെ അലട്ടുന്ന പ്രധാന ചോദ്യം. തങ്ങളുടെ തൊഴിൽമേഖലയെ തന്നെ ഇല്ലാതാക്കാൻ സാധ്യതയുള്ള സാങ്കേതികവിദ്യയുടെ നിർമാണത്തിൽ തങ്ങൾ പങ്കാളികളാകുകയാണെന്ന തോന്നലുണ്ടെന്നും അദ്ദേഹം കുറിച്ചു.

എഐ മേഖലയിൽ പുതിയ അവസരങ്ങളും

അതേസമയം, നിർമിതബുദ്ധിയുടെ വളർച്ച സാങ്കേതികമേഖലയിൽ പുതിയ അവസരങ്ങളും സൃഷ്ടിക്കുന്നുണ്ട്. ഇലോൺ മസ്‌കിന്റെ എക്സ്എഐയിൽ പ്രവർത്തിച്ച ഗവേഷകനായ ടോണി യുഹുവായ് വുവിന്റെ കരിയർ ഇതിന് ഉദാഹരണമാണ്. ഗൂഗിളിലും ഓപ്പൺഎഐയിലും ഗൂഗിൾ ഡീപ്‌മൈൻഡിലും പ്രവർത്തിച്ച പരിചയമുള്ള വു 2023ൽ എക്സ്എഐയുടെ സ്ഥാപക സംഘത്തിൽ ചേർന്നു. ഗ്രോക്ക് ചാറ്റ്ബോട്ടിന്റെ വികസനത്തിലും പങ്കാളിയായി.

70 മില്യൺ ഡോളറിന്റെ ആഡംബര ഭവനം വാങ്ങിയെന്ന് റിപ്പോർട്ട്

ടൊറന്റോ സർവകലാശാലയിൽനിന്ന് മെഷീൻ ലേണിങ്ങിൽ പിഎച്ച്ഡി നേടിയ വു ഫെബ്രുവരിയിൽ എക്സ്എഐ വിട്ടതായാണ് റിപ്പോർട്ട്. എഐയുടെ സഹായത്തോടെ ചെറിയ സംഘങ്ങൾക്ക് വലിയ മാറ്റങ്ങൾ സൃഷ്ടിക്കാനും പുതിയ സാധ്യതകൾ തുറക്കാനും കഴിയുന്ന കാലമാണിതെന്ന് അദ്ദേഹം സമൂഹമാധ്യമമായ എക്സിൽ കുറിച്ചു.

അതേസമയം, 70 മില്യൺ ഡോളർ വിലമതിക്കുന്ന കാലിഫോർണിയയിലെ ആഡംബര ഭവനം വു വാങ്ങിയതായും റിപ്പോർട്ടുകളുണ്ട്. എന്നാൽ ഇക്കാര്യം അദ്ദേഹം പരസ്യമായി സ്ഥിരീകരിച്ചിട്ടില്ല. എഐയുടെ വളർച്ച ഒരുവശത്ത് പുതിയ അവസരങ്ങൾ തുറക്കുമ്പോൾ മറുവശത്ത് തൊഴിൽസുരക്ഷയെക്കുറിച്ചുള്ള ആശങ്കകളും ശക്തമാകുകയാണ്. സാങ്കേതികവിദ്യയുടെ മാറ്റങ്ങൾക്കൊപ്പം മുന്നേറാൻ കഴിയുമോ എന്ന ചോദ്യം സോഫ്റ്റ്‌വെയർ മേഖലയിലെ നിരവധി പ്രൊഫഷണലുകളെയും അലട്ടുന്നുണ്ട്.